ཆེ་བ་དེ་ལྡན་གྱི་རྒྱུད་དོན་བཤད་པ།
གསུམ་པ་ཆེ་བ་དེ་ལྡན་གྱི་རྒྱུད་དོན་བཤད་པ་ནི། དེ་ཡང་རྒྱུད་དབུ་ཞབས་ཀྱི་དོན་ཐམས་ཅད་ཀྱང་དགོས་འབྲེལ་ཡན་ལག་བཞི་ལྡན་དུ་གནས་ཏེ། ཐུགས་ཐིག་ལས། བརྗོད་འབྲེལ་དགོས་དང་ཡང་དགོས་དང་། །རྒྱུ་རྐྱེན་ཡན་ལག་བཞི་རུ་འགྱུར། །ཞེས་སོ། །དེའི་དོན་གྱིས་དགོས་སོགས་མཐོང་ན་དོན་ངེས་པར་འགྲུབ་པའི་ཕྱིར། རེ་ཞིག་ཐོག་མར་དགོས་འབྲེལ་བརྗོད་པ་ལ། དྲི་བས་མཚམས་སྦྱར་བ་དང་། ལན་གྱིས་རྒྱས་པར་བཤད་པའོ། །དང་པོ་ནི། ཕྱི་མའི་རྒྱུད་འགོས་འགྱུར་ལས། འདི་ལ་བརྗོད་པར་གྱུར་པ་གང་། །འདི་ཡི་དགོས་པའང་ཅི་ཞིག་ཡིན། །འདིར་བཤད་པ་རྣམས་ཇི་ལྟར་འབྲེལ། །རྗོད་པར་བྱེད་པ་གང་ལ་བརྗོད། །ཅེས་སོ། །གཉིས་པ་ནི། དེ་ལས། སྟོང་ཉིད་སྙིང་རྗེར་སྦྱོར་བ་ནི། །བརྗོད་པར་བྱ་བ་འདིར་བཤད་དོ། །ཕྱག་རྒྱ་ཆེན་པོའི་དངོས་གྲུབ་ནི། །དགོས་པའི་གཙོ་བོའི་རང་བཞིན་ཕྱིར། །འཇིག་རྟེན་པ་ཡི་ལམ་གྱུར་པས། །སྣ་ཚོགས་རང་བཞིན་མཐའ་དག་གོ །ཐབས་དང་ཐབས་བྱུང་འབྲེལ་བ་སྟེ། །བླ་མ་སློབ་མ་དག་ཀྱང་ངོ་། །གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །ཞེས་གསུངས་པ་ལྟར། མཚོན་བྱ་རང་བཞིན་གྱི་རྒྱུད་གཞི་ལམ་འབྲས་གསུམ་གཅིག་ཏུ་གྱུར་པའི་ཟུང་འཇུག་རང་བཞིན་གྱི་ཆོས་སྐུ་ནི་བརྗོད་བྱ་སྟེ། ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །ཅེས་སོ། །དེ་ཁོང་དུ་ཆུད་པར་བྱ་བའི་ཕྱིར། མཚོན་བྱེད་ཡི་གེའི་རྒྱུད་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བཤད་ཀྱི་རྒྱུད་རྣམས་ནི་རྗོད་པར་བྱེད་པ་སྟེ། དེ་ཉིད་ལས། སྒྲོ་སྐུར་མེད་པར་བསྟན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །ཞེས་སོ། །རྗོད་བྱེད་ལ་བརྟེན་ནས་བརྗོད་བྱའི་དོན་རྣམས་ཤེས་པ་ནི་དགོས་པ་སྟེ། དེ་ལས། མཛུབ་མོས་རི་བོང་ཅན་བཞིན་ནོ། །ཞེས་སོ། །དེ་ལྟར་ཤེས་པའི་དོན་ཉམས་སུ་བླངས་པས་ཐུན་མོང་གི་དངོས་གྲུབ་ཐོབ་པ་ནི་ཉིང་དགོས་ཕྲ་མོ་དང་། སློབ་པ་དང་མི་སློབ་པའི་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ནི་དགོས་པའི་ཡང་དགོས་པ་མཆོག་སྟེ། དེ་ལས། དགོས་པའི་དགོས་པ་འབྲས་བུ་ཉིད། །ཅེས་སོ། །དེའང་བརྗོད་བྱ་རྗོད་བྱེད་གཉིས་ཤེས་བྱ་ཤེས་བྱེད་དང་། རྗོད་བྱེད་དང་དགོས་པ་གཉིས་ཐབས་དང་ཐབས་བྱུང་དང་། བླ་མ་དང་སློབ་མའི་འབྲེལ་བ་ནི་དོན་རྟགས་ཀྱི་ཁྱད་པར་གྱིས་ངོ་བོ་ཉིད་དང་སྣོད་བཅུད་དུ་འབྲེལ་ལ། དགོས་པ་དང་ཉིང་དགོས་གཉིས་དེ་ལས་དེ་བྱུང་དང་། ཉིང་དགོས་དང་བརྗོད་བྱ་གཉིས་ངོ་བོ་བདག་ཉིད་གཅིག་པར་འབྲེལ་པ་རྣམས་ནི་འབྲེལ་པ་སྟེ། ཙནྡྲ་གོ་མིས་རིག་པ་གྲུབ་པའི་སྒྲོན་མར། མེད་ན་མི་འབྱུང་རག་ལས་འབྲེལ། །ཞེས་སོ། །དེ་ལྟ་བུའི་དོན་དང་ལྡན་པའི་རྒྱུད་འདི་བཤད་པའི་དབང་དུ་བྱས་ན། སྤྱིར་ཐེག་པ་ཆེན་པོ་གསང་སྔགས་ཀྱི་སྒོར་སྤྱད་པ་སྤྱོད་པའི་སྐྱེས་བུ་བློ་གྲོས་ཅན་རྣམས་ཀྱིས་དོན་དུ་གཉེར་བའི་གཙོ་བོ་ནི་གཞན་དོན་ཕུན་ཚོགས་ཏེ། ཇི་སྐད་དུ། གཞན་དོན་ཕུན་ཚོགས་སངས་རྒྱས་ཀྱི། །འབྲས་བུ་གཙོ་བོ་ཡིན་པར་འདོད། །ཅེས་སོ། །དེའི་རྟེན་ནི་རང་དོན་ཕུན་ཚོགས་ཀྱི་བྱང་ཆུབ་ཅེས་གྲགས་པ་འབྲས་རྒྱུད་ཡིན་ལ། དེ་མངོན་དུ་བྱེད་པའང་ཉེར་ལེན་གྱི་རྒྱུ་དང་། ལྷན་ཅིག་བྱེད་པའི་རྐྱེན་གཉིས་ཚང་བ་ལ་རག་ལས་པའི་ཕྱིར། དང་པོའི་དབང་དུ་བྱས་ཏེ་གཞིའམ་རྒྱུའི་རྒྱུད་བཞག །གཉིས་པའི་དབང་དུ་བྱས་ཏེ་ཐབས་སམ་ལམ་གྱི་རྒྱུད་བཞག་གོ །དེའི་ཕྱིར་རྒྱུད་ཐམས་ཅད་ཀྱི་བརྗོད་བྱའི་དོན་རྣམས་མ་ལུས་པ་གཞི་ལམ་འབྲས་གསུམ་དུ་འདུ་བ་ཉིད་དོ། །ཞེས་རྒྱུད་གསུམ་གྱི་མིང་གང་ལ་གདགས་བྱའི་ཡུལ་ངོས་བཟུང་ནས།
དེ་འཆད་པ་ལ། ཐ་སྙད་ཀྱི་དབང་དུ་བྱས་ཏེ་རྣམ་པར་དབྱེ་བ། དོན་གྱི་དབང་དུ་བྱས་ཏེ་རྣམ་པར་བསྡུ་བ། བསྡུས་པའི་དོན་གཏན་ལ་དབབ་པ་དང་གསུམ། དང་པོ་ལའང་། རྒྱུད་གསུམ་དུ་དབྱེ་བ། སྣང་བ་གསུམ་མམ་བཞིར་དབྱེ་བ། རྣལ་འབྱོར་གསུམ་མམ་རིགས་གསུམ་དུ་དབྱེ་བ། གཞི་ལམ་འབྲས་གསུམ་དུ་དབྱེ་བའོ། །དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས། ཆོས་ཉིད་རང་བཞིན་གྱི་རྣམ་པར་དག་པ་རྒྱུའི་རྒྱུད། རང་བཞིན་མངོན་དུ་བྱེད་པ་ཐབས་ཀྱི་རྒྱུད། རང་བཞིན་མངོན་དུ་བྱས་པ་འབྲས་བུའི་རྒྱུད་དེ། ཤེས་ཐོབ་ཀྱི་བྱ་བྱེད་དང་བདག་ཉིད་གཅིག་པར་འབྲེལ་ཞིང་། གཞི་ལམ་འབྲས་གསུམ་གྱི་དགོས་པ་མ་ཚང་བ་མེད་པའི་ཕྱིར་ཏེ། རྔམ་གློག་ལས། འབྲེལ་དང་མ་ཚང་མེད་པ་དང་། །ཕུན་སུམ་ཚོགས་པས་རྒྱུད་ཅེས་བྱ། །ཞེས་དང་། སྤར་ཁབ་ལས། ཐམས་ཅད་དུ་འབྲེལ་ཞིང་ཐམས་ཅད་ཚང་བའི་ཕྱིར། ཞེས་སོ། །གཉིས་པ་ནི། ཐུགས་ཐིག་ལས། རང་བཞིན་བདེ་གཤེགས་གདུལ་བྱ་ཡི། །སྣང་བ་གསུམ་གྱི་ངོ་བོ་ལས། །རྒྱུད་ཀྱི་དབྱེ་བ་རྣམ་པར་བཞག །གཅིག་ལ་གསུམ་གྱི་ངོ་བོ་ཡང་། །འཁྲུལ་པའི་སྣང་བས་གསུམ་དུ་འགྱུར། །དེས་ན་སྣང་བ་བཞི་དག་ཏུ། །ལུང་རིགས་ཀུན་ལས་གསལ་བར་བཤད། །ཅེས་པས་གཞི་རང་བཞིན་གྱི་སྣང་བ། ལམ་གདུལ་བྱའི་སྣང་བ། འབྲས་བུ་བདེ་གཤེགས་ཀྱི་སྣང་བ་སྟེ། གཞི་ནི་ཆོས་ཐམས་ཅད་ཀྱི་འབྱུང་གཞི། རང་བཞིན་ནི། དབུ་མ་རྩ་ཤེས་ལས། རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་མེད་པའོ། །ཞེས་པ་ལྟར་ཤེས་རབ་དང་གཏན་ཚིགས་ཀྱིས་མ་བྱས་པ་སྟེ། རང་རིག་པ་བྱང་ཆུབ་ཀྱི་སེམས་རྩལ་མ་འགགས་པར་རང་སྣང་བའོ། །གདུལ་བྱ་ནི་ཐུན་མོང་དང་མཆོག་གི་སེམས་ལྔ་སྐྱེས་སམ་སྐྱེར་རུང་བ། ལམ་ནི་ཐེག་པ་སྟེ། དེ་གདུལ་བྱའི་བློའི་རིམ་པས་བྱེ་བྲག་ཏུ་སྣང་བའོ། །བྲལ་ཐོབ་མེད་པའི་ཡོན་ཏན་ནར་སོན་པས་བདེ་གཤེགས། དེར་སྨིན་པས་འབྲས་བུ་སྟེ། སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའོ། །དེ་གསུམ་ངོ་བོ་སེམས་སུ་གཅིག་ཀྱང་སོ་སོར་སྣང་བ་ནི། ལོག་རྟོག་འཁྲུལ་པའི་སྣང་བས་བསླད་པ་སྟེ། ཡུལ་ཡུལ་ཅན་གཉིས་མེད་ལ་གཉིས་སུ་རྟོག་པས་ལོག་རྟོག །དེ་མ་ཡིན་ལ་དེར་བཟུང་བས་འཁྲུལ་པ། ལས་དང་ལོག་རྟོག་གི་བློར་སྣང་བའོ། །དེ་ལྟར་སྣང་བ་བཞི་ལས། ཕྱི་མ་ནི་སྦྱང་བྱའི་དྲི་མ་ཡིན་པས་འབྲེལ་བ་དང་དགོས་པ་མེད་པའི་ཕྱིར་རྒྱུད་དུ་བཞག་ཏུ་མེད་པས་རྒྱུད་ཀྱི་དབྱེ་བ་ནི་གསུམ་ཉིད་དོ། །གསུམ་པ་ནི། སྒྱུ་འཕྲུལ་བྱེ་བྲག་བསྟན་པ་ལས། ཚད་མ་གསུམ་གྱི་དངོས་པོ་ཡིས། །རྣལ་འབྱོར་གསུམ་གྱི་ཕུང་པོ་ལ། །རིགས་དང་སྣང་བའི་ཡན་ལག་བཞག །དེ་ཉིད་ཐུར་མའི་མཆོག་ཏུ་ངེས། །ཞེས་པས་འཁོར་འདས་ཀྱི་ཆོས་ཐམས་ཅད་མ་འདྲེས་ལ་ཡོངས་སུ་རྫོགས་པ་ནི་བྱ་བ་གཞིའི་རྣལ་འབྱོར་ཏེ། བྱ་བ་ནི་:རྒྱུ་༼‹བ›རྒྱུད༽། གཞི་ནི་གནས་ལུགས། དེའི་དོན་ལ་བཅོས་སླད་མེད་པར་ཡེ་ནས་གནས་པའོ། །དེའང་མདོའི་དོན་བསྡུས་ལས། ཕྱི་ནང་བྱེ་བྲག་ཇི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པ། །ཤེས་པར་བྱ་བའི་རྒྱུད་དོན་ཡིན། །ཞེས་སོ། །ལྟ་བ་དང་ཏིང་ངེ་འཛིན་གཉིས་མེད་ཀྱི་འཇུག་པ་བྱེད་པ་རྐྱེན་གྱི་རྣལ་འབྱོར་ཏེ། ཤེས་ཐོབ་ཀྱི་རྐྱེན་དུ་གྱུར་པའི་བྱེད་རྩོལ་གྱི་ངང་དུ་བློ་གནས་པའོ། །འབྲས་བུར་སྨིན་པ་ནི་བྱ་བ་བྱས་ཟིན་པ་སྟེ། དེས་རང་གཞན་གྱི་དོན་གཉིས་མེད་མངོན་དུ་གྱུར་པ་ལ་དབང་འབྱོར་བ་ནི་བྱ་བྲལ་འབྲས་བུའི་རྣལ་འབྱོར་རོ། །འོ་ན་འདིར་བསྟན་གྱི་རྣལ་འབྱོར་གསུམ་དང་། མདོའི་དོན་བསྡུས་ལས། བྱ་བ་གཞི་དང་བྱེད་པ་རྐྱེན། །བྱ་བྲལ་འབྲས་བུའི་རྣལ་འབྱོར་དག །ཅེས་གསུངས་པ་གཉིས་དགོངས་པ་གཅིག་གམ་ཐ་དད་ཟེར་ན། གཡུང་སྟོན་ཆེན་པོས། ལམ་རིམ་སོ་སོའི་གོ་མཐུན་བརྩི་ཚུལ་ནི་གཅིག་པར་མཛད་ཀྱང་། རྣལ་འབྱོར་ཕྱི་མ་གཉིས་འདི་དང་བཞེད་ཚུལ་ཐ་དད་པར་མངོན་ཏེ། དེ་ལས། རྩོལ་བྱས་སྤྱོད་པ་འདྲེན་འཇུག་པའི། །ཐེག་པ་དེ་ནི་བྱ་བྱེད་རྐྱེན། །ཞེས་ཀུན་འབྱུང་འདྲེན་པའི་ཐེག་པ་གསུམ་ལ་བྱེད་པ་རྐྱེན་གྱི་རྣལ་འབྱོར་དུ་གསུངས་པ་དང་། གཞན་དུ་འབྲས་བུ་རེ་སྩོལ་མེད། །བསྒྲུབ་བྱ་ཉིད་ལ་ལམ་གནས་པ། །ཐབས་ཆེན་ཐེག་འདི་བྱ་བྲལ་བའོ། །དེ་ཡང་ཕྱི་ནང་། ཞེས་ཕྱི་དཀའ་ཐུབ་རིག་བྱེད་ཀྱི་ཐེག་པ་གསུམ་དང་། ནང་དབང་སྒྱུར་ཐབས་ཀྱི་ཐེག་པ་གསུམ་ལ་བྱ་བྲལ་འབྲས་བུའི་རྣལ་འབྱོར་དུ་གསུངས་པའི་ཕྱིར། འོ་ན་འདིར་ཡང་དེ་དང་མཐུན་པར་བཤད་པར་བྱ་བ་ཡིན་ནམ་སྙམ་ན། མ་ཡིན་ཏེ། རྣལ་འབྱོར་ཕྱི་མ་ལ། སྤྱན་འགྲེལ་ལས། མཐར་ཐུག་གི་རྣལ་འབྱོར་བྱ་བ་མེད་པའི་རྒྱུད་དུ་བྱུང་ཟིན་པས་མི་འགྱུར་བ་འབྲས་བུའི་རིགས་སོ། །ཞེས་གསུངས་པའི་ཕྱིར་རོ། །ཡང་འདིར་རིགས་དང་ཞེས་པའི་ཟུར་གྱིས་རིགས་གསུམ་དུའང་འགྱུར་ཏེ། ངོ་བོ་གཞན་དུ་མི་འགྱུར་ཞིང་མ་ཆད་པ་ཕྱི་མོའི་རིགས་དང་། སེམས་ལྔ་བསྐྱེད་པས་ཆོས་ཉིད་ཀྱི་རྒྱུད་དུ་བྱུང་ཞིང་། དེའི་མི་མཐུན་ཕྱོགས་སུ་མི་གཏོང་བ་རྩོལ་བའི་རིགས་དང་། རྒྱུད་དུ་བྱུང་ཟིན་པས་ལམ་རྩོལ་གྱི་བྱ་བ་མེད་པ་འབྲས་བུའི་རིགས་དང་གསུམ་དུ་བཤད་དོ། །བཞི་པ་ནི། རིམ་གསུམ་ལས། གཞི་ལམ་འབྲས་བུར་བཅས་པའི་ཆོས། །ཞེས་པས། གང་རྟོགས་བྱ་གཞིའི་རྒྱུད་དང་། གང་གིས་རྟོགས་ཤིང་བགྲོད་པ་ལམ་གྱི་རྒྱུད་དང་། གང་དུ་མཐར་ཕྱིན་པ་འབྲས་བུའི་རྒྱུད་དེ་གཞི་ལམ་འབྲས་བུ་གསུམ་དུའང་བཤད་དོ། །དེ་ལྟ་ནའང་དབྱེ་སྒོ་བཞིའི་ནང་གསེས་བཅུ་གཉིས་སུ་ཕྱེ་བ་དེ་རྣམས་ངོ་བོ་རིས་སུ་ཆད་པ་ཞིག་ན། ཐུགས་ཐིག་ལས། གཅིག་ལ་གསུམ་གྱི་ངོ་བོ་ཡང་། །ཞེས་པ་དང་འགལ་ལ། ཡང་ལྡོག་བཅས་ཀྱི་དབྱེ་བའང་མེད་པར་གཅིག་པ་ཞིག་ན་སོ་སོར་ཕྱེ་བ་དང་འགལ་ལོ་ཞེ་ན། ངོ་བོ་གཅིག་ལ་ལྡོག་པ་ཐ་དད་པས་སྐྱོན་མེད་དོ། །ལམ་རིམ་ལས། དེ་ལྟར་ཡེ་ཤེས་རང་གནས་པ། །ལམ་དང་འབྲས་བུ་ཀུན་ངོ་བོ། །ཞེས་པས་ངོ་བོ་རང་རིག་པ་བྱང་ཆུབ་ཀྱི་སེམས་སུ་གཅིག་པར་གསུངས་པ་གང་ཞིག །དེའི་མཚོན་ཚུལ་གྱི་ལྡོག་ཆ་གཞི་ལམ་འབྲས་གསུམ་དུ་ཐ་དད་པར་སྣང་བའི་ཕྱིར།
གཉིས་པ་རྣམ་པར་བསྡུ་བ་ནི། ཤེས་བྱའི་ཆོས་ཀུན་གཞི་ལམ་འབྲས་བུ་གསུམ་དུ་འདུ་སྟེ། སྔར་དབྱེ་སྒོ་བཞིར་ཕྱེ་བ་དེ་རྣམས་མིང་གི་རྣམ་གྲངས་ཙམ་ལས་ངོ་བོ་ཐ་དད་དུ་མ་གྲུབ་པའི་ཕྱིར། དཔེར་ན་སྐྱེས་བུ་གཅིག་ཉིད་ལ་མིང་གི་རྣམ་གྲངས་དུ་མ་བཏགས་པ་བཞིན་ནོ། །