གཞི་ལམ་འབྲས་གསུམ་སྤྱིར་གཏན་ལ་དབབ་པས་མདོར་བསྟན།
གསུམ་པ་བསྡུས་པའི་དོན་གཏན་ལ་དབབ་པ་ལ། གཞི་ལམ་འབྲས་གསུམ་སྤྱིར་གཏན་ལ་དབབ་པས་མདོར་བསྟན། དེ་སོ་སོར་གཏན་ལ་དབབ་པས་རྒྱས་པར་བཤད་པའོ། །དང་པོ་ལ། དབྱེ་བ། ངོ་བོ། སྒྲ་དོན། མཚན་ཉིད་དང་བཞི། དང་པོ་ལའང་། དབྱེ་གཞི། དབྱེ་ཆོས། དབྱེ་བའི་དགོས་པ། ངེས་བྱེད་ཀྱི་ཚད་མ་བསམ་པའོ། །དང་པོ་ནི། གང་ལས་འབྱེད་པའི་གཞིར་མེད་མི་རུང་བ་སྟེ། དབྱེ་གཞི་མེད་པའི་དབྱེ་སྒོ་མི་མཚུངས་པའི་ཕྱིར། ཤེས་བྱ་ཙམ་དབྱེ་གཞིར་འཐད་ཅེས་མཁས་པ་ཕལ་ཆེར་ཞལ་མཐུན་པར་གསུངས་སོ། །དེ་སྐད་དུའང་། སྤྱན་འགྲེལ་ལས། གཞི་ལམ་འབྲས་བུའི་ཤེས་བྱ་རྣམས། །འབྲུ་མཐུན་ཚིག་དོན་ཤེས་བྱའི་ཕྱིར། །རྣམ་གསུམ་རྒྱུད་ཀྱི་དོན་དུ་བསྡུས། །ཞེས་སོ། །གལ་ཏེ་མི་འཐད་དེ། ལུང་རིགས་མན་ངག་གསུམ་དང་འགལ་བའི་ཕྱིར། ལུང་དང་འགལ་ཏེ། དགོངས་འདུས་ལས། དཔེའམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོ་འཇལ་འདྲ། །ཞེས་སོ། །མན་ངག་དང་འགལ་ཏེ། ལམ་རིམ་ལས། དེ་མིང་ཞེན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་སོ། །རིགས་པས་ཀྱང་གནོད་དེ། ཤེས་བྱ་ཙམ་དབྱེ་གཞིར་བྱས་ན་གནས་ལུགས་ངོ་བོ་ཉིད་ཀྱི་གཞི་ཡང་ཤེས་བྱར་ཐལ། དབྱེ་གཞིའི་ཁྱབ་བྱ་ཡིན་པའི་ཕྱིར། འདོད་མི་ནུས་ཏེ། དེ་ཤེས་བྱའི་ཡུལ་ལས་འདས་པའི་ཕྱིར་ཏེ། རྡོར་གཅོད་ལས། ཆོས་དབྱིངས་ཤེས་བྱ་མ་ཡིན་པས། །དེ་ནི་རྣམ་པར་ཤེས་མི་ནུས། །ཞེས་དང་། གལ་པོ་ལས། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་པའི་ཕྱིར་ཟེར་ན། ལན་དུ་ཁ་ཅིག །གནས་ལུགས་ཤེས་བྱ་མ་ཡིན་ཡང་། གཏན་ལ་འབེབས་ལྡོག་ཤེས་བྱའི་ཡུལ་ཡིན་པས་སྐྱོན་མེད་ཟེར་ཡང་། གཏན་ལ་དབབ་བྱ་ཁོ་ན་གནས་ལུགས་དེ་ཡིན་པའི་ཕྱིར་མི་འཐད་གསུངས། མཁས་པ་དག་རོག །གནས་ལུགས་ངོ་བོ་ཉིད་ཀྱི་གཞི་ཤེས་བྱར་ཐལ་བ་ལ་སྐྱོན་མེད་དེ། དགོངས་འདུས་ཀྱི་ལུང་དེའི་དོན་ནི། རྟོག་གེའི་རིགས་པས་མི་རྟོགས་པ་ལ་དགོངས་ཀྱི། ཀུན་ཁྱབ་ཀྱི་གཏན་ཚིགས་གསུམ་གྱིས་མི་རྟོགས་པ་ལ་དགོངས་པ་མ་ཡིན་ཞིང་། མན་ངག་ཀྱང་གནས་ལུགས་ལ་ཐ་དད་མེད་པ་ལ་བརྗོད་ཀྱི། གཏན་ལ་འབེབས་ཚུལ་ལ་བརྗོད་པ་མ་ཡིན་ནོ། །འོན་ཀྱང་ཤེས་བྱ་ལ་དངོས་པོ་དང་དངོས་མེད་གཉིས་སུ་ཁ་ཚོན་ཆོད་དམ་མ་ཆོད་ཟེར་ན། དེ་ཙམ་དུ་གསང་བ་སྒྱུ་འཕྲུལ་པའི་ལུགས་ཀྱི། ལམ་མཐའ་དག་ལྟ་བ་དང་ཏིང་ངེ་འཛིན་གཉིས་སུ་འདུས་སམ་མ་འདུས། འདུས་ན་འདིར་ཡང་ཆོད་དོ། །གནས་ལུགས་དེ་དངོས་པོ་དང་དངོས་མེད་ཀྱི་མཐར་ཐལ་ཞེ་ན། ལམ་ཡང་ལྟ་བ་དང་ཏིང་ངེ་འཛིན་གང་རུང་གིས་མཚོན་ནུས་པར་ཐལ་ལོ། །ཡང་མ་འདུས་ཟེར་ན། འདིར་ཡང་མ་ཆོད་དོ། །འོ་ན་ཤེས་བྱ་ཁ་ཚོན་གཅོད་པའི་ཚད་མ་རྒྱུན་ཆད་དུ་ཐལ། ཤེས་བྱ་ལ་ཕུང་པོ་གསུམ་པ་སྲིད་པར་འགྱུར་རོ་ཟེར་ན། ལམ་མཐའ་དག་ལྟ་བ་དང་ཏིང་ངེ་འཛིན་གཉིས་སུ་འདུས་པར་བཤད་པ་དང་འགལ་ཏེ། ལམ་གྱི་གཙོ་བོ་གསུམ་པ་ཞིག་ཀྱང་སྲིད་པར་འགྱུར་རོ་ཞེས་མགོ་བསྒྲེའོ། །དེས་ན་ལམ་མཐའ་དག་ལྟ་བ་དང་ཏིང་ངེ་འཛིན་གཉིས་སུ་འདུས་ཀྱང་། ལམ་ཙམ་སྤྱི་ཁྱབ་ཏུ་གནས་པ་བཞིན་དུ་ཤེས་བྱ་མཐའ་དག་དངོས་པོ་དང་དངོས་མེད་གཉིས་སུ་ཁ་ཚོན་ཆོད་ཀྱང་། གནས་ལུགས་ཀྱི་གཞི་དེ་སྤྱི་ཁྱབ་ཏུ་གནས་པ་ནི་གཏན་ལ་དབབ་བྱར་རིགས་ཞེས་གསུངས། དེ་ལྟར་ཡང་ཡིན་མོད། ཁོ་བོ་ནི་གནས་ལུགས་ཀྱི་ངོ་བོ་ཤེས་བྱ་ཤེས་བྱེད་ལས་འདས་ཀྱང་། ཐ་སྙད་ཙམ་དུ་གཞལ་བྱར་བྱས་པ་མི་འགལ་ཏེ། དཔེར་ན་ནམ་མཁའ་སེམས་རྟོག་གི་ཡུལ་ལས་འདས་ཀྱང་སྐྱེས་བུས་འཇལ་བ་བཞིན་དང་། ཡབ་སྲས་མཇལ་བའི་མདོ་ལས། ཤེས་པར་བྱ་བའང་ཀུན་རྫོབ་དང་དོན་དམ་པའི་བདེན་པ་གཉིས་སུ་ཟད་དོ། །ཞེས་དང་། གལ་པོ་ལས། ཤེས་བྱའི་ནང་ནས་དམ་པར་ནི། །གྱུར་ཕྱིར་ངེས་པའི་ཚིག་ཡིན་ནོ། །ཞེས་དོན་དམ་ཤེས་བྱར་བཤད་པའི་སྐབས་མང་ཡང་། སྔར་གྱི་ལུང་རྣམས་དང་མི་འགལ་བའི་གནད་ཀྱང་དེ་ཡིན་པའི་ཕྱིར་དང་། མདོར་ན་གཞི་ལམ་འབྲས་གསུམ་དུ་ཕྱེ་བ་ཡང་རྨི་ལམ་གྱི་རྒྱུ་འབྲས་སོ་སོར་སྣང་བ་ལྟར། རེ་ཞིག་འཁྲུལ་སྣང་ཀུན་བརྟགས་ཀྱི་དབང་གིས་སོ་སོར་སྣང་བ་ཙམ་ལ་བཞག་མོད། ཆོས་ཀྱི་ངོ་བོ་ཉིད་ཀྱིས་ཕྱེ་བ་མ་ཡིན་ཏེ། ངོ་བོ་རང་རིག་པའི་བྱང་ཆུབ་ཀྱི་སེམས་སུ་གཅིག་པའི་ཕྱིར། འོན་ཀྱང་ཐ་སྙད་ཀྱི་བློ་ངོར་དབྱེ་གཞི་ཤེས་བྱ་ཙམ་དུ་བྱས་པས་གནས་ལུགས་ཤེས་བྱར་ཐལ་བ་ལ་སྐྱོན་མེད་དེ། འདིར་དབྱེ་གཞི་ཉིད་གནས་ལུགས་ཡིན་པས་དེ་ཤེས་པར་བྱ་བའི་རྒྱུད་དོན་གྱི་རྩ་བ་ཡིན་པའི་ཕྱིར་ཏེ། དོན་བསྡུས་ལས། ཕྱི་ནང་བྱེ་བྲག་ཇི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པ། །ཤེས་པར་བྱ་བའི་རྒྱུད་དོན་ཡིན། །ཞེས་བཞེད་པའི་ཕྱིར་དང་། དོན་དམ་བློའི་སྤྱོད་ཡུལ་མིན་ཡང་བདེན་གཉིས་འབྱེད་པའི་རྣམ་བཞག་གི་ཚེ། གལ་པོར། ཤེས་བྱ་ཙམ་གྱི་སྣང་བ་ལ། །བདེན་པ་གཉིས་ཀྱི་ཞིང་ཡང་གྲུབ། །ཅེས་དབྱེ་གཞི་ཤེས་བྱར་གསུངས་པ་ལྟར། འདིར་ཡང་མཚུངས་པའི་ཕྱིར་རོ། །གཉིས་པ་ནི། དབྱེ་གཞི་ཤེས་བྱ་ཙམ་ལས། དབྱེ་བའི་ཆོས་གཞི་ལམ་འབྲས་བུ་གསུམ་དུ་ངེས་ཏེ། དེ་ལས་མང་མི་དགོས་ཤིང་ཉུང་ན་མི་འདུ་བའི་ཕྱིར་རོ། །གསུམ་པ་ནི། གཞི་དེ་རང་ལ་ཡོད་པ་ལ་བརྟེན་ནས། འབྲས་བུ་སྐུ་དང་ཡེ་ཤེས་ལ་བྲོད་པ་བསྐྱེད་པས་ལམ་གྱི་དཀའ་ཚེགས་བཟོད་པར་བྱས་ནས་འཇུག་པའི་དགོས་པ་ཡོད་དེ། ཡུངས་ཀར་ལ་མར་ནག་ལྷུན་གྲུབ་ཏུ་ཡོད་པས། མར་ནག་འདོད་པ་རྣམས་བཏག་འཚག་གི་རྩོལ་བ་ལ་མི་བལྟ་བར་འཇུག་པ་བཞིན་ནོ། །བཞི་པ་ནི། དེ་ལྟར་དབྱེ་སྒོ་གཞི་ལམ་འབྲས་གསུམ་ཁོ་ནར་ངེས་ཤིང་འདུས་པ་དེ་ཚད་མས་ཤེས་སམ། ཚད་མ་མ་ཡིན་པ་ཞིག་གིས་ཤེས་ཞེ་ན། ཚད་མས་ཤེས་ཏེ། གཞན་དུ་ན་སྒྲོ་འདོགས་ཀྱི་བློར་ཟད་པའི་ཕྱིར་ཡིད་བརྟན་མི་རུང་ངོ་། །འོ་ན་རྟོག་གེའི་རིགས་པས་ཤེས་པར་འགྱུར་རོ་སྙམ་ན། མ་ཡིན་ཏེ། རྟོགས་བྱ་གནས་ལུགས་ཀྱི་དོན་དེ་ནི་ཐ་སྙད་པའི་ཤེས་ངོ་ལས་འདས་པའི་ཕྱིར་རོ། །དེ་ལྟར་ཡང་དགོངས་འདུས་ལས། དཔེའམ་ཚད་མའི་གཏན་ཚིགས་སམ། རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོ་འཇལ་འདྲ། །ཞེས་དང་། དགོངས་པ་ངེས་འགྲེལ་ལས། སོ་སོ་རང་རིག་མཚན་མེད་སྤྱོད་ཡུལ་ནི། །བརྗོད་དུ་མེད་ཅིང་ཐ་སྙད་ཡོངས་ཆད་པས། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེའི་ཡུལ་ལས་འདས་པའོ། །ཞེས་དང་། ལངྐར་གཤེགས་པ་ལས་ཀྱང་། བྱིས་པ་དེ་དག་རྟོག་གེ་བ། །རོ་དང་འདྲ་བས་དེ་དག་བརྟགས། །ཞེས་སོ། །འོ་ན་གང་གིས་ཤེས་ན། ལམ་རིམ་ལས། བྱེ་བྲག་བསྡུས་པས་ཀུན་ཁྱབ་གསུམ། །ཞེས་པས་ཤིན་ཏུ་ལྐོག་གྱུར་གྱི་དོན་ཆད་ལྷག་མེད་པར་འཇལ་ནུས་པ་ནི། རྒྱལ་བའི་བཀའ་དྲི་མ་མེད་པའི་ལུང་ཚད་མ་དང་། མཁས་པས་མཛད་པའི་མན་ངག་ཚད་མ་དང་། དེ་གཉིས་དང་རྗེས་སུ་མཐུན་པར་སྐྱེས་པའི་རིགས་པ་ཚད་མ་གསུམ་ལས་གཞན་མེད་པའི་ཕྱིར། ཀུན་ཁྱབ་ཀྱི་ཚད་མ་གསུམ་གྱིས་ཤེས་ཏེ། བཤད་རྒྱུད་རྡོ་རྗེ་མེ་ལོང་ལས། ལུང་དང་རིགས་པ་མན་ངག་གི །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་དང་། འགྲེལ་ཆུང་ལས། ཐུགས་ཀྱི་སྒྲོན་མ་གསང་བའི་འགྲེལ་པ་འདི། །ལུང་དང་མན་ངག་རིགས་པས་གཏན་ལ་དབབ། །ཅེས་དང་། སློབ་དཔོན་དཔལ་དབྱངས་ཀྱིས་ལྟ་བ་ཡང་དག་སྒྲོན་མར། རྣམ་པར་མི་རྟོག་དོན་དམ་རང་བཞིན་གྱི། རིག་པའི་ཚུལ་ཆེན་སེམས་ཀྱི་དམིགས་པ་ནི། །ལུང་དང་མན་ངག་རིགས་པས་ཐག་བཅད་དེ། །ཆོས་ཀྱི་རང་བཞིན་ཡང་དག་ཡིད་ཆེས་བྱ། །ཞེས་སོ། །དེས་ན་ལུང་ནི་འདི་ཉིད་ལས། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་སོ། །མན་ངག་ནི། གཞི་ལམ་འབྲས་བུའི་ཤེས་བྱ་རྣམས། །འབྲུ་མཐུན་ཚིག་དོན་ཤེས་བྱའི་ཕྱིར། །རྣམ་གསུམ་རྒྱུད་ཀྱི་དོན་དུ་བསྡུས། །ཞེས་སོ། །རིགས་པ་ནི། དབྱེ་གཞི་ལས་དབྱེ་སྒོ་གཞི་ལམ་འབྲས་བུ་གསུམ་དུ་ངེས་ཏེ། དེ་དག་མ་ཚོགས་པར་དོན་གཉིས་རྫོགས་པའི་བྱང་ཆུབ་ཀྱི་འབྲས་བུ་མི་འབྱུང་བ་གང་ཞིག །དེར་ཤེས་བྱའི་ཆོས་ཀུན་མ་འདུས་པ་མེད་པའི་ཕྱིར། དང་པོ་གྲུབ་སྟེ། དེ་གསུམ་ཁ་ཡར་བ་ལས་འབྲས་བུ་འབྱུང་མི་སྲིད་པའི་ཕྱིར། དཔེར་ན། ས་བོན་ཡོད་ཀྱང་ཞིང་ས་དང་སྐྱེས་བུའི་རྩོལ་བ་མེད་པ་དང་། དེ་གཉིས་ཡོད་ཀྱང་ས་བོན་མེད་ན་སྟོན་ཐོག་མི་འབྱུང་བ་བཞིན་ནོ། །གཉིས་པ་གྲུབ་སྟེ། དེར་མ་འདུས་པའི་ཆོས་གཞན་མ་དམིགས་པའི་ཕྱིར། ཁ་ཅིག་འཁྲུལ་བའི་སྣང་བ་མ་འདུས་སོ་ཞེ་ན། དེ་ནི་བརྟགས་གཞི་ཡིན་པས་གཞིར་འདུ་བའི་ཕྱིར་སྐྱོན་མེད་དེ། གཞི་ལ་ངོ་བོའི་གཞི་དང་བརྟགས་གཞི་གཉིས་སུ་ངེས་པའི་ཕྱིར་ཏེ། རིམ་གསུམ་ལས། ངོ་བོའི་གཞི་དང་བརྟགས་པའི་གཞི། །ཞེས་སོ། །
གཉིས་པ་ལ། གཞིའི། ལམ། འབྲས་བུའི་ངོ་བོ་དང་གསུམ། དང་པོ་ལའང་། གཞི་སྤྱིའི། གནས་ལུགས་ཀྱི། བརྟགས་གཞིའི་ངོ་བོའོ། །དང་པོ་ནི། རང་རིག་པ་བྱང་ཆུབ་ཀྱི་སེམས་ཏེ། རིམ་གསུམ་ལས། ངོ་བོ་ཐམས་ཅད་སེམས་ཉིད་དེ། །གསེར་གྱི་དཔེ་བཞིན་གཉིས་སུ་མེད། །ཅེས་སོ། །གཉིས་པ་ནི། བཅོས་བསླད་མེད་པར་རང་རྩལ་འགག་མེད་དུ་ཅིར་ཡང་སྣང་བ་སྟེ། སྤར་ཁབ་ལས། རང་རིག་པའི་ལུགས་ཀྱི་ཅིར་ཡང་སྣང་བ། ཞེས་སོ། །གསུམ་པ་ནི། སྣོད་བཅུད་སྣང་ཞེན་གྱིས་བསྡུས་པའི་ཆོས་ཐམས་ཅད་དེ། རིམ་གསུམ་ལས། ངོ་བོ་སྣོད་བཅུད་འཇིག་རྟེན་གྱི། །སྣང་དང་ཞེན་པའི་ཆོས་རྣམས་སོ། །ཞེས་སོ། །གཉིས་པ་ལམ་གྱི་ངོ་བོ་ནི། སྐྱེད་བྱེད་ཤེས་རབ་གསུམ་གྱིས་བསྐྱེད་བྱ་ཐུན་མོང་དང་མཆོག་གི་སེམས་བཞིའམ་ལྔ་སྐྱེས་སམ་སྐྱེ་བ་སྟེ། དེ་ལས། ངོ་བོ་ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། །ཞེས་དང་། སྤྱན་འགྲེལ་ལས། ལྔ་སེམས་ལྡན་པའི་ཤེས་རབ་ཉིད། །སྐྱེ་བའི་གཞི་དང་སྐྱེ་ངེས་པའོ། །ཞེས་སོ། །གསུམ་པ་འབྲས་བུའི་ངོ་བོ་ནི། རྒྱལ་བའི་སྐུ་གསུང་ཐུགས་ཡོན་ཏན་ཕྲིན་ལས་ལྔའམ་ཉི་ཤུ་རྩ་ལྔ་སྟེ། ལམ་རིམ་ལས། སྐུ་དང་གསུང་དང་ཐུགས་ཉིད་དང་། །ཡོན་ཏན་ཕྲིན་ལས་རྨད་བྱུང་བ། །ལྔའམ་ལྔ་ཉིད་ངོ་བོར་གནས། །ཞེས་སོ། །
གསུམ་པ་ལ་གཞིའི། ལམ་གྱི། འབྲས་བུའི་སྒྲ་དོན་དང་གསུམ། དང་པོ་ནི། འཁོར་འདས་ཀྱི་ཆོས་ཐམས་ཅད་ཀྱི་འབྱུང་ཁུངས་སམ་གཞིར་གྱུར་པས་ན་གཞི་སྟེ། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་སོ། །གཉིས་པ་ནི། གང་གིས་གང་དུ་བགྲོད་བྱར་གྱུར་པས་ན་ལམ་སྟེ། དོན་བསྡུས་ལས། བགྲོད་དང་དེ་ཆོས་ལྡན་པ་དང་། །ཞེས་སོ། །གསུམ་པ་ནི། སྨིན་པའམ་མཐར་ཕྱིན་པའི་ཕྱིར་འབྲས་བུ་སྟེ། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་སོ། །ཞར་ལ་དེ་གསུམ་རྒྱུད་དུ་མཚོན་བྱའི་སྒྲ་བཤད་ནི། ཕྱི་མ་འགོས་འགྱུར་ལས། རྒྱུད་ནི་རྒྱུན་ཆགས་ཞེས་བྱ་སྟེ། །ཐབས་དང་རྒྱུ་ལས་འབྲས་བུའོ། །ཞེས་པས་གཞི་ལམ་གཉིས་ཤེས་བྱ་ཤེས་བྱེད་དང་། ལམ་འབྲས་གཉིས་འཐོབ་བྱ་འཐོབ་བྱེད་དང་། གཞི་འབྲས་གཉིས་བདག་ཉིད་གཅིག་པར་འབྲེལ་བས། རྒྱུ་རྐྱེན་འབྲས་བུའི་ཚུལ་དུ་འབྲེལ་ཞིང་རྒྱུན་ཆགས་པས་ན་རྒྱུད་དེ། སྤར་ཁབ་ལས། རང་བཞིན་འབྲས་བུ་རྣམ་གཉིས་ཀྱིས། །ཤེས་ཐོབ་བཏགས་པའི་ངེས་ཚིག་གཉིས། །ཞེས་སོ། །
བཞི་པ་མཚན་ཉིད་ལ། དགག་གཞག་གཉིས། དང་པོ་ནི། སྔ་རབས་པ་ཁ་ཅིག །གཞི་ཤེས་བྱ། ལམ་ཤེས་བྱེད། འབྲས་བུ་ཤེས་ཟིན་པའམ། ཡང་ན། གཞི་གསལ་བྱ། ལམ་གསལ་བྱེད། འབྲས་བུ་གསལ་ཟིན་པའོ་ཟེར། དེ་གཉིས་ཀ་མི་འཐད་དེ། ལམ་དེ་ཤེས་ཤིང་གསལ་བར་བྱ་དགོས་སམ་མི་དགོས། དགོས་ན་གཞིར་འགྱུར། མི་དགོས་ན་འབྲས་བུར་ཐལ། གཞན་ཡང་ཡུལ་སྔོན་པོ། ཡུལ་ཅན་མིག་ཤེས། སྔོན་པོར་རྟོགས་པ་གསུམ་ཡང་སྒྱུ་འཕྲུལ་གྱི་གཞི་ལམ་འབྲས་གསུམ་དུ་འགྱུར་རོ་གསུངས། གླན་ཉ་ཚལ་པ་ནི། གནས་པ་གཞི། འཇུག་པ་ལམ། སྨིན་པ་འབྲས་བུའོ་གསུངས། དེ་ལྟར་ན་ལམ་ཡང་གཞིར་ཐལ། གང་གིས་བགྲོད་བྱར་གྱུར་པའི་གནས་སམ་རྟེན་ལམ་ཡིན་པའི་ཕྱིར་དང་། ལམ་གྱི་མཚན་ཉིད་ཀྱིས་ཀྱང་ལྟ་བ་ལ་མ་ཁྱབ་སྟེ། དེ་ཤེས་བྱེད་ཡིན་གྱི་འཇུག་བྱེད་མ་ཡིན་པའི་ཕྱིར། གྲུབ་སྟེ། ཤེས་འཇུག་མཚན་ཉིད་འབྱོར་བའི་གཟུངས། །ཞེས་གསུངས་པའི་ཕྱིར། ལྷ་རྗེ་དཔྱལ་ན་རེ། གནས་ཤིང་བརྟེན་པས་གཞི། འཇུག་ཅིང་བགྲོད་པར་བྱེད་པས་ན་ལམ། ཡོན་ཏན་གྱིས་སྨིན་པ་མཐར་ཐུག་པ་འབྲས་བུའོ་གསུངས་ཀྱང་། གཞི་ལམ་གཉིས་ལ་སྐྱོན་སྔ་མ་ལྟར་འབབ་ཅིང་། འབྲས་བུ་ལ་འཆད་འགྱུར་གྱི་སྐྱོན་གནས་པས་མི་རིགས་སོ། །ཡང་བདག་ཉིད་ཆེན་པོ་འགའ་ཞིག །ཡེ་ནས་གནས་པ་བརྟག་བྱ་དང་བཅས་པ་ནི་གཞི། བགྲོད་པར་བྱེད་པ་རྟོགས་བྱེད་དང་བཅས་པ་ནི་ལམ། མཐར་ཐུག་པའི་དོན་མངོན་དུ་བྱས་པས་རྩོལ་བ་ལས་གྲོལ་བ་ནི་འབྲས་བུའོ། །ཞེས་བཞེད་ཀྱང་། མི་འཐད་དེ། དེ་ལྟར་ན་ལམ་འབྲས་གཉིས་ཡེ་ནས་གནས་པའི་བརྟག་བྱ་ཡིན་ནམ་མིན། ཡིན་ན། གཞི་ལམ་འབྲས་གསུམ་ཀ་མཚན་ཉིད་གཅིག་གིས་མཚོན་ནུས་པར་འགྱུར་ལ། གལ་ཏེ་མ་ཡིན་ན་ནི། དེ་ལྟར་ཡེ་ཤེས་རང་གནས་པ། །ལམ་དང་འབྲས་བུ་ཀུན་ངོ་བོ། །ཞེས་གསུངས་པ་དང་འགལ་ཞིང་། འབྲས་བུའི་མཚན་ཉིད་ཀྱིས་ཀྱང་། ལམ་གྱུར་གྱི་འབྲས་བུ་ལ་མ་ཁྱབ་སྟེ། ད་དུང་མཐོང་ཟིན་བསྒོམ་པའི་རྩོལ་བ་ལས་མ་གྲོལ་བས་མཐར་ཐུག་གི་དོན་མངོན་དུ་མ་བྱས་པའི་ཕྱིར་རོ། །གཉིས་པ་ནི། ཆོས་ཐམས་ཅད་ཀྱི་འབྱུང་གནས་སུ་གྱུར་པ་ནི་གཞི། ཤེས་འཇུག་གི་བྱེད་རྩོལ་དང་བཅས་པ་ནི་ལམ། ཆོས་ཉིད་མངོན་གྱུར་བསྐྱེད་དུ་བྱར་མེད་པར་སོན་པ་ནི་འབྲས་བུ་སྟེ། མཚན་ཉིད་དང་པོས་ངོ་བོ་དང་བརྟག་གཞི་གཉིས་ཀ་ལ་ཁྱབ་ཅིང་ལམ་འབྲས་བཅད། བར་པས་ལྟ་བ་དང་ཏིང་ངེ་འཛིན་གཉིས་ཀ་ལ་ཁྱབ་ཅིང་གཞི་འབྲས་བཅད། ཐ་མས་གནས་སྐབས་དང་མཐར་ཐུག་གཉིས་ཀ་ལ་ཁྱབ་ཅིང་གཞི་ལམ་བཅད་པས་སྐྱོན་ལས་གྲོལ་བའི་ཕྱིར། མཁས་པས་བསྔགས་པར་འོས་པ་ཡིན་ནོ། །