གཞི་ལམ་འབྲས་གསུམ་བཤད་པ།
གཉིས་པ། སོ་སོར་གཏན་ལ་དབབ་པས་རྒྱས་པར་བཤད་པ་ལ། གཞི་བཤད་པ། ལམ་བཤད་པ། འབྲས་བུ་བཤད་པ་དང་གསུམ། དང་པོ་ལའང་། སྤྱིར་བཤད་པ་དང་། བྱེ་བྲག་རྒྱུ་རྒྱུད་དུ་ཇི་ལྟར་འགྱུར་བའི་འཐད་པ་བཤད་པའོ། །དང་པོ་ནི། རིམ་གསུམ་ལས། དང་པོ་རྣམ་པ་གཉིས་ཡིན་ཏེ། །ངོ་བོའི་གཞི་དང་བརྟགས་པའི་གཞི། །ཞེས་པས། གནས་ལུགས་ངོ་བོ་ཉིད་ཀྱི་གཞི་དང་། འཁྲུལ་པ་བརྟགས་པའི་གཞི་གཉིས། དང་པོ་ལ། རང་གི་མཚན་ཉིད་ངོས་བཟུང་བ་དང་། དེ་གཏན་ལ་དབབ་པའོ། །དང་པོ་ལ། དངོས་དང་། སྒྲུབ་བྱེད། སྐབས་འཕྲོས་ཀྱི་གཞལ་བྱ་དང་གསུམ། དང་པོ་ནི། རང་རིག་པ་བྱང་ཆུབ་ཀྱི་སེམས་ཤེས་བྱ་དངོས་པོའི་གཤིས་མཐའ་དང་བྲལ་བར་གནས་ཙམ་ཞིག་སྟེ། དེ་ལས། མཚན་ཉིད་མཐའ་རྣམས་ཀུན་བྲལ་བ། །ཅིར་ཡང་གཟུང་དུ་མེད་པའོ། །ཞེས་སོ། །གཉིས་པ་ནི། ཀུན་ཁྱབ་ཀྱི་གཏན་ཚིགས་གསུམ་སྟེ། དེ་ལ་ལུང་ནི། རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་སོ། །མན་ངག་ནི། ལྟ་ཕྲེང་ལས། ཆོས་ཐམས་ཅད་སེམས་ལ་གནས། ཞེས་དང་། རྣལ་འབྱོར་མིག་གི་བསམ་གཏན་གྱི་རྒྱ་ཆེར་འགྲེལ་ལས། ཆོས་ཐམས་ཅད་རང་རིག་པའི་ཡེ་ཤེས་རང་གི་མཚན་ཉིད་རིག་པར་གསལ་བས་ཅིས་ཀྱང་མ་བསྒྲིབས་པ། གཉིས་སུ་མེད་པ་ལ་མཚན་ཉིད་འདི་འདྲར་བརྗོད་དུ་མེད་པ་སྟེ། ཞེས་སོ། །རིགས་པ་ནི། འཁོར་འདས་ལམ་གསུམ་གྱིས་བསྡུས་པའི་ཆོས་རྣམས་ཆོས་ཅན། རང་རིག་པ་བྱང་ཆུབ་ཀྱི་སེམས་ཡིན་ཏེ། ཐམས་ཅད་སེམས་སུ་འདུས་པས། སེམས་ལས་མ་གཏོགས་པའི་ཆོས་གཞན་མེད་པའི་ཕྱིར། རིན་ཆེན་གསེར་གླིང་དུ་ཕྱིན་པ་བཞིན་ནོ། །དེ་ལ་ཁ་ཅིག་ན་རེ། ཡུལ་རྫས་སུ་སྣང་བ་འདི་དག་ཤེས་པ་ལས་གཞན་དུ་གྲུབ་པའི་ཕྱིར་མི་འཐད་དོ་ཟེར། འོ་ན། ཡུལ་ཤེས་ལ་བདག་གཅིག་གི་འབྲེལ་པ་མེད་དེ། བདག་ཉིད་མི་གཅིག་པའི་ཕྱིར། ཀ་བ་དང་བུམ་པ་བཞིན་ནོ། །དེ་ལས་དེ་བྱུང་གི་འབྲེལ་པའང་མེད་དེ། བསྟན་མེད་ཐོགས་མེད་ཀྱི་རིག་ཙམ་དེ་ལས་བེམ་པོའི་རྫས་སྐྱེ་མི་སྲིད་པའི་ཕྱིར། ནམ་མཁའ་དང་པདྨ་བཞིན་ནོ། །དེ་ལྟར་འབྲེལ་མེད་པར་འདོད་ན། ཤེས་པ་ལས་ཡུལ་རྣམས་སྣང་བ་མི་རིགས་ཏེ། ཡུལ་ཤེས་ལ་འབྲེལ་བ་གཏན་མེད་པའི་ཕྱིར། མིག་དང་སྒྲ་བཞིན་ནོ། །འདོད་མི་ནུས་ཏེ། མངོན་སུམ་གྱི་ཚད་མས་གནོད་པའི་ཕྱིར་རོ། །དེ་བས་ན་སེམས་ལས་གཞན་པའི་ཆོས་གཞན་མ་གྲུབ་སྟེ། འདི་ལྟར་ཡུལ་སོགས་སྣང་བ་ན་ཉམས་སུ་མྱོང་བའི་ཕྱིར། རྨི་ལམ་གྱི་སྣང་བ་བཞིན་དང་། སེམས་ཀྱི་ཇི་ལྟར་དབང་བསྒྱུར་བ་ལྟར་རང་སྣང་བའི་ཕྱིར། ཟད་པར་གོམས་པའི་སྣང་བ་བཞིན་ནོ། །དེ་ལྟར་ཡང་རྒྱས་པ་ལས། ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །ཞེས་དང་། འདི་ལྟར་སྣང་བའི་ཆོས་རྣམས་ཀུན། །གདོས་པ་ཅན་གྱི་ཆོས་མིན་ཏེ། །རྟོག་མེད་རང་རིག་འོད་གསལ་བའི། །ཤེས་པ་འབའ་ཞིག་ཁོ་ནའོ། །ཞེས་དང་། ལམ་རིམ་ལས། སེམས་ལས་མ་གཏོགས་ཆོས་མེད་ཕྱིར། །སྒྱུ་མ་རྡོ་རྗེ་བཙན་པོ་མཆོག །ཅེས་དང་། སློབ་དཔོན་དཔལ་དབྱངས་ཀྱི་མཐའི་མུན་སེལ་སྒྲོན་མ་ལས། ཆོས་རྣམས་སེམས་ཀྱི་འཕྲུལ་པ་སྟེ། །སེམས་ལས་མ་གཏོགས་ཆོས་རྣམས་མེད། །ཅེས་སོ། །དེ་ལྟར་ཐུན་མོང་གི་ལུང་ལས་ཀྱང་གསུངས་ཏེ། ལང་གཤེགས་ལས། ཇི་ལྟར་བྱིས་པས་བརྟགས་པ་ཡི། །ཕྱི་རོལ་དངོས་པོ་ཡོད་མིན་པར། །བག་ཆགས་ཀྱིས་ནི་སྦགས་པའི་སེམས། །དོན་གྱི་དངོས་པོར་རབ་ཏུ་སྐྱེས། །ཞེས་དང་། མདོ་སྡེ་ས་བཅུ་པར་ཡང་། ཀྱེ་རྒྱལ་བའི་སྲས་དག
ཁམས་གསུམ་པོ་འདི་དག་སེམས་ཙམ་མོ། །ཞེས་དང་། རིགས་པ་དྲུག་ཅུ་པ་ལས། འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་ཡང་དག་འདུ། །ཞེས་སོ། །དེ་དག་ཐུན་མོང་གི་གཏན་ཚིགས་ཀྱིས་ཆོས་ཐམས་ཅད་རང་སྣང་དུ་སྒྲུབ་པ་སྟེ། དེ་ཉིད་ཐུན་མིན་གྱི་གཏན་ཚིགས་ཀྱིས་མཐའ་བྲལ་དུ་བསྒྲུབ་པ་ནི་འོག་ཏུ་འཆད་པར་འགྱུར་རོ། །གསུམ་པ་ནི། དེ་ལྟར་ན་སོ་སྐྱེའི་སྣང་བ་སོར་བཞག་འདི་གནས་ལུགས་ངོ་བོ་ཉིད་ཀྱི་གཞིར་འདོད་ན་ནི། ཤེས་བྱ་མ་ནོར་བ་ཡུལ་དུ་བྱེད་པའི་ཕྱིར། སོ་སྐྱེའི་ཤེས་པ་འདི་ཡང་དག་པའི་ཚད་མར་འགྱུར་ཏེ། འཕགས་པའི་མཁྱེན་དངོས་བཞིན་དང་། གལ་ཏེ་ངོ་བོ་ཉིད་ཀྱི་གཞི་མ་ཡིན་ན་འཁྲུལ་སྣང་འདི་ཆོས་ཉིད་ཀྱི་ཁྱབ་བྱ་མ་ཡིན་པར་འགྱུར་ཏེ། ངོ་བོ་ཐ་དད་པའི་ཕྱིར། ཀ་བ་དང་བུམ་པ་བཞིན་ནོ་ཞེ་ན། ལན་དུ། མཁས་པ་གླན། སྣང་ངོ་ནས་ཆོས་ཉིད་རང་སྣང་ཡིན་པས་ཆོས་ཉིད་ཡིན་གྱི། ཞེན་ངོ་ལ་ཕྱོགས་སུ་ཞེན་པས་མ་ཡིན་ཏེ། ལྟོས་ས་ཐ་དད་ལ་ལྟོས་པའོ་གསུངས། རྗེ་ཉ་རི་བ། རྟོགས་པའི་དུས་སུ་གཞིར་མ་གྱུར་པ་མེད་ལ། མ་རྟོགས་པའི་འཁྲུལ་ངོ་འདི་མ་ཡིན་ནོ་གསུངས་ཀྱང་། དེ་གཉིས་ཀ་ལེགས་པར་མི་སེམས་ཏེ། དང་པོ་ལྟར་ན། སྣང་ཞེན་གཉིས་བློ་རྫས་ངོ་བོ་གཅིག་ན། རྫས་གཅིག་ལ་སྣང་མི་སྣང་གི་ཆ་གཉིས་འགལ་བས། ཞེན་ངོ་ཡང་ཆོས་ཉིད་རང་སྣང་དུ་འགྱུར་ཞིང་། ཐ་དད་ན་ཞེན་འཁྲུལ་སྤངས་ཚེ་སྣང་འཁྲུལ་མི་སྤོང་བར་ཐལ་བ་དང་། གཉིས་པ་ལྟར་ན། རྟོགས་པ་དེ་རྐྱེན་ལ་རག་ལུས་ན་རང་བཞིན་གྱི་སྣང་བ་མ་ཡིན་པར་འགྱུར་ཞིང་། རག་མ་ལུས་ན་རྟོགས་མ་རྟོགས་ཀྱི་དུས་ཀྱི་ལྡོག་ཆས་གཞི་ཡིན་མིན་དུ་འདོད་པའི་དམ་བཅའ་ཉམས་སོ། །འོ་ན་གང་ཞེ་ན། རང་བཞིན་ཆོས་ཉིད་དུ་ཡོངས་རྫོགས། རྣམ་པ་འཁྲུལ་ལྡོག་ཏུ་མ་འདྲེས། ངོ་བོ་ལ་དབྱེར་མེད་ཅེས་བྱ་སྟེ། དགོངས་འདུས་ལས། ཞེ་སྡང་མ་འདྲེས་མནར་སེམས་པ། །ཡོངས་སུ་རྫོགས་པར་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ནས། །མ་བཅོས་དེ་བཞིན་ཉིད་ཁོ་ན། །ཞེས་སོ། །འོ་ན་མ་འདྲེས་པས་ཆོས་ཉིད་མིན་པ་བཞིན་དུ། ཡོངས་རྫོགས་ཀྱི་ངོས་ནས་ཀྱང་མ་ཡིན་པར་འགྱུར་ཏེ། དེ་ཉིད་ངོ་བོ་དབྱེར་མེད་ཡིན་པས་སོ། །ཟེར་ན། སྐྱོན་མེད་དེ། ཏིལ་འབྲུ་དང་སྣུམ་གཉིས་རྫས་དབྱེར་མེད་ནའང་། ཏིལ་འབྲུ་ཁུ་བ་དང་། སྣུམ་གོང་བུར་མི་སྣང་བ་བཞིན་ནོ། །ཞེས་གོང་མ་རྣམས་གསུང་།