ཀ་དག་ལྷུན་གྲུབ་ཀྱི་དབྱེ་བ་བཤད་པས་གཞི་འཆིང་གྲོལ་མེད་པར་བསྟན།
གཉིས་པ་ལ། ཀ་དག་ལྷུན་གྲུབ་ཀྱི་དབྱེ་བ་བཤད་པས་གཞི་འཆིང་གྲོལ་མེད་པར་བསྟན། གྲུབ་མཐའ་བདེན་པ་གསུམ་གྱིས་རང་གཞུང་མཐའ་བྲལ་དུ་བསྒྲུབས། གཞི་ངེས་བྱེད་ཀྱི་ཚད་མ་བསམ་པའོ། །དང་པོ་ལ། ཀ་དག་ལྷུན་གྲུབ་ཀྱི་གོ་བ་བསྟན། འདོད་གཞུང་གི་དབྱེ་བ་བརྗོད། སྐྱོན་ཅན་གྱི་ཕྱོགས་དགག །རང་གཞུང་བཞག་སྟེ་ལ་བཟླ་བ་དང་བཞི། དང་པོ་ནི། གཞི་གདོད་མ་ནས་དག་པ་ཡིན་ཏེ། མ་རིག་པ་གློ་བུར་གྱི་དྲི་མ་ཡིན་པའི་ཕྱིར། ནོར་བུ་རིན་པོ་ཆེ་མི་གཙང་བའི་འདམ་གྱིས་གཏུམས་པ་བཞིན་ནོ། །ཞེས་གཞི་དང་དྲི་མ་ཐ་དད་དུ་འདོད་པའི་ཀ་དག་པ་དང་། གཞི་ཡེ་ནས་ལྷུན་གྲུབ་ཡིན་ཏེ། མ་རིག་པ་གཞན་བྱུང་མ་ཡིན་པའི་ཕྱིར། ཡེ་ནས་གསེར་ལྕགས་དབྱེར་མེད་དུ་མེད་ན་གསེར་འགྱུར་གྱི་རྩིས་ལྕགས་གསེར་དུ་བསྒྱུར་དུ་མི་བཏུབ་པ་བཞིན་ནོ། །ཞེས་གཞི་དང་དྲི་མ་དབྱེར་མེད་དུ་འདོད་པའི་ལྷུན་གྲུབ་པའོ། །གཉིས་པ་ནི། དེ་གཉིས་རེ་རེ་ལའང་དབྱེ་བ་གསུམ་གསུམ་དུ་ཡོད་ནའང་། ཀ་དག་ཆེན་པོ་དང་། ལྷུན་གྲུབ་ཆེན་པོ་གཉིས་ཡོངས་གཅོད་བསྒྲུབ་བྱ་ཡིན་པས་འོག་ཏུ་འཆད་ལ། འདིར་སྐྱོན་ཅན་གྱི་འདོད་གཞུང་གི་དབང་དུ་བྱས་ནས་རེ་རེའང་གཉིས་གཉིས་སུ་དབྱེ་སྟེ། དེ་ཡང་ཀ་དག་ལ་གཉིས་ལས། དབྱིངས་ཀ་དག་པ་ན་རེ། གཞི་ཆོས་དབྱིངས་རྣམ་དག་ཡིན་པའི་ཕྱིར། མ་རིག་པའི་གཞིར་མི་རུང་སྟེ། ནོར་བུ་རིན་ཆེན་ལ་མི་གཙང་བའི་འདམ་གྱི་སེལ་མེད་པ་བཞིན་ནོ་ཟེར། ཡེ་ཤེས་ཀ་དག་པ་ན་རེ། འབྲས་བུ་སྐུ་དང་ཡེ་ཤེས་ལ་མ་རིག་གློ་བུར་གྱི་དྲི་མ་ལམ་ལྔས་སྤངས་པ་ཡིན་ཏེ། རིན་པོ་ཆེའི་དགོས་འདོད་འབྱུང་བའི་གེགས་མི་གཙང་བའི་འདམ་དེ་བཀྲུས་ཤིང་ཕྱིས་ནས་དག་པ་ལས་དགོས་འདོད་འབྱུང་བ་བཞིན་ནོ་ཟེར། ལྷུན་གྲུབ་པ་ལའང་གཉིས་ལས། ཆོས་ཉིད་ལྷུན་གྲུབ་པ་ན་རེ། གཞི་མ་རིག་པ་དང་ཡེ་ཤེས་དབྱེར་མེད་ཡིན་པའི་གནད་ཀྱིས་ཆོས་ཉིད་གཅིག་གི་རང་བཞིན་ལས་མ་འདས་པའི་ཕྱིར། ཆོས་ཅན་སོ་སོ་ཡང་ཕན་ཚུན་གཅིག་ལ་གཅིག་ལྷུན་གྱིས་གྲུབ་པ་སྟེ་ཡེ་ནས་གསེར་ལྕགས་དབྱེར་མེད་དུ་མེད་ན་འགྱུར་རྩིས་གསེར་དུ་བསྒྱུར་དུ་མི་བཏུབ་པ་རྫ་ཤིང་ལ་སོགས་པ་བཞིན་ནོ་ཟེར། ཆོས་ཅན་ལྷུན་གྲུབ་པ་ན་རེ། འབྲས་བུ་སྐུ་དང་ཡེ་ཤེས་ཐོབ་ཀྱང་མ་རིག་པ་གཏན་ནས་མ་སྤངས་ཏེ། འཁོར་འདས་གཉིས་དེ་ལས་དེ་མི་གཞན་པའི་ཕྱིར། ལྕགས་གསེར་དུ་གྱུར་པའི་ཚེ་ལྕགས་ལ་གསེར་གྱི་མཚན་མ་མི་སྣང་ཡང་ལྕགས་དེར་གྱུར་པ་ལས་ལོགས་སུ་མ་སྤངས་པ་བཞིན། ཞེས་ཟེར་རོ། །གསུམ་པ་ནི། དབྱིངས་ཀ་དག་པ་ལྟར་ན། གཞི་དེ་མ་རིག་པའི་བརྒྱུད་རྒྱུར་ཡང་མི་རུང་བའི་ཕྱིར། འཁྲུལ་པ་སྐྱེ་མི་སྲིད་པར་ཐལ་བ་དང་། གལ་ཏེ་མ་རིག་པ་གློ་བུར་གྱི་དྲི་མ་ཡིན་ནོ་ཟེར་ན། རྒྱུ་བཀག་པས་འབྲས་བུ་ཁེགས་པའི་ཕྱིར། གློ་བུར་གྱི་དྲི་མ་འབྱུང་མི་རིགས་ཏེ། རྒྱུ་བདེ་གཤེགས་སྙིང་པོ་དྲི་བྲལ་ཡིན་པའི་ཕྱིར་རོ། །ཡེ་ཤེས་ཀ་དག་པ་ལྟར་ན། སྐུ་དང་ཡེ་ཤེས་ཐོབ་པའི་ཚེ་འཁྲུལ་པ་སྤངས་པའི་ཕྱིར། ལྷ་དང་རྟོག་པ་ཐ་དད་དུ་འགྱུར་བས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་སོགས་དང་འགལ་བ་དང་། ཀ་དག་པ་སྤྱིའི་སྐྱོན་དུ། གཞི་དང་དྲི་མ་ཐ་དད་པའི་ཕྱིར། རྒྱས་པ་ལས། མ་རིག་ཡེ་ཤེས་ཐ་དད་མིན། །མ་རྟོགས་རྟོགས་པའི་ལམ་འདིར་གཅིག །ཅེས་པའི་ལུང་དང་འགལ་ཞིང་། རིགས་པའི་གནོད་པའང་། འཁྲུལ་སྣང་དག་ཕྱོགས་སུ་བསྒྱུར་དུ་མི་བཏུབ་པ་དང་། ཆོས་ཉིད་མཐོང་ཡང་འཁྲུལ་སྣང་མི་སྤོང་བ་སོགས་ཆར་ལྟར་འབབ་ཅིང་། འཆད་འགྱུར་ལྟར། འཁྲུལ་གཞི་མེད་ན་སྐྱོན་དུ་འགྱུར་བའི་ལུང་རིགས་རྣམས་ཀྱིས་ཀྱང་གནོད་དོ། །ཡང་། ཆོས་ཉིད་ལྷུན་གྲུབ་པ་ལྟར་ན། གཞི་དང་འཁྲུལ་པ་དབྱེར་མེད་ཡིན་པའི་ཕྱིར། འཁྲུལ་པ་སྤང་དུ་མི་རུང་བར་ཐལ་བ་དང་། ཆོས་ཅན་ལྷུན་གྲུབ་པ་ལྟར་ན། མ་རིག་པའི་རང་བཞིན་ལས་མ་འདས་པའི་ཕྱིར། འབྲས་བུ་སངས་རྒྱས་ཐོབ་ཀྱང་དགོས་མེད་དུ་ཐལ་བ་དང་། སྤྱི་སྐྱོན་དུ། གཞི་དང་དྲི་མ་དབྱེར་མེད་དུ་འདོད་པའི་ཕྱིར། རྒྱས་པ་ལས། ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །ཅེས་པའི་ལུང་དང་འགལ་ཞིང་མ་རིག་པའི་འཁྲུལ་སྣང་མཐོང་བས་ཆོས་ཉིད་མཐོང་བ་སོགས་དང་། འཁྲུལ་གཞི་ཡོད་ན་སྐྱོན་དུ་འགྱུར་བའི་གནོད་བྱེད་འོག་ཏུ་འཆད་པ་རྣམས་ཀྱང་འབབ་པར་འགྱུར་ཞིང་། མདོར་ན། ཀ་དག་ལྷུན་གྲུབ་གཉིས་གཅིག་གི་གྲུབ་མཐས་གཅིག་ལ་གནོད་པའི་ཕྱིར། གྲུབ་མཐའ་བཞི་པོ་དེ་ཐམས་ཅད་སྐྱོན་ཅན་འབའ་ཞིག་པའོ་ཞེས་བླ་མ་རྣམས་གསུངས་སོ། །བཞི་པ་ཀ་དག་ཆེན་པོའམ་ཀ་དག་སྐྱོན་མེད་དང་། ལྷུན་གྲུབ་ཆེན་པོའམ་ལྷུན་གྲུབ་སྐྱོན་མེད་གཉིས་ནི། གཞི་འབྲས་ལ་མ་རིག་པ་མི་ལྡན་པའི་ཆ་ནས་ཀ་དག་དང་། གཞི་འབྲས་ཀྱིས་མ་རིག་པ་མ་སྤངས་པའི་ཆ་ནས་ལྷུན་གྲུབ་ཅེས་བཏགས་ཀྱིས། དོན་ལ་གཞི་འབྲས་གཉིས་ལ་མ་རིག་པ་མ་སྤངས་ལ་མི་ལྡན་པ་སྟེ། དཔེར་ན་སྣུམ་ལ་ཏིལ་གྱི་རྫས་མ་སྤངས་ལ། ཏིལ་གོང་མི་ལྡན་པ་བཞིན་ནོ། །དེའི་ཕྱིར། འཁོར་འདས་སོ་སོར་སྣང་བ་ཡང་ཀུན་བརྟགས་འཁྲུལ་ངོ་ཙམ་དུ་ཟད་ཀྱི། ཆོས་ཀྱི་ངོ་བོ་ནས་ཡང་དག་པར་གཞལ་ན། ཡེ་ནས་བཅིངས་གྲོལ་མེད་པ། དཔེ་རྒྱལ་བུ་དམངས་སུ་འཁྱམས་པ་ལྟར། འཁོར་འདས་མཉམ་པ་ཉིད་དུ་ལ་བཟླས་པ་སྟེ། རྩ་རྒྱུད་ལས། བཅིངས་མེད་རྣམ་པར་གྲོལ་མེད་པས། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང་། རྒྱུད་ཕྱི་མ་ལས། སྤྲོས་པ་ཐམས་ཅད་ཉེར་ཞི་བ། །རང་བཞིན་གྱིས་ནི་གྲོལ་བར་བརྗོད། །འཆིང་བ་མེད་ཕྱིར་དེ་གྲོལ་ལོ། །ཞེས་དང་། ཀུན་བྱེད་ལས། བཙལ་ནས་གྲུབ་པའི་འབྲས་བུ་བསྟན་པ་མིན། །མ་བཙལ་ཡེ་ནས་ལྷུན་གྱིས་གྲུབ་པ་ཡིན། །ཞེས་སོ། །
གཉིས་པ་ནི། ལམ་རིམ་ལས། དེ་ཡང་རྣམ་གསུམ་གནས་ཚུལ་བཞག །ཅེས་པས། ཀུན་རྫོབ། དོན་དམ། བདེན་པ་དབྱེར་མེད་དང་གསུམ། དང་པོ་ལ། ངོ་བོ། སྒྲ་དོན། དབྱེ་བ། སྤགས་ལུགས་སོ། །དང་པོ་ལའང་། སྤྱིའི་ངོ་བོ་དང་། ལྷག་པ་ཀུན་རྫོབ་ཀྱི་ངོ་བོའོ། །དང་པོ་ནི། ཐ་སྙད་ཀྱི་ངོར་སྣང་ལ་མ་འགགས་ཙམ་མོ། །གཉིས་པ་ནི། ཆུ་ཟླ་ལྟར་བདེན་དངོས་ཀྱིས་སྟོངས་པའི་སྣང་བ་རིས་སུ་མ་ཆད་པའོ། །དེ་དག་སྒྲུབ་པ་ལ། ལུང་རིགས་མན་ངག་གསུམ་ལས། ལུང་ནི། རྒྱས་པ་ལས། ཀུན་རྫོབ་སྒྱུ་མར་མཉམ་པ་ཡང་། །འདུས་བྱས་དངོས་པོ་སྣ་ཚོགས་ནི། །སྒྱུ་མའི་ཚུལ་དུ་ཐམས་ཅད་སྣང་། །འཕྲལ་སྣང་བྱ་བ་ཀུན་བྱེད་ཀྱང་། །རྟོག་པ་ཀུན་གྱི་ཚད་མར་སྣང་། །འདི་དག་ཐམས་ཅད་གཟུགས་བརྙན་ཏེ། །བྱ་བྱེད་མེད་ཅིང་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །ཅེས་དང་། ཀུན་རྫོབ་ཆུ་ཟླ་ལྟར་ཡིན་པས། །ཅིར་ཡང་འགྱུར་ཞིང་ཅིར་ཡང་འགྲུབ། །ཅེས་སོ། །མན་ངག་ནི། ལམ་རིམ་ལས། ཆུ་ཟླ་སྒྱུ་མ་སྤྲུལ་པ་བཞིན། །ཞེས་སོ། །རིགས་པ་ལ་སྣང་ཙམ་འགག་མེད་དུ་སྒྲུབ་པ་དང་། བདེན་པས་སྟོངས་པའི་སྣང་བ་རིས་མེད་དུ་སྒྲུབ་པའོ། །དང་པོ་ནི། སྣང་བ་ཆོས་ཅན། འགག་པ་མེད་པ་ཡིན་ཏེ། གཤིས་ལ་ཡང་དག་ཡེ་ཤེས་ཀྱི་སྣང་བ་ཞིག་ཡོད་པར་གཏན་ཚིགས་བཞིས་གྲུབ་པའི་ཕྱིར། བཞི་གང་ཞེ་ན། སྣང་བ་མ་གྲུབ་ན་འཁྲུལ་སྣང་འབྱུང་མི་རིགས་པའི་ཕྱིར་དང་། སྣང་བ་མེད་ན་དོན་དམ་ཤེས་བྱེད་ཀྱང་མེད་པའི་སྐྱོན་དུ་འགྱུར་བའི་ཕྱིར་དང་། སྣང་ཙམ་པ་འདི་སུས་ཀྱང་དགག་མི་ནུས་པའི་ཕྱིར་དང་། རང་རིག་པ་ཐམས་ཅད་དུ་རྩལ་མ་འགགས་པར་རང་སྣང་བའི་ཕྱིར་རོ། །དེ་ལྟར་བཞི་ལས། དང་པོ་ནི། ད་ལྟར་གྱི་འཁྲུལ་སྣང་འདི་ཆོས་ཅན། འབྱུང་མི་རིགས་ཏེ། དེ་ལ་གཞི་གཤིས་ལ་སྣང་བ་མེད་པའི་ཕྱིར། གང་དུ་སྣང་བ་ཁེགས་པ་ལ་འཁྲུལ་སྣང་ཁེགས་པས་ཁྱབ་སྟེ། དངོས་པོའི་སྦྲུལ་ཁེགས་ན་ཐག་ཁྲ་ལ་སྦྲུལ་འཛིན་གྱི་འཁྲུལ་ཤེས་ཁེགས་པ་བཞིན་ནོ། །གཉིས་པ་ནི། སྣང་བ་ཆོས་ཅན། ཁྱོད་མེད་ན་དོན་དམ་སྟོང་པ་རང་དུ་ཤེས་བྱེད་མེད་དེ། སྟོང་པ་ཕྱོགས་གཅིག་པར་སོང་བའི་ཕྱིར། སྐྱོན་མེད་དེ། སྣང་བ་མ་ཡིན་པ་ཞིག་གིས་ཤེས་ཟེར་ན། དེ་འཁྲུལ་ལམ་མ་འཁྲུལ། འཁྲུལ་ན་དོན་དམ་སྟོང་པར་མི་བདེན་པར་འགྱུར་ཏེ། ཤེས་བྱེད་འཁྲུལ་པས་ཤེས་པའི་ཡུལ་ཡིན་པའི་ཕྱིར། མིག་ཤེས་འཁྲུལ་མཐོང་གི་དུང་གི་རང་བཞིན་སེར་པོ་མིན་པ་བཞིན་ནོ། །མ་འཁྲུལ་ན། ཤེས་བྱ་དོན་དམ་ཤེས་པའི་ཤེས་བྱེད་དེ་ཁོ་ན་ལ་སྣང་བ་ཟེར་བ་ཡིན་ཏེ། ཀ་བ་ཞེས་པ་གདུང་འདེགས་ནུས་པ་ལ་ཟེར་བ་བཞིན་ནོ། །གསུམ་པ་ནི། སྣང་བ་འདི་ཆོས་ཅན། ཐམས་ཅད་མཁྱེན་པའི་ཕྱག་གིས་ཀྱང་མི་ཁེགས་ཏེ། རང་སྣང་བའི་ཕྱིར་ཏེ། རིགས་དྲུག་གི་སྡུག་བསྔལ་མ་ཁེགས་པར་འདུག་པའི་ཕྱིར་རོ། །ཁེགས་ཏེ་མ་བཀག་གོ་ཟེར་ན། རྒྱལ་བ་ཐབས་མཁས་ཐུགས་རྗེ་དང་མི་ལྡན་པར་ཐལ་ལོ། །བཞི་པ་ནི། རང་རིག་པ་ཆོས་ཅན། ཐམས་ཅད་དུ་རྩལ་མ་འགགས་པར་རང་སྣང་བ་ཡིན་ཏེ། གཞན་དུ་ན་བེམ་སྟོང་དང་ཁྱད་པར་མེད་པར་ཐལ་བའི་ཕྱིར། འདོད་མི་ནུས་ཏེ། སྟོང་པའི་རང་འོད་འགག་པ་མེད་པར་འཁོར་འདས་ཀྱི་ཆོས་སུ་ཤར་བའི་ཕྱིར། དཔེར་ན་མཚོ་ཉིད་རླབས་དང་། ཉི་མ་ཉི་འོད་ཀྱི་དཀྱིལ་འཁོར་དུ་སྣང་བ་བཞིན་ནོ། །གཉིས་པ་སྣང་བ་བདེན་སྟོང་རིས་མེད་དུ་སྒྲུབ་པ་ནི། མཐུན་སྣང་གི་ཆོས་ཅན་གཅིག་ལ་སྒྲུབ་ན། རང་ཅག་མི་རྣམས་ལ་སྣང་གྱུར་ཐུན་མོང་དུ་དམིགས་པའི་ཆུ་འདི་ཆོས་ཅན། རིག་པ་སྒྱུ་མའི་སྣང་བ་ཡིན་ཏེ། སྣང་བའི་ངོ་བོ་རིས་སུ་མ་ངེས་པའི་ཕྱིར་ཏེ། ཡི་དྭགས་རྣམས་ལ་རྣག་ཏུ་སྣང་བའི་ཕྱིར། དེ་ལྟར་ཡང་སྐ་བ་དཔལ་བརྩེགས་ཀྱི་ལྟ་རིམ་ལས། དམྱལ་བ་རང་སེམས་མེ་སོགས་སྣང་། །ཡི་དྭགས་སྡིག་སེམས་མི་གཙང་ཡུལ། །བྱོལ་སོང་གྱེན་ཐུར་ངམ་གྲོག་སྟེ། །མི་ལ་མཐོང་ཡུལ་འདི་ཉིད་སྣང་། །དེ་བཞིན་ལྷ་མིན་གོ་མཚོན་སོགས། །ལྷ་ལ་དགེ་སེམས་རིན་ཆེན་སྣང་། །ཞེས་སོ། །དེ་ལྟར་ནའང་། ཁོ་ན་རེ། ང་ལ་ཆུར་སྣང་བ་བཞིན་དུ་ཁྱོད་ལ་མི་སྣང་བར་འགྱུར་ཏེ། མ་ངེས་པའི་ཕྱིར་ཞེ་ན། ཁྱོད་དང་ང་གཉིས་ལས་མཐུན་གཅིག་ཏུ་ཚོགས་པས་མཐུན་པར་སྣང་བ་མི་འགལ་ཏེ། དཔེར་ན་ནད་ཀྱིས་བཏབ་པའི་མིག་སེར་ཅན་གཉིས་ཀྱི་དུང་དཀར་པོ་སེར་པོར་མཐུན་པར་མཐོང་བ་དེ། དུང་སེར་པོར་ཡོད་ནས་མཐོང་ལུགས་མཐུན་པ་མ་ཡིན། ནད་རིགས་མཐུན་པས་མཐོང་ལུགས་གཅིག་པ་བཞིན་ནོ། །གཞན་ཡང་། ཤེས་ངོ་ཐུན་མོང་པ་དང་། དུས་གསུམ་ཐུན་མོང་པ་ལ་མཐུན་པ་མི་འགལ་ཡང་། ཤེས་ངོ་ཁྱད་པར་བ་དང་། དུས་གསུམ་སྔ་ཕྱི་མཐུན་པར་མི་འགྱུར་ཏེ། ཡི་དྭགས་གཉིས་ཀྱི་ཆུ་རྣག་ཏུ་མཐུན་པར་མཐོང་ནའང་། མི་དང་ཡི་དྭགས་གཉིས་མཐོང་ལུགས་སོ་སོ་བའི་ཕྱིར་དང་། ཤེས་ངོ་ཁྱད་པར་བ་ལ་སྣང་བའི་ངོ་བོ་རིས་སུ་མ་ངེས་པ་དང་། དུས་ཐུན་མོང་པ་དུས་གསུམ་གདོང་ཚུགས་སུ་སྣང་བ་ངེས་ནའང་། དུས་གསུམ་སྔ་ཕྱིར་མ་ངེས་ཏེ། དུས་སྔར་གྱི་འཇིམ་པ། ད་ལྟའི་རྫ་བུམ། ཕྱིས་ཀྱི་གྱོ་དུམ་རྣམས་སྣང་བའི་ངོ་བོ་མ་ངེས་པའི་ཕྱིར། རྒྱུ་མཚན་དེ་དག་གིས་རིག་པ་སྒྱུ་མའི་སྣང་བ་ཡིན་པར་གྲུབ་སྟེ། ཏིང་འཛིན་རྒྱལ་པོ་ལས། ཇི་ལྟར་སྒྱུ་མ་མཁན་གྱིས་སྤྲུལ་པའི་གཟུགས། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་བྱ། །ཞེས་པ་ལྟར་རོ། །གཉིས་པ་ནི། སཾབྲྀཏྟ་སཏྱ་ཞེས་པའི་སྒྲ་ལས། ཀུན་རྫོབ་བདེན་པ་སྟེ། བྲྀ་ཉ་འགེགས་པ་དང་སྒྲིབ་པ་ལའོ། །ཞེས་པའི་བྱིངས་དོན་གྱིས། ཉོན་མོངས་པ་ཅན་མ་ཡིན་པའི་མ་རིག་པའི་རྟོག་པས་བསྐྱེད་པའི་ཀུན་བརྟགས་བདེན་འཛིན་གྱི་སྣང་བརྙན་ནི་ཀུན་རྫོབ་ཡིན་ལ། དེས་བདེན་པར་གཟུང་བས་ན་ཀུན་རྫོབ་བདེན་པ་སྟེ། འདིའི་རྒྱུད་ཕྱི་མ་ལས། རྣམ་པར་རྟོག་པའི་སྣང་བརྙན་ཡང་། །རྣམ་པ་ཀུན་ཏུ་ཀུན་རྫོབ་འདོད། །ཅེས་དང་། དབུ་མ་འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་ཏེ། ཞེས་སོ། །གསུམ་པ་ནི། དབུ་མ་པ་དག །ཐ་སྙད་ཀྱི་ངོར་མི་བསླུ་བ་ཡང་དག་ཀུན་རྫོབ་དང་། བསླུ་བ་ལོག་པའི་ཀུན་རྫོབ་བདེན་པ་གཉིས་སུ་འབྱེད་དེ། བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་སོ། །འདིར་ནི། དབུ་མ་པས་ཡང་དག་ཀུན་རྫོབ་ཏུ་འདོད་པའི་ཕུང་སོགས་ཀྱི་ཆོས་སུ་རྟོག་པ་རྣམས་ལ། མ་དག་པ་ལས་སྣང་ལོག་པའི་ཀུན་རྫོབ་ཅེས་བཞག །ཡང་དག་པའི་ཀུན་རྫོབ་ནི་ཕུང་ལྔ་དེ་བཞིན་གཤེགས་པ་ལྔ་དང་། ཡུལ་འབྱུང་བ་ལྔ་རིགས་ཀྱི་ཡུམ་ལྔ། རྣམ་ཤེས་ཚོགས་བརྒྱད་ཡེ་ཤེས་ལྔར་རང་བཞིན་གྱིས་དག་པས་ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་འདོད་ལ། གནས་ཚུལ་ཡང་། ལམ་རིམ་ལས། མཚོན་བྱ་དོན་གྱི་བསྟན་པ་ཡེ་ཤེས་ལྔ་རང་ལ་གནས་པའི་ཚུལ་དང་། དེ་བཞིན་དུ། རྒྱུད་ཀྱི་གླེང་གཞི་དང་། རྒྱུད་དོན་ཐབས་གྲོལ་དང་། འབྲས་བུ་རང་ལ་གནས་ཚུལ་རྣམས་རྒྱ་ཆེར་གསུངས་ཀྱང་། འདིར་ཁ་རག་སྟོན་སྙིང་གི་ཞལ་ནས། འདྲེན་བཤད་ལས། ཇི་ལྟར་ཕྱི་རོལ་དེ་བཞིན་ནང་། །དེ་བཞིན་གསང་བར་ཤེས་པར་བྱ། །ཞེས་པས། ཕྱི་ནང་གསང་གསུམ་དུ་དབྱེ་གསུངས། དེ་ཡང་ཀུན་རྫོབ་ཕྱི་ལྟར། རྟོག་ཚོགས་ལྷའི་རང་བཞིན་དུ་གནས་ཏེ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་སོགས་སོ། །ནང་ལྟར་ན། སྟེང་སྒོ་འཁོར་ལོ་བཞིར་རང་ལ་ཡེ་ནས་ཇི་ལྟར་གནས་པ་སྟེ། ལམ་རིམ་ལས། དཀྱིལ་འཁོར་བཞི་དང་སྲོག་ཤིང་གསུམ། །གནས་ན་ཀཱ་ལི་སྒྲ་དབྱངས་ལྡན། །ཞེས་སོ། །དེའི་ནང་ནས་ཀྱང་ཆོས་ཀྱི་འཁོར་ལོ་ལ་གླེང་གཞི་ཇི་ལྟར་གནས་ཚུལ་ཡང་། རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །མ་ནུ་རྣམ་ཤེས་ཡིད་སོགས་བཞི། །ཡེ་ཤེས་མྱོང་བས་སྡུད་པར་བཤད། །ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱཪྠ་དོན་ཟབ་མོ། །བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་སོ། །གསང་བ་ལྟར་ན། འོག་སྒོ་ཐབས་ཤེས་ལ་གླེང་གཞི་གནས་ཚུལ་ཡང་། ཐལ་རྒྱུད་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །མ་ད་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཉིད་དོ། །དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་གསུངས་པ་ལྟར་རོ། །སྤྱིར་ན་ལམ་རིམ་ལས། སྒྱུ་མ་མིག་ཡོར་སྤྲུལ་པ་དང་། །སྨིག་རྒྱུ་འཇའ་ཚོན་ཆུ་ཟླ་བཞིན། །ཞེས་པའི་དཔེས་སྒྱུ་མའི་དངོས་པོ་དྲུག་ཏུ་དབྱེ་སྟེ། དེ་ལ་ལོག་རྟོག་སྒྱུ་མ་ནི། སྒྱུ་མའི་རྟ་གླང་ལྟར་དེ་མ་ཡིན་ལ་དེར་འཛིན་གྱི་ཞེན་པའི་ལོག་རྟོག་དང་། རྟེན་འབྲེལ་སྒྱུ་མ་ནི་རྒྱུ་རྐྱེན་གྱིས་བསྐྱེད་པའི་ཆོས་དེས་དབང་པོ་བསླད་པའི་མིག་ཡོར་གྱི་གཟུགས་ལྟར་སྣང་ལ་མ་གྲུབ་པ་དང་། དངོས་པོ་སྒྱུ་མ་ནི་སྣང་ལ་ཚིམ་པ་མེད་པ་སྨིག་རྒྱུའི་དཔེས་བུམ་པ་ལ་བུམ་པར་སྣང་བ་ལྟ་བུའི་སྣང་ཆ་དང་། ཕྱག་རྒྱ་སྒྱུ་མ་ནི། སྣང་ལ་རྟོག་པ་མེད་པ་ཆུ་ཟླའི་དཔེས་བདེན་དངོས་ཀྱིས་སྟོངས་པའི་སྣང་བ་ལྷ་སྐུར་གསལ་བའི་ཆ་དང་། ཡེ་ཤེས་སྒྱུ་མ་ནི་མེད་བཞིན་དུ་རྣམ་པར་བཀྲ་བ་འཇའ་ཚོན་གྱི་དཔེས་རིག་པ་ཕྱི་ནང་མེད་པར་གསལ་བའི་ཆ་དང་། ཐབས་སྒྱུ་མ་ནི་གཅིག་ཏུ་མ་ངེས་པ་སྤྲུལ་པའི་དཔེས་དེ་དང་དེར་སྣང་གི་སྣང་བ་འགག་མེད་དུ་འཆར་བའི་ཆ་ནས་བཞག་པའོ། །དེ་ལྟར་སྒྱུ་མའི་དངོས་པོ་དྲུག་པོ་ཐ་དད་མེད་པར་རིག་པ་ལ་གསལ་བ་ནི་ལྷག་པ་ཀུན་རྫོབ་བོ། །བཞི་པ་ལ། ངོ་བོ། མཚན་ཉིད། རང་བཞིན་གྱི་སྤགས་ལུགས་གསུམ། དང་པོ་ནི། རྒྱུའི་ཐེག་པའི་ཀུན་རྫོབ་རྒྱུ་རྐྱེན་གྱིས་བསྐྱེད་ལ། འདིར་རྒྱུ་རྐྱེན་གྱིས་མ་བསྐྱེད་པས་འཕགས་ཏེ། རྒྱས་པ་ལས། རྒྱུ་རྐྱེན་རག་ལུས་མེད་པའི་ཕྱིར། །ཞེས་སོ། །གཉིས་པ་ནི། རྒྱུའི་ཀུན་རྫོབ་སྐྱེ་འཇིག་ཅན་ཡིན་ལ། འདིར་སྐྱེ་འཇིག་དང་བྲལ་བས་འཕགས་ཏེ། འདི་ཉིད་ལས། སྒྱུ་མ་རྡོ་རྗེ་བཙན་པོ་མཆོག །ཅེས་སོ། །གསུམ་པ་ནི། རྒྱུའི་ཀུན་རྫོབ་བཟང་ངན་ཅན་ཡིན་ལ། འདིར་ཀུན་རྫོབ་ཏུའང་ཆོས་རྣམས་ལ་མི་གཉིས་པའི་བསམ་སྤྱོད་དང་ལྡན་པས་འཕགས་ཏེ། རྒྱས་པ་ལས། ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་དང་། ཀུན་རྫོབ་ཏུ་ནི་མཉམ་རྫོགས་སོ། །ཞེས་སོ། །དེ་ལྟར་ན་ཀུན་རྫོབ་དང་བདེན་པ་དབྱེར་མེད་ལ་ཁྱད་པར་མེད་པར་འགྱུར་རོ་ཞེ་ན། སྣང་ཡང་བདེན་པས་སྟོངས་པ་ཙམ་ཏུ་ངོ་བོ་གཅིག་ཀྱང་། གཏན་ལ་འབེབས་ཚུལ་གྱི་ལྡོག་པ་ཐ་དད་པས་སྐྱོན་མེད་དེ། འཁྱགས་པ་དངོས་སུ་མཐོང་བས་ཆུ་ལྐོག་གྱུར་དུ་ཤུགས་ལས་རྟོགས་པ་ལྟར། སྣང་བ་ཀུན་རྫོབ་བདེན་པར་གཏན་ལ་ཕབ་པས་རང་བཞིན་མེད་པར་ཤུགས་ལས་རྟོགས་པ་ཡིན་གསུངས། ཞར་ལ་སྐབས་འཕྲོས་ཀྱི་རྩོད་སྤོང་ནི། ཁ་ཅིག །ཀུན་རྫོབ་སྤྱི་མཚན་གྱིས་ལྷག་པའི་ཀུན་རྫོབ་ལ་ཁྱབ་བམ་མ་ཁྱབ། ཁྱབ་ན་ལྷག་པའི་ཀུན་རྫོབ་ཀྱང་འཁྲུལ་སྣང་ལོག་ཤེས་སུ་འགྱུར་ལ། མ་ཁྱབ་ན་སྤྱི་མཚན་ཁེགས་པས་རང་མཚན་ཡང་ཁེགས་པར་འགྱུར་ཏེ། ཤིང་ཙམ་ཁེགས་པས་ཤ་པ་སོགས་ཁེགས་པ་བཞིན་ཞེ་ན། སྤྱི་ལ་མ་ལྟོས་པའི་བྱེ་བྲག་མི་སྲིད་པའི་ཕྱིར་ཁྱབ་པ་ཁས་བླང་ངོ་། །དེ་ལྟ་ནའང་། ལྷག་པའི་ཀུན་རྫོབ་འཁྲུལ་སྣང་ལོག་ཤེས་སུ་མི་འགྱུར་ཏེ། ཁྱབ་བྱེད་ཀུན་རྫོབ་སྤྱི་མཚན་བདེན་པའི་སྤྲོས་པས་སྟོངས་པ་ཡིན་པའི་ཕྱིར། དཔེར་ན་མི་ལ་ཆུ་དང་ཡི་དྭགས་ལ་རྣག་ཏུ་སྣང་བའི་མཐོང་ཚུལ་ཐ་དད་ཀྱང་། གཞི་གཤེར་བས་གཉིས་ག་ལ་ཁྱབ་པ་བཞིན་ནོ། །ཡང་ལྷག་པ་ཀུན་རྫོབ་འདི་ལྟར་སྣང་བ་ལྷའི་དཀྱིལ་འཁོར་དུ་འདོད་པ་དེ། ཡེ་ནས་མེད་པའི་སྒྲོ་བཏགས་ཤིག་གམ། ངོ་བོ་ཉིད་ཀྱིས་ཡོངས་སུ་གྲུབ་པ་ཞིག་ཡིན། ཞེས་འདྲི་ན། འདིར་ཕྱི་མ་ལྟར་འདོད་དེ། གལ་ཏེ་སྒྲོ་བཏགས་ཤིག་ན། སྒྲོ་བཏགས་དངོས་མེད་རྫུན་པ་ཡིན་པས་དོན་བྱེད་ནུས་པ་མཐའ་དག་གིས་སྟོངས་པའི་ཕྱིར། ལམ་ལྷའི་རྣལ་འབྱོར་བསྒོམ་པ་དོན་མེད་དུ་འགྱུར་བས་ན་མི་རིགས་སོ། །དེ་ལྟར་ནའང་ཆོས་ཅན་མཚན་མར་སྣང་བ་འདི་དག་ཡེ་ནས་དག་པ་ལྷའི་དཀྱིལ་འཁོར་དུ་གྲུབ་ཟིན་ན། གསེར་ས་ལེ་སྦྲམ་ལྟར་རྒྱུ་རྐྱེན་གཞན་ལ་མ་ལྟོས་པའི་ཕྱིར། ལྷར་སྐྱེས་བྱེད་ཀྱི་ཤེས་པ་ཙམ་ལའང་མ་ལྟོས་པར་ཐལ་ཞེ་ན། དེའི་སྐྱོན་མེད་དེ། ཇི་ལྟར་ནོར་བུ་རིན་པོ་ཆེ་རྙེད་པ་ངོ་མ་ཤེས་ཏེ་ནོར་བུ་ཕལ་པའི་ཁྲོད་དུ་བཞག་པ་ན། དེའི་ཡོན་ཏན་མི་མཐོང་མོད། དེ་ནོར་བུའི་རིགས་ཤེས་པས་ངོ་སྤྲད་དེ་བྱི་དོར་བྱས་པ་ན། གདོད་དེ་ལས་རིན་པོ་ཆེའི་ཡོན་ཏན་ཁྱད་པར་ཅན་འབྱུང་བ་ལྟར། ཡེ་ནས་ལྷར་དག་ཀྱང་སྣང་བ་འདིའི་བདེན་ཞེན་གྱིས་དག་པར་མ་ཤེས་པས། དེའི་ཕྱིར་ལམ་བསྐྱེད་རིམ་ཡང་བདེན་ཞེན་འགོག་བྱེད་ཙམ་ཡིན་པས། དེ་ལ་ལྟོས་ནས་ཡོངས་གྲུབ་ཀྱི་དམ་བཅའ་ཉམས་པར་མི་འགྱུར་རོ། །དེས་ན་འདིར་ཡོངས་གྲུབ་ཏུ་ལུང་རིགས་མན་ངག་གསུམ་ཀས་གྲུབ་སྟེ། ལུང་ནི། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་སོགས་དང་། རྨད་བྱུང་རྒྱལ་པོ་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལས། །ཞེས་སོ། །མན་ངག་ནི། ལམ་རིམ་ལས། ཡན་ལག་དབང་པོ་རྣམ་ཤེས་ཀུན། །རང་བཞིན་ཡོངས་ཀྱིས་དག་པ་དང་། །ཏིང་འཛིན་དེ་བཞིན་གཤེགས་པ་ལྔར། །ཡེ་ནས་མ་བཅོས་ཡོངས་ཀྱིས་གནས། །ཞེས་དང་། ནམ་སྙིང་གི་ཞི་ཁྲོ་གལ་ཕྲེང་ལས། རྡོ་རྗེ་ཕུང་པོའི་ཡན་ལག་རྣམས། །ཡེ་ནས་ལྷ་ཡི་དཀྱིལ་འཁོར་ལ། །ཏིང་འཛིན་སྔགས་རྐྱེན་བསྒོམ་པ་ཡིས། །རང་བཞིན་མངོན་དུ་འགྱུར་བྱའི་ཕྱིར། །ཕྱག་རྒྱ་ཆེན་པོ་ཚང་བར་བསྐྱེད། །ཅེས་དང་། ཀུན་མཁྱེན་ཆོས་རྗེས། ཡེ་ནས་དཀྱིལ་འཁོར་ཡིན་པའི་བདག་ཉིད་ལ། །ཡིན་པར་ཤེས་པའི་ཚུལ་གྱིས་གསལ་འདེབས་ལས། །མ་གྲུབ་པ་ལ་ཡང་སྒྲུབ་བྱེད་པ་མིན། །ཞེས་སོ། །རིགས་པ་ནི། ཕུང་སོགས་རང་བཞིན་གྱིས་ལྷའི་དཀྱིལ་འཁོར་དུ་གྲུབ་སྟེ། རང་བཞིན་མཐར་ཕྱིན་ཀྱི་གཟུགས་སྐུ་མངོན་དུ་བྱར་རུང་བའི་ཕྱིར། དངུལ་རྡོ་ལ་དངུལ་རང་བཞིན་གྱིས་གནས་པ་བཞིན་ནོ། །དེས་རང་བཞིན་འདུས་བྱས་སུ་ཡང་མི་འགྱུར་ཏེ། ལམ་གྱིས་མེད་པ་ཞིག་ཡོད་པར་སྒྲུབ་པ་ལྟ་བུ་མ་ཡིན་གྱི། རང་གནས་མངོན་དུ་གྱུར་པའི་ཕྱིར། འཁྲུལ་ཞེན་སྦྱོང་བ་ཙམ་དུ་ཟད་དེ། དཔེར་ན་དུང་སེར་མཐོང་གི་མིག་ནད་སྦྱོང་བྱེད་ཀྱི་སྨན་ལ་ལྟོས་ཏེ། དུང་གི་དཀར་པོ་མེད་པ་ཡོད་པར་སྒྲུབ་པ་ལྟ་བུ་མ་ཡིན་པ་བཞིན་ནོ། །
གཉིས་པ་དོན་དམ་ལའང་། ངོ་བོ། སྒྲ་དོན། དབྱེ་བ། སྤགས་ལུགས་བཞི། དང་པོ་ལ། དོན་དམ་ཙམ་གྱི་ངོ་བོ་དང་། ལྷག་པ་དོན་དམ་གྱི་ངོ་བོའོ། །དང་པོ་ནི། ཆོས་ཐམས་ཅད་ཀྱི་རང་བཞིན་སྐྱེ་མེད་སྤྲོས་པའི་མཚན་མ་དང་བྲལ་བའོ། །གཉིས་པ་ནི། རིག་པ་སྤྲོས་བྲལ་ལ་སྣང་བ་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་པའོ། །དེ་སྒྲུབ་པའི་ལུང་ནི། འདི་ཉིད་ལས། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་བརྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་སོ། །མན་ངག་ནི། རིན་ཆེན་དྲ་བ་ལས། དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །ཞེས་སོ། །རིགས་པ་ལ། སྤྲོས་བྲལ་དུ་སྒྲུབ་པ་དང་། དེ་ཉིད་སྣང་བ་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་པར་སྒྲུབ་པའོ། །དང་པོ་ནི། སྤྱན་འགྲེལ་དུ། སྐྱེ་མེད་སྒྲུབ་བྱེད་ཀྱི་གཏན་ཚིགས་བཞི་གསུངས་ཏེ། བུམ་པ་ཆོས་ཅན། ཡང་དག་པར་རང་བཞིན་མེད་དེ། གཏན་ཚིགས་བཞིས་སྐྱེ་མེད་དུ་གྲུབ་པའི་ཕྱིར། བཞི་གང་ཞེ་ན། རྒྱུ་རྐྱེན་ལས་མ་སྐྱེས་པའི་ཕྱིར་དང་། དུས་གློ་བུར་དུ་མ་བྱུང་བའི་ཕྱིར་དང་། བྱེད་པ་པོས་མ་བྱས་པའི་ཕྱིར་དང་། སྐྱེས་པའི་དངོས་པོ་འདི་འདྲ་བ་མ་གྲུབ་པའི་ཕྱིར་རོ། །དེ་ལྟར་བཞི་ལས། དང་པོ་མ་གྲུབ་སྟེ། དངོས་པོ་ཐམས་ཅད་རྒྱུ་རྐྱེན་ལས་སྐྱེས་པའི་ཕྱིར་ཟེར་ན། འོ་ན་དངོས་པོ་དེ་བདག་གམ། གཞན་ནམ། གཉིས་ཀའམ། རྒྱུ་མེད་པ་བཞི་གང་ལས་སྐྱེ། དང་པོ་བདག་ལས་སྐྱེའོ་ཞེ་ན། བདག་གྲུབ་པ་ལས་སྐྱེ་བའམ། མ་གྲུབ་པ་ལས་སྐྱེ། གལ་ཏེ་གྲུབ་པ་ལས་སྐྱེ་སྙམ་ན། རྫ་བུམ་ཆོས་ཅན། བསྐྱེད་མི་དགོས་པར་འགྱུར་ཏེ། འཇིམ་པ་ལ་གྲུབ་ཟིན་པའི་ཕྱིར། རྟགས་མ་གྲུབ་ན་སྐྱེད་བྱེད་ཀྱི་རྒྱུ་གྲུབ་དུས་སུ་བསྐྱེད་བྱ་འབྲས་བུ་གྲུབ་པ་ཉམས་ལ། གལ་ཏེ་གྲུབ་ཟིན་ནས་ཀྱང་སྐྱེའོ་ཞེ་ན། ཐུག་མེད་དུ་སྐྱེ་བར་ཐལ་ཏེ། བུམ་པ་ལས་ཀྱང་བུམ་པ་སྐྱེ་བར་འགྱུར་རོ། །ཡང་མ་གྲུབ་པ་ལས་སྐྱེའོ་ཞེ་ན། རྒྱུ་མ་གྲུབ་པས་སྐྱེད་བྱེད་དུ་མི་འཐད་ཅིང་། འབྲས་བུ་མ་གྲུབ་པས་བསྐྱེད་བྱར་ཡང་མི་འཐད་དོ། །གཉིས་པ་གཞན་ལས་སྐྱེའོ་ཞེ་ན། གཞན་རྟག་མི་རྟག་གང་ལས་སྐྱེས། རྟག་པ་ལས་སྐྱེའོ་ཞེ་ན། རྟག་པ་སྐྱེད་བྱེད་ཀྱི་རྒྱུར་མི་འཐད་དེ། རྒྱུ་མི་འགྱུར་བས་འབྲས་བུ་བསྐྱེད་པ་མི་སྲིད་པའི་ཕྱིར། བསྐྱེད་ན་རྟག་པ་ཉམས་ཏེ། བདེན་གཉིས་ལས། དངོས་རྣམས་གཞན་དུ་འགྱུར་བ་ལ། །མཁས་རྣམས་མི་རྟག་བརྗོད་པ་མཛད། །ཅེས་སོ། །གལ་ཏེ་གཞན་མི་རྟག་པ་ལས་སྐྱེའོ་ཞེ་ན། དུས་གསུམ་གང་ལས་སྐྱེ། འདས་པ་རྒྱུ་འབྲས་སྤྱད་ཟིན་པས་སྐྱེ་བ་མི་འཐད། མ་འོངས་པ་མ་སྐྱེས་པས་སྐྱེད་བྱེད་དུ་མི་འཐད། ད་ལྟར་བ་ལས་སྐྱེ་ན། འབྲས་བུ་རང་དང་དུས་མཉམ་པ་ལས་སྐྱེའམ། མི་མཉམ་པ་ལས་སྐྱེ། དུས་མཉམ་པ་བསྐྱེད་བྱ་སྐྱེད་བྱེད་དུ་མི་འཐད། མི་མཉམ་ན་རྒྱུ་འབྲས་འཕྲད་པ་མེད་པས་སྐྱེ་བར་མི་རིགས་སོ། །གསུམ་པ་གཉིས་ཀ་ལས་སྐྱེའོ་ཞེ་ནའང་། མི་འཐད་དེ། རྒྱུ་འབྲས་གཉིས་བདག་གཅིག་པ་དང་། རྫས་གཞན་གཉིས་ཕན་ཚུན་གཅིག་ཡིན་ན་གཅིག་ཡིན་པ་འགལ་བ་དང་། བདག་གཞན་སོ་སོ་ལས་སྐྱེ་བ་ཁེགས་པས་གཉིས་ཀ་ལས་སྐྱེ་བ་ཁེགས་ཏེ། བྱེ་མ་རེ་རེ་ལ་མར་བསྐྱེད་པའི་ནུས་པ་མེད་པས་བྱེ་མ་ཚོགས་པའི་ཕུང་པོ་ལའང་ནུས་པ་མེད་པ་བཞིན་ནོ། །བཞི་པ་རྒྱུ་མེད་པ་ལས་སྐྱེའོ་ཞེ་ན་ཡུལ་དུས་གང་དུ་ཡང་དེ་ལྟར་སྐྱེས་པ་ཚད་མས་མ་མཐོང་བའི་ཕྱིར་ཏེ། གཞན་དུ་ན་ནམ་མཁའ་ལས་ཀྱང་པདྨ་སྐྱེ་བར་ཐལ་བའི་ཕྱིར་རོ། །དེས་ན་མུ་བཞི་ལས་སྐྱེ་བ་ཁེགས་པའི་ཕྱིར། སྐྱེ་བ་ལྟར་སྣང་ཡང་། སྐྱེ་བ་བདེན་པར་གྲུབ་པ་མེད་དེ། རྩ་བ་ཤེས་རབ་ལས། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་སོ། །ཡང་གཉིས་པ་མ་གྲུབ་སྟེ། དུས་གློ་བུར་དུ་བྱུང་ངོ་ཞེ་ན། གློ་བུར་བ་དེ་རྒྱུ་རྐྱེན་ཞིག་ཡོད་ནས་བྱུང་ངམ། མེད་ཀྱང་བྱུང་། གལ་ཏེ་ཡོད་ནས་བྱུང་སྙམ་ན། རྒྱུ་རྐྱེན་བདག་གཞན་གང་ལས་བྱུང་བརྟག་པ་སྔར་དང་འདྲ། རྒྱུ་རྐྱེན་མེད་པར་སྐྱེ་མི་སྲིད་དེ། སྐྱེད་བྱེད་ཀྱི་རྒྱུ་བདག་མ་གྲུབ་པར་གཞན་སྐྱེད་བྱེད་ཀྱི་ནུས་པས་སྟོངས་པའི་ཕྱིར། གང་དུ་འབྲས་བུ་དམིགས་པ་ལ་རྒྱུ་སྔོན་སོང་གིས་ཁྱབ་པས་གློ་བུར་བ་ཉམས་སོ། །དེ་ལྟར་ཡང་རྣམ་ངེས་ལས། རྒྱུ་མེད་རྐྱེན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་ཐལ། །ཞེས་སོ། །ཡང་གསུམ་པ་མ་གྲུབ་སྟེ། བྱེད་པ་པོ་གཞན་གྱིས་བྱས་སོ་ཟེར་ན། བྱེད་པ་པོ་དེ་རྟག་པ་ཞིག་གམ། མི་རྟག་པ་ཞིག་གིས་བྱས། གལ་ཏེ་རྟག་པ་ཞིག་གིས་བྱས་ཤེ་ན། དེ་ཆོས་ཅན། དོན་བྱེད་ནུས་པས་སྟོངས་ཏེ། རྟག་པ་ཡིན་པའི་ཕྱིར། གང་དོན་བྱེད་མི་ནུས་པ་ལ་བྱེད་པ་པོ་མིན་པས་ཁྱབ་སྟེ། བུམ་པ་ཆོས་ཅན། རི་བོང་གི་རྭ་བཞིན་ནོ། །གལ་ཏེ་མི་རྟག་པ་ཞིག་གིས་བྱས་ཞེ་ན། དེ་ནི་སྐད་ཅིག་མ་འགྱུར་བ་དང་བཅས་པ་ཡིན་པས་འདས་མ་འོངས་གཉིས་དངོས་མེད་ཡིན་པའི་ཕྱིར་བྱེད་པ་པོར་མི་འཐད། ད་ལྟར་བ་ལ་བསྐྱེད་བྱ་རང་དང་དུས་མཉམ་པས་བྱེད་ན་ཕན་འདོགས་བྱེད་མེད་ལ། དུས་མི་མཉམ་པས་བྱེད་ན་བྱ་བྱེད་འཕྲད་པ་མེད་པས་བྱེད་པ་པོར་མི་འཐད་དོ། །ཡང་ཁོ་ན་རེ། རྒྱུ་རྐྱེན་ལས་མ་བྱུང་། བྱེད་པ་པོས་ཀྱང་མ་བྱས། དུས་གློ་བུར་དུའང་མ་བྱུང་མོད། འོན་ཀྱང་དངོས་པོ་འདི་དག་སྐྱེས་ནས་འདུག་པ་སུས་ཀྱང་མི་ཁེགས་པའི་ཕྱིར། བཞི་པ་མ་གྲུབ་བོ་ཞེ་ན། བུམ་པ་ཆོས་ཅན། ཡང་དག་པར་རང་བཞིན་མེད་དེ། གཅིག་དང་དུ་མ་དང་བྲལ་བའི་ཕྱིར། དེ་ལྟར་ཡང་དབུ་མ་སྣང་བ་ལས། བདག་དང་གཞན་གྱི་དངོས་འདི་དག །ཡང་དག་པར་ནི་གཅིག་པ་དང་། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་སོ། །གཏན་ཚིགས་མ་གྲུབ་ཅེ་ན། འོ་ན་བུམ་པ་ཉིད་གཅིག་ཏུ་ཡོད་དམ། དུ་མར་ཡོད། གཅིག་ཏུ་ཡོད་ན། ཆ་ཤས་དང་བཅས་པར་ཡོད་དམ། བྲལ་བར་ཡོད། གལ་ཏེ་ཆ་ཤས་དང་བཅས་པར་ཡོད་ན། གཅིག་ཏུ་མི་བཏུབ་སྟེ། སྐར་མའི་ཚོགས་ལྟར་དུ་མར་ཐལ་ལོ། །ཆ་བྲལ་དུ་འདོད་ན་མི་འགྲུབ་སྟེ། ཕྱོགས་ཆ་དྲུག་དང་བཅས་པའི་ཕྱིར། རགས་སྣང་འདི་ནུབ་པར་འགྱུར་རོ། །དེའང་ཉི་ཤུ་པ་ལས། དྲུག་གིས་ཅིག་ཆར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ཀྱང་གོ་གཅིག་ན། །གོང་བུའང་རྡུལ་ཕྲན་དག་ཏུ་འགྱུར། །ཞེས་སོ། །ཡང་དུ་མར་ཡོད་ན་དུ་མ་དེ་གཅིག་ལ་ལྟོས་སམ་མི་ལྟོས། མི་ལྟོས་ན་ཁྱབ་བྱེད་གཅིག་མ་གྲུབ་པས་ཁྱབ་བྱ་དུ་མའང་མི་འགྲུབ་སྟེ། གྲངས་ཀྱི་གནས་བཞིན་ནོ། །ལྟོས་ན། གཅིག་ཏུ་ཐལ་ཏེ། ལྟོས་པས་གྲུབ་པའི་ཕྱིར་མེར་འཛིན་ལ་མེ་གཅིག་ཏུ་སྣང་བ་བཞིན་ནོ། །དེས་ན་གང་གཅིག་དང་དུ་མའི་སྤྲོས་པ་དང་བྲལ་བ་ལ་རང་བཞིན་མེད་པས་ཁྱབ་སྟེ། ནམ་མཁའ་བཞིན་ནོ། །གཉིས་པ་ཐུན་མོང་མ་ཡིན་པའི་རིགས་པས་སྤྲོས་བྲལ་དེ་ཉིད་སྣང་བ་ངོ་བོ་ཉིད་ཀྱི་རྒྱུར་ལྷུན་གྲུབ་ཏུ་སྒྲུབ་པ་ནི། གོང་གི་སྤྲོས་བྲལ་དེ་ཆོས་ཅན། སྣང་བ་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་སྟེ། སྣང་ཙམ་ཉིད་ནས་བརྟགས་ན་ཡང་དག་ཏུ་མ་གྲུབ་ཅིང་། སྣང་ཚོད་ཙམ་ཞིག་མ་འགགས་པའི་ཕྱིར། རྟགས་མ་གྲུབ་ན། འོ་ན་སྣང་སྟོང་ལ་འབྲེལ་ཡོད་དམ་མེད། ཡོད་ན་གྲུབ་པ་ཉིད་དེ། འབྲེལ་པའི་མཚན་ཉིད་མེད་ན་མི་འབྱུང་བའི་རྒྱུ་འབྲས་ཡིན་པའི་ཕྱིར། གལ་ཏེ་འབྲེལ་མེད་དོ་ཟེར་ན། འོ་ན་གཞིའི་དུས་ན་ཆོས་དང་ཆོས་ཉིད་མ་ཡིན་པ་དང་། ལམ་གྱི་དུས་ན་ཚོགས་གཉིས་བསྟེན་པའི་རྒྱུད་ཐ་དད་པ་དང་། འབྲས་བུའི་དུས་ན་སྐུ་གཉིས་ངོ་བོ་ཕན་ཚུན་གཅིག་གིས་གཅིག་སྤངས་པར་ཐལ་ཏེ། སྣང་སྟོང་ལ་འབྲེལ་མེད་པའི་ཕྱིར་རོ། །འདོད་ན། རྒྱས་པ་ལས། མེད་པ་ཉིད་ན་སྣ་ཚོགས་སྣང་། །ཐམས་ཅད་ཤེས་རབ་དབྱིངས་ལས་བྱུང་། །ཞེས་པའི་ལུང་གིས་གསལ། གང་དུ་འབྲེལ་མེད་ལ་རྫས་ཕན་ཚུན་སྤངས་པས་ཁྱབ་སྟེ། ཀ་བ་དང་བུམ་པ་བཞིན་ནོ། །གཉིས་པ་ནི། པ་ར་མཱརྠ་སཏྱ་ཞེས་པའི་སྒྲ་ལས། པ་ར་མ་ནི་དམ་པ། ཨརྠ་དོན། སཏྱ་བདེན་པ་སྟེ། དམ་པ་ནི་སྒོམ་བྱུང་གི་མཉམ་བཞག་ཡེ་ཤེས་དང་། དེའི་རྗེས་མཐུན་རིགས་ཤེས་རྗེས་དཔག །དོན་ནི། དེའི་སྤྱོད་ཡུལ་དུ་གྱུར་པའི་སྟོང་ཉིད་དང་། རྗེས་མཐུན་མེད་དགག་གི་མཚན་ཉིད་ཅན་གྱི་སྟོང་ཉིད། དེ་ལ་རིག་པ་གཞན་གྱིས་མི་གནོད་པས་ན་བདེན་པའོ། །ཡང་ན་དབུ་མ་ཚིག་གསལ་ལས། དོན་ཡང་དེ་ཡིན། དམ་པའང་དེ་ཡིན་པས་ན་དོན་དམ་པ་ཞེས་བྱའོ། །དེ་ཉིད་བདེན་པ་ཡིན་པས་ན་དོན་དམ་པའི་བདེན་པ་ཞེས་བྱའོ། །ཞེས་པས། དོན་དང་། དམ་པ་དང་། བདེན་པ་གསུམ་གཞི་མཐུན་པའི་བསྡུ་བར་བཞེད་དོ། །གསུམ་པ་ནི། ཐུན་མོང་པ་དག །སྤྲོས་པ་ཕྱོགས་རེ་ཆོད་པ་རྣམ་གྲངས་པའི་དོན་དམ་དང་། སྤྲོས་པ་མཐའ་དག་ཆོད་པ་རྣམ་གྲངས་མ་ཡིན་པའི་དོན་དམ་གཉིས་སུ་འབྱེད། འདིར་ནི། ལམ་རིམ་ལས། དོན་མཆོག་ལྔ་འབྲས་ཡེ་ཤེས་དབྱིངས། །བདུན་དང་གསུམ་ཕྱིར་དོན་དམ་པ། །ཞེས་པས་བདུན་ནི། ཡེ་ནས་རིག་པ་སྐུ་གསུང་ཐུགས་ཡོན་ཏན་ཕྲིན་ལས་དབྱིངས་དང་ཡེ་ཤེས་ཀྱི་ངོ་བོར་ལྷུན་གྱིས་གྲུབ་པ་སྟེ། དེ་ཉིད་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཞེས་སོ། །དེ་བདུན་ཡང་རིགས་བསྡུས་ན་གསུམ་སྟེ། རང་བཞིན་དོན་དམ། ཡེ་ཤེས་དོན་དམ། འབྲས་བུ་དོན་དམ་མོ། །དང་པོ་ནི་ཆོས་ཐམས་ཅད་ཀྱི་རང་བཞིན་སྤྲོས་པ་དང་བྲལ་བའི་གནས་ལུགས་ཏེ་དབྱིངས་སོ། །གཉིས་པ་ནི། དེ་རྟོགས་པས་ཤེས་བྱ་ལ་སྒྲིབ་གཡོགས་ཀྱིས་དབེན་པ་སྟེ་ཡེ་ཤེས་སོ། །གསུམ་པ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔའོ། །དེ་དག་ཀྱང་རང་བཞིན་དང་འབྲས་བུ་མངོན་དུ་བྱས་མ་བྱས་དང་། འབྲས་བུ་དང་ཡེ་ཤེས་སྤྱི་བྱེ་བྲག་དང་། རང་བཞིན་དང་ཡེ་ཤེས་གཉིས་གཞི་འབྲས་ཀྱི་ཆ་ལས་ཕྱེ་བར་ཟད་དོ། །ཞེས་སྔ་རབས་པ་རྣམས་གསུང་ཡང་། གཞི་འབྲས་གཉིས་དམིགས་འདྲེས་པའི་སྐྱོན་དུ་འགྱུར་རམ་སྙམ་སྟེ། དེས་ན་རང་ལུགས། དབྱིངས་སྤྲོས་བྲལ་དེ་ཉིད་རང་གསལ་སྒྲིབ་གཡོགས་དང་བྲལ་བའི་ཆ་ནས་ཡེ་ཤེས་དོན་དམ་དང་། དེ་ཉིད་ལ་འབྲས་ཆོས་ལྔ་པོ་ཡེ་ནས་ལྷུན་གྲུབ་ཏུ་བཞུགས་པ་ནི་འབྲས་བུ་དོན་དམ་མོ་ཞེས་བཤད་ན་འཐད་དོ། །དེ་ལྟར་ན་མཐར་ཐུག་གི་འབྲས་བུ་དང་ཁྱད་པར་ཡོད་དམ་མེད་ཅེ་ན། དེ་ལས་གཞན་པའི་འཐོབ་བྱ་མེད། །ཅེས་པས་ངོ་བོ་ལ་ཁྱད་པར་མེད་ཀྱང་། རྣམ་པ་ལམ་གྱིས་མངོན་གསལ་དུ་བྱས་མ་བྱས་ལ་ཁྱད་པར་ཡོད་པ་ཡིན་ནོ། །བཞི་པ་ལ། ངོ་བོ། མཚན་ཉིད། རང་བཞིན་གྱིས་སྤགས་ལུགས་གསུམ། དང་པོ་ནི། རྒྱུའི་ཐེག་པའི་དོན་དམ་སྟོང་ཉིད་སྤྲོས་བྲལ་དུ་འདོད་ལ། འདིར་སྟོང་མཐའ་ལས་གྲོལ་ཏེ་སྣང་བ་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་པས་འཕགས་ཏེ། ལམ་རིམ་ལས། དཔག་བསམ་ཤིང་དང་རིན་ཆེན་ལྟར། །དེ་ཀུན་ངོ་བོ་ཉིད་རྒྱུར་གནས། །ཞེས་སོ། །གཉིས་པ་ནི། རྒྱུའི་དོན་དམ་སྟོང་པའི་མཐར་ལྷུང་ལ། འདིར་ནི་སྣང་ཆོས་མ་སྤངས་ལ་མི་ལྡན་པའི་ཕྱིར་འཕགས་ཏེ། དེ་ལས། གང་ཡང་མ་སྤངས་མི་ལྡན་པས། །མ་བྲལ་ཕྱིར་ན་བྲལ་ཞེས་བྱ། །ཞེས་སོ། །གསུམ་པ་ནི། རྒྱུའི་དོན་དམ་སྐྱེ་མེད་སྒྲ་ཇི་བཞིན་པར་སོང་བས་བྱིན་རླབས་རིག་པ་རང་སྣང་དུ་མི་འཆར་ལ། འདིར་ནི་བྱིན་རླབས་རིག་པ་རང་སྣང་ལྷ་དང་གཞལ་ཡས་ཁང་སོགས་སུ་འཆར་བས་འཕགས་ཏེ། འདི་ཉིད་ལས། དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་སོ། །ཞར་བྱུང་སྐབས་འཕྲོས་ཀྱི་རྩོད་སྤོང་ནི། ཁྱེད་ཅག་སྤྲོས་བྲལ་ལ་སྣང་བ་ངོ་བོ་ཉིད་རྒྱུར་གྲུབ་པར་འདོད་པ་དེ། སྐྱེད་བྱེད་དམ་རྣམ་འཇོག་གི་རྒྱུ་གང་ཡིན། དང་པོ་ལྟར་ན། སྐྱེད་བྱེད་ཀྱི་རྒྱུར་གྲུབ་པའི་ཕྱིར། དོན་དམ་དངོས་པོར་ཐལ་བས་སྤྲོས་བྲལ་ཉམས་ལ། གཉིས་པ་ལྟར་ན། དོན་དམ་གྱིས་རྣམ་པར་བཞག་པའི་འབྲས་བུ་ཡིན་པའི་ཕྱིར། ཀུན་རྫོབ་དེ་ཉིད་དོན་ལས་མི་བསླུ་བའི་འཇུག་ཡུལ་དུ་ཐལ་ལོ་ཞེ་ན། ལན་དུ། རྫས་མ་སྤངས་ལ་ལྡོག་པ་མི་གནས་པ་ངོ་བོ་ཉིད་ཀྱི་རྒྱུ་སྟེ། ཤེལ་མེ་ལྡན་བཞིན་ནོ་གསུང་། འོ་ན་ཀུན་རྫོབ་ཀྱི་རྫས་མ་སྤངས་པའི་ཕྱིར། དོན་དམ་ལ་སྤྲོས་པ་མ་ཁེགས་པར་ཐལ་ཞེ་ན། དེ་ཙམ་དུ་ཤེལ་གྲང་མོ་ལ་མེ་ངོ་བོ་ཉིད་ཀྱི་རྒྱུར་གྲུབ་བམ་མ་གྲུབ། མ་གྲུབ་ན། ཉི་མ་ལ་སྐྱོན་མེད་པ་དང་བར་སྣང་ལ་སྒྲིབ་གཡོགས་མེད་པའི་རྐྱེན་དང་སྤྲོད་པ་དོན་མེད་དུ་ཐལ། རྒྱུ་མེད་རྐྱེན་ལ་མི་ལྟོས་ཕྱིར། །ཞེས་གསུངས་པས་སོ། །གྲུབ་ན། མེ་རྫས་མ་སྤངས་པའི་ཕྱིར། ཤེལ་གྲང་མོ་ལ་སྲེག་བྱེད་མངོན་གྱུར་གྱི་དོན་བྱེད་མ་ཁེགས་པར་ཐལ་ཞེས་མགོ་བསྒྲེའོ། །