བདེན་པ་དབྱེར་མེད།
གསུམ་པ་བདེན་པ་དབྱེར་མེད་ལའང་། ངོ་བོ། སྒྲ་དོན། དབྱེ་བ། སྤགས་ལུགས་བཞི། དང་པོ་ནི། མཐའ་གང་དུའང་མ་རེག་པའི་སེམས་ཉིད་ཡེ་ནས་དཀོར་བདུན་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་པའི་དོན་དམ་བདེན་པ་དང་། དེ་ཉིད་ཀྱི་རྩལ་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་ཀུན་རྫོབ་ཀྱི་བདེན་པ་གཉིས། མཚོན་བྱེད་ཀྱི་ཚིག་ལ་སྔ་ཕྱི་བྱུང་ཡང་། མཚོན་བྱའི་དོན་ངོ་བོ་མཉམ་པ་ཉིད་དུ་གནས་པས་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བའོ། །དེ་སྒྲུབ་པ་ལ་གསུམ་ལས། ལུང་ནི། འདི་ཉིད་ལས། བདེན་པ་གཉིས་ཀ་དབྱེར་མེད་པས། །འཕྲུལ་དགའི་ཚུལ་དེ་ཐ་དད་མིན། །ཞེས་དང་། རྒྱས་པ་ལས། དོན་དམ་ཀུན་རྫོབ་དབྱེར་མེད་དེ། །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་བ་རྡོ་རྗེ་ཉིད། །ཅེས་སོ། །མན་ངག་ནི། ལམ་རིམ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའོ། །ཞེས་སོ། །རིགས་པ་ནི། །སྒྲོལ་ཊཱིཀ་པ། མ་ཡིན་པ་དཔེ་ལ་བརྟེན་ནས་དགག་པ་དང་། ཡིན་པ་དཔེ་ལ་བརྟེན་ནས་བསྒྲུབ་པ་གཉིས་ཡིན་གསུངས། དང་པོ་ནི། སྐུད་པ་དཀར་ནག་སྒྲིལ་བ་བཞིན་སྣང་སྟོང་རེ་མོས་མེད་པའི་ཕྱིར་དང་། བུམ་པ་དང་སྣམ་བུ་བཞིན་ཐ་དད་པ་མེད་པའི་ཕྱིར་དང་། དངོས་པོ་གླང་རྭ་དང་དངོས་མེད་རི་བོང་གི་རྭ་ལྟར་སྣང་སྟོང་ཐ་དད་པ་མེད་པའི་ཕྱིར་དབྱེར་མེད་གྲུབ་བོ། །གཉིས་པ་ནི། གསེར་དང་གསེར་གྱི་སེར་པོ་དང་། གཡུ་དང་གཡུའི་སྔོན་པོ་དང་། མཚོ་དང་མཚོའི་རླབས་དང་། བར་སྣང་དང་འཇའ་ཚོན་གྱི་དཔེ་བཞིས་དབྱེར་མེད་དུ་བསྒྲུབ་གསུང་། རྒྱལ་བ་གཡུང་སོགས་གོང་མ་ཕལ་ཆེར། དབྱེར་མེད་དུ་སྒྲུབ་བྱེད་ཀྱི་རིགས་པ་བཞིར་བཞེད་དེ། བདེན་པ་གཉིས་པོ་དེ་རང་བཞིན་བཟང་ངན་མེད་པའི་ཕྱིར་དང་། ངོ་བོ་དབྱེར་མི་ཕྱེད་པའི་ཕྱིར་དང་། འདུག་ས་ཐ་མི་དད་པའི་ཕྱིར་དང་། དུས་སྔ་ཕྱི་མེད་པའི་ཕྱིར་དབྱེར་མེད་དུ་གྲུབ་གསུངས་སོ། །འདིར་མཐུན་སྣང་གི་ཆོས་ཅན་གཅིག་གི་སྟེང་དུ་བསྒྲུབ་ན། བུམ་པ་ཆོས་ཅན། བདེན་པ་དབྱེར་མེད་ཡིན་ཏེ། སྣང་སྟོང་གང་གི་ཡང་ཕྱོགས་སུ་མ་ཆད་པའི་ཕྱིར། གཏན་ཚིགས་མ་གྲུབ་ཅེ་ན། འོ་ན་བུམ་པ་སྣང་ཕྱོགས་སུ་ཆད་དམ། སྟོང་ཕྱོགས་སུ་ཆད། དང་པོ་ལྟར་ན། སྣང་བ་འདི་ཡང་དག་པར་བདེན་པས་སྟོང་ངམ་མི་སྟོང་། སྟོང་ན་སྣང་ཕྱོགས་སུ་ཆད་པ་ཉམས་ལ། མི་སྟོང་ན་སྣང་བ་རྟག་དངོས་སུ་ཐལ། འདོད་ན། སྤྱི་མདོ་ལས། བྱས་པ་ཐམས་ཅད་མི་རྟག་ཕྱིར། །ཞེས་པ་ལྟར་འདུས་བྱས་འཇིག་པས་གསལ་ཏེ། བུམ་པ་དངོས་པོ་གཞན་གྱིས་བཅོམ་པ་ན་རང་གི་གནས་སྐབས་བཏང་སྟེ་མི་རྟག་པར་འགྱུར་བའི་ཕྱིར། དེ་ལྟར་ཡང་། ཀུན་འདུས་ལས། དཔེར་ན་རྡོ་ཡི་དངོས་པོ་ལས། །བཏགས་སམ་ཕྱེ་མར་བྱས་ནས་ནི། །རླུང་གི་ངོ་ལ་བསྐྱོད་བྱས་ན། །དེ་ལ་རང་བཞིན་གང་ཡང་མེད། །ཅེས་སོ། །ཡང་། སྟོང་ཕྱོགས་སུ་ཆད་ན། བུམ་པར་སྣང་རུང་མ་གྲུབ་པར་ཐལ། འདོད་ན། བུམ་པར་སྣང་བས་གསལ། གལ་ཏེ་སྣང་སྟོང་གང་གི་ཕྱོགས་སུ་མ་ཆད་ནའང་བདེན་པ་དབྱེར་མེད་མིན་ན་ཅི་སྟོ་ཞེ་ན། གང་དུ་སྣང་ཕྱོགས་དང་སྟོང་ཕྱོགས་གར་ཡང་མ་ཆད་ན་དབྱེར་མེད་ཡིན་པས་ཁྱབ་སྟེ། སྒྱུ་མའི་རྟ་གླང་བཞིན་ནོ། །དེའི་ཕྱིར་སྣང་བ་མ་སྤངས་སྣང་བའི་མཐའ་ལས་གྲོལ། སྟོང་པ་མ་སྤངས་སྟོང་པའི་མཐའ་མི་འཛིན། གཉིས་ཀ་མ་སྤངས་གཉིས་སུ་འཛིན་པའི་མཐའ་ལས་གྲོལ། མདོར་ན་དབྱེར་མེད་ཅེས་བརྗོད་པ་ཉིད་ཀྱང་སྣང་སྟོང་ཐ་དད་དུ་ཞེན་པ་དགག་པའི་ཕྱིར་སྨོས་པར་ཟད་ཀྱི། ཡང་དག་པར་ན། དབྱེར་མེད་དུ་འཛིན་པ་དང་ཡང་བྲལ་བའི་ཕྱིར། བློའི་སྤྱོད་ཡུལ་དང་བྲལ་བ་ཞེས་བྱ་སྟེ། འདི་ཉིད་ལས། ཨ་ནི་སྟོང་དང་མི་སྟོང་གི །དབུ་མའང་དམིགས་སུ་ཡོད་མ་ཡིན། །ཞེས་དང་། ལམ་རིམ་ལས། དེ་མིང་ཞེན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་སོ། །གཉིས་པ་ནི། བི་བྷེ་ད། ཞེས་པའི་སྒྲ་ལས། བྷི་ད་ནི་དབྱེ་བ། བི་ནི་དགག་སྒྲ་སྟེ། སྣང་སྟོང་གང་གིའང་རིས་སུ་མ་ཆད་པས་དབྱེ་བ་བྱར་མེད་པའི་དོན་ཏེ། ཕན་ཚུན་བསྡེབས་པ་ལྟ་བུ་མ་ཡིན་པར། ཆོས་གཉིས་པོ་གཅིག་གིས་གཅིག་མི་གཏོང་བའི་མཚན་ཉིད་ཅན་གྱི་དབྱེར་མེད་དོ། །གསུམ་པ་ནི། གཅིག་ལ་གཉིས་མེད་པའི་དབྱེར་མེད། མཐའ་གཉིས་བཀག་པའི་དབྱེར་མེད། ངོ་བོ་དབྱེར་མེད་གསུམ། དང་པོ་ནི། སེམས་ཙམ་པའི་དོན་དམ་བདེན་པ་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ། གཉིས་པ་ནི། དབུ་མ་པའི་རྣམ་གྲངས་མ་ཡིན་པའི་དོན་དམ་བདེན་པ། གསུམ་པ་ནི། གསང་སྔགས་པའི་སྣང་སྟོང་ཟུང་འཇུག་གི་གྲུབ་མཐའོ། །བཞི་པ་ལ། ངོ་བོ། མཚན་ཉིད། རང་བཞིན་གྱིས་སྤགས་ལུགས་གསུམ། དང་པོ་ནི། རྒྱུའི་ཐེག་པའི་བདེན་གཉིས་རེས་འཇོག་ཏུ་གྱུར་པས་ངོ་བོ་སྐུར་འདེབས་སུ་སོང་ལ། འདིར་སྣང་སྟོང་དུས་གཅིག་ཏུ་ཆོད་པས་སྐུར་འདེབས་སུ་མ་སོང་བའི་ཕྱིར་ངོ་བོས་ལྷག་སྟེ། ཨ་ནི་སྟོང་དང་མི་སྟོང་གི །དབུ་མའང་དམིགས་སུ་ཡོད་མ་ཡིན། །ཞེས་སོ། །གཉིས་པ་ནི། རྒྱུའི་དབྱེར་མེད་མཐར་ཐུག་དཔྱད་པའི་རིག་ངོར་གྲུབ་པར་འདོད་པས་མཚན་ཉིད་བཟུང་དུ་ཡོད་ལ། འདིར་བློའི་སྤྱོད་ཡུལ་དང་བྲལ་བའི་ཕྱིར་མཚན་ཉིད་ཕྱོགས་གཅིག་ཏུ་མེད་པས་མཚན་ཉིད་ཀྱིས་ལྷག་སྟེ། ཐ་སྙད་གཉིས་པར་བསམ་བརྗོད་འདས། །ཞེས་སོ། །གསུམ་པ་ནི། རྒྱུའི་བདེན་གཉིས་རང་བཞིན་ཡོད་མེད་རིས་ཆད་དུ་སོང་ལ། སྔགས་ཀྱི་སྣང་སྟོང་དབྱེར་མེད་པའི་ཕྱིར། རང་བཞིན་གྱིས་འཕགས་ཏེ། ལམ་རིམ་ལས། རང་བཞིན་ངང་གིས་དབྱེར་མེད་པའོ། །ཞེས་སོ། །ཞར་བྱུང་སྐབས་འཕྲོས་ཀྱི་རྩོད་སྤོང་ནི། དེ་ལྟར་ན་རང་བཞིན་གྱི་སྣང་བ་གསུམ་དུ་འགྱུར་ཏེ། གནས་ཚུལ་དེ་ལྟར་གྲུབ་པའི་ཕྱིར་ཟེར་ན། རྟགས་མ་གྲུབ་ལ། དེར་བཀོད་པའི་ཕྱིར་ཞེ་ན། རང་བཞིན་དེ་རྟོགས་པར་བྱ་བའི་ཕྱིར་བློས་སྒྲོ་བཏགས་ཏེ་གསུམ་དུ་བཀོད་ཀྱང་། དེར་མི་འགྱུར་ན་ཅི་སྟོ་སྟེ། ཁྱབ་པ་མེད་དོ་ཞེས་ཉང་ཊཱིཀ་པ་གསུངས། ཡང་ཁ་ཅིག་ན་རེ། སྣང་བ་སྐྱེ་འགག་བྱེད་པའི་ཚེ་སྟོང་ཉིད་ཀྱང་སྐྱེ་འགག་བྱེད་པར་འགྱུར་ཏེ། སྣང་སྟོང་གཉིས་ངོ་བོ་བདག་གཅིག་པའི་ཕྱིར་ཟེར་ན། ལན་དུ་མཁས་པ་གླན། སྣང་ལྡོག་སྐྱེ་འགག་བྱེད་ཀྱི། ངོ་བོ་མི་བྱེད་གསུངས། འོ་ན་སྐྱེ་འགག་བྱེད་མི་བྱེད་འགལ་བའི་ཆོས་ཡིན་པའི་ཕྱིར། སྣང་སྟོང་བདག་མི་གཅིག་པར་འགྱུར་རོ་ཞེ་ན། དེ་ཙམ་དུ་མི་རྟག་ལྡོག་དང་བྱས་ཆོས་ཀྱང་བདག་མི་གཅིག་པར་འགྱུར་ཏེ། མི་རྟག་ལྡོག་སྐད་ཅིག་སྐྱེ་འགག་བྱེད་ཚེ་དེ་དང་བདག་གཅིག་པའི་བྱས་ཆོས་ཀྱི་རྫས་སྐྱེ་འགག་མི་བྱེད་པའི་ཕྱིར། དཔེར་ན་ད་ལྟ་བུམ་འཛིན་གྱི་ཤེས་པ་སྐད་ཅིག་གཉིས་པ་ལ་བུམ་པའི་རྫས་རྒྱུན་མ་འགགས་པ་བཞིན་ནོ། །ཡང་དབྱེར་མེད་སྤྱོད་ཡུལ་དང་བྲལ་བ་དེ། ཐོས་བསམ་གྱིས་གཏན་ལ་དབབ་ཏུ་ཡོད་དམ་མེད། ཡོད་ན་བློའི་སྤྱོད་ཡུལ་དང་བྲལ་བ་ཉམས་ལ། མེད་ན་འདི་ལྟར་གཏན་ལ་དབབ་པའི་གཏན་ཚིགས་རྣམས་དོན་མེད་པར་འགྱུར་རོ་ཞེ་ན། གནས་ལུགས་ཀྱི་རང་མཚན་རྟོགས་པའི་མཐར་རྟོགས་བྱ་རྟོགས་བྱེད་གཉིས་མེད་དུ་གྲོལ་བས་མི་སྟོ་སྟེ། རྟོགས་པའི་རང་མཚན་བློ་མཐའ་གང་གིས་ཀྱང་མ་རིག་པའི་ཕྱིར། རྩོད་པའི་ངལ་བ་དོན་མེད་དོ། །དེ་ལྟ་ནའང་། སོ་སྐྱེའི་བློ་ཡུལ་དུ་རྟོགས་པའི་ངེས་ཤེས་ཡོད་དམ་མེད་ཅེ་ན། རང་མཚན་རྟོགས་པའི་ངེས་ཤེས་མེད་མོད། འོན་ཀྱང་རྗོད་བྱེད་ཟབ་མོའི་སྒྲས་མཚོན་ཏེ་སྤྱོད་ཡུལ་དང་བྲལ་བའི་དོན་ལ། དེ་དང་རྗེས་མཐུན་གྱི་དོན་སྤྱི་རྟོགས་པའི་ངེས་ཤེས་ཙམ་སྐྱེར་ཡོད་པའི་ཕྱིར་གཏན་ལ་ཕབ་པ་དོན་མེད་དུ་མི་འགྱུར་ཏེ། འབྱུང་ཆེན་གཏོས་ཀྱི་ནམ་མཁའ་ལ་བློས་གཞལ་བ་ན། མཐའ་དབུས་དང་། དབྱིབས་ཁ་དོག །གཅིག་དང་དུ་མ་སོགས་སྤྲོས་པ་དུ་མས་གཏན་ལ་ཕབ་ཀྱང་། འབྱུང་བ་གཞན་གྱི་གོ་འབྱེད་པ་ཙམ་ལས་རང་གི་མཚན་ཉིད་ངོས་གཟུང་རྒྱུ་མ་དམིགས་པ་ལྟར། འདིར་ཡང་སྣང་སྟོང་དབྱེར་མེད་སོ་སོ་ནས་ཞིབ་ཏུ་སྨྲས་ཀྱང་། དོན་གྱི་གྲུབ་མཐའ་བརྗོད་དུ་མེད་པའི་དོན། དང་པོར་དོན་སྤྱི་ཙམ་དང་མཐར་རང་མཚན་ཡིན་ལུགས་ལྟར་མངོན་དུ་རྟོགས་པས་འགལ་བར་སྣང་བའི་ཆོས་རྣམས་མི་འགལ་བ་སོགས་ལུང་ཚད་མས་གྲུབ་ཀྱི། འདི་དག་ཐ་སྙད་ཀྱི་རིག་པ་ཁོ་ནས་བསྒྲུབ་ཏུ་མེད་དེ། བརྗོད་མེད་ཀྱི་དོན་ལ་གང་ལྟར་བརྗོད་ཀྱང་མཐར་འཛིན་གྱི་བློ་མི་འདོར་བའི་ཕྱིར། ཐམས་ཅད་མཁྱེན་པའང་ཚིག་གིས་དབུལ་བར་འགྱུར་རོ། །དེ་ལྟར་ཡང་། སྤྱི་མདོ་ལས། སྣང་དང་མི་སྣང་ལ་སོགས་པ། །གཉིས་སུ་རྟོག་པ་ཐམས་ཅད་མཐའ། །ཀུན་མཁྱེན་རྣམས་ནི་དབུས་ལའང་མིན། །ཞེས་དང་། སློབ་དཔོན་གཉན་དཔལ་དབྱངས་ཀྱིས་མཛད་པའི་ལྟ་བ་ཡང་དག་སྒྲོན་མ་ལས། ཇི་ལྟར་ནམ་མཁའ་ལ་ནི་ཐ་སྙད་དུ། །མིང་དང་ཚིག་གིས་བརྗོད་པར་བྱེད་མོད་ཀྱི། །མཚན་མ་མེད་ཅིང་སྤྲོས་དང་བྲལ་བ་དེ། །ངོ་བོ་ཉིད་ཀྱི་སེམས་ཀྱི་ཡུལ་ལས་འདས། །ཞེས་དང་། དེས་མཛད་པ་ཡི་ངེས་དོན་ལ། །ཇི་ལྟར་བསྒོམ་པའི་ཐབས་ལས་ཀྱང་། །ཇི་བཞིན་པ་ཡི་ཆོས་བཙན་པར། །ཆོས་ལ་ཆོས་ནི་མི་འཇུག་སྟེ། །ཇི་ཙམ་ཟབ་པའི་ཚིག་བརྗོད་ཀྱང་། །དོན་དང་མཐུན་པར་མི་འགྱུར་རོ། །ཞེས་སོ། །འོན་ཀྱང་སོ་སོར་རྟོག་པའི་ཤེས་རབ་ཀྱིས་རྟོགས་པའི་ཐབས་མེད་པའང་མ་ཡིན་ཏེ། ཏིང་འཛིན་རྒྱལ་པོ་ལས། ཡི་གེ་མེད་པའི་ཆོས་རྣམས་ལ། །ཉན་ཅིང་སྟོན་པར་བྱེད་པ་གང་། །འགྱུར་བ་མེད་ལ་སྒྲོ་བཏགས་ནས། །ཉན་ཅིང་ལེན་པར་བྱེད་པ་ཡིན། །ཞེས་པས་སྤྱོད་ཡུལ་དང་བྲལ་བར་གཏན་ལ་ཕབ་ནས་ངེས་ཤེས་བསྐྱེད་པར་བྱ་བ་ཡིན་པས་ཀྱང་མི་འགལ་ལོ། །དེས་ན་ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །སྒྲོ་སྐུར་མེད་པར་བསྟན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །མཛུབ་མོས་རི་བོང་ཅན་བཞིན་ནོ། །ཞེས་རང་བཞིན་གྱི་རྒྱུད་སྒྲ་རྒྱུད་ཀྱིས་མཚོན་ནུས་པར་གསུངས་པས་ཀྱང་གསལ་ལོ། །ཅི། དེ་ལྟར་ན། ཟླ་བ་ལྟ་འདོད་པ་ལ་མཛུབ་མོས་བསྟན་ནས་ཟླ་བའི་རང་མཚན་མཐོང་ངེས་པའི་ཕྱིར། དང་པོ་ནས་རང་མཚན་མཐོང་གི་དོན་སྤྱི་མཐོང་བའི་དཔེར་མི་རུང་ངོ་ཞེ་ན་སྐྱོན་མེད་དེ། བྱིས་པ་བརྡའ་ལ་མ་བྱང་པ་ལ་ཟླ་བ་དངོས་སུ་བསྟན་ཀྱང་དོན་སྤྱིར་སོང་སྟེ། ཕྱིས་ཆུ་ཟླ་ལ་དེར་རྟོག་པའི་བློ་སྐྱེ་བ་ལྟར། མཚོན་བྱ་མཚོན་ནུས་ཀྱིས་ཟབ་མོའི་སྒྲས་བཤད་ཀྱང་སོ་སྐྱེ་མཚན་མའི་བློ་ཅན་གྱིས་ཇི་ལྟར་བཤད་པ་ལྟར་མི་རྟོགས་པས། ཐོག་མར་དོན་སྤྱི་ཙམ་བློ་ལ་བཀོད་དེ་དད་པས་དྲངས་པའི་ངེས་ཤེས་བསྐྱེད་པས་བརྒྱུད་ནས་བརྗོད་བྱ་ཟབ་མོའི་དོན་རྣམས་རིམ་གྱིས་རྟོགས་པར་གདོན་མི་ཟ་བར་གྲུབ་པ་ཡིན་ནོ། །
གསུམ་པ་གཞི་ངེས་བྱེད་ཀྱི་ཚད་མ་ལའང་གསུམ་ལས། ལུང་ནི། རྒྱས་པ་ལས། བདེན་པ་ཀུན་རྫོབ་དོན་དམ་དང་། །གཉིས་སུ་མེད་དང་རྣམ་གསུམ་ཡང་། །དེ་གསུམ་ཉིད་དུ་མཉམ་པས་གསལ། །ཞེས་སོ། །མན་ངག་ནི། ལམ་རིམ་ལས། དེ་ཡང་རྣམ་གསུམ་གནས་ཚུལ་བཞག །ཅེས་སོ། །རིགས་པ་ནི། གནས་ལུགས་སམ་རང་བཞིན་གྱི་གཞི་ཆོས་ཅན། བདེན་པ་གསུམ་དུ་ངེས་ཏེ། རྣམ་པ་མ་འདྲེས་ལྡོག་བདེན་གཉིས་སུ་སྣང་ཞིང་། རང་བཞིན་དབྱེར་མེད་དུ་ཡོངས་སུ་རྫོགས་པ་ཉིད་ཐམས་ཅད་མཁྱེན་པས་ཀྱང་དགག་ཏུ་མེད་པའི་ཕྱིར་རོ། །ཇི་སྐད་དུ་རིམ་ལྔ་ལས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པ་དེ་བཤད་དོ། །ཞེས་དང་། བྱང་ཆུབ་སེམས་འགྲེལ་ལས་ཀྱང་། ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་སྟེ། །བྱས་པ་དང་ནི་མི་རྟག་བཞིན། །མེད་ན་མི་འབྱུང་ངེས་ཕྱིར་རོ། །ཞེས་སོ། །
གཉིས་པ་བརྟག་གཞི་ལ། མཚན་ཉིད་ངོས་བཟུང་བ་དང་། དེ་གཏན་ལ་དབབ་པ་གཉིས། དང་པོ་ལ། དགག །གཞག །སྤང་གསུམ། དང་པོ་ནི། སྔ་རབས་པ་ཕལ་ཆེར། ལམ་པའི་བློས་བརྟགས་པས་ན་བརྟགས་གཞིའོ་གསུང་། དེ་ལྟར་ན་ལམ་ཡང་བརྟག་གཞིར་འགྱུར་ཞིང་། སྨིག་རྒྱུ་ལ་ཆུ་རགས་མི་དགོས་པ་བཞིན་བློས་སྒྲོ་བཏགས་ལ་སྤང་བྱའི་རྫས་མ་གྲུབ་པའི་ཕྱིར། ལམ་སྦྱངས་པའང་དོན་མེད་དུ་ཐལ་ལོ། །ཡང་། བླ་མ་བདེ་གཤེགས་ཆེན་པོ་ནི། སོ་སོར་རྟོགས་པའི་ཤེས་རབ་ཀྱིས། །བརྟག་དཔྱད་བྱ་བའི་གཞིར་གྱུར་པའོ། །གསུང་། དེ་ལྟར་ན་ཤེས་རབ་ཀྱིས་དཔྱད་བྱའི་ཡུལ་ཡིན་པའི་ཕྱིར། གཞི་ལམ་འབྲས་གསུམ་ཀ་དེར་ཐལ་བས་མི་རིགས་སོ། །གཉིས་པ་ནི། གནས་ལུགས་ལ་ཡང་དག་པར་མ་གྲུབ་པ་ལས་ལོག་པར་རྟོག་པའི་ཞེན་སྣང་སྟེ། ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་སོ། །གསུམ་པ་ནི། འོ་ན་འདས་པའི་ཆོས་ཀྱང་ལོག་རྟོག་ཏུ་ཐལ་ཏེ། བརྟག་གཞི་ཡིན་པའི་ཕྱིར་ཟེར་ན། རང་མཚན་ལ་མ་ཁྱབ་ཅིང་། ཞེན་ངོ་ལ་འདོད་པ་ཉིད་དོ། །དེ་ཅིའི་ཕྱིར་ཞེ་ན། འདས་པ་རང་མཚན་སྤྱོད་ཡུལ་དུ་མ་གྱུར་ཅིང་། འཁོར་བའི་རང་མཚན་འཁྲུལ་པ་ནི་རྫུན་པའི་ཕྱིར། རང་མཚན་གཉིས་ཀ་གཞལ་བྱར་མི་རུང་བ་མཉམ་པས་ཞེན་སྣང་ལ་འཇལ་བའི་ཕྱིར་སྐྱོན་མེད་དེ། དེ་ལས། ཞེན་སྣང་འཇལ་ལ་སྐྱོན་པ་མེད། །ཅེས་སོ། །འོ་ན་འཁོར་འདས་ཀྱི་ཞེན་སྣང་གཉིས་སོ་སོ་ནས་གཞལ་ལམ་ཞེ་ན། མ་ཡིན་ཏེ། སྣང་ཆ་ནས་ཐག་པ་ཡིན་ཡང་། ཞེན་ཆ་ནས་སྦྲུལ་དུ་ཞེན་པ་ལྟར། སྣང་ཆ་ནས་འདས་པ་ཡིན་ཡང་། ཞེན་ཆ་ནས་འཁོར་བར་འཛིན་པའི་ཚོགས་པ་དེ་གཞལ་བྱའོ། །