འཁོར་བའི་ཆོས་གཏན་ལ་དབབ་པ།
གཉིས་པ་ནི། རིམ་གསུམ་ལས། བརྟག་གཞི་གཉིས་སུ་བསྟན་པའི་ཆོས། །འཁོར་དང་མྱ་ངན་འདས་པར་གསུངས། །ཞེས་པས། འཁོར་བའི་ཆོས་གཏན་ལ་དབབ་པ་དང་། མྱང་འདས་ཀྱི་ཆོས་གཏན་ལ་དབབ་པའོ། །དང་པོ་ནི། ཐུགས་ཐིག་ལས། འཁྲུལ་གཞི་འཁྲུལ་ཚུལ་རང་བཞིན་གྱིས། །བསྡོམས་ཏེ་ཡོངས་སུ་ཤེས་པར་བྱ། །ཞེས་པས། གང་ལས་འཁྲུལ་པའི་གཞི། ཇི་ལྟར་འཁྲུལ་པའི་ཚུལ། འཁྲུལ་པའི་རང་བཞིན་ཆོས་ཉིད་ལས་མ་གཡོས་པར་ལ་བཟླ་བའོ། །དང་པོ་ལའང་། དགག །གཞག །སྤང་གསུམ། དང་པོ་ནི། ཁ་ཅིག་ན་རེ། གཉགས་པད་འབྱུང་སོགས། ཡེ་ནས་འཁྲུལ་གཞི་ཡོད་པ་ལས་འཁྲུལ་ལོ་ཟེར་བ་ནི། མི་འཐད་དེ། ཐུགས་ཐིག་ལས། སྒྲོ་འདོགས་དབང་གྱུར་གང་ཟག་རྣམས། །སེམས་ཉིད་དམིགས་སུ་མེད་པ་ལ། །དངོས་པོར་རང་རྒྱུད་གཞིར་སྨྲ་བ། །དེ་ཡི་རིགས་རྒྱུད་རྟག་པར་ལྷུང་། །ཞེས་པས་སྐྱོན་བཞི་གནས་ཏེ། དང་པོ་ནི། འཁྲུལ་པ་རང་རྒྱུད་པ་རྟག་པར་ཐལ། ཡེ་ནས་འཁྲུལ་གཞི་ཡོད་པ་ལས་འཁྲུལ་པའི་ཕྱིར། རྟགས་མ་གྲུབ་ན་དམ་བཅའ་ཉམས་ལ། འདོད་ན། ལམ་རིམ་ལས། འཁོར་བའི་རང་བཞིན་མི་དམིགས་ཕྱིར། ཞེས་པས་གསལ། སྐྱོན་གཉིས་པ་ནི། གཞི་འཁོར་བའི་མཐར་ལྷུང་བར་ཐལ། འཁྲུལ་གཞི་ཡོད་པའི་ཕྱིར། འདོད་ན། དེ་ཉིད་ལས། རང་བཞིན་ངང་གིས་དབྱེར་མེད་པའང་། །ཞེས་པས་གསལ། སྐྱོན་གསུམ་པ་ནི། ཐོས་བསམ་སྒོམ་གསུམ་གྱིས་འཁྲུལ་པ་མི་སེལ་བར་ཐལ། འཁྲུལ་གཞི་ཡེ་ནས་དམིགས་པའི་ཕྱིར། འདོད་ན། རྩ་རྒྱུད་ལས། ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས་གསལ། སྐྱོན་བཞི་པ་ནི། གཞི་གཟུང་འཛིན་ཅན་དུ་ཐལ། ཡེ་ནས་འཁྲུལ་གཞི་ཡོད་པའི་ཕྱིར། འདོད་ན། རིམ་གསུམ་ལས། མཚན་ཉིད་མཐའ་རྣམས་ཀུན་བྲལ་བ། །ཞེས་དང་། རྒྱས་པ་ལས། གཟུང་འཛིན་བྲལ་བའི་ཡེ་ཤེས་ནི། ཞེས་པས་གསལ་ལོ། །ཡང་ཁ་ཅིག་ན་རེ། འཁྲུལ་གཞི་མེད་ཀྱང་འཁྲུལ་ལོ་ཟེར་བ་ནི། མི་འཐད་དེ། ཐུགས་ཐིག་ལས། སྐུར་པ་པོ་ནི་ལྷུན་གྲུབ་ལ། །དེ་དང་མི་མཐུན་སོ་སོར་རྟོག །དེ་ལ་དེ་ནི་མི་སྲིད་བཞིན། །གཞི་ལ་ཡེ་ནས་མེད་ཅེས་སྨྲ། །ཞེན་བློའི་ངོ་ལ་ཡོད་དོ་ཞེས། །སྐུར་པ་གང་ཡིན་ཆད་ལྟ་བ། །དེ་དང་དེ་གཉིས་ཐ་དད་ཅིང་། །མི་སྲིད་ཀུན་འབྱུང་ཐོག་མ་འབྱུང་། །ཞེས་པས་སྐྱོན་བཞིས་གནོད་པའི་ཕྱིར། གང་ཞེ་ན། དང་པོ་ནི། ལྷན་ཅིག་སྐྱེས་པའི་མ་རིག་པ་མ་གྲུབ་པར་ཐལ། འཁྲུལ་གཞི་མེད་པའི་ཕྱིར། འདོད་ན། སྤར་ཁབ་ལས། ངེས་པའི་ཤེས་པ་མ་སྐྱེས་པ་ནི་ལྷན་ཅིག་སྐྱེས་པའི་མ་རིག་པའོ། །ཞེས་སོ། །སྐྱོན་གཉིས་པ་ནི། གཞི་མྱང་འདས་ཀྱི་མཐར་ལྷུང་བར་ཐལ། འཁྲུལ་གཞི་མེད་པའི་ཕྱིར། འདོད་ན། མྱ་ངན་འདས་པའང་ཡོད་མ་ཡིན། །ཞེས་པས་གནོད་དོ། །སྐྱོན་གསུམ་པ་ནི། འཁོར་བ་ལ་ཐོག་མ་འབྱུང་བར་ཐལ། འཁྲུལ་གཞི་མེད་པ་ལས་འཁྲུལ་པའི་ཕྱིར། འདོད་ན། སྤྱི་མདོ་ལས། འཁོར་བ་ཐོག་མ་ཐ་མ་མེད། །ཅེས་སོ། །སྐྱོན་བཞི་པ་ནི། རྒྱུད་དག་པའི་སངས་རྒྱས་ལའང་འཁྲུལ་པ་འབྱུང་རིགས་པར་ཐལ། འཁྲུལ་པ་གཞི་ལ་མེད་ཀྱང་གློ་བུར་དུ་འབྱུང་བའི་ཕྱིར། འདོད་ན། ཐུགས་ཐིག་ལས། དེ་བཞིན་ཉིད་དུ་གཤེགས་པའང་། །སྣ་ཚོགས་ཞེན་ལས་གྲོལ་བར་ཟད། །ཅེས་སོ། །ཡང་ཁ་ཅིག་ན་རེ། འཁྲུལ་གཞི་ཡོད་མེད་དབྱེར་མེད་ལས་འཁྲུལ་ལོ་ཟེར། དེ་ཡང་མི་རིགས་ཏེ། གཞི་རང་བཞིན་ནི་ཡེ་ནས་རྣམ་དག་ཡིན་ལ། འཁྲུལ་པ་ནི་གློ་བུར་གྱི་དྲི་མ་ཡིན་པའི་ཕྱིར་རོ། །གཉིས་པ་རང་ལུགས་ལ་སྐད་ཡངས་དོག་གཉིས་ལས། དང་པོ་ནི། འཁྲུལ་གཞི་ཡོད་མེད་དབྱེར་མེད་གསུམ་ཀ་ལས་འཁྲུལ་གྱི། གང་རུང་གཅིག་ཁོ་ན་ལས་འཁྲུལ་པ་ནི་མ་ཡིན་ནོ། །དེའི་ཕྱིར། འཁྲུལ་གཞི་ཡོད་པ་ལས་ཀྱང་འཁྲུལ་ཏེ། སྦྲུལ་ཡོད་པས་ཐག་པ་ལ་སྦྲུལ་འཛིན་གྱི་ཤེས་པ་ཞུགས་པ་བཞིན་ནོ། །དེ་ལྟར་ཡང་ཨ་རོ་ཐིག་ལེའི་སྐོར་ལས། འཁྲུལ་གཞི་མེད་པའི་འཁྲུལ་པ་འབྱུང་མི་འགྱུར། །ཡང་དག་མེད་པས་དེ་མི་འབྱུང་བ་བཞིན། །ཞེས་སོ། །འདིར་བླ་མ་བདེ་གཤེགས་ཆེན་པོ་ནི། གཞི་ལ་འཁྲུལ་པ་མེད་ཀྱང་འཁྲུལ་པ་ལ་གཞི་ཡོད་དེ། ཐག་པ་ལ་སྦྲུལ་དུ་འཁྲུལ་པ་བཞིན་ཞེས་ཕྱེ་སྟེ་གསུངས་སོ། །ཡང་འཁྲུལ་གཞི་མེད་པ་ལས་ཀྱང་འཁྲུལ་ཏེ། རབ་རིབ་ཅན་གྱི་མིག་ལམ་དུ་མཁའ་ལས་སྐྲ་ཤད་འཛག་པ་བཞིན་ནོ། །དེ་ཡང་གསལ་བཀྲ་ལས། ཉི་མའི་དཀྱིལ་ན་མུན་མེད་ལྟར། །ཞེས་དང་། སྤྱི་མདོ་ལས། སྲིད་པ་དང་མྱ་ངན་ལས་འདས་པའི་ཆོས་ཐམས་ཅད་ཅི་ཡང་མེད་པ་ལས་སྣང་བར་ཟད་དོ། །ཞེས་སོ། །དབྱེར་མེད་ལས་ཀྱང་འཁྲུལ་ཏེ། གནས་ལུགས་ཀྱི་གཞི་ལ་མ་རིག་ཡེ་ཤེས་དབྱེར་མེད་པའི་གནད་ཀྱིས་དེ་ཉིད་རྟོགས་མ་རྟོགས་ལས་གྲོལ་འཁྲུལ་ལྟར་སྣང་བའི་ཕྱིར། ག་བུར་ལ་སྨན་དུག་དབྱེར་མེད་པས་ཚད་ནད་ཅན་ལ་སྨན་དང་། རླུང་ནད་ཅན་ལ་དུག་ཏུ་འགྱུར་བ་བཞིན་ནོ། །དེ་ལྟར་ཡང་ཐུགས་ཐིག་ལས། དོན་གཉིས་ཡོད་མེད་རིས་མེད་པས། །དེ་ཡི་རྒྱུ་རྐྱེན་རང་བཞིན་པས། །སྨན་གྱི་ཕན་གནོད་ཇི་བཞིན་དུ། །ཐམས་ཅད་མ་ལུས་རྒྱུ་གཅིག་པས། །མི་མཐུན་ཁྱད་པར་སོ་སོར་སྣང་། །ཞེས་སོ། །གཉིས་པ་སྐད་དོག་པའི་དབང་དུ་བྱས་ན། གཞི་རང་བཞིན་རྣམ་དག་ཡོད་མེད་དབུ་མའི་མཐའ་ལས་གྲོལ་བ་དེ་རང་ངོ་རང་གིས་མ་ཤེས་པས་འཁྲུལ་ཏེ། ཐུགས་ཐིག་ལས། དྲུག་གི་འགྲོ་བ་ཐམས་ཅད་ཀྱི། །སེམས་ཉིད་ནོར་བུ་རིན་པོ་ཆེ། །ཇི་ལྟར་བསམ་པ་སྣང་བ་ལ། །འཁྲུལ་གཞི་ཡོད་མེད་སྒྲོ་སྐུར་མེད། །ཅེས་སོ། །གསུམ་པ་ནི། དེ་ལྟར་ནའང་། འཁྲུལ་གཞི་ཞེས་བྱ་བ་དེ། བདེ་གཤེགས་སྙིང་པོ་ལ་འདོད་དམ། མ་རིག་པ་རྒྱུ་དང་བཅས་པ་ལ་འདོད། དང་པོ་ལྟར་ན། སངས་རྒྱས་ཀྱི་དགོངས་པ་མི་རྙེད་པར་འགྱུར་ཞིང་། གཉིས་པ་ལྟར་ན་འཁྲུལ་པའི་ངོ་བོ་མི་རྙེད་པར་འགྱུར་རོ་ཞེ་ན། སྐྱོན་མེད་དེ། བརྒྱུད་པའི་རྒྱུ་བདེ་གཤེགས་སྙིང་པོ། དངོས་རྒྱུ་མ་རིག་པ་སྟེ། རྒྱས་པར་ད་ལྟ་ཉིད་དུ་འཆད་འགྱུར་ལས་ཤེས་པ་ཉིད་དོ། །གཉིས་པ་འཁྲུལ་ཚུལ་ནི། སྒྱུ་འཕྲུལ་བྱེ་བྲག་བསྟན་པ་ལས། རྒྱུ་རྐྱེན་འབྲས་བུ་འབྱུང་བའི་དུས། །ཚུལ་དང་ཉེས་པ་སྒྲུབ་བྱེད་པ། །ཉེ་བར་མཚོན་པས་རྣམ་པར་དབྱེ། །ཞེས་པས་དོན་བརྒྱད་ལས། དང་པོ་རྒྱུ་ལ་སྤྱི་བྱེ་བྲག་གཉིས། དང་པོ་ནི། འཁོར་བའི་ཆོས་ཐམས་ཅད་བདག་ཏུ་རྟོག་པ་ལས་བྱུང་བ་ཡིན་ཏེ། འདི་ཉིད་ལས། སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །ཞེས་དང་། རྒྱུད་ཕྱི་མ་ལས། ཐོག་མེད་དུས་ཀྱི་ཉོན་མོངས་བདག །བརྟགས་ཕྱིར་འཁྲུལ་པ་ཙམ་ཡིན་ནོ། །ཞེས་སོ། །གཉིས་པ་ནི། རིམ་གསུམ་ལས། བརྒྱུད་མཚུངས་ལྷན་ཅིག་ཉེ་བར་ལེན། །ཞེས་པས་བཞི་སྟེ། བརྒྱུད་པའི་རྒྱུ་ནི། ཆོས་ཀྱི་དབྱིངས་རང་བཞིན་རྣམ་དག་ཡེ་ནས་དྲི་མ་མེད་པར་བདེ་བར་གཤེགས་པའི་སྙིང་པོ་སྟེ། དེ་ཡིན་བཞིན་དུ་ངོ་མ་ཤེས་པས་འཁྲུལ་པའི་རྒྱུར་གྱུར་པའོ། །དེའང་འདི་ཉིད་ལས། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་སོ། །མཚུངས་ལྡན་གྱི་རྒྱུ་ནི། ཆོས་ཉིད་དང་ལྷན་ཅིག་ཏུ་སྐྱེས་པའི་མ་རིག་པ་སྟེ། རྐྱེན་དང་འཕྲད་ན་འཁྲུལ་པ་འབྱུང་རུང་དུ་གནས་པ་ནི་གསེར་དང་གསེར་གྱི་གཡའ་བཞིན་ནོ། །དེ་ཡང་རྒྱས་པ་ལས། ཀུན་གཞི་རྣམ་པ་གཉིས་བྲལ་བས། །ཞེན་པ་སྣང་བར་འགྱུར་མ་ཡིན། །རྟག་ཏུ་རང་མཚན་སྣང་གྱུར་ཀྱང་། །མིག་གིས་མིག་བཞིན་མ་རིག་པའོ། །ཞེས་དང་། དུར་ཁྲོད་བདེ་བའི་དཔེ་ཆུང་རང་གནས་ལས། བདེ་གཤེགས་སྙིང་པོ་རང་རིག་ལ། །མ་རིག་བདག་ལྟ་མཚུངས་པའི་རྒྱུ། །ཞེས་དང་། སྤར་ཁབ་ལས། སེམས་རང་བཞིན་གྱིས་འོད་གསལ་བ་ཡིན་ཡང་། ངེས་པའི་ཤེས་པས་ངེས་པར་མ་བྱས་པ་ནི། ལྷན་ཅིག་སྐྱེས་པའི་མ་རིག་པའོ། །ཞེས་སོ། །ལྷན་ཅིག་བྱེད་པའི་རྒྱུ་ནི། ཀུན་བརྟགས་ཀྱི་མ་རིག་པ་སྟེ། ཡུལ་ཡུལ་ཅན་དུ་སྣང་བའི་ལོག་རྟོག་ལས་གཟུང་འཛིན་གཉིས་སྣང་གི་རྐྱེན་གྱིས་དགེ་སྡིག་གི་བག་ཆགས་ཀུན་གཞི་ལ་བཞག་ནས། འཁོར་བའི་གནས་མཐོ་དམན་དུ་ལྷན་ཅིག་བྱེད་པའོ། །དེ་ཡང་འདི་ཉིད་ལས། མ་རིག་རྟོག་པའི་གཟུང་འཛིན་གྱིས། །ཞེས་དང་། གཟུང་འཛིན་སྤྲོས་ལ་འཆེལ་བ་ཡི། །རྣམ་རྟོག་ཞགས་པས་སོ་སོར་འཛིན། །ཞེས་དང་། དཔེ་ཆུང་ལས། ཀུན་བརྟགས་མ་རིག་ཉོན་མོངས་ལས། །ལྷན་ཅིག་བྱེད་རྒྱུ་རྒྱུ་ཡི་རྒྱུད། །ཅེས་སོ། །ཉེར་ལེན་གྱི་རྒྱུ་ནི། ལས་དགེ་སྡིག་གི་བག་ཆགས་མཐུ་ཅན་དུ་གྱུར་པས་བདེ་སྡུག་གི་འབྲས་བུ་འབྱིན་མ་རག་པ་སྟེ། འདི་ཉིད་ལས། སྲིད་པའི་ས་བོན་རྩུབ་མོས་འཕངས་ནས། ཞེས་དང་། རྒྱས་པ་ལས། རྟོག་པའི་བག་ཆགས་སྟུག་པོ་ཡིས། །ཞེས་སོ། །གཉིས་པ་རྐྱེན་ནི། རིམ་གསུམ་ལས། རྐྱེན་གཉིས་བསྟན་པ་ལས་གསུམ་དང་། །ཀུན་བརྟགས་མ་རིག་ཉོན་མོངས་ལྔ། །ཞེས་པས། ལས་གསུམ་དང་། ཉོན་མོངས་པ་དུག་ལྔའོ། །དང་པོ་ནི། རྒྱུད་ཕྱི་མ་ལས། བསོད་ནམས་གཞན་ལ་ཕན་པ་སྟེ། །དེ་ལས་བཟློག་པ་སྡིག་པའོ། །ཞེས་པས། མཐོ་རིས་སུ་སྐྱེ་བའི་རྐྱེན་བསོད་ནམས་ཀྱི་ལས་དང་། ངན་འགྲོར་སྐྱེ་བའི་རྐྱེན་སྡིག་ཏོའི་ལས་གཉིས་ཀྱི་སྟེང་དུ། ཁམས་གོང་མ་གཉིས་སུ་སྐྱེ་བའི་རྐྱེན། བསམ་གཏན་བཞི་དང་། སྙོམས་འཇུག་བཞི་ལ་མི་གཡོ་བའི་ལས་ཞེས་བྱ་སྟེ། དེ་ཉིད་བསྣན་པས་ལས་གསུམ་མོ། །དེ་ལྟར་ཡང་འདི་ཉིད་ལས། རང་གི་རྣམ་རྟོག་ལས་ཀྱིས་སྤྲུལ། །ཞེས་སོ། །གཉིས་པ་ནི་ལས་དེ་དག་ཀུན་ནས་སློང་བ་པོ་སྟེ། དེའང་ཞེ་སྡང་གིས་ཀུན་ནས་བསླངས་པའི་མི་དགེ་བའི་ལས་ཀྱིས་དམྱལ་བ། དེ་བཞིན་དུ་སེར་སྣས་ཡི་དྭགས། གཏི་མུག་གིས་དུད་འགྲོ། འདོད་ཆགས་ཀྱིས་མི། ཕྲག་དོག་གིས་ལྷ་མ་ཡིན། ང་རྒྱལ་གྱིས་ལྷར་སྐྱེ་བའི་རྐྱེན་བྱེད་དེ། རྒྱུད་ཕྱི་མ་ལས། ཉོན་མོངས་ལས་ཀྱིས་འཁོར་བ་སྟེ། །དེ་ཡང་འགྲོ་དྲུག་རང་བཞིན་ཡིན། །ཞེས་དང་། རྒྱས་པ་ལས། ཐམས་ཅད་མཉམ་པར་མ་ཤེས་ཤིང་། །མ་ལུས་ཀུན་ལ་ཞེ་སྡང་བས། །དམྱལ་ཁམས་བཅུ་དྲུག་དག་ཏུ་བརྒྱུད། །ཅེས་སོགས་དང་། དེ་དག་ཀྱང་སྤྱན་འགྲེལ་དུ། རྐྱེན་ནི་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བའི་ལས་དང་། ཉོན་མོངས་པ་བརྟགས་པ་ལྔ། ཕྲ་རགས་དང་མང་ཉུང་གིས་སོ་སོར་སྦྱར་བའོ། །ཞེས་གསུངས་སོ། །དེ་ལྟར་ནའང་འཁོར་བའི་རྒྱུ་དང་རྐྱེན་ལ་ཁྱད་པར་ཅི་ཡོད་ཅེ་ན། འབྲས་བུའི་ངོ་བོ་སྐྱེ་བར་བྱེད་པ་རྒྱུ་ཡིན་ལ། དེའི་ཁྱད་པར་བསྐྱེད་པ་རྐྱེན་ཡིན་ནོ། །གསུམ་པ་འཁྲུལ་པའི་འབྲས་བུ་ནི། ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་དུ་སྣང་ཞིང་ཞེན་པ་ལས་ཉོན་གྱི་འབྲས་བུ་སྡུག་བསྔལ་གྱི་རྣམ་པར་སྨིན་པ་སྟེ། འདི་ཉིད་ལས། ཇི་སྙེད་འཇིག་རྟེན་འཁྲུལ་པའི་ཆོས། །ཞེས་དང་། རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ཞེས་དང་། རྒྱུད་ཕྱི་མའི་ལུང་དེའི་འཕྲོས་ལས། འགྲོ་ས་དེར་འགྲོ་དེ་རུ་གནས། །ཞེས་སོ། །བཞི་པ་འཁྲུལ་པའི་དུས་ནི། ཐོག་མ་དང་ཐ་མ་མེད་པར་འཁོར་ཞིང་འཁྲུལ་པས་སྡུག་བསྔལ་གྱིས་ལོང་བཏགས་ཏེ། རྒྱས་པ་ལས། ཐོག་མ་མེད་ནས་སེམས་ཡན་བཏང་། །ཞེས་དང་། རིམ་གསུམ་ལས། ཐོག་མ་ཐ་མ་མེད་དུས་ནས། །ཡང་དག་དོན་ལ་རྟོག་པས་ཉམས། །ཞེས་སོ། །འདིར་ཁ་ཅིག་ན་རེ། འཁོར་བ་ལ་ཐོག་མ་དང་ཐ་མ་ཡོད་དམ་མེད། གཉིས་པ་ལྟར་ན། ལམ་ཉམས་སུ་བླངས་པ་ལ་དགོས་པ་མེད་པར་ཐལ། སྟོངས་པའི་ཕྱི་མཐའ་མེད་པའི་ཕྱིར། འདོད་ན། འདི་ཉིད་ལས། ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པ་དང་འགལ་ལོ། །དང་པོ་ལྟར་ན། འཁོར་བ་ཆོས་ཅན། དོང་སྤྲུགས་པ་སྲིད་པར་ཐལ། འདོད་ན། སྤྱི་མདོ་ལས། འཁོར་བ་ཐོག་ཐ་མེད་པའི་ཁམས་སུ། ཞེས་པས་གསལ་ལོ་ཞེ་ན། ལན་དུ་ཁ་ཅིག་ན་རེ། ཐོག་མ་ཡོད་དེ། ལྷན་སྐྱེས་ཀྱི་མ་རིག་པའོ་ཟེར། དེ་ནི་ཤིན་ཏུ་མི་རིགས་ཏེ། མ་རིག་པ་ནི་ཆོས་ཉིད་དང་མཚུངས་ལྡན་དུ་གནས་ལ། དེ་དང་བདག་གཅིག་པའི་ཆོས་ཉིད་ལ་ཐོག་ཐ་མེད་པའི་ཕྱིར་རོ། །ཡང་ཁ་ཅིག་ན་རེ། འབྲིད་པ་ཡོད་ལ་སྣོན་པ་མེད་པའི་ཕྱིར་ཐ་མའང་ཡོད་དེ། འབྲུའི་ཕུང་པོ་རེ་རེ་ནས་བགྲངས་ན་འཛད་པ་བཞིན་ཟེར། དེ་ཡང་མི་འཐད་དེ། སྒྲུབ་བྱེད་དེའི་ཕྱིར། ངས་ཀྱང་ཤར་ཕྱོགས་སུ་རིང་དུ་བརྒྱུགས་ན་ནམ་མཁའི་མཐའ་རྙེད་པར་འགྱུར་རོ་བྱས་ན་ཅིས་དགག །དེ་ལ་རྙེད་རྒྱུའི་མཐའ་མ་གྲུབ་པའི་ཕྱིར་ཟེར་ན། འདིར་ཡང་ཡོད་རྒྱུའི་གྲལ་གྱི་མཐའ་ཉིད་མ་གྲུབ་པའི་ཕྱིར་མཚུངས་སོ། །འབྲིད་པ་ཡོད་ལ་སྣོན་མཁན་མེད་པའི་ཕྱིར་ཟེར་ན། འདིར་ཡང་བགྲོད་པ་ཡོད་ལ་བཟློག་མཁན་མེད་པའི་ཕྱིར་ཞེས་མགོ་བསྒྲེའོ། །དེས་ན་སྡུད་པ་ལས། མ་རིག་འཁྲུལ་འཁོར་འདི་ལ་ཟད་མེད་འཕེལ་བ་མེད། །ཅེས་སོ། །ཡང་། སྤྱི་བཙན་དུ་ཐོག་མ་དང་ཐ་མ་གཉིས་ཀ་མེད་ལ། ལམ་གྱིས་གྲོལ་བར་ནུས་པའི་ཕྱིར་བྱེ་བྲག་གང་ཟག་སྒོས་བཙན་ལ་མཐའ་ཡོད་དོ་བྱས་པ་ལ། ཁ་ཅིག་ན་རེ། དེ་ལྟར་ན་སྤྱི་དེས་སྒོས་ལ་ཁྱབ་བམ་མ་ཁྱབ། དང་པོ་ལྟར་ན་སྒོས་བཙན་ལའང་ཐ་མ་མེད་པར་ཐལ། ཁྱབ་བྱེད་སྤྱི་ལ་མེད་པའི་ཕྱིར། གཉིས་པ་ལྟར་ན། སྒོས་ལ་མ་ཁྱབ་པའི་ཕྱིར་སྤྱི་མ་ཡིན་པར་ཐལ་ལོ་ཟེར་ན། མཁས་པ་དག །རིགས་སྤྱིས་ཁྱབ་པ་རྟགས་མ་གྲུབ་སྟེ། སྤྱི་ལོག་ན་བྱེ་བྲག་བཟློག་པའི་རིགས་དོན་དུ་ཁས་མ་བླངས་པའི་ཕྱིར་དང་། ཚོགས་སྤྱིས་ཁྱབ་པའི་ཕྱིར་ཞེ་ན། ཚོགས་པའི་སྤྱི་ཁེགས་ཀྱང་བྱེ་བྲག་ཁེགས་པའི་ཁྱབ་པ་མེད་དོ་གསུང་། འདིར་སྒྲོལ་གཡུང་གཉིས་ཀྱི་ཊཱི་ཀའི་དགོངས་པ་ལྟར་ན། ༼‹བ›གོ་དོན་དང་ལན་གཉིས་ལས། ༽གོ་དོན་ནི། འདི་ཉིད་ལས། རང་བཞིན་ཉིད་ལས་ཉམས་པ་མེད། །ཅེས་དང་། ལམ་རིམ་ལས། འཁོར་བའི་རང་བཞིན་མི་དམིགས་ཕྱིར། །ཞེས་པས་འཁོར་བ་དང་འདས་པའི་ཆོས་གཉིས། དེ་གཉིས་དང་གཞན་དུ་བརྗོད་དུ་མེད་པའི་ཕྱིར། བློའི་ཡུལ་ལས་འདས་པ་སྟེ། ཐོག་མཐའ་ཡོད་མེད་ཀྱི་ཐ་སྙད་ལས་གྲོལ་བ་ཡིན་ནོ། །འོན་ཀྱང་ལན་གྱི་དབང་དུ་བྱས་ན། འགལ་ན་འགོག །མཚུངས་ན་བསྒྲེ་བྱ་བ་ཡིན་པས། འབྱུང་ཆེན་གཏོས་ཀྱི་ནམ་མཁའ་ལ་མཐའ་དབུས་ཡོད་དམ་མེད་བྱས་པས། ཡོད་ཟེར་ན། འཁོར་བ་ལའང་ཐོག་མཐའ་ཡོད་བྱ། འཁོར་བ་ལ་ཐོག་མཐའ་མེད་པར་སྤྱི་མདོའི་ལུང་གིས་གསལ་ལོ་ཟེར་ན། དེ་ཙམ་དུ་ནམ་མཁའ་ལའང་མཐའ་དབུས་མེད་པར་ལུང་རིགས་ཚད་མས་གསལ་བའི་ཕྱིར་མགོ་སྙོམས་སོ། །ཡང་ནམ་མཁའ་ལ་མཐའ་དབུས་མེད་ཟེར་ན། འཁོར་བ་ལའང་ཐོག་མཐའ་མེད་དོ། །དེ་ལྟར་ན་ལམ་ཉམས་སུ་བླངས་པ་དོན་མེད་དུ་ཐལ་ཟེར་ན། བུ་གའི་ནམ་མཁའ་བཀག་ཀྱང་མི་ཁེགས་པར་ཐལ་ལོ་ཞེས་མགོ་མཚུངས་བསྒྲེའོ། །ལྔ་པ་འཁྲུལ་ཚུལ་ནི། འདི་ཉིད་ལས། ཕྱི་ནང་རྟེན་འབྲེལ་གཉིས་སུ་འཁོར། །ཞེས་པས་ཕྱི་ནང་གཉིས་ལས། དང་པོ་ཕྱིའི་རྟེན་འབྲེལ་བཅུ་གཉིས་ནི། མང་ཉུང་གི་ཚུལ་དུ་འཁོར་རོ། །དེ་ཡང་གལ་པོ་ལས། ཕྱི་ནི་རྒྱུ་དང་འབྲེལ་བ་དྲུག །དེ་བཞིན་རྐྱེན་དང་འབྲེལ་བ་དྲུག །ཅེས་པས་རྒྱུ་འབྲེལ་དྲུག་ནི། ས་བོན་ལས་མྱུ་གུ་དང་། དེ་ནས་རིམ་བཞིན་སྡོང་བུ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་རྣམས་སྔ་མ་སྔ་མས། ཕྱི་མ་ཕྱི་མ་བསྐྱེད་པ་ལྟ་བུ་ནི་མང་བའི་འཁོར་ཚུལ་ལོ། །ཉུང་བ་རྡོ་ཟླུམ་ལྟ་བུ་ལ་སྦྱར་ན། དྲུག་ཀ་དེ་རང་ཡིན་པ་ལྟ་བུའོ་གསུང་། གཉིས་པ་རྐྱེན་དང་འབྲེལ་བ་དྲུག་ནི། འབྱུང་བ་ལྔ་དུས་ཀྱི་འགྱུར་བ་དང་དྲུག་གོ །དེ་ལྟར་རྒྱུ་དང་འབྲེལ་བའི་ཆོས་དྲུག་པོ་རྐྱེན་དྲུག་གིས་བརྟེན་པ་ལ་སོགས་པའི་བྱ་བ་བྱས་ནས་ཕྱི་རོལ་ལྟར་སྣང་བའི་ཡུལ་སྣོད་ཀྱི་འཇིག་རྟེན་ལ་སོགས་པ་འདི་དག་བསྐྱེད་པ་སྟེ། ལངྐར་གཤེགས་པ་ལས། བློ་གྲོས་ཆེན་པོ། ཇི་ལྟར་འཇིམ་པའི་གོང་བུ་ལས་རྫ་མ་བྱུང་བ་དེ་བཞིན་དུ། ཐག་པ་ལས་སྣམ་བུ་དང་། རྩི་སྐྱོང་ལས་རེ་ལྡེ་དང་། ས་བོན་ལས་མྱུ་གུ་དང་། སྲུབ་མ་ལ་སོགས་པ་མིའི་ནན་ཏན་དང་ཞོ་ལས་མར་བྱུང་བ་འདི་ནི། བློ་གྲོས་ཆེན་པོ། ཕྱིའི་རྟེན་ཅིང་འབྲེལ་བར་འབྱུང་བ་སྔ་མ་ལས་ཕྱི་མ་འབྱུང་བའོ། །ཞེས་སོ། །གཉིས་པ་ནང་གི་རྟེན་འབྲེལ་ལ། མཚན་ཉིད། དབྱེ་བ། བསྡུ་བའོ། །དང་པོ་ནི། མེད་ན་མི་འབྱུང་ཞིང་ལྟོས་པས་གྲུབ་པ་ཞིག་སྟེ། གལ་པོ་ལས། འདི་ཡོད་ཕྱིར་ན་འདི་འབྱུང་ལ། །འདི་སྐྱེས་ཕྱིར་ན་འདི་སྐྱེ་བས། །སྔ་མའི་རྐྱེན་གྱིས་ཕྱི་མ་འབྱུང་། །ཞེས་སོ། །གཉིས་པ་ལ། དངོས་དང་། དབྱེ་དོན་གྱི་ཁྱད་པར་ཇི་ལྟར་འཁོར་ཚུལ་ལོ། །དང་པོ་ནི། མ་རིག་པ་ལ་སོགས་པ་བཅུ་གཉིས་སོ། །གཉིས་པ་ནི། རྫོགས་ཆེན་གྱི་རྒྱུད་རིག་པ་རང་ཤར་ལས། དེ་ཡང་མ་རིག་པ་ལས་བྱུང་། །མ་རིག་པ་ལས་འདུ་བྱེད་དོ། །འདུ་བྱེད་རྣམ་པར་ཤེས་པའོ། །རྣམ་པར་ཤེས་ལས་མིང་འབྱུང་ཞིང་། །མིང་ལས་གཟུགས་ཀྱི་རང་བཞིན་འབྱུང་། །གཟུགས་ལས་སྐྱེ་མཆེད་རྣམ་དྲུག་འབྱུང་། །སྐྱེ་མཆེད་དྲུག་ལས་རེག་པ་འབྱུང་། །རེག་ལས་ཚོར་བ་འབྱུང་བར་འགྱུར། །ཚོར་ལས་སྲེད་པ་འབྱུང་བར་འགྱུར། །སྲེད་པ་ལས་ནི་ལེན་པ་འབྱུང་། །ལེན་པ་ལས་ནི་སྲིད་པ་འབྱུང་། །སྲིད་པ་ལས་ནི་སྐྱེ་བ་འབྱུང་། །སྐྱེ་བ་ལས་ནི་རྒ་བ་འབྱུང་། །རྒ་བ་ལས་ནི་ན་བ་འབྱུང་། །ན་བ་ལས་ནི་ཤི་བ་འབྱུང་། །ཞེས་གསུངས་པ་ལྟར། མ་རིག་པ་ནི། དེ་ཁོ་ན་ཉིད་ཀྱི་དོན་དང་ལས་འབྲས་ལ་རྨོངས་པའོ། །དེས་རྒྱུ་བྱས་ནས་དགེ་མི་དགེའི་ལས་གསོག་པའམ་མངོན་པར་འདུ་བྱེད་པ་ནི་འདུ་བྱེད་དོ། །ལས་དེ་དག་རྒྱུན་དང་བཅས་པའི་རྣམ་ཤེས་ཀྱི་སྟེང་དུ་བསགས་ཏེ་སྐྱེ་བ་ཕྱི་མར་འཁྱེར་བ་པོ་ནི་རྣམ་ཤེས་སོ། །དེ་སྐྱེ་གནས་སུ་ཚུད་པ་ལས་ཚོར་སོགས་མིང་བཞིའི་ཕུང་པོ་དང་ལྷན་ཅིག་པའི་འབྱུང་བ་དང་འབྱུང་བ་ལས་གྱུར་པའི་གཟུགས་ཏེ་ཕུང་པོ་ལྔའི་རང་བཞིན་གྱི་མིང་གཟུགས་གྲུབ་པའོ། །དེ་རིམ་གྱིས་འཕེལ་བས་མིག་སོགས་ནང་གི་སྐྱེ་མཆེད་དྲུག་དོད་པའོ། །དེ་ལས་ཡུལ་དབང་རྣམ་ཤེས་གསུམ་འདུས་པའི་རེག་པ་དང་། དེ་ལས་བདེ་སྡུག་ཉམས་སུ་མྱོང་བའི་ཚོར་བ་དང་། དེ་ལས་བདེ་བ་བླང་འདོད་དང་སྡུག་བསྔལ་འདོར་འདོད་ཀྱི་སྲེད་པ་དང་། དེ་ལས་བླང་དོར་གྱི་བྱ་བ་སྒོ་གསུམ་གྱིས་རྩོལ་བར་བྱེད་པའི་ལེན་པ་དང་། དེས་གསོས་བཏབ་སྟེ་ལས་ཀྱི་བག་ཆགས་ཡང་སྲིད་ལེན་པ་ལ་ནུས་མཐུ་ཅན་དུ་གྱུར་པ་ནི་སྲིད་པའོ། །དེ་ལས་ཕྱི་མའི་སྐྱེ་བ་འབྱུང་ཞིང་། སྐྱེ་བ་ཡོད་ན་ན་ཚོད་འགྱུར་བའི་རྒས་པ་དང་། ཁམས་འགྱུར་བའི་ནད་དང་། སྲོག་འགྱུར་བའི་ཤི་བ་སྟེ། རྟེན་འབྲེལ་ཡན་ལག་བཅུ་གཉིས་ཀྱི་འཁོར་ལོ་བར་མེད་པར་འཁོར་བས་ན་འཁོར་བ་ཞེས་བྱའོ། །དེ་དག་ཀྱང་ཚེ་གསུམ་ལ་རྫོགས་ཏེ། མ་རིག །འདུ་བྱེད། རྣམ་ཤེས་གསུམ་ནི། སྐྱེ་བ་འཕེན་བྱེད་ཡིན་པའི་ཕྱིར་ཚེ་སྔ་མ་དང་། མིང་གཟུགས་ནས། སྲིད་པའི་བར་བདུན་ནི་ཚེ་བར་པ་ལ་རྫོགས་ཏེ། དང་པོ་བཞི་རྣམ་སྨིན་གྱི་རང་བཞིན་དང་། ཕྱི་མ་གསུམ་རྣམ་སྨིན་དེ་དག་གི་རྐྱེན་ལས་བྱུང་བའི་ཕྱིར་རོ། །སྐྱེ་བ་དང་རྒ་ཤི་གཉིས་ཕྱི་མ་ལ་རྫོགས་ཏེ། ཚེ་འདིའི་ཐ་མ་སྲིད་པ་ཡིན་ལ། དེའི་རྐྱེན་ལས་སྐྱེ་བ་དང་། དེ་ལས་རྒ་ཤི་འབྱུང་བའི་ཕྱིར་རོ། །དེ་སྐད་དུའང་ཀླུ་སྒྲུབ་ཀྱིས། གསུམ་པོ་དག་ལས་གཉིས་བྱུང་སྟེ། །གཉིས་ལས་བདུན་འབྱུང་བདུན་ལས་ཀྱང་། །གསུམ་འབྱུང་སྲིད་པའི་འཁོར་ལོ་སྟེ། །ཉིད་ནི་ཡང་དང་ཡང་དུ་འཁོར། །ཞེས་སོ། །དེ་དག་ཀྱང་སྔ་མ་སྔ་མས་ཕྱི་མ་ཕྱི་མ་བསྐྱེད་པའི་ཆ་ནས་རྒྱུ་དང་འབྲེལ་བ་དང་། ནང་གི་འབྱུང་ལྔ་དང་རྣམ་ཤེས་ཏེ་ཁམས་དྲུག་འདུས་པས་བསྐྱེད་པའི་ཕྱིར་རྐྱེན་དང་འབྲེལ་བ་ཞེས་བྱ་སྟེ། སཱ་ལུ་ལྗང་པའི་མདོ་ལས། ནང་གི་རྟེན་ཅིང་འབྲེལ་བར་འབྱུང་བ་ནི་གཉིས་ཀྱི་ཕྱིར་འབྱུང་སྟེ། གཉིས་གང་ཞེ་ན། འདི་ལྟ་སྟེ། རྒྱུ་དང་འབྲེལ་བ་དང་། རྐྱེན་དང་འབྲེལ་བའོ། །ཞེས་སོགས་རྒྱ་ཆེར་གསུངས་སོ། །གསུམ་པ་བསྡུ་ན་གསུམ་སྟེ། མ་རིག་སྲེད་ལེན་གསུམ་ཉོན་མོངས་པའི་རང་བཞིན་དང་། འདུ་བྱེད་དང་སྲིད་པ་གཉིས་ལས་དང་། ལྷག་མ་བདུན་ནི་སྡུག་བསྔལ་ཏེ། ཀླུ་སྒྲུབ་ཀྱིས། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་བདུན་ནི་སྡུག་བསྔལ་ཡིན། །ཞེས་སོ། །དེ་ཡང་ཉོན་མོངས་པ་ལས་ལས་དང་། དེ་ལས་སྡུག་བསྔལ་དང་། དེ་ལས་ཀྱང་ཉོན་མོངས་པ་སྟེ། ལུས་ཅན་རྣམས་ལ་དངོས་དང་། ལུས་མེད་རྣམས་ལ་བག་ཆགས་ཀྱི་ཚུལ་དུ་འཁོར་རོ། །དེ་ལྟར་ན་ཕྱི་ནང་གི་རྟེན་འབྲེལ་གཉིས་ཀ་བཅུ་གཉིས་ཀྱི་ཚུལ་དུ་འཁོར་བ་ཉིད་དེ། རིམ་གསུམ་ལས། རྟེན་འབྲེལ་བཅུ་གཉིས་ཚུལ་དག་ཏུ། །ཕྱི་ནང་གཉིས་ཀར་འཁོར་བའོ། །ཞེས་སོ། །དྲུག་པ་འཁྲུལ་པའི་ཉེས་པ་ནི། དེ་ཉིད་ལས། འཕགས་ལམ་བྲལ་དང་སྡུག་བསྔལ་མྱོང་། །ཉེས་པ་རྣམ་པ་གཉིས་སུ་གསུངས། །ཞེས་པས། འདོད་བྱ་འཕགས་ལམ་དང་བྲལ་བའི་སྡུག་བསྔལ་ནི། རྒྱས་པ་ལས། སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཀྱང་། །རང་གི་རྣམ་རྟོག་བསྒྲིབས་བྱས་ནས། །ཡེ་ཤེས་ལྔ་ཡི་དོན་མ་རྟོགས། །ཞེས་སོ། །སྤང་བྱ་ཤིན་ཏུ་མནར་བའི་སྡུག་བསྔལ་དྲག་པོ་དང་། གནས་སྐབས་བདེ་བ་ལྟར་སྣང་བའི་སྡུག་བསྔལ་རིས་མི་མཐུན་པ་སྣ་ཚོགས་ཀྱི་ཚོར་བ་ཉམས་སུ་མྱོང་བའི་ཉེས་པ་ནི། འདི་ཉིད་ལས། མི་མཐུན་བདེ་སྡུག་མྱོང་བར་འགྱུར། །ཞེས་སོ། །འདིར་ཁ་ཅིག་ན་རེ། སྡུག་བསྔལ་ཉེས་པར་འགྲོ་མོད་དེ། བདེ་བ་ཉེས་པར་ཅིས་འགྲོ་ཞེ་ན། ལན་དུ་ལྷ་རྗེ་ཉེ་སྟོན། སངས་རྒྱས་ཀྱི་བདེ་བ་ལ་ལྟོས་ན་སེམས་ཅན་གྱི་བདེ་བ་ཇི་ལྟར་ཕུན་སུམ་ཚོགས་ཀྱང་སྡུག་བསྔལ་གྱི་རང་བཞིན་ལས་མ་འདས་ཏེ། གླ་མིས་གླ་ས་རྙེད་པ་ལྟ་བུའོ་གསུངས། དེར་ཡང་མ་ཟད་འགྱུར་བའི་སྡུག་བསྔལ་གྱི་རྒྱུར་ངེས་པའི་ཕྱིར་རོ། །བདུན་པ་འཁྲུལ་པའི་སྒྲུབ་བྱེད་ལ། འཁོར་འདས་གཉིས་ཀའི་བྱེད་པ་པོ་ནི་མ་བཅོས་རྒྱུན་གྱི་སྐད་ཅིག་མ་སྟེ། རྒྱས་པ་ལས། མ་བཅོས་རྒྱུན་གྱི་སྐད་ཅིག་མ། །དེ་ཡིས་མ་ཟིན་གང་ཡང་མེད། །ཅེས་སོ། །བྱེ་བྲག་ཏུ་འཁོར་བའི་བྱེད་པ་པོ་ནི། ལོག་རྟོག་རྒྱུན་གྱི་སྐད་ཅིག་མ་སྟེ། དེ་ལས། ལོག་རྟོག་རྒྱུན་གྱི་སྐད་ཅིག་མ། །དེ་ཡིས་མ་བྱས་གང་ཡང་མེད། །ཅེས་དང་། འདི་ཉིད་ལས། བདག་དང་གཞན་དང་རྟོག་པའི་རྒྱུན། །ཞེས་དང་། རིམ་གསུམ་ལས། རྒྱུན་དང་བཅས་པའི་སྐད་ཅིག་མ། །ལས་ཀྱི་བྱེད་པོར་བརྗོད་པའོ། །ཞེས་སོ། །བརྒྱད་པ་དཔེ་ནི། འཁོར་བ་ཟོ་ཆུན་གྱི་འཁྱུད་མོ་ལྟ་བུ་དང་། མཆེད་པ་རྩྭ་སོག་གི་མེ་ལྟ་བུ་སྟེ། རིམ་གསུམ་ལས། ཟོ་ཆུན་རྩྭ་སོག་མེ་དཔེ་བཞིན། །རྟག་ཏུ་འཁོར་ཞིང་མཆེད་པའོ། །ཞེས་སོ། །དེ་ལྟར་བརྒྱད་ཀྱི་སྟེང་དུ། དེ་ལས། འཇིག་དང་ཆགས་དང་སྟོངས་དང་གནས། །སྐྱེ་རྒ་ན་འཆི་བཞི་ལྡན་པས། །མཚན་ཉིད་ཐེར་ཟུག་མེད་པའོ། །ཞེས་པས་སྐྱེ་ཞིང་འཇིག་པའི་ཆོས་དང་ལྡན་པ་འཁོར་བའི་མཚན་ཉིད་དུ་བཤད་དོ། །གསུམ་པ་འཁྲུལ་པ་ཆོས་ཉིད་དུ་ལ་བཟླ་བ་ནི། དེ་ལྟར་བརྟག་གཞི་འཁོར་བའི་ཆོས་དེ་དག་ཏུ་འཁྲུལ་པ་ལྟར་སྣང་ཡང་རང་བཞིན་ཆོས་ཉིད་ལས་གཡོས་པ་མེད་དེ། ཐོ་ཡོར་ལ་མིར་སྣང་ཡང་ཐོ་ཡོར་ལས་མ་གཡོས་པ་བཞིན་ནོ། །དེ་ལྟར་ཡང་འདི་ཉིད་ལས། རང་བཞིན་ཉིད་ལས་ཉམས་པ་མེད། །ཅེས་དང་། ལོག་རྟོག་ཉིད་ལས་གཞན་དུ་ཅི་ཡང་མེད། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་དང་། རྒྱས་པ་ལས། མཆོག་གསུམ་རྫོགས་པ་མན་ཆོད་ནས། །ངན་སོང་གནས་རྣམས་ཐམས་ཅད་ཀུན། །ཡང་དག་པར་ནི་དབྱེར་མེད་དེ། །གང་ཡང་སྤང་བར་བྱ་བ་མིན། །ཞེས་སོ། །འདིར་འཁོར་བའི་ཆོས་གཏན་ལ་ཕབ་པ་ལ་དགོས་པ་ཅི་ཞིག་ཡོད་ཅེ་ན། དགོས་པ་གཉིས་ཏེ། འཁྲུལ་ཚུལ་བཤད་པས་འཁོར་བའི་མཚང་ཤེས་ནས་མྱང་འདས་ཀྱི་ལམ་ལ་བཀྲི་བའི་དགོས་པ་དང་། དེའི་རང་བཞིན་བཤད་པས་འཁོར་བ་འདི་མ་སྤངས་པར་རང་བྱུང་གི་ཡེ་ཤེས་སུ་ངོ་འཕྲོད་དེ་འཁོར་འདས་དབྱེར་མེད་དུ་ཤེས་པའི་དགོས་པ་ཡོད་དོ། །དེ་ལས་དང་པོ་ནི། ལུང་ལས། སྡུག་བསྔལ་མེད་ན་ངེས་འབྱུང་མེད། །ཅེས་སོ། །གཉིས་པ་ནི། གཞན་ན་མེད་དེ་དེ་ཉིད་དེ་ལྟར་ཡིན། །ཞེས་པའི་འགྲེལ་པར་སློབ་དཔོན་ཉི་འོད་སེང་གེས། འཁོར་བའི་ཆོས་ཞེས་བྱ་བ་གཞན་ཡུལ་ལོགས་ཤིག་ན་མེད་དོ། །འཁོར་བའི་ཆོས་དེ་ཉིད་མྱ་ངན་ལས་འདས་པའི་དཀྱིལ་འཁོར་དེ་ལྟར་ཡིན་ཞེས་བྱའོ། །ཞེས་དང་། ལེ་ལག་ལས། འཁོར་བ་དང་ནི་མྱ་ངན་འདས། །གཉིས་ཀ་ཡོད་པ་མ་ཡིན་ཏེ། །འཁོར་བ་ཡོངས་སུ་ཤེས་པ་ན། །མྱ་ངན་འདས་ཞེས་དེ་ལ་བྱ། །ཞེས་བསམ་གཏན་མིག་སྒྲོན་གྱི་རང་འགྲེལ་དུ་དྲངས་ཤིང་། དགྱེས་རྡོར་ལས་ཀྱང་། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །ཞེས་སོ། །གལ་ཏེ་དེ་ལྟར་མ་ཡིན་ན། ལམ་སྦྱངས་པར་དོན་མེད་པར་འགྱུར་ཏེ། སོལ་བ་ལ་བྱི་དོར་བྱས་ཀྱང་དཀར་པོ་མི་འགྱུར་བ་བཞིན་ནོ། །དེ་ལྟར་ཡང་རྒྱས་པ་ལས། རྣམ་པར་བྱང་དང་སྡུག་བསྔལ་དང་། །ཡེ་ནས་ངོ་བོ་ཡོད་མིན་ན། །ཉོན་མོངས་སྤངས་ཤིང་བྱང་བསྒྲུབ་མེད། །ཅེས་སོ། །
གཉིས་པ་བརྟག་གཞི་མྱ་ངན་ལས་འདས་པའི་ཆོས་ལ་བི་མ་ལས་རིམ་པ་གསུམ་པར་ས་དམིགས་དྲུག་ཏུ་བསྡུས་ནས་གསུངས་ཀྱང་། དེ་དག་ནི་མྱང་འདས་རང་གི་མཚན་ཉིད་ཡིན་གྱི། འདིར་ནི་སྐུ་དང་ཡེ་ཤེས་སུ་ཞེན་པ་སྒྲོ་བཏགས་ཀྱི་བློ་དེ་བརྟག་གཞིའོ། །དེའི་ཕྱིར་རང་གི་མཚན་ཉིད་ནི་འབྲས་བུའི་སྐབས་སུ་རྒྱ་ཆེར་ཤེས་པར་འགྱུར་བས་འདིར་མ་སྤྲོས་སོ། །དེ་རྣམས་ནི་གཞི་སྤྱིར་བཤད་པའོ། །
གཉིས་པ་རྒྱུ་རྒྱུད་དུ་འགྱུར་བའི་འཐད་པ་ནི། འཁོར་འདས་སུ་སྣང་ཙམ་ཉིད་ནས་འཆིང་གྲོལ་མེད་པས་དག་པ་ཆེན་པོའོ། །ལྷུན་གྲུབ་ཆེན་པོའི་གཞི། མ་ཡིན་དགག་གི་སྟོང་ཉིད་རང་བཞིན་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་ཡེ་ནས་བཞུགས་པ་ནི། འབྲས་རྒྱུད་ཀྱི་ཉེ་བར་ལེན་པའི་རྒྱུ་ཡིན་པའི་ཕྱིར་རྒྱུ་དང་། སེམས་ཅན་ནས་སངས་རྒྱས་ཀྱི་བར་དུ་གསེར་བཟང་པོའི་ཁམས་ལྟར་རང་བཞིན་འགྱུར་བ་མེད་པར་རྒྱུན་ཆགས་པས་ན་རྒྱུད་དོ། །དེ་ཡང་རྗེ་བླ་མའི་གཏེར་བྱོན་བདེ་གཤེགས་ཀུན་འདུས་ཀྱི་རྩ་སྒྲུབ་སློབ་དཔོན་གྱིས་མཛད་པ་ལས། གདོད་ནས་དག་པའི་རིག་པ་ནི༔ ཡེ་ནས་ཆོས་སྐུར་གནས་པ་ལ༔ དབུལ་པོའི་ཁྱིམ་གྱི་ས་འོག་ན༔ གནས་པའི་ནོར་བུ་རིན་ཆེན་བཞིན༔ ངོ་མ་ཤེས་པས་འཁོར་བར་འཁྲུལ༔
ངོ་སྤྲད་དེ་ངོ་ཤེས་པ་ནི༔ ཆོས་དབྱིིངས་ཡེ་ཤེས་རྟོགས་པ་དེ༔ སངས་རྒྱས་ཞེས་སུ་གྲགས་པའོ༔ ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། རང་བཞིན་དེ་བཞིན་ཉིད་གཉིས་སུ་མེད་པ་ཡིན་ཡང་། ཐབས་དང་མ་ལྡན་པས། དབུལ་པོའི་གཏེར་དང་གྱད་ཀྱི་ནོར་བུ་བཞིན་མ་མཐོང་བར་ཟད་དོ། །ཞེས་སོ། །གཞི་དོན་གྱི་ཀུན་གཞིའམ་རང་བཞིན་གྱི་ཆོས་ཉིད་དེ་ལ་ཕྱིར་མི་ལྡོག་པ་འཁོར་ལོའི་གཏམ་གྱི་མདོ་སྡེ་དགོངས་འགྲེལ་དང་བཅས་པར་དཔེ་དགུ་དང་། སྟོང་གསུམ་དར་ཡུག་ཆེན་པོའི་དཔེ་སོགས་ཀྱི་སྒོ་ནས་ཁམས་བདེ་བར་གཤེགས་པའི་སྙིང་པོ་ཞེས་བཤད་པ་ལྟར། རྒྱུད་འདིར་ཡང་བཞེད་དེ། ཨེ་མའོ་བདེ་གཤེགས་སྙིང་པོ་ལས། །ཞེས་དང་། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་དང་། རྒྱས་པ་ལས་ཀྱང་། རྣམ་རྟོག་ཀུན་གཞི་མ་ཡིན་ཏེ། །རང་བཞིན་མེད་པ་དོན་གྱི་གཞི། །དེ་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཞེས་དང་། གཞན་ཡང་མདོ་སྡེ་ཆེན་པོ་ལས། ཡེ་ནས་ངང་གིས་མ་སྐྱེས་པ། །མ་བཅོས་ཡོངས་ཀྱི་འོད་གསལ་བ། །ཞེས་སོ། །གཞི་དོན་གྱི་ཀུན་གཞིའི་དོན་དེ་ཡང་རྒྱན་སྟུག་པོ་བཀོད་པ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་བར་གཤེགས་པའི་སྙིང་པོའང་དེ། །སྙིང་པོ་དེ་ལ་ཀུན་གཞིའི་སྒྲས། བདེ་བར་གཤེགས་པས་བསྟན་པར་མཛད། །ཅེས་སོ། །སྙིང་པོ་དེས་འགྲོ་བ་ཀུན་ལ་ཏིལ་ལ་མར་བཞིན་དུ་ཁྱབ་སྟེ། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཏིལ་འབྲུ་ལ་མར་གྱིས་ཁྱབ་པ་བཞིན་དུ་གནས་སོ། །ཞེས་དང་། མདོ་སྡེ་ལས་ཀྱང་། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་གསུངས་པའི་ཕྱིར། དེ་ཡང་སྙིང་པོའི་དོན་ནང་རིག་འགྱུར་མེད་ལ་བཞེད་པའི་ཕྱོགས་ལེགས་ཏེ། མགོན་པོ་བྱམས་པས། རིག་ཁམས་སྦྲང་རྩི་འདྲ་བ་འདི་གཟིགས་ནས། །ཞེས་དང་། སློབ་དཔོན་དུར་ཁྲོད་བདེ་བས་ཀྱང་། བདེ་གཤེགས་སྙིང་པོ་རང་རིག་ལ། །ཞེས་དང་། སློབ་དཔོན་མ་དྷུ་སཱ་དྷུས། ནང་ཞེས་བྱ་བ་ནི་ཆོས་ཉིད་ཀྱི་འཁོར་ལོ་ཁ་ནང་དུ་འདུས་པའོ། །ཞེས་མིག་སྒྲོན་དུ་དྲངས་པ་དང་། སྔར་གྱི། གདོད་ནས་དག་པའི་རིག་པ་ནི། །ཞེས་སོགས་ཀྱིས་ཀྱང་སྟོན་པའི་ཕྱིར་རོ། །འོ་ན་འཁོར་ལོ་བར་པའི་དངོས་བསྟན་ལྟར་བདག་ཉིད་ཆེན་པོ་ཀླུ་སྒྲུབ་ཞབས་སོགས་ཀྱིས། ཕུང་སོགས་ལ་གཅིག་དུ་བྲལ་གྱི་རིགས་པས་དཔྱད་པའི་རིག་ཤེས་ཀྱི་ཡུལ་སྟོང་པ་ཉིད་མེད་པར་དགག་པའི་མཚན་ཉིད་ཅན་ལ། དེ་བཞིན་ཉིད་དང་། ཆོས་ཀྱི་དབྱིངས་སོགས་སུ་གསུངས་པས་གནོད་དོ་ཞེ་ན། དེ་ནི་རྒྱུའི་རྒྱུད་ནང་རིག་འགྱུར་མེད་འདིར་འཇུག་པའི་ཐབས་ཀྱི་ཡན་ལག་གམ་དེར་བགྲོད་པའི་ཐེམ་སྐས་ལྟ་བུ་ཡིན་ནོ་ཞེས་འགོས་ལོ་ཆེན་པོ་གསུང་ཞིང་། འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་ཆོས་ཀྱི་རྣམ་གྲངས་ལས་ཀྱང་། སྔོན་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་བརྗོད་པ་ལས། ངས་ཆོས་ཐམས་ཅད་སྟོང་པ་ཉིད་དུ་བསྟན་པ་གང་ཡིན་པ་དེ་བྱིས་པ་རྣམས་བདག་ཏུ་མངོན་པར་ཞེན་པ་ལས་ཡོངས་སུ་དྲང་བའི་ཕྱིར་བཤད་ཀྱི། ཡང་དག་པར་ན་དེ་བཞིན་གཤེགས་པའི་སྙིང་པོ་ཉག་གཅིག་དོན་དམ་པའི་བདེན་པའོ། །ཞེས་གསུངས་པས་ཀྱང་ཤེས་སོ། །ཁྱད་པར་དུ། རྒྱུད་འདི་ཉིད་ཀྱི་མན་ངག་གསང་ཐིག་གི་བརྒྱད་དཀྱིལ་ན། དོན་དམ་སྙིང་པོ་དེ་ལ་ཕྱག་འཚལ་ལོ། །ཞེས་པའི་འགྲེལ་པར། འོད་དེའི་དཀྱིལ་ན་ཐིག་ལེ་ཆེན་པོ་བྱང་ཆུབ་ཀྱི་སེམས་བཞུགས་སོ། །ཞེས་དང་། དེ་ནི་ཆོས་ཀྱི་དབྱིངས་ཀྱི་སྙིང་པོ་དོན་དམ་པ་ཀུན་གྱི་རྒྱུ་ཡིན་པས་དེ་ལ་ཕྱག་འཚལ་ལོ། །ཞེས་དང་། དབང་གི་གལ་པོའི་རང་འགྲེལ་ལས། དེའི་ནང་ན་བྱང་ཆུབ་སེམས་སྤྲོས་པ་མེད་པའི་ཐིག་ལེ་ཚོགས་བརྒྱད་གང་ཡང་མ་ཡིན་པ་ངོ་བོ་ཉིད་ཀྱི་སྐུར་བཞུགས་པ་ནི། ཞེས་དྭངས་མ་ལྔ་འདུས་ཀྱི་དབུས་ན་སེམས་ཉིད་འོད་གསལ་བའི་ཆོས་སྐུ་བྱང་ཆུབ་ཀྱི་སེམས་བཞུགས་པར་བཤད་པ་དེ་ཉིད་སྔར་བརྗོད་པའི་བདེ་གཤེགས་སྙིང་པོ་ཞེས་བསྙད་པ་གང་ཡིན་པ་དེ་ཉིད་དེ། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་དང་། རྒྱུད་བླར། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང་། ས་ར་ཧས། མཁས་པ་ཐམས་ཅད་བསྟན་བཅོས་འཆད་པ་ཡིས། །ལུས་ལ་སངས་རྒྱས་ཡོད་པ་མ་རྟོགས་སོ། །ཞེས་སོ། །བྱང་ཆུབ་ཀྱི་སེམས་དེ་ཡང་རང་བཞིན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་ཏེ། རྡོ་རྗེ་མེ་ལོང་གི་ལེའུ་དྲུག་པ་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དཔེ་ཆུང་རང་གནས་ཀྱི་འགྲེལ་པར་བི་མ་ལས། དེའི་ནང་ན་བྱང་ཆུབ་ཀྱི་སེམས་ཐིག་ལེ་ཆེན་པོ་འོད་ཁ་དོག་སྣ་ཚོགས་པའི་དབྱིབས་དང་ཁ་དོག་གང་ལ་ཡང་མ་བརྟེན་པར་བཞུགས་པ་ནི་བདེ་བའི་དྭངས་མ། ཞེས་དང་། བརྟག་གཉིས་ལས། དམྱལ་བ་ཡི་དྭགས་དུད་འགྲོ་དང་། །ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་སོགས་ཀྱིས་ཀྱང་། །བདེ་བ་གང་ཕྱིར་མི་ཤེས་པ། །རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་དེ། །སངས་རྒྱས་གཞན་དུ་བསྟན་པ་མེད། །ཅེས་སོ། །དེས་ན་ནང་རིག་འགྱུར་མེད་ལ་དེ་བཞིན་ཉིད་དུ་བྱས་པ་ནི་སྙིང་པོའི་སྐོར་གྱི་མདོ་དང་། རྒྱུད་བླ་སོགས་དེ་དག་གི་དགོངས་འགྲེལ་རྣམས་དང་མཐུན་ཡང་། འདིར་ནང་རིག་དེ་བདེ་བ་ཆེན་པོའི་རང་བཞིན་དུ་བྱས་པ་ནི། བླ་ན་མེད་པའི་རྒྱུད་ཀྱི་ཁྱད་ཆོས་ཡིན་ནམ་སྙམ་དུ་སེམས་ཏེ། དུས་འཁོར་ལས། སྲིད་གསུམ་ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་རྣམ་པར་ཤེས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་གིས་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོན་པར་ལྟ་བྱེད་པ། །དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཅེས་སོ། །འོ་ན་ལུས་ལ་གནས་པའི་མི་ཤིགས་པའི་ཐིག་ལེ་ལ་སྙིང་པོ་དང་རྒྱུ་རྒྱུད་དུ་བཞག་པ་དེ་ལྟར་ན། མུ་སྟེགས་པའི་བདག་རྟག་པ་དང་མཚུངས་སོ་ཟེར་ན། མི་མཚུངས་ཏེ། མུ་སྟེགས་པའི་འདོད་པ་དེ་ནི་བདག་ཏུ་ལྟ་བའི་མཚན་ཉིད་ཅན་ཡིན་ལ། འདིར་ནི་ཡེ་ནས་འོད་གསལ་ཞིང་ལུས་ལ་གནས་ཀྱང་རྟག་མི་རྟག་གི་སྤྲོས་པ་ལས་འདས་པས་རྟག་པ་ཁོ་ནར་མི་འདོད་པའི་ཕྱིར་དང་། འོད་གསལ་བ་དེ་སུས་ཀྱང་མི་མཐོང་བའི་ལྐོག་ཏུ་གྱུར་པ་མ་ཡིན་ཏེ། བླ་མའི་མན་ངག་གིས་མཐོང་དུ་ཡོད་པའི་ཕྱིར་དང་། མུ་སྟེགས་པ་ལྟར་མཐེ་བོང་གི་ཚད་ལ་སོགས་པའི་དངོས་པོ་རང་མཚན་དང་ཆོས་མི་སྦྱོར་ཏེ། འདིར་ངོ་བོ་སྣང་སྟོང་དབྱེར་མེད་མཐའ་བྲལ་དུ་འདོད་པའི་ཕྱིར་དང་། ཆོས་ཉིད་འོད་གསལ་བའི་དོན་དེ་མངོན་དུ་རྟོགས་པ་ན། བདག་གཉིས་ཀྱིས་དབེན་པའི་གནས་ལུགས་མངོན་དུ་གྱུར་པ་ཡིན་པའི་ཕྱིར། བདག་ལྟར་མི་འགྱུར་བར་མ་ཟད། དེའི་གཉེན་པོར་མཆོག་ཏུ་འགྱུར་བ་སོགས་ཁྱད་པར་ཤིན་ཏུ་མང་ངོ་། །མདོར་ན་འདི་ཉིད་ལས། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཞིག །ཅེས་དང་། ཡེ་ཤེས་རྫོགས་པའི་དཀྱིལ་འཁོར་ལ། །ཞེས་སོགས་གསུངས་པ་བློ་དང་ལྡན་པ་རྣམས་ཀྱིས་ངེས་ཤེས་ཁྱད་པར་ཅན་གྱི་སྒོ་ནས་སྤྲོ་དགའ་བསྐྱེད་དེ། སེམས་ཉིད་འོད་གསལ་བའི་དོན་ལ་འབད་པས་སྦྱོར་བ་གཅེས་སོ། །དེ་ལྟར་ཡང་ཀུན་མཁྱེན་ཆོས་རྗེས། མ་ལུས་འགྲོ་ཀུན་བདེ་གཤེགས་སྙིང་པོ་ཅན། །གློ་བུར་དྲི་མས་གཡོགས་པའི་སྦུབས་ནང་ན། །འོད་གསལ་ཆོས་ཁམས་མར་མེ་ཡེ་ནས་གནས། །སྐུ་དང་ཡེ་ཤེས་འདུ་འབྲལ་མེད་པའི་ཆོས། །རང་ལ་ཡོད་དེ་དེ་ཉིད་ལྷུན་གྱིས་གྲུབ། །སྟོང་དང་སྙིང་རྗེའི་སྙིང་པོ་ལྷུར་ལེན་པས། །ཁམས་དེ་བྱང་ཆུབ་ཅེས་བྱའི་མིང་ཐོབ་ནས། །མ་ལུས་སྐྱེ་རྒུའི་ཚོགས་ལ་ཕན་བདེ་བྱེད། །ཉི་མཁའ་བཞིན་དུ་གདོད་ནས་རང་བྱུང་ཡང་། །གློ་བུར་ཉོན་མོངས་ཆུ་འཛིན་གྱིས་བསྒྲིབས་པས། །རྨི་ལམ་འདྲ་བའི་སྲིད་པར་སྡུག་བསྔལ་མྱང་། །དེ་བསལ་བྱ་ཕྱིར་བརྩོན་པའི་སྟོབས་སྐྱེད་ཅིག །ཅེས་གསུངས་སོ། །གཞིའི་དོན་རྒྱས་པར་བཤད་ཟིན་ཏོ། །
གཉིས་པ་ནི། དཔེ་ཆུང་རང་གནས་ལས། རང་བཞིན་མངོན་དུ་བྱེད་རྒྱུད་ནི། །ངོ་བོ་དང་ནི་རྐྱེན་ཉིད་དོ། །ཞེས་པས། བརྗོད་བྱ་དོན་གྱི་རྒྱུད་ལམ་གྱི་ངོ་བོ་ཉིད་དང་། རྗོད་བྱེད་ཚིག་གི་རྒྱུད་ལམ་རྐྱེན་དུ་གྱུར་པ་གཉིས་ལས། དང་པོ་ལ། དབྱེ་བ། དབྱེ་དོན་གྱི་ས་མཚམས་འཇོག་ལུགས། ཇི་ལྟར་བཞག་པའི་དོན་གཏན་ལ་དབབ་པའོ། །དང་པོ་ནི། ཐུན་མོང་སྤྱིའི་ལམ་དང་། ཁྱད་པར་འདི་ཉིད་ཀྱི་ལམ་གཉིས་ཏེ། རིམ་གསུམ་ལས། ཐུན་མོང་ལམ་ལྔར་བསླབ་པ་དང་། །ཁྱད་པར་སོ་སོའི་ལམ་བཞིན་བསླབ། །ཅེས་སོ། །
གཉིས་པ་ནི། དོན་སྤྱི་བྱེ་བྲག་ལ་འཇུག་པའི་ཁྱད་པར་ཏེ། ཅིའི་ཕྱིར་ཞེ་ན། མདོ་སྔགས་གཉིས་ཀའི་འཇུག་ཡུལ་དུ་གྱུར་པ་ནི་ཐུན་མོང་གི་ལམ་དང་། མཧྭ་ཡོ་ག་ཉིད་ཀྱི་འཇུག་ཡུལ་དུ་གྱུར་པ་ནི་ཁྱད་པར་གྱི་ལམ་མོ། །
གསུམ་པ་ལ། ཐུན་མོང་གི་ལམ་དང་། ཁྱད་པར་གྱི་ལམ་གཉིས། དང་པོ་ལ། དགོས་ཆེད། ངོ་བོ། སྒྲ་དོན། དབྱེ་བ། རྩོད་པ་སྤང་བ་དང་ལྔ། དང་པོ་ནི། དངོས་སུ་འདིའི་ལམ་གྱི་གོལ་ས་ཤེས་ཤིང་། བརྒྱུད་ནས་ཐུན་མོང་གི་ལམ་པ་རྣམས་ཀྱང་ཁྱད་པར་གྱི་ལམ་འདིར་འཇུག་པའི་དགོས་པ་ཡོད་དེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། ཁོག་གཞུང་ལས། ཐུན་མོང་ལམ་སྟེགས་ཙམ་ཉིད་དུ། །ཕ་རོལ་ཕྱིན་བཅུ་རྒྱུ་འབྲས་སྤྱོད། །ཅེས་སོ། །གཉིས་པ་ནི། གང་བློ་ཆེ་ཆུང་གི་ཡུལ་དུ་གྱུར་པའི་ཐུང་མོང་གི་སེམས་ལྔ་སྐྱེས་པ་སྟེ། ངེས་འབྱུང་གི་ཐེག་པ་བཞི་དང་། ཕྱི་རྒྱུད་སྡེ་གསུམ་མོ། །གསུམ་པ་ནི། དེ་དག་གིས་རང་རང་གི་འབྲས་བུ་སྒྲུབ་པ་དང་འདིའི་ལམ་སྟེགས་སུ་བགྲོད་པ་ཐུན་མོང་དུ་བྱེད་པའི་ཕྱིར། ཐུན་མོང་གི་ལམ་ཞེས་བྱའོ། །བཞི་པ་ལ། དངོས་ཀྱི་ཐུན་མོང་གི་ལམ་དང་། ལྟོས་པའི་ཐུན་མོང་གི་ལམ་མོ། །དང་པོ་ནི། ལྷ་མི། ཉན་ཐོས། རང་རྒྱལ། བྱང་སེམས་ཏེ། ངེས་འབྱུང་གི་ཐེག་པ་བཞིའོ། །དེའང་རྒྱ་མཚོ་ལས། རིགས་ཀྱི་དབྱེ་བས་ལམ་དབྱེ་བ། །ལྔ་དང་གཅིག་གིས་རྒྱུ་འབྲས་འགྱུར། །མ་ངེས་སྤྱི་ཡི་དབྱེ་བ་སྟེ། །བཞི་ནི་ངེས་འབྱུང་ཐུན་མོང་ལམ། །ཞེས་སོ། །གཉིས་པ་ནི། ཕྱི་རྒྱུད་སྡེ་གསུམ་གཅིག་ཏུ་བསྡོམས་པ་སྟེ་དེ་ཉིད་ལས། དེ་བཞིན་རིགས་གཅིག་ཐུན་མོང་མིན། །དེ་ཉིད་ཕྱི་ནང་ཆར་སྣང་བས། །ཕྱི་རོལ་ལྟོས་པའི་ཐུན་མོང་ལམ། །ཞེས་སོ། །ལྔ་པ་ནི། ཐུན་མོང་གི་ལམ་དེ་ཁྱད་པར་གྱི་ལམ་དུ་འགྲོའམ་མི་འགྲོ། འགྲོ་ན་ཐུན་མོང་དང་ཁྱད་པར་ལ་ཁྱད་མེད་དུ་ཐལ། ཐུན་མོང་ཡང་ཁྱད་པར་གྱི་ལམ་དུ་འགྲོ་བའི་ཕྱིར། གལ་ཏེ་མི་འགྲོ་ན། ཐུན་མོང་གི་དམ་བཅའ་ཉམས་སོ་ཞེ་ན། ལན་ནི། དངོས་སུ་ཁྱད་པར་གྱི་ལམ་མིན་པས་སྐྱོན་སྔ་མ་མེད་ལ། རིམ་གྱིས་པ་ལ་ལྟོས་ནས་ལམ་སྟེགས་ཙམ་དུ་སྔོན་དུ་རྫོགས་པར་སྦྱོར་བས་སྐྱོན་ཕྱི་མ་ཡང་མེད་དོ། །དེ་ལྟར་ཡང་སྤྱན་འགྲེལ་ལས། རང་བཞིན་སྔོན་དུ་སོང་བ་དང་། །ཆེད་དུ་སྔོན་དུ་བསྡུར་བས་འགྲོ། །དེས་ན་ཐུན་མོང་མངོན་རྫོགས་ལམ། །ཞེས་སོ། །