ཁྱད་པར་གྱི་ལམ།

གཉིས་པ་ཁྱད་པར་གྱི་ལམ་ལ། དགོས་ཆེད། ངོ་བོ། སྒྲ་དོན། དབྱེ་བ། གཏན་ལ་དབབ་པ། སྔོན་དུ་གང་འགྲོ་དཔྱད་པ་དང་དྲུག །དང་པོ་ནི། བྱེད་པ་གཉིས་དང་ལྡན་པ་སྟེ། ཅིའི་ཕྱིར་ཞེ་ན། རང་བཞིན་མངོན་བྱེད་ཅེས་པས་གཞི་ཤེས་པར་བྱེད་པ་ལ་དགོས་ཏེ། འདི་ཉིད་ལས། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །ཞེས་སོ། །དེས་འཐོབ་བྱའི་འབྲས་བུ་མངོན་དུ་བྱེད་པ་ལའང་དགོས་ཏེ། འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་སོ། །

གཉིས་པ་ནི། ཁྱད་པར་གྱི་སེམས་ལྔ་སྐྱེས་པའོ། །དེ་ལའང་རྒྱ་མཚོ་ལས། སྐྱེ་ས་རྐྱེན་གྱིས་སྐྱེ་ཚུལ་དང་། །སྐྱེས་པའི་ངོ་བོ་སེམས་རིམ་པ། །ཞེས་པས། གང་ན་སྐྱེ་བའི་གཞི། གང་གིས་སྐྱེ་བའི་རྒྱུ་རྐྱེན། ཇི་ལྟར་སྐྱེ་བའི་ཚུལ། སྐྱེས་པ་རང་གི་ངོ་བོ་བསྟན་པའོ། །དང་པོ་ནི། དེ་ཉིད་ལས། གཞི་དང་སྐབས་ནས་སྐྱེ་འགྱུར་བ། །གྲོལ་མཐར་ལམ་དུ་རྣམ་པར་བཤད། །ཅེས་པས། གཞི་དང་། ལམ་དང་། འབྲས་བུ་ནས་སེམས་སྐྱེ་བའོ། །དང་པོ་ལ། གཞིའི་རིགས་གསུམ་བཤད་པ་དང་། གང་ལས་སྐྱེ་བའི་ས་ངོས་བཟུང་བའོ། །དང་པོ་ལ། རིགས་ངེས་པ་དང་། ཆད་པ་དང་། མ་ངེས་པ་གསུམ། དང་པོ་ནི། ཐེག་པའི་རིམ་པ་ལ་རང་བློ་དང་འཚམས་པར་འཇུག་པའི་ཡིད་གཞན་དུ་མི་ནུར་བས་ངེས་པ་སྟེ། རྒྱས་པ་ལས། བླ་མེད་ཐེག་པ་བསམ་ཡས་གསུངས་པ་དང་། །སོ་སོ་རང་གི་བློ་ལ་སྣང་བར་ཟད། །ཅེས་སོ། །དེ་ལ་དབྱེ་ན། ཉན་རང་བྱང་སེམས་ཀྱི་རིགས་ཅན་གསུམ་མོ། །གཉིས་པ་ནི། དེ་ལས། ཆོས་ཀྱི་དབྱིངས་ཀྱིས་ཀུན་ལ་ཁྱབ་གྱུར་ཀྱང་། །རང་རིག་རྟོགས་པའི་སྐལ་དང་མི་ལྡན་ན། །ཇི་ལྟར་དམུས་ལོང་མདུན་དུ་མདོག་བསྟན་བཞིན། །འདི་ནི་སྐལ་མེད་རིགས་ཆད་ས་པ་ཡིན། །ཞེས་པས། རེ་ཞིག་ཐར་ཐོབ་ཀྱི་སྐལ་བ་ཆད་པའོ། །དབྱེ་ན། རྣམ་བཅད་རང་བཞིན་གྱི་རིགས་ཆད་དུ་འདོད་པ་དགག་པ་དང་། ཡོངས་གཅོད་གནས་སྐབས་རྐྱེན་གྱིས་རིགས་ཆད་པར་སྒྲུབ་པའོ། །དང་པོ་ནི། མཁས་པ་ཁ་ཅིག་ན་རེ། གང་ཟག་གི་ཤེས་རྒྱུད་ཆོས་ཅན། ཁྱོད་ལ་རང་བཞིན་གྱིས་རིགས་ཆད་པ་ཡོད་དེ། རང་རིག་རྟོགས་པའི་སྐལ་བ་དང་མི་ལྡན་པའི་ཕྱིར། ལོང་བའི་མདུན་དུ་ཁ་དོག་བསྟན་པ་བཞིན་གསུང་། དེ་ལྟར་ན་རང་བཞིན་གྱི་གཞི་བཟང་ངན་ཅན་དུ་ཐལ་བའི་ཕྱིར་མི་འཐད་དེ། མགོན་པོ་བྱམས་པས། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་དང་། རིམ་དྲུག་ལས། ཆོས་རྣམས་མ་ལུས་ཐམས་ཅད་ལ། །བྱང་ཆུབ་སྙིང་པོ་ཡོད་པར་བལྟ། །རང་བཞིན་ཡེ་ནས་འོད་གསལ་བར། །ཀུན་བཟང་རྡོ་རྗེ་སེམས་དཔའ་གསུངས། །ཞེས་སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་ཅན་དུ་གསུངས་པས་གནོད་དོ། །ཁོ་ན་རེ། སྐྱོན་དེ་མི་འཇུག་སྟེ། འདིར་མཐུན་རྐྱེན་གྱིས་ཅིག་ཅར་དུ་རིགས་མི་སད་པའི་ཕྱིར་སྐལ་བ་དང་མི་ལྡན་པ་ལ་རང་བཞིན་གྱི་རིགས་ཆད་ཟེར་གྱིས་བྱང་ཆུབ་ཀྱི་སྙིང་པོའི་ས་བོན་ཙམ་ཡང་རྒྱུད་ལ་མེད་པར་བདག་མི་འདོད་དོ་ཞེ་ན། དེ་ལྟར་ན། རེ་ཞིག་དད་མོས་མ་སྐྱེས་ཀྱང་ཀུན་གཞི་ལ་དཀར་པོའི་བག་ཆགས་བཞག་སྟེ་ནམ་ཞིག་ན་རིགས་སད་པའི་རྒྱུར་འགྱུར་བའང་སྲིད་པའི་ཕྱིར། རང་བཞིན་གྱི་རིགས་ཆད་ཡིན་པར་མ་ངེས་ཏེ། ཕལ་ཆེན་གྱི་མདོ་ལས། སེམས་ཅན་ལ་ལ་ཞིག་ལས་ཀྱི་སྒྲིབ་པས་དེ་བཞིན་གཤེགས་པ་ལ་མ་དད་ནའང་། དེ་དག་གིས་མཐོང་ཞིང་ཐོས་པའི་དགེ་བའི་རྩ་བ་དེ་ནི་ཡོངས་སུ་མྱ་ངན་ལས་འདས་པའི་བར་དུ་དོན་ཡོད་པར་འགྱུར་རོ། །ཞེས་སོ། །དེར་མ་ཟད། ཇི་ལྟར་དམུས་ལོང་མདུན་དུ་མདོག་བསྟན་བཞིན། ཞེས་པའང་རང་བཞིན་གྱི་དཔེར་མི་མཚུངས་ཏེ། གལ་ཏེ་མཚུངས་ན། མིག་མཁན་གྱིས་ཕྱེ་བ་རྣམ་པ་ཀུན་ཏུ་དོན་མེད་པར་འགྱུར་རོ། །གཉིས་པ་ནི། རང་བཞིན་ཉིད་བཏགས་པའི་བག་ཆགས་མཐུག་པོས་རིང་པོ་ནས་བསྒྲིབས་པས་ཡུན་རིང་པོར་མཐོང་དཀའ་བའམ། གྲུབ་མཐའ་ལོག་པ་ལ་ཞེན་པས་ཡང་དག་པའི་གེགས་སུ་གྱུར་པ་ལ་དགོངས་ནས། རེ་ཞིག་ཐར་ཐོབ་ཀྱི་སྐལ་བ་དང་མི་ལྡན་པས་རིགས་ཆད་ཅེས་གསུངས་སོ། །དེ་ལྟར་ཡང་འདི་ཉིད་ལས། བདག་ཏུ་རྨོངས་པའི་རྟོག་པ་དང་བརྟགས་པ་ལ་མངོན་པར་ཞེན་པས་ཡང་དག་པའི་ལམ་དང་བྲལ་བ་དག །ཅེས་དང་། ཆོས་ཀྱི་དབྱིངས་ཀྱིས་ཀུན་ལ་ཁྱབ་གྱུར་ཀྱང་། །ཞེས་པའི་སྤྱན་འགྲེལ་ལས། ཆད་པའི་རྒྱུ་མ་རིག་པ་གཉིས་ཀྱིས་ཤེས་རབ་ཀྱི་སྤྱན་ལྡོངས་པས་དཔེ་ཇི་ལྟ་བར་ཡེ་ནས་ལོག་པས་རང་རྒྱུད་དུ་གོལ་བ་ནི་རིགས་ཆད་པའི་ས་པ་སྟེ། རྩ་བ་དང་ཡན་ལག་ཉམས་པ་ལས་ཀྱང་འབྱུང་སྟེ། ཡུན་རིང་དུ་འགྱངས་པ་ཙམ་ལ་བརྗོད་པའོ། །ཞེས་སོ། །དེ་ལ་ཁ་ཅིག་ན་རེ། གོལ་བ་ནི་རིགས་ཆད་པའི་ས་པ་སྟེ། ཞེས་པ་ཡན་ཆད་རང་བཞིན་གྱིས་རིགས་ཆད་སྒྲུབ་པའི་ལུང་ཡིན་ཟེར་ནའང་། མ་ཡིན་ཏེ། གལ་ཏེ་ཡིན་ན། རྩ་བ་དང་ཡན་ལག་ཉམས་པ་ལས་ཀྱང་། ཞེས་པའི་ཀྱང་སྒྲས། རྩ་བ་ཡིན་ཏེ་རིགས་མེད་འགྱུར། །ཞེས་རྐྱེན་གྱིས་ཆད་པའང་རང་བཞིན་གྱིས་རིགས་ཆད་དུ་འགྱུར་རོ། །དེས་ན་རྩ་འགྲེལ་གྱི་ལུང་དེ་དག་གི་དོན་ནི། རྐྱེན་གྱིས་ཆད་པ་ཁོ་ན་ལ་དགོངས་པ་སྟེ། ཡུན་རིང་དུ་འགྱངས་པ་ཙམ་ལ་བརྗོད་པའོ། །ཞེས་པས་གསལ་ལོ། །གསུམ་པ་རིགས་མ་ངེས་པ་ནི། རྐྱེན་གྱི་དབང་གིས་སེམས་གང་དུའང་སྐྱེར་རུང་བ་སྟེ། རྒྱས་པ་ལས། ཐེག་པ་གང་དུ་བསྟན་པར་མ་ངེས་པའི། །ཞེས་སོ། །དེ་ལའང་དབྱེ་ན་མ་ངེས་པ་བཟང་ངན་གཉིས། དང་པོ་ནི། ཐེག་པ་གང་བསྟན་ཀྱང་ཐོགས་མེད་དུ་གོ་བའི་བཟང་པོའི་རིགས་ཅན་ཏེ། དེ་ལས། ཡང་ན་ཀུན་ལ་མཐུན་བྱས་བྱམས་པར་འཇུག །ཅེས་སོ། །གཉིས་པ་ནི་ཐེག་པ་མཐའ་དག་ལ་ཞུགས་ཤིང་ངེས་ཤེས་ཀྱི་མཐར་མི་ཕྱིན་པའི་མ་ངེས་པ་ངན་པའི་རིགས་ཅན་ཏེ། དེ་ལས། ཡང་ན་ངེས་མེད་འདི་ཞེས་བརྟག་ཏུ་མེད། །ཅེས་སོ། །

གཉིས་པ་ནི། སྔར་གྲུབ་མཐས་བློ་མ་བསྒྱུར་བའི་གང་ཟག་གང་ཞིག །འབྲས་བུའི་ཐེག་པ་འདིར་རིགས་ངེས་པའི་དབང་རྣོན་ནམ། རིགས་མ་ངེས་པ་བཟང་པོ་དེ་ལས་སྐྱེ་བར་བཞེད་དེ། ལམ་རིམ་ལས། མ་ངེས་པ་ནས་འབྲེལ་རྒྱུ་རྐྱེན། །ལྡན་པས་རྣལ་འབྱོར་མཆོག་སྦྱོར་བའོ། །ཞེས་དང་། ལམ་ཆུང་ལས། ངོ་བོས་འབྲེལ་ཕྱིར་གཞི་ཉིད་ནས། །འདིར་འཇུག་ངེས་པའི་དོན་དུ་རུང་། །ཞེས་སོ། །

གཉིས་པ་ནི། ལམ་རིགས་བཞི་ནས་སྐྱེ་བ་ཡིན་ཏེ་ལྷ་མི་དང་། ཉན་རང་དང་། བྱང་སེམས་དང་། ཕྱི་རྒྱུད་རྣམས་རིམ་གྱིས་བགྲོད་པའམ། གང་རུང་ལ་སྦྱོར་འཕྲོ་ནས་འདིར་འཇུག་པའོ། །དེའང་ལམ་རིམ་ལས། གཞི་ཡི་ཐེག་པ་དང་པོར་ཞོག །དེ་ནས་རིམ་གྱིས་བགྲོད་བྱས་ཏེ། །ཞེས་དང་། ལམ་ཆུང་ལས། ལ་ལ་ཐུན་མོང་ལམ་རྣམས་ནས། །རྐྱེན་རྒྱུས་འདིར་འཇུག་བསླབ་པར་ངེས། །ཞེས་སོ། །

གསུམ་པ་ནི། འོག་མའི་འབྲས་བུ་མཐར་ཕྱིན་ནས་འདིར་འཇུག་པ་སྟེ། ལམ་ཆུང་ནས། ཐུན་མོང་ས་མཐར་བྱས་པའི་ཚེ། །ཡང་དག་སྐུ་གསུང་ཐུགས་བཅོ་ལྔ། །བྱིན་རླབས་འཚམས་པར་མོས་སྣང་བས། །འཁོར་ལོའི་ས་ལ་འགྱུར་བར་ངེས། །ཞེས་སོ། །

གཉིས་པ་ནི། རྒྱུ་དང་རྐྱེན་དུ་འབྲེལ་བས་ཁྱད་པར་དུ་བྱས་ནས་སྐྱེ་བའི་ཕྱིར་གསུམ་སྟེ། རྒྱུ་དང་། རྐྱེན་དང་། འབྲེལ་པའོ། །དང་པོ་ལ་གཉིས་ལས། མཚུངས་ལྡན་གྱི་རྒྱུ་ནི། སེམས་ཉིད་ཡེ་ནས་བདེ་བར་གཤེགས་པའི་སྙིང་པོར་གནས་པ་སྟེ། ལམ་རིམ་ལས། སྙིང་པོ་རང་བཞིན་མཚུངས་པ་དང་། ཞེས་སོ། །ལྷན་ཅིག་བྱེད་པའི་རྒྱུ་ནི། ཐེག་པ་འོག་མའི་སྐྱོན་ཐོས་པས་སྐྱོ་ཞིང་། གོང་མའི་ཡོན་ཏན་ཐོས་པས་བྲོད་ནས། འདིར་འཇུག་པའི་འདུན་རྩོལ་སྐྱེ་བ་སྟེ། སྔ་མའི་འཕྲོས་ལས། བཤེས་གཉེན་མགོན་ལས་ལུང་གཉིས་ཐོས། །ཡོན་ཏན་མཐོང་དང་སྐྱོན་མཐོང་དང་། །དེ་ཡི་སྐྱོ་རྨོངས་བྲོད་དང་བས། །གཉིས་པའི་རྒྱུ་རུ་གསུངས་པ་ཡིན། །ཞེས་སོ། །གཉིས་པ་ནི། དེ་ལས། དེ་དག་གསང་སོགས་དམིགས་པ་སྟེ། །སྐད་ཅིག་འཕེལ་བ་དེ་མ་ཐག །ཅེས་པས་རྐྱེན་བཞི་ལས། ཆོས་ཉིད་རྟོགས་རུང་གི་བློ་སོ་སོར་རྟོག་པའི་ཤེས་རབ་ཅན་གྱི་སློབ་བུ་དེ་རྒྱུའི་རྐྱེན། ལུང་མན་ངག་དང་ལྡན་པའི་བླ་མ་ནི་བདག་པོའི་རྐྱེན། མཚོན་བྱེད་ཡི་གེའི་རྒྱུད་མན་ངག་དང་བཅས་པ་ནི་དམིགས་པའི་རྐྱེན། ཐོས་བསམ་གྱིས་རྟོགས་པའི་ཤེས་རབ་སྐད་ཅིག་སྔ་མས་གོ་ཕྱེ་ནས་ཕྱི་མའི་རྟོགས་པ་བོགས་ཕྱུང་བ་ནི་དེ་མ་ཐག་རྐྱེན་ནོ། །གསུམ་པ་འབྲེལ་པ་ལའང་བཞི་ལས། ལྷན་ཅིག་བྱེད་རྒྱུ་དང་བཅས་པའི་ལམ་པ་དེ། མཚུངས་ལྡན་གྱི་རྒྱུ་རང་རིག་དོན་གྱི་བླ་མ་དང་བྱས་པ་དང་མི་རྟག་པ་ལྟར་ངོ་བོ་ཉིད་ཀྱིས་འབྲེལ། བདག་རྐྱེན་རྟགས་ཀྱི་བླ་མ་དང་གསེར་སྣོད་དང་སེང་གེའི་འོ་མ་ལྟར་སྣོད་བཅུད་དུ་འབྲེལ། དམིགས་རྐྱེན་བསྟན་བྱའི་ཆོས་མ་ཧཱ་ཡོ་ག་དང་མེ་དང་དུ་བ་ལྟར་ཤེས་བྱ་ཤེས་བྱེད་དུ་འབྲེལ། དེ་སྟོན་པ་པོ་རྒྱལ་བ་དྲུག་པ་དང་ཉི་མ་དང་གླིང་བཞི་ལྟར་ལས་དང་ཐུགས་རྗེས་འབྲེལ་བ་སྟེ། དེ་ཉིད་ལས། བཤེས་གཉེན་རྣམས་དང་ངོ་བོས་འབྲེལ། །དེ་ལྡན་བྱ་བྱེད་སྣོད་བཅུད་དུ། །ཆེན་པོའི་ལུང་དང་འབྲེལ་བ་དང་། །མགོན་དང་བྱ་བྱེད་ཐུགས་རྗེས་འབྲེལ། །ཞེས་སོ། །དེ་ལྟར་སེམས་སྐྱེ་བ་ལ་རྒྱུ་རྐྱེན་དྲུག་དང་ལྡན་པ་དགོས་ན། ལམ་རིགས་བཞི་ནས་སེམས་བསྐྱེད་པ་ཉམས་ཏེ། རང་རྒྱལ་ལ་བླ་མ་མེད་པས་སེམས་སྐྱེར་མི་བཏུབ་པར་འགྱུར་རོ་ཞེ་ན། བདེན་མོད་ཀྱི། འོན་ཀྱང་བསེ་རུའམ་ནེ་ཙོ་ལྟ་བུ་རིགས་མཐུན་པའི་གྲོགས་པོར་བརྟེན་ནས་དོན་བྱེད་པའི་ཕྱིར་སྐྱོན་མེད་དེ། འདི་ཉིད་ལས། རང་རྒྱལ་རྣམས་ལ་བསེ་རུའི་ཚུལ། །ཞེས་དང་། རྣམ་སྣང་སྒྱུ་དྲྭ་ལས། རང་རྒྱལ་རྣམས་ལ་གྲོགས་པོའི་གཟུགས། །བསྟན་ནས་ཐེག་ཆེན་དམིགས་ལ་འཛུད། །ཅེས་དང་། རྣམ་པར་འཕྲུལ་པའི་རྒྱལ་པོས་ཞུས་པའི་མདོ་ལས། གང་དག་རང་སངས་རྒྱས་ཀྱི་གཟུགས་ཀྱིས་གདུལ་བར་བྱ་བ་དེ་དག་ལ་ནི་རང་སངས་རྒྱས་ཀྱི་གཟུགས་སུ་འདུག་སྟེ་རྟེན་ཅིང་འབྲེལ་བར་འབྱུང་བ་དང་ལྡན་པའི་ཆོས་བརྡས་ཡང་དག་པར་སྟོན་ཏོ། །ཞེས་གསུངས་པས་གསལ་ལོ། །

གསུམ་པ་སྐྱེ་ཚུལ་ནི། ཉང་ཊཱིཀ་དང་གླན་ཊཱིཀ་པ་སོགས་རྣམ་གྲངས་བརྒྱད་དུ་བཞེད་དོ། །མོས་པ་ཐ་དད་པ་ལ་ལྟོས་ཏེ་ཐབས་གྲོལ་གཉིས་སུ་དང་། བློ་ཆེ་ཆུང་ལ་ལྟོས་ཏེ་རིམ་ཅིག་ཆར་གཉིས་སུ་དང་། རིམ་པ་འདོར་མི་འདོར་ལ་ལྟོས་ཏེ་ཐོད་རྒལ་དང་མཐར་ཆགས་གཉིས་སུ་དང་། ཞེན་པ་དག་མ་དག་ལ་ལྟོས་ཏེ་ཟག་བཅས་ཟག་མེད་གཉིས་སུ་དང་། མཚན་མ་ཆེ་ཆུང་ལ་ལྟོས་ཏེ་ལྷ་དང་མི་རྟོག་པ་བསྒོམ་པ་གཉིས་སུ་དང་། གདུལ་བྱ་དྲག་ཞན་ལ་ལྟོས་ཏེ་ཞི་བ་དང་ཁྲོ་བོ་གཉིས་སུ་དང་། རང་སྟོབས་དང་གཞན་སྟོབས་ལ་ལྟོས་ཏེ་ཤེས་རབ་དང་གདམས་ངག་གཉིས་སུ་དང་། ཏིང་ངེ་འཛིན་གསལ་མི་གསལ་ལ་ལྟོས་ཏེ་མོས་བསྒོམ་དང་ངེས་རྫོགས་བསྒོམ་པའི་ཚུལ་གཉིས་སུ་སེམས་སྐྱེའོ་ཞེས་བཞེད་ནའང་། འདིར་ནི། ལམ་གྱི་རྩ་བ་ཐབས་གྲོལ་གཉིས་ཏེ། དེ་གཉིས་ཀ་སྐྱེ་ཚུལ་དབང་པོ་ལ་ལྟོས་ཏེ་རིམ་དང་ཅིག་ཆར་དུ་འཇུག་པས་སྐྱེ་བའི་ཕྱིར། རིམ་ཅིག་ཅར་གཉིས་སུ་འཆད་དེ་ཞེས་གསང་བདག་ཆེན་པོ་སྒྲོ་ཕུག་པ་དང་། རྗེ་དྲི་ངས་པ་སོགས་བཞེད་པ་ཉིད་ལེགས་པར་སྣང་བས་དེ་བཞིན་དུ་འཆད་དོ། །དེ་ལ་དབྱེ་བ་དང་སྒྲུབ་བྱེད་གཉིས། དང་པོ་ནི། རང་བཞིན་གྱི་དབང་རྣོན་དང་། སྦྱངས་པའི་དབང་རྣོན་གཉིས་རེ་རེ་ལའང་བློ་ཆེ་ཆུང་གི་སྒོ་ནས་རིམ་འཇུག་དང་ཅིག་ཆར་དུ་འཇུག་པ་གཉིས་རེའི་ཚུལ་གྱིས་འཇུག་སྟེ། ལམ་རིམ་ལས། དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པས་ཉེ་རིང་ཕྱིར། །རིམ་དང་ཅིག་ཆར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །ཅེས་པ་ལྟར་བཞི་ལས། སྦྱངས་པའི་དབང་རྣོན་རིམ་གྱིས་པ་ནི། ཚེ་སྔོན་མ་ཕན་ཆད་ཐུན་མོང་གི་ཐེག་པ་ལ་ཡུན་རིང་སྦྱངས་ཤིང་། འདིའི་ཚེ་སྟོད་ལའང་ལམ་སྟེགས་ཀྱི་ཐེག་པར་སྦྱངས་པ་ཞིག་མཧཱའི་ཐེག་པར་འཇུག་པའོ། །སྦྱངས་རྣོ་ཅིག་ཆར་བ་ནི། སྔ་མ་སྦྱངས་པར་མཐུན་ཞིང་། ཚེ་འདི་ལ་ཐོག་མ་རང་ནས་མཧཱར་འཇུག་པའོ། །རང་བཞིན་གྱི་དབང་རྣོན་རིམ་གྱིས་པ་ནི། ཚེ་སྔ་མ་ཕན་ཆད་མ་སྦྱངས་ཤིང་། འདིའི་ཚེ་སྟོད་ལ་ལམ་སྟེགས་ཙམ་དུ་རེ་ཞིག་འོག་མ་ལ་སྦྱངས་པའི་མཐར་མ་ཧཱར་འཇུག་པའོ། །རང་རྣོ་ཅིག་ཆར་བ་ནི། སྔ་མ་ལའང་མ་སྦྱངས་ཤིང་། ཚེ་འདིའི་ཡང་ཐོག་མ་ནས་མ་ཧཱ་ཉིད་དུ་འཇུག་པའོ། །

གཉིས་པ་ལ། སྦྱངས་རྣོ་དང་། རང་རྣོ་སྒྲུབ་པའོ། །དང་པོ་ནི། ལམ་རིམ་ལས། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་འདིར་འཇུག་ཕྱིར། །རིང་བའང་རིམ་དང་ཅིག་ཆར་བའོ། །ཞེས་སོགས་མདོ་སྔགས་གཉིས་ཀའི་ཐུན་མོང་གི་ལུང་རིགས་དུ་མས་གྲུབ་པ་ཉིད་དོ། །

གཉིས་པ་ལ། རང་རྣོ་མེད་ན་སྐྱོན་དུ་འགྱུར་བས་ཡོད་པར་བསྒྲུབ། དེ་སྒྲུབ་པའི་རིགས་པ་དངོས་བཤད། རྒྱུད་འདི་རང་རྣོའི་སྤྱོད་ཡུལ་མིན་པར་འདོད་པ་དགག་པའོ། །དང་པོ་ནི། ཁ་ཅིག་ན་རེ། དབང་རྣོན་ཡིན་ན་སྦྱངས་རྣོ་ཡིན་པས་ཁྱབ་ཀྱི། རང་བཞིན་གྱི་དབང་རྣོན་གཞི་མ་གྲུབ་བོ་ཟེར། དེ་ལྟར་ན། འཇིག་རྟེན་ཕལ་པའི་སེམས་བརྒྱད་ཀྱང་སྐྱེ་མི་རིགས་པར་ཐལ། དབང་རྣོན་ཡིན་ན་སྦྱངས་རྣོ་ཡིན་པས་ཁྱབ་པ་གང་ཞིག །འཇིག་རྟེན་ཕལ་པའི་སེམས་བརྒྱད་ལས་སྔ་བའི་ལམ་སྡེ་སྣོད་ནས་མ་བཤད་པས་དེའི་སྔོན་ན་སྦྱང་དུ་མེད་པའི་ཕྱིར་ཏེ། ལམ་རིམ་ལས། མུན་པའི་ཤེས་པའི་ས་དེ་ཉིད། །རང་བཞིན་རྒྱུ་ཡིས་བསྙུང་བར་གནས། །ཕལ་པའི་སེམས་བརྒྱད་མཐར་གནས་ཚེ། །ཞེས་དང་། རང་གནས་རྒྱལ་པོའི་འགྲེལ་པར། ཆོས་ཉིད་ཀྱི་རིགས་པས་མུན་པའི་ས་ནས་སེམས་ཕལ་པ་བརྒྱད་སྐྱེ་སྟེ། ཞེས་གསུངས་པའི་ཕྱིར་རོ། །གལ་ཏེ། ཕལ་པའི་སེམས་བརྒྱད་མུན་པའི་ས་ནས་སྐྱེ་བར་འདོད་ན། རང་རྣོ་མེད་པར་འདོད་པ་ཉམས་སོ། །གཞན་ཡང་། དབང་རྣོན་ཡིན་ན་སྦྱངས་རྣོ་ཡིན་པས་ཁྱབ་པའི་ཕྱིར། སྦྱངས་པ་མཉམ་པོ་ལ་རྣོ་རྟུལ་མི་རུང་ངོ་། །འདོད་ན་མངོན་སུམ་གྱིས་གསལ། རྣོ་བ་དེ་ཉིད་སྔ་མ་ལ་སྦྱངས་སམ་ཅི་ཆ་ཟེར་ན། མ་སྦྱངས་སམ་ཡང་ཅི་ཆ་སྟེ། ཅི་ཆ་ཡོད་ཀྱིས་རིགས་པ་མི་བཏུབ་བོ་ཞེས་བླ་མ་བདེ་གཤེགས་ཆེན་པོ་གསུང་ངོ་། །ཡང་ཐེག་པ་ཆེ་ཆུང་དུ་སྣང་བའང་མི་རིགས་ཏེ། སྦྱངས་པ་མཉམ་པོ་ལ་བློ་ཆེ་ཆུང་འོང་བ་མི་རིགས་ལ། བློ་ལ་ཆེ་ཆུང་མེད་ན་ཐེག་པ་ལ་ཆེ་ཆུང་མི་སྲིད་དེ། ཐེག་པའི་རིམ་པ་ནི་བློ་ཁྱད་ཀྱིས་ཕྱེ་བ་ཡིན་པའི་ཕྱིར། དེ་ལྟར་ཡང་། དགོངས་འདུས་ལས། ཆེ་ཆུང་རིམ་པའི་བློ་ཡོད་ཕྱིར། །ཐེག་པའི་རིམ་པའང་དེ་བཞིན་ཏེ། །ཞེས་སོ། །

གཉིས་པ་ལ། ལུང་། མན་ངག །རིགས་པའི་སྒྲུབ་བྱེད་གསུམ་ལས། ལུང་ནི། དགོངས་འདུས་ལས། རྡོ་རྗེ་སེམས་དཔའི་ཞིང་ཁམས་ན་གནས་པའི་སེམས་ཅན་ཆེན་པོ་འདི་དག་ནི། སེམས་ཀྱི་རང་བཞིན་སྣ་ཚོགས་པའི་ཕྱིར། ཤིན་ཏུ་ཟབ་པ་དང་། མི་ཟབ་པ་དང་། ཡངས་པ་དང་། དོག་པ་དང་། རྣོ་བ་དང་། རྟུལ་བ་དང་། མྱུར་བ་དང་། བུལ་བ་ཤ་སྟག་ལས། གསང་སྔགས་ཀྱི་གཏམ་རིམ་གྱིས་སམ། ཅིག་ཆར་དུ་ཐོས་ནས། ཞེས་དང་། ཀུན་བྱེད་རྒྱལ་པོ་ལས། ལྷ་མིའི་སེམས་ཅན་དབང་པོ་མི་མཐུན་པས། །ལ་ལ་དབང་པོ་ཡེ་ནས་ཆིག་ཆོད་ཡོད། །ལ་ལ་སྦྱངས་པའི་དབང་པོ་འཕྲོ་ཅན་ཡོད། །ཅེས་སོ། །མན་ངག་ནི། ལམ་རིམ་ལས། མ་སྦྱངས་གྲུབ་པ་གསུམ་ཕྱིར་གྱིས། །མཐོ་བརྟན་མྱུར་རྣོ་རྒྱ་ཆེ་ཡངས། །ཟབ་མོ་རྒྱུ་ཡི་གང་ཟག་དེ། །ཞེས་དང་། མཛོད་ལས་ཀྱང་། ཁ་ཅིག་ཐོག་མ་ནས་དེའི་རིགས། །ཁ་ཅིག་སྦྱངས་པ་ལས་གྱུར་པའོ། །ཞེས་སོ། །རིགས་པ་ལ། དགག །གཞག །སྤང་གསུམ། དང་པོ་ནི། ལྷ་རྗེ་མདར་ནག་ན་རེ། སེམས་ཅན་གྱི་ཤེས་རྒྱུད་ཆོས་ཅན། ཁྱོད་ལ་དབང་པོ་རྣོན་པོ་གཞི་ལ་གྲུབ་སྟེ། ཀུན་གཞི་ལ་བག་ཆགས་སྣ་ཚོགས་བསགས་པའི་ཕྱིར་གསུང་། དེ་མི་འཐད་དེ། ཀུན་གཞི་ལ་བག་ཆགས་འཇོག་པ་དེ། རྒྱུ་རྐྱེན་ཐོས་བསམ་གྱིས་སྦྱངས་པ་ལ་ལྟོས་དགོས་པའི་ཕྱིར་རང་བཞིན་གྱི་དམ་བཅའ་ཉམས་སོ། །གཉིས་པ་ནི། གསང་བདག་སྒྲོ་ཕུག་པའི་ཞལ་ནས། སེམས་ཅན་གྱི་ཤེས་རྒྱུད་ཆོས་ཅན། ཁྱོད་ལ་དབང་པོ་རྣོ་རྟུལ་གྲུབ་སྟེ། སེམས་ཀྱི་རང་བཞིན་སྣ་ཚོགས་པའི་ཕྱིར། ལྕགས་ཀྱི་རྣོ་རྟུལ་བཞིན་ནོ། །གསུངས་ཏེ། སྐྱོན་དང་བྲལ་བའི་སྦྱོར་བའོ། །

གསུམ་པ་ནི། ཁ་ཅིག་ན་རེ། གཞི་ལ་རྣོ་རྟུལ་གྲུབ་ན། གཞི་བཟང་ངན་ཅན་དུ་ཐལ་བའི་ཕྱིར་མི་འཐད་དོ་ཟེར་ན། ལན་དུ་རྗེ་ཉེ་སྟོན་དང་། ཟུར་འཁོར་ན་རེ། གཞིའི་ངོ་བོ་བཟང་ངན་ཅན་དུ་ཐལ་ལམ། ལྡོག་པ་བཟང་ངན་ཅན་དུ་ཐལ་ཟེར། དང་པོ་ལྟར་ན། རྣོ་རྟུལ་འཇུག་པའི་བློ་ལ་དཔྱད་པ་ཡིན་པའི་ཕྱིར་ཁྱབ་པ་མེད་དོ། །གཉིས་པ་ལྟར་ན། འདོད་པ་ཉིད་དེ། ལྡོག་པ་བཟང་ངན་ལས་འཁོར་འདས་སྣ་ཚོགས་སུ་ཤར་བའི་ཕྱིར་རོ་གསུང་། ལྷ་རྗེ་གནུབས་གཤེན་ན་རེ། གཞི་བཟང་ངན་ཅན་དུ་མི་འགྲོ་སྟེ། དོན་དམ་པར་དབང་པོ་རྣོ་རྟུལ་གང་དུའང་མ་གྲུབ། ཀུན་རྫོབ་ཏུ་རྣོ་རྟུལ་སྣ་ཚོགས་སུ་མ་འགགས། དབྱེར་མེད་ལ་རྣོ་རྟུལ་ཐ་དད་ཀྱི་ཞེན་པ་ལས་གྲོལ་ལོ་གསུང་། ཡང་ཁ་ཅིག་རང་རྣོ་དེ་རྐྱེན་ཐོས་བསམ་ལ་རག་ལུས་སམ་མ་ལུས། དང་པོ་ལྟར་ན་རང་བཞིན་གྱི་དམ་བཅའ་ཉམས་ལ། གཉིས་པ་ལྟར་ན་འབད་མེད་དུ་གྲོལ་བར་ཐལ་ལོ་ཞེ་ན། དེ་ཚོད་དུ་ལྕགས་ཀྱི་རྣོ་རྟུལ་རྒྱུ་ལ་ཡོད་པ་དེ་རྐྱེན་མགར་བ་ལ་རག་ལུས་སམ་མ་ལུས། ལུས་ན་འདིར་ཡང་ཐོས་བསམ་ལ་རག་ལུས་སོ། །འོ་ན་རང་བཞིན་གྱིས་རྣོ་བ་མ་ཡིན་པར་ཐལ། ཐོས་བསམ་ལ་རག་ལུས་པའི་ཕྱིར་ཟེར་ན། ལྕགས་རང་བཞིན་གྱིས་རྣོ་བ་མ་ཡིན་པར་ཐལ། རྐྱེན་མགར་བ་ལ་རག་ལུས་པའི་ཕྱིར་ཞེས་བསྒྲེའོ། །ཡང་ལྕགས་ཀྱི་རང་རྣོ་དེ་རྐྱེན་མགར་བ་ལ་རག་མ་ལུས་སོ་ཞེ་ན། འདིར་ཡང་རྐྱེན་ཐོས་བསམ་ལ་རག་མ་ལུས་སོ་བྱ། མ་སྦྱངས་པའི་རྒྱུད་དག་པ་སྲིད་པའི་ཕྱིར། འབད་མེད་དུ་གྲོལ་བར་ཐལ་ལོ་ཞེ་ན། དེ་ཙམ་དུ་ལྕགས་རྣོས་ཀྱང་མཚོན་གྱི་བྱ་བ་བྱེད་ནུས་པར་ཐལ། ཞེས་མགོ་མཚུངས་སོ། །དེས་ན་རྐྱེན་མགར་བ་དང་འཕྲད་པ་མཉམ་པོ་ལ་ལྕགས་ལ་རྣོ་རྟུལ་འབྱུང་བ་བཞིན་དུ། འདིར་ཡང་རྐྱེན་ཐོས་བསམ་དང་འཕྲད་པ་མཉམ་པོ་ལ་རྣོ་རྟུལ་གྱི་ཁྱད་པར་འབྱུང་བ་ཉིད་མངོན་སུམ་གྱིས་གྲུབ་བོ། །གསུམ་པ་ནི། ཁ་ཅིག་ན་རེ། གསང་བ་སྙིང་པོའི་རྒྱུད་འདི་སྦྱངས་པའི་དབང་རྣོན་གྱི་ཡུལ་ཡིན་གྱི། རང་བཞིན་གྱི་དབང་རྣོན་གྱི་ཡུལ་མ་ཡིན་ནོ་ཟེར་ན། ལན་དུ་སྒྲོལ་གཡུང་རྣམ་གཉིས་ཀྱི་ཊཱི་ཀར། དེ་རིགས་པ་མ་ཡིན་ཏེ། དེ་ཚོད་དུ་ཟག་མེད་ཀྱི་ཆོས་ཉིད་དེ་མཐོང་ལམ་པའི་ཡུལ་ཡིན་གྱི། མཐར་ལམ་པའི་ཡུལ་མ་ཡིན་ནོ་བྱས་པས། ཁོ་ན་རེ། མཐོང་ལམ་ལས་མཐར་ལམ་བློ་ཆུང་བར་ཐལ་ཟེར་ན། འོ་ན་སྦྱངས་རྣོ་བས་རང་རྣོ་བློ་ཆུང་བར་ཐལ། རྟགས་ཁྱབ་མགོ་མཚུངས། འདོད་ན། འདིར་ཡང་འདོད་དོ། །ལམ་རིམ་ལས། ཐམས་ཅད་མཁྱེན་པའི་སྤྱན་མཆོག་འཆང་། །ཞེས་པས་གསལ་ལོ་ཟེར་ན། དེ་ཉིད་ལས། མ་སྦྱངས་གྲུབ་པ་གསུམ་ཕྱིར་གྱིས། །ཞེས་པས་གསལ་ཞེས་མགོ་བསྒྲེའོ་གསུང་།

བཞི་པ་སྐྱེས་པ་རང་གི་ངོ་བོ་ནི། སེམས་ལྔ་སྐྱེས་པ་སྟེ། ཁོག་གཞུང་ལས། ངོ་བོ་སེམས་ལྔ་སྐྱེས་པ་དང་། །ཞེས་དང་། དཔེ་ཆུང་ལས། འཇིག་ལྡང་ལ་སོགས་བྱང་སེམས་ལྔ། །ངེས་པར་སྐྱེས་པ་ངོ་བོར་འདོད། །ཅེས་སོ། །དེ་ལ་གཉིས་ཏེ། གྲོལ་ལམ་གྱི་དང་། ཐབས་ལམ་གྱི་སེམས་ལྔའོ། །དང་པོ་ལའང་། སྤྱི་ནས་འདིར་སྐྱེ་ཚུལ་བརྩི་བ་དང་། འདི་ཉིད་ཀྱི་ལམ་གོང་འོག་ལ་བརྩི་བ་གཉིས། དང་པོ་ནི། རང་བཞིན་གྱི་མུན་པ་ཅན་སོ་སོ་སྐྱེ་བོ་དང་། ཆེད་དུ་རྒྱས་པའི་མུན་པ་ཅན་མུ་སྟེགས་པ་སོགས་ཐེག་པ་འོག་མ་རྣམས་ཀྱི་ཞེ་འདོད་ལས་གྲོལ་ནས་མཧཱ་ཡོ་གར་སེམས་གཡོ་བ་ནི་གཡོ་ལྡང་བྱང་ཆུབ་ཀྱི་སེམས། གཞི་དེས་མ་ཧཱའི་དོན་ཁོང་དུ་ཆུད་པར་སྨོན་པ་ནི་སྨོན་པ་བྱང་ཆུབ་ཀྱི་སེམས། དེའི་དོན་ལ་འཇུག་པ་ནི་འཇུག་པ་བྱང་ཆུབ་ཀྱི་སེམས། ཞུགས་ནས་དབྱེར་མེད་ཀྱི་དོན་ཉམས་སུ་ལེན་པའི་རྩོལ་བ་ལ་གནས་པ་ནི་གནས་པ་བྱང་ཆུབ་ཀྱི་སེམས། གནས་པས་ལམ་ལྔ་མཐར་ཕྱིན་པ་ནི་མཐར་ཕྱིན་པ་བྱང་ཆུབ་ཀྱི་སེམས་སོ། །དེའང་ལམ་རིམ་ལས། དེ་ཇི་བཞིན་དུ་གཉིས་དང་བཞིས། །མཆོག་གི་གཡོ་བའི་སེམས་འབྱུང་འགྱུར། །གཞི་དེས་ཁོང་དུ་ཆུད་སྨོན་པས། །ལྷག་པའི་གཟུགས་བརྙན་འཇུག་པར་བྱེད། །མཆོག་གི་དམ་ཚིག་དེ་རུ་བྱིན། །རིགས་ངེས་གྱུར་ལ་ཕན་པ་བཅུ། །ནུས་པ་གཉིས་ཀྱིས་བྱིན་རླབས་བཞག །རང་གི་སྤྱན་མཆོག་འབྱེད་ལ་བརྩོན། །རྒྱུ་ཡི་དཀྱིལ་འཁོར་མཐོང་བྱའི་ཕྱིར། །ཐོས་བསམ་དམ་པ་ལེན་པར་བྱེད། །ཅེས་དང་། རང་གནས་ཀྱི་འགྲེལ་པ་ལས། རྒྱུ་རྐྱེན་ཐུན་མོང་མ་ཡིན་པ་དྲུག་གི་སྔ་མའི་ལོག་པ་གཉིས་ཀྱི་ཤེས་པའི་གཞི་ནས་ཐེག་པ་མཆོག་ལ་འཇུག་པའི་སེམས་ཡར་རྩྭ་མེ་ལྟར་ལྡང་ཞིང་གཡོ་བ་དང་། རྒྱུ་དེས་སྨོན་པ་གསུམ་སྐྱེ་བ་དང་། དེས་སྒྱུ་འཕྲུལ་རི་མོའི་དཀྱིལ་འཁོར་དུ་ཞུགས་ཏེ། དམ་ཚིག་བྱིན་ནས་རིགས་བསྟན་པ་ལ། བདག་དོན་གྱི་ནུས་དབང་གཉིས་ཡན་ཆད་བྱིན་ཏེ། ཤེས་བྱའི་མཚན་ཉིད་འཚོལ་བའི་རྒྱུ་ཉན་བསམ་ལ་གནས་ཏེ། གླེང་གཞི་དང་། གླེང་བསླང་བ་དང་། དགོས་འབྲེལ་དང་། ཡོངས་སུ་ཤེས་པར་བྱ་བའི་དངོས་པོ་དང་། གཏད་པའི་དབྱེ་བའི་རྐྱེན་སྡུད་ཅིང་། སྤྱོད་ཡུལ་དུ་བྱེད་པ་ནི་གནས་པ་དང་པོའོ། །:དེ་ལ་༼‹བ›དེས་༽ཚད་དུ་ཕྱིན་པ་ལ། བཅོ་ལྔའམ་བཅོ་བརྒྱད་བྱིན་ཏེ། བདག་གཞན་གཉིས་ཀའི་དོན་སྤྱོད་པ་ནི། ཤེས་པ་ཚད་དུ་ཕྱིན་པའི་བར་མན་ཆད་དང་། དེ་ཡང་གནས་པའི་སེམས་ལ་གཉིས། མཐོང་བ་ལ་གནས་པ་དང་། འཇུག་པ་ལྔ་ལ་གནས་པའོ། །མཐར་ཕྱིན་པའི་སེམས་ནི། སྐབས་ཀྱི་མཐར་ཕྱིན་པའི་ལམ་དང་སྤྱིའི་མཐར་ཕྱིན་པའི་ལམ་གསུམ་མོ། །དེ་དག་ནི་རིམ་པའི་དབང་དུ་བརྗོད་དེ། ཞེས་སོ། །གཉིས་པ་ལ། ལམ་སྤྱིར་བརྩི་བ། ཟག་བཅས་ཁོ་ན་ལ་བརྩི་བ། ལམ་རེ་རེ་ལའང་སེམས་ལྔའི་ལྡན་ཚུལ་བརྩི་བའོ། །དང་པོ་ནི། སྤྱན་འགྲེལ་ལས། དང་པོ་གཡོ་ལྡང་བྱང་ཆུབ་སེམས། །གཉིས་པ་སྨོན་པ་གསུམ་འཇུག་སེམས། །གནས་པ་མཐར་ཕྱིན་བཞི་ལྔ་པ། །ཞེས་པས། ལྟ་བ་རྟོགས་ནས། དེ་ཏིང་ལ་སེམས་གཡོ་ཞིང་ལྡང་། དེ་ནས་སྒྱུ་མ་ལ་སྨོན། དེ་ཕྱག་རྒྱ་གཅིག་པ་ལ་འཇུག །སྤྲོས་བཅས་དང་ཚོགས་སྒྲུབ་ལ་གནས། རིག་འཛིན་བཞི་ལ་མཐར་ཕྱིན་པའོ། །གཉིས་པ་ནི། དེ་ལས། གསུམ་མཐོང་གནས་པ་བཞི་དང་ལྡན། །ལྔ་པ་ལྔ་པ་ཉིད་དུ་སྦྱོར། །ཞེས་པས་ལྟ་བ་ལ་གཡོ་སྨོན་འཇུག་གསུམ་དང་། དེ་ཏིང་ནས་སྤྲོས་པའི་བར་བཞི་ལ་གནས་པ། ཚོགས་སྒྲུབ་ལ་མཐར་ཕྱིན་པའོ། །གསུམ་པ་ནི། དེ་ལས། ཡང་ན་རྣལ་འབྱོར་གཅིག་ལྔར་ལྡན། །ཞེས་པས། ལམ་རེ་རེ་ལ་སེམས་ལྔ་ལྔའི་ལྡན་ཚུལ་བརྩི་སྟེ། གོ་སླའོ། །

གཉིས་པ་ཐབས་ལམ་གྱི་སེམས་ལྔ་ནི། ཁམས་ཉེར་གཅིག་པ་ལས། འཇུག་དང་ལྡང་དང་གནས་པ་དང་། །སྨོན་པ་བྱང་ཆུབ་སེམས་ཡིན་ནོ། །གཡོ་དང་བསྐྱོད་དང་ལྡང་དང་གནས། །ཞེས་སོ། །དེ་ཡང་ལམ་པས་ཐབས་ལམ་ཉམས་སུ་ལེན་པའི་དུས་སུ། རྩ་གནས་ནས་ཐིག་ལེ་མགོ་གཡོས་ཙམ་ན་བདེ་བ་མགོ་ལྡང་བའི་ཚུལ་དུ་འདུག་པ་ནི་གཡོ་ལྡང་བྱང་ཆུབ་ཀྱི་སེམས་སོ། །བདེ་བ་སྔ་མ་འཇིག་ཅིང་ཕྱི་མ་ལ་འཇུག་པ་ནི་འཇིག་འཇུག་བྱང་ཆུབ་ཀྱི་སེམས་སོ། །ལུས་ཀྱི་རྩ་ཐིག་རྣམས་རང་སར་གནས་པས་བདེ་བའང་སྐྱེས་ལ་མ་འགགས་པར་གནས་པ་ནི་གནས་པ་བྱང་ཆུབ་ཀྱི་སེམས་སོ། །སྔ་མའི་བདེ་བ་ལ་དམིགས་ཤིང་ཕྱི་མའི་བདེ་བ་ལ་སྨོན་པ་ནི་སྨོན་པ་བྱང་ཆུབ་ཀྱི་སེམས་སོ། །ཐིག་ལེ་དབབ་བཟློག་གི་སྦྱོར་བས་བྱང་ཆུབ་ཀྱི་སེམས་རྡོ་རྗེ་དང་པདྨའི་རྩེར་འགྲོ་འོང་དུ་གནས་པ་ནི་འགྲོ་འོང་བྱང་ཆུབ་ཀྱི་སེམས་སོ། །འདིར་ཁ་ཅིག །ལམ་གྱི་ངོ་བོ་སེམས་ལྔ་ཡིན་ན། ལམ་པ་གང་གིས་བྱེད་ཅེས་རྒོལ་ན། ལན་ནི། སེམས་ལྔ་སྐྱེ་བའི་གཞི་མའི་ངོས་ནས་ལམ་པ་ཡིན་ལ། སྐྱེས་པ་རང་གི་ངོས་ནས་ལམ་གྱི་ངོ་བོ་ཡིན་པས་སྐྱོན་མེད་དོ། །ཞེས་བླ་མ་གོང་མ་རྣམས་གསུངས་སོ། །

གསུམ་པ་སྒྲ་དོན་ནི། ངོ་བོ་དང་ལྟོས་པའི་ཐུན་མོང་གི་ལམ་པ་རྣམས་ཀྱིས་སྤྱད་བྱར་མ་གྱུར་པའི་ཕྱིར་ཁྱད་པར་གྱི་ལམ་ཞེས་བྱ་སྟེ། རྒྱུད་ཕྱི་མ་ལས། རྣལ་འབྱོར་སྤྱོད་ཡུལ་སྙིང་པོའི་དོན། །ཉན་ཐོས་རྣམས་ལ་མ་བཤད་ཅིང་། །རབ་ཏུ་མཆོག་གྱུར་དགེ་སློང་ལའང་། །གསང་ལས་ཤིན་ཏུ་གསང་བ་མཆོག །ཅེས་སོ། །

བཞི་པ་དབྱེ་བ་ལ། དངོས་དང་། འབྱེད་བྱེད་ཀྱི་ཁྱད་པར་རོ། །དང་པོ་ནི། ཁོག་གཞུང་ལས། ཐུན་མོང་མ་ཡིན་རྣམ་གཉིས་ཏེ། །ཞེས་པས་གཉིས་སུ་དབྱེའོ། །གཉིས་གང་ཞེ་ན། ཤེས་རབ་རྣམ་པར་གྲོལ་བའི་ལམ་དང་། ཐབས་ཀྱིས་ངེས་པའི་ལམ་སྟེ། རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། །ཅེས་སོ། །གཉིས་པ་ལ། དགག །གཞག །སྤང་གསུམ། དང་པོ་ནི། ཉང་ཇོ་མདོ་ན་རེ། དབང་དང་བདེ་བ་སྟོན་པ་ཐབས་ལམ། ཤེས་རབ་གསུམ་གྱི་སྒོ་ནས་ཉམས་སུ་ལེན་པ་གྲོལ་ལམ་མོ་གསུང་། བླ་མ་གོང་མ་ཕལ་ཆེར། ཐབས་ཀྱི་མན་ངག་དང་ལྡན་པས་ཉོན་མོངས་པ་ལ་སྤྱད་ཀྱང་མི་འཆིང་ཞིང་གྲོལ་བར་སྟོན་པས་ཐབས་ལམ། ཆོས་ཉིད་ཀྱི་དོན་ལ་ཤེས་རབ་གསུམ་གྱིས་སྦྱོར་བ་ནི་གྲོལ་ལམ་མོ་གསུང་། བཞེད་པ་དེ་གཉིས་ཀ་ལེགས་པར་མི་སེམས་ཏེ། དང་པོ་ལྟར་ན། དབང་དང་བདེ་བ་མི་སྟོན་པའི་ཕྱིར། མངོན་དུ་བྱུང་བའི་སྒྲོལ་བ་འདི་ཐབས་ལམ་མ་ཡིན་པར་ཐལ། འདོད་ན། ངོ་མཚར་ངན་འགྲོ་ཐར་པའི་ཐབས། ཞེས་ཐབས་ལམ་དུ་གསུངས་པ་དང་འགལ་ལོ། །གཉིས་པ་ལྟར་ན། ཉོན་མོངས་པ་མ་སྤངས་པར་གྲོལ་བའི་ཐབས་སུ་སྟོན་པའི་ཕྱིར། གསང་སྔགས་མཐའ་དག་ཐབས་ལམ་དུ་ཐལ། འདོད་ན། གསང་སྔགས་ལ་གྲོལ་ལམ་གཏན་མེད་དུ་ཐལ་ལོ། །འདོད་མི་ནུས་ཏེ། རིམ་གསུམ་ལས། དབུ་མ་རྣམ་པ་གཉིས་ཡིན་ཏེ། །གྲོལ་ལམ་ཐབས་སུ་རྣམ་པར་བསྟན། །ཅེས་པ་དང་འགལ་བའི་ཕྱིར། གཉིས་པ་ནི། གཙོ་བོར་ཤེས་རབ་གསུམ་གྱི་སྒོ་ནས་ཤེས་འཇུག་གིས་འཆིང་བ་ལས་གྲོལ་བས་འབྲས་བུ་གྲུབ་པར་བྱེད་པ་ནི་གྲོལ་ལམ་སྟེ། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་སོ། །གཙོ་བོར་ཐབས་དང་གདམས་ངག་གི་སྒོ་ནས་འཆིང་བ་ལ་བརྟུལ་ཞུགས་ཀྱིས་སྤྱད་པས་འབྲས་བུ་མྱུར་དུ་འགྲུབ་པར་བྱེད་པ་ནི་ཐབས་ལམ་སྟེ། ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་དང་། ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཞེས་སོ། །གཞན་ཡང་ལམ་དེ་ཉིད་དཔེས་མཚོན་ནས་བཤད་ན་བདེ་བླག་ཏུ་གོ་བར་འགྱུར་ཏེ། མཀྵི་ཀའི་སྦྱོར་བས་ལྕགས་ཁམས་གསེར་དུ་བསྒྱུར་བ་བཞིན་ཐབས་ལ་མཁས་པའི་མྱུར་ལམ་ཡིན་པས་ཐབས་ལམ་དང་། དེ་ལ་མ་བརྟེན་པར་གསེར་འགྱུར་གྱི་ཐབས་གཞན་མེད་པའང་མ་ཡིན་ཏེ། རིན་པོ་ཆེ་ཀཽསྟུ་བྷ་དང་ལྷན་ཅིག་ཏུ་བཞག་པའི་རྡོའི་ཁམས་གསེར་དུ་འགྱུར་བ་ཉིད་གྲོལ་ལམ་གྱི་དཔེའོ་ཞེས་བཞེད་དོ། །གསུམ་པ་ནི། དེ་ལྟ་ནའང་གྲོལ་ལམ་ལ་ཐབས་དང་གདམས་ངག་མི་དགོས་ཤིང་། ཐབས་ལམ་ལ་ཤེས་རབ་གསུམ་མི་དགོས་པར་ཐལ་ཞེ་ན། རྣམ་པར་ཕྱེ་སྟེ། གཙོ་བོར་མི་དགོས་པ་འདོད་ལ། ཐམས་ཅད་དུ་མི་དགོས་པས་མ་ཁྱབ་སྟེ། རྗེ་དྲི་ངས་པ་ཉེ་སྟོན་གྱི་གེགས་སེལ་སྒྲོན་མེ་ལས། ལམ་དེ་གཉིས་མགོ་འབྲེལ་ལམ་ལྟག་ཤལ་ན། མགོ་འབྲེལ་ཏེ་གཅིག་གི་ཆ་རྐྱེན་དུ་གཅིག་དགོས་སོ། །འོ་ན་གཉིས་སུ་ཕྱེ་བ་ལ་དགོས་པ་མེད་དོ་ཞེ་ན། དགོས་པ་ཡོད་དེ། གཙོ་བོར་གང་བྱས་ན་འབྲས་བུ་ཐོབ་པའི་སྒོ་ནས་བཞག་གོ །ཞེས་སོ། །སྔར་གྱི་དཔེའང་དོན་དང་ཤིན་ཏུ་མཚུངས་ཏེ། གང་དག་གྲོལ་ལམ་དུ་ཤེས་རབ་གསུམ་གཙོ་བོར་བསྟན་ཏེ་མཉམ་པའི་ལྟ་བ་ལས་སུ་རུང་བ་ལས་ཐབས་ལམ་དུ་རྨད་དུ་བྱུང་བའི་བརྟུལ་ཞུགས་ཀྱི་སྤྱོད་པ་དང་དུ་བླངས་ཏེ་མཉམ་པའི་ལྟ་བ་ལས་སུ་རུང་བ་ཆེས་མྱུར་བར་བླ་ན་མེད་པའི་རྒྱུད་སྡེ་ཐམས་ཅད་དུ་གསུངས་ལ། རྒྱུ་མཚན་དེས། མཀྵིའི་དཔེ་དང་། ཀཽསྟུ་བྷའི་དཔེས་བསྟན་པ་གཉིས་འབྲས་བུ་གསེར་དུ་གཅིག་ཀྱང་། མྱུར་བུལ་གྱི་ཁྱད་པར་ཡོད་པ་བཞིན་ནོ། །

ལྔ་པ་ལམ་གྱི་ངོ་བོ་ཐབས་གྲོལ་གཉིས་གཏན་ལ་དབབ་པ་ནི། རྒྱུད་ཕྱི་མ་ལས། གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །ཞེས་པས། བརྗོད་བྱ་འཆད་བྱེད་རྗོད་བྱེད་ཡིན་པའི་ཕྱིར། འོག་ཏུ་ལམ་རྐྱེན་ཡི་གེའི་རྒྱུད་འཆད་པ་ལས་རྒྱ་ཆེར་ཤེས་པར་འགྱུར་བས་འདིར་མ་སྤྲོས་སོ། །

དྲུག་པ་ནི། ཐབས་ལམ་གྱི་སྔོན་དུ་གྲོལ་ལམ་འགྲོ་དགོས་པ་ཡིན་ཏེ། བརྟགས་པ་གཉིས་ཀྱི་གཞི་ནས་མ་ཧཱར་འཇུག་པའི་ཉེར་བསྡོགས་སུ་གཡོ་ལྡང་དང་། སྨོན་སེམས་འགྲོར་ངེས་པས་ཁྱབ་པ་གང་ཞིག །ཐབས་ལམ་གྱི་སེམས་བསྐྱེད་ཐོག་མ་ནས་སྐྱེ་བ་མི་སྲིད་པའི་ཕྱིར་རོ། །དེ་ལ་དགོངས་ཏེ་ཐུགས་ཐིག་ལས། ལམ་གྱི་ཤེས་རབ་སྔོན་འགྲོ་བ། །ཐབས་ལ་དེ་ཉིད་རིམ་པར་བསླབ། །ཅེས་པ་ལྟར་འདིར་ཡང་རིམ་པ་དེ་ལྟར་དུ་བཤད་ཅིང་འཆད་དོ། །བླ་མ་གོང་མ་ཕལ་ཆེར། ཐབས་ལམ་སྔོན་ལ་འཆད་པར་མཛད་པ་ནི་བརྗོད་བྱ་ཉུང་བའི་དབང་གིས་འཆད་བདེ་བ་ལ་དགོངས་པ་སྟེ། འགལ་བར་མ་མཐོང་ངོ་། །

གཉིས་པ་ལམ་རྐྱེན་ཡི་གེའི་རྒྱུད་ནི། འདི་ལྟར་གང་བརྗོད་པར་བྱ་བ་ཉིད་རྗོད་བྱེད་ཀྱི་ངག་གིས་མ་བརྗོད་ན། བརྗོད་བྱའི་དོན་མཚོན་པར་མི་ནུས་པའི་ཕྱིར། རྒྱུད་དོན་རྟོགས་པར་འདོད་པས་སྒྲ་རྒྱུད་ལ་འཇུག་པར་བྱ་དགོས་པ་ཉིད་དོ། །དེ་ཡང་མཚོན་ཚུལ་གང་ཞེ་ན། འདི་ཉིད་ལས། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས་པས། དབྱངས་དང་གསལ་བྱེད་ཀྱི་བདག་ཉིད་ཅན་གྱི་ཡི་གེ་དུ་མ་འདུས་པ་ལས། ཀ་བ་དང་བུམ་པ་ཞེས་སོགས་ཆོས་རྣམས་ཀྱི་ངོ་བོ་ཙམ་བསྟན་པའི་མིང་དང་། མིང་དེ་དག་འདུས་པ་ལས། ཙནྡན་གྱི་ཀ་བ་དང་། གསེར་གྱི་བུམ་པ་ཞེས་སོགས་ཆོས་རྣམས་ཀྱི་དོན་གྱི་ཁྱད་པར་སྟོན་པའི་ཚིག་དང་། དེ་འདུས་པ་ལས། ཚིགས་སུ་བཅད་པ་དང་། ལྷུག་པ་དང་། ལེའུ་དང་། སྐབས་ལ་སོགས་པའི་རིམ་པས་གླེགས་བམ་གྱི་བར་དུ་རྒྱུན་ཆགས་པར་བྱུང་སྟེ་རྗོད་བྱེད་སྒྲའི་རྒྱུད་གྲུབ་ཅིང་། དེས་བརྗོད་བྱའི་དོན་ཇི་ལྟར་མཚོན་ནུས་པ་ནི། ལོ་ཙཱ་བ་ཆེན་པོ་ཐུ་མིས། ཡི་གེའི་ཁོང་ནས་མིང་བྱུང་སྟེ། །མིང་གི་ཁོང་ནས་ཚིག་བྱུང་ལ། །ཚིག་གིས་དོན་རྣམས་སྟོན་བྱེད་པ། །ཞེས་ཚིག་ཚོགས་པ་ལས། དཔེར་ན་ཙནྡན་གྱི་ཀ་བས་བཏེགས་པའི་རྟ་བབས་ལ་གསེར་གྱི་བུམ་པ་བཟང་པོ་དག་འགོད་དོ། །ཞེས་བརྗོད་བྱའི་དོན་གང་ཡིན་གསལ་བར་སྟོན་པ་ལྟར། འདིར་ཡང་། མཚོན་བྱ་རང་བཞིན་གྱི་རྒྱུད་ཀྱི་དོན་མཚོན་བྱེད་སྒྲ་རྒྱུད་ཀྱིས་མཚོན་ནུས་པ་སྟེ། ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །སྒྲོ་སྐུར་མེད་པར་བསྟན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །མཛུབ་མོས་རི་བོང་ཅན་བཞིན་ནོ། །ཞེས་དང་། རིམ་གསུམ་ལས། ཚིག་དང་ཡི་གེའི་རྐྱེན་གཉིས་ལས། །བརྟེན་ནས་རྟོགས་པར་བྱེད་པ་ཡིན། །ཞེས་སོ། །ཅིའི་ཕྱིར། གཞན་ལ་རག་མ་ལུས་པར་གཞུང་ཚོགས་ཡི་གེའི་རྒྱུད་ཁོ་ནས་རང་བཞིན་གྱི་རྒྱུད་དོན་ཇི་ལྟ་བ་བཞིན་སྟོན་པར་ནུས་པ་ཡིན་ནམ་ཞེ་ན། མ་ཡིན་ཏེ། འདི་ཉིད་ཀྱི་ལུང་དེའི་འཕྲོས་ལས། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེ་ཐུགས་ལ་གནས། །ཞེས་གསུངས་པའི་ཕྱིར། དེའི་དོན་ཡང་། སློབ་དཔོན་སྒེག་པ་རྡོ་རྗེའི་ཊཱི་ཀར། སྔོན་བྱུང་དང་རྗེས་འཇུག་གི་སྟོན་པ་གཉིས་ཀྱིས་ཇི་ལྟར་འབྱིན་པའི་ཚུལ་གསུངས་ནའང་། འདིར་སྐབས་སུ་བབས་པ་རྗེས་འཇུག་གི་དབང་དུ་བྱས་ཏེ། གོང་དུ་སྨོས་པའི་རྐྱེན་བཞིའི་ནང་ཚན་བདག་རྐྱེན་རྡོ་རྗེ་སློབ་དཔོན་གྱིས། རང་བཞིན་གྱི་རྒྱུད་གདུལ་བྱའི་རྒྱུད་ལ་གབ་པ་དེ་ངོ་སྤྲོད་པའི་ཐབས་ཀྱིས་འབྱིན་ཅིང་། ལམ་རྐྱེན་ཡི་གེའི་རྒྱུད་དུ་སྦས་པའི་དོན་རྣམས་འཁྲུགས་སྡེབས་མངོན་དུ་བྱུང་བའི་ཚུལ་གྱིས་འབྱིན་པར་མཛད་པ་སྟེ། བི་མ་ལའི་འགྲེལ་ཆུང་ལས། ཀུན་གྱི་ཁོང་ན་གནས་པའི་དོན་དེ་གསང་བ་འདི་ལས་འབྱིན་མཛད་པའི། །ཐེག་པ་ཀུན་ལ་མཁས་པའི་སྟོན་པའི་ཐུགས་ལ་གནས། །ཞེས་དང་། ཉི་འོད་སེང་གེའི་རྒྱ་ཆེར་འགྲེལ་ལས་ཀྱང་། སློབ་དཔོན་གྱི་ཚིག་གིས་རབ་ཏུ་མཚོན་ཏེ། རྒྱུད་ཀྱི་ཁོང་ནས་ཚིག་དོན་གྱི་གབ་པ་དང་། དོན་ཚིག་ལ་སོགས་པ་སྦས་པའི་དོན་འབྱིན་པར་བྱེད། ཅེས་སོ། །མདོར་ན་འཆད་པ་པོ་རྡོ་རྗེ་སློབ་དཔོན་གྱིས། བཤད་བྱ་སྒྲ་རྒྱུད་ལ་བརྟེན་ཏེ། དེའི་ཁོང་ནས་གནས་པའི་རྒྱུད་དོན་ཉིད་ཕྱིན་ཅི་མ་ལོག་པར་སྟོན་དགོས་པའི་ཕྱིར། འདི་དག་ནི་རྒྱུད་ལ་འཇུག་པའི་མཐུན་རྐྱེན་གྱི་གཙོ་བོ་ཡིན་པར་ཤེས་པར་བྱའོ། །དེ་ལྟར་མཚོན་བྱེད་ཡི་གེའི་རྒྱུད་ཉིད། བརྒྱུད་པའི་མན་ངག་གི་བཤད་ཐབས་གང་གིས། ཚུལ་ཇི་ལྟར་འཆད་ཅེ་ན། བཤད་ཐབས་ཀྱི་མན་ངག་ནི་སྔར་རྒྱ་ཆེར་བཤད་གྲུབ་ལ།