རྒྱུད་ཀྱི་མཚན་བསྟན་པ།
དེས་ཇི་ལྟར་འཆད་པ་ལ། རྒྱུད་ཀྱི་མཚན་བསྟན་པ་དང་། མཚན་དེ་ལྡན་གྱི་རྒྱུད་དོན་ནོ། །དང་པོ་ནི། ཐུགས་ཐིག་ལས། དང་པོར་མཚོན་པ་མཚན་གསུམ་ལྡན། །ཞེས་དང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་པས་མཚན་གྱི་རྣམ་གྲངས་གསུམ་སྟེ། རྒྱུད་དང་འཆད་པའི་སྐྱེས་བུའི་མཚན་ཐུན་མོང་དུ་བསྟན་པ་དང་། ཆེ་བ་ལས་བཏགས་པ་དང་། དོན་རང་གི་ངོ་བོ་ལས་བཏགས་པའོ། །དང་པོ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ། རྡོ་རྗེ་མེ་ལོང་ལས། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་པས། རྡོ་རྗེ་ནི་དབྱེར་མི་ཕྱེད་པའི་རང་བཞིན་ཅན། སེམས་དཔའ་ནི། ས་ཏྭའི་སྒྲ་སྤྱིར་དོན་དྲུག་ལ་འཇུག་ཀྱང་། སྐབས་འདིར་བརྟན་པ་དང་། བསྡུས་པ་དང་། རྟོགས་པ་གསུམ་ལ་འཇུག་ཅེས་རོང་ཟོམ་ཆེན་པོ་གསུངས་པ་ལྟར། རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་དེ་ཉིད། རྡོ་རྗེ་ལྟར་བརྟན་པས་ན། རྡོ་རྗེ་སེམས་དཔའ་དང་། དེས་འཁོར་འདས་ཀྱི་ཆོས་ཐམས་ཅད་རྡོ་རྗེ་ལྟར་དབྱེར་མེད་པར་བསྡུས་པས་སམ། དབྱེར་མི་ཕྱེད་པའི་དོན་རྟོགས་པས་ཀྱང་རྡོ་རྗེ་སེམས་དཔའ་དང་། གང་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པ་སྟེ། དང་པོ་གཉིས་ཀྱིས་གཞི་འབྲས་དབྱེར་མེད་པའི་རྡོ་རྗེ་སེམས་དཔའ་དང་། ཕྱི་མ་གཉིས་ཀྱིས་འབྲས་བུའི་སྤྱི་དང་བྱེ་བྲག་གི་ཕྱོགས་བཟུང་བའོ། །སྒྱུ་འཕྲུལ་དྲྭ་བ་ནི། སྤྱིར་རྒྱལ་བ་རྣམས་ཀྱིས་འགྲོ་བ་འདུལ་བའི་ཐབས་ཀྱི་རྣམ་འཕྲུལ་སྒྱུ་མ་ལྟར་ཅིར་ཡང་མ་ངེས་པར་སྣང་བའི་སྒོ་ནས་ཐུགས་རྗེའི་དཔྱང་ཐག་གིས་མི་གཏོང་བར་འཛིན་ཅིང་འབྲེལ་པའི་དོན་ནམ། ཐབས་ཀྱི་འཕྲུལ་པ་ཇི་སྙེད་པའང་མཚན་མ་མེད་པའི་ཤེས་རབ་ཀྱིས་མ་ཟིན་པ་མེད་པས་ཀྱང་འབྲེལ་བ་སྟེ་སྒྱུ་འཕྲུལ་དྲྭ་བའོ། །ཁྱད་པར་དུ། རྡོ་རྗེ་མེ་ལོང་ལས། ཐབས་དང་ཤེས་རབ་འབྲེལ་བའི་དོན། །སྒྱུ་འཕྲུལ་ཞེས་ནི་བཞིར་བཤད་དོ། །ཞེས་པས་ཕྱི་ནང་གསང་བ་དེ་ཁོ་ན་ཉིད་དང་བཞིར་བརྒྱུད་པའི་བཀའ་སྲོལ་གྱིས་འཆད་པ་ལས། དང་པོ་ཕྱི་ལྟར་ན། འབྱུང་བ་ལྔ་སྒྱུ་མ་ལྟར་སྣང་ལ་མ་ངེས་པ་དང་། དེའི་རྒྱུས་ཅིར་ཡང་འཕྲུལ་པ་ནི་ཕུང་པོ་ལྔའོ། །དེ་གཉིས་འབྲེལ་པ་ཅན་གྱི་ཕྱིར་དྲྭ་བ་སྟེ། དོན་དེས་སྒྱུ་མ་མཚོན་པ་ལྷ་ཡུམ། འཕྲུལ་པ་མཚོན་པ་ཡབ། དྲྭ་བ་མཚོན་པ་ཟུང་དུ་འབྲེལ་བའམ། ཡང་ན་འདིའི་ལེའུ་བཞི་པར། ཡབ་ལ་སྒྱུ་འཕྲུལ་དང་། ཡུམ་ལ་དྲྭ་བར་བཤད་དེ། དང་པོ་ནི། ཕུང་པོ་སྒྱུ་མ་ལྟ་བུ་ལ་རང་རིག་རྟོགས་པའི་ཐབས་ཀྱིས་ཡེ་ཤེས་ལྔར་མཚོན་ནས་རིགས་ལྔར་སྣང་བ་ལ་འཕྲུལ་ཞེས་བྱ་སྟེ། ལེ་ལག་ལས། ལྔ་ཕུང་སྒྱུ་མའི་ཡེ་ཤེས་ལ། །རང་རིག་ཐབས་ཀྱིས་རིགས་ལྔར་འཕྲུལ། །ཞེས་སོ། །གཉིས་པ་ནི། སྒྱུ་མ་རྟོག་ཚོགས་དང་། འཕྲུལ་པ་ལྷ་གཉིས་དབྱེར་མེད་དུ་འབྲེལ་བ་ལའང་བཤད་དུ་རུང་མོད། འདིར་ནི་ཡུམ་གྱི་མཁའ་དང་དྲྭ་བ་ཆོས་མཐུན་པའི་ཕྱིར་ཡུམ་ལ་དྲྭ་བར་བཤད་དེ། རྡོ་རྗེ་གཡུང་དྲུང་འཁྱིལ་བའི་མདོ་ལས། དྲྭ་བ་ཅིར་ཡང་འགྱུར་བ་སྟེ། །མདོ་མདུད་འབྲེལ་ཅིང་ཟང་ཐལ་བ། །གང་ནས་བལྟས་ཀྱང་གསལ་བར་སྣང་། །ཅིར་ཡང་སྡུད་ཅིང་ཤོང་བ་བཞིན། །དེ་བཞིན་ཡུམ་གྱི་མཁའ་དབྱིངས་ཀྱང་། །མདོ་མདུད་འབྲེལ་ཅིང་ཟང་ཐལ་བས། །གང་ནས་ཞུགས་ཀྱང་གསལ་བར་སྣང་། །ཐམས་ཅད་སྡུད་ཅིང་ཤོང་བའི་ཕྱིར། །ཡུམ་ལ་དྲྭ་བ་ཞེས་སུ་བརྗོད། །ཅེས་སོ། །གཉིས་པ་ནང་སྒྱུ་འཕྲུལ་དྲྭ་བ་ནི། སྒྱུ་མ་ནི་རྟེན་འཁོར་ལོ་བཞིའི་རྩ། འཕྲུལ་པ་ནི་བརྟེན་པ་ཐིག་ལེ། དེ་གཉིས་སྒོམ་པའི་ཐབས་ཀྱིས་འབྲེལ་པ་ནི་དྲྭ་བ་སྟེ། རྒྱ་མཚོ་ལས། གནས་བཞི་གར་ཐབས་སྒྱུ་མ་ལས། །ནམ་མཁའི་ཡེ་ཤེས་ཅིར་ཡང་གསལ། །ཅིར་སྣང་བདག་ཉིད་རིག་པར་འབྲེལ། །དྲྭ་བའི་དོན་དུ་ང་ཡིས་བཤད། །ཅེས་སོ། །གསུམ་པ་གསང་བ་སྒྱུ་འཕྲུལ་དྲྭ་བ་ནི། སྒྱུ་མ་ནི་ཡབ་ཀྱི་རྡོ་རྗེ། འཕྲུལ་པ་ནི་ཡུམ་གྱི་མཁའ་པདྨ། དེ་གཉིས་བདེ་བས་འབྲེལ་པ་ནི་དྲྭ་བ་སྟེ། དེ་ལས། ཐབས་དང་ཤེས་རབ་སྒྱུ་མ་ལས། །རང་བཞིན་སྒྱུ་འཕྲུལ་ཆེན་པོར་ཤར། །ཐབས་དང་ཐབས་སུ་འབྲེལ་བ་ཉིད། །ཐམས་ཅད་ཀུན་གྱི་གཞིར་གནས་པའོ། །ཞེས་སོ། །བཞི་པ་དེ་ཁོ་ན་ཉིད་སྒྱུ་འཕྲུལ་དྲྭ་བ་ནི། སྣང་ཡང་མ་གྲུབ་པའི་ཕྱིར་སྒྱུ་མ་ནི་དོན་དམ། དེ་ལས་འཁོར་འདས་སྣ་ཚོགས་སུ་ཤར་བ་ནི་མེད་བཞིན་དུ་སྣང་བའི་ཕྱིར་འཕྲུལ་པ་སྟེ་ཀུན་རྫོབ། དེ་གཉིས་དབྱེར་མེད་པས་ན་དྲྭ་བའམ། ཡང་ན་རང་རིག་པ་བྱང་ཆུབ་ཀྱི་སེམས་ལྷག་པ་བདེན་པ་དབྱེར་མེད་དེས་འཁོར་འདས་ཀུན་ལ་ཁྱབ་ཅིང་འབྲེལ་པས་ན་དྲྭ་བ་སྟེ། བླ་མ་ལས། སྟོང་ཞིང་དབེན་པའི་སེམས་ཉིད་འདིས། །རིགས་དང་ཁ་དོག་དབྱིབས་མེད་དེ། །ཅིར་ཡང་མེད་ལས་ཅིར་ཡང་སྣང་། །མ་སྐྱེས་སྒྱུ་འཕྲུལ་སྣ་ཚོགས་འབྱུང་། །རྒྱལ་བའི་དཀྱིལ་འཁོར་སྣ་ཚོགས་ཀྱང་། །སེམས་ཀྱི་སྒྱུ་འཕྲུལ་ཆེན་པོ་ཡིན། །ཞེས་སོ། །དེ་ལྟར་ན་གཞི་འབྲས་ལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བར་གྲགས་པ་ལྟར་ན། ཤེས་ཐོབ་ཀྱི་བྱ་བྱེད་དང་འབྲེལ་བའི་ལམ་དང་། དེ་སྟོན་པའི་གཞུང་ཚོགས་ཡི་གེའི་རྒྱུད་ལའང་དེ་སྐད་དུ་བཏགས་ཏེ། རྒྱ་མདུད་འགྲེལ་ལས། སྒྱུ་འཕྲུལ་དྲྭ་བ་རྡོ་རྗེ་སེམས། །ཞེས་དང་། རྒྱུད་འདི་ཉིད་ཀྱི་མཇུག་ཏུ། འཕགས་པ་རྟོག་པའི་རྒྱལ་པོ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་གསུངས་སོ། །འོ་ན་འཕགས་པ་རྟོག་པའི་རྒྱལ་པོ་ཞེས་པའི་དོན་གང་ཞེ་ན། དེ་ཡང་ཞར་བྱུང་དུ་འཆད་དེ། འཕགས་པ་ནི་ཐེག་པ་གཞན་ལས་རྒྱུད་འདི་ཆེ་བ་བརྒྱད་ཀྱིས་ཁྱད་པར་དུ་བྱས་པ་དང་། རྟོག་པ་ནི། ཐུན་མོང་དང་མཆོག་གི་དངོས་གྲུབ་སྒྲུབ་པའི་ཐབས་ཀྱི་རྒྱུད་ཐམས་ཅད་ལ་དེ་སྐད་དུ་གྲགས་ཤིང་། འདི་ནི་དེ་དག་གི་ནང་ནས་ཀྱང་མཆོག་ཏུ་གྱུར་པའི་ཕྱིར་རྒྱལ་པོའོ། །འགྲེལ་པ་སྤར་ཁབ་ལས་ནི། མཚོན་བྱ་ཡང་དག་པའི་དོན་བློ་ལ་ངེས་པར་བྱེད་པའི་ཕྱིར་ཡང་དག་པའི་རྟོག་པ་ལ་བཞེད་དོ། །
གཉིས་པ་ཆེ་བ་ལས་བཏགས་པ་ནི་ལུང་གི་སྤྱི་སྟེ། རྡོ་རྗེ་ལས། མ་བརྗོད་གྲགས་པའི་བསྟན་པ་ཉིད། །སྒྲོ་སྐུར་མེད་དང་ཞལ་ནས་གསུངས། །དྲི་མ་མེད་པའི་ལུང་ཉིད་དེ། །ལས་དང་ཡེ་ཤེས་སྤྱི་ཉིད་ཀྱི། །རྫོགས་པས་རྫོགས་ཕྱིར་ལུང་ཉིད་དེ། །བསྟན་པ་སྤྱི་ཡི་བདག་ཉིད་ནི། །ཐམས་ཅད་ཀུན་གྱི་བདག་ཉིད་པས། །གཅིག་དང་དུ་མར་མི་གནས་ཀྱང་། །སོ་སོ་བསྟན་པ་རྒྱ་མཚོའི་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་པས། རྒྱ་མ་ལས་ཀྱི་ལུང་མཚན་ཉིད་སྡེ་གསུམ། ཡེ་ཤེས་ལྷའི་ལུང་ཕྱི་རྒྱུད་སྡེ་གསུམ། བྱ་བྲལ་རྫོགས་པའི་ལུང་ནང་རྒྱུད་སྡེ་གསུམ་མོ། །དེ་ལྟར་ཐེག་པ་ཀུན་གྱི་དོན་དང་འབྲས་བུ་ཐམས་ཅད་འདིར་འདུ་ཞིང་། འདི་ལས་འཕྲོས་པའི་ཕྱིར། ལུང་གི་སྤྱི་སྟེ། འདི་ཉིད་ལས། མཚན་ཉིད་དང་། རྒྱུད་ཐམས་ཅད་ཀྱི་ལུང་གི་སྤྱི། ཞེས་སོ། །
གསུམ་པ་དོན་རང་གི་ངོ་བོ་ལས་བཏགས་པ་ནི། གླེགས་བམ་གྱི་ཀླད་དུ་བཀོད་པའི་མཚན་ཏེ། སྔ་འགྱུར་ལས། བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པ་ལས་སྐད་གཉིས་མ་སྨོས་སོ། །ཐར་ལོའི་འགྱུར་དུ། དཔལ་གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པའི་རྒྱུད་ཆེན་པོ་ཞེས་བྱ་བ། ཞེས་བསྒྱུར་ཅིང་སྐད་གཉིས་ཀ་སྨོས་ཏེ། རྒྱ་དཔེར། ཤྲཱི་གུ་ཧྱ་གརྦྷ་ཏ་ཏྭ་བི་ནིཥྩ་ཡ་མ་ཧཱ་ཏནྟྲ་ནཱ་མ། ཞེས་སྣང་བ་ལྟར་བཀོད་དོ། །དེས་ན་འདིར་སྣར་སྟོན་གྱི་བཀའ་ཚོམས་དང་། རྩགས་ཚ་དང་ཉང་གླན་གྱི་ཊཱི་ཀ་སོགས་སུ། དེ་ཁོ་ན་ཉིད་ངེས་པ་ཞེས་པའི་སྐད་དོད། ཏ་ཐཱ་ཡ་ཧི་ན། ཞེས་ཀླད་དུ་བཀོད་པ་ནི་རྒྱ་དཔེའི་མཚན་གྱི་སྐད་མ་ཡིན་པས་མ་དག་ལ་ཀློང་ཊཱིཀ་ཏུ། རྒྱ་གར་སྐད་དུ། གུ་ཧྱ་གརྦྷ་ཏ་ཏྭ་བི་ནིཥྩ་ཡ། ཞེས་སྨོས་པ་ཉིད་རྒྱ་དཔེ་དང་མཐུན་པས་དག་པར་མངོན་ནོ། །དེ་ལྟར་མཚན་བསྟན་ནས། དེའི་དོན་འཆད་པ་ལ། ཀླད་དུ་སྨོས་པའི་དགོས་པ་དང་། མཚན་གྱི་བསྡུས་དོན་དང་། ཚིག་གི་དོན་དང་། བརྒལ་ལན་ནོ། །དང་པོ་ནི། བུམ་པ་ཞེས་པའི་མིང་ལས། ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་དངོས་པོ་གོ་བ་ལྟར། མཚན་མཐོང་བའམ། ཐོས་པ་ལ་བརྟེན་ཏེ། དབང་པོ་རབ་ཀྱིས་གཞུང་གི་དོན་གོ་བ་དང་། འབྲིང་གིས་དོན་གྱི་རྣམ་གྲངས་ཁོང་དུ་ཆུད་པ་དང་། ཐ་མས་ཀྱང་སྨན་གྱི་ཁ་བྱང་ལྟར་གླེགས་བམ་བཙལ་བདེ་བའི་དགོས་པ་ཡོད་དོ། །
གཉིས་པ་ནི། གསང་བ་དང་། སྙིང་པོ་དང་། དེ་ཁོ་ན་ཉིད་དང་། ངེས་པ་བཞིས་རིམ་པ་བཞིན། རྒྱུད་ཀྱི་རང་བཞིན་དང་། ཆེ་བ་དང་། མཚན་ཉིད་དང་། ངེས་པའི་དོན་དུ་སྟོན་པ་སྟེ། འགྲེལ་ཆུང་ལས། འདི་ཡི་རང་བཞིན་ཆེ་བ་དང་། །མཚན་ཉིད་དང་ནི་དོན་བསྟན་ཕྱིར། །སྒྱུ་འཕྲུལ་དྲྭ་བའི་རྒྱུད་ཆེན་ལས། །མདོར་བསྡུས་གཏན་ལ་ཕབ་པ་ཡིན། །རང་བཞིན་གསང་བ་ཞེས་བྱ་སྟེ། །ཆེ་བ་ཞེས་པ་སྙིང་པོའི་དོན། །དེ་ཁོ་ན་ཉིད་མཚན་ཉིད་དོ། །ངེས་པས་ངེས་དོན་མདོར་བསྟན་པ། །དེ་ལྟར་རྣམ་པ་བཞི་པོ་རུ། །མདོར་བསྡུས་སྤྱི་ཡི་དོན་དུ་བཤད། །ཅེས་སོ། །དེ་ལས་གོ་ཚུལ་ཡང་རྟོགས་དཀའ་བ་དང་། བཅུད་འདུས་པ་དང་། མཚན་ཉིད་གཞན་རྣམ་པར་བཅད་པ་དང་། དྲང་དོན་མ་ཡིན་ངེས་དོན་ཐེ་ཚོམ་དང་བྲལ་བར་གོ་ཞིང་། སྟོན་ཚུལ་དང་རྗེས་སུ་མཐུན་པར་རྒྱུད་ཀྱི་རང་བཞིན་དང་ཆེ་བ་སོགས་ཀྱང་རྟོགས་པར་འགྱུར་རོ། །
གསུམ་པ་ནི། བླ་མ་བརྒྱུད་པའི་མན་ངག་ལས། ཕྱི་ལྟར་ཤེས་རབ་གྲོལ་ལམ་དང་སྦྱར་ཏེ་བཤད་པ། ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་པ། གསང་བ་ལྟར་འོག་སྒོ་དང་སྦྱར་ཏེ་བཤད་པ་གསུམ་ལས། དང་པོ་ནི། གསང་བ་ཞེས་པའི་དོན། འགྲེལ་ཆུང་ལས། རང་བཞིན་གབ་དང་སྦས་པ་དང་། །བསྟན་མིན་ཞེས་པའི་རང་བཞིན་ནི། །མཉམ་པ་ཉིད་དང་དགོངས་པའི་དོན། །མཛད་སྤྱོད་གསང་བའི་ཐེག་པ་འདི། །རྣམ་བཞི་གསང་བ་ཞེས་བྱའི་མཚན། །ཞེས་བཞིར་བཞེད། དེ་དག་ཀྱང་འདི་ཉིད་ལས། གབ་པའི་གསང་བ་མ་རྟོགས་པར། སྦས་པའི་གསང་བ་ལ་མངོན་པར་འཆེལ་ནས། ཞེས་པས་གབ་སྦས་གཉིས་སུ་འདུས་པར། ལོ་ཙཱ་བ་ཆེན་པོ་རོང་ཟོམ་དང་། ཀུན་མཁྱེན་ཆེན་པོ་བཞེད་ནའང་། འདིར་སློབ་དཔོན་སྒེག་པའི་རྗེས་སུ་འབྲངས་ཏེ་བཤད་ན་གསུམ་སྟེ་རང་བཞིན་གྱི་དང་། གབ་པའི་དང་། སྦས་པའི་གསང་བའོ། །དང་པོ་ནི། སེམས་ཉིད་བདེན་པ་དབྱེར་མེད་ལྷག་པ་ཆོས་ཀྱི་སྐུར་ཡེ་ནས་རང་ཆས་སུ་གནས་ཀྱང་བློའི་སྤྱོད་ཡུལ་དང་བྲལ་བས་མ་རྟོགས་པ་ནི་རང་བཞིན་གྱི་གསང་བ་སྟེ། ནམ་མཁའ་ཉིད་མིག་གིས་མཐོང་བྱར་མ་གྱུར་པ་བཞིན་ནོ། །དེ་ཡང་འདི་ཉིད་ལས། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པས། ལྷན་སྐྱེས་ཀྱི་མ་རིག་པས་དོན་དམ་མ་རྟོགས་པ་ནི་ཡེ་ནས་གསང་བ། དེ་བཞིན་ཀུན་བརྟགས་ཀྱིས་ཀུན་རྫོབ་མ་རྟོགས་པ་ནི་རང་བཞིན་གསང་བ། སྣང་སྟོང་སོ་སོར་བཟུང་བས་དབྱེར་མེད་མ་རྟོགས་པ་ནི་ངོ་བོ་ཉིད་ཀྱིས་གསང་བ། ཡུལ་ཡུལ་ཅན་དུ་བཟུང་བས་སྤྱོད་ཡུལ་དང་བྲལ་བར་མ་རྟོགས་པ་ནི་ཤིན་ཏུ་གསང་བ་སྟེ། གསང་ཚུལ་བཞིས་ཆོད་པའི་ཚུལ་དུ་གསང་ངོ་། །གཉིས་པ་ནི། གདུལ་བྱ་འཁྲུལ་པའི་བློ་ཅན་གྱིས་རྟོགས་དཀའ་བ་དང་། རས་ཆོད་ཅན་གྱིས་རྟོགས་སུ་མི་རུང་བས་ན་གབ་པ་སྟེ། མིག་སེར་ཅན་ལ་དུང་གི་ཁ་དོག་བཞིན་ནོ། །དེ་ཡང་རང་བཞིན་གྱི་རྒྱུད་དུ་གབ་པ་ནི། མཚོན་བྱའི་རྒྱུད་རང་ལ་རང་ཆས་སུ་གནས་ཀྱང་རྟོག་པས་བསྒྲིབས་པའི་ཕྱིར་གབ་སྟེ། དེ་གང་གིས་འབྱིན་ན་ལུང་ཚད་མའི་བདག་པོ་སངས་རྒྱས་ཀྱིས་སོ། །དཀྱུས་ཡི་གེ་ལ་གབ་པ་ནི། རས་ཆོད་ཅན་མགོ་རྨོངས་པར་བྱ་བའི་ཕྱིར། རྒྱུད་དཀྲུགས། ལུང་གཅུས། མན་ངག་གབ་པའི་ཚུལ་དུ་སྟེ། དེ་ནི་མན་ངག་ཚད་མའི་བདག་པོ་རྡོ་རྗེ་སློབ་དཔོན་གྱིས་འབྱིན་པར་མཛད་དེ། དེ་ཉིད་ལས། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེ་ཐུགས་ལ་གནས། །ཞེས་སོ། །གསུམ་པ་ནི། སྔགས་ཀྱི་མན་ངག་མེད་པ་དང་། སྒྲ་ཇི་བཞིན་པར་སྤྱོད་པ་རྣམས་ལ་སྦས་ཏེ། དེ་དག་གི་ཡུལ་མ་ཡིན་པའི་ཕྱིར། གཅན་གཟན་ཆེན་པོའི་སྒྱུ་རྩལ་སྤྲེའུས་མི་བཟོད་པའམ། སེང་ཞོ་སྣོད་ངན་དུ་བླུག་པར་བྱ་བ་མ་ཡིན་པ་བཞིན་ནོ། །གང་སྦ་ན། གསང་སྔགས་ཀྱི་མཛད་སྤྱོད་སྦྱོར་སྒྲོལ་ལ་སོགས་པ་ལྟ་སྤྱོད་འབྲེལ་བས་སྤྱད་པར་གསུངས་པ་དེ་དག་བརྡའི་ཚུལ་གྱིས་སྦས་ཏེ། གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡ་དག་སྣ་ཚོགས་གསུངས། །ཞེས་སོ། །དེ་ཡང་ལྟ་སྤྱོད་མགོ་མ་འབྲེལ་བ་ནི། རྒྱས་པ་ལས། ཁ་ཅིག་ལྟ་བ་མཉམ་གནས་ཀྱང་། །སྤྱོད་པ་དག་དང་ཡོངས་མི་མཐུན། །ཁ་ཅིག་སྤྱོད་པ་རྫོགས་བྱེད་ཀྱང་། །མཉམ་པའི་དོན་ལ་ཡོངས་མི་གནས། །ཁ་ཅིག་ལྟ་སྤྱོད་གཉིས་ཀ་མེད། །ཅེས་དང་། མ་རྟོགས་པར་ཚིག་ཙམ་ལ་བརྟེན་ནས་སྤྱད་ན་ལྟུང་བ་ཡང་། དེ་ལས། མ་རྟོགས་པ་ཡིས་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །ཞེས་སོ། །སྙིང་པོ་ལའང་། རྒྱུའི་དང་། འབྲས་བུའི་དང་། བཅུད་འདུས་པ་དོན་གྱི་སྙིང་པོའོ། །དང་པོ་ནི། ཐེག་པ་ཐམས་ཅད་ཀྱི་འཕྲོ་གཞིའམ་འབྱུང་བའི་རྒྱུར་གྱུར་པ་ན་རྒྱུད་འདི་ཡིན་ཏེ། འདི་ཉིད་ལས། འདུལ་བ་མདོ་སྡེ་ཆོས་མངོན་དང་། །ཞེས་སོགས་རྐང་པ་ལྔ་གསུངས་པའི་ཕྱིར་རོ། །གཉིས་པ་ནི། ཐེག་པའི་སྒོ་གང་ནས་བསྒྲུབས་ཀྱང་། མཐར་རང་བཞིན་གསང་བའི་སྙིང་པོ་འདིའི་དོན་མངོན་དུ་བྱེད་དགོས་པ་སྟེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སོ། །གསུམ་པ་ནི། གཏན་ཚིགས་ཀྱི་སྒོ་གང་ནས་གཏན་ལ་ཕབ་ཀྱང་། མཐར་ཐུག་སངས་རྒྱས་ཀྱི་དགོངས་པའི་:དོན་༼‹བ›ངོ་ན་༽རྟོག་ཚོགས་ཐམས་ཅད་སྐུ་དང་ཡེ་ཤེས་བཞི་བཅུ་རྩ་གཉིས་སུ་སངས་རྒྱས་པས་འཁོར་བ་མ་གྲུབ་སྟེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པས་འཁྲུལ་པ་ཡིན། །ཞེས་སོ། །དེ་ཁོ་ན་ཉིད་ལ། མ་བཅོས་པའི། མ་ནོར་བའི། གཞན་མ་ཡིན་པའི་དེ་ཁོ་ན་ཉིད་དོ། །དང་པོ་ནི། རྟོག་ཚོགས་ཐམས་ཅད་རང་རིག་ལས་མི་གཞན་པའི་ཕྱིར། སྣང་སྟོང་གཉིས་མེད་རང་བྱུང་གི་ཡེ་ཤེས་ལ། སྒོམ་བྱེད་ཀྱི་བློས་མ་བཅོས་པར་བཞག་པ་སྟེ། རྒྱས་པ་ལས། མ་བཅོས་ལྷུན་མཉམ་ཇི་བཞིན་ངང་བཞག་དང་། །ཞེས་སོ། །དེ་ལས་འབྲས་བུ་འབྱུང་བས་རྒྱུའི་དེ་ཁོ་ན་ཉིད་ཅེས་ཀྱང་བསྙད་དོ། །གཉིས་པ་ནི། དེ་ཉིད་གོམས་པ་ལས་འབྲས་བུ་སྐུ་དང་ཡེ་ཤེས་ཀྱི་ཕྱག་རྒྱ་མང་པོར་རང་སྣང་བ་སྟེ། མ་བཅོས་པར་བཞག་པ་ལས་བྱུང་བའི་ཕྱིར་དེ་ལ་འབྲས་བུའི་དེ་ཁོ་ན་ཉིད་དུའང་ཐ་སྙད་འདོགས་སོ། །དེ་ལྟར་ཡང་། སྔ་མ་ལས། རྒྱུ་འབྲས་ལྷུན་གྱིས་གྲུབ་པའི་ངང་དུ་གནས། །ཞེས་སོ། །གསུམ་པ་ནི། འབྲས་བུ་དེའང་སྒྲིབ་བྱེད་ཀྱི་ཞེན་པ་དག་པའི་ཚེ་རང་ལ་ཡོད་པའི་དོན་སྣང་བ་ལས་གཞན་ནས་བྱུང་བ་མ་ཡིན་པའི་ཕྱིར། དེ་ལ་རྒྱུ་འབྲས་ཀྱི་དབྱེ་བ་ཙམ་ཡང་མ་གྲུབ་པས་རྒྱུ་འབྲས་གཉིས་སུ་མེད་པའི་དེ་ཁོ་ན་ཉིད་ཀྱང་ཟེར་རོ། །དེའང་། འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཞེས་དང་། རྒྱས་པ་ལས། ཇི་སྙེད་བརྗོད་པའི་ཁ་བརྒྱུད་ཀྱང་། །ཡང་དག་དོན་གྱི་སྙིང་པོ་ནི། །གཞན་ནས་བཙལ་ཀྱང་མི་རྙེད་དོ། །རང་རིག་སྒྲིབ་མེད་དག་པ་ཡིན། །ཞེས་སོ། །ངེས་པ་ལ། གཞི་དང་། ལམ་དང་། འབྲས་བུར་ངེས་པའོ། །དང་པོ་ནི། གཞིའི་རྒྱུད་རང་བཞིན་གསང་བའི་སྙིང་པོ་དེ། ཆོས་ཉིད་སྒྲོ་སྐུར་དང་བྲལ་བར་བདེན་པས་ན་ངེས་པ་སྟེ། འདི་ཉིད་ལས། སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་སོ། །གཉིས་པ་ནི། ཐེག་པ་འདིའི་ལུགས་ཀྱིས་ཡེ་ནས་གནས་པའི་འབྲས་བུ་ཉིད། ཤེས་ཐོབ་ཀྱི་བྱེད་པས་འབྲས་བུ་ལམ་དུ་བྱེད་པའི་ཕྱིར་ངེས་པ་སྟེ། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་སོ། །གསུམ་པ་ནི། རྒྱུད་འདི་རང་གི་ངོ་བོས་བརྗོད་བྱ་རྒྱལ་བའི་དགོངས་པ་ངེས་དོན་མངོན་དུ་ཕྱུང་ནས་སྟོན་པའི་ཕྱིར་ངེས་པ་སྟེ། རྒྱལ་བའི་དཀྱིལ་འཁོར་མ་ལུས་ལས། །འདི་ལས་གསང་བའི་ངེས་དོན་མེད། །ཅེས་སོ། །
གཉིས་པ་མཚན་ནང་ལྟར་བཤད་པ་ལ། སྙིང་གའི་འཁོར་ལོ་དང་སྦྱར་ཏེ་བཤད་པ་དང་། མཚན་བཞི་དང་འཁོར་ལོ་བཞི་སྦྱར་ཏེ་བཤད་པའོ། །དང་པོ་ནི། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་ན་དྭངས་མ་ཆེན་པོ་ལྔ་དང་། དེའི་དཀྱིལ་ན་ཡེ་ཤེས་སྙིང་པོའི་ཐིག་ལེ་ཡེ་ནས་གནས་ཀྱང་རང་གསང་ཐབས་ཀྱིས་ཆོད་ནས་མ་མཐོང་བ་ནི་གསང་བའོ། །ཐིག་ལེ་དེ་ཉིད་ལ་ཤེས་བྱ་དང་བསྒྲུབ་བྱའི་དོན་གྱི་བཅུད་འདུས་པས་ན་སྙིང་པོའོ། །ཐབས་ཀྱི་མན་ངག་དང་ལྡན་པའི་སྒོ་ནས་ཉམས་སུ་བླངས་པས། རང་གི་སེམས་ཉིད་བདེ་ཆེན་ལྷན་ཅིག་སྐྱེས་པའི་ཡེ་ཤེས་སུ་རང་གསལ་བ་ནི་དེ་ཁོ་ན་ཉིད་དོ། །སྙིང་པོའི་ཐིག་ལེ་དེ་གཞི་ལམ་འབྲས་གསུམ་གྱི་དངོས་གཞིར་ངེས་པའི་ཕྱིར་ངེས་པའོ། །གཉིས་པ་ནི། ལྟེ་བའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཨའི་རྣམ་པར་གནས་པ་ནི་གསང་བ་སྟེ། ཡུམ་གྱི་མཁའ་གསང་གི་སྣ་རྩེའི་ཐིག་ལེ་དང་འབྲེལ་ཏེ་གནས་པའི་ཕྱིར་རོ། །སྙིང་གི་འཁོར་ལོའི་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་བཞུགས་པ་ནི་སྙིང་པོ་སྟེ། ཆོས་ཐམས་ཅད་ཀྱི་བཅུད་འདུས་པའི་སྙིང་པོ་ཡིན་པའི་ཕྱིར་རོ། །མགྲིན་པའི་འཁོར་ལོ་རྩ་འདབ་བཅུ་དྲུག་གི་དབུས་ན་མཁའ་འགྲོ་མ་རྔམ་མའི་ཐིག་ལེ་ཨཾ་གི་དབྱིབས་སུ་གནས་པ་ནི་དེ་ཁོ་ན་ཉིད་དེ། ཐིག་ལེ་འོད་དུ་འབར་ཙམ་ན་བདེ་བ་སྐྱེ་བས་དེ་ཁོ་ན་ཉིད་ལས་མི་གཡོ་བའི་ཕྱིར་རོ། །སྤྱི་བོའི་འཁོར་ལོ་རྩ་འདབ་སོ་གཉིས་ཀྱི་དབུས་ན་ཀུན་ཏུ་བཟང་པོའི་ཐིག་ལེ་ཧཾ་གི་རྣམ་པར་གནས་པ་ནི་ངེས་པ་སྟེ། དེ་ལས་སྐྱེས་པའི་བདེ་ཆེན་མི་རྟོག་པའི་ཡེ་ཤེས་དེ་ནི་རྒྱལ་བ་ཀུན་གྱི་དགོངས་པའི་དངོས་གཞིར་ངེས་པའི་ཕྱིར་རོ། །
གསུམ་པ་མཚན་གསང་བ་ལྟར་བཤད་པ་ནི་ལུས་ཅན་རྣམས་ཀྱི་རྩ་སྟོང་ཕྲག་བདུན་ཅུ་རྩ་གཉིས་ལ་སོགས་པའི་ནང་ན་ཐིག་ལེ་བདེ་བའི་ཡེ་ཤེས་ཀྱི་རོ་དང་བཅས་པ་རང་ཆས་སུ་ཡོད་ཀྱང་ངོ་མ་ཤེས་པ་ནི་གསང་བའོ། །ཐིག་ལེ་དེ་ལ་རྒྱུ་འབྲས་ཐམས་ཅད་ཀྱི་བཅུད་འདུས་པའི་ཕྱིར་སྙིང་པོའོ། །བྱེད་པ་སྡོམ་པ་རླུང་དང་བཅས་པའི་ཐབས་ཀྱིས་ཉམས་སུ་བླངས་པས་བདེ་ཆེན་ལྷན་ཅིག་སྐྱེས་པའི་ཡེ་ཤེས་དངོས་སུ་རྒྱུད་ལ་སྐྱེས་པ་ནི་དེ་ཁོ་ན་ཉིད་དོ། །ཐིག་ལེ་དེ་ཉིད་གཞི་ལམ་འབྲས་གསུམ་ཀའི་དངོས་གཞིར་ངེས་པའི་ཕྱིར་ངེས་པའོ། །འདིར་ནང་བཤད་དང་། གསང་བཤད་གཉིས་ལའང་། ཕྱི་བཤད་ལྟར་མཚན་གྱི་དོན་བཞི་པོ་རེ་རེར་ཆོས་གསུམ་གསུམ་དུ་ཕྱེ་སྟེ་འཆད་པའི་བཀའ་སྲོལ་ཡོད་ཀྱང་ཡི་གེས་འཇིགས་ཏེ་མ་སྤྲོས་པས་སྤྲོ་ན་ཊཱི་ཀ་ལས་ཤེས་པར་བྱའོ། །དེ་ལྟར་མཚན་གྱི་བཤད་ཚུལ་གསུམ་པོ་དེ་ནི་བླ་མ་བརྒྱུད་པའི་མན་ངག་ཡིན་ལ། རྣམ་པ་གཅིག་ཏུ། རང་གི་ཤེས་རབ་ཀྱི་འཕྲུལ་གྱིས་འདི་ལྟར་ཡང་བཤད་དུ་རུང་སྟེ། ཆོས་ཐམས་ཅད་ཀྱི་འབྱུང་གནས་སུ་གྱུར་པའི་གནས་ལུགས་དེ་བཞིན་ཉིད་ནམ་མཁའི་དབྱིངས་ལྟར་ཁྱབ་ཅིང་རྟག་པའི་བདག་ཉིད་ཅན་དུ་བཞུགས་པའི་དཔལ་ཀུན་ཏུ་བཟང་པོ་སྟེ། དེ་ཉིད་ཤིན་ཏུ་རྟོགས་དཀའ་བས་ན་གསང་བའོ། །དེ་རྟོགས་པར་བྱེད་པའི་ཐབས་ཀྱི་ལམ་དང་། དེའི་རྗོད་བྱེད་ཟབ་ཅིང་རྒྱ་ཆེ་བ་རྣམས་ནི་བསྟན་པ་ཐམས་ཅད་ཀྱི་འཕྲོ་གཞིའམ་བཅུད་འདུས་པ་དང་དམ་པའི་མཆོག་ཏུ་གྱུར་པའི་ཕྱིར་སྙིང་པོའོ། །གཞི་མི་འགྱུར་བ་དང་ལམ་གྱིས་དེ་རྟོགས་པ་ལ་མི་བསླུ་བས་དོན་ལ་ཕྱིན་ཅི་མ་ལོག་པའི་ཕྱིར་དེ་ཁོ་ན་ཉིད་དོ། །དེ་ཡང་སྟོན་པས་གདུལ་བྱ་རྣམས་ཁ་དྲང་བའི་ཆེད་དུ་གསུངས་པ་ལྟ་བུ་མ་ཡིན་གྱི། འདིར་རང་གི་དགོངས་པ་མཐར་ཐུག་ཏུ་ངེས་པ་གང་ཡིན་པ་དེ་བསྟན་པའི་ཕྱིར་རྣམ་པར་ངེས་པ་ཞེས་བྱ་སྟེ། འདི་ཉིད་ལས། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཅེས་སོ། །ཡང་ན། གསང་བ་ནི་སྙིང་ག་ཆོས་ཀྱི་འཁོར་ལོ་དང་། སྙིང་པོ་ནི་དེའི་དཀྱིལ་གྱི་སྲོག་མི་ཤིགས་པའི་ཐིག་ལེའམ། །གཞན་དུ་ན། གསང་བ་ནི་ཡུམ་གྱི་གསང་བའི་པདྨ། སྙིང་པོ་ནི་དེའི་དབུས་ན་བྱང་ཆུབ་ཀྱི་སེམས་ཟླ་བ་ལྟར་དག་ཅིང་གསལ་བའི་ཚུལ་དུ་གནས་པ་སྟེ། གཉིས་ཀའི་ནང་ཚན་གྱི་ཆོས་གཉིས་པོ་ཕྱིན་ཅི་མ་ལོག་པར་འདིར་ངེས་པར་བསྟན་པའི་ཕྱིར་དེ་ཁོ་ན་ཉིད་ངེས་པའོ། །དེ་དག་ཀྱང་། རྒྱུད་ཕྱི་མ་ལས། གསང་བའི་སྙིང་པོ་ཞེས་གསུངས་གང་། །དེ་ཉིད་རྣམ་ངེས་ཇི་ལྟ་བུ། །ཞེས་དེ་བཞིན་གཤེགས་པ་རྣམས་ཀྱིས་དྲིས་པའི་ལན་དུ་སྟོན་པས། གསང་བ་ཆོས་འབྱུང་ལ་བཤད་དེ། །སྙིང་པོའང་དེ་ཡི་ཐབས་ཅན་ནོ། །གཉིས་པོ་ཕྱིན་ཅི་མ་ལོག་ཕྱིར། །དེ་ཉིད་དོན་འདིར་རྣམ་ངེས་སོ། །ཞེས་གསུངས་ཤིང་། གཞན་ཡང་། འཁོར་འདས་དབྱེར་མེད་པ་ནི་གཞི་གསང་བའི་སྙིང་པོ། དེ་འཆིང་གྲོལ་མེད་པར་རྟོགས་པའི་ཐབས་བསྐྱེད་རྫོགས་ཟུང་དུ་འཇུག་པ་ནི་ལམ་དེ་ཁོ་ན་ཉིད། དེས་རྟོགས་པ་མཐར་ཐུག་མངོན་དུ་གྱུར་པ་ནི་འབྲས་བུ་འཆིང་གྲོལ་མེད་པར་ངེས་པའོ། །ཞེས་ཀྱང་བཤད་དུ་རུང་སྟེ། རྡོ་རྗེའི་ཚིག་ཡིན་པའི་ཕྱིར་སྤྲོས་པས་ཆོག་གོ །
བཞི་པ་བརྒལ་ལན་ལ། མཚན་རྒྱུད་དོན་ཡིན་མིན་གྱི། མཚན་དུ་རྒྱུད་དོན་འདུས་མ་འདུས་ཀྱི། མན་ངག་ཁོ་ནའི་མཚན་ནས་སྨོས་པའི། རྒྱ་སྐད་མི་སྨོས་པར་བོད་སྐད་སྨོས་པའི་བརྒལ་ལན་ནོ། །དང་པོ་ལ་བརྒལ་བ་དང་ལན་གཉིས། དང་པོ་ནི། ཁོ་ན་རེ། མཚན་རྒྱུད་དོན་ཡིན་ནམ་མིན། ཡིན་ན་གླེང་གཞི་གླེང་བསླང་དགོས་མེད་དུ་ཐལ། དམ་བཅའ་དེ་འཐད་པ་གང་ཞིག །གླེང་གཞི་གླེང་བསླང་གི་གོང་དུ་རྒྱུད་དོན་བྱུང་བའི་ཕྱིར། མཚན་རྒྱུད་དོན་མིན་ན། རྒྱུད་འདིའི་ཆེད་དུ་བྱ་བའི་གདུལ་བྱ་དབང་པོ་ཡང་རབ་དེས་མཚན་མཐོང་བའམ་ཐོས་པས་རྒྱུད་དོན་མི་རྟོགས་པར་ཐལ། རྟགས་ཁས། ཁྱབ་པ་ཚད་མས་གྲུབ། འདོད་ན། རབ་ལ་མཚན་བསྟན། ཅེས་སོགས་མི་འཐད་པར་འགྱུར་རོ། །ཟེར་ན། གཉིས་པ་ནི། རྗེ་ཉེའུ་སྟོན་གྱིས། སྔོན་བྱུང་འོག་མིན་དུ་གླེང་གཞི་ཚོགས། གླེང་བསླངས་ནས་རྒྱུད་དོན་གསུངས་པས། གླེང་གཞི་གླེང་བསླང་མི་དགོས་པའི་སྐྱོན་མེད་ལ། མི་ཡུལ་དུ་གསང་བདག་གིས་ཚིག་དང་ཡི་གེར་འགོད་པའི་ཚེ། བློ་རབ་འབྲིང་ཐ་གསུམ་ལ་དགོངས་ནས་མཚན་ཀླད་དུ་སྨོས་པས། མཚན་རྒྱུད་དོན་ཡིན་ཡང་། གླེང་གཞི་གླེང་བསླང་དགོས་མེད་དུ་མི་འགྱུར་གསུང་། དེ་ལ་རྗེ་འཁོན་སྟོན་ན་རེ། འོ་ན་སྟོན་པས་འོག་མིན་དུ་རྒྱུད་འདི་རྗོད་བྱེད་ཀྱི་ཚིག་ཏུ་མ་གསུངས་པར་ཐལ། དམ་བཅའ་དེ་འཐད་པའི་ཕྱིར། འདོད་ན། འདི་སྐད་བཤད་པའི་དུས་ན། ཞེས་གསུང་བ་མི་འཐད་པར་ཐལ། འདོད་པའི་ཕྱིར་གསུངས་ནའང་། སྐྱོན་དེ་མི་འཇུག་སྟེ། དགོངས་པ་བརྡའི་བཤད་པ་ཉིད་གསང་བདག་གིས་ཚིག་ཏུ་སྡུད་པའི་ཚེ། རང་ཉིད་སྟོན་པ་དང་དགོངས་པ་མཉམ་པར་ཁས་བླངས་ནས། འདི་སྐད་ཅེས་སོགས་བསྡུས་པར་བཞེད་པའི་ཕྱིར་ཏེ། འགྲེལ་པ་ཉི་སེང་མར། ད་ནི་སྡུད་པ་པོས་བཅོམ་ལྡན་འདས་ཀྱི་ལུང་དང་མཐུན་པ་ལྟར་རྒྱུད་ཀྱི་གླེང་གཞི་མཛད་པ་བླ་མའི་མན་ངག་གིས་བཤད་པར་བྱ་སྟེ། འདི་སྐད། ཅེས་སོགས་གསུངས་པའི་ཕྱིར་རོ། །གཉིས་པ་ལའང་བརྒལ་བ་དང་། ལན་གཉིས། དང་པོ་ནི། མཚན་དུ་རྒྱུད་དོན་འདུས་སམ་མ་འདུས། འདུས་ན་མཚན་དང་རྒྱུད་ཀྱི་དངོས་པོ་བཅུ་པོ་བྲང་སྤྲད་ལ་སྦྱོར་རིགས་པར་ཐལ། མ་འདུས་ན། དབང་རབ་ཀྱིས་མཚན་ལ་བརྟེན་ནས་རྒྱུད་དོན་མི་རྟོགས་པར་ཐལ་ལོ། །ཟེར་ན། གཉིས་པ་ནི། རྒྱུད་ཀྱི་དངོས་པོ་བཅུ་དང་མཚན་དོན་སོ་སོར་སྦྱོར་དུ་མེད་ཀྱང་། མཚན་དོན་གཞི་ལམ་འབྲས་གསུམ་དུ་གནས་པས། དེར་རྒྱུད་དོན་མ་འདུས་པའི་སྐྱོན་མེད་དོ་གསུང་། ཡང་། མཚན་མཐོང་བས་རྒྱུད་དབུ་ཞབས་ཀྱི་དོན་རྟོགས་པར་གསུངས་པ་དེ། དོན་མཐོང་བ་ལ་བརྟེན་ནས་མཚན་དུ་བཏགས་པའི་ཕྱིར་སྔོན་བྱུང་གི་འཁོར་གྱི་རྟོགས་ཚུལ་ལོ་ཞེས་ཉང་ཊཱིཀ་པ་བཞེད་པ་ཉིད་ལེགས་སམ་སྙམ་སྟེ། དེ་ཡང་གསང་བདག་གིས་རང་གིས་རྒྱུད་དོན་ཐུགས་སུ་ཆུད་ནས་འཁོར་ལ་འཆད་པའི་ཚེ་དོན་ལ་བརྟེན་ནས་མཚན་དུ་བཏགས་པའི་ཕྱིར། དེས་ན་སྔོན་བྱུང་གི་ངོར་མཚན་དུ་ཚིག་དོན་མ་ལུས་པ་འདུས་པ་དང་། སྐད་ཅིག་ཙམ་ལ་རྟོགས་པ་མི་འགལ་ཏེ། རྒྱ་མཚོ་ལས། སྒྲིབ་པ་མཐའ་སྤང་གདུལ་བྱ་ལ། །སྐད་ཅིག་ཙམ་གྱིས་སྣང་བར་མཛད། །ཅེས་སོ། །རྗེས་འཇུག་ཏུ་མཚན་ལ་བརྟེན་ནས་དོན་གོ་བ་ནི། དེར་གཞི་ལམ་འབྲས་གསུམ་གྱི་བརྡ་འཕྲད་པ་ཙམ་དུ་གོ་བ་ཡིན་ཏེ། མིང་གིས་དོན་མཚོན་པར་ནུས་པ་ཙམ་གྱི་མིང་ཡིན་པའི་ཕྱིར་རོ། །དཔེར་ན་བུམ་པ་ཞེས་བརྗོད་པས། ལྟོ་ལྡིར་ཞབས་ཞུམ་ཆུ་སྐྱོར་ནུས་པའི་དངོས་པོ་ཙམ་གོ་ཡང་། གསེར་བུམ་སོགས་ཁྱད་ཆོས་རྣམས་གོ་བས་མ་ཁྱབ་པ་བཞིན་སྙམ་མོ། །གསུམ་པ་ནི། རྒྱུད་འདི་ལ། རྒྱུད་ཀྱི་མཚན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། ལུང་གི་མཚན་ལུང་གི་སྤྱི། མན་ངག་གི་མཚན་གསང་བ་སྙིང་པོ་ཞེས་གྲགས་པ་ལས། གླེགས་བམ་གྱི་ཀླད་དུ་མན་ངག་གི་མཚན་ཁོ་ན་སྨོས་པ་ཅིའི་ཕྱིར་ཞེ་ན། ལན་ནི། མཧཱ་ཡོ་ག་ལའང་ནང་གསེས་ཀྱི་རྒྱུད་ལུང་མན་ངག་གསུམ་དུ་ཕྱེ་བ་ལས། འདི་ནི་མ་ཧཱའི་ཨ་ཏི་ཡིན་པའི་ཕྱིར་མན་ངག་གི་མཚན་ནས་སྨོས་སོ། །བཞི་པ་ལའང་། བརྒལ་བ་དང་། ལན་གཉིས། དང་པོ་ནི། རྨོངས་པ་ཁ་ཅིག་ན་རེ། རྒྱུད་འདི་རྒྱ་གར་ནས་བསྒྱུར་བ་མ་ཡིན་ཏེ། ཀླད་དུ་རྒྱ་སྐད་མ་སྨོས་པའི་ཕྱིར། ཟེར། གཉིས་པ་ལ། དགག་གཞག་གཉིས། དང་པོ་ནི། གོང་མ་འགའ་ཞིག །རྒྱ་སྐད་གཏན་མེད་ན་བོད་སྐད་དུ་སྒྱུར་བ་མི་རིགས་པས། བོད་སྐད་དུ་ཞེས་པས་རྒྱ་སྐད་ཡོད་པར་ཤུགས་ཀྱིས་བརྡའ་འཇལ་བར་བྱའོ། །ཞེས་གསུང་པ་ནི་མ་ཡིན་ཏེ། བོད་ཀྱི་སྐད་ལ་རྒྱ་ནག་ལ་སོགས་པའི་སྐད་ཀྱང་སྦྱར་དུ་རུང་བའི་ཕྱིར་རྒྱ་གར་མར་མི་འགྲུབ་ཅིང་། བོད་དུ་བརྩམས་པའི་བསྟན་བཅོས་རྣམས་ལའང་རྒྱ་སྐད་ཤུགས་ལ་སྦྱར་དུ་རུང་བའི་ཕྱིར་རྒྱ་གར་མར་ཐལ་བར་འགྱུར་རོ། །གཉིས་པ་ནི། འདིར་རྒྱ་སྐད་མེད་པས་བོད་མར་འགྱུར་བའི་ཁྱབ་པ་མེད་དེ། བོད་དུ་བརྩམས་པའི་བསྟན་བཅོས་དུ་མར་ཡང་རྒྱ་སྐད་ཀླད་དུ་བཀོད་པ་ཡོད་མོད། དེས་རྒྱ་གར་མར་མི་འགྱུར་བ་བཞིན་ནོ། །གཞན་ཡང་ཀླད་དུ་རྒྱ་གར་གྱི་སྐད་གཅིག་པོ་མ་སྨོས་པས་བོད་མར་འགྱུར་ཟེར་ན་ནི། རྒྱ་ནག་ནས་བསྒྱུར་བའི་ཆོས་ཀྱང་བོད་མར་ཐལ་ཞིང་། སྐད་གཉིས་མ་སྨོས་པའི་ཕྱིར་ཟེར་ན་རྒྱ་གར་གྱི་དཔེ་རྣམས་ཀྱང་བོད་མར་ཐལ་བ་བཟློག་ཏུ་མེད་དོ། །དེ་ལྟ་ནའང་། ཅིའི་ཕྱིར་བོད་སྐད་ཁོ་ན་ཀླད་དུ་སྨོས་ཤེ་ན། སྔ་འགྱུར་གྱི་རྒྱ་དཔེར་རྒྱ་གར་སྐད་དུ་ཞེས་ཡོད་པར་མངོན་ཏེ། འགྲེལ་པ་ཉི་སེང་མར་བཀྲལ་བའི་ཕྱིར་རོ། །དེ་ལྟར་སྨོས་པ་ལ་དགོས་པ་ཅི་ཡོད་སྙམ་ན། གསང་སྔགས་ཀྱི་རྒྱུད་རྣམས་རྒྱ་གར་གྱི་སྐད་རིགས་བཞི་ཁོ་ནར་མ་ངེས་པ་དུས་འཁོར་འགྲེལ་ཆེན་སོགས་ལས་རྒྱ་ཆེར་བཤད་པ་ལྟར་ཡིན་པས། དེའི་ཕྱིར་འདི་ནི་རྒྱ་གར་གྱི་སྐད་རིགས་བཞི་ལས་སཾསྐྲྀ་ཏའི་སྐད་དུ་བསྟན་ཏོ་ཞེས་ངེས་པར་བཟུང་བ་སྟེ། འགྲེལ་པ་ཉི་སེང་མ་ལས། རྒྱ་གར་ཞེས་པ་སྣོད་དང་བཅུད་རྣམ་པ་གཉིས་ཏེ། རྡོ་རྗེ་གདན་དྲུང་ལ་སོགས་པའོ། །སྐད་ཅེས་པ་ནི་རིགས་བཞིའི་སྐད་ལ་སོགས་པ་ལས། འདིར་སཾ་སྐྲྀ་ཏའི་སྐད་ལ་ཤེས་པར་བྱའོ། །ཞེས་གསུངས་པ་ལྟར། ལོ་ཙཱ་བས་ཀྱང་དེ་དང་བསྟུན་དེ་བོད་སྐད་དུ་ཞེས་ཀླད་དུ་སྨོས་པར་མངོན་ནོ། །སྔ་རབས་པ་རྣམས། ཚིག་ཉུང་བར་བྱ་བའི་ཕྱིར་རྒྱ་སྐད་མ་སྨོས་ལ། དོན་མྱུར་དུ་ངོས་ཟིན་པར་བྱ་བའི་ཕྱིར་བོད་སྐད་དུ་ཞེས་བོད་སྐད་རྐྱང་པ་སྨོས་སོ་གསུངས་པ་ནི་གསུངས་པ་ཙམ་དུ་ཟད་དོ། །མདོར་ན་རྒྱུད་འདི་ནི་ཡོངས་སུ་གྲགས་པའི་རྒྱ་གར་གྱི་པཎ་ཆེན་རྣམས་ཀྱིས་ཀྱང་མང་དུ་བཀྲལ་ཞིང་། གསང་འདུས་ཀྱི་འགྲེལ་པ་བི་ཤཱ་མི་ཏྲས་མཛད་པར་ཡང་རྒྱུད་འདིའི་ལུང་མང་དུ་དྲངས་པ་དང་། དུས་ཕྱིས་ཀྱང་རྒྱ་དཔེ་རྙེད་པ་ལས་ཐར་ལོ་དང་འགོས་ལོ་སོགས་ལོ་ཙཱ་བ་ཆེན་པོ་འགས་འགྱུར་མཛད་པའི་ཕྱིར་བོད་མར་འགྱུར་བའི་སྐྱོན་མེད་དོ། །
གཉིས་པ་མཚན་དེ་ལྡན་གྱི་རྒྱུད་དོན་ལ། སྟོན་པ་ལ་དབང་མི་ཟ་བའི་ཕྱིར་ཀླད་དོན་ཕྱག་དང་། བཀའི་དོན་བདེ་བླག་ཏུ་རྟོགས་པར་བྱ་བའི་ཕྱིར་གཞུང་དོན་གཏན་ལ་དབབ་པའོ། །དང་པོ་ལ། ངག་དོན། ཚིག་དོན། རྩོད་པ་སྤང་བའོ། །དང་པོ་ནི། བྱེད་པའི་མུ་བཞི་དང་སྦྱར་ན། ཕྱག་གང་གིས་ན་སྡུད་པ་པོས། གང་ལ་ན་རྒྱུད་ཀྱི་སྟོན་པ་ལ། དུས་གང་གི་ཚེ་ན་སྡུད་པ་པོས་འོག་མིན་དུ་དང་པོར་ཤེས་པའི་རྒྱུད་ལ་བསྡུས་ཏེ། དེ་ནས་མི་ཡུལ་དུ་ཚིག་ཏུ་སྡུད་པའི་ཚེ་ནའོ། །ཚུལ་ཇི་ལྟར་བཙལ་ན། རབ་ལྟ་བ་མཇལ་བ། འབྲིང་སྒོམ་པ་གོམས་པ། ཐ་མ་མོས་གུས་ཀྱི་ཕྱག་གསུམ་ལས། འདི་ནི་སྡུད་པ་པོའི་ཕྱག་ཡིན་པའི་ཕྱིར་དང་པོའོ། །གཉིས་པ་ནི། འགྲེལ་ཆུང་ལས། མཉམ་ཉིད་དབྱིངས་སུ་བདུད་བཞི་ངང་གིས་བཅོམ། །ཕྱག་རྒྱའི་རང་བཞིན་ཚོགས་གཉིས་རྫོགས་པར་ལྡན། །ཡོད་མེད་མཐའ་འདས་བདག་གཞན་ཡོངས་ཀྱི་དཔལ། །ཐམས་ཅད་རང་བཞིན་རྟོགས་དང་ཐུགས་རྗེ་བཟང་། །ཀུན་བཟང་ལྷ་ཡི་ལྷ་ཁྱོད་དབྱེར་མེད་ལ། །རྟོགས་དང་གུས་པས་རབ་ཏུ་ཕྱག་འཚལ་ལོ། །ཞེས་སོ། །དེ་ཡང་ཆོས་ཉིད་མཉམ་པ་ཉིད་ཀྱི་དབྱིངས་སུ་བདུད་བཞི་ངང་གིས་དག་པས་བཅོམ་པ་སྟེ། ཇི་ལྟར་བཅོམ་ན། རྒྱུ་ཉོན་མོངས་པའི་མཚན་མ་རང་སར་གྲོལ་བས། འབྲས་བུ་ཉེར་ལེན་གྱི་ཕུང་པོ་མི་ལེན་ཞིང་། དེ་མ་བླངས་ན་སྐྱེ་ཤི་དང་། ལྷའི་བུའི་བདུད་ཀྱིས་བར་དུ་གཅོད་པས་མི་ཚུགས་པའི་ཕྱིར་བདུད་བཞི་བཅོམ་པ་སྟེ། རྒྱས་པ་ལས། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་གནས། །ཞེས་སོ། །ལྡན་པ་ནི། བྷ་ག་བཱན་གྱི་སྒྲ་ལས་བྷ་ག་ནི་བཅོམ་པ་ལ་འཇུག་པར་མ་ཟད། རྣམ་པ་གཅིག་ཏུ་སྐལ་བའམ་ལེགས་པ་རྣམ་པ་དྲུག་ལ་འཇུག་པར་ཡང་རྒྱུད་གཞན་ལས་བཤད་པ་ལ། འདིར་ནི་ཆོས་སྐུའི་ཕྱག་རྒྱ་ཡེ་ཤེས་ཀྱི་ཚོགས་དང་གཟུགས་སྐུའི་ཕྱག་རྒྱ་བསོད་ནམས་ཀྱི་ཚོགས་རྫོགས་པས་སྐུ་ལྔ་ལ་སོགས་པའི་ཡོན་ཏན་རང་རིག་པའི་ཡེ་ཤེས་ལ་རང་བཞིན་གྱིས་ལྡན་པའོ། །འདས་པ་ཡང་། བཀས་བཅད་ལས། འཇིག་རྟེན་པའི་བྷ་ག་བཱན་ལས་ཁྱད་པར་འདས་ཞེས་བླ་ཐབས་སུ་བསྣན་ཏེ། ཞེས་གསུངས་ཤིང་། བྷ་གའི་སྒྲ་སྲིད་པ་དང་འཇིགས་པར་འགྲོ་བ་ལ་འཇུག་པ་སྟེ། དེ་ལས་འདས་པས་ན་བྷ་ག་བཱན་ནོ། །འདིར་ནི་ཆོས་སྐུ་སྐྱེ་བ་མེད་པས་ཡོད་པའི་མཐའ་དང་། གཟུགས་སྐུ་འགག་པ་མེད་པས་མེད་པའི་མཐའ་སྟེ་སྤྲོས་པའི་མཚན་མ་ཀུན་ལས་འདས་པའོ། །དེ་ལྟར་ཡང་ཕལ་པོ་ཆེ་ལས། སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་སོ། །དཔལ་ནི། གཞི་ཆོས་དབྱིངས་ཤིན་ཏུ་དྲི་མེད་དེ་རང་བཞིན་ལྷུན་གྱིས་གྲུབ་པའི་དཔལ་དང་། དེ་མངོན་དུ་གྱུར་པའི་འབྲས་བུ་ནི། ཆོས་སྐུ་རྟོགས་པ་བདག་གི་དཔལ་དང་། གཟུགས་སྐུ་ཐུགས་རྗེ་གཞན་གྱི་དཔལ་གཉིས་སོ། །དེའང་རྡོ་རྗེ་ལས་རིམ་ལས། རང་བཞིན་མངོན་བྱས་མ་ལུས་རེ་བ་སྐོང་། །ཞེས་སོ། །ཀུན་ཏུ་བཟང་པོ་ནི་འཁོར་འདས་ཀྱི་ཆོས་ཐམས་ཅད་འཆིང་གྲོལ་མེད་པའི་རང་བཞིན་མངོན་དུ་རྟོགས་པས་སྤྱོད་ཡུལ་དག་པ་སྟེ། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་སོ། །སྤྱིར་གནས་ལུགས་ཡེ་སངས་རྒྱས་པ་ནི་རང་བཞིན་ཀུན་ཏུ་བཟང་པོ། དེ་ཉིད་རྟོགས་པའི་ཡོན་ཏན་མངོན་དུ་གྱུར་པ་ནི་རྟོགས་པ་ཀུན་ཏུ་བཟང་པོ། དེ་ལས་གཟུགས་ཀྱི་སྐུ་མངོན་དུ་སྣང་བ་ནི་ཐུགས་རྗེ་ཀུན་ཏུ་བཟང་པོའོ། །དེ་དག་ཀུན་ཀྱང་འགྲོ་བ་ལ་ཕྱོགས་དུས་ཀུན་ཏུ་གནས་སྐབས་དང་མཐར་ཐུག་གི་ཕན་བདེ་སྟེར་བར་བྱེད་པ་པོ་སྟེ། རྒྱུད་ཕྱི་མ་ལས། ཕྱོགས་བཅུའི་འཇིག་རྟེན་ཐམས་ཅད་དུ། །མངོན་མཐོ་ངེས་ལེགས་རབ་བསྟན་པ། །ཀུན་ཏུ་བཟང་པོར་བརྗོད་པ་ཡིན། །ཞེས་སོ། །ཡུལ་དེ་ལ་སྡུད་པ་པོ་གསང་བདག་གིས་རང་དང་སྟོན་པའི་ཐུགས་གཉིས་སུ་མེད་པར་རྟོགས་པའི་སྒོ་ནས་ཕྱགས་བཙལ་བ་སྟེ། འགྲེལ་པ་མངོན་རྟོགས་ལས། དེ་ཡང་ཐུན་མོང་པ་དག་ལུས་ངག་ཡིད་གསུམ་གྱིས་སོ་སོར་བལྟས་ནས་ཕྱག་འཚལ་བ་ནི་ཤིན་ཏུ་འགལ་ཏེ། ཚི་ཆད་པར་འགྱུར་རོ། །རྨད་དུ་བྱུང་བའི་ཐེག་པ་འདིར་ཀུན་ཏུ་བཟང་པོ་དང་རིག་པ་གཉིས་མེད་དུ་མཇལ་བ་ཕྱག་ཏུ་གསུངས་ཏེ། དཔེ་མར་གྱི་ནང་དུ་མར་བླུགས་པ་བཞིན་ནོ། །ཞེས་སོ། །གསུམ་པ་ནི། ཁ་ཅིག་ན་རེ། འདི་ལོ་ཙཱ་བའི་འགྱུར་ཕྱག་ཡིན་གྱི་སྡུད་པ་པོའི་ཕྱག་མ་ཡིན་ཏེ། སྡུད་པ་པོའི་ཚིག་ནི་འདི་སྐད་བཤད་པའི་དུས་ན། ཞེས་པ་མན་ཆད་ཡིན་པའི་ཕྱིར་ཟེར། དེ་ལྟར་ན་སྡུད་པ་པོས་བཀའ་བསྡུ་བྱེད་པའི་ཐོག་མར་རང་གི་སྟོན་པ་ལ་བསྟོད་ཕྱག་བྱས་པ་མེད་པར་ཐལ། དམ་བཅའ་དེ་འཐད་པའི་ཕྱིར། འདོད་ན། དེ་ཡོད་པར་ཐལ། སོ་ཐར་གྱི་མདོའི་བཀའ་བསྡུ་བའི་ཚེ་སྟོན་པ་ལ་བསྟོད་ཕྱག་བྱས་ནས་བཀའ་བསྡུས་པའི་ཕྱིར་ཏེ། དེ་ལས། འགྲོ་བའི་གཙོ་ལ་སྤྱི་བོས་ཕྱག་བཙལ་ནས། །ཐམས་ཅད་མཁྱེན་པའི་བསླབ་གཞི་དཀོན་མཆོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །ཞེས་གསུངས་པའི་ཕྱིར་བྱས་པ་ལ། ཁོ་ན་རེ། འོ་ན་རྒྱུད་འདིའི་ཀླད་དུ་སྨོས་པའི་ཕྱག་འདི་སྡུད་པ་པོའི་ཕྱག་ཡིན་པའི་ཕྱིར། ལོ་ཙཱ་བའི་འགྱུར་ཕྱག་མེད་པར་ཐལ་ལོ་ཟེར་ན། སྐྱོན་མེད་དེ། ལོ་ཙཱ་བས་རྒྱལ་པོའི་བཀས་བཅད་དང་བསྟུན་པའམ་རང་གི་འདོད་ལྷ་ལ་ཕྱག་བྱེད་པ་གང་ལྟར་ནའང་། སྟོན་པ་ཀུན་ཏུ་བཟང་པོ་ལ་ཕྱག་འཚལ་བར་རིགས་པར་མཐོང་ནས་འགྱུར་ཕྱག་ཟུར་དུ་མ་བཀོད་པའི་ཕྱིར་ཏེ། དུས་འཁོར་གྱི་རྒྱུད་ཀྱི་ཀླད་དུའང་ཡི་གེ་པའི་ཕྱག་གིས་གོ་བཅད་དེ་འགྱུར་ཕྱག་མ་བཀོད་པ་བཞིན་ནོ། །འདིར་གཡུང་ཊཱིཀ་ཏུ། རྒྱུད་གཞུང་སྤྱིའི་ལུགས་ཀྱི་ཀླད་ཀྱི་བསྟོད་ཕྱག་ཡི་གེ་པའི་ཕྱག་ཏུ་བཞེད་པ་ནི་མ་ཡིན་ཏེ། ཕལ་ཆེ་བར་འགྱུར་ཕྱག་ཏུ་སྣང་བའི་ཕྱིར་དང་། འདིར་ནི། སྤར་ཁབ་ལས། སྡུད་པ་པོས་ཚིག་གཉེར་བ་དེའི་ཚེ་རང་གི་སྟོན་པ་ལ་མཆོད་པར་བརྗོད་པའོ། །ཞེས་སྡུད་པ་པོའི་ཕྱག་ཏུ་བཤད་པའི་ཕྱིར་རོ། །