གཞུང་དོན་གཏན་ལ་དབབ་པ།
གཉིས་པ་གཞུང་དོན་གཏན་ལ་དབབ་པ་ནི། འདི་ཉིད་ལས། རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །ཞེས་པས་རྒྱུད་འདི་ཉིད་ཀྱི་ཆེད་དུ་བྱ་བའི་གདུལ་བྱ་དབང་པོ་རབ་འབྲིང་ཐ་གསུམ་ལ་ལྟོས་ནས་འཆད་ཚུལ་གསུམ་དུ་གསུངས་ཏེ། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་གསུངས་པའི་ཕྱིར། དེ་ལས། དང་པོ་ནི། སྔར་བཤད་གྲུབ་ལ། གཉིས་པ་དབང་པོ་འབྲིང་ལ་དོན་རྣམ་པར་དབྱེ་བ་དང་། གསུམ་པ་དབང་རྟུལ་ལ་འབྲུ་རེ་གཉེར་རེའི་སྒོ་ནས་འཆད་པ་གཉིས་ཀྱི་ཕྱི་མ་ནི། མེ་ལོང་བཅུའི་བཤད་ཐབས་དང་སྦྱར་ཏེ་རྒྱུད་ཀྱི་མཚན་དང་ཊཱི་ཱཀ་སོགས་ལས་ཤེས་པར་བྱ་ཞིང་། འདིར་བར་མའི་དབང་དུ་བྱས་ཏེ་བཤད་ན། སྤྱན་འགྲེལ་ལས། ལུང་གི་སྤྱི་རུ་གྲགས་པ་ཡི། །རྣམ་པར་དབྱེ་བ་ལྔ་རུ་འགྱུར། །ཞེས་སོ། །ལྔ་གང་ཞེ་ན། མངོན་རྟོགས་འགྲེལ་ལས། རྒྱུད་གཞུང་གཞི་བསླང་ཡོངས་སུ་ཤེས། །དགོས་འབྲེལ་གཏད་དང་རྫོགས་པའོ། །ཞེས་ལྔར་གསུངས་ནའང་། དགོས་འབྲེལ་སྔར་བཤད་གྲུབ་པའི་ཕྱིར། འདིར། འགྲེལ་ཆུང་ལས། རྒྱུ་དང་རྐྱེན་དང་གཞུང་ཉིད་དང་། །འགྲོ་བའི་དོན་དུ་སྣང་བའི་ཕྱིར། །གླེང་གཞི་དང་ནི་གླེང་བསླང་སྟེ། །དོན་དང་ཡོངས་སུ་བཟུང་བ་དང་། །རྣམ་པ་བཞིར་ནི་བསྡུས་པ་ཡིན། །ཞེས་པས། རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་བསླང་བ། འབྲས་བུ་ཡོངས་ཤེས་རྒྱུད་དོན། གདམས་ཤིང་བསྟན་པ་གཏད་པའོ། །དང་པོ་ལའང་། དགོས་ཆེད། ངོ་བོ། སྒྲ་དོན། རྣམ་གྲངས་བཞི། དང་པོ་ནི། གཉིས་སུ་ངེས་ཏེ། གླེང་གཞི་ཚོགས་པས་རྒྱུད་དོན་འབྱུང་བའི་རྒྱུ་བྱེད་པའི་ཕྱིར་དང་། གླེང་གཞི་ལོ་རྒྱུས་ལ་བརྟེན་ནས་མ་འོངས་པའི་གདུལ་བྱ་རྣམས་ཡིད་ཆེས་ཤིང་འཇུག་པར་འགྱུར་བའི་ཕྱིར་རོ། །
གཉིས་པ་ནི། ཕུན་སུམ་ཚོགས་པ་ལྔའམ་དྲུག་ལྡན་ཏེ། དོན་བསྡུས་ལས། ངོ་བོ་ཚོགས་པ་དྲུག་ཉིད་དེ། །ཞེས་སོ། །
གསུམ་པ་ནི། གང་གླེང་ན་བསྟན་པ་སྟེ། དེའི་རྒྱུའམ་གཞི་ནི་ཕུན་སུམ་ཚོགས་པ་ལྔ་ཡིན་པའི་ཕྱིར་དང་། ཡང་རྣམ་པ་གཅིག་ཏུ་ན། ནཱ་དའི་སྒྲ་ལས་ངེས་པ་སྦྱིན་པ་སྟེ། བཀའ་མ་ཡིན་པར་རྟོག་པའི་ཐེ་ཚོམ་ཅན་གྱི་བློ་ལ་ཡིད་ཆེས་ཀྱི་ངེས་པ་སྦྱིན་པར་བྱེད་པས་ན་གླེང་གཞིའོ། །
བཞི་པ་ནི། ཁོག་གཞུང་ལས། ཐུན་མོང་གླེང་གཞི་རྣམ་གཉིས་དང་། །ཐུན་མོང་མིན་པ་རྣམ་པ་གཉིས། །ཞེས་པས། ཐུན་མོང་མ་ཡིན་པའི་དང་། ཐུན་མོང་གི་གླེང་གཞིའོ། །དང་པོ་ལའང་། ནང་ལྟར་ཐབས་ལམ་སྟེང་སྒོ་དང་སྦྱར་ཏེ་དང་། གསང་བ་ལྟར་འོག་སྒོ་དང་སྦྱར་ཏེ་བཤད་པ་གཉིས། དང་པོ་ནི། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ལས། རྩ་བའི་འདབ་མ་གཞི་ཨེ་གྲུ་གསུམ་སོགས་ལས་བཞིའི་དབྱིབས་དང་། ཁ་དོག་འོད་བཞིའི་རྣམ་པར་གནས་པ་ནི། ཡེ་ཤེས་སྙིང་པོའི་ཐིག་ལེ་བཞུགས་པའི་གནས་ཡིན་པའི་ཕྱིར། གནས་ཕུན་སུམ་ཚོགས་པ་སྟེ། རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །ཞེས་སོ། །དེའི་དབུས་ན། སྲོག་མི་ཤིགས་པའི་ཐིག་ལེ་དྭངས་མ་ལྔ་འདུས་ཀྱི་ངོ་བོ་ཡི་གེ་ཝཾ་གི་དབྱིབས་ཅན་ནི། དཔེར་ན་མར་མེ་གསལ་བྱེད་གཞན་ལ་ལྟོས་མི་དགོས་པ་ལྟར་དེ་ཉིད་རང་ལ་བདེ་བ་གསལ་བར་སྟོན་པའི་བདག་ཉིད་ཡིན་པའི་ཕྱིར་སྟོན་པ་ཕུན་སུམ་ཚོགས་པ་སྟེ། མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །ཅེས་སོ། །རྩ་བཞི་ལ། ཀུན་གཞི་དང་། ཡིད་དང་། ཉོན་ཡིད་དང་། སྒོ་ལྔའི་རྣམ་ཤེས་བཞི་གནས་ལ། དེ་དག་གིས་བརྗོད་བྲལ་རྣམ་པར་མི་རྟོག་པའི་ཡེ་ཤེས་གསལ་བར་ཉམས་སུ་མྱོང་བ་ནི་བཤད་པ་དང་འདྲ་བའི་ཕྱིར་འཁོར་དང་། བྱེ་བྲག་ཚོགས་བདུན་ཀུན་གྱི་རྗེས་སུ་འཇུག་པའི་ཡིད་ཀྱི་རྣམ་ཤེས་ནི་སྡུད་པ་པོར་བཞེད་པར་འཁོར་ཕུན་སུམ་ཚོགས་པ་སྟེ། མ་ནུ་རྣམ་ཤེས་ཡིད་སོགས་བཞི། །ཡེ་ཤེས་མྱོང་བས་སྡུད་པར་བཤད། །ཅེས་སོ། །སྟེང་སྒོ་འཁོར་ལོ་བཞིའི་ཏིང་ངེ་འཛིན་གྱིས་ཉམས་སུ་བླངས་པས་བདེ་གསལ་མི་རྟོག་པའི་ཡེ་ཤེས་ཉམས་སུ་མྱོང་བའི་ཕྱིར་བསྟན་པ་ཕུན་སུམ་ཚོགས་པ་སྟེ། ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །ཞེས་སོ། །དེའི་ཚེ་དུས་སྔ་ཕྱིར་འཛིན་པའི་རྟོག་པ་དང་བྲལ་བ་ནི་བསམ་གྱིས་མི་ཁྱབ་པའི་དུས་ཡིན་པའི་ཕྱིར་དུས་ཕུན་སུམ་ཚོགས་པ་སྟེ། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་སོ། །
གཉིས་པ་ནི། ཡུམ་གྱི་བྷ་ག་ཕྱི་ཁྱམས་ཨེ་གྲུ་གསུམ་ལ་སོགས་ཏེ་ལས་བཞིའི་དབྱིབས་སུ་གནས་པ་ནི་གསང་བའི་སྐུའི་བཞུགས་གནས་ཀྱི་ཕྱིར་གནས་ཏེ། ཐལ་རྒྱུད་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །ཞེས་སོ། །ཡབ་ཀྱི་རྡོ་རྗེའི་:དབང་བསྐུར་༼‹བ›དབུར་༽ཐིག་ལེ་ཐབས་ཀྱིས་བཟུང་བའི་ཚེ་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝཾ་གི་དབྱིབས་ཅན་ནི། ཡབ་ཡུམ་གཉིས་ཀའི་རྒྱུད་ལ་བདེ་བ་གསལ་བར་བྱེད་པའི་བདག་ཉིད་དུ་བཞུགས་པའི་ཕྱིར་སྟོན་པ་སྟེ། སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །ཞེས་སོ། །བདེ་བ་སྡོམ་པར་བྱེད་པའི་ལས་ཀྱིས་ཡིད་ལ་སོགས་པ་གསང་བའི་རྣམ་ཤེས་ནི་བདེ་བའི་ཡེ་ཤེས་ཉམས་སུ་མྱོང་བའི་ཕྱིར་འཁོར་ཏེ། མ་ད་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ཅེས་སོ། །དེའི་ཚེ་བདེ་བ་སྡོམ་པར་བྱེད་པའི་ཡིད་ནི་ཉམས་སུ་མྱོང་བའི་ཆོས་རྣམས་བདེ་བར་བསྡུས་ནས་སྟོན་པའི་ཕྱིར་སྡུད་པ་པོར་ཡང་རུང་ལ། མྱང་བྱ་སེམས་ལྔ་རྫོགས་པའི་དགའ་བ་བཅུ་དྲུག་གི་མཐའི་སྐད་ཅིག་མ་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི་རང་བཞིན་གསང་བའི་སྙིང་པོའི་དོན་ཡིན་པའི་ཕྱིར་བསྟན་པ་སྟེ། པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །ཞེས་སོ། །དེའི་ཚེ་སྔ་ཕྱིའི་འཛིན་རྟོག་བྲལ་བའི་ཕྱིར་བསམ་གྱིས་མི་ཁྱབ་པའི་དུས་ཏེ། དུས་ནི་བསམ་གྱིས་མི་ཁྱབ་དུས། །ན་མ་དེ་མིང་ཞེས་བྱའོ། །ཞེས་སོ། །དེ་དག་ཀྱང་། སཾ་སྐྲྀ་ཏའི་སྐད་དུ། ཨེ་ཝཾ་མ་ཡ། ཞེས་པ་ཐུན་མིན་གྱི་གླེང་གཞི་དབང་བཙན་པར་བྱས་ཏེ། འདི་སྐད་བཤད་པའི་དུས་ན་ཞེས་འགྱུར་གྱི་རྒྱུད་གཞུང་ཐམས་ཅད་ཀྱི་ལེགས་པར་སྦྱར་བའི་སྐད་ལ། ཨེ་ཝཾ་མ་ཡ་བྱ་བ་ལས། བཤད་དང་ཐོས་སོགས་རྣམ་དབྱེ་གཞི་མི་མཐུན་པ་མེད་ཅེས། ཉང་ཇོ་མདོ་དང་། རྗེ་གཡུང་སོགས་གསུངས་ནའང་། རིགས་པར་མ་མཐོང་སྟེ། འདི་སྐད་བདག་གིས་ཐོས་པའི་དུས་གཅིག་ན། ཞེས་པའི་རྒྱ་དཔེ་རྣམས་སུ། ཨེ་ཝཾ་མ་ཡ་ཤྲུ་ཏ་མེ་ཀ་སྨན་ས་མ་ཡེ། ཞེས་འབྱུང་བའི་ཕྱིར་རོ། །ཡང་རྗེ་རོང་ཟོམ་གྱི་ཞལ་ནས། རྒྱུད་འདི་ལ་ཡི་གེ་མ་ཡ་གཉིས་མེད་པས། འདི་ཉིད་ནས་ནི་བསྡུས་པའི་གཞི་མེད་དོ་གསུངས་ཀྱང་། མ་ཡའི་ཡི་གེ་གཉིས་ཡོད་པར་དྲངས་མ་ཐག་པའི་བཤད་རྒྱུད་ཀྱི་ལུང་རྣམས་ཀྱིས་སྟོན་ཅིང་། ཐར་ལོའི་འགྱུར་དུའང་། འདི་སྐད་བདག་གིས་བཤད་པའི་དུས་ན་ཞེས་འབྱུང་སྟེ། མ་ཡ་ཉིད་ཨསྨད་ལ་ཊཱ་བྱིན་པའི་རྣམ་འགྱུར་དུ་མཛད་དེ་བསྒྱུར་བའི་ཕྱིར་རོ། །དེས་ན་ཐར་ལོས་ནི་སྒྲ་འགྱུར་གཙོ་བོར་མཛད་ལ། སྔོན་གྱི་ལོ་ཆེན་རྣམས་ཀྱིས་བཤད་རྒྱུད་ཀྱི་ཡི་གེ་བསྡུས་བཤད་ལྟར། དོན་འགྱུར་གཙོ་བོར་མཛད་པར་མངོན་ནོ། །འདིར་གང་བཞག་ན། ཐུགས་ཐིག་ལས། ཡི་གེ་བཞི་ཡིས་ཤེས་པར་འགྱུར། །ཞེས་པ་ལྟར་ཨེ་ཝཾ་མ་ཡ་བཞིས་སྟོན་པའི་དབང་དུ་བྱ་སྟེ། དེ་ལ། ཨེ་ཝཾ་ནི། འདི་སྐད་དང་། འདི་ལྟར་དང་། དེ་བཞིན་སོགས་ལ་འཇུག་པ་ལས། འདིར། ཨེ་ནི་ཨི་དཾ་ལ་བདུན་པའི་ཏྲ་སྦྱར་བའི་རྣམ་འགྱུར་དུ་བྱས་ཏེ་འདི་དང་། ཝཾ་ནི་ཝ་ཙའི་བྱིང་དོན་ལས་སྐད། མ་ཡའི་སྒྲ་ནི། ཀུན་མཁྱེན་ཆེན་པོའི་ཊཱི་ཀར། རང་བཞིན་དང་། སྒྱུ་མ་དང་། བདག་དང་། འབྱུང་བ་སོགས་ལ་འཇུག་པ་ལས་འདིར་འབྱུང་བ་བཟུང་སྟེ་བཤད་པའི་དུས་ན་ཞེས་བསྒྱུར་བར་གསུངས་སོ། །དེ་ལྟར་ན་འདི་སོགས་ཀྱིས་མཚོན་པའི་ཨེ་ནི་ཡུམ་ལྔའི་མཁའ་སྟེ་གནས། ཝཾ་ནི་ཝཾ་བཛྲ་ཞེས་རྡོ་རྗེ་ཀུན་ཏུ་བཟང་པོའི་རང་བཞིན་ཏེ་སྟོན་པ། མ་ནི་མ་ད་ན་སྡོམ་པ་དང་། མ་ནུས་སྒྲས་ཡིད་སོགས་རྣམ་ཤེས་ཏེ་འཁོར་དང་སྡུད་པ་པོ། ཡ་ནི་ཡ་ནའི་སྒྲས་ཐེག་པ་སྟེ་བསྟན་པ། དེའང་པ་སྒྲས་པ་ར་མཱརྠ་ཞེས་དོན་དམ་སྟེ། འོད་གསལ་ལམ་ལྷན་སྐྱེས་ཀྱི་ཡེ་ཤེས་ཟབ་མོའི་དོན་ནོ། །ཡ་ནི་རྣམ་པ་གཅིག་ཏུ་ས་མ་ཡའི་མིང་མཐའ་བསྡུས་པ་ལ་བྱས་ཏེ་དུས་ལའང་འཇུག་གོ །དེ་དག་དང་བསྟུན་ཏེ་སྔོན་གྱི་མཁན་པོ་ཆོས་ཀྱི་སྤྱན་ལྡན་རྣམས་ཀྱིས། འདི་ཞེས་པ་གནས་སོགས་བོད་སྐད་ལའང་སོ་སོར་སྦྱར་ཏེ་བསྒྱུར་བཤད་ཀྱིས་གཏན་ལ་འབེབས་པར་མཛད་པ་ཡིན་མོད། འོན་ཀྱང་རྒྱ་སྐད་ཇི་ལྟ་བར་བོད་སྐད་ལ་སྦྱར་དུ་མེད་པའི་ཕྱིར། འདིར་སྐད་གཉིས་ཀ་དང་སྦྱར་ནས་བཤད་ན་ལེགས་པ་ཡིན་ནོ། །གཞན་དུ། བཤད་པ། ཞེས་པའི་པ་ཡིག་དང་། པ་སྒྲ་དོན་དམ། ཞེས་པའི་ལུང་གི་ཡི་གེ་གཉིས་སྦྱོར་དགོས་སམ་སྙམ་དུ་རྟོག་པ་ནི་རྒྱ་སྐད་བོད་སྐད་དུ་འཁྲུལ་པའི་བཤད་པར་མངོན་ཏེ་ལེགས་པར་མི་སེམས་སོ། །འདིར་སྐབས་འཕྲོས་ཀྱི་བརྒལ་ལན་ནི། ཁ་ཅིག་ན་རེ། མདོ་རྒྱུད་གཞན་ཐམས་ཅད་དུ། འདི་སྐད་བདག་གིས་ཐོས་པའི་དུས་གཅིག་ན། ཞེས་འབྱུང་བ་ལས། འདིར་དེ་ལྟར་མ་སྨོས་པའི་ཕྱིར་གླེང་གཞི་ལོག་པས་བཀའ་ཡང་དག་པ་མ་ཡིན་ནོ་ཟེར། དེའི་ལན་དུ། ལྷ་རྗེ་གླན་ཤཱཀ་བཟང་ན་རེ། བཤད་ཐོས་གཉིས་ཚིག་མི་མཐུན་ཡང་། སྟོན་པས་འཁོར་ལ་བཤད་པ་དང་འཁོར་གྱིས་སྟོན་པ་ལས་ཐོས་པ་དོན་མཐུན་གསུངས་ནའང་། ཐོས་པ་ལ་བཤད་པས་མ་ཁྱབ་པའི་ཕྱིར་ལེགས་པར་མི་སེམས་སོ། །ལྷ་རྗེ་མདའ་ཏིག་ན་རེ། ཐོས་པ་ལ་མ་རྟོགས་ལོག་རྟོག་ཐེ་ཚོམ་གསུམ་གྱི་སྐྱོན་སྲིད་པ་ལས། འདིར་བཤད་ཅེས་པ་སྟོན་འཁོར་དགོངས་པ་གཉིས་སུ་མེད་པ་ཉིད་ལ་ཉིད་བཤད་པའི་ཕྱིར་སྔར་གྱི་སྐྱོན་གསུམ་རྣམ་པར་བཅད་པའོ་གསུང་ཡང་། མི་འཐད་དེ། བཤད་ཙམ་ལ་སྐྱོན་གསུམ་དང་བྲལ་བས་མ་ཁྱབ་ཅིང་། དགོངས་པ་གཉིས་སུ་མེད་པ་ཉིད་ལ་ཉིད་ཐོས་པའང་འགལ་བའི་ཕྱིར་རོ། །ཡང་ཁྱེད་བླ་མ་དང་རྗེ་སྒྲོ་ཕུག་པའི་བཞེད་ཀྱི། སྐུ་གཉིས་ཀྱི་བསྟན་པའི་ཁྱད་པར་ཡིན་ཏེ། ལོངས་སྐུ་ཚིག་ཏུ་མི་གསུང་བས་རྣ་བས་ཐོས་སུ་མེད་པའི་ཕྱིར་བཤད་ཅེས་དང་། སྤྲུལ་སྐུ་ཚིག་ཏུ་གསུངས་པའི་ཕྱིར་ཐོས་བྱ་བར་འོང་བ་ཡིན་གསུངས་ནའང་། ལོངས་སྐུས་གསུངས་པའི་རྒྱུད་དུ་བཤད་ཅེས་འོང་བས་ཁྱབ་ན་ལོངས་སྐུས་བསྟན་པའི་རྒྱུད་ཀུན་ཏུ་དེ་ལྟར་འབྱུང་རིགས་པ་ལས་མ་བྱུང་བའི་ཕྱིར་སྙམ་དུ་དོགས་སོ། །རྗེ་དྲི་ངས་པ་ན་རེ། སྟོན་པའི་དགོངས་པ་བརྡའི་བཤད་པ་སྡུད་པ་པོས་མ་ཕྲི་མ་བསྣན་པར་བཤད་པར་བཞེད་པའང་། སྔ་མ་དང་ཞེ་འདོད་གཅིག་མོད། འོན་ཀྱང་འདི་ལ་འགལ་བ་མ་མཐོང་ངོ་། །རང་ལུགས་ནི། གསང་བདག་གིས་བསྡུ་བ་བྱེད་པ་ན་རང་ཉིད་སྟོན་པ་ཉིད་དུ་ཁས་བླངས་ཏེ། སྔར་ངས་འོག་མིན་དུ་བཤད་པ་ཉིད་ཡང་འདིར་བཤད་པར་བྱ་ཞེས་དང་། དུས་ན་ཞེས་པའང་དུས་རེས་འགའ་བ་མ་ཡིན་ཏེ། རྟག་པ་རྒྱུན་གྱི་འཁོར་ལོར་གསུངས་པའི་དོན་གྱིས་རྒྱུད་གཞན་དང་ཐུན་མོང་མ་ཡིན་པའི་ཕྱོགས་བཟུང་ནས་བསྡུས་པར་མངོན་ཏེ། ཉི་འོད་སེང་གེའི་རྒྱ་ཆེར་འགྲེལ་པར་བཤད་ཅེས་པས་ནི་འཁོར་དང་སྟོན་པ་གཉིས་སུ་མེད་པར་བསྟན་པ་ཡིན་ལ། ཞེས་སོགས་དང་། སྤར་ཁབ་ལས་ཀྱང་། ཐུན་མོང་མ་ཡིན་པའི་གླེང་གཞི་སྟེ། རྒྱུད་གཞན་ལས་ཁྱད་པར་དུ་གྱུར་པའི་ཕྱིར་ཞེས་གསུངས་པའི་ཕྱིར་བྱས་པ་ལ། ཁོ་ན་རེ། འོ་ན་བདེ་འདུས་ཀྱི་ཞི་བ་འདུས་པ་རྩ་བའི་རྒྱུད་ཀྱི་ཀླད་དུའང་། འདི་སྐད་བཤད་པའི་དུས་ན། ཞེས་འབྱུང་རིགས་པར་ཐལ། རྒྱུད་དེར་སྟོན་འཁོར་རྒྱུད་གཅིག་ཏུ་གསུངས་པའི་ཕྱིར་ཏེ། ང་ནི་ཆེ་བའི་རྒྱལ་པོ་སྟེ། །འཆད་དང་ཉན་པའང་ང་ཉིད་ཡིན། །ཞེས་གསུངས་པའི་ཕྱིར་ཟེར་ན། སྐྱོན་མེད་དེ། སྟོན་འཁོར་ཁྱད་མེད་པར་མཚུངས་པ་བདེན་ཡང་། རྒྱུད་འདི་ནི་ཁྱད་པར་མེད་པར་མཚོན་པའི་ངོས་ནས་སྨོས་ལ། བདེ་འདུས་སོགས་ཐུན་མོང་མ་ཡིན་པའི་རྒྱུད་གཞན་དུ་ཁྱད་པར་ཡོད་པར་མཚོན་པའི་ངོས་ནས་སྨོས་པ་ཙམ་དུ་ཟད་དེ། གདུལ་བྱ་མོས་པ་ཐ་དད་ལ་གྲགས་པའི་ཕྱིར། ཁོ་བོས་ཁྱབ་མཐའ་མ་བཅས་སོ། །གཞན་ཡང་། འདི་སྐད་བདག་གིས་ཐོས་པའི་དུས་གཅིག་ན། ཞེས་མ་སྨོས་པས་བཀའ་ཡང་དག་པ་མ་ཡིན་པར་འགྱུར་ན། བདེ་མཆོག་རྩ་རྒྱུད་དང་། འཇམ་དཔལ་མཚན་བརྗོད་སོགས་ཀྱང་དེར་ཐལ། དེ་ལྟར་མ་སྨོས་པའི་ཕྱིར་ཏེ། དེ་ནས་གསང་བ་བཤད་པར་བྱ། །ཞེས་དང་། དེ་ནས་དཔལ་ལྡན་རྡོ་རྗེ་འཆང་། །ཞེས་གསུངས་པའི་ཕྱིར། དེས་ན། མངོན་རྟོགས་རྒྱན་གྱི་འགྲེལ་པ་ལས། འདི་ནི་རྣམ་པར་གཞག་པ་གཞན་ཁོ་ན་ཡིན་པས། ཐེག་པ་གཞན་གྱི་ལུགས་ལ་བརྟེན་ནས་ནམ་དུའང་སུན་འབྱིན་བརྗོད་པར་མི་བྱའོ། །ཞེས་པ་ལྟར་ཤེས་པར་བྱས་ཏེ་བག་ཡོད་པར་སྤྱོད་ཅིག །