ཐུན་མོང་གི་གླེང་གཞི།
གཉིས་པ་ཐུན་མོང་གི་གླེང་གཞི་ལ། རྒྱུད་ཁྱད་པར་གྱི་གླེང་གཞི་དང་། བསྟན་པ་འབྱུང་བ་སྤྱིའི་གླེང་གཞི་གཉིས། དང་པོ་ལའང་། གླེང་གཞི་དངོས་དང་། ཞར་བྱུང་གདུལ་བྱ་དགོས་ཆེད་ཀྱི་གླེང་གཞིའོ། །དང་པོ་ནི་རྒྱུད་འདིའི་ལེའུ་དང་པོས་སྟོན་ཏེ། དེ་འཆད་པ་ལ། མདོར་བསྟན་དང་། རྒྱས་བཤད་གཉིས། དང་པོ་ནི། འདི་སྐད་བཤད་པའི་སོགས་ལ་ཕུན་སུམ་ཚོགས་པ་དྲུག་སྔར་ལྟར་ངོས་བཟུང་ནས་རྒྱས་བཤད་དང་སྦྱར་རོ། །འདིར་ཐུན་མོང་གི་གླེང་གཞིར་བརྗོད་པ་ནི་སྔ་མ་ཐུན་མིན་ལ་ལྟོས་ནས་ཏེ། གཞན་དུ་ན་འདི་ཡང་ཐུན་མིན་ཉིད་དོ། །གལ་ཏེ་ཐུན་མོང་ཡིན་ན། གནས་གང་དུ། སྟོན་པ་གང་ཞིག །འཁོར་གང་དང་ལྷན་ཅིག་ཏུ་བཞུགས་པའི་དུས་དེའི་ཚེ་ཆོས་འདི་ལྟ་བུ་ཞིག་ཐོས་ཞེས། སྟོན་འཁོར་ཐ་དད་པ་དང་། ཆོས་ཐེག་པ་སྣ་ཚོགས་པ་དང་། དུས་རེས་འགའ་བ་ཞིག་སྟོན་དགོས་པ་ལས་འདིར་དེ་ལྟར་མི་སྟོན་ཏེ། འདི་སྐད་བཤད་པའི་དུས་ན། ཞེས་དང་། དེའི་དོན་རྒྱས་བཤད་ལས་ཤེས་པར་འགྱུར་བའི་ཕྱིར། དེ་བས་ན་ཐུན་མོང་ཁྱད་པར་གྱི་གླེང་གཞིར་བསྙད་དོ་ཞེས་བླ་མ་རྣམས་གསུངས་སོ། །ཅིའི་ཕྱིར། ཐུན་ཁྱད་འགལ་བར་མི་འགྱུར་རམ་སྙམ་ན། མི་འགལ་ཏེ། དེའི་མིང་དོན་ནི། གླན་ཊཱིཀ་པ་སོགས་སྔ་རབས་པ་དག །གནས་འོག་མིན་ཙམ་དུ་མིང་ཐུན་མོང་དུ་གྱུར་ཀྱང་། འདིར་དབང་ཕྱུག་ཆེན་པོའི་འོག་མིན་གྱིས་ཁྱད་པར་དུ་སྤགས། སྟོན་པ་ལོངས་སྐུ་ཙམ་དུ་མཐུན་ཡང་རྒྱལ་བ་དྲུག་པས་སྤགས། འཁོར་བྱང་སེམས་ཙམ་དུ་མཐུན་ཡང་འབྲས་བུའི་སེམས་དཔས་སྤགས། བསྟན་པ་གྲོལ་ལམ་ཙམ་དུ་མཐུན་ཡང་གྲོལ་ལམ་ཁྱད་པར་ཅན་ལམ་གསང་བའི་སྙིང་པོས་སྤགས། དེས་ན་ཐུན་མོང་ཁྱད་པར་གྱི་གླེང་གཞིའོ་གསུང་།
གཉིས་པ་རྒྱས་བཤད་ནི། རྒྱུད་ཕྱི་མ་ལས། སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་དང་། ཁོག་གཞུང་ལས། སྟོན་གནས་འཁོར་དང་སྡུད་པ་དང་། །བསྟན་པ་དུས་ཀྱིས་ཤེས་པར་བྱ། །ཞེས་པས་ཕུན་སུམ་ཚོགས་པ་ལྔའམ་དྲུག་ལས། དང་པོ་སྟོན་པ་ལའང་། སྟོན་པའི་བདག་ཉིད་དང་། འཆད་པའི་སྐྱེས་བུ་གཉིས། དང་པོ་ནི། བཅོམ་ལྡན་འདས་དྲུག་པ་སྤྱིའི་གཟུགས་ཅན་ཀུན་ཏུ་བཟང་པོ་སྟེ། ཁོག་གཞུང་ལས། སྟོན་པའི་རང་བཞིན་བརྒྱད་དང་ལྡན། །བདག་ཉིད་བྱེད་པ་ཀུན་ཏུ་བཟང་། །ཞེས་སོ། །དེ་ལའང་། སྟོན་པའི་རང་བཞིན་དང་། ངོ་བོ་གཉིས། དང་པོ་ལ། གོ་དོན་དང་། གཏན་ལ་དབབ་པའོ། །དང་པོ་ནི། སྟོན་པའི་དགོངས་པ་རང་བྱུང་གི་ཡེ་ཤེས་དེ་ཉིད་ཆོས་ཅན་འཁོར་འདས་ཀྱིས་བསྡུས་པའི་ཆོས་ཐམས་ཅད་དང་ཆོས་ཉིད་ཐ་མི་དད་པར་གནས་པ་ནི་རང་བཞིན་ནོ། །གཉིས་པ་ནི། བི་མ་ལས་རང་བཞིན་བཞིར་བཤད་དེ། འགྲེལ་ཆུང་ལས། བྱང་ཆུབ་མཆོག་གི་ངོ་བོ་དང་། །ཆོས་རྣམས་རོལ་པར་ལོངས་སྤྱོད་དང་། །ཕྱོགས་དུས་བདེ་གཤེགས་བདག་པོ་དང་། །ཆོས་སོ་ཅོག་དང་དབྱེར་མེད་པའོ། །ཞེས་སོ། །སྤར་ཁབ་ལས། རྒྱལ་བ་དྲུག་པའི་ཡོན་ཏན་ཕ་མཐའ་ཡས་པའང་མདོར་བདུན་དུ་འདུ་སྟེ། ཞེས་པ་རང་བཞིན་བདུན་དང་། ཁོག་གཞུང་ལས། ཡང་དག་པ་དང་། རྫོགས་པ་སོ་སོར་ཕྱེ་བས་བརྒྱད་དུ་བཤད་ཀྱང་། མདོར་བསྡུ་ན་གཉིས་ལས། དང་པོ་འདས་པའི་ཆོས་དང་དབྱེར་མི་ཕྱེད་པར་བསྟན་པ་ལ། མཚན་གྱི་རྣམ་གྲངས་ལྔ་སོ་སོར་བསྟན་པ་དང་། སྤྱིར་བསྡུས་ཏེ་མི་ཕྱེད་པར་བསྟན་པའོ། །དང་པོ་ནི། སྟོན་པའི་ཆེ་བའི་ཡོན་ཏན་གྱི་ལྡོག་ཆ་ནས་སྨོས་ན་མཚན་ལྔ་སྟེ། དེ་བཞིན་ཉིད་དུ་ནར་སོན་པའི་རང་བཞིན་ནི་དེ་བཞིན་གཤེགས་པ། ཞེས་གསུངས་ཏེ། སྤྱིར་ཏ་ཐཱ་ག་ཏའི་སྒྲ་ལས་ཏ་ཐཱ་ནི་དེ་བཞིན། ག་ཏ་ནི་གཤེགས་པའམ། བྱོན་པའམ། མཁྱེན་པའམ། གསུང་པ་ལ་བྱ་སྟེ། སྔོན་གྱི་རྒྱལ་བ་རྣམས་ཇི་ལྟར་བྱང་ཆུབ་ཀྱི་སྤྱོད་པའི་སྒོ་ནས་གཤེགས་པ་དེ་ལྟར་ལམ་མཐུན་པས་གཤེགས་ཤིང་བྱོན་པ་དང་། དེ་བཞིན་ཉིད་ཇི་ལྟ་བར་མཁྱེན་ཅིང་གསུང་བ་དང་། འདོད་ཡོན་གྱི་སྣང་བ་ཇི་ལྟར་སྣང་བ་དེ་:ནི་༼‹བ›བཞིན་༽ཐབས་ཀྱིས་སྤྱད་པས་གཤེགས་པ་དང་། སེམས་ཅན་རྣམས་སྐྱེ་བ་རྣམ་པ་བཞིའི་ཚུལ་གྱིས་སྐྱེ་བ་ལས་དེ་དག་གི་བསམ་པ་དང་མཐུན་པར་མངལ་ནས་སྐྱེ་བ་དེ་བཞིན་དུ་གཤེགས་པ་སོགས་བཤད་ཀྱང་། འདིར་ནི། རྒྱུད་ཕྱི་མ་ལས། གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པར་མངོན་པར་བརྗོད། །ཅེས་པ། ཆོས་ཉིད་དེ་བཞིན་ཉིད་ཀྱི་དོན་སྒྲིབ་བྱེད་ཀྱི་ཞེན་པ་དང་བྲལ་བས་ནར་སོན་ཞིང་། དེའི་ངོ་བོ་མངོན་དུ་གྱུར་པའི་ཕྱིར་གཤེགས་པ་སྟེ། རྡོ་རྗེ་ལས། དེ་བཞིན་ཉིད་དུ་གཤེགས་པ་ཡང་། །སྣ་ཚོགས་ཞེན་ལས་གྲོལ་བར་བཤད། །ཅེས་སོ། །ཡང་དག་པར་རྫོགས་པ། ཞེས་པ་ནི་ཡོན་ཏན་མ་བཙལ་བར་ལྷུན་གྱིས་གྲུབ་པའི་རང་བཞིན་ཏེ། རང་བྱུང་གི་ཡེ་ཤེས་ལ་སྤང་བྱ་མ་གྲུབ་པས་མ་ནོར་མི་འགྱུར་མི་བསླུ་བའི་ཕྱིར་ཡང་དག་པ་དང་། དེས་ན་ཐམས་ཅད་འབྲས་བུ་སྐུ་དང་ཡེ་ཤེས་སུ་རང་སྣང་བས་སྤང་ཐོབ་ལྷག་མ་མ་ལུས་པའི་ཕྱིར་རྫོགས་པ་སྟེ། འདིས་ལྷུན་གྱིས་གྲུབ་པའི་རིག་འཛིན་ལས་ཁྱད་པར་དུ་བྱས་པའོ། །སངས་རྒྱས་ཞེས་པ་ནི་སྒྲིབ་བྲལ་གྱི་ཡེ་ཤེས་མཐའ་དབུས་མེད་པར་བརྡལ་བའི་རང་བཞིན་ཏེ། བུདྡྷའི་སྒྲས། གཉིད་སད་པ་ལྟར་སངས་པ་དང་། པདྨ་ཁ་བྱེ་བ་ལྟར་རྒྱས་པའི་དོན་གཉིས་ལ་འཇུག་པར། གཞུང་གཞན་ལས། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །ཞེས་སོ། །འདིར་ནི་མི་མཐུན་པ་དང་གཉེན་པོ་དབྱེར་མེད་ཀྱང་། དོན་ཇི་བཞིན་པ་མངོན་དུ་བྱས་པའི་སྟོབས་ཀྱིས་སྤང་ཐོབ་མེད་པའི་ཡོན་ཏན་མཐར་ཐུག་པ་སྟེ། ལེ་ལག་ལས། མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་སོ། །བཅོམ་ལྡན་འདས་ཞེས་པ་ནི་སྒྲིབ་པའི་ཆ་ཤས་ཕྲ་མོ་ཙམ་ཡང་མི་གནས་པས་བདུད་བཞི་བཅོམ་ཞིང་ཆེ་བའི་ཡོན་ཏན་གྱི་འབྲས་བུ་ལ་མངའ་མཛད་ཀྱང་རང་གི་ངོ་བོ་བསྟན་དུ་མེད་པའི་རང་བཞིན་ཏེ། རྡོ་རྗེ་ལས་རིམ་ལས། བདུད་བཞི་ལ་སོགས་རིག་པའི་གདེང་གིས་བཅོམ། །སྐུ་ལྔ་ལ་སོགས་ཡོན་ཏན་བརྗོད་ལས་འདས། །རང་གི་ངོ་བོ་འདི་ཞེས་བསྟན་དུ་མེད། །ཅེས་སོ། །ལོངས་སྤྱོད་ཆེན་པོ་ཞེས་པ་ནི་མཉམ་པ་ཉིད་ཀྱི་དོན་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན་ཏེ། འཁོར་འདས་ཀྱི་ཆོས་ཐམས་ཅད་ལ་སྤྱད་བྱ་སྤྱོད་བྱེད་དུ་འཛིན་པའི་ཞེན་པ་དང་བྲལ་བའི་སྒོ་ནས་ལོངས་སྤྱོད་པས་གཞན་ལས་ཆེས་མཆོག་ཏུ་གྱུར་པའི་ཕྱིར་རོ། །དེ་ལྟར་ཡང་འཆི་མེད་མཛོད་ལས། ཆེན་པོ་མཆོག་དང་ཚད་མེད་དང་། །མཁས་མཚོན་སྤྲོས་པའི་ལས་འདི་ཉིད། །ཤིན་ཏུ་རྨད་བྱུང་བྱེད་པ་ནི། །ཆེན་པོ་ཞེས་ནི་བཤད་པ་ཡིན། །ཞེས་སོ། །གཉིས་པ་ནི། ཕྱོགས་བཅུ་ནས། རྡོ་རྗེའི་བདག་ཉིད་ཅེས་པའི་བར་གྱིས་དེ་བཞིན་གཤེགས་པ་ཀུན་གྱི་བདག་ཉིད་གཅིག་དང་དུ་མ་ལས་གྲོལ་བའི་རང་བཞིན་ཏེ། སྔར་སྨོས་པའི་མཚན་ལྔ་དང་ལྡན་པའི་ཕྱོགས་དུས་བདེ་གཤེགས་ཀུན་གྱི་ཡོན་ཏན་ཐམས་ཅད་བསྡུ་ན། སྐུ་གསུང་ཐུགས་གསུམ་དང་། དེའི་ཟླས་དྲངས་པའི་ཡོན་ཏན་ཕྲིན་ལས་གཉིས་ཏེ་ལྔའོ། །དེའང་རྟེན་བྱེད་པའི་ངོས་ནས་སྐུ་ལྔ། བརྡའ་སྤྲོད་པའི་གསུང་ལྔ། མི་གཡོ་བའི་ཐུགས་ལྔ། དགོས་འདོད་འབྱུང་བའི་ཡོན་ཏན་ལྔ། གཞན་དོན་མཛད་པའི་ཕྲིན་ལས་ལྔ་སྟེ། དེ་དག་གཅིག་དང་དུ་མ་དང་བྲལ་ཞིང་། རང་བཞིན་དབྱེར་མི་ཕྱེད་པ། མཚན་ཉིད་སྐྱེ་འཇིག་དང་བྲལ་བ། ངོ་བོ་འདུས་མ་བྱས་པའི་ཕྱིར་རྡོ་རྗེའི་བདག་ཉིད་དེ། འགྲེལ་པ་མུན་སེལ་ལས། འབྲས་བུ་ལྔ་ནི་རིགས་ལྔ་སྟེ། །ཞེས་པས་སྐུ་གསུང་ཐུགས་ཡོན་ཏན་ཕྲིན་ལས་ལྔ་པོ་ནི་རིགས་ལྔར་བཞེད་ལ། དེའི་ཕྱིར་སྔར་གྱི་འབྲས་བུ་ཉེར་ལྔ་པོའང་ཀུན་ཏུ་བཟང་པོའི་དགོངས་པ་རང་བྱུང་གི་ཡེ་ཤེས་སུ་འདུས་ཤིང་། རིགས་ལྔ་ཡང་དྲུག་པར་འདུས་པས་ན་དུ་མ་དང་བྲལ་བའི་ཕྱིར། ཀུན་བཟང་ལ་སངས་རྒྱས་ཐམས་ཅད་ཀྱི་སྤྱི་གཟུགས་ཅན་ཞེས་བྱའོ། །དྲུག་པའི་ཡོན་ཏན་གྱི་ཁྱད་པར་ལས་འབྲས་བུ་ཉེར་ལྔ་དང་རིགས་ལྔར་མ་འགགས་པར་སྣང་བས་གཅིག་དང་དུ་མ་དང་བྲལ་བའི་ཕྱིར་རིགས་ཐམས་ཅད་ཀྱི་བདག་པོ་ཞེས་བཏགས་སོ། །གཉིས་པ་འཁོར་བའི་ཆོས་དང་དབྱེར་མི་ཕྱེད་པའི་རང་བཞིན་ནི། མ་ལུས་ནས་རང་བཞིན་ཏེ་ཞེས་པའི་བར་ཏེ། ཁམས་གསུམ་དང་:དུས་༼‹བ›དུག་༽གསུམ་གྱིས་བསྡུས་པའི་འཁོར་བའི་ཆོས་དང་རྒྱལ་བ་དྲུག་པ་གཉིས་ཀའང་། ཀུན་རྫོབ་ཏུ་རིག་པ་སྒྱུ་མ་ཡིན་པའི་ཕྱིར་སོ་སོ་མ་ཡིན། དོན་དམ་པར་སེམས་ཉིད་དུ་མ་སྐྱེད་པའི་ཕྱིར་ཐ་མི་དད། བདེན་པ་གཉིས་ཀྱི་ཐ་སྙད་ལས་འདས་པའི་ཕྱིར་དབྱེར་མེད་པའི་རང་བཞིན་ཏེ། གལ་ཏེ་ཀུན་རྫོབ་ཏུ་སོ་སོ་དང་། དོན་དམ་དུ་ཐ་དད་ན། སྐྱོན་རིམ་བཞིན། རྒྱས་པ་ལས། སོ་སོ་རང་བཞིན་ངེས་ཤེས་ན། །ཡང་དག་ལམ་གྱིས་བཅོས་སུ་མེད། །ཅེས་དང་། ཡེ་ནས་ངོ་བོ་ཡོད་མིན་ཡིན་ན། །ཉོན་མོངས་སྤངས་ཤིང་བྱང་བསྒྲུབ་མེད། །ཅེས་པས་གནོད་པའི་ཕྱིར་རོ། །དེ་ལྟར་རང་བཞིན་བདུན་པོ་ཀུན་ཏུ་བཟང་པོའི་རང་བཞིན་ཡིན་པ་ལྟར་རིགས་ལྔའི་རང་བཞིན་ཡང་དེ་བདུན་དང་ལྡན་པའི་ཕྱིར། རིགས་ལྔ་ལ་རང་བཞིན་གཉིས་སུ་མེད་པའི་འཁོར་ཞེས་གྲགས་སོ། །གཉིས་པ་ངོ་བོ་ལའང་། གོ་དོན་དང་། གཏན་ལ་དབབ་པའོ། །དང་པོ་ནི། རང་བཞིན་དེ་ཉིད་གདུལ་བྱ་ལ་སྐུ་གསུང་ཐུགས་ཀྱི་མཚན་མ་སྣ་ཚོགས་པར་སྣང་བའོ། །གཉིས་པ་ནི། སྟོན་པའི་ངོ་བོ་ཡང་ཡིན་ལ་འཆད་པའི་སྐྱེས་བུའི་མཚན་ཉིད་ཀྱང་ཡིན་པས་ཐུན་མོང་དུ་སྟོན་ཞེས་སྤར་ཁབ་མཁན་པོ་གསུངས་སོ། །དེའང་ཚོམས་བསྡུས་ན་བཞི་སྟེ། སྐུ་གསུམ་གྱི་བདག་ཉིད་ཡིན་པའི་དང་། ཐབས་ཤེས་གཉིས་སུ་མེད་པའི་དང་། ཡེ་ཤེས་དྲུག་དང་ལྡན་པའི་དང་། རྣམ་ཐར་གསུམ་ཆུབ་པའི་དོན་རྟགས་སོ། །དང་པོ་གསུམ་ལས། ཆོས་སྐུའི་ནི། སྐུ་མདུན་དང་རྒྱབ་མེད་པ་ཐམས་ཅད་དུ་ཞལ་ཐལ་ལེ་བར་གསལ་ཞིང་། ཞེས་པས། སྟོན་པ་དང་རིགས་ལྔ་ནི་ཡེ་ཤེས་ཀྱི་སྐུ་ཡིན་པའི་ཕྱིར། བདེ་གཤེགས་རང་སྣང་ལ་སྐུ་མདུན་དང་རྒྱབ་མ་གྲུབ་ཅིང་། གདུལ་བྱའི་སྣང་བ་ལ་རིས་མེད་པར་ཐམས་ཅད་དུ་ཞལ་ཐལ་ལེ་བར་གསལ་བས་གཟུགས་སྐུའི་ཡོན་ཏན་མི་འགག་པ་སྟེ། སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གསལ། །ཀུན་གཟིགས་ཀུན་བཟང་སྐུ་ལ་མདུན་རྒྱབ་མེད། །ཕྱོགས་བཅུ་གང་བར་སྤྱན་གྱིས་རྣམ་པར་གཟིགས། །ཞེས་སོ། །དེའི་ཕྱིར་ལོངས་སྐུའི་ནི། མཚན་དང་དཔེ་བྱད་དང་ལྡན་པ། ཞེས་པས། མཚན་དཔེ་ལ་གཉིས་ལས། ཐུན་མོང་གི་མཚན་ནི། གལ་པོ་ལས། མཚན་མཆོག་སུམ་ཅུ་རྩ་གཉིས་ནི། །ཕྱག་ཞབས་འཁོར་ལོའི་མཚན་དང་ལྡན། །ཞེས་སོགས་དང་། དཔེ་བྱད་ཀྱང་། དེ་ལས། དཔེ་བྱད་བཟང་པོ་བརྒྱད་ཅུ་ནི། །སེན་མོ་ཟངས་ཀྱི་མདོག་ལྟར་འདུག །ཅེས་སོགས་སོ། །ཁྱད་པར་གྱི་མཚན་དཔེ་ལ་ཕྱི་ནང་གསང་གསུམ་ལས། དང་པོ་ནི། མེ་ལོང་ལྟ་བུ་སོགས་ཡེ་ཤེས་བཞི་པོ་རེ་རེ་ལའང་བཞི་བཞིར་ཕྱེ་བའི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་དང་། དེའི་ཡུལ་ཆོས་ཀྱི་དབྱིངས་བཅུ་དྲུག་གི་རྩལ་སེམས་མ་བཅུ་དྲུག་སྟེ་སུམ་ཅུ་རྩ་གཉིས་ནི་མཚན་བཟང་པོའོ། །སེམས་དཔའ་བཅུ་དྲུག་པོར་ཡེ་ཤེས་ལྔའི་རྟགས་རིགས་ལྔས་དབུ་བརྒྱན་པའི་ལྷ་བརྒྱད་ཅུ་ནི་དཔེ་བྱད་དེ། སྤྱི་མདོ་ལས། མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུས་སྤྲས་པའི་ཕྱིར། སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །ཞེས་སོ། །འདིར་ཡུམ་བཅུ་དྲུག་ལ་དབུ་རྒྱན་མ་བཤད་དེ། ཆོས་ཀྱི་དབྱིངས་མཚོན་པའི་ཕྱིར། དེ་དག་ཀྱང་རྒྱན་དུ་ཅིས་འགྱུར་ཞེ་ན། འཁོར་དང་འཁོར་གྱི་རྒྱན་ཕུན་སུམ་ཚོགས་པས་གཙོ་བོའི་རང་བཞིན་ཡང་བཀོད་པས་མཛེས་ཤིང་ཕུན་སུམ་ཚོགས་པ་བཞིན་ནོ་གསུང་། གཉིས་པ་ནི། འཁོར་ལོ་བཞིའི་རྩ་སྟེ། སྤྱི་བོའི་སོ་གཉིས་ཀྱིས་མཚན་བཟང་པོ་དང་མགྲིན་པའི་བཅུ་དྲུག །སྙིང་གའི་རྩ་ཆེན་བཞི། ལྟེ་བའི་དྲུག་ཅུ་རྩ་བཞི་ལས་སྟོང་པའི་རྩ་བཞི་ཕྲི་བས་དྲུག་ཅུ་སྟེ། དེ་ལྟར་བརྒྱད་ཅུ་ནི་དཔེ་བྱད་དོ། །དེའང་ཐལ་རྒྱུད་ལས། སྒྲ་དབྱངས་གསུང་གི་གནས་བཞི་ཡི། །དབྱེ་བས་གསུམ་གསུམ་ངོས་གཉིས་དང་། །བཞི་བཅུ་གཉིས་སུ་འགྱུར་པ་ཡིན། །ཞེས་སོ། །གསུམ་པ་ནི། སྟོན་པ་ཡབ་ཡུམ་གཉིས་རོལ་པའི་དུས་ཀྱི་དགའ་བ་ལ་བརྩི་སྟེ། ཡབ་ཀྱི་དགའ་བ་བཅུ་དྲུག་དང་ཡུམ་གྱི་དགའ་བ་བཅུ་དྲུག་སྟེ་སོ་གཉིས་ནི་མཚན་བཟང་པོའོ། །ཡབ་ཀྱི་དགའ་བ་རེ་རེ་ལའང་ཡེ་ཤེས་ལྔ་ལྔའི་རོ་དང་ལྡན་པའི་ཕྱིར་བརྒྱད་ཅུ་ནི་དཔེ་བྱད་དེ། རྒྱ་མཚོ་ལས། ཨཱ་ལི་ཀཱ་ལིའི་བདེ་བ་ཉིད། །ཕན་ཚུན་མ་འདྲེས་གཅིག་པར་ཤེས། །བཅུ་དྲུག་:རོས་༼‹བ›ངོས་༽གཉིས་མཚན་དང་ལྡན། །ཕྱོགས་གཅིག་ཡེ་ཤེས་ལྔ་ལྡན་པ། །བརྒྱད་ཅུའི་བཟོད་སོགས་རྒྱུ་ལས་འཕགས། །ཞེས་སོ། །ཅིའི་ཕྱིར་ནང་དང་གསང་བའི་མཚན་དཔེ་རྩ་ཁམས་ཀྱི་རང་བཞིན་དུ་འདུག་པས་རྒྱན་དུ་ཇི་ལྟར་འགྱུར་སྙམ་ན། ལོངས་སྤྱོད་རྫོགས་པའི་སྐུ་ལ་རྩ་ཁམས་རྣམ་པར་དག་པ་བདེ་བ་ཆེན་པོའི་རང་བཞིན་དུ་རོ་མཉམ་པ་ནི་རྒྱན་གྱི་ནང་ནས་མཆོག་གོ་ཞེས་གཡུང་ཊཱིཀ་པ་གསུང་ངོ་། །དེ་ལྟར་ན་ཕྱག་ཞབས་འཁོར་ལོ་ལ་སོགས་པ་ནི་སྤྲུལ་སྐུ་སོགས་ལའང་ཡོད་པའི་ཕྱིར་ཐུན་མོང་དང་། ཕྱི་ནང་གསང་གསུམ་གྱི་མཚན་དཔེ་ནི་སྟོན་པ་དང་འཆད་པའི་སྐྱེས་བུ་ཁོ་ནའི་འཕགས་ཆོས་ཡིན་པའི་ཕྱིར་ཁྱད་པར་རོ། །སྤྲུལ་སྐུའི་ནི། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ། ཞེས་པ་སྤྲུལ་པ་ཐམས་ཅད་ཀྱི་འབྱུང་གནས་ཏེ། རྣམ་པར་འཕྲུལ་པ་བསམ་གྱིས་མི་ཁྱབ་ཅིང་ཚད་མེད་པ་ནི་མཛད་པའི་སྣང་ཚུལ་ལོ། །དེ་ལྟར་ཡང་སྡོང་པོ་བཀོད་པ་ལས། །སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་དང་། གསང་བ་བསམ་གྱིས་མི་ཁྱབ་པའི་མདོ་ལས། ཞི་བའི་བློ་གྲོས། ནམ་མཁའ་ཇི་ཙམ་ཁྱབ་པ་དེ་ཙམ་དུ་དེ་བཞིན་གཤེགས་པའི་སྐུས་ཁྱབ་བོ། །ཞེས་སོགས་རྒྱ་ཆེར་གསུངས་སོ། །གཉིས་པ་ནི། ཐབས་དང་ཤེས་རབ་ཀྱི་ཞབས་གཉིས་སོགས་ཏེ། ཐབས་སྙིང་རྗེ་ཆེན་པོ་དང་། ཤེས་རབ་སྟོང་པ་ཉིད་ཀྱི་ཡེ་ཤེས་ཀྱི་བརྡར་ཞབས་གཉིས་ཡབ་ཡུམ་གཉིས་ཀ་སྐྱིལ་ཀྲུང་དུ་མཚུངས་པར་བཞུགས་ནས་འཁྲིལ་བ་སྟེ། ཐར་ལོའི་འགྱུར་དུ། ཐབས་དང་ཤེས་རབ་ཀྱི་ཞབས་གཉིས་མཚུངས་པར་སྐྱིལ་ཀྲུང་དུ་བཅིངས་ནས་སྙོམས་པར་འཇུག་ཅིང་བཞུགས་པ། ཞེས་པས་བཞེངས་པ་ལྟ་བུ་མ་ཡིན་གྱི་གཉིས་ཀ་སྐྱིལ་ཀྲུང་དུ་བསྟན་ཏོ། །སྐྱིལ་ཀྲུང་ལ་བླ་མ་རྣམས་རིགས་དྲུག་པ་རྡོ་རྗེའི་སྐྱིལ་ཀྲུང་དང་། ཡུམ་པདྨའི་སྐྱིལ་ཀྲུང་། འཆད་པའི་སྐྱེས་བུ་རིགས་ལྔ་ཡབ་རྣམས་མཉམ་པའམ་རྫོགས་པའི་སྐྱིལ་ཀྲུང་དང་། ཡུམ་བརྟུལ་ཞུགས་ཀྱི་སྐྱིལ་ཀྲུང་གིས་གཡོན་ཕྱོགས་ནས་འཁྱུད་པའོ་གསུངས། གསུམ་པ་ནི། ཡེ་ཤེས་དྲུག་གི་སོགས་ཏེ། ཡེ་ཤེས་ལྔ་རང་བྱུང་གི་ཡེ་ཤེས་དང་དྲུག་ལྡན་པའི་རྟགས་སུ་ཕྱག་དྲུག་དང་། དེས་འགྲོ་དོན་མཛད་པའི་རྟགས་སུ་ཕྱག་མཚན་དྲུག་འཛིན་པ་ནི། རིགས་ལྔ་ཡེ་ཤེས་ལྔའི་མཚན་མར་གྱུར་པའི་རྡོ་རྗེ་སོགས་ལྔ་དང་། ཆོས་ཀྱི་དབྱིངས་ཀྱི་ཕྱག་རྒྱ་དྲིལ་བུ་སྟེ། སྒྱུ་འཕྲུལ་རོལ་པ་ཆེན་པོའི་རྒྱུད་ལས། ཡེ་ཤེས་དྲུག་གི་བདག་ཉིད་ཀྱི། །ཕྱག་རྒྱ་རིན་ཆེན་འབར་བའི་མཚན། །རྡོ་རྗེ་འཁོར་ལོ་རིན་པོ་ཆེ། །དྲིལ་བུ་པདྨ་རལ་གྲི་འབར། །ཞེས་སོ། །བཞི་པ་ནི། སྐུ་གསུང་ཐུགས་ཞེས་སོགས་ཏེ་སྐུ་སྟོང་པ་ཉིད་དང་། གསུང་མཚན་མ་མེད་པ་དང་། ཐུགས་སྨོན་པ་མེད་པ་གསུམ་ནི་བློའི་སྤྱོད་ཡུལ་ལས་འདས་པའི་ཕྱིར་བསམ་གྱིས་མི་ཁྱབ་པ་སྟེ། དེ་གསུམ་གྱི་མཚན་མའང་རིམ་བཞིན་དབུ་དཀར་དམར་མཐིང་གསུམ་གྱི་ཁ་དོག་ཏུ་བསྟན་ཏོ། །དེ་དག་གིས་སྟོན་པ་ཕུན་སུམ་ཚོགས་པ་རྒྱས་པར་བསྟན་པ་ཡིན་ཏེ། ཐལ་རྒྱུད་ལས། འཁོར་ལོའི་ལྟེ་བར་མི་འཇིགས་སྟེང་། །བདག་པོ་ཀུན་བཟང་འཁོར་རྣམས་ལ། །ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་རྒྱལ་པོ་མདུན་ན་གནས། །ཞེས་པས། རྒྱུད་ཀྱི་སྟོན་པ་རིགས་དྲུག་པ་ཀུན་བཟང་དང་། འཆད་པའི་སྐྱེས་བུ་ནི། སྤྱིར་ཁོག་གཞུང་ལས། འཆད་པའི་སྐྱེས་བུ་རིགས་ལྔ་སྟེ། །ཞེས་པས་རིགས་ལྔ་ཆར་ཡིན་ཡང་། ཐུགས་ཀྱི་སྒྱུ་འཕྲུལ་གྱི་སྐབས་འདིར་མི་བསྐྱོད་པ་མདུན་ན་བཞུགས་སོ། །གཉིས་པ་འཆད་པའི་སྐྱེས་བུ་ནི། རིགས་ལྔ་ཡབ་ཡུམ་སྟེ། དེ་ལས། མཚུངས་པ་བཞི་དང་ལྡན་པའི་ཕྱིར། །ལྔས་ཀྱང་བསྟན་པ་གསུང་མི་འགལ། །ཞེས་གསུངས་པའི་ཕྱིར། དང་པོ་རིགས་ལྔ་ཡབ་ལྔ་ནི། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། ཞེས་སོགས་སོ། །དེ་ལ་གསུམ་སྟེ། རྟོག་པ་བཤད་པ། དེ་ལྷར་དག་ཚུལ། དེའི་རིགས་ཀྱི་དབྱེ་བའོ། །དང་པོ་ནི། རྒྱུད་ཕྱི་མ་ལས། གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་པར་ཤེས་པ་ཉིད། །ཕུང་པོ་ལྔ་ཞེས་རབ་ཏུ་བརྗོད། །ཅེས་སོ། །དེ་ལ་རྣམ་ཤེས་ནི། ཡུལ་རྣམ་པར་རིག་པའི་མཚན་ཉིད་ཅན་གྱི་ཚོགས་བརྒྱད་དེ། ཀུན་གཞི། ཉོན་ཡིད། ཡིད། སྒོ་ལྔའི་རྣམ་ཤེས་སོ། །གཟུགས་ནི། གཟུགས་སུ་རུང་བའི་མཚན་ཉིད་ཅན་གྱི་ཆོས་བཅོ་ལྔ་སྟེ། རྒྱུའི་གཟུགས་འབྱུང་བ་བཞི་དང་། འབྲས་གཟུགས་ནི། མཛོད་ལས། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་པས་བཅུ་གཅིག་གོ །ཚོར་བ་ནི་ཉམས་སུ་མྱོང་བའི་མཚན་ཉིད་ཅན་གྱི། བདེ། སྡུག །བར་མ་གསུམ་མོ། །འདུ་ཤེས་ནི། ཡུལ་ལ་མཚན་མར་འཛིན་པའི་མཚན་ཉིད་ཅན་གྱི། རྒྱ་ཆེ། ཆུང་། ཚད་མེད་པ་སྟེ་གསུམ་མོ། །འདུ་བྱེད་ནི། མངོན་པར་འདུ་བྱེད་པའི་མཚན་ཉིད་ཅན་གྱི་སེམས་པའོ། །དེའང་སེམས་བྱུང་ལྔ་བཅུ་རྩ་གཅིག་སྟེ། ཀུན་འགྲོ་ལྔ། ཡུལ་ངེས་ལྔ། དགེ་བ་བཅུ་གཅིག །རྩ་ཉོན་དྲུག །ཉེ་ཉོན་ཉི་ཤུ། གཞན་འགྱུར་བཞི་རྣམས་སུ་ཡོད་པའི་ཕྱིར། དང་པོ་ནི། ཚོར་འདུ་སེམས་རེག་ཡིད་བྱེད་དེ། །ཀུན་ཏུ་འགྲོ་བ་རྣམ་པ་ལྔ། །གཉིས་པ་ནི། འདུན་མོས་དྲན་ཏིང་ཤེས་རབ་སྟེ། །ཡུལ་ངེས་སྐྱེ་བ་རྣམ་པ་ལྔ། །གསུམ་པ་ནི། དད་དང་ངོ་ཚ་ཤེས་ཁྲེལ་ཡོད། །མ་ཆགས་ཞེ་སྡང་གཏི་མུག་མེད། །བརྩོན་འགྲུས་བག་ཡོད་ཤིན་ཏུ་སྦྱངས། །བཏང་སྙོམས་རྣམ་པར་མི་འཚེ་བ། །བཅུ་གཅིག་པོ་ནི་དགེ་བ་ཡིན། །བཞི་པ་ནི། འདོད་ཆགས་ཁོང་ཁྲོ་ང་རྒྱལ་དང་། །མ་རིག་ཐེ་ཚོམ་ལྟ་བ་སྟེ། །རྩ་བའི་ཉོན་མོངས་རྣམ་པ་དྲུག །ལྔ་པ་ནི། ཁྲོ་འཁོན་འཆབ་འཚིག་ཕྲག་སེར་སྒྱུ། །གཡོ་རྒྱགས་མེད་ངོ་ཚ་ཁྲེལ། མཆན་གཉིས་རྣམ་པར་འཚེ། །དམུ་རྒོད་མ་དད་ལེ་ལོ་དང་། །བག་མེད་བརྗེད་ངས་ཤེས་བཞིན་མིན། །རྣམ་གཡེང་ཉི་ཤུ་ཉེ་ཉོན་མོངས། །དྲུག་པ་ནི། གཉིད་འགྱོད་རྟོག་དཔྱོད་གཞན་འགྱུར་བཞི། །ཞེས་སོ། །དེ་ལྟར་སེམས་བྱུང་ལྔ་བཅུ་རྩ་གཅིག་ལས། ཚོར་བ་དང་། འདུ་ཤེས་གཉིས་ཕྲི་བའི་ལྷག་མ་བཞི་བཅུ་རྩ་དགུ་ནི་འདུ་བྱེད་དོ། །ཅིའི་ཕྱིར། ཀུན་འགྲོ་ལྔ་ལས་ཚོར་འདུ་གཉིས་ཕུང་པོར་ལོགས་སུ་བཞག་ཅེ་ན། མཛོད་ལས། རྩོད་པའི་རྩ་བར་གྱུར་པ་དང་། །འཁོར་བའི་རྒྱུ་ཕྱིར་རིམ་རྒྱུའི་ཕྱིར། །སེམས་བྱུང་རྣམ་ལས་ཚོར་བ་དང་། །འདུ་ཤེས་ལོགས་ཤིག་ཕུང་པོར་བཞག །ཅེས་སོ། །དེས་ན་ཕུང་པོ་ལྔ་ལ་ཡན་ལག་བརྒྱད་ཅུ་སྟེ། སྤར་ཁབ་ལས། དེ་དག་རང་གི་ཡན་ལག་བརྒྱད་ཅུ་དང་བཅས་པ་ཉིད། རྫོགས་པའི་སངས་རྒྱས་ལྔ་རུ་གྲགས། ཞེས་སོ། །འདིར་ཁ་ཅིག་ན་རེ། གཞུང་གཞན་རྣམས་སུ། ཕུང་པོའི་གོ་རིམ་དང་པོར་གཟུགས་ཕུང་སྨོས་ན། འདིར་རྣམ་ཤེས་དང་པོར་སྨོས་པ་གང་ཞེ་ན། ལན་ནི། འདི་ལས་ཕྱི་རོལ་དུ་གྱུར་པའི་ཐུན་མོང་གི་ཐེག་པ་ལས་ཁྱད་པར་དུ་འཕགས་པར་སྟོན་པ་སྟེ། འགྲེལ་པ་ཉི་སེང་མར། ཕྱི་རོལ་པ་དག་གཟུང་བའི་དོན་རགས་པ་དག་ལ་གཙོ་བོར་འདོད་པ་ཡིན་ལ། འདིར་ནི་འཛིན་པའི་གཞི་རྩ་བའི་རྣམ་པར་ཤེས་པ་གཙོ་བོར་འདོད་པ་ཡིན་པས། འགལ་བ་མ་ཡིན་པ་དང་། ཐེག་པ་ཆེན་པོ་སངས་རྒྱས་ཀྱི་བཀར་བཞེད་པ་ཡིན་ནོ། །ཞེས་གསུངས་སོ། །གཉིས་པ་ལྷ་དང་སྦྱོར་ཚུལ་ལ། དགག་གཞག་གཉིས། དང་པོ་ནི། རྗེ་འཁོན་སྟོན་ན་རེ། འདིའི་སྐབས་ཀྱི་རྣམ་ཤེས་ནི་ཚོགས་བརྒྱད་མ་ཡིན་ཏེ། སྒོ་ལྔའི་རྣམ་ཤེས་སོ། །གལ་ཏེ་ཚོགས་བརྒྱད་དུ་འདོད་ན། མི་བསྐྱོད་པའི་རྒྱུད་ལ་ཀུན་གཞི་ཡོད་པའི་ཕྱིར། དགྲ་བཅོམ་པ་མ་ཡིན་པར་ཐལ་བ་དང་། ཉོན་ཡིད་ཡོད་པའི་ཕྱིར། སྒྲིབ་གཉིས་སྤངས་པའི་གང་ཟག་མ་ཡིན་པར་ཐལ་བའི་སྐྱོན་ཡོད་དོ་གསུངས་ནའང་། ཐུན་མོང་གི་གཞུང་དང་བསྟུན་པར་ཟད་ཀྱི། འདིར་ནི་ཤིན་ཏུ་མི་རིགས་ཏེ། དམྱལ་བའི་ཐུབ་པ་ཆོས་ཅན། ཁྱོད་ཀྱི་རྒྱུད་ལ་ཞེ་སྡང་མེད་པར་ཐལ། ཁྱོད་ཞེ་སྡང་ཟད་པར་སྤངས་པའི་གང་ཟག་ཡིན་པའི་ཕྱིར་ཏེ། ཁྱོད་སངས་རྒྱས་འཕགས་པ་ཡིན་པའི་ཕྱིར། ཞེས་རྟོག་པ་ཐམས་ཅད་ལ་མགོ་མཚུངས་པའི་ཕྱིར་མི་འཐད་དོ། །ལུང་དང་ཡང་འགལ་ཏེ། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་དང་། རྒྱ་ཆེར་འགྲེལ་ལས། རྣམ་པར་ཤེས་པའི་རྒྱལ་པོ་ནི། དཔལ་རྡོ་རྗེ་སེམས་དཔའ་ཀུན་གཞི་རྣམ་པར་དག་པའོ། །དེ་ཡང་ཡོངས་སུ་མ་དག་པའི་དུས་ན་ནི། འཁོར་བའི་ཆོས་ཐམས་ཅད་ཀྱི་རྩ་བ་ཡིན་ལ། ཡོངས་སུ་དག་པའི་དུས་ན་ནི། མྱ་ངན་ལས་འདས་པའི་ཆོས་ཐམས་ཅད་ཀྱི་རྩ་བའོ། །ཞེས་སོ། །དེའི་ཕྱིར་ཐེག་པ་འདིའི་ལུགས་ཀྱི་ཀུན་གཞི་ཉིད་ཆོས་ཀྱི་དབྱིངས་ཀྱི་ཡེ་ཤེས་སུ་ཡེ་ནས་དག་པས་སྤང་གཉེན་དུ་མི་འདོད་དེ། འཆིང་གྲོལ་ལས་འདས་པའི་ཕྱིར་དང་། རང་གི་ཊཱི་ཀར་ཡང་། རྡོ་རྗེ་ཕུང་པོ་ཡན་ལག་ནི། །ཞེས་པའི་ཡན་ལག་འདྲེན་པའི་ཚེ་བརྒྱད་ཅུར་བགྲངས་པ་དང་ཡང་ནང་འགལ་ཏེ། ཀུན་གཞི་དང་ཉོན་ཡིད་ཕྲི་བས། རྟོག་པ་དོན་བརྒྱད་ལས་མ་བྱུང་བའི་ཕྱིར་རོ། །གཉིས་པ་ནི། རྟོག་ཚོགས་ཕུང་པོ་ལྔའི་རང་བཞིན་ཡེ་ཇི་བཞིན་པའི་རིགས་ལྔ་ཡིན་པ་ལས། ཁྱད་པར་དུ་རྒྱུད་དག་པའི་སངས་རྒྱས་ལྔའི་འབྲས་བུ་མངོན་དུ་བྱས་ཏེ་མཐར་ཕྱིན་པར་གྱུར་པའམ། དེ་ལྟ་བུའི་རྟོག་པ་ལ་ཐུགས་རང་རིག་པའི་ཡེ་ཤེས་ཀྱིས་རང་དབང་བསྒྱུར་ཞིང་ཟག་མེད་ཀྱི་ཆོས་ལ་མངའ་བརྙེས་པས་བདེ་བ་ཆེན་པོར་ལོངས་སྤྱོད་པས་ན་རྒྱལ་པོ་ཞེས་བྱའོ། །གལ་ཏེ་གཞུང་འདིར་ལྷའི་མཚན་ནས་མི་སྨོས་པར་རྟོག་པའི་མཚན་ནས་སྨོས་པའི་རྒྱུ་མཚན་ཅི་ཞེ་ན། རྒྱལ་པོ་དང་འོག་ཏུ་ཆེན་པོ་ཞེས་སོགས་ཀྱིས་རྟོག་པའི་མཚན་ནས་སྨོས་པ་མ་གྲུབ་སྟེ། མྱ་ངན་ལས་འདས་པ་ཞེས་པས་སངས་རྒྱས་ལ་མྱ་ངན་གྱི་མིང་གིས་བརྗོད་པ་མ་ཡིན་པ་བཞིན་ནོ་གསུངས། དོན་དུ་འདི་ཡིན་ཏེ། མ་དག་པ་འཁོར་བའི་གནས་སྐབས་སུའང་། རྟོག་པ་རྣམས་རང་བཞིན་གྱིས་དག་པས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་གསང་སྔགས་ཀྱི་རྒྱུད་རྣམས་སུ་གསུངས་པར་མ་ཟད། ངེས་དོན་གྱི་མདོ་སྡེ་ཟབ་མོ་རྣམས་ལས་ཀྱང་འབྱུང་སྟེ། འདི་ལྟར། སྡོང་པོ་བཀོད་པ་ལས། གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་དཔའ་ནི། །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་དང་། བྱམས་པ་སེང་གེའི་སྒྲའི་མདོ་ལས་ཀྱང་། གལ་ཏེ་དེ་བཞིན་གཤེགས་པ་མཆོད་པར་འདོད་པ་དེས་བདག་ཉིད་མཆོད་པར་བྱའོ། །ཞེས་དང་། དྲི་མ་མེད་པར་བསྟན་པའི་མདོ་ལས། འཇིག་ཚོགས་ལ་ལྟ་བ་ནི་དེ་བཞིན་གཤེགས་པའི་གདུང་ངོ་། །ཞེས་སོགས་རྒྱ་ཆེར་གསུངས་སོ། །དེས་ན་འདིར་རྟོག་པའི་མཚན་ནས་སྨོས་པའི་དགོས་པ་ནི། སྤར་ཁབ་ལས། ཀུན་གཞི་ལ་སོགས་པའི་རྟོག་པ་ལྔ་སྨོས་པ་ནི། རང་བཞིན་དང་ཐུན་མོང་མ་ཡིན་པའི་ཕྱིར་སྨོས་པ་སྟེ། དེ་དག་ཀར་དག་པར་ཐུགས་སུ་ཆུད་པ་ལ་རྡོ་རྗེ་འཛིན་པ་ལ་སོགས་པར་རང་སྣང་བའི་ཕྱིར་རོ། །ཞེས་པས་རང་བཞིན་ཤེས་བྱའི་གཤིས་ལ། རྟོག་པ་དང་ལྷ་གཉིས་སྣང་ན་སྣང་མཉམ། སྟོང་ན་སྟོང་མཉམ། བཟང་ངན་མེད་པར་མཉམ་པའི་ཕྱིར་དང་། ཐུན་མིན་གྱི་ཐེག་པ་འདིར་ལམ་པས་ལྷ་རྟོག་དབྱེར་མེད་དུ་ངོས་ཟིན་པར་བྱ་བའི་ཕྱིར་དང་། འབྲས་བུ་མཐར་ཕྱིན་པའི་དུས་ན་རྟོག་པ་ཉིད་མ་སྤངས་མ་བསྒྱུར་བར་ལྷའི་དཀྱིལ་འཁོར་དུ་རང་སྣང་བའི་ཕྱིར་སྨོས་པའོ། །རྟོག་ཚོགས་ལྷར་སྣང་བའི་འཐད་པ་གང་ཞེ་ན། གཉིས་ཏེ། ཕྱི་རོལ་གྱི་དོན་ཡོད་པའི་དབང་དུ་བྱས་པ་དང་། ཤེས་བྱ་ནང་གི་དབང་དུ་བྱས་པའོ། །དང་པོ་ནི། རྟོག་པའི་རང་བཞིན་ལྷར་སྣང་བ་ཡིན་ཏེ། ཡེ་ནས་ཡིན་པ་ཉིད་ལམ་རྐྱེན་དང་འཕྲད་ན་ལྷར་སྣང་རུང་མ་འགགས་པའི་ཕྱིར། དཔེར་ན་དངུལ་ཆུས་བསྡུས་པའི་གསེར་ཕྱེ་ཉིད་དངུལ་གྱི་གོང་བུ་ལྟ་བུར་སྣང་ཡང་མེའི་རྐྱེན་དང་འཕྲད་ན་གསེར་དུ་འགྱུར་ཞིང་། མ་འཕྲད་ན་མི་འགྱུར་བ་བཞིན་ནོ། །དེ་སྐད་དུའང་། སྒྱུ་འཕྲུལ་རྟོག་པའི་དྲྭ་བ་རྣམ་པར་བསལ་བའི་རྒྱུད་ཕྱི་མའི་ཕྱི་མ་ལས། གསོལ་པ། བཅོམ་ལྡན་འདས་རྣལ་འབྱོར་པ་འདི་དག་རྒྱུ་ཅི་ལྟ་བུ་ཞིག་ལས་བསྒྲུབ་པར་བགྱི་བ་ལགས། བཀའ་སྩལ་པ། ཕུང་པོ་དང་། ཁམས་དང་། སྐྱེ་མཆེད་དང་། འབྱུང་བ་ལ་སོགས་པའོ། །གསོལ་པ། འོ་ན་རྒྱུ་ལས་ཀྱང་འབྲས་བུ་སྣང་བ་བསྐྱེད་པར་འགྱུར་བ་ལགས། ཅི་སྐད་གསུང་། བཀའ་སྩལ་པ། རིགས་ཀྱི་བུ། དེ་བཞིན་ཏེ། རྒྱུ་ལས་འབྲས་བུའི་ཤེས་རབ་སྣང་ངོ་། །དེ་ཅིའི་ཕྱིར་ཞེ་ན། ཕུང་པོ་ལྔ་ལ་སོགས་པ་གང་དག་པ་སྒྱུ་མར་ཕྱག་རྒྱ་བཞི་བཅུར་སྣང་བ་དང་། དོན་དམ་པར་ན་དོན་དམ་རྩེ་གཅིག་པར་སྣང་བའི་ཕྱིར་ཏེ། ང་དེ་སྐད་ཅེས་སྨྲའོ། །གསོལ་པ། བཅོམ་ལྡན་འདས། བཅོམ་ལྡན་འདས་ཀྱིས་གསུངས་པ་ལྟར་ན། དེ་ཉིད་ནི་དེ་ཡིན་པའི་ཕྱིར། བསྒྲུབ་པར་བྱ་བ་དང་ཡང་འགལ་བའི་ཕྱིར་རོ། །བཀའ་སྩལ་པ། ཇི་སྙམ་དུ་སེམས། དཔེར་ན་རྐྱེན་གྱི་འབྲེལ་པ་དང་མ་འཕྲད་པའི་འབྲས་བུ་སྐྱེ་བའི་རྒྱུ་ཡོད་ཀྱང་། མངོན་དུ་འབྱིན་པའི་ནུས་པ་མེད་པ་བཞིན་དུ། བྱང་ཆུབ་ཀྱི་རྒྱུ་ཡོད་ཀྱང་། རྐྱེན་ཏིང་ངེ་འཛིན་ལ་མ་འབྲེལ་བའི་ཕྱིར། འབྲས་བུ་འབྱིན་པའི་ནུས་པ་མེད་པས་ན་དེ་ལྟར་ཤེས་པར་བྱའོ། །ཞེས་སོ། །གཉིས་པ་ནི། སྣང་ལ་མ་ངེས་པའི་ཕྱིར་རྟོག་པའི་རང་བཞིན་ལྷ་ཡིན་ཏེ། ཆུའི་དངོས་པོ་གཅིག་གམ། མ་དག་པ་དང་། དག་པའི་ཞིང་གི་འགྲོ་བ་དང་། གྲུབ་པའི་གང་ཟག་རྣམས་ཀྱིས་མཐོང་ཚུལ་ཐ་དད་པ་བཞིན་ནོ། །དེའང་དཔལ་ནམ་མཁའ་དང་མཉམ་པའི་རྒྱུད་ལས། འགྲོ་བ་འདི་ཀུན་སངས་རྒྱས་ལྔ་བདག་ཉིད། །གར་མཁན་དང་ནི་རི་མོ་བཟང་ལྟར་སྣང་། །ཞེས་སོ། །ལྷ་དང་རྟོག་པའི་ཆོས་མཐུན་ནི། རྣམ་ཤེས་ཐུགས་ཀྱི་བདག་ཉིད་ཡིན་པ་དང་། གཟུགས་དང་སྐུ་མཐུན་པ་གཉིས་ནི་དངོས་སུ་མཐུན་པར་ཟད་དོ། །ཚོར་བ་ནི་ཡུལ་ལ་ལོངས་སྤྱོད་དུ་བལྟ་བའི་གཞི་ཡིན་པའི་ཕྱིར་ཡོན་ཏན་དང་། འདུ་ཤེས་ནི་མཚན་མར་འཛིན་པའི་བདག་ཉིད་ཕྱི་ནང་གི་ཆོས་རྣམས་ལ་ཐ་སྙད་དུ་འདོགས་པའི་ལས་ཀྱིས་བརྡའ་སྤྲོད་པའི་ཕྱིར་གསུང་དང་། འདུ་བྱེད་ནི་བྱ་བ་བྱེད་པས་ལས་ཀྱི་བདག་ཉིད་ཡིན་པའི་ཕྱིར་རོ། །དེ་དག་ཀྱང་ཡེ་ཤེས་གྲུབ་པའི་རྒྱུད་ལས། གཟུགས་ནི་རྣམ་པར་སྣང་མཛད་ཉིད། །ཚོར་བ་རིན་ཆེན་འབྱུང་ལྡན་ལ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་དོན་ཡོད་གྲུབ་པ་ཉིད། །རྣམ་པར་ཤེས་པ་མི་བསྐྱོད་པ། །ཞེས་པ་ལྟར་སྦྱར་རོ། །ཡང་རྒྱུད་ཕྱི་མ་ལས། ཚུལ་ཁྲིམས་ལ་སོགས་ཕུང་པོ་ལྔ། །ཟག་མེད་རྣམས་ནི་གཞན་ཡིན་ནོ། །ཞེས་ཉེར་ལེན་གྱི་ཕུང་པོ་ལྔ་གནས་གྱུར་པའི་ཟག་མེད་ཀྱི་ཕུང་པོ་ལྔ་དང་ཆོས་མཐུན་བརྩི་བ་ནི། རྣམ་ཤེས་གནས་གྱུར་རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ནི་ཐུགས་ཀྱི་བདག་ཉིད་ཡིན་པ་དང་། དེ་བཞིན་དུ་གཟུགས་གནས་གྱུར་ཚུལ་ཁྲིམས་ཀྱི་ཕུང་པོ་ནི་དྲི་མ་མེད་པའི་སྐུ་དང་། ཚོར་བ་གནས་གྱུར་ཏིང་ངེ་འཛིན་ཡོན་ཏན་གྱི་གཞིར་གྱུར་པའི་ཕྱིར་ཡོན་ཏན་དང་། འདུ་ཤེས་གནས་གྱུར་ཤེས་རབ་ནི་ལུང་རྟོགས་ཀྱི་ཆོས་ཀྱི་གཞིའི་ཕྱིར་གསུང་དང་། འདུ་བྱེད་གནས་གྱུར་རྣམ་པར་གྲོལ་བའི་ཕུང་པོ་ནི་མཛད་པ་ཡོངས་སུ་རྫོགས་པའི་བདག་ཉིད་དང་གཞིར་གྱུར་པའི་ཕྱིར་ཕྲིན་ལས་ཏེ། རིགས་ལྔ་དང་སྦྱར་རོ། །སྒྲོལ་ཊཱིཀ་ཏུ་འདི་དང་གོ་རིམ་མི་གཅིག་པར་སྦྱར་ནའང་། འདི་ནི། གཟུགས་ཀྱི་ཕུང་པོ་གནས་གྱུར་ཚུལ་ཁྲིམས་སྐུ། །ཚོར་བ་གནས་གྱུར་ཏིང་འཛིན་འབུམ་ཕྲག་བརྙེས། །འདུ་ཤེས་གནས་གྱུར་ཤེས་རབ་ཕུང་པོ་སྟེ། །འདུ་བྱེད་གནས་གྱུར་རྣམ་པར་གྲོལ་བའོ། །སེམས་གྱུར་ཡེ་ཤེས་དེ་ནི་རྣམ་གྲོལ་མཐོང་། །ཞེས་དཀོན་མཆོག་འགྲེལ་དུ་གསུངས་པ་ལྟར་རོ། །ཡང་ཉོན་མོངས་པ་ལྔ་དང་། ཕུང་པོ་ལྔ་ཆོས་མཐུན་བརྩིས་ཏེ་རིགས་ལྔ་དང་སྦྱར་བ་ནི། གསང་འདུས་ལས། གཟུགས་ནི་གཏི་མུག་ཏུ་བསྟན་པ། །བླུན་པས་བཅིངས་པའི་ངོ་བོའོ། །ཚོར་བ་འདོད་པས་མྱོས་བསྟན་པ། །ང་རྒྱལ་གྱི་ནི་ངོ་བོའོ། །འདུ་ཤེས་འདོད་ཆགས་བདག་ཉིད་ནི། །དངོས་པོ་ལ་ནི་ཆགས་པའི་མཚན། །འདུ་བྱེད་རྟག་ཏུ་ཕྲག་དོག་སྟེ། །རྩེ་གཅིག་བདག་ཉིད་གཏོད་པའོ། །རྣམ་ཤེས་ཞེ་སྡང་ཞེས་བསྟན་ཏེ། །རྒྱུ་དང་འབྲས་བུར་རབ་ཏུ་གྲགས། །ཞེས་པ་སྔར་བཞིན་རིགས་ལྔ་དང་སྦྱར་རོ། །ཞར་བྱུང་རྩོད་སྤོང་ནི། གལ་ཏེ་རྣམ་ཤེས་ལྷར་དག་པའི་ཚེ་མིག་གི་རྣམ་ཤེས་ཀྱང་མི་བསྐྱོད་པར་དག་གམ་མ་དག །གཉིས་པ་ལྟར་ན། དག་མ་དག་འགལ་བའི་ཆོས་ཅན་ཡིན་པའི་ཕྱིར་སྤྱི་བྱེ་བྲག་བདག་མི་གཅིག་པར་འགྱུར་ལ། དང་པོ་ལྟར་ན། དག་པ་གཞན་དུ་བརྗོད་དུ་མེད་པར་འགྱུར་ཞིང་། འདོད་ན། འོག་ཏུ་བྱང་ཆུབ་ཆེན་པོ་རྡོ་རྗེ་མཐོང་བ་དང་། ཞེས་པས་གསལ་ལོ་ཞེ་ན། སྐྱོན་མེད་དེ། ལྟོས་ས་ཐ་དད་ལ་ལྟོས་ནས། རྣམ་ཤེས་ཀྱི་ཕུང་པོ་སྤྱི་བྱེ་བྲག་གཉིས་གཙོ་འཁོར་དུ་དག་པ་སྟེ། ཐ་མལ་གྱི་རྣམ་ཤེས་རིལ་པོ་གཅིག་ཏུ་ཞེན་པའི་གཉེན་པོར་བྱེ་བྲག་ས་སྙིང་སོགས་སུ་དག་ཚུལ་དང་། སླར་ཐ་དད་དུ་ཞེན་པའི་གཉེན་པོར་སྤྱིར་མི་བསྐྱོད་པར་དག་ཚུལ་སྨོས་པ་སྟེ། འདི་ཉིད་ལས། ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱའི་མཆོག །ཅེས་སོ། །དེ་བཞིན་དུ་གཟུགས་ཕུང་སྤྱི་རྣམ་སྣང་དུ་དག་པའི་ཚེ་རྒྱུའི་གཟུགས་བཞི་ཡུམ་དུ་དག་གམ་མ་དག་གི་རྩོད་སྤོང་སོགས་རིགས་འགྲེ་སྦྱར་རོ། །གསུམ་པ་རིགས་ཀྱི་དབྱེ་བ་ལ། དགག་གཞག་གཉིས། དང་པོ་ནི། གང་དག །རྣམ་པར་ཤེས་པའི་རྒྱལ་པོ་ཞེས་པ་ནི་ལྷའི་དུས་ན་མི་བསྐྱོད་པ་མ་ཡིན་ཏེ། རྣམ་ཤེས་དག་པ་ཐུགས་ཀྱི་བདག་ཉིད་རྣམ་སྣང་ཡིན་པའི་ཕྱིར་ཏེ། དབུས་སུ་རིགས་བདག་མཚོན་བྱེད་ཀྱི་གདན་འཁོར་ལོ་དང་སེང་གེ །ཡུམ་དབྱིངས་ཕྱུག་མ། ཆོས་དབྱིངས་ཡེ་ཤེས་རྣམས་བྱུང་བའི་ཕྱིར་དང་། ཁྲོ་བོའི་སྐབས་སུའང་བུདྡྷ་ཧེ་རུ་ཀའི་སྐུ་མདོག་དང་སྔགས་ཐོག་མར་སྨོས་པའི་ཕྱིར་རོ་ཞེ་ན། དེ་ནི་རྒྱུད་གཞུང་སོ་སོའི་དགོངས་པ་ཐ་དད་པ་མང་དུ་སྣང་བ་ལྟར་གདུལ་བྱ་ལ་ཤེས་རབ་ཀྱི་བློ་ནོར་སྟེར་བའི་སྐྱེས་སུ་སྣང་བའི་ཕྱིར་གཅེས་སྤྲས་སུ་བྱ་བ་ཙམ་ཡིན་གྱི། སྐབས་འདིར་བླང་བར་བྱ་བ་མ་ཡིན་ཏེ། ཐུན་མོང་མ་ཡིན་པའི་ལུང་རིགས་མན་ངག་གསུམ་དང་འགལ་བའི་ཕྱིར། དེ་ཡང་ལུང་དང་འགལ་ཏེ། སྒྱུ་འཕྲུལ་བླ་མ་ལས། གཟུགས་ལ་རྣམ་པར་སྣང་མཛད་དེ། །ཞེས་པ་ནས། རྣམ་ཤེས་རྡོ་རྗེ་སེམས་དཔའ་སྟེ། །ཞེས་པའི་བར་དང་། ཡང་དེ་ལས། འཁོར་ལོ་འབར་བའི་ལྟེ་བ་ལ། །སྟོན་པ་རྡོ་རྗེ་སེམས་དཔའ་དག །ཅེས་དང་། ཤར་གྱི་འཁོར་ལོའི་རྩིབས་སྟེང་ན། །བདེ་གཤེགས་རྣམ་པར་སྣང་མཛད་དག །ཅེས་སོ། །མན་ངག་དང་ཡང་འགལ་ཏེ། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། །ཞེས་དང་། ཉི་འོད་སེང་གེས། ཀུན་གཞི་བྱང་ཆུབ་ཀྱི་སེམས་རྡོ་རྗེ་མི་བསྐྱོད་པ་ལ་ནི་རྣམ་པར་ཤེས་པའི་རྒྱལ་པོ་ཞེས་གནས་སྐབས་འདིར་བྱའོ། །ཞེས་སོ། །རིགས་པ་ནི། རྣམ་པར་ཤེས་པའི་རྒྱལ་པོ་ཆོས་ཅན། རྣམ་སྣང་མ་ཡིན་ཏེ། ཁྱོད་མི་བསྐྱོད་པ་ཡིན་པའི་ཕྱིར། དེ་ཡིན་ཏེ། རྣམ་ཤེས་དག་པ་ཐུགས་ཡིན་ལ། དེ་རྡོ་རྗེའི་རིགས་མི་བསྐྱོད་པར་ངེས་པའི་ཕྱིར་ཏེ། གླང་པོ་ཆེ་རབ་འབོག་གི་རྒྱུད་ལས། དོན་དམ་པར་སེམས་ཅན་གྱི་རྣམ་པར་ཤེས་པ་གནས་སུ་དག་པ་དེ་བཞིན་གཤེགས་པའི་ཐུགས་ཀྱི་བདག་ཉིད། ཅེས་པ་ནས། བཅོམ་ལྡན་འདས་རྡོ་རྗེ་མི་བསྐྱོད་པ། ཞེས་གསུངས་པའི་ཕྱིར། དེ་ལྟར་རྣམ་ཤེས་དག་པ་མི་བསྐྱོད་པར་གྲུབ་མོད། འོན་ཀྱང་སྔར་གྱི་སྐྱོན་རྣམས་ཀྱིས་གནོད་པར་མི་འགྱུར་རམ་སྙམ་ན། མི་གནོད་དེ། གདན་གྱི་འཁོར་ལོ་ནི་རིགས་བདག་མཚོན་བྱེད་ཀྱི་མཚན་མ་མ་ཡིན་གྱི། རིགས་ལྔ་ཡེ་ཤེས་ལྔའི་ཕྱག་རྒྱ་སྟེ། འགྲེལ་ཆུང་ལས། གཞི་ཡང་ཚད་མེད་འཁོར་ལོ་སྟེ། །ཡེ་ཤེས་ལྔ་ཡི་རང་བཞིན་ཡིན། །ཞེས་སོ། །སེང་ཁྲི་ཡང་ཐུགས་གཙོ་བོར་སྟོན་པའི་ཕྱིར་རྡོ་རྗེའི་རིགས་དང་སྦྱར་བ་ཙམ་དུ་ཟད་དེ། སློབ་དཔོན་པདྨས་མཛད་པའི་ཡང་དག་གི་ལས་རིམ་ཤེལ་ཕྲེང་ལས། སེང་གེ་གླང་རྟ་རྨ་བྱ་ཁྱུང་། །ཉི་ཟླ་པདྨ་རིན་པོ་ཆེ། །གཙོ་དང་འཁོར་དུ་རིམ་པར་བསམ། །ཞེས་གཙོ་བོ་རྡོ་རྗེའི་རིགས་མི་བསྐྱོད་པའི་གདན་དུ་སེང་གེ་བྱུང་བའི་ཕྱིར་དང་། ཡུམ་དབྱིངས་ཕྱུག་མ་ནི་རྣམ་ཤེས་ཀྱི་ཡུལ་ནམ་མཁའི་ཁམས་དང་སྦྱོར་བ་སྟེ། དེ་ལས། མི་བསྐྱོད་མཐིང་ག་དཀར་དམར་ཞལ། །རྡོ་རྗེ་འཁོར་ལོ་རིན་ཆེན་གཡས། །དྲིལ་བུ་པདྨ་རལ་གྲི་གཡོན། །དབྱིངས་ཕྱུག་གཡས་བརྟེན་གཡོན་དྲིལ་སོགས། །ཞེས་དང་། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །ཅེས་པས་ཀྱང་བསྟན་པའི་ཕྱིར། ཡེ་ཤེས་ནི། རྒྱ་ཆེར་འགྲེལ་ལས། ཞེ་སྡང་རྣམ་པར་དག་པའི་རང་བཞིན་རྣམ་པར་ཤེས་པའི་ཕུང་པོ་ཡོངས་སུ་དག་པ་ཐུགས་རྡོ་རྗེ་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་མི་བསྐྱོད་པའི་དཀྱིལ་འཁོར། ཞེས་པས་འདིར་ཞེ་སྡང་དག་པ་ཆོས་དབྱིངས་ཡེ་ཤེས་སུ་བཞེད་པའི་ལུགས་ཡིན་པའི་ཕྱིར་སྐྱོན་མེད་དེ། ཡེ་ཤེས་ཐིག་ལེའི་རྒྱུད་ལས། གཏི་མུག་མེ་ལོང་ཡེ་ཤེས་བལྟ། །ང་རྒྱལ་མཉམ་པ་ཉིད་དུ་དྲན། །སོ་སོར་རྟོག་པ་འདོད་ཆགས་ཡིན། །བྱ་བ་གྲུབ་པ་ཕྲག་དོག་ཆེ། །ཞེ་སྡང་ཆོས་དབྱིངས་རྣམ་པར་དག །ཅེས་པ་ལྟར་རོ། །ཁྲོ་བོའི་སྐབས་སུའང་། བུདྡྷ་ཧེ་རུ་ཀ་གཙོ་བོར་མ་གྲུབ་སྟེ། པཎ་གྲུབ་ཀྱི་མན་ངག་རྣམས་སུ་རྒྱུད་འཁྲུགས་པ་བསྡེབས་ནས་གཙོ་བོར་བཛྲ་ཧེ་རུ་ཀར་བཞེད་པའི་ཕྱིར། དེ་ལྟར་ཡང་རྒྱ་ཆེར་འགྲེལ་ལས། ཞི་བའི་དུས་སུ་མི་བསྐྱོད་པ་དང་པོར་སྨོས་ཤིང་གཙོ་བོར་བྱས་ལ། ཁྲོ་བོའི་དུས་སུ་ནི་གཟུགས་ཀྱི་ཕུང་པོ་རྣམ་པར་དག་པ་བུདྡྷ་ཧེ་རུ་ཀ་དང་པོར་བྱུང་ཞིང་གཙོ་བོར་སྨོས་པ་ཅིའི་ཕྱིར་ཞེ་ན། དེ་ནི་རྒྱུད་དཀྲུགས་པ་ཡིན་ཏེ། དབྱིངས་ཕྱུག་མ་གཙོ་བོ་ལ་འཁྲིལ་བའི་གནས་སྐབས་ན་དེ་ཉིད་མངོན་པར་འགྱུར་ཏེ། འདི་ནི་རྡོ་རྗེ་ཁྲག་འཐུང་ཉིད་ལ་ཅི་ནས་ཀྱང་དོན་གྱིས་ཤེས་པར་བྱའོ། །ཞེས་དང་། འདིར་ཡང་རྣམ་པར་ཤེས་པའིི་རང་བཞིན་ཞེ་སྡང་རྣམ་པར་དག་པའི་ངོ་བོ་མི་བསྐྱོད་པ་རྡོ་རྗེ་ཁྲག་འཐུང་དུ་མངོན་པར་འདུ་མཛད་པ་དེ་ལ་ཤེས་པར་བྱའོ། །ཞེས་གསུངས་ཤིང་། དེར་མ་ཟད། འབར་བ་ཆེན་པོའི་ཁྲག་འཐུང་སྐུ་སྨུག་ནག །ཅེས་པའི་རྒྱ་དཔེར་མ་ཧཱ་ཛྭ་ལནྟཾ་རུ་དྷི་ར་པཱ་ནཱ་མ་ནཱི་ལ་ཀྲྀཥྞཱ་ཀཱ་ཡཾ། ཞེས་མཐིང་ནག་གི་སྐད་དོད་ཡོད་པའི་ཕྱིར་དང་། དེར་རྡོ་རྗེ་ཁྲག་འཐུང་གི་སྔགས་ཀྱང་ཐོག་མར་བྱུང་བའི་ཕྱིར་རོ། །གཉིས་པ་ནི། རྡོ་རྗེ་བཀོད་པ་ལས། སྐུ་ནི་མ་བཅོས་དེ་བཞིན་ཉིད། །ཐུགས་ནི་མི་འགྱུར་རྡོ་རྗེའི་རིགས། །ཡོན་ཏན་ཀུན་འབྱུང་རིན་ཆེན་རིགས། །གསུང་ནི་ཆགས་མེད་པདྨའི་རིགས། །དོན་གྲུབ་སྤྱོད་པ་ལས་ཀྱི་རིགས། །ཞེས་པ་ལྟར་སྦྱར་རོ། །དེ་ལ་སྐབས་འདིར། དཀྱིལ་འཁོར་གྱི་གཙོ་བོ་མི་བསྐྱོད་པ་ཐུགས་རྡོ་རྗེའི་རིགས་དང་ཆོས་ཀྱི་དབྱིངས་ཀྱི་ཡེ་ཤེས། དེ་བཞིན་དུ་རྣམ་སྣང་སྐུ་དེ་བཞིན་གཤེགས་པའི་རིགས་མེ་ལོང་ལྟ་བུ། རིན་འབྱུང་ཡོན་ཏན་རིན་པོ་ཆེའི་རིགས་མཉམ་ཉིད། སྣང་མཐའ་གསུང་པདྨའི་རིགས་སོར་རྟོག །དོན་གྲུབ་ཕྲིན་ལས་ལས་ཀྱི་རིགས་བྱ་གྲུབ་ཡེ་ཤེས་སོ། །དེ་དག་ཀུན་ཀྱང་ཞེས་སོགས་ཀྱིས་རིགས་ཀྱི་མཚན་མར་གྱུར་པའི་ཁ་དོག་རྣམས་བསྟན་ཏེ། ཆོས་ཉིད་འགྱུར་བ་མེད་༡པ་དང་། ཉེས་སྐྱོན་གྱིས་མ་གོས་པ་༢དང་། ཆེ་བའི་ཡོན་ཏན་རྒྱས་པ་༣དང་། གདུལ་བྱའི་དོན་ལ་ཆགས་པ་༤དང་། ལས་སྣ་ཚོགས་ལྷུན་གྱིས་གྲུབ་པའི་༥རྟགས་སུ། རིམ་པ་ལྟར། ཆོས་དབྱིངས་ཡེ་ཤེས་དང་རྡོ་རྗེའི་རིགས་༡མཐིང་ག །མེ་ལོང་ལྟ་བུ་དང་བདེ་གཤེགས་རིགས་༢དཀར་པོ། མཉམ་ཉིད་དང་རིན་ཆེན་རིགས་༣སེར་པོ། སོར་རྟོག་དང་པད་རིགས་༤དམར་པོ། བྱ་གྲུབ་དང་ལས་རིགས་༥ལྗང་གུ་སྟེ། རྒྱས་པ་ལས། མ་མཐོང་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོར་བསྟན། །ཅེས་སོགས་རྒྱས་པར་གསུངས་སོ། །གཉིས་པ་རིགས་ཀྱི་ཡུམ་ལྔའི་མཚན་ལ། སྤྱི་བྱེ་བྲག་གཉིས་ལས། སྤྱི་ནི། བཙུན་མོ་དམ་པ་དང་། དབྱིངས་སོ། །དེ་ལ་བཙུན་མོའི་སྒྲ་ནི། སྐྱེད་པར་བྱེད་པའི་རྒྱུ་དང་། སྤྱད་བྱའི་ཡུལ་དུ་གྱུར་པ་གཉིས་ལ་འཇུག་སྟེ། རྟོག་པའི་དུས་སུ་འབྱུང་བ་ལྔས་ཕུང་པོ་ལྔ་བསྐྱེད་ཅིང་། ལྷའི་སྐབས་སུ་རིགས་ཀྱི་ཡབ་ལྔས་སྤྱད་པར་བྱ་བའི་ཡུལ་ཡིན་པའི་ཕྱིར་རམ། ཡང་ན། ཡུམ་གྱི་ངོ་བོ་དབྱིངས་དང་། ཡབ་ཀྱི་ངོ་བོ་ཡེ་ཤེས་ཏེ། དབྱིངས་ཀྱིས་ཡེ་ཤེས་བསྐྱེད་པ་དང་། དབྱིངས་ཡེ་ཤེས་ཀྱི་ཡུལ་དུ་གྱུར་པའི་ཕྱིར་རོ། །དམ་པའི་སྒྲ་ནི་རང་བཞིན་རྟོག་པ་ལས་ཁྱད་པར་དུ་བྱས་པའི་འཕགས་ཆོས་སོ། །དབྱིངས་ཞེས་པ་ནི། ཉི་འོད་སེང་གེས། དབྱིངས་ཀྱི་སྒྲ་ནི་མི་ཟད་པ་ལ་བྱའོ། །ཞེས་གསུངས་ཤིང་། དོན་ལ་སྲས་ཀྱི་འབྱུང་ཁུངས་དང་བདེ་བའི་ཡེ་ཤེས་བསྐྱེད་པའི་རྒྱུར་གྱུར་པའི་ཕྱིར་རམ། ཡུམ་རྣམས་དབྱིངས་ཀྱི་ཕྱག་རྒྱར་གྱུར་པའི་ཕྱིར་ཡང་དེ་སྐད་དུ་གྲགས་སོ། །བྱེ་བྲག་ནི་རྟོག་པའི་མཚན་ཏེ། དེ་ལ་སྣང་བ་ཞེས་པ་ནི་ནམ་མཁས་གོ་མ་ཕྱེ་ན་དངོས་པོ་ཐམས་ཅད་སྣང་མི་ནུས་པའི་ཕྱིར་ནམ་མཁའ་སྟེ། ཆོས་ཀྱི་ཁམས་རྣམ་ཤེས་ཀྱི་ཡུལ་ཡིན་པའི་ཕྱིར་ཐུགས་རྡོ་རྗེའི་རིགས་ཀྱི་ཡུམ་དབྱིངས་ཕྱུག་མའོ། །སྲ་བ་ནི་སྲ་བརྟན་མཁྲང་བའི་མཚན་ཉིད་ཅན་གྱི་སའི་ཁམས་ཏེ། བརྟན་ཅིང་རྟེན་དུ་གྱུར་པའི་ཕྱིར་སྐུའི་རིགས་ཀྱི་ཡུམ་སངས་རྒྱས་སྤྱན་མའོ། །མཉེན་པ་ནི་གཤེར་སྡུད་བརླན་པའི་མཚན་ཉིད་ཅན་གྱི་ཆུའི་ཁམས་ཏེ། རྒྱུད་བརླན་ཅིང་ཡོན་ཏན་སྡུད་པ་རིན་པོ་ཆེ་རིགས་ཀྱི་ཡུམ་མཱ་མ་ཀཱིའོ། །དྲོ་བ་ནི་ཚ་ཞིང་སྲེག་པའི་མཚན་ཉིད་ཅན་གྱི་མེའི་ཁམས་ཏེ། མཚན་འཛིན་གྱི་སྤུ་རིས་གསལ་བ་དང་ཤེས་རབ་ཀྱི་མེས་དག་པར་བྱེད་པའི་བདག་ཉིད་པདྨ་རིགས་ཀྱི་ཡུམ་གོས་དཀར་མོའོ། །བསྐྱོད་པ་ནི་ཡང་ཞིང་གཡོ་བའི་མཚན་ཉིད་ཅན་གྱི་རླུང་གི་ཁམས་ཏེ། བསྐྱོད་འདེགས་ཀྱི་བྱ་བ་བྱེད་པ་ལྟར་ཐོགས་པ་མེད་པའི་ལས་ཅན་ལས་རིགས་ཀྱི་ཡུམ་སྒྲོལ་མའོ། །དེ་ཡང་། འདི་ཉིད་ལས། ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །ཞེས་སོ། །དེ་ལྟར་དེ་བཞིན་གཤེགས་པ་རྣམས་དེ་ལྟ་བུའི་བཙུན་མོའི་ཚོགས་དང་ཐབས་ཤེས་གཉིས་སུ་མེད་པའི་ཚུལ་གྱིས་ཀུན་ཏུ་ཁྱབ་པར་བཞུགས་པ་སྟེ། འགྲེལ་ཆུང་ལས། ནམ་མཁའི་དབྱིངས་ནི་མཐའ་ཀླས་པར། །སྟོན་པའི་མཛད་སྤྱོད་རོལ་མོ་ཡིས། །ཏིལ་གྱི་གང་བུ་བཞིན་དུ་ཁྱབ། །སྟོན་པའི་ཁྱད་པར་ཡིན་པར་གྲགས། །ཞེས་སོ། །
གཉིས་པ་གནས་ཕུན་སུམ་ཚོགས་པ་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། ཁོག་གཞུང་ལས། གནས་ཀྱི་རང་བཞིན་དེ་བཞིན་ཉིད། །ངོ་བོ་འོག་མིན་གཞལ་ཡས་ཁང་། །ཞེས་སོ། །སྤྱིར་འོག་མིན་ལ། དོན་གྱི། རིག་པའི། གསང་བའི། འཇིག་རྟེན་གནས་ཀྱི། དབང་ཕྱུག་ཆེན་པོའི་འོག་མིན་དང་ལྔ། དང་པོ་ནི། ཆོས་ཀྱི་དབྱིངས་ཏེ། སངས་རྒྱས་ཐམས་ཅད་ཀྱི་རྟེན་ཡིན་པའི་ཕྱིར་དང་། རྣམ་རྟོག་དང་མཚན་མ་གང་གིའང་འོག་ཏུ་མ་གྱུར་པའི་ཕྱིར་ཏེ། རྒྱས་པ་ལས། གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །ཞེས་སོ། །གཉིས་པ་ནི། དེ་རྟོགས་པ་རང་རིག་པའི་ཡེ་ཤེས་ནི་གཉིས་འཛིན་གྱི་འོག་ཏུ་མ་གྱུར་པའི་ཕྱིར་དང་། ཡང་ན་ལོངས་སྐུའི་ཞིང་དང་ཆ་མཐུན་པར་ལྷག་པའི་ཏིང་ངེ་འཛིན་བསྒོམ་པ་སྟེ། དེ་ལས། རང་བཞིན་དཀྱིལ་འཁོར་ཇི་ལྟ་བར། །ཏིང་འཛིན་དཀྱིལ་འཁོར་བསྒོམ་པར་བྱ། །ཞེས་སོ། །དེ་ལ་བཏགས་པའི་འོག་མིན་ཞེས་ཀྱང་ཟེར་རོ། །གསུམ་པ་ནི། ཡུམ་གྱི་མཁའ་སྟེ། སྟོན་པ་གསང་བའི་སྐུའི་གནས་དང་མཚན་མའི་རྟོག་པ་རང་རྒྱུད་པའི་འོག་ཏུ་མ་གྱུར་པའི་ཕྱིར། དེ་ལྟར་ཡང་རྒྱས་པ་ལས། ནུབ་ཕྱོགས་འོག་མིན་གནས་མཆོག་ཏུ། །མ་ཆགས་པདྨའི་གདན་བཏིང་ནས། །དུས་གསུམ་རྒྱལ་བ་བཞུགས་པའི་གནས། །ཞེས་དང་། རྒྱུད་གཞན་ལས་ཀྱང་། རྡོ་རྗེ་བཙུན་མོའི་བྷ་ག་ལ་བཞུགས་སོ། །ཞེས་འབྱུང་སྟེ། ཆོས་ཀྱི་དབྱིངས་རྣམ་པར་དག་པ་ཡུམ་ལྔའི་མཁའ་ཀློང་གི་རང་བཞིན་ཡིན་པའི་ཕྱིར། འདིར་གཞལ་ཡས་སྤྱིའི་ཁྱད་པར་སོགས་ཀྱང་བཤད་དུ་རུང་ཞིང་། བཅོམ་ལྡན་འདས་ཞེས་པའི་མཚན་ལས་ཀྱང་གྲུབ་སྟེ། བྷ་ག་ཝཱན་གྱི་སྒྲ་ལས། བྷ་ག་ནི་ཡུམ་གྱི་མཁའ་དབྱིངས། ལྡན་པ་ནི་དེ་དང་གཉིས་སུ་མེད་པར་བཞུགས་པའི་དོན་ནོ། །བཞི་པ་ནི། གཟུགས་ཁམས་གནས་རིགས་བཅུ་བདུན་གྱི་ཡ་ཐ་གཙང་རིགས་ཀྱི་ལྷའི་གནས་དང་པོ་དེའོ། །དེ་ལ་དེར་གྲགས་པས་ན་གྲགས་པའི་འོག་མིན་ཞེས་བྱ་སྟེ། གཟུགས་ཅན་གྱི་གནས་གཞན་གྱི་འོག་ཏུ་མ་གྱུར་པའི་ཕྱིར། འདིར་ཁ་ཅིག་ལས། ཡོད་མིན་མེད་མིན་གྱི་སྐྱེ་མཆེད་ལ་:གྲངས་༼གྲགས་༽པའི་འོག་མིན་ཞེས་བཏགས་ཏེ། སྲིད་པའི་རྩེ་མོར་གྱུར་པའི་ཕྱིར་རོ། །ལྔ་པ་ནི། འདིར་འཆད་པའི་གནས་ལོངས་སྐུའི་བཞུགས་གནས་འོག་མིན་ཆེན་པོ་སྟེ། སྒྱུ་འཕྲུལ་རྡོ་རྗེ་ལས། གཙང་མའི་རིས་དག་རབ་སྤངས་པའི། །འོག་མིན་ཆེན་པོའི་གནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམས་སྤངས་པ། །སངས་རྒྱས་ཀུན་གྱི་སྤྱི་གཟུགས་ཏེ། །གདོད་ནས་ཐེག་ཆེན་མཛོད་ཉིད་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་སོ། །དེ་ལའང་། གནས་ཀྱི་ངོ་བོ། སྒྲ་དོན། གཏན་ལ་དབབ་པ་གསུམ། དང་པོ་ནི། དོན་དབྱིངས་དང་ཡེ་ཤེས་དབྱེར་མི་ཕྱེད་པའི་རྟགས་གཞལ་ཡས་ཁང་གི་དབྱིབས་དང་ཁ་དོག་ཏུ་རང་སྣང་བ་སྟེ་འཆད་པར་འགྱུར་རོ། །གཉིས་པ་ནི། ཨ་ཀ་ནིཥྛའི་སྒྲ་ལས་འོག་མ་མ་ཡིན་པ་སྟེ། དོན་གདུལ་བྱའི་བློ་ལས་འདས་ཤིང་། རྟགས་དེ་འཇིག་རྟེན་གནས་ཀྱི་འོག་མིན་ལས་ཉིས་འགྱུར་གྱིས་སྤགས་པའི་ཕྱིར། དེའང་རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉིས་འགྱུར་ཤིན་ཏུ་སྤགས་པ་ཡི། །ཞེས་སོ། །འདིར་འཕྲོས་དོན་ཉིས་འགྱུར་འཕགས་ཚུལ་གྱི་དོགས་པ་བཅད་པ་ནི། ཁ་ཅིག །འདི་ནས་འཇིག་རྟེན་གནས་ཀྱི་འོག་མིན་ལ་བར་ཐག་ཇི་ཙམ་ཡོད་པའི་ཉིས་འགྱུར། དེ་ནས་འོག་མིན་ཆེན་པོའི་བར་དུ་ཡོད་ཟེར་བ་སོགས་ཡ་རོལ་དུ་འཕགས་པར་འདོད་པ་ནི་མི་རིགས་ཏེ། མ་དག་པའི་འཇིག་རྟེན་སྤངས་པའི་ཕ་རོལ་ན་དག་པའི་ཞིང་བསྒྲུབ་ཏུ་མེད་པའི་ཕྱིར་དེས་ན་དམུས་ལོང་གིས་མ་མཐོང་བས་ཉི་ཟླའི་དཀྱིལ་འཁོར་མེད་པར་མི་འགྱུར་བ་ལྟར། མ་དག་པའི་འགྲོ་བ་ལ་མ་དག་པའི་ཞིང་དུ་སྣང་བ་ཙམ་གྱིས། དེ་ཉིད་དག་པའི་ཞིང་མ་ཡིན་པར་བསྒྲུབ་ཏུ་མེད་དེ། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །དོན་ལ་སེམས་ཅན་གྱིས་གར་ཁྱབ་ཏུ་རྒྱལ་བའི་སྐུ་དང་ཕྲིན་ལས་ཀྱིས་ཁྱབ་པའི་ཕྱིར་སངས་རྒྱས་ཀྱི་ཞིང་ལ་ཕྱོགས་དང་རིས་སུ་ཆད་པ་མེད་དོ། །དེའི་ཕྱིར་དག་མ་དག་གི་སྣང་བས་ཕྱེ་བ་ཉིད་དུ་ཤེས་པར་བྱ་སྟེ། དྲི་མ་མེད་པར་གྲགས་པའི་མདོ་ལས། བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ། བཅོམ་ལྡན་འདས་ཀྱིས་བཀའ་སྩལ་པ། ངའི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ། ཁྱེད་རྣམས་ཀྱིས་མི་མཐོང་ངོ་། །ཞེས་གསུངས་པ་ལྟར་རོ། །དེ་བས་ན་སྤགས་ལུགས་ལ་ཉིས་འགྱུར་ཞེས་བརྗོད་པའང་། གཙང་མའི་འོག་མིན་ནི་རྒྱུའི་བྱང་སེམས་དང་པོའི་བདེན་པ་མཐོང་བའི་གནས་ཡིན་ལ། འོག་མིན་ཆེན་པོ་ནི་ངེས་དོན་དུ་འཚང་རྒྱ་བའི་གནས་ཡིན་པས། སློབ་ལམ་དང་པོ་ནས་བདེན་པ་མཐོང་བ་ལ་ཡུན་ཇི་ཙམ་ཐོགས་པའི་ཉིས་འགྱུར་མི་སློབ་པའི་སའི་བར་དུ་དགོས་པས་ན་དེ་སྐད་ཅེས་བྱའོ་ཞེས་གསུངས་པ་ཉིད་ལེགས་པར་མངོན་ནོ། །གསུམ་པ་ནི། གནས་དེའི་རང་བཞིན་གང་ཞེ་ན། དེའི་རང་བཞིན་ནི་ཆོས་ཀྱི་དབྱིངས་ཉིད་ཡིན་པའི་ཕྱིར་མཐའ་དབུས་ལ་སོགས་པའི་སྤྲོས་པ་ཐམས་ཅད་ལས་འདས་པ་སྟེ། འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་སོ། །དེ་ཉིད་ཀྱི་ངང་ལས་ཡོན་ཏན་གྱི་ཁྱད་པར་རང་སྣང་བའི་ཕྱིར། གནས་ཀྱི་ངོ་བོའི་ཆོས་རྣམས་དབྱེ་བར་བྱ་སྟེ། དེའང་སྔ་མ་ལས། གཞལ་ཡས་གཞི་༡དང་རྒྱུ་༢དང་རྒྱ༣། །དབྱིབས་༤དང་གློ་འབུར་༥རྩེ་མོ་༦དང་། །རྒྱན་༧དང་སྒོ་ཁྱུད་༨རྟ་བབས་༩དང་། །མཚན་ཉིད་༡༠གདན་གྱི་༡༡རྣམ་པ་སྟེ། །བཅུ་གཅིག་དག་གིས་དབྱེ་བར་བྱ། །ཞེས་པ་ལྟར་ལས། དང་པོ་ལ་སྤྱིའི་འོག་གཞི་ནི། ཡེ་ཤེས་ལྔ་མཚོན་པའི་ཕྱིར་རྒྱ་ཁྱོན་ཚད་མེད་པའི་འཁོར་ལོ་སྟེ། བཤད་རྒྱུད་རོལ་པ་ཆེན་པོ་ལས། འཁོར་ལོ་ཆེན་པོའི་ས་གཞི་ལ། །ཁང་པ་གྲུ་བཞི་རྣམ་པར་བརྗིད། །ཅེས་སོ། །ནང་གི་འོག་གཞི་ནི་སྒོ་དང་ཁྱམས་སོགས་ནས་ལྟེ་བའི་བར་རྡོ་རྗེ་འགྲེང་བུ་རེས་སྤགས་པ་སྟེ། ཐེག་པ་འོག་མ་ནས་འདིར་འཕགས་པའི་ཕྱིར། གཉིས་པ་རྒྱུ་ནི། རིན་པོ་ཆེ་སྟེ། ཡེ་ཤེས་ཉིད་དབྱིབས་དང་ཁ་དོག་ཏུ་རང་སྣང་བས་རེ་བ་སྐོང་བའི་ཕྱིར། གསུམ་པ་རྒྱ་ནི། ཕྱོགས་ཀུན་ཏུ་ཡོངས་སུ་མ་ཆད་པ་སྟེ། ཆོས་དབྱིངས་མཐའ་ཀླས་པར་ཁྱབ་པར་རང་སྣང་བའི་ཕྱིར། བཞི་པ་དབྱིབས་ནི། གྲུ་བཞི་པ་སྟེ། དེ་བཞིན་གཤེགས་པའི་ཆེ་བའི་ཡོན་ཏན་ཐམས་ཅད་ཀྱིས་འདིར་ཁྱབ་པ་དང་མཉམ་པ་དང་རྒྱས་པའི་ཕྱིར། དེ་ཡང་རྒྱ་ཆེར་འགྲེལ་ལས། མཉམ་པའི་ཕྱིར་དང་ཁྱབ་པའི་ཕྱིར། །རྒྱས་པའི་ཕྱིར་ནི་གྲུ་བཞིར་གྱུར། །ཞེས་སོ། །ལྔ་པ་གློ་འབུར་ནི། གྲུ་ཆད་ལས་ཕྱིར་འཕྱར་བའི་དབྱིབས་མཁར་གྱི་འབུར་ཐབས་ལྟ་བུ་དང་། ཁ་དོག་རིགས་བཞིའི་མདོག་ཅན་གྱི་རིན་པོ་ཆེའི་གློ་འབུར་གྱིས་མཛེས་པ་སྟེ། ཡེ་ཤེས་རེ་རེའང་ལྷག་པའི་ཡེ་ཤེས་བཞི་བཞི་དང་ལྡན་པའི་ཕྱིར། དྲུག་པ་རྩེ་མོ་ནི། ཚད་དཔག་ཏུ་མེད་པ་དང་། དབྱིབས་བུམ་པ་ཟླུམ་པོའི་རྣམ་པར་འཁྱིལ་བ་སྟེ། རིམ་པ་བཞིན་ཆོས་ཀྱི་དབྱིངས་ཀྱི་ཡེ་ཤེས་་ལ་མཐར་ཐུག་པ་མེད་ཅིང་སྤྲོས་པ་དང་བྲལ་བའི་ཕྱིར། བདུན་པ་རྒྱན་ལ་བདུན་ལས། འོག་གཞིའི་རྒྱན་ནི། གཞལ་ཡས་ཁང་གི་ལྟེ་བར་ཡེ་ཤེས་ལྔ་མཚོན་པའི་འཁོར་ལོ་རྩིབས་བཞི་པའི་མཐའ་ཆོས་ཉིད་མཚོན་པའི་རྡོ་རྗེའི་ར་བ་ཟླུམ་པོས་བསྐོར་བའོ། །ལོགས་རྒྱན་ནི། གཉིས་སུ་མེད་པའི་ཡེཤེས་ཀྱི་རྩལ་སྣང་མ་འགགས་པའི་ཕྱིར། པཉྩ་རེ་ཁའི་རྩིག་པའི་སྟེང་དུ། རིན་པོ་ཆེའི་ཕ་གུ་དང་། ཕྲེང་བ་དང་། ཆུན་འཕྱང་དང་། ཤར་བུ་དང་། མདའ་ཡབ་ལ་སོགས་པའི་རྒྱན་དང་། འདོད་པའི་ཡོན་ཏན་ལྔ་མ་སྤངས་རྣམ་དག་རྒྱན་དུ་རྫོགས་པའི་ཕྱིར། འདོད་ཡོན་གྱི་ལྷ་མོས་ཕྱོགས་ཀུན་ཏུ་འཁྲིགས་པའོ། །དེ་ལྟར་ཡང་འོད་རིམ་ལས། ཡེ་ཤེས་རྩིག་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧར། །ཕ་གུ་མཛེས་པའི་བད་དང་ལྡན། །དྲྭ་བ་དྲྭ་ཕྱེད་མགུལ་འཁོར་ལྡན། །གཟུགས་སོགས་ལྷ་མོ་འཁྲིགས་པ་སྟེ། །སྣ་ཚོགས་མཆོད་བྱེད་རོལ་མོ་ཡིས། །བར་སྣང་ཁམས་ཀུན་སྤྲིན་ཕུང་བཞིན། །ཞེས་སོ། །སྟེང་རྒྱན་ནི། བུམ་པ་ཟླུམ་པོའི་སྟེང་དུ་བྲེ་མཚོན་པའི་ཕྱུར་བུའི་རྩེར། པདྨ་ལ་གནས་པའི་འཁོར་ལོ་རིམ་པ་བཅུ་གསུམ་གྱི་སྟེང་ན་རཏྣའི་གདུགས་ཀྱིས་མཛེས་ཤིང་ཏོག་དང་ལྡན་པ་སྟེ། རྡོ་རྗེ་མེ་ལོང་ལས། ཆོས་ཀྱི་འཁོར་ལོ་བསྐོར་བྱས་ཤིང་། །ཉོན་མོངས་ཚད་པའི་གདུང་བ་སེལ། །ཐུགས་རྗེ་གདུགས་ཀྱི་འཁོར་ལོ་བསྟན། །མ་ལུས་གཅིག་ཏུ་འདུས་པ་ནི། །ཏོག་སྟོང་འོད་ཟེར་འབར་བ་སྟེ། །ཞེས་དང་། རྟ་བབས་ཀྱི་རྩེར་ཡང་གདུགས་ཀྱི་རྩ་བར་འཁོར་ལོ་རི་དྭགས་ཀྱིས་བསྐྱོད་པ་དང་། གཞན་ཡང་ཕྱོགས་ཀུན་ཏུ་རྔ་ཡབ་དང་བ་དན་ལ་སོགས་པས་མཛེས་པར་སྤྲས་པའོ། །སྒོ་དང་རྟ་བབས་ཀྱི་རྒྱན་ནི། རྔམ་གློག་ལས། གཞལ་ཡས་དེ་ཡི་སྒོ་བཞི་ན། །གླང་སེང་གཉིས་ཀྱིས་མཛེས་པར་བརྒྱན། །རྟ་བབས་རྣམས་ཀྱི་འཁོར་ལོ་ལ། །གསེར་གྱི་དྲིལ་བུ་འབར་བ་དག །དཀོན་མཆོག་གསུམ་གྱི་སྒྲ་ཡང་སྒྲོག །ཅེས་སོ། །ཕྱིའི་རྒྱན་ནི། འོད་རིམ་ལས། སྒོ་བཞི་གཡས་གཡོན་ལྗོན་ཤིང་དང་། །དཔག་བསམ་ཤིང་ཟུང་ཙོང་ཙོང་སྦྲེལ། །དྲིལ་བུ་གཡེར་ཁ་ཐེག་ཆེན་སྒྲོག །བཀྲ་ཤིས་བྱ་སྙན་སྒྲ་སྒྲོག་ལྡན། །ཡིད་བཞིན་རིན་ཆེན་བརྒྱད་བསྐོར་བ། །རིན་ཆེན་ཕུང་པོ་བཞི་གཉིས་ལྡན། །ཞེས་སོ། །ངོ་བོ་ཉིད་ཀྱི་རྒྱན་ནི། བདེན་བཞི་མཚོན་པའི་གྲུ་ཆད་དང་བདེན་པ་དབྱེར་མེད་མཚོན་པའི་བར་ཁྱམས་ལ་སོགས་པ་སྟེ། གྲུ་ཆད་བཞིས་བརྒྱན་སོགས་གསུངས་པ་ལྟར་རོ། །བདག་པོའི་རྒྱན་ནི། དཀྱིལ་འཁོར་བཞི་བཅུ་གཉིས་ཀྱིས་བརྒྱན། །ཞེས་པའི་དོན་ཏེ། འདི་ལ་བདག་པོ་ཉིད་རྒྱན་དུ་བཞག་པ་དང་། དེའི་སྤྲུལ་པའི་འཕྲོ་འདུ་ལ་རྒྱན་དུ་བཤད་པ་དང་། བདག་པོ་ལ་ཡོད་པའི་ཡོ་བྱད་རྒྱན་དུ་བཤད་པ་གསུམ་ལས། རོག་ཊཱིཀ་པ་དང་པོ་འཐད་གསུངས། མང་མཁར་བ་ཕྱི་མ་ལྟར་བཞེད་དེ། ཁྱིམ་བདག་གི་ལོངས་སྤྱོད་ཀྱིས་ཁང་པ་མཛེས་པ་བཞིན་ནོ་གསུངས། གོང་མ་ཕལ་ཆེར་སྤར་ཁབ་ཀྱི་རྗེས་སུ་འབྲངས་ཏེ་བར་མ་ལྟར་བཞེད་དོ། །བརྒྱད་པ་སྒོ་ནི། རྣམ་ཐར་བཞིའི་ཏིང་ངེ་འཛིན་གྱི་སྒོ་ནས་བྱང་ཆུབ་ཆེན་པོར་ལྷུན་གྱིས་འཇུག་པའི་ཕྱིར་སྒོ་བཞི་སྟེ། ལེ་ལག་ལས། སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་ཤར། །ཞེས་སོ། །དེའང་ཐང་སྒོ་ལྟ་བུ་མ་ཡིན་ཏེ། སྒོ་ཁྱུད་ཀྱི་ཟླས་དྲངས་པའི་འགྲམ་ལོགས་དང་། ཡ་ཕུབས་རྡོ་རྗེའི་དྲྭ་མིག་ཅན་ནོ། །དགུ་པ་རྟ་བབས་ནི། རྡོ་རྗེ་མེ་ལོང་ལས། ལམ་བརྒྱད་རིམ་པར་བགྲོད་པ་ཡིས། །འབྲས་བུའི་ཡོན་ཏན་ཀུན་རྫོགས་པས། །རྟ་བབས་རྒྱུ་འབྲས་བཅུ་དྲུག་བསྟན། །ཅེས་པ་ལས། རྒྱུའི་རྟ་བབས་ནི། མཚོན་སྒོ་རྣམ་ཐར་བཞིའི་སྒོ་ནས་མཚོན་བྱ་མི་གནས་པའི་ཡེ་ཤེས་ལ་འཇུག་པ་དེ་ཡང་། ཐུན་མོང་རྣམ་ཐར་གྱི་ཐེག་པ་བརྒྱད་ལ་སྦྱངས་པས་རྟོགས་པའི་རྟགས་སུ། སྒོ་ཕུབས་ཀྱི་ཕྱི་ནང་གཉིས་སུ་ཐེམ་སྐས་བཞི་བཞི་སྟེ་བརྒྱད་ནི་བབས་ཞོན་གྱི་རྟ་བབས་ཏེ། ལེ་ལག་ལས། དེར་འགྲོ་ལམ་སྟེགས་བརྒྱད་དང་ལྡན། །རྟ་བབས་བརྒྱད་དུ་གྱུར་པ་ཡིན། །ཞེས་དང་། འགྲེལ་ཆུང་ལས། ཉན་ཐོས་རང་རྒྱལ་བྱང་ཆུབ་དང་། །བྱ་བའི་རྒྱུད་དང་གཉིས་ཀའི་རྒྱུད། །རྣལ་འབྱོར་བསྐྱེད་དང་རྫོགས་པ་ཡི། །རྣམ་ཐར་བརྒྱད་ཕྱིར་རྟ་བབས་བརྒྱད། །ཅེས་སོ། །འབྲས་བུའི་རྟ་བབས་ནི། ཐེག་པ་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ། སྒོ་ལོགས་ཀྱི་ཕྱི་ཟུར་བཞི་ནས་ཀ་བས་བཏེགས་པའི་སྒོ་ཁང་གི་སྟེང་དུ་རྒྱན་གྱི་རྟ་བབས་བརྒྱད་དེ། སྒྱུ་འཕྲུལ་བྱེ་བྲག་བསྟན་པ་ལས། དེ་ཡི་གྲུབ་པའི་མཐའ་རྫོགས་པའི། །ཡོན་ཏན་བརྒྱད་ཕྱིར་རྟ་རྐང་དང་། །ཆུ་སྐྱེས་སྒྲོམ་དང་ཟ་ར་ཚགས། །སྣ་འཕྱང་ཆུན་འཕྱང་ཤར་བུ་དང་། །ཁྱུང་མགོ་མཛེས་པས་རིམ་པར་འཁྲིགས། །ཞེས་སོ། །དེ་ལ་སྒོ་ཁང་དང་སྒོའི་བསིལ་ཁང་གི་མུན་པ་སེལ་བྱེད་གླང་རྒྱབ་ལ་སོགས་པས་སྤྲས་པའོ། །བཅུ་པ་མཚན་ཉིད་ནི། རང་བྱུང་ཡེ་ཤེས་ལ་ཕྱི་གཟུང་བའི་ཡུལ་དང་། ནང་འཛིན་པའི་སེམས་གཉིས་སུ་མེད་པས་ཤེས་བྱའི་དཀྱིལ་འཁོར་ཀུན་ཀྱང་རང་བྱུང་ཡེ་ཤེས་སུ་གསལ་བ་ལས་གཞན་མ་དམིགས་པའི་ཕྱིར། ཆོས་ཀྱི་དབྱིངས་རྡོ་རྗེ་ཀུན་ཏུ་བཟང་མོའི་བྷ་ག་ཉིད་དུ་འདུས་པས་ན་ནང་ཞེས་བྱ་སྟེ། འགྲེལ་ཆུང་ལས། གནས་མཆོག་མཚན་ཉིད་བརྗོད་པ་ནི། །གཞལ་ཡས་ཕྱི་ནང་ཆོས་དབྱིངས་ནང་། །བྷ་ག་ཉིད་དུ་བསྡུས་པས་ན། །ཀུན་ཏུ་ནང་ཞེས་བརྗོད་པ་ཡིན། །ཞེས་སོ། །དེ་ལྟར་ན་ཆོས་ཀྱི་དབྱིངས་དེའི་ངང་ལས། ཡེ་ཤེས་ཀྱི་འཕྲུལ་པར་རང་སྣང་བའི་གཞལ་ཡས་ཁང་རྒྱན་དང་བཅས་པ་ཐམས་ཅད་ཀྱང་ཤེལ་གྱི་སྦུ་གུར་རིན་པོ་ཆེ་སྣ་ཚོགས་བཅུག་པ་ལྟར་མི་བསྒྲིབ་པར་གསལ་བའི་རང་བཞིན་ཅན་ནོ། །བཅུ་གཅིག་པ་གདན་ལ། ཆོས་ཀྱི་འཁོར་ལོ་བསྐོར་བའི། སའི་ཁྱད་པར་བགྲོད་པའི། ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་ནོ། །དང་པོ་ནི། སྔར་གྱི་འོག་གཞིའི་རྒྱན་དེ་ཉིད་དོ། །གཉིས་པ་ནི། རང་བྱུང་གི་ཡེ་ཤེས་རྟོགས་པའི་རིག་པ་ལ་འབྲས་བུའི་ཆོས་མི་འཇིགས་པ་བཞི་སོགས་ལྷུན་གྱིས་གྲུབ་པས། ཡང་དག་པར་རྫོགས་པའི་སངས་རྒྱས་སུ་བསྟན་ཅིང་ངེས་པར་བྱས་པའི་རྟགས་སུ་སེང་གེ་ལ་སོགས་པ་སེམས་ཅན་ལྔའི་གདན་བྱུང་བ་ནི་ཡོན་ཏན་རྟགས་ཀྱི་གདན་ཁྲི་སྟེ། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་བཞི་ཡིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་སོ། །དེ་ལ་མི་འཇིགས་པ་བཞི་ནི། འགྲེལ་ཆུང་ལས། མངོན་སངས་རྒྱས་དང་ཟག་པ་ཟད། །བར་མི་ཆོད་དང་ངེས་པར་འབྱུང་། །ཞེས་སོ། །སྟོབས་བཅུ་ནི། གནས་དང་གནས་མིན་ཡང་དག་མཁྱེན། །དུས་གསུམ་ལས་འབྲས་རྣམ་སྨིན་མཁྱེན། །ཁམས་རྣམས་སྣ་ཚོགས་མཁྱེན་པ་དང་། །ཕ་རོལ་མོས་པ་མཁྱེན་པའི་སྟོབས། །དབང་པོ་མཆོག་དང་མཆོག་མིན་མཁྱེན། །ཀུན་ཏུ་འགྲོ་ལམ་མཁྱེན་པའི་སྟོབས། །བསམ་གཏན་ཐར་དང་ཉོན་མོངས་མཁྱེན། །སྔོན་གྱི་གནས་མཁྱེན་སྟོབས་དང་ནི། །སྐྱེ་དང་འཆི་འཕོ་མཁྱེན་པ་དང་། །ཟག་པ་:ཟད་༼ཟག་༽མེད་སེམས་གྲོལ་མཁྱེན། །དེ་བཅུ་སྟོབས་སུ་གྱུར་པས་ན། །འབྲས་བུ་མངོན་ཤེས་དྲུག་ཡིན་ནོ། །རྫུ་འཕྲུལ་གྱི་རྐང་པ་བཞིའང་། འདུན་དང་བརྩོན་འགྲུས་སེམས་དང་ནི། །དཔྱོད་པའི་ཏིང་འཛིན་སྤོང་བ་ཡི། །འདུ་བྱེད་རྣམས་ཏེ་རྐང་པ་བཞིས། །ཡེ་ཤེས་བཞི་གྲུབ་འབྲས་བུ་སྟེ། །ཆོས་དབྱིངས་ཡེ་ཤེས་ཀུན་ལ་ཁྱབ། །དབང་བཅུའང་། ཡོ་བྱད་སྐྱེ་བ་ཚེ་ལ་དབང་། །ཡེ་ཤེས་ཆོས་དང་སེམས་དང་ལས། །རྫུ་འཕྲུལ་སྨོན་ལམ་ཆོས་རྣམས་ཀྱིས། །ཁམས་གསུམ་ཀུན་གྱི་དབང་ཕྱུག་རྒྱལ། །ཕྲིན་ལས་བཞི་ཡང་། ཞི་རྒྱས་དབང་དྲག་ལས་རྣམས་ཀྱིས། །ཐོགས་མེད་ལས་རྣམས་ལྷུན་གྱིས་གྲུབ། །ཅི་ལའང་ཐོགས་པ་མེད་པར་སྤྱོད། །ཅེས་སོ། །འོ་ན་སེམས་ཅན་གྱི་གདན་དེ་དག་ཐུགས་རིིག་པར་རང་སྣང་དུ་འདོད་པ་ལྟར་ན། རྒྱ་མཚོ་ལས། བྱང་ཆུབ་སེམས་དཔའ་སྨོན་ལམ་དབང་། །ཐོས་པའི་རྒྱ་མཚོ་བསགས་པའི་ཕྱིར། །ལུས་ནི་སེང་གེའི་གདན་དུ་ཕུལ། །ཞེས་དང་། སྤར་ཁབ་ལས། སེང་གེ་ལ་སོགས་པ་སྨོན་ལམ་གྱི་དབང་གིས་བྱང་ཆུབ་སེམས་དཔའ་གཅིག་ཀྱང་བརྒྱད་བརྒྱད་དོ། །ཞེས་སྨོན་ལམ་གུས་པའི་གདན་དུ་གསུངས་པ་དང་འགལ་ལོ་ཞེ་ན། རྒྱུད་ཐ་དད་པ་ལ་ལྟོས་ནས་འགལ་ཡང་། འདིར་ཡེ་ཤེས་རང་སྣང་དང་སྨོན་ལམ་གུས་པ་གཉིས་རྒྱུད་ཐ་དད་དུ་མ་གྲུབ་པས་མི་འགལ་ཏེ། དཔེར་ན་དགེ་བཤེས་ཀྱི་ཆིབས་དེ་རང་གི་བསོད་ནམས་ཀྱིས་གྲུབ་པ་དང་། གཞན་གྱི་དད་པས་ཕུལ་བ་གཉིས་རྟ་གཅིག་གི་སྟེང་དུ་མཚུངས་པ་བཞིན། རྒྱལ་བ་ལ་མི་འཇིགས་པ་བཞི་སོགས་ལྷུན་གྱིས་གྲུབ་པའི་རྟགས་སུ་སྣང་བ་དང་། བྱང་སེམས་སྨོན་ལམ་གྱི་དབང་གིས་རང་དབང་ཅན་དུ་སེང་གེ་ལ་སོགས་པར་སྤྲུལ་ཏེ་གུས་པས་ལུས་གདན་དུ་ཕུལ་ནས་རྣ་བས་ཆོས་ཉན་པའི་ཕྱིར་མི་འགལ་ལོ་གསུངས་སོ། །གཞན་ཡང་གསང་བའི་ཐེག་པ་འདི་ནི། འོག་མ་ལ་ཉམ་མི་ང་ཞིང་མི་འཇིགས་པ་དང་། འོག་མར་མི་ཚུད་པའི་དོན་འདིར་ཤོང་ཞིང་ཆུད་པའི་སྟོབས་དང་། གདུལ་བྱ་རྣམས་སྨིན་གྲོལ་གྱི་སར་མྱུར་དུ་བཀྲི་བའི་རྫུ་འཕྲུལ་དང་། ལས་ཉོན་མ་སྤངས་པར་དབང་དུ་བྱེད་པ་དང་། ཆགས་ཐོགས་མེད་པའི་ཕྲིན་ལས་ཀྱིས་གདུལ་བྱ་འདུལ་བའི་ཕྱིར་ཏེ། རིམ་བཞིན་སེང་གེ་ལ་སོགས་པ་དང་སྦྱར་རོ། །དེའང་ཐེག་པ་བརྒྱད་ལ་བགྲོད་ནས་འབྲས་བུའི་ཡོན་ཏན་ཐུགས་སུ་ཆུད་པའི་རྟགས་སུ་སེང་གེ་ལ་སོགས་པ་རེ་རེའང་བརྒྱད་བརྒྱད་མཇུག་མ་ནང་དུ་བསྣོལ་ནས་རིན་པོ་ཆེའི་ཁྲི་རྐང་འདེགས་པའི་ཕྱིར། སའི་ཁྱད་པར་བགྲོད་པའི་གདན་ཞེས་གྲགས་སོ། །གསུམ་པ་ནི། རྒྱལ་བའི་ཐུགས་རང་བཞིན་གྱིས་འོད་གསལ་ཞིང་ཐབས་ཤེས་དབྱེར་མེད་པའི་བརྡར་ཉི་ཟླའི་གདན་དང་། པདྨ་ནི་འདམ་ལས་སྐྱེས་ཀྱང་ཉེས་སྐྱོན་གྱིས་མ་གོས་པ་ལྟར་མཐའི་སྐྱོན་གྱིས་གོས་པ་མེད་པ་པདྨའི་གདན་དང་། ཡིད་བཞིན་གྱི་རེ་བ་སྐོང་བའི་རྟགས་སུ་རིན་པོ་ཆེའི་གདན་དང་། དེ་ཀ་བས་བཏེགས་པའི་མཛོད་མིག་བདུན་ལྡན་ནི་དཀོར་བདུན་ལྷུན་གྱིས་གྲུབ་པའི་བརྡའོ། །འདིར་གདན་གྱི་བརྩེགས་ལུགས་ནི། སྐྱེས་བུ་ལྔ་ལ་ལྔ་བརྩེག་སྟེ། །སེམས་དཔའ་ལ་ནི་སུམ་བརྩེག་གོ །ཉི་རྐྱང་ཁྲོ་ལ་པད་རྐྱང་ཐུབ། །ཀུན་བཟང་ཡབ་ཡུམ་བཞི་བརྩེག་གོ །ཞེས་བླ་མ་གོང་མ་རྣམས་གསུངས་ཏེ་འོད་རིམ་དང་འགྲེལ་པ་མུན་སེལ་གྱི་བཞེད་པར་མངོན་ནོ། །སྤྱན་འགྲེལ་དུ། ཀུན་བཟང་ཡབ་ཡུམ་དཀྱིལ་འཁོར་ལ་འགོད་པའི་ཚེ་སུམ་བརྩེག་དང་ཆོས་འཆད་པའི་ཚེ་ལྔ་བརྩེག
སྒོ་བ་ལ་པད་ཉི་བརྩེག་མ་སྟེ་གཞན་འདྲའོ། །གདན་བརྩེགས་ཀྱི་ཟླ་བ་སྟེང་དུ་འོང་བ་གང་ཞེ་ན། སྤྱན་འགྲེལ་ལས། གཙོ་བོ་ནི་ཤེས་རབ་ལ་སྤྱོད་པའི་ཕྱིར་དང་ནང་གི་ཆུ་སྐྱེས་ཀྱི་ལྟེ་བའི་ཉི་མ་ལ་ཟླ་བ་བརྟེན་པའི་ཕྱིར་རི་བོང་ཅན་སྟེང་ན་གནས་སོ། །ཞེས་པ་ནི་གསང་བ་ལྟར་བཤད་པའོ། །གཞན་དུ་གྲོལ་ལམ་ལྟར་ན་གཙོ་བོར་ཐབས་སྣང་བ་འགགས་པ་མེད་པ་མཚོན་པའི་ཕྱིར་ཟླ་བ་སྟེང་དང་། ནང་ལྟར་ན་ལྟེ་བའི་ཨ་ཐུང་གི་སྟེང་དུ་སྤྱི་བོའི་ཧཾ་ཡིག་གམ། སྙིང་གའི་སྲོག་མི་ཤིགས་པའི་ཐིག་ལེར་གནས་པའི་ཕྱིར་རོ། །དེ་དག་གིས་གནས་རྒྱས་པར་བསྟན་ཏེ། རྒྱ་མཚོ་ལས། དགའ་བདེ་ཡང་དག་རྫོགས་པའི་གནས། །ཕྱོགས་བཅུ་དུས་བཞི་རྫོགས་པ་ཡི། །མ་ལུས་འདུས་པའི་གཞལ་ཡས་ཁང་། །བདག་པོ་རྒྱན་དང་བཅས་པ་ཉིད། །འཇིག་རྟེན་གནས་ཀྱི་འོག་མིན་ལས། །ཉིས་འགྱུར་ཤིན་ཏུ་སྤགས་པ་ན། །ངོ་བོ་མཐའ་གསུམ་ལས་འདས་པ། །མ་སྤངས་རྒྱན་རྫོགས་གཞལ་ཡས་ཁང་། །ཡོན་ཏན་ལྔ་ཡི་བདག་པོ་སྟེ། །གྲུ་བཞི་སྤྱི་བོ་འཁྱིལ་སྣང་བའོ། །ཞེས་སོ། །
གསུམ་པ་འཁོར་ཕུན་སུམ་ཚོགས་པ་ལ། རྣམ་གྲངས་དངོས་དང་། ཞར་ལ་དེ་དག་གི་ཚད་བཤད་པའོ། །དང་པོ་ལའང་ལྷན་ཅིག་པ་དང་། གོ་ཕྱེ་བའི་འཁོར་གཉིས་ཏེ། ཁོག་གཞུང་ལས། ལྷན་ཅིག་འཁོར་དང་གོ་ཕྱེ་བ། །ཞེས་སོ། །དང་པོ་ལ། རང་བཞིན་གཉིས་སུ་མེད་པའི། རིག་པ་ཁྱད་པར་ཅན་གྱི། དད་པས་གཏམ་ཉན་པའི་འཁོར་རོ། །དང་པོ་ནི། དེ་ཉིད་ལས། ཉིད་ལས་མི་གཞན་རིགས་ལྔ་དང་། །ཞེས་པས་འཆད་པའི་སྐྱེས་བུ་ལྔ་སྟེ་བཤད་གྲུབ་བོ། །གཉིས་པ་ནི། སྟོན་པའི་ཐུགས་རང་རིག་པའི་ཡེ་ཤེས་ཀྱི་ཁྱད་པར་ལས་རང་སྣང་བའི་ཕྱིར་རིག་པ་ཁྱད་པར་ཅན་གྱི་འཁོར་ཞེས་བྱ་སྟེ། རྒྱ་མཚོ་ལས། དེ་བཞིན་ཐུགས་ཀྱི་ཁྱད་པར་ལས། །རང་སྣང་རྒྱལ་བ་སེམས་སོགས་དང་། །ཞེས་སོ། །དེ་ལའང་གཉིས་ཏེ། རྒྱལ་སྲས་སེམས་དཔའི་འཁོར་དང་། འཇོམས་བྱེད་ཁྲོ་བོའི་འཁོར་རོ། །དང་པོ་ལ་སྤྱི་དང་། བྱེ་བྲག་གི་མཚན་གཉིས་ལས། དང་པོ་ནི་མིག་ཤེས་ལ་སོགས་པའི་རྟོག་ཚོགས་རྣམས་ཡེ་ནས་ཆོས་ཉིད་བྱང་ཆུབ་ཀྱི་སེམས་ཡིན་པ་ལས། ཡིན་པ་ལྟར་མངོན་དུ་གྱུར་པའི་འབྲས་བུ་ནི་བྱང་ཆུབ་ཆེན་པོའོ། །དེ་ལྟར་རྒྱུ་འབྲས་ལྟར་སྣང་ཡང་དོན་དམ་པར་ལྷ་རྟོག་དབྱེར་མི་ཕྱེད་པས་ན་རྡོ་རྗེ་སྟེ། འགྲེལ་ཆུང་ལས། འཁོར་གྱི་བཀོད་པ་ཇི་སྙེད་པ། །ཁམས་དང་སྐྱེ་མཆེད་ཡིན་པར་གྲགས། །རྣམ་ཤེས་ཡུལ་དང་དབང་པོ་དང་། །དུས་དང་ཕྱིན་ཅི་མ་ལོག་རྣམས། །བྱང་ཆུབ་ཆེན་པོའི་རང་བཞིན་དུ། །ལྷུན་གྱིས་གྲུབ་པའི་དཀྱིལ་འཁོར་ཡིན། །ཞེས་སོ། །ཡུམ་གྱི་མཚན་བཙུན་མོ་ནིི་སྔར་ལྟར་ལས། ཁྱད་པར་ཡུལ་བཞིས་རྣམ་ཤེས་བཞི་བསྐྱེད་པ་དང་། དུས་བཞིས་གོ་ཕྱེ་ནས་དབང་པོ་བཞི་བསྐྱེད་པའི་ཕྱིར་རོ། །གཉིས་པ་ནི། ནང་སེམས་ཡབ་ཡུམ་ལ། མཐོང་བ་ལ་སོགས་པར་སྨོས་པ་ནི། མིག་རྣ་བ་སྣ་ལྕེའི་རྣམ་ཤེས་བཞི་སྟེ། མིག་དབང་ལ་བརྟེན་ནས་མིག་ཤེས་ཀྱིས་ཡུལ་གཟུགས་མཐོང་བ་ལ་སོགས་ཡིན་པའི་ཕྱིར། དེ་དག་རིམ་པ་བཞིན། སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། སྤྱན་རས་གཟིགས་དབང་ཕྱུག་རྣམས་སོ། །དེ་རྣམས་ལ་ཐུགས་ཀྱི་སེམས་དཔར་གྲགས་ཏེ། འདི་ཉིད་ལས། ཀ་ནི་སྤྱན་གྱི་ཐུགས་ཀྱི་མཆོག །ཅེས་སོགས་དང་། སྤར་ཁབ་ལས། རྣམ་ཤེས་བཞི་པོ་ནི་རིག་པ་ཁོ་ནའི་ཕྱིར་ཐུགས་ཏེ། །ཞེས་སོ། །མཐོང་བར་བྱ་བ་སོགས་ནི། ཡུལ་གཟུགས་སྒྲ་དྲི་རོ་བཞི་སྟེ། མིག་ཤེས་སོགས་ཀྱིས་མཐོང་བྱ་ལ་སོགས་པའི་ཡུལ་ཡིན་པའི་ཕྱིར། དེ་དག་ཀྱང་། ལཱ་སྱ་མ་དང་། གཱིརྟི་མ་དང་། མཱ་ལེ་མ་དང་། ནཱིརྟི་མ་རྣམས་དང་རིམ་པར་སྦྱར་རོ། །དེ་རྣམས་ལ་སྐུའི་སེམས་མར་གྲགས་ཏེ། ཡུལ་བཞིས་རྣམ་པར་ཤེས་པའི་རྟེན་བྱེད་པའི་ཕྱིར། དེའང་། ཙ་ནི་སྤྱན་གྱི་སྐུ་ཡི་མཆོག །ཅེས་སོགས་དང་། རྡོ་རྗེ་ལས། རྣམ་ཤེས་བཞི་ཡིས་དམིགས་པའི་ཡུལ། །མཐོང་བར་བྱ་བ་ལ་སོགས་པ། །དམིགས་པར་བྱ་ཕྱིར་སྐུ་ཡི་མཆོག །ཅེས་སོ། །འདིར་ཁ་ཅིག་ན་རེ། རྟོག་པའི་གོ་རིམ་ཁོ་ན་ལྟར་སྦྱར་ན་ཡུལ་ཡུལ་ཅན་མ་འཁྲུལ་ནའང་། ལྷ་ཡབ་ཡུམ་སྦྱོར་བའི་ཚེ་རྣ་བའི་ཡུལ་རོ་དང་། ལྕེའི་ཡུལ་སྒྲར་བྱུང་བས་སྦྱར་ཚུལ་ནོར་ཏེ། ཅིའི་ཕྱིར་ན། སྤྱན་རས་གཟིགས་ཀྱི་ཡུམ་གཱིརྟི་མ་དང་། ཕྱག་རྡོར་གྱི་ཡུམ་ནཱིརྟི་མར་བྱུང་བས་སོ། །ཟེར་ན། ཡུལ་ཡུལ་ཅན་གྱི་དབང་དུ་བྱས་ན། དེ་ལྟར་བདེན་མོད་ཀྱང་། འདིར་རིགས་ཀྱི་དབང་དུ་བྱས་པའི་ཕྱིར། འགལ་བ་མེད་དེ། ཉི་འོད་སེང་གེའི་རྒྱ་ཆེར་འགྲེལ་ལས། རྒྱུད་འདིར་ནི་རིགས་ཁོ་ན་གཙོ་བོར་བྱས་ཏེ། མཉན་པར་བྱ་བ་སྒྲའི་ལྷ་མོ་རྣ་བའི་ཡུལ་ཡིན་ཡང་། རིགས་ཀྱི་དུས་སུ་གསུང་གི་རིགས་ཡིན་པས། འཇིག་རྟེན་དབང་ཕྱུག་གི་ཡུམ་དུ་ཤེས་པར་བྱའོ། །ཞེས་སོགས་གསུངས་པའི་ཕྱིར་རོ། །ཕྱི་སེམས་ཡབ་ཡུམ་ནི། རྣམ་ཤེས་བཞིས་ཡུལ་བཞི་མཐོང་བའི་བདག་རྐྱེན་དབང་པོ་བཞིས་བྱེད་པའི་ཕྱིར། མཐོང་བྱེད་ལ་སོགས་པར་སྨོས་སོ། །དེའང་མིག་རྣ་བ་སྣ་ལྕེའི་དབང་པོ་བཞི་ནི། རིམ་པ་ཇི་ལྟར་བར། བྱམས་པ་དང་། སྒྲིབ་པ་རྣམ་སེལ་དང་། ཀུན་ཏུ་བཟང་པོ་དང་། འཇམ་དཔལ་དབྱངས་སོ། །དེ་དག་ལ་གསུང་གི་སེམས་དཔའ་ཞེས་ཀྱང་གྲགས་ཏེ། དབང་པོས་ཡུལ་དང་ཤེས་པ་གཉིས་ཕྱི་ནང་གི་བརྡའ་སྦྱོར་བྱེད་པའི་ཕྱིར། པ་ནི་སྤྱན་གྱི་གསུང་གི་མཆོག །ཅེས་གསུངས་སོ། །ཡུམ་ནི་དུས་བཞིའི་ལྷ་མོ་སྟེ། འདས་པ་དང་། ད་ལྟར་དང་། འབྱུང་བ་སྟེ་མ་འོངས་པ་དང་། མ་བྱོན་པ་སྟེ་འབྱུང་བར་མ་ངེས་པའི་དུས་རྣམས་རིམ་པ་བཞིན། བདུག་སྤོས་མ་དང་། མེ་ཏོག་མ་དང་། མར་མེ་མ་དང་། དྲི་ཆབ་མ་རྣམས་ཏེ། རྔམ་གློག་ལས། འདས་པ་དང་ནི་དཔྱིད་ཀྱི་དུས་ཏེ་དྷཱུ་པེ་མ། །ད་ལྟར་བ་ནི་དབྱར་གྱི་དུས་ཏེ་པུཥྤེ་མ། །མ་འོངས་པ་ནི་སྟོན་གྱི་དུས་ཏེ་ཨཱ་ལོ་ཀེ །མ་ངེས་པ་ནི་དགུན་གྱི་དུས་ཏེ་གནྡྷེའོ། །ཞེས་སོ། །འདིའི་སྐབས་སུ་ཁ་ཅིག་ན་རེ། འདིར་དུས་བཞི་སྨོས་པས་དུས་ལོག་སྟེ། སྡེ་སྣོད་གཞན་དུ་དུས་གསུམ་ལས་མ་བཤད་པའི་ཕྱིར་ཟེར་བ་ནི། རང་གི་རང་བཞིན་གསལ་བར་སྒྲོག་པའི་སྨྲེ་སྔགས་ཏེ། མཛོད་ལས། ཆགས་གནས་འཇིག་སྟོངས་བཞི་དང་རྫོགས་ལྡན་ལ་སོགས་པའི་དུས་བཞི་བཤད་པ་དང་། དཀོན་མཆོག་བརྩེགས་པ་ལས་ཀྱང་། འོད་སྲུངས། སེམས་དང་ཆོས་ཀྱི་དེ་བཞིན་ཉིད་ནི་གང་ནས་ཀྱང་མ་འོངས། གང་དུའང་མ་སོང་། གར་ཡང་མི་གནས་པས་ན་མ་ངེས་པ་སྟེ་བསམ་གྱིས་མི་ཁྱབ་པའི་དུས་སོ། །ཞེས་དུས་གསུམ་དང་བསམ་གྱིས་མི་ཁྱབ་པའི་དུས་ཏེ་བཞིར་གསུངས་པ་སོགས་ཀྱང་། དུས་ལོག་པར་ཐལ་བ་བཟློག་ཏུ་མེད་དོ། །རིགས་པས་ཀྱང་གནོད་དེ། ཁྱེད་ཅག་དུས་གསུམ་ཁོ་ནར་འདོད་པ་དེ་ཚོད་དུ། ཁོ་བོ་ཅག་གིས། དུས་གསུམ་དུ་ངེས་པར་འདོད་པའང་མི་རིགས་པར་ཐལ། དུས་ཡིན་ན་གཉིས་ཁོ་ནར་ངེས་པའི་ཕྱིར་ཏེ། ད་ལྟར་དང་། ད་ལྟར་མ་ཡིན་པ་གཉིས་སུ་ངེས་པའི་ཕྱིར་བྱས་ན་ཅིས་འགོགཁོ་ན་རེ། ད་ལྟར་མ་ཡིན་པ་ལས་འདས་པ་དང་མ་འོངས་པ་གཉིས་སུ་ཕྱེ་བས་གསུམ་མོ་ཞེ་ན། དེ་འདྲ་དུས་བཞི་ལའང་མཚུངས་ཏེ། ད་ལྟར་མ་ཡིན་པ་ལས། འདས་མ་འོངས་མ་ངེས་པ་གསུམ་དུ་ཕྱེ་བའི་ཕྱིར་རོ། །དེས་ན་ལྷ་རྟོག་སྦྱར་བའི་དབང་དུ་འདིར་དུས་བཞིར་གྲངས་དང་གོ་རིམ་ངེས་པ་སྟེ། ཇི་ལྟར་ན། དུས་རིང་བ་དཔེར་བྱས་ན། བསྐལ་པ་གཅིག་ལ་ཆགས་གནས་འཇིག་སྟོངས་བཞིར་གྲངས་ངེས། དུས་ཐུང་བ་དཔེར་བྱས་ན། ལོ་གཅིག་ལ་དབྱར་དགུན་སྟོན་དཔྱིད་བཞི་དང་། ཉིན་ཞག་རེ་ལ་ཐུན་ཆེན་བཞི་ལ་སོགས་པར་གྲངས་ངེས་པའི་ཕྱིར། གོ་རིམ་ངེས་པ་ནི། ད་ལྟ་བསྐལ་པ་གནས་པའི་དུས་ལ་དཔེར་མཚོན་ན། གནས་པའི་དུས་འདི་ནི་རྒྱུ་སྤྱད་ཅིང་འབྲས་བུ་མ་སྤྱད་པའི་ཕྱིར་ད་ལྟ་བ་དང་། ཆགས་པ་ནི་རྒྱུ་འབྲས་གཉིས་ཀ་སྤྱད་ཟིན་པའི་ཕྱིར་འདས་པ་དང་། འཇིག་པ་ནི་རྒྱུ་འབྲས་ཚོགས་ལ་མ་སྤྱད་པའི་ཕྱིར་མ་འོངས་པ་དང་། སྟོངས་པ་ནི་རྒྱུ་འབྲས་ཡོད་ལ་མ་ཚོགས་པའི་ཕྱིར་འདས་མ་འོངས་གང་དུའང་མ་ངེས་པའི་དུས་སོ། །དེ་ལྟར་ཡང་རྔམ་གློག་ལས། རྒྱུ་འབྲས་ངེས་པ་མ་ཚོགས་པ། །འབྱུང་བར་མ་ངེས་དུས་ཞེས་གྲགས། །ཞེས་སོ། །དེ་ལ་ཁོ་ན་རེ། བསྐལ་པ་སྔར་སྟོངས་པ་ནི་འདས་པ་དང་། ཕྱིས་སྟོངས་པར་འགྱུར་པ་ནི་མ་འོངས་པའི་ཕྱིར་དུས་གསུམ་དུ་ངེས་སོ་ཞེ་ན། སྟོངས་པའི་དུས་དེ་ཉིད་གཞིར་བྱས་པ་ལ་འདས་མ་འོངས་གང་རུང་གཅིག་ཏུ་ཁ་ཚོན་མ་ཆོད་པས་མ་ངེས་པའི་དུས་སུ་ཅིའི་ཕྱིར་མི་འགྱུར། རྒྱུ་མཚན་དེའི་ཕྱིར་དུས་བཞིར་གྲངས་དང་གོ་རིམ་ངེས་པ་ཡིན་ནོ། །འདིར་ཁ་ཅིག་ན་རེ། མ་ངེས་པའི་དུས་ནི་མཉམ་པ་ཉིད་ཀྱི་དུས་ཏེ། སྤར་ཁབ་ལས། ལ་ནི་སྟོང་པ་དག་པའོ། །ཞེས་པའི་འགྲེལ་པར། ངོ་བོ་ཉིད་འདི་འདྲ་བསྟན་དུ་མེད་པ། ཞེས་གསུངས་པའི་ཕྱིར་ཟེར། མི་རིགས་ཏེ། འགྲེལ་པའི་དགོངས་པ་ནི་དུས་གསུམ་གང་རུང་གི་ངོ་བོ་འདི་འདྲར་བསྟན་པར་བྱར་མེད་པའི་དོན་ཏེ། གཞན་དུ་ན་མཉམ་པ་ཉིད་རྟོག་པ་མ་ཡིན་པའི་ཕྱིར་རྟོག་ཚོགས་མ་ཚང་བའི་སྐྱོན་གནས་སོ། །དེ་ལྟ་ནའང་བསམ་གྱིས་མི་ཁྱབ་པའི་དུས་མ་འདུས་སོ་ཞེ་ན། སྐྱོན་མེད་དེ། དེ་ནི་དོན་དམ་འདུས་མ་བྱས་ཀྱི་དུས་ཡིན་པའི་ཕྱིར་རྟོག་པ་བཤད་པའི་སྐབས་འདིར་མ་སྨོས་ཏེ། རྟོག་པ་ནི་ཀུན་རྫོབ་འདུས་བྱས་ཀྱི་དུས་བཞིར་དམིགས་པའི་ཕྱིར་རོ། །གཉིས་པ་ལའང་སྤྱི་བྱེ་བྲག་གཉིས་ཀྱི། སྤྱི་ནི། འཇོམས་པ་ཆེན་པོ་རྡོ་རྗེ། ཞེས་པ་ལ་ཕྱི་ནང་གཉིས་ལས། ཕྱི་ལུས་ཀྱི་ཆོས་བཞི་དང་སྦྱར་ན། རྟོག་པའི་རང་བཞིན་མངོན་དུ་གྱུར་པའི་ཁྲོ་བོ་བཞིའི་སྐུ་གསུང་ཐུགས་ཀྱི་མཛད་པས་བདུད་དང་ལོག་པར་འདྲེན་པ་རྣམས་འཇོམས་པ་དང་། ནང་གསང་བའི་ཁམས་བཞི་དང་སྦྱར་ན། འོག་སྒོ་གསང་བའི་ཁམས་གསུམ་འདུས་པའི་བདེ་བའི་རྟོག་པ་ལྷའམ་བདེ་བར་འཛིན་པའི་ཞེན་པ་གཉིས་ཀ་འཇོམས་པ་སྟེ། འདི་ཉིད་ལས། ང་ནི་ཐུགས་ཀྱང་འཇིག་པར་བྱེད། །ཅེས་སོགས་འཇིག་པ་བཞི་དང་། ཨཽ་ནི་ཐམས་ཅད་ཞིག་པ་ཡིན། །ཞེས་སོ། །དེའི་ཕྱིར་འཇོམས་པ་ལ་ཐོགས་པ་མེད་པས་ན་རྡོ་རྗེ་དང་། དེས་འཇོམས་པའི་ཕྲིན་ལས་གཞན་ལས་ཁྱད་པར་དུ་གྱུར་པའི་ཕྱིར་ཆེན་པོའོ། །དེ་ལྟ་བུ་འཇོམས་བྱེད་ཀྱི་གཉེན་པོ་དེའང་། དཔེར་ན་དཀར་པོ་འཇོམས་པ་དེ་དཀར་པོ་མིན་པ་གཅིག་གིས་བསྐྱེད་པ་ལྟར། རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཡུམ་གྱི་ངོ་བོ་དེས་བསྐྱེད་པའི་ཕྱིར་བཙུན་མོ་སྟེ་ཡབ་ཡུམ་དུ་གྱུར་རོ། །ཡང་། ཕྱིན་ཅི་ལོག་གི་རྟོག་པ་བཞི་ལྟར་ན། དེས་ལུས་ཀྱི་རྟོག་པ་བཞི་དངོས་སུ་མི་བསྐྱེད་ཀྱང་བརྒྱུད་ནས་བསྐྱེད་ཅེས་གསུངས་སོ། །བྱེ་བྲག་ནི། ཕྱི་ལྟར་ལུས་ཀྱི་འདུས་ཏེ་རེག་པའི་ཚོར་བ་བསྐྱེད་པ་ལ། རེག་བྱེད་ལུས་དབང་། རེག་བྱ་ཡུལ། དེ་གཉིས་འཕྲད་པའི་རེག་ཤེས་སམ། ནང་ལྟར་ན། གསང་བའི་ཡུལ་དབང་རྣམ་ཤེས་གསུམ་འདུས་ཀྱི་རེག་པ་བསྐྱེད་པ་ལ། རེག་བྱེད་གསང་དབང་ཐབས་ཀྱི་རྡོ་རྗེ། རེག་བྱ་གསང་ཡུམ་ཤེས་རབ་ཀྱི་པདྨ། གསང་བའི་རེག་ཤེས་དགའ་བ་ཉམས་སུ་མྱོང་བ་སྟེ། ཕྱི་ནང་གི་རྟོག་པ་གཉིས་ཀ་རིམ་པ་བཞིན། ཁྲོ་བོ་བདུད་རྩི་འཁྱིལ་བ་དང་། རྟ་མགྲིན་དང་། སྟོབས་པོ་ཆེ་དང་། གཤིན་རྗེ་གཤེད་རྣམས་དང་སྦྱར་རོ། །རྟག་པར་མ་ཡིན་པ་སོགས་ཡུམ་བཞིའི་རྟོག་པ་ནི། ཕུང་པོ་མི་རྟག་པར་འཛིན་པ་དང་། སྡུག་བསྔལ་གྱི་རང་བཞིན་ངར་འཛིན་པ་དང་། བདག་མེད་དུ་འཛིན་པ་དང་། སྟོང་པར་འཛིན་པ་བཞི་གོ་རིམ་ཇི་ལྟ་བར་ཁྲོ་མོ་ལྕགས་ཀྱུ་མ་སོགས་དང་སྦྱར་རོ། །ཡང་ན། རྟག་པར་འཛིན་པའི་རྟོག་པ་ཉིད་རང་ག་མར་སྣང་བ་ལྟར་མ་ཡིན་ཏེ། དེ་མ་སྤངས་པར་ཁྲོ་མོ་ལྕགས་ཀྱུ་མའི་རང་བཞིན་དུ་དག་པའི་ཕྱིར། ཞེས་པ་ལྟར་འབྲུ་གཉེར་ཏེ། རྟག་ཆད་བདག་མཚན་དུ་འཛིན་པའི་ཕྱིན་ཅི་ལོག་གི་རྟོག་པ་བཞིར་སློབ་དཔོན་ཁ་ཅིག་བཞེད་པའང་མི་འཐད་པ་མ་ཡིན་ཏེ། ཐལ་རྒྱུད་ལས། རྟག་སོགས་མཚན་མ་ལས་བསྐྱེད་ཕྱིར། །བཙུན་མོ་ཞེས་སུ་བསྟན་པ་སྟེ། །ཞེས་དང་། གླང་པོ་ཆེ་རབ་འབོག་ལས་ཀྱང་། དོན་དམ་པར་སེམས་ཅན་རྟག་པར་ལྟ་བ་གནས་སུ་དག་པ་བཛྲ་ཨངྐུ་ཤ་སྟེ། ཞེས་སོགས་གསུངས་པའི་ཕྱིར་རོ། །གསུམ་པ་ནི། ཁོག་གཞུང་ལས། དད་པས་ཉན་པའི་ལྷ་ཆེན་རྣམས། །ཞེས་པས་ཕྱིའི་ཁོར་ཡུག་ལ་བཞུགས་པའི་འཇིག་རྟེན་གྱི་ལྷ་ཆེན་པོ་རྣམས་ཏེ། རྒྱུད་ལས། ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཞེས་པའི་སྤྱན་འགྲེལ་ལས། འཁོར་བའི་ཆོས་རྣམས་ཀྱང་བདག་ཉིད་དུ་རང་སྣང་བའི་ཕྱིར། ཕྱི་རོལ་དུ་མ་ཧཱ་དེ་བ་ལ་སོགས་པའི་ལྷ་ཆེན་པོ་རྣམས་ཀྱིས་བསྐོར་བ་སྟེ། རང་རང་གི་མཆོད་ཡོན་དང་རྒྱན་དང་ལྡན་པར་འཁོད་པའོ། །ཞེས་སོ། །གཉིས་པ་གོ་ཕྱེ་བའི་འཁོར་ནི། ཐུན་མོང་འགྲོ་བ་འདུལ་བའི་སྤྲུལ་སྐུ་ཐུབ་པ་དྲུག་དང་། རྗེས་འཇུག་ཆོས་ཀྱི་མིག་དང་ལྡན་པའི་གང་ཟག་སྐལ་བ་ཅན་རྣམས་ཏེ། ཁོག་གཞུང་ལས། འགྲོ་བ་འདུལ་བར་སྤྲུལ་སོགས་པའོ། །ཞེས་དང་། འདི་ཉིད་ལས། སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་དང་། རྡོ་རྗེ་ལས་ཀྱང་། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པ་མངོན་བྱས་པས། །རིག་འཛིན་མཆོག་དེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱངས་སེམས་དཔས་བསྐྱེད་དུ་མེད། །བདེ་གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུར་ལུང་ཐོབ་པའོ། །ཞེས་སོ། །གཉིས་པ་ཚད་ནི། ཁོག་གཞུང་ལས། འཁོར་གྱི་ཚད་ནི་ཁྱབ་དང་མང་། །བརྗོད་འདས་ནམ་མཁའི་མཐའ་ཀླས་གང་། །ཞེས་པས་ཁྱབ་པ་དང་། མང་བ་གཉིས། དང་པོ་ནི། ཀུན་ཏུ་ཁྱབ་ཅིང་མཐའ་ཀླས་པར་ཁྱབ་པ་སྟེ། ཆོས་ཀྱི་དབྱིངས་མཐའ་ཡས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གང་བུ་བཞིན་དུ་གང་ནས་ཁྱབ་པར་བཞུགས་སོ། །ཞེས་སོ། །གཉིས་པ་ནི། གྲངས་བརྗོད་ཀྱིས་མི་ལང་བའི་ཕྱིར་མང་བ་སྟེ། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་སོ། །དེའང་དེ་བཞིན་གཤེགས་པ་དང་བྱང་ཆུབ་སེམས་དཔའ་མ་ལུས་པ་ཐམས་ཅད་དཔལ་ཀུན་ཏུ་བཟང་པོའི་རང་བཞིན་དུ་འདུས་ཤིང་། འགྲོ་བའི་ཕུང་ཁམས་སྐྱེ་མཆེད་ཇི་སྙེད་པ་ཐམས་ཅད་ཀྱང་ལྷའི་རང་བཞིན་དུ་གནས་པའི་ཕྱིར། རང་བཞིན་གཉིས་སུ་མེད་པར་བཞུགས་ཏེ། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་སོ། །སློབ་དཔོན་སྒེག་པ་ནི། མཚུངས་པ་བཞིའི་སྒོ་ནས་གཉིས་སུ་མེད་པར་བཞུགས་པར་བཞེད་དེ། སྤར་ཁབ་ལས། རང་བཞིན་དང་། ཐུན་མོང་མ་ཡིན་པ་དང་། བདག་ཉིད་ཆེན་པོ་དང་། གནས་ཀྱི་ཕྱིར་བཞག་པའོ། །ཞེས་སོ། །འདིར་སྐབས་འཕྲོས་ཀྱི་རྩོད་སྤོང་ནི། ཁ་ཅིག་ན་རེ། ལེའུ་དང་པོའི་འཁོར་འདི་རྣམས། རྒྱུད་མས་སྦྱངས་རང་རྒྱུད་པ་ཡིན་ནམ། ཐུགས་རང་སྣང་སྤྲུལ་པ་བ་ཡིན། དང་པོ་ལྟར་ན། གང་ཟག་གཅིག་གིས་སྦྱངས་སམ་ཐ་དད་པས་སྦྱངས། གཅིག་གིས་སྦྱངས་ན། གང་ཟག་གཅིག་གི་རྟོག་པ་ལ་ལྷ་གཙོ་འཁོར་བཟང་ངན་དུ་འོང་བ་མི་རིགས་ལ། ཐ་དད་པས་སྦྱངས་ན། འདིར་གང་ཟག་གཅིག་གི་རྟོག་ཚོགས་ལས་མ་སྨོས་པའི་ཕྱིར་མི་འཐད་དོ། །གཉིས་པ་ལྟར་ནའང་། གདུལ་བྱ་རང་རྒྱུད་པ་མེད་པའི་ཕྱིར། འདུལ་བྱེད་སྤྲུལ་པ་ཚོགས་པ་དོན་མེད་དུ་འགྱུར་རོ་ཞེ་ན། ལན་དུ་བླ་མ་རྒྱ་གབ་གོང་པ་སོགས་སྔ་རབས་པ་ཁ་ཅིག་ན་རེ། རིགས་ལྔ་ཡན་ཆད་སྤྲུལ་པ་བ་དང་། སེམས་དཔའ་མན་ཆད་རང་རྒྱུད་པར་འཐད་དེ། རིགས་ལྔའི་སྐབས་སུ་སྤར་ཁབ་ལས། མཚན་ཐུན་མོང་བ་གཉིས་ནི་སྔར་ཐལ་ཏེ། ཞེས་དང་། སེམས་དཔའ་སེམས་མའི་སྐབས་སུ། ལྟ་བའི་སྒྲིབ་པ་འཇོམས་པའི་ཕྱིར་ལས་ཀྱི་རྡོ་རྗེའོ། །ཞེས་བག་ལ་ཉལ་ཕྲ་བའི་སྒྲིབ་པ་ཡོད་པར་བཤད་པའི་ཕྱིར་གསུངས་ནའང་། རིགས་པར་མ་མཐོང་སྟེ། རྒྱུད་འདིའི་མཐར་ཐུག་གི་འབྲས་བུ་སངས་རྒྱས་བཞི་བཅུ་རྩ་གཉིས་ཡིན་ནམ་མིན། གཉིས་པ་ལྟར་ན། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་བས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློ་བསམ་པ་འཁྲུལ་པ་ཡིན། །ཞེས་པ་དང་འགལ་ལ། དང་པོ་ལྟར་ན། སེམས་དཔའ་མན་ཆད་རང་རྒྱུད་པར་འདོད་པའི་དམ་བཅའ་ཉམས་སོ། །རང་ལུགས། ལེའུ་དང་པོར་དངོས་སུ་སྨོས་པའི་འཁོར་འདི་རྣམས་ཐུགས་རང་སྣང་སྤྲུལ་པ་ཡིན་ཏེ། སྤར་ཁབ་ལས། སྟོན་པ་དང་། གནས་དང་། འཁོར་ཁྱད་པར་དུ་གྱུར་པ་ལ་ངམ་པ་སྟེ། རང་རིག་པ་ཉིད་གསུམ་གྱི་ཁྱད་པར་དུ་སྣང་བ་ལ་ངམ་པ་གསུམ་མོ། །ཞེས་དང་། སྐབས་དོན་སྔར་དྲངས་པའི་གཉིས་སུ་མེད་པར་བཞུགས་སོ། །ཞེས་པའི་འགྲེལ་པའི་ལུང་གིས་གསལ་བའི་ཕྱིར་རོ། །དེ་ལྟ་ནའང་འདུལ་བྱེད་ཚོགས་པ་དོན་མེད་དུ་མི་འགྱུར་ཏེ། གོ་ཕྱེད་བའི་འཁོར་གྱིས་གསང་སྔགས་ཀྱི་ངེས་པ་རྙེད་པར་བྱ་བའི་ཕྱིར་སྟོན་འཁོར་དུ་བསྟན་ནས་རྒྱུད་གསུང་བའང་མི་འགལ་བའི་ཕྱིར་དང་། དེར་མ་ཟད། རྗེ་སྒྲོ་ཕུག་པ་ཁུ་དབོན་དང་ཉ་རི་དྲི་ངས་པའི་ཞལ་ནས། དཀྱུས་གཅིག་ལ་འཁོར་ཆ་གཉིས་བཟུང་བ་མི་འཐད་ཀྱང་། སྤྱིར་ཆ་གཉིས་ཡོད་པར་ངེས་པས། འདིར་རྟོག་ཚོགས་སྦྱར་བའི་འཁོར་འདི་རྣམས་ཐུགས་རང་སྣང་སྤྲུལ་པ་བ་ཡིན་ཏེ། རྒྱ་མཚོ་ལས། དེ་བཞིན་ཐུགས་ཀྱི་ཁྱད་པར་ལས། །རང་སྣང་རྒྱལ་བ་སེམས་སོགས་དང་། །ཞེས་གསུངས་པའི་ཕྱིར། དེ་དང་ཆ་འདྲ་བའི་རྒྱུད་མས་སྦྱངས་ཀྱི་མཐར་ལམ་པ་དང་། ཐེག་པ་འོག་མའི་རྒྱལ་བ་བརྗོད་ཀྱིས་མི་ལང་བ་ཡོད་དེ། སྔ་མའི་འཕྲོས་ལས། དང་པོའི་སངས་རྒྱས་ས་རྒྱལ་བ། །སེམས་དཔའ་ཆེ་དང་འཇོམས་པ་ཆེ། །བརྗོད་ཀྱིས་མི་ལང་ཚད་མེད་དང་། །རྣམ་གཉིས་ཚུལ་དུ་བཞུགས་པའོ། །ཞེས་པས་མངོན་ནོ་གསུངས། རྒྱལ་བ་གཡུང་ནི། ཐུན་མོང་མ་ཡིན་པའི་གླེང་གཞིའི་སྐབས་འདིར་བྱུང་བའི་འཁོར་ཐམས་ཅད་ཡིན་ཚུལ་ནས་ཐུགས་རང་སྣང་སྤྲུལ་པ་བ་ཡིན་ཡང་། སྣང་ཚུལ་གྱི་དབང་དུ་ས་མཐའི་བྱང་ཆུབ་སེམས་དཔའི་ཚུལ་དུ་སྣང་བ་མི་འགལ་ཏེ། སྤར་ཁབ་ལས། གདུལ་བྱ་ལས་མཐར་ཐུག་པ་ནི་དྲུག་པའི་སངས་རྒྱས་ཀྱི་ཞིང་དུ་འགྱུར་ཏེ། དེ་དག་ས་གཞན་ལས་ཁྱད་པར་དུ་གྱུར་པས་ཆེན་པོ་སྟེ། ལྟ་བའི་སྒྲིབ་པ་འཇོམས་པའི་ཕྱིར་ལས་ཀྱི་རྡོ་རྗེའོ། །ཞེས་སོགས་གསུངས་པའི་ཕྱིར་རོ་གསུངས། གང་ལྟར་ཡང་། དངོས་སུ་སྨོས་པ་དང་ཆ་འདྲའི་མས་སྦྱངས་ཀྱི་འཁོར་ཡོད་པར་གཉིས་ཀ་བཞེད་པའི་ཕྱིར་གདུལ་བྱ་མེད་པར་སྐྱོན་འཇུག་པའི་གནས་མེད་དོ། །ཡང་ཁ་ཅིག་ན་རེ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན་ལྷ་བཞི་བཅུ་རྩ་གཉིས་བཞུགས་སམ་མི་བཞུགས། གལ་ཏེ་མི་བཞུགས་ན་རྗེས་འཇུག་ལམ་པས་བསྒོམ་པ་བློས་བརྟགས་སུ་འགྱུར་ལ། བཞུགས་ན་ཀུན་ཏུ་བཟང་མོ་དང་ཐུབ་དྲུག་མི་འདུག་པས་གསལ་ལོ་ཞེ་ན། བཞུགས་ཏེ། རྩ་རྒྱུད་འདིར། ཐབས་དང་ཤེས་རབ་ཞེས་པའི་སྐབས་སུ་ཀུན་ཏུ་བཟང་མོ་དང་། སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ་ཅེས་པའི་སྐབས་སུ་ཐུབ་དྲུག་ཡོད་པར་ཤུགས་ཀྱིས་བསྟན་ཅིང་། བཤད་རྒྱུད་སྙིང་པོ་བཀོད་པའི་གླེང་གཞིར། དཔལ་ཀུན་ཏུ་བཟང་པོ་རང་སྣང་བའི་སྐུ་དཀར་དམར་མཐིང་གའི་ཞལ་གསུམ་དུ་སྣང་བ་རྡོ་རྗེ་དང་འཁོར་ལོ་དང་རིན་པོ་ཆེ་གཡས་ན་འཛིན་པ། པདྨ་དང་དྲིལ་བུ་དང་རལ་གྲི་གཡོན་ན་འཛིན་པ། རྡོ་རྗེའི་སྐྱིལ་མོ་ཀྲུང་གིས་ཀུན་ཏུ་བཟང་མོ་དང་འདུ་འབྲལ་མེད་པ། ཞེས་དང་། གཞན་ཡང་ཐུབ་པ་ཆེན་པོ་གསེར་ཐུབ་འཛིན་དང་། ཞེས་སོགས་གཉིས་ཀ་དངོས་སུ་སྨོས་པའི་ཕྱིར་རོ། །འོ་ན་ཐུབ་དྲུག་འོག་མིན་དུ་བཞུགས་པ་ལྟར་ན། གདུལ་བྱ་དང་འདུལ་བྱེད་གནས་ཐ་དད་པར་འགྱུར་ཏེ། ཐུབ་དྲུག་གི་གདུལ་བྱ་རིགས་དྲུག་གི་སེམས་ཅན་ཡིན་པའི་ཕྱིར་ཞེ་ན། སྐྱོན་མེད་དེ། རིགས་དྲུག་གི་གནས་དང་ཆོས་ཀྱི་དབྱིངས་ཀྱི་ཕོ་བྲང་གཉིས་དེ་ཉིད་དང་གཞན་དུ་བརྗོད་དུ་མེད་པ་སྟེ། དག་མ་དག་གི་སྣང་བས་ཕྱེ་བ་ཙམ་དུ་ཟད་པའི་ཕྱིར་རོ། །གཞན་ཡང་། བདེ་མཆོག་གི་སྐུ་གསུང་ཐུགས་ཀྱི་འཁོར་ལོའི་དཔའ་བོ་དང་དཔའ་མོ་རྣམས་ཡུལ་ཉེར་བཞི་ན་བཞུགས་པར་རྩ་རྒྱུད་དུ་གསུང་མོད། དེས་ན་འོག་མིན་གྱི་གནས་སུ་བདེ་མཆོག་ལྷ་དྲུག་ཅུ་རྩ་གཉིས་མ་ཚང་ངམ་སྙམ་དུ་རྟོག་པ་དང་འདྲ་སྟེ་བཞད་གད་ཀྱི་གནས་སོ། །
བཞི་པ་བསྟན་པ་ཕུན་སུམ་ཚོགས་པ་ནི། ལམ་གསང་བའི་སྙིང་པོ་སྟེ། མཚོན་བྱ་རང་བཞིན་གཞི་ཡི་རྒྱུད། །ཅེས་སོགས་གསུངས་པའི་ཕྱིར་རོ། །ཁ་ཅིག་ན་རེ། མདོར་བསྟན་གྱི་རྗེས་སུ་རྒྱས་བཤད་འཇུག་གམ་མི་འཇུག །གཉིས་པ་ལྟར་ན་མདོར་བསྟན་དོན་མེད་དུ་ཐལ་ཞིང་། དང་པོ་ལྟར་ན། བསྟན་བཤད་ཀྱི་དོན་གཉིས་ནང་འགལ་ཏེ། རྒྱུད་འདིར་མདོར་བསྟན་ལ་ལྔ་བྱུང་ལ། རྒྱས་བཤད་ལ་སྟོན་འཁོར་གནས་གསུམ་ལས་མ་བྱུང་བའི་ཕྱིར་ཟེར་ན། ལན་དུ། བླ་མ་གོང་མ་རྣམས། དོགས་པ་དེའི་སྐྱོན་མེད་དེ། བསྟན་པ་ནི་སྟོན་པའི་ཐུགས་ལ་རྫོགས་ཤིང་། དུས་ནི་སྟོན་འཁོར་གནས་གསུམ་ནམ་འཛོམ་པའི་དུས་ཏེ། ཡེ་ཤེས་རྫོགས་པའི་རྒྱུད་ལས། གནས་དང་སྟོན་པ་འཁོར་ཚོགས་ན། །དུས་དང་བསྟན་པ་ཤུགས་ལས་འབྱུང་། །ཞེས་གསུངས་པའི་ཕྱིར་གསུངས། ལྷ་རྗེ་ཟུར་ཆུང་པའི་ཞལ་ནས། དེ་བཞིན་ཉིད་ཀྱི་དབྱིངས་ཉིད་ཅེས་སོགས་ཀྱིས་བསྟན་པ་བསྟན་ཏེ། གླེང་བསླང་གི་གོང་དུ་བྱུང་བ་ནི་རྒྱུད་འཁྲུགས་པའོ་གསུངས། རྗེ་སྒྲོ་ཕུག་པ་ཁུ་དབོན་སོགས་ཕལ་ཆེར། སྤར་ཁབ་ཀྱི་རྗེས་སུ་འབྲངས་ཏེ་གཙོ་བོར་གླེང་གཞི་བསྡུས་པའི་དོན་དུ་བཞེད་དོ། །དེ་ལྟར་ནའང་། བསྟན་པར་འདོད་པའི་ཕྱོགས་ལ་གླེང་མ་བསླང་བར་བྱུང་བའི་སྐྱོན་དང་གླེང་གཞིར་འདོད་པའི་ཕྱོགས་ལ་རྡོ་རྗེ་ལས་ཕྱུང་ངོ་ཞེས་པས་གནོད་དོ་ཞེ་ན། ཁོ་བོ་ནི་གཉིས་ཀ་ལྟར་བཤད་ཀྱང་མི་འགལ་བར་སེམས་ཏེ། དང་པོ་ལྟར་ན། དེ་བཞིན་གཤེགས་པ་ཐམས་ཅད་འདུས་པའི་སྤྱི་གཟུགས་རིགས་ལྔ་དབྱེར་མི་ཕྱེད་པའི་སྟོན་པ་ཉིད་ཀྱི་ཐུགས་ལ་རྒྱུད་དོན་ཇི་ལྟར་ཤར་བའི་དོན་གསང་བདག་གིས་བསྡུ་བ་བྱེད་པའི་ཚེ་བསྡུས་པས་གླེང་མ་བསླང་བར་བྱུང་བའི་སྐྱོན་མེད་ཅིང་། དེ་ཉིད་གདུལ་བྱ་དབང་རབ་ལ་ལྟོས་ནས་རྒྱུད་དོན་མདོར་བསྟན་དུ་བཤད་པ་ཡིན་པས་བསྟན་པ་ཉིད་དུ་འགྱུར་ཏེ། རྒྱ་མདུད་འགྲེལ་ལས། ད་ནི་ཆོས་ཕུན་སུམ་ཚོགས་པ་བསྟན་པར་བྱ་སྟེ། དེ་བཞིན་གཤེགས་པ་བཙུན་མོའི་ཚོགས་དང་། ཞེས་སོགས་དང་། འགྲེལ་ཆུང་ལས། རྒྱུད་འདི་ཉིད་ཀྱི་མདོ་དོན་དུ། །དཀྱིལ་འཁོར་ཀུན་གྱི་གསང་བ་འདི། །སྐུ་གསུང་ཡོན་ཏན་ཕྲིན་ལས་ཐུགས། །རྡོ་རྗེ་ལས་ནི་ངེས་པར་ཕྱུང་། །ཞེས་རྒྱུད་དོན་མདོར་བསྟན་དུ་བཞེད་པའི་ཕྱིར། གཉིས་པ་ལྟར་ན། གདུལ་བྱ་དབང་འབྲིང་མན་ཆད་ལ་རྒྱུད་དོན་འོག་ཏུ་སྟོན་པའི་ཕྱིར་འདི་ཉིད་གླེང་གཞི་བསྡུས་པ་སྟེ། སྤར་ཁབ་ལས། འདི་ནས་མར་གླེང་གཞི་བསྡུས་པ་སྟོན་ཏེ། །ཞེས་སོ། །དེ་ལྟར་ནའང་རྡོ་རྗེ་ལས་ཕྱུང་ངོ་། །ཞེས་པས་གནོད་དམ་སྙམ་ན། མི་གནོད་དེ། དེ་ལས། དབང་རྫོགས་པ་རིགས་དྲུག་པ་ཉིད་དུ་འགྱུར་པའི་ཕྱིར། ཞེས་དབང་རྫོགས་ནས་སྟོན་སྡུད་ཁྱད་པར་མེད་ཅིང་། དགོངས་པའི་རྒྱུད་གཅིག་དང་ཐ་དད་ལས་གྲོལ་བའི་ཕྱིར་སྡུད་པ་པོས་བཤདཔ་ལ་རྡོ་རྗེ་ལས་ཕྱུང་ངོ་ཞེས་སྟོན་པ་དང་སྐྱེས་བུའི་ཐུགས་ལས་ཕྱུང་བར་བསྟན་པ་མི་འགལ་ལོ། །འོ་ན། འདིས་དབང་རབ་ལ་རྒྱུད་དོན་མདོར་བསྟན་དུ་ཇི་ལྟར་འགྲོ་ཞེ་ན། འགྲེལ་ཆུང་ལས་དཀྱིལ་འཁོར་བཅུ་གཉིས་དང་། བླ་མ་རྣམས་དཀྱིལ་འཁོར་བདུན་དང་ཐེག་པ་རིམ་དགུར་བསྡུ་བར་མཛད་པས་ཀྱང་རྒྱུད་དོན་དུ་འགྱུར་ཏེ། དཀྱིལ་འཁོར་བཅུ་གཉིས་སམ་བདུན་ནི་རྒྱུད་དོན་དངོས་དང་། ཐེག་པའང་རྒྱུད་དོན་དང་ངོ་བོ་གཅིག་པའི་ཕྱིར་རོ། །འདིར་ནི། རྒྱུད་ཀྱི་བརྗོད་བྱ་ཐམས་ཅད་རྒྱུད་གསུམ་དུ་འདུ་བ་ལས། དེ་འདིར་བསྡུས་པས་ན་བསྟན་པར་འགྱུར་ཏེ། དེ་བཞིན་ཉིད་ཀྱི་དབྱིངས་ཉིད་ཅེས་པས་གཞི་རྒྱུད་དང་། དབང་བསྒྱུར་ཞེས་དང་། རྐང་པ་གཉིས་པས་ལམ་རྒྱུད་དང་། ཡེ་ཤེས་དཀྱིལ་འཁོར་ཐུགས་རྗེའི་ངང་། །ཞེས་དང་། རྐང་པ་གསུམ་པ་མན་ཆད་ཀྱིས་འབྲས་རྒྱུད་དེ། རྒྱུད་གསུམ་མདོར་བསྟན་པའི་ཕྱིར། རྒྱུད་དབུ་ཞབས་ཀྱི་བརྗོད་བྱ་གཞི་ལམ་འབྲས་གསུམ་དང་། དེ་སྟོན་པ་ཐམས་ཅད་འདི་ལས་འཕྲོས་པས་ཤེས་པར་བྱའོ། །
ལྔ་པ་དུས་ཕུན་སུམ་ཚོགས་པ་ནི། ཁོག་གཞུང་ལས། དུས་ཀྱི་ངོ་བོ་མཉམ་གནས་ཀྱང་། །སྐལ་བ་ཅན་ལ་དཀོན་པའི་དུས། །ཞེས་པས། ངོ་བོའི་དུས་དང་། གདུལ་བྱ་ལ་སྣང་བའི་དུས་གཉིས། དང་པོ་ནི། དུས་བཞི་མཉམ་པ་ཉིད་ཀྱི་དུས་ཏེ། ཀུན་རྫོབ་བདེན་ངོར་དུས་སྔ་ཕྱི་ཐ་དད་པ་ལྟར་སྣང་ཡང་། དོན་དམ་བདེན་པའི་ཆ་ནས་དེར་མ་དམིགས་ལ། དབྱེར་མེད་ཀྱི་ངོས་ནས་དེ་ཉིད་དང་གཞན་དུ་བརྗོད་དུ་མེད་པས་ན་མཉམ་པ་ཉིད་ཀྱི་དུས་ཞེས་བྱ་སྟེ། རྒྱས་པ་ལས། འདས་དང་མ་འོངས་ཐམས་ཅད་ཀུན། །ཡེ་ཤེས་རྟོགས་པའི་ཁྱད་པར་ལས། །དུས་བཞི་སྔ་ཕྱི་མེད་པ་ཡི། །མཉམ་པ་ཉིད་དུ་ལྷན་ནེར་སྦྱོར། །ཞེས་དང་། འགྲེལ་ཆུང་ལས། དུས་བཞི་མཉམ་པ་ཆོས་ཀྱི་དབྱིངས་ཉིད་དུ། །སྟུག་པོ་བཀོད་པའི་རྒྱན་ལ་ཐིམ་པར་བཞུགས། །ཞེས་སོ། །གཉིས་པ་ནི། རྒྱུད་ཀྱི་རྒྱུ་ཕུན་སུམ་ཚོགས་པ་ལྔ་ཚང་བས་གདུལ་བྱའི་ངོ་ལ་རྒྱུད་དོན་བྱུང་བ་དེ་ཡིན་ཏེ། སྐལ་བ་ཅན་ལ་དཀོན་པའི་དུས། །ཞེས་པས་མངོན་ནོ། །
དྲུག་པ་སྡུད་པ་པོ་ནི། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་གསང་བའི་མཛོད་འཛིན་པའི་རྒྱལ་སྲས་ལག་ན་རྡོ་རྗེ་སྟེ། རྒྱ་མཚོ་ལས། འཁོར་གྱི་ནང་ན་སྐལ་མཆོག་ལྡན། །འདུལ་བའི་དུས་བབས་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་དང་། ཁོག་གཞུང་ལས། གསང་བདག་ཕྱག་ན་རྡོ་རྗེ་ཡིས། །ཐུན་མོང་མ་ཡིན་ངེས་པའི་རྒྱུད། །དྲིས་ལན་མི་མངོན་དོན་གྱིས་བསྡུས། །བྱིན་རླབས་མི་ཡུལ་གྲགས་པ་ཡིན། །ཞེས་སོ། །དེའང་འདི་ཉིད་ལས། རྡོ་རྗེ་གསང་བའི་ཚིག་ཏུའོ། །ཞེས་པས་བསྟན་ཏེ། སློབ་དཔོན་ཉི་འོད་སེང་གེས། རྡོ་རྗེ་གསང་བ་ཞེས་པ་ནི་དབང་བསྐུར་བའི་མཚན་ཡིན་ཏེ། གསང་བའི་བདག་པོ་ཕྱག་ན་རྡོ་རྗེ་ལ་གྲགས་པའོ། །ཞེས་སོ། །དེ་ལྟར་སྡུད་པ་པོ་སྨོས་པའི་དགོས་པ་ནི། སྡུད་པ་པོ་མེད་ན་གཏམ་ལྐུག་པ་ལྟར་ཕྱིས་མི་འབྱུང་བའི་སྐྱོན་དང་། གཞན་དུ་རྒྱུད་འདི། གནས་གང་དུ། སྟོན་པ་གང་གིས་བསྟན་ཅིང་། གང་ལ་གཏད། དེ་ནས་སུ་ཞིག་གིས་སྤེལ་ཞེས་པའི་སྒྲོ་སྐུར་སྤང་བའི་ཕྱིར། ཀླད་དུ་བཤད་དང་། འདིར་ཚིག་ཏུའོ། །ཞེས་སྨོས་པར་ཟད་དོ། །