གདུལ་བྱ་དགོས་ཆེད་ཀྱི་གླེང་གཞི།
གཉིས་པ་གདུལ་བྱ་དགོས་ཆེད་ཀྱི་གླེང་གཞི་ནི། རྒྱུད་འདིའི་ལེའུ་བཅོ་ལྔ་པ་ཁྲོ་བོ་སྔོན་བྱུང་གི་ལེའུས་སྟོན་ཏེ། དེ་ལ་སྤྱིར་ཁྲོ་བོ་ལ། ཤེས་རབ་ཆེན་པོའི། ཡེ་ཤེས་ཆེན་པོའི། ཕྱག་རྒྱ་ཆེན་པོའི་ཁྲོ་བོ་དང་གསུམ། དང་པོ་ནི། བདག་མེད་རྟོགས་པའི་ཤེས་རབ་སྟེ། དེས་དངོས་པོ་དང་མཚན་འཛིན་གྱི་རྣམ་རྟོག་འཇོམས་པའི་ཕྱིར་ངང་གིས་ཁྲོ་བ་སྟེ། རྡོ་རྗེ་ལས། ཡང་དག་ཤེས་རབ་ཆེན་པོ་ནི། །མཚན་མ་འཇོམས་ཕྱིར་ཁྲོ་བོ་མཆོག །ཅེས་སོ། །གཉིས་པ་ནི། རང་རིག་རྟོགས་པའི་ཡེ་ཤེས་ཏེ། དེས་ཆོས་ཐམས་ཅད་ལ་དབང་བསྒྱུར་ཅིང་འཁོར་བའི་ས་བོན་དྲུངས་ནས་འཇོམས་པའི་ཕྱིར། ངང་གིས་ཁྲོ་བ་སྟེ། རྒྱས་པ་ལས། རང་རིག་ཡེ་ཤེས་རྒྱལ་པོ་ཡིས། །ཕྱོགས་བཅུའི་ཁམས་རྣམས་དབང་བསྡུས་ནས། །ཀུན་ཀྱང་མི་དམིགས་དབྱིངས་སུ་ཐིམ། །ཐམས་ཅད་ཁྲོ་བོའི་ཚོགས་སུ་གྱུར། །ཞེས་སོ། །གསུམ་པ་ནི། གདུལ་བྱ་ནམ་ཡང་མི་འདོར་བའི་ཕྱིར། འདུལ་བའི་དུས་ལས་མི་འདའ་བ་ནི་ཕྱག་རྒྱ་ཆེན་པོའོ། །དེ་ལའང་འགྲོ་བ་སྐྱོབ་པ་ན་འབད་རྩོལ་མེད་པའི་ཐུགས་རྗེས་མི་མཐུན་ཕྱོགས་འཇོམས་པའི་ཕྱིར་ངང་ངམ་ཤུགས་ཀྱིས་ཁྲོ་བ་ནི་ཐུགས་རྗེ་སྟེ། ལྷ་རྒྱུད་ལས། འཛིན་པ་མི་རྟོག་ཐུགས་རྗེ་ཞེན་ཆགས་ཁྲོ། །ཞེས་སོ། །རྒྱུ་དེས་གདུལ་བྱ་གདུག་པ་ཅན་འདུལ་བའི་ཕྱིར། འཇིགས་བྱེད་ཆེན་པོའི་སྐུ་དང་ཆ་ལུགས་སུ་སྣང་བའི་ཁྲོ་བོར་བཅོས་པ་སྟེ། ཇི་ལྟར་འཚམས་པར་སྟོན་པའི་མཛད་པའོ། །དེ་སྐད་དུའང་། དགོངས་འདུས་ལས། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཕྱག་རྒྱ་ལས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་སོ། །དེ་ལྟར་གསུམ་ལས། འདིར་ནི་ཕྱག་རྒྱ་ཆེན་པོའི་ཁྲོ་བོའོ། །དེ་ཡང་དེ་བཞིན་གཤེགས་པ་རྣམས་ཀྱི་མངག་གཞུག་གི་ཕོ་ཉར་ཁྲོས་པ་ལྟ་བུ་ཞིག་སྟོན་པ་ནི་མ་ཡིན་ཏེ། སངས་རྒྱས་ཐམས་ཅད་ཀྱི་ངོ་བོ་ཉིད་ཀྱིས་ཁྲོ་བོའི་དཀྱིལ་འཁོར་མངོན་པར་འདུ་མཛད་དེ། ཞེས་གསུངས་པའི་ཕྱིར། ཇི་ལྟར་བསྟན་ན། སྔར་ལྟར་ཕུན་སུམ་ཚོགས་པ་དྲུག་ལས། དང་པོ་སྟོན་པ་ནི། རིགས་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་སྤྱིའི་གཟུགས་ཅན་དྲུག་པ་ཀུན་ཏུ་བཟང་པོ་ཉིད་ལས་མ་གཡོས་པར། རཱུ་ཏྲའི་ངོ་ན་དཔལ་ཆེན་པོ་ཆེ་མཆོག་བཛྲ་ཧེ་རུ་ཀར་སྣང་བ་སྟེ། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ངོ་བོ། །ཞེས་སོ། །གཉིས་པ་གནས་ནི། བཟོད་པར་དཀའ་བའི་དུར་ཁྲོད་ཆེན་པོ་སྟེ། དུར་ཁྲོད་ཆེན་པོར་དགྱེས་ནས་ཁྲག་གི་རྒྱ་མཚོའི་དཀྱིལ་ན། ཀེང་རུས་ཆེན་པོའི་རི་རབ་ཀྱི་སྟེང་། འབར་བ་ཆེན་པོའི་ཀློང་གི་འཁོར་ལོའི་དཀྱིལ་ན། ཞེས་སོ། །གསུམ་པ་འཁོར་ལ། གདུལ་བར་བྱ་བ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་གཉིས། དང་པོ་ནི། རཱུ་ཏྲ་འཁོར་དང་བཅས་པ་སྟེ། དེར་གོལ་བའི་རྒྱུ་ཅི་སྙམ་ན། སྤྱིར་མ་རིག་པ་གཉིས་ཀྱིས་སེམས་ཅན་ཐམས་ཅད་སྲིད་པར་འཁྱམས་ལ། བྱེ་བྲག་ཏུ་རཱུ་ཏྲ་ནི། སྔོན་བསྐལ་པ་ཀུན་བཀོད་ཀྱི་དུས་སུ་ཐར་པ་ནག་པོར་སྐྱེས་པའི་ཚེ། ཐུབ་དཀའ་གཞོན་ནུས། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །ཞེས་གསུངས་པ་སྒྲ་ཇི་བཞིན་པར་སྤྱད་པར་གོལ་བའི་རྣམ་སྨིན་གྱིས་དམྱལ་བ་ཚ་གྲང་གི་གནས་སུ་བསྐལ་པ་ཆེན་པོ་སྟོང་ཕྲག་བཅུ་གཉིས་དང་། དེ་ནས་བསྐལ་ཆེན་དྲུག་ཏུ་ཡི་དྭགས་སུ་སྐྱེ་བ་བརྒྱུད་དེ་རྣམ་སྨིན་གྱི་འབྲས་བུ་མྱོང་སྟོབས་ཀྱིས་ཟད་པའི་མཐར། སྔོན་གྱི་རྒྱུ་མཐུན་པའི་འབྲས་བུས་མཚམས་སྦྱར་ནས། ཡུལ་ལངྐ་པུ་རིར་ཡི་དྭགས་ཀྱིས་འགྲོ་བས་བསྡུས་པའི་སྲིན་པོ་བྱའི་གཤོག་པ་ཅན་དུ་སྐྱེས་ཏེ། གཟུགས་ཁམས་ཀྱི་འཕགས་པའི་གནས་ལྔ་མ་གཏོགས་པ་འདོད་གཟུགས་ཀྱི་ཁམས་ཐམས་ཅད་དབང་དུ་བསྡུས་ཤིང་། འགྲོ་བའི་ཚོགས་ལ་གནོད་པར་བྱེད་པའི་ལས་ཀྱི་རཱུ་ཏྲར་གྱུར་པ་དེ་ཉིད། ཐུབ་དཀའ་རྡོ་རྗེ་སྙིང་པོར་གྱུར་པ་དང་སྔོན་དཔོན་སློབ་ཏུ་འབྲེལ་བའི་སྟོབས་ཀྱིས་གདུལ་བྱར་གྱུར་པའོ། །དེ་དག་ཀྱང་། བདག་ཏུ་རྨོངས་པའི་རྟོག་པ་དང་། ཞེས་པ་ནས། ཐུགས་རྗེས་འདུལ་བར་གྱུར་ཏེ་ཞེས་པའི་བར་རོ། །གཉིས་པ་ནི། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ། ཞེས་སོགས་ཀྱིས་རིགས་བཞིའི་འཁོར་དང་། དཀར་མོའི་ཚོགས་དང་། ཞེས་སོགས་ཀྱིས་གསང་བའི་བུ་མོ་བརྒྱད་དང་། སེང་གདོང་ཆེན་མོའི་ཚོགས་དང་། ཞེས་སོགས་ཀྱིས་གུས་པའི་བུ་མོ་བརྒྱད་དང་། རྡོ་རྗེ་སྲིང་འགྲོ་མའི་ཚོགས་དང་སོགས་ཀྱིས་དུར་ཁྲོད་པའི་སྒོ་སྲུང་བཞི་དང་། སྲིན་མོ་ཆེན་མོ་མིའི་སྲིན་མོ་དང་། ཞེས་སོགས་ཀྱིས་དབང་མོ་ཉེར་བརྒྱད་རྣམས་སོ། །བཞི་པ་བསྟན་པ་ནི། གདུལ་དཀའ་དྲག་པོའི་གདུལ་བྱ་ཉིད་ཕྲིན་ལས་དྲག་ཤུལ་གྱི་སྒོ་ནས་འདུལ་བའི་དོན་མཛད་པའོ། །དེ་ཡང་ཇི་ལྟར་བཏུལ་བ་ནི། འགྲེལ་ཆུང་ལས། ཇི་ལྟར་འདུལ་བའི་དབང་ནི་དྲུག་འགྱུར་ཏེ། །ཆེ་མཆོག་ཉིད་དང་ཁྲོ་བོ་འཆོལ་པ་དང་། །རྡོ་རྗེ་ཞེ་སྡང་རྡོ་རྗེ་སྲིན་པོ་དང་། །རྡོ་རྗེ་ཁྲོ་བོ་འཇིགས་བྱེད་ཁྲོ་བོའོ། །ཞེས་དྲུག་ཏུ་གསུངས་ནའང་། འདིར་སློབ་དཔོན་སྒེག་པའི་བཞེད་པ་ལྟར་དོན་བཅུ་བཞིས་འཆད་དོ། །དེའང་། ཞི་བ་རིགས་དྲུག་པ་ཉིད་ཁྲོ་བོ་ཆེ་མཆོག་ཏུ་སྣང་བའི་ཏིང་ངེ་འཛིན་ལ་སྙོམས་པར་ཞུགས་པ་ནི་ཏིང་ངེ་འཛིན་གྱི་ཆོ་འཕྲུལ་༡ལོ། །དེ་ནས་དེ་བཞིན་ཉིད་ཀྱི་དབྱིངས་ནས་གསང་བའི་ཡུམ་སྤྲུལ་ཏེ་སྦྱོར་བ་མཛད་པས་དཀྱིལ་འཁོར་ཐམས་ཅད་བསྐྱེད་པའི་རྒྱུ་བྱང་ཆུབ་ཀྱི་སེམས་སྤྲོ་བ་ནི་ཆེ་མཆོག་ལོངས་སྤྱོད་ཆེན་པོའི་དཀྱིལ་༢འཁོར་རོ། །དེའི་ཚེ་ཧཱུཾ་ཧཱུཾ་ཧཱུཾ་བི་ཤྭ་བཛྲ་ཞེས་སོགས་བརྗོད་པ་ནི་གཉེན་པོའི་ཁྲོ་ཚོགས་ཀུན་སྣང་བའི་རྐྱེན་དེ་ཀུན་བརྗོད་པའི་ཆོ་འཕྲུལ་༣ལོ། །རྒྱུ་སེམས་སྤྲིན་དང་རྐྱེན་སྔགས་ལས་ཁྲོ་བོ་འཆོལ་པ་གྲངས་མེད་པར་འཐོན་པ་ནི་སྤྲུལ་པ་རྫུ་འཕྲུལ་གྱི་ཆོ་འཕྲུལ་༤ལོ། །དེའི་མཐུ་བྱིན་གྱིས། ཕྱིར་འཇིག་རྟེན་གྱི་ཁམས་གཡོས་པ་སོགས་ལྟས་ཆེན་པོ་བཅོ་ལྔ་དང་། ནང་དུ་ལམ་པའི་སེམས་ལ་ཚོགས་སྦྱོར་གྱི་ཏིང་ངེ་འཛིན་ལྔར་གཡོ་ཐོབ་གོམས་པའི་ཉམས་གསུམ་བོགས་འཐོན་པ་ནི་བྱིན་རླབས་ཀྱི་ཆོ་འཕྲུལ་༥ལོ། །ཕྱི་སྣོད་གཡོ་བ་སོགས་དང་ནང་ཁྲོ་བོའི་སྤྲིན་ཚོགས་མི་བཟད་པའི་ཆོས་ཀུན་ཏུ་སྣང་བས། དེའི་ཚེ་གདུག་པ་ཅན་ཐམས་ཅད་བརྒྱལ་བར་བྱས་པ་ནི་ཆོས་སྣང་བའི་ཆོ་འཕྲུལ་༦ལོ། །དེ་ནས་སྤྲུལ་པའི་ཁྲོ་ཚོགས་དེ་དག་རིགས་ལྔའི་ཁྲག་འཐུང་ཡབ་ཡུམ་དང་བཅས་པར་བསྡུས་ནས་རང་རང་གི་རིགས་དང་མཐུན་པའི་ཕྱོགས་སུ་དྲེགས་པ་ཅན་དེ་རྣམས་གདན་དུ་བྱས་ཏེ་བཞུགས་པ་ནི་གོང་གི་སྤྲུལ་པ་ལས་ཁྱད་པར་དུ་གྱུར་པའི་ཕྱིར་སྤྲུལ་པ་ཆེན་པོའི་དཀྱིལ་འཁོར་༧རོ། །དེ་ནས་དྲེགས་པ་ཅན་དེ་རྣམས་ཁྲོས་ཏེ་གཏུམ་ཚིག་ཏུ་སྨྲ་བ་ན། དེའི་གཉེན་པོར་རྡོ་རྗེ་སྲིན་པོ་དབུ་དགུ་ཕྱག་བཅོ་བརྒྱད་ཞབས་བརྒྱད་དུ་སྣང་བར་མཛད་ནས་དེ་དག་གི་ཕུང་པོ་བསྒྲལ་ཏེ་ཞལ་དུ་གསོལ་བ་ནི་ཕྲིན་ལས་རྨད་དུ་བྱུང་བའི་ངོ་༨བོའོ། །དེ་ལྟར་ཕོ་རྣམས་བསྒྲལ་ནས་དེ་དག་གི་ཆུང་མ་དབང་ཕྱུག་མ་བྲན་གཡོག་གི་ཚོགས་དང་བཅས་པ་དབང་དུ་བསྡུས་པ་ནི་འཁོར་སྡུད་པའི་ཆོ་འཕྲུལ་༩ལོ། །ཆེ་མཆོག་ཉིད་དབང་པོའི་ངོ་ལ་རིགས་ལྔའི་འཇིགས་བྱེད་ཆེན་པོ་ལྔ་ག་ཡོངས་སུ་རྫོགས་པར་སྣང་བ་ནི་ཡོངས་སུ་རྫོགས་པའི་དཀྱིལ་འཁོར་༡༠རོ། །རིགས་ལྔའི་གཙོ་བོ་ལ་མ་མོ་བརྒྱད་དང་། རིགས་བཞི་ལ་ལྔ་ལྔ་འཁྲིལ་ཏེ་རོལ་པ་ནི་འཁོར་བསྡུས་པའི་ཆོ་འཕྲུལ་གྱི་བྱ་༡༡བའོ། །གཉིས་སུ་མེད་པར་རོལ་པའི་སེམས་སྤྲིན་ལས་འཁོར་གྱི་དཀྱིལ་འཁོར་ཁྲོ་མོ་ཉི་ཤུ་ངོ་མཚར་དང་བཅས་པས་རེ་རེ་ཡང་ཉེར་བརྒྱད་དུ་འཐོན་ཅིང་། སོ་སོ་ཡང་རང་རང་གི་རིགས་གཅིག་ཏུ་བསྡུས་ཏེ་དཀྱིལ་འཁོར་ལ་འགོད་པའི་མཛད་པ་རྫོགས་ནས་དབང་མོ་རྣམས་རང་གནས་སུ་བཀྱེ་བ་ནི་ངོ་མཚར་ཚོགས་ཀྱི་དཀྱིལ་འཁོར་༡༢རོ། །དེ་ནས་དྲེགས་པ་ཅན་རྣམས་འོག་སྒོ་ནས་བཏོན་ཏེ་མི་གཙང་བའི་འདམ་དུ་ཆུད་པ་ན། སླར་ཡང་སྣམས་ནས་ཁྲོ་བོ་རྨེ་བརྩེགས་སམ་དམ་རྫས་བདུད་རྩི་རློན་སྦྱོར་ཕྱུང་ནས་འདམ་ཀུན་འཐུངས་ཏེ་དབང་བསྐུར་བས་བསམ་ཡས་ལྷུན་གྲུབ་ཀྱི་ཏིང་ངེ་འཛིན་ཐོབ་ཅིང་། སྐུ་འབར་བ་ཆེན་པོ་མི་བཟད་པར་མཐོང་ངོ་། །དེའི་ཚེ་འདུལ་ཐབས་བསམ་ཡས་ཐ་དད་པས་འཇིག་རྟེན་གྱི་དྲེགས་པ་ཅན་ཐམས་ཅད་དུས་གཅིག་ཏུ་བཏུལ་ཏེ། དེ་དག་ཤིན་ཏུ་འདར་ཞིང་བྲེད་པས་མནའ་བོར་ནས་ལུས་གདན་དུ་ཕུལ་ཞིང་། མགྲིན་གཅིག་ཏུ་འཁོར་ཕུལ་བ་རྣམས་ནི་ཕྲིན་ལས་ཀྱི་འབྲས་བུ་དྲེགས་པ་ཅན་གནས་སུ་བསྟབ་༡༣པའོ། །དེ་ནས་མ་མོ་རྣམས་སླར་འཁོར་དུ་འདུས་ཏེ་ལས་ཀྱི་དངོས་གྲུབ་ནོས་པ་ན་ལག་ཏུ་རྡོ་རྗེ་བྱིན་ནས་མིང་བཏགས་ཏེ། དཀྱིལ་འཁོར་གྱི་ཕྱི་ཁྱམས་སུ་བཀོད་པ་ནི་ཕྲིན་ལས་ཀྱི་འབྲས་བུ་འཁོར་དམ་ལ་བཏགས་༡༤པའོ། །དེ་དག་ནི་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པ། ཞེས་པ་མན་ཆད་ཀྱིས་སྟོན་ཏོ། །འདིར་སྐབས་འཕྲོས་ཀྱི་བརྒལ་ལན་ནི། ཁ་ཅིག་ན་རེ། འདིར་བསྟན་གྱི་རཱུ་ཏྲ་དེ་ཐ་མལ་པའམ་སྤྲུལ་པ་བ་ཡིན། དང་པོ་ལྟར་ན་ཡི་དྭགས་སྲིན་པོ་ཆེན་པོ་ཟེར་བས་འདོད་ཁམས་པ་ཡིན་པའི་ཕྱིར། དེ་གཟུགས་ཁམས་དབང་དུ་སྡུད་པ་མི་འཐད་དེ། དེར་བགྲོད་པ་ལ་བསམ་གཏན་གྱི་ཏིང་ངེ་འཛིན་ཐོབ་དགོས་པའི་ཕྱིར་དང་། དཔལ་ཆེན་པོ་དང་སྤྱོད་ཡུལ་གཅིག་ཏུ་མ་སྤྱད་པའི་ཕྱིར་ཞལ་མཐོང་བའི་དངོས་ཀྱི་གདུལ་བྱར་གྱུར་པའང་མི་འཐད་དོ། །གཉིས་པ་ལྟར་ན། ངན་སོང་གི་སྡུག་བསྔལ་མྱོང་བར་བཤད་པ་སོགས་རིགས་པ་མ་ཡིན་ནོ་ཟེར་ན། ལན་ནི། འདོད་པའི་རྟེན་ལ་འཕགས་ས་ཐོབ་པ་དང་། སྔོན་གྱི་ལས་རྨད་དུ་བྱུང་བའི་མཐུ་ནི་བསམ་གྱིས་མི་ཁྱབ་པའི་ཕྱིར། འདོད་པ་ཡིན་ཡང་གཟུགས་དབང་དུ་སྡུད་པ་མི་འགལ་ཞིང་། དཔའ་བོས། སྐྱེ་བོ་མ་རིག་གིས་ལྡོངས་པས། །སྲིད་རྩེའི་བར་དུ་སོང་ནས་ཀྱང་། །ཞེས་འདོད་པའི་སོ་སྐྱེས་བསམ་གཏན་གྱི་ཏིང་འཛིན་ཐོབ་པར་གསུངས་པའི་ཕྱིར། དེ་མ་ཐོབ་པར་ཡང་མ་ངེས་པའི་ཕྱིར་དང་། དཔལ་ཆེན་པོ་མཐོང་བ་ལ་སྤྱོད་ཡུལ་གཅིག་ཏུ་སྤྱོད་དགོས་ན། ཤཱཀ་ཐུབ་མཐོང་བའི་སེམས་ཅན་ཐམས་ཅད་ཀྱིས་ཐུབ་པ་དང་སྤྱོད་ཡུལ་གཅིག་ཏུ་སྤྱོད་དགོས་པ་སོགས་ཧ་ཅང་ཐལ་ལོ། །ཕྱོགས་གཉིས་པའི་ལན་ནི། ཐ་མལ་པའི་གཟུགས་དང་སྡུག་བསྔལ་མྱོང་བ་ལྟར་བསྟན་པས་སྡུག་བསྔལ་རང་མཚན་པ་མྱོང་བ་དང་ཐ་མལ་པ་ཡིན་པར་མ་ངེས་ཏེ། སེམས་ཅན་གྱི་དོན་དུ་དེ་བཞིན་གཤེགས་པའི་སྤྲུལ་པ་ཐ་མལ་པའི་གཟུགས་སུ་སྣང་བ་རྣམས་དང་། སེམས་ཅན་རྣམས་སྐྱོ་བ་བསྐྱེད་པའི་ཕྱིར་དམྱལ་བའི་འཇིག་རྟེན་སྤྲུལ་ནས་བསྟན་པ་སོགས་ཀྱང་དེར་མ་ངེས་པ་བཞིན་ནོ། །འོ་ན་འདིར་གང་བཞག་སྙམ་ན། ཁོ་བོ་ནི་གསང་བདག་ཆེན་པོ་སྒྲོ་ཕུག་པའི་རྗེས་སུ་འབྲངས་ནས་སྤྲུལ་པ་བར་ཁས་བླངས་ཏེ། འགྲེལ་པ་ལུང་བསྟན་ལས། དེ་བཞིན་གཤེགས་པ་ཉིད་ཀྱིས་ཚུལ་དུ་བསྟན་པར་རིག་པར་བྱ་སྟེ། དེ་ལ་དགོས་པ་དང་དགོངས་པ་ཅི་ཡོད་ཅེ་ན། རང་རྒྱུད་པའི་གོལ་ས་དགག་པ་དང་། ཆེ་བའི་མཐུའི་ཚད་བསྟན་པའི་དགོས་པ་དང་། ནང་དུ་བདུད་བཞི་བཏུལ་བའི་རྟགས་ཕྱི་རོལ་དུ་བསྟན་པར་འགྲེལ་ཏོ། །ཞེས་དང་། ཇི་སྐད་བཤད་པའི་མཐུ་འདི་དག་རང་རྒྱུད་པ་ལ་ཡོད་པ་མ་ཡིན་ཏེ། སྤྲུལ་པ་ཡིན་པར་སོམ་ཉི་མི་བྱའོ། །ཞེས་སོ། །དེ་ལྟར་ནའང་བདག་ཏུ་རྨོངས་པའི་ཞེས་སོགས་ཀྱིས་གནོད་དོ་ཞེ་ན་མི་གནོད་དེ། ཕྱིས་འཇིག་རྟེན་དུ་ཆ་ལུགས་དང་མཐུ་ཆ་འདྲ་བའི་རཱུ་ཏྲ་རང་མཚན་པ་འབྱུང་བ་རྣམས་རྒྱུ་དེ་ལྟ་བུས་བསྐྱེད་པར་བསྟན་ཏེ། ཆེ་མཆོག་འདུས་པའི་རྒྱུད་ལས། འདས་པའི་དུས་ན་སྔོན་བྱུང་ལྟར། །མ་འོངས་དུས་ན་འབྱུང་བ་ཡང་། །ཞེས་སོ། །དེའི་ཕྱིར་གཉེན་པོ་མཆོག་རྣམས་ལ་ཉེས་པས་མི་གོས་པར་བསྟན་པའི་ཆེད་དུ་རྒྱལ་བས་སོར་ཕྲེང་ཅན་དུ་སྤྲུལ་ནས་བཏུལ་བ་བཞིན་ཐབས་ཀྱི་ཆེ་བ་དབྱུང་བ་དང་། སྔགས་ལམ་པའི་གོལ་ས་དགག་པའི་ཕྱིར་ཐབས་ལ་མཁས་པའི་ཆོ་འཕྲུལ་དུ་གདོན་མི་ཟའོ། །ཡང་། ཧེ་རུ་ཀ་རྣམས་དབང་མོ་དང་རོལ་པ་ལས་སྲས་སྤྲུལ་པའི་སྐབས་འདིར། ཁ་ཅིག་ན་རེ། ཧེ་རུ་ཀ་རེ་རེ་ལ་དབང་མོ་བརྒྱད་དང་ལྔ་ལྔས་འཁྲིལ་བའི་ཚེ། རེ་མོས་སུ་འཁྲིལ་ལམ། ཡང་ན་ཞི་བའི་ལྷག་ཆོག་ཏུ། མདུན་རྒྱབ་ཟུར་གཉིས་དབུ་གསུམ་པོ། །བདུན་ལ་གཙོ་མོ་བདུན་གྱིས་འཁྲིལ། །ཞེས་པ་ལྟར་དུས་གཅིག་ཏུ་རོལ་གྲང་ཞེ་ན། འཁྲིལ་ཚུལ་གཉིས་ཀ་ལྟར་མ་ཡིན་ཏེ། འགྲེལ་པ་མངོན་རྟོགས་ལས། མ་མོ་རེ་རེ་ཡང་དེ་བཞིན་གཤེགས་པ་རེ་རེ་དང་སྦྱོར་བར་མ་མོ་རྣམས་ཀྱིས་མཐོང་བ་ནི། ཞེས་མ་མོའི་སྣང་བ་ལ་དེ་བཞིན་གཤེགས་པ་རེ་རེ་ཡང་བརྒྱད་དང་ལྔར་སྣང་ནས་སྦྱོར་བར་གསུངས་པའི་ཕྱིར་རོ། །ཡང་འདིར་དབང་མོ་དང་རོལ་པ་ལས་སྲས་ཉི་ཤུ་བསྐྱེད་པ་དང་། སྒྲུབ་ཐབས་ལས་རིགས་ཀྱི་ཡུམ་ལྔ་དང་རོལ་པ་ལས་བསྐྱེད་པ་ནང་འགལ་ལོ་ཞེ་ན། འདིར་ནི་གཞན་གྱི་ཆེ་བ་དབྱུང་བའི་ཕྱིར། ཕོ་རྣམས་བསྒྲལ། མོ་རྣམས་སྦྱོར་ནས་འདུས་པའི་ཆེད་དུ་བསྟན་པར་ཟད་ཀྱི། ཉམས་ལེན་གྱི་དུས་སུ་ལས་ཀྱི་སྲིན་མོ་ལ་མོས་པ་མི་སྐྱེ་བས་རིགས་ཀྱི་ཡུམ་ལྔ་དང་རོལ་པ་ལས་བསྐྱེད་པའི་ཕྱིར་སྐྱོན་མེད་དོ། །ལྔ་པ་དུས་ནི། མ་རུངས་པའི་གདུལ་བྱ་ལ་དྲག་པོའི་ཕྲིན་ལས་སུ་སྣང་བའི་དུས་ཏེ། འདུལ་བའི་ཐབས་སྣ་ཚོགས་བསམ་གྱིས་མི་ཁྱབ་པར་སོ་སོར་སྣང་བས་དུས་གཅིག་ཏུ་བཏུལ་ལོ། །ཞེས་སོ། །དྲུག་པ་སྡུད་པ་པོ་ནི། གོང་མ་ལྟར་གསང་བདག་ཉིད་དོ། །
གཉིས་པ་བསྟན་པ་འབྱུང་བ་སྤྱིའི་གླེང་གཞི་ནི། རྒྱུད་འདིའི་ལེའུ་གསུམ་པའི་སྟོད་ཀྱིས་སྟོན་ཏེ། དེ་ལ་ཡང་། གླེང་གཞིའི་རྒྱུ་དང་། རང་གི་ངོ་བོ་དང་། ཞར་བྱུང་རྩོད་པ་སྤང་བ་དང་གསུམ། དང་པོ་ནི། འདིའི་དོན་མ་རྟོགས་པ་རྣམས་ལམ་སྟེགས་ཀྱི་ཐེག་པ་ལ་བཀྲི་བའི་ཆེད་དུ་སྟོན་པའི་ཐུགས་རིག་པ་ཡེ་ཤེས་ཀྱི་བྱིན་རླབས་ལས་ཐུབ་པ་དྲུག་འཕྲོས་པ་སྟེ། དེ་ནས་དེ་བཞིན་གཤེགས་པ་ཐམས་ཅད་ལས་ཐུགས་རྗེ་ཆེན་པོའི་བྱིན་གྱིས་རླབས་ཞེས་བྱ་བའི་རིག་པའི་སྐྱེས་བུ་ཐུབ་པ་དྲུག་དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །ཞེས་སོ། །འདིར་རིག་པའི་སྐྱེས་བུའི་དོན་ནི། གསང་འདུས་ཀྱི་རྒྱུད་ཕྱི་མ་ལས། རང་གི་ལུས་ངག་ཡིད་རྡོ་རྗེ། །མི་ཕྱེད་པ་ཡི་ངོ་བོ་སྟེ། །རིག་དང་བཅས་པར་ལྡན་པས་ན། །རིག་པའི་སྐྱེས་བུ་ཞེས་སུ་བཤད། །ཅེས་སྤར་ཁབ་ཏུ་དྲངས་པ་ལྟར་རོ། །
གཉིས་པ་ནི། འཐོན་ནས་ཀྱང་ཅིར་འགྱུར་ཞེ་ན། ཁོག་གཞུང་ལས། གྲགས་པའི་ཐུན་མོང་ངོ་བོ་ནི། །ཐུབ་དྲུག་སྟོན་པ་སྟོང་གསུམ་གནས། །ཁྱད་པར་ཤཱཀྱ་ཐུབ་པ་ཉིད། །རྒྱལ་སྲིད་བཙུན་མོའི་འཁོར་སྤངས་ནས། །རབ་ཏུ་བྱུང་རྫོགས་མཛད་པ་ཡིས། །རྒྱུ་ཡི་འཁོར་ལོ་བསྟན་པར་སྒྲོག །འགྲོ་དྲུག་འཁོར་དང་རྣམ་བཞི་སོགས། །ཤིན་ཏུ་དཀོན་པའི་དུས་སུའོ། །ཞེས་ཕུན་སུམ་ཚོགས་པ་ལྔ་ལས། དང་པོ་གནས་ནི། སྤྱིར་ཕལ་ཆེན་ལས། ཕྱོགས་རྣམས་ཀུན་ན་ཞིང་རྣམས་རྒྱ་མཚོ་སྣང་། །ལ་ལ་ཟླུམ་པོ་ལ་ལ་ཟུར་གསུམ་སྟེ། །དེ་དག་ལ་ལ་ཕྱོགས་ན་གྲུ་བཞིར་གནས། །ནོར་བུ་པདྨ་འཁོར་ལོ་ཡན་ལག་བརྒྱད། །ཀུན་ཀྱང་ལས་རྣམས་རྒྱ་མཚོས་རྣམ་པར་བྲིས། །ཞེས་འགྲོ་བའི་ལས་དབང་གིས་ཞིང་ཁམས་ཀྱི་བཀོད་པ་མཐའ་ཡས་ཀྱང་། འདིར་མཛོད་ལས། གླིང་བཞི་དང་ནི་ཉི་ཟླ་དང་། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །མཉམ་དུ་འཇིག་ཅིང་འབྱུང་བ་ཡིན། །ཞེས་པའི་སྟོང་གསུམ་གྱི་སྟོང་ཆེན་པོ་ནི་སྤྲུལ་སྐུ་ཐུབ་པ་གཅིག་གི་ཞིང་སྟེ། སྟོང་གསུམ་གྱི་སྟོང་ཆེན་པོ་རེར། ཞེས་སོ། །འོ་ན། སྣྲེལ་ཞི་དང་ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི། ཞེས་པ་དོན་མེད་དུ་འགྱུར་རོ་ཞེ་ན། སྐྱོན་མེད་དེ། དེ་ནི་ཆོས་སྐུ་དང་ལོངས་སྐུའི་ཞིང་ཡིན་ལ། དེ་སྤྲུལ་སྐུའི་ཞིང་གི་གཞིར་མཚོན་པའི་ཕྱིར། ཞེས་བླ་མ་གོང་མ་རྣམས་གསུང་ངོ་། །སྐུ་གསུམ་གྱི་ཞིང་ཁམས་ཀྱི་ཁྱད་པར་དེ་གང་ཞེ་ན། དོན་ལ་སྐུ་གསུམ་དབྱེར་མེད་ཡིན་པའི་ཕྱིར། སྤྱིའི་དབང་དུ་ཞིང་ཁམས་ལ་ཆེ་ཆུང་མེད་ནའང་། བྱེ་བྲག་གི་དབང་དུ་བྱས་ན། ཆོས་སྐུའི་ཞིང་ཁམས་ནི། ཆོས་དབྱིངས་བརྡལ་ཁྱབ་ཆེན་པོའི་ཞིང་ཡིན་པའི་ཕྱིར། དངོས་པོའི་ཆོས་ཀྱིས་ཚད་གཟུང་དུ་མེད་དོ། །མཐའ་ཡས་མུ་མེད། ཅེས་སོ། །ལོངས་སྐུའི་ཞིང་ཁམས་ནི། སྟོང་གསུམ་གྱི་འཇིག་རྟེན་སྟོང་ལ་སྟོང་རྒྱུ་བཀོད་དང་པོ། དེ་སྟོང་ལ་སྟོང་རྒྱུ་བཀོད་བར་མ། དེ་སྟོང་ལ་སྟོང་མཚམས་སྦྱོར་ཡོངས་སུ་འདས་པ་ཞེས་བྱ་བ་ལོངས་སྐུའི་ཞིང་གི་ཚད་དོ། །སྣྲེལ་ཞི་དང་ཡན་མན་གྱི་འཇིག་རྟེན་དྲུག་གི་ཕྱོགས་བཅུ། ཞེས་པས་བསྟན་པར་བཞེད་དོ། །ཁོ་བོ་ནི། དེ་ཡང་མི་སྤོང་མོད་ཀྱི་འོན་ཀྱང་ཕལ་ཆེན་ལས། ལས་ཀྱི་བྱེ་བྲག་བསམ་མི་ཁྱབ། །དམྱལ་བའི་འཇིག་རྟེན་ཐུར་འཕྱང་ཞིང་། །གཤིན་རྗེའི་འཇིག་རྟེན་སྣྲེལ་ཞི་སྟེ། །བྱོལ་སོང་ལྷ་མི་གྱེན་དུ་འགྲོ། །ཞེས་པ་ལྟར་རམ། ཡང་ན་མགོ་གྱེན་བསྟན་དུ་འགྲོ་བ་མཐོ་རིས། སྣྲེལ་ཞི་སྟེ་འཕྲེད་བསྟན་གྱིས་འགྲོ་བ་དུད་འགྲོ། ཐུར་བསྟན་གྱིས་འགྲོ་བ་དམྱལ་བ་དང་ཡི་དྭགས་ཏེ། དེ་ལྟར་སྟོང་གསུམ་གྱི་འཇིག་རྟེན་གཅིག་ལའང་། སྣྲེལ་ཞི་དང་ཡན་མན་གསུམ་དུ་སྦྱར་ཏེ་འགྲོ་རིས་ལྔས་བསྡུས་པའི་སྣོད་བཅུད་དམ། རྣམ་པ་གཞན་དུ་ན། འགྲེལ་ཆུང་ལས། སྟོང་གསུམ་གཅིག་ལའང་ཆགས་ཚུལ་དྲུག །སྤྲུལ་སྐུ་གཅིག་གི་ཞིང་དུ་གྲགས། །ཞེས་པས། ལས་མི་མཐུན་པའི་དབང་གིས་སྣྲེལ་ཞིའི་འཇིག་རྟེན་ལྗིད་འབེབས་ལུགས་བཞི་དང་། ཡན་མན་སྟེ་སྣྲེལ་མ་དང་སྤྱིའུ་ཚུགས་ཀྱི་འཇིག་རྟེན་གྱི་ཁམས་འཆགས་ཚུལ་མི་འདྲ་བ་དྲུག་གིས་བསྡུས་པའི་འཇིག་རྟེན་རེ་རེ་ལའང་ཕྱོགས་མཚམས་སྟེང་འོག་གི་དབྱེ་བས་ཕྱོགས་བཅུར་རྒྱ་དང་གྲངས་ལས་འདས་པས་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོར་སྤྲུལ་སྐུ་རེ་རེས་འདུལ་བའི་ཕྱིར། འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད། ཅེས་པ་ཉིད་སྤྲུལ་སྐུའི་ཞིང་དུ་བཤད་ན་བདེའམ་སྙམ་སྟེ། ཕལ་ཆེན་གྱི་ལེའུ་བཅུ་བཞི་པར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བར་བྱས་ནས་འཛམ་གླིང་བྱེ་བ་ཕྲག་བརྒྱ་བསྟན་ཏོ། །ཞེས་པ་ནས། དེ་ལྟར་ཕྱོགས་བཅུ་ཤིན་ཏུ་རྒྱས་པར་བྱས་ནས་ཆོས་ཀྱི་དབྱིངས་མ་ལུས་པ་ཐམས་ཅད་སྣང་བར་བྱས་སོ། །འཇིག་རྟེན་གྱི་ཁམས་རེ་རེ་ཡང་འཛམ་གླིང་བྱེ་བ་ཕྲག་བརྒྱ་བསྟན་ནས། ཞེས་དང་། ཇི་ལྟར་བཅོམ་ལྡན་འདས་སངས་རྒྱས་ཀྱི་གདན་ལ་བཞུགས་ཤིང་། བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང་ཐབས་ཅིག་ཏུ་སྣང་བ་དེ་བཞིན་དུ། འཇིག་རྟེན་གྱི་ཁམས་རེ་རེའི་གླིང་བཞི་པ་བྱེ་བ་ཕྲག་བརྒྱ་ཀུན་ནའང་། དེ་བཞིན་གཤེགས་པ་བྱེ་བ་ཕྲག་བརྒྱ་དག་སངས་རྒྱས་ཀྱི་གདན་ལ་བཞུགས་པ་སྣང་ངོ་། །ཞེས་གསུངས་པ་ལྟར་དང་། འགྲེལ་ཆུང་ལས་ཀྱང་། དཔེར་ན་བར་སྣང་ཟླ་བ་གཅིག་ཤར་བ། །འཛམ་གླིང་ཆུ་རྣམས་ཀུན་ཏུ་ཆུ་ཟླ་སྣང་། །ཆུ་གཅིག་ནང་གི་ནམ་མཁའི་ཟླ་བ་ཡང་། །འགྲོ་བ་སོ་སོ་རང་གི་མདུན་དུ་སྣང་། །དེ་ནི་སྤྲུལ་སྐུ་གཅིག་ལ་གླིང་རྣམས་སྣང་། །གླིང་རྣམས་གཅིག་ལ་འགྲོ་བ་དྲུག་ཏུ་སྣང་། །ཐ་དད་དེ་ཀུན་སྤྲུལ་སྐུ་གཅིག་ཏུ་གྲགས། །དེ་འདྲའི་སྟོང་གསུམ་མཐའ་ཡས་མུ་མེད་ན། །དེ་འདྲའི་སྤྲུལ་སྐུ་རེ་རེས་འགྲོ་དོན་མཛད། །ཅེས་སོ། །གཉིས་པ་སྟོན་པ་ནི། ཐུབ་པ་ཆེན་པོ་བཅོམ་ལྡན་འདས་རེ་རེས། ཞེས་པས། སྟོང་གསུམ་གྱི་སྟོང་ཆེན་པོ་རེ་རེར་ཐུབ་པ་རེ་རེས་དོན་མཛད་པ་སྟེ། ཤེར་ཕྱིན་གྱི་ལྗགས་ཀྱི་དབང་པོ་བཀྲམ་པའི་ལེའུ་ལས། བཅོམ་ལྡན་འདས་ཀྱིས་སྟོང་གསུམ་གྱི་སྟོང་ཆེན་པོ་ལྗགས་ཀྱི་དབང་པོས་ཁེབས་པར་མཛད་པས། དེ་ན་གནས་པའི་སེམས་ཅན་འདུལ་བའི་སྣོད་དུ་གྱུར་པ་རྣམས་ནི་བླ་ན་མེད་པའི་བྱང་ཆུབ་ཏུ་ལུང་བསྟན་པར་གྱུར་ལ། ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་ནི་འོད་ཀྱིས་ཁྱབ་པར་མཛད་དོ། །ཞེས་སོ། །དེ་འདྲའི་ཐུབ་པ་རེ་རེའང་གདུལ་བྱའི་རིགས་དྲུག་གི་དབང་གིས་དྲུག་ཏུ་སྣང་བར་འགྱུར་ཏེ། སྒྱུ་འཕྲུལ་བླ་མ་ལས། ལྷ་ཡི་གནས་ན་བརྒྱ་བྱིན་མགོན། །ལྷ་མ་ཡིན་ལ་ཐགས་བཟང་རིས། །མི་ལ་བདུད་འདུལ་ཤཱཀྱ་མགོན། །ཡི་དྭགས་གནས་ན་ཁ་འབར་ཏེ། །བྱོལ་སོང་སེང་གེ་ཉིད་དུ་སྨྲ། །དམྱལ་བ་ལ་ནི་གཤིན་རྗེའི་མགོན། །ཞེས་སོ། །དེ་དག་སོ་སོས་ཀྱང་འགྲོ་བའི་ངོར་གང་འདུལ་གྱི་བཀོད་པ་ཚད་མེད་པ་སྟོན་པར་མཛད་ཀྱང་། རིགས་བསྡུས་ན། གང་འདུལ་བའི་ཚེ་སྐུའི་བཀོད་པ་བསྒྱུར་བ་བཟོའི་སྤྲུལ་པ་དང་། གང་འདུལ་གྱི་གཟུགས་སུ་སྐྱེ་བ་བཞེས་པའི་ཚུལ་སྟོན་པ་སྐྱེ་བ་སྤྲུལ་སྐུ་དང་། བྱང་ཆུབ་ཆེན་པོ་མཆོག་གི་སྤྲུལ་སྐུ་དང་གསུམ་མོ། །ཕྱི་མའི་གཟུགས་བརྙན་ནི། འགྲོ་བ་ལས་དག་པའི་སེམས་སྣང་ལ་སྣང་བ་སྟེ། དཔེར་ན་བཻ་ཌཱུཪྱའི་ས་གཞི་ལ་བརྒྱ་བྱིན་གྱི་གཟུགས་བརྙན་སྣང་བ་བཞིན་ནོ། །དེ་ཡང་རྒྱུད་བླ་མ་ལས། ཇི་ལྟར་བཻ་ཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་སོ། །གསུམ་པ་འཁོར་ནི། འགྲོ་བ་ལྔའི་དོན་མཛད་དེ། ཞེས་པས་ལྷ་མིན་སྟོད་རིས་ལྷ་དང་སྨད་རིས་དུད་འགྲོར་བསྡུས་པའི་ཕྱིར། དོན་ལ་འགྲོ་བ་རིགས་དྲུག་དང་། བྱེ་བྲག་འཁོར་རྣམ་པ་བཞི་ལ་སོགས་པའོ། །བཞི་པ་བསྟན་པ་ནི། འདུལ་བ་རྣམ་པ་བཞིས་གདུལ་བྱའི་བསམ་པ་དང་མཐུན་པར་ཆོས་སྟོན་པའོ། །དེ་ལ་འདུལ་བ་བཞི་ནི། སྐུ་གཞན་ལས་འཕགས་པར་བསྟན་པའི་ཕྱིར་བསོད་ནམས་ཆེན་པོས་འདུལ་བ་དང་། གསུང་རིག་པ་དང་ལྡན་པའི་ཐེག་པ་སྣ་ཚོགས་ཀྱི་ཆོས་སྟོན་པའི་ཕྱིར་རིག་པས་འདུལ་བ་དང་། ཐུགས་མངོན་ཤེས་ཆེན་པོ་ནི་དོན་ཐམས་ཅད་མངོན་སུམ་དུ་གྱུར་པས་འདུལ་བའི་ཕྱིར་མངོན་སུམ་པས་འདུལ་བ་དང་། ཕྲིན་ལས་བསམ་གྱིས་མི་ཁྱབ་པས་འདུལ་བ་ནི་རྫུ་འཕྲུལ་སྣ་ཚོགས་སྟོན་པའི་ཕྱིར་རྫུ་འཕྲུལ་གྱིས་འདུལ་བའོ། །དང་པོ་ནི་བལྟམས་པ་དང་། ཞེས་སོགས་མཛད་པ་བརྒྱད་དངོས་སུ་གསུངས་ཤིང་། བླ་མ་གོང་མ་རྣམས་མདོ་སྡེ་དང་མཐུན་པར་ཁ་བསྐངས་ཏེ་མཛད་པ་བཅུ་གཉིས་སུ་བཞེད། ཀུན་མཁྱེན་ཆོས་ཀྱི་རྒྱལ་པོ་ནི། དེར་མ་ངེས་ཏེ། འདིར་ཆོ་འཕྲུལ་བསྟན་པར་གསུངས་པའི་ཕྱིར་གསུངས། དེ་ལ་མཛད་པ་བཅུ་གཉིས་ཀྱི་དབང་དུ་བྱས་ན། རྒྱུད་བླ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་སོགས་སྐུའི་ཆོ་འཕྲུལ་ཆེན་པོས་འགྲོ་བ་འདུལ་བའི་མཛད་པ་ཐམས་ཅད་དེ། མྱ་ངན་ལས་འདས་པ་ལ་སོགས་པར་སྟོན་པའི་ཐུབ་པས། ཞེས་པའི་སོགས་ཁོངས་ཀྱིས་བསྡུས་སོ། །གཉིས་པ་ནི། ཐམས་ཅད་ཀྱང་འདི་ལྟ་སྟེ། འདུལ་བའི་དབང་གིས་ལྷ་དང་མིའི་ཐེག་པ་དང་། ཞེས་སོགས་ཀྱིས་ཐེག་པའི་རྐང་གྲངས་དང་། མ་རིག་པའི་ཞེས་སོགས་ཀྱིས་གང་གི་གཉེན་པོར་དགོངས་ཏེ་གསུང་ཚུལ་དང་། དེ་དག་ཐམས་ཅད་ཀྱང་། ཞེས་སོགས་ཀྱིས། གཉེན་པོ་དེ་དག་ཀྱང་དབང་པོའི་བྱེ་བྲག་གིས་ལྔར་བསྡུས་ཏེ་བསྟན་པའོ། །གསུམ་པ་ནི། དུས་བཞི་ཀུན་ཏུ། ཞེས་པ་ནས། མངོན་པར་ཤེས་པ་ཆེན་པོ་དྲུག་དང་། ཞེས་པའི་བར་རོ། །དེ་ཡང་དུས་བཞི་ལ་མ་ཐོགས་མ་ཆགས་པའི་ཡེ་ཤེས་ཀྱིས་མཉམ་པ་ཉིད་དུ་རང་གསལ་འཛིན་པ་མེད་པར་མཁྱེན་པ་སྟེ། བདེན་གཉིས་ལས། མཁྱེན་པའི་སྐད་ཅིག་གཅིག་ཉིད་ཀྱིས། །ཤེས་བྱའི་དཀྱིལ་འཁོར་ཀུན་ཁྱབ་པར། །ཞེས་པ་ལྟར་གནས་ལུགས་དུས་ལས་འདས་ཀྱང་། དེ་ལྟར་མ་རྟོགས་པའི་བློ་དུས་ལྟར་འཁྲུལ་པ་ཐམས་ཅད་མ་འདྲེས་ཡོངས་རྫོགས་སུ་ག །སལ་ལེར་གཟིགས་པ་ནི། སྔོན་དང་ཕྱི་མཐའ་མཁྱེན་པའི་མངོན་ཤེས་སོ། །དེ་བཞིན་དུ་ཉིད་ལས་མི་གཞན་པའམ་ཡུལ་མེད་རང་གསལ་གྱི་ཚུལ་གྱིས་གཞན་སེམས་མཁྱེན་པའི་མངོན་ཤེས་དང་། གཟིགས་པ་ལྷའི་མིག་གི་མངོན་ཤེས་དང་། གསན་པ་ལྷའི་རྣ་བའི་མངོན་ཤེས་དང་། གང་གིས་འདུལ་བ་དེ་ལ་དེར་སྟོན་པའི་རྫུ་འཕྲུལ་གྱི་མངོན་ཤེས་དང་། དེ་ལྟ་བུའི་ཚུལ་ཇི་ལྟར་སྤྱོད་ཀྱང་གཟུང་འཛིན་མི་མངའ་བས་ཟག་མེད་ཀྱི་མངོན་ཤེས་དང་དྲུག་གི་རིམ་པ་ཐམས་ཅད་ཐུགས་ཀྱི་རྗེས་སུ་འགྲོ་ཞིང་མཁྱེན་ནས་དོན་མཛད་པའི་ཕྱིར་མངོན་ཤེས་སོ། །བཞི་པ་ནི། ཀུན་ཏུ་སྐུ། ཞེས་སོགས་ཏེ། སྤྲུལ་པའི་སྐུས་འགྲོ་བའི་དོན་མཛད་པ་ནི་བསམ་གྱིས་མི་ཁྱབ་པའི་ཕྱིར། རིས་དྲུག་གིས་བསྡུས་པའི་འགྲོ་བ་གང་དང་གང་གིས་འདུལ་བ་དེ་དང་མཐུན་པར། ཞི་ཁྲོ་ལ་སོགས་པའི་སྐུ་དང་། དེ་ལས་བྱུང་བའི་གསུང་དང་། དེ་དག་སློང་བ་པོའི་ཐུགས་བསམ་གྱིས་མི་ཁྱབ་པ་དང་། སྐུ་གཅིག་ལའང་ཞལ་མང་པོ་དང་ཕྲ་མེན་ལ་སོགས་པའི་ཞལ་གཟུགས་མི་མཐུན་པའང་སྣ་ཚོགས་སྟོན་པར་མཛད་པ་སྟེ། སངས་རྒྱས་མཉམ་སྦྱོར་ལས། རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་གེགས་མཛད་དེ། །དེ་ལ་སོགས་པ་མཐའ་ཡས་མཆོག །རི་དང་སྐྱེ་བོ་ཐམས་ཅད་དོ། །ཞེས་སོ། །མདོར་ན་སྐུ་སོགས་མང་པོར་སྟོན་པས་གྲངས་བསམ་གྱིས་མི་ཁྱབ་པར་མ་ཟད། ནམ་མཁས་ཇི་ཙམ་ཁྱབ་པ་དེ་སྲིད་དུ་སྐུས་ཁྱབ་པ་སོགས་ཚད་བསམ་གྱིས་མི་ཁྱབ་པའང་སྦྱར་དུ་རུང་ངོ་། །ལྔ་པ་དུས་ནི། སྒྲོན་མ་བཀོད་པའི་དུས་ཏེ། ཤིན་ཏུ་དཀོན་པའི་དུས་ནའོ། །ཞེས་གསུངས་པའི་ཕྱིར་རོ། །
གསུམ་པ་ལ། རྩོད་པ་དགོད་པ་དང་། དེ་སྤང་བའོ། །དང་པོ་ནི། ཤ་ཟ་དགེ་སྦྱོང་གི་ཚུལ་འཛིན་པ་དཔལ་འཛིན་ན་རེ། ཁྱོད་ཀྱི་ཐུབ་པའི་དབྱེ་བ་ལ། །འགྲོ་དྲུག་ཐུབ་པ་དྲུག་ཡིན་ལོ། །འོ་ན་ཐུབ་པ་གཞན་ལྔ་ཡིས། །མཛད་པ་བཅུ་གཉིས་གང་དུ་བསྟན། །ཆོས་ཀྱི་འཁོར་ལོ་གང་དུ་བསྐོར། །བསྟན་པ་གང་ཡིན་དེ་འཛིན་སུ། །གལ་ཏེ་དེ་དག་མེད་ན་ནི། །ཐུབ་པ་ཡིན་པའི་སྒྲུབ་བྱེད་གང་། །ཞེས་ཟེར། གཉིས་པ་ནི། དེ་སྐད་དུ་སྨྲ་བ་དག་ཤིན་ཏུ་རིགས་པ་མ་ཡིན་ཏེ། རྒྱུ་མཚན་དེའི་ཕྱིར། འབྱོན་འགྱུར་གྱི་རྒྱལ་བ་བྱམས་པ་མགོན་པོ་ཆོས་ཅན། ཁྱོད་ཐུབ་པ་མ་ཡིན་པར་ཐལ། ཐུབ་པ་ཡིན་ན་ད་ལྟར་གྱི་སྟོན་པ་འདི་ཁོ་ན་ལྟར་མཛད་པ་བཅུ་གཉིས་སྟོན་དགོས་པ་གང་ཞིག །ཁྱོད་ཀྱིས་དཀའ་བ་སྤྱོད་པའི་མཛད་པ་མི་སྟོན་པའི་ཕྱིར། རྟགས་དང་པོ་ཁས། གཉིས་པ་མདོའི་ལུང་གིས་གྲུབ། གཞན་ཡང་། དག་པའི་ཞིང་ན་ངེས་འབྱུང་དང་རོལ་རྩེད་མི་སྟོན་པའི་རྒྱལ་བ་མཐའ་ཡས་པ་དང་། ཞིང་ཁམས་ལ་ལར་བདུད་ཀྱང་མེད་པས། དེ་འདུལ་མི་དགོས་པའི་ཕྱིར། དེ་དག་ཀྱང་ཐུབ་པ་མ་ཡིན་པར་ཐལ་ལོ། །དེའི་ཕྱིར་འགྲོ་འདུལ་སྤྲུལ་སྐུ་གྲངས་མེད་ནའང་། རིགས་བསྡུས་ན་དྲུག་ཏུ་བཞག་པ་ནི་འཐད་པ་དང་བཅས་པ་སྟེ། འཕགས་པ་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། འཇམ་དཔལ། དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་བས་འདུལ་བར་བྱ་བ་ཡིན་ན། དེ་བཞིན་གཤེགས་པའི་སྐུ་ཡང་གསེར་གྱི་ཁ་དོག་ཏུ་སྣང་ངོ་། །དེ་བཞིན་དུ། བཻ་ཌཱུཪྱ་དང་། ཨནྡྷ་རྙིལ་དང་། སྤུག་དང་། མུ་ཏིག་དམར་པོའི་ཁ་དོག་གིས་འདུལ་བར་བྱ་བ་ཡིན་ན། དེ་དག་གི་ཁ་དོག་ཏུ་བཞུགས་སོ། །དེ་བཞིན་དུ་འཇིག་རྟེན་སྐྱོང་བ་དང་། བརྒྱ་བྱིན་དང་། ཚངས་པ་དང་། དབང་ཕྱུག་དང་། ལྷ་མ་ཡིན་དང་། མི་དང་། དུད་འགྲོ་དང་། དམྱལ་བ་དང་། གཤིན་རྗེའི་འཇིག་རྟེན་པས་འདུལ་བར་བྱ་བ་ཡིན་ན། དེ་དག་གི་གཟུགས་སུ་བཞུགས་ནས་ཆོས་སྟོན་ཏོ། །ཞེས་དང་། ཕལ་ཆེན་ལས། ཀྱེ་རིགས་ཀྱི་བུ། དེ་བཞིན་གཤེགས་པའི་སྤྲུལ་པ་ནི་ཚད་མེད་དེ། འགྲོ་བ་གང་དང་གང་གིས་འདུལ་བ་དེ་དང་དེའི་གཟུགས་དང་ཁ་དོག་དང་མིང་གིས་དོན་མཛད་དོ། །འདི་ལྟ་སྟེ། དབང་བསྒྱུར་གྱི་གནས་སུ་ལྷའི་བདག་པོ་དབང་བསྒྱུར་དུ་སྤྲུལ་ནས་དགེ་བཅུའི་ལས་ཀྱི་ལམ་ཡང་དག་པར་ལེན་དུ་འཇུག་གོ །ཞེས་པ་ནས་ཡི་དྭགས་དང་དམྱལ་བའི་གཟུགས་ཀྱིས་འདུལ་བ་རྣམས་ལའང་དེའི་གཟུགས་སུ་སྤྲུལ་ཞིང་དོན་མཛད་དོ། །ཞེས་གསུངས་པའི་ཕྱིར། རྒྱལ་བ་ཐུབ་པ་ཉིད་དམྱལ་བའི་འགྲོ་བ་པས་དགེ་སྡིག་ལུང་སྟོན་གྱི་ཆོས་རྒྱལ་གཤིན་རྗེར་མཐོང་བ་སོགས་འགྲོ་བའི་ལས་མཐུན་དུ་བསྟན་པར་ཟད་དེ། བླ་མ་ལས། ལ་ལ་ལྷུམས་ཞུགས་ལ་ལ་བལྟམས། །ལ་ལ་ཚུལ་བསྲུང་རབ་ཏུ་བྱུང་། །ལ་ལ་བསྙེན་རྫོགས་དཀའ་ཐུབ་བྱེད། །ལ་ལ་དམ་ནོད་འགྲོ་བ་སྒྲོལ་། །ལ་ལ་བཅུ་དྲུག་ཆོས་ལ་འཛུད། །ལ་ལ་མེ་འབར་ཆུ་ཡང་བྲུབ། །ཅེས་སོགས་གསུངས་པའི་ཕྱིར། དེ་ལྟ་ནའང་ཐུབ་པ་དྲུག་ཀ་རབ་བྱུང་སྤྲུལ་སྐུར་བྱེད་པར་སྣང་བའི་ཕྱིར་ལས་མཐུན་དུ་བསྟན་པར་མི་རིགས་སོ་ཞེ་ན། དེའང་སྐྱོན་མེད་དེ། མངོན་རྟོགས་ལས། དག་པ་རྣམས་ལ་མཚན་དཔེ་དོད་པའི་སྐུ། །མ་ལུས་འདུལ་ཕྱིར་སྟོན་པའི་ཐུབ་པ་དྲུག །ཅེས་པ་ལྟར་འགྲོ་བ་གཞན་ལྔ་ཡང་མིའི་གདུལ་བྱ་ལྟར་ཤཱཀྱ་ཐུབ་པའི་སྐུས་འདུལ་བ་ཡོད་པའི་ཕྱིར་ཏེ། དེ་བཞིན་གཤེགས་པའི་ཆོ་འཕྲུལ་ཆེན་པོས་དམྱལ་བའི་མེ་ཞི་བར་བྱས་ནས་བྱམས་པ་ཆེན་པོའི་ཏིང་ངེ་འཛིན་ལ་རབ་ཏུ་འཛུད་པ་དང་། ཡི་དྭགས་ལ་དེ་བཞིན་གཤེགས་པའི་འོད་ཟེར་གྱིས་བཟའ་བའི་དབང་ཐོབ་པར་བྱས་ནས་སྦྱིན་པ་རྣམ་བཞིས་འདུལ་བ་སོགས་བཤད་པའི་ཕྱིར། དེ་ལྟར་སྤྲུལ་པ་མཆོག་གིས་འདུལ་བའི་ངོས་ནས་རབ་བྱུང་སྤྲུལ་སྐུར་བྱས་ཀྱི། དེ་དག་གིས་མི་ཐུལ་བ་ལ་སོ་སོའི་ལས་མཐུན་དུ་སྟོན་པའི་ཕྱིར་འགལ་བ་མེད་དོ། །གཞན་ཡང་། ལྷའི་ཐུབ་པ་སོགས་ལ་བསྟན་པ་དང་། དེ་འཛིན་གྱི་གང་ཟག་མེད་པར་ཡང་བསྒྲུབ་མི་ནུས་ཏེ། མ་མཐོང་བའི་ཕྱིར་མེད་པས་མ་ཁྱབ་ཅིང་། དེར་མ་ཟད་ལྷའི་བདག་པོ་དབང་བསྒྱུར་དུ་སྤྲུལ་ནས་དགེ་བཅུའི་ལས་ལམ་ལེན་དུ་འཇུག་པར་སྔར་གྱི་ལུང་གིས་གྲུབ་པའི་ཕྱིར། དེ་འཛིན་པའི་ལྷ་ཡོད་པར་ངེས་ཏེ། དཔེར་ན་བརྒྱ་བྱིན་གྱིས་བསྟན་པའི་སྒྲ་མདོ་འཛིན་པའི་ལྷ་ཡོད་པ་བཞིན་དང་། དེ་དག་གི་གཟུགས་སུ་བཞུགས་ནས་ཆོས་སྟོན་ཏོ། །ཞེས་པའི་ལུང་གིས་ཀྱང་གསལ་བའི་ཕྱིར་རོ། །གཞན་དུ་ཐུབ་པ་ཡིན་ན། དེས་བསྟན་པའི་ཆོས་དང་དེ་འཛིན་གྱི་གང་ཟག་ཡོད་དགོས་པར་འདོད་པའང་བློ་གྲོས་ཤིན་ཏུ་རྩིང་བ་སྟེ། རང་རྒྱལ་ལའང་ཐུབ་པའི་སྒྲས་བཤད་པའི་ཕྱིར། དེས་བསྟན་པའི་ཆོས་དང་། དེ་འཛིན་གྱི་སློབ་མ་ཡོད་དགོས་ན་ཧ་ཅང་ཐལ་ལོ། །དེས་ན་བདག་ཅག་གི་ལུགས་འདི་ལ་འགྲོ་འདུལ་གྱི་སྤྲུལ་སྐུ་དྲུག་ལ་ཐུབ་པའི་སྒྲར་བཤད་པ་ནི་ཤིན་ཏུ་འཐད་པ་དང་བཅས་ནས་སྨྲ་སྟེ། དགོངས་འདུས་ལས། རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པས་འཁོར་བའི་དཔུང་གཏན་བཅོམ་པའི་ཕྱིར་ཐུབ་པ་ཞེས་བྱའོ། །ཞེས་གསུངས་པའི་ཕྱིར་རོ། །
གཉིས་པ་རྐྱེན་གླེང་བསླང་བ་ནི། ལེའུ་གཉིས་པས་སྟོན་ཏེ། དེ་ལའང་། དགོས་ཆེད། ངོ་བོ། སྒྲ་དོན། རྣམ་གྲངས་བཞི། དང་པོ་ནི། རྒྱུད་དོན་གདུལ་བྱའི་བློ་དང་འཚམས་པར་མྱུར་དུ་འབྱུང་བའི་དགོས་པ་ཡོད་དེ། ཐུགས་ཐིག་ལས། བརྗོད་བྱ་རང་བཞིན་གསང་བའི་རྒྱུད། །དེ་ཇི་བཞིན་དུ་རྗོད་བྱེད་དག །སྟོན་པས་རྒྱུད་དོན་ལམ་དང་ཚིག །འབྲེལ་པ་རིམ་དང་འཆོལ་འཁྲུགས་པ། །གླེང་གཞིའི་རྗེས་སུ་ངེས་པར་འགྲོ། །ཞེས་སོ། །གཉིས་པ་ནི། སྟོན་འཁོར་གྱི་དྲི་ལན་གཅིག་གི་རྐྱེན་དུ་གཅིག་གྱུར་པས་བསྟན་པ་འབྱུང་མ་རག་པ་སྟེ། དེ་ཉིད་ལས། སྟོན་པས་གནང་དང་འཁོར་གྱིས་ཞུས། །སྐབས་ལས་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རག་པ། །ཞེས་སོ། །
གསུམ་པ་ནི། གླེང་བར་བྱ་བ་བསྟན་པ་སྟེ། དེ་གླེང་བར་བསྐུལ་བ་ནི། བསྟན་པ་འབྱུང་བའི་རྐྱེན་དུ་གྱུར་པའི་ཕྱིར་བསླང་ཞེས་བྱའོ། །
བཞི་པ་ནི། ཁོག་གཞུང་ལས། དེ་བཞིན་གླེང་བསླང་རྣམ་པ་གཉིས། །ཞེས་པས། ཐུན་མིན་ལྷན་ཅིག་པའི་ཆེད་དུ་སྟོན་པས་མདུན་བསུས་ཏེ་གླེང་བསླང་བ་དང་། ཐུན་མོང་གོ་ཕྱེ་བའི་ཆེད་དུ་འཁོར་གྱིས་གུས་པས་དྲིས་ཏེ་གླེང་བསླང་བ་གཉིས། དེའང་ཐུགས་ཐིག་ལས། འཁོར་དང་གཞན་གྱི་དོན་ཕྱིར་དུ། །རྒྱུ་ཚོགས་ཐུགས་རྗེས་སྣང་བར་འགྱུར། །ཞེས་སོ། །དང་པོ་ལའང་། གོ་དོན་དང་། གཏན་ལ་དབབ་པའོ། །དང་པོ་ནི། སྟོན་པ་ཡབ་ཡུམ་གྱིས་ལྷན་ཅིག་པའི་འཁོར་ལ་ཟབ་དབང་གསུམ་བསྐུར་བས་ཞེན་པ་དག་ནས་རང་བཞིན་གསང་བའི་སྙིང་པོའི་དོན་རྟོགས་ཏེ་རང་དོན་དུ་སངས་རྒྱས་པ་ནི་ཐུན་མིན་གྱི་གླེང་བསླང་ཡིན་ཏེ། དོན་དམ་ངེས་པའི་ཚིག་གིས་རང་བཞིན་གསང་བའི་སྙིང་པོའི་དོན་དངོས་སུ་སྟོན་པའི་ཕྱིར། དེ་སྐད་དུའང་ཁོག་གཞུང་ལས། ཐུན་མོང་མ་ཡིན་སྟོན་པ་ཉིད། །ཡབ་ཡུམ་ཆགས་བསྐུལ་རོལ་པ་དང་། །དགྱེས་བསྟར་འཁོར་ལ་དབང་བསྐུར་བས། །རྒྱུད་དོན་འབྱུང་ཕྱིར་བསླང་ཞེས་བྱ། །ཞེས་སོ། །
གཉིས་པ་ལ། གསང་དབང་བསྐུར་བ་དང་། དབང་གཉིས་ཀྱི་ལས་ཐུན་མོང་དུ་བསྟན་པའོ། །དང་པོ་ནི། མ་རྟོགས་པའི་དུས་ན་ཡིད་ཀྱི་རྟོག་པ་ནི་འཁོར་བའི་བྱེད་པ་པོ་དང་། རྟོགས་པའི་དུས་ན་འདས་པའི་བྱེད་པ་པོ་རང་རིག་པའི་ཡེ་ཤེས་གཉིས་རང་བཞིན་དབྱེར་མི་ཕྱེད་པའི་ཕྱིར་རྡོ་རྗེ་ཡིད་དེ་ཀུན་ཏུ་བཟང་པོའོ། །བྱ་བ་མོ་ནི། དབང་པོ་ལྔའི་ཡུལ་དུ་མ་གྱུར་པའི་ཡུལ་འདུས་བྱས་དང་འདུས་མ་བྱས་ཀྱི་ཆོས་ཀྱི་ཁམས་ཡིན་ལ། དེས་ཡིད་སྐྱེད་པར་བྱེད་ཅིང་། ཡིད་ཀྱི་ཡུལ་དུ་གྱུར་པའི་ཕྱིར་བཙུན་མོ་སྟེ་ཀུན་ཏུ་བཟང་མོའོ། །དེའི་ཕྱིར། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད། ཅེས་སོགས་དང་། དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོས། ཞེས་སོགས་ཏེ། དེ་ལྟར་སྟོན་པ་ཡབ་ཡུམ་གཉིས་སྙོམས་པར་ཞུགས་པ་ལས་བྱུང་བའི་ཉི་ཟླ་བྱང་ཆུབ་ཀྱི་སེམས་ཀྱིས་རྒྱུ་བྱས་ཤིང་། ཡབ་ཡུམ་གྱིས་ཉམས་སུ་བསྟར་བའི་དོན་ཆེད་དུ་བརྗོད་པ་གཉིས་ཀྱིས་རྐྱེན་བྱས་ཏེ། དེའི་འབྲས་བུ་རྟོགས་པ་བརྗོད་པ་ནི། ཡབ་ཀྱིས་ཐབས་ཀྱི་ཆ་བཟུང་ནས། འཁོར་འདས་ཐམས་ཅད་ཕྱག་རྒྱའི་དཀྱིལ་འཁོར་གཅིག་གི་རང་བཞིན་དུ་སངས་རྒྱས་པ་ལ་ངམ་པའི་ཚུལ་གྱིས། ཨེ་མའོ། རྡོ་རྗེ་ཕུང་པོ་ཡན་ལག་ནི། །ཞེས་སོགས་གླེང་བར་མཛད་པས། འཁོར་རྣམས་ཀྱིས་ལྷག་པ་ཀུན་རྫོབ་ཀྱི་བདེན་པ་མཐོང་སྟེ། ཕུང་ཁམས་སྐྱེ་མཆེད་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ་རྟོགས་ཤིང་། ཡུམ་གྱིས་ཤེས་རབ་ཀྱི་ཆ་བཟུང་སྟེ། ཀྱེ་མའོ། ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོགས་དབྱིངས་ཀྱི་དོན་གླེང་བར་མཛད་པས། འཁོར་རྣམས་ཀྱིས་ལྷག་པ་དོན་དམ་གྱི་བདེན་པ་མཐོང་སྟེ། འདི་ལྟར་ཕྱོགས་བཅུ་སྟོང་ཁམས་དང་། སྲིད་པ་གསུམ་དང་། སྙིགས་མ་ལྔ་དང་། ཕུང་པོ་ལྔ་སྟེ། ཐ་སྙད་བཞིས་བསྡུས་པ་ཐམས་ཅད་ཡེ་ནས་ཆོས་ཀྱི་སྐུར་མངོན་སངས་རྒྱས་པའི་ཕྱིར། འབྲས་བུ་གཞན་ནས་བཙལ་དུ་མེད་པར་རྟོགས་པའོ། །དེའི་ཚེ་སྔོན་བྱུང་ལྷན་ཅིག་པའི་འཁོར་ལ། གླེང་བསླང་། དབང་བསྐུར། རྒྱུད་བཤད་པ་གསུམ་ཀ་ཆིག་རྫོགས་ཡིན་ལ། རྗེས་འཇུག་གོ་ཕྱེ་བའི་འཁོར་ལ། སྔ་ཕྱིའི་རིམ་པ་ཇི་ལྟ་བར་སྒྲིབ་པ་རགས་འབྲིང་དག་ཅིང་ཀུན་རྫོབ་དང་དོན་དམ་པའི་བདེན་པ་བཤད་དུ་རུང་བའི་སྣོད་ལྡན་དུ་བྱས་པའོ། །གལ་ཏེ་གཞུང་གི་ཚིག་འབྲེལ་ལྟར། ཡབ་ཡུམ་གཉིས་སྙོམས་པར་ཞུགས་པ་དང་། དབང་བསྐུར་བ་དང་། འཁོར་གྱིས་བདེན་པ་མཐོང་བ་རྣམས་དུས་སྔ་ཕྱི་ཡིན་ནམ་སྙམ་ན། མ་ཡིན་ཏེ། སྤར་ཁབ་ལས། ཐིག་ལེ་གཉིས་སུ་མེད་པ་སྟེ་དགོངས་པའང་བསྡུའོ། །ཡབ་ཡུམ་གཉིས་ཀྱི་ལས་དང་། མྱོང་བ་དང་། ཚིག་འདི་དག་ཡི་གེ་སྔ་ཕྱིར་ཡོད་ཀྱང་། དུས་མཉམ་པར་གསུངས་སོ། །ཞེས་པས་ཚིག་ལ་སྔ་ཕྱི་བྱུང་ཡང་དུས་སྔ་ཕྱི་མེད་དོ། །དེའི་ཕྱིར་སྔོན་དུ་བཞུགས་པ་གཉིས་བཤད་ནས། ཉམས་སུ་བསྟར་བ་གཉིས་ཕྱི་ལ་བཤད་པ་ཡིན་ནོ། །ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ་ཞེས་པ་ནི། གསང་དབང་གི་ངེས་ཚིག་སྟེ། ཉི་ཟླ་གཉིས་བསྲེས་ཀྱི་ཐིག་ལེས་འཁོར་ལ་གསང་དབང་བསྐུར་བས་དོན་དམ་པའི་བདེན་པ་རྟོག་མེད་ཀྱི་ཡེ་ཤེས་སྐྱེས་ཀྱང་། སྟོན་པའི་དགོངས་པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་མ་མྱོང་བའི་ཕྱིར་གསང་དབང་ཞེས་བྱའོ། །འདིར་ཁ་ཅིག་ན་རེ། སྟོན་པ་ཡབ་ཡུམ་གྱིས་གསང་དབང་བསྐུར་བ་མི་འཐད་དེ། ཁྱད་པར་གྱི་བྱེད་ཆོས་དབང་རྫས་མེད་པའི་ཕྱིར་ཏེ། སྟོན་པ་ཡབ་ཡུམ་གདོས་བཅས་ཤ་ཁྲག་གི་ལུས་སུ་མེད་པའི་ཕྱིར། དེ་ལ་བརྟེན་པའི་ཉི་ཟླ་བྱང་ཆུབ་ཀྱི་སེམས་མེད་དེ། གྱང་མེད་ན་དེ་ལ་བརྟེན་པའི་རི་མོ་མེད་པ་བཞིན་ནོ་ཞེ་ན། གདོས་པའི་དེ་དང་དེ་མེད་པ་བདེན་ཀྱང་། གདུལ་བྱའི་སྣང་བ་ལ་ཉི་ཟླ་གཉིས་འདྲེས་ཀྱི་བྱང་སེམས་འོང་བ་མི་འགལ་ཏེ། དཔེ་ཆུང་ལས། གནས་རྟེན་རྩ་དང་ཐིག་ལེ་ལས། །རང་རིག་ཡེ་ཤེས་གཟུགས་སུ་འཆགས། །ཞེས་པས། རྒྱལ་བའི་ཐུགས་རང་རིག་པ་ཉིད་གདུལ་བྱའི་ངོ་ལ་ཡེ་ཤེས་སྒྱུ་མའི་རང་བཞིན་གྱི་གནས་པ་རྩ་དང་བརྟེན་པ་ཐིག་ལེར་སྣང་ནས་དོན་མཛད་པའི་ཕྱིར་རོ། །
གཉིས་པ་ནི། དེ་ལྟར་གསང་དབང་བསྐུར་ནས། ཤེས་རབ་ཡེ་ཤེས་དང་། དབྱེར་མེད་བདེ་ཆེན་གྱི་དབང་གཉིས་ཀྱི་ལས་ཐུན་མོང་དུ་སྟོན་པར་བཞེད་པས། དེ་ནས་གཉིས་སུ་མེད་པའི་བདག་ཉིད་ཆེན་པོས། ཞེས་སོགས་ཏེ། དོན་དགོངས་པ་དང་། རྟགས་ཡབ་ཡུམ་གྱི་ཉི་ཟླ་གཉིས་སུ་མེད་པའི་ངང་ནས། བདག་རྨད་བྱུང་རྒྱལ་པོ་ལས། དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་ལྟར་འཁོར་གྱི་སེམས་ལྔ་བསྐྱེད་པའི་ཕྱིར་འདི་གསུངས་སོ། །དེའང་སེམས་བསྐྱེད་པའམ་དབང་བསྐུར་བ་དངོས་ལ་བླ་མ་རྣམས་ཀྱི་དགོངས་པ་ཐ་དད་པ་རྣམས་བསྡུ་ན་གསུམ་དུ་འདུ་སྟེ། གཞི་རང་བཞིན་གྱི། བགྲོད་པ་ལམ་གྱི། མཐར་ཕྱིན་འབྲས་བུའི་སེམས་བསྐྱེད་དོ། །དང་པོ་ནི། ཨེ་ངོ་རྨད་གསུམ་རིམ་པར་གཞི་རྣམ་ཤེས་ཡེ་ནས་ཡེ་ཤེས་ཡིན་པ་དང་། དེ་ཉམས་སུ་ལེན་པའི་ཐབས་དང་། དེས་མཐར་ཕྱིན་པའི་འབྲས་བུ་ལ་ངམ་པའོ། །དེ་དག་ནི་རྫོགས་པའི་སངས་རྒྱས་ཀུན་གྱི་གསང་བ་སྟེ། ཐུགས་ཀྱི་བརྣག་བྱ་གཞི་འཆིང་གྲོལ་མེད་པར་ཡོན་ཏན་ལྷུན་གྱིས་གྲུབ་པ་འདི་ཕལ་གྱི་ཡུལ་མ་ཡིན་པའི་ཕྱིར་རོ། །དེ་ཡང་དོན་དམ་པར་སྐྱེ་འགག་གནས་དམིགས་འགྲོ་འོང་མེད་པ་ལས། ཀུན་རྫོབ་ཏུ་སྐྱེ་སོགས་ལྔར་སྣང་ཞིང་། སྐྱེས་པར་སྣང་ཙམ་ཉིད་ནས་སྐྱེ་བ་ལ་སོགས་པ་མེད་པའི་ཕྱིར། བདེན་པ་དབྱེར་མེད་དེ། རིམ་པ་བཞིན། གཞི་དོན་གྱི་ཀུན་གཞི་སྟོང་པ་ཉིད་ཀྱི་ཡེ་ཤེས་སུ་དང་། སྦྱོར་བ་དོན་གྱི་ཀུན་གཞི་མེ་ལོང་ལྟ་བུ་དང་། ཉོན་ཡིད་མཉམ་ཉིད། ཡིད་སོ་སོར་རྟོག་པ། སྒོ་ལྔ་བྱ་གྲུབ་ཡེ་ཤེས་སུ་སེམས་བསྐྱེད་པར་སྦྱར་རོ། །གཉིས་པ་ལ། གྲོལ་ལམ་དང་། ཐབས་ལམ་གཉིས། དང་པོ་ནི། ཨེ་མ་སོགས་བདེན་པ་གསུམ་ལ་རིམ་པར་དམ་པ་དང་། སངས་རྒྱས་ཀུན་གྱི་དགོངས་པ་དེ་རྟོགས་དཀའ་བའི་ཕྱིར་གསང་བའོ། །དེའང་སེམས་ལྔ་དང་སྦྱར་བ་དང་། ཡེ་ཤེས་ལྔ་དང་སྦྱར་བ་གཉིས། དང་པོ་ནི། སྐྱེ་བ་མེད་སོགས་བདེན་པ་དབྱེར་མེད་དུ་ལ་བཟླ་བ་ལྔ་པོ་གཡོ། འཇུག །གནས། སྨོན། མཐར་ཕྱིན་པ་སྟེ། གྲོལ་ལམ་གྱི་སེམས་ལྔ་རིམ་ཅིག་ཆར་དུ་སྐྱེ་བ་གཉིས་ལ་སྦྱར་རོ། །འདིར་གནས་པའི་རྗེས་སུ་སྨོན་པ་ནི་དཀྱུས་ཀྱི་གོ་རིམ་སྟེ། སྐྱེ་རིམ་གྱི་དབང་དུ་གཡོ་བའི་རྗེས་སུ་སྨོན་པ་འབྱུང་ངོ་། །གཉིས་པ་ནི། སྐྱེ་མེད་དོན་དམ། ཐམས་ཅད་སྐྱེས་པ་ཀུན་རྫོབ། སྐྱེས་མ་སྐྱེས་གཉིས་སུ་མེད་པར་རྟོགས་པ་ཆོས་ཀྱི་དབྱིངས་ཀྱི་ཡེ་ཤེས་སུ་བསྐྱེད་པ་སོགས་གོ་རིམ་སྔར་ལྟར་སྦྱོར་ཏེ། རྔམ་གློག་གི་ལེའུ་བཞི་པར་གསུངས་སོ། །གཉིས་པ་ཐབས་ལམ་འོག་སྒོ་ལྟར་བཤད་པ་ནི། ཨེ་མའོ་སོགས་ཏེ། འདོད་ཆགས་ཆེན་པོའི་སྤྱོད་པས་མི་འཆིང་བ་དང་། དེས་མྱུར་དུ་འབྲས་བུ་ལ་སྦྱོར་བ་དང་། ཐབས་དེ་གཞན་ལས་འཕགས་པ་བཀའ་རྨད་དུ་བྱུང་བ་འདིའི་ཁྱད་ཆོས་ཡིན་པ་ལ་ངམ་པ་དང་། རྒྱལ་བའི་དགོངས་པ་ཐབས་ཀྱི་ལམ་འདི་ཁེ་ཉེན་དང་བཅས་པའི་ཕྱིིར་གསང་བའོ། །དེ་ཡང་། རང་བཞིན་ལྷན་ཅིག་སྐྱེས་པའི་ཡེ་ཤེས་ལ་ཉི་ཟླ་བྱང་ཆུབ་ཀྱི་སེམས་སྐྱེ་འགག་གནས་དམིགས་འགྲོ་འོང་མེད་པ་ལས། དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་བླང་བའི་དུས་སུ་ཐམས་ཅད་སྐྱེ་འགག་གནས་དམིགས་ལྟར་སྣང་བ་བཞི་རིམ་པ་ལྟར། གཡོ་ལྡང་དང་། འཇིག་འཇུག་དང་། གནས་པ་དང་། སྨོན་པ་བྱང་སེམས་ཏེ། དབང་གཉིས་ཀྱི་སྔོན་འགྲོ་ཐུན་མོང་བ་སེམས་བཞི་དང་། འགྲོ་དང་འོང་ཞེས་པས་དངོས་གཞི་ཐུན་མོང་བ་སྟེ། ཉི་ཟླ་བྱང་ཆུབ་ཀྱི་སེམས་རྡོ་རྗེ་དང་པདྨའི་རྩེར་དགའ་བཞི་ལུགས་འབྱུང་དུ་འགྲོ་བའི་དུས་དེར། ཐིག་ལེ་གཉིས་འཕྲད་ནས་ཐབས་ཀྱིས་བཟུང་སྟེ་མ་ཤོར་བས་ཤེས་རབ་ཡེ་ཤེས་ཀྱི་དབང་ཐོབ་ཅིང་། དོན་དམ་འོད་གསལ་གྱི་ཡེ་ཤེས་སྐྱེས་པའོ། །སླར་ཐབས་ཀྱིས་ལྡོག་སྟེ་ཡར་གྱེན་དུ་འོང་བས་མས་བརྟན་གྱི་དགའ་བཞི་རྫོགས་ནས་ཐིག་ལེ་རང་གནས་སུ་སླེབ་ཙམ་ན་རྟོག་ཚོགས་སྐུ་དང་ཡེ་ཤེས་སུ་སངས་རྒྱས་པ་ནི་བདེ་བ་ཆེན་པོའི་དབང་ཐོབ་པའོ། །དེའི་ཚེ་ཀུན་རྫོབ་དང་དབྱེར་མེད་ཀྱི་ཡེ་ཤེས་སྐྱེས་པ་ནི་མཐར་ཕྱིན་པའམ་འགྲོ་འོང་བྱང་ཆུབ་ཀྱི་སེམས་ཏེ། དབང་ཕྱི་མ་གཉིས་སྐབས་འདི་ཉིད་དུ་བསྐུར་བར་ཤེས་པར་བྱའོ། །དེ་ལྟར་དངོས་པོ་ལྷན་ཅིག་སྐྱེས་པའི་ཡེ་ཤེས་ལ་སྐྱེ་འགག་གནས་དམིགས་འགྲོ་འོང་དུ་སྣང་བ་བདོ་བའི་དུས་ཉིད་ན་རང་བཞིན་ལྷན་སྐྱེས་ཀྱི་ཡེ་ཤེས་སྐྱེས་པ་ལ་སོགས་པ་ལྔ་དབྱེར་མེད་དུ་ལ་བཟླའོ། །འདིར་ཁ་ཅིག་ན་རེ། ཟབ་མོའི་དབང་གསུམ་པོ་འདི་གླེང་བསླང་ཡིན་ནམ་རྒྱུད་དོན་ཡིན། དང་པོ་ལྟར་ན། ལྷན་ཅིག་པས་དབང་ཐོབ་པའི་ཚེ་རྒྱུད་དོན་གོ་བར་མི་འགྱུར་ཏེ། རྒྱུད་དོན་མཐར་ཕྱིན་པའི་ཕྱིར་རོ། །གཉིས་པ་ལྟར་ན། སྤར་ཁབ་ལས། སེམས་ལྔས་གླེང་བསླང་བའི་ལས་ཀྱི། ཞེས་པ་དང་འགལ་ལོ་ཞེ་ན། ལྟོས་ས་གཉིས་ལ་ལྟོས་ནས་རྐྱེན་དང་བསྟན་པ་གཉིས་ཀ་ཡིན་པ་མི་འགལ་ཏེ། དེའི་རྒྱུ་མཚན་ཡང་། ལྷན་ཅིག་ལ་ལྟོས་ཏེ། དབང་བསྐུར་བའི་སྒོ་ནས་བརྗོད་བྱ་དོན་གྱི་རྒྱུད་འཁོར་ལ་སྣང་བར་མཛད་པའི་ཕྱིར། རྒྱུད་དོན་རྟོགས་པའི་ལྡོག་ཆ་ནས་བསྟན་པ་དང་། གསང་དབང་བསྐུར་བས་སྣོད་རུང་དུ་བྱས་ནས། དབང་ཕྱི་མ་གཉིས་ཀྱིས་སྨིན་པ་གྲོལ་བའི་སྐལ་བ་ཅན་དུ་བྱས་ཏེ། རང་བཞིན་གསང་བའི་སྙིང་པོའི་དོན་རྟོགས་པའི་རྐྱེན་དུ་གྱུར་པའི་ཕྱིར་གླེང་བསླང་དུའང་འགྱུར་ལ། ཡང་ན་གསང་དབང་རྐྱེན་དང་། དབང་ཕྱི་མ་གཉིས་རྒྱུད་དོན་དུ་འགྱུར་བའི་ཕྱིར་ཉེས་པ་དང་པོ་མེད་དོ། །དེའང་སྤར་ཁབ་ལས། རྒྱུད་ཀྱི་རྐྱེན་གཉིས་ལས་ཐུན་མོང་མ་ཡིན་པའི་གླེང་བསླང་བ་གསང་བའི་དབང་སྟོན་པའི་ཕྱིར་རོ། །ཞེས་དང་། པ་ར་མཱརྠ་ནི་དོན་དམ་པ་བྱང་ཆུབ་ཀྱི་སེམས་ཏེ། སེམས་ལྔའི་ཐ་མ་སྐད་ཅིག་མ་བཅུ་དྲུག་པའི་བྱང་ཆུབ་སེམས་མཐས་མ་རེག་པ་ནི་མཱ་ཧཱ་ཡཱ་ན་ནི་ཐེག་པ་ཆེན་པོ་སྟེ་རྒྱུད་འདིའོ། །ཞེས་དང་། མངོན་རྟོགས་ལས་ཀྱང་། སྟོན་པ་ཡབ་ཡུམ་གྱིས་གླེང་བསླང་བ་ནི་དབང་བསྐུར་ཞིང་རྒྱུད་བཤད་པའི་ཕྱིར། ཞེས་སོ། །གོ་ཕྱེ་བ་ལ་ལྟོས་ཏེ། དབང་བསྐུར་བས་སྟོན་འཁོར་ཁྱད་མེད་དུ་གྱུར་ནས། གཞན་དོན་དུ་རྒྱུད་ཞུ་བའི་སྤོབས་པ་སྐྱེས་ཏེ་བསྟན་པ་འབྱུང་བའི་རྐྱེན་དུ་གྱུར་པས་ན་དབང་གསུམ་ཀ་གླེང་བསླང་དུ་འགྱུར་པའི་ཕྱིར་ཉེས་པ་གཉིས་པ་མེད་དོ། །དེའང་སྔ་མ་ལས། འཁོར་གྱིས་རྟོགས་ནས་གླེང་བསླང་བ་ནི་གོ་ཕྱེ་བ་རྣམས་ཀྱི་ཆེད་དོ། །ཞེས་སོ། །དེས་ན་གླེང་བསླང་བ། དབང་ཐོབ་པ། རྒྱུད་གོ་བ་གསུམ་ངོ་བོ་གཅིག་པའི་ཕྱིར། སྔོན་བྱུང་ལྷན་ཅིག་པ་ལ་རྒྱུད་ཚར་གཅིག་རྫོགས་པ་ཡིན་ནོ། །དེ་ལྟར་ལྷན་ཅིག་པ་ལ་དབང་བསྐུར་བས་ཤེས་བྱའི་སྒྲིབ་པ་ཆ་ཕྲ་མོ་དག །རང་བཞིན་གསང་བའི་སྙིང་པོའི་དོན་ཁོང་དུ་ཆུད་དེ་གཉིས་མེད་ཀྱི་ཡེ་ཤེས་ཤར་ནས་རང་དོན་དུ་སྐུ་ལྔའི་བདག་ཉིད་དུ་སངས་རྒྱས་པ་ནི། གསུམ་པ་མཐར་ཕྱིན་འབྲས་བུའི་སེམས་བསྐྱེད་དེ། གང་ཞེ་ན། ཨེ་མའོ་སོགས་ཏེ། སྐུ་ལྔ་ལ་སྙོམས་པར་ཞུགས་ཤིང་གླེང་བསླང་བ་དང་། དབང་བསྐུར་ཞིང་རྒྱུད་བཤད་པ་དང་། སྒྲིབ་པ་དག་ནས་སངས་རྒྱས་པ་ལ་ངམ་པ་སྟེ། ལྷན་ཅིག་པ་རྣམས་སྐུ་ལྔའི་ངོ་བོར་སངས་རྒྱས་པས་སྟོན་འཁོར་དགོངས་པ་གཅིག་ཏུ་གྱུར་པ་དེ་གོ་ཕྱེ་བའི་སྤྱོད་ཡུལ་དུ་མ་གྱུར་པའི་ཕྱིར་གསང་བའོ། །དེའང་། སྐྱེས་མ་སྐྱེས་དབྱེར་མེད་ཆོས་ཀྱི་སྐུ་དང་། འགག་མི་འགག་གཉིས་མེད་མངོན་བྱང་གི་སྐུ་དང་། གནས་མི་གནས་གཉིས་མེད་ལོངས་སྐུ་དང་། དམིགས་མི་དམིགས་གཉིས་མེད་རྡོ་རྗེའི་སྐུ་དང་། འགྲོ་འོང་མེད་པ་ལས་དེར་སྣང་བ་གཉིས་མེད་སྤྲུལ་སྐུར་སེམས་བསྐྱེད་པ་དང་ལྔའོ། །ཞེས་བརྗོད་པས་དབང་ཐོབ་པའི་ཡོན་ཏན་སྟོན་འཁོར་དགོངས་པ་ཐ་མི་དད་དུ་གྱུར་པ་ལ་མཉེས་པའོ། །དེ་དག་ཀྱང་ཁོག་གཞུང་ལས། འགྲོ་བ་ཆགས་ཅན་སྤོང་མེད་ལ། །ལོངས་སྤྱོད་རྫོགས་སྐུ་བཙུན་མོ་དང་། །གཉིས་མེད་རོལ་སོགས་བསྟན་པ་སྟེ། །མཐུན་པས་མཐུན་པ་སྒྲོལ་ཕྱིར་རོ། །ཞེས་སོ། །
གཉིས་པ་ལའང་། གོ་དོན་དང་། གཏན་ལ་དབབ་པ་གཉིས། དང་པོ་ནི། ལྷན་ཅིག་པ་རྣམས་རང་དོན་དུ་སངས་རྒྱས་པའི་ཕྱིར་རྒྱུད་ཞུ་མི་དགོས་ཀྱང་། གཞན་དོན་གོ་ཕྱེ་བའི་འཁོར་གསང་བ་བཞིས་ཆོད་པ་རྣམས་ཀྱི་ཆེད་དུ་རྒྱུད་བཤད་པར་ཞུས་པས། སྟོན་པའི་ཐུགས་རྗེ་སྐྱེས་ཏེ་དགྱེས་པའི་ཚུལ་དྲུག་གི་སྒོ་ནས་རྒྱུད་བཤད་ཅིང་། འདི་ཉིད་རྟོགས་པའི་སྐལ་བ་དང་མི་ལྡན་པ་རྣམས་ལ་ལམ་སྟེགས་ཀྱི་ཐེག་པ་གཞན་སྟོན་པའི་ཕྱིར་ཐུབ་པ་དྲུག་སྤྲུལ་ཏེ་ཆོས་སྒོ་བསམ་གྱིས་མི་ཁྱབ་པ་སྤྲོ་བར་ཞལ་གྱིས་བཞེས་པ་ནི་ཐུན་མོང་གི་གླེང་བསླང་སྟེ། དེ་ཉིད་ལས། ཐུན་མོང་གླེང་བསླང་སྟོན་དང་འཁོར། །ཐ་དད་སྣང་ནས་དབང་ཐོབ་སྟེ། །ཉིད་ཀྱིས་རྟོགས་ནས་འགྲོ་དོན་དུ། །བཀའ་སྩལ་དོན་གྱིས་ཞུས་དང་ལན། །གནང་བར་དོན་གྱིས་ཚིག་ཏུ་ཕྱུང་། །སྐུ་གསུང་ཐུགས་ཀྱི་སྤྲོ་བ་མཛད། །ཅེས་སོ། །