རྒྱུད་ཀྱི་དོན་བཤད་པ།
ༀ་སྭ་སྟི་སིདྡྷཾ། འཁོར་འདས་ཆོས་ཀུན་རང་རིག་བྱང་ཆུབ་སེམས། །སྣང་སྟོང་དབྱེར་མེད་ལྷག་པ་ཆོས་ཀྱི་སྐུར། །ཡེ་ནས་རྣམ་དག་བདེ་གཤེགས་སྙིང་པོ་སྟེ། །གཞི་རྒྱུད་སེམས་ཀྱི་ཆོས་ཉིད་ལ་ཕྱག་འཚལ། །མཐའ་བྲལ་རིགས་ལམ་མཁའ་ལ་གཏན་ཚིགས་རྟས། །དྲངས་པའི་ཐབས་གྲོལ་ལམ་མཆོག་ཚ་ཟེར་ཅན། །ཤེས་ཐོབ་བྱེད་པའི་སྣང་བས་གཞི་ཇི་བཞིན། །གསལ་ནུས་ལམ་རྒྱུད་གསང་བའི་སྙིང་པོར་མོས། །ཤེས་རབ་རལ་གྲི་རྣོན་པོས་མ་རིག་པའི། །སྒོ་ངའི་སྦུབས་བརྟོལ་གནས་ལུགས་མངོན་གྱུར་ལ། །མཐར་ཐུག་འབྲས་རྒྱུད་བདེ་བར་གཤེགས་པ་ཞེས། །འདི་ན་དྲིན་ཅན་བླ་མར་བསྟན་ལ་འདུད། །སྦྱང་གཞི་སྦྱོང་བྱེད་སྦྱངས་འབྲས་དྲི་བྲལ་གྱི། །གནས་སྐབས་གསུམ་སྟེ་ཤེས་ཐོབ་བྱ་བྱེད་དང་། །བདག་ཉིད་གཅིག་པར་འབྲེལ་ཞིང་རྒྱུན་ཆགས་དོན། །རྨོངས་པས་བདེ་བླག་རྟོགས་ཕྱིར་དེ་དོན་དགྲོལ། །གཞུང་ལུགས་མང་པོའི་ཐོས་རྒྱ་མི་ལྡན་ཞིང་། །ཆོས་རབ་འབྱེད་པའི་ཤེས་རབ་མཐུ་ཆུང་ཡང་། །བླ་མའི་དྲིན་གྱིས་རྙེད་པའི་ཟབ་དོན་གནད། །ཅུང་ཟད་ངེས་འདི་བརྗོད་ལ་སྐྱོན་ཡོད་མིན། །དེ་ལྟར་སྔོན་དུ་འགྲོ་བ་སྤྱིའི་རྣམ་པར་གཞག་པས་བློ་སྦྱང་ནས། དབང་བསྐུར་བ་ཐོབ་ཅིང་དམ་ཚིག་གིས་རྒྱུད་བསྡམས་པའི་སྐལ་ལྡན་ལ་ཟབ་མོའི་རྒྱུད་བཤད་པར་བྱ་བ་ཡིན་པས། དེའི་ཕྱིར། བྱེ་བྲག་རྒྱུད་ཀྱི་དོན་བཤད་པ་ལ་འཇུག་པར་བྱ་སྟེ། འདི་ལ་གསུམ། ཁུངས་ལ་ཡིད་ཆེས་བསྐྱེད་པའི་ཕྱིར་སྔོན་ཇི་ལྟར་བྱུང་བའི་ལོ་རྒྱུས་དང་། ཆོས་ལ་དོན་གཉེར་གྱི་གུས་པས་འཇུག་པའི་ཕྱིར་རྒྱུད་ཀྱི་ཆེ་བ་དང་། ཆེ་བ་དེ་ལྡན་གྱི་རྒྱུད་དོན་དངོས་བཤད་པའོ། །དང་པོ་ལ། སྟོན་པས་ཇི་ལྟར་གསུང་ཚུལ། དེ་ལས་ཇི་ལྟར་བརྒྱུད་ཚུལ་ལོ། །དང་པོ་ལའང་། ཉི་འོད་སེང་གེའི་བཞེད་པ་དང་། སྒེག་རྡོར་གྱི་བཞེད་པ་གཉིས། དང་པོ་ནི། འོག་མིན་དུ་ལོངས་སྤྱོད་རྫོགས་པའི་སྐུས་གསང་སྔགས་རྡོ་རྗེའི་ཐེག་པ་སྟོན་པའི་ཚེ། དེ་དང་དུས་མཚུངས་པར་མིའི་ཡུལ་དུ་མཆོག་གི་སྤྲུལ་པའི་སྐུས་རྡོ་རྗེ་གདན་དུ་འཚང་རྒྱ་ཚུལ་མ་བསྟན་པའི་གོང་རོལ་དུ་གསུངས་པར་བཞེད་དེ། རྒྱ་ཆེར་འགྲེལ་ལས། ཆུ་བོ་ནཻ་རཉྫ་ནའི་འགྲམ་དུ་དཀའ་ཐུབ་མཛད་པ་ལ་རིགས་བཞི་སངས་རྒྱས་ཀྱིས་བསྐུལ་ནས་ཞུས་པས། བཏགས་པའི་ལུས་དེར་བཞག་ནས། ཡེ་ཤེས་ཀྱི་ལུས་འོག་མིན་དུ་གཤེགས་ནས། དོན་ཐམས་ཅད་གྲུབ་པའི་བྱང་ཆུབ་སེམས་དཔའི་བྱ་བ་རྫོགས་པའི་སྐད་ཅིག་མར་གནས་པ་ལས། རང་གི་ལུས་ལས་འོད་ཀྱི་རྫུ་འཕྲུལ་གྱིས་ནམ་མཁའི་དབྱིངས་ཐམས་ཅད་ཁྱབ་པར་བྱས་པས། དེ་བཞིན་གཤེགས་པ་ཐམས་ཅད་ཀྱང་གཅིག་ཏུ་འདུས་ནས་ཕྱོགས་བཞིའི་རིགས་ཀྱི་སངས་རྒྱས་ཀྱིས་མངོན་པར་བྱང་ཆུབ་པ་ལྔས་བྱིན་གྱིས་བརླབས་པས་མངོན་པར་རྫོགས་པར་སངས་རྒྱས་སོ། །གལ་ཏེ་དེ་ལྟར་མ་ཡིན་དུ་ཟིན་ན། སློབ་དཔོན་མེད་པའི་ཡེ་ཤེས་ནི་མི་འཐད་པ་ཉིད་ཀྱི་ཕྱིར་རོ། །མཚན་ཡང་རྡོ་རྗེ་དབྱིངས་ཆེན་པོར་གསོལ་ལོ། །དེ་ནས་ཞུགས་བཞིན་དུ་ཡེ་ཤེས་ཀྱི་དབང་གིས་བབས་ནས། རི་རབ་རིའི་རྩེ་མོ་རྡོ་རྗེ་དང་ནོར་བུ་བརྩེགས་པའི་ཁང་པར་བྱོན་ནས། དེ་ཁོ་ན་ཉིད་འདུས་པའི་སྡེ་ལ་སོགས་ཏེ་ཡོ་གའི་ཐེག་པ་ཆེན་པོ་རྣམས་བཀའ་སྩལ་ཏོ། །དེ་ནས་ཕྱག་ན་རྡོ་རྗེས་ཞུས་པས། རྒྱ་མཚོའི་འགྲམ་དུ་བྱོན་ནས་རྡོ་རྗེ་དབྱིངས་ཀྱི་ཁང་བཟང་ཆེན་པོར་ཡང་ཡོ་གའི་ཐེག་པ་རྣམས་བཀའ་སྩལ་ཏོ། །དེ་ནས་ཨོ་རྒྱན་དང་ཟ་ཧོར་གྱི་ཡུལ་དུ་གཤེགས་ནས་རྒྱལ་པོ་ཨིནྡྲ་བྷཱུ་ཏི་ལ་སོགས་པ་ལ་གསང་བའི་རྒྱུད་སྡེ་ཐམས་ཅད་བཀའ་སྩལ་ཏོ། །དེ་ནས་སླར་དཀའ་ཐུབ་མཛད་པའི་སར་གཤེགས་ནས་བཏགས་པའི་ལུས་ལ་ཡེ་ཤེས་སླར་ཞུགས་ནས། དེ་ལས་བཞེངས་ནས། བསོད་སྙོམས་མཛད་པ་དང་། རྡོ་རྗེ་གདན་མནན་ནས་སངས་རྒྱས་ཏེ། བདུད་བཏུལ་བ་དང་། ཆོས་ཀྱི་འཁོར་ལོ་བསྐོར་བ་དང་། ཆོ་འཕྲུལ་བསྟན་པ་དང་། མཐར་མྱ་ངན་ལས་འདས་པས་མཛད་པ་མཐར་དབྱུང་ངོ་། །དེར་བརྒལ་བ། འོ་ན། འདི་ལྟར་མི་ཡུལ་དུ་བཀའ་སྩལ་པ་ལགས་ན། རྒྱུད་དངོས་ལས། འོག་མིན་གྱི་གནས་མཐའ་དང་དབུས་མེད་པ། ཞེས་འབྱུང་བ་ཅིའི་ཕྱིར་དེ་མི་ཡུལ་དུ་བཀའ་སྩལ་པ་མི་སྨོས་ཞེ་ན། ལན་དུ། དེ་ནི་འདི་ལྟར་ལགས་ཏེ། རྣམ་པ་གཅིག་ཏུ་ཁུངས་གསང་དགོས་པ་དང་། གཉིས་སུ་གང་གི་ཚེ། གང་གི་དུས་ན་འོག་མིན་ལྷའི་རྒྱལ་པོའི་གནས་ན་ལོངས་སྤྱོད་རྫོགས་པའི་སྐུས་གསང་སྔགས་རྡོ་རྗེའི་ཐེག་པ་སྟོན་པ་དེའི་ཚེ། དེའི་དུས་ན། སྤྲུལ་པའི་སྐུས་ཀྱང་། དེའི་དབང་གིས་མི་ཡུལ་དུའང་གསང་སྔགས་རྡོ་རྗེའི་ཐེག་པ་འཆད་པར་འགྱུར་རོ། །ཞེས་ཏ་ཐཱ་ཨ་བ་ལོ་ཀི་ཀ་ར་ལས་གསུངས་སོ། །དེ་ནས་མཇུག་ཏུ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན་ངའི་ཆོས་འདི་དག་ཕྱུང་ལ་ཁུངས་ལྷ་ཡུལ་ནས་བབས་པར་སྙོད་ལ། བཀའ་ཡང་དག་པའི་དོན་དང་མི་འགལ་བའི་ཕྱིར་ཕྱག་ན་རྡོ་རྗེའི་མཐུས་བསྟན་ཏོ་བར་སྒྲོགས་ཤིག
དེ་ཅིའི་ཕྱིར་ཞེ་ན། སྡུད་པ་པོ་ཡིན་པའི་ཕྱིར་ཏེ། གཞུང་འདི་ཉིད་ནས་ཀྱང་། རྡོ་རྗེ་གསང་བའི་ཚིག་ཏུའོ། །ཞེས་གསུངས་པའི་ཕྱིར་རོ། །ཞེས་སོ། །གཉིས་པ་ནི། མཆོག་གི་སྤྲུལ་སྐུས་མི་ཡུལ་དུ་ལམ་ཐུན་མོང་བ་བཤད་པ་དང་། དུས་མཚུངས་པར་སྟོན་པས་འོག་མིན་དུ་གསུངས་པར་བཞེད་དེ། སྤར་ཁབ་ལས། དྲུག་པའི་སྟོན་པ་ལྷུན་གྱིས་གྲུབ་པའི་ཐབས་དང་། སྨོན་ལམ་གྱིས་གོ་ཕྱེ་ནས་ལེའུ་དང་པོར་རྒྱུ་སྣང་བར་མཛད། གཉིས་པར་རྐྱེན་སྦྱར་། གསུམ་པར་ཐུན་མོང་བཅའ་གཞིའི་སྟོན་པ་དྲུག་སྣང་བར་མཛད་དོ། །དུས་མཚུངས་པར་ཐ་དད་པའི་རྒྱུད་རྣམས་བྱུང་བའོ། །ཞེས་པ་ལྟར་རྒྱ་བོད་ཀྱི་བླ་མ་ཕལ་ཆེར་འདི་དང་མཐུན་པར་འོག་མིན་དུ་གསུངས་པར་བཞེད་དོ། །དེ་ཡང་། སྤྱན་འགྲེལ་ལས། གསང་བའི་འོག་མིན་དང་། གྲགས་པའི་འོག་མིན་དང་། བཏགས་པའི་འོག་མིན་དང་། དོན་གྱི་འོག་མིན་དང་། འོག་མིན་ཆེན་པོ་ལས། གདུལ་བྱའི་སྣང་བ་:ལམ་༼‹བ›ལ་མ་༽མཐའ་ཉིད་དུའོ། །ཞེས་དང་། སྒྱུ་འཕྲུལ་རྡོ་རྗེ་ལས། གཙང་མའི་རིས་དག་རྣམ་སྤངས་པ། །འོག་མིན་ཆེན་པོའི་གནས་མཆོག་ན། །ཞེས་འོག་མིན་ཆེན་པོར་གྲགས་པ་ཆོས་ཀྱི་དབྱིངས་ཀྱི་ཕོ་བྲང་དུ་གསུངས་པའི་ཕྱིར། དག་མ་དག་གི་ཞིང་ཆས་ཕྱེ་བའི་གནས་ཕྱོགས་རེ་བ་གཅིག་བསྒྲུབ་ཏུ་མེད་དེ། ཐུགས་ཐིག་ལས། ཆོས་དབྱིངས་འོག་མིན་གསང་བ་ན། །ལྷན་གཅིག་འདུས་པའི་རིན་ཆེན་ཁང་། །ཞེས་དང་། བླ་མའི་འགྲེལ་པ་མུན་སེལ་ལས། འོག་མིན་ཆེན་པོ་དབྱིངས་ཀྱི་གཟུགས་བརྙན་སྣང་བའི་གནས་སུ། ཞེས་དང་། འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་དང་། རྒྱུད་ལས་ཀྱང་། འོག་མིན་གྱི་གནས་མཐའ་དང་དབུས་མེད་པ། ཞེས་སོགས་གསུངས་པས། འོག་མིན་ཆེན་པོའི་གནས་སུ། སྟོན་པ་རིགས་དྲུག་པ་ཀུན་ཏུ་བཟང་པོས། འཁོར་དགོངས་པ་གཉིས་སུ་མེད་པ་དང་། རིག་པ་ཁྱད་པར་ཅན་གྱི་འཁོར་རྣམས་ལ་བསྟན་པ་སྟེ། རྒྱུད་ཀྱི་གླེང་གཞི་སྒྲ་ཇི་བཞིན་པ་ལྟར་བཞེད་པ་ཡིན་ནོ། །དེ་ལྟར་བཞེད་ལུགས་གཉིས་ལས། ཁོ་བོ་ནི། གང་ལྟར་བཤད་ཀྱང་མི་འགལ་བར་མངོན་ཏེ། མཆོག་གི་སྤྲུལ་སྐུ་ཐུབ་པའི་དབང་པོ་ཡང་སྟོན་པ་རིགས་དྲུག་པ་ལས་རྒྱུད་གཞན་དུ་མ་གྱུར་པའི་ཕྱིར་དང་། མཁའ་ཟླ་དང་། ཆུ་སྣོད་ལྟར་གདུལ་བྱའི་བློ་སྣང་བ་ལ་སོ་སོར་གསུངས་པའང་མི་འགལ་བའི་ཕྱིར་དང་། ལུགས་དེ་གཉིས་ཀྱང་། སྔ་མ་འོག་མིན་དུ་ལོངས་སྐུས་བསྟན་པ་དང་དུས་མཚུངས་པར་སྤྲུལ་སྐུས་མི་ཡུལ་དུ་གསུངས་པའི་ཕྱོགས་བཟུང་ཞིང་། དེ་ཡང་། ཁུངས་ལྷ་ཡུལ་ནས་བྱུང་བར་བསྙད་ནས་ཕྱག་རྡོར་གྱིས་སྟོན་ཅིག་པར་སྟོན་པས་བཀའ་གནང་བའང་བཤད་ལ། ཕྱི་མས་དེའི་ཕྱོགས་བཟུང་ནས་ལོངས་སྐུའི་གླེང་གཞི་དང་སྦྱར་ཏེ་གསུངས་པས་གཉིས་པོ་འགལ་མེད་དུ་འཆད་ཐུབ་ཅིང་། དེར་མ་ཟད་རྒྱུད་གཞུང་གཅིག་ལ་གླེང་གཞི་བཤད་ཚུལ་ཐ་དད་པ་གཞན་ལས་ཀྱང་འབྱུང་སྟེ། འཇམ་དཔལ་སྒྱུ་དྲྭའི་བཤད་རྒྱུད་ལས། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེར། །འཛམ་བུའི་གླིང་འདིར་གྲགས་པ་ཡིན། །བྱང་ཆུབ་སེམས་དང་ལྷ་རྣམས་དང་། །མི་རྣམས་ཀྱི་ནི་དོན་དུ་གསུངས། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །སྤྲུལ་སྐུ་འཁོར་ལོ་སྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །དུས་ནི་གདུལ་བྱ་འདུལ་བའི་ཚེ། །འཁོར་རྣམས་འདུས་པའི་དུས་དེར་གསུངས། །ཞེས་གསུངས་པའི་ཕྱིར་རོ། །དེ་ལྟར་ལུགས་གཉིས་འགལ་མེད་དུ་བསྒྲུབས་ནས། རང་ལུགས་ནི། བརྒྱུད་པའི་བཀའ་སྲོལ་ཕྱི་མ་ཉིད་ཡིན་པས། རེ་ཞིག་འདིར་ཡང་སྤར་ཁབ་ཀྱི་ལུགས་ལྟར་བཟུང་ངོ་། །སྔགས་པ་ཁ་ཅིག །མི་ཡུལ་དུ་སྤྲུལ་སྐུས་ལམ་སྟེགས་ཀྱི་ཐེག་པ་ཙམ་ལས་མ་ཧཱ་ཡོ་གའི་རྒྱུད་མ་གསུངས་པར་འདོད་པ་ནི་ཤིན་ཏུ་མི་རིགས་ཏེ། རྩ་རྒྱུད་དུ། སྤྲུལ་སྐུའི་བསྟན་པ་འདུལ་བ་རྣམ་པ་བཞི་ལས་གསུང་གིས་འདུལ་བའི་སྐབས་སུ། བླ་ན་མེད་པའི་ཐེག་པ་དང་། ཞེས་དང་། བཤད་རྒྱུད་ཀྱི། བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་པས་འཆད་དགོས་པའི་ཕྱིར། དེའང་འདིའི་ལམ་སྟེགས་ཀྱི་རྒྱུད་སྡེ་འོག་མ་རྣམས་ལ་དགོངས་སོ་ཞེ་ན། མ་ཡིན་ཏེ། དེའི་སྤྱན་འགྲེལ་ལས། ཐབས་ཀྱི་རྒྱུད་དུ་ལམ་ཐུན་མོང་བ་རྣམས་འདུས་པ་སྟེ། རྒྱུད་ཐམས་ཅད་ཀྱི་རྒྱལ་པོ། བསྟན་པ་ཐམས་ཅད་ཀྱི་འབྱུང་གནས་ཀྱི་ཕྱིར་རོ། །ཞེས་སོ། །འོ་ན། དགོངས་འདུས་ལས། ངེས་པའི་ཐེག་པ་ཡོངས་མ་གསུངས། །ཞེས་མི་ཡུལ་དུ་ཐུབ་པས་གསང་སྔགས་མ་གསུངས་པ་དང་། ང་ནི་འདི་ནས་མི་སྣང་ནས། །ཞེས་སོགས་སྔགས་ཕྱིས་འབྱུང་བར་ལུང་བསྟན་པ་དང་འགལ་ལོ་ཞེ་ན། ལན་དུ། བླ་མ་སྔ་རབས་པ་རྩགས་ཚ། སྨན་སོགས། དག །གསང་སྔགས་ཀྱི་སྣོད་དུ་མ་གྱུར་པའི་གདུལ་བྱ་ཕལ་ལ་མ་བཤད་པས་ཕྱིས་འབྱུང་བར་ལུང་བསྟན་པ་དང་མི་འགལ་ཞིང་། སྣོད་ལྡན་ལ་བཤད་པས་འདིར་བླ་ན་མེད་པའི་ཐེག་པ། ཞེས་གསུངས་པ་དང་མི་འགལ་ལོ་གསུངས་ཀྱང་། སྔགས་ཀྱི་སྣོད་དུ་མ་གྱུར་པའི་སྐལ་མེད་ལ་ཕྱིས་འབྱུང་བར་ལུང་བསྟན་པ་ལ་དོན་མེད་ཅིང་། སྐལ་ལྡན་ལ་ཕྱིས་འབྱུང་བར་ལུང་བསྟན་ན། དེ་ལྟར་གསུངས་པ་དང་ཡང་འགལ་བའི་ཕྱིར་མ་ངེས་སོ། །རོག་གི་ཞལ་ནས། རྒྱུའི་ཐེག་པ་སྡེ་སྣོད་གསུམ་ནི་དངོས་སུ་ཞལ་ནས་གསུངས་པའི་བཀའ་ཡིན་ལ། འབྲས་བུའི་ཐེག་པ་རིག་པ་འཛིན་པའི་སྡེ་སྣོད་རྗེས་སུ་གནང་བའི་སྒོ་ནས་གསུངས་པས་གཉིས་ཀ་དང་མི་འགལ་གསུངས་ཏེ། དང་པོ་ལ་མདོའི་གླེང་གཞི་སོགས་ཀྱིས་མ་ངེས། ཕྱི་མ་ལ་དཔལ་ལྡན་འབྲས་སྤུངས་སུ་དུས་འཁོར་གྱི་རྒྱུད་གསུངས་པ་སོགས་ཀྱིས་མ་ངེས་སོ། །རང་ལུགས། རེ་ཞིག་རྡོ་རྗེ་ཐེག་པས་འདུལ་བའི་དུས་ལ་མ་བབས་པའི་ཕྱིར། ཐུབ་པའི་དབང་པོས་གདུལ་བྱ་ཕལ་གྱི་སྣང་ངོར་ཡོངས་སུ་གྲགས་པར་མ་གསུངས་པས་རིགས་ཅན་ལྔ་དང་རྒྱལ་པོ་ཟླ་བཟང་སོགས་ལ་མ་གསུངས་པར་མ་ངེས་ལ། ཕྱིས་འབྱུང་བར་ལུང་བསྟན་པའང་འཇིག་རྟེན་དུ་གསང་སྔགས་ཀྱི་སྒྲ་ཡོངས་སུ་གྲགས་པར་འགྱུར་བ་ལ་དགོངས་པའི་ཕྱིར་སྐྱོན་མེད་དོ། །
གཉིས་པ་ནི། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་པས་གསུམ་སྟེ། རྒྱལ་བ་དགོངས་བརྒྱུད། རིག་འཛིན་རིག་པའི་བརྡ་བརྒྱུད། གང་ཟག་སྙན་བརྒྱུད་དོ། །དང་པོ་ནི། རྒྱལ་བ་ཀུན་ཏུ་བཟང་པོས་རྒྱལ་ཚབ་རིགས་ལྔ་ལ་བརྒྱུད། རིགས་ལྔས་རྒྱལ་སྲས་སེམས་དཔའ་སོགས་ལྷན་ཅིག་པའི་འཁོར་ལ་བརྒྱུད་དོ། །གཉིས་པ་ལ། མི་མ་ཡིན་ལ་བརྒྱུད་པ་དང་། མི་དང་མི་མ་ཡིན་གཉིས་ཀ་ལ་བརྒྱུད་པ་གཉིས། དང་པོ་ནི། རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས་རིགས་གསུམ་གྱིས་གདུལ་བྱ་རང་རང་གི་བསམ་པ་དང་མཐུན་པར་བསྟན་ཅིང་དར་བར་མཛད་དེ་འཇམ་དཔལ་གྱིས་ལྷའི་གནས་སུ་ལྷ་གྲགས་ལྡན་མཆོག་སྐྱོང་ལ་བཤད། དེས་ལྷའི་རིག་འཛིན་རྣམས་ལ་བརྒྱུད་ཅིང་དར་བར་བྱས། སྤྱན་རས་གཟིགས་ཀྱིས་ཀླུའི་གནས་སུ། ཀླུ་རྒྱལ་མགྲིན་པ་ནག་པོ་ལ་བཤད་དེ་རིམ་པར་བརྒྱུད་ཅིང་དར། ཕྱག་ན་རྡོ་རྗེས་གནོད་སྦྱིན་གྱི་གནས་སུ། གནོད་སྦྱིན་ཀུན་ཏུ་བཟང་པོ་ལ་བཤད་དེ་རིམ་པར་བརྒྱུད་ཅིང་དར་རོ། །གཉིས་པ་ནི། ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན། ལྷ་གྲགས་ལྡན་མཆོག་སྐྱོང་། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་རིག་འཛིན་ལི་ཙ་བཱི་དྲི་མེད་གྲགས་པ་སྟེ། དམ་པའི་རིགས་ཅན་ལྔ་པོ་རང་རང་གི་མངོན་པར་ཤེས་པས་ལངྐའི་ཡུལ་གྱི་གྲོང་རྡལ་གྱི་མཚོ་གླིང་རི་མ་ལ་ཡ་གནམ་ལྕགས་ཡོད་པའི་རྩེར་རྫུ་འཕྲུལ་གྱི་བྱ་བས་འདུས་ཏེ། གདུང་ཚིག་བཏོན་པས། ཕྱག་ན་རྡོ་རྗེ་མངོན་སུམ་དུ་བྱོན་ནས། དེར་རིགས་ཅན་ལྔ་ལ་བཤད་ཅིང་བརྒྱུད་དོ། །གསུམ་པ་ལ། མི་ཡུལ་དུ་རྒྱུད་འདི་ཐོག་མར་བབས་ཚུལ་དང་། དེ་ལས་ཇི་ལྟར་བརྒྱུད་ཚུལ་གཉིས། དང་པོ་ནི་དུས་གང་གི་ཚེ། གནས་གང་དུ། གང་ཟག་གང་ལ། ཚུལ་ཇི་ལྟར་བབས་པ། དེ་ལ་རྩོད་པ་སྤང་བ་དང་ལྔ། དང་པོ་ནི། ལམ་རིམ་ལས། གསང་བའི་བདག་པོས་མངོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང་། །མི་ལས་སྐལ་ལྡན་འདུས་པ་ལ། །དབང་པོས་ཇི་ལྟར་ལུང་བསྟན་དུས། །རྒྱལ་བུ་རིགས་ཅན་ལྟས་ཤར་ནས། །ཞེས་པས། རི་མ་ལ་ཡའི་རྩེར་རིགས་ཅན་ལྔ་ལ་གསང་བདག་གིས་ཆོས་འཁོར་བསྐོར་བའི་ཚེ། དེའི་བྱིན་རླབས་ཀྱིས་རྒྱལ་པོ་ཛཿལ་རྨི་ལྟས་བདུན་ཤར་ཞིང་། དེའི་རྗེས་ཐོག་ཏུ། སྔོན་ཐུབ་པའི་དབང་པོས་ལུང་བསྟན་པ་བཞིན་དུ་གསང་སྔགས་བབས་པར་བཤད་དོ། །དེའང་ལུང་ཇི་ལྟར་བསྟན་སྙམ་ན། འགྱུར་ཁྱད་ཙམ་མ་གཏོགས་སྤྱི་མདོ་ལས་གསུངས་པ་དང་ཚིག་དོན་མཐུན་པར། སྡོམ་འབྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛཿཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོས་སྣང་བར་འགྱུར། །ཞེས་སོ། །འོ་ན། གོང་དུ་ཐུབ་དབང་གཤེགས་ནས་ལོ་ཉེར་བརྒྱད་ན་བབས་པར་བཤད་པ་མི་རིགས་ཏེ། འདིར་ལོ་བརྒྱད་དང་བཅུ་གཉིས་ན་བབས་པར་བཤད་པའི་ཕྱིར་ཟེར་ན། སྐྱོན་མེད་དེ། ལུང་འདིར་བསྟན་གྱི་ལོ་བཅུ་གཉིས་ནི་བཅུ་ཚན་གཉིས་ལ་དགོངས་པས་དོན་ལ་ཉི་ཤུ་སྟེ། ཨ་ཏི་ཟབ་དོན་སྙིང་པོའི་ལོ་རྒྱུས་ལས། ལོ་ནི་བརྒྱད་དང་ཉི་ཤུའི་ཚེ༔ ཞེས་གསུངས་པ་དང་མཐུན་པའི་ཕྱིར། བརྒྱད་དང་ཉི་ཤུ་ཡང་གྲངས་ཀྱི་གནས་གཞན་འགོད་པའི་རིགས་པས་དོན་ལ་ཉི་ཤུ་རྩ་བརྒྱད་དེ། འགྲེལ་པ་ཉི་སེང་མར། མྱ་ངན་འདས་ནས་ལོ་ཉི་ཤུ་རྩ་བརྒྱད་ན། ཞེས་དང་། ཨ་ཏི་ཟབ་དོན་སྙིང་པོར། སྟོན་པ་གཤེགས་ནས་ལོ་ཉི་ཤུ་རྩ་བརྒྱད་ན་རྒྱལ་པོ་ཛཿལ་རྨི་ལྟས་བདུན་བྱུང་སྟེ། ཞེས་སོགས་གསུངས་པའི་ཕྱིར། གཉིས་པ་ནི། རྒྱ་གར་ཤར་ཕྱོགས་ཟ་ཧོར་ཡུལ་དང་ཉེ་བ་ལངྐའི་ཡུལ་གྱི་རི་མ་ཡའི་ཤར་ལྷོའི་ངོས་ན་ཨ་སུ་རའི་བྲག་ཕུག་བྱ་བ་ཡོད། དེར་རྒྱལ་པོ་ཛཿསྒྲུབ་པ་མཛད་ཅིང་བཞུགས་པའི་ཡང་ཐོག་ཏུ་བབས་པར་བླ་མ་གོང་མ་རྣམས་བཞེད་མོད་ཀྱི། ཤེར་ཕྱིན་ཚུལ་བརྒྱ་ལྔ་བཅུ་པའི་འགྲེལ་པར་ཟ་ཧོར་གྱི་ཡུལ་ཉིད་དུ་བབས་པར་གསུངས་སོ། །འོ་ན་ལངྐའི་ཡུལ་དེ་ཟ་ཧོར་གྱི་ཉེ་འཁོར་ན་ཡོད་པ་གང་གིས་ཤེས་ཞེ་ན། དེ་ནི་མདོའི་འགྲེལ་པ་སྨན་པ་ལྕགས་འགྲོལ་ལས། ཟ་ཧོར་ཡུལ་གྱི་ཉེ་འཁོར་ན། །མཐུ་སྟོབས་ཞབས་བཅག་མ་ལ་ཡ། །གནམ་ལྕགས་འབར་བའི་རི་རྩེ་ན། །ཞེས་སོ། །དེ་ལ་ཁ་ཅིག །ལངྐ་ཟ་ཧོར་གྱི་ཉེ་འཁོར་ན་ཡོད་པ་མི་རིགས་ཏེ། ལངྐའི་ཡུལ་ནི་རྡོ་རྗེ་གདན་གྱི་ལྷོ་ནུབ་ན་ཡོད་ལ། ཟ་ཧོར་ནི་ཤར་ན་ཡོད་པའི་ཕྱིར་ཟེར། ལན་དུ་སེ་སྟོན་ཆེན་པོ་ནི། དེ་གཉིས་ཀྱི་བར་ན་རྒྱང་ཤིན་ཏུ་རིང་བ་ཡོད་པ་བདེན་མོད། འོན་ཀྱང་ལངྐ་དང་ཟ་ཧོར་གཉིས་རྒྱ་མཚོའི་དོ་ལ་གྲོང་ཁྱེར་ཟམ་མ་ཆད་པར་འབྲེལ་ནས་ཡོད་པ་ལ་དགོངས་ནས་ཟ་ཧོར་གྱི་ཉེ་འཁོར་ཞེས་གསུངས་ཏེ། ཐུགས་སྒྲུབ་རིན་ཆེན་འབར་བ་ལས། ཟ་ཧོར་ཡུལ་ཞེས་བྱ་བ་དེ། །རྒྱ་མཚོའི་གླིང་གི་མཧཱ་དོ། །གནས་པ་འཛམ་གླིང་ཤར་ན་གནས། །རྒྱ་མཚོའི་གླིང་ལ་རྒྱུད་མ་རུ། །སྲིན་པོ་ལངྐ་མགྲིན་བཅུའི་ཡུལ། །ལངྐ་པུ་རི་དག་དང་འབྲེལ། །སྲིན་པོ་སྲིན་མོ་ཤ་ཟ་རྣམས། །ཀུན་ལ་དབང་སྒྱུར་ལོངས་སྤྱོད་ཆེ། །ཞེས་འབྱུང་བའི་ཕྱིར་གསུངས་པ་ཡང་མི་རིགས་ཏེ། ཕ་རོལ་པོའི་གེགས་མ་སེལ་བའི་སྟེང་། དེ་གཉིས་རྒྱ་མཚོའི་དོ་ལ་གྲོང་ཁྱེར་ཟམ་མ་ཆད་པར་འབྲེལ་བའང་མི་སྲིད་པའི་ཕྱིར་དང་། སྲིད་ནའང་ཉེ་འཁོར་དུ་མི་རིགས་པའི་ཕྱིར་དང་། ལུང་དེའི་དོན་ཡང་དེ་ལྟར་མ་ཡིན་པར་འཆད་འགྱུར་ལས་ཤེས་པའི་ཕྱིར་རོ། །ཁོ་བོ་ནི་འདི་སྙམ་སྟེ། ལངྐའི་ཡུལ་ཡིན་ན་ལྷོ་ནུབ་ན་ཡོད་དགོས་སྙམ་པའི་དོགས་པ་འདི། རྒོལ་བ་པོ་ཁྱོད་མཐོང་རྒྱ་ཆུང་བའམ་རྣམ་དཔྱོད་རྩིང་བ་སྟེ། འདིར་བསྟན་གྱི་ལངྐའི་ཡུལ་དེ་རྔ་ཡབ་ཀྱི་ལངྐ་མ་ཡིན་པའི་ཕྱིར། འོ་ན་གང་ཞེ་ན། འདི་ནི་སྔོན་བཅོམ་ལྡན་འདས་ལངྐའི་བདག་པོ་སྒྲ་སྒྲོགས་ཀྱི་བུ་མགྲིན་བཅུས་སྤྱན་དྲངས་ནས་བློ་གྲོས་ཆེན་པོས་ཞུས་པ་ལས། ལངྐར་གཤེགས་པའི་མདོ་གསུངས་པའི་གནས་འཛམ་གླིང་གི་ཤར་ལྷོ་མཚམས་ན་ཡོད་པ་དེ་ཡིན་ཞིང་། ཡུལ་དེ་ལ་སྔོན་སྲིན་པོས་བཟུང་བས་ལངྐའི་ཡུལ་དང་། ཕྱིས་དེད་དཔོན་སེང་གེས་བཟུང་བས། དེང་སང་སིངྒྷ་ལའི་གླིང་ཞེས་གྲགས་པ་དེ་ཡིན་ཏེ། པཎ་ཆེན་ཝ་ན་རཏྣའི་ཞལ་ནས། སིངྒྷ་ལའི་གླིང་དེ་ནི་གསུང་རབ་ལས་ལངྐའི་གླིང་དུ་གྲགས་པ་དེ་ཡིན་ཏེ། རཱ་མ་ཎས་འཛམ་བུའི་གླིང་དང་ལངྐའི་གླིང་གི་བར་དུ་རྡོའི་ཟམ་པ་བཙུགས་པ་རྣམས་ཀྱང་རྒྱ་མཚོའི་ནང་ན་རྡོའི་ཕུང་པོ་འདུག་པ་དངོས་སུ་སྣང་ཞིང་། སྐབས་འགར་རྡོའི་ཕུང་པོ་ལ་གཟིངས་ཐོགས་འོང་བས་བྱོལ་ནས་འགྲོ་དགོས་པ་དང་། གླིང་དེ་ན་སྲིན་པོ་ལངྐ་མགྲིན་བཅུ་བསད་པའི་ཁྲག་གིས་སྦགས་པ་ཡིན་ཟེར་བའི་རྡོ་དམར་པོ་སྔ་དྲོ་ཙམ་གྱི་སའི་ཆ་ཁྱབ་པར་ཡོད་པ་དང་། གླིང་དེ་ན་སུ་མ་ན་ཀཱུ་ཊ་ཟེར་བའི་རི་བོ་སུམ་གཅིག་ཡན་ཆད་བྲག་རིའི་ཟེ་བས་བསྐོར་བས་སྐྱེ་བོ་ཕལ་གྱིས་བགྲོད་མི་ནུས་པ་དེར། པཎ་ཆེན་འཁོར་བཅས་ཀྱིས་འབྱོན་ཐུབ་པ་སོགས་ཀྱི་གཏམ་རྒྱུད་གསུངས་ཞེས་རྣམ་ཐར་ལས་འབྱུང་ཞིང་། པཎ་ཆེན་གྱིས་གླིང་དེར་ལོ་དྲུག་བཞུགས་པར་གྲགས་པས་གཏམ་ཁུངས་བཙུན་པར་མ་ཟད། སྐྱེས་བུ་དེ་ནི་ཀུན་གྱིས་རྩོད་མེད་དུ་བཀུར་བའི་མཁས་གྲུབ་ཡིན་པའི་ཕྱིར། འོ་ན། ལྷོ་ནུབ་རྔ་ཡབ་གླིང་ནའང་། རི་བོ་མ་ལ་ཡ་སོགས་ཡོད་པར་བཤད་པས་མི་འགལ་ལམ་ཞེ་ན། གནས་ཀྱི་མིང་དང་། མཚན་ཉིད་དེ་འདྲ་བ་ཅི་རིགས་གཞན་ན་མེད་པས་མ་ཁྱབ་སྟེ། འདིར་བསྟན་གྱི་ཨ་སུ་ར་དང་མིང་གཅིག་པ་རྒྱ་བལ་མཚམས་ནའང་ཡོད་ལ། ཞི་བྱེད་ཀྱི་རྒྱུད་ཆུ་ཀླུང་ཆེན་མོར་གསུངས་པའི་གནས་སིངྒྷ་ལའི་གླིང་དེའང་འདིར་བསྟན་དང་དོན་མི་གཅིག་པར་རྒྱུད་དེ་ལས་གསལ་བའི་ཕྱིར་རོ། །འདི་ལྟར་འཐད་པའི་རྒྱུ་མཚན་གཞན་ཡང་ཡོད་དེ། ཨ་ནུའི་རྒྱུད་རྣམས་ལངྐའི་ཡུལ་དུ་བབས་པར་ཀུན་ལ་གྲགས་པ་ལྟར། ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་ཐབས་ཀྱི་ལམ་མཆོག་འདུས་པའི་རྒྱུད་ཀྱི་ལེའུ་ལྔ་པར། མ་ཧཱ་ཡོ་གའི་རྒྱུད་རྣམས་ནི་རྒྱལ་པོ་ཛཿའི་ཁང་སྟེང་དུ་འབབ་པར་འགྱུར་ལ། ཨ་ནུ་ཡོ་གའི་རྒྱུད་རྣམས་ནི་སིངྒྷ་ལའི་ནགས་ཚལ་དུ་འབྱུང་བར་འགྱུར་ཏེ། ཞེས་ལུང་བསྟན་པའི་ཕྱིར། དེས་ན་གླིང་དེར་ཁ་སྐད་དུ་སུ་མ་ན་ཀཱུ་ཊ་ཞེས་གྲགས་པའི་རི་བོ་ཡོད་པར་གསུངས་པའང་། འདིར་བཤད་པའི་དྲག་ཤུལ་ཅན་གྱི་རིའམ། རི་བོ་མ་ལ་ཡར་གྲགས་པ་དེ་ཡིན་ནམ་སྙམ་དུ་སེམས་ཏེ། བགྲོད་དཀའ་བ་སོགས་མཚན་ཉིད་ཆ་འདྲ་བ་ཡོད་པར་སྣང་བའི་ཕྱིར། འོ་ན། རི་མ་ལ་ཡའི་མཚན་ཉིད་ཀྱང་གང་ཞེ་ན་སྨན་པ་ལྕགས་འགྲོལ་ལས། རྩེ་ན་རྩལ་གྱི་རྒྱལ་པོ་གནས། །ངོས་ལ་བྲག་དཀར་ཁྱི་ཚུགས་པ། །སེང་གེ་གནམ་དུ་མཆོངས་འདྲས་བརྒྱན། །རྩི་སྨན་རྩ་བརྒྱད་ཚང་བར་འཁྲུངས། །འདུ་བའི་ནད་ཀྱིས་ཡོངས་མི་ཚུགས། །སྤྱི་བོར་ཀ་ལནྟ་ཀ་ནི། །མི་གཉིས་གཅིག་པུར་གནས་པ་ཡི། །མཛོད་ལྡན་དེ་ཡི་ཚང་བཅས་པ། །སྐལ་ལྡན་རྣམས་ཀྱིས་བགྲོད་པར་སླ། །སྐལ་མེད་རྣམས་ཀྱིས་ཡོངས་མི་ཐར། །ཞེས་སོ། །གསུམ་པ་ནི། ཟ་ཧོར་གྱི་རྒྱལ་པོ་ཨུ་ཏ་ཛྙཱ་ནའི་སྲས་རྒྱལ་པོ་ཛཿལའོ། །བཞི་པ་ནི། རྒྱལ་པོ་ཉིད་གསང་སྔགས་ཕྱི་རྒྱུད་ལ་སྒྲུབ་པ་མཛད་ཅིང་བཞུགས་པ་ན་རྨི་ལྟས་བདུན་ཤར་ཏེ། དེའང་མདོའི་འགྲེལ་པ་ལུང་བསྟན་མ་ལས། བདག་ཉིད་ལ་ལྟས་བདུན་ཤར་བ་སྟེ། དེ་ཡང་། སྐུ་གསུང་ཐུགས་རྟགས་ཐིམ་པ་དང་༡། །རིན་ཆེན་གླེགས་བམ་བབས་པ་དང་༢། །ཆོས་ཀྱི་བགྲོ་བ་བྱས་པ་དང་༣། །ཀུན་གྱིས་དམ་པར་བསྒྲགས་པ་དང་༤། །མཆོད་པ་ཆེན་པོ་བྱས་པ་དང་༥། །རིན་ཆེན་ཆར་དུ་བབས་པ་དང་༦། །སངས་རྒྱས་ས་ལ་ལུང་བསྟན་པའོ༧། །ཞེས་གསུངས། ཁ་ཅིག་རྨི་ལམ་གཉིས་པ་དང་གསུམ་པ་གོ་བརྗེས་ནས་འཆད་དེ། མདོ་འགྲེལ་ཡེ་ཤེས་སྣང་བ་རྒྱན་གྱི་ལུགས་སུ་བཞེད་དོ། །དེ་ནས་རྨི་ལྟས་དང་མཐུན་པར་དངོས་སུ་རང་གི་ཁང་ཐོག་ཏུ་གསང་སྔགས་རྒྱུད་སྡེའི་གླེགས་བམ་དང་། ཕྱག་ན་རྡོ་རྗེའི་སྐུ་ཁྲུ་གང་པ་ཞིག་བབས་ཏེ། གསོལ་བ་བཏབ་པས་རྡོར་སེམས་ཞལ་མཐོང་གི་ལེའུ་རྟོགས་ནས། དེ་དང་ཕྱག་རྡོར་གྱི་སྐུ་ལ་བརྟེན་ཏེ་ཟླ་བ་དྲུག་བསྒྲུབས་པས་རྡོ་རྗེ་སེམས་དཔའི་ཞལ་མཇལ་ཞིང་བྱིན་གྱིས་བརླབས་པའི་མཐུས་གླེགས་བམ་གྱི་དོན་མ་ལུས་པར་མཁྱེན་ཏོ། །ཞེས་རྗེ་བླ་མའི་གཏེར་བྱོན་གྱི་ཨ་ཏིའི་ལོ་རྒྱུས་ལས་གསུངས། སྔ་རབས་ཀྱིས་བླ་མ་ཕལ་ཆེར། རྨི་ལྟས་བདུན་བྱུང་བ་སད་ནས་ཡང་ཐོག་ཏུ་བྱོན་པས་ཕྱག་རྡོར་གྱི་སྐུ་རྙེད། དེ་ལ་བརྟེན་ཏེ་ཟླ་བ་བདུན་བསྒྲུབས་པས་གླེགས་བམ་རྣམས་དངོས་སུ་བབས་པ་ལ་བརྟགས་ན་རྟོགས་པར་འདུག་ཀྱང་། གདུལ་བྱ་རྒྱུད་ལ་རང་དགར་འཇུག་པ་དགག་པའི་ཕྱིར་མ་རྟོགས་པ་ལྟར་བསྟན་ནས། གླེགས་བམ་རྣམས་ཤིང་རྟ་ལ་སྤྱན་དྲངས་ཏེ་ཨུ་པ་རཱ་ཛ་ལ་བསྟན་པས་བརྡ་མ་འཇལ། དེ་ནས་དགེ་སློང་ཀུ་ཀུ་རཱ་ཛ་ལ་བསྟན་པས། དེས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ཏེ་བསྒྲུབས་པས་ཞལ་མཇལ་ནས་ཕྱག་རྡོར་གྱིས་སྟོན་པར་འགྱུར་རོ་ཞེས་ལུང་བསྟན། ད་དུང་བསྒྲུབས་པས་ཕྱག་རྡོར་བྱོན་ནས། སྤོང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །ཅེས་དོན་གྱི་བསྟན་པ་དང་ཐེག་པ་ཐམས་ཅད་རྫོགས་པའི་དབང་བསྐུར། ཚིག་གི་བསྟན་པ་ལི་ཙ་བཱི་དྲི་མེད་ལ་ཞུས་ཤིག་པར་ལུང་བསྟན་པ་ལྟར། ཀུ་ཀཱུ་རཱ་ཛས་གསང་བདག་གི་བཀའ་བཞིན་དུ་བསྒྲུབས་ཏེ། ཏནྟྲ་སྡེ་བཅོ་བརྒྱད་དུ་ཕྱེ་ནས་རྒྱལ་པོ་ཛཿལ་བསྟན་པར་བཞེད་ཅིང་། ཚུལ་བརྒྱ་ལྔ་བཅུ་པ་དང་། མཉམ་སྦྱོར་གྱི་འགྲེལ་པར་ཡང་དེ་ལྟར་འབྱུང་ངོ་། །ལུགས་དེ་གཉིས་ཀ་ལ་འགལ་བ་མེད་དེ། རྒྱལ་པོ་ཉིད་ཀྱིས་རྟོགས་ཀྱང་། གཞན་གྱི་གཟུ་ལུམ་དང་རས་གཅོད་དགག་པའི་ཕྱིར་ཀུ་ཀུ་རཱ་ཛ་ལ་བརྟེན་པ་ལྟར་མཛད་པའི་ཕྱིར་རོ། །འོན་ཀྱང་འདིར་ནི་རྒྱལ་པོ་རང་གིས་རྟོགས་པའི་ཕྱོགས་ལེགས་ཏེ། རྒྱལ་པོ་ཉིད་ཀྱིས་མཛད་པའི་ལམ་རྣམ་བཀོད་ལས། ཤར་ཕྱོགས་ཨིནྡྲའི་ལུང་པ་ན། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྡྲ་བྷཱུ་ཏི་ངས། །གསང་བའི་བདག་པོས་མངོན་བསྟན་པའི། །སྒྱུ་འཕྲུལ་དྲྭ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤོང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །དེ་ནས་ས་ལ་རེག་པར་བྱས། །ཞེས་དང་། སངས་རྒྱས་གསང་བའི་ལམ་རིམ་གྱི་ལུང་སྔ་མའི་འཕྲོས་ལས། འབྲེལ་པས་སྣང་ལ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་གྲུབ། །བརྟན་པའི་དངོས་གྲུབ་དེ་ནས་འཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །སྨོན་པའི་ལྷ་དང་དེ་རུ་མཇལ། །ཞེས་རང་གིས་རྟོགས་པར་བཤད་ཀྱི། གཞན་ལ་བརྟེན་པར་མ་བཤད་པའི་ཕྱིར་རོ། །དེ་ལ་ཏནྟྲ་སྡེ་བཅོ་བརྒྱད་ནི། སྔ་རབས་པ་ཕལ་ཆེར། སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་གསུམ་གསུམ་སྟེ་བཅོ་ལྔ། སྤྱི་རྒྱུད་གསུམ་སྟེ་བཅོ་བརྒྱད་དོ། །ཞེས་བཞེད། དཔལ་འཕྲེང་དམ་པའི་སློབ་དཔོན་ཀུ་ཀུ་རཱ་ཛས་མཛད་པར། སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་དེའི་རྩ་བར་གྱུར་པའི་རྒྱུད་སྡེ་ལྔ། སྒྲུབ་པ་ལག་ལེན་དུ་བསྟན་པ་རོལ་པའི་རྒྱུད་ལྔ། སྤྱོད་པའི་ཡན་ལག་ཏུ་འགྲོ་བའི་རྒྱུད་ལྔ། ཆོ་ག་མ་ཚང་བ་ཁ་སྐོང་བར་བྱེད་པ་རྒྱུད་ཕྱི་མ་ལྟ་བུ་གཉིས། དེ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་ཆེན་པོ་གཅིག་དང་བཅོ་བརྒྱད་དོ། །ཞེས་གསུངས་པ་ལྟར་བདག་ཅག་གི་རྗེ་བླ་མའི་དགོངས་པའང་ཕྱི་མར་གནས་ཏེ་ཤིན་ཏུ་ལེགས་པ་ཉིད་དོ། །ལྔ་པ་ནི། མཁས་པ་དག་གླེགས་བམ་བལྟས་ནས་བསྒྲུབས་པས་འགྲུབ་ན། གསང་སྔགས་རང་ཉིད་ལེན་པ་ནི། །ལུས་ཅན་དམྱལ་བ་འབའ་ཞིག་རྒྱུ། །ཞེས་བཤད་པ་དང་འགལ་ལ། བླ་མ་མེད་པར་མི་འགྲུབ་པར་བཤད་པ་དང་འགལ་ལོ། །གཞན་ཡང་། ཤར་ལྷོའི་ཕྱོགས་མཚམས་ཞེས་ཟེར་བ་དེ་ཨོཌྱཱ་ན་ཡིན་ཞེས་པའང་འཇིག་རྟེན་གྱི་གྲགས་པ་དང་མངོན་སུམ་དུ་འགལ་ལོ་ཟེར་བ་མི་འཐད་དེ། སྐལ་མེད་ལ་དེ་ལྟར་འགལ་ཡང་། སྐལ་ལྡན་ལ་ངེས་པ་མེད་པའི་ཕྱིར་མཐའ་གཅིག་ཏུ་དགག་པ་མི་རིགས་སོ། །རྒྱུ་མཚན་དགྱེས་རྡོར་དང་གདན་བཞི་སོགས་ཀླུ་སྒྲུབ་ཀྱིས་ལྐུག་པར་བརྫུས་ནས་ཨོ་རྒྱན་ནས་བརྐུས་ཏེ་བྲོས་པ་མཁའ་འགྲོ་རྣམས་ཀྱིས་བདས་ཀྱང་མ་ཟིན་ཏེ། སྐལ་ལྡན་ལ་བྱིན་ཅིག་ཅེས་རྗེས་གནང་མཛད་པ་ལ་བརྟེན་ནས་སློབ་དཔོན་གྱིས་དར་བར་མཛད་དོ་ཞེས་གྲགས་པའི་ཕྱིར་དང་། བི་རཱུ་པ་ལ་ གསང་སྔགས་རང་ཉིད་ལེན་པའི་སྐྱོན་མེད་དེ། བདག་མེད་མས་བསྟན་པའི་ཕྱིར་དང་། དེ་འདོད་ན་ཕྱག་རྡོར ་གྱིས་རྒྱལ་པོ་ཛཿ་སོགས་ལ་བསྟན་པ་ལའང་མཚུངས་པའི་ཕྱིར་དང་། གང་དུ་བབས་པའི་གནས་སྔར་དཔྱད་པ་ལྟར་ཡིན་པས་ཁྱེད་ཀྱི་སྐྱོན་འདི་འཇུག་པའི་གནས་མེད་པའི་ཕྱིར་དང་། དེར་མ་ཟད་ཤར་ལྷོ་མཚམས་ཀྱི་ཡུལ་ལ་ཨོ་རྒྱན་དུ་འདོད་པ་ཁོ་བོ་ཅག་གི་གཞུང་ཁུངས་མ་གང་དུའང་བྲིས་པ་མེད་པས། སུ་ཞིག་གིས་སྨྲས་ཁྱེད་ཅག་ལའང་ཆ་མེད་པའི་ཕྱིར་དང་། གསང་སྔགས་བབས་ཚུལ་འདི་ལ་ཐུན་མོང་དུ་གྲགས་པའི་ལུང་གི་དཔང་པོའང་ཡོད་དེ། ཤེར་ཕྱིན་ཚུལ་བརྒྱ་ལྔ་བཅུ་པའི་འགྲེལ་པ་ལས། གསུང་རབ་འདིའི་ལོ་རྒྱུས་བཤད་ན། སྔོན་སངས་རྒྱས་མི་ཡུལ་དུ་ལོ་བརྒྱད་ཅུ་ཞུགས་པའི་ཚེ་ན། སརྦ་བུདྡྷ་ས་མ་ཡོ་ག་དང་། གུ་ཧྱ་ས་མ་ཡ་སོགས་པས་འདུལ་ཞིང་། དེ་ནས་ཐེག་པ་དེ་དག་གི་སྣོད་དུ་གྱུར་པ་འཛམ་བུའི་གླིང་གི་མི་ཡུལ་ན་མེད་པས་རྒྱལ་ཆེན་རིགས་བཞི་ལ་སོགས་པའིི་གནས་ན་ལྷ་རྣམས་དང་བསྐལ་པ་བཟང་པོའི་བྱང་ཆུབ་སེམས་དཔའ་ལ་སོགས་པ་སྣོད་དུ་གྱུར་ནས། དེའི་ཚེ་མདོ་སྡེ་དེ་ན་བཞུགས་སོ། །སླད་ཀྱིས་སངས་རྒྱས་མྱ་ངན་ལས་འདས་པའི་འོག་ཏུ་ཟ་ཧོར་གྱི་རྒྱལ་པོ་འཁོར་དང་བཅས་པ་ངོ་མཚར་དུ་གྱུར་ཏེ། ཆོས་ལ་དད་པ་ཞིག་འདུག་པ་ཐེག་པ་དེའི་འདུལ་སྐལ་དུ་གྱུར་ཅིང་སྣོད་དུ་གྱུར་ནས། སརྦ་བུདྡྷ་ས་མ་ཡོ་ག་ལ་སོགས་པ་མདོ་སྡེ་ཆེན་པོ་བཅོ་བརྒྱད་ཕྱག་ན་རྡོ་རྗེའི་བྱིན་རླབས་ཀྱིས་ཟ་ཧོར་གྱི་ཡུལ་དུ་གཤེགས་པ་དང་། ཟ་ཧོར་གྱི་རྒྱལ་པོ་ཨིནྡྲ་བྷཱུ་ཏིས་མདོ་སྡེ་བལྟས་པས་བརྡ་མ་འཕྲོད་ནས། གང་གིས་ཤེས་མངོན་ཤེས་ཀྱིས་བལྟས་པ་ན། ཡུལ་དབུས་སུ་དགེ་སློང་ཀུ་ཀུ་རཱ་ཛ་ཉིན་རེ་བཞིན་ཁྱི་སྟོང་ལ་ཆོས་འཆད། མཚན་རེ་བཞིན་ཁྱི་དེ་དག་ལ་དམ་ཚིག་གི་ལོངས་སྤྱོད་མཛད་པ་ཞིག་བཞུགས་པ་དེ་ཐེག་པའི་སྣོད་དུ་གྱུར་ལ། བདག་གི་འདུལ་སྐལ་དུ་འགྱུར་བའང་འདྲ་ནས། རྒྱལ་པོས་ཕོ་ཉ་བཏང་སྟེ་སློབ་དཔོན་སྤྱན་དྲངས་པ་དང་། སློབ་དཔོན་གྱིས་མངོན་ཤེས་ཀྱིས་བརྟགས་པས་བདག་འདུལ་སྐལ་དུའང་བབས། བདག་ཀྱང་མདོ་སྡེའི་སྣོད་དུ་འགྱུར་བར་ཤེས་མོད་ཀྱི། འོན་ཀྱང་མདོ་སྡེ་དེ་དག་སྔར་མ་བལྟས་ན། བརྒྱ་ལ་རྒྱལ་པོའི་ཐེ་ཚོམ་དག་མ་སེལ་བར་གྱུར་ན་མི་རུང་སྙམ་ནས། མདོ་སྡེ་ཚུར་བླངས་ཏེ་བལྟས་པ་ན། མགོ་མཇུག་གར་ཡང་བལྟ་བའི་ཆ་མ་མཆིས་ནས། དེ་ཉིད་དུ་ལུས་བརྡབས་ཏེ། མགོན་མེད་དོ། །སྐྱབས་མེད་དོ། །ཞེས་བོས་པ་དང་། དཔལ་རྡོ་རྗེ་སེམས་དཔའ་མངོན་པར་གཤེགས་ཏེ། ཁྱོད་ཅི་འདོད་ཅེས་དྲིས་པས། བདག་མདོ་སྡེ་ཟབ་མོ་འདི་བལྟས་པ་ཙམ་གྱིས་ཤེས་པར་འདོད། ཅེས་གསོལ་བ་དང་། དེ་བཞིན་གནང་ངོ་། །དེ་ནས་སརྦ་བུདྡྷ་ས་མ་ཡོ་ག་ལ་སོགས་པའི་གླེགས་བམ་རྣམས་མ་ཕྱེ་བར་དེ་དག་གི་དོན་ཡིད་ལ་མངོན་སུམ་གསལ་བར་གྱུར་ཏོ། །དེ་ནས་སློབ་དཔོན་དེ་ཟ་ཧོར་གྱི་ཡུལ་དུ་གཤེགས་ནས་རྒྱལ་པོ་འཁོར་དང་བཅས་པ་ལ་ཆོས་དེ་དག་བཤད་དོ། །དཔལ་རྡོ་རྗེ་སེམས་དཔས་ལུང་བསྟན་ནས། རྒྱལ་པོ་འཁོར་དང་བཅས་པ་རྣམས་རྡོརྗེ་དབྱིངས་ཀྱི་དཀྱིལ་འཁོར་ལྷར་བཀོད་ནས་བསྒོམ་དུ་བཅུག་པས་རིམ་པ་ལྟར་རྒྱལ་པོ་འཁོར་དང་བཅས་པ་དང་། དེའི་སྲས་འཁོར་དང་བཅས་པ་དང་། སྲས་མོ་འཁོར་དང་བཅས་པ་རྣམས། ས་ལ་གནས་པའི་རིག་འཛིན་དུ་གྲུབ་བོ། །དེ་ནས་སྲས་མོ་དེ་རྒྱལ་བུ་ལ་ལུང་དང་མན་ངག་བཞག་པ་ལས་འཕེལ་བ་ནི་དེང་སང་གི་འདི་ལགས་ཏེ། ཞེས་དང་། མཉམ་སྦྱོར་གྱི་འགྲེལ་པ་བརྒྱ་བྱིན་སྡོང་པོས་མཛད་པར་ཡང་། སྤྲུལ་པའི་སྐུ་འདས་ཕྱི་མའི་དུས་ཤིག་ཚེ། །རྒྱལ་བའི་བཀའ་གསང་འཛམ་གླིང་གནས་སུ་ཤར། །རྒྱལ་པོའི་ཁབ་ཏུ་སྤྱན་དྲངས་མཆོད་བྱས་ཏེ། །དགའ་ཞིང་གུས་བསྟོད་ལེགས་བལྟས་བརྡ་མ་འཇལ། །ཐུགས་རྗེའི་འབྲེལ་ཤུགས་གསང་སྔགས་འཛིན་པར་གྲགས། །དམ་པར་བཟུང་སྟེ་གླེགས་བམ་གཟིགས་པར་ཞུས། །སྒྱུ་འཕྲུལ་ཐིག་ལེ་སྟོང་པའི་དཀྱིལ་འཁོར་བཞུགས། །གྲུབ་ཐོབ་ལྷག་པའི་ལྷ་ཡིས་ལུང་བསྟན་མཛད། །རྡོ་རྗེ་ཐེག་པའི་གཞུང་ལུགས་སྣ་ཚོགས་མཐའ། །དམ་པ་རྣམས་ཀྱི་གདམས་པ་ཇི་བཞིན་པ། །མི་འགལ་ལེགས་པར་བསྡུས་ཤིང་རབ་བཀྲོལ་ཏེ། །འགྲེལ་དང་བསྡུས་དོན་སྒྲུབ་ཐབས་མང་དུ་བསྟན། །ཅེས་གསུངས་པའི་ཕྱིར་དང་། གཞན་ཡང་ལོ་ཙཱ་བ་གཟུ་དགའ་རྡོར་གྱིས་ནཱ་ལེནྡྲའི་གཙུག་ལག་ཁང་ན་པུསྟིའི་ཆར་བབས་པའི་བཀོད་པ་རི་མོར་བྲིས་པ་མཐོང་བ་སོགས་མཁས་པ་ལ་གྲགས་པའི་གཏམ་ངེས་པ་ཅན་མང་དུ་ཡོད་པས་དེ་ཐམས་ཅད་མི་བདེན་ནོ་ཞེས་སྨྲ་དགོས་ན་ཧ་ཅང་ཐལ་བའི་ཕྱིར་བག་ཡོད་པར་མཛོད་ཅིག །གཉིས་པ་ནི། རྒྱལ་པོ་ཛཿས་ཏནྟྲ་སྡེ་བཅོ་བརྒྱད་པོ། ཀུ་ཀུ་རཱ་ཛ་ལ་བཤད། དེས་གྲུབ་ཐོབ་ཨིནྡྲ་བྷཱུ་ཏི་ལ་དེས་སིངྷ་རཱ་ཛ་ལ། དེས་ཨུ་པ་རཱ་ཛ་ལ། དེས་སྲས་མོ་གོ་མ་དེ་ཝཱི་ལ་བསྟན་ཏེ། དེ་རྣམས་ཀྱིས་བསྒྲུབས་པས་རང་རང་གི་ཚོམ་བུ་དང་བཅས་ཏེ་རིག་པ་འཛིན་པའི་སར་གཤེགས་སོ། །དེ་ལྟར་ཡང་། ལམ་རིམ་ལས། དེ་ནས་རྡོ་རྗེ་གདན་སྟེང་གི །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་དམ་པ་རིན་ཆེན་ནང་། །བཀྲ་ཤིས་དམ་པའི་ཁང་བུ་རུ། །ཀུ་ཀུ་རཱ་:ཛཱནྡྲི་༼‹བ›ཛེནྡྲ་༽བྷཱུ་ཏི། །སིཾ་ཧ་ཨུ་པ་རཱ་ཛ་དང་། །སྲས་མོ་གོ་མ་ས་ལ་སོགས། །སྒྱུ་འཕྲུལ་དྲྭ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་སོ། །སྲས་མོས་རྒྱལ་པོ་ཀུ་ཀུ་རཱ་ཛ། སློབ་དཔོན་སྒེག་པ་རྡོ་རྗེ། སློབ་དཔོན་སངས་རྒྱས་གསང་བ་གསུམ་ལ་བཤད། རྒྱལ་པོ་ཀུ་ཀུ་རཱ་ཛས། རོ་ལངས་བདེ་བའི་དངོས་གྲུབ་དང་། དྲང་སྲོང་བྷ་ཤི་ཏ་གཉིས་ལ་བཤད། སྔ་མས་རྡོ་རྗེ་བཞད་པ་ལ། དེ་དང་ཕྱི་མ་གཉིས་ཀས་ཟ་ཧོར་གྱི་རྒྱལ་པོ་པྲ་ཧསྟི་ལ་བཤད། དེ་ལ་སློབ་དཔོན་སངས་རྒྱས་གསང་བ་དང་། སློབ་དཔོན་ཆེན་པོ་པདྨ་སཾ་བྷ་བས་གསན། ཡང་སློབ་དཔོན་པདྨས་ནི་རྒྱལ་པོ་ཛཿཉིད་ལའང་གསན་པར་ཨ་ཏི་ཟབ་དོན་སྙིང་པོ་ལས་གསུངས་སོ། །སྒེག་པ་རྡོ་རྗེ་དང་། སངས་རྒྱས་གསང་བ་གཉིས་ཀྱིས། པཎ་ཆེན་བི་མ་ལ་མི་ཏྲ་ལ་བཤད། དེས་བོད་དུ་ལོ་ཙཱ་བ་རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱ་ར་གཉིས་ལ་བཤད་ཅིང་། མངའ་བདག་རལ་པ་ཅན་གྱི་དུས་སུ་རྨས་བསྒྱུར་ཞེས་རྗེ་གཡུང་བཞེད་ཀྱང་། ཀུན་མཁྱེན་ཆོས་རྗེའི་དགོངས་པ་ལྟར་རྨ་གཉགས་ཐུན་མོང་གིས་མངའ་བདག་ཁྲི་སྲོང་གི་དུས་བསྒྱུར་གསུང་བ་འདི་འཐད་པར་མངོན། སྤྱིར་རྩ་རྒྱུད་འདི་ལ་བོད་དུ་ལོ་པཎ་བསྡེབས་པའི་གཞི་འགྱུར་གསུམ་དང་། པཎྜི་ཏ་མེད་པའི་རྩལ་འགྱུར་གཉིས་ཏེ་འགྱུར་ལྔ་བྱུང་བར་གྲགས་པ་ལས། གཞི་འགྱུར་གསུམ་ནི། སངས་རྒྱས་གསང་བ་དང་བཻ་རོ་ཙ་ནའི་སྔ་འགྱུར། པདྨ་དང་གཉགས་ཛྙཱ་ནའི་བར་འགྱུར། བི་མ་ལ་དང་རྨ་གཉགས་ཐུན་མོང་གི་ཕྱི་འགྱུར་གསུམ་ལས། འདི་ནི་ཕྱི་མ་སྟེ་འཕྱོང་ཅན་ཡིན་ལ། སྔ་བར་གཉིས་ལ་འཕྱོང་མེད་བར་གྲགས་སོ། །རྩལ་འགྱུར་གཉིས་ནི། ཐར་ལོ་ཉི་མ་རྒྱལ་མཚན་གྱི་འགྱུར་དང་། འགོས་ལོ་ཙཱ་བ་གཞོན་ནུའི་ཞབས་ཀྱི་འགྱུར་བཅོས་གཉིས་སོ། །སྤྱིར་གནུབས་སངས་རྒྱས་ཡེ་ཤེས་ལ་རྨ་གཉགས་གཉིས་ལས་བརྒྱུད་པའི་བཀའ་སྲོལ་གསུམ་བབས་ཏེ། དེ་ཡང་རྨ་རིན་ཆེན་མཆོག་གིས། གཙུག་རུ་རིན་ཆེན་གཞོན་ནུ་དང་། གྱེ་རེ་མཆོག་སྐྱོང་གཉིས་ལ་བཤད། དེ་གཉིས་ཀས་དར་རྗེ་དཔལ་གྱི་གྲགས་པ་དང་ཞང་རྒྱལ་བའི་ཡོན་ཏན་གཉིས་ལ་བཤད། དར་རྗེ་ལས་ཡོངས་གྲགས་དབུས་ལུགས་པ་དང་། ཁམས་ལུགས་པ་ཞེས་བཀའ་སྲོལ་གཉིས་སུ་གྱེས། ཞང་ལ་གནུབས་སངས་རྒྱས་ཡེ་ཤེས་ཀྱིས་གསན། འདི་ལ་སྒྱུ་འཕྲུལ་གདམས་ངག་ལུགས་སམ་ནོར་བུ་ལུགས་སུ་གྲགས་ཏེ་བཀའ་སྲོལ་གཅིག་གོ །ཡང་། སློབ་དཔོན་པདྨ་དང་བི་མ་ལ་གཉིས་ཀའི་སློབ་མ་གཉགས་ཛྙཱ་ནས། སོག་པོ་དཔལ་གྱི་ཡེ་ཤེས་ལ་བཤད། དེས་གནུབས་ལ་བཤད་དེ་བཀའ་སྲོལ་གཅིག་གོ །ཡང་རྨ་གཉགས་ཐུན་མོང་གི་སློབ་མ་ཁུ་བྱང་ཆུབ་འོད་དང་། ཁྱུང་པོ་དབྱིག་འོད་གཉིས་ལས། ཁུས་ཞང་དང་། ཁྱུང་པོས་དར་རྗེ་ལ་བཤད། ཞང་གིས་མཁས་པ་གཙུག་གྱེར་རྣམ་གཉིས་དང་ཁུའི་བཤད་བཀའ་གཙོ་བོར་བཟུང་བས་བཀའ་ཕྱོགས་སྐྱོང་མ་དང་། གནས་ལས་བཏགས་པ་བཀའ་མཆིམས་ཕུ་མར་ཡང་གྲགས་ཏེ། གནུབས་ལ་བཤད་པ་ནི་བཀའ་སྲོལ་གཅིག་གོ །གནུབས་སངས་རྒྱས་ཡེ་ཤེས་ལ། ཐུགས་ཟིན་གྱི་སྲས་བཞི། སྲས་ཀྱི་དམ་པ་གཅིག་དང་ལྔ་བྱུང་བ་ལས། སྲས་བཞི་ནི། སོ་ཡེ་ཤེས་དབང་ཕྱུག །སྤ་གོར་བློན་ཆེན་འཕགས། དན་ཡོན་ཏན་མཆོག །སྲུ་ལེགས་པའི་སྒྲོན་མེ་རྣམས་སོ། །སྲས་ཀྱི་དམ་པ་གཅིག་ནི་གནུབས་ཡོན་ཏན་རྒྱ་མཚོའོ། །དེས་སྲས་ཡེ་ཤེས་རྒྱ་མཚོ་ལ་བཤད། ཡབ་སྲས་དེ་གཉིས་དང་། སོ་ཡེ་ཤེས་དབང་ཕྱུག་གིས་ཉང་ཤེས་རབ་མཆོག་ལ་བཤད། དེས་ཉང་ཡེ་ཤེས་འབྱུང་གནས་ལ། དེས་ལྷ་རྗེ་ཟུར་པོ་ཆེ་ཤཱཀྱ་འབྱུང་གནས་ལ་བཤད། དེ་ལ་སློབ་མ་རྩེ་མོ་བཞི། རྩེ་ལྐོག་དང་ལྔ། སྒོམ་ཆེན་བརྒྱ་རྩ་བརྒྱད་སོགས་བྱུང་བ་ལས། རྩེ་མོ་བཞི་ནི། མི་ཉག་འབྱུང་གྲགས། ཞང་འགོས་ཆུང་བ། བཟང་སྒོམ་ཤེར་རྒྱལ། ལྷ་རྗེ་ཟུར་ཆུང་པ་ཤེས་རབ་གྲགས་པ་རྣམས་སོ། །རྗེ་ཟུར་ཆུང་པ་ལ། སློབ་མ་ཀ་བ་བཞི། གདུང་མ་བརྒྱད། ཕྱམ་བཅུ་དྲུག །དྲལ་མ་སུམ་ཅུ་རྩ་གཉིས། ཡུས་པོ་ཆེ་མི་གཉིས་སོགས་མང་དུ་བྱུང་ངོ་། །དེ་ལ་ཀ་བ་བཞི་ནི། རྫོགས་ཆེན་གྱི་ཀ་བ་སྐྱོ་སྟོན་ཤཱཀ་ཡེ། མདོའི་ཀ་བ་ཡང་ཁྱེད་བླ་མ། སྒྱུ་འཕྲུལ་གྱི་ཀ་བ་གླན་ཤཱཀྱ་བཟང་པོ། ཕྲིན་སྒྲུབ་ཀྱི་ཀ་བ་མདའ་ཏིག་ཆོས་ཤཱཀ་གོ །ལྷ་རྗེ་ཟུར་ཆུང་པའི་སྲས། རྩགས་ཚ་རྡོ་རྗེ་འབར་དང་། གསང་བདག་སྒྲོ་ཕུག་པ་ཆེན་པོ་ཤཱཀྱ་སེང་གེ་གཉིས་ལས། རྗེ་སྒྲོ་ཕུག་པས་ཡབ་ཀྱི་སློབ་མ་ཀ་བ་བཞི་དང་། གླན་ཉ་ཚལ་བ་ཤཱཀྱ་བྱང་ཆུབ་རྣམས་ལ་གཏུགས་ཏེ་ལེགས་པར་གསན། སྒྲོ་ཕུག་པ་ལ་གདུགས་ཐོགས་ཀྱི་སློབ་མ་གྲྭ་ས་འཛིན་པ་སྟོང་དང་། དེའི་ནང་ནས་ཀྱང་ཐུགས་ཟིན་གྱི་སློབ་མ་བཞི་གསུམ་བཅུ་གཉིས་ཏེ། དེ་ལ་ནག་པོ་བཞི་ནི། ཟུར་ནག་འཁོར་ལོ། ལྕེ་སྟོན་རྒྱ་ནག་པ། ཉང་ནག་མདོ་བོ། འདར་ནག་གཙུག་ཏོར་དབང་ཕྱུག་གམ། ཁ་ཅིག་ལྕེ་དཔལ་སེང་ཟེར། སྟོན་བཞི་ནི། ཉེ་སྟོན། གྱབས་སྟོན། ཞང་སྟོན། རྒྱ་སྟོན་ནམ། ཕྱི་མ་གཉིས་ཕྲི་ནས་གཉན་སྟོན་དང་། ཁ་རག་སྟོན་སྙིང་བསྣན་པའངམཐོང་ངོ་། །མི་བཞི་ནི། གཡུང་སྟོན་ཧོར་པོ། སྤོང་སྟོན་ལྕགས་ཀྱུ། གཙང་པ་བྱིས་སྟོན། དབུས་པ་ཆོས་སེང་སྟེ། དེས་སྔོན་དུ་ཕྱི་མ་གཉིས་ཕྲི་ནས་ཤངས་པ་རྩེ་སེར་བ་དང་། བྱ་སྟོན་རྡོ་རྗེ་གྲགས་གཉིས་བགྲངས་སོ། །དེ་ཡང་ལ་སྟོད་པ་གཙང་ནག་འོད་འབར་གྱིས། རྗེ་སྒྲོ་ཕུག་པ་དང་། ཟུར་དཔལ་ལེ། གཙང་པ་བྱིས་སྟོན་རྣམས་ལའང་ཉན་མོད་ཀྱི། གཙོ་བོར་ཐུགས་ཐག་གཅོད་ས་ནི། ཉ་རི་དྲི་ངས་པ་ཉེའུ་སྟོན་ཆོས་སེང་ངོ་། །གཙང་ནག་གིས། གཅུང་གི་མེ་སྟོན་མགོན་པོ་ལ་བཤད། དེས་སོ་ཤེས་རབ་ཚུལ་ཁྲིམས་ལ། དེས་རྟ་ནག་བདུད་འདུལ་འབུམ་ལ། དེས་མདའ་ཤཱཀྱ་འཕེལ་ལ། དེས་ཟུར་ཐམས་ཅད་མཁྱེན་པ་བྱམས་པ་སེང་གེ་ལ། དེས་སྒྲོལ་མ་བ་འབྲོ་སྟོན་བསམ་འགྲུབ་རྡོ་རྗེ་ལ། དེས་སྒྲོལ་ཆེན་སངས་རྒྱས་རིན་ཆེན་ལ། དེས་འགོས་ལོ་ཐམས་ཅད་མཁྱེན་པ་གཞོན་ནུ་དཔལ་ལ། དེས་སྤྱན་སྔ་རིན་པོ་ཆེ་ཡེ་ཤེས་དཔལ་བཟང་པོ་ལ། དེས་སྐྱུ་ར་ཆོས་རྒྱལ་རིན་ཆེན་ཕུན་ཚོགས་ལ། དེས་རང་གྲོལ་ཉི་ཟླ་སངས་རྒྱས་ལ། དེ་ལ་འཁོན་ཚེ་དབང་ནོར་རྒྱས་ཀྱིས་གསན་པ་ནི་སྤར་ཁབ་ཀྱི་བཤད་སྲོལ་དང་ལུང་གི་བརྒྱུད་པ་སྟེ། གཡུང་ཊཱིཀ་ལྟར་ན། མདའ་ཤཱཀྱ་འཕེལ་དང་། ཟུར་བྱམས་སེང་གཉིས་ཀ་ལ། གཡུང་སྟོན་རྡོ་རྗེ་དཔལ་གྱིས་གསན། དེས་བྲག་རྒྱ་བོ་པ་སྟོན་པ་མཁའ་འགྲོ་ལ། དེས་རྒྱ་བོ་བླ་མ་བཀྲ་ཤིས་ལ། དེས་རྒྱ་བོ་སྲི་ཐར་བསམ་འགྲུབ་ལ། དེས་སློབ་དཔོན་ཨུ་ལེགས་པ་ལ། དེ་ལ་འཁོན་ཇོ་སྲས་ཚེ་དབང་ནོར་རྒྱས་ཀྱིས་གསན་ནས་རང་གི་སྲས་ལུང་རྟོགས་ཀྱི་མངའ་བདག་དཔལ་འབྱོར་ལྷུན་གྲུབ་ལ་བཤད། དེས་ཟུར་ཆེན་བཀྲ་ཤིས་ཀུན་དགའ་ལ། དེས་སྨྱོས་སྟོན་གསང་བདག་དཔའ་བོ་ཕྲིན་ལས་ལྷུན་གྲུབ་དཔལ་བཟང་པོ་ལ། དེས་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་འཇིགས་བྲལ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ལ། དེས་བདག་གཉོས་ཀྱི་བན་ཆུང་དྷརྨ་ཤྲཱི་ལ་དགྱེས་བཞིན་དུ་སྩལ་ཏོ། །གཞན་ཡང་སྒྱུ་འཕྲུལ་ཞི་ཁྲོའི་དབང་དང་མན་ངག་རྒྱ་གཞུང་ཕྲ་མོའི་དཔེ་ལུང་མང་པོ་དང་། ལོ་ཙཱ་བ་ཆེན་པོ་དྷརྨ་བྷ་དྲས་མཛད་པའི་ཊཱི་ཀ་ཚུལ་བཞི་ཡན་ལག་བཅོ་ལྔ་པ་དང་། ཀུན་མཁྱེན་ཆོས་ཀྱི་རྒྱལ་པོའི་ཊཱི་ཀ་ཕྱོགས་བཅུ་མུན་སེལ་རྣམས་ཀྱི་བཀའ་ལུང་ཡང་བདག་ལ་སྩལ་ཅིང་། སྒྱུ་འཕྲུལ་སྡེ་བརྒྱད། བཤད་རྒྱུད་སྡེ་བཞི། རྒྱུད་ཕྲན་དང་བཅས་པ་རྣམས་ནི། གྲོགས་རྡོ་རྗེ་ཐེག་པའི་དོན་གྱི་དགེ་འདུན་ཉིས་བརྒྱ་བརྒལ་བ་དང་ཐབས་ཅིག་པར་སྔ་འགྱུར་བླ་ན་མེད་པའི་རྒྱུད་འབུམ་ཆེན་མོ་སྟན་ཐོག་གཅིག་ཏུ་སྩལ་བའི་དུས་ལེགས་པར་ནོད་ཅིང་། རྩ་བརྒྱུད་དང་། བརྒྱད་ཅུ་པ་ནི་གནས་སྐབས་གཞན་དུའང་ལན་དུ་མར་བཀའ་དྲིན་དུ་སྩལ་ཏེ། དེ་དག་གི་བརྒྱུད་པ་དང་། བརྒྱུད་པ་སོ་སོའི་སྐུ་ཆེ་བའི་ལོ་རྒྱུས་ལ་སོགས་པ་ནི་འདིར་ཡི་གེ་མང་གིས་དོགས་ནས་མ་བཀོད་པས་གཞན་ལས་ཤེས་པར་བྱའོ། །མདོར་ན་བདག་ཅག་གི་དཔལ་ལྡན་བླ་མ་དམ་པ་སའི་སྟེང་ན་འགྲན་པའི་ཟླ་ཐམས་ཅད་དང་བྲལ་བའི་གཙོ་བོ་གཅིག་པུ་པ། མཚན་བརྗོད་པར་དཀའ་བ་རྗེ་བཙུན་ཐམས་ཅད་མཁྱེན་པ་གཏེར་ཆེན་ཆོས་ཀྱི་རྒྱལ་པོ་ཞེས་ལྷ་དང་བཅས་པའི་འཇིག་རྟེན་དུ་རྣམ་པར་གྲགས་པ་འདི་ནི། སྤྱིར་རྒྱལ་བའི་བསྟན་པ་ཡོངས་སུ་རྫོགས་པ་དང་། བྱེ་བྲག་སྔ་འགྱུར་རྡོ་རྗེ་ཐེག་པ་བཀའ་གཏེར་ཐམས་ཅད་ཀྱི་སྟོན་པ་པོ་དང་། ཁྱད་པར་སྒྱུ་འཕྲུལ་སྙིང་པོའི་སྐོར་གྱི་དབང་བཀའ་བཤད་བཀའ་གདམས་ངག་ཡན་ལག་དང་བཅས་པ་ནུབ་པར་ཉེ་བ་ན་ལྷ་རྗེ་ཟུར་པོ་ཆེ་ཉིད་འདིའི་ངེས་པ་གསལ་བར་མཛད་པའི་ཕྱིར་སླར་ཡང་བྱོན་པ་ལགས་པས། ངེས་པའི་དོན་དུ་ན་རྗེ་རིན་པོ་ཆེ་འདི་ལ་ཐུག་པ་རྣམས་ཉེ་བརྒྱུད་རྨད་དུ་བྱུང་བ་ཡིན་ནོ། །
གཉིས་པ་ཆེ་བ་ནི། ཁོག་གཞུང་གསལ་སྒྲོན་ལས། རང་བཞིན་གསང་བའི་སྙིང་པོ་འདི། །གཞན་ལས་འཕགས་པའི་ཆེ་བ་བརྒྱད། །ཅེས་པས་བརྒྱད་དེ། རྒྱུད་ཐམས་ཅད་ཀྱི་རྒྱལ་པོ་ཡིན་པས་ངེས་པར་ཆེ་བ་གཟི་ལྡན་གསལ་བའི་ཉི་མ་ལྟ་བུ། ཐེག་པ་ཐམས་ཅད་ཀྱི་ཡང་རྩེ་ཡིན་པས་ཆེ་བ་དབུས་ཀྱི་རི་བོ་མཆོག་རབ་ལྟ་བུ། བསྟན་པ་ཐམས་ཅད་ཀྱི་འབྱུང་ཁུང་ཡིན་པས་ཆེ་བ་འབྱུང་བ་ནམ་མཁའ་ལྟ་བུ། ལུང་ཐམས་ཅད་ཀྱི་སྤྱི་འགྲེལ་ཡིན་པས་ཆེ་བ་ནམ་མཁས་སྣང་སྲིད་ཀྱི་གོ་ཕྱེ་བ་ལྟ་བུ། དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཞེ་ཕུགས་ཡིན་པས་ཆེ་བ་རྒྱལ་པོའི་བཀའ་གསང་ཐོབ་པའི་མི་ལྟ་བུ། འབྲས་བུ་ཐམས་ཅད་ཀྱི་ཐུག་ས་ཡིན་པས་ཆེ་བ་ཡིད་བཞིན་གྱི་ནོར་བུ་རིན་ཆེན་ལྟ་བུ། དེ་བཞིན་གཤེགས་པ་ཐམས་ཅད་ཀྱི་གཤེགས་ཤུལ་ཡིན་པས་ཆེ་བ་སྟོང་ལམ་གྱི་ཤུལ་ལྟ་བུ། མ་འོངས་པའི་རྣལ་འབྱོར་པ་རྣམས་ཀྱི་ལམ་ཡིན་པས་ཆེ་བ་ཁྲི་ལམ་ལྟ་བུ་སྟེ་བརྒྱད་དོ། །དེ་ལས་དང་པོ་ནི། ཇི་ལྟར་ཉི་མའི་སྣང་བ་ནི་སྣང་བ་ཐམས་ཅད་རྒྱལ་པོ་ཡིན་པ་བཞིན་དུ་རྒྱུད་འདི་ཉིད་ཀྱང་རྒྱུད་ཐམས་ཅད་ཀྱི་རྒྱལ་པོ་སྟེ། རྒྱས་པ་ལས། གསང་བའི་སྙིང་པོ་ངེས་པ་ནི། །གསང་སྔགས་ཀུན་གྱི་རྒྱལ་པོ་ཡིན། །ཞེས་སོ། །གཉིས་པ་ནི། ཇི་ལྟར་ལྷུན་པོའི་རྩེར་ཕྱིན་ན་རི་བྲན་ཐམས་ཅད་མིག་འོག་ཏུ་ཚུད་པ་ལྟར། རྒྱུད་འདིའི་དོན་རྟོགས་ན་ཐེག་པ་ཐམས་ཅད་ཀྱི་དོན་འདིར་འདུས་པའི་ཕྱིར་དེ་ཐམས་ཅད་ཤེས་པར་འགྱུར་ཏེ། སྔ་མ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་སོ། །གསུམ་པ་ནི། ཇི་ལྟར་ནམ་མཁའ་ལས་འབྱུང་བ་བཞི་ཤར་ནས་སྣོད་བཅུད་ཆགས་པ་ལྟར། རྒྱུད་འདིའི་བྱིན་རླབས་ལས་བསྟན་པ་དང་ཐེག་པ་ཐམས་ཅད་འཕྲོས་པ་ཡིན་ཏེ། འདི་ཉིད་ལས། འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་སོ། །བཞི་པ་ནི། ཇི་ལྟར་ནམ་མཁས་སྣང་སྲིད་ཀྱི་གོ་ཕྱེ་བ་ལྟར། མཚན་ཉིད་དང་རྒྱུད་ཐམས་ཅད་ཀྱི་དོན་དང་འབྲས་བུ་ཐམས་ཅད་འདིར་འདུས་ཤིང་འདིས་སྟོན་པས་ན་ལུང་ཐམས་ཅད་ཀྱི་སྤྱི་འགྲེལ་ཏེ། འདི་ཉིད་ལས། སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཞེས་སོ། །ལྔ་པ་ནི། ཇི་ལྟར་རྒྱལ་པོའི་བཀའ་གསང་ཐོབ་པའི་མི་ནི་རྒྱལ་པོའི་བློའི་གཏད་ས་ཡིན་པས་འབངས་བློན་གཞན་ལ་རག་མི་ལུས་པ་བཞིན་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་དམ་པའི་མཐར་ཐུག་འདི་ལས་མི་འདའ་བས་འདིའི་དོན་རྟོགས་ན་ཐེག་པ་གཞན་ལ་རག་ལུས་མི་དགོས་པ་སྟེ། འདི་ཉིད་ལས། འདི་ནི་གསང་ཆེན་ངེས་པ་སྟེ། །འབྲས་བུ་ལམ་དུ་གྱུར་པ་ཡིན། །ཞེས་སོ། །དྲུག་པ་ནི། ཇི་ལྟར་ཡིད་བཞིན་གྱི་ནོར་བུ་རིན་ཆེན་ནི་འདོད་རྒུ་ཐམས་ཅད་སྟེར་བའི་མཆོག་མཐར་ཐུག་ཏུ་གྲུབ་པ་བཞིན་དུ། བསྟན་པ་དང་ཐེག་པ་ཐམས་ཅད་ཀྱི་མཐར་ཐུག་གི་འབྲས་བུ་ནི་རང་བཞིན་གསང་བའི་སྙིང་པོ་འདི་ཁོ་ནར་ཐུག་པ་སྟེ། འདི་ཉིད་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུ་གནས། །ཞེས་སོ། །བདུན་པ་ནི། ཇི་ལྟར་གང་དུ་འགྲོ་བའི་ལམ་པོ་ཆེ་དེར་:སླེབས་༼‹བ›ཕྱིན་༽པ་ཐམས་ཅད་ཀྱིས་:ཕྱིན་༼‹བ›བགྲོད་༽པ་ལྟར། སྔར་འདས་པའི་སངས་རྒྱས་ཐམས་ཅད་ལམ་འདི་ལ་བརྟེན་ནས་སངས་རྒྱས་པ་སྟེ། འདི་ཉིད་ལས། འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་ཀུན། །བསྙེན་ནས་སྐུ་ལྔ་ལྷུན་གྱིས་རྫོགས། །ཞེས་སོ། །བརྒྱད་པ་ནི། ཇི་ལྟར་གནས་དེར་སླར་འགྲོ་འགྱུར་རྣམས་ཀྱང་ལམ་དེ་ལ་འགྲོ་བ་བཞིན་དུ། མ་འོངས་པ་ན་འཚང་རྒྱ་འགྱུར་རྣམས་ཀྱང་ལམ་འདི་ཁོ་ན་ལ་བརྟེན་ནས་འཚང་རྒྱ་བར་འགྱུར་ཏེ། འདི་ཉིད་ལས། འབྱུང་དང་མ་འོངས་ཐམས་ཅད་ཀུན། །འདི་ཡིས་ལྷུན་གྱིས་འགྲུབ་པར་འགྱུར། །ཞེས་སོ། །