བཅུད་ཆོག་ཁ་སྐོང་།
བཅུད་ཆོག་ཁ་སྐོང་། དམ་ཚིག་ཕྱག་རྒྱའི་ལྷ་རྣམས་འོད་ཟེར་གྱིས། །དབྱིངས་ནས་ཡེ་ཤེས་མཁའ་ཁྱབ་ཕྱག་རྒྱའི་ཚོགས། །དངས་བའི་མཁའ་ལ་ཆར་སྤྲིན་གཏིབ་པ་བཞིན། །སྐད་ཅིག་ཉིད་ལ་མངོན་སུམ་བྱོན་པར་གྱུར། །ཧོཿ རྟག་ཁྱབ་ལྷུན་གྲུབ་བདེ་བ་ཆེན་པོའི་སྐུ། །གདུལ་བྱའི་དོན་བཞིན་ཐུགས་རྗེ་འགོག་མེད་གར། །བདུད་རྩི་བདེ་བ་ཆེན་པོའི་དཀྱིལ་འཁོར་ལྷ། །ད་ལྟ་ཉིད་དུ་གནས་འདིར་གཤེགས་སུ་གསོལ། །བཛྲ་ས་མཱ་ཛཿཛཿཧཱུྃ་བཾ་ཧོཿ དམ་ཚིག་ཕྱག་རྒྱའི་དཀྱིལ་འཁོར་དམ་པ་འདིར། །ཡེ་ཤེས་ཕྱག་རྒྱ་ཆེན་པོར་དགྱེས་བཞུགས་ནས། །ཆོས་ཀྱི་ཕྱག་རྒྱ་སྔགས་ཀྱི་འོད་ཟེར་གྱིས། །ལས་ཀྱི་ཕྱག་རྒྱའི་དངོས་གྲུབ་སྩལ་དུ་གསོལ། །བཛྲ་ས་མ་ཡ་ཏིཥྛ་ལྷན། ཧཱུྃ། དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེན་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །མ་ཧཱ་སུ་ཁ་པཱུ་ཛ་ཧོཿ ཨོཾཿ སྣང་སྲིད་གདོད་ནས་རྣམ་པར་དག་པ་ཡི། །འཇམ་དཔལ་འཆི་མེད་རྟག་པ་ཡེ་ཤེས་སྐུ། །བདེ་བ་ཆེན་པོ་བདུད་རྩིའི་དཀྱིལ་འཁོར་ལ། །གུས་པས་བསྟོད་དོ་མཆོག་ཐུན་དངོས་གྲུབ་སྩོལ། །ན་མོ་ན་མ་མི། བདག་དང་མདུན་གྱི་སོགས་བཟླས་དམིགས་བཅས་སྔགས་
བཟླ། སྐབས་སུ་བྱིན་ཕབ་ཅིང་སྨན་སྲུང་བསྐུལ་བའི་ཕྱིར་སྤོས་བརྟུལ། བདུད་རྩི་འཐོར། དར་སྣ་གཡབ་ཅིང་རོལ་མོ་བཅས་མོས་གུས་བསྐྱེད་ལ་དབྱངས་སྙན་པས། ཧཱུྃ་ཧྲཱིཿ ཕྱོགས་དུས་རྩ་གསུམ་རྒྱལ་བ་ཐུགས་དམ་ཅན། ལྷ་དང་དྲང་སྲོང་རིག་པ་འཛིན་པ་དང་། །ཁྱད་པར་འཇམ་དཔལ་བདེ་ཆེན་བདུད་རྩིའི་ལྷ། །ཐུགས་དམ་བསྐུལ་ལོ་ཡེ་ཤེས་བྱིན་ཆེན་ཕོབ། །རྔ་ཡབ་ཟངས་མདོག་དཔལ་རིའི་ཕོ་བྲང་ནས། །རིག་འཛིན་རྒྱལ་པོ་པདྨ་ཐོད་ཕྲེང་རྩལ། །གྲུབ་པའི་དབང་ཕྱུག་ཚོམ་བུར་བཅས་པ་ཡིས། །སྒྲུབ་པའི་རྫས་ལ་བདུད་རྩིའི་བྱིན་ཆེན་ཕོབས། །ཆོས་དབྱིངས་འབར་བ་ཆེན་པོའི་དཀྱིལ་འཁོར་ནས། །དཔལ་ཆེན་ཆེ་མཆོག་ཚོམ་བུ་དགུ་ཡི་ལྷ། །ཡེ་ཤེས་རང་སྣང་རབ་འབྱམས་ཡི་དམ་ལྷས། །སྒྲུབ་རྫས་ཡེ་ཤེས་བདུད་རྩིར་བྱིན་གྱིས་རློབས། །སྒྲུབ་ལ་དངོས་གྲུབ་སྩོལ་བའི་གཡར་དམ་ཅན། །རང་བྱུང་གནས་ཆེན་བརྒྱད་ཀྱི་མཁའ་འགྲོ་མ། །ཀཽ་རི་ལ་སོགས་མ་སྲིང་མཁའ་འགྲོའི་ཚོགས། །དམ་རྫས་བདུད་རྩི་འདི་ལ་བྱིན་ཕོབ་ཅིག །ཚངས་པ་ཀུན་སྒྲོལ་དུང་གི་ཐོར་ཚུགས་ཅན། །ཙ་ར་ཀ་དང་མུ་ཁྱུད་འཛིན་ལ་སོགས། །མཁའ་མཐས་གཏུག་པའི་དྲང་སྲོང་རིག་འཛིན་རྣམས། །དེང་འདིར་བདུད་རྩིའི་རྫས་ལ་བྱིན་ཆེན་ཕོབས། །སྨན་གྱི་ལྷ་མོ་ནོར་གྱི་རྒྱུན་མ་དང་། །གྲུབ་པའི་བློ་གྲོས་དང་ནི་
འོད་འཆང་མ། །རྨ་བྱའི་མགྲིན་སོགས་སྨན་སྲུང་ལྷ་མོའི་ཚོགས། །ཐུགས་དམ་བཞིན་དུ་བདུད་རྩིའི་བྱིན་ཆེན་ཕོབས། །བདུད་རྩི་བསྒྲུབ་པའི་གྲོགས་དང་བྲན་གྱུར་པ། །ལྷ་ཀླུ་གཟའ་སྐར་གནོད་སྦྱིན་གྲུབ་པའི་ཚོགས། །ཀུན་ཀྱང་སྔོན་གྱི་དམ་ཚིག་ཇི་བཞིན་དུ། །འདིར་གཤེགས་སྒྲུབ་པའི་རྫས་ལ་བྱིན་ཆེན་ཕོབས། །མཁའ་དབྱིངས་པདྨ་དྲྭ་བའི་ཞིང་ཁམས་ནས། །དགྲ་བླའི་རྒྱལ་པོ་སེང་ཆེན་ཚེ་ཡི་ལྷ། །དགྱེས་ཡུམ་བཀའ་འཁོར་བཀའ་སྡོད་ཕོ་ཉར་བཅས། །ཐུགས་དམ་མ་གཡེལ་དེང་འདིར་བྱིན་ཕོབ་ཅིག །ཕྱོགས་བཅུ་རབ་འབྱམས་ནམ་མཁའི་མཐས་ཁྱབ་པའི། །རྩ་གསུམ་རྒྱལ་བ་སྨན་སྐྱོང་སྲུང་མའི་སྡེ། །སྔོན་གྱི་ཐུགས་དམ་ཆེན་པོའི་དམ་ཚིག་གིས། །སྐད་ཅིག་ཡུད་ལ་གནས་འདིར་གཤེགས་སུ་གསོལ། །སྣང་སྟོང་སྐུ་ཡི་གར་སྟབས་ཤིགས་སེ་ཤིག །དགྱེས་པའི་གླུ་དབྱངས་རོལ་མོ་དི་རི་རི། །བདེ་སྟོང་ཐུགས་ཀྱི་དགོངས་པ་ཡ་ལ་ལ། །འཆི་མེད་བདུད་རྩིའི་སྦྲང་ཆར་སི་ལི་ལི། །འཇའ་འོད་མེ་ཏོག་ཆར་པ་ཐོ་ལོ་ལོ། །མངོན་སུམ་བྱིན་ཕོབ་སྲིད་ཞིའི་དངས་བཅུད་བསྡུས། །སྒྲུབ་པའི་དམ་རྫས་འདི་ལ་བཅུད་དུ་བསྐྱིལ། །དགེ་ལེགས་ཤིས་པའི་རྟགས་མཚན་མྱུར་དུ་སྟོན། །གཞོམ་མེད་རྡོ་རྗེའི་ཚེ་དང་ལང་ཚོའི་དཔལ། །མཆོག་
ཏུ་སྒྲུབ་བྱེད་བདུད་རྩི་བཅུད་ཀྱིས་ལེན། །ད་ལྟ་ཉིད་དུ་གྲུབ་པར་མཛད་ནས་ཀྱང་། །མཆོག་ཐུན་དངོས་གྲུབ་དཔལ་དུ་འབར་བར་མཛོད། །མ་ཧཱ་སུ་ཁ་བཛྲ་ཨ་མྲྀ་ཏ་ཛྙཱ་ན་ཨ་བེ་ཤ་ཡ་ཕེམ་ཕེམ། ཨ་ལ་ལ་སརྦ་སིདྡྷི་ཧོཿ ཞེས་བྱའོ། །རྟགས་མཐོང་ནས་དངོས་གྲུབ་ལེན་ཆོག་ནི། ཧོཿ སྣང་སྲིད་བདེ་ཆེན་ཡེ་ཤེས་བདུད་རྩིའི་ལྷ། །འཇམ་དཔལ་སྒྱུ་འཕྲུལ་དྲྭ་བར་ཡོངས་ཤར་བ། །ཀུན་ཀྱང་མཉམ་སྦྱོར་བདེ་བའི་གཟི་བྱིན་འབར། །བདུད་རྩི་བྱང་ཆུབ་སེམས་ཀྱི་ཆར་ཆེན་འབེབས། །དམ་ཚིག་བདུད་རྩིའི་དཔལ་དུ་གཉིས་མེད་འདྲེས། །སྲིད་ཞིའི་དངས་མ་བདུད་རྩི་བཅུད་ཀྱིས་ལེན། །དངོས་གྲུབ་ཀུན་གྱི་དབྱིག་ཏུ་འབར་བ་ཡི། །གཟི་བྱིན་ཉི་མ་སྟོང་ལྟར་ལྷམ་མེར་གྱུར། །རྩ་སྔགས་དང་བཅས་བཅུ་དྲུག་བདུད་རྩིའི་སྔགས། །འབུམ་ཕྲག་བར་དུ་བུང་བསྐྱེད་རྟགས་མཐོང་ནས། །གྲུབ་པའི་རྫས་ལས་དངོས་གྲུབ་བླང་བར་བྱ། །བདེ་བ་ཆེན་པོའི་བདུད་རྩི་ངེས་པར་འགྲུབ། །ས་མ་ཡཿ ཧོཿ འགྲོ་བ་ཉོན་མོངས་ནད་ཀྱིས་གཟིར་བ་ལ། །ཡེ་ཤེས་བདུད་རྩིའི་ཆར་གྱི་རྒྱུན་འབེབས་པ། །བདུད་རྩི་བདེ་བ་ཆེན་པོའི་དཀྱིལ་འཁོར་ལྷ། །རོ་མཉམ་ངང་དུ་དགྱེས་ཤིང་དངོས་གྲུབ་སྩོལ། །བསྒྲུབ་པའི་རིག་འཛིན་བདག་གིས་གདུང་ཤུགས་ཀྱིས། །ཆོས་དབྱིངས་ཀུན་ཁྱབ་རྒྱལ་བ་སྲས་དང་བཅས། །དྲང་སྲོང་རིག་འཛིན་སྨན་སྐྱོང་སྲུང་མ་ཡི། །
ཐུགས་དམ་གཉན་པོ་སྔགས་ཀྱིས་རྒྱུད་བསྐུལ་ནས། །བདུད་རྩིའི་དངོས་གྲུབ་ནོད་པའི་དུས་ལགས་ན། །དུས་ལས་མི་འདའ་ཐུགས་རྗེའི་ཡལ་གམ་ཅན། །ཐམས་ཅད་འདིར་གཤེགས་དགོངས་པས་བྱིན་རློབས་ལ། །དངོས་གྲུབ་དམ་པ་ད་ལྟ་ཉིད་དུ་སྩོལ། །གཞོམ་མེད་རྡོ་རྗེའི་ཚེ་དང་ལང་ཚོའི་དཔལ། །གཟི་བྱིན་ཉི་མ་འབུམ་ལྟར་རབ་གསལ་བས། །ས་གསུམ་ཡིད་འཕྲོག་བདེ་ཆེན་དབང་གི་ལུས། །ད་ལྟ་ཉིད་དུ་གྲུབ་པའི་དངོས་གྲུབ་སྩོལ། །སྣང་སྲིད་ཀུན་གསལ་ཐུགས་ཀྱི་མེ་ལོང་ལ། །ཇི་ལྟ་ཇི་སྙེད་ཆོས་ཀུན་ལེགས་འཆར་ཞིང་། །རོ་མཉམ་ནམ་མཁའ་ལྟ་བུའི་ཡེ་ཤེས་མཆོག །བདེ་ཆེན་རྡོ་རྗེའི་དངོས་གྲུབ་དེང་འདིར་སྩོལ། །དཔལ་དང་འབྱོར་པ་དབང་དང་གྲགས་པ་སོགས། །སྲིད་ཞིའི་ལེགས་ཚོགས་མ་ལུས་འདུ་ཞིང་འཕེལ། །ཡིད་ལ་ཇི་ལྟར་ཕན་པ་ཡོངས་རྫོགས་པའི། །དངོས་གྲུབ་དམ་པ་དུས་འདིར་སྩལ་དུ་གསོལ། །འབད་མེད་ལྷུན་གྱིས་གྲུབ་པའི་ཕྲིན་ལས་ཀྱིས། །བསྟན་འགྲོའི་དོན་ཆེན་མཁའ་དང་མཉམ་པར་ནི། །ཡོངས་གྲུབ་མཐུ་དང་དབང་གི་དངོས་གྲུབ་མཆོག །དམ་འདི་ཉིད་དུ་མངོན་གྱུར་དམ་པ་རྩོལ། །སྲིད་གསུམ་བརྟན་དང་གཡོ་བའི་དངས་བཅུད་དང་། །བདེ་ཆེན་མཁའ་འགྲོའི་འདུ་བ་སྤྲིན་བཞིན་རྒྱས། །དགའ་སྐྱིད་འབྱོར་པ་
རྫོགས་ལྡན་སྤྲིན་ཆེན་ལ། །རང་དབང་འབྱོར་བའི་དངོས་གྲུབ་དེང་སྩོལ་ཅིག །སྲས་བཅས་རྒྱལ་བ་ཀུན་དང་མཉམ་པ་ཉིད། །ཡེ་ཤེས་རྡོ་རྗེ་རྟག་པ་ཆེན་པོའི་དབྱིངས། །མངོན་གྱུར་གདོད་མའི་རྒྱལ་ས་ཟིན་པ་ཡི། །དངོས་གྲུབ་ཆེན་པོ་ད་ལྟ་སྩལ་དུ་གསོལ། །རྩ་སྔགས་དང་། སརྦ་པཉྩ་ཨ་མྲྀ་ཏ་ར་ས་ཡཱ་ན་ཀཱ་ཡ་སིདྡྷི་ཨོཾ། ཝ་ཀཱ་སིདྡྷི་ཨཱཿཙིཏྟ་སིདྡྷི་ཧཱུྃ། སརྦ་སིདྡྷི་ཕ་ལ་ཧོཿ ཞེས་དངོས་གྲུབ་བླང་ངོ་། །ཤིང་རྟ་མགོ་ཟླའི་གྲལ་ཚེས་དགེ་བ་རྣམས་སུ་ལྷུན་གྲུབ་སྟེང་དུ་འཇམ་དཔལ་རྡོ་རྗེས་རིམ་སྤེལ་དགེ་ལེགས་འཕེལ་ལོ། །མངྒ་ལཾཿ