འཇམ་དཔལ་གྱི་ལས་ཚོགས་ཀུན་འབྱུང་ནོར་བུའི་རྒྱལ་པོ།
འཇམ་དཔལ་གྱི་ལས་ཚོགས་ཀུན་འབྱུང་ནོར་བུའི་རྒྱལ་པོ་བཞུགས་སོ། །
ཨོཾ་སྭ་སྟི། དཔལ་ལྡན་རྫོགས་པའི་སངས་རྒྱས་པདྨ་སྐྱེས། །འཇམ་དཔལ་ཡེ་ཤེས་སེམས་དཔར་གུས་བཏུད་ནས། །འཇམ་དཔལ་ལ་བརྟེན་ལས་ཀྱི་མན་ངག་ནི། །བསླུ་མེད་ཚོགས་རྣམས་གསལ་བར་འདིར་བཤད་བྱ། །དེ་ཡང་དད་བརྩོན་དམ་ཚིག་དང་ལྡན་པའི་སྐལ་པ་བཟང་པོ་གང་གིས་ཁྱབ་བདག་འཇམ་དཔལ་རྡོ་རྗེའི་སྨིན་བྱེད་ནོས་ཤིང་། བསྙེན་བསྒྲུབ་རྣམ་དག་ལ་རྣལ་འབྱོར་དུ་བྱས་པའི་སྒོ་ནས་ལས་ཀྱི་ཚོགས་རབ་འབྱམས་བསྒྲུབ་པར་བྱ་སྟེ། དེ་ལ་ཐོག་མར་ལྷག་པའི་ལྷ་འདི་ཉིད་ལ་བརྟེན་ནས་ལས་ཀྱི་གཙོ་བོ་སྤོབས་པའི་གཏེར་ཆེན་པོ་བརྒྱད་གྲོལ་བར་བྱ་བ་ཡིན་པས། ཐོག་མར་བློ་གྲོས་ལ་བརྟེན་པའི་ལས་
བཅུ་གཅིག་གི་དང་པོ་ལས་ཀུན་གྱི་རྩ་བ་རྡོ་རྗེའི་བཟླས་པས་ཞི་གནས་སྒྲུབ་ཅིང་ཞི་སོགས་ལས་ཀུན་བྱེད་པ་དང་ཤེས་རབ་འཕེལ་བར་བྱེད་པ་ལ། རང་ཉིད་འཇམ་དཔལ་གྱི་རྣལ་འབྱོར་ལ་གནས་པས། རླུང་ཕྱིར་འབྱིན་ཚེ་ཐུགས་ཀའི་དྷཱི་ཡིག་གི་ནཱད་ལས་སྔགས་ཕྲེང་དམར་སེར་ཨོཾ་ནས་བརྩམས་ཏེ་ན་ར་ར་རང་སྒྲ་དྲིལ་བུའི་སྒྲ་གདངས་ལྟ་བུ་དང་བཅས་ཏེ་བྱུང་། ཕྱིར་སོར་བཅུ་དྲུག་གི་མདུན་གྱི་ནམ་མཁར་ཀྱི་ལི་ལི་གཡས་སུ་འཁོར། སླར་ནང་དུ་རྔུབ་ཚེ་ཨོཾ་སྔོན་དུ་བྱས་ཏེ་རང་སྒྲ་བཅས་ནར་གྱིས་དྲངས་ནས་དྷཱིཿལ་ཐིམ་པར་བསམས་ཤིང་གནས་པ་ན་ཐུགས་སྲོག་གསལ་སྟོང་ལ་སེམས་བཟུང་ནས་དེའི་འོད་ཀྱིས་ལུས་ནང་མེ་རེ་གང་
བར་བསམ། འདིར་སྣ་བུག་གཡས་གཡོན་མི་ཕྱེ་བར་དམིགས་པའམ། ཡང་ན་གཡས་ནས་ཕར་འབྱིན། གཡོན་ནས་ཚུར་བསྡུ་བར་བསམ། ཞི་བ་ལ་སྔགས་ཀྱི་འོད་དཀར་པོས་འཁོར་འདས་ཁྱབ་རྒུད་པ་ཞི་བར་བསམ། དེ་བཞིན་རྒྱས་པར་སེར་པོས་དཔལ་འབྱོར་སྤེལ། དབང་ལ་དམར་པོས་སྣོད་བཅུད་དམར་ལམ་དུ་བཞུས་ཏེ་སྣང་སྲིད་དབང་དུ་བྱས་དངས་བཅུད་བཀུག་སྟེ་སྔགས་ཕྲེང་ལ་བསྟིམ། དེ་ནང་དུ་དྲངས་ལུས་བདེ་མེར་གྱིས་སོང་། སྙིང་དབུས་ང་སེམས་ཀྱི་ངོ་བོ་སྟོང་གསལ་མཐའ་བྲལ་དུ་ཐིམ་ནས་མི་ཕྱེད་པའི་རང་བཞིན་དུ་བལྟ། དྲག་པོ་ལ་འོད་ལྗང་ནག་ཁྲོ་ཚོགས་མེ་དཔུང་མཚོན་ཆས་གནོད་བྱེད་ཚར་བཅད་འོད་ཚུར་འདུས་སྔགས་ལ་ཐིམ། ནང་དུ་རྔུབས་ཏེ་རང་བཀྲག་མདངས་ལྡན་ཅིང་ཕྱོགས་ལས་རྣམ་པར་རྒྱལ་བའི་ནུས་པ་དང་ལྡན་པར་བསམ། མཆོག་ལ་འོད་མཐིང་ཀས་སྣང་སྲིད་བདེ་སྟོང་འོད་གསལ་ཆོས་སྐུ་ཆེན་པོར་འབྱམས་སུ་ཀླས་པར་བསམ། གཞན་ཡང་སྲིད་ཞིའི་དངས་བཅུད་དང་སྤོབས་པ་སོགས་སོ་སོ་ལ་དམིགས་པ་བསྒྱུར་ཏེ་ཚུལ་འདི་ལྟ་བུའི་སྒོ་ནས་སྲོག་གཟུགས་བསྒྲུབ་ནས། རླུང་སྔགས་སེམས་གསུམ་དབྱེར་མེད་པར་འཇའ་ལུས་རྡོ་རྗེའི་སྐུ་བསྒྲུབ་པར་བྱའོ། །གཞན་ལ་མེད་པའི་ཁྱད་ཆོས་མཁའ་འགྲོ་
གསང་བའི་སྙིང་ཁྲག་སྣོད་མིན་ལ་གུ་ཧྱ་རྒྱཿ འདིའི་དམིགས་པ་དང་བུམ་ཅན་སྦྲགས་ནས་བྱ་ཞིང་། ཁོང་པར་ཞུགས་པའི་དུས་འོད་གསལ་དངས་ཐ་ལེ་བའི་ངང་མི་ཤིགས་པའི་སྒྲ་གདངས་ཨ་ར་པ་ཙ་སོགས་སྔགས་སྒྲ་ལ་སེམས་གཏད། རླུང་ཕྱིར་འབྱིན་དུས་ཀྱང་སྣང་སྲིད་ཐམས་ཅད་འོད་ལམ་ལམ་གཅིག་ཏུ་འཁྱིལ་བའི་ཀློང་ན། བརྟན་གཡོ་ཐམས་ཅད་ལྷ་སྔགས་རླུང་སེམས་དབྱེར་མེད་ཀྱི་རང་བཞིན་ཨ་ར་པ་ཙ་སོགས་སྔགས་ཀྱི་སྒྲ་གདངས། ཞི་བ་ལ་དྲིལ་བུ་དང་སིལ་སྙན་གྱི་སྒྲ་ལྟ་བུ། རྒྱས་པར་རྔ་སྒྲ་དང་འབྲུག་སྒྲ་སྙན་པ་ལྟ་བུ། དབང་ལ་གླུ་དབྱངས་ཡིད་འཕྲོག །དྲག་པོ་ལ་འབྲུག་དྲག་པོ་དང་རི་ཉིལ་བ་ལྟ་བུ་མེ་མཚོན་དུག་སོགས་ཀྱི་ཟི་ར་ཁོལ་བ་དང་བཅས་པས་སྒྲ་འུར་བར་བསམས་ལ་རྟགས་བྱུང་གི་བར་དུ་བཟླས་དམིགས་སྦྲགས་ཏེ་གཟབ་པར་བྱ་བ་ནི་ལས་བསྒྲུབ་པའི་ཐོག་མཐའ་བར་གསུམ་དུ་གལ་ཆེ་བ་ཉིད་དོ། །ཟབ་རྒྱ༔ གཞན་ཡང་སྣོད་བཅུད་ཐམས་ཅད་འོད་དམར་སེར་ལས་གྲུབ་པའི་ཨ་ར་པ་ཙ་སོགས་སྔགས་ཀྱི་ཡི་གེའི་རྡུལ་ཕྲ་རབ་ཀྱི་རང་བཞིན་ཅན་ཤིག་ཤིག་གཡོ་བ་རང་གི་སྔགས་ལ་སིབ་ཀྱིས་ཐིམ། དེ་ཁོང་པར་སོན་དང་སྔགས་ཕྲེང་ལ་ཐིམ་པས། རང་ལུས་འོད་དམར་སེར་ལས་གྲུབ་
པའི་ལྷ་སྐུའི་རྣམ་པ་ལ། སྔགས་ཨ་ར་པ་ཙ་ལ་སོགས་པའི་ཡི་གེའི་རྡུལ་ཕྲ་རབ་ལས་གྲུབ་པའི་རང་བཞིན་དུ་བལྟ། མཐར་རང་ལུས་སྙིང་གའི་དྷཱི་ལ་ཐིམ། དེ་ནཱ་དར་གྱུར་པ་ཇེ་ཕྲར་འོད་གསལ་དུ་ཡལ་བར་བསམ། སླར་འོད་གསལ་གྱི་ངང་ནས་སྔར་བཞིན་གསལ་བཏབ་ལ་སྔགས་ཡིད་ཀྱིས་བཟླའོ། །གཞན་ཡང་སྣོད་བཅུད་དབྱངས་གསལ་གྱི་ཡི་གེ་ཁ་དོག་སྣ་ལྔ་གསལ་ཞིང་འབར་བའི་ཚོགས་མ་ལུས་པ་རང་གི་སྔགས་ཕྲེང་ལ་བསྟིམས་ཤིང་རིག་སྟོང་མི་ཤིགས་པའི་ཐིག་ལེར་མཉམ་པར་བཞག་པས་མི་བརྗེད་པའི་གཟུངས་སོགས་ཟབ་ཅིང་རྒྱ་ཆེ་བའི་ཡོན་ཏན་གྱི་དཔལ་མ་ལུས་པ་མངོན་དུ་འགྱུར་རོ། །ས་མ་ཡཿ ཡོན་ཏན་གྱི་གཏེར་བསྒྲུབ་པའི་མན་ངག་ལ། གཟུངས་སྤོབས་བློ་གྲོས་བསྒྲུབ་པར་འདོད་པས། རང་འཇམ་དཔལ་དབྱངས་སུ་གསལ་བའི་ཐུགས་ཀར་རིན་པོ་ཆེའི་དཔལ་བེའུ་ཟུར་དྲུག་པའི་ནང་དུ་ཟླ་བའི་སྟེང་རང་གི་རླུང་སེམས་ཀྱི་ངོ་བོ་ཡི་གེ་དྷཱི་དམར་སེར་ལ་སྔགས་ཀྱིས་བསྐོར་བ་དང་། གྲེ་ཕུག་ཨཱཿདཀར་པོ་གཅིག་བསམ། སྙིང་གའི་སྔགས་ཕྲེང་ལས་འོད་ཟེར་མཁའ་ཁྱབ་ཏུ་འཕྲོས། ཕྱོགས་དུས་ཀྱི་རྒྱལ་བ་སྲས་བཅས་ཐམས་ཅད་ཟག་མེད་ཀྱི་བདེ་བས་ཐུགས་མཉེས་པར་བྱས། སྣོད་བཅུད་ཐམས་ཅད་འོད་གསལ་ཆོས་སྐུ་ཆེན་པོར་འབྱམས་སུ་
ཀླས། དེའི་ངང་ནས་རྒྱལ་བ་ཐམས་ཅད་ཀྱི་གཟུངས་དང་སྤོབ་པ་བློ་གྲོས་གང་བསྡུ་འདོད་པ་དེ་དག་སྲིད་ཞིའི་དངས་བཅུད་དང་ཆབས་ཅིག་ཏུ་བསྡུས་ཏེ་འོད་ཟེར་དམར་སེར་ཉི་མ་འཆར་ཁའི་མདངས་ལྟ་བུ། ཨཱ་ལི་ཀཱ་ལིའི་རྡུལ་ཕྲ་རབ་ལས་གྲུབ་པ་ཐམས་ཅད་སིབ་སིབ་འདུས་ཏེ་བདག་གི་འཇུག་པའི་རླུང་དང་ཆབས་ཅིག །ལུས་ནང་རྩ་གནས་ཕྲ་མོ་ཚུན་ཆད་དབྱངས་གསལ་གྱིས་མེ་རེ་རེ་ལྟེམ་མེ་གང་། དངས་མ་རྣམས་སྙིང་གའི་ས་བོན་ལ་འདུས་བས་སྤོབས་པའི་གཏེར་ཆེན་པོ་བརྒྱད་གྲོལ་བར་བསམས་ལ་སྔགས་བཟླ། ཡང་ན་རླུང་བུམ་ཅན་བཟུང་། ཨ་ར་པ་ཙ་སོགས་སྔགས་ཡིད་ཀྱིས་བཟླ། ཡང་རླུང་འབྱིན་པ་དང་འོད་སྤྲོ་བ་སོགས་བྱ་སྟེ། ཐོ་རངས་ཉམས་སུ་བླངས་པས་ཞག་གསུམ་ན་འགྲུབ་བོ། །ས་མ་ཡཿ ཆོས་ཉན་པའི་ཚེ་ཐོས་པ་འཛིན་པ་ནི་ཨུཏྤ་ལ་ཁ་སྦྱར་གྱི་མན་ངག་སྟེ། རང་འཇམ་དཔལ་དུ་གསལ་བའི་སྙིང་ཨུཏྤལ་ཅུང་ཟད་རྙིང་པ་གཉིས་ཟུར་ལ་ཁ་སྦྱར་བའི་དབུས་སུ་རང་སེམས་ཨཱཿདཀར་པོ་ལས་ཤེས་རབ་རྐང་དྲུག་གི་རྣམ་པ་ལེགས་བཤད་སྦྲང་རྩི་ལེན་པ་ལ་བརྩོན་བཞིན་པར་བསམ། ཨུཏྤལ་ཡུ་བ་གཉིས་རྣ་བ་གཡས་གཡོན་ལ་ཟུག་པ་རྣ་བའི་དབང་པོ་དང་དབྱེར་མེད་དུ་བསམ། ཕྱོགས་དུས་ཀྱི་རྒྱལ་བ་སྲས་བཅས་དང་སློབ་དཔོན་
སོགས་གཞན་འཆད་པ་པོའི་ཆོས་ཀྱི་ངག་དེ་ཉིད་ཡན་ལག་བརྒྱད་ལྡན་གྱི་བདུད་རྩིའི་རྣམ་པར་རྣ་བའི་ཨུཏྤལ་གྱི་རྩ་བ་ནས་ཞུགས་ཏེ་འདབ་མ་རྒྱས་ཤིང་ཟིལ་དངར་གྱིས་རང་སེམས་རྐང་དྲུག་ལུས་བརྟས་ཤིང་ཚིམ་པར་བསམ། ཚུལ་འདིས་གསུང་རབས་ཀློག་པ་དང་དཔེ་ཆ་འཛིན་པ་སོགས་ལའང་ཕན་པ་ཆེ། འདིའི་དམ་ཚིག་ཏུ། ཆོས་དང་ཆོས་སྨྲ་བ་ལ་སྐྱོན་མི་རྟོག །ཉིན་གཉིད་དང་ལོག་གཡེམ་རྟེན་གྱི་དྲུང་དུ་འཁྲིག་པ་རྣམས་ཤེས་རབ་འཆལ་བའི་རྒྱུ་ཡིན་པས་སྤངས་ནས་བཟླས་དམིགས་ལ་ནན་ཏན་བྱའོ། །དེས་ཐོས་པ་འཛིན་ནོ། །ས་མ་ཡཿ ཆོས་འཆད་པ་ན། མགྲིན་པ་ཆོས་ཀྱི་དུང་གི་ཏིང་ངེ་འཛིན་ལ་བརྟེན་ནས་འཆད་པའི་བློ་གྲོས་བསྒྲུབ་པའི་མན་ངག་ནི། རང་འཇམ་དཔལ་གྱི་མགྲིན་པ་ཆོས་དུང་གཡས་སུ་འཁྱིལ་བའི་ནང་དུ་གསུང་རབས་ཀུན་གྱི་ངོ་བོ་ཨཱ་ལི་ཀཱ་ལིས་གང་བ་རང་སྒྲ་བུང་བ་ཚང་ཞིག་པ་ལྟ་བུར་སྒྲོགས་པ་ལས་འོད་འཕྲོས། རྒྱལ་བ་ཐམས་ཅད་ཀྱི་མཁྱེན་རབ་དང་གསུང་ཆོས་ཀྱི་སྒྲ་དབྱངས་མི་ཟད་པ་ཐམས་ཅད་ཨཱ་ལི་ཀཱ་ལིའི་རྣམ་པར་སྤྱན་དྲངས། མགྲིན་པའི་དབྱངས་གསལ་ལ་ཐིམ། རང་སྒྲ་འོད་ཟེར་དང་བཅས་ཏེ་ཕྱོགས་དུས་ཀུན་ཏུ་ཁྱབ་པས་སློབ་མའི་སྙིང་གར་ཆོས་ཀྱི་བདུད་རྩིའི་འོད་ཟེར་ཕོག་སྟེ་ཐིམ་པས་མི་ཤེས་པ་གཅོད་ཅིང་ཡེ་
ཤེས་ཀྱི་སྣང་བ་རྒྱས་པར་བསམས་ལ་སྔགས་བཟླས་ན་འཆད་པ་ལ་ཐོགས་པ་མེད་ཅིང་གཞན་ལ་ཕན་ཐོགས་པར་འགྱུར་རོ། །ས་མ་ཡཿ ཕས་རྒོལ་འཇོམས་པའི་འཁོར་ལོའི་གདམས་ངག་ལ། རྩོད་པའི་ཚེ་ལྕེ་དང་མཐེ་བོང་རལ་གྲིའི་མན་ངག་རང་འཇམ་དཔལ་དུ་གསལ་བའི་ལྗགས་རལ་གྲི་སྔོ་བསང་མེ་འབར་བ་ལ་ཨཱཿཡིག་སྔགས་ཀྱིས་བསྐོར་བ་དང་། རང་གི་མཐེ་བོང་གཡས་པའང་རལ་གྲི་སྔོ་བསང་མེ་འབར་བ་ཡུ་བར་ཨས་མཚན་པ་གཅིག་བསམ། དེ་ལས་འོད་འཕྲོས་རྒོལ་བའི་ཤེས་རབ་ཨ་དཀར་པོའི་རྣམ་པར་རང་གི་མཐེ་བོང་གི་ཨ་ལ་ཐིམ་པའི་བཅུད་བརྒྱུད་ནས་ལུས་ནང་གང་། རལ་གྲི་གཉིས་ཀའི་མེ་ལྕེས་རྒོལ་བའི་ལྕེ་ཐུལ་གྱིས་ཚིག་པར་བསམས་ལ་སྔགས་བཟླ། ཡང་ན་རྒོལ་བའི་ཤེས་རབ་ཨཱཿདཀར་པོའི་རྣམ་པས་རང་གི་ལྕེ་ཡི་ཨཱཿལ་བསྟིམ། མཐེ་བོང་གི་རལ་གྲིས་རྒོལ་བའི་ལྕེ་གཏུབ་པར་བསམ་མོ། །དེས་ནི་ཕ་རོལ་རྩོད་པ་སྨྲ་བ་ལས་བདག་ཤིན་ཏུ་རྒྱལ་ཏེ་སེང་གེས་ཝ་འཇོམས་པ་བཞིན་དུ་འགྱུར་རོ། །ས་མ་ཡཿ ཕ་རོལ་རྒོལ་བ་ངན་པ་ཆོས་ལ་འཚེ་བའི་ངག་གནོན་པར་འདོད་ན། རང་འཇམ་དཔལ་དུ་གསལ་བའི་ལྗགས་ཀྱི་སྟེང་དུ་སྔགས་ཕྲེང་གསལ་བཏབ། རྒོལ་བའི་ཡ་རྐན་ཟངས་དང་། མར་རྐན་ལྕགས་ཀྱི་འཁོར་ལོ་རྩིབས་བརྒྱད་པ།
ལྕེ་སྟེང་རྡོ་རྗེ་རྒྱ་གྲམ་སྟེ། དེ་གསུམ་གྱི་ལྟེ་བར་ཡི་གེ་སྟྃ་ནག་པོ་མགོ་མཇུག་ལོག་པའི་གཟེར་གྱིས་བཏབ་པ། གྲེ་བར་ཁྲོ་ཆུའི་མཆོད་རྟེན་ནག་པོ་གདུགས་ཆོས་འཁོར་དང་བཅས་པ་མགོ་མཇུག་ལོག་པས་དགག་པར་བསམ། རྩ་སྔགས་མཐར། ཆེ་གེ་མོའི་ངག་སཏྭཾ་བྷ་ཡ་ནན༔ ཞེས་བརྒྱ་རྩ་བརྒྱད་བཟླས་ཤིང་དམིགས་ན་ཕ་རོལ་གྱི་ངག་འཆིང་ཞིང་བདག་ཉིད་རྩོད་པ་ལས་ངེས་པར་རྒྱལ་ལོ། །ཕ་རོལ་ཚངས་པ་ཡིན་ཡང་དམིགས་པ་ཙམ་གྱིས་ངག་གི་སྟོབས་འཆིང་ཞིང་ནན་ཏར་བྱས་པས་ལྐུགས་ཅིང་ངག་གི་ནུས་པ་བརླག་པར་བྱེད་པ་འདི་སངས་རྒྱས་ཀྱི་བསྟན་ལ་སྨྲ་བ་ངན་པས་རྨ་འབྱིན་པ་ལ་བྱའི་གཞན་དུ་མི་བྱའོ། །ས་མ་ཡ༔ གཞན་གྱི་ངག་རྐུ་བ་ནི། ང་རྒྱལ་དང་ལྡན་པའི་དགེ་བཤེས་སམ། སྔགས་པ་ནུས་པ་ཅན་ནམ། རིགས་ཀྱི་གཙོ་བོ་དྲན་པ་ཅན་ལ་བྱ་སྟེ། བསྒྲུབ་བྱའི་ལྕེ་སྟེང་པདྨ་དམར་པོ་འདབ་མ་ལྔ་པ་ཁ་ཐུར་བསྟན། སྙིང་ཁར་པདྨ་དམར་པོ་འདབ་མ་བརྒྱད་པ་ཁ་གྱེན་དུ་བསྟན་པ་གཅིག་བསམ། དེ་གཉིས་ཁ་སྦྱོར་གྱི་ཚུལ་དུ་བསམ་པའི་ནང་ཐབས་ཤེས་ཀྱི་ཡི་གེ་ཨཱ་ལི་ཀཱ་ལིས་གང་བར་བསམ། རང་འཇམ་དཔལ་གྱི་དྷཱི་ལས་འོད་དམར་པོ་འཕྲོས་པས་སངས་རྒྱས་བྱང་སེམས་ཀུན་གྱི་བཅུད་བསྡུས། ཁོའི་སྙིང་གའི་དབྱངས་གསལ་ལ་ཐིམ། ཡང་རང་གི་དྷཱི་ལས་ཤེས་རབ་ཀྱི་བུང་བ་དམར་པོའི་ཚོགས་འཕྲོས།
ཁོའི་ཁོང་བར་ཞུགས་ཏེ་དབྱངས་གསལ་རྣམས་སོ་སོར་ཁྱེར་འོང་ནས་རང་གི་ལྕེ་སྟེང་ཐིམ་པར་བསམ་ཞིང་། མཐར་ཁོའི་སྙིང་གའི་པདྨ་ལྕེའི་པདྨར་ཐིམ། ལྕེའི་པདྨའང་འོད་དམར་གྱིས་དྲངས་ནས་རང་གི་ལྕེར་ཐིམ་པར་བསམ། དེས་ཁོའི་དྲན་ཤེས་ཉམས་ནས་རང་ལ་དྲན་ཤེས་དང་སྤོབས་པ་སྐྱེའོ། །ངག་རྐུ་བའི་གདམས་པའོ། །ས་མ་ཡ༔ ཕ་རོལ་གྱི་ཤེས་རབ་འཕྲོག་པ་ནི། ཕ་རོལ་ཤེས་རབ་ཆེ་ཞིང་མ་གུས་པ་ལ་བྱ་སྟེ། བསྒྲུབ་བྱའི་རྩ་ཨ་བ་དྷུ་ཏི་མར་སྣ་སྤུ་ན་གུ་ལ་ཟུག་པ་ཡར་སྣ་སྨིན་མཚམས་སུ་ཟུག་པ། དེའི་ནང་ཤེས་རབ་ཀྱི་ངོ་བོ་ཨཱཿདམར་པོས་ཐེམ་གྱིས་གང་བ། དེའི་སྨིན་མཚམས་སུ་བུག་པ་གྲུ་གསུམ་གཅིག་ཕུག་པར་བསམ། རང་འཇམ་དཔལ་གྱི་ཐུགས་ཀའི་དྷཱི་ལས་འོད་འཕྲོས་ཁོའི་ཤེས་རབ་ཀྱི་ཨ་རྣམས་རིམ་གྱིས་དྲངས་ནས་བདག་གི་ཐུགས་ཀར་བསྟིམ། མཐར་ཁོའི་ཨཱཿརྣམས་ཟད་ནས་ལུས་སྟོང་སངས་བཀྲག་མེད་དུ་བསམ། རང་ལུས་ཤེས་རབ་ཀྱི་ཨཱཿཡིས་གང་ཞིང་བཀྲག་དང་ལྡན་པར་བསམས་ལ་སྔགས་བཟླ། དེས་ཕ་རོལ་གྱི་ཤེས་པ་ཉམས་ནས་རང་ལ་ཤེས་རབ་ཕྱོགས་མེད་སྐྱེ། ཤེས་རབ་འཕྲོག་པའི་མན་ངག་གོ །ས་མ་ཡ༔ དེ་ལྟར་བཤད་མ་ཐག་པ་འདི་གསུམ་དང་རིག་སྔགས་གཅོད་པ་སོགས་ནི་འཕྲལ་དུ་སྔགས་དམིགས་ཀྱི་ནུས་པས་རེ་བ་ལྟར་འགྲུབ་ཀྱང་། གཞན་ལ་འཚེ་བ་ནི་
རང་གི་རིག་སྔགས་གྲུབ་པ་ལའང་གནོད་པའི་ཕྱིར་ན་བསྟན་པ་འདི་ལ་མ་དད་ཅིང་འཚེ་བའི་ཡིད་ཅན་ལ་སྙིང་རྗེ་དང་བཅས་ཏེ་སྦྱར་བར་བྱ་ཡི་གར་ཐོད་ཐོད་དུ་བྱ་བ་མ་ཡིན་ནོ། །ཉེས་བྱས་གཞིལ་བའི་འཁོར་ལོའི་གདམས་ངག་ལ། རང་གི་ངག་འགྲོལ་བ་ནི། གྲིབ་བྱད་སོགས་ཀྱིས་བདག་ཉིད་ངག་དིག་ལྐུག་སྨྲ་མི་བདེ་བ་བྱུང་ན་རང་འཇམ་དཔལ་དུ་གསལ་བའི་ལྕེ་སྟེང་ཉེས་པའི་ངོ་བོ་ཡི་གེ་ཀཾ་ནག་པོ། མགྲིན་པའི་ནང་ཡེ་ཤེས་ཀྱི་ངོ་བོ་ཡི་གེ་རཾ་དམར་པོ། སྙིང་གར་ཤེས་རབ་ཡེ་ཤེས་ཀྱི་འཁོར་ལོ་རྩིབས་དྲུག་པའི་ལྟེ་བར་ཡཾ་སྔོ་སྐྱ་གསལ། འཁོར་ལོ་གཡས་དང་། ཡཾ་ཡིག་གཡོན་དུ་འཁོར་བས་རླུང་གཡོས་མགྲིན་པའི་རཾ་ལ་ཕོག །མེ་འབར་བས་ལྕེ་སྟེང་གི་ཀཾ་ཐུལ་གྱིས་བསྲེག །ངག་གི་ཉེས་སྐྱོན་དག་ནས་ཀཾ་གི་ཤུལ་དེར་ཨ་དཀར་གཅིག་བསམ། ངག་ཏུ་རྩ་སྔགས་དང་ཨ་བཟླས། ངག་གིས་མི་ནུས་ན་ཨ་ཁོ་ན་ཡིད་ཀྱིས་བརྗོད། དེ་ལྟར་ཡང་ཡང་བྱས་པས་ངག་གི་ཉེས་པ་ཀུན་ལས་གྲོལ། ཚངས་པ་དང་མིའམ་ཅིའི་དབྱངས་ལྟ་བུ་ཐོབ་པར་འགྱུར་རོ། །ས་མ་ཡ༔ ཡང་ཕ་རོལ་པོས་བདག་གི་ཤེས་རབ་སོགས་བརྐུ་བའི་སྦྱོར་བ་བྱས་ན། རང་ཉིད་འཇམ་དཔལ་དུ་གསལ་བའི་འོད་ཀྱིས་ཕ་རོལ་པོས་བདག་གི་ཤེས་རབ་དང་ངག་བརྐུས་པ་ཐམས་ཅད་དང་། སྲིད་ཞིའི་ཤེས་རབ་དངས་བཅུད་བསྡུས་ཨཱ་ལི་ཀཱ་ལིའི་རྣམ་པར་སྤྱན་
དྲངས་རང་གི་ཐུགས་ཀར་ཐིམ་པར་བསམས་ལ་སྔགས་བཟླའོ། །ཡང་ཕ་རོལ་གྱི་སྦྱོར་བ་བཤིག་པ་ལ། ཕ་རོལ་གྱི་བསམ་སྦྱོར་མཐུ་ནུས་མུན་པ་ལྟར་གནག་པའི་ངོ་བོ་ལ། བདག་གི་ལྷ་སྔགས་ཀྱི་འོད་ཟེར་ཉི་ཟླ་སྟོང་ལྟར་འབར་བས་མུན་པ་སངས་བར་བསམས་ལ་སྔགས་བཟླས་པས། ཕ་རོལ་གྱིས་བདག་གི་ངག་དང་ཤེས་རབ་རྐུ་བ་ལ་སོགས་པའི་སྦྱོར་བས་མི་ཚུགས་པར་ཁོ་རང་གི་བསམ་སྦྱོར་ངན་པའི་ཁང་བུ་རང་འགྱེལ་པར་འགྱུར་རོ། །ས་མ་ཡ༔ རྩོམ་པ་ན་ཐུགས་ཀ་དཔལ་བེའུའི་མན་ངག་ནི། རང་ལྷའི་ཐུགས་ཀའི་འོད་ཀྱིས་སྲས་བཅས་རྒྱལ་བའི་མཁྱེན་རབ་དབྱངས་གསལ་གྱི་རྣམ་པར་སྤྱན་དྲངས། རང་གི་ཐུགས་ཀའི་ས་བོན་གྱི་འོད་ཟེར་འབྲེལ་བ་ལས་བྱུང་བའི་དཔལ་བེའུ་དྲྭ་བ་ཅན་མིག་འབུམ་ཕྲག་མངའ་བ་དབྱངས་གསལ་གྱི་ཡི་གེ་ཁ་དོག་སྣ་ཚོགས་པས་གང་བ་དེ་ལ་ཐིམ། ཐུགས་ཀའི་དཔལ་བེའུའི་དྲྭ་བའི་ཡི་གེ་དང་སྔགས་ཕྲེང་ལས་སྤོབས་པའི་གཏེར་དང་རྩོམ་པའི་ཚིག་དོན་འཛད་མེད་དུ་རྡོལ་ཞིང་འོད་ཀྱིས་འཇིག་རྟེན་གྱི་ཁམས་ཀུན་ཏུ་ཁྱབ་པས་སེམས་ཅན་ཐམས་ཅད་ཀྱི་མ་རིག་པའི་མུན་པ་སངས་ཤིང་ཡེ་ཤེས་ཀྱི་སྣང་བ་རྒྱས་པས་གཞན་ཕན་མཁའ་དང་མཉམ་པར་འབྱུང་བར་བསམས་ལ། སྔགས་བཟླ་ཞིང་ཡི་དམ་ལ་བསྟོད་ཅིང་གསོལ་བ་བཏབ་པས་རྩོམ་པའི་བློ་གྲོས་ཕྱོགས་
མེད་དུ་སྐྱེ་ཞིང་བརྩམས་པས་གཞན་ལ་ཕན་པ་ཚད་མེད་པ་འབྱུང་ངོ་། །ས་མ་ཡཿ དེ་ནས་ཤིན་ཏུ་གསང་བའི་ལས་དགུ་ལས་ཐོག་མར། ཡི་གེ་གཅིག་པ་ལ་བརྟེན་ནས་བསྲུང་བ་ནི། བྷྲཱུྃ་ཞེས་བརྗོད་པས་ནམ་མཁའི་དཀྱིལ་དུ་བྷྲཱུྃ་འོད་དུ་ཞུ་བ་ལས་བྱུང་བའི་རྡོ་རྗེ་ཕ་ལམ་ལས་གྲུབ་པའི་གུར་བྱ་སྒོང་སྲུབ་མེད་པ་ལྟ་བུ་ངོ་བོ་ཡེ་ཤེས་ཀྱི་རང་བཞིན་ནམ་ཡང་གཞོམ་གཞིག་མེད་པ་གང་སྲུང་བའི་ཚད་དམ་ནམ་མཁའ་དང་མཉམ་པ། ཕྱི་ནས་ཁྲོ་ཆུའི་མེ་དམར་ལམ་ལམ་འབར་བ་ནད་མཚོན་སྣ་ཚོགས་ཀྱི་ཟི་ར་ཁོལ་བ་དཔག་ཚད་མང་པོའི་མཐའ་ནས་དགྲ་བགེགས་བརླག་པར་བྱེད་པ་བལྟར་མི་བཟོད་པའི་ནང་དུ་བདག་དང་བསྲུང་བྱ་ཐམས་ཅད་ཚུད་ནས་འཇིགས་པ་མེད་པར་བསམ་ཞིང་རང་ལྷའི་རྣལ་འབྱོར་ལ་གནས་པའི་ཐུགས་དབུས་སུ་གཙུག་ཏོར་འཁོར་ལོས་བསྒྱུར་བའི་ངོ་བོ་བྷྲཱུྃ་སེར་པོ་གསལ་ལ་རྩ་སྔགས་དང་བྷྲཱུྃ་སྦྲེལ་ཏེ་བརྒྱ་ལ་སོགས་པར་བཟླས་ན། སྲུང་བ་ཐམས་ཅད་ཀྱི་རྒྱལ་པོ་ཡིན་ནོ། །ཚུལ་དེ་ལྟ་བུས་སྲུང་མདུད་སོགས་བསྔགས་ནས་སྦྱིན་ཅིང་གང་འཚེ་བའི་མིང་སྤེལ་སྲུང་བའི་ཁ་བསྒྱུར་བཅས་བྱའོ། །དེ་ཡི་གྲུབ་པའི་རྟགས་སུ་རིག་པ་དཔའ་ངར་ཆེ་ཞིང་། རྨི་ལམ་དུ་མཁར་དུ་ཚུད་པ་གོ་ཆ་བགོ་བ་དང་། ཕྱོགས་ལས་རྣམ་པར་རྒྱལ་བ་སོགས་འབྱུང་ངོ་། །ཤིན་ཏུ་ཟབ། གཞན་ཡང་ཇི་ལྟར་ཐམས་ཅད་ཀྱི་མཆོག་
སངས་རྒྱས་བཅོམ་ལྡན་འདས་ཡིན་པ་དེ་བཞིན་དུ། འཇིག་རྟེན་དང་འཇིག་རྟེན་ལས་འདས་པའི་སྔགས་ཐམས་ཅད་ཀྱི་རྒྱལ་པོ། བསྟན་པ་ནུབ་པ་རྩོད་པའི་དུས་འདི་ལ་བཅོམ་ལྡན་འདས་གཙུག་ཏོར་འཁོར་ལོས་བསྒྱུར་བ་ཉིད་སྲུང་བ་གཅིག་པུར་འགྱུར་ཞིང་དུས་ཐམས་ཅད་དུ་ཡང་གྲུབ་པར་འགྲོ་བ་སངས་རྒྱས་བཅོམ་ལྡན་འདས་མངོན་སུམ་པ་དེ་བཞིན་གཤེགས་པའི་ཆོས་ཀྱི་མཛོད་འདུས་པ། ལས་ཀྱི་སྒྲིབ་པ་ཐམས་ཅད་རྒྱུན་གཅོད་པ་ཕན་ཡོན་ཚད་མེད་པ་ཡི་གེ་གཅིག་པ་བྷྲཱུྃ་ཞེས་པ་འདི་དང་པོར་འབུམ་ཕྲག་གསུམ་བཟླས་ནས་ལས་ཀྱི་ཚོགས་རབ་འབྱམས་བསྒྲུབ་པར་བྱ་སྟེ། འཁོར་ལོ་དང་རལ་གྲི་སོགས་ཕྱག་མཚན་དང་། སེང་གེ་སོགས་བཞོན་པའི་གཟུགས་བརྙན་དང་། མིག་སྨན་སོགས་ལ་བརྟེན་ནས། ལྷ་ཀླུ་གནོད་སྦྱིན་གྱི་འཁོར་ལོས་བསྒྱུར་བ་དང་། མི་སྣང་བ་དང་རོ་ལངས་དང་། གཏེར་གྱི་བུམ་པ་དང་། ཡིད་བཞིན་ནོར་བུ་སོགས་མཆོག་དང་ཐུན་མོང་གི་དངོས་གྲུབ་གང་འདོད་པ་བསྒྲུབ་པར་བྱ་ཞིང་། སྔགས་འདི་ལན་གཅིག་གིས་བདག་སྲུང་། གཉིས་པས་གཞན་སྲུང་། གསུམ་པས་རྫས་སྲུང་། བཞི་པས་ཡུལ་སོགས་འདོད་པ་བཞིན་དུ་སྲུང་སྟེ། འདིས་དཔག་ཚད་ལྔའི་ནང་ཚུན་ཆད་དུ་རང་གིས་འདོད་པའི་ལྷ་མ་གཏོགས་ལྷ་གཞན་ཀྱང་གནས་པར་མི་འགྱུར་ན་བགེགས་
ལྟ་ཅི་སྨྲོས། འདི་ལན་གཅིག་བཟླས་པས་སྡིག་པ་ཐམས་ཅད་ཞི་ཞིང་རེ་བ་ཡིད་བཞིན་དུ་རྫོགས་པར་བྱེད་དོ་ཞེས་བདེ་བར་གཤེགས་པའི་བཀའོ། །གོས་ལ་བསྔགས་པས་ནད་ཀུན་ལས་གྲོལ་ལོ། །གདོང་དང་མིག་ལ་བསྔགས་ནས་བལྟས་པ་ཙམ་གྱིས་ཁྲོ་བ་ཞི་བར་བྱེད་དོ། །སྔགས་ཀྱི་རྒྱལ་པོ་ལན་སུམ་ཅུར་བཟླས་ཏེ་འབྱུང་པོས་འཚེ་བ་ཅན་ལ་བལྟ་བའམ། ལག་པར་བསྔགས་ནས་ཐལ་མོ་བརྡབས་ན་ལུས་ཅན་གདོན་ལས་གྲོལ་བར་བྱེད་དོ། །བྱིས་པའི་ཁྲུས་དང་བཟའ་བཏུང་ལ་སྔགས་དྲུག་བརྒྱ་བཟླས་ནས་བཏབ་ན་གདོན་ཐམས་ཅད་ཞི་བར་བྱེད་དོ། །སྡིག་སྦྲུལ་སོགས་དུག་ཐམས་ཅད་ཀྱང་དུག་མེད་པར་བྱེད་དོ། །སྡུག་བསྔལ་དང་འཚེ་བ་ཐམས་ཅད་ཀྱང་བཟླས་པས་ཞིའོ། །གནོད་པ་དང་འཆི་བ་དང་འགོ་བའི་ནད་ལ་སྔགས་ཀྱི་རྒྱལ་པོ་དྲུག་བརྒྱ་བཟླས་པས་མྱུར་བ་ཉིད་དུ་སེལ་ལོ། །ཞི་བར་བྱེད་འདོད་ན་པདྨའི་རྣམ་པ་འདྲ་བའི་ཐབ་ཁུང་བྱས་ལ་མཆོད་སྦྱིན་ལ་འོས་པའི་མེ་སྦར་ཞིང་། ཟས་མཆོག་ཞོ་དང་སྦྲང་རྩི་མར་དང་སྦྱར་བས་སྦྱིན་སྲེག་སྟོང་བརྒྱ་རྩ་བརྒྱད་ཞག་གསུམ་བྱས་ན་བདག་དང་གཞན་ཞི་བར་འགྱུར་རོ། །ཞག་བདུན་གྱིས་ནི་གྲོང་ངམ་གྲོང་ཁྱེར་གྱི་འཆི་བ་མང་པོའི་ཉེ་བར་འཚེ་བ་ཞི་བར་འགྱུར་རོ། །ཆར་མི་འབབ་པ་ལ་ནི་མངར་གསུམ་གྱི་སྦྱིན་སྲེག་བྱས་ན་མཆོག་ཏུ་ཞི་བ་ཆེན་པོར་འགྱུར་རོ། །
བུམ་པ་གསར་པར་འབྲུ་ཐམས་ཅད་དང་སྤོས་ཆུས་བཀང་བ་ལ་ལན་བརྒྱ་རྩ་བརྒྱད་བཟླས་ཏེ་ལོག་འདྲེན་གྱིས་ཟིན་པ་བཀྲུས་ན། སྡིག་པ་དང་གདོན་ཀུན་ལས་ཐར་ཞིང་དཔལ་དང་ལྡན་ནོ། །རྨ་བྱའི་མཇུག་མ་ལ་འབུམ་བཟླས་ཏེ་བྱ་བས་པ་སོགས་ཀྱིས་གདོན་དུག་རིམས་དང་མིག་ནད་གཟེར་ཐབས་སོགས་སེལ་བར་བྱེད་དོ། །སྲུང་བའི་སྐུད་པས་ནད་ཀུན་ལས་གྲོལ་བར་འགྱུར་རོ། །སྨན་ཨུ་ཤིར་ལ་དམིགས་བྱའི་གཟུགས་བརྙན་བྱས་ཏེ་མེ་ཏོག་དཀར་པོས་མཆོད་ཅིང་། འོ་མ་བརྒྱ་རྩ་བརྒྱད་ཀྱིས་སྦྱིན་སྲེག་བྱས་ཏེ་འོ་མས་གཟུགས་བརྙན་བཀྲུ་ཞིང་བཟླས་པ་བརྒྱ་རྩ་བརྒྱད་བཟླས་ཏེ་ཨ་ག་རུའི་དུ་བས་བདུག་ན། ལུས་ཆ་དེ་བཞོམ་པ་དུག་གིས་རེག་པ་ཕུར་བུས་བཏབ་པ་སོགས་ཟུག་རྔུ་དབྱུང་ཞིང་ཚིམ་ཞིང་རྒྱས་ལ་དཔལ་དང་ལྡན་པར་བྱེད་དོ། །རྗེས་སུ་བཟུང་བའི་ལས་སོ། །ཕ་རོལ་གྱི་རིག་སྔགས་གཅོད་ན། དམིགས་པ་རང་འཇམ་དཔལ་གསལ་བའི་ཕྱི་རོལ་རྡོ་རྗེའི་སྲུང་འཁོར་ནང་སྦུབས་སྟོང་སྟེང་འོག་འཁོར་ལོ་ཁ་སྦྱར་དུ་འཁོར་བའི་རྩིབས་བར་དགྲ་བགེགས་དུམ་བུར་གཏུབ་པར་བསམས་ལ། ལག་ཏུ་རྩ་ཀུ་ཤ་སྔོན་པོ་ཆང་བ་གང་ཐོགས་པ་བྲིས་གཅོད་བཞིན། རྩ་སྔགས་བྷྲཱུྃ་དང་བཅས་པའི་མཐར་ཆེ་གེ་མོའི་རིག་སྔགས་ཚིནྡྷ་ཡ་ཧཱུྃ་ཕཊཿ ཅེས་སྦྱར་བ་བརྒྱ་རྩ་ལ་སོགས་པར་བཟླས་པས་ཕ་རོལ་གྱི་
རིག་སྔགས་གཅོད་པར་བྱེད་དོ། །གཞན་ཡང་སྲི་གེགས་ལའང་དམིགས་པ་དེ་བཞིན་གསལ་ལ་རྩ་སྔགས་བྷྲཱུྃ་བཅས་བཟླས་པ་ཁོ་ནས་འཇོམས་པར་འགྱུར་རོ། །ཕ་རོལ་གྱི་སྟོབས་བཤིག་པའང་དེ་དང་འདྲའོ། ༣༠། སྔགས་བཟླ་ཞིང་ཁུ་ཚུར་བཅིང་བས་གཞན་གྱི་སྔགས་ཐམས་ཅད་རེངས་བར་འགྱུར་ཏེ་མཉམ་གཉིས་འགྲན་པ་ལྟ་བུའི་ཕ་རོལ་གྱི་སྔགས་དང་རྩལ་ཤུགས་འཆིང་བ་ལའང་སྦྱར་ཏེ་ཡིད་ཀྱིས་དཀྲོལ་པར་བསམ་པས་གྲོལ་བར་འགྱུར་རོ། །དམིགས་བྱའི་གཟུགས་བརྙན་བྱས་ཏེ་སྔགས་ཀྱི་རྒྱལ་པོ་ཡི་གེ་གཅིག་པ་བཟླས་ནས་སེང་ལྡེང་གི་ཕུར་བུས་སྙིང་ལ་བཏབ་ན་གནད་ལ་དབབ་བར་འགྱུར་རོ། །སྐུད་པ་དམར་པོ་ལ་ལན་བདུན་བཟླས་ཏེ་གཟུགས་བརྙན་ལ་མདུད་པ་བོར་ཞིང་བཟླས་ན་འཆིང་བར་འགྱུར་རོ། །ཁམ་ཕོར་ཁ་སྦྱར་ནང་དུ་གཟུགས་བརྙན་བཅུག་སྟེ་སྔགས་བརྒྱ་རྩ་བརྒྱད་བཟླས་ནས་ཁ་བཀབ་ན་རེངས་པར་འགྱུར་རོ། །སྔགས་བཟླ་ཞིང་མཚོན་ཆས་གཟུགས་བརྙན་གྱི་སྙིང་དུམ་བུ་གཉིས་སུ་བྱས་ན་འགས་པར་འགྱུར་རོ། །སྔགས་བཟླ་ཞིང་དུག་ཁྲག་དང་སྦྱར་པའི་སྐེ་ཚེས་བསྐུས་ན་འཆི་བར་འགྱུར་རོ། །སྔགས་བཟླ་ཞིང་ཀ་ར་ཝཱི་རའི་ལྕུག་མས་ཀུན་ཏུ་བརྡེག་ན་གནོད་པར་འགྱུར་རོ། །གཞན་ཡང་གང་ལ་གདབ་བར་འདོད་པའི་གནས་སུ་ཕུར་བུས་གདབ་ཅིང་བཟླས་པས་མངོན་
སྤྱོད་ཀྱི་ལས་ཇི་ལྟར་བསམ་པ་བཞིན་དུ་བྱེད་དེ། ཚར་གཅོད་པའི་ལས་དེ་དག་གྲོལ་བར་འདོད་ན་གཟུགས་བརྙན་འོ་མས་བཀྲུ་ཞིང་སྔགས་ཀྱིས་སྦྱིན་སྲེག་བྱས་ན་ཞི་བར་འགྱུར་རོ། །ཡང་ལྷ་དབང་དུ་འདོད་ན་ཨ་ག་རུའི་ཡམ་ཤིང་ཞོ་དང་སྦྲང་རྩི་མར་གྱིས་བཏགས་པའི་སྦྱིན་སྲེག་སྟོང་བརྒྱ་རྩ་བརྒྱད་བྱའོ། །ཤིང་མྱ་ངན་མེད་པའི་ཡམ་ཤིང་གིས་གནོད་སྦྱིན་མོ་རྣམས་ལའོ། །ཀླུ་རྣམས་ཀླུ་ཤིང་གི་མེ་ཏོག་གིས་སོ། །འཕགས་པ་ཕྱག་ན་རྡོ་རྗེ་ལ་ཨ་ག་རུའི་ཡམ་ཤིང་གིས་སོ། །རིག་པ་འཛིན་པ་རྣམས་ལ་པོ་སོའི་ཆའི་ཤིང་གི་ཡམ་ཤིང་གིས་སོ། །ཨ་ག་རུའི་ཤིང་ལ་དུ་རུ་ཀའི་འབྲུ་མར་གྱིས་བཏགས་པས་ནི་དྲི་ཟ་ལ་སྦྱིན་སྲེག་བྱའོ། །ཡི་དྭགས་རྣམས་ལ་ནི་བིལ་བའི་ཤིང་གི་ཡམ་ཤིང་གིས་སོ། །མིའམ་ཅི་རྣམས་ལ་པྲ་རྩི་སོགས་ཀྱིས་སོ། །ལོག་འདྲེན་ཐམས་ཅད་ལ་ཞག་བདུན་དུ་སྦྱིན་སྲེག་བརྒྱ་རྩ་བརྒྱད་བྱའོ། །རྒྱལ་བུ་ལ་ཡུངས་ཀར་ཏིལ་མར་གྱིས་བཏགས་པས་དུས་གསུམ་དུ་ཞག་བདུན་ལ་སྦྱིན་སྲེག་བརྒྱ་རྩ་བརྒྱད་བྱའོ། །དེ་དག་རྣམས་ཀྱིས་ཇི་ལྟར་འདོད་པ་དབང་དུ་འགྱུར་རོ། །གཞན་ཡང་ཉི་མ་ལ་མངོན་དུ་ཕྱོགས་པས་བཟླས་བརྗོད་འབུམ་བྱས་ན་སྡིག་པ་ཐམས་ཅད་ཟད་པར་འགྱུར་རོ། །མཚན་མོ་སྐྱིལ་ཀྲུང་དུ་འདུག་ནས་བཟླས་པས་ཐོ་རེངས་གྲུབ་པར་
འགྱུར་ཏེ་མངོན་པར་ཤེས་པ་ལྔ་ཐོབ་པར་བྱེད་དོ། །རྩ་དཱུར་བའི་འཇག་མ་ལ་ཞོ་དང་སྦྲང་རྩི་མར་གྱིས་བཏགས་པའི་སྦྱིན་སྲེག་སྟོང་བརྒྱ་རྩ་བརྒྱད་ནུབ་བཅུའི་བར་དུ་བྱས་ན་དུས་མ་ཡིན་པའི་འཆི་བ་རབ་ཏུ་ཞི་ཞིང་ཚེ་རིང་བར་འགྱུར་རོ། །ཉིན་མཚན་ཉི་ཤུ་རྩ་གཅིག་ལ་དུས་གསུམ་དུ་འབྲས་ཐུག་པོ་ཆེ་དང་ཞོ་དང་སྦྲང་རྩི་མར་གྱིས་བཏགས་པའི་སྦྱིན་སྲེག་སྟོང་བརྒྱ་རྩ་བརྒྱད་བྱས་ན་ལོངས་སྤྱོད་ཆེན་པོ་འཐོབ་པར་འགྱུར་རོ། །འབྲས་ཐུག་པོ་ཆེ་དང་ཞོ་དང་སྦྲང་རྩི་མར་གྱི་སྦྱིན་སྲེག་གིས་ཟས་མི་ཟད་པར་འགྱུར་རོ། །རྒྱལ་མཚན་དང་དུང་སོགས་ལ་བསྔགས་ན། དེ་མཐོང་པ་དང་དེའི་སྒྲ་ཐོས་པས་ཕ་རོལ་གྱི་སྡེ་དཔུང་གིས་རང་ཕྱོགས་མི་གཡོ་བར་བྱས་པར་འགྱུར་རོ། །ཟླ་བ་གཟས་ཟིན་པ་ན་བ་ནག་མོའི་འོ་མ་ལ་བརྒྱ་རྩ་བརྒྱད་བསྔགས་ཏེ་འཐུང་ན་བཅུད་ཀྱིས་ལེན་གྱི་ཡོན་ཏན་དང་ལྡན་པར་འགྱུར་རོ། །དཔའ་པོའི་ཟོང་གིས་ཉོས་པའི་ལྡོང་རོས་རྒྱལ་གྱི་དུས་སུ་སྨྱུང་བར་གནས་པས་བསྒྲུབ་པར་བྱ་སྟེ། དེ་ཡང་སྔོན་དུ་དགེ་འདུན་ལ་མཆོད་སྟོན་བྱས་ནས། རང་གི་གནས་སུ་མཆོད་པ་རྒྱ་ཆེན་པོ་དང་མར་གྱི་མར་མེ་སྟོང་སྦར་ལ་ཞག་གསུམ་སྨྱུང་བ་བྱས་ནས་སེམས་ཅན་ཐམས་ཅད་ལ་བྱམས་པའི་སེམས་བསྐྱེད་དེ་ལྡོང་རོས་བླངས་ནས། ཇི་སྲིད་དྲོ་བ་དང་དུ་བ་འཐུལ་བ་དང་འབར་བར་གྱུར་པའི་གྲུབ་པའི་རྟགས་གསུམ་མཐོང་བའི་
བར་བཟླས་པར་བྱ་སྟེ། དེ་ཡང་དྲོ་བར་གྱུར་ན་ནི་དེས་དཔྲལ་བར་ཐིག་ལེ་བྱས་པས། ལྷ་ཀླུ་གནོད་སྦྱིན་འབྱུང་པོ་ཤ་ཟ་སོགས་འཛམ་གླིང་ན་གནས་པའི་སེམས་ཅན་བྲན་ཏུ་འགྱུར་ཞིང་བྱ་བ་ཐམས་ཅད་སྒྲུབ་པར་བྱེད་ལ་ལོ་སྟོང་གི་བར་འཚོའོ། །དུ་བ་འཐུལ་བས་དཔྲལ་བར་ཐིག་ལེ་བྱས་ན་མི་སྣང་བ་འགྲུབ་སྟེ། གལ་ཏེ་འདོད་ན་ལྷས་ཀྱང་མི་མཐོང་ལ་མི་སྣང་བ་ཐམས་ཅད་ཀྱི་རྒྱལ་པོར་འགྱུར་ཞིང་ལོ་སུམ་སྟོང་གི་བར་དུ་འཚོའོ། །འབར་བས་ནི་རིག་པ་འཛིན་པར་འགྱུར་ཏེ་གཡོག་འཁོར་དང་བཅས་པ་ནམ་མཁའ་ལ་འགྲོ་ཞིང་། རིག་འཛིན་གྱི་རྒྱལ་པོ་ལྷ་གཞོན་ནུའི་ལུས་སུ་འགྱུར་ཞིང་ལྷ་ཐམས་ཅད་ཀྱིས་མི་ཐུབ་ན་རིག་པ་འཛིན་པ་གཞན་གྱིས་ལྟ་སྨོས་ཀྱང་ཅི་དགོས་ཏེ་བསྐལ་པར་ཡང་གནས་པར་འགྱུར་ཞིང་དུས་བྱས་ནས་དགའ་ལྡན་ལྷའི་རིས་སུ་སྐྱེའོ། །སྔགས་གང་བསྒྲུབ་པར་འདོད་པ་དེ་དག་འདི་དང་ལྷན་ཅིག་བཟླས་ཏེ་འདིས་བཅིང་ནས་བསྒྲུབ་ན་མྱུར་དུ་འགྲུབ་པར་འགྱུར་ཞིང་། དེ་ལྟར་མ་གྱུར་ན་ལྷ་དེ་དག་མྱུར་དུ་འཇིག་པར་འགྱུར་རོ། །དེའི་ཕྱིར་ན་ཚངས་དབང་ཁྱབ་འཇུག་གནོད་སྦྱིན་མོ་སོགས་གང་འགུགས་པར་འདོད་པ་དེ་ཡི་མིང་འདི་དང་ལྷན་ཅིག་བཟླ་ཞིང་བསྒྲུབ་ན་དབང་དུ་འགྱུར་ཞིང་མཆོག་སྟེར་བར་འགྱུར་ཏེ་ཡུལ་བདག་སོགས་གང་ལ་དམིགས་པའང་དེ་བཞིན་དུ་བཟླས་པ་ཙམ་གྱིས་བྲན་
དུ་བྱེད་དོ། །དེས་ན་འཇིག་རྟེན་འདས་མ་འདས་ཀྱི་སྔགས་གང་ཡིན་པའི་མགོ་བོར་འདི་གདགས་ན་རང་དབང་མེད་པར་འགྲུབ་པར་འགྱུར་ཏེ་དཔེར་ན་ལྷ་གནད་ལ་དབབ་པའི་ཆོ་ག་བཞིན་ནོ། །སྔགས་གཞན་གང་ཞིག་ཇི་སྲིད་ཚུལ་བཞིན་བཟླས་ཀྱང་འབྲས་བུ་མེད་ན་གི་ཝཾ་གིས་གྲོག་ལ་བྲིས་ཏེ། གྲོག་དེ་ལ་ལན་བརྒྱ་རྩ་བརྒྱད་མངོན་པར་བསྔགས་པ་བྱས་ནས། བཅོམ་ལྡན་འདས་ལ་མཆོད་པ་བྱས་ཏེ་སྔགས་ཀྱི་རྒྱལ་པོ་འདི་དང་བསྒྲུབ་བྱའི་སྔགས་ལྷན་ཅིག་སྟོང་བརྒྱ་རྩ་བརྒྱད་བཟླས་ལ་ཀུ་ཤའི་སྟན་ལ་དེ་ཉིད་དུ་གཉིད་ལོག་ན་རྨི་ལམ་དུ་འོང་སྟེ་འབྲས་བུ་མེད་པའི་རྒྱུ་སྟོན་པར་འགྱུར་རོ། །གཞན་ཡང་འདིའི་ལས་རབ་འབྱམས་ནི་འཇམ་དཔལ་རྩ་བའི་རྟོག་པ་ལས་ཤེས་པར་བྱ་ཞིང་། སྔགས་འདི་ནི་ཕྲལ་དུ་དྲན་པས་ལས་བྱེད་པ་སྟེ་སྔགས་རིག་འཛིན་པས་ཇི་ལྟར་རིགས་པ་བཞིན་དུ་སྦྱར་བར་བྱའོ། །ས་མ་ཡ༔ སྙིང་པོ་འབྲུ་གཅིག་ལ་བརྟེན་ནས་གནོད་པ་གསོ་བ་ནི། རང་ལྷའི་རྣལ་འབྱོར་གྱི་ཐུགས་ཀར་སྔགས་བཀོད་པའི་འོད་ཟེར་གྱིས་གནོད་པ་གང་ལ་ཆེད་དུ་བྱ་བ་དེ་དག་ཐམས་ཅད་ལྷག་མེད་དུ་ཞི་ཞིང་གང་འདོད་པའི་མཆོག་ཐོབ་པར་བསམས་ལ། རྩ་སྔགས་དང་མུ་ཞེས་པའི་ཡི་གེ་འབྲུ་གཅིག་པོ་ཇི་ནུས་བཟླས་པས། རིག་སྔགས་ཀྱི་བྱད་སྟེམས་དང་། མི་དང་མི་མ་ཡིན་པའི་འཚེ་བ། རྒྱུ་
དང་མི་རྒྱུ་བ་ལས་བྱུང་བའི་གནོད་པར་རྣམ་པ་གང་བྱུང་བ་དེ་ཐམས་ཅད་ཞི་ཞིང་སླར་བསྐྱོད་དུ་མེད་པར་བྱིན་གྱིས་བརླབས་པར་འགྱུར་རོ། །དེས་ན་དགྲོལ་ཞིང་གསོ་བ་ལ་བསྔགས་སོ། །འདིའི་རྟགས་ལ་རིག་པ་གསལ་ཞིང་རྨི་ལམ་དུ་ཁྲུས་བྱ་བ། མུན་པ་དངས་པ། མི་འདོད་པ་ལས་ཐར་བ་སོགས་འབྱུང་ངོ་། །གཞན་ཡང་རྒྱུད་ལས་གསུངས་པ། དེ་བཞིན་གཤེགས་པ་ཀུན་གྱི་སྔགས་དང་རྒྱུད་ཀྱི་སྙིང་པོར་གྱུར་པ་བསྟན་པ་འདི་ལ་དེ་བཞིན་གཤེགས་པ་ཀུན་གྱི་ནོར་དུ་གྱུར་པ། ཆོས་ཀྱི་མཛོད་འཇིག་རྟེན་པ་རྣམས་ཀྱི་བསམ་པ་འབྲས་བུར་བཅས་པར་བྱེད་པའི་ནོར་བུ་རིན་པོ་ཆེ་ལྟ་བུ། སངས་རྒྱས་ཚེ་དཔག་ཏུ་མེད་པའི་སངས་རྒྱས་ཀྱི་བྱིན་གྱིས་བརླབས་ཀྱིས་ཀུན་ཏུ་བཟང་པོ་ལ་བྱིན། ཀུན་ཏུ་བཟང་པོ་དེས་ཀྱང་འཇམ་དཔལ་གཞོན་ནུར་གྱུར་པ་ལ་བྱིན། འཇམ་དཔལ་གྱིས་སེམས་ཅན་ཐམས་ཅད་རྗེས་སུ་བཟུང་བའི་ཕྱིར་སྙིང་རྗེའི་དབང་གིས་རང་གི་ལུས་ཀྱི་སྙིང་གར་བཞག་པ་སྟེ། མ་འོངས་རྩོད་པའི་དུས་སུ་བསྟན་པ་སྲུང་བའི་བྱ་བ་བྱེད་པ་ཡི་གེ་འབྲུ་གཅིག་པ་མུ་ཞེས་པ་འདི་ཐོག་མར་འབུམ་ཕྲག་སུམ་ཅུ་བཟླས་ནས་ལས་བསྒྲུབ་པར་བྱ་སྟེ། གཙུག་ཏོར་འཁོར་ལོས་བསྒྱུར་བ་ཇི་ལྟ་བ་བཞིན་དུ་འདི་ཡང་ཡིན་ཏེ་ལས་དག་ཀྱང་དེ་བཞིན་དུ་སྦྱར་བར་བྱ་ཞིང་། འདི་མ་བསྒྲུབ་ཀྱང་
བཟླས་པ་ཙམ་གྱིས་ལས་རྣམས་བྱེད་ན་བསྒྲུབ་པས་ལྟ་ཅི་སྨོས། ཇི་ལྟར་འདོད་པའི་འབྲས་བུ་ཐོབ་ཅིང་ངེས་པར་བྱང་ཆུབ་ལ་གཞོལ་བར་འགྱུར་རོ། །ཁྱིམ་གྱི་རྩོམ་པ་ལ་གནས་ཤིང་ཤ་ཆང་དང་གྲོང་ཆོས་ལ་ཞུགས་པས་ཀྱང་འགྲུབ་སྟེ། དད་པ་མེད་པ་དང་སེམས་བསྐྱེད་པ་སྤངས་པ་དཀོན་མཆོག་ལ་གནོད་པ་བྱེད་པ་ནི་མ་གཏོགས་སོ། །ལན་གཅིག་བཟླས་པས་བདག་སྲུང་། གཉིས་པས་གཞན་སྲུང་། གསུམ་པས་སྲུང་བ་དམ་པར་འགྱུར་ཏེ་འདིས་སྲུང་བ་བྱས་པ་ནི་བྱང་སེམས་ས་བཅུ་ལ་གནས་པའི་མཐུས་ཀྱང་བསྐྱོད་པར་མི་ནུས་ན་དེ་ལས་གཞན་པའི་སེམས་ཅན་གྱིས་ལྟ་ཅི་སྨོས། ཚོན་སྣ་ལྔའི་སྐུད་པ་ལ་ལན་བཞི་བཟླས་ནས་སྐེད་པར་བཅིང་ན་ས་བོན་བསྡམ་པར་འགྱུར་ཏེ་རྨི་ལམ་དུ་ཡང་འབྱུང་བར་མི་འགྱུར་ལ་རང་འདོད་པ་ནི་མ་གཏོགས་སྟེ་གལ་ཏེ་འདོད་ན་ཉིན་མཚན་རེ་རེ་བཞིན་བྱའོ། །ཅི་སྟེ་མི་འདོད་ན་ཐལ་བ་ལ་ལན་བདུན་བསྔགས་ནས་ལྟེ་བའི་ཕྱོགས་སུ་བརྐུས་ན་ཞག་བདུན་ཕྲག་གསུམ་དུ་ས་བོན་བསྡམ་པར་འགྱུར་རོ། །ལན་ལྔ་བཟླས་ཏེ་སངས་རྒྱས་བཅོམ་ལྡན་འདས་བསྒོམ་ན་གང་ལ་རེག་པ་དེ་དབང་དུ་འགྱུར་རོ། །ཟླ་བ་གཟས་ཟིན་པའི་དུས་སུ་ཤིང་ཇི་སྙེད་པས་མེ་སྦར་ལ། མར་གྱི་སྲེག་བླུགས་ཀྱིས་སྦྱིན་སྲེག་སྟོང་བརྒྱ་རྩ་བརྒྱད་བྱས་ནས། ཐ་མར་གང་ན་བདག་ལ་སྣང་བའི་རྒྱལ་པོ་ཡོད་པ་དེ་
ཡི་ཕྱོགས་སུ་ཐལ་བ་གཏོར་ན་དབང་དུ་འགྱུར་ཞིང་འདོད་པའི་ལོངས་སྤྱོད་དང་གྲོང་སྟེར་རོ། །གང་ལ་སེམས་འཁྲུགས་པ་དེའི་ཕྱོགས་སུ་ཐལ་བ་གཏོར་ན་ཡུལ་གཞན་དུ་འགྲོ་བའམ་སྐྱོ་བའམ་མཚན་མོ་ཀླལ་བའམ་ཉེ་དུ་ལ་གནོད་པར་འགྱུར་རོ། །གསོ་བར་འདོད་ན་འོ་མའི་སྲེག་བླུགས་སྟོང་བརྒྱ་རྩ་བརྒྱད་བྱས་ན་སོས་པར་འགྱུར་རོ། །དེ་ལྟར་ཕྱོགས་གང་ནས་སྡང་སེམས་དང་ལྡན་པའམ། དམག་འོངས་པའམ་འགོ་བའི་ནད་དང་རྣམ་པར་འཚེ་བ་བྱུང་བའི་ཕྱོགས་སུ་ཡི་གེ་གཅིག་པའི་སྔགས་བཟླ་ཞིང་སྦྱིན་སྲེག་བྱས་པའི་ཐལ་བ་གཏོར་བས་བཟློག་པར་འགྱུར་རོ། །གོས་ལ་བསྔགས་ནས་བགོས་ན་སྐལ་པ་བཟང་པོར་འགྱུར་རོ། །མིག་སྨན་ལ་བསྔགས་ནས་མིག་ལ་བརྐུས་ན་སྐྱེ་བོ་ཐམས་ཅད་དགའ་བར་འགྱུར་རོ། །མིག་དང་གདོང་ལ་ལན་བདུན་བསྔགས་ནས་ཁྲོ་བའི་གདོང་ལ་བལྟས་ན་ཞི་བ་དང་དབང་དུ་འགྱུར་རོ། །མེ་ཏོག་གམ་འབྲས་བུའམ་གཞན་ཅུང་ཟད་དྲི་ཞིམ་པ་ལ་ལན་བདུན་བསྔགས་པ་རྒྱལ་པོ་ལ་བྱིན་ན་དེ་བསྣམས་པ་ཙམ་གྱིས་དབང་དུ་འགྱུར་རོ། །གཞན་སེམས་ཅན་གང་ལ་ལ་མཐོང་བ་ཙམ་གྱིས་དེ་དབང་དུ་འགྱུར་རོ། །རྨི་ལམ་ངན་པ་མཐོང་ན་འདི་བཟླས་ཏེ་ཉལ་བས་རྨི་ལམ་བཟང་པོ་མཐོང་བར་འགྱུར་རོ། །ཡན་ལག་ཐམས་ཅད་ན་བ་ལ་བརྒྱ་རྩ་བརྒྱད་མངོན་པར་
བསྔགས་པའི་ཆུ་དྲོན་མོས་ཁྲུས་བྱས་ན་བདེ་ལེགས་སུ་འགྱུར་རོ། །འདི་ཡིད་ལ་རྗེས་སུ་དྲན་ན་དགྲས་མཐོང་ཀྱང་ཁྲོ་བ་མེད་པར་འགྱུར་རོ། །རྟག་ཏུ་བཟླས་ན་སྐྱེ་བོ་ཐམས་ཅད་བདག་ལ་དགའ་བར་འགྱུར་རོ། །འཇིགས་པ་བྱུང་བའི་ཚེ་ཡིད་ལ་བྱས་ན་འཇིགས་པ་མེད་པར་འགྱུར་རོ། །དྲི་ཞིམ་པོའི་མེ་ཏོག་གི་སྦྱིན་སྲེག་བྱས་ན་གང་གི་ཆེད་དུ་བྱས་པ་དེ་དབང་དུ་འགྱུར་རོ། །ཏིལ་གྱི་སྦྱིན་སྲེག་གིས་ཡུལ་གྱི་བདག་པོར་འགྱུར་རོ། །སྣ་མའི་མེ་ཏོག་གི་སྦྱིན་སྲེག་གིས་གང་དང་གང་འདོད་པ་དེ་ཐོབ་པར་བྱེད་དོ། །མིག་སྨན་ལ་བསྔགས་ཏེ་སློང་མོར་བྱིན་ན་སློང་མོ་མི་ཟད་པ་ཐོབ་བོ། །རྒྱལ་པོའི་རྐང་རྗེས་ཀྱི་ས་དང་ཡུང་མར་དང་ཏིལ་བསྲེས་ཏེ་ཞག་བདུན་དུས་གསུམ་སྦྱིན་སྲེག་བྱས་ན་རྒྱལ་པོ་དེ་དབང་དུ་འགྱུར་རོ། །རྒྱལ་རིགས་ལ་འབྲས་སཱ་ལུའི་ཆན་མར་དང་སྦྱར་བ་དང་། བྲམ་ཟེ་ལ་འོ་ཐུག་མར་དང་སྦྱར་བ་དང་། རྗེའུ་རིགས་ལ་ནས་ཆན་ཁྱོར་གང་བུ་རམ་ལྡན་པས་ཞག་བདུན་སྦྱིན་སྲེག་བྱས་ན་དེ་རྣམས་དབང་དུ་འགྱུར་རོ། །ཏིལ་གྱི་ཚིགས་སམ་མར་གྱི་སྦྱིན་སྲེག་གིས་དམངས་རིགས་སོ། །རྫས་དེ་ཀུན་བསྡོམས་ནས་སྦྱིན་སྲེག་བྱས་ཏེ། བཞི་མདོའམ་ཁང་སྟོང་དང་ཤིང་གཅིག་དག་ཏུ་གཏོར་མ་བཏང་ན་ནད་པ་དེ་ནད་དེ་ལས་རྣམ་པར་གྲོལ་ལོ། །གདོང་ལ་བལྟས་ཏེ་བཟླས་ན་ནད་ལས་གྲོལ་བར་འགྱུར་
རོ། །སྐུད་པ་ལ་མདུད་པ་བྱས་ནས་གཙུག་ཕུད་ལ་བཅིང་ནས་བཟླས་པས་ནད་ཀུན་ལས་གྲོལ་ལོ། །ནད་ཀྱིས་བཏབ་པ་ན་བཟླས་པ་ཙམ་གྱིས་ནད་ཀུན་ལས་ཡོངས་སུ་ཐར་བར་འགྱུར་རོ། །མགུལ་བའི་ནད་ལ་གྲོག་མཁར་གྱི་ས་ལ་བཟླས་པའི་ལྡེ་གུས་བྱུགས་པས་ཞིའོ། །མིག་ནད་ལ་ཟར་མའི་མེ་ཏོག་གིས་སྦྱིན་སྲེག་བྱས་ན་ཉེ་བར་ཞིའོ། །གི་ཝཾ་ལ་སྔགས་བྲིས་ནས་སྤྱི་བོར་བཅིངས་ཏེ་གཡུལ་དུ་ཞུགས་ན་མཚོན་གྱིས་རེག་པར་མི་འགྱུར་རོ། །བྱེ་བ་གཅིག་བཟླས་པས་འཇམ་དཔལ་རང་ཉིད་མཐོང་ཞིང་ཆོས་འཆད་ལ་དེ་དང་ལྷན་ཅིག་སྨྲ་ཞིང་མངོན་སུམ་སྣང་ནས་ཕྱིར་མི་ལྡོག་པའི་བྱང་ཆུབ་སེམས་དཔར་འགྱུར་རོ། །རྒྱ་ཤུག་གི་འབྲས་བུའི་སྦྱིན་སྲེག་གིས་གང་གི་མིང་བཟུང་བ་དེ་དབང་དུ་འགྱུར་རོ། །སྨན་བྲམ་ཧའི་མར་དང་ལྡན་པ་ཟངས་ཀྱི་སྣོད་དུ་བཞག་ལ་བཟླས་པ་ཁྲི་གཅིག་བྱས་ནས་འཐུང་ན་རྒོལ་བ་ཐམས་ཅད་ལས་རྣམ་པར་རྒྱལ་ལོ། །ཤིན་ཏུ་ཞེ་སྡང་བ་ལའང་བརྒྱ་རྩ་བརྒྱད་མངོན་པར་བསྔགས་པའི་བོང་བ་དེའི་མདུན་དུ་བོར་ན་ཁྲོ་བ་མེད་པར་འགྱུར་རོ། །ཁམ་ཕོར་སོ་མ་བཏང་བ་ཁ་སྦྱར་པའི་ནང་དུ་ཤུ་དག་སྣ་མའི་མེ་ཏོག་གིས་དཀྲིས་པ་བཞག་ནས་ཇི་སྲིད་དུ་མྱུ་གུ་འབྱུང་གི་བར་བཟླས་ནས་ཟོས་པས་ཐོས་པ་འཛིན་ནོ། །ལངས་ཤིང་ལངས་ཤིང་བརྒྱ་རྩ་བརྒྱད་བཟླས་པས་
སེམས་ཅན་ཐམས་ཅད་ཀྱིས་མི་ཐུབ་པར་འགྱུར་རོ། །མིག་ལ་བསྔགས་ན་བདག་པོས་མཐོང་ནས་བཀའ་དྲིན་ཐོབ་པར་འགྱུར་རོ། །གང་གི་ཆེད་དུ་བྱས་པ་ཞག་བདུན་ན་དབང་དུ་འགྱུར་ཏེ། གྲོང་གཞན་ན་གནས་པ་ཞག་ཉེར་གཅིག་དང་། ཡུལ་གཞན་ན་གནས་པ་ཟླ་བ་གཉིས་ཀྱིས་དབང་དུ་འགྱུར་རོ། །གཞན་ཡང་འདིའི་ལས་རབ་འབྱམས་ཚད་མེད་དོ། །ས་མ་ཡ༔ སྔགས་རྒྱལ་འབྲུ་གསུམ་ལ་བརྟེན་ནས་ནུས་པ་བསྐྱེད་པ་ལ། རང་འཇམ་དཔལ་དུ་གསལ་བའི་ཐུགས་ཀར་ཟླ་བའི་དབུས་སུ་ཨོཾ་ཨཱཿཧཱུྃ་བརྩེགས་མར་གནས་པ་ལ་རྩ་སྔགས་ཀྱིས་བསྐོར་བ་དམིགས་ནས། དེའི་འོད་ཀྱིས་རང་གི་ལུས་གང་། རྩ་ནང་གི་ནད་གདོན་སྡིག་སྒྲིབ་ཐམས་ཅད་གཞི་མེད་དུ་བསྲེག །རྒྱལ་བ་ཐམས་ཅད་ཀྱི་མཁྱེན་བརྩེ་ནུས་པའི་བྱིན་རླབས་མ་ལུས་པ་བཀུག་ནས་འབྲུ་གསུམ་ལ་ཐིམ་པར་བསམ་ཞིང་། འབྲུ་གསུམ་གྱིས་སྣ་དྲང་བའི་རྩ་སྔགས་བརྗོད་པས། ནད་གདོན་སྡིག་སྒྲིབ་ཐམས་ཅད་རྨིང་ནས་ཞི་ཞིང་སྔགས་ཀྱི་ནུས་པ་རྒྱས། སྔགས་མ་དག་པ་དང་སྡེབས་ཀྱི་ཉེས་པ་སེལ། གཞན་ཡང་དམིགས་པ་གང་འདོད་དུ་སྤོས་པས་ཆོག །འདི་གྲུབ་པའི་མཚན་མ་ནི། ཉམས་དགའ་ཞིང་བྱིན་ཆེ་ལ། རྨི་ལམ་དུ་ཁྲི་ལ་འདུག་པ། གོས་གསར་གྱོན་པ། འབྱོར་པའི་རིགས་བཟང་པོ་རྙེད་པ།
མེ་ཏོག་གི་ཚལ་སོགས་བཟང་པོའི་རིགས་རྨིའོ། །ཇི་ལྟ་ཇི་ལྟར་སྔགས་ཀྱི་ཆོ་གས་ལས་སྒྲུབ་པ་དེ་ལྟ་དེ་ལྟར་སྒྲུབ་བྱེད་སྟོབས་ཆེན་པོ་སྟེ་ཁྲོ་བོ་གཤིན་རྗེ་གཤེད་མངོན་སུམ་པ་ཕྱོགས་དུས་རྒྱལ་བ་ཐམས་ཅད་ཀྱི་ཡང་སྙིང་འབྲུ་གསུམ་པོ་འདི་ཁོ་ན་བཟླས་པས་འཇིག་རྟེན་དང་འཇིག་རྟེན་ལས་འདས་པའི་སྔགས་ཀུན་བཟླས་པ་སྟེ་ལས་ཀྱི་ཆོ་ག་རབ་འབྱམས་བསམ་གྱིས་མི་ཁྱབ་པ་དང་བཅས་པ་སྟེ་ཕན་ཡོན་ཚད་ལས་འདས་པའོ། །གཞན་ཡང་ཨོཾ་ཨཱཿཧཱུྃ་ཨ་ར་པ་ཙ་ན་དྷཱིཿ ཞེས་པ་འདི་ལ་ནད་སོགས་ཞི་བ་དང་། ཚེ་བསོད་རྒྱས་པ། གང་འདོད་དབང་དུ་བྱ་བ་སོགས་ལས་རབ་འབྱམས་ཀྱི་དམིགས་པ་དང་བཟླས་ཤམ་གདགས་པས་དེ་དང་དེ་མཆོག་ཏུ་བྱེད་དོ། །བཤད་མ་ཐག་པ་སྔགས་འབྲུ་དགུ་པོའི་ཤམ་བུར། མུ་བཛྲ་ཀ་བཱ་ཙི་རཀྵ་བྷྲཱུྃ། ཞེས་བཏགས་ནས། གུ་གུལ་གླ་རྩི་དྲི་ཆེན་ཆོས་སྨན་རྣམས་རང་གི་དྲི་ཆུ་དང་སྦྱར་བའི་རིལ་བུ་ལ་ལན་བརྒྱ་རྩ་བརྒྱད་བཟླས་ནས་བཏབ་སྟེ་རང་གི་གནས་དྲུག་ཏུ་ཐིག་ལེ་བྱས་པས། སྡེ་བརྒྱད་འབྱུང་པོའི་གནོད་པ་ཐམས་ཅད་སྲུང་བ་དང་། རང་གི་སྔགས་ཀྱི་ནུས་པ་མེ་ལྟར་འབར་བ་དང་། ལྷའི་བྱིན་རླབས་འཇུག་པར་བྱེད་པ་སྟེ། ནད་རིམས་དྲག་པོ་དང་གདོན་གདུག་པ་སོགས་བར་ཆད་ཆེ་བའི་ཕྱོགས་སུ་ཕྱིན་པ་དང་། ཡ་ང་བ་དང་རྦོད་གཏོང་
གཏད་མནན་སོགས་ལས་ཇི་བྱས་ཀྱང་འཚུབ་རང་ལ་མི་འབྱུང་ཞིང་ཕར་ཐོགས་མེད་དུ་གཅོད་པའི་རྣོ་ནུས་དང་ལྡན་ནོ། །གཞན་ཡང་སྲུང་བྱ་གང་ལ་དམིགས་ནས་སྔགས་བདུན་ལ་སོགས་པ་བཟླ་བའམ། སྲུང་སྐུད་སོགས་ལ་སྔགས་དེས་བྱིན་གྱིས་བརླབས་ཏེ་གང་ལ་བཏགས་པས་སྲུང་བ་ཐམས་ཅད་ཀྱི་རྒྱལ་པོ་སྟེ་དུས་ཀུན་ཏུ་གཅེས་སྤྲས་སུ་བྱ་བ་སྙིང་གི་ནོར་བུ་འདི་ཉིད་ཡིན་ནོ། །ས་མ་ཡཿ གསང་བ་འབྲུ་བཞི་ལ་བརྟེན་ནས་ཡེ་ཤེས་པ་དབབ་པ་ནི། རང་འཇམ་དཔལ་དུ་གསལ་བའི་ཞབས་ཀྱི་མཐིལ་དུ་ཡཾ་ལས་རླུང་དཀྱིལ་སྔོན་པོ་གཞུ་དབྱིབས་བ་དན་གྱིས་མཚན་པ། འདོམས་སུ་ར་ལས་མེ་དཀྱིལ་དམར་པོ་གྲུ་གསུམ། ལྟེ་བར་བྃ་ལས་ཆུ་དཀྱིལ་དཀར་པོ་ཟླུམ་པོ། དེ་སྟེང་སྙིང་གར་ལྃ་ལས་ས་དཀྱིལ་སེར་པོ་གྲུ་བཞི་རྡོ་རྗེས་མཚན་པ་བསམ། ལྟེ་བར་ཛྙེེཾ་དམར་པོ་འོད་འཕྲོ་ཞིང་མི་ཟད་པ། སྙིང་གར་ཧཱུྃ་མཐིང་ཀ་འོད་འབར་བ། མགྲིན་པར་ཨཱཿདམར་པོ་འོད་འབར་བ། སྤྱི་བོར་ཧཾ་དཀར་ཞིང་བསིལ་བར་བསམ། ཧཱུྃ་ཧ་ཨ་ཛྷཻཾཿ ཞེས་བཟླས་པས་ཛྷཻཾ་ལས་འོད་དམར་པོའི་རང་བཞིན་སྒྲ་དང་བཅས་པའི་རླུང་བྱུང་སྟེ་རྐང་མཐིལ་གྱི་ཡྃ་རླུང་དང་བཅས་ཆེར་གཡོས་ནས་ནམ་མཁར་ཡེམ་ཡེམ་འདེགས་ཤིང་རླུང་གྱེན་དུ་བསྐྱོད་པས་སུམ་མདོའི་མེ་ཆེས་ཆེར་འབར་བས་ལྟེ་བའི་ཆུ་ཁོལ་ཞིང་དེས་སྙིང་གའི་
ས་དཀྱིལ་གཡོས་ཤིང་འཁོར་བའི་འོད་དང་སྒྲས་ཡི་གེ་གཞན་གསུམ་བསྐུལ་ཏེ་བདེ་བ་ཆེན་པོ་བཟོད་མེད་དུ་འབར་བའི་འོད་ཀྱིས་ལུས་གང་ཞིང་སྤུར་ནས་འཕར་ལམ་ལམ་བྱེད་པ་སྣ་བུག་གཡས་ནས་བྱུང་། སྣོད་བཅུད་ཐམས་ཅད་ལ་ཁྱབ་པས་བདེ་སྟོང་གི་ངང་དུ་ཞུ་ཞིང་འོད་ལམ་ལམ་དུ་གཡོ་ཞིང་ཆེར་བསྐྱོད། བཅོམ་ལྡན་འདས་འཇམ་པའི་རྡོ་རྗེ་སོགས་ཕྱོགས་དུས་རྒྱལ་བ་སྲས་བཅས་ལ་འོད་དེ་ཕོག་པ་ཙམ་གྱིས་ཐུགས་རྒྱུད་རང་དབང་མེད་པར་བསྐུལ་ཏེ་སྐུ་ཆེ་བ་རི་རབ་ཆུང་བ་ཡུངས་འབྲུའི་ཚུལ་དུ་བཞད་པའི་གསུང་དང་དགྱེས་པའི་གར་གྱིས་རོལ་བས་སྔགས་ཕྲེང་དང་ཕྱག་མཚན་འོད་ཟེར་གྱི་འདུ་འཕྲོ་འབར་ཞིང་འཁྲུགས་པ་ཕྱོགས་ཀུན་ནས་ཁ་བ་བུ་ཡུག་འཚུབས་པ་ལྟར་སྤྱན་དྲངས་ཏེ་སྣོད་བཅུད་ཐམས་ཅད་ཀྱང་བདེ་སྟོང་ལྷ་སྐུའི་རྣམ་པར་སད་པ་སྔགས་ཀྱི་རང་སྒྲ་བཅས་འུར་འུར་ཤིག་ཤིག་འཕར་ཞིང་གཡོ་བཞིན་དུ་ཐམས་ཅད་རྒྱ་མཚོ་ལ་ཆར་བབ་པ་ལྟར་རང་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པར་བསམས་ལ་རྩ་སྔགས་དང་དབབ་པའི་ཡི་གེ་བཞི་སྤྲེལ་ཏེ་བརྒྱ་ནས་འབུམ་གྱི་བར་ཅི་རིགས་བཟླ། འཕར་ཞིང་གཡོ་བ་བྱུང་ནས་མི་བཟོད་ན་དཀྱིལ་འཁོར་བཞི་དང་ཡི་གེ་རྣམས་མི་གཡོ་བར་གསལ་ཙམ་ལས་གཞན་མི་དམིགས་པར་ལུས་ནང་འོད་
ཀྱིས་གང་པའི་སྤྲོ་བསྡུ་བྱ། གཞན་ལ་ཡེ་ཤེས་པ་དབབ་པ་སོགས་ལ་ཁྱེའུ་དང་བུ་མོ་གཙང་མའི་རྐང་མཐིལ་དུ་རྫ་ཡི་བྱེ་མ་སོ་མས་ཉི་ཟླ་བྲིས་ལ་ཁྲུས་བྱས་ལངས་ཏེ་ཐལ་མོ་སྦྱར་ནས་འདུག་ལ། རང་གི་གནས་ཀྱི་དཀྱིལ་འཁོར་དང་ཡི་གེའི་འོད་སྔ་མ་ལྟར་འཕྲོས་པས། ཁྱེའུ་དང་བུ་མོའི་ཛྷཻཾ་བསྐུལ་བ་སོགས་བྱ། གསང་རྫས་རྒྱས་བསྡུས་ཅི་རིགས་བདུག་ཅིང་། ལུས་ལ་བདུད་རྩི་འཐོར་རོལ་མོ་བསྒྲག་ཅིང་སྔགས་དམིགས་ཀྱིས་གཟིར་བས་དངོས་སུ་ཡེ་ཤེས་པ་ཕེབས་པར་འགྱུར་རོ། །འདིར་དང་པོར་གནས་དབེན་པར་གཙང་མའི་སྤྱོད་ལམ་གྱིས་འཁོད་ལ། དམ་ཚིག་གི་བྲིས་སྐུ་སོགས་ཀྱི་མདུན་དུ་མཆོད་པ་ཇི་འབྱོར་བཤམས་ཤིང་། ཐོག་མར་སྔགས་ཕྱག་རྒྱས་སྲུང་བ་བྱས་ནས་དབབ་པའི་བཟླས་དམིགས་ཚད་དུ་བསྐྱལ་བས་ཡེ་ཤེས་པ་ཕེབས་པའི་རྟགས་ཡོངས་སུ་རྫོགས་ནས་དུས་སུ་གང་འདོད་པའི་ལྷ་དེ་དག་དབབ་པའི་ལས་བརྩམ་པར་བྱ་སྟེ། ཕེབས་པར་གྱུར་ན་གྲུབ་པ་རྣམས་ཀྱང་དེ་ཉིད་དུ་མངོན་དུ་འགྱུར་ཞིང་། སྔགས་ཀྱི་ཆོ་ག་དང་དུས་གསུམ་གྱི་དངོས་པོ་ལུང་སྟོན་ཅིང་དངོས་གྲུབ་གྲུབ་པའི་ཐབས་མཚུངས་པ་མེད་པ་ཡིན་པས་ན། ཚུལ་འདིས་རྒྱུད་ལ་སྔགས་ཀྱི་བྱིན་རླབས་བཙན་ཐབས་སུ་འཇུག་པར་བྱེད་པ་ཡིན་པར་ཤེས་ནས་དང་པོར་འབད་པར་བྱ་བ་སྔགས་རིག་
འཛིན་པའི་མན་ངག་གི་གནད་གཅིག་པུ་ཟླ་མེད་པ་སྟེ། འདིའི་རྟགས་ནི་དངོས་སུ་ལུས་ངག་ཡིད་ལ་ཕྲལ་དུ་འབྱུང་ཞིང་། ལྷའི་བྱིན་གྱིས་བརླབས་པས་སྐུ་དང་། གླེགས་བམ་ཕྱག་མཚན་རྙེད་པ་ལ་སོགས་པའི་ལྟས་བཟང་པོ་གཞན་ཡང་སྣང་བར་འགྱུར་རོ། །ས་མ་ཡ༔ དཔའ་ཆེན་ཡིག་བརྒྱད་ལ་བརྟེན་ནས་ལས་སྒྲིབ་རྒྱུན་གཅོད་པ་ནི། རྒྱུད་ལས། ཕྱག་རྒྱ་ཐམས་ཅད་ཀྱི་སྙིང་པོ་དཔའ་བོ་ཆེན་པོ་ཞེས་བྱ་བ་ཡི་གེ་བརྒྱད་ཡོད་དེ་དཔལ་མཆོག་ཏུ་བྱེད་པ་དག་བྱེད་ཆེན་པོ་སྲིད་པ་གསུམ་གྱི་ཆོས་ཉེ་བར་གཅོད་པར་བྱེད་པ། ངན་འགྲོ་ཐམས་ཅད་བཟློག་པར་བྱེད་པ། ཞི་བ་ཐམས་ཅད་བྱེད་པ། ལས་ཐམས་ཅད་བྱེད་པ། མྱ་ངན་ལས་འདས་པའི་བདེ་བ་ཐོབ་པར་བྱེད་པ། སངས་རྒྱས་མངོན་སུམ་དུ་མཐོང་བ་བཞིན་དུ་ཉེ་བར་གནས་པ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཉིད་བཞིན་དུ་ཉེ་བར་གནས་པ། སེམས་ཅན་ཐམས་ཅད་ཀྱི་དོན་གྱི་ཕྱིར་མཆོག་ཏུ་གསང་བའི་ངོ་བོས་ཉེ་བར་གནས་པ། རེ་བ་ཐམས་ཅད་ཡོངས་སུ་རྫོགས་པར་བྱེད་པ། གང་དུ་དྲན་པ་ཙམ་གྱིས་མཚམས་མེད་པ་ལྔ་ཡང་ཡོངས་སུ་སྦྱོང་བར་བྱེད་ན་བཟླས་པས་ལྟ་སྨོས་ཀྱང་ཅི་དགོས། དེ་ཡང་གང་ཞེ་ན། ཨོཾ་ཨཱ་བཱི་ར་ཧཱུྃ། ཁེ་ཙ་ར། གྲོགས་པོ་འདི་ནི་ཡི་གེ་བརྒྱད་པ་དཔའ་
པོ་ཆེན་པོ་ཞེས་བྱ་བ། གསང་བའི་སྙིང་པོའི་བདག་ཉིད་ཡིན་ཏེ་སངས་རྒྱས་ཉིད་བཞིན་དུ་རབ་ཏུ་ཉེ་བར་གནས་པ་ཡིན་ནོ། །མདོར་ན་བྱ་བ་ཐམས་ཅད་ལ་ཡོན་ཏན་གྱི་མཐའ་རྒྱ་ཆེན་པོ་བརྗོད་པ་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་ཡང་མི་ནུས་ཏེ། ཞེས་གསུངས་པའི་འཇམ་དཔལ་གྱི་ཡི་གེ་འབྲུ་བརྒྱད་པོ་འདི་དག་གི་མཇུག་ཏུ་མྃ་ཡིག་འཇམ་པའི་རྡོ་རྗེ་དང་མཐའ་རྟེན་སྭཱ་ཧཱ་སྦྱར་བའི་ཡི་གེ་བཅུ་གཅིག་པ་ཉིད་རྩ་སྔགས་དང་སྦྲེལ་བའམ། རང་ཉིད་རྐྱང་པར་བཟླས་པས་ཀྱང་རུང་སྟེ་ལས་དང་ཉོན་མོངས་པ་དང་སྐལ་བ་ངན་པའི་ཉེས་པ་ཐམས་ཅད་གཏན་ནས་ཡོངས་ཟད་དུ་བྱེད་པ་ཡིན་ཞིང་། གཞན་དོན་དུའང་ལྷ་སྔགས་ཀྱི་འོད་ཟེར་འཕྲོས་པས་དམིགས་བྱའི་ལས་ཉོན་སྦྱངས་ཤིང་ཡེ་ཤེས་ཀྱི་སྣང་བ་རྒྱས་པའི་དམིགས་པ་དང་བཅས་ཏེ་བཟླས་པས་འདི་ཕྱིར་སྡུག་ཀུན་དང་བྲལ་ཞིང་མཐར་གྱིས་མྱང་འདས་ཆེན་པོ་ལ་འགོད་པའི་ཕྲིན་ལས་བླ་ན་མེད་པ་འབྱུང་བར་འགྱུར་རོ། །དམིགས་བྱའི་སྐྲ་སེན་རུས་པ་སོགས་སམ་མིང་གཟུགས་ཀྱི་རྟེན་ལ་དགུག་བསྟིམ་བྱས་ནས་སྔགས་ཀྱིས་བརླབ་པའི་བྱེ་མས་གཏོར་བས་གནས་ངན་ལས་ཐར་ཞིང་ཕན་བདེ་ལ་འགོད་པར་བྱེད་དོ། །གཞན་ཡང་ལས་ཀྱི་ཚོགས་མཐའ་ཡས་པ་དང་བཅས་པ་འདིས་ནི་ལས་སྒྲིབ་རྒྱུན་གཅོད་པ་ན། སྔགས་གྲུབ་པའི་གེགས་
སུ་གནས་པའི་སྒྲིབ་པ་བསལ་བའི་ཕྱིར་སྔགས་འཛིན་པས་འབད་པས་འདི་བརྟེན་པར་བྱའོ། །རྟགས་ནི་རིག་པ་སྤྲོ་ཞིང་གསལ་བ། དྲི་མ་དག་པ། འོད་དང་སྣང་བས་ཁྱབ་པ། ཁྲུས་བྱས་པ་སོགས་སྡིག་སྒྲིབ་དག་པའི་རྟགས་འབྱུང་ངོ་། །ས་མ་ཡ༔ ཨཱ་ལི་བཅུ་དྲུག་ལ་བརྟེན་ནས་དབང་དུ་བྱ་བ་ནི། རང་ཉིད་འཇམ་དཔལ་དུ་གསལ་བའི་སྤྱི་བོར་ཨ་ཨཱཿམིག་གཡས་གཡོན་གཉིས་ལ་ཨི་ཨཱི། སྣ་ལ་ཨུ་ཨཱུ། ལྕེ་ལ་རྀ་རཱྀ། རྣ་བར་ལྀ་ལཱྀ། སྙིང་ལ་ཨེ་ཨཻ། ལག་གཉིས་ཨོ་ཨཽ། རྡོ་རྗེའི་རྩེ་མོར་ཨཾ། འོག་སྒོར་ཨཱཿརྣམས་མེ་ལོང་ལ་གཟུགས་བརྙན་ཤར་བའི་ཚུལ་དུ་མདོག་དམར་ལམ་མེར་གསལ་བཏབ་ལ་རྩ་སྔགས་དང་ཨཱ་ལི་ཁྲི་གཅིག་བཟླའོ། །དེ་ནས་ལས་ལ་སྦྱར་ཚེ་དབང་དུ་བྱ་བ་མདུན་དུ་དམིགས་ལ། རང་གི་གནས་སོ་སོའི་ཡི་གེ་ལས་འོད་དམར་པོ་ལྕགས་ཀྱུ་ལྟ་བུ་འཕྲོས། ཁོའི་གནས་སོ་སོ་ནས་བཟུང་སྟེ་ལུས་འོད་དུ་དམར་ལམ་གྱིས་སོང་། སེམས་ཆགས་པས་མྱོས་ཏེ་གདུང་བ་འབར། རང་དབང་མེད་པར་དྲངས་ནས་བདག་གི་དབང་དུ་བྱས་པར་བསམས་ལ། རྩ་སྔགས་དང་ཨཱ་ལིའི་མཐར། ཆེ་གེ་མོ་ཝཱ་ཤངྐུ་རུ་ཡེ་ཨངྐུ་ཤ་ཛ་ཧྲིང་ཧྲིང་ཿ ཞེས་སྟོང་བཟླས་པས་དབང་དུ་འགྱུར་ཏེ། འདིའི་སྒྲུབ་པ་དང་ལས་སྦྱོར་ནི་ཟླ་བ་ཉ་
པའི་ཚེས་དང་བསྟུན་ཏེ་ཉིན་ཞག་དེ་ལ་བྱའོ། །འདིར་སྣོད་བཅུད་འོད་དམར་དུ་བཞུ་ཞིང་དབང་དུ་བྱ་བའི་དམིགས་པ་བཅས་སྔགས་བཟླས་ནས་དྲི་རོ་སོགས་ལ་བཏབ་སྟེ་གང་ལ་བྱིན་པ་དང་དྲི་ཚོར་བ་སོགས་ཀྱིས་ཕ་རོལ་པོ་དབང་དུ་འགྱུར་རོ། །མེ་ཡི་ལས་དང་སྦྱར་ཏེ་བཟླས་པས་རྡོ་རྗེ་ཅན་ཡང་འགུགས་པར་བྱེད་ན་ཚངས་དབང་སོགས་ལ་ལྟ་ཅི་སྨོས། གཞན་ཡང་ཐོ་རངས་བྱ་མ་གྲགས་གོང་སྤྱིའམ་བྱེ་བྲག་གང་ལ་དམིགས་ནས་བཟླས་པ་ཅུང་ཟད་བྱས་པས་ཀྱང་འདོད་པ་ལྟར་དབང་དུ་བྱེད་དོ། །འདི་ལ་རྟགས་རབ་ཀྱིས་ཡིག་འབྲུའི་གསལ་སྣང་འབྱུང་ཞིང་སྣང་བ་ཧྲལ་མ་ཧྲོལ་དུ་གྱུར་ནས་ཆགས་པ་དང་བྲལ་ཏེ་དགོས་མེད་རྒྱུད་ལ་སྐྱེ་ཞིང་སྣང་སྲིད་དབང་དུ་བྱེད་དོ། །ཕལ་པའི་རྟགས་ནི་རབ་ལ་ཕ་རོལ་པོས་ཕྱག་འཚལ་བ་དང་འདུད་པ། ཉི་ཟླ་ཞོན་པ། རྒྱ་མཚོ་འཐུང་བ། ཉམས་བདེ་བ་སོགས་འབྱུང་ངོ་། །གཞན་ཡང་དབྱངས་ཡིག་གི་འཁྲུལ་འཁོར་རབ་འབྱམས་ཀྱི་ལས་དང་བཅས་པ་འཇམ་དཔལ་རྡོ་རྗེའི་གསང་བའི་སྙིང་པོ་འདི་ནི་ཕན་ཡོན་བསམ་གྱིས་མི་ཁྱབ་པའོ། །ས་མ་ཡ༔ ཀཱ་ལི་སོ་ལྔ་ལ་བརྟེན་ནས་ཚེ་བསྲིང་བ་ནི། ས་བཟང་པོའི་མཎྜལ་ཁྲུ་གང་བ་དྲི་བཟང་གིས་བྱུགས་པའི་དབུས་སུ། པདྨ་འདབ་མ་བཞི་དང་དེའི་ཕྱི་རོལ་འདབ་མ་སུམ་ཅུ་ལ་དབུས་ནས་བརྩམས་ཏེ་གཡས་སྐོར་གྱིས་ཀཱ་
ལི་སོ་སྔ་དཔེ་འུ་རིས་བཞིན་བཀོད་པ། རེ་ཁ་དཀར་པོས་བྲིས་པའི་ལྟེ་བར། རིན་པོ་ཆེའི་བུམ་པ་གས་ཆག་མེད་པའི་ནང་དུ་བ་དང་འབྲི་ཡི་འོ་མར་ལྔ་ཚན་ལྔའི་རྫས་བཏབ་ཅིང་། རྒྱུན་འབབ་ཀྱི་ཆུ་བོ་གཙང་མས་བཀང་ནས་འབྲས་བུའི་ཤིང་ངམ་ཀུ་ཤའི་ཆུན་པོས་ཁ་བརྒྱན་ལ་དར་རམ་རས་དཀར་པོ་ཁ་ཚར་མ་ཉམས་བས་བུམ་དཀྲིས་བྱ། མཆོད་པ་ལྔས་འཁོར་བར་བཤམས། རང་འཇམ་དཔལ་དུ་གསལ་ལ་བདག་བསྐྱེད་ཀྱི་མཆོད་བསྟོད་པར་བྱ། མདུན་དུ་བུམ་པའི་དབུས་སུའང་བདག་བསྐྱེད་ལྟ་བུའི་འཇམ་དཔལ་གསལ་བཏབ་ལ་བུམ་ལྷའི་ཐུགས་ཀར་ཟླ་བའི་དབུས་སུ་དྷཱི་ཡིག་གི་མཐར་རྩ་སྔགས་དང་ཀཱ་ལིས་བསྐོར་བའི་འོད་ཀྱིས་འཁོར་འདས་ཀྱི་ཚེ་བཅུད་བུམ་ལྷར་བསྟིམ། དེའི་ཐུགས་ནས་བདུད་རྩི་བབ་པས་བུམ་པ་གང་ཞིང་ཡེ་ཤེས་ཀྱི་བདུད་རྩིར་འཁྱིལ་བར་བསམས་ལ་བཟླ། ཐུན་མཐར་མཆོད་བསྟོད་གཏོར་མ་ཕུལ་ནས་འདོད་དོན་ལ་གསོལ་བ་བརྩེ་གཅིག་བཏབ་ལ། ལྷ་འོད་དུ་ཞུ་ནས་བུམ་པའི་ཆུ་དང་དབྱེར་མེད་དུ་གྱུར་ཏེ་བུམ་ནང་ནས་བདུད་རྩི་དཀར་ནར་གྱིས་ལུད་པ་རང་གི་སྤྱི་བོ་ནས་ཞུགས་ལུས་གང་ཚེ་གནས་པའི་མི་མཐུན་ཕྱོགས་སུ་གྱུར་བ་མཐའ་དག་ལྷག་མེད་དུ་ཞི་ཞིང་འཆི་བ་མེད་པ་ཚེ་ཡི་རིག་འཛིན་ཐོབ་པར་བསམས་ལ། རྩ་སྔགས་ཀཱ་ལི་བཅས་ཁྲི་
ཐིམ་པར་བཟླས་པས། རྨི་ལམ་དུ་ཉི་ཟླ་ཤར་བ། ཉམས་ལ་རང་ལུས་མི་སྣང་བ་སྙམ་བྱེད་པ་དང་། དངོས་སུ་དབང་པོའི་སྟོབས་འཕེལ་བ་དང་། རྫས་འཕེལ་བ་ལ་སོགས་པ་འབྱུང་ངོ་དེ་ལྟ་བུའི་ཆུ་འཐུང་ཞིང་ཁྲུས་བྱས་པས་ཚེ་ཡི་བར་ཆད་ཞི་ཞིང་ཚེ་ལ་དབང་པའི་རིག་འཛིན་ཐོབ་པར་འགྱུར་རོ། །ལས་ཀྱི་རྗེས་ནི་སྤྱི་དང་འདྲའོ། །གཞན་ཡང་ཁམས་ཀྱི་ཡི་གེའི་འཁྲུལ་འཁོར་རབ་འབྱམས་ཀྱང་གཞན་དུ་ཤེས་པར་བྱ་སྟེ་ཕན་ཡོན་ཚད་མེད་པའོ། །ས་མ་ཡ༔ རྟེན་འབྲེལ་སྙིང་པོ་ལ་བརྟེན་ནས་ཕ་རོལ་ཇག་ཀུན་བཅིང་བ་ནི། རང་འཇམ་དཔལ་དུ་གསལ་བའི་ཐུགས་ཀར་ཟླ་བའི་དབུས་སུ་དྷཱིཿལ་རྩ་སྔགས་དང་རྟེན་སྙིང་གིས་བསྐོར་བར་བསམས་ལ་རྩ་སྔགས་དང་རྟེན་སྙིང་ཁྲི་ཕྲག་གཅིག་བཟླ། དེ་ནས་རས་སམ་པ་ལ་དཀར་གྱི་སྲད་བུ་འདོམ་གང་ལ་རྟེན་འབྲེལ་བཅུ་གཉིས་ཀྱི་མདུད་པ་བཅུ་གཉིས་བྱས་པ་ལ་རྟེན་འབྲེལ་སྙིང་པོ་སྟོང་བཟླས་བས་བཏབ། ཡིག་འབྲུ་ཡང་དེར་བསྟིམས་ལ་འགྲོ་བ་གཞན་གང་གིས་ཀྱང་མ་མཐོང་བར་བྱ། ནམ་ལས་སྦྱོར་བྱེད་ན་རྒྱ་ཤོག་སོགས་ལ་དུག་ཁྲག་གིས་ལིང་གའི་ཁོག་པར་མིང་རུས་བྲིས། མ་ཤེས་ན་ཡུལ་སོགས་ཆེ་གེ་མོའི་ཆོམ་རྐུན་ཇག་པ་སོགས་ཁ་བསྒྱུར་ལ་བྲི། རཱུ་པའི་མཐའ་བསྐོར་དུ་གནོད་བྱེད་ཆེ་གེ་མོ་སྡང་བའི་སེམས་དང་ལྡན་པ།
གདུག་པའི་སེམས་དང་ལྡན་པ། དྲག་ཤུལ་གྱི་སེམས་དང་ལྡན་པ། གནོད་ཅིང་གནག་པའི་སེམས་དང་ལྡན་པ་རྣམས་ཀྱི་ལུས་བཅིང་བར་བགྱིའོ། །ངག་བཅིང་བར་བགྱིའོ། །ཡིད་བཅིང་བར་བགྱིའོ། །དེ་དག་གི་རྣམ་པར་ཤེས་པ་མྱོས་ཤིག །དེ་ཉིད་ཀྱི་རྟེན་འབྲེལ་བཅུ་གཉིས་རང་གཤེད་རང་ལ་ཕོབ་ཅིག །སྟོབས་དང་རྫུ་འཕྲུལ་ཤིག་ཅིག །མ་རིག་པའི་སྨག་རུམ་གཏིབ་ཅིག །རྒ་ཤི་རྟེན་དང་ཕྲོལ་ཅིག །སྐྱེ་བ་དབང་པོ་སྡོམས་ཤིག །སྲིད་པ་ལྔ་ཕུང་ཆོམས་ཤིག །ལེན་པ་མདངས་ཕྲོག་ཅིག །སྲེད་པ་ཚང་ཤིག་ཅིག །ཚོར་བ་མྱ་ངན་དུ་ཕོབ་ཅིག །རེག་པ་ཁུངས་ཕྱུངས་ཤིག །སྐྱེ་མཆེད་དྲུག་འགགས་སུ་ཆུག་ཅིག །མིང་དང་གཟུགས་སྒྲིབས་ཤིག རྣམ་པར་ཤེས་པ་རྟེན་དང་ཕྲོལ་ཅིག །འདུ་བྱེད་སྐྱེངས་སུ་ཆུག་ཅིག །རྟེན་འབྲེལ་བཅུ་གཉིས་འཁྲུགས་སུ་ཆུག་ཅིག །ཅེས་བྲིས་སྐབས་སུ་ངག་ཏུའང་བརྗོད་དོ། །དེ་ནས་འགུགས་འདྲེན་དྲག་པོ་བྱ། གཟུགས་ལྟེ་བས་ལ་གོང་གི་སྲད་བུས་ལེགས་པར་བཅིངས། རྟེན་འབྲེལ་སྙིང་པོའི་རང་བཞིན་མི་ཤིགས་པའི་གུར་དུ་བཅུག་ནས་སྒོ་གསུམ་གཡོ་འགུལ་མེད་ཅིང་ཐར་པའི་གནས་མེད་པར་ནག་ཐིབས་སེ་སོང་བར་བསམ། རྟེན་སྙིང་ཉེར་གཅིག་གིས་རབ་གནས་བྱས་ནས་རང་གི་ལུས་ལ་བཅིང་། འཇིགས་
པ་གྲོལ་ནས་སྲད་བུ་སྔར་བཞིན་མིས་མི་མཐོང་བར་སྦ། འགྲོལ་བའི་སླད་དུ་གཟུགས་དྲི་བཟང་གི་ཆུས་བཀྲུས་ལ་ལས་རྗེས་མི་མངོན་པར་བྱའོ། །འདིའི་རྟགས་སུ་རང་གི་ཤེས་པ་འཁྲུགས་ལ་ཁད་པ་དང་། སྣང་ཡུལ་འཁོར་བ་དང་། ལུས་རེངས་པ་སོགས་འབྱུང་། ཚུལ་འདི་ལྟ་བུས་གཤིན་རྗེའི་འཚེ་བ་རྩོམ་པའང་མྱོས་ཤིང་ཞི་བར་བྱེད་ན་གཞན་དག་ལ་ལྟ་ཅི་སྨོས། དེས་དགྲ་རྐུན་ཇག་པ་དང་གནོད་བྱེད་གང་ལ་དམིགས་པ་ཐམས་ཅད་རབ་ཏུ་འཆིང་བར་འགྱུར་རོ། །ཟབཿ གཞན་ཡང་རང་འཇམ་དཔལ་དུ་གསལ་བའི་ཐུགས་ཀར་དྷཱི་ཡིག་སྔགས་ཕྲེང་གི་མཐའ་སྐོར་དུ་རྟེན་སྙིང་གིས་བསྐོར་བ་གསལ་བཏབ། ཕྱག་གཡས་མཆོག་སྦྱིན་གྱི་མཐིལ་དུ་སངས་རྒྱས་བཅོམ་ལྡན་འདས་བསམས་ལ་རྩ་སྔགས་དང་རྟེན་སྙིང་འབུམ་ཕྲག་གཅིག་སྔོན་དུ་བསྙེན་ནས་ལས་སྣ་ཚོགས་བསྒྲུབ་པར་བྱ་སྟེ། རིམས་དང་ཁོང་ནད་ཀླད་ནད་སོགས་ལ་སྔགས་བཟླས་པའི་ལག་གཡས་ཁུ་ཚུར་གྱིས་བྱུག་ཐབས་སུ་བྱའོ། །ཉིན་གཅིག་པ་སོགས་རིམས་ལ་བུ་མོ་གཞོན་ནུས་བཀལ་བའི་སྐུད་པ་དཀར་པོ་སུམ་བསྒྲིལ་ལ་བཟླས་བརྗོད་ཉི་ཤུ་རྩ་བརྒྱད་བཟླས་ནས་མགུལ་དུ་བཏགས་ན་བདེ་བར་འཚོའོ། །ནད་ལ་ཕན་པའི་སྨན་སོ་སོར་སྔགས་བཏབས་སྟེ་བཏང་བས་ནད་ཀུན་སོས་སོ། །སྙིང་
ནད་དང་རྩིབ་ལོག་ན་བ་དང་། ཁོང་ནད་ཇི་ཡོད་ལ་ཆུ་ལ་སྔགས་མང་དུ་བཟླས་ནས་བླུད་ན་ཕན་ནོ། །གཡེན་པ་འབྲུམ་བུ་ཕོལ་མིག་རྨ་རེ་བ་ལ་གྲོག་ཚང་གི་ས་ལ་སྙིང་པོ་མང་དུ་བཟླས་ནས་བཏབ་ན་འཚོའོ། །གཞང་འབྲུམ་གཞང་ནད་ཟ་ཁུ་དང་ཕོ་མཚན་སྐྲངས་ཤིང་ན་བ་ལ་སྐྱེར་ཁན་གྱི་རིལ་བུའམ་བྱང་སེམས་ཀྱི་རིལ་བུ་ལ་ཉི་ཤུ་བཟླས་ཤིང་བསྐུས་ན་ཕན། ནད་གང་ལའང་ནད་བབ་དང་བསྟུན་ཏེ་བཟླས་པ་མང་བར་བྱས་ནས་བྱ་བས་ན་ཕན་ནོ། །འཁྲུ་ནད་ལ་སྨན་ནམ་ཁ་ཟས་ལ་བདུན་ནམ་ཉི་ཤུ་བཟླས་ནས་ཁོང་དུ་བཏང་ན་སོས་སོ། །ཞིང་ལ་ཟ་བའི་སྲིན་བུ་བྱིའུ་བྱི་བ་ནེ་ཙོ་སོགས་ཁ་བཅིང་ན་ཞིང་གི་ཁྱོན་དང་སྦྱར་བའི་བྱེ་མས་དང་ཐལ་བ་ལ་བཟླས་བརྗོད་བརྒྱ་རྩ་བརྒྱད་བཟླས་ཏེ་གཏོར་ན་དེ་དག་ཁ་འཆིང་ངོ་། །ཧ་ཅང་ཆར་ཆེས་ན་སངས་རྒྱས་ལ་ཕུལ་བའི་མེ་ཏོག་རེ་རེ་ལ་བཟླས་བརྗོད་ཉེར་གཅིག་བཏབ། གཙང་མའི་གནས་སུ་དཀྱིལ་འཁོར་གྱི་དབུས་དག་ཏུ་བུམ་པ་གང་བའི་སྟེང་ཁམ་ཕོར་གཙང་མའི་ནང་དུ་མེ་ཏོག་གཙང་མ་ལ་སྔགས་བཏབ་པ་དེ་བསྲེག་ན་ཆར་པ་འཆད་དོ། །སེར་བ་དྲག་པོ་འོང་ན་སེ་བ་ཉ་མིག་ལྕུག་མ་ལ་བཟླས་བརྗོད་བརྒྱ་རྩ་བརྒྱད་བཏབ་སེར་བ་འོང་ངོས་སུ་ཀླད་ལ་བསྐོར་ཞིང་བྱ་བས་ན་འཆད་དོ། །ཡང་ན་ཐལ་ཆེན་དང་། ཡུངས་ཀར་ལ་བཟླས་
བརྗོད་བརྒྱ་རྩ་བརྒྱད་བྱས་པའི་ཐུམ་པོ་ལྕུག་མ་ལ་བཏགས་ཏེ་བཅུག་ན་སེར་བ་འཆད་དོ། །འབྱུང་པོ་ཤ་ཟ་ཡི་དྭགས་དང་བརྗེད་བྱེད་སོགས་གདོན་གྱིས་ཟིན་པ་ལ་དཀྱིལ་འཁོར་འདོམ་གང་གྲུ་བཞི་པའི་སྟེང་བུམ་པ་གཙང་མ་ལྔ་བཞག་སྟེ་གུ་གུལ་གྱི་དུ་བས་བདུག་ནས། ཡུངས་ཀར་ག་བུར་ཙནྡན་གླ་རྩི་སོགས་སྨན་སྦྱར་ཏེ་བཟླས་བརྗོད་བརྒྱ་རྩ་བརྒྱད་བྱས་ཏེ། ནད་པ་གོས་དང་ཟས་དཀར་པོ་སྦྱར་ལ་དཀྱིལ་འཁོར་དུ་གཞུག་ནས་བུམ་པའི་ཆུས་བཀྲུ་བར་བྱ་ཞིང་། སངས་རྒྱས་ལ་སྐུ་ཁྲུས་གསོལ་བའི་ཆུས་བཀྲུས་ཤིང་བླུད་ན་ནད་གདོན་ལས་ཐར་ཞིང་གདོན་གྱིས་གླག་མི་རྙེད་དོ། །བུད་མེད་ཀྱི་བུ་མ་ཐོན་བ་ལ་ཆུ་ལ་ལྔའམ་བདུན་བཟླས་ནས་བླུད་ན་བདེ་བར་བཙའོ། །མོ་གཤམ་བུ་མེད་པ་ལ་སངས་རྒྱས་ལ་སྐུ་ཁྲུས་གསོལ་བའི་ཆུ་ལ་བཟླས་པ་ཉི་ཤུ་བྱས་ནས། ཁྲུས་བྱས་ལུས་གཙང་མར་གྱུར་པ་ལ་ཆུ་དེ་བླུད་ན་བུ་ཚ་འབྱུང་ངོ་། །ལམ་དུ་ཞུགས་ཏེ་འགྲོ་ན་སྐུད་པ་དང་གོས་ཀྱི་གྲྭར་བཟླས་བརྗོད་བདུན་བྱས་ནས་མདུད་པ་བདུན་མདུད་ཅིང་བཟླས་ཏེ་སོང་ན་བདེ་བར་འགྲོ་ཞིང་དོན་འགྲུབ་ལ་དགྲ་དང་ཉེ་ཞོ་མེད་པར་འགྲོའོ། །ཡིད་གཞུངས་པར་འདོད་ན་མར་དང་འོ་ཐུག་ལ་བཟླས་ཏེ་བཟའ་བར་བྱའོ། །ཡིད་འཐད་པའི་མི་དང་འགྲོགས་ཤིང་མཛའ་བར་འདོད་ན། མེ་ཏོག་དང་རྩྭ་ཤིང་དང་འབྲས་
བུའམ་འཇིམ་པ་དེ་དག་ལག་པ་གཡས་པའི་ཆང་པར་བཅུག་ལ་བཟླས་བརྗོད་བརྒྱ་རྩ་གཅིག་བཏབ་སྟེ་གང་གི་ལག་ཏུ་བྱིན་པ་ན་དེ་དང་རྟག་ཏུ་མཛའ་བར་འགྱུར་རོ། །རྟ་སོགས་ཕྱུགས་འཆི་བར་ཉེ་བ་ན་ཆུ་ཡུངས་ཀར་བཅས་ལ་བཟླས་བརྗོད་བརྒྱ་རྩ་བརྒྱད་བྱས་ནས་གཏོར་ན་སོས་སོ། །ཡང་ན་ཡུངས་ཀར་ཐུམ་པོ་ལ་བཟླས་པ་བྱས་ནས་མགུལ་དུ་བཏགས་པར་བྱའོ། །དེས་ནད་མེད་ཅིང་བདེ་བར་འགྱུར་རོ། །ཡུངས་ཀར་དང་གུ་གུལ་ལ་སྔགས་བཟླས་ཏེ་བདུག་ན་མཁའ་འགྲོ་མའི་གདོན་སོགས་ལས་ཐར་བར་འགྱུར་རོ། །ཡུངས་ཀར་ཐུམ་པོ་ལ་བཟླས་བརྗོད་བརྒྱ་སྟོང་འབུམ་དུ་བྱས་ཏེ་སྒོ་ལ་གདགས་ན་མི་ནད་ཕྱུགས་ནད་མིང་ཡང་མེད་ཅིང་བདེ་བར་འགྱུར་རོ། །ན་མོ་རཏྣ་ཏྲཱ་ཡཱ་ཡ། ཨོཾ་ཡེ་དྷརྨཱ་ཧེ་ཏུ་པྲ་བྷ་བ་ཧེ་དུནྟེ་ཥཱནྟ་ཐཱ་ག་ཏོ་ཧྱ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་བྃ་བཱ་དཱི་མ་ཧཱ་ཤྲ་མ་ཎཿཡེ་སྭཱ་ཧཱ། ཞེས་བཟླས་པས་ནད་གདོན་གནོད་པ་ཀུན་དང་བྲལ་ཞིང་བསམ་པ་ཡོངས་སུ་རྫོགས་པ་དང་དམ་པའི་ཆོས་ཡོངས་སུ་གཟུང་བར་འགྱུར་རོ། །འདི་དེ་བཞིན་གཤེགས་པའི་ཕྱག་རྒྱ་ཡིན་པས་ན་གང་ལ་དམིགས་ནས་བཟླས་པ་ཡང་ཡེ་ཤེས་ཀྱི་རང་བཞིན་དུ་འགྱུར་ཏེ་ཕན་ཡོན་བསམ་གྱིས་མི་ཁྱབ་པ་སངས་རྒྱས་ཐམས་ཅད་ཀྱི་གསུང་གི་མཛོད་གཅིག་
པུ་ཡིན་ནོ། །གཞན་ཡང་རྟེན་འབྲེལ་སྙིང་པོ་བཟླས་ཏེ་གང་སྣང་རྟེན་འབྲེལ་གྱི་ཕན་དཔྱད་ཇི་ལྟར་རིགས་པ་བྱས་ན་བདག་གིས་ཇི་ལྟར་བསམ་ཞིང་བརྩམས་པ་དེ་བཞིན་རྟེན་འབྲེལ་བསླུ་མེད་ཀྱིས་ཕན་པར་འགྱུར་བ་ཡིན་ནོ། །ས་མ་ཡ༔ རེའུ་མིག་ཞེ་དགུ་པ་ལ་བརྟེན་ནས་རིག་སྔགས་བཟློག་པ་ནི། མཐིང་ཤོག་མཐོ་གང་པར་གསེར་གྱིས་རེའུ་མིག་ཞེ་དགུ་ལ། ཨ་ཨ་ནས་གརྦྷ་ཨཱཿཞེས་པའི་བར་གྱི་སྔགས་རྣམས་དཔེའུ་རིས་བཞིན་དབུ་ཅན་དུ་བྲིས་ལ་གཞི་དཀར་པོའི་སྟེང་དུ་བཞག །རང་འཇམ་དཔལ་དུ་གསལ་ལ་བཟླས་པ་ཅི་རིགས་བྱ། ཙཀྲ་མི་དམིགས་པའི་ངང་ལས་རེའུ་མིག་རེ་རེ་གཞལ་ཡས་ཁང་རེར་གྱུར་པའི་དབུས་སུ་ཡིག་འབྲུ་རྣམས་ལས་འཇམ་དཔལ་རེ་རེ་གསལ། ཡེ་ཤེས་པ་སྤྱན་དྲངས་ནས་བསྟིམས་ལ་དབང་བསྐུར་རྒྱས་གདབ་བྱ། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར་ཨོཾ་ཧཱུྃ་ཧྲཱིཿ བྷ་ག་ཝཱན་ཛྙཱ་ན་མཱུརྟྟི་ཝཱ་གཱི་ཤྭ་ར་མ་ཧཱ་པཱ་ཙཿ སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷེ་དྷརྨ་དྷ་ཏུ་ཛྙཱ་ན་གརྦྷ་ཨཱཿཞེས་པའི་སྔགས་ཁྲི་ཕྲག་གཅིག་བཟླ། རྟགས་ནི་རྨི་ལམ་དུ་གཡུལ་འགྱེད་པ་དང་སྟོབས་འགྲན་པས་རང་རྒྱལ་བ། ཤིང་བཅད་པ་དང་མཚོན་རྣོན་པོ་ཐོགས་ནས་གཞན་འཇོམས་པ་སོགས་ཡིན་ཏེ་དེ་ལྟ་བུ་བྱུང་ན་གྲུབ་བོ། །མཐར་རྟེན་སྙིང་བརྒྱས་
རབ་གནས་བྱས། ལྷ་འོད་དུ་ཞུ་ནས་ཡིག་འབྲུར་བསམ། དར་སྣ་ཚོགས་ཀྱིས་དྲིལ་ལ་སྔགས་པ་དམ་ཉམས་ཀྱིས་མ་རེག་པར་བྱས་ཏེ་རང་ལུས་ལ་བཅིང་བས་ཕ་རོལ་མི་དང་མི་མ་ཡིན་གྱི་རྦོད་གཏོང་དང་བསམ་སྦྱོར་ངན་པ་ཐམས་ཅད་ཀྱིས་མི་ཚུགས་ཤིང་ཕར་ལ་འཇོམས་པའི་ནུས་པ་དང་ལྡན་ནོ། །གཞན་ཡང་སྔགས་འདི་ནི་འཇམ་པའི་རྡོ་རྗེའི་གསང་སྔགས་མཆོག་ཏུ་གྱུར་པ་ཡི་དམ་ཞི་ཁྲོ་རབ་འབྱམས་ཀྱི་སྔགས། མཆོག་ཐུན་མོང་གི་དངོས་གྲུབ་མཐའ་དག་འདི་ཉིད་བཟླས་པས་གྲུབ་པར་བྱེད་པའོ། །ས་མ་ཡཿ རྒྱཿ དེ་ལྟ་བུ་ཤིན་ཏུ་གསང་བའི་སྔགས་ཀྱི་ལས་དགུ་པོ་འདི་ནི་ལས་སོ་སོ་ལ་བསྔགས་པ་དེ་ཙམ་དུ་མ་ཟད་རིག་སྔགས་ཐམས་ཅད་གྲུབ་པའི་མན་ངག་དང་ཤེས་རབ་འཕེལ་བའི་ཐབས་བླ་ན་མེད་པ་དང་ལས་ཐམས་ཅད་ཀྱི་སྒྲུབ་བྱེད་དམ་པ་མཐར་ཐུག་པ་ཡིན་པས་མ་སྦས་པར་བཀོད་པ་འདི་ཤིན་ཏུ་གསང་བར་བྱའོ། །ཨི་ཐི་རྒྱ༔ དེ་ནས་སྒོ་གསུམ་ལ་བརྟེན་པའི་ལས་བདུན་ནི། དང་པོ་ནད་སོགས་ཉེས་པ་ཞི་བ་ལ། རང་འཇམ་དཔལ་གྱི་སྐུ་སྟོང་གསལ་གྱི་རང་བཞིན་ཅན་རྩ་གསུམ་འཁོར་ལོ་བཞི་རྩ་ཕྲན་དང་བཅས་པ་གསལ་བཏབ་ལ། སྙིང་གའི་ཐུགས་སྲོག་དང་སྔགས་ཕྲེང་ལས་འོད་ཟེར་ཡེ་ཤེས་ཀྱི་བདུད་རྩིའི་རང་བཞིན་ཅན། རེག་
པ་ཙམ་གྱིས་ཁམས་ཀྱི་ཉེས་པ་ཀུན་འཇའ་ལྟར་ཡལ་བར་བྱེད་ཅིང་བདེ་ཆེན་བསྐྱེད་པ། དེ་ཡང་ཚ་བ་ལ་མདོག་དཀར་པོ་བསིལ་བའི་རྣམ་པ། གྲང་བར་དམར་པོ་ཚ་བ། རླུང་སོགས་དང་ནད་སྤྱི་ལ་དམར་སེར་བདེ་བའི་རྣམ་པ་ཅན་གྱིས་རྩ་གནས་ཐམས་ཅད་བརྒྱུད་དེ་ལུས་གང་ནད་གདོན་སོགས་ཁམས་ཀྱི་ཉེས་པ་ཐམས་ཅད་དབང་པོའི་སྒོ་དང་བ་སྤུའི་བུ་ག་ནས་རླངས་པ་སྔོ་དམར་གྱི་རྣམ་པར་ཐོལ་གྱིས་ཕྱིར་ཕྱུངས། ལུས་ནང་ཐམས་ཅད་བདུད་རྩིས་གང་ནས་ལུས་འོད་ལམ་ལམ་དུ་བདེ་དྲོད་འབར་བར་བསམ་ཞིང་སྔགས་བཟླས་པས་ནད་གདོན་ཀུན་ཞི་ཞིང་ཚེ་དང་ལུས་ཀྱི་བཅུད་ལེན་གྲུབ། བདེ་དྲོད་འབར་ཞིང་རིམ་གྱིས་གོམས་པས་དངས་མའི་ལུས་སུ་འགྱུར་རོ། །དེའང་ལུས་སྤྱིར་དམིགས་པས་གཟུགས་སྡུག་ཅིང་ཡིད་དུ་འོང་། སྤྱི་བོའི་འཁོར་ལོ་ཆེད་དུ་དམིགས་པས་བདེ་བ་རྒྱས་ཤིང་བཅུད་འཕེལ། མགྲིན་པར་དམིགས་པས་ངག་སྙན་ཞིང་ལོངས་སྤྱོད་རྒྱས། སྙིང་གི་འཁོར་ལོར་དམིགས་པས་མངོན་ཤེས་འཆར་ཞིང་ཡིད་བདེ། ལྟེ་བར་དམིགས་པས་དྲོད་འབར་ཞིང་བག་ཕེབས། ཐུན་མོང་དུ་བློ་གསལ་ཞིང་ཉམས་དགའ་བར་འགྱུར་རོ། །ས་མ་ཡཿ རང་ངམ་གཞན་གྱི་སྒོ་གསུམ་ཕ་རོལ་གྱིས་བྱད་དུ་བཅུག་པ་སོགས་བཀྲོལ་བར་འདོད་ན། རང་ལྷར་གསལ་བའི་
ཡེ་ཤེས་ཀྱི་འོད་ཟེར་གྱིས་བཅིངས་པ་བཀྲོལ་ཐུག་པ་དབྱུང་མནན་པ་བཤིག་གཏད་པ་ཧྲུལ་བར་བསམས་ལ། རྩ་སྔགས་མཐར། ཨ་ཤིག་ཤིག་ཕྱུང་ཕྱུང་ཁྲོལ་ཁྲོལ་སྭཱ་ཧཱཿཞེས་བརྒྱ་རྩ་བརྒྱད་བཟླས་ནས་ཐོད་པ་མཚན་ལྡན་གྱི་ནང་དུ་ཆང་དང་ཨ་མྲྀ་ཏ་སྦྱར་བ་ལ་བཏབ་སྟེ་དེ་ཉིད་ཡེ་ཤེས་ཀྱི་བདུད་རྩིར་བསམ། ལྕེ་རྡོ་རྗེར་བསམས་ལ་ཐིག་པ་གསུམ་ལྕེ་ཐོག་ཏུ་བཞག །གནས་གསུམ་དུའང་ཐིགས་པ་གསུམ་གསུམ་བཞག་པས་སྒོ་གསུམ་བཅིངས་པ་ལས་གྲོལ། མནན་གཏད་ངག་མནན་ལ་སོགས་པ་ཐམས་ཅད་རྨེག་མེད་པར་འགྱུར་རོ། །ས་མ་ཡ༔ བྱེ་བྲག་ཏུ་བདག་གི་ངག་གཞན་གྱིས་མནན་པ་དང་ངག་རྐུ་བའི་སྒོ་ནས་ནུས་པ་ཉམས་པར་བྱས་པ་ན། རང་འཇམ་དཔལ་ཐུགས་ཀའི་སྔགས་དང་བཅས་པ་གསལ་བཏབ། གྲེ་བར་ཡི་གེ་མཱུྃཿ དམར་སེར་ལས་འོད་འཕྲོས་ཕྱོགས་དུས་རྒྱལ་བའི་བྱིན་རླབས་དང་ཆབས་གཅིག་བདག་གི་ངག་ཕ་རོལ་གྱིས་བརྐུས་པ་ཐམས་ཅད་ཁབ་ལེན་གྱིས་ལྕགས་ཕྱེ་ལྟར་བསྡུས་ནས་གྲེ་བའི་མཱུྃཿལ་ཐིམ། མཱུྃཿཡིག་ཉི་མ་འཆར་ཁའི་འོད་ཟེར་དང་བདུད་རྩི་དམར་སེར་གྱིས་ངག་མནན་པ་སོགས་ཀྱི་ཉེས་པ་གཞི་མེད་དུ་སྦྱངས་ནས་རང་ལུས་ལྟེམ་མེ་གང་བར་བསམས་ལ། རྩ་སྔགས་རེ་རེ་དང་སྔགས་ཚན་ལྔ་པོ་འདི་སྤེལ་ཏེ་
བཟླའོ། །མ་ཏིའུ་རབ་ནན་ཁྲོལཿ ལྕེ་ཏིའུ་རབ་ནན་ཁྲོལཿ ཙི་ཏི་འུར་པ་ནན་ཁྲོལཿ མ་མ་དེ་བ་ཁྲོལ་ཕྱེཿ ས་མ་ཡ་ཁྲོལཿ ཞེས་ཐོ་རངས་བདུན་ནམ་ཉེར་གཅིག་ལ་སོགས་པར་བཟླས་ན་ངག་མནན་པ་ལ་སོགས་པ་ཉི་མས་མུན་པ་སེལ་བ་ལྟར་ཞི་ཞིང་སྔགས་ཀྱི་ནུས་པ་རྒྱས་པར་འགྱུར་རོ། །ས་མ་ཡ༔ རང་གི་སྔགས་ཀྱི་ནུས་པ་བསྐྱེད་ན། རང་འཇམ་དཔལ་དུ་གསལ་བའི་ལྗགས་རྡོ་རྗེ་ཕ་ལམ་གྱི་རལ་གྲི་དམར་པོའི་ལྟེ་བར་ཨོཾ་ཨཱཿཧཱུྃ་བརྩེགས་མར་གནས་པའི་མཐར་བཟླ་བྱའི་སྔགས་ཕྲེང་དམར་པོ་དང་། དེའི་ཕྱི་རིམ་ཨཱ་ལི་དང་ཀཱ་ལི་དང་རྟེན་འབྲེལ་སྙིང་པོ་དམར་སེར་གྱི་སྔགས་ཕྲེང་གསལ་བཏབ། འོད་ཟེར་གྱིས་སྲས་བཅས་རྒྱལ་བའི་བྱིན་རླབས་ཐམས་ཅད་གསུང་རྡོ་རྗེའི་ངོ་བོ་ཨཱ་ལི་ཀཱ་ལི་དམར་སེར་གྱི་རྣམ་པར་སྤྱན་དྲངས། ལྕེའི་འཁོར་ལོ་ལ་ཐིམ་པས་སྔགས་ཀྱི་ནུས་པ་རྒྱས་པར་བསམས་ལ། ཨོཾ་ཨཱཿཧཱུྃ་ཨོཾ་ཨ་ར་པ་ཙ་ན་དྷཱི། ལྟ་བུའི་འབྲུ་གསུམ་རྩ་སྔགས་སྦྱར་བའི་མཐར། ཨོཾ་རུ་ཙི་ར་མ་ཎི་པྲ་ཝརྡྷ་ན་ཡེ་སྭཱ་ཧཱ། ཧྲཱིཿབཛྲ་ཛྭི་ཧོ་མནྟྲ་དྷ་ར་ཝརྡྷ་ནི་ཨྃཿ དབྱངས་གསལ་རྟེན་སྙིང་བཏགས་ཏེ་ཉེར་གཅིག་སོགས་ཅི་ནུས་བཟླས། ཐུན་མཐར་སྔགས་ཉིད་ལྕེ་ལ་བསྟིམ་ཞིང་རྒྱལ་བ་ཐམས་ཅད་ཀྱི་གསུང་རྡོ་རྗེ་མི་ཤིགས་པའི་ངང་དུ་རོ་གཅིག་མཉམ་
པ་ཉིད་དུ་བལྟ་བར་བྱའོ། །དེས་ནི་སྔགས་ཀྱི་ནུས་པ་མེ་ལྟར་འབར་ཞིང་སྔགས་ཐམས་ཅད་བཟླས་པ་ཙམ་གྱིས་འགྲུབ་ཅིང་སངས་རྒྱས་ཐམས་ཅད་ཀྱི་བྱིན་གྱིས་བརླབ་པར་འགྱུར་རོ། །ས་མ་ཡཿ འཕྲལ་གྱི་ཀུན་རྟོག་རྩུབ་ཅིང་བག་མི་ཕེབས་པ་ལྟ་བུའི་ཁམས་འདུས་པའི་སྐྱོན་སེལ་བ་ལ། རང་ལྷའི་རྣམ་པས་སྔགས་ཡིད་ཀྱིས་བཟླས་པས་རླུང་སེམས་ངན་པའི་ཆ་ཐམས་ཅད་སྙིང་ནང་དུ་ཧ་དཀར་པོ་ལ་སིབ་སིབ་འདུས་ཏེ་མོག་པོར་སོང་བ་ཁ་ནས་ལིང་གིས་ཧ་ཞེས་བཏོན་ཏེ་མདུན་གྱི་མཁའ་ལ་འཇའ་ལྟར་ཡལ་བར་བསམས་ལ་ཅི་ཡང་མི་དམིགས་ཧད་དེ་ཇི་གནས་སུ་བཞག །དེ་ལྟར་ལན་གཅིག་གམ་ཁམས་དང་བསྟུན་ཏེ་ལན་ཁ་ཡར་བྱས་པས་སྙིང་རླུང་དང་ཁམས་འདུས་སོགས་སྐྱོན་ཀུན་ཕྲལ་དུ་སེལ་ཞིང་ཕན་ཡོན་ཆེའོ། །ས་མ་ཡ༔ ཡང་རྐྱེན་ངན་དང་ཉམ་ང་བ་སོགས་འཚུབས་ཀྱི་རྣམ་པ་བྱུང་ཚེ། རང་གི་སྙིང་ནང་ཨ་དཀར་པོའི་འོད་ཀྱིས་ལུས་ཀྱང་མེ་ལོང་ལ་ཧས་བཏབ་པ་ལྟར་འོད་དུ་ཡལ་ཏེ་སྙིང་ཁའི་ཨ་ལ་ཐིམ་པ་དེ་ནམ་མཁར་ལིང་ངེར་གནས་པ་ལ་དམིགས་ཏེ་རྩ་སྔགས་མཐར་ཨ་བཏགས་པ་ཉེར་གཅིག་བཟླས་མཐར་ཨ་ཉིད་ནམ་མཁར་ཡལ་བར་བསམས་ལ། རང་སེམས་དང་ནམ་མཁའ་དབྱེར་མེད་དུ་འདྲེས་པའི་ངང་ལ་ཅི་ཡང་ཡིད་ལ་མི་བྱ་
བར་ལྷོད་དེ་བཞག་པ་ལ་ཡུན་ཇི་གནས་སུ་བྱས་པས་གྲིབ་དང་བྱད་ཕུར་གཏད་མནན་བཅིང་བ་དང་། རྣམ་རྟོག་ངན་པ་དང་འདྲེ་གདོན་ཕྱོགས་ངན་སྲི་སྐེག་དང་། རེ་གནས་སུ་གྱུར་པ་ལ། རྒྱལ་ཁམས་ཀྱི་ཁ་འདྲེ་མིག་འགོང་ལྟ་བུའི་གདོང་ཟུར་གྱི་སྣ་ཁ་ཕོག་པ་སོགས་ཕྱི་ནང་གི་འཚེ་བ་ཐམས་ཅད་ཕྲལ་དུ་དངས་ནས་སླར་ཡང་གནོད་མི་ནུས་པར་འགྱུར་རོ། །ས་མ་ཡཿ ཡང་རང་སེམས་རྨུགས་འཐིབས་ཀྱི་ངང་ནས་གསལ་དངས་ཕྱེད་པར་མ་ནུས་ནས་རིག་པའི་རྩལ་ཀ་ཕྱོགས་མེད་དུ་རྒྱས་མ་ནུས་ན། ཤེས་རབ་ཡེ་ཤེས་ཀྱི་རྩ་སྒོ་འབྱེད་པའི་མན་ངག་ཁྱད་པར་ཅན་ནི། ཐོག་མར་རང་རིག་ཡེ་སྟོང་འོད་གསལ་ཆེན་པོ་བཅིང་གྲོལ་དང་བྲལ་བ་སྤོབས་པའི་གཏེར་བརྒྱད་ཀྱི་འབྱུང་གནས་དེ་ཉིད་གདོད་མའི་འཇམ་དཔལ་དཔའ་བོར་ངེས་པར་འདྲོང་བར་བྱས་ལ། དེ་ནས་རང་འཇམ་དཔལ་གྱི་སྐུ་འོད་ལུས་སྟོང་སངས་དུ་གསལ་བའི་སྐུ་དབུས་སུ་ཡེ་ཤེས་ཀྱི་རྩ་དབུ་མ་སྦོམ་ཕྲ་རང་གི་མཐེའུ་ཆུང་གི་ཚད་ཙམ་ལ་གསང་བ་ནས་སྤྱི་བོའི་བར་ཁང་སྟོང་དུ་ཀ་བ་ལྟར་ཟུག་པ། མར་སྣེ་རྡོ་རྗེའི་རྩེ་མོར་ཕུག་རྡུག་ཏུ་ཡོད་པ། ཡར་སྣེ་ལ་རྩ་འདབ་གྱེས་པ་དབང་པོའི་སྒོ་རྣམས་ལ་ཧ་རེ་མ་བསྒྲིབ་པར་ཟུག་ལ། དེའི་ནང་ཐམས་ཅད་སྟོང་སངས་མཐིང་ཀའི་རྣམ་པ་དེའི་ནང་དུ་རིག་པ་ཡེ་ཤེས་ཀྱི་ངོ་བོ་འོད་ཀྱི་ཐིག་ལེ་ཟླུམ་པོ་ཆུ་མིག་ལ་རྡོ་བོར་བ་
ལྟ་བུ། ཕྱི་ནང་མུ་ཁྱུད་ཀྱི་ར་བ་དུ་མ་ཅན་གྱི་དབུས་ན། འོད་ཀྱི་ཐིག་ལེ་ཤེལ་དཀར་གྱི་ཕྲེང་བ་ལྟ་བུ་ལུ་གུ་རྒྱུད་དུ་འབྲེལ་བའི་རང་བཞིན་ཅན་རྩ་སྔགས་ས་བོན་དང་བཅས་པའི་དབྱིབས་སུ་གནས་པ། དེ་དག་གི་བར་མཚམས་ཐམས་ཅད་འོད་ལྔའི་སྣང་བ་འབར་བས་ཁྱབ་པ་དེ་ལྟ་བུའི་འཇའ་ཐིག་སྔགས་གསུམ་གྱིས་དབུ་མའི་ནང་སྟེང་འོག་བར་མཚམས་ཐམས་ཅད་ཐེམ་མེ་རེ་རེ་གང་བ་དེ་ལ་སེམས་གཏད། དེ་ནས་སྔ་མར་དམིགས་པ་ཟིན་པ་དང་རིམ་པས་སྐུ་ལུས་དང་གོང་གི་དབུ་མ་རྒྱ་ཇེ་ཆེར་བསྐྱེད་དེ། ཁྱིམ་གང་དང་མཐོང་གང་གི་ནམ་མཁའ་སོགས་དེའི་ནང་དུ་ཚུད་དེ་ཐམས་ཅད་འོད་གསལ་གྱི་སྣང་བས་ཁྱབ་ཅིང་། མཐར་ནམ་མཁས་གར་ཁྱབ་ཏུ་རྒྱ་བསྐྱེད་ལ་དེའི་ནང་ཐམས་ཅད་འོད་གསལ་ཡེ་ཤེས་ཀྱི་སྒྲོན་མའི་ཐིག་ལེས་ཁྱབ་པར་བསྒོམས་ལ་དེ་དང་རང་བཞིན་གྱིས་དབྱེར་མེད་པའི་གཞོམ་མེད་སྔགས་ཀྱི་རང་སྒྲ་ཡིད་ཀྱིས་བཟླས་པ་ལས་ངག་བཟླས་མི་བྱ་བར་དམིགས་པའི་རྩོལ་བ་དྲག་ཏུ་བསྐྱེད། རེས་ལྷ་སྐུ་ཇེ་ཆུང་དུ་བསྡུས་ནས་ཐིག་ལེ་ནམ་མཁར་ཡལ་ནས་མི་དམིགས་པར་བཞག །རེས་སྤྲོ་བསྡུ་དང་བྲལ་བར་རིག་པའི་ངང་དུ་ཅོག་གེ་བཞག་པས། ཤེས་རབ་ཡེ་ཤེས་ཀྱི་རྩ་སྒོ་འབྱེད། སྤོབས་པའི་གཏེར་ཆེན་པོ་བརྒྱད་གྲོལ། རྨུགས་
འཐིབ་དང་ཉམས་གྲིབ་གཞི་མེད་དུ་སངས། འོད་གསལ་ཡེ་ཤེས་ཀྱི་རྟགས་སྣང་མུ་མེད་པར་འཆར་ཞིང་མྱུར་དུ་ཟུང་འཇུག་ཡེ་ཤེས་ཀྱི་སྐུ་ཡང་འགྲུབ་པར་བྱེད་ན་མཁའ་སྤྱོད་སོགས་ཐུན་མོང་གི་གྲུབ་པ་ལྟ་ཅི་སྨོས། འོད་གསལ་བའི་རང་མདངས་འདི་རྣམས་རྡོ་རྗེའི་ལུས་ལ་རིག་ཁམས་དང་དབྱེར་མེད་དུ་ཡེ་ནས་བཞུགས་པ་བླ་མའི་མན་ངག་གིས་ཤེས་པར་བྱས་ལ། དེ་ལྟ་བུར་རང་བཞིན་གྱིས་བཞུགས་པ་ལ་ད་ལྟ་དེའི་རྣམ་པ་ཙམ་ལ་དམིགས་པའི་རྩོལ་བཅས་བསྐྱེད་པའི་རིམ་པས་ཀྱང་ཡེ་ཤེས་འཆར་བར་བྱེད་པ་ནི་སྔགས་རྒྱུད་དུ་གསུངས་པའི་མན་ངག་ཟབ་མོ་ཡིན་ལ་འོད་གསལ་བའི་རང་མདངས་དངོས་ལམ་དུ་བྱེད་པ་ནི་རྩོལ་མེད་རྡོ་རྗེ་རྩེ་མོ་ལས་འབྱུང་ངོ་། །འདི་ནི་རྒྱུད་སྡེ་ཀུན་ལས་འཁོར་ལོའི་གནས་སུ་ཐིག་ལེ་སྣ་ཚོགས་ལ་དམིགས་པའི་འོད་གསལ་འཛིན་ཚུལ་དུ་མ་གསུངས་པས་ཅུང་ཟད་བསྟན་ཀྱང་བསྟན་ལ་ཇི་བཞིན་པ་སྦས་པའི་གནད། ཡང་དག་པའི་མན་ངག་གིས་གསལ་བར་བྱས་པའི་གདམས་པ་མྱོང་བས་གྲུབ་པ་འདི་ནི་རིག་སྟོང་འཇམ་དཔལ་དཔའ་བོའི་ཐུགས་ཀྱི་བྱིན་རླབས་ཆེན་པོའི་བབས་སོ་མོས་ལྡན་གྱི་སྐལ་པར་བྱོན་པ་ལགས་སོ། །ཟབ་ས་མ་ཡ་རྒྱ༔ ཨི་ཐི༔ དེ་ནས་ཕྱག་མཚན་ལ་དམིགས་པའི་ལས་གསུམ་ནི། ཕྱག་མཚན་རལ་གྲི་ལ་བརྟེན་ནས་གྲིབ་དང་
བར་ཆད་གཞོམ་པ་ལ། རང་ཉིད་ངོ་བོ་འཇམ་དཔལ་སྡུག་བསྔལ་ཀུན་གཅོད་ལ་རྣམ་པ་འོད་ཀྱི་རང་བཞིན་གྱི་རལ་གྲི་སྔོ་བསང་རེག་པ་ཙམ་གྱིས་གཅོད་པའི་རྣོ་ངར་དང་ལྡན་པ་གྱེན་དུ་འགྲེང་བའི་རྩེ་མོར་ཨོཾ་དཀར་པོ། སྐེད་པར་ཨཱཿདམར་པོ། ཡུ་བར་ཧཱུྃ་སྔོན་པོས་མཚན་པ། ལྕགས་སྲེག་ལ་མེ་སྟགས་ཀྱི་ཟིར་འཕྲོ་བ་བཞིན་དུ་མེ་ལས་གྲུབ་པའི་ཕཊ་ཀྱི་ཚྭ་ཚྭ་དྲག་པོ་རང་སྒྲ་དང་བཅས་པ་འཚུབ་ཅིང་འཕྲོ་བའི་རལ་གྲི་དེ་ལས་ཡེ་ཤེས་ཀྱི་མེ་དཔུང་ཕྱོགས་ཀུན་ཏུ་ཁྱབ་པར་འབར་བས་གྲིབ་དང་མི་གཙང་བ་དང་བར་ཆད་མི་མཐུན་པའི་ཕྱོགས་ཐམས་ཅད་ཐལ་བ་བུན་བུན་བསྲེག་པར་བསམ། འདི་དམིགས་པ་ཁོ་ནས་འཐུས་ཀྱང་ནན་ཏར་སྤྲོས་པ་ལ་དགའ་ན་རྩ་སྔགས་དང་ཨོཾ་ཨཱཿཧཱུྃ་ཕཊ་ཅེས་ཅི་ནུས་བཟླས་བཞིན་དམིགས་པས་གྲིབ་དང་བར་ཆད་ཐམས་ཅད་ཤིང་སྐམ་མེས་བསྲེག་པ་བཞིན་འཇོམས་བར་བྱེད་དོ། །ས་མ་ཡ༔ ཡང་ཕྱག་མཚན་ཨུཏྤལ་ལ་བརྟེན་ནས་དོན་གྲུབ་པར་བྱེད་པ་ནི། རང་ལྷར་གསལ་བའི་སྙིང་དེ་འཇམ་དཔལ་དོན་ཡོད་གྲུབ་པ་ཡེ་ཤེས་སྐུ་ཅན་ལ། རྣམ་པ་ཕྱག་མཚན་ཨུཏྤལ་དཀར་པོ་ཁ་འབུས་པ་ཤིན་ཏུ་ཡིད་དུ་འོང་བའི་དབུས་སུ་རླུང་སེམས་ཀྱི་ངོ་བོ་སྔགས་ཕྲེང་ས་བོན་དང་བཅས་པ་འོད་དུ་ཞུ་ནས་དགོས་འདོད་ཀུན་འབྱུང་གི་ནོར་བུར་གྱུར་པ། དེ་
ཡང་རང་བཞིན་གྱིས་རང་བྱུང་འདུས་མ་བྱས་པའི་ཡེ་ཤེས་ཀྱི་བདག་ཉིད་དུ་གནས་པ་ལ། ཕྱོགས་དུས་ཀྱི་སངས་རྒྱས་བྱང་སེམས་རྩ་གསུམ་རྒྱལ་བ་རབ་འབྱམས་སྐུ་དངོས་གནས་དང་བཅས་པ་དེར་འུབ་ཀྱིས་འདུས་ནས་རོ་མཉམ་འདུ་འབྲལ་མེད་པར་བཞུགས་ཤིང་། ཉན་རང་དང་སོ་སྐྱེའི་ལེགས་ཚོགས་དང་བསོད་ནམས་ཚད་མེད་པ་དང་། བརྟན་གཡོའི་དངས་བཅུད་དེ་མདོར་ན་འཁོར་འདས་ལམ་གསུམ་གྱི་དཔལ་ཡོན་ཐམས་ཅད་བུམ་བཟང་ནོར་བུ་དཔག་བསམ་བདུད་རྩི་སོགས་དགེ་ལེགས་ཀྱི་དངོས་པོའི་རྣམ་པས་ཁབ་ལེན་ལ་ལྕགས་འདུ་བའི་ཚུལ་དུ་འདུས་ནས་ཐིམ་པས་དེ་ལས་དྲན་པ་ཙམ་གྱིས་ཇི་འདོད་ཆར་དུ་འབབ་པར་བསམས་ལ། ཨུཏྤ་ལའི་ཕྱག་རྒྱ་སྙིང་ཁར་བཅའ་བཞིན་དུ་རླུང་བཟུང་ནས་ཡིད་བཟླས་སམ། ངག་ཏུ་རྩ་སྔགས་མཐར། མ་མ་སརྦ་ཨརྠ་སིདྡྷ་ཡེ་སྭཱ་ཧཱ། ཞེས་བཟླས་པས་དོན་གང་བསམ་པ་ཐམས་ཅད་འབད་མེད་ཡིད་བཞིན་དུ་གྲུབ་པར་འགྱུར་རོ། །ས་མ་ཡ༔ ཕྱག་མཚན་མདའ་གཞུ་ལ་བརྟེན་ནས་གནོད་འཚེ་གློ་བུར་དུ་བཟློག་པ་ནི། ལམ་དུ་ཞུགས་ཚེ་སྒོ་ཐེམ་གྱི་ཕྱིར་ཐོན་པའམ། དུས་སུ་གང་གནོད་པའི་ཕྱོགས་སུ་ཁ་བལྟས་ལ། རང་ངམ་གཞན་གྱིས་མཛུབ་མོའམ་ཤིང་བུ་སོགས་ཀྱིས་ས་ལ་མདའ་གཞུ་འགེངས་པ་ལྟ་བུའི་རྣམ་པ་ཙམ་མདེའུ་རྩེ་ཕར་
གཏད་པ་བྲིས་ལ། མཆོག་གཉིས་ཀྱི་སྟེང་ནས་རང་གི་རྐང་པ་གཉིས་ཀྱིས་མནན་ལ་འགྲེངས་ཏེ་འདུག་ཅིང་། རང་འཇམ་དཔལ་དབྱངས་ཕྱག་ན་མདའ་གཞུ་བསྣམས་པར་གསལ་བ་གང་གནོད་པའི་ཕྱོགས་སུ་མདའ་འཕངས་པས། ཕྱོགས་དེ་ནས་བརྟན་གཡོ་སྣང་སྲིད་ལས་བྱུང་བའི་ཉེས་ཚོགས་འཚེ་བ་ཇི་ཡོད་པ་དང་། བྱེ་བྲག་ཆེད་དུ་དམིགས་བྱའི་འཚེ་བ་ཐམས་ཅད་སྦུར་མ་མེས་བསྲེག་པ་ལྟར་རྗེས་ཤུལ་མེད་པར་ཟང་ཐ་ལེ་བཏང་ནས་ཤུལ་ལམ་བདེ་ཧ་རེ་བ་དོད་པར་བསམས་ལ། རྩ་སྔགས་ཤམ་དུ། མ་ཧཱ་ཤ་རི་ནི་ཕཊ་བྷྱོ་བཟློག་ཡ༔ ཞེས་འབྲུ་དགུ་བཏགས་ལ་བདུན་ནམ་ཉེར་གཅིག་ཙམ་བཟླས་རྗེས་རང་ངམ་གཞན་གྱིས་ས་རིས་དེ་དག་མདའ་སྟོང་གི་ཕྱོགས་ནས་ཕར་ལ་བསྡུས་པ་གར་འགྲོ་བའམ་གནོད་པའི་ཕྱོགས་སུ་གཏོར་ན་ལམ་དུ་འཇུག་པ་སོགས་ཀྱི་ཚེ་ཕྱོགས་ངན་དང་ལམ་དགྲ་འཇིགས་པ་སོགས་སྣོད་བཅུད་ཀྱི་ཉེ་བར་འཚེ་བ་མ་ལུས་པ་ཕྲལ་དུ་སྤུར་མ་རླུང་གིས་བདས་པ་ལྟར་བཟློག་པར་འགྱུར་ཞིང་། འཕྲང་བསྒུག་དང་རྦབ་དྲག་གནམ་ཐོག་ལྟ་བུའི་ཡང་བའང་ཐལ་བར་རླག་པར་བྱེད་ན་གཞན་ལྟ་ཅི་སྨོས་ཏེ་ཤིན་ཏུ་གལ་ཆེ་ན་སྔགས་བརྒྱ་རྩ་རེ་བཟླའོ། །ཚུལ་འདི་ནི་འབྱུང་གཞིའི་གནོད་པ་དྲག་པོའི་གདོང་སྣ་དང་། གཟུགས་མེད་ཀྱི་རྒྱུ་གདོང་། གཟུགས་
ཅན་གྱི་ངན་ཤོམས། ལོག་པའི་མཚན་མར་སྣང་བ། དམག་སྣ་ཟོར་སྣ་ཐན་ལྟས་ངན་པ་སོགས་ཕྱོགས་གང་ནས་བདག་ལ་གནོད་པའི་གདོང་དབལ་བསྟན་པའི་རིགས་སུ་གྱུར་པ་ཇི་ཡོད་པ་ཐམས་ཅད་དེ་མ་ཐག་ཏུ་རྩད་ནས་བཟློག་པར་བྱེད་པའི་ཐབས་དམ་པར་སྦྱར་བར་བྱ་སྟེ་ཤིན་ཏུ་ཟབ་ཅིང་གསང་བར་བྱ་བའོ། །སྲུང་མནན་སཱཙྪ་དཀར་ནག་གི་ལས་སྦྱོར་ནི། བཀྲ་ཤིས་པའི་ས་ལ་སཱཙྪ་དཀར་པོ་བརྒྱད་བྱ། དེའི་ནང་དུ་ཤོག་གུ་ལ་རྩ་སྔགས་སྲུང་ཤམ་ཡེ་དྷར་བཅས་བྲིས་ནས་གཞུག་ལ་ཕྱོགས་བརྒྱད་དུ་བཞག །སྐྱབས་སེམས་བདག་བསྐྱེད་རྗེས་སྟོང་པའི་ངང་ལས་སཱཙྪའི་ནང་དུ་འཇམ་དཔལ་ཞི་བ་གཞུང་བཞིན་བསྐྱེད། བྱིན་རླབས་རྒྱས་གདབ་དང་ཡེ་ཤེས་པ་སྤྱན་དྲངས་ཤིང་བསྟིམས་ནས་མཆོད་བསྟོད་བྱ། བསྒྲུབ་སྔགས་རཀྵཿསྤེལ་བ་བརྒྱ་རྩ་བརྒྱད་བཟླས། རང་འཇམ་དཔལ་དུ་གསལ་བའི་འོད་ཕྱོགས་མཚམས་ཀྱི་འཇམ་དཔལ་ལ་ཕོག་པས་དེ་དག་གི་ཞལ་ནས་སྔགས་བཟླ་བཞིན་པའི་སྔགས་ཀྱི་འོད་ཟེར་གྱིས་ཕྱོགས་ཐམས་ཅད་འཇམ་དཔལ་གྱི་གུར་དུ་བསམས་ལ་བྱང་ཆུབ་སྙིང་པོའི་བར་དུ་བར་ཆད་མི་མཐུན་པའི་ཕྱོགས་ཐམས་ཅད་སྲུང་ཞིང་སྐྱོབ་པར་བྱིན་གྱིས་བརླབས་པར་བསམ། དེ་དག་ནི་སྲུང་བའི་རྒྱལ་པོ་སྟེ་སྒྲུབ་པའི་བར་ཆད་ཞི་ཞིང་བཀྲ་ཤིས་པར་བྱེད་པའི་མཆོག་
གོ །ས་མ་ཡ༔ ཡང་ཕུང་ཤུལ་དང་དུར་ཁྲོད་ཀྱི་ས་ལ་བྲུབ་ཁུང་བྱ། དེའི་ནང་དུ་ལིང་ག་ལྕེ་བྲང་དཀྱིལ་དུ་ཐོན་པའི་སྟེང་རྡོ་རྗེ་རྒྱ་གྲམ་བྲི། དེའི་དབུས་ན་ཧཱུྃ་ནན་དང་། རྒྱ་གྲམ་ཐ་མར་མུ་ཁྱུད་གཅིག་བསྐོར་དེར། མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊཿ སྒྲུབ་པ་པོ་ལ་བར་དུ་གཅོད་པའི་གནོད་བྱེད་གང་ཡིན་པའི་ལུས་ངག་ཡིད་གསུམ་སཏྭཾ་བྷ་ཡ་ནན་ཧཱུྃ་ནན་སུམ་ནན། ཞེས་གཡོན་སྐོར་དུ་བྲིས། དེ་ཉིད་བསྒྲུབ་པའི་མཎྜལ་གྱི་འོག་ཏུ་གྲུ་གསུམ་ཁྲུ་གང་བ་ཞིག་གི་ནང་དུ་བཅུག །གྲུ་གསུམ་གྱི་ཟུར་རང་ལ་མི་བསྟན། དེ་སྟེང་རོ་གཡམ་ལ་རྡོ་རྗེ་རྒྱ་གྲམ་རི་རབ་བཅས་བྲིས་པས་བཀབ། དེ་ཡང་རྒྱ་གྲམ་ལ་ཧཱུྃ་ནན། རི་རབ་དཀྱིལ་དུ་ལཾ་ནན་བྲིས། དེ་སྟེང་སཱཙྪ་ནག་པོ་བཞག་སཙྪའི་ནང་དུ་རྩ་སྔགས་དང་ཡ་མཱནྟ་ཀའི་སྔགས་མནན་ཤམ་ཡེ་དྷར་བཅས་གཞུག །ཏིང་ངེ་འཛིན་ནི་བསྒྲུབ་པའི་བར་ཆད་ལ་བྱང་སེམས་བསྒོམས་ནས། བསྒྲུབ་པའི་མཎྜལ་འོག་དཔག་ཚད་བདུན་འདས་པ་ན། གཤིན་རྗེའི་ཁང་སྒྲོམ་ཟུར་གསུམ་པ་ནད་མཚོན་ན་བུན་འཐིབ་པའི་མུན་ཁང་དགུ་རིམ་གྱི་ནང་ན་ཏྲི་ལྗང་ནག་ལས་བར་ཆད་དམ་སྲི་ཐམས་ཅད་འདུས་པའི་ངོ་བོ། གཟུགས་རིང་ཞིང་ཡན་ལག་ལྕགས་སྒྲོག་གིས་བསྡམ་པ། གཡོ་འགུལ་མེད་པ་ལྕེ་བྲང་སྟེང་ཐོན་པ་རྒྱ་གྲམ་རི་རབ་
དང་བཅས་པས་མནན་པར་བསམས་ལ། དགུག་གཞུག་བཅིང་ཞིང་མྱོས་ཏེ་ཡུངས་ཀར་སོགས་ཐུན་བྲབས་པས་གཟིར་ཞིང་འཐིབ་པར་གྱུར། དེ་སྟེང་རི་རབ་དང་ས་གཞི་ཆུ་མེ་རླུང་སྟེ་དཀྱིལ་འཁོར་བཞི་རི་རབ་དང་བཅས་པ་ཁ་སྦུབ་པས་མནན། དེ་སྟེང་དཀྱིལ་འཁོར་བཞི་རི་རབ་བཅས་གྱེན་དུ་རིམ་བརྩེགས་ཀྱི་སྟེང་དུ་སཱཙྪ་འཇམ་དཔལ་ཁྲོ་བོའི་དཀྱིལ་འཁོར་དུ་བསྐྱེད་ནས་སྤྱན་དྲངས་ལ་བསྟིམ། བདག་བསྐྱེད་ཀྱི་འོད་ཟེར་གྱིས་མདུན་གྱི་ལྷ་རྣམས་བསྐུལ་བས། རྡོ་རྗེ་བྲོ་ཡི་ལས་ཀྱིས་རི་རབ་འབུམ་ལས་ལྗིད་ཆེ་བའི་གནམ་ལྕགས་ཀྱི་ཕུར་བུ་ཐོག་ལྟར་ལྷུང་བས་ལྕེ་དང་སྙིང་ཡན་ལག་བཞི་ཡི་དཀྱིལ་དུ་ཕུག་ནས་འོག་གཞིར་གཟེར་བཏབ་སྟེ་ནམ་ཡང་ཐར་བ་མེད་པ་སོགས་འབར་བའི་འདུ་འཕྲོས་གནོད་བྱེད་ཀྱི་མཐུ་རྨིང་ནས་ཉམས་ཤིང་བསྐལ་པའི་མཐར་གནོད་པའི་བསམ་པ་བཏང་ཞིང་བྱང་ཆུབ་ཀྱི་སེམས་སྐྱེས་པ་དེ་སྲིད་དུ་ཐར་བའི་དུས་མེད་པར་བསམས་ལ། དྲག་སྔགས་མནན་པའི་ཤམ་བུ་དང་བཅས་པ། ཨོཾ་ཨཱཿཧཱུྃ་མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊཿ དགྲ་བགེགས་དམ་སྲི་ནྲྀ་ཏྲི་རྦད་ཐུཾ་དྷ་ར་ཡཱ་དྷ་ར་ཡཱཿམཱ་ར་ཡ་མཱ་ར་ཡ་ནན༔ ཞེས་པ་འདི་བཟླ་ཞིང་མཐར་མི་དམིགས་པས་རྒྱས་གདབ་བོ། །དེས་བར་ཆད་ཐམས་ཅད་མི་ལྡང་ཞིང་མནན་པའི་མཆོག་ཏུ་འགྱུར་རོ། །གཞན་ཡང་དགྲ་བགེགས་སོ་
སོའི་མིང་སྤེལ་དང་། རྨི་ལམ་དུ་གནོད་པའི་གཟུགས་བྲིས་ཏེ་ཆོ་ག་འདིས་མནན་ན་དགྲ་བགེགས་སྟོབས་ཆུང་ན་མནན་པ་ཙམ་གྱིས་ནུས་པ་ཞི། སྟོབས་ཆེ་བ་ལ་དམིགས་སྔགས་ཀྱིས་ཇི་ལྟར་རིགས་པར་གཅུན་ན་གནོད་པ་རྨིང་ནས་འཇིག་ཅིང་སླར་ལྡང་བ་མི་སྲིད་པར་འགྱུར་རོ། །ས་མ་ཡ༔ རྒྱ༔ དེ་ནས་ཉེ་བར་མཁོ་བའི་ལས་བཅུ་གཉིས་ལས་དང་པོ་རྐྱེན་ངན་འདུལ་བའི་ལས་བཞི་ལས། ཐོག་མར་དུག་ཞི་བ་ནི་རང་ལྷའི་རྣལ་འབྱོར་གྱིས་སྔགས་ཕྲེང་གི་འོད་ཟེར་ཟླ་བ་ལྟ་བུས་ལུས་ལ་ཞུགས་པའི་དུག་དབྱུང་ཞིང་སྦྱང་། གཞན་ཡང་བརྟན་གཡོའི་དུག་གི་ནུས་པ་བཅོམ་ནས་བདུད་རྩིར་བསྒྱུར་བར་བསམས་ལ། རྩ་སྔགས་ལ་ཨོཾ་ཧ་སིང་ཧ་སིང་། ཀ་ལིང་ཧ་སིང་ཀ་མ་ར་ཏྲི་ཡེ་སྭཱ་ཧཱ། སྔགས་འདི་སྦྲེལ་ནས་གང་ལ་དོགས་པའི་ཟས་སོགས་ཀུན་ལ་བཏབ་པས་རྒྱུ་བ་དང་མི་རྒྱུ་བའི་དུག་ཐམས་ཅད་འཇོམས་པར་ངེས་སོ། །ས་མ་ཡཿ མཚོན་ཆ་སྲུང་ན་མཐིང་ཤོག་ལ་མཚོན་ཁ་སྙོལ་བར་བྱེད་པའི་ཡི་གེ་ཁྲོཾ་གསེར་གྱིས་བྲིས་ལ་རྩ་སྔགས་ཤམ་དང་བཅས་པས་བསྐོར་བ་དབུ་ཅན་དུ་འབྲི། དེ་དར་སྣ་ལྔས་གྲིལ་ལ་སྔགས་ཀྱིས་རབ་གནས་བྱས་ནས་མགུལ་དུ་བཏགས་པས་མཚོན་མཐའ་དག་སྲུང་བར་འགྱུར་ཏེ། ཤམ་སྔགས་ནི། ཨོཾ་རྣོ་སོད་
བཟློག་ཆུ་མ་དྲིལ་སྭཱ་ཧཱ། ཞེས་པ་སྟེ། གཞན་ཡང་རྒྱུན་དུ་འདྲེན་པ་དང་ས་ལ་བསྔགས་ཏེ་གཏོར་བས་མཚོན་ཆའི་དཔལ་ཐམས་ཅད་མར་མེ་ཡིས་བཞུས་པ་བཞིན་ཉམས་པར་འགྱུར་རོ། །ཏིང་ངེ་འཛིན་ནི་ལྷ་སྔགས་ཀྱི་འོད་ཟེར་ཡེ་ཤེས་ཀྱི་མེ་འབར་བས་མཚོན་ཆའི་རྣོ་ངར་ཐམས་ཅད་མར་བཞིན་དུ་བཞུས་ནས་མི་ཤིགས་པའི་རྡོ་རྗེའི་གུར་དུ་བསྲུང་བྱ་ཚུད་པར་བསམ་མོ། །ས་མ་ཡ༔ འབྱུང་པོའི་གདོན་འདུལ་བར་བྱེད་ན། གཏོར་ཚོགས་བཟང་པོ་བཤམས་ཤིང་ཡེ་ཤེས་དང་འཇིག་རྟེན་གྱི་དྲེགས་པ་ཐུགས་དམ་བསྐུལ་ཞིང་དཔང་དུ་གཟུག་ནས་རང་ཉིད་ཁྲོ་བོར་གསལ་བའི་སྐུ་ལས་ཁྲོ་མཚོན་མེ་དཔུང་གི་ཚྭ་ཚྭས་གནོད་བྱེད་གཟིར་བར་བསམས་ལ། ལྷའི་སྙིང་པོ་འདྲེ་བགེགས་འདུལ་བྱེད་ཀྱི་སྔགས་ཤམ་དང་བཅས་པ། ཨོཾ་ཨཱཿཧཱུྃ་མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊ། འབྱུང་པོ་གནོད་བྱེད་ཤ་ཏྲུྃ་ཙུ་ལུ་ཙུ་ལུ་ཕཊ་ཕཊཿ འདི་བཟླས་ནས་ཕུར་ཐུན་གྱིས་བྲབས་ན། གནོད་བྱེད་སྐད་ངན་ཙེ་རེ་རེ་འོང་། དེ་ཚེ་མནའ་བགག་འགགས་བསྡམ་རྗེས་གཅོད་བྱའོ། །རང་ལ་རྨི་ལམ་སོགས་སུ་གང་གནོད་པའི་གཟུགས་བརྙན་བྱས་ལ་སྙིང་གར་ཕུར་བུ་གདབ་ཅིང་དམིགས་པ་གཟིར། མིང་ཤེས་ན་གནོད་བྱེད་དང་ཤ་ཏྲུྃ་གི་བར་དུ་གདགས་ཏེ་བཟླས་སོ། །དེས་གནོད་
བྱེད་འདུལ་ཞིང་བགེགས་འཇོམས་པར་འགྱུར་རོ། །ས་མ་ཡ༔ བྱད་བཟློག་པ་ནི། རང་ལ་རྦོད་གཏོང་བྱུང་ན་བྱད་མའི་རྗེས་ས་དང་དྲི་མ་བསྲེས་པའི་ལིང་ག །མིང་རུས་བྲིས་ལ་སྙིང་གར་གླན་ནམ་གཞུག །མཆོག་ཕུར་སོར་བརྒྱད་པ་སྙིང་གར་བཏབ་ལ་དུག་ཁྲག་བྱུགས་པ། རང་གི་མལ་འོག་ཏུ་དོང་གྲུ་གསུམ་མམ་བྲུབས་ཁུང་དུ་བཞག །དེའི་ཁ་རོག་གཡམ་ལ་རྒྱ་གྲམ་བྲིས་པས་བཀབ། དེ་སྟེང་རང་ཉིད་འཇམ་དཔལ་ཁྲོ་བོར་གསལ་བས་འདུག་ལ་རྡོ་རྗེའི་སྲུང་བའི་འཁོར་ལོ་ལ་ཁྲོ་བཅུ་བཀོད་པ་ཞལ་ཕྱིར་གཟིགས་ནས་བཟློག་སྔགས་བསྒྲགས་པས་གུར་ཁང་གི་ཕྱི་རོལ་ནས་མེ་མཚོན་ཁྲོ་ཆུའི་ཐོག་སེར་འཕྲོས་པས་ཁྱད་མ་ཐལ་བར་བརླག་པར་བསམས་ལ། སྙིང་པོ་དང་རྦོད་གཏོང་བཟློག་པའི་སྔགས་སྦྲེལ་བ། ཨོཾ་ཨཱཿཧཱུྃ། མཱཉྫུ་ཤྲཱི་ཡ་མཱནྟ་ཀ་ཧཱུྃ་ཕཊཿ པ་ར་ཙཀྲ་ཧྲཱིཿ ཥྚི་ཨ་པ་ན་ཡ། ཆེ་གེ་མོའི་རྦོད་ཟོར་རཾ་སརྦ་བཟློག་བཟློག་ཡ་ཡཱ༔ ཞེས་པ་འདི་བཟླ་བར་བྱ་སྟེ། དེ་ཡང་སྔགས་འདི་བརྒྱ་རྩ་བརྒྱད་བཟླས་པས་ལོ་གཅིག་ཐུབ། སྟོང་རྩ་བརྒྱད་ཀྱིས་བྱད་ཕུར་ཐམས་ཅད་བཟློག་ཅིང་། ཁྲི་གཅིག་བཟླས་ན་རྦོད་གཏོང་ཐམས་ཅད་རྟག་ཏུ་བཟློག་པར་བྱེད་དེ། ཕ་རོལ་གྱིས་བྱས་པའི་བསམ་སྦྱོར་ངན་པ་རང་གཤེད་དུ་སློང་བར་འགྱུར་རོ། །
ས་མ་ཡ༔ ཡང་ཟློག་ནག་པོ་ཟབ་པའི་མཐར་ཐུག་ནི། རང་ལ་རྦོད་གཏོང་དང་དུས་སྐག་ཆག་ཆེ་ཉམ་ང་བྱུང་ན་བྱ་སྟེ་གཞན་གར་ཐོད་ཐོད་དུ་བྱས་ན་མི་རུང་བས་གཟབ་པར་བྱ། དེ་ཡང་ཉེར་དགུ་ལ་སོགས་པའི་དུས་ཚེས་རྩུབ་མོའི་གྲིབ་སོ་ས་ལ་ཕེབ་པའམ། ཉི་མ་དམར་ཐག་ཆད་པའམ་སྲོད་དུས་སུ་གོས་མགོ་མཇུག་བཟློག་སྟེ་གྱོན་ནས་ལྷོའམ་བྱད་མའི་ཕྱོགས་སུ་ཁ་བལྟས་ལ། ཐམས་ཅད་སྟོང་པའི་ངང་ལས་ཨེ་ལས་གནས་གྲུ་གསུམ་མཐིང་ནག་འབར་བའི་དབུས་སུ། བདག་ཉིད་ཡ་མཱནྟ་ཀ་མཐིང་ནག་མཚོན་ཆའི་རལ་པ་ཅན་གཡས་ལྕགས་ཀྱུས་དགྲ་བོའི་སྙིང་ནས་འདྲེན་པ། གཡོན་རལ་གྲིས་དགྲ་བགེགས་དུམ་བུར་གཏུབ་པའི་མདུན་དུ། ཁྲོ་ཆུའི་དུག་མཚོ་ཟི་ར་དམར་ནག་ཁོལ་བའི་དབུས་ན་ལས་གཤིན་དམར་ནག་གཅེར་བུ་ལྟེ་བ་ཡན་ཆད་མཚོ་ཡི་སྟེང་དུ་ཐོན་པ་ལག་གཉིས་ཉི་ཟླ་ཆ་ལང་བསྡེབ་པར་གསལ། བདག་མདུན་གྱི་བར་དུ་དགྲ་བགེགས་བྱད་མ་གང་ཡིན་བཀུག་ནས་དྲག་སྔགས་དུག་མཚོན་གྱིས་མྱོས་ཤིང་འཐིབ་པར་བསམས་ལ། ལག་གཡོན་རཀྴ་སོགས་ཕྲེང་ནག་ཐོགས་པ་ནང་དུ་བསྒྱུར་ཏེ། ཨོཾ་ཨཱཿཧཱུྃ་མཱཉྫུ་ཤྲཱི་ཡ་མཱནྟ་ཀ་ཧཱུྃ་ཕཊཿ ཅེས་བརྒྱ་རྩ་གཅིག་བཟླས། དེ་ནས་ལག་གཡོན་མཐེབ་མཛུབ་ཀྱིས་ཕྲེང་བ་རེ་རེ་ཕྱིར་བསྒྱུར་བ་དང་།
བཟློག་སྔགས་རྒྱལ་པོ་འབྲུ་ལྔ་པ་རེ་རེ་བཟླ་བར་བྱ་སྟེ་དམིགས་པ་ནི་རང་གི་མཐེབ་མོ་གསེར་གྱི་སྟ་རེས། མཛུབ་མོ་དངུལ་གྱི་གཏན་པའི་ཁར་དགྲ་བགེགས་བྱད་མའི་མགོ་ཧྲུག་གེ་བཅད་ནས་ལས་གཤིན་གྱི་ཞལ་དུ་འཕང་། གནམ་ས་བར་སྣང་ཐམས་ཅད་མེ་ཡི་གུར་གྱིས་ཁྱབ་ཅིང་། ལྕགས་བསྲེག་གི་ས་གཞིར་དྲག་སྔགས་ཀྱི་ཟི་ར་ཁོལ་བར་བྱད་མའི་ལུས་ཐུལ་ཐུལ་ཚིག་པར་བསམས་ལ། ཨྱཻ་ས་བྷྱོ་བཟློག་རྦད༔ ཅེས་བརྒྱ་ཐམ་པ་གྲངས་ཚང་བ་དང་། དེ་ལས་མི་མང་མི་ཉུང་བར་བྱས་ལ། མཐར་ཐལ་མོ་ལན་གསུམ་བསྡབས་བས་དགྲ་བོ་ཁ་ཕུང་རྗེས་མེད་དུ་བཏང་བར་བསམ། དེ་ནས་སྣོད་བཅུད་ཐམས་ཅད་འོད་དུ་ཞུ་གཞལ་ཡས་ཁང་ལ་ཐིམ། དེ་ལས་གཤིན་ལ་ཐིམ། ལས་གཤིན་རང་ལ་ཐིམ། རང་ཡང་མི་དམིགས་པའི་ངང་དུ་བཞག་གོ །འདི་ནི་བཟློག་པའི་རྒྱལ་པོ་སྟེ། ཕ་རོལ་གྱི་དྲག་སྔགས་དང་ངན་སྔགས་ཀྱི་ནུས་པ་གཞོམ་ཞིང་རྨིང་མེད་དུ་བརླག་པར་བྱེད་པ། གྲིབ་རྩོག་དང་གདོན་ཆེན་པོ་དང་དགྲ་སྟོབས་ཅན་ཐལ་བར་བརླག་པའི་ཐབས་དམ་པ། ཕུར་ཐོགས་ནུས་ལྡན་སྟོང་གིས་རྦད་གཏང་བྱས་ཀྱང་ཁོ་རང་གི་ནུས་པ་ཁོ་རང་གི་གཤེད་དུ་འབབ་པས་ནུས་པ་ཆེ་རིམ་བཞིན་མྱུར་དུ་འཆི་བར་བྱེད་པ།
ཆག་ཆེ་ཉམ་ང་ཐམས་ཅད་རྩྭ་སྦུར་མེས་བསྲེག་པ་བཞིན་མཐར་བྱེད་པ། གང་ལ་དམིགས་པ་མྱུར་དུ་བསྒྲལ་བའི་ལས་ལ་ཟབ་པ་ཀུན་གྱི་སྙིང་པོ་འདི་ཁོ་ན་སྟེ། མན་ངག་ཞལ་ཤེས་ཀྱི་མཐར་ཐུག་འདི་ན་གསལ་པོར་བཀོད་པས་སྐལ་མེད་ལ་རླུང་ཕྱོགས་ཙམ་ཡང་བསྟན་པར་མི་བྱའོ། །ས་མ་ཡ་རྒྱ༔ བཟློག་པ་གཉིས་དང་གདོན་གདུལ་བ་སཱཙྪ་ནག་པོའི་ལས་དང་བཞི་ནི་ཁྲོ་བོའི་སྔགས་ཤམས་ལ་གདགས་ཤིང་གཞན་མཐའ་དག་ནི་ཞི་བའི་སྔགས་ལ་སྦྱར་བར་བྱའོ། །དེ་ཡང་མན་ངག་གི་དབང་དུ་བྱས་ནས་ཞི་ཁྲོའི་སྔགས་སྦྲགས་ཏེ་དཔེར་ན་ཨོཾ་ཨཱཿཧཱུྃ་ཨ་ར་པ་ཙ་ན་མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊ༔ ཅེས་པ་བཞིན་ནོ། །ཨི་ཐིཿ ཡང་མངོན་ཤེས་སྒྲུབ་པའི་ལས་བཞི་ལས། མིག་མཐོང་དང་མངོན་ཤེས་འདོད་ན། འུག་པ་དང་པུ་ཤུད་དང་བྱི་ལའི་མིག་ལུང་ཐང་རྣམས་ར་དཀར་འོ་མས་སྦྲུས་ལ་རྩ་སྔགས་ཀྱི་ཤམ་དུ་རྣོ་མཐོང་གི་སྔགས་ཨོཾ་ཨཱཿཧཱུྃ་མ་དྷ་ལ་མ་དྷ་ལ་ཙཀྵུ་ཙཀྵུ་མ་ཧཱ་ཧ་ར་བཛྲ་ཙཀྵུ་པྲ་བེ་ཤ་ཕཊཿ འདི་སྦྲེལ་བ་བཟླས་ཤིང་རང་ལྷའི་མིག་གཡས་པ་ཉི་མ། གཡོན་པ་ཟླ་བ། དཔྲལ་བར་ཡེ་ཤེས་ཀྱི་མིག་ཕྱེ་བས་སྣང་སྲིད་ཐམས་ཅད་མཐོང་བར་བསམས་ལ་སྔགས་བཏབ་པའི་རྫས་དེ་མིག་དང་དཔྲལ་བར་བྱུགས་པས་སྲིད་པ་གསུམ་པོ་མཐོང་བར་འགྱུར་རོ། །ས་མ་ཡ༔ ༔
མངོན་པར་ཤེས་པ་འཆད་པར་འདོད་ན་ཐོག་མར་ཡི་དམ་ལ་མཆོད་པ་ཕུལ་ནས་མངོན་ཤེས་གསལ་བའི་གསོལ་འདེབས་དང་སྨོན་ལམ་རྩེ་གཅིག་བྱ། དེ་ནས་ཟླ་བ་ཉ་བའི་ཚེ་རང་ལྷར་གསལ་བའི་སྙིང་དཔལ་བེའུའི་ནང་དུ་ཨཱ་ལི་དམར་པོ་དང་ཀཱ་ལི་དཀར་པོ་ཤིག་ཤིག་གཡོ་བའི་འོད་ཟེར་དཀར་དམར་གྱི་ཕྲེང་བ་འཁྲུགས་པས་རང་རྒྱུད་ལ་བདེ་སྟོང་བསྐྱེད་ཅིང་དུས་གསུམ་ཤེས་བྱ་ཐམས་ཅད་ཡིད་ལ་མངོན་སུམ་ས་ལེར་གསལ་བའི་མངོན་ཤེས་ཐོབ་པར་བསམས་ལ། རྩ་སྔགས་ཤམ་དུ། ཏདྱ་ཐ། ཨོཾ་གྷི་པ་ཙཀྵུ་སྭཱ་ཧཱ། བརྒྱ་རྩ་ལ་སོགས་པ་ཇི་ནུས་སུ་བཟླས་པས་ཕ་རོལ་གྱི་སེམས་ཤེས་པ་ལ་སོགས་མངོན་པར་ཤེས་པ་དང་། བླང་དོར་མཐོང་བའི་ཉམས་རྩལ་སྣ་ཚོགས་འབར་བ་ཐོབ་བོ། །ས་མ་ཡ༔ རྨི་ལམ་གསལ་བར་འདོད་ན་ཐོག་མར་ཡི་དམ་ལ་མཆོད་པ་ཕུལ་ནས་འདོད་དོན་ལ་གསོལ་བ་བཏབ། དེ་ནས་རང་ལྷའི་ཐུགས་སྲོག་སྔགས་ཕྲེང་གི་རྒྱབ་ཏུ་ལས་སྔགས་ཀྱིས་བསྐོར་བ་ལས་འོད་འཕྲོས་རྒྱལ་བ་སྲས་བཅས་མཆོད། ཐམས་ཅད་ཀྱི་མཁྱེན་བརྩེ་ནུས་པའི་བྱིན་རླབས་བསྡུས། རང་གི་སྙིང་གའི་སྔགས་ལ་ཐིམ་པས་རྨི་ལམ་དུ་ཇི་ལྟར་འདོད་པའི་དོན་མཐོང་ཞིང་གསལ་བའི་དངོས་གྲུབ་ཐོབ། སླར་འོད་ཀྱིས་སྣང་སྲིད་ཀུན་གསལ་
བར་བསམས་ལ། རྩ་སྔགས་ཀྱི་ཤམ་དུ། ཨོཾ་ས་སྣ་བི་ལོ་ཀི་ནི་སིདྡྷ་ལོ་ཙ་ནི་ས་སྣམ། མེ་ཀ་ཐཱ་ཡ་སྭཱ་ཧཱ། ཞེས་སྔགས་ཀྱི་རྒྱལ་པོ་ཇི་ལྟར་རིགས་པ་བཟླས་ཤིང་། དུས་སུ་གཙང་མའི་ཆུ་ལ་ལན་བརྒྱ་རྩ་བརྒྱད་བསྔགས་པའི་ཆུས་གདོང་བཀྲུས་ནས་མི་སྨྲ་བར་གོང་གི་རྣལ་འབྱོར་ལ་གནས་པའི་སྙིང་གར་ས་བོན་དང་སྔགས་མར་མེ་འབར་བ་ལྟ་བུར་དམིགས་པ་རྩ་གསུམ་རྒྱལ་བ་ཏིལ་གང་ལྟ་བུའི་དབུས་སུ་ཡོད་པར་བསམ། གཏད་ནས་དགོས་པའི་དོན་ལ་དྲན་པ་ཉེ་བར་བཞག་སྟེ་ཉལ་ན། ཡིད་ལ་སེམས་པའི་དགོས་པ་དང་དུས་གསུམ་གྱི་བླང་དོར་སྐྱེ་བ་སྔ་ཕྱི་དང་ད་ལྟའི་བདེ་སྡུག་ལ་སོགས་པ་ཇི་བཞིན། ཤིན་ཏུ་གསལ་པོར་སྟོན་ཏེ། དགེ་མི་དགེའི་ལྟས་སྣ་ཚོགས་ཀྱང་ཉེ་བར་སྟོན་ཅིང་ཤེས་པར་བྱེད་དོ། །ས་མ་ཡ༔ པྲ་དབབ་ན་རང་ལྷའི་རྣལ་འབྱོར་ལ་གནས་པས་གཙང་སྦྲ་དང་ལྡན་པར་བྱས་ཏེ། སྙིང་གའི་ས་བོན་དང་རྩ་སྔགས་ལས་འོད་འཕྲོས་པས་ཡེ་ཤེས་དང་ལས་དང་འཇིག་རྟེན་གྱིས་བསྡུས་པའི་རྣོ་མཐོང་མཁྱེན་པའི་དངོས་གྲུབ་ཐམས་ཅད་བསྡུས་ནས་རང་གིས་སྙིང་གར་ཐིམ་པར་བསམས་ལ། རྩ་སྔགས་དང་པྲ་འབེབས་ཀྱི་སྔགས་འདི་སྦྲེལ་བ་ཁྲི་གཅིག་སྨྲ་བ་བཅད་དེ་སྒྲ་དག་པར་བཟླ། དེ་ནས་ལས་སྦྱོར་དུས། ཕྱིང་དཀར་རམ་རས་དཀར་གཙང་མའི་སྟེང་ནས་ཀྱི་
གཡུང་དྲུང་བྲིས་ལ་པྲ་རྟེན་ཁྱེའུའམ་བུ་མོ་གཙང་མ་གྲོང་ཆོས་ཀྱིས་མ་གོས་པ་ཁྲུས་བྱས་ལ་བཞག །རང་ལྷའི་འོད་ཀྱིས་རྣོ་མཐོང་གི་དངོས་གྲུབ་བཀུག་ནས་རྫས་དང་ཁྱེའུའི་སྙིང་གར་ཐིམ་པས་དུས་གསུམ་སྒྲིབ་མེད་དུ་མཐོང་བར་བསམ། སྔགས་ནི། མུ་ཤྲཱི་ཀུ་ཤྲཱི་པྲ་མ་དན་ཏི་ཝཱ་ཀ་སིདྡྷི་གྷར་ཁུགཿ ངའི་བུ་མོ་དགར་ཆུག་ཁོའི་བུ་མོ་སྨྱོར་ཆུགཿ ཅེས་བཟླས་ནས་ལ་བསྔགས་ནས་པྲ་རྟེན་ལ་གཟིར་ན་ལེགས་ཉེས་གང་དྲིས་པ་སྨྲ་བར་འགྱུར་རོ། །མེ་ལོང་ལ་སོགས་པའི་ངོས་དང་པྲ་རྟེན་གྱི་མིག་དང་ལྟག་པར་སྔགས་བཏབ་ནས་བལྟར་བཅུག་པས་དགོས་པ་ཕྱིན་ཅི་མ་ལོག་པར་འཆར་རོ། །ལས་སྦྱོར་དུས་སྔགས་བརྒྱ་ནས་སྟོང་གི་བར་ཅི་རིགས་བཟླ། དབབ་པའི་སྔགས་དམིགས་དང་སྦྱར་བས་རྣོ་མཐོང་པྲ་ཡི་ལས་ཇི་ལྟར་འདོད་པ་བཞིན་དུ་བྱེད་དོ། །ས་མ་ཡ༔ རྒྱ༔ ཡང་ཤིན་ཏུ་ཟབ་པའི་པྲ་དབབ་པ་ལ། ཐོག་མར་ཉི་མ་བཟང་པོར་རང་སྨྱུང་བའམ་གཙང་སྦྲ་ལ་གནས་པས་མཎྜལ་ལ་དྲི་བཟང་གི་ཚོམ་བུ་ལྔ་བཀོད་ལ། དབུས་སུ་རྣམ་སྣང་སོགས་བདེ་གཤེགས་ལྔ་ཡི་རིགས་སུ་གྱུར་པའི་སངས་རྒྱས་ཐམས་ཅད། གཡས་སུ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་རྡོ་རྗེ་སེམས་དཔལ་རྒྱབ་ཏུ་དམ་པའི་ཆོས་ཀུན་འདུས། གཡོན་
ཏུ་འཇམ་དཔལ་དབྱངས་སོགས་དགེ་འདུན་ཐམས་ཅད། མདུན་དུ་འཕགས་པ་དཀོན་མཆོག་གསུམ་གྱི་ཐུགས་རྗེའི་བྱིན་རླབས་འདུས་པ་ལྷ་མོ་ཚིག་དབང་བཀྲ་ཤིས་དཀར་མོ་བསམས་ལ། སྤྲོ་ན་སོ་སོའི་སྐུ་དང་། ཆོས་ཀྱི་གནས་སུ་རྟེན་འབྲེལ་སྙིང་པོ་བྲིས་པ་སོགས་བཞག །མཐར་མཆོད་པ་ལྔ། ཚར་ལྔ་སོགས་ཇི་འབྱོར་བཤམས། རང་ཁྲུས་བྱས་གོས་གཙང་མ་གྱོན་ནས་དལ་གྱི་ནུབ་ཏུ་ཁ་ཤར་དུ་བལྟས་པས་འཁོད་ལ། མེ་ལོང་སྐྱོན་མེད་ཞིག་ལྷ་མོའི་གནས་སུ་བཞག །རང་འཇམ་དཔལ་དུ་གསལ། མཆོད་པ་བྱིན་གྱིས་བརླབས་ནས་ལྷ་ཀུན་སྤྱན་དྲངས་ཞིང་མཆོད་པ་འབུལ། དེ་ནས་ལག་གཡོན་མེ་ལོང་གཟུང་སྟེ་འཕགས་པ་ཐམས་ཅད་ཀྱི་བྱིན་རླབས་གཅིག་ཏུ་བསྡུས་ནས་སྣང་གསལ་པྲ་ཡི་ལྷ་མོར་ཤར་བ་ཚིག་དབང་བཀྲ་ཤིས་མ་དཀར་མོ་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཟླ་བ་གཞོན་ནུ་ལྟ་བུ་མཚན་དཔེའི་ལང་ཚོ་འབར་བ། གཡས་གཡོན་མེ་ལོང་བསྣམས་པ་གསལ། ཞབས་བཞེངས་བསམ། མཆོག་སྦྱིན་གྱིས་མེ་ཏོག་ཨུཏྤལའི་ལྟེ་བར་མེ་ལོང་དང་། གཡོན་མཉམ་བཞག་གིས་བདུད་རྩིའི་བུམ་པ་བསྣམས་པ་ཞབས་ཕྱེད་སྐྱིལ་གྱིས་པད་ཟླ་ལ་བཞུགས་པར་གསལ་བའི་ཐུགས་ཀའི་འོད་ཟེར།
བསམ། བདག་གི་སྙིང་ཁར་ཕོག་པས་ལེགས་ཉེས་ཐམས་ཅད་སྒྲིབ་མེད་དུ་གསལ་བར་བསམས་ལ། རྩ་སྔགས་ཀྱི་ཤམ་བུར། ཨཱི་ལཱ་ཡཱུཾ་བི་ལཱ་ཡཱུཾ་སྭཱ་ཧཱ༔ ཞེས་པའི་འབྲུ་བརྒྱད་པོ་འདི་གདགས་ཤིང་འབུམ་ཕྲག་གཅིག་བཟླས། ཉིན་རེ་ཞིང་མཆོད་པ་བརྗེ། ཐུན་མཐར་ལྷ་མོ་མེ་ལོང་ལ་བསྟིམ། དེ་ནས་ལས་སྦྱོར་ནམ་དགོས་དུས་བཅའ་གཞི་སྔར་ལྟར་ལ་པྲ་རྟེན་ཁྱེའུ་དང་བུ་མོ་གཙང་མ་ཁྲུས་བྱས་ཤིང་དལ་གྱི་ནུབ་ཏུ་ཁ་ཤར་དུ་བལྟས་པས་འཁོད་ལ། རྡོ་རྗེ་བསྡུ་བའི་ཕྱག་རྒྱས་འཕགས་པ་ཀུན་བསྐུལ་ཏེ་པྲ་ཡི་ལྷ་མོའི་རྣམ་པར་བྱོན་ནས་བདག་དང་པྲ་རྟེན་མེ་ལོང་སོགས་རྫས་ལ་ཐིམ་པས་རྟེན་འབྲེལ་སྒྱུ་མའི་སྣང་ཆར་སྣང་སྲིད་ཀྱི་ལེགས་ཉེས་ཐམས་ཅད་ཇི་ལྟ་བ་བཞིན་དུ་གསལ་བར་སམས་ལ་སྔགས་བརྒྱའམ་སྟོང་བཟླས་མེ་ལོང་དང་མིག་ལ་བཏབ་ནས་བལྟས་པས་སྣང་སྲིད་ཀྱི་ལེགས་ཉེས་ཐམས་ཅད་གསལ་པོར་སྟོན་པར་འགྱུར་རོ། །དེ་བཞིན་དུ་ཤེལ་གོང་དང་། ཐིག་ལེ་བཟང་པོ། རལ་གྲི་ཆུ་དངས་བ། མཐེ་བོང་སོགས་ལའང་སྟོན་ཏེ། ནད་པ་འཚོ་འཆི། རྐུན་མ་སྐྱེ་བ་སྔ་ཕྱི། ད་ལྟའི་ཚེ་ཚད་བདེ་སྡུག །རྫས་སྟོར་བ། གདོན། དོན་བསྒྲུབ་པ་སོགས་ཡིད་ལ་གང་འདོད་པ། ཡིད་ཀྱིས་གསོལ་བ་བཏབ་ནས་སམ་དངོས་སུ་ངག་གིས་སྨྲས་ནས་དྲིས་པས་ཐམས་ཅད་བསླུ་
མེད་དུ་སྟོན་ཅིང་། སྲིད་པ་གསུམ་གྱི་གནས་ན་སྣང་བའི་དངོས་པོ་མ་ལུས་པ་གསལ་བར་མཐོང་བ་སྟོན་ནོ། །ཚུལ་དེས་ལྟ་བསྒྲུབ་པ་དང་ལས་ཀྱི་བྱེ་བྲག་བསྒྲུབ་པ་སོགས་ལ་ལུང་བསྟན་པ་ཐོབ་ནས་བརྩམ་པའི་ལས་ཀྱི་འབྲས་བུའི་དགའ་སྟོན་ཉམས་སུ་མྱོང་བར་འགྱུར་རོ། །མཐར་པྲ་སྟོན་བྱ་ཞིང་། ལྷ་གཤེགས་སུ་གསོལ་ནས་དཀྱིལ་འཁོར་བསྡུ་བར་བྱའོ། །ས་མ་ཡ༔ ཨི་ཐི༔ གཞན་ཡང་རྒྱས་པའི་ལས་བཞི་ལས་དང་པོ་འབྱོར་པ་རྒྱས་པ་ལ་རྟེན་བཅས་དང་། རྟེན་མེད་སྔགས་ཙམ་གྱིས་ལས་བྱེད་པ་གཉིས། དང་པོ་རིན་པོ་ཆེའམ་རྫའི་བུམ་པའམ་གའུ་ལ་སོགས་པ་དང་། དར་ཟབ་སོགས་ཀྱི་སྣོད་དུའང་རུང་སྟེ་འབྲུ་སྣ་དང་རིན་པོ་ཆེ་དགེ་ལེགས་ཀྱི་རྫས་ཅི་རིགས་པས་བཀང་། ཡེ་ཤེས་དང་ལས་དང་འཇིག་རྟེན་གྱི་ནོར་ལྷ་གང་མོས་པའི་སྔགས་བྱང་བྲིས་པ་གཟུག །རང་ལྷའི་རྣལ་འབྱོར་གྱིས་ཐུགས་སྲོག་སྔགས་ཕྲེང་ཤམ་བུ་དང་བཅས་པའི་འོད་ཀྱིས་འཕགས་པ་མཆོད། བྱིན་རླབས་བསྡུས། སེམས་ཅན་གྱི་དབུལ་ཕོང་རྒྱུན་བཅད། སྣོད་བཅུད་ཐམས་ཅད་ཡེ་ཤེས་རིན་པོ་ཆེ་ནོར་བུ་རྒྱས་པའི་འོད་ཟེར་སེར་པོས་ཁྱབ་ཅིང་འདོད་དགུ་ཆར་དུ་འབབ་པར་བསམ་ལ། སྔགས་ཤམ་དུ། རཏྣ་པ་ལ་སིདྡྷི་བྷྲཱུྃ༔ ནན་ཁདྷེ་པུཥྚིཾ་སིདྡྷི་ཧཱུྃ༔ ཞེས་ཇི་ནུས་བཟླས། ཐུན་མཐར་མཆོད་པ་ཇི་འབྱོར་ཕུལ།
བསྟོད་ཅིང་ཐུགས་དམ་བསྐུལ་ལ་འཁོར་འདས་ལམ་གསུམ་གྱི་དངས་བཅུད་བསྡུས་ནས་ལྷ་དང་རྟེན་ལ་བསྟིམ། དངོས་གྲུབ་བླང་། ཐུན་མཐར་ལྷ་རྟེན་ལ་བསྟིམ། དེས་འདོད་དགུའི་དངོས་གྲུབ་ཐམས་ཅད་ལྷུན་གྱིས་གྲུབ་པར་འགྱུར་ཏེ་བུམ་བཟང་དཔག་བསམ་ཤིང་དང་ཡིད་བཞིན་གྱི་ནོར་བུ་རྙེད་པ་བཞིན་ནོ། །གཞན་ཡང་ཚུལ་འདིས་བུམ་པ་བཟང་པོ་དང་འདོད་འབྱུང་གི་ནོར་བུ་སོགས་ཀྱང་བསྒྲུབ་པར་བྱ་སྟེ། ཡིད་ལ་གང་འདོད་པའི་རྫས་ཀྱང་ཚུལ་དེས་འདོད་ཡོན་འབྱུང་བའི་རྟེན་དུ་བརླབ་པར་བྱའོ། །ས་མ་ཡ༔ གཉིས་པ་ཟས་ནོར་ཡོ་བྱད་ཐམས་ཅད་བློས་བླངས་ནས་ཀུན་བཟང་མཆོད་པའི་སྤྲིན་དུ་དམིགས་ཏེ་ལྷག་པའི་ལྷ་ལ་མཎྜལ་དུ་དབུལ་ཞིང་བདེ་སྐྱིད་དང་ལོངས་སྤྱོད་འབྱུང་བའི་གསོལ་བ་བཏབ། རྩ་སྔགས་ཀྱི་ཤམ་དུ། མུ་ཀ་ཡེ༔ ཨ་པ་ཡེ༔ ཀ་པ་ཡེ༔ བཛྲ་སིདྡྷི་ཧཱུྃ༔ ཞེས་དུས་དང་དུས་སུ་ཇི་ལྟར་རིགས་པ་བཟླས་པས། བདེ་དགའ་གོང་ནས་གོང་དུ་འཕེལ་ཞིང་ཟས་ནོར་ལོངས་སྤྱོད་ནམ་མཁའི་མཛོད་ལ་མངའ་བརྙེས་ནས་འདོད་དགུ་ཟད་མི་ཤེས་པར་འགྱུར་རོ། །ས་མ་ཡ༔ ཚེ་རྒྱས་པར་འདོད་པས་དུས་དང་རྒྱུན་གྱི་ཚེ་སྒྲུབ་ཟབ་མོ་ཉམས་སུ་བླང་བར་འདོད་ན། རང་ལྷའི་ཐུགས་སྲོག་སྔགས་ཀྱི་འོད་ཟེར་གྱིས་འཁོར་འདས་ཀྱི་ཚེ་བཅུད་བསྡུས་ནས་
རང་སེམས་གཉུག་མའི་ཐིག་ལེར་ཐིམ་ནས་འཕོ་འགྱུར་མེད་པའི་གནས་སུ་རྒྱས་བཏབ་པས་རྡོ་རྗེ་ཡེ་ཤེས་ཀྱི་ཚེ་གྲུབ་པར་བསམས་ལ། སྔགས་ཤམ་དུ། ཨོཾ་ནྲི་བྷྲཱུྃ་བཛྲ་ཛྙཱ་ན་ཨཱ་ཡུཿཁེ་ཧཱུྃ་ཨཱཿཞེས་ཅི་ནུས་བཟླས་པས་ཚེ་ཉི་ཟླ་དང་མཉམ་ཞིང་འཆི་བ་མེད་པའི་མཆོག་ཐབ་པར་འགྱུར་རོ། །ས་མ་ཡ༔ ཚེ་དང་ལུས་རྒྱས་པའི་ཕྱིར་བཅུད་ཀྱིས་ལེན་པ་ནི། སྔོ་བདུད་རྩི་འོད་ལྡན་རྟག་ཏུ་ངུ་གཙོ་བོར་གྱུར་པའི་རྩི་སྨན་གྲུབ་པའི་ཕྱེ་རིལ་སྨན་མར་སོགས་ཚུལ་བཞིན་འདུ་བྱས་ལ། རང་དང་མདུན་དུ་ལྷ་གསལ་གདབ། སྐུའི་འོད་ཀྱིས་བརྟན་གཡོའི་དངས་བཅུད་བསྡུ་ཞིང་རྫས་ལ་བསྟིམ་པའི་དམིགས་པ་བཅས་རྩ་སྔགས་དང་། ཨོཾ་ཨཱཿཧཱུྃ་སརྦ་པྲཛྙཱ་ཛྙཱ་ན་ཨཱ་ཡུ་ཥེ་ར་ས་ཡཱན་ཨ་མྲྀ་ཏ་ཧཱུྃ་ཧྲཱིཿ ཋཱ་ཨཱཿཞེས་བཟླ་ཞིང་ཟོས་བས་ཚེ་དང་ལང་ཚོ་དང་མཐུ་ནུས་གོང་དུ་འཕེལ་ལོ། །དེ་དག་ཀྱང་གཟའ་འཛིན་གྱི་དུས་དང་བསྟུན་ནས་བསྒྲུབ་པ་དང་ཟོས་པས་ནུས་པ་ཁྱད་པར་དུ་འཕེལ་ཞིང་རྟགས་ཐོན་པར་བགྱིས་ན་བཅུད་ལེན་གྱི་ཡོན་ཏན་ཡོངས་སུ་གྲུབ་པར་འགྱུར་རོ། །ས་མ་ཡ༔ གཞན་ཡང་ལུས་ཡིད་དུ་འོང་བ་དང་། ངག་སྙན་པ་དང་། ཡིད་བདེ་བ་དང་། ཤེས་རབ་འཕེལ་བ་དང་། དབང་དུ་བྱ་བ་ལ་སོགས་པའི་ལས་སྣ་ཚོགས་ཀྱི་རིལ་བུ་དང་རྫས་ལ་སྔགས་ཀྱིས་བརླབས་པའི་
མཐུས་འདོད་པའི་དོན་གྱི་དཔལ་སྣ་ཚོགས་པ་རྒྱས་པར་བྱེད་དེ། དེ་དག་གི་ལག་ལེན་ཟུར་དུ་ཤེས་པར་བྱའོ། །ས་མ་ཡ༔ དེ་ནས་ཐུན་མོང་གི་ལས་ལྔ་ལས་དང་པོ་སྐུ་ཡི་ལས་ནི་སྔོན་དུ་བསྙེན་སྒྲུབ་ཡང་དག་པར་གྲུབ་པའི་སྒྲུབ་པ་པོས་ཇི་ལྟར་རྒྱུད་ལས་གསུངས་པའི་བྲིས་སྐུ་ཚད་ལྡན་ནམ། དམ་ཚིག་གི་རྟེན་གྱི་སྐུ་བྲིས་འབུར་གང་རུང་དང་དེས་མཚོན་ནས་གསུང་རྟེན་དང་། ཡོན་ཏན་སྣ་ཚོགས་བསྒྲུབ་པའི་དམ་ཚིག་གི་རྫས་གང་ཡང་རུང་སྟེ། གཟའ་འཛིན་སོགས་དུས་ཁྱད་པར་ཅན་ལ་ཕྱག་རྒྱ་དང་སྔགས་ཀྱི་བྱིན་གྱིས་བརླབ་ཅིང་། དམིགས་པའི་འཁྲུལ་འཁོར་དང་ལྡན་པས་ཆོ་ག་བཞིན་དུ་བསྒྲུབས་པས་ནི་སྣ་ཚོགས་ནོར་བུ་བཞིན་དུ་འདོད་པའི་དོན་འཇོ་བར་འགྱུར་ཏེ་ཕུན་སུམ་ཚོགས་པའི་དཔལ་གྱི་དབྱིག་ཏུ་འགྱུར་རོ། །ས་མ་ཡ༔ གསུང་གི་ལས་ནི། ཇི་ལྟར་རྒྱུད་ཀྱི་རྒྱལ་པོ་ཆེན་པོ་ལས་བྱུང་བའི་འཁྲུལ་འཁོར་ཆེ་ཆུང་ཚུལ་བཞིན་བྲིས་ཏེ་སྔོན་དུ་བསྙེན་པའི་ཆོ་ག་ལེགས་པར་རྫོགས་པའི་སྒོ་ནས་ལས་རབ་འབྱམས་བསྒྲུབ་པར་བྱ་སྟེ་རྒྱས་པར་འཁྲུལ་འཁོར་གྱི་ཡིག་ཆ་ཟུར་དུ་ཡོད་པ་ཉིད་ལས་ཤེས་པར་བྱའོ། །ས་མ་ཡ༔ ཐུགས་ཀྱི་ལས་ནི། ལྕགས་བརྒྱད་དམ་ཙན་དན་དཀར་དམར་སོགས་དངོས་པོ་སྣ་ཚོགས་ལས་བྱས་པའི། རལ་གྲི་དང་ཨུཏྤལ་རྡོ་རྗེ་དང་ལྕགས་ཀྱུ་
ཞགས་པ་རྒྱལ་མཚན་མདའ་གཞུ་ལ་སོགས་པའི་ཕྱག་མཚན་གང་ཡང་རུང་བ་ལག་ཏུ་ཐོགས་ཏེ་གཟའ་འཛིན་གྱི་དུས་སུ་བཟླས་པ་བྱས་པས་མེ་འབར་བ་དང་འོད་དང་དུ་བ་སྒྲ་ལ་སོགས་པ་དགེ་བའི་ལྟས་མཐོང་ན་རལ་གྲིའི་རིག་པ་འཛིན་པ་སོགས་དངོས་གྲུབ་སྣ་ཚོགས་སུ་འགྱུར་ཞིང་། ལྟས་མ་བྱུང་ཡང་བྱིན་གྱིས་བརླབས་པའི་དངོས་གྲུབ་ཀྱི་རྫས་དེ་དག་གིས་ཕྲལ་ཕུག་ཀུན་ཏུ་དགེ་ཞིང་ཤིས་པའི་དཔལ་ཡོན་མི་ཟད་པ་འབད་མེད་དུ་སྩོལ་བར་འགྱུར་རོ། །ས་མ་ཡ༔ ཡོན་ཏན་གྱི་ལས་ནི། ཉི་ཟླ་གཟས་འཛིན་པའི་དུས་སུམ་ཤའི་སྲན་མ་སྐྱོན་མེད་པ་དར་དཀར་པོ་གཙང་མས་དྲིལ་ལ་འོ་མའི་ནང་དུ་བཞག་མཆོད་པ་བཟང་པོ་བཤམས། མདུན་དུ་འཇམ་དབྱངས་དང་རྒྱལ་བ་སྲས་བཅས་གསལ་བཏབ་ལ་མཆོད་ཅིང་བསྟོད་ནས་དངོས་གྲུབ་ཀྱི་ལྟས་གསལ་བའི་གསོལ་བ་བཏབ། རྩ་སྔགས་དང་དབྱངས་གསལ་རྟེན་སྙིང་སྦྲེལ་བ་ལན་བདུན་བརྗོད་ནས། ཉི་ཟླ་ལ་གཟའ་ཞུགས་མ་ཐག་པའི་དུས་སུ་སྲན་མ་དར་དང་བཅས་པ་འོ་མ་ནས་བཏོན་ཏེ་ལྕེ་འོག་བཅུག་ལ། རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཧཱུྃ་ཨཱཿཞེས་སྨྲ་བ་བཅད་དེ་ཉི་ཟླ་གཟའ་ལས་གྲོལ་ཟིན་གྱི་བར་དུ་བཟླ་ཞིང་། དེའི་ཚེ་ཕྱོགས་དུས་རྒྱལ་བའི་སྐུ་གསུང་ཐུགས་ཀྱི་དངོས་གྲུབ་དང་སྲིད་ཞིའི་དངས་བཅུད་ཐམས་ཅད་
ཡི་གེ་འབྲུ་གསུམ་དང་འོད་དཀར་དམར་མཐིང་གསུམ་གྱི་རྣམ་པར་ལྕེ་འོག་གི་སྲན་མ་ལ་ཐིམ་པས་དངོས་གྲུབ་ཀྱི་ལྟས་སྟོན་ཅིང་དངོས་གྲུབ་ཡིད་བཞིན་གྲུབ་པའི་རྫས་སུ་གྱུར་པར་བསམ་པའི་ཏིང་འཛིན་བརྟན་པོར་བྱ། ཉི་ཟླ་གཟའ་ལས་གྲོལ་བ་དང་གནས་དབེན་པར་དཀྲིས་གྲོལ་ཏེ་བལྟས་པས། མྱུ་གུ་བྱུང་ན་གྲུབ་པའི་རྟགས་ཏེ་དེ་ཡང་མྱུ་གུ་སྦོམ་ན་བར་ཆད་མེད་ཅིང་ཡོན་ཏན་བརྟན། མཆོག་ཏུ་གྲུབ་ན་རིང་པོར་རྒྱས་ཤིང་མེ་ཏོག་སོགས་ངོ་མཚར་བའི་མཚན་མ་སྣ་ཚོགས་འབྱུང་། མྱུ་གུ་སྔོ་ཟླུམ་མཉེན་ན་ཡོན་ཏན་འཕེལ། དཀར་འཇམ་དྲི་མེད་བཟང་། སྔོ་བའི་རྣམ་པ་དང་རྩེ་མོ་རྣོ་ན་ཤེས་རབ་འཕེལ། དེ་ཡང་རྩ་བ་སྔོ་ཞིང་རྩེ་མོ་སྐྱ་ཉམས་ཡོད་ན་བསྐྱར་ན་འགྲུབ། རྩ་བ་ཆད་ན་ངན། རྩ་བ་ཕྲ་ན་བར་ཆད་ཆེ། རུལ་བ་དང་སྐྱ་ཧམ་པ་བྱུང་ན་དམ་ཉམས་དང་བར་ཆད་ཀྱི་ངོ་། །ནོར་བུ་སོགས་བཀྲ་ཤིས་པའི་རྟགས་རྫས་ཐུན་མོང་གི་དངོས་གྲུབ། རལ་གྲི་སོགས་ཕྱག་མཚན་ནི་ཐུགས་གྲུབ་པའི་རྟགས་ཏེ་ཏིང་འཛིན་བཟང་པོ་སྐྱེ། ཨ་སོགས་ཡིག་འབྲུ་ནི་གསུང་གྲུབ་པའི་རྟགས་ཏེ་འཆད་རྩོད་རྩོམ་པ་འཕེལ། ལྷ་སྐུ་དང་ཞལ་ཕྱག་གི་རྣམ་པ་འདྲ་བ་ནི་སྐུ་གྲུབ་པའི་རྟགས་ཏེ་ཚེ་དཔལ་འཕེལ། མདོར་ན་ལས་སོ་སོ་དང་བསྟུན་པའི་ལྟས་སྤྱི་དང་བྱེ་བྲག་ཏུ་ཤེས་
པར་བྱས་ལ་ལྟས་གང་བྱུང་ཡང་གསང་སྟེ། སོ་སེན་གྱིས་མ་རེག་ཆག་ཉམས་སུ་མ་སོང་བར་ཆུ་གཙང་ངམ་འོ་མས་ཕུལ་ཏེ་མིད་པར་བྱས་ན་ཚེ་དང་ལུས་ཀྱི་བཅུད་ལེན་དང་དངོས་གྲུབ་ཀྱི་དབྱིག་ཏུ་འགྱུར་རོ། །མྱུ་གུ་མ་བྱུང་ན་སྔགས་ཀྱི་ནུས་པ་མ་སྨིན་པས་སླར་བསྐྱར་ལ་བསྒྲུབ་སྟེ་ཡང་ཟླ་འཛིན་གྱི་དུས་སུ་ལས་སྦྱོར་གོང་བཞིན་བྱའོ། །མྱུ་གུ་མ་བྱུང་ཡང་བཏགས་ཏེ་ཕྱེ་མར་བྱས་པ་གང་གི་མགོ་བོར་གཏོར་བས་གདོན་ཞི་བར་བྱེད་པ་སོགས་ཕན་ཡོན་ཚད་མེད་དོ། །གཞན་ཡང་ཉི་ཟླ་གཟས་ཟིན་པའི་དུས་སུ་འོ་ཐུག་གམ། ཞོ་དང་ཟན། མར་དང་བཅས་པར་ཀ་ར་བཏབ་པ་ལག་པས་བཀབ་ནས་ལྷའི་རྣལ་འབྱོར་ལ་གནས་ཤིང་སྔགས་བཟླས་པ་འཐུང་ན་ལོ་ལྔ་བརྒྱར་འཚོའོ། ༈ །ཡང་དུར་ཁྲོད་དུ་མི་མགོ་གསུམ་ལས་སྒྱེད་པུ་བྱ། དེའི་སྟེང་དུ་སྐྱེས་པའི་ཐོད་པའི་ནང་དུ་ཚིལ་ཆེན་དང་རོ་རས་ཀྱི་མར་མེ་སྦར་ལ། བུད་མེད་ཀྱི་ཐོད་པས་ཁ་བཅད་དེ་དུད་པ་བླང་ནས་སྣག་ཚ་བཞིན་སྦྱར་ཞིང་། གཟའ་འཛིན་གྱི་དུས་སུ་དེ་བཟུང་ལ་གསང་སྔགས་བཟླ། རྫས་དེ་མིག་ལ་བྱུགས་ན་སྲིད་པ་གསུམ་མཐོང་། དཔྲལ་བར་ཐིག་ལེ་བྱས་ན་བདག་སུས་ཀྱང་མི་མཐོང་ལ། རྐང་པ་ལ་བྱུགས་ན་རྐང་མགྱོགས་འགྲུབ། རྫས་དེས་གང་ལ་རེག་པའི་སྐྱེ་བོ་བདག་གི་དབང་དུ་འགྱུར་རོ། ༈ །ཡང་ན་རིན་ཆེན་གྱི་ཀོང་
བུ་རབ་སེར་སྐྱའི་མར་དང་པདྨ་དཀར་པོའི་སྐུད་པའམ། དྲི་བཟང་གི་ཤིང་གི་སྡོང་བུ་ལ་མེ་སྦར་བའི་དུད་པ་སྔ་མ་ལྟར་བསྒྲུབས་པ་མིག་ལ་བསྐུས་པས་མིག་སྨན་དུ་འགྱུར་རོ། །གི་ཝཾ་ལྡོང་རོས་གུར་གུམ་ཙན་དན་དམར་པོ་རྣམས་སྦྱར་བའི་རིལ་བུ་གསེར་དངུལ་ཟངས་གསུམ་གྱིས་དཀྲིས་ལ་གཟའ་འཛིན་གྱི་དུས་སུ་བསྒྲུབས་པས་དཔྲལ་བར་ཐིག་ལེ་བྱས་ན་གང་གིས་ཀྱང་མི་མཐོང་བའི་མི་སྣང་བ་གྲུབ་པར་འགྱུར་རོ། ༈ །ཡང་ན་ཝ་ཎ་ཁོ་ཌི་དང་། ནཱ་གི་དང་། ཙན་དན་དམར་པོ་དང་། ག་བུར་དང་། ཨ་ག་རུ་རྣམས་ཆ་མཉམ་དུ་སྦྱར་བའི་བདུག་སྤོས་བསྡུས་ཏེ་གཟའ་འཛིན་གྱི་དུས་སུ་བསྒྲུབ་པའི་རྫས་དེའི་དྲི་ཚོར་པ་ཙམ་གྱིས་འགྲོ་བ་དབང་དུ་འགྱུར་རོ། ༈ །གཞན་ཡང་ལས་ཀྱི་ཚོགས་རབ་འབྱམས་ཅི་རིགས་པ་དག་ནི། སྒྲུབ་པ་སྔོན་དུ་སོང་བའམ་མ་སོང་ཀྱང་རུང་སྟེ་དངོས་གྲུབ་དེ་མ་ཐག་ཏུ་འགྲུབ་པའི་དུས་ཁྱད་པར་ཅན་གཟའ་འཛིན་གྱི་དུས་སུ་བསྒྲུབ་པར་བྱ་སྟེ། དང་པོར་སྐར་རྩིས་ཀྱི་ཆོ་གས་ཉི་ཟླ་ལ་གཟའ་ནམ་འཇུག་པར་ཤེས་ནས། དེའི་དུས་ལ་བབ་པར་ཉེ་བ་ན་གནས་བཟང་པོར་ཡི་དམ་གྱི་སྐུ་རྟེན་དགྲམ་ཞིང་མཆོད་པ་གྱ་ནོམས་པ་བཤམས་ལ་སྒྲུབ་པའི་དམ་རྫས་འདུ་བྱ། བདག་གི་རྣལ་འབྱོར་མཆོད་པ་སོགས་སྔོན་དུ་བཏང་
ནས། བདག་གནས་རྫས་སྲུང་བར་བྱས་ལ། གང་གི་ཚེ་ཉི་ཟླ་ལ་གཟའ་འཇུག་པར་རྩོམ་པ་ན་བདག་ཉིད་སྒྲུབ་ཁང་དུ་ལྷ་སྔགས་ཀྱི་རྣལ་འབྱོར་ལ་རྩེ་གཅིག་ཏུ་གཞོལ་ཞིང་དངོས་གྲུབ་ཀྱི་རྫས་བསྒྲུབ་བར་བྱ་སྟེ། སྒྲུབ་གཡོག་པས་བརྡ་སྦྱར་ནས་ཉི་ཟླ་གཟའ་ལས་གྲོལ་བ་ན་རྫས་གྲུབ་པར་འགྱུར་བའི་ཚད་ཡིན་ཏེ། དེ་ཡང་རབ་མཚན་མ་མངོན་དུ་འབྱུང་བར་འགྱུར་ཏེ་ཟབ་ཅིང་ཡིད་ཆེས་པའི་གནས་སོ། ༈ །གཞན་ཡང་ཤུ་དག་དཀར་པོ་ལ་སོགས་པའི་རྫས་སྦྱར་ཏེ་རིལ་བུ་སོགས་ཚུལ་བཞིན་འདུ་བགྱིས་ལ། བདག་མདུན་ཡི་དམ་ལྷའི་རྣལ་འབྱོར་ལ་གནས་པས་སྲིད་ཞིའི་དངས་བཅུད་བསྡུ་བའི་དམིགས་པ་བཅས་རྩ་སྔགས་ཇི་ནུས་སུ་བཟླས་པའི་སྨན་གྱིས་བློ་གྲོས་སྤོབས་པའི་གཏེར་རྡོལ་བ་དང་དབྱངས་ཅན་གྱི་ངག་གྲུབ་པ་ལ་སོགས་པའི་ཡོན་ཏན་དཔག་ཏུ་མེད་པ་འབྱུང་སྟེ། དེ་དག་གི་སྦྱར་ཚུལ་ཞིབ་པར་ནི་བཅུད་ལེན་དང་རིལ་བུའི་ཡིག་ཆ་ཟུར་དུ་ཡོད་པ་ལས་ཤེས་པར་བྱའོ། །ས་མ་ཡ༔ ཕྲིན་ལས་རྣོ་མྱུར་གྱི་ལས་ནི། ལས་རབ་འབྱམས་ཀྱི་འབྲས་བུ་མྱུར་དུ་འབྱིན་པ་མེ་ཡི་ལས་ཏེ། དེ་ཡང་ལས་སོ་སོ་དང་བསྟུན་པའི་དམིགས་འདོན་བྱ་བའི་ཁ་བསྒྱུར་མ་ནོར་བ་དང་ལྡན་པའི་སྒོ་ནས་རྫས་སོ་སོས་ལས་གང་ཡིན་པ་བསྒྲུབ་པར་བྱ་སྟེ་ཟུར་དུ་སྦྱིན་སྲེག་གི་ཡིག་ཆ་ལས་ཤེས་པར་
བྱའོ། །ས་མ་ཡཿ རྒྱ༔ དེ་ནས་སྔགས་ལ་རྒྱས་འདེབས་པ་ཕྱག་རྒྱའི་ལས་གཅིག་བཤད་པར་བྱ་སྟེ། ལག་པ་གཉིས་ཐལ་མོ་ཁ་འབུས་སུ་སྦྱར་པའི་སྲིན་ལག་གཉིས་རྩེ་སྤྲད་པའི་ཚིགས་དབུས་མའི་བར་བཅག་ནས། མཛུབ་མོ་ངོས་སུ་ཅུང་ཟད་ཕྱོགས་པའི་སེན་མོ་མཛུབ་མོ་གཉིས་ཀྱི་རྩེ་སྤྲད་པ་བཀུག་བས་མནན་ཏེ། གུང་མ་ཐེབ་མཐེའུ་ཆུང་གསུམ་སྔར་གྱི་ཐལ་མོའི་རང་བཞིན་དུ་གནས་པ་ཨུཏྤལ་ཁ་འབུས་པ་ལྟ་བུ་འཇམ་དཔལ་གྱི་རྩ་བའི་ཕྱག་རྒྱ་ལས་ཐམས་ཅད་བྱེད་པའི་མཆོག་ཨུཏྤ་ལའི་ཕྱག་རྒྱ་ཞེས་གྲགས་པ་དང་། ལག་གཡས་རྡོ་རྗེ་ཁུ་ཚུར་གྱི་གུང་མཛུབ་གཉིས་གཤིབ་སྟེ་བསྒྲེང་བ་རལ་གྲིའི་ཕྱག་རྒྱ་སྟེ། གཉིས་པོ་འདི་ཙམ་མམ། སྤྲོ་ན་ལས་སོ་སོ་ལ་བསྔགས་པ་དང་སོ་སོའི་སྔགས་ཀྱི་ཕྱག་རྒྱ་དང་ལྡན་པའི་སྒོ་ནས་སྔགས་དང་བཅས་ཏེ་ཟས་གོས་ཡོ་བྱད་ཐམས་ཅད་དངོས་གྲུབ་ཀྱི་རྫས་ལྷའི་རྣམ་རོལ་དུ་ཏིང་འཛིན་གྱིས་མོས་ཤིང་ཕྱག་རྒྱས་རེག་པ་སོགས་ཀྱིས་བྱིན་གྱིས་བརླབས་ན། གེགས་ཞི་ཞིང་ལས་རབ་འབྱམས་བསྒྲུབ་པ་ལ་ནུས་པ་འབད་མེད་དུ་འཕེལ་ཞིང་དངོས་གྲུབ་རྣམ་གཉིས་ཡིད་བཞིན་དུ་འགྲུབ་སྟེ། ཚུལ་འདི་ལྟ་བུའི་སྒོ་ནས་གནས་དང་ལམ་སོགས་མི་ཤིས་པ་ཤིས་པར་བྱེད་པ་དང་། དགེ་མཚན་མཐོང་བའི་དངོས་གྲུབ་ལེན་པ་དང་། རིགས་མཐུན་གྱི་རྣལ་
འབྱོར་ཕོ་མོ་རྣམས་ལ་དགའ་བའི་སྐྱེས་འབུལ་བ་དང་། གེགས་ཀྱི་རྣམ་པ་ཞི་བ་དང་། ལྷ་རྣམས་རྒྱུད་བསྐུལ་བར་བྱེད་པ་དང་། བདག་ཉིད་དགའ་ཞིང་ཡིད་བདེ་བ་དང་ལྡན་པའི་མཆོད་སྟོན་ལྷ་ལ་ཕུལ་བ་སོགས་སྣ་ཚོགས་པའི་རྟོགས་པ་སོ་སོའི་དུས་སུ་ཤུབ་བུར་བཟླས་པའི་སྔགས་དང་བཅས་ཏེ་ཕྱག་རྒྱ་བཅིངས་ཤིང་ཕྱོགས་སུ་བསྟན་པས་གང་སྣང་དབང་དུ་འགྱུར་ཞིང་དངོས་གྲུབ་ཀྱི་དགའ་སྟོན་ཆེན་པོར་འགྱུར་ཏེ་རྣལ་འབྱོར་པའི་སྤྱོད་ལམ་གང་དུ་དུས་སུ་བྱ་བ་འདི་ནི་རྣལ་འབྱོར་དུ་བྱ་བ་ཤིན་ཏུ་གལ་པོ་ཆེ་སྟེ། འདིའི་ཡོན་ཏན་ནི་རྣལ་འབྱོར་པ་ཉིད་ལ་མངོན་པར་འགྱུར་ཏེ་ཀུན་ཏུ་གཅེས་སྤྲས་སུ་བྱ་བ་ཉིད་དེ། ཕྱག་རྒྱ་དང་ལྡན་པས་སྔགས་གྲུབ་པར་འགྱུར་ཞེས་རྒྱལ་བ་རྣམས་ཀྱིས་ཡོངས་སུ་བསྔགས་པ་ཉིད་དོ། །ས་མ་ཡཿ རྒྱ༔ གཞན་ཡང་རྟེན་འབྲེལ་གྱི་སྒོ་ནས་བླང་དོར་བརྟགས་པ་དང་། རྟེན་འབྲེལ་གྱི་མཁྱུད་སྤྱད་ཟབ་མོ་རྣམས་ནི་སྔོན་དུ་ཡི་དམ་གྱི་ལྷ་ལ་བསྙེན་བསྒྲུབ་ཐེམ་པས་ཇི་ལྟར་རིགས་པར་སྦྱར་བར་བྱ་སྟེ་གཞན་དུ་ཤེས་པར་བྱའོ། །ས་མ་ཡ༔ ཡི་དམ་ལྷག་པའི་ལྷའི་རིམ་གཉིས་ཟབ་མོའི་རྣལ་འབྱོར་ལ་བརྟེན་ནས་ཟབ་པའི་མན་ངག་གིས་ཚེ་འདི་ཉིད་ལ་མཉྫུ་ཤྲཱིའི་ཡེ་ཤེས་ཀྱི་སྐུ་མངོན་དུ་བྱའོ་ས་མ་ཡ༔ དེ་ལྟར་གོང་གི་སྔགས་ཀྱི་ཚོགས་དེ་དག་ནི་འདིར་རིགས་ཀྱི་ཁྱབ་
བདག་བྱང་ཆུབ་སེམས་རྡོ་རྗེ་ཨ་ར་པ་ཙ་ལ་སྦྱར་ཀྱང་རུང་རང་གང་ལ་མོས་པའི་འཇམ་དཔལ་གྱི་སྔགས་ལའང་སྦྱར་དུ་རུང་ངོ་། །དེ་ཡང་ཐོག་མར་རྩ་བའི་བསྙེན་པ་ཚད་དང་ལྡན་པ་གྲུབ་པའི་སྒོ་ནས་ལས་གང་ཡང་ཐོགས་པ་མེད་པར་འགྲུབ་ཅིང་། དེ་ནས་ལས་སྔགས་ཀྱི་ཚད་གཞུང་ནས་བཤད་པ་དེས་ལས་གྲུབ་པའམ། གལ་ཏེ་མ་གྲུབ་ན་ལས་གྲུབ་པའི་རྟགས་དང་སྦྱར་ཏེ་ཚད་གཟུང་བར་བྱ་དགོས་ཤིང་། འདིར་བསྟན་པ་འདི་དག་སངས་རྒྱས་ཀྱིས་བསྟན་པའི་གསང་སྔགས་བླ་ན་མེད་པ་ཡིན་པས་ན། འབྲས་བུ་གདོན་མི་ཟ་བར་ཐོབ་པར་བྱེད་པ་ཡིན་པས་ཡིད་ཆེས་པས་གྲུབ་པའི་འབྲས་བུ་མངོན་དུ་མ་མཐོང་གི་བར་དུ་བརྩོན་པ་བསྐྱེད་པར་བྱའོ། །དེ་ལྟ་བུའི་ཤིན་ཏུ་ཟབ་ཅིང་བསླུ་བ་མེད་པ་མཆོག་གི་མན་ངག་དམ་པ་རྒྱལ་བའི་གསུང་གིས་བསྔགས་པ་འདི་དག་ནི་བདེན་འབྲས་མངོན་སུམ་པ་ཉིད་དེ། སྔགས་དང་ཕྱག་རྒྱ་ཏིང་ངེ་འཛིན་རྫས་སོགས་ལ་བརྟེན་པའི་འཁྲུལ་འཁོར་རབ་འབྱམས་ནི་འཇམ་དཔལ་རྡོ་རྗེའི་སྔགས་རྒྱུད་རྣམས་སུ་གསལ་ཞིང་། སྙིགས་མའི་དུས་འདིར་ཡང་འཇམ་དཔལ་གྱི་སྔགས་གྲུབ་པ་འབྱུང་ཞེས་རྒྱལ་བའི་བཀའ་ལས་བྱུང་སྟེ། གང་གིས་འཇམ་དཔལ་ཞེས་པའི་མཚན་ཐོས་པའང་རིག་སྔགས་གྲུབ་པའི་ཡོན་ཏན་ཐོབ་ཅིང་། འཇམ་
དཔལ་ལ་བརྟེན་པའི་རིག་སྔགས་ཐམས་ཅད་བསླུ་མེད་ངེས་པར་གྲུབ་ཅེས་ཆེ་ཐང་དུ་བསྔགས་པ་དང་། འཛམ་གླིང་མཛེས་པའི་རྒྱན་དུ་གྱུར་པ་རྒྱ་བོད་ཀྱི་དམ་པ་དངོས་གྲུབ་བརྙེས་པ་ཐམས་ཅད་ཕལ་མོ་ཆེ་འཇམ་དཔལ་གྱི་སྔགས་ལས་གྲུབ་པ་ཐོབ་པ་མང་ཞིང་། དེང་གི་བར་བདེན་འབྲས་མངོན་སུམ་མྱོང་བའི་བྱིན་རླབས་ལ་ཡིད་ཆེས་པ་དག་པའི་སྣང་བར་བརྟེན་ཏེ་ཚད་ལྡན་གྱི་ལུང་དོན་གབ་སྦས་མེད་པར། འདིར་བཀོད་པས་ན་ཤིན་ཏུ་ཟབ་ཅིང་ཡིད་ཆེས་པའི་གནས་ཏེ། དེ་དག་གི་ཚུལ་ལག་ཏུ་བླང་བས་གསལ་བར་འགྱུར་རོ། །ས་མ་ཡཱ༔ རྒྱ༔ འདི་ལྟ་བུ་ཡི་མན་ངག་བཅུད། །ཟབ་ཅིང་གསང་བའི་སྙིང་པོ་སྟེ། །རང་གིས་སྦས་ནས་ཉམས་སུ་ལོངས། །ནོར་བུའི་གཏེར་ཆེན་རྙེད་དང་མཚུངས། །མཆོག་གསུམ་བྱིན་རླབས་བསླུ་མེད་དང་། །རང་གི་དད་དམ་རྣམ་དག་བློ། །ཕན་ཚུན་རྟེན་འབྲེལ་གྱུར་པ་ན། །རྒྱུད་དོན་རིག་པས་གསང་ནས་སྤེལ། །སངས་རྒྱས་ཀྱི་ནི་བཀའ་ཡིན་ལ། །བླ་མས་གནང་བའི་མན་ངག་ཡིན། །ཐུན་མིན་གསང་བའི་གཏེར་ཡང་སྟེ། །རང་གིས་མྱོང་བའི་དག་སྣང་ཡིན། །དད་དམ་གཙང་མའི་སློབ་ཚོགས་ཀྱིས། །དེ་བཞིན་རིག་སྔགས་ཡོན་ཏན་མྱོང་། །ཟབ་བོ་གསང་ངོ་གཏད་དོ་རྒྱ༔ བཀའ་སྲུང་རྣམས་ཀྱིས་བྱ་ར་ཀྱིས། །ས་མ་ཡཿརྒྱ༔
ཨི་ཐི༔ གུཧྱ༔ མནྟྲ་དྷ་ཐིམ༔ དེ་ལྟར་འཇམ་དཔལ་ཀུན་འབྱུང་ནོར་བུའི་རྒྱལ་པོའི་ལས་ཚོགས་འདི་དག་ནི། འཇམ་དཔལ་རྩ་བའི་རྟོག་པ་དང་དཔའ་བོ་གཅིག་ཏུ་གྲུབ་པའི་རྒྱུད་སོགས་རྒྱལ་བའི་བཀའ་དང་། གྲུབ་ཆེན་རྣམས་ཀྱི་མན་ངག་དང་། དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་ཝའི་ཟབ་གཏེར་རྡོ་རྗེའི་གསུང་གི་གནད་རྣམས་ལ་བརྟེན་ནས། དཔལ་མ་ཧཱ་གུ་རུ་བློ་ལྡན་མཆོག་སྲེད་རྩལ་འཇམ་དཔལ་རྡོ་རྗེ་རྣོན་པོའི་བྱིན་རླབས་ཀྱི་སྣང་བས་གོ་ཕྱེས་ཏེ་མཆོག་གི་གདམས་པ་ཇི་ལྟར་རྙེད་པའི་ཟབ་དགུའི་བཅུད་དྲིལ་བའི་མན་ངག་སྙིང་པོའི་བེ་བུམ་འདི་ནི་འཇམ་དཔལ་དགྱེས་པའི་རང་མདངས་མཚོ་བྱུང་བཞད་པའི་གེ་སར་རམ། ཟིལ་གནོན་དགྱེས་པ་རྩལ་དུ་འབོད་པས་རབ་ཚེས་མྱོས་ལྡན་ཁྲུམས་ཟླའི་དམར་ཕྱོགས་ཀྱི་ཚེས་དགུ་རེས་གཟའ་ལྷ་ཡི་བླ་མ་དང་རྒྱུ་སྐར་གྲུབ་པའི་རྒྱལ་མོ་རྩེ་བའི་དུས་ཚེས་དགེ་བར་རྫོགས་པར་བགྱིས་པ་འདིས་བསྟན་འགྲོ་ལ་མཆོག་ཏུ་ཕན་པའི་ཕྲིན་ལས་མཁའ་དང་མཉམ་པ་འབྱུང་བར་གྱུར་ཅིག །དགེ་ལེགས་བཀྲ་ཤིས་ཕྱོགས་ཐམས་ཅད་དུ་འཕེལ་ཞིང་རྒྱས་སོ།། །།