འཆི་མེད་བཅུད་ལེན་སྒྲུབ་པའི་ཐབས་མཆོག་བདུད་རྩིའི་འབུམ་པ་བཟང་པོ།
འཆི་མེད་བཅུད་ལེན་སྒྲུབ་པའི་ཐབས་མཆོག་བདུད་རྩིའི་འབུམ་པ་བཟང་པོ་བཞུགས། །
ཨོཾ་སྭ་སྟི། འཆི་མེད་པདྨ་རྒྱལ་པོ་ཡེ་ཤེས་སྐུ། །འཇམ་པའི་དཔལ་སྟེ་གཞོན་ནུའི་གཟུགས་ལྡན་པ། །བདེ་ཆེན་མཁའ་འགྲོའི་སྤྲིན་ཕུང་གཏིབས་པ་དེས། །རྡོ་རྗེའི་ཚེ་དང་ལང་ཚོ་སྩོལ་བར་མཛོད། །རྫས་དང་དམིགས་པ་སྔགས་ཀྱི་རྟེན་འབྲེལ་ལས། །བདུད་རྩི་ར་ས་ཡཱ་ན་སྒྲུབ་པའི་ཐབས། །རིག་འཛིན་མཁའ་འགྲོའི་ཚོགས་ཀྱི་ཞལ་ལུང་བཞིན། །དེང་འདིར་བཀོད་པས་ཀུན་ལ་བན་གྱུར་ཅིག །རྡོ་རྗེའི་རྟེན་མཆོག་རིང་དུ་གནས་པ་ནི། །དངོས་གྲུབ་ཀུན་གྱི་གཞི་ཡིན་འདོད་པའི་དོན། །ཕུལ་བྱུང་འདི་ལ་དགའ་བར་མི་བྱེད་སུ། །དེ་ཕྱིར་བརྩོན་བས་སྒྲུབས་ཤིག་སྐལ་བཟང་རྣམས། །འབྱུང་ལྔའི་དངས་མ་ཨ་ཧ་མ་སྲོག་གི་ཟུངས། །བརྟན་པོའི་རྒྱུ་ནི་ལས་དང་བསོད་ནམས་སྟེ། །རྟེན་ནི་ལུས་ཀྱི་འབྱུང་བ་ཆེ་ལག་ནས། །དེ་སླད་བསོད་ནམས་སྤེལ་ཕྱིར་དཀར་ཆོས་དང་། །མཆོད་སྦྱིན་གང་འགྲུབ་ཁྱད་པར་ཚོགས་འཁོར་བྱ། །ཚེ་སྤེལ་འབྱུང་བསྙོམས་ཤིང་བཅུད་འཕེལ་ཕྱིར། །བདུད་རྩི་སྨན་གྱི་བཅུད་ལེན་བྱ་བ་ནི། །བདུད་རྩི་འདོ་ལྡན་ཆོ་ག་བཞིན་དུ་བཏུ། །འབྲས་གསུམ་བཟང་དྲུག་རྡོ་གཉིས་ཅོང་རྩི་བཞི་དང་ཤུགས་འབྲུམ་བ་ལུ་མཚེ་མ་ཁན། ར་མ་ཉེ་ཉེ་ཤིང་བ་སྤུ་དབང་པོ་ལག །ཐལ་ཀ་རྡོ་རྗེ་མེ་ཏོག་ལུག་མིག་བ། །ཤུ་དག་དཀར་པོ་བུ་རམ་
སྦྲང་རྩི་ས་དྲིལ། །ནང་ཁམས་དང་བསྟུན་སྦྱར་ཚད་ལག་ལེན་དང་། །སྦྱོར་སྣོན་བཅས་པ་ཞལ་ལས་མཉན་བྱས་ཏེ། །རྒྱལ་དང་པུར་བུའི་དུས་བཟང་དགེ་བ་ལ། །བདག་མདུན་མཉྫུ་ཤྲཱི་ར་གསལ་བ་ཡིས། །འོད་ཀྱི་འཁོར་འདས་བཅུད་བསྡུས་སྔགས་ཀྱིས་སྒྲུབས། །དངོས་ཉམས་རྨི་ལམ་མཚན་མ་མཐོང་བར་བྱ། །དེ་ནས་དུས་བཟང་ནས་ཟུང་དུ་དུས་རྒྱུན་དུ། །ཐོང་རངས་རིལ་བུ་བཟའ་ཞིང་དེ་ཡི་ཚེ། །ལུས་ཀྱི་ཆ་བསྲངས་རླུང་རོལ་ན་གསུམ་བསལ། །ནད་གདོན་བར་ཆད་མ་ལུས་དག་པར་བསམ། །རང་ཉིད་ལྷར་གསལ་ཐུགས་ཀའི་འོད་ཟེར་གྱིས། །འཁོར་འདས་དངས་བཅུད་རིགས་ལྔའི་བདུན་རྩི་བཀུག །ལུས་ཀྱི་ནང་གང་སྙིགས་མའི་ཆ་དག་ནས། །འོད་སྐུ་རྡོ་རྗེའི་ལང་ཚོ་གྲུབ་པར་བསམ། །བུམ་ཅན་བདུན་ནམ་ཉེར་གཅིག་བརྒྱ་བར་འབད། །སྐབས་དང་སྐབས་སུ་དམིགས་པ་གསུམ་དང་ནི། །སྔགས་གསུམ་བྱ་བ་གསུམ་པོ་དགུ་ཕྲུགས་སུ། གོ་རིམ་མེད་པར་ཇི་ལྟར་ནུས་པར་འབད། །དེ་ལ་དང་པོ་དམིགས་པ་གསུམ་པོ་ནི། །ཟླ་བའི་བདུད་རྩི་བཏུང་དང་ནམ་མཁའ་གཟའ། །སྙིང་གི་དཔྱིད་སྤེལ་བ་དང་གསུམ་ཡིན་ཏེ། །དང་པོར་རང་གི་སྤྱི་བོར་ཟླ་གདན་ལ། །རྒྱལ་ཀུན་ཡེ་ཤེས་རྡོ་རྗེའི་ངོ་བོ། །རྣམ་སྣང་ངོ་བོ་ཨོཾ་ཡིག་དཀར་པོ་བསམ། །དེ་ལས་
འོད་འཕྲོས་སྲིད་ཞིའི་དངས་མ་བཀུག །ཨོཾ་ལ་བསྟིམས་ནས་བདུད་རྩི་དཀར་པོའི་རྒྱུན། །བབས་པས་ལུས་གང་བཅུད་མཆོག་གྲུབ་བར་བསམ། །འདི་ནི་སྐད་ཅིག་གིས་ཀྱང་མདངས་ལྡན་ཞིང་། །ཚེ་དང་ལང་ཚོའི་བཅུད་ལེན་འགྲུབ་པར་བྱེད། །ཐུན་མཐར་ཟླ་བ་ཨོཾ་དང་བཅས་པ་ནི། །བདུད་རྩིར་ཞུ་སྟེ་རང་གི་ལུས་ལ་བསྟིམ། །ཐོ་རེངས་ལ་སོགས་ནམ་གྲུབ་ཡང་ཡང་བསྐྱར། །གཉིས་པ་ནམ་མཁའ་རྒྱ་ཆེར་མཐོང་བའི་སར། །ལུས་གནད་བསྲངས་ལ་ཐོག་མར་རླུང་རོ་བསལ། །ཆོས་དབྱིངས་ནམ་མཁའི་ཁམས་ཀུན་བདུད་རྩི་ནི། །དཀར་པོ་ལ་སོགས་གང་འདོད་རྣམ་པར་ཞུ། །ཁ་ནས་སིད་ཀྱིས་རྡུབ་པའི་རླུང་དང་སྦྱར། །རང་གི་ལུས་དང་དངས་མར་གྱུར་བར་བསམ། །བུམ་ཅན་བཟུང་ལ་འབྱིན་རྡུབ་སྦྱར་སྟེ། །དེ་འདྲའི་དམིགས་པ་ཡང་ནས་ཡང་དུ་བྱ། །གོམས་པའི་ཚེ་ན་བདུད་རྩིའི་ཁ་དོག་ནི། །གང་ལྟར་དམིགས་པ་དེ་བཞིན་རྣལ་འབྱོར་ལུས། །དེ་འདྲའི་འདབས་དང་ལྡན་པར་འགྱུར་ཞེས་གསུངས་སོ། །ཐུན་གཅིག་དམིགས་ཀྱང་ཚེ་ཉམས་གསོ་བ་དང་། །ཁྱད་པར་རྣམ་ཤེས་ཁམས་ནས་ཉམས་པ་གསོ། །ལེགས་པར་གོམས་ན་ཟས་སོགས་ཞེན་པ་འཆད། །འཆི་མེད་ཚེ་དང་ལང་ཚོ་ཆོག་གྲུབ་སྟེ། །ནམ་མཁའ་བཞིན་དུ་འཕོ་འགྱུར་མེད་པར་གནས། །
གསུམ་པ་རང་ཉིད་འཇམ་པའི་དབྱངས་སུ་གསལ། །ཐུགས་ཀར་དྷུ་ཏེའི་དབུས་སུ་ཟླ་སྟེང་ན། །དྷཱིཿཡིག་མར་སེར་ཉིན་བྱེད་ལྟར་འབར་བས། །འོད་འཕྲོས་སྣང་སྲིད་ཐམས་ཅད་ཁྱབ་བྱས་པས། །ཀུན་ཀྱང་བདེ་ཆེན་པོའི་རང་བཞིན་གྱུར། །དེ་ཀུན་འོད་ལྔ་ཡེ་ཤེས་བདུད་རྩིར་ཞུ། །ལུས་ནང་རྩ་ཁམས་ཀུན་ཏུ་ཁྱབ་པ་ཡིས། །ནད་སོགས་སྙིགས་མའི་ཆ་རྣམས་སངས་ཀྱིས་སྦྱངས། །གསེར་འགྱུར་རྩི་ལྟར་རྩ་ཁམས་རླུང་གི་ཆ། །ཐམས་ཅད་ཡེ་ཤེས་བདུད་རྩིར་གསན་གྱུར་པའི། །དངས་མ་བྷཱི་ཡིག་མི་ཤིག་ཐིག་ལེར་ཐིམ། །འོད་ཀྱི་ལུས་ལ་བདེ་ཆེན་ཡེ་ཤེས་ཐུགས། །འོད་ཟེར་ཉི་མ་འཆར་ཁའི་མདངས་ལྷ་བུ། །སྲིད་ཞི་ཀུན་ཁྱབ་དེ་འདྲའི་དམིགས་པ་ལ། །ཡང་ཡང་རྩ་ལ་སྦྱངས་འཇམ་རླུང་བུམ་ཅན་འབད། །འདི་ནི་རགས་ལུས་དངས་མར་འགྱུར་བ་དང་། །བདེ་ཆེན་ཡེ་ཤེས་མཆོག་ཀྱང་ཚེ་འདིར་འགྲུབ། །སྙིམས་མའི་ཆ་དག་སྒྲིབ་བྲལ་ལྷ་ཡི་ལུས། །འཇིག་རྟེན་གསུམ་ན་ཉི་ལྟར་ལྷམ་མེར་འགྱུར། །ཉིན་མཚན་ངེས་མེད་གང་དེར་རིལ་བུ་བཟའ། །དམིགས་པ་འདི་དང་སྦྱར་བས་རྣལ་འབྱོར་དེས། །རྡོ་རྗེ་སེམས་དཔའི་ཚེ་དང་ལང་ཚོ་འགྲུབ། །སྔགས་གསུམ་དང་པོ་མ་མ་ཀཱིའི་སྔགས་ཀྱིས། །སྲོད་དང་ཐོ་རེངས་ལ་སོགས་ནམ་བདེ་བར། །སྲུང་བ་བྱ་སྟེ་རང་ཉིད་མ་མཱ་ཀཱི། །སྔོན་མོ་དར་དང་རིན་ཆེན་རྒྱན་གྱིས་བརྒྱན། །
པད་ཟླའི་གདན་ལ་ཕྱེད་སྐྱིལ་གྱིསགཡོན་བརྐྱང། བཞུགས་ཤིང། །ཕྱག་གཡས་རྡོ་རྗེ་ལྡ་མེ་འབར་གདེངས། །ཨུཏྤལ་སྔོན་པོའི་ཞགས་བཅས་སྡིགས་མཛུབ་གཡོན། །ཐུགས་ཀར་ཟླ་སྟེང་མྃ་ལས་སྔགས་ཕྲེང་བསྐོར། །དེ་ལས་འོད་ཟེར་སྔོན་པོ་མཁའ་ཁྱབ་འཕྲོས། །ཕྱོགས་བཅུའི་རྒྱལ་བ་སྲས་དང་བཅས་པ་ཡི། །གསང་གསུམ་བྱིན་རླབས་འོད་སྔོན་རྣམ་པར་བསྡུས། །རང་ལ་ཐིམ་པས་རང་ལུས་རྡོ་རྗེ་ཡི། །རྡལ་ཕྲན་ལས་གྲུབ་གཞོམ་དུ་མེད་པ་ལ། ཡེ་ཤེས་མི་ལྕེ་འབར་བས་ནད་གདོན་སོགས། །མི་མཐུན་བར་ཆད་ཐམས་ཅད་བསྲེགས་པར་བསམ། །ཨོཾ་ཤཾ་་ཀ་རེ་ཤཱནྟི་ཀ་རེ་གྷཊ་གྷུཏ་གྷུཊ་ནི་གྷཱ་ཏ་ཡ་གྷ་ཏ་ཡགྷུ་ཊྚི་ནི་སྭཱ་ཧཱ། བདུན་དང་བརྒྱ་ལ་སོགས་པ་གང་འགྲུབ་བཟླ། །འདིས་ནི་ཚེ་དང་བཅུད་ལེན་སྒྲུབ་པ་ལ། །བར་དུ་གཅོད་པའི་བགེགས་ཀུན་རྨང་ནས་ཞི། །དྲན་པ་ཙམ་གྱིས་བར་ཆད་མ་ལུས་འཛོམས། །དེ་ཕྱིར་རྒྱུན་དང་ཁྱད་པར་བར་ཆོད་ཀྱི། །ལྷས་དང་འཇིགས་པའི་དུས་སུ་ལྷག་པར་བཟླ། །གཉིས་པ་སྤྱན་མའི་སྔགས་ཀྱི་གསོ་བ་ནི། །རང་ཉིད་སངས་རྒྱས་སྦྱན་མ་སྐུ་མདོག་དཀར། །ཕྱག་གཡས་འཁོར་ལོ་མིག་འབྲས་ཀྱིས་མཚན་པ། །གཡོན་པས་པདྨ་དཀར་པོ་ལེགས་པར་བསྣམས། །དར་དཀར་ན་བཟའ་རྡོ་རྗེའི་སྐྱིལ་ཀྲུང་གིས། །པད་
ཟླའི་གང་ན་བཞུགས་ཐུགས་ཀར་ཟླ་སྟེང་ལྃཿ དེ་ཡི་ཐ་མར་སྔགས་ཕྲེང་དཀར་པོས་བསྐོར་། །དེ་ལས་འོས་འཕྲོས་རྒྱལ་བ་སྲས་བཅས་ཀྱི། །བྱིན་རླབས་མཆོག་དང་བརྟན་གཡོའི་དངས་མ་ཀུན། །འོད་ཟེར་བདུད་རྩི་དཀར་པོའི་རྣམ་པར་བཀུག །རང་ལུས་གང་བས་ཉམས་པ་ཀུན་གསོས་ནས། །གཞོན་མེད་རྡོ་རྗེའི་ལང་ཚོ་གྲུབ་པར་བསམ། །ཨོཾ་རུ་རུ་སྥུ་རུ་ཛྭ་ལ་ཏི་ཥྛ་སི་དྡྷ་ལོ་ལོ་ཙ་ནི་སརྦ་ཨརྠ་སངྷ་ནི་སྭཱ་ཧཱ། །ཇི་འགྲུབ་བཟླ་བྱ་འདིས་ནི་ཚེ་དང་བཅུད། །ཉམས་པ་ཀུན་གསོ་ཤི་བ་སློང་བར་བྱེད། །ནད་རྣམས་མ་ལུས་ཞི་བའི་མཆོག་ཡིན་ཏེ། །བཟླས་པ་ཙམ་གྱིས་རྡོ་རྗེའི་ལང་ཚོ་འགྲུབ། །གསུམ་པ་གོས་དཀར་མོ་ཡིག་སྔ་སྔགས་ཀྱིས། །རྡོ་རྗེའི་ཚེ་དང་གཟི་མདངས་སྒྲུབ་པ་ལ། །རང་ཉིད་ཡུམ་ཆེན་གོས་དཀར་སྐུ་མདོག་དམར། །གཡོན་པའི་ཕྱག་གི་བརླ་གཡོན་སྟེང་དུ་ནི། །པདྨ་དམར་པོ་འཛིན་ཅིང་ཕྱག་གཡས་ཀྱིས། །ཐུགས་ཀར་པདྨ་དེ་ཡི་ཁ་འབྱེད་ཅིང་། །ལྟེ་པར་གནས་པའི་ནོར་བུ་དམར་པོ་ལ། །གཟིགས་པའི་ཚུལ་ཅན་སྟོད་གཡོགས་དཀར་པོ་སོགས། །དར་དང་རིན་ཆེན་རྒྱན་ལྡན་སྐྱིལ་ཀྲུང་གིས། །པད་ཟླའི་སྟེང་བཞུགས་ཐུགས་ཀར་མདོག་དམར་བའི། །པདྨ་ཁ་སྦྱོར་དབུས་སུ་ཟླ་བ་ལ། །པཱཾ་ཡིག་སྔགས་ཕྲེང་བཅས་པའི་འོད་ཟེར་གྱིས། །སྲས་
བཅས་རྒྱལ་བ་ཁམས་གསུམ་སྣོད་བཅུད་ཀྱི། །ཚེ་དང་གཟི་བརྗིད་བདེ་ཆེན་བདུད་རྩི་ནི། །དམར་པོའི་རྣམ་པས་རང་ལུས་གང་བར་དམིགས། །ཨོཾ་ཀ་ཊེ་ནི་ཀ་ཊཾ་ཀ་ཊེ་སྭཱ་ཧཱ། ཇི་འགྲུབ་བཟླ་སྟེ་འདིས་ནི་ཚེ་ཟད་ཀྱང། །ངེས་པར་གསོ་ཞིང་འཆི་མེད་ཚེ་དབང་འགྲུབ། །གཟི་བྱིན་ཉི་མ་ལྟ་བུ་ལྷམ་མེར་བྱེ། །སྡིག་སྒྲིབ་མ་ལུས་རྩྭ་སྡུར་མེས་བཞིན་འཛོམས། །དེ་ཕྱིར་ཚེ་མཆོག་སྒྲུབ་པས་འདི་ལ་འབད། །བྱ་བ་གསུམ་གྱི་དང་པོ་ཟས་སྐོམ་ཀུན། །བདུད་རྩིར་བྱས་ནས་ཟོས་པས་ནད་འཛོམས་ཤིང། །ཚེ་དང་ལང་ཚོ་འགྲུབ་པར་བྱེད་པ་ན། །བཟའ་བཏུང་ཐམས་ཅད་བྃ་ཡིག་དཀར་པོ་ལས། །བདུད་རྩིའི་རང་བཞིན་ཉིད་དུ་དམིགས་བྱས་ལ། །དེ་ལ་འཁོར་འདས་བརྟན་གཡོའི་བཅུད་བསྡུས་ནས། །བདུད་རྩི་བྱིན་རླབས་སྔགས་བདུན་བཏབ་ལ་བཟའ། །གཉིས་པ་ཉིན་རེ་བཞིན་དུ་ཚེ་གསོ་བ། །བདེ་ཆེན་ཐིག་ལེ་བཅུ་དྲུག་དབྱངས་ཀྱི་གཟུགས། །གཡས་གཡོན་ལུས་ཀྱི་ཆ་རུ་འཕོ་བ་ཡིན། གནས་དེ་དཀར་དམར་ཐིག་ལེའི་དབུས་སུ་ནི། །སོ་སོའི་ཡི་གེ་བསྒོམ་ལ་དེའི་འོད་ཟེར། །ཕྱོགས་བཅུར་འཕྲོས་པས་བརྟན་གཡོའི་དངས་བཅུད་བཀུག །གནས་དེར་ཐིམ་པས་ཚེ་དང་འབྱུང་བའི་བཅུད། །འཕེལ་ཞིང་རྒྱས་པས་ལུས་ཀུན་ཁྱབ་པར་བསམ། །ཞུད་མར་བདུད་རྩིས་དེར་བྱུགས་མཉེ་ཞིང་བསྲུག །དབྱངས་
གསལ་རྟེན་འབྲེལ་སྙིང་པོ་བརྗོད་ཅིང་བཏབ། །ཁྱད་པར་སྤྱི་བོར་གནས་ཚེ་ཙན་དན་དཀར། །གླ་རྩི་ཞུན་མར་སྦྱར་བས་དེར་བྱུ་གསལ། །ཉ་གང་ཟླ་བའི་འོད་ལ་བདེ་བ་དང་། །སྟོང་ལ་ཛ་ཏི་འབྲུ་མར་སྣ་ཚོགས་དང་། །སྦྲང་རྩིས་རྐང་མཐིལ་བྱུ་གསལ་ཉི་མར་བསྲོ། །དེ་ནི་ཚེ་དང་གཟི་མདངས་བདེ་བ་འཕེལ། །ཁམས་སྙོམས་རྡོ་རྗེའི་བཅུད་ལེན་མྱུར་དུ་འགྲུབ། །གསུམ་པ་སྤྱོད་ལམ་བདེ་བར་བྱ་བ་ནི། །བཟའ་བཏུང་གོས་བརྒྱན་གནས་གྲོགས་ཡོ་བྱེད་སོགས། །ཇི་ལྟར་མཐུན་པར་བདེ་ཞིང་བག་ཕེབ་པར། །བརྟེན་ལ་དེ་ཀུན་ལྷ་སྔགས་ཕྱག་རྒྱ་ཡིས། །འདོད་ཡོན་རྡོ་རྗེའི་ལྷ་མོ་དྲུག་ཉིད་དུ། །བྱིན་གྱིས་བརླབས་ཤིང་རང་ཉམས་བདེ་བར་སྦྱར། །གང་སྣང་བདེ་བ་ཆེན་པོའི་ངང་དུ་སྦྱངས། །འཁོར་འདས་བདེ་ཆེན་བདུད་རྩི་དཀར་དམར་གྱི་རྣམ་པར་འོད་ཞུ་རང་ལ་བསྟིམས་བྱས་ཏེ། །གཉུག་མའི་ཐིག་ལེར་རོ་མཉམ་ངང་བཞག་ལ། །འདོད་ཡོན་བདེ་སྟོང་ཆེན་པོར་ལམ་ཁྱིར་བྱ། །ཁྱད་པར་སྲོད་ཀྱི་དུས་ལ་སོགས་པར་ནི། །རང་ལུས་སྐུར་གསལ་ཞི་པ་ཨ་ཧཾ་གི །འབར་འཛག་བདེ་བས་སྒོམས་ཤིང་རླུང་སྦྱོར་བཅས། །བདེ་ཆེན་བདུད་རྩི་དཀར་དམར་འོད་འབར་བས། །རྩ་གནས་ཀུན་དུ་ཁྱབ་པར་བསམ་ཞིང་དགྲམ། །སྐབས་སུ་འཁྲུལ་འཁོར་བྱ་ཞིང་རིགས་
ལྡན་གྱི། །གྲོགས་བཅས་བདེ་བ་སྤེལ་བའི་ཐམས་ལ་འབད། །དེས་ནི་རྡོ་རྗེའི་ཚེ་དང་གཞོམ་མེད་ཀྱི། །ལང་ཚོ་མཆོག་དང་བདེ་ཆེན་ཡེ་ཤེས་འགྲུབ། །དེ་ལྟར་ར་ས་ཡཱ་ནའི་རྫས་མཆོག་གང་། །བརྟེན་ཞིང་རླུང་དང་སྦྱར་བའི་དམིགས་པ་ནི། །ནན་ཏན་བྱ་བ་དངོས་གཞིར་བྱས་ནས་སུ། །དེ་ཡི་གྲོགས་སུ་ཐབས་དགུ་བརྟེན་བྱས་ལ། །བརྩོན་པས་ཉམས་སུ་བླངས་ན་ཟླ་གཅིག་ནས། །བརྒྱད་ཅུའི་མཐར་ཐུག་རྒས་ཤིང་འཁོགས་པ་ཡང་། །འདམ་གྱི་ནང་ནས་པདྨ་གཞོན་ནུ་བཞིན། །བཅུ་དྲུག་ལང་ཚོ་གསར་དུ་འཆར་བྱེད་ཅིང་། །སྙིམས་མའི་ཆ་རྣམས་རིམ་གྱི་དག་ནས་སུ། །ལྷ་ལུས་ཡིད་འོང་འཇིག་རྟེན་ཀུན་གྱི་མཆོག །ཉི་ཟླ་གནས་པ་སྲིད་དུ་འཚོ་བ་བྱེད། །ཚོགས་དང་གཏོར་མ་རྩ་གསུམ་སྲུང་མ་བསྐངས། །འདོད་པའི་དོན་ལ་ཕྲིན་ལས་རྒྱ་ཆེར་བཅོལ། །གཞན་ཡང་ཆུ་སྣའི་བཅུད་དང་འོ་མ་སོགས། །བཏུང་བའི་བཅུད་བླང་ཁྲག་གི་ཁམས་གསོ་ཞིང། །རྡོ་སྣའི་བཅུད་ཀྱིས་རུས་པ་སྲ་བར་བྱེ། །མེ་ཏོག་སྣ་ཚོགས་བཅུད་བླང་མདངས་དང་ལྡན། །དྲོད་སྨན་འབར་འཛག་སྦྱོར་བས་དྲོད་ཉམས་གསོ། །བུམ་ཅན་སོགས་ཀྱིས་རླུང་ཁམས་ཉམས་པ་འཕེལ། །འཆི་མེད་ནམ་མཁའི་བཅུད་བླང་ཡིད་ཉམས་གསོ། །ཀུན་གྱི་ཚེ་འཕེལ་འབྱུང་བ་ཀུན་ཀྱང་གསོ། །དེ་ཕྱིར་ལྟར་རིགས་པར་བརྟེན་པར་བྱ། །རྟེན་འབྲེལ་ཟབ་མོས་
ཐམས་རྣམས་སྣ་ཚོགས་པ། །དུས་དང་དུས་སུ་ཇི་ལྟར་རིགས་པ་བརྟེན། །ལྷ་སྔགས་དམིགས་པ་ཟབ་མོས་ཚེ་སྒྲུབ་ནས། །དངོས་གྲུབ་འདོད་དགུ་ཡིད་བཞིན་འཇོ་བར་བྱ། །ཀུན་ཀྱང་རང་བཞིན་མ་གྲུབ་སྒྱུ་མ་ཡི། །རང་ཚུལ་ཤེས་ནས་ཐམས་ཅད་ལམ་དུ་ཁྱེར། །ཁྱད་པར་སེམས་ཡེ་ནས་འོད་གསལ་བ། །དམིགས་མེད་རྒྱ་ཡིན་ཆེན་པོའི་རང་བབ་ལ། །བླ་མའི་མན་ངག་ལམ་གྱིས་ཡིད་ཆེས་ནས། །མཉམ་པར་བཞག་པས་མཆོག་གི་དངོས་གྲུབ་ཆེ། །གཉུག་མ་རྡོ་རྗེའི་སྲོག་ལ་དབང་ཐོབ་འགྱུར། །དེ་ཕྱིར་སྙིང་རྗེ་ཆེ་ལྡན་ལྷག་བསམ་གྱིས། །སྙིམས་མའི་དུས་སུ་བསྟན་འགྲོའི་ཁུར་ཁྱེར་བ། །དོན་གཉིས་སྒྲུབ་པར་ནུས་པའི་སྤོབས་པ་ཅན། །ཤེས་རབ་མཆོག་གི་རྩལ་འཆང་དེ་རྣམས་ལ། །ཡིད་བཞིན་ནོར་བུ་ལས་ཀྱང་ལྷག་པ་ཡི། །གདམས་པ་ཟབ་མོ་འདི་ནི་གཉེར་དུ་གཏད། །དེས་ཀྱང་དོན་ཆེན་ཉིད་དུ་ཤེས་པ་ཡིས། །ཡ་ལ་བར་མ་དོར་བརྩོན་པས་ཉམས་སུ་ལོངས། །མི་བསླུ་ངེས་པ་རྒྱལ་བ་རིག་འཛིན་གྱི། །བཀའ་ལུང་བཞིན་དུ་དངོས་གྲུབ་དགའ་སྟོན་མྱོང། །ཚུལ་འདི་ལེགས་པར་སྤེལ་བའི་བསོད་ནམས་ཀྱིས། །བསྟན་འཛིན་ཚོགས་རྣམས་ཞབས་པད་བརྟན་པ་དང་། །དེ་ཡི་མཐུ་ལས་རྒྱལ་བའི་བསྟན་པ་དར། །འགྲོ་ཀུན་ཕན་བདེར་འགོད་པའི་བཀྲ་ཤིས་ཤོག །ཅེས་པ་
འདི་རབ་ཚེས་ལྕགས་ཡོས་ཁྲུམ་ཟླའི་དམར་ཕྱོགས་ཀྱི་ཚེས་བཅུའི་ཉི་དྲོས་ཀྱི་ཐུན་སྐབས་སུ་མི་ཕམ་རྣམ་པར་རྒྱལ་བའམ་འཇམ་དཔལ་དགྱེས་པའི་རྡོ་རྗེར་གྲགས་པས་ཤར་མར་སྤེལ་བ་དགེའོ་མངྒ་ལཾ