གེ་སར་རྒྱལ་པོའི་གཡང་འབོད་ཕྱྭ་གཡང་འགུགས་པའི་ལྕགས་ཀྱུ།
གེ་སར་རྒྱལ་པོའི་གཡང་འབོད་ཕྱྭ་གཡང་འགུགས་པའི་ལྕགས་ཀྱུ། བཀྲ་ཤིས་ཕྱྭ་ཆ་གཡང་རྟེན་དང་། །ཡིད་འོང་མཆོད་པ་རྒྱ་ཆེར་བཤམས། །ལྷ་སྔགས་ཏིང་འཛིན་གཟི་བྱིན་བསྐྱེད། །མདའ་དར་གཡབ་ཅིང་འདི་སྐད་བསྐུལ། ཧཱུྃ། སྣང་སྟོང་རོལ་པ་ཆེན་པོ་ལས། །ཤར་ཕྱོགས་རྨ་གཡང་ཆགས་པའི་ཡུལ། །བཀྲ་ཤིས་གངས་དཀར་རི་ཡི་སྤོ། །བདུད་རྩིའི་སྤྲིན་བཟང་ཏ་ལ་ལ། །དབང་གི་གློག་དམར་ཁྱུགས་སེ་ཁྱུག །སྙན་གྲགས་གཡུ་འབྲུག་འུ་རུ་རུ། །བདེ་སྐྱིད་སྦྲང་ཆར་ཤ་ར་ར། །ཕྱྭ་གཡང་ན་བུན་ཐིབས་སེ་ཐིབ། །འཇའ་ཟེར་མེ་ཏོག་ཐོ་ལོ་ལོ། །སྨན་སྤོས་དྲི་བཟང་དུངས་སེ་དུང་། །དེ་འདྲའི་མཐོང་བ་ཀུན་སྨོན་གླིང་། །ངོ་མཚར་ནོར་བུའི་ཕོ་བྲང་ན། །དཔའ་བོ་གླིང་གི་རྒྱལ་པོ་ནི། །གཡང་འཕེལ་ཀུན་གྱི་གཡང་ཆེན་པོ། །བདེ་སྟོང་མཉམ་པའི་ཡེ་ཤེས་ཐུགས། །རིགས་གསུམ་པདྨའི་སྒྱུ་འཕྲུལ་གར། །མ་སངས་གཡང་གི་ནོར་བུ་བཞུགས། །འཁོར་ལོས་བསྒྱུར་བའི་རྒྱལ་པོའི་ཚུལ། །ཞལ་མཛེས་བཀྲག་སྣུམ་ཡ་ལ་ལ། །གསེར་འཁོར་ནོར་བུ་བསམ་འཕེལ་འཛིན། །དཔའ་བརྟུལ་དྭངས་སྨན་ཝེར་མ་དང་། །
རྒྱབ་བརྟེན་རྨ་རྒྱལ་སྤོམ་ར་ནི། །རྨ་རིགས་སུམ་བརྒྱ་དྲུག་ཅུས་བསྐོར། །རྒྱལ་མཚན་བ་དན་ནམ་མཁར་ཕྱར། །དཔའ་བོ་གླིང་གི་སྐྱིད་བྲོ་ལ། །ངོ་མཚར་ཕྱྭ་དང་གཡང་གི་དཔལ། །དེ་རིང་དམ་ལྡན་རྣལ་འབྱོར་པས། །མཆོད་པའི་ལས་ལ་སྤྱན་འདྲེན་ན། །ཐོགས་པ་མེད་པར་འདིར་གཤེགས་ལ། །མཆོད་དོ་བསྟོད་དོ་ཐུགས་དམ་བསྐུལ། །བཀྲ་ཤིས་གཡང་གི་བྱིན་ཆེན་ཕོབ། །སྣོད་བཅུད་བདེ་དྲོད་གཟི་མདངས་སྤོར། །ཆོས་སྐྱོང་དམ་ཅན་དམ་ལ་གནས། །དགྲ་བླ་ཝེར་མ་མཐུ་ཡང་ཆེ། །གནོད་སྦྱིན་གཏེར་བདག་ལས་ལ་དབང་། །དེ་རིང་བསྐུལ་ལོ་སྙིང་གི་ལྷ། །ཐོགས་མེད་དབང་གི་འོད་ཟེར་གྱིས། །སྟེང་འོག་ཕྱོགས་མཚམས་གནས་པ་ཡི། །བཀྲ་ཤིས་བདེ་སྐྱིད་ཕྱྭ་དང་གཡང་། །སྟོབས་འབྱོར་ནུས་པ་ཚེ་བཀྲག་མདངས། །ཕྱོགས་ལས་རྣམ་པར་རྒྱལ་བའི་གཡང་། །ཟས་གོས་དཔལ་ཡོན་མ་ལུས་པ། །འོད་ལྔའི་ཐིག་ལེའི་རྣམ་པ་རུ། །འདིར་ཁུག་འདིར་སྡུས་འདིར་སྟིམས་ལ། །ཕྱྭ་ཆ་གཡང་གི་རྫས་རྣམས་དང་། །རྣལ་འབྱོར་
ལུས་ངག་ཡིད་གསུམ་ལ། །བྱང་ཆུབ་བར་དུ་མི་འབྲལ་བར། །ནོར་བུ་བུམ་བཟང་དཔག་བསམ་ཤིང་། །གསེར་གྱི་སྙིང་པོའི་སྤྲིན་བཞིན་དུ། །དགོས་འདོད་ཆར་པ་རྟག་ཏུ་ཕོབ། །འདོད་རྒུའི་འབྱོར་པ་མཚོ་ལྟར་བསྐྱིལ། །སྟོབས་དཔལ་མཐུ་ནུས་གོང་དུ་འཕེལ། །རིགས་ཁམས་རྩ་རླུང་ཉམས་པ་གསོས། །བཀྲ་ཤིས་ཕྱྭ་གཡང་གཟི་བྱིན་སྤོར། །རེ་འབྲས་ད་ལྟ་ཉིད་དུ་སྨོན། །སྲིད་ཞིའི་དྭངས་བཅུད་དབང་གྱུར་ནས། །འདོད་པ་ཆོས་ཀྱི་དབྱིངས་སུ་ནི། །མཐར་ཕྱིན་ཡེ་ཤེས་སྐུ་རུ་སྨིན། །མཁའ་ཁྱབ་འགྲོ་ལ་ཕན་བདེའི་ཆར། །རྟག་ཁྱབ་ལྷུན་གྲུབ་འབེབས་པར་མཛོད། །ཨོཾ་ཧེ་ཧེ་ཏིཥྛ་ཏིཥྛ་བྷནྡྷ་བྷནྡྷ་དྷ་ར་ཡ་དྷ་ར་ཡ་ནི་རུནྡྷ་ནི་རུནྡྷ། ཨུ་རྣྣ་མ་ཎི་ཡེ་སྭཱ་ཧཱ། ཨོཾ་ཁུ་ཡེ་ཁུ་ཡེ་ཕྱྭ་ཁུ་ཡེ། ཁུ་ཡེ་ཁུ་ཡེ་གཡང་ཁུ་ཡེ། ཧཱུ་ཡེ་ཧུ་ཡེ་མ་ཧཱ་ཤྲཱི་ཡེ་བི་ཛ་ཡ་འདུ། བདེ་སྐྱིད་དཔལ་འབྱོར་ཐམས་ཅད་པུཥྚི་ཀུ་རུ་ཡེ་སྭཱ་ཧཱ། ཞེས་བྱའོ། །མཐའ་བཞིའི་རྒྱལ་ཁམས་བྲན་བསྒྱུར་བའི། །སེང་ཆེན་ནོར་བུ་དགྲ་འདུལ་ཉིད། །རྟེན་འབྲེལ་དུས་དང་སྨོན་ལམ་གྱིས། །
ཕན་བྱེད་ལྷ་ཡི་རྒྱལ་པོར་གྱུར། །དེ་ཕྱིར་ཕུན་ཚོགས་དཔལ་ཀུན་དང་། །ཕྱོགས་ལས་རྣམ་པར་རྒྱལ་བའི་གཡང་། །སྔོན་བྱོན་མཁས་གྲུབ་དུ་མ་ཡི། །ཐུགས་མཛོད་དཔལ་གྱི་བེའུ་ནས། །འདི་ཡི་གཡང་སྒྲུབ་མ་ཎི་ཀ། གཞན་ལ་མི་སྣང་རྒྱས་བཏབ་ན། །རང་བཞིན་འདོད་རྒུ་འཇོ་ཞེས་གྲགས། །དེ་ཡི་རྟེན་འབྲེལ་གསང་བའི་གནད། །ཅུང་ཟད་བླ་མ་ཡི་དམ་གྱི། །བྱིན་རླབས་མཐུ་ཡིས་ཡིད་ཆེས་པས། །དེ་ཚེ་དགེ་བའི་སེམས་ཀྱིས་བྲིས། །རབ་ཚེས་ཆུ་བྱ་ཟླ་༦ཚེས་༡༡ལ་རྫོང་གསར་བཀྲ་ཤིས་ལྷ་རྩེར་མི་ཕམ་པས་བྲིས་པའོ། །མངྒ་ལཾ། །ཀ་ཡ་ཨར་ཨ་སྨད། འདུ་སྨད་ཐི་ཕན། མངྒ་ལཾ། །