འཆི་བསླུ་ནད་གདོན་ཀུན་གྲོལ།
འཆི་བསླུ་ནད་གདོན་ཀུན་གྲོལ་ནི། ཟན་ལས་མི་ཕྱུགས་གང་ཡིན་དེ་ཇི་འདྲ་བའི་གླུད་བཟོས་འཆང་བུ་ཟས་སྣས་བརྒྱན། འོ་སྐྱེམས་དཀར་བོ་གཙང་མ་གཅིག་བཤམས། སྐྱབས་སེམས་ཚད་མེད་བསྒོམ་པ་སྔོན་དུ་བཏང་། རང་ཉིད་སྐད་ཅིག་གིས་འཇམ་དཔལ་མཆོག་སྦྱིན་རྡོ་རྗེའི་སྐུར་བསྒོམ་ལ་དེའི་སྔགས་ཅུང་ཟད་བཟླ། འོ་སྐྱེམས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཅེས། ཨོཾ་ཨཱཿཧཱུྃ་ཧོ། ལན་གསུམ་གྱིས་བྱིན་བརླབས་བྱ། སྟོང་པའི་ངང་ལས་གླུད་གཏོར་དངོས་ཀྱི་ཕུང་ཁམས་སྐྱེ་མཆེད་ཇི་འདྲ་བ་འདོད་ཡོན་མི་ཟད་པའི་གཏེར་དུ་གྱུར། འབྲུ་གསུམ་སམྦྷ་ར་མཚན་བཞིའི་བརླབ། ཧོཿ དགོངས་སུ་གསོལ་ལོ་དཀོན་མཆོག་གསུམ། །དེང་འདིར་འགྲོ་ལ་ཕན་གདགས་སླད། །སྤྱན་འདྲེན་ཕྱག་འཚལ་མཆོད་པ་འབུལ། །ཐུགས་རྗེས་གཟིགས་ལ་བྱིན་གྱིས་རློབས། །ཕྱོགས་བཅུ་དུས་གསུམ་སངས་རྒྱས་དང་། །རྒྱལ་སྲས་སེམས་དཔའ་སེམས་མའི་ཚོགས། །རིག་སྔགས་ལྷ་དང་ལྷ་མོ་རྣམས། །བདུད་རྩི་ཞལ་སྐྱེམས་འདི་བཞེས་ཤིག །ཁྲོ་བོ་ཁྲོ་མོ་བཀའ་ཉན་བཅས། །དཔའ་བོ་མཁའ་འགྲོ་ཆོས་སྐྱོང་དང་། །གནས་བདག་དཀར་ཕྱོགས་སྐྱོང་བ་རྣམས། །བདུད་རྩི་ཞལ་སྐྱེམས་འདི་བཞེས་ཤིག །ལོ་ཟླ་ཞག་དུས་གཟའ་སྐར་དང་། །སྤར་སྨེ་ས་བདག་འབྱུང་བའི་ལྷ། །འཇིག་
རྟེན་སྲིད་པའི་ལྷ་འདྲེ་རྣམས། །བདུད་རྩི་ཞལ་སྐྱེམས་འདི་བཞེས་ཤིག །དྲང་སྲོང་གྲུབ་པ་ལྷ་སོགས་སྡེ། །སྨན་གྱི་ལྷ་མོ་མགོན་སྐྱབས་ལྷ། །འགྲོ་ལ་ཕན་བར་མཛད་པ་རྣམས། །བདུད་རྩི་ཞལ་སྐྱེམས་འདི་བཞེས་ཤིག །སྡུག་བསྔལ་ཅན་ལ་ཕན་བཞེད་པའི། །ཐུགས་དམ་ཆེན་པོའི་བྱིན་རླབས་ཀྱིས། །ནད་པ་འདི་ཡི་ནད་སོལ་ལ། །ཚེ་རིང་ནད་མེད་དངོས་གྲུབ་སྩོལ། །ཞེས་བྱས་ལ་འོ་ཕུད་ནམ་མཁའི་ཁམས་སུ་འཐོར་བར་བྱ། ཧོཿ གླུད་གཏོར་འདོད་ཡོན་རྒྱ་མཚོ་འདི། །དམིགས་བྱ་ཆེ་གེ་མོ་འདི་ལ། །སྔོན་གྱི་ལན་ཆགས་ཡོད་པ་དང་། །ཕྲལ་གྱི་རྐྱེན་བགེགས་བྱེད་པ་ཡི། །གནོད་བྱེད་ནད་བདག་འབྱུང་པོའི་ཚོགས། །ཀུན་ལ་འབུལ་ལོ་ཚིམ་གྱུར་ཅིག །བུ་ལོན་ཤ་འཁོན་གནོད་འཚེ་ཞི། །གླུད་འདི་སྣང་སྲིད་ལྷ་འདྲེས་བཞེས། །མི་ཕྱུགས་འདི་རྣལ་འབྱོར་བདག་ལ་བྱིན། །བཟུང་བ་ཐོག་ལ་བཅིང་པ་ཁྲོལ། །བསྡམ་པ་ལྷོད་ལ་མནན་པ་ཁྱོགས། །ནད་དེ་ཉེ་བར་ཕྱུངས་ནས་སུ། །གདོན་རྣམས་རང་གི་གནས་སུ་དེངས། །ཁྱེར་ཅིག་སོགས་ཚིགས་བཅད་བཅས་བརྗོད། གལ་ཆེ་ན་སཾ་བྷར་མཚན་བཞི་བཅས་ལན་གསུམ་བསྐྱར་ལ། སརྦ་བྷཱུ་ཏ་གཙྪཿ ཞེས་གཤེགས་གསོལ་བྱ། འབྱུང་པོ་གང་དག་དང་། བགེགས་རིགས་སྟོང་ཕྲག་བརྒྱད་ཅུ་ཞི་སོགས་བཀྲ་ཤིས་ཀྱི་ཚིགས་བཅད་བརྗོད་ལ་གླུད་བོར་བར་བྱའོ། །དེས་ཕྲལ་དུ་ཕན་ངེས་སོ། །མེ་རྟ་ཟླ་བ་དགུ་པའི་ཚེས་བཅོ་ལྔ་ལ་མི་ཕམ་པས་ཕྲལ་བྲིས་དགེ། དགེའོ།།