མདོས་གཞུང་བཀྲ་ཤིས་འཁྱིལ་པ།
མདོས་གཞུང་བཀྲ་ཤིས་འཁྱིལ་པ་བཞུགས། །
མདོས་རྣམས་ཐོག་མར་བྱིན་རླབས། སྔགས་དྲུག་ཕྱག་དྲུག་བྱ་བ་ནི། སྦྱངས་བའི་ལྷ་ནི་ཤཱཀ་ཐུབ་སེར། དཀར་པོའང་། ཕྱག་གཉིས་ས་གནོན་ལྷུང་བཟེད་བསྣམས། །མཚན་དང་དཔེ་བྱད་ལྡན་པར་བཞུགས། །པལ་མཾ་ཐལ་མོ་ཁང་སྟོང་ཕྱག་རྒྱའི་ནང་དུ། ཨཱཿདཀར་འོད་འཕྲོས་དངོས་འཛིན་སྦྱང་། ཨོཾ་སྭཱ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། རྫས་རྣམས་རང་བཞིན་གྱིས་རྣམ་པར་དག་པ་སྟོང་པ་ཉིད་དུ་གྱུར། སྤེལ་བའི་ལྷ་ནི་རྣམ་སྣང་དཀར། སེར་འང་། ཕྱག་མཚན་འཁོར་ལོ་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །མཛོད་སྡུར། ཐལ་མོ་ཚིག་
བཅག་ཕྱག་རྒྱའི་ནང་། །ཁཾ་སྔོན་འོད་འཕྲོས་སྣོད་བཅུད་སྤེལ། ཨོཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། རིན་ཆེན་སྒྲོམ་བུའི། ཇི་ལྟར་འདོད་པའི་ཡོན་ཏན་ཟད་མི་ཤེས་པས་ནམ་མཁའི་ཁམས་ཐམས་ཅད་གང་བར་གྱུར། བསྒྱུར་ལྷ་བདུད་རྩི་འཁྱིལ་པ་ལྗང་། ཕྱག་མཚན་རྒྱ་གྲམ་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །ཐལ་མོ་ཁ་འབྱེད་ཕྱག་རྒྱའི་ནང་། །ཛ་དམར་འོད་འཕྲོས་བདུད་རྩིར་གྱུར། །ཨོཾ་བཛྲ་ཨ་མྲྀ་ཏ་ཀུཎྚ་ལི་ཧ་ན་ཧ་ན་ཧཱུྃ་ཕཊཿ །ཐོབ་ལྷ་རིན་འབྱུང་སྐུ་མདོག །མཐེ་བོང་གཉིས་བསྣོལ་སོར་མོ་ལྷག་མ་རྣམས་ཁ་འགྲམ་དུ་འགྱེད་པར་བྱས་པའི་ནང་
དུ་ཛ་དམར་པོ། ཡོ་བྱད་ཐམས་ཅད་བདུད་རྩིའི་རྒྱ་མཚོ་ཆེན་པོར་གྱུར། སེར། །ཕྱག་ན་རིན་ཆེན་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །གཡས་འཛུབ་མོ་ཐུགས་ཀར་བསྒྲེང་། གཡོན་མཆོག་སྦྱིན་ལ་ཏྲཱཾ་སེར་གསལ། མཆོག་སྦྱིན་ཕྱག་རྒྱའི་ཏྲཱཾ་སེར་ལས། །འོད་འཕྲོས་ཀུན་གྱིས་འབད་མེད་ཐོབ། །ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷར་སམྦྷར་ཧཱུྃ། ཡོ་བྱད་ཐམས་ཅད་སོ་སོའི་བསམ་པ་དང་མཐུན་ཞིང་ཡིད་བཞིན་དུ་ཐོབ་བར་གྱུར། ཚིམ་ལྷ་དོན་ཡོད་གྲུབ་པ་ལྗང་། །ཕྱག་མཚན་རལ་གྲི་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །གཡས་ཁུ་ཚུར་མཆོག་ཐུགས་ཀར་བཀན། གཡོན་འདེགས་པའི་སྦྱིན་ཕྱག་རྒྱའི་ནང་། །ཧ་ལྗང་འོད་འཕྲོས་བདུད་རྩིའི་གྱུར། །ཨོཾ་ཛྙ་ན་ཨ་ཝ་ལོ་ཀི་ཏེ་ན་མཿས་མནྟ་སྥ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་སྭཱ་ཧཱ། ཡོ་བྱད་ལ་མགྲོན་རྣམས་འཐབ་རྩོད་མེད་པར་ལོངས་སྤྱོད་ནས་དགྱེས་ཤིང་ཚིམ་པར་གྱུར། དབང་བྱེད་ཕྱག་རྡོར་དམར་པོ་ནི། །ཕྱག་མཚན་རྡོ་རྗེ་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །སོར་མོ་ནང་དུ་བསྣོལ་བ་སྤྱི་བོར་བཅངས་བའི་ཕྱག་རྒྱའི་ཛ་དམར་ལས། འོད་འཕྲོས་མགྲོན་བཞིའི་ སྔོན་པོའང་། མཐུ་སྟོབས་བསྡུས། ཨོཾ་ན་མཿས་མནྟ་བུདྡྷཱ་ནཱཾཿ གྲ་ཧེ་ཤྭ་རི་
པྲ་བྷཉྫ་ཏི་མ་ཧཱ་ས་མ་ཡ་སྭཱ་ཧཱ། མགྲོན་ཐམས་ཅད་བདག་གི་དབང་དུ་འདུས་པར་གྱུར་ཅིང་། ན་མོ་བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་རྣམས་ལ་ཕན་གདགས་སླད། །དོན་རྣམས་གང་དག་བསམ་པ་བྱིན་རླབས་ཀྱི་ཀུན། དེ་དག་ཐམས་ཅད་ཅི་རིགས་པར། །ཐོག་པ་མེད་པར་འབྱུང་གྱུར་ཅིག །དེ་ནས་མདོས་མགྲོན་འགུག་པ་ལ། དང་པོ་བདེན་པའི་ཚིག་གིས་འགུག །ན་མོ་སངས་རྒྱས་རྐང་གཉིས་གཙོ་སྟེ་བདེན་པའི་མཆོག །ཆོས་ཉིད་ཆགས་དང་བྲལ་ཏེ་བདེན་པའི་མཆོག །དགེ་འདུན་འདུས་པའི་གཙོ་ཚོགས་མཆན། སྟེ་བདེན་པའི་མཆོག །བདེན་པའི་མཆོག་ནི་དཀོན་མཆོག་གསུམ་གྱི་བཀའ། །བདེན་པའི་བཀའ་ལ་མི་ཉན་གད་ཡང་མེད། །འབྱུང་བ་ལྔ་ལ་མི་བརྟེན་གང་ཡང་མེད། །འཚོ་བའི་ཟས་ལ་མི་བརྟེན་གང་ཡང་མེད། །འཆི་བའི་སྲོག་ལ་མི་འཛེམ་གང་ཡང་མེད། །སྨྲས་པའི་ཚིག་ལ་མི་ཉན་གང་ཡང་མེད། །ཟབ་མོའི་དོན་ལ་མི་སེམས་གང་ཡང་མེད། །མཐོ་བ་སྲིད་པའི་རྩེ་མོ་མན་ཆད་ནས། །དམའ་བ་ན་རག་དམྱལ་ཁམས་ཡན་ཆད་དུ། །བདག་
དང་རྒྱུ་འབྱོར་ཡོན་གྱི་བདག་པོ་ཡི། །མི་ཕྱུགས་འབྱོར་པ་སྟོབས་དཔལ་བཅས་པ་ལ། །སྔོན་གྱི་ལན་ཆགས་དབང་གིས་འབྲེལ་བ་དང་། །འཕྲལ་གྱི་རྐྱེན་བགེགས་བྱེད་པ་འབྱུང་པོའི་ཚོགས། །ཐམས་ཅད་མ་ལུས་བདག་གི་བཀའ་ལ་ཉོན། །སྐད་ཅིག་ཡུད་ལ་གནས་འདིར་གཤེགས་སུ་གསོལ། །ཧཱུཾ་ཞེ་སྡང་གདུག་པའི་སེམས་རྣམས་ཞི་བར་གྱིས། །སྙིང་རྗེ་བྱམས་པའི་སེམས་སུ་ད་བྱོན་ལ། །དགའ་མགུ་རངས་པའི་སེམས་ཀྱིས་གཏོར་མ་ལོངས། །ཞི་བ་བྱང་ཆུབ་སེམས་དང་ལྡན་པར་མཛོད། །ཞེས་དང་། གཉིས་པ་ལྷ་སྔགས་ཀྱི་སྟོབས་ཀྱིས་འགུག་པ་ནི། རང་ཉིད་ཡི་དམ་གྱི་ཐུགས་ཀའི་ཧཱུྃ་གི་འོད་ལས་འདོད་རྒྱལ་དམར་པོ་ལྕགས་ཀྱུ་དང་ཞགས་པ་ཐོགས་པ་འཕྲོས་པས་ལྷ་འདྲེ་མདོས་བདག་གང་ལ་བྱ་བ་མདོས་ཀྱི་མགྲོན་དུ་རང་དབང་མེད་པར་བཀུག་པར་བསམ་ལ། །ཧཱུྃ་འཇིགས་པའི་ཧཱུཾ་སྒྲ་ངེས་སྒྲོགས་ཤིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་ལོ། །ཧཱུཾ་དུས་གསུམ་སངས་རྒྱས་ཐམས་ཅད་ཀྱི། །ཐུགས་ལས་སྤྲུལ་པའི་ཁྲོ་བོ་ནི། །ཐམས་ཅད་འགུག་མཛད་ཁྲོ་བོའི་རྒྱལ། །
ཊཱཀྐི་ཞེས་བྱ་བྱུང་ནས་ནི། །བགེགས་རྣམས་འགུག་པའི་ལས་མཛད་དེ། །ནམ་མཁའ་སྟོང་པ་འགུག་བྱེད་ན། །གཟུགས་སུ་སྣང་བ་སྨོས་ཅི་དགོས། །བེམ་པོ་རྡོ་ཡང་འགུག་བྱེད་ན། །རྣམ་ཤེས་ལྡན་པ་སྨོས་ཅི་དགོས། །ཁུག་ཅིག་དྲངས་ཤིག་ཁྲོ་བོའི་རྒྱལ། །བགེགས་རྣམས་ཐམས་ཅད་མྱུར་ཁུག་ཅིག །ཨོཾ་བཛྲ་ཊཱཀྐི་རཱ་ཛ་ཧཱུཾ་ཛཿ ཞེས་བཀུག་ལ་སོ་སོ་རང་རང་ལ་འཚམས་པའི། །བདེ་ཞིང་ཡངས་པའི་གནས་སུ་ནི། །ཇི་སྲིད་མཆོད་སྦྱིན་བགྱིད་ཀྱི་བར། །དེ་སྲིད་དུ་ནི་གནས་པར་མཛོད། །ཅེས་བྱས་ལ་གླུད་རང་རང་གི་ཁུང་སྨྲེང་དང་། བསྔོ་བ་གང་འདོད་བྱ། བར་འཕྱོང་གི་རིགས་སྦྱར་བར་བྱའོ། །སྤྱིར་བསྔོ་བ། །ཧཱུྃ་འདོད་པའི་ཡོན་ཏན་ཀུན་ལྡན་བྱིན་རླབས་པས། །ལན་ཆགས་གླུད་ཀྱི་གཏོར་མ་འདི་ཉིད་ནི། །ཚེ་རབས་ཐོག་མ་མེད་ནས་ད་ལྟའི་བར། །སྲོག་ལུས་ལོངས་སྤྱོད་ལན་ཆགས་བསྙགས་རྣམས་དང་། །སྟོང་ཕྲག་བརྒྱད་ཅུའི་བགེགས་ཀྱི་ཚོགས་རྣམས་དང་། །ནད་ཡམས་དལ་བདག་གནོད་བྱེད་ཚོགས་རྣམས་ལ། །འབུལ་ལོ་གདུག་པའི་བསམ་སྦྱོར་ཀུན་ཞི་ཞིང་། །གཞན་ཕན་བྱང་སེམས་རྒྱུད་ལ་སྐྱེས་ནས་ཀྱང་། །རྒྱུ་སྦྱོར་བདག་ཅག་ཅེས་ཁ་བསྒྱུར། ནད་གདོན་བགེགས་ལས་གྲོལ་བར་མཛོད། །
སམྦྷཱ་ར་དང་མཚན་བཞི་བརྗོད། ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང་། །དྲན་དང་བཟུང་དང་བསམ་དང་རེག །གློད་དང་ཞི་དང་གྲོལ་བར་མཛོད། །ཅེས་པ་འདི་ལ་གྲངས་བསོགས་སྟེ་ཆང་བུ་བསྔོའོ། །མཐར་གླུད་བསྔོ་བ་ནི། ཧཱུཾ། སྔོན་ཚེ་ལྷ་དབང་བརྒྱ་བྱིན་གླུད། །ད་ལྟ་རྒྱུ་སྦྱོར་ཡོན་བདག་གླུད། །ཤ་ཡི་གླུད་འདི་ས་ལ་གཏོང་། །ས་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །ཁྲག་གི་གླུད་འདི་ཆུ་ལ་གཏོང་། །ཆུ་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །དྲོད་ཀྱི་གླུད་འདི་མེ་ལ་གཏོང་། །མེ་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདི་གནོད་པ་མ་བྱེད་ཅིག །དབུགས་ཀྱི་གླུད་འདི་རླུང་ལ་གཏོང་། །རླུང་ལ་གནས་པའི་ལྷ་འདྲེ་རྣམས། །གླུད་དང་ཆང་བུ༴ འཁོར་འདིར་གནོད༴ རུས་པའི་གླུད་འདི་བྲག་ལ་གཏོང་། །བྲག་ལ་གནས༴ གླུད་དང་ཆང་བུ༴ འཁོར་འདིར༴ རྩ་རྒྱུས་གླུད་འདི་ཤིང་ལ་གཏོང་། །ཤིང་ལ་གནས༴ གླུད་དང་ཆང་བུ༴ འཁོར་འདིར་གནོད༴ ལྤགས་པའི་གླུད་འདི་
ཐང་ལ་གཏོང་། ཐང་ལ་གནས༴ གླུད་དང་ཆང་བུ་འདི༴ འཁོར་འདིར་གནོད་པ༴ སེམས་ཀྱི་གླུད་འདི་མཁའ་ལ་གཏོང་། མཁའ་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །གང་ཞིག་མཚན་མོར་རྒྱུ་བ་ཡི། །འབྱུང་པོ་རྣམས་དང་ཤ་ཟ་དང་། །སྲིན་པོ་ཤ་རྗེན་ཟ་བ་དང་། །སེམས་ཅན་རྣམ་པ་སྣ་ཚོགས་པ། །ལྗོན་ཤིང་གེལ་པ་སོགས་གནས་པ། །དེ་དང་དེ་ལ་གཏོར་མ་ནི། །བཟའ་བ་ཤ་ཆང་ལ་ཕུག་བཅས། །འབྲས་ཆན་འབྲས་བུ་མང་པོ་ཡི། །མཆོད་སྦྱིན་འདི་ཡིས་འགུ་མགུ་བྱོས་ལ། །གནོད་པའི་བསམ་པ་ཞི་བ་དང་། །བདག་ཅག་རྣམས་ལ་ཕན་པའི་ཡིད། །དེ་རིང་ཕྱིན་ཆད་བསྐྱེད་བར་གྱིས། །རྒྱན་གྱི་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་སྟེ། །དགེ་སློང་དགེ་སྦྱོང་དེ་ཡིན་བྲམ་ཟེའང་དེ། །མཚོན་ཆས་མི་འཇིགས་གང་ཡང་མེད། །འཆི་བའི་སྲོག་ལ་ཀུན་ཀྱང་འཛེམ། །འཚོ་བའི་ཟས་ལ་ཀུན་ཀྱང་འདུ། །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །ཨོཾ་ཆེན་པོའམ་ཆུང་ངུ་གང་དག་གིས། །ལུས་ལ་
མངོན་པར་གནོད་གྱུར་པའི། །ནད་དེ་ཉེ་བར་ཕྱུངས་ནས་སུ། །གདོན་དེ་རང་གི་གནས་སུ་དེངས། །དེ་ལྟར་བདག་གིས་ཅི་ནུས་ཀྱིས། །མཆོད་དང་བསྙེན་བསྐུར་བྱས་པ་ཡི། །དམ་ཚིག་ལ་ནི་གནས་ནས་སུ། །བདག་གི་བསམ་པ་བསྐང་བར་མཛོད། །འདིར་ནི་སེམས་ཅན་ཐམས་ཅད་ཀྱི། །ནད་དེ་རབ་ཏུ་སོལ་མཛོད་ལ། །གདོན་རྣམས་རང་གི་གནས་སུ་དེངས། །སྙིང་རྗེའི་སེམས་ཀྱིས་ཆོས་སྦྱིན་བྱ་བ་ནི། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པར་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་བསྲུང་བའི་དགེ་སློང་དག །སྡུག་བསྔལ་ཀུན་ལས་ངེས་གྲོལ་ལོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོགས་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་རྣམས་ཤེས་གྱིས་ལ། །སེམས་
ཅན་དོན་ནི་མཉམ་མེད་བྱོས། །འོན་ཀྱང་སྐྱོབས་པའི་སྲས་སུ་སྐྱེ། །ཞེས་བྱའོ། །དེ་ནས་གཤེགས་སུ་གསོལ་བ་ནི། ཧཱུྃ་བདག་གིས་ལག་ན་རྡོ་རྗེ་དབང་བསྐུར་བའི་རྒྱུད་ལས་གསུངས། དེ་རིང་ཁྱོད་མཆོད་ཀྱིས། །སོངས་ཤིག་བགེགས་ཆེན་འགྲོ་བར་གྱིས། །ཕྱིན་ཆད་དེ་ལྟར་མ་བྱེད་ཅིག །ཁྱོད་ཀྱི་སྟོབས་དང་རྩལ་མཐོང་སྟེ། །ཁྱོད་ནི་བགེགས་ཀྱང་བྱེད་པར་ནུས། །ཁྱོད་ནི་ལྷ་ཡི་སྤྲུལ་པ་སྟེ། །ཁྱོད་ནི་བགེགས་བྱེད་མི་ནུས་མིན། །སྔོན་ཆད་མཆོད་པ་མ་ཐོབ་པ། །དེ་རིང་བདག་གིས་མཆོད་བྱས་པས། །ཁྱོད་ཀྱིས་ད་ནི་མཆོད་ཁྱེར་ལ། །བགེགས་ཀྱི་བདག་པོ་འགྲོ་བར་གྱིས། །གལ་ཏེ་འདུག་ཀྱང་བགེགས་མིན་ན། །སྔགས་པས་མཆོད་བྱའི་འོས་ཀྱང་ནི། །ཅི་སྟེ་བགེགས་ནི་ཡང་བྱེད་ན། །ཕྱོགས་བཅུའི་སངས་རྒྱས་དབང་གྱུར་ལ། །མི་མཆོག་རྣམས་ཀྱིས་མཁྱེན་པར་གསོལ། །ཞེས་དང་། འབྱུང་པོ་ས་འོག་རྒྱུ་བ་དང་། །གང་ཡང་ས་སྟེང་འཁོད་པ་དང་། །ས་བླར་རྒྱུ་བ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐ་དད་འགྲོ་བར་གྱིས། །སརྦ་བྷུ་ཏ་གཙྪ། ཞེས་རང་གནས་སུ་སོང་བར་བསམ། བསྐྲད་མདོས་ལ་དྲག་སྔགས་ཀྱིས་སྲུང་འཁོར་བསྒོམས། ༈ །རྒྱལ་དབྱངས་ནི། སངས་རྒྱས་ཀྱིས་ནི་བདུད་ཕམ་
མཛད། །ཆོས་མ་ཡིན་ནི་ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་པར་མཛད། །ལྷ་མིན་རྣམས་ཀྱིས་ཟླ་བ་ཕམ། །ནམ་མཁའ་ལྡིང་གིས་རྒྱ་མཚོ་ཕམ། །མེ་ཡིས་ཤིང་རྣམས་ཕམ་པར་འགྱུར། །ཆུས་ནི་མེ་ཡང་ཕམ་པར་འགྱུར། །རླུང་གིས་སྤྲིན་རྣམས་རབ་ཏུ་ཕམ། །རྡོ་རྗེ་ཡིས་ནི་རིན་ཆེན་ཕུག །ལྷ་རྣམས་བདེན་པར་རབ་ཏུ་གསུངས། །ས་ཡང་བདེན་པར་གནས་པ་ལགས། །སངས་རྒྱས་དང་ནི་ཆོས་ཀྱང་བདེན། །བདེན་པར་རྒྱལ་གྱུར་རྫུན་མ་ལགས། །བདེན་པའི་ཚིག་ནི་འདི་དག་གིས། །བསྲུང་བྱ་འདི་ནི་ནད་དང་གདོན། །ཕྱིར་རྒོལ་བ་ནི་ཀུན་ལས་རྒྱལ། །སྡིག་པ་ཐམས་ཅད་རབ་ཏུ་ཕམ་སྭཱ་ཧཱ། ཞེས་དང་། བཀྲ་ཤིས་ཀྱི་ཚིགས་སུ་བཅད་པ་ཅི་རིགས་པས་བདེ་ལེགས་སུ་བྱའོ། །འདི་ནི་གཞུང་རྣམས་ལས་བདག་ཅག་རྣམས་ནི། མི་ཕམ་པས་བསྡུས་པ་དགེ་ཞིང་བཀྲ་ཤིས་པར་གྱུར་ཅིག། །།