དབྱངས་འཆར་དཔེ་རིས་ཟུར་འདེབས།
ཀུན་གཟིགས་དབྱངས་འཆར་ཆེན་མོ་ལས། སོ་ནམ་གཉའ་ཤིང་འཁོར་ལོ། སོ་ནམ་འཁོར་ལོ་ཡུམ་ཁྱོན་ཉོན། །ཐོང་གཤོལ་གཉའ་ཤིང་བཅས་པ་བྲི། །སུརྱ་འཁྱུད་པའི་སྐར་མ་དེ། །ལྕགས་ཀྱི་རྩེ་ལ་གཉིས་བཀོད་ཏེ། །ས་ཐོང་གསུམ་ཡིན་མི་ཐོང་གསུམ། །འཆང་ཟུང་དག་ལ་གཉིས་ཡིན་ཏེ། །གཤོལ་མདའ་བཅུ་ལ་གཉའ་ཤིང་བརྒྱད། །ཟླ་སྐར་ལྕགས་རྩེ་གཉིས་ལ་སོགས། །བཙའ་ཡིས་ཁྱེར་བར་ཐེ་ཚོམ་མེད། །ས་ཐོང་གསུམ་ལ་སོང་བ་ན། །ལོ་ལེགས་འབྱུང་སྟེ་སྲོག་ཆགས་སྡང་། །མི་ཐོང་འབྲུ་འཕེལ་ཤིན་ཏུ་ལེགས། །འཆང་ཟུང་ཆག་རུལ་ལོ་ནད་འབྱུང་། །གཤོལ་མདའ་བཅུ་ལ་བཏང་སྙོམས་བྱེད། །གཉའ་ཤིང་ལོ་ལེགས་དགྲ་ཡིས་འཇོམས། །འདི་ནི་སོ་ནམ་འཁོར་ལོའོ། ༈ །གཞན་ཡང་སོ་ནམ་འཁོར་ལོ་བཤད། །ཉི་མས་འཁྱུད་པའི་སྐར་མ་དེ། །ཏྲི་ཤུལ་དབུས་མའི་རྩེ་མོར་བཀོད། །དེ་ནས་རིམ་བཞིན་གཡས་སྐོར་བཀོད། །ཟླ་བ་རྩེ་མོའི་གུང་ལ་སོང་། །ལོ་ཐོག་རྒྱལ་པོ་རྣམ་པར་འཕེལ། །རྩ་བ་གསུམ་ལ་འབྲས་བུ་མེད། །བར་རྩིབས་བཞི་ལ་བཏང་སྙོམས་ཏེ། །ཡན་ལག་བཅུ་གཉིས་བདེ་ལེགས་བྱེད། །
ཅེས་པ་སོ་ནམ་འཁོར་ལོའོ། །འདི་ནི་ཁ་ཆེའི་མན་ངག་གོ །ཏྲི་ཤུལ་འཁོར་ལོ། ༈ གོས་ཀྱི་འཁོར་ལོ་བཤད་པར་བྱ། །གོས་ཀྱི་གཟུགས་ནི་ལེགས་བྲིས་ལ། །ཉི་སྐར་ནས་བརྩམས་གོང་བར་བདུན། །ཕུ་དུང་གཡས་གསུམ་གཡོན་ལ་གསུམ། །དེ་བཞིན་གོས་ཀྱི་རྒྱབ་ལ་བདུན། །མདུན་གཤམ་གཡས་དང་གཡོན་ལ་རེ། །གོས་ཀྱི་ཆ་གར་སྐར་མ་དྲུག །ཟླ་སྐར་གོང་བར་སོང་བ་ན། །གོང་མ་རྗེས་འཛིན་གོས་མང་ཐོབ། །ཕུ་དུང་གཡས་སོང་བཟའ་བཏུང་ཐོབ། །གཡོན་སོང་ཁ་སྨྲས་གྲི་མཚོན་འཁོར། །མདུན་གཤམ་གཡས་པར་ལོངས་སྤྱོད་གཏེར། །གཡོན་པར་དབུལ་འཕོངས་སྡུག་བསྔལ་བྱེད། །ཆ་གར་མ་ཟད་བར་དུ་ནི། །མྱ་ངན་བྲེལ་འཕོངས་བྱེས་སུ་འཁྱམས། །གོས་གསར་བཟོ་གྱོན་རྣམས་ཀྱི་དོན། །རྒྱལ་པོ་སོགས་ཀྱིས་བརྩི་བར་བྱ། །གཞན་དུ་མ་བཤད་རི་སྲས་མོ། །མངྒ་ལཾ། སྨན་དཔྱད་འཁོར་ལོ་ཡུམ་ཁྱོད་
ཉོན། །སྨན་པ་སྨན་ཐུར་སྨན་ཕོར་དང་། །ནད་པའི་གཟུགས་ནི་ལེགས་བྲིས་ལ། །ཉི་སྐར་ནས་བརྩམས་སྨན་ཕོར་བདུན། །སྨན་ཐུར་བདུན་ལ་སྨན་ཕོར་བདུན། །ནད་པ་དག་ལ་བདུན་བྲིས་ཏེ། །ཟླ་བའི་སྐར་མ་གར་གནས་བརྟགས། །སྨན་པ་དག་ལ་སོང་བ་ན། །ནད་གཞི་ཆེ་ཞིང་སྨན་པ་དེ། །ཡུན་རིང་བརྟེན་པར་བཤད་པ་ཡིན། །སྨན་ཐུར་བདུན་ལ་སོང་བ་ན། །ནད་ནི་རིམ་གྱིས་འཚོ་བར་བཤད། །སྨན་ཕོར་ལ་ནི་ཟླ་སྐར་སོང་། །སྨན་ནི་བདུད་རྩིར་འགྱུར་བ་སྟེ། །བསམ་པའི་དོན་འགྲུབ་མྱུར་བར་དྭངས། །ནད་ལས་གྲོལ་གྱུར་ཡིད་འདྲེན་མ། །ནད་པའི་བདུན་ལ་ཟླ་སྐར་སོང་། །སྨན་ནི་དུག་ཏུ་འགྱུར་བར་བཤད། །ནད་མེད་ནད་འབྱུང་ནད་ཅན་འཆི། །ཤིན་ཏུ་ངན་པར་བཤད་པ་ཡིན། །ནད་པ་དག་གི་དོན་ཆེད་དུ། །མཚན་མ་མཁན་པོས་བརྩི་བར་བྱ། །འདི་ནི་སྨན་དཔྱད་འཁོར་ལོ་སྟེ། །གཞན་དུ་མ་བཤད་གངས་རིའི་བདག །མངྒ་ལཾ། །གཞན་ཡང་སྲང་གི་འཁོར་ལོ་ཉོན། །སུརྱ་ཡིས་ནི་འཁྱུད་པ་ནས། །བརྩིས་སྟེ་སྲང་མདའ་དག་
ལ་བདུན། །སྲང་རྡོ་བདུན་ལ་སྲང་ཐག་བདུན། །སྲང་མཐིལ་བདུན་ལ་ལྷས་མཆོད་མ། །བུ་རམ་མར་སོགས་འདེགས་པའི་དུས། །ཟླ་སྐར་སྲང་མདའ་བདུན་ལ་སོང་། །ཚུར་ལེན་བཟང་ཏེ་ཕར་འཇལ་ངན། །སྲང་རྡོ་བདུན་ལ་གཉིས་ཀ་འབྲིང་། །སྲང་ཐག་བདུན་ལ་སོང་བ་ན། །འཇལ་ལེན་གཉིས་ཀ་ཤིན་ཏུ་བཟང་། །སྲང་མཐིལ་བདུན་ལ་ཟླ་སྐར་སོང་། །ལེན་པ་འབྲིང་ཡིན་འཇལ་བ་བཟང་། །འདི་ནི་བྲེ་སྲང་འཁོར་ལོ་སྟེ། །ནས་འཇལ་མར་ཐུད་འདེགས་སོགས་ལ། །དུས་ཀྱི་འཁོར་ལོའི་སྦྱོར་བ་ཤེས། །མཁས་པ་དག་གིས་བརྩིས་ལ་སྨྲ། །བྲེ་སྲང་འཁོར་ལོ་འདི་ལྟ་བུ། །དཀར་མོ་ས་སྟེང་དག་ན་དཀོན། །གཞན་དུ་མ་བཤད་གངས་རིའི་བདག། །བྲེ་ཡི་འཁོར་ལོ་བཙུན་མོ་ཉོན། །འབྲུ་སོགས་འཇལ་ལེན་བྱེད་པ་བཟང་། །རི་ཤྲི་ཀ་ཡིས་འཁྱུད་པ་ནས། །བྲེ་ཡི་ཁ་ལ་སྐར་མ་བདུན། །ཕྱི་ལ་བདུན་དང་ནང་དུ་བདུན། །བྲེ་ཞབས་དག་ལ་བདུན་བྲིས་ཏེ། །ཟླ་སྐར་བྲེ་ཡི་ཁ་ལ་སོང་། །ཤིན་ཏུ་བཟང་སྟེ་འབྲུ་མང་འདུ། །ཕྱི་ལ་ཟླ་སྐར་སོང་བ་ན། །འབྲུ་ནི་འདུ་བར་མི་འགྱུར་རོ། །གལ་
ཏེ་འདུས་ན་དབང་ཕྱུག་ལ། །དགྲའམ་ཁ་སྨྲས་མེད་དུ་འཆོར། །ནང་གི་སྐར་མར་སོང་བ་ན། །འབྲུ་མང་བཀྲ་ཤིས་བསམ་པ་འགྲུབ། །བྲེ་ཞབས་བདུན་ལ་ཟླ་སྐར་སོང་། །འབྲུ་བསྡུད་བཏང་སྙོམས་ཅན་དུ་འགྱུར། །དེ་ནི་བྲེ་ཡི་འཁོར་ལོ་ཡིན། །ནས་སོགས་ནང་བསྡུད་ཕྱི་ནས་ལེན། །དེ་ཚེ་མཁས་པས་བརྩི་བར་བྱ། །དགེའོ། །མངྒ་ལཾ། །