རྣོ་མཐོང་མོ་ལྷའི་རྒྱལ་པོ།
རྣོ་མཐོང་མོ་ལྷའི་རྒྱལ་པོ་བཞུགས། །
རྣོ་མཐོང་མོ་ལྷའི་རྒྱལ་པོ་ལ་ཕྱག་འཚལ་ལོ། །འདིར་ཞང་ཞོང་འཕྲུལ་གྱི་བཅུ་ཐིག་ཆེན་པོ་བརྟག་པར་བྱ་བ་ལ། ལས་ཀྱི་རིམ་པ་རྣམས་ཕྱོགས་གཅིག་འབྲི་ན། དང་པོ་རྟེན་བཅུ་ཐིག་བཅའ་ཚུལ་ནི། ལུག་གཡང་མོ་ཁྱུ་བརྒྱ་མཚོ་མོ་དལ་ཆེན་གྱི་འགྲམ་དུ་བསྐོར་ནས། ལུག་ཆེ་བ་ཐོད་དཀར་བོང་མིག་ལ་དར་གྱིས་བརྒྱན་པར་བྱས་ནས་གྱེན་དུ་བཏང་། ཁྱི་སེ་མཁལ་ནག་ལ་བཟློག་གཏོ་བཀལ་ནས་ཐུར་དུ་བཏང་། ནག་པོ་སྤྱི་དཀར་ལ་རྣ་དར་དཔུང་རྒྱན་བྱས་ནས་ལྷ་དང་སྲུང་མ་ལ་འབུལ། རྒྱ་རྩ་བཞིན་བཟང་དང་། དམར་རྩ་མཚལ་ཁ། སྔོན་པོ་ལྕགས་ཁ། ཀ་བ་བོང་མིག་དང་བཞི་མགོ་ན་ར་ཕྱུགས་པ་མིག་དང་དབང་པོ་མ་ཉམས་པ་དེ་རྣམས་ཀྱི་སོག་བལ་གཡས་གཡོན་ནས་འདབ་མ་གསུམ་གསུམ་བླང་བའི་བལ་ལ་གཞི་བྱས་ཏེ། དེ་ཡི་ནང་དུ་བསྲེ་རྒྱུ། ར་དཀར་མོའི་ཨག་ཚོམ། དྲེད་མོང་གི་རྣ་བའི་སྤུ། རི་སྤྱང་གི་རྔ་ལྗགས། འབྲོང་གི་རྩིད་པ། སྟག་གཟིག་གི་སྤུ། བྱ་རྒོད་ཐང་དཀར་གྱི་ལྟག་སྤུ། ཕུང་སྲི་རྔ་མང་གི་དཔུང་རྩིད། རྟ་མཆོག་མཚལ་བུའི་རྔོག་མ། རི་སྤྱང་སྔོན་མོས་བསད་པའི་ལུག་གི་སོག་བལ་བཅུ་གསུམ་དང་བཅས་པ། བུ་མོ་ཕ་མ་འཛོམ་པ་གསུམ་གྱིས། དུས་ཚེས་བཟང་པོར་སྔ་དྲོ་གསུམ་ལ་སྔ་བཀལ་བྱས། ཕྱི་དྲོ་གསུམ་ལ་ཕྱིར་འཁེལ་བྱས། ཉིན་གུང་གསུམ་ལ་བཞི་སྒྲིལ་བྱས་ཏེ། ནང་རྐྱ་བརྒྱད་ཕྱི་རྐྱ་བཞི་ཡོད་
པ། སྦོམ་ན་བྱ་རྒོད་ཀྱི་སུག་པ། ཕྲ་ན་ཨབ་ཐོང་གི་རྒྱུ་མ་ཙམ་པ་ཐིག་གུ་ལྔ་ནི་རིང་ཐུང་ཁྲུ་དོ་པ། མོ་རྟ་འདོམ་གསུམ་མམ་འདོམ་གང་བ། སོ་སོའི་རྩེ་མོར་ཁ་བུན་མཛུབ་གང་བ་དར་སྐུད་དམ་རས་སྐུད་དམ་མ་འབྱོར་ན་བལ་སྐུད་ཀྱིས་ཀྱང་རུང་སྟེ། གྲངས་བརྒྱད་དམ། ཡང་ན་སུམ་ཅུ་ཡོད་པ་བྱས་པ། མོ་རྟའི་ཁྲུ་དོའི་མཚམས་སུ་ཤེས་བཞི་མཚོན་བྱེད་ཁ་བུན་བཞི་བཏགས་པ། དེར་དངུལ་དཀར་མེ་ལོང་བཏགས། ཁ་བུན་ཐམས་ཅད་སྔོན་པོ་ཆིག་རྐྱང་ངམ། དཀར་སེར་དམར་ལྗང་སྔོ་ནག་གི་མདོག་སོ་སོར་བྱས་ཀྱང་རུང་། ཁབ་ཚུབ་བདུན་བརྒྱ་ཉི་ཤུ་བཏབ་པ། ཁ་བུན་མཐོ་བརྒྱད་བྱ་རྒོད་ཀྱི་སུག་རིས་སུ་བཏགས་པའམ། མཛེས་ཆོས་སུ་ཚར་ལོའི་རྣམ་པར་རྐེ་དཀྲིས་དང་། ཁ་བུན་གྱི་གོང་དུ་ཁ་དོག་ལྔ་པའི་དཀྲིས་སོགས་མཛེས་ཆོས་མཐོང་བརྒྱུད་ལྟར་བྱ་ཞིང་། ཕྱི་ནང་གསལ་བའི་ཤེལ་དཀར། འུག་པའི་སྤུ་རུ། སྟག་རས་གཟིག་རས་གཡི་དཀར་དང་གསའ་ཡི་སེན་མོ། གླག་གི་ཕྱི་སྡེར། སྟག་གཟིག་གི་སྡེར་མོ་རྣམས་དང་། རིན་ཆེན་སྣ་ལྔ། གཡུ་བྱེར་དུང་སོགས་སྒྲོན་མ་རིན་ཆེན་སྣ་ཚོགས་ཀྱང་། ཤེས་མཐོང་རྣམས་སུ་ཅི་རིགས་པར་གདགས། གཞན་ཡང་མགྲོན་ཡག་གི་སོ་སེན་དང་། བཀྲ་ཤིས་པའི་རྫས་སོགས་ཅི་རིགས་དང་དར་སྣ་སོགས་བཏགས་པར་བྱ་ཞིང་། བགེགས་བསྐྲད་དུག་
ཕྱུང་ཁྲུས་བསང་བྱས་ལ། ཝེར་མའི་རྟེན་དུ་བསྒྲུབ་པར་བྱའོ། ༈ །དེ་ལྟར་བསྒྲུབས་པའི་ཇུ་ཐིག་དེས། རྣོ་མཐོང་བརྟག་པའི་དུས་སུ། གནས་གཙང་མར་ལེབ་ཕྱིང་དཀར་པོའི་སྟེང་ནས་ཀྱི་གཡུང་དྲུང་བཀོད་པར། འབྲུག་ཁྱུང་སེང་གསུམ་བྲིས་པའི་ལྷ་གདན་ལ། མདའ་དར་ལ་གཡུ་དང་ཤེལ་རྡོ་རིན་ཆེན་སྣ་ཚོགས་ཕུ་ཝེར་སོགས་ཀྱི་བྲིས་སྐུ་དང་མེ་ལོང་བཏགས་པ་བཤམ། མོ་ཆས་རྣམས་ཀྱང་དེར་བཤམ། འོལ་སྐོམ་གྱི་ཕྱེ་མར། དཀར་མོ་ལག་གཡས། འོ་ཆང་བསྲེས་པའི་སྐྱེམས་ཕུད། དམོད་ནས། བསང་སོགས་མཆོད་པ་ཅི་འབྱོར་འདུ་བྱ། རྒྱས་པར་རྩ་གསུམ་གཏོར་མ་དང་། རྣམ་ལྔ་བདུད་རྩི་སོགས་ཀྱང་བཤམ། མར་གཞི་ནག་པོར། འདྲེ་སྲིན་བྱུར་གསུམ་དང་། ངམ་རྗེ་རྩོལ་པོ། ཉ་རིང་ཁྲག་མིག་ལྔ་མཚོན་བྱེད། ཕྱོགས་བཞིར་དབུས་ལྔར་མི་གཟུགས་ལྔའམ་བཤོས་བུའམ་འབྲུ་ནག་ཚོམ་བུ་རེ་བཞག །ཐུག་དམར་བུ་དགུ་ལ་ངར་མི་དགུའམ་རྡི་ལ་ནག་དགུ། ཕྱི་རིམ་གོ་བོ་མིག་དམར། བྱི་བ་ལག་སེར། སོལ་པ་ནག་པོ། ཕོ་རོག །སོལ་ཁྲ། སྤྱང་ཀི་ཁ་ནག །རི་བོང་། བྱ་ནག །དྲེལ་ནག །ཁྱི་ནག་ལྕགས་མགོ་རྣམས་ཀྱི་གཟུགས་བྱང་ངམ་མཚོན་བྱེད་ཀྱི་སྔོན་དུ། ཆང་བུ། ཤ་རུས། རམ་པ། ཇ་ལོ་སོགས་མི་ཁའི་ཡས་རྫས་སྣ་ཚོགས་བཞག་གོ ། དེ་ནས་དང་པོ་བགེགས་བསྐྲད་པ་ནི། ཀྱེ། སྟོན་པ་གཤེན་རབ་ཐུགས་རྗེ་ཡིས། །ངེད་སྐྱེས་མཆོག་སྲིད་པའི་བོན་པོ་རྣམས། །ཕྱྭ་གཤེན་བོན་གྱི་སྒོར་ཞུགས་ནས། །ལྷ་གཞི་རིན་ཆེན་སྟེང་ཤེད་ནས། །མོ་པྲ་བཟང་ངན་ལྟ་བ་ལ། །བར་དུ་གཅོད་པའི་བདུད་བགེགས་ཀུན། །གནས་འདིར་མ་འདུག་གཞན་དུ་དེངས། །གལ་ཏེ་མི་འགྲོ་འདུག་གྱུར་ན། །བདག་ཉིད་མགོན་པོ་རྣམ་གསུམ་དང་། །ཕུ་ཝེར་མཆེད་གསུམ་སྤྲུལ་པ་ལས། །འཕྲུལ་གྱི་ཇུ་ཐིག་
གློག་ལྟར་འགྱུ། །ཁ་བུན་ཛོ་དཔལ་མེ་ལྟར་འཕར། །མོ་མདའ་དྲག་ཆེན་ཐོག་ལྟར་འབེན། །བར་དུ་གཅོད་པའི་བདུད་བགེགས་དང་། །སྡིག་པ་མོ་རྐུན་རྡུལ་དུ་རློག །མོ་ཡི་དམུ་གབ་ངན་པ་ཐལ་བ་རྡུལ་དུ་བརླག་པའི་ཕྲིན་ལས་མཛོད་ཅིག །བ་སྭོ་ཨོཾ་ཡུ་ཏྲ་རུ་ཏྲི་ཕཊ་ཤག་ཤག་དུལ་དུལ་ནན་ནན་༔ ཞེས་བརྗོད་ཇུ་ཐིག་གི་བྱ་གླག་སྡེར་མོ་སོགས་ཕྱོགས་བཞིར་ཕྱར་རོ། །དེ་ནས་མཚམས་བཅད་པ། དེ་རིང་སྤྲུལ་པ་ཇུ་ཐིག་གི་མོ་འདི་ལ་བཟང་མཐོང་ངན་དུ་བསྟན་པ། ངན་མཐོང་བཟང་དུ་སྟོན་པ། དགྲ་ངོ་དྲག །གདོན་བྱིངས་ཆེན། སྡིག་པ་མོ་རྐུན་རྣམས་མཚམས་ཆོད་ཅིག །སྟེང་འོག་ཕྱོགས་མཚམས་ཐམས་ཅད་ཁྲོ་བོ་ཕྱག་མཚན་མེ་རི་འབར་བས་མཚམས་བཅད་དེ་སྲུང་བའི་གུར་ཁང་བརྟན་པར་གྱུར། ཨོཾ་དུམ་བུ་ཚལ་པ་རྦད་སྭཱ་ཧཱ། བསོ་རཾ་རཾ་ཛ་རཾ་རཾ་ཧཱུྃ་རཾ་རཾ་ཕཊ་དུང་ལེ་ཕཊ༔ དེ་ནས་དུག་ཕྱུང་བ་ལ། བསེ་ཤིང་ཁྲག་ཅན་རེག་པའི་དུག །རེ་ལྕག་ཁྲ་མོ་མཐོང་བའི་དུག །ཐར་ནུ་སེར་པོ་ཁ་རླངས་དུག །ཐང་ཁྲོམ་དཀར་མོ་མྱོས་པའི་དུག །དུག་ཆེན་བོང་ངག་གསོད་པའི་དུག །མུ་ཟི་སེར་ནག་དྲི་ཡི་དུག །ཨག་ཙམ་སྒོག་པ་ངད་ཀྱི་དུག །ཤུ་ཙཱ་སླ་མོ་བཟའ་བའི་དུག །བཙག་ཆུ་ཉོག་མོ་ཆུ་ཡི་དུག་སྟེ། །དུག་དེ་དགུས་དུག་མར་ལ་ཕུད་དེ། །འདི་སྐད་བརྗོད་དོ། །ཀྱེ། ལྷ་གཞི་དཀར་པོའི་གོང་འདི་རུ། །རྣོ་མཐོང་སྟོན་པའི་ལྷ་ཚོགས་རྣམས། །ཐུགས་དགོངས་ཤེལ་ལྟར་གསལ་བ་ལ། །མུན་པའི་བཙོག་དུག་མི་མངའ་སྟེ། །སེམས་ཅན་མ་རིག་ཉོན་མོངས་པའི། །མེད་ཁམས་གདུག་པའི་ངན་སེམས་ལས། །གདུག་པའི་དུག་དང་བཙོག་པའི་གྲིབ། །ཡི་དམ་ལྷ་དང་དགྲ་བླ་ཡིས། །མི་བཞེད་པ་ཡི་དུག་མར་ཕྱུང་། །དུག་ཕྱུང་ཆག་བསལ་བསྦྲེན་འདོན་ནོ། །ཧ་ལ་ཧ་ལ་མཱ་ར་ཡ་དུག་
ཤིག་ཤིག་ཆོམ་ཆོམ། །ཀ་ཡ་ཀ་ཡ་མཱ་ར་ཡ་དུག་ཤིག་ཤིག་ཆོམ་ཆོམ། །ཀེ་དུ་ཀེ་དུ་མཱ་ར་ཡ་དུག་ཤིག་ཤིག་ཆོམ་ཆོམ། ཞེས་བཟླས་ལ་དུག་སྣ་རྣམས་ལྷ་གཞི་ལ་བསྐོར་ཚུལ་བྱས་ལ་གཞི་ནག་སྟེང་དུ་བོར་རོ། །དེ་ནས་ཚན་ཁྲུས་བྱ་བ་ལ། ག་བུར་གངས་ཀྱི་སྨན། རྒྱ་མཚོ་སྦུ་བ་ཆུ་ཡི་སྨན། གུར་གུམ་སེར་པོ་སྤང་གི་སྨན། ཅོང་ཞི་རྡོའི་སྨན། བྲག་ཞུན་བྲག་གི་སྨན། གླ་རྩི་ནགས་ཀྱི་སྨན། གི་ཝཾ་གླང་པོའི་སྨན། ཏི་སའི་གངས་དང་མ་ཕམ་གྱི་མཚོ་དང་བཅས་པ་དངུལ་སྐྱོགས་ནང་བླུག་པ་ཚན་ཁྲུས་ཀྱི་རྫས་ཡིན་ལ། དེ་ལྷ་བྱ་གོང་མོའི་གཤོག་གཡས་ཀྱིས་གཏོར་ནས། འདི་སྐད་བྱའོ། །གང་ཞིག་གློ་བུར་རྟོག་བཅས་དྲི་མ་རྣམས། །ནམ་མཁའི་ངོགས་ལྟར་གསལ་བར་བྱ་བའི་ཕྱིར། །འོད་དཀར་ཚན་ཁྲུས་འཛིན་པའི་ལྷ་མོ་ཡིས། །ཁྲུས་གསོལ་དག་ཚང་ཁ་བཤལ་ཚངས་པར་བགྱིད། །སྒོ་གསུམ་སྒྲིབ་པ་མ་ལུས་དག་གྱུར་ཅིག །བསོ། དེང་གི་གཙང་མའི་གནས་འདི་རུ། །མོ་པྲ་བཟང་ངན་ལྟ་བ་ལ། །རྫས་དང་ཡོ་བྱད་ཐམས་ཅད་དང་། །ཕྱྭ་གཤེན་བདག་ཅག་འཁོར་བཅས་ལ། །མི་གཙང་དྲི་མ་མི་མངའ་ཡང་། །གཙང་ཆབ་ཁྲུས་ཀྱི་བདུད་རྩི་འདིས། །བག་ཆགས་སྡིག་སྒྲིབ་བྱང་གྱུར་ཅིག །ཨོཾ་ཀུ་ཤུདྡྷོ་གཙང་སལ་ལེ་སང་ངེ་ཡེ་སྭཱ་ཧཱ། ཞེས་ཁྲུས་བྱའོ། །དེ་ནས་བསང་བྱ་བ་ལ། ཨ་ཀྲོང་དཀར་པོ་གངས་ཀྱི་རྩི། སྲོ་ལོ་གཡའ་ཡི་རྩི། ཨ་བ་བྲག་གི་རྩི། སྦྲ་བ་ཐོད་དཀར་སྤངས་ཀྱི་རྩི། སྤོས་མོ་དྲི་ཞིམ་རྫ་ཡི་རྩི། མཁན་པ་གསེར་ལོ་གད་པའི་རྩི། །ཤུག་པ་གཡུ་ལོ་ཉིན་གྱི་རྩི། བ་ལུ་དཀར་པོ་སྲི་བ་ཀྱི་རྩི། ཙནྡན་སྨུག་པོ་ནགས་ཀྱི་རྩི་སྟེ་རྩི་དགུ་སྦྱར་ལ་བསང་བྱ་ཞིང་འདི་སྐད་དོ། །སྐྱོན་རྣམས་མ་ལུས་གློ་བུར་དྲི་མ་ཅན། །ལས་དང་བག་ཆགས་འཁོར་བའི་སྡུག་བསྔལ་རྣམས། །བསང་གིས་དག་པར་བྱེད་པའི་
ལྷ་མོ་ཡིས། །གསེར་གྱི་སྤོས་ཁང་དྲི་ངད་འཕྱུར་བ་འཛིན། །རྣམ་ཐར་གཙང་མའི་ལས་ལ་ངེས་པར་མཛོད། །བསང་ངོ་། །ཡབ་ལྷ་དཔལ་ཆེན་གེ་ཁོད་བསང་། །ལྕམ་མོ་མུ་ཏིང་ཙ་མེད་བསང་། །དགྲ་བླ་དཀྱེལ་ཆེན་ཕུ་ཝེར་བསང་། །རྫུ་འཕྲུལ་ཀུ་བྱི་མང་ཀེ་བསང་། །ཡུམ་གཅིག་ཚང་ཏང་རྒྱལ་མོ་བསང་། །སྲིང་གཅིག་ཏིང་ནམ་རྒྱལ་མོ་བསང་། །ལྕམ་གཅིག་ལི་མུན་ལིན་བརྒྱད་བསང་། །དཔའ་བོ་གྱད་ཀྱི་ཁྱེའུ་བཞི་བསང་། །ཕ་མྱེས་རིགས་ཀྱི་བརྒྱུད་གསས་བསང་། །སློབ་དཔོན་གཉན་གྱི་དྲིན་གསས་བསང་། །བླ་རི་གངས་དཀར་ཏི་སེ་བསང་། །བླ་མཚོ་མ་ཕམ་གཡུ་མཚོ་བསང་། །སྤྲུལ་པ་སུམ་བརྒྱ་དྲུག་ཅུ་བསང་། །རྣལ་འབྱོར་བདག་གི་སྲུང་མ་བསང་། །རྣོ་མཐོང་སྟོན་པའི་འཕྲག་ལྷ་བསང་། །གར་འདུག་ཡུལ་ལྷ་གཉན་པོ་བསང་། །ཁ་ཟ་འབྱེད་པའི་ཞལ་ལྕེ་བསང་། །བསང་ངོ་ལྷ་ཚོགས་དག་གྱུར་ཅིག །ཅེས་བྱས་ལ་བསང་བྱ། དུག་ཕྱུང་ཚན་ཁྲུས་བསང་འདི་རྣམས་རྨི་ལམ་བརྟག་པ་དང་མོ་དང་པྲ་ཡི་རིགས་གང་ལའང་ཤིན་ཏུ་གཅེས་སོ། །དེ་ནས་སྒྲིབ་པ་ཕྱེ་ཞིང་བསལ་བ་ནི། །བསོ། རྣོ་མཐོང་མོ་ལྷའི་རྒྱལ་པོ་རྣམས་ཀྱི་ཡེ་ཤེས་མཁྱེན་པའི་འོད་ཟེར་དང་། རིན་ཆེན་སྒྲོན་མ་འབར་བའི་འོད་ཀྱིས། མོ་འདིའི་མི་མཐོང་བའི་དམུག་པ་དང་གབ་སྐུང་ངན་པ་ཐམས་ཅད་ཕུད་དུ་གསོལ། གཅིག་གཉིས་གསུམ་སྤྲུགས་པས་བཅུ་ཐིག་གི་རྨུག་པ་དེངས། གཅིག་གཉིས་གསུམ་དུ་སྤྲུགས་པས་བཅུ་ཐིག་གི་འཐིབ་པ་སང་། ཤེལ་བས་གསལ། མཆོང་བས་དམར། གཡུ་བས་སྔོ། གསལ་བྱེད་ཀྱི་སྒྲོན་མ་བཀྱག་གོ། །ཕྲག་པ་གཡས་གཡོན་དུ་བརྡབ་བོ། །ཐང་གསུམ་ཀླད་ལ་གཡུག་གོ ། མོ་དམུ་གབ་ཀྱིས་མ་ནོན། ཇུ་ཐིག་འདྲེ་སྲིན་གྱིས་མ་ནོངས། ལྷའི་བདེན་ཚིག་
ལ་བདུད་ཀྱིས་བསླུ་བ་མ་བྱེད། འདྲེ་གདོན་གྱིས་སྒྲིབ་གཡོགས་མ་འཛུད། སྲིན་པོས་གློ་མདའ་མ་རྡེག །མ་སང་གི་འཕྲུལ་མདུད་མ་ཉམས། ཐེ་གུའི་ལེ་ཡོག་མ་ཁུར། བཅུ་ཐིག་ཤར་པ་སྐྱ་དྲུག་འདི་ཡི་འབྱུང་ཁུངས་ལྷ་ལུག་ཉམ་ཆུང་གི་རིང་ལ་རྩྭ་ངན་ཟོས་པ། ཆུ་ངན་འཐུངས་པ་སོགས་ཀྱི་གྲིབ་དང་། མོ་ཆས་ལ་དམེ་བསྣོལ་འགོ་མ་ཡུག་མི་གཙང་བ་ཕོག་པའི་གྲིབ་དང་། ལ་ཁ་བས་ཆོད་པ། ལུང་བ་མོས་ཆོད་པ། བར་སྣང་སྨུག་པས་ཆོད་པ། རྣོ་ལམ་རྡུལ་གྱིས་ཆོད་པ། གནམ་ལ་གོ་བོ་མིག་དམར་གྱི་གྲིབ། ས་ལ་བྱི་བ་ལག་སེར་གྱི་གྲིབ། ཉི་མ་གུང་གི་གྲིབ། མུན་པ་ཚབ་ཚུབ་ཀྱི་གྲིབ། སྐར་མ་རྟ་ཡི་གྲིབ། བྱི་བའི་ཉི་མའི་གྲིབ། ཚེས་དགུ་གསུམ་གྱི་གྲིབ། ཟླ་བ་ཉ་ཡི་གྲིབ་ལ་སོགས་ཕྱོགས་དུས་ཡོ་བྱད་མི་རུང་བའི་དབང་གིས་མོ་སྨོད་པ་བཞིན་དུ་མི་འབབ་མི་ཐིག་པའི་གྲིབ་ཐམས་ཅད་དང་། སྔ་དྲོ་མ་ཕྱིས་མ་བདར་བས། ཕྱི་དྲོ་རང་ཤི་རང་གིས་མ་ཚོར་བའི་གབ་སྐུང་རྨུགས་འཐིབ་དམུ་གབ་ཅི་ཡོད་པ་ཐམས་ཅད་རྩྭ་ཤིང་མཁར་གོང་ལ་སོགས་པའི་རྫས་འདིས། དགྲ་ཁ་དྲག་གདོན་ངོ་དྲག་སྡིག་པ་མོ་རྐུན་ངམ་ཁམས་བདུད་ཀྱི་མགོ་ལ་མར་གཟར་རོ། །ཞེས་བརྗོད་ལ། རྩྭ་འཇག་མ་གཅིག་དང་། ཤིང་མགལ་བ་ཁ་ནག །མཁར་གོང་སྲིན་ཅན། སྤྲུ་མ་མཁན་པ། ཐང་ཕུབ་རྣམས་ལ་མཆིལ་མས་ཐུ་ཡིས་བཏབ་ལ་མར་བཞིའི་སྟེང་དུ་བོར་བར་བྱའོ། །དེ་ནས་སྨྲེང་གྱེར་བྱི་ཞིང་མོ་ལྷ་སྤྱན་འདྲེན་པ་ལ། བསང་བཏང་མདའ་དར་ཐོགས་ལ་འདི་སྐད་དོ། །ཀྱེ། དེ་རིང་སྲིད་པའི་ཁྲི་གདུགས་ལ། གནམ་ལ་ཉི་མ་ཀླུང་བཟང་། ས་ལ་དུས་ཚོད་བག་དྲོ། གཟའ་སྐར་ཐམས་ཅད་མཐུན་ཞིང་ཤིས་དུས་འདིར། བདག་ཅག་རྒྱུད་ཀྱི་བོན་པོས། རིགས་ཀྱི་ལྷ་བདར། ཁུང་གི་སྨྲེང་གྱེར་རོ། །
ད་སྲིད་པ་རྒྱུད་ནས་འབྱུང་བ་ཡི། །རྣོ་མཐོང་མོ་ལྷའི་རྒྱལ་པོ་སྟེ། །ཕུ་ཝེར་རྒྱལ་པོ་མཆེད་དེ་གསུམ། །སྲིང་མོ་ཙ་མིན་མཆེད་གསུམ་དང་། །ཕྱྭ་འུ་གཡང་དཀར་དེ་དང་བདུན། །མདུན་ལྷ་སུམ་བརྒྱ་དྲུག་ཅུ་དེ། །སྔོན་ཕྱྭ་གཤེན་ལེགས་རྒྱལ་ཐང་པོ་ཡིས། །ཇི་ལྟར་མཆོད་ཅིང་བསྟེན་པ་ལྟར། །དེ་རིང་མཆོད་ཅིང་ངས་བསྟེན་ན། །རྣོ་མོ་ཡོན་གཉན་པོ་ཕྱག་ཏུ་བཞེས། །རྣོ་མཐོང་སྟོན་པའི་བྱ་ར་མཛོད། །དེ་འོག་རྒྱུད་ནས་རྒྱུད་དུ་བསྟེན། །ཀུན་མཁྱེན་འཕྲུལ་གྱི་རྒྱལ་པོ་དང་། །ཡེ་མཁྱེན་མངོན་ཤེས་རྒྱལ་པོ་དང་། །ཀུན་རིགས་འཕྲུལ་གྱི་སྒྲོལ་མ་དང་། །སྐལ་ལྡན་ཡིད་བཞིན་ཐང་པོ་ཡིས། །ཇི་ལྟར་མཆོད་ཅིང་བསྟེན་པ་ལྟར། །དེ་རིང་མཆོད་ཅིང་ངས་བསྟེན་ན། །རྣོ་མོ་ཡོན་གཉན་པོ་ཕྱག་ཏུ་བཞེས། །རྣོ་མཐོང་སྟོན་པའི་བྱ་ར་མཛོད། །ད་སྲིད་པ་དེ་རིང་ལུག་ལ་རིང་། །ལུག་ལྷ་བ་བལ་ཆེན་གྱི་སོག་བལ་ལ། །བཅུ་ཐིག་ཤར་པ་སྐྱ་དྲུག་བྱུང་། །དེ་མ་ཆགས་འཕུར་ཏེ་སོང་བ་ལས། །དཔག་བསམ་ཤིང་གི་རྩེ་མོ་ན། །སྤྱི་རྗེ་ཁྱུང་གི་རྭ་ལ་བབས། །དེར་ཡང་མ་ཆགས་འཕུར་ཏེ་སོང་། །རི་བདུན་ཁ་ཁྱེར་བར་མ་ཡི། །བ་བཙུན་འཕྲུལ་མོའི་སྟེང་དུ་བབས། །དེར་ཡང་མ་ཆགས་འཕུར་ཏེ་སོང་། །དབང་ཆེན་གསེར་གྱི་ས་གཞི་ཡི། །མ་ཧཱ་རུས་སྦལ་སྟེང་དུ་བབས། །དེར་ཡང་མ་ཆགས་འཕུར་ཏེ་སོང་། །ཡོད་རི་དིལ་དཀར་རྩེ་མོ་ན། །གཡང་ལྷ་བ་བལ་ཆེན་གྱི་སྟེང་དུ་བབས། །མདུད་མགོ་དྲུག་ལ་མཁར་དྲུག་བཅས། །ཡེ་རྗེ་སྨོན་པས་མིང་བཏགས་པ། །དིང་དིང་སྤུང་པ་གུར་ཆེན་ཞེས། །དེ་ལྷ་གཞི་དཀར་པོའི་སྟེང་དུ་བཏགས། །ཀུན་ཤེས་དྲོང་མཁན་གྱི་དབང་བཟུང་ནས། །ཕྱྭ་འུ་གཡང་དཀར་གྱི་དཔྱད་བཏབ་པས། །ད་བསྐལ་སྲིད་ཆགས་གནས་འཇིག་སྟོང་དང་། །ཚེ་རབས་སྔ་ཕྱི་ད་ལྟ་དང་། །
འབྱུང་བ་དུས་ཀྱི་འགྱུར་ལྡོག་དང་། །སྐྱོན་ཡོན་ལེགས་ཉེས་ཚེ་ཚད་དང་། །སྲིད་པ་རྩ་དཀར་འཕེལ་འགྲིབ་དང་། །ན་ཤི་དུར་གསུམ་གྱི་དཔྱད་ལུགས་དང་། །དགྲ་ཞི་དུར་གསུམ་དཔྱད་རྣམས་ཐིག །ད་མོ་ལ་དིང་དིང་བྱ་བ་དང་། །ཡེ་སྨོན་རྒྱལ་པོའི་བླ་མདུད་དང་། །བ་སྦལ་ཁྱུང་གསུམ་གྱི་དཔྱད་ལུགས་དང་། །ཀུན་མཁྱེན་དྲོང་མཁན་གྱི་སྟོན་པ་དང་། །ཕྱྭ་འུ་གཡང་དཀར་གྱི་སྨྲ་བ་རྣམས་ཀྱང་དེ་ནས་སྲིད། །ད་སྔོན་ཚེ་སྲིད་པའི་ལུགས་བཞིན་དུ། །གཡུང་དྲུང་ཕྱྭ་གཤེན་བདག་ཅག་གིས། །སེམས་བསྐྱེད་སྙིང་རྗེས་གཞི་བཟུང་ནས། །སྣང་སྲིད་གཏན་ལ་དབབ་པའི་ཕྱིར། །ལེབ་ཕྱིང་དཀར་པོ་གཙང་མའི་སྟེང་། །སྔོན་མོ་ནས་ཀྱི་སྨན་མ་བླུགས། །མཚོ་རོག་གཡུ་ཡི་སྒྲོན་མ་བཏེགས། །ལི་དམར་མདའ་ཡི་སྲོག་མཁར་བཙུགས། །བདུད་རྩི་ཤིང་གི་དུད་པ་སྦྲེང་། །དྲི་ཞིམ་སྤོས་ཀྱིས་གཤེགས་ཤུལ་མཚོན། །ཕྱེ་མར་འོལ་སྐོམ་ཕུད་ཀྱིས་མཆོད། །གཡུ་འབྲང་བདུད་རྩི་སྐྱེམས་ཀྱིས་གསོལ། །སྒྲུབ་གཤེན་དཔལ་བོན་སྨྲེང་གིས་བཀྲོལ། །ལྷ་ཆེན་ཕུ་ཝེར་དཀར་པོ་མཆོད། །ཡེ་སྲིད་འཕྲུལ་གྱི་ཇུ་ཐིག་བདར། །ཡེ་མཁྱེན་དགྲ་བླའི་མངོན་ཤེས་བསྒྲུབ། །ཡེ་རྗེ་སྨོན་པའི་རྨི་ལམ་བརྟག །ཡེ་དབང་ལྔ་ཡི་བཀའ་བབ་བྱ། །སྔ་རྟགས་ཕྱི་རྟགས་ངོས་འཛིན་ན། །རྣོ་མཐོང་མོ་ལྷའི་རྒྱལ་པོ་རྣམས། །དེ་རིང་བདག་གི་མགོན་མཛོད་ཅིག །བསོ། ལམ་སྣ་འདྲེན་པའི་བླ་མ་དང་། །རྣོ་མཐོང་མོ་ལྷའི་རྒྱལ་པོ་ལ། །སྒོ་གསུམ་གུས་པས་ཕྱག་འཚལ་ལོ། །ཁྱེད་བཞུགས་པ་ནམ་མཁའི་དབྱིངས་ན་བཞུགས། །སྤྱན་འདྲེན་པ་བར་སྣང་ཁམས་ནས་འདྲེན། །སྐུ་བསྐྱོད་པ་ས་གཞིའི་གནས་སུ་བསྐྱོད། །ལྷ་གཞིའི་གོང་དུ་གདན་ཕོག་ལ། །འབྲུག་ཁྱུང་སེང་གསུམ་གདན་ལ་བཞུགས། །ལྷ་རྟེན་
རྣམས་ལ་རྟེན་ཆོས་ལ། །སྒྲུབ་གཤེན་བདག་ལ་བྱིན་གྱིས་རློབས། །ཇུ་ཐིག་འདི་ལ་དབང་ཞིག་སྐུར། །སྲིད་པ་རྣམས་ལ་གྲོས་ཤིག་གྱིས། །བདར་བ་ཙམ་གྱིས་དགོངས་མཛོད་ལ། །དྲང་པོར་ཕོབ་ལ་གསལ་བར་སྟོན། །རྣོ་མཐོང་མོ་ཡི་དངོས་གྲུབ་སྩོལ། །ཞེས་བྱས་ལ་མདའ་དར་གཡབ། ནས་མཆོད་ཅིང་། ཀྱེ། ལྷ་མཆོད་དོ་བསྟོད་དོ་བཀུར་རོ་བཀྱག་གོ་དབྱིང་ངོ་བརྔན་ནོ་གསོལ་ལོ་འབོད་དོ་བདར་རོ། །མཆོད་ནི་ནས་དང་འབྲས་ཀྱིས་མཆོད། །བརྔན་ནི་གཡག་དང་ལུག་གིས་བརྔན། །བྲག་གི་ཁ་ཁོག །དབྱིག་གི་ངོ་ལོང་། སྐྱ་ཞིབ་ཀྱི་གཉའ་ནོན། ལྟག་བདུད་བཅུ་གཉིས་མ་འགུལ། དུར་སོ་བཅུ་གསུམ་མ་ལྡང་། ལྷ་ཡེ་ཤེས་སྤྱན་ལྡན་གྱི་སྤྱན་དེ་ཡར་ལ་ཕྱེས། །འདྲེ་སྲིན་མོ་མོ་རྐུན་མའི་མིག་དེ་མར་ལ་ཁོབ། །མོ་མིག་གཉན་པོ་ནས་ཀྱིས་ཕྱེས། །བྱ་མིག་གཉན་པོ་རླུང་གིས་ཕྱེས། །དེ་ནས་བདར་བ་ལ་ཇུ་ཐིག་ཐིག་གུ་རྣམས་སོར་རྩེས་འཕེན་བཞིན་འདི་ལྟར་བདར་རོ། །བསོ། མོ་བདར་བ་འདི་དྲངས་སུ་བདར། ཤེས་སུ་བདར། རྣོ་རུ་བདར། མཐོང་དུ་བདར། གསལ་དུ་བདར། བདར་རོ་བདར་རོ་རྣོ་མཐོང་མངོན་ཤེས་འཕྲུལ་གྱི་ལྷ་བདར་རོ། །བསོ། ཇུ་ཐིག་ཤར་བ་སྐྱ་དྲུག་གི ། ཡང་མྱེས་པོ་ཡེ་གཤེན་འཕྲུལ་གྱི་རྒྱལ་པོ། མི་ཤེས་དགུ་ཤེས་ཁོག་པ་ལ་སྙིང་གིས་གང་བ་བདར། ཡང་ཕྱི་དྲོང་མཁན་འཕྲུལ་གྱི་རྒྱལ་མོ། མི་མཐོང་དགུ་མཐོང་དཔྲལ་བ་ལ་མིག་གིས་གང་བ་བདར། མྱེས་པོ་ཡེ་སྲིད་འཕྲུལ་ཀྱི་རྒྱལ་པོ་སྟེང་དུ་གནམ་ཕུབ་མཁན་བདར། ཕྱི་མོ་ཡེ་ཕྱི་འཕྲུལ་གྱི་རྒྱལ་མོ་འོག་ཏུ་ས་བཏིང་མཁན་བདར། ཡབ་ལྷ་རྒྱལ་ཚངས་པ་དཀར་པོ་རིན་ཆེན་གསེར་གྱི་བྲག་ཐོག་ན་རྐན་སྒྲ་ཐག་ཐག་བརྡེབ་པ་བདར། ཡུམ་མཚོ་སྨན་ནེ་ཏྲ་སྔོན་མོ་གཡུ་ཡི་མཚོ་གཏིང་ན་ཟིལ་
བ་ཕྲོ་ཕྲོམ་བྱེད་པ་བདར། སྲས་ཕྱྭ་གསས་ཁྱེའུ་དྲུག་གསུམ་བཅོ་བརྒྱད་བྲག་ལ་མདའ་རྒྱབ་ན་ཤར་ཤར་འབུད་པ་བདར། གཡུ་མིག་ལ་མཚལ་གྱིས་བྲིས་པ་བདར། མཚལ་ཐོག་ཏུ་མེ་འབར་བ་བདར། མེ་ཐོག་ཏུ་དུ་བ་འཐུལ་བ་བདར། ཞང་མེས་དྲོང་མཁན་མུན་རུམ་དཀར་པོ་དགེ་སྡིག་གི་རྟིང་འབྱེད་པ་བདར། སྲིང་མོ་ཕྱྭ་ལྕམ་གནམ་སྨན་མཆེད་གསུམ་མཚོ་ལ་མེ་སྔར་ན་ལྷབ་ལྷབ་བྱེད་པ་བདར། བསོ། ད་ནི་བརྒྱུད་པའི་བླ་མ་བདར། །སངས་རྒྱས་བསྟན་པའི་གཙོ་བོ་བདར། །སྟོན་པ་གཤེན་རབ་མི་བོ་བདར། །སྤྲུལ་པ་ཀུན་ཤེས་ཐང་པོ་བདར། །ཕྱྭ་གཤེན་ལི་རྒྱལ་ཐང་པོ་བདར། །སྟོན་པ་ཡེ་གཤེན་དབང་རྫོགས་བདར། །མཁས་པར་ལྗགས་ལ་སོགས་ཞང་ཞོང་བརྒྱུད་པའི་བླ་མ་བདར། བསོ། ད་ནི་མོ་ཡི་དགྲ་བླ་བདར། སྙིང་མིག་སྲོག་གསུམ་དར་བའི་དགྲ་བླ་ཕུ་ཝེར་རྒྱལ་པོ་མཆེད་གསུམ་བདར། བ་ཁོག་རྣམ་གསུམ་དར་བའི་དགྲ་བླ་སྲིང་མོ་ཙ་མེད་མཆེད་བཞི་བདར། སྲུང་བརྒྱད་དར་བའི་དགྲ་བླ་ལང་རྒྱུད་དཀར་པོ་མཆེད་བརྒྱད་བདར། ལོ་ཁྱིམ་ཕྱག་རྩེ་དར་བའི་དགྲ་བླ་འོལ་རྗེ་གནམ་གྱི་ལྷ་དགུ་བདར། གནས་མལ་རྩེ་འཛིན་དར་བའི་དགྲ་བླ་སྤྲུལ་པ་གཉན་ཆེན་སྡེ་བཞི་བདར། ནམ་མཁའ་འོད་ཀྱི་ལྡིང་ཁང་ན། །འཐོར་གསས་སུམ་བརྒྱ་དྲུག་ཅུ་བདར། །བར་སྣང་འོད་ཀྱི་ལྷ་རྫོང་ན། །བདར་གསས་ཉི་ཁྲི་ལྔ་སྟོང་བདར། །ས་གཞི་བདལ་བའི་གྲུབ་གནས་ན། །རྣོ་གསས་བརྒྱ་དང་རྩ་བརྒྱད་བདར། །དྲོང་མཁན་ཤེས་བཞི་མཐོང་བརྒྱད་བདར། །བསོ། ཤར་ཕྱོགས་དུང་གི་མཁར་ནང་ན། །ཀྱེ་བ་དར་བའི་རྣོ་ལྷ་བདར། །ལྷོ་ཕྱོགས་གཡུ་ཡི་མཁར་ནང་ན། །ད་རོག་དར་བའི་རྣོ་ལྷ་བདར། །ནུབ་ཕྱོགས་ཟངས་ཀྱི་མཁར་ནང་ན། །དམུ་དབལ་དར་བའི་རྣོ་ལྷ་བདར། །བྱང་ཕྱོགས་ལྕགས་ཀྱི་མཁར་ནང་ན། །
མུ་ཁེད་དར་བའི་རྣོ་ལྷ་བདར། །དབུས་ཀྱི་གའུ་གསེར་རྫོང་ན། །གཡུང་དྲུང་དར་བའི་རྣོ་ལྷ་བདར། །ཕྱོགས་བཞི་སྒོ་བཞིའི་མཁར་ནང་ན། །མ་ཟེ་དར་བའི་རྣོ་ལྷ་བདར། །ནམ་མཁའ་སྟོང་པའི་དབྱིངས་རུམ་ན། །དིང་དིང་དར་བའི་རྣོ་ལྷ་འདྲར། །དོག་མོ་ས་ཡི་དཀྱིལ་འཁོར་ནས། །སྐྱིན་དིང་དར་བའི་རྣོ་ལྷ་བདར། །དབུས་རི་རྒྱལ་ལྷུན་པོའི་གཞལ་ཡས་ནས། །གལ་བར་ལིང་ཚེ་ལྷ་བརྒྱད་བདར། །མེ་ཤེལ་ཉི་མའི་མཁར་ནང་ན། །བྱ་ཡུན་དར་བའི་རྣོ་ལྷ་བདར། །ཆུ་ཤེལ་ཟླ་བའི་མཁར་ནང་ན། །བྱ་བུར་དར་བའི་རྣོ་ལྷ་བདར། །འཕན་པོ་སྐར་མའི་མཁར་ནང་ན། །མུ་ས་དར་བའི་རྣོ་ལྷ་བདར། །ཕྱུག་པོ་སྦྲིན་གྱི་མཁར་ནང་ན། །བག་ཚོ་དར་བའི་རྣོ་ལྷ་བདར། །བཙུན་པོ་གཞའ་ཡི་མཁར་ནང་ན། །དོག་ཚང་དར་བའི་རྣོ་ལྷ་བདར། །བར་སྣང་འོད་ཀྱི་གཞལ་ཡས་ན། །ཡར་ལྡིང་དར་བའི་རྣོ་ལྷ་བདར། །སྣང་བྱེད་ཟེར་གྱི་མཁར་ནང་ན། །ཝ་ཚོ་དར་བའི་རྣོ་ལྷ་བདར། །བརྟན་པ་ས་ཡི་མཁར་ནང་ན། །ཁྱུང་བརྒྱང་དར་བའི་རྣོ་ལྷ་བདར། །སྲ་བརྟན་ལྕགས་ཀྱི་མཁར་ནང་ན། །ཚོལ་ཚེ་དར་བའི་རྣོ་ལྷ་བདར། །ལོ་ཕྲོམ་བསེ་ཡི་མཁར་ནང་ན། །ལྡི་བུར་དར་བའི་རྣོ་ལྷ་བདར། །མེ་དཔུང་འབར་བའི་མཁར་ནང་ན། །ཨ་ཁད་དར་བའི་རྣོ་ལྷ་བདར། །ཤིང་ཆེན་ལོ་རྒྱས་མཁར་ནང་ན། །སྤོ་ཚེ་དར་བའི་རྣོ་ལྷ་བདར། །རྣོན་པོ་མཚོན་ཆའི་མཁར་ནང་ན། །ཙེ་ར་དར་བའི་རྣོ་ལྷ་བདར། །དྲང་ཤིང་ལྡེམ་པའི་མཁར་ནང་ན། །དམུ་དག་དར་བའི་རྣོ་ལྷ་བདར། །བདུད་རྩི་ཆུ་ཡི་མཁར་ནང་ན། །སྐྱམ་རིགས་དར་བའི་རྣོ་ལྷ་བདར། །རྦབ་རྒོད་འདྲིལ་བའི་མཁར་ནང་ན། །དྲོང་རིགས་དར་བའི་རྣོ་ལྷ་བདར། །རཀྟ་ཁྲག་གི་མཁར་ནང་ན། །སེ་སྟོད་དར་བའི་རྣོ་ལྷ་བདར། །འཐིབ་བྱེད་མུན་པའི་
མཁར་ནང་ན། །བྲག་རིགས་དར་བའི་རྣོ་ལྷ་བདར། །རྒྱུག་བྱེད་རླུང་གི་མཁར་ནང་ན། །སངས་རིགས་དར་བའི་རྣོ་ལྷ་བདར། །བསོ། དགྲ་བླ་གཡའ་སྤང་སྐྱེས་གཅིག་སོགས། །བྱོད་ཕུར་དར་བའི་རྣོ་ལྷ་བདར། །དགྲ་བླ་བྱ་དཀར་མཚལ་ཐིག་སོགས། །སད་ཁམས་དར་བའི་རྣོ་ལྷ་བདར། །དགྲ་བླ་དུང་སྤྱང་སྔོན་མོ་སོགས། །སུམ་མཉམ་དར་བའི་རྣོ་ལྷ་བདར། །དགྲ་བླ་གཡུ་འབྲུག་སྔོན་པོ་སོགས། །ཧྲང་ཟེ་དར་བའི་རྣོ་ལྷ་བདར། །དགྲ་བླ་དོམ་བུ་ཐུགས་དཀར་སོགས། །མར་ལྡིང་དར་བའི་རྣོ་ལྷ་བདར། །སྲིད་པ་ཡེ་སྨོན་རྒྱལ་པོ་སོགས། །སྐྱེར་རིགས་དར་བའི་རྣོ་ལྷ་བདར། །དགྲ་བླ་ཙང་ཀུན་ཁྱབ་པ་སོགས། །སྤོ་བར་དར་བའི་རྣོ་ལྷ་བདར། །དགྲ་བླ་རེ་འབྱམས་རྒྱུག་པ་སོགས། །སོ་ཡོན་དར་བའི་རྣོ་ལྷ་བདར། །དགྲ་བླ་རྣོ་གཅོད་གཏིང་འབྱིན་སོགས། །མ་ཟེ་དར་བའི་རྣོ་ལྷ་བདར། །དགྲ་བླ་མཐུ་ཆེན་ཝེར་མ་སོགས། །དིང་ཆུ་དར་བའི་རྣོ་ལྷ་བདར། །དགྲ་བླ་སྤྱི་རྗེ་ཁྱུང་ཆེན་སོགས། །ཛ་ཝང་ཛུ་ཝང་དར་བའི་རྣོ་ལྷ་བདར། །བསོ། ན་འབན་གཉན་མཚམས་གོང་མ་དེར། །སྨུག་པོ་སྟོང་གི་དགྲ་བླ་བདར། །རུ་སོད་བདུད་དམག་ཁྲོས་པ་དེར། །ཨ་ལྕགས་འགྲུ་ཡི་དགྲ་བླ་བདར། །བྱ་རལ་སྦྲིན་དམར་གཏིབ་པ་དེར། །སེ་ཁྱུང་དགྲ་ཡི་དགྲ་བླ་བདར། །ལི་ཡན་རླུང་ཁྲིག་ཤོག་རག་དེ། །དམུ་ཚ་སྒ་ཡི་དགྲ་བླ་བདར། །བསོ། ནམ་མཁའི་ཝེར་མ་འབྲུག་ལ་ཆིབས། །ཁམས་གསུམ་སྐད་ཀྱིས་གནོན་པ་བདར། །བར་སྣང་ཝེར་མ་སེང་ལ་ཆིབས། །སྲིད་གསུམ་ཟིལ་གྱིས་གནོན་པ་བདར། །ས་གཞིའི་ཝེར་མ་གླང་ལ་ཆིབས། །ས་གསུམ་ཁ་ལོ་བསྒྱུར་བ་བདར། །ཨ་བསེ་གེ་ཁོད་སྟག་ལ་ཆིབས། །སྟག་ཆིབས་ཅན་སུམ་བརྒྱ་དྲུག་ཅུ་བདར། །ཁས་དྲག་དང་པོ་གཡག་ལ་ཆིབས། །
གཡག་ཆིབས་ཅན་སུམ་བརྒྱ་དྲུག་ཅུ་བདར། །མུ་མཐུར་སྨུག་པོ་རྐྱང་ལ་ཆིབས། །རྐྱང་ཆིབས་ཅན་སུམ་བརྒྱ་དྲུག་ཅུ་བདར། །ཁས་དྲག་ཡོ་གསལ་ཁྱུང་ལ་ཆིབས། །ཁྱུང་ཆིབས་ཅན་སུམ་བརྒྱ་དྲུག་ཅུ་བདར། །མ་ཡམ་རིན་ཆེན་ཤ་བ་ཆིབས། །ཤ་ཆིབས་ཅན་སུམ་བརྒྱ་དྲུག་ཅུ་བདར། །ཅང་སེ་གར་མཁན་ལུག་ལ་ཆིབས། །ལུག་ཆིབས་ཅན་སུམ་བརྒྱ་དྲུག་ཅུ་བདར། །མེ་ཕུར་དམར་པོ་གློག་ལ་ཆིབས། །གློག་ཆིབས་ཅན་སུམ་བརྒྱ་དྲུག་ཅུ་བདར། །ཆུ་སྲིན་སྔོན་པོ་གྱུར་ལ་ཆིབས། །གྱུར་ཆིབས་ཅན་སུམ་བརྒྱ་དྲུག་ཅུ་བདར། །བསོ། ལྷ་རབ་དབང་པོ་བརྒྱ་བྱིན་བདར། །གཙང་རིས་དཔལ་མགོན་བདུན་ཅུ་བདར། །གཉན་རྗེ་སྦར་པ་དུང་མགོ་བདར། །མ་སང་སྤུན་དགུའི་དགྲ་བླ་བདར། །ཀླུ་རྒྱལ་གཙུག་ན་རིན་ཆེན་བདར། །སྤར་སྨེ་ལོ་སྐོར་ས་བདག་བདར། །ལྷ་རབ་སྣང་བ་འོད་ལྡན་བདར། །མི་རབ་ཡེ་སྨོན་རྒྱལ་པོ་བདར། །སྤྲུལ་པ་དུང་མི་ལྡན་དཀར་བདར། །དྲོང་མཁན་མུད་རུམ་དཀར་པོ་བདར། །བན་གྱི་དགྲ་བླ་གསེར་ཐོག་འབར་བ་བདར། །བོན་གྱི་དགྲ་བླ་གཡུ་ཐོག་འབར་བ་བདར། །སྐྱེས་བུའི་དགྲ་བླ་ཐོག་འབྲུག་གློག་གསུམ་བདར། །སྟོང་གསུམ་མགོན་ལྷ་དཀར་པོ་བདར། །སྲིད་པའི་རྨ་གཉན་ཐུགས་ཀར་བདར། །དམུ་ཆེན་དར་མ་སྣང་བྲན་བདར། །ཡེ་སང་དཔའ་བོ་མཆེད་དགུ་བདར། །མ་སང་དཔའ་མོ་མཆེད་དགུ་བདར། །འགྱེད་པའི་ཁྲ་དགུ་བདར། །ཕུག་པའི་དུང་ཁྱུང་དཔལ་རུ་ཅན་དེ་བདར། །བར་པའི་གཡུ་འབྲུག་མེ་གཤོག་ཅན་དེ་བདར། །སྒོ་པའི་དུང་སེང་གཡུ་རལ་ཅན་དེ་བདར། །ཕྱྭ་ཡི་གསེར་སེང་རྔམ་བརྗིད་ཅན་དེ་བདར། །དམུ་ཡི་གཡུ་སེང་བཙུན་བརྗིད་ཅན་དེ་བདར། །གཙུག་གི་དུང་སེང་དཔའ་བརྗིད་ཅན་དེ་བདར། །ཡེ་སྲིད་དཔའ་བརྟན་ལྡོག་མེད་བདར། །
། ཡེ་དབང་དོམ་མགོ་གླང་སྙིང་བདར། །ཡེ་རྗེ་རྣོ་གཅོད་གཏིང་འབྱིན་བདར། །ཡེ་གྲུབ་དྲ་མ་མཆེད་དགུ་བདར། །ཐུགས་དཀར་སྣང་ལྡན་ལ་ཁྲ་བདར། །ཕོ་ལྷ་མི་རྫི་དཀར་མོ་བདར། །ཅང་སེ་མི་མགོན་དཀར་པོ་བདར། །ལྕམ་མོ་ལམ་ལྷ་ཆེན་མོ་བདར། །མཐུ་ཆེན་ཡོར་བོ་རུ་མང་བདར། །གཤེན་མགོན་གསེར་མི་གཡུ་རྟ་བདར། །ཐུག་དཀར་བུ་དགུ་ཡབ་དང་བཅུ་པོ་བདར། །དགུང་སྨན་མཆེད་བདུན་ཡུམ་དང་བརྒྱད་པོ་བདར། །བསོ། གསལ་ནས་མ་འགྲིབ་པ་ཉི་ཟླ་གཉིས་ཀྱི་དྲང་མཁན་བདར། །ཆགས་ནས་མ་ཞིག་པ་འབྱུང་བ་ལྔའི་དྲང་མཁན་བདར། །འདྲེས་ནས་མ་ཕྱེ་བ་གནམ་ས་གཉིས་ཀྱི་དྲང་མཁན་བདར། །བརྩིགས་ནས་མ་ཞིག་པ་རི་རབ་ལྷུན་པོའི་དྲང་མཁན་བདར། །ལྷ་ཀླུ་གཉན་དང་ཝེར་མའི་དྲང་མཁན་བདར། །དགྲ་འདུལ་གྲུབ་པ་མཐུ་ཆེན་བདར། །མ་སང་སྟོང་སྡེ་ཝེར་མ་བདར། །བསྐལ་སྲིད་གཞི་བཏིང་གནམ་ཕྱི་མཆེད་གསུམ་བདར། །ཡང་སྙིང་དཔའ་བོ་སྡེ་བཞི་བདར། །རྣོ་མཐོང་མོ་ལྷ་མཆེད་བརྒྱད་བདར། །མགྲོན་ཡག་དར་མ་བཅུ་གསུམ་བདར། །རྫུ་འཕྲུལ་རླུང་རྟ་ལྷ་བཞི་བདར། །བསོ། ཇུ་ཐིག་མཛད་མི་གཤེན་རབ་མི་བོ་བདར། །བརྒྱུད་པ་ལེགས་རྒྱལ་ཐང་པོ་བདར། །སྤེལ་མི་རིག་པ་དེས་ཁྱེར་བདར། །ཞུ་མི་ཞང་ཞོང་སྤུན་དགུ་བདར། །སྒྲུབ་མི་དཔལ་བོན་རྣམ་གསུམ་བདར། །སྒྲུབ་ས་ཁྱུང་ལུང་དངུལ་མཁར་བདར། །ཇུ་ཐིག་གི་མགོ་བོ་རྨ་རྒྱལ་སྤོམ་ར་བདར། །རྟིང་པ་བཀྲ་རི་ལྷ་མཚོ་བདར། །བཞག་ས་བཞག་བྲ་ལྷ་རྩེ་བདར། །འགྲིམ་ས་ལྷ་སྒང་རིང་མོ་བདར། །ཁྲུས་བྱེད་སྟོང་རི་མཚོ་ནག་བདར། །ཁ་འཛིན་ཡེ་གཤེན་དབང་རྫོགས་བདར། །སྲིང་མོ་འཛི་ཆུ་ལྷ་རྩེ་བདར། །རྒྱབ་བརྟེན་བསིའུ་རུ་གཅིག་བདར། །ཤག་ཕོ་བཀྲ་རི་ལྷ་མཚོ་བདར། །ཕ་ཞང་
རྨ་ཆེན་སྤོམ་ར་བདར། །མ་ཞང་འབྲི་ཆེན་སྡོང་དུར་བདར། །ཞང་པོ་ཁྲི་ལ་སྐྱ་དྲུག་བདར། །སྲུ་མོ་ནེ་བྲ་གཡག་སྙིང་བདར། །བསོ། ནམ་མཁའ་ཁྱུང་གི་རྣོ་ལྷ་བདར། །ཁྱུང་མངོན་ཤེས་ཅན་གྱི་རྣོ་ལྷ་བདར། །བར་སྣང་བ་ཡི་རྣོ་ལྷ་བདར། །བ་རྫུ་འཕྲུལ་ཅན་གྱི་རྣོ་ལྷ་བདར། །ས་གཞི་སྦལ་པའི་རྣོ་ལྷ་བདར། །སྦལ་པ་ཤེས་རབ་ཅན་གྱི་རྣོ་ལྷ་བདར། །དྲན་པོ་འོད་དཀར་ལ་སོགས་པ། །ཞང་ཞོང་སྒོ་ཕུག་བར་གསུམ་གྱི་རྣོ་ལྷ་བདར། །དེ་དང་དེ་ལ་སོགས་པ་དགྲ་བླ་ཝེར་མ་ཐུག་དཀར་ཅོང་སེ་གཉེན་པོ་རྣོ་མཐོང་མོ་ལྷ་རབ་འབྱམས་བདར་རོ། །བསོ། མགོ་བའི་ལྷ་དང་སྲུང་མ་གཉན་པོ་བདར་རོ། །སྐྱབས་གནས་དཀོན་མཆོག་གསུམ་གྱི་བདེན་པ་བདར་རོ། །ཡི་དམ་མཁའ་འགྲོ་ཆོས་སྐྱོང་གི་ནུས་པ་བདར་རོ། །མཐུ་ཆེན་དགྲ་བླ་ཝེར་མའི་སྟོབས་རྩལ་བདར་རོ། །བསོ། རང་གི་ལུས་ངག་ཡིད་གསུམ་ཕུ་ཝེར་རྒྱལ་པོ་མཆེད་གསུམ་གྱི་སྐུར་གྱུར་པ་ལ། སྣང་སྲིད་མོ་ལྷ་ཐམས་ཅད་འདུས་པ་དེ། རྣོ་བའི་མོ་དང་ཕྱ་ལ་བདར། མིག་དང་རྣ་བ་ལྕེ་གསུམ་དུ་སྲིང་མོ་ཙ་མེད་མཆེད་གསུམ་དུང་གི་ལྕོག་ག་དཀར་མོ། སྨྲ་མཁས་གཡུ་ཡི་ནེ་ཚོ། གཡུ་ཡི་ཁྱུ་བྱུག་སྔོན་མོ་གསུམ་དུ་སྤྲུལ་པ་ལ། སྒྲ་ལྷང་ལྷང་། སྐད་སྙན་སྙན། བཞིན་འཛུམ་འཛུམ་དུ་སྟོན་པའི་རྣོ་མཐོང་སྣ་ཚོགས་གཟུགས་ཅན་གྱིས་བསྐོར་བ་དེ། རྣོ་བའི་མོ་དང་ཕྱ་ལ་བདར། བདག་གི་ལག་པ་གཉིས་སུ་ཁྱུང་ནག་གཡུ་ཡི་རལ་བ་ཅན་དང་། བྱ་ཁྲ་ལྕགས་ཀྱི་མཆུ་སྡེར་ཅན་གཉིས་ལ་སྣང་སྲིད་ཀྱི་དགྲ་བླས་བསྐོར་བ་དེ། རྣོ་བའི་མོ་དང་ཕྱ་ལ་བདར། གཞན་ཡང་ལུས་ཕུང་ཁམས་སྐྱེ་མཆེད་ཐམས་ཅད་སྣང་གསལ་རྣོ་མཐོང་མོ་ལྷའི་དཀྱིལ་འཁོར་ཆེན་པོར་གྲུབ་པ་ནང་ཞུགས་པའི་ལྷ་ཚོགས་ཐམས་ཅད་དེ། རྣོ་བའི་མོ་དང་ཕྱ་ལ་བདར། བདག་གི་སྤྱི་
བོའི་གཙུག་ན་བཞུགས་པ་རྣོ་མཐོང་ཕྱ་འུ་གཡང་དཀར་ལ། སྲོག་ལྷ་ཡུལ་ལྷ་ཁ་འཛིན་རྒྱབ་བརྟེན་གྱི་ལྷ་སྲུང་གཉན་པོས་བསྐོར་བ་དེ། རྣོ་བའི་མོ་དང་ཕྱ་ལ་བདར། ཕྲག་པ་གཡས་ཀྱི་གོང་རོལ་ན་མཐུ་ཆེན་ཝེར་མ་ཉི་ཉལ་དགྲ་བླ་འཕྲག་ལྷ་སྡོང་གྲོགས་ཀྱི་ལྷ་ཡིས་བསྐོར་པ་དེ། རྣོ་བའི་མོ་དང་ཕྱྭ་ལ་བདར། ཕྲག་པ་གཡོན་གྱི་གོང་ན་སྲིད་མོ་ཕྱ་ལྕམ་དཀར་མོ་ལ་མ་ལྷ་ཞང་ལྷ་གཉན་པོས་བསྐོར་བ་དེ། རྣོ་བའི་མོ་དང་ཕྱ་ལ་བདར། སྙིང་ཁ་ཆོས་ཀྱི་ཕོ་བྲང་ན་དོན་གྲུབ་ཝེར་མ་དཀར་པོ་དང་དྲོང་མཁན་སྲིད་པའི་གཟུ་བོ་ལ་མངོན་ཤེས་སྣང་གསལ་ཝེར་མས་བསྐོར་བ་དེ། རྣོ་བའི་མོ་དང་ཕྱ་ལ་བདར། ལྟག་རྩ་འཁྱིལ་པའི་གནས་ན་མ་སྲིང་བའི་རྒྱལ་མོ་འདོད་ཁམས་དབང་ཕྱུག་མ་ལ་མ་མཁའ་འགྲོས་བསྐོར་བ་དེ། རྣོ་བའི་མོ་དང་ཕྱ་ལ་བདར། ལྟེ་བ་སྤྲུལ་པའི་མཁའ་ཀློང་ན་གྲོག་མ་བདུད་རྒྱལ་མོ་སྟག་རི་རོང་བར་ཆད་འདུལ་བའི་ཕོ་ཉའི་ཚོགས་ཀྱིས་བསྐོར་བ་དེ། རྣོ་བའི་མོ་དང་ཕྱ་ལ་བདར། མདུན་གྱི་ནམ་མཁར་དཔལ་ལྡན་ནག་པོ་ཆེན་པོ་ལ་བསྟན་སྲུང་དམ་ཅན་རྒྱ་མཚོས་བསྐོར་བ་དེ། རྣོ་བའི་མོ་དང་ཕྱ་ལ་བདར། མདུན་དུ་གཏེར་སྲུང་རྨ་རྒྱལ་སྤོམ་ར་ལ་འཛམ་གླིང་ཟོ་དོར་ཡོངས་ཀྱིས་བསྐོར་བ་དེ། རྣོ་བའི་མོ་དང་ཕྱ་ལ་བདར། བསོ་བསོ། མགོན་པོ་དགྲ་བླ་བཅུ་གསུམ། འགོ་བའི་ལྷ་ལྔ། སྐྱོབ་པའི་ལྷ་དགུ། བཀའ་གཏེར་གྱི་སྲུང་མ། ཕ་མྱེས་བརྒྱུད་ཀྱི་སྲུང་མ། སློབ་དཔོན་བརྒྱུད་ཀྱི་སྲུང་མ། ཁ་འཛིན་རྒྱབ་བརྟེན་སྡོང་གྲོགས་མཛད་པའི་ལྷ་མགོན་གཉན་པོ་བདར་རོ། །བསོ་བདར་རོ། །ཇུ་ཐིག་གི་མདུད་ལྷ་སུམ་བརྒྱ་དྲུག་ཅུ། རྫིའུ་སུམ་བརྒྱ་དྲུག་ཅུ། ཝེར་མ་སུམ་བརྒྱ་དྲུག་ཅུ། ཕྲག་པ་གཡས་ལ་ལྡིང་བ། གཡོན་ལ་འཁོར་བ། ལྷང་ལྷང་དུ་འབོད་པ། ཡུག་ཡུག་ཏུ་རྒྱུག་པ། དག་དག་ཏུ་སྨྲ་བ། གསལ་གསལ་དུ་སྟོན་པ། མདངས་ལ་
བལྟས་པས་ཁམས་གསུམ་གསལ་བ། སྐད་ལ་ཉན་པས་སྲིད་གསུམ་གོ་བ། ཡིད་ལ་བསམ་པས་དུས་གསུམ་ཤེས་པ་ཁྱེད་རྣམས་ཀྱིས་བདག་གི་མོ་འདི་དོན་ཆེ་གེ་མོ་འདི་ལ་འདེབས་ན། བདག་གིས་མི་ཤེས་པའི་དྲི་བ་འདི་ལ། ཐུགས་ཀྱིས་དགོངས་སྙན་གྱིས་གསོན། སྤྱན་གྱིས་གཟིགས་ལ། བཟང་ལ་མི་བྲ་དང་ངན་ལ་མི་ཕོད་མེད་པར་བཟང་ངན་གྱི་ཤན་ཕྱེས། ལེགས་ཉེས་ཀྱི་ལྟད་ཆོད། དཀར་ནག་གི་ཐིག་ཐོབ། ལས་ལ་བསྐོས་པ་གང་ཡོད། མོ་ལ་མངོན་ཤེས་བཞིན་དུ་ཕོབ་ཅིག །བཟང་ངན་མ་བསྲེ། ཡག་ཉེས་མ་བསྣོལ། མགོ་མ་གཡོགས། དིག་མ་བསྐོར། དྲང་དུ་ཕོབ། དྲང་དུ་སྨྲོས། རྣོ་རུ་སྟོན། གསལ་བར་སྟོན། མ་ནོར་མ་འཁྲུལ་མ་བསླུ་བར་འཕྲུལ་གྱི་མཛུབ་མོ་ཅན་གྱིས་མདུད། རིག་པའི་ལྡེའུ་མིག་ཅན་གྱིས་ཁྲོལ། གསལ་བའི་སྒྲོན་མེ་ཅན་གྱིས་དཔྱོད། མཁྱེན་པའི་ཡེ་ཤེས་ཅན་གྱིས་དགོངས། ཡིད་ཀྱི་སྨྱུ་གུ་ཅན་གྱིས་བྲིས། གསལ་པོར་སྟོན་ཅིག །ཅེས་བྱས་ལ། མོ་རྣོ་བའི་སྔགས་འདི་ཅི་མང་བཟླའོ། །བསྭོ་མུ་ཡེ་སྤྲོས་འབར་གསལ་ཟེར་ཕྱོད་ལམ་གསལ། སད་ཀྱེང་ཨ་དཀར་འོད་ལམ་ཕྱོད། མ་མིག་རྐོ་ཡི་ས་ལེ་ཤག་སལ་སལ། ཞེས་བཟླ་ཞིང་། ཡང་དེའི་ཤམ་དུ་འདི་བཏགས་ལ་བཟླའོ། །བསོ་ཐ་ཐ་ཡེ་ཡེ་སྤྲ་མོ་ཡེ། སྤྲ་ཉོས་ན། སྤྲ་མོ་ཕོབ། ཏྲད་ཅི་ཧོ་ཡ། སྤྲ་མོ་སྟོན། ཞེས་བཟླས་ནས་ཇུ་ཐིག་ལ་ཕུས་གདབ། གཞན་ཡང་གང་མོས་ཀྱི་བླ་མ་ཡི་དམ་ཆོས་སྐྱོང་དགྲ་བླ་ཟོ་དོར་སོགས་འགོ་བའི་ལྷ་དང་སྲུང་མ་དྲག་ཏུ་བདར། ཡེ་དྷརྨཱ་མང་དུ་བཟླས་ལ་ཚུགས་བཅུ་གསུམ་དུ་མདུད་པར་བྱ་ཞིང་། གནས་རྣམས་སུ་ཆོ་ལོ་སོགས་བཀྲམ་པའམ། མིང་སོགས་མཚོན་བྱེད་བྲིས་ལ་མ་ནོར་བར་བྱ། མོ་འདེབས་ཚེ་ཞྭ་གྱོན་པ་དང་། མདུན་ནས་ལང་བ་
སོགས་མི་བྱ་བར། ཇུ་ཐིག་ལ་བཤད་དང་བྱུག་པ་ཡང་ཡང་བྱས་ལ་ཚུགས་རེ་བཞིན་སྨྲེང་འདོན་བཞིན་མདུད་པར་བྱའོ། ༈ །། །གཅིག་ལ་མ་ཟློ་གདོང་བཟློག་འོང་། གཉིས་ལ་མ་གསང་དམུ་གབ་ཡིན་ཞེས་པ་ལྟར། གཅིག་དང་པོར་བབས་པའི་ཚེ་ན་ཡིད་ལ་བཞག་ནས་མི་བཤད། གཉིས་ནས་བརྩམས་ཏེ་ཐམས་ཅད་བྲི་བར་བྱའོ། །ཆང་ངབ་འདི་མོའི་དང་པོ། བབ་ཀྱི་ཐོག་མ། དཔྱད་ཀྱི་དང་པོ། མཁར་གྱི་རྨངས་རྡོ། སྲིད་པའི་གཞི་མ། འབྱུང་བའི་ཕུག །དཔའ་བོ་ཆས་ས། མགྱོགས་པ་འགྲོ་ས། རྣོན་པོ་གཟིང་ས། ཉི་མ་ཤར་བའི་རྩེ་མོ། །ཤར་ཕྱོགས་ཤིང་གི་རྫིའུ། དགྲ་བླ་དར་མ་སྐྱ་གཅིག་གི་ས་མལ། གཞི་འཛིན་དབང་ཅན་འདུག་ས། ལོ་ཡི་མགོ་བོ་བྱི་བ། ཟླ་བའི་མགོ་བོ་སྟག །དུས་ཚོད་ཐོག་མ་ཡོས། འབྱུང་བའི་དང་པོ་ཤིང་། བྱི་བ་ལོ་པའི་ལོ་མལ། བུ་ཚའི་གླིང་རི། ཡུལ་ལ་འཕོ་འཆུག་མེད་ས། ས་ལ་རྟེན་ཕུར་འཛུགས་ས། རྒྱལ་པོས་གདན་ནོན་ས། གཞི་ལ་བུག་རལ་འཁྱམས་གསུམ་ཨེ་འོང་མི་འོང་ལྟ་ས་ཡིན་པས། གོར་མོ་རྡོ་བས་ལྕི་ན་བཟང་། ༈ །། །གཉིས་འདི་སྒོ་ཕྱི་ནང་གཉིས་ཀྱི་ས་མཚམས། མར་གྱི་ས་སྒོ་མ་སང་གི་རྡོག་སོ། །རྒྱ་བོད་ཀྱི་ཟམ་སོ། །མི་འགྱུར་ཤར་གྱི་དགྲ་ས། ཁྱིམ་མཚེས་ར་བ་སྒོ་སྤྲོད་དང་། བྲན་དང་སྒོ་ཁྱི་བུ་མོའི་ས་མལ། ཕྱི་ས་བཞི་ཡི་ཆུང་བ། སྒོ་གདན་ཨི་འགུལ་ལྟ་ས། སྒོ་ཁྱིའི་རྔ་མ་བསྒྲིལ་ས། ཁོལ་པོ་གསོས་པ་ལས་ལ་རེམ་ས། ཁོལ་མོ་གསོས་པ་གཡོག་ལ་མཁས་ས། སྒོ་ཁྱི་གསོས་པ་སྟག་ལས་ངར་ས། བུ་མོ་དང་མཛོ་མོའི་གླིང་རི། གླང་ལོ་པ་ཡི་ལོ་མལ་ཡིན། དར་བས་འཇམ་དགོས། ༈ །། །གསུམ་འདི་སྙིང་དགའ་གསུམ་གྱི་དང་པོ། རྒྱལ་བུ་མཐིང་གི་བ་ཁོག །བ་ཁོག་གསུམ་གྱི་
ཆུང་བ། གཅེས་པའི་བུ་ཆུང་རྩེ་ས། རྨང་གི་རྟིའུ་ཆུང་རྒྱུག་ས། སྨྲ་བ་ཚིག་གསུམ་བརྗོད་ས། མི་གསུམ་གྲོས་ལ་འདུ་ས། དཔའ་གསུམ་དགྲ་ལ་ཆས་ས། མགྱོགས་གསུམ་རྔ་མ་སྒྲིལ་ས། རྣོ་གསུམ་ཡུ་བ་བརླིང་ས། སྒྱེད་པུ་སུམ་ཚུགས་ཀྱི་གནས་མལ། ནུ་བོ་དང་བུ་ཚའི་གླེང་རི། སྟག་ལོ་པ་ཡི་ལོ་མལ་ཡིན། མེ་ལྟར་གསལ་ན་བཟང་།། །།བཞི་འདི་གཡང་གི་ར་བ། ནོར་གྱི་ཀ་བ་བཙུགས་ས། སྲིང་གི་ཆུ་མིག་རྡོལ་ས། གཡང་གི་ལྡིང་ཕུར་བཙུགས་ས། གྲོག་གི་རྒྱ་མཚོ་བསྐྱིལ་བ། རྫུ་འཕྲུལ་པ་ཡི་ནུ་མ། རྒྱ་མཚོ་ཀླུའི་ལྟོ་བ། དཀོར་ནོར་སྣ་ཐག་དཀྲི་ས། ཡང་དག་མ་སང་གི་བརྒྱག་སྒྲོ། ཡོས་ལོ་པ་ཡི་ལོ་མལ། མནའ་མའི་གླེང་རི། བརྒྱ་ཞོན་བརྒྱ་ཁྲིད་མན་ཆད་རྐང་ཐང་ཁུ་རུ་ཅན་ཡན་ཆད་ཀྱི་གྲོག་ས་འགྱུར་མེད། གཡང་གི་རུ་མ་ཆགས་ས། ཕྱུག་གི་གསེར་རྩི་འབེབ་ས། གྲོག་གི་སྤུངས་རི་ཡིན་པས་མར་ཁུ་བས་སྣུམ་དགོས།། །།ལྔ་འདི་མི་འགྱུར་དགྲ་ས། ལྷོ་ཕྱོགས་འཇང་གི་གཡུལ་སོ། །སྲིན་པོ་ཕག་ནག་ཞོན་པའི་ས། སྲིན་མོ་མི་རྐུན་ཆས་པའི་ས། གནམ་གྱི་གཡས་རུ་གྲུམ་པའི་ས། ས་ཡི་གཡོན་ཤ་བདར་བའི་ས། ཐུག་དམར་བུ་དགུ་ལང་བའི་ས། མཁར་ལྔ་ཡོད་པ་དགྲ་མཁར། མི་ལྔ་ཡོད་པ་དགྲ་མི། ཆུ་ལྔ་ཡོད་པ་དམེ་ཆུ། ལྷོ་ཐང་ཤིང་ནག་པོའི་སྒུག་ར་ན། ཁྱི་ནག་རྟོད་ལ་སྐོར་ས། འདྲེ་ངན་གྱི་བར་ཆད་ལྟ་ས། གདོན་ངན་ཕྱི་ལྟས་བྱེད་ས། འདྲེ་གདོན་ལམ་དུ་ཚུད་ས། བུ་སྲིང་མག་པའི་གླེང་རི། འབྲུག་ལོ་པ་ཡི་ལོ་མལ་ཡིན། སྤྱིར་བཏང་ཞན་ཅིང་དམའ་ན་བཟང་།། །།དྲུག་འདི་ཡབ་ལྷ་བདལ་དྲུག་གི་བ་ཁོག །བ་ཁོག་གསུམ་གྱི་འབྲིང་པོ། ཁྱིམ་ས་བར་མ། ཡར་དྲུག་གི་རྩ་བ། མར་དྲུག་གི་རྩེ་མོ། གྱོད་དྲུག་
ལྡོག་པས་ནོན་ས། འདྲེ་དྲུག་ཆམ་ལ་ཕབ་ས། རྒྱན་དྲུག་ལུས་ལ་རྫོགས་ས། མོ་བཙུན་དར་མའི་ས་མལ། མོ་བཙུན་ཐབ་གཡང་ཆགས་ས། མ་འབྲི་རྒོད་གསུམ་གྱི་ས་མལ། ཁྱིམ་བདག་མོ་ངོ་སོ་འཛུམ་ས། གཞིན་ཁྲ་མོ་དུང་འཕྲུ་བཙུགས་ས། བྱེས་ན་ཁྲ་མོ་སྟག་འཕྲུ་བཙུགས་ས། སྦྲ་ཕུག་བརྩིགས་བྲུང་བརྩིགས་ས། བཞོན་མ་ཞོ་འབེབ་ཆེ་ས། སྦྲུལ་ལོ་པ་ཡི་ལོ་མལ་ཡིན། ཁ་འོ་མ་འཐུང་བ་བཞིན་དུ་དཀར་ཞིང་སྣུམ་ན་བཟང་།། །།བདུན་འདི་མོ་ཉིས་ཁུག་གི་མགོ་བོ། སྐྱེས་ཀྱི་ཕོ་བློ་ཤར་གཅིག་གཏད་ས། ཕུ་ནུ་ཕ་ཚོའི་གནས་མལ། ཕ་སྤུན་སྟག་ལག་རྒྱས་ས། མཉེས་སྤུན་འབྲོང་རུ་གཤིབ་ས། དབུས་ཀྱི་རི་བོ་མཆོག་རབ། འོག་རྟ་འགེལ་མཛོའི་ས་མལ། གཡའ་སྤང་སྲིན་ལ་ཆས་ས། རྡོ་རྟ་གྲོ་མོ་རྟོད་ས། གཞོན་ནུ་དགྲ་ལ་དཔའ་ས། མི་ཕོ་བློ་ལ་མཁས་ས། རྟ་ཕོ་བང་སྣ་མགྱོགས་ས། སྐྱེས་བུ་དར་མའི་བློ་རྩ། རྟ་ལོ་པའི་ལོ་མལ། མི་འགྱུར་དོན་དང་ལྡན་པའི་མདུད་པ་བབ་ན་བཟང་།། །།བརྒྱད་འདི་མོ་ཡི་མིག །ནོར་གྱི་གཡང་ར་ཆེ་བ། ལྷ་བརྒྱད་གདན་ལ་བཞུགས་ས། འདྲེ་བརྒྱད་དམ་ལ་བཏགས་ས། ཛ་ཡེ་ལྷ་ལ་འབོད་ས། ལྷ་མགོན་གདན་ལ་བཞུགས་ས། ཨ་སུ་ར་ཡི་བྲག་ཕུག །བཅོམ་ལྡན་འདས་ཀྱི་བཞུགས་ས། སངས་རྒྱས་ཆོས་ཀྱི་སྒྲུབ་གནས། ཆོས་ཀྱི་ཉི་མ་ཤར་ས། བན་ཆོས་བྱེད་ཆོས་ལ་མཁས་ས། ཆོས་དར་བྱེད་དགྲ་བླའི་ས་མལ། ཝེར་མའི་དཔའ་མཁར་བང་མཛོད། དགྲ་བླའི་ཁྱུད་ཚང་བྲག་དམར། བཟའ་དཔོན་དང་དམག་དཔོན་གྱི་གླེང་རི། སྙིང་མི་འགྱོད་པའི་ས་མལ། དགེ་སློང་ཆོས་གོས་ཅན་གྱི་བཞུགས་གནས། གདོན་ཕྱ་གདོན་གྱི་ཁང་པ། ལུག་ལོ་བ་ཡི་ལོ་མལ་ཡིན། གསལ་བྱེད་ཉི་ཟླ་འདྲ་བ་བབ་ན་བཟང་།། །།དགུ་འདི་བཟང་དགུ་
རང་ལ་ཚང་ས། ངན་དགུ་དགྲ་ལ་བསྒྱུར་ས། གཉན་སྡོང་གཉིས་ཀྱི་ཟམ་སོ། ཉི་མ་ནུབ་ཀྱི་དགྲ་ས། གཉན་བོན་པོ་གཉིས་ཀྱི་ས་མལ། སྟོན་པ་གཤེན་རབ་བཞུགས་ཁྲི། བོན་དར་བྱེད་དགྲ་བླའི་གནས་མལ། གཤེན་རབ་ཕྱག་ཤིང་བཙུགས་ས། ལྷ་གཞི་གསས་མཁར་བརྟོད་ས། ལེའུ་གཏོ་བྱེད་ཀྱི་ས་མལ། ཕྱི་མ་ནང་གི་ཟམ་སོ། བདུད་མུན་པ་མགོ་དགུའི་སོ་བ། ལྷ་སྲིན་སྡེ་བརྒྱད་ཀྱི་རྫོང་མཁར། སོ་པ་མི་དགུ་རྐུང་ས། སྒྲིབ་ཤིང་རིམ་དགུ་བཙུགས་ས། ཁེ་ལེ་མོན་གྱི་ལ་སོ། སྔ་དྲོ་བཏབ་ན་རང་ས། ཕྱི་དྲོ་བཏབ་ན་དགྲ་ས། དགྲ་ཟུན་ལ་བཙས་ཐུན་མོང་། ཕྱི་སའི་ནང་ནས་རང་ས། ཞང་པོའི་གླིང་རི། སྦྲེལ་ལོའི་ལོ་མལ་ཡིན་པས་སྐབས་དང་བསྟུན་པར་བབ་ལུགས་དགོས།། །།བཅུ་འདི་སྨོན་ལམ་བྲག་ཐོག །གནམ་ཕྱི་གུང་རྒྱལ་བཞུགས་ས། བདུད་རྩི་ཐང་མར་བདལ་ས། སྲིད་པ་རྒན་རྒོན་གནས་མལ། མ་སྲུ་རྒན་རིམ་ས་མལ། དབང་ཡོད་ཀྱི་དབང་གཅོད་ས། དབང་མེད་ཆམ་ལ་འབེབ་ས། ཕྱི་ས་གསུམ་གྱི་ཁ་གནོན། རང་ས་གསུམ་གྱི་ཁ་འཛིན། དགུང་སྔོན་གནམ་གྱི་ཡར་སྟེང་། ཐུག་དཀར་བྱ་ལམ་གོང་མ། དགུང་ལ་ལྷོ་སྤྲིན་ཆགས་ས། ཐུག་དཀར་བུ་དགུ་ཕ་དང་བཅུ་བཞུགས་ས། མ་སང་གི་བགོས་གཞི་ཁྲ་མོ་བཏིང་ས། བ་ཁོག་གསུམ་གྱི་ཆེ་བ། ཆུ་བཞི་འབབ་པའི་མགོ་བོ། རི་བཞི་བརྟན་པའི་རྩེ་མོ། བུ་སྲིང་མཛེས་པ་གནས་མགོ་མཐོ་ས། རྟ་ཕོ་མགྱོགས་པ་གོང་ཐང་ཆེ་ས། ནོར་དང་མི་གྲངས་འཕེལ་ས། ཚ་ཐུབ་གྲང་ཐབ་ཝེར་མའི་ཁ། མ་ཕྱིའི་གླང་རི། བྱ་ལོ་པའི་ལོ་མལ་ཡིན། འཇའ་ལྷོ་སྤྲིན་བཞིན་དུ་ཕྱུག་ཅིང་མཛེས་ན་བཟང་།། །།བཅུ་གཅིག་འདི་མོ་ཡི་སྲོག །དགྲ་བླའི་གནས་མལ་གོང་མ། ཝེར་མའི་ཁྲ་ཚང་མཐོན་པོ། ཁྲ་རྒན་ཉི་མ་འདེ་ས། ཁྲ་མོས་གཤོག་པ་རྐྱོང་ས།
གཤོག་མཐུ་བུ་ལ་འགེབ་ས། གཤོག་ལྕག་དགྲ་ལ་རྒྱབ་ས། ཁྲ་ཕྲུག་རྩེད་མོ་རྩེ་ས། ཁྲ་ཀི་རིག་ཀི་རིག་ཟེར་ས། ཀི་རིག་ལྷ་ལ་འབོད་ས། ཛ་ཡེ་ཛ་ཡེ་ཟེར་ས། ཛ་ཡེ་ལྷ་ལ་འབོད་ས། ཁྲམ་བུས་བྱིན་ལེན་བྱེད་ས། དོན་ག་རེ་འདི་རེ་ལྟ་ས། དགྲ་བླའི་རྒྱུག་ལམ་དང་པོ། ཕོ་ལྷའི་བཙན་མཁར་གོང་མ། ཕོ་ལྷ་དུང་ཁྱུང་འབབ་ས། དུང་ཁྱུང་གཤོག་པ་རྐྱོང་ས། རྨོག་ལ་དར་འཕྲུ་བཙུགས་ས། མདུང་ལ་བ་དན་བཏགས་ས། དགྲ་བླའི་དར་ཆེན་ཕྱར་ས། ཕོ་ལྷས་དུང་ཆེན་འབུད་ས། ཝེར་མའི་གློག་དམར་འགྱུ་ས། ཅང་སེའི་རླུང་དམར་འཚུབ་ས། ལྷ་ཞལ་དུང་བས་དཀར་ས། གསས་ཞལ་དགུང་བས་མཐོ་ས། ཡུལ་མཁར་འཛིན་ས། དར་འཛིན་སྡོད་ས། མི་ཚེ་རིང་ས། མི་སྲོག་སྲ་ས། དགྲ་བླའི་གླིང་རི། ཁྱི་ལོ་པ་ཡི་ལོ་མལ། བཙན་ཁས་དྲག་གི་དར་འཕྲུ་བཙུགས་ན་བཟང་།། །།བཅུ་གཉིས་ཡེ་ངམ་འཁྲུག་སོ། །ངམ་གྱི་མགར་བའི་འཚོགས་ར། ཉ་ར་ཁྱི་ཐོད་ཀྱི་མཁར་རྫོང་། སྟོང་གསུམ་གླིང་གི་ཕྱི་ར། ཨ་བ་གླང་མགོའི་བྲེས་ར། ཨ་བ་ཧོར་གྱི་དགྲ་ས། དགྲ་ཁ་དྲག་དང་གདོན་བྱིང་ཆེན་གྱི་ས་མལ། བྱང་གི་དགྲ་ས་འགྱུར་མེད་ཡིན། ལོ་ཟླ་འབྱུང་བའི་མཇུག་མ། བསྐལ་པ་ཟད་པའི་སྙིགས་མ། འབྱུང་བ་ཟད་པའི་ཐ་མ། ཁྱུང་ཆེན་ཨན་ཐག་བཅད་ས། ཡེ་ངམ་གཉིས་ཀྱི་ཟམ་སོ། ངམ་རྗེ་རྩོལ་པོའི་ས་མལ། ངམ་མི་ནག་པོའི་གླིང་རི། ངམ་སྲས་ནེ་གུའི་གནས་མལ། ངམ་གྱི་བུ་མོ་ངུ་ས། བྱང་གི་བྱེ་རི་སྨུག་པོ། །ཇག་པ་ཚོང་པའི་ཕྱི་ལམ། སྡང་དགྲ་གདོན་བགེགས་བཀུག་ས། སྡང་དགྲ་བོ་ལ་གོང་བ་འཛིན་ས། དགྲ་བལ་གཞོབ་ལྡོག་པས་དྲིལ་ས། ཕག་ལོ་པ་ཡི་ལོ་མལ་ཡིན། དགྲ་རོ་ཐང་ལ་རུལ་ན་བཟང་།། །།བཅུ་གསུམ་ཐེག་པའི་ཡང་གོང་། བློ་ཡི་བློ་ཕུག །དཔའ་བོ་སྐྱབས་ས། སྡར་མ་བྲོས་ས། དགུང་སྔོན་པོས་ཀུན་ལ་ཁྱབ་ས།
ནམ་ཕུག་ངོ་སོ་ལྟ་ས། ཕྱི་ཕུག་རྒྱལ་ཁ་རྩོད་ས། སུམ་ཅུ་གྲུབ་པའི་ལྷ་གནས། རྣམ་པར་རྒྱལ་པའི་ཁང་བཟང་། དཔག་བསམ་ཤིང་གི་རྩེ་མོ། སྨོན་པའི་ལྷ་ཤུག་གི་མགོ་བོ། བྱ་རྒྱལ་ཁྱུང་གི་ནོར་བུ། ནམ་མཁའ་གཡུ་ཡི་ལྡིང་ཁང་། གཡུ་འབྲུག་གསུང་སྐད་སྒྲོགས་ས། གསེར་གྱི་ཡི་གེ་འབྲུ་གཅིག །སྔ་དྲོ་གཙོ་བོ་བརྒྱ་འདུས་ཀྱང་ཕྱི་དྲོ་དབང་ཆེན་གཅིག་གི་ཐག་བཅད་ས། མ་སང་གནང་གི་ལྷ་བ་མུར་ས། གནང་ཁ་དོག་སྤུ་རིས་བརྟག་ས། ཡང་དག་སྨོན་པའི་དམག་མི་བགྲང་ས། བཟོས་བཟོས་གོས་ཀྱི་གོང་བ། བརྩིགས་བརྩིགས་མཁར་གྱི་རྩེ་མོ། མོ་བཅུ་གཉིས་ཀྱི་ནམ་ཕུག་གཏད་ས། ཡང་འཁོར་ལྷ་ལམ་དཀར་པོ། མགོན་པོའི་བྱ་ལྡང་རྩེ་མོ། མོ་ཐམས་ཅད་བཅུ་གསུམ་གྱི་མངའ་འོག །མི་ཐམས་ཅད་རྗེ་རྒྱལ་གྱི་བྲན་འབངས། ཆུ་ཐམས་ཅད་གཙང་པོའི་རུ་ལག །བསོ་བསོ་བསོ། བཅུ་གསུམ་མིན་པས་བསོ་མི་ཁྱགས། ནམ་མཁའ་མིན་པས་ཁྱུང་མི་ཁྱགས། བསོ་བསོ། ཞེས་མདུད་དོ། །དེ་ནས་ཁ་དམར་གདགས། མཐར། ད་མོ་བཟང་ཕྱ་ཡི་རྒྱལ་ཁ་ཟུང་། འདྲེ་སྲིན་བྱུར་གསུམ་གྱི་མགོ་མ་ལྡང་། ཕྱ་དམུ་གཙུག་གསུམ་གྱི་སྐོས་མ་ཞིག །ལྷ་མི་གཤེན་གསུམ་གྱི་དབུ་མ་དམའ། ངོ་སོ་དགྲ་བླ་གཉན་པོ་བསྟོད། རྟིང་མ་མཐུན་ཆེན་ཝེར་མས་མཛོད། དིང་དིང་རྒྱལ་གྱི་མོ་སྨྲེང་ཡག །ཡགས་སོ་ཡགས་སོ་ལྷ་རྒྱལ་ལོ། །ཞེས་སྨྲས་ལྷ་གཞིའི་སྟེང་དུ་ངོ་སོ་བསྟོད་ལ་འབྲུ་མཆོད་དོ། །རྒྱས་པར་སྤྲོ་ན་སྔོན་གྱི་བདར་ཆེན་མོ་རྣམས་བྱའོ། །ཞེས་པའང་ཞང་ཞོང་གི་མོ་བདར་གསལ་སྒྲོན་ཁྲི་འདུག་འཁོར་ལོ་སོགས། ཆེན་གཞུང་རྙིང་གསུམ་གྱི་ལུང་ཚིག་གཙང་མ་རང་བཟོ་སྤངས་ཏེ་འབྲེལ་བསྒྲིགས་ནས་ཁོག་གཅིག་ཏུ་དྲིལ་བར་བྱས་པ་མི་ཕམ་པས་སོ།། །།མངྒ་ལཾ། ༈ ། སྨྲེང་གྱེར་ཟབ་མོ་
བཞུགས། འོ་དེ་རིང་གནམ་གྱི་ལྷ་དཔང་། བར་གྱི་དགྲ་བླ་དཔང་། ས་འོག་གི་ཀླུ་དཔང་། སྲིད་པའི་ཇུ་ཏིག་ཤར་པ་སྐྱ་དྲུག །མ་དག་རིགས་དྲུག་གི་སེམས་ཅན། དག་པ་ཡེ་ཤེས་དྲུག་གི་རོལ་བ། ཁམས་གསུམ་འདུས་པའི་དྭངས་མ་འདིའི་ནང་དུ། ཡ་ཀི་རྒྱལ་བ་ཞི་ཁྲོ་ནས། མ་ཀི་གྲོང་རྒྱུག་ཐེའུ་རང་ཡན་ཆོད་ཀྱི། འཁོར་འདས་སྣང་སྲིད་སྣོད་བཅུད་ཐམས་ཅད་ཀྱི། སྲོག་ཚང་། ལུས་ཚང་། རིགས་ཚང་། མིང་ཚང་། ཡར་འདྲེན་དྭངས་མ་ཡོད་ཁམས་དཔལ་ཁམས་ཡེ་ཁམས་ལྷ་ཁམས་ཀྱི་བླ་ཚང་། མར་འདྲེན་སྙིགས་མ་མེད་ཁམས་བྱུང་ཁམས་ངམ་ཁམས་འདྲེ་ཁམས་ཀྱི་བླ་ཚང་། སྲིད་པ་རྟེན་འབྲེལ་གྱི་ཆེ་བ་ཡིན་པས་བཟང་ངན་གཉིས་སུ་སྲིད། རྟེན་འབྲེལ་ལ་མ་བརྟེན་གང་ཡང་མེད། རྟེན་འབྲེལ་འདི་དབང་བཙན། ལྷ་ཡང་རྟེན་འབྲེལ་ལ་རག་ལས། འདྲེ་ཡང་རྟེན་འབྲེལ་ལ་རག་ལས་པས། སྣང་སྲིད་ལྷ་སྲིན་སྡེ་བརྒྱད་སྲིད་པ་ཆགས་གནས་ཀྱི་བདག་པོ་ཀུན། སྦྱན་ས་ལེར་གཟིགས། སྙན་ཀྲོང་ངེར་གསོན། ཐུགས་ལྷན་ནེར་དགོངས། ངའི་མོ་འདིའི་ནང་དུ་རྒྱུ་འབྱོར་ཡོན་གྱི་བདག་པོ་སོགས་དམོད་དོན། སྔ་ཕྱི་བར་གསུམ་ལེགས་ཉེས་གང་འདོད་མ་དྲིས་པ་མི་འོང་། མ་སྨོད་པ་མི་འབབ། བསྐོས་པ་ཤོག །སྨྲོས་པ་སྟོན། འོང་གང་དགོས། འོང་དོན་གང་ཡོད་ཀྱི་མོ་ཤོག །པྲ་ཤོག །ཆ་ཆ། བསོ་བསོ། འདུ་འདུ། ཧེ་ཧེ། མུ་ཁྲི་མུ་རྒྱང་ཨ་དཀར་ས་ལེ་འོད་པོ་ཆ་འདུ་འདུ། ཨོཾ་ཧ་རམ་སྤུང་ལཾ་གསལ་ཁོད་དེ་འདུ། མདུད་ལྷ་སུམ་བརྒྱ་དྲུག་ཅུ་པོ་ཁྱེད་རྣམས་སྨྲེང་གང་ཡོད་གྱེར། ཆ་གང་ཡོད་ཤོད། བརྡའ་གང་ཡོད་སྟོན། སྔོན་ཚེ་ལྷ་མི་གཤེན་གསུམ་གྱི་དམ་ཚིག་བཞིན་དུ་སྲིད་པ་རང་གི་ལུགས་ལས་འགྱུར་མི་སྲིད། ད་ཡང་གཡུང་དྲུང་སེམས་དཔའི་རྟེན་འབྲེལ་བརྟག་པ་ལ། རྟེན་
འབྲེལ་ནམ་ཡང་མི་འགྱུར་བདེན་ཅིང་བསླུ་བ་མེད། རྣོ་མཐོང་སྲིད་པ་འཕྲུལ་གྱི་ལྷ་མཆོད་དོ། །བསྟོད་དོ། །བརྡར་རོ། །མོ་འདི་གསལ་ས་ལེར་པྲ་ཕོབ། མི་ཕམ་རྣམ་རྒྱལ་ལམ། དུན་མུ་ལེ་གཡུང་དྲུང་འོད་དཀར་གྱིས་བྲིས་པ་དགེའོ། ༈ །མོ་བདར་བསྡུས་པ་བཞུགས། བསོ་བསོ་ཨོཾ། རྩ་གསུམ་སྲུང་མའི་བྱིན་རླབས་ཀྱིས། །མོ་ཡི་དམུ་གབ་ཐམས་ཅད་སོལ། །སྣང་གསལ་འཕྲུལ་གྱི་སྒྲོན་མེ་སྦོར། །བྱིན་གྱིས་རློབས་ཤིག་མཐུ་སྩལ་སྐྱེད། །བསོ། རང་སྣང་ཡེ་ཤེས་གཞལ་ཡས་ཁང་། །སྣང་སྲིད་ཀུན་གསལ་ཆོས་དབྱིངས་ཀློངས། །རབ་འབྱམས་རྩ་བ་གསུམ་གྱི་ལྷ། །སྲིད་ཞིའི་དྭངས་བཅུད་ལས་འཁྲུངས་པའི། །རྣོ་གསལ་དགྲ་བླའི་སྐུར་བཞེངས་ལ། །ལེགས་ཉེས་དྲང་ཤན་འབྱེད་ཚུལ་གྱིས། །ཇུ་ཐིག་འདི་ལ་བྱིན་གྱིས་རློབས། །མཆོད་པ་འདི་རྣམས་བཞེས་སུ་གསོལ། །གང་དྲིས་དོན་འདི་གསལ་བོར་སྟོན། །བསོ་བསོ། བདར་རོ་དཀོན་མཆོག་རྩ་བ་གསུམ། །ཆོས་སྐྱོང་ནོར་ལྷ་གཞི་བདག་དང་། །དགྲ་བླ་ཝེར་མ་ཐུགས་ཀར་ཚོགས། །ཅོང་སེ་རྣོ་མཐོང་འཕྲུལ་གྱི་ལྷ། །དྲོང་མཁན་ཤེས་བཞི་མཐོང་བརྒྱད་བདར། །ལྷ་ཆེན་སྣང་བ་འོད་ལྡན་དང་། །གཤེན་རབ་བརྒྱུད་པའི་མོ་ལྷ་བདར། །ཕུ་ཝེར་རྒྱལ་པོ་ལྕམ་དྲལ་བཅས། །རྣོ་མཐོང་ཕྱ་འུ་གཡང་དཀར་བདར། །བ་སྤལ་ཁྱུང་གསུམ་རྣོ་ལྷ་དང་། །སྒོ་ཕུག་བར་གསུམ་མོ་ལྷ་བདར། །ལྷ་ཆེན་དུང་མི་ལྡན་དཀར་དང་། །སྲིད་པ་ཡེ་སྨོན་རྒྱལ་པོ་སོགས། །སྔོན་རབ་སྲིད་པའི་དགྲ་བླ་བདར། །བན་བོན་གཉིས་ཀྱི་དགྲ་བླ་དང་། །ཕྱ་དམུ་གཙུག་གསུམ་དགྲ་བླ་བདར། །དགྲ་བླ་མཆེད་གསུམ་དྲ་མ་བརྒྱད། །རྫུ་འཕྲུལ་རླུང་རྟ་ལྷ་བཞི་དང་། །མགྲོན་
ཡག་དར་མ་བཅུ་གསུམ་སོགས། །མ་ངེས་རྫུ་འཕྲུལ་རོལ་བ་ཅན། །གནམ་ས་བར་སྣང་གང་བའི་ཚོགས། །མཆོད་དོ་བསྟོད་དོ་བཀུར་རོ་བདར། །རྫིའུ་སྤྱན་རྣོ་འཕྲུལ་གྱི་ལྷ། །དིང་དིང་སྐྱིན་དིང་གལ་བར་སོགས། །སྡེ་ཚན་སུམ་ཅུ་རྩ་གསུམ་གྱི། །མདུད་ལྷ་སུམ་བརྒྱ་དྲུག་ཅུ་བདར། །སྲིད་དང་ཞི་བའི་མོ་ལྷ་ཀུན། །ཡོངས་འདུས་སྙིང་པོའི་བརྫུས་གཟུགས་གར། །རྟེན་འབྲེལ་མི་བསླུའི་འཆར་སྒོ་ལས། །གང་བསམ་བླང་དོར་གསལ་བར་མཛོད། །བསོ། འབྲུག་ཞོན་གློག་འགྱུ་ཐོག་འབེབས་པའི། །ནམ་མཁའ་གང་བའི་དགྲ་བླ་ནི། །དྲག་རྩལ་ཆེ་བའི་ཚོགས་རྣམས་བདར། །རྣོ་མཐོང་མོ་ཡི་ཁ་འཛིན་མཛོད། །སེང་ཞོན་དར་ཕྱར་དུང་འབུད་པའི། །བར་སྣང་གང་བའི་ཝེར་མ་ནི། །རྫུ་འཕྲུལ་ཆེ་བའི་ཚོགས་རྣམས་བདར། །རྣོ་མཐོང་མོ་ལ་གསལ་སྣང་སྤོར། །སྣ་ཚོགས་རྫུ་འཕྲུལ་རོལ་པ་ཅན། །ས་གཞི་གང་བའི་ཅང་སེ་ནི། །མྱུར་མགྱོགས་ཐོགས་པ་མེད་པ་བདར། །རྣོ་མཐོང་མོ་ཡི་ཁ་དམར་སྨྲོས། །བསོ། སྲིད་པ་རྒྱུད་ཀྱི་དགྲ་བླ་བདར། །རྣོ་མཐོང་འཕྲུལ་གྱི་མོ་ལྷ་བདར། །སྐྱེས་བུ་རང་གི་དགྲ་བླ་བདར། །ཕྱོགས་དུས་གནས་རྒྱུའི་མཐུ་ལྡན་བདར། །རྟེན་འབྲེལ་རྒྱུད་ལ་སྲིད་ཚད་བདར། །དེ་རིང་མོ་འདིའི་དཔང་པོ་མཛོད། །ཆོས་ཉིད་ཀ་ནས་དག་པ་དང་། །ཆོས་ཅན་རྟེན་འབྲེལ་བསླུ་མེད་དང་། །སྔགས་དང་ཕྱག་རྒྱ་ཏིང་འཛིན་མཐུ། །རྩ་གསུམ་ལྷ་ཡི་བདེན་ཚིག་གིས། །འཇམ་དཔལ་དབྱངས་དང་དོན་གྲུབ་རྗེ། །ཐོགས་མེད་དགྲ་བླའི་རྒྱུད་བསྐུལ་ཏེ། །ཡེ་སྲིད་འཕྲུལ་གྱི་བཅུ་ཐིག་འདིར། །གཉིས་སུ་མེད་པར་འཇུག་མཛད་ཅིང་། །རྟེན་འབྲེལ་དབང་གིས་སྣང་སྲིད་ཀུན། །མཉམ་ཉིད་འོད་གསལ་རྒྱས་ཐེབས་ནས། །གང་འདོད་རྩོལ་མེད་རང་ཤར་
བ། །བརྡའ་རྟགས་མཚན་མའི་སྣང་ཆ་ལས། །བསླུ་མེད་བླང་དོར་གསལ་གྱུར་ཅིག །ཨོཾ་ཨ་ར་པ་ཙ་ན་དྷཱི་ཧ་ཧཱ་ཧི་ཧཱི་ཧེ་ཧཻ་ཧོ་ཧཽ་ཧཾ་ཨཱཿ ཨོཾ་ཧ་རྃ་སྤྲུངས་སོ་ལཾ་གསལ་ཁོད་དེ་འདུཿ ཨ་ཀརྵ་ཡེ་ར་ཡ་ཝ་ཡྃ་ཨུར་ཏེཾ་ཏེཾ་ཏ། ན་མོ་རཏྣ་ཏྲ་ཡཱ་ཡ། ཨོཾ་ཡེ་དྷརྨཱ་ཧེ་ཏུ་སོགས། ཎ་ཡེ་སྭཱ་ཧཱ། ཨོཾ་པྲ་མོ་ཐུན། པྲ་མོ་ཤག །པྲ་མོ་ཚལ། པྲ་མོ་ཕོབ། པྲ་མོ་སྟོན། བྲ་མོ་གསལ་སྭཱ་ཧཱ། ཞེས་བཟླས་བཅུ་ཐིག་བསྔགས་ལ་གདབ། དེས་དུས་གསུམ་བླང་དོར་གསལ་ལོ། །བཅུ་ཐིག་གི་མོ་བདར་སྣང་སྲིད་ཀུན་གསལ་ཞེས་པ་འདི་མི་ཕམ་རྣམ་པར་རྒྱལ་བས་རབ་ཚེས་ཤིང་བྱ་ཟླ་༢ཚེས་༡ལ་དཔལ་སྤུངས་སུ་བྲིས་པ་མངྒ་ལཾ། །མོ་བདམ་བྱ་མང་དུ་ཡོད་པ་ལྟ་བུ་ལ། དང་པོ་བསང་ཁྲུས་དང་བདར་ཆེན་མོ་ལན་གཅིག་བཏང་ནས། དེ་འོག་བདར་ཆུང་གིས་ཆོག །དུས་རྒྱུན་ཚེགས་ལ་མི་ལྟ་བར་བདར་ཆེན་བྱས་ན་བཟང་བས་གང་དགོས་སུ་སྦྱར་རོ། །མངྒ་ལཾ། ༈ ། བཀའ་སྲུང་གི་མཆོད་ཐབས་བཞུགས། བྷྱོ། མ་གཡེལ་ནག་མོ་སྟག་རི་རོང་། །ཚུར་གཤེགས་ནག་མོ་སྟག་རི་རོང་། །གཡའ་དང་གངས་ཀྱི་ཕ་རོལ་ན། །སྤྲིན་དང་ན་བུན་ཚུ་རོལ་ན། །དགྲ་བླའི་རྒྱལ་མོ་སྟག་རི་རོང་། །ནམ་མཁའ་དག་པའི་སྐུ་མདོག་ལ། །མཐིང་ནག་མུན་གྱི་ཚྭ་ཚྭ་འཕྲོ། །རལ་པ་ཁམ་ནག་སྤྲིན་ལྟར་གཏིབ། །སྐུ་ལ་དར་ནག་ཐུལ་བ་གསོལ། །གཡས་པས་གྲི་གུག་དགྲ་སྲོག་གཅོད། །གཡོན་པས་ནད་རྐྱལ་དགྲ་ཡུལ་ཕུང་། །འཁོར་དུ་མ་མོ་འབུམ་གྱིས་བསྐོར། །འདིར་བྱོན་རྒྱན་གྱི་མཆོད་པ་བཞེས། །མི་མཐུན་རྐྱེན་རྣམས་ཕྱིར་བཟློག་ཅིང་། །བསྟན་པ་སྲུང་ཞིང་སྡོང་གྲོག་མཛོད། །བྷྱོ། མ་མ་རག་མོ་མུ་ཏྲི་མུ་ཤང་ཛ་བྷྱོ། །སྟོང་དུམ་པ་ནི་ས་མ་ཡ་ཛ་ཛཿ དབོན་དྲུང་ཞི་བ་ལྷ་འཕགས་
པ་དགེ་ལེགས་རྒྱལ་མཚན་དཔལ་བཟང་པོའི་ཐུགས་བཞེད་དུ། རྒྱ་བཙུན་མཁས་གྲུབ་ཁམ་སྤྱོད་ཁི་ཁར་གྱིས་སྦྱར་བ་དགེའོ། ༈ ། གཏེར་སྲུང་མཆོད་ཐབས་བཞུགས། ཀྱེཿ ཤར་ཕྱོགས་རྨ་རི་བཀྲ་གསལ་གྱི། །འོད་དང་གཞའ་ཚོན་གུར་ཁྱིམ་ན། །ཀུན་བཟང་ཐུགས་ཀྱི་སྤྲུལ་པ་སྟེ། །རྨ་གཉན་སྤོམ་ར་ལྷ་ཡི་སྲས། །འཁོར་ཏུ་ལྷ་ཀླུ་གཉན་ཟོ་དོར། །གནོད་སྦྱིན་གཏེར་བདག་འབུམ་གྱིས་བསྐོར། །ལས་སུ་གཡུང་དྲུང་བསྟན་པ་སྲུང་། །ཕྱ་གཤེན་ཀུན་གྱི་རྣོ་མཐོང་སྟོན། །དར་དཀར་ཇུ་ཐིག་གཡབ་ཅིང་འབོད། །མ་ཐོགས་མྱུར་དུ་ད་ཚུར་བྱོན། །བསང་དང་སྐྱེམས་ཕུད་གཏོར་མ་དང་། །བརྔན་ཆ་འདོད་ཡོན་སྣ་ཚོགས་འབུལ། །མོ་མ་བདག་ལ་རྣོ་དབང་སྐུར། །ཇུ་ཐིག་འདི་ལ་དངོས་གྲུབ་ཕོབ། །ཁ་བུན་འདི་ལ་རྣོ་ངར་ལུད། །རྣོ་མཐོང་སྟོན་པའི་བྱ་ར་མཛོད། །སྔ་རྟགས་ཕྱི་རྟགས་དྲང་ཤན་ཕྱེས། །ལུས་དང་གྲིབ་བཞིན་ཁ་འཛིན་མཛོད། །ཕྱ་གཤེན་ཇུ་ཐིག་རྣོ་མཐོང་གི ། བསྟན་པ་ཕྱོགས་བཅུར་རྒྱས་པར་མཛོད། །ར་ཙེ་ཧ་ར་ཎ་འདུས་ཐོལ་ཐོལ་སྨྲོས་སྨྲོས། །གཏེར་སྲུང་རྨ་རྒྱལ་གྱི་གསོལ་མཆོད་དགེའོ། ༈ ། ཕུ་ཝེར་ཕྱ་གཤེན་རྣོ་མཐོང་གི་སྒྲུབ་པ་བཞུགས་སོ། །ཕུ་ཝེར་གསང་བའི་སྒྲུབ་པ། ཕུ་ཝེར་ལྷ་ལ་ཕྱག་འཚལ་ལོ། །གསང་བའི་སྒྲུབ་པ་འདི་ཉམས་སུ་ལེན་པར་འདོད་ན་སྔོན་འགྲོ་དངོས་གཞི་རྗེས་ཀྱི་རིམ་པའོ། །དང་པོ་སྔོན་འགྲོ་ལ། བྲག་རི་དཀར་པོ་ཤིང་རྩི་རྒྱས་པའམ། མཚོ་གཉན་གྱི་འགྲམ་དུ་འགྲོལ། ཆབ་གཏོར་གསེར་སྐྱེམས་བཏང་ཞིང་། གཞི་བདག་ལྷ་ཀླུ་བརྟན་མ་མཆོད། སྡོང་གྲོགས་བཅོལ་པའི་སྙན་གསན་གསོལ། དེ་ནི་སྔོན་འགྲོའི་རིམ་པའོ། །གཉིས་པ་དངོས་གཞི་ནི། བཀྲ་ཤིས་
པའི་ས་ལ་དཀྱིལ་འཁོར་ཟླུམ་པོ་འདབ་བརྒྱད་གོང་རས་བཅས་པ་ལ། ལྟེ་བ་སེར་ལ་འདབ་བརྒྱད་དཀར། གོང་རས་དམར། མུ་ཁྱུད་སྔོ། དེ་ལ་གཡུང་དྲུང་ར་བས་བསྐོར། སུར་དཀར་ཉི་ཤུ་རྩ་བརྒྱད་ཀྱིས་བསྐོར། མདའ་བྱ་རྒོད་མ་གཅིག་ལ་དར་སྣ་ལྔ་རིན་པོ་ཆེ་ལྔ་བལ་ཚོན་སྣ་ལྔ་བཏགས། དར་དཀར་པོ་ཁ་གང་ལ་ཕུ་ཝེར་ཀྱི་སྐུ་བྲི་བ་ནི། དབུས་སུ་ལྷ་ཕུ་ཝེར་སེར་པོ་དར་དཀར་ཉི་ཟླ་རིས་གསོལ་བ། གཡས་ཇུ་ཐིག་གཡོན་མེ་ལོང་བསྣམས་པ་གཅིག་བྲི། གཡས་སུ་དཀྱིལ་ཕུ་ཝེར་དཀར་པོ་ནི། སྔོན་པོ་འཇའ་ཚོན་རལ་ཀ་གྱོན་པ། གཡས་ཇུ་ཐིག་གཡོན་ཁུ་བྱུག་བསྣམས་པ་བྲི། གཡོན་དུ་ཤེལ་ཕུ་ཝེར་དཀར་པོ་ནི། དར་དཀར་རལ་ཀ་གསོལ་བ། གཡས་རྩིས་བྱང་དང་གཡོན་ཇུ་ཐིག་བསྣམས་པ་བྲིས། ལྕམ་གསུམ་སྔོན་མོ་དར་དཀར་གོ་ཟུ་ཅན་གཡས་གསུམ་མེ་ལོང་། གཡོན་གསུམ་བུམ་པ་བསྣམས་པ་བྲི། ཀུན་ཀྱང་བཞེངས་སྐུ་བྲི། དེ་མདའ་ཡི་མགུལ་དུ་བཏག །ཕ་ཝང་། ཁུ་བྱུག །ཁྲུང་ཁྲུང་གི་སྙིང་དང་རྒྱལ་མཚན་དངུལ་དཀར་མེ་ལོང་ལྤགས་བུ་དཀར་པོ་བཏགས ། དེ་དཀྱིལ་འཁོར་དབུས་སུ་འཛུག །མཆོད་རྫས་འབྲུ་སྣའི་ཕྱེ་མ་ལ་གཡུ་ཏི་བྲན། འབྲང་རྒྱས་མར་གྱི་གཡུང་དྲུང་ཅན། གཡག་ལུག་ར་གསུམ། བྱ་དང་རི་དྭགས་སྣ་ཚོགས་ཀྱི་གཟུགས་བྱས་ལ་རིན་པོ་ཆེའི་སྣོད་དུ་བཤམ། གཡང་མོ་ལུག་གི་སྟོད་ཤས་བརྒྱན། གཡུ་ཏི་སྦྲང་ཆང་རྒུན་ཆང་གིས་བྲན། དཀྱིལ་འཁོར་དབུས་སུ་བཞག །དུས་གསུམ་བསང་བྱ། དུག་ཕྱུང་བྱ། དམུ་ཕོད་བྱ། ཚན་ཁྲུས་བྱ། བགེགས་བསྐྲད། མཚམས་བསྡམ། ངག་བཅད། མི་ལ་གསང་། དེ་ནས་ཏིང་འཛིན་རིམ་པ་ནི། བདག་ཕུ་ཝེར་དུ་བསྒོམ། དཀྱིལ་འཁོར་འཇའ་ཚོན་སྣ་ལྔའི་གུར་དུ་བསྐྱེད། དེའི་ནང་དུ་ཕུ་ཝེར་
མཆེད་གསུམ་དང་ལྕམ་གསུམ་བྲིས་སྐུ་བཞིན་དུ་བསྐྱེད། འཁོར་སྨན་བྲན་བརྒྱད་ཕྱག་ན་མེ་ལོང་སྟོན་ཞིང་གླིང་བུ་བཀྲོལ་བར་བསམ། གནས་ནས་སྤྱན་དྲངས་ལ་བསྟིམ། བདག་ལ་ཡོན་ཏན་ཐམས་ཅད་དང་སྲིད་པ་གསུམ་གྱི་མངོན་ཤེས་སྟོན་པར་བསམ། སྙིང་པོས་རྒྱུད་བསྐུལ་སྔགས་ཀྱི་འོད་ཟེར་ཐུགས་ཀ་ནས་འཕྲོས། མདུན་གྱི་ལྷ་ལ་ཕོག་པས་བདག་ལ་ས་འོག་གི་གཏེར་རྣམས་སྟོན་པར་བསམ། དེ་ནས་སྙིང་པོ་འདི་སྨྲ་བ་བཅད་ལ་བསྒྲང་། ཨཱོཾ་ཧ་རཾ་སྤུངས་སོ་ལམ་གསལ་ཁོད་དོ་འདུ། སྟོང་བཟླས་པས། ཉི་ཟླ་ཤར་དང་སྒྲོན་མེ་འདེགས། །མེ་ཏོག་བཏུ་དང་ཞལ་ཟས་སྟེར། །དྲི་བཟང་སྨན་རྣམས་དྲི་བྲོ་འོང་། །དེ་ནས་བསྟོད་དེ་འདི་སྐད་དོ། །ཀྱེ། གཡུ་བུན་འོད་ཀྱི་གཞལ་ཡས་ཀྱི། །འཇའ་ཚོན་འོད་ཀྱི་ཕོ་བྲང་ནས། །ཕུ་ཝེར་གསང་བའི་ལྷ་ཚོགས་བཞེངས། །སྨྲ་བྱེད་ཕུ་ཝེར་རྒྱལ་པོ་ནི། །གསེར་གྱི་མི་བོ་དར་དཀར་རལ་ཀ་ལུས་ལ་གྱོན། གཡས་ན་དུང་གི་ཇུ་ཐིག་བསྣམས། །བཟང་ངན་སྐྱོན་ཡོན་གཤེན་ལ་སྟོན། །གཡོན་ན་དངུལ་གྱི་མེ་ལོང་བསྣམས། །སྣང་སྲིད་ཐམས་ཅད་ས་ལེར་གསལ། །བདག་ལ་སྣང་སྲིད་ཡོན་ཏན་སྟོན། །དཀྱིལ་ཆེན་ཕུ་ཝེར་དཀར་པོ་ནི། །སྔོན་པོ་གཞའ་ཚོན་རལ་ཀ་གསོལ། །ཕྱག་ན་སྣང་བྱེད་སྒྲོན་མེ་འཛིན། །སྣང་སྲིད་ཐམས་ཅད་བདག་ལ་སྟོན། །ཤེལ་ཆེན་ཕུ་ཝེར་དཀར་པོ་ནི། །དུང་མདངས་དར་དཀར་རལ་ཀ་གྱོན། །རྩིས་བྱང་ཇུ་ཐིག་ཕྱག་ན་བསྣམས། །སྐྱོན་ཡོན་ཀུན་གྱི་དྲང་ཤན་ཕྱེས། །ལྕམ་མོ་བཟང་བྱེད་གསལ་མཛད་གསུམ། །སྔོན་མོ་དར་དཀར་གོས་སུ་གྱོན། །མེ་ལོང་བུམ་པ་ཕྱག་ན་བསྣམས། །རྣོ་གཡང་དངོས་གྲུབ་བདག་ལ་སྟོན། །འཁོར་དུ་སྨན་ཕྲན་བརྒྱད་ཀྱིས་བསྐོར། །སྨྲ་བྱེད་ལྕམ་དྲལ་ད་ཚུལ་བྱོན། །འབོད་ཟས་མང་པོ་བདག་ལ་
ཡོད། །སྨྲ་བྱེད་ལྕམ་དྲལ་བྱོན་ཙམ་ན། །གཞའ་ཚོན་འོད་ཟེར་ཐིབས་སེ་ཐིབ། །རིན་ཆེན་རྒྱན་ཆ་སི་ལི་ལི། །རྦ་གླིང་སྙུག་གླིང་ཀྱུ་རུ་རུ། །དངུལ་དཀར་མེ་ལོང་ད་ལ་ལ། །གླུ་ལེན་བྲོ་བརྡུངས་ཁྲིགས་སེ་ཁྲིག །བདག་ལ་སྣང་སྲིད་ས་ལེར་སྟོན། །ཅེས་བརྗོད་ཅིང་གླིང་བུའི་སྒྲ་བཏང་། བསང་བྱ། དེ་ནས་བདག་ལ་བཟང་ངན་ཐམས་ཅད་དང་ས་འོག་གི་གཏེར་ཡང་སྟོན། དངོས་གཞི་སྒྲུབ་ཐབས་ཀྱི་རིམ་པའོ། །གསུམ་པ་མཇུག་གི་རིམ་པ་ནི། སྒྲུབ་པ་ཐོན་ནས་སྐུ་དང་རྟེན་རྣམས་རང་གི་ལུས་ལ་བཅིང་། མཆོད་རྫས་ཆ་གསུམ་བྱ། ཆ་གཅིག་བསང་བྱ། ཆ་གཅིག་རང་གིས་རོལ། ཆ་གཅིག་རྟེན་དུ་བཅང་། རྟ་བྱིན་ཡང་རྐུན་མ་ངོས་མི་བཟུང་། དུས་སུ་བསང་དང་མཆོད་པ་བྱ། དེ་ནས་ལུས་དང་གྲིབ་མར་འགྲོགས། དེ་ནི་མཇུག་གི་རིམ་པའོ། །ཕུ་ཝེར་གསུང་གི་སྒྲུབ་པ་ནི། བྱ་བ་སླ་ལ་དངོས་གྲུབ་མྱུར། བླ་ཆེན་བདག་གིས་ཕྱི་རབས་དོན་དུ། མོ་སྤྲ་དོན་འདུས་པ་ཕུ་ཝེར་ལྕམ་དྲལ་སྒྲུབ་ཐབས་ཡང་བཅུད། མདོ་ཁམས་ལྷ་བཙན་རྒྱལ་པོ་ལ་གཏད། འདི་ནི་ཡིད་བཞིན་ནོར་བུ་འདྲ། ལས་འཕྲོ་ཅན་དང་འཕྲད་པར་ཤོག། དྦྲྒྱ་བ་ཏཿ །བྷཿཨུ་ཡ་བྒ་རྒྱ་རྒྱ་རྒྱ་བི་ཏུ་ཞུ་རར་སྦག །གསལ་སྒྲོན་བསྟན་པ་ནི། སྒྲུབ་པ་ཐམས་ཅད་གོང་དུ་གསལ། བྱ་གསུམ་གྱི་སྙིང་དང་རྒྱལ་མཚན་འཛོམ་ན་རབ། མ་འཛོམ་ན་དར་ལ་བྲི། དངུལ་གྱི་མེ་ལོང་མེད་ཁ་མེད། ཕྱེ་མར་འོལ་སྐོམ་རྟེན་དུ་བཤམ། ཇུ་ཐིག་ལ་དིང་དིང་ཤཱཀྱ་གུར་ཆེན་གཅིག་མདུད་ལ་རྟེན་དུ་བཤམ། ཡང་ན་དིང་དིང་ཅོག་ཁ་གཅིག་མདུད་ལ་བརྟེན་དུ་བཀོད། སྟེང་དུ་དར་དཀར་ཉི་མ་རིས་ཀྱི་གུར་ཕུབ། མནོལ་ཡས་ནལ་མ་དང་ཡུག་ས་ལ་འཛེམ། སྒྲུབ་ཚེ་མི་ཟས་མི་ཟ། མཁོན་འཐབ་མི་བྱ། མི་རོ་མི་བཟུང་། ཐབ་གཞོབ་མི་བྱ། རྟགས་
ཐམས་ཅད་གསང་ངེས་ཐུབ་པར་བྱ། བསྟོད་པ་དུས་གསུམ་ལ་བྱ། སྤོས་དཀར་དུད་པ་བཏང་། མཚན་མ་ངན་ན་ཡི་དམ་བསྙེན་པ་བཟླ། ལིངྒ་བྲི་ལ་སྒོ་ཐེམ་ཞབས་སུ་མནན། དེ་ཡིས་དངོས་གྲུབ་མྱུར་རོ། །ཨུ་ཡ་ཡག་ཐཾ། རྒྱ་རྒྱ་རྒྱ། གནད་ཀྱི་གདམས་པ་ནི་གོང་གི་རྟགས་བྱུང་ནས་གཞུང་བསྙེན་དགུ་པ་ལ་ཤམ་བུ་བཅུ་པ་འདི་བཏགས། མ་མ་སིང་སིང་ཁྲོལ་ཁྲོལ་ལ་པུ་ཙ་ཏ་ར་བདག་ལ་ཕོབ། དེར་ཁྱེའུ་ཆུང་གཡུ་ཡི་ཟུར་ཕུད་ཅན་དང་བུད་མེད་རྒྱན་བཟང་གིས་བར་སྣང་ནས་བདག་ལ་སྨྲ་བའམ་སྒྲུབ་ཁང་དུ་སྒྲ་བཟང་ངན་སྒྲོག་པ་དང་།གླིང་བུའི་སྒྲ་བསྒྲགས་པ་སྐྱོན་ཡོན་ཏན་ཐམས་ཅད་མཐོང་བ་མེད་པར་ལྷང་ལྷང་བསྒྲག་པ་འོང་། དེ་ནས་གོང་མ་གཉིས་ལ་བཅུ་དགུ་པའི་ཡབ་སྔགས་འདི་བཏགས་པ་སྟོང་བཟླ། ཨོཾ་རི་མ་མ་སྟོན་སྲིད་པ་གསུམ་གྱི་མངོན་ཤེས་སྟོན་སི་རི་སི་རི་མི་གོ་སྟོན། དེ་བཟླས་པས་སྐྱོན་ཡོན་བཟང་ངན་ཐམས་ཅད་བཀག་པ་མེད་པར་སྟོན་ཏེ་ཐེ་ཚོམ་མེད། དྲི་བཟང་ཆི་ལི་ལི་འོང་། དེ་ནས་འབྲུ་བཅུ་གཅིག་པ་འདི་བཏགས་ལ་བཟླ། སིང་སིང་ཕོབ་ཕོབ། སྣང་སྲིད་ས་ལེར་སྟོན། བྲུཾ་འདུ། དེས་ནི་སྣང་སྲིད་སྐྱོན་ཡོན་སྣ་ཚོགས་དང་། དངོས་གྲུབ་ཐམས་ཅད་བདག་ལ་སྟོན་པར་འགྱུར། རྣ་བར་སྐྱོན་ཡོན་ཟློ་བར་ངེས། འདི་ནི་གནད་ཀྱི་གདམས་པའོ། །ཨུ་ཡ་རྒྱ་རྒྱ་རྒྱ་༔ ཇུ་ཐིག་འདི་སྤུ་བར་འདོད་ན། སྔགས་གོང་མ་རྣམས་ལ་བཅུ་གསུམ་པ་འདི་བཏགས། ཡང་ཡང་ཏེ་སྤུར། མ་སྤུར་ག་སྤུར་ཇུ་སྤུར་ཏིག་ནཾ་སྤུར། ཞེས་སྟོང་བཟླས།ཇུ་ཐིག་ལ་ཨ་ཁད་རྩེ་མ་མདུད་ལ་བསང་བྱ་བའི་ནང་དུ་བསྒྱུར་རོ། །བསྟོད་པ་བྱ། དེ་ནས་རྒྱ་མཚོ་ཡང་བསྐོར་ནུས་སོ། །སྤྱད་ཆ་ལ་སོགས་གང་ཚོལ་དེའི་མིང་ནས་བརྗོད། འཕྲུལ་གྱི་ཇུ་ཐིག་ཁྱོད་བདག་གི་ཅི་འདོད་དྲོངས་ཤིག །ཅེས་བརྗོད་པས་འདོད་པ་ཐམས་ཅད་བསྒྲུབས་
ནས་འོང་། དེ་ནི་སྤུར་བའི་རིམ་པའོ། །ཨུ་ཡ་རྒྱ་རྒྱ་རྒྱ། བདག་སྒྲུབ་པ་ལ་ཞུགས་པའི་དུས་སུ། ཡིད་མི་དགའ་ཁྲོ་སྙིང་འདོད། གནས་སྔར་བས་འཇིགས་པར་གྱུར་ན། གྲོ་ཤོག་ལ་ལིངྒ་བྲིས་ལ་སྔགས་འདིས་བསྐོར། སྒྲུབ་པ་ལ་བར་ཆད་བྱེད་པའི་འབྱུང་པོ་ཏྲི་ཛ་ནན། སྔགས་ཡི་དམ་མམ་ཕུ་ཝེར་གྱི་བསྙེན་པའི་ཤམ་ལ་བཏགས། ཏྲི་ཛ་སྟྭཾ་བྷ་ཡ་གནོད་བྱེད་ཏྲིག་ནན། ཅེས་བརྒྱ་ཙམ་བརྗོད་ལ་སྒོ་ཐེམ་ཞབས་སུ་མནན། དེས་ཅི་བསམ་འགྲུབ་བོ། །ཕུ་ཝེར་དཀར་པོའི་སྒྲུབ་པ་ལ། འདི་མེད་གཞན་གྱིས་ཡུག་པ་རྐྱང་། བྦ་ཉྱ་བྒས་ཐྭཾ་྅རྒྱ་རྒྱ། །བྦ། ནོར་དུ་སྒྲུབ་ན་སྔགས་འདི་གོང་མ་ལ་བཏགས། རཏྣ་སི་ཏི་ཕ་ལ་དྲུང་མུ་རཏྣ་བྲུཾ་འདུ། རྫས་ནི་འབྲུ་སྣ་ཚོགས་ཚད། ཕྱུག་པོའི་ནོར་ལུག་སྤུ་རྩིད་དགོས། སྒྲུབ་པ་ཐོན་ནས་མེ་ལོང་སྐུ་ནི་མཆན་ཁུང་གཡོན་དུ་བཏགས། རྟེན་གཞན་མ་བང་མཛོད་ནང་དུ་སྤ། དེ་ནི་ནོར་སྒྲུབ་ཀྱི་རིམ་པའོ། །ཨུ་ཡ༔ གསལ་སྒྲོན་ལག་ལེན་འདི། ཕྱི་རབས་ལས་འཕྲོ་ཅན་དང་འཕྲད་པར་ཤོག། བྦ་བྦ་ཞ་རྒྭ་རྒྭཿཨ་ཀ་ཐོཾ། རྒྱ་རྒྱ་རྒྱ། ཤོག་སེར་བུ་ལས་ཞལ་བཤུ་བྱས། ༤༡༢྅་བྦ་྅་བྚ ཕུ་ཝེར་སྒྲུབ་པའི་གནད་ཡིག་བཞུགས་སོ། བྦ ཕུ་ཝེར་ལྕམ་དྲལ་བསྒྲུབ་པ་ལ། ཐམས་ཅད་གཞུང་གིས་གསལ་བ་ལ། གནད་ཀྱི་གདམས་པ་བསྟན་པ་ནི། བསེ་རགས་བླ་རྐུན་སྦུན་བཞི་མནན་ཐབས་བསྟན། །བསེར་རག་སྦུན་བཞི་མ་མནན་ན། །སྒྲུབ་པ་མི་འགྲུབ་བར་ཆད་མང་། །དེས་ན་འདིའི་བྱ་ཐབས་བསྟན། །རོ་རས་དག་གམ་གྲོ་བ་ལ། །གྲི་ཁྲག་ཁྱི་ཁྲག་བསྲེས་པའི་ལིངྒ་བྱ། །བྱ་མགོ་ཁྱི་མགོ་སྦྲུལ་མགོ་བུ་མེད་མགོ་ཅན་གཟུགས་བཞི་བྲིས། ཏྲི་བཞི་ལ་སོགས་སྔགས་ཀྱིས་བསྐོར། །ར་རུ་ནག་པོའི་ནང་དུ་གཞུག །ཁྱིས་ཕུང་རེ་བའི་ནང་དུ་དྲིལ། །བདག་
ཉིད་ཕུ་ཝེར་རྒྱལ་པོ་སྒོམ། །ཏྲི་ལས་འོད་ཟེར་ལྕགས་ཀྱུ་སྤྲོས། །དེ་འདྲ་གཟུགས་ལ་ཡང་ཡང་བསྟིམ། །ཉུངས་དཀར་ཉུངས་ནག་ཆོགས་ཕྱེ་ཁྱི་ཁྲག །རམ་པ་ལ་བསད་སྔགས་འདི་བཟླས་ལ་ཐུན་གྱིས་བྲག །བསོ་རུ་ཏྲི་མར་ཤང་། ཨེ་ཏྲི་ནག་ཤན། ས་མ་ཡ་ཛ༔ རཱ་ཛ་ཏྲི་ཤཾ་བཛྲ་འུར་འུར་རྦད། བསེ་རག་ཨུ་དུག་རྦད་ནན། འདིའི་ཤམ་དུ་ལ་ཏ་བཏགས། ཞག་བདུན་བཟླས་པའི་ཐུན་བྲབ། ཐུན་དེ་མེ་རུ་འབར་བས་བསྲེགས་པར་བསམ། བུད་མེད་ཁྱེའུ་བསད་པ་འོང་། དེ་ལྟར་བྱུང་ནས་སྒྲུབ་ཁང་མི་མཐོང་བའི་ཕག་ཏུ་མནན། དེས་ནི་ལས་གྲུབ་བཀྲ་ཤིས་སོ། །དེ་ལྟར་བྱས་ན་སྒྲུབ་པ་པོ་དང་ཕུ་ཝེར་གཉིས། རྩི་ཏ་ཞིག་གི་ནང་དུ་གཏམས། དེ་མེད་གཞུང་ཡང་ཡུག་པ་རྐྱང་། དཀྱུས་ནས་གུད་དུ་ཕྱུང་བའི་ཡིག་ཆུང་། །ཨུ་ཡ་རྒྱ་རྒྱ་རྒྱ༔ ༤༡༔ ཐམས་ཅད་གཞུང་གིས་ཤེས་པ་ལ། །མན་ངན་ཟུར་ཙམ་བསྟན་པ་ནི། །ལིངྒ་གོང་བཞིན་བྲིས། སྙིང་གར་ཏྲི་བཞི་བྲིས་ལ་སྔགས་འདིས་བསྐོར། ཏྲི་ཛ་སྟམ་བྷ་ཧྲིང་གསང་བའི་སྒྲུབ་པ་ལ་བར་ཆད་བྱེད་པའི་བསེ་རག་སྟཾ་ཧྲིང་ནན། མ་ཏ་དེའི་ཤམ་དུ་བཏགས་ལ་བསྐོར། བདག་ཉིད་ཡི་དམ་དུ་བསྒོམ། ཐུགས་ལས་འོད་ཟེར་སྤྲོས་ལ་བསྟིམ། ཐུན་རྫས་མཚོན་ཆར་བསམས་ལ་བྲབ། །མཆོད་རྟེན་སྒོ་ཐེམ། ཡང་ན་སྒྲུབ་ཁང་ཕག་ཏུ་མནན། ཁྱད་པར་དུ་འདི་གལ་ཆེ། འདི་བྱས་བར་ཆད་མེད་པར་འགྱུར། ཨུ་ཡ་རྒྱ་རྒྱ་རྒྱ། འདི་རྩིས་ལ་མེད་དོ། །ཨུ་ཡ། ཐག་རིང་ལ་མི་མནན། མགོ་མཛུག་བར་གཙང་ཁྲིགས་སེ་འདུག་གོ། མངྒ་ལཾ། །འཁོར་ལོའི་གནད་ཡིག་ནི། དར་རས་རྒྱ་ཤོག་གང་རུང་གཙང་མ་ལ། སྨན་སྣ་གསུམ་བྱུག་ལ་བྲི། མུ་ཁྱུད་རིམ་པ་
བཞི་རུ་བསྐོར། དབུས་སུ་ནོར་བུའི་ཁང་སེང་དུ་ནྲྀ་ལ་རང་མིང་གིས་བསྐོར། ནོར་བུའི་ལྟེ་བར་ཨ་གསུམ་རེ་བྲི། དེ་རྒྱབ་མུ་ཁྱུད་ལ་ཨོཾ་ཧ་ར་ཞེས་སོགས་བྲི། མ་མ་སིང་སིང་ཞེས་སོགས་བྲི། དེ་རྒྱབ་མུ་ཁྱུད་ལ། ཡང་ཡང་ཏི་སོགས་བྲི། འདོད་གསོལ་མཐའ་བསྒྱུར་ཤེས་པར་བྱ། སྤྱིར་གཟུགས་བརྙན་གསུམ་ནི། ཁུ་བྱུག་སྔོ། ཁྲུང་ཁྲུང་དཀར། ཕ་ཝང་གྲོ་བོའོ། །འཁོར་ལོའི་ཞལ་ཤེས་འདི་གཞན་ལ་མ་བསྟན། ཨུ་ཡ་རྒྱ་རྒྱ་རྒྱ། མངྒལཾ།