དཔལ་དུས་ཀྱི་འཁོར་ལོའི་རྒྱུད་ཀྱི་ཚིག་དོན་རབ་ཏུ་གསལ་བྱེད་རྡོ་རྗེ་ཉི་མའི་སྣང་བ།
བཛྲ སཱུ ཪྻ བྷཱ ས ནཱ མ ཤྲཱི ཀཱ ལ ཙ ཀྲ སྱ ཏནྟྲཱ ཎཱཾ ཝཱ ག རྠ པྲ ཀཱ ཤ ཀ ར བི ཧ ར ཏི སྨ། །
དཔལ་དུས་ཀྱི་འཁོར་ལོའི་རྒྱུད་ཀྱི་ཚིག་དོན་རབ་ཏུ་གསལ་བྱེད་རྡོ་རྗེ་ཉི་མའི་སྣང་བ་ཞེས་བྱ་བ་བཞུགས་སོ། །
ན་མོ་གུ་རུ་ཤྲཱི་ཀཱ་ལ་ཙཀྲ་དྷརྨ་དྷཱ་ཏུ་ཝཱ་གཱི་ཤྭ་རཱ་ཡ། གང་གིས་བསོད་ནམས་ཡེ་ཤེས་ཚོགས་ཆེན་རབ་རྫོགས་མཆོག་ཏུ་མི་འགྱུར་ཡེ་ཤེས་བརྙེས། །བདུད་ཀྱི་སྡེ་ཆེན་རབ་བཅོམ་འཇིག་རྟེན་གསུམ་ན་མཆོད་འོས་མཚུངས་མེད་སྙན་པར་གྲགས། །ཤཱཀྱའི་རིགས་འཁྲུངས་ཤཱཀྱ་སེང་གེ་དཔལ་ལྡན་རྡོ་རྗེ་སེང་གེའི་ཁྲིར་བཞུགས་པ། །རྡོ་རྗེའི་རྣལ་འབྱོར་དང་པོའི་སངས་རྒྱས་རྒྱུད་མཆོག་སྟོན་མཛད་དེ་ལ་གུས་ཕྱག་འཚལ། །མཆོག་ཏུ་མི་འགྱུར་བདེ་བ་ཆེན་པོ་རྡོ་རྗེའི་སྐུ་ནི་འཕོ་བའི་སྒྲིབ་པ་ཀུན་ལས་རྣམ་པར་གྲོལ། །རྣམ་ཀུན་མཆོག་ལྡན་སྟོང་ཉིད་ཕྱག་རྒྱ་ཆེན་མོས་ཀུན་ནས་ལེགས་འཁྱུད་གཉིས་
སུ་འཛིན་པའི་མཐའ་དང་བྲལ། །སྐུ་བཞི་བྱང་ཆུབ་བཞི་དང་རྡོ་རྗེ་བཞི་ལྡན་དེ་ཉིད་བཅུ་དྲུག་བདེན་དོན་བཅུ་གཉིས་མཐར་སོན་པ། །རིགས་རྣམས་ཀུན་གྱི་ཁྱབ་བདག་མཆོག་གི་དང་པོའི་སངས་རྒྱས་དཔལ་ལྡན་དུས་ཀྱི་འཁོར་ལོ་དེ་ལ་འདུད། །རྡོ་རྗེ་ཟླ་བ་དྲི་མེད་འོད་བཟང་རྡོ་རྗེ་འཛིན་རྒྱལ་ཞུ་ཞིང་གསོལ་བ་འདེབས་པ་པོ། །འཇམ་དཔལ་དཔལ་ལྡན་གྲགས་པ་མཆོག་ཉིད་རྡོ་རྗེའི་རྒྱུད་ཆེན་ལེགས་པར་བསྡུ་མཛད་རིགས་ལྡན་གཙོ། །དགོངས་འགྲེལ་དྲི་མེད་འོད་ཀྱི་སྣང་བ་ཕྱོགས་ཀུན་རབ་བཀྱེ་འཇིག་རྟེན་མགོན་པོ་པད་དཀར་འཆང་། །རྣམ་གསུམ་དབྱེར་མེད་སྙིང་དབུས་པདྨོར་རྡོ་རྗེ་སེམས་མཆོག་ལྷག་པའི་ལྷ་ཡི་ངོ་བོར་མཆོད། །ཙི་ལུ་པ་དང་དུས་ཞབས་འབྲོ་སྟོན་སོགས། །རྒྱ་བོད་མཁས་གྲུབ་ལམ་འདི་གསལ་བྱེད་པའི། །བརྒྱུད་པའི་བླ་མ་རྣམས་དང་དུས་འཁོར་གྱི། །དཀྱིལ་འཁོར་ལྷ་ཚོགས་རྣམས་ལ་
ཕྱག་འཚལ་ལོ། །ཟླ་ཉིའི་བགྲོད་པ་དྷུ་ཏིར་རབ་ཐིམ་འཕོ་བའི་སྒྲིབ་བྲལ་ཡེ་ཤེས་ཀྱི། །སྐུ་མཆོག་འགྱུར་མེད་འཇིག་རྟེན་གསུམ་ན་དཔལ་དང་ཕུན་ཚོགས་ཀུན་གྱི་གཞི། །དྲན་པའི་མོད་ལ་འཇིགས་པ་ཀུན་སེལ་ཇི་ལྟར་འདོད་པའི་འབྲས་སྩོལ་པ། །དཔལ་ལྡན་རྣལ་འབྱོར་མ་རྣམས་དགྱེས་པས་འཆད་ཉན་རྩོམ་ལ་གེགས་མེད་མཛོད། །རྒྱུད་དོན་རྒྱ་མཚོ་མཆོག་ཏུ་རབ་ཟབ་རྒྱ་ཆེ་བའི། །གནས་འདི་བྱིས་པ་བདག་འདྲའི་བློ་ཡི་ཡུལ་མིན་ཡང་། །བྱང་ཆུབ་སེམས་དཔས་རྗེས་བསྟན་དམ་པའི་ལེགས་བཤད་ལ། །བརྟེན་ནས་གཞན་ཕན་སེམས་ཀྱིས་རྒྱུད་ཀྱི་རྣམ་བཤད་བརྩམས། །ཕྱོགས་དུས་རྒྱལ་བའི་ཡེ་ཤེས་སྐུ་གཅིག་པུ། །འཇམ་དཔལ་ཉིན་མོར་བྱེད་པའི་སྣང་བ་ནི། །སྙིང་གི་ཆུ་སྐྱེས་བཞད་པའི་གེ་སར་ལ། །འབྲལ་མེད་བསྟེན་ནོ་ཡབ་གཅིག་ཐུགས་རྗེ་ཅན། །འདི་ན་ལུས་སེམས་ཟུག་རྔུའི་བཅིང་བ་ལྔས། །དམ་པོར་བཅིངས་ཞིང་འཁོར་བའི་མཚོ་ཀློང་གི། ཉེས་པ་མཐོང་བཞིན་ཞུམ་པའི་ཉམས་ཆུང་བདག །རྒྱུད་དོན་རྒྱ་མཚོར་འཇུག་ལ་ཐུགས་བརྩེར་མཛོད། །གལ་ཏེ་མཐར་ཕྱིན་གྱུར་ན་ཁྱོད་ཀྱི་དྲིན། །ལེགས་བརྩམ་དེས་ཀྱང་ལམ་འདི་དོན་གཉེར་ལ། །བློ་སྣང་རྒྱ་ཆེ་མཆོག་ཏུ་རབ་སྦྱིན་ཞིང་། །ཆོས་འདི་ཕྱོགས་ཀྱི་ཐ་གྲུར་རྒྱས་པར་མཛོད། །དེ་ལྟར་མཆོད་པར་བརྗོད་ཅིང་གསོལ་བ་གདབ་པའི་ཚིག་གི་མེ་ཏོག་གིས་མདུན་བསུས་ཏེ། གང་ཞིག་བཤད་པར་བྱ་བའི་ཆོས་དེ་གང་ཞེ་ན། བདག་ཅག་གི་སྟོན་པ་མཚུངས་པ་མེད་པ་ཤཱཀྱའི་རྒྱལ་པོ་ཉིད་ཀྱིས་བསྐལ་པ་གྲངས་མེད་པ་རྣམས་ཀྱི་སྔོན་ནས་བླ་མེད་བྱང་ཆུབ་མཆོག་ཏུ་ཐུགས་བསྐྱེད་ཅིང་། ལྷག་པར་རྩོད་ལྡན་སྙིགས་མ་ལྔ་བདོའི་མི་མཇེད་འཇིག་རྟེན་གྱི་ཁམས་འདི་ཉིད་ཐུགས་རྗེ་ཆེན་པོས་བདག་གིར་བཟུང་སྟེ་སྨོན་ལམ་ཆེན་པོ་ལྔ་བརྒྱ་བཏབ་པ་ཇི་ལྟར་སྨོན་པ་དེ་ལྟར་འགྲུབ་པའི་རྒྱུ་
ཚོགས་གཉིས་ཡོངས་སུ་རྫོགས་པའི་སྟོབས་ཀྱིས། རྩོད་ལྡན་ཚེ་ལོ་བརྒྱ་པའི་དུས་སུ་འཛམ་གླིང་ལས་ཀྱི་ས་པའི་ཡུལ་དབུས་སུ་རྡོ་རྗེ་གདན་ལ་བྱང་ཆུབ་ཤིང་གི་དབང་པོའི་དྲུང་དུ་མངོན་པར་རྫོགས་པར་སངས་རྒྱས་ཏེ། སྡེ་སྣོད་གསུམ་དང་སྔགས་ཕྱི་ནང་གི་ཆོས་ཀྱི་འཁོར་ལོ་དཔག་ཏུ་མེད་པ་བསྐོར་ནས་གདུལ་བྱ་རྣམས་རྣམ་གྲོལ་གྱི་ལམ་ལ་བཀོད་པར་མཛད་ཅིང་། སླར་ཡང་འབྲས་བུ་གསང་སྔགས་རྡོ་རྗེ་ཐེག་པའི་རྒྱུད་ཐམས་ཅད་ཀྱི་མཐར་ཐུག་པ་སྟོན་པའི་སླད་དུ། དཔལ་ལྡན་འབྲས་སྤུང་གི་མཆོད་རྟེན་ཆེན་པོར་རྡོ་རྗེ་དབྱིངས་ཀྱི་དཀྱིལ་འཁོར་དུ། རྒྱལ་བ་དང་རྒྱལ་སྲས་ཁྲོ་བོ་ལྷ་དང་ལྷ་མོའི་ཚོགས་འདུས་པའི་དབུས་སུ། ནག་པའི་ཉ་ལ་སྲིད་གསུམ་རྣམ་པར་རྒྱལ་བའི་དུས་སྦྱོར་དང་ལྡན་པའི་ཚེ། རྡོ་རྗེ་སེང་གེའི་ཁྲི་ལ་ཞལ་ཤར་དུ་ཕྱོགས་པས་བཞུགས་ཏེ། ཕྱག་ན་རྡོ་རྗེའི་སྤྲུལ་པ་ཤམ་བྷ་ལའི་ཡུལ་གྱི་རྒྱལ་པོ་ཟླ་བ་བཟང་པོས་གསོལ་བ་བཏབ་པ་བཞིན། དཔལ་དུས་ཀྱི་འཁོར་ལོའི་རྩ་བའི་རྒྱུད། ཡི་གེ་བརྒྱད་པ་རྗེས་བསྔགས་ཀྱི་ཚིགས་བཅད་སྟོང་ཕྲག་བཅུ་གཉིས་པ་བསྟན་པར་མཛད་ཅིང་དེ་ལ་ཡི་གེའི་གྲངས་སུམ་འབུམ་བརྒྱད་ཁྲི་བཞི་སྟོང་ཡོད་དོ། །རྒྱུད་དེ་ཉིད་དུ་བསྡུས་པའི་རྒྱུད་བྱེད་པ་པོ་རིགས་ལྡན་འཇམ་དཔལ་གྲགས་པ་དང་། དེ་ལ་འགྲེལ་པ་མཛད་པ་པདྨ་དཀར་པོ་དང་། རྒྱུད་ཀྱི་རྒྱལ་པོ་འཛིན་པའི་ཆོས་རྒྱལ་དང་རིགས་ལྡན་བརྒྱུད་པ་རྣམས་རིམ་པར་ལུང་བསྟན་པར་ཡང་མཛད་པ་ནི་འདི་ལྟར་བཅོམ་ལྡན་འདས་ཀྱིས་རྩ་བའི་རྒྱུད་དུ་གསུངས་པ། ལོ་འདི་ནས་ནི་དྲུག་བརྒྱའི་ལོས། །དྲང་སྲོང་རྣམས་ནི་སྨིན་དོན་དུ། །འཇམ་དབྱངས་མི་བདག་གྲགས་པ་ནི། །ཤམྦྷ་ལ་ཞེས་བྱ་བར་འབྱུང་། །འདི་ཡི་སྒྲོལ་མ་ལྷ་མོ་ཆེ། །སྲས་ནི་པད་འཛིན་འཇིག་རྟེན་དབང་། །བདག་གི་ཤཱཀྱའི་རིགས་རྒྱུད་ལས། །བྱུང་བ་ཟླ་༡བཟང་ཁྱོད་རིགས་ལའོ། །སྨྲ་མཁས་རྡོ་རྗེའི་
རིགས་དང་ལྡན། །རིགས་བཞི་རིགས་གཅིག་བྱས་གང་དེས། །རིགས་ལྡན། ཞེས་བྱ་སྟེ། ཚངས་པའི་རིགས་དང་ལྡན་པ་ཉིད་ཀྱིས་མིན། །ནོ། འདི་སྐད་བདག་གིས་ཐོས་པ་འདིས། །དྲང་སྲོང་རྣམས་ལ་ཆོས་བསྟན་ན། །གཞན་ལས་ཐོས་ཕྱིར་ཀུན་མཁྱེན་མིན། །ཞེས་པའི་རྩོད་པ་འབྱུང་བར་འགྱུར། །རྣམ་པ་གང་དང་གང་དག་གིས། །སེམས་ཅན་རྣམས་ནི་ཡོངས་སྨིན་བྱེད། །རྣམ་པ་དེ་དང་དེ་དག་གིས། །ཆོས་ནི་བསྟན་པར་བྱ་བ་ཡིན། །སྒྲ་དང་སྒྲ་ཉམས་དག་གི་ཆོས། །རྣལ་འབྱོར་པས་ནི་འབད་པས་འཛིན། །ཡུལ་གྱི་སྒྲ་ཡིས་དོན་རྙེད་པ། །དེ་ལ་བསྟན་བཅོས་སྒྲ་ཡིས་ཅི། །ཇི་ལྟར་ས་ལ་རིན་ཆེན་མིང་། །དབྱེ་བ་ཐ་དད་ཐ་དད་ནི། །ཡུལ་དང་ཡུལ་གྱི་དབང་གིས་བརྗོད། །རིན་ཆེན་དབྱེ་བ་འགར་ཡང་མེད། །དེ་བཞིན་བདག་གི་དག་པའི་ཆོས། །སྡུད་པར་བྱེད་པ་སྣ་ཚོགས་ཀྱིས། །སེམས་ཅན་བསམ་པའི་དབང་གིས་མིང་། །སྣ་ཚོགས་ཐ་དད་ཐ་དད་བརྗོད། །དེས་ན་སྙིང་པོའི་དོན་བསྡུས་འདི། །ཐམས་ཅད་མཁྱེན་སོགས་བདག་འདོད་དོ། །ཕྲེང་འཛིན་ཚིགས་བཅད་སུམ་ཅུ་ནི། །ལྷག་པའི་ཕྱོགས་བརྒྱ་སྟེ་སྟོང་ཕྲག་གཅིག་ལེའུ་ལྔས། །དཔལ་ལྡན་རྒྱུད་དག་རྫོགས་པར་ནི། །རིགས་ལྡན་གྲགས་པ་སྨྲ་བའི་རྒྱལ་པོས་སྟོན་འགྱུར་ཏེ། །སྡུད་པར་བྱེད་པ་པོ་ཡང་འདི། །འགྲེལ་བཤད་བྱེད་པ་པད་དཀར་འཛིན། །རྒྱུད་འདིར་དྲང་སྲོང་རིགས་སོགས་ལ། །སངས་རྒྱས་ལམ་ནི་གསལ་བྱེད་པ། །ཟླ་བ་༢ལྷ་དབང་༣གཟི་བརྗིད་༤ཅན་། ཟླ་བས་༥བྱིན་དང་ལྷ་དབང་ཕྱུག་༦། སྣ་ཚོགས་གཟུགས་༧དང་ལྷ་དབང་༨ལྡན། །གྲགས་པ་པད་དཀར་རིམ་པས་སོ། །འདས་པའི་རྒྱལ་པོ་ཉི་མའི་འོད། །དེ་ནི་བགེགས་དགྲའི་སྤྲུལ་པ་སྟེ། །ཕྱག་ན་རྡོ་རྗེ་ཟླ་བཟང་ཁྱོད། །ས་སྙིང་གཤིན་རྗེ་མཐར་བྱེད་དང་། །སྒྲིབ་པ་ཐམས་ཅད་རྣམ་སེལ་དང་། །རྨུགས་བྱེད་ཁེངས་བྱེད་རིམ་པ་སྟེ། །ནམ་མཁའི་སྙིང་པོ་འཇམ་དབྱངས་དང་། །འཇི་རྟེན་མགོན་པོ་གོ་
རིམ་བཞིན། །གཤིན་རྗེ་གཤེད་སོགས་ཁྲོ་བོ་བཅུ། །དེ་བར་བྱང་ཆུབ་སེམས་དཔའ་གཞན། །བཅུ་གསུམ་དེ་དག་རིམ་པ་ཡིས། །རིགས་ལྡན་རིགས་ལ་འབྱུང་བར་འགྱུར། །གྲགས་པ་རིགས་ལྡན་༡རིགས་ཀྱང་སྟེ། །དེ་ནས་རིགས་ལྡན་པདྨ་༢དཀར། །བཟང་པོ་རིགས་ལྡན་༣གསུམ་པ་སྟེ། །དེ་བཞིན་བཞི་པ་རྣམ་༤རྒྱལ་ལོ། །བཤེས་༥གཉེན་བཟང་པོ་ཕྱག་དམར་༦དང་། །རིན་ཕྱག་ཀྱང་། །བདུན་པ་ཁྱབ་འཇུག་༧སྦས་པའོ། །ཉི་མ་གྲགས་༨དང་ཤིན་ཏུ་༩བཟང་། །རྒྱ་མཚོ་རྣམ་རྒྱལ་༡༠རྒྱལ་དཀའ་༡༡དང་། །རིགས་ལྡན་ཉི་མ་༡༢བཅུ་གཉིས་པ། །སྣ་ཚོགས་གཟུགས་༡༣དང་ཟླ་བའི་༡༤འོད། །མཐའ་ཡས་༡༥དང་ནི་ས་སྐྱོང་༡༦དང་། །དཔལ་༡༧སྐྱོང་སེང་གེ་༡༨རྣམ་པར་༡༩གནོན། །སྟོབས་པོ་༢༠ཆེ་དང་མ་འགགས་༢༡པ། །མི་ཡི་སེང་གེ་༢༢དབང་ཕྱུག་༢༣ཆེ། །མཐའ་ཡས་༢༤རྣམ་རྒྱལ་རིགས་ལྡན་དང་། །གྲགས་པ་རིགས་ལྡན་ཉིད་དེ་ནས་སླར། །མཐའ་ཡས་རྣམ་རྒྱལ་དེ་སྲས་འཁོར་ལོ་ཆེན་པོ་ཅན། །རིགས་ལྡན་དྲག་པོ་༢༥འབྱུང་འགྱུར་ཏེ། །ཆོས་མཛོད་སྨྲ་ལ་མཁས་ཤིང་རྡོ་རྗེ་རྟ་མཆོག་གི་ཏིང་འཛིན་གྱིས། །ཀླ་ཀློའི་ཆོས་ནི་མཐར་བྱེད་པའོ། །ཉི་མའི་ཤིང་རྟ་ལ་སོགས་ཀྱི། །སྨྲ་མཁས་རྣམས་ཀྱི་སྟོན་པ་རྒྱུད་སྡུད་པ་པོ་འབྱུང་འགྱུར་གང་། །དེ་ཡིས་ཟླ་བཟང་གིས་ཞུས་པའི་རྩ་རྒྱུད་ལ། །ཁྱོད་གྲགས་པ་ནི་སྡུད་པར་བྱེད་པ་སྟེ། །འདིར་ནི་སེམས་ཅན་ཡོངས་སྨིན་བྱེད། །ཟླ་བཟང་ཁྱོད་ཉིད་རྩ་རྒྱུད་ལ་འགྲེལ་བཤད་བྱེད་པའོ། །འཇམ་པའི་རྡོ་རྗེས་བསྡུས་པའི་རྒྱུད་ལ། འགྲེལ་བཤད་བྱེད་པ་ནི་པད་འཛིན་རང་། །ཞེས་གསུངས་པ་ལྟར། རྩ་བའི་རྒྱུད་དང་རྩ་རྒྱུད་དེ་ལ་ཆོས་རྒྱལ་ཟླ་བ་བཟང་པོས་འགྲེལ་བཤད་སྟོང་ཕྲག་དྲུག་ཅུ་པ་མཛད་པ་ཤམ་བྷ་ལ་ལ་སོགས་པའི་སྐད་དུ་མས་གླེགས་བམ་ལ་བྲིས་ནས་ཡུལ་དེའི་གྲོང་བྱེ་བ་ཕྲག་དགུ་བཅུ་གོ་དྲུག་ན་གནས་པ་རྣམས་ལ་བསྟན་ཅིང་། དེ་དག་གིས་ཀྱང་འཆད་ཉན་བསྒོམ་པ་སོགས་ཀྱི་རིམ་པས་རྒྱ་ཆེར་བཟུང་ངོ་། །རྩ་རྒྱུད་བསྟན་པའི་
དུས་དེ་ནས་ལོ་གཉིས་པ་ལ་རྒྱལ་པོ་ཟླ་བ་བཟང་པོས་གྲོང་ཁྱེར་ཀཱ་ལཱ་པར་མ་ལ་ཡའི་སྐྱེད་ཚལ་དུ་སེམས་ཅན་རྣམས་ཀྱི་དངོས་གྲུབ་ཀྱི་རྒྱུའི་སླད་དུ་དཔལ་དུས་ཀྱི་འཁོར་ལོའི་དཀྱིལ་འཁོར་བསྐྲུན་པར་མཛད་ཅིང་རྫུ་འཕྲུལ་ཀྱང་བསྟན་ཏེ་སྤྲུལ་པའི་སྐུ་གང་ནས་བྱོན་པ་དེ་ཉིད་དུ་ལོངས་སྤྱོད་རྫོགས་སྐུས་གཤེགས་སོ། །དེ་ནས་དེའི་སྲས་རྒྱུད་དུ་རིམ་པར་ལྷ་དབང་དང་། གཟི་བརྗིད་ཅན་དང་། ཟླ་བས་བྱིན་དང་། ལྷའི་དབང་ཕྱུག་དང་། སྣ་ཚོགས་གཟུགས་དང་། །ལྷའི་དབང་ལྡན་ཏེ་ཆོས་རྒྱལ་དྲུག་པོས་ཀྱང་རིམ་བཞིན་ལོ་བརྒྱ་རེ་བརྒྱ་རེར་ཆོས་བསྟན་ཏོ། །ནམ་མཁའི་སྙིང་པོའི་སྤྲུལ་པ་ལྷའི་དབང་ལྡན་དེའི་དགའ་མའམ། ལྷ་མོ་སྣ་ཚོགས་ཡུམ་གྱི་སྲས་སུ་འཇམ་དཔལ་གྱི་སྤྲུལ་པ་རྒྱལ་པོ་གྲགས་པ་ཉིད་བལྟམས་པ་སེང་གེའི་ཁྲི་ལ་བཞུགས་ནས་ལོ་བརྒྱར་ཆོས་བསྟན་པར་མཛད་དེ། ལོ་བརྒྱ་པོ་རྫོགས་པ་ན་དེ་བཞིན་གཤེགས་པས་ལུང་བསྟན་པའི་བྱིན་གྱིས་བརླབས་པའི་སྟོབས་ཀྱིས། དྲང་སྲོང་རྣམས་ཡོངས་སུ་སྨིན་ཅིང་ཡང་དག་པའི་ལམ་ཐོབ་པར་མངོན་ཤེས་ཀྱིས་གཟིགས་ནས་ཀཱ་ལཱ་པའི་གྲོང་གི་ལྷོ་ཕྱོགས་སུ་མ་ལ་ཡའི་སྐྱེད་ཚལ་རྒྱར་དཔག་ཚད་བཅུ་གཉིས་པ་ཀཱ་ལཱ་པའི་གྲོང་དང་མཉམ་པ། སྐྱེད་ཚལ་དེའི་ཤར་ཕྱོགས་ན་ཉེ་བའི་ཡིད་ཀྱི་མཚོ་དང་། ནུབ་ཕྱོགས་སུ་པདྨ་དཀར་པོའི་མཚོ་གཉིས་ཀའང་རྒྱ་ཚད་དཔག་ཚད་བཅུ་གཉིས་ཡོད་པ། མ་ལ་ཡའི་སྐྱེད་མོས་ཚལ་དེའི་དབུས་ན་རྒྱལ་པོ་ཟླ་བ་བཟང་པོས་བསྐྲུན་པར་མཛད་པ། བཅོམ་ལྡན་འདས་དུས་ཀྱི་འཁོར་ལོའི་དཀྱིལ་འཁོར་གྱི་འཁོར་ལོ་ལྷ་དང་ལྷ་མོར་བཅས་པ་རིན་པོ་ཆེ་ལྔའི་རང་བཞིན་གྲུ་བཞི་པ་རྒྱར་ཁྲུ་བཞི་བརྒྱ་ཡོད་པ། སྐུ་དཀྱིལ་གྱི་ནང་དུ་སྟེ་དེའི་ཕྱི་རོལ་དུ་ཕྱི་མར་སྐུའི་དཀྱིལ་འཁོར། གྲུ་བཞི་སྒོ་བཞི་རྟ་བབས་བཞི་དང་དུར་ཁྲོད་བརྒྱད་ཀྱིས་བརྒྱན་པ། ར་བ་ལྔས་བསྐོར་བའི་ཕྱི་རོལ་དུ་ས་སོགས་དཀྱིལ་འཁོར་བཞི་དང་རྡོ་རྗེ་ཕྲེང་བས་བརྒྱན་པ་སྟེ། རྡོ་རྗེ་ཕྲེང་བའི་མཐར་ཐུག་
པའི་རྒྱར་ཁྲུ་བརྒྱད་བརྒྱ་ཡོད་པའོ། །སྐུ་དཀྱིལ་དེའི་ནང་དུ་ཕྱེད་ཀྱི་ཚད་ཀྱི་གསུང་དཀྱིལ་གྲུ་བཞི་སྒོ་བཞི་རྟ་བབས་བཞི་ལྡན་ར་བ་ལྔས་བསྐོར་བ། །གསུང་དཀྱིལ་གྱི་ཕྱེད་ཚད་དུ་ཐུགས་ཀྱི་དཀྱིལ་འཁོར་གྲུ་བཞི་སྒོ་བཞི་རྟ་བབས་བཞི་ལྡན་ར་བ་གསུམ་གྱིས་བསྐོར་བ། དེའི་ནང་དུ་དེའི་ཕྱེད་ཀྱི་ཡེ་ཤེས་ཀྱི་དཀྱིལ་འཁོར་ཀ་བ་བཅུ་དྲུག་པ་མཛེས་པ། ཡེ་ཤེས་འཁོར་ལོ་དེའི་ཕྱེད་ཀྱི་པདྨ་འདབ་བརྒྱད། ལྟེ་བ་རང་གི་སུམ་ཆ་ཅན་ཏེ་དེ་ལྟར་ཐུགས་གསུང་སྐུའི་དཀྱིལ་འཁོར་གསུམ་ཀ་མཚན་ཉིད་ཐམས་ཅད་ཡོངས་སུ་རྫོགས་ཤིང་། དོ་ཤལ་དང་དོ་ཤལ་ཕྱེད་པ། རིན་པོ་ཆེའི་སྣམ་བུ་དང་། ཁ་ཁྱེར་དང་། བ་ཀུ་ལཱི་དང་བཅས་པ། མེ་ལོང་དང་ཟླ་ཕྱེད་དང་དྲིལ་བུས་མཛེས་པའོ། །དེ་ལྟ་བུའི་དཀྱིལ་འཁོར་གསུམ་གྱི་བདག་ཉིད་ཀྱི་ཁང་པ་དེར། དབོ་ཟླ་བའི་ཉ་ལ་ཉི་མའི་ཤིང་རྟ་ལ་སོགས་པ་ཚངས་པའི་དྲང་སྲོང་བྱེ་བ་ཕྲག་ཕྱེད་དང་བཞི་ལ། རྒྱལ་པོ་གྲགས་པས་གསུངས་པ། ནག་པའི་ཉ་འདི་ལ་རིག་བྱེད་ཀྱི་གཞུང་འཛིན་པ་ཁྱེད་རྣམས་ལ་བདག་གིས་བསྟན་པ་སྦྱིན་པར་བྱ་སྟེ། དེ་ལ་ཁྱེད་ཀྱི་ཡུལ་སྣ་ཚོགས་ན་རིགས་དང་ལྡན་པའི་བྲམ་ཟེ་གང་ཡིན་པ་དེ་དག་གི་སྤྱོད་པ་རྣམས་བདག་ལ་བསྟན་པར་གྱིས་ཞེས་བཀའ་སྩལ་བ་དང་། དེ་དག་གིས་དེ་ལྟར་བསྟན་པའི་ཚིག་ལས། ཡུལ་སྣ་ཚོགས་པ་སོ་སོའི་སྤྱོད་པ། ཐོད་པར་ཟ་བ་དང་། བ་ལང་དང་མ་ཧེའི་ཤ་ཟ་བ། ཆང་འཐུང་བ། མ་ལ་སོགས་པ་ཆུང་མར་ལེན་པའི་ཐ་སྙད་ཕན་ཚུན་འགལ་བ་ཅན། རྣམ་པར་དཔྱད་མི་བཟོད་པར་གཟིགས་ནས་རྒྱལ་པོ་གྲགས་པས་དེ་དག་ལ་གསུངས་པ། འདིར་ཁྱེད་རྣམས་བཅོམ་ལྡན་འདས་དུས་ཀྱི་འཁོར་ལོའི་དཀྱིལ་འཁོར་གྱི་ཁང་པ་འདིར་བདག་གིས་གཞུག་པར་བྱ་ཞིང་། འཇིག་རྟེན་དང་འཇིག་རྟེན་ལས་འདས་པའི་དབང་སྦྱིན་པར་བྱའོ། །བདག་གི་བཀས་ཁྱེད་རྣམས་ཀྱིས་རྡོ་རྗེའི་རིགས་དང་ལྷན་ཅིག་ཏུ་
བཟའ་བ་དང་བཏུང་བ་བྱ་བ་དང་། བག་མ་བླང་བའི་འབྲེལ་པ་དག་ཀྱང་བྱའོ། །ཅི་སྟེ་ཁྱེད་རྣམས་དེ་ལྟར་མི་བྱེད་ན། །བདག་གི་གྲོང་བྱེ་བ་ཕྲག་དགུ་བཅུ་རྩ་དྲུག་པོར་ལ་གང་དུ་མོས་པ་དེར་སོངས་ཤིག །དེ་ཅིའི་ཕྱིར་ན། འདི་ནས་ལོ་བརྒྱད་བརྒྱ་འདས་པའི་རྗེས་སུ་ཁྱེད་ཀྱི་བུ་དང་ཚ་བོ་ལ་སོགས་པས་ཀླ་ཀློའི་ཆོས་དར་བར་བྱས་ནས་ཤམ་བྷ་ལ་ལ་སོགས་པའི་ཡུལ་ཆེན་པོ་དགུ་བཅུ་རྩ་དྲུག་ཏུ་ཀླ་ཀློའི་ཆོས་དར་བར་བྱེད་པར་འགྱུར་རོ། །ཀླ་ཀློའི་ལྷ་བི་ཥི་མིལླཱའི་སྔགས་ཀྱིས་ཕྱུགས་ཀྱི་སྐེ་གྲི་གུག་གིས་བཅད་དེ་ལྷའི་སྔགས་ཀྱིས་བསད་པའི་ཕྱུགས་དེ་དག་གི་ཤ་ཟ་བར་བྱེད་ཅིང་། རང་གི་ལས་ཀྱིས་ཤི་བ་རྣམས་ཀྱི་ཤ་ཟ་བར་མི་བྱེད་པར་འགྱུར་རོ། །དེ་འདྲའི་ཆོས་དེ་ཡང་ཁྱེད་ལ་ཚད་མར་འགྱུར་ཏེ། ཁྱེད་ཀྱི་གཞུང་ལས། མཆོད་སྦྱིན་དོན་དུ་ཕྱུགས་དག་སྤྲོས། །ཞེས་པའི་ཚིག་གིས་སོ། །དེས་ན་རིག་བྱེད་ཀྱི་ཆོས་དང་། ཀླ་ཀློའི་ཆོས་དག་ལ་ཁྱད་མེད་དེ་སྲོག་གཅོད་པར་བྱེད་པའི་ཕྱིར་རོ། །དེའི་ཕྱིར་ཁྱེད་ཀྱི་རིགས་བརྒྱུད་རྣམས་ཀྱིས་ཀླ་ཀློ་རྣམས་ཀྱི་གཟི་བྱིན་དང་། གཡུལ་དུ་བདུད་ཀྱི་ལྷ་འཇུག་པ་ཡང་མཐོང་ནས་ལོ་བརྒྱད་བརྒྱ་འདས་པ་ན་ཀླ་ཀློར་འགྱུར་རོ། །དེ་དག་ཀླ་ཀློར་གྱུར་པ་ན་གྲོང་བྱེ་བ་ཕྲག་དགུ་བཅུ་རྩ་དྲུག་ན་གནས་པའི་རིགས་བཞི་སོགས་ཐམས་ཅད་ཀྱང་ཀླ་ཀློར་འགྱུར་ཏེ། སྔར་སྐྱེ་བོ་ཆེན་པོས་བགྲོད་པ་དེ་ནི་ལམ་མོ་ཞེས་ཚངས་པའི་དྲང་སྲོང་གིས་སྨྲས་པའི་ཕྱིར་རོ། །འདིར་ཀླ་ཀློ་དང་རིག་བྱེད་ཀྱི་ཆོས་ལས་ལྷ་དང་ཕ་མེས་ཀྱི་དོན་དུ་སྲོག་གཅོད་པ་ཡིན་ལ། རྒྱལ་རིགས་ཀྱི་ཆོས་ལ་ཡང་དེ་ལྟར་འདོད་དེ། ལྷ་དང་ཕ་མེས་ཚིམ་བྱས་ནས། །ཤ་ཟོས་སྐྱོན་གྱི་ཆ་ཡོད་མིན། །ཞེས་དང་། གང་ཞིག་གདུག་ལ་གདུག་སྤྱོད་པ། །དེ་ལ་སྐྱོན་ནི་མ་མཐོང་ངོ་། །ཞེས་བྲམ་ཟེའི་གཞུང་ལས་སྨྲས་པའི་ཕྱིར་རོ། །དེ་ལྟར་རིག་བྱེད་ཀྱི་ཆོས་ཚད་མར་བྱས་ན་ཀླ་ཀློའི་ཆོས་འཛིན་པར་འགྱུར་
ཏེ། རྒྱུ་དེས་མ་འོངས་པ་ན་ཀླ་ཀློ་མི་འཇུག་པར་བྱ་བའི་ཕྱིར་ཁྱེད་རྣམས་ལ་བདག་གི་ངེས་པ་སྦྱིན་ནོ། །དེ་བས་ཁྱེད་རྣམས་ཀྱིས་བདག་གི་བཀའ་བཞིན་བྱའོ། །ཞེས་རྒྱལ་པོ་གྲགས་པའི་གསུང་ཆད་པས་བསྡིགས་པ་དང་། བཅས་པ་མགོ་བོར་ཐོག་ལྷུང་བ་བཞིན་བབ་པས། ཚངས་པའི་དྲང་སྲོང་རྣམས་ཀྱིས་ཉི་མའི་ཤིང་རྟ་ལ་སྨྲས་པ། ཀྱེ། ཉི་མའི་ཤིང་རྟ་ཁྱོད་ཀྱིས་མིའི་དབང་པོ་གྲགས་པ་ལ། བདག་ཅག་རིག་བྱེད་ལས་བཤད་པའི་རིགས་ཀྱི་ཆོས་དོར་ནས་རྡོ་རྗེའི་རིགས་ཀྱིས་དབང་བསྐུར་བའི་ཆོས་ལ་མི་འཇུག་སྟེ། དེ་བས་བདག་ཅག་ཁྱོད་ཀྱི་བཀས། ཤཱི་ཏ་དང་ཁ་བ་ཅན་གྱི་ལྷོ་ལིངྐའི་གླིང་གི་བྱང་འཕགས་པའི་ཡུལ་དུ་འགྲོ་བ་མཆོག་གོ་ཞེས་ཞུ་བ་མཛོད་ཅིག ཅེས་སྨྲས་སོ། །དེ་ནས་ཉི་མའི་ཤིང་རྟས།ཀྱེ། རྒྱལ་པོ་ཆེན་པོ་མཆོག་གི་དབང་ཕྱུག་དམ་པ། སྐྱེས་བུ་ཆེན་པོའི་མཚན་དང་དཔེ་བྱད་ཡོངས་སུ་རྫོགས་པ། དཔལ་ཤཱཀྱའི་རིགས་ཀྱི་ཐིག་ལེ་མཆོག་གི་ཐུགས་རྗེ་ཅན། རང་རང་གི་རིགས་ཀྱི་ཆོས་ལ་ཞུགས་པ། ཚངས་པའི་དྲང་སྲོང་རྣམས་ལ་སྙིང་རྗེར་མཛོད་ཅིག ཅི་སྟེ་ཁྱོད་ཀྱི་བཀའ་བཞིན་བྱ་བ་ཡིན་པ་དེ་ལྟ་ནའང་། བདག་ཅག་རྡོ་རྗེའི་རགས་ལ་འཇུག་པར་མི་བྱའི། ཁྱོད་ཀྱི་བཀས་ཆུ་བོ་ཤཱི་ཏའི་ལྷོ། ཁ་བ་ཅན་དང་ལིངྐའི་གླིང་གི་བར་འཕགས་པའི་ཡུལ་དུ་འགྲོ་བ་མཆོག་གོ་ཞེས་ཞུས་སོ། །དེ་ནས་རྒྱལ་པོ་གྲགས་པས། ཁྱེད་རྣམས་མྱུར་དུ་ཤམ་བྷ་ལའི་ཡུལ་ནས་ཕྱུངས་ལ་སོངས་ཤིག་ཅེས་གསུངས་པ་ལྟར། ཚངས་པའི་དྲང་སྲོང་དེ་ཐམས་ཅད་ཀཱ་ལཱ་པའི་གྲོང་ནས་ངེས་པར་བྱུང་ཞིང་སོང་བ། ཉི་མ་བཅུ་པ་ལ་ནགས་ཚལ་གྱི་ནང་དུ་རབ་ཏུ་ཞུགས་སོ། །དེ་རྣམས་རྒྱལ་པོ་གྲགས་པས་མངོན་ཤེས་ཀྱིས་གཟིགས་ཏེ་འདི་རྣམས་འཕགས་ཡུལ་དུ་སོང་ན། ཤམ་བྷ་ལ་ལ་སོགས་པ་གྲོང་བྱེ་བ་ཕྲག་དགུ་བཅུ་རྩ་དྲུག་ན་གནས་པའི་སེམས་ཅན་ཐམས་ཅད་མི་བཟད་པའི་སེམས་དང་ལྡན་
པར་འགྱུར་ཏེ། གང་ཞིག་རྡོ་རྗེ་ཐེག་པར་གསུངས་པ་དེ་ནི་ཡང་དག་ཡེ་ཤེས་ཀྱི་ལམ་མ་ཡིན་པའི་རྒྱུ་དེས། དྲང་སྲོང་ཐར་པ་དོན་གཉེར་འདི་ཐམས་ཅད་རྒྱལ་པོ་གྲགས་པའི་བཀས་འཇིགས་པས་རང་རང་གི་གནས་བཏང་སྟེ་གཉེན་བཤེས་རྣམས་བསྡུས་ནས་འཕགས་ཡུལ་དུ་སོང་ངོ་ཞེས། རིགས་བཞིའི་སྐྱེ་བོ་རྣམས་སེམས་སྐལ་བ་ངན་པར་གྱུར་ཏེ། ཟབ་པ་དང་རྒྱ་ཆེ་བའི་སྣོད་དུ་གྱུར་པའི་སེམས་ལེགས་པར་མི་ལྡན་པའི་ཕྱིར་རོ་ཞེས་དེ་ལྟར་སེམས་ཅན་རྣམས་ཀྱི་བསམ་པ་མཁྱེན་པ། མིའི་དབང་པོ་གྲགས་པས། ཁྱབ་འཇུག་དང་ཚངས་པ་དྲག་པོའི་རིགས་ཐམས་ཅད་རྨོངས་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེ་དང་ལྷའི་བྱིན་གྱི་བརླབས་ཀྱི་སྟོབས་ཀྱིས། དྲང་སྲོང་དེ་དག་ཐམས་ཅད་ནགས་ཚལ་དེ་ཉིད་དུ་རྨོངས་པར་གྱུར་པས། ནགས་ཚལ་དེ་ན་གནས་པའི་རི་ཁྲོད་པ་ལ་སོགས་པ་རྣམས་ཀྱིས་བཅིང་པས་སླར་དཀྱིལ་འཁོར་གྱི་ཁང་པ་དེར་ཁྱེར་ཏེ་འོངས་ནས་མིའི་དབང་པོ་གྲགས་པའི་ཞབས་དྲུང་དུ་དོར་བ་དང་། དེ་རྣམས་རབ་ཏུ་སད་དེ་མིའི་དབང་པོ་གྲགས་པ་དང་དཀྱིལ་འཁོར་གྱི་ཁང་པ་མ་ལ་ཡའི་ཚལ་དང་བཅས་པ་མཐོང་བས། ཡ་མཚན་སྐྱེས་ནས། ཨེ་མ་ཧོ། འདི་ནི་ངོ་མཚར་ཆེ་སྟེ། བདག་ཅག་རབ་ཏུ་མ་སད་པར་ནགས་ཚལ་ཆེན་པོ་ནས་དཀྱིལ་འཁོར་གྱི་ཁང་པ་ཆེན་པོར་སུས་ཁྱེར་ཏེ་འོངས་ཞེས་པའི་ཚིག་དེ་སྐད་སྨྲས་པ། རྒྱལ་པོ་འཇམ་དཔལ་གྲགས་པའི་བློན་པོ་སྤྲུལ་པའི་སྐུ་རྒྱ་མཚོའི་བློ་གྲོས་ཀྱིས་ཐོས་ནས་སྨྲས་པ། ཀྱེ། ཉི་མའི་ཤིང་རྟ་ལ་སོགས་པ་ཚངས་པའི་དྲང་སྲོང་རྣམས་ཡ་མཚན་པར་མ་བྱེད་ཅིག །རྒྱལ་པོ་གྲགས་པ་འདི་ནི་ཕྱོགས་གཅིག་པ་མ་ཡིན་ཏེ། ཁྱེད་རྣམས་རྗེས་སུ་བཟུང་བའི་དོན་དུ་སངས་རྒྱས་ཀྱི་བྱིན་གྱི་བརླབས་ཀྱིས་བྱུང་བའི་བྱང་ཆུབ་སེམས་དཔའ་ཆེན་པོ་ཞིག་གོ། དེའི་ཕྱིར་འདིའི་ཞབས་ལ་སྐྱབས་སུ་སོང་ལ། རྒྱུད་ཀྱི་རྒྱལ་པོ་དང་
པོའི་སངས་རྒྱས་ལས་འཇིག་རྟེན་དང་འཇིག་རྟེན་ལས་འདས་པའི་ལམ་གྱི་དབང་བསྐུར་བར་གསོལ་བ་ཐོབ་ཅིག ཅེས་སྨྲས་པའི་ཚིག་དེ་དང་སངས་རྒྱས་ཀྱི་བྱིན་གྱི་བརླབས་ཀྱིས་ཉི་མའི་ཤིང་རྟ་སོགས་ཚངས་པའི་དྲང་སྲོང་རྣམས་བློ་རབ་ཏུ་སད་པར་གྱུར་ཏེ་སྨྲས་པ། ལེགས་སོ་ལེགས་སོ་རྒྱ་མཚོའི་བློ་གྲོས་ཁྱོད་ཀྱི་ཚིག་གང་གིས་བདག་ཅག་གི་སེམས་རབ་ཏུ་སད་པར་གྱུར་ཏོ། །དེའི་ཕྱིར་ད་ནི་དཀོན་མཆོག་གསུམ་ལ་སྐྱབས་སུ་སོང་སྟེ། སེམས་ཅན་མཐའ་དག་གིས་སྐྱེ་བ་འདི་ཉིད་ལ་ཡང་དག་པར་རྫོགས་པའི་སངས་རྒྱས་ཐོབ་པར་བྱ་བའི་སླད་དུ་རྒྱུད་ཀྱི་རྒྱལ་པོ་དུས་ཀྱི་འཁོར་ལོ་ལས། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་སྒྲུབ་པའི་ལམ་དབང་བསྐུར་བར་གསོལ་བ་གདབ་པར་བགྱིའོ། །ཞེས་དེ་སྐད་སྨྲས་ནས། དྲང་སྲོང་དེ་རྣམས་ཀྱིས་ཚངས་པའི་རིགས་ཀྱི་རྒྱལ་པོ་ཉི་མའི་ཤིང་རྟ་ལ་བོས་ཏེ། ཀྱེ ། ཉི་མའི་ཤིང་རྟ་ཁྱོད་ནི་རིག་བྱེད་ལ་སོགས་པའི་བསྟན་བཅོས་ཀྱི་གླེགས་བམ་གཅིག་པུར་གྱུར་པ། འཇིག་རྟེན་དང་འཇིག་རྟེན་ལས་འདས་པའི་བསྟན་བཅོས་ཐམས་ཅད་ཀྱི་གཞལ་བྱ་འཛིན་པའི་ཐུགས་ཅན་ནོ། །དེས་ན་བདག་ཅག་གི་གསོལ་བ་འདེབས་པའི་ཚིག་གིས། རྒྱལ་པོ་གྲགས་པ་ལ་གསོལ་བ་གདབ་པར་བྱོས་ཤིག བདག་ཅག་ཀྱང་མཎྜལ་སྔོན་དུ་འགྲོ་བ་ཅན་གྱིས་སྐྱབས་སུ་སོང་སྟེ་ཐམས་ཅད་ཀྱིས་གསོལ་བ་གདབ་པར་བགྱིའོ། །དེ་ནས་ཚངས་པའི་དྲང་སྲོང་རྣམས་ཀྱི་ཚིག་དེས་ཉི་མའི་ཤིང་རྟས། རིན་པོ་ཆེ་གསེར་གྱི་རང་བཞིན་གྱི་མེ་ཏོག་རྣམས་ཀྱིས་མཎྜལ་བྱས་ནས། མིའི་དབང་པོ་གྲགས་པའི་ཞབས་ཀྱི་དྲུང་དུ་རིན་པོ་ཆེའི་མེ་ཏོག་གི་སྙིམ་པ་གཏོར་ཏེ། པུས་མོ་གཉིས་ས་ལ་བཙུགས་ཤིང་ལག་པ་གཉིས་ཐལ་མོ་སྦྱར་བ་སྤྱི་བོར་སོན་པས་ཚངས་པའི་དྲང་སྲོང་རྣམས་དང་ཐབས་ཅིག་ཏུ་རྒྱལ་པོ་གྲགས་པའི་ཞབས་ལ་ཕྱག་འཚལ་ནས།
པུས་མོ་གཡས་པའི་ལྷ་ང་ས་ལ་བཙུགས་ཤིང་ཐལ་མོ་སྦྱར་བ་དཔྲལ་བར་བཀོད་དེ། མིའི་དབང་པོ་གྲགས་པ་ལ་གསོལ་བ་བཏབ་པ། བཅོམ་ལྡན་འདས་ཀྱིས་གང་དུ་མཚམས་མེད་པ་ལྔ་བྱེད་པ་པོ་རྣམས་ཀྱང་སྐྱེ་བ་འདི་ཉིད་ལ་སངས་རྒྱས་ཉིད་འཐོབ་པར་ལུང་བསྟན་ཅིང་། བཅོམ་ལྡན་འདས་རྡོ་རྗེ་འཛིན་པའི་མཆོག་ཏུ་མི་འགྱུར་བའི་བདེ་བས་ཡང་དག་པར་བསྡུས་པའི་ཕྱག་རྒྱ་ཆེན་པོ་ཐོབ་པར་ལུང་སྟོན་པ། རྒྱུད་ཀྱི་རྒྱལ་པོ་དང་པོའི་སངས་རྒྱས་བསྟན་དུ་གསོལ། དེ་བཞིན་གཤེགས་པས་རྒྱལ་པོ་ཟླ་བ་བཟང་པོ་ལ་བསྟན་པའི་དང་པོའི་སངས་རྒྱས་སྟོང་ཕྲག་བཅུ་གཉིས་པ་གང་ཡིན་པ་དེ་ཉིད་གཞུང་ཉུང་ངུས། དང་པོའི་སངས་རྒྱས་རྒྱུད་ཀྱི་རྒྱལ་པོ་བསྡུས་པ་འདི་ཡང་དག་པར་བསྡུ་བ་མཛད་ནས་ཚངས་པའི་དྲང་སྲོང་རྣམས་ལ་སྟོན་པས་བསྟན་དུ་གསོལ། ཞེས་ཞུས་སོ། །དེའི་ཚེ་དུས་ཀྱི་འཁོར་ལོའི་དཀྱིལ་འཁོར་གྱི་ཁང་པའི་ཤར་གྱི་སྒོ་དང་ཉེ་བའི་ནོར་བུ་རིན་པོ་ཆེའི་ཁྱམས་ཆེན་པོར། རིན་པོ་ཆེའི་སེང་གེའི་ཁྲི་ཆེན་པོ་ལ་བཞུགས་པ། ཆོས་ཀྱི་རྒྱལ་པོ་འཇམ་དཔལ་གྲགས་པ་གང་ཞིག །ལྷ་དང་ལྷ་མ་ཡིན་དང་ཀླུའི་སྤྲུལ་པའི་སྐུ་རྒྱལ་པོའི་རིགས་ཆེན་པོ་དགུ་བཅུ་རྩ་དྲུག་ཏུ་སྐྱེས་པ་རིན་པོ་ཆེའི་ཅོད་པན་ཆེན་པོ་བཅིངས་པ་གྲོང་ཁྱེར་བྱ་བ་བྱེ་བའི་བདག་པོ་རྣམས་ཀྱིས་ཞབས་ཀྱི་པདྨ་ལ་ཕྱག་བྱས་པ། དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་སྐུ་ཉིད་ལ་ཞུ་བ་པོ་ཉི་མའི་ཤིང་རྟས་གསོལ་བ་བཏབ་པ་གསན་ནས་ཉི་མའི་ཤིང་རྟ་ལ་གསུངས་པ། ཉི་མའི་ཤིང་རྟ་ཁྱོད་ཚངས་པའི་དྲང་སྲོང་གི་རིགས་ལ་སོགས་པ། སེམས་ཅན་ཐམས་ཅད་ཀྱིས་ཡང་དག་པར་རྫོགས་པའི་སངས་རྒྱས་ཀྱི་ལམ་ཐོབ་པར་བྱ་བའི་སླད་དུ། རྒྱུད་ཀྱི་རྒྱལ་པོ་མཆོག་གི་དང་པོའི་སངས་རྒྱས་དམ་པའི་དངོས་པོ་ཉན་པར་འདོད་ཅིང་ཡང་དག་པར་བརྩོན་པ་གང་ཡིན་པ་དེ་ནི་ལེགས་སོ་ལེགས་སོ། །ཁྱོད་ཀྱི་འདི་ལེགས་པ་དེ་བས་ན་རྒྱུད་ཀྱི་རྒྱལ་
པོ་མཆོག་གི་དང་པོའི་སངས་རྒྱས་དམ་པའི་དངོས་པོ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་སྒྲུབ་པར་བྱེད་པ་དུས་ཀྱི་འཁོར་ལོའི་རྣལ་འབྱོར་གང་ཡིན་པ་ཁྱོད་ཀྱིས་དྲིས་པ་དེ་ཐམས་ཅད་བདག་གིས་བསྟན་པར་བྱའོ། །སྡུད་པར་བྱེད་པ་པོ་རྒྱལ་པོ་གྲགས་པ་བདག་གིས་དེ་བཞིན་གཤེགས་པའི་བྱིན་གྱི་བརླབས་ཀྱི་སྟོབས་ཀྱིས། ཡང་དག་པར་རྫོགས་པའི་སངས་རྒྱས་དང་ཟླ་བ་བཟང་པོ་སྟོན་པ་པོ་དང་གསོལ་བ་འདེབས་པ་པོར་འབྲེལ་བས་རྩ་བའི་རྒྱུད་ཉིད། ཕྲེང་བ་འཛིན་པའི་སྡེབ་སྦྱོར་གྱིས་ཡང་དག་པར་བསྡུས་ཏེ། རྒྱུད་ཀྱི་རྒྱལ་པོ་ཆེན་པོ་ལས་འབྱུང་བ་སྔོན་དུ་ལུང་བསྟན་པའི་དོན་བཞིན་བགྱིད་ན་རྒྱུད་ཀྱི་རྒྱལ་པོ་དམ་པའི་དངོས་པོ་ཤེས་རབ་དང་ཐབས་ཀྱི་བདག་ཉིད་ཀྱི་རྣལ་འབྱོར་འདི་ཉིད་ཁྱོད་ཀྱིས་ཀྱང་རྩེ་གཅིག་པའི་ཡིད་ཀྱིས་ཉོན་ཅིག །ཅེས་གསུངས་ཏེ། སྟོན་པ་པོ་ལ་སོགས་པ་ནས་མཇུག་གི་བར་དུ་ཡང་དག་པར་བསྡུ་བར་མཛད་དོ། །དེར་ཡང་སྒྲ་བཟང་པོ་ལ་ཞེན་པ་དག་གི་ཞེན་པ་དེ་དག་སྤང་བའི་སླད་དུ་དོན་ལ་རྟོན་པ་ཉིད་ལ་བརྟེན་ཏེ། ཚིགས་སུ་བཅད་པ་ཁ་ཅིག་ཏུ་ཟུར་ཆག་གི་སྒྲ་དང་། ཁ་ཅིག་ཏུ་གཅོད་མཚམས་ཉམས་པ། དེ་བཞིན་དུ་རྣམ་དབྱེ་མེད་པ་དང་། དབྱངས་གསལ་བྱེད་ཕྱིས་པ་དང་། རིང་པོ་ལ་ཐུང་ངུར་བྱས་པ། ཐུང་ངུ་ལ་རིང་པོ། ཁ་ཅིག་ཏུ་རྣམ་དབྱེ་ལྔ་པའི་དོན་ལ་བདུན་པ། བཞི་པའི་དོན་ལ་དྲུག་པ། གཞན་གྱི་ཚིག་ཅན་གྱི་བྱིངས་ལ་བདག་གི་ཚིག་ཅན། བདག་གི་ཚིག་ཅན་ལ་གཞན་གྱི་ཚིག་ཅན། གཅིག་ཚིག་ལ་མང་ཚིག མང་ཚིག་ལ་གཅིག་ཚིག ཕོའི་རྟགས་ལ་མ་ནིང་། མ་ནིང་གི་རྟགས་ལ་ཕོ། རྐན་བྱུང་ཤ་སོགས་སོ་དང་སྤྱི་བོ་ལས་བྱུང་བར་བཀླག་པ་དང་། སྤྱི་བྱུང་ལ་སོ་རྐན་ལས་བྱུང་བ་དང་། སོ་བྱུང་ལ་རྐན་དང་སྤྱི་བོ་ལས་བྱུང་བ་དང་། དེ་ལྟ་བུ་གཞན་ཡང་རྒྱུད་སྟོན་པ་པོའི་མན་ངག་གི་རྗེས་སུ་འབྲང་བར་བྱ་
དགོས་ཏེ། དེ་ལྟར་བཅོམ་ལྡན་འདས་ཀྱིས་རྩ་བའི་རྒྱུད་ལས་ཀྱང་། ཟླ་བཟང་སངས་རྒྱས་ཐམས་ཅད་དང་། །བླ་མ་རྣམས་ཀྱི་སློབ་མ་ཡིས། །ཆུང་མ་བུ་མོ་བུ་སྡུག་དང་། །རྟག་ཏུ་འདོད་པའི་དངོས་པོ་འབུལ། །དྲི་ནི་ས་ལས་བྱུང་བ་སྟེ། །ཆུ་ལ་གཟུགས་དང་མེ་ལ་རོ། །རླུང་རེག་འགྱུར་བ་མེད་ལ་སྒྲ། །ནམ་མཁའ་ཆེ་ལ་ཆོས་ཀྱི་དབྱིངས། །དྲི་དང་སྤོས་སོགས་མར་མེ་དང་། །བཟའ་དང་བཏུང་སོགས་གོས་རྣམས་ཀྱིས། །རྟག་ཏུ་ཕྱག་རྒྱ་མཆོད་བྱས་ཏེ། །དམ་པའི་བུ་ཡིས་བླ་མའི་དབུལ། །ཞེས་གསུངས་པ་དེ་ལྟ་བུ་ལ་སོགས་པའི་སྒྲ་ཟུར་ཆག་གཞན་ཡང་རྣལ་འབྱོར་པས་ལུང་བཀླགས་པ་ལས་རྟོགས་པར་བྱའོ། །དེ་བཞིན་དུ་འགྲེལ་བཤད་ལ་ཡང་སྒྲ་བཟང་པོའི་མངོན་པའི་ང་རྒྱལ་ཉམས་པར་བྱ་བའི་སླད་དུ་དོན་ལ་རྟོན་པར་བྱས་ཏེ་དེ་བཞིན་དུ་བཀོད་པ་ཡོད་ལ། རྣམ་པ་གང་གིས་རིགས་དང་རིག་པ་དང་སྒྲ་བཟང་པོའི་མངོན་པའི་ང་རྒྱལ་ཟད་པར་འགྱུར་བའི་རྣམ་པ་དེ་དང་དེས་དོན་ལ་རྟོན་པ་ཉིད་ལ་བརྟེན་ཏེ། ཡུལ་གྱི་སྐད་གཞན་དང་སྒྲའི་བསྟན་བཅོས་ཀྱི་སྐད་གཞན་གྱིས་ཐར་པའི་དོན་དུ་སངས་རྒྱས་དང་བྱང་ཆུབ་རྣམས་ཀྱིས་ཆོས་སྟོན་པ་ཡིན་ནོ། །ཞེས་འགྲེལ་ཆེན་ལས་གསུངས་པའང་ཤེས་པར་བྱའོ། །དེ་ལྟར་ལོ་རྒྱུས་ཀྱི་རིམ་པས་གོ་ཕྱེས་ནས། གང་བཤད་པར་བྱ་བའི་རྒྱུད་ནི། མཆོག་གི་དང་པོའི་སངས་རྒྱས་རིགས་མེད་པ་རྒྱུད་ཀྱི་རྒྱལ་པོ་དུས་ཀྱི་འཁོར་ལོ། རྡོ་རྗེ་འཛིན་པའི་ཡེ་ཤེས་ཀྱི་སྐུ་མངོན་དུ་གྱུར་པས་མཚན་ཡང་དག་པར་བརྗོད་པས་འཁྱུད་པ། རྒྱུད་ཐམས་ཅད་ཀྱི་རྡོ་རྗེའི་ཚིག་མངོན་དུ་གྱུར་བས་སངས་རྒྱས་རིན་ཆེན་ཟ་མ་ཏོག་ཁ་འབྱེད་པ། འཇིག་རྟེན་དང་འཇིག་རྟེན་ལས་འདས་པའི་བདེན་པ་ལ་བརྟེན་པ། རྫོགས་པའི་བྱང་ཆུབ་རྣམ་པ་བཞི་དང་། རྡོ་རྗེ་བཞིས་ཡོངས་སུ་དག་པ། སྐུ་བཞི་དང་རིགས་དག་དང་བདེན་པ་བཅུ་གཉིས་དང་དེ་ཁོ་
ན་ཉིད་བཅུ་དྲུག་དང་སྟོང་པ་ཉིད་བཅུ་དྲུག་དང་སྙིང་རྗེ་བཅུ་དྲུག་གི་བདག་ཉིད་ཀྱི་བརྗོད་པར་བྱ་བ་དང་རྗོད་པར་བྱེད་པ། དབང་བསྐུར་བ་འཇིག་རྟེན་པའི་བཅུ་དང་འཇིག་རྟེན་ལས་འདས་པའི་བཅུ་གཅིག་པ་རབ་ཏུ་གསལ་བར་བྱེད་པ། ལས་ཀྱི་ཕྱག་རྒྱ་དང་ཡེ་ཤེས་ཀྱི་ཕྱག་རྒྱ་དང་ཕྱག་རྒྱ་ཆེན་མོ་དང་། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རབ་ཏུ་གསལ་བར་བྱེད་པ། འཇིག་རྟེན་གྱི་ཁམས་དང་། ནང་དང་། མངོན་པར་དབང་བསྐུར་བ་དང་། སྒྲུབ་ཐབས་དང་། མཆོག་ཏུ་མི་འགྱུར་བའི་ཡེ་ཤེས་ཏེ་ལེའུ་ལྔའི་བདག་ཉིད་དམ་བརྟག་པ་ལྔའི་བདག་ཉིད་ཅན་ནོ། །དེ་ཡང་ཉན་ཐོས་པ་འདོད་ཡོན་ལྔ་ལ་ཉེ་བར་ལོངས་སྤྱོད་པ་དང་བྲལ་བའི་ཁྲིམས་ཀྱི་སྡོམ་པ་ལ་ངེས་པར་གནས་པའི་བསམ་པ་དེ་ལྟ་བུ་བྲལ་ཏེ། འདོད་པ་ལྔ་ལ་ལོངས་སྤྱོད་པ་དང་། དབང་པོ་གཉིས་སྦྱོར་གྱི་བདེ་བ་ཆེན་པོ་འདོད་པའི་བསམ་པ་ཅན་སྔགས་ལམ་གྱི་གདུལ་བྱ་རྣམས་ལ་མིའི་སྐྱེ་བ་འདི་ཉིད་ཀྱིས་སངས་རྒྱས་རྡོ་རྗེ་འཆང་གི་འབྲས་བུ་འགྲུབ་པའི་ལམ་དེ་ལྟ་བུ་ནི་རྒྱུད་ཀྱི་རྒྱལ་པོ་འདི་ཉིད་དུ་བསྟན་པ་ཡིན་ནོ། །དེ་དག་གི་དོན་བསྡུས་ན། བརྗོད་པར་བྱ་བ་ནི། དང་པོའི་སངས་རྒྱས་དུས་ཀྱི་འཁོར་ལོའོ། །དེ་རྗོད་པར་བྱེད་པ་ནི་དབྱངས་གསལ་གྱི་ཡི་གེ་འདུས་པའི་མིང་ཚིག་ངག་གི་རང་བཞིན་ཅན་ནོ། །དེ་དག་བརྗོད་བྱ་དང་རྗོད་བྱེད་དུ་འབྲེལ་ཞིང་། རྗོད་བྱེད་ལ་བརྟེན་ནས་བརྗོད་བྱའི་རྒྱུད་ཀྱི་དོན་རྟོགས་པ་ལས་འཇིག་རྟེན་པའི་དངོས་གྲུབ་འགྲུབ་པ་གནས་སྐབས་ཀྱི་དགོས་པ་དང་། ཕྱག་རྒྱ་ཆེན་པོ་འཇིག་རྟེན་ལས་འདས་པའི་དངོས་གྲུབ་འགྲུབ་པ་ནི་ཉིང་དགོས་སམ་དགོས་པའི་ཡང་དགོས་པའོ། །དེ་ཡང་རྒྱུད་ཀྱི་བརྗོད་བྱའི་དོན་གཙོ་བོར་བསྡུས་ན། དམ་པ་དང་པོའི་སངས་རྒྱས་རིགས་མེད་པ་ཞེས་བྱ་བ་ནི་ཐབས་ཤེས་གཉིས་སུ་མེད་པ་རྡོ་རྗེ་སེམས་དཔའ་མ་ནིང་གི་རང་བཞིན་སྟོན་པས་གང་ལ་ཐབས་ཤེས་
སུ་འབྱེད་པའི་ཕྱོགས་སམ་རིགས་མེད་པའོ། །དེ་ཉིད་རྡོ་རྗེ་འཛིན་པའི་ཡེ་ཤེས་ཀྱི་སྐུ་ཐོག་མ་དང་ཐ་མ་མེད་པར་དུས་གསུམ་མཉམ་པ་ཉིད་ཀྱི་ཆོས་ཉིད་སྒྲིབ་བྲལ་ལོ། །དེ་ལྟ་བུ་ཉིད་བརྗོད་བྱར་བྱས་ནས་དོན་དམ་པའི་མཚན་ཡང་དག་པར་བརྗོད་པ་རྣམ་པ་ཐམས་ཅད་པའི་རྣམ་གྲངས་ཀྱིས་བརྗོད་པར་གྱུར་པའི་ཕྱིར་མཚན་ཡང་དག་པར་བརྗོད་པར་འཁྱུད་པའོ། །དེས་ན་སངས་རྒྱས་ཐམས་ཅད་ཀྱིས་དེ་ཁོ་ན་ཉིད་ཀྱི་ཡེ་ཤེས་འདི་ཐོག་མ་མེད་པའི་དུས་ནས་གསུངས་ཤིང་། ཐ་མ་མེད་པའི་དུས་སུ་ཡང་གསུངས་པར་མཛད་དེ། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ཞེས་སོགས་གསུངས་པ་ལྟར་སངས་རྒྱས་ཐམས་ཅད་ཀྱིས་འདི་ཉིད་མི་སྟོན་པ་མེད་དེ་ཐམས་ཅད་མཁྱེན་པ་ཡིན་པའི་ཕྱིར་རོ། །གསང་སྔགས་ནི་སངས་རྒྱས་རྣམས་ཀྱིས་དུས་ཐམས་ཅད་དུ་གསུངས་པ་མིན་པར་བསྟན་པ་ནི་སྣོད་དུ་མ་གྱུར་པའི་ཡུལ་དུས་ཉི་ཚེ་བ་ལ་དགོངས་ཀྱི་སྤྱིར་ཡུལ་དུས་གཞན་དུ་གསང་སྔགས་མི་གསུང་བའི་སངས་རྒྱས་མེད་དོ་ཞེས་འགྲེལ་བར་གསུངས་སོ། །རྒྱུད་གཞན་ལས་བཞི་པ་དེ་ཡང་དེ་བཞིན་ནོ་ཞེས་པ་ཙམ་ལས་བཞི་པའི་ཡེ་ཤེས་གསལ་པོར་མ་བསྟན་ཏེ་སྦས་པར་མཛད་ལ། དེའི་ཕྱིར་དེའི་དོན་འཆད་པ་ཕལ་གྱིས་དབང་པོ་གཉིས་ལས་སྐྱེས་པའི་འཕོ་བའི་བདེ་བ་བཞི་པའི་དོན་དུ་འཛིན་པའི་མུན་སྤྲུལ་རྟོག་གེ་བ་མང་ཞིག་བྱུང་བ་དང་འབྱུང་བར་ཡང་ལུང་བསྟན་ཏོ། །དེ་ཡང་འཕོ་བ་དེ་མི་རྟག་པ་བཞི་པ་མ་ཡིན་ཏེ། བཞི་པ་ནི་འཕོ་བ་མེད་པའམ་རྟག་པ་འགྱུར་མེད་ལྷན་ཅིག་སྐྱེས་པའི་བདེ་བ་ཆེན་པོ་ཡིན་ལ། དེ་ནི་དུ་བ་ལ་སོགས་པ་མཐོང་བ་རྫོགས་པའི་རིམ་པ་མངོན་སུམ་ལམ་གྱིས་སྟོང་གཟུགས་ཕྱག་རྒྱ་ཆེན་མོ་དང་མཉམ་པར་སྦྱོར་བའི་གཉིས་སུ་མེད་པའི་ཡེ་ཤེས་རྣལ་འབྱོར་བས་སོ་སོར་རང་གིས་རིག་པར་བྱ་བ་ཉིད་རྒྱུད་འདིར་མ་སྦས་པར་མངོན་དུ་བསྟན་པའི་ཕྱིར་ན། རྡོ་རྗེ་པདྨའི་ཟ་མ་ཏོག་ཁ་འབྱེད་ཅིང་
འགྱུར་མེད་ཀྱི་བདེ་བ་སངས་རྒྱས་རིན་པོ་ཆེ་མངོན་དུ་སྟོན་པའོ། །བསྐྱེད་པའི་རིམ་པ་རྣམ་པར་རྟོག་པས་དཀྱིལ་འཁོར་གྱི་འཁོར་ལོ་དབྱིབས་དང་མཚན་མའི་རྣམ་པ་ཅན་བསྒོམ་པས་འོག་མིན་པའི་བར་གྱི་འཇིག་རྟེན་པའི་དངོས་གྲུབ་འགྲུབ་པ་འཇིག་རྟེན་པའི་བདེན་པ་དང་། རྣམ་པར་རྟོག་པས་མ་བརྟག་པར་དུ་བ་སོགས་ཀྱི་མཚན་མ་གཞོན་ནུ་མ་ལ་པྲ་ཕབ་པ་ལྟར་མངོན་སུམ་མཐོང་བ་རྣམ་ཀུན་མཆོག་ལྡན་གྱི་སྟོང་ཉིད་ལམ་དུ་གྱུར་པ་རྣམ་པར་མི་རྟོག་པ་རྫོགས་པའི་རིམ་པས་ཕྱག་རྒྱ་ཆེན་པོའི་དངོས་གྲུབ་བསྒྲུབ་པ་ནི་འཇིག་རྟེན་ལས་འདས་པ་སྟེ་དེ་ལྟར་བདེན་པ་གཉིས་པོ་རྒྱུད་འདིར་སྟོན་པས་ན། བདེན་པ་དེ་གཉིས་ལ་བརྟེན་པ་ཞེས་གསུངས་སོ། །རྫོགས་པའི་བྱང་ཆུབ་རྣམ་པ་བཞི་ནི། །སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ། དེ་བཞིན་དུ་རྣམ་པ་ལྔ་དང་། རྣམ་པ་ཉི་ཤུ་དང་། སྒྱུ་འཕྲུལ་དྲ་བས་མངོན་པར་བྱང་ཆུབ་པ་བཞི་ནི། བསྐྱེད་པ་དང་རྫོགས་པའི་བདེན་པ་གཉིས་ཀར་ཡང་སྦྱར་ཏེ་གཞུང་དུ་སྟོན་པར་འགྱུར་རོ། །རྡོ་རྗེ་བཞི་ནི་སྐུ་གསུང་ཐུགས་ཡེ་ཤེས་རྡོ་རྗེ་བཞིའོ། །སྐུ་བཞི་ནི་དག་པའི་སྐུ་དང་། ཆོས་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུ་བཞི་སྟེ། དེ་དག་ཀྱང་མངལ་སྐྱེས་རྣམས་ཀྱི་སྙོམས་འཇུག་གི་གནས་སྐབས་བཞི་པ་དང་། ཤིན་ཏུ་གཉིད་ལོག་པ་དང་། རྨི་ལམ་དང་། སད་པའི་གནས་སྐབས་ཀྱི་མཚན་ཉིད་ཅན་ཏེ། དེ་རྣམས་སྒྲིབ་པ་དང་བྲལ་བ་སངས་རྒྱས་རྣམས་ཀྱི་སྐུ་བཞིའོ། །རིགས་དྲུག་ནི་མི་འགྱུར་བའི་བདེ་བ་ཡེ་ཤེས་ཀྱི་ཁམས་དང་། རྣམ་པར་ཤེས་པ་ནམ་མཁའི་ཁམས་དང་། འདུ་བྱེད་རླུང་གི་ཁམས་དང་། ཚོར་བ་མེའི་ཁམས་དང་། འདུ་ཤེས་ཆུའི་ཁམས་དང་། གཟུགས་སའི་ཁམས་ཏེ་མངལ་སྐྱེས་རྣམས་ཀྱི་རིགས་དྲུག་པོ་དེ་སྒྲིབ་པ་དང་བཅས་པ་ཡིན་ལ། སངས་རྒྱས་རྣམས་
ཀྱི་སྒྲིབ་པ་བྲལ་བས་གྲི་གུག་གི་རིགས་རྡོ་རྗེ་སེམས་དཔའ་དང་། རྡོ་རྗེའི་རིགས་མི་བསྐྱོད་པ་ལ་སོགས་པ་རིགས་དྲུག་གོ། བདེན་པ་བཅུ་གཉིས་ནི་མ་རིག་པ་ལ་སོགས་རྟེན་འབྲེལ་ཡན་ལག་བཅུ་གཉིས་ཏེ་དེ་དག་སྒྲིབ་པ་དང་བཅས་པ་ཡིན་ལ། སངས་རྒྱས་རྣམས་ཀྱི་སྒྲིབ་པ་དང་བྲལ་བ་སྟེ། དེ་ཡང་ནང་དུ་འཕོ་བ་བཅུ་གཉིས་ཀྱི་དབྱེ་བས་སྲོག་གི་རླུང་རྒྱུ་བའི་ཕྱིར་མངལ་སྐྱེས་རྣམས་ཀྱི་སྒྲིབ་པ་དང་བཅས་པའོ། །ཡན་ལག་བཅུ་གཉིས་པོ་དེ་འགགས་པའི་ཕྱིར་སངས་རྒྱས་རྣམས་ཀྱི་སྒྲིབ་པ་དང་བྲལ་བ་སྟེ། དེའི་ཕྱིར་བདེན་དོན་ཡན་ལག་བཅུ་གཉིས་སོ། །དེ་ཁོ་ན་ཉིད་བཅུ་དྲུག་ནི། སྤྲུལ་པའི་སྐུ་དང་གསུང་དང་ཐུགས་དང་ཡེ་ཤེས་བཞི་དང་། དེ་བཞིན་དུ་ལོངས་སྤྱོད་རྫོགས་པ་དང་། ཆོས་ཀྱི་དང་། ལྷན་ཅིག་སྐྱེས་པའི་སྐུ་སོགས་བཞི་སྟེ་དགའ་བ་དང་མཆོག་དགའ་དང་ཁྱད་པར་གྱི་དགའ་བ་དང་། ལྷན་ཅིག་སྐྱེས་པའི་དགའ་བ་བཞི་ལས་ཕྱེ་བའི་བཅུ་དྲུག་པོ་མངལ་སྐྱེས་རྣམས་ཀྱི་སྒྲིབ་པ་དང་བཅས་པ་ཡིན་ཏེ་བཅུ་དྲུག་ཕྱེད་ཕྱེད་ཀྱི་ཐིག་ལེ་འདོར་ཞིང་འཕོ་བའི་ཕྱིར་རོ། །སངས་རྒྱས་རྣམས་ཀྱི་སྒྲིབ་པ་དང་བྲལ་བ་སྟེ། བཅུ་དྲུག་ཕྱེད་ཕྱེད་ཐིག་ལེ་འཛིན་ཅིང་མི་འཕོ་བའི་ཕྱིར་རོ། །སྟོང་པ་ཉིད་བཅུ་དྲུག་ནི་ནག་པོའི་ཕྱོགས་དང་ཉི་མ་དང་ཤེས་རབ་ཀྱི་ཆའོ། །སྙིང་རྗེ་བཅུ་དྲུག་ནི་དཀར་པོའི་ཕྱོགས་དང་ཟླ་བ་དང་ཐབས་ཀྱི་ཆའམ་ཕྱོགས་སོ། །དེ་ཡང་སྟོང་ཉིད་ལ་དབྱེ་བ་གསུམ་སྟེ། སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དོ། །དེ་ལ་དང་པོ་ནི། ཕུང་པོ་ལྔ་སྟོང་པ་ཉིད་དེ་ནག་པོའི་ཚེས་གཅིག་ནས་ལྔའི་བར་རོ། །ཆེན་པོ་སྟོང་པ་ཉིད་ནི་ཁམས་ལྔ་སྟོང་པ་ཉིད་དེ་དྲུག་ནས་བཅུའི་བར་རོ། །དོན་དམ་པ་སྟོང་པ་ཉིད་ནི་དབང་པོ་ལྔ་སྟོང་པ་ཉིད་དེ་བཅུ་གཅིག་ནས་བཅོ་ལྔ་པ་གནམ་སྟོང་གི་མཐར་ཐུག་པ་སྟེ། གནམ་སྟོང་གི་མཐའ་རྫོགས་པ་དང་དཀར་པོའི་ཚེས་གཅིག་འཇུག་པའི་བར་ནི་བཅུ་དྲུག་པ་རྣམ་པ་ཐམས་ཅད་
སྟོང་པ་ཉིད་དོ། །དེ་བཞིན་དུ་སྙིང་རྗེ་རྣམ་པ་གསུམ་སྟེ། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པའོ། །དེ་ལ་དང་པོ་ནི་དཀར་པོའི་ཚེས་གཅིག་ལ་སོགས་པ་ལྔའོ། །ཆོས་ལ་དམིགས་པ་ནི་དྲུག་པ་ལ་སོགས་པ་ལྔའོ། །དམིགས་པ་མེད་པ་ནི་བཅུ་གཅིག་ལ་སོགས་པ་ལྔ་སྟེ་བཅོ་ལྔས་ཟླ་བ་ཉ་བའི་མཐར་ཐུག་པའོ། །ཉའི་མཐའ་དང་ནག་པོའི་ཚེས་གཅིག་འཇུག་པའི་དང་པོའི་དབུས་སུ་སྙིང་རྗེ་བཅུ་དྲུག་པའོ། །འདི་དག་གཅིག་ཏུ་སྦྱོར་བ་ནི་སྟོང་ཉིད་བཅུ་དྲུག་དང་སྙིང་རྗེ་བཅུ་དྲུག་གི་བདག་ཉིད་དེ། དེ་ལྟ་བུའི་བརྗོད་པར་བྱ་བ་རྒྱུད་འདི་ཉིད་ཀྱིས་རྗོད་པར་བྱེད་པའོ། །འཇིག་རྟེན་པའི་དབང་བཅུ་ནི། ཆུ་དང་ཅོད་པན་དང་དར་དཔྱངས་དང་རྡོ་རྗེ་དྲིལ་བུ་དང་། །བརྟུལ་ཞུགས་ཆེན་པོ་དང་། མིང་དང་རྗེས་སུ་གནང་བ་དང་། བུམ་པ་དང་། གསང་བ་དང་། ཤེས་རབ་ཡེ་ཤེས་ཏེ་མངལ་ནས་སྐྱེས་པ་རྣམས་ཀྱི་འཇིག་རྟེན་ཀུན་རྫོབ་ཀྱི་དབང་བཅུ་ནི། ལུས་དང་ངག་དང་སེམས་དང་ཡེ་ཤེས་དང་ཁམས་དང་ཕུང་པོ་དང་སྐྱེ་མཆེད་དང་ལས་ཀྱི་དབང་པོ་ལ་སོགས་པ་ཡོངས་སུ་དག་པར་བྱ་བའི་ཕྱིར་རོ། །འཇིག་རྟེན་ལས་འདས་པ་བཅུ་གཅིག་པ་ནི་བཞི་པ་དེ་ཡང་དེ་བཞིན་ནོ། །ཞེས་པའི་ངེས་པས་མཆོག་ཏུ་མི་འགྱུར་བའི་ཡེ་ཤེས་ཀྱི་མཚན་ཉིད་བླ་མའི་ཞལ་ལ་གནས་པ། ལུས་དང་ངག་ལ་སོགས་པ་སྒྲིབ་པ་མེད་པ་ཉིད་ཀྱིས་སྦྱོང་བར་བྱེད་པའོ། །ལས་ཀྱི་ཕྱག་རྒྱ་ནི་ནུ་མ་དང་སྐྲར་ལྡན་པའོ། །ཡེ་ཤེས་ཀྱི་ཕྱག་རྒྱ་ནི་རང་གི་སེམས་ཀྱིས་ཡོངས་སུ་བརྟག་པའོ། །ཕྱག་རྒྱ་ཆེན་མོ་ནི་རྣམ་པར་རྟོག་པ་དང་བྲལ་བ་པྲ་ཕབ་པའི་རང་བཞིན་ཅན་ནོ། །བདེ་བའི་རྟེན་དུ་གྱུར་པ་ཕྱག་རྒྱ་གསུམ་པོའི་དངོས་གྲུབ་ནི་གསུམ་སྟེ། འདོད་པ་ན་སྤྱོད་པ་ནི་ལས་ཀྱི་ཕྱག་རྒྱའི་དངོས་གྲུབ་བོ། །གཟུགས་ཀྱི་སྲིད་པའི་དངོས་པོའི་མཚན་ཉིད་ནི་ཡེ་ཤེས་ཀྱི་ཕྱག་རྒྱའི་དངོས་གྲུབ་བོ། །དངོས་པོ་དང་དངོས་པོ་མེད་པ་
དང་བྲལ་བ་རྣམ་པ་ཀུན་གྱི་མཆོག་དང་ལྡན་པ་ནི་ཕྱག་རྒྱ་ཆེན་པོའི་དངོས་གྲུབ་བོ། །དེ་ལྟར་བསྟན་པ་འདིས་རྒྱུད་ཀྱི་བརྗོད་བྱ་རྟོགས་པར་འགྱུར་ལ། འཇིག་རྟེན་གྱི་ལེའུ་སོགས་བརྟག་པ་རྣམ་པ་ལྔའི་ཚུལ་གྱིས་རྒྱུན་ཆགས་པའི་རྒྱུད་འདིས་གོང་ལྟར་བརྗོད་བྱ་དེ་དག་མ་སྦས་པར་ཡང་དག་པར་བསྟན་པའི་སྒོ་ནས་གནས་སྐབས་འཇིག་རྟེན་པའི་དངོས་གྲུབ་དང་། མཐར་ཐུག་འཇིག་རྟེན་ལས་འདས་པ་རྫོགས་པའི་སངས་རྒྱས་ཀྱི་གོ་འཕང་མི་ལ་སོགས་པའི་སེམས་ཅན་མཐའ་དག་གིས་བདེ་ཞིང་མྱུར་བར་ཐོབ་པའི་ཆེད་དུ་རྒྱུད་འདི་ཉིད་བསྟན་པ་ཡིན་ནོ། །དེ་ལྟར་ཡང་མཚན་ཡང་དག་པར་བརྗོད་པ་ལས། དང་པོའི་སངས་རྒྱས་རིས་མེད་པ། །ཞེས་དང་། ཡེ་ཤེས་སྐུ་རྣམས་མ་ལུས་འཆང་། །ཞེས་དང་། རྒྱུད་ཀུན་གྱི་ནི་བདག་པོ་མཆོག །ཅེས་དང་། བདེན་པ་གཉིས་ཀྱི་ཚུལ་ལ་གནས། །ཞེས་དང་། སྐད་ཅིག་གཅིག་གིས་རྫོགས་སངས་རྒྱས། །ཞེས་དང་། ཁྱབ་བདག་ཡེ་ཤེས་ལྔ་ཡི་བདག །ཅེས་དང་། བདེན་དོན་རྣམ་པ་བཅུ་གཉིས་ལྡན། །དེ་ཉིད་རྣམ་པ་བཅུ་དྲུག་རིག །རྣམ་པ་ཉི་ཤུས་བྱང་ཆུབ་པ། །རྣམ་པར་སངས་རྒྱས་ཀུན་རིག་མཆོག །སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །ཞེས་དང་། མཆོག་གི་དང་པོ་སྐུ་གསུམ་འཆང་། །ཞེས་པ་ལ་སོགས་པས་བསྟན་ཏེ། དེའི་ཕྱིར་ན་རྣམ་པར་དག་པའི་རིམ་པ་ཕྱག་རྒྱ་ཆེན་པོའི་དངོས་གྲུབ་སྒྲུབ་པར་བྱེད་པའི་ལམ་ནི་མཆོག་གི་དང་པོའི་སངས་རྒྱས་ཀྱི་རྒྱུད་དུ་མ་སྦས་པར་གསལ་བར་མཛད་པའི་ཕྱིར། འདི་ཤེས་ན་སྔགས་ཀྱི་ཐེག་པའི་ཚུལ་ཐམས་ཅད་ཀྱི་ངེས་པའི་དོན་བསྟན་པ་མཚན་ཡང་དག་པར་བརྗོད་པ་ཡང་ཤེས་པར་འགྱུར་རོ། །དེའི་ཕྱིར་འགྲེལ་ཆེན་ལས། གང་གིས་མཆོག་གི་དང་པོའི་སངས་རྒྱས་མི་ཤེས་པ་དེས་མཚན་ཡང་དག་པར་བརྗོད་པ་མི་ཤེས་སོ། །གང་གིས་མཚན་ཡང་དག་པར་བརྗོད་པ་མི་
ཤེས་པ་དེས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་སོ། །གང་གིས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་པ་དེས་སྔགས་ཀྱི་ཐེག་པ་མི་ཤེས་སོ། །གང་གིས་སྔགས་ཀྱི་ཐེག་པ་མི་ཤེས་པ་དེ་དག་ཐམས་ཅད་ནི་འཁོར་བ་པ་སྟེ་བཅོམ་ལྡན་འདས་རྡོ་རྗེ་འཛིན་པའི་ལམ་དང་བྲལ་བའོ། །དེ་བས་ན་མཆོག་གི་དང་པོའི་སངས་རྒྱས་ནི་བླ་མ་དམ་པ་རྣམས་ཀྱིས་བསྟན་པར་བྱ་ཞིང་། ཐར་པ་དོན་དུ་གཉེར་བའི་སློབ་མ་དམ་པ་རྣམས་ཀྱིས་མཉན་པར་བྱའོ། །ཞེས་གསུངས་སོ། །ད་ནི་དེ་ལྟ་བུའི་རྒྱུད་དེའི་དགོངས་པ་ཡང་དག་པར་ཇི་ལྟར་འགྲེལ་བར་བྱེད་ཅེ་ན། སྤྱིར་རྡོ་རྗེ་ཐེག་པའི་རྒྱུད་སྡེ་རྣམས་ནི་དོན་ཤིན་ཏུ་ཟབ་ཅིང་བརླིང་ལ། མཐའ་དྲུག་དང་ཚུལ་བཞིས་རྒྱས་བཏབ་པའི་ཕྱིར། དེ་དག་གི་དགོངས་དོན་ཚུལ་བཞིན་རྟོགས་པའི་དེ་ཁོ་ན་ཉིད་ཀྱི་ཡེ་ཤེས་དང་ལྡན་པ། མངོན་པར་ཤེས་པའི་མཐུ་མངའ་བ། དེ་བཞིན་གཤེགས་པས་རྒྱུད་དོན་འགྲེལ་པར་བྱེད་པར་ལུང་བསྟན་པ་བྱང་ཆུབ་སེམས་དཔའ་ཆེན་པོ་རྣམས་དང་། དཀྱིལ་འཁོར་གྱི་བདག་པོ་རྣམས་ལས་གདམས་ངག་གི་ལུང་དངོས་སུ་ནོད་པའི་གྲུབ་ཆེན་རིག་པ་འཛིན་པ་རྣམས་ལྟ་བུ་ལས། མང་ཐོས་གང་ཞིག་རྟོག་གེ་ལ་སོགས་པའི་བསྟན་བཅོས་ལ་ཆེར་བྱང་དུ་ཟིན་ཀྱང་དེ་དག་གིས་རང་དབང་དུ་འགྲེལ་བཤད་བྱེད་པའི་ཡུལ་མ་ཡིན་ཏེ། འགྲེལ་ཆེན་དྲི་མ་མེད་པའི་འོད་ལས། མངོན་ཤེས་མེད་གང་དཔལ་ལྡན་རྡོ་རྗེ་ཐེག་པ་ལ་གནས་བསྟན་བཅོས་དུ་མ་ཡི། །རྣམ་རྟོག་ཆོས་ཀྱི་སྙིང་དང་མཁས་པ་ཉིད་ཀྱི་དྲེགས་ལྡན་འགྲེལ་བཤད་ཆེན་པོ་དག །བྱེད་པ་དེ་ནི་གླང་ཆེན་ལོང་བ་མྱོས་བཞིན་དགྲ་ཡི་རྒྱུད་ནི་རྒྱལ་བའི་སླད། །གང་གནས་དེ་ཡི་རང་གི་རྒྱུད་ནི་ཉམས་བྱེད་འདི་ནི་རྟག་ཏུ་བདུད་ཀྱི་གཉེན། །ཞེས་གསུངས་པ་ལྟར་སྐབས་འདིར་མངོན་ཤེས་ཡོད་མེད་གསུངས་པའི་དོན་ཀྱང་སྤྱི་ཟག་བཅས་
མངོན་ཤེས་ལྔ་ལྡན་རྣམས་ལྟ་ཅི་སྨོས་ཏེ་འཕགས་པ་དགྲ་བཅོམ་པ་མངོན་ཤེས་དྲུག་ལྡན་རྣམས་ཀྱི་ཡང་རྡོ་རྗེ་ཐེག་པའི་དགོངས་དོན་རང་སྟོབས་ཀྱིས་འབྱེད་མི་ནུས་པས་སྐབས་འདིའི་མངོན་ཤེས་ནི་དབང་བཞི་པའི་ལམ་གྱི་ཡེ་ཤེས་ཁྱད་པར་ཅན་གྱིས་སྒོ་ནས་རྡོ་རྗེ་ཐེག་པའི་དགོངས་དོན་མ་ནོར་བ་འབྱེད་ནུས་པའི་མངོན་ཤེས་ལ་གོ་དགོས་སོ། །དེ་ལྟར་གཞན་གང་རུང་རུང་གི་སྤྱོད་ཡུལ་མ་ཡིན་པའི་ཕྱིར། །རྒྱུད་ཆེན་པོ་འདི་ཡི་དོན་འཆད་པ་ལ། རིགས་ལྡན་པདྨ་དཀར་པོ་ཉིད་ཀྱིས་འདི་སྐད་དུ། །གང་ཞིག་སྟོན་པ་ཉིད་ཀྱིས་ལུང་བསྟན་རྒྱལ་བདག་བདེ་སྟེར་རྡོ་རྗེ་ཐེག་པར་མཐའ་དག་ནི། །འགྲེལ་བཤད་དག་དང་བསྡུ་བ་མཛད་པ་རྡོ་རྗེ་མཆོག་འཛིན་བདག་འདྲའི་བྱང་ཆུབ་སེམས་དཔའ་སྟེ། །དེ་དག་འདིར་ནི་ལྷ་དང་ལག་འགྲོ་མི་རྣམས་སྨིན་པའི་དོན་དུ་སངས་རྒྱས་མཐུར་སྨྲ་ལ། །གང་དག་མངོན་ཤེས་ལྔ་མེད་དེ་དག་བདག་ཅག་རྒྱལ་དབང་ཡིན་ཞེས་བདེན་པ་མིན་པ་སྨྲ། ཞེས་གསུངས་ལྟར། འགྲེལ་ཆེན་དྲི་མེད་འོད་ཉིད་ཚད་མར་བྱེད་དགོས་པ་གཞིར་བཅས་ཀྱང་། དེ་དེ་ཡང་ཡེ་ཤེས་ཀྱི་སྤྱོད་ཡུལ་ཟབ་མོ་རྣམས་ལ་ངེས་པ་ཇི་བཞིན་མ་རྙེད་པ་དག་གིས། རང་གི་ཡིད་ལ་འཐད་པའི་ལྟ་བའི་ཞེན་ཕྱོགས་སུ་རྒྱུད་དོན་ཟབ་མོ་རྣམས་རྣམ་རྟོག་དང་རྣམ་ཤེས་ཀྱི་སྤྱོད་ཡུལ་དག་ཏུ་གཙོ་བོར་སྟོན་པ་ཡང་སྲིད་དེ། འགྲེལ་ཆེན་ལས། མ་འོངས་དུས་ན་རྟོག་གེ་ལ་སོགས་བསྟན་བཅོས་ལ་གཏད་སྣ་ཚོགས་བློས། །སངས་རྒྱས་པ་ཡང་གཞན་གྱི་རྟོག་གེ་དང་འཕྲད་དབང་གིས་ལོག་པར་འབྱུང་འགྱུར་ཏེ། །རྟོག་གེ་ལ་གཏད་དེ་ཡིས་འདོད་པའི་ཡུལ་ལ་ལམ་ནི་སྟོན་པར་བྱེད་པ་གང་། །དེ་ཉིད་ཀྱིས་ནི་བློ་ངན་སྐྱོན་ནི་འཇོམས་བྱེད་འགྲེལ་བཤད་བདག་གིས་བྲི་བར་བྱ། །ཞེས་གསུངས་ཏེ་རྒྱུད་ཀྱི་རྡོ་རྗེའི་ཚིག་གི་སྲོག་ལྟ་བུ་འཇིག་རྟེན་ལས་འདས་པ་དབང་བཞི་པ་དོན་གྱི་ཡེ་ཤེས་དེ་ཉིད་རྒྱུད་འདི་ལས་འཕོ་མེད་ཀྱི་བདེ་བ་དང་འདུས་བྱས་དང་འདུས་མ་བྱས་ཀྱི་
མཐའ་ལ་མི་གནས་པ་དང་། ཐབས་ཤེས་དབྱེར་མེད་པས་གཉིས་སུ་མེད་པའི་ཡེ་ཤེས། རིགས་མེད་པའམ་རིས་མེད་པ་དང་། འཇིག་རྟེན་པའི་འདོད་ཡོན་འཕོ་བའི་བདེ་བ་ལས་འདས་པ་དང་། དེ་ཉིད་རྣམ་པར་ཤེས་པའི་ཆོས་ལས་འདས་ཤིང་། ཡེ་ཤེས་གཉིས་མེད། རྣམ་པར་རྟོག་མེད་དུ་ལྷུན་གྱིས་གྲུབ་པ་ཉིད་དུ་བསྟན་ཅིང་། དེའི་དོན་འགྲེལ་པའི་ཐོག་མཐའ་བར་གསུམ་དང་། མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་རྒྱ་ཆེར་གསུངས་པ་ལྟར་དེ་དག་གི་དོན་ལས་མ་འདས་པར་འཆད་དགོས་ཏེ། གཞན་དུ་ན་རྒྱུད་བླ་མ་ལས། གང་ཞིག་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་པ། །ཞེས་སོགས་ཚིགས་སུ་བཅད་པའི་དོན་བཞིན་དུ་འགྱུར་བ་དང་། རྒྱུད་འདིའི་གཞུང་དགོངས་འགྲེལ་དང་བཅས་པའི་ཕྱོགས་རྣམས་ནས་མ་འོངས་པ་ན་གདུག་པའི་སློབ་དཔོན་དབང་བཞི་པའི་ཡེ་ཤེས་འཕོ་བའི་བདེ་བ་ལ་འཆད་པ་མང་དུ་འབྱུང་བར་ལུང་བསྟན་པའི་ཁོངས་སུ་གཏོགས་པར་འགྱུར་རོ། །རྒྱུད་འདིས་བསྟན་བྱའི་གཙོ་བོ་རྒྱུད་གཞན་ལས་སྦས་པ་གང་ཞིག་རྒྱུད་འདིར་གསལ་བར་མཛད་པ་ནི་བཞི་པའི་ཡེ་ཤེས་འཕོ་མེད་ཕྱག་རྒྱ་ཆེན་པོ་ཡེ་ཤེས་ཀྱི་སྐུ་དེ་ཡིན་ཕྱིར་དེའི་གནད་མ་འཆུག་པ་ཤིན་ཏུ་གལ་ཆེ་ལ། གཞན་ཡང་རྒྱུད་དང་འགྲེལ་པ་ལས་གསུངས་པའི་དགོངས་དོན་ཆེ་ཕྲ་མཐའ་དག་རང་བློས་མ་བསླད་པར་ཅི་ནུས་སུ་བླ་མ་བརྒྱུད་པའི་མན་ངག་ལ་བརྟེན་ཏེ་འཆད་དགོས་པ་ཡིན་ནོ། །ཁ་ཅིག་འདི་སྙམ་དུ། དེ་ལྟར་དེ་ཁོ་ན་ཉིད་རྟོགས་པ་དང་མངོན་ཤེས་དང་ལྡན་པ་མ་གཏོགས་གསང་སྔགས་ཀྱི་རྒྱུད་ལ་འགྲེལ་པ་རྩོམ་མི་རུང་ན་ཁྱོད་ཀྱང་གནས་འདི་ལ་སེམས་ལས་ཆུང་ངུར་འདུག་པར་རིགས་སོ་ཞེ་ན། བདེན་མོད་ཀྱི་ཤིང་རྟའི་ལམ་སྲོལ་ཐོག་མར་ཕྱེ་བ་ནི་ཚེགས་ཆེན་པོ་དག་གི་ལས་ཡིན་ལ། ཕྱེས་ཟིན་ནས་
ཕལ་པ་དག་ཀྱང་ཚེགས་མེད་པར་དེར་བགྲོད་པ་ལྟར་དམ་པའི་མན་ངག་དང་མ་བྲལ་བར་རྡོ་རྗེ་ཐེག་པའི་རྒྱུད་རྣམས་བཤད་པ་དང་ཉན་པ་དང་དགོངས་པ་གསལ་བའི་ཕྱིར་རྩོམ་པ་བྱེད་པ་ལ་འགལ་བ་ཅི་ཡང་མེད་དོ། །དེའི་ཕྱིར་འགྲེལ་ཆེན་དྲི་མེད་འོད་ཉིད་དཔང་པོར་བྱས་ཤིང་། དེའི་རྗེས་སུ་འབྲང་བའི་རྒྱ་བོད་ཀྱི་མཁས་པ་རྣམས་ཀྱི་ལེགས་བཤད་རྣམས་ལ་ཅི་ནུས་སུ་བལྟས་ཏེ། གོང་འོག་གོ་རིམས་བསྡེབས་ཚུལ་སོགས་མ་འདྲེས་ཤིང་། འགའ་ཞིག་ཏུ་མ་གསལ་པ་འགའ་ཞིག་ཏུ་གསལ་བ་རྣམས་ཕྱོགས་གཅིག་ཏུ་སྡུད་པ་དང་། རྒྱ་ཆེར་བཤད་པའི་ཚིགས་རྣམས་ཀྱི་དོན་སྙིང་པོར་བསྡུས་ཏེ་གསལ་བའི་ངག་གིས་བསྟན་པ་དང་། ཟབ་དོན་རྣམས་ཀྱང་དམ་པའི་མན་ངག་བཞིན། རིགས་པའི་ལམ་གྱིས་ངེས་པ་རྣམས་ཚུལ་བཞིན་བཤད་པ་རང་བློས་གང་ནུས་བགྱིས་པས་གལ་ཏེ་ན་ལམ་འདི་དོན་གཉེར་རྣམས་ལ་རྒྱུད་དང་འགྲེལ་པའི་དོན་བློ་ཡུལ་དུ་འཆར་བདེ་བའི་རྐྱེན་དུ་སོང་ན་དེ་བཞིན་གཤེགས་པ་སྲས་དང་བཅས་པའི་བྱིན་རླབས་ཀྱི་མཐུ་ཡིན་པར་རིག་པར་བྱ་ལ། རང་ཉིད་བྱིས་པའི་ས་ལས་མ་བརྒལ་བས་ན་མ་རྟོགས་པ་དང་ལོག་པར་རྟོག་པའི་ཆ་བྱུང་ན་དེ་ཉིད་དུ་དོན་ལ་མཁས་པ་དག་གིས་བཅོས་པར་མཛད་པའི་འོས་ཡིན་ལ། སངས་རྒྱས་དང་བྱང་སེམས་རྣམས་ཀྱིས་ཀྱང་མཁྱེན་ཅིང་བཟོད་པར་མཛད་ནས་དག་ཚང་དུ་མཛད་པར་གསོལ་བའང་ཡིན་ཏེ། སློབ་དཔོན་དབྱིག་གཉེན་གྱི་ཞལ་ནས། ཉེས་པར་གྱུར་གང་དེ་འདིར་བདག་གི་ཉེས། །དམ་ཆོས་ཚུལ་ལ་ཚད་མ་ཐུབ་རྣམས་ཡིན། །ཞེས་གསུངས་པ་བཞིན་ནོ། །ད་ནི་རྒྱུད་ཀྱི་རྒྱལ་པོ་ཆེན་པོའི་གཞུང་གི་ཚིག་དོན་བཤད་པ་ལ། མཚན་དོན། འགྱུར་ཕྱག གཞུང་དོན། མཇུག་དོན་བཞི་ལས། དང་པོ། རྒྱ་གར་སྐད་དུ། པ་ར་མ།
བོད་སྐད་དུ། མཆོག་གི དེ་བཞིན་དུ། ཨཱ་དི། དང་པོའི། བུདྡྷ། སངས་རྒྱས་ལས། ཨུརྔྷྀ་ཏ། ཕྱུངས་པ། ཤྲཱི། དཔལ། ཀཱ་ལ། དུས། ཙཀྲ། འཁོར་ལོ། ནཱ་མ། ཞེས་བྱ་བ། ཏནྟྲ། རྒྱུད། རཱ་ཛ། རྒྱལ་པོ། ཞེས་བྱ་སྟེ། གཉིས་སུ་མེད་པའི་ཡེ་ཤེས་ལྷན་ཅིག་སྐྱེས་པ་དེ་ཉིད་ཐོག་མ་དང་ཐ་མ་མེད་པར་ཆོས་ཀུན་གྱི་ཆོས་ཉིད་དུ་གནས་པ་དེ་ཉིད་གློ་བུར་གྱི་སྒྲིབ་པ་དང་བྲལ་བ་ནི་མཆོག་གི་དང་པོའི་སངས་རྒྱས་ཞེས་བྱ་སྟེ། འདི་ལྟར་མངོན་པར་བྱང་ཆུབ་པ་རྣམ་པ་བཞིས་མངོན་པར་རྫོགས་པར་བྱང་ཆུབ་པའི་མཚན་ཉིད་འགྱུར་བ་མེད་པའི་བདེ་བ་ནི་མཆོག་ཡིན་ལ། དེས་དང་པོར་སངས་རྒྱས་པ་ནི་མཆོག་གི་དང་པོའི་སངས་རྒྱས་ཡིན་ལ་དེའི་མཚན་གཞན་ཡང་། གདོད་མའི་མགོན་པོ་དང་། ཀུན་ཏུ་བཟང་པོ་དང་། ཐོག་མའི་སངས་རྒྱས་ལ་སོགས་པས་མངོན་པར་བརྗོད་པའོ། །དེ་ལྟ་བུའི་འཕོ་མེད་ལྷན་ཅིག་སྐྱེས་པའི་ཡེ་ཤེས་དེ་ཉིད་བརྗོད་བྱར་བྱེད་པ་དུས་ཀྱི་འཁོར་ལོའི་རྩ་རྒྱུད་སྟོང་ཕྲག་བཅུ་གཉིས་པ་ལས་ཕྱུངས་ཏེ་བཏུས་པས་ན་དེ་ལྟར་བརྗོད་དོ། །དེ་ལྟར་བསྡུས་པའི་རྒྱུད་འདི་ཉིད་ལའང་དུས་ཀྱི་འཁོར་ལོ་ཞེས་བྱ་སྟེ། སྐབས་འདིར་དུས་ཞེས་བྱ་བ་དུས་གསུམ་དུས་མེད་དུ་མཉམ་པ་རྡོ་རྗེའི་དུས་མི་འགྱུར་བའི་བདེ་བ་ཆེན་པོའི་མཚན་ཉིད་ཅན་དེ་ལ་བརྗོད་ཅིང་། དེ་ཉིད་ཀྱིས་ཕུང་ཁམས་སྐྱེ་མཆེད་ཀྱི་ཆོས་ཐམས་ཅད་སྒྲིབ་པ་མེད་པའི་འཁོར་ལོར་སྐྱེད་པའི་ཕྱིར་ན་དུས་ཀྱི་འཁོར་ལོ་ཞེས་བྱའོ། །ཡང་ན་ཕྱོགས་དུས་ཀྱིས་བསྡུས་པའི་སྣང་བ་ཇི་སྙེད་པ་འདི་རྣམས་ནི་རང་རང་གི་རྒྱུ་རྐྱེན་ཚོགས་པ་ལས་སྣང་ཞིང་སྐྱེ་འགག་བྱེད་པ་ཡིན་ལ། དེ་ཡང་འཕོ་བའི་དབང་ལས་བྱུང་བ་ལ་དུས་ཞེས་བྱ་སྟེ། དེས་ཤེས་བྱ་ཐམས་ཅད་བསྡུས་པའོ། །དུས་དེ་ཐམས་ཅད་ལ་ཁྱབ་བྱེད་དུ་འགྲོ་བ་ལ་འཁོར་ལོ་ཞེས་བརྗོད་པ་ཡིན་ནོ། །ཁྱབ་བྱེད་དུ་འགྲོ་བ་དེ་གང་ཞེ་ན། དབང་
ཕྱུག་ལ་སོགས་པའི་བྱེད་པོ་གཞན་མ་ཡིན་ཏེ། དུས་དང་ཆ་དང་རིགས་སོགས་གཉིས་ཆོས་སུ་འབྱེད་པ་མེད་པའི་འགྱུར་མེད་ཀྱི་བདེ་བ་དང་རྣམ་ཀུན་མཆོག་ལྡན་གྱི་སྟོང་པ་ཉིད་དབྱེར་མེད་པ། དུས་གསུམ་མཉམ་པ་ཉིད་ཀྱི་ཆོས་ཉིད་དེ་ཡིན་ཏེ། ཆ་མེད་ཀུན་འགྲོ་ཁྱབ་པ་པོ། །ཕྲ་མོ་ས་བོན་ཟག་པ་མེད། །ཅེས་སོགས་གསུངས་པ་བཞིན་ནོ། །དེས་ན་བཤད་ཚུལ་དེ་དག་དོན་འདྲ་སྟེ། །གཉིས་སུ་མེད་པའི་ཡེ་ཤེས་ལ་གོ་བར་བྱའོ། །མདོ་རྒྱུད་གཞན་ལས་སེམས་ཀྱི་དག་པའམ། རང་བཞིན་འོད་གསལ་བའི་སེམས་དང་། བདེ་གཤེགས་སྙིང་པོ་ལ་སོགས་པའི་རྣམ་གྲངས་ཀྱིས་བསྟན་པ་ཐམས་ཅད་མཐར་ཐུག་གི་དགོངས་པ་གཅིག་ཏུ་གནད་མཐུན་ན་ཡང་། འདིར་རྡོ་རྗེའི་རྣལ་འབྱོར་གྱི་ལམ་གྱིས་འཕོ་བ་དང་བྲལ་བའི་བདེ་བ་ཆེན་པོ་མངོན་དུ་བྱས་པའི་དུས་ན་བརྗོད་བྱའི་དོན་མངོན་དུ་གྱུར་པ་ཡིན་ནོ། །གཞན་ཡང་རྩ་བའི་རྒྱུད་ལས། ཀཱ་ཡིག་ལས་ནི་རྒྱུ་ཞི་བ། །ལ་ཡིག་འདི་ལ་ཐིམ་པ་ཉིད། །ཙ་ཡིག་གིས་ནི་གཡོ་བའི་སེམས། །ཀྲ་ཡིག་རིམ་པ་བཅིངས་པས་སོ། །ཞེས་སད་རྨི་གཉིད་འཐུག་བཞི་པའི་གནས་སྐབས་ཀྱི་ཐིག་ལེ་བཞི་སྒྲིབ་བྲལ་དུ་གྱུར་པ་རྣམ་ཐར་བཞི་དང་རྡོ་རྗེ་བཞིས་ཡོངས་སུ་དག་པ་ཐབས་ཤེས་གཉིས་སུ་མེད་པའི་རྣལ་འབྱོར་གྱི་སྒོ་ནས་བརྗོད་པ་སྟེ། འགྲེལ་ཆེན་ལས། གང་ལ་རྒྱུ་དང་མཚན་ཉིད་མེད། །གཡོ་དང་དེ་བཞིན་རིམ་མེད་པས། །ཀཱ་ལ་ཙཀྲའི་མངོན་བརྗོད་པ། །གཉིས་མེད་དེ་ལ་བཏུད་བྱས་ཤིང་། །ཞེས་གསུངས་པ་བཞིན་ནོ། །དེའི་ཕྱིར་འཇིག་རྟེན་དང་འཇིག་རྟེན་འདས་པའི་དངོས་གྲུབ་བསྒྲུབ་པའི་རྒྱུད་ཐམས་ཅད་ཀྱི་བླ་མ་སྟེ་རྒྱལ་པོར་གྱུར་པའོ། །གཉིས་པ་འགྱུར་མཛད་པའི་ཕྱག་ནི། དཔལ་དུས་ཀྱི་འཁོར་ལོ་ལྷག་པའི་ལྷ་ལ་སྒོ་གསུམ་གུས་པས་བཏུད་ཅིང་ཕྱག་འཚལ་ལོ་ཞེས་སོ། །གསུམ་པ་གཞུང་གི་
དོན་ལ། རྒྱུད་ཀྱི་ཐོག་མར་གླེང་གཞི་དང་གླེང་བསླང་བ་རྒྱུད་འབྱུང་བའི་རྒྱུ་དང་། ཡོངས་སུ་ཤེས་པར་བྱ་བ་རྒྱུད་ཀྱི་ལུས་རྣམ་པར་གཞག་པ་དང་། རྒྱུད་ཡོངས་སུ་རྫོགས་པའི་བྱ་བ་མཇུག་གི་དོན་གསུམ་ལས། དང་པོ། ཐམས་ཅད་མཁྱེན་པ་སོགས་ཚིགས་སུ་བཅད་པ་གསུམ་གྱིས་བསྟན་ཞིང་། དེ་མན་ཆད་ཀྱིས་རྒྱུད་ཀྱི་གཞུང་དོན་དང་། ཡེ་ཤེས་ལེའུའི་མཇུག་ཏུ་རྒྱུད་ཀྱི་རྒྱལ་པོ་ཐམས་ཅད་དག་ཏུ་སོགས་ཀྱིས་མཇུག་གི་དོན་བསྟན་ཏེ་རྒྱུད་དོན་ཡོངས་སུ་རྫོགས་པ་ལ་བསྟོད་ཅིང་ཡི་རངས་པ་དང་བཅས་པས་གཞུང་དོན་རྫོགས་ནས། གང་ཞིག་མི་ཡི་འཇིག་རྟེན་སོགས་ཚིགས་བཅད་ཉིས་བརྒྱ་ཞེ་དགུ་པ་མན་ཆད་ཀྱིས་བཞི་པ་རྒྱུད་བསྡུས་པའི་མཇུག་དོན་བསྟན་ནོ། །དེ་ལ་རྒྱུད་འདི་འཆད་ཐབས་ཀྱི་ཡན་ལག་ཅི་ལྟ་བུའི་ཆིངས་ཀྱིས་བཅིངས་ནས་འཆད་ཅེ་ན། རྩ་བའི་རྒྱུད་ཀྱི་རྒྱལ་པོ་ཉིད་ཀྱི་དོན་བརྒྱན་བྱ་སྐུ་གཅིག་ལ། རྒྱན་བྱེད་དཔེ་བྱད་བརྒྱད་ཅུའི་གྲངས་དང་མཚུངས་པར་གནས་པ་བརྒྱད་ཅུ་གྱ་གཅིག་གི་རྣམ་གྲངས་ཀྱིས་བཅིངས་ཏེ་ཆོས་རྒྱལ་ཟླ་བ་བཟང་པོས་བཤད་པར་མཛད་པ་བཞིན། རྩ་རྒྱུད་ཀྱི་གོ་རིམ་དང་མཚུངས་པར་བསྡུས་པའི་རྒྱུད་འདི་ཉིད་ལ་ཡང་གནས་པ་བརྒྱད་ཅུ་གྱ་གཅིག་གི་ཆིངས་སུ་བྱས་ཏེ་བཤད་པར་བྱའོ། །འགྲེལ་པ་དྲི་མེད་འོད་ཉིད་ལས་མདོར་བསྡུས་པ་ཆེན་པོ་མཚན་བཟང་པོ་སུམ་ཅུ་རྩ་གཉིས་ཀྱི་གྲངས་དང་མཚུངས་པའི་སྡོམས་སུ་མཛད་པ་ཡིན་པས། དེ་དག་སྦྱར་ནས་ལེའུ་རེ་རེ་བཞིན་དུ་ཁོག་དོན་ཆུབ་པར་བྱས་ན། འགྲེལ་བྱེད་ཆེན་པོ་དག་གི་ལུགས་བཞིན་བཤད་པའི་བཀའ་སྲོལ་ལས་མི་ཉམས་པའི་ཕྱིར་དེ་ལྟར་འཆད་དགོས་ལ། དེ་ཡང་རྒྱུད་ཀྱི་རྒྱལ་པོ་ཆེན་པོ་འདིར་ནི། ཕྱི་འཇིག་རྟེན་ཁམས་ཀྱི་བཀོད་པ། ནང་རྡོ་རྗེའི་ལུས་ཀྱི་རྣམ་གཞག །སྨིན་བྱེད་ཀྱི་དབང་བསྐུར་བ། དཀྱིལ་འཁོར་གྱི་ལྷའི་སྒྲུབ་ཐབས།
མཆོག་ཏུ་མི་འགྱུར་བའི་ཡེ་ཤེས་བསྟན་པ་སྟེ་དེ་ལྟར་ལེའུ་འམ་བརྟག་པ་ལྔ་ཡི་བདག་ཉིད་ཅན་ཡིན་ཞིང་། དེ་ཡང་ལེའུ་དང་པོ་ལ་ཕྱི་ནང་གི་ཡུལ་ཉེར་བཞི་དང་། ཁྱིམ་དང་རྟེན་འབྲེལ་བཅུ་གཉིས་ཚན་གཉིས་བསྡོམ་པའི་ཉེར་བཞི་དག་པའི་གནས་པ་ཉི་ཤུ་རྩ་བཞིར་གསུངས་ཏེ། སྟོན་པ་པོའི་ངོ་བོ་ཉིད་ཀྱིས་གནས་པ་དང་། གནས་བསྟན་པའི་ངོ་བོ་ཉིད་ཀྱིས་གནས་པ་དང་། དེ་བཞིན་དུ་ངོ་བོ་ཉིད་ཀྱིས་གནས་པ་ཞེས་ཚིག་འོག་མ་རྣམས་ཀྱི་མཇུག་ཏུ་སྦྱར་ལ། འཁོར་ཕུན་སུམ་ཚོགས་པའི་དང་། གསོལ་བ་འདེབས་པ་པོའི་དང་། རྡོ་རྗེའི་རྣལ་འབྱོར་བརྗོད་བྱ་རྗོད་བྱེད་ཉིང་དགོས་བཅས་ཞུས་པའི་དང་། སྟོང་ཆེན་ཡིག་ལྔ་སོགས་དང་སྣ་ཚོགས་འབྱུང་བ་དང་དཀྱིལ་འཁོར་དང་དབང་བསྐུར་བར་གསོལ་བ་འདེབས་པའི་དང་། སྟོན་པ་པོའི་ལན་གྱི་དང་། འཇིག་རྟེན་གྱི་ཁམས་དང་། གཟའ་དང་རྒྱུ་སྐར་དང་སེམས་ཅན་དང་སྔགས་དང་སྲོག་ལ་སོགས་པ་འབྱུང་བ་དང་སྡུད་པའི་དང་། རླུང་སོགས་ཀྱི་དཀྱིལ་འཁོར་དང་རྒྱ་མཚོ་དང་གླིང་དང་རིའི་གྲངས་ཀྱི་དང་། སྲིད་པ་སུམ་ཅུ་རྩ་གཅིག་གི་དང་། འཁོར་ལོར་སྒྱུར་བ་ཆེན་པོ་འབྱུང་བའི་དང་། ཤིན་ཏུ་ཕྲ་བའི་དབུགས་སོགས་ཀྱིས་ཉིན་མོའི་ཚད་ལ་སོགས་པའི་དང་། འཇམ་དཔལ་ལུང་བསྟན་པའི་དང་། གྲུབ་པའི་མཐའ་དང་བྱེད་པའི་སྐར་རྩིས་ཀྱི་དང་། དབུ་མའི་རྩའི་དབུགས་རྣམས་ལས་གཟའ་དང་རྒྱུ་སྐར་གྱི་རྐང་པ་སྐྱེ་བའི་དང་། ཁྱིམ་བཅུ་གཉིས་ཀྱི་རྣམ་པས་ས་ལ་འཁོར་བའི་དང་། དབྱངས་འཆར་བ་ལ་སོགས་པའི་དང་། སྒྲ་གཅན་ལ་སོགས་པའི་སའི་སྟོབས་ཀྱི་དང་། རྫོང་འཇོམས་པ་དང་བསྲུང་བའི་འཁྲུལ་འཁོར་གྱི་དང་། འཁོར་ལོས་སྒྱུར་བ་དུམ་བུ་བཅུ་གཉིས་སུ་འཁོར་བའི་དང་། ཀླ་ཀློའི་ཆོས་བཅོམ་ནས་སངས་རྒྱས་ཀྱི་ཆོས་རབ་ཏུ་འཇོག་པའི་དང་། སེམས་ཅན་མཐའ་དག་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱི་ལམ་སྦྱིན་པའི་
དང་། འཇམ་དཔལ་དང་འཇིག་རྟེན་དབང་ཕྱུག་སྔོན་དང་ཕྱི་མར་སྟོན་པ་པོའི་དང་། འཁོར་ལོས་སྒྱུར་བ་ཆེན་པོ་ལ་སོགས་པ་རིགས་ལྡན་གྱི་མཐར་ཐུག་པའི་མི་རྣམས་ཀྱི་མཆོག་གི་ཚེའི་ངོ་བོ་ཉིད་ཀྱིས་གནས་པ་སྟེ་ཉི་ཤུ་རྩ་བཞིའོ། །བརྗོད་བྱ་དེ་དག་རྗོད་བྱེད་ཚིག་གི་ངོ་བོ་ཉིད་ཀྱི་སྐབས་དེ་དག་ཏུ་གནས་པའམ། ཡང་ན་བརྗོད་བྱ་དེ་དག་གི་ངོ་བོ་ཉིད་ཀྱི་སྐབས་དེ་དག་ཡིན་པས་བྱེད་འགྲེལ་གྱི་སྒྲ་ཇི་ལྟར་བྱས་ཀྱང་རུང་ངོ་། །ལེའུ་དང་པོ་འདི་ལ་ཡི་གེ་ཉེར་གཅིག་པ་རབ་བྱེད་ལྡན་གྱི་ནང་ཚན་སྡེབ་སྦྱོར་མེ་ཏོག་ཕྲེང་འཛིན་གྱིས་བཅིངས་པའི་ཚིགས་བཅད་བརྒྱ་དང་དྲུག་ཅུ་རེ་དགུ་ཡོད་པ་དེ་རྣམས་དེ་ལྟར་གནས་པ་ཉེར་བཞིའི་ས་ཁོངས་སུ་བསྡུས་ནས་འཆད་པར་བྱའོ། །བརྒྱུད་ཀྱི་དགོངས་འགྲེལ་རྩ་བའི་རྒྱུད་ཀྱི་རྗེས་སུ་འཇུག་པ་དྲི་མ་མེད་པའི་འོད་གཞུང་ཚད་སྟོང་ཕྲག་བཅུ་གཉིས་པ་ལས། ལེའུ་དང་པོ་འདིར་མདོར་བསྡུས་ཆེན་པོ་བཅུའི་སྒོ་ནས་གཏན་ལ་དབབ་པར་མཛད་དེ། བདུད་དང་བགེགས་མཐའ་དག་ཉམས་པའི་དོན་དུ་རྒྱུད་ཀྱི་བདག་པོ་དུས་ཀྱི་འཁོར་ལོ་ཉིད་ལ་རྒྱུད་དོན་ཟབ་མོ་དང་མཐུན་པར་མཆོད་པར་བརྗོད་པ་སོགས་འདོད་པའི་ལྷ་དང་དམ་པའི་ལམ་ངེས་པའི་མདོར་བསྡུས་དང་པོ་དང་། དེའི་དགོས་སོགས་ཆོས་བཞི་གཟིགས་ནས་བཅོམ་ལྡན་འདས་ཀྱིས་རྒྱུད་བསྟན་པའི་མདོར་བསྡུས་གཉིས་པ་དང་། རྒྱུད་སྟོན་པ་དང་གསོལ་བ་འདེབས་པ་པོ་དང་རྩ་བའི་རྒྱུད་དང་བསྡུས་པའི་རྒྱུད་ཀྱི་འབྲེལ་བའི་མདོར་བསྡུས་གསུམ་པ་རྣམས་ཀྱིས་རྒྱུད་བཤད་པའི་སྤྱི་ཁོག་ཕུབ་པ་སྔོན་དུ་བཏང་ནས། དེ་མན་ཆད་ཀྱི་མདོར་བསྡུས་རྣམས་ཀྱིས་གཞུང་དོན་རིམ་པར་བསྟན་པ་ལ། སྟོན་པ་དང་གསོལ་བ་འདེབས་པ་པོའི་མདོར་བསྡུས་བཞི་པ་དང་། དེའི་རྗེས་སུ་རྣལ་འབྱོར་དཔལ་ལྡན་སོགས་ཀྱི་དོན་ལས་བརྩམ་སྟེ་སྟོན་པ་པོ་ལ་སོགས་པ་བསྡུས་པའི་མདོར་བསྡུས་ལྔ་པ་དང་། སྟོང་པ་ཡེ་ཤེས་སོགས་ཞུས་པའི་ཚིགས་བཅད་ཀྱི་དོན་རྒྱས་པར་བཤད་པ། དཀྱིལ་འཁོར་དང་དབང་ལ་སོགས་པ་བསྡུས་
པའི་མདོར་བསྡུས་དྲུག་པ་དང་། ཟླ་བ་བཟང་པོ་ཁྱོད་ལ་བདག་མགུ་སོགས་ལན་གྱི་ཚིགས་བཅད་ཀྱི་དོན་རྒྱས་པར་བཀྲལ་བ་འཇིག་རྟེན་ཁམས་བསྡུས་པའི་མདོར་བསྡུས་བདུན་པ་དང་། རླུང་གི་མཐའ་ནས་སོགས་འཇིག་རྟེན་གྱི་ཚད་དང་སྲིད་པ་སོ་གཅིག་དང་། འཁོར་བསྒྱུར་ཆེན་པོ་འབྱུང་བ་དང་། ཕྲ་དབུགས་སོགས་ཚད་ཀྱི་བར་རྣམས་ཀྱི་དོན། །འཇིག་རྟེན་ཁམས་ཀྱི་ཚད་བསྡུས་པའི་མདོར་བསྡུས་བརྒྱད་པས་བསྟན་ནོ། །དེ་ནས་རིགས་ལྡན་འཇམ་དཔལ་གྲགས་པ་ལུང་བསྟན་པ་དང་། བྱེད་གྲུབ་ཀྱི་སྐར་རྩིས་དང་། དབུ་མའི་དབུགས་ལས་གཟའ་དང་སྐར་མའི་རྐང་པ་འབྱུང་བ་དང་། ཁྱིམ་གྱི་གོ་ལ་འཁོར་ཚུལ་རྣམས་ཀྱི་དོན། སྐར་རྩིས་ཤེས་པའི་ཆོ་གའི་མདོར་བསྡུས་དགུ་པས་བསྟན། དབྱངས་འཆར་བ་དང་།གཟའི་ཕྱོགས་ཀྱི་སྟོབས་དང་། སྒྱོགས་སོགས་ཀྱི་འཁྲུལ་འཁོར་རྣམས་ནི། དབྱངས་འཆར་བ་དང་འཁྲུལ་འཁོར་གྱི་ཆོ་ག་ངེས་པའི་མདོར་བསྡུས་བཅུ་པས་བསྟན་ལ། དེ་མན་ཆད་གོ་སླ་བས་འགྲེལ་བཤད་མ་མཛད་དོ། །མདོར་བསྡུས་དང་པོ་དྲུག་པོ་དེ་ནི་འོག་མའི་དོན་ཐམས་ཅད་ཀྱི་ཁྱབ་བྱེད་ལྟ་བུ་ཡིན་ནོ་ཞེས་བླ་མ་རྣམས་གསུངས་སོ། །དེ་ལྟར་སོ་སོའི་སྐབས་ཀྱི་ཚིག་གི་དོན་རྣམས་ལ་བཤད་བྱ་རྒྱ་ཆེ་ཆུང་དང་གོ་དཀའ་སླའི་དབང་གིས་མདོར་བསྡུས་པ་རེ་རེས་དེ་ལྟར་འཆད་པར་མཛད་དོ། །གནས་པ་ཞེས་པའི་དོན་ནི་བརྗོད་བྱ་དེ་དང་དེ་དག་གི་ངོ་བོ་ཉིད་དམ་དོན་དེ་ཉིད་སྐབས་དེར་གནས་པ་ཡིན་པའི་ཆ་ནས་གནས་པ་ཞེས་བྱའོ། །དེ་ལྟར་གནས་པ་བརྒྱད་ཅུ་གྱ་གཅིག་དང་། མདོར་བསྡུས་སོ་གཉིས་ཀྱི་སྡོམ་གྱི་དགོངས་དོན་ལེའུ་རེ་རེ་བཞིན་དུ་སྦྱར་ཏེ་བསྟན་པ་ལ་གཞི་བྱས་ནས། གོ་བདེ་བའི་སླད་དུ་སོ་སོའི་ས་ཁོངས་མདོར་བསྡུས་བཅད་ནས་བརྗོད་ན། ཐོག་མར་གླེང་གཞི་དང་། གླེང་བསླང་བའི་ཚུལ་ལ་གླེང་གཞི་སྟོན་པ་དང་གནས་དང་འཁོར་ཕུན་སུམ་ཚོགས་པ་དང་། གླེང་
བསླང་བ་ཞུས་ཞིང་གསོལ་བ་གདབ་པ་གཉིས་ལས། དང་པོ་སྟོན་པ་ཕུན་སུམ་ཚོགས་པ་ནི། ཐམས་ཅད་མཁྱེན་པ་ཡེ་ཤེས་སྐུ་དང་ཉིན་མོར་བྱེད་པའི་སྐུ་སྟེ་པདྨའི་འདབ་མ་རྒྱས་པའི་སྤྱན། སངས་རྒྱས་ཞེས་ཡི་གེ་ཉི་ཤུ་རྩ་གསུམ་པོ་དེས་བསྟན་ཏེ། དེ་ཡང་དཔལ་དུས་ཀྱི་འཁོར་ལོ་རྩ་བའི་རྒྱུད་སྟོང་ཕྲག་བཅུ་གཉིས་པ་ལས། ཐམས་ཅད་མཁྱེན་པ་ཡེ་ཤེས་སྐུ། །ཉི་མའི་སྐུ་གང་མི་ཟད་པ། །དཔལ་ལྡན་པད་འདབ་རྒྱས་པའི་སྤྱན། །སངས་རྒྱས་སེང་གེའི་ཁྲིར་བཞུགས་པ། །སྐུ་གསུང་ཐུགས་དང་ཆགས་པ་ཡིས། །སྐུ་གསུང་ཐུགས་ཀྱི་དཀྱིལ་འཁོར་ལ། །སྐུ་གསུང་ཐུགས་དང་ཆགས་པའི་བདག །རྡོ་རྗེ་སེམས་དཔའ་ལྷག་པའི་ལྷ། །མི་ཕྱེད་རྡོ་རྗེ་རྣལ་འབྱོར་འདི། །དུས་ཀྱི་འཁོར་ལོར་མི་འགྱུར་བདེ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རིགས་མེད་པ། །ཀུན་ནས་རྡོ་རྗེ་སྐལ་བཟང་ཉིད། །ཀུན་ནས་སྣ་ཚོགས་སྡོམ་པ་སྟེ། །བདེན་དོན་རྣམ་པ་བཅུ་གཉིས་དང་། །དེ་ཉིད་རྣམ་པ་བཅུ་དྲུག་འཛིན། །ཞེས་སོགས་གསུངས་པའི་དོན་དེ་ཉིད་བསྡུས་པའི་རྒྱུད་འདིར་གོང་ལྟར་བསྡུ་བར་མཛད་དོ། །དེ་ལ་ཤེས་བྱའི་རྣམ་པ་ཐམས་ཅད་མཁྱེན་པ་ཡི་སྐུ་ནི་སྐབས་འདིར་དག་པའི་སྐུ་ཞེས་གསུང་པ་སྟེ། མདོ་ལྟར་ན་ངོ་བོ་ཉིད་སྐུ་སྟེ་སྔགས་ལྟར་ན་འདི་ལ་ལྷན་སྐྱེས་དག་པའི་སྐུའི་རྣམ་གཞག་ཀྱང་བྱེད་ལ། འདི་ནི་རྣམ་ཐར་སྒོ་བཞིའི་ནང་ནས་སྟོང་པ་ཉིད་དང་། རྡོ་རྗེ་བཞིའི་ནང་ནས་ཡེ་ཤེས་རྡོ་རྗེ། རྣལ་འབྱོར་བཞིའི་ནང་ནས་ཐབས་ཤེས་རྣམ་པར་དག་པའི་རྣལ་འབྱོར་རོ། །གཉིས་སུ་མེད་པའི་ཡེ་ཤེས་ཀྱི་སྐུ་ནི་ཆོས་ཀྱི་སྐུ་དང་མཚན་མ་མེད་པའི་རྣམ་པར་ཐར་པས་ཡོངས་སུ་དག་པ། ཐུགས་རྡོ་རྗེ། ཆོས་ཀྱི་རྣལ་འབྱོར་མཐར་ཕྱིན་པའོ། །མི་ཤེས་པའི་
མུན་པ་ཐམས་ཅད་འཇོམས་པ་ཉིན་མོར་བྱེད་པའི་སྐུ་ཉིད་ཀྱང་སྟེ། འདི་ནི་གདུལ་བྱ་རྣམས་ལ་ཆོས་ཀྱི་ལོངས་སྤྱོད་རྫོགས་པར་མཛད་པའི་ལོངས་སྐུ་དང་། སྨོན་པ་མེད་པའི་རྣམ་ཐར་ལ་གནས་པ། གསུང་རྡོ་རྗེ་སྔགས་ཀྱི་རྣལ་འབྱོར་རོ། །པདྨའི་འདབ་མ་རྒྱས་པའི་སྤྱན་མངའ་བའི་སྐུ་ནི། འགྲོ་བའི་དོན་ལ་ཡེ་ཤེས་ཀྱི་གཟིགས་པ་འཇུག་པའི་སྤྲུལ་པའི་སྐུ། འདུས་མ་བྱས་པའི་རྣམ་པར་ཐར་པ་ལ་གནས་པ། སྐུ་རྡོ་རྗེ་དབྱིངས་ཀྱི་རྣལ་འབྱོར་ཡང་དག་པ་དང་ལྡན་པའོ། །དེ་ལྟར་སྐུ་བཞི་དང་ལྡན་པའི་སངས་རྒྱས་ནི་སྟོན་པ་པོ་ཡིན་ནོ། །སྐབས་འདིར་ལ་ལ་དག་འདི་སྙམ་དུ། ཐམས་ཅད་མཁྱེན་པ་གང་ཡིན་པ་དེ་ཉིད་སངས་རྒྱས་མ་ཡིན་ནམ། དེས་ན་མིང་གཉིས་ཟློས་སོ་སྙམ་ན། ཐམས་ཅད་མཁྱེན་པ་དེ་སངས་རྒྱས་ཡིན་ཡང་། བྱིས་པའི་སྐྱེ་བོ་རྣམས་ཀྱིས་ཁྱབ་འཇུག་དང་དྲག་པོ་ལ་སོགས་པ་གཞན་ཐམས་ཅད་མཁྱེན་པར་འདོད་པ་བསལ་བའི་སླད་དུ་ཐམས་ཅད་མཁྱེན་པ་ནི་སངས་རྒྱས་བཅོམ་ལྡན་འདས་ཉིད་དོ་ཞེས་བརྗོད་པ་སྟེ། འཇིག་རྟེན་འདིར་སེམས་ཅན་ཐམས་ཅད་ཀྱི་སྐད་ཀྱིས་ཆོས་སྟོན་པའི་ཐམས་ཅད་མཁྱེན་པ་སངས་རྒྱས་ཉིད་འཁོར་བའི་ཕ་རོལ་ཏུ་སོན་པ་ཡིན་ལ། ཁྱབ་འཇུག་ལ་སོགས་པ་འཁོར་བ་འདིར་ལྷའི་སྐྱེ་བར་སྐྱེས་ཤིང་སྐད་ཉི་ཚེ་བས་དོན་ཉི་ཚེ་བ་སྟོན་པ་ཙམ་སྟེ་ཐམས་ཅད་མཁྱེན་པ་མ་ཡིན་ནོ། །ཐམས་ཅད་མཁྱེན་པ་གང་ཡིན་པ་ཡེ་ཤེས་ཀྱི་སྐུ་མ་ཡིན་ནམ་ཞེ་ན་ཡིན་མོད་ཀྱང་། ཉན་ཐོས་དང་རང་སངས་རྒྱས་ལ་ཡང་སྐབས་འགར་སངས་རྒྱས་ཀྱི་སྒྲ་འཇུག་པ་ཡོད་ཀྱང་། དེ་དག་ལམ་གྱི་ལྷག་མ་དང་བཅས་བཞིན་ཞི་བ་ཕྱོགས་གཅིག་པའི་མྱང་འདས་ཐོབ་པ་ཡིན་ལ། སངས་རྒྱས་བཅོམ་ལྡན་འདས་ནི་ལྷག་མ་མེད་པའི་རྣམ་གྲོལ་གྱི་འབྲས་བུ་ཡེ་ཤེས་ཀྱི་སྐུ་མངོན་དུ་མཛད་པ་ཤེས་པར་བྱ་བའི་ཕྱིར། ཐམས་ཅད་མཁྱེན་པ་ཡེ་ཤེས་ཀྱི་
སྐུ་ཅན་སངས་རྒྱས་ཞེས་གསུངས་ཏེ་དོན་ལ་མི་ཟློས་སོ། །ཡེ་ཤེས་ཀྱི་སྐུ་གང་ཡིན་པ་མི་ཤེས་པའི་མུན་པ་འཇོམས་པ་ཉིན་མོར་བྱེད་པའི་སྐུ་མ་ཡིན་ནམ། དེ་ལྟར་ཟློས་པ་ཅི་ལ་གསུངས་ཞེ་ན། དེ་ཡིན་མོད་ཀྱི་སངས་རྒྱས་པའི་གྲུབ་མཐའ་རྣམ་རིག་སྨྲ་བ་དག་གིས་སངས་རྒྱས་ཀྱང་རྣམ་པར་ཤེས་པ་ལས་མ་འདས་པ་སྨྲ་བ་བསལ་བའི་ཕྱིར། །ཡེ་ཤེས་སྐུ་ཉིན་མོར་བྱེད་པའི་སྐུ་རྣམ་པར་ཤེས་པའི་ཆོས་ཉིད་ལས་འདས་པ། ཡང་དག་པར་རྫོགས་པའི་ཞེས་སུ་བསྟན་ཏེ། རྣམ་རིག་སྨྲ་བ་རྣམས་ནི་རྣམ་པར་ཤེས་པའི་ཆོས་ལ་གནས་པ་ཡིན་ལ། ཡང་དག་པར་རྫོགས་པའི་སངས་རྒྱས་ནི་གཟུང་འཛིན་གྱི་རྣམ་རྟོག་མཐའ་དག་དང་བྲལ་བཞིན་ཡེ་ཤེས་ཀྱི་སྐུའི་གསུང་གི་འོད་ཟེར་གྱི་སྣང་བས་གདུལ་བྱ་མཐའ་དག་གི་མི་ཤེས་པའི་མུན་པ་སེལ་བ་ཉིན་མོར་བྱེད་པའི་སྐུ་ཡིན་པས་ན། རྣམ་པར་ཤེས་པའི་ཆོས་ཉིད་ལས་འདས་པའི་ཕྱིར་ཏེ། གཟུང་འཛིན་ཅན་གྱི་རྣམ་པར་ཤེས་པ་ནི་རྒྱུད་ཉི་ཚེ་བས་བསྡུས་པ་ཡིན་ལ། གཟུང་འཛིན་མེད་པའི་ཡེ་ཤེས་ཀྱི་ངོ་བོ་ནི་གཉིས་ཆོས་སུ་འབྱེད་པ་མེད་པས་རྒྱུད་ཀྱིས་རིས་སུ་མ་བཅད་པའི་མཉམ་པ་ཉིད་དུ་གནས་ཤིང་། རང་གི་ངོ་བོ་ལ་མཚན་མའི་དབྱེ་བ་མེད་མོད། ཆོས་ཅན་སོ་སོ་ལ་བརྟེན་པ་ལྟར་སྣང་བ་ནི་ལྟོས་ཏེ་བཏགས་པས་དབྱེ་བ་ཙམ་མོ། །དེ་ལྟར་ཡང་མཚན་ཡང་དག་པར་བརྗོད་པའི་སོ་སོར་རྟོགས་པའི་ཡེ་ཤེས་ལ་བསྟོད་པའི་ཚིགས་བཅད་ཉེར་གསུམ་པས་གསུངས་པ། རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་པ། །རྣམ་པར་རྟོགས་མེད་ལྷུན་གྱིས་གྲུབ། །དུས་གསུམ་སངས་རྒྱས་སྐུ་འཆང་བ། ཞེས་གསུངས་སོ། །ཡང་འགའ་ཞིག་གིས་རྒྱུད་ཀྱི་བརྗོད་བྱ་ཡེ་ཤེས་ཀྱི་སྐུ་དེ་ནི་རྡུལ་ཕྲ་རབ་འདུས་པའི་གཟུགས་ཅན་མ་ཡིན་ལ། པདྨའི་འདབ་མ་རྒྱས་པའི་སྤྱན་གཟུགས་ཅན་མིན་ནམ་སྙམ་དུ་སེམས་ན། འདིར་ངེས་པའི་དོན་དུ་
པདྨའི་སྒྲས་ནམ་མཁའི་ཁམས་བརྗོད་དེ། པདྨ་ནམ་མཁའི་ཁམས་དེ་ལ་འདབ་མ་རྣམས་བཞིན་དུ། རིགས་བརྒྱ་རིང་བའི་ངོ་བོ་ཉིད་ཀྱིས་གནས་པའི་སེམས་ཅན་རྣམས་སོ། །པདྨའི་འདབ་མ་དེ་དག་གི་མཐའ་ཇི་སྲིད་པར་བཅོམ་ལྡན་འདས་གང་གི་ཡེ་ཤེས་ཀྱི་གཟིགས་པའི་སྤྱན་བརྒྱ་རྒྱས་པ་དེ་ནི་པདྨའི་འདབ་མ་རྒྱས་པའི་སྤྱན་ཞེས་གསུངས་ཏེ། མཚན་ཡང་དག་པར་བརྗོད་པ་ལས། རྡོ་རྗེ་འབར་བ་མིག་མི་བཟད། །སྒྲ་ཡང་རྡོ་རྗེ་འབར་བ་སྟེ། །རྡོ་རྗེ་འབེབས་པ་འབེབས་པ་ཆེ། །མིག་བརྒྱ་པ་སྟེ་རྡོ་རྗེའི་མིག །ཅེས་སོ། །དེ་ཡང་བརྒྱ་ནི་མང་པོའི་དོན་དང་གོང་དུ་རིང་བའི་ཞེས་པ་སངས་རྒྱས་ཀྱི་འབྲས་བུ་ལ་ཉེ་བར་མ་གྱུར་པའི་སེམས་ཅན་རྣམས་ཀྱི་དོན་ནོ། །དེའི་ཕྱིར་ཡེ་ཤེས་ཀྱི་སྐུ་ལ་གཟུགས་རང་མཚན་དུ་གྲུབ་པ་མེད་ཀྱང་། ཡེ་ཤེས་རྣམ་པ་ཐམས་ཅད་པའི་དབང་ལས་གདུལ་བྱའི་ངོར་སྤྲུལ་པའི་གཟུགས་བརྙན་སྣ་ཚོགས་སུ་སྣང་བ་པདྨའི་འདབ་མ་རྒྱས་པ་ལྟ་བུའི་སྤྱན་སོགས་མཚན་དཔེ་མངའ་བ་ནི་ཀུན་རྫོབ་ཏུ་གདུལ་བྱའི་བསམ་པའི་དབང་ལས་སོ། །དེ་དག་འགྲེལ་ཆེན་ལས་གསུངས་པ་བཞིན་མདོར་བསྡུས་ཏེ་བཀོད་པའོ། །གཉིས་པ་གནས་ཕུན་སུམ་ཚོགས་པ་ནི། སེང་གེའི་ཁྲི་ལ་བཞུགས་ཞེས་ཡི་གེ་ལྔས་བསྟན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་དབུས་སུ་རྡོ་རྗེ་སེང་གེའི་ཁྲི་ལ་བཞུགས་པ་ཞེས་པས་གང་དུ་བཞུགས་པའི་གནས་བསྟན་ཏེ། སེང་གེའི་ཁྲི་ནི་མཁའ་ཁམས་ཡིན་ལ། རྣམ་པའི་ཚུལ་དུ་ཟླ་ཉི་དུས་མེའི་གདན་ལ་བཞུགས་པའོ། །དེ་ལྟར་ཡང་རྩ་བའི་རྒྱུད་ལས། ཨེ་གསང་མཁའ་ཁམས་བྷ་གའམ། །ཆོས་འབྱུང་ཆུ་སྐྱེས་སེང་གེའི་ཁྲིར། །བཞུགས་པའི་རྡོ་རྗེ་ཅན་ཝྃ་དང་། །རྡོ་རྗེ་ཅན་དང་རྡོ་རྗེ་སེམས། །རྡོ་རྗེ་འཇིགས་བྱེད་དབང་ཕྱུག་དང་། །ཧེ་རུ་ཀ་དང་དུས་འཁོར་དང་། །དང་པོའི་སངས་རྒྱས་ལ་སོགས་མཚན། །སྣ་ཚོགས་ཡུལ་གྱི་མིང་རྣམས་ཀྱིས། །རྒྱུད་གཞན་
དག་ཏུ་བདག་གིས་བརྗོད། །སྣ་ཚོགས་སེམས་ཅན་བསམ་པས་ཀྱང་། །རྟེན་གྱི་མཚན་ཉིད་གནས་དང་ནི། །བརྟེན་པ་དག་ཀྱང་བདག་གིས་བརྗོད། །ཀུན་མཁྱེན་སྟོན་པ་རྡོ་རྗེ་འཛིན། །སངས་རྒྱས་སེང་གེའི་ཁྲི་ལ་བཞུགས། །ཟླ་བཟང་ཁྱོད་ཀྱིས་གསོལ་བཏབ་པ། །དུས་ཀྱི་འཁོར་ལོའི་སྟོན་པ་པོ། །ཞེས་གསུངས་སོ། །སྐབས་འདིར་འགའ་ཞིག་འདི་སྙམ་དུ། རྒྱུད་རྣམས་སུ་འདི་སྐད་བདག་གིས་ཐོས་པ་ཞེས་སོགས་ཀྱིས་གླེང་གཞི་བསྟན་ཅིང་། དེ་ཡང་འདི་སྐད་ཅེས་པའི་ཚིག་ཨེ་ཝྃ་ཐབས་ཤེས་ཀྱི་ཡི་གེ་ཐོག་མར་སྨྲོས་པས་ཐབས་ཤེས་ཟུང་འཇུག་གི་རྣལ་འབྱོར་མཚོན་པ་དང་། བཅོམ་ལྡན་འདས་རྡོ་རྗེ་བཙུན་མོའི་བྷ་ག་ལ་བཞུགས་ཞེས་སོགས་ཀྱིས་ཀྱང་དེ་བཞིན་དུ་སྟོན་པ་ཡིན་ན། འདིར་དེ་ལྟ་བུར་མི་སྟོན་པར། ཐོག་མ་ནས་ཐམས་ཅད་མཁྱེན་པ་སོགས་ནས་སེང་གེའི་ཁྲི་ལ་བཞུགས་ཞེས་བཤད་པས་འདི་སངས་རྒྱས་ཀྱིས་གསུངས་པ་མ་ཡིན་ནམ་སྙམ་དུ་ཉི་ཚེ་བའི་བློ་ཅན་ཚིག་ཙམ་ལ་རྟོན་པ་དག་གི་བསམ་པ་ནི་འབྲས་བུ་མེད་པ་སྟེ། ཅིའི་ཕྱིར་ན། དེ་བཞིན་གཤེགས་པས་ཆོས་སྟོན་པ་ནི་གདུལ་བྱའི་བསམ་པ་དང་མཐུན་པར། ཡུལ་སྣ་ཚོགས་ཀྱི་སྐད་དང་། དོན་ལ་རྟོན་པའི་ཚིག་སྣ་ཚོགས་ཀྱི་སྒོ་ནས་སྟོན་གྱི་ཉི་ཚེ་བ་མ་ཡིན་ནོ། །དེའི་ཕྱིར་ལེགས་སྦྱར་གྱི་སྐད་དུ་གསུངས་པ་ཕལ་མོ་ཆེ་ལ་འདི་སྐད་བདག་གིས་ཐོས་པ་ཞེས་སྦྱར་ཡོད་པ་བདེན་ཏེ། གསང་བ་འདུས་པའི་རྩ་རྒྱུད་དུ། འདི་སྐད་བདག་གིས་ཐོས་པ་དུས་ཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཞུགས་ཏེ། ཞེས་གནས་ངེས་པར་གསུངས་སོ། །དེ་བཞིན་དུ་སྒྱུ་འཕྲུལ་དྲ་བ་ལས་ཀྱང་། འདི་སྐད་བདག་གིས་ཐོས་པ་ཞེས་གསུངས་སོ། །དེ་དང་འདྲ་བར་རྩ་རྒྱུད་གཞན་དང་དེ་དག་གི་བསྡུས་རྒྱུད་
རྣམས་ལའང་དེ་ལྟར་བཞུགས་པའི་གནས་བསྟན་པ་ཡོད་དོ། །དུས་ཀྱི་འཁོར་ལོའི་རྩ་རྒྱུད་ལས། ཐམས་ཅད་མཁྱེན་པ་སོགས་ནས་སེང་གེའི་ཁྲི་ལ་བཞུགས་ཞེས་པས་གནས་ངེས་པར་བསྟན་པ་གསུངས་ལ། བསྡུས་པའི་རྒྱུད་འདིར་ཡང་དེ་བཞིན་དུ་གསུངས་སོ། །དེ་དང་འདྲ་བར་འཇིགས་བྱེད་ཀྱི་རྒྱུད་རྒྱས་པ་རྣལ་འབྱོར་རྗེས་སུ་རིག་པ་སྟོང་ཕྲག་སུམ་ཅུ་རྩ་དྲུག་པ་ལས་བཅོམ་ལྡན་འདས་ཀྱིས། རྡོ་རྗེ་མཁའ་འགྲོའི་པདྨར་གནས། །ལྷག་པའི་ལྷ་ནི་གཅིག་པོ་འདི། །ལྷན་སྐྱེས་དགའ་བའི་གཟུགས་ཀྱིས་ནི། །སྲིད་གསུམ་བདག་ཉིད་དག་ལ་གནས། །ཞེས་སོགས་ཀྱིས་གནས་ངེས་པ་བསྟན་པར་མཛད་ལ། དེ་བཞིན་དུ་བདེ་མཆོག་གི་རྒྱུད་རྒྱས་པ་མངོན་པར་བརྗོད་པ་འབུམ་པ་ལས་ཀྱང་། ཕོ་ཉ་ཀུན་གྱི་གསང་བ་ལ། །སེམས་དཔའ་ཀུན་གྱི་བདག་ཉིད་གནས། །སེམས་དཔའ་ཕོ་ཉ་ཀུན་རང་བཞིན། །རྡོ་རྗེ་སེམས་དཔའ་བདེ་བ་ཆེ། །ཞེས་གསུངས་ཏེ་རྒྱུད་ཀྱི་ཚིག་དོན་ཟབ་མོ་རྣམས་བླ་མའི་མན་ངག་ལས་རྟོགས་པར་བྱ་བ་ཡིན་ནོ། །དེ་བཞིན་དུ་རྒྱུད་རྣམས་སུ་གསོལ་བ་འདེབས་པ་པོ་ཡང་། འདུས་པར་ཕྱག་ན་རྡོ་རྗེ་དང་། རྣལ་འབྱོར་རྗེས་སུ་རིག་པའི་རྒྱུད་ལ་སྣ་ཚོགས་གཟུགས་ཅན་མ་དང་། མངོན་བརྗོད་འབུམ་པ་ལ་རྡོ་རྗེ་ཕག་མོས་གསོལ་བ་བཏབ་པ་སོགས་སྣ་ཚོགས་སུ་གནས་ཤིང་དུས་ཀྱི་འཁོར་ལོའི་རྒྱུད་འདིར་ནི་གསོལ་བ་འདེབས་པ་པོ་རྒྱལ་པོ་ཟླ་བ་བཟང་པོའོ། །འདིར་མཆོག་གི་དང་པོའི་སངས་རྒྱས་ལས། སེམས་ཅན་ཉོན་མོངས་གཞིལ་བའི་སླད། །སྐུ་གསུང་ཐུགས་ཀྱི་སྦྱོར་བ་ཡིས། །བཅོམ་ལྡན་འདས་ཀྱིས་བསྐུལ་གྱུར་པས། །སྟོན་པའི་ཞབས་ཀྱི་པདྨ་གཉིས། །རིན་ཆེན་མེ་ཏོག་རྣམས་ཀྱིས་མཆོད། །སླར་ཡང་སྙིམ་པ་རིན་ཆེན་བཅས། །པུས་མོ་གཉིས་ནི་སར་བཙུགས་ཤིང་། །སྤྱི་བོ་ཡིས་ཀྱང་ཕྱག་འཚལ་ཏེ། །དེ་ནས་པུས་མོ་
གཡས་པ་ཡི། །ལྷ་ང་ས་ལ་བཙུགས་ནས་ནི། །དཔྲལ་བར་ཐལ་མོ་སྦྱར་བྱས་ཏེ། །མི་བདག་གསོལ་བ་འདེབས་པར་བྱེད། །རྒྱུད་རྣམས་ཀུན་གྱི་བླ་ན་མེད། །དང་པོའི་སངས་རྒྱས་རྟག་ཏུ་ནི། །དངོས་གྲུབ་ཀུན་ཚོགས་མཚན་ཉིད་ཅན། །ཨཱ་ལི་ཀཱ་ལི་ལེགས་ལྡན་དཔལ། །དུས་འཁོར་འདི་ལ་རྣལ་འབྱོར་ནི། །སྐད་ཅིག་གཅིག་མངོན་རྫོགས་སངས་རྒྱས། །སྐད་ཅིག་བཞི་ཡི་རྣམ་དབྱེ་ཅན། །དེ་ཉིད་བཅུ་དྲུག་དབྱེ་བ་ཡིས། །ཐ་དད་ཐིག་ལེ་བཞི་འཛིན་པ། །སྟོང་དང་ཡེ་ཤེས་ཐིག་ལེ་དང་། །མཆོག་དང་རྡོ་རྗེ་འཛིན་པ་ཆེ། །སྟོང་པ་ཆེན་པོ་ཡི་གེ་ལྔ། །ཐིག་ལེ་སྟོང་པ་ཡི་གེ་དྲུག །ཕྱི་དང་ལུས་དང་གཞན་ལ་ཡང་། །སངས་རྒྱས་ལྷ་དང་ལྷ་མིན་ཉིད། །དེ་བཞིན་རང་བཞིན་རྣམས་ལ་ནི། །སྐྱེས་བུ་ཉི་ཤུ་ལྔ་པ་གཞན། །ལུས་ལ་སྣ་ཚོགས་ཚད་དང་གང་། །འཇིག་རྟེན་གསུམ་པོ་འབྱུང་བའི་རྒྱུ། །ལྷ་དང་ལྷ་མིན་ལོངས་སྤྱོད་པ། །ཇི་བཞིན་གསལ་བར་འདི་དག་ཀུན། །མ་ལུས་སྟོན་པས་བཤད་དུ་གསོལ། །ཞེས་པ་དེ་ལྟ་བུ་ལ་སོགས་པས་མཆོག་གི་དང་པོའི་སངས་རྒྱས་ལ་རྒྱལ་པོ་ཟླ་བ་བཟང་པོས་གསོལ་བ་བཏབ་བོ། །དེ་བཞིན་དུ་རྣལ་འབྱོར་རྗེས་སུ་རིག་པའི་རྒྱུད་ལས། དཔལ་ལྡན་སྣ་ཚོགས་གཟུགས་ཅན་མས། །རྡོ་རྗེ་འཇིགས་བྱེད་ལ་བཏུད་ཞུས། །རྣལ་འབྱོར་རྗེས་སུ་རིག་པའི་རྒྱུད། །རྡོ་རྗེ་སེམས་དཔའི་མཆོག་བདེ་ཅི། །ཞེས་སོགས་ཀྱིས་སོ། །མངོན་བརྗོད་འབུམ་པར། སྲིད་གསུམ་བདག་ཉིད་ཧེ་རུ་ཀར། །རྡོ་རྗེ་ཕག་མོས་ཕྱག་འཚལ་ཏེ། །མངོན་པར་བརྗོད་པ་འབུམ་པའི་རྒྱུད། །རྡོ་རྗེ་སེམས་དཔའི་མཆོག་བདེ་ཅི། །ཞེས་སོགས་ཀྱིས་གསོལ་བ་བཏབ་པའོ། །དེ་བཞིན་དུ་རྒྱུད་ཀྱི་རྒྱལ་པོ་གཞན་རྣམས་ལའང་གསོལ་བ་
འདེབས་པ་དུ་མར་རྣལ་འབྱོར་པས་ཤེས་པར་བྱའོ། །དེའི་ཕྱིར་འདི་སྐད་བདག་གིས་ཐོས་ཞེས་པའི་ཚིག་འདི་འབའ་ཞིག་གིས་རྒྱུད་ཐམས་ཅད་ཀྱི་གནས་ངེས་པར་སྟོན་དགོས་པར་འདོད་པ་ནི་ཉི་ཚེ་བའི་བློ་གྲོས་རྒྱ་ཆུང་བར་གྱུར་པ་སྟེ། སེམས་ཅན་ཐམས་ཅད་ཀྱི་སྐད་ཀྱི་རང་བཞིན་དུ་ཆོས་སྟོན་པ་གང་ཞིག་ཐམས་ཅད་མཁྱེན་པའི་རྣམ་པ་ཐམས་ཅད་པའི་སྐད་དབྱངས་བསམ་གྱིས་མི་ཁྱབ་པ་མེད་པར་ལེགས་སྦྱར་འབའ་ཞིག་གིས་ཆོས་སྟོན་པ་ཡིན་ན་སངས་རྒྱས་ཀྱང་ཡུལ་འགའ་ཞིག་གིས་སྟོན་པ་ཉི་ཚེ་བ་དང་། སྐད་འབའ་ཞིག་པ་སྨྲ་བའི་ཉི་ཚེ་བར་འགྱུར་རོ། །དེ་ལྟ་ནའང་འཕགས་པའི་ཡུལ་དུ་སྒྲ་སྨྲ་བའི་མུ་སྟེགས་པ་མངོན་པའི་ང་རྒྱལ་དང་ལྡན་པ་རྣམས་མཐོང་ནས། ཇི་ལྟར་བྲམ་ཟེ་དང་ཁྱབ་འཇུག་པ་དང་། ཞི་བ་པ་ལ་སོགས་ཀྱི་འདོད་པའི་ལྷ་ཚངས་པ་དང་ཁྱབ་འཇུག་དྲག་པོ་སོགས་ལེགས་སྦྱར་སྨྲ་བ་པོ་ཡིན་པ་དེ་བཞིན་དུ། བདག་ཅག་ནང་པ་རྣམས་ཀྱི་འདོད་པའི་ལྷ་སངས་རྒྱས་དང་བྱང་ཆུབ་སེམས་དཔའ་རྣམས་ལེགས་པར་སྦྱར་བ་སྨྲ་བ་པོ་ཡིན་ནོ་ཞེས་སངས་རྒྱས་པ་བྱིས་པའི་བློ་ཅན་རྣམས་ཀྱི་བསམ་པ་སྟེ། འདིར་སངས་རྒྱས་བྱང་སེམས་རྣམས་ནི་ལྷའི་སྐྱེ་བ་དང་འབྲེལ་བས་ལུས་ཉི་ཚེ་བ་དང་། ལེགས་སྦྱར་གྱི་སྐད་ཉི་ཚེ་བ་འབའ་ཤིག་སྨྲ་བ་པོ་མ་ཡིན་ཏེ། གདུལ་བར་བྱ་བའི་སེམས་ཅན་གྱི་དབང་གིས་སྐུ་རྣམ་པ་ཐམས་ཅད་པ་དང་། སེམས་ཅན་ཐམས་ཅད་ཀྱི་སྐད་དུ་ཆོས་སྟོན་པ་དང་། ཆོས་དེ་ཡང་དག་པར་སྡུད་པ་བྱེད་པ་པོ་ཡིན་ནོ། །དེ་བས་ན་སངས་རྒྱས་ཚད་མེད་པ་དང་། དེ་བཞིན་དུ་ཆོས་དང་དགེ་འདུན་ཀྱང་ཚད་མེད་པར་དེ་བཞིན་གཤེགས་པས་གསུངས་པ་འདིའི་ཕྱིར། གདུལ་བྱའི་དབང་གིས་གནས་གཅིག་ཏུ་ངེས་པ་མེད་ལ། གསོལ་བ་འདེབས་པ་པོ་ཡང་ཉན་ཐོས་ཀྱི་དགེ་འདུན་ལ་སོགས་པ་གཅིག་ཏུ་ངེས་པ་མེད་
པ་དང་། སྐད་ཀྱང་སེམས་ཅན་མཐའ་ཡས་པའི་སྐད་དུ་སྟོན་གྱི་ལེགས་སྦྱར་འབའ་ཤིག་གིས་མ་ཡིན་ནོ། །དེ་ལྟར་ཡང་སྡེ་སྣོད་གསུམ་ལ་སོགས་པ་ཡང་། མ་ག་དྷཱ་དང་། ཙམ་པ་ཀ་དང་། སུ་རམྨའི་ཡུལ་སོགས་ཀྱི་སྐད་མི་འདྲ་བ་ཐ་དད་དུ་མས་བསྟན་པ་ཡིན་གྱི་སྐད་གཅིག་ཁོ་ནས་མ་ཡིན་ནོ། །གང་གི་ཕྱིར་སྐད་ཉི་ཚེ་བ་འབའ་ཤིག་གིས་ཆོས་སྟོན་ན་ཐམས་ཅད་མཁྱེན་པ་མ་ཡིན་པར་འགྱུར་ན་ཡང་། འདི་ལྟར་སེམས་ཅན་གྱི་ཁམས་མཐའ་ཡས་པ་མཐའ་ཡས་པའི་སྐད་དུ་ཅིག་ཆར་ཆོས་སྟོན་པ་དེ་ནི་སྟོན་པ་པོ་ཐམས་ཅད་མཁྱེན་པ་ཉིད་ཡིན་ནོ། །དེའི་ཕྱིར་བཅོམ་ལྡན་འདས་ཀྱིས་ཆོས་གསུངས་པ་ནི་སེམས་ཅན་ཐམས་ཅད་ལ་ཕན་པའི་ཕྱིར། དོན་ལ་བརྟོན་པའི་སྒོ་ནས་སྐད་སྣ་ཚོགས་ཀྱིས་སྟོན་ཅིང་། གདུལ་བྱའི་བསམ་པ་མཐུན་པར་ཟབ་པ་དང་རྒྱ་ཆེ་བའི་ཚུལ་སྣ་ཚོགས་སུ་སྟོན་པ་ཡིན་ལ། ཕྱི་རོལ་པའི་བྲམ་ཟེ་རིགས་ཀྱི་ང་རྒྱལ་དང་ལྡན་པ་རྣམས་འདི་སྐད་སྨྲ་སྟེ། རིག་བྱེད་བཞི་བྲམ་ཟེ་དང་རྒྱལ་རིགས་དག་གིས་བཀླག་པར་བྱའི། རྗེ་རིགས་དང་དམངས་རིགས་སོགས་ཀྱིས་མ་ཡིན་ནོ། །དེ་བཞིན་གླུ་དང་གྲུབ་པའི་མཐའ་དང་སྔོན་གྱི་རབས་ཀྱི་ཆོས་རྣམས་བྲམ་ཟེའི་ཁ་ལས། བྲམ་ཟེ་དང་རྒྱལ་རིགས་དང་རྗེ་རིགས་དང་དམངས་རིགས་ཏེ་རིགས་བཞི་པོས་མཉན་པར་བྱའི། རབ་ཏུ་བྱུང་བ་འཛིན་པ་མེད་པས་ན་ཉ་པ་སོགས་གདོལ་པ་རྣམས་ཀྱིས་མ་ཡིན་ནོ་ཞེས་བཤད་པས་དེ་དག་གི་ཆོས་ནི་ཁ་ཅིག་ལ་བཀག་པའི་ཕྱིར་སེམས་ཅན་ཐམས་ཅད་ལ་ཕན་པར་བྱེད་པ་མ་ཡིན་ནོ། །སྒྲ་གཅིག་པུ་ལེགས་པར་སྦྱར་བ་བྱས་ན་མཐོ་རིས་སུ་འདོད་པ་འཇོའོ་ཞེས་ལོག་པའི་ང་རྒྱལ་ཅན་རྣམས་ཀྱི་བསམ་པའོ། །དེ་ཡང་དེ་དག་གིས། གལ་ཏེ་རིག་བྱེད་དང་རྟོག་གེ་ལ་སོགས་པའི་བསྟན་བཅོས་འདི་དམངས་རིགས་སོགས་མི་ཐམས་ཅད་ཀྱིས་ཤེས་པར་གྱུར་
ན། རིག་པ་དང་ཆོས་དང་ཡེ་ཤེས་ཐུན་མོང་དུ་གྱུར་ནས་བྲམ་ཟེ་རྣམས་ལ་སུ་ཞིག་གུས་པར་འགྱུར་སྙམ་དུ། རྫས་ལ་ཆགས་པའི་དྲང་སྲོང་གདུག་པ་ཅན་རྣམས་ཀྱིས། གླུ་དང་གྲུབ་མཐའ་སྔོན་གྱི་རབས་ལ་སོགས་པའི་ཆོས་རྣམས་ལེགས་པར་སྦྱར་བའི་སྐད་ཀྱིས་གླེགས་བམ་ལ་བྲིས་ཤིང་། རིག་བྱེད་ཀྱང་ཁ་ཐོན་གྱིས་བཀླག་པར་བྱའོ་ཞེས་པའི་ངེས་པ་བྱས་པ་ཀུན་གྱིས་ཤེས་པར་མི་སྟོན་པའི་བསམ་པས་བྱིས་པའི་སྐྱེ་བོ་རྣམས་རྨོངས་པ་ཆེན་པོ་སྐྱེད་པར་བྱེད་པ་སྟེ། དེ་ཡང་སྔོན་གྱི་དུས་སུ་རིག་བྱེད་སོགས་གླེགས་བམ་ལ་བྲིས་པར་མ་གྱུར་པའི་ཚེ་ན་སྡོམ་བརྩོན་རྣམས་ཀྱི་ཁ་ལག་ནས་སོ། །དེ་ནས་སྙིགས་མའི་དུས་ཀྱི་དབང་གིས། མི་རྣམས་ཤེས་རབ་དམན་པའི་ཕྱིར་སྡོམ་བརྩོན་རྣམས་ཀྱིས་གླེགས་བམ་ལ་བྲིས་སོ་ཞེས་བརྗོད་དོ། །དེ་ལྟ་བས་ན་ཕྱི་རོལ་པའི་བསྟན་བཅོས་སེམས་ཅན་ཀུན་ལ་སྙོམ་པའི་བརྩེ་བ་སྤང་བ། འཁོར་བའི་སྡུག་བསྔལ་སྟེར་བར་བྱེད་པ་ལོག་པའི་ང་རྒྱལ་སྐྱེད་ཅིང་། རིགས་སུ་སྨྲ་བས་མངོན་པར་ཁེངས་པར་བྱེད་པ་དག་ལ་སངས་རྒྱས་པ་རྣམས་རྗེས་སུ་ཡི་རངས་པར་མི་བྱའོ། །ཁམས་གསུམ་འདིར་ཐམས་ཅད་མཁྱེན་པས་སྐད་ཐམས་ཅད་དུ་ཆོས་བསྟན་ཅིང་སྡུད་པར་བྱེད་པ་རྣམས་ཀྱིས་སེམས་ཅན་སྣ་ཚོགས་པའི་སྐད་ཀྱིས་གླེགས་བམ་ལ་བྲིས་པ། རིག་བྱེད་ལ་སོགས་པ་འཇིག་རྟེན་པའི་དོན་ཀྱང་སྟོན་ལ། ངེས་པར་འབྱུང་བ་ཐེག་པ་གསུམ་གྱི་དོན་སྟོན་པ། འཇིག་རྟེན་ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པ་གཉིས་བསྟན་པ་འདི་ཉིད་རིས་སུ་མ་ཆད་པའི་སེམས་ཅན་ཐམས་ཅད་ཀྱིས་མཉན་པ་དང་བརྗོད་པའི་སླད་དུ་སྟེ། དེ་ལ་མོས་པའི་སེམས་ཅན་རྣམས་ཀྱིས། ཐམས་ཅད་མཁྱེན་པས་བསྟན་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འཇིག་རྟེན་དང་འཇིག་རྟེན་
ལས་འདས་པའི་དོན་སྟོན་པར་བྱེད་པ་དེ་དག་ཉན་པར་བྱེད། ཀློག་པར་བྱེད། ཁ་ཐོན་དུ་འདོན་པར་བྱེད། གཞན་དག་ལ་རྒྱ་ཆེར་ཡང་དག་པར་རབ་ཏུ་སྟོན་པར་བྱེད། རབ་ཏུ་གནས་པར་བྱེད། མེ་ཏོག་སྣ་ཚོགས་དང་། སྤོས་སྣ་ཚོགས་དང་། དྲི་དང་ཕྱེ་མ་གོས་དང་རིན་པོ་ཆེའི་རྒྱན་ལ་སོགས་པ་སྣ་ཚོགས་ཀྱིས་མཆོད་པར་བྱེད། མཆོད་པར་བྱས་ནས་ཡན་ལག་ལྔས་ཕྱག་འཚལ་བར་བྱེད་དོ། །དེ་ལྟར་ཐམས་ཅད་མཁྱེན་པས་བསྟན་པའི་ཆོས་གཞན་ལ་ཕན་པར་བྱེད་པ་དེ་དག་ནི། སེམས་ཅན་སོ་སོའི་མོས་པའི་དབང་གིས་གཞན་ལ་ཕན་པར་བྱེད་པའི་སླད་དུ་དེ་བཞིན་གཤེགས་པས་རིགས་དང་རིགས་མ་ཡིན་པའི་དབང་གིས་འགའ་ཞིག་ལ་བསྒྲུབ་པ་དང་འགའ་ཞིག་ལ་བཀག་པ་མེད་དེ་ད་ལྟ་ཡང་མ་ནུབ་པར་གནས་སོ། །རེ་ཤིག་ཡུལ་གྱི་ཁྱད་པར་གཞན་དང་གཞན་མང་པོ་ལྟ་ཞོག་གི། དེ་བཞིན་གཤེགས་པ་མངོན་པར་སངས་རྒྱས་པ་འཕགས་པའི་ཡུལ་འདིར། བཅོམ་ལྡན་འདས་ཡོངས་སུ་མྱ་ངན་འདས་པར་གྱུར་པ་ན་སྡུད་པར་བྱེད་པ་དག་གིས་ཐེག་པ་གསུམ་གླེགས་བམ་ལ་བྲིས་ཏེ། དེ་བཞིན་གཤེགས་པའི་ངེས་པས་སྡེ་སྣོད་གསུམ་མ་ག་དྷཱའི་སྐད་ཀྱིས་བྲིས་སོ། །མདོ་སྡེ་ནི་སིནྡྷུའི་སྐད་ཀྱིས་སོ། །ཕ་རོལ་དུ་ཕྱིན་པའི་ཚུལ་དང་སྔགས་ཀྱི་ཚུལ་ནི་ལེགས་པར་སྦྱར་བའི་སྐད་ཀྱིས་སོ། །རྒྱུད་དང་རྒྱུད་གཞན་དག་ནི། ལེགས་སྦྱར་དང་། ཐ་མལ་པ་དང་། ཟུར་ཆག་དང་། ལེགས་པར་སྦྱར་བ་མ་ཡིན་པ་རི་ཁྲོད་པ་ལ་སོགས་པའི་སྐད་ཀྱིས་ཏེ། དེ་ལྟར་ཐམས་ཅད་མཁྱེན་པས་བསྟན་པའི་ཆོས་རྣམས་སྡུད་པར་བྱེད་པ་པོ་དག་གིས་བྲིས་སོ། །དེ་བཞིན་དུ་བོད་ཀྱི་ཡུལ་དུ་ཐེག་པ་གསུམ་པོ་བོད་ཀྱི་སྐད་ཀྱིས་བྲིས་ཏེ། རྒྱ་ནག་ཏུ་རྒྱ་ནག་གི་སྐད་ཀྱིས་སོ། །རྒྱ་ནག་ཆེན་པོར་རྒྱ་ནག་ཆེན་པོའི་སྐད་ཀྱིས་སོ། །དེ་བཞིན་དུ་འགྲེལ་ཆེན་ལས་གསུངས་པ་
ལྟར་གཞན་ཡང་ཤེས་པར་བྱ་སྟེ། མདོར་ན་ཐེག་པ་གསུམ་དང་། ཐེག་པ་ཆེན་པོ་གསང་སྔགས་རྒྱུ་དང་འབྲས་བུའི་བདག་ཉིད་རྣམས་སྡུད་པར་བྱེད་པ་པོ་སྣ་ཚོགས་ཀྱིས་སེམས་ཅན་རྣམས་གདུལ་བར་བྱ་བའི་དོན་དུ་ཡུལ་སྣ་ཚོགས་ཀྱིས་སྐད་ཀྱིས་བྲིས་པ་ཡིན་ནོ། །དེ་ལྟ་བུའི་ལུང་དང་རིགས་པ་འདིས་དཔྱད་ན་སངས་རྒྱས་བཅོམ་ལྡན་འདས་ནི་ཐམས་ཅད་མཁྱེན་པའི་སྐད་ཀྱིས་ཆོས་སྟོན་པ་ཡིན་གྱི་ཁྱབ་འཇུག་དང་དྲག་པོ་ལ་སོགས་པ་གཞན་ནི་མ་ཡིན་ནོ། །ཅི་སྟེ་ཁྱབ་འཇུག་ལ་སོགས་པའི་ནང་ན་ཡོན་ཏན་འདི་དག་ཡོངས་སུ་རྫོགས་པ་འགའ་ཞིག་ཡོད་ན། དེ་ཡང་བདག་ཅག་གིས་རྣམ་པ་ཐམས་ཅད་དུ་ཕྱག་དང་མཆོད་པ་བཀུར་བར་བྱ་བ་ཡིན་ནོ། །བར་སྐབས་ཀྱི་ཚིགས་སུ་བཅད་པ་འགྲེལ་པ་ལས་གསུངས་པ། །མཁས་པ་རྣམས་ནི་སྐྱེས་བུའི་རྒྱུད་ཀྱི་ཡོན་ཏན་ལ་གུས་ཏེ། །ཡོན་ཏན་ཡོད་མེད་མ་དཔྱད་པར་སངས་རྒྱས་དང་དབང་ཕྱུག་སོགས་ལ་མིན་ནའང་། །ཡོན་ཏན་མེད་པ་རང་གི་འདོད་པའི་ལྷར་བཟུང་སྟེ་དེ་ལའང་གུས་པ་གང་། །དེ་བླུན་པོ་མི་དགེའི་ལས་ལས་སྐྱེས་པ་ཡིན་ནོ། །སེམས་ཅན་རྣམས་ལ་ཕན་པའི་ཆོས། །བྲམ་ཟེ་མཁས་པར་གྲགས་པ་མིན་ཡང་། ཐ་མལ་རྣམས་ཀྱང་སྟེན་པར་བྱེད་པ་ཡོད་ལ། །བྲམ་ཟེ་མཁས་པས་བདག་གི་དགའ་བ་དང་མི་དགས། །སེམས་ཅན་རྣམས་ལ་འཚེ་བ་ཆོས་སུ་སྟོན་ནོ། །མ་ཡིན་ན་ཡང་སྲིན་མོའི་རིགས་ཀྱིས་འཇིག་རྟེན་ན། །རང་གི་བུ་ལ་བཟའ་བར་སེམས། །གང་ཞིག་བུ་ལ་བརྩེ་མེད་པ། །དེ་ལ་སྐྱེ་བོ་གཞན་ལྟ་ཅི། །སྨྲོས་ཏེ་བརྩེ་བ་ག་ལ་ཡོད། མཆོད་སྦྱིན་ལ་སོགས་པ་ཆོས་ཀྱི་རྒྱུ། །གང་ལ་ཕ་མ་གསོད་པ་ནི་རུང་ཞེས། །རང་དོན་ལྷུར་ལེན་བྲམ་ཟེས་བརྗོད། །པ་ཡིན་ལ། །དེ་ལྟ་བུ་ལ་གཞན་དོན་ཅི་ཞིག་གཏམ་སྟེ་སྨྲོས་མ་དགོས་ཞེས་སོ། །ཞེས་སོ། །དེའི་ཕྱིར་ཚིག་རྣམས་ནི་དོན་གོ་བའི་ཆེད་དུ་བཀོད་པ་ཙམ་ཡིན་པས་དོན་གོ་བར་གྱུར་ན་ལེགས་སྦྱར་ལྟ་བུ་འབའ་ཞིག་ལ་ལྟོས་པ་མིན་པས། དོན་ལ་རྟོན་པའི་བདག་ཉིད་རྣམས་ཀྱིས་ཚིག་ལ་
འཆེལ་བ་གཙོ་བོར་མི་བྱ་སྟེ། འགྲེལ་ཆེན་གྱི་མདོར་བསྡུས་དང་པོར། ཀུན་མཁྱེན་ལམ་དོན་གཉེར་བ་རྣམས་ལ་ལེགས་པར་སྦྱར་བའི་སྒྲ་དང་དེ་མ་ཡིན་པའི་སྒྲ་མིན་རྣམ་དཔྱད་ཆེན་པོ་མེད། དེ་རྒྱུ་མཚན་ཅིས་ན། སྣ་ཚོགས་ཡུལ་སྐད་ལེགས་པར་མ་སྦྱར་བ་ངན་པ་ཡིས་ཀྱང་དོན་ཆེ་བ་འབྱུང་བའི་ཆེན་པོ་རྣམས་ཀྱི་ལམ་ལ་རྟག་ཏུ་འཇུག །སེམས་ཅན་རྣམས་ཀྱི་རང་རང་གི་མོས་པའི་སེམས་ཀྱི་དབང་གིས་ཐམས་ཅད་མཁྱེན་པའི་གསུང་སོ་སོའི་སྐད་དུ་སྣང་བའང་གཞན་ལ། །ལུང་སྟོན་པའམ་བརྡའ་སྤྲོད་པ་དག་ལ་ལྷ་ཀླུས་བཀོད་པའི་རྐྱེན་དང་རང་བཞིན་སོགས་སུ་ཕྱེ་བའི་སྒྲ་སོགས་འདི་རིགས་འདི་མི་རིགས་ཞེས། རྩོད་པ་དོན་གཉེར་རྣམས་ཀྱི་སྐད་ཀྱང་གཞན། །ཡུལ་གྱི་སྐད་དང་ཟུར་ཆག་སྒྲ་ལས་ཀྱང་། །རྣལ་འབྱོར་ལྡན་པས་དོན་ནི་འཛིན་བྱེད་དེ། །ཆུ་ལ་འོ་མ་ངེས་པར་ཞུགས་པ་དེ། །ངང་པས་རབ་ཏུ་ཕྱུང་ནས་འཐུང་བར་བྱེད། །པ་བཞིན་ནོ་ཞེས་ཤེས་ཏེ་ཟླ་བོ་དངོས་པོའི་དཔེའོ། །དོན་དམ་དེ་ཁོ་ན་ཉིད་ཡུལ་ལ་རྟག་ཏུ་ནི། །ཆེན་པོ་རྣམས་དག་ཚིག་ལ་རྟོན་པ་མིན། །ཡུལ་གྱི་མིང་རྣམས་ཀྱིས་ཀྱང་དོན་ཤེས་པར་གྱུར་པ་ལ། བསྟན་བཅོས་སྒྲ་ལས་བཤད་པའི་རྐྱེན་སོགས་ལེགས་པར་སྦྱར་བའི། དག་གིས་ནི་ཅི་ཞིག་བྱ། །སྟེ་དེས་ལྷག་པར་གོ་རྒྱུ་ཅི་ཡང་མི་བྱེད་དོ།། །གང་ཞིག་ཟུར་ཆག་པའི་སྒྲ་དང་ཟུར་མ་ཆག་པ་ལེགས་སྦྱར་གྱི་སྒྲར་གྱུར་པས། །བརྗོད་པ་དེ་ཉིད་ཡེ་ཤེས་མ་ཡིན་ཞིང་། གང་ཞིག་འགྲོ་བ་དག་ལ་སོ་སོའི་སྐད་ཉི་ཚེ་བ་ཙམ་ལས། ཐམས་ཅད་ཀྱི་སྐད་དུ་གོ་མི་ནུས་པ་དེ་ནི་ཐམས་ཅད་མཁྱེན་པའི་གསུང་མ་ཡིན་པ་དེའི་ཕྱིར་དོན་དམ་པ་སྟོན་པའི་རྗོད་བྱེད་ལེགས་སྦྱར་ཁོ་ན་དགོས་པ་མིན་ནོ་ཞེས་སོ།། ཞེས་གསུངས་པ་ལྟར་རྒྱུད་ཀྱི་ཚིག་ཐམས་ཅད་ལེགས་སྦྱར་འབའ་ཞིག་ལ་བརྟེན་དགོས་པ་མ་ཡིན་ནོ། །དེའི་ཕྱིར་ལས་སྣ་ཚོགས་བསྒྲུབ་པའི་རིག་སྔགས་རྣམས་ཀྱང་ཡུལ་སྣ་ཚོགས་ཀྱི་སྐད་དུ་བྱིན་གྱིས་བརླབས་པ་ཡོད་པའང་ཤུགས་ཀྱིས་ཤེས་སོ། །ཇི་སྐད་བཤད་པ་དེ་
ལྟར་རྟོགས་ན་རྒྱུད་ཐམས་ཅད་ཀྱི་ཀླད་དུ་ཐབས་ཤེས་མཚོན་པའི་ཨེ་ཝྃ་འབའ་ཞིག་དགོས་པའི་ངེས་པ་མེད་པར་ཤེས་ནུས་ཏེ། ཨེ་ཝྃ་ལས་གཞན་པའི་མིང་དུ་མས་ཀྱང་ཐབས་ཤེས་མཚོན་ནུས་པའི་ཕྱིར་རོ། །དེ་ཡང་དཔེར་ན་བུད་མེད་དང་མི་མོ་དང་ན་ཆུང་མ་ཞེས་པའི་མིང་དེ་དག་སྐྲ་དང་ནུ་མར་ལྡན་པའི་བུད་མེད་ཀྱི་དངོས་པོ་གོ་བར་བྱེད་པ་ལ་མཚུངས་བཞིན་དུ་བུད་མེད་གཅིག་པུ་དེ་བརྗོད་པའི་གཙོ་བོའི་མིང་ཡིན་མི་དགོས་པ་བཞིན་ནོ། །དེ་བཞིན་དུ་ཨེ་ཡིག་དང་། གསང་བ་དང་། པདྨ་དང་། ཆོས་འབྱུང་དང་། ནམ་མཁའི་ཁམས་དང་། བདེ་བ་ཆེན་པོའི་གནས་དང་། སེང་གེའི་ཁྲི་དང་། བྷ་ག་དང་། གཞན་ཡང་གསང་བའི་བརྡར་གྱུར་པའི་མིང་རྣམས་ཀྱི་ནང་ནས་ཨེ་གཅིག་པུ་གཙོ་བོའི་མིང་མ་ཡིན་ཏེ། དེ་ཐམས་ཅད་ཀྱིས་ཀྱང་རྣམ་པ་ཐམས་ཅད་པའི་སྟོང་པ་ཉིད་གོ་བར་བྱེད་པའི་ཕྱིར་རོ། །དེ་བཞིན་དུ་ཝཾ་ཡིག་དང་། བདེ་བ་ཆེན་པོ་དང་། ཆགས་པ་ཆེན་པོ་དང་། ལྷན་ཅིག་སྐྱེས་པ་དང་། མཆོག་ཏུ་མི་འགྱུར་བ་དང་། ཐིག་ལེ་དང་། དེ་ཉིད་དང་། ཡེ་ཤེས་དང་། རྣམ་པར་དག་པའི་སེམས་ཀྱི་མིང་རྣམས་ཀྱི་ནང་ནས་ཝཾ་ཡིག་གཅིག་པུ་གཙོ་བོའི་མིང་མ་ཡིན་ཏེ། དེ་ཐམས་ཅད་ཀྱིས་ཕྱག་རྒྱ་ཆེན་པོ་ལྷན་ཅིག་སྐྱེས་པའི་དགའ་བ་འགྱུར་བ་མེད་པའི་བདེ་བ་གོ་བར་བྱེད་པའི་ཕྱིར་རོ། །དེ་བཞིན་དུ་ཨེ་ཝཾ་དག་ལྷན་ཅིག་ཏུ་བཀོད་པས། རྣམ་ཀུན་མཆོག་ལྡན་གྱི་སྟོང་ཉིད་དང་དམིགས་པ་མེད་པའི་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་ཀྱི་ངོ་བོ་གོ་བར་བྱེད་པས་ན། ཨེ་ཝཾ་གྱི་ཡི་གེ་དང་། རྡོ་རྗེ་སེམས་དཔའ་དང་། བྱང་ཆུབ་ཀྱི་སེམས་དང་། དུས་ཀྱི་འཁོར་ལོ་དང་། དང་པོའི་སངས་རྒྱས་དང་། ཤེས་རབ་དང་ཐབས་ཀྱི་བདག་ཉིད་དང་། རྣལ་འབྱོར་དང་། ཤེས་པ་དང་ཤེས་བྱའི་བདག་ཉིད་དང་། གཉིས་སུ་མེད་པ་དང་། ཐོག་མ་དང་ཐ་མ་མེད་པ་དང་།
ཞི་བ་དང་། འདུས་པ་དང་། སྡོམ་པ་ལ་སོགས་པ་མིང་དུ་མ་རྣམས་ཀྱིས་ཤེས་རབ་དང་ཐབས་ཀྱི་བདག་ཉིད་གཉིས་སུ་མེད་པའི་རྣལ་འབྱོར་རིགས་མེད་པ་དེ་ཉིད་རྣལ་འབྱོར་པས་རྟོགས་པར་བྱའོ། །དེ་ལྟར་ལྷ་རྣམས་ལྷའི་སྐད་ཀྱིས་ཡོངས་སུ་སྨིན་པའི་དོན་དུ་འདུས་པ་ལ་སོགས་པའི་རྒྱུད་ཀྱི་དང་པོར་ཨེ་ཝཾ་གྱི་ཡི་གེ་ཉིད་བཅོམ་ལྡན་འདས་ཀྱིས་ངེས་པའི་ཚིག་གི་ཚུལ་གྱིས་བསྟན་ཅིང་། གདུལ་བྱའི་ངོར་བཅོམ་ལྡན་འདས་ཀྱི་རྐན་ལ་སོགས་པའི་གནས་ཀྱི་གསུངས་པ་དེ་ལྟར་མ་ཐོས་པར་སྡུད་པ་པོ་རྣམས་ཀྱིས་རྒྱུད་ཀྱི་ཐོག་མར་བྲིས་པ་མ་ཡིན་པ་དེའི་ཕྱིར་ཡི་གེ་གཉིས་པོ་འདིའི་ངེས་པའི་དོན་བརྗོད་ན། ཨ་ཡིག་ནམ་མཁའི་ཁམས་དང་། གསང་བའི་པདྨ་དང་། དེའི་རྗེས་སུ་རྣམ་པར་བཅད་པ་ཉི་མ་དང་རྡུལ། དེའི་རྗེས་སུ་ཨ་ཡིག་སྒྲ་གཅན་དང་རྣམ་པར་ཤེས་པ་བདེ་བས་བྱིན་གྱིས་བརླབས་པའོ། །དེའི་འོག་ཏུ་རྗེས་སུ་ང་རོ་ཟླ་བ་དང་ཁུ་བའོ། །ཨ་ཡིག་མཁའ་ཁམས་དང་། སྒྲ་གཅན་རྣམ་ཤེས་འདི་གཉིས་ཀྱི་བར་དུ་རྣམ་པར་བཅད་པ་ཉི་མ་དང་རྡུལ་ནི་ཨུ་ཉིད་དུ་འགྱུར་བ་ཐོབ་སྟེ། དེས་ན་དོན་དམ་པའི་བདེན་པ་ལས་ཡོན་ཏན་མེད་དོ། །ཡོན་ཏན་མེད་པའི་ཕྱིར་ཡ་ཎར་འགྱུར་ཏེ། ཕྱི་མིའི་ཨ་ཡིག་སྒྲ་གཅན་དང་ལྷན་ཅིག་ཝ་ཉིད་དོ། །རྗེས་སུ་ང་རོ་ཟླ་བ་ཁུ་བ་ཡང་དག་པར་སྦྱར་ཏེ་ཝྃ་ཡིག་གོ། དེ་བཞིན་དང་པོའི་ཨ་ཡིག་མཁའ་ཁམས་དང་། གསང་བའི་པདྨ་ནི་རྟེན་གནས་ཀྱི་ཕྱིར་བདུན་པའི་གཅིག་ཚིག་གི་མཐའ་ཅན་དེ། ཨ་ཡིག་ཕ་རོལ་གྱི་རྣམ་དབྱེ་དེ་ཡི་ཨི་ཡིག་དང་ལྷན་ཅིག་ཡོན་ཏན་ལྡན་པར་འགྱུར་ཏེ་ཨེ་ཡིག་གོ། ཨེ་ཡིག་ནམ་མཁའི་ཁམས་རྟེན་པར་འགྱུར་བའི་དབུས་སུ། ཝྃ་ཡིག་གང་ཞིག་རྣམ་བཅད་དང་། ཨ་ཡིག་དང་ཐིག་ལེ་ནི་རིམ་བཞིན་ཕྱི་རོལ་ཏུ་ཉི་མ་སྒྲ་གཅན་ཟླ་བ་དང་ནང་དུ་རྡུལ་དང་ཀུན་གཞིའི་རྣམ་ཤེས་དང་།
ཁུ་བའི་བདག་ཉིད་ཅན་བརྟེན་པ་ཡིན་པ་དེ་ལྟར་ཕྱི་དང་ལུས་དང་གཞན་དཀྱིལ་འཁོར་ལ་སྐུ་གསུང་ཐུགས་སུ་ཡང་ཤེས་པར་བྱའོ། །འདིར་རྩ་བའི་རྒྱུད་ལས་གསུངས་པ། ཨེ་ཡིག་མཁའ་ཁམས་དབུས་སུ་ནི། །སངས་རྒྱས་ཀུན་གྱི་བདེ་བ་ལེན། །ཝྃ་ཡིག་རྡོ་རྗེ་སེམས་དཔའ་འདི། །སྐུ་གསུང་ཐུགས་ཀྱི་རྣལ་འབྱོར་པས། །ཐིག་ལེ་ཟླ་བ་ཁུ་བ་སྐུ། །རྣམ་པར་བཅད་པ་རྡུལ་ཉི་གསུང་། །ཨ་ཡིག་མུན་ཅན་ཐུགས་རབ་བརྗོད། །མཁའ་ཁམས་ཨེ་ལ་རྣམ་པར་གནས། །སྐུ་གསུང་ཐུགས་ཀྱི་རྣལ་འབྱོར་གྱིས། །སྐུ་གསུང་ཐུགས་ཀྱི་དཀྱིལ་འཁོར་ལ། །སྐུ་གསུང་ཐུགས་དང་ཆགས་པ་ཡིས། །སྲིད་གསུམ་བདག་ཉིད་དག་ལ་གནས། །ཞེས་གསུངས་སོ། །དེས་ན་རྒྱུ་འདིས་འདུས་པ་ལ་སོགས་པར་ཨེ་ཝྃ་ཞེས་པའི་མིང་འདིས་བརྗོད་པའི་དོན་དེ་ཉིད། མངོན་བརྗོད་འབུམ་པ་ལ་སོགས་པའི་རྒྱུད་རྒྱལ་རྣམས་སུ་གསང་བ་ཞེས་པ་ལ་སོགས་པར་དེ་བཞིན་གཤེགས་པས་བསྟན་ཏོ། །དེ་བཞིན་བླ་མའི་མན་ངག་གིས་རྒྱུད་གཞན་དང་གཞན་དུ་དོན་དེ་ཉིད་ལ་དགོངས་པའི་སྐད་གཞན་དང་གཞན་གྱིས་བསྟན་པ་རྟོགས་པར་བྱའོ། །འདིར་རྩ་བའི་རྒྱུད་ལས། དགོངས་པའི་སྐད་དང་དེ་བཞིན་མིན། །ཇི་བཞིན་སྒྲ་དང་དེ་བཞིན་མིན། །དྲང་བའི་དོན་དང་ངེས་དོན་ཏེ། །རྒྱུད་ནི་མཐའ་དྲུག་མཚན་ཉིད་དོ། །ཞེས་གསུངས་པའི་ཕྱིར་མིང་གཅིག་རྟག་ཏུ་གཙོ་བོ་མ་ཡིན་ནོ། །སྔགས་ཀྱི་ཐེག་པ་འདིར་ཡིད་ཆེས་པ་རྣམ་པ་གསུམ་བཅོམ་ལྡན་འདས་ཀྱིས་འདི་སྐད་དུ། དང་པོར་རྒྱུད། དེ་ནས་བླ་མ། དེ་ནས་བདག་ཉིད་ལ་ཡིད་ཆེས་པ་དེ་གསུམ་གྱིས་སངས་རྒྱས་ཀྱི་ལམ་ཡོངས་སུ་དག་པར་འགྱུར་རོ། །དེ་གསུམ་དང་མི་ལྡན་པར་བླ་མས་སློབ་མ་ལ་བསྟན་པ་ནི་སངས་རྒྱས་ཀྱི་འབྲས་བུར་མི་འགྱུར་ཏེ་སློབ་མའི་དད་པ་དམན་པའི་
ཕྱིར་འཇིག་རྟེན་པའི་འབྲས་བུར་འགྱུར་པར་གསུངས་སོ། །དེ་དཔེར་ན་རྣམ་པར་རྟོག་པ་དང་བྲལ་བའི་སེམས་སུ་བྱས་ཏེ་ཉི་མ་གཅིག་ལ་མཚན་མ་བརྟག་པས་དུ་བ་སོགས་མཐོང་བས་ཡིད་ཆེས་པར་མ་གྱུར་ན་བཅོམ་ལྡན་འདས་རྫུན་གསུང་བར་འགྱུར་རོ་ཞེས། རྒྱུད་ལས་གསུངས་པའི་ཆོ་ག་བཞིན་བླ་མའི་མན་ངག་གིས་ལེགས་པར་བསྟན་པ་ལྟར་ཡིད་ཆེས་པར་ནུས་ཏེ། གཞན་དཀྱིལ་འཁོར་འཁོར་ལོ་བསྒོམ་པ་སོགས་ལ་ཉི་མ་གཅིག་གིས་མཚན་མ་མཐོང་བར་མ་གསུངས་སོ། །གལ་ཏེ་བླ་མས་ལེགས་པར་མ་བསྟན་པ་དང་། སློབ་མ་རང་གིས་བསྟན་པ་བཞིན་ནན་ཏན་མ་བྱས་པ་ནི་མ་གཏོགས་སོ། །དེ་ལྟར་ཡིད་ཆེས་པ་གསུམ་དང་ལྡན་པས་དངོས་གྲུབ་ཐོབ་པར་འགྱུར་རོ། །རྒྱུད་རྣམས་སུ་སྐུ་གསུང་ཐུགས་ཀྱི་རིགས་གསུམ་གྱི་ཞལ་གསུམ་པ། སྐུ་གསུང་ཐུགས་ཡེ་ཤེས་རྡོ་རྗེའི་རིགས་བཞིའི་བདག་ཉིད་ཀྱི་ཞལ་བཞི་པ། རིགས་བཞི་དང་རང་བཞིན་གྱི་རིགས་ལྷན་ཅིག་པའི་རིགས་ལྔ་དང་། རིགས་ལྔ་དང་རང་བཞིན་གྱི་རིགས་གཅིག་དང་བཅས་པས་རིགས་དྲུག་གི་བདག་ཉིད་བརྗོད་བྱར་འགྱུར་རོ། །རིགས་བཞིའི་རྒྱུད་ལ་རིགས་བཞིའི་བདག་ཉིད་བརྗོད་པར་བྱ་བ་སྟེ། ཉི་མ་དང་ཟླ་བ། སྒྲ་གཅན་དང་དུས་མེ། རྡུལ་དང་ཁུ་བ། སེམས་དང་ཡེ་ཤེས་གཅིག་ཏུ་སྦྱོར་བའོ། །འདི་ཉིད་མཚན་ཡང་དག་པར་བརྗོད་པ་ལས། རྡོ་རྗེ་ཉི་མ་སྣང་བ་ཆེ་སོགས་ཚིགས་སུ་བཅད་པ་གསུམ་གྱིས་བསྟན་ཏོ། །གསུང་འདིའི་ཕྱིར། དག་པ་དང་ཆོས་དང་སྔགས་དང་དབྱིབས་ཀྱི་བདག་ཉིད་ཀྱི་རྡོ་རྗེ་སེམས་དཔའ་དུས་ཀྱི་འཁོར་ལོར་བརྗོད་པའོ། །ཡང་ཕུང་ཁམས་ཀྱི་དབྱེ་བས་རིགས་ལྔའི་བདག་ཉིད་དེ། གདོང་ལྔ་ཟུར་ཕུད་ལྔ་དང་ལྡན་སོགས་ཚིགས་བཅད་གཅིག་
གིས་སོ། །དེ་བཞིན་དུ་ཕུང་ཁམས་ཀྱི་དབྱེ་བས་རིགས་དྲུག་གི་བདག་ཉིད་ནི། རྡོ་རྗེ་འཇིགས་བྱེད་འཇིགས་པར་བྱེད། །ཁྲོ་བོའི་རྒྱལ་པོ་གདོང་དྲུག་འཇིགས། །མིག་དྲུག་ལག་དྲུག་སྟོབས་དང་ལྡན། །ཞེས་དང་། ཞལ་གྱི་དབྱེ་བས་རིགས་བརྒྱ་པ་ཡང་། ཀེང་རུས་མཆེ་བ་གཙིགས་པ་པོ། །ཧ་ལཱ་ཧ་ལ་གདོང་བརྒྱ་པ། །ཞེས་པས་བསྟན་ཏོ། །རྒྱུད་འདིར་སྟོན་པ་པོའི་ངོ་བོ་ཉིད་བསྟན་པ་ཡི་གེ་ཉེར་གསུམ་པོས་སྟོང་པ་ཉིད་དང་སྙིང་རྗེ་དབྱེར་མེད་པ་བྱང་ཆུབ་ཀྱི་སེམས་བདེ་བ་ཆེན་པོ་བསྟན་ཏེ། སེང་གེའི་ཁྲི་ཞེས་པས་ནམ་མཁའི་ཁམས་རྣམ་པ་ཐམས་ཅད་པའི་གནས་བསྟན་པའོ། །སངས་རྒྱས་ནི་རྡོ་རྗེ་སེམས་དཔའོ། །རྣལ་འབྱོར་ཞེས་པ་དོན་ཆེན་པོ་མཆོག་ཏུ་མི་འགྱུར་བའོ། །འདི་མཚན་ཡང་དག་པར་བརྗོད་པ་ལས། འདི་ལྟར་སངས་རྒྱས་བཅོམ་ལྡན་འདས་ནས། ཐེག་པ་ཆེན་པོའི་ཚུལ་གྱི་མཆོག་ཅེས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལ་བསྟོད་པའི་ཚིགས་བཅད་བཅུ་བཞིར་བསྟན་ཏེ་རྒྱུད་ཐམས་ཅད་དུའང་བརྗོད་བྱ་འདི་ཆུང་འབྲིང་ཆེན་པོའི་སེམས་ཅན་གྱི་བསམ་པའི་དབང་གིས་བཅོམ་ལྡན་འདས་ཀྱིས་ཡང་དག་པར་བརྗོད་དོ། །དེ་བཞིན་དུ་སྟོང་པ་ཡེ་ཤེས་ལ་སོགས་པ་ཡང་། གསང་སྔགས་དོན་ཀུན་སྐྱེད་པ་པོ་སོགས་ཚིགས་བཅད་གཅིག་གིས་སོ། །དེ་ལྟར་མིང་མཐའ་ཡས་པ་དག་གིས་ཆོས་སྟོན་པ་ཤེས་པར་བྱས་ནས་ཉི་ཚེ་བའི་ཚིག་གི་འཆད་ཚུལ་ལ་འཆེལ་པ་དོན་ལ་རྟོན་པ་དང་བྲལ་བ་གདུག་པའི་སློབ་དཔོན་དེ་བཞིན་གཤེགས་པའི་སྙིང་པོའི་དོན་ལས་ཕྱི་རོལ་དུ་གྱུར་པ་ཡུལ་དང་དབང་པོའི་ཉེ་བར་སྤྱོད་པ་ལ་ཆགས་པ་རྒྱུད་དོན་ཟབ་མོ་གཞན་གྱི་དོན་མ་མཐོང་པས་རྒྱུད་ཆེན་པོ་གཞན་དང་གཞན་ལ་སངས་རྒྱས་ཀྱི་བཀའ་ཡིན་མིན་ཐེ་ཚོམ་ཟ་ཞིང་བདེན་པ་མིན་པ་རྫུན་གྱིས་སྐྱོན་གདགས་པ་རྣམས་ལ་རང་དང་གཞན་གྱི་གྲུབ་མཐའ་ལ་སྐྱོན་འཛིན་པའི་རྩ་བའི་ལྟུང་བ་
དྲུག་པ་འཕོག་ཅིང་། ཆོས་སྤང་བས་མནར་མེད་དུ་འགྲོ་བར་འགྱུར་རོ་ཞེས་གསུངས་སོ། །གསུམ་པ་འཁོར་ཕུན་སུམ་ཚོགས་པ་ནི། གོང་མའི་ཚིག་མཐའི་བདག་སྒྲ་པ་ཡིག་དང་འབྲེལ་བའི་ལྷ་མཆོག་རྣམས་ཀྱིས་བཏུད་ལ་ཞེས་པ་ཡི་གེ་བདུན་གྱིས་བསྟན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དེར། ལྷ་མཆོག་ཅེས་མི་བསྐྱོད་པ་སོགས་སངས་རྒྱས་དང་ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་དང་། གཙུག་ཏོར་ལ་སོགས་པ་ཁྲོ་བོའི་རྒྱལ་པོ་དང་། དབང་ཕྱུག་སོགས་ལྷ་དང་། མཐའ་ཡས་སོགས་ཀླུ་དང་། དེ་དག་གི་ཡུམ་རྡོར་དབྱིངས་མ་ནས་གཏུམ་མོ་རྣམས་ཀྱི་བར་ཏེ་དེ་ལྟར་ལྷ་དང་ལྷ་མོའི་ཚོགས་དཀྱིལ་འཁོར་གྱི་འདུས་པ་རྣམས་ཀྱིས་གཙོ་བོ་གང་གི་ཞབས་ཀྱི་པདྨ་ལ་རབ་ཏུ་བཏུད་པར་གྱུར་པ་ཁམས་གསུམ་པོས་ཞབས་ཀྱི་པདྨ་ལ་ཕྱག་བྱས་པ། ཁམས་གསུམ་པའི་ཆོས་ཀྱི་འཁོར་ལོས་སྒྱུར་བ་ཆེན་པོ། མཆོག་གི་དང་པོའི་སངས་རྒྱས་རིགས་མེད་པ་བཅོམ་ལྡན་འདས་དུས་ཀྱི་འཁོར་ལོ་ཉིད་ལ་ཞེས་སོ། །དུས་ཕུན་སུམ་ཚོགས་པ་ནི་ཤུགས་ཀྱིས་བསྟན་ཏེ་དེ་ལྟར་སྟོན་འཁོར་ཕུན་སུམ་ཚོགས་པ་འཛོམས་ནས་རྒྱུད་ཀྱི་རྒྱལ་པོ་གསུང་བའི་དུས་ནག་པའི་ཉ་ལ་ཞེས་སོ། །གཉིས་པ་གླེང་བསླང་བ་ལ། ཞུ་བ་པོ་དང་། གང་ཞུས་པའི་ཆོས་གཉིས་ལས། དང་པོ་འཁོར་གྱི་གཙོ་བོས་གླེང་བསླང་བ་གསོལ་བ་འདེབས་པ་པོའི་ངོ་བོ་ཉིད་ཀྱི་གནས་པ་ནི། རྒྱལ་པོ་ཟླ་བ་བཟང་པོ་ཡིས། མགོ་བོས་རབ་ཏུ་ཕྱག་འཚལ་ལག་པའི་པདྨ་སྦྱར་བ་ཡན་ལག་མཆོག་ལ་བཞག་ནས་ཞུས་པ་ནི། ཞེས་པ་ཡི་གེ་ཉི་ཤུ་རྩ་བརྒྱད་ཀྱིས་བསྟན་ཏེ། ཡུལ་ཤམ་བྷ་ལའི་རྒྱལ་པོ་ཕྱག་ན་རྡོ་རྗེས་སྤྲུལ་པ་མཚན་ཟླ་བ་བཟང་པོ་ཡིས། བཅོམ་ལྡན་འདས་གང་གི་ཞབས་ཀྱི་པདྨ་ལ་མགོ་བོས་བཏུད་པའི་སྒོ་ནས་
རབ་ཏུ་གུས་པའི་ཕྱག་འཚལ་ཞིང་ལག་པའི་པདྨ་ཁ་སྦྱར་བ་ཡན་ལག་གི་མཆོག་མགོ་བོ་ལ་བཞག་ནས་ཞུས་པ་ནི། ཞེས་སོ། །སྐབས་འདིར་བློ་དམན་པ་ཁ་ཅིག་འདི་སྙམ་དུ། རྡོ་རྗེ་ཐེག་པའི་རྒྱུད་ཐམས་ཅད་ཀྱི་ཞུ་བ་དང་སྡུད་པ་པོ་ཕྱག་ན་རྡོ་རྗེ་ཡིན་ནའང་། འདིར་ནི་ཤམ་བྷ་ལའི་ཡུལ་གྱི་ཀ་ལཱ་པའི་གྲོང་ཁྱེར་གྱི་བདག་པོ་རྒྱལ་པོ་ཉི་མའི་འོད་ཀྱི་ལྷ་མོ་སྟེ་དགའ་མ་རྣམ་པར་རྒྱལ་མའི་མངལ་ནས་བྱུང་བ་ཟླ་བ་བཟང་པོ་ཞུ་ཞིང་གསོལ་བ་འདེབས་པ་པོར་འབྲེལ་བ་མི་འགལ་ལམ་ཞེ་ན། དེ་ལ་ལན་བརྗོད་པ་འགྲེལ་ཆེན་ལས་གསུངས་པའི་དོན་འདིར་བཀོད་པ་སྔགས་ཀྱི་ཐེག་པ་འདིར་མངལ་ནས་བྱུང་བ་གསོལ་བ་འདེབས་པ་པོར་མི་འགྱུར་བ་མ་ཡིན་ཏེ། གལ་ཏེ་ཡིན་ན་སངས་རྒྱས་བཅོམ་ལྡན་འདས་ཉིད་ཀྱང་ཤཱཀྱའི་རྒྱལ་པོ་ཟས་གཙང་དང་ལྷ་མོ་སྒྱུ་འཕྲུལ་ཆེན་མོའི་ལྷུམ་ནས་བལྟམ་པ་ཡིན་པས་དེ་སྟོན་པ་པོར་ཅི་ལྟར་འགྱུར། དེས་སྔར་བདུད་བཅོམ་པར་བྱས་ཤིང་བྱང་ཆུབ་བརྙེས་ཏེ་ཐམས་ཅད་མཁྱེན་པ་ཆོས་སྟོན་པ་པོར་གྱུར་ཅིང་མྱ་ངན་ལས་འདས་པའི་རྗེས་ལ་སླར་ཡང་མངལ་དུ་འཇུག་པ་མེད་དོ་ཞེ་ན། དེ་འགལ་བའི་ཚིག་ཡིན་པས་འདིར་སྒྲུབ་བྱེད་དུ་གྱུར་པ་མ་ཡིན་ཏེ། སངས་རྒྱས་བཅོམ་ལྡན་འདས་ཉིད་མ་གཏོགས་པར་ལྷ་དང་མི་སོགས་ཀྱི་འཇིག་རྟེན་ན་གཞན་དག་བདུད་འཇོམས་པར་ནུས་པ་སུ་ཡང་མེད་དོ། །དེ་ཡང་སངས་རྒྱས་པའི་ཚེ་སྒྲིབ་པ་མཐའ་དག་བྲལ་ཟིན་པའི་ཕྱིར་བདུད་མེད་ལ། བདུད་ཡོད་པའི་ཚེ་སེམས་སྒྲིབ་པ་དང་བཅས་པའི་ཕྱིར་སངས་རྒྱས་མ་ཡིན་ནོ། །དེའི་ཕྱིར་སངས་རྒྱས་པ་དང་བདུད་བཅོམ་པ་ཅིག་ཆར་དུ་ཡང་མ་ཡིན་ཏེ་གཅིག་གི་དུས་སུ་གཅིག་མེད་པའི་ཕྱིར་རོ། །ལས་ཀྱི་ས་པ་འདིར་སངས་རྒྱས་བཅོམ་ལྡན་འདས་མ་གཏོགས་པ་བུད་མེད་ཀྱི་མངལ་ནས་སྐྱེས་པ་གཞན་ནི་མཚན་སོ་གཉིས་དང་དཔེ་བྱད་བརྒྱད་ཅུ་དང་མཛོད་སྤུ་
སོ་གཉིས་འཁྱིལ་བ་དང་། མངོན་ཤེས་དྲུག་དང་ལྡན་པ་མ་ཡིན་ནོ། །དེའི་ཕྱིར་བདུད་ཅེས་ཞེས་བྱ་བ་སེམས་ཅན་རྣམས་ཀྱི་འཁོར་བའི་སེམས་ཀྱི་བག་ཆགས་ཀྱི་དྲི་མའོ། །སངས་རྒྱས་ཉིད་ཅེས་བྱ་བ་ནི་འཁོར་བའི་བག་ཆགས་དང་བྲལ་བའི་སེམས་སོ། །དེ་ལྟར་ཡང་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལས། སེམས་གང་ཞིག་ཡོད་པའི་སེམས་དེ་ནི་སེམས་མ་ཡིན་ནོ་ཞེས་རང་བཞིན་གྱིས་འོད་གསལ་བར་གསུངས་ཏེ་དེ་ཉིད་ནི་འཁོར་བའི་བག་ཆགས་དང་བྲལ་བའོ། །དེའི་ཕྱིར་བདུད་ནི་དྲི་མ་དང་བཅས་པའི་སེམས་ཡིན་ལ། སངས་རྒྱས་ནི་དྲི་མ་མེད་པའི་སེམས་ཡིན་ནོ། །འདིར་ཕྱི་རོལ་དུ་སངས་རྒྱས་ཀྱིས་བདུད་བཅོམ་པ་གང་ཡིན་པ་དེ་ནི་རྨི་ལམ་བཞིན་དུ་སེམས་ཅན་རྣམས་ཀྱི་རང་གི་སེམས་ཀྱི་སྣང་བ་ཡིན་ནོ། །དོན་དམ་པར་དེ་བཞིན་གཤེགས་པའི་ཐུགས་ནི་ལེའུ་ལྔ་པར་རྒྱས་པར་བརྗོད་པར་བྱའོ། །འདིར་སེམས་ཅན་གྱི་དོན་དུ་སངས་རྒྱས་དང་བྱང་ཆུབ་སེམས་དཔའ་རྣམས་འཁོར་བར་འཇུག་པ་ནི་འཁོར་བ་པ་རྣམས་ཀྱིས་བརྟག་པར་མི་ནུས་ཏེ་བརྗོད་པར་བྱ་བ་མ་ཡིན་ནོ། །འཇིག་རྟེན་དབང་ཕྱུག་བདག་སེམས་ཅན་གྱི་དོན་ལ་དམྱལ་བར་ཞུགས་པའི་དུས་སུ་གཤིན་རྗེའི་ཕོ་ཉ་རྣམས་དང་གཤིན་རྗེའི་རྒྱལ་པོ་རྣམས་ཀྱིས་བསྟོད་པ། གང་ཞིག་སྲིད་པའི་འཆིང་བ་རྣམས་ལས་གྲོལ་ཡང་སེམས་ཅན་དོན་དུ་སྲིད་པ་འཛིན། །དེ་ནི་སྟོང་པའི་དོན་དག་སྟོན་མཛད་དུས་ལས་ལས་ཀྱི་འབྲས་བུ་གཏོང་མ་ཡིན། །སེམས་ཀྱི་དྲི་མ་ཡང་དག་ཡེ་ཤེས་མེས་བསྲེག་རྟག་ཏུ་ཡང་དག་བརྩེ་བས་བརླན། །མཛད་སྤྱོད་བརྟག་མིན་སེམས་ཅན་དོན་ལ་དགྱེས་པའི་སངས་རྒྱས་དེ་ལ་བདག་ཅག་འདུད། ཅེས་པ་བཞིན་ནོ། །དེའི་ཕྱིར་སེམས་ཅན་གྱི་དོན་གྱི་ངོ་བོར་སངས་རྒྱས་པ་དང་། བྱང་
ཆུབ་སེམས་དཔའ་རྣམས་མངལ་དུ་འཇུག་པའམ། དམྱལ་བར་གཤེགས་པ་ནི་བྱིས་པའི་སྐྱེ་བོ་རྣམས་ཀྱིས་བརྟག་པར་མི་ནུས་སོ། །ཕར་ཕྱིན་བཅུ་བསྒྲུབ་པས་ས་བཅུའི་དབང་ཕྱུག་དབང་བཅུ་ཐོབ་པའི་བྱང་ཆུབ་སེམས་དཔའ་གཅིག་གིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་བྱང་ཆུབ་སེམས་དཔའ་གདུལ་བར་བྱ་བ་རྣམས་ལ། བྱང་ཆུབ་སེམས་དཔའི་ཆོས་སྟོན་པར་བྱེད་དེ། བྱང་ཆུབ་སེམས་དཔའ་ཆེན་པོ་དེ་དུ་མ་ཉིད་དུ་གྱུར་པ་ནི་མ་ཡིན་ནོ། །དེ་བཞིན་ཚོགས་གཉིས་ཡོངས་སུ་རྫོགས་ཤིང་མི་འཇིགས་བཞི་སོགས་དབང་ཕྱུག་གི་ཡོན་ཏན་ཕུན་སུམ་ཚོགས་པའི་སངས་རྒྱས་བཅོམ་ལྡན་འདས་ཉིད་ནི། སངས་རྒྱས་ཀྱི་ཞིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་སུ་སྒྱུ་མའི་སྐུ་སྒྲིབ་པ་དང་བྲལ་བ་མཐའ་ཡས་པ་མཐའ་ཡས་བདག་གིས་སེམས་ཅན་མཐའ་ཡས་པ་མཐའ་ཡས་པ་དག་གི་སྐད་མཐའ་ཡས་པ་མཐའ་ཡས་པ་དག་གིས་གསོལ་བ་འདེབས་པ་པོ་སྣ་ཚོགས་ཀྱིས་གསོལ་བ་བཏབ་པ་ན། སེམས་ཅན་ཐམས་ཅད་ཀྱི་སྐད་ལ་རབ་ཏུ་འཇུག་པ་ཐམས་ཅད་མཁྱེན་པའི་སྐད་ཀྱིས་འཇིག་རྟེན་དང་འཇིག་རྟེན་ལས་འདས་པའི་ཆོས་སྟོན་པར་མཛད་དེ་ཐམས་ཅད་མཁྱེན་པ་དེ་དུ་མ་ནི་མ་ཡིན་ནོ། །དཔེར་ན་སྒྱུ་མའི་སྐྱེས་བུ་ཆེན་པོ་འགའ་ཞིག་གིས་སྒྱུ་མའི་གཟུགས་དུ་མ་སྤྲུལ་ཏེ་སྤྲུལ་པའི་གཟུགས་དེ་དག་གིས་ཤིང་རྣམས་རྩ་བ་ནས་འབྱིན་པར་བྱེད་ཅིང་རིའི་རྩེ་མོ་ཡང་སྐྱོད་པར་བྱེད་ལ། ལྷ་ཆེན་པོ་དང་ཁྱབ་འཇུག་གི་གཟུགས་ལྟ་བུས་ལྷས་སྦྱིན་ལ་སོགས་པ་འཆིང་བར་བྱེད་པ་བསྟན་ན་སྒྱུ་མའི་སྐྱེས་བུ་ཆེན་པོ་དེ་དུ་མ་མ་ཡིན་པ་དེ་བཞིན་དུ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྒྱུ་མའི་སྤྲུལ་པའི་སྐུ་དག་གིས་སྲིད་པ་གསུམ་དུ་སེམས་ཅན་གྱི་དོན་མཛད་པའོ། །དེས་ན་སེམས་ཅན་ཐམས་ཅད་ལ་
འཇིག་རྟེན་དང་འཇིག་རྟེན་ལས་འདས་པའི་ཆོས་བསྟན་པའི་ཕྱིར། སངས་རྒྱས་བཅོམ་ལྡན་འདས་སྔར་ས་བཅུ་གཉིས་ཀྱི་དབང་ཕྱུག་ཏུ་གྱུར་པ་ཉིད། མཁས་པ་སྒྱུ་འཕྲུལ་ཆེན་པོ་འཆང་བ་སྒྱུ་འཕྲུལ་ཆེན་པོའི་མིག་འཕྲུལ་དང་ལྡན་པ་ཡི་ཚུལ་གྱིས་འཕགས་པའི་ཡུལ་ལུ་མྦི་ནིར་ཤཱཀྱའི་རིགས་མིའི་དབང་པོ་ཟས་གཙང་མའི་ལྷ་མོ་སྒྱུ་འཕྲུལ་ཆེན་མོའི་ལྷུམས་ལས་བལྟམས་པ་ནི་གཞོན་ནུ་དོན་གྲུབ་ཡིན་ལ། སངས་རྒྱས་ཀྱི་ཞིང་དུ་བདེན་པ་གཉིས་ཀྱི་ཆོས་བསྟན་པའི་དོན་དུ་ས་བཅུ་གཉིས་མངོན་དུ་མཛད་ནས་ཤཱཀྱ་ཐུབ་པར་གྱུར་ཏོ། །ས་བཅུའི་དབང་ཕྱུག་ཕྱག་ན་རྡོ་རྗེ་ཡང་ཆུ་བོ་ཤཱི་ཏིའི་བྱང་ཕྱོགས་ཤམ་བྷ་ལའི་ཡུལ་གྱི་གྲོང་བྱེ་བ་ཕྲག་དགུ་བཅུ་རྩ་དྲུག་ན་གནས་པའི་གདུལ་བྱ་རྣམས་ཡང་དག་པར་རྫོགས་པའི་སངས་རྒྱས་ཀྱི་ལམ་ཐོབ་པར་བྱ་བའི་ཕྱིར། ཀ་ལཱ་པའི་གྲོང་དུ་ཡབ་ཉི་མའི་འོད་ཀྱི་ལྷ་མོ་རྣམ་པར་རྒྱལ་མའི་མངལ་ནས་འཁྲུངས་པ་ཟླ་བ་བཟང་པོའོ། །དེ་ལྟར་སངས་རྒྱས་དང་བྱང་ཆུབ་སེམས་དཔའ་འདི་གཉིས་སྤྲུལ་པའི་སྐུའམ་ལོངས་སྤྱོད་རྫོགས་པའི་སྐུ་དག་གིས་སྟོན་པ་པོ་དང་གསོལ་བ་འདེབས་པ་པོར་འབྲེལ་བ་ཡིན་ཏེ་སྔ་མ་དང་ཕྱི་མ་འགལ་བ་མེད་པའི་ཕྱིར་རོ། །དེ་ལྟར་ཕྱག་ན་རྡོ་རྗེ་ནི་དེ་བཞིན་གཤེགས་པས་ཆོས་གསུངས་པ་རྣམས་སྐད་སྣ་ཚོགས་ཀྱི་སྡུད་པར་བྱེད་པའི་ཕྱིར་སངས་རྒྱས་ཐམས་ཅད་ཀྱི་གསང་བ་ཉན་པ་པོར་གྱུར་པ་གསང་བའི་བདག་པོ་ཞེས་བྱ་སྟེ། ནང་ལྟར་ན་གསང་བ་ནི་ཉན་རང་གི་ཐེག་པ་ལས་མཆོག་ཏུ་གྱུར་པ་རྡོ་རྗེའི་ཐེག་པ་སྣོད་དམན་ལ་གསང་བ་དེ་ཉིད་མཉན་ཅིང་སྡུད་པར་བྱེད་པ་ཡིན་ལ། ཕྱི་རོལ་དུ་འཇིག་རྟེན་སྣང་ཚུལ་ལྟར་ན། གསང་བའི་སྒྲས་གནོད་སྦྱིན་རྣམས་བརྗོད་ལ་དེ་དག་གི་བདག་པོར་གྱུར་པ་སྟེ། དེ་ཡང་སྲོག་དང་བྲལ་བའི་རོ་ལྡན་དུར་ཁྲོད་ཀྱི་ས་ལ། སེམས་ཅན་རྣམས་
ལ་ཐོ་བཙམ་ཞིང་བགེགས་དུ་མ་བྱེད་པའི་གནོད་སྦྱིན་ཆེན་པོ་ཡོད་པ་དེ་དག་གི་བདག་པོའོ། །ནང་དུ་རོ་ཞེས་པ་དབུགས་འབྱུང་འཇུག་སུམ་སྟོང་དྲུག་བརྒྱས་དམན་པའི་ཉི་ཁྲི་ཆིག་སྟོང་དྲུག་བརྒྱ་འགོག་པ་དེ། དེ་ཉིད་འདི་ལ་ཡོད་པ་ཆོས་ཀྱི་སྤྲིན་གྱི་ས་ལ་གནས་པ་ནི་རོ་ལྡན་ན་གནས་པའོ། །བདུད་དང་ཉོན་མོངས་ཤེས་བྱ་སྙོམས་འཇུག་གི་སྒྲིབ་པའི་གནོད་སྦྱིན་རྣམས་གསོད་པར་བྱེད་པ་གནོད་སྦྱིན་གྱི་བདག་པོ་ཞེས་བྱའོ། །དེ་ལྟར་ཐེ་ཚོམ་བསལ་ནས་ད་ནི་གཉིས་པ་གང་ཞུས་པའི་ཆོས་ལ་སྤྱིར་ཞུས་པ་དང་། བྱེ་བྲག་རྒྱས་པར་ཕྱེ་སྟེ་ཞུས་པ། དེའི་ལན་གསུངས་པ་གསུམ་ལས། དང་པོ་རྡོ་རྗེའི་རྣལ་འབྱོར་བརྗོད་བྱ་བརྗོད་བྱེད་ཉིང་དགོས་བཅས་ཞུས་པའི་ངོ་བོ་ཉིད་ཀྱིས་གནས་པ་ནི། རྣལ་འབྱོར་དཔལ་ལྡན་དུས་འཁོར་ཀ་ཕྲེང་ལྡན་པའི་ཨ་འདུས་ལ་སྟེ་མི་རྣམས་དགྲོལ་བའི་དོན་དུའོ། །ཞེས་ཚིག་རྐང་པ་གཅིག་ལ་ཡི་གེ་ཉེར་གཅིག་ཡོད་པས་བསྟན་ཏེ། ཟབ་མོ་སྔགས་ཀྱི་ཚུལ་འདི་ལས་བདེན་པ་གཉིས་བསྟན་ཏེ་གང་འཇིག་རྟེན་ཀུན་རྫོབ་ཀྱི་བདེན་པ་ནི། ཁ་དོག་ཞལ་ཕྱག་སོགས་མཚན་མ་དང་དབྱིབས་ཀྱི་བདག་ཉིད་དུ་རང་གི་སེམས་ཀྱིས་ཡོངས་སུ་བརྟག་པའི་ཆོས་གང་ཞིག་ཕྱི་དང་ནང་དུ་འཇིག་རྟེན་པའི་དངོས་གྲུབ་བསྒྲུབ་པའི་ཐབས་སོ། །དོན་དམ་པའི་བདེན་པ་ནི། ཁ་དོག་ལ་སོགས་པའི་དབྱིབས་དང་མཚན་མ་ཐམས་ཅད་བྲལ་བ་རང་གི་སེམས་ཀྱིས་ཡོངས་སུ་བརྟགས་པའི་ཆོས་དང་བྲལ་བ་གཞོན་ནུ་མ་རྣམས་ལ་པྲ་ཕབ་པའི་སྣང་བ་བཞིན་དུ། རྣལ་འབྱོར་པ་རྣམས་ཀྱི་རང་གི་སེམས་ཉིད་འོད་གསལ་གྱི་རང་མདངས་མངོན་སུམ་དུ་ནམ་མཁའ་ལ་སྣང་བ་འགྱུར་མེད་བདེ་བའི་ཡེ་ཤེས་ཀྱི་སེམས་གང་ཞིག །འཇིག་རྟེན་ལས་འདས་པ་རྣམ་པ་ཐམས་ཅད་ཀྱི་མཆོག་དང་ལྡན་པ་ཕྱག་རྒྱ་ཆེན་པོའི་དངོས་གྲུབ་བསྒྲུབ་པའི་ཐབས་སོ། །དེ་ལྟར་སེམས་གཉིས་པོའམ་བདེན་པ་
གཉིས་པོ་དབྱེར་མེད་ཅིང་གཅིག་པ་ཉིད་དུ་གྱུར་པ་ནི་ཤེས་རབ་དང་ཐབས་ཀྱི་བདག་ཉིད་རོ་མཉམ་པ། དོན་ཆེན་པོ་མཆོག་ཏུ་མི་འགྱུར་བ་རྡོ་རྗེའི་རྣལ་འབྱོར་ཞེས་བྱ་བ་རྣལ་འབྱོར་ཀུན་གྱི་བླ་མར་གྱུར་པ་དེ་ཉིད་ཞུའོ། །དོན་དེ་ཉིད་གང་དུ་མ་སྤས་པར་སྟོན་པ་དཔལ་ལྡན་དུས་ཀྱི་འཁོར་ལོ་དང་པོའི་སངས་རྒྱས་རིགས་མེད་པ་རྡོ་རྗེ་སེམས་དཔའ་ཞེས་རྒྱུད་ཐམས་ཅད་དུ་གྲགས་པ་དེ་ཡི་རྒྱུད་ཆེན་པོ་གང་ཞིག །ཀ་ཡིག་ལ་སོགས་པའི་གསལ་བྱེད་ཀྱི་ཕྲེང་བ་དང་ལྡན་པའི་ཨ་སོགས་དབྱངས་ཀྱི་འདུས་པ་དང་བཅས་པ་ལ་གནས་པ་སྟེ། ཞེས་བརྗོད་བྱ་དེ་ཉིད་ཀྱི་དོན་རྗོད་བྱེད་ཀྱི་ཚིག་ལ་གནས་པའི་རྒྱུད་དེ་ཉིད་ཞུས་པའོ། །འདིར་ཨ་འདུས་སུ་སྟེ་ཞེས་འདོན་པའང་ཡོད་དོ། །ཚིག་འདིས་མདོར་ན་དབྱངས་དང་གསལ་བྱེད་ཚོགས་ཤིང་འདུས་པའི་ངག་གི་རྣམ་རིག་ཅན་གྱི་རྗོད་བྱེད་ཚིག་གི་རྒྱུད་གང་གིས་བརྗོད་བྱ་རྡོ་རྗེའི་རྣལ་འབྱོར་རིགས་མེད་པ་དུས་ཀྱི་འཁོར་ལོ་སྟོན་པ་དེ་ཉིད་གསུང་བར་ཞུས་པའོ། །དེ་དགོས་པ་གང་གི་ཕྱིར་ཞེ་ན། སྔགས་ཀྱི་གདུལ་བྱའི་གཙོ་བོ་ཁམས་དྲུག་དང་ལྡན་པའི་རྡོ་རྗེའི་ལུས་རྟེན་རྙེད་པ་མི་རྣམས་དགྲོལ་པའི་དོན་ནི། །དང་པོར་དཀྱིལ་འཁོར་དུ་འཇུག་པ་སོགས་ཀྱིས་སེམས་ཅན་གྱི་དོན་བྱེད་པ་ནི་དགོས་པ་དང་བསོད་ནམས་ཀྱི་ཚོགས་དང་དཀྱིལ་འཁོར་འཁོར་ལོའི་གཟུགས་བསྒོམ་པའི་སྟོབས་དང་། བྱིན་གྱིས་བརླབས་པ་བསྒོམ་པའི་སྟོབས་དང་། དཔའ་བོའི་རིམ་པ་དང་། བྱིན་གྱིས་བརླབས་པའི་རིམ་པས་འཇིག་རྟེན་པའི་དངོས་གྲུབ་བསྒྲུབ་པ་དེའི་ཡང་དགོས་པའོ། །རྣམ་པར་རྟོགས་པ་མེད་པའི་སེམས་ཀྱིས་ནམ་མཁའ་ལ་དུ་བ་ལ་སོགས་པའི་མཚན་མ་སྣང་བའི་སྒོ་ནས། ཕྱག་རྒྱ་ཆེན་པོ་རྣམ་པ་ཀུན་ལྡན་སྣ་ཚོགས་པའི་ངོ་བོ་ཉིད་ཀྱིས་བསྒོམ་པ་མི་འགྱུར་བའི་བདེ་བའི་སྒྲུབ་ཐབས་དང་། དེ་ལྟར་བསོད་ནམས་དང་
ཡེ་ཤེས་ཀྱི་ཚོགས་དག་གིས་མི་རྣམས་ཀྱི་སྐྱེ་བ་འདི་ལ་སངས་རྒྱས་ཉིད་དང་རྡོ་རྗེ་འཛིན་པ་ཉིད་དུ་གྱུར་པ་ནི་རིམ་བཞིན་དགོས་པ་དང་། དགོས་པའི་དགོས་པའོ། །དོན་གྱི་དགོས་པ་དེ་ལྟ་བུའི་སླད་དུ་རྒྱུད་ཞུས་པའོ། ༡ །སྐབས་འདིར་རྡོ་རྗེའི་རྣལ་འབྱོར་ཞེས་པའི་དོན་ཅུང་ཟད་རྒྱས་པར་ཕྱེ་ན། གཉིས་སུ་འབྱེད་པ་མེད་པ་རྡོ་རྗེ་ལྟ་བུའི་རྣལ་འབྱོར་དུས་ཀྱི་འཁོར་ལོ་རྡོ་རྗེ་སེམས་དཔར་རྒྱུད་ཐམས་ཅད་དུ་རབ་ཏུ་གྲགས་སོ། །བཅོམ་ལྡན་འདས་དེ་ཉིད་རྒྱུ་ཕ་རོལ་ཏུ་ཕྱིན་པའི་ཚུལ་ལས་སྐུ་བཞིར་བཤད་པའི་ནང་གི་ངོ་བོ་ཉིད་ཀྱི་སྐུ་ཞེས་བྱ་སྟེ། མངོན་པར་རྟོགས་པའི་རྒྱན་དུ་རྗེ་བཙུན་བྱམས་པས། ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པར་བཅས་པ་སྟེ། །རྣམ་པ་བཞིར་ནི་ཡང་དག་བརྗོད། །ཅེས་སོ། །འབྲས་བུ་སྔགས་ཀྱི་ཚུལ་ལས་ལྷན་ཅིག་སྐྱེས་པའི་དགའ་བ་དང་། ལྷན་ཅིག་སྐྱེས་པའི་སྐུ་ཞེས་གསུངས་ཏེ། གཟུང་བ་དང་འཛིན་པ་སྤངས་པ་རྣམ་པར་ཤེས་པའི་ཆོས་ཉིད་ལས་འདས་པ། སྲིད་པ་དང་མྱ་ངན་འདས་པ་ལ་རབ་ཏུ་མི་གནས་པ། སངས་རྒྱས་རྣམས་ཀྱི་འདུས་པ་དང་། ལྷ་མོ་རྣམས་ཀྱི་སྡོམ་པ་ཡང་ཡེ་ཤེས་ཀྱི་སྐུ་འདི་དང་ལྷན་ཅིག་རོ་མཉམ་པ་ཉིད་དོ། །ཞེས་པ་ངེས་པའི་དོན་ཏེ་དཀྱིལ་འཁོར་གྱི་འཁོར་ལོ་རྣམས་ཀྱང་ཁྱབ་བདག་གཙོ་བོའི་ཡེ་ཤེས་ཀྱི་སྐུ་དང་མཉམ་པ་ཉིད་དུ་གྱུར་པའོ། །འདིར་རྣལ་འབྱོར་པ་རྣམས་ཀྱི་ཕྱོགས་སུ་འཛིན་པ་ཐམས་ཅད་ཉམས་པ་སྟེ་གཞིག་པའི་སླད་དུ། རྡོ་རྗེའི་རྣལ་འབྱོར་རིགས་མེད་པ་རྟག་པ་དང་ཆད་པ་སྤངས་པ། ཡོད་པ་དང་མེད་པའི་བློ་སྤངས་པ། གཞོན་ནུ་མའི་མེ་ལོང་ལ་པྲ་ཕབ་པ་བཞིན། རང་གི་སེམས་ཀྱིས་མ་བརྟག་པའི་རྣམ་པ་མངོན་སུམ་མཐོང་བ། ཡིད་ཆེས་པའི་དོན་ཅན། རྣམ་པ་ཐམས་ཅད་པ། ནམ་མཁའ་ལས་བྱུང་བ། ཀུན་ཏུ་བཟང་
པོ། དབང་པོ་ཐམས་ཅད་པ། སེམས་ཅན་ཐམས་ཅད་ཀྱི་བདག་ཉིད་དུ་གནས་པའི་ལྷན་ཅིག་སྐྱེས་པའི་དགའ་བ། འཇིག་རྟེན་པའི་དཔེ་ལས་འདས་པས། གཏན་ཚིགས་དང་དཔེ་སྤངས་པ་སྟེ། ཅིའི་ཕྱིར་ན་འདིའི་དཔེར་དངོས་པོ་དང་། དངོས་པོ་མེད་པ་གཅིག་པ་ཉིད་དུ་གྱུར་པ་ཞིག་འགྱུར་ནའང་། དེ་དག་ཆོས་མི་མཐུན་པའི་ཕྱིར་གཅིག་ཏུ་གྱུར་པ་འཇིག་རྟེན་ན་མི་སྲིད་དོ། །དཔེར་ན་འཇིག་རྟེན་ན་བུམ་པ་ཡོད་ལ་ནམ་མཁའི་མེ་ཏོག་ནི་རྣམ་པ་ཐམས་ཅད་དུ་མེད་པའི་ཕྱིར་བུམ་པ་དང་ཆོས་མི་མཐུན་པའམ། །ནམ་མཁའི་མེ་ཏོག་དང་ཆོས་མི་མཐུན་པ་བུམ་པ་ནི་རྣམ་པ་ཐམས་ཅད་ཀྱིས་ཡོད་པའོ། །དེའི་ཕྱིར་དེ་གཉིས་ཕན་ཚུན་ཆོས་མི་མཐུན་པའི་དཔེར་འགྱུར་རོ། །དེ་བཞིན་དུ་སྲིད་པ་དངོས་པོ་དང་། སྲིད་པ་ཆད་པ་མྱང་འདས་དངོས་པོ་མེད་པའི་མཚན་ཉིད་ལའང་དེ་ལྟར་འགྱུར་ཏེ། དེའི་ཕྱིར་གང་ཡོད་པ་དེ་མེད་པར་མི་འགྱུར་ལ། མེད་པ་དེ་ཡོད་བར་མི་འགྱུར་ཏེ་ཕན་ཚུན་འགལ་བའི་ཕྱིར། དེ་ལྟར་ཡོད་པ་དང་མེད་པར་འཛིན་པའི་སེམས་དེས་ཅིག་ཤོས་སུ་མི་འཛིན་པ་དེའི་ཕྱིར་འཇིག་རྟེན་པའི་དཔེར་བྱ་ཀུན་ལས་འདས་པའོ། །འདིར་ཡང་སྟོང་པ་ཉིད་དང་སྙིང་རྗེའི་བདག་ཉིད་ཀྱི་གཟུགས་རྣམ་པར་དག་པའི་པྲ་ཕབ་པ་ལྟ་བུ་ནི། གཟུགས་ཀྱི་མཚན་ཉིད་མ་ཡིན་ཏེ་རྡུལ་ཕྲ་རབ་ཏུ་གྲུབ་པ་མེད་པའི་ཕྱིར་རོ། །གཟུགས་མེད་པའི་མཚན་ཉིད་མ་ཡིན་ཏེ་སྟོང་པ་ལས་དེ་སྣང་བ་ཡོད་པའི་ཕྱིར་རོ། །དེའི་ཕྱིར་ཀུན་རྫོབ་སྟོང་པ་ཉིད་ཀྱི་གཟུགས་ཅན་དང་། སྟོང་པ་ཉིད་ཀུན་རྫོབ་ཀྱི་གཟུགས་ཅན་དེ། འཇིག་རྟེན་པའི་དཔེ་ལས་འདས་པ་ཉིད་ཀྱི་ཕྱིར། ཀུན་རྫོབ་ཏུ་སེམས་གང་ཡོད་པའི་སེམས་དེ་ནི་སེམས་དོན་དམ་པར་མེད་པ། རྟག་པ་དང་ཆད་པའི་མཚན་ཉིད་དང་བྲལ་བ། སྟོང་པ་ཉིད་དང་སྙིང་རྗེ་དབྱེར་མེད་པ་ཞེས་བྱའོ། །དོན་དམ་པའི་བདེན་པའི་དབང་
དུ་བྱས་ན། གཉིས་ཀའི་སེམས་དག་ཆོས་མི་མཐུན་པའི་ཡོད་པ་དང་མེད་པ་ལས་འདས་པ། དངོས་པོ་དང་དངོས་པོ་མེད་པ་ཟད་པ། རྡོ་རྗེའི་རྣལ་འབྱོར་གཉིས་སུ་མེད་པ་སྟེ་དེ་བཞིན་གཤེགས་པའི་གསུང་རིགས་མེད་པ་ཉིད་ཀྱི་ཕྱིར་རོ། །དེ་ལྟར་ཡང་རྩ་བའི་རྒྱུད་ལས། ཡོད་དང་མེད་ལས་རྣམ་པར་འདས། །གཉིས་མེད་དངོས་དང་དངོས་མེད་ཟད། །སྟོང་ཉིད་སྙིང་རྗེ་དབྱེར་མེད་པ། །རྡོ་རྗེའི་རྣལ་འབྱོར་བདེ་བ་ཆེ། །ཕྲ་རབ་རྡུལ་གྱི་ཆོས་ཉིད་འདས། །སྟོང་པའི་ཆོས་ནི་རྣམ་པར་སྤངས། །རྟག་དང་ཆད་ལས་རྣམ་པར་གྲོལ། །རྡོ་རྗེའི་རྣལ་འབྱོར་རིགས་མེད་པ། །ཞེས་གསུངས་སོ། །དེ་བཞིན་དུ་གཉིས་སུ་མེད་པ་རྡོ་རྗེ་ལྟ་བུའི་རྣལ་འབྱོར་འདི་རྒྱུད་གཞན་རྣམས་སུའང་གསུངས་སོ། །རྡོ་རྗེའི་རྣལ་འབྱོར་རྣམ་པར་དག་པ་སྐད་ཅིག་གཅིག་གིས་མངོན་པར་རྫོགས་པར་སངས་རྒྱས་པ། དམ་པའི་དོན་ཆེན་པོ་མཆོག་ཏུ་མི་འགྱུར་བ་ལྷན་ཅིག་སྐྱེས་པའི་དགའ་བ་འདི་ནི། འདོད་པའི་སྲིད་པ་ལ་མི་གནས། གཟུགས་ཀྱི་སྲིད་པ་ལ་མི་གནས། གཟུགས་མེད་པའི་སྲིད་པ་ལ་མི་གནས། འདོད་པའི་མྱ་ངན་ལས་འདས་པ་ལ་མི་གནས། གཟུགས་ཀྱི་མྱ་ངན་ལས་འདས་པ་ལ་མི་གནས། གཟུགས་མེད་པའི་མྱ་ངན་ལས་འདས་པ་ལ་མི་གནས་ཏེ། དེ་ཅིའི་ཕྱིར་ན་སྲིད་པ་དང་མྱ་ངན་ལས་འདས་པ་ལ་མི་གནས་པ་ཉིད་ཀྱི་ཕྱིར་རོ། །གཉིས་ཀ་ལ་ཡང་མི་གནས་ཏེ་ཕན་ཚུན་འགལ་བའི་ཕྱིར་རོ། །སྲིད་པ་དང་མྱ་ངན་ལས་འདས་པ་གཅིག་པ་མ་ཡིན་ཏེ་གྲིབ་མ་དང་ཉི་མ་བཞིན་ནོ། །དཔེར་ན་མེ་ནི་གཙུབ་སྟན་ལ་མི་གནས་གཙུབ་ཤིང་ལ་མི་གནས། སྐྱེས་བུའི་ལག་པའི་རྩོལ་བ་ལ་མི་གནས་པ་དེ་བཞིན་དུ་རྡོ་རྗེའི་རྣལ་འབྱོར་ཡང་ཕྱི་དང་ནང་དང་གཞན་ཐམས་ཅད་ལ་རྣལ་འབྱོར་པས་རྟོགས་པར་བྱའོ། །འདིར་སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་ཞེས་བྱ་བ་ནི་མཆོག་ཏུ་མི་འགྱུར་བའི་བདེ་བ་ཆེན་པོའི་སྐད་ཅིག་སྟེ་དེ་ལྟ་བུའི་སྐད་ཅིག་གཅིག་ལ་མངོན་པར་རྫོགས་པར་སངས་རྒྱས་པ་འདི་ནི་དབུགས་ཀྱི་གྲངས་ཀྱི་
མཐའ་ཇི་སྲིད་པར་སྐད་ཅིག་ཐམས་ཅད་ཡོངས་སུ་རྫོགས་པ་ཉིད་རྣམ་པར་བསྒོམ་པ་པོ་ཡིན་ནོ། །དེ་ནས་མཐར་རྫོགས་པའི་སྐད་ཅིག་དེ་ལ་མངོན་པར་རྫོགས་པར་སངས་རྒྱས་པ་སྟེ་ཡང་དག་པར་རྫོགས་པའི་སངས་རྒྱས་སོ། །འདིར་རྫོགས་པའི་སྐད་ཅིག་གང་ལ་དེ་བཞིན་གཤེགས་པ་ཐམས་ཅད་མངོན་པར་རྫོགས་པར་སངས་རྒྱས་པའི་སྐད་ཅིག་དེ་ནས་ཆོས་ཐམས་ཅད་སྐྱེ་བ་མེད་པ་གནས་པ་མེད་པ་འཇིག་པ་མེད་པ་སྟེ་རིགས་མེད་པའི་ཕྱིར་རོ། །དེ་ལྟ་བུ་བྱིས་པའི་ངོར་བརྟག་པར་དཀའ་ཡང་ཡང་དག་པར་དཔྱད་ན་ཆོས་ཐམས་ཅད་ལ་སྐྱེ་འགག་མེད་དེ་འདི་ལྟར་ཆོས་གང་ལ་སྐྱེ་བར་གྱུར་པའི་སྐད་ཅིག་དེ་ལ་གནས་པ་དང་འཇིག་པ་མེད་དོ། །དེ་བཞིན་དུ་གནས་པ་ལ་སྐྱེ་བ་དང་འཇིག་པ་མེད་དོ། །འཇིག་པའི་སྐད་ཅིག་དེ་ལ་སྐྱེ་བ་དང་གནས་པ་མེད་དོ། །དེ་ལྟར་བརྟག་ན་སྐྱེ་བ་དང་གནས་པ་འཇིག་པའི་སྐད་ཅིག་གསུམ་རིམ་པར་བྱུང་བ་མེད་དོ། །ཅིག་ཆར་བྱུང་བ་མ་ཡིན་ཏེ་འགལ་བའི་ཆོས་གསུམ་པོ་གཅིག་པ་མ་ཡིན་པས་དུས་གཅིག་ཏུ་ཡོད་མི་སྲིད་དོ། །ཅི་སྟེ་སྐྱེ་བའི་སྐད་ཅིག་ལས་གནས་པ་དང་།གནས་པ་ལས་འཇིག་པ་དང་། འཇིག་པའི་སྐད་ཅིག་ལས་སྐྱེ་བའི་སྐད་ཅིག་འབྱུང་ངོ་ཞེ་ན། འདི་དོན་དམ་པའི་རིགས་པས་མི་འཐད་དེ། སྐད་ཅིག་སྔ་མ་འགག་པ་ལས་སྐད་ཅིག་གཞན་འབྱུང་བ་དང་། མ་འགག་པ་ལས་སྐད་ཅིག་གཞན་མི་འབྱུང་སྟེ། ས་བོན་ཉམས་པ་དང་མ་ཉམས་པ་ལས་ཀྱང་མྱུ་གུ་མི་འབྱུང་བ་བཞིན་ནོ། །དེ་ལྟར་དོན་དམ་པར་ཡོད་པའི་དངོས་པོ་མེད་པའི་ཕྱིར་སྐད་ཅིག་གཅིག་ཅེས་པ་མེད་དེ། གཅིག་དང་དུ་མར་ཡོད་པ་གཉིས་ཀ་རིགས་པ་དང་འགལ་བའི་ཕྱིར་རོ། །འདིར་སྐད་ཅིག་ཐམས་ཅད་རྣམ་པར་སྒོམ་པ་པོ་དེ་སྐད་ཅིག་གཅིག་ལ་མངོན་པར་རྫོགས་པར་སངས་རྒྱས་པ་ཞེས་པ་གང་ཡིན་པ་དེ་ནི། མཆོག་ཏུ་མི་འགྱུར་བའི་བདེ་བའི་སྐད་ཅིག་ཉི་ཁྲི་ཆིག་སྟོང་དྲུག་བརྒྱ་རྫོགས་པར་སྒོམ་པ་པོ་དེས་སྒོམ་པ་དེ་ཡོངས་སུ་རྫོགས་པའི་དང་པོར་
མཆོག་ཏུ་མི་འགྱུར་བའི་བདེ་བའི་སྐད་ཅིག་གིས་མངོན་པར་རྫོགས་པར་སངས་རྒྱས་ཏེ། དེའི་རྗེས་ལ་སངས་རྒྱས་རྣམས་ཀྱི་རྣལ་འབྱོར་སྐད་ཅིག་ཐམས་ཅད་མེད་པ་གཅིག་དང་དུ་མ་དང་བྲལ་བ་མཆོག་གི་གཉིས་སུ་མེད་པ་ཐོབ་པ་སྟེ། དོན་དམ་པར་ཡོད་པ་དང་མེད་པ་བྲལ་བ་ཉིད་ཀྱི་ཕྱིར་རོ། །ཇི་སྲིད་དུ་འཇིག་རྟེན་གྱི་སེམས་ཡོད་པ་དེ་སྲིད་དུ་ཆོས་རྣམས་གཅིག་དང་དུ་མའི་རྣམ་པར་དཔྱོད་དེ་སྐད་ཅིག་མའི་སེམས་ཀྱི་རང་བཞིན་སྣང་བའི་ཕྱིར་རོ། །གང་གི་ཚེ་སེམས་སྐད་ཅིག་གི་ཆོས་དང་བྲལ་བ་དེའི་ཚེ་སྐྱེ་འགག་ལ་སོགས་པའི་རང་བཞིན་མེད་པ་ཞེས་བརྗོད་དོ། །དེའི་ཕྱིར་རང་བཞིན་མེད་པའི་ཕྱོགས་ནི་མཐར་གཉིས་གང་གི་ཡང་ཕྱོགས་མེད་པར་བཅོམ་ལྡན་འདས་ཀྱིས་གསུངས་སོ། །ཇི་ལྟར་དེ་ལ་གཉིས་སུ་འབྱེད་པ་མེད་ཅེ་ན། ཕྱོགས་ཞེས་བྱ་བ་ནི། དངོས་པོ་དང་དངོས་པོ་མེད་པ། ཡོད་པ་མེད་པ། ཡིན་པ་མ་ཡིན་པ། གཅིག་དང་གཅིག་མིན་པ། རྟག་པ་དང་ཆད་པ། སྲིད་པ་དང་མྱང་འདས། གཟུགས་དང་གཟུགས་མིན་པ། སྒྲ་དང་སྒྲ་མིན་པ། སྐད་ཅིག་དང་སྐད་ཅིག་མིན་པ། དེ་བཞིན་དུ་ཆགས་དང་ཆགས་མིན། སྡང་དང་སྡང་མིན། རྨོངས་དང་རྨོངས་མིན་ཞེས་པ་དེ་ལྟ་བུ་ལ་སོགས་པ་རྣམས་ནི་ཕྱོགས་རེ་ཕན་ཚུན་ལྟོས་པ་དང་བཅས་པ་ཉིད་ཀྱི་ཕྱིར་རོ། །དེ་ལྟ་བུའི་ཕྱོགས་སམ་གཉིས་ཆོས་ཀྱི་དབྱེ་བ་འདི་དང་བྲལ་བ་ནི་སངས་རྒྱས་རྣམས་ཀྱི་མི་གནས་པའི་མྱ་ངན་ལས་འདས་པ་རང་བཞིན་མེད་པ་སྟེ། སྐད་ཅིག་གཅིག་དང་སྐད་ཅིག་དུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ན་ཉིད་ཅེས་གསུངས་སོ། །ཚུལ་འདིས་དེ་ཁོ་ན་ཉིད་ནི་སྣང་སྟོང་དང་བདེན་གཉིས་གང་རུང་གི་ཕྱོགས་སུ་ལྷུང་བ་མ་ཡིན་པར་ཟུང་འཇུག་སོ་སོ་རང་གིས་རིག་པར་བྱ་བའི་གཉིས་སུ་མེད་པའི་ཆོས་ཉིད་དུ་ཤེས་པར་བྱ་སྟེ། རྩ་བ་ཤེས་རབ་ལས། མ་སྐྱེས་པ་དང་མ་འགག་པ། །ཆོས་ཉིད་མྱ་ངན་འདས་དང་མཚུངས། །
ཞེས་གསུངས་པ་ལྟར་གོ་དགོས་ཀྱི་དགག་བྱ་བཅད་ཙམ་གྱི་སྟོང་པ་ལ་གནས་ལུགས་མཐར་ཐུག་ཏུ་འཛིན་པར་མི་བྱའོ། །དེ་ལྟར་ཕྱོགས་གཉིས་སུ་འབྱེད་པ་དོན་དམ་པར་མེད་ན་ཡང་དེ་ཉིད་སེམས་ཅན་རྣམས་ཀྱི་རང་གི་བསམ་པའི་དབང་གིས་རྣམ་པ་བཞི་དང་རྣམ་པ་བཅུ་དྲུག་ཏུ་ཡང་སོ་སོར་སྣང་སྟེ། དགའ་བ། མཆོག་དགའ། ཁྱད་པར་གྱི་དགའ་བ། ལྷན་ཅིག་སྐྱེས་པའི་དབྱེ་བས་རྣམ་པ་བཞི་དང་། དེ་ནས་སྐུའི་དགའ་བ། དེ་བཞིན་གསུང་དང་ཐུགས་དང་ཡེ་ཤེས་ཀྱི་དགའ་བ་བཞི་དང་། དེ་བཞིན་དུ་དགའ་བ་ལྷག་མ་གསུམ་ལའང་སྐུ་གསུང་ཐུགས་ཡེ་ཤེས་ཀྱི་དབྱེ་བས་ཕྱེ་སྟེ། ཡེ་ཤེས་ཀྱི་ལྷན་ཅིག་སྐྱེས་པའི་དགའ་བའི་བར་གྱི་བཅུ་དྲུག་སྟེ། དེ་ལྟར་དེ་ཉིད་རྣམ་པ་བཅུ་དྲུག་པོ། དེ་ལྟར་གང་གི་ཚེ་རྣལ་འབྱོར་བས་རིག་པ་དེའི་ཚེ། དེ་ཉིད་རྣམ་པ་བཅུ་དྲུག་རིག་ཅེས་གསུངས་སོ། །དེ་ཉིད་རྟོགས་པ་དེ་ཁོ་ན་ལ་ལྷན་ཅིག་སྐྱེས་པའི་སྐུ་ཞེས་བརྗོད་དེ། དེའི་འོག་ཏུ་ཆོས་སྐུ་དང་། དེ་འོག་ལོངས་སྐུ། དེ་འོག་སྤྲུལ་སྐུའོ། །དེ་བཞིན་དུ་ལྷན་ཅིག་སྐྱེས་པའི་གསུང་དང་། ལྷན་ཅིག་སྐྱེས་པའི་ཐུགས་དང་། ལྷན་ཅིག་སྐྱེས་པའི་ཡེ་ཤེས་དང་། དེ་བཞིན་དུ་ཆོས་ཀྱི་གསུང་ལ་སོགས་པ་གསུམ་དང་། ལོངས་སྤྱོད་རྫོགས་པའི་གསུང་ལ་སོགས་པ་གསུམ་དང་། སྤྲུལ་པའི་གསུང་སོགས་གསུམ་སྟེ། དེ་ལྟར་དེ་ཉིད་རྣམ་པ་བཅུ་དྲུག་ཏུ་སེམས་ཅན་ཐམས་ཅད་ཀྱི་སེམས་ཀྱི་ལྷག་པར་མོས་པའི་དབང་གིས་རབ་ཏུ་སྣང་སྟེ། དེ་ཉིད་ལྷན་ཅིག་སྐྱེས་པའི་སྐུ། སྟོང་པ་ཉིད་ཀྱི་རྣམ་པར་ཐར་པས་དག་པ། ཡེ་ཤེས་རྡོ་རྗེ། ཐམས་ཅད་མཁྱེན་པ། ཤེས་རབ་དང་ཐབས་ཀྱི་བདག་ཉིད་རྣམ་པར་དག་པའི་རྣལ་འབྱོར་ཞེས་བརྗོད་དོ། །དེ་ཉིད་ཤེས་རབ་དང་ཐབས་ཀྱི་བདག་ཉིད་ལྷན་ཅིག་སྐྱེས་པའི་སྐུ་ཐམས་ཅད་མཁྱེན་པ་ཐོབ་པ་ནི་ཤེས་བྱ་ཐམས་ཅད་མཁྱེན་པ་སྟེ་ཆོས་
ཐམས་ཅད་ཆགས་ཐོགས་མེད་པར་གཟིགས་པས་སོ། །དེ་ཉིད་ཆོས་ཀྱི་སྐུ་མཚན་མ་མེད་པའི་རྣམ་པར་ཐར་པས་རྣམ་པར་དག་པ་ཐུགས་རྡོ་རྗེ་ཡེ་ཤེས་ཀྱི་སྐུ་ཤེས་རབ་དང་ཐབས་ཀྱི་བདག་ཉིད་ཀྱི་ཆོས་ཀྱི་རྣལ་འབྱོར་ཞེས་བརྗོད་དེ། དེ་ལ་ཤེས་རབ་དང་ཐབས་ཀྱི་བདག་ཉིད་ཆོས་ཀྱི་སྐུ་ལམ་གྱི་རྣམ་པ་མཁྱེན་པ་ནི་ཡེ་ཤེས་སྐུ་ཞེས་བྱ་སྟེ། མཆོག་ཏུ་མི་འགྱུར་བའི་བདེ་བས་གནས་པ་ཉིད་ཀྱི་ཕྱིར་རོ། །དེ་ཉིད་ལོངས་སྤྱོད་རྫོགས་པའི་སྐུ་སྨོན་པ་མེད་པའི་རྣམ་པར་ཐར་པས་རྣམ་པར་དག་པ། གསུང་རྡོ་རྗེ་ཉིན་མོར་བྱེད་པའི་སྐུ། ཤེས་རབ་དང་ཐབས་ཀྱི་བདག་ཉིད་སྔགས་ཀྱི་རྣལ་འབྱོར་ཞེས་བརྗོད་དོ། །ཤེས་རབ་ཐབས་ཀྱི་བདག་ཉིད་ལོངས་སྤྱོད་རྫོགས་པའི་སྐུ་ལམ་མཁྱེན་པ་ཉིད་ཐོབ་པ་ནི་ཉིན་མོར་བྱེད་པའི་སྐུ་སྟེ་མཐའ་ཡས་པའི་སེམས་ཅན་གྱི་སྐད་ཀྱིས་ཅིག་ཆར་དུ་འཇིག་རྟེན་དང་འཇིག་རྟེན་ལས་འདས་པའི་ལམ་མམ་ཆོས་སྟོན་པ་པོ་ཉིད་ཡིན་པའི་ཕྱིར་རོ། །དེ་ཉིད་སྤྲུལ་པའི་སྐུ། མངོན་པར་འདུས་མ་བྱས་པའི་རྣམ་པར་ཐར་པས་རྣམ་པར་དག་པ། སྐུ་རྡོ་རྗེ་པདྨའི་འདབ་མ་རྒྱས་པའི་སྤྱན། ཤེས་རབ་དང་ཐབས་ཀྱི་བདག་ཉིད་ཀྱི་དབྱིངས་ཀྱི་རྣལ་འབྱོར་ཞེས་བརྗོད་དོ། །ཤེས་རབ་དང་ཐབས་ཀྱི་བདག་ཉིད་སྤྲུལ་པའི་སྐུ་རྣམ་པ་ཐམས་ཅད་མཁྱེན་པ་ཉིད་ཐོབ་པ་ནི་པདྨའི་འདབ་མ་རྒྱས་པའི་སྤྱན་ཏེ། མཐའ་ཡས་པའི་སྤྲུལ་པའི་སྐུ་དག་གིས་ཅིག་ཅར་རྣམ་པ་ཐམས་ཅད་པའི་སྐུའི་བཀོད་པའི་རྫུ་འཕྲུལ་སྤྲོ་བའི་ཕྱིར་རོ། །དེ་ལྟར་རྡོ་རྗེའི་རྣལ་འབྱོར་རྣམ་པ་བཞི་པོ་འདི་སངས་རྒྱས་ལ་ཕྱག་ན་རྡོ་རྗེས་ཞུས་སོ། །དེ་བཞིན་དུ་སྐད་ཅིག་གཅིག་གིས་མངོན་པར་རྫོགས་པར་སངས་རྒྱས་པ་ནི་ཡེ་ཤེས་རྡོ་རྗེ་སྟེ་དོན་ཐམས་ཅད་གཟིགས་པའོ། །རྣམ་པ་ལྔས་སངས་རྒྱས་པ་ནི་ཐུགས་རྡོ་རྗེ་སྟེ་མཆོག་ཏུ་མི་འགྱུར་བའི་བདེ་བའོ། །རྣམ་པ་ཉི་ཤུས་བྱང་ཆུབ་པ་ནི་གསུང་རྡོ་རྗེ་སྟེ། བདེན་དོན་རྣམ་པ་བཅུ་གཉིས་དང་ལྡན་པ། སེམས་
ཅན་ཐམས་ཅད་ཀྱི་སྐད་ཀྱིས་ཆོས་སྟོན་པའོ། །སྒྱུ་འཕྲུལ་དྲ་བས་མངོན་པར་སངས་རྒྱས་པ་ནི་སྐུ་རྡོ་རྗེ་སྟེ། དེ་ཉིད་རྣམ་པ་བཅུ་དྲུག་རིག་པ་མཐའ་ཡས་པའི་སྒྱུ་འཕྲུལ་དྲ་བ་དག་གིས་སྤྲོས་པའི་སྐུའོ། །འདིར་གནས་སྐབས་བཞིའི་སེམས་ཀྱི་རྡོ་རྗེ་རྣམ་པ་བཞི་རྣམ་པར་དག་པ་ནི་སྐུ་བཞིའི་མཚན་ཉིད་དུ་འགྱུར་ཏེ། བཟློག་པར་དཀའ་བའི་འདོད་ཆགས་ཀྱི་དྲི་མས་ཀུན་ནས་བགོས་པ་བྷ་ག་དང་དབང་པོ་འདུ་འཕྲོད་ཀྱི་བདག་ཉིད་ཅན་བཞི་པའི་སེམས་ཀྱི་དངོས་པོ་མེད་པའི་སེམས་ནི་ངོ་བོ་ཉིད་སྐུ་ཐམས་ཅད་མཁྱེན་པ་ཞེས་བྱའོ། །མུན་པས་ཟིལ་གྱིས་མནན་པ་ཤིན་ཏུ་གཉིད་ལོག་པའི་སེམས་ཀྱི་དངོས་པོ་མེད་པའི་སེམས་ནི་ཆོས་ཀྱི་སྐུ་སྟེ་ཡེ་ཤེས་ཀྱི་སྐུ་ཞེས་བྱའོ། །སྲོག་གིས་བསྐྱེད་པ་ཡོད་པ་དང་མེད་པའི་རྨི་ལམ་གྱི་སེམས་ཀྱི་དངོས་པོ་མེད་པའི་སེམས་ནི་ལོངས་སྤྱོད་རྫོགས་པ་ཉིན་མོར་བྱེད་པའི་སྐུ་ཞེས་པའོ། །རྣམ་པར་རྟོག་པ་དུ་མའི་དངོས་པོའི་འདུ་ཤེས་སད་པའི་སེམས་ཀྱི་དངོས་པོ་མེད་པའི་སེམས་ནི་སྤྲུལ་པའི་སྐུ་སྟེ་པདྨའི་འདབ་མ་རྒྱས་པའི་སྤྱན་ཞེས་པའོ། །དེ་ལྟར་རྡོ་རྗེའི་རྣལ་འབྱོར་འདི་ཡེ་ཤེས་ཀྱི་ལེའུར་རྒྱ་ཆེར་བརྗོད་པར་བྱ་སྟེ། ལེའུ་དང་པོ་འདིར་མདོར་བསྟན་པ་ཙམ་ཡིན་ནོ་ཞེས་འགྲེལ་ཆེན་གསུངས་པའི་ཚིག་སྣ་ཅི་རིགས་བསྡུས་ནས་བཀོད་པ་ཡིན་ནོ། །དེ་ལྟར་མཆོག་གི་དང་པོའི་སངས་རྒྱས་ཀྱི་ལམ་རྡོ་རྗེའི་རྣལ་འབྱོར་འདི་ནི་འདས་པ་དང་ད་ལྟ་མ་འོངས་པའི་སངས་རྒྱས་རྣམས་ཀྱིས་སྟོན་ལ། འདས་པ་དང་ད་ལྟ་དང་མ་འོངས་པའི་འཁོར་རྣམས་ཀྱིས་ཞུས་སོ། །མཐའ་ཡས་མཐའ་ཡས་པའི་སངས་རྒྱས་ཀྱི་ཞིང་རྣམས་སུ་མཐའ་ཡས་མཐའ་ཡས་པའི་སེམས་ཅན་རྣམས་ལ། མཐའ་ཡས་མཐའ་ཡས་པའི་དེ་བཞིན་གཤེགས་པ་རྣམས་ཀྱིས་བསྟན་ཏོ། །སྟོན་ཏོ། །བསྟན་པར་འགྱུར་རོ། །གཉིས་པ་བྱེ་བྲག་ཕྱེ་སྟེ་ཞུས་པ་ནི། སྟོང་ཆེན་ཡིག་
ལྔ་སོགས་ནས་དཀྱིལ་འཁོར་དང་དབང་བསྐུར་བར་གསོལ་བ་འདེབས་པའི་ངོ་བོ་ཉིད་ཀྱི་གནས་པ་སྟེ། སྟོང་པ་ཡེ་ཤེས་ཀྱང་སྟེ་སོགས་ཚིགས་བཅད་གཅིག་གིས་བསྟན་ཏེ། སྤྱིར་བརྗོད་པར་བྱ་བའི་དོན་གང་ལ་དངོས་དང་དངོས་མེད་དུ་ཤེས་པར་བྱ་བ་ཐམས་ཅད་མིང་སྔོན་དུ་འགྲོ་བས་ཐ་སྙད་བྱེད་དགོས་ཏེ་བུམ་པ་དང་ནམ་མཁའི་མེ་ཏོག་ལ་སོགས་པ་བརྗོད་པ་བཞིན་ནོ། །འདིར་ཉི་ཚེ་བའི་དབང་པོའི་སྤྱོད་ཡུལ་དུ་མཐོང་བ་དང་། དེའི་སྤྱོད་ཡུལ་མ་ཡིན་པ་མ་མཐོང་བའི་དངོས་པོ་རྣམས་ལ་སྟོང་པ་ལ་སོགས་པའི་མིང་གིས་བསྟན་པར་མཛད་དོ། །དེ་བཞིན་རྒྱུད་དང་རྒྱུད་གཞན་སྣ་ཚོགས་རྣམས་སུ། བསྟན་བཅོས་ཀྱི་མིང་དང་། ཡུལ་གྱི་མིང་དང་། སྔགས་ཀྱི་ཡི་གེའི་མིང་དང་། ཡི་གེ་རེ་རེ་བའི་མིང་རྣམས་ཀྱིས། དོན་གྱི་དངོས་པོ་གང་དག་དེ་བཞིན་གཤེགས་པ་ངེས་པར་བསྟན་ཅིང་སྡུད་པ་པོ་རྣམས་ཀྱིས་ཀྱང་ཡི་གེར་བྲིས་པ་དེ་དག་ཐམས་ཅད། རྣལ་འབྱོར་པ་རྣམས་ཀྱིས་དྲང་བའི་དོན་དང་ངེས་པའི་དོན་གྱི་ཚུལ་རྣམ་པ་གཉིས་ཀྱི་དབྱེ་བས་རྟོགས་པར་བྱ་སྟེ། འདི་ལྟར་དངོས་པོ་གཅིག་ལ་ཡང་མིང་སྣ་ཚོགས་དང་། དངོས་པོ་མེད་པ་ལ་ཡང་མིང་དུ་མས་བསྟན་པ་ལ། རྣལ་འབྱོར་པ་རྣམས་ཀྱིས་བླ་མ་དམ་པས་འདི་དང་འདིའོ་ཞེས་ཉེ་བར་བསྟན་པའི་སྒོ་ནས་གསེར་བཞིན་ཡོངས་སུ་བརྟག་པས་འཛིན་ཏེ་དོན་ལ་བརྟེན་པ་ཉིད་ཀྱི་ཕྱིར་རོ། །དེ་ལྟར་ཤེས་པར་བྱས་ནས། འདིར་སྟོང་པ་ཡེ་ཤེས་ཀྱང་སྟེ་ཐིག་ལེ་མཆོག་མཆོག་རྡོ་རྗེ་འཛིན་པ་ཞེས་པའི་ཡི་གེ་བཅུ་བཞི་པོ་འདིས་ཅི་ཞིག་བསྟན་ཞེ་ན། སྟོང་པ་ཞེས་པ་ལ་སོགས་པའི་མིང་རྣམས་ཀྱིས་ཁམས་དྲུག་གི་བདག་ཉིད་སྐྱེས་བུ་ཆེན་པོའི་གང་ཟག་འདི་བསྡུས་པ་ནི་བཅོམ་ལྡན་འདས་ཀྱིས། ས་དང་ཆུ་དང་དེ་བཞིན་མེ། །རླུང་དང་ནམ་མཁའི་ཁམས་དང་ནི། །རྣམ་ཤེས་ཁམས་དྲུག་པར་བརྗོད་པ། །སྐྱེས་བུ་ཆེན་པོའི་གང་ཟག་གོ །
ཞེས་གསུངས་པ་ལྟར་ལ། དེ་ཡང་རྒྱས་པར་ཕྱེ་ན་འདི་ལྟར་ཕུང་ཁམས་སོ་དྲུག་སྟེ། གཟུགས་ཚོར་འདུ་ཤེས་འདུ་བྱེད་རྣམ་ཤེས་ཡེ་ཤེས་ཀྱི་ཕུང་པོ་དྲུག་དང་། ས་ཆུ་མེ་རླུང་ནམ་མཁའ་ཡེ་ཤེས་ཀྱི་ཁམས་དྲུག་དང་། མིག་རྣ་སྣ་ལྕེ་ལུས་ཡིད་ཀྱི་དབང་པོ་དྲུག་དང་། གཟུགས་སྒྲ་དྲི་རོ་རེག་བྱ་དང་ཆོས་ཀྱི་དབྱིངས་ཏེ་ཡུལ་དྲུག་དང་། ངག་དང་ལག་པ་རྐང་པ་རྐུབ་དང་འདོམས་དང་མཆོག་གི་དབང་པོ་སྟེ་ལས་ཀྱི་དབང་པོ་དྲུག་དང་། བརྗོད་པ་དང་ལེན་པ་འགྲོ་བ་བཤང་གཅི་འབྱིན་པ། དྲི་ཆུ་འཛགས་པ་དང་ཁུ་བ་འཕོ་བ་སྟེ། ལས་དབང་གི་བྱ་བ་དྲུག་རྣམས་ཏེ་སྒྲིབ་པ་དང་བཅས་པ་མ་དག་པའི་སྐབས་སུ་ཕུང་ཁམས་སོ་དྲུག སྒྲིབ་པ་དང་བྲལ་བ་དག་པའི་དུས་ན་ཕུང་པོ་དྲུག་སངས་རྒྱས་དྲུག འབྱུང་བའི་ཁམས་དྲུག་ཡུམ་དྲུག དབང་པོ་དྲུག་སེམས་དཔའ་དྲུག ཡུལ་དྲུག་སེམས་མ་དྲུག ལས་དབང་དྲུག་ཁྲོ་བོ་དྲུག །དེའི་བྱ་བ་དྲུག་ཁྲོ་བོའི་ཡུམ་དྲུག་ཡིན་ཅིང་། ཁམས་དྲུག་ཏུ་བསྡུ་ན། གཟུགས་དང་ས་དང་ལུས་དང་དྲི་དང་བཤང་ལམ་དང་བརྗོད་པའམ་སྨྲ་བ་དྲུག་ནི། ས་ཡི་ཁམས་རྣམ་སྣང་གི་རིགས་སོ། །ཚོར་བ་དང་མེ་དང་མིག་དང་རོ་དང་ལག་པ་དང་འགྲོ་བ་རྣམས་མེ་ཡི་ཁམས་རིན་འབྱུང་གི་རིགས་སོ། །འདུ་ཤེས་དང་ཆུ་དང་ལྕེ་དང་གཟུགས་དང་རྐང་པ་དང་ལེན་པ་དྲུག་ཆུ་ཁམས་སྣང་བ་མཐའ་ཡས་ཀྱི་རིགས་སོ། །འདུ་བྱེད་དང་རླུང་དང་སྣ་དང་རེག་བྱ་དང་ངག་དང་བཤང་པ་འཛག་པ་རྣམས་རླུང་གི་ཁམས་དོན་ཡོད་གྲུབ་པའི་རིགས་སོ། །རྣམ་ཤེས་དང་ནམ་མཁའ་དང་རྣ་བ་དང་ཆོས་ཀྱི་དབྱིངས་དང་བྷ་ག་དང་ཁུ་བ་འཕོ་བ་རྣམས་ནི་ནམ་མཁའི་ཁམས་མི་བསྐྱོད་པའི་རིགས་སོ། །ཡེ་ཤེས་ཀྱི་ཕུང་པོ་དང་། ཡེ་ཤེས་ཀྱི་ཁམས་དང་། ཡིད་དང་སྒྲ་དང་མཆོག་གི་དབང་པོ་དང་། དྲི་ཆུ་འཛགས་པ་དྲུག་ནི་ཡེ་ཤེས་ཀྱི་
ཁམས་རྡོ་རྗེ་སེམས་དཔའི་རིགས་སོ། །སྤྱིར་ཆོས་ཅན་གཟུང་འཛིན་ཅན་གྱི་རྣམ་ཤེས་དང་། དེའི་ཆོས་ཉིད་རང་བཞིན་འོད་གསལ་ལ་ཡེ་ཤེས་སུ་འཇོག་པ་ནི་གཞུང་སྤྱི་ལས་གྲགས་པ་སྟེ། དེ་འདྲའི་ཡེ་ཤེས་ཀྱི་ངོ་བོ་རང་བཞིན་རྣམ་དག་ཡིན་པས་སྒྲིབ་པ་མེད་ཀྱང་དེ་ཇི་བཞིན་མ་རྟོགས་པ་གློ་བུར་འཁྲུལ་པའི་སྦུབས་སུ་གནས་པའི་སྣང་ཚུལ་གྱི་དབང་དུ་བྱས་ན་དྲི་བཅས་དེ་བཞིན་ཉིད་ཅེས་བྱ་ཞིང་། སྐབས་འདིར་ཡེ་ཤེས་ཀྱི་ཁམས་ཞེས་པ་ཕལ་ཆེར་ཡེ་ཤེས་དེ་འཆར་བ་ཁུ་བ་འཕོ་བའི་བདེ་བའི་ཆ་ནས་གསུངས་པ་ཤེས་པར་བྱའོ། །དེ་བཞིན་འདོམས་དབང་ལ་རྟགས་ཞེས་བྱ་ཞིང་དེར་གཅི་བ་འབབ་པ་དང་། ཁྱད་པར་དུ་བུད་མེད་ཀྱི་བྷ་ག་དང་སྐྱེས་པའི་རྡོ་རྗེར་ཁུ་བ་འབབ་པས་བདེ་བ་སྟེར་བའི་ཆ་ལས་མཆོག་གི་དབང་པོ་ཞེས་གཉིས་སུ་འབྱེད་ཅིང་། དེ་དག་གི་བྱ་བའང་རིམ་བཞིན་དྲི་ཆུ་འཛག་པ་དང་ཁུ་བ་འཕོ་བར་བྱེད་པ་ཡིན་ནོ། །དེ་ལྟར་སུམ་ཅུ་རྩ་དྲུག་པོ་དེའི་ཚན་རེ་རེ་སྒྲིབ་པ་དང་བྲལ་བར་གྱུར་བའི་ཡེ་ཤེས་ལྔ་མཚོན་བྱེད་སྟོང་པ་ཆེན་པོ་ཡི་གེ་ལྔ་འགོད་པའི་སྐབས་སུ་རྣམ་ཤེས་དང་ཡེ་ཤེས་ཀྱི་དྲུག་ཚན་གཉིས་པོ་གཅིག་ཏུ་བསྡོམ་ཞིང་། ཐིག་ལེ་སྟོང་པ་ཡི་གེ་དྲུག་འགོད་པའི་སྐབས་སུ་རྣམ་ཤེས་དང་ཡེ་ཤེས་ཀྱི་ཁམས་སོ་སོར་ཕྱེ་བ་ཡིན་ཏེ། དེའི་ཕྱིར་སྟོང་ཆེན་ཡི་གེ་ལྔ་འགོད་པའི་ཚིག་འདིས་དེ་གཉིས་ཀ་བསྟན་པ་ཡིན་ནོ། །དེ་ལ་དང་པོ་སྟོང་ཆེན་ཡི་གེ་ལྔ་ནི། སྟོང་པ་ཞེས་པའི་མིང་གིས་སྟོང་ཆེན་ཡི་གེ་དང་པོ་བརྗོད་དེ། འདི་ལྟར་ཕུང་པོ་དྲུག་གི་ནང་ནས་ཡེ་ཤེས་ཀྱི་ཕུང་པོ་དང་། རྣམ་ཤེས་ཀྱི་ཕུང་པོ་དང་། ཁམས་དྲུག་གི་ནང་ནས་ཡེ་ཤེས་ཀྱི་ཁམས་དང་། ནམ་མཁའི་ཁམས་དང་། དབང་པོ་དྲུག་གི་ནང་ནས་ཡིད་དང་རྣ་བ། ཡུལ་དྲུག་གི་ནང་ནས་སྒྲ་དང་ཆོས་ཀྱི་དབྱིངས། ལས་དབང་དྲུག་གི་ནང་ནས་མཆོག་གི་དབང་པོ་དང་ལས་དབང་གི་རྟགས། བྱ་བ་དྲུག་གི་ནང་ནས་ཁུ་བ་འཕོ་བ་དང་དྲི་ཆུ་འཛག་པ་སྟེ། འདི་རྣམས་
སྒྲིབ་པ་དང་བྲལ་བ་ཉིད་དང་། རོ་མཉམ་པ་ཉིད་དང་། གཅིག་ཏུ་འདྲེས་པར་གྱུར་པ་ཉིད་ལ་སྟོང་པ་ཞེས་མིང་བཏགས་པའོ། །དེ་ལ་དེ་རྣམས་རང་བཞིན་གྱིས་རྣམ་པར་དག་པའི་ཕྱིར་ན་འཕོ་བའི་སྒྲིབ་པ་ཟད་པས་སྒྲིབ་པ་མེད་པ་ཉིད་དང་། མི་འཕོ་བའི་བདེ་བ་ཆེན་པོར་རོ་མཉམ་པ་ཉིད་དང་། བདེ་སྟོང་དབྱེར་མེད་ཀྱི་ངོ་བོར་གཅིག་ཏུ་འདྲེས་པར་གྱུར་པ་ཉིད་ལ་ཞེས་སོ། །དེ་ཡང་ཅང་མེད་ཀྱི་ཆད་སྟོང་ནི་མ་ཡིན་ཏེ། རང་བཞིན་མེད་ཀྱང་རྣལ་འབྱོར་པས་དམིགས་ཤིང་རང་རིག་པ་ཉིད་ཀྱི་ཕྱིར་རོ། །དེ་ཉིད་ལ་རྒྱལ་བ་རྣམས་ཀྱིས་གཞོམ་དུ་མེད་པར་གསུངས་ཏེ། གཞོམ་མེད་འདིའི་མིང་ངམ་མཚོན་བྱེད་ཀྱི་མཚན་མ་ནི་ལྷོ་བྱང་ཤར་ནུབ་ཀྱི་ཕྱོགས་བཞིའི་དབུས་སུ་གྱུར་པ་གང་ཡིན་པར་གྲི་གུག་གི་རྣམ་པའི་རི་མོ་ཙམ་ངག་ཏུ་བརྗོད་དུ་མེད་པ་བཀོད་པ་ནི་སྟོང་ཆེན་ཡི་གེ་དང་པོའོ། །ཡེ་ཤེས་ཀྱང་ཞེས་པ་ཡེ་ཤེས་ཞེས་པའི་མིང་འདིས་སྟོང་ཆེན་གྱི་ཡི་གེ་གསུམ་པ་བསྟན་ལ། ཀྱང་ཡིག་ནི་གོང་དང་སྡུད་པའི་དོན་ཏེ། གོང་མ་བཞིན་དུ་སྟོང་ཆེན་ཡི་གེ་གཞན་ཀྱང་འདི་ལྟ་སྟེ་ཞེས་པའི་དོན་ཏོ། གང་ཞེ་ན། ཚོར་ཕུང་མེ་ཁམས་མིག་དང་རོ་དང་ལག་པ་འགྲོ་བ་རྣམས། སྒྲིབ་པ་མེད་པ་དང་རོ་མཉམ་པ་དང་གཅིག་ཏུ་འདྲེས་པར་གྱུར་པ་ནི་ཡེ་ཤེས་ཀྱི་མིང་ཅན་སྟོང་ཆེན་ཡི་གེ་གསུམ་པ་སྟེ། འདིའི་མིང་གི་མཚན་མ་དབུས་མ་གཞོམ་དུ་མེད་པའི་མཚན་མའི་ལྷོ་རུ་ཐིག་ལེ་གཉིས་ཏེ་རྣམ་བཅད་བཀོད་པ་བརྗོད་དུ་མེད་པའོ། །ཐིག་ལེ་ཞེས་པས་སྟོང་ཆེན་བཞི་པ་བསྟན་ཏེ། སྔ་མའི་ཀྱང་ཡིག་གིས་བསྡུས་ཏེ་བསྟན་པའོ། །དེ་ཡང་འདུ་ཤེས་ཀྱི་ཕུང་པོ་དང་། ཆུ་ཡི་ཁམས་དང་། ལྕེ་དང་གཟུགས་དང་རྐང་པ་དང་ལེན་པ་སྟེ། འདི་རྣམས་གོང་བཞིན་སྒྲིབ་མེད་རོ་མཉམ་གཅིག་ཏུ་འདྲེས་པ་ཉིད་ཀྱི་ཕྱིར་གཞོམ་དུ་མེད་པ་སྟོང་ཆེན་བཞི་པ་ཐིག་ལེའི་མིང་ཅན་ནོ། །དེའི་མིང་གི་མཚན་མ་
ནི་དབུས་ཀྱི་མཚན་མའི་བྱང་དུ་ཐིག་ལེ་གཅིག་བཀོད་པ་ང་རོ་སྟེ་བརྗོད་དུ་མེད་པའོ། །མཆོག་ཅེས་པ་མཆོག་དང་པོའི་མིང་གིས་སྟོང་ཆེན་གཉིས་པ་བསྟན་ཏེ། སྔར་གྱི་ཀྱང་ཡིག་གིས་འདི་ཡང་སྟོང་ཆེན་གྱི་མིང་ཅན་དུ་སྡུད་པའོ། །དེ་ཡང་འདུ་བྱེད་ཀྱི་ཕུང་པོ་དང་། རླུང་གི་ཁམས་དང་། སྣ་དང་རེག་བྱ་དང་། ངག་གི་དབང་པོ་དང་། བཤང་བ་འཛག་པ་འདི་རྣམས་སྒྲིབ་བྲལ་རོ་མཉམ་གཅིག་ཏུ་འདྲེས་པར་གྱུར་པ་ནི་མཆོག་གི་མིང་ཅན་སྟོང་ཆེན་ཡི་གེ་གཉིས་པ་སྟེ། འདིའི་མིང་གི་མཚན་མ་ནི་དབུས་མ་གཞོམ་དུ་མེད་པའི་ཤར་དུ་དབྱུག་པའི་རྣམ་པའི་རི་མོ་ཙམ་བརྗོད་དུ་མེད་པའོ། །འདིར་འགྱུར་ལ་ལར་མཆོག་དང་རྡོ་རྗེ་འཛིན་པ་ཞེས་ཡོད་པ་ལྟར་ན། མཆོག་ཕྱི་མ་ནི་དང་ཡིག་གིས་ཟླས་དབྱེ་བའི་བསྡུ་བའི་ཤུགས་ཀྱིས་གོ་བར་བྱའོ། །མཆོག་གཉིས་པས་སྟོང་པ་ལྔ་པ་བརྗོད་དེ། གཟུགས་ཕུང་དང་ས་ཁམས་ལུས་དབང་དྲི་དང་བཤང་ལམ་དང་ངག་གིས་བརྗོད་པ་རྣམས་སྒྲིབ་པ་མེད་པ་ཉིད་དང་རོ་མཉམ་པ་ཉིད་དང་གཅིག་ཏུ་འདྲེས་པར་གྱུར་པ་ཉིད་ནི་མཆོག་ཅེས་པའི་མིང་ཅན་སྟོང་པ་ཆེན་པོའི་ཡི་གེ་ལྔ་པ་སྟེ། འདིའི་མིང་གི་མཚན་མ་ནི་དབུས་མ་གཞོམ་དུ་མེད་པའི་ནུབ་ཏུ་ཐོང་བའི་རྣམ་པ་བརྗོད་དུ་མེད་པའོ། །ཐོང་བའི་རྣམ་པ་ནི་ཐོང་བཤོལ་གྱི་རྣམ་པ་ལྟར་གུག་པ་ལ་གོ་བར་བྱའོ། །དེ་ལྟར་བརྗོད་པའི་རིམ་པས་སྟོང་པ་ལྔ་པོ་དེ་རྣམས་གཅིག་ཏུ་འདུས་པའམ་འདྲེས་པར་གྱུར་པ་ལས་སྟོང་ཆེན་ཡི་གེ་ལྔའི་བདག་ཉིད་ཝྃ་ཡིག་གྲུབ་པ་ནི་རྡོ་རྗེ་སེམས་དཔའ་བདེ་བ་ཆེན་པོ་སྟེ་རྡོ་རྗེ་ཞེས་བརྗོད་དོ། །འདིར་དབྱངས་ཀྱི་མིང་ཅན་དུ་བྱས་པའི་བརྗོད་དུ་མེད་པའི་ཡི་གེ་ལྔ་ནི། དབུས་སུ་ཨ་ཡིག་སྟོང་པ་གྲི་གུག་གི་རྣམ་པ། ལྷོར་རྀ་ཡིག་སྟོང་པ་ཐིག་ལེ་གཉིས། བྱང་དུ་ཨུ་ཡིག་སྟོང་པ་ཐིག་ལེ་གཅིག །ཤར་དུ་ཨི་ཡིག་སྟོང་པ་དབྱུག་པའི་རྣམ་པ། ནུབ་ཏུ་ལྀ་ཡིག་སྟོང་པ་ཐོད་པའི་རྣམ་པ་སྟེ། དེ་ལྟར་རང་བྱུང་རྩ་བའི་
དབྱངས་ལྔ་པོ་འདིས་ཁམས་ལྔ་སྒྲིབ་བྲལ་དུ་གྱུར་པའི་གཞོམ་དུ་མེད་པའི་སྟོང་ཆེན་ཡི་གེ་ལྔ་བརྗོད་དུ་མེད་པ་ཉིད་མཚོན་པ་ཡིན་ནོ། །དེ་བཞིན་དུ་དབྱངས་ལྔ་པོ་དེ། ཡོན་ཏན་དུ་གྱུར་པ་ཨཱ་སོགས་དང་། འཕེལ་བ་ཨཱ་སོགས་དང་། ཡ་ཎྜ་ར་བསྒྱུར་བ། ཧ་སོགས་ཏེ་རྣམ་པར་འགྱུར་བ་རྣམས་ཀྱང་དེའི་མཚོན་བྱེད་དུ་རུང་བ་ཤེས་པར་བྱའོ། །དེ་ལྟར་ཝྃ་ཡིག་ནི་སྟོང་པ་ཆེན་པོ་ལྔ་ཡི་བདག་ཉིད་ཅེས་བྱ་བ་སྟེ། དམིགས་པ་མེད་པའི་སྙིང་རྗེའི་བདག་ཉིད། རྡུལ་ཕྲ་རབ་ཀྱི་ཆོས་ལས་འདས་པ་པྲ་ཕབ་པའི་རང་བཞིན་དང་མཚུངས་པ་ཉིད་དུ་རྣལ་འབྱོར་བས་རྟོགས་པར་བྱའོ། །འདིར་ཕུང་ཁམས་སོ་དྲུག་པོའི་དབྱངས་རྣམས་ནི་འདི་ལྟ་སྟེ། ཡེ་ཤེས་ཕུང་པོ་ཨཾ། རྣམ་ཤེས་ཕུང་པོ་ཨ ། ཡེ་ཁམས་ཨཱཿ མཁའ་ཁམས་ཨཱ། ཡིད་དབང་ཨཾ། རྣ་དབང་ཨ། སྒྲ་ཨཱཿ ཆོས་དབྱིངས་ཨཱ། བྷ་ག་ཧ། དྲི་ཆུ་འཛག་པ་ཧཱཿ མཆོག་གི་དབང་པོ་ཧཾ། ཁུ་བ་འཕོ་བ་ཧཱ་སྟེ། འདི་རྣམས་དབུས་མ་གཞོམ་དུ་མེད་པའི་སྒྲིབ་བྲལ་གྲི་གུག་གི་རྣམ་པའི་མིང་གི་མཚན་མས་བསྡུས་པར་རྟོགས་པར་བྱའོ། །འདུ་བྱེད་ཕུང་པོ་ཨི། རླུང་ཁམས་ཨཱི། སྣ་དབང་ཨེ། རེག་བྱ་ཨཻ། ངག་དབང་ཡ། བཤང་བ་འཛག་པ་ཡཱ། འདི་དག་རྣམས་སྒྲིབ་པ་དང་བྲལ་བ་ཤར་དུ་དབྱུག་པའི་རྣམ་པས་རྟོགས་པར་བྱའོ། །ཚོར་ཕུང་རྀ། མེ་ཁམས་རཱྀ། མིག་དབང་ཨར། རོ་ཨཱར། ལག་པའི་དབང་པོ་ར། འགྲོ་བ་རཱ། འདི་རྣམས་སྒྲིབ་བྲལ་ལྷོར་ཐིག་ལེ་གཉིས་ཀྱི་མཚན་མས་རྟོགས་པར་བྱའོ། །འདུ་ཤེས་ཀྱི་ཕུང་པོ་ཨུ། ཆུ་ཁམས་ཨཱུ། ལྕེ་དབང་ཨོ། ཡུལ་གཟུགས་ཨཽ། རྐང་པའི་དབང་པོ་ཝ། ལེན་པ་ཝཱ། འདི་དག་སྒྲིབ་པ་དང་བྲལ་བ་དབུས་ཀྱི་མཚན་མའི་བྱང་དུ་ཐིག་ལེས་མཚན་མས་རྟོགས་པར་བྱའོ། །གཟུགས་ཕུང་ལྀ། སའི་ཁམས་ལཱྀ། ལུས་དབང་ཨལ། ཡུལ་དྲི་ཨཱལ།
བཤང་ལམ་གྱི་དབང་པོ་ལ། བརྗོད་པ་ལཱ། འདི་དག་སྒྲིབ་པ་དང་བྲལ་བ་ནུབ་ཏུ་ཐོང་བའི་རྣམ་པས་མཚན་མས་རྟོགས་པར་བྱ་བའོ། །དེ་ལྟར་དབྱངས་དང་ཡོན་ཏན་དང་འཕེལ་བ་དང་ཡ་ཎྜ་ར་བསྒྱུར་བའི་རྣམ་པས་སུམ་ཅུ་རྩ་དྲུག་གི་དབྱེ་བ་ཐ་དད་པར་འགྱུར་རོ། །དེ་ལྟར་ཕུང་པོ་རྣམས་སོ་དྲུག་ཏུ་དབྱེ་བས་ཐ་དད་པར་གྱུར་པ་དེར། ཕུང་པོའི་གནས་སུ་རོ་དྲུག་གཟུང་བར་བྱ་སྟེ། ཡེ་ཤེས་དང་ནམ་མཁའ་ནས་ས་ཁམས་ཀྱི་བར་དུ་རིམ་པར་སྐྱུར་བ་བསྐ་བ་ཁ་བ་ཚ་བ་མངར་བ་ལན་ཚྭ་རྣམས་སོ། །རོ་དྲུག་གི་དབྱངས་ནི་རིམ་བཞིན་ཨཾ་ཨ་ཨི་རྀ་ཨུ་ལྀ་ཞེས་སོ། །འགྲེལ་པར་ལྷག་མ་ནི་བརྗོད་པའི་རྣམ་པས་སོ་ཞེས་པ་ཁ་ཅིག་འདི་དྲུག་གི་ལྷག་མ་སུམ་ཅུ་ནི་སྔགས་བརྗོད་པའི་རྣམ་པས་སོ་ཟེར་ཀྱང་དོན་ལྷག་པོ་གོ་རྒྱུ་མི་འདུག་ལ། ཁ་ཅིག་སྟོང་ཆེན་ལྔའི་ལྷག་མ་མཚོན་བྱེད་འདི་དག་ངག་ཏུ་བརྗོད་པའི་རྣམ་པས་མཚོན་བྱེད་ཡིན་ནོ་ཞེས་དང་། འདིར་བཤད་པའི་ལྷག་མ་ཆོས་སྣ་ཚོགས་སོ་སོ་རེ་རེ་ནས་ཀྱང་རང་རང་གི་མིང་གི་དང་པོ་བརྗོད་པའི་རྣམ་པས་མཚོན་པར་ཤེས་པར་བྱའོ་ཞེས་ཀྱང་བཤད་དོ། །དེ་ལྟར་ཡི་གེ་སུམ་ཅུ་རྩ་དྲུག་གི་བདག་ཉིད་ཅན། སྟོང་པ་ཆེན་པོ་ཡི་གེ་ལྔ་ཝྃ་ཡིག་དེ་ལ་རྒྱལ་བ་རྣམས་ཀྱིས་རྡོ་རྗེ་ཞེས་སུ་བརྗོད་དེ། སྒྲིབ་བྲལ་རོ་མཉམ་གཅིག་ཏུ་འདྲེས་པའི་ངོ་བོས་གཞོམ་དུ་མེད་པ་རྡོ་རྗེ་ལྟ་བུ་ཡིན་པའི་ཕྱིར་རོ། །རྡོ་རྗེ་དེ་འཛིན་པ་ནི་ཝཾ་ཡིག་དམིགས་པ་མེད་པའི་སྙིང་རྗེ་བདེ་བ་ཆེན་པོ་ཉིད་ཡིན་ནོ། །ཐིག་ལེ་སྟོང་པ་ཡི་གེ་དྲུག་ནི་ཨེ་ཡིག་ཆོས་འབྱུང་རྣམ་པ་ཐམས་ཅད་པའི་སྟོང་པ་ཉིད་ཀྱི་གཟུགས་སོ། །དེ་ཡང་འདི་ལྟར་རྣམ་ཤེས་ཀྱི་ཕུང་པོ་དང་། ནམ་མཁའི་ཁམས་དང་རྣ་བ་དང་། ཆོས་ཀྱི་དབྱིངས་དང་བྷ་ག་སྟེ་མཚན་མ་དང་ཁུ་བ་འཕོ་བ་སྟེ་འདི་རྣམས་སྒྲིབ་པ་དང་བྲལ་བ་རྣམ་པ་ཐམས་ཅད་པའི་གཟུགས་ཅན་སྟོང་པ་ཉིད་དོ། །དབུས་མ་གཞོམ་དུ་མེད་པའི་སྟེང་དུ་
འདིའི་མིང་གི་མཚན་མ་ཀ་སྡེའི་གཙོ་བོའམ་བདག་ཉིད་ཀ་ཡིག་གསལ་བྱེད་སྲོག་མེད་རྐྱང་པ་བརྗོད་དུ་མེད་པ་སྟེ་ཐིག་ལེ་སྟོང་པ་དང་པོའོ། །འདིར་གསལ་བྱེད་སྲོག་མེད་བརྗོད་དུ་མེད་པ་དེ་རྣམས་དབྱུག་པའི་རྣམ་པ་ཙམ་དུ་བཀོད་པ་མཐར་གཉིས་རེ་འདུས་ཏེ་ཨེ་ཡིག་ཏུ་གྲུབ་པ་ནི་ཨེ་ཡིག་གི་གཟུགས་སྒྲུབ་པའོ། །འདུ་བྱེད་རླུང་ཁམས་སྣ་དང་རེག་བྱ་ངག་དང་བཤང་བ་འཛག་པ་འདི་རྣམས་སྒྲིབ་པ་དང་བྲལ་བ་རྣམ་པ་ཐམས་ཅད་པའི་སྟོང་པ་ཉིད་འདིའི་མིང་གི་མཚན་མ་ཤར་གྱི་མཚན་མའི་ཤར་དུ་གསལ་བྱེད་ཙ་སྡེའི་དང་པོ་ཙ་ཡིག་སྲོག་མེད་བརྗོད་དུ་མེད་པ་ནི་ཐིག་ལེ་སྟོང་པ་གཉིས་པའོ། །ཚོར་བ་མེ་དང་མིག་དང་རོ་དང་ལག་པ་འགྲོ་བ་འདི་རྣམས་སྒྲིབ་བྲལ་རྣམ་པ་ཐམས་ཅད་པའི་སྟོང་པ་ཉིད་འདིའི་མིང་གི་མཚན་མ་ཊ་སྡེའི་དང་པོ་ཊ་ཡིག་གསལ་བྱེད་བརྗོད་དུ་མེད་པ་ཉིད་ལྷོའི་མཚན་མའི་ལྷོར་བཀོད་པ་ཐིག་ལེ་སྟོང་པ་གསུམ་པའོ། །འདུ་ཤེས་ཀྱི་ཕུང་པོ་དང་ཆུ་དང་ལྕེ་དང་ཡུལ་གཟུགས་དང་རྐང་པའི་དབང་པོ་དང་ལེན་པ་འདི་རྣམས་སྒྲིབ་བྲལ་རྣམ་པ་ཐམས་ཅད་པའི་སྟོང་པ་ཉིད་འདིའི་མིང་གི་མཚན་མ་པ་སྡེའི་པ་ཡིག་གསལ་བྱེད་བརྗོད་དུ་མེད་པ་བྱང་གི་མཚན་མའི་བྱང་དུ་བཀོད་པ་ཐིག་ལེ་སྟོང་པ་བཞི་པའོ། །གཟུགས་ཕུང་དང་ས་ཁམས་ལུས་དབང་དྲི་དང་བཤང་ལམ་དང་བརྗོད་པ་འདི་རྣམས་སྒྲིབ་བྲལ་རྣམ་པ་ཐམས་ཅད་པའི་སྟོང་པ་ཉིད་འདིའི་མིང་གི་མཚན་མ། ཏ་སྡེའི་ཏ་ཡིག་གསལ་བྱེད་བརྗོད་དུ་མེད་པ་ནུབ་ཀྱི་མཚན་མའི་ནུབ་ཏུ་བཀོད་པའི་ཐིག་ལེ་སྟོང་པ་ལྔ་པའོ། །ཡེ་ཤེས་ཀྱི་ཕུང་པོ་དང་ཡེ་ཤེས་ཀྱི་ཁམས་དང་། ཡིད་དང་སྒྲ་དང་མཆོག་གི་དབང་པོ་དང་དྲི་ཆུ་འཛག་པ་འདི་རྣམས་སྒྲིབ་པ་དང་བྲལ་བ་རྣམ་པ་ཐམས་ཅད་པའི་སྟོང་པ་ཉིད་འདིའི་མིང་གི་མཚན་མ་ས་སྡེའི་བདག་ཉིད་ས་ཡིག་གསལ་བྱེད་བརྗོད་དུ་མེད་པ་དབུས་ཀྱི་མཚན་མའི་འོག་ཏུ་བཀོད་པ་ཐིག་ལེ་སྟོང་པ་ཡི་གེ་དྲུག་པའོ། །དཔེ་ལ་ལར་རྣམ་པ་ཐམས་ཅད་
པས་སྟོང་པ་ཞེས་རྣམ་དབྱེ་གསུམ་པ་སྦྱར་བ་ལྟར་ན་སྤྲོས་པའི་རྣམ་པ་ཐམས་ཅད་ཀྱིས་སྟོང་པ་རྣམ་མེད་ཀྱི་ཆ་ནས་བཤད་དགོས་ལ་གང་ལྟར་ཀྱང་མི་འགལ་ཏེ་རང་བཞིན་གྱིས་གྲུབ་པའི་རྣམ་པ་མེད་བཞིན་རྣམ་བཅས་ཀྱི་སྣང་བ་མི་འགག་པའི་རྣམ་ཀུན་མཆོག་ལྡན་གྱི་སྟོང་ཉིད་ཡིན་པས་སོ། །དེ་ལྟར་ཐིག་ལེ་སྟོང་པ་འགྱུར་མེད་དམ་ཡི་གེ་དྲུག་ནི་ཆོས་འབྱུང་གཞིག་ཏུ་མེད་པའི་རྡོ་རྗེ་འཛིན་པ་ཨེ་ཡིག་སྟེ་རྡོ་རྗེ་ཝཾ་ཡིག་གི་རྟེན་གནས་ཡིན་པས་གོང་གི་རྡོ་རྗེ་འཛིན་པ་ཞེས་པའི་སྒྲའི་ཕྱོགས་གཅིག་གིས་འདི་བསྟན་པའང་ངོ་། །དེ་ཡང་རྣལ་འབྱོར་པའི་སོ་སོ་རང་རིག་པའི་ཡུལ་དུ་སྟོང་པ་ཉིད་དམིགས་པ་དང་བཅས་པ་པྲ་ཕབ་པའི་རང་བཞིན་ཅན་རྣམ་ཀུན་མཆོག་ལྡན་གྱི་སྟོང་པ་ཉིད་དོ། །འདིར་ཕུང་པོ་དང་ཁམས་ལ་སོགས་པའི་གསལ་བྱེད་རྣམས་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་དྷ་ཎ། པ་ཕ་བ་བྷ་མ། ཏ་ཐ་ད་དྷ་ན། ས་ཉྤ་ཥ་ཤ་ྈྐ། ཧ་ཡ་ར་ཝ་ལཀྵ། ཞེས་པ་སྟེ། དབྱངས་དང་གསལ་བྱེད་འདི་དག་གི་ཡང་ཐུང་ངུ་དང་རིང་པོའི་དབྱེ་བས་ཕུང་པོ་དང་ཁམས་ལ་སོགས་པའི་དབྱེ་བ་ཤེས་པར་བྱ་སྟེ། ལུས་ཀྱི་དབྱེ་བས་ཕུང་པོ་དང་། དབང་པོ་ནི་དབྱངས་གསལ་ཐུང་ངུ་རྣམས་ཡིན་ལ། ཁམས་དང་ཡུལ་ནི་རིང་པོའི་ཆོས་སུ་གྱུར་པའོ། །རོ་དྲུག་དང་བཅས་པའི་ཡེ་ཤེས་དང་ནམ་མཁའ་སོགས་ཁམས་ཀྱི་རྣམ་པར་འགྱུར་བའི་དབྱེ་བ་སོ་དྲུག་དང་། ཕུང་པོ་དྲུག་ལ་དབང་པོ་དྲུག་གི་དབྱེ་བས་ཕུང་པོ་སོ་དྲུག་ཏུ་འགྱུར་བ་འདི་ལྟ་སྟེ། རོ་དྲུག་དང་ཁམས་དྲུག་དང་དབང་པོ་དྲུག་དང་ཡུལ་དྲུག་དང་ལས་དབང་དྲུག་དང་ལས་དབང་གི་ཡུལ་དྲུག་ནི་རོ་དྲུག་དང་བཅས་པ་རྣམས་ཁམས་ཀྱི་རྣམ་པར་འགྱུར་བའོ། །རྣ་བའི་རྣམ་པར་ཤེས་སོགས་རྣམ་ཤེས་དྲུག་དང་། དེ་བཞིན་དུ་འདུ་བྱེད་དྲུག་དང་། ཚོར་བ་དྲུག་དང་། འདུ་ཤེས་དྲུག་དང་། གཟུགས་ཕུང་དྲུག་དང་། ཡེ་ཤེས་ཀྱི་ཕུང་པོ་དྲུག་ནི་ཕུང་པོའི་རྣམ་པར་འགྱུར་བའོ། །དབང་པོ་དྲུག་གི་སྒོ་ནས་རྣམ་ཤེས་དྲུག་དང་།
དེ་དྲུག་ཡུལ་ལ་འཇུག་པའི་མིག་ཤེས་ཀྱི་འདུ་བྱེད་སོགས་འདུ་བྱེད་དྲུག་དང་། མིག་ཤེས་ཀྱི་ཚོར་བ་ནས་ཡིད་ཤེས་ཀྱི་ཚོར་བའི་བར་དྲུག་དང་། གཟུགས་ནས་ཆོས་ཀྱི་བར་དུ་འདུ་ཤེས་པ་མིག་ཤེས་ཀྱི་འདུ་ཤེས་སོགས་དྲུག་དང་། གཟུགས་ཀྱི་ཕུང་པོ་ས་ཆུ་མེ་རླུང་ཁམས་དཀར་དམར་དྲུག་དང་ཡེ་ཤེས་ཀྱི་ཕུང་པོ་སྟེང་འོག་གི་རྩ་གསུམ་གསུམ་དྲུག་ལ་སྲོག་ཐུར་གྱི་རླུང་རྒྱུ་བ་དྲུག་གམ་མིག་ཤེས་ཀྱི་ཡེ་ཤེས་ནས་ཡིད་ཀྱི་ཡེ་ཤེས་ཀྱི་བར་དྲུག་གོ། འདི་དག་འོག་ཏུ་འཆད་པར་འགྱུར་བས་ལེའུ་དང་པོ་འདིར་མདོར་བསྡུས་པ་ཙམ་ཞིག་བསྟན་པའོ། །འདིར་སྟོང་ཆེན་ཡིག་ལྔ་ནི་དབྱངས་ཀྱི་ཚོགས་ཏེ་ཁུ་བ་དང་ཟླ་བ་ཞེས་བརྗོད་དོ། །ཐིག་སྟོང་ཡིག་དྲུག་ནི་གསལ་བྱེད་ཀྱི་ཚོགས་ཏེ་རྡུལ་དང་ཉི་མ་ཞེས་བརྗོད་དོ། །ཁུ་བ་དང་ཟླ་བ་ནི་ཝཾ་ཡིག་སྟེ་རྡོ་རྗེའོ། །རྡུལ་དང་ཉི་མ་ཨེ་ཡིག་སྟེ་པདྨའོ། །རྡོ་རྗེ་དང་པདྨ་གཉིས་གཅིག་ཏུ་སྦྱོར་བ་ཉིད་ནི་རྡོ་རྗེ་སེམས་དཔའ་ཞེས་བྱ་སྟེ། རྡོ་རྗེ་ཞེས་པ་མཆོག་གི་བདེ་བ་དང་ཡུལ་ཅན་ཤེས་པ་དང་ཁུ་བའོ་ཞེས་ཟླ་བ་དང་སྐུ་ཡང་ངོ་། །སེམས་དཔའ་ཞེས་པ་རྣམ་པ་ཐམས་ཅད་པའི་ཤེས་རབ་ཀྱི་གཟུགས་ཏེ་སྟོང་གཟུགས་དང་ཤེས་བྱ་དང་རྡུལ་དམར་ཆ་དང་ཉི་མ་དང་གསུང་ཞེས་སུའང་བརྗོད་དོ། །དེ་དག་ལ་ཆོས་ཉིད་ཀྱི་ཡེ་ཤེས་དང་སྲོག་གི་རླུང་བཅས་ཀུན་གཞི་རྣམ་པར་ཤེས་པ་ཐུགས་ཀྱིས་བྱིན་གྱིས་བརླབས་པ་སྟེ་རོ་མཉམ་པར་བཟུང་བ་དང་། གདོད་མ་ནས་རང་བཞིན་རྣམ་དག་སྒྲིབ་པ་དང་བྲལ་བ་དང་། དེ་རྣམས་རོ་མཉམ་པར་གཅིག་ཏུ་འདྲེས་པར་གྱུར་པ་ནི་དོན་དམ་པ་དང་། གསང་སྔགས་ཀྱི་དེ་ཁོ་ན་ཉིད་དང་། དེ་ཡི་མཐུས་འགྲོ་བའི་དོན་བྱེད་པ་པོ་ཡང་ཡིན་ནོ། །དེའི་ཕྱིར་རྒྱུ་དེ་ལས་སྐུ་གསུང་ཐུགས་གསུམ་ཡེ་ཤེས་དང་ལྷན་ཅིག་ཏུ་སྦྱོར་བ་ཞལ་བཞིའི་རྒྱུར་འགྱུར་ཏེ། ཡེ་ཤེས་དུས་མེ་ནུབ་ཀྱི་ཞལ་སེར་པོ་དང་། རྣམ་ཤེས་དང་སྒྲ་གཅན་ཤར་གྱི་ཞལ་
ནག་པོ། ཟླ་བ་དང་སྐུ་བྱང་གི་ཞལ་དཀར་པོ། ཉི་མ་དང་གསུང་ལྷོའི་ཞལ་དམར་པོའོ། །ཐབས་ཤེས་ཀྱི་ཆ་ཟླ་བ་དང་ཉི་མ་འདི་དག་ལུས་བསམ་མམ་གཙོ་བོ་དང་ཕལ་བའི་དབྱེ་བས་ཁམས་དྲུག་དྲུག་ཏུ་རྟོགས་པར་བྱ་སྟེ། རེ་རེ་ལའང་ས་ཆུ་མེ་རླུང་རོ་དང་རོ་ཆེན་པོའི་ཆ་ཤས་ཀྱིས་སོ། །རོ་ཞེས་པ་ནམ་མཁའི་ཁམས་ཀྱི་མིང་ངོ་། །རོ་ཆེན་པོ་ཞེས་པ་ཡེ་ཤེས་ཀྱི་ཁམས་ཀྱི་མིང་ངོ་། །འདི་རྣམས་ལ་གཙོ་བོའི་དབང་དུ་བྱས་ན་ཁུ་བ་ལས་བྱུང་བ་གསུམ་དང་། བྱུང་བ་མ་ཡིན་པ་གསུམ་སྟེ། ཆུ་རླུང་རོའི་ཁམས་གསུམ་པོ་འདི་དག་ཁུ་བ་ལས་བྱུང་བའོ། །ལྷག་མ་གསུམ་ཁུ་བ་ལས་གཙོ་བོར་བྱུང་བ་མ་ཡིན་པའོ། །དེ་བཞིན་རྡུལ་ལས་བྱུང་བ་གསུམ་དང་བྱུང་བ་མ་ཡིན་པ་གསུམ་སྟེ། ས་མེ་རོ་ཆེན་པོའི་ཁམས་གསུམ་འདི་དག་རྡུལ་ལས་བྱུང་བའོ། །ལྷག་མ་གསུམ་དེ་ལས་བྱུང་བ་མིན་པར་ཤུགས་ཀྱིས་ཤེས་སོ། །དེ་ལྟར་གཙོ་བོ་རང་རང་ལས་མ་བྱུང་བའི་ཁམས་ལྷག་མ་གསུམ་ནི་ཁུ་བ་དང་རྡུལ་ཕན་ཚུན་འདུས་པའི་རྐྱེན་ལས་ཕལ་པའི་རྒྱུ་ལས་བྱུང་བའོ། །དེ་ལྟར་ན་རེ་རེའང་ཁམས་དྲུག་གི་ཆ་ཤས་སུ་འགྱུར་རོ། །དེ་ལྟར་ཟླ་བ་དང་ཉི་མ་དག་གི་ཉེར་ལེན་ལས་བྱུང་བའི་ཁམས་གསུམ་པོ་རྣམས་ནི་རིམ་པ་བཞིན་མངལ་སྐྱེས་རྣམས་ཀྱི་ལུས་དང་ངག་དང་སེམས་སུ་འགྱུར་ཏེ། ཟླ་བའི་ཁམས་ཆུ་རླུང་ནམ་མཁའ་གསུམ་པོ་རྣམས་ཐབས་ཀྱི་ལུས་ངག་སེམས་དང་ཉི་མའི་ས་མེ་ཡེ་ཤེས་ཀྱི་ཁམས་རྣམས་ཤེས་རབ་ཀྱི་ལུས་ངག་སེམས་ཏེ། དེ་ལྟར་ཁུ་བ་དང་རྡུལ་ལས་བྱུང་བའི་ཕྱིར་ནའོ། །དེའི་ཕྱིར་ས་ཆུ་ཟུང་འཇུག་ལུས། མེ་རླུང་ངག །མཁའ་སེམས་ཟུང་འཇུག་ཐུགས་ཏེ་གཉུག་མའི་སྒོ་གསུམ་མམ། རྡོ་རྗེ་གསུམ་གྱི་བསྒྲུབ་གཞི་འབྱུང་ལྔ་སེམས་དང་བཅས་པའི་དངས་མའི་ཐིག་ལེ་མི་ཤིགས་པ་རྒྱུད་གཞན་ལས་གསུངས་པའང་གནད་འདི་ལས་སོ། །དེ་ལྟར་ཁམས་དྲུག་པོ་
འདི་དག་ནི་དབང་པོ་དྲུག་ལ་སོགས་པའི་དབྱེ་བས་རིགས་དྲུག་སྟེ་དྲུག་ཚན་དྲུག་ཏུ་འགྱུར་རོ། །དེ་བཞིན་སྐུ་གསུང་ཐུགས་ཀྱི་རིགས་གསུམ་ནི་ངོ་བོ་ཉིད་ཀྱི་རིགས་དང་བཅས་པས་རིགས་བཞིར་འགྱུར་རོ། །དེའི་དབང་གིས་དག་པའི་སྐབས་སུའང་སྐུ་གསུམ་ཡང་སྐུ་བཞིར་འགྱུར་རོ། །སྒྲིབ་བཅས་ལ་ལུས་ངག་སེམས་སམ་སད་རྨི་གཉིད་འཐུག་གི་གནས་སྐབས་གསུམ་དང་ཡེ་ཤེས་བཞི་པའི་དབང་གིས་གནས་སྐབས་བཞིར་འགྱུར་རོ། །ཁམས་ལྔའི་མི་བསྐྱོད་པ་ལ་སོགས་པའི་རིགས་ནི་ཡེ་ཤེས་ཀྱི་རིགས་དང་ལྷན་ཅིག་རིགས་དྲུག་ཏུ་འགྱུར་རོ། །དེ་བཞིན་དུ་མངལ་ནས་སྐྱེས་པ་རྣམས་ཀྱི་ཕུང་པོ་ལྔའི་རིགས་ནི་ཡེ་ཤེས་ཀྱི་ཕུང་པོ་དང་ལྷན་ཅིག་རིགས་དྲུག་ཏུ་འགྱུར་རོ། །ཇི་ལྟར་ན་བུ་མོ་ལོ་བཅུ་གཉིས་པ་ན་རྡུལ་འབབ་པ་དང་། སྐྱེས་པ་ལོ་བཅུ་དྲུག་པ་ལ་ཁུ་བ་འཕོ་བ་སྟེ། བུ་མོ་དང་སྐྱེས་པ་ལ་རྡུལ་དང་ཁུ་བ་འབབ་པའི་དུས་ཇི་སྲིད་པ་དེའི་སྔོན་དུ་སྒོ་གསུམ་གྱི་རིགས་གསུམ་མམ། ཕུང་པོ་ལྔའི་རིགས་ལྔར་རིག་པར་བྱའོ། །ཁུ་རྡུལ་འབབ་པ་ཡེ་ཤེས་ཀྱི་ཁམས་བྱུང་བའི་དུས་ནས་ཇི་སྲིད་འཆི་བའི་བར་དུ་གཉིས་ཀ་ལ་ཡེ་ཤེས་ཀྱི་རིགས་བསྣན་ཏེ་རིགས་བཞི་དང་རིགས་དྲུག་གོ། དེ་ལྟར་ཡང་རྩ་བའི་རྒྱུད་ལས། རིགས་གསུམ་དང་ནི་རིགས་ལྔ་ཉིད། །རང་བཞིན་གཅིག་དང་རིགས་བརྒྱའོ། །ཞེས་གསུངས་ཏེ། གཉིས་མེད་ལྷན་སྐྱེས་ཀྱི་ཡེ་ཤེས་རིགས་གཅིག་དང་། དེ་ལས་ལུས་ངག་ཡིད་ཀྱི་རིགས་གསུམ་དང་། ཕུང་པོ་ལྔའི་རིགས་ལྔ་དང་། དེ་ལས་དབྱེ་བའི་རིགས་བརྒྱ་འབྱུང་ཞིང་བསམ་ཡས་སྒྱུ་འཕྲུལ་དྲྭ་བའི་རིགས་ཀྱི་བར་དུའོ། །དེ་ལྟར་ཡང་མཚན་ཡང་དག་པར་བརྗོད་པ་ལས། སྟོང་པ་ཆེན་པོ་ཡི་གེ་ལྔ། །ཐིག་ལེ་སྟོང་པ་ཡི་གེ་དྲུག །ཅེས་གསུངས་པ་ལྟར། སྟོང་ཆེན་ལྔ་དང་། ཐིག་སྟོང་དྲུག་གི་ཡི་གེ་ཨེ་བཾ་བཤད་
པ་འདི་ནི་ཤིན་ཏུ་གལ་ཆེ་སྟེ། མཚོན་བྱེད་རྟགས་ཀྱི་ཨེ་ཝཾ་གྱིས། མཚོན་བྱ་དོན་གྱི་ཨེ་ཝཾ་ཐབས་ཤེས་ཟུང་འཇུག་རྟོགས་པར་བྱེད་ལ། ཐབས་ཤེས་གཉིས་སུ་དབྱེར་མེད་ཅིང་རིགས་མེད་པ་དུས་ཀྱི་འཁོར་ལོ་རྡོ་རྗེ་སེམས་དཔའ་དང་པོའི་སངས་རྒྱས་གསང་ཆེན་རིགས་གཅིག་ལས། རིགས་གསུམ་དང་རིགས་ལྔ་དང་རིགས་བརྒྱ་ནས་སྒྱུ་འཕྲུལ་དྲ་བའི་རིགས་ཀྱི་རྣམ་པར་འཕྲོ་བ་ཤེས་པར་བྱེད་པའི་ཕྱིར་རྒྱུད་ཀྱི་བཤད་བྱའི་སྙིང་པོ་ཉིད་དུ་ངེས་ལ། དེས་རྒྱུད་གཞན་མཐའ་དག་གི་ངེས་པའི་དོན་ཡང་གསལ་བར་ནུས་ཏེ་གསང་སྔགས་ཀྱི་བརྡ་ཁྱད་པར་ཅན་འདི་དག་གི་སྒོ་ནས་ཟབ་མོའི་རྒྱུད་དོན་བསྟན་པ་ཤེས་པར་བྱའོ། །དུས་ཀྱི་འཁོར་ལོའི་རྒྱུད་དང་འགྲེལ་པ་རྣམས་སུ་བརྗོད་བྱའི་དངོས་པོ་རྣམས་རང་རང་གི་ཡི་གེ་དང་སྦྱར་བ་འདི་ཤིན་ཏུ་དོན་ཆེ་བ་ཞིག་ཡིན་ཀྱང་བློ་དམན་དག་ལྷ་བསྒོམ་ན་ས་བོན་དགོས་ཀྱང་ཐམས་ཅད་ལ་ཡི་གེ་དང་སྦྱར་བ་མེད་ཀྱང་ཆོག་གོ་སྙམ་པས་གལ་ཆུང་དུ་བྱེད་པ་ནི་གནད་མ་གོ་བ་སྟེ། འདི་ལྟར་ཡི་གེ་ཨ་ཡི་གདངས་གཅིག་པུ། གནས་དང་བྱེད་པ་ལ་སོགས་པས་བསྐྱོད་པའི་དབྱངས་དང་གསལ་བྱེད་རྩ་བའི་ཡི་གེ་རྣམས་སུ་འགྱུར་ཞིང་། དེ་དག་ཕན་ཚུན་ཚོགས་པའི་མིང་དང་ཚིག་གིས་འཁོར་འདས་ཀྱི་ཆོས་ཀུན་མཚོན་པར་ནུས་པ་ནི་གསུང་རྡོ་རྗེ་འཕྲུལ་ཆེན་ཡི་གེའི་ཆོ་འཕྲུལ་རྨད་དུ་བྱུང་བ་ཡིན་ལ། རྗོད་བྱེད་སྲོག་ཆེན་པོ་ཨ་ཡིག་ལྷན་སྐྱེས་དག་པའི་རིགས་ལས་བྱུང་བའི་ཡི་གེའི་ཚོགས་རྣམས་ཀྱང་། ཐབས་ཤེས་གཉིས་ཀྱི་རིགས་དང་། རིགས་གསུམ་དང་བཞི་དང་ལྔ་ལ་སོགས་པའི་རྣམ་པར་གནས་ཤིང་། བརྗོད་བྱ་དོན་གྱི་ཆོས་སྣང་ཞིང་སྲིད་པས་བསྡུས་པ་ཐམས་ཅད་ཀྱང་། སྲོག་གི་རླུང་གི་བཞོན་པས་བསྐྱོད་པའི་རྣམ་པར་རྟོག་པ་སེམས་ཀྱི་དབང་ལས་བྱུང་ཞིང་། ཆོས་ཉིད་མི་རྟོག་འོད་གསལ་བའི་ཡེ་ཤེས་ཀྱི་དབྱིངས་སུ་དབྱེར་མེད་པའི་རིགས་གཅིག་དང་། ཐབས་ཤེས་ཀྱི་གཉིས་དང་།
དེ་བཞིན་རིགས་གསུམ་དང་བཞི་དང་ལྔ་དང་དྲུག་ལ་སོགས་པར་འགྱུར་རོ། །བརྗོད་བྱ་དོན་དང་རྗོད་བྱེད་ཡི་གེ་དེ་དག་ཇི་ལྟར་མེའི་ཚ་བ་དང་ཆུའི་གཤེར་བ་བཞིན་དུ་ཀུན་རྫོབ་ཏུ་རང་རང་གི་ཆོས་ཉིད་དམ་རང་བཞིན་གྱི་ཡོན་ཏན་གྱི་དབང་གིས་སོ་སོའི་རིགས་སུ་གནས་པའི་ཕྱིར། བརྗོད་བྱའི་དོན་གྱི་དངོས་པོ་ཐམས་ཅད་ཀྱང་རྗོད་བྱེད་ཡི་གེ་དང་འབྲེལ་ཞིང་ཡི་གེ་ལས་བྱུང་བ་ཡི་གེའི་རྩ་བ་ཅན་ཡིན་པས། དེ་དག་རང་རང་གི་ཡི་གེ་བསྟན་པ་དེས། དེའི་བྱུང་ཁུངས་དང་རིགས་དང་ཁ་དོག་དང་ཡོན་ཏན་དང་བྱེད་ལས་སོགས་མཚོན་པར་ནུས་པའི་ཕྱིར་འདི་ལྟ་བུ་གསང་སྔགས་ཀྱི་བརྡའ་ཁྱད་པར་ཅན་དོན་ཆེན་པོ་ཡིན་ཏེ། ཇི་ལྟར་ལྷ་རྣམས་ཀྱི་ས་བོན་ནི། ལྷ་དེ་དག་བསྐྱེད་པའི་རྒྱུ་དང་། ཐུགས་སྲོག་ཡིན་ལ། དེ་བསྒོམ་ཞིང་བཟླས་པས་དངོས་གྲུབ་ཏུ་འགྱུར་བས། ལྷའི་སྲོག་དང་རྩ་བ་ནི་ཡི་གེར་བཤད་པ་དེ་བཞིན་དུ་དངོས་པོ་ཀུན་ལའང་ཡིན་ཏེ་དེ་དག་གི་སྲོག་དང་རྩ་བར་གྱུར་པ་ཡི་གེ་ཡིན་པར་ཤེས་པར་བྱ་ཞིང་། འོག་གི་སྐབས་རྣམས་སུའང་དེ་ལྟར་དྲན་པར་བྱ་སྟེ། ཕྲ་བའི་རླུང་སེམས་ཡི་གེས་མཚོན་ཅིང་དེ་ལས་དེ་གྱུར་པ་ཡིན་པའི་ཕྱིར་རོ། །དེ་ལྟར་འཕྲོས་དོན་དང་བཅས་ཏེ་ཡི་གེ་ལྔ་དང་དྲུག་གི་དོན་ཞུས་པ་བཤད་ཟིན་ཏོ། །དེ་ནས་ཇི་སྐད་བཤད་པའི་རྒྱུ་གཞི་དུས་ཀྱི་རིགས་དེ་དག་གི་རིགས་ཅན་ལྷ་རྣམས་བརྗོད་པ་ལ། དང་པོ་སྒྲིབ་བྲལ་དག་པ་དཀྱིལ་འཁོར་གྱི་འཁོར་ལོ་ལས་བརྩམ་སྟེ། སངས་རྒྱས་ཞེས་པ་ཡེ་ཤེས་དང་རྣམ་ཤེས་སོགས་ཕུང་པོ་དྲུག་སྒྲིབ་བྲལ་གྱི་རིགས་དྲུག་གི་སངས་རྒྱས་དྲུག་གོ། འོག་ཏུ་སྡུད་སྒྲ་ཡང་ཡིག་གི་ནུས་པས་འདིར་ཁམས་དྲུག་དང་དབང་པོ་དྲུག་དག་ཡུལ་དྲུག་དང་ལས་ཀྱི་དབང་པོ་དྲུག་དང་དེའི་བྱ་བ་དྲུག་རྣམ་པར་དག་པ། རིམ་བཞིན་རྡོར་དབྱིངས་ལ་སོགས་ཡུམ་དྲུག་དང་། བྱང་
ཆུབ་སེམས་དཔའ་དྲུག་དང་། སེམས་མ་དྲུག་དང་། སྒོ་སྐྱོང་ཁྲོ་བོ་དྲུག་དང་། དེའི་ཡུམ་དྲུག་དང་བཅས་པ་རྣམས་བཟུང་ངོ་། །ལྷ་དང་ལྷ་མིན་ཡང་། ཞེས་པས་ལྷ་ནི་ཚིགས་བཅུ་གཉིས་དག་པའི་ལྷ་ཆེན་པོ་བཅུ་གཉིས་དང་ཐུན་བརྒྱད་དག་པའི་ཙཱརྩི་ཀ་ལ་སོགས་པ་བརྒྱད་འཁོར་དང་བཅས་པའོ། །ལྷ་མིན་ནི་ཀླུའི་རྒྱལ་པོ་རྣམས་དང་ལྷ་མོ་ཁྱི་གདོང་མ་སོགས་པ་ཡང་ངོ་། །དེ་བཞིན་དུ་མུ་སྟེགས་པ་གཞུག་པའི་ཕྱིར་དེ་ཉིད་ཉི་ཤུ་རྩ་ལྔ་དྲིས་པ་ནི། ཕྱི་རོལ་དུ་དང་ནང་རང་གི །ལུས་ལ་དང་གཞན་དག་པའི་དཀྱིལ་འཁོར་ལ་ཡང་སྟེ་ཞེས་པ་ཁྱད་པར་གྱི་ཆོས་ཀྱི་དབྱེ་བ་གསུམ་པོ་དེ་སྔོན་དུ་བརྗོད་ནས། ཁྱད་གཞི་གང་ལ་ཞེ་ན། དེ་ཉིད་ཉེར་ལྔ་དང་། ལུས་ཀྱི་ཚད་ལ་སོགས་པ་ཡང་ཕྱི་ནང་གཞན་གསུམ་ལ་སྦྱར་ཚུལ་ཞུས་པའོ།།དེ་ཉིད་ཉེར་ལྔ་གང་ཞེ་ན། ལོངས་སྤྱད་བྱ་རང་བཞིན་སོགས་ཉི་ཤུ་རྩ་བཞི་པོ་རྣམས་ལ། ལོངས་སྤྱོད་པ་པོའམ་ཟ་བ་པོ་སྐྱེས་བུ་དང་བཅས་པ་ཤེས་བྱ་དེ་ཉིད་ཉི་ཤུ་རྩ་ལྔ་པའི་བདག་ཉིད་ཇི་ལྟར་ཡིན་པ་ཡང་ཞུས་སོ། །དང་ཞེས་པ་ཚིག་འོག་མ་དང་སྡུད་པའི་སྒྲའོ། །དེ་ལ་མུ་སྟེགས་བྱེད་རྣམས་ཀྱི་འཇིག་རྟེན་ཐམས་ཅད་ཚངས་པ་སོགས་བྱེད་པ་པོས་བྱས་སོ་ཞེས་དང་བྱེད་པ་པོ་རྟག་གཅིག་རང་དབང་ཅན་དུ་བཤད་པ་དེ་ལྟ་བུ་ནི་མི་སྲིད་དེ་རིགས་པས་ཁེགས་པའི་ཕྱིར། སེམས་ཅན་རྣམས་ལྷན་སྐྱེས་འོད་གསལ་གྱི་ངང་ལས་གཡོ་བྱེད་ལས་ང་གི་ཆོ་འཕྲུལ་ལས་བྱུང་བ་སོགས་ལ་དགོངས་ནས། བཅོམ་ལྡན་འདས་ཀྱིས་ཀྱང་། སྒྱུ་འཕྲུལ་ཆེན་མོ་དྲག་ཆེན་པོ། །འབྱུང་དང་སྡུད་པར་བྱེད་པ་མོ། །རང་ཉིད་བྱེད་པོ་དང་འཕྲོག་པོ། །རང་ཉིད་རྒྱལ་པོ་རང་གཙོ་བོ། །ཞེས་རྒྱུད་གཞན་དུ་བསྟན་པ་དེ་ལྟར་དགོངས་པའི་དབང་གིས་གསུངས་པ་ཡོད་ལ། དོན་དམ་པར་དེ་ལྟར་བྱེད་པོ་འཕྲོག་པོ་རང་རྒྱུད་པར་འཛིན་པ་ནི་བརྫུན་པ་སྟེ། དོན་དམ་པར་བྱེད་པ་པོ་དང་འཕྲོག་པ་པོ་མེད་དོ། །མུ་སྟེགས་བྱེད་
རྣམས་ཀྱིས་ཡོངས་སུ་བརྟག་པའི་ཆོས་རང་བཞིན་དང་སྐྱེས་བུ་ལ་སོགས་པ་གཞན་ཡང་དེ་དག་གིས་དོན་དམ་པར་བརྟག་པ་ཡང་རྫུན་ནོ། །འདིར་མུ་སྟེགས་པ་རྣམས་ཀྱི་རང་བཞིན་ལ་སོགས་པ་ཉེར་བཞི་དང་སྐྱེས་བུ་དང་ཉེར་ལྔ་བཤད་དེ། རྩ་བའི་རང་བཞིན་ཡོན་ཏན་གསུམ་ཆ་མཉམ་པ་ནི་རྣམ་པར་འགྱུར་བ་མ་ཡིན་ཏེ། རྣམ་འགྱུར་གཞན་ཐམས་ཅད་ཀྱི་རྒྱུའོ་ཞེས་བཤད་པ་དེ་ནི་འདིར་སེམས་ཅན་རྣམས་ཀྱི་བཞི་པའི་གནས་སྐབས་སྐྱེད་པར་བྱེད་པ་ནམ་མཁའི་ཁམས་སོ། །རང་བཞིན་དེ་ལས་ཆེན་པོ་བདུན་བྱུང་ཞེས་པ་ནི་འདིར་ས་ཆུ་མེ་རླུང་ཡིད་དང་བློ་དང་ང་རྒྱལ་ཏེ། འདི་རྣམས་རྩ་བའི་རང་བཞིན་ལ་ལྟོས་ནས་རྣམ་འགྱུར་དང་། དེ་ཉིད་རྣམ་འགྱུར་ཕྱི་མ་བསྐྱེད་པའི་རང་བཞིན་ཡང་ཡིན་པས་རང་བཞིན་དང་རྣམ་འགྱུར་གཉིས་ཀ་ཡིན་ཞེས་སོ། །རྣམ་པ་བཅུ་དྲུག་ནི་རྣམ་པར་འགྱུར་བ་ཁོ་ན་སྟེ། དབང་པོ་ལྔ་དང་ཡུལ་ལྔ་དང་ལས་དབང་ལྔ་དང་མཆོག་གི་དབང་པོ་དང་བཅུ་དྲུག་ཡིན་ནོ། །དེ་ལྟར་རང་བཞིན་དང་རྣམ་འགྱུར་ཉེར་གསུམ་བཅས་ཉི་ཤུ་རྩ་བཞིའོ། །འདིར་སྐྱེས་བུ་ཞེས་པ་ཁྱབ་བྱེད་ཡིན་པའི་ཕྱིར་རང་བཞིན་དང་རྣམ་འགྱུར་གཉིས་ཀ་མ་ཡིན་ཏེ་དེ་གཉིས་ཀྱི་ངོ་བོ་དང་བྲལ་བའི་ཕྱིར་རོ། །དེ་ལྟར་ན་ཕྱི་རོལ་དུ་མཁའ་སོགས་འབྱུང་བའི་ཁམས་ལྔ་དང་། སྒྲ་གཅན་དང་ཉི་མ་ཟླ་བ་ཞེས་པ་ནི་རང་བཞིན་བརྒྱད་དེ་རྩ་བའི་རང་བཞིན་དང་ཆེན་པོ་བདུན་ནོ། །བཀྲ་ཤིས་ལ་སོགས་པའི་གཟའ་ལྔ་ནི། དབང་པོ་ལྔ་དང་། ཕྱི་རོལ་གྱི་དབང་པོའི་ཡུལ་ལྔ་དང་། ས་ལ་སོགས་པ་རྣམས་ཀྱི་རོ་དྲུག་ནི་རྣམ་འགྱུར་བཅུ་དྲུག་གོ། ཁ་ཅིག་སྟེ་ཟད་བྱེད་པ་ལྟར་ན་དབང་ལྔ་ཡུལ་ལྔ་སྟེ་བཅུ་དང་འཚོ་བའི་ལུས་དྲུག་སྟེ་ས་ཆུ་མེ་རླུང་ཤིང་དང་འབྲས་བུའི་ལུས་ཀྱི་སྲོག་དྲུག་བཅས་བཅུ་དྲུག་ཅེས་འདོད་དོ། །ལུས་ལ་སྣ་ཚོགས་པའི་ཚད་ཇི་ལྟར་ཡིན་པ་ཞུས་པ་ནི་ནང་གི་ལེའུར་བརྗོད་པར་བྱའོ། །
དང་ནི་སྡུད་སྒྲའོ། །ཕྱི་རོལ་དུ་སྲིད་པ་གསུམ་གྱི་འཇིག་རྟེན་གྱི་བཀོད་པ་ཇི་ལྟར་ཡིན་པ་ཞུས་པ་ནི། འདོད་པ་དང་གཟུགས་དང་གཟུགས་མེད་པའི་སྲིད་པ་སོ་གཅིག་ལེའུ་དང་པོར་ཇི་ལྟར་བསྟན་པའི་དོན་དེ་ལྟ་བུ་ཞུས་པའོ། །ཕྱི་རོལ་གྱི་སྲིད་པ་གསུམ་ནི་ནང་དུ་མིའི་ལུས་ཀྱི་ལུས་ངག་ཡིད་གསུམ་གྱི་ཁམས་སོ། །གཞན་དུ་དཀྱིལ་འཁོར་གྱི་འཁོར་ལོར་དག་པ་ཉིད་སྒྲུབ་ཐབས་ཀྱི་ལེའུ་ལས་བསྟན་པ་བཞིན་ནོ། །ལྷ་དང་ལྷ་མིན་རྣམས་ཀྱི་ལོངས་སྤྱོད་དང་ཞེས་པ། ལྷ་རྣམས་ཉིན་མོ་ལ་ལོངས་སྤྱོད་ཅིང་། ལྷ་མིན་རྣམས་མཚན་མོ་ལ་ལོངས་སྤྱོད་པ་ཡིན་པས་ཉིན་མཚན་གྱི་ཆུ་ཚོད་དང་། དེ་བཞིན་དུ་བྱང་དུ་བགྲོད་པ་དང་ལྷོར་བགྲོད་པ་དག་ནི་ནང་དུའོ། །དཀྱིལ་འཁོར་དང་ནི་དབང་སྟེ། ཞེས་པ་དཀྱིལ་འཁོར་ལ་གཉིས་ཏེ་འཇིག་རྟེན་ཀུན་རྫོབ་བདེན་པས་ཚོན་དང་ཐིག་གདབ་པས་རབ་ཏུ་ཕྱེ་བ་རྡུལ་ཚོན་གྱི་དཀྱིལ་འཁོར་དང་། དོན་དམ་པའི་བདེན་པས་ནམ་མཁའི་ཁམས་ལ་ཐིག་གདབ་པ་དང་ཚོན་དགྱེ་བ་སོགས་དང་བྲལ་བ། ཁ་དོག་དང་དབྱིབས་ཀྱི་རྣམ་པས་ཞལ་ཕྱག་སོགས་གཟུགས་ཀྱི་ལྷ་རྣམ་པར་རྟོག་པས་བསྒོམ་པའི་སེམས་དང་བྲལ་བ་རྣམ་པ་ཐམས་ཅད་པ་མེ་ལོང་གི་པྲ་ཕབ་པ་ལྟ་བུའི་དཀྱིལ་འཁོར་ཏེ། དེ་ལྟར་དཀྱིལ་འཁོར་དང་ནི། འཇིག་རྟེན་པའི་དབང་ཆུ་དང་ཅོད་པན་དང་དར་དཔྱངས་དང་རྡོ་རྗེ་དྲིལ་བུ་དང་བརྟུལ་ཞུགས་ཆེན་པོ་དང་མིང་དང་རྗེས་སུ་གནང་བ་བདུན་དང་། དེ་བཞིན་དུ་གོང་མ་ནི་བུམ་པ་དང་གསང་བ་དང་ཤེས་རབ་ཡེ་ཤེས་ཏེ། དེ་གསུམ་དང་བཅས་པའི་དབང་བཅུ་དང་། འཇིག་རྟེན་ལས་འདས་པའི་དབང་ནི་བཅུ་གཅིག་པ་སྟེ། ཞུ་བ་འདི་རྣམས་སུ་ཞིག་གིས་ལུང་སྟོན་པར་བྱེད་ཅེ་ན། སྐབས་གསུམ་པ་ཞེས་པ་ལྷའི་མིང་ཡིན་ཏེ། ལྷ་རྣམས་ལ་དང་པོར་སྐྱེ་བ་དང་བར་དུ་གནས་པ་ཐ་མར་འཆི་བའི་སྐབས་གསུམ་ཡོད་ཀྱི་རྟག་ཏུ་ལོ་ཉེར་ལྔའི་ན་ཚོད་དུ་གཞོན་པར་གནས་པའི་ཕྱིར་
རྒས་པའི་སྐབས་མེད་པས་དེ་ལྟར་བཏགས་པ་མངོན་བརྗོད་ཀྱི་བསྟན་བཅོས་ལས་སོ། །དེ་ལྟར་ལྷ་དང་མི་ཡི་བླ་མས། གང་ཞུས་པ་འདི་དག་རྣམས་ཡང་དག་པར་བཤད་དུ་གསོལ། ཞེས་ཞུས་པའོ། ༢ །དེ་ལྟར་ཞུས་པའི་དོན་མདོར་བསྡུས་ན་ཕྱི་ནང་གཞན་གསུམ་གྱི་བདག་ཉིད་ཅན་དུས་ཀྱི་འཁོར་ལོའི་རྒྱུད་ཞུས་པར་འདུ་སྟེ། ཕྱི་ནི་ཕྱི་རོལ་དུ་ཇི་ལྟར་སྣང་བ་འཇིག་རྟེན་གསུམ་གྱི་ཁམས་ཀྱི་བཀོད་པ་བསྟན་པ་ནི་ཕྱི་དུས་ཀྱི་འཁོར་ལོ་ཡིན་ལ། ཕྱི་རོལ་གྱི་སྣང་བ་ཐམས་ཅད་ནང་གི་ལུས་ཀྱི་ཁམས་ཀྱི་འདུ་འཕྲོད་ལས་སྣང་བའི་ཕྱིར་ནང་རྡོ་རྗེ་ལུས་ཀྱི་ཚད་དང་རྩ་རླུང་ཐིག་ལེའི་བཀོད་པ་བསྟན་པ་ནི་ནང་དུས་ཀྱི་འཁོར་ལོ་ཞེས་བྱ་སྟེ། རྒྱུད་གཞན་ལས་ཀྱང་། ཇི་ལྟར་ཕྱི་རོལ་དེ་བཞིན་ནང་། །ཞེས་གསུངས་ཤིང་། དུས་ཀྱི་འཁོར་ལོའི་རྩ་བའི་རྒྱུད་ལས། ཇི་ལྟར་ཕྱི་རོལ་དེ་བཞིན་ལུས། །ཇི་ལྟར་ལུས་ལ་དེ་བཞིན་གཞན། །ཞེས་གསུངས་པ་བཞིན་ནོ། །དེ་ལྟར་སྒྲིབ་པ་དང་བཅས་པའི་ཕྱི་རོལ་དང་ནང་གི་རྣམ་པར་སྣང་བ་དེ་དག་སྒྲིབ་པ་དང་བྲལ་བའི་ཚེ་དག་པ་ཡེ་ཤེས་ཀྱི་དཀྱིལ་འཁོར་དུ་སྣང་བ་ནི་གཞན་དུས་ཀྱི་འཁོར་ལོ་ཞེས་བྱ་སྟེ། སྒྲིབ་པ་དང་བཅས་པའི་ཕྱི་དང་ནང་གི་སྣང་བ་རྣམས་ལས་གནས་གཞན་དུ་གྱུར་པ་ཡིན་པའི་ཕྱིར་རོ། །གཞན་དུས་ཀྱི་འཁོར་ལོ་དེ་ལའང་། རྣམ་རྟོག་གི་སྤྲོས་པས་བསྒོམ་པ་བསྐྱེད་པའི་རིམ་པས་དཔའ་བོའི་རིམ་པ་ལྷ་དྲག་པོ་དང་། བདག་བྱིན་གྱིས་བརླབས་པའི་རིམ་པ་ལྷ་ཞི་བ་བསྒོམ་པ་རྣམས་ནི་དྲང་དོན་ཀུན་རྫོབ་ཀྱི་བདེན་པ་སྟེ་འཇིག་རྟེན་པའི་དངོས་གྲུབ་བསྒྲུབ་པ་ཙམ་ལས་འཇིག་རྟེན་ལས་འདས་པ་རྣམ་གྲོལ་ཐར་པའི་ལམ་གྱི་དངོས་རྒྱུ་མ་ཡིན་ལ། ཤིན་ཏུ་རྣམ་པར་དག་པ་རྫོགས་པའི་རིམ་པས་དབྱིབས་སོགས་ཀྱི་སྤྲོས་མཚན་བྲལ་བ་རྣམ་པར་མི་རྟོག་པའི་ངང་ལས་རྣམ་ཀུན་མཆོག་ལྡན་གྱི་སྟོང་ཉིད་རྣམ་པ་ཐམས་ཅད་
པ་པྲ་ཕབ་ལྟར་མཐོང་བ་ནི་དེ་ཁོ་ན་ཉིད་དུས་ཀྱི་འཁོར་ལོ་ཞེས་བྱ་བ་འཇིག་རྟེན་ལས་འདས་པའི་དངོས་གྲུབ་བསྒྲུབ་པ་ཡིན་ཏེ། འགྲེལ་ཆེན་གྱི་མདོར་བསྡུས་དང་པོར། །དཔའ་བོའི་རིམ་པ་བདག་བྱིན་བརླབས་པ་ཡི། །རིམ་པ་དག་ཀྱང་ཐར་པའི་ལམ་མ་ཡིན། །ཤིན་ཏུ་རྣམ་དག་རིམ་པ་གཅིག་པུ་ནི། །ཐར་པའི་སླད་དུ་སངས་རྒྱས་རྣམས་ཀྱིས་བསྟན། །ཞེས་གསུངས་སོ། །སྐབས་འདིར་བསྐྱེད་རིམ་རྐྱང་པས་འཇིག་རྟེན་པའི་དངོས་གྲུབ་ལས་མཆོག་གི་དངོས་གྲུབ་མི་ཐོབ་པར་བསྟན་གྱི་ཐར་པའི་ལམ་གཏན་མིན་པར་རྣམ་པ་ཀུན་ཏུ་གོ་བར་མི་བྱ་སྟེ། བསྐྱེད་རིམ་ལྟ་ཅི་སངས་རྒྱས་ཀྱི་སྐུའི་གཟུགས་བརྙན་མཐོང་བ་དང་མཚན་གྱི་སྒྲ་ཐོས་པ་ཡང་ཐར་པའི་རྒྱུར་འགྱུར་པར་གསུངས་ལ། བསྐྱེད་རིམ་བསོད་ནམས་ཀྱི་ཚོགས་དང་། རྫོགས་རིམ་ཡེ་ཤེས་ཀྱི་ཚོགས་གཉིས་པོ་རྒྱུ་དང་འབྲས་བུར་གྱུར་པའང་ཡོད་པའི་ཕྱིར་རོ། །ཡང་འགྲེལ་ཆེན་ལས་གསུངས་པ་དེའི་ཕྱིར་དང་པོའི་སངས་རྒྱས་ཀྱི་རྩ་བའི་རྒྱུད་དང་བསྡུས་པའི་རྒྱུད་དུ་དབང་བཞི་པ་ཤེས་རབ་ཡེ་ཤེས་རབ་ཏུ་གསལ་ཞིང་། ཕྱག་རྒྱ་ཆེན་པོ་བསྒོམ་པ་དུ་བ་ལ་སོགས་པའི་ལམ་ཡང་རབ་ཏུ་གསལ་ཏེ་མ་སྦས་པའི་ཕྱིར་ན། རྡོ་རྗེ་སློབ་དཔོན་བརྒྱུད་པའི་རིམ་པའི་མན་ངག་ལས་འོང་ཞིང་ལྟོས་མི་དགོས་ཏེ་རྒྱུད་གཞན་ན་སྔགས་ཀྱི་ལྷ་དང་། ཕྱི་རོལ་གྱི་དངོས་གྲུབ་བསྒྲུབ་པའི་ཐབས་དང་། དཔའ་བོའི་རིམ་པ་དང་། རང་བྱིན་གྱིས་བརླབས་པའི་རིམ་པ་དངོས་སུ་བསྟན་གྱི་བླ་མ་བརྒྱུད་པའི་རིམ་པས་འོངས་པ་མ་ཡིན་པ་བཞིན་ནོ། །འདུས་པ་ལ་སོགས་པའི་རྒྱུད་གཞན་དུ། བཞི་པ་དེ་ཡང་དེ་བཞིན་ནོ། །ཞེས་གསུངས་པ་ཙམ་ལས་བཞི་པའི་ཡེ་ཤེས་གསལ་བར་མ་བསྟན་ཏེ་རྡོ་རྗེའི་ཚིག་དེ་དག་ཏུ་སྦས་སོ། །དེ་ཡང་དང་པོའི་སངས་རྒྱས་ལས། ཕྱི་མའི་དུས་ཀྱི་རྣལ་འབྱོར་སྤྱོད་མང་དག །བརྐམ་ཞིང་རབ་ཏུ་མ་བསྡམ་འབྱུང་བར་འགྱུར། །སྡིག་ལ་རབ་དགའ་རྣལ་འབྱོར་
ཡོ་བྱད་ཆགས། །རྒྱུད་ཆེན་འདི་དང་བཞི་པ་འདི་སྤོང་འགྱུར། །ཞེས་སོགས་རྒྱ་ཆེར་གསུངས་པ་དེའི་ཕྱིར་འཕགས་པའི་ཡུལ་དུ་མ་འོངས་པའི་དུས་ན་སྔགས་ཀྱི་རྡོ་རྗེ་སློབ་དཔོན་རྫས་ལ་བརྐམ་པ་དག་འབྱུང་བར་འགྱུར་ཏེ། ཕྱུག་པོ་རྫས་ཀྱིས་ཁེངས་པ་རྣམས་ལ་རྫས་ཀྱི་དོན་དུ་ཆོས་འཚོང་ཞིང་སྐལ་བ་དང་མི་ལྡན་པ་རྣམས་ལའང་འཇིག་རྟེན་ལས་འདས་པའི་དབང་སྟེར་བ་དང་། དང་པོར་རྒྱལ་པོ་ལ་སོགས་པའི་མངག་གཞུག་པ་ཐོས་བྲལ་རྣམས་ཀྱིས་རྒྱལ་པོ་བྲིད་ནས་ཐབས་དེས་ཕྱིས་རྒྱལ་པོའི་བླ་མར་གྱུར་པ་དང་། མི་དགེ་བཅུའི་ལས་ལམ་སྤངས་པའི་སེམས་ཅན་སྐལ་པ་དང་ལྡན་པར་གྱུར་པ་གཞན་རྣམས་ལ་རྫས་ཀྱིས་དམན་པར་གྱུར་ན་འཇིག་རྟེན་ལས་འདས་པའི་དབང་མི་སྟེར་ཞིང་དེ་དག་རྣམས་ལ་རེ་བ་བསད་པའི་ཉོན་མོངས་པ་སྐྱེད་པར་འགྱུར་བ་དང་། རྫས་ཀྱི་དབང་གིས་གདུག་པའི་སེམས་ཅན་རྣམས་ལ་རྡོ་རྗེའི་ཚིག་རབ་ཏུ་གསལ་བར་བྱེད་པར་འགྱུར་བ་དང་། གཞན་ཡང་རྡོ་རྗེའི་ཚིག་མི་ཤེས་པ་ཕན་ཚུན་རྩོད་པར་བྱེད་པར་འགྱུར་བ་དང་། མཁས་པ་མངོན་པའི་ང་རྒྱལ་གྱིས་རློམ་པ་ཅན་རྒྱུད་ཀྱི་དོན་མི་ཤེས་པ་རྣམས་ཀྱང་རྒྱུད་ཀྱི་འགྲེལ་བཤད་བྱེད་པར་འགྱུར་བ་དང་། བདུད་ཀྱི་རིས་རྣམས་སེམས་ཅན་རྣམས་ཀྱི་བླ་མར་གྱུར་ནས་རྡོ་རྗེའི་ཚིག་ཕྱིན་ཅི་ལོག་ཏུ་སྟོན་པར་འགྱུར་བ་དང་། སངས་རྒྱས་ཀྱི་ཡེ་ཤེས་ནི་དབང་པོ་གཉིས་ལས་སྐྱེས་པའི་བདེ་བར་བྱིས་པའི་བློ་ཅན་རྣམས་ལ་སྟོན་པར་འགྱུར་བ་དང་། གསུམ་པ་ཤེས་རབ་ཡེ་ཤེས་དེ་ཉིད་བཞི་པ་སྟེ། དེ་ཡང་དེ་བཞིན་ནོ་ཞེས་པའི་སྒྲས་རྒྱུ་དང་འབྲས་བུ་དབྱེ་བ་མེད་པར་བཅོམ་ལྡན་འདས་ཀྱིས་གསུངས་སོ་ཞེས། གསུམ་པའི་ཡེ་ཤེས་སངས་རྒྱས་ཀྱི་ཡེ་ཤེས་སུ་སྨྲ་བར་འགྱུར་བ་དང་། འཕགས་ཡུལ་དུ་དབང་བསྐུར་མེད་པར། མཁས་པར་མངོན་པའི་ང་རྒྱལ་གྱིས་གླེགས་བམ་མཐོང་ནས་རྡོ་རྗེ་ཐེག་པ་སྟོན་པ་པོ་བྱེད་པར་
འགྱུར་བའི་ཕྱིར། དེ་ལྟར་མ་འོངས་པའི་དུས་ཀྱི་གདུག་པའི་སློབ་དཔོན་རྣམས་ཀྱི་འཇུག་པ་གཟིགས་ནས། བཅོམ་ལྡན་འདས་ཀྱིས་རྩ་བའི་རྒྱུད་དང་བསྡུས་པའི་རྒྱུད་གཞན་ཐམས་ཅད་དུ་བཞི་པ་ཤེས་རབ་ཡེ་ཤེས་ཀྱི་དབང་གསལ་པོར་མ་མཛད་དེ། རྩ་རྒྱུད་དང་བསྡུས་རྒྱུད་རྣམས་སུ་བཞི་པ་ཤེས་རབ་ཡེ་ཤེས་རང་གི་ངོ་བོ་དང་། དེའི་ལམ་ཕྱག་རྒྱ་ཆེན་པོ་བསྒོམ་པ་དུ་བ་ལ་སོགས་པའི་ལམ་འདི་ནི་ཤིན་ཏུ་སྦས་སོ། །གདུལ་བྱའི་བསམ་པའི་དབང་གིས་དུས་འཁོར་དང་མངོན་བརྗོད་འབུམ་པ་སོགས་རྩ་བའི་རྒྱུད་འགའ་ཞིག་ལ་མ་སྦས་པར་རབ་ཏུ་གསལ་བའང་ཡོད་དེ་དེ་དག་གི་བསྡུས་རྒྱུད་ལ་ཡང་དེ་བཞིན་ནོ། །རྣམ་པར་དག་པའི་རིམ་པ་ཕྱག་རྒྱ་ཆེན་པོའི་དངོས་གྲུབ་སྟེར་བར་བྱེད་པ་པོ་འདི། མཆོག་གི་དང་པོའི་སངས་རྒྱས་ལས་རབ་ཏུ་གསལ་བར་གླེགས་བམ་དུ་བྲིས་ཏེ། ཆུ་བོ་ཤཱི་ཏའི་བྱང་དུ་སེམས་ཅན་སྐལ་པ་དང་ལྡན་པ་རྣམས་ཀྱི་སེམས་ཀྱི་ལྷག་པར་མོས་པ་མཁྱེན་ནས། བཅོམ་ལྡན་འདས་ཀྱིས་བསྟན་ཅིང་། ཕྱག་ན་རྡོ་རྗེ་ཟླ་བ་བཟང་པོས་གླེགས་བམ་ལ་བྲིས་སོ། །མཚན་ཡང་དག་པར་བརྗོད་པ་ཚད་མར་བྱས་ནས་སེམས་ཅན་རྣམས་ཐེ་ཚོམ་མེད་པར་གྱུར་པ་གང་ཡིན་པ་དེས་ན། ཞེས་སོགས་གསུངས་པ་ལྟར་དེང་སང་སྙིགས་མའི་དུས་འདིར་ཡང་སངས་རྒྱས་ཀྱི་བཀའ་ལུང་ཚད་མ་འདི་ལྟ་བུ་ཡོད་བཞིན་དུ། གཉིས་སུ་མེད་པའི་ཡེ་ཤེས་དངོས་པོ་དང་དངོས་མེད་ཀྱི་མཐའ་གང་དུའང་མི་གནས་པའི་ཕྱིར་གཉིས་སུ་ཕྱེ་བའི་རིགས་མེད་པ་འདུས་མ་བྱས་ཆེན་པོ་སྐད་ཅིག་མའི་ཆོས་ལས་འདས་པའི་དུས་གསུམ་དུས་མེད་དུ་རྟག་པ་ཆེན་པོ་ཡིན་པ་ཁོང་དུ་མ་ཆུད་ནས་ཡེ་ཤེས་ཡིན་ཕན་ཆད་འདུས་བྱས་སྐད་ཅིག་མ་ལས་འོས་མེད་དོ་སྙམ་པ་དང་། རྣམ་ཀུན་མཆོག་ལྡན་གྱི་སྟོང་ཉིད་པྲ་ཕབ་པ་ལྟ་བུའི་སྣང་བ་ལ་དངོས་པོ་དང་མཚན་མ་ཅུང་ཟད་ཀྱང་མེད་པས་གཟུགས་སྟོང་
པའོ། །སྟོང་པ་ཉིད་གཟུགས་སོ། །ཞེས་སོགས་སྟོང་ཉིད་བཞི་སྦྱོར་གྱི་དོན་རྣལ་འབྱོར་པ་ལ་མངོན་དུ་གྱུར་པའི་ཚུལ་ཁོང་དུ་མ་ཆུད་པར་ཁ་དོག་དང་དབྱིབས་སུ་སྣང་བ་ཞིག་ཡོད་ཕྱིན་ཆད་ཀུན་རྫོབ་འཁྲུལ་སྣང་ལས་འོས་མེད་དོ་སྙམ་པ་དང་། འདུས་བྱས་མི་རྟག་པ་གཡོ་བ་རྫུན་པའོ་སྙམ་དུ་རྣམ་ཀུན་མཆོག་ལྡན་གྱི་སྟོང་ཉིད་ལ་རྒྱབ་ཀྱིས་ཕྱོགས་ཏེ་སྟོང་ཉིད་ཡིན་ན་དངོས་མེད་འབའ་ཞིག་ཡིན་དགོས་སྙམ་པ་དེའི་དབང་གིས་དངོས་དང་དངོས་མེད་རོ་གཅིག་ཏུ་གྱུར་པ། དངོས་པོའམ་དངོས་པོ་མེད་པ་སོགས་གཉིས་ཆོས་སུ་འབྱེད་པ་མེད་པ་འཇིག་རྟེན་ལས་འདས་པ་དབང་བཞི་པའི་ཟུང་འཇུག་ལྷན་ཅིག་སྐྱེས་པའི་དོན་ལ་མྱོང་བ་ལྟ་ཅི་གོ་བ་ཙམ་ཡང་མ་ཤར་བར། སྙོམས་འཇུག་གི་ཚོར་བ་དེ་ལ་དངོས་མེད་སྟོང་འཛིན་གྱི་རྟོག་པས་རྒྱས་འདེབས་པ་སྔགས་ཀྱི་ལྷན་སྐྱེས་བསྒོམ་པའི་དོན་ཡང་དག་ཏུ་འཆད་པ་སོགས་བྱུང་བ་ནི་རྒྱུད་དང་འགྲེལ་བ་ཆེན་པོ་འདི་དག་གིས་ཆེད་དུ་བཀག་པའི་ཕྱོགས་སྔར་སོང་མོད་ཀྱི་དུས་ཀྱི་དབང་གིས་སྐལ་དམན་རྣམས་ལ་དག་པ་ལས་མ་དག་པར་སྨྲ་བ་ངོ་སོ་མཐོ་བར་གྱུར་ནའང་། རྒྱལ་བ་སྲས་དང་བཅས་པའི་ཡེ་ཤེས་ཀྱི་གཟིགས་པ་དང་། ཆོས་ཉིད་ཀྱི་བདེན་པ་བསླུ་བ་མེད་པའི་སྟོབས་ཀྱིས་ཆེར་སྙིགས་ལྔ་བདོའི་དུས་འདིར་ཡང་རྡོ་རྗེ་ཐེག་པའི་རྣལ་འབྱོར་ཟབ་མོའི་དོན་ལེགས་པར་མཐོང་བ་གང་དག་གིས་ལམ་དང་ལམ་མིན་དེ་དག་ཚུལ་བཞིན་འབྱེད་པའི་བློ་གྲོས་ཀྱིས་རྒྱལ་བ་དང་རིགས་ལྡན་བརྒྱུད་པའི་ལམ་སྲོལ་ཕྱོགས་བཅུ་ཀུན་ཏུ་གསལ་བར་བྱེད་པར་མཛོད་ཅིག་ཅེས་ལེགས་པར་སྨོན་པའང་བྱས་སོ། །དེ་ལྟར་བརྗོད་པ་དེ་ནི་ཞེན་ལྟས་བསྐྱེད་པའི་ཆགས་སྡང་གི་དབང་གིས་ངེས་པར་མ་ཡིན་ཏེ་རྒྱུད་ཟབ་མོའི་དོན་ཆུད་མི་ཟ་བའི་ཕྱིར་བརྗོད་པ་འདི་ལ་གལ་ཏེ་རྒྱལ་བ་རྣམས་ཀྱི་ཡེ་ཤེས་ཀྱི་གཟིགས་པ་སྒྲིབ་པ་མེད་པས་ལེགས་པར་བཤད་པ་ཉིད་དུ་གཟིགས་ན་བདེན་པ་དེས་ཚིག་འདི་ཐོས་ཤིང་མཐོང་བའི་ཚེ་ཕྱོགས་སུ་ཞེན་པ་ཅན་རྣམས་ལ་
ཉོན་མོངས་པའི་བསམ་པ་མི་སྐྱེད་ཅིང་རིམ་གྱིས་ཡང་དག་པའི་ལམ་གྱི་སྣང་བ་ཐོབ་པར་གྱུར་ཅིག གོང་གི་ས་བཅད་གསུམ་པ་སྟོན་པ་པོའི་ལན་གྱི་ངོ་བོ་ཉིད་ཀྱིས་གནས་པ་སྟེ་གནས་པ་བདུན་པ་ནི། ཟླ་བ་བཟང་པོ་ཁྱོད་ལ་བདག་མགུ་སོགས་ཚིགས་བཅད་གཅིག་གིས་བསྟན་ཏེ། རྒྱུད་སྟོན་པ་པོའི་ཞལ་ནས་ཀྱེ་ཟླ་བ་བཟང་པོ་ཁྱོད་ལ་བདག་མགུའོ། །དེ་ཅིའི་ཕྱིར་ཞེ་ན། གང་ཞིག་ཁྱོད་ཀྱིས་དྲིས་པ་དུས་ཀྱི་འཁོར་ལོའི་རྣལ་འབྱོར་འདི་ལྟ་བུ་ནི་འཇིག་རྟེན་པའི་བློ་གྲོས་རབ་དང་མཆོག་ཏུ་གྱུར་པ་རྒྱལ་ཆེན་རིས་བཞི་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་མཐར་སོན་པའི་ལྷ་རྣམས་དང་། འཁོར་ལོས་སྒྱུར་བ་སོགས་མི་རྣམས་དང་། བདེན་བྲལ་ལ་སོགས་པ་སྲིན་པོ་རྣམས་དང་། གཞན་གྱིས་མི་ཐུབ་པ་ལ་སོགས་པ་ལྷ་མིན་རྣམས་དང་། མཐའ་ཡས་ལ་སོགས་པ་ཀླུ་རྣམས་དང་། ཀུན་དགའ་བོ་ལ་སོགས་པ་ཆགས་བྲལ་རྣམས་དང་། དྲང་སྲོང་མི་སྦྱིན་ལ་སོགས་ཐུབ་པ་མཆོག་གི་རིགས་སུ་གྱུར་པ་རྣམས་དག་གིས་ཤེས་པ་མིན་པས་སོ། དེ་ལྟར་དེ་དག་གིས་མི་ཤེས་པ་དུས་ཀྱི་འཁོར་ལོའི་རྣལ་འབྱོར་གང་ཞིག་མྱ་ངན་ལས་འདས་པ་ཡེ་ཤེས་ཀྱི་ཁམས་ལ་སོགས་པ་འཛིན་མའི་མཐར་ཐུག་པའི་ཁམས་དྲུག་གི་རང་བཞིན་ནི། ཡེ་ཤེས་དང་ནམ་མཁའ་དང་རླུང་དང་མེ་དང་ཆུ་དང་འཛིན་མའམ་སའི་ཁམས་དྲུག་སྟེ། དེ་ཡང་ནམ་མཁའ་སོགས་ཁམས་ལྔ་ནི་ཁྱབ་བྱ་དང་ཡེ་ཤེས་ཀྱི་ཁམས་ནི་ཁྱབ་བྱེད་དོ། །དེ་ལྟར་ཁྱབ་བྱ་དང་ཁྱབ་བྱེད་དུ་འབྲེལ་བའི་རྣལ་འབྱོར་དེ་དག་དང་། ཚིག་གི་བགྲོད་པ་ཞེས་ཚིག་ནི་དབྱངས་གསལ་གཉིས་ཡིན་ལ་དེའི་བགྲོད་པའམ་གནས་ནི་མགྲིན་རྐན་སྤྱི་བོ་མཆུ་དང་སོའི་གནས་རྣམས་ཏེ་དེ་ལྟར་གནས་དེ་རྣམས་ལས་བྱུང་བའི་དབྱངས་དང་གསལ་བྱེད་རྣམས་བརྗོད་པའོ། །བགྲོད་པ་དེ་དང་བཅས་པ་ནི་སྔགས་ཀྱི་བརྡས་བརྗོད་བྱའི་དོན་མཐའ་དག་རབ་ཏུ་བརྗོད་པའོ། །སྔགས་ཀྱི་བརྡའ་ནི་རྣམ་པ་གཉིས་ཏེ་དང་པོ་སྔགས་
ཀྱི་བརྡ་ཞེས་པ་འཇིག་རྟེན་ན་ཚིག་ཏུ་བརྗོད་པ་ཨོཾ་ཨཱཿཧཱུྃ་ལ་སོགས་པ་སྔགས་ཀྱི་མིང་ངོ་། །དེ་ཁོ་ན་ཉིད་ཀྱི་བརྡ་ནི་དམ་པའི་དོན་ཅན་ཚིག་ཏུ་བརྗོད་པ་སྤངས་པ་སྟེ། ཨ་ཡིག་ནི་ཆོས་ཐམས་ཅད་ཀྱི་སྒོ་སྟེ་གདོད་མ་ནས་མ་སྐྱེས་པ་ཉིད་ཀྱི་ཕྱིར་རོ་ཞེས་དང་། མཚན་ཡང་དག་པར་བརྗོད་པ་ལས། འདི་ལྟར་སངས་རྒྱས་བཅོམ་ལྡན་འདས། །རྫོགས་པའི་སངས་རྒྱས་ཨ་ལས་བྱུང་། ཞེས་པ་ནས། ཚིག་ཀུན་རབ་ཏུ་གསལ་བར་བྱེད། །ཅེས་པའི་བར་གྱིས་གསུངས་པ་དང་། །གསང་སྔགས་སྐྱེ་གནས་ཡི་གེ་མེད། །གསང་སྔགས་ཆེན་པོ་རིགས་གསུམ་པ། །སྟོང་པ་ཆེན་པོ་འགྱུར་མེད་ལྔ། །ཐིག་ལེ་སྟོང་པ་ཡི་གེ་དྲུག །ཅེས་གསུངས་པ་གོང་དུ་བསྟན་པ་བཞིན་ནོ། །འདིར་ཨ་ཀྵ་ར་ཡི་སྒྲ་འགྱུར་མེད་དང་ཡི་གེ་གང་དུ་ཡང་བསྒྱུར་རུང་ངོ་། །གཞན་ཡང་སྔགས་ཀྱི་ཐེག་པ་ལས་བཅོམ་ལྡན་འདས་ཀྱིས་གསུངས་པ། འདི་ལྟར་མྱ་ངན་ལས་འདས་པ་ཡེ་ཤེས་ཀྱི་ཁམས་གཞོམ་དུ་མེད་ཅིང་བརྗོད་དུ་མེད་པ་སྟེ། བརྗོད་དུ་མེད་པའི་དབྱངས་དང་གསལ་བྱེད་ཀྱི་མཚན་ཉིད་ཅན་ནོ་ཞེས་སོ། །ནམ་མཁའི་ཁམས་ལ་སོགས་པའི་སྔགས་ཀྱི་བརྡ་རབ་ཏུ་བརྗོད་པའི་མཚན་ཉིད་ཅན་མགྲིན་པ་ལ་སོགས་པ་ནས་བརྗོད་པའི་ཆོས་ཅན་དུ་བཅོམ་ལྡན་འདས་ཀྱིས་གསུངས་ཏེ། ཨ་ཀུ་ཧ་རྣམ་བཅད་རྣམས་མགྲིན་པ་ལས་སོ། །ཞེས་སོགས་འོག་ཏུ་འཆད་འགྱུར་བཞིན་ནོ། །དེ་བཞིན་གནས་གཉིས་པ་དང་གསུམ་པ་དང་བཞི་པ་དང་གནས་ལྔ་པའི་སྔགས་ཏེ་བརྩེགས་པའི་ཡི་གེ་རྣམས་ཀྱང་ངོ་། །འདི་ལྟར་བུམ་པ་སོགས་ཀྱི་མིང་གིས་མིང་ཅན་གྱི་དངོས་པོ་བུམ་པ་ལ་སོགས་པ་རྣམས་གོ་བར་བྱེད་པས་ན། ཚིག་གིས་བགྲོད་པ་ནི་ཚིག་གི་བརྗོད་དུ་རུང་བ་སྟེ་ཆོས་ཐམས་ཅད་དོ། །སྔགས་ཀྱི་བརྡས་འཇིག་རྟེན་པའི་དངོས་གྲུབ་དང་། དེ་ཁོ་ན་ཉིད་ཀྱི་བརྡ་ཚིག་ཏུ་བརྗོད་པ་སྤངས་པས་ནི་ཕྱག་རྒྱ་ཆེན་པོའི་དངོས་གྲུབ་བསྒྲུབ་པའོ། །
དེ་ལྟ་བུའི་སྦྱོར་བ་འདི་མཐའ་དག་ནི་ནང་རྡོ་རྗེ་ལུས་ཀྱི་ནང་ངམ་དབུས་སུ་སྟེ་དེ་ལས་བྱུང་ཞིང་དེ་ལ་གནས་པའོ། །ཀུན་རྫོབ་དང་དོན་དམ་པའི་དཀྱིལ་འཁོར་དག་དང་ནི་འཇིག་རྟེན་དང་འཇིག་རྟེན་ལས་འདས་པའི་དབང་བསྐུར་བ་ནི་སེམས་ཅན་ཐམས་ཅད་ཀྱིས་སྒྲིབ་པ་མེད་པའི་གནས་ཐོབ་པར་བྱ་བའི་སླད་དུ་བདག་གིས་བཤད་པར་བྱ་ཡིས་མི་ཡི་བདག་པོ་བཟང་པོ་ཁྱོད་ཉོན་ཅིག་ཅེས་སོ། ༣ །དེ་ཡན་ཆད་ཀྱི་གླེང་གཞི་རྒྱུད་སྟོན་པ་པོ་སོགས་དང་། གླེང་བསླང་བ་ཞུས་པ་ལན་དང་བཅས་སོང་ནས། ད་ནི་ཡོངས་སུ་ཤེས་པར་བྱ་བ་རྒྱུད་ཀྱི་ལུས་རྣམ་པར་བཞག་ལ་རྣམ་པ་ལྔ་སྟེ། ཕྱི་འཇིག་རྟེན་ཁམས་ཀྱི་བཀོད་པ། ནང་རྡོ་རྗེ་ལུས་ཀྱི་རྣམ་བཞག །སྨིན་བྱེད་ཀྱི་དབང་བསྐུར་བ། དཀྱིལ་འཁོར་འཁོར་ལོ་སྒྲུབ་པའི་ཐབས། མཆོག་ཏུ་མི་འགྱུར་བའི་ཡེ་ཤེས་བསྟན་པ་སྟེ་ལེའུ་ལྔ་ཡོད་པ་ལས། དང་པོ་རྡུལ་ཕྲ་རབ་སྔོན་དུ་འགྲོ་བ་ཅན་གྱི་འཇིག་རྟེན་ཇི་ལྟར་གྱུར་པ་བརྗོད་པ་ལ། འཇིག་རྟེན་གྱི་ཁམས་ཇི་ལྟར་འབྱུང་ཚུལ་བརྗོད་པ་དང་། དེ་ལྟར་བྱུང་བའི་འཇིག་རྟེན་ཁམས་དེའི་ཚད་ལ་སོགས་པ་བཤད་པ་གཉིས་ལས་དང་པོ་འདི་ལ། གནས་པ་བརྒྱད་པ་འཇིག་རྟེན་གྱི་ཁམས་དང་། གཟའ་དང་རྒྱུ་སྐར་དང་སེམས་ཅན་དང་སྔགས་དང་སྲོག་ལ་སོགས་པ་འབྱུང་བ་དང་སྡུད་པའི་ངོ་བོ་ཉིད་ཀྱིས་གནས་པ་ཞེས་གསུངས་ཏེ། དུས་ཀྱི་སྟོང་པ་རྣམས་ལས་ཞེས་སོགས་ཚིགས་བཅད་དྲུག་གིས་བསྟན་པ་ཡིན་ནའང་། འདི་ལ་ནང་གསེས་སུ་དབྱེ་ན་སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས་ལས། དང་པོ་དུས་ཀྱིས་སྟོང་པ་རྣམས་ལས་སོགས་ཚིགས་བཅད་གཅིག་གིས་བསྟན་ཏེ། སྔགས་ཀྱི་ཐེག་པ་ནི་ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པ་ལྟར་ཡིན་པས་ཐེག་པ་གསུམ་གྱི་དགོངས་དོན་ལ་མཁས་པར་བྱ་དགོས་ཀྱི་ཐེག་པ་གསུམ་གྱི་དགོངས་དོན་མི་
ཤེས་པ་དང་། སྔགས་ཀྱི་ཐེག་པ་ལས་གསུངས་པའི་སྲོག་གཅོད་པ་སོགས་ལྡེམ་པོར་དགོངས་པའི་དོན་མི་ཤེས་པ་ནི་སྔགས་ཀྱི་ལམ་ལས་ཉམས་པར་འགྱུར་པས་ཐེག་པ་གསུམ་ལས་དང་པོར་ཕྱི་དོན་འདོད་པ་བྱེ་བྲག་སྨྲ་བའི་གཞུང་གིས་འདོད་པ་ལྟར་རྡུལ་ཕྲ་རབ་འདུས་པའི་འཇིག་རྟེན་གྱི་ཁམས་ཇི་ལྟར་ཆགས་པའི་ཚུལ་ནི། གང་ཞིག་འཇིག་རྟེན་འབྱུང་བར་རྩོམ་པའི་དུས་ཀྱིས་སྔར་འཇིག་རྟེན་གྱི་ཁམས་སྟོང་ཞིང་ཞིག་སྟེ་དབང་པོའི་ཡུལ་མ་ཡིན་པ་རྡུལ་ཕྲ་རབ་ཀྱི་ངོ་བོས་གནས་པའི་ས་ཆུ་མེ་རླུང་ནམ་མཁའི་རྫས་སྒྲ་སོགས་ཀྱི་ཡོན་ཏན་ལྔ་ནས་གཅིག་གི་རང་བཞིན་ཅན་རྣམས་དང་། ཡོན་ཏན་དྲུག་པ་ཆོས་ཀྱི་དབྱིངས་ཐམས་ཅད་དུ་ཁྱབ་པར་བྱེད་པ་ནི་སྟོང་པ་རྣམས་སོ། །སྟོང་པའི་རྡུལ་ཕྲ་རབ་དེ་དག་རྣམས་ལས་དང་པོར་རེ་ཤིག་འཇིག་རྟེན་འབྱུང་བའི་དུས་ཀྱི་དབང་གིས་རླུང་གི་རྡུལ་ཕྲ་རབ་རྣམས་ཕན་ཚུན་འབྱར་བར་འགྱུར་ལ་དེ་ལས་ཡང་ཞིང་གཡོ་བ་ཉིད་དུ་བགྲོད་པ་ནི་རླུང་ཞེས་བརྗོད་དོ། །དེ་བཞིན་མེའི་རྡུལ་ཕྲ་རབ་རྣམས་ཀུན་ཏུ་འབྱར་བར་གྱུར་པ་རླུང་དང་ལྡན་པའི་གློག་ནི་མེ་ཞེས་བརྗོད་དོ། །དེ་བཞིན་དུ་ཆུའི་རྡུལ་ཕྲ་རབ་རྣམས་འབྱར་བ་རླུང་དང་མེ་དང་ལྡན་པའི་ཆར་ནི་ཆུ་ཞེས་བརྗོད་དོ། །སའི་རྡུལ་ཕྲ་རབ་རྣམས་འདུས་ཤིང་འབྱར་བ་ནམ་མཁའ་ལ་དབང་པོའི་གཞུ་སྟེ་འཇའ་ཚོན་དུ་སྣང་བ་ནི་ས་ཞེས་བརྗོད་དོ། །རོའམ་ནམ་མཁའི་རྡུལ་ནི་ཐམས་ཅད་དུ་ཁྱབ་པར་བྱེད་པ་སྟེ། དེ་ལྟར་སྟོང་པ་ལྔ་རྣམས་ལས་རླུང་དང་འབར་བྱེད་དེ་མེ་དང་ཆུ་དང་འཛིན་མ་སྟེ་འབྱུང་བ་བཞི་བྱུང་ངོ་། །དེ་ནས་ཡང་དག་པར་འཛིན་པ་དང་སྲུབ་པ་དང་དབྱིབས་སུ་བྱེད་པའི་རླུང་གི་མཐུ་ལས། འོག་གཞིའི་དཀྱིལ་འཁོར་བཞི་དང་། དེའི་སྟེང་དུ་གླིང་བདུན་དང་། རི་བོ་བདུན་དང་། རྒྱ་མཚོ་བདུན་དང་། རྒྱུ་སྐར་ཉེར་བདུན་དང་ནི་དེ་དང་འབྲེལ་བ་མཐའ་ཡས་པ་རྣམས་སོ། །དབྱིབས་ཟླུམ་པོའི་
རྣམ་པ་ཅན་གྱི་ཉི་མ་དང་ཟླ་བ་དང་སྐར་མ་རྣམས་དང་། སྐར་མའི་བྱེ་བྲག་བཀྲ་ཤིས་ལ་སོགས་པ་གཟའ་ཡི་ཚོགས་དང་། དྲང་སྲོ༷ང་བདུན་གནས་པའི་སྐར་མ་སྨེ་བདུན་ཏེ། དྲང་སྲོང་བདུན་པོའི་མིང་རྟོག་གེ་འབར་བར། དབང་པོ་དང་། གསལ་བ་དང་སྡེ་ཅན་དང་། བདེན་ལྡན་དང་། གསེར་ཅན་དང་། ཕྱོགས་ཅན་དང་། ཤ་ཀུ་ན་ཞེས་བརྗོད་དོ་ཞེས་ཀྱང་ཟེར། རྒྱལ་ཆེན་བཞིའི་རིས་ལ་སོགས་པའི་ལྷ་དང་། གཞན་གྱིས་མི་ཐུབ་པ་སོགས་འབྱུང་པོ་རྣམས་དང་འབྱུང་པོའི་བྱེ་བྲག་ཡི་དྭགས་ལ་སོགས་པ་ཐམས་ཅད་དོ། །མཐའ་ཡས་ལ་སོགས་ཀླུ་ཡི་རིགས་རྣམས་དང་། དུད་འགྲོ་སྐྱེ་གནས་རྣམ་པ་བཞི་དང་ཞེས། མཁའ་ལྡིང་སོགས་སྒོ་ང་ལས་སྐྱེས་པ་ནི་རླུང་གི་སྐྱེ་གནས་ཞེས་བྱའོ། །གླང་པོའི་དབང་པོ་སོགས་མངལ་ནས་སྐྱེས་པ་ནི་མེ་ཡི་སྐྱེ་གནས་སོ། །སྲིན་བུ་དང་ཕྱེ་ལེབ་གྲོག་སྦུར་སོགས་དྲོད་གཤེར་ལས་སྐྱེས་པ་ནི་ཆུའི་སྐྱེ་གནས་སོ། །ལྗོན་པ་སོགས་རྫུས་ཏེ་སྐྱེས་པ་ནི་སའི་སྐྱེ་གནས་སོ། །དེ་བཞིན་དུ་རྫུས་ཏེ་སྐྱེས་པ་ཆེན་པོ་ལྷ་ལ་སོགས་པ་ནི་རོ་སྟེ་ནམ་མཁའི་སྐྱེ་གནས་སོ། །སྐབས་འདིར་འགྲེལ་ཆེན་དུ་ལྗོན་པ་སོགས་རྫུས་ཏེ་སྐྱེས་པ་སའི་སྐྱེ་གནས་སོ་ཞེས་གསུངས་པ་འདིར་ཤིང་ལྗོན་པ་ནི་རྣམ་པ་ཀུན་ཏུ་མ་ཡིན་ཏེ། ཤིང་དུད་འགྲོ་སྐྱེ་གནས་བཞིའི་ནང་དུ་མི་གཏོགས་ཏེ་སེམས་ཅན་མ་ཡིན་པའི་ཕྱིར་དང་། རྫུས་སྐྱེས་སོགས་སྐྱེ་གནས་བཞི་ནི་སེམས་ཅན་གྱི་སྐྱེ་གནས་སུ་བཤད་པ་ཡིན་གྱི་བརྟན་པ་ཤིང་སོགས་ལ་དེ་འདྲའི་སྐྱེ་གནས་བཤད་དོན་མེད་ཅིང་། ཤིང་ལས་རིམ་གྱིས་སྐྱེ་བ་རྫུས་སྐྱེས་ག་ལ་ཡིན། དེའི་ཕྱིར་འདིའི་དོན་སྔར་གྱི་དུས་འཁོར་པ་ཁ་ཅིག་གིས། བརྟན་པའི་རྫུས་སྐྱེས་ཤིང་སོགས་ཡིན་པར་སྐབས་འདིར་ཞར་ལ་གསུངས་པ་སྟེ། སྒྲུབ་ཐབས་ལེའུ་ལས། དེ་ལྟར་སའི་སྐྱེ་བ་ནི་ཤིང་ལ་སོགས་པ་བརྟན་པ་རྣམས་སོ། །ཞེས་གསུངས་པ་དང་དོན་འདྲ་སྙམ་དུ་ཤིང་དངོས་ལ་འཆད་དོ། །ཁ་ཅིག་གིས་མིའམ་
ཅི་ལྗོན་པ་རྟ་མགོ་ཅན་ཡིན་ཟེར་བ་དང་། འགའ་ཞིག་གིས་ཤིང་སྡོང་པོ་སྲིན་སོགས་ཀྱིས་ཟོས་པ་ན་ཉི་ཙེ་བའི་དམྱལ་བ་གང་གིས་རང་གི་ལུས་ཤིང་དེར་སྣང་ནས་སྡུག་བསྔལ་མྱོང་བར་མདོ་ལས་གསུངས་པ་ལྟ་བུ་ཡིན་ཟེར་བ་སོགས་སྣ་ཚོགས་བྱུང་སྟེ་དེ་རྣམས་དེ་ཙམ་ལས་གཞན་ཅི་ཟེར་མ་བྱུང་བའོ། །སྒྲུབ་ཐབས་ལེའུར་གསུངས་པའི་དོན་ཤིང་སོགས་བརྟན་པ་ཕལ་ཆེར་ས་ལས་སྐྱེ་བ་ཡིན་པར་གསུངས་ཀྱང་སའི་རྫུས་སྐྱེས་ཞེས་གསུངས་པ་མེད་པས་ཕན་ཚུན་ཤན་མ་ཕྱེད་པའི་ནོར་བ་ཆེན་པོའོ། །མིའམ་ཅི་རྟ་མགོ་ཅན་རྣམས་རྟའི་མགོ་ཡོད་པ་ཙམ་གྱིས་དུད་འགྲོར་གཏོགས་ངེས་ཡིན་པར་མི་འགྱུར་ཏེ་རྒྱལ་པོ་བཞིའི་རིས་སུ་གཏོགས་པའི་ལྷ་ཡི་རིགས་ཡིན་ལ། ཉི་ཚེ་པའི་དམྱལ་བ་ནི་ཤིང་གི་ངོ་བོར་སྐྱེས་པ་མ་ཡིན་གྱི་ལས་སྣང་གིས་དེར་སྣང་བ་ཕྱིན་ཅི་ལོག་ཏུ་སོང་བ་ཡིན་པས་དུད་འགྲོ་རྫུས་སྐྱེས་ཀྱི་དོན་མེད་དེ་དམྱལ་བའི་འགྲོ་བར་བསྡུ་དགོས་སོ། །ཡང་འགའ་ཞིག་གིས་འདི་ཐད་ཙ་མིའི་འགྱུར་ལས་ཤིག་ལ་སོགས་པ་རྫུས་ཏེ་སྐྱེས་པ་རྣམས་ནི་དུད་འགྲོ་ས་ཡི་སྐྱེ་གནས་ཅན་ནོ། །ཞེས་འབྱུང་ཞིང་ལྗོན་ཤིང་གི་མིང་མེད་ལ། ཤུད་ཀེ་གྲགས་པ་རྒྱལ་མཚན་གྱི་འགྱུར་ལས་ཀྱང་དེ་དང་འདྲ་བར་འབྱུང་བས་ཤིག་ལ་ངོས་འཛིན་ཏེ། ཤིག་ལ་སྐྱེ་གནས་བཞི་འདོད་པ་ལྟར་ན་ཡང་ཤིག་རྫུས་སྐྱེས་རྣམས་སའི་སྐྱེ་གནས་སོ་ཞེས་བཤད་པས་ཆོག་གི་གསུངས་པ་ལྟར་ན་ཤིག་ལ་རྫུས་སྐྱེས་ཡོད་པ་འགལ་བ་མེད་མོད། རྒྱ་དཔེའི་འགྱུར་འདི་ལྟར་ན་ལྗོན་པ་སོགས་སུ་རྫུས་ཏེ་སྐྱེས་པའི་དུད་འགྲོ་རྣམས་ནི་ས་ལས་སྐྱེ་བ་ཞེས་རྟེན་གནས་ཀྱི་སྒྲ་དངོས་སུ་མེད་ཀྱང་དུད་འགྲོའི་སྐྱེ་གནས་འཆད་པའི་སྐབས་དོན་གྱིས་གོ་བར་བྱས་ནའང་ལེགས་པར་སེམས་ཏེ། སྤྱིར་དུད་འགྲོ་ལ་རྫུས་སྐྱེས་དུ་མ་ཡོད་པ་ནི་ཡོངས་སུ་གྲགས་ལ། ལྕགས་གོང་མེ་འབར་བ་གཤག་པའི་བར་དུ་སེམས་ཅན་ཡོད་པར་མཐོང་བ་མཛོད་
འགྲེལ་སོགས་སུ་བཤད་པ་ལྟར་སེམས་ཅན་ལས་ཀྱི་སྣང་བས་རྡོ་དང་ཤིང་སོགས་བརྟན་པའི་ཁམས་གང་ལའང་དུད་འགྲོ་རྫུས་སྐྱེས་ཡོད་པ་རྣམས་ནི་སའི་ཁམས་ཀྱི་སྐྱེ་གནས་ཅན་དུ་བཤད་ལ། དེ་ལས་གཞན་པའི་རྫུས་སྐྱེས་ལྷ་སོགས་ནམ་མཁའི་ཁམས་ཀྱི་སྐྱེ་གནས་ཅན་དུ་བཤད་ཀྱང་འགལ་བ་མ་མཐོང་ལ། ཡང་ན་ལྗོན་པ་ཞེས་པ་དུད་འགྲོ་རྫུས་སྐྱེས་བྱེ་བྲག་པ་ཞིག་གི་མིང་ཡིན་ཚུལ་གྱི་ངེས་པ་ཡོད་ན་དེར་ཟད་ཀྱི། གཞན་དུ་ཤིང་དངོས་ལ་གོ་ན་ཅིར་ཡང་མི་རུང་ངོ་། །སྣ་ཚོགས་ས་དང་ཞེས་པ་ས་ཡང་ཡིན་ལ་སྣ་ཚོགས་ཀྱང་ཡིན་པས་སྣ་ཚོགས་ས་ལ་ནི། ནང་གི་གླིང་བདུན་གྱི་བདག་ཉིད་དང་། ཕྱི་རོལ་དུ་གླིང་དུམ་བུ་བཅུ་གཉིས་ཀྱི་རང་བཞིན་ནོ། །འགྲེལ་པར་ས་ཞེས་པ་ནི་ལུང་གི་ཚིག་གོ་ཞེས་པ་དེའི་སྐད་དོད་མ་ཧཱི་རིང་པོ་དགོས་ཀྱང་ཐུང་ངུ་བྱུང་བ་ལུང་འདི་ཡི་ཚིག་གོ་ཞེས་སོ། །ས་ཡི་འོག་ཏུ་ཀླུ་ཡི་སྲིད་པ་དང་། དམྱལ་བའི་སྲིད་པ་བདུན་ནོ། །དེ་ཡང་སྣ་ཚོགས་ས་ལ་མི་རྣམས་དང་ནི་སྣ་ཚོགས་སའི་འོག་ཏུ་དམྱལ་བ་ཡི་སྲིད་པ་ཡང་ངོ་། །དེ་ལྟར་སྟོང་པའི་དབུས་སུ་ཡང་དག་པར་འབྱུང་སྟེ། དཔེར་ན་ཆུ་ལ་ཉི་མའི་འོད་ཀྱི་སྦྱོར་བས་ཆུ་གཤེར་བ་ལས། ལན་ཚྭའི་ཁམས་ཀྱི་རྡུལ་ཕྲ་རབ་རྣམས་གཅིག་ཏུ་བསྡུས་ཏེ་ལན་ཚྭ་སྲ་བ་ཉིད་ཆགས་པ་ལྟར་བརྟན་པ་སྣོད་ཀྱི་འཇིག་རྟེན་རྣམས་འབྱུང་བ་ནི་དེ་ལྟ་བུ་ཡིན་པ་དང་ནི། ཁུ་བ་ཞུ་བའི་རྡུལ་ཕྲ་རབ་རྣམས་སྒོ་ངའི་དབུས་སུ། གདོང་དང་རྐང་པ་སོགས་ཀྱི་ཆ་ཤས་ཅན་གྱི་ལུས་སུ་སྨིན་པ་སྒོང་སྐྱེས་དེ་བཞིན་གཡོ་བ་སེམས་ཅན་རྣམས་ཀྱི་ལུས་འབྱུང་ཚུལ་རིག་པར་བྱའོ། །འཇིག་རྟེན་ཁམས་འདིའི་འབྱུང་ཚུལ་ནི་ལེའུ་ལྔ་པར་རྒྱས་པར་བརྗོད་པར་འགྱུར་རོ། ༤ །གཉིས་པ་བྱེ་བྲག་ཏུ་བཤད་པ་ལ། རྡོ་རྗེ་སྔགས་ཀྱི་ལུས་ཀྱིས་སྲིད་པ་རྣམ་བཅུ་འབྱུང་སྡུད་ཀྱི་ཚུལ་བསྟན་པ་དང་། གཞོམ་མེད་སྲོག་གི་ང་ལས་གཟའ་སོགས་སྲིད་པ་རིམ་པར་མཆེད་པའི་ཚུལ། ཐབས་
ཤེས་དབྱངས་གསལ་གྱི་ཡི་གེས་དུས་དང་སྲིད་པ་སྤྲོ་བའི་ཚུལ་དང་གསུམ་ལས་དང་པོ། ལུས་དང་ཡེ་ཤེས་སོགས་ཚིགས་བཅད་གཅིག་གིས་བསྟན་ཏེ། སྐུའམ་ལུས་ཞེས་པ་ནི་ཟླ་བ་སྒྲིབ་པ་དང་བྲལ་བ་དང་། ཡེ་ཤེས་ནི་ཉི་མ་སྒྲིབ་པ་དང་བྲལ་བའོ། །ནམ་མཁའ་ནི་མཁའ་ཁམས་སྒྲིབ་པ་དང་བྲལ་བ་དང་ནི་དེ་བཞིན་དུ་རླུང་དང་མེ་དང་ཆུ་དང་ས་དང་ཁམས་ལྔའི་བདག་ཉིད་བརྟན་པ་རི་རབ་དང་གཡོ་བ་ཁམས་དྲུག་གི་བདག་ཉིད་ཀྱི་གང་ཟག་གི་ཁམས་རྣམས་སྒྲིབ་པ་དང་བྲལ་བ་དང་། ལྷ་ནི་གང་ཞིག་མཐོང་བ་སྐྱེད་པ་མིན་པ་གཟུགས་མེད་པའི་སྲིད་པ་རྣམ་པར་ཤེས་པའི་ང་རྒྱལ་ཙམ་དང་ལྡན་པ་ནམ་མཁའ་མཐའ་ཡས་ཀྱི་སྐྱེ་མཆེད་ལ་སོགས་པ་བཞི་པོ་དག་དང་། དེ་ལྟར་ལུས་ལ་སོགས་པ་རྡོ་རྗེ་ཡེ་ཤེས་ཀྱི་སྲིད་པ་རྣམ་པར་བཅུར་དེ་བཞིན་གཤེགས་པས་གསུངས་པ་རྡོ་རྗེ་ཡི་ནི་ལུས་དག་ལས་སྔགས་ཀྱི་སྐྱེ་གནས་ཐིག་ལེ་ལ་སོགས་པ་དག་ནི་འབྱུང་བར་འགྱུར་ཞིང་། ཞེས་སྔགས་ཀྱི་སྐྱེ་གནས་འབྱུང་ཚུལ་ནི། ཟླ་བ་ལས་ཐིག་ལེ་དང་། ཉི་མ་ལས་རྣམ་བཅད། མཁའ་ལས་ཨ། རླུང་ལས་ཨི། མེ་ལས་རི། ཆུ་ཁམས་ལས་ཨུ། ས་ལས་ལྀ། བརྟན་པའི་ཁམས་ལས་མ། གཡོ་ཁམས་ལས་ཀྵ། གཟུགས་མེད་པའི་ཁམས་ལས་ཧ་ཡིག་སྟེ། འདི་རྣམས་གཡོན་སྐོར་གྱིས་ཏེ་མཇུག་ནས་ཡར་ཧ་ཀྵ་མ་ལྀ་ཨུ་རྀ་ཨི་ཨཿ འདི་ལྟར་བཀོད་ལ། གསལ་བྱེད་སྔ་མ་རྣམས་ཕྱི་མའི་སྟེང་དུ་འགྲོའོ། །ལྀ་ཡིག་ལ་སོགས་པ་རྣམས་ནི། བརྡ་སྤྲོད་པའི་གཞུང་ལས། ཨི་ཀ་ནི་ཨཙ྄་ལ་ཡ་ཎའོ། །ཞེས་པས་ཡ་ཎ྄་རུ་བསྒྱུར་བར་བྱ་སྟེ། ལྀ་ལ། ཨུ་ཝ། རྀ་ར། ཨི་ཡ་བསྒྱུར་པར་བྱས་ནས་ཕ་རོལ་གྱི་ཨ་ཡའི་སྲོག་ཏུ་གཞུག་ཅིང་། ཡི་གེ་རྣམས་བརྩེགས་པའི་སྟེང་དུ་ཐིག་ལེ་ཟླུམ་པོ་ལ་ཡེ་ཤེས་རྩེ་མོའི་རྣམ་པ་དང་། ཐིག་ལེའི་རྣམ་བཅད་ཟླ་ཕྱེད་ཀྱི་རྣམ་པར་བྱས་པས།
འདི་ལྟར་གྲུབ་པ། འདིར་ནི་ཕྱི་རོལ་དུ་འཇིག་རྟེན་གྱི་ཁམས་བརྟན་གཡོ་མཐའ་དག་ཀྱང་འདུལ། ནང་དུ་རྡོ་རྗེ་ལུས་ཀྱི་ཚུལ་ཀྱང་འདིས་བསྡུས་ཏེ། ཕྱི་ལྟར་ན་ནམ་མཁའི་ཁམས་ལ། ཡ་ཡིག་རླུང་གི་དཀྱིལ་འཁོར་དང་། དེའི་སྟེང་དུ་ར་མེ། ཝ་ཆུ། ལ་ས་དཀྱིལ། མ་ལྷུན་པོ་ཡིན་ལ་དེའི་སྟེང་དུ་ཀྵ་ཡིག་པདྨའི་ཚུལ་གྱིས་གཡོ་བའི་སེམས་ཅན་གྱི་ཚོགས་སོ། །ཧ་ཡིག་གཟུགས་མེད་པའི་ཚོགས་སོ། །ཧ་ཡིག་ལ་རྣམ་བཅད་ཟླ་ཕྱེད་རྣམ་པ་ཉི་མ་དང་ཐིག་ལེ་ཟླ་བ། ནཱ་ད་རྡོ་རྗེའི་མཚན་མ་རྩེ་གཅིག་པ་སྒྲ་གཅན་དེ། ཕྲ་བའི་སྒོ་གསུམ་དང་ཁུ་རྡུལ་རླུང་གསུམ། སྣང་མཆེད་ཐོབ་གསུམ་སོགས་སྲིད་པ་ཐམས་ཅད་གང་ལས་བྱུང་བའི་གནས་མཚོན་ནོ། །ནང་ལྟར་ན། ལ་ཡིག་མན་ཆད་ཀྱི་ཡི་གེ་བཞི་ནི་ཆུ་སོ་མན་ཆད་དེ། ཡ་རྐང་མཐིལ་རླུང་། ར་རྗེ་ངར་མེ། ཝ་པུས་མོ་ཆུ། ལ་དཔྱི་ས་དཀྱིལ། མ་རྒལ་ཚིགས། ཀྵ་མགྲིན་པ་ནས་གཙུག་ཏོར་གྱི་བར་དང་། ཧ་དང་ཟླ་ཚེས་ཐིག་ལེ་གསུམ་ནི་དབུ་མ་རོ་རྐྱང་གསུམ་མོ། །འཁོར་ལོ་ལྔ་དང་སྦྱར་ན། ཡ་སོགས་བཞི་དཔྲལ་མགྲིན་སྙིང་ལྟེའི་འཁོར་ལོ། མ་ལྟེ་བ་ནས་གསང་བའི་བར། ཀྵ་གསང་བའི་པདྨ། ཧ་ཟླ་ཚེས་ཐིག་ལེ་གསུམ་ཐུར་སེལ་རྒྱུ་བའི་བཤང་གཅི་ཁུ་བའི་རྩ་གསུམ་མོ། །གཞན་ལྟར་ན་དཀྱིལ་འཁོར་གྱི་གཞལ་ཡས་ཁང་གི་དབང་དུ་བྱས་ན། སྲོག་གི་ཨ་ཆོས་འབྱུང་ནམ་མཁའི་ཁམས་སུ། །ཡ་ནས་རིམ་པར་འབྱུང་བཞི་རི་རབ་ཀྱི་སྟེང་དུ་ཀྵ་སྣ་ཚོགས་པདྨ་དང་། ཧ་དང་ཟླ་ཚེས་ཐིག་ལེ་གསུམ་ནི་ཟླ་ཉི་སྒྲ་གཅན་གྱི་གདན་ནོ། །བརྟེན་པ་ལྷའི་དབང་དུ་བྱས་ན་རྒྱལ་བ་རིགས་དྲུག་གི་ས་བོན་སོགས་སུ་འགྱུར་རོ། །དེ་ལྟར་རྡོ་རྗེའི་ལུས་རང་བཞིན་འོད་གསལ་གྱི་ངང་ནས་ཀུན་ཏུ་རྟོག་པ་སྐྱོད་བྱེད་ཀྱི་ལས་རླུང་ཕྲ་མོས་འཁོར་བར་གྲུབ་ཅིང་། ཀྱེ་མི་ཡི་བདག་པོ་ཞེས་བོས་ནས་སླར་
ཡང་སྲིད་པ་སྡུད་པའི་དུས་སུ་རྡོ་རྗེའི་ལུས་འདི་ཉིད་དུ་གྲོལ་བའམ་ཐིམ་པར་འགྱུར་ཏེ། དེ་ལྟར་སྲིད་པ་རྣམས་གང་ལས་འབྱུང་བ་དང་གང་དུ་ཐིམ་པའི་རྡོ་རྗེའི་ལུས་རྣམ་བཅུ་སྒྲིབ་བྲལ་དུ་གང་ཟག་གང་གིས་ཡང་དག་པར་རིག་པ་དེ་ནི་ཕྱུགས་མིན་ཞེས་ཕྱུགས་ཀྱི་སྒྲས་རྨོངས་པའམ་མི་ཤེས་པ་བརྗོད་པས་ན་རྨོངས་པ་མིན་ཞེས་སོ། །དེ་ལྟ་བུར་སྒྲིབ་བྲལ་རྡོ་རྗེའི་ལུས་རང་བཞིན་འོད་གསལ་བའི་དོན་མཐོང་བའི་སེམས་ཀྱིས་འདི་ལྟར་དཀྱིལ་འཁོར་དུ་བརྟག་པའི་ཀུན་ཏུ་རྟོག་པ་དག་ལས་གྲོལ་བ་ཡིན་ཏེ་རྣམ་པར་རྟོག་པ་དང་བྲལ་བ་འོད་གསལ་གཉུག་མ་སྔགས་ཀྱི་ལུས་དེ་ཁོ་ན་ཉིད་ཀྱི་དོན་ལ་མ་རྨོངས་པའི་ཕྱིར་རོ། །དེ་ལྟར་སྣང་སྲིད་ཐམས་ཅད་ཆོས་ཉིད་གནས་ལུགས་ཀྱི་དབང་དུ་བྱས་ན་རང་བཞིན་འོད་གསལ་གཉུག་མ་རྡོ་རྗེ་སྔགས་ཀྱི་སྐུར་ལྷུན་གྱིས་གྲུབ་པ་ཡིན་པ་ཤེས་པར་བྱའོ། །རྣམ་པ་བཅུ་པོ་མདོར་བསྡུས་པ་ནི། མཚན་བརྗོད་ལས། རྣམ་པ་བཅུ་པོ་དོན་བཅུའི་དོན། ཞེས་པ་ནས། མུ་སྟེགས་རི་དྭགས་ངན་འཇིགས་བྱེད། །ཅེས་པའི་བར་གྱིས་བསྟན་ཏོ། །གཉིས་པ་གཞོམ་མེད་སྲོག་གི་རླུང་ལས་གཟའ་སོགས་སྲིད་པ་རིམ་པར་མཆེད་པའི་ཚུལ་ནི། གཡོན་གྱི་ཡན་ལག་ཏུ་ནི་སོགས་ཚིགས་བཅད་གཉིས་ཀྱིས་བསྟན་ཏེ། སྔར་བསྟན་པའི་གཞོམ་མེད་ཀྱི་ཡི་གེའི་རང་བཞིན་དེ་ལས་སྲིད་པ་འབྱུང་ཚུལ་བསྟན་པ་ཡིན་ལ། གཞོམ་མེད་ལྔ་པོ་འདི་ལ་རྒྱུད་གཞན་དང་གཞན་དུ། མི་ཤིགས་པའི་ཐིག་ལེ་དང་། སྲོག་ཆེན་པོ་སོགས་ཀྱི་མིང་གིས་བསྟན་པ་དང་། འབྱུང་བའི་དྭངས་མ་ལྔ་འདུས་ཀྱི་ཐིག་ལེ་ཞེས་དང་། དབུ་མའི་སྲོག་གི་རླུང་འོད་ཟེར་ལྔ་པ་སོགས་གནས་སྐབས་ཀྱི་དབང་གིས་མིང་སྣ་ཚོགས་སུ་བརྗོད་ཀྱང་དོན་ལ། རྩ་བའི་གཞི་དབུ་མའི་སྲོག་གི་རླུང་གདངས་ཁ་དོག་ལྔ་པའི་རྣམ་པའི་ཕྲ་མོའི་ཐིག་ལེ་ཡིན་པར་གནད་གཅིག་ཅིང་། གསང་བའི་འབྱུང་
བ་རླུང་སེམས་ཕྲ་བའི་ཆ་འདི་ལས། ནང་གི་འབྱུང་བ་ས་སོགས་ཀྱི་ཁམས་དང་། དེའི་དབང་གིས་ཕྱི་རོལ་གྱི་འབྱུང་བ་ལྔ་དང་། དེ་ལས་བྱུང་བའི་གཟའ་སྐར་སོགས་སྣང་བ་རྣམས་འཆར་བར་ཤེས་པ་འདི་གསང་སྔགས་ཐབས་ཀྱི་ལམ་ཀུན་གྱི་གནད་གལ་པོ་ཆེ་ཡིན་ནོ། ༥ །སྔར་བཤད་པའི་དབུས་ཀྱི་གཞོམ་མེད་དང་པོ་འཁྱོགས་པོའི་ཕྱེད་ཀྱི་རྣམ་པ་གྲི་གུག་གི་མཚན་མའི་མིང་ཅན་གྱི་གཡོན་གྱི་ཡན་ལག་ཏུ་ནི་འགྱུར་མེད་བཞི་པ་ཐིག་ལེ་གཅིག་སྟེ། དེ་ཡང་དཀར་པོ་འབར་བ་ཞེས་པ་ཡེ་ཤེས་དཀར་པོའི་འོད་ཟེར་འབར་བ་སྟེ། ཆུ་ཁམས་སྒྲིབ་བྲལ་སོར་རྟོག་ཡེ་ཤེས་ཀྱི་རང་བཞིན་ཅན་དེ་ཉིད་འགྲོ་བའི་ལུས་ཀྱི་བདུད་རྩིའི་ཆ་སྟེ་ཁུ་བ་དང་ལྷན་ཅིག་པ་རྩ་རྐྱང་མ་བསྐྱེད་པའི་གཞི་དང་། དབུས་ཀྱི་གཞོམ་མེད་གྲི་གུག་གི་མཚན་མའི་མིང་ཅན་གྱི་གཡས་སུ་འགྱུར་མེད་གསུམ་པ་རྣམ་བཅད་ཀྱི་མཚན་མའི་མིང་ཅན་མེ་ཁམས་སྒྲིབ་བྲལ་མཉམ་ཉིད་ཡེ་ཤེས་ཀྱི་འོད་ཟེར་དམར་པོའི་མདོག་ཅན་རཀྟ་དང་ལྡན་པ་རོ་མའི་བསྐྱེད་གཞིའོ། །དེ་ལྟར་གཡོན་དང་གཡས་ཀྱི་ཡན་ལག་དེ་ལས་གཡོན་དུ་སྒྲ་གཅན་དང་། གཡས་སུ་དུས་མེ་གཉིས་ནམ་མཁའི་ཁམས་ཀྱི་རང་བཞིན་དང་། དེ་བཞིན་གཡོན་དང་གཡས་སུ་སྦྱར་ཏེ། ཟླ་བ་དང་ཉི་མ་ཟུང་ནི་རླུང་གི་རང་བཞིན། རི་བོང་ཅན་གྱི་བུ་ལྷག་པ་དང་། ས་སྐྱེས་ཏེ་མིག་དམར་ཟུང་ནི་མེའི་རང་བཞིན། དཀར་པོ་པ་སངས་དང་བླ་མ་ཕུར་བུ་ཟུང་ཆུ་ཡི་རང་བཞིན་དང་། དུ་བ་མཇུག་རིང་དང་། འགྲོ་འོང་དམན་པ་སྤེན་པ་ཟུང་ས་ཡི་རང་བཞིན། ཆར་པ་ཆུ་ཁམས་དང་གློག་མེ་ཁམས་ཟུང་དང་། ཆུ་དང་རྩེ་མོ་ཅན་མེ་དག་ཟུང་ཡིན་ཏེ། དབུས་ཀྱི་མཚན་མའི་བྱང་དང་ལྷོའི་འབར་བ་དཀར་དམར་གཉིས་ལས་བྱུང་བ་རྣམས་ནི་ཟུང་དུ་སྦྱར་བ་བདུན་པོ་འདི་དག་ཕྱི་རོལ་འཇིག་རྟེན་གྱི་ཁམས་ལ་ནི་གནས་པ་ཉིད་དེ། མུན་པ་མེད་པ་ཟུང་གཅིག་དག་ནི་
ཞེས་པ་མུན་པ་དབུས་ཀྱི་གཞོམ་མེད་མ་ཡིན་པ། གཡོན་དང་གཡས་སུ་དཀར་པོ་དང་དམར་པོའི་ཡེ་ཤེས་ཀྱི་འོད་ཟེར་ཅན་ཟུང་གཅིག་པོ་དེ་དག་ནི། དབུས་ཀྱི་གཞོམ་མེད་གང་ཞིག །མུན་པའི་མིང་ཅན་དེའི་མཐའ་ལ་གནས་དེ་གཞོམ་མེད་ཀྱི་ཡན་ལག་ཡིན་གྱི་གཞན་མ་ཡིན་ཞེས་པའོ། །དབུས་ཀྱི་གཞོམ་མེད་ནི་རྣམ་པར་ཤེས་པ་སྒྲིབ་བྲལ་ཆོས་དབྱིངས་ཡེ་ཤེས་རྩ་ཨ་བ་དྷུ་ཏི། ཁུ་བ་འཕོ་བའི་རྩ་ཁམས་ལྔ་ཡི་རང་བཞིན་ཅན་ཏེ། དབུས་ཀྱི་སྟོང་པ་གཞོམ་མེད་ནི་ཡི་གེ་ཨའམ་གྲི་གུག་གི་མཚན་མའི་མིང་ཅན་ནོ། ༦ །དེ་ཡང་རྣམ་ཤེས་སྒྲིབ་བྲལ་དུ་གྱུར་ན་ཁམས་གཞན་སྒྲིབ་བྲལ་དུ་འགྱུར་བ་དང་། ཆོས་དབྱིངས་ཡེ་ཤེས་ཡེ་ཤེས་གཞན་བཞིའི་རང་བཞིན་ཡིན་པའི་ཕྱིར་དང་། དབུ་མ་དག་པས་རྩ་ཀུན་དག་ཅིང་། ཁུ་བ་མི་འཕོ་བས་ཁམས་གཞན་ཀྱང་མི་འཕོ་བ་དང་། ཕྱི་རོལ་དུ་སྒྲ་གཅན་སོགས་ཁམས་ལྔའི་རང་བཞིན་ཡིན་པའི་ཕྱིར་དང་། ཨ་སྔགས་ཐམས་ཅད་ཀྱི་སྲོག་ཡིན་པའི་ཕྱིར་དེ་ལྟར་བརྗོད་དོ། །དབུས་ཀྱི་གཞོམ་དུ་མེད་པའི་རྒྱབ་ཏུ་སྟེ་ནུབ་ཏུ་འགྱུར་མེད་ལྔ་པ་ཐོད་པའི་རྣམ་པའི་མཚན་མའི་མིང་ཅན་གཞོམ་དུ་མེད་པའོ། །དེ་ཡང་དབུས་ཀྱི་གཞོམ་མེད་དེའི་ཕྱི་རོལ་ཐོད་པའི་རྣམ་པ་དང་བཅས་པའི་ཡེ་ཤེས་ཀྱི་འོད་ཟེར་སེར་པོ་འབར་བ་ས་ཁམས་སྒྲིབ་བྲལ་མེ་ལོང་ཡེ་ཤེས་ཀྱི་རང་བཞིན་ཅན་དེ་ཡང་ནི་གོང་བཞིན་དུ། ནང་དུ་བཤད་པའི་རྩ་དང་དྲི་ཆེན་གྱི་ཁམས་དང་། ཕྱི་རོལ་དུ་ཕྲ་མོ་དང་སྦོམ་པོའི་སྐར་མ་རྣམས་དང་། ལྷ་ཡི་གཞུ་ཞེས་པ་འཇའ་ཚོན་དང་ས་སྟེ་ས་ཁམས་ཕྲ་རགས་དེ་དག་བསྐྱེད་ལ། དེ་ལྟར་སེར་པོ་འབར་བ་དེ་ནི་དབྱེ་བ་རྣམ་པ་བཞི་རུ་འགྱུར་ཏེ། གང་གིས་ན། ས་རང་ཉིད་ལ་ས་དང་རྡོ་བའི་ཁམས་གཉིས་ཀྱི་དབྱེ་བ་བྱས་པ་དེ་དང་། སྐར་མ་དང་ལྷ་གཞུ་བཅས་རྣམ་པ་བཞིར་འགྱུར་བས་སོ། །ཞེས་བྱ་སྟེ་རྒྱུད་འགྲེལ་ལས་སེར་པོ་འབར་བ་དེ་
ནི་རྣམ་བཞི་ཞེས་འབྲུ་བརྣན་པའི་ཕྱིར་རོ། །ས་དེ་ནི་རྣམ་བཞི་སྟེ་ས་རྡོ་གཉིས་ལ་ཕྲ་རགས་ཕྱེ་བས་བཞི་ཞེས་བཤད་པའང་སྣང་ངོ་། །རྒྱབ་ཏུ་ས་ཟུང་བདུན་ནི། སྐར་མ་ཕྲ་སྦོམ་གཉིས། ལྷ་གཞུ། ས་ཕྲ་སྦོམ། རྡོ་ཕྲ་སྦོམ་བཅས་བདུན་ནོ། །དབུ་མར་གནས་པ་སྲོག་ཅེས་བྱ་བ་གཅིག་པུའི་རླུང་དེ་ནི་རྩ་བ་དང་ཡན་ལག་གི་རླུང་རྣམ་པ་བཅུར་འགྱུར་ཏེ། གང་ཞེ་ན་དབུ་མའི་ནང་གི་དབུས་སུ་གནས་པའི་གཞོམ་མེད་ཀྱི་སྤྱི༷་བོ་སྟེ་སྟེང་དང་། རྩ་བ་ཞེས་པ་འོག་དག་དང་། མདུན་ཤར་དུའོ་ཞེས་པ། དབུས་ཀྱི་གཞོམ་མེད་ཀྱི་སྟེང་དུ་ཐིག་ལེས་མཚོན་པ་དོན་དམ་མཁའ་ཁམས་སྒྲིབ་བྲལ་གྱི་འོད་ཟེར་ལྗང་གུ་ལས། དེ་ཉིད་ཀྱི་ཕྱི་རོལ་དུ་སྟོང་པའི་ས་བོན་ལས་བྱུང་བ་སྲོག་འཛིན་གྱི་ང་གནས་སོ། །དེའི་དབང་གིས་སྟེང་དུ་སྒྲ་གཅན་གྱི་རྩ་དབུ་མ་ཡེ་ཤེས་ཀྱི་རླུང་འབབ་པ་ཉིད་དུ་འགྱུར་རོ། །གཞོམ་མེད་ཀྱི་འོག་ཏུ་ཐིག་ལེས་མཚོན་པ་ཡེ་ཤེས་ཀྱི་ཁམས་སྒྲིབ་བྲལ་འོད་ཟེར་སྔོན་པོ་ལས། དེ་ཉིད་ཀྱི་ཕྱི་རོལ་དུ་ཡེ་ཤེས་ཀྱི་ས་བོན་ལས་བྱུང་བ་ཐུར་དུ་སེལ་བའི་ང་གནས་སོ། །དེ་ཡང་ནང་དུ་དབུ་མའི་མར་སྣ་དུང་ཅན་མ་ཁུ་བ་འབབ་པ་དུས་མེའི་རྩ་དང་། སྟེང་འོག་གི་དབུ་མ་སྟོང་པ་ནང་གི་དབྱིངས་ཀྱི་ཆ་ལས་ཕྱི་རོལ་དུ་ནམ་མཁའོ། །དབུས་ཀྱི་གཞོམ་མེད་ཀྱི་མདུན་ཏེ་ཤར་དུ་རླུང་ཁམས་སྒྲིབ་བྲལ་བྱ་གྲུབ་ཡེ་ཤེས་ཀྱི་རང་བཞིན་འགྱུར་མེད་གཉིས་པ་དབྱུག་པའི་མཚན་མའི་མིང་ཅན་འོད་ཟེར་ནག་པོ་ཡོད་ཅིང་། དེའི་ཕྱི་རོལ་དུ་མཉམ་གནས་ཞེས་བྱ་བའི་རླུང་གནས་སོ། །དེའི་དབང་གིས་ནང་དུ་གཅི་བའི་རྩ་དང་ཕྱི་རོལ་དུ་འབྱུང་བ་རླུང་ངོ་། །དེ་ལ་མཉམ་གནས་ནི་སའི་ཁམས་སོ། །དེ་བཞིན་དུ་གྱེན་རྒྱུ་མེ། ཁྱབ་བྱེད་ཆུ་སྟེ་རྩ་བའི་རླུང་ལྔའོ། །ཡན་ལག་གི་རླུང་ལྔ་ནི། ཀླུ་ཞེས་པ་ས་ཁམས། རུས་སྦལ་རླུང་། རྩང་བ་མེ། ལྷ་སྦྱིན་ཆུ། ནོར་ལས་རྒྱལ་ས་སྟེ་ལྔའོ། །རླུང་བཅུ་པོ་འདི་དག་ལས་སྟེང་དང་འོག་ཏུ་སྟོང་པ་དང་ཡེ་ཤེས་
ཀྱི་ཁམས་སྲོག་ཐུར་ཟུང་གཅིག་ནི་མུན་པའི་མཐར་རོ། །ཤར་དང་ནུབ་སྟེ་མདུན་དང་རྒྱབ་ཏུ་ནི་རླུང་དང་ས་ཡི་ཟུང་བདུན་ནོ། །འོན་ཏེ་ནུབ་ཏུ་ས་བདུན་དང་ཤར་དུ་རླུང་བརྒྱད་ཡོད་པས་ས་རླུང་ཟུང་བདུན་དུ་མི་འགྱུར་རོ་ཞེ་ན། ནོར་ལས་རྒྱལ་བ་ནི་རླུང་བཅུའི་ནང་དུ་གཏོགས་ཀྱང་། སྐབས་འདིའི་ཐབས་ཤེས་ཟུང་བདུན་དུ་མི་གཏོགས་པའི་མ་ནིང་སྟེ་ལྕི་བ་སའི་ཡོན་ཏན་ཤས་ཆེ་བ་ཅན་ཤི་བའི་ལུས་ཡོངས་སུ་མི་གཏོང་བའི་ཕྱིར་དེ་མ་བགྲང་བ་ཡིན་ནོ། །ཕྱོགས་བཞིའི་ཟུང་བདུན་ལ་སོགས་པའི་སྔགས་ཀྱི་ཡི་གེ་ནི། གཡོན་དང་། གཡས་ཀྱི་སྒྲ་གཅན་དང་དུས་མེ་ལ་སོགས་པ་ཟུང་བདུན་པོ་རིམ་པས། ཨཾ་ཨཱཿ ཨུ་རྀ། ཨཱུ་རཱྀ། ཨོ་ཨར། ཨཽ་ཨཱར། ཝ་ར། ཝཱ་ར། ཞེས་པ་གཟའ་བདུན་སོགས་ཀྱི་ལྷག་པའི་ལྷའོ། །རྒྱབ་མདུན་གྱི་ས་རླུང་ཟུང་བདུན་གྱི་ས་བོན་ནི། ཨ་ཨཱ། ཨི་ལྀ། ཨི་ལཱྀ། ཨེ་ཨལ྄། ཨཻ་ཨཱལ྄། ཡ་ལ། ཡཱ་ལཱ། ཞེས་དང་། སྟེང་འོག་གི་སྲོག་ཐུར་གཉིས་ཀྱི་ས་བོན། ཧ་ཧཱ། ཟུང་བདུན་དུ་མ་བགྲང་བ་ནོར་ལས་རྒྱལ་གྱི་ས་བོན་ཀྵའོ། །འདི་རྣམས་ཕྱོགས་སུ་ཡོད་པ་མཚོན་བྱེད་དུ་བྲིན་སོ་སོའི་ས་བོན་ཡི་གེའམ་སོ་སོའི་ཁ་དོག་གི་ཐིག་ལེ་བྲི་བ་བླ་མ་སྔ་མའི་ཕྱག་སྲོལ་ལ་གདའོ། །དེ་ལྟར་ཕྱོགས་བཞིར་ཆུ་མེ་ས་རླུང་ཟུང་བདུན་སྟེ་ཉེར་བརྒྱད་པོ་འདི་ཞག་གཅིག་གི་ཐུན་མཚམས་ལ་བཞིར་དབྱེ་བས་གཟའ་བདུན་གྱི་ས་བོན་རྐང་པ་སྐྱེ་བའི་གནས་ཏེ་གཟའ་ཉི་མ་ལ་མཚན་ཕྱེད་ནས་ཤར་ནས་འཆར་བ་་ཨ། ལྷོར་འཆར་བ་ཨཿ ནུབ་ནས་ཨཱ། བྱང་ནས་ཨཾ། དེ་བཞིན་ཟླ་བར་ཨི་རྀ་ལྀ་ཨུ། བཀྲ་ཤིས་ཨཱི་རཱྀ་ལཱྀ་ཨཱུ། གཟའ་ལྷག་ཨེ་ཨར་ཨལ་ཨོ། ཕུར་བུ་ཨཻ་ཨཱར་ཨཱལ་ཨཽ། པ་སངས་ཡ་ར་ལ་ཝ། སྤེན་པར་ཡཱ་རཱ་ལཱ་ཝཱ་ཞེས་སོ། །དབུས་ཀྱི་རྡོ་རྗེའི་སྟེང་དུ་ཞེས་པ་ནི། སྟེང་འོག་ཕྱོགས་བཞིའི་དབུས་ཀྱི་སྟོང་ཆེན་ཡི་གེ་གྲི་གུག་གི་རྣམ་པ་རྟོག་པས་མི་ཕྱེད་པའི་རྡོ་རྗེའི་སྟེང་དུ་
འགྱུར་མེད་བཞི་པ་གཡོན་ནམ་བྱང་དུ་གནས་པ་རྗེས་སུ་རླུང་རོ་ཐིག་ལེ་ནི་ས་བོན་ཞེས་བྱ་ལ། དེ་ནི་དབུས་ཀྱི་སྟེང་དུ་བཞག་པར་བྱ་སྟེ། རྣམ་ཤེས་དང་ཡེ་ཤེས། སྒྲིབ་བྲལ་དུ་གྱུར་པ་ལས། ཁུ་བ་སྟེང་དུ་ཡར་འགྲོ་བ་མཚོན་ནོ། །ས་བོན་ནམ་ཐིག་ལེ་དེའི་རང་གི་ནུས་པ་ཞེས་བྱ་བ་རྣམ་བཅད་དེ། དེའི་ཡོན་ཏན་ནི་མེ་ཁམས་སྒྲིབ་བྲལ་མཉམ་ཉིད་ཡེ་ཤེས་འོད་དམར་པོ་ཡིན་ལ། དེ་ཡི་ཚོགས་དང་བཅས་པའི་སྟོང་ཆེན་གསུམ་པ་ལྷོའི་ཚེག་དྲག་ནི་ཐིག་ལེའི་འོག་ཏུ་ཟླ་ཕྱེད་ཀྱི་རྣམ་པས་གནས་པ་སྟེ་ཁུ་བ་སྟེང་དུ་བརྟན་པར་གྱུར་པ་རང་གི་ནུས་པས་རྡུལ་འོག་ཏུ་འགྲོ་ཞིང་བརྟན་པ་མཚོན་ནོ། །རང་ནུས་ཞེས་པའི་ཚིག་འདིས་དངོས་སུ་མ་གསུངས་ཀྱང་དོན་གྱིས་ཐོབ་པས་དབུས་མ་གཞོམ་མེད་ཀྱི་ནུས་པ་ལས་བྱུང་བ། ཤར་དང་ནུབ་ཀྱི་དབྱུག་པ་དང་ཐོང་བའི་རྣམ་པ་གཉིས་ནི་གྲི་གུག་གི་རྣམ་པ་དེའི་འོག་ཏུ་རྐང་པ་དང་། སྟེང་དུ་མགོ་བོའི་ཡན་ལག་ཏུ་བཞག་པར་བྱ་སྟེ་རྣམ་པར་ཤེས་པ་སྒྲིབ་པ་དང་བྲལ་བར་གྱུར་ན་རླུང་དང་ས་དག་སྒྲིབ་པ་བྲལ་བ་མཚོན་ནོ། །དེ་ལྟར་སྟོང་པ་ཆེན་པོ་ཡི་གེ་ལྔ་ནི་རྡོ་རྗེ་སེམས་དཔའི་ཡུལ་ལ་ཝཾ་ཡིག་སྟེ། རྡོ་རྗེ་ཡན་ལག་མེད་པའམ་ལུས་མེད་རྡོ་རྗེའི་སྒྲུབ་པ་ལ་ཧྃ་ཡིག་གོ། དེའི་ཕྱི་རོལ་དུ་ཐིག་ལེ་སྟོང་པ་ཡི་གེ་དྲུག་ནི་ཝཾ་ཡིག་གི་ཕྱོགས་ལ་རྟེན་ཨེ་ཡིག་ཅེས་བརྗོད་ཅིང་། ཧྃ་གི་ཕྱོགས་ལ་སྐྱེ་གནས་ཀྵ་ཡིག་སྟེ་རྡོ་རྗེ་དང་པདྨ་ཡང་ངོ་། །རྡོ་རྗེ་ཡན་ལག་མེད་པ་ཞེས་གཙོ་བོ་དུས་འཁོར་གྱི་གསང་བའི་རྡོ་རྗེ་དང་། པདྨ་ནི་ཡུམ་གྱི་པདྨ་ལ་བཤད་པའང་སྣང་ཞིང་། ལྷ་ཡབ་ཡུམ་གྱི་མིང་དུ་བྱས་པའི་སྐབས་ཀྱང་ཡོད་ལ། གང་ལྟར་ཀྱང་ཡི་གེ་འདི་དག་གིས་ཐབས་ཤེས་མཚོན་པ་ཡིན་ལ། འབྲི་བའི་དུས་སུ་ཨེ་ཝཾ་ནི་ཕྱི་ནང་དང་། ཧཾ་ཀྵ་སྟེང་འོག་ཏུ་བྲི་བ་ཡིན་ནོ། །དེ་ལྟར་ན་ཕྱི་རོལ་གྱི་སྔགས་ཀྱི་ཡི་གེ་ཀུན་ཏུ་སྟེ་ཐམས་ཅད་ལ་ཡེ་ཤེས་ཞེས་གཞོམ་མེད་ཀྱི་སྟེང་གི་རྣམ་བཅད་ཀྱི་གཟུགས་འགྱུར་བ་ཟླ་ཕྱེད་ཀྱི་རྣམ་པ་དང་ནི་སྟོང་པ་ཐིག་ལེ་བཀོད་པར་བྱའོ། །ཞི་བ་
ནི་དབུས་ཀྱི་གཞོམ་མེད་དེ་ཡི་གེ་གཞན་གང་དང་གང་གི་ཡང་ཁོག་པའོ། །གནས་དང་བཅས་པ་ནི་ཤར་ནུབ་ཀྱི་མཚན་མ་རྐང་པ་དང་མགོ་བོར་བྱས་པའི་རླུང་དང་ས་དག་གོ། དེ་དག་ཀྱང་ཕྱི་རོལ་གྱི་ཡི་གེ་ཐམས་ཅད་ལ་རང་རང་གི་རྐང་པ་དང་མགོ་བོའོ། །དེ་ལྟར་ཞི་བ་གནས་དང་བཅས་པ་ནི་སྒྲིབ་པ་དང་བཅས་པའི་དངོས་པོ་ཀུན་གྱིས་རྣམ་པར་གྲོལ་བའོ། །མགོའི་སྟེང་དུ་ཆུ་ཞེས་ཟླ་བའི་ཆ་ཤས་ཟླ་ཕྱེད་དང་། ཆའི་སྟེང་དུ་ཐིག་ལེ་དང་། ཐིག་ལེའི་སྟེང་དུ་ནཱ་ད་གཞོམ་དུ་མེད་པ་བཅས་བརྗོད་པར་བྱའོ། །འདིའི་དོན་ཅན་སྔགས་ཀྱི་ཚིག་རྣམས་ནི། ཨེྂ་ཝྂ། ཀྵྂ་ཧྂ། ཨྂ་ཨྂཿ ཨྂ་ཨཱྂ། ཨིྂ་ཨིྂ། རྂ་རཱྂ། ལྂ་ལྂ། ཨུྂ་ཨཱུྂ། ཨེྂ་ཨེྂ། ཨྂར་ཨཱྂར། ཨྂ་ལ་ཨཱྂ་ལ། ཨྂ་ཨྂ ཽ ། ཧྂ་ཧཱྂ། ཡྂ་ཡཱྂ། རྂ་རཱྂ། ལྂ་ལཱྂ། ཝྂ་ཝཱྂ། ཀྵྂ། ཞེས་འདི་ལྟར་ཨེ་ཝཾ་དང་ཀྵ་ཧ་དང་། རྩ་བའི་དབྱངས་ཐུང་ངུ་དང་རིང་པོ་ཐབས་ཤེས་སུ་གྱུར་པའི་ས་བོན་དང་དེ་བཞིན་འཕེལ་བ་དང་ཡོན་ཏན་དུ་བསྒྱུར་བ་ལ་ཟླ་ཚེས་ཐིག་ལེ་ནཱ་དས་བརྒྱན་པ་འདི་བཞིན་ཡི་གེ་ཐམས་ཅད་ལའང་སོ་སོའི་མགོ་རྐང་དབུས་ཀྱི་ཆ་དང་སྟེང་དུ་ཟླ་ཚེས་ཐིག་ལེ་སྟེ་སྟོང་པ་ལྔ་དག་སྟེང་དུ་གཞོམ་མེད་ནཱ་ད་སྦྱར་བས་ཁྱབ་པར་བྱ་བ་སྔགས་ཀྱི་ཚིག་ཐམས་ཅད་ལ། སྟོང་པ་ཆེན་པོ་ཡི་གེ་ལྔ་ནི་ཁྱབ་པར་བྱེད་པ་པོར་རིག་པར་བྱ་སྟེ། རྒྱུད་སྒྱུ་འཕྲུལ་དྲ་བ་ལས། རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིག་སྔགས་འཛིན། །རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག །ཅེས་དང་། ཆ་མེད་ཀུན་འགྲོ་ཁྱབ་པ་པོ། །ཕྲ་མོ་ས་བོན་ཟག་པ་མེད། །རྡུལ་མེད་རྡུལ་བྲལ་དྲི་མ་མེད། །ཉེས་པ་སྤངས་པ་སྐྱོན་མེད་པ། །ཅེས་གསུངས་པ་ལྟར་ཤིན་ཏུ་ཟབ་པའི་སྔགས་ཀྱི་བརྡ་ཁྱད་པར་ཅན་དོན་ཆེན་རྨད་དུ་བྱུང་བའོ། །རྨད་བྱུང་གསང་བ་དཔག་པར་དཀའ་བ་ཡི། །འཕྲུལ་ཆེན་ཡི་གེ་གསང་
སྔགས་ཆོས་ཀྱི་བརྡ། །ཟབ་དོན་ཀུན་གྱི་གསང་བ་རབ་འབྱེད་པའི། །ངོ་མཚར་བསམ་མི་ཁྱབ་ལ་མཆོག་ཏུ་འདུད། །ཅེས་བར་སྐབས་ཀྱི་ཚིགས་སུ་བཅད་པའོ། །གསུམ་པ་ཐབས་ཤེས་དབྱངས་གསལ་གྱི་ཡི་གེས་དུས་དང་སྲིད་པ་སྤྲོ་བའི་ཚུལ་ནི། ཨ་སོགས་སུམ་ཅུའི་དབྱངས་གང་སོགས་ཚིགས་བཅད་གཉིས་ཀྱིས་བསྟན་ཏེ། ཡི་གེ་ཨ་ལ་སོགས་པ་སུམ་ཅུའི་དབྱངས་གང་ཞེ་ན། ཨ་ཨི་རྀ་ཨུ་ལྀ། རང་བྱུང་རྩ་བའི་དབྱངས་ཐུང་ངུ་ལྔ། ཨཱ་ཨཱི་རཱྀ་ཨཱུ་ལཱྀ། རིང་པོ་ལྔ། ཨ་ཨེ་ཨར྄་ཨོ་ཨལ྄། ཡོན་ཏན་ལྔ། ཨཱ་ཨཻ་ཨཱར྄་ཨཽ་ཨཱལ྄། འཕེལ་བ་ལྔ་དང་། ཨ་སོགས་ཡ་ཎ྄་དུ་བསྒྱུར་བ། ཧ་ཡ་ར་ཝ་ལར་ལྡན་པ་དང་བཅས་པ་སྟེ། ཨ་བསྒྱུར་བ་ཧ། ཨི་བསྒྱུར་བ་ཡ། དེ་བཞིན་རྀ་ར། ཨུ་ཝ། ལྀ་ལ་སྟེ། འདི་རྣམས་དབྱངས་བསྒྱུར་བའི་ཡི་གེ་ཡིན་པས་དབྱངས་ཀྱི་གྲངས་སུ་བགྲང་སྟེ། འདི་ལྔ་ལ་ཐུང་ངུ་དང་རིང་པོའི་དབྱེ་བ་བཅུར་ཡོད་པས་དེ་ལྟར་དབྱངས་སུམ་ཅུ་ཐམ་པའོ། །འདིར་ཨི་ཡར་བསྒྱུར་བ་སོགས་བཞི་ཀ་ཙན་སོགས་སྒྲ་གཞུང་རྣམས་ལ་ཡོངས་སུ་གྲགས་པ་ཡིན་ལ་ཨ་ཡིག་ཧར་བསྒྱུར་བ་འདི་ཀ་ཙན་སོགས་སུ་མ་གྲགས་ཀྱང་ཤམ་བྷ་ལའི་འཇམ་དཔལ་བརྡ་སྤྲོད་ཀྱི་ལུགས་ལ་ཡོད་དོ། །དབྱངས་དེ་དག་ཟླ་ཆ་འཕེལ་འགྲིབ་ཀྱི་རྒྱུ་ཉིད་དུ་ཟླ་བའི་ཆ་འཕེལ་འགྲིབ་བཅོ་ལྔ་ལ་འཆར་བ་དང་། དེ་བཞིན་དུ་ཉིན་མོར་བྱེད་པ་ཉི་མའི་དབང་གིས་བཞག་པ་དག་ཀྱང་། ཀ་ལ་སོགས་པའི་སྡེ་པའི་ཡི་གེ་རྣམས་དབྱངས་ཐུང་རིང་ཐིག་ལེ་རྣམ་བཅད་དང་བཅས་པ་དག་གིས་ཕྱེ་བ་རྣམས་ཉིན་ཞག་སྟོང་དྲུག་མེ་ཡི་ཚད་ཀྱིས་ཞེས་སུམ་བརྒྱ་དྲུག་ཅུ་ལ་སྤྱོད་པར་བྱེད་དོ། །འདིར་གསལ་བྱེད་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། པ་ཕ་བ་བྷ་མ། ཏ་ཐ་ད་དྷ་ན། ས་ཉྤ་ཥ་ཤ་ྈྐ་་སྟེ་དེ་ལྟར་གསལ་བྱེད་སུམ་ཅུར་འདོད་དེ། དབྱངས་
གསལ་གྱི་ཡི་གེ་དྲུག་ཅུ་པོ་འདི་ནི་རྒྱུད་འདིར་བསྟན་པ་རྩ་བའི་ཡི་གེའོ། །འདི་དག་གི་ཡི་གེའི་བསྡུ་བ་བརྗོད་པའི་ཕྱིར། ཨ་ཨི་རྀ་ཨུ་ལྀ་ཀ྄། ཨ་ཨེ་ཨ་ར་ཨོ་ཨལ་ཙ྄། ཧ་ཡ་ར་ཝ་ལཏ྄། ཅེས་དང་། ང་ཉ་ཎ་མ་ནན། གྷ་ཛྷ་ཌྷ་བྷ་དྷ་ངྷ྄། ག་ཛ་ཌ་པ་དད། ཁ་ཚ་ཋ་ཕ་ཐ་ཐ྄། ཀ་ཙ་ཊ་པ་ཏ་ཏ྄། ྈྐ་ཤ་ཥ་ཉྤ་ས་ས྄། ཞེས་པ་དང་པོ་དང་མཐའ་བཀླག་པ་ལས་བར་གྱི་ཡི་གེ་གང་ཡོད་བསྡུ་བ་སྟེ། དཔེར། ཨཀ྄། ཅེས་བརྗོད་ཚེ་དབྱངས་ཐུང་ངུ་ལྔ། བསྡུས་པ་དང་། ངན྄། ཞེས་པས་ང་ཉ་ཎ྄་མ་ན་ལྔ་བསྡུས་པ་དང་། ངས྄། ཞེས་པས་གསལ་བྱེད་ཐམས་ཅད་བསྡུས་པར་གོ་བར་བྱ་སྟེ། འདིའི་ཚུལ་གྱིས་འཇམ་དཔལ་དང་སྤྱན་རས་གཟིགས་ཀྱི་བརྡ་སྤྲོད་པའི་སྒྲ་མདོ་ཤམ་བྷ་ལར་ཡོད་པར་གྲགས་སོ། །ད་ནི་གོང་དུ་བསྟན་པ་དབྱངས་གསལ་རྣམས་དུས་ལ་འཆང་ཚུལ་བརྗོད་པ། ཟླ་བ་འཕེལ་བ་དཀར་ཕྱོགས་ཀྱི་ཚེས་གཅིག་ནས་ལྔའི་བར་དབྱངས་ཐུང་ངུ་ལྔ་འཆར་ཏེ། ཚེས་གཅིག་ཨ། གཉིས་ལ་ཨི་ནས། ལྔ་ལ་ལྀའོ། །ཚེས་དྲུག་ནས་བཅུའི་བར་ཡོན་ཏན་ལྔ་སྟེ། ཨ་ཨེ་སོགས་སོ། །བཅུ་གཅིག་ནས་བཅོ་ལྔ་བར་ཧ་སོགས་ལྔའོ། །བཅུ་དྲུག་ནས་ལ་བ་ར་སོགས་གོང་གི་བཅོ་ལྔ་པོ་ལུགས་ལས་བཟློག་སྟེ་འཆར་ཞིང་། དཀར་ཕྱོགས་ལ་ཐུང་ངུ་དང་། ནག་ཕྱོགས་ཀྱི་ཡི་གེ་ཐམས་ཅད་རིང་པོ་ཡིན་ལ། དཀར་ཕྱོགས་ཀྱི་ཡི་གེ་ཐམས་ཅད་ལ་ཁུ་བ་དང་ཐབས་སྙིང་རྗེ་ཆེན་པོ་མཚོན་པ་ཟླ་བའི་ངོ་བོ་ཐིག་ལེས་བརྒྱན་པ་དང་། ནག་ཕྱོགས་ཀྱི་ཡི་གེ་ཐམས་ཅད་ལ་རྡུལ་དང་ཤེས་རབ་སྟོང་པ་མཚོན་པ་རྣམ་བཅད་ཀྱིས་བརྒྱན་པར་བྱའོ། །དགའ་བཟང་རྒྱལ་སྟོང་རྫོགས་པ་ཞེས་པའང་དབྱངས་བཞིན་དུ་ཕྱོགས་རེ་ལ་ལན་གསུམ་འཆར་ཞིང་དེ་དང་ལྷན་ཅིག་མཁའ་རླུང་མེ་ཆུ་ས་ཡི་ཁམས་ཀྱང་དེ་ལྟར་སྦྱར་རོ། །དེ་དག་མུན་པ་རྡུལ་དང་སྙིང་སྟོབས་ཀྱི་དབྱེ་བས་ཆུང་
འབྲིང་ཆེན་པོར་འགྱུར་ཏེ། ཚེས་ལྔའི་བར་དུ་དགའ་བ་དང་མཁའ་སོགས་ཤར་བ་མུན་པ་བསལ་བ་ཆུང་ངུའི་ཚད་དོ། །དགའ་སོགས་ལན་གཉིས་པ་དྲུག་ནས་བཅུའི་བར་ལ་རྡུལ་གྱི་ཡོན་ཏན་དེ་སྔར་གྱི་མུན་པ་ཆུང་ངུ་བསལ་བའི་ཚད་སྐབས་འདིར་འབྲིང་པོར་འགྱུར་ཞིང་། རྡུལ་བསལ་བ་ཆུང་ངུའི་ཚད་དོ། །ལན་གསུམ་པ་བཅོ་ལྔའི་བར་དུ་གཉིས་པའི་སྡེ་ཚན་རྡུལ་འབྲིང་པོའི་ཚད་དང་། དང་པོའི་སྡེ་ཚན་མུན་པ་བསལ་བ་ཆེན་པོའི་ཚད་དུ་འགྱུར་ཏེ། འདིར་སྙིང་སྟོབས་ཀྱི་དབྱེ་བས་ཚེས་བཅུ་གཅིག་པ་ལ། དང་པོའི་ཚེས་གཅིག་གི་ཆ་ཆེན་པོའི་ཚད་བུ་མོ། །དེ་བཞིན་བཅུ་གཉིས་པ་ལ་གཞོན་ནུ་མ། བཅུ་གསུམ་པ་ལང་ཚོ་མ། བཅུ་བཞི་པ་ལ་རྒན་མོ། བཅོ་ལྔ་པ་ལ་ཡོངས་སུ་སྨིན་པ་སྟེ། ཆ་མཐར་ཐུག་པར་གང་བ་ནི་རྫོགས་པ་ཞེས་བརྗོད་དོ། །དེ་ལྟར་ཟླ་བའི་ཆ་འཕེལ་བའི་དབང་གིས་མུན་པ་བསལ་བ་ལ་དཀར་ཕྱོགས་ཞེས་བྱའོ། །དེའི་མཐའ་ནག་པོའི་ཚེས་གཅིག་གི་དང་པོ་ལ་མུན་པ་འཇུག་པའི་དུས་ནི་བཅུ་དྲུག་པའི་ཆ་ཞེས་ཞེས་བརྗོད་ཅིང་། དེའི་མཐར་དཀར་པོའི་ཚེས་གཅིག་གི་ཟླ་བའི་ཆ་དེ་ནག་པོའི་ཚེས་གཅིག་གི་མུན་པ་ལ་འཇུག་པར་འགྱུར་ཏེ། དཀར་པོའི་ཆ་གཉིས་པ་ཡོངས་སུ་སྨིན་པར་འགྱུར་རོ། །དེ་ནས་ཆ་གཉིས་པ་ཡང་ནག་པོའི་ཚེས་གཉིས་པའི་མུན་པ་ལ་འཇུག་ཅིང་། ཆ་གསུམ་པ་ཡོངས་སུ་སྨིན་པ་སོགས་རིམ་པར་སྦྱར་ཏེ་ཆ་བཅོ་ལྔའི་མཐར་ཐུག་པར་ཡོངས་སུ་སྨིན་པ་རྣམས་མུན་པ་ལ་འཇུག་པར་འགྱུར་ཏེ་དེ་ལྟར་ཟླ་བའི་ཆ་འགྲིབ་པའི་དབང་གིས་མུན་པར་འཇུག་པ་ལ་ནག་ཕྱོགས་ཞེས་བརྗོད་དོ། །དེ་ནས་གནམ་སྟོང་གི་མཐར་ཆ་དང་པོ་འཆར་བའི་མཚམས་དང་། ཟླ་བ་ཉ་བའི་ཆ་བཅུ་དྲུག་པའི་དང་པོའི་ཆ་ལ་སྒྲ་གཅན་འཇུག་པར་འགྱུར་ཏེ། དེ་ལྟར་གཟས་ཟིན་པ་རྣམ་པ་གཉིས་ཏེ་ཉ་ཡི་ཆ་རྫོགས་པའི་མཐར་ཟླ་བ་སྒྲ་གཅན་གྱིས་འཛིན་ཅིང་། གནམ་སྟོང་
ལ་ཆ་དང་པོ་འཆར་བའི་ཐོག་མར་ཉི་མ་འཛིན་པའོ། །འདིར་ནག་པོའི་ཕྱོགས་ལ་ས་ལ་སོགས་པ་སྡུད་པའི་རིམ་པས་མུན་པ་ལ་འཇུག་སྟེ། དེའི་ཕྱིར་ཟླ་བའི་ཆ་ཡར་སྐྱེ་བའམ་སྤྲོ་བའི་རིམ་པས་ཤར་བ་རྣམས་འཛད་པ་ཡིན་ཏེ། ནག་པོའི་ཚེས་གཅིག་ས་ཡི་མུན་པ་ལ་དཀར་པོའི་ཚེས་གཅིག་ནམ་མཁའི་ཁམས་ཀྱི་ཆ་ཞུགས་ཏེ་མུན་པས་སྒྲིབ་པར་འགྱུར་རོ། །དེ་བཞིན་གཉིས་པར་རླུང་གི་ཆ་ཆུའི་མུན་པས་སྒྲིབ་ཅིང་། གསུམ་པར་མེའི་ཆ་མེའི་མུན་པས་དང་། བཞི་པར་ཆུའི་ཆ་རླུང་གི་མུན་པས་དང་། ལྔ་པར་སའི་ཆ་མཁའ་ཁམས་ཀྱི་མུན་པས་སྒྲིབ་པར་འགྱུར་ཏེ། དེ་ལྟར་དང་པོའི་སྡེ་ཚན་ལ་མུན་པ་འཇུག་པ་ཆུང་ངུའི་ཚད་དོ། །དེ་ནས་གཉིས་པའི་སྡེ་ཚན་ལའང་དེའི་ཚུལ་གྱིས་ཤེས་པར་བྱ་སྟེ། སྡེ་ཚན་དང་པོའི་མུན་པ་འཇུག་པ་ཆུང་ངུའི་ཚད་གཉིས་པའི་སྐབས་སུ་འབྲིང་པོའི་ཚད་དུ་འགྱུར་རོ། །དེ་བཞིན་དུ་ནག་ཕྱོགས་ཀྱི་ཚེས་བཅུ་གཅིག་ལ་སོགས་པ་སྡེ་ཚན་གསུམ་པ་ལ། སྡེ་ཚན་གཉིས་པོའི་མུན་པ་འཇུག་པ་འབྲིང་པོའི་ཚད་དེ་ཉིད་ཆེན་པོའི་ཚད་དུ་འགྱུར་ཞིང་། མུན་པ་ཆེན་པོའི་ཚད་ཀྱི་དབྱེ་བ་ལྔ་སྟེ། བཅུ་གཅིག་པ་ལ་བྱིས་པ། བཅུ་གཉིས་པ་ལ་གཞོན་ནུ། བཅུ་གསུམ་པ་ལང་ཚོ། བཅུ་བཞི་པ་ལ་རྒན་པོ། གནམ་སྟོང་ལ་ཡོངས་སུ་སྨིན་པའོ། །དེ་ནས་དཀར་པོའི་ཚེས་གཅིག་འོང་བ་ན། སའི་ཁམས་ཀྱི་མཚན་ཉིད་ཀྱི་མུན་པ་སྨིན་པ་སེལ་བར་འགྱུར་རོ། །དེ་བཞིན་དུ་གཉིས་པ་ལ་ཆུའི་མུན་པའོ། །གསུམ་པར་མེའི། བཞི་པར་རླུང་གི ལྔ་པར་ནམ་མཁའི་མུན་པ་སེལ་བར་འགྱུར་རོ། །དེ་ལྟར་ཆ་དང་པོ་ཆུང་ངུའི་ཚད་རྫོགས་པ་ནི་སྨིན་པར་འགྱུར་རོ། །དེ་ནས་ཡར་བརྩིས་པའི་གཉིས་པ་རྒན་མོ། གསུམ་པ་ལང་ཚོ་མ། བཞི་པ་གཞོན་ནུ་མ། ལྔ་པ་བུ་མོ་སྟེ། དྲུག་པ་ལ་སོགས་ནུབ་པར་གྱུར་པ་རྣམས་སླར་ཡང་འཆར་ཏེ་གནས་སོ། །
མུན་པ་འཇུག་པ་འབྲིང་དང་ཆེན་པོའི་ཚད་ཀྱང་དེ་བཞིན་དུ་ཤེས་པར་བྱའོ། །གཞོན་ནུ་དང་གཞོན་ནུ་མ་སོགས་ཀྱི་ཐ་སྙད་ཀྱིས་བརྗོད་པ་ཐབས་ཤེས་ཀྱི་ཆ་མཚོན་པ་ཙམ་སྟེ་དོན་འདྲའོ། །དེ་ལྟར་ཆུང་ངུའི་སྡེ་ཚན་ལ་ཆ་ཆུང་ངུ་སྨིན་པ་དང་ཇི་སྲིད་ནག་པོའི་ཕྱོགས་ལ་གསུམ་པ་ཆེན་པོའི་ཚད་སྨིན་པར་མ་གྱུར་པ་དེ་སྲིད་མུན་པ་འཇུག་པར་མི་འགྱུར་རོ། །སོ་སོའི་བཅོ་ལྔའི་ཆ་དག་ནུབ་པར་གྱུར་པ་རྣམས་ཉི་མ་བཅུ་དྲུག་པ་ལ་སླར་ཡང་འཆར་རོ། །ཤར་བ་རྣམས་ཉི་མ་བཅུ་དྲུག་པ་ལ་ནུབ་པར་འགྱུར་རོ། །དེ་ལྟར་ཟླ་བའི་དཀར་ནག་གི་ཕྱོགས་ཀྱི་ཆ་ཤས་སུམ་ཅུའི་མིང་ནི་ཨ་སོགས་སུམ་ཅུའི་དབྱངས་རྣམས་སོ། །ད་ནི་ཉིན་ཞག་རྣམས་ལ། ཀ་ལ་སོགས་སྡེ་པ་རྣམས་དབྱངས་དང་བཅས་པ་འཆར་ཚུལ་ནི། ཀ་ཙ་ཊ་པ་ཏ་ས་ཡི་སྡེ་པ་དྲུག་པོ་འདི་ལ། དབྱངས་ཐུང་ངུ་ལྔ་དང་རྗེས་སུ་ང་རོ་ཨཾ་སྦྱར་བ་དྲུག་དང་། རིང་པོ་ལྔའི་མཐར་རྣམ་བཅད་སྦྱར་བའི་ཨཿདང་དྲུག་སྟེ་དེ་དག་གིས་སྡེ་པ་དྲུག་པོ་རྣམས་སྤེལ་བ་ནི། ཀ་ཀི་ཀྲྀ་ཀུ་ཀླྀ་ཀ། ཀཱ་ཀཱི་ཀྲཱྀ་ཀཱུ་ཀླཱྀ་ཀཿ ལྟ་བུས་མཚོན་ནས་གསལ་བྱེད་སུམ་ཅུ་ལ་སྦྱར་བས་ཡི་གེ་སུམ་བརྒྱ་དྲུག་ཅུ་ནི་ཉིན་ཞག་སུམ་བརྒྱ་དང་དྲུག་ཅུར་འཆར་བ་ཡིན་ལ། དེ་དག་གིས་ཟླ་བ་བཅུ་གཉིས་དང་བགྲོད་པ་གཉིས་སུ་ཡང་འགྱུར་ཏེ། ཟླ་བ་དྲུག་རེས་ལྷོ་དང་བྱང་གི་བགྲོད་པ་ཡིན་པས་བགྲོད་པ་རེ་ལ་ཉིན་ཞག་བརྒྱ་དང་བརྒྱད་ཅུའོ། །ཟླ་བ་རེ་ལ་ཞག་སུམ་ཅུའོ། །ཉི་མ་འཕོ་བའི་ཟླ་བའི་དབྱེ་བས་ཀརྐ་ཊ་སོགས་ལྷོར་བགྲོད་པ་ལ་ནམ་མཁའ་ལ་སོགས་པ་སྤྲོ་བའི་རིམ་པས་དབྱངས་ཐུང་ངུ་དྲུག་དང་བཅས་པའི་སྡེ་པ་དྲུག་ཉི་མས་ཟླ་བ་དྲུག་གི་བར་དུ་སྤྱོད་དོ། །དེ་ནས་བྱང་དུ་བགྲོད་པའི་ཚེས་སོགས་སྡུད་རིམ་གྱི་དབྱེ་བས། དབྱངས་རིང་པོ་དང་བཅས་པའི་སྡེ་པ་དྲུག་ཟླ་བ་དྲུག་གིས་སྤྱོད་དོ། །གང་དུ་དབྱངས་ཐུང་ངུ་དང་བཅས་པ་དེར་མཚན་མོ་འཕེལ་བར་འགྱུར་ཞིང་། དབྱངས་
རིང་པོ་དང་བཅས་པ་སྤྱོད་པ་དེར་ཉིན་མོ་འཕེལ་བར་འགྱུར་རོ། །འདིར་ལྷོར་བགྲོད་པ་ཟླ་བ་དང་བྱང་དུ་བགྲོད་པ་ཉི་མའོ། །དེ་ཕྱིར་གསལ་བྱེད་གཅིག་པ་ཅན་ནི་ཟླ་བའོ། །གཉིས་བརྩེགས་པ་ནི་ཉི་མའོ། །གལ་ཏེ་གསུམ་བརྩེགས་པ་ནི་སྒྲ་གཅན་ནོ། །དེ་བཞིན་དབྱངས་ཐུང་ངུ་ནི་ཟླ་བ། རིང་པོ་ཉི་མའོ། །ཤིན་ཏུ་རིང་པོ་ནི་སྒྲ་གཅན་ནོ་ཞེས་སྤྱིར་སྐབས་ཐམས་ཅད་དུ་ཡིན་ནོ། །དེ་ལྟར་སྒྲ་གཅན་གྱི་ངོ་བོ་ཤིན་ཏུ་རིང་པོ་ལ་མུན་པ་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའི་བདག་ཉིད་དོ། །འདིར་ཀརྐ་ཊའི་འཕོ་བའི་ཉིན་ཞག་ལ་སྤྲོ་བའི་རིམ་པས་ཀ་སྡེའི་ང་ཡིག་དབྱངས་ཨ་དང་ལྡན་པ་ཉི་མས་སྤྱོད་དོ། །གཉིས་པ་ངི་། གསུམ་པ་དྼྀ་། བཞི་པར་ངུ་། ལྔ་པར་དླྀ་། དྲུག་པར་ངཾ་། བདུན་པ་གྷ་སོགས་དྲུག བཅུ་གསུམ་པར་ག་སོགས། བཅུ་དགུ་པར་ཁ་སོགས། ཉེར་ལྔ་ནས་ཀ་སོགས་སྤྱོད་དེ། གནམ་སྟོང་ལ་ཀཾ་འཆར་བའོ། །སྟོང་པའི་ཉིན་ཞག་འབའ་ཞིག་ལ་གཞོམ་དུ་མེད་པའོ། །དེ་བཞིན་དུ་སེང་གེའི་འཕོ་བའི་ཟླ་བའི་ཉིན་ཞག་སུམ་ཅུ་པོ་རྣམས་ཀྱིས་ཉ་ཡིག་སོགས་སོ། །དེ་བཞིན་དུ་བུ་མོའི་ཎ་ནས། སྲང་གིས་མ་ནས། སྡིག་པས་ན་སོགས། གཞུས་ྈྐ་སོགས་ཏེ། དེ་ལྟར་ལྷོར་བགྲོད་པའི་ཟླ་བ་དྲུག་ལ་སྡེ་པ་དྲུག་དབྱངས་དང་བཅས་པ་བརྒྱ་དང་བརྒྱད་ཅུ་རྣམས་ཟླ་བའི་རང་བཞིན་མཚན་མོ་འཕེལ་བའི་དབྱེ་བས་སྤྱོད་དོ། །དེ་ནས་བྱང་དུ་བགྲོད་པའི་ཚེ་ས་ཡིག་ལ་སོགས་པ་ལུགས་བཟློག་གིས་བརྗོད་དེ། ཆུ་སྲིན་སོགས་ཀྱི་འཕོ་བའི་ཟླ་བའི་ཉིན་ཞག་གི་དབྱེ་བས། སྡེ་པ་དྲུག་དབྱངས་དང་བཅས་པ་སྡུད་པའི་རིམ་པས་གསལ་བྱེད་བརྩེགས་པ་དབྱངས་རིང་པོ་དང་བཅས་པའི་ཡི་གེ་རྣམས་ཉི་མས་སྤྱོད་དེ། འདིར་ཆུ་སྲིན་གྱི་འཕོ་བའི་ཉིན་ཞག་ལ། སྶཱཿ གཉིས་པར། སྶླྰྀ། གསུམ་པར། སྶཱུ། བཞི་པར། སྶྲཱྀ། ལྔ་པར། སྶཱི། དྲུག་པར། སྶཱ། དེ་བཞིན་དུ་ཉིན་ཞག་དྲུག་པ་སོགས་
ཀྱིས། ཉྤྙྤཱཿ ལྤྙྤླཱྀ། སོགས་དྲུག་དང་། དེ་བཞིན་ཥ་དང་ཤ་དང་། ྈྉྈཱཿ སོགས་ཀྱིས་ཆུ་སྲིན་འཕོ་བའི་ཉིན་ཞག་སུམ་ཅུར་སྤྱོད་དོ། །དེ་བཞིན་བུམ་པ་ལ་ཏ་སྡེ། ཉ་པ་སྡེ། ལུག་ཊ་སྡེ། གླང་ཙ་སྡེ། འཁྲིག་པ་ྈྐ་སྡེ་རྣམས་ཉིན་ཞག་བརྒྱ་བརྒྱད་ཅུར་སྤྱོད་དོ། །དེ་དག་རྒྱས་པར་འགྲེལ་ཆེན་དུ་བཀོད་ཀྱང་འདིར་མ་བྲིས་ཏེ་སྒྲུབ་ཐབས་ཀྱི་ཚེས་ལྷ་རྣམས་ཀྱི་ས་བོན་གྱིས་ཀྱང་ཤེས་ནུས་པའི་ཕྱིར་རོ། །དེ་ལྟར་ལྷོར་བགྲོད་ལ་གསལ་བྱེད་གཅིག་དབྱངས་ཐུང་ངུ་དང་ལྡན་པ་ནི་དབྱངས་གསལ་གཉིས་ཀ་ཟླ་བའི་ཆའི་མཚན་ཉིད་དོ། །བྱང་བགྲོད་ལ་གསལ་བྱེད་གཉིས་བརྩེགས་དབྱངས་རིང་པོ་དང་ལྡན་པ་ནི་གཉིས་ཀ་ཉི་མའི་མཚན་ཉིད་ཡིན་ནོ། །དེའི་ཕྱིར་གཞན་ཡང་གསལ་བྱེད་གཅིག་དབྱངས་རིང་པོ་དང་ལྡན་པ་ནི་ཟླ་ཉི་གཉིས་ཀའི་བདག་ཉིད་དུ་འགྱུར་རོ། །གསལ་བྱེད་གཉིས་བརྩེགས་པ་དབྱངས་ཐུང་ངུ་དང་ལྡན་པ་ཡང་དེ་བཞིན་ནོ། །དེ་ལྟར་དབྱངས་དང་གསལ་བྱེད་ཀྱི་དབྱེ་བས་ཟླ་བ་རྣམ་པ་གཉིས་དང་ཉི་མ་རྣམ་པ་གཉིས་སོ། །དེ་བཞིན་དུ་ཡོན་ཏན་དང་འཕེལ་བ་དང་ལྡན་པའི་གསལ་བྱེད་རྣམས་ཀྱང་རིག་པར་བྱའོ། །དེ་ལྟར་བགྲོད་པའི་དབྱེ་བས་ཉི་མའི་རྐང་པའི་དབྱངས་ཀྱི་དབྱེ་བ་བཤད་ཟིན་ལ། གཞན་མཁའ་སོགས་དཀྱིལ་འཁོར་ལྔ་འབབ་པས་སུམ་བརྒྱ་དྲུག་ཅུའི་དབྱངས་ཀྱི་དབྱེ་བ་ནི་འོག་ཏུ་འཆད་པར་འགྱུར་རོ། །སྐབས་འདིའི་མདོར་བསྡུས་ནི། སྒྱུ་འཕྲུལ་དྲ་བ་ལས། སངས་རྒྱས་ཀུན་གྱི་ཐུགས་ཆེན་པོ་སོགས་ནས་ཁ་དོག་སྣ་ཚོགས་འབར་བའི་འོད། ཅེས་པའི་བར་གྱིས་བསྟན་ཏེ། དཀར་པོའི་ཕྱོགས་ཀྱི་ལྔ་ དགའ་བ་ དང་། བཅུ་པ་ མཆོག་དགའ་ ཉ་ནི་ ཁྱད་དགའ་ ཆགས་པའོ། །ནག་པོའི་ལྔ་དང་བཅུ་པ་གནམ་སྟོང་ནི་ཆགས་བྲལ་ལོ། །འདི་གཉིས་ཀྱི་དབུས་རྫོགས་པ་གསུམ་གྱི་མཇུག་དགའ་བྲལ་གྱི་མཐར། སྟོང་ཆེན་ཡིག་ལྔ་གཅིག་ཏུ་འདྲེས་པར་གྱུར་པའི་ཝཾ་ཡིག་བདེ་བ་ཆེན་པོའི་རྣལ་འབྱོར་ནི། དེ་བཞིན་གཤེགས་པ་རྣམས་ཀྱི་ཐུགས་ཏེ། དེའི་ཕྱིར་སངས་
རྒྱས་ཀུན་གྱི་ཐུགས་ཆེན་པོ་ཟླ་བའི་ཆ་བཅུ་དྲུག་པའི་མཐར་སྟོང་པ་ཆེན་པོའོ། །སངས་རྒྱས་ཀུན་གྱི་ཐུགས་ལ་གནས་ནི་གནམ་སྟོང་གི་མཐའ་ཆ་དང་པོ་འཆར་བའི་མཚམས་སུ་ཉི་མ་མུན་པ་བཅུ་དྲུག་པའི་མཐར་ཐིག་ལེ་སྟོང་པ་ཡི་གེ་དྲུག་གོ །སངས་རྒྱས་ཀུན་གྱི་སྐུ་ཆེ་བ་ནི་སྟོང་པ་ཆེན་པོའོ། །སངས་རྒྱས་ཀུན་གྱི་གསུང་ཡང་ཡིན་ཞེས་པ་ཐིག་ལེ་སྟོང་པའོ། །རྡོ་རྗེ་ཉི་མ་སྣང་བ་ཆེ་ནི་ཐིག་ལེ་སྟོང་པ་ཡི་གེ་དྲུག་གོ། རྡོ་རྗེ་ཟླ་བ་དྲི་མེད་འོད་ནི་སྟོང་པ་ཆེན་པོ་ཡི་གེ་ལྔའོ། །དེ་བཞིན་ཤེས་རབ་ཐབས་ཀྱི་ཆོས་དང་། གསང་སྔགས་སྐྱེ་གནས་ཡི་གེ་མེད། གསང་སྔགས་ཆེན་པོ་རིགས་གསུམ་པ་ཡང་རྒྱ་ཆེར་འཆད་པར་འགྱུར་རོ། །ད་ནི་ཧ་སོགས་དབྱངས་རྣམས་སོགས་ཀྱི་དོན་ནི། ཧ་ལ་སོགས་པ་དབྱངས་རྣམས་ཏེ་ཧ་སོགས་ནི་འདིར་དབྱངས་སུ་གཏོགས་པས་དེ་རྣམས་དག་ཀྱང་ཞེས་ཀྱང་ཡིག་གིས་གཞན་གསལ་བྱེད་ཡིན་པའང་སྡུད་དེ་གཉིས་ཡིན་པ་མི་འགལ་ལོ། དེ་དག་དབྱངས་བཅུ་གཉིས་དང་བཅས་པས་དྲུག་ཅུར་འགྱུར་ཏེ། ཧ་ཧི་ཧྲྀ་ཧུ་ཧླྀ་ཧཾ། ཞེས་པ་དེ་བཞིན་ཡ་ར་ཝ་ལ་རྣམས་ལ་སྦྱར་བས་སུམ་ཅུ་སྤྲོ་བའི་རིམ་པས་དང་། ལླཱཿལླླླཱྀ་ལླླཱུ་ལླྲཱྀ་ལླཱི་ལླཱ། དེ་བཞིན་ལྦར་ཡ་ཧ་ལ་སྦྱར་བས་སུམ་ཅུ་སྡུད་པའི་རིམ་པ་སྟེ་དྲུག་ཅུ་པོ་འདི་ནི་ཉིན་མཚན་གྱི་ཆུ་ཚོད་འཕེལ་འགྲིབ་ཀྱི་དབང་གིས་ཞག་ལ་སྦྱར་བར་བྱ་སྟེ། མཚན་མོ་འཕེལ་བ་ལ་དབྱངས་ཐུང་ངུ་དང་ལྡན་པའི་དབྱངས་སུམ་ཅུ་པོ་དེ་དག་ཉི་མ་ཕྱེད་ནས་མཚན་ཕྱེད་ཀྱི་བར་དུ་འགྱུར་རོ། །ཉིན་མོ་འཕེལ་བ་ལ་ཡི་གེ་བརྩེགས་པ་དབྱངས་རིང་པོ་དང་ལྡན་པ་སུམ་ཅུ་མཚན་ཕྱེད་ནས་ཉི་མ་ཕྱེད་ཀྱི་བར་དུ་འགྱུར་རོ། །དབྱངས་ཐུང་ངུ་རྣམས་ནི་མཚན་མོ་སྟེ་བསམ་པའི་དབྱེ་བས་ཤེས་རབ་དང་ལུས་ཀྱི་དབྱེ་བས་ཐབས་སོ། དབྱངས་རིང་པོ་དང་ལྡན་པ་རྣམས་ནི་ཉིན་མོ་སྟེ་བསམ་པའི་དབྱེ་བས་ཐབས་དང་། ལུས་ཀྱི་དབྱེ་བས་ཤེས་རབ་བོ། །དེ་ཡང་ཁུ་བ་དང་ཟླ་བ་ནི་ཤེས་རབ་ཀྱི་བསམ་པ་ལས་བྱུང་བ་ཉིད་ཀྱི་ཕྱིར་ཤེས་རབ་དང་། །
ཐབས་ཀྱི་ལུས་ལས་བྱུང་བ་ཉིད་ཀྱི་ཕྱིར་ཐབས་སོ། །དེ་བཞིན་དུ་རྡུལ་དང་ཉི་མ་ནི་ཐབས་ཀྱི་བསམ་པ་ལས་བྱུང་བ་ཉིད་ཀྱི་ཕྱིར་ཐབས་དང་། ཤེས་རབ་ཀྱི་ལུས་ལས་བྱུང་བ་ཉིད་ཀྱི་ཕྱིར་ཤེས་རབ་སྟེ། དེ་ལྟར་སྐབས་ཐམས་ཅད་དུ་རྗེས་སུ་རྟོགས་པར་བྱའོ། །དེ་ཡན་ཆད་ཀྱིས་དབྱངས་གསལ་རྣམས་ཚེས་ཞག་དང་ཉིན་ཞག་དང་། དུས་ཀྱི་ཆུ་ཚོད་ལ་འཆར་ཚུལ་བསྟན་ནས། ད་ནི་བརྟན་པ་དང་གཡོ་བ་ཁམས་གསུམ་གྱི་སྔགས་གསུངས་པ། ལྷ་ནི་འདོད་གཟུགས་གཟུགས་མེད་གསུམ་གྱིས་བསྡུས་པ་སྟེ། ལྷ་མིན་ཡང་འདོད་ལྷའི་རིས་སུ་བསྡུས་པའོ། །མི་ནི་འཁོར་ལོས་བསྒྱུར་བ་སོགས་དང་། མཐའ་ཡས་ལ་སོགས་པ་གདེངས་ཅན་ཏེ་ཀླུ་དང་། གཞན་ཡང་འབྱུང་པོའི་སྐྱེ་གནས་བཞི་སྟེ་སྔར་བརྗོད་པ་མངལ་སྐྱེས་ལ་སོགས་པའོ། །བརྟན་པའི་སྐྱེ་གནས་ལྷུན་པོ་དང་ཤིང་ལ་སོགས་པ་སྟེ། དེ་ལྟར་བརྟན་པ་དང་གཡོ་བའི་སྐྱེ་གནས་དེ་དག་ཀྱང་སྔགས་སུ་ཤེས་པར་བྱ་བའམ་སྔགས་ཞེས་པ་དག་ཏུ་འགྱུར་ཏེ། སོ་སོ་རང་རང་གི་མིང་གང་ཡིན་པ་སྔགས་སུ་འགྱུར་བས་སོ། །དེ་ལྟར་དབྱངས་དང་གསལ་བྱེད་ཀྱི་སྔགས་ཀྱི་མིང་གིས་དངོས་པོ་དེ་དག་མིང་ཅན་དུ་བྱས་པའི་ཕྱིར་སྔགས་རྣམས་སུ་འགྱུར་ཏེ། ཁམས་གསུམ་བརྟན་པ་དང་གཡོ་བ་འདིར་གང་གི་མིང་གང་ཡིན་པ་དེས་དེ་དག་བསྒྲུབ་པའི་སླད་དུ་སྔགས་ཀྱི་བརྡར་འགྱུར་བ་ནི་སོ་སོའི་མིང་གི་ཡི་གེ་དང་པོ་ཡེ་ཤེས་ཀྱི་ས་བོན་དང་སྐྱེད་བྱེད་ཀྱི་རྒྱུར་འགྱུར་ལ་མིང་མཐའ་དག་ནི་བཟླས་པའི་སྔགས་སུ་འགྱུར་རོ། །དོན་སྣ་ཚོགས་བསྒྲུབ་པའི་སླད་དུ་སེམས་ཅན་མཐའ་ཡས་པའི་མིང་གི་དབྱེ་བས། སྔགས་མཐའ་ཡས་པར་ཁོང་དུ་ཆུད་པར་བྱའོ། །དཔེར་ན་འཇིག་རྟེན་ན་དགེ་མི་དགེའི་འབྲས་བུ་བརྟག་པའི་སླད་དུ་གང་ཟག་གི་མིང་གི་ཡི་གེ་དང་པོས་ཁྱིམ་དང་མིང་སྐར་སོགས་འཚོལ་བ་དང་། མིང་གི་ཡི་གེ་ཐམས་ཅད་ཀྱིས་ཀྱང་དབྱངས་
ཕན་ཚུན་མང་ཉུང་བལྟས་ཏེ་དམན་པ་དང་ལྷག་པ་དག་གཡུལ་འགྱེད་པ་ལ་ཕམ་རྒྱལ་བལྟ་བ་དེ་བཞིན་དུ་སོ་སོའི་མིང་གི་ཡི་གེ་དང་པོ་དང་། མིང་ཐམས་ཅད་ཀྱིས་ཀྱང་བསྒོམ་པ་དང་བཟླས་པའི་བྱ་བ་འགྲུབ་སྟེ། རྟེན་ཅིང་འབྲེལ་འབྱུང་འཁྲུལ་པའམ་བསླུ་བ་མེད་ཅིང་། ནོར་བུ་དང་སྔགས་དང་སྨན་རྣམས་ཀྱི་མཐུ་གང་ཞིག་བརྟེན་པ་པོ་རང་གི་སེམས་ཡོངས་སུ་གྱུར་པ་ལས་མངོན་དུ་འབྱུང་ཞིང་སྣང་བ་ནི་བསམ་གྱིས་མི་ཁྱབ་བོ། །དེ་ལྟར་ན་ཨ་སོགས་དབྱངས་དང་། ཀ་སོགས་ལྡན་པ་ནི་གསལ་བྱེད་ཀྱི་ཚོགས་སོ། །འདི་ལྟར་དབྱངས་གསལ་གྱི་ཚོགས་ལྡན་པ་ཡི་སྔགས་དག་ལས་དེ་ལྟར་འདོད་གཟུགས་གཟུགས་མེད་ཀྱི་ཁམས་གསུམ་པོ་དག་ནི་ངེས་པར་སྐྱེད་པར་འགྱུར་རོ་ཀྱེ་མི་ཡི་བདག་པོ་ཞེས་བོད་པའོ། །སྔགས་ཀྱི་ཡི་གེ་བཟླས་དང་བསྒོམ་པའི་དོན་དུ་དབྱངས་དང་གསལ་བྱེད་རྣམས་ཀྱི་སྐྱེ་གནས་དང་ཁམས་དང་རིགས་ལ་སོགས་པ་གསུངས་པ་ནི། དབྱངས་ཨ་ཨི་རྀ་ཨུ་ལྀ་ལྔ་ནི་འཆད་འགྱུར་མགྲིན་པ་ལ་སོགས་པའི་སྐྱེ་གནས་དང་ཁམས་རིམ་པ་བཞིན་དུ་སྦྱར་རོ། །དེ་བཞིན་གསལ་བྱེད་ཀ་ཙ་ཊ་པ་ཏ་ར་ལྡན་པ་དང་། ྈྐ་ལ་སོགས་པ་ཞེས་ྈྐ་ཤ་ཥ་྅ྤ་ས་དང་ཧ་ཡ་ར་ཝ་ལ་རྣམས་ཏེ་འདི་རྣམས་ཀ་སོགས་སྡེ་པ་ལྔ་གོང་གི་དབྱངས་ལྔའི་སྐྱེ་གནས་ཇི་ལྟར་གྱུར་པ་དང་ཡང་དག་པར་སྦྱར་བ་རང་། ྈྐ་་ལ་སོགས་པ་སྡེ་པ་སོ་སོ་དང་སྦྱར་བ་རྣམས་ཀྱི་སྐྱེ་བའི་གནས་ནི་རིམ་པ་བཞིན་མགྲིན་པ་རྐན་དང་སྟེང་གི་ཆ་སྟེ་སྤྱི་བོ་ལས་སྐྱེས་པ་གསུམ་གྱི་ཁམས་ནི་རིམ་བཞིན་ནམ་མཁའ་དང་རླུང་དང་བསྲེག་བྱ་སྟེ་མེ་ལས་སྐྱེས་པའི་གནས་སོ། །མཆུ་དང་སོ་ལས་བྱུང་བ་ནི་ཆུ་དང་ས་ཡི་ཁམས་དག་གོ། ཞེས་གསུངས་པའི་དོན་དྲིལ་ན། ཨ་ཀུ་ཧ་ྈྐཿནམ་མཁའི་ཁམས། །མགྲིན་པའི་གནས་ནས་བྱུང་བ་ཡིན། །ཨི་ཙུ་ལ་ཤ་ང་གི་ཁམས། །ལྕེ་རྩེ་སོ་རྐན་དག་ལས་བྱུང་། །རྀ་ཊུ་ར་ཥ་མེ་ཡི་ཁམས། །
སྤྱི་བོ་དག་ལས་སྐྱེ་བ་ཡིན། །ཨུ་པུ་ཝ་ྉྤ་ཆུ་ཡི་ཁམས། །མཆུ་ཡི་གནས་ལས་སྐྱེ་བ་ཡིན། །ལྀ་ཏུ་ལ་ས་ས་ཡི་ཁམས། །སོ་ཡི་གནས་ལས་སྐྱེ་བ་ཡིན། །ཞེས་བཤད་པ་ལྟར་ཏེ། ཀུ་ཞེས་སྨྲོས་པས་ཀ་སྡེ་ཐམས་ཅད་གོ་བར་བྱ་བ་དེ་བཞིན་ཀུན་ལ་ཤེས་པར་བྱ་སྟེ། ཨུཏྲ་ཀྱིས་སྡེ་དང་བཅས་པའོ་ཞེས་བརྡ་སྤྲོད་པའི་ལུང་ལས་གྲགས་པ་ལྟར་རོ། །ཨ་སོགས་དབྱངས་ཁམས་ལྔ་པོ་དེ་དག་རྣམས་ནི་རིམ་པར་ནམ་མཁའི་ཁམས་མི་བསྐྱོད་པ་གཙུག་ཏོར་གྱི་འཁོར་ལོ་དང་། རླུང་ཁམས་དོན་གྲུབ་སྙིང་ག་དང་། མེ་ཁམས་རིན་འབྱུང་མགྲིན་པ་དང་། ཆུ་ཁམས་འོད་དཔག་མེད་མགོ་བོའམ་སྤྱི་བོའི་དཔྲལ་བ་དང་། ས་ཁམས་རྣམ་སྣང་ལྟེ༷་བའི་འཁོར་ལོ་དག་ལ་རིམ་པ་བཞིན་དུ་སྟེ། དེ་དག་གི་ཁ་དོག་ཀྱང་རིམ་བཞིན་ཁ་དོག་སྣ་ཚོགས་པའི་རང་བཞིན་ལྗང་གུ་དང་། གནག་པ་དང་། དམར་པོ་དང་། རི་བོང་ཅན་ལྟར་དཀར་བ་དང་། གསེར་འདྲ་བ་སེར་པོ་རྣམས་ནི་རིམ་བཞིན་ཕུང་པོ་ལྔ་དང་ཁམས་ལྔ་པོ་རྣམས་ཀྱི་རང་རང་གི་ལྷག་པའི་ལྷ་དང་ལྡན་པ་ལའོ་ཞེས་དེའི་མདོག་གོ། དེ་ལྟར་ན་རྣམ་ཤེས་དང་མཁའ་ཁམས་ཀྱི་ལྷག་པའི་ལྷ་དང་ལྡན་པ། གཙུག་ཏོར་གྱི་འཁོར་ལོ་ལ་བསྒོམ་པར་བྱ་བ་སོགས་གཞན་ལ་འགྲེའོ། །ཚུལ་དེའི་ཕྱིར་ཨ་ཀུ་ཧ་དང་རྣམ་བཅད་ཀྱི་ལུས་འགྱུར་ྈྐ་རྣམས་ནི་གཙུག་ཏོར་གྱི་འཁོར་ལོ་ལ་བསྒོམ་པ་སོགས། གོང་བཞིན་ཁམས་གཞན་གྱི་ཡི་གེ་རྣམས་ཀྱང་སོ་སོའི་གནས་སུ་བསྒོམ་པར་བྱ་བར་གསུངས་སོ། །དེ་ཡན་ཆད་ཀྱིས་གནས་པ་བརྒྱད་ཀྱི་དོན་བཤད་པ་སོང་ནས། གཉིས་པ་དེ་ལྟར་བྱུང་བའི་འཇིག་རྟེན་གྱི་ཁམས་དེའི་ཚད་ལ་སོགས་པ་བསྟན་པ་ལ་འཇུག་པ་བདེ་བའི་ཕྱིར་གནས་པ་ལྷག་མ་བཅུ་དྲུག་པོ་རྣམས་དང་སྦྱར་ཏེ་བཤད་ན། རླུང་སོགས་ཀྱི་དཀྱིལ་འཁོར་དང་རྒྱ་མཚོ་དང་གླིང་དང་རིའི་གྲངས་ཀྱི་ངོ་བོ་ཉིད་ཀྱིས་གནས་པ་
དགུ་པ་ནི། རླུང་གི་མཐའ་ནས་སོགས་ཚིགས་སུ་བཅད་པ་བཅུ་པ་ནས་བཟུང་སྟེ། བཅུ་གསུམ་པའི་བར་གྱིས་བསྟན་ཏེ། དོན་དམ་པའི་དབང་དུ་བྱས་ན་འཇིག་རྟེན་ཚད་འདི་ཞེས་དམིགས་སུ་མེད་ཀྱང་། སེམས་ཅན་རྣམས་ཀྱི་རང་སེམས་ཀྱི་སྣང་བ་རྨི་ལམ་ལྟ་བུ་ཡིན་པས་ཀུན་རྫོབ་སྣང་ཚུལ་གྱི་དབང་དུ་བྱས་ཏེ་འཇིག་རྟེན་གྱི་ཚད་སེམས་ཅན་རྣམས་ཀྱི་བསམ་པ་དང་མཐུན་པར་བསྟན་པ་སྣ་ཚོགས་སུ་གསུངས་པ་ཡོད་ནའང་། འདིར་ཕྱི་དང་ནང་གི་དག་པ་གཅིག་ཏུ་སྦྱོར་བའི་དབང་གིས་གསུངས་པ། འོག་གཞི་རླུང་གི་དཀྱིལ་འཁོར་གྱི་ཞབས་ཀྱི་མཐའ་ནས་ལྷུན་པོའི་མཚམས་སུ་ཐུག་པའི་བར་གྱི་ཆ་ལ་གནས་པའི་མས་ནས་ཡས་རིམ་གྱི་དམྱལ་བ་བདུན་དང་། བརྒྱད་པ་གདེངས་ཅན་ཀླུ་ཡི་གྲོང་ཁྱེར་ལ་ནི་དཔངས་སུ་དཔག་ཚད་འབུམ་ཕྲག་གཉིས་ཡིན་ཏེ། ནང་དུ་ལུས་ལ་རྐང་མཐིལ་ནས་སྐེད་པའི་བར་རོ། །ལྷུན་པོའི་དཔངས་ཀྱི་ཚད་ནི་ས་དཀྱིལ་ནས་ལྷུན་པོའི་རྩེ་མོའི་བར་དུ་དཔག་ཚད་འབུམ་ཕྲག་གཅིག་སྟེ། ལུས་ལ་སྐེད་པ་ནས་མགྲིན་པའི་བར་ཁྲུ་གང་ངོ་། །རི་རབ་ཀྱི་སྐེད་པ་ལ་གཟའ་ཡི་ཚོགས་ཀྱི་གནས་གོ་ལའི་འཁོར་ལོ་ཡོད་པའི་མཚམས་ནས་གྱེན་དུ་དཔག་ཚད་སྟོང་ཕྲག་དག་ནི་ཉི་ཤུ་རྩ་ལྔ་ཡོད་པ་དེ་ལ་ལྷུན་པོའི་མགྲིན་པ་ཞེས་པའི་ཐ་སྙད་དུ་བྱའོ། །ལུས་ལ་སོར་དྲུག་གོ་ལྷུན་པོའི་གདོང་གི་ཐ་སྙད་དུ་བྱ་བ་ལ་ནི་ལྷུན་པོའི་རྩེ་ནས་གྱེན་དུ་དཔག་ཚད་སྟོང་ཕྲག་ལྔ་བཅུ་སྟེ། ལུས་ལ་མགྲིན་པ་ནས་དཔྲལ་བའི་མཐའི་བར་དུ་སོར་བཅུ་གཉིས་སོ། །སྔ་མའི་ཚད་ཀྱི་སྟེང་ནས་བརྟན་པའི་གོ་འཕང་ངམ་གནས་ནི་གཡོ་མེད་དུ་གྱུར་པ་ལྷུན་པོའི་གཙུག་ཏོར་དག་ལ། སྔ་མ་ལྷུན་པོའི་མགྲིན་པའི་ཚད་དེ་བཞིན་ཉིད་དུ་དཔག་ཚད་སྟོང་ཕྲག་ཉི་ཤུ་རྩ་ལྔ་སྟེ། ལུས་ལ་དཔྲལ་བའི་མཐའ་ནས་གཙུག་ཏོར་ཡོད་པའི་གནས་ཀྱི་བར་དུ་སོར་དྲུག་གི་ཚད་དོ། །འོག་ཏུ་ང་དཀྱིལ་དང་སྟེང་དུ་
གཙུག་ཏོར་གྱི་གནས་དེ་ཡི་ཕྱི་རོལ་སྟོང་པ་གཅིག་པུ་སྟེ་རྡུལ་ཕྲ་རབ་སོ་སོའི་ངོ་བོ་ཁམས་ལྔ་པ་མ་འབྱར་བར་གནས་པས་སྟོང་པ་གཅིག་པུའོ། །འདི་ནམ་མཁའ་ནི་མ་ཡིན་ཏེ་སྒྲ་གཅིག་པུའི་ཡོན་ཏན་ཅན་ནམ་མཁའ་ནི་ཐམས་ཅད་དུ་ཁྱབ་པར་བྱེད་པའི་ཕྱིར་དེའི་སྟོང་པ་གཅིག་པུར་རྟོགས་པར་མི་བྱའོ། །དེ་ལྟ་བུའི་སྟོང་པ་གཅིག་པུ་དེ་ནི་སྲིད་པ་གསུམ་དང་བྲལ་བ་སྟེ་དེར་མི་གཏོགས་པ་དང་། སྲ་གཤེར་ལ་སོགས་པ་འབྱུང་ལྔའི་ཡོན་ཏན་མེད་ཅིང་། ཡོན་ཏན་ལྔ་པོ་དེ་ཉིད་ཀྱིས་དམན་པའོ། །སྤྱིར་ནམ་མཁའ་ཞེས་པ་ལ་འདོད་ལུགས་བཞི་སྟེ། ནམ་མཁའ་ཞེས་པ་སྒྲ་གཅིག་པུའི་ཡོན་ཏན་ཅན་གྱི་རྡུལ་དུ་འདོད་པ་དང་། འདི་ས་སོགས་ཀྱི་རྡུལ་ལ་སྒྲ་བསྐྱེད་པའི་གོ་སྐབས་ཡོད་པ་དེ་ལ་དགོངས་སམ་སྙམ། ཁ་ཅིག་གིས་མིག་ལ་སྣང་རྒྱུ་དངས་སང་ངེ་བ་ལ་འདོད་པ་དང་། ཁ་ཅིག་གིས་གོ་འབྱེད་ནུས་པའི་དངོས་པོ་ཞིག་ཏུ་འདོད་པ་དང་གསུམ་པོ་དེ་ནི་ནམ་མཁའ་སྒྲུབ་པའི་ཚུལ་གྱིས་ཡོད་པར་འཛིན་པའོ། །མདོ་སྡེ་པས་དགག་པ་དངོས་མེད་དུ་འདོད་པ་སྟེ་ལུགས་བཞི་ཡོད་པར་འགྲེལ་པ་གཞན་ལས་བཤད་དོ། །དེས་ན་སྒྲའི་ཡོན་ཏན་ཅན་གྱི་ནམ་མཁའི་རྡུལ་རྫས་ཞེས་པས་སོགས་ཀྱི་རྡུལ་རྫས་ཐམས་ཅད་ལ་སྒྲ་བསྐྱེད་པའི་གོ་སྐབས་ཀྱིས་ཁྱབ་པའི་ཆ་ལ་དགོངས་པ་འདྲ་སྙམ་མོ། །དེ་ཡན་ཆད་ཀྱིས་མཐོ་དམན་གྱི་ཚད་བཤད་པའོ། །དེ་ལྟར་འཇིག་རྟེན་གྱི་ཚད་འབུམ་ཕྲག་བཞི་སྟེ་ལུས་ལ་ཁྲུ་བཞིའོ། །ཁྲུ་ཡང་སོར་མོ་ཉེར་བཞིའོ། །དེ་ནས་ཞེང་གི་ཚད་ནི་རླུང་དཀྱིལ་གྱི་མཐའ་ནས་རླུང་གི་མཐའི་མཚམས་ཏེ་ཤར་ནུབ་དང་། ལྷོ་བྱང་ལྟ་བུར་ཐད་ཀར་གཞལ་ན་དཔག་ཚད་འབུམ་ཕྲག་བཞིའོ། །དེ་ལྟར་ཞེང་དུ་འབུམ་ཕྲག་བཞི་པའི་རླུང་དཀྱིལ་ཟླུམ་པོའི་དབུས་སུ་མེ་དཀྱིལ་ཞེང་དུ་འབུམ་ཕྲག་གསུམ་པ་ཟླུམ་པོ། དེའི་དབུས་སུ་ཆུ་དཀྱིལ་ཞེང་དུ་འབུམ་ཕྲག་གཉིས་པ་ཟླུམ་པོ། དེའི་དབུས་སུ་ས་དཀྱིལ་ཞེང་དུ་འབུམ་ཕྲག་གཅིག་པ་ཟླུམ་པོ། དེའི་དབུས་ཀྱི་ལྟེ་བར་རི་རབ་ལྷུན་པོ་ཟླུམ་པོ།
ལྷུན་པོའི་ཕྱི་ན་འོག་གཞི་ས་དཀྱིལ་ལ་བརྟེན་པའི་ནང་གི་གླིང་དྲུག །མཚོ་དྲུག །རི་དྲུག་རྣམས་ཀྱིས་ཟླུམ་པོར་བསྐོར་ཞིང་། དེའི་ཕྱི་རོལ་ཏུ་ལས་ཀྱི་ས་དུམ་བུ་བཅུ་གཉིས་པ་གླིང་བཅུ་གཉིས་གནས་པ་ནི་གླིང་བདུན་པ་དང་། དེའི་འོག་ཐམས་ཅད་དང་ཕྱི་རོལ་དུ་ཆུ་དཀྱིལ་ར་བའི་ཚུལ་དུ་གྱེན་དུ་མངོན་པ་ལན་ཚའི་རྒྱ་མཚོ་ནི་མཚོ་བདུན་པ་དང་། དེའི་མཐར་མུ་ཁྱུད་དུ་བསྐོར་བ་ལྷོར་རྟ་གདོང་གི་མེ་ཅན་མཚོའི་འོག་དང་། ཐད་ཀའི་ཆར་གནས་པ་མེ་དཀྱིལ་གྱི་ཁ་ཁྱེར་ལྟ་བུ་རྡོ་རྗེའི་རི་ནི་རི་བདུན་པའོ། །འདི་མེ་དཀྱིལ་གྱི་ཁ་ཁྱེར་ལ་བཞེད་པའི་ལུགས་སོ། །དེ་ལྟར་རླུང་གི་མཐའ་ནས་རླུང་གི་མཐའི་མཚམས་སུ་ཐད་ཀར་དང་། བརྟན་པ་འཛིན་མའི་གཞི་ལ་གླིང་དང་རི་དང་རྒྱ་མཚོ་རྣམས་གནས་པའི་ཞེང་གི་ཚད་ནི། རིམ་པ་ལྟར་བཞི་ཞེས་པ་རླུང་དཀྱིལ་གྱི་ཐད་ཀར་རོ། །བཞི་དེ་ཡི་ཕྱེད་འབུམ་ཕྲག་གཉིས་ནི་ལྷུན་པོའི་དབུས་ཀྱི་རྩ་བའི་ཐིག་ནས་ལན་ཚའི་རྒྱ་མཚོའི་དཀྱིལ་འཁོར་གྱི་མཐའ་ཏེ་གཡས་སུ་འབུམ་གཅིག་དང་གཡོན་དུ་འབུམ་གཅིག་སྟེ་དེ་བཞིན་ཕྱོགས་བརྒྱད་པོ་ཀུན་དུའོ། །ལན་ཚའི་ཆུ་དཀྱིལ་དེ་ཡི་མཐའ་ནས་གཡས་དང་གཡོན་དུ་རྩེ་མོ་ཅན་མེ་དང་གཡོ་བའི་སྟེ་རླུང་གི་དཀྱིལ་འཁོར་གཉིས་པོ་དག་ནི་ཐད་ཀར་དཔག་ཚད་འབུམ་ཕྲག་གཉིས་ཏེ་གཡས་སུ་གཅིག་གཡོན་དུའང་གཅིག་སྟེ་ཕྱོགས་ཐམས་ཅད་དུ་དེ་བཞིན་ནོ། །དེ་ལྟར་དཀྱིལ་འཁོར་བཞི་པོ་འོག་ནས་སྟེང་དུ་བརྩེགས་ཤིང་དཀྱིལ་འཁོར་བཞི་རང་རང་གི་དཔངས་ནི་སྟོང་ཕྲག་ལྔ་བཅུ་རེ་སྟེ་གྱེན་དུ་ཁོར་ཡུག་ཏུ་གྱུར་པ་ཉིད་སྟེང་དུ་འཕགས་པ་དཔེར་ན་མཎྜལ་གྱི་སྣོད་གསུམ་ཁ་གྱེན་བསྟན་གཅིག་གི་ནང་དུ་གཅིག་བཙུད་པ་ལྟར་རླུང་མེ་ཆུ་ཡི་རབ་ཁད་མཉམ་པའི་དབུས་ནས་དཀྱིལ་མེ་ལོང་བཞག་པ་ལྟ་བུའོ། །དཀྱིལ་འཁོར་བཞི་དང་རི་གླིང་རྒྱ་མཚོ་ལྷུན་པོ་ཐམས་ཅད་དབྱིབས་ཟླུམ་པོའི་རྣམ་པ་ཅན་ནོ། །ས་དཀྱིལ་གྱི་དབུས་ན་རི་རབ་ལྷུན་པོ་ཡོད་པ་གང་གི་སྟེང་དུ་སྟེ་ས་སྟེང་ནས་ཡར་འཕགས་པའི་
ལྷུན་པོའི་ཕྱེད་ཀྱི་སྟེང་ན། ཁྱིམ་གྱི་འཁོར་ལོ་རྩིབས་སྟེ་ཆ་བཅུ་གཉིས་པ་སྐར་མའི་ཕུང་པོ་མཐའ་ཡས་པ་དང་བཅས་པ་ཉིན་དང་མཚན་མོར་འཁོར་ལོ་ལྟར་འཁོར་བ་སྟེ། ཚུལ་འདིས་ལྷུན་པོའི་མིང་ཅན་མནྡར་བ་སོགས་གཞན་ལས་རི་ཡི་རྒྱལ་པོ་ཉིད་ཀྱི་ཁྱད་ཆོས་བསྟན་པའོ། །ལྷུན་པོའི་དབུས་ཀྱི་འོག་གི་རྩ་ཐིག་གི་ལྟེ་བ་ནས་སྟེང་འོག་ཕྱོགས་བཞིའི་ཆ་དྲུག་པོ་ལ་ནི་གང་ནས་གཞལ་ཀྱང་འབུམ་ཕྲག་གཉིས་གཉིས་ཡིན་ཏེ། ཕྱོགས་བཞིར་རླུང་དཀྱིལ་གྱི་མཐའི་བར་དུ་དེ་ལྟར་ལ། སྟེང་དུ་རི་རབ་ཀྱི་རྩེ་མོ་དང་། འོག་ཏུ་རླུང་དཀྱིལ་གྱི་མ་མཐར་ཐུག་གི་བར་དུའང་དེ་དང་འདྲའོ། །དེ་ལྟར་མཐོ་རིས་ལྷ་དང་། མི་ཡུལ་དང་། ས་འོག་སྟེ་སྲིད་པ་གསུམ་པོ་མཐའ་དག། ཁམས་གསུམ་ལ་ཞེན་ཅིང་ཆགས་པ་སྐྱེད་པའི་དུས་ཀྱི་སྦྱོར་བ་དག་ལས་རབ་ཏུ་སྐྱེས་པ་ཡིན་ཏེ། ཆགས་པ་སྐྱེས་པའི་དུས་ཀྱི་དབང་གིས་ཡང་དག་པར་འཛིན་པ་དང་སྲུབ་པ་དང་། དབྱིབས་ཀྱི་རླུང་གི་དུས་ཀྱི་སྦྱོར་བ་ལས། སེམས་ཅན་རྣམས་ཀྱི་དགེ་བ་དང་མི་དགེ་བའི་འབྲས་བུ་ལ་ཉེ་བར་ལོངས་སྤྱོད་པའི་དོན་དུ་སྐྱེས་སོ། །ད་ནི་ཁོར་ཡུག་གི་ཚད་བརྗོད་པ། འཇིག་རྟེན་ཁམས་ཀྱི་ཚད་དེ་དག་གི་མཐའ་ཀུན་ནས་འཁོར་བའི་འཁོར་ཡུག་ཏུ་ནི། རང་རང་གི་ཐད་ཀའི་རྒྱ་ཚད་གང་ཡིན་པ་དེ་ཉིད་ཀྱི་སུམ་འགྱུར་དུ་ཡང་འགྱུར་བ་སྟེ། ས་ཡི་དཀྱིལ་འཁོར་ནི་ཐད་ཀར་འབུམ་ཕྲག་གཅིག་ཡིན་པས་འཁོར་ཡུག་ཏུ་འབུམ་ཕྲག་གསུམ་དུ་འགྱུར་བ་དང་། དེ་བཞིན་དུ་ཆུ་དང་མེ་དང་རླུང་གི་དཀྱིལ་འཁོར་རྣམས་ཀྱི་འཁོར་ཡུག་ནི་དཔག་ཚད་འབུམ་ཕྲག་དྲུག་དང་དགུ་དང་ཉི་མ་སྟེ་བཅུ་གཉིས་སུ་རིམ་པས་སོ། །ཀྱེ། མི་ཡི་དབང་པོ་ཕྱི་རོལ་སྲིད་པ་གསུམ་གྱི་གནས་ལ་དཔག་ཚད་འབུམ་ཕྲག་གཅིག་ཉིད་ཀྱི་ཚད་གང་ཡིན་པ། དེ་ནི་ས་ཡི་སྟེང་གི་གནས་སུ་ནང་རང་གི་ལུས་ལ། །རང་རང་དག་གི་ལུས་ཀྱི་ཚད་ཀྱིས་ཡང་དག་པར་
ཁྲུ་གང་ངོ་། །དེ་ལྟར་དཔག་ཚད་བཤད་པ་དེ་དག་ཚད་ཅི་ལྟ་བུ་ཞིག་ཡིན་ཞེ་ན། རྡུལ་ཕྲ་རབ་བརྒྱད་རྣམས་ཕྲེང་བར་གནས་པ་དག་གིས་ཕྲ་མོ་ཞེས་པ་འདི་གཅིག་གི་ཚད་དུ་འགྱུར་ལ། ཕྲ་མོ་བརྒྱད་ཕྲེང་བར་གནས་པ་ཉིད་ཀྱིས་མི་རྣམས་ཀྱི་སྐྲ་ཡི་རྩེ་མོ་ཕྲ་མོ་གཅིག་གི་ཚད་དུ་སྟེ། སྐྲ་རྩེ་འདི་བརྒྱད་ཕྲེང་བར་གནས་པ་རྣམས་ཀྱིས་ནི་སྐེ༷་ཚེ་གཅིག་དང་། དེ་བརྒྱད་ཀྱིས་ཤིག་དང་། དེ་བརྒྱད་ཀྱིས་ནས་ཏེ། ལྟོས་འགྲོ་ནི་བརྒྱད་ཡིན་པས། ནས་བརྒྱད་ཀྱིས་སོར་ཏེ་སོར་མོ་ཉི་མ་སྟེ་བཅུ་གཉིས་ནི། ཟུང་སྟེ་གཉིས་ཡིན་པས། ཉིས་ལོག་བྱས་པ་ཉེར་བཞི་དག་གིས་ཁྲུའོ། །ཁྲུ་བཞིས་གཞུ་ཞེས་བྱ་བ་སྟེ། འདིར་ནི་སྟོང་ཕྲག་གཉིས་ཀྱི་གྲངས་ཀྱི་གཞུ་འདོམས་དེ་ཡིས་རྒྱང་གྲགས་དག་ཏུ་འགྱུར་ཞིང་རྒྱང་གྲགས་བཞི་རྣམས་དག་གིས་དཔག་ཚད་གཅིག་གི་ཚད་དུ་འགྱུར་པ་ཡིན་ལ། ཚད་དེ་ཡིས་ལྷ་ཡུལ་ལ་ལྷ་རྣམས་ཀྱི་ཚད་དང་། ས་ལ་མི་རྣམས་ཀྱི་གནས་སོགས་ཀྱི་ཚད་དང་། ནམ་མཁའ་དག་ལ་ཉི་མ་དང་ཟླ་བ་ལ་སོགས་པ་འཁོར་བའི་གནས་ཀྱི་ཚད་གཞལ་བ་ཡིན་ནོ། །དེ་ལྟར་རྒྱུད་འདིར་འཇིག་རྟེན་ཁམས་ཀྱི་ཚད་དཔག་ཚད་འབུམ་ཕྲག་བཞིར་གསུངས་པ་དང་། མངོན་པ་མཛོད་ལས་འཇིག་རྟེན་གྱི་ཚད་འབུམ་ཕྲག་སུམ་ཅུ་རྩ་དྲུག་ལྷག་བཅས་སུ་གསུངས་པས་བཅོམ་ལྡན་འདས་ཀྱི་གསུང་དེ་དག་ནང་མི་འགལ་ལམ་ཞེ་ན་མི་འགལ་ཏེ། དོན་དམ་པར་མཐའ་གཅིག་ཏུ་འཇིག་རྟེན་གྱི་ཚད་ནི་འདི་ཁོ་ནའོ་ཞེས་ངེས་པ་མེད་ནའང་། སེམས་ཅན་རྣམས་ཀྱི་དགེ་སྡིག་དབང་གིས་སྣང་བ་སྣ་ཚོགས་སུ་སྣང་བའི་སྣང་ངོ་དང་བསྟུན་ནས་སངས་རྒྱས་ཀྱིས་འཇིག་རྟེན་གྱི་ཚད་སྣ་ཚོགས་སུ་གསུངས་པ་སྟེ། དཔེར་ན་བསོད་ནམས་དང་ཡེ་ཤེས་ལྡན་པའི་བྱང་ཆུབ་སེམས་དཔའ་འམ། ཆགས་བྲལ་དག་བཞུགས་པའི་ཕུག་ཁྲུ་ལྔ་པའི་ནང་དུ་དེའི་མཐུ་དང་རྫུ་འཕྲུལ་གྱིས་འཁོར་ལོས་
སྒྱུ་རབ་དཔུང་གི་སྡེ་དང་བཅས་པ་ཞུགས་ཀྱང་དོག་པ་ཅུང་ཟད་མེད་པར་ཡངས་པོར་གྱུར་པ་ནི་ཕུག་རྒྱ་ཇེ་ཆེར་སྐྱིད་པ་མིན་ཡང་དེ་ལྟར་བ་ལྟར། ཡང་དག་པར་རམ་དོན་དམ་པར་སེམས་ཅན་རྣམས་ཀྱི་བསམ་པའི་དབང་གིས་འཇིག་རྟེན་ཚད་ཀྱང་དེ་བཞིན་ནོ། །འདིར་རིག་བྱེད་ཀྱི་གྲུབ་པའི་མཐའི་བསམ་པ་སྣ་ཚོགས་པ་དང་། ཚངས་པའི་ཡུལ་ས་གཅིག་ནི་དཔག་ཚད་བྱེ་བའི་ཁྱོན་ནོ། །ཞེས་མུ་སྟེགས་པ་དག་གིས་ཚད་མས་མ་དམིགས་པའམ་མ་མཐོང་བར་རྫུན་དུ་སྨྲ་བ་གཞོམ་པ་དང་། ཉི་མའི་ཤིང་རྟ་ལ་སོགས་པ་སྨིན་པའི་དོན་དུ་རྒྱུད་འདིར་གཟའ་དང་རྩིས་དང་ཁྱིམ་གྱི་འཁོར་ལོ་དང་བཅས་པའི་འཇིག་རྟེན་གྱི་ཚད་བཀོད་པ་འདི་ནི་ཕྱི་རོལ་འཇིག་རྟེན་ཁམས་ཀྱི་དཀྱིལ་འཁོར་དང་། ནང་དུ་ལུས་ཉིད་དཀྱིལ་འཁོར་ཡིན་པས་དེ་གཉིས་གནད་མཐུན་པར་འཆར་བ། ཇི་ལྟར་ཕྱི་རོལ་དེ་བཞིན་ལུས། །ཞེས་གསུངས་པ་ལྟར་དགོས་པ་ཁྱད་པར་ཅན་གྱི་སྒོ་ནས་འཕགས་ཤིང་ཚད་གཞན་དང་འགལ་བའང་མེད་དོ། །འདིར་སངས་རྒྱས་ཀྱིས་འཇིག་རྟེན་ཁམས་ཀྱི་ཚད་འདི་ཁོ་ནའོ་ཞེས་དམ་བཅས་པ་མ་ཡིན་ཏེ། དམ་བཅས་པ་མཛད་པ་ནི་བསོད་ནམས་དང་ཡེ་ཤེས་ཀྱི་ཡུལ་ལ་མཐའ་གཅིག་ཏུ་ལུང་སྟོན་པ་ཡིན་གྱི། འདིར་དོན་དམ་པར་ཚད་མེད་པ་གོང་དུ་བརྗོད་པ་བཞིན་ནོ། །དེ་ལྟར་ཡང་། སེམས་ཅན་མོས་པ་སྣ་ཚོགས་པ། །གྲུབ་མཐའ་སྣ་ཚོགས་རིག་པ་པོ། །སྣ་ཚོགས་ལམ་ལ་རབ་གནས་པ། །ཤེས་པའི་ང་རྒྱལ་ཁེངས་པ་ཅན། །དེ་དག་རང་གཞན་གྲུབ་མཐའ་ལ། །ཇི་སྲིད་རིགས་པ་མ་བསྟན་པ། །དེ་སྲིད་ཁེངས་པ་ཅན་དེ་དག །ཀུན་མཁྱེན་གྱི་ཡང་དབང་མི་འགྱུར། །སེམས་ཅན་ཕན་ལས་མི་བདེན་པ། །བསོད་ནམས་ཚོགས་ཀྱི་རྒྱུ་ཡིན་ཏེ། །གཞན་ལ་གནོད་ལས་བདེན་པ་ནི། །མནར་མེད་ལ་སོགས་རབ་ཏུ་སྟེར། །གཏོང་བ་པོ་མིན་ཡི་དྭགས་ཀྱིས། །ཁྱིམ་གྱི་གནས་ནི་རིར་མཐོང་སྟེ། །སྡིག་པ་བྱེད་
པ་དག་གི་ཁྱིམ། །ཁབ་རྩེའི་རི་ཡི་རྣམ་པར་རོ། །ས་འོག་དངོས་གྲུབ་ཐོབ་གྱུར་ནས། །ལྷ་མོ་རྣམས་ཀྱི་གྲོང་འགྲོ་བ། །གྲུབ་པ་རྣམས་ཀྱིས་རབ་བརྟན་ས། །ཀུན་ནས་བུག་པ་བཅས་པར་མཐོང་། །ཞེས་གསུངས་པ་ལྟར། འཇིག་རྟེན་གྱི་ཚད་བཅོམ་ལྡན་འདས་ཀྱིས་གསུངས་པ་ནི་སེམས་ཅན་རྣམས་ཀྱི་རང་གི་སེམས་ཀྱི་བག་ཆགས་ཀྱི་དབང་གིས་རབ་ཏུ་སྣང་བ་སྟེ། དེ་བཞིན་གཤེགས་པས་མངོན་པར་ཞེན་པས་འཇིག་རྟེན་གྱི་ཁམས་གཟིགས་ནས། གཟུང་བ་དང་འཛིན་པའི་ངོ་བོས་དངོས་པོའི་ཚད་གསུངས་པ་ནི་འགའ་ཡང་མེད་དོ། །དེའི་ཕྱིར་གདུལ་བྱ་སེམས་ཅན་རྣམས་ཀྱི་བསམ་པ་ཐམས་ཅད་མཁྱེན་ནས། དྲང་སྲོང་རྣམས་སྨིན་པའི་དོན་དུ། འཇིག་རྟེན་ཁམས་དང་ལུས་ཀྱི་ཚད་དཀྱིལ་འཁོར་དུ་སྦྱངས་པའི་དོན་དུ་བཅོམ་ལྡན་འདས་ཀྱིས་གསུངས་སོ། །གནས་པ་བཅུ་པ་ནང་བཅུད་སྲིད་པ་སུམ་ཅུ་རྩ་གཅིག་གི་ངོ་བོ་ཉིད་ཀྱིས་གནས་པ་ནི། དང་པོར་ཆོས་བཟང་སོགས་ཚིགས་བཅད་བཅུ་བཞི་པ་ནས་ཉེར་གཅིག་པའི་བར་གྱིས་བསྟན་ཏེ། དང་པོར་ཏེ་ཐོག་མར་ཆོས་བཟང་ཞེས་པས་གཟུགས་མེད་ཀྱི་སྲིད་པ་བརྗོད་དེ་གནས་དེ་དག་ཏུ་ཚེ་བསྐལ་པར་གནས་པས་ཆོས་བཟང་བསྐལ་པ་ཟུང་ནི་ཟུང་དང་ལྡན་པ་ཞེས་བཞི་ནི་སྲིད་རྩེ་དང་ཅི་ཡང་མེད། རྣམ་ཤེས་མཐའ་ཡས། ནམ་མཁའ་མཐའ་ཡས་བཞི་པོ་དག་སྟེ། འདི་དག་ཚེ་ནི་རིམ་བཞིན་མཆོག་བསྐལ་ལམ་བསྐལ་པ་ཆེན་པོ་བཞི་དང་གསུམ་དང་གཉིས་དང་གཅིག་གོ། འོག་ཏུ་རང་རང་གི་དབུགས་ལས་བསྒྲེས་པའི་ལོ་བརྒྱར་གསུངས་པ་ལས་འདི་རིང་ཡང་སེམས་ཅན་གྱི་དགེ་སྡིག་གི་དབང་གིས་སྣང་ཚུལ་ཐ་དད་ཡོད་པ་ལ་དགོངས་ཤིང་འོག་ནས་ཕྱི་ནང་གཞན་གསུམ་སྦྱར་བའི་དོན་དུ་ཡིན་ཞེས་བོད་འགྲེལ་རྣམས་སུ་བཤད། དེ་ལྟར་ཟད་པ་སྟོང་པ་རྣམ་པ་བཞི་བསྒོམ་པ་རྣམས་ཀྱི་གནས་གཟུགས་མེད་སྐྱེ་མཆེད་མུ་བཞི་པོ་དེ་དག་གཟུགས་ཁམས་པའི་འཇིག་རྟེན་གྱི་སྟེང་ན་གནས་
ཤིང་། ནང་དུ་ལུས་ལ་གཙུག་ཏོར་ནས་སྐྲ་མཚམས་བར་རོ། །དེའི་འོག་ཏུ་ཚངས་པའི་བསྐལ་པ་ཟུང་ནི་ཟུང་དང་ལྡན་པ་བཞི་ནི། འོག་མིན་དང་། ཤིན་ཏུ་མཐོང་དང་། མི་གདུང་བ་དང་། མི་ཆེ་བ་དང་། བཞི་ནི་ཟད་པར་རླུང་རྣམ་བཞི་བསྒོམ་པ་རྣམས་ཀྱི་གནས་ཏེ། ལུས་ལ་དཔྲལ་བའི་གནས་སོར་བཞིའོ། །འདིར་ཤིན་དུ་མཐོང་སྨྲོས་ལ། ཡེ་ཤེས་ལེའུར་གྱ་ནོམས་སྣང་བ་ཞེས་གསུངས་པ་གནས་དེ་གཉིས་གནས་གཅིག་ཏུ་བྱས་པས་གཟུགས་ཁམས་གནས་རིས་བཅུ་དྲུག་གོ། འདི་བཞི་ནི་བསམ་གཏན་བཞི་ཐོག་མའི་གནས་ཡིན་ལ། དེའི་འོག་ཏུ་ཚངས་པ་འཇིག་རྟེན་ལས་འདས་པ་ཡི་བསྐལ་པ་ཞེས་པ་བསམ་གཏན་བཞི་པའི་གནས་འོག་མ་གསུམ་ནས་མར་རིམ་པར་བགྲང་བའི་ནང་གི འབྲས་བུ་ཆེ་བ། བསོད་ནམས་སྐྱེས། སྤྲིན་མེད་འོད། དགེ་རྒྱས་བཞི་སྟེ་ཟད་པར་མེ་རྣམ་པ་བཞི་བསྒོམ་པ་རྣམས་ཀྱི་གནས་ཡིན་པ་དང་། ནང་དུ་སྣའི་གནས་སོར་བཞིའོ། །དེ་བཞིན་དུ་དཔལ་གྱི་བསྐལ་པ་ཞེས་པ། ཚད་མེད་དགེ། དགེ་ཆུང་། འོད་གསལ། ཚད་མེད་འོད་བཞི་ནི་ཟད་པར་ཆུ་རྣམ་པ་བཞི་བསྒོམ་པ་རྣམས་ཀྱི་གནས་ཏེ། ནང་དུ་ལུས་ལ། སྣའི་འོག་ཀོ་སྐོའི་སོར་བཞིའི་གནས་སོ། །དེའི་འོག་ཏུ་དཀར་པོའི་བསྐལ་པ་བཞི་ནི། འོད་ཆུང་། ཚངས་ཆེན། ཚངས་པ་མདུན་འདོན། ཚངས་རིས་ཞེས་བྱ་བ་ཡང་དེ་བཞིན་དུ་སྟེ། ཟད་པར་ས་རྣམ་པ་བཞི་བསྒོམ་པ་རྣམས་ཀྱི་གནས་དང་། ལུས་ལ་མགྲིན་པའི་གནས་སོར་དྲུག་ལ་ཀོ་སྐོ་དང་བསྣོལ་སྟབས་ཀྱིས་བཞིའོ། །དེ་ལྟར་ཚུལ་ཁྲིམས་དང་ཟད་པར་རླུང་ལ་སོགས་པ་བསྒོམ་པའི་ཏིང་ངེ་འཛིན་གྱི་སྟོབས་ཀྱིས་འོག་མིན་ལ་སོགས་པ་གཟུགས་ཁམས་བཅུ་དྲུག་ཏུ་འགྱུར་ཞིང་། དེ་དག་གི་ཚེ་ཚད་ནི་འོག་མིན་པའི་ཚེ་བར་གྱི་བསྐལ་པའམ་བསྐལ་པ་འབྲིང་པོ་བཅུ་དྲུག་ཡིན་པ་ནས་ཚངས་རིས་པ་བསྐལ་པ་གཅིག་གི་ཚེའི་བར་དུ་རིམ་པས་
ཤེས་པར་བྱའོ། །དེའི་འོག་ཏུ་ཤིན་ཏུ་དབང་གྱུར་རམ་གཞན་འཕྲུལ་དབང་བྱེད་ཀྱི་གནས་ནས་དམྱལ་བ་ལ་ཐུག་གི་བར་ནི་འདོད་པ་ཁམས་ལ་གནས་པ་ཡི་རིས་བཅུ་གཅིག་གོ། གང་ཞེ་ན་གཞན་འཕྲུལ་དབང་བྱེད་དང་། འཕྲུལ་དགའ་དང་། དགའ་ལྡན་དང་། འཐབ་བྲལ་དང་། སུམ་ཅུ་རྩ་གསུམ་པ་དང་། རྒྱལ་ཆེན་བཞིའི་རིས་ཏེ་འདོད་ལྷ་དྲུག་གོ། དེ་དག་གི་ཚེ་བསྐལ་པ་ཆུང་ངུ་དྲུག་ནས་གཅིག་གི་བར་དུ་མས་རིམ་དུ་ཤེས་པར་བྱའོ། །ལྷ་མ་ཡིན་དང་། མི་དང་། དུད་འགྲོ་དང་། ཡི་དྭགས་དང་། དམྱལ་བ་སྟེ་ལྔ་དང་བཅས་པའི་འདོད་ཁམས་ཀྱི་སྲིད་པ་བཅུ་གཅིག་གོ། ལྷ་མ་ཡིན་ནི་གནས་རིས་ཕལ་ཆེར་ལྷའི་དང་ཀླུའི་ནང་དུ་འདུས་ཀྱང་རིགས་ཀྱི་དབང་གིས་ཐ་དད་དུ་བགྲང་བས། །དེ་ལྟར་ན་འདོད་པའི་སྲིད་པ་བཅུ་གཅིག་གཟུགས་ཀྱི་བཅུ་དྲུག གཟུགས་མེད་པའི་བཞི་སྟེ་སྲིད་པ་སུམ་ཅུ་རྩ་གཅིག་གོ། སྲིད་པ་སོ་གཅིག་པོའི་སྔགས་ནི། གཟུགས་མེད་པ་བཞི་པོ་དག་ནི་ཨ་སོགས་བཞི་པོ་སྟེ། ཨ་ཨཱ་ཨཾ་ཨཿ ཞེས་པ་ཧ་འཁྲིག་ཞེས་ཧ་རིང་ཐུང་ཟུང་དང་བྲལ་བ་དེ་ཟད་པར་ནམ་མཁའི་སྔགས་རྣམས་ཏེ། ཧ་འཁྲིག་བྲལ་ཞེས་མ་སྨྲོས་ཀྱང་བཞི་པོ་སྨྲོས་པས་ཆོག་གི་འདི་ལ་དགོས་པ་མེད་དོ་སྙམ་ན། ཧ་ཡིག་ཀྱང་སྟོང་པ་མཁའ་ཁམས་ཅན་ཡིན་ཡང་གཟུགས་མེད་ཁམས་རིས་བཞི་ལས་མེད། ས་བོན་གཞན་མི་དགོས་ཞེས་དང་དེ་བཞིན་སྐབས་འདིར་བསྒྱུར་བའི་དབྱངས་རྣམས་མིན་ཞེས་པའི་དོན་ཏོ། །གཉིས་ཀྱི་མངོན་བརྗོད་གཞན་ལས་འཁྲིག་པ་ཅེས་སྨྲོས་པ་ཚིག་ལ་སྡེབས་སྦྱོར་གྱི་དབང་གིས་དང་། དོན་ལ་གནས་དེ་དག་བལྟ་བ་སོགས་ཀྱི་ཆགས་པ་དང་བྲལ་བར་ཡང་བསྟན་པ་སོགས་ཀྱི་ཆེད་དུའོ། །གནས་འོག་མ་གཞན་བཞིར་ཡེ་ལེར་འཆད་པ་ལྟར་རྒོད་བལྟ་རེག་བཅིང་གི་ཆགས་བཅས་སུ་བཤད་དོ། །ཨཾ་ཨཿ
ཡེ་ཤེས་ཀྱི་ས་བོན་ཡིན་ཀྱང་། འདིར་ཨ་ནམ་མཁའ་ཡིན་པ་དེའི་རིགས་ལས་བྱུང་བའོ། །དེ་བཞིན་དུ་ཨི༷་ལ་སོགས་པ་བཅུ་དྲུག་ནི་གཟུགས་ཁམས་བཅུ་དྲུག་གི་ཡིན་ཏེ། ཨི་ཨཱི་ཨེ་ཨཻ་ཟད་པར་རླུང་ངོ་། །རྀ་རཱྀ་ཨར་ཨཱར་ཟད་པར་མེ། ཨུ་ཨཱུ་ཨོ་ཨཽ་ཟད་པར་ཆུ། ལྀ་ལཱྀ་ཨལ་ཨཱལ་ཟད་པར་སའོ། །དབྱངས་བསྒྱུར་པའི་དང་པོ་ཧ་ལ་སོགས་པ་ལ་ཡི་མཐའ་ལ་ཐུག་པའི་བར་ཡང་ནི་འདོད་པའི་སྲིད་པ་རྣམ་བཅུར་ལུང་ལས་རབ་ཏུ་གསལ་ཏེ། ཧ་ཧཱ། ཡ་ཡཱ། ར་རཱ། ཞེས་འདོད་པའི་ལྷ་དྲུག་ཏུ་སྦྱིན་པ་དང་སྔགས་བཟླས་པའི་སྟོབས་ཀྱིས་འགྱུར་རོ། །ཝ་ཝཱ་ཞེས་པ་ལྷ་མིན་དང་མི་སྟེ། སྦྱིན་པའི་སྟོབས་ཀྱིས་ལྷ་མིན་དང་དགེ་མི་དགེའི་ལས་ཀྱི་སྟོབས་ཀྱིས་མིར་འགྱུར་རོ། །ལ་ལཱ་ཞེས་པ་དུད་འགྲོ་དང་ཡི་དྭགས་ཏེ། སྡིག་པ་ཆུང་ངུས་དུད་འགྲོ་དང་། འབྲིང་གིས་ཡི་དྭགས་སོ། །གསལ་བྱེད་ཀྱི་ཡི་གེ་ཀུན་གྱི་ཐོག་མ་དང་མཐའ་བསྡུས་ཏེ་ཡི་གེ་གཅིག་ཏུ་བྱས་པ་ཀྵ་ཞེས་ཀ་དང་ས་སྦྱར་ཞིང་ས་ཥར་བསྒྱུར་བ་འདི་ནི་གོང་དུ་འདོད་པ་རྣམ་བཅུ་ཞེས་སྨོས་པའི་ལྷག་མ་སྲིད་པ་བཅུ་གཅིག་པ་དམྱལ་བ་ལའོ། །དམྱལ་བ་ནི་སྡིག་པ་ཆེན་པོས་འགྱུར་རོ། །ས་འོག་པ་རྣམས་ཀྱི་ཚེ་ཚད་ནི། ཀླུའི་འཇིག་རྟེན་དང་པོར་བསོད་ནམས་ཀྱི་སྟོབས་དང་། དམྱལ་བའི་གནས་དང་པོར་སྡིག་པའི་སྟོབས་ཀྱིས་སྐྱེ་ཞིང་། དེ་གཉིས་བར་གྱི་བསྐལ་པ་ཆུང་ངུའི་ཚེའོ། །དམྱལ་བའི་གནས་གཉིས་པ་དང་གསུམ་པར་བསྐལ་པ་བར་མའི་ཚེའོ། །བཞི་པ་དང་ལྔ་པར་བསྐལ་པ་མཆོག་གི་ཚེའོ། །དྲུག་པ་དང་བདུན་པར་བསྐལ་པ་ཆེན་པོའི་ཚེའོ། །བརྒྱད་པ་འཇིག་རྟེན་ཉེ་བར་སྡུད་པའི་ཚེའོ། །དེ་ལྟར་སྲིད་པ་སུམ་ཅུ་རྩ་གཅིག་དེ་དག་གིས་སམ་རྣམས་ཀྱིས་འདིར་ནི་མཐོ་རིས་དང་མི་ཡུལ་ས་འོག་གི་སྲིད་པ་གསུམ་དུ་འགྱུར་ལ། ཁམས་ཀྱི་དབྱེ་བས་འདོད་ཁམས་དང་གཟུགས་ཁམས་གཟུགས་མེད་ཀྱི་ཁམས་གསུམ་མོ། །དེ་ལྟ་བུའི་སྲིད་པ་གསུམ་པོ་མ་ལུས་པ་འདི་ཡང་སྒྲིབ་པ་
དང་བྲལ་བས་སྐུ་གསུང་ཐུགས་ཀྱི་རྡོ་རྗེ་རྣམ་པ་གསུམ་དུ་འགྱུར་ཏེ་ཨ་སོགས་ཐབས་དང་ཀ་སོགས་ཤེས་རབ་ཀྱི་རབ་ཏུ་དབྱེ་བས་ཤེས་པར་བྱའོ། །ཞེས་སོ། །འདིར་འགྲེལ་པ་ལས་བསྐལ་པའི་ཚད་གསུངས་པ། ཆུ་དང་ཞེང་ལ་དཔག་ཚད་གཅིག་ཡོད་པ་ཐ་གྲུར་མཉམ་པར་བྱས་པའི་དོང་དེ་སྐྲའི་རྩེ་མོ་རྣམས་ཀྱིས་ཡོངས་སུ་བཀང་བ་ལས་མི་ཡི་ལོ་བརྒྱ་རེ་རེ་སོང་བ་ན་སྐྲ་རྩེ་རེ་རེ་བྱུང་བས་གང་གི་ཚེ་དོང་ནང་གི་སྐྲ་ཐམས་ཅད་ཟད་པ་ལ་བསྐལ་ཆུང་གི་ཉིན་ཞག་གཅིག་ཅེས་བྱའོ། །ཉིན་ཞག་དེ་སུམ་ཅུས་ཟླ་བ། ཟླ་བ་དེ་བཅུ་གཉིས་ཀྱིས་ལོར་བྱས་པའི་ལོ་བརྒྱ་ལ་བསྐལ་ཆུང་ཞེས་བྱའོ། །དེ་བཞིན་དུ་དེའི་སྡེ་ནི་བསྐལ་པ་བར་མ་སྟེ་ཞེས་འགྲེལ་པར་གསུངས་པའི་དོན་བསྐལ་ཆུང་དེ་ཡི་དབང་དུ་བྱས་པའི་ལོ་བརྒྱ་ན་སྐྲ་རེ་བྱུང་བ་ཟད་པ་ཞག་གཅིག་ཏུ་བརྩིས་ནས་ཞག་སུམ་ཅུ་ལ་ཟླ་བ་སོགས་བརྩིས་པའི་ལོ་བརྒྱ་ནི་བར་བསྐལ། བར་བསྐལ་ལ་ལོ་རེ་བརྩིས་པས་སྐྲ་རྩེ་ཕྱུང་བ་སོགས་སྔ་མ་ལྟར་བསྒྲེས་པའི་ལོ་བརྒྱ་མཆོག་བསྐལ་ཞེས་བྱའོ། །ཞེས་ཀྱང་བཤད་པ་ཡོད། འགྲེལ་བྱེད་སྔ་མ་ཕལ་གྱིས་བསྐལ་ཆུང་གཅིག་ཞག་ཏུ་བརྩིས་ནས་རིམ་པས་ལོར་བསྒྲེས་པའི་ལོ་བརྒྱ་ལ་བར་བསྐལ། དེ་བཞིན་བར་བསྐལ་ཞག་བརྩིས་ཀྱིས་ལོ་བརྒྱ་ལ་མཆོག་བསྐལ་དུ་བཞེད་པའང་ཡོད། འོག་མ་འོག་མའི་ལོ་ཅི་ཙམ་པ་རང་རང་གིས་རང་རང་བསྒྱུར་བས་གོང་མ་གོང་མ་འགྲུབ་པ་དེའི་སྡེ་ཞེས་པའི་དོན་དུ་འགོས་ལོ་ཙཱས་གསུངས་པ་འདི་ཕལ་གྱིས་འཐད་ཕྱོགས་སུ་མཛད། བི་བྟཱུ་ཏིས་ལོ་བརྒྱ་ལོ་བརྒྱས་བསྒྱུར་བ་ལ་འཆད་དོ། །དོང་གི་སྐྲ་རྩེ་ཅི་ཙམ་པ་རྩིས་ལ་ཕབ་པ་དང་། དེ་མི་ལོ་བརྒྱས་བསྒྱུར་བ་མི་ལོ་དུ་ཡིན་པ་སོགས་ཀྱང་རྩིས་ལམ་དུ་ཞིབ་པར་ཕབ་ན་ཤེས་པར་འགྱུར་ཏེ་འདིར་ཡི་གེར་འགོད་པ་ལ་དགོས་པ་ཆེར་མི་སྣང་ངོ་། །དེ་ལྟར་དགེ་སྡིག་གི་དབང་གིས་མཐོ་རིས་ལྷ་དང་། དམྱལ་བ་རྣམས་སུ་བསྐལ་པ་དུ་མར་བདེ་སྡུག་མྱོང་
བར་འགྱུར་རོ། །ད་ནི་སྲིད་པ་སོ་གཅིག་པོ་དེའི་བྱེ་བྲག་འགའ་ཞིག་གི་གནས་དང་གནས་ཅན་གྱི་ཁྱད་པར་ཅི་རིགས་གསུངས་པ། རིན་ཆེན་སྣ་ཚོགས་ཀྱི་ཁང་པ་སོགས་ཀྱི་འོད་ཀྱིས་སྣང་བར་བྱེད་པའི་གནས་ལྷ་མིན་དང་ཀླུའི་འཇིག་རྟེན་ཡིན་ལ་དེ་ཡང་ས་དཀྱིལ་ཕྱེད་མར་བྱས་ནས་སྟེང་གི་ཆ་དེ་ཡང་ཕྱེད་མར་བྱས་པའི་སྟེང་དུ་ལྷ་མིན་དང་འོག་ཏུ་ཀླུ་གནས་སོ། །དེ་ནས་འོག་ཏུ་དཔག་ཚད་སྟོང་ཕྲག་ཉེར་ལྔའི་ཚད་ཅན་གསེག་མའི་ཆུ་ཞེས་པ་ནི་གནས་དང་པོའི་དམྱལ་བར་ངེས་པར་བརྗོད་དེ་ས་དཀྱིལ་གྱི་ཕྱེད་གོང་མར་རིན་ཆེན་སྣང་དང་། འོག་མར་གསེག་མའི་ཆུ་ཡི་དམྱལ་བའོ། །བྱེ་མའི་ཆུ་ཞེས་པ་ནི་དམྱལ་བ་གཉིས་པའོ། །འདམ་གྱི་ཆུ་དམྱལ་བ་གསུམ་པ་དང་དེ་གཉིས་ནི་ཆུ་དཀྱིལ་གྱི་ཕྱེད་གོང་འོག་ལ་གནས་ཏེ་འདམ་དང་བྱེ་མའི་ཆུ་དང་ལྡན་པ་གྲང་བའི་དམྱལ་བའོ། །མི་བཟད་པའི་དུ་བ་ཞེས་པ་དམྱལ་བ་བཞི་པ་དག་དང་། མེ་ཞེས་པ་ལྔ་པ་དང་འདི་གཉིས་འོག་གཞི་མེ་ཡི་དཀྱིལ་འཁོར་གྱི་ཕྱེད་གོང་འོག་ཏུ་གནས་པ་ཚ་བའི་དམྱལ་བ་གཉིས་སོ། །དེ་ནས་དེའི་འོག་ཏུ་མུན་པ་ཞེས་པ་དྲུག་པ་དང་ནི། ངུ་འབོད་མུན་པ་ཆེན་པོ་ནི་བདུན་པ་སྟེ། དྲག་པོའི་རླུང་གི་དམྱལ་བ་འདི་གཉིས་རླུང་དཀྱིལ་གྱི་ཕྱེད་གོང་འོག་ཏུ་སྟེ་དཔངས་ཚད་དཔག་ཚད་སྟོང་ཕྲག་ཉེར་ལྔ་རེ་དང་རྒྱའི་ཚད་ས་དཀྱིལ་དང་མཉམ་པའོ། །དངོས་སུ་མ་གསུངས་ཀྱང་དང་ཡིག་གིས། རྡོ་རྗེའི་མེ་ལྕེ་དང་བཅས་པ་དམྱལ་བ་བརྒྱད་པ་ནི། རྡོ་རྗེའི་མེ་ཁབ་རྩེའི་རྣམ་པ་ལྟར་རྣོ་བས་སའི་ཆ་རྟག་ཏུ་རབ་ཏུ་འབར་བ་སྟེ། འདི་ཀུན་གྱི་འོག་ན་གནས་ཀྱི་གནས་ཟུར་དུ་མེད་ཅིང་དེ་ལྟར་དམྱལ་བ་བརྒྱད་ནི་ས་འོག་ནའོ། །རི་རབ་ཀྱི་རྡོ་རྗེའི་འགྲམ་སྟེགས་ཀྱི་ཕྱི་རོལ་ནས་བསིལ་རི་ལ་ཐུག་གི་བར་དུ་རི་རབ་ཀྱི་བྱ་སྐྱིབས་ནང་ན་ནང་གི་གླིང་དྲུག་དང་མཚོ་དྲུག་རི་དྲུག་པོ་མུ་ཁྱུད་བཞིན་དུ་བསྐོར་ནས་རིམ་པས་སྤེལ་མར་གནས་ཏེ། རི་རབ་ཀྱི་རྡོ་རྗེའི་འགྲམ་སྟེགས་ཀྱི་མཐར་ཟླ་བའི་གླིང་།
དེའི་མཐར་སྦྲང་རྩིའི་རྒྱ་མཚོ་དེའི་མཐར་རི་འོད་སྔོན་ཞེས་བྱ་བས་བསྐོར་བ་སྟེ་དེ་ལྟར་ནང་གི་གླིང་རི་དང་མཚོ་རེ་རི་རེ་རིམ་པར་བསྐོར་བས་གླིང་དྲུག་མཚོ་དྲུག་རི་དྲུག་ནི་ནང་གི་ཡིན་ལ། གླིང་བདུན་པ་ལས་ས་དུམ་བུ་བཅུ་གཉིས་པ་དང་མཚོ་བདུན་པ་ལན་ཚྭའི་རྒྱ་མཚོ། རི་བདུན་པ་རྡོ་རྗེའི་ལྕགས་རིའོ། །དེ་ལྟར་གནས་པ་ལས་མཚོ་བདུན་བཤད་པ། གླིང་དུམ་བུ་བཅུ་གཉིས་ཀྱི་ཕྱི་རོལ་ན་ལན་ཚྭ་ཡི་རྒྱ་མཚོ་དང་། དེ་བཞིན་དུ་རི་རབ་ཀྱི་བྱ་སྐྱིབས་བསིལ་རིའི་ནང་ན་ཆང་གི་མཚོ་དང་དེ་བཞིན་ཕྱི་ནས་ཕར་བརྩིས་ཏེ། ཆུ་དང་འོ་མ་དང་ཞོ་དང་མར་དང་སྦྲང་རྩིའི་རྒྱ་མཚོ་ཡོད་པ་ནི་མཚོ་བདུན་ཏེ། ཞེས་དང་། དེ་བཞིན་དུ་རི་བོ་ནི་རི་རབ་ཀྱི་ཕྱོགས་ནས་མགོ་བརྩམ་སྟེ་ནང་ནས་ཕྱིར་བགྲང་བའི་རིམ་པས་ནང་གི་གླིང་རེ་རེའི་རྒྱབ་ཏུ། འོད་སྔོན་དང་། མནྡ་ར་སྟེ། དལ་འབབ་བམ་དལ་འཛིན་ཞེས་བྱ་བའི་རི་དང་ནི་ཥ་ཊ་སྟེ་དྲུག་བྲལ་ལམ། གཙུབ་ལྡན་ནམ་མཚན་མ་སྣང་བར་ཡང་བསྒྱུར་བ་དེ་དང་ནོར་བུའི་འོད་དང་དྲོ་ཎ་སྟེ་འཇལ་བྱེད་ངམ་བྲེ་བོ་ཞེས་བྱ་བ་དང་། བསིལ་རི་དྲུག་ནང་གི་མཚོ་རྣམས་ཀྱི་མཐའ་འཁོར་བའི་རི་ཡིན་ལ། ལན་ཚའི་རྒྱ་མཚོའི་མཐར་རྡོ་རྗེ་ཡི་རི་དང་བཅས་པ་རི་བདུན་ཞེས་བྱའོ། །གླིང་ནི་ཟླ་བ་ཞེས་བྱ་བའི་གླིང་དང་། འོད་དཀར་གྱི་གླིང་ཞེས་བྱ་བ་དག་དང་། རབ་མཆོག་དུ་གཙང་བའམ་བདེ་བ་ཀུ་ཤ་ཞེས་བྱ་བའི་གླིང་དང་ནི། མི་འམ་ཅི་དང་། ཁྲུང་ཁྲུང་དང་། དྲག་པོ་ཞེས་བྱ་བ་ཡང་ནི་དྲུག་པོ་སྟེ་རི་རབ་ཀྱི་རྩ་བའི་རྡོ་རྗེའི་འགྲམ་སྟེགས་ཀྱི་རྒྱབ་ནས་བརྩམ་སྟེ་ནང་ནས་ཕྱིར་རིམ་བཞིན་གནས་པ་ནང་གི་གླིང་དྲུག་ནི་ལོངས་སྤྱོད་ཀྱི་ས་ཞེས་བྱ་བ་སྟེ་དགེ་བའི་ལས་ཀྱི་འབྲས་བུ་བདེ་བ་ལ་སྤྱོད་པ་ཤ་སྟག་གོ། དེ་དག་གི་ཕྱི་རོལ་དུ་གླིང་བདུན་པ་འཛམ་བུ་ཡི་གླིང་ཞེས་པས་དུམ་བུ་བཅུ་གཉིས་སུ་མི་རྣམས་གནས་པ་དག་ནི་འཛམ་གླིང་ཆེན་པོ་ལས་ཀྱི་ས་པ་ཞེས་བྱ་
སྟེ། མི་རྣམས་བདེ་སྡུག་གི་རྒྱུ་ལས་སྣ་ཚོགས་བསྒྲུབ་པ་ལ་སྟོབས་དང་ལྡན་པའི་ཕྱིར་རོ། །རང་རེའི་གནས་ཀྱི་དུམ་བུ་འདི་ལ་འཛམ་གླིང་ཆུང་ངུའི་ཐ་སྙད་དུ་བྱེད་པ་ཤེས་པར་བྱའོ། །ལས་ཀྱི་ས་པ་དེའི་ཤར་དུ་རླུང་དཀྱིལ་གྱི་རང་བཞིན་ཅན་གྱི་གླིང་ནི་དབྱིབས་ཤིན་ཏུ་ཟླུམ་པོར་འགྱུར་ཏེ་ཟླ་བ་ཉ་བ་ལྟ་བུའོ། །དེ་བཞིན་དུ་ཀྱེ་མི་ཡི་བདག་པོ་ལྷོ༷་རུ་མེ་ཡི་དཀྱིལ་འཁོར་གྱི་རང་བཞིན་གྱིས་ནི་གྲུ་གསུམ་མོ། །བྱང་དུ་ཆུ་དཀྱིལ་གྱི་རང་བཞིན་གྱི་ནི་ཕྱེད་ཀྱི་ཟླ་བའམ། ཟླ་བ་ཕྱེད་པའམ། ཟླ་གམ་དག་དང་ནུབ་ཏུ་གསེར་མཆོག་ས་ཡི་དཀྱིལ་འཁོར་གྱི་རང་བཞིན་ཅན་ནི་ཆུ་ཡི་གཏེར་ཏེ་བཞི་ཡི་རང་བཞིན་གྱི་ཟུར་ཞེས་པ་གྲུ་བཞིའོ། །འདིར་བི་བཏི་ཙནྡྲའི་ཕྱག་དཔེར། ཤར་ཟླ་ཕྱེད། བྱང་ཟླུམ་པོར་བྱས་པ་ཡོད་པ་དེ་འགྲིག་ཟེར་བ་ཡོད་ཀྱང་འབྲོ་ཤོང་གི་འགྱུར་འདིར་གོང་ལྟར་དངོས་སུ་གསལ། ཕྱི་རོལ་དུ་དཀྱིལ་འཁོར་བཞི་པོ་དེ་བཞིན་ནང་དུ་ལུས་ཀྱི་མདུན་ཕྱོགས་རླུང་། རྒྱབ་ས། གཡོན་ཆུ་གཡས་མེའི་རང་བཞིན་ཕན་ཚུན་ཐད་ཀར་ཤེས་རབ་དང་ཐབས་ཀྱི་བདག་ཉིད་དོ། །དབུས་སུ་རི་རབ་ལྷུན་པོ་སྟོང་པའི་དཀྱིལ་འཁོར་གྱི་རང་བཞིན་ཅན་ཟླུམ་པོ་ཐིག་ལེའི་རྣམ་པ་ནི། རྡོ་རྗེ་མཆོག་གི་རང་བཞིན་ཤར་རླུང་ལྷོ་མེ་སོགས་ཀྱི་དཀྱིལ་འཁོར་རྣམས་ཀྱི་དབུས་སུ་སྟེ། དེ་ལྟར་གླིང་བཞི་རི་རབ་དང་བཅས་པ་ཁམས་ལྔ་རིགས་ལྔ་སྟེ་སྟོང་ཆེན་ཡི་གེ་ཡེ་ཤེས་ལྔའི་རང་བཞིན་ནོ། །གླིང་བཞི་ཡི་དཀྱིལ་འཁོར་བཞི་ནི་ས་ཡི་སྟེང་དུ་འདི་ལྟར་གྱེན་དུ་འཕགས་པའི་དཔང་ཚད་ནི་དཔག་ཚད་སྟོང་ཕྲག་རྣམས་ནི་རིམ་བཞིན་ཤར་གྱི་རི་སྟེ་བདུན་དང་། ལྷོའི་ཀླུ་སྟེ་བརྒྱད་དང་། བྱང་གི་གཟའ་སྟེ་དགུ་དང་། ནུབ་ཀྱི་ཕྱོགས་ཏེ་བཅུ་རྣམས་དག་ཏུ་འགྱུར་རོ། །འདིར་གླིང་བཞི་པོ་ལ་དཔག་ཚད་སྟོང་ཕྲག་བདུན་དང་བརྒྱད་སོགས་གསུངས་པ་འདིར། ས་སྟེང་དུ་གླིང་བཞི་རང་རང་གི་རྒྱ་ཚད་དུ་འདོད་པ་ནི་ཆུང་ཆེས་ནས་ཡུལ་
དྲུག་སོགས་མི་ཤོང་བའི་སྐྱོན་ཡོད་ལ། གླིང་བཅུ་གཉིས་པོ་བསིལ་རི་དང་ལན་ཚྭའི་རྒྱ་མཚོའི་བར་གྱི་ཚད་ཅན་དུ་འདྲ་བས་མི་འཐད་ཅིང་། ཡང་ཁ་ཅིག་གླིང་བཞི་པོའི་རྩ་བའི་དབང་གི་རིང་ཐུང་ལ་འདོད་པའང་མི་འཐད་དེ། གླིང་ཐམས་ཅད་ཀྱི་རྩ་བ་ཆུ་དཀྱིལ་ལ་ཟུག་པར་མཚུངས་པ་ལས། གླིང་འགའ་ཞིག་གི་རྩ་བ་ཆུ་དཀྱིལ་མ་རེག་པར་ཟད་པ་མི་སྲིད་དོ། །འགའ་ཞིག་སོ་སོའི་གླིང་གི་མཐའ་ནས་དབུས་སུ་དེ་ལྟར་མཐོ་ཟེར་ཀྱང་། དེ་ལྟ་ན་རྒྱ་གར་ཡུལ་དབུས་སུ་མཐའ་ཁོབ་པ་རྣམས་བགྲོད་མི་ནུས་པས་མི་འཐད་དོ། །ཡང་འགའ་ཞིག་གདེངས་ཅན་གྱི་གནས་ཀྱི་ཡ་མཐའ་ནས་གླིང་དེ་དག་གི་སའི་དབང་དེ་ལྟར་མཐོ་བར་འདོད་པ་ལྟར་ན། འཇིག་རྟེན་གྱི་ཁམས་ཀྱི་དཔང་འབུམ་བཞིར་བཤད་པ་ལས་དེ་དག་ལྷག་པར་འགྱུར་བས། དེས་ན་གླིང་སོ་སོའི་དབུས་ནས་ཚད་དེ་ཙམ་ཞིག་ཟླུམ་པོ་དང་ཟླ་ཕྱེད་སོགས་ཀྱི་རྣམ་པར་ཡོད་པ་ལ་བཤད་པ་འདུག་ཀྱང་། ཕལ་ཆེ་བས་ཚད་འདི་དག་ས་ཡི་སྟེང་དུ་གླིང་སོ་སོ་གྱེན་དུ་འཕགས་པའི་ཚད་ལ་བཞེད་པ་དེ་ལྟར་བྱས་ཀྱང་། འཇིག་རྟེན་གྱི་དཔང་ཚད་བཞི་འབུམ་དུ་གསུངས་པ་ལས་ལྷག་མི་དགོས་པ་འདྲ་སྟེ། དེ་དག་རི་རབ་ཀྱི་སྟེང་ལས་བརྒལ་བར་མཐོ་བ་མ་ཡིན་ལ། གླིང་སོ་སོའི་ས་ཡི་སྟེང་དུ་རི་རྣམས་གྱེན་དུ་མཐོ་ཡང་དེ་བཞི་འབུམ་ལས་ལྷག་པར་བརྩི་མི་དགོས་པ་བཞིན་དང་། ས་ཡི་སྟེང་དུ་དཔག་ཚད་སྟོང་ཕྲག་རྣམས་ནི་ཞེས་པས་གླིང་རྣམས་ས་སྟེང་དུ་འཕགས་ཚད་བྱས་ཀྱང་མི་འགྲིག་པ་མེད་པ་འདྲ་སྙམ་མོ། །རི་རབ་ལྷུན་པོ་ཡི་ནི་སྟེང་གི་རྒྱ་ལ་ཤར་ནུབ་དང་ལྷོ་བྱང་དུ་ཐད་ཀར་དང་། ས་གཞི་དག་གི་གནས་ལ་ཐད་ཀར་རྒྱར་རིམ་བཞིན་སྟེང་གི་ཞེང་ལ་དཔག་ཚད་རྣམས་ནི་སྟོང་ཕྲག་ནི་ལྔ་བཅུ་དང་། རྩ་བའི་ཞེང་ལ་བཅུ་དྲུག་དག་གོ་ཞེས་རི་རབ་ཀྱི་སྟེང་རྒྱ་ཆེ་ཞིང་རྩ་བ་ཕྲ་བའི་ཚད་དེ་ལྟ་བུ་ཡིན་ལ། དཔག་ཚད་སྟོང་ཕྲག་གཅིག་ནི་
རབ་མཆོག་ས་ཡི་གཞི་ལ་རི་རབ་ཀྱི་རྩ་བ་དཀྲིས་པ་ལྟ་བུའི་རྡོ་རྗེའི་ཁོར་ཡུག་དག་གི་ཞེང་ཡང་དག་པ་སྟེ། རི་རབ་རྩ་བ་གཅིག་པ་དེ་ཉིད་ལ་རྩེ་མོའི་རྭ་ལྔ་ཡོད་པ་ཞེས་བང་རིམ་བཞི་དང་། སྟེང་གི་རྩེ་མོ་བཅས་ལ་རྭའམ་རྩེ་མོ་ལྔ་པའི་ཐ་སྙད་བྱེད་ལ། རྩེ་མོའམ་རྭ་ནི་ལྔ་པོ་རྣམས་དེ་དག་སྟེང་ནས་སྟེང་དུ་བརྩེགས་པ་དང་། ས་གཞི་དག་གི་གནས་ལ་ཕྱོགས་ཐམས་ཅད་ཀུན་དུ་ནི་ཕྱིར་སོན་ཡོད་ཅིང་ཁོར་ཡུག་ཏུ་འཁོར་བ་དག་གོ། འདི་ལ་ཇོ་འགྱུར་ལས། སྟེང་གི་རྩེ་མོ་ལྔ་པོ་རྣམས་ནི་ས་གཞིའི་གནས་རྣམས་ལ་སྟེ་ཕྱོགས་ཀུན་དུ་ནི་ཁོར་ཡུག་གོ། ཞེས་གསུངས། རི་རབ་ཀྱི་ཁོར་ཡུག་དེ་ཡི་ཕྱི་རོལ་དུ་རྭ་བཞིའི་ཁང་སྐྱིབས་ཀྱི་གནས་སུ་ནང་གི་གླིང་དྲུག་དང་། མཚོ་དྲུག་དང་རི་དྲུག་སྟེ་དེ་རྣམས་ལས་ཁ་བའི་རི་དང་རི་རབ་ཀྱི་རྭ་བཞི་པ་ཕྱིར་གྱེད་པ་དག་ཕྱི་མཐའ་མཉམ་པའོ། །རི་རབ་ལྷུན་པོ་དེ་ཡི་ཕྱི་རོལ་དུ་ནང་དང་ཕྱིའི་གླིང་བདུན་དང་། རི་བོ་བདུན་པོ་དག་དང་ཆུ་གཏེར་བདུན་པོ་རྣམས་ཏེ་མཚོ་བདུན་པ་ལན་ཚའི་རྒྱ་མཚོའི་མཐར་ཕྱོགས་རྣམས་ཀུན་ཏུ་མེ་དང་ང་གི་དཀྱིལ་འཁོར་གྱི་ཟླུམ་པོར་བསྐོར་བའོ། ནང་གི་སྤྲང་རྩི་ལ་སོགས་པའི་ཆུ་གཏེར་དྲུག་པོ་ཐམས་ཅད་དག་ཀྱང་ཟླ་བ་ཟླ་བ་གཅིག་སྟེ་བརྒྱ་བཅུ་གཅིག་གིས་དམན་པའི་སྟོང་ཕྲག་རེ་རེ་སྟེ། དཔག་ཚད་བརྒྱད་བརྒྱ་དང་བརྒྱད་ཅུ་རྩ་དགུའི་ཞེང་གི་ཚད་ཅན་ནོ། །དེ་བཞིན་དུ་ནང་གི་གླིང་དྲུག་པོ་རྣམས་དང་ནི་རི་ཡི་རྒྱུད་ཁོར་ཡུག་ཏུ་འཁོར་བ་མཆོག་རྣམས་དག་ཀྱང་ཚད་དེ་འདྲ་སྟེ་ནང་གི་རི་མཚོ་གླིང་གསུམ་བཅོ་བརྒྱད་པོ་ཀུན་ཚད་མཉམ་མོ། །དེའི་ཕྱིར་གོང་བཤད་བརྒྱ་བཅུ་གཅིག་གིས་དམན་པ་དེ་ལྟའི་སྟོང་ཕྲག་གི་ཚད་ཅན་ནོ། །ཞེས་སོ། །ཚིག་རྐང་འདི། ཇོ་འགྱུར་ལས། གླིང་དང་རི་རྒྱུད་མཆོག་རྣམས་དག་ཀྱང་དེ་ལྟའི་སྟོང་ཕྲག་རྣམས་ཏེ་ཉི་ཤུ་རྩ་ལྔ་ནི། །ཞེས་གསུངས། འདིར་ནང་གི་རི་གླིང་མཚོའི་ཚད་འདི་ནི་རགས་པའི་རྣམ་གཞག་རྩིང་པོའི་ཚད་མདོར་བསྡུས་སུ་བརྗོད་པ་སྟེ།
ཞིབ་ཏུ་ན་ནང་གླིང་གི་ས་ཁྱོན་དཔག་ཚད་སྟོང་ཕྲག་བཅུ་དྲུག་ལ་བཅོ་བརྒྱད་ཀྱིས་བགོས་པས་བརྒྱད་བརྒྱ་དང་གྱ་བརྒྱད། ལྷག་མ་བཅུ་དྲུག་པོ་བཞིས་བསྒྱུར་ལ་བཅོ་བརྒྱད་ཀྱིས་ཐོབ་པ་རྒྱང་གྲགས་གསུམ། ལྷག་མ་བཅུ་ཡོད་པ་ཉིས་སྟོང་གིས་བསྒྱུར་ཐོབ་གཞུ་འདོམས་སྟོང་བརྒྱ་བཅུ་གཅིག་ལྷག་མ་གཉིས་ལུས་པ་བཞིས་བསྒྱུར་བ་བཅོ་བརྒྱད་ཀྱིས་མ་ཐོབ་པས་ཁྲུ་མེད་ལ། བརྒྱད་པོ་དེ་ཉེར་བཞིས་བསྒྱུར་ཐོབ་སོར་མོ་བཅུ། ལྷག་སོར་བཅུ་གཉིས་པོ་བརྒྱད་ཀྱིས་བསྒྱུར་ཐོབ་ནས་ལྔ། ལྷག་མ་ནས་དྲུག་ཡོད་པ་བཅོ་བརྒྱད་ཀྱི་ཆར་ཕྱེ་བས་ནས་གཅིག་གི་སུམ་ཆ་རེ་ཐོབ་པ་ནི་ཞིབ་པར་གཏན་ལ་ཕབ་པ་ཡིན་ནོ། །དཔག་ཚད་སྟོང་ཕྲག་ཉི་ཤུ་རྩ་ལྔ་ནི་འཛམ་བུའི་གླིང་ཆེན་པོ་དག་གི་ས་གཞི་ཡངས་པ་དག་གི་ཚད་དང་དེའི་མཐར་ཕྱོགས་ཐམས་ཅད་དུ་འཁོར་བ་ལན་ཚྭའི་ཆུ་ཡི་གཏེར་ནི་ཁ་ཞེང་འབུམ་ཕྲག་ཕྱེད་ཀྱི་ཚད་ཡིན་ཏེ། སྲིད་པ་གསུམ་པོ་འདེགས་ཤིང་འཛིན་པ་ཡི་ནི་དཀྱིལ་འཁོར་བཞིའི་མཐའ་མ་ན་གནས་པ་དག་གི་མེ་དཀྱིལ་དང་ང་གི་ཚད་དག་ཀྱང་ཞེང་དུ་ཆུ་དེ་བཞིན་འབུམ་གྱི་ཕྱེད་ཡིན་ནོ། །ཁ་ཅིག་འདིར་འཛིན་མ་ལ་འཛིན་པ་ཞེས་ཕོའི་རྟགས་སུ་བྱས་པའོ་ཟེར་ཀྱང་རྒྱ་དཔེའི་སྐྱོན་དེ་དེར་མ་ངེས་སོ་ཞེས་བཤད། དེ་ལྟར་ལྷུན་པོའི་རྩ་བའི་ཚངས་པའི་གནས་དབུས་ཐིག་དེ་ནས་ཕྱོགས་ཐམས་ཅད་དུ་དཔག་ཚད་སྟོང་ཕྲག་བརྒྱད་དང་དེ་སྟེང་ཁོར་ཡུག་གི་གཅིག་བསྣན་པས་དགུའོ། །དགུ་པོ་དེའི་ཕྱི་རོལ་ཕྱོགས་ཀུན་ཏུ་དཔག་ཚད་སྟོང་ཕྲག་བཅུ་དྲུག་གི་ས་ནི་གླིང་དྲུག་ལ་སོགས་པའི་སའོ། །དེའི་ཕྱི་རོལ་དུ་ལས་ཀྱི་ས་པའི་གནས་ཞེང་དུ་སྟོང་ཕྲག་ཉེར་ལྔ་དང་། དེའི་མཐར་ཆུ་མེ་རླུང་དཀྱིལ་གསུམ་འབུམ་ཕྲག་ཕྱེད་རེའི་ཞེང་དུ་མཉམ་པས་བསྐོར་བ་སྟེ། དེ་ལྟར་ན་ལྷུན་པོའི་དབུས་ཚངས་པའི་གནས་ནས་ཕྱོགས་ཐམས་ཅད་དུ་རླུང་དཀྱིལ་གྱི་མཐའི་བར་དུ་དཔག་ཚད་འབུམ་ཕྲག་གཉིས་རེ་ཡིན་ཏེ་གཡས་
སུ་གཉིས་གཡོན་དུ་གཉིས་ཡིན་ནོ། །ནང་དུ་ལུས་ལ་བྲང་ནི་ས་ཡི་དཀྱིལ་འཁོར་ཡིན་པས་བྲང་གི་དབུས་ནས་གཡས་སུ་ཕྱེད་དང་གཡོན་དུ་ཕྱེད་དུ་འགྱུར་རོ། །ལག་པ་གཉིས་ཀྱི་དཔུང་པ་ཆུའི་དཀྱིལ་འཁོར་རོ། །ཉེ་བའི་དཔུང་པ་སྟེ་ལག་ངར་ནི་མེའི་དཀྱིལ་འཁོར་རོ། །ནོར་བུ་འཆིང་བ་སྟེ་མཁྲིག་མ་ནས་ལག་པའི་རྩེ་མོའི་བར་ནི་རླུང་གི་དཀྱིལ་འཁོར་རོ། །དེ་ལྟར་འཇིག་རྟེན་ཁམས་དེའི་རི་རབ་ཀྱི་གཙུག་ཏོར་གྱི་དབུས་དྲང་པོ་ཚངས་པའི་ཡུལ་སའམ་ཚངས་པའི་གནས་སུ་བཅོམ་ལྡན་འདས་དུས་ཀྱི་འཁོར་ལོ་བཞུགས་ཏེ། ནང་དུ་ལུས་ལ་གཙུག་ཏོར་ནོར་བུ་ལའོ། །འགྲེལ་པ་འགར་ལྷུན་པོའི་སྟེང་དབུས་སུ་དུས་འཁོར་བཞུགས་པར་གསུངས་པ་བསྒོམ་པའི་དབང་དུ་བྱས་ཀྱི་དངོས་སུ་ཕྱི་འཇིག་རྟེན་གྱི་རི་རབ་སྟེང་དབུས་སུ་དུས་འཁོར་བཞུགས་པ་མི་འཐད་པར་བཤད་ཀྱང་། བསྒོམ་པའི་དུས་སུ་དུས་འཁོར་གྱི་དཀྱིལ་འཁོར་རི་རབ་སྟེང་དུ་བསྒོམ་པ་ལྟར། ཁམས་གསུམ་གྱི་གནས་སུ་སེམས་ཅན་གྱི་དོན་དུ་རི་རབ་སྟེང་དུ་དུས་ཀྱི་འཁོར་ལོའི་དཀྱིལ་འཁོར་དང་། ཞིང་དང་ཉེ་ཞིང་ལ་སོགས་པར་དཔའ་བོ་དང་རྣལ་འབྱོར་མ་རྣམས་བཞུགས་པར་གྱུར་ནའང་འགལ་བ་ག་ལ་ཡོད་དེ། སྒྲིབ་བྲལ་གྱི་སྐུས་གཞན་གོ་བཀག་པ་དང་། ཀུན་གྱིས་མཐོང་བར་ཐལ་བ་ནི་བསྒྲུབ་མི་ནུས་ལ། སངས་རྒྱས་ཀྱི་ཡེ་ཤེས་ཀྱི་སྐུ་འཇིག་རྟེན་གྱི་ཁམས་ན་མི་བཞུགས་པའང་བསྒྲུབ་མི་ནུས་སོ། །དུས་ཀྱི་འཁོར་ལོ་དེ་ཉིད་ཕུང་ཁམས་སྒྲིབ་བྲལ་གྱི་རྒྱལ་བ་མཆོག་བཅས་ཏེ་སངས་རྒྱས་ཐམས་ཅད་འདུས་ཤིང་གཅིག་ཏུ་འདྲེས་པར་གྱུར་པ་དང་། བྱང་སེམས་དང་ཚངས་པ་ཆེན་པོ་སོགས་ལྷ་ཡི་ཚོགས་ཀྱིས་ཡང་དག་པར་མཆོད་ཅིང་བསྟོད་པ་སྟེ། ལྷུན་པོ་ལ་ནི་གང་ཞིག་དམོད་པ་འགྲུབ་པའི་ཚིག་གི་མདའ་ཅན་ནི་ལྷའི་མིང་སྟེ། དེ་ལྟར་ཚིག་མདའི་ཚོགས་ཚངས་པ་སོགས་ཕྱོགས་སྐྱོང་བའི་ལྷ་རྣམས་དང་།
ས་གཞིའི་འོག་ན་གནས་པ་ཀླུ་རྣམས་དག་ནི་བྲམ་ཟེ་དང་རྒྱལ་རྗེ་དམངས་དང་གདོལ་པའི་རིགས་ལྔའོ། །དཔལ་ལྡན་ལྷུན་པོའི་ཕྱོགས་རྣམས་ཀུན་ཏུ་ས་ཡི་དཀྱིལ་འཁོར་ལ་སོན་པ་རླུང་མེ་ཆུ་སའི་དཀྱིལ་འཁོར་བཞིར་རང་བཞིན་གྱིས་གནས་པ་ཤར་གྱི་ལུས་འཕགས་དང་། ལྷོ་འཛམ་གླིང་ཆུང་ངུ་དང་། བྱང་སྒྲ་མི་སྙན་དང་། ནུབ་བ་ལང་སྤྱོད་དེ་ཕྱོགས་བཞི་ན་གནས་པ་འདི་རྣམས་ནི་གནས་བཅུ་གཉིས་ཀྱི་ནང་ནས་གནས་རྣམས་ཀུན་ཞེས་བྱ་བ་དང་། གླིང་དེ་དག་གི་མཚམས་བཞི་སྟེ། ཤར་དང་ལྷོའི་མཚམས་ནི་མེ་ཡི་ཕྱོགས་དང་། དེ་བཞིན་བདེན་བྲལ་ཏེ་སྲིན་པོ་དང་། དབང་ལྡན་དང་རླུང་གི་ཕྱོགས་ནི་ཉེ་བའི་གནས་ཡིན་ནོ། །དེ་བཞིན་དུ་ཞིང་དང་ཉེ་བའི་ཞིང་ནི་ལན་ཚྭའི་རྒྱ་མཚོའི་ཕྱེད་སྔ་མའི་ཕྱོགས་དང་མཚམས་སུ་ཤེས་པར་བྱའོ། །འདུས་པ་དང་ཉེ་བའི་འདུན་པ་དག་ནི་རྒྱ་མཚོའི་ཕྱེད་ཕྱི་མའི་ཕྱོགས་བཞི་དང་མཚམས་བཞི་ལ་གནས་པ་དང་དེ་བཞིན་དུ། འདུས་པ་ཅན་དང་ཉེ་བའི་འདུས་པ་ནི་མེའི་དཀྱིལ་འཁོར་གྱི་ཕྱེད་སྔ་མ་ལའོ། །རོ་ཡི་ཁང་པ་ཡིན་པས་རོ་ཁང་གི་གནས་དུར་ཁྲོད་ནི་མེ་དཀྱིལ་དང་རླུང་དཀྱིལ་ནི་མཚམས་ཀྱི་ས་དང་། མཐར་གནས་ཏེ་ཇི་ལྟར་ན་ཁང་པ་དང་ཉེ་བའི་ཁང་པ་ནི་མེ་དཀྱིལ་གྱི་ཕྱེད་ཕྱི་མར་རོ། །དུར་ཁྲོད་དང་ཉེ་བའི་དུར་ཁྲོད་ནི་རླུང་གི་དཀྱིལ་འཁོར་གྱི་ཕྱེད་སྔ་མ་ལའོ། །དུར་ཁྲོད་ཆེན་པོ་བརྒྱད་ནི། རླུང་གི་དཀྱིལ་འཁོར་གྱི་མཐའ་ལའོ། །འདིར་ཁང་པ་ཞེས་པ་འཐུང་གཅོད་དང་དོན་གཅིག་གོ། དུར་ཁྲོད་རྣམས་གཅིག་ཏུ་བརྩིས་ན་ཧེ་རུ་ཀའི་གནས་བཅུ་ཞེས་ཀྱང་བྱ་ལ། དུར་ཁྲོད་ཆེན་པོ་བརྒྱད་ཀྱང་ཉེ་བའི་དུར་ཁྲོད་ཀྱི་ཁོངས་སུ་བསྡུས་ཏེ། དེ་ལྟར་ཕྱི་རོལ་དུ་གནས་བཅུ་གཉིས་སུ་བསྟན་པ་ནི་དོན་གྱི་ངོ་བོས་བགྲོད་བྱ་ས་བཅུ་གཉིས་ཡིན་ལ། ནང་དུ་ལུས་ལ་རྐང་ལག་གི་ཚིགས་ཆེན་བཅུ་གཉིས་སོ། །ཕྱོགས་སྐྱོང་བ་རྣམས་ཀྱི་གནས་ནི་ལྷུན་པོའི་སྟེང་གི་ཤར་དུ་བརྒྱ་བྱིན། མེར་
ནི་མེ་ལྷ་དང་གཤིན་རྗེ་ཞེས་ལྷོ་ཕྱོགས་དང་བདེན་བྲལ་ཞེས་པ་སྲིན་པོའི་མིང་སྟེ་དེའི་ཕྱོགས་ལྷོ་ནུབ་དང་། ནུབ་ཕྱོགས་སུ་ནི་རིམ་པ་ལྟར་གཤིན་རྗེ་དང་སྲིན་པོ་དང་ཆུ་བདག་སྟེ་ཀླུའི་གཙོ་བོ་གནས་སོ། །དེ་བཞིན་ཕྱོགས་ཀྱི་བདག་པོའི་མིང་གིས་ཕྱོགས་ཉིད་བརྗོད་པ་རླུང་ནུབ་བྱང་དང་། ནོར་སྦྱིན་བྱང་དང་འཕྲོག་བྱེད་དབང་ཕྱུག་གི་ཕྱོགས་བྱང་ཤར་གྱི་ཆ་རྣམས་སུ་རིམ་བཞིན་རླུང་གི་ལྷ་དང་། གནོད་སྦྱིན་གྱི་རྒྱལ་པོ་དང་། དྲག་པོ་དབང་ཕྱུག་གམ། དབང་ལྡན་ཞེས་བྱ་བ་གནས་ཤིང་། སྟེང་གི་ཆ་དང་འོག་ཏུ་ཡང་། རིམ་བཞིན་ཚངས་པ་དང་ཁྱབ་འཇུག་གནས་སོ། །ཕྱོགས་སྐྱོང་བའི་གཙོ་བོ་དེ་རྣམས་ཀྱང་། མཚོན་ཆ་དང་ལྡན་པ། རང་རང་གི་འཁོར་གྱི་སྐྱེ་བོ་མང་པོ་དང་བཅས་པ་སོ་སོ་རང་རང་གི་ཕྱོགས་ནི་སྲུང་ཞིང་སྐྱོང་བ་སྟེ། དེ་ཐམས་ཅད་ཀྱི་གཙོ་བོ་གང་ཞིག་སྲིད་པ་གསུམ་གྱིས་མཆོད་ཅིང་བསྟོད་པ་ནི། ཕྱོགས་སྐྱོང་བ་དེ་དག་གི་དབུས་སུ་བཅོམ་ལྡན་འདས་དུས་ཀྱི་འཁོར་ལོ་གང་ཞིག་རྩ་དབུ་མར་རླུང་འགག་པས་ཐིག་ལེ་འཛག་མེད་དུ་འཆིང་བས་ལྷན་སྐྱེས་འགྱུར་མེད་ཡེ་ཤེས་ཀྱིས་ཕུང་པོ་ཐམས་ཅད་སྒྲིབ་བྲལ་དུ་སྐྱེད་པར་བྱེད་པས་ན་རྒྱལ་བ་མཆོག་གི་སྐྱེད་མཛད་གཞོམ་དུ་མེད་པ་རྡོ་རྗེའི་སྐུ་ཉིད་དུ་བཞུགས་པ་སྟེ། ནང་དུ་སྙིང་གའི་རྩ་བརྒྱད་དང་སྟེང་འོག་གི་ཆ་སྟེ་བཅུ་ཕྱོགས་སྐྱོང་བཅུའི་དབུས་སུ་འཁོར་ལོ་ལྔའི་ལྟེ་བར་དྭངས་མ་མི་ཤིགས་པའི་ཡེ་ཤེས་གཞོམ་དུ་མེད་པ་གནས་པའོ། །གནས་པ་བཅུ་གཅིག་པ་འཁོར་ལོས་སྒྱུར་བ་ཆེན་པོ་འབྱུང་བའི་ངོ་བོ་ཉིད་ཀྱིས་གནས་པ་ནི། ལྷུན་པོའི་རྒྱབ་ཀྱི་སོགས་ཚིགས་བཅད་ཉེར་གཉིས་དང་ཉེར་གསུམ་པ་གཉིས་ཀྱིས་བསྟན་ཏེ། འདིས་ལས་ཀྱིས་དུམ་བུ་བཅུ་གཉིས་སུ་དེ་བཞིན་གཤེགས་པའི་ཆོས་འཇུག་ཚུལ་བསྟན་པ་སྟེ། གང་ཞེ་ན་རི་རབ་ལྷུན་པོའི་རྒྱབ་སྟེ་ཕྱི་རོལ་ཉིད་ཀྱི་ཕྱོགས་ལས་ཀྱི་ས་དུམ་བུ་བཅུ་གཉིས་པོ་རྣམས་སུ་ནི་ས་གཞི་དག་ལ་ལྷ་མིན་ཀླ་ཀློ་རྣམས་ཀྱིས་རྒྱལ་བར་དཀའ་བ་
འཁོར་ལོ་ཅན་འཁོར་བར་འགྱུར་ཏེ། སའི་དུམ་བུ་བཅུ་གཉིས་པོ་གང་དུ་དེ་བཞིན་གཤེགས་པའི་ཆོས་ནི་རྣམ་པར་ཉམས་ཤིང་རྩོད་པའི་དུས་ཞེས་པ་སྐབས་འདིར་ཆོས་མ་ཡིན་པ་ལ་བརྗོད་ཅིང་ཆོས་མིན་དེ་འཇུག་པ་དེ་དང་དེར་ནི། ཆོས་ཀྱི་འཁོར་ལོ་ཅན་རབ་ཏུ་བགྲོད་པར་བྱེད་ཅིང་རིམ་པས་འཁོར་བར་བྱེད་དེ། ཆོས་མིན་འཛིན་པ་ཀླ་ཀློ༷་རྣམས་དང་ཀྱང་ཡིག་གིས་བསྡུས་པ་ལྷ་མིན་རྣམས་དང་བཅས་པ། འཁོར་ལོ་ཅན་དེས་གཡུལ་དུ་བཅོམ་སྟེ་སངས་རྒྱས་པ་རང་གི་ཆོས་ལ་དགོད་པ་ཉིད་བྱས་ནས་སླར་ཡང་མདུན་གྱི་ཕྱོགས་ཉིད་དུ་ཆོས་མིན་གཞན་འཇོམས་པའི་ཆེད་དུ་རྣམ་པར་རྒྱུའོ། །དེ་ལྟར་དུམ་བུ་སོ་སོར་ཆོས་དང་། ཆོས་མིན་དར་བའི་ཆ་ལས་བཏགས་པའི་དུས་བཞི་ནི་རྫོགས་ལྡན་དང་གསུམ་ལྡན་དང་གཉིས་ལྡན་དག་དང་རྩོད་པའི་དུས་ཞེས་པའི་མིང་ཅན་གྱི་བསྟན་པའི་དུས་བཞི་གཞན་ནི་ཞེས་བསྐལ་པ་རྫོགས་ལྡན་སོགས་ཀྱི་དུས་བཞི་ཆེན་པོ་ལས་གཞན་པ་དེ་ནི་ས་ཡི་རྩིབས་བཅུ་གཉིས་སུ་རིམ་པར་འཁོར་བ་བསྟན་པའི་འཕེལ་འགྲིབ་ཀྱི་དུས་ཀྱི་སྦྱོར་བ་དག་གིས་འབྱུང་བར་འགྱུར་ཏེ། ཇི་ལྟར་ཞེ་ན། སའི་དུམ་བུ་གང་དུ་ཆོས་མིན་ཀླ་ཀློ་འཇོམས་པའི་སྟོབས་དང་ལྡན་པ་ཆོས་ཀྱི་འཁོར་ལོ་ཅན་དེ་རབ་ཏུ་ཞུགས་པ་དེར་ནི་ཡང་དག་པའི་ཆོས་མ་ཉམས་པ་ཡོད་པའི་ཕྱིར། སངས་རྒྱས་ཀྱི་ལུང་དང་རྟོགས་པའི་བསྟན་པ་ཡོངས་སུ་རྫོགས་པའི་རྫོགས་ལྡན་གྱི་དུས་བགྲོད་པའམ་སླེབས་པ་ཉིད་དེ་ཆོས་ཀྱི་རྒྱལ་པོའི་རྒྱབ་ཏུ་སྟེ་དེས་བགྲོད་ཟིན་པའི་སའི་དུམ་བུ་གང་དུ་ལུང་རྟོགས་ཀྱི་ཆོས་ཀྱི་བསྟན་པ་ཡོངས་རྫོགས་ཀྱི་ཆ་བཞི་ཡི་རྐང་པ་གཅིག་མེད་པའི་སུམ་ལྡན་གྱི་དུས་ཞེས་བྱ་བ་དང་། རྩོད་པའི་དུས་ཆོས་ཡང་དག་པའི་རྐང་པ་བཞི་ཀ་ཅི་རིགས་ཉམས་པ་ཆོས་མིན་གྱི་དུས་ཀྱང་རྒྱལ་པོའི་མདུན་དག་ཏུ་སྟེ། དེར་ཆོས་ཀྱིས་མ་སླེབས་པའི་ཕྱིར་ད་གཟོད་འཁོར་ལོ་ཅན་གྱིས་གཞོམ་བྱར་འགྱུར་རོ། །རྩོད་དུས་དང་གསུམ་ལྡན་གཉིས་ཀྱི་བར་དུ་ཆོས་ཀྱི་རྐང་པ་
གསུམ་མ་རྫོགས་ལ་གཉིས་དང་ལྡན་པ་གཉིས་ལྡན་གྱི་དུས་བགྲོད་པ་ཡིན་ནོ། །དེ་ལྟར་ན་ལས་ཀྱི་ས་ཁྱིམ་གྱི་འཁོར་ལོ་རྩིབས་བཅུ་གཉིས་པ་ལ་སངས་རྒྱས་ཀྱི་ཆོས་འཇུག་པའི་ཡུལ་དེ་དག་ཏུ་སངས་རྒྱས་ཀྱི་བསྟན་པ་འཇུག་པ་དང་ནུབ་པའི་དབང་གིས་བཞག་པའི་ས་མཚམས་ཀྱི་དབྱེ་བས་དུས་བཞི་པོ་དེ་འཁོར་ཏེ་དུམ་བུ་གསུམ་རེ་དུས་རེ་རེས་ཁྱབ་པའི་ཚུལ་གྱིས་སོ། །འཁོར་ཚུལ་འདི་རིགས་ལྡན་དྲག་པོ་འཁོར་ལོ་ཅན་དངོས་དུམ་བུ་བཅུ་གཉིས་སུ་བྱོན་ཏེ་འཁོར་བ་དང་། དེ་དང་ཆ་འདྲ་སངས་རྒྱས་ཀྱི་བསྟན་པ་གླིང་བཅུ་གཉིས་སུ་འཁོར་བའི་ཚུལ་ལའང་བཤད་དུ་ཡོད་ན་ཡང་། རིགས་ལྡན་དྲག་པོ་འཁོར་ལོ་ཅན་དངོས་ལ་འཆད་པ་མང་ངོ་། །དེ་ལྟར་དུས་བཞི་པོ་དེ་རྣམས་དག་གི་ལོ་ཡི་ཚད་ནི་སྟོང་ཕྲག་ཉི་ཤུ་རྩ་གཅིག་རོ་སྟེ་དྲུག་བརྒྱ་དག་དང་བཅས་པ་སྟེ། མི་ལོ་ཉི་ཁྲི་ཆིག་སྟོང་དྲུག་བརྒྱ་ནི་གླིང་ཐམས་ཅད་ཀྱིའོ། །དུམ་བུ་རེ་རེའི་དུས་བཞི་པོ་རེ་རེ་དག་གི་ཚད་ནི་དུས་དང་མདའ་སྟེ་ལྔ་བཅུ་ང་བཞི་ཡིས་བསྒྱུར་བའི་མི་རྣམས་དག་གི་ལོ་བརྒྱ་གང་ཡིན་པའོ། །ཞེས་ལོ་ལྔ་སྟོང་བཞི་བརྒྱ་ཡིན་ནོ། །གནས་པ་བཅུ་གཉིས་པ་ཤིན་ཏུ་ཕྲ་བའི་དབུགས་སོགས་ཀྱིས་ཉིན་མོའི་ཚད་ལ་སོགས་པའི་ངོ་བོ་ཉིད་ཀྱིས་གནས་པ་ནི། ཕྲ་དབུགས་དྷྲུ་དང་སོགས་ཚིགས་བཅད་ཉེར་བཞི་པ་དང་ཉེར་ལྔ་པས་བསྟན་ཏེ། འདིས་ནི་དུས་ཀྱི་ཆ་ཇི་ལྟར་ཡིན་པ་བསྟན་ཏེ། དེ་ཡང་ཕྲ་དབུགས་དྷྲུ་དང་ཆུ་ཚོད་ཉིན་ཞག་དྷྲུ་དང་དུས་བཞི་དག་ནི་སྟོང་ཕྲག་ཉི་ཤུ་རྩ་གཅིག་དང་། དྲུག་བརྒྱ་རྣམས་ནི་ཞེས་པ་འཆད་འགྱུར་སོ་སོའི་ཉིན་ཞག་གཅིག་བརྩི་བའི་གཞི་ཡིན་ལ། དེ་རྣམས་རིམ་པས་ལུས་སྐྱེས་ཕྲ་མོ་དང་མི་དང་འབྱུང་པོ་ལྷ་དང་ལྷ་མིན་རྣམས་དང་ནི། ནུས་དང་གཙོ་བོའི་ཉིན་ཞག་གཅིག་གི་ཚད་ཡིན་པར་བཤད་དེ། དེའི་དོན་བཀྲོལ་ན་མིའི་དབུགས་གཅིག་ཉི་ཁྲི་ཆིག་སྟོང་དྲུག་བརྒྱར་ཕྱེ་བའི་ཆ་གཅིག་ནི་ཕྲ་མོའི་དབུགས་ཞེས་བྱ་སྡེ། མིའི་ལུས་སྐྱེས་
ཕྲ་མོ་རྣམས་ཀྱི་དབུགས་གཅིག་གོ། འདི་ལྟར་དབུགས་ཕྱིར་འབྱིན་པ་དང་ནང་དུ་འཇུག་པ་ཟུང་གཅིག་ལ་ཆ་དེ་ལྟར་ཕྱེ་བའོ། །ཕྲ་དབུགས་དྲུག་གིས་ལུས་སྐྱེས་སྲིན་བུའི་རིགས་ལ་སོགས་པ་དེ་དག་རང་རང་གི་ཆུ་སྲང་གཅིག་ཅེས་བྱའོ། །ཆུ་སྲང་དྲུག་ཅུ་ནི་ཆུ་ཚོད་དོ། །ཆུ་ཚོད་དྲུག་ཅུ་ནི་དེ་དག་གི་ཉིན་ཞག་གཅིག་གོ། དེ་ལ་ཕྲ་དབུགས་ཉི་ཁྲི་ཆིག་སྟོང་དྲུག་བརྒྱ་ཡོད་པས་མིའི་དབུགས་གཅིག་ནི་དེ་དག་གི་ཞག་གཅིག་གོ། མི་རྣམས་ནི་རང་རང་གི་དབུགས་ཉི་ཁྲི་ཆིག་སྟོང་དྲུག་བརྒྱས་ཞག་གཅིག་ཡིན་པ་ཡོངས་སུ་གྲགས་པ་བཞིན་ནོ། །དྷྲུ་ཞེས་པ་མིའི་དབུགས་སུམ་ཅུ་ལ་དབུགས་གཅིག་ཏུ་བྱས་པའི་མིང་སྟེ། དེ་འདྲ་བའི་དབུགས་དྲུག་ལ་ཆུ་སྲང་སོགས་བྱས་པའི་ཞག་གཅིག་ནི་མིའི་ཞག་སུམ་ཅུ་ཡིན་པས་འབྱུང་པོ་སྟེ་ཡི་དྭགས་མཚུན་རྣམས་ཀྱི་ཞག་གཅིག་ཡིན་ལ་དེ་ཡང་མི་རྣམས་ཀྱི་ནག་ཕྱོགས་ཀྱི་ཞག་བཅོ་ལྔ་དེ་དག་གི་ཉིན་མོ་དང་། དཀར་ཕྱོགས་བཅོ་ལྔ་མཚན་མོར་བྱས་པའི་ཞག་གཅིག་གོ། འདི་ལ་ཡི་དྭགས་ཕ་མེས་དང་། སེར་སྣ་ཅན་ཡང་ཟེར་རོ། །ཆུ་ཚོད་གཅིག་ནི་མི་རྣམས་ཀྱི་དབུགས་སུམ་བརྒྱ་དྲུག་ཅུ་ཡིན་ལ་དེ་འདོད་ལྷ་ཚེ་ཐུང་བ་རྣམས་ཀྱི་དབུགས་གཅིག་ཡིན་པས་དེའི་ཚུལ་གྱིས་མི་ལོ་སུམ་བརྒྱ་དྲུག་ཅུ་ལ་འདོད་ལྷའི་ཞག་གཅིག་གོ། དེ་བཞིན་དུ་ཉིན་ཞག་ཅེས་པ་མི་རྣམས་ཀྱི་དབུགས་ཉི་ཁྲི་ཆིག་སྟོང་དྲུག་བརྒྱ་ལ་ལྷ་མིན་རྣམས་ཀྱི་དབུགས་གཅིག་གོ། སྟོད་འགྲེལ་དུ་ལྷ་རྣམས་ཀྱི་ལོ་ནི་ལྷ་མིན་གྱི་ལོ་དྲུག་ཅུའོ་ཞེས་སོ། །དྷྲུ་ཞེས་པ་མི་རྣམས་ཀྱི་ལོ་གཅིག་ནུས་པའི་དབུགས་གཅིག་གོ། ནུས་པ་ཞེས་གཟུགས་ཁམས་འོག་མིན་པར་སྐྱེས་པ་རྣམས་ཀྱིའོ། །འདི་སྐབས་འོག་མིན་པའི་དབུགས་ཞེས་པ་དངོས་སུ་དེ་དག་ལ་དབུགས་འབྱིན་རྡུབ་ཡོད་པས་མིན་ཡང་དབུགས་ཀྱི་ཚད་ལས་ཚེ་ཚད་བརྩི་བའི་ཐོབ་ཐང་བཤད་པ་ཡིན་ནོ། །ཞེས་སྔ་འགྲེལ་རྣམས་སུ་གསུངས་སོ། །དེ་
ལྟར་མི་ལོ་ཉི་ཁྲི་ཆིག་སྟོང་དྲུག་བརྒྱ་ནུས་པའི་ཞག་གཅིག་གོ། དུས་བཞི་ཞེས་པ་བསྟན་པའི་དུས་བཞིའི་ཚད་མི་ལོ་ཉི་ཁྲི་ཆིག་སྟོང་དྲུག་བརྒྱ་ནི་གཙོ་བོའི་དབུགས་གཅིག་གི་ཚད་དོ། །གཙོ་བོ་ཞེས་པ་སྲིད་རྩེ་བ་རྣམས་ཀྱིའོ། །དེ་ལྟར་དེ་དག་རང་རང་སོ་སོའི་དབུགས་དེ་ཉི་ཁྲི་ཆིག་སྟོང་དྲུག་བརྒྱ་ལ་སོ་སོའི་ཉིན་ཞག་གཅིག་ཏུ་བརྩི་བ་ཡིན་ནོ། །ལས་ཀྱི་ས་གཞི་དག་ལ་འཁོར་ལོ་ཅན་གྱི་དུས་བཞི་ནི་ནུས་པའི་ཞག་གཅིག་གི་ཚད་དང་གཙོ་བོའི་དབུགས་གཅིག་གི་ཚད་དུ་འཇུག་པ་ཡིན་ནོ། །ས་ཡི་དུམ་བུ་དུམ་བུར་ཞི་བའི་གོ་འཕང་སྟེར་བའི་ཆོས་སྟོན་པ་པོ་འཁོར་ལོ་ཅན་བགྲོད་པ་ནི་ནུས་པའི་ཉིན་ཞག་གཅིག་ལ་མི་ཤེས་པའི་མུན་པ་འཇོམས་པའི་ཉི་མ་བཅུ་གཉིས་སུ་གནས་སོ། །དེ་ལྟར་དུམ་བུ་སོ་སོར་བསོད་ནམས་དང་ཡེ་ཤེས་ཀྱི་ལམ་རབ་ཏུ་སྟོན་པ་ཆོས་ཀྱི་ཉིན་མོར་བྱེད་པ་ཆོས་ཀྱི་འཁོར་ལོས་སྒྱུར་བའི་ཉི་མ་བཅུ་གཉིས་སོ་སོ་རེ་འབྱུང་སྟེ། ནུས་དབུགས་སྟོང་དང་བརྒྱད་བརྒྱའམ་མི་ལོ་སྟོང་དང་བརྒྱད་བརྒྱར་དུམ་བུ་རེར་འཁོར་བསྒྱུར་རེ་རེ་བགྲོད་དོ། །དེ་ཕྱི་རོལ་དུ་ལོ་གཅིག་ལ་ཁྱིམ་བཅུ་གཉིས་སུ་བགྲོད་པའི་དབང་གིས་ཉི་མ་བཅུ་གཉིས་སུ་འགྱུར་རོ། །ནང་དུ་ལུས་ལ་ཞག་གཅིག་གི་བཅུ་གཉིས་ཆ་དབུགས་སྟོང་དང་བརྒྱད་བརྒྱ་སྟེ་ཆུ་ཚོད་ལྔའི་རང་བཞིན་དུས་སྦྱོར་བཅུ་གཉིས་སོ། །འདིར་ལུས་སྐྱེས་ལ་སོགས་པ་རྣམས་ཀྱི་ཉིན་ཞག་སོ་སོ་ལ་དཀར་ནག་གི་ཕྱོགས་ཉེར་བཞི་དང་། ཟླ་བ་མཐའ་དག་སྟེ་རིལ་པོ་བཅུ་གཉིས་དང་སྨིན་དྲུག་དང་ནི་མགོ་ཟླ་དགུན་སྟོད་བྱས་ཏེ་ཟླ་བ་གཉིས་རེ་རིམ་བཞིན་དགུན་སྨད་དཔྱིད་སོས་ཀ་དབྱར་སྟོན་ཏེ་དུས་དྲུག་དང་། དབོ་ནག་པ་ས་གའི་ཟླ་བ་གསུམ་དཔྱིད་དང་དེ་ནས་གསུམ་རེ་རིམ་པར་དབྱར་སྟོན་དགུན་ཏེ་དཔྱིད་ལ་སོགས་པའི་དུས་བཞི་དང་ནི། མེ་དུས་ཏེ་དབོ་ནག་པ་ས་ག་སྣྲོན་བཞི་དཔྱིད་དང་དེ་བཞིན་ཟླ་བ་བཞི་རེ་དབྱར་དང་དགུན་གྱི་སྟེ་དུས་གསུམ་དང་། ལྷོ་བྱང་གི་བགྲོད་པ་རྣམ་པ་གཉིས་དང་། རྒྱལ་པོ་
ཞེས་བོས་ནས། ལོ་ནི་མཐའ་དག་སྟེ་རིལ་པོ་འདི་ལ་རྗེས་སུ་ཉིན་ཞག་སུམ་བརྒྱ་དྲུག་ཅུ་དང་། དུས་སྦྱོར་བཞི་སྟོང་སུམ་བརྒྱ་ཉི་ཤུ་དང་། ཆུ་ཚོད་ཉི་ཁྲི་ཆིག་སྟོང་དྲུག་བརྒྱ་དག་དང་། ཆུ་ཡི་སྲངས་ཡ་གཅིག་དང་ཉིས་འབུམ་དགུ་ཁྲི་དྲུག་སྟོང་རྣམས་ཏེ་དེ་དྲུག་གིས་བསྒྱུར་བ་ནི་དབུགས་ཀྱི་གྲངས་སོ། །འདི་རྣམས་དེ་ལྟར་བགྲོད་པ་ལུས་སྐྱེས་ཕྲ་མོ་དང་མི་དང་འབྱུང་པོ་དང་ལྷ་དང་ལྷ་མིན་རྣམས་དང་ནི། ནུས་པ་འོག་མིན་པ་དང་གཙོ་བོའི་སྟེ་སྲིད་རྩེ་བའི་ཞག་རེ་ལ་སྟེ། ཕྱི་རོལ་དུ་སྲིད་པ་གསུམ་གྱི་གནས་འཇིག་རྟེན་དུ་ལོའི་ཡན་ལག་དང་། ནང་དུ་རང་རང་གི་ལུས་ཀྱི་དབུས་སུ་དེ་བཞིན་དུ་དབུགས་ཀྱི་དབྱེ་བས་བགྲོད་པ་ཅན་ནོ། །དེ་ཡང་ནང་དུ་དབུགས་དགུ་བརྒྱས་ཕྱོགས་སུ་འགྱུར་ཏེ། དེ་འདྲའི་ཕྱོགས་ཉེར་བཞིས་ཕྱི་རོལ་དུ་ཉིན་ཞག་གཅིག་དང་ནང་དུ་ལོ་གཅིག་ཏུ་འགྱུར་རོ། །འདི་ལ་ནང་དུ་ཉིན་ཞག་དང་ཕྱིར་ལོར་འགྱུར་ཞེས་འོག་གི་སྐབས་རྣམས་སུའང་དེ་ལྟར་སྦྱར་བ་ལ་ཡང་གོ་བ་ལེན་ཚུལ་དེ་ལྟ་བུ་ཡོད་མོད་ཀྱི་ནང་གི་དབུགས་དང་ཕྱིའི་ཆུ་ཚོད་ཆོས་མཐུན་བྱས་ནས་འདི་ལྟར་སྦྱར་བར་བྱའོ། །དབུགས་སྟོང་བརྒྱད་བརྒྱས་ནང་དུ་ཟླ་བ་སྟེ་ཟླ་བ་བཅུ་གཉིས་ཀྱིས་ཕྱིར་ཉིན་ཞག་དང་ནང་དུ་ལོར་འགྱུར་ཏེ་ནང་གི་ཟླ་བ་བཅུ་གཉིས་རྫོགས་པས་ལོར་བཏགས་པའོ། །དེ་བཞིན་དུ་དབུགས་སུམ་སྟོང་དྲུག་བརྒྱས་ཉིན་ཞག་གཅིག་གི་དྲུག་ཆ་ནང་གི་དུས་ཏེ་དུས་དྲུག་གིས་ཕྱིར་ཉིན་ཞག་གཅིག་དང་ནང་དུ་ལོར་འགྱུར་རོ། །དེ་བཞིན་དབུགས་ལྔ་སྟོང་བཞི་བརྒྱས་ནང་གི་དུས་བཞི་ཡི་དུས་གཅིག་ཏུ་འགྱུར་ཏེ། དུས་བཞིས་ཕྱིར་ཉིན་ཞག་དང་ནང་དུ་ལོར་འགྱུར་རོ། །དབུགས་བདུན་སྟོང་ཉིས་བརྒྱས་ནང་གི་དུས་གསུམ་གྱི་དུས་གཅིག་ཏུ་འགྱུར་ཏེ་དུས་གསུམ་གྱིས་ཉིན་ཞག་དང་ནང་དུ་ལོར་འགྱུར་རོ། །དབུགས་ཁྲི་བརྒྱད་བརྒྱས་ནང་གི་བགྲོད་པར་འགྱུར་ཏེ་བགྲོད་པ་གཉིས་ཀྱི་ཕྱིར་ཉིན་ཞག་དང་ནང་དུ་ལོར་འགྱུར་རོ། །དེ་ལྟར་ལུས་
སྐྱེས་ལ་སོགས་པ་རྣམས་ཀྱི་རང་རང་གི་ཚད་བཤད་པ་དེས་དབུགས་ཉི་ཁྲི་ཆིག་སྟོང་དྲུག་བརྒྱས་སོ་སོའི་ཉིན་ཞག་དང་ལོར་འགྱུར་རོ། །དེ་བཞིན་དབུགས་དྲུག་ཅུས་ནང་དུ་ཉིན་ཞག་གཅིག་ཏུ་འགྱུར་ཏེ། དེ་འདྲའི་ཉིན་ཞག་སུམ་བརྒྱ་དྲུག་ཅུས་ཕྱིར་ཉིན་ཞག་དང་ནང་དུ་ལོར་འགྱུར་རོ། །དབུགས་ལྔས་དུས་སྦྱོར་དུ་འགྱུར་ཏེ། དེ་འདྲའི་དུས་སྦྱོར་བཞི་སྟོང་སུམ་བརྒྱ་ཉི་ཤུས་ཕྱི་རོལ་དུ་ཉིན་ཞག་དང་ནང་དུ་ལོར་འགྱུར་རོ། །དེ་ལྟར་ནང་དུ་དབུགས་གཅིག་གིས་ཆུ་ཚོད་དུ་འགྱུར་རོ། །དེའི་ཕྱིར་དབུགས་གཅིག་གི་དྲུག་ཅུའི་ཆའི་ནང་གི་ཆུ་སྲང་དུ་འགྱུར་རོ། །དབུགས་གཅིག་གི་སུམ་བརྒྱ་དྲུག་ཅུའི་ཆ་གཅིག་ནང་གི་དེའི་དབུགས་སུ་འགྱུར་ཏེ། དེ་འདྲའི་ཆུ་ཚོད་ཉི་ཁྲི་ཆིག་སྟོང་དྲུག་བརྒྱས་ཕྱིར་ཉིན་ཞག་དང་ནང་དུ་ལོར་འགྱུར་རོ། །ཆུ་སྲང་ས་ཡ་གཅིག་དང་ཉིས་འབུམ་དགུ་ཁྲི་དྲུག་སྟོང་གིས་ཕྱིར་ཉིན་ཞག་དང་ནང་དུ་ལོར་འགྱུར་རོ། །དབུགས་ས་ཡ་བདུན་དང་བདུན་འབུམ་བདུན་ཁྲི་དྲུག་སྟོང་གིས་ཕྱིར་ཉིན་ཞག་དང་ནང་དུ་ལོར་འགྱུར་རོ། །འདིར་ནུས་པའི་དཀྱིལ་འཁོར་བཅུའི་དབུགས་གྲངས་སོ། །དེ་བཞིན་དུ་དབུགས་ཀྱི་གྲངས་དེ་ལྟ་བུ་བརྒྱས་བསྒྱུར་བས་དབུགས་དུང་ཕྱུར་བདུན་དང་བྱེ་བ་བདུན་དང་ས་ཡ་བདུན་དང་འབུམ་ཕྲག་དྲུག་གིས་ཕྱི་རོལ་དུ་ཉིན་ཞག་བརྒྱ་དང་ནང་དུ་ལོ་བརྒྱར་འགྱུར་རོ། །འདི་གཙོ་བོ་སྲིད་རྩེ་བའི་དཀྱིལ་འཁོར་བཅུའི་ཚད་ཀྱི་དབུགས་གྲངས་སོ། །དེ་ལྟར་ཚེ་ལོ་བརྒྱ་ཐུབ་པའི་དུས་སུ་མཆོག་གི་ཚེ་ལོ་བརྒྱ་ཐམ་པའོ་ཞེས་གྲགས་པ་འདི་ནི་སེམས་ཅན་རང་རང་གི་ལས་ཀྱི་དབང་གིས་ཚད་དེ་ལས་ལྷག་པ་དང་དམན་པར་ཡང་འགྱུར་ཚུལ་ནི་རྣལ་འབྱོར་པ་རྣམས་ཀྱི་རྣལ་འབྱོར་དང་དཀའ་ཐུབ་པ་རྣམས་ཀྱི་ཏིང་ངེ་འཛིན་གྱི་སྟོབས་ཀྱིས་བརྒྱ་ལས་ལྷག་པར་འགྱུར་ཏེ་དབུགས་གཅིག་ཆུ་ཚོད་ཀྱི་ཡུན་དུ་འཕེལ་བར་འགྱུར་ནས་འདོད་པའི་ལྷའི་ཚེ་དང་མཉམ་པར་འཚོ་བ་སོགས་སོ། །སེམས་ཅན་སྡིག་པ་ཅན་རྣམས་སྡིག་པའི་སྟོབས་ཀྱིས་ལོ་
བརྒྱ་ལས་དམན་པར་འགྱུར་རོ། །སྐྱེས་བུའི་ཚེ་ཚད་ལོ་བརྒྱ་ཞེས་པ་འདིར་ལུང་དང་རིགས་པ་དམ་པས་དེ་ལྟར་བརྒྱར་ངེས་པ་མེད་ཀྱང་། རིག་བྱེད་ལས་སྐྱེས་བུ་ཚེ་ལོ་བརྒྱ་པ། སྲོག་གི་དབང་པོ་བརྒྱ་པ་ཞེས་བརྗོད་དེ་སྲོག་ལོ་བརྒྱའི་ཡུན་དུ་འཚོ་བས་ན་འདིར་མཆོག་ལོ་བརྒྱ་འོ་ཞེས་སྤྲོས་པས་བརྗོད་དོ། །དབང་པོ་བརྒྱ་པ་ཞེས་པ་མིའི་དབང་པོ་འཁོར་ལོ་ཅན་ཚེ་ལོ་བརྒྱ་པ་ཞེས་འཆད་པའང་སྣང་ངོ་། །རྫོགས་ལྡན་གྱི་དུས་ཀྱི་མི་རྣམས་ཚེ་འཕེལ་བའི་དབང་གིས་བརྒྱ་ལས་ལྷག་ཅིང་། བསྐལ་པ་མར་འགྲིབ་ཀྱི་ཐ་མར་བརྒྱ་ལས་ཇེ་ཐུང་དུ་འགྱུར་རོ། །འདིར་ཐ་སྙད་ཀྱི་ངེས་པའི་དོན་དུ་སྐྱེས་བུའི་སྒྲས་ལུས་སྐྱེས་ཕྲ་མོ་སོགས་སེམས་ཅན་རང་རང་གི་ནང་དུ་ཉིན་ཞག་སོ་སོ་དང་། ཕྱིའི་ལོ་སོ་སོ་བརྗོད་དེ། ནང་དུ་རང་རང་གི་ཉིན་ཞག་བརྒྱ་དང་ཕྱི་རོལ་དུ་རང་རང་གི་ལོ་བརྒྱས་རིམ་བཞིན་ནང་དང་ཕྱི་རོལ་ལ་བརྒྱ་རེ་འགྲོ་བ་དེའི་དབང་དུ་བྱས་ནས་སྐྱེས་བུ་ཚེ་ལོ་བརྒྱ་པའི་ཐ་སྙད་བྱས་པའོ། །བརྒྱ་པོ་དེ་རྗེས་སླར་ཡང་དབུགས་ཀྱི་འཁོར་ལོ་བརྒྱ་པ་གཞན་ལ་འཇུག་པའི་ཕྱིར་སྐྱེས་བུ་ཚེ་ལོ་བརྒྱ་པ་ཞེས་བརྗོད་པའོ། །ནང་དུ་ཉིན་ཞག་བརྒྱ་ཕྲག་གཉིས་ཀྱི་དབུགས་ཀྱི་གྲངས་ཀྱིས་དུས་བཞི་ཆེན་པོའི་ལོ་གྲངས་རྣམས་སུ་འགྱུར་ཏེ། གང་ཞེ་ན་དབུགས་ས་ཡ་བཞི་དང་འབུམ་ཕྲག་གསུམ་དང་ཉི་ཁྲིའི་གྲངས་ཀྱིས་སོ། །ཕྱི་རོལ་དུ་ནི་ལོ་ས་ཡ་བཞི་དང་སུམ་འབུམ་ཉི་ཁྲིའི་གྲངས་དེས་ཕྱི་རོལ་གྱི་དུས་བཞི་ཆེན་པོའི་ཚད་རྫོགས་པར་འགྱུར་རོ། །དེ་ལྟར་ནང་དང་ཕྱིའི་དུས་བཞི་ཆེན་པོའི་འཁོར་ལོ་གཉིས་ཀ་ཡོངས་སུ་འཁོར་བས་ནང་དང་ཕྱིའི་དབང་དུ་བྱས་པའི་སྐྱེས་བུ་གཉིས་ཀའི་ཚེ་ཚད་ལས་ཟླ་བ་གཉིས་ལ་ནི་སོ་སོའི་དུས་དྲུག་གི་ནང་ཚན་དུས་གཅིག་གོ། དེའི་གྲངས་ནི་དུས་བཞི་ཆེན་པོའི་ནང་ནས་གསུམ་ལྡན་གྱི་ལོ་གྲངས་དང་མཉམ་པ་སྟེ་རྫོགས་ལྡན་སོགས་ཀྱི་རྐང་པ་རེ་རེ་ཞག་ཉི་ཤུའི་དབུགས་ཀྱི་གྲངས་དང་མཉམ་པའི་ལོ་ཡིན་པས་སོ། །དེའི་ཕྱིར་
རྫོགས་ལྡན་ལ་རྐང་པ་བཞི་ཡོད་པས། རྐང་པ་རེ་རེ་ཞག་ཉི་ཤུའི་དབུགས་གྲངས་དང་མཉམ་པའི་ལོ་ཡིན་པས། ཁྱོན་ཞག་བརྒྱད་ཅུའི་དབུགས་ཀྱི་གྲངས་ཀྱི་ལོ་དང་། དེ་བཞིན་ཟླ་བ་གཉིས་ཏེ་ཞག་དྲུག་ཅུའི་དབུགས་དང་གྲངས་མཉམ་ཀྱི་ལོ་ནི་སུམ་ལྡན་གྱི་ལོ་གྲངས་དང་། ཞག་བཞི་བཅུའི་དབུགས་དང་གྲངས་མཉམ་གྱི་ལོ་ཉིས་ལྡན་དང་རྩོད་ལྡན་ལ་རྐང་པ་གཅིག་ལས་མེད་པས། ཞག་ཉི་ཤུའི་དབུགས་ཀྱི་གྲངས་ཏེ་འོག་ཏུ་སྟོང་འཇུག་གི་རུས་བཞི་ཆེན་པོ་བཤད་པའི་སྐབས་སུའང་འཆད་པར་འགྱུར་རོ། །དེ་ཡང་གཙོ་བོའི་གཡོན་དང་གཡས་ཀྱི་དཀྱིལ་འཁོར་བཅུའི་ནང་གི་དཀྱིལ་འཁོར་རེ་རེའི་ཚད་དང་གྲངས་འདྲ་བ་སྟེ། ཞག་ཉི་ཤུའི་དབུགས་ཀྱི་གྲངས་དང་མཚུངས་པ་ལོ་བཞི་འབུམ་སུམ་ཁྲི་ཉིས་སྟོང་གིས་གཙོ་བོའི་དཀྱིལ་འཁོར་གཅིག་ལ་སྲོག་སྟེ་རླུང་འབབ་བོ། །དེ་བཞིན་གཡོན་དང་གཡས་ཀྱི་དཀྱིལ་འཁོར་ལྔ་རེ་ལྔ་རེ་རྣམས་ཏེ་དཀྱིལ་འཁོར་བཅུའི་སྲོག་འབབ་པ་རྫོགས་ནས་གཟའ་ཐམས་ཅད་རང་རང་གི་རྐང་པའམ་ལོངས་སྤྱོད་སྐྱེ་བའི་གནས་སྟོང་པ་ལ་འཇུག་སྟེ་ཟད་བྱེད་མེ་སྟག་གི་ལོའི་དཔྱིད་ར་བའི་གནམ་སྟོང་ལ་རྩིས་འཕྲོ་ཐམས་ཅད་སྟོང་པར་འགྱུར་རོ། །འདི་ནི་གོང་བསྟན་ཞག་ཉི་ཤུའི་དབུགས་གྲངས་ཀྱི་ལོ་དེ་བཅུས་བསྒྱུར་བས། ས་ཡ་བཞི་འབུམ་ཕྲག་གསུམ་ཁྲི་གཉིས་སུ་གྱུར་པ་ནི་དུས་བཞི་ཆེན་པོའི་ཚད་དེ། ཚད་འདི་དག་གིས་གཟའ་རྣམས་ཀྱི་རྩིས་འཕྲོ་སྟོང་པར་འཇུག་པ་ཡིན་ལ། དེ་ལྟར་ཕྱི་ནང་གི་དུས་བཞིའི་འཁོར་ལོ་རེ་རྫོགས་པ་དེའི་ཚེ་སྐྱེས་བུ་དེའི་སྲོག་དབུ་མར་ཞུགས་པའི་ཐ་སྙད་བྱེད་དོ། །དེ་ནས་ཡང་གཙོ་བོའི་དཀྱིལ་འཁོར་བཅུའི་རྒྱུ་བ་གཞན་ལ་འཇུག་པས་སྐྱེས་བུ་གཞན་དབུ་མ་ལས་ངེས་པར་འབྱུང་ཞེས་པ་སྟེ་འཆད་པར་འགྱུར་རོ། །དེ་བཞིན་གཟའི་རྩིས་འཕྲོའི་ངེས་པ་ཡང་སླར་སྐྱེ་བར་འགྱུར་རོ། །འདི་རྣམས་ས་རིས་ཀྱིས་རི་མོས་གཏན་ལ་ཕབ་སྟེ་ནང་དུ་དབུགས་ཀྱི་འཁོར་ལོ་ལས་བརྩམ་པའི་ཉིན་ཞག་དང་ཕྱོགས་ལ་སོགས་པ་མཐའ་དག་དང་དུས་
བཞི་རྫོགས་ཚུལ་དང་། ཕྱི་རོལ་དུ་ཞག་དང་ཕྱོགས་ལ་སོགས་པ་དུས་བཞིའི་བར་རྫོགས་ཚུལ་སྦྱར་ཏེ་ཤེས་པར་བྱའོ། །དེ་ནས་གནས་པ་བཅུ་གསུམ་པ་འཇམ་དཔལ་ལུང་བསྟན་པའི་ངོ་བོ་ཉིད་ཀྱིས་གནས་པ་ནི། ལོ་འདི་ནས་ནི་སོགས་ཚིགས་བཅད་ཉེར་དྲུག་པས་བསྟན་ཏེ། དེ་བཞིན་གཤེགས་པས་དུས་འཁོར་རྩ་རྒྱུད་བསྟན་པའི་ལོ་འདི་ནས་ནི་དྲུག་བརྒྱའི་ལོ་ཡིས་གསལ་བར་མི་ཡི་བདག་པོ་འཇམ་དཔལ་གྲགས་པ་ཞེས་བྱ་བ་ཆུ་བོ་ཤཱི་ཏའི་བྱང་ཤམ་བྷ་ལ་ཞེས་བྱ་བར་སེང་གེའི་ཁྲི་ལ་བཞུགས་ནས་ཆོས་སྟོན་པར་བྱེད་པ་ཡི་སྤྲུལ་པའི་སྐུ་འཛིན་པའམ་འབྱུང་བར་འགྱུར་རོ། །གྲགས་པ་ཞེས་པ་ལུང་གི་བརྗོད་པ་སྟེ་ཞེས་འགྲེལ་བར་གསུངས་པ་སྡེབ་སྦྱོར་གྱི་དབང་གིས་ཡ་ཤ་ལ་རྣམ་དབྱེ་ཐོབ་ཀྱང་མ་སྦྱར་བ་ཞེས་སྔ་འགྲེལ་རྣམས་སུ་བཤད། གྲགས་པས་བསྡུས་རྒྱུད་བསྟན་ཅིང་མྱ་ངན་ལས་འདས་པ་དེ་ནས་ཀླུ་ཡི་ལོ་བརྒྱ་ཞེས་པ་བརྒྱད་བརྒྱ་རྣམས་ཀྱིས་ངེས་པར་ཏེ་གདོན་མི་ཟ་བར་ཆུ་བོ་ཤཱི་ཏའི་ལྷོ་ཕྱོགས་མཁའི་ཡུལ་གྲོང་བྱེ་བས་བརྒྱན་པ་དེ་ཉིད་དུ་ཀླ་ཀློ༷འི་ཆོས་དག་རབ་ཏུ་འཇུག་པར་འགྱུར་ཏེ་ཀླ་ཀློ་སྟག་གཟིག་པ་རྣམས་ཀྱིས་ལྷ་མ་ཡིན་གྱི་ཆོས་རབ་ཏུ་འཇུག་པར་བྱེད་དོ། །དེ་ཡང་པད་དཀར་ཁྲིར་བཞུགས་པ་ནས་ཤིན་ཏུ་བཟང་པོའི་བར་རིགས་ལྡན་བརྒྱད་ཀྱི་ཁྲིར་བཞུགས་ཀྱི་ལོ་བརྒྱད་བརྒྱ་རྫོགས་པ་ནའོ། །ཀླ་ཀློ་འཇུག་པ་དེ་ཡི་དུས་སུ་འཛིན་མ་ས་གཞི་ལ་ནི་ཉུང་ངུའི་བྱེད་པ་ཡི་རྩིས་གསལ་བར་འགྱུར་བ་མི་རྣམས་དག་གིས་རིག་པར་བྱའོ། །ཉུང་དུ་ཞེས་པ་གྲུབ་མཐའི་རྩིས་ལྟར་ཞིབ་ཅིང་རྒྱས་པ་མིན་པར་རགས་པ་བརྩི་བའི་དོན་ཏོ། །དེའི་ཚེ་ཆུ་བོ་ཤི་ཏཱའི་ལྷོ་ཕྱོགས་མཁའི་ཡུལ་ལ་སོགས་པ་གང་དུ་སྔར་མུ་སྟེགས་པའི་རྩིས་ཀྱི་གྲུབ་པའི་མཐའ་འཛིན་པའི་ཡུལ་མཐའ་དག་གི་ས་གཞི་ལ་ནི་ཚངས་པ་པ་དང་། ཉི་མ་པ་དང་། གཅེར་བུ་པ་དང་། སྐྲ་ཅན་གྱི་སྐར་རྩིས་ཀྱི་གྲུབ་པའི་མཐའ་སྟེ་འདི་བཞི་རྣམ་པར་ཉམས་པ་ནི། གྲུབ་པའི་མཐའ་
རྣམས་རྣམ་པར་ཉམས་པ་ཞེས་གསུངས་ཏེ། ཤམ་བྷ་ལ་ལ་སོགས་པའི་ཡུལ་དུ་སངས་རྒྱས་པའི་རྩིས་ཀྱི་གྲུབ་མཐའ་རྣམ་པར་ཉམས་པ་ནི་མ་ཡིན་ནོ། །དེ་ལྟར་ཀླ་ཀློའི་ཆོས་ཀྱི་ལུགས་སམ་གྲུབ་མཐའ་ལ་མི་རྣམས་ཕལ་ཆེར་སྦྱོར་བའི་དུས་ཀྱི་སྦྱོར་བ་གྲུབ་མཐའ་ཞེས་པ་སྐར་རྩིས་ཀྱི་རྣམ་དག་གྲུབ་མཐའ་ལ་གོ་བར་བྱ་སྟེ་ཟུར་གྱིས་ཆོས་ཀྱི་གྲུབ་མཐའང་ངོ་། །མཆན། ལ་ནི་དེ་ལྟ་བུ་འབྱུང་བར་འགྱུར་རོ་ཞེས་རྣམ་དབྱེ་ལྔ་པའི་དོན་ལ་བདུན་པ་བྱས་པ་སྟེ། དོན་ལ་དུས་ཀྱི་སྦྱོར་བ་ལས་ཞེས་པར་འགྱུར་རོ། །གྲུབ་པའི་མཐའ་ཉམས་པ་དེའི་ཕྱིར་ཉུང་ངུའི་བྱེད་པ་གསལ་ཞེས་པ་མའི་ལ་དུའི་ཚིག་ལྟ་བུ་སྟེ། བྱིས་པ་ལ་འདིར་ཤོག་དང་ལ་དུ་སྦྱིན་ནོ་ཞེས་ཆང་པ་སྟོང་པ་བསྟན་ནས་འགུག་པ་ལྟར། མུ་སྟེགས་རྣམས་ཀྱི་ཉུང་ངུའི་བྱེད་པ་ནི་ཡང་དག་པར་གསལ་བ་མ་ཡིན་ཏེ། གང་གི་ཕྱིར་གྲུབ་མཐའ་ཉམས་ཞེས་པའི་ཚིག་ཟུར་གྱིས་སོ། །གལ་ཏེ་བྱེད་པ་ལ་སོགས་པ་གསལ་བ་ཡིན་ན་གྲུབ་མཐའི་རྩིས་ཉམས་པར་མི་འགྱུར་ཏེ། བྱེད་པས་ཀྱང་རེས་གཟའ་ཡང་དག་པར་འགྲུབ་པའམ་གཟའ་རྣམ་པར་དག་པ་ཤེས་པའི་ཕྱིར་རོ། །ཉི་མ་བྱང་དུ་ལྡོག་པའི་ཉིན་མོར་ཐུར་གྲིབ་བརྟག་པས་བྱེད་པའི་ཉི་མའི་ལོངས་སྤྱོད་མ་དག་པར་ཤེས་ནུས་ཤིང་། ཉི་མའི་ལོངས་སྤྱོད་མ་དག་པས་ཟླ་བའི་ལོངས་སྤྱོད་དང་། བཀྲ་ཤིས་ལ་སོགས་པ་གཟའ་རྣམས་ཀྱང་མི་དག་སྟེ། དེ་ཐམས་ཅད་ཉི་མའི་ལོངས་སྤྱོད་ལ་ལྟོས་ནས་དག་པར་བསྒྲུབ་དགོས་པའི་ཕྱིར་རོ། །གཟའི་ལོངས་སྤྱོད་མ་དག་ན་མུ་སྟེགས་པ་རྣམས་ཀྱི་གཟའི་འབྲས་བུ་སྐྱེས་རབས་སམ་ཚེ་རྩིས་ལ་སོགས་པ་བརྩི་བ་དོན་མེད་དེ། འདི་ལྟར་གཟའ་རྣམས་ཀྱི་དབྱངས་ཀྱི་དཀྱིལ་འཁོར་དང་རིགས་དང་ནུས་པ་བྱེད་ལས་ཞི་དྲག་སོགས་དང་དེ་ལ་སྐྱེས་པ་དང་ལས་བརྩམ་པའི་འབྲས་རྩིས་བསྟན་པ་དོན་མེད་པར་འགྱུར་ཏེ་གཟའ་མ་དག་པ་ལ་གཟའ་དེ་དང་དེར་བཟུང་བའི་འབྲས་བུ་འོང་བ་སྲིད་པ་མ་ཡིན་ནོ། །དེ་ཡང་མུ་སྟེགས་རྣམས་ཀྱིས་གཟའི་
ལོངས་སྤྱོད་རྣམ་པར་དག་པ་ཉིད་དུ་མི་གསལ་བ་བྱེད་རྩིས་འདི་ཅིའི་ཕྱིར་བཀོད་ཅེ་ན། མུ་སྟེགས་པའི་བྲམ་ཟེ་གདུག་པ་ཅན་རྣམས་ཀྱི་སྐར་རྩིས་ཀྱི་གྲུབ་པའི་མཐའ་ལས་གཟའ་རྣམས་ཀྱི་བགྲོད་པ་གསལ་བ་འདི་ལེགས་པར་བཀོད་ན། བྱིས་པ་དང་བུད་མེད་ཀྱིས་ཀྱང་བདེ་བླག་ཏུ་ཤེས་པར་གྱུར་ནས། བདག་ཅག་ལ་གུས་པར་མི་འགྱུར་བས། དེའི་ཕྱིར་སྐར་རྩིས་རྣམ་དག་གྲུབ་པའི་མཐའ་སྔར་ཡོད་རྣམས་སྦས་ཏེ། རྒྱུད་ཀྱི་བྱེད་པ་ལ་སོགས་པ་བྱའོ་ཞེས་གྲོས་བྱས་ནས་གྲུབ་པའི་མཐའ་རྣམས་སྦས་ཤིང་། རང་རང་གི་ལུགས་ཀྱི་རྒྱུད་ཀྱི་བྱེད་པ་སོགས་གསལ་བར་བྱས་ནས། བྱིས་པའི་སྐྱེ་བོ་རྣམས་ཀྱིས་ཤེས་དཀའ་བས་དེ་དག་སྐར་རྩིས་ལ་འཇུག་པ་ལས་རིང་དུ་འབྲོས་པར་བྱེད་པའི་ཉིན་ཞག་གི་ཚོགས་མང་པོ་དང་། བྱེད་པ་ལ་ཡང་དལ་མྱུར་སོགས་ཀྱི་སྤྲོས་པ་བྱས་སོ། །དེ་ལྟར་བྱེད་པ་ལ་གཟའི་ངེས་པ་མི་གསལ་ཞིང་དུས་ཅི་ཙམ་རིང་བ་བཞིན་སྐྱོན་གྱི་ཆ་འཕེལ་བས་ཉི་མའི་ལོངས་སྤྱོད་ཀྱང་མི་དག་ལ། དེའི་དབང་གིས་གཟའ་གཞན་ཀྱང་མི་དག་སྟེ། དེ་ལྟར་གདུག་པའི་མུ་སྟེགས་དེ་དག་གིས་གཞན་ལ་གནོད་པ་བྱས་པ་ཡིན་ནའང་། དུས་ཀྱི་དབང་གིས་དེ་འཛིན་པ་རྣམས་ཀྱིས་དེ་ལྟར་ཡིན་པ་མི་ཤེས་སོ། །དེའི་ཕྱིར་གཞན་ལ་གནོད་པ་བྱེད་པ་འདི་ལྟ་བུ་ལ་སོགས་པ་ཐམས་ཅད་དུ་འགལ་བ་ཡིན་པས་སྤངས་བར་བྱའོ། །བཅུ་བཞི་པ་གྲུབ་པའི་མཐའ་དང་བྱེད་པའི་སྐར་རྩིས་ཀྱི་ངོ་བོ་ཉིད་ཀྱིས་གནས་པ་ནི། མེ་མཁའ་རྒྱ་མཚོ་སོགས་ཚིགས་བཅད་ཉེར་བདུན་པ་ནས་རླུང་གཉིས་པའི་རྐང་པ་གསུམ་པའི་བར་གྱིས་བསྟན་ཏེ། གླིང་བཞིའི་འཇིག་རྟེན་འདིར་དུས་ཀྱི་ཆ་འཛིན་པ་གཟའ་སྐར་ཁྱིམ་གྱི་བགྲོད་པ་གཏན་ལ་ཕབ་ནས། དེ་ནང་དུ་རྩ་རླུང་ཐིག་ལེའི་འཕོ་བ་དང་སྦྱར་བས་ཕྱི་ནང་གནད་གཅིག་པའི་དག་པ་འཆར་བ་ལ་ངེས་པ་འདྲོངས་པའི་ཕྱིར་གཟའ་སྐར་གྱི་རྩིས་རྣམས་ཁམས་ལེ་འདིར་བརྗོད་བྱའི་གཙོ་བོར་བསྟན་པ་ཡིན་ལ། དེ་ཡང་བསྡུས་
པའི་རྒྱུད་འདིར་ཉུང་ངུའི་བྱེད་པ་བསྟན་ཅིང་རྩ་བའི་རྒྱུད་ལས་གསུངས་པའི་གྲུབ་པའི་མཐའི་རྩིས་གསལ་པོར་མ་གསུངས་པར་འགྲེལ་བཤད་ལ་ལྟོས་པར་མཛད་པ་ནི་བསྡུས་རྒྱུད་འདིར་དེ་གསལ་པོར་བསྟན་ན། མུ་སྟེགས་རྣམས་ཀྱིས་བསྡུས་རྒྱུད་མཐོང་ནས། ངེད་ཀྱི་བྱེད་རྩིས་ལའང་ཉི་མའི་ལོངས་སྤྱོད་དག་པ་ཡོད་དོ་ཞེས་རང་གི་བྱེད་པའི་ནང་དུ་བཀོད་པར་འགྱུར་བའི་ཕྱིར་དགོས་པའི་དབང་གིས་དེ་ལྟར་གསལ་བར་མ་མཛད་དོ། །སྐར་རྩིས་ཀྱི་སྐབས་འདིར་རྒྱུད་ཚིག་དངོས་བསྟན་ལྟར་ཉུང་ངུའི་ངག་གིས་བརྗོད་པར་བྱ་སྟེ། འགྲེལ་པའི་འབྲུ་མནན་ན་ཤིན་ཏུ་མང་ཞིང་ཚོགས་ཆེ་བར་འགྱུར་ཞིང་། བོད་དུའང་བྱེད་གྲུབ་གཉིས་ཀའི་ལུགས་ཀྱི་ཆོ་ག་ཡོད་ཅིང་། དེ་དག་གི་རི་མོའི་གོ་བའི་གནད་རྣམས་ཀྱང་དེ་དང་དེ་དག་ཏུ་གསལ་བའི་ཕྱིར་རོ། །དེ་ལ་ཡན་ལག་ལྔའི་རྩིས་བརྗོད་པ་ལ། ཐོག་མར་ལོ་གང་ནས་མགོ་བཟུང་སྟེ་བརྩི་བའི་ལོ་དག་གསུངས་ཏེ། དེ་བཞིན་གཤེགས་པས་རྒྱུད་བསྟན་པའི་ལོ་དེ་ནས་ལོ་དྲུག་བརྒྱ་ན་རིགས་ལྡན་འཇམ་དཔལ་གྱི་དུས་སོ། །དེ་ནས་བརྒྱད་བརྒྱ་ན་ཀླ་ཀློའི་དུས་སོ། །ཀླ་ཀློའི་དུས་དེ་ལ་བརྒྱ་གྱ་གཉིས་ཕྲི་བ་ནི་རིགས་ལྡན་རྒྱལ་དཀའ་གང་གིས་བརྩམ་པའི་བྱེད་རྩིས་ཀྱི་མགོ་ཟུག་པ་སྟོན་ཕྱིར་རིགས་ལྡན་བཅུ་པ་རྒྱ་མཚོ་རྣམ་རྒྱལ་ཁྲིར་ཕེབས་ནས་དེས་ལོ་བརྒྱ་དང་བརྒྱད་ཅུ་གྱ་གཉིས་སུ་ཆོས་བསྟན་པ་ཡིན་པས། རྒྱ་མཚོ་རྣམ་རྒྱལ་ཁྲིར་བཞུགས་ཀྱི་ལོ་དེ་རྣམས་ཕྲི་བ་ཡིན་ཏེ་ཅིའི་ཕྱིར་ན་རྒྱ་མཚོ་རྣམ་རྒྱལ་ཁྲིར་ཕེབས་པའི་ལོ་དེ་ལ་ཕྱི་རོལ་བ་ཀླ་ཀློའི་སྟོན་པ་བདུན་པས་བྱེད་པའི་རྩིས་མགོ་ཐོག་མར་ཟུག་པ་ཡིན་པའི་དེ་ནས་མགོ་བརྩམ་སྟེ་སྟོན་པ་ཡིན་ནོ། །དེའི་རྗེས་སུ་རིགས་ལྡན་རྒྱལ་དཀའ་ཁྲིར་ཕེབས་ཏེ་ལོ་ཉིས་བརྒྱ་ཉེར་གཅིག་ཏུ་ཆོས་བསྟན་པར་མཛད་དོ། །རྒྱ་མཚོ་རྣམ་རྒྱལ་ཁྲིར་ཕེབས་པའི་ལོ་དང་པོ་ཕྱི་རོལ་པའི་བྱེད་པའི་རྩིས་མགོ་ཟུག་པ་ནས་བརྩམ་སྟེ། རིགས་ལྡན་ཉི་མ་ཁྲིར་ཕེབ་པའི་ལོ་དེ་ལ་དུས་འཁོར་བསྡུས་རྒྱུད་འཕགས་པའི་ཡུལ་དུ་ཕེབས་པ་དང་། རབ་བྱུང་
དང་པོ་སོགས་བརྩི་བའི་ཐ་སྙད་ཀྱང་ཐོག་མར་ཆགས་པ་ཡིན་ལ། རབ་བྱུང་ལོའི་དང་པོར་བརྩི་བ་ནི་བྱེད་རྩིས་པ་རྣམས་ལ་ཡོངས་སུ་གྲགས་པ་སྟེ་གཟའི་དང་པོ་ཉི་མ་བཞིན་ནོ། །བྱེད་རྩིས་མགོ་ཟུག་པ་ནས་དེའི་བར་ལ་ལོ་བཞི་བརྒྱ་དང་གསུམ་ཡོད་པས་མེ་མཁའ་རྒྱ་མཚོ་ཞེས་དོན་དུ་རྒྱ་མཚོ་རྣམ་རྒྱལ་དང་རྒྱལ་དཀའི་ཁྲི་བཞུགས་ཀྱི་ལོ་གྲངས་བསྡོམ་པའོ། །དེས་ན་མེ་མཁའ་རྒྱ་མཚོ་རྣམས་ལ་ལོ་དྲུག་ཅུ་སྐོར་རེ་ལ་ཐོག་མ་མེ་ཡོས་རབ་བྱུང་ཞེས་པའི་མིང་ཅན་ཡིན་པས་དེ་ལ་སོགས་པ་རབ་བྱུང་སྐོར་དུ་འདས་པ་དང་། ད་ལྟ་རབ་བྱུང་དུ་ཡིན་པ་དེའི་ནང་གི་ལོ་སྔ་མ་ཡན་ཆད་ཀྱི་ལོ་དུ་འདས་པ་རྣམས་བསྲེས་པ་ནི་ཀླ་ཀློ༷འི་སྟོན་པ་བདུན་པ་སྦྲང་རྩིའི་བློ་གྲོས་ཀྱིས་བྱེད་རྩིས་བརྩམ་པའི་ལོར་ནི་རབ་ཏུ་གྲུབ་བོ། །ཀླ་ཀློའི་དབང་པོའི་སྟེ་བླ་མའམ་རྗེ་བོར་གྱུར་པ་སྦྲང་རྩིའི་བློ་གྲོས་ཀྱིས་བྱེད་རྩིས་ཀྱི་མགོ་བཟུང་བའི་ལོ་མེ་མཁའ་རྒྱ་མཚོ་ནི་ལག་པ་གདེངས་ཅན་ཟླ་བས་ཏེ་བརྒྱ་གྱ་གཉིས་ཀྱིས་དམན་པ་ནི་རིགས་ལྡན་རྒྱལ་དཀས་བྱེད་རྩིས་ཀྱི་རྩིས་མགོ་གང་ནས་བཟུང་བའི་ལོ་དག་སྟོན་པའོ། །རིགས་ལྡན་རྒྱལ་དཀས་བྱེད་རྩིས་མཛད་པ་དེ་བཞིན་རྒྱུད་འདིར་ཡང་མ་འོངས་པ་ན་འབྱུང་བའི་རྩིས་དེ་ལྟར་བསྟན་པའོ། །དེ་ལྟར་དམན་པའི་ལྷག་མ་དག་ཀྱང་ཟླ་དག་གི་ཆེད་དུ་ཉི་མས་བསྒྱུར་བ་ནི་ལོ་ཉིད་ཟླ་བའི་གྲངས་སུ་སྤེལ་བའོ། །དེ་ལ་ད་ལྟའི་ལོ་དེའི་ནག་པ་ལ་སོགས་པ་འདས་པའི་ཟླ་བ་བསྲེས་ཏེ་གནས་སྟེང་འོག་གཉིས་སུ་བྱས་ཏེ་བཞག་ལ། འོག་ཏུ་དུས་ཀྱིས་ཞེས་བཞིས་བསྒྱུར་བ་དེ་ལ་རྩིས་འཕྲོ་ཐིག་ལེ་ཡིན་པས་སྦྱིན་བྱ་མེད་དོ། །དེ་ཉིད་མཁའ་མེ་ཟླ་བས་ཏེ་བརྒྱ་དང་སུམ་ཅུས་རྣམ་པར་དབྱེ་བའམ། བགོས་པའི་རྙེད་པའམ་ཐོབ་ནོར་སྟེང་གི་གནས་དེ་ཉིད་དུ་བསྲེས་པ་དག་ནི། མི་ཡི་བདག་པོ་ཞེས་བོས་ཏེ། བརྩི་བའི་དུས་དེ་ཡན་ཆད་དུ་སྔར་ཟླ་བཤོལ་དུ་ཙམ་སོང་བ་དང་བཅས་པའི་ཟླ་བའི་ཚོགས་པ་རྣམ་པར་དག་པར་འགྱུར་རོ། །
འདིར་འོག་མ་མིག་བསྒྱུར་རེ་ལྔས་བགོས་པས་ཆོག་མོད་དེ་ཉིས་ལོག་བྱས་པའི་ཚེགས་ཅན་འདིས་ཅི་བྱ་ཟེར་ན་དོན་འདྲ་ཡང་སྡེབ་སྦྱོར་བསྒྲིག་པའི་ཆེད་ཡིན་ཞེས་བླ་མ་སྔ་མ་དག་གསུངས། རེས་གཟའི་དོན་དུ་དེ་ལྟ་བུའི་ཟླ་བ་དག་པ་སྟེང་འོག་ཏུ་གནས་གསུམ་བྱས་ཏེ་བཞག་པར་གྱུར་པའི་དབུས་མའི་ཕུང་པོ་དག་ལ་གང་གནས་པ་དེ་ཟླ་བ་གཅིག་གི་རྟག་ལོངས་རགས་པ་ལག་པ་རྩེ་མོ་ཅན་གྱིས་ཞེས་སུམ་ཅུ་རྩ་གཉིས་ཀྱིས་བསྒྱུར། རྩ་བ་སྟེ་གནས་འོག་མ་དག་ལ་དྲུག་གི་ཆས་བགོས་པའི་རྙེད་པ་དེ་ཡང་དབུས་མ་ལ་བུ་ལོན་དུ་འགྱུར་བས་དབུས་མ་ལ་ནི་དེས་སྦྱང་བར་བྱ་སྟེ། འོག་མ་དྲུག་གིས་བགོས་པའི་ཐོབ་ནོར་དེས་གནས་པར་མར་ཕྲི་བར་བྱ་བའོ།། དེའི་སྟེང་གཟའ་ཡི་གནས། འོག་ཆུ་ཚོད་ཀྱི་གནས་གཉིས་པོ་དག་ལས་ཞེས་བདུན་པའི་དོན་ལ་ལྔ་པ་འབྱུང་ཁུངས་ཀྱི་སྒྲར་མཛད་པ་སྟེ། མིག་དང་སུམ་ཅུའི་ནོར་ནི་བསྲེས་པ་ཞེས་པ་སྟེང་དུ་གཉིས་དང་། དེའི་འོག་མར་སུམ་ཅུ་ནི་ནོར་ཏེ་སྟེར་བྱའི་རྩིས་འཕྲོའོ། །དེ་ལྟར་གསལ་བར་རམ་ངེས་པར་བྱ་སྟེ་དྲུག་ཅུའི་ཆ་དག་གིས། རྙེད་པ་སྟེང་དུ་རབ་ཏུ་བསྲེས་ལ་དེ་ཉིད་ཐུབ་པ་མཆོག་རྣམས་ཏེ་བདུན་གྱི་གྲངས་དག་གིས་བཅད་པའི་ལྷག་མ་དག་ནི་རེས་ཀྱི་གཟའ་རུ་འགྱུར་རོ། །ཞེས་པ་ནི་རེས་གཟའི་སྒྲུབ་གཞི་དྷྲུ་བ་ཀའོ། །འདིར་དེ་དག་གི་གནད་ཅུང་ཟད་བརྗོད་ན། གྲུབ་མཐའི་ཚེས་ཀྱི་རྟག་ལོངས་ འདི་སུམ་ཅུས་བསྒྱུར་བ་འདི་ལ་བྱ་སླ་བའི་ཆེད་དུ་རགས་རྩིས་ཀྱི་འོག་མ་ལྔ་བཅུ་པོ་ཆུ་ཚོད་གཅིག་ཏུ་བྱས་ནས་གོང་མར་བསྲེས་པས་ཆུ་ཚོད་སོ་གཉིས་དེས་གོང་གི་ཟླ་དག་གི་ཕུང་པོ་དབུས་མ་བསྒྱུར་བ་དེའི་དོན་ཡིན་ནོ། །དེ་རགས་རྩིས་ཡིན་པའི་སྐྱོན་གྱིས་ཟླ་བ་རེ་ལ་ཆུ་སྲང་བཅུ་རེ་བསགས་པས་ཟླ་བ་དྲུག་ན་ཆུ་ཚོད་གཅིག་ལྷག་པ་དེ་བསལ་ཕྱིར་འོག་མར་དྲུག་གིས་ཐོབ་པས་སྟེང་མར་ཕྲི་བའོ། །འདིར་གཟའ་གནས་གཉིས་མ་ཡིན་ཡང་། གལ་ཏེ་ཆུ་སྲང་བྱེད་
འདོད་ན་འོག་མ་དྲུག་གིས་བགོས་ལྷག་དྲུག་ཅུས་བསྒྱུར་ནས་ཆུ་ཚོད་ནས་གཅིག་ཕབ་སྟེ་སྦྱང་ལྷག་ཆུ་སྲང་ངོ་། །དེ་ནས་གཟའི་རྐང་རྩིས་ཀྱི་དོན་དུ་རིལ་པོ་དང་ཆ་ཤས་བཟོ་བ་ནི། སླར་ཡང་ཟླ་དག་གནས་གཉིས་སུ་བྱས་པའི་འོག་མ་ལ་ཉི་ཟླ་སྟེ་བརྒྱ་དང་བཅུ་གཉིས་བསྲེས་པ་དག་ལས་དུས་དང་ཉི་མས་ཞེས་བརྒྱ་ཉེར་དྲུག་གིས་ཐོབ་པ་ལ་འབྱུང་བ་སྟེ་ལྔ་བསྲེས་པ་མཐའ་དག་ནི། དེ་ཡི་སྟེང་གི་ཕུང་པོར་སྦྱིན་ཏེ། དེ་ཡང་གནས་དང་པོ་དེ་ཐོག་མར་ལག་པས་བསྒྱུར་བ་ལའོ།དེ་ནས་དེ་ལ་བརྒྱད་དང་གཉིས་ཀྱིས་ཕྱེ་བ་ནི་ཉེར་བརྒྱད་ཀྱིས་བགོ་བའོ། །དེ་ནི་རིལ་པོའམ་ཆོགས་ཞེས་བྱའོ། །དུས་ཉིའི་ལྷག་མ་ནི་ཆ་ཤས་སོ། །དེ་ལ་འདིའི་གནད་ནི་གྲུབ་རྩིས་ལ་གཟའི་རྐང་རྩིས་ཟླ་དག་གནས་གཉིས་སྟེང་མིག་འོག་གཟུགས་བསྒྱུར་རྩིས་འཕྲོ་བསྲེ་སོ་སོའི་འཁོར་ལོས་བགོས་པའི་རིལ་ཆ་གྲུབ་པར་བྱས་ནས་རིལ་པོར་ཚེས་བསྲེས་བཅུ་བཞིས་བགོས་པས་ཟླ་རྐང་འཛིན་པ་དེའི་དོན་ཅན་ཏེ། གཟའ་བདུན་གྱི་རྐང་པ་རིལ་ཆ་ཡིན་ལ། ཚེས་ཞག་གཅིག་གི་བཞི་ཆ་ཆུ་ཚོད་བཅོ་ལྔ་ཅུང་མེད་པས་འཕེལ་འགྲིབ་ཆ་སྟེ། དོན་དུ་ཚེས་ཞག་རེ་ལ་ཉིན་ཞག་གི་སུམ་སྟོང་བདུན་བརྒྱ་བརྒྱད་ཅུའི་ཆ་ཤས་རེས་འཕེལ་འགྲིབ་བྱེད་པ་དེ་ཟླ་བའི་བར་དུ་བསགས་པ་རིལ་པོའོ། །དེས་ཟླ་རྐང་བཅུ་བཞི་པོ་ལན་གཉིས་སྤྱོད་པ་ཡིན་ཞིང་། འདིར་དེའི་དོན་གོང་གི་རི་མོས་གྲུབ་པའོ། །དེ་ནས་ཉི་སྐར་གྱི་ཆེད་དུ་ཟླ་བ་དག་པ་སྟེང་འོག་གནས་གསུམ་དུ་བཞག་པའི་དབུ་མ་སྟེ་བར་མ་དག་ནི་དབང་ཕྱུག་སྟེ་བཅུ་གཅིག་གིས་བསྒྱུར་ལ། གནས་འོག་མ་ལ་དགུ་དང་ཡོན་ཏན་རྣམས་ཀྱིས་ཆ་ཇི་ཐོབ་པར་ཞེས་གནས་འོག་མ་སུམ་ཅུ་རྩ་དགུས་བགོས་ཐོབ་ལ། གཉིས་བསྲེས་པ་དེས་དམན་པར་བྱས་པའི་དབུ་མར་ཆུ་ཚོད་དེ་དྲུག་ཅུ་དག་གིས་ཐོབ་པ་ནོར་ཏེ། ནོར་དེ་ཉིད་དེ་ཡི་སྟེང་གི་ཕུང་པོར་གཉིས་ཀྱིས་ནི། བསྒྱུར་ནས་བྱིན་ལ་སྐར་མས་༧བགོས་ལྷག་ནི། ཀྱེ་མི་ཡི་བདག་པོ་ཉི་མའི་སྐར་མ་དང་ལ་སོགས་
པའི་སྒྲས་ཟླ་རྐང་སོགས་ཀྱི་ལོངས་སྤྱོད་དག་ཏུ་ཡང་འགྱུར་རོ། །འདི་ཡི་གནད་ནི། ཉི་མའི་རྟག་ལོངས་ཧཱུྃ འདི་འདོད་ཆར་དགུ་ཅུང་མེད་ཀྱང་འཇུག་བདེ་ཕྱིར་རགས་རྩིས་སུ་དགུར་མཛད། དེ་འཇུག་བདེ་ཕྱིར་ཆ་ཤས་སུ་བཞི་བསྣན་ཏེ་རང་འཁོར་གྱིས་དྲིལ་བས་ཆུ་སྲང་ཉེར་གཉིས་སུ་འགྱུར། དེ་སུམ་ཅུས་བསྒྱུར་བས་ཆུ་ཚོད་བཅུ་གཅིག་འོང་པ་དེས་ཟླ་དག་གནས་བར་མ་བསྒྱུར་བ་ཡིན་ནོ། །ཚེས་རེར་ཆ་ཤས་བཞི་རེ་ལྷག་པས་ཟླ་བ་རེ་ན། ཆུ་སྲང་གཅིག་དང་དབུགས་གསུམ། ལྷག་པ་དེ་བསགས་པས་ཟླ་བ་སུམ་ཅུ་རྩ་དགུ་ན་ཆུ་ཚོད་གཅིག་ལྷག་པ་དེས་མ་དག་པ་འདོན་ཕྱིར་འོག་མ་སོ་དགུས་བགོས་པའི་ནོར་གྱིས་སྟེང་མར་ཕྲི་བས་སྐྱོན་བཏོན་པ་ཡིན་ནོ། །གཉིས་བསྲེས་པ་ནི་རྩིས་འཕྲོ་ལ། ཡོད་པས་ང་བརྒྱད་བྱིན་པའམ་གཉིས་ཕྲི་བ་དོན་འདྲ་བས་སོ། །རྙེད་ནོར་གཉིས་ཀྱིས་བསྒྱུར་བ་ནི། ཚེས་ཀྱི་རྟག་ལོངས་ཆུ་ཚོད་བཞི་སུམ་ཅུས་བསྒྱུར་བས་སྐར་མ་གཉིས་ལོངས་པ་དེའི་དོན་ཏོ། །ཉི་སྐར་འོག་ཏུ་ཆུ་སྲང་བྱེད་འདོད་ན་སོ་དགུའི་ལྷག་མ་དྲུག་ཅུས་བསྒྱུར། སོ་དགུས་ཐོབ་པའི་སྟེང་ནས་གཅིག་ཕབ་དྲུག་ཅུར་བྱས་པ་ལ་སྦྱང་ལྷག་ཆུ་སྲང་། སྔར་ལྷག་དྲུག་གིས་བསྒྱུར་སོ་དགུས་ཐོབ་པས་ཆུ་སྲང་ལས་གཅིག་ཕབ་དྲུག་ཅུར་བྱས་པར་སྦྱང་ལྷག་དབུགས། དེ་ལྷག་བཅུ་གསུམ་གྱིས་བསྒྱུར་སོ་དགུས་ཐོབ་པས་དབུགས་ལས་གཅིག་ཕབ་པ་བཅུ་གསུམ་བྱས་པར་སྦྱང་ལྷག་འདོད་ཆའོ། །བྱེད་སླ་རགས་རྩིས་འདི་ལ་ཆ་འོག་མའི་སྐྱོན་རྣམས་ཆུ་ཚོད་དུ་མ་ལོངས་པའི་བར་གྱིས་ཉེས་པ་ཆེན་པོ་མི་སྐྱེད་པས་རྒྱུད་ལས་གནས་གཉིས་མ་ལས་ཆུ་སྲང་མ་མཛད་དོ། །སླར་ཡང་རགས་རྩིས་ལས་ཀྱང་རགས་པའི་མགྱོགས་རྩིས་གང་ཞིག་ཟླ་བ་སྔ་མའི་དྷྲུ་པ་ལ་བྱིན་ན་ཕྱི་མའི་དྷྲུ་བ་འཆར་པའི་བྱ་སླ་བྱིས་པ་རྣམས་ཀྱིས་རྟོགས་ཕྱིར་གསུངས་པ། གཟའ་ལ་སྟེ་གཟའི་གནས་སུ་གཟའ་གཅིག་ནི་རབ་ཏུ་སྦྱིན་པར་བྱའོ། །མི་བདག་ཉིས་འགྱུར་ནི་སོ་གཉིས་ཏེ་དེ་ཆུ་ཚོད་རྣམས་ལ་སྦྱིན་
པར་བྱས་ཏེ། ཆུ་ཚོད་ཀྱི་འོག་ཏུ་ཚོགས་དག་ལ་ཡང་གཉིས་ཞེས་པ་རིལ་པོ་ལ་གཉིས་སྦྱིན་ཞིང་། ཉི་མའི་སྐར་མར་གཉིས་དང་ཆུ་ཚོད་དུ་དྲག་པོ་ནོར་དུ་རབ་གསལ་ཏེ་ངེས་པར་ཉི་མའི་ལོངས་སྤྱོད་དག་ལ་རབ་ཏུ་སྦྱིན། འདི་དག་ཟླ་བའི་ཞེས་ཟླ་བ་རེ་རེའི་དྷྲཱུ་བའི་ངེས་པར་འགྱུར་ཏེ་དེའི་རིམ་བས་སླར་ཡང་ཟླ་བ་ཟླ་བ་དག་ལ་སྔ་མ་སྔ་མར་རབ་ཏུ་སྦྱིན་པར་བྱས་པས་ཕྱི་མ་ཕྱི་མ་འཆར་བར་གསུངས་སོ་ཞེས་བཅོམ་ལྡན་འདས་ཀྱིས་འདི་ལྟར་བྱེད་རྩིས་མ་འོངས་པ་ལུང་བསྟན་པར་མཛད་དོ། །ད་ནི་ཟླ་བའི་ངེས་པ་ལས་ཚེས་ལ་སོགས་པའི་ལྔ་བསྡུས་ཀྱི་རྩིས་གསུངས་པ། ཚེས་གཅིག་གནས་སུམ་ཅུའི་བར་གྱི་ཚེས་གང་བརྩི་ཉིན་གྱི་གྲངས་རྣམས་སྦྱིན་དང་དོར་དང་སླར་ཡང་སྦྱིན་པ་དག་ནི་རིམ་པ་ལྟར་གཟའ་དང་ཆུ་ཚོད་དང་རྐང་པ་རྣམས་སུ་སྟེ། གཟའ་གནས་སུ་སྦྱིན་ཆུ་ཚོད་དུ་དོར་ཚོགས་ཀྱི་གནས་སུ་སླར་ཡང་སྦྱིན་ཏེ་ཟླ་རྐང་གི་དོན་དུའོ། །དེ་ནས་ཟླ་རྐང་བཟུང་བའི་དོན་དུ་ཚོགས་ཀྱི་སྟེ་རིལ་པོའི་ཆ་ལ་ཆུ་གཏེར་ཟླ་བས་ཞེས་བཅུ་བཞིས་བགོས་པའི་ཐོབ་ནོར་ཐིག་དང་གཉིས་དང་བཞི་མཉམ་པ་དང་། གཅིག་གསུམ། མི་མཉམ་ཐོབ་པ་དག་ལ་རིམ་པ་ལྟར་མཉམ་པར་སྦྱིན་པ་དང་། མི་མཉམ་པ་ལ་དོར་དགོས་པ་ཡིན་པར་ཤེས་པར་བྱ་ཞིང་སྦྱིན་དོར་བྱ་རྒྱུ་ནི་འཆད་འགྱུར་རྐང་སྡོམ་སོགས་ཡིན་ནོ། །བཅུ་བཞིས་བགོས་ལྷག་ནི་རྐང་པའི་དོན་ཞེས་པ་རྐང་པ་འཛིན་པའི་དོན་ཏོ། །འདིའི་གནད་ནི། གཟའ་གནས་སུ་ཚེས་གྲངས་གང་ཡིན་དེ་བྱིན་པས་རེས་གཟའ་དང་ཚེས་གྲངས་དེ་ཡུལ་ལོངས་མཉམ་མམ་ཞེ་ན་མ་ཡིན་ཏེ། ཟླ་བའི་ཡེ་ཤེས་ཆ་ལ་ཕྲ་རགས་གཉིས་ལས། རགས་པར་ཞག་གཅིག་ལ་ཆུ་ཚོད་དྲུག་ཅུའི་ཆ་ཆུ་ཚོད་རེ་རེ་དམན་པའི་ཕྱིར། ཆུ་ཚོད་ཀྱི་གནས་སུ་ཚེས་གྲངས་དོར་བས་ཆུ་ཚོད་ང་དགུ་བྱིན་པ་སྟེ། ཞིབ་པར་བརྩིས་ན་གཟའ་ལ་ཚེས་བྱིན་ཆུ་སྲང་ནས་ང་དྲུག་དང་། དབུགས་ལ་གཉིས་ཕྲི་ན་གཟའི་ཚེས་ལོངས། འདི་
བྱིན་པ་དང་དོན་འདྲ་བར་འགྱུར་མོད་ཀྱང་། རྒྱུད་ལས་དེ་ལྟར་མ་བསྟན་པས་ཟླ་བ་གཅིག་ལ་ཆུ་སྲང་བརྒྱ་དང་བཅུ་ཆད་ཀྱང་། ཟླ་བའི་ངེས་པའི་སྐབས་སུ་སྐྱོན་དེ་བཏོན་པས་སོས་པར་འགྱུར་བ་དང་། ཟླ་བའི་ངེས་པ་ལ་ལྷག་པོ་ཅུང་ཟད་ཡོད་པའི་གཉེན་པོ་དེ་ལྟར་མཛད་དོ། །རིལ་པོ་ནི་ཞག་རེ་རྐང་པ་རེ་འཕོ་བས་ན་ཚེས་གྲངས་དེ་བྱིན་པས་འཐུས་སོ། །དེ་ལ་རྐང་པ་བཟུང་ནས་རྐང་བསྡོམ་བྲི་ཚུལ་ནི། བཟུང་བྱ་ཟླ་རྐང་ནི། འབྱུང་བ་འབྱུང་བ་མདའ་དང་རིག་བྱེད་སོགས་འཆད་འགྱུར་རྐང་གནས་བདུན་རིམ་རིམ་མིན་དུ་བརྩེགས་པ་བཅུ་བཞི་པོ་དེ་ཡིན་ནོ། །འཛིན་བྱེད་ནི་བཅུ་བཞིས་བགོས་ལྷག་སྟོང་པ་ཐིག་ལེར་ཤར་བ་ལ་རྐང་བསྡོམ་གྱི་གནས་སུ་སྟོང་པ་རྣམ་དག་སྟེ་སྦྱིན་དོར་བྱ་རྒྱུ་མེད་པས་ཐིག་ལེབྲིའོ། །བཅུ་གསུམ་ཡོད་ན་ཕྱི་རྐང་དྲུག་པར་ཟིན་པས་སླར་སྤྱོད་རྒྱུ་ལྔ་དང་། ཟླ་བའི་རྐང་པར་ཞེས་གཅིག་ལྷག་ན་སྔ་རྐང་དང་པོའི་འོག་ཏུ་ཟིན་པས་སྤྱོད་ཟིན་ལྔ་རྐང་བསྡོམ་གྱི་གནས་སུ་བྲི་བར་བྱ་སྟེ། དེ་བཞིན་དུ་མིག་དང་ཉི་མ་དག་ལ་ཕྱོགས་ཏེ་བཅུ་དང་། བཅུ་གཅིག་མེ་ལ་ཚེས་ཞེས་བྱ་བ་སྟེ། བཅུ་དང་ཆུ་གཏེར་རྐང་པར་ཉི་ཤུར་གཅིག་གིས་དམན་པ་བཅུ་དགུའོ། །ལྔ་དང་བུག་པར་ཉི་ཤུ་རྩ་གཉིས། དུས་དང་ནོར་ལ་རྒྱལ་བ་དང་། ལྷག་བདུན་པར་གྱུར་ན་སྔ་ཕྱིའི་རྐང་མཚམས་སུ་ཟིན་པས། རྐང་བསྡོམས་ཉི་ཤུ་རྩ་ལྔ་སྟེ་དེ་ལྟར་བྲི་བར་བྱའོ། །ཟླ་བའི་རྐང་རྩིས་ཀྱིས་དག་པར་བྱས་པའི་ཚེས་ཀྱི་ལོངས་སྤྱོད་དེ་ལ། སླར་ཡང་འཆད་འགྱུར་ལྟར་ཉི་མའི་རྐང་པ་སྦྱིན་དོར་གྱི་རབ་ཏུ་དབྱེ་བས་གསལ་བར་བྱས་པའི་ཉི་མའི་རྐང་པ་དག་ནི། ཉི་མ་ལ་སྦྱིན་བྱ་ཡིན་ན་ཚེས་དེ་ལའང་ནོར་དུ་འགྱུར་ཏེ་སྦྱིན་པར་བྱ་བ་དང་། ཉི་མར་འབྲི་བྱེད་ཡིན་ན་འདི་ལའང་བུ་ལོན་དུ་འགྱུར་ཏེ་དོར་བར་འགྱུར་རོ། །དེ་ཡང་ཚེས་ཀྱི་ལོངས་སྤྱོད་དུ་གྱུར་པ་གཟུང་བྱ་ཟླ་བའི་རྐང་པ་ནི། འབྱུང་བ་དང་འབྱུང་བ་མདའ་དང་རིག་བྱེད་མེ་ལག་རི་བོང་ཅན་ནི་སྟེང་ནས་འོག་ཏུ་རིམ་པར་
བརྩེགས་པ་སྔ་མའི་སྟེ་སྔ་རྐང་གི་ཆ་དང་། གཞན་ཕྱི་རྐང་ལ་ཡང་དེ་དག་ལྡོག་སྟེ་གཅིག་ནས་ལྔའི་བར་དུ་བཀོད་པར་བྱའོ། །འདི་དག་ནི་ས་ལ་སྒྲ་དྲི་སོགས་ཡོན་ཏན་ལྔ་ཚང་བ་དེ་ཉིད་རྡུལ་མུན་སྙིང་སྟོབས་ཀྱི་དབྱེ་བས་ལན་གསུམ་དུ་ལྔ་ཉིད་བརྩེགས་པ་དང་། དེ་ནས་ཆུའི་ཡོན་ཏན་བཞི་སོགས་ནས། རླུང་ལ་རེག་སྒྲ་གཉིས་དང་ནམ་མཁའ་སྒྲ་གཅིག་པུའི་ཡོན་ཏན་གྱི་བར་དུ་ཤེས་པར་བྱའོ། །དེ་ལྟར་རྐང་བསྡོམ་བྲིས་པ་དང་སྦྱིན་པའམ་དོར་བར་བྱ་བ་གང་ཡིན་ཞེ་ན། ཚོགས་ཀྱི་ཆའམ་རིལ་པོ་ལ་ཆུ་གཏེར་ཟླ་བས་བགོས་ཚེ་མཉམ་དང་མི་མཉམ་པའི་ཐོབ་པ་ལ་ལྟོས་ནས་རིམ་པ་བཞིན་ཡང་དག་རྒྱུ་བ་རྣམས་ནི་སྦྱིན་པ་དང་དོར་བར་བྱ་བ་ཡིན་ནོ། །རྒྱུ་ཞིང་ཡོད་པས་ཞེས་པ་བཅུ་བཞིའི་ལྷག་མ་གང་ཡིན་པ་དེས་རྐང་པ་གང་དུ་ཟིན་པའི་མདུན་མ་དེ་ནི་རྒྱུ་ཞིང་ཡོད་པའམ། ཡང་དག་རྒྱུའི་ཆུ་ཚོད་ཅེས་བྱ་སྟེ་དེས་རིལ་པོའི་ལྷག་མའམ་སྔར་གྱི་ཆ་ཤས་ཉིད་བསྒྱུར་བར་བྱ་སྟེ། རྐང་འཛིན་སྟོང་ན་སྔ་རྐང་དང་པོ་དང་། རྐང་མཚམས་སུ་ཕྱི་རྐང་གི་གཅིག་དང་། བཅུ་གསུམ་པ་ལ་ཕྱི་རྐང་གི་ལྔ་ལྟ་བུ་དེ་ཡིས་སོ། །དེ་ལྟར་བསྒྱུར་བ་དེ་ལས་ནི་དུས་དང་ཉི་མས་ཆ་ཅི་ཙམ་ཐོབ་པ་དག་ཀྱང་སྦྱིན་དོར་བྱ་ཚུལ་སྔར་བཤད་དེ་བཞིན་ནོ། །དེས་གཟའ་ཕྱེད་དག་ཏུ་འགྱུར་རོ། །ཡང་དག་རྒྱུ་བའི་ཆུ་ཚོད་བཤད་མ་ཐག་པ་དུས་ཉིས་ཐོབ་པ་དེ་ཉིད་ལ་ནི་འཆད་འགྱུར་ཉི་མའི་རབ་ཏུ་དབྱེ་བས་ཉི་མའི་རྐང་པའི་ཡང་དག་རྒྱུའི་ཆུ་ཚོད་ཀྱང་ཉི་མ་ལྟར་སྦྱིན་དང་དོར་བར་འགྱུར་ཏེ། དེ་ལྟར་བྱིན་ནས་རང་འཁོར་དྲིལ་བ་དེ་རེས་གཟའ་དང་ཚེས་ཀྱི་ལོངས་སྤྱོད་རྣམ་དག་ཏུ་འགྱུར་རོ། །ད་ནི་ཉིན་ཞག་སོ་སོའི་ཉི་མའི་ལོངས་སྤྱོད་རྣམ་དག་གི་ཆེད་དུ་ཉི་མའི་རྐང་རྩིས་གསུངས་པ། གང་ཞིག་རིག་བྱེད་རྣམས་ཀྱིས་ཚེས་བསྒྱུར་ཞེས་པ་ཚེས་གྲངས་གང་ཡིན་པ་དེ་བཞིས་བསྒྱུར་པ་ནི་གསལ་བར་ནོར་དུ་འགྱུར་ཏེ། དེ་ལྟར་བསྒྱུར་བའི་ཚེས་གྲངས་དེ་ཡི་སུམ་ཆ་
དག་གིས་བསྲེས་པའོ་ཞེས་པ། བསྒྱུར་བའི་ཚེས་གྲངས་དེ་གནས་གཉིས་བྱས་པའི་གཅིག་ལ། གནས་གཅིག་གསུམ་གྱིས་བགོས་པའི་རྙེད་པ་བསྲེས་པར་བྱ་བའོ། །འདིའི་གནད་དོན་ནི། ཉི་མའི་རྟག་ལོངས་ཧཱུྃ འདི་ཆུ་ཚོད་བཞི་དང་ཆུ་སྲང་ཉི་ཤུར་བྱས་པ་སྟེ། དེ་ཡང་ཆུ་ཚོད་བཞི་ཚེས་རེ་རེ་བཞིན་དུ་སྦྱིན་པའི་དོན་དུ་ཚེས་གྲངས་བཞིས་བསྒྱུར་ནས་སྦྱིན་པ་སྟེ་འདི་ལྟར་ཚེས་གྲངས་གནས་གནས་གཉིས་བྱས་ལ་སྟེང་མ་བཞིས་བསྒྱུར་བ་ཉི་སྐར་ལོངས་སྤྱོད་དུ་སྟེར། ཡང་འོག་མ་བཞིས་བསྒྱུར་བ་ལ་གསུམ་གྱིས་བགོས་ཐོབ་ཀྱང་ཉི་མའི་དབྱུག་གུར་བསྲེ་བ་ནི་དེ་ཡི་སུམ་ཆ་བསྲེས་པ་སྟེ་དེ་ནི་ཆུ་ཚོད་གཅིག་གི་སུམ་ཆ་ཆུ་སྲང་ཉི་ཤུ་བསྲེས་པ་དང་དོན་འདྲའོ། །གསུམ་ལྷག་ཉི་ཤུས་བསྒྱུར་བ་ཆུ་ཚོད་དུ་མ་ལོང་བའི་ཆུ་སྲང་ཡིན་ནོ། །འོ་ན་ཞག་རེ་ལ་ཆུ་སྲང་གཉིས་སུ་ཆ་ཤས་བཞིས་ཆད་པ་མ་ཚང་བ་ཇི་ལྟར་བྱ་སྙམ་ན། ཟླ་བའི་ངེས་པའི་སྐབས་སུ་གནས་གསུམ་གྱི་དབུས་མ་དབང་ཕྱུག་གིས་བསྒྱུར་བས། ཆུ་ཚོད་བཞི་སྲང་ཉེར་གཉིས་རེ་ཚེས་རེ་རེ་ལ་ཆ་ཤས་བཞི་རེ་བཞི་རེ་ལྷག་བཅུག་པས་སྔ་མའི་ཆད་པ་སོས་ནས་ཅུང་ཞིག་དག་པར་འགྱུར་རོ། །ལོ་གཅིག་ཚེས་ཞག་སུམ་བརྒྱ་དོན་གཅིག་དེའི་ཟླ་བ་བཅུ་གཉིས་པོ་སྟེང་མིག་འོག་མ་བཅུ་གཅིག་གིས་བསྒྱུར་བ་དང་། ལྷག་མ་ཚེས་ཞག་བཅུ་གཅིག་པོའི་ཆུ་ཚོད་བཞི་དང་སྲང་ཉི་ཤུས་བསྒྱུར་ཏེ་དེ་རྣམས་བསྲེས་པས་ཆུ་སྲང་ཉི་ཤུ་ཆད་པའི་རྒྱུ་སྐར་འཁོར་ལོ་ལོངས་ལ་ཚེས་རེ་རེ་ལ་བཅུ་གསུམ་ཆ་བཞི་ལྷག་པ་བསགས་པས་ཞག་སུམ་བརྒྱ་དོན་གཅིག་ན་བཅུ་གསུམ་ཆ་གཉིས་ཀྱིས་ལྷག་པའི་ཆུ་སྲང་བཅུ་དགུ་འབྱུང་བས་ཆད་ལྷག་སྟོབས་ཕལ་ཆེར་མཚུངས་པར་འགྱུར་རོ། །དག་པར་བརྩི་ན་ཚེས་གྲངས་གནས་གསུམ་བྱས་པའི་སྟེང་བཞི་དང་བར་མ་ཉེར་གཉིས་ཀྱིས་བསྒྱུར་ཏེ་དབྱུག་སྲང་དུ་བྱིན། འོག་མར་གང་བྱུང་གིས་དབུགས་ལ་སྦྱང་བས་དག་སྟེ་ཉི་མ་ཕྱེད་དག་གོ། ཉི་མ་ཕྱེད་དག་གནས་
གཉིས་བྱས་པའི་ཕྱོགས་གཅིག་ལ་དུས་ཀྱི་རྒྱུ་སྐར་ཞེས་པ་དྲུག་དང་རྐང་པ་གསུམ་ནི་རྒྱུ་སྐར་གྱི་རྐང་པ་རེ་ཆུ་ཚོད་བཅོ་ལྔ་ཡིན་པས་རྐང་པ་གསུམ་ནི་ཆུ་ཚོད་ཞེ་ལྔ་སྟེ་དོན་ལ་སྐར་དྲུག་ཆུ་ཚོད་ཞེ་ལྔ་དང་བཅས་པ་ནི་བུ་ལོན་དག་ཡིན་པ་སྟེ་ལུག་ནས་ཉི་མ་རང་གི་སྐྱེས་ཁྱིམ་བར་དུ་སྦྱང་བའི་ཆེད་དུའོ། །དེའི་ཕྱིར་དེས་ཉི་མའི་ལོངས་སྤྱོད་ཀྱི་ནང་ངམ་དབུས་ནས་སྦྱང་བར་བྱ་ཞིང་། དེར་ཡང་མ་ལྡང་ན་འཁོར་ལོ་བསྣོན་པ་དང་འཁོར་ཕྱེད་པས་ལྷག་ན་འཁོར་ཕྱེད་དོར་བ་སོགས་བྱ་བ་ལྷག་མ་རྣམས་ནི་འཆད་འགྱུར་མིག་དམར་གྱི་རྐང་རྩིས་ཇི་བཞིན་དུ་བྱའོ། །རྐང་པ་ནི་རོ་དྲུག་དང་དུས་བཞི་དང་རི་བོང་ཅན་གསུམ་རྣམས་སྔ་རྐང་དང་བཟློག་པ་ཕྱི་རྐང་སྟེ་རྐང་གནས་དྲུག་པོ་དེ་ནི། ཉི་མའི་དལ་བའི་ལས་ལ་རྐང་པ་སྟེ། ཁྱིམ་རེ་ལ་རྐང་པ་རེའོ། །འཁོར་ཕྱེད་དོར་ལྷག་སྐར་གནས་དྲུག་ཅུས་བསྒྱུར་ཆུ་ཚོད་བཅུག་ལ་མདའ་ཡོན་ཟླ་བས་ཐོབ་པས་རྐང་པ་འཛིན་པར་བྱའོ། །རྐང་བཟུང་སྡུན་མ་ལོངས་སྤྱོད་བཞིན་པ་དེ་ཉིད་ཀྱིས་ནི། ཆུ་ཚོད་བསྒྱུར་ནས་མདའ་དང་ཡོན་ཏན་ཟླ་བས་ཆ་ཇི་ཙམ་ཐོབ་པ་དེ་རྐང་པ་སྡོམ་ལ་སྔ་རྐང་དུ་བྱིན་ཕྱི་རྐང་དུས་ཕྲི་བའི་ལོངས་སྤྱོད་དང་བཅས་པ་དེ་ནི། ཉི་མའི་བགྲོད་པ་འགྲོ་བའི་དབང་གིས་ཉི་མ་དལ་བ་ལ་ནི་འཁོར་ཕྱེད་དོར་བ་བྱང་བགྲོད་ལ་སྦྱིན་པ་དང་། མ་དོར་བ་ལྷོ་བགྲོད་ལ་དོར་དགོས་ཏེ། གཞན་དུ་དེ་ལྟར་མ་བྱས་ན་རྐང་པའི་ལོངས་སྤྱོད་དག་པ་ཡོད་པ་མ་ཡིན་ནོ། །འདིར་བྱེད་པ་ལ་བརྗོད་པའི་སྣོན་འབྲིད་གསུངས་པ། ཉི་མ་ཀརྐ་ཊའི་ཁྱིམ་ནས་ལྷོར་བགྲོད་རྩོམ་པས་ཀརྐ་ཊའི་ཕྱེད་དམ་ཕྱོགས་དང་པོ་ལ་ནི་དུས་ཞེས་པ་ཆུ་ཚོད་གསུམ་དང་། ཕྱོག་གཉིས་པར་རོ་སྟེ་དྲུག་གོ། དེ་བཞིན་དུ་སེང་གེ་ལ་སྤྲུལ་ཏེ་བརྒྱད་དང་བཅུ་དང་། བུ་མོར་འཕྲོག་བྱེད་དང་འཕྲོག་བྱེད་དེ་བཅུ་གཅིག་ལན་གཉིས་སོ། །སྲང་ལ་དྲག་པོ་ཕྱོགས་ཞེས་བཅུ་གཅིག་དང་བཅུའོ། །སྡིག་པ་ལ་ཀླུ་སྟེ་བརྒྱད་དང་དྲུག་གོ། གཞུ་ལ་མེ་དང་ནམ་མཁའ་ཐིག་གོ །
དེ་རྣམས་ལྷོ་བགྲོད་ཡིན་པས་བུ་ལོན་དུ་བྱས་ཏེ་ཕྲི་བར་བྱའོ། །དེ་ནས་ཆུ་སྲིན་སོགས་དྲུག་ལ་ཡར་བཟློག་ནས་སྦྱིན་པར་བྱ་སྟེ། ཆུ་སྲིན་གྱི་ཕྱོགས་སྔ་མར་སྟོང་ཕྱི་མར་མེ། བུམ་པའི་སྔ་མར་དྲུག་ཕྱི་མར་བརྒྱད་སོགས་ནས། འཁྲིག་པའི་སྔ་མར་དྲུག་ཕྱི་མར་གསུམ་བསྣོན་པའི་བར་དུ་ཤེས་པར་བྱ་སྟེ། དེ་ལྟ་བུའི་གྲངས་དག་ཀྱང་ལྷོ་བྱང་དུ་བགྲོད་པའི་མཐར་སྦྱར་ཏེ་བྱང་དུ་བགྲོད་པ་དང་། ལྷོ༷་རུ་བགྲོད་པ་དག་ལ་རིམ་བཞིན་ནོར་དང་བུ་ལོན་དག་ཏུ་འགྱུར་བ་ཡིན་ནོ། །ཟླ་བ་བཅུ་གཉིས་ལ་ཉི་ཁྱིམ་འཕོ་བའི་དབྱེ་བ་དག་ལས་ཕྱོགས་ཏེ་ཟླ་བ་ཕྱེད་ཀྱི་དབྱེ་བས་ཟླ་བ་དྲུག་ནི་ཉིན་མོར་བྱེད་པས་གོང་དུ་ཇི་སྐད་བཤད་པ་དེ་བཞིན་ལོངས་སྤྱོད་དོ། །འདི་དག་བྱེད་པའི་དབང་དུ་སྟེ་གྲུབ་པའི་མཐས་ནི་མ་ཡིན་ནོ། །དེ་ཡི་དོན་ནི་ཉི་མ་ཀརྐ་ཊ་ལ་གནས་པ་ནས་ལྷོ་བགྲོད་རྩོམ་པས་ཆུ་ཚོད་དྲུག་བུ་ལོན་དུ་འགྱུར་བ་དེ་ཉིད་ཕྱེད་མར་བགོས་ནས་ཕྱོགས་ཏེ་ཟླ་ཕྱེད་དང་པོའི་ལོངས་སྤྱོད་ལ་ཆུ་ཚོད་གསུམ། ཀརྚའི་ཕྱོགས་གཉིས་པ་ལ་དྲུག །དེ་བཞིན་སེང་གེའི་བཞི་ཕྱེད་དུ་བྱས་པ་གཉིས་ལ་སྔ་མའི་དྲུག་བསྣན་པས་བརྒྱད། ཕྱི་མར་བཅུ་གྲུབ་པ་དང་། དེ་བཞིན་བུ་མོ་ལ་ཆུ་ཚོད་སྔ་མ་གཅིག་གམ་གཉིས་བུ་ལོན་དུ་འགྱུར་བས་ཕྱེད་བྱས་པས་སྔ་ཕྱི་གཉིས་ཀར་བཅུ་གཅིག །དེ་ནས་རིམ་པས་ཕྱི་རྐང་ལ་སྲང་ལ་བུ་མོ་དང་ལོངས་སྤྱོད་མཚུངས་པས་ཕྱོགས་སྔ་མར་བཅུ་གཅིག །ཕྱི་མར་དེ་ལས་གཅིག་ཕྲི་བ་བཅུ། དེ་བཞིན་སྡིག་པ་སེང་གེ་དང་འདྲ་བས་ཕྱོགས་སྔ་མར་བཅུ་ལས་གཉིས་ཕྲི་བརྒྱད། ཕྱི་མར་དེ་ལ་སླར་ཡང་གཉིས་ཕྲི་དྲུག །དེ་ནས་གཞུ་ཀརྚ་དང་འདྲ་བས་དྲུག་བུ་ལོན་ཏེ་སྔ་མར་དྲུག་ལ་གསུམ་ཕྲི་གསུམ། ཕྱི་མར་གསུམ་ཡང་ཕྲི་བས་སྟོང་པ་སྣོན་འབྲི་མེད་པའོ། །ད་ནི་ཚེས་འཁྱུད་ཟླ་སྐར་བྱ་བའི་དོན་ཉི་མ་དག་པ་གནས་གཉིས་བཀོད་ལ་གཅིག་གི་སྐར་གནས་སུ་བྱིན་པའི་ཚེས་གྲངས་དག་ཀྱང་ཞེས་དང་པོ་ཉི་དག་གི་སྐར་གནས་སུ་ཚེས་གྲངས་གང་ཡིན་བྱིན་ལ། བྱིན་པའི་ཚེས་གྲངས་དེ་སྐར་གནས་ཀྱི་འོག་ཏུ་རོ་ཡིས་བསྒྱུར་བ་
ལ་དེ་ཉིན་རེས་ཀྱི་གཟའ་ཡི་ལོངས་སྤྱོད་ཚེས་ལོངས་བསྲེས་པ་དག་གིས་སྐར་མའི་ཆུ་ཚོད་ལ་བྲི་བའམ་དམན་པར་གྱུར་པ་ནི་རི་བོང་མཚན་མར་ཞེས་ཟླ་བའི་རེས་འགྲོགས་ཀྱི་ལོངས་སྤྱོད་དུ་འགྱུར་ཏེ་ཟླ་སྐར་རོ། །འདིའི་གནད་ནི།ཉི་དག་གི་སྐར་གནས་སུ་ཚེས་གྲངས་བརྩིས་ལ་སྦྱིན་པ་ནི་ཉི་མ་ལ་ཟླ་བའི་ལོངས་སྤྱོད་ཐུན་མོང་མིན་པ་ཤེས་པའི་ཆེད་དེ་དེ་ཡང་ཞིབ་པར་ཞག་རེ་བཞིན་ཟླ་ལོངས་ཆུ་ཚོད་ལྔ་བཅུ་ང་བཞིས་ལྷག་པ་ཡིན་ནའང་། འདིར་སྔ་མར་ཞག་རེ་བཞིན་ཆུ་ཚོད་དྲུག་ཅུ་ཡོད་པའི་དབང་དུ་བྱས་ཏེ་རགས་རྩིས་བྱ་སླ་བ་ཚེས་རེ་བཞིན་སྐར་མ་འགྲོ་བའི་དབང་ལྟར་ཚེས་གྲངས་སྦྱིན་པར་བྱའོ། །དེ་ལྟ་ན་ཆུ་ཚོད་དྲུག་གིས་མང་བའི་སྐྱོན་འདོན་དུ། སྐར་མའི་འོག་ཏུ་ཆུ་ཚོད་ཀྱི་གནས་ལ་ཚེས་གྲངས་དྲུག་གིས་བསྒྱུར་བས་ཕྲི་བས་དོན་འདྲ་བར་བྱས་པ་ཡིན་ནོ། །དྲུག་པོ་བསགས་པས་ཞག་བཅུས་སྐར་གནས་སུ་གཅིག་ལོངས་པའི་ཕྱིར་མཁའ་རོས་དྲིལ་ནས་སྐར་གནས་ལ་སྦྱང་བར་བྱའོ། །རེས་གཟའི་ལོངས་སྤྱོད་ཀྱིས་ཟླ་སྐར་གྱི་དབྱུག་གུ་ལ་སྦྱངས་པ་ནི་ཚེས་འཕོས་ནས་ནམ་ལངས་གོང་དུ་ཇི་ཙམ་སྤྱད་པ་རྟོགས་པའི་དོན་ཏེ། རེས་གཟའི་འོག་གི་ལོངས་སྤྱོད་དེ་དེ་རིང་གི་ནམ་ལོངས་པ་ནས་བརྩམས་ཏེ་ཚེས་དེ་ཇི་ཙམ་ཞིག་ན་རྫོགས་པའི་བར་གྱི་ཚེས་ཀྱི་ལོངས་སྤྱོད་ཡིན་པའི་ཕྱིར་ནའོ། །དེའི་ཕྱིར་གཟའ་ལོངས་དང་ཚེས་གྲངས་དྲུག་བསྒྱུར་བ་བསྲེས་ཏེ་དྲུག་ཅུར་ལོངས་ན་དྲིལ་བ་དེས་སྐར་གནས་དང་ཆུ་ཚོད་དུ་ཕྲི་བར་བྱ་ཞིང་སྐར་གནས་ཆུ་ཚོད་དུ་ཕྲི་བར་མ་འདང་ན་སྟེང་ནས་ཕབ་ལ་ཕྲི་བར་བྱའོ། །སྦྱོར་བ་བཤད་པ། ཀྱེ་མི་ཡི་བདག་པོ་ཉི་དག་དང་ཟླ་སྐར་གཉིས་བསྲེས་པ་ལ་ཆུ་ཚོད་དང་སྐར་མའི་འཁོར་ལོས་དྲིལ་བ་ནི་སྦྱོར་བའོ། །བྱེད་པ་དག་ནི་ཚེས་གང་ཡིན་པའི་གྲངས་ལ་མིག་གིས་བསྒྱུར་བ་ཟླ་བ་སྟེ་གཅིག་བྲལ་བའམ་ཕྲི་བ་གང་ཞིག་བདུན་གྱི་ཆ་ཡི་རྙེད་པ་དོར་བས་ཞེས་མདོར་ན་བདུན་གྱིས་བགོས་པའི་ལྷག་མ་ནི་ཚེས་དེའི་ཕྱི་ཆའི་བྱེད་པ་སྟེ་སྔ་བྱེད་དེ་ཡི་ཤུགས་
ཀྱིས་ཤེས་ཞིང་གཅིག་བྱུང་ན་གདབ་པ་ནས་ཐིག་བིཥྚི་བར་དུ་སྦྱར་ཏེ་ཚེས་གཅིག་གི་ཕྱེད་ཕྱི་མ་ནས་ཉེར་དགུའི་ཕྱེད་སྔ་མའི་བར་དུ་ལན་བཞིར་འཁོར་བ་པ་ནི་འཕོ་བའི་བྱེད་པ་བདུན་ནོ། །ཉེར་དགུའི་ཕྱི་མ་དང་གནམ་སྟོང་གི་སྔ་ཕྱི་གཉིས་ཀ་དང་། ཚེས་གཅིག་གི་སྔ་ཆ་བཞི་ལ་ཤ་ཀུ་ནི་ལ་སོགས་པ་བཞི་ལན་གཅིག་སྤྱོད་པ་ནི་རྟག་པའི་བྱེད་པ་བཞིའོ། །དེ་ལྟར་རེས་གཟའ་ཚེས་ཀྱི་ལོངས་སྤྱོད་དང་བཅས་པ་དང་། ཟླ་སྐར་དང་། ཉི་སྐར་དང་། སྦྱོར་བ་དང་། བྱེད་པ་ལྔ་པོ་འདི་ལ་ཡན་ལག་ལྔ་ཡི་རྩིས་ཞེས་བྱ་ཞིང་། འབྲས་རྩིས་ཀྱི་སྐབས་སུ་བླང་དོར་བྱ་བའི་གཞི་གཟའ་ཚེས་སྐར་སྦྱོར་བྱེད་པའི་ཡན་ལག་ལྔ་ཞེས་བགྲང་ངོ་། །དེ་ལ་རེས་ཀྱི་གཟའ་ནི་གཅིག་བྱུང་ན་ཉི་མ་ཡིན་པ་ནས་ཐིག་ལེ་སྤེན་པའི་བར་གྱི་བདུན་པོ། ཁོ་ན་སྟེ་དེ་ནི་ཉིན་ཞག་ལ་དབང་བའི་ཕྱིར་ད་ནང་ནམ་ལངས་ནས་སང་གི་ནམ་ལངས་པའི་སྔ་ལོགས་ཀྱི་བར་དུ་གནས་སོ། །དེ་འོག་གི་ཆུ་ཚོད་ནི་ཚེས་གཅིག་ནས་སུམ་ཅུའི་བར་གྱི་དེ་རིང་གི་ཚེས་གྲངས་གང་ཡིན་པ་དེ་ཇི་ཙམ་གནས་པའི་ཡུན་མ་འོངས་པའོ། །ཟླ་སྐར་ནི་སྐར་མ་དེ་དེ་རིང་གི་རེས་གཟའ་དང་ཇི་ཙམ་འགྲོགས་པའི་ཡུན་སྟོན་པ་སྟེ། ནམ་ལངས་ཡན་ཆད་དུ་ཇི་ཙམ་ལོངས་སྤྱད་ཟིན་པ་དེའི་ཆུ་ཚོད་སོགས་ཀྱིས་སྟོན་པས་འདས་པའོ། །དེས་དྲུག་ཅུ་ལ་ཕྲི་ཞིང་གནས་ལྔ་པ་ལྟར་ན་ཆུ་སྲང་སོགས་ཀྱིས་ཀྱང་རིམ་བཞིན་སྟེང་ནས་ཕབ་ལ་ཕྲི་བའི་ལྷག་དེ་སྐར་མ་དེ་དེ་རིང་ནམ་ལངས་ཀྱི་ཐོག་མ་ནས་ཇི་ཙམ་གནས་པའི་ཡུན་ནོ། །ཡུན་དེ་རྫོགས་ནས་སྐར་མ་གཞན་འབྱུང་བར་འགྱུར་རོ། །ཉི་སྐར་ནི་དེ་རིང་ནམ་ལངས་ཀྱི་ཐོག་མར་གཟའ་ཉི་མ་རྒྱུ་སྐར་དེ་དང་དེའི་ཡུལ་གྱི་ཆུ་ཚོད་སོགས་དེ་ལ་གནས་པ་སྟོན་ཏོ།། རགས་པ་ཚེས་ལངས་རྫོགས་པའི་བར་དུའང་མཆན། དེ་ཡང་ཐིག་ཐ་སྐར་ནས་གཅིག་བྲ་ཉེའི་བར་དུའོ། །སྦྱོར་བ་ནི་ཉི་ཟླའི་སྐར་མ་འཕྲོད་ཚུལ་གྱི་དབང་ལས་དུས་ཀྱི་དགེ་མི་དགེའི་མིང་ཞིག་གོ། དེ་ཡང་གཅིག་སེལ་བ་ནས་ཁོན་
འཛིན་གྱི་བར་ཉེར་བདུན་ནོ། །འདིའི་ལོངས་སྤྱོད་ནི་ནམ་ལངས་ཕན་ཆད་འདས་ཟིན་དུ་བཞེད་དོ། །བྱེད་པ་བཅུ་གཅིག་ནི་ཚེས་ཞག་གི་སྔ་ཆ་དང་ཕྱི་ཆ་ལའོ། །འདི་རྣམས་ཀྱི་དུས་སུ་དགེ་བ་དང་། མི་དགེ་བའི་འབྲས་བུ་སྣ་ཚོགས་སུ་འབྱུང་སྟེ་འབྲས་རྩིས་རྣམས་ལས་གསུངས་པ་ལྟར་ཤེས་པར་བྱའོ། །རྒྱུ་སྐར་ཉེར་བདུན་པོ་དེ་དག་ཁྱིམ་བཅུ་གཉིས་ལ་གནས་ཏེ། རྒྱུ་སྐར་རེ་རེའི་ཡུལ་གྱི་ས་ཁྱོན་དྲུག་ཅུར་བཅད་པའི་བཅོ་ལྔ་རེ་ལ་རྐང་པ་གཅིག་ཏུ་བརྩིས་པའི་རྒྱུ་སྐར་གྱི་རྐང་པ་དགུ་རེ་ཁྱིམ་གཅིག་ཏུ་གནས་ཏེ། ཐ་སྐར་བྲ་ཉེའི་རྐང་པ་བཞི་བཞི་དང་། སྨིན་དྲུག་གི་རྐང་པ་གཅིག་ནི་ལུག་གི་ཁྱིམ་མོ། །དེ་བཞིན་རིམ་པར་བརྩིས་ཏེ། ཁྲུམས་སྟོད་ཀྱི་རྐང་པ་ཐ་མ་དང་། ཁྲུམས་སྨད་དང་ནམ་གྲུའི་རྐང་པ་བརྒྱད་ཀྱིས་ཉ་ཡི་ཁྱིམ་རྫོགས་པའི་བར་དུ་ཤེས་པར་བྱའོ། །ཁྱིམ་གྱི་ཞིང་བཅུ་གཉིས་པོ་དེའི་བདག་པོའི་གཟའ་ནི། ལུག་དང་སྡིག་པའི་ཞིང་བདག་མིག་དམར་ཡིན་པ་སོགས་སོ། །འདིར་སྐྱེས་བུ་རྣམས་གང་ལ་སྐྱེས་པའི་དུས་ཀྱིའམ། སྐྱེས་རབས་ཀྱི་དཀྱིལ་འཁོར་གྱི་དབྱངས་དང་གསལ་བྱེད་ཡོངས་སུ་མ་ཤེས་པའི་ཕྱིར་མུ་སྟེགས་རྣམས་ཀྱི་མིང་གི་ཡི་གེ་བརྟགས་ནས་བཀོད་པ། ཨ་ཨི་ཨུ་ཨེ་སྨིན་དྲུག་གིའོ། །ཨོ་ཝ་ཝི་ཨུ་སྣར་མའི་ཡི་གེ་སོགས་བཀོད་པ་དེས་སེམས་ཅན་རྣམས་ཀྱི་མིང་གི་དང་པོས་ཁྱིམ་གང་ཡིན་ཤེས་པར་བྱས་ནས། དེ་ལས་དགེ་མི་དགེའི་འབྲས་བུ་འབྱུང་བར་སེམས་པ་ནི་རིགས་པས་སྟོང་པ་སྟེ། དགེ་མི་དགེ་བ་འབྱུང་བ་ནི་སེམས་ཅན་སོ་སོའི་ལས་ཀྱི་དབང་གིས་འབྱུང་བ་ལ་གཟའ་སོགས་ཀྱིས་བྱས་སོ་སྙམ་དུ་བརྟག་པ་ནི་ཕྱིན་ཅི་ལོག་ཡིན་ནོ། །དེ་ལྟར་ཡང་། དུས་འཁོར་རྩ་རྒྱུད་ལས། གཟའ་ཚེས་རྒྱུ་སྐར་སྦྱོར་བ་དང་། །བྱེད་པ་ཉིད་དང་དུས་སྦྱོར་དང་། །གདུག་པའི་གཟའ་སྟེ་འདི་དག་ནི། །བསོད་ནམས་བྱེད་པ་རྣམས་ལ་དགེ། སྐད་ཅིག་གཅིག་ལ་སྐྱེས་རྣམས་ཀྱི། །
སྐྱེས་རབས་ཐ་དད་ཐ་དད་འབྲས། །རང་རང་ལས་ལ་ཉེར་སྤྱོད་པས། །དེ་རྣམས་འབྲས་བུ་གཅིག་པ་མིན། །གཡུལ་དང་ནགས་བསྲེག་པ་དང་ནི། །ཉ་པས་རྒྱ་ནི་བཅིངས་པ་ལ། །གང་གིས་ལུས་ཅན་མང་པོ་རྣམས། །ཅིག་ཆར་དུ་ནི་འཆི་བར་འགྱུར།བ་དེ་དག་སྐྱེས་དུས་གཅིག་མིན་པའོ། །ལུས་ཅན་རྣམས་ཀྱི་བསོད་ནམས་ཀྱིས། །ཚེ་སྟོབས་བརྩོན་འགྲུས་རྫུ་འཕྲུལ་དང་། །སྐལ་བཟང་གཟུགས་ཉིད་སྡིག་པས་ནི། །ཚེ་ཟད་བརྩོན་འགྲུས་རྫུ་འཕྲུལ་ཉམས། །ཞེས་གསུངས་སོ། །དེ་ཡན་ཆད་ཀྱིས་ཡན་ལག་ལྔའི་བྱེད་པ་བསྟན་པའོ། །ད་ནི་བྱེད་པའི་ལོ་འཕོ་བའི་ངེས་པ་གསུངས་པ། དག་པའི་ལོ་ནི་བྱེད་པའི་ལོ་དག་ལ་ཀླུ་བསྲེས་པ་མཁའ་དང་ནམ་མཁའ་ཆུ་གཏེར་གྱིས་ཞེས་པ་བཞི་བརྒྱས་བསྒྱུར་བ་ལ། སླར་ཡང་བྱེད་པའི་ལོའི་ཀླུ། བསྲེས་པ་རྣམས་ཀྱིས་སྦྱང་བ་དག། རི་ཟླ་མེ་ཡིས་ཞེས་སུམ་བརྒྱ་བཅུ་བདུན་གྱིས་རབ་ཏུ་ཕྱེ་བ་སྟེ་ཞེས་བགོས་ཐོབ་གཟའ་དང་། དེའི་ལྷག་མ་ནམ་མཁའ་རོས་བསྒྱུར་བ་རི་ལ་སོགས་པས་ཞེས་གོང་གི་བགོད་བྱེད་དེས་བགོས་པ་ཆུ་ཚོད་དེ། །དེ་ལ་སྟེང་དུ་གཉིས་དང་འོག་ཏུ་སུམ་ཅུའི་གྲངས་གཟའ་གནས་དང་ཆུ་ཚོད་དུ་རྩིས་འཕྲོའི་ངེས་པ་འདིར་ལྡན་པ་སྟེ་བྱིན་པ་རང་འཁོར་དྲིལ་བ་ནི། ཟླ་བ་དག་ལ་ལོ་ཡིས་འཕོ་བའོ་ཞེས་པ་ལོ་སྔ་མ་ནས་ཕྱི་མར་འཕོ་མཚམས་ཀྱི་གཟའ་དང་ཆུ་ཚོད་དོ། །དེ་བཞིན་བྱ་སླ་བའི་ལུག་སོགས་རྣམས་ཀྱི་རིམ་པས་སྣོན་བྱེད་དག་ལ་བཤད་མ་ཐག་པའི་ལོ་འཕོ་བའི་གཟའ་དང་ཆུ་ཚོད་རིམ་པར་ཡོངས་སུ་བཀོད་པ་བཅུ་གཉིས་པོ་ལ་སྦྱིན་བྱ་འདི་དག་སྟེ། ཟླ་བ་རི་འབྱུང་བསྟན་པས་ལུག་ཁྱིམ་དུ་འཕོ་བའི་གཟའ་དབྱུག་གོ། དེ་བཞིན་དུ་རིག་བྱེད་དག་དང་ཞེས་གཉིས་ཚིག་ནི་སྡེབ་སྦྱོར་གྱི་དབང་གིས་ཡིན་ལ་ཡོན་ཏན་མདའ་སྟེ། གླང་གིའོ། །རི་བོང་ཅན་དང་རི་ཟླ། ཁྱིམ་གསུམ་པ་འཁྲིག་པ་ལའོ། །རིག་བྱེད་མེ་འབྱུང་། ཀརྐ་ཊའི་འཕོ་བ་ལའོ། །ཟླ་
བ་མིག་དང་ལག་པ་སེང་གེ་ལའོ། །དུས་དང་རིག་བྱེད་མིག་ནི་ཁྱིམ་དྲུག་པ་བུ་མོའི་འཕོ་བ་དག་ལའོ། །དྲུག་དང་ཟླ་བ་མདའ་དང་ཞེས་པ་སྲང་གི་འཕོ་བ་ལའོ། ཟླ་བ་རི་དུས་སྡིག་པའི་འཕོ་བ་ལའོ། །མེ་དང་དྲུག་ཟླ་གཞུའི་འཕོ་བ་ལའོ། །རིག་བྱེད་རི་དང་འཇིག་རྟེན་དང་ཞེས་པ་ཆུ་སྲིན་གྱི་འཕོ་བ་ལའོ། །དྲུག་དང་རིག་བྱེད་སྟོང་པ་དག་སྟེ་ཞེས་བུམ་པའི་འཕོ་བ་ལའོ། །སྟོང་པ་དག་སྟེ་ཞེས་ཅི་ལ་སྨྲོས་ན་སྐབས་འདིར་གཞན་ཐམས་ཅད་ལ་ཆུ་ཚོད་ཀྱི་གནས་སུ་ཟུང་རེ་ཡོད་མོད་འདི་ལ་རིག་བྱེད་ཀྱི་རྗེས་སུ་སྟོང་པ་དག་སྟེ་ཞེས་རིག་བྱེད་འབའ་ཞིག་ལས་གཞན་མེད་ཅེས་པའི་ཚིག་སྟེ་སྡེབ་སྦྱོར་གྱི་ཡིན་པ་འདྲའོ། །སྟོང་པ་མིག་མདའ་ཉི་མའི་གོ་འཕང་ངམ་བགྲོད་པ་ཉ་ཡི་ཁྱིམ་དུ་འཕོ་བ་ལའོ། །སྟོང་པ་ནི་ཐིག་ལེ་ཡིན་པས་གཟའ་གནས་སུ་ཐིག་ལེ་བྱིན་ནའང་ཅི་ཡང་མ་བྱིན་པ་དང་དོན་འདྲའོ། །འདིའི་གནད་དོན་ནག་ཟླ་ནས་ནག་ཟླའི་བར་ལོ་སོ་སོ་ཙམ་གྱི་ལོ་འཕོ་སྟེ། ཞི་བ་ཏུ་ན་ཉི་མའི་ཉིན་ཞག་གི་ལོངས་སྤྱོད་སོ་སོ་ལ་དབུགས་བཞི་དང་ཆུ་སྲང་གསུམ་མེད་པས་མ་དག་སྟེ་སྐྱོན་དེས་ཟླ་བ་གཅིག་ལ་ཆུ་ཚོད་ཉེར་ལྔ་དང་། ལོ་གཅིག་ལ་ཞག་ལྔ་ཆད་པས་སོ། །བྱེད་པ་འཕོ་དུས་ནས་འཕོ་དུས་ཀྱི་ཟླ་བ་སོ་སོའི་འཕོ་ཞག་ལ་ཆུ་ཚོད་ཉེར་ལྔ་ལྷག་པ་དེས་འཕོ་ཞག་སུམ་བརྒྱ་དྲུག་ཅུ་ལ། གཟའ་སུམ་བརྒྱ་རེ་ལྔ་བྱུང་བས་གཟའ་ལྔ་ལྷག་གོ། འདིར་ཆད་པ་དང་ལྷག་པ་ཅིས་ཤེས་ཞེ་ན། ཉི་མ་བྱང་དུ་བགྲོད་པའི་ཟླ་བ་དང་པོ་སྟེ་ཐོག་མ་ཆུ་སྲིན་ཁྱིམ་ཟླ་ལ་ཉི་མ་ལྡོག་པར་ཉེ་བའི་སྔ་རོལ་དུ་ཉི་མ་བཅུའི་བར་དུ་ཐུར་མའི་གྲིབ་མ་ཡོངས་སུ་བརྟག་པར་བྱ་སྟེ། ཉིན་ཞག་གང་ནས་བརྩམ་སྟེ་ཐུར་གྲིབ་བྱང་ནས་ལྷོར་ལོག་པར་གྱུར་པའི་ཚེས་དེ་དང་གཟའ་དང་སྦྱོར་བ་བྱེད་པ་དེས་ཉི་མ་འཕོ་བའི་ཉིན་ཞག་ཤེས་ཏེ། ཉིན་ཞག་དེ་ལ་ཉི་སྐར་གྱི་ལོངས་སྤྱོད་ཀྱི་སྐར་གནས་སུ་ཉི་ཤུ་དང་། ཆུ་
ཚོད་ཀྱི་གནས་སུ་བཅོ་ལྔ་ཞེས་པ་རྩ་བའི་ངེས་པའོ། །ངེས་པ་དེ་ལ་ཉིན་ཞག་སོ་སོར་ཉི་དཀྱིལ་གྱི་ཉིན་ཞག་རྣམས་ཀྱིས་ཐོབ་པ་རྟག་པའི་ལོངས་སྤྱོད་བསྲེས་ཏེ། ཉི་མའི་རྐང་རྩིས་བྱས་པས་ཉིན་ཞག་སོ་སོའི་ཉི་མ་དག་པ་ཤེས་པའི་ཕྱིར་རོ། །དུས་ཀྱི་འཁོར་ལོ་རྩ་བའི་རྒྱུད་ལས་ཉི་མའི་དཀྱིལ་འཁོར་གྱི་ཉིན་ཞག་དང་ཆུ་ཚོད་དང་ཆུ་སྲང་དང་དབུགས་དང་ཁྱིམ་གྱི་འཁོར་ལོ་ལོངས་སྤྱོད་པའི་མཐར་ཐུག་པར་གསུངས་པ་འདི་ལྟ་སྟེ། ལོ་གཅིག་མཁའ་དུས་མེས་བསྒྱུར་ཏེ། །གནས་གཉིས་འོག་མ་གཉིས་ཀྱིས་བསྒྱུར། །དྲུག་ཅུ་རྩ་ལྔས་བགོས་ཐོབ་པ། །སྟེང་གི་ཕུང་པོར་ནོར་དུ་སྦྱིན། །སླར་ཡང་ལྷག་མ་དྲུག་ཅུས་བསྒྱུར། །ཆ་ཐོབ་དེ་ཡི་འོག་ཏུ་ཡང་། །སླར་ཡང་ལྷག་མ་དྲུག་ཅུས་བསྒྱུར། །ཆ་ཐོབ་དེ་ལས་ཀྱང་འོག་སྟེ། །སླར་ཡང་ལྷག་མ་དྲུག་གིས་བསྒྱུར། །དྲུག་ཅུ་རྩ་ལྔས་བགོས་ཐོབ་པ། །དབུགས་ཀྱི་ཚོགས་ཏེ་མི་ཡི་བདག །དེ་ཡི་ཡང་ནི་འོག་ཏུ་བཞག །ཉིན་ཞག་ཆུ་ཚོད་ཆུ་སྲང་རྣམས། །དབུགས་སུ་བྱས་ནས་རྣམ་གསུམ་སླར། །འོག་མ་རི་མཁའ་རིས་ཐོབ་པ། །དབུས་ཀྱི་ཕུང་པོར་ནོར་དུ་བྱིན། །དེ་ལས་དྲུག་ཅུ་རྩ་བཞིས་ཐོབ། །སྟེང་གི་ཕུང་པོར་བུ་ལོན་དབྲོག །ལྷག་མ་འདི་ནི་ཉིན་ཞག་དང་། །ཆུ་ཚོད་ཆུ་སྲང་དག་དང་དབུགས། །འདི་དག་འཁོར་ལོ་ལོངས་སྤྱོད་པས། །ཉི་མའི་དཀྱིལ་འཁོར་དུ་འགྱུར་རོ། །ཉིན་གཅིག་རྒྱུ་སྐར་གྱིས་བསྒྱུར་གང་། །ཆུ་ཚོད་དྲུག་ཅུས་དེ་བཞིན་ཏེ། །ཉི་མའི་དཀྱིལ་འཁོར་ལོངས་སྤྱོད་ཀྱིས། །ཐོབ་པ་ཞག་རེའི་ཆུ་ཚོད་དོ། །སླར་ཡང་དྲུག་ཅུས་བསྒྱུར་ཆུ་སྲང་། །དྲུག་གིས་བསྒྱུར་ལས་དབུགས་སུ་འགྱུར། །ལོངས་སྤྱོད་འདི་ནི་ཉི་མ་ཡི། །རྒྱུ་སྐར་ཆུ་ཚོད་སོགས་ལ་སྦྱར། །བགྲོད་ནས་ཉིན་ཞག་སོ་སོར་སླར། །བགྲོད་པར་འགྱུར་གྱི་བར་དུ་སྦྱིན། །བརྗོད་པའི་ལས་ཀྱི་ཆོ་ག་ཡིས། །ཉི་མའི་རྐང་པ་སྦྱང་བར་བྱ། །གཞན་དུ་བྱེད་པའི་ལམ་གྱིས་ནི། །ཉི་མ་རྟག་ཏུ་དག་
པ་མེད། །ཉི་མའི་ལོངས་སྤྱོད་མ་དག་ན། །འདི་ལ་སྦྱངས་པའི་མིག་དམར་སོགས། །རྩ་བ་ཉམས་པའི་ལྗོན་པ་བཞིན། །འདིར་ནི་གསལ་བ་ཉིད་མི་འགྱུར། །ཁྱིམ་གྱི་འཁོར་ལོ་ལོངས་སྤྱོད་པས། །ཟླ་བའི་དཀྱིལ་འཁོར་བཤད་བྱ་ལ། །འཁོར་ལོའི་ཆུ་ཚོད་ཉི་ཆུ་ཚོད། །ཟླ་བའི་ལོངས་སྤྱོད་བསྲེས་པ་དག །སུམ་ཅུའི་ཆས་ཐོབ་ཟླ་ལོངས་སྤྱོད། །ཉིན་ཞག་སོ་སོའི་ཆུ་ཚོད་འགྱུར། །ཟླ་བས་ཉིན་ཞག་ཆུ་ཚོད་དང་། །ཆུ་སྲང་དབུགས་ནི་གང་དག་གིས། །འཁོར་ལོའི་ཆུ་ཚོད་མཐར་སྤྱོད་པ། །དེ་ནི་དེ་ཡི་དཀྱིལ་འཁོར་འགྱུར། །ཉིན་ཞག་སྟོང་ཕྲག་དྲུག་དང་ནི། །དགུ་བརྒྱ་སྒྲ་གཅན་དཀྱིལ་འཁོར་ཏེ། །མིག་དམར་ལ་སོགས་དཀྱིལ་འཁོར་ནི། །རང་རང་རྒྱུ་བ་ལས་རབ་གྲུབ། །ཉིན་གཅིག་རྒྱུ་སྐར་རྣམས་ཀྱིས་བསྒྱུར། །དཀྱིལ་འཁོར་གྱི་ནི་རྣམ་པར་དབྱེ། །ཐོབ་པ་དག་ནི་སྐར་མར་འགྱུར། །ལྷག་མ་སླར་ཡང་དྲུག་ཅུས་བསྒྱུར། །དཀྱིལ་འཁོར་ཆ་ཡིས་ཆུ་ཚོད་དེ། །དེ་བཞིན་ཆུ་སྲང་དབུགས་དག་ཀྱང་། །དཀྱིལ་འཁོར་ཆས་ཐོབ་གཟའ་རྣམས་ཀྱི། །ཉིན་ཞག་སོ་སོར་མི་ཡི་བདག །དེ་ཉིད་སྦྱིན་པ་བྱས་ནས་ནི། །གཟའ་ཡི་རྒྱུ་བས་གཟའ་སྦྱར་བྱ། །གང་ཚེ་གཟའ་ཡི་ལོངས་སྤྱོད་དག །དེ་ཚེ་ཟླ་བའི་ཆ་འཆར་ལ། །བགྲོད་པའི་རི་མོ་ལ་གནས་པ། །ཟླ་བའི་ལོངས་སྤྱོད་ཀྱིས་ཤེས་བྱ། །བགྲོད་པས་ཉི་མ་སྦྱང་བྱས་ཏེ། །ལོངས་སྤྱོད་ཆ་གཅིག་ལ་གནས་པའི། །ཟླ་བ་ཉི་མས་སྦྱང་བར་བྱ། །ཟླ་བས་མིག་དམར་ལ་སོགས་སོ། །ཚིགས་མཚམས་དཀར་པོ་ནག་པོ་ལ། །ཚེས་གྲངས་གཉིས་ཀའི་དབུས་སུ་ནི། །ཟླ་བ་ཉི་མ་རྣམ་འཇོམས་པ། །སྒྲ་གཅན་འཇུག་པའི་ཚེས་གྲངས་སོ། །དེ་ལྟར་ཐམས་ཅད་ཡོངས་ཤེས་ནས། །གྲུབ་མཐའི་ལོངས་སྤྱོད་རྣམ་པ་གཞན། །རྣམ་གཞན་ཉུང་ངུའི་བྱེད་ལ་སོགས། །འདི་ལས་མ་དག་རྣམ་པར་སྤངས། །ཞེས་གསུངས་པ་ལྟར་ཞག་གསུམ་གྱི་དཀྱིལ་འཁོར་དང་
ལོངས་སྤྱོད་རྣམ་པར་དབྱེ་བ་ལས་བརྩམ་སྟེ་ཆ་ཤས་ཀྱི་ཉེས་པ་ཕྲ་མོའི་སྐྱོན་ཡང་རྣམ་པ་ཀུན་ཏུ་སྤངས་པ་རྣམ་དག་གྲུབ་རྩིས་ལ་ངེས་པ་རྙེད་པས་རགས་རྩིས་བྱེད་སླ་བ་བྱེད་པ་རྣམས་ཀྱི་མ་དག་པ་འདོར་ཤེས་པར་བྱའོ། །ད་ནི་ཉིན་མཚན་འཕེལ་འགྲིབ་གསུངས་པ་འདི་ལྟར། ཟླ་བ་དྲུག་གིས་འཕེལ་བ་དང་ཟླ་བ་དྲུག་གིས་འགྲིབ་པར་འགྱུར་ཏེ། གང་ཞེ་ན་ཉིན་མོ་དང་མཚན་མོ་དག་ཀྱང་ངོ་། །ཇི་ལྟར་ཞེ་ན་ཟླ་བ་དྲུག་གིས་ཉིན་མོ་འཕེལ་བའི་སྐབས་སུ་མཚན་མོ་འབྲི་བ་དང་། ཟླ་བ་དྲུག་ལ་ཉིན་མོ་འགྲིབ་པའི་སྐབས་སུ་མཚན་མོ་འཕེལ་བ་དེ་ལྟ་བུ་འབྱུང་བའི་རྒྱུ་མཚན་ནི། །ཉི་མ་ཁྱིམ་བཅུ་གཉིས་པོ་སོ་སོར་རབ་ཏུ་རྒྱུ་བས་སོ། །དེ་ཡང་ཀཻ་ལ་ཤའི་བྱང་གི་ཆ་ཁ་བ་ཅན་ཏེ་རི་གངས་ལྡན་གྱི་བར་དུ། ཆུ་གཏེར་སྲོག་ཞེས་པ་དབུགས་བཞི་དང་ཆུ་སྲང་མེ་ནི་ཉིན་ཞག་སོ་སོའི་དུས་སུ་འཕེལ་འགྲིབ་བྱེད་པའི་ཆེད་དུ་ལྷོ་བྱང་གི་བགྲོད་པའི་ཡན་ལག་ཞེས་པ་ཞག་ཕྱེད་དང་བཅས་པའི་བརྒྱ་བརྒྱད་ཅུ་གྱ་གཉིས་ཡིན་ཏེ། ཉིན་ཞག་སུམ་བརྒྱ་དང་རེ་ལྔ་ཕྱེད་མར་བྱས་པས་བརྒྱ་གྱ་གཉིས་ཐོབ་ཅིང་ཞག་གཅིག་ལྷག་པ་ཕྱེད་དུ་བྱས་པའི་དབང་གིས་སོ། །ཁྱིམ་ཞག་གི་དབང་དུ་བྱས་ན་བརྒྱ་བརྒྱད་ཅུའོ། །ལྷོ་ཕྱོགས་སུ་མཚན་མོ་འཕེལ་བའི་ཚེ་བྱང་དུ་ཉིན་མོ་འཕེལ་བར་འགྱུར་རོ། །ཀཻ་ལ་ཤའི་ལྷོ་ཕྱོགས་ལ་ནི་འཆད་པར་འགྱུར་རོ། །ཚད་འདིས་ལྷོར་བགྲོད་པར་འཕོ་བ་ཐོག་མར་རྩོམ་པའི་ཉིན་ཞག་བྱང་བགྲོད་མཐར་ཐུག་པའི་དུས་སུ་ཆུ་ཚོད་སུམ་ཅུ་རྩ་དྲུག་ཉིན་ཚད་དང་མཚན་ཉེར་བཞིར་འགྱུར་ལ། བྱང་དུ་བགྲོད་པ་རྩོམ་པའི་ཉིན་ཞག་ལྷོར་བགྲོད་མཐར་ཐུག་གི་དུས་སུ་ཉིན་ཆུ་ཚོད་ཉེར་བཞི་དང་མཚན་སོ་དྲུག་ཏུ་འགྱུར་རོ། །དེ་ལྟར་ཉི་མ་ལྷོ༷འི་ཕྱོགས་སུ་ནི་བགྲོད་པས་མཚན་མོ་དག་ཀྱང་འཕེལ་བར་འགྱུར་ཏེ། ཁ་བའི་རི་ཡི་བྱང་དུ་བགྲོད་པས་ཉིན་མོ་འཕེལ་བ་ཉིད་དུ་འགྱུར་བའོ། །དེ་ནས་སྒྲ་གཅན་རྒྱུ་སྐར་ལ་ལོངས་སྤྱོད་པ་གསུངས་པ།
ཟླ་བ་དག་པ་ལ་མིག་དང་ཉི་མ་ཞེས་བརྒྱ་ཉི་ཤུ་བསྲེས་པ་ཟླ་བ་དུ་ཡིན་གྱི་རྩིས་འཕྲོའོ། །འདི་ཡང་བྱེད་པས་ལྟོས་པ་ཡིན་གྱི་གྲུབ་རྩིས་ཀྱི་མ་ཡིན་ནོ། །ཉ་སྟོང་གི་ཕྱོགས་ཀྱི་དོན་དུ་མིག་གིས་རྣམ་པར་བསྒྱུར་བ་ལ་ཟླ་བའི་ཚིགས་མཚམས་ལ་གཅིག་བསྲེས་ཏེ་ཞེས་པས་ཚིགས་དང་པོ་ཉ་ལ་གཅིག གཉིས་པ་སྟོང་ལ་ཚིགས་གཉིས་པ་ཡིན་པས་གཉིས་བསྲེས་པ་ནི་ཕྱོགས་ཀྱི་ཕུང་པོའོ། །དེ་ལ་སྒྲ་གཅན་གྱི་ཕྱོགས་ཀྱི་དཀྱིལ་འཁོར་མཁའ་དུས་ཆུ་ཡིས་ཞེས་པ་བཞི་བརྒྱ་དྲུག་ཅུས་རབ་ཏུ་ཕྱེ་བས་རྙེད་པ་ནི་འཁོར་ཟིན་པས་དོར་བར་བྱའོ། །ལྷག་མ་ཐུབ་པ་ལག་པས་ཞེས་ཉེར་བདུན་གྱིས་བསྒྱུར་བ་ལས་ཀྱང་གོང་ལྟར་བགོད་བྱེད་མཁའ་སོགས་ཆ་ཡིས་རྙེད་པ་སྐར་མའོ། །དེའི་ལྷག་མ་དྲུག་ཅུས་བསྒྱུར་བ་གང་ཡིན་དེ་ལས་བགོད་བྱེད་ཀྱིས་ཐོབ་པ་ཆུ་ཚོད། སླར་ཡང་དེ་དྲུག་ཅུས་བསྒྱུར་བ་ལས་ཐོབ་པ་ཆུ་སྲང་སྟེ། ལྷག་དྲུག་གིས་བསྒྱུར་ཐོབ་དབུགས་སུ་འགྱུར་རོ། །དེ་ལྟར་སྐར་མ་ལ་སོགས་པ་ཐོབ་པས་དམན་པའི་འཁོར་ལོ་སྟེ། ཉེར་བདུན་ལ་སྐར་མ་ལ་སོགས་པས་ཕྲི་བ་ནི་གདོང་དུ་འགྱུར་ཏེ། སྒྲ་གཅན་དེའི་སྐར་གནས་ཀྱིས་ཉེར་བདུན་ལ་ཕྲིས་ནས་ཆུ་ཚོད་ལ་སོགས་པས་སྟེང་ནས་རང་འཁོར་ཕབ་པ་ལ་རིམ་བཞིན་ཕྲི་བར་བྱས་པའོ། །གང་གི་གདོང་ཡིན་ཞེ་ན་སྒྲ་གཅན་འདི་ལ་མུན་པ་ཡོད་པའི་ཕྱིར་མུན་ཅན་ཏེ་སྒྲ་གཅན་གྱི་གདོང་ཡིན་ནོ། །མུན་ཅན་དེའི་མཇུག་མ་དག་ཀྱང་གདོང་གི་ལོངས་སྤྱོད་དེ་ལ་རྒྱུ་སྐར་གྱི་ཕྱེད་དེ་སྐར་མ་བཅུ་གསུམ་དང་ཆུ་ཚོད་སུམ་ཅུ་སྟེ་འཁོར་ཕྱེད་བསྲེས་པའོ། །དེ་ནས་བཀྲ་ཤིས་ལ་སོགས་པ་གཟའ་ལྔ་ཉིན་ཞག་ཏུ་རྒྱུ་སྐར་ལ་ལོངས་སྤྱོད་པའི་དོན་དུ། ཟླ་བ་དག་པ་དེ་ཉིན་ཞག་གི་ཕུང་པོར་བྱ་བའི་དོན་དུ་སུམ་ཅུས་བསྒྱུར་བ་ནི་ཚེས་ཞག་གོ། དེ་ལ་སྔར་གྱི་རྩིས་འཕྲོ་ཐིག་ལེ་སྟོང་པ་ཡིན་པས་བསྲེ་རྒྱུ་མེད་ལ་གང་བརྩི་བའི་ཉིན་ཞག་སོ་སོ་བསྲེས་པ་དག་དང་བཅས་པ་གནས་སྟེང་
འོག་གསུམ་དུ་བཞག་ལ། ཚེས་ཞག་དང་ཉིན་ཞག་གི་བར་ཁྱད་སྟོན་པའི་ཆེད་དུ། འོག་མ་ལས་ནི་རི་མཁའ་རིས་ཐོབ་པ། གནས་གསུམ་པོའི་དབུས་སུ་ཡོད་པ་ལ་རྣམ་པར་བསྲེས་པ་དེ་ལས་ཀྱང་ཆུ་གཏེར་རོས་ཏེ་རེ་བཞིས་ཐོབ་པས་སྟེང་མ་ལ་དམན་པ་ནི་མི་གསལ་པའི་ཉིན་ཞག་གོ། མི་གསལ་ཞག་དེ་གནས་གཉིས་བྱས་པའི་ཕྱོགས་གཅིག་ལ་རིས་བགོས་པས་བརྩི་ཉིན་གྱི་རེས་གཟའ་དང་མཐུན་ན་དེ་གར་བཞག །མི་མཐུན་ན་གཅིག་ཕྲི་བའམ་གཅིག་བསྣན་ན་འགྲིག་སྟེ་དེ་ནི་གསལ་བའི་ཉིན་ཞག་ཅེས་བྱའོ། །གསལ་ཞག་དེ་ནི་གཟའ་ལྔ་སྤྱིའི་ཉིན་ཞག་གོ། དེ་ལ་གཟའ་སོ་སོའི་རྩིས་འཕྲོ་སྟེར་དགོས་པས། འདིར་བྱེད་པ་ལ་ལྟོས་པའི་རྩིས་འཕྲོ་ནི། རི་དུས་གཅིག་གིས་ཏེ་བརྒྱ་རེ་བདུན་བསྲེས་པ་དག་ཀྱང་མིག་དམར་གྱི་གསལ་བའི་ཉིན་ཞག་ཚོགས་ཏེ། དེ་ལ་བཀྲ་ཤིས་ཀྱི་དཀྱིལ་འཁོར་རི་ཀླུ་དུས་ཀྱིས་ཞེས་ཉིན་ཞག་དྲུག་བརྒྱ་བརྒྱད་ཅུ་རྩ་བདུན་གྱིས་བགོས་པ་ཡི་ཐོབ་པ་ནི་ཞག་འདི་ཙམ་གྱིས་མིག་དམར་གྱིས་རྒྱུ་སྐར་འཁོར་ལོ་ཡོངས་སུ་བསྐོར་བའམ་འཁོར་ཟིན་པ་སྟོན་པ་ཡིན་པར་ཤེས་ནས་ཐོབ་པ་དེ་ཉིད་དོར་བར་བྱའོ། །བགོས་པའི་ལྷག་མ་སྐར་མས་ཏེ་ཉེར་བདུན་གྱིས་བསྒྱུར་བ་གོང་གི་དཀྱིལ་འཁོར་དེས་བགོས་ཐོབ་སྐར་མའོ། །སླར་ཡང་ལྷག་མ་ནམ་མཁའ་རོ་ཡིས་བསྒྱུར་ལས་དཀྱིལ་འཁོར་གོང་བཤད་རི་ལ་སོགས་པས་བགོས་པ་ཡི་ཐོབ་པ་ཆུ་ཚོད་དོ། །དེ་ལྟའི་སྐར་དབྱུག་དེ་དག་གནས་གཉིས་བཞག་པའི་གཅིག་ལ་གཟའ་ཡི་སྐྱེས་ཁྱིམ་སྦྱང་དགོས་པས། སྐྱེས་ཁྱིམ་གང་ཞེ་ན་མིག་དམར་ལ་ནི་ཕྱེད་བཅས་དགུ་སྦྱང་ཞེས་པ་སྐར་མ་དགུ་དང་སྐར་མའི་ཕྱེད་ཆུ་ཚོད་སུམ་ཅུས་སྦྱང་བར་བྱའོ། །གལ་ཏེ་སྦྱོང་བྱེད་བུ་ལོན་ཉིད་མང་པའམ་ལྷག་པར་གྱུར་ན། སྐར་གནས་སུ་འཁོར་ལོ་བསྲེས་ལ་རྣམ་པར་སྦྱང་བར་བྱའོ། །སྦྱང་ལྷག་དེ་འཁོར་ལོ་ཕྱེད་དེ་འདི་ལས་ལྷག་པར་ཏེ་མང་བར་གྱུར་ནའང་འཁོར་ལོ་
ཕྱེད་ནི་དོར་བར་བྱ་སྟེ་དོར་བའི་ལྷག་མ་ལ་ནི་རྐང་པ་རིམ་མིན་དུ་འཛིན་དགོས་པར་འགྱུར་ཞིང་། མདོར་ན་རིམ་པས་འཛིན་ནོ་གཟའ་ཐམས་ཅད་ཀྱི་དལ་བའི་ལས་ལ་རིམ་པ་མིན་པས་ནོར་དང་རིམ་པས་ནི་བུ་ལོན་དུ་འགྱུར་རོ། །རྐང་པ་འཛིན་བྱེད་ནི། དོར་ལྷག་གམ་དོར་རྒྱུ་མེད་པ་གང་ཡིན་ཀྱང་དེ་ཡི་སྐར་མ་དྲུག་ཅུས་བསྒྱུར་ཏེ། འོག་གི་ཆུ་ཚོད་གཞུག་པ་དག་དང་རབ་ཏུ་ལྡན་པར་གྱུར་པ་འབྱུང་མེ་ཟླ་བས་བགོ། གང་ཐོབ་པའི་ནོར་དེ་དལ་བའི་རྐང་པའི་ལས་དག་ལ་ཡང་འཛིན་བྱེད་དུ་འགྱུར་ཏེ་དེ་དལ་བ་ལ་ནོར་དང་བུ་ལོན་དུ་གྱུར་པ་གང་ཡིན་པ་དག་ནི་རིམ་པ་མིན་དང་རིམ་པས་སོ། །ཁྱིམ་གྱི་རྐང་པ་དལ་རྐང་ནི་དེ་ཉིད་བཅོ་བརྒྱད་རི་ནི་རབ་ཏུ་གསལ་བར་རོ་རྐང་ཞེས་པ་རྐང་གནས་དྲུག་གོ། དེ་ཡང་ཁྱིམ་གྱི་འཁོར་ལོ་ཕྱེད་དེ་ཁྱིམ་དྲུག་ལ་སྤྱོད་པའི་དབང་གིས་སྟེང་དུ་སྔ་རྐང་གསུམ་གོང་ལྟར་དང་འོག་ཏུ་ཕྱི་རྐང་རི་ལ་སོགས་པ་གསུམ་ནི་སྔ་རྐང་ལས་བཟློག་པ་སྟེ། སྔར་གྱི་ཐོབ་པས་རྐང་པ་དྲུག་ལས་གང་བབ་བཟུང་ནས། རྐང་བར་ལོངས་སྤྱོད་བཞིན་པ་རྐང་བཟུང་སྡུན་མའམ་གདོང་མ་དེ་ཉིད་ཀྱིས་ནི་ཆུ་ཚོད་ལྷག་མ་བསྒྱུར་བ་ལས་མདའ་དང་ཡོན་ཏན་ཟླ་བས་འཁོར་ལོ་ཕྱེད་ལས་མི་མང་བདེ་ལས། ཡང་རྒྱུའི་ཆ་ཇི་ཙམ་ཐོབ་པ་སྔ་མ་ཕྱེད་དེ་སྔ་རྐང་ལ་གཟུང་བྱར་ཞེས་བསྣན་པར་འདོད་དེ་རྐང་པའི་དབང་གིས་དེ་བཞིན་ཕྱི་མ་ཕྱེད་ལ་དོར་བྱར་འགྱུར་རོ། །སྔ་རྐང་ལ་སྔར་སོང་ཕྱི་རྐང་ལ་ཕྱིར་ཡོད་རྣམས་ཟོས་པ་སྟེ་ལོངས་སྤྱོད་ཀྱི་ངོ་བོར་ཚོགས་གཅིག་ཞེའམ། ཡང་ན་སྔ་རྐང་ལ་ཟོས་པ་དང་ཕྱི་རྐང་ལ་དེ་སྔ་མ་ཟོས་པ་ཚོགས་གཅིག་ཏུ་བསྡོམ་པར་བྱས་ནས། གཟའ་ཡི་བགྲོད་པའི་ཞེས་རིམ་པ་མིན་པ་དང་། རིམ་པའི་དབང་གིས་སྦྱིན་པ་དང་དོར་བ་དག་ཀྱང་གནས་གཅིག་ཤོས་དལ་བའི་ཆུ་ཚོད་ལའོ། །དེས་བཀྲ་ཤིས་ཀྱི་དལ་དག་ཏུ་འགྱུར་རོ། །དེ་ནས་མྱུར་དག་གི་ཆེད་དུ་ཉི་མར་ཞེས་པ་ཉི་མའི་དལ་བ་བར་པ་ལ་ས་སྐྱེས་ཏེ་མིག་
དམར་གྱི་དལ་བས་རྣམ་པར་སྦྱང་བར་བྱ་སྟེ། དེ་བཞིན་དུ་བླ་མ་ཕུར་བུ་དང་ཉི་སྐྱེས་སྤེན་པ་དག་ཀྱང་མྱུར་བའི་ལས་ལའོ། །ཞེས་པ་དྲག་གསུམ་གྱི་དལ་བས་ཉི་བར་ལ་སྦྱངས་དགོས་ཏེ་ཉི་བར་འདི་གཟའ་དྲག་པོ་དེ་གསུམ་གྱིས་མྱུར་བའི་སྐབས་སུ་ཐུན་མོང་བའི་ལོངས་སྤྱོད་དུ་འགྱུར་བ་ཡིན་ནོ། །ཟླ་སྐྱེས་ལྷག་པ་དང་། དཀར་པོ་པ་སངས་ཏེ་ཞི་གཉིས་ལ་ཡང་ཉི་མ་ཡི་དལ་བ་དག་གིས་སྦྱང་བར་བྱ་སྟེ་ཞེས་སམ། ཉི་མ་ཡིས་ཏེ་ཞེས་བསྒྱུར་བའང་ཡོད་དོ། །དེ་ལྟར་གཟའ་མཐོན་པོས་དམའ་མོ་ལ་སྦྱང་བ་ནི་ངེས་པའོ། །ཉི་བར་ནི་ཞི་གཉིས་ཀྱི་རྐང་པ་འཛིན་བྱེད་ཡིན་པས་སོ། །དེ་ལྟར་དྲག་གསུམ་གྱི་ཉི་དལ་ལ་དང་། ཞི་གཉིས་ཀྱི་དལ་བར་ཉི་དལ་གྱིས་སྦྱངས་ཚེ་མ་ལྡང་འཁོར་ལོ་བསྣན་ནས་སྦྱང་བ་དང་སྦྱང་ཤུལ་འཁོར་ཕྱེད་ལྷག་ན་དོར་བ་སོགས་གོང་བཤད་བཞིན་ནོ། །དེའི་ཕྱིར་དོར་མ་དོར་གྱི་དབང་གིས་མྱུར་བའི་ལས་ལ་ནི་ངེས་པར་རིམ་པས་ནོར་དུ་འགྱུར་ལ། གཅིག་ཤོས་རིམ་མིན་གྱིས་བུ་ལོན་དུ་འགྱུར་བ་ཤུགས་ལ་བསྟན་ཏེ་དེ་ལྟར་བསྣན་པ་དང་ཕྲི་བར་བྱའོ། །སྦྱངས་པའི་ལྷག་མས་ཞེས་སྐར་མས་འདིར་ནི་གཟའ་རྒྱུ་བའི་རྐད་པ་དག་སྟེའམ་རྣམས་ནི་བཟུང་ཞིང་། གཟའ་རྒྱུ་བ་ཡི་མདུན་གྱི་རྐང་པ་སྟེ་རྐང་བཟུང་མདུན་མ་རྣམས་ཀྱིས་ནི་ལྷག་མའི་ཆུ་ཚོད་བསྒྱུར་ལ། དྲུག་ཅུའི་ཆ་ཡིས་ཐོབ་པ་དང་ཆུ་ཚོད་ལྷག་ཆུ་སྲང་དང་དབུགས་ཀྱི་བར་དུ་ཡང་འདོད་ན་བྱའོ། །ཐོབ་པ་དེ་དག་གཟའ་རྒྱུ་བ་ཡི་རྐང་པ་དག་ལས་གཟུང་བྱ་སྣོན་པ་དང་ནི་ཕྲོག་བྱ་ཕྲི་བ་ནི་རྐང་པ་སྔ་ཕྱིའི་དབང་གིས་སྔར་བརྗོད་པ་དེ་བཞིན་ཉིད་དོ་ཞེས་སྔ་རྐང་ཕྱི་རྐང་གི་དབང་གིས་སོ། །ཟོས་པ་དང་མ་ཟོས་པ་དག་ནི་ཚོགས་གཅིག་ཏུ་བསྡོམ་པར་བྱས་ནས་གཟའ་ཡི་བགྲོད་པའི་དབང་གིས་སྔ་རྐང་ལ་སྦྱིན་དང་ཕྱི་རྐང་ལ་དོར་བ་མཐའ་དག་སྟེ་ཞེས་པ་གནས་ཐམས་ཅད་དུའོ། །དེ་ཡང་བཟུང་བྱ་མྱུར་རྐང་ནི་ས་སྐྱེས་མིག་དམར་ལ་ནི་རྐང་པ་རྒྱལ་བ་སྟེ་རྐང་གནས་
དང་པོ་ལ་ཉེར་བཞི་སོགས་ཡིན་ཏེ་རབ་གསལ་མ་ནུའི་གནས་ཞེས་རྒྱུ་སྐར་བཅུ་བཞིའི་གནས་ལ་རྐང་པ་དེ་མཐའ་དག་བཞག་པར་བྱའོ། །དེ་ལྟར་གཟའ་རྣམས་ཐམས་ཅད་ཀྱི་ནི་རིམ་པར་རིགས་བསྒྲེས་ཏེ་མྱུར་བའི་ཆོ་ག་ཡོངས་སུ་བརྩི་བ་རིག་པར་བྱའོ། །ཀྱེ་མི་ཡི་དབང་པོ་ཟླ་སྐྱེས་དང་དཀར་པོ་ལས་ནི་ཉིན་མོར་བྱེད་པས་སྦྱངས་ཏེ་རྣམ་པར་དག་པའི་ཟླ་སྐྱེས་དང་དཀར་པོ་ཡི་མྱུར་བ་དག་ཏུ་ཡང་དག་འགྱུར་རོ། །བཀྲ་ཤིས་ཀྱི་མྱུར་བ་ལ་གཞི་བྱས་ནས་གཟའ་གཞན་གྱི་མྱུར་དག་བྱ་ཚུལ་གསུང་ནས། ལྷག་པའི་ལོངས་སྤྱོད་བཤད་པ་ནི་སྟོང་དང་ནམ་མཁའ་ཟླ་བས་ཏེ་བརྒྱས་བསྒྱུར་བའི་མཐའ་དག་ཉིན་ཞག་ཚོགས་ལ་མེ་དང་ཉི་མ་རི་ཡིས་ཞེས་བདུན་སྟོང་བརྒྱ་ཉེར་གསུམ་གྱིས་དམན་པར་བྱས་པ་ནི་ལྷག་པའི་རྐང་པའི་ལོངས་སྤྱོད་ཀྱི་རྩིས་འཕྲོ་སྟོང་དང་དྲུག་བརྒྱ་དོན་བཞི་ཡིན་པས་དེ་བསྲེ་བའམ། དེས་རི་བུག་རི་ཀླུ་ལ་ཕྲི་ལྷག་མེ་ཉི་རི་ཡིན་པས་དེས་ཕྲི་བདེ་གཉིས་དོན་འདྲ་བའི་དབང་གིས་སོ། །རི་ནས་བུག་པ་རི་དང་ཀླུ་ཡིས་ཞེས་བརྒྱད་སྟོང་བདུན་བརྒྱ་གོ་བདུན་གྱིས་བགོ་སྟེ་སླར་ཡང་ལྷག་མ་སྐར་མ་ཉེར་བདུན་ལ་སོགས་པའི་ཆུ་ཚོད་དྲུག་ཅུ་སོགས་ཀྱི་དབྱེ་བས་བསྒྱུར་ནས་གོང་དུ་རབ་བརྗོད་རི་བུག་རི་ཀླུའི་ཆ་ཡིས་ཐོབ་པ་རྒྱུ་སྐར་དག་དང་སླར་ཡང་ཆུ་ཚོད་རྣམས་ནི་ཟླ་སྐྱེས་ལྷག་པའི་རྐང་པའི་ལོངས་སྤྱོད་དག་ཏུ་འགྱུར་རོ། །འདིའི་དོན་ནི། ལྷག་པའི་སྔར་གྱི་རྩིས་འཕྲོ་སྟོང་དྲུག་བརྒྱ་དོན་བཞི་སྟེ། ཉིན་ཞག་བཅུ་དྲུག་ཆུ་ཚོད་ཞེ་བཞི། ཆུ་སྲང་ཉེར་བཞི་ཡིན་ལ། གོང་གི་རྩིས་འཕྲོ་བརྒྱས་བགོས་ན་ཞག་བཅུ་དྲུག་སོགས་འདི་ཉིད་འབྱུང་ངོ་། །དེའི་ཕྱིར་གསལ་ཞག་ལ་མེ་ཉི་རིས་དམན་པས་གོང་གི་རྩིས་འཕྲོ་དེ་འབྱུང་ངོ་། །གཟའ་ལྷག་གི་མྱུར་རྐང་ནི་ཉིན་ཞག་རི་བུག་སོགས་ཀྱི་དོན་ནི། ཞག་གྱ་བདུན་ཆུ་ཚོད་ང་བརྒྱད། སྲང་བཅུ་གཉིས་ཀྱིས་བདག་ཉིད་ཡིན་ཀྱང་དེས་བགོད་མི་བདེ་བས་བརྒྱས་བསྒྱུར་
ནས་རང་འཁོར་དྲིལ་བས་ཞག་དེ་དག་འབྱུང་ངོ་། །ཟླ་སྐྱེས་ཀྱི་དལ་དག་ཆེད་དུ་སྐྱེས་ཁྱིམ་དོར་བར་བྱ་སྟེ་ཇི་ལྟར་ན་ཉི་མའི་དལ་བའི་དབུས་ནས་ཀྱེ་མི་བདག་བཟང་པོ་མི་བདག་སྐར་མ་བཅུ་དྲུག་དང་། ཆུ་ཚོད་དྲུག་ཅུའི་ཕྱེད་སུམ་ཅུ་ཐམ་པ་དག་ཀྱང་ཡང་དག་སྤངས་པ་སྟེ་དོར་བར་བྱའོ། །ལྷག་མའི་བྱ་བ་ནི་ནོར་དང་བུ་ལོན་དུ་འགྱུར་བ་དེ་དག་དལ་བ་དང་མྱུར་བའི་ལས་ལ་སྦྱར་ཚུལ་ཀྱང་མིག་དམར་གྱི་ཇི་ལྟ་བ་བཞིན་དུ་འགྱུར་རོ། །ཟླ་སྐྱེས་ཀྱི་རྐང་པ་དལ་བའི་ལས་ལ་བཅུ་རི་མེ་སྟེ་རྐང་གནས་དྲུག་ཁྱིམ་རེ་རེ་ལའོ། །མྱུར་བའི་ལས་ལ་མི་བདག་ལ་སོགས་པ་རྐང་གནས་བཅུ་བཞི་ནི་རྒྱུ་སྐར་རེ་རེ་ལ་གནས་སོ། །གཟའ་ལག་ཡོངས་སུ་དག་པའོ། །དེ་ནས་ཕུར་བུ་གསུངས་པ། སྔར་གྱི་གསལ་བའི་ཉིན་ཞག་གི་ཚོགས་ནི་མཁའ་མཁའ་རོ་དང་མིག་གིས་དམན་པར་བྱས་ནས་ཞེས་ཉིས་སྟོང་དྲུག་བརྒྱས་ཕྲི་བའི་ལྷག་དེ་ཕུར་བུའི་དཀྱིལ་འཁོར་སོ་མེ་ཆུ་གཏེར་དག་གིས་ཞེས་བཞི་སྟོང་སུམ་བརྒྱསོ་གཉིས་ཀྱིས་བགོ། ལྷག་མ་སྐར་མས་བསྣུན་པ་ཞེས་བསྒྱུར་བ་ལས་གོང་གི་བགོད་བྱེད་དེས་རྙེད་པ་ནི་སྐར་མའོ། །སླར་ཡང་དྲུག་ཅུས་བསྒྱུར་བ་ལས་རྙེད་པ་ཆུ་ཚོད། བླ་མ་ཡི་ཡང་དལ་བའི་ལས་ལའོ། །དལ་རྐང་གི་རྒྱུ་སྐར་གྱི་གནས་སུ་ཉི་མ་སྦྱང་སྟེ་འཕྲོག་བྱེད་བཅུ་གཅིག་དང་དགུ་དང་རྩེ་མོ་ཅན་གསུམ་སྔ་རྐང་དང་ཕྱི་རྐང་བཟློག་བརྩེགས་རྐང་གནས་དྲུག་ནི་དལ་བའི་ལས་ལ་ཁྱིམ་རེའི་རྐང་པའོ། །སླར་ཡང་མྱུར་བ་དག་ལ་རྐང་པ་རབ་གསལ་མ་ནུའི་གནས་ལ་ཕྱོགས་ཏེ་བཅུ་དང་པོར་བྱས་པའི་རྐང་པ་ལ་སོགས་པ་དེ་དག་གོ། འདིར་ཕུར་བུའི་སྔར་གྱི་ཉིན་ཞག་གི་རྩིས་འཕྲོ་སྟོང་དང་བདུན་བརྒྱ་སོ་གཉིས་ཡིན་པས་དེ་བསྲེ་བ་ལས། དེས་དཀྱིལ་འཁོར་ལ་དམན་པ་ཉིས་སྟོང་དྲུག་བརྒྱས་ཕྲི་བ་དོན་འདྲའོ། །པ་སངས་ཀྱི་རྐང་པའི་ལོངས་སྤྱོད་གསུངས་པ། གསལ་བའི་ཉིན་ཞག་མཁའ་དང་ཟླ་བས་ཏེ་བཅུས་བསྒྱུར་ནས། ཆུ་གཏེར་ནོར་གྱིས་ཞེས་
གྱ་བཞིས་དམན་པ་པ་སངས་ཀྱི་རྐང་པའི་འཁོར་ལོ་རི་དང་རྒྱལ་བ་མིག་གིས་ཏེ་ཉིས་སྟོང་ཉིས་བརྒྱ་ཞེ་བདུན་གྱིས་བགོ། སྐར་མས་བསྒྱུར་བ་ལས་ཀྱང་བགོ་བྱེད་ཀྱིས་ཐོབ་པ་སྐར་མའི་ལོངས་སྤྱོད་དང་དེ་ལྷག་སླར་ཡང་དྲུག་ཅུས་བསྒྱུར་ལ་རང་འཁོར་གྱིས་ཐོབ་པ་ཆུ་ཚོད་ཡིན་ཞིང་མྱུར་བའི་ལས་ལ་པ་སངས་ཀྱི་རྐང་འཛིན་ནོ། །འདིར་པ་སངས་ཀྱི་རྩིས་འཕྲོ་དང་དཀྱིལ་འཁོར་གྱི་དོན་ནི་རྩིས་འཕྲོ་ཞག་བརྒྱ་དང་བཅུ་དྲུག་ཆུ་ཚོད་བཅོ་བརྒྱད་བསྲེ་བའི་དོན་དུ་གྱ་བཞིས་ཕྲི་བ་ཡིན་ནོ། །འཁོར་ལོའི་དོན་ནི། ཞག་ཉིས་བརྒྱ་ཉེར་བཞི་ཆུ་ཚོད་ཞེ་གཉིས་ཡིན་ཀྱང་དེས་བགོད་མི་བདེ་བས་གནས་གཉིས་བཅུས་བསྒྱུར་ཏེ་ཆུ་ཚོད་དྲུག་ཅུས་ཞག་གནས་དྲིལ་བས་རི་རྒྱལ་མིག་འབྱུང་བ་ཡིན་ནོ། །དེའི་ཕྱིར་པ་སངས་ཀྱི་སྔར་གྱི་རྩིས་འཕྲོ་ཉིས་སྟོངབརྒྱ་རེ་གསུམ་བསྲེ་བའམ། དེས་དཀྱིལ་འཁོར་ལ་ཕྲི་ལྷག་བརྒྱད་ཅུ་གྱ་བཞིས་ཕྲི་བ་དོན་འདྲའོ། །དཀར་པོའི་སྐྱེས་ཁྱིམ་རྒྱུ་སྐར་དུས་ཏེ་དྲུག་ནི་པ་སངས་ཀྱི་དལ་བ་ཉིད་དུ་མྱུར་བ་ཉི་མ་ཡི་དལ་བ་ལ་སྦྱངས་ནས་མདའ་དུས་རི་བོང་ཅན་ཏེ་རྐང་གནས་དང་པོར་ལྔ་གཉིས་པར་བཞི་གསུམ་པར་གཅིག་སྔ་རྐང་དང་ཕྱི་རྐང་ལ་གསུམ་པོ་བཟློག་སྟེ་བཀོད་པའི་རྐང་གནས་དྲུག་ནི་པ་སངས་ཀྱི་དལ་བའི་ལས་ལ་རྐང་པ་སྟེ། དེ་ཡང་པ་སངས་ཀྱི་ཞག་ཉི་ཤུ་དང་ཆུ་ཚོད་ཉེར་ལྔ་ན་ཁྱིམ་རེ་རྫོགས་པས། ཁྱིམ་དང་པོའི་དུས་དེ་ལ་ཁྱིམ་རེ་ཆུ་ཚོད་བརྒྱ་སོ་ལྔ་ལས་ཆུ་ཚོད་བརྒྱ་སུམ་ཅུ་ལས་མི་སྤྱོད་པས་རྟགས་ལོངས་ལ་ལྔ་འབྲིད། གཉིས་པར་བརྒྱ་སོ་གཅིག་ལས་མི་སྤྱོད་པས་བཞིས་འབྲིད། གསུམ་པར་བརྒྱ་སོ་བཞི་ལས་མི་བགྲོད་པས་གཅིག་འབྲིད། བཞི་པ་ནས་འཕེལ་ཏེ་བཞི་པར་བརྒྱ་སོ་དྲུག་བགྲོད་པས་སྣོན་བྱེད་རྐང་པའི་བཞི་ཆ་གཅིག །ལྔ་པར་བརྒྱ་སོ་དགུ་སྤྱོད་པས་བཞི་སྣོན། དྲུག་པར་བརྒྱ་བཞི་བཅུ་སྤྱོད་པས་ལྔ་སྣོན་པའོ། །དེ་བཞིན་སྤེལ་བས་ཞག་བརྒྱད་བརྒྱ་གོ་
བདུན་དང་ཆུ་ཚོད་བཅུ་ན་ཁྱིམ་རེ་རྫོགས་པས། ཁྱིམ་དང་པོར་ཆུ་ཚོད་བརྒྱ་བཅུ་གསུམ་ལས་མི་བགྲོད་པ་ནས། དྲུག་པར་བརྒྱ་དང་བདུན་བགྲོད་པའི་བར་རོ། །པ་སངས་ཀྱི་མྱུར་རྐང་ལ་དེ་ཉིད་ཞེས་རྐང་གནས་དང་པོ་ཉེར་ལྔ་ལ་སོགས་དབྱེ་བས་རབ་གསལ་མ་ནུའི་གནས་དག་ལས་ཏེའམ་ལ་སྟེ། སྦྱིན་དོར་བྱ་ཚུལ་མིག་དམར་བཞིན་ནོ། །འདི་སྐོར་ལ་ཞེས་བདུན་པའི་དོན་ལ་ལས་ཞེས་ལྔ་པ་བྱས་པ་དུ་མ་ཡོད་པ་ཤེས་པར་བྱའོ། །སྤེན་པའི་དལ་བ་གསུངས་པ། མཁའ་མིག་ཀླུ་དང་རིག་བྱེད་ཀྱིས་ཞེས་པ་བཞི་སྟོང་བརྒྱད་བརྒྱ་ཉི་ཤུས་དམན་པའི་གསལ་བའི་ཉིན་ཞག་ཚོགས་ནི། དྲུག་རོ་རི་མཁའ་ཟླ་བ་ཡིས་ཞེས་པ་སྤེན་པའི་ཉིན་ཞག་གི་དཀྱིལ་འཁོར་ཁྲི་དང་བདུན་བརྒྱ་རེ་དྲུག་གིས་བགོ་ཞིང་། ལྷག་མ་སྐར་མས་བསྒྱུར་ལས་དཀྱིལ་འཁོར་གྱིས་ཐོབ་པ་སྐར་མར་འགྱུར་ཏེ། ཆུ་ཚོད་ཀྱང་སྔར་ལྟར་བྱས་ལ་སྤེན་པ་ཡི་ནི་དོར་བྱ་སྐྱེས་ཁྱིམ་སྦྱང་བ་དག་ཀྱང་སྐར་མ་བཅོ་བརྒྱད་དོ། །རྐང་པ་ནི་ཉི་ཤུ་རྩ་གཉིས་དང་ཚེས་བཅོ་ལྔ་དང་དུས་དྲུག་ནི་སྔ་རྐང་དང་ཕྱི་རྐང་བཟློག་པ་བཅས་རབ་གསལ་རོ་ཡི་སྟེ་དྲུག་གི་གནས་ནི་ཁྱིམ་དྲུག་ལའོ། །སྤེན་པའི་སྔར་གྱི་ཉིན་ཞག་གི་རྩིས་འཕྲོ་ལྔ་སྟོང་དགུ་བརྒྱ་ཞེ་དྲུག་ཡིན་པས་དེ་གསལ་ཞག་ལ་བསྣན་པའམ། ཡང་ན་རྩིས་འཕྲོས་དཀྱིལ་འཁོར་ལ་ཕྲི་ལྷག་བཞི་སྟོང་བརྒྱད་བརྒྱ་ཉི་ཤུས་དམན་པ་གང་ཡིན་ཀྱང་རི་མོའི་རྣམ་འགྱུར་ཙམ་ལས་དོན་འདྲ་བ་ཡིན་ནོ། །མྱུར་བའི་ལས་ལ་རྐང་པ་ནི་རོ་སྟེ་དྲུག་དང་པོར་བྱས་པའི་དེ་ལ་སོགས་པ་རྐང་གནས་བཅུ་བཞི་སྐར་མ་རེ་རེའི་སྟེང་ནས་སྤྱོད་དོ། །གཟའ་རྣམས་ཀྱི་འགྲོས་བཞི་གསུངས་པ། མྱུར་འགྲོས་དང་དལ་འགྲོས་ཀྱིས་རྒྱུ་བ་དག་ཀྱང་རིམ་པས་གཟའི་རྐང་པ་བགྲོད་པ་ལ་སྟེ། རིམ་པའི་སྔ་རྐང་མྱུར་འགྲོས་ཤར། །རིམ་པའི་ཕྱི་རྐང་དལ་འགྲོས་ལྷོ། །ཞེས་པ་བཞིན་ནོ། །
འཁྱོགས་པོ་ཡི་འགྲོས་ཉིད་ནི་རིམ་མིན་གྱིས་ཏེ་འཁོར་ཕྱེད་དོར་བ་ལས་སོ། །དེ་ཡང་རྐང་གནས་ཀྱི་ཕྱེད་སྔ་མ་དང་སྦྱར་ཏེ་འཁྱོགས་འགྲོས་སུ་འགྱུར་རོ། །དེ་ནས་ཕྱེད་སྔ་མ་དང་ཕྱེད་ཕྱི་མར་ཡང་ཉི་མ་འགྲོ་བའི་དབང་གིས་གཟའ་རྣམས་ཀྱི་ནི་འབྱུང་བ་ཡི་འགྲོས་ཞེས་པར་ཡང་འགྱུར་ཏེ་འཁྱོགས་འགྲོས་བཏང་ནས་འབྱུང་འགྲོས་སུ་བྱེད་དེ། རིམ་མིན་སྔ་རྐང་འཁྱོགས་འགྲོས་ནུབ། །རིམ་མིན་ཕྱི་རྐང་འབྱུང་འགྲོས་བྱང་། །ཞེས་སོ། །འདིར་ཉི་མ་ལས་ཤར་ནས་རིམ་པར་བགྲོད་པ་ལ་ཕྱེད་སྔ་མའི་བར་དུ་རྐང་པའི་ནོར་འཕེལ་བས་དལ་བ་ལས་ཆེས་མང་བས་མྱུར་འགྲོས་སོ། །དེ་ནས་རྐང་པའི་ཕྱེད་ཕྱི་མ་ལ་འཁོར་ལོ་ཕྱེད་ཀྱི་བར་དུ་ནོར་འགྲིབས་པས་དལ་བ་ལས་ཆེས་ཉུང་བའི་དལ་འགྲོས་སོ། །འཁོར་ཕྱེད་དོར་ནས་རིམ་མིན་གྱི་རྐང་པའི་ཕྱེད་སྔ་མ་ལ་བུ་ལོན་འཕེལ་བས་དལ་བ་ལས་ཆེས་ཉུང་སྟེ་འཁྱོགས་འགྲོས་སོ། །ཕྱེད་ཕྱི་མ་ནས་ཉི་མའི་རྒྱུ་སྐར་ལ་རབ་ཏུ་ཞུགས་ཀྱི་བར་དུ་བུ་ལོན་འགྲིབས་པས་དལ་བ་དང་མཉམ་པར་རྒྱུ་བ་འབྱུང་འགྲོས་སོ། །དེ་ནས་ཉི་མར་ནུབ་སྟེ་སླར་ཡང་འཆར་བའི་རིམ་པ་དེ་ཉིད་ཀྱིས་རིག་པར་བྱའོ། །དེ་ནས་མཇུག་རིང་གི་ལོངས་སྤྱོད་མདོ་ཙམ་བསྟན་པ། སུམ་ཅུ་རྩ་བདུན་ལག་པས་བསྒྱུར་བའི་ཟླ་བ་རྣམས་ཀྱིས་དུ་བ་མཇུག་རིང་དག་ནི་མྱུར་དང་འཁྱོག་པོར་འགྱུར་ཞེས་པ། ཟླ་བ་ཕྱེད་པ་བདུན་ཅུ་རྩ་བཞི་དང་ཟླ་བ་ཕྱེད་བསྣན་པས་ཟླ་ཕྱེད་དོན་ལྔས་དུ་མཇུག་ཉི་མ་ལས་འཆར་ནུབ་བྱེད་དེ། ལོ་གསུམ་དང་ཕྱོགས་གསུམ་གྱིས་ཉི་མའི་མདུན་དུ་མྱུར་བའི་འགྲོས་ཀྱི་དབང་གིས་སྲོད་ལ་ནུབ་ཏུ་འཆར་ལ། ལོ་གསུམ་ཕྱོགས་གསུམ་གྱིས་ཉི་མའི་རྒྱབ་ཏུ་འཁྱོགས་པོར་འགྲོ་ཞིང་དེའི་མཐར་ཐོ་རེངས་ཤར་དུ་འཆར་བར་འགྱུར་བ་སྟེ་རྗེས་ནས་རྒྱས་པར་འཆད་དོ། །གཟའ་ལྔའི་འཆར་ནུབ་ནི་བཀྲ་ཤིས་ལ་སོགས་པའི་གཟའ་གང་དག་སུ་ཞིག་
ཉི་མའི་ལོངས་སྤྱོད་ལ་ནི་རབ་བཞུགས་གཟའ་དེ་དག་ཀྱང་ངེས་པར་ཉི་མའི་འོད་ཀྱིས་བསྒྲིབ་ནས་ཉི་མ་ལ་ནུབ་པར་འགྱུར་ཏེ་མི་མཐོང་ངོ་། །གཟའ་དེ་དག་རང་འགྲོས་ཀྱི་དབང་གིས་ཉི་མ་དང་ལྷན་ཅིག་འགྲོགས་པ་བཏང་ནས་སམ་དོར་ནས་སླར་ཡང་འགྲོ་བ་རྣམས་ཀྱི་མཐོང་བའི་ལམ་དུ་འཆར་བར་འགྱུར་ཏེ། གཟའ་བཀྲ་ཤིས་ལ་སོགས་པ་དེ་ཡི་ལམ་ཡང་ཉི་མས་ལྷོ་དང་བྱང་དུ་བགྲོད་པ་གངས་ཅན་དང་མེ་ཡི་བར་དུ་ཕྱེད་དང་བཅས་པའི་ཉིན་ཞག་གྱ་གཉིས་ཀྱིས་འགྲོ་བའི་རྣམ་པར་དབྱེ་བས་གཉིས་སུ་ཡོད་པ་དེ་བཞིན་དུ་ཤེས་སོ། །གཡོན་པའི་ལམ་ལ་གནས་པ་གང་ཡིན་པ་ནི་ཞི་གཟའ་ལྷག་པ་སོགས་ཏེ་ལྷག་སངས་མཇུག་རིང་ངོ་། །དེ་རྣམས་ནི་གོང་བཤད་ལྟར་གཡོན་གྱི་ཡན་ལག་ལས་བྱུང་བའི་ཕྱིར་ཞི་གཟའ་སྟེ་དུ་མཇུག་ཀྱང་གཡོན་གྱི་ཡན་ལག་ལས་བྱུང་བས་ན་ལུས་ཀྱི་དབྱེ་བས་ཞི་བར་བསྡུའོ། །དེ་ལྟར་ཞི་གཟའ་རྣམས་འཆར་བ་དང་ནུབ་པ་ནི་ཉི་མ་རང་གི་རྐང་པའི་ལོངས་སྤྱོད་ཀྱིས་རྒྱུ་སྐར་འཁོར་ལོར་འགྲོ་བའི་དབང་གིས་ཉི་མ་དེའི་གཡོན་ནས་འགྲོ་བ་ཞེས་གཡོན་ནས་འཇུག་ཅིང་ནུབ་ལ་གཡོན་ནས་འཆར་བ་ཤེས་པར་བྱ་སྟེ། སྤྱིར་ཞི་གཟའ་འདི་རྣམས་ཉི་མའི་རྒྱབ་ཏུ་ནུབ་ཅིང་མདུན་ནས་འཆར་བ་ཡིན་ཏེ་ཉི་མ་ལས་འགྲོས་མྱུར་བའི་ཕྱིར་རོ། །གཡོན་ཞེས་པ་ནུབ་ཕྱོགས་དང་གཡས་ཤར་ཕྱོགས་སུ་གོ་བར་བྱའོ་ཞེས་ཀྱང་ཟེར། དེ་བཞིན་གཡས་ལ་གནས་པ་དག་སྟེ་དམར་ཕུར་སྤེན་གསུམ་ནི་གཡས་ཀྱིས་ཞེས་ཉི་མའི་གཡས་ནས་འཇུག་ཅིང་གཡས་ཀྱི་ཆ་ནས་འཆར་བར་འགྱུར་རོ། །དྲག་པོ་རྣམས་ཞི་གཟའ་རྣམས་ཀྱི་གཡས་ནས་འགྲོ་སྟེ་གཡས་ཀྱི་ཡན་ལག་ལས་བྱུང་བའི་ཕྱིར་རོ། །ཕུར་བུ་ནི་གཡས་ཀྱི་ཡན་ལག་ལས་བྱུང་བའི་ཕྱིར་ལུས་ཀྱི་དབྱེ་བས་དྲག་པོ་དང་བསམ་པས་ཞི་བའོ། །སླར་ཡང་གསལ་བར་འདིར་ནི། ཞི་དྲག་ཕན་ཚུན་འཐབ་ཏེ་ཇི་ལྟར་ན་ལྷག་མིག་གཉིས་དང་། ཕུར་སངས་གཉིས་དང་སྤེན་པ་དུ་མཇུག་གཉིས་ཕན་ཚུན་དགྲ་ཡིན་པའི་ཕྱིར་
རོ། །གཟའ་རྣམས་རང་རང་གི་ཞིང་སོ་སོ་ལ་ཡང་དག་པར་གནས་པ་དེ་རྣམས་ཀྱི་དྲུང་དུ། གལ་ཏེ་ཞིང་དེ་ལ་དེ་ཡི་དགྲ་དག་འོང་བར་འགྱུར་ན་ངེས་པར་རྩོད་ཅིང་འཐབ་པའོ། །རང་རང་གི་ཞིང་གང་ཞེ་ན། མིག་དམར་གྱི་རང་གི་ཞིང་ནི་ལུག་དང་སྡིག་པའི་ཁྱིམ་ཡིན་ལ་དེར་མིག་དམར་ཞུགས་ཤིང་གནས་པའི་ཚེ་གཟའ་ལག་འོང་ནས་ལོངས་སྤྱོད་ན་ངེས་པར་འཐབ་བོ། །དེ་བཞིན་དུ་འཁྲིག་པ་བུ་མོའི་ཁྱིམ་གྱི་བདག་པོ་ལྷག་པའོ། །ལྷག་པ་དེར་ཞུགས་པའི་དུས་སུ་དེར་མིག་དམར་འོང་ན་འཐབ་བོ། །གཞུ་དང་ཉ་ནི་ཕུར་བུའི་ཞིང་ལ་ཕུར་བུ་རང་གི་ཞིང་དེར་གནས་ཚེ་པ་སངས་ཞུགས་པ་དེ་གཉིས་འཐབ་བོ། །གླང་དང་སྲང་གི་ཁྱིམ་གྱི་ཞིང་བདག་པ་སངས་སོ། །དེར་པ་སངས་ཡོད་ཅིང་ཕུར་བུའང་ཞུགས་ན་དེ་གཉིས་འཐབ་བོ། །ཆུ་སྲིན་དང་བུམ་པ་སྤེན་པའི་ཞིང་ཡིན་ལ། དེར་སྤེན་པ་ཡོད་ཚེ་མཇུག་རིང་ཞུགས་ན་དེ་གཉིས་འཐབ་བོ། །ཀརྐ་ཊ་ཟླ་བའི་ཞིང་། སེང་གེ་ཉི་མའི་ཞིང་ངོ་། །དེ་ལྟར་རེས་གཟའ་བདུན་གྱི་ཞིང་བཅུ་གཉིས་པོ་དེ་ཡིན་ལ། གཞན་ཡང་བུ་མོ་ལ་སྒྲ་གཅན་དང་། བུམ་པ་ལ་དུས་མེའི་དབང་བྱེད་པ་ཡིན་ཀྱང་ཟླ་ཉི་གདོང་མཇུག་རྣམས་ལ་དགྲ་ཟླས་འཐབ་པ་མེད་དོ། །འོན་ཀྱང་ཟླ་བའི་ཞིང་ཀརྐ་ཊ་ལ་སྤེན་པ་ཞུགས་ན་དེའི་ཚེ་མཇུག་རིངས་དང་ལྷན་ཅིག་ཏུ་གྱུར་ན་དེ་གཉིས་རྩོད་དོ། །ཉི་མའི་ཞིང་སེང་གེ་ལ་སྤེན་པ་ཡོད་ཚེ་མཇུག་རིངས་འོང་ན་སྤེན་པས་རྩོད་དོ། །དེར་མ་ཟད་གཟའ་རང་རང་སྐྱེས་པའི་སྐར་མ་ལ་ཡང་དགྲར་གྱུར་པ་དག་ལྷན་ཅིག་གྱུར་ན་འཐབ་སྟེ། སྐྱེས་སྐར་ནི་པ་སངས་ནབ་སོ་ལ་སྐྱེས་པའོ། །དེ་བཞིན་དུ་མིག་དམར་མཆུ། ཕུར་བུ་མེ་བཞི། གཟའ་ལྷག་ལྷ་མཚམས། སྤེན་པ་སྣུབས། མཇུག་རིང་ཆུ་སྨད་ལའོ། །ལྷག་པ་དང་མིག་དམར་རང་སྐྱེས་སྐར་མར་ལྷན་ཅིག་གྱུར་ན། ཕན་ཚུན་འཐབ་པ་སོགས་གཞན་ལའང་
གོང་ལྟར་ཤེས་པར་བྱའོ། །དེ་ལྟར་རང་རང་གི་ཞིང་དུ་གྱུར་པའི་ཁྱིམ་དང་སྐྱེས་སྐར་དེ་དག་མ་ཡིན་པའི་ཞིང་དང་སྐར་མ་གཞན་ལ་འཐབ་པ་མིན་པར་ངེས་ཤིང་། ཁྱིམ་དང་སྐར་མ་གཞན་འདིར་ནི་དགྲ་ཟླ་དེ་དག་ཀྱང་ཕན་ཚུན་གཉིས་ཀ་ལྷན་ཅིག་ཏུ་འཐབ་པ་མེད་པར་མཚུངས་པ་དག་ཏུ་ལྡན་པར་འགྱུར་རོ། །དེ་ནས་ཟླ་བའི་རྭ་མཐོ་དམན་བཤད་པ། གལ་ཏེ་ཉི་མ་ཡི་ནི་གཡོན་དུ་ཟླ་བ་རབ་ཏུ་ཞུགས་པར་གྱུར་ཅིང་སླར་འབྱུང་བ་ཡང་ནི་ཉི་མའི་གཡོན་པ་ཡི་ཆ་ནས་ཡིན་པ་དེ་ཡིས། ཟླ་བའི་བྱང་གི་ཕྱོགས་ཀྱི་རྭ་ནི་མཐོ་བར་འགྱུར་ཏེ། ཞེས་སོ། །འདིར་འགྱུར་ལ་ལར། རྩེ་མོ་བྱང་དུ་མཐོ་བར་འགྱུར་ཏེ་ཞེས་དང་། བྱང་གི་རྭ་རྩེ་བྱང་དུ་མཐོ་བར་འགྱུར་ཏེ་ཞེས་བཀོད་པ་ཡོད་དོ། །ཡང་ཁ་ཅིག་དུ་ནི་ཟླ་བ་བགྲོད་པའི་དབང་གིས་ཉི་མའི་ལྷོ་རུ་བགྲོད་ཅིང་འབྱུང་བ་གཡས་པ་ནས་བྱེད་པ་ཡང་ཡོད་པ་དེས་ཟླ་བའི་ལྷོ་ཡི་རྭ་མཐོ་བ་ནི་ཆར་མི་འབབ་པ་ལ་སོགས་པའི་ལྟས་སུ་ཕྱིན་ཅི་ལོག་དེ་ལྟར་སྣང་གི་ངོ་བོ་ཉིད་ལས་མ་ཡིན་ཏེ་ཟླ་བ་ནི་འགྲོས་མྱུར་བས་རྟག་པར་ཉི་མའི་མདུན་ནས་འཆར་བ་ཡིན་ནོ། །འདི་ལ་ཟླ་བ་ཉི་མའི་གཡས་ནས་འཆར་ནུབ་བྱེད་ཚེ་རྭ་ལྷོ་ངོས་མཐོ་བ་ནི་མི་ཤིས་པའི་ལྟས་ཡིན་ནོ་ཞེས་ཟེར་བ་དང་། ཡང་རྭ་གཉིས་མཐོ་དམན་དུ་སྣང་བའི་རྒྱུ་གཉིས་ཀ་ལྟས་ཀྱི་དབང་གིས་ཡིན་གྱི་ཟླ་བ་ཉི་མའི་གཡས་ནས་འཆར་ནུབ་བྱེད་མི་སྲིད་དེ་རྟག་པར་ཉི་མའི་མདུན་ནས་རྒྱུ་བས་སོ་ཞེས་ཀྱང་ཟེར་རོ། །ད་ནི་ཉི་ཟླ་ལ་སྒྲ་གཅན་འཇུག་པ་གསུངས་ཏེ། དཀར་ནག་གི་ཚིགས་མཚམས་སུ་ཡང་ཞེས་ཉའི་ཚིག་མཚམས་སུ་ཟླ་བ་ལ་སྒྲ་གཅན་འཇུག་པ་དང་། ཡང་ཡིག་གིས་སྟོང་གི་ཚིགས་མཚམས་སུ་ཉི་མ་ལ་འཇུག་པ་བསྟན་ཏོ། །དེ་ཡང་སྒྲ་གཅན་གྱི་གདོང་དང་ཟླ་བ་མཉམ་པར་འགྲོ་བ་སྟེ་གདོང་གི་སྐར་མའི་མདུན་ན་ཟླ་སྐར་གནས་པ་སྟེ་དེའི་ཚེ་གདོང་ཟླ་བ་ལ་མངོན་དུ་ཕྱོགས་པར་འཛིན་པ་ཁོ་ནའོ། །ཞེས་བཟླ་བ་འགྲོས་མྱུར་བས་སྒྲ་
གཅན་གྱི་གདོང་གང་དུ་གནས་པ་དེར་འགྲོ་བའི་དབང་གིས་ཟླ་བའི་ཆ་ཤར་གྱི་ཕྱོགས་ནས་དང་པོར་སྒྲིབ་པར་འགྱུར་རོ། །ཟླ་བའི་གཡོན་ཏེ་བྱང་དུ་སྒྲ་གཅན་རྒྱུ་བའམ་བགྲོད་པ་དག་ལ་ཟླ་བའི་གཡས་མིན་དུ་སྟེ་བྱང་ཕྱོགས་ནས་འཛིན་པར་འགྱུར་རོ། །དེ་བཞིན་དུ་གདོང་སྐར་གྱི་ལྷོ་ནུབ་ན་ཟླ་སྐར་གནས་པའི་ཚེ་ཟླ་བའི་བྱང་ཤར་གྱི་ཆ་ནས་འཛིན་པའོ། །ཉི་མའི་ལོངས་སྤྱོད་ལས་བྱུང་བ་ཟླ་བ་བགྲོད་པའི་དབང་གིས་ཟླ་བའི་གཡས་ཏེ་ལྷོར་སྒྲ་གཅན་ཡོད་པ་ལ་ཟླ་བའི་གཡས་པའི་ཆར་ཏེ་ལྷོ་ཡི་ཕྱོགས་ཆ་ནས་འཛིན་པར་འགྱུར་རོ། །དེ་བཞིན་དུ་སྒྲ་གཅན་གྱི་སྐར་མའི་ནུབ་བྱང་དུ་ཟླ་བ་གནས་ན་ཟླ་བ་ཤར་ལྷོ་ནས་དང་། བྱང་ཤར་དུ་གནས་ན་ཟླ་བའི་ལྷོ་ནུབ་དང་། ཤར་ལྷོར་གནས་ན་ཟླ་བ་ནུབ་བྱང་ནས་འཛིན་ཏེ། དེ་ལྟར་སྒྲ་གཅན་གྱིས་ནི་ཕྱོགས་དང་མཚམས་དེ་རྣམས་སུ་འཛིན་ཏེ་གང་ལ་ན་རི་བོང་འཛིན་པ་ལའོ། །སྒྲ་གཅན་ཤར་ལ་སོགས་པའི་ཕྱོགས་གཞན་འཁོར་ནས་འབྱུང་བ་ཡི་འགྲོས་ལ་གནས་པ་དག་ནི་ཟླ་བའི་ནུབ་ཏུ་འཁོར་བས་ན་སྒྲ་གཅན་གྱི་ཤར་དུ་ཟླ་བའི་སྐར་མ་གནས་པའི་ཚེ་ཟླ་བའི་རྒྱབ་སྟེ་ནུབ་ཏུ་ཡང་འཛིན་པར་འགྱུར་རོ། །དེ་ལྟར་སྒྲ་གཅན་སྐར་མ་ལ་འཁོར་བའི་དབང་གིས་དུས་སུ་གཟའ་འཛིན་འབྱུང་བ་འདི་ནི་སྒྲ་གཅན་གདོང་མཇུག་དང་ཉི་ཟླའི་སྐར་མ་ཕན་ཚུན་ཕྲི་ལྷག་གིས་བརྟག་པའི་ཚུལ་རྣམས་བྱེད་གྲུབ་ཀྱི་རྩིས་རྣམས་སུ་ཡོངས་སུ་གྲགས་པའི་ཕྱིར་རྒྱུད་འདིར་རྣམ་པར་ཕྱེ་སྟེ་མ་བསྟན་ཏོ། །འདིར་ཟླ་བ་ཡོངས་སུ་རྫོགས་པའི་ཆ་བཅུ་དྲུག་པ་ནི་ཟླ་བའི་ཤར་མཐའ་ཁོ་ནར་བཞག་དགོས་པའི་ཕྱིར་དངོས་པོ་ལ་ཟླ་བ་ཤར་གྱི་ཕྱོགས་སུ་གཏོགས་པ་ཁོ་ན་ནས་འཛིན་ཀྱང་། ཕྱོགས་གཞན་ནས་བཟུང་བར་སྣང་བ་ནི་ཟླ་བ་འཁོར་བའི་དབང་གིས་ཡིན་ནོ་ཞེས་བླ་མ་དག་འཆད་དོ། །དེ་ལྟར་ན་སྐར་རྩིས་ཀྱི་ངོ་བོ་ཉིད་ཀྱིས་གནས་པ་ལ་ནང་གསེས་སུ། ཡན་ལག་ལྔ་དང་། ལོ་འཕོ་དང་། ཉིན་མཚན་གྱི་ཆ་འཕེལ་འགྲིབ་དང་། སྒྲ་གཅན་
དང་། གཟའ་ལྔའི་ལོངས་སྤྱོད་དང་། མཇུག་རིང་དང་གཟའི་འཆར་ནུབ་དང་། འཕྲོས་དོན་ཟླ་བའི་རྭ་བརྟག་པ་དང་། གཟའ་འཛིན་དང་བཅས་པའི་བར་གྱིས་སྐར་རྩིས་ཀྱི་ཆོ་གའི་རིམ་པའམ་གནས་པ་སོང་ནས། ད་ནི་བཅོ་ལྔ་པ་ཁྱིམ་བཅུ་གཉིས་ཀྱིས་ས་འཁོར་བའི་ངོ་བོ་ཉིད་ཀྱིས་གནས་པ། ཁྱིམ་གྱི་འཁོར་ལོ་འཁོར་བའི་དབང་གིས་ས་ལ་དུས་བཞིར་འགྱུར་ཚུལ་གསུངས་པ། ཐ་སྐར་ལ་སོགས་ཞེས་ང་གཉིས་པའི་རྐང་པ་ཐ་མ་ནས། ཚིགས་བཅད་རེ་གསུམ་པའི་བར་གྱིས་བསྟན་ཏེ། གནས་པ་འདི་རྩ་རྒྱུད་ལྟར་ན་དབུ་མའི་དབུགས་ལས་གཟའ་རྒྱུ་སྐར་གྱི་རྐང་པ་སྐྱེ་བའི་གནས་པའི་རྗེས་སུ་ཡིན་ཀྱང་། བསྡུས་རྒྱུད་འདིར་སྡེབ་སྦྱོར་སོགས་ཀྱི་དབང་གིས་སྔ་མར་མཛད་དེ་དེ་ལྟར་རྩ་རྒྱུད་དང་དོན་འདྲ་ཡང་གོ་རིམ་མི་འདྲ་བ་ཅུང་ཟད་འོག་ཏུ་ཡང་འབྱུང་ངོ་། །དེ་ཡང་བྱང་ངམ་གཡོན་དུ་ཐ་སྐར་ལ་སོགས་པ་ནས་ནག་པ་ཡི་ཕྱེད་ཀྱི་བར་དུ་རྒྱུ་སྐར་ཕྱེད་བཅུ་གསུམ་ལུག་སོགས་ཁྱིམ་དྲུག་དང་། ཡང་ལྷོ་འམ་གཡས་སུ་ནག་པའི་ཕྱེད་ནས་ནམ་གྲུའི་བར་སྐར་མ་ཕྱེད་བཅུ་གསུམ་སྲང་སོགས་ཁྱིམ་དྲུག་སྟེ། དེ་ལས་ཉིན་དང་མཚན་མོ་མཉམ་པའི་དུས་སུ་ཉི་མ་རྒྱུ་བའི་ལྷོ་བྱང་གི་ཁྱིམ་གྱི་དབུས་སུ། ཉིན་མཚན་ཆུ་ཚོད་སུམ་ཅུ་རེར་མཉམ་པའི་ཉིན་ཞག་གཅིག་གི་ཉི་མ་གནས་པའི་མཚན་མ་གོ་ལའི་རི་མོ་ལ་ཕྱེད་དུ་བྱས་པའི་དབུས་སུ་ཐིག་དྲང་པོ་བྱའོ། །དེ་ཡང་ལྷོ་གླིང་དབུས་མ་ལ་ཉི་མ་ཐ་སྐར་གྱི་སྟེང་དུ་སླེབས་ཚེ་དཔྱིད་ཉིན་མཚན་མཉམ་ལ། ནག་པའི་ཕྱེད་དུ་སྟོན་མཉམ་འོང་བས་ཉིན་མཚན་མཉམ་པའི་གཡས་སམ་ལྷོར་རྒྱུ་སྐར་རངས་པོ་བཅུ་གསུམ་དང་ཕྱེད་པ་གཅིག་སྟེ། གཡོན་དུའང་དེ་ལྟར་ཕྱེད་བཅུ་བཞི་གནས་ཤིང་། དེ་ལྟར་རྒྱུ་སྐར་གྱི་གནས་གཡས་ལྷོ་ཕྱོགས་དང་གཡས་མིན་བྱང་ཕྱོགས་དག་ལ་ངེས་པར་སྲིད་པའི་གནས་སམ་བཅུ་བཞིའི་གནས་སུ་ཉི་མ་ལྷོ་དང་བྱང་དུ་བགྲོད་པ་ཡི་ཁྱིམ་དྲུག་རེ་དྲུག་རེ་ཅན་གྱི་
དབྱེ་བས་ཡང་དག་པར་གནས་སོ། །སྐབས་འདིར་འགྲེལ་ཆེན་ལས་མུ་སྟེགས་པའི་གོ་ལ་འདོད་ཚུལ་བཀག་པ་ནི་ལས་ཀྱིས་ཁྱད་པར་ཅན་འཛམ་གླིང་ཆུང་དུ་འདིར་མི་ཤེས་པའི་དབང་གིས་གོ་ལའི་འདོད་པ་སྣ་ཚོགས་པ་དང་གཟའ་རྣམས་གང་ནས་བགྲོད་པའི་གནས་ལ་སོགས་པ་ཐ་དད་པའི་ཞེ་འདོད་མུ་སྟེགས་རྣམས་ཀྱིས་བརྗོད་དེ། ཇི་ལྟར་ན་གོ་ལ་ལ་གཟའ་བརྒྱད་པོ་དག་འགྲོས་མྱུར་དལ་ཡོད་ཀྱང་། ཁྱིམ་བཅུ་གཉིས་ལ་ལོངས་སྤྱོད་ནས་རི་རབ་འཁོར་བར་མཉམ་སྟེ། དཔེར་ན་སོ་བའི་སྤུན་པ་འཆག་པའི་ཕྱིར་སོ་བའི་སྟེང་དུ་བ་ལང་ཀ་བ་ལ་འཁོར་དུ་བཅུག་པ་རྣམས་ལས་ཀ་བའི་ཉེ་ཕྱོགས་སུ་གནས་པ་རྣམས་དལ་བར་འགྲོ་ཞིང་གོམ་པ་ཉུང་དུས་ཀ་བར་འཁོར་ལ། ཀ་བའི་རིང་ཕྱོགས་སུ་གནས་པ་རྣམས་མགྱོགས་པར་འགྲོ་བའི་གོམ་པ་མང་པོས་ཀ་བ་འཁོར་བ་ལྟར། གཟའ་རྣམས་ཀྱང་འབྲུ་སྙིལ་བ་དེ་ལྟར་རི་རབ་ལ་ཉེ་རིང་དུ་གནས་པའི་དབང་གིས་འགྲོས་མྱུར་བུལ་དུ་སྣང་བ་ཡིན་ཏེ་རྒྱུ་སྐར་འཁོར་ལོ་ཡོངས་རྫོགས་སྤྱད་ནས་རི་རབ་འཁོར་བ་ལ་ཁྱད་མེད་ཅེས་མུ་སྟེགས་པས་འདོད་དོ། །འཇིག་རྟེན་པས་ཐོག་མར་བཞག་པའི་འདོད་པ་དེ་ལ་རིགས་པས་དཔྱད་ན་མི་འཐད་ཞེས་སམ། འདིར་འགྲེལ་བྱེད་ཁ་ཅིག་མུ་སྟེགས་རང་གི་གྲུབ་མཐའི་བསམ་པའི་དབང་གིས་བཞག་པས་རྩིས་ཀྱི་ཐ་སྙད་རྣམ་དག་མེད་ཅིར་གོ་ལ་སོགས་འདོད་ཚུལ་མི་གཅིག་པར་བཤད་པའང་ཡོད་ལ། ཡང་ན་འདིར་རང་རང་གི་གྲུབ་པའི་མཐའི་བསམ་པའི་དབང་གིས་ཞེས་གསུངས་པའི་དོན་ནང་པ་སངས་རྒྱས་པའི་ལུགས་སམ་དུས་འཁོར་གྱི་གྲུབ་མཐའི་ལུགས་འདིའི་ཚུལ་གྱི་རིགས་པས་དཔྱད་ན་ཕྱི་རོལ་པ་དེ་དག་གི་ལུགས་ལ་གཟའི་བགྲོད་པའི་རྩིས་ཀྱི་ཐ་སྙད་མ་ནོར་བ་མེད་ཅིང་དེ་དག་རང་རང་གི་སྔོན་གྱི་གྲུབ་མཐའི་བསམ་པའི་དབང་གིས་བཞག་པ་ཙམ་ཡིན་པས་དེ་རྣམས་དང་རང་ལུགས་ཀྱི་འདོད་པ་གཅིག་ཏུ་མི་འགྱུར་ཏེ་དེ་དག་གི་འདོད་ཚུལ་
ལོག་རྟོག་ཏུ་ཤེས་པར་འགྱུར་རོ། །དེའི་ཕྱིར་རྣམ་པར་དཔྱད་པར་བྱ་སྟེ། འདིར་གོ་ལ་ལ་ཟླ་བ་སོགས་གཟའ་ཁ་ཅིག་ཉི་མ་ལས་མྱུར་བར་འགྲོ་བ་དང་། སྤེན་པ་སོགས་ཁ་ཅིག་ཉི་མ་ལས་དལ་བར་འགྲོ་བའི་གཟའ་གང་ཡིན་དེ་དག་སྟེང་ནས་སྟེང་དང་འོག་ནས་འོག་ཏུ་མཐོ་དམན་དུ་རིམ་པས་གནས་སམ། འོན་ཏེ་གཡོན་དང་གཡས་ཀྱི་ཆར་འཕྲེད་དུ་བསྒྲིག་ནས་གནས་པའི་དབང་གིས་རི་རབ་དང་ཉེ་རིང་དུ་གྱུར་པ་གང་ཡིན་ཞེས་དྲིས་ན། དེ་གཉིས་གང་ཡང་འགལ་ཏེ། གལ་ཏེ་སྟེང་འོག་ཏུ་གནས་སོ་ཞེ་ན། འགྲོས་མྱུར་དལ་གྱི་དབང་གིས་ལྷན་ཅིག་ཕྲད་པར་མི་འགྱུར་ཏེ། རང་གི་གནས་ཡོངས་སུ་མི་གཏོང་བས་ནམ་ཡང་འཕྲད་པར་མི་འགྱུར་རོ། །རིགས་པའི་གཙོ་བོ་འདི་ཡིན་ཡང་། ཅི་སྟེ་ཕ་རོལ་པོས་སྨྲས་པ། གཟའ་སྐར་དེའི་འོག་ན་གནས་པའི་སེམས་ཅན་རྣམས་ཀྱིས་སྟེང་འོག་གི་གཟའ་ཕྲད་པར་སྣང་སྟེ་འོག་གི་གཟས་སྟེང་གི་གཟའ་སྒྲིབ་པར་སྣང་བ་ནི་སྟེང་འོག་མཉམ་པར་གྱུར་བས་སོ་ཞེ་ན། དེ་ལྟ་ན་ཉི་མ་གུང་གི་དུས་སུ་ཡར་བལྟས་ན་འོག་མས་སྟེང་མ་བསྒྲིབ་སྟེ་མི་སྣང་བར་འགྱུར་དུ་ཆུག་མོད། འཆར་བ་དང་ནུབ་པའི་དུས་སུ་གཟའ་གཉིས་པོ་སྟེང་འོག་ཏུ་བརྩེགས་པ་མཐོང་དགོས་ནའང་དེ་ལྟར་མ་ཡིན་པས་གནོད་དོ། །དེ་བཞིན་དུ་གཡས་གཡོན་དུ་འཕྲེད་ལ་གནས་ན་རང་རང་གི་གནས་དེ་ཉིད་ཡོངས་སུ་མི་གཏོང་བས་གཟའ་ལྷན་ཅིག་ཚོགས་པར་མཐོང་བ་ནམ་ཡང་མི་སྲིད་མོད། འདིར་ནི་ཤིན་ཏུ་འགྲོས་མྱུར་བའི་ཟླ་བ་ལྟ་བུ་ཡང་རི་རབ་དང་རིང་བ་གོ་ལའི་མཐའ་རུ་བགྲོད་པ་དང་། འགྲོས་བུལ་བ་སྤེན་པ་ཡང་རེས་རི་རབ་དང་ཉེ་བའི་གོ་ལའི་ཕྱོགས་སུ་མཐོང་ཞིང་། དེ་ལྟར་གཟའ་བདུན་པོ་ཀུན་ལ་མཐོ་དམན་སྣ་ཚོགས་སུ་མངོན་སུམ་མཐོང་བ་འདིས་རི་རབ་དང་ཁད་ཉེ་རིང་གི་དབང་གིས་འགྲོས་དལ་མྱུར་དུ་སོང་བ་མིན་པར་ངེས་ནུས་སོ། །མུ་སྟེགས་པའི་འདོད་པ་དེ་ལྟར་ན་གཟའ་རྣམས་ཉི་མའི་
དཀྱིལ་འཁོར་ལ་འཆར་བ་དང་ནུབ་པ་འདི་ནམ་ཡང་མི་སྲིད་པར་འགྱུར་རོ། །འདི་དང་ཚུལ་འདྲ་བར་གོ་ལ་བཅུ་གཉིས་སྟེང་ནས་སྟེང་དུ་བརྩེགས་པ་དང་། ནང་ནས་ཕྱིར་བསྐྱེད་དེ་རིམ་པ་བཅུ་གཉིས་སུ་གནས་པར་འདོད་པ་ཡང་འདི་དང་ཆ་འདྲ་བར་རིགས་པས་སུན་དབྱུང་བར་བྱའོ། །དེའི་ཕྱིར་དོན་དམ་པར་གཟའ་རྣམས་ཀྱི་གནས་ཐ་དད་པ་གཞན་པ་མེད་དོ་ཞེས་པའི་དོན་དམ་ནི་བདེན་གཉིས་སུ་ཕྱེ་བའི་དོན་དམ་ལ་གོ་དོན་ཅི་ཡང་མེད་དེ། ཡང་དག་པར་ན་གོ་ལ་ཁྱིམ་བཅུ་གཉིས་པོ་འདི་ལ་གཟའ་རྣམས་རང་འགྲོས་ཀྱིས་བགྲོད་པ་ལས་གཟའ་སོ་སོའི་གནས་ཀྱི་གོ་ལ་རི་རབ་ལ་ཉེ་རིང་དུ་གྱུར་པ་གང་ཡང་མེད་དོ་ཞེས་པའོ། །བྱིས་པ་རྨོངས་པ་བསྐྱེད་པའི་ཚིག་རིགས་པ་དང་བྲལ་བ་འདི་དག་སྐྱེ་བོ་མི་ཤེས་པ་རྣམས་ཀྱིས་བཀོད་པ་སྟེ། གང་ཞེ་ན། འདིར་གནས་དང་པོ་ལ་ཟླ་བ། གཉིས་པར་གཟའ་ལག །གསུམ་པར་པ་སངས། བཞི་པར་ཉི་མ། ལྔ་པར་མིག་དམར། དྲུག་པར་ཕུར་བུ། བདུན་པར་སྒྲ་གཅན། བརྒྱད་པ་ལ་སྤེན་པ་གནས་སོ་ཞེས་སྲིད་པའོ་བྱ་བ་ནི། འགྲོས་མྱུར་བུལ་འོང་བའི་དབང་གིས་གོ་རིམ་དེ་ལྟར་བྱས་ཀྱང་འགྲོས་མྱུར་བུལ་ནི་གཟའ་རང་རང་གི་རྒྱུ་སྐར་རྐང་པ་བགྲོད་པའི་མྱུར་བུལ་ཡོད་པ་ལས་ཡིན་གྱི་རི་རབ་དང་ཉེ་མི་ཉེའི་ཕྱོགས་ཀྱི་གོ་རིམ་གྱི་ཅི་ཡང་མ་ཡིན་ཏེ་གཟའི་འགྲོས་ལ་བརྟགས་པས་མངོན་སུམ་གྱིས་རྟོགས་ནུས་སོ། །སྲིད་པའོ་ཞེས་བྱ་བ་ནི་ཤིན་ཏུ་མི་སྲིད་པའི་ཚིག་འདི་ཡང་དེ་དག་གི་ལུགས་ལ་སྲིད་པ་སྟེ་ཡོད་པའོ་ཞེས་པའི་དོན་ཏོ། །འགྱུར་གཞན་ལས་གནས་སོ་ཞེས་འབྱུང་ངོ་ཞེས་བསྒྱུར། །ཁ་ཅིག་མུ་སྟེགས་འདོད་པ་ལྟར་གནས་དེ་དང་དེར་ངེས་པ་མིན་གྱི་ལན་རེ་ཙམ་སྲིད་པའོ་ཞེས་འཆད་ཀྱང་ལན་རེ་ཙམ་སྲིད་པས་སྲིད་གོ་མི་ཆོད་དེ། ཟླ་བ་བརྒྱད་པའི་གནས་སུ་དང་། སྤེན་པ་དང་པོའི་གནས་སུ་འོང་བའང་ལན་དུ་མར་སྲིད་
པས་སོ། །དེས་ན་མགྱོགས་བུལ་གྱི་གོ་རིམ་ཙམ་ལ་དེ་ལྟར་རིམ་པ་བརྒྱད་དུ་བྱས་ན་མི་སྲིད་པ་མ་ཡིན་ཏེ་སྲིད་མོད་ཀྱི། མུ་སྟེགས་པས་རང་གི་མགྱོགས་བུལ་གྱི་གོ་རིམ་མ་ཡིན་པར་རི་རབ་དང་ཉེ་བའི་གོ་རིམ་དུ་བྱས་པའི་ཕྱིར་ཤིན་ཏུ་མི་རིགས་པ་རྟོགས་སླ་ཡང་། འདི་སྐབས་དཔྱིས་ཕྱིན་པར་བཤད་པ་མ་མཐོང་བས་གོ་རྒྱུ་ཆེན་པོ་མི་སྣང་ལ་དོན་ཇི་བཞིན་མ་འཚལ་བའི་བཤད་པར་སོང་ན་མཁས་པ་དག་གིས་འཆོས་པར་མཛོད་ཅིག །འོན་ཀྱང་ཤིན་ཏུ་མི་རིགས་པའི་སྨྲ་བ་འདི་ལྟ་བུའང་འཇིག་རྟེན་འདིར་སྨྲ་བ་སྲིད་དོ་ཞེས་ཕ་རོལ་གྱི་འདོད་པའི་མཚངས་འབྱིན་པ་ཙམ་ལ་རིགས་པ་འདི་རུང་བས་དེའི་དགོས་པ་ཡིན་ནམ་སྙམ་མོ། །འདིར་ཁྱིམ་གྱི་འཁོར་ལོ་ལ་གཟའ་ཐམས་ཅད་བྱང་དུ་རི་རབ་ལ་ཉེ་བར་འགྲོ་བ་དང་། ལྷོར་རི་རབ་ལས་རིང་བར་འགྲོ་བ་ཡོད་དེ། དཔེར་ན་ཉི་མས་ལྷོ་བྱང་གི་ཁྱིམ་དྲུག་དང་རྒྱུ་སྐར་ཕྱེད་དང་བཅུ་གསུམ་ལོངས་སྤྱོད་པའི་དབང་གིས་རི་རབ་དང་ཉེ་རིང་དུ་གྱུར་པ་བཞིན་ནོ། །གཟའ་རང་རང་ལྷོ་བྱང་དུ་བགྲོད་པའི་དབང་གིས་ལྷོ་བྱང་དུ་འགྲོ་བའི་ཉི་མ་དང་འཕྲད་པ་ན་ནུབ་པར་འགྱུར་གྱི། གཟའ་འགའ་ཞིག་སྟེང་འོག་ཏུ་འགྲོ་བའི་དབང་གིས་ནུབ་པ་གཞན་ནི་མེད་དོ། །འདིར་ཁྱིམ་གྱི་འཁོར་ལོ་ལ་རང་འགྲོས་ཀྱིས་ཉི་མ་ལས་དལ་བར་འགྲོ་བའི་དབང་གིས་གཟའ་འགའ་ཞིག་ཉི་མས་སླེབས་ཏེ་ནུབ་པ་སླར་ཡང་ཉི་མའི་རྒྱབ་ནས་ཏེ་རྗེས་སུ་ལུས་ནས་འཆར་བ་འོང་ངོ་། །ཉི་མ་ལ་ནུབ་པ་སླར་ཡང་ཤར་བར་གྱུར་པ་ན་ཟླ་བ་ནི་ཉི་མའི་མདུན་དུ་སྔོན་ནས་འགྲོ་སྟེ་ཉི་མ་ལས་མྱུར་པར་བགྲོད་པའི་དབང་གིས་སོ། །ལྷག་སངས་གཉིས་ནི་རྐང་པའི་མྱུར་བུལ་གྱི་དབང་གིས་རེས་མདུན་དང་རེས་རྒྱབ་ཏུ་ཤར་ནས་བགྲོད་དོ། །འདི་དག་གི་བགྲོད་པ་ཤེས་པར་བྱ་བའི་དོན་དུ། སྔར་བཤད་ལྷོ་བྱང་གི་ཁྱིམ་དྲུག་དྲུག་པོ་དེ་དག་གཞུ་ཡི་རྣམ་པས་དུས་ཁྱིམ་ཞེས་ཁྱིམ་དྲུག་རེའི་རྒྱུ་སྐར་ཕྱེད་དང་བཅུ་གསུམ་ཙམ་རེ་གླིང་འདིས་མཐོང་དགོས་ཀྱང་དེ་
ཡང་། གོ་ལའི་དབུས་རི་རབ་ལ་ཉེ་བའི་ཕྱོགས་ནས་ལྷོར་ནི་ལྷོར་བགྲོད་ཀྱི་ཁྱིམ་རྣམས་ནི་སྐེད་ཉག་གཞུ་ཁ་སྦྱོར་བ་ལྟ་བུ་ཡི་རྣམ་པའི་མཐའ་དེ་ནི། གླིང་སོ་སོའི་དགུན་ཉི་ལྡོག་པའི་སྐར་མ་ཡོད་པའི་གནས་དེ་ཡིན་ལ། དེ་ལ་སོགས་པ་དུས་ཁྱིམ་ཞེས་ཁྱིམ་དྲུག་པོ་དེ་དག་ལ་གོ་ལའི་དབུས་ནས་ལྷོར་ནི་སྟེ། ལྷོ་ཕྱོགས་སུ་མེ་ཡི་དཀྱིལ་འཁོར་གྱི་ཕྱོགས་གང་ལ་གནས་ཤིང་། བྱང་བགྲོད་མཐར་ཐུག་པའི་ཁྱིམ་དེ་དབུས་སུ་བྱས་པའི་བྱང་དུ་གནས་པའི་ཁྱིམ་དྲུག་དེ་ནི་བྱང་དུ་བསིལ་བའི་རི་ལ་ཉེ་བ་སྟེ། དབྱིབས་པད་མའི་འདབ་མ་བཟང་པོ་བཞིན་དུ་གནས་སོ། །དེས་ན་གླིང་འདིར་དགུན་ཉི་ལྡོག་པའི་སྐར་མ་ཡོད་པའི་ཁྱིམ་དེ་ནི་མདུན་གྱི་གླིང་བདུན་པ་བྱང་གླིང་དབུས་མའི་སྟེང་དུ་བསིལ་རི་ལ་ཉེ་བ་པད་འདབ་ཀྱི་རྣམ་པར་དབུས་ཀྱི་ཆར་གནས་སོ། །གླིང་འདིར་བྱང་བགྲོད་མཐར་ཐུག་གི་སྐར་མ་གནས་པའི་ཁྱིམ་དེ་ནི་བྱང་གླིང་བདུན་པའི་སྟེང་དུ་མེ་དཀྱིལ་གྱི་ཕྱོགས་སུ་གཞུ་ཡི་རྣམ་པའི་མཐའི་ཆ་ཉིད་དུ་གནས་སོ། །འདིའི་གོ་བ་ནི་སྤྱིར་རི་རབ་ལ་གོ་ལ་ཁྱིམ་བཅུ་གཉིས་པོ་རི་རབ་ཀྱི་མགུལ་བར་སོ་སོ་ནས་བསྐོར་ཏེ་འཁོར་བའི་ནང་ཐིག་ཙམ་ཞིག་བོད་རྩིས་ཉིན་སྣང་སོགས་ལས་གསལ་བ་དེ་ལྟར་ལ་དེ་རྒྱ་མཚོའི་བཞི་ཆ་ཕྱིར་ལུས་པའི་མཚམས་སུ་ཡིན། དེ་ཡི་ཕྱི་ཐིག་བཅུ་གཉིས་ཀྱང་རྒྱ་མཚོའི་བཞི་ཆ་དང་མཉམ་པར་བྱས་པའི་ལན་ཚའི་རྒྱ་མཚོ་དང་མེ་རིའི་མཚམས་སུ་སླེབས་པ་ནི། རྒྱུད་ལས་ལན་ཚྭའི་རྒྱ་མཚོ་འགོངས་ནས་ཉིན་མོར་བྱེད་པ་དག་ནི་ལྷོ་རུ་མེ་ཡི་བར་དུ་འགྲོ་བར་བྱེད། ཅེས་གསུངས་པའི་དོན་ཡིན་ལ། དེ་ལྟར་ཐིག་བཏབ་ནས་གོ་ལ་ཟླུམ་ལེབ་བཅུ་གཉིས་པོ་རེ་རེའི་དཀྱུས་སུ་ཆ་བཅུ་གཉིས་སུ་བགོས་པའི་ཆ་གཅིག་ལ་གཟའི་རྒྱུ་ལམ་རྒྱུ་སྐར་ཉེར་བདུན་པོའི་རྐང་པ་རྣམས་རིམ་པར་བཀོད་པའི་ཡུལ་གྱི་ཆུ་ཚོད་སྤྱིར་མཁའ་མིག་རྒྱལ་པོ་ལས། ཁྱིམ་རེའི་ཆུ་ཚོད་མདའ་ཡོན་ཟླ་བ་དང་། དེ་ཡང་དགུས་
བགོས་པས་བཅོ་ལྔ་རེ་ཐོབ་པའི་ཕྱིར། ཁྱིམ་རེ་ན་རྒྱུ་སྐར་གྱི་ཡུལ་གྱི་ཆུ་ཚོད་བཅོ་ལྔ་རེ་ལ་རྐང་པ་རེར་བྱས་པའི་རྐང་པ་དགུ་རེ་གནས་པའི་རྐང་པ་དེ་རྣམས་རིམ་པར་ཕྲེང་བ་ལྟར་བཀོད་པའི་ཁྱིམ་བཅུ་གཉིས་པོའི་ཆ་དེ་དག་རྒྱུ་སྐར་གནས་པའི་ས་ཁྱོན་དང་གཟའ་ཡི་བགྲོད་ལམ་ཡིན་གྱི། ཁྱིམ་བཅུ་གཉིས་པོའི་ཆ་གཞན་བཅུ་གཅིག་ནི། སྐར་མ་ཕལ་པ་མང་པོའི་གནས་ཡུལ་དུ་ཤེས་པར་བྱ་སྟེ། དེར་རྒྱུ་སྐར་མེད་པས་གཟའ་དགུའི་བགྲོད་ལམ་ཡང་མིན་ནོ། །དེ་ལྟར་ན་གོ་ལ་ལེབ་ཆགས་གཅིག་གི་སྟེང་ན་ཁྱིམ་བཅུ་གཉིས་ཕྲེང་བ་བཞིན་དུ་བསྒྲིག་པ་མ་ཡིན་ལ། གོ་ལ་བཅུ་གཉིས་པོ་ནང་ནས་ཕྱིར་མུ་ཁྱུད་བཞིན་དུ་རིམ་པར་ཡོད་པའམ་སྟེང་ནས་སྟེང་དུ་རྨོག་བརྩེགས་པ་ལྟ་བུ་མ་ཡིན་པར། དྲུ་གུ་འཛིང་བ་བཞིན་དུ་ཁྱིམ་བཅུ་གཉིས་པོ་སོ་སོ་ནས་ལྷས་མ་ལྟ་བུར་ཕན་ཚུན་སྟེང་འོག་ཏུ་འཛིང་བར་ཡོད་པ་ཡིན་ཡང་། མགྱོགས་བུལ་གྱི་འགྲོས་རྣམ་པ་ཀུན་ཏུ་མཉམ་པའི་ཕྱིར་རྒྱུ་སྐར་རྐང་པའི་ཁྱོན་ནི་དུས་ཀུན་ཏུ་མི་འབྲལ་བར་འཁོར་ལ། གླིང་འདིའི་ཁྱིམ་གང་ཞིག་གི་སྐར་མ་ལྷོ་བགྲོད་མཐར་ཐུག་ཏུ་གྱུར་པ་དེ། གླིང་འདིར་ལྷོ་ཕྱོགས་ཀྱི་དབུས་སུ་མེ་དཀྱིལ་ལ་ཕྱོགས་པར་འཆར་བ་ན་དེའི་སྔ་ལོགས་དང་ཕྱི་ལོགས་སུ་གནས་པའི་སྐར་མ་རྣམས་ཚུར་ཚུར་བྱང་གི་ཕྱོགས་སུ་ཇེ་ཉེར་འཁོད་ལ་གླིང་འདིའི་ལྷོ་བགྲོད་མཐར་ཐུག་གི་སྐར་མ་དེ་བྱང་གླིང་དབུས་མའི་སྟེང་དུ་བསིལ་རི་ལ་ཉེ་བའི་ཚེ། དེའི་སྔ་མ་དང་ཕྱི་མར་གནས་པའི་སྐར་མ་རྣམས་ཕར་ཕར་མེ་དཀྱིལ་ལ་ཕྱོགས་པར་གནས་པར་འགྱུར་ཏེ། མདོར་ན་གླིང་འདིའི་ཡུལ་དབུས་ཀྱི་དབང་དུ་བྱས་ན། སྐར་མ་ནབས་སོ་དེ་བས་རི་རབ་ལ་ཉེ་བའི་སྐར་མ་གཞན་མེད་ཅིང་། ཆུ་སྨད་ལས་ལྷོ་ཕྱོགས་སུ་མེ་རི་ལ་ཉེ་ཆེ་བ་མེད་པ་དེས་མཚོན་ནས་གླིང་དུམ་བུ་བཅུ་གཉིས་སོ་སོར་ལྷོ་བྱང་གི་བགྲོད་པ་མཐར་ཐུག་པའི་སྐར་མ་བཅུ་གཉིས་དང་། མཉམ་གཉིས་ཀྱི་སྐར་མ་བཅུ་གཉིས་བཅུ་གཉིས་སུ་ཤེས་
པར་བྱའོ། །འདི་ལ་མང་དུ་བཤད་ཀྱང་གོ་བ་བདེ་བླག་ཏུ་རྙེད་པ་མི་འོང་ལ། གོང་དུ་བཤད་པ་བཞིན་ཐིག་བཏབ་ནས་དཔྱད་ན་ངེས་པ་བདེ་བླག་ཏུ་འདྲོང་བར་འགྱུར་ཏེ། ཁོ་བོས་བྱས་པའི་གོ་ལ་དྲུ་འཛིང་མའི་ཐིག་རིས་ལ་བལྟས་པས་གསལ་ལོ། །འདིའི་ཐད་ནས་དཔྱིས་ཕྱིན་པར་ཤེས་པ་སྔར་ཡང་དཀོན་པར་སྣང་ངོ་། །དེ་ལྟར་ཤེས་ན་རྒྱུད་འདིའི་དཀའ་གནད་ཆེན་པོ་ཞིག་ཤེས་ཤིང་རྒྱུད་དོན་ལ་ཡ་མཚན་གྱི་བློ་ཡང་རྙེད་པ་ཞིག་འོང་ལ། གོ་ལའི་དོན་ལོག་པར་བཤད་པའི་མུན་པ་ཐམས་ཅད་ཀྱང་ཅིག་ཆར་འཇིག་པར་འགྱུར་རོ། །ད་ནི་དཀྱུས་ཀྱི་ཚིག་དོན་ལ་འཇུག་པར་བྱ་སྟེ། གོ་ལ་ཞེས་པ་འདི་སྔར་གྱི་ལོ་ཙཱ་ཆེན་པོ་རྣམས་ཀྱིས་ལེགས་སྦྱར་གྱི་སྐད་སོར་བཞག་པ་སྟེ། ལོ་ཙཱ་སྔ་མ་གཞན་རྣམས་ཀྱིས་ཁོངས་དང་། སྤུབས་དང་། ཟླུམ་པོ་དང་། སྒང་གཤོང་དང་། ལྕི་ཡང་སོགས་སུ་བསྒྱུར་ཞིང་། ཁ་ཅིག་གིས་གོ་དོན་དགུ་ལ་འཇུག་པའི་ནང་ཚན་གྱི་མཐོ་རིས་དང་ལ་འཛིན་པའི་དོན་དུ་བྱས་ཏེ། མཐོ་རིས་འཛིན་ཞེས་ཀྱང་ཟེར་ཏེ་ངོ་བོ་གཟའ་སྐར་གྱི་གནས་འདེགས་བྱེད་ཁྱིམ་བཅུ་གཉིས་དྲུ་གུ་འཛིངས་པ་ལྟ་བུ་ཟླུམ་པོའི་རྣམ་པ་རླུང་གི་ཤུགས་ཀྱིས་ཉིན་ཞག་རེ་ལ་རི་རབ་ལ་གཡས་སུ་འཁོར་བར་བྱེད་པའོ། །ཁྱིམ་བཅུ་གཉིས་པོའི་རེ་རེའི་ཡང་བཅུ་གཉིས་ཀྱི་ཆ་གཅིག་ལ་རྒྱུ་སྐར་ཆུ་ཚོད་གནས་པ་དེ་ལ་ཁྱིམ་བཅུ་གཉིས་པོའི་སྤྱི་མིང་བྱེ་བྲག་ལ་ཞུགས་ནས་རྒྱུ་སྐར་གྱི་གོ་ལ་དང་། གཟའ་གང་དུ་བགྲོད་པའི་གོ་ལ་ཞེས་བཏགས་ཤིང་། དེ་འདྲའི་རྒྱུ་སྐར་ལམ་གྱི་གོ་ལ་བཅུ་གཉིས་པོར་ཉི་མ་བགྲོད་པའི་དབང་གིས་སའི་དུམ་བུ་བཅུ་གཉིས་སུ་དུས་བཅུ་གཉིས་འཁོར་བ་ལ་སའི་གོ་ལ་ཞེས་བཏགས་པ་ནི། གོ་ལའི་དབང་གིས་དུས་བཞི་འཁོར་བའི་ཕྱིར་རྒྱུ་མིང་འབྲས་བུ་ལ་བཏགས་པ་དང་། གླིང་དུམ་བུ་སོ་སོའི་སྟེང་གི་ཁྱིམ་བཅུ་གཉིས་པོ་ལྷོ་བྱང་མཉམ་གཉིས་སོགས་ཀྱི་རྒྱུ་ལམ་སྟོན་པའི་ཐིག་ཟླུམ་
པོ་རེ་བཏབ་པ་ནི། ས་འདིར་ཁྱིམ་བཅུ་གཉིས་པོ་འཆར་ཚུལ་ཤེས་པའི་ཆེད་ཙམ་ཡིན་པས་དེ་ལའང་གོ་ལའི་མིང་འཇུག་པ་ཡིན་ཀྱང་། ཁྱིམ་བཅུ་གཉིས་དེ་ལྟར་གླིང་དེའི་སྟེང་ན་ཅིག་ཆར་ཡོད་པ་ནི་མི་སྲིད་མོད་ཀྱི། འཆར་ས་དེ་དང་དེ་ཡིན་པ་ཤེས་པར་བྱེད་དོ། །ཁ་ཅིག་གོ་ལ་དང་དེ་འདེགས་བྱེད་ཀྱི་རླུང་ཐ་དད་ཡིན་པར་བཞེད་ཀྱང་། གོ་ལ་ཉིད་རླུང་ཡིན་ཅིང་དེ་ཉིད་འཁོར་བ་ལས་བསྐོར་བྱེད་གཞན་མི་དགོས་ལ། འཇིག་རྟེན་གྱི་གོ་ལ་སྤྱི་ཞེས་པ་འདི་བསིལ་རི་ནས་མེའི་བར་དུ་ཁྱབ་པའི་བར་སྣང་ལ་གཟའ་སྐར་ཐམས་ཅད་འདེགས་པའི་ང་དེ་ཡིན་ལ། དེ་ཐམས་ཅད་ཀྱང་ཁྱིམ་བཅུ་གཉིས་སུ་འདུ་མོད་ཀྱི། དེའི་ཆ་ཤས་རྒྱུ་སྐར་རྐང་པ་དགུ་རེ་ལ་ཁྱིམ་རེར་འཇོག་པ་འདིར་གཟའ་རྒྱུ་བའི་ཆ་ནས་དུས་ཀྱི་ཆ་ཐམས་ཅད་འཇོག་དགོས་པའི་ཕྱིར། རྣམ་གཞག་ཕལ་མོ་ཆེ་འདིའི་སྟེང་ནས་བྱ་དགོས་པས་དེ་ལྟར་གོ་ལ་ཞེས་པ་ལ་སྤྱི་དང་བྱེ་བྲག དངོས་དང་བཏགས་པའི་མིང་འཇུག་ཚུལ་གྱི་ཤན་ལེགས་པར་མ་ཕྱེད་ན་མགོ་རྨོངས་པར་འགྱུར་བས་དེ་ལྟར་ཤེས་པར་བྱས་ནས། གླིང་སོ་སོའི་སྟེང་གི་ཁྱིམ་བཅུ་གཉིས་པོའི་རྒྱུ་ལམ་གྱི་ཐིག་འདེབས་ན། ཟླུམ་སྐོར་གྱི་དབུས་ཕྱེད་མར་བྱས་པའི་དཀྱིལ་དྲང་པོར་མཉམ་གཉིས་ཀྱི་ཁྱིམ་བཀོད། ཁྱིམ་བཅུ་གཉིས་པོའི་ཕྱེད་བྱང་དང་ཕྱེད་ལྷོ་རུ་གནས་ཏེ། ཐ་སྐར་དབུས་མཉམ་གྱི་རི་མོའི་ཐད་དུ་འཆར་ཚེ་ཤར་གྱི་ཕྱེད་ཕྱི་མ་ཉིད་དུ་ལུག་དང་། དབང་ལྡན་དུ་གླང་སོགས་ནས། ནུབ་ཀྱི་ཕྱེད་ཕྱི་མར་སྲང་ལ་སོགས་པ་རིམ་པར་བཀོད་པ་ལ་བརྟེན་ནས་དུས་ཀྱི་བགྲོད་པ་རྣམས་ཤེས་པར་བྱའོ། །དེ་ཡང་ཤར་གྱི་ཕྱེད་ཕྱི་མར་ལུག དབང་ལྡན་དུ་གླང་། བྱང་གི་ཕྱེད་སྔ་མར་འཁྲིག་པ། ཕྱེད་ཕྱི་མར་ཀརྐ་ཊ། རླུང་དུ་སེང་གེ། ནུབ་ཀྱི་ཕྱེད་སྔ་མར་བུ་མོ། ཕྱེད་ཕྱི་མར་སྲང་། བདེན་བྲལ་དུ་སྡིག་པ། ལྷོའི་ཕྱེད་སྔ་མར་གཞུ། ཕྱི་མར་ཆུ་སྲིན། མེ་རུ་བུམ་པ། ཤར་གྱི་ཕྱེད་སྔ་མར་ཉ་ཞེས་བྲིས་པ་ནི་ཁྱིམ་
དགོད་པའོ། །ལུག་ཤར་བ་ན་སྲང་ནུབ་པ་སོགས་ཤར་བ་ནས་བརྩིས་པའི་ཁྱིམ་བདུན་པ་ནུབ་པར་ཤེས་པར་བྱའོ། །འདིར་བཀོད་ཚུལ་འདི་ཁོ་ནའི་དབང་དུ་བྱས་ཏེ་ལྷོ་ཁྱིམ་དྲུག་གཞུ་དང་བྱང་ཁྱིམ་དྲུག་པད་འདབ་ཀྱི་རྣམ་པར་བཤད་པའང་ཡོད་དོ། །དེས་ན་གོ་ལ་འདི་ལ་གླིང་ཐམས་ཅད་སྤྱིའི་སྟེང་དུ་དུས་བཞི་འཆར་ཚུལ་དང་། གླིང་དུམ་བུ་རེ་རེའི་སྟེང་དུ་འཆར་ཚུལ་གྱི་ཐིག་གཉིས་ཡོད་པ་སྤྱི་དང་བྱེ་བྲག་ཏུ་གོ་བར་བྱའོ། །ད་ནི་རྒྱུ་སྐར་གྱི་རྐང་པ་ཡོད་པའི་གོ་ལའི་ཆ་ཤས་ལ་ཁྱིམ་གྱི་མིང་བྱེ་བྲག་ཏུ་ཆགས་པ་དེ་ཙམ་ཞིག་མིན་པར་ཁྱིམ་བཅུ་གཉིས་པོ་ཕྱོགས་ཐམས་ཅད་དུ་འཁོར་བའི་འཇིག་རྟེན་སྤྱིའི་སྟེང་གི་གོ་ལའི་རྒྱ་ཚད་གསུངས་པ། གླིང་ཐམས་ཅད་ཀྱི་ལྷོ་ཕྱོགས་མེ་ཡི་དཀྱིལ་འཁོར་ནས་བྱང་ཁ་བ་ཅན་ཆེན་པོའམ། བསིལ་བའི་རི་ཡི་མཚམས་སུ་སླེབ་པའི་གོ་ལའི་ཞེང་གི་ཐད་ཀར་དཔག་ཚད་སྟོང་ཕྲག་མཁའ་དང་ནམ་མཁའ་མཁའ་དང་མདའ་རིའོ། །ཞེས་བདུན་ཁྲི་ལྔ་སྟོང་ཡོད་དོ། །ས་ལ་ལན་ཚྭའི་རྒྱ་མཚོ་དང་ས་དཀྱིལ་གྱི་ཁ་ཞེང་བསྡོམ་པ་ལའང་ཚད་འདི་དག་གོ །ཚད་དེའི་དབུས་སུ་དཔག་ཚད་སུམ་ཁྲི་བདུན་སྟོང་ལྔ་བརྒྱ་བར་རྒྱུ་སྐར་འཁོར་ལོ་ཕྱེད་ཀྱི་རི་མོ་དེ་ལ་ཉི་མའི་བགྲོད་པ་དག་ཀྱང་སླེབ་པ་དེའི་དུས་སུ་མཚན་མོ་ཞེས་པ་ཉིན་མཚན་གཅིག་ནི་ཉིན་མཚན་རིང་ཐུང་གི་ཚད་མཉམ་པ་ལ་སླེབས་པ་ཤེས་པར་བྱའོ། །ཀྱང་ཡིག་གི་སྒྲས་གཟའ་གཞན་ཀུན་སྡུད་དེ་དེར་སླེབས་དུས་མཉམ་ལམ་ལ་འགྲོ་བའོ། །མཉམ་པའི་ཉིན་ཞག་གཅིག་པོ་དེ་ཡི་ཕྱི་ནས་གཡས་ཏེ་ལྷོ་དང་གཡས་མིན་བྱང་དག་ཏུ་ཉི་མ་སོགས་གཟའ་རྣམས་རྒྱུ་སྟེ་ཉིན་དང་མཚན་མོ་སོ་སོར་རྒྱུ་སྐར་འཁོར་ཕྱེད་ལ་ལོངས་སྤྱོད་པའི་དབྱེ་བའི་རིམ་པ་ཡིས་སྲང་ལ་སོགས་པ་དང་ལུག་ལ་སོགས་པ་ལའོ། །ཞེས་པ་ཉི་མ་ཁ་ཤར་ལ་བལྟས་པའི་གཡས་ལྷོ་ཕྱོགས་སུ་ལྷོ་བགྲོད་མཐར་ཐུག་པའི་བར་དུ་རིམ་གྱིས་འགྲོ་བ་ལ་ཁྱིམ་གསུམ། དེ་ནས་བྱང་
བགྲོད་ཀྱི་མགོ་བརྩམ་སྟེ་རིམ་གྱིས་བྱང་དུ་འོང་བས་ཉིན་མཚན་མཉམ་པའི་གནས་ཀྱི་ཚད་དེར་སླེབས་ཀྱི་བར་ལ་ཁྱིམ་གསུམ་སྟེ་སྲང་ལ་སོགས་པ་ཁྱིམ་དྲུག་དང་། ཉིན་མཚན་མཉམ་པའི་གནས་དེ་ནས་གཡས་མིན་བྱང་དུ་རིམ་གྱིས་བྱང་བགྲོད་མཐར་ཐུག་གི་བར་ལ་ཁྱིམ་གསུམ། དེ་ནས་ལྷོ་བགྲོད་ཀྱི་མགོ་བརྩམ་སྟེ་ཚུར་འོངས་པས་ཉིན་མཚན་མཉམ་པའི་གནས་དེར་སླེབས་ཀྱི་བར་ལ་ཁྱིམ་གསུམ་སྟེ་ལུག་ལ་སོགས་པ་ཁྱིམ་དྲུག་ལ་རྒྱུའོ། །ལྷོ་བྱང་གི་བགྲོད་པ་མཐར་ཐུག་པའི་ཞག་གཅིག་པོ་དེ་ལས་མགོ་བརྩམ་ནས་བགྲོད་པ་རེ་ལ་ལམ་རྣམས་ཁྱིམ་ཞག་གི་གྲངས་སུ་བྱས་ན་མཁའ་ཀླུ་ཟླ་བ་སྟེ་བརྒྱ་དང་བརྒྱད་ཅུ་འདོར་ཞིང་དེའི་རིང་ལ་ཉིན་མོ་མཚན་མོ་དག་ཀྱང་ཇི་སྲིད་བགྲོད་པ་གཉིས་པོ་དག་གི་མཐར་ཐུག་པའི་བར་དུ་རིམ་པས་རིང་ཐུང་དུ་འགྱུར་ཏེ་ཉི་མ་ཞེས་པ་ཉི་མའི་ཆ་ཉིན་མོ་དང་། རི་བོང་ཅན་ཞེས་པ་ཟླ་བའི་ཆ་མཚན་མོ་སྟེ། དེ་ལྟར་ཉི་མ་དང་རི་བོང་ཅན་གྱི་ཉིན་དང་མཚན་མོ་ཡི་ཆུ་ཚོད་བསྡོམ་ན། དྲུག་ཅུ་ཉིད་དུ་ངེས་པ་དག་ལས་མར་འགྲིབ་པ་དང་ཡར་འཕེལ་བ་དག་ནི་དྲུག་ཆས་སོ་ཞེས་པ་དྲུག་ཅུའི་དྲུག་ཆ་ནི་བཅུ་ཡིན་པས་ཀརྚ་ནས་གཞུའི་མཐར་ཐུག་པའི་བར་གྱི་ལྷོ་བགྲོད་ཀྱི་ཁྱིམ་ཟླ་དྲུག་རྫོགས་པའི་ཉིན་ཞག་ཐ་མ་ལ་ཉིན་མོ་ཆུ་ཚོད་བཅུས་ཐུང་ཞིང་མཚན་མོ་བཅུས་རིང་བ་དང་། ཆུ་སྲིན་ནས་འཁྲིག་པའི་མཐར་ཐུག་པའི་བར་གྱི་ཁྱིམ་ཟླ་དྲུག་རྫོགས་པའི་བྱང་བགྲོད་མཐར་ཐུག་གི་ཉིན་ཞག་དེ་ལ་དེ་ལས་ལྡོག་སྟེ་ཉིན་མོ་ཆུ་ཚོད་བཅུས་རིང་ཞིང་མཚན་མོ་བཅུས་ཐུང་ངོ་ཞེས་བགྲོད་པ་རེའི་འཕེལ་བའམ་འགྲིབ་པ་ཐམས་ཅད་བསྡོམ་པའི་དབང་དུ་བྱས་པའོ། །འདིར་ཞིབ་པར་ན་ཆུ་ཚོད་བཅུ་ཆུ་སྲང་བརྒྱད་དབུགས་གཉིས་ཀྱིས་འཕེལ་འགྲིབ་བྱེད་པར་བཤད་དོ། །འོ་ན་གླིང་འདིའི་དུམ་བུ་ཐམས་ཅད་དུ་འཕེལ་འགྲིབ་དེ་ལྟར་ངེས་སམ་ཞེ་ན་མ་ཡིན་ཏེ། ཀཻ་ལ་ཤའི་དུམ་བུ་སྟེ་ཤམ་བྷ་ལ་ལ་ཐུར་གྲིབ་ཀྱི་ངེས་པ་ལས་ཉིན་མཚན་
འཕེལ་འགྲིབ་བཤད་པ་དེ་ལྟ་བུ་འཕགས་ཡུལ་ལ་མ་ཡིན་ཏེ་སོ་སོའི་ཡུལ་གྱི་ཐུར་ཤིང་གི་གྲིབ་མ་བརྟག་པའི་སྒོ་ནས་འཕེལ་འགྲིབ་མི་འདྲ་བ་ཡོད་པར་ཤེས་སོ། །དེའི་ཕྱིར་འཕགས་ཡུལ་དུ་བགྲོད་པ་རེ་ལ་གོང་ལྟར་བཅུ་ཆས་འཕེལ་འགྲིབ་བྱེད་ལ། དེ་བཞིན་བོད་དུ་དགུ་ཆ། ལི་ཡུལ་དུ་བརྒྱད་ཆ། རྒྱ་ནག་ཏུ་བདུན་ཆ་དག་གིས་འཕེལ་འགྲིབ་བྱེད་པ་ནས་ཤམ་བྷ་ལའི་བར་དུ་ཐུར་གྲིབ་ཀྱི་དབང་གིས་འཕེལ་ཞིང་འགྲིབ་པ་རིག་པར་བྱའོ། །ཞེས་གསུངས་སོ། །འདིར་ཤམ་བྷ་ལ་དྲུག །ཤམ་བྷ་ལའི་བྱང་གངས་ལྡན་ཏེ་དུམ་བུ་དྲུག་པར་ལྔ་ཞེས་བཤད། འདིར་གླིང་འདིར་ལྷོ་ནས་བྱང་དུ་ཤར་ནུབ་ཏུ་ཐིག་གིས་ཆ་མཉམ་དྲུག་ཏུ་ཕྱེ་བའི་ཆ་གང་ན་ཡུལ་བའི་གཙོ་བོ་འཕགས་ཡུལ་ཡོད་པའི་དུམ་བུ་ལ། འཕགས་ཡུལ་གྱི་དུམ་བུ་སོགས་ཡུལ་དྲུག་སོ་སོའི་དུམ་བུར་འདོགས་ལ། ཡུལ་གྱི་གཙོ་བོ་དེ་དག་སའི་དུམ་བུ་དེའི་ནང་ན་ཡོད་པ་ཙམ་དུ་འདྲ་ཡང་། དེའི་ཡུལ་འགའ་ཞིག་ཤར་དང་། འགའ་ཞིག་ནུབ། འགའ་ཞིག་དབུས་ཀྱི་ཆ་ལ་གནས་པ་སོགས་སྣ་ཚོགས་ཡོད་པས་ལི་དང་རྒྱ་ནག་སོགས་ལྷོ་བྱང་ཐད་མཉམ་ལ་ཡོད་མི་དགོས་ཀྱི། དུམ་བུ་དེ་དང་དེ་ན་ཡོད་པའི་ཡུལ་གྱི་གཙོ་བོས་མཚོན་ནས་དུམ་བུ་དེ་དང་དེའི་མིང་གི་ཐ་སྙད་བྱས་པ་ཤེས་པར་བྱའོ། །ཞེས་མཁས་གྲུབ་རྗེས་གསུངས་པ་ལེགས་ཏེ། ལྷོ་བྱང་དུ་ཡུལ་དྲུག་ཆ་བགོས་ནའང་ཚུལ་དེ་འདྲ་རགས་པའི་རྣམ་བཞག་སྟེ། ཞིབ་ཏུ་ས་སོ་སོའི་ལྡོག་གཉིས་སོགས་ཐུར་གྲིབ་ཀྱིས་ཤེས་པར་བྱའོ། །ད་ནི་སྟེང་དུ་རྒྱུ་སྐར་གྱི་ཁྱིམ་སོ་སོ་ལ་གནས་པའི་ཉི་མ་འཁོར་བའི་དབང་གིས་དུམ་བུ་བཅུ་གཉིས་ལ་སའི་གོ་ལ་འཁོར་ཚུལ་གསུངས་པ་ལས་དང་པོར་སྟོན་མཉམ་དང་། དཔྱིད་མཉམ་བཅུ་གཉིས་ས་དུམ་བུ་བཅུ་གཉིས་སུ་རིམ་ཅན་དུ་འཁོར་ཚུལ་ནི། གང་གི་ཕྱིར་སའི་དུམ་བུ་གང་དུ་ལུག་གི་ཉི་མ་ལ་དཔྱིད་ཕྱེད་ཀྱི་ཉིན་མཚན་མཉམ་
པར་གྱུར་ན། སྲང་གི་ཉི་མ་ལ་སྟོན་གྱི་ཕྱེད་མཉམ་དུ་འགྱུར། ལུག་ལ་སྟོན་མཉམ་དུ་གྱུར་ན་སྲང་ལ་དཔྱིད་མཉམ་དུ་འགྱུར་ཏེ། དེ་ལྟར་ཕན་ཚུན་ལྟོས་པ་ཤེས་པར་བྱས་ནས། གང་གི་ཕྱིར་རི་སྟེ་སའི་དུམ་བུ་གང་ནས་བགྲང་བའི་དུམ་བུ་བདུན་པ་ལ་ནི་སྐྱེ་བོ་རྣམས་ཀྱི་ཉིན་མཚན་མཉམ་པར་འགྱུར་ཏེ། ལྷོ་གླིང་དབུས་མའི་གླིང་འདི་ཉིད་ཀྱི་དབང་དུ་བྱས་ན་ལུག་ཁྱིམ་དུ་ཉི་མ་སླེབས་པ་ལ་དཔྱིད་མཉམ་དང་། སྲང་གི་ཁྱིམ་དུ་ཉི་མ་གནས་པ་ལ་སྟོན་མཉམ་སྟེ་དེ་ལྟར་མཉམ་གཉིས་ནི་ཁྱིམ་དེ་གཉིས་ལའོ། །དེའི་ཚེ་སའི་དུམ་བུ་འདི་ནས་བགྲང་བའི་དུམ་བུ་བདུན་པ་བྱང་གླིང་དབུས་མར་ལུག་ལ་སྟོན་མཉམ་དང་། སྲང་ལ་དཔྱིད་མཉམ་དུ་འགྱུར་རོ། །བདུན་པ་ཕན་ཚུན་མཉམ་པ་དེ་ཡི་ཕྱིར་དུམ་བུ་དང་པོ་གླིང་འདིར་བྱས་ནས་གཡས་སྐོར་གྱིས་བགྲང་བས་དུམ་བུ་གཉིས་པ་ལྷོ་ནུབ་ཀྱི་གླིང་སྟེ་ལྷོའི་གླིང་གཡོག་ནུབ་མ་དང་། དེ་ནས་བརྩིས་པས་བདུན་པ་ཡིན་ཡང་འདི་ནས་བརྩིས་པའི་བརྒྱད་པ་བྱང་ཤར་གྱི་ཆ་བྱང་གླིང་ནུབ་མའི་དུམ་བུ་དག་ལ་ངེས་པར་ཉི་མ་གླང་ཁྱིམ་ལ་གནས་པ་དང་སྡིག་པ་ལ་གནས་པ་ན་དུམ་བུ་དང་པོ་དང་བདུན་པ་ལ་བཤད་པ་དེ་བཞིན་དུ་དཔྱིད་མཉམ་དང་སྟོན་མཉམ་དུ་འགྱུར་བ་ཡིན་ནོ། །དེ་བཞིན་དུ་ལྷག་མ་རྣམས་ལ་སྦྱར་ནས་བུག་པ་ཞེས་བྱ་དགུ་དང་མེ་གྲངས་གསུམ་དག་གི་དུམ་བུ་ལ་འཁྲིག་པ་དང་གཞུར་ཉི་མ་གནས་པས་སོ། །ཕྱོགས་ཀྱི་ཚད་བཅུ་དང་བཞི་པ་དག་ལ་ནི་ཉི་མ་ཀརྐ་ཊ་ལ་གནས་པ་དག་དང་ཆུ་སྲིན་ལ་གནས་པས་སོ། །ལྔ་པ་དང་བཅུ་གཅིག་པ་གཉིས་ལ་ཡང་། ཉི་མ་སེང་གེ་དང་བུམ་པར་རབ་ཏུ་ཞུགས་པས་སོ། །བཅུ་གཉིས་པ་དང་རོ་ཡི་སྟེ་དྲུག་གི་དུམ་བུའི་སར་ནི་ཉ་དང་བུ་མོར་གནས་པ་དག་ལའོ། །ས་དུམ་བུ་བཅུ་གཉིས་པོར་བགྲོད་པ་གཉིས་དང་པོར་རྩོམ་པའི་ཁྱད་པར་བཤད་པ་རང་རེ་གནས་པ་གླིང་དུམ་བུ་བཅུ་གཉིས་ཀྱི་ནང་ཚན་འཛམ་གླིང་ཆུང་ངུ་དེ་བཞིན་གཤེགས་པས་ཆོས་བསྟན་པའི་གླིང་འདི་དང་པོར་
བྱས་ནས། གླིང་འདིར་ནི་གཡོན་བགྲོད་དེ་བྱང་བགྲོད་དུ་འགྱུར་བ་བྱང་བགྲོད་རྩོམ་པའི་ཐོག་མ་ནི་ཉི་མ་ཆུ་སྲིན་གྱི་ཁྱིམ་དུ་གནས་པ་ལ་སྟེ། དེ་བཞིན་དུ་གཡས་བསྐོར་གྱིས་བུམ་པར་ཉི་མས་བགྲོད་ཚེ་སའི་དུམ་བུ་གཉིས་པ་ལ་བྱང་དུ་བགྲོད་པར་བྱེད་དོ། །ཉ་ལ་དུམ་བུ་གསུམ་པར་རོ། །མི་རྣམས་ཀྱི་ནི་བྱང་དུ་བགྲོད་པ་དག་ཀྱང་འདི་ལྟར་ལུག་གི་ཁྱིམ་དུ་ཉི་མས་བགྲོད་པས་དུམ་བུ་བཞི་པར་རོ། །དུམ་བུ་འབྱུང་བ་ཞེས་བྱར་ཉི་མ་གླང་ལ་གནས་པས་སོ། །འཁྲིག་པར་ཉི་མ་གནས་པས་ས་ཡི་དུམ་བུ་ནི་དྲུག་པ་དང་། ས་ཡི་དུམ་བུ་བདུན་པར་ཡང་ཉི་མ་ཀརྐ་ཊ་ལ་གནས་པས་འགྱུར་ཏེ། སེང་གེ་ལ་གནས་པས་ས་ཡི་དུམ་བུ་བརྒྱད་པར་རོ། །བུ་མོས་བུག་པར་ཏེ་ས་ཡི་དུམ་བུ་དགུ་པར་རོ། །སྲང་གི་ཁྱིམ་གྱི་ཉི་མས་དུམ་བུ་བཅུ་པར་འགྱུར་ཏེ། སྡིག་པ་ཡིས་ཀྱང་དྲག་པོའི་དུམ་པུ་ལའོ། །གཞུ་ལ་ཉི་མ་གནས་པས་ལྷོ་གླིང་ཤར་མ་དུམ་བུ་བཅུ་གཉིས་པར་ཉི་མ་བྱང་དུ་བགྲོད་པར་འགྱུར་ཏེ། དེ་ལྟར་ས་དུམ་བུ་བཅུ་གཉིས་ཀྱི་མི་རྣམས་ཀྱི་བྱང་དུ་བགྲོད་པ་དག་ཀྱང་བཅུ་གཉིས་ཀྱི་རྩིབས་སམ་སའི་དུམ་བུ་བཅུ་གཉིས་ཀྱི་ས་ལ་འཁོར་བའོ། །དེ་བཞིན་ལྷོར་བགྲོད་པ་བཅུ་གཉིས་ཉིད་དུ་འགྱུར་བ་ནི་ཉི་མ་ཁྱིམ་སོ་སོར་བགྲོད་པའི་དབང་གིས་གླིང་འདིར་ཀརྐ་ཊ་དང་དེ་ནས་གཡས་བསྐོར་གྱིས་གཉིས་པར་སེང་གེ་གསུམ་པར་བུ་མོ་སོགས་འཁྲིག་པའི་བར་དུ་རིམ་པར་བགྲང་བ་ཡི་ཁྱིམ་རྣམས་དག་ལའོ། །ད་ནི་གླིང་བདུན་པ་འཛམ་གླིང་ཆེན་པོའི་ས་ཡི་དཀྱིལ་འཁོར་ལ་ཉི་མ་སྟེང་དུ་འགྲོ་བའི་ཚད་གསུངས་པ། ས་ཡི་དཀྱིལ་འཁོར་ནས་སྟེང་དུ་དཔག་ཚད་དྲུག་དང་ཀླུ་ཡི་སྟེ་བརྒྱད་ཅུ་རྩ་དྲུག་གི་གྲངས་ནི་ཉི་མའི་ཚ་བའི་གདུང་བྱེད་དག་ཀྱང་བྱང་དུ་བགྲོད་པ་དག་གི་མཐར་ཐུག་པར་འཕགས་སོ། །དེ་ནས་གཡས་ཕྱོགས་སུ་ལྷོར་བགྲོད་པ་ན་ཡང་རིམ་བཞིན་ཟད་པར་འགྱུར་ཏེ་ཇི་ཙམ་ཞེ་ན། ཀྱེ་མི་ཡི་བདག་པོ་ཞེས་བོས་ནས་བྱང་བགྲོད་ཐོག་མའི་བར་དུ་སྟོང་ཕྲག་དག་ནི་དྲག་པོའི་
གྲངས་ཏེ། སྟོང་ཕྲག་བཅུ་གཅིག་རིམ་པར་ཟད་ནས་ལྷོ་བགྲོད་མཐར་ཐུག་པ་དེ་དུས་གདུང་བྱེད་ས་ལས་སྟོང་ཕྲག་བདུན་ཅུ་རྩ་ལྔ་མཐོའོ། །དཔག་ཚད་སྟོང་ཕྲག་བརྒྱད་ཅུ་རྩ་གཅིག་ལ་མདའ་ནི་བརྒྱད་དང་ཞེས་ལྔ་བརྒྱ་བྲལ་བར་གྱུར་པ་ནི་དབུས་ནས་ཉིན་མཚན་མཉམ་པའི་གོ་ལའི་རི་མོ་སྟེ་དེ་ཡི་སྟེང་དུ་ཉི་མ་ཡོད་པའི་ཚེས་ནས་གདུང་བྱེད་ཀྱི་བར་གྱི་གྱེན་ཚད་ལ་དཔག་ཚད་བརྒྱད་ཁྲི་ལྔ་བརྒྱའོ། །མཉམ་དུས་ཀྱི་གོ་ལའི་དབུས་ཀྱི་རི་མོ་དེ་ལས་ཉི་མ་སྟེང་དུ་འཕགས་པའི་དཔག་ཚད་ཀྱི་གྲངས་གང་ཞིག་བྱང་བགྲོད་ལ་འཕེལ་བ་དང་ལྷོ་བགྲོད་ལ་འགྲིབ་པར་འགྱུར་པ་དེ་ནི་མཁའ་མཁའ་མདའ་དང་མདའ་ནི་ལྔ་སྟོང་ལྔ་བརྒྱའོ། །དེ་ལྟར་ཚད་དེས་བྱང་དུ་མཐོ་བ་དང་ལྷོར་དམའ་བར་ཡང་ངོ་། །དེ་ཡང་རི་རབ་དཔངས་ཚད་དཔག་ཚད་འབུམ་ཡིན་ཞིང་བྱང་བགྲོད་མཐར་ཐུག་གི་ཉིན་ཉི་མ་མཐོ་དམན་རི་རབ་ཀྱི་ར་བཞི་པ་དང་མཉམ་མོ། །དེའི་ཚེ་གདུང་བྱེད་ཀྱི་སྣེ་མོ་ནས་སའི་བར་ལ་དཔག་ཚད་སྟོང་ཕྲག་བརྒྱད་ཅུ་རྩ་དྲུག་ཏུ་བཤད་པའི་ཕྱིར། གདུང་བྱེད་ཀྱི་རྩ་བ་ཉི་མའི་དཀྱིལ་འཁོར་ལ་ཟུག་པ་ནས། ཐུར་ལ་བབ་པའི་སྣེ་མོའི་བར་གྱི་དཔངས་ཚད་སྟོང་ཕྲག་བཅུ་བཞིའོ། །དེ་ནས་ཉིན་ཞག་རེ་ལ་ཉི་མ་ཐད་ཀར་འགྲོ་བའི་རྒྱ་ཚད་ནི། ལྷོ་བགྲོད་དུ་ལན་ཚའི་རྒྱ་མཚོ་འགོངས་ནས་ཉིན་མོར་བྱེད་པ་དག་ནི་ལྷོ༷་རུ་མེ་ཡི་དཀྱིལ་འཁོར་ལ་ཐུག་པའི་བར་དུའམ། མཚམས་སུ་སྟེང་གི་མཁའ་ལ་ཐད་ཀར་འགྲོ་བར་བྱེད་ཅིང་། དེ་ལས་ཚུར་ལོག་སྟེ་བྱང་བགྲོད་དུ་ཀཻ༷་ལ་ཤ་སྟེ་གངས་ཅན་ཆེན་པོ་བསིལ་བའི་རི་ཡི་བྱང་དུ་འགྲོ་སྟེ། ཇི་ཙམ་དུ་ཞེ་ན་གངས་ཀྱི་རི་ཡི་དཔངས་ལ་ཐུག་གི་བར་རོ། །དུས་ནི་བྱང་གི་ལམ་དུ་ཡང་ནི་བྱང་བགྲོད་ལ་གནས་པ་དེ་ཙམ་དུའོ། །མདའ་རྣམས་ཚེས་ཀྱིས་བསྒྱུར་བའི་བདུན་ཅུ་རྩ་ལྔ་ཡི་དཔག་ཚད་སྟོང་ཕྲག་རྣམས་ནི། ལྷོ་བྱང་གི་ཕྱོགས་ཀྱིས་བགྲོད་པ་དག་ལ་ཉི་མ་དེ་གངས་ཅན་ནས་མེའི་བར་དང་མེ་ནས་གངས་ཅན་གྱི་བར་དུ་འགྲོ་བར་བྱེད་དོ། །
འདིའི་སྐབས་སུ་འདིའི་དོན་འཆད་པའི་སྔ་མ་དག་གིས་མེ་དང་བསིལ་རི་ལ་རེག་པར་བཤད་པ་ཉི་མའི་གདུང་བྱེད་ཡིན་གྱི་ཉི་མ་མ་ཡིན་ཏེ་རྒྱུ་མཚན་ཉི་མ་བོད་ཀྱི་ཐད་ཀ་ལས་བྱང་དུ་མི་འགྲོ་བ་བྱང་བགྲོད་མཐར་ཐུག་དུས་ཐུར་གྲིབ་ཅུང་ཟད་བྱང་དུ་ལུས་པས་ཤེས་ལ། ལྷོ་ཕྱོགས་མེ་རི་ནི་ལྕགས་རི་ཡིན་ལ་དེའི་ཕྱི་རོལ་ན་སྐར་མ་མེད་པར་མངོན་པ་ནས་བཤད་ཀྱང་། ད་ལྟ་ལྷོ་བགྲོད་མཐར་ཐུག་པའི་ཕྱི་རོལ་ན་སྐར་མ་ཡོད་པར་མངོན་སུམ་གྱིས་གྲུབ་པའི་ཕྱིར་རོ། །འོད་ཟེར་གྱིས་རེག་པ་ཙམ་ལ་བྱས་ན་ཧ་ཅང་ཐལ་ཏེ། དེས་ནི་བགྲོད་གཉིས་ཀྱི་མཐར་ཐུག་གི་དུས་མིན་ཡང་། མེ་རི་དང་གངས་རི་ལ་འོད་ཀྱིས་རེག་དགོས་སོ་སྙམ་པའོ། །དེ་ལ་མཁས་གྲུབ་རྗེའི་འགྲེལ་ཆེན་དེ་ཁོ་ན་ཉིད་སྣང་བར་བྱེད་པ་ལས། འཛམ་གླིང་ཆུང་ངུའི་རྒྱ་ཚད་དཔག་ཚད་སྟོང་ཕྲག་ཉེར་ལྔ་ལ་འཕགས་ཡུལ་དང་བོད་སོགས་དུམ་བུ་དྲུག་ཏུ་བགོས་པས་རེ་རེའི་ཐོབ་སྐལ་ལ་དཔག་ཚད་སྟོང་ཕྲག་བཞི་དང་བརྒྱ་དང་དྲུག་ཅུ་རེ་ཕྱེད་དང་བདུན། རྒྱང་གྲགས་ཕྱེད། གཞུ་འདོམ་སུམ་བརྒྱ་དང་སོ་གསུམ། ཁྲུ་གང་སོར་བརྒྱད་འབྱུང་ཞིང་། བོད་ཀྱི་བྱང་མཐའ་ཕན་ཆད་ལ་ད་དུང་དུམ་བུ་བཞི་ཡོད་པས་གོང་གི་ཚད་བཞིས་བསྒྱུར་བས་དཔག་ཚད་ཁྲི་གཅིག་སྟོང་དྲུག་དྲུག་བརྒྱ་རེ་དྲུག་དང་རྒྱང་གྲགས་གཉིས་སོགས་འབྱུང་བས། བྱང་བགྲོད་མཐར་ཐུག་གི་ཉིན་ཉི་མ་བོད་ཀྱི་བྱང་མཐའི་སྟེང་ཐད་ནས་ཚུ་རོལ་ན། གནས་པ་ལྟ་ཞོག བྱང་མཐའི་སྟེང་ཐད་ན་གནས་པའི་དབང་དུ་བྱས་ཀྱང་། དེ་ཚེ་ཉི་དཀྱིལ་དང་ལྷུན་པོའི་བར་ལ་དཔག་ཚད་སྟོང་ཕྲག་བཅུ་དྲུག་སོགས་བཤད་མ་ཐག་པ་དེ་ཙམ་ཡོད་པས། གདུང་བྱེད་ལ་རིང་ཚད་དཔག་ཚད་སྟོང་ཕྲག་བཅུ་བཞིར་བཤད་པས་དེའི་ཚེ་གདུང་བྱེད་རྭ་ལ་རེག་པ་ག་ལ་སྲིད། མེ་རི་དང་གངས་རིའི་བར་གྱི་དཔག་ཚད་སྟོང་ཕྲག་བདུན་ཅུ་རྩ་ལྔ་ལ། ཉིན་ཞག་བརྒྱ་བརྒྱད་ཅུ་རྩ་གཉིས་དང་ཕྱེད་ཀྱིས་བགོས་པས་རྙེད་
པ་ཞག་རེར་ལྷོ་བྱང་དུ་འགྲོ་བའི་ཚད་ཡིན་པས། དེ་ལ་ཞག་རེར་དཔག་ཚད་བཞི་བརྒྱ་དང་བཅུ་ནས་ཕྲ་རབ་དྲུག་གི་བར་དུ་ཡོད་པ་ནི་འཆད་པ་པོ་དེ་དག་གིས་ཀྱང་འདོད་པ་ཡིན་ནོ། །དེ་ལྟར་ན་བྱང་བགྲོད་བརྩམ་ནས་ཉིན་ཞག་བརྒྱ་དང་ལྔ་བཅུར་སོན་པ། ཉིན་ཞག་ཕྱེད་དང་བཅས་པའི་གཉིས་ཙམ་མ་ལོངས་པ་ན། ཉི་མས་དཔག་ཚད་སྟོང་ཕྲག་དྲུག་ཅུ་རེ་གཅིག་དོར་ཟིན་པ་དེ་ནས་ལྷུན་པོའི་རྭའི་བར་ལ། དཔག་ཚད་སྟོང་ཕྲག་བཅུ་བཞི་ལས་མེད་ཅིང་། གདུང་བྱེད་ལ་ཡང་ཚད་དེ་ཡོད་པས་བྱང་བགྲོད་མགོ་བརྩམ་ནས་ཉིན་ཞག་བརྒྱ་དང་ལྔ་བཅུར་ཉིན་ཞག་ཕྱེད་དང་གཉིས་ལྷག་ཙམ་གྱིས་མ་ལོངས་པ་ན་གདུང་བྱེད་ལྷུན་པོའི་རྭ་ལ་རེག་པའི་ཕྱིར་དུས་དེར་བྱང་བགྲོད་མཐར་ཐུག་པར་ཐལ་ཞིང་དེ་བཞིན་ལྷོ་བགྲོད་ལ་ཡང་མཚུངས་པས། བགྲོད་པ་གཉིས་རེ་རེ་ལ་ཟླ་བ་ལྔ་ཅུང་མེད། ལོ་རེ་ལ་ཟླ་བ་བཅུ་ཅུང་མེད་རེ་ལས་མེད་པར་ཐལ་བའི་གནོད་པ་ཐོག་ཏུ་འབབ་བོ། །དེས་ན་ཉི་མའི་དཀྱིལ་འཁོར་མཐའི་མེ་རིའི་བར་དུ་འགྲོ་ཡང་ཉི་དཀྱིལ་མེ་རི་ལ་རེག་པར་འདོད་མི་དགོས་ཀྱི། ཁོར་ཡུག་གི་ནང་མཐའི་སྟེང་ཐད་ཀྱི་ནམ་མཁའ་ལ་སླེབ་པས་ཆོག་ལ། དེ་ལྟར་གནས་པའི་ཚེ་མེ་རི་དང་ཉི་མའི་བར་ན་བར་ཐག་ཤིན་ཏུ་རིང་བའི་མཐོ་དམའི་ཁྱད་ཡོད་པའི་ཕྱིར། ལྷོ་བགྲོད་མཐར་ཐུག་གི་ཚེ་ཉི་མ་ཁོར་ཡུག་གི་སྟེང་ཐད་ན་ཡོད་ཀྱང་། ཉི་མ་དང་ཁོར་ཡུག་གི་བར་གྱི་ནམ་མཁའ་མཐོང་བ་མི་འགལ་ཞིང་། མངོན་པ་ནས་ཁོར་ཡུག་གི་ཕྱི་རོལ་ན་ནམ་མཁའ་མེད་པར་བཤད་ཀྱང་དེའི་ལུགས་ཀྱི་ཁོར་ཡུག་གི་ཞེང་ཚད་ལ་དཔག་ཚད་སུམ་བརྒྱ་ཕྱེད་དང་བཅུ་གསུམ་ཡོད་ཅིང་། དུས་འཁོར་ལུགས་ལ་ཞེང་ཚད་དཔག་ཚད་སྟོང་ཕྲག་ལྔ་བཅུ་ཡོད་པས་དེ་རྣམས་ཀྱི་ཁྱོན་གྱི་སྟེང་གི་ནམ་མཁའ་ལ་སྐར་མ་དུ་མ་ཡོད་པ་མི་འགལ་བས་སྐར་མ་དུ་མ་ལྷོ་བགྲོད་མཐར་ཐུག་གི་ཉི་མའི་མཐར་མཐོང་ཡང་འགལ་བ་མེད་དོ། །མངོན་པ་ཁུངས་སུ་བྱས་ན་ཉི་མའི་
འོག་གཞི་མེ་ཤེལ་ལས་གྲུབ་པ་ཐུར་དུ་ས་ལ་བསྟན་ཅིང་། ལོགས་གཞན་མེ་ཤེལ་མིན་པར་བཤད་པས་གདུང་བྱེད་འཕྲེད་ལ་འགྲོ་བའི་ཤེས་བྱེད་ཀྱང་མེད་དོ། །གཞན་ཡང་ཉི་དཀྱིལ་མེ་ལ་རེག་ན་གདུང་བྱེད་སོར་གང་ཡང་དེའི་བར་དུ་ག་ལ་ཡོད། ཉི་དཀྱིལ་མེ་དང་ཆུ་ལ་རེག་ན་དེ་མཐོང་ཐབས་ཀྱང་ག་ལ་ཡོད། དེ་ལ་སོགས་པའི་ཉེས་པ་དུ་མར་འགྱུར་བ་བརྗོད་ནས། རང་ལུགས་ལ་ཁྱིམ་གྱི་འཁོར་ལོ་འཁོར་བའི་དབང་གིས་མེ་ལ་རེག་པ་གང་ཡིན་པ་དེ་ནི་བདུན་པའི་ཕྱོགས་ཐོབ་པ་ན་ལྷུན་པོའི་རྭ་ལ་རེག་ཅིང་གངས་ཀྱི་རིའི་སྟེང་དུ་འགྲོའོ་ཞེས་གསུངས་པ་ལ། མེ་ལ་རེག་པའི་མཚན་གཞི་ཉི་དཀྱིལ་དང་གདུང་བྱེད་གཉིས་གང་རུང་ཡིན་དགོས་པར་བསམ་ནས་ལུགས་ཐ་དད་པ་སྨྲ་བར་བྱས་སོ། །དེས་ན་མེ་རི་དང་ལྷུན་པོའི་རྭ་ལ་རེག་པར་འགྲོ་བ་འདི་གོ་ལའི་དཔེ་རིས་ཀྱི་རི་མོ་བཀོད་པ་ལ་མཚོན་ནས་བསྟན་པ་སྟེ། དབུས་སུ་བསིལ་རིའི་ཕྱི་ཐིག་ཟླུམ་པོ་དང་། ཕྱི་མཐའ་མེ་རིའི་ཟླུམ་པོའི་བར་དུ་གོ་ལའི་རི་མོ་དེ་ལྟར་འཁོར་བ་དེའི་དབང་དུ་མཛད་དེ། བྱང་བགྲོད་མཐར་ཐུག་དུས་ལྷུན་པོའི་རྭ་དང་ཐད་མཉམ་དུ་ཉི་མ་སླེབས་པ་དང་། ལྷོ་བགྲོད་མཐར་ཐུག་ཉི་མ་མེ་རིའི་ནང་མཐའི་སྟེང་གི་ཐད་དྲང་ལ་སླེབས་པའི་དོན་ཡིན་ལ། དེའི་ཚེ་ཉི་མའི་གདུང་བྱེད་ཀྱི་མར་སྣེའི་རྩེ་མོ་ནས་མེ་རིའི་བར་ལ་དཔག་ཚད་སྟོང་ཕྲག་བདུན་ཅུ་རྩ་ལྔ་ཡོད་ཀྱང་། རི་མོར་བྲིས་པ་ལ་སྟེང་འོག་གི་བར་སྟོང་འཆར་ས་མ་བྱུང་བས་ལྷོ་བགྲོད་མཐར་ཐུག་གི་གོ་ལའི་རི་མོ་མེ་རི་ལ་རེག་པ་ཡིན་ནོ། །ཞེས་གསུངས་པ་ལེགས་བཤད་ཆེན་པོ་ཡིན་ནོ། །དེ་ལྟར་ཡང་ཉི་མ་གླིང་གཞན་གྱི་སྟེང་གི་ཐད་དྲང་ན་ཡོད་ཀྱང་། རང་རེས་སོ་སོའི་ཡུལ་གྱི་ཤར་རིའི་རྩེ་ཐད་ནས་ཤར་བ་ལྟ་བུར་མཐོང་བ་ཐག་རིང་པོས་བསྐལ་བའི་དོན་འདི་ལྟ་བུ་ལ་ལེགས་པར་དཔྱད་མ་ཤེས་ན་མགོ་རྨོངས་པར་འགྱུར་རོ། །དེ་ནས་ཞག་རེ་ལ་ལྷོ་འམ་བྱང་དུ་ཉི་མས་ས་ཁྱོན་ཇི་ཙམ་ཞིག་
བགྲོད་ཅེ་ན། གོང་བཤད་ལྷོ་བྱང་དུ་བགྲོད་པའི་ཚད་རིལ་པོ་དེ་ལ་ཞག་ཕྱེད་དང་བཅས་པའི་མིག་ཀླུ་ཟླས་ཐོབ་ཞེས་ཉིན་ཞག་བརྒྱ་དང་བརྒྱད་ཅུ་གྱ་གཉིས་དང་ཞག་ཕྱེད་བཅས་ཀྱིས་བགོད་བྱ་བགོད་བྱེད་ཤེད་མཚུངས་སུ་བྱས་ཏེ་བགོས་པའི་ཐོབ་པ་ནི་ཉིན་ཞག་དང་ཉིན་ཞག་རེ་ལས་ས་དེ་ཙམ་ཉི་མས་འདོར་བ་ཡིན་ནོ། །ལྷོ་བྱང་དུ་བགྲོད་པའི་ས་ཁྱོན་རིལ་པོ་གང་ཞེ་ན། གོང་དུ་བསྟན་པ་ལྟར་ལྔ་དང་ས་འཛིན་སྟོང་ཕྲག་དག་ལས་སོ་ཞེས་དཔག་ཚད་སྟོང་ཕྲག་བདུན་ཅུ་དོན་ལྔ་ལ་གོ་བར་བྱའོ། །འདིར་ཞག་ཕྱེད་པོ་བཅུག་ཕྱིར་ཞག་བརྒྱ་གྱ་གཉིས་མིག་གིས་བསྒྱུར་བ་ལ་ཕྱེད་པོ་བཅུག་པས་ཞག་ཕྱེད་སུམ་བརྒྱ་རེ་ལྔ་འོང་ཞིང་། བགོད་བྱ་དཔག་ཚད་བདུན་ཁྲི་ལྔ་སྟོང་ཡང་བགོད་བྱེད་དང་ཤེད་མཚུངས་ཕྱིར་གཉིས་ཀྱིས་བསྒྱུར་བས་ཆིག་འབུམ་ལྔ་ཁྲི་ལ་བགོས་ཐོབ་དཔག་ཚད། དེ་ལྷག་བཞི་ས་བསྒྱུར་ཐོབ་རྒྱང་གྲགས། དེ་ལྷག་རྣམས་རིམ་བཞིན་ཉིས་སྟོང་དང་། བཞི་དང་། ཉེར་བཞི་དང་། བརྒྱད་པ་ལན་དྲུག་གིས་བསྒྱུར་ཐོབ། གཞུ་འདོམ་ནས་རྡུལ་ཕྲ་རབ་ཀྱི་བར་དུ་རིམ་པར་བསྒྱུར་བགོད་བྱའོ། །དེ་ལྟར་བགོས་པས་དཔག་ཚད་བཞི་བརྒྱ་དང་བཅུ། རྒྱང་གྲགས་གསུམ། གཞུ་འདོམས་སྟོང་དང་དྲུག་བརྒྱ་དོན་གཅིག །ཁྲུམ་ཐོབ། སོར་ཉེར་གཉིས། ནས་གཉིས། ཤིག་དྲུག །སྐེ་ཚེ་དྲུག་སྐྲ་རྩེ་གཉིས། ཕྲ་མོ་དྲུག ཕྲ་རབ་དྲུག་ཐོབ་ལ། ལྷག་ཅུང་ཟད་ལུས་པ་མ་བརྩིས་ཤིང་། དེ་ལྟ་བུ་རྣམས་ཞག་རེ་ལ་བགྲོད་དོ། །དེ་ལྟར་ལུག་ལྟ་བུའི་ཁྱིམ་གཅིག་ལ་ནི་ཉི་མ་གནས་པས་མཐའ་དག་དུས་ཀྱི་ཚོགས་དྲུག་དང་བཞི་དང་ཟླ་བ་བཅུ་གཉིས་དང་ནི་ཕྱོགས་ཉེར་བཞི་རྣམས་བྱེད་དེ་འདི་ལྟར་ས་ཡི་དུམ་བུ་དུམ་བུ་དག་ཏུ་མི་འདྲ་བའི་ཟླ་བར་འགྱུར་ཏེ་དེ་ཡང་ས་གཞི་བཅུ་གཉིས་ཀྱི་རྩིབས་རྣམས་ལ་ནི་རིམ་པས་སོ་ཞེས་པ། འདིར་ལྷུན་པོའི་ཕྱོགས་ཀྱི་ཆ་ཐམས་ཅད་དུ་ཁྱིམ་གྱི་འཁོར་ལོ་འཁོར་བའི་
དབང་གིས་དུམ་བུ་སོ་སོའི་མེ་ལ་རེག་པ་གང་ཡིན་པ་དེ་ནི་མདུན་ཐད་ཀྱི་སའི་དུམ་བུ་བདུན་པའི་ཕྱོགས་སུ་བགྲོད་པ་ཐོབ་པ་ན་ལྷུན་པོའི་རྭ་ལ་རེག་ཅིང་གངས་ཀྱི་རིའི་སྟེང་དུ་འགྲོའོ་ཞེས་པའི་རིགས་པས་ཉི་མ་ཁྱིམ་སོ་སོར་གནས་པའི་དབང་གིས་དཔྱིད་ལ་སོགས་པའི་དུས་ཀྱི་ཚོགས་མཐའ་དག་འབྱུང་བར་རིག་པར་བྱ་སྟེ། ལྷུན་པོའི་ལྷོ་གླིང་གི་དུམ་བུ་རང་ཅག་གནས་པ་འདི་ལས་མཚོན་ན་ལུག་ཁྱིམ་ལ་ཉི་མ་གནས་པས། གླིང་འདིར་དཔྱིད་ཀྱི་དུས་ས་གའི་ཟླ་བ་བྱེད་དོ། །ས་གའི་ཟླ་བ་དེ་ནི་རང་རེའི་དཔྱིད་ཐ་ཆུང་ཡིན་ཡང་མདུན་གྱི་གླིང་བདུན་པ་བྱང་གླིང་དབུས་མར་རང་རེའི་སྨིན་དྲུག་གི་ཟླ་བ་སྟོན་ཐ་ཆུང་གི་དུས་དེ་ལྟ་བུ་དེ་ལ་འཆར་རོ། །དེས་ན་གླིང་འདིར་ས་གས་ཉ་བ་སྟེ་ཟླ་བ་ཉ་གང་བ་དང་ས་ག་ལྷན་ཅིག་འགྲོགས་པའི་དུས་དེ་ནི་གླིང་ཐམས་ཅད་ལ་འདྲ་བས། འདིར་ས་གའི་ཉ་བའི་ནུབ་མོ་གླིང་བདུན་པར་སྨིན་དྲུག་གིས་ཉ་བ་མ་ཡིན་ཏེ་དེར་ཟླ་བ་དང་སྨིན་དྲུག་འགྲོགས་པ་མེད་ཀྱང་གླིང་འདིར་སྨིན་དྲུག་གི་ཟླ་བའི་དུས་དེ་གླིང་བདུན་པར་འཆར་བ་བཞིན་གཞན་ཐམས་ཅད་ལ་གོ་བར་བྱའོ། །ཉི་མ་ལུག་ཁྱིམ་ལ་གནས་ཚེ་གླིང་འདི་ཉིད་ནས་གཡོན་སྐོར་གྱིས་བརྩིས་པས་དུམ་བུ་གཉིས་པ་གླིང་འདིའི་ཕྱོགས་བཞིའི་དབང་དུ་བྱས་པའི་རི་རབ་ཀྱི་ཤར་ལྷོའི་ཟུར་ན་གནས་པ་གླིང་འདིའི་ལྷོ་གླིང་ཤར་མ་ལུང་གཞན་ལས་རྔ་ཡབ་གཞན་དུ་གྲགས་པ་དེར་སྣྲོན་གྱི་ཟླ་བའམ་དབྱར་ར་བ་འཆར་རོ། །དུམ་བུ་གསུམ་པ་ཤར་གླིང་ནུབ་མ་མེའི་ཟུར་གྱི་ཕྱེད་གཞན་པ་ལུང་གཞན་ལས་ལུས་ཞེས་ཤར་གླིང་དབུས་མའི་གླིང་གཡོན་དུ་གྲགས་པ་དེར་ཆུ་སྟོད་ཟླ་བའམ་དབྱར་འབྲིང་པོར་བྱེད་དོ། །དུམ་བུ་བཞི་པ་ཤར་གླིང་དབུས་མ་ལུས་འཕགས་པོའི་གླིང་དུ་ནི་དབྱར་ཐ་ཆུང་གྲོ་བཞིན་གྱི་ཟླ་བ་བྱེད་དོ། །དུམ་བུ་ལྔ་པ་རི་རབ་ཀྱི་བྱང་ཤར་གྱི་ཕྱེད་ཀྱི་དུམ་བུ་ལ་གནས་པ་ཤར་གླིང་ཤར་མ་དེར་སྟོན་ར་བ་ཁྲུམས་སྟོད་ཟླ་བར་བྱེད་དོ། །དུམ་བུ་དྲུག་པ་དབང་ལྡན་གྱི་ཟུར་ཕྱེད་
ལ་གནས་པ་བྱང་གླིང་ནུབ་མར་སྟོན་འབྲིང་ཐ་སྐར་ཟླ་བར་བྱེད་དོ། །དུམ་བུ་བདུན་པ་བྱང་གླིང་དབུས་མ་སྒྲ་མི་སྙན་ལ་སྟོན་ཐ་ཆུང་སྨིན་དྲུག་ཟླ་བར་བྱེད་དོ། །དུམ་བུ་བརྒྱད་པ་རླུང་གི་ཟུར་གྱི་ཕྱེད་བྱང་གླིང་ཤར་མར་དགུན་ར་བ་མགོའི་ཟླ་བ་བྱེད་དོ། །དུམ་བུ་དགུ་པ་རླུང་གི་ཕྱེད་གཞན་ལ་གནས་པ་ནུབ་གླིང་ནུབ་མ་ལ་དགུན་འབྲིང་རྒྱལ་གྱི་ཟླ་བ་བྱེད་དོ། །དུམ་བུ་བཅུ་པ་ནུབ་གླིང་དབུས་མ་བ་ལང་སྤྱོད་དུ་དགུན་ཐ་ཆུང་མཆུའི་ཟླ་བ་བྱེད་དོ། །དུམ་བུ་བཅུ་གཅིག་པ་བདེན་བྲལ་གྱི་ཟུར་ཕྱེད་ཀྱི་དུམ་བུ་ནུབ་གླིང་ཤར་མ་ལ་དཔྱིད་ར་བ་དབོའི་ཟླ་བ་བྱེད་དོ། །དུམ་བུ་བཅུ་གཉིས་པ་ལྷོ་གླིང་ནུབ་མ་རྔ་ཡབ་གླིང་ཕྲན་དུ་གྲགས་པ་རི་རབ་ཀྱི་བདེན་བྲལ་ཏེ་སྲིན་པོའི་ཕྱོགས་ཀྱི་ཟུར་ཕྱེད་གཞན་ལ་གནས་པ་དེར་དཔྱིད་འབྲིང་པོ་ནག་པའི་ཟླ་བ་བྱེད་དོ། །དེ་ལྟར་དུམ་བུ་སོ་སོར་ཟླ་བ་གཉིས་ཀྱིས་དུས་གཅིག་ཏུ་འགྱུར་བས་དུས་དྲུག་དང་། ཟླ་བ་བཅུ་གཉིས་དང་། ཕྱོགས་ཉི་ཤུ་རྩ་བཞི་རྣམས་ས་དུམ་བུ་བཅུ་གཉིས་ལ་འཁོར་ལོའི་རྣམ་པས་འཁོར་བར་ཤེས་པར་བྱའོ། །གླིང་འདིར་ལུག་གི་ཁྱིམ་ལ་ཉི་མ་གནས་པས་དཔྱིད་ཐ་ཆུང་གང་ཡིན་པའི་དུས་དེ་ནི་ཉི་ཁྱིམ་འཕོ་བའི་ཚེ་གཡས་བསྐོར་གྱིས་ལྷོ་གླིང་ནུབ་མ་རྔ་ཡབ་ཏུ་འགྲོ་ཞིང་། ལྷོ་གླིང་ཤར་མའི་དབྱར་ར་བ་དེ་གླིང་འདིར་འཕོ་བ་དེ་ལྟར་ཟླ་བ་བཅུ་གཉིས་དང་དུས་བཞི་སོགས་ཐམས་ཅད་གཡས་སྐོར་གྱིས་ས་དུམ་བུ་བཅུ་གཉིས་སུ་རིམ་པ་བཞིན་འཁོར་བ་ཡིན་ནོ། །ཉིན་མཚན་གྱི་ཚད་གང་ཞིག་ས་ཡི་དུམ་བུ་གང་དུ་ཉིན་མོའི་དབང་གིས་ཡིན་པ་དེ་ནི་དུམ་བུ་དེ་ནས་རིམ་བཞིན་བགྲང་བའི་བདུན་པ་དག་ཏུ་མཚན་མོ་ལའོ། །ཞེས་རང་གླིང་འདིའི་ཉིན་མོ་ལ་ཆུ་ཚོད་སོ་དྲུག་ཡོད་ན། བྱང་གླིང་དབུས་མ་སྒྲ་མི་སྙན་ལ་མཚན་མོ་ཆུ་ཚོད་སོ་དྲུག་ཡོད་པས་མཚན་རིང་བར་འགྱུར་ཞིང་ཉིན་མོ་ཆུ་ཚོད་ཉེར་བཞི་ལས་མེད་པར་འགྱུར་རོ། །དེའི་ཉིན་མོའི་ཆུ་ཚོད་ཉེར་བཞི་པོའི་རིང་ལ་གླིང་འདིར་མཚན་མོར་འགྱུར་རོ། །སྒྲ་མི་སྙན་དུ་མཚན་ཆུ་ཚོད་སོ་དྲུག་ཡོད་པ་དེའི་རིང་ལ་
གླིང་འདིར་ཉིན་མོར་འགྱུར་རོ། །དེའི་ཚུལ་གྱིས་དུམ་བཅུ་གཉིས་པོ་ཐམས་ཅད་དུ་རང་རང་གི་ཐད་ཀའི་གླིང་རྣམས་སུ་ཉིན་མཚན་འཕེལ་འགྲིབ་ཤེས་པར་བྱའོ། །དེ་བཞིན་ཉིན་མཚན་མཉམ་པའང་ཐད་ཀར་ཡོད་པའི་དུམ་བུ་བདུན་པ་རྣམས་ལ་མཉམ་ཡང་ཅིག་ཤོས་ལ་ཉིན་དུ་གྱུར་པའི་ཚེ་ཅིག་ཤོས་ལ་མཚན་དུ་གྱུར་པ་ཡིན་ནོ། །ཉི་མའི་འོད་ཀྱིས་ཇི་ཙམ་ཁྱབ་པ་གསུངས་པ། ལན་ཚྭའི་རྒྱ་མཚོའི་མཐའ་སྐོར་འབུམ་ཕྲག་དྲུག་གིས་འཁོར་བའི་ཟླུམ་པོར་གནས་པ་དེ་ལས། ཉི་མའི་ལམ་ཕྱེད་དེ་རྒྱ་མཚོའི་དབུས་ནས་ཕྱེད་མར་བྱས་པའི་ཟླུམ་པོའི་ཕྱེད་འབུམ་ཕྲག་གསུམ་པོ་དག་ལ་ཉི་འོད་ཀྱིས་ཁྱབ་ནུས་ཏེ་དེའི་ཕྱིར་ཉི་མའི་མདུན་དུ་ཞེས་གོ་ལའི་རླུང་འགྲོས་ཀྱི་དབང་གིས་ཉི་མ་ཤར་བ་ན་ཉིན་མོ་དང་ནི། རྒྱབ་ཏུ་སྟེ་ཉི་མ་ནུབ་པ་ན་མཚན་མོའོ། །དེ་ལྟ་ན་ཉི་འོད་ཀྱིས་རྒྱ་མཚོའི་ཕྱེད་ཀ་རེ་ཁྱབ་སྟེ། རི་ཡི་རྒྱལ་པོ་རི་རབ་དག་ནི་ས་དུམ་བུ་བཅུ་གཉིས་ལ་གནས་པའི་སྐྱེ་བོ་ཐམས་ཅད་ཀྱི་ཡང་བྱང་ན་གནས་པར་འགྱུར་རོ་མི་ཡི་བདག་པོ་ཟླ་བ་བཟང་པོ་ཞེས་བོད་པའོ།། དེའི་རྒྱུ་མཚན་ཕྱོགས་གང་ནས་ཉི་མ་འཆར་བ་དེ་ཤར་དུ་འགྱུར་ཏེ། དབུས་ཀྱི་རི་རབ་ལྷུན་པོ་དང་མཉམ་པ་སྟེ་རི་རབ་ཀྱི་དབུས་དྲང་པོའི་ཐད་དུ་རི་རབ་ཀྱི་ཕྱི་རོལ་ན་ཡོད་པའི་གངས་རིའི་བར་འགྲོ་བ་དེ་ཕྱོགས་ལ་བྱང་དང་། མེ་རིའི་བར་བགྲོད་པའི་ཐད་ཀ་དེ་ལ་ལྷོ་ཞེས་བྱ་སྟེ། གླིང་གི་དབུས་ནས་ལྷོ་བྱང་དུ་བགྲོད་པ་ཡི་ལམ་དེ་ལ་ལྷོ་དང་བྱང་དག་ཏུ་མིང་འདོགས་པ་དང་། ཉི་མ་དེ་ནི་ནུབ་པ་ནུབ་ཀྱི་ཕྱོགས་ཞེས་བྱའོ། །དེའི་ཕྱིར་ལྷོ་འཛམ་བུ་གླིང་ན་གནས་པ་རྣམས་ཀྱིས་ཤར་ན་ལུས་འཕགས་པོའི་གླིང་ཡོད་པར་བྱེད་དོ། །ནུབ་བ་ལང་སྤྱོད་པ་རྣམས་ཀྱིས་འཛམ་བུ་གླིང་ཤར་ན་ཡོད་པར་བྱེད་དོ། །སྒྲ་མི་སྙན་པས་བ་ལང་སྤྱོད་ཤར་ཕྱོགས་སུ་ཡོད་པར་བྱེད་དོ། །ལུས་འཕགས་པོའི་གླིང་ན་གནས་པ་རྣམས་ཀྱིས་སྒྲ་མི་སྙན་ཤར་ཕྱོགས་སུ་ཡོད་པར་བྱེད་དེ་ཉི་
མ་འཁོར་བའི་དབང་གིས་སོ། །གླིང་འདི་ཉིད་དུ་ཉི་མ་ཤར་ནས་ཆུ་ཚོད་ལྔ་སོང་བ་ན། ལྷོ་གླིང་ནུབ་མར་ཉི་མ་འཆར་བར་འགྱུར་བ་ལྟར་དུམ་བུ་སོ་སོར་གཡས་སྐོར་གྱི ས་དབྱུག་གུ་ལྔ་རེ་ལྔ་རེས་སྔ་མ་ཤར་བའི་རྗེས་སུ་ཕྱི་མར་འཆར་བ་ཤེས་པར་བྱའོ། །དུས་ནི་ཉིན་མོ་གཅིག་ལ་སྔ་དྲོ་ཉིན་གུང་ཕྱི་འཕྲེད་གསུམ་དང་། ཐུན་མཚམས་ནི་ཉིན་མཚན་གཅིག་ལ་སྔ་དྲོའི་ཐུན་མཚམས་དང་། ཉིན་གུང་གི་ཐུན་མཚམས་དང་། ཕྱི་འཕྲེད་ཀྱི་ཐུན་མཚམས་དང་། མཚན་ཕྱེད་ཀྱི་ཐུན་མཚམ་བཞི་སྟེ་གུང་གཉིས་དང་འཆར་ནུབ་གཉིས་པོ་དང་། ཐུན་ཚོད་ནི་བརྒྱད་དེ་ཉིན་མོ་ལ་བཞི་དང་མཚན་ལ་བཞིར་བགོས་པ་ཡི་ཆ་རེའི་དུས་སོ། །དེ་ལྟར་ཉིན་དང་མཚན་མོ་ཡི་དུས་ཀུན་ཏུ་ནི་དུས་དང་ཐུན་མཚམས་ལ་སོགས་པའི་རྣམ་པར་ཡང་དག་པར་རྒྱུ་བ་རྣམས་ནི་སའི་དུམ་བུ་ནས་དུམ་བུར་ལྷུན་པོའི་ཕྱོགས་རྣམས་སུ་རིམ་པར་འཁོར་རོ། །དེ་ལྟར་འབྱུང་བ་ཡང་དུས་སྦྱོར་བཅུ་གཉིས་ཀྱི་དབྱེ་བས་དུས་སོ་སོར་ཕྱེ་བར་གྱུར་པ་ཡིན་ཏེ། ཞག་གཅིག་ལ་དུས་གསུམ་དུ་ཕྱེ་བ་ན་དུས་སྦྱོར་བཞི་རེས་འཁོར་རོ། །ཐུན་མཚམས་བཞིར་ཕྱེ་བ་དུས་སྦྱོར་གསུམ་རེས་འཁོར་རོ། །ཐུན་ཚོད་བརྒྱད་དུ་ཕྱེ་ན་ཐུན་ཚོད་རེ་དུས་སྦྱོར་ཕྱེད་གཉིས་རེས་འཁོར་རོ། །དེ་བཞིན་དུ་དུས་སྦྱོར་རེ་རེ་ནི་དབྱུག་གུ་ལྔས་འཁོར་རོ། །ཐུན་ཚོད་ཕྱེད་དུ་བྱས་པ་བཅུ་དྲུག་ནི་ཐུན་ཚོད་ཕྱེད་པ་རེ་རེས་འཁོར་རོ། །ཡུད་ཙམ་ནི་ཐུན་ཚོད་ཀྱི་ཕྱེད་བཅུ་དྲུག་སླར་ཡང་ཕྱེད་མར་བྱས་པས་སོ་གཉིས་ཀྱིས་ཡུད་ཙམ་སོ་གཉིས་འཁོར་རོ། །འདི་དག་རགས་པ་ཙམ་སྟེ་ཞིབ་པ་རྗེས་སུ་འཆད་དོ། །ཆུ་ཚོད་རེ་རེ་ཆུ་སྲང་དྲུག་ཅུས་འཁོར་བ་སྟེ་རྫོགས་སོ། །ཆུ་སྲང་སོ་སོའམ་རེ་རེའི་དབུགས་དྲུག་གིས་འཁོར་ཏེ། དེ་ལྟར་ཉིན་དང་མཚན་དུ་ནང་དུ་ལུས་ཅན་རྣམས་ཀྱི་དབུགས་ཀྱི་དབྱེ་བ་དང་། ཕྱི་རོལ་ཁྱིམ་གྱི་དུས་སྦྱོར་གྱི་དབྱེ་བས་དུས་ཀྱི་ཚད་མི་འདྲ་བ་སྣ་ཚོགས་སུ་འབྱུང་ཞིང་བགྲོད་དོ། །དེ་ལྟ་བུར་དུས་
སྦྱོར་གྱི་དབྱེ་བས་ཕྱེ་བའི་དུས་དེ་རྣམས་རི་རབ་ལྷུན་པོའི་ཕྱོགས་རྣམས་སུ་ནི་རབ་ཏུ་གསལ་བའམ་ངེས་པར་ཉི་མའི་ཞེས་བཅུ་གཉིས་ཀྱི་ས་ལ་སྟེ། ས་དུམ་བུ་བཅུ་གཉིས་སུ་འཁོར་བ་ནི་ཉི་མ་ཁྱིམ་གང་དུ་ཞུགས་པ་དང་གོ་ལའི་རི་རླུང་འགྲོས་ཀྱི་དབང་གིས་ཞག་གཅིག་ལའང་དུས་ཀྱི་དབྱེ་བ་དེ་ལྟ་བུ་འཁོར་ཞིང་འགྲོད་པ་འབྱུང་བ་ཡིན་ནོ། །ད་ནི་ཉི་མས་གོ་ལའི་རླུང་འགྲོས་ཀྱི་དབང་གིས་ས་ཁྱོན་ཇི་ཙམ་ཆོད་པ་གསུངས་པ། ཆུ་ཚོད་གཅིག་གི་ཡུན་ནམ་དུས་ཏེ་དབུགས་སུམ་བརྒྱ་དྲུག་ཅུའི་ཡུན་ལ་དཔག་ཚད་སྟོང་ཕྲག་དྲུག་དང་ནི་རྐང་པ་ཞེས་པ་སྟོང་ཕྲག་ཁ་མ་ལོངས་པའི་དཔག་ཚད་ཉིས་བརྒྱ་ལྔ་བཅུ་དང་བཅས་པ་ཉིན་མོར་བྱེད་པ་མཁའ་ལ་གཡས་བསྐོར་དུ་འགྲོ་བ་སྟེ། དཔག་ཚད་སྟོང་ཕྲག་དྲུག་དང་ཉིས་བརྒྱ་ལྔ་བཅུ་ཡི་ས་དེ་ཙམ་ཆུ་ཚོད་གཅིག་གི་ཡུན་ལ་བགྲོད་ནུས་པ་འདི་ནི་གོ་ལའི་བགྲོད་པའི་དབང་གིས་ཡིན་གྱི་ཉི་མ་རང་གི་བགྲོད་པའི་འགྲོས་ཀྱིས་ནི་མ་ཡིན་ནོ། །ཉིན་ཞག་གཅིག་གི་ཚད་ཆུ་ཚོད་དྲུག་ཅུ་ལ་ནི་གོང་གི་ཚད་དེ་དྲུག་ཅུས་བསྒྱུར་བ་མེ་འབུམ་དག་དང་ལྔ་དང་རི་བོའི་སྟོང་ཕྲག་ཞེས་སུམ་འབུམ་བདུན་ཁྲི་ལྔ་སྟོང་གི་དཔག་ཚད་ཀྱི་ཁྱོན་ཉིན་དང་མཚན་མོ་ཟུང་དག་གི་ཉིན་ཞག་གཅིག་ཏུ་བགྲོད་ཅིང་འཁོར་བར་བྱེད་དོ། །ཚད་དེའི་ཆུ་ཚོད་གཅིག་གི་བགྲོད་པའི་ཆ་དབུགས་ལ་ཐོབ་པ་དཔྱད་ན། དབུགས་གཅིག་གི་ཡུན་ལ་དཔག་ཚད་བཅུ་བདུན། རྒྱང་གྲགས་གཅིག །གཞུ་འདོམས་བརྒྱད་བརྒྱ་དང་བརྒྱད་ཅུ་རྩ་བརྒྱད་ལྷག་ཙམ་རེ་བགྲོད་པར་འགྱུར་རོ། །དེ་ཡང་ཉི་མ་ལྷོ་བགྲོད་མཐར་ཐུག་གི་ཉིན་ལྟ་བུ་ལ་མཚོན་ན། ཉི་མ་གླིང་འདིའི་མེ་རིའི་ནང་མཐའི་ཐད་མཉམ་དུ་སླེབ་ཅིང་། སྒྲ་མི་སྙན་གྱི་རི་རབ་ཀྱི་རྭ་དང་ཐད་མཉམ་དུ་སླེབ་ལ། རི་རབ་ཀྱི་རྭ་ནས་གླིང་འདིའི་ལྷོའི་མེ་རིའི་ནང་མཐའི་བར་ལ་ཐད་ཀར་དཔག་ཚད་འབུམ་ཕྲག་གཅིག་དང་སྟོང་ཕྲག་ཉི་ཤུ་རྩ་ལྔ་ཡོད་པ་དེ་ཉིད་ཟླུམ་པོའི་མཐའ་སྐོར་ལ་
སུམ་འགྱུར་དུ་འགྲོ་བས་དཔག་ཚད་སུམ་འབུམ་ཁྲི་བདུན་སྟོང་ལྔར་འགྱུར་བ་དེ་གོ་ལའི་ཁྱིམ་གཅིག་གི་ཟླུམ་སྐོར་གྱི་མཐའ་ཚད་ཡིན་པས་ཁྱིམ་བཅུ་གཉིས་པོ་གང་དུ་ཉི་མ་ཡོད་ཀྱང་འཁོར་ཚད་དེ་ཁོ་ནར་ངེས་སོ། །དེའི་ཕྱིར་ཁྱིམ་བཅུ་གཉིས་ཀྱི་ཆ་ལ་གནས་པའི་སྐར་མ་གཞན་ཐམས་ཅད་དེ་ལྟར་ཉིན་ཞག་གཅིག་གིས་རི་རབ་ལ་འཁོར་བར་འགྱུར་རོ། །དེ་ལྟར་གོ་ལ་ནི་རླུང་གི་ཤུགས་ཀྱིས་རྟག་ཏུ་གཡས་སུ་འཁོར་བ་ཡིན་ལ། ཁ་ཤར་དུ་ཕྱོགས་པའི་གཟའ་བརྒྱད་པོ་རྣམས་ནི་རང་འགྲོས་ཀྱིས་རྒྱུ་སྐར་ལ་རིམ་པར་སྤྱོད་པས་རི་རབ་ལ་གཡོན་དུ་བསྐོར་བར་བྱེད་ལ། སྒྲ་གཅན་རང་འགྲོས་ཀྱིས་ནི་རི་རབ་ལ་རྟག་ཏུ་གཡས་སུ་བསྐོར་བའི་ཚུལ་དུ་རྒྱུའོ། །དེ་ཕྱིར་སྒྲ་གཅན་ནི་བསོད་ནམས་ལྡན་པ་ཡིན་གྱི་སྡིག་པའི་གཟའ་མིན་པ་དང་། གཟའ་གཞན་སྡིག་པར་བརྗོད་པ་ཡང་ཡོད་དོ། །བཀྲ་ཤིས་སོགས་འཁྱོགས་འགྲོས་ཀྱི་ཚེ་འགའ་ཞིག་ཏུ་གཡས་སུ་རྒྱུ་སྐར་ལ་ལུགས་ལྡོག་ཏུ་སྤྱོད་པ་ཅུང་ཟད་རེ་སྲིད་ཀྱང་དེ་ནི་རྒྱུན་གྱི་འགྲོས་མ་ཡིན་པས་སྒྲ་གཅན་མ་གཏོགས་པའི་གཟའ་གཞན་རི་རབ་ལ་རང་འགྲོས་ཀྱིས་གཡོན་དུ་བསྐོར་བ་ཞེས་བྱའོ། །སྐར་མ་བརྟན་པ་རྟག་ཏུ་གནས་གཅིག་ཏུ་ཡོད་པ་ནི་ཁྱིམ་བཅུ་གཉིས་པོའི་རླུང་འགྲོས་ཀྱིས་འཁོར་བ་རྣམས་ལ་མི་གཏོགས་པ་ཞིག་གོ། དྲང་སྲོང་རི་བྱི་ཡང་གོ་ལའི་གདུགས་ཀྱི་ཤམ་བུའི་ཚུལ་དུ་ཡོད་པར་བཤད་པ། དུས་རྒྱུན་དུ་མི་འཆར་བ་ཡང་འཁོར་བར་བྱེད་པའི་ཁྱིམ་བཅུ་གཉིས་སུ་ཡོད་པ་ཞིག་མ་ཡིན་པ་འདྲའོ། །ཁྱིམ་ཆེན་པོ་བཅུ་གཉིས་ལ་ཁྱིམ་གྱི་འཁོར་དུ་མ་ཡོད་པར་གསུངས་པ་ལྟར་འདི་དག་གི་དོན་ཅི་འདྲ་ཞིག་ཡིན་པ་འཆད་བྱེད་ཀྱི་ལུང་ཡོད་ན་ཤེས་ནུས་ཀྱི་རིག་པ་ཁོ་ནས་བགྲོད་མི་ནུས་པ་ཞིག་གོ། དེ་ལྟར་སུམ་འབུམ་ལ་སོགས་པ་བགྲོད་པར་བྱེད་པ་དེ་ནི་ཉིན་དང་མཚན་མོར་ཁྱིམ་གྱི་གོ་ལ་ཕྱེད་ལ་མཉམ་པའི་རི་མོའི་སྟེང་དུ་ཉི་མ་སླེབས་པའི་ཚེ་མཁའ་མེ་ཡི་ཆུ་ཚོད་བགྲོད་དེ་ཉིན་
ལ་སུམ་ཅུ་དང་མཚན་ལའང་སུམ་ཅུ་བགྲོད་དོ། །མཉམ་པའི་རི་མོ་དེ་ནས་གོ་ལ་དག་ལ་གཡས་ལྷོ་སྟེ་མེ་རིའི་ཕྱོགས་སུ་ཁྱིམ་གསུམ་དང་ནི་གཡས་མིན་བྱང་སྟེ་རི་རབ་ཀྱི་ཕྱོགས་དག་ཏུ་གསུམ་སྟེ་བགྲོད་པའི་དབང་གིས་ཉིན་ཚད་འཕེལ་བ་དང་འགྲིབ་པ་ཆུ་ཚོད་ལྔ་སྟེ། ལྷོ་བགྲོད་ཀྱི་ཁྱིམ་ཟླ་གསུམ་ལ་ཉིན་མོ་ཆུ་ཚོད་ལྔ་འགྲི༷བ་ཅིང་མཚན་དེ་ཙམ་འཕེལ་བ་དང་བྱང་བགྲོད་ཀྱི་ཁྱིམ་ཟླ་གསུམ་ལ་ཉིན་མོ་ལྔ་འཕེལ་བ་དང་མཚན་འགྲིབ་པ་དེ་ལྟར་ཆུ་ཚོད་ལྔ་འཕེལ་འགྲིབ་བྱེད་པ་སྟེ་སྔར་ཡང་བརྗོད་ཟིན་ཏོ། །དེའི་ཉིན་ཞག་སོ་སོར་ཏེ་རེ་རེ་བཞིན་དུ་འཕེལ་འགྲིབ་དེ་ནི་དབུགས་ཟུང་དང་ཆུ་སྲང་གསུམ་རེས་འཕེལ་བའམ་འགྲིབ་པར་བྱེད་དོ། །ཚད་འདི་ཀཻ་ལཱ་ཤའི་དུམ་བུའི་དབང་དུ་བྱས་པ་ཡིན་གྱི་འཕགས་ཡུལ་སོགས་ལ་མ་ཡིན་ནོ་ཞེས་འགྲེལ་ཆེན་ལས་གསུངས་ཏེ། འཕགས་ཡུལ་དུ་ཉིན་ཞག་རེ་ལ་ཆུ་སྲང་གཉིས་འཕེལ་བའམ་འགྲིབ་པར་གསུངས་སོ། །དེས་ན་ཟླ་བ་རེ་ལ་ཆུ་ཚོད་རེ་ལོངས་པས་ཉིན་མཚན་མཉམ་པའི་དུས་དེའི་རྗེས་ནས་ཟླ་བ་གསུམ་གྱིས་ཆུ་ཚོད་གསུམ་འཕེལ་བའམ་འགྲིབ་པར་གསུངས་པས། དེ་གཉིས་ཀྱི་བར་གྱི་དུམ་བུ་རྣམས་དེ་ལས་དཔགས་ཏེ་ཤེས་ནུས་སོ། །ཀཻ་ལཱ་ཤའི་དུམ་བུ་དེའི་དབང་དུ་བྱས་པའི་དུས་སྦྱོར་གྱི་འཆར་ཚད་ནི། ལུག་གི་དུས་སྦྱོར་ལ་ནི་ཆུ་སྲང་དུ་འགྱུར་བ་མཁའ་དགུ་ལག་སྟེ་ཉིས་བརྒྱ་དགུ་བཅུའོ། །ཆུ་སྲང་མཁའ་དུས་མིག་སྟེ་ཉིས་བརྒྱ་དྲུག་ཅུ་ནི་གླང་ལ་འགྱུར་རོ། །ཟུང་ངམ་འཁྲིག་པ་དག་ལ་ཡང་མཁའ་མཁའ་གཉིས་ཏེ་ཉིས་བརྒྱའོ། །མདའ་དང་རོའི་ཆུ་ཚོད་དུ་འགྱུར་བ་ནི་རིམ་བཞིན་ཀུ་ལཱི༷་ར་ཞེས་པ་རུས་སྦལ་ཏེ་ཀརྐ་ཊ་དང་སེང་གེ་ལའོ་ཞེས། ཀརྐ་ཊའི་ཆུ་ཚོད་ལྔ་ནི་ཆུ་སྲང་སུམ་བརྒྱའོ། །སེང་གེའི་ཆུ་ཚོད་དྲུག་ནི་ཆུ་སྲང་སུམ་བརྒྱ་དྲུག་ཅུའོ། །བུ་མོ་ལ་ནི་ཕྱེད་དང་བཅས་པའི་ཆུ་ཚོད་དྲུག་སྟེ་ཆུ་སྲང་སུམ་བརྒྱ་དགུ་བཅུའོ། །ངེས་པར་
སྲང་སོགས་ལྷག་མ་དྲུག་ནི་རིམ་པ་མིན་པས་ཡར་དེ་བཞིན་ཏུ་སྦྱར་བས་དུས་སྦྱོར་བཅུ་གཉིས་པོ་ཐམས་ཅད་ལ་རང་རང་གི་ཆུ་སྲང་འཆར་ཚད་དུ་འགྱུར་ཏེ། བུ་མོའི་ཚད་དེ་སྲང་གི་ཡིན་པ་ནས་ལུག་གི་ཚད་དེ་ཉ་ཡི་ཡང་ཡིན་པའི་བར་དུ་འདི་ལྟར། སྲང་དང་བུ་མོ། སྡིག་པ་སེང་གེ། གཞུ་ཀརྚ། ཆུ་སྲིན་དང་འཁྲིག་པ། བུམ་པ་གླང་། ཉ་ལུག་དག་འཆར་ཚད་གཅིག་པར་ཤེས་པར་བྱའོ། །དེ་ལྟར་དུས་སྦྱོར་སོ་སོའི་ཚད་འདི་ནི་རང་རང་གི་ཁྱིམ་དེ་ས་དེར་ཤར་ནས་ཕྱི་མ་འཆར་བའི་བར་གྱི་ཡུན་གྱི་ཚད་ཡིན་ལ་འདི་ཀཻ་ལཱ་ཤའི་ཡུལ་དུ་ངེས་པའོ་ཞེས་གསུངས་པ་ཀཻ་ལཱ་ཤ་གངས་ཀྱི་མིང་ཡིན་ཡང་ཤམ་བྷ་ལའི་ཡུལ་གངས་རིས་བསྐོར་བའི་དབང་གིས་ཤམ་བྷ་ལ་ཉིད་ལ་གོ་དགོས་ཀྱི་ཤམ་བྷ་ལའི་བྱང་ན་ཡོད་པའི་དུམ་བུ་དྲུག་པ་གངས་ལྡན་གྱི་ཡུལ་ལ་མ་ཡིན་པས་འདི་གཉིས་ཤན་ཕྱེད་དགོས་ཏེ་ཀཻ་ལཱ་ཤའི་དུམ་བུ་ཞེས་པའང་ཤམ་བྷ་ལ་ཉིད་ལ་བཟུང་ན་ལེགས་སོ། །དབྱངས་འཆར་གྱི་རྒྱུད་ལས། ནམ་མཁའ་མཁའ་ཟུང་ལུག་གི་ཚད། །ཅེས་སོགས་བཤད་པ་དང་མི་མཐུན་པ་ནི། དབྱངས་འཆར་གྱི་དེ་ནི་ཀཻ་ལཱ་ཤའི་བྱང་གི་ཆ་ཁ་བ་ཅན་གྱི་བར་དུ། ཉིན་རིང་དུས་ཆུ་ཚོད་སོ་དྲུག་ཐུང་དུས་ཉེར་བཞི་འཆར་བ་དེའི་དབང་དུ་བྱས་པ་དང་། འདིར་ཀཻ་ལཱ་ཤའི་དུམ་བུ་གང་ལ་ཉིན་རིང་དུས་ཆུ་ཚོད་སོ་ལྔ་དང་། ཐུང་དུས་ཉེར་ལྔ་འཆར་བའི་དབང་དུ་བྱས་པའོ་ཞེས་བླ་མ་སྔ་མ་དག་འཆད་དོ། །སྐབས་འདིར་བོད་ཀྱི་བླ་མ་དག་ཡུལ་དྲུག་གི་ནང་ཚན་རི་རབ་ལ་ཉེ་ཤོས་གངས་ལྡན་དུ་ཆུ་ཚོད་བཅུ་གཉིས་ཀྱི་འཕེལ་འགྲིབ་དང་། བོད་དུ་ཆུ་ཚོད་དགུས་འཕེལ་འགྲིབ་བྱེད་པའི་དབང་དུ། ལུག །གླང་། འཁྲིག །ཀརྚ། སེང་གེ། བུ་མོ། སྲང་སྡིག་གཞུ། ཆུ་སྲིན། བུམ་པ། ཉ། ཞེས་བཤད། ལི་ཡུལ་དུ་བརྒྱད་ཀྱིས་འཕེལ་འགྲིབ་བྱེད་པའི་
དབང་དུ་བྱས་ཏེ། ལུག་ལ་ཆུ་ཚོད་ལྔ། གླང་ལ་དབྱུག་བཞི་ཆུ་སྲང་བཞི་བཅུ་སོགས་བཀོད་པ་འདུག་གོ། ཁྱིམ་རྣམས་ཀྱི་ཚད་ལ་ཁྱད་མེད་ཀྱང་ས་ཡི་དུམ་བུ་སོ་སོར་དུས་སྦྱོར་གྱི་འཆར་ཚད་མི་འདྲ་བ་འོང་བ་ནི་རང་རང་གིས་དེར་ཁྱིམ་སོ་སོ་ལ་བགྲོད་པ་སོ་སོ་འབྱུང་བས། རང་རང་གི་དུམ་བུའི་གོ་ལ་ཟླུམ་པོའི་ཐིག་གི་མཉམ་ལམ་ནས་བྱང་ཕྱོགས་ཀྱི་ནུབ་ཀྱི་ཁྱིམ་གསུམ་དང་ཤར་གྱི་གསུམ། ལྷོ་ཕྱོགས་ཀྱི་དེ་གསུམ་ལ་བགྲོད་པ་གཉིས་མཐར་ཐུག་པའི་ཞག་ནས་ཕར་འགྲོ་ཚུར་འོང་བྱེད་པའི་ཁྱིམ་དེ་རྣམས་ས་དེར་ནམ་མཁའ་ལས་འཆར་བའི་ཚེ་རྒྱུ་སྐར་ཁྱིམ་གྱི་གོ་ལའི་ཆ་དེ་སྣེ་ནས་རིམ་པར་ཡོངས་རྫོགས་སུ་འཆར་བ་དང་། ཁུག་མགོའི་ནང་ནས་འཆར་ཚུལ་གྱི་དབང་གིས་རིང་ཐུང་འོང་བ་འདྲའམ་སྙམ་སྟེ་སླར་དཔྱད་པར་གྱིས་ཤིག །ཁྱིམ་འཆར་ཚད་རིང་བ་དྲུག་གི་ཚད་རྣམས་བསྡོམ་པས་ཉིན་རིང་ལ་ཐུང་བ་དྲུག་གི་ཚད་བསྡོམ་པས་ཉིན་ཚད་ཐུང་བ་སོགས་དང་། ཁྱིམ་ལ་འཆར་ཚད་རིང་ཐུང་ཡུལ་སོ་སོར་བཤད་ཀྱང་ཐམས་ཅད་ཆུ་ཚོད་དྲུག་ཅུ་ལ་རྫོགས་པར་དུམ་བུ་ཀུན་ལ་འདྲ་དགོས་པ་དང་། ཉིན་མཚན་འཕེལ་འགྲིབ་རིང་ཐུང་དུམ་བུ་སོ་སོ་ལ་མི་འདྲ་ཡང་ཉིན་མཚན་བསྡོམ་ན་ཆུ་ཚོད་དྲུག་ཅུར་འདྲ་དགོས་པ་དང་། དེ་ཡང་སྤྱིར་རགས་པར་གླིང་འདིར་ལྷོ་ནས་བྱང་དུ་ཆ་དྲུག་བགོས་པའི་དུམ་བུ་ལ་ལྷོ་ནས་བྱང་དུ་རིམ་བཞིན། འཕགས་ཡུལ་དང་། བོད་དང་། ལི་དང་། རྒྱ་ནག་དང་། ཤམ་བྷ་ལ་དང་། གངས་ལྡན་དྲུག་གི་ཡུལ་མིང་གཙོ་བོའི་ཆ་ནས་བཏགས་ལ། དེ་དག་ཏུ་ཉིན་མཚན་མི་འདྲ་བ་འོང་བ་སྤྱིར་རགས་པར་བསྟན་པ་དང་། ཞིབ་ཏུ་མཎྜལ་ཁྲུ་གང་བ་སྟེང་མ་ཡོ་བར་བཞི་མཉམ་པའི་དབུས་སུ་ཐུར་ཤིང་མཐོ་གདབ་བཙུགས་ཏེ་ལྷོ་བྱང་དུ་བགྲོད་ཉེ་བའི་ཞག་བཅུའི་སྔ་ལོགས་ནས་བརྟག་པས་ཐུར་གྲིབ་ལོག་པར་གྱུར་པ་ལས་ཉི་མ་ལྷོ་བྱང་དུ་བགྲོད་པའི་ཞག་ངོས་བཟུང་ནས་དེ་ཡི་ཉི་སྐར་སོགས་ངེས་པར་བྱེད་པའི་ཚུལ་འདི་གོ་ལའི་ཐིག་རྣམས་
དང་། རྒྱུད་དང་འགྲེལ་བའི་གཞུང་རྣམས་ཞིབ་ཏུ་བསྡུར་ཏེ་དཔྱད་ན་གོ་རྒྱུ་ལེགས་པོ་ཡོད་པ་གཞིར་བཅས་ཀྱང་སྔ་མ་ཚོའི་དཔྱད་པའི་ཡིག་འཇོག་རྣམས་ལས་གསར་དུ་བརྟག་པ་བགྱིད་པའི་ངལ་བ་དང་དུ་མ་བླངས་པ་ནི་རང་ཉིད་ན་ཚོད་ཡོལ་ཞིང་ནད་ཀྱིས་མནར་བའི་དབང་གིས་སོ། །དེ་ཡང་རྒྱུ་སྐར་གྱི་འཁོར་ཕྱེད་སྐར་མ་བཅུ་གསུམ་དང་སྐར་མ་གཅིག་གི་ཕྱེད་ཆུ་ཚོད་སུམ་ཅུ་དང་བཅས་པའི་ས་ཁྱོན་ལ་གནས་པའི་དུས་སྦྱོར་དྲུག་གིས་ཉི་མ་དེ་ནུབ་པར་འགྱུར་ཏེ་གང་ཕྱིར་ཉི་མ་འཆར་བ་དག་ཀྱང་དེ་བཞིན་དུ་ཉི་མའི་འོད་ཀྱིས་ཁྱབ་པའི་རྒྱུ་སྐར་ཕྱེད་བཅས་བཅུ་གསུམ་པོའི་དབྱེ་བས་སོ་ཞེས་མདོར་ན་དུས་སྦྱོར་བཅུ་གཉིས་པོ་ཉིན་ཞག་གཅིག་ལ་འཁོར་བ་དེའི་དྲུག་ཉིན་མོ་འཆར་བ་དང་དྲུག་མཚན་མོར་འཆར་བར་ངེས་ཀྱི་རྒྱུ་སྐར་འཁོར་ལོའི་ཕྱེད་ལས་ལྷག་པ་ཉི་འོད་ཀྱིས་མི་ཁྱབ་པའི་ཕྱིར་རོ། །ས་སོ་སོར་ཁྱིམ་རྣམས་ཀྱི་འཆར་ཚད་རིང་ཐུང་ཡོད་པ་དེའི་དབང་གིས་ཉིན་མཚན་རིང་ཐུང་ཡོད་རུང་ལ། དེ་ལྟ་མིན་པར་ཁྱིམ་ཐམས་ཅད་དབྱུག་གུ་ལྔ་རེའི་འཆར་ཚད་དུ་མཉམ་ན་རྟག་ཏུ་ཉིན་མཚན་མཉམ་པ་འབའ་ཞིག་ཏུ་འགྱུར་ཏེ། ཉི་མ་ཡོད་པའི་འཁོར་བྱེད་ཀྱི་ས་ན་ཟླ་བ་ཡོད་དུས་ཟླ་བ་ཉ་གང་ཞིང་དེ་ཉིན་ཉི་མ་ནུབ་པའི་རྗེས་སུ་མཚན་གྱི་དང་པོ་ནས་ཟླ་བ་འཆར་བ་བཞིན་ནོ། །དེས་ན་ཉི་མ་ཡོད་པའི་ཁྱིམ་ནས་བདུན་པའམ་དོན་ལ་ཉི་མ་ཡོད་པ་ནས་བརྩིས་པའི་འཁོར་ཕྱེད་ཀྱི་ཁྱིམ་འཆར་བའི་ཚེ་མཚན་མོ་ཡིན་པར་མི་འགྱུར་ན་ཟླ་བ་ཉ་གང་བའང་མཉམ་གཉིས་ཀྱི་ཁྱིམ་ཟླ་དེ་ལས་གཞན་ཐམས་ཅད་ལ་མི་སྲིད་པར་འགྱུར་རོ། །དེའི་ཕྱིར་ཉི་མ་གང་དུ་ཡོད་པ་ནས་བརྩིས་པའི་ཁྱིམ་དྲུག་གི་འཆར་ཚད་བསྡོམ་པས་ཉིན་མོའི་ཚད་དང་ལྷག་མ་མཚན་མོའི་ཚད་དུ་འགྱུར་ཏེ། ཞིབ་པར་ན་ཉི་མ་ཡོད་པ་ནས་འཁོར་ཕྱེད་ཕན་ཆད་ཀྱི་ཁྱིམ་རྣམས་མཚན་མོའི་དུས་སུ་འཆར་རོ། །བླ་མ་འགའ་ཞིག་ཉིན་གཅིག་ལའང་སྔ་དྲོ་དུས་སྦྱོར་རིང་བ་འཆར་ཞིང་། ཕྱི་དྲོ་ཐུང་བ་འཆར་ཚེ་སྔ་དྲོ་ཡུན་རིང་ཞིང་
ཕྱི་དྲོ་ཡུན་ཐུང་བ་དང་། དེ་ལས་ལྡོག་ཚེ་སྔ་དྲོ་ཡུན་ཐུང་ལ་ཕྱི་དྲོ་རིང་བར་འགྱུར་བས་འདི་གཟའ་འཛིན་བརྩི་བ་སོགས་ལ་གལ་ཆེ་ཞེས་བཤད་ཀྱང་། ཉིན་ཞག་གཅིག་ལ་འཆར་བའི་དུས་སྦྱོར་གྱི་ཚད་རྣམས་བསྡོམ་པའི་ཉིན་ཚད་དེ་ལས་ཉིན་གུང་གི་ཕྱེད་ཡན་ཆད་སྔ་དྲོ་དང་མན་ཆད་ཕྱི་དྲོ་བྱེད་པ་ལས་སྔ་རིང་ཕྱི་ཐུང་སོགས་འབྱེད་དཀའོ། །གནས་པ་བཅུ་དྲུག་པ་དབུ་མའི་རྩའི་དབུགས་རྣམས་ལས་གཟའ་དང་རྒྱུ་སྐར་གྱི་རྐང་པ་སྐྱེ་བའི་ངོ་བོ་ཉིད་ཀྱིས་གནས་པ་བཤད་པ་ནི། སྟོང་ཕྲག་ཉི་ཤུ་རྩ་གཅིག་སོགས་ཚིགས་བཅད་རེ་བཞི་པ་ནས་དགུ་བཅུ་རྩ་གསུམ་པའི་བར་གྱིས་བསྟན་ཏེ། གོང་དུ་བསྟན་པའི་གཟའ་སྐར་གྱི་བགྲོད་པ་འབྱུང་བ་དེ་དག་ནང་དུ་ངེས་དོན་ལ་སྦྱར་བའི་དོན་དུ་འདི་ཉིད་གསུངས་པ་སྟེ། ནང་ལུས་ལ་དབུ་མའི་རྩ་ལ་ཡེ་ཤེས་ཀྱི་རླུང་རྒྱུ་ཚུལ་ནི། སྟོང་ཕྲག་ཉི་ཤུ་རྩ་གཅིག་རོ་བརྒྱ་དག་དང་ལྡན་པ་ནི་ཉིན་ཞག་གཅིག་གི་དབུགས་གྲངས་ཉི་ཁྲི་ཆིག་སྟོང་དྲུག་བརྒྱ་དག་ལས་སོ་ཡི་སྟེ་སུམ་ཅུ་རྩ་གཉིས་ཀྱི་ཆ་ཡིས་ངེས་པར་ཕྱུངས་པར་གྱུར་པའམ་བགོ་བར་བྱས་པས། ནང་དུ་ལུས་ལ་རོ་རྐྱང་གི་ལམ་ནས་ལས་རླུང་རྒྱུ་བའི་དབུགས་ལྷག་ཡེ་ཤེས་ཀྱི་རླུང་རྒྱུ་བ་གང་དག་ཉིན་ཞག་སོ་སོའི་ཞེས་ཉིན་ཞག་རེ་རེའི་དུས་སུ་འབྱུང་བ་རི་དང་དུས་རྣམས་དག་གི་གྲངས་ཏེ་དྲུག་བརྒྱ་བདུན་ཅུ་རྩ་ལྔའོ། །དེ་ཡང་ཞག་གཅིག་ལ་སྐྱེས་བུ་དར་མ་ཁམས་སྙོམས་པའི་དབུགས་འབྱུང་འཇུག་གནས་གསུམ་གཅིག་ཏུ་བརྩིས་པའི་དབུགས་ཉི་ཁྲི་ཆིག་སྟོང་དྲུག་བརྒྱ་རྒྱུ་ལ། དེ་ལྟ་བུའི་ཞག་རེ་ལ་དུས་སྦྱོར་འཕོ་ཆེན་བཅུ་གཉིས་ཡོད་ཅིང་། འཕོ་ཆེན་རེ་ལ་ནང་གསེས་སུ་འབྱུང་བ་ལྔའི་རླུང་གི་དབུགས་རྒྱུ་བས་དབྱེ་བས་འཕོ་ཆུང་ལྔ་རེ་ཡོད་དོ། །དེ་ཡང་འཕོ་ཆེན་རེའི་ཡུན་ལ་དབུགས་གྲངས་སྟོང་དང་བརྒྱད་བརྒྱ་ཡོད་ཅིང་། འཕོ་ཆུང་རེ་ལ་དབུགས་གྲངས་སུམ་བརྒྱ་དྲུག་ཅུ་ཡོད་དོ། །འཕོ་ཆུང་རེ་རེའི་ཐ་མར་ཡེ་ཤེས་ཀྱི་རླུང་དབུགས་བཅུ་གཅིག་
དང་དབུགས་གཅིག་གི་བཞི་ཆ་གཅིག་རྒྱུའོ། །འཕོ་ཆུང་རེར་ཡེ་རླུང་ཕྲི་བའི་ལྷག་མ་སུམ་བརྒྱ་བཞི་བཅུ་རྩ་བརྒྱད་དང་དབུགས་གཅིག་ཆ་བཞིར་བཏང་བའི་ཆ་གསུམ་རྒྱུའོ། །ལས་རླུང་ནི་རོ་རྐྱང་གི་ལམ་ནས་རྒྱུ་སྟེ་གཡས་རོ་མ་ནས་ཉི་མའི་རླུང་དང་། གཡོན་རྐྱང་མ་ནས་ཟླ་བའི་རླུང་རྒྱུའོ། །ཡེ་ཤེས་ཀྱི་རླུང་ནི་དབུས་ཀྱི་དབུ་མ་ནས་སྒྲ་གཅན་གྱི་རླུང་རྒྱུ་བའོ། །དེའི་ཕྱིར་འཕོ་ཆེན་རེ་ལ་ཡེ་ཤེས་ཀྱི་རླུང་དབུགས་ལྔ་བཅུ་རྩ་དྲུག་དང་རྐང་པ་ཞེས་པ་དབུགས་གཅིག་ཏུ་མ་ལོངས་པ་དབུགས་གཅིག་དུམ་བུ་བཞིར་བྱས་པའི་ཆ་གཅིག་རྒྱུ་སྟེ། དེའི་ལྷག་མ་དབུགས་སྟོང་དང་བདུན་བརྒྱ་ཞེ་གསུམ་དང་དབུགས་གཅིག་གི་བཞི་ཆ་གསུམ་རྒྱུ་བ་ནི་ལས་རླུང་ངོ་། །འཕོ་ཆེན་བཅུ་གཉིས་པོའི་ཡེ་ཤེས་ཀྱི་རླུང་རྒྱུ་བ་རྣམས་བསྡོམ་ན་དྲུག་བརྒྱ་བདུན་ཅུ་རྩ་ལྔ་ཡིན་ཞིང་། དེའི་ལྷག་མ་ལས་རླུང་ཉི་ཁྲི་དགུ་བརྒྱ་དང་ཉེར་ལྔ་རྒྱུའོ། །ལས་རླུང་ཡེ་རླུང་གཉིས་ཀ་བསྡོམས་ན་དབུགས་ཉི་ཁྲི་ཆིག་སྟོང་དྲུག་བརྒྱ་སྟེ་ཞག་གཅིག་ལ་དབུགས་རྒྱུ་བའི་གྲངས་སོ། །དེས་ན་ཞག་གཅིག་གི་དབུགས་གྲངས་དེ་ཉིད་སུམ་ཅུ་སོ་གཉིས་ཀྱིས་བགོས་པས་དྲུག་བརྒྱ་བདུན་ཅུ་རྩ་ལྔ་ཐོབ་ཅིང་ལྷག་མ་མེད་པའི་ཕྱིར་ཞག་གཅིག་པོ་དེ་ཆ་སོ་གཉིས་སུ་བྱས་པའི་ཆ་གཅིག་ལ་ཡེ་ཤེས་ཀྱི་རླུང་རྒྱུ་བ་ཡིན་ནོ། །ཞག་གཅིག་ལ་ལམ་གསུམ་ནས་རྒྱུ་བའི་དབུགས་ཉི་ཁྲི་ཆིག་སྟོང་དྲུག་བརྒྱ་དེ་ཉིད་ལོ་བརྒྱ་ཐམ་པའི་ཞག་གྲངས་སྟོང་ཕྲག་སུམ་ཅུ་རྩ་དྲུག་སྟེ་སུམ་ཁྲི་དྲུག་སྟོང་དག་གིས་བསྒྱུར་བ་རྣམས་ཀྱང་ལོ་བརྒྱའི་ལས་རླུང་དང་ཡེ་ཤེས་ཀྱི་རླུང་གཉིས་ཀ་རྒྱུ་བའི་དབུགས་ཀྱི་ཚད་དུ་རབ་ཏུ་གྲགས་པ་སྟེ་དབུགས་འབུམ་ཕྲག་བདུན་ཅུ་རྩ་དྲུག་ལྷག་པའི་བྱེ་བ་ཕྲག་བདུན་ཅུ་རྩ་བདུན་དུ་འགྱུར་བ་ནི་འདི་ལྟར་དུང་ཕྱུར་བདུན་དང་བྱེ་བ་བདུན་དང་ས་ཡ་བདུན་དང་འབུམ་ཕྲག་དྲུག་གོ། དེ་ལ་སུམ་ཅུ་རྩ་གཉིས་ཀྱིས་བགོས་པས་ཐོབ་པ་ནི་ལོ་བརྒྱའི་བར་དུ་རྒྱུ་བའི་ཡེ་ཤེས་ཀྱི་དབུགས་ཀྱི་གྲངས་ཏེ་འབུམ་ཕྲག་བཞི་
བཅུ་རྩ་གསུམ་ལྷག་པའི་བྱེ་བ་ཕྲག་གཉིས་ཡིན་པས་བྱེ་བ་གཉིས་ས་ཡ་བཞི་འབུམ་ཕྲག་གསུམ་མོ། །ཡང་ན་ཞག་གཅིག་གི་ཡེ་ང་དྲུག་བརྒྱ་དོན་ལྔ་སྟེ་ལོ་བརྒྱའི་ཞག་སུམ་ཁྲི་དྲུག་སྟོང་གིས་བསྒྱུར་བས་བཤད་མ་ཐག་པ་ལྟར་འབྱུང་སྟེ་འདི་དག་ནི་ལོ་བརྒྱའི་བར་དུ་དབུ་མ་ཨ་བ་དྷཱུ་ཏི་ནས་འབབ་པ་ཡེ་ཤེས་ཀྱི་རླུང་གི་དབུགས་རྒྱུ་བའི་གྲངས་སོ། །ཡེ་རླུང་གི་ལྷག་མ་འབུམ་ཕྲག་སུམ་ཅུ་རྩ་གསུམ་ལྷག་པའི་བྱེ་བ་ཕྲག་བདུན་ཅུ་རྩ་ལྔ་སྟེ་དུང་ཕྱུར་བདུན་དང་བྱེ་བ་ལྔ་ས་ཡ་གསུམ་འབུམ་ཕྲག་གསུམ་ནི། ལ་ལ་ནཱ་རྐྱང་མ་དང་ར་ས་ནཱ་རོ་མ་དག་གི་དཀྱིལ་འཁོར་ལྔ་ནས་འབབ་སྟེ་དེ་ཡང་དབུགས་གྲངས་དེའི་ཕྱེད་རྐྱང་མ་དང་། ཕྱེད་རོ་མ་ནས་འབབ་སྟེ་ཆ་མཉམ་པའོ། །དེ་ལྟར་བཤད་པའི་དབུགས་གྲངས་དེ་ནི་ལོ་བརྒྱའི་ཕྱི་མཚམས་སུ་ཐུག་པའི་བར་གྱི་དབུགས་གྲངས་ཏེ་ལོ་བརྒྱ་རྫོགས་པའི་མཐར་ཐུག་པར་རོ། །དེ་ལྟར་ལོ་བརྒྱའི་ཚད་དུ་གྲགས་པའི་དབུགས་དེ་དག་སྟོང་དུས་མེ་ཡིས་ཞེས་སུམ་བརྒྱ་དྲུག་ཅུས་རབ་ཏུ་ཕྱེ་བའམ་བགོས་པས་ཐོབ་པ་དག་ནི་ཆུ་ཚོད་དུ་འགྱུར་ཞིང་། ཆུ་ཚོད་དེ་ལ་དྲུག་ཅུའི་ཆ་ཡིས་བགོས་པས་ཐོབ་པ་ཉིན་ཞག་དག་ཀྱང་ཡིན་ནོ། །དེས་ན་ལོ་བརྒྱའི་ཞག་སུམ་ཁྲི་དྲུག་སྟོང་ལས་དབུ་མའི་ཡེ་རླུང་གི་ཐོབ་སྐལ་ཞག་སྟོང་དང་བརྒྱ་ཕྲག་གཅིག་དང་ཉེར་ལྔའོ། །རོ་རྐྱང་ལས་རླུང་གི་ཐོབ་སྐལ་ཞག་བརྒྱ་ཕྲག་བཞི་བཅུ་རྩ་བརྒྱད་དང་བདུན་ཅུ་རྩ་ལྔ་ལྷག་པའི་ཁྲི་ཁྲག་གསུམ་ཞེས་གསུངས་ཏེ་སུམ་ཁྲི་བཞི་སྟོང་བརྒྱད་བརྒྱ་དོན་ལྔའོ། །ཡེ་རླུང་ལས་རླུང་གཉིས་ཀའི་ཐོབ་སྐལ་གྱི་ཞག་གྲངས་བསྲེས་པས་སུམ་ཁྲི་དྲུག་སྟོང་། དེ་མཁའ་མེས་བགོས་པས་ཟླ་བ་སྟོང་དང་ཉིས་བརྒྱ། དེ་བཅུ་གཉིས་ཀྱིས་བགོས་པས་ལོ་བརྒྱ་ཐམ་པར་འགྱུར་རོ། །ཡེ་རླུང་ཁོ་ནའི་ཐོབ་སྐལ་ལ་ལོ་གསུམ་ཟླ་བ་གཅིག་ཞག་བཅོ་ལྔ་ཡོད་པས་དོན་དུ་ལོ་གསུམ་ཕྱོགས་གསུམ་མམ་ལོ་གསུམ་དང་ཞག་ཞེ་ལྔའོ། །དེའི་ལྷག་མ་ལས་རླུང་
རྒྱུ་བའི་ཐོབ་སྐལ་ལ་ལོ་དགུ་བཅུ་གོ་དྲུག །ཟླ་བ་བཅུ། ཞག་བཅོ་ལྔ་འོང་པ་སྤྱིར་ངེས་པར་བྱས་ནས། འགྲེལ་ཆེན་དུ་གཟའ་བརྒྱད་ཀྱི་ལོ་བརྒྱའི་ཚད་འཁོར་ལོ་ཕྱེད་དང་བཅས་པ་ལ་ལོངས་སྤྱོད་པའི་ཕྱིར་གཅིག་ཏུ་བསྡུས་པ་ཉིད་ཀྱིས་དུས་ཀྱི་འཁོར་ལོ་དང་བྲལ་བ་ཞེས་འགྱུར་ལ་ལར་ཡོད་ཀྱང་དོན་དུ། ལོ་བརྒྱའི་ཚད་གཅིག་ཏུ་བསྡུས་པ་དེ་ལས་དུས་ཀྱི་འཁོར་ལོ་ལོ་གསུམ་ཕྱོགས་གསུམ་བྲལ་བའི་ལྷག་དེ་ལ་གཟའ་བརྒྱད་ཀྱི་རང་རང་གི་ཉིན་ཞག་གི་དཀྱིལ་འཁོར་གྱི་ཕྱེད་པ་གསུམ་ལོངས་སྤྱོད་པའི་ཚད་ཀྱིས་སྤྱོད་པར་གསུངས་པ་ཞེས་སོ། །དེ་ཇི་ལྟར་ན་སྐབས་འདིར་གཟའ་རྣམས་ཀྱི་རྒྱུ་སྐར་འཁོར་ལོ་རྫོགས་པར་ལོངས་སྤྱད་པའི་དཀྱིལ་འཁོར་ལ་ཞག་རིལ་པོ་གཅིག་དང་། དེའི་ཕྱེད་རྒྱུ་སྐར་འཁོར་ཕྱེད་སྤྱད་པ་ལ་ཞག་གཅིག་གི་ཕྱེད་ཆུ་ཚོད་སུམ་ཅུའི་ཡུན་ཅན་མཚན་མོའི་ཐ་སྙད་མཛད་ནས་ཚུལ་དེ་ལྟ་བུའི་ཕྱེད་དང་བཅས་པའི་ཞག་གཅིག་ལ་འཁོར་ཕྱེད་ལན་གསུམ་སྤྱད་པས་ན་ཕྱེད་དང་བཅས་པའི་རྒྱུ་སྐར་གྱི་འཁོར་ལོ་གཅིག་ལོངས་སྤྱོད་པའི་ཡུན་དེས་སྐྱེས་བུ་རྣམས་ཀྱི་ཉི་ཟླའི་རླུང་གི་དབུགས་ཀྱི་ལོ་གོ་དྲུག་ཟླ་བ་བཅུ་དང་ཞག་བཅོ་ལྔ་འོང་བ་དེ་རྫོགས་པར་སྤྱོད་པའི་དབང་དུ་བྱས་ཤིང་། དེ་ཡང་གཟའ་བརྒྱད་པོས་འཁོར་ཕྱེད་དང་པོ་ལོངས་སྤྱོད་པའི་རིང་ལ་མི་རྣམས་ཀྱི་ལོ་སུམ་ཅུ་རྩ་གཉིས་ཟླ་བ་གསུམ་ཞག་བཅོ་ལྔའི་བར་སྟེ་དེ་ཡི་ཚེ་སྲོག་སྙིང་སྟོབས་ལས་འབབ་པའི་ཡོན་ཏན་དུ་འགྱུར་ཞིང་། དེ་ནས་ཚན་པ་གཉིས་པ་གཟའ་བརྒྱད་ཀྱི་འཁོར་ཕྱེད་གཉིས་པ་ལོངས་སྤྱད་དེ་དཀྱིལ་འཁོར་རྫོགས་པ་ལ་མི་རྣམས་ཀྱི་ལོ་དྲུག་ཅུ་རྩ་བཞི་དང་ཟླ་བ་བདུན་པའི་བར་དུ་རྡུལ་གྱི་ཡོན་ཏན་ནོ། །དེ་ནས་སླར་ཡང་གཟའ་བརྒྱད་ཀྱིས་འཁོར་ཕྱེད་གཅིག་ལོངས་སྤྱོད་པའི་ཡུན་ལ་མི་རྣམས་ཀྱི་ལོ་གོ་དྲུག་དང་ཟླ་བ་བཅུ་ཞག་བཅོ་ལྔ་རྫོགས་ཏེ་མུན་པའི་ཡོན་ཏན་གྱི་དུས་སོ། །དེ་ལྟར་ཉི་ཟླའི་ལམ་གྱི་ལས་རླུང་རྒྱུ་བའི་དབུགས་གྲངས་ཀྱི་
ལོ་ཟླ་ཞག་ཡོངས་རྫོགས་ལ་གཟའ་བརྒྱད་ཀྱི་འཁོར་ཕྱེད་གསུམ་སྤྱོད་པའི་ཚད་ཀྱིས་སོ། །དོན་དེ་ཉིད་བསྟན་པའི་ཆེད་དུ། ཟླ་བས་ཞག་རེར་རྒྱུ་སྐར་ལ་སྤྱོད་པའི་ཆུ་ཚོད་ང་བཞི་བཅོ་ལྔས་བསྒྱུར་བས་བརྒྱད་བརྒྱ་དང་བཅུ་འོང་བ་སྟེ་རྒྱུ་སྐར་ཉེར་བདུན་པོའི་ཡུལ་གྱི་ཆུ་ཚོད་མཁའ་མིག་རྒྱལ་པོའི་ཕྱེད་ཡིན་ཕྱིར་རྒྱུ་སྐར་ཕྱེད་རྫོགས་པའི་དབང་གིས་ཟླ་བས་ཞག་སུམ་ཅུས་རྒྱུ་སྐར་འཁོར་བ་འཇིག་རྟེན་ལ་གྲགས་པ་དང་བསྟུན་ཏེ་ཟླ་བའི་དཀར་ནག་གི་ཕྱོགས་ཏེ་ཟླ་ཕྱེད་གཅིག་སྟེ་ཞག་བཅོ་ལྔ་དང་། ཉི་མས་བགྲོད་པ་གཉིས་ཀྱིས་རྒྱུ་སྐར་འཁོར་ལོ་ལོངས་སྤྱོད་པས་ན་དེའི་ཕྱེད་བགྲོད་པ་གཅིག་དག་དང་ས་སྐྱེས་མིག་དམར་གྱི་ཟླ་བ་བཅོ་བརྒྱད་ན་རྒྱུ་སྐར་འཁོར་རོ་ཞེས་འཇིག་རྟེན་ན་གྲགས་པའི་བྱེད་པ་བརྗོད་པར་འདོད་ནས་དེའི་དབང་དུ་བྱས་ཏེ་འཁོར་ཕྱེད་ལོངས་སྤྱོད་པའི་ཟླ་བ་དགུ་རྣམས་དག་གིས་མཚན་མོ་སྟེ་ཞག་གཅིག་གི་ཕྱེད་ཆུ་ཚོད་སུམ་ཅུའི་ཆ་ཉིད་དུ་བརྩི་ཞིང་འཁོར་ཕྱེད་གཞན་ནི་ཉིན་མོའི་ཆར་བརྩིའོ། །གོང་དུ་ཟླ་ཉིའི་འཁོར་ཕྱེད་སྤྱོད་པའང་མཚན་མོའོ་ཞེས་དོན་གྱིས་སྦྱར་ཏེ་དེ་གསུམ་ཐུན་མོང་དུ་མཚན་མོའི་ཞེས་གསུངས་པ་དེ་བཞིན་ཕུར་བུ་སོགས་ལའང་འདྲ་བ་ཡིན་ནོ། །ཞིབ་ཏུ་ན་མིག་དམར་གྱི་དཀྱིལ་འཁོར་ནི་ལོ་གཅིག་དང་ཟླ་བ་བཅུ་ཞག་ཉེར་བདུན་དུ་གསལ་བས་དེའི་ཕྱེད་ཟླ་བ་བཅུ་གཅིག་ཞག་བཅུ་གསུམ་ཆུ་ཚོད་སུམ་ཅུ་ཡིན་པས་ཟླ་བ་གཉིས་སོགས་ཆད་དོ། །བླ་མའི་ཞེས་ཕུར་བུའི་ལོ་བཅུ་གཉིས་དང་ཞག་བཅུ་གཉིས་ཀྱིས་རྒྱུ་སྐར་འཁོར་ཡང་ཞག་པོར་ཏེ་ལོར་བསྡུས་པའི་ལོ་བཅུ་གཉིས་ཀྱི་ཕྱེད་ལོ་དྲུག་ཏུ་བརྩིས་པ་ཞག་ཕྱེད་དུ་འགྱུར་ཞིང་། པ་སངས་ཀྱི་ཡང་འཁོར་ཕྱེད་སྤྱོད་པ་བགྲོད་པར་འགྱུར་ཏེ་ཟླ་སྐྱེས་ཀྱི་ཡང་བགྲོད་པ་གཅིག་ཞག་ཕྱེད་པའོ། །ཞེས་ལྷག་སངས་གཉིས་ཀ་དཀྱིལ་འཁོར་ཉི་མ་དང་མཚུངས་པའི་ཕྱིར་རོ། །ཚེས་ཞེས་བྱ་བའི་ལོ་བཅོ་ལྔ་ནི་ཉི་སྐྱེས་ཀྱི་ཞེས་པ་
སྤེན་པའི་འཁོར་ཕྱེད་འཁོར་བ་ཞག་གཅིག་གི་ཕྱེད་དུ་བརྩིས་པ་སྤེན་པའི་མཚན་མོ་གཅིག་སྟེ། དེས་ལོ་སུམ་ཅུ་ལ་རྒྱུ་སྐར་འཁོར་ལོ་འཁོར་བར་གྲགས་པ་དང་བསྟུན་པ་སྟེ། ཞིབ་ཏུ་ན་དེའི་དཀྱིལ་འཁོར་རོ་དུས་རི་ཕྱོགས་ལོང་དྲིལ་བས་ལོ་ཉེར་དགུ་ཟླ་བ་བཅུ་ཞག་ཉེར་དྲུག་ཡིན་ལ་དེའི་ཕྱེད་ལོ་བཅུ་བཞི་ཟླ་བ་བཅུ་གཅིག་ཞག་བཅུ་གསུམ་ཡིན་ཀྱང་ལོ་བཅོ་ལྔ་བྱས་པས་ཞག་བཅུ་བདུན་ལྷག་གོ། དེ་བཞིན་དུ་མུན་ཅན་སྒྲ་གཅན་གྱི་ལོ་དགུ་ལ་ཞག་ཕྱེད་དེ། ཞིབ་ཏུ་སྒྲ་གཅན་གྱིས་རྒྱུ་སྐར་རྫོགས་པར་འཁོར་བ་ཟླ་བ་ཉིས་བརྒྱ་དང་སུམ་ཅུ་ལོར་དྲིལ་བས་ལོ་བཅུ་དགུ་དང་ཟླ་བ་གཉིས་འབྱུང་བས་དེའི་ཕྱེད་ལ་ལོ་དགུ་དང་ཟླ་བ་བདུན་ཐོབ་ཀྱང་ལོར་མ་ལོངས་པའི་ཟླ་བ་བདུན་པོ་བཏང་སྙོམས་སུ་བྱས་ཏེ་ལོ་དགུ་དཀྱིལ་འཁོར་ཕྱེད་དུ་བྱས་ཏེ་མཚན་མོའི་ཆར་བཞག་པས་ཟླ་བ་བདུན་ཆད་པའོ། །ཀྱེ་རྒྱལ་པོ་ཞེས་བོས་ནས་སྐབས་འདིར་དུ་བ་མཇུག་རིང་ནི་དམན་པ་སྟེ་འདིར་མི་གཏོགས་ཞེས་སོ། །དེ་ལྟར་གཟའ་བརྒྱད་པོའི་བགྲོད་ཞག་དེ་དག་ཐམས་ཅད་གཅིག་ཏུ་བསྡུས་པ་ནི་ནོར་གྱིས་ཞེས་བརྒྱད་ཀྱིས་བསྒྱུར་བའི་དུས་བཞི་ཉིད་ཀྱི་ལོ་དང་ཕྱེད་དང་བཅས་པའི་ཟླ་བ་གསུམ་ཡོད་པ་ནི། ལོ་སོ་གཉིས་དང་ཟླ་བ་གསུམ་ཟླ་བའི་ཕྱེད་ཞག་བཅོ་ལྔ་འོང་བ་ཡིན་ཏེ་ཉི་སངས་ལྷག་གསུམ་གྱི་བགྲོད་པ་གསུམ་ལ་ལོ་གཅིག་དང་ཟླ་བ་དྲུག །དེ་སྟེང་མིག་དམར་གྱི་ཟླ་བ་དགུ་བསྣན་པས་ལོ་གཉིས་དང་ཟླ་བ་གསུམ། ཕུར་སྤེན་སྒྲ་གཅན་གསུམ་གྱི་ལོ་བསྡོམ་པ་སུམ་ཅུ་གོང་གི་ལོ་ལ་བསྣན་པས་ལོ་སོ་གཉིས་དང་ཟླ་བ་གསུམ། ཟླ་བའི་ཞག་བཅོ་ལྔ་དང་བཅས་པས་དེ་ལྟར་གྱུར་པ་ཡིན་ནོ། །དེ་དག་གཟའ་བརྒྱད་པོ་རྒྱུ་སྐར་གྱི་འཁོར་ཕྱེད་ལ་ལོངས་སྤྱོད་པའི་ཆ་ལས་བཏགས་པའི་ཞག་ཕྱེད་བརྩི་ཚུལ་གོང་ལྟར་བྱས་པའི་ཞག་ཕྱེད་དང་བཅས་པའི་ཉིན་ཞག་གཅིག་གི་གྲངས་སུ་ལོངས་པ་གཟའ་བརྒྱད་ཀྱིས་འཁོར་ཕྱེད་གསུམ་སྤྱད་པའི་ལོ་དེ་དག་ལས་ཀྱང་སྙིང་སྟོབས་དང་རྡུལ་
དང་མུན་པའི་དབྱེ་བས་གནས་སྐབས་གསུམ་དུ་བཞག་པ་གོང་དུ་བཤད་པ་བཞིན་ལ། ཚུལ་དེས་སྐྱེས་བུའི་ལོ་བརྒྱར་འགྱུར་ཏེ་ཇི་ལྟར་ན་གནས་སྐབས་གསུམ་གྱི་ལོ་དགུ་བཅུ་རྩ་དྲུག་དང་། ཟླ་བ་བཅུ། ཞག་བཅོ་ལྔ་པོ་དེ། དུས་ཀྱི་འཁོར་ལོས་དམན་པ་ཡིན་ནོ་ཞེས། ཞག་གཅིག་གི་སོ་ཡི་ཆ་ཡེ་རླུང་གི་ཐོབ་སྐལ་ལོ་གསུམ་དང་ཕྱོགས་གསུམ་གྱིས་ཉུང་བ་ཡིན་པས་དེ་ལ་དེ་བསྣན་ན་ལོ་བརྒྱར་འགྱུར་བ་ཤེས་པར་བྱའོ། །དེ་ཡང་འདིར་གནས་སྐབས་དང་པོ་ལ་སྲོག་སྟེ་དབུགས་ནི་སྙིང་སྟོབས་ཀྱི་ཡོན་ཏན་ལའམ་དེ་ལས་འབབ་སྟེ་རྩ་གཡོན་པ་རྐྱང་མའི་ནུས་པ་ཤས་ཆེ་བས་སོ། །དེ་བཞིན་དུ་སྲོག་རྡུལ་གྱི་ཡོན་ཏན་ལས་འབབ་པ་རྩ་གཡས་པ་རོ་མའི་ནུས་པ་ཤས་ཆེ་བ་ནི་ལོ་སོ་གཉིས་སོགས་འཁོར་ཕྱེད་བར་མ་ལ་དེ་ལྟར་དང་།དེ་ནས་ཆའམ་འཁོར་ཕྱེད་ཐ་མ་ལ་དབུ་མའི་ནུས་པ་མུན་པ་ཡི་ཡོན་ཏན་ལ་ཡང་གོང་གི་ཚད་དེ་ལྟ་བུར་ཤེས་པར་བྱའོ། །དེ་གསུམ་ཡང་རྩ་རོ་རྐྱང་དབུ་མ་གསུམ་དང་ལུས་ངག་སེམས་ཀྱི་དབྱེ་བས་འབབ་པས་སོ་ཞེས་ཤེས་པར་བྱ་སྟེ། རྩ་བ་སྲོག་གི་རླུང་ལ་བརྟེན་པའི་སེམས་ཀྱིས་ལུས་རྟེན་བཟུང་ནས་སྲོག་གི་རླུང་གིས་སྣ་ནས་ཕྱི་རོལ་དུ་རྒྱུ་བ་རིམ་པར་ཡོན་ཏན་གསུམ་གྱི་ཚུལ་དུ་འབབ་པ་ཟད་ནས་ལྷ་དང་མི་དང་ལག་འགྲོ་ཀླུའམ་དུད་འགྲོ་རྣམས་ནི་རང་རང་གི་དབུགས་ལས་བརྩིས་པའི་ལོ་བརྒྱའི་ཚད་ཀྱིས། ཡོན་ཏན་གསུམ་འབེབ་པའི་ལོ་གྲངས་དགུ་བཅུ་གོ་དྲུག་དང་ཟླ་བ་བཅུ་ཞག་བཅོ་ལྔ་རྫོགས་པ་དེ་ནས། བྱིས་པ་དང་གཞོན་ནུ་དང་ལང་ཚོ་དར་ལ་བབ་པ་དང་། རྒན་པོ་དང་། ཡོངས་སུ་སྨིན་པ་ནས་འཆི་བ་ནི་གནས་སྐབས་ལྔ་པ་སྟེ་དེ་ཉིད་དུ་འགྱུར་ཏེ་ཚད་དེ་དག་གི་སྟེང་དུ་ཡེ་རླུང་དུས་ཀྱི་འཁོར་ལོའི་ཟླ་བ་གཅིག་ཕྱེད་དང་བཅས་པ་ནི་ཕྱོགས་གསུམ་གྱི་མཚན་མོ་ཞེས་པ་ཞག་ཡིན་ལ། ཞག་དེ་དག་གིས་ཀྱང་ཞེས་ཀྱང་ཡིག་གིས་ལོ་གསུམ་བཟུང་སྟེ། མདོར་ན་ལོ་གསུམ་དང་ཕྱོགས་གསུམ་སྔར་
གྱི་ལོ་གོ་དྲུག་སོགས་ལ་བསྣན་པས་རང་རང་གི་ཚེ་ཚད་ལོ་བརྒྱ་པོ་རྫོགས་པའི་ཕྱིར་འཆི་བ་ནི་དུས་སུ་བབ་ནས་འཆི་བ་ཡིན་ནོ་ཞེས་སོ། །ལོ་བརྒྱའི་རོ་རྐྱང་དང་དབུ་མའི་དབུགས་རྒྱུ་ཚུལ་ལས་བརྩམ་སྟེ་གྲངས་ནི་ཤིན་ཏུ་ངེས་པ་ཉིད་དུ་བཤད་པ་འདི་དག་ཕྱི་རོལ་རིག་བྱེད་སོགས་ཀྱི་གཞུང་ལས་དེ་ལྟར་མ་གྲགས་ཀྱང་རྒྱུད་ཀྱི་རྒྱལ་པོ་དུས་ཀྱི་འཁོར་ལོར་རབ་ཏུ་གྲགས་པ་ཡིན་ནོ་ཀྱེ་མི་ཡི་དབང་པོ་ཟླ་བ་བཟང་པོ་ཞེས་གསུངས་པའོ། །དེ་ལྟར་འཇིག་རྟེན་ན་བྱིས་པ་ལ་སོགས་པ་སྨིན་པའི་བར་གྱི་གནས་སྐབས་ལྔའི་མཐར་འཆི་བ་ཡོད་པ་དང་དེ་ཡང་བསྐལ་པ་འདིའི་རྩོད་དུས་ཀྱི་དུས་ད་ལྟ་བའི་མི་རྣམས་ཀྱི་ཚེ་ཚད་སྐྱེས་བུ་ཚེ་ལོ་བརྒྱ་པ་དབང་པོ་བརྒྱ་པ་ཞེས་བརྗོད་ཀྱང་། ངེས་པའམ་དོན་དམ་པའི་རིགས་པས་མཐའ་གཅིག་ཏུ་ངེས་པ་མེད་དེ། སེམས་ཅན་རྣམས་རང་རང་གི་ལས་ཀྱི་དབང་གིས་སྐྱེ་བ་དང་འགག་པ་ཞེས་འཆི་བར་སངས་རྒྱས་པ་རྣམས་ཀྱིས་རྟོགས་པར་བྱ་སྟེ་ཚེའི་ཚད་ལའང་དགེ་མི་དགེའི་རྒྱུ་ལས་རིང་ཐུང་སྣ་ཚོགས་སུ་འབྱུང་ངོ་། །སྐྱེས་བུ་ཚེ་ལོ་བརྒྱ་པ་ཞེས་པ་ནི་དགོངས་པའི་སྐད་དུ་གསུངས་པ་སྟེ། ཅི་ལ་དགོངས་ན་སྐྱེས་བུ་ནི་ཕྱི་རོལ་དུ་དུས་བཞིའི་བདག་ཉིད་ཀྱི་ལོ་ས་ཡ་བཞི་དང་འབུམ་ཕྲག་གསུམ་དང་ཁྲི་གཉིས་ཀྱི་དབུགས་ཀྱི་མཚན་ཉིད་ལ་བཤད་དེ། དེ་ལྟ་བུའི་དུས་ཀྱི་སྦྱོར་བ་འབྱུང་བའམ་བྱེད་པའི་ཕྱིར་སྐྱེས་བུར་བརྗོད་དོ། །ནང་དུ་དབུགས་ཀྱི་ཚད་དེ་ཉིད་ཀྱིས་དུས་བཞིའི་བདག་ཉིད་དེ་དུས་བཞི་ཆེན་པོའི་ལོ་གྲངས་རྫོགས་པར་གང་གི་དུས་སུ་གཟའ་ཐམས་ཅད་ཀྱི་རྐང་པའི་ལོངས་སྤྱོད་རྒྱུ་བ་དབོ་ཟླའི་སྟོང་གི་མཐར་སྟོང་པ་ལ་འཇུག་པར་འགྱུར་བ་ནི་ཕྱི་དང་ནང་གི་དུས་དེ་དག་གི་ཚད་ཡོངས་སུ་རྫོགས་པ་ལ་སྐྱེས་བུ་མཆོག་གི་ལོ་ཚེ་ལོ་བརྒྱ་པ་དབང་པོ་བརྒྱ་པ་ཞེས་བརྗོད་པ་ནི་དོན་དམ་པའམ་ངེས་པའི་རིགས་པ་སྟེ་དེ་ལ་མ་ངེས་པར་རིང་ཐུང་དུ་འགྱུར་བ་མེད་པའི་ཕྱིར་རོ། །ད་ནི་དབུ་མ་ཨ་བ་དྷུ་ཏིའི་ཞག་རྣམས་ཀྱིས་དྲུག་ཅུའི་ཆའི་ཆུ་ཚོད་རྣམས་གཟའ་ལྔ་རྒྱུ་སྐར་ལམ་ལ་འཆར་བའི་རྐང་
པའི་ཆུ་ཚོད་ཀྱི་ཚོགས་སུ་གསུངས་པ། གོང་བཤད་ཡོན་ཏན་གསུམ་གྱི་ལོའི་གྲངས་སུ་མ་བཅད་པའམ་མ་བརྩིས་པ་ཡེ་རླུང་དུས་ཀྱི་འཁོར་ལོའི་འགྲོད་པ་ལོ་གསུམ་ཕྱོགས་གསུམ་གྱི་ཞག་ཆིག་སྟོང་བརྒྱ་ཉེར་ལྔ་དག་ལ། བུ་ལོན་སྟེ་སྔར་དེའི་གྲངས་སུ་མ་བརྩིས་པས་ཆད་པ་ནི་མངལ་ན་ཟླ་དགུར་གནས་པའི་དུས་སུ་དབུགས་འབྱུང་འཇུག་མི་བྱེད་པར་དབུ་མར་གནས་པའི་སྐབས་ཀྱི་དབུགས་ཡེ་ཤེས་ཆར་བྱས་ཏེ། ཆུ་ཚོད་དགུ་བསྲེ་བ་ཡིན་ལ་འདིར་མངལ་ཟླ་དགུ་མཁའ་མེས་བསྒྱུར་བས་ཉིས་བརྒྱ་བདུན་ཅུ་འབྱུང་ལ་དེ་གཉིས་ཀྱིས་བསྒྱུར་བས་ལྔ་བརྒྱ་བཞི་བཅུ་ལ་དྲུག་ཅུས་ཐོབ་པས་ཞག་དགུ། དེ་ཆུ་ཚོད་དུ་བསྒྱུར་བ་ལ་ཟླ་བའི་ཡེ་ཤེས་ཆ་རགས་པ་ཆུ་ཚོད་དྲུག་ཅུས་བགོས་ཐོབ་ཆུ་ཚོད་དགུ་དེ་བསྲེས་པའོ་ཞེས་བོད་ཀྱི་འགྲེལ་པ་རྣམས་སུ་བཤད། དོན་ལ་ཡེ་རླུང་གི་ཞག་གྲངས་གཞི་མ་རྣམས་སྐབས་འདིར་ཆུ་ཚོད་ཀྱི་གྲངས་སུ་བརྩི་བ་སྟེ་འདི་རྣམས་ཆུ་ཚོད་དུ་ཕབ་ནས་ཟླ་བའི་ཡེ་ཤེས་ཆ་རགས་པ་ཆུ་ཚོད་དྲུག་ཅུས་བགོས་པའི་གོང་གི་ཞག་གྲངས་དེ་འཆར་བ་ལ་དེ་མཚུངས་མངལ་གྱི་ཟླ་བའི་ཆུ་ཚོད་དགུ་ནི་བསྲེས་པར་གྱུར་པ་ཆིག་སྟོང་བརྒྱ་དང་སོ་བཞི་པོ་མཐའ་དག་འདི་རྣམས་བཀྲ་ཤིས་ལ་སོགས་གཟའ་ནི་ལྔ་པོ་རྣམས་ཀྱིས་མྱུར་བའི་ལས་དག་ལ་ཡང་སྐར་མ་ལ་སྤྱོད་པའི་རྐང་པའི་ཆུ་ཚོད་དེ་ཡི་གྲངས་སུ་འགྱུར་རོ། །ཇི་ལྟར་ན་ས་སྐྱེས་མིག་དམར་ལ་ནི་རྐང་པ་སྔ་ཕྱི་གཉིས་ཀྱི་ནོར་བུ་ལོན་གྱི་ཆུ་ཚོད་བསྡོམ་པས་རིག་བྱེད་དུས་མེར་རབ་ཏུ་འགྱུར་ཏེ་སུམ་བརྒྱ་དང་དྲུག་ཅུ་རྩ་བཞི་འབྱུང་བ་ནི། མིག་དམར་གྱི་རྐང་གནས་སྲིད་པའི་སྟེ་བཅུ་བཞིའི་གནས་རྣམས་དག་ལ་རྒྱུ་བའི་རྐང་པ་དང་པོ་ཉེར་བཞི་ལ་སོགས་པས་དབྱེ་བ་ཡིས། སྔ་རྐང་ལ་རིམ་པ་དང་། ཕྱི་རྐང་ལ་རིམ་མིན་དུ་རྒྱུ་བས་རྒྱུ་སྐར་འཁོར་ཕྱེད་ལོངས་སྤྱོད་པའི་ཚེ། ཕྱེད་སྔ་མ་ལ་བཀྲ་ཤིས་ཀྱི་རྐང་པ་སུམ་བརྒྱ་རེ་བཞི་པོའི་ཕྱེད་བརྒྱ་གྱ་གཉིས་དང་། ཕྱེད་ཕྱི་མ་བརྒྱ་གྱ་
གཉིས་ཏེ། དེ་ལྟར་ཕྱེད་གཉིས་པོ་ལ་མཚུངས་པར་རིམ་མིན་ལ་བུ་ལོན་དང་རིམ་པར་ནོར་གྱི་བགྲོད་པ་དག་ལ་རྐང་གནས་བཅུ་བཞི་པོ་ཉིད་ཀྱི་དབྱེ་བས་ཆུ་ཚོད་དེ་རྣམས་ངེས་པར་སྦྱར་ཏེ་རྒྱུ་སྐར་ཕྱེད་དང་བཅུ་གསུམ་ལ་སྤྱོད་པའོ། །ཉི་བར་ལ་བཀྲ་ཤིས་ཀྱིས་དལ་དག་གིས་སྦྱངས་པས་དལ་དག་ལ་ཉི་མའི་ལོངས་སྤྱོད་ཅུང་མེད་པ་ན། བཀྲ་ཤིས་ཉི་མ་ལས་འཐོན་ཏེ་ཉི་མའི་དཀྱིལ་འཁོར་ལས་ཤར་བའི་སྐར་མའི་ལོངས་སྤྱོད་ནི་གནས་དང་པོའོ། །སྐབས་འདིའི་འགྲེལ་པ་ཇོ་འགྱུར་དུ། གནས་ཀྱི་དབྱེ་བ་དེ་ལས་འཆར་བའི་གནས་གཞན་བཅུ་བཞི་རྣམས་ཏེ་ཞེས་བསྒྱུར་བ་བདེའོ། །དེ་ལ་བཀྲ་ཤིས་ཀྱི་མྱུར་རྐང་གང་ཞེ་ན། རྐང་འཛིན་དག་པས་རྒྱུ་སྐར་དང་པོ་སྤྱད་པའི་གནས་རྐང་པ་དང་པོར། རྒྱལ་དབང་གྲངས་ཀྱི་ཞེས་ཉེར་བཞིའི་ཆུ་ཚོད་དག་སྟེ།མེ་དང་མིག་ནི་རྣམ་གསུམ་དག་ཏུ་རབ་ཏུ་འགྱུར་ཞེས་པ་ཉེར་གསུམ་ནི་རྐང་གནས་གཉིས་པ་དང་གསུམ་པ་བཞི་པ་རྣམ་པ་གསུམ་ཀར་འགྱུར་རོ། །དེ་ནས་ལྔ་པ་དང་དྲུག་པའི་གནས་གཉིས་དག་ལ་གཅིག་དང་མིག་སྟེ་ཉེར་གཅིག་ལན་གཉིས་སུ་འགྱུར་རོ། །རྐང་གནས་བདུན་པ་བརྒྱད་པ་དགུ་པ་བཅུ་པ་རྣམས་ལ། བཅོ་བརྒྱད་དང་ཚེས་ཏེ་བཅོ་ལྔ་དང་དྲག་པོ་སྟེ་བཅུ་གཅིག་དང་། མེ་ཞེས་པ་གསུམ་རྣམས་རིམ་པ་བཞིན་དུ་དང་། རྩ་བར་ཞེས་པ་འོག་གི་ཕྱི་རྐང་སྟེ་ཕྱི་མར་སྟེང་ནས་མར་རིམ་བཞིན་རྐང་གནས་བཅུ་གཅིག་དང་བཅུ་གཉིས་དང་བཅུ་གསུམ་རྣམས་ལ་དྲག་པོ་དང་སུམ་ཅུ་རྩ་བརྒྱད་དང་བརྒྱད་ཅུ་དག་དང་། བརྟན་པ་སྲིད་པའི་གནས་ཞེས་པ་རྐང་གནས་བཅུ་བཞི་པ་གནས་ཐ་མ་ལ་འདིར་ནི་གསུམ་བཅས་ལྔ་བཅུའོ་ཞེས་ལྔ་བཅུ་རྩ་གསུམ་མོ། །དེ་ལྟར་རྐང་གནས་ཐ་མ་ནི་རྒྱུ་སྐར་ཕྱེད་ཀྱི་ཆ་ཡིན་ལ། རྒྱུ་སྐར་གྱི་འཁོར་ལོ་ཕྱེད་རྫོགས་པ་དེ་ཡིས་ཉི་མ་ལ་བརྟེན་ནས་མིག་དམར་རྣམ་པར་དག་པར་འགྱུར་ལ། དེ་ཡི་རྗེས་སུ་རྐང་པའི་ཆུ་ཚོད་དེ་དག་དོར་བར་བྱ་བ་བུ་ལོན་དག་དང་
བསྣན་པར་བྱ་བའི་ནོར་དུ་གྱུར་པ་ཡང་རྐང་པ་རིམ་པ་མིན་པ་དང་རིམ་པས་ལོངས་སྤྱོད་པའི་དབང་གིས་སོ། །དེ་ལྟར་བཀྲ་ཤིས་ཀྱི་རྐང་གནས་བཅུ་བཞི་པོའི་ཆུ་ཚོད་རྣམས་གཅིག་ཏུ་བསྡོམ་པས་སུམ་བརྒྱ་རེ་བཞིར་འགྱུར་བ་དེ་བཞིན་འོག་མ་བཞི་ལ་ཤེས་པར་བྱའོ། །ལྷག་པའི་མྱུར་རྐང་བཤད་པ། རིག་བྱེད་དག་དང་བུག་པ་ཟླ་བའི་གྲངས་བརྒྱ་གོ་བཞི་ནི། གཟའ་ལག་དག་གི་མྱུར་བའི་ལས་ལ་ཆུ་ཚོད་དག་ཏུ་འགྱུར་ཏེ་དེའི་རྐང་གནས་བཅུ་བཞི་ནི། རྐང་གནས་དང་པོ་གཉིས་ལ་ནི་བཅུ་དྲུག་བཅུ་དྲུག་དང་། གཞན་གསུམ་པ་ལ་ཚེས་ཞེས་བཅོ་ལྔ་དང་། བཞི་པར་མ་ནུ་སྟེ་བཅུ་བཞི་དང་། ལྔ་པར་མྱོས་བྱེད་དེ་བཅུ་གསུམ་དང་། དྲུག་པར་དྲག་པོ་དང་། བདུན་པར་རི་དང་བརྒྱད་པར་དབང་པོ་དང་། དགུ་པར་མཁའ་སྟེ་སྟོང་པ་ཡིན་ལ་དེ་དག་ནི་སྔ་རྐང་ངོ་། །རྩ་བ་དག་ལས་ཕྱི་རྐང་དང་པོ་སྟེང་ནས་མར་བགྲངས་བས་བཅུ་པ་ལ་རིག་བྱེད་དང་། བཅུ་གཅིག་པ་ལ་དྲག་པོ་དང་ནི་རབ་གསལ་ངེས་པར་བཅུ་གཉིས་པ་ལ་ཉི་ཤུ་སྟེ། བཅུ་གསུམ་པ་ལ་ཉི་ཤུ་རྩ་བརྒྱད་དང་། བཅུ་བཞི་པ་ལ་སུམ་ཅུ་རྩ་བཞི་དག་ཀྱང་སྟེ། དེ་ལྟར་མ་ནུའི་གནས་ཏེ་རྐང་གནས་བཅུ་བཞི་ལ་རྒྱུ་བའི་ཆུ་ཚོད་ཀྱི་དབྱེ་བས་ཡང་དག་པར་གནས་སོ། །ཕུར་བུའི་མྱུར་རྐང་གི་ཆུ་ཚོད་གསུངས་པ། ཆུ་གཏེར་ནམ་མཁའ་དག་དང་ཟླ་བའི་གྲངས་ཏེ་ཞེས་པ་བརྒྱ་དང་བཞི་པོ་འདི་དག་རྣམས་ནི་བླ་མའི་རྐང་པའི་ཆུ་ཚོད་ཀྱི་ཚོགས་སུ་འགྱུར་རོ། །དེ་ཡང་རྐང་གནས་དང་པོ་གཉིས་དག་ལ་ཕྱོགས་ཀྱི་ཚད་དེ། དང་པོ་ལ་བཅུ། གཉིས་པར་བཅུ། གསུམ་པར་དགུ། བཞི་པར་ནོར་ཏེ་བརྒྱད། ལྔ་པར་དུས་ཏེ་དྲུག །དྲུག་པར་དྲུག བདུན་པར་ལག་པ། བརྒྱད་པར་ཟླ་བ་དག་དང་བཅས་པའི་འདིའི་སྔ་རྐང་ནི་གནས་བརྒྱད་དོ། །ཕྱི་རྐང་ངམ་རྩ་པར་ནི། དགུ་པར་མེ། བཅུ་པར་དྲུག། བཅུ་གཅིག་པར་བུག་པ་དང་ནི་བཅུ་གཉིས་པར་དྲག་པོ་དང་། བཅུ་གསུམ་པར་མི་བདག་དང་། བཅུ་བཞི་ཐུབ་པ་
རྣམས་ཏེ་འདིའི་ཕྱི་རྐང་ལ་གནས་དྲུག་ཡོད་ཅིང་དེ་ལྟར་གཟའ་ཕུར་བུའི་རྐང་པའི་ཆུ་ཚོད་རྒྱུ་བ་བཅུ་བཞི་པོ་ཐམས་ཅད་རིམ་པས་སོ། །གཟའ་རྣམས་མྱུར་འགྲོས་ནི་རིམ་པ་ལས་གཟའ་ཤར་བའི་ཕྱེད་སྔ་མ་ལའོ། །དལ་འགྲོས་ནི་ཕྱེད་ཕྱི་མ་ལའོ། །འཁྱོགས་པོ་ཡི་འགྲོས་ལ་ནི་རིམ་པ་མིན་པའི་ཕྱེད་སྔ་མ་ལའོ། །ཡང་ཡིག་གིས་བསྡུས་པ་འབྱུང་འགྲོས་ནི་རིམ་པ་མིན་པའི་ཕྱེད་ཕྱི་མ་ལའོ། །གཟའ་ལྔ་ཡི་ཚོགས་ནི་ངེས་པར་ཉི་མའི་དབྱེ་བ་དག་གིས་རྒྱུ་བར་བྱེད་དེ། ཉི་མའི་ལོངས་སྤྱོད་ལས་རྣམ་པར་དག་པར་འགྱུར་རོ། །པ་སངས་ཀྱི་མྱུར་རྐང་བཤད་པ། དྲུག་དང་ཟླ་བ་ཆུ་གཏེར་གྲངས་ཀྱི་ཆུ་ཚོད་བཞི་བརྒྱ་བཅུ་དྲུག་དག་ནི། པ་སངས་ཀྱི་ཡང་མྱུར་བའི་ལས་ལ་རྐང་པར་འགྱུར་ཏེ། གནས་དང་པོ་གསུམ་པོ་དག་ལ་ཉི་ཤུ་ལྔ་སྟེ་ཞེས་གནས་དང་པོ་ལ་ཉེར་ལྔ། གཉིས་པར་ཉེར་ལྔ། གསུམ་པར་ཉེར་ལྔའོ། །དེ་རྗེས་ཀྱི་གནས་གཉིས་ནི་རྒྱལ་བ་ཞེས་དང་དེ་བཞིན་ལག་མིག་རྣམ་པ་གཉིས་ཞེས་པས། བཞི་པར་ཉེར་བཞི། ལྔ་པར་ཉེར་བཞི། དྲུག་པར་ཉེར་གཉིས། བདུན་པར་ཉེར་གཉིས། བརྒྱད་པར་སྐྱོན་ཏེ་བཅོ་བརྒྱད་དང་། དགུ་པར་ཚེས་དང་། བཅུ་པར་བརྒྱད་དེ་སྔ་རྐང་གི་གནས་བཅུའོ། །ཕྱི་རྐང་ངམ་རྩ་བར་ནི། བཅུ་གཅིག་པར་དྲུག་དང་། བཅུ་གཉིས་པར་ནམ་མཁའ་ཡོན་ཏན་ཏེ་སུམ་ཅུ་ཐམ་པ་དག་དང་། བཅུ་གསུམ་པར་གཅིག་གིས་དམན་པའི་བརྒྱ་སྟེ་དགུ་བཅུ་གོ་དགུའོ། །རྐང་པའི་མཐར་གནས་པ་བཅུ་བཞི་པ་ལ་ནི་མེ་དང་རི་ཡི་གྲངས་ཏེ་བདུན་ཅུ་རྩ་གསུམ་མོ། །དེ་ལྟར་བརྟན་པ་སྲིད་པའི་གནས་ཞེས་པ་བཅུ་བཞི་ལ་པ་སངས་ཀྱི་ཆུ་ཚོད་རྒྱུ་བ་རིམ་པས་སོ། །འདིར་བརྟན་པ་སྲིད་པ་ཡི་གནས་ཞེས་པའི་སྲིད་པ་བཅུ་བཞི་ནི། ལྷ་བརྒྱད། མི་དང་དགུ། དུད་འགྲོ་སྐྱེ་གནས་བཞི་དང་བཅུ་གསུམ། དམྱལ་བ་དང་བཅུ་བཞི་ལ་སྲིད་པ་བཅུ་བཞིར་ནང་ལེར་བཤད་པ་ལྟར་སྲིད་
པ་ནི་གྲངས་བཅུ་བཞི་པའི་མངོན་བརྗོད་དུ་གྱུར་པ་ཡིན་ནོ། །སྤེན་པའི་མྱུར་རྐང་གསུངས་པ། ཉི་མའི་བུ་ལ་དྲུག་དང་འབྱུང་བའི་གྲངས་ཀྱི་ཆུ་ཚོད་ཚོགས་པ་ལྔ་བཅུ་རླུང་དྲུག་པོ་འདི་དག་ཏུ་འགྱུར་རོ་ཀྱེ་མི་ཡི་དབང་པོ་ཞེས་སོ། །རྐང་གནས་བཅུ་བཞི་ནི། གནས་དང་པོ་ནས་མར་རིམ་པས་དྲུག་དང་། འབྱུང་བ་དག་དང་འབྱུང་བ་དང་རིག་བྱེད་དང་། ཆུ་གཏེར་དང་མིག་དང་ཟུང་དང་སྟོང་པ་སྟེ་སྔ་རྐང་བརྒྱད་དོ། །རྩ་བར་ནི། ཕྱོགས་ཞེས་པ་སྐབས་འདིར་དཀར་ནག་གི་ཕྱོགས་ལ་གོ་བའི་དབང་དུ་བྱས་ཏེ་གཉིས་དང་འགྱུར་ཁ་ཅིག་ལས་ཟུང་ཞེས་སོ། །རིག་བྱེད་དག་དང་འབྱུང་བ་དང་རོ་དང་ནོར་དང་རྩེ་མོ་ཅན་ཏེ་དྲུག་ནི་རིམ་པས་བཞག་པར་བྱའོ། །དེ་ལྟར་གཟའ་རྣམས་ཀྱི་ནི་རྐང་པའི་ཆུ་ཚོད་ཀྱི་རྒྱུ་བ་མཐའ་དག་དུས་ཀྱི་འཁོར་ལོ་སྟེ་དབུ་མའི་ལོ་བརྒྱའི་ཡེ་རླུང་གི་ཆ་དག་ལས་ཤིན་ཏུ་ངེས་པར་འགྱུར་ཏེ། གཟའ་ལྔ་པོའི་རྐང་གནས་བཅུ་བཞི་པོའི་ཆུ་ཚོད་ཐམས་ཅད་བསྡོམས་པས་ཡེ་རླུང་རྒྱུ་བ་དུས་ཀྱི་འཁོར་ལོ་ཞེས་བརྗོད་པའི་ལོ་གསུམ་ཕྱོགས་གསུམ་པོའི་ཞག་ལ་དགུ་བསྲེས་པའི་ཆུ་ཚོད་ཀྱི་གྲངས་སྟོང་དང་བརྒྱ་སོ་བཞི་པོ་དེ་འབྱུང་བ་ཡིན་ནོ། །དེ་ནས་གཟའ་རྣམས་ཀྱི་རང་རང་སྐྱེས་པའི་ཁྱིམ་ནས་བརྩམ་སྟེ་ཁྱིམ་རེ་ལ་རྐང་བ་རེས་སྤྱོད་པའི་དལ་བའི་རྐང་པ་གསུངས་པ། ཡེ་རླུང་རྒྱུ་བའི་ལོ་གསུམ་གྱི་ཟླ་བ་སུམ་ཅུ་རྩ་དྲུག་དང་དེའི་སྟེང་དུ་ཕྱོགས་གསུམ་ལས་ཕྱོགས་གཉིས་སྒྲ་གཅན་དང་དུ་བའི་སྐལ་བར་བཞག་པའི་ལྷག་མ་ཕྱོགས་གཅིག་བསྣན་པས། སུམ་ཅུ་རྩ་དྲུག་ཕྱེད་དང་བཅས་པའི་ཟླ་བ་འདི་དག གཟའ་ལྔ་པོ་ཟླ་ཉི་གཉིས་གའི་ལོངས་སྤྱོད་ལ་སྤྱད་པས་ན་ཟླ་བའི་རྐང་པའི་ཡོན་ཏན་སྒྲ་རེག་གཟུགས་རོ་དྲི་ལྔ་དང་། ཉི་མའི་རྐང་པའི་ཡོན་ཏན་སྙིང་སྟོབས་དང་རྡུལ་དང་མུན་པ་གསུམ་གཅིག་ཏུ་བསྲེས་པ་ངེས་པར་ནོར་གྱིས་ཞེས་པ་ཡོན་ཏན་བརྒྱད་པོ་འདི་དག་
གིས་བསྐྱུར་བ་དག་ནི་བཀྲ་ཤིས་ལ་སོགས་པ་གཟའ་ལྔ་པོ་རྣམས་དག་གི་དལ་བའི་ལས་སམ་བྱ་བ་ལ་རྐང་པར་འགྱུར་ཏེ། ཟླ་བ་སོ་དྲུག་པོ་དེ་བརྒྱད་ཀྱིས་བསྒྱུར་བས་ཉིས་བརྒྱ་དང་གྱ་བརྒྱད། ཟླ་བ་ཕྱེད་པོ་བརྒྱད་ཀྱིས་བསྒྱུར་བས་ཞག་བརྒྱ་ཉི་ཤུ་ལ་སུམ་བཅུས་བགོས་པས་བཞི་ཐོབ་པ། སྔ་མར་བསྲེས་པས་མིག་བུག་མིག་གི་གྲངས་ཞེས་ཉིས་བརྒྱ་དགུ་བཅུ་རྩ་གཉིས་ཀྱི་གྲངས་ནི་ཁྱིམ་གྱི་རྐང་པ་སྔ་ཕྱི་རྣམས་ཀྱི་ཆུ་ཚོད་དོ། །དལ་བའི་རྐང་གནས་དྲུག་ནི། དེ་ཉིད་ཉེར་ལྔ་དང་། བཅོ་བརྒྱད་དང་རི་བདུན་རྣམས་ནི། བརྟན་པ་ས་ཡི་བུ་ཡི་དལ་རྐང་ཕྱི་མ་དང་ནི་སྔ་མའི་ཆ་ལ་སྟེ་ཞེས་པ་རྐང་གནས་དང་པོར་ཉེར་ལྔ། གཉིས་པར་བཅོ་བརྒྱད། གསུམ་པར་བདུན་ཏེ་གསུམ་ནི་སྔ་རྐང་དང་། ཕྱི་རྐང་ལ་གོ་རིམ་བཟློག་སྟེ། བདུན་དང་བཅོ་བརྒྱད་དང་ཉེར་ལྔ་འགོད་པ་འདི་བཞིན་དལ་རྐང་གི་སྐབས་སུ་སྔ་རྐང་གསུམ་དང་ཕྱི་རྐང་གསུམ་རེར་འགྱུར་པ་འོག་མ་ཀུན་ལ་འདྲ་བར་ཤེས་པར་བྱའོ། །མིག་དམར་གྱི་མིང་དུ་བརྟན་པ་ས་ཡི་བུ་ཞེས་བརྗོད་པ་ནི། གཞུ་ཁྱིམ་ས་ཡི་ཁམས་ཡིན་ཅིང་དེ་ལས་སྐྱེས་པའི་ཕྱིར་ན་ས་ཡི་བུ་དང་ས་སྐྱེས་སུ་བརྗོད་ཅེས་སྔ་འགྲེལ་རྣམས་སུ་བཤད་ན་ཡང་ས་ལྷའི་བུ་ཡིན་པས་དེ་ལྟར་བཞེད་པའང་ཡོད་དོ། །དེ་བཞིན་དུ་ཕྱོགས་བཅུ་དང་རི་དང་མེ་ནི་གཟའ་ལག་གིའོ། །དབང་ཕྱུག་སྟེ་བཅུ་གཅིག་དང་། དགུ་དང་མེ་ནི་བླ་མའི་སྔ་ཆ་དག་དང་གཞན་གྱི་སྟེ། ཕྱི་ཆ་ལ་ཡང་ངོ་། །དཀར་པོའི་མདའ་དང་ཆུ་གཏེར་ཟླ་བའོ། །སྤེན་པ་ཡི་ཡང་མིག་བཅས་མིག་ཉེར་གཉིས་དང་། ཉིན་ཞག་བཅོ་ལྔ་དང་། དུས་སུ་འགྱུར་ཞེས་པ་དྲུག་གོ། དེ་ལྟར་བཀྲ་ཤིས་ཀྱི་དལ་རྐང་གནས་དྲུག་པོ་གཅིག་ཏུ་བསྡོམས་པས་བརྒྱ། ལྷག་པའི་བཞི་བཅུ། ཕུར་བུའི་ཞེ་དྲུག །པ་སངས་ཀྱི་ཉི་ཤུ། སྤེན་པའི་གྱ་དྲུག་རྣམས་བསྡོམ་པས་མིག་བུག་མིག་གི་གྲངས་ཀྱི་ཆུ་ཚོད་དུ་འགྱུར་བ་ཡིན་ནོ། །དེ་ལྟར་ཡེ་ང་དུས་ཀྱི་འཁོར་ལོའི་ལོ་
གསུམ་གྱི་ཟླ་བ་ལ་སོགས་པ་བརྒྱད་ཀྱིས་བསྒྱུར་པ་དེ་ཞག་གི་ངོ་བོར་གནས་སུ་ཟིན་ཀྱང་དེ་ཆུ་ཚོད་དུ་བྱས་པ་ནི་ཞག་དེ་ལ་ཆུ་ཚོད་ཀྱི་འཁོར་ལོ་དྲུག་ཅུས་བགོས་པས་ཞག་བཞི་དང་ཆུ་ཚོད་ང་གཉིས་འོང་བ་དེ་ཡིན་ཏེ། ཞག་བཞི་ཆུ་ཚོད་དྲུག་ཅུས་བསྒྱུར་ནས་ང་གཉིས་བཅུག་ཀྱང་གོང་གི་ཞག་གྲངས་འཆར་རོ། །ད་ནི་མིག་དམར་སོགས་གཟའ་ལྔ་པོ་དག་གིས་ཁྱིམ་གསུམ་ལོངས་སྤྱོད་པ་ལ་ཡེ་རླུང་གི་ལོ་གསུམ་གྱི་ཉིན་ཞག་དང་མཚུངས་པའི་ཆུ་ཚོད་ལོངས་སྤྱོད་པར་གསུངས་པ།འདི་ལྟར་ཁྱིམ་གྱི་ཟླ་བ་གཅིག་ལ་ནི་ས་སྐྱེས་མིག་དམར་གྱི་ལོངས་སྤྱོད་ཆུ་ཚོད་དགུ་བཅུ་དག་སྟེ་ཞེས་པ་ཉིན་ཞག་ཕྱེད་གཉིས་ཀྱི་ཡུན་ནོ། །འདི་ནི་མིག་དམར་གྱིས་ཟླ་བ་བཅོ་བརྒྱད་ལ་རྒྱུ་སྐར་འཁོར་བར་འཇིག་རྟེན་ན་གྲགས་པ་དང་སྒོ་བསྟུན་པ་སྟེ། རྒྱུ་སྐར་ཆུ་ཚོད་སྟོང་དྲུག་བརྒྱ་ཉི་ཤུ་ལ་ཟླ་བའི་གྲངས་བཅོ་བརྒྱད་ཀྱིས་བགོས་པས་དགུ་བཅུ་ཐོབ་པ་དེ་ཡི་དབང་དུ་བྱས་པའོ། །ཞིབ་པར་དངོས་གནས་གྲུབ་མཐའི་རྩིས་དང་བསྟུན་ན་ཁྱིམ་ཟླ་གཅིག་ལ་དཀྱིལ་འཁོར་གྱི་སུམ་ཅུའི་ཆ་ཟླ་བ་ཉེར་གཉིས་ཀྱིས་ཐོབ་པ་ཆུ་ཚོད་དོན་གསུམ་ཆུ་སྲང་སོ་བརྒྱད་སོགས་འབྱུང་སྟེ། ཁྱིམ་ཟླ་རེ་ཉིན་ཞག་ཕྱེད་བཅས་སུམ་ཅུས་རྫོགས་སོ། །དེས་ན་གྲུབ་མཐའི་རྩིས་ལ་རང་རང་གི་དཀྱིལ་འཁོར་གྱི་ཆས་རྒྱུ་སྐར་ཆུ་ཚོད་རྣམ་པར་འབྱེད་པའི་སྒོ་ནས་ཞག་གསུམ་གྱི་རྟག་པའི་ལོངས་སྤྱོད་ཀྱི་དབྱེ་བ་ཤེས་པར་བྱ་ཞིང་དེ་ལས་ཁྱིམ་ཟླ་རེའི་ལོངས་སྤྱོད་ཚུལ་ཀྱང་ཤེས་པར་བྱའོ། །མིག་དམར་གྱི་ཇི་ལྟ་བ་བཞིན་དུ་ཕུར་བུ་དང་སྤེན་པའི་ཡང་དགུ་བཅུ་སྟེ་དྲག་གསུམ་མཚུངས་པར་ཉི་མ་ལ་སྦྱང་དགོས་པ་ཡིན་པས་སོ། །ལྔ་དང་འཇིག་རྟེན་ཟླ་བའི་གྲངས་བརྒྱ་སོ་ལྔ་ནི་པ་སངས་ཀྱི་སྟེ། འགྱུར་ལ་ལར་སངས་རྒྱས་ཀྱི་སྟེ་ཟེར་ཡང་བྷྲ་དྷ་ལྷག་པའི་མིང་ཡིན་པས་རྒྱ་དཔེའི་སྐྱོན་ཡིན་ནམ་སྙམ་མོ། །དེ་བཞིན་གཟའ་ལྷག་གི་ཡང་བརྒྱ་སོ་ལྔའོ། །འདི་པ་སངས་ཀྱི་ཁྱིམ་ཟླ་གཅིག་གི་ལོངས་སྤྱོད་དུ་མི་
རིགས་ཏེ། པ་སངས་མྱུར་རྐང་གི་ལོངས་སྤྱོད་ནི་རྒྱུ་སྐར་ཆུ་ཚོད་བཅུས་བསྒྱུར་བ་ལ་རི་རྒྱལ་མིག་གིས་བགོས་པས་ཆུ་ཚོད་བདུན་ཆུ་སྲང་བཅུ་གཉིས་དབུགས་གསུམ་རྣམས་གོང་གི་ཞག་དེས་བསྒྱུར་བས་ཆུ་ཚོད་ཉིས་བརྒྱ་སོ་གཉིས་འབྱུང་བས་སོ་ཞེ་ན། དེ་པ་སངས་ཀྱི་རྐང་པའི་ལོངས་སྤྱོད་ཀྱི་དཀྱིལ་འཁོར་ཡིན་གྱི་གྲུབ་མཐའི་དཀྱིལ་འཁོར་གྱི་ལོངས་སྤྱོད་མ་ཡིན་ཞིང་། གྲུབ་མཐའི་དབང་དུ་བྱས་པའི་ལོངས་སྤྱོད་ཉི་མ་དང་མཉམ་ལ་གྲུབ་པའི་མཐའ་ཚད་མ་ཡིན་པའི་ཕྱིར་རོ། །གྲུབ་མཐའི་ལོངས་སྤྱོད་ལ་དེ་ལྟར་ཡིན་པའི་རྒྱུ་མཚན་གང་གི་ཕྱིར་ཞེ་ན། ཉི་མའི་ལོངས་སྤྱོད་ཀྱིས་པ་སངས་ལ་རྣམ་པར་སྦྱངས་པས་པ་སངས་སུ་འགྱུར་བ་སྟེ་པ་སངས་ཀྱི་མྱུར་དག་ཏུ་འགྱུར་བ་དེས་ན་པ་སངས་ཀྱི་ཟླ་བའི་ལོངས་སྤྱོད་ཀྱི་ཆུ་ཚོད་ཀྱི་ཚོགས་ནི་ཉི་མ་དང་མཚུངས་པར་བརྒྱ་སོ་ལྔ་སྟེ་གཟའ་ལྷག་གི་ཡང་དེ་བཞིན་ནོ། །དེ་ལྟར་དྲག་གསུམ་གྱི་ལོངས་སྤྱོད་གཅིག་ཏུ་བསྡོམས་པ་དགུ་བཅུ་དང་། ཞི་གཉིས་ཀྱི་མདའ་ཡོན་ཟླ་བ་གཉིས་ཚན་བཅས་གཅིག་ཏུ་བསྡུས་པ་ཆུ་ཚོད་མཁའ་རོ་བསྲེག་ཟ་སྟེ་སུམ་བརྒྱ་དྲུག་ཅུ་དག་ཏུ་འགྱུར་རོ། །སུམ་བརྒྱ་དྲུག་ཅུ་འདི་དག་གཟའ་ལྔ་ཀའི་ཁྱིམ་ཟླ་གཅིག་གི་ལོངས་སྤྱོད་དེ་འདི་ཉིད་ཟླ་བ་གསུམ་གྱི་གྲངས་ཀྱིས་བསྒྱུར་བས་སྟོང་དང་བརྒྱད་ཅུ་ནི། ལོ་བརྒྱ་ཡི་ཉིན་ཞག་གི་གཡས་གཡོན་གྱི་རྒྱུ་བ་ལས་དབུ་མའི་ཐོབ་སྐལ་དུ་སོང་བས་ལས་རླུང་གི་གྲངས་ལས་དེ་ཆད་པའམ་བུ་ལོན་དུ་གྱུར་པ་ཡེ་རླུང་ལོ་གསུམ་དང་ཕྱོགས་གསུམ་ལས་ལོ་གསུམ་པོའི་ཞག་སྟོང་བརྒྱད་ཅུ་དང་གྲངས་མཉམ་པའི་ཆུ་ཚོད་ཡིན་པས། རིགས་ལྡན་འཇམ་དཔལ་གྲགས་པས་དངོས་སུ་དྲག་གཟའ་གསུམ་གྱི་ལོངས་སྤྱོད་ཆུ་ཚོད་དགུ་བཅུ་རེ་སོ་སོར་བཤད་པ་ལྟ་བུར་སྣང་ཡང་། ཟུར་གྱིས་དོན་ལ་གནས་པ་གྲུབ་པའི་མཐའི་ལོངས་སྤྱོད་གསུངས་པ་ཡིན་ཏེ། ཆུ་ཚོད་དགུ་བཅུ་པོ་འདི་ནི་དོན་དུ་དྲག་གཟའ་གསུམ་གྱི་ཟླ་བ་གཅིག་ལ་ལོངས་སྤྱོད་པ་བསྡོམས་པ་ལ་གོ་བར་
མཛད་པ་ཡིན་པའོ། །ཟླ་བར་ཞེས་པ་ཁྱིམ་ཟླ་གཅིག་ལ་བླ་མའི་རྟག་པའི་ལོངས་སྤྱོད་དུ་འགྱུར། རབ་ཏུ་གསལ་བར་ཆུ་ཚོད་དྲག་པོའི་གྲངས་ནི་རྐང་པ་དང་བཅས་པ་ཞེས་ཏེ་དབྱུག་བཅུ་གཅིག་དང་ཆུ་སྲང་བཅོ་ལྔའོ། །དེ་ཡང་ཉིན་ཞག་གཅིག་ལ་ཕུར་བུའི་རྟག་ལོངས་ཆུ་སྲང་ཉེར་གཉིས་དབུགས་གཉིས། དབུགས་ཀྱི་འདོད་ཆ་བརྒྱད། དེའི་བདུན་བརྒྱ་ཉེར་གཉིས་ཆ་བརྒྱ་ཡོད་ཀྱང་། རགས་རྩིས་སུ་བྱས་ནས་ཆུ་སྲང་ཉེར་གཉིས་དང་དབུགས་གསུམ་དུ་བཅུག་པ་དེ་ཟླ་བ་གཅིག་གི་གྲངས་སུམ་ཅུས་བསྒྱུར་ནས་དབུགས་སོགས་རང་འཁོར་དྲིལ་བས་ཆུ་ཚོད་བཅུ་གཅིག་དང་ཆུ་སྲང་བཅོ་ལྔ་འབྱུང་ངོ་། །ཚིགས་བཅད་འདིས་མིག་དམར་གྱི་ཟླ་བ་བཅོ་བརྒྱད་ཀྱིས་རྒྱུ་སྐར་འཁོར་བ་སོགས་སུ་བཤད་པའི་འཇིག་རྟེན་གྱི་གྲགས་པ་དོན་དུ་མི་གནས་པར་བསྟན་པའི་སྒོ་ནས་ཉམས་པར་བྱ་བའི་ཕྱིར་གྲུབ་པའི་མཐའ་ལ་བརྟེན་པ་ཚིག་ཟུར་གྱིས་གསུངས་པའོ། །ཆུ་སྲང་སུམ་ཅུ་རྣམས་དང་གསལ་བར་དུས་ཀྱི་ཆུ་ཚོད་དག་ནི་ཉི་མའི་བུ་ཡི་ལོངས་སྤྱོད་དོ། །ཞེས་ཆུ་ཚོད་བཞི་དང་ཆུ་སྲང་སུམ་ཅུ་ཐམ་པའོ། །སྤེན་པའི་རྟག་ལོངས་ལ་ཆུ་སྲང་ལྷག་བཅས་ཡོད་ཀྱང་ཆུ་སྲང་དགུར་བསྡུས་ཏེ་གོང་བཞིན་བརྩིས་པས་ཟླ་གཅིག་ལ་དེ་འབྱུང་ངོ་། །ཕུར་སྤེན་དེ་གཉིས་ཀྱི་ཆུ་ཚོད་གཅིག་ཏུ་བསྡོམ་པར་གྱུར་པ་ཉིན་ཞག་ཅེས་བྱ་བ་ནི་བཅོ་ལྔའི་བརྡ་ཆད་ཡིན་པས་ཆུ་ཚོད་བཅོ་ལྔ་ཡིན་ལ། དེ་གསུས་གྱིས་བསྒྱུར་བའི་བཞི་བཅུ་ཞེ་ལྔ་པོ་དེ་ཡང་གྲུབ་པའི་མཐའ་ཡི་དབང་ལས་མིག་དམར་གྱི་ལོངས་སྤྱོད་ལ་ཁ་སྣོན་དུ་སྦྱིན་དགོས་ལ། འཇིག་རྟེན་གྲགས་པའི་དབང་ལས་ནི་ཟླ་བ་ཕྱེད་དང་བཅས་པའི་མཚན་མོར་བཅས་ཞེས་པ་ཕྱོགས་ཞེ་ལྔ་དང་སྦྱར་བ་ཡིན་ལ། གྲུབ་པའི་མཐའི་དབང་དུ་ན་དེ་དུ་བའི་ལོངས་སྤྱོད་ཡིན་པས་ཕུར་བུ་དང་སྤེན་པ་འདི་དག་དང་མི་སྦྱར་རོ། །འདིར་འགྱུར་གཞན་ལས། ཟླ་བ་
ཕྱེད་བཅས་མཚན་མོར་བཅས། །ཞེས་པ་དེ་ལ་ཕྱེད་བཅས་ཟླ་བའི་ཉིན་ཞག་ལས། །ཞེས་བསྒྱུར་བ་ལེགས་སོ། །གཙོ་བོའི་ལོངས་སྤྱོད་ནི་གཙོ་བོའི་དུས་ཀྱི་འཁོར་ལོའི་ལོ་གསུམ་ཕྱོགས་གསུམ་གྱི་ཞག་གྲངས་བརྒྱ་ཉེར་ལྔ་ལ་ནི་གཟའ་ལྔ་སྒྲ་གཅན་དང་དྲུག་གི་ཡང་ལོངས་སྤྱོད་དོ། །འདིར་ལོ་བརྒྱའི་ཉིན་ཞག་རྣམས་ཀྱི་ཉིན་རེ་བཞིན་དུ་བུ་ལོན་དུ་གྱུར་པ་དེར་སྒྲ་གཅན་གྱིས་ཀྱང་ལོངས་སྤྱོད་པས་གཟའ་ལྔ་སྒྲ་གཅན་དང་དྲུག་གི་ཡང་ལོངས་སྤྱོད་དོ། །ཚིག་རྐང་འདི། ཉིན་ཞག་རྣམས་ཀྱི་ཉིན་བཞིན་བུ་ལོན་གཙོ་བོའི་ལོངས་སྤྱོད་ལ་ནི་གཟའ་དྲུག་གི་ཡང་ལོངས་སྤྱོད་དོ། །ཞེས་སུ་བཤད་པ་བདེའོ། །ད་ནི་ཕྱོགས་གཉིས་དང་འབྲེལ་བའི་སྒྲ་གཅན་གྱི་ལོངས་སྤྱོད་ལས་ཀེ་ཏུའམ་མཇུག་རིང་གི་ལོངས་སྤྱོད་གསུངས་པ། འདིར་སྔར་གྱི་དལ་བའི་བྱ་བ་ལ་ལོ་གསུམ་དང་ཕྱོགས་གཅིག་གི་ཆ་ཟླ་བ་སོ་དྲུག་ཕྱེད་དང་བཅས་པ་བཤད་ཀྱི་ཕྱོགས་གཉིས་ལུས་པའི་ཟླ་བ་གཅིག་ལྷག་པ་གང་ཞིག་དལ་བའི་ལས་སམ་བྱ་བ་ལ་ཁྱབ་བདག་གཙོ་བོའི་དབུགས་ཀྱི་ཆ་གང་ཞིག་རྗེས་སུ་གཟའ་ལྔ་པོ་རྣམས་ཀྱིས་ནི་ལོངས་མ་སྤྱད་པ་ཟླ་བ་གཅིག་པོ་དེ། སྒྲ་གཅན་ཉི་ཟླ་གཉིས་ཀའི་ལོངས་སྤྱོད་ལ་སྤྱོད་པས། གོང་བཤད་བཞིན་ཉི་ཟླའི་ཡོན་ཏན་བརྒྱད་ཀྱིས་བསྒྱུར་ཏེ་ཉི་མའི་ཡེ་ཤེས་ཆ་རགས་པ་སུམ་ཅུས་བགོས་པས་བརྒྱད་ཐོབ་ཁྱབ་བདག་སྒྲ་གཅན་ལ་ཟེར་བའང་སྣང་མཆན། པ་དེ་ཉིད་དམ་ཡང་ན་བརྒྱད་པོ་དེ་སླར་ཆུ་ཚོད་དུ་བྱས་པ་དེ་ལས་ཟླ་བའི་ཡེ་ཤེས་ཆ་རགས་པ་དྲུག་ཅུས་བགོས་པས་ཆུ་ཚོད་བརྒྱད་ཐོབ་པ་དེ་ཉིད་གཟུང་བར་བྱ་སྟེ། བརྒྱད་པོ་དེ་ལས་རབ་ཏུ་གསལ་བར་དུ་བའི་ལོངས་སྤྱོད་ཀྱི་ཆ་ཆུ་ཚོད་ཕྱེད་དོར་བའི་ལྷག་དུས་ཕྱེད་བཅས་བདུན་གྱི་ཆུ་ཚོད་དག་ནི་སྒྲ་གཅན་གྱི་ལོངས་སྤྱོད་དེ་ཇི་ལྟར་ན་ཆུ་ཚོད་བདུན་དང་ཕྱེད་བཅས་དེ་ནི་ཉི་མའི་ཁྱིམ་གྱི་ཟླ་བ་གཅིག་པོ་འདི་ཉིད་ལ་སྤྱོད་དེ། རགས་པར་སྒྲ་གཅན་གྱིས་རྒྱུ་སྐར་འཁོར་ལོ་བཅོ་བརྒྱད་ཀྱིས་འཁོར་བའི་དབང་དུ་བྱས་ན། ལོ་བཅོ་བརྒྱད་སུམ་བརྒྱ་
དྲུག་ཅུས་བསྒྱུར་བས་ཞག་གྲངས་དྲུག་སྟོང་བཞི་བརྒྱ་བརྒྱད་ཅུ་དེས། རྒྱུ་སྐར་གྱི་ཆུ་ཚོད་སྲང་དུ་བྱས་ལ་བགོས་པས་ཆུ་སྲང་བཅོ་ལྔ་ཐོབ་སྟེ་ཁྱིམ་ཞག་རེའི་ལོངས་སྤྱོད་དོ།། དེ་སུམ་ཅུས་བསྒྱུར་བའི་ཆུ་ཚོད་ཕྱེད་བརྒྱད་འབྱུང་བ་འདི་ཉིད་ནི་འཇིག་རྟེན་གྲགས་པ་དང་མཐུན་པའོ། །སྒྲ་གཅན་གྱི་ཁྱིམ་གྱི་ཟླ་བའི་ལོངས་སྤྱོད་ནི་ཉི་མ་ཡི་ཡོན་ཏན་གསུམ་དང་བཅས་པའི་ཟླ་བའི་རྐང་པ་སྒྲ་སོགས་ཡོན་ཏན་ལྔ་སྟེ་བརྒྱད་པོ་དེ་ནི་སྒྲ་གཅན་གྱི་ཆུ་ཚོད་ཕྱེད་བདུན་དང་། ཆུ་ཚོད་ཕྱེད་ཀྱིས་རྣམ་པར་དམན་པ་ནི། ཕྱེད་མུན་པའི་ཡོན་ཏན་སྒྲ་གཅན་གྱི་ཡིན་ཡང་ཕྱེད་མུན་པ་མེད་པ་མཇུག་རིངས་ཀྱི་ལོངས་སྤྱོད་ཡིན་པའི་ཕྱིར་རོ། །དེ་ཡང་ཉི་མའི་བགྲོད་པ་དང་པོ་ཆུ་སྲིན་གྱི་འཕོ་བ་ཆ་གཉིས་སུ་བྱས་པའི་ཕྱོགས་དང་པོ་ལ་ཆུ་ཚོད་གསུམ་སྟེ་སྙིང་སྟོབས་རྡུལ་མུན་གྱི་བདག་ཉིད་ཀྱིས་ནོར་དུ་ལོངས་སྤྱོད་དོ། །དེ་བཞིན་དུ་དེ་གསུམ་ཀརྐ་ཊའི་ཕྱོགས་དང་པོ་ལ་བུ་ལོན་གྱིས་སྤྱོད་དོ། །རིལ་པོའི་གནས་སུ་ཚེས་བསྲེས་བཅུ་བཞིས་བགོས་པའི་ཆ་ལྷག་མ་ལ་ཟླ་བ་ཞེས་པ་སྔ་རྐང་དང་པོ་དང་། མྱོས་བྱེད་དེ་ཕྱི་རྐང་བཅུ་གསུམ་པའི་ཉིན་ཞག་དག་ལ་ཟླ་བའི་ཆུ་ཚོད་ལྔ་སྟེ་ཡོན་ཏན་ལྔའི་བདག་ཉིད་སྔ་རྐང་ལ་ནོར་དང་ཕྱི་རྐང་ལ་བུ་ལོན་དུ་འགྱུར་རོ། །དེ་ལྟར་ན་སྒྲ་གཅན་ཉི་ཟླ་གཉིས་ཀའི་ལོངས་སྤྱོད་ལ་སྤྱོད་པ་ཡིན་པ་དེའི་ཕྱིར་ཉི་ཟླའི་ཡོན་ཏན་བརྒྱད་ཀྱིས་བསྒྱུར་བ་ཡིན་ནོ། །གང་ཞིག་སྒྲ་གཅན་གྱིས་མ་སྤྱད་པའི་ཕྱེད་ཀྱི་ཆུ་ཚོད་དེ་ནི་དུས་ཀྱི་ཉིན་ཞག་ཞེས་བཞིས་བཅོ་ལྔ་བསྒྱུར་བ་དྲུག་ཅུའི་དུས་ལ་ཞེས་རགས་པའམ། ཡང་ན་ཞིབ་པར་ཉིན་ཞག་དུས་ཀྱི་དུས་ལ་ཞེས་དུས་སྔ་མ་བཞི་དང་ཕྱི་མ་དྲུག་སྟེ་དོན་དུ་ཉིན་ཞག་རེ་བཞི་ལ་ཞག་རེ་ཆད་པ་ནི་ཚེས་ཞག་རེ་ལ་ཆུ་ཚོད་དྲུག་ཅུ་མེད་པས་དེ་བསགས་པ་སྟེ་དེའི་ཕྱིར་ཟླ་བའི་ཆ་ཉམས་པའམ་ཆ་དེ་ཡིས་དམན་པའི་ཟླ་བ་སྟེ། དེའི་རྒྱུ་མཚན་གྱིས་སྒྲ་གཅན་གྱིས་མ་སྤྱད་པའི་ཆུ་ཚོད་ཕྱེད་ནི་ཁྱིམ་ཟླ་གཅིག་
ལ་བུ་ལོན་དུ་འགྱུར་ཏེ། དེ་ཡང་སྒྲ་གཅན་གྱི་ཁྱིམ་ཟླ་གཅིག་གི་ལོངས་སྤྱོད་བཞི་འགྱུར་གཅིག་ཟླ་བའི་ཁྱིམ་ཟླ་གཅིག་གི་ལོངས་སྤྱོད་ལ་བུ་ལོན་དུ་འགྱུར་ཞིང་། དེ་ལས་ཉིས་འགྱུར་གཅིག་ཉི་མའི་ཁྱིམ་ཟླ་གཅིག་གི་ལོངས་སྤྱོད་ལ་བུ་ལོན་དུ་འགྱུར་རོ། །དེ་ཇི་ལྟར་ན་སྒྲ་གཅན་གྱི་ཁྱིམ་ཟླའི་ལོངས་སྤྱོད། འདི་བཞིས་བསྒྱུར་བས་ཆུ་ཚོད་སུམ་ཅུ་འབྱུང་བ་དེ་ཉིད་ཟླ་བའི་ཁྱིམ་ཟླ་གཅིག་ལ་བུ་ལོན་དུ་གྱུར་པའི་མ་ཆད་པ་བསགས་པས་ཟླ་བས་རགས་པར་ཟླ་བ་གཉིས་ན་ཞག་གཅིག །ལོ་གཅིག་ལ་ཞག་དྲུག་གོ། འབྲིང་དུ་ཚེས་ཞག་རེ་བཞི་ལ་ཞག་རེའི་ཆས་དམན་པ་ཟླ་བའི་ལོངས་སྤྱོད་དེ་ཉམས་པ་སྟེ་ཞིབ་པར་ཚེས་ཞག་རེ་ལ་ཆུ་སྲང་ང་དྲུག་དབུགས་གཅིག །དབུགས་ཀྱི་སོ་གཉིས་ཆ་བཅུ་དྲུག་བུ་ལོན་དུ་འགྱུར་བས། ཚེས་ཞག་རེར་རྟག་ལོངས་འདིས་དྲུག་ཅུར་མ་ལོངས་པས་ཟླ་བའི་ཚེས་ཞག་གཅིག་གི་ལོངས་སྤྱོད་དེ་ཙམ་ཞིག་ཉིན་ཞག་རེ་རེ་ལ་ཆད་པའམ་ཉམས་པའོ། །དེའི་ཕྱིར་ཞག་རེ་བཞི་ན་ཞག་གཅིག །ལོ་གཅིག་ན་ཞག་ལྔ། ཆུ་ཚོད་སོ་བདུན། ཆུ་སྲང་སུམ་ཅུ། འདི་རྒྱུ་སྐར་ཡོངས་རྫོགས་འཁོར་བའི་དཀྱིལ་འཁོར་ལ་ནོར་དང་ཞག་རེའི་ལོངས་སྤྱོད་ལ་བུ་ལོན་༧ ༣༠༥༧༣༤༠༦དུ་འགྱུར་རོ། །ཟླ་བའི་བུ་ལོན་ཉི་མའི་ལྷག་པར་གྱུར་པ། རགས་པར་ཆུ་ཚོད་གཉིས། ཞིབ་པར་ཆུ་ཚོད་གཅིག །ཆུ་སྲང་ང་གཉིས་དབུགས་གསུམ་ཉིན་ཞག་སོ་སོར་དཀྱིལ་འཁོར་ལ་ལྷག །རྟག་ལོངས་ལ་ཆད་པར་འགྱུར་བས་ཉིན་ཞག་རེ་ལ་རགས་པར་ཆུ་ཚོད་ང་བརྒྱད། འབྲིང་དུ་ན་འགྱུར་རོ། །དེ་བསགས་པས་རགས་པར་ཟླ་བ་གཅིག་ན། འོག་ཏུ་ངེས་པར་དུས་ཀྱིས་བསྒྱུར་བ་སོགས་ཉིན་ཞག་གཅིག་ལྷག་པར་གསུངས་སོ། །དེ་ལྟར་ཟླ་བའི་བུ་ལོན་དུ་གྱུར་པའི་ཆ་དེ་ནི་ཉི་མའི་ལྷག་པར་འགྱུར་ཏེ། ངེས་པར་དུས་ཀྱིས་ཞེས་བཞིས་ཚེས་གྲངས་བསྒྱུར་བ་སྟེ། ཉི་མའི་ཟླ་བར་ཞེས་ཁྱིམ་ཟླ་གཅིག་ལ་ཉིན་ཞག་
གཅིག་ལྷག་པ་དེ་ནི་དབུ་མའི་ཡན་ལག་ཏུ་བཞག་པའོ། །འདིར་འགྱུར་མི་བདེ་འདྲ་སྟེ། དུས་ཀྱིས་བསྒྱུར་བ་ཞེས་པའི་བསྒྱུར་བྱ་མི་གོ་བའི་སྐྱོན་སྣང་བས། དེ་ནི་ཉི་མའི་ལྷག་པར་འགྱུར་ཏེ་ངེས་པར་དུས་ཀྱིས་ཉིན་ཞག་བསྒྱུར་བ་ཉི་མའི་ཟླ་བར་རོ། །ཞེས་བྱས་ན། ཟླ་བའི་བུ་ལོན་དེ་ནི་རགས་པར་ཉི་མའི་ཉིས་ལོག་ཏུ་ལྷག་པར་འགྱུར་ཏེ་ངེས་པར་དུས་བཞིས་བསྒྱུར་བའི་ཉིན་ཞག་གམ་ཚེས་གྲངས་ནི་བཅོ་ལྔའི་མིང་ཡིན་པས། བཞིས་བཅོ་ལྔ་བསྒྱུར་བ་དྲུག་ཅུ་སྟེ། ཆུ་ཚོད་དྲུག་ཅུ་ལོངས་པ་ནི་ཉིན་ཞག་གཅིག་གོ། དེ་ནམ་ལོངས་ན་ཉི་མའི་ཟླ་བ་ཞེས་ཉི་མའི་ཉིན་ཞག་གི་ཟླ་བར་ཏེ་ཟླ་བ་གཅིག་ནའོ། །ཞེས་གོ་བར་བྱའོ། །སྤྱིར་འདི་སྐབས་སུ་ཉི་མའི་ཆ་ཞེས་པ་ཉི་མའི་དབང་གིས་བཞག་པ་ཉིན་ཞག་དང་ཁྱིམ་ཞག་གཉིས་ལ་གོ་དགོས་ལ། ཟླ་བའི་ཆ་ཞེས་པ་ཟླ་བའི་འཕེལ་འགྲིབ་ཀྱི་དབང་གིས་བཞག་པ་ཚེས་ཞག་ལ་གོ་བར་བྱ་ཞིང་། དེ་ལྟར་ན་འདི་གསུམ་ཡུན་རིང་ཐུང་མི་འདྲ་བས། ཚེས་ཞག་ནི་ཆུ་ཚོད་དགུ་རྗེས་འབྲངས་དང་བཅས་པ་དང་། ཉིན་ཞག་ནི་ཆུ་ཚོད་དྲུག་ཅུ་ཐམ་པ་ཁོ་ནའི་ཡུན་ཅན། ཁྱིམ་ཞག་ཆུ་ཚོད་དྲུག་ཅུ་རྗེས་འབྲང་དང་བཅས་པ་ཅན་གྱི་ཡུན་ཚད་ཅན་ཡིན་པས། ཚེས་ཞག་གི་ཚད་དེས་ཉིན་ཞག་གི་ཆུ་ཚོད་ལ་ཕྲི་ལྷག །ཆུ་སྲང་ང་དྲུག་དབུགས་གཅིག་སོགས་ཡོད་པས་མཚོན་ནས། ཕན་ཚུན་མང་ལ་ཉུང་གིས་ཕྲི་བའི་བར་ཁྱད་དེ་བསགས་པས། ཕན་ཚུན་མང་བ་ལ་ལྟོས་ནས་ཉུང་བ་ཆད་པ་དང་ཉུང་བ་ལ་ལྟོས་ནས་མང་བ་ལྷག་པར་འགྱུར་བ་ནི། ཚེས་ཞག་རེ་བཞི་ལོངས་པ་ན་ཉིན་ཞག་རེ་གསུམ་ལས་མི་འབྱུང་བས། ཉིན་ཞག་ལ་ལྟོས་ན་ཚེས་ཞག་ལྷག་པ་དང་། ཚེས་ཞག་ལ་ལྟོས་ན་དེའི་མཚམས་སུ་ཉིན་ཞག་གི་གྲངས་གཅིག་ཆད་པ་ལྟ་བུར་འགྱུར་བས་མཚོན་ནས་ཞག་གསུམ་གྱི་བར་ཁྱད་ལས་ཆད་པ་དང་ལྷག་པ་ལྟ་
བུ་འབྱུང་བ་རྣམས་ཞག་གསུམ་རྣམ་དབྱེའི་རི་མོ་ལ་བརྟེན་ནས་ཞིབ་ཏུ་ཤེས་པར་བྱ་ཞིང་། ཚེས་ཞག་དང་ཉིན་ཞག་གི་བར་ཁྱད་དེ་ལ་ཆུ་ཚོད་གཅིག་ཅུང་མེད་ཀྱང་། རགས་རྩིས་སུ་ཆུ་ཚོད་རེར་བྱས་པ་དེ། ཉི་མའི་ཁྱིམ་ཞག་གི་དབང་དུ་བྱས་ན། ཆུ་ཚོད་གཉིས་སུ་གྱུར་ནས་ཁྱིམ་ཞག་སུམ་ཅུར་ལོངས་པ་ཟླ་བ་གཅིག་ན་ཞག་གཅིག་ལྷག་པར་འགྱུར་རོ། །ཞག་གཅིག་ལྷག་པ་དེ་ནི་ནང་གི་འཕོ་བའི་མཚམས་སུ་ཡེ་རླུང་ང་དྲུག་དང་བཞི་ཆ་རེ་རྒྱུ་བ་དེ། ཉི་ཟླའི་རྒྱུ་བར་བུ་ལོན་ནམ་ཆད་པར་གྱུར་པའི་དབང་གིས་ཕྱི་རོལ་དུ་ཞག་ལྷག་པར་དེ་ལྟར་གྱུར་པ་ཡིན་པས། ཞག་གཅིག་པོ་དེ་དབུ་མའི་ཡན་ལག་ཏུ་བཞག་པའི་དོན་ཏོ། །སྒྲ་གཅན་གྱི་ཟླ་བའི་ལོངས་སྤྱོད་མིག་གིས་རྣམ་པར་བསྒྱུར་བ་ཏེ་ཞེས་པ། སྒྲ་གཅན་གྱི་ཟླ་བ་གཅིག་གི་ལོངས་སྤྱོད་དབྱུག་བདུན་དང་ཆུ་སྲང་སུམ་ཅུ་སོ་གཉིས་ཀྱིས་བསྒྱུར་བ་ནི་ཟླ་བ་གཉིས་ཀྱི་ལོངས་སྤྱོད་བསྡོམ་པ་སྟེ་དུས་དྲུག་གི་ཆ་གཅིག་གིས་སྒྲ་གཅན་གྱི་ལོངས་སྤྱོད་ཡིན་ལ་དེ་གང་ཞེ་ན། ཆུ་ཚོད་བཅོ་ལྔ་འོང་བ་དེ། སྒྲ་གཅན་གྱི་ཕྱོགས་ཀྱི་ལོངས་སྤྱོད་དེ་སྔར་གྱི་ཟླ་བ་གཉིས་པོ་ཟླ་ཕྱེད་དུ་བྱས་པའི་གྲངས་བཞི་དག་གིས་བགོས་པ་ལས་གསུམ་ཐོབ་ཅིང་གསུམ་ལྷག་པ་དེ་ནི་རྐང་པ་གཅིག་གིས་དམན་པ་དང་བཅས་པའི་བཞི་ཐོབ་པ་དག་ནི་མཇུག་རིང་ཀྱི་ཆུ་ཚོད་ཡིན་ཏེ་ཉིན་ཞག་སོ་སོའི་དུས་སུ་ལོངས་སྤྱོད་པ་སྟེ་ཉི་མ་དང་ཐུན་མོངས་པའོ། །དེ་ཡང་ཆུ་སྲང་དབྱུག་ཏུ་བཅུག་ཕྱིར་ཆུ་ཚོད་གསུམ་པོ་བཞིས་བསྒྱུར་བས་བཅུ་གཉིས། དེ་ཆུ་ཚོད་ཀྱི་བཞི་ཆའི་ཕུང་པོ་ཡིན་པས་བཞིས་བཅོ་ལྔ་བགོས་པས་གསུམ་ཐོབ་པ་གོང་གི་བཅུ་གཉིས་ལ་བསྲེས་པས་བཅོ་ལྔ། དེ་དང་སྟོབས་མཚུངས་བྱ་ཕྱིར་སྒྲ་གཅན་གྱི་ལོངས་སྤྱོད་ཆུ་ཚོད་བཅོ་ལྔ་བཞིས་བསྒྱུར་ནས་བགོས་པས་བཞི་ཐོབ་པ་མཇུག་རིང་ཀྱི་ལོངས་སྤྱོད་དོ་ཞེས་བོད་ཀྱི་བླ་མ་དག་གསུངས། སླར་ཡང་སྒྲ་གཅན་གྱི་ཟླ་བའི་ལོངས་
སྤྱོད་ཀྱི་ཆུ་སྲང་སུམ་ཅུ་པོ་དེ་ལས། ཆུ་སྲང་བདུན་དང་ཆུ་སྲང་གཅིག་གི་ཕྱེད་དབུགས་གསུམ་ཕྲིས་པས། ཆུ་སྲང་ཉེར་གཉིས་དང་དབུགས་གསུམ་འབྱུང་ངོ་། །ཡང་ན་ཆུ་སྲང་བདུན་དང་དབུགས་གསུམ་དེ་ངེས་པར་ཡོན་ཏན་ཏེ་གསུམ་གྱིས་བསྒྱུར་པས་ཆུ་སྲང་ཉེར་གཉིས་དང་དབུགས་གསུམ་འབྱུང་བ་ཚེས་ཞག་གི་དབང་དུ་བྱས་པའི་བྱེད་པ་ལ་ལྟོས་པའོ། །དེ་ཉིད་གོང་གི་མཇུག་རིང་ཀྱི་ཆུ་ཚོད་བཞིའི་འོག་ཏུ་བཞག་ནས་ཉི་མའི་ལོངས་སྤྱོད་དག་ནི་སྦྱང་བར་བྱ་ཞེས་པ། བྱེད་པ་ལྟར་ན་ཉི་མའི་ལོངས་སྤྱོད་འདིས་དུ་བའི་ལོངས་སྤྱོད་འདི་ལ་སྦྱང་བའམ། རང་གི་ངོ་བོས་ཏེ་དོན་ཇི་བཞིན་པའི་གྲུབ་པ་ལྟར་ན་ཉིན་ཞག་གི་ཉི་མའི་ལོངས་སྤྱོད་འདིས། དུ་བའི་ལོངས་སྤྱོད་འདི་ལ་སྦྱང་བར་བྱས་པས་ཆུ་སྲང་གཉིས་དང་དབུགས་གསུམ་ལྷག་པ་འདི་མཇུག་རིང་ཀྱི་རྐང་པའི་ལོངས་སྤྱོད་ཉི་མ་ལས་ཐུན་མིན་ཉིད་དུ་གྱུར་པའོ། །དེ་ཡང་མཇུག་རིང་ནི་ཉི་མ་དག་དང་ལྷན་ཅིག་རྣམ་པར་རྒྱུ་སྟེ། མཇུག་རིང་ཉི་མ་ལས་མྱུར་བ་དང་། འཁྱོགས་འགྲོས་དག་ལ་རིམ་བཞིན་ཉི་མའི་མདུན་ནས་རང་གི་ལོངས་སྤྱོད་ཐུན་མིན་ནོར་དུ་གྱུར་ཏེ་སྤྱོད་པ་དང་། ཉི་མའི་རྒྱབ་ནས་རང་གི་ལོངས་སྤྱོད་ཐུན་མིན་བུ་ལོན་དུ་གྱུར་པའི་དབང་གིས་ཉི་མ་དང་ཐག་ཇེ་རིང་དུ་འགྱུར་བས་སོ། །མཇུག་རིང་རྒྱུ་སྐར་གྱི་ཆུ་ཚོད་ལ་རྒྱུ་བར་བྱེད་པ་ནི། ཆུ་སྲང་ཕྱེད་དབུགས་གསུམ་དང་བཅས་པའི་ཆུ་སྲང་གཉིས་སྤྱོད་དེ་ཉིན་ཞག་དང་ཉིན་ཞག་ལ་ཉི་མའི་ལོངས་སྤྱོད་དག་ལས་རིམ་པའམ་རིམ་མིན་དུ་སྟེ་ཉི་མའི་ལོངས་སྤྱོད་ལ་ནོར་དང་བུ་ལོན་དུ་གྱུར་བས་སྤྱོད་དོ། །འགྲེལ་ཆེན་ལས་རང་གི་ངོ་བོས་ནི་གང་ཞིག་ཕྱེད་དང་བཅས་པའི་ཆུ་སྲང་གསུམ་གྱིས་ཏེ་ཞེས་གསུངས་པའང་ཆུ་སྲང་གཉིས་དང་ཆུ་སྲང་གི་ཕྱེད་དབུགས་གསུམ་པོ་འདིའི་དོན་ཏོ། །མཇུག་རིང་ལ་འགྲོས་གཉིས་ལས་དལ་འབྱུང་མེད་པ་ནི་ཉི་མ་ལས་གཞན་པའི་
འདིའི་དལ་རྐང་ཁྱད་པར་བ་མེད་པས་སོ་ཞེས་བླ་མ་དག་གསུངས། མཇུག་རིང་རང་གི་ཟླ་བ་སུམ་ཅུ་རྩ་དྲུག་གིས་རྒྱུ་བའི་བར་དུ་དེ་ལྟར་རྒྱུ་བའི་ཆུ་ཚོད་དག་ཀྱང་བསགས་པ་ལས། འཇིག་རྟེན་གྱིས་ནི་ཚེས་གྲངས་བསྒྱུར་ཞེས་པ་གསུམ་གྱིས་བཅོ་ལྔ་བསྒྱུར་བས་བཞི་བཅུ་ཞེ་ལྔ་སྟེ་ཕྱོགས་གསུམ་མམ། ཕྱེད་དང་བཅས་པའི་ཟླ་བར་ལོ་གསུམ་གྱི་མཐའི་བར་དུ་ཆུ་སྲང་གིས་ལོངས་སྤྱོད་པ་བཏང་ནས་ཆུ་ཚོད་གཉིས་ནི་ཉིན་ཞག་སོ་སོར་ཉི་མ་ལས་ལྷག་པོར་འཆར་ཏེ། དེ་ཡང་དུ་མཇུག་རིང་གི་མྱུར་འགྲོས་དང་འཁྱོགས་འགྲོས་དག་ལ་རིམ་བཞིན་ཉི་མའི་མདུན་དང་རྒྱབ་ཏུའོ། །དེ་ལྟར་ཕྱོགས་གསུམ་མམ་ཕྱེད་བཅས་ཟླ་བའི་བར་དག་ཏུ་ནི་མཇུག་རིང་དེ་ཡི་སྐར། །ཆུ་སྲང་ང་དྲུག་དང་བཞི་ཆ་ལ་ཆུ་ཚོད་དུ་བྱས་པ་ཞེས་བཤད། མཆན། མ་འཆར་བ་མི་ཡི་འཇིག་རྟེན་དེ་དག་ཏུ་མཐོང་བར་འགྱུར་གྱི་དེའི་བར་དུ་ཉི་མའི་འོད་ཀྱིས་བསྒྲིབ་ནས་མི་མཐོང་ངོ་། །ཕྱོགས་གསུམ་ལ་མཐོང་ན་ཡང་ཟླ་བ་གཅིག་གི་བར་སྐར་མ་མཐོང་གི་དུ་བ་མི་སྣང་ངོ་། །དེ་ནས་མཐའི་ཕྱོགས་གཅིག་ལ་དུ་བ་དང་བཅས་པར་མཐོང་ངོ་། །དུ་བ་མཐོང་བ་དེས་ན་སེམས་ཅན་རྣམས་ལ་དུ་བ་མཇུག་རིང་ཡིན་པར་རབ་ཏུ་གསལ་ཏེ་དུ་མཇུག་ཤར་རོ་ཞེས་ཤེས་པར་འགྱུར་ལ་ཕྱོགས་གཅིག་པོ་དེ་ལ་ཕར་ཚུར་འགྲོ་འོང་གི་དབྱེ་བས་ཟླ་བ་གཅིག་ཏུ་དུ་བ་དང་བཅས་པར་མཐོང་ངོ་། །དེ་ནས་དུ་བ་མེད་པར་སྐར་མ་ཙམ་སྣང་བར་འགྱུར་རོ། །སླར་ཡང་དཔལ་དུས་ཀྱི་འཁོར་ལོར་ཏེ་ལོ་གསུམ་གྱི་ལོངས་སྤྱོད་ལ་རབ་ཏུ་འཇུག་སྟེ་དུ་བ་དེ་ནི་གང་ཚེ་ལོ་གསུམ་པོ་ཡི་ལོངས་སྤྱོད་དག་ལ་ཞུགས་པ་ཟླ་བ་སུམ་ཅུ་རྩ་དྲུག་པོ་དེའི་ཚེ་ན་མི་རྣམས་ཀྱིས་མཐོང་བར་མི་འགྱུར་ཏེ་ཉི་མ་དང་འགྲོགས་པའི་དབང་གིས་སོ། །དུ་མཇུག་དེ་ཡི་འཆར་བའི་ཆ་དག་ལན་གཅིག་ཤེས་པར་གྱུར་ན། དེ་ཡི་འཆར་བ་མཐའ་ཡས་པའི་དུས་ཀྱང་ཤེས་པར་འགྱུར་རོ། །ད་ནི་དུས་ཀྱི་འཁོར་ལོའི་ལོ་གསུམ་གྱི་ཉིན་ཞག་བརྒྱ་བརྒྱད་ཅུ་དེ་ལྔས་
བསྒྱུར་ཞིང་སླར་ཡང་ལྔས་བསྒྱུར་བ་ནི་དོན་ལ་ཉེར་ལྔས་བསྒྱུར་ནས་བགྲོད་པ་གཅིག་གི་ཉིན་ཞག་བརྒྱ་བརྒྱད་བཅུ་དམན་པ་ལ་བུག་པ་སྟེ་སྒྲ་རེག་གཟུགས་རོ་དྲི་ཆོས་ཀྱི་ཡོན་ཏན་དྲུག་དང་སྙིང་སྟོབས་སོགས་གསུམ་བསྲེས་པས་དགུའམ་མངལ་གྱི་བུ་ལོན་ཞག་དགུ་བསྲེས་པ་ལས་གཟའ་ལྔའི་དཀྱིལ་འཁོར་འབྱུང་ཚུལ་གསུངས་པ་ཡིན་ལ་དེ་ཡང་ལོ་བརྒྱ་ཡི་དབུ་མའི་དབུགས་ཀྱི་ཐོབ་སྐལ་གྱི་ལོ་གསུམ་ཕྱོགས་གསུམ་ལས་ཕྱོགས་གསུམ་བཞག་ནས་ལོ་གསུམ་པོ་ཡི་ཉིན་ཞག་བརྒྱ་དང་བརྒྱད་ཅུ་དེ་ཉིད་གཟའ་ལྔའི་ལོངས་སྤྱོད་ཡིན་པས་ལྔ་ཡིས་བསྒྱུར་ཏེ་སླར་ཡང་གཟའ་ལྔ་པོ་རེ་རེ་ལ་ཡོན་ཏན་ལྔ་རེ་ཡོད་པས་མདས་བསྣུན་པ་སྟེ་བསྒྱུར་བ་དག་ཏུ་བྱའོ། །འདིར་ཉེར་ལྔས་བསྒྱུར་བས་ཆོག་མོད། ལན་གཉིས་སུ་ལྔས་བསྒྱུར་བ་ཅི་ཞེ་ན་སྡེབ་སྦྱོར་གྱི་དོན་ནོ་ཞེས་ཀྱང་བཤད། དེ་ལྟར་བསྒྱུར་ནས་ལྷོ་བྱང་དུ་བགྲོད་པའི་ཕྱོགས་གཅིག་གི་ཉིན་ཞག་གི་གྲངས་བརྒྱ་དང་བརྒྱད་ཅུ་དག་གིས་རབ་ཏུ་དམན་པར་བྱས་པ་ནི། ལོ་གསུམ་ལ་བགྲོད་པ་དྲུག་ཡོད་པ་ལས། བགྲོད་པ་གཅིག་གཟའ་ལྔའི་ཟླ་བ་དྲུག་གི་ལོངས་སྤྱོད་ལ་འཆད་འགྱུར་ལྟར་སྐྱེས་ཁྱིམ་ལོངས་སྤྱོད་པའི་དབང་གིས་གཟའ་ལྔའི་ལོངས་སྤྱོད་ལ་བུ་ལོན་དུ་འགྱུར་བས་ན་དེ་ཕྲི་བའོ། །བུག་པ་བསྲེས་པ་ནི་མངལ་གྱི་བུ་ལོན་ཞག་དགུ་བསྲེས་པ་སྟེ། གཞན་ཡང་ཁམས་དྲུག་གི་ཡོན་ཏན་སྒྲ་སོགས་དྲུག་དང་། སྙིང་སྟོབས་སོགས་ཡོན་ཏན་གསུམ་བསྡོམས་པ་དགུ་བསྲེས་པ་ཡང་ངོ་། །དེ་ལྟར་བྱས་པའི་ཞག་གྲངས་ཉི་ཁྲི་དྲུག་སྟོང་བརྒྱད་བརྒྱ་ཉེར་དགུ་རྣམས་ནི། གཟའ་ལྔ་པོ་རང་རང་གི་ལྷོ་བྱང་དུ་བགྲོད་པའི་ཡོན་ཏན་གྱི་དབང་གིས་གཟའ་ལྔ་པོ་རྣམས་ཀྱི་ཉིན་ཞག་གི་དཀྱིལ་འཁོར་དག་ཏུ་འགྱུར་རོ། །དེ་ཡང་ས་སྐྱེས་ལ་ནི་རི་ཀླུ་དྲུག་གི་ཉིན་ཞག་ནི་དྲུག་བརྒྱ་གྱ་བདུན་གྱི་ཚོགས་སུ་འགྱུར་ཏེ། རི་བུག་རི་ཀླུ་སྟེ་བརྒྱད་སྟོང་བདུན་བརྒྱ་གོ་བདུན་ཟླ་སྐྱེས་ལྷག་
པ་ལའོ། །ལྷ་ཡི་བླ་མ་དག་ལ་སོ་མེ་རིག་བྱེད་ཅེས་བཞི་སྟོང་སུམ་བརྒྱ་སོ་གཉིས་ཉིད་དུ་འགྱུར་རོ། །པ་སངས་ལ་ནི་རི་དང་རྒྱལ་བ་མིག་སྟེ་ཉིས་སྟོང་ཉིས་བརྒྱ་ཞེ་བདུན་ནོ། །ཉི་མའི་བུ་སྤེན་པ་ལ་དྲུག་དྲུག་རི་དང་ནམ་མཁའ་གཅིག་གི་ཉིན་ཞག་སྟེ། ཆིག་ཁྲི་བདུན་བརྒྱ་རེ་དྲུག་གི་ཚོགས་ནི་དཀྱིལ་འཁོར་དུ་འགྱུར་རོ། །གཟའ་ལྔ་ཀ་བསྡོམ་པས་གོང་སྨྲོས་ཞག་ཉིས་ཁྲི་དྲུག་སྟོང་བརྒྱད་བརྒྱ་ཉེར་དགུ་པོ་དེར་འགྱུར་རོ། །གཟའ་རྣམས་ཀྱི་རྩིས་འཕྲོ་གསུངས་པ། གསལ་བའི་ཞག་ལ་ས་སྐྱེས་ལ་ནི་རི་དུས་གཅིག་སྟེ་བརྒྱ་རེ་བདུན་དག་ཀྱང་ངེས་པར་ནོར་དུ་འགྱུར་ཏེ་བསྲེ་བར་བྱའོ། །ཟླ་བའི་བུ་ལྷག་པ་ལ་དཀྱིལ་འཁོར་གྱི་ཆུ་ཚོད་ཆུ་སྲང་ཉིན་ཞག་ཏུ་བསྡུ་བའི་དོན་དུ་བརྒྱས་བསྒྱུར་བའི་ཕྱིར། དེ་དང་ཤེད་མཚུངས་པའི་དོན་དུ་ལོངས་སྤྱོད་ཀྱི་གསལ་ཞག་ཀྱང་བརྒྱས་བསྣུན་པ་ལ་མ་འོངས་པ་ན་ལྷག་འགྱུར་མེ་དང་ཉི་མ་རི་ཡིས་ཏེ་བདུན་སྟོང་བརྒྱ་དང་ཉེར་གསུམ་གྱིས་དམན་པ་སྟེ་ཕྲི་ཞིང་། པ་སངས་དག་ལ་ཉིན་ཞག་གི་དཀྱིལ་འཁོར་གྱི་ལྷག་མར་ཆུ་ཚོད་ལུས་པ་དེ་དག་ཉིན་ཞག་ཏུ་བསྡུ་བའི་ཕྱིར་བཅུས་བསྒྱུར་བས་ཞག་གནས་སུ་གྱུར་པ་དེ་བཞིན། ལོངས་སྤྱོད་དང་དེ་དང་ཤེད་སྙོམས་བྱ་ཕྱིར་གསལ་བའི་ཉིན་ཞག་རྣམས་ཀྱང་བཅུས་བསྒྱུར་བ་ལ། མ་འོངས་པ་ན་ལྷག་འགྱུར་རྩིས་འཕྲོ་ཆུ་གཏེར་བརྒྱད་དེ་བརྒྱད་ཅུ་རྩ་བཞི་ཉིད་ཀྱིས་དམན་པར་བྱའོ། །སྟོང་མཁའ་དུས་མིག་སྟེ་ཉིས་སྟོང་དྲུག་བརྒྱ་དག་དང་། མཁའ་ལག་གདེངས་ཅན་དུས་ཞེས་བཞི་སྟོང་བརྒྱད་བརྒྱ་ཉི་ཤུ་རྣམས་རིམ་བཞིན་བློན་པོ་ཕུར་བུ་དང་། ཉི་སྐྱེས་སྤེན་པ་དག་ལ་བུ་ལོན་དུ་འགྱུར་ཏེ་མ་འོངས་པ་ན་ལྷག་འགྱུར་ཡིན་པས་ཕྲི་བར་བྱའོ། །རྩིས་འཕྲོ་རྣམས་སྔར་ཡང་བསྟན་ཏོ། །འདི་རྣམས་བྱེད་པ་ལ་ལྟོས་ནས་གསུངས་ཏེ་གྲུབ་མཐའི་རྩིས་ཟུར་གྱིས་ཅི་རིགས་ཤེས་སོ། །དེ་ལྟར་གསལ་ཞག་ལ་རྩིས་འཕྲོ་ཕྲི་བསྣན་བགྱིས་ནས་སྐར་
མ་སོགས་སོ་སོའི་འཁོར་ལོས་བསྒྱུར་ཞིང་དཀྱིལ་འཁོར་གྱིས་ཐོབ་པ་ལས་གཟའ་ལྔའི་དལ་བ་བར་པ་འགྲུབ་བོ། །དེ་ནས་དལ་བ་དག་པ་བསྒྲུབ་ཕྱིར་གཟའ་སོ་སོའི་སྐྱེས་ཁྱིམ་སྦྱང་ནས་དལ་རྐང་བཟུང་སྟེ་ཕྲི་སྣོན་བྱ་དགོས་པས། སྐྱེས་ཁྱིམ་ནི་ས་སྐྱེས་ལ་ནི་སྐར་མ་ཕྱེད་བཅས་དགུ་སྟེ་སྐར་མ་དགུ་དང་ཆུ་ཚོད་སུམ་ཅུ་དལ་བ་བར་པའི་གནས་ནས་སྦྱང་བར་བྱའོ། །གཟའ་ལག་པ་ལ་ཕྱེད་ལྷག་གམ་ཕྱེད་བཅས་མི་བདག་ཞེས་པ་སྐར་མ་བཅུ་དྲུག་དང་ཆུ་ཚོད་སུམ་ཅུའོ། །རྒྱུ་སྐར་ཉི་མ་སྟེ་སྐར་གནས་སུ་བཅུ་གཉིས་ཁོ་ན་ཕྲི་བ་བླ་མ་ཕུར་བུ་ལའོ། །དེ་བཞིན་དུ་པ་སངས་ལ་སྐར་མ་དྲུག་དང་། ཉི་སྐྱེས་སྤེན་པ་ལ་སྐྱོན་ཏེ་སྐར་མ་བཅོ་བརྒྱད་བུ་ལོན་དུ་འགྱུར་ཏེ་ཕྲི་བར་བྱ་བ་ཡིན་པས། ཕྲི་བྱེད་དེ་མཐའ་དག་གཟའ་རང་རང་གི་རྟག་པའི་ལོངས་སྤྱོད་དལ་བ་བར་མའི་དབུས་ནས་སྦྱང་བར་བྱ། དེ་ལྟར་སྦྱང་བའི་ཕྱི་ནས་ཏེ་རྗེས་སུ་གཟའ་དེ་དག་རྣམས་ནི་དག་པར་འགྱུར་ཏེ་ཇི་ལྟར་ན་ཀྱེ་མི་ཡི་བདག་པོ་གཟའ་རང་རང་སྐྱེ་བའི་རྒྱུ་སྐར་གང་ཡིན་པ་དེ་ནས་བརྩམ་སྟེ་ཁྱིམ་རེ་ལ་དལ་བའི་རྐང་པ་རྒྱུ་བ་ལས་དལ་རྐང་དྲུག་པོ་བཟུང་ལ་དལ་རྩིས་བྱས་པས་དལ་བ་རྣམ་དག་ཏུ་འགྱུར་རོ། །དེ་ཙམ་གྱིས་ད་ལྟ་ཡི་ལོངས་སྤྱོད་ཤིན་ཏུ་རྣམ་དག་མ་ཡིན་པས་མྱུར་དག་བསྒྲུབ་པ་ལ། ཉི་མ་ལས་དམའ་བ་དག་ཏུ་རྒྱུ་ཞིང་ཉི་མ་ལས་བགྲོད་པ་མྱུར་བཞི་གཟའ་ལྷག་སངས་གཉིས་ནི་རང་རང་གི་ཡན་ལག་རྐང་འཛིན་གྱི་ལོངས་སྤྱོད་དག་ལ་ཉི་བར་གྱིས་སྦྱང་བ་ལས་རྣམ་པར་དག་པར་འགྱུར་ཞིང་། ཉི་མ་ལས་བུལ་བར་བགྲོད་པའི་དབང་གིས་ཉི་མ་བས་མཐོན་པོ་ཡི་གནས་ནས་རྒྱུ་བ་དམར་ཕུར་སྤེན་པ་དྲག་གཟའ་གསུམ་གྱི་རང་རང་གི་དལ་བ་དག་པས་ཉི་མའི་ལོངས་སྤྱོད་ཉི་བར་གྱི་དབུས་ནས་སྦྱང་བས་མྱུར་རྐང་གི་ལོངས་སྤྱོད་རྣམ་པར་དག་པར་གནས་སོ། །ད་ནི་གཟའ་རྣམས་ཀྱི་སྐྱེ་བའི་སྐར་མ་དག་པར་བྱ་བའི་དོན་
དུ་རྒྱུ་སྐར་གྱི་ཚོགས་གསུངས་པ་ཟླ་བ་དྲུག་གིས་ཞེས་པ་བསྒྱུར་བྱེད་ཀྱི་གྲངས་ཏེ་དྲུག་གོ། ཟླ་བའི་ལོངས་སྤྱོད་ཞེས་པ་བསྒྱུར་བྱ་སྟེ་གང་ཞེ་ན་སྔར་བཤད་ལྟར་གཟའ་ལྔའི་ཟླ་བ་རེ་རེའི་མིག་དམར་གྱི་ཆུ་ཚོད་དགུ་བཅུ་ལྷག་སངས་གཉིས་ཀྱི་བརྒྱ་སོ་ལྔ་པ་རེ་རེ། ཕུར་བུའི་བཅུ་གཅིག་སྤེན་པའི་བཞི་རྣམས་བསྡོམས་པས་སུམ་བརྒྱ་བདུན་ཅུ་དོན་ལྔའོ། །དེ་དྲུག་གིས་བསྒྱུར་བ་ཉིས་སྟོང་ཉིས་བརྒྱ་ལྔ་བཅུ་དེ་ལས་ཀྱང་ཡེ་ང་དུས་ཀྱི་འཁོར་ལོའི་ལོ་གསུམ་པོ་ཡི་ཟླ་བ་སུམ་ཅུ་རྩ་དྲུག་དེ་ཡིས། བགོས་པས་ཆ་ལས་ཐོབ་པ་དྲུག་ཅུ་རེ་གཉིས་དག་ཀྱང་གཟའ་ལྔའི་སྐྱེས་ཁྱིམ་གྱི་སྐར་མ་རྣམས་བསྡོམ་པ་དང་གྲངས་མཉམ་ཞིང་དེ་དག་ལོངས་སྤྱོད་ལ་བུ་ལོན་དུ་འགྱུར་བའམ་སྦྱང་བར་བྱ་བ་ཡིན་ནོ། །དེ་ཡང་གཟའ་ལྔའི་སྐྱེས་སྐར་གྱི་གྲངས་བསྡོམས་པས་རེ་གཅིག་ལ་དམར་ལྷག་གཉིས་ཀྱི་ཆུ་ཚོད་སུམ་ཅུ་གཉིས་པོ་བསྡོམས་པས་སྐར་མ་གཅིག་བསྣན་པས་རེ་གཉིས་སུ་ངེས་པའོ། །རེ་གཉིས་ཐོབ་པའི་ལྷག་མ་བཅོ་བརྒྱད་ལུས་པ་དེ་ཆུ་སྲང་དྲུག་ཅུས་བསྒྱུར་ཏེ་ཟླ་གྲངས་སོ་དྲུག་གིས་བགོས་པས་ཆུ་སྲང་སུམ་ཅུ་ཐོབ་སྟེ། དེ་ནི་ཉི་མ་དང་རི་བོང་ཅན་གྱི་རྐང་པའི་ལོངས་སྤྱོད་ཉི་རྐང་གི་གསུམ་དང་ཟླ་རྐང་གི་ལྔ་སྟེ་བརྒྱད་སྒྲ་གཅན་གྱིས་སྤྱོད་པ་དེ་ལས། མུན་པའི་ཡོན་ཏན་མེད་པ་ཕྱེད་གཅིག་སྒྲ་གཅན་གྱིས་རྗེས་སུ་མ་སྤྱད་པ་ཆུ་ཚོད་ཕྱེད་ཆུ་སྲང་སུམ་ཅུ་ནི། སླར་ཡང་མཇུག་རིང་ཀྱི་ནི་ལོངས་སྤྱོད་དོ། །སླར་ཡང་མཇུག་རིང་ཀྱི་ནི་ལོངས་སྤྱོད་གང་ཞིག་ཉི་མས་ལྷག་པ་ཉིད་དུ་ཉིན་ཞག་རེ་རེ་བཞིན་དུའམ་སོ་སོའི་དུས་སུ་འབྱུང་བ་སྲང་གཉིས་དང་དབུགས་གསུམ་པོ་དེ་ཟླ་བའི་ཆ་ཕྱོགས་གསུམ་གྱི་ཉིན་ཞག་ཞེ་ལྔའི་གྲངས་ཅན་གྱིས་བསྒྱུར་བ་དྲུག་ཅུའི་ཆ་ཡིས་ཐོབ་པ་ཆུ་ཚོད་གཅིག་དང་ཆུ་སྲང་ང་གཉིས་དབུགས་གསུམ་འབྱུང་བ་ནི། ཕྱོགས་གསུམ་གྱི་ཉིན་ཞག་སོ་སོའི་དུས་སུ་མྱུར་བར་རྒྱུ་བ་ལ་ཉི་མའི་མདུན་དུ་ནོར་དང་། འཁྱོགས་པོར་འཆར་བ་
དག་ལ་ཉི་མའི་རྒྱབ་ཏུ་བུ་ལོན་དུ་ཡང་འགྱུར་རོ། །གོང་གི་ཚིག་རྐང་དེ་ཇོ་འགྱུར་དུ། མཇུག་རིང་ཀྱིའོ་སླར་ཡང་ཉིན་ཞག་སོ་སོའི་དུས་སུ་གང་ཞིག་ལྷག་པ་ཟླ་བའི་ཞག་གིས་བསྒྱུར། ཞེས་ཡོད་པ་དེ་བཤད་པ་དེའོ། །དེ་ལྟར་མཇུག་རིང་ཀྱི་ལོངས་སྤྱོད་བསྟན་པ་དེ་དག་བྱེད་པ་ལ་ལྟོས་ཤིང་སེམས་ཅན་བསམ་པ་ལ་ལྟོས་ནས་རེ་ཤིག་དེ་ལྟར་བཞག་པ་སྟེ། གྲུབ་མཐའ་ལ་བརྟེན་པའི་ངེས་པ་ཅན་མ་ཡིན་ལ་སེམས་ཅན་སྨིན་པར་བྱེད་པའི་ཆེད་དུ་མའི་ལ་དུའི་ཚིག་ལྟར་གྲུབ་མཐའི་ངེས་པ་ལས་གཞན་དུ་བསྟན་པ་སྟེ། གཞུང་གོང་འོག་ཀུན་ཏུ་བྱེད་པ་དངོས་སུ་གསུངས་ཀྱང་ཟུར་གྱིས་གྲུབ་མཐའི་རྩིས་ཅི་རིགས་པ་བསྟན་པ་ཤེས་པར་བྱའོ། །དེ་ནས་གཟའ་རྣམས་ཀྱི་རྒྱུ་བའི་སྟོབས་བསྟན་པ་ནི། ཟླ་སྐྱེས་ལྷག་པ་དང་ལྷ་ཡི་བློན་པོ་ཕུར་བུ་གཉིས་ནི་རང་རང་གི་འགྲོས་བཞི་ལས། མྱུར་བ་ཡི་འགྲོས་དག་ལ་སྟོབས་དང་ལྡན་པར་འགྱུར་ཏེ་ས་སྐྱེས་དང་མཇུག་རིང་དག་ནི་འཁྱོགས་པོ་ཡི་འགྲོས་ཀྱི་དུས་ལ་སྟོབས་དང་ལྡན་ནོ། །འགྲོས་བུལ་བའམ་དམན་པ་སྤེན་པ་དང་པ་སངས་དལ་བ་ཡི་འགྲོས་ལ་སྟོབས་ཆེ་སྟེ། གཟའ་དེ་དག་ཀྱང་རང་བཞིན་ཡོན་ཏན་དབང་གིས་དེ་ལྟར་སྟོབས་དང་ལྡན་པར་འགྱུར་ལ་རྒྱུ་བ་ལྷག་མ་ལ་སྟོབས་དེ་ལྟ་བུ་མེད་པར་རིག་པར་བྱའོ། །འགྲོས་བཞིའི་ཁྱད་པར་ཡང་གཟའ་རྣམས་མྱུར་བའི་འགྲོས་ལ་ཤར་དུ་ཁའམ་གདོང་ཕྱོགས་པར་འགྱུར་ཏེ། བྲ་ཉེའི་སྟེང་དུ་ཡོད་ན་སྨིན་དྲུག་གི་ཕྱོགས་སུ་ཁ་ཕྱོགས་ཏེ་རྒྱུའོ། །སླར་ཡང་འཁྱོགས་པོར་རྒྱུ་བ་ལ་རབ་ཏུ་ཞུགས་པའི་དུས་སུ་ཤར་ལས་གཞན་དུ་ནུབ་ཉིད་ལ་ཁ་མངོན་པར་ཕྱོགས་པར་འགྱུར་ཏེ་བྲ་ཉེ་ལ་ཡོད་ན་ཐ་སྐར་གྱི་ཕྱོགས་སུའོ། །དལ་འགྲོས་ལ་ལྷོ༷་རུ་བཞིན་ནམ་གདོང་ཕྱོགས་པར་འགྱུར་ཏེ་མེ་རིའི་ཕྱོགས་སུའོ། །རང་རང་གི་བགྲོད་པའི་ཡོན་ཏན་དབང་གིས་འབྱུང་བ་ཡི་འགྲོས་ལ་ཡང་བྱང་རི་རབ་ཀྱི་ཕྱོགས་ཉིད་དུ་གདོང་ཕྱོགས་པ་ཡིན་ནོ་ཞེས་སོ། །
འདི་དབྱངས་འཆར་བ་ལ་སའི་སྟོབས་ཤེས་པའི་དོན་དུ་བསྟན་ཏོ། །ད་ནི་ཉི་ཟླའི་རྐང་པ་གསུངས་པ། ཟླ་བའི་ཚེས་ཀྱི་ཉིན་ཞག་སུམ་ཅུ་གང་དག་ཆུ་གཏེར་གྱིས་བསྒྱུར་བ་མཁའ་མིག་ཟླ་བ་སྟེ། བརྒྱ་དང་ཉི་ཤུ་ནི་ཟླ་བའི་རྐང་པ་སྟེ་ཉིན་ཞག་བདུན་གྱི་བར་དུ་ཟླ་བའི་ཆ་འཕེལ་བའི་དོན་དུ་དེ་ལྟར་འགྱུར་ཏེ་འོག་ཏུ་འཆད་དོ། །ཁྱིམ་ནི་བཅུ་གཉིས་པོ་རྣམས་དུས་ཀྱིས་ཅེས་བཞིས་བསྒྱུར་བ་བརྒྱད་དང་རིག་བྱེད་ཞེས་བཞི་བཅུ་རྩ་བརྒྱད་པོ་དག་ཀྱང་ཁྱིམ་དྲུག་རེའི་ཉི་མའི་རྐང་པའོ། །ཁྱིམ་གྱི་ཟླ་བ་དྲུག་པོ་དེ་ཡི་ནང་དུ། རྐང་ལོངས་འགྲིབ་པ་དང་འཕེལ་བ་དག་ཀྱང་ཉི་མའི་བགྲོད་པ་འགྲོ་བའི་དབང་གིས་རིམ་མིན་ལ་འགྲིབ་ཅིང་རིམ་པལ་འཕེལ་བ་སྟེ། རྒྱུ་སྐར་གྱི་འཁོར་ལོ་ཕྱེད་ཀྱི་ཕྱེད་བཞི་ཆ་དག་ལ། ཉི་རྐང་དྲུག་དང་བཞི་དང་གཅིག་རྣམས་ཕྱེད་མར་བགོས་ཏེ་ཕྱོགས་རེ་ལ་འཆར་བའི་རྐང་པའི་ཆུ་ཚོད་མཐའ་དག་གཅིག་ཏུ་བསྡོམས་ན་ནོར་དང་དུས་ཀྱི་གྲངས་བཞི་བཅུ་རྩ་བརྒྱད་རྣམས་ཡིན་པར་རིག་པར་བྱའོ་ཀྱེ་མི་ཡི་དབང་པོ་ཞེས། དེ་ལ་འདིར་ཉི་རྐང་ཆུ་ཚོད་བཅུ་གཅིག་པོ་དེ་ཟླ་བ་གསུམ་མམ་འཁོར་ཕྱེད་ཕྱེད་དེ་ཟླ་བ་གསུམ་གྱི་བར་དུ་ལོངས་སྤྱོད་པ་ལ་ཕྱོགས་དང་པོ་ལ་གསུམ། གཉིས་པ་ལ་དྲུག །གསུམ་པར་བརྒྱད། བཞི་པར་བཅུ། ལྔ་པར་བཅུ། དྲུག་པ་ལ་བཅུ་གཅིག་སྟེ་དེ་རྣམས་བསྡོམས་པས་ཞེ་བརྒྱད་དུ་འགྱུར་རོ། །དེ་ལྟར་འཇོག་པ་ཡང་ཕྱི་རོལ་དུ་ཁྱིམ་བཅུ་གཉིས་ཀྱི་བདག་ཉིད་ཟླ་བ་བཅུ་གཉིས་པོ་རེ་རེ་ཡང་རྐང་མཚམས་བཞི་བཞིས་ཕྱེ་བས་བཞི་བཅུ་རྩ་བརྒྱད་དུ་འགྱུར་ལ། ཟླ་བའི་ཞག་སུམ་ཅུ་རེ་རེར་ཡང་ཐུན་མཚམས་བཞི་བཞིས་ཕྱེ་བས་ཉེར་བརྒྱད་དུ་འགྱུར་རོ། །ཉི་མས་ཁྱིམ་ཟླ་བཅུ་གཉིས་ཀྱིས་ཁྱིམ་བཅུ་གཉིས་སྤྱོད་ལ། ཟླ་བས་ཚེས་ཟླ་གཅིག་གིས་ཁྱིམ་བཅུ་གཉིས་ལོངས་སྤྱོད་པ་ཡིན་ནོ། །འདིར་ཉི་ཟླའི་རྩིས་ནང་ལ་སྦྱར་བ་ནང་ལེར་འཆད་པར་འགྱུར་བས་རྒྱས་པར་བརྗོད་པར་བྱེད་ཅིང་། སྐབས་
འདིར་ནང་དོན་དུ་སྦྱར་བྱ་ཉི་ཟླའི་རྐང་པ་ཙམ་མདོར་བསྡུས་སུ་བརྗོད་པ་ཡིན་ནོ། །དེ་ནས་ཟླ་བ་ལ་སྒྲ་གཅན་འཇུག་པའི་ཚུལ་གསུངས་པ། དཀར་ནག་གི་ཚིགས་མཚམས་སུ་ནིའམ་དག་ལ་རི་བོང་ཅན་གྱི་དཀྱིལ་འཁོར་དག་ལ་སྒྲ་གཅན་རབ་ཏུ་འཇུག་སྟེ། འདིར་དཀྱིལ་འཁོར་གྱི་སྒྲས་ཉི་ཟླའི་དཀྱིལ་འཁོར་གྱི་སྒྲིབ་ཆ་རྟོགས་བྱེད་ཉི་ཟླ་སྒྲ་གཅན་གང་ལ་གནས་པ་ཆུ་ཚོད་དྲུག་ཅུའི་བདག་ཉིད་ཅན་གྱི་རྒྱུ་སྐར་གཅིག་གི་ལོངས་སྤྱོད་ལ་གོ་བར་བྱས་ཏེ། དེ་ཡང་ཉི་མ་ཁྱིམ་བཅུ་གཉིས་ཀྱི་གྲངས་ཀྱི་ཆ་དང་། ཟླ་བའི་དཀྱིལ་འཁོར་ཆ་བཅུ་དྲུག་གི་བདག་ཉིད་དུ་རིག་པར་བྱས་ནས། ཉི་ཟླའི་སྐར་མ་དང་། སྒྲ་གཅན་གདོང་མཇུག་གི་སྐར་མ་གཉིས་གང་དང་ཉེ་བས་ཕན་ཚུན་གང་མང་ལ་སྦྱང་བས། དཀྱིལ་འཁོར་དེ་ཡང་སྟོང་པར་གྱུར་པའམ་རྣམ་པར་དག་པར་གྱུར་ན་ཉི་ཟླའི་ཆ་ཐམས་ཅད་འཛིན་ཏེ། རི་བོང་ལྡན་པའི་ཞེས་སམ། །རི་བོང་ཅན་གྱི་རྒྱུ་བའི་དབང་གིས་ཉི་ཟླའི་དཀྱིལ་འཁོར་ནི་རྒྱུ་སྐར་གཅིག་གི་ལོངས་སྤྱོད་ཆུ་ཚོད་དྲུག་ཅུ་ཡིན་པར་ཤེས་པར་བྱའོ། །དཀྱིལ་འཁོར་ཕྱེད་དག་སྟེ་ཕྱེད་ལྷག་པར་གྱུར་ན་ཕྱེད་འཛིན་ལ་དེ་བཞིན་ཉི་མ་དང་རི་བོང་ཅན་གྱི་རྒྱུ་བའི་དབང་གིས་སྦྱང་ལྷག་ཆུ་ཚོད་དག་ནི་ཇི་སྙེད་ཡོད་པ་དེ་བཞིན་ཆ་རྣམས་འཛིན་པ་སྟེ། ཉིན་མཚན་གྱི་དུས་ཀྱི་ཆ་ནམ་འཛིན་ན། གནག་དང་དཀར་བའི་ཚིགས་མཚམས་ཉ་དང་བཅུ་དྲུག་པའམ། གནམ་སྟོང་དང་ཚེས་གཅིག་གི་མཚམས་དག་ལ་འཛིན་པས་ན། ཚེས་དེ་དག་གི་མཚམས་ཉིན་མོའི་དུས་སུ་གྱུར་ན་ཉིན་མོ་དང་། མཚན་མོའི་དུས་སུ་བབ་ན་མཚན་མོའི་དུས་སུ་ཉི་མ་དང་ནི་ཟླ་བ་སྒྲ་གཅན་གྱི་གྲིབ་མར་འཛིན་པ་ཡིན་ནོ། །འདིར་ནང་ལ་མཁོ་བའི་ཡན་ལག་ཏུ་མདོར་བསྡུས་ཙམ་གསུངས་པ་ཡིན་གྱི། གཟའ་འཛིན་གྱི་ལག་ལེན་ཞིབ་པར་སྐར་རྩིས་ཀྱི་གཞུང་རྣམས་སུ་ཤེས་པར་བྱའོ། །དེ་བཞིན་
དུ་སྐར་མ་གཅིག་གི་སྟེང་དུ་ཚོགས་ནས་གཟའ་ཕན་ཚུན་འཐབ་པ་ལ་སོགས་པའི་རྣམ་དབྱེ་མཐའ་དག་གྲུབ་པའི་མཐའ་ཡི་རྩིས་ལས་ཤེས་པར་བྱ་སྟེ་དེ་ལས་ངེས་པར་ནུས་སོ། །འདི་དག་ཐམས་ཅད་ཕྱི་རོལ་དུ་དེ་ལྟར་སྣང་བ་ཙམ་སྟེ། ནང་དུ་གཟའ་འཐབ་པ་དང་། ཕྱི་རོལ་དུ་ཉི་ཟླ་བཟུང་བས་ནང་དུ་ཁུ་རྡུལ་འཛིན་པ་མ་ཡིན་མོད་ཀྱི། ཕྱི་རོལ་གྱི་གཟའི་རྒྱུ་བ་ཤེས་ནས་ནང་དུ་རླུང་གི་འཕོ་བ་ལས་དེ་ལྟར་སྣང་བ་ཤེས་པའི་སླད་དུ། ཚངས་པ་པ་དང་། ཉི་མ་པ་དང་། གཅེར་བུ་པ་དང་། སྐྲ་ཅན་རྣམས་ཀྱི་གྲུབ་པའི་མཐའ་རྣམས་ཀྱང་ཤེས་པར་བྱའོ་ཞེས་པ་བཅོམ་ལྡན་འདས་ཀྱི་ངེས་པའོ། །དེ་ཅིའི་སླད་དུ་ན་ཕྱི་རོལ་གྱི་གཟའི་རྒྱུ་བ་དེ་ཙམ་ཞིག་ཤེས་པ་ཐར་ལམ་ལ་ཕན་པའི་དོན་དུ་མི་འགྱུར་ཡང་། ནང་ལ་སྦྱར་ནས་གནད་ཟབ་མོ་རྟོགས་ན་གསང་སྔགས་ནང་གི་དགོངས་དོན་ལ་མཁས་པར་འགྱུར་ཞིང་ནང་གིས་ལམ་བགྲོད་ཚུལ་གྱི་ལམ་ཁྱད་པར་ཅན་ལ་ངེས་པ་རྙེད་པར་འགྱུར་བའི་ཕྱིར་རོ། །ད་ནི་གཟའ་ཐམས་ཅད་ཀྱི་རྒྱུ་བ་དུས་བཞིའི་མཐར་སྟོང་པ་ལ་འཇུག་སྟེ་སྡུད་པ་དང་། སླར་ཡང་རྐང་པ་སྐྱེ་བ་འབྱུང་བའི་ཚུལ་ནང་ལ་སྦྱར་བ་ནི། མི་རྣམས་ཀྱི་ནི་ལོ་བརྒྱ་དག་ཀྱང་ཞེས་པ་བསྒྱུར་བྱའོ། །སྒྱུར་བྱེད་ནི་གཟའ་རྣམས་དག་གི་ལོ་ཡི་ལོངས་སྤྱོད་དེ། གང་ཞེ་ན་གཟའ་སོ་སོའི་དཀྱིལ་འཁོར་ལན་གཅིག་འཁོར་བའམ་རྫོགས་པ་གཟའ་སོ་སོའི་ཞག་གཅིག་ཡིན་ལ། དཀྱིལ་འཁོར་གྱི་ཕྱེད་ནི་ཞག་ཕྱེད་དུ་བརྩིའོ། །སྔར་བཤད་པ་ལྟར་ཟླ་བའི་ཞག་བཅོ་ལྔ་སོགས་ནས་སྒྲ་གཅན་གྱི་ལོ་དགུའི་བར་གྱི་ཆ་རྣམས་བསྡོམ་པས་ལོ་གཉིས་ཟླ་བ་གསུམ་ཞག་བཅོ་ལྔ་ནི་གཟའ་རྣམས་བསྡོམ་པའི་ཞག་ཕྱེད་ཡིན། དེ་གསུམ་གྱིས་བསྒྱུར་བས་ལོ་གོ་དྲུག་དང་ཟླ་བ་བཅུ་ཞག་བཅོ་ལྔ་ནི་གཟའ་རྣམས་ཀྱི་ཞག་གཅིག་དང་ཞག་ཕྱེད་དོ། །དེ་ལ་བུ་ལོན་དུས་ཀྱི་འཁོར་ལོའི་དབུགས་ཡེ་རླུང་གི་ཐོབ་སྐལ་ལོ་གསུམ་ཕྱོགས་གསུམ་བསྣན་
པས་མི་ལོ་བརྒྱར་ལོངས་ཤིང་། དེ་ཉིད་གཟའ་ཞག་ཕྱེད་གཉིས་ཏེ་ཞག་གཅིག་དང་ཞག་ཕྱེད་དུ་བརྩིས་ནས། དེ་གཉིས་ཀྱིས་བསྒྱུར་པས་གཟའི་ཉིན་ཞག་གསུམ་གྱིས་མི་ལོ་ཉིས་བརྒྱ། དེ་བཅུས་བསྒྱུར་བས་གཟའི་ཉིན་ཞག་སུམ་ཅུ་ལ་མིའི་ལོ་སྟོང་ཕྲག་གཉིས། དེ་བཅུ་གཉིས་ཀྱིས་བསྒྱུར་བས་གཟའི་ཉིན་ཞག་སུམ་བརྒྱ་དྲུག་ཅུ་ནི་སྐབས་འདིར་བཤད་པའི་གཟའི་ལོ་གཅིག་སྟེ། འདི་ལ་མི་ཡི་ལོ་སྟོང་ཕྲག་ཉི་ཤུ་རྩ་བཞི་ཡོད་དོ། །དེ་ལྟ་བུའི་གཟའི་ལོ་ཡི་ལོངས་སྤྱོད་མི་ལོ་ཉི་ཁྲི་བཞི་སྟོང་དེ་ཉིད་ཀྱིས་ནི་མི་ལོ་བརྒྱ་པོ་དེ་བསྒྱུར་བར་བྱའོ། །དེ་ལྟར་བསྒྱུར་བས་མི་ལོ་ས་ཡ་གཉིས་དང་འབུམ་ཕྲག་བཞི་ནི་གཟའ་རྣམས་ཀྱི་བུ་ལོན་དང་བཅས་པའི་ལོ་སྟེ་བུ་ལོན་གྱིས་འབྲིད་པར་བྱ་བའི་གཞིའོ། །དེ་གནས་སྟེང་འོག་གཉིས་སུ་བཞག་པའི་འོག་མར་ཕྱོགས་ཀྱི་ཞེས་བཅུ་ཡི་ཆས་ཐོབ་པ་ཉིས་འབུམ་བཞི་ཁྲི་དེ་ནི་སྟེང་མ་ལ་བུ་ལོན་དུ་འགྱུར་པས་སྟེང་གི་ཕུང་པོ་དག་ལ་སྦྱང་བར་བྱའོ། །སྦྱང་ལྷག་འབུམ་ཕྲག་ཉི་ཤུ་རྩ་གཅིག་དང་ཁྲི་ཕྲག་དྲུག་གི་ལོ་གྲངས་གང་དག་རྣམས་ནི། དུས་བཞི་ཆེན་པོའི་དུས་ཀྱི་ཕྱེད་ལ་རྫོགས་པའོ། །དེ་ཡང་དུས་ཕྱེད་འདི་ལ་རྫོགས་ལྡན་ལ་རྐང་པ་བཞི་ཀ་ཚང་བས་དེའི་བཞི་དང་སུམ་ལྡན་གྱི་རྐང་པ་གཅིག་དང་ལྔ་རྫོགས་ལ་དེ་ལྔ་མཁའ་སོགས་དཀྱིལ་འཁོར་ལྔ་སྐྱེད་རིམ་གྱིས་འབྱུང་བ་གཙོ་བོ་དུས་འཁོར་གྱི་རྩ་གཡོན་པ་ལ་སྲོག་ཡང་དག་པར་རྒྱུ་བའོ། །སླར་ཡང་སྔ་མའི་ལོའི་ཕུང་པོ་གཉིས་པ་ཉིད་ཀྱིས་ཕྱེད་རྫོགས་ཏེ་དེའི་རིང་ལ་སུམ་ལྡན་གྱི་རྐང་པ་གོང་གི་ལྷག་མ་གཉིས་དང་། ཉིས་ལྡན་གྱི་རྐང་པ་གཉིས། རྩོད་ལྡན་གྱི་རྐང་པ་གཅིག་སྟེ་ལྔ་རྫོགས་སོ། །འདི་དག་ནི་ས་སོགས་སྡུད་རིམ་གྱིས་ཤར་བའི་འབྱུང་བ་ལྔའི་དཀྱིལ་འཁོར་ནི་གཙོ་བོའི་རྩ་གཡས་པ་ནས་སྲོག་ཡང་དག་པར་རྒྱུ་བའི་དཀྱིལ་འཁོར་ལྔ་འབབ་པའོ། །གཡས་གཡོན་གྱི་རྒྱུ་བ་བཅུ་པོ་བསྡོམ་
པས་ངེས་པར་དུས་བཞི་པོ་རྣམས་ཀྱི་ལོ་ཡི་གྲངས་ས་ཡ་བཞི་དང་སུམ་འབུམ་ཉི་ཁྲི་དག་ཏུ་ནི་རབ་ཏུ་འགྱུར་རོ། །གཙོ་བོ་ཞེས་པའི་དོན་སྔར་སྲིད་རྩེ་བ་ལ་གཙོ་བོའི་དབུགས་ཞེས་བཤད་པ་སྲིད་རྩེ་བ་ལ་དབུགས་འབྱུང་བ་མེད་ཀྱང་། མི་ལོ་ཉི་ཁྲི་ཆིག་སྟོང་དྲུག་བརྒྱའི་ཡུན་ཚད་ལ་སྲིད་རྩེ་བའི་དབུགས་གཅིག་གི་ཐ་སྙད་བཏགས་ནས། དེ་འདྲའི་དབུགས་ལས་བརྩམ་སྟེ་བསྒྲེས་པས་རང་ལོ་བརྒྱ་སྲིད་རྩེ་བའི་ཚེ་ཚད་དུ་ཐ་སྙད་མཛད་པ་གཙོ་བོ་ཆེ་བ་དང་། འདིར་དུས་བཞི་ཆེན་པོ་གཅིག་ལ་འཕོ་བ་གཉིས་བྱེད་པའི་གཙོ་བོ་ཞེས་བཏགས་ནས་གསུངས་པ་གཙོ་བོ་ཆུང་པར་བྱེད་པ་ཡང་ཡོད་ལ། དེ་ཙམ་ལ་མི་འཐད་པ་མེད་མོད་ཀྱང་། གཙོ་བོ་ཞེས་བརྗོད་པ་གོང་འོག་ཀུན་ཀྱང་སྲིད་རྩེ་བ་ལ་འདོད་པ་ནི་ཆེས་མི་འགྲིག་པ་དེས་ན་གཙོ་བོ་ཞེས་པ་དགོངས་པའི་དབང་གིས་བཏགས་པས་གནས་སྐབས་སོ་སོར་གོ་དགོས་ཏེ་འདིར་ཡེ་རླུང་ལ་གཙོ་བོ་དུས་ཀྱི་འཁོར་ལོའི་དབུགས་ཞེས་གསུངས་པ་དུས་ཀྱི་འཁོར་ལོ་དངོས་ལ་དབུགས་ཀྱི་རྒྱུ་བ་དེ་ལྟ་བུ་ཡོད་པས་མ་ཡིན་ཀྱང་། ཡེ་རླུང་གི་ཆ་དང་དཀྱིལ་འཁོར་ལྔ་རྫོགས་པ་ནི་དབུ་མར་ཐིམ་ཞིང་སླར་ཡང་སྐྱེ་བའི་རིམ་པའི་དབུགས་ལ་དུས་ཀྱི་འཁོར་ལོའི་དབུགས་ཀྱི་ཐ་སྙད་བཏགས་པའང་ཤེས་པར་བྱའོ། །བསྟན་པའི་དུས་བཞི་ཆུང་ངུའི་ཚད་དེས་དུས་བཞི་ཆེན་པོའི་ཚད་ལ་བགོས་པས་ཉིས་བརྒྱ་ཐོབ་སྟེ་ལྷག་མེད་འཆར། ཡང་ན་དུས་བཞི་ཆེན་པོའི་ཚད་དེ་ལ་ཉིས་བརྒྱས་བགོས་པས་དུས་བཞི་ཆུང་ངུའི་མི་ལོའི་གྲངས་འཆར་ཏེ་དུས་བཞི་ཆེན་པོའི་ཡུན་ལ་དུས་བཞི་ཆུང་ངུ་ཉིས་བརྒྱའི་ཚད་ཡོད་དོ། །དུས་བཞི་སོ་སོའི་གྲངས་ནི། སྟོང་པ་སྟོང་པ་ནམ་མཁའ་ཀླུ་དང་ལག་པ་ཐུབ་པ་རི་བོང་ཅན་རྣམས་རྫོགས་ལྡན་དུས་ཀྱི་ཚད་དེ། ས་ཡ་གཅིག་དང་བདུན་འབུམ་ཉི་ཁྲི་བརྒྱད་སྟོང་ངོ་། །གསུམ་ལྡན་ལ་ནི་ནམ་མཁའ་མཁའ་སྟོང་རོ་དང་དགུ་དང་ཉིན་བྱེད་ལོ་ཡི་གྲངས་སུ་རབ་ཏུ་གྲགས་
ཞེས་གསུངས་པ་ལོ་ས་ཡ་གཅིག་དང་ཉིས་འབུམ་དགུ་ཁྲི་དྲུག་སྟོང་ངོ་། །སྟོང་པ་སྟོང་པ་མཁའ་དང་རིག་བྱེད་རོ་དང་ལག་འགྲོ་ཞེས་པ་གཉིས་ལྡན་ལོར་ནི་ཡང་དག་སྟེ། ཞེས་པ་བརྒྱད་འབུམ་དྲུག་ཁྲི་བཞི་སྟོང་ངོ་། །སྟོང་པ་ནམ་མཁའ་མཁའ་མིག་ཡོན་ཏན་ཆུ་གཏེར་རྣམས་ཀྱི་ལོ་ཡི་གྲངས་ནི་རྩོད་པའི་དུས་ལ་འགྱུར། །ཞེས་པ་བཞི་འབུམ་སུམ་ཁྲི་ཉིས་སྟོང་ངོ་། །དེ་བཞི་ཀ་གཅིག་ཏུ་བསྡོམ་པ་དུས་བཞི་ཆེན་པོའི་ལོ་ནི་འདི་དག་རྣམས་ཀྱིས་དུས་ཀྱི་མཐའ་རུ་གཟའ་ཡི་ཚོགས་རྣམས་ཀྱི་རྩིས་འཕྲོ་དག་སྟེ་ལོངས་སྤྱོད་ཀྱི་རྒྱུ་བ་ཟད་བྱེད་ཀྱི་ལོའི་དབོ་ཟླའི་སྟོང་ལ་སྐར་མ་ནམ་གྲུའི་མཐར་ཁྱིམ་ནི་སྟོང་པ་དག་ལ་གནས་ཏེ་ཐིག་ལེ་འབའ་ཞིག་ཏུ་ཤར་བ་ལ་གཟའ་ཐམས་ཅད་སྟོང་པར་ཞུགས་པའི་ཐ་སྙད་བྱེད་དོ། །དུས་བཞིའི་ལོ་དེ་རྣམས་ལོ་གཅིག་གི་ཉིན་ཞག་སུམ་བརྒྱ་དྲུག་ཅུས་བསྒྱུར་ནས་གཟའ་སོ་སོའི་དཀྱིལ་འཁོར་སུམ་བརྒྱ་དྲུག་ཅུས་བསྒྱུར་བས་བགོས་པས་ལྷག་མེད་འཆར་རོ། །དེ་ལ་འདི་སྐད་དུ། དུས་བཞིའི་ལོ་གྲངས་ཇི་སྙེད་པ། །སུམ་བརྒྱ་དྲུག་ཅུས་བསྒྱུར་བ་ལ། །གཟའ་རྣམས་རང་རང་དཀྱིལ་འཁོར་ལོ། །སུམ་བརྒྱ་དྲུག་ཅུས་བསྒྱུར་བ་ཡི། །ཞག་གིས་བགོས་པའི་རྙེད་པ་དོར། །ལྷག་མ་མེད་ཕྱིར་སྟོང་པར་ཞུགས། །བསིལ་ཟེར་ཅན་ནི་སུམ་ཅུའི་ཞག །ཉི་ལྷག་པ་སངས་མཇུག་རིང་ཀྱི། །ཉིན་ཞག་མཁའ་རོ་མེ་ཉིད་དེ། །མིག་དམར་ཟླ་བ་བཅོ་བརྒྱད་དོ། །ཕུར་སྤེན་སྒྲ་གཅན་རིམ་པ་བཞིན། །ཉི་མ་མཁའ་མེ་སྐྱོན་གྱི་ལོ། །གཟའ་ཡི་བྱེད་པའི་དཀྱིལ་འཁོར་ཡིན། །ཞེས་ཤེས་པར་བྱ་སྟེ་ཡེ་ཤེས་ལེའུའི་ཚིགས་བཅད་བརྒྱ་ལྔ་བཅུ་པ་དང་། བརྒྱ་ང་གཅིག་པས་དོན་འདི་ཉིད་བསྟན་ཏོ། །ཟད་བྱེད་ལོའི་དཔྱིད་འབྲིང་གི་མཐའ་དེ་ལས་སླར་ཡང་སྐར་མའི་དང་པོ་ཐ་སྐར་ལ་སོགས་པ་ནས་རིམ་བཞིན་གཟའ་རྣམས་ཀྱིས་ལོངས་སྤྱོད་པ་དག་དང་། ལོ་ཡི་དང་པོ་རབ་བྱུང་ཞེས་བྱ་བ་དང་
དེ་བཞིན་ཟླ་བའི་ཐོག་མ་ནག་པའི་ཟླ་བ་ཞེས་དང་། ལ་སོགས་པའི་སྒྲས་དེ་ནས་ས་ག་སོགས་ཀྱི་ཟླ་བ་འབྱུང་བ་དང་། རེས་ཀྱི་གཟའ་དང་སྦྱོར་བ་ཚེས་དང་བྱེད་པ་རྣམས་ཀྱང་སྔ་མ་དེ་བཞིན་དང་པོ་དག་འཆར་བ་སྟེ། གཟའ་ཉི་མ་སྦྱོར་བ་སེལ་བ་དཀར་ཕྱོགས་ཀྱི་ཚེས་གཅིག་བྱེད་པའོ་ཞེས་པ་གདབ་པ་འཆར་རོ། །དེ་ཡི་དུས་སུ་ནི་རིགས་ལྡན་ལྷ་རྣམས་དག་པ་དང་བཅས་པ་དང་། ཀླ་ཀློ་ལྷ་མིན་གྱི་ཕྱོགས་རྣམས་ཀྱི་འཁྲུག་པ་དྲག་པོ་འཛམ་བུ་གླིང་འདིའི་ས་གཞིའི་གནས་པཱ་ག་དཱ་ཞེས་པ་ལ་སོགས་པ་རྣམས་སུ་ནི་འབྱུང་བར་འགྱུར་ཏེ། བསྟན་པའི་དུས་བཞི་སྔ་མའི་རྩོད་ལྡན་གྱི་མཐའ་རྫོགས་ནས། སླར་ཡང་བསྟན་པའི་དབང་དུ་བྱས་པའི་དུས་བཞི་ཕྱི་མའི་རྫོགས་ལྡན་གྱི་མགོ་འཛུགས་པར་འགྱུར་རོ། །སྐབས་འདིའི་ཚིགས་བཅད་འདིའི་རྗེས་སུ་འགྲེལ་བ་ལས་ཚིགས་བཅད་ཉིད་སོར་བཞག་ཏུ་བཀོད་པའི་ཚིགས་བཅད་གཅིག་ནི་འདི་ལྟ་སྟེ། དེ་ནས་རྒྱུ་སྐར་རྣམས་ཀྱིས་ཉིན་ཞག་གཅིག་ནི་བསྒྱུར་བར་འགྱུར་ཏེ་ཆུ་ཚོད་དྲུག་ཅུ་རྣམས་ཀྱིས་ཀྱང་། །གཟའ་རྣམས་ཀྱི་ནི་དཀྱིལ་འཁོར་དག་གིས་ངེས་པར་ཆ་ནི་རབ་ཏུ་ཐོབ་པར་གྱུར་པ་ལོངས་སྤྱོད་འགྱུར། །ཟླ་བ་རྫོགས་ན་ངེས་པར་འགྱུར་ཏེ་སླར་ཡང་གཟའ་དང་ཆུ་ཚོད་ཀྱི་ནི་གནས་རྐང་པ་རྣམས་སུ་འགྱུར་ཞེས་ཇོ་འགྱུར། རྣམས་དག་ཏུ་འགྱུར། །རྒྱུ་སྐར་ལ་ནི་ཉི་མའི་ལོངས་སྤྱོད་དུ་འགྱུར་ཟླ་བ་གཅིག་ལས་སྦྱངས་པ་ཉིན ཉིན་ཞག་ཚོགས་ལས་དག་པ་ཟླ་བ་གཅིག་གིའོ། །ཞག་དག་ནི་ཚོགས། །ཞེས་སོ། །འདིའི་དོན་ནི་སླར་ཡང་ངེས་པ་སྐྱེ་བའི་རྩིས་བྱེད་ཚུལ། །སྟོང་པར་ཞུགས་པ་དེ་ནས་རྒྱུ་སྐར་རྣམས་ཀྱིས་ཉིན་ཞག་གཅིག་བསྒྱུར་བས་ཉེར་བདུན་དེ་ཆུ་ཚོད་དྲུག་ཅུས་བསྒྱུར་བས་རྒྱུ་སྐར་གྱི་ཆུ་ཚོད་མཁའ་མིག་རྒྱལ་པོ་ལ་གཟའ་རྣམས་ཀྱིས་དཀྱིལ་འཁོར་གྱིས་བགོས་ཐོབ་སོ་སོའི་རྟགས་ལོངས་སོ། །དེས་ན་ནག་ཟླའི་ཚེས་གཅིག་ནས་གནམ་སྟོང་གི་བར་དུ་གཟའ་རང་རང་གི་ཞག་གཅིག་གི་རྟག་ལོངས་དེ་ཉིད་ཚེས་གྲངས་ཀྱིས་བསྒྱུར་བ་
བཀོད་པ་ལ་ཉི་བར་སོགས་སུ་བྱེད་པ་ལས་བྱ་བ་གཞན་མེད་དེ་རྩིས་འཕྲོ་མེད་པའི་ཕྱིར་རོ། །ནག་ཟླ་རྫོགས་ནས་སྔ་མའི་ཟླ་བ་དེའི་གནམ་སྟོང་གི་རྟག་ལོངས་ན་ཕྱི་མའི་དྷྲུ་བ་ཀ་ཡིན་པས་རྩིས་འཕྲོའི་ངེས་པར་འགྱུར་ཏེ། སླར་ཡང་གཟའ་གནས་དང་། ཆུ་ཚོད་ཀྱི་གནས་རྣམས་སུ་འགྱུར་རོ། །དེ་བཞིན་དུ། རྒྱུ་སྐར་འཁོར་ལོའི་ཆུ་ཚོད་ལ་ཉི་མའི་དཀྱིལ་འཁོར་གྱིས་ཐོབ་པ་ཉི་མའི་རྟག་ལོངས་དང་སླད་མའི་རྩིས་འཕྲོར་འགྱུར་རོ། །ཟླ་བ་གཅིག་ལས་ཉི་མ་དེ་ལ་སྐྱེས་ཁྱིམ་སོགས་སྦྱང་བའི་རྐང་རྩིས་བྱ་ཞིང་ཉིན་ཞག་གང་ཡིན་པ་དག་ནི་ཚོགས་ཏེ་རིལ་པོ་ཞེས་སོ། །ཚིགས་བཅད་འདི་བི་བྷཱུ་ཏི་ཙནྡྲའི་ཕྱག་དཔེའི་རྒྱུད་ཀྱི་རྒྱ་དཔེ་ལ་དཀྱུས་སུ་ཡོད་ཅིང་། གྲངས་ཡིག་དགུ་བཅུ་པ་བཏབ་ཡོད་ལ། འགྲེལ་པའི་ཕྱག་དཔེ་ལ་ཡང་མཆན་བུ་ཡོད་དོ། །འགྲེལ་ཆེན་ལས་ད་ནི་ཆོས་ལ་སོགས་པ་གཟའི་ལོངས་སྤྱོད་ཐམས་ཅད་སྟོང་པ་ལ་གནས་པ་ནི་སླར་ཡང་ངེས་པ་འབྱུང་བར་གསུངས་པ། དེ་ནས་རྒྱུ་སྐར་རྣམས་ཀྱི་སོགས་ཚིགས་བཅད་འདི་བཞག་པས་རྩ་བ་ཡིན་པར་གསལ་ཞིང་། འདི་མེད་ན་རྒྱུད་རྩ་བའི་ཚིགས་བཅད་ཀྱི་གྲངས་མི་ཚང་བས་ངེས་པར་རྩ་བ་ཡིན་ལ། འབྲོ་འགྱུར་དང་ཤོང་འགྱུར་དུ་མ་བྱུང་བ་ནི་རྒྱ་དཔེ་ལ་ཆད་པ་ཡིན་ནོ་ཞེས་སྔོན་གྱི་འགྲེལ་བྱེད་དམ་པ་རྣམས་ཀྱིས་གསུངས།ལྷོ་བ་དགེ་འདུན་གྲགས་ཀྱིས་འབྲོ་འགྱུར་གྱི་ཚིགས་བཅད་གྱ་དགུ་པའི་རྗེས་སུ་བཙུད་པར་བྱས་སོ། །དེ་ལྟར་སྐབས་འདིར་གསུངས་པའི་སྟོང་འཇུག་ནི་བྱེད་པ་ལ་ལྟོས་ཏེ་གསུངས་པ་ཡིན་ལ། གྲུབ་མཐའ་ལ་ལྟོས་པའི་སྟོང་འཇུག་ནི་འདི་ལས་དཔག་སྟེ་བཙལ་བར་བྱ་བ་ཡིན་ནོ་ཞེས་བོད་ཀྱི་སྔ་འགྲེལ་བྱེད་པོ་རྣམས་གསུངས་སོ། །ད་ནི་དུས་ཀྱི་འཁོར་ལོའི་ལོ་དང་ཕྱོགས་ལས་ཟླ་བའི་ངེས་པ་གསུངས་པ། ཀ་ཙ་ཊ་པ་ས་སྟེ་སྡེ་པ་དྲུག་གི་བསྡུས་པའི་གསལ་བྱེད་སུམ་ཅུ་ནི། ཨ་ཨཱ་
ཨི་ཨཱི་རྀ་རཱྀ་ཨུ་ཨཱུ་ལྀ་ལཱྀ་ཨཾ་ཨཱཿ ཞེས་པ་རྩ་བའི་དབྱངས་ཐུང་ངུ་དང་རིང་པོ་བཅུ་དང་ཐིག་ལེ་དང་རྣམ་བཅད་ཅན་བཅས་ཉི་མའི་དབྱངས་ཏེ་བཅུ་གཉིས་དང་བཅས་པ་སྟེ་ལྷན་ཅིག་པས་སུམ་བརྒྱ་དྲུག་ཅུ་དང་། ངེས་པར་ཡོན་ཏན་གྱི་དབྱངས་ཨ་ཨེ་ཨ་རུ་ཨོ་ཨལ་ཨཾ་དྲུག་དང་། འཕེལ་བ་ཨཱ་ཨཻ་ཨཱར་ཨཽ་ཨཱལ་ཨཱཿ དྲུག་སྟེ་བཅུ་གཉིས་སུ་གྱུར་པ་ཅན་གྱིས་གསལ་བྱེད་སུམ་ཅུ་བསྒྱུར་བས་སུམ་བརྒྱ་དྲུག་ཅུ་དང་། ཡ་ཎ྄་ཉིད་དུ་བསྒྱུར་བ་ཧ་ཧཱ་ཡ་ཡཱ་ར་རཱ་ཝ་ཝཱ་ལ་ལཱ་ཧཾ་ཧཱཿ ཞེས་པ་བཅུ་གཉིས་གྱིས་གསལ་བྱེད་སུམ་ཅུ་བསྒྱུར་བས་སུམ་བརྒྱ་དྲུག་ཅུ་སྟེ། དེ་ལྟར་སུམ་བརྒྱ་དྲུག་ཅུ་ཚན་པ་གསུམ་ནི་ལོ་གསུམ་གྱི་ཉི་མ་ཉིན་ཞག་སྟོང་བརྒྱད་ཅུ་དག་ལ་འགྱུར་བ་སྟེ། ཨ་སོགས་ཐུང་ངུ་རྣམས་ཉིན་ཞག་ཅེས་བྱ་བ་ནི་བཅོ་ལྔའི་མིང་ངོ་། །དེ་སུམ་འགྱུར་དུ་བྱས་པས་དབྱངས་ཞེ་ལྔ་འོང་བ་ནི་རི་བོང་ཅན་ཟླ་བའི་ཆ་ཕྱེད་དང་བཅས་པའི་ཟླ་བ་སྟེ་ཕྱོགས་གསུམ་གྱི་བར་དུ་ཟླ་བ་ལ་ས་བོན་དུ་འགྱུར་རོ། །དེ་ཡང་རང་བྱུང་རྩ་བའི་དབྱངས་ཨ་ཨི་རྀ་ཨུ་ལྀ། ཐུང་ངུ་ལྔ་དང་། ཡོན་ཏན་ཨ་ཨེ་ཨ་ར་ཨོ་ཨལ་ལྔ་དང་། ཡ་ཎ་དུ་བསྒྱུར་བ། ཧ་ཡ་ར་ཝ་ལ་དང་བཅོ་ལྔ་དང་། དེ་ནས། ལཱ་ཝཱ་རཱ་ཡཱ་ཧཱ། ཨཱལ་ཨཽ་ཨཱར་ཨཻ་ཨཱ། ལཱྀ་ཨཱུ་རཱྀ་ཨཱི་ཨཱ། སྟེ་སྔ་མ་བཅོ་ལྔ་ལུག་ལྡོག་རིང་པོར་བྱས་པས་བཅོ་ལྔ་དང་། ཨཱཾ་ཨཱིཾ་རཱྀ་ཨཱུཾ་ལཱྀཾ། ཨཱཾ་ཨཻཾ་ཨཱཾ་ར་ཨཽཾ་ཨཱཾ་ལ། ཧཱྃ་ཡཱྃ་རཱྃ་ཝཱྃ་ལཱྃ། སྔ་མ་རིང་པོ་བཅོ་ལྔ་ལུག་འབྱུང་དུ་བཀོད་པ་ལ་ཐིག་ལེས་བརྒྱན་ཅིང་བསྒྱུར་བ་རྣམས་ལ་ཟླ་ཚེས་དང་བཅས་པ་སྟེ་དེ་ལྟར་བཅོ་ལྔ་དང་བཅས་པའི་ཚན་པ་གསུམ་ནི་ཕྱོགས་གསུམ་གྱི་ས་བོན་ཡི་གེའོ། །དེ་ལྟར་ཡི་གེ་དེ་རྣམས་ཡེ་རླུང་དུས་ཀྱི་འཁོར་ལོའི་ལོ་གསུམ་ཕྱོགས་གསུམ་གྱི་ཞག་གི་གྲངས་དང་མཉམ་པའོ། །ཆུ་ཚོད་ནི་ཧ་སོགས་ལྔ་པོ་དབྱངས་ཐུང་རིང་བཅུ་གཉིས་དང་བཅས་པ་སྟེ་ལྷན་ཅིག་ཏུ་བྱས་པས་དྲུག་ཅུ་ནི་ཚིགས་བཅད་བརྒྱད་པར་སྔར་བཤད་པ་ལྟར་ཉི་མ་ཕྱེད་
ནས་མཚན་ཕྱེད་བར་ཐུང་ངུ་རྣམས་དང་། མཚན་ཕྱེད་ནས་ཉི་མ་ཕྱེད་ཀྱི་བར་རིང་པོ་སུམ་ཅུའོ། །དྲུག་ཅུ་པོ་སུམ་འགྱུར་དུ་བྱས་པའི་དབྱངས་བརྒྱ་དང་བརྒྱད་ཅུ་གང་ཡིན་པ་དེ་དག་རྣམས་ཀྱང་སྒྲ་གཅན་གྱི་ནི་མཚན་མོ་ཡི་ཆ་ཟླ་བ་དྲུག་ལ་དུས་དྲུག་གི་དབང་དུ་བྱས་པའི་དུས་གསུམ་དུ་བྱས་པའི་ཞག་གྲངས་ཏེ་དུས་གསུམ་མམ་ཟླ་བ་དྲུག་གི་ཞག་གྲངས་བརྒྱ་བརྒྱད་ཅུའོ། །དཔལ་ལྡན་སྟོང་པ་གཞོམ་མེད་ལ་སོགས་སྟོང་ཆེན་ཡིག་ལྔ་སྙིང་སྟོབས་སོགས་ཡོན་ཏན་གསུམ་གྱི་དབྱེ་བ་སྟེ་སད་པ་དང་། རྨི་ལམ་དང་ཤིན་ཏུ་གཉིད་ལོག་པའི་གནས་སྐབས་གསུམ་གྱི་དབྱེ་བས་སུམ་འགྱུར་དུ་བྱས་པ་བཅོ་ལྔ་གང་དེ་རྣམས་ཀྱང་སྒྲ་གཅན་གྱི་ནི་ཟླ་བ་གཉིས་ཀྱི་ལོངས་སྤྱོད་ཆུ་ཚོད་བཅོ་ལྔ་དེ་ནི་ནང་དུ་སྲོག་གི་རླུང་གི་དུས་སྦྱོར་གསུམ་དུ་འགྱུར་ཏེ། དུས་སྦྱོར་རེ་རེ་དབྱུག་གུ་ལྔ་རེའི་རང་བཞིན་ཡིན་པས་བཅོ་ལྔའོ། །ད་ནི་ལོ་བརྒྱའི་ཡེ་ཤེས་ཆ་དཀྱིལ་འཁོར་དུ་ལྷ་གྲངས་དང་ཕྱི་རོལ་དུ་རྩིས་ཀྱི་ལྔ་བསྡུས་ལ་སྦྱར་ནས་བསྟན་པ། ལོ་གསུམ་ཕྱོགས་གསུམ་གྱི་ཉིན་ཞག་འབྱུང་བ་ཉི་མ་ཟླ་བའི་གྲངས་ནི་སྟོང་དང་བརྒྱ་ཉེར་ལྔ་སྟེ། ཀྱེ་མི་ཡི་བདག་པོ་དེ་ནི་ཕྱེད་དང་བཅས་པའི་ཟླ་བ་དག་དང་ལོ་གསུམ་སྟེ་དོན་དུ་ལོ་གསུམ་དང་ཕྱོགས་གསུམ་མོ། །དེ་ལས་ཕྱེད་དང་བཅས་པའི་ཟླ་བ་ཕྱོགས་གསུམ་པོ་དོར་ནས་ལོ་གསུམ་གྱི་ཞག་སྟོང་དང་བརྒྱད་ཅུ་པོ་ཐུབ་མཆོག་ཞེས་གྲངས་བདུན་པོ་རྣམས་ཀྱི་ས་བཅད་པ་ཐོབ་ནོར་བརྒྱ་ང་བཞི་དག་ནི་དུས་ཀྱི་འཁོར་ལོར་འགྱུར་ཞེས་པའི་དོན་ནི། བདུན་གྱིས་བགོས་ལྷག་གཉིས་བྱུང་བ་ཁྱབ་བྱེད་གཙོ་བོ་ཡབ་ཡུམ་ཟུང་དང་། ཐོབ་ནོར་ནི་དུས་ཀྱི་འཁོར་ལོའི་དཀྱིལ་འཁོར་གྱི་ལྷ་ཡི་གཙོ་བོ་རིགས་བསྡུས་པའི་གྲངས་སུ་འགྱུར་ཞིང་སྔར་གྱི་ལྷག་ཁྱབ་བྱེད་ཀྱི་ཚུལ་དུ་ཡར་བསྲེས་པའི་བརྒྱ་དང་ལྔ་བཅུ་རྩ་དྲུག་འདི་ནང་ལེར་བསྡུས་རྒྱུད་ཀྱི་ལྷ་གཙོ་བོ་རིགས་བསྡུས་པ་ཕྱག་རྒྱ་དྲུག་དང་བཅས་པས་བརྒྱ་རེ་གཉིས་སུ་གསུངས་པ་དེ་ཡི་ཕྱག་རྒྱ་དྲུག་མ་གཏོགས་པའི་ལྷ་དེ་རྣམས་
ཡིན་གྱི། པདྨའི་ལྟེ་བའི་ལྷ་ནུས་མ་སོགས་དོན་བརྒྱད་ལ་ཐབས་ཤེས་ཀྱི་དབྱེ་བས་བརྒྱ་ང་དྲུག་ཏུ་གསུངས་པ་དེ་དང་གྲངས་འདྲ་བ་སོགས་ཀྱིས་དེ་ཐམས་ཅད་པདྨའི་གདན་ཅན་གྱི་ལྷ་ཞེས་གཅིག་ཏུ་འཁྲུལ་ན་མི་འགྲིག་པ་མང་པོ་འོང་བས་བདག་གིས་དེ་དག་ཤན་ཕྱེས་ཏེ་བཤད་པར་བྱ་སྟེ། འདིར་ཡེ་ང་གི་ཉི་ཆ་ལོ་གསུམ་གྱི་ཞག་སྟོང་དང་བརྒྱད་ཅུ་ནི་བསྡུས་པའི་རྒྱུད་ཀྱི་ལྷ་གྲངས་གཙོ་བོ་དབུ་མའི་དབུགས་ལས་འབྱུང་ཚུལ་སྟོན་པ་ལ་ཞག་དེ་དག་བདུན་གྱིས་བགོས་པས་ཐོབ་པ་བརྒྱ་ང་བཞི་ནི་རིགས་བསྡུས་པའི་ལྷ་དང་ལྷ་མོའི་གྲངས་ཡིན་ལ་དེ་ཙམ་གྱིས་གཉིས་ཚང་མེད་པས་ལྷག་མ་གཉིས་པོ་ཁྱབ་བྱེད་གཙོ་བོ་དུས་ཀྱི་འཁོར་ལོ་ཡབ་ཡུམ་གྱི་ཚུལ་དུ་ཐོབ་པ་ལ་ཡར་བསྲེས་པས་བརྒྱ་ང་དྲུག་འབྱུང་བ་དེས་བསྡུས་པའི་རྒྱུད་ཀྱི་ལྷའི་གཙོ་བོ་ཐམས་ཅད་ཀྱི་གྲངས་བསྟན་པ་ཡིན་གྱི་གཙོ་བོ་དུས་འཁོར་ཡབ་ཡུམ་ནི་འདི་དག་གི་ཁོངས་སུ་བགྲང་བ་ནི་མ་ཡིན་ཏེ་གཙོ་བོ་དུས་ཐམས་ཅད་དང་ལྷ་ཐམས་ཅད་ལ་ཁྱབ་བྱེད་ཡིན་པས་འདིར་བགྲང་མི་དགོས་སོ། །འོ་ན་ལྷ་གྲངས་དང་སྦྱར་ཚུལ་ཇི་ལྟར་ཡིན་ཞེ་ན། ནུས་མ་བརྒྱད་དང་། སངས་རྒྱས་ཡབ་ཡུམ་ལུས་བསམ་གྱི་དབྱེ་བས་བཅུ་དྲུག་ཡོད་ཀྱང་ལྷ་ངོ་བོའི་སྒོ་ནས་བརྒྱད་དུ་འདུ་བ་དེས་མཚོན་ནས་བྱང་སེམས་ཡབ་ཡུམ་བཅུ་གཉིས། ཁྲོ་བོ་བརྒྱད། རྣལ་འབྱོར་མ་བརྒྱད་ཐབས་དང་བཅས་པ་ལྷ་ཆེན་བཅུ་གཉིས་ཡབ་ཡུམ་གྱི་ཁོངས་སུ་འདུས་པས་འདིར་མ་བགྲང་ལ། རྣལ་འབྱོར་མ་རེ་བཞི། ལྷ་ཆེན་ཡབ་ཡུམ་ཉེར་བཞི། སྒོ་སྐྱོང་ཁྲོ་བོ་ཡབ་ཡུམ་བཅུ་གཉིས། རྣམ་པའི་ཆ་ནས་ཀླུ་དང་གཏུམ་མོ་བཞི་བཅུ་ཡིན་ཡང་ངོ་བོའི་སྒོ་ནས་ཀླུ་བཅུ་དང་རབ་གཏུམ་མ་བཅུར་འདུ་བས་ཉི་ཤུ་སྟེ། ཐམས་ཅད་བསྡོམ་པས་བརྒྱ་ང་དྲུག་འདི་སྐབས་འདིའི་དུས་ཀྱི་འཁོར་ལོ་བསྡུས་པའི་ལྷའི་གྲངས་སོ། །དེ་ལས་ནུས་མ་རྣམས་དང་། གཞན་སངས་རྒྱས་བཞི་སོགས་
ཐམས་ཅད་ཐབས་ཤེས་ཟུང་འབྲེལ་ཅན་འབའ་ཞིག་ཡིན་པས། བདེ་གཤེགས་ཡབ་ཡུམ་བརྒྱད་ཀྱི་གྲངས་ལྟ་བུ་ལའང་བསྡུས་པའི་རྒྱུད་དུ་ལུས་དང་བསམ་པས་དབྱེ་བས་ཡབ་བརྒྱད་དང་ཡུམ་བརྒྱད་དུ་འགྱུར་མོད་ཀྱང་། འདིར་ཡུམ་བརྒྱད་པོ་ཁོ་ན་བགྲང་བས་བརྒྱད་ལས་མང་དུ་མི་འགྱུར་བས་སྔར་ཡབ་ཡུམ་བརྒྱད་བགྲང་བའི་གྲངས་དང་འདྲ་ལ་དེ་བཞིན་ལྷག་མ་རྣམས་ལའང་ཤེས་པར་བྱས་ནས་ལྷ་མོ་བརྒྱ་ང་དྲུག་ནི་འདིར་ལྔ་བསྡུས་ཀྱི་ངེས་པ་ལ་སྦྱར་རྒྱུ་ཡིན་ཏེ། འགྲེལ་བར་ལྷ་མོ་དྲུག་ཅུ་རྣམས་ཀྱི་གཟའ་གཅིག་ཏུ་འགྱུར་བ་སོགས་ལྷ་མོའི་མིང་གིས་བསྟན་པ་ཤ་སྟག་མཛད་པ་འདིས་ལྷ་བརྒྱ་ང་དྲུག་པོ་ཐབས་ཤེས་དབྱེར་མེད་ཡིན་པས་འདིར་ལྷ་མོའི་ཆ་ནས་བསྟན་པ་ཡིན་པ་ཤེས་པར་བྱའོ། །འགྲེལ་པ་པདྨ་ཅན་ལས་ཀྱང་ལོ་གསུམ་ཕྱོགས་གསུམ་གྱི་ཉིན་མཚན་གྱི་ཚོགས་བདུན་གྱི་ཕྱེ་བར་གྱུར་པ་ནི། བཅོམ་ལྡན་འདས་དུས་ཀྱི་འཁོར་ལོའི་ཐབས་དང་ཤེས་རབ་ཀྱི་རང་བཞིན་དུ་གྱུར་པའི་དཀྱིལ་འཁོར་གྱི་བདག་པོ་དང་འཁོར་ནི་བརྒྱ་ལྔ་བཅུ་རྩ་དྲུག་ཏུ་གྱུར་པའོ། །ཞེས་གསུངས་སོ། །དེ་ལྔ་བསྡུས་ལ་སྦྱར་ན། ཟླ་བར་བསྲེ་བ་ཞེས་ཟླ་བ་གཅིག་གི་དྷྲཱུ་བ་ལ་བསྲེ་བ་ཡི་ངེས་པ་སྟེ་རྩིས་འཕྲོ་ལ་གཟའ་གཅིག་སྟེ་དེ་ནི་ཆུ་ཚོད་དྲུག་ཅུ་ཡིན་ནོ། །དེ་དང་ནི་གཟའ་གནས་སུ་མ་ལོངས་པ་མི་བདག་ཉིས་འགྱུར་ཏེ་བཅུ་དྲུག་ཉིས་འགྱུར་སོ་གཉིས་ཀྱི་ཆུ་ཚོད་དང་། ཚོགས་ཏེ་རིལ་པོ་ལ་གཉིས་དང་བཅས་པ་བསྲེས་པས་ཆུ་ཚོད་གོ་བཞིར་འགྱུར་ཏེ་གཟའ་ཆུ་ཚོད་དྲུག་ཅུར་བྱས་པ་ལ་གཞན་བསྣན་པས་སོ། །དེ་སྟེང་རིལ་པོ་ལ་བསྲེ་རྒྱུའི་ཚེས་གཅིག་དང་ཟླ་བའི་རྐང་པ་དང་པོ་མདའ་སྡེ་ལྔ་བསྲེས་པས་བརྒྱར་འགྱུར་རོ། །དེའི་སྟེང་དུ་དུས་ཀྱི་འཁོར་ལོ་ལོ་གསུམ་གྱི་ལོངས་སྤྱོད་སྟོང་བརྒྱད་ཅུ་དག་ལས་བདུན་གྱིས་བགོས་པས་བརྒྱ་དང་ང་བཞི་ཐོབ་པ་ལས་བརྒྱ་ནི་གཟའི་ངེས་
པ་གོང་དུ་སོང་ཟིན་པས་བོར་ཏེ། དེའི་ལྷག་མ་ང་བཞི་དང་བདུན་གྱིས་བགོས་ལྷག་གཉིས་ལུས་པ་བསྲེས་པས་ང་དྲུག་ཏུ་གྱུར་པ་ནི་གཟའི་རྐང་པའོ། །དེ་ལྟར་བདུན་གྱིས་ཐོབ་ནོར་བརྒྱ་དང་ང་བཞི་ནི་ལྷ་མོ་བསྡུས་པའི་དུས་ཀྱི་འཁོར་ལོ་དག་ལས་ངེས་པར་ལྷ་མོ་དྲུག་ཅུ་རྣམས་ཀྱིས་རྣམ་པར་ཕྱེ་བ་དག་ནི་གཟར་འགྱུར་རོ། །འདིར་ཇོ་འགྱུར་ལས། འཁོར་ལོ་དག་གིས་རྣམ་པར་ཕྱེ་བ་རྣམས་ནི་གཟར་འགྱུར་ངེས་པར་ལྷ་མོ་དྲུག་ཅུ་རྣམས་ཀྱིས་སོ། །ཞེས་བསྒྱུར་ཀྱང་འགྱུར་སྔ་མ་བདེའོ། །དེའིཕྱིར་གོང་གི་འཁོར་ལོ་དེ་ལས་གཟའི་སྐལ་བ་དྲུག་ཅུ་དོར་ལྷག་གོ་བཞི་འབྱུང་ངོ་། །དེ་ལ་ལྷ་མོ་སུམ་ཅུ་རྩ་གཉིས་ཀྱིས་ཀྱང་རྩིས་འཕྲོ་ཆུ་ཚོད་སོ་གཉིས་པོ་དེ་ཡིན་པས་དེའི་སྐལ་བ་ཕྲི་ལྷག་དྲུག་ཅུ་རྩ་གཉིས་ལུས་སོ། །དེ་ལ་ཐུབ་པ་ནོར་གྱིས་བསྒྱུར་བའི་ཞེས་ལྔ་བཅུ་རྩ་དྲུག་གི་ལྷ་མོ་རྣམས་ཀྱི་གྲངས་ཕྲི་བས་ལྷག་དྲུག་ལུས་སོ། །ང་དྲུག་པོ་དེ་ལས་ཉེར་བརྒྱད་ཀྱིས་བགོས་པས་གཉིས་ཐོབ་ཅིང་ལྷག་མ་མེད་དེ་ཐོབ་ནོར་གཉིས་པོ་དེ་ནི་རིལ་པོའམ་ཚོགས་ཀྱི་གནས་ལ་གཉིས་ཡིན་པས་ལྷ་མོ་ང་དྲུག་པོ་དེར་བསྡུས་སོ། །དེ་ཡང་ཟླ་བ་རེའི་ཚེས་ཀྱི་ལྷ་མོ་གཙོ་བོ་ཡབ་ཡུམ་མ་གཏོགས་པའི་འཁོར་གྱི་ལྷ་མོ་ཉེར་བརྒྱད་རྣམས་རིགས་བསྡུས་ཏེ་ཉེར་བརྒྱད་དུ་བྱས་པའི་གནད་འདིས་ཤེས་པར་བྱ་བའམ། ཡང་ན་འདི་ཟླ་བ་གཅིག་གི་ངེས་པ་ཡིན་པས་ལྷ་མོ་ཉེར་བརྒྱད་ལས་མི་དགོས་ཏེ་གཞན་ནི་ཟླ་བ་གཞན་ལའོ། །སྔར་གྱི་ང་དྲུག་ཕྲི་བས་ལྷག་མ་དྲུག་ལུས་པ་ནི། ཟླ་བ་གཅིག་གི་རྩིས་འཕྲོའི་ངེས་པ་ལ་ཚེས་གཅིག་གཟའ་གནས་སུ་སྦྱིན་པ་དང་། ཆུ་ཚོད་དུ་དོར་བ་དག་གི་ཆེད་དུ་ཚེས་གཅིག་སྦྱིན་པ་དག་ནི་ལྷ་མོ་གཅིག་དང་། རི་བོང་ཅན་གྱི་རྐང་པ་དང་པོ་ལྔ་ནི་ལྷ་མོ་ལྔ་སྟེ་འདིར་ནི་དེ་གཉིས་བསྡོམ་པའི་ལྷ་མོ་དྲུག་གིས་སོ། །དེ་ལྟར་དཀྱིལ་འཁོར་གྱི་ལྷ་མོ་རིགས་བསྡུས་པའི་གྲངས་བརྒྱ་ང་བཞི་དང་ཟླ་བ་གཅིག་གིས་རྩིས་འཕྲོའི་ངེས་
པ་གྲངས་མཚུངས་པར་འགྱུར་རོ། །དེ་ལྟར་ཟླ་གཅིག་གི་ངེས་པ་ལ་སྦྱར་རྒྱུའི་ལྷ་གྲངས་དངོས་གནས་ལྟར་བརྒྱ་ང་དྲུག་བྱས་ན་ཚེས་ཀྱི་ལྷ་མོ་ང་དྲུག་ལས་རིལ་པོ་གཉིས་འབྱུང་བ་ཡིན་ཡང་། རིལ་པོ་གཉིས་པོའི་གྲངས་ཀྱིས་ཀྱང་ཕྲི་བར་བྱས་ན་འགྲིག་ཅིང་། ཡང་ན་ལྷག་མ་མ་བསྡོམ་པའི་གྲངས་བརྒྱ་ང་བཞི་ལ་བྱས་ན་གཞུང་ནས་གསུངས་པ་ལྟར་འགྲིག་པར་འགྱུར་བས་གང་བྱས་ཀྱང་འགལ་བ་མེད་དོ། །འདི་སྐབས་འགྲེལ་ཆེན་གྱི་ཚིག་མདོར་བསྡུས་ཙམ་ལས་མ་གསུངས་པས་བོད་ཀྱི་སྔ་འགྲེལ་ཐམས་ཅད་དུ། འགྲེལ་པར་བདུན་གྱིས་ཐོབ་ནོར་བརྒྱ་ང་བཞི་ལ་བསྡུས་པའི་དུས་ཀྱི་འཁོར་ལོ་ཞེས་གསུངས་པ་དུས་ཀྱི་འཁོར་ལོའི་དཀྱིལ་འཁོར་གྱི་ལྷ་མོ་རིགས་བསྡུས་པའི་དོན་ཡིན་པ་དེ་ཉིད་མ་རྟོགས་པར་འཆད་ཚུལ་སྣ་ཚོགས་བྱུང་འདུག་ལ། དེའི་དབང་གིས་འོག་ཏུ་ཟླ་གཅིག་གི་རྩིས་འཕྲོ་དང་ལྷ་མོ་སྦྱར་ཚུལ་ལའང་ངེས་པར་གསལ་པོར་བཤད་པ་མ་མཐོང་སྟེ་སོ་སོའི་ཡིག་འཇོག་ལ་ལྟོས་དང་གསལ་བར་འགྱུར་རོ། །དེས་ན་འདིར་ཤིན་ཏུ་གསལ་པོར་ཕྱེ་སྟེ་བཤད་པ་ལ་བློ་ལྡན་རྣམས་དགྱེས་པར་མཛོད་ཅིག །གོང་དུ་ལོ་གསུམ་གྱི་ཉི་མའི་ཆར་གྱུར་པའི་ཉིན་ཞག་རྣམས་བཤད་པའི་ལྷག་མ་ཟླ་བའི་ཆར་གྱུར་པའི་ཕྱོགས་གསུམ་གྱི་ཉིན་ཞག་བཞི་བཅུ་རྩ་ལྔ་རྣམས་ནི་ཉི་མའི་ཡོན་ཏན་སྙིང་སྟོབས་སོགས་གསུམ་གྱི་དབང་གིས་སུམ་འགྱུར་དུ་བྱས་པ་ཆུ་ཚོད་བརྒྱ་དང་སོ་ལྔ་དག་ཀྱང་ཉི་མའི་ཁྱིམ་ཟླ་གཅིག་གི་ལོངས་སྤྱོད་ལ་ནི་འགྱུར་བར་རབ་ཏུ་གྲགས་སོ་ཞེས་རྒྱུ་སྐར་ཡུལ་གྱི་ཆུ་ཚོད་དེ་ཙམ་ཉི་མས་ཁྱིམ་ཟླ་རེས་བགྲོད་དོ། །ཆུ་ཚོད་མདའ་ཡོན་ཟླ་བ་དེ་དྲུག་ཅུས་ཕྱེ་བས་གཉིས་ཐོབ་བཅོ་ལྔ་ལྷག་པ་ལས། སྐར་མ་གཉིས་ཐོབ་པ་ཆུ་ཚོད་བརྒྱ་ཉི་ཤུ་ཉི་མའི་ཟླ་གཅིག་གི་ངེས་པ་རྩིས་འཕྲོ་སྟེ་སྐར་གནས་སུ་གཉིས་སྦྱིན་པ་དེའི་དོན་ནོ། །དེ་ལྟར་ན་ཆུ་ཚོད་བརྒྱ་ཉི་ཤུ་དེ་དང་། དེའི་སྟེང་དུ་ཉི་མའི་ཉིན་ཞག་དང་པོར་ལོངས་སྤྱོད་པ་དང་ལྡན་པའམ་སྤྱོད་པ་ཅན་རྟག་
ལོངས་ཆུ་ཚོད་བཞི་དང་ཆུ་སྲང་ཉེར་གཉིས་སོགས་ཏེ། དེའི་ཕྱིར་ཚེས་གཅིག་བཞིས་བསྒྱུར་བ་ཉི་ལོངས་སུ་སྟེར་བ་གོང་གི་ལྔ་བསྡུས་སྐབས་སུ་བཤད་པ་བཞིན་ནོ། །དེ་ལྟར་ཆུ་ཚོད་བཞི་དང་ཆུ་སྲང་ཉེར་གཉིས་པོ་ཟླ་བ་གཅིག་ཏུ་བསགས་པ་དབང་ཕྱུག་ཆུ་ཚོད་ཅེས་བཅུ་གཅིག་ཏུ་ལོངས་པ་དང་བསྡོམ་པས་བཅོ་ལྔ་འོང་བ་གོང་གི་བརྒྱ་ཉི་ཤུའི་སྟེང་དུ་བསྣན་པས་བརྒྱ་དང་སུམ་ཅུ་རྩ་ལྔ་ཚང་བ་ཉི་མའི་ལོངས་སྤྱོད་དོ། །དེ་ལྟར་ཉི་མའི་ཆ་ཟླ་བར་སྦྱར་ཞིང་། ཟླ་བའི་ཉི་ཆ་ཉི་མའི་ལོངས་སྤྱོད་དུ་སྦྱང་བ་ནི། ཐབས་ཤེས་དབྱེར་མེད་མཚོན་ནོ་ཞེས་སྔ་མའི་འགྲེལ་པ་རྣམས་སུ་བཤད་དོ། །དེ་ལྟར་དཔལ་ལྡན་དུས་ཀྱི་འཁོར་ལོ་ལོ་གསུམ་དང་ཕྱོགས་གསུམ་ལོངས་སྤྱོད་པའི་གཟའ་ཡི་ཚོགས་དང་བཅས་པ་འདི་དག་སྔར་བརྗོད་པ་བཞིན་ཕྱི་འཇིག་རྟེན་དང་། ནང་དུ་ལུས་ལ་དབྱེར་མེད་པར། བརྟན་གཡོའི་འཇིག་རྟེན་བསྡུ་བ་དང་ནི། སླར་སྤྲོ་བ་སྟེ། སྐྱེ་བའི་སླད་དུ། འདོད་གཟུགས་གཟུགས་མེད་ཀྱི་སྲིད་པ་གསུམ་གྱི་གནས་སུ། ཀྱེ་ཉི་མ་ཞེས་ཉི་མའི་ཤིང་རྟ་ལ་བོས་ནས། དུས་ཀྱི་གཟུགས་སྲོག་གི་ང་གི་གཟུགས་སམ་རང་བཞིན་དུ་གནས་པ་དང་ནི། ཤེས་རབ་དང་ཐབས་ཀྱི་རབ་ཏུ་དབྱེ་བ་དང་ནི་ཞེས་པ་ཕྱི་རོལ་དུ་ཉིན་མོ་དང་མཚན་མོ་ཉི་མ་དང་ཟླ་བ་ནི་ཤེས་རབ་དང་ཐབས་སོ། །ནང་དུ་རོ་མ་དང་རྐྱང་མ། རྡུལ་དང་ཁུ་བ་ནི་ཤེས་རབ་དང་ཐབས་སོ། །དེ་བཞིན་དུ་མཉམ་པ་དང་མི་མཉམ་པའི་རིགས་དང་ཞེས་པ། མཉམ་པ་ས་བོན་གྱི་དབྱངས་རིང་པོ་དང་། མི་མཉམ་པ་ཐུང་ངུ་ནི་རིམ་བཞིན་ཤེས་རབ་དང་ཐབས་སོ། །གཞན་ཡང་ཟུང་དུ་གྱུར་པའི་གྲངས་སུ་བཞག་པ་རྣམས་མཉམ་ལ། ཡ་ཡི་གྲངས་སུ་བཞག་པ་རྣམས་མི་མཉམ་པའི་རིགས་ཏེ། མཉམ་པ་རྣམས་མོ་དང་ཤེས་རབ་ཀྱི་རིགས་དང་། མི་མཉམ་པ་རྣམས་ཕོ་དང་ཐབས་ཀྱི་རིགས་སུ་གནས་སོ། །གཞན་ཡང་གཟའ་རྣམས་མྱུར་བ་དང་འཁྱོགས་པོ་ལ་སོགས་པ་འགྲོས་བཞིའི་རྒྱུ་བ་སྟེ། དེས་མཚོན་པས་ཁྱབ་
བྱ་ཕྱིའི་དུས་ཀྱི་གཟུགས་སམ་རང་བཞིན་རྣམ་པ་སྣ་ཚོགས་པ་དང་། ནང་གི་ལུས་ལ་རླུང་ཁམས་ཀྱི་འདུ་འཕྲོད་ཀྱི་འཕོ་བ་སྣ་ཚོགས་ཀྱི་དུས་ཀྱི་རང་བཞིན་དུ་དབྱེ་བ་དེ་དག་ལ། གཞན་དུས་ཀྱི་འཁོར་ལོ་སྟོང་པ་དང་བདེ་བ་ཆེན་པོ་གཉིས་སུ་མེད་པའི་ཡེ་ཤེས་དེ་ནི་ཆོས་ཉིད་ཀྱི་ཚུལ་དུ་ཁྱབ་བྱེད་དུ་འཇུག་པ་ཡིན་ཏེ། ཕྱི་དང་ནང་གི་ཆོས་ཇི་སྙེད་པ་ཐམས་ཅད་རང་བཞིན་རྣམ་དག་གི་ཆོས་ཉིད་ལས་མི་འདའ་ལ། རང་བཞིན་གྱིས་རྣམ་པར་དག་པ་དེ་ཁོ་ན་ཉིད་ནི་དགག་བྱ་བཅད་ཙམ་གྱི་སྟོང་རྐྱང་མ་ཡིན་ཏེ་སྣང་སྟོང་ཟུང་འཇུག་ཐབས་ཤེས་གཉིས་སུ་དབྱེར་མེད་པའི་ཕྱིར་ན་རིགས་མེད་པ་བཅོམ་ལྡན་འདས་དུས་ཀྱི་འཁོར་ལོ་ཞེས་སྔར་ཡང་ཡང་གཏན་ལ་ཕབ་པ་དེ་ཉིད་དོ། །དེའི་ཕྱིར་ཕྱི་ནང་གི་ཆོས་ཐམས་ཅད་ཀྱང་གཞི་ཆོས་ཉིད་ཟུང་འཇུག་འོད་གསལ་བའི་དབྱིངས་དེ་ལས་ནམ་ཡང་འདའ་མི་སྲིད་པས་ན། གཞན་དུས་ཀྱི་འཁོར་ལོ་རང་བཞིན་གྱིས་རྣམ་པར་དག་པ་དེ་ཁོ་ན་ཉིད་ཀྱི་དོན་འདི་སྲིད་ཞི་ཀུན་ལ་ཆོས་ཉིད་ཀྱི་ངོ་བོས་ཁྱབ་བྱེད་དུ་འཇུག་ཀྱང་། འདི་ལ་འཕོ་ཞིང་གཡོ་བའི་བྱེད་རྩོལ་ཅུང་ཟད་ཀྱང་མི་མངའ་བར་དུས་གསུམ་མཉམ་པ་ཉིད་ཡིན་པའི་ཕྱིར། འདིས་རྒྱུ་བྱས་ནས་ཕྱི་སྣོད་ཀྱི་འཇིག་རྟེན་དང་ནང་སེམས་ཅན་གྱི་ཕུང་ཁམས་རྣམས་བསྐྱེད་པ་མ་ཡིན་ཏེ། ཡིན་ན་མུ་སྟེགས་བྱེད་ཀྱི་དབང་ཕྱུག་འཇིག་རྟེན་གྱི་བྱེད་པ་པོར་སྨྲ་བ་དང་མཚུངས་པར་འགྱུར་རོ། །འོན་ཀྱང་ཆོས་ཉིད་འགྱུར་མེད་འོད་གསལ་བ་དེའི་ངང་དུ་ཕྱི་ནང་གི་ཆོས་ཐམས་ཅད་སྡུད་ཅིང་དེའི་ངང་ལས་མཆེད་པ་ཡིན་མོད་དེ་ལ་སྡུད་པ་དང་སྐྱེ་བ་གང་ཡང་མེད་དེ། རྒྱུད་བླ་མ་ལས། ས་ནི་ཆུ་ལ་ཆུ་རླུང་ལ་སོགས་ཀྱིས་ཚིགས་སུ་བཅད་པའི་དོན་དང་། རྒྱུད་འདིར་ཡང་། གང་ལས་སྲིད་པ་གསུམ་པོ་མཐའ་དག་ཏུ་འགྱུར་སླར་ཡང་གང་དུ་ཐིམ་པའོ། །ཞེས་སོགས་གསུངས་པ་བཞིན་ནོ། །དེ་ལྟ་བུའི་ཆོས་ཉིད་དེ་ཁོ་ན་ཉིད་དེ་གློ་བུར་གྱི་སྒྲིབ་བྲལ་དག་པ་གཉིས་ལྡན་དུས་ཀྱི་འཁོར་ལོ་དེ་ཉིད་རྣམ་པ་རྟགས་
ཀྱི་ཕྱག་རྒྱར་སྣང་བ་བདེ་བ་ཆེན་པོའི་ཐུགས་དང་སྟོང་གཟུགས་ཀྱི་སྐུ་ཟུང་དུ་འཇུག་པ་མཚན་བཅས་ལྷའི་དཀྱིལ་འཁོར་གྱི་འཁོར་ལོར་སྣང་བའི་སྐབས་སུ་ཐབས་དང་ཤེས་རབ་ལ་སོགས་པས་དབྱེ་བས་མཉམ་དང་མི་མཉམ་གྱི་རིགས་དུ་མར་འགྱུར་ཏེ། མ་དག་པའི་སྣོད་བཅུད་དུ་སྣང་བའི་ཁམས་མཐའ་དག་སྒྲིབ་བྲལ་དུ་གྱུར་པའི་ཆ་ནས་དག་པའི་རྟེན་དང་བརྟེན་པར་སྣང་བ་ལ་གཞན་དུས་ཀྱི་འཁོར་ལོ་ཞེས་བྱ་སྟེ། དེ་ལྟར་ན་ཕྱི་ཡི་དུས་དང་། ནང་གི་དུས་དང་། གཞན་ཡེ་ཤེས་ཀྱི་དུས་དང་གསུམ་དུ་རྣམ་པར་ཕྱེ་བའི་སྒོ་ནས་ཕྱི་ནང་གཞན་གསུམ་དག་པ་གཅིག་ཏུ་སྦྱོར་ཚུལ་གྱི་ངེས་པའི་དོན་འདི་ལྟ་བུ་ནི། ཆགས་བྲལ་ཉན་རང་དང་ནི། ཕྱི་རོལ་པའི་དྲང་སྲོང་ཐུབ་པ་མཆོག་གི་རིགས་རྣམས་དང་། ཚངས་པ་ཆེན་པོ་དང་དྲག་པོ་དབང་ཕྱུག་ལ་སོགས་པ་འཇིག་རྟེན་པའི་ལྷ་རྣམས་ཀྱིས་ནི་ཤེས་པ་མ་ཡིན་ཀྱང་། སྟོན་པ་བཅོམ་ལྡན་འདས་ཐམས་ཅད་མཁྱེན་པ་དཔལ་དུས་ཀྱི་འཁོར་ལོས་འཇིག་རྟེན་ཀུན་རྫོབ་དང་འཇིག་རྟེན་ལས་འདས་པ་དོན་དམ་པའི་བདེན་པ་གཉིས་ཀྱི་ངོ་བོ་ཉིད་དམ་རང་བཞིན་ལས་བརྩམ་སྟེ་ཕྱག་ན་རྡོ་རྗེ་ཟླ་བ་བཟང་པོ་ལ་རབ་ཏུ་བསྟན་པ་བཞིན་དུ་མིའི་དབང་པོ་འཇམ་དཔལ་གྲགས་པ་བདག་གིས་ཀྱང་ཉི་མའི་ཤིང་རྟ་ཁྱོད་ལ་བཅོམ་ལྡན་འདས་དུས་ཀྱི་འཁོར་ལོ་དེ་ཉིད་མདོར་བསྡུས་པས་རབ་ཏུ་བསྟན་ཏོ། །ཞེས་སོ། །ཚིགས་བཅད་འདིར་ཉི་མའི་ཤིང་རྟ་ལ་བོད་པ་ཡོད་པས་རྩ་རྒྱུད་ཀྱི་མ་ཡིན་པར་འཇམ་དཔལ་གྲགས་པའི་གསུང་དུ་བཞེད་པ་ལེགས་ཟེར། བཅུ་བདུན་པ་དབྱངས་འཆར་བ་ལ་སོགས་པའི་དུས་ཀྱི་ངོ་བོ་ཉིད་ཀྱི་གནས་པ་ནི། ཨ་སོགས་ལྔ་ཡི་དབྱངས་གང་སོགས་ཚིགས་བཅད་དགུ་བཅུ་རྩ་བཞི་པ་ནས་བརྒྱ་བཅུ་བདུན་པའི་བར་གྱིས་བསྟན་ཏེ། སྐབས་འདིར་དུས་ཀྱི་དགེ་མི་དགེ་བརྟག་པའི་འབྲས་རྩིས་གསུངས་པ་ཡིན་ཞིང་དེ་ཡང་ཚེས་གྲངས་ཀྱི་ཉིན་ཞག་ལ་འཆར་རྒྱུའི་དབྱངས་བཤད་པ་ལ་དོགས་པ་སྤངས་པའི་ཆེད་དུ་འགྲེལ་ཆེན་ལས་གསུངས་པའི་དོན་མདོར་བསྡུས་
སུ་བརྗོད་ན། ཨ་ཨི་ཨུ་ཨེ་ཨོ་ལྔ་ལ་རྩ་བའི་དབྱངས་ལྔར་བྱས་པ་ནི་འཇིག་རྟེན་ན་བརྡ་སྤྲོད་བྱས་པ་རྣམས་ལ་ཡོངས་སུ་གྲགས་པ་སྟེ། དབང་ཕྱུག་གི་གཞུང་གཡུལ་རྒྱལ་བའི་རྒྱུད་དུའང་དེ་ལྔ་ཞག་ལ་འཆར་བར་བཤད་དོ། །འདིར་ནི་རང་བྱུང་རྩ་བའི་དབྱངས་ཨ་ཨི་རྀ་ཨུ་ལྀ་ལྔ་འཆར་བར་གསུངས་པ་ལ་རྀ་ལྀ་གཉིས་རྒྱུད་གཞན་དུ་མ་ནིང་གི་ཡི་གེ་ཞེས་དབྱངས་གསལ་གཉིས་ཀར་གཏོགས་པས་དབྱངས་རང་རྒྱུད་པར་མི་བཞེད་པ་ཡང་ཡོད་མོད་ལུགས་འདིར་རྩ་བའི་དབྱངས་སུ་བཞེད་དེ།ལུགས་འདིའི་སྒྲ་མདོའི་སྐབས་ཀྱི་དབྱངས་ཀྱི་ཡི་གེ་བསྡུ་བའི་བརྡ་ཁྱད་ཐུན་མོང་མིན་པ་འཇམ་དཔལ་གྲགས་པས་འདི་ལྟར་མཛད་དེ། ཨ་ཨི་ཨུ་ཎ྄། རྀ་ལྀ་ཀྲ། ཨ་ཨེ། ཨར་ཨོ། ཨལ་ཙ྄། ཧ་ཡ་ར་ཝ་ལཊ྄། ཅེས་དབྱངས་སུམ་ཅུའི་བར་དུ་གསལ་བྱེད་སྲོག་མེད་རེ་རེ་སྦྱར་བ་ནི་ཡི་གེ་བསྡུ་བའི་ཆེད་དེ། ཨུ་ཎ་ཞེས་བརྗོད་ན་ཨ་ཨི་ཨུ་གསུམ་བསྡུས་ཏེ། དཔེར་ན་ཨ་མཐའི་ཕ་རོལ་དུ་ཨི་ཨུ་བྱུང་ན་དབྱངས་གཉིས་མཚམས་སྦྱར་ཏེ། ཨ་ཨི་ལ་ཨེ་དང་། ཨ་ཨུ་ཕྲད་ན་ཨོ་ཉིད་དུ་འགྱུར་བས་ཨེ་དང་ཨོ་ནི་དབྱངས་རྩ་བ་མིན་ཏེ་ཡོན་ཏན་གྱི་དབྱངས་སུ་བཞེད་དོ། །རྀ་ཀྲའི་ཨཎ་ལས་ར་ལ་དག་གོ་ཞེས་པས་རྀ་ལྀ་ར་དང་ལ་ཉིད་དུ་འགྱུར་བའི་ཕྱིར། རྀ་ལྀ་གཉིས་ནི་ཨི་ལ་སོགས་པ་བཞིན་དུ་དབྱངས་རྩ་བར་འགྱུར་གྱི་མ་ནིང་མ་ཡིན་ནོ། །ཨ་ཀྲའི་ཨ་ཀྲ་ལ་རིང་པོ་ཞེས་པས་དབྱངས་རིང་པོ་དག་ཀྱང་རྩ་བའི་ཡི་གེ་མ་ཡིན་ལ་རྩ་བའི་དབྱངས་དེ་ལས་བྱུང་བའོ། །ཨི་ཀའི་ཨ་ཙ་ལ་ཡ་ཎ་འོ་ཞེས་པས་དབྱངས་བསྒྱུར་བའི་ཡ་ཎའི་ཡི་གེ་ཧ་ཡ་ར་ཝ་ལ་རྣམས་ཀྱང་དབྱངས་སུ་བཞེད་དོ། །དེས་ན་གོང་བཤད་རྩ་བའི་དབྱངས་ལྔ་ནི། དབྱངས་གཞན་གྱི་རྩ་བ་ལས་མ་བྱུང་བར་རང་ཉིད་དབྱངས་ཀུན་གྱི་རྩ་བར་གྱུར་པས་གཞན་ལ་མ་ལྟོས་པའི་ཆ་ནས་རང་བྱུང་དུ་ལུང་བསྟན་པའམ་བརྡ་སྤྲོད་པས་ན་འདི་ལྔ་སྒྲའི་སྐྱེ་གནས་ལྔ་ལས་བྱུང་བའི་ཡི་གེ་ཀུན་གྱི་རྩ་བར་མཉམ་པའི་
ངོ་བོ་སྟེ་ནམ་མཁའ་ལ་སོགས་པའི་འབྱུང་བ་ལྔའི་ངོ་བོ་ཉིད་ཀྱི་དབང་གིས་ཚེས་རྣམས་ལ་རིམ་པས་འཆར་བ་ཡིན་པས། འཇམ་དཔལ་གྲགས་པ་རང་གི་ལུང་སྟོན་པའམ་བརྡ་སྤྲོད་ལས། ཨ་ཨི་རྀ་ཨུ་ལྀ་ཀ་ཅེས་བྲིས་སོ། །དེ་ལྟར་དོགས་པ་བཅད་ནས། ཨ་ནི་དབྱངས་ཀྱི་དང་པོ་ཡིན་པས་དེ་ཐོག་མར་སྨྲོས་ནས་ཨ་ལ་སོགས་པ་སྟེ་ཨ་ཨི་རྀ་ཨུ་ལྀ་ལྔ་ཡི་དབྱངས་གང་མུན་པ་བསལ་བ་ཆུང་ངུའི་ཚད་ཀྱི་དང་པོའི་ཚེས་གྲངས་ཚེས་གཅིག་གི་དབང་གིས་དགའ་བ་ལ་སོགས་པ་ལྔ་དང་ལྷན་ཅིག་ལྡན་པར་གྱུར་པ་དེ་དག་ཚེས་གྲངས་ལྔ་ཚན་གཉིས་པ་རྡུལ་གྱི་ཡོན་ཏན་དང་གསུམ་པ་སྙིང་སྟོབས་ཀྱི་ཡོན་ཏན་གྱི་རིམ་པ་གསུམ་ལ་འདིར་ནི་འཆར་བར་བྱེད་དོ་ཀྱེ་མི་ཡི་བདག་པོ་ཞེས་གསུངས་ཏེ། ཚེས་གཅིག་ལ་དབྱངས་ཨ། དེའི་ཡོན་ཏན་ནམ་མཁའ། ཚེས་ཀྱི་མིང་དགའ་བ། དེ་བཞིན་དུ་ཚེས་གཉིས་ལ་ཨི་དང་རླུང་དང་བཟང་པོ། གསུམ་པར་རྀ་དང་མེ་དང་རྒྱལ་བ། བཞི་པར་ཨུ་དང་ཆུ་དང་སྟོང་པ། ལྔ་པར་ལྀ་དང་ས་ཁམས་དང་རྫོགས་པ། ཞེས་པ་དེ་བཞིན་སླར་ཡང་ཇི་སྲིད་དུ་བསྐྱར་ཏེ་འཁོར་བར་འགྱུར་རོ། །དེ་ལས་དགེ་མི་དགེ་བརྟག་པ་ནི། གལ་ཏེ་དེ་ལས་སྐྱེས་ལ་སོགས་གཟའ་དག་ལྷན་ཅིག་ཏུ་ཤར་བར་མ་གྱུར་ན་མི་ཤིས་པ་མེད་པ་ཤིས་པར་ཤར་བ་ཞེས་བྱའོ། །དེ་ཡང་དགའ་བ་ལས་སྐྱེས། བཟང་པོ་ལ་གཟའ་ལྷག །རྒྱལ་བ་ལ་ཕུར་བུ། སྟོང་པ་ལ་པ་སངས། རྫོགས་པ་ལ་སྤེན་པ་སྟེ་དབྱངས་དང་ཚེས་དེ་དག་རེས་གཟའ་ལྔ་པོ་དེ་དག་དང་ལྷན་ཅིག་ཤར་ན་མི་ཤིས་པ་ཤར་བ་ཞེས་བྱ་སྟེ་དབྱངས་གང་ཡིན་དེའི་མིང་གི་ཐོག་མ་ཅན་ལ་མི་ཤིས་སོ། །དེ་རྒྱས་པར་བཤད་པ། དགའ་བའི་ཚེས་དབྱངས་ཨ་དང་ལྡན་པ་ལ་ས་སྐྱེས་མི་ཤིས་པ་ཤར་བར་གྱུར་ཅིང་། དེར་མ་ཟད་གལ་ཏེ་སླར་ཡང་དེའི་ཚེས་ལ་སྐར་མ་སྨིན་དྲུག་དག་དང་ལྡན་པ་ཉིད་དུ་གྱུར་པ་ཡི་དུས་དེ་ལ། གལ་ཏེ་གཡུལ་ལམ་ཞེས་སམ་གཡུལ་དུ་ཞུགས་པ་དང་
ནད་དུ་གྱུར་པ་སྟེ་ནད་ཀྱིས་བཏབ་པར་གྱུར་ན་མི་རྣམས་འཆི་བར་འགྱུར་ཏེ་སུ་ལན་དང་པོའི་དབྱངས་ཨ་ཡི་ཡི་གེ་མིང་གི་ཐོག་མར་ཡོད་པ་དེ་ཉིད་ཀྱིའོ། །དེ་བཞིན་དུ་ཚེས་གྲངས་བཟང་པོ་ཨི་ཡིག་འཆར་བའི་དུས་སུ་ཟླ་སྐྱེས་དག་གི་རེས་གཟའ་འདི་ལ་ནི་གལ་ཏེ་སྐར་མ་མཆུ་ཉིད་དང་ལྡན་པ་དག་ཀྱང་ཤར་ན་དབྱངས་གཉིས་པ་ཨི་ཡིག་གི་མིང་ཅན་འཆི་བར་འགྱུར་རོ། །དེ་བཞིན་དུ་ཚེས་རྒྱལ་བ་དང་གཟའ་བླ་མ་དག་ལ་གལ་ཏེ་སྐར་མ་སྐག་ཏུ་གྱུར་ན་དབྱངས་གསུམ་པ་རྀ་ཡིག་མིང་ཅན་དག་ནི་འཆི་བར་འགྱུར་བ་ཡིན་ནོ། །སྟོང་པའི་ཚེས་དང་པ་སངས་དག་ལ་གལ་ཏེ་མོན་གྲུར་གྱུར་ན་དབྱངས་བཞི་པ་ཨུའི་མིང་ཅན་དག་ནི་འཆི་བར་འགྱུར། རྫོགས་པ་སྤེན་པ་དག་དང་ལྷན་ཅིག་ཏུ་ནི་བྲ་ཉེ་ཡོད་པར་གྱུར་ན་ལྔ་པ་ལྀ་ཡིག་གི་མིང་ཅན་འཆི་བ་ཉིད་དུ་འགྱུར་རོ། །གོང་གི་གཟའ་ལྔ་པོ་དེར་མ་ཟད་རེས་གཟའ་ཉི་མ་དག་ལ་དགའ་བ་ཡི་ཚེས་ལྷན་ཅིག་འཆར་བ་རྣམས་ཀྱིས་ཨ་མིང་ཅན་ལ་གཡུལ་དུ་རྨར་ཡང་འགྱུར་ཏེ། ནད་ཀྱིས་གཟིར་བ་རྣམས་ནི་ཉོན་མོངས་པར་ཉིད་དུ་འགྱུར་རོ། །རེས་གཟའ་ཟླ་བ་ལ་ནི་ཚེས་བཟང་པོ་ལྷན་ཅིག་འཆར་བ་རྣམས་ཀྱིས་ངེས་པར་གཡུལ་དང་ནད་དག་ལ་ཡང་ཉི་མ་དེ་བཞིན་འགྱུར། །དེ་ལྟར་ཚེས་དང་འཕྲད་པའི་རེས་གཟའ་བདུན་གྱི་འབྲས་བུ་རྒྱུད་དང་འགྲེལ་པས་གསུངས་ཤིང་གཞན་མ་བསྟན་ཀྱང་། འགྲེལ་པ་ལ་ལར་རྒྱལ་བར་དམར་སྐག་ཨུ། སྟོང་ལྷག་མོན་གྲུ་ཨུ། རྫོགས་སངས་བྲ་ཉེ་ལྀ་ཡང་དེ་དང་འདྲ་བར་བཤད་པའང་སྣང་། དེ་ལྟར་གཟའ་སྐར་ཚེས་གསུམ་འཛོམ་པ་འདི་སྦྱོར་བ་གསུམ་འཛོམ་ཞེས་འཆི་བའི་སྦྱོར་བར་བཤད་དེ་དབྱངས་དེའི་མིང་ཐོག་ཅན་ལ་མི་ཤིས་པ་ཡིན་གྱི་གང་ཟག་ཐམས་ཅད་ལ་མ་ཡིན་ནོ། །བདེན་པར་དབྱངས་ཚེས་ལ་འཆར་བ་ལྔ་པོ་རྣམས་ཀྱི་འབྲས་བུ་བཟང་པོ་མང་པོར་ནི་འཆི་བའི་སྦྱོར་བས་དམན་པ་སྟེ་དེ་དག་མེད་པ་
དག་ལ་འགྱུར་ཏེ་གཟའ་སྐར་དེ་དག་མེད་ན་རང་རང་གི་མིང་ཐོག་གི་དབྱངས་འཆར་བ་ནི་ཤིས་པར་ཤར་བ་ཡིན་ནོ་ཞེས་བཤད། དེ་ལྟ་བས་ན་ནད་ཀྱིས་བཏབ་པ་དང་གཡུལ་དུ་འཇུག་པ་དང་། ཡུལ་གཞན་དུ་བགྲོད་པ་དང་། བག་མ་ལེན་པ་དག་ལ་དགེ་བ་དང་མི་དགེའི་འབྲས་བུ་རང་གི་མིང་ཐོག་གམ་སྐྱེས་སྐར་གྱི་དབྱངས་འཆར་བའི་མཚན་མས་ཤེས་པར་བྱའོ། །འདིར་མིང་ཐོག་ཨེ་ཡིག་ཅན་ཨི་ལ་བསྡུ་བ་དང་། ཨོ་ཅན་ཨུ་ལ་བསྡུ་བ་སོགས་དབྱངས་གཞན་རྣམས་རྩ་བའི་དབྱངས་ལྔར་བསྡུས་ནས་མིང་ཐོག་ལ་བརྟག་པར་བྱའོ། །དེ་ལྟར་རྒྱུ་སྐར་དང་གཟའ་སྟེ་དབྱངས་ཀྱི་ཚོགས་དང་། ཚེས་དགའ་བ་ལ་སོགས་ལྔ་རྣམས་དག་ནི་དེ་ཉིད་ལྔ་ཡི་རབ་ཏུ་དབྱེ་བ་ཡིས། ཕྱོགས་ཟླ་ཕྱེད་དང་ཟླ་བ་དང་བགྲོད་པ་དག་དང་ལོ་རེ་དང་རབ་བྱུང་སོགས་དྲུག་ཅུའི་ལོ་རྣམས་ལ་ཡང་འདིར་ནི་འཆར་བར་འགྱུར་ཏེ་ཞེས་མདོར་བསྟན་ནས། རྒྱས་པར་བཤད་པ་ལ་ཕྱོགས་ལ་འཆར་ཚུལ་ནི། ནག་པ་ཡི་ཟླ་བ་ཐོག་མར་བྱས་ཏེ་དེ་ལ་སོགས་ཟླ་བ་བཅུ་གཉིས་ལ་འདིར་ནི་ཉིན་ཞག་གི་ཡན་ལག་བཅུ་གཉིས་དག་གིས་འཆར་བར་འགྱུར་བ་ནི་ཕྱོགས་ཀྱི་དབྱེ་བ་ཡི་འཆར་ཚུལ་དེ་ཉིད་དོ། །ཞེས་ནག་ཟླའི་ཚེས་གཅིག་ནས་བཟུང་ཞག་བཅུ་གཉིས་ལ་དབྱངས་ཨ་འཆར་བ་སོགས་ཏེ་ཟླ་བ་གཉིས་ལ་དབྱངས་ལྔ་ལན་རེ་འཁོར་བ་ནི་ཞག་དྲུག་ཅུ་ལྔས་བགོས་པས་བཅུ་གཉིས་རེ་ཐོབ་པ་ལྟར་བསྐོར་བས་དབྱངས་རེས་ཕྱོགས་རེ་ལས་ཞག་གསུམ་མ་ཚང་ཡང་སྤྱིར་ཕྱོགས་རེ་ལ་འཆར་ཚུལ་ཡིན་ནོ། །ལོ་གཅིག་གི་ཉིན་ཞག་སུམ་བརྒྱ་དྲུག་ཅུ་ལ་དབྱངས་ལྔ་པོ་རྣམས་ལན་གཅིག་འཆར་བ་རྫོགས་པའི་དབང་དུ་བྱས་ཏེ། ཞག་དེ་དག་ལྔས་བགོས་པས་ཞག་བདུན་ཅུ་རྩ་གཉིས་དག་གིས་འདིར་ནི་དབྱངས་རེ་རེ་འཆར་བར་འགྱུར་ཏེ། དེ་ལྟར་ན་ཟླ་བ་གཉིས་དང་ཞག་བཅུ་གཉིས་རེ་ལ་དབྱངས་རེ་འཆར་བའི་ཕྱིར་ཟླ་བའི་དབྱེ་བ་ལ་དབྱངས་འཆར་ཚུལ་ཡིན་པ་ཤེས་པར་བྱའོ། །ཟླ་བ་དྲུག་གིས་
བགྲོད་པའི་ཡན་ལག་གཅིག་དག་སྟེ་བགྲོད་པ་རེ་ལ་དབྱངས་རེ་འཆར་བ་ལ་ལོ་ཕྱེད་གསུམ་གྱིས་དབྱངས་ལྔ་ཆར་གཅིག་འཁོར་ཞིང་ལོ་ལྔས་ལན་གཉིས་འཁོར་བར་འགྱུར། རབ་བྱུང་ལ་སོགས་པའི་ལོ་དྲུག་ཅུ་ལ་དབྱངས་ལྔ་ལན་གཅིག་རྫོགས་པར་འཆར་བ་ནི་བཅུ་གཉིས་ཀྱི་ལོ་རྣམས་ལ་ཨ་སོགས་ལྔ་རིམ་པས་འཆར་བ་དག་གིས་ལོ་ལ་འཆར་བའི་ཚུལ་ཡིན་ནོ། །རབ་བྱུང་སོགས་ལོ་རེ་རེ་ལ་དབྱངས་རེ་འཆར་བ་ལ་ལོ་ལྔས་འཁོར་བས་ལོ་དྲུག་ཅུ་ལ་འཁོར་ཐེབས་བཅུ་གཉིས་སོ། །དེ་ལྟར་ཞག་རེ་དང་། ཞག་བཅུ་གཉིས་དང་། ཞག་དོན་གཉིས་དང་། ཞག་བརྒྱ་དང་བརྒྱད་ཅུ་དང་། ཞག་སུམ་བརྒྱ་དྲུག་ཅུ་དང་། ལོ་བཅུ་གཉིས་ལ་འཆར་ཚུལ་དེ་དག་རིམ་བཞིན་ཞག་རེ་དང་། ཕྱོགས་དང་ཟླ་བ་དང་། བགྲོད་པ་དང་ལོ་དང་། ལོ་དྲུག་ཅུ་ལ་འཆར་ཚུལ་རྣམ་པ་དྲུག་བཤད་པ་དེ་ལྟར་དབྱངས་ནི་ལྔ་པོ་རྣམས་དག་འདིར་ནི་ཞག་སོགས་ལ་འཆར་བར་འགྱུར་ཏེ། གང་ཤར་བ་དེ་ཉིད་ནི་ཕྱི་ནས་སམ་སླར་ཡང་རང་ས་ནས་བགྲང་བའི་ལྔ་པ་ལ་ནུབ་པ་ཉིད་དུ་འགྱུར་བའོ། །དེ་ཡང་དང་པོ་ལ་ནི་དབྱངས་རྣམས་རང་རང་འཆར་བ་ནི་བྱིས་པ་སྟེ། རང་རང་གི་ཆོས་ཀྱི་ཡོན་ཏན་གྱི་དབང་གིས་དང་པོར་བཙས་པ་ལྟར་ཐོག་མར་ཤར་ཞིང་། དེ་ནས་སྔ་མ་དེ་དཔལ་དང་ལྡན་པའི་གཞོན་ནུ་ཡི་གནས་སྐབས་སུ་འགྱུར་ཏེ་གང་ཞེ་ན་རང་ས་ནས་བགྲང་བའི་དབྱངས་གཉིས་པ་ཤར་བའི་དུས་ལ་བྱིས་པ་ཉིད་གཞོན་ནུར་གྱུར་པ་བཞིན་ནོ། །དེ་བཞིན་དུ་དར་ལ་བབ་པ་དང་། རྒན་པོ་དག་ཏུ་གྱུར་པ་ནི་རིམ་པས་མེ་དང་ཆུ་གཏེར་ཉིན་ཞག་ལ་སྟེ་ལྔ་པ་ལ་ནི་སྨིན་ནས་ཤི་བའམ་ནུབ་པར་འགྱུར་རོ་ཞེས་རང་ས་ནས་བགྲང་བའི་གསུམ་པར་དར་བབ། བཞི་པར་རྒན་པོ། ལྔ་པར་སྨིན་པ་རྫོགས་ཏེ་ནུབ་པ་ཡིན་ནོ། །དེ་དག་གང་ཟག་གི་ལུས་ཀྱི་ན་ཚོད་ཀྱི་གནས་སྐབས་ལྔའི་དཔེས་མཚོན་ནས་བསྟན་པའོ། །དེའི་ཕྱིར་རང་གི་མིང་གི་དབྱངས་འཆར་བ་དང་གཞོན་ནུ་དང་དར་བབ་ཀྱི་དུས་སུ་ལས་རྩོམ་པ་
དང་ཕ་རོལ་དང་འཐབ་པ་སོགས་ལ་དགེ་ཞིང་། ཕྱི་མ་གཉིས་ཀྱི་དུས་སུ་མི་དགེ་ལ་ཁྱད་པར་དབྱངས་ནུབ་པའི་དུས་སུ་ལས་བརྩམ་ན་སྟོབས་མེད་དོ། །ཕྱོགས་དང་། ཟླ་བ་བགྲོད་པ་ལོ་རྣམས་ལ་དབྱངས་འཆར་ཚུལ་དེ་བཞིན། དགའ་བ་ལ་སོགས་པ་ཡང་སྔར་བཤད་པ་ལྟར་དབྱངས་དང་ལྷན་ཅིག་འཆར་ཏེ། ཕྱོགས་ལ་འཆར་ཚེ་ནག་ཟླའི་ཉིན་ཞག་བཅུ་གཉིས་ནི་དགའ་བ། དེའི་རྗེས་ཀྱི་བཅུ་གཉིས་བཟང་པོ་སོགས་ནས་རིམ་པར་བསྐོར་བར་བྱའོ། །དེ་བཞིན་རབ་བྱུང་སོགས་ལོ་བཅུ་གཉིས་ནི་དགའ་བ། དེའི་རྗེས་ཀྱི་ལོ་བཅུ་གཉིས་བཟང་པོ་སོགས་འཆར་ཚུལ་ཀུན་ལ་དགའ་སོགས་ལྔ་པོའང་དབྱངས་དང་ལྷན་ཅིག་འཁོར་བ་དང་། དེ་བཞིན་མཁའ་རླུང་མེ་ཆུ་སའི་ཡོན་ཏན་དང་དེའི་དབང་གི་སྒྲ་རེག་རོ་གཟུགས་དྲི་ཡི་ཡོན་ཏན་ཀྱང་རིམ་པར་དབྱངས་ལྔ་དང་ལྷན་ཅིག་འཆར་ཞིང་འཁོར་བའམ། དེ་ལྟར་འཁོར་བའི་དབང་གིས་རང་སར་ཤར་ཞིང་ལྔ་པར་ནུབ་དྲུག་པ་ལ་སླར་ཡང་འཆར་བ་དེ་ལྟར་འཁོར་བ་སྟེ། དེ་ཡང་དགའ་བའི་ཚེས་ཁོ་ན་ལ་དཔེར་བརྗོད་ན་དགའ་བའི་ཚེས་དེར་ཨ་ཡིག་འཆར་བ་བྱིས་པའོ། །ཨི་ཡིག་ནུབ་ཅིང་། སླར་ཕྱི་ཉིན་བཟང་པོ་ལ་འཆར་རོ། །རྀ་ཡིག་རྒན་པོའོ། །ཨུ་ཡིག་དར་བབ་པོ། ལྀ་ཡིག་གཞོན་ནུར་གྱུར་པའོ། །དེ་བཞིན་དུ་བཟང་པོ་ལ་ཨི་ཡིག་འཆར་བ་བྱིས་པའི་སྐབས་སུ། ཨ་ཡིག་གཞོན་ནུ་དང་། རྀ་ནུབ་པ། ལྀ་དར་བབ་སོགས་སུ་ཤེས་པར་བྱ་སྟེ། མདོར་ན་དབྱངས་གང་ཤར་བ་དེའི་དུས་སུ་རང་ས་ནས་རིམ་པར་བྱིས་པ་སོགས་བགྲང་བས་དབྱངས་དེ་ཉིད་དབྱངས་གཞན་བཞི་པོའི་དུས་སུ་དར་བ་དང་གུད་པ་ཤེས་ལ། རང་གི་མིང་གི་དབྱངས་ནས་བྱིས་པ་ལ་སོགས་པ་ལྔ་པོ་གོ་རིམ་བཞིན་བགྲང་བས། དབྱངས་ད་ལྟ་གང་ཤར་བ་དེའི་དུས་སུ་རང་གི་དབྱངས་གནས་སྐབས་ལྔ་གང་ལ་བབ་པ་ཤེས་པར་བྱས་ནས་དབྱངས་ཀྱི་དར་གུད་བརྩིས་ཏེ་ལས་བརྩམ་པར་བྱའོ། །དེ་ལྟར་རྩ་བའི་དབྱངས་ལྔ་འཆར་ཚུལ་
བཤད་ནས་སླར་ཡང་དབྱངས་སུམ་ཅུ་འཆར་ཚུལ་བཤད་པ། ཨ་སོགས་རྩ་བའི་དབྱངས་ལྔ་གང་དག་ངེས་པར་སྙིང་སྟོབས་སོགས་ཡོན་ཏན་གསུམ་མམ་སྐུ་གསུང་ཐུགས་གསུམ་གྱིས་བསྒྱུར་བས་རྩ་བ་དང་ཡོན་ཏན་བསྒྱུར་བའི་དབྱངས་བཅོ་ལྔ་འོང་ལ། སླར་ཡང་དབྱངས་དེ་དག་རྣམས་ནི་ཐབས་ཤེས་ཀྱི་རྣམ་པ་ཐུང་ངུ་དང་རིང་པོ་གཉིས་སུ་གྱུར་པས་སུམ་ཅུ་ཉིད་དེ། ཨ་ཨི་རྀ་ཨུ་ལྀ། ཨ་ཨེ་ཨར་ཨོ་ཨལ། ཧ་ཡ་ར་ཝ་ལ་རྣམས་དཀར་ཕྱོགས་དང་། ལཱ་ཝཱ་རཱ་ཡཱ་ཧཱ། ཨཱལ་ཨཽ་ཨཱར་ཨཻ་ཨཱ། ལཱྀ་ཨཱུ་རཱྀ་ཨཱི་ཨཱ། རྣམས་ནག་ཕྱོགས་ལ་གྲངས་བཞིན་འཆར་རོ། །ཀ་སོགས་སྡེ་པའི་ཡི་གེ་སུམ་ཅུ་རྣམས་ལ་རང་བཞིན་ཡོན་ཏན་དབང་གིས་དབྱངས་སུམ་ཅུ་པོ་དེ་མཐའ་དག་སྦྱར་བར་བྱ་བ་སྟེ། དབྱངས་ཐུང་ངུ་རྣམས་དང་དབྱངས་ཐུང་ངུ་ལྡན་པའི་གསལ་བྱེད་རྣམས་ནི་འདིར་ཡང་དཀར་པོའི་ཕྱོགས་ལ་འཆར་པར་འགྱུར་ཏེ་དེ་ལྟར་རྩ་བའི་དབྱངས་ཀྱི་དེ་ཉིད་ལྔ་ཡི་དབྱེ་བས་སོ། །དབྱངས་རིང་པོ་དང་དབྱངས་རིང་པོས་བརྗོད་པའི་གསལ་བྱེད་རྣམས་ནི་ནག་པོའི་ཕྱོགས་ལ་ཤིན་ཏུ་ངེས་པར་འཆར་བར་འགྱུར་ཏེ་ལྷོ་བགྲོད་དུ་ཐུང་ངུ་སྤྲོ༷་བ་སྐྱེ་བའི་རིམ་པ་དང་བྱང་བགྲོད་དུ་རིང་པོ་བསྡུ་བའི་རིམ་པའི་སྦྱོར་བས་སོ། །ཞེས་པ་ཚེས་ཞག་ལ་འཆར་བའི་དབང་དུ་བྱས་པའོ། །སྔར་ཚིགས་བཅད་བརྒྱད་པར་གསལ་བྱེད་རྣམས་རང་བཞིན་གྱི་དབྱངས་དང་། ཡོན་ཏན་དང་འཕེལ་བ་དང་། ཡ་ཎ་རྣམས་ཀྱིས་ཕྱེ་བ་སྟོང་བརྒྱད་ཅུར་བཤད་པ་ནི་ཉི་ཁྱིམ་འཕོ་བའི་ཕྱོགས་ཀྱི་ས་བོན་དུ་བསྟན་པ་སྟེ། ལྷོར་བགྲོད་ཀྱི་ས་བོན་རྣམས་སྐྱེ་རིམ་དང་མཐུན་པར་དབྱངས་ལུགས་འབྱུང་དང་། བྱང་བགྲོད་ཀྱི་ས་བོན་རྣམས་སྡུད་རིམ་དང་མཐུན་པར་དབྱངས་ཡིག་ལུགས་ལས་ལྡོག་པའི་སྒོ་ནས་གསུངས་སོ། །དེ་ནས་དུས་སྦྱོར་བརྟག་པ་གསུངས་པ། ཉི་ཤུ་རྩ་བདུན་གྱི་རྒྱུ་སྐར་དག་གི་གནས་སམ་ཡུལ་གྱི་ཆུ་ཚོད་མཁའ་མིག་རྒྱལ་པོ་ལས་རྒྱུ་སྐར་རེ་རེའི་ཡུལ་གྱི་ཆུ་ཚོད་དྲུག་ཅུ་
ལ་རྐང་པ་བཞིར་བྱས་པའི་དང་པོ་ཆུ་ཚོད་བཅོ་ལྔ། གཉིས་པ་སུམ་ཅུ། གསུམ་པ་ཞེ་ལྔ། བཞི་པ་དྲུག་ཅུའི་བར་ལ་རྒྱུ་སྐར་གྱི་རྐང་པ་བཞིའོ། །དེ་འདྲའི་རྐང་པ་དགུ་རེ་ཁྱིམ་གཅིག་ཏུ་འགྱུར་བས། ཐ་སྐར་དང་བྲ་ཉེའི་རྐང་པ་བཞི་དང་། སྨིན་དྲུག་གི་རྐང་པ་དང་པོའི་བར་ནི་ལུག་གི་ཁྱིམ་མོ། །དེ་བཞིན་དུ་རྐང་པ་གཅིག་དང་བཅས་པའི་སྐར་མ་གཉིས་ཀྱིས་ཁྱིམ་རེ་རྫོགས་པ་ཡི་ཁྱིམ་རེ་རེ་ས་འདིར་འཆར་བའི་དུས་དེ་ལ་དུས་སྦྱོར་ཞེས་བྱ་སྟེ། དུས་སྦྱོར་བཅུ་གཉིས་པོ་དེ་དག་ཉིན་ཞག་གཅིག་ལ་འཆར་བས་ན་སྤྱི་ཁྱབ་ཀྱི་དབང་དུ་བྱས་ནས་དུས་སྦྱོར་དེ་ལ་གསལ་བར་མདའ་ཡི་ཆུ་ཚོད་དེ་ལྔ་ཡི་ཚད་ཅན་གྱི་ཉི་མའི་ཞེས་བཅུ་གཉིས་ཀྱི་དུས་སྦྱོར་གང་ཞིག་རྒྱུ་སྐར་གྱི་རྐང་པ་ཆ་དགུ་པ་ཅན་ཡིན་ནོ། །དེ་ལྟར་ལུག་གི་དུས་སྦྱོར་ལ་སོགས་པ་འདི་དག་རྣམས་ཀྱང་འདིར་ནི། རང་བཞིན་གསུམ་སྟེ། བརྟན་པ་དང་། གཡོ་བ་དང་། ཤིན་ཏུ་མཉམ་པའམ། བར་མ་གསུམ་མོ། །དེ་ཇི་ལྟར་ན། ལུག་དང་ཀརྐ་ཊ་དང་སྲང་དང་ཆུ་སྲིན་བཞི་པོ་འདིར་ནི་གཡོ་བ་དག་སྟེ་རྡུལ་གྱི་ཡོན་ཏན་ཅན་ནོ། །སྔ་མ་དེ་དག་ལས་གཉིས་པ་གླང་སེང་སྡིག་བུམ་བཞི་པོ་སྙིང་སྟོབས་ཀྱི་ཡོན་ཏན་ཅན་བརྟན་པའོ། །ལྷག་མ་གཞན། འཁྲིག་པ་བུ་མོ་གཞུ་དང་ཉ་བཞི་ནི། བརྟན་གཡོ་གཉིས་ཀྱི་རང་བཞིན་མུན་པའི་ཡོན་ཏན་ཅན་ནོ། །དུས་སྦྱོར་བཅུ་གཉིས་པོ་དེ་དག་ཉིན་དང་མཚན་མོའི་དུས་སུས་ཡི་སྟེང་དུ་རྟག་པ་ཉིད་དུ་འཆར་ཏེ་གོ་ལ་བགྲོད་པའི་དབང་གིས་སོ། །དུས་སྦྱོར་གཡོ་བ་འཆར་བའི་དུས་སུ་ལས་དོན་ཅི་འདྲ་འདྲི་བ་བྱུང་ན་བྱ་བ་མྱུར་དུ་འགྲུབ་བོ། །བརྟན་པ་རྣམས་ལ་བརྟན་པ། བར་མ་རྣམས་ལ་མྱུར་བུལ་འབྲིང་པོ་ཙམ་དུ་འགྱུར་རོ། །དེ་ལ་སོགས་པ་དུས་སྦྱོར་གྱི་འབྲས་རྩིས་རྣམས་ཀྱང་ཤེས་པར་བྱའོ། །དེ་ལྟར་ཆུ་ཚོད་དྲུག་ཅུ་ལ་དུས་སྦྱོར་བཅུ་གཉིས་འཆར་བ་དེ་ཡང་ཡུད་ཙམ་སུམ་ཅུ་དང་། ཐུན་ཚོད་བརྒྱད་དང་དུས་སྦྱོར་ཕྱེད་པ་ཉེར་བཞི་ལ་སོགས་པའི་དུས་ཀྱི་ཆ་དུ་མའི་རྣམ་པ་དང་
ལྡན་པ་ལས། དེ་ལ་ཡུད་ཙམ་ཞེས་པ་ཆུ་ཚོད་གཉིས་རེའི་ཡུན་ཏེ་དེ་ལྟ་ན་ཞག་གཅིག་ལ་ཡུད་ཙམ་སུམ་ཅུ་རྣམས་སུ་ཡོད་པ་དང་། ཉིན་ཞག་གཅིག་གི་དུས་ལ་ཆུ་ཚོད་དག་ཀྱང་དྲུག་ཅུ་ཁོ་ན་སྟེ་དེ་ལས་ཆད་པ་དང་ལྷག་པ་ཡང་མེད་དོ། །ཡུད་ཙམ་སུམ་ཅུ་ལ་དབྱངས་ཡིག་འཆར་བའི་ཚུལ་ནི། གོང་དུ་ཚེས་ལ་འཆར་བའི་དབྱངས་སུམ་ཅུ་བཤད་པ་དེ་ཁོ་ན་ལྟར། དང་པོར་རང་ཚེས་གང་ཡིན་ཀྱི་དབྱངས་དེ་ནས་མགོ་བརྩམ་སྟེ་སུམ་ཅུའི་དབྱངས་རྣམས་ཉིན་ཞག་གཅིག་ལ་འདིར་ནི་འཆར་བར་འགྱུར་བ་ཉིད་དེ་ཡུད་ཙམ་དང་ཡུད་ཙམ་རེ་རེ་དག་ལ་རིམ་བཞིན་འཆར་བའོ། །ཀ་སོགས་སྡེ་པའི་ཡི་གེ་སུམ་ཅུ་པོ་ཆུ་ཚོད་རྣམས་ལ་རབ་ཏུ་འཆར་བར་འགྱུར་ཏེ། གཡོན་པའི་དུས་སྦྱོར་ལ་ཐུང་ངུ་དང་གཡས་ལ་རིང་པོ་དག་ཏུ་རབ་ཏུ་དབྱེ་བས་ཡི་གེ་དྲུག་ཅུ་ཆུ་ཚོད་དྲུག་ཅུ་ལ་འཆར་བར་འགྱུར་རོ། །ཚེས་ཞག་གི་དབང་དུ་བྱས་ཏེ་ཟླ་བའི་ཆ་ཡི་ཞག་དེའི་དབུས་སུ་ཚེས་ཞག་གི་ཆ་སུམ་ཅུར་བྱས་པའི་ཚེས་ཀྱི་ཆ་ལ་ཡུད་ཙམ་རེ་བྱས་ཏེ། དེ་ལ་རང་ཚེས་ཀྱི་ཡི་གེ་སྔར་བཤད་ལས་བརྩམ་ནས་དབྱངས་སུམ་ཅུ་འཆར་བར་བརྗོད་དེ། དཀར་ཕྱོགས་ཀྱི་ཚེས་གཅིག་ལ་ཨ། གཉིས་པར་ཨི་སོགས་ནས། ཉ་ལ་ལ་ཡིག་འཆར་ཞིང་སོ་སོའི་ཚེས་ཀྱི་དབྱངས་དེ་ནས་མགོ་བརྩམ་སྟེ་དབྱངས་སུམ་ཅུ་སྤྲོ་བའི་རིམ་པས་ཚེས་དེའི་ཆ་ལ་འཆར་རོ། །ནག་ཕྱོགས་ཀྱི་ཚེས་གཅིག་ལ་ལཱ། གཉིས་པར་ཝཱ་སོགས་ནས། སྟོང་ལ་ཨཱ་འཆར་བའི་བར་དུ་གོང་བཤད་བཞིན་ལ། སོ་སོའི་ཚེས་ཞག་དེར་རང་ཚེས་ཀྱི་ཡི་གེས་མགོ་དྲངས་ནས་དབྱངས་སུམ་ཅུ་སྡུད་པའི་རིམ་པ་སྟེ་ལུགས་ལྡོག་ཏུ་འཆར་བར་འགྱུར་རོ། །དབྱངས་དེ་དག་ནུབ་པ་དག་ཀྱང་ཡུད་ཙམ་གྱི་ཆ་དེ་ཉིད་ལ་རྩི་བར་བྱ་སྟེ། དབྱངས་གང་ཤར་བ་དེ་ནས་བགྲང་བས་བཅུ་དྲུག་པའི་དུས་སུ་ནུབ་པར་འགྱུར་ཏེ། དཀར་པོའི་ཚེས་གཅིག་ལ་ཤར་བ་སྟེ་ནག་པོའི་ཚེས་གཅིག་ལ་ནུབ་པ་དང་།
དཀར་པོའི་ཚེས་གཉིས་ལ་ཤར་བ་དེ་ནག་པོའི་ཚེས་གཉིས་ལ་ནུབ་པ་ལ་སོགས་སུ་ཤེས་པར་བྱའོ། །སྟོང་པ་མཁའ་དང་རླུང་དང་མེ་དང་ཆུ་དང་ས་རྣམས་དག་ཀྱང་ཨ་ལ་སོགས་པ་དབྱངས་ནི་ལྔ་པོ་རྣམས་ཀྱི་ཁམས་སམ་རིགས་ཡིན་ནོ། །ཨ་ཐུང་སྒྲ་གཅན་དང་ཨཱ་རིང་དུས་མེ་དང་། ཨི་ཐུང་རིང་ཟླ་བ་དང་ཉི་མ། རྀ་ཐུང་རིང་དག་ཟླ་སྐྱེས་དང་མིག་དམར། ཨུ་ཐུང་རིང་པ་སངས་དང་བླ་མ། ལྀ་ཐུང་རིང་དག་རིམ་བཞིན་མཇུག་རིངས་དང་སྤེན་པ་ནི་འདིར་དབྱངས་རྣམས་ཀྱི་ལྷག་པའི་ལྷ་ཡིན་ནོ། །སྔར་བརྗོད་པ་ལྟར་གྱི་དུས་སྦྱོར་རེ་རེ་དེ་ལ་ཉིན་དང་མཚན་མོའི་དབང་གིས་ཆུ་ཚོད་ལྔ་ཡོད་པ་དེ་ལ་རང་བདག་གི་གཟའ་ཤར་བ་རྣམས་ནི་སྐབས་དེ་དང་དེའི་དུས་སུ་བསྒྲུབ་པར་བྱ་སྟེ། ལྔ་པོ་དེ་ཡི་དབུས་སུ་དབྱངས་གང་བྱུང་བའི་བདག་པོའི་གཟའ་ཞེས་བྱ་བ་སྟོབས་དང་ལྡན་པ་ཡི་དུས་ཡིན་པས། གཟའ་དེ་ཡིས་ཞེས་དེ་ཡི་དུས་ཀྱི་སྒོ་ནས་དཀྱིལ་འཁོར་ས་སོགས་འབྱུང་ཁམས་དང་གཟའ་ཡི་ཁམས་དང་མཚུངས་པའི་ལས་རྣམས་དེ་དུས་ཤར་བའི་དབྱངས་དེའི་མིང་ཅན་རྣམས་ཀྱིས་བསྒྲུབ་པར་བྱ་སྟེ་དེ་ལྟར་བྱས་ན་འབྲས་བུ་ཡོད་པར་འགྱུར་རོ། །དོན་དེ་ཉིད་རྒྱས་པར་གསུངས་པ་སྣ་བུག་གཡོན་པ་དག་ནས་རྐྱང་མ་ཁུ་བ་ཐབས་ཀྱི་ཆར་གྱུར་པའི་ཆ་ནས་ཐུང་ངུའི་དབྱངས་རྣམས་འདིར་ནི་འཆར་བར་འགྱུར་ཏེ་ཨ་ལ་སོགས་པ་རིམ་པར་ལྀའི་བར་དུའོ། །གཡས་པ་རོ་མ་རྡུལ་ཉི་ཤེས་རབ་ཀྱི་ཆར་གྱུར་པ་ནས་ཀྱང་གཞན་དབྱངས་རིང་པོ་ལྔ་པོ་ལཱྀ་ནས་ཨཱའི་བར་དུ་རིམ་མིན་དུ་འཆར་བ་དག་གོ། གཡོན་པའི་དུས་སྦྱོར་ལ་སྟོང་པ་ལ་སོགས་ཁམས་ལྔ་ཡི་དེ་ཉིད་སྐྱེད་རིམ་གྱིས་འཆར་བ་དག་དང་དེའི་བདག་པོ་གཟའ་ཡི་ཚོགས་རྒྱུ་བ་སྒྲ་གཅན་ལ་སོགས་པ་བསོད་ནམས་ཀྱི་གཟའ་མཐའ་དག་སྟེ། སྟོང་པའི་བདག་པོ་སྒྲ་གཅན་དང་། རླུང་གི་བདག་པོ་ཟླ་བ། མི་ཡི་བདག་པོ་ལྷག་པ། ཆུ་ཡི་བདག་པོ་པ་སངས། ས་ཡི་བདག་པོ་མཇུག་རིངས་ཏེ་འདི་ཡི་དུས་སུ་ཞི་བ་དང་
རྒྱས་པའི་ལས་རྣམས་བསྒྲུབ་པ་དགེ་ལ། མཇུག་རིངས་ཀྱང་གཡོན་གྱི་ཡན་ལག་ལས་བྱུང་བའི་ལུས་ཀྱི་དབང་དུ་ཞི་བ་བསོད་ནམས་ཀྱི་གཟར་སྐབས་འདིར་ངེས་པར་འགྱུར་རོ།།14ཁྱད་པར་ལས་སྒྲུབ་པར་བྱེད་པ་པོ་རང་གི་མིང་ཐོག་གི་དབྱངས་འཆར་བ་དང་འགྲིགས་པས་བསྒྲུབ་ན་ཚེགས་ཆུང་ངུས་འབྲས་བུ་ཆེན་པོར་འགྱུར་རོ། །གཡས་ཀྱི་དུས་སྦྱོར་ལ་དེ་ཉིད་ལྔ་ནི་འཛིན་མ་སྟེ་ས་ལ་སོགས་པ་ལྔ་སྡུད་རིམ་གྱིས་འཆར་བ་དང་བདག་པོའི་གཟའ་ཡི་ཚོགས་ནི་ངེས་པར་ཉི་མའི་བུ་ལ་སོགས་པ་ཉིད་ཡིན་ཏེ། ས་ལ་སྤེན་པ། ཆུ་ལ་ཕུར་བུ། མེ་ལ་མིག་དམར། རླུང་ལ་ཉི་མ། མཁའ་ལ་དུས་མེ་འཆར་བའི་ཚེ་ཞི་ལས་ལ་མི་ལེགས་ཤིང་དྲག་པོའི་ལས་ལ་བཟང་ངོ་། །ཕུར་བུ་ཡང་སྐབས་གཞན་དུ་བསམ་པའི་དབང་གིས་ཞི་བ་དང་བསོད་ནམས་ཀྱི་གཟར་གཏོགས་པ་ཡོད་ཀྱང་སྐབས་འདིར་གཡས་ཀྱི་ཡན་ལག་ལས་བྱུང་བའི་ཕྱིར་དྲག་གཟར་འགྱུར་རོ། །དེ་ལྟར་གཡས་ཀྱི་ཁྱིམ་རྣམས་མི་མཉམ་པ་དང་ཕོ་དང་དྲག་པོ་དང་། གཡོན་ཁྱིམ་རྣམས་དེ་ལས་ལྡོག་པའོ། །འདི་དག་ནང་ང་གི་འཕོ་བའི་དུས་སྦྱོར་དང་བསྟུན་ན་ཆེས་ཤིན་ཏུ་སྟོབས་དང་ལྡན་ལ། དེ་ལྟར་མི་ནུས་པས་ཕྱི་རོལ་ཏུ་ཡང་ཁྱིམ་བཅུ་གཉིས་འཆར་བའི་དུས་སྦྱོར་གྱི་དུས་ཀྱི་ཆུ་ཚོད་དང་། བདག་པོའི་གཟའ་ཡི་གནས་ཆུ་ཚོད་ལྔ་དང་མཉམ་པ་སྟེ་དེ་དང་ལྷན་ཅིག་འཆར་བའི་དབྱངས་གསལ་བྱེད་དང་བཅས་པ་དག་ནི་ལེགས་པར་བརྩིས་ནས་ཆེད་དུ་བསྒྲུབ་པར་བྱ་བ་ཡིན་ནོ། །ཞེས་འདི་དག་གི་གནད་ཚུལ་བཞིན་ཤེས་ཤིང་དང་དུ་བླངས་ན་ལས་བསྒྲུབ་པ་དོན་ཡོད་པར་བྱེད་པའི་མན་ངག་ཟབ་མོ་འབྲས་རྩིས་ཐམས་ཅད་ཀྱི་ནང་ན་སྙིང་དང་སྲོག་ལྟ་བུར་གྱུར་པ་ཡིན་ནོ། །སྣ་བུག་གཡས་གཡོན་གྱི་དཀྱིལ་འཁོར་བཅུ་དང་གཟའ་བཅུའི་དུས་སྦྱོར་འཆར་བ་དེ་ལས། གཡུལ་གྱི་སླད་དུ་དྲིས་ན་འབྲས་བུ་ལུང་སྟོན་
ཚུལ་གསུངས་པ། གང་ཞིག་གིས་དུས་སྦྱོར་འདི་དག་ཤར་བའི་དུས་སུ་དྲིས་ན་འདི་ལྟར་ལུང་སྟོན་ཏེ། གཡུལ་རྒྱལ་ཕམ་གྱི་སླད་དུ་ཡིན་ན་འདྲི་བ་པོའི་ཕྱོགས་གང་གི་མིང་དང་པོར་སྨྲོས་པ་སོགས་ནི་འཆི་བར་འགྱུར་ཏེ། གང་ཞེ་ན་གཡས་ཀྱི་དུས་སྦྱོར་སྟོང་པ་ལ་ནི་དུས་ཀྱི་མེ་དག་ཤར་བར་གྱུར་པ་ནའོ། །དེ་བཞིན་དུ་རླུང་དུ་ཉི་མ་དག་ལ་འདྲི་བ་པོའི་ཕྱོགས་དེ་ཉིད་གཡུལ་འཕམ་ཞིང་། མེ་ལ་ས་སྐྱེས་ཤར་བ་དག་ལ་གཡུལ་དུ་ལུས་ལ་རྨ་རུ་འགྱུར་བ་ཡིན་ནོ། །ཆུ་དང་བླ་མ་ལ་ནི་འཁྲུག་པ་འདུམ་པར་འགྱུར་ཏེ། ས་ལ་སྤེན་པ་ཤར་བར་གྱུར་པ་ལ་དྲིས་ན་བརྟན་པའི་དབང་གིས་འཁྲུག་པར་མི་འགྱུར་རོ། །གལ་ཏེ་ནད་པའི་དོན་དུ་འདྲི་ན་སྟོང་པ་དུས་མེ་ནས་ས་ལ་སྤེན་པའི་བར་དུ་རིམ་པ་བཞིན་འཆི་བ་དང་ནད་ཀྱིས་མནར་བའམ་ཉོན་མོངས་པ་དང་། ལུས་ལ་རྨར་འགྱུར་བ་དང་། ནད་མེད་པར་བདེ་བ་དག་ཏུ་འགྱུར་བ་དང་། མཉམ་པ་སྟེ་བཏང་སྙོམས་པ་ཉིད་ནི་འདྲི་བྱེད་ནད་པ་རྣམས་ཀྱིའོ། །གཡོན་གྱི་དཀྱིལ་འཁོར་གྱི་དུས་སུ་ནི། གང་ཞིག་གཡུལ་དུ་དགྲ་ནི་ངེས་པར་རབ་ཏུ་ཉམས་པར་འགྱུར་ཏེ། གང་གིས་ན་སྒྲ་གཅན་སྟོང་པ་དག་ལ་ཤར་བའི་དུས་སུ་གཡུལ་གྱི་དོན་འདྲི་བར་བྱེད་ནའོ། །ཡང་ཡིག་ནི་རྐང་པ་ཁ་བསྐང་བའི་དོན་ཏོ། །རླུང་དང་ཟླ་བ་དག་ལ་ཕ་རོལ་དགྲ་རྣམས་འཕམ་པ་དང་། གཡུལ་དུ་དགྲ་ལ་རྨ་འབྱུང་བ་ཡང་ཟླ་སྐྱེས་མེ་ལ་ཤར་བ་དག་ལ་འདྲི་བ་ལའོ། །ཆུ་ལ་པ་སངས་ཤར་བ་ལ་ནི་འདྲི་བ་པོས་དོན་རྙེད་པར་འགྱུར་ཞིང་ས་ལ་མཇུག་རིངས་ཤར་བ་དག་ལ་དགྲ་ཡང་དབང་དུ་འགྱུར་རོ། །ནད་པ་ལའང་འཚོ་བ་དང་ཟུག་རྔུ་མེད་པར་བདེ་བའི་འབྲས་བུར་འགྱུར་བ་ཤུགས་ཀྱིས་བསྟན་ཏོ། །གཡུལ་གྱིས་མཚོན་ནས་བྱ་བ་གཞན་རྣམས་ཀྱང་དེ་བཞིན་དུ་ཤེས་པར་བྱ་སྟེ་ཡུལ་གཞན་དུ་བགྲོད་པ་དང་བག་མ་ལེན་པ་དག་ལ་གཡོན་གྱི་ལམ་ལ་གནས་པའི་གཟའ་རྣམས་ཤར་བ་ཉིད་ཀྱིས་ནི་དགེ་བའི་འབྲས་བུར་
འགྱུར་ཏེ། ཅིག་ཤོས་མི་དགེ་བར་ཤུགས་ཀྱིས་བསྟན་ཏོ། །དེ་ལྟར་ལས་རྩོམ་པའམ་གཞན་གྱིས་བླང་དོར་འདྲི་ན་ནང་དང་ཕྱིའི་དུས་སྦྱོར་གྱི་དུས་ཀྱི་འབྱུང་བ་དང་གཟའ་དང་ཡི་གེ་ལ་བརྟེན་ནས་བླང་དོར་ཤེས་པར་བྱའོ། །འདི་ཤིན་ཏུ་གནད་ཆེ་བའི་ཕྱིར་ནང་དང་ཕྱིའི་དུས་སྦྱོར་བཅུ་གཉིས་ཀྱི་ཆུ་ཚོད་ལ་ཡི་གེ་འཆར་ཚུལ་འགྲེལ་པས་རྒྱས་པར་གསུངས་པ་མདོར་བསྡུས་ཏེ་བཀོད་ན། གཡས་ཀྱི་རྒྱུ་བ་མཉམ་པའི་དུས་སྦྱོར་ཆུ་སྲིན་གྱི་འབྱུང་ཆུང་ཆུ་ཚོད་ལྔ་ལ་རིམ་པ་བཞིན་ཨཱ་སོགས་དབྱངས་རིང་པོ་ལྔ་འཆར་ཞིང་། གསལ་བྱེད་ནི་སྐབས་འདིར་བརྗོད་དོན་དུ་བཅུག་པའི་ཨཱ་རིང་པོ་སྲོག་ཏུ་ཞུགས་པའི་ཀ་སོགས་ལྔ་རིམ་པས་འཆར་ཏེ། ཆུ་ཚོད་དང་པོ་ས་དཀྱིལ་ལ་ཀཱ། གཉིས་པ་ཆུ་ལ་ཁཱ། གསུམ་པ་མེ་ལ་གཱ། བཞི་པ་རླུང་ལ་གྷཱ། ལྔ་པ་སྟོང་དཀྱིལ་ལ་ངཱའོ། །དེ་ལྟར་ཀཱ་ལ་སོགས་པའི་གསལ་བྱེད་ལྔ་ཨཱ་ཡིག་སྲོག་ཏུ་ཞུགས་ནས་བརྗོད་པ་དེ་བཞིན་དུ་རྩ་བའི་དབྱངས་ལྷག་མ་དང་། དེའི་ཡོན་ཏན་ལྔ་དང་། འཕེལ་བ་ལྔ་རིང་པོས་བརྗོད་པའི་གསལ་བྱེད་རྣམས་ལྷན་ཅིག་ཏུ་འཆར་བ་དོན་གྱིས་ཤེས་པར་བྱའོ། །དེ་བཞིན་དུ་གཡོན་ནས་རྒྱུ་བ་མི་མཉམ་པའི་ཁྱིམ་བུམ་པ་ལ་སྟོང་པ་ལ་སོགས་པའི་དཀྱིལ་འཁོར་ལྔ་ལ་དབྱངས་ཐུང་ངུས་བརྗོད་པའི་ང་ལ་སོགས་པ་ལུགས་ལྡོག་ཏུ་འཆར་ཏེ། ཆུ་ཚོད་དང་པོ་ནམ་མཁའི་དཀྱིལ་འཁོར་ལ་ང་། གཉིས་པ་རླུང་ལ་གྷ། གསུམ་པ་མེ་ལ་ག །བཞི་པ་ཆུ་ལ་ཁ། ལྔ་པ་ས་ལ་ཀ་འཆར་བ་ཡང་གོང་བཞིན་ཤེས་པར་བྱའོ། །དེ་བཞིན་དུ་རིགས་བསྒྲེས་ཏེ། ཉ་ལ་ཙཱ་ཚཱ་ཛཱ་ཛྷཱ་ཉཱ། ལུག་ལ་ཉ་ཛྷ་ཛ་ཚ་ཙ། གླང་ལ་ཊཱ་ཋཱ་ཌཱ་ཌྷཱ་ཎཱ། འཁྲིག་པར་ཎ་ཌྷ་ཌ་ཋ་ཊ། ཀརྚ་ར་པཱ་ཕཱ་བཱ་བྷཱ་མཱ། སེང་གེར་མ་བྷ་བ་ཕ་པ། བུ་མོར་ཏཱ་ཐཱ་དཱ་དྷཱ་ནཱ། སྲང་ལ་ན་དྷ་ད་ཐ་ཏ། སྡིག་པར་སཱ་ཉྤཱ་ཥཱ་ཤཱ་ྈྐ་། གཞུ་ལ་ྈྐ་ཤ་ཥ་ྉྤ་ས་སྟེ། དེ་ལྟར་དུས་སྦྱོར་བཅུ་གཉིས་ཀྱི་ཆུ་ཚོད་འབྱུང་ཆུང་ལྔ་ལ་གསལ་བྱེད་འདི་རྣམས་
ནི་ལྷག་པའི་ལྷའོ། །གསལ་བྱེད་བརྗོད་པའི་དབྱངས་ཏེ་དབྱངས་མེད་པའི་གསལ་བྱེད་རྐྱང་པ་བརྗོད་དུ་མེད་པས་ན་དབྱངས་བརྗོད་དོན་དུ་ཤུགས་ཀྱིས་འཇུག་པ་ཡིན་པས་གསལ་བྱེད་ཀྱི་སྲོག་ཏུ་ཞུགས་པའི་དབྱངས་ནི་གསལ་བྱེད་ཀྱི་ཡི་གེའི་དབྱངས་སུ་འགྱུར་ཞིང་། དབྱངས་རྐྱང་པར་འཆར་བ་ནི་སྲོག་གི་དབྱངས་སུ་འགྱུར་རོ། །སྲོག་གི་དབྱངས་དེ་ཡང་ཟླ་བའི་ཚེས་ཀྱི་ཆ་ལ་ཐུང་ངུ་དང་རིང་པོའི་དབྱེ་བ་དང་། ཡུད་ཙམ་གྱི་དབྱེ་བ་སྔར་བརྗོད་པ་ལས་ཤེས་པར་བྱའོ། །གསལ་བྱེད་འཆར་བ་ནི་དུས་སྦྱོར་གྱི་ཆུ་ཚོད་ལྔ་ཡི་དབྱེ་བས་ཤེས་པར་བྱའོ། །འདིར་གཡུལ་དུ་འཇུག་པའི་དུས་སུ་དེའི་སྲོག་གི་དབྱངས་ནུབ་པར་གྱུར་ན་འཆི་ཞིང་ནད་པ་ལའང་དེ་བཞིན་ནོ། །གསལ་བྱེད་ཀྱི་ཡི་གེའི་སྲོག་གི་དབྱངས་ནུབ་ན་གཡུལ་དུ་རྨ་འབྱུང་ཞིང་ནད་པ་ལ་ཉོན་མོངས་པར་འགྱུར་རོ། །གང་ལ་མིང་གི་དང་པོ་དབྱངས་ཡིག་ཏུ་གྱུར་ནས་གསལ་བྱེད་མེད་པ་དེ་ལ་དབྱངས་དེ་ཉིད་སྲོག་གི་དབྱངས་སོ། །ཅིག་ཤོས་མིང་གི་དང་པོ་གསལ་བྱེད་ཡིན་པ་ལ་ནི་གསལ་བྱེད་སྲོག་ཏུ་ཞུགས་པ་ཡི་གེའི་དབྱངས་ནི་སྲོག་གི་དབྱངས་སོ། །དེ་ལྟར་ན་གཡོན་དང་གཡས་ཀྱི་སྣ་བུག་ལས་དཀྱིལ་འཁོར་ལྔ་འབབ་པའི་དབྱེ་བས་གསལ་བྱེད་འཆར་བ་ཤེས་པར་བྱའོ། །འདི་སྐབས་སུ་གཞུང་གཞན་ལས་ཁྱིམ་རང་གི་དབང་དུ་བྱས་ཏེ་ལུག་སོགས་དྲུག་མི་མཉམ་པ་ཕོ་ཁྱིམ་དང་། གླང་སོགས་མཉམ་པ་མོ་ཁྱིམ་དུ་བྱེད་པ་དང་། ལུས་ཀྱི་གཡས་རོ་མ་ཐབས་དང་། གཡོན་རྐྱང་མ་ཤེས་རབ་ཏུ་བཤད་པ་དང་། སྐབས་འདིར་རོ་མ་ལས་རྡུལ་ཉི་མའི་ཁམས་འབབ་པའི་དབང་གིས་གཡས་ཕྱོགས་ཤེས་རབ་ཡུམ་གྱི་ཆ་འབྱུང་བ་སྡུད་པའི་རིམ་པས་འཆར་བ་དང་། རྐྱང་མར་ཟླ་བའི་ཁམས་ཁུ་བ་འབབ་པའི་དབང་གིས་གཡོན་ཕྱོགས་ཐབས་ཡབ་ཀྱི་ཆ་འབྱུང་བ་སྐྱེད་པའི་རིམ་པས་འཆར་བར་གསུངས་པ་སྐབས་དོན་སོ་སོའི་དགོངས་པ་ཤན་ཕྱེས་ཏེ་གོ་
དགོས་ཀྱི། གཞན་དུ་ན་མགོ་རྨོངས་པར་འགྱུར་རོ། །དེ་ཡང་སྣ་བུག་གཡས་ནས་རྒྱུ་བ་ཕོ་ཡི་ཆ་དང་ཕྱི་རོལ་གྱི་ལྷོ་བགྲོད་མི་ཤིས་པ་དང་། གཡོན་རྒྱུ་མོ་དང་བྱང་བགྲོད་ཀྱི་ཕྱོགས་དང་ཤིས་པར་བརྩི་བ་ལ་ནི་མི་མཐུན་པ་མེད་ཀྱང་། གཡས་རྒྱུ་ཀརྐ་ཊ་ནས་ལྷོ་བགྲོད་ཀྱི་ཁྱིམ་དྲུག་དང་། གཡོན་རྒྱུ་ཆུ་སྲིན་ནས་བྱང་བགྲོད་ཀྱི་ཁྱིམ་དྲུག་དང་སྦྱར་བ་ནི་སྣ་གཡས་གཡོན་གྱི་དཀྱིལ་འཁོར་ལྔ་ཁྱིམ་རེ་དང་། ཀརྐ་ཊ་དང་ཆུ་སྲིན་སྤྱིར་བྱས་ཏེ་དབང་ཕྱུག་གིས་སྦྱར་བ་གཡུལ་རྒྱལ་དབྱངས་འཆར་གྱི་རྒྱུད་དུ་གསུངས་པ་དུས་སྦྱོར་བ་བཅུ་གཉིས་ཇི་ལྟར་འཆར་ཚུལ་དང་སྦྱར་བ་མ་ཡིན་ཏེ་གཡས་གཡོན་གྱི་དཀྱིལ་འཁོར་ལྔའི་ང་རྒྱུ་ཚུལ་དང་སྦྱར་བ་ཡིན་ལ། འདིར་ཡང་དབྱངས་ཐུང་ངུ་ལྔ་གཡོན་དང་། རིང་པོ་ལྔ་གཡས་ནས་འཆར་བར་གསུངས་པ་དཀྱིལ་འཁོར་བཅུའི་དབང་དུ་བྱས་པའོ། །ལུགས་འདིར་ཕྱི་རོལ་ཁྱིམ་གྱི་དུས་སྦྱོར་བཅུ་གཉིས་པོ་ཇི་ལྟར་འཆད་པ་ལྟར་ནང་དུ་ཞག་གཅིག་ལ་གཡས་གཡོན་གྱི་འཕོ་བ་བཅུ་གཉིས་འབྱུང་བའི་དབང་དུ་བྱས་ན་ཆུ་ཚོད་ལྔ་རེའི་མཚམས་ནས་སྣ་གཡས་གཡོན་དུ་འཕོ་ལ། ལུག་སོགས་མི་མཉམ་པ་གཡོན་དང་། གླང་སོགས་མཉམ་ཁྱིམ་དྲུག་གཡས་ནས་རྒྱུ་བས། མི་མཉམ་པའི་ཁྱིམ་དྲུག་ཐབས་ཀྱི་ཆ་ལ་དབྱངས་གསལ་ཐུང་ངུ་ལུགས་འབྱུང་དུ་འཆར་བ་དགེ་བ་དང་། མཉམ་ཁྱིམ་ཤེས་རབ་ཀྱི་ཆ་དྲུག་ལ་དབྱངས་གསལ་རེང་པོ་ལུགས་ལྡོག་ཏུ་འཆར་བ་མི་དགེ་ལ། ཕྱི་རོལ་ཏུ་ལུག་སོགས་ཀྱི་ཁྱིམ་འབྱུང་བ་སྡུད་རིམ་གྱིས་འཆར་བ་དྲག་པོ་དང་མི་དགེ་ཞིང་། གླང་སོགས་དེ་ལས་ལྡོག་སྟེ་འབྱུང་བ་སྤྱོ་རིམ་གྱིས་འཆར་བ་ཞི་ཞིང་དགེ་བར་བཤད་པ་ཡིན་པས་དེ་ལྟར་མཉམ་མི་མཉམ་གྱི་ཁྱིམ་ཕྱི་དང་ནང་ལ་འཇོག་ཚུལ་གོ་བཟློག་པ་འདི་གཉིས་ཀྱི་གནད་མི་འགལ་བར་མ་གོ་ན་དགེ་མི་དགེ་གོ་བཟློག་གི་སྐྱོན་དུ་འགྱུར་རོ། །ད་ནི་ཕོ་ཉས་སྨྲས་པའི་དབྱངས་
ལས་གཟའ་བདུན་གྱི་རྩིས་གསུངས་པ། ཕོ་ཉས་དོན་གང་ཞིག་གི་ཆེད་དུ་དྲིས་པའི་ཚིག་གི་བརྗོད་པའི་དབྱངས་རྣམས་དུ་ཡོད་པ་གང་དག་བསྡོམ་སྟེ། གཡས་གཡོན་གྱི་དཀྱིལ་འཁོར་གྱི་གྲངས་སུ་གྱུར་པ་ངེས་པར་བཅུ་ཡིས་བསྒྱུར་ཏེ། ལྟེ་བའི་རྩ་འདབ་བཅུ་གཉིས་ཀྱི་རང་བཞིན་ཁྱིམ་གྱི་འཁོར་ལོ་བཅུ་གཉིས་ཀྱི་གྲངས་དག་གིས་དེ་ལ་བསྲེའོ། །སླར་ཡང་དེ་དག་དུས་སྦྱོར་རེ་རེའི་ཆུ་ཚོད་འབྱུང་བས་བསྣུན་ཏེ། མཚན་མ་མཁན་རང་ཉིད་མ་གཏོགས་པའི་ཐག་ཉེ་བ་དྲུང་དེར་མཐོང་བར་གྱུར་པའི་ཉེ་བའི་སྐྱེ་བོ་དུ་ཡོད་པའི་གྲངས་བསྲེས་པའམ་གྲངས་དང་ལྡན་པ་དེ་ལ་བགོ་བྱེད་བདུན་གྱི་ཆ་ཡི་གྲངས་ཀྱིས་དོར་བས་ལྷག་མ་ནི་གཟའ་བདུན་ཏེ། ཟླ་མེ་མདའ་དང་རི་བོ་སྟེ་བདུན་པའི་གནས་འཛིན་པ་ཐིག་ཡིན་ལ། དེ་ལྟར་གྲངས་མི་མཉམ་པའི་གནས་སུ་གྱུར་ན། འདྲི་བའི་མི་རྣམས་ལ་ནི་དོན་རྙེད་པ་འགྲུབ་པ་ཡོད་པ་མ་ཡིན་ནོ། །མིག་དང་རིག་བྱེད་རོ་སྟེ་ཤིན་ཏུ་མཉམ་པའི་གནས་སུ་གྱུར་ན་བྱ་བ་གང་གི་ཆེད་དུ་འདྲི་བ་དེ་དག་ཀྱང་ལེགས་པར་འགྲུབ་པར་འགྱུར་རོ། །འདི་ལ་དཔེར་བརྗོད་ན། བདག་རྒྱ་གར་དུ་སོང་ན་དོན་འགྲུབ་བམ། ཞེས་པ་ལྟ་བུ་ལ་ཚེགས་བར་འདོན་ཐང་སྤྱིར་བོད་སྐད་ཚེགས་བར་རེ་ལ་དབྱངས་རེ་ཡིན་ཀྱང་དེའི་ལྟ་བུ་ལ་ཨེ་དང་ཨིའི་དབྱངས་གཉིས་བརྩི་དགོས་ཞེས་བླ་མ་དག་གསུངས། མཆན། གི་དབྱངས་དགུ་པོ་ཕྱོགས་ཀྱིས་བསྒྱུར་བས་དགུ་བཅུ་རེ་ལ་བཅུ་གཉིས་བསྲེས་པས་བརྒྱ་དང་གཉིས། དེ་ལྔས་བསྒྱུར་བས་ལྔ་བརྒྱ་དང་བཅུ། དེ་ལ་དྲུང་གནས་སྐྱེ་བོ་གསུམ་ཡོད་པ་ལྟ་བུའི་དབང་དུ་བྱས་ཏེ་གསུམ་བསྲེས་ཁ་ཅིག་འདྲི་བྱེད་སྐྱེ་བོ་ཉེ་དྲུང་ན་ཡོད་ཀྱང་མི་བསྲེ་ཟེར་བ་མི་འཐད་ཅེས་བླ་མ་དག་གསུངས། མཆན། པས་ལྔ་བརྒྱ་བཅུ་གསུམ། དེ་བདུན་གྱིས་བགོས་པས་ལྷག་གཉིས་ནི་གཟའ་ཟླ་བ་ཤར་བ་ལྟ་བུའོ། །ས་རིས་མི་ཤེས་པ་དག་གིས་འདི་ཕྲེང་མོར་འདེབས་འདོད་ན་སྨྲས་དབྱངས་བསྡོམ་པའི་གྲངས་ལ་ཉེ་བའི་སྐྱེ་བོའི་གྲངས་བསྣན་ནས་དེ་ལས་
གསུམ་ཕྲི་བའམ། ཡང་ན་བཞི་བསྣན་ལ་བདུན་ཆོད་བྱས་པའི་ལྷག་མ་གང་བྱུང་དེ་ཡིན་ཏེ་སྔར་གྱི་ཆོ་ག་དང་བདུན་གྱི་ལྷག་མའི་བརྟག་བྱ་འདི་གནད་རྣམ་པ་ཀུན་ཏུ་གཅིག་པར་འགྱུར་རོ། །དུས་སྦྱོར་འདི་ལ་ལོ་སོགས་དུས་ཀུན་གྱི་རྩིས་ཀྱི་སྟོབས་ཚང་བར་འགྱུར་ཚུལ་གསུངས་པ། ལོ་དྲུག་ཅུ་དང་ཟླ་བ་བཅུ་གཉིས་དང་ཕྱོགས་ཉེར་བཞི་དང་ཉིན་དང་མཚན་མོའི་དུས་ཉིན་ཞག་ཕྲུག་གཅིག་གི་ཐུན་བརྒྱད་ཀྱི་དུས་ཀྱི་དབང་གིས་དགེ་བ་དང་མི་དགེ་བའི་འབྲས་བུའི་ཆ་ཐམས་ཅད་ནི་དུས་སྦྱོར་བཅུ་གཉིས་ཀྱི་དབུས་སུ་རབ་ཏུ་ཞུགས་པ་སྟེ། དེར་འདུ་ཞིང་དེའི་འབྲས་བུ་ལ་ནུབ་པའམ་མཐར་ཐུག་པར་གྱུར་པ་ཡིན་པས་དུས་ཀྱི་སྦྱོར་བའི་རྩིས་ཀྱི་སྟོབས་ལས་ཆེ་བ་གཞན་མེད་དེ་དུས་གཞན་འདི་དག་གི་སྟོབས་དུས་སྦྱོར་རྒྱུ་བ་ལས་གཞན་དུ་མེད་དོ། །དུས་སྦྱོར་གཅིག་ནི་ཆུ་ཚོད་ལྔ་ཡི་དབྱེ་བས་སོ་སོའི་བདག་པོའི་གཟའ་ཡི་ཚོགས་དང་ལྡན་ཞིང་དེ་དེའི་དབྱངས་དང་བཅས་པའི་དེ་ཉིད་ལྔ་སོ་སོར་ཐ་དད་དོ། །དེ་ལྟ་བུའི་དེ་ཉིད་གཅིག་གི་ཆུ་ཚོད་ནི་དབུགས་རྣམས་དྲུག་ཅུ་མངོན་པར་ལྷག་པ་ཡོན་ཏན་བརྒྱ་ཡི་ཞེས་སུམ་བརྒྱ་སྟེ་དེ་ལྟ་བུའི་དུས་ཀྱི་བདག་ཉིད་ཅན་ཆུ་ཚོད་གཅིག་པོ་དག་ལ་གནས་ཞེས་པ། ཆུ་ཚོད་གཅིག་ལ་22དབུགས་སུམ་བརྒྱ་དྲུག་ཅུ་ཡོད་ཅེས་སོ། །དེའི་རྒྱུ་མཚན་ཆུ་ཚོད་གཅིག་གི་ཆ་ཤས་ནི་ཆུ་སྲང་དྲུག་ཅུ་ཡིན་ལ་ཆུ་སྲང་དེ་ཡི་ཆ་ཤས་ཞེས་པ་དབུགས་དྲུག་རྣམས་སོ་མི་ཡི་དབང་པོ་ཟླ་བ་བཟང་པོ་ཞེས་སོ། །དེས་ན་རགས་པ་རགས་པར་གྱུར་པའི་དུས་རྣམས་ཀྱི་འབྲས་བུའི་རྩིས་ཀྱི་སྨིན་སོ་ཕྲ་བ་ཕྲ་བར་གྱུར་པའི་དུས་རྣམས་སུ་འཇུག་ཅིང་སྨིན་པ་དཔེར་ན་ས་བོན་དང་ས་ཆུ་སོགས་ཀྱི་ཡུན་རིང་བསྐྱེད་པའི་སྨིན་སོ་འབྲས་བུ་སྐྱེས་པའི་བྱ་རྫོགས་ཀྱི་སྐད་ཅིག་ལ་ཐུག་པ་བཞིན་ནོ། །འདིར་མཚན་མ་མཁན་པོའི་ལྟེ་བ་ནས་དབུགས་ཕྱིར་འབྱུང་བ་དང་ནང་དུ་ལྟེ་བར་རྩ་ཡི་འདབ་མར་སྲོག་འཇུག་པའི་དུས་སམ་
དབུས་སུ་དོན་གང་གི་བརྟག་བྱ་ཕོ་ཉ་བས་དྲིས་པར་གྱུར་ན་རིམ་བཞིན་མི་དགེ་བ་དང་དགེ་བའི་འབྲས་བུ་དག་ཀྱང་སེམས་རྣལ་མར་བག་ཕབ་པར་བྱས་པའི་རྣལ་འབྱོར་དང་ལྡན་པས་ཤེས་པར་བྱེད་དེ། རྡོ་རྗེའི་བཟླས་པ་སོགས་ཀྱིས་ནང་གི་རླུང་ལ་དབང་འབྱོར་བའི་རྣལ་འབྱོར་པ་རྣམས་ཀྱིས་རླུང་རྒྱུ་བའི་ཁ་དོག་དང་བྱེད་ལས་སོགས་རྣལ་འབྱོར་མངོན་སུམ་གྱིས་ཤེས་པར་འགྱུར་ལ། དེའི་དབང་གིས་རླུང་སྦྱོར་ལ་བརྟེན་ནས་ཞི་སོགས་ལས་སྣ་ཚོགས་བསྒྲུབ་པ་དང་གཞན་ལ་དགེ་མི་དགེའི་བླང་དོར་ལུང་སྟོན་པར་ནུས་སོ། །ཕྲ་བ་ནང་གི་རླུང་རྩིས་མི་ཤེས་ན། ལྷ་ཤེས་སམ་དུས་ཤེས་སམ་སྐར་རྩིས་པ་དུས་ཀྱི་མཚན་མ་ལས་གཞན་ལ་དགེ་མི་དགེ་ལུང་སྟོན་པར་འདོད་པ་རྣམས་ཀྱིས་ཉིན་ཞག་གི་ཆུ་ཚོད་ཇི་ཙམ་འདས་པའི་དབང་གིས་ཉི་མ་མི་མཉམ་པ་དང་ཟླ་བ་མཉམ་པའི་དུས་སྦྱོར་གྱི་རྩིས་ལེགས་པར་བརྩིས་པའམ་བསྒྲུབས་ནས་དཀྱིལ་འཁོར་ལྔའི་དུས་ཀྱི་ཆུ་ཚོད་ངོས་བཟུང་སྟེ་དེ་ལས་གཞན་ལ་ལུང་སྟོན་པར་བྱེད་དོ། །ད་ལྟར་གང་བྱུང་བ་ཡི་དུས་ཀྱི་ལྷ་དང་ཁམས་སོགས་དང་དུས་སྦྱོར་གྱི་ཚུལ་ཤེས་པ་མིན་པར་དགེ་བ་དང་མི་དགེའི་འབྲས་བུ་འདི་ལྟར་འབྱུང་ངོ་ཞེས་འཇིག་རྟེན་འདིར་ནི་གང་བརྗོད་པར་བྱེད་པ་དེ་ནི་ལམ་དུ་འཁྲིད་བྱེད་སྐྱེས་བུ་ལོང་བ་ཡིས་ཀྱང་ལམ་དུ་འཁྲིད་བྱ་ལོང་བ་ཡི་ཚོགས་རྣམས་བཟུང་བའམ་ཁྲིད་ནས་གླང་ཆེན་དང་སེང་གེས་རབ་ཏུ་གང་བའམ་ཡོངས་སུ་གཏམས་པའི་ནགས་ཁྲོད་ཐིབ་པོར་རབ་ཏུ་འཇུག་པ་དང་འདྲ་བར་རང་དང་གཞན་ཕུང་བར་བྱེད་དོ་ཞེས་སོ། །དེའི་ཕྱིར་ན་ནང་གི་རླུང་རྩིས་ཕྲ་མོའི་རྣལ་འབྱོར་མི་ཤེས་པ་ལ་ཕྱི་འཇིག་རྟེན་མཐུན་སྣང་ལས་གྲུབ་པའི་གཟའ་ཡི་སྟོབས་དང་བཅས་པའི་དུས་སྦྱོར་གྱི་སྦྱོར་བ་སྟོན་པའི་ཚུལ་སྦྱིན་པ་ནི། བརྩི་བྱ་སྐྱེ་བའི་ཁྱིམ་དང་དེ་ནས་བརྩིས་པའི་ཁྱིམ་བདུན་པར་གནས་པའི་ཁྱིམ་ལ་དུས་མེ་དང་ཉི་མ་དང་ས་སྐྱེས་དང་ཉིན་མོར་བྱེད་པའི་བུ་སྟེ་དྲག་གཟའ་རྣམས་ཀྱིས་བརྩི་བྱ་དེ་ལ་རིམ་བཞིན་དགེ་བ་
དོན་དུ་གཉེར་བ་རྣམས་འཆི་དང་ནད་དང་རྨ་དང་ངེས་པར་མཐའ་དག་ནོར་ནི་རྣམ་པར་ཉམས་པ་དག་ཀྱང་བྱེད། དེ་ཕྱིར་དེ་འདྲའི་དུས་སྦྱོར་ཤར་བའི་དུས་དེར་ལས་བརྩམ་པ་ལས་ལྡོག་པར་བྱ་ཞིང་དུས་སྦྱོར་དེ་ལྟ་བུ་སྤང་བར་བྱ་སྟེ་ངེས་པར་ལྷ་ཤེས་སམ་སྔགས་པ་བདག་གི་ལུང་སྟོན་པའི་ཚིག་གིས་དུས་ཀྱི་སྦྱོར་བ་བཟང་པོ་གཞན་ནི་རབ་ཏུ་སྦྱིན་པར་བྱའོ། །རང་སྐྱེས་པའི་དུས་སྦྱོར་དང་དེའི་བདུན་པ་མིན་ཡང་ད་ལྟ་གང་ཤར་དང་དེའི་བདུན་པ་ལ་ཡང་དེ་ལྟར་བརྩི་བའང་ཡིན་ནོ། །སྐྱེ་དང་བདུན་པར་གནས་པའི་ཁྱིམ་ལ་སྒྲ་གཅན་དང་ཟླ་བ་དང་ཟླ་སྐྱེས་དང་བླ་མ་དང་པ་སངས་དང་བཅས་པས། རིམ་པ་བཞིན་ཕ་རོལ་གྱི་དགྲ་ཉམས་པ་དང་རང་ཉིད་ཀྱི་དཔལ་རྒྱས་ཤིང་གཡུལ་དུ་རྣམ་པར་རྒྱལ་ཏེ་དགའ་མ་དང་བཅས་པའི་ནོར་དག་ཐོབ་པར་འགྱུར་རོ། །ཕྱི་རོལ་དུ་ཡང་དག་པའི་དུས་སྦྱོར་ཞི་གཟའ་དང་ལྡན་པ་སོགས་ཀྱི་སྒོ་ནས་དགེ་བ་ཐམས་ཅད་ཀྱིས་ཀྱང་དགེ་ཞིང་ཤིས་པའི་ཡན་ལག་དང་མཚན་མ་བྱེད་པར་འགྱུར་ཏེ། དེར་མ་ཟད་སླར་ཡང་གལ་ཏེ་ནང་གི་དུས་སྦྱོར་རང་གི་ལུས་ཀྱི་གཡོན་གྱི་རྩ་ལས་སྲོག་རྒྱུ་བར་གྱུར་པ་ན། ངེས་པར་དོན་ནི་ཐམས་ཅད་འགྲུབ་སྟེ་ཕྱི་རོལ་དུ་མཐའ་དག་ས་ཡི་སྟེང་དུ་དག་པའི་གཟའ་དང་ཚེས་ལའོ། །ཞེས་པ་དག་པའི་གཟའ་ནི་རྒྱུ་སྐར་མེ་བཞི་དང་ཉི་མ། རྒྱལ་དང་བླ་མ། ལྷ་མཚམས་དང་གཟའ་ལག །སྣར་མ་དང་སྤེན་པ། གྲོ་བཞིན་དང་ཟླ་བ། ཐ་སྐར་དང་བཀྲ་ཤིས། ནམ་གྲུ་དང་པ་སངས་ཏེ་འཆི་མེད་གྲུབ་པའི་སྦྱོར་བ་བདུན་པོའོ། །མི་དགེ་བ་ནི། ལྷ་མཚམས་དང་ཉི་མ། སྨིན་དྲུག་དང་ཟླ་བ། མོན་གྲུ་དང་ས་སྐྱེས། ཐ་སྐར་དང་གཟའ་ལྷག །མགོ་དང་བླ་མ། སྣར་མ་དང་པ་སངས། མེ་བཞི་དང་སྤེན་པ་སྟེ་འཆི་བའི་སྦྱོར་བའོ། །སྲེག་པའི་ཚེས་ནི་ཉི་མ་དང་ཚེས་བཅུ་གཉིས་པ། ཟླ་བ་དང་བཅུ་གཅིག་པ། བཀྲ་ཤིས་དང་བཅུ། ལྷག་པ་དང་གསུམ་
ཕུར་བུ་དང་དྲུག་པ། པ་སངས་དང་གཉིས་པ། སྤེན་པ་དང་བདུན་པ་སྟེ། ཚེས་གྲངས་འདི་དག་དགེ་བའི་བྱ་བ་ལ་སྤང་བར་བྱའོ། །གཞན་ཡང་བིཥྚིའི་ལོངས་སྤྱོད་པའི་ཚེས་ཀྱི་ཆ་རྣམས་སྤང་བར་བྱའོ། །མི་དགེ་བའི་བྱ་བ་ལ་ནི་གདུག་པའི་གཟའ་དང་། འཆི་སྦྱོར་དང་། སྲེག་ཚེས་སོགས་གདུག་པ་ཐམས་ཅད་གཟུང་བར་བྱའོ། །ཤིན་ལྟུང་དང་ཡོངས་འཇོམས་ཁོན་འཛིན་སྤངས་པའི་སྦྱོར་བ་ཐམས་ཅད་དགེ་བའི་བྱ་བ་ལ་ཤིས་ལ། དེ་བཞིན་དུ་སེལ་བ་ལ་ཆུ་ཚོད་གསུམ་སྤང་བར་བྱའོ། །ཟུག་རྔུ་ལ་ཡང་ལྔ། སྐྲང་བ་དང་ཤིན་ཏུ་སྐྲང་བ་ལ་དྲུག །ཀུན་འཇོམས་དང་རྡོ་རྗེ་ལ་ཆུ་ཚོད་དགུ་རྣམས་ནི་སྦྱོར་བ་མ་དག་པའོ། །ཇི་སྐད་བརྗོད་པ་དེ་བཞིན་དུ་ཤེས་པར་བྱས་ཏེ། འཇིག་རྟེན་པའི་སྐར་རྩིས་སོགས་ཀྱི་ཐ་སྙད་ཀྱིས་གཟའ་དང་ཚེས་ལ་སོགས་པ་ཡོངས་སུ་དག་པ་གཟུང་བར་བྱ་སྟེ། ཡང་དག་པར་ན་སྔོན་ལས་ཀྱིས་དགེ་དང་མི་དགེའི་འབྲས་བུར་འགྱུར་རོ་ཞེས་པ་ནི་དེ་བཞིན་གཤེགས་པའི་ངེས་པའོ། །ད་ནི་འཇིག་རྟེན་ཐ་སྙད་ཀྱིས་སྐར་མ་ལ་སོགས་པའི་སྟོབས་གསུངས་པ། རྒྱུ་སྐར་ཉེར་བདུན་པོ་རྣམས་ནི་དགུ་དང་དགུ་དང་དགུ་ཡིས་ཆ་གསུམ་དུ་བྱས་ཏེ། བརྩི་བྱ་ནད་པའམ་གཡུལ་དུ་འཇུག་པ་པོ་རང་ཉིད་སྐར་མ་གང་ལ་སྐྱེས་པའི་རྒྱུ་སྐར་དེ་དང་པོ་ཉིད་དུ་བཞག་ནས་དེ་ལྟར་དགུ་ཚན་གསུམ་དུ་བཀོད་པ་འདི་སྐྱེས་སྐར་ཐ་སྐར་ལ་མཚོན་ན་ཐ་སྐར་མཆུ་སྣྲུབ་གསུམ་དང་པོ། སྐག་སྣྲོན་ནམ་གྲུ་གསུམ་དགུ་པར་བྱས་པ་ལྟར་གནས་གསུམ་པའི་དགུ་ཚན་ལས། གཟའ་གདུག་པ་ཉི་མ་མིག་དམར་སྤེན་པ་དུས་མེ་རྣམས་ནི་གཟའ་ཟླ་བ་དག་དང་ལྷན་ཅིག་སྐར་མ་དང་པོ་ནས་བགྲང་བའི། གཅིག་གསུམ་ལྔ་བདུན་སོགས་མི་མཉམ་པའི་གནས་སུ་ཡོད་པར་གྱུར་ན་ནད་པ་རྣམས་ནི་འཆི་བ་ཉིད་དང་འཐབ་མོ་བ་འཕམ་པར་འགྱུར་ལ། མཉམ་པའི་གནས་ལ་ཡོད་ན་རྒྱལ་བ་ཉིད་དུ་འགྱུར་ཏེ་སྐར་མའི་སྟོབས་བརྟག་པའོ། །དེ་ནས་གདེངས་ཅན་སྦྲུལ་གྱི་
འཁོར་ལོ་གསུངས་པ། ཐ་སྐར་ལ་སོགས་རྒྱུ་སྐར་ཉེར་བདུན་པོ་རྣམས་ཀྱིས་རྩ་རྒྱུད་གསུམ་འཁྱོགས་ལྔ་པའི་སྦྲུལ་གྱི་གཟུགས་ལ་ཡང་སྤྲས་པར་གྱུར་པ་ནམ་གྲུ་ཉིད་ཀྱི་བར་དུ་སྟེ། སྦྲུལ་གྱི་རྩ་རྒྱུད་དང་པོ་ལ་ཐ་སྐར་ནས་སྐག་གི་བར་དུ་བཀོད། གཉིས་པར་མཆུ་ནས་སྣྲོན་བར་དང་། རྩ་རྒྱུད་འོག་མར་སྣྲུབ་ནས་ནམ་གྲུ་བར་དུ་བཀོད་དོ། །དེར་སྡིག་པའི་གཟའ་དང་ཟླ་བ་ནི་ནད་པའམ་འཐབ་མོ་བའི་སྐྱེས་པའི་རྒྱུ་སྐར་དང་གསུམ་པོ་དེ་གལ་ཏེ་སྦྲུལ་གྱི་རྩ་རྒྱུད་གཅིག་དག་ལ་གནས་པར་གྱུར་ན་མི་རྣམས་དག་ནི་རྣམ་པར་ཉམས་པར་འགྱུར་རོ། །རྩ་རྒྱུད་དེར་བསོད་ནམས་ཀྱི་གཟའ་ཡོད་ན་བཟང་ངོ་། །རྩ་གསུམ་སྦྲུལ་གྱི་འཁོར་ལོ་འདི་དབྱངས་འཆར་གྱི་རྒྱུད་ལས་ཀྱང་གསལ་བར་བཤད་དོ། །འགྲེལ་ཆེན་ལས་ཡང་གདེངས་ཅན་གྱི་འཁོར་ལོ་རྩ་གསུམ་འཁྱོགས་བཞི་ལ་སྨིན་དྲུག་ལ་སོགས་པ་སྐར་མ་གཅིག་གི་བར་དུ་ཆོད་པ་སྟེ་བར་སྟོང་དུ་བཞག་ནས་བཀོད་པ་དང་། སྨིན་སྣར་མགོ་གསུམ་རྩ་རྒྱུད་ཐོག་བར་མཐའ་གསུམ་དང་། ལག་པར་སྟོང་། ན་བས་སོ་རྩ་རྒྱུད་འོག་མ་སོགས་གྱེན་ཐུར་རིམ་པས་བྲ་ཉེ་མཇུག་གི་རྩ་རྒྱུད་འོག་མའི་བར་དུ་བཀོད་པ་དང་། དེ་བཞིན་དུ་རྩ་གསུམ་འཁྱོགས་གསུམ་པའི་སྦྲུལ་ལ་ལག་ལ་སོགས་པ་རྒྱུ་སྐར་གསུམ་གྱིས་བར་དུ་ཆོད་པ་སྟེ་ལག་སོགས་གསུམ་མགོ་ཕྱོགས་ཀྱི་རྩ་རྒྱུད་གསུམ་ལ་མཐུར་དུ་བཀོད་ཅིང་སྐག་མཆུ་གྲེ་གསུམ་བར་སྟོང་ཕྱི་རོལ་དུ་བཀོད་ནས་དབོ་སོགས་གསུམ་གྱེན་དུ་དང་ས་རི་སོགས་གསུམ་བར་སྟོང་དུ་བཀོད་པ་སོགས་ཡར་མར་རིམ་བཀོད་བྱས་ནས་སྨིན་སྣར་མགོ་གསུམ་མཇུག་གི་རྩ་གསུམ་ལ་ཐུར་དུ་བཀོད་པའི་བར་དུ་བྱས་པ་དེ་གཉིས་ལ། རྩ་རྒྱུད་ཀྱི་སྐར་མར་ཟླ་བ་གནས་ན་གཡུལ་གྱི་སར་ཐོག་མར་ཞུགས་པ་དེ་རྒྱལ་ལ། རྩའི་ཕྱི་རོལ་གྱི་རྒྱུ་སྐར་གསུམ་པོ་རྣམས་ལ་ཟླ་བ་གནས་ན་གཡུལ་གྱི་སར་གང་ཕྱི་ནས་ཞུགས་པ་རྣམ་པར་རྒྱལ་བར་འགྱུར་རོ་ཞེས་
གདེངས་ཅན་འཁོར་ལོ་གསུམ་གྱི་ངེས་པའོ། །ཚེའི་གནས་སྐབས་ཀྱི་འབྲས་བུ་གསུངས་པ། རེའུ་མིག་ལིང་ཚེ་དགུ་པའམ་རྩིབས་བརྒྱད་པའི་འཁོར་ལོར་བྱས་ལ། ཤར་ནས་དབང་ལྡན་གྱི་བར་དུ་སྐྱེས་བུའི་མཆོག་ལོ་བརྒྱ་རྩ་བརྒྱད་ལ་གཟའ་བརྒྱད་ཀྱིས་གནས་སྐབས་སོ་སོར་ལོངས་སྤྱོད་པའི་ལོ་ཤར་ཕྱོགས་ཀྱི་རྩིབས་ལ་ཉི་མའི་ལོ་དྲུག་དང་། དེ་བཞིན་དུ་མེར་གཟའ་ཟླ་བའི་ཚེས་ཏེ་ལོ་བཅོ་ལྔ་དང་། དེ་བཞིན་དུ་ལྷོར་ལོ་བརྒྱད་དང་། བདེན་བྲལ་དུ་རི་ཟླ་སྟེ་བཅུ་བདུན་དང་། ཆུར་བཅུ་དང་། རླུང་དུ་བཅུ་དགུ་དང་། བྱང་དུ་ཉི་མ་སྟེ་བཅུ་གཉིས་དང་། དབང་ལྡན་དུ་ཉི་ཤུ་རྩ་གཅིག་གི་ལོ་བཟང་པོ་སྟེ་རྩོད་དུས་འདིའི་མཆོག་གི་ཚེ་ལོའི་ཚད་བརྒྱ་དང་བརྒྱད་རྣམས་དེ་ལྟར་བགོས་ནས་བཀོད། དེ་ལྟར་ལོ་ཚན་པ་བརྒྱད་པོ་དེ་ལ་རིམ་བཞིན་ལོངས་སྤྱོད་པ་པོའི་གཟའ་ནི། ཉི་མ་དང་ཟླ་བ་དང་། མིག་དམར་དང་། གཟའ་ལྷག་དང་། ཉི་སྐྱེས་སྤེན་པ་དང་། བླ་མ་ཕུར་བུ་དང་ལག་འགྲོ་སྒྲ་གཅན་དང་། དཀར་པོ་པ་སངས་རྣམས་ཀྱིས་ལོ་གྲངས་དེ་དག་གཡས་སྐོར་གྱིས་རིམ་པས་སྤྱོད་དེ། ཤར་དུ་ཉི་མའི་ལོ་དྲུག་ལོངས་སྤྱོད་པ་ནས་དབང་ལྡན་དུ་དཀར་པོའི་ཉེར་གཅིག་སྤྱོད་པའི་བར་དུའོ། །རགས་པ་ནི་གནས་སྐབས་བརྒྱད་པོ་བཤད་མ་ཐག་པ་དེ་དང་། ཕྲ་བ་ནི་རགས་པ་བརྒྱད་པོ་རེ་རེ་ལའང་སོ་སོའི་ནང་གི་གནས་སྐབས་བརྒྱད་དུ་ཕྱེ་བས་གནས་སྐབས་རེ་བཞིར་འགྱུར་བ་ལ་ཡང་། ཉི་མའི་ཉི་མ་དང་ཉི་མའི་ཟླ་བ་ལ་སོགས་པའི་ཚུལ་གྱིས་ལོངས་སྤྱོད་པར་བྱེད་དོ། །གཟའ་རང་རང་གི་ལོ་ཡི་གནས་སྐབས་དེ་ལས་ཡི་གེ་ལ་ལོངས་སྤྱོད་ཚུལ་ནི། འཇིག་རྟེན་གྲགས་པ་ལྟར་བརྗོད་པའི་དབང་དུ་བྱས་ན། ཨ་ཀ་ཙ་ཊ་ཏ་པ་ཡའི་སྡེ་པ་བརྒྱད་པོ་རྣམས་ཀྱིས་ཕྱེ་བའི་ཡི་གེ་དག་ལ་ནི་ལོངས་སྤྱོད་དེ། ཨ་ཨི་ཨུ་ཨེ་ཨོ་ལྔ་སྟེ། གཞན་ཡོན་ཏན་སོགས་ནི་རྩ་བ་ལྔ་པོ་དེ་ལས་བྱུང་ཞིང་རྀ་ལྀ་བཞི་དབྱངས་སུ་མ་བགྲང་མོད་ཀྱི།
ཨ་ཨི་རྀ་ཨུ་ལྀ་ཀ་ཅེས་རྒྱུད་འདིར་རྩ་བའི་དབྱངས་ལྔར་བཞེད་པ་ནི་རིགས་པ་སྟེ་འཐད་པ་ཡིན་ནོ། །ཀ་སྡེ་ནི་ཀ་ཁ་ག་གྷ་ང་། ཡིན་པ་སོགས་སྡེ་པ་གཞན་ཀྱང་དེ་ལྟ་སྟེ། ཡ་ཡི་སྡེ་ཚན་ཡ་ར་ལ་ཝ། ཤ་ཡི་སྡེ་ཚན་ཤ་ཥ་ས་ཧ། ཞེས་པ་འཇིག་རྟེན་དུ་ཡོངས་སུ་གྲགས་པའོ། །རྒྱུད་འདིའི་བཞེད་པས་དབྱངས་ལྔ་དང་། གསལ་བྱེད་ནི་འདིའི་ལུགས་ཀྱི་བརྡ་སྤྲོད་པ་ལས། ཧ་ཡ་ཝ་ར་ལཎ྄། ཉ་མ་ང་ཎ་ནམ྄། ཛྷ་བྷཉ྄། གྷ་ཌྷ་དྷ་ཥ྄། ཛ་བ་ག་ཌ་ད་ཤ྄་ཁ་ཕ་ཚ་ཋ་ཐ་ཙ་ཊ་ཏ་བ྄། ག་པཡ྄། ཤ་ཥ་སར྄། ཞེས་པ་ལ་སོགས་པ་ཡི་གེ་བསྡུ་བའི་མཚན་མ་དང་བཅས་པ་འདི་དག་ནི་ནམ་མཁའ་ལ་སོགས་པའི་འབྱུང་བ་ལྔའི་སྐྱེ་གནས་དང་མཐུན་པར་ཡོད་པས་རིགས་ཤིང་འཐད་པ་སྟེ། རྩ་བའི་དབྱང་ལྔ་ཡང་མཁའ་རླུང་མེ་ཆུ་སའི་ཁམས་དང་སྐྱེ་གནས་ཅན་ཡིན་ལ། དེ་བཞིན་དུ་ཡོན་ཏན་དང་འཕེལ་བ་ཡང་དེ་འདྲ་ལ། ཡ་ཎའི་ཧ་ཡ་སོགས་ཀྱང་ཁམས་ལྔའི་རིམ་པ་དང་། གསལ་བྱེད་རྣམས་ཀྱང་འབྱུང་བ་ཆེ་ཆུང་གི་ཕྱེ་བས་ཁམས་ལྔ་ཡིན་ནོ། །གཞན་བདེ་བྱེད་དབང་ཕྱུག་གིས་འཇིག་རྟེན་ན་གྲགས་པ་ལྟར་དབྱངས་འཆར་དུ་སྤྲོས་པས་བརྗོད་པའི་ཡི་གེ་རྣམས་ལ་ནམ་མཁའ་ལ་སོགས་པའི་སྡེ་པའི་ཡི་གེའི་གོ་རིམ་སོགས་རྒྱུད་འདིར་བསྟན་པ་ལྟར་ཡོངས་སུ་དག་པ་མེད་དོ་ཞེས་འགྲེལ་པས་གསུང་། ལུགས་འདིར་སྡེ་པ་བརྒྱད་པོ་རྣམས་ཀྱིས་ཡི་གེ་དག་ལ་ལོངས་སྤྱོད་ཚུལ་ནི། ཨ་ཨི་རྀ་ཨུ་ལྀ་ལྔ་ནི་ཉི་མའི་གནས་ཀྱི་ལོ་རགས་པ་དང་ཕྲ་བ་ཆ་ལྔར་ཕྱེ་བ་ལ་རིམ་པར་སྤྱོད་དོ། །དེ་བཞིན་ཧ་ཡ་ར་ཝ་ལ་ཟླ་བའི་གནས་སྐབས་དང་། ང་གྷ་ག་ཁ་ཀ །བཀྲ་ཤིས་ཀྱི་དང་། ཉ་ཛྷ་ཛ་ཚ་ཙ། གཟའ་ལག་གི་དང་། ཎ་ཌྷ་ཌ་ཋ་ཊ། སྤེན་པའི་དང་། མ་བྷ་བ་ཕ་པ། ཕུར་བུའི་དང་། ནདྷ་ད་ཐ་ཏ། སྒྲ་གཅན་དང་། ྈྐ་་ཤ་ཥ་ྉྤ་ས་ནི་དཀར་པོའི་རགས་པ་དང་ཕྲ་བའི་
གནས་སྐབས་ལ་ཤེས་པར་བྱའོ། །དེ་ལྟར་སྡེ་ཚན་བརྒྱད་ཀྱི་སྡེ་པའི་ཡི་གེ་དེ་ཡང་རིམ་པ་བཞིན་ཉི་མ་དང་ཟླ་བའི་ཁམས་དང་། ནམ་མཁའ་དང་རླུང་དང་མེ་དང་ཆུ་དང་ས་དང་ཡེ་ཤེས་ཀྱི་ཁམས་རྣམ་པ་བརྒྱད་དོ། །ཡོན་ཏན་དང་འཕེལ་བའི་དབྱངས་རྣམས་རྩ་བའི་དབྱངས་ལྔ་ཡི་རིགས་སུ་བསྡུ་བའམ་གཟུང་བར་བྱའོ། །དབྱངས་སུམ་ཅུས་ཡུད་ཙམ་དང་། གསལ་བྱེད་ཐུང་རིང་དྲུག་ཅུས་ཉིན་ཞག་གི་དཀྱིལ་འཁོར་ལོངས་སྤྱོད་ཚུལ་སྔར་བཤད་པ་ལྟར་ལ། འདིར་ནི་ཚེའི་གནས་སྐབས་ཚན་ལྔ་པ་ཉིད་དུ་རྣམ་པར་ཕྱེ་བ་ལ་དབྱངས་གསལ་འཆར་ཚུལ་ལོ། །ཕྲ་བ་ནང་གི་གནས་སྐབས་བརྒྱད་ལ་དང་པོའི་ཆ་ལ་ཚེའི་གནས་སྐབས་ཀྱི་བདག་པོ་ཉི་མ་སོགས་རང་རང་གང་ཡིན་དེ་ཐོག་མར་བྱས་ནས་དེ་ནས་གཞན་བདུན་པོ་རིམ་པ་བཞིན་དུ་ལོངས་སྤྱོད་པ་ཡིན་ནོ། །གཡུལ་རྒྱལ་གྱི་རྒྱུད་ཀྱི་ཚེ་ཡི་གནས་སྐབས་ནི་གཟའ་དགུ་ལ་སྦྱར་ཞིང་དེ་དང་འདི་རྩི་ཚུལ་མི་འདྲའོ། །དེ་ཡང་ཕྱོགས་བཞི་ན་གནས་པ་ཉི་མ་དང་མིག་དམར་སྤེན་པ་སྒྲ་གཅན་ཏེ་གཟའ་དྲག་པོ་རྣམས་ཀྱིས་ལོངས་སྤྱོད་པའི་གནས་སྐབས་དེར་ཞི་བ་མིན་པ་བྱེད་ཅིང་མི་བདེ་ལ། མཚམས་བཞིར་གནས་པ་རྣམས་ཀྱི་ལོངས་སྤྱོད་པའི་གནས་སྐབས་སུ་མཆོག་ཏུ་བདེ་བར་བྱེད་དེ་ཞི་བའི་རང་བཞིན་གྱི་གཟའ་ཟླ་ལྷག་ཕུར་སངས་བཞི་པོ་གང་དག་གིའོ། །ཞེས་སོ། །འདི་ལ་ཤར་གྱི་ཉི་མའི་ལེ་ཚེར་རྒྱུ་སྐར་ཐ་སྐར་བྲ་ཉེ་སྨིན་དྲུག་སྣར་མ་བཞི་དང་། ཤར་ལྷོ་ཟླ་བའི་ཕྱོགས་དེར་མགོ་ལག་ནབས་སོ་གསུམ། དེ་བཞིན་ལྷོ་མིག་དམར་ལ་རྒྱལ་སོགས་བཞི། ལྷག་པར་དབོ་སོགས་གསུམ་ནས་གཡས་བསྐོར་གྱིས་ཕྱོགས་བཞིར་སྐར་མ་བཞི་རེ་དང་། མཚམས་བཞིར་གསུམ་རེ་བཀོད་པས་རྒྱུ་སྐར་ཉེར་བརྒྱད་ཚང་སྟེ། དབང་ལྡན་དུ་པ་སངས་ཀྱི་ལེ་ཚེ་ལ་ཁྲུམས་སྟོད་ཁྲུམས་སྨད་ནམ་གྲུ་བཀོད་ནས། རང་གི་སྐྱེས་སྐར་གྱི་བདག་པོའི་གཟའ་ནས་མགོ་འཛིན་པར་
བཞེད་དོ། །དེ་ནས་རྟེན་འབྲེལ་ཡན་ལག་བཅུ་གཉིས་ཞག་ལ་འཆར་ཚུལ་གསུངས་པ། རྒྱལ་གྱི་ཟླ་བར་ཞེས་རྒྱལ་གྱི་ཟླ་བའི་གཞུ་ཁྱིམ་འདས་ཤིང་མཆུ་ཡི་ཟླ་བའི་ཆུ་སྲིན་འཇུག་པའི་ཉིན་ཞག་དེ་ཐོག་མ་ཡིན་ལ། དེ་ཡང་ཁྱིམ་གྱི་འཁོར་ལོ་རྩིབས་བཅུ་གཉིས་པ་ལས། ཉི་མ་ཆུ་སྲིན་གྱི་ཁྱིམ་ལ་ཐོག་མར་ཞུགས་པའམ་སོན་པའི་ཉིན་ཞག་དེ་ལ་རྟེན་འབྲེལ་མ་རིག་པ་འཆར་བ་དག་སྟེ། བུམ་པར་ཉི་མ་ཞུགས་པ་མཆུ་ཡི་ཟླ་བའི་མཐའ་ལ་ཡང་རྟེན་འབྲེལ་འདུ་བྱེད་དུ་འགྱུར་ཞིང་། ཀྱེ་མི་ཡི་བདག་པོ་དེ་བཞིན་དུ་ཉ་རུ་ཉི་མ་ཞུགས་པ་དབོ་ཟླ་དག་ལ་ནི་རྣམ་པར་ཤེས་པ་སྟེ་ལུག་ཏུ་ཉི་མ་ནག་པ་ཡི་ཟླ་བ་ལ་ནི་མིང་དང་གཟུགས་སོ། །གླང་དང་འཁྲིག་པའི་ཁྱིམ་ལ་ཉི་མ་སོན་པ། ས་ག་དང་སྣྲོན་ཟླ་དག་ལ། རིམ་བཞིན་མིག་སོགས་སྐྱེ་མཆེད་དྲུག་དང་ནི་རེག་པ་དག་སྟེ། ཉི་མ་ཀརྐ་ཊར་གནས་ཆུ་སྟོད་ཟླ་བ་ལ་ནི་རྟེན་འབྲེལ་ཚོར་བར་འགྱུར། སེང་གེ་ཡི་ཁྱིམ་དུ་ཉི་མ་ཞུགས་པ་གྲོ་བཞིན་འཕོ་བའམ་འདས་པའི་ཟླ་བ་ལ་ཡང་སྲེད་པ་འཆར་རོ། །ཉི་མ་བུ་མོ་དང་ནི་སྲང་དུ་སོན་པ། ཁྲུམས་སྟོད་ཟླ་བའི་མཐའ་དང་ནི། ཐ་སྐར་ཟླ་བ་ཡི་མཐའ་མ་དག་ལ་རིམ་བཞིན་ལེན་པ་ཉིད་དང་སྲིད་པར་འགྱུར་ཏེ། སྨིན་དྲུག་གི་ཟླ་བའི་སྡིག་པར་ཉི་མ་ཞུགས་པའི་ཞག་ལ་རྟེན་འབྲེལ་སྐྱེ་བ་དང་ནི། གཞུ་ལ་ཉི་མ་གནས་པ་སྐར་མ་མགོ་ཡི་ཟླ་བ་འཕོ་འཚམས་དག་ལ་ཡང་དེ་བཞིན་རྒ་ཤི་འཆར་བ་ཡན་ལག་བཅུ་གཉིས་དེ་དག་རིམ་པ་བཞིན་དུ་སྟེ། དེ་ལྟར་ཉི་མ་ཁྱིམ་བཅུ་གཉིས་ལ་ཞུགས་པ་དང་ཟླའི་ཞེས་པ་ཟླ་བ་སོ་སོའི་དབྱེ་བ་དག་ལས་མ་རིག་པ་སོགས་འཆར་ཚུལ་དེ་ལྟར་ཤེས་པར་བྱ་ལ། ཉི་མ་འཕོ་བའི་བགྲོད་པའི་དབང་དང་ཟླ་བ་ཕྱོགས་དང་ཚེས་ཀྱི་བགྲོད་པའི་དབང་གིས་དེ་ལྟར་བྱུང་བས་ན་ཉི་ཟླ་གཉིས་ཀ་ཡི་བགྲོད་པའི་དབང་གིས་ཀྱེ་རྒྱལ་པོ་རྟེན་འབྲེལ་མ་རིག་པ་སོགས་ཡན་ལག་བཅུ་གཉིས་པོ་དེ་དག་ཉིན་ཞག་གི་ཚེས་གྲངས་སོ་
སོར་འཆར་བ་ཉིད་དུ་གནས་སོ། །ཞེས་ཉི་མ་ཁྱིམ་གང་དུ་ཞུགས་པའི་ཞག་དེ་ལ་རྟེན་འབྲེལ་རེ་རེ་འཆར་བའི་ཐོག་དྲངས་ནས་ཟླ་བའི་དཀར་ནག་གི་ཕྱོགས་སོ་སོའི་ཚེས་གྲངས་ཀྱི་མིང་བཏགས་པའི་ཞག་རེ་རེ་ལ་རྟེན་འབྲེལ་རེ་རེ་འཆར་རོ། །དེ་རྒྱས་པར་བཤད་པ། རྒྱལ་འཕོ་བ་དང་མཆུ་འཇུག་པ་ཡི་མཚམས་སུ་ཆུ་སྲིན་གྱི་ཁྱིམ་དག་ལ་ཉི་མ་ཐོག་མར་ཞུགས་པའམ་གནས་པའི་གཟའ་ཞེས་པ་ཆུ་ཚོད་དྲུག་ཅུའི་བདག་ཉིད་ཅན་གྱི་ཉིན་ཞག་གམ་གཟའ་གང་ཡོད་དེ་ལ་ནི་མ་རིག་པ་ཡིན་ལ། དེ་ནས་བརྩིས་པའི་ཉིན་ཞག་གཉིས་པ་ལ་ནི་རྒ་ཤིའམ་ཤི་བར་འགྱུར་ཏེ་ཀྱེ་མི་ཡི་བདག་པོ་དེ་བཞིན་སྐྱེ་བ་ནི་ཉིན་ཞག་གསུམ་པ་ལའོ། དེ་བཞིན་བཞི་པར་སྲིད་པ་ལྔ་པར་ལེན་པ་ལ་སོགས་པ་ཐམས་ཅད་ཡན་ལག་བཅུ་གཉིས་བར་དུ་རིམ་པ་སྔ་མའི་ཚུལ་དག་གིས་ཡོངས་སུ་འཆར་བར་འགྱུར་ཏེ། ཞག་བཅུ་གཉིས་པར་འདུ་བྱེད་འཆར་ཞིང་། དེ་ནས་སྔ་མའི་གཟའ་ཞག་མེ་སྟེ་གསུམ་པ་དང་ཆུ་གཏེར་བཞི་པ་དང་མདའ་སྟེ་ལྔ་པ་རྣམས་ལ་ཤར་བའི་རྟེན་འབྲེལ་དེ་རྣམས་ཞག་བཅུ་གསུམ་པ་སོགས་ལ་འཆར་ཏེ་བཅུ་གསུམ་པ་ལ་སྐྱེ་བའོ། །བཅུ་བཞི་པ་ལ་སྲིད་པའོ། །བཅོ་ལྔ་པ་ལ་ལེན་པའོ། །ཆུ་སྲིན་གྱི་ཁྱིམ་དུ་བགྲོད་པའི་དབང་གིས་ཕྱོགས་རེས་འགའ་ལ་གཟའ་ཞག་བཅུ་དྲུག་འབྱུང་ཚེ་བཅུ་དྲུག་པ་དེ་ལའང་མ་རིག་པ་ནས་ལུགས་ལྡོག་ཏུ་བརྩིས་པས་ཡན་ལག་དྲུག་པ་སྲེད་པའོ། །དེ་ཅིའི་ཕྱིར་ན་དུས་ཕལ་ཆེར་ཚེས་ཞེས་བྱ་བའི་གཟའ་ཡིས་ཏེ་ཉིན་ཞག་བཅོ་ལྔས་ཕྱོགས་གཅིག་རྫོགས་ཏེ་ཉི་མ་རྒྱུ་བའི་ཁྱིམ་འཕོ་བའི་དབང་གིས་ཉིན་ཞག་སུམ་ཅུས་ཁྱིམ་འཕོ་མི་རྫོགས་པས་རེས་འགའ་ཕྱོགས་ཀྱི་ཡན་ལག་ཞག་བཅུ་དྲུག་གིས་རྫོགས་པ་ཡོད་པའི་དོན་དེས་སོ། །དེ་ལྟར་ལུགས་འདིའི་གཡས་ཀྱི་རྩ་ལ་རྒྱུ་བ་ཆུ་སྲིན་གྱི་དུས་སྦྱོར་ནི་མཉམ་པའི་ཁྱིམ་གྱི་དབང་གིས་དེ་ལྟར་རྟེན་འབྲེལ་བཅུ་གཉིས་ཞག་ལ་ལུགས་ལྡོག་ཏུ་འགོད་པ་ཡིན་ནོ། །འདུ་བྱེད་ནི་
མཆུ་དང་དབོ་ཡི་མཚམས་དག་ཏུ་སྟེ་བུམ་པར་ཉི་མ་སོན་པ་དེ་ལ་རྟེན་འབྲེལ་འདུ་བྱེད་ཁོ་ནའོ་ཞེས་ངེས་པར་རོ། །དེ་ནས་གཟའ་ཞག་གཉིས་པ་ལ་ནི་རྣམ་པར་ཤེས་པར་འགྱུར་ཏེ་ཉིན་ཞག་གསུམ་པ་ལ་ནི་མིང་དང་གཟུགས་བཞི་པ་ལ་སྐྱེ་མཆེད་དྲུག་ལ་སོགས་པ་རིམ་པས་འཆར་ཏེ་བཅོ་ལྔ་པ་ལ་རེག་པའི་བར་དུའོ། །ཁ་ཅིག་ཏུ་གཟའ་ཞག་བཅུ་དྲུག་བྱུང་ན་ཚོར་བའོ། །གཡོན་གྱི་ཆར་གྱུར་པ་བུམ་པའི་དུས་སྦྱོར་མི་མཉམ་པའི་དབང་གིས་རྟེན་འབྲེལ་བཅུ་གཉིས་དེ་སྤྲོ་བའི་རིམ་པས་ལུགས་འབྱུང་དུ་འཆར་བ་ཡིན་ནོ། །དེ་ལྟར་ཟླ་བ་གཉིས་ཀྱི་ཞག་དྲུག་ཅུ་ལ་རྟེན་འབྲེལ་ཡན་ལག་བཅུ་གཉིས་དག་ཏུ་འཆར་བར་འགྱུར་བ་ནི། ཉི་མའི་ཁྱིམ་འཕོ་བའི་དབང་གིས་སྤྲོ་བ་སྐྱེ་རིམ་ལུགས་འབྱུང་དུ་རིམ་པས་དང་། ལུགས་ལྡོག་རིམ་མིན་དུ་བསྡུ་བའི་སྦྱོར་བས་སོ། །དེ་ལ་དེ་དག་གི་འབྲས་བུ་ནི། མ་རིག་པ་དང་རྣམ་ཤེས་ལ་སོགས་ཡན་ལག་མི་མཉམ་པ་དྲུག་པོ་ཡང་བྱ་བ་ཀུན་ལ་དགེ་བར་འགྱུར་བ་སྟེ། གང་ཞིག་འདུ་བྱེད་ལ་སོགས་མཉམ་པ་དྲུག་པོ་དག་ཀྱང་དུས་རྟག་ཏུ་དབང་བསྐུར་བ་དང་ཡུལ་དུ་འགྲོད་པ་བག་མ་ལ་སོགས་པ་ཞི་བའི་ལས་དག་ལ་དགེ་བ་མིན་ཀྱང་དྲག་པོའི་བྱ་བ་ལ་དགེའོ། །མཉམ་མི་མཉམ་ནི་མ་རིག་པ་ནས་རིམ་པར་བརྩིས་པས་ཡ་རྣམས་མི་མཉམ་ལ་ཟུང་རྣམས་མཉམ་པའོ། །རྟེན་འབྲེལ་ཚེས་ཞག་ལ་འཆར་ཚུལ་གསུངས་པ། གོང་དུ་ཉིན་ཞག་ལ་རྟེན་འབྲེལ་འཆར་ཚུལ་བཤད་པ་དེ་བཞིན་ཟླ་བའི་དཀར་ནག་གི་ཕྱོགས་ཀྱི་དབྱེ་བ་དག་ལ་རི་བོང་ཅན་གྱི་བགྲོད་པའི་དབང་གིས་རྟེན་འབྲེལ་ཡན་ལག་བཅུ་གཉིས་གང་ཡིན་པ། དཀར་པོ་དང་ནག་པོའི་ཕྱོགས་ཀྱི་ཚེས་ཞག་གི་གྲངས་ལ་དང་པོའི་ཚེས་གྲངས་ལ་གང་ཤར་བ་དེའི་དབང་གིས་སྤྲོ་དང་བསྡུ་བའི་སྦྱོར་བ་དག་གིས་སོ། །ཞེས་པ་རྒྱལ་གྱི་ཟླ་བའི་དཀར་ཕྱོགས་དང་ནག་ཕྱོགས་ཀྱི་ཚེས་དང་པོ་ལ་མ་རིག་པ་དང་། མཆུ་ཟླའི་དཀར་
ནག་གི་ཕྱོགས་དང་པོ་ལ་འདུ་བྱེད་ལ་སོགས་པ་རིམ་བཞིན་སྦྱར་ཏེ་འཆར་རོ། །རྒྱལ་ཟླའི་ཚེས་གཅིག་ལ་མ་རིག་པ། གཉིས་པར་འདུ་བྱེད། གསུམ་པར་རྣམ་ཤེས་སོགས་སྤྲོ་བའི་རིམ་པས་བཅོ་ལྔ་ལ་རྣམ་ཤེས་ཀྱི་བར་དུའོ། །ནག་ཕྱོགས་ཚེས་གཅིག་སྟེ་ཚེས་བཅུ་དྲུག་ལ་མ་རིག་པ། གཉིས་པར་རྒ་ཤི གསུམ་པར་སྐྱེ་བ་སོགས་སྡུད་པའི་རིམ་པས་སྟོང་ལ་སྐྱེ་བའི་བར་དུའོ། །དེ་བཞིན་དབོ་ཟླའི་ཕྱོགས་ལ་རྣམ་ཤེས་ནས་སྤྲོ་བསྡུའི་སྦྱོར་པས་རིམ་པར་ཤེས་པར་བྱའོ། །འདི་དག་འཇིག་རྟེན་ཐ་སྙད་ཀྱི་སྐར་རྩིས་ཤེས་པ་དག་གི་ལུགས་ལས་བཤད་པ་ཇི་བཞིན་མངོན་ཤེས་དང་བྲལ་བ་རྣམས་ཀྱིས་དེའི་རྗེས་སུ་ཤེས་པར་བྱའོ་ཞེས་པས་རྒྱས་པར་མ་གསུངས་སོ། །ཞེས་སམ། རྩ་མིའི་འགྱུར་ལས། འདིར་དེ་ཉིད་ཇི་ལྟ་བ་བཞིན་འཇིག་རྟེན་པའི་ཐ་སྙད་དུ་རྩིས་ཤེས་པ་མངོན་ཤེས་ལྔ་དང་བྲལ་བས་ཀྱང་ཤེས་པ་དེས་ན་རྟེན་ཅིང་འབྲེལ་པར་འབྱུང་བའི་ངེས་པ་རྒྱས་པར་མ་གསུངས་སོ། །ཞེས་འབྱུང་ངོ་། །གནས་པ་བཅོ་བརྒྱད་པ་སྒྲ་གཅན་ལ་སོགས་པའི་སའི་སྟོབས་ཀྱི་ངོ་བོ་ཉིད་ཀྱི་གནས་པ་ནི། ཉི་མ་མིག་དམར་མཇུག་རིངས་སོགས་ཚིགས་སུ་བཅད་པ་བརྒྱ་དང་བཅོ་བརྒྱད་པ་ནས། བརྒྱ་ཉེར་དྲུག་པའི་བར་གྱིས་བསྟན་པ་འདི་ནི་ཕྱོགས་ཀྱི་དགེ་བ་དང་མི་དགེ་བའི་འབྲས་རྩིས་བསྟན་པ་ཡིན་ཏེ། གཡུལ་འགྱེད་པ་སོགས་ཕ་རོལ་དང་རྩོད་པའི་དུས་སུ་དྲག་པོའི་གཟའ་ཉི་མ་དང་མིག་དམར་དང་མཇུག་རིངས་དང་སྤེན་པ་བཞི་ནི་ཁྱིམ་གྱི་རྒྱུ་སྐར་གྱི་རྐང་པ་གང་ལ་གནས་པ་གཟའ་ལྔའི་རྩིས་ཀྱིས་ཤེས་པར་བྱ་ཞིང་། ཁྱིམ་གྱི་གོ་ལ་འཁོར་བའི་དབང་གིས་དུས་ད་ལྟ་བ་ལ་ཕྱོགས་གང་དུ་ཡོད་པ་ལེགས་པར་བརྟག་ནས་དྲག་པོའི་གཟའ་དེ་རྣམས་རང་གི་གཡས་ཀྱི་ཕྱོགས་སམ། ཡང་ན་རྒྱབ་ཀྱི་ཕྱོགས་དག་ཏུ་ཡང་དག་གནས་པར་བྱས་པས་ཕ་རོལ་དགྲ་ནི་འཆི་བར་བྱེད་དོ། །རང་གི་གཡོན་དང་ཡང་ན་མདུན་གྱི་ཕྱོགས་ཉིད་དུ་ཞི་བའི་རང་
བཞིན་ཅན་གྱི་གཟའ་ཡི་ཚོགས་ཟླ་ལྷག་སངས་ཕུར་མཐའ་དག་ཡོད་པར་བྱས་ཏེ་ཚུར་རང་ལ་ཁ་ཕྱོགས་ནས་འགྱེད་པ་པོ་དགྲའི་མདུན་དུ་དྲག་གཟའ་དང་། རྒྱབ་ཏུ་ཞི་གཟའ་ཡོད་པ་དེ་ལྟ་བུར་གྱུར་པ་ནི། གཡུལ་གྱི་སར་ནི་ཕན་ཚུན་འཐབ་པའི་དུས་སུ་ས་ཡི་སྟོབས་བརྩི་བ་ནི་དེ་བཞིན་ཁོ་ན་བགྱིའོ། །དེ་བཞིན་དུ་འཆར་བར་འགྱུར་པའི་རྣལ་འབྱོར་མ་བརྒྱད་དང་། བིཥྚི༷་དང་དྲག་པོ་དང་། རླུང་ཞེས་པ་སྐབས་འདིར་རླུང་གི་ཤུགས་ཀྱིས་ཉིན་མཚན་ཕྲུག་རེ་ལ་རི་རབ་ལ་ལན་ལྔ་ལྷག་ཙམ་འཁོར་བ་ཐུན་ཕྱེད་སྒྲ་གཅན་དང་བཅས་པ། རང་གི་གཡས་དང་རྒྱབ་ཏུ་བཞག་ན་རང་ལ་བདེ་བ་སྦྱིན་པ་སྟེ། དྲག་པོའི་གཟའ་དང་རྣལ་འབྱོར་མ་ལ་སོགས་པ་དུས་ལྷ་སྟོབས་ལྡན་འདི་རྣམས་གཡུལ་བཀྱེ་བ་དང་མདོས་ཟོར་སོགས་དྲག་ལས་ཀྱི་དུས་སུ་གཡོན་དང་མདུན་དུ་བྱས་ན་འཆི་བའི་རང་བཞིན་སྟེར་བར་འགྱུར་རོ། །གལ་ཏེ་སྟབས་ཀའི་དབང་གིས་ས་ཡི་སྟོབས་དེ་ལྟར་མཐའ་གཅིག་ཏུ་ངེས་པར་མ་གྱུར་ཏེ། དྲག་པོ་ཕྱེད་དགྲ་ཡི་རྒྱབ་དང་གཡས་དང་། ཕྱེད་རང་གི་རྒྱབ་དང་གཡས་སུ་ཡོད་ལ། ཞི་གཟའ་ཕྱེད་ཕ་རོལ་དང་ཕྱེད་རང་གི་མདུན་དང་གཡོན་དུ་ཡོད་པ་ལྟ་བུའི་ས་སྟོབས་མཉམ་པར་གྱུར་པ་ན་གཉིས་ཀའི་དཔུང་ནི་འཇོམས་པ་ལ་སྟོབས་མཚུངས་པར་འགྱུར་བ་དང་། གལ་ཏེ་ཞི་དྲག་རྣམས་ངེས་པ་མེད་པར་རང་དང་དགྲའི་མདུན་རྒྱབ་ལ་སོགས་པར་མི་མཉམ་པར་སྣ་ཚོགས་སུ་གྱུར་པས་ཀྱང་གཉིས་ཀའི་དཔུང་ནི་འཇོམ་པར་འགྱུར་ཏེ་འོན་ཀྱང་ནང་གི་དབྱེ་བ་ནི་སའི་སྟོབས་ཆེ་ཆུང་ལ་དཔགས་ནས་ཤེས་པར་བྱའོ། །རྣལ་འབྱོར་མ་བརྒྱད་ཀྱི་རྒྱུ་ཕྱོགས་གསུངས་པ། ཚངས་པ་མ་དང་དྲག་མོ་དང་གཞོན་ནུ་མ་དང་། མཁའ་འགྲོའི་བདག་གིས་འགྲོ་མ་ནི་ཁྱབ་འཇུག་མ་སྟེ་མཁའ་འགྲོའི་བདག་པོ་ཁྱུང་གི་བཞོན་པས་འགྲོ་བ་ཁྱབ་འཇུག་ཡིན་པས་སོ། །ཕག་མོ་དང་། རྡོ་རྗེ་ལག་མ་
དང་ཞེས་དབང་མོ་སྟེ་དབང་པོ་ལ་རྡོ་རྗེ་ཅན་ཞེས་བྱ་སྟེ་ལག་ན་རྡོ་རྗེ་ཐོགས་པས་སོ། །ཙ་མུཎྜཱ་ཉིད་དང་དཔལ་མོ་སྟེ་བརྒྱད་པོ་དག་ནི། དཀར་ནག་གི་ཕྱོགས་གཉིས་ཀྱི་ནོར་གྱི་ཚེས་ཏེ་ཚེས་གྲངས་བརྒྱད་ཀྱི་ཞག་ལ་རེས་བསྐོར་ནས་འཆར་བར་འགྱུར་ཏེ། དཀར་ནག་གི་ཕྱོགས་ཀྱི་དང་པོའི་ཚེས་གཅིག་དང་དགུ་པ་ལ་བརྒྱ་བྱིན་དུ་སྟེ་ཞེས་པ་ཤར་ཕྱོགས་སུ་ཚངས་མ་འཆར་རོ། །ཚེས་གཉིས་པ་དང་བཅུ་ལ་གནོད་སྦྱིན་ཏེ་བྱང་གི་ཕྱོགས་སུ་དྲག་མོའོ། །གསུམ་པ་དང་བཅུ་གཅིག་ལ། མེ་སྟེ་ཤར་ལྷོའི་ཟུར་དུ་གཞོན་ནུ་མའོ། །ཚེས་བཞི་པ་དང་བཅུ་གཉིས་ལ་ལྷ་མིན་ནམ་བདེན་བྲལ་གྱི་ཕྱོགས་ལྷོ་ནུབ་ཏུ་ཁྱབ་འཇུག་མའོ། །ལྔ་དང་བཅུ་གསུམ་ལ་གཤིན་རྗེ་ཡི་ཕྱོགས་ལྷོ་རུ་ཕག་མོའོ། །དྲུག་དང་བཅུ་བཞི་པ་ལ་ཆུ་ལྷ་ཡི་ཕྱོགས་ནུབ་ཏུ་དབང་མོའོ། །བདུན་དང་ཉ་ཡི་ཕྱེད་སྔ་མར་ང་ལྷའི་ཕྱོགས་ནུབ་བྱང་དུ་ཙཱ་མུཎྜཱ་འཆར་བ་དང་། བརྒྱད་དང་ཉ་ཡི་ཕྱེད་ཕྱི་མར་དབང་ལྡན་གྱི་ཕྱོགས་སམ་ས་ལ་དཔལ་མོ་ཆེན་མོ་འཆར་བའོ། །དེ་བཞིན་དུ་ནག་པོའི་ཚེས་གཅིག་ནས་གནམ་སྟོང་གི་སྔ་ཆ་དང་ཕྱི་ཆའི་38བར་དུ་གོང་ལྟར་བསྐོར་བས་ཤེས་ཏེ་འདི་དག་དཔེའུ་རིས་ལ་བལྟས་པས་བདེ་བླག་ཤེས་ནུས་ཤིང་སྐར་རྩིས་ཀྱི་གཞུང་རྣམས་ལས་ཡོངས་སུ་གྲགས་སོ། །དབྱངས་འཆར་གྱི་རྒྱུད་དུ་རྣལ་འབྱོར་མ་བརྒྱད་དང་བིཥྚི་བཤད་པ་དང་འདིའི་ལུགས་ཕྱོགས་ཅི་རིགས་མི་མཚུངས་པ་ཡོད་དོ། །དེ་ལྟར་ཕྱོགས་འདི་དག་ཏུ་ཚེས་དེ་ལ་རྣལ་འབྱོར་མ་འདི་དག་ནི་འཆར་བ་དག་ཏུ་བྱེད་དེ་འཆར་ཕྱོགས་དེ་རྒྱབ་ཏུ་བཞག་ནས་དགྲ་དང་འཐབ་པར་བྱའོ། །འདིར་ནི་རྣལ་འབྱོར་མ་བརྒྱད་ཚེས་རིལ་པོ་རེ་ལ་འཆར་ཚུལ་ལོ། །སླར་ཡང་དཀར་ནག་གི་ཚེས་རྣམས་ལ་ནི་སྔ་ཆ་དང་ཕྱི་ཆ་བྱས་ཏེ་བརྒྱད་གཉིས་བཅུ་དྲུག་ཏུ་དབྱེ་བས་འཆར་ཚུལ་ཐ་དད་དུ་ཡོད་དོ། །དེ་གང་ཞེ་ན་རང་རང་གི་ཚེས་རྣམས་ཀྱི་སྔ་ཆ་ལ་སྔར་ཇི་སྐད་བརྗོད་པ་ལྟར་རྣལ་འབྱོར་
མ་དེ་དག་འཆར་ལ། ཕྱི་ཆ་ལ་རང་རང་གི་རྗེས་ཀྱི་ཚེས་ལ་འཆར་བའི་རྣལ་འབྱོར་མ་དེ་ཉིད་དེ་ཡི་ཕྱོགས་སུ་འཆར་ཏེ། དཔེར་ན་ཚེས་གཅིག་དང་དགུ་ཡི་སྔ་ཆར་ཚངས་མ་འཆར་ཞིང་། དེ་དག་གི་ཕྱི་ཆ་ལ་དྲག་མོ་བརྒྱད་ཀྱི་སྔ་ཆར་དཔལ་མོ་དང་ཕྱི་ཆར་ཚངས་མ་འཆར་བ་སོགས་རིམ་བཞིན་སྦྱར་ཏེ་བཅུ་བཞིའི་སྔ་ཆར་དབང་མོ་དང་ཕྱི་ཆར་ཙཱ་མུཎྜཱ། ཉ་སྟོང་གི་སྔ་ཆར་ཙཱ་མུཎྜཱ་དང་ཕྱི་ཆར་དཔལ་མོ་འཆར་བའི་བར་དུའོ། །འདིར་རྣལ་འབྱོར་མ་བརྒྱད་ཀ་ཚེས་ཀྱི་ཕྱེད་རེ་ལ་འཆར་བར་མཉམ་པས་རྣལ་འབྱོར་མ་བཅུ་དྲུག་གི་འཆར་ཚུལ་ཞེས་སྔ་འགྲེལ་རྣམས་སུ་བཤད་ཀྱང་ངོ་བོས་རྣལ་འབྱོར་མ་བརྒྱད་དཀར་ནག་གི་ཚེས་ལ་ལན་བརྒྱད་རེ་འཁོར་བ་ཡིན་ནོ། །སྔ་མར་རྣལ་འབྱོར་མ་ཕྱི་མ་གཉིས་ནི་ཞག་ཕྱེད་ལས་འཆར་བ་མེད་དོ། །དེ་ནས་བིཥྚི་འཆར་ཚུལ་གསུངས་པ། བི༷ཥྚི༷་བརྒྱད་པོ་རྣམས་ནི་དཀར་པོའི་ཕྱོགས་ཀྱི་ཚེས་ལ་བརྒྱ་བྱིན་གྱི་ཕྱོགས་སུ་ཚེས་བཞི་ལ་འཆར་རོ། །བརྒྱད་ལ་གཤིན་རྗེ། བཅུ་གཅིག་ལ་ཆུ་བདག་གི་ཕྱོགས་དང་། ཉ་ལ་གནོད་སྦྱིན་གྱི་ཕྱོགས་ཉིད་དུ་ཡང་འདིར་འཆར་པར་འགྱུར་རོ། །སླར་ཡང་ནག་པོའི་ཕྱོགས་ལ། བཅོ་བརྒྱད་ཀྱི་ཚེས་ལ་རྩེ་མོ་ཅན་མེ་ཡི་ཕྱོགས་དང་། ཉེར་གཉིས་ལ་ལྷ་མིན་གྱི་ཕྱོགས་ལྷོ་ནུབ་དང་། ཉེར་ལྔ་ལ་རླུང་གི་ཕྱོགས་དང་། ཉེར་དགུ་ལ་དབང་ལྡན་བྱང་ཤར་གྱི་ཟུར་རམ་མཚམས་ཉིད་དུ་འཆར་ཏེ་དེ་ལྟར་བིཥྚི་འཆར་བའི་བྱ་བའམ་ཆོ་ག་ནི་སྔར་ལྔ་བསྡུས་ཀྱི་སྐབས་སུ་བཤད་པའི་བིཥྚི་ཚེས་ལ་རྒྱུ་བ་དེ་དག་ཕྱོགས་གང་ནས་འཆར་ཚུལ་སྐབས་འདིར་བཤད་པ་བཞིན་རིམ་པས་སོ། །ཞེས་ཚེས་གྲངས་སྐབས་འདིར་དངོས་སུ་མ་གསུངས་པ་ཡང་དེའི་དབང་གིས་ཡིན་ནོ། །དེ་ནས་དྲག་པོ་འཆར་ཕྱོགས་ཀྱི་སྟོབས་གསུངས་པ། རཱ་ཧུ་དྲག་པོ་ནི་ལོ་གཅིག་ཉི་མའི་ཁྱིམ་འཕོ་བཅུ་གཉིས་དང་བསྟུན་ནས་ཕྱོགས་མཚམས་བརྒྱད་དུ་རིམ་པར་གཡོན་དུ་འཁོར་བ་སྟེ།
ཤར་ནས་བརྩམ་སྟེ་གཡོན་གྱི་ཕྱོགས་གཞན་གྱི་ཕྱེད་ནུབ་བྱང་གི་བར་དུ་འགྲོ་སྟེ་ཉི་མའི་ཁྱིམ་འཕོ་བའི་ཉིན་ཞག་གི་དབང་གིས་ཤར་ནས་བྱང་དུ་འཁོར་བ་ཡང་སྟེ་བྱང་དུ་བགྲོད་པ་དག་གི་ཉི་མ་རྣམས་ལའོ། །བྱང་བགྲོད་ཀྱི་ཁྱིམ་དྲུག་རྫོགས་ནས་ཆུ་སྟེ་ནུབ་ཕྱོགས་ནས་མ་ལྡན་ཤར་ལྷོའི་བར་དག་ཏུ་དྲག་པོ་དེ་ནི་ངེས་པར་འགྲོ་སྟེ་ནུབ་ནས་ལྷོ༷་རུ་ཕྱོགས་པར་ལྷོ་རུ་བགྲོད་པ་ཡི་ཉི་མ་ཡི་ཞག་དག་ལའོ། །ཞེས་གསུངས་པ་ལྟར། ཆུ་སྲིན་དང་བུམ་པའི་ཕྱེད་ལ་ཤར་དུའོ། །བུམ་པའི་ཕྱེད་དང་ཉ་ལ་དབང་ལྡན་དུའོ། །ལུག་དང་གླང་གི་ཕྱེད་ལ་བྱང་དུའོ། །གླང་གི་ཕྱེད་དང་འཁྲིག་པ་ལ་རླུང་དུའོ། །དེ་ལྟར་བྱང་བགྲོད་རྫོགས་ནས་ཀརྐ་ཊ་དང་སེང་གེའི་ཕྱེད་ལ་ཆུ་རུའོ། །སེང་གེའི་ཕྱེད་དང་བུ་མོ་ལ་བདེན་བྲལ་དུའོ། །སྲང་དང་སྡིག་པའི་ཕྱེད་ལ་གཤིན་རྗེར་རོ། །སྡིག་པའི་ཕྱེད་དང་གཞུ་ལ་མེ་རུའོ། །འདི་སྐབས་ཕྱོགས་བཤད་པ་འདི་དག་སྒྲ་གཅན་འཆར་ཕྱོགས་སུ་མི་བྱེད་པར་སྒྲ་གཅན་ལུས་ཀྱིས་ཕྱོགས་བརྒྱད་ཀྱི་ཕྱེད་ཁྱབ་ཅིང་དེའི་གདོང་གི་ཁ་བལྟ་ཕྱོགས་སུ་བཤད་པས་ཆུ་སྲིན་བུམ་པའི་ཕྱེད་ལ་སྒྲ་གཅན་གདོང་ནུབ་ནས་ཤར་དུ་ཁ་བལྟས་པ་དེའི་ཚེ་ཤར་དུ་ཁ་བལྟ་བ་རྒྱལ་ཞིང་ནུབ་ཏུ་བལྟས་པ་འཕམ་ཞེས་བཤད་པ་སྣང་སྟེ་བརྟག་པར་བྱའོ། །གཞན་ཟླ་བ་དང་ཕྱོགས་དང་ཉིན་ཞག་དང་དུས་ཀྱི་དྲག་པོ་རྣམ་པ་དྲུག་ཏུ་བཤད་པ་ནི་དོན་ཆེན་པོ་མེད་པ་སྟེ་དེས་ན་རྒྱུད་འདིར་མ་གསུངས་སོ་ཞེས་འགྲེལ་པ་ལས་གསུངས་པའི་ཤོང་འགྱུར་ལ་གཅིག་མ་ཚང་བ། དཔང་འགྱུར་ལས་བགྲོད་པའི་དྲག་པོ་དང་ལྔ་བྱུང་ངོ་། །དེ་ལྟར་ན་དེ་དྲུག་ལས་འདིར་ལོ་ཡི་དྲག་པོ་ཁོ་ན་གསུངས་ཞེས་སོ། །དེ་ནས་ཐུན་ཕྱེད་སྒྲ་གཅན་འཆར་བའི་སྟོབས་གསུངས་པ། ཐུན་ཕྱེད་སྒྲ་གཅན་འདིའི་རྒྱུ་ཚུལ་ནི་ཉིན་མོ་ཐུན་བརྒྱད་དང་མཚན་མོ་ཐུན་བརྒྱད་དུ་བྱས་པའི་ཐུན་རེ་ལ་ཕྱོགས་རེ་རེ་ནས་འཆར་བར་འགྱུར་ཏེ་འདིའི་རྒྱུ་བའི་ཕྱོགས་ནི་ཉིན་གྱི་ཐུན་ཕྱེད་དང་པོ་ཉི་མ་འཆར་
བའི་དུས་སུ་ཤར་ནས་རྒྱུ་བའི་ཚེ་ཐུན་ཕྱེད་དེའི་རིང་དག་ལ་ཤར་དུ་གནས་ནས་ཐུན་ཕྱེད་ཀྱི་མཇུག་ཏུ་ཕྱོགས་གཞན་རླུང་དུ་རབ་ཏུ་འཇུག་སྟེ་དེ་བཞིན་དུ་ནི་རླུང་ནས་ལྷོ༷་རུ་འགྲོ་བར་བྱེད་ཅིང་། ལྷོ་ནས་དབང་ལྡན་དང་དེ་ནས་ཆུ་དང་། དེ་ནས་མེ་དང་། དེ་ནས་གནོད་སྦྱིན་དང་། དེ་ནས་ལྷ་མིན་གྱི་གྲོང་ཁྱེར་དུ་སྟེ་ལྷོ་ནུབ་ཏུ་འགྲོ་ཞིང་དེ་ལྟར་ཉིན་ཐུན་བརྒྱད་རྫོགས་ནས་བདེན་བྲལ་གྱི་ཕྱོགས་དེ་ནས་སླར་ཡང་ཤར་དུ་འཁོད་པ་དེ་ང་གི་ཕྱོགས་ཉིད་དུ་རྒྱུ་བ་ནི་ཉི་མ་ནུབ་པ་མཚན་མོའི་ཐུན་ཕྱེད་དང་པོ་ལ་ཡིན་པར་འགྱུར་ཞིང་དེ་ནས་སྔར་བཞིན་བསྐོར་ཏེ་རྟག་ཏུ་གཡོན་སྐོར་འབའ་ཞིག་གིས་རྒྱུ་བ་ཡིན་ལ། རྒྱུད་དང་འགྲེལ་པ་ལས་དངོས་བསྟན་དུ་དེ་ལས་གཞན་ཅི་ཡང་མ་གསུངས་པ་འདི་ལྟར་ན་དུས་རྟག་ཏུ་ཉིན་མཚན་གྱི་ཐུན་ཕྱེད་བཅུ་དྲུག་པོ་འབའ་ཞིག་ལ་རྒྱུ་ཚུལ་ཡིན་ཞིང་། སྔ་འགྱུར་གཏེར་མའི་ཕྱོགས་འགའ་ལས་ཉིན་བཞི་མཚན་བཞིའི་ཐུན་བརྒྱད་ལ་དུས་ཀྱི་སྒྲ་གཅན་རྒྱུ་ཚུལ་ཡང་འདི་ལྟར་གསུངས་སོ། །དབྱངས་འཆར་བ་སོགས་རྩིས་ཀྱི་མན་ངག་གི་རྒྱུད་གཞན་ན། ཤར་དུ་ཉི་མ་ཤར་ལྷོར་མིག་དམར་སོགས་དང་བྱང་ཤར་དུ་རཱ་ཧུ་བཀོད་ཅིང་རེས་གཟའ་གང་ཡིན་དེ་ཡི་ཕྱོགས་ནས་ཉིན་གྱི་ཐུན་ཕྱེད་དང་པོ་ཡི་རཱ་ཧུ་འཆར་ཞིང་། དཀར་ནག་གི་ཕྱོགས་ཀྱི་ཉིན་མོ་དང་མཚན་མོ་ལ་གཡས་བསྐོར་གཡོན་བསྐོར་གྱི་ཁྱད་པར་བཤད་པ་ཡོད་དོ། །འགྲེལ་ཆེན་ལས་འདིར་གཟའ་བདུན་པོ་རྣམས་ལས་ཉི་མ་འཆར་བ་ལ་ཤར་ནས་ཏེ་ཞེས་གསུངས་པ་འདི་ལ་བརྟེན་ནས་རེས་གཟའ་བདུན་དང་སྦྱར་བའང་འགྲེལ་པ་དུ་མར་སྣང་མོད། གཟའ་བདུན་པོ་རྣམས་ལས་ཞེས་པ་ལུགས་འདིར་རེས་གཟའ་བདུན་པོ་རྣམས་ལས་གང་ཡོད་ཀྱང་འདྲ་སྟེ་ཉི་མ་འཆར་བའི་ཐུན་ཕྱེད་ལ་ཤར་ནས་ཅེས་པའི་དོན་ཡིན་པར་གོ་ཡང་ཆོག་ལ། གལ་ཏེ་རེས་གཟའི་ཁྱད་པར་གྱི་ཉིན་གྱི་དང་པོར་རྟག་ཏུ་ཤར་ནས་འཆར་བར་མི་ངེས་ན་གཟའ་
གཞན་བདུན་པོའི་འཆར་ཕྱོགས་གང་ཡིན་གསུངས་རིགས་པ་ལ་དེའི་ཟུར་ཙམ་ཡང་མ་བྱུང་བས་ལུགས་དེ་གཉིས་གང་འཐད་བརྟག་པར་བྱ་བའི་གནས་སུ་སྣང་ངོ་། །ཐུན་ཕྱེད་སྒྲ་གཅན་དེའི་སྟོབས་བསྔགས་པ་གསུངས་པ། དཔལ་ལྡན་རྩ་བའི་སྒྲ་གཅན་དོར་ནས་ཏེ་དེ་མ་གཏོགས་པ་དུས་ལྷ་གཞན་ལས་རླུང་སྟེ་ཐུན་ཕྱེད་སྒྲ་གཅན་དག་སྟོབས་ཆེ་བས་འདི་ལ་བརྟེན་པར་བྱས་པ་ལས་ཀྱང་རྣམ་པར་རྒྱལ་བ་ཐོབ་པར་འགྱུར་རོ། །རྩ་བའི་སྒྲ་གཅན་གྱི་སྟོབས་བསྔགས་པ་ན། གང་ཞིག་ཕན་ཚུན་རྒྱལ་ཕམ་འགྲན་པའི་འཐབ་མོ་ཆུང་ངུ་དང་། འཐབ་རྩོད་ཆེན་པོ་གཡུལ་དུ་འཁྲུག་པ་དག་ལ་རྩ་བའི་སྒྲ་གཅན་གྱིས་ནི་དགྲ་ཡི་སྟོབས་འཇོམས་པ་དེ་དང་མཚུངས་པ་གཞན་དུས་ལྷ་གང་ཡང་ཡོད་པ་མིན་ཏེ། ཟླ་བའི་སྒྲ་གཅན་དང་བིཥྚི་དང་རྣལ་འབྱོར་མ་ལ་སོགས་པ་མཐའ་དག་ལས་ཀྱང་རྩ་བའི་སྒྲ་གཅན་ཉིད་མཆོག་གོ་ཞེས་གསུངས་སོ། །འཐབ་མོ་པའི་རྒྱལ་ཕམ་གྱི་མཚན་མ་བརྟག་པ་གསུངས་པ། འཐབ་མོ་པ་གཉིས་པོའི་མིང་གཉིས་ཀྱི་དབྱངས་གཅིག་གིས་གཅིག་ལ་དམན་པར་བྱ་ཞིང་། དེ་ཡང་དབྱངས་ཐུང་ངུ་ནི་རིང་པོ་དང་། རིང་པོའང་ཤིན་ཏུ་རིང་པོས་འཇོམས་པའི་ཕྱིར་མིང་གི་དབྱངས་ཀྱི་ཡི་གེ་རྣམས་ཀྱི་མང་ཉུང་གི་སྟོབས་བརྟག་ནས། མཚན་མའི་འཐབ་མོ་པ་ནི་མཉམ་པ་དང་། མི་མཉམ་པའི་གཡུལ་ལ་གང་གི་མིང་གི་དབྱངས་ལྷག་པ་སྟེ་མང་བ་གང་གིས་ཅིག་ཤོས་འཇོམས་པར་བྱེད་པ་སྟེ། ཞེས་མིང་གི་དབྱངས་གང་མང་བ་རྒྱལ་བར་འགྱུར་ཞེས་སོ། །གོང་དུ་རྩ་བའི་སྒྲ་གཅན་གྱི་སྟོབས་བསྔགས་པའི་སྐབས་སུ། འགྲན་པའི་འཐབ་མོ་དང་། འཁྲུག་པ་ཞེས་གསུངས་པ་ལ་འགྲེལ་བར། མཚན་མའི་འཐབ་མོ་འཐབ་མོ་པ་གཉིས་ཀྱི་འཐབ་མོ་དང་འཁྲུག་པ་དག་ལ་ཡང་རྩ་བའི་སྒྲ་གཅན་གྱིས་ནི་ཞེས་གསུངས་ཤིང་། སྐབས་འདིར་འཐབ་མོ་པ་ནི་མཉམ་པའི་གཡུལ་མཚན་མའི་འཐབ་མོ་དང་། མི་མཉམ་
པའི་གཡུལ་གཉིས་ཀའི་དཔུང་གི་འཁྲུག་པ་ལ་སྟེ། ཞེས་གསུངས་པའི་དོན། སྔ་འགྲེལ་རྣམས་སུ་གཡུལ་འགྱེད་པའི་ཆས་སུ་ཞུགས་པའི་མཚན་མའམ། དཔའ་བོའི་མཚན་མ་ཅན་གྱི་དཔུང་ཕན་ཚུན་གྲངས་མཉམ་པ་དང་མི་མཉམ་པ་ཞེས་གསུངས་མོད། འགྲེལ་ཆེན་གྱི་ཚིག་རིས་དང་མི་མཐུན་པས་དཔྱད་བྱར་སྣང་ལ། འདིའི་དོན་འདི་ལྟར་བཤད་དེ་གཡུལ་འཁྲུགས་པ་ལའང་འཐབ་མོའི་མིང་འཇུག་ཅིང་། མཚན་མའི་འཐབ་མོ་ལའང་འཐབ་པའི་མིང་གཡུལ་ཞེས་བརྗོད་འདོད་ཀྱིས་བཏགས་པ་ཙམ་རུང་མོད། སྐབས་འདིར་ཕན་ཚུན་འགྲན་པའི་འཐབ་མོ་དང་། གཡུལ་གཉིས་སུ་བཤད་པའི་དོན་ནི། རང་དང་གཞན་གྱི་ཕྱོགས་ཀྱི་མཚན་མ་བཟུང་ནས་ཐུག་འགྱེད་པ་དང་། ཤོ་དང་རྒྱན་དང་མིག་མང་སོགས་འགྲན་པ་དང་། ཤེད་དང་མདའ་དང་བང་སོགས་འགྲན་པ་ལས་རྒྱལ་ཕམ་གྱི་མཚན་མ་བཟུང་བའི་རིགས་ནི་འཐབ་མོ་ཞེས་བྱ་སྟེ་ཕན་ཚུན་རྩོད་པ་ཡིན་ཡང་ཤིན་ཏུ་མི་མཐུན་པ་མ་ཡིན་པས་མཉམ་པའི་འཐབ་མོ་ཞེས་བྱའོ། །ཞེ་ཤིན་ཏུ་མི་མཐུན་པ་མི་མཉམ་པའི་འཐབ་པ་ནི་གཡུལ་འཁྲུག་པ་སྟེ་དེ་ལྟར་གཉིས་སུ་འབྱེད་པ་འགྲེལ་བའི་དགོངས་པར་གནས་སོ་སྙམ་དུ་བདག་གིས་སེམས་སོ། །གཞན་ཡང་ལུང་སྟོན་པ་པོའི་འབྱིན་རྔུབ་ཀྱི་དབུགས་ལ་འཐབ་མོ་པ་གཉིས་ཀྱི་མིང་གཉིས་ལས་གང་ཞིག །དབུགས་ནང་དུ་སྙིང་ལ་རབ་ཏུ་འཇུག་པ་རྔུབས་པའི་ཚེ་བརྗོད་ན་མིང་ཅན་དེ་ནི་འཁྲུག་པ་དག་ལས་རྒྱལ་བར་འགྱུར་ཞིང་དེའི་ཤུགས་ཀྱིས་དབུགས་ཕྱིར་འབྱིན་པའི་དུས་སུ་གང་གི་མིང་བརྗོད་པ་སྟེ་འཕམ་པར་འགྱུར་རོ། །ཞེས་བསྟན་ཏོ། ཕོ་ཉས་བརྗོད་པ་དག་གི་ཚེ་ན་དང་པོའི་མིང་སྟེ་གང་གི་མིང་དང་པོར་བརྗོད་པ་དེ་རྣམ་པར་རྒྱལ་བར་འགྱུར་ཏེ་མིང་སྔ་མ་བརྗོད་པ་དེའི་རྗེས་ནས་བརྗོད་པའམ། ཕྱིས་ཀྱི་མིང་ཅན་ནི་འཕམ་པར་འགྱུར་རོ། །དབྱངས་
དང་དབུགས་ཀྱི་མཚན་མ་ལ་བརྟག་ནས་རྒྱལ་འཕམ་དུ་འགྱུར་ཚུལ་འདི་དབྱངས་འཆར་རྒྱུད་ཀྱི་རྩིས་ཕྲན་སྐོར་དུའང་བཤད་དོ། །གཞན་ཡང་འཐབ་མོའི་རྒྱལ་འཕམ་བརྟག་པའི་རྩིས་ཀྱི་སྐོར་དབྱངས་འཆར་གྱི་རྒྱུད་ལས་བཤད་པ་རྒྱན་གྱི་འཁོར་ལོ་རྒྱལ་མཚན་དང་དུ་བ་དང་སེང་གེ་དང་ཁྱི་ལ་སོགས་པ་བརྒྱད་ཀྱི་འདུ་བ་དང་ཁ་དོག་ལྗང་དཀར་དམར་ནག་དང་། དེ་བཞིན་བྲམ་ཟེ་སོགས་རིགས་བཞི་དང་མིང་གི་དབྱངས་ལ་སོགས་པ་ཡི་གེའི་ཚོགས་ཀྱི་གསལ་བྱེད་གཉིས་ཀྱིས་བསྒྱུར་ཞིང་དབྱངས་བཞིས་བསྒྱུར་བ་བསྡོམ་སྟེ་བདུན་གྱིས་བགོས་པའི་ལྷག་མ་མཉམ་དང་མི་མཉམ་གྱུར་པ་ལས་རྒྱལ་འཕམ་གྱི་འབྲས་བུ་སྟོན་པ་དབང་ཕྱུག་གིས་དབྱངས་འཆར་གྱི་རྒྱུད་དུ་སྤྲོས་པས་བརྗོད་པ་འདི་དག་ལ་བརྟེན་ནས་ཕྱི་རོལ་པའི་ལྷ་ཤེས་པ་རྣམས་ཀྱིས་མཉམ་པ་དང་མི་མཉམ་པར་གྱུར་པ་རྣམས་ཀྱི་དོན་དེ་ཁོ་ན་ལྟར་མཐའ་གཅིག་ཏུ་གཞན་ལ་རྒྱལ་འཕམ་ལུང་སྟོན་པ་ནི་འབྲས་བུ་མེད་པ་ལུང་སྟོན་པ་ཉིད་དེ། གང་གི་ཕྱིར་ན་མངོན་པར་ཤེས་པ་ལྔ་མེད་པའི་ཕྱིར་གཟའ་སོགས་ཀྱི་མཚན་མའི་བརྟག་པ་ཙམ་ཞིག་གིས་སེམས་ཅན་རྣམས་ཀྱི་ལས་ཀྱི་མྱོང་བ་སྣ་ཚོགས་མཐའ་གཅིག་ཏུ་རྟོགས་པར་མི་ནུས་སོ། །འཇིག་རྟེན་པའི་ཐ་སྙད་ཀྱིས་བརྗོད་པ་དག་གིས་བྱིས་པ་རྣམས་ཀུན་ཏུ་རྨོངས་པ་བསྐྱེད་པའི་ཚིག་ལ་གཙོ་བོར་བཟུང་ནས་སེམས་ཅན་རང་རང་གི་ལས་ཀྱི་འབྲས་བུ་ལ་ལོངས་སྤྱོད་པ་མི་ཤེས་པར་གཟའ་དང་སྐར་མ་ཁྱིམ་ལ་སོགས་པའི་དུས་ཀྱི་དབང་གིས་སེམས་ཅན་རྣམས་བདེ་བ་དང་སྡུག་བསྔལ་བ་དང་འཕམ་པ་དང་རྒྱལ་བ་སོགས་བྱུང་ངོ་སྙམ་དུ་གཟའ་ལ་སོགས་པའི་འབྲས་བུའི་ཟོལ་གྱིས་བྱིས་པ་བསླུ་བར་བྱེད་པའི་རྫུན་གྱི་ཚིག་གི་བཀོད་པ་དུ་མ་དབང་ཕྱུག་གི་ཆོས་ལ་གནས་པའི་དྲང་སྲོང་རྣམས་ཀྱིས་དབྱངས་འཆར་བའི་རྒྱུད་ཀྱི་དོན་དུ་བཀོད་པ་བྱས་ཏེ་དབང་ཕྱུག་གིས་དེ་ལྟར་གསུངས་སོ་ཞེས་རྫུན་གྱི་ཚིག་གིས་འཇིག་རྟེན་རྣམས་རབ་ཏུ་བསླུ་བར་བྱེད་པ་སྟེ་འདིའི་སྤྲོས་པ་རྒྱ་ཆེར་མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་བརྗོད་པར་བྱའོ་ཞེས་འགྲེལ་པའི་གསུངས་པ་གོ་བདེར་བཤད་པ་སྟེ། དྲང་སྲོང་སྐར་མ་ལ་དགའ་བས། ཐུབ་པ་ཁྱོད་ནི་
རྒྱལ་ལ་སྐྱེས། །མཚན་མཆོག་དག་ནི་ཤིན་ཏུ་དགའ། །ཞེས་པའི་ལན་དུ་བཅོམ་ལྡན་འདས་ཀྱིས། ཀུན་ཏུ་རྟོག་པའི་སྤྱོད་ཡུལ་ཅན། །བྱིས་པ་གང་ལ་སེམས་ཆགས་པ། །དེ་ནི་བྱིས་པ་རྨོངས་པ་སྟེ། །ཞེས་སོགས་ཀྱིས་སྐར་མ་རྒྱལ་ལ་སྐྱེས་པའི་སེམས་ཅན་ཐམས་ཅད་མཐའ་གཅིག་ཏུ་བདེ་བར་འགྱུར་བ་མ་ངེས་པ་དང་། ཉ་ཡི་རྒྱ་བཅིངས་པ་སོགས་ལས་སྲོག་ཆགས་དུ་མ་གཅིག་ཆར་འཆི་བ་རྣམས་སྔར་སྐྱེས་པའི་དུས་གཅིག་མ་ཡིན་པ་སོགས་ལས་ཀྱི་དབང་ལས་ཡིན་པར་གསུངས་པ་དང་། སྔར་དྲངས་པའི་རྒྱུད་ཀྱི་ལུང་ལས་ཀྱང་དོན་དེ་ལྟ་བུ་གསུངས་ཏེ། མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་ཀྱང་དོན་དེ་གསུངས་པ་འདིས། དབང་ཕྱུག་ལ་མངོན་ཤེས་ལྔ་མེད་པ་དང་། དབྱངས་འཆར་བའི་རྒྱུད་མཐའ་དག་དབང་ཕྱུག་ལ་ཁ་གཡར་ནས་དྲང་སྲོང་རྣམས་ཀྱི་རྫུན་གྱིས་བཀོད་པ་འབའ་ཞིག་ཏུ་བཤད་པར་མི་བྱ་སྟེ། ཟབ་མོ་ནང་གི་ང་རྩིས་དབུ་མའི་དབུགས་ཀྱི་རྒྱུ་ཚུལ་སོགས་དབྱངས་འཆར་ནས་བཤད་པ་དང་རྒྱུད་འདིར་གསུངས་པ་དགོངས་པ་གཅིག་ཏུ་གྱུར་ཅིང་གཞན་ཡང་རྩ་གསུམ་སྤྲུལ་འཁོར་སོགས་དུ་མ་རྒྱུད་འདི་དང་མཐུན་པ་དང་། ཐུན་ཕྱེད་སོགས་རྒྱུ་ཚུལ་ཆ་འགའ་ལ་མི་མཐུན་པ་ཡོད་ཀྱང་། དེ་འདྲ་ནང་པའི་རྒྱུད་སོ་སོ་ལ་ཡང་དགོངས་པའི་དབང་གིས་མི་འདྲ་བ་ཡོད་ལ། འདུ་བ་སོགས་ཀྱི་ཐད་འདི་མ་གཏོགས་དབྱངས་འཆར་གྱི་རྒྱུད་སྤྱིར་བཀག་པ་མེད་པའི་ཕྱིར། དབྱངས་འཆར་ནི་སྐར་རྩིས་ཀྱི་གཞུང་དག་གི་བླང་དོར་གྱི་འབྲས་རྩིས་སྟོན་པ་ལ་མཆོག་ཏུ་ཟབ་ཅིང་རྒྱུད་འདིའི་འབྲས་རྩིས་ཀྱི་ཆ་ལག་ལྟ་བུ་ཡིན་ལ། སྤྱན་རས་གཟིགས་དང་སྒྲོལ་མས་དབང་ཕྱུག་ཡབ་ཡུམ་གྱི་རྣམ་པས་བསྟན་ཏོ་ཞེས་བླ་མ་སྔ་མ་མང་པོས་གསུངས་ཤིང་ལྷ་དབང་ཕྱུག་ཆེན་པོ་ཡང་མུ་སྟེགས་འདུལ་བ་སོགས་ཀྱི་ཆེད་དུ་སྤྱན་རས་གཟིགས་ཀྱིས་སྤྲུལ་པ་ཡིན་ལ་མ་འོངས་པར་སངས་རྒྱས་པའི་ལུང་བསྟན་ཐོབ་པ་ཡིན་ཞིང་། རྒྱུད་འདིའི་དཀྱིལ་
འཁོར་དུ་ཡང་བཞུགས་པ་ཡིན་པ་དང་། མཆོག་ཏུ་མི་འགྱུར་བའི་ཡེ་ཤེས་གྲུབ་པའི་མདོར་བསྡུས་ཆེན་པོ་ལས། དེ་ལྟར་བརྗོད་པའི་རིམ་པ་འདིས་ས་བརྒྱད་ཀྱི་དབང་ཕྱུག་དང་། དབང་ཕྱུག་ལ་སོགས་པའི་ལྷ་རྣམས་དང་། བྱང་ཆུབ་སེམས་དཔའ་རྣམས་ལ་ཡང་མངོན་པར་ཤེས་པ་ལྔ་རིག་པར་བྱའོ། །ཞེས་གསུངས་པས་སྐུའི་དཀྱིལ་འཁོར་གྱི་གཙོ་བོ་ལྷ་ཆེན་རྣམས་ལ་མངོན་ཤེས་ལྔ་མེད་ཅེས་རྒྱུད་དང་འགྲེལ་པར་དངོས་འགལ་སུ་ཞིག་གིས་སྨྲ་བར་ནུས་ཏེ་ལེགས་པར་བརྟག་ལ་སྨྲོས་ཤིག །ད་ནི་རྩ་བའི་སྒྲ་གཅན་གྱི་སྟོབས་གསུངས་པ། སྒྲ་གཅན་གྱི་མཇུག་མ་དུས་མེ་ནི་འཐབ་མོའི་ས་ལ་གཡུལ་འགྱེད་པ་པོ་མི་བདག་རྣམས་ཀྱི་གཡས་ཀྱི་ཕྱོགས་སུ་ཡོད་པ་དང་། གལ་ཏེ་གཡས་མིན་པ་གཡོན་གྱི་ཕྱོགས་དག་ལ་མུན་ཅན་ཏེ་སྒྲ་གཅན་གདོང་ཡོད་པར་གྱུར་པ་ན། དེ་ཡི་གཡུལ་དུ་ལྷ་ཡི་མགོན་པོ་དག་ནི་འཕྲོག་བྱེད་ཁྱབ་འཇུག་དང་དྲག་པོ་དབང་ཕྱུག་ཆེན་པོ་དང་བཅས་པ་ཡང་མི་རྣམས་ཀྱིས་ཀྱང་འཇོམས་པར་འགྱུར་ན་གཞན་ཕལ་པ་ལྟ་ཅི་སྨོས་སོ། །དེའི་ཕྱིར་དཔལ་ལྡན་རྩ་བའི་སྒྲ་གཅན་རྒྱུ་སྐར་གྱི་ཕྱེད་ཁྱབ་པའི་ལུས་བགས་ཀྱིས་ནང་དུ་འགུག་པའི་ལྟོས་འགྲོ་འཁྱོགས་པོ་ཡི་རྣམ་པ་གཟའ་དྲག་པོ་རྣལ་འབྱོར་མ་དྲུག་ཅུ་སོགས་ལྷ་མིན་རྣམས་ལས་མཆོག་ཏུ་གྱུར་ཅིང་། སྲིད་པ་གསུམ་ལས་རྣམ་པར་རྒྱལ་བ་དེ་ནི། གཡུལ་གྱི་དུས་སུ་ས་ཡི་དཀྱིལ་འཁོར་ལ་ཕྱོགས་གང་དུ་ཇི་ལྟར་གནས་པའི་ཚུལ་ཤེས་པར་བྱ་སྟེ། གཞན་དུ་སྟེ་དེ་ལྟར་མ་ཤེས་ན་ཕ་རོལ་དགྲ་ཡི་དཔུངས་ནི་ཉམས་པ་དག་ཏུ་བྱེད་པ་མེད་དོ། །དེ་ཇི་ལྟར་ཤེས་པར་བྱ་ཞེ་ན། འཐབ་མོ་པའི་ས་ཡི་ཕྱོགས་ཀྱི་ཆ་རྣམས་ལ་རྒྱུ་སྐར་བཀོད་པར་བྱས་ནས་ཐུབ་པ་དུས་ཀྱིས་ཏེ་བཞིས་བསྒྱུར་བ་ཡི་རྒྱུ་སྐར་ཉེར་བརྒྱད་པོ་གཡོན་དུ་རིམ་པས་འགོད་དེ་ཉི་མ་རྒྱུ་སྐར་གང་ལ་གནས་པ་དེ་ཤར་གྱི་དབུས་སུ་བྱས་ནས་དེའི་གཡས་སུ་གསུམ་དང་གཡོན་དུ་གསུམ་སྟེ་བདུན་ནི་དབང་པོ་སྟེ་ཤར་གྱི་སྐར་མ་བདུན་
དང་དེ་བཞིན་དུ་གནོད་སྦྱིན་བྱང་དང་ཆུ་ནུབ་དང་ལྷོ་ཕྱོགས་གཤིན་རྗེར་ནི་བདུན་རེ་བདུན་རེ་བཀོད་པ་དེ་ཡི་རྒྱུ་སྐར་གང་ལ་སྒྲ་གཅན་གདོང་སྐར་ཡོད་པ་དེ་ནས་རིམ་པར་བགྲང་བས་འཁོར་ཕྱེད་ལ་མཇུག་གནས་པས་ཕྱོགས་ཀྱི་ཕྱེད་ཁྱབ་པའི་འཁོར་ལོ་གོ་ལའི་རླུང་འགྲོས་ཀྱི་དབང་གིས་ས་ལ་གཡས་བསྐོར་དུ་འཁོར་བར་བྱེད་དེ། ཉིན་ཞག་བགྲོད་པའི་དབང་གིས་ནམ་ལངས་པ་ནས་སང་ཉིན་གྱི་ནམ་མ་ལངས་པའི་བར་དུ་ཕྱོགས་གང་དང་གང་དུ་འཁོར་བའི་ཚུལ་མཐའ་དག་རྣམས་ནི་རིག་པར་བྱ་སྟེ། ད་ལྟ་ཉི་མ་ས་ཡི་ཕྱོགས་དུམ་བུ་བཅུ་གཉིས་གང་དུ་ཡོད་པ་དེར་ཤར་དུ་ཡོད་པའི་སྐར་མ་བདུན་ཡོད་ལ། དེ་ཡི་མདུན་དྲང་པོར་ནུབ་སྐར་བདུན་ཡོད་ཅིང་། གཡས་དང་གཡོན་དུའང་བདུན་རེ་ཡོད་པ་དེ་ལས་སྒྲ་གཅན་གདོང་མཇུག་ཕྱོགས་གང་ན་ཡོད་པ་དང་། གང་དུ་འཁོར་བ་ཤེས་པར་འགྱུར་ཏེ་རང་གླིང་འདིའི་ཉི་མ་གུང་གི་དུས་ངེས་པར་ཉི་མ་ལྷོ་གླིང་དབུས་མའི་དབུས་དྲང་པོར་སླེབས་པ་ཡིན་པས་དེ་བཞིན་ནམ་ལངས་ནས་ཆུ་ཚོད་ལྔ་རེས་ཉི་མས་དུམ་བུ་རེ་རེ་ལ་གཡས་བསྐོར་གྱིས་བགྲོད་ཅིང་འཁོར་ཚུལ་དེ་ལས་སྒྲ་གཅན་འཁོར་བ་ཤེས་པར་བྱེད་དེ། གྲོ་བཞིན་བྱི་བཞིན་སྐར་མ་གཅིག་གིས་ཁྱོན་ཡིན་པས་རྒྱུ་སྐར་ཉེར་བདུན་གྱི་འཁོར་ལོ་ཟླུམ་པོར་བཀོད་པ་ལ་ནང་དུ་སྒྲ་གཅན་གྱི་གཟུགས་རྒྱུ་སྐར་ཕྱེད་དང་བཅས་པའི་བཅུ་གསུམ་ཁྱབ་པའི་ཟླུམ་སྐོར་འཁོར་རུང་བ་བྱས་ནས་དེ་གདོང་མཇུག་གི་སྐར་མ་གང་གནས་དེ་དང་སྤྲད་ལ། རྒྱུ་སྐར་འཁོར་ལོའི་ཟླུམ་འཁོར་གྱི་ཕྱི་ལས་དུམ་བུ་བཅུ་གཉིས་པོ་ཆུ་ཚོད་ལྔ་རེས་བགྲོད་པའི་དུས་བཅུ་གཉིས་མཚོན་བྱེད་ཟླུམ་སྐོར་ཆ་བཅུ་གཉིས་པ་ལ་ལོ་བཅུ་གཉིས་ཀྱི་མིང་བྲིས་ནས། ཉི་མའི་སྐར་མ་གང་ཡིན་འདབ་མ་དེ་དུས་ཚོད་གང་ཡིན་གྱི་ལོ་དེ་ཡི་ཐད་ཀར་བསྐོར་བས་ད་ལྟ་སྒྲ་གཅན་ཕྱོགས་ལ་ཇི་ལྟར་འཁོར་བ་བདེ་བླག་ཏུ་ཤེས་པར་བྱེད་དེ། དེར་མ་ཟད་གཟའ་བདུན་པོ་ཡང་རྒྱུ་སྐར་གང་དང་གང་ལ་གནས་པ་ཤེས་པས་ད་ལྟ་ཕྱོགས་གང་དང་
གང་ན་འཁོད་པ་དེ་ཤེས་ཤིང་ས་ཡི་སྟོབས་བརྩི་བའི་ཚུལ་དཀའ་བ་མེད་པར་ཁོང་དུ་ཆུད་པར་འགྱུར་བས་སྒྲ་གཅན་བརྩི་བའི་འཁོར་ལོ་སུམ་བརྩེགས་མ་འདི་དེང་སང་སྐར་རྩིས་པ་ཡོངས་ལ་གྲགས་པའོ། །རྒྱུ་སྐར་གང་ལ་དུས་ཀྱི་མེ་དང་མུན་ཅན་དུ་ཡང་རབ་ཏུ་གྱུར་པའི་ལྟ་བ་ལྷུང་བ་ཞེས་པ། འཐབ་མོ་པ་གཅིག་གདོང་གི་སྐར་མའི་ཕྱོགས་དང་གཅིག་མཇུག་གི་སྐར་མའི་ཕྱོགས་སུ་ཡོད་ན། གཅིག་ལ་གདོང་དང་ཅིག་ཤོས་ལ་མཇུག་གི་ལྟ་བ་ལྷུང་སྟེ་དེ་ཡིས་དེ་ལ་ཁ་བལྟས་པའི་ཕྱིར་ན་འཐབ་མོ་པའི་ཕྱོགས་གཉིས་པོ་དག་ལ་ཡང་གཡུལ་དུ་ཕན་ཚུན་དགྲ་ཡི་སྡེ་རྣམས་དག་ནི་འཕྲལ་ལ་ངེས་པར་ལྷུང་བར་འགྱུར་བ་སྟེ་འཕམ་པར་འགྱུར་རོ། །གདོང་མཇུག་གི་སྐར་མ་དེ་གཅིག་པུར་མ་ཟད་དེ་ཡི་མདུན་དང་རྒྱབ་ཏུ་སྐར་མ་བཞི་བཞི་སྟེ་སྐར་མ་དགུ་ནི་གདོང་མཇུག་ཅིག་ཤོས་ཀྱི་ལྟ་བར་གཏོགས་པས་དེར་ཁ་བལྟ་བ་སྤང་བར་བྱའོ། །གདོང་མཇུག་གི་དབུས་ཕྱེད་ལ་གནས་པའི་སྐར་མ་བཞི་ནི་ལྟོ༷་བ་ཡི་དབུས་སུ་གྱུར་པ་དེ་ལ་རྒྱབ་གཏད་པ་རྣམས་རྒྱལ་བར་འགྱུར་རོ། །ལྟོ་བའི་དབུས་ཀྱི་སྐར་མ་བཞིའི་ཐད་དྲང་པོའི་སྐར་མ་བཞི་ནི་གདོང་མཇུག་གཉིས་ཐེབས་པའི་ཕྱོགས་རང་གི་ཁ་བལྟ་བའི་ཕྱོགས་མ་ནོར་བའོ། །དེ་ལྟར་ཤར་དུ་གདོང་པ་དང་ནུབ་ཏུ་མཇུག་མ་ཡོད་ན་དེའི་ཚེ་ལྷོར་ལྟ་བ་དང་། བྱང་དུ་ལྟོ་བའོ། །མེ་ལ་གདོང་པ་ཡོད་ན་རླུང་དུ་མཇུག་མ་དང་། བདེན་བྲལ་དུ་ལྟ་བ་དང་དབང་ལྡན་དུ་ལྟོ་བ་ཡིན་པ་དེའི་འགྲོས་ཀྱིས་ཕྱོགས་བརྒྱད་ཀྱི་ཕྱེད་ཁྱབ་པའི་ཕྱིར་ན་ཕྱོགས་ལྷག་མ་རྣམས་ལ་ཤེས་པར་བྱའོ། །སྒྲ་གཅན་གྱི་དུས་མི་བཟད་པ་ལ་གནས་པ་རྣམས་ནི་འཆི་བ་དང་བཅས་པར་འགྱུར་ཞིང་དེར་གནས་པའི་དཔུང་རྣམས་མཉམ་དུ་ལྷུང་བ་སྟེ་འཕམ་པ་ནི། སྒྲ་གཅན་གདོང་མཇུག་གཉིས་ཀའི་ཁ་བལྟ་བའི་ཕྱོགས་སུ་གྱུར་པ་ལྟོ་བའི་དབུས་ཀྱི་མདུན་གྱི་ཐད་ཀའི་ལྟ་བའི་ཆ་ལ་ངེས་པར་སོང་བ་སྒྲ་གཅན་ལྟོ་བར་ཁ་བལྟས་པ་རྣམས་ཏེ་རྐང་ལག་མེད་པར་བྲང་གིས་འགྲོ་བའི་གཟུགས་ཅན་སྒྲ་གཅན་འཁོར་བའམ་
འགྲོ་བའི་དབང་གིས་དེར་ནི་ཕྱོགས་དེ་ཡི་སྡེ་རྣམས་བཅོམ་པར་འགྱུར་རོ། །གཉིས་ཀས་ལྟ་བ་དང་། གདོང་མཇུག་རེ་རེའི་ཐད་ཀའི་ལྟ་བའི་ཆ་ནི་སྤང་བ་རྣམས་དག་ནི་རྣམ་པར་རྒྱལ་བར་འགྱུར་ཏེ། ལྟོ༷་བར་རྒྱབ་གཏད་ནས་ཞུགས་པ་ལ་གདོང་མཇུག་གཉིས་པོ་ཡང་རང་གི་སྟོབས་སུ་གྱུར་ནས་ཤིན་ཏུ་རྣམ་པར་རྒྱལ་བར་འགྱུར་རོ། །དེ་ལྟར་དཔལ་ལྡན་རྩ་བའི་སྒྲ་གཅན་བཅོམ་ལྡན་འདས་ས་གསུམ་འགྲོ་བའི་བླ་མའི་གསུངས་ལ་གནས་པ་དཔལ་དུས་ཀྱི་འཁོར་ལོར་ཤེས་པར་བྱའོ། །འདིར་རྣལ་འབྱོར་མ་དང་བི༷ཥྚི༷་དང་རཱ་ཧུ་དྲག་པོ་དང་བཀྲ་ཤིས་ལ་སོགས་པ་གཟའ་ཡི་ཚོགས་དང་བཅས་པ་དང་། དབྱངས་ནི་དུས་ལ་འཆར་བ་དག་དང་བཅས་པར་གྱུར་པ་དེ་དག་ཐམས་ཅད་རང་གི་ཕྱོགས་ལ་སྟོབས་སུ་གྱུར་པ་དང་འགྲིགས་ན་ལེགས་པ་ཡིན་མོད་ཀྱི། གལ་ཏེ་མ་འགྲིགས་ན་དེ་དག་ཐམས་ཅད་བཏང་ནས་རྒྱལ་རིགས་གཡུལ་འགྱེད་པ་རྣམས་ཀྱིས་སྲིད་གསུམ་རྣམ་རྒྱལ་རྩ་བའི་སྒྲ་གཅན་གཅིག་པུ་གཟུང་བར་བྱ་བ་སྟེ། གཟའ་ཆེན་པོ་གང་གིས་ཟླ་བ་ཉི་མ་ཟ་ཞིང་། སྐབས་གསུམ་པ་ལྷ་རྣམས་དག་འཇིགས་པར་བྱེད་པ་དྲག་པོའི་གཟུགས་ཅན་མིག་སྨན་གྱི་མདོག་ལྟར་གནག་པ་དེ་ནི་ས་ལ་གང་ཞིག་ཉིན་དང་མཚན་མོར་ཤར་དང་ནུབ་དང་ལྷོ་དང་བྱང་དུ་ཡང་ནི་འཁོར་བ་དེའོ། །ཞེས་སོ། །སྲིད་གསུམ་རྣམ་རྒྱལ་གྱི་དུས་སྦྱོར་ཁྱད་པར་ཅན་ནི། རང་གི་གཡས་སུ་དུས་མེ་དང་། གཡོན་དུ་སྒྲ་གཅན་གདོང་། རྒྱབ་དབུས་སུ་ཉི་མ། མདུན་དབུས་སུ་ཟླ་བ་ཡོད་པ་ལ་ལས་བརྩམ་པ་ན་སྲིད་པ་གསུམ་ལས་རྣམ་པར་རྒྱལ་བའི་དུས་ཁྱད་པར་འཕགས་པ་ཡིན་ནོ། །བཅུ་དགུ་པ་རྫོང་འཇོམས་པ་དང་བསྲུང་བའི་འཁྲུལ་འཁོར་གྱི་ངོ་བོ་ཉིད་ཀྱི་གནས་པ་ནི། གཡུལ་དུ་ཕམ་པའི་དགྲ་བོ་དག་ནི་ཞེས་སོགས་ཚིགས་བཅད་བརྒྱ་ཉེར་བདུན་པ་ནས། བརྒྱ་ཞེ་བརྒྱད་པའི་བར་གྱིས་བསྟན་ཏེ། ཆོས་དང་ལྡན་པའི་ཕྱོགས་
བསྲུང་ཞིང་ཕ་རོལ་གྱི་སྡེ་འཇོམས་པའི་སླད་དུ་དུས་དང་ཕྱོགས་ཀྱི་སྟོབས་བརྩི་བ་སྔོན་དུ་བཏང་ནས་འདིར་འཁྲུལ་འཁོར་གྱི་བྱ་བ་ཅི་རིགས་གསུངས་པ་ལས། རྒྱུད་འདིར་རྡོ་སྒྱོགས་སོགས་བདུན་དང་། ས་འོག་རལ་གྲི་དང་ཤིང་རྟ་དང་། ལྟད་མོའི་ཁང་པ་དང་། འཁོར་ལོའི་ཁྱོགས། ཆུ་འདྲེན་པའི་འཁྲུལ་འཁོར་བཅས་རྣམ་གྲངས་བཅུ་གཉིས་གསུངས་པ་ལས། དང་པོ་ཕ་རོལ་གཞོམ་པའི་འཁྲུལ་འཁོར་གྱི་དགོས་པ་གསུངས་པ། གཡུལ་དུ་ཕམ་པར་གྱུར་པའི་དགྲ་བོ་དག་ནི། གལ་ཏེ་འཕྲལ་ལ་ཁོ་རང་གི་རྫོང་བཙན་པོ་དག་གི་ནང་དུ་ཞུགས་པར་གྱུར་པ་ན། དེ་ཡི་ཕྱི་རོལ་དུ་ནི་འཁྲུལ་འཁོར་བྱ་སྟེ་རྒྱུན་ཆད་མེད་པར་རྡོ་དང་མེ་ཡི་མདའ་རབ་ཏུ་འབབ་པ་དང་། རང་གི་ཁྱིམ་བསྲུང་བ་རལ་གྲི༷་ལ་སོགས་གཅོད་པའི་འཁྲུལ་འཁོར་དག་དང་། ས་གཞིའི་གནས་ལ་རྡོ་རྗེའི་གུར་དང་ཅོག་ནི་དབྱེ་བ་ཡིས། དེ་ཡི་རྫོང་ནི་ཕྱེ་མར་བྱས་ཏེ། ཉིན་ཞག་ཉུང་ཟད་དག་གིས་འགྲུབ་པ་གདུག་པ་ཡི་ལས་དེ་ནི་བསྒྲུབ་པར་བྱ། །ཞེས་སོ། །གཉིས་པ་རྒྱས་པར་བཤད་པ་ལ་བཅུ་གཉིས་པོ་རིམ་པར་བསྟན་ཏེ་ར་བ་བཙན་པོས་བསྐོར་བའི་ཐང་རྫོང་འཇོམས་པ་སྒྱོགས་རྡོའི་འཁྲུལ་འཁོར་གསུངས་པ། ཀ་བ་བཞི་ནི་བརྒྱད་གཉིས་ཁྲུ་ལྡན་ཞེས་སྲིད་དུ་ཁྲུ་བཅུ་དྲུག་པ། དབྱིབས་གྲུ་བཞི། ཞེང་སོར་བཅུ་དྲུག་པ་སྟེ་འཁྲུལ་འཁོར་རབ་ཀྱི་ཚད་དོ། །འབྲིང་དུ་ཀ་བ་བཞི་པོ་ཁྲུ་བཅུ་བཞི་པ་ཞེང་སོར་བཅུ་བཞི་པའོ། །ཐ་མ་ཁྲུ་བཅུ་གཉིས་པ་ཞེང་སོར་བཅུ་གཉིས་པའོ། །ཀ་བ་བཞི་པོ་དེ་དག་ལ་བུག་པ་གྲངས་མཉམ་པ་ཤར་ནུབ་དང་། མི་མཉམ་པ་ལྷོ་བྱང་གི་མཐའི་གནས་ནས་གནས་བརྒྱད་དུ་ནི་ཀ་བའི་ཞེང་གི་སུམ་ཆའི་ཚད་ཙམ་གྱི་བུག་པ་ཕུག་པར་གྱུར་པ་ནི་གདང་བུ་འཛུག་པའི་གནས་སོ། །བུག་པ་དེ་དག་ཐ་དད་པ་རྣམས་ནི་མདུན་ཏུ་གདང་བུ་ཆུ་གཏེར་ཏེ་བཞི་དང་། གཡས་སུ་དུས་ཏེ་བཞི་དང་། གཡོན་དུ་དུས་ཏེ་བཞི་རྣམས་ཀྱིས་ཏེ། རྒྱབ་ཏུ་འོག་གི་ཆ་ལ་ཡང་ནི་གཅིག་གིས་སོ། །རྒྱབ་ཀྱི་ཀ་བ་གཉིས་ལ་བུག་པ་ལྔ་
སྟེ་ཤར་དུ་བསྟན་པའི་བུག་པ་བཞི་དང་། ལྷོ་བྱང་དུ་བསྟན་པའི་རེ་རེའོ། །མདུན་གྱི་ཀ་བ་གཉིས་པོ་དག་ལ་བུག་པ་བརྒྱད་དོ། །འཁྲུལ་འཁོར་གྱི་རྒྱའི་ཚད་ནི། རྩ་བར་ཏེ་འོག་ཏུ་འཁྲུལ་འཁོར་གྱི་ཀ་བ་བཞི་པོའི་རྒྱའི་ཚད་ནི། ལག་པ་བཅུ་ཞེས་པ་ཁྲུ་བཅུ་རུ་འགྱུར་ཏེ་སྟེང་གི་ཆ་དག་ལ་ནི་དེ་ཡི་ཕྱེད་ཁྲུ་ལྔ་ཡིན་ལ། དེ་གཉིས་ཀ་གྲུ་བཞིའོ། །སྒྱོགས་མདའ་ནི་ཀ་བ་རྣམས་ལས་ཁྲུ་གཉིས་དག་གིས་དམན་པར་འགྱུར་ཏེ་ཁྲུ་བཅུ་བཞིའོ། །སྒྱོགས་མདའི་མགོ་བོ་འཇུག་པའི་འཕྲུལ་ཤིང་ངམ་ཨོ༷་ལོག་གཅུ་ཡི་གཞུང་གི་ཚད་ནི་ཁྲུ་དྲུག་པ་སྟེ་སྟེང་གི་ཆ་ནི་ལྷག་པའོ་ཞེས་དེར་མ་གཏོགས་པའོ། །དབུས་སྦོམ་ཞིང་ངོས་གཡས་གཡོན་དུ་བ་ལང་གི་མཇུག་མའི་རྣམ་པར་ཇེ་ཕྲར་བྱས་པའི། །དབུས་ཀྱི་ཟླུམ་པོར་སྦོམ་ཚད་ཕྱེད་དང་བཅས་པའི་ཁྲུ་གཉིས་དག་སྟེ་ངོས་གཉིས་ཀར་སོར་ཉི་ཤུའོ། །ཨོ་ལོག་གཅུའི་རྩེ་མོ་གཉིས་ཀྱི་ཕྱིའི་བུམ་པ་དག་ལ་སོར་སུམ་ཅུའོ། །དབུས་ཀྱི་ཟླུམ་པོ་འདིའི་དབུས་སུ་སོར་མོ་ཐུབ་པ་མ་ནུར་ངེས་པའི་བུག་པ་གཅིག་ཏུ་ནི། ཞེས་པ་བུག་པ་སོར་བཅུ་བཞི་པ་ཞེང་དུ་སོར་བདུན་པ་ཕུག་པར་བྱས་ལ། ཨོ་ལོག་གཅུའི་བུག་པ་དེར་སྒྱོགས་མདའི་ཁྲུ་གང་དོར་ནས་ཁྲུ་བཅུ་གསུམ་པོ་རྣམས་བ་ལང་གི་མཇུག་མའི་རྣམ་པར་བྱས་ཏེ། སྒྱོགས་མདའ་དེ་དེའི་བུ་གར་རབ་ཏུ་གཞུག་པར་བྱ་སྟེ། འཕྲུལ་ཤིང་ཨོ༷་ལོག་གཅུ་ཡི་རྒྱབ་ཀྱི་ཆ་ལ་ལྕགས་ཀྱི་གཟེར་གྱིས་གདབ་སྟེ་བརྟན་པར་བྱའོ། །སྒྱོགས་མདའི་མགོ་བོར་ཁྲུ་གང་གི་ཚད་ལ། སུམ་ཆའི་བར་དུ་བུག་པ་གཉིས་ཕུག་པར་བྱས་པའི་བུག་པ་དེར་ལྕགས་ཀྱི་ཨ་ལོང་གཉིས་ལྡན་པ་དེའི་དབྱིབས་ཟླུམ་པོ་མཐའ་སྐོར་སོར་དྲུག་ཅུ་པ་ལྕགས་ཀྱི་དབྱུག་གུ་ཟླུམ་པོ་དེའི་རྒྱར་སོར་དྲུག་པའོ། །ཨ་ལོང་དེ་དག་རེ་རེ་ལ་ཐག་པ་ལྔ་བཅུ་གདགས་པར་བྱ་སྟེ། ཨོ་ལོག་བཅུའི་སྟེང་གི་ཚད་ནི་ཟླུམ་པོ་ཕྱེད་པའོ། །སྒྱོགས་མདའི་མཐར་ཞེས་རྩེ་
མོར་ནི་མཛུབ་མོ་ལྕེ་དང་བཅས་པ་རབ་ཏུ་འཇུག་སྟེ། སྒྱོགས་མདའི་མཐར་གཉའ་ནོན་དབྱིབས་བས་ཟླུམ་པོ་དག་ནི་མཐོ་གང་ངོ་ཞེས་པ་སོར་བཅུ་གཉིས་སོ། །གཟེར་གཉིས་ཀྱིས་སྒྱོགས་མདའ་དང་བཅས་པ་དང་ལྕེ་དང་བཅས་པ་ལ་གདབ་བོ། །ལྕེའི་རྩེ་མོར་མཛུབ་མོར་ཤེས་པར་བྱ་སྟེ། སོར་དྲུག་ནི་ལྕེའི་གཉའ་ནོན་གྱི་ཚད་ཡིན་ལ་དེའི་བུག་པར་སྒྱོགས་མདའི་གཉའ་ནོན་གྱི་བར་དུ་ལྕེ་དང་མཛུབ་མོ་བཅས་པ་བཅུག་པར་འགྱུར་རོ། །སྒྱོགས་མདའི་མཛུབ་མོ་འདི་ལ་ནི་འུར་མཐིལ་ཐག་པར་བཅས་པ་དག་ལས་ངེས་པར་ཁྲུ་གསུམ་དག་ཏུ་འགྱུར་ཞིང་། འདིར་པགས་པའི་འུར་མཐིལ་སོར་ཉེར་བཞི་པ། དབུས་སྦོམ་པའི་ཞེང་ལ་སོར་བཅུ་གཉིས་པ་གཡས་གཡོན་དུ་རིམ་ཕྲ་བ་ལང་གི་མཇུག་མའི་རྣམ་པའོ། །དེ་ཡི་ངོས་གཉིས་ཀར་སྲད་བུའི་རང་བཞིན་གྱི་ཐག་པ་གཉིས་ཏེ། ཕྱེད་དང་བཅས་པའི་ཁྲུ་གཉིས་ལྷག་པའོ། །འུར་མཐིལ་དེ་ཡི་ནང་དུ་རྡོ་བ་རབ་ཏུ་བཅུག་སྟེ་མི་སྟོབས་དང་ལྡན་པ་འཐེན་པར་བྱེད་པ་རྣམས་ཀྱིས་ཐག་པ་འཐེན་པར་གྱུར་པ་དག་བཏང་བ་ནི་འཕྲལ་ལ་མྱུར་དུ་ནམ་མཁར་འགྲོ་སྟེ་སོང་ནས་འཕྲལ་ལ་ངེས་པར་ལྟུང་ཞིང་ཁང་སྟེང་སོགས་དང་ར་བའམ་ལམ་སྲང་ཉིད་དུ་དངོས་པོ་མཐའ་དག་ཕྱེ་མར་བྱས་ནས་རྡོ་བ་དེས་ཡི་འོག་ཏུ་འགྲོ་སྟེ། དཔེར་ན་རྡོ་རྗེ་སྟེ་ཐོག་འབབ་པ་ཇི་ལྟ་བ་ཉིད་བཞིན་ནོ། །འཁྲུལ་འཁོར་དེ་ཡི་མཛུབ་མོ་ཟླ་བ་ཕྱེད་པ་ཡི་རྣམ་པ་ཅན་ནི། ས་གཞིའི་གནས་སུ་ཤར་ནུབ་ཀྱི་དབུས་སུ་ཚངས་པའི་རི་མོ་མཛུབ་མོའི་འོག་གི་ཐད་ཀ་དང་མཉམ་པ་གདབ་པར་འགྱུར་རོ། །རི་མོ་དེ་ཡི་གཡས་གཡོན་གྱི་ངོས་གཉིས་པོ་དག་ཏུ་ནི་མཐོ་རེ་རེའི་བར་གྱིས་རྡོ་བ་བཏང་བའི་གནས་བརྒྱད་དུ་འགྱུར་བས་གཡས་གཡོན་གྱིས་ཆར་བརྒྱད་གཉིས་ནི་རྡོ་བ་བཏང་བའི་གནས་རྣམས་དག་སྟེ། རྡོ་བ་བཏང་ཚུལ་ནི་མི་རྣམས་ཀྱི་ལག་པ་གཉིས་ཀའི་ཁུ་ཚུར་བཅིངས་པ་བཀྲོལ་བ་ལས་ནི་གཏང་བར་བྱ་ཞིང་གཏོང་བ་ཡི་
དུས་སུ། ལག་གཉིས་ཁུ་ཚུར་གྱིས་རྡོ་བ་ས་ལ་རེག་པ་ཉིད་བྱེད་དེ། གཡས་སུ་གཏོང་ཚེ་ཁ་གཡས་སུ་ཕྱོགས་ཏེ་མཉམ་པ་རྐང་པ་གཡས་པ་དང་། གཡོན་དུ་གཏོང་ཚེ་ཁ་གཡོན་དུ་བལྟས་ཏེ་མི་མཉམ་པ་རྐང་པ་གཡོན་པ་འཁྲུལ་འཁོར་གྱི་ནང་དུ་གཞུག་སྟེ་གནས་པས་ནི་རྡོ་གཏོང་བར་བྱའོ། །དབུས་སུ་གཏོང་ན་རྒྱབ་དྲང་པོར་བསྲང་། རྐང་པ་གཉིས་ཀ་འཁྲུལ་འཁོར་གྱི་ནང་དུ་གཞུག་ནས་སོ། །དེ་ལས་རང་གིས་ཇི་ལྟར་འདོད་པ་བཞིན་རྡོ་བ་ལྷུང་སྟེ་གཡས་གཡོན་དབུས་རྣམ་པ་གསུམ་དུ་བགྲོད་པའི་དབང་གིས་ཕ་རོལ་གྱི་རྫོང་ནི་རྣམ་པར་གཞོམ་པའི་དོན་དུའོ། །སྒྱོགས་རྡོ་གང་ཞིག་བསྣུན་པས་གླང་ཆེན་ཀྱང་འཕྲལ་ལ་ངེས་པར་ལྟུང་བ་སྟེ་གཞོམ་པ་དེ་ལ་སྲོག་ཆགས་ཕྲ་མོ་དག་ནི་ཅི་ཞིག་སྨྲོས། རྫོང་གི་སྟེང་ཁང་ལ་གནས་པའི་དགྲ་ཡི་དཔུང་མ་ལུས་པ་གང་དག་ཕྱི་རོལ་ཏུ་གནས་པར་ལྟུང་བར་བྱེད་པ་སྟེ། དེའི་ཕྱིར་ས་སྟེང་གི་གནས་སུ་ཐང་གི་རྫོང་གི་འཐབ་མོ་འགྱེད་པ་ལ་ནི་གཞུ་འཛིན་ཅིང་འཕོང་སྐྱེན་པ་རྣམས་ཀྱིས་འཁྲུལ་འཁོར་དེ་དང་ལྷན་ཅིག་སུ་ཞིག་འགྲན་ནུས་ཏེ། གང་དུ་དེ་འདྲའི་འཁྲུལ་འཁོར་རབ་ཏུ་བསྣུན་པར་གྱུར་པའི་རྫོང་དེར་དགྲ་བོ་སུ་ཞིག་ཞུགས་པ་དག་ནི་གཤིན་རྗེའི་ཁ་རུ་ཚུད་པའོ། །ཞེས་ཐང་རྫོང་འཇོམས་པ་རྡོའི་འཁྲུལ་འཁོར་བཤད་པའི་སྐབས་སོ། །དེ་ནས་ཆུ་ལ་གནས་པའི་རྫོང་བླང་བའི་དོན་དུ་ཆུའི་འཁྲུལ་འཁོར་གྲུ་བོ་ཆེའི་མཚན་ཉིད་གསུངས་པ། འདིར་ཆུའི་འཁྲུལ་འཁོར་གྱི་དོན་དུ་གཞུང་ཤིང་སྦོམ་དུ་སོར་དྲུག་པ་ཁྲུ་བཅུ་བཞི་པའོ། །གླང་པོ་ཆེ་འཇུག་པའི་འཁྲུལ་འཁོར་ལ་སོར་ཉེར་བཞི། རྟ་འཇུག་པའི་འཁྲུལ་འཁོར་ལ་སོར་ཉི་ཤུ། མི་འཇུག་པའི་འཁྲུལ་འཁོར་ལ་སོར་བཅུ་དྲུག་སྟེ། འཁྲུལ་འཁོར་དང་པོ་ལ་དཀྱུས་སུ་ཁྲུ་བཅུ་གཉིས་ཀྱི་ཁྲུ་དོ་རེ་དོ་རེའི་བར་དུ་འཕྲེད་ལ་གནས་པའི་ཀ་བ་དང་དཔུང་པ་སྟེ་གདང་ཤིང་གཉིས་དྲུག་རེ་དྲུག་རེ་དག་གིས་བརྒྱན་པ་
དང་སྟེང་དུ་ཡང་དེ་དང་འདྲ་སྟེ། སྟེང་འོག་གཉིས་ཀའི་ནང་ངམ་བར་ནི་ཚད་མཉམ་པ་སྟེ་རེ་རེ་ལ་ཁྲུ་ནི་ཟུང་གི་བར་ཏེ་ཁྲུ་གཉིས་པ་ཡིན་པས་གྲུ་བཞི་ལྷག་ཆད་མེད་པ་དག་ལ་ཀ་བ་དྲུག་དང་གདང་ཤིང་གི་ནང་གཉིས་ཀྱིས་སྙིང་པོ་རེ་རེ་དག་ཏུ་འགྱུར་བ་བསྡོམ་པས་ཉི་མའི་ཁྲུ་རུ་འགྱུར་ཏེ་ཀ་བ་དང་གདང་བུ་གཉིས་ཀའི་ནང་ནི་མཉམ་པ་ལྷག་པ་དང་ཆད་པ་མེད་པ་ཉིད་དོ། །སོ་སོའི་རེའུ་མིག་ཀུན་ལ། སྤང་ལེབ་ཁ་འགྲིག་པར་གཤོང་བྲུས་ཏེ་ཆུ་མི་འཆོར་བར་སྤྲད་པ་དག་སྟེང་འོག་ཤར་ལྷོ་ནུབ་བྱང་ཀུན་ཏུ་དང་། སྤང་ལེབ་སོ་སོའི་མཚམས་སུ་པགས་པ་བཞུ་བ་སྦྱིན་དང་སྤྲ་ཚིལ་དང་དེས་བསྐུས་པའི་གོས་ཆུ་དར་རྣམས་ཀྱིས་ཀྱང་གཡོགས་པ་སྟེ། དེ་ཡང་གླང་པོ་ཆེ་རྣམས་ཀྱི་སྙིང་པོ་ནི་དཔངས་སུ་ཁྲུ་གསུམ་མོ། །རྟ་རྣམས་ཀྱི་ཕྱེད་དང་བཅས་པའི་ཁྲུ་གཉིས། མི་རྣམས་ཀྱི་ཁྲུ་གཉིས་སོ། །ཇི་ལྟར་སྙིང་པོའི་དབུས་སུ་རླབས་ཀྱི་ཆུ་མི་འཇུག་པའི་ཆེད་དུ་ཁྲུ་གཉིས་ཀྱི་དཔངས་ནི་གྲུ་བོ་ཆེའི་མགྲིན་པའི་གནས་སུ་སྙིང་པོའི་དབུས་སུ་འཇུག་པའི་སླད་དུ་བྱའོ། །སྙིང་པོ་དམན་འབྲིང་མཆོག་གི་དབྱེ་བས་འཁྲུལ་འཁོར་དུ་མར་འགྱུར་ཏེ། དུས་ཞེས་པ་སྙིང་པོ་དྲུག་གིས་འཁྲུལ་འཁོར་གཅིག་ཏུ་འགྱུར་བ་དང་། དེ་བཞིན་དུ་བརྒྱད་དང་སྐྱོན་ཏེ་བཅོ་བརྒྱད་དང་། སུམ་འགྱུར་ཉིན་བྱེད་ཀྱིས་ཀྱང་སྟེ་སྙིང་པོ་སུམ་ཅུ་རྩ་དྲུག་གིས་འཁྲུལ་འཁོར་གཅིག་ནི་རབ་ཏུ་བྱ་ལ་རྒྱ་མཚོ་ཆེན་པོ་བརྒལ་བའི་སླད་དུ་སྙིང་པོ་སྟོང་ཕྲག་གི་མཐར་ཐུག་པའི་བར་དུའོ། །འདིར་ཕྱི་རོལ་དུ་དཔུང་པ་གདང་ཤིང་བཞི་རྣམས་ལ་ཤར་ནུབ་ཀྱི་དཔུང་བ་གཉིས་དང་། ལྷོ་བྱང་གི་གཉིས་ཏེ་བཞི་པོ་རྣམས་ཀྱི་ཀ་བའི་ཤིང་སྙིང་པོའི་གྲ་བཞིའི་བར་དུ་འཕྲུལ་བ་སྤང་ལེབ་དག་ཀྱང་དཔུང་པ་གདངས་ཤིང་རྣམས་ཀྱི་རྒྱ་ཡིས་བཏབ་པའམ་ཀུན་ནས་འཁོར་བར་གནས་སོ། །དེ་ཡང་སྐྱ་བ་འཛིན་པ་གྲུ་པ་རྣམས་ཀྱི་གནས་གསེང་བུ་ག་བཏོད་པ་མ་གཏོགས་པར་དེ་ལྟར་འཁོར་བར་བྱའོ། །འཁྲུལ་འཁོར་ཀུན་
གྱི་རྒྱབ་ཏུ་སྙིང་པོ་བཅུ་གཉིས་པ་ལ་སྐྱ་བ་འཛིན་པ་དྲུག་སྟེ། དེ་བཞིན་དུ་འཁྲུལ་འཁོར་ཆེ་རིམ་ལ་བཅུ་གཉིས་དང་སུམ་ཅུ་དང་བརྒྱའི་མཐར་ཐུག་པའི་བར་དུའོ། །སྐྱ་བ་འཛིན་པ་དེ་རྣམས་ཀྱི་ཐད་ཀ་འཁྲུལ་འཁོར་གྱི་མདུན་ནས་ཀྱང་རྒྱབ་མདུན་གྱི་དཔུང་པ་གཉིས་ཀ་མཉམ་པ་འཁྲུལ་འཁོར་འདྲེན་པ་གྲངས་སྔ་མ་ལྟ་བུའམ་འཁྲུལ་འཁོར་ཆེ་ཆུང་དང་རྗེས་སུ་མཐུན་པས་འཁྲུལ་འཁོར་འདྲེན་པ་སྟོང་གི་མཐར་ཐུག་པའི་བར་དུའོ། །ཕྱོགས་ཀྱི་ཀ་བའི་སྟེང་གི་ཁུང་བུར་རབ་ཏུ་བཙུགས་པའི་གཡོ་བའི་རླུང་གི་དར་རྣམས་ཀྱིས་ནི། རླུང་འགྲོ་ཕྱོགས་དང་རྗེས་སུ་མཐུན་པར་ཤེས་ནས་རླུང་དར་བཙུགས་པ་དེ་ཡིས་གྲུ་རླུང་གིས་བསྐྱོད་པ་ལས་གང་དྲང་སར་ཡང་འགྲོ་སྟེ། དེ་ལྟ་བུའི་གཟིངས་ཀྱི་འཁྲུལ་འཁོར་ལ་ཞོན་པ་རང་གི་སྡེ་རྣམས་ནི་ཕ་རོལ་གྱི་ཆུ་ཡི་དབུས་སུ་ཚུད་པའི་རྫོང་དག་ཉམས་པར་བྱེད་པའི་དོན་དང་གླིང་བཟུང་བའི་དོན་དུ་ཆུ་ཡི་གཏེར་ལ་འགྲོ་བ་ཡིན་ནོ། །ཆུ་རྫོང་འཇོམས་པ་གྲུ་ཡི་འཁྲུལ་འཁོར་བཤད་པའོ། །ད་ནི་རིའི་རྫོང་བཤིག་པ་མེའི་འབྲུ་མར་འཕེན་པའི་ཆེད་དུ་རླུང་གི་འཁྲུལ་ཁོར་རམ་མེའི་འཁྲུལ་འཁོར་གསུངས་པ། ཆུ་གཏེར་ཟུར་ལྡན་ཏེ་ཟུར་བཞི་པའི་སྟེགས་བུ་བྱ་ཚུལ་སྤང་ལེབ་གྲུ་བཞི་པ་ཁྲུ་བཞིའི་སྟེགས་བུ་གཅིག་གི་དབུས་དག་ལ་ཀ་བ་ཟླུམ་པོ་སྲིད་དུ་ཁྲུ་གསུམ་པ་རྒྱར་སོར་བཅུ་གཉིས་པ་གཅིག་བྱས་ཏེ། སྤང་ལེབ་འདིར་ཟུར་དུ་གཡོ་བའི་རླུང་གི་དར་དང་། སྲིད་དུ་ཁྲུ་ལྔ་པ་རྒྱར་གཅིག་པ་ཅན་གྱི་རྒྱལ་མཚན་རྣམས་དང་བཅས་པ་ཀ་བར་གདགས་པར་བྱའོ། །སྤང་ལེབ་ཀྱི་གཡོན་གཡས་རྒྱབ་མདུན་གྱི་ཟུར་རྣམས་སུ་ལྕགས་ཀྱི་ཕུར་པ་རྩེར་ཨ་ལོང་དང་བཅས་པའམ། ཨ་ལོང་དེ་རྣམས་ལ་བཏགས་པའི་ཐག་པ་རྣམས་ཀྱི་ཀ་བའི་མགོ་བཅིང་བར་བྱ་ཞིང་། འཁྲུལ་འཁོར་གྱི་ཕྱོགས་ཆ་གཉིས་སྟེང་དང་འོག་གི་མཐར་ཐུག་པར་སྲ་བའི་གོས་རྣམས་ཀྱིས་
གཡོག་པར་བྱའོ། །དེའི་ཟུར་དུ་རྒྱལ་མཚན་གོང་བཤད་བཞིན་ནོ། །འོག་དང་གཡོན་དང་གཡས་ཀྱི་ཟུར་གྱི་ཨ་ལོང་ལ་ཁྲུ་གཉིས་ཀྱི་བར་དུ་ཐག་པ་གསུམ་མོ། །དེར་ཐག་པ་རྣམས་གཅིག་ཏུ་བསྡོམ་པའི་རྩེ་ནས་ཐག་པ་རིའི་རྫོང་གི་དཔངས་ཀྱི་ཚད་དང་མཚུངས་པར་བྱས་ནས། ཐག་པ་དེས་རྫོང་གི་རྒྱབ་ཀྱི་ཕྱོགས་ནས་མི་རྣམས་དག་གིས་དྲངས་ཤིང་ས་ལས་ཐག་པ་དག་གིས་དྲངས་པའི་མཐུས་སྟེང་དུ་འགྲོ་བ་ནི་འཁྲུལ་འཁོར་དེ་རླུང་གིས་རབ་ཏུ་བསྐྱོད་པར་གྱུར་པ་ངེས་པར་བྲག་གི་རྫོང་གི་སྟེང་དུ་མཁའ་ལ་འགྲོ་བ་སྟེ། འཁྲུལ་འཁོར་དེར་མེ་ཡི་འབྲུ་མར་དང་མེ་དང་བཅས་པའི་སྐྱེས་བུ་ཞིག་གཞུག་པར་བྱ་ཞིང་། རླུང་གི་འཁྲུལ་འཁོར་ལ་ཞོན་པའི་མི་དེས་རླུང་གི་འཁྲུལ་འཁོར་དེ་ནས་མེ་ཡི་འབྲུ་མར་འཕངས་པས་དགྲ་ཡི་དཔུང་དང་རྫོང་ནི་ཐམས་ཅད་ཀུན་ནས་སྲེག་པར་བྱེད་པའོ། །རི་རྫོང་འཇོམས་པ་མེ་ཡི་འཁྲུལ་འཁོར་གྱི་ངེས་པའོ། །རང་གི་རྫོང་སོགས་ཀྱི་ཕྱོགས་ཀྱི་གནད་དུ་གཞན་མི་འཇུག་པའི་ཆེད་དུ་རལ་གྲི་འཁོར་བ་གྲི་གུག་གི་འཁྲུལ་འཁོར་ནི། རལ་གྲིའི་འཁོར་ལོའི་རྩ་བར་སྲོག་ཤིང་གི་སྣ་ལ་ལྕགས་ལས་བྱས་པའི་གནམ་གདན་རྩེ་གཅིག་པ་ནི་འོག་གི་ཁུང་བུར་གཞུག་ཅིང་། གནམ་གདན་གྱི་སྟེང་དུ་ཡང་ནི་འཁོར་ལོ་ཆུ་འཁོར་དང་ཆུ་འཐགས་ཀྱི་གཤོག་པའི་འཁོར་ལོ་ལྟ་བུ་དག་བྱས་པ་ལ་ནི་སྲོག་ཤིང་གི་ཟླུམ་སྐོར་གྱི་སོར་མོ་གཉིས་གཉིས་ཀྱི་བར་དུ་འཁོར་ལོའི་རྩིབས་སུ་ཞེས་རྩིབས་རེ་རེ་གཞུག་པར་འགྱུར་ཏེ། རྩིབས་ཀྱང་སྲོག་ཤིང་གི་ཟླུམ་པོའི་མཐའ་མ་མ་ལུས་པར་ནི་ཁྱབ་པར་དགོད་པར་བྱ། འཁོར་ལོ་དེ་ཡི་ཚད་ནི་ཐད་ཀར་ཁྲུ་ནི་ཕྱེད་དང་གསུམ་པར་འགྱུར་ཞིང་། གནམ་གདན་གྱི་སྟེང་དུ་འཁོར་ལོ་ལས་གཞན་ཡང་དེར་ནི་འཁོར་ལོའི་སྲོག་ཤིང་གནས་པ་སྟེ། སྲོག་ཤིང་གི་སྟེང་གི་རྩེ་མོ་ཉིད་དུ་འོག་གི་འཁོར་ལོའི་རྩིབས་བཅུག་པ་ལྟར་རལ་གྲི༷་རྣོན་པོ་བཅུག་པ་མྱུར་བར་འཁོར་ཏེ་དེས་དགྲའི་ལུས་གཅོད་པར་བྱེད་དོ། །དེ་འཁོར་བར་གང་གིས་བྱེད་ན་འཁྲུལ་
འཁོར་གྱི་ནི་རྩ་བ་ལ་ཡོད་པའི་འོག་གི་འཁོར་ལོ་དེ་ཆུའམ་རླུང་གིས་འཁོར་བས་སོ། །ཞེས་གསུངས་ཏེ། འགྲེལ་ཆེན་ལས་གྲི་གུག་གི་འཁྲུལ་འཁོར་ནི་མངོན་སུམ་མཐོང་བས་རྟོགས་པར་བྱ་སྟེ། ཚིགས་སུ་བཅད་པས་ཀྱང་གསལ་བར་གསུངས་ལ་དེ་བཞིན་རྩེ་མོ་འབྱེད་པ་རླུང་གི་འཁྲུལ་འཁོར་ཡང་རབ་ཏུ་གསལ་བར་གྱུར་པས་དེ་གཉིས་དང་གུར་གྱི་འཁྲུལ་འཁོར་ལ་ཡང་འགྲེལ་བཤད་མ་བྱས་ཞེས་གསུངས། འདིར་ནི་སྔ་འགྲེལ་རྣམས་ཀྱི་འབྲུ་གནོན་ཚུལ་དེ་བཞིན་དུ་བརྗོད་པའོ། །གྲི་གུག་གི་འཁྲུལ་འཁོར་གྱི་ངེས་པའོ། །རྫོང་གི་རྩེ་མོ་འབྱེད་པ་ང་གི་འཁྲུལ་འཁོར་གསུངས་པ། ཐག་པ་དྲངས་པ་ཡིས་ནི་རླུང་གི་འཁྲུལ་འཁོར་ནམ་མཁའ་དག་ལ་འགྲོ་སྟེ། སྔར་མེ་ཡི་འཁྲུལ་འཁོར་བཤད་པ་ལྟར་ལ།རང་གི་ཕྱོགས་ནས་དགྲ་ཡི་རྫོང་གི་ཕྱོགས་སུ་རིམ་པར་འགྲོ་བའི་རླུང་རྗེས་སུ་མཐུན་པ་གཡོ་བ་དང་རླུང་གི་དར་སོགས་ཀྱི་འཕྲུལ་ཐབས་ཁྱད་པར་བ་ལས། རིམ་པས་སོ་ཞེས་ཕ་རོལ་གྱི་རྫོང་གི་སྟེང་དང་དགྲ་ཡི་ཁྱིམ་དུ་སོ་སོར་འགྲོ་བར་ངེས་པ་ཉིད་དུ་མི་རྣམས་ཀྱི་ཚད་བཟུང་སྟེ་ཐག་པ་དྲངས་པར་བྱས་ནས། རི་ཡི་མཐོ་དམན་དང་དགྲ་ཡི་ས་ཡི་བར་ཐག་ལ་ཇི་ཙམ་ཡོད་པའི་ཚད་ཀྱང་ཚུལ་དེ་ཡིས་ཤེས་པའམ་བརྗོད་པར་འགྱུར་ཏེ། དེ་ལྟར་རླུང་གི་འཁྲུལ་འཁོར་ལ་ཞོན་ནས་དགྲ་རྣམས་ཀྱི་ནི་རྫོང་གི་རྩེ་མོ་འབུག་པའམ་འབྱེད་པ་ཡིས་བཤིག་པར་བྱེད་པ་རྫོང་གི་རྩེ་ལ་བཀོད་དེ་དགྲ་ཡི་ཁང་པའི་གཞི་དང་འདུན་ས་དག་ལ་སྔར་བཞིན་མེ་ནི་རབ་ཏུ་སྦྱིན་པར་བྱའོ། །རྫོང་གི་རྩེ་མོ་འབྱེད་པ་ང་གི་འཁྲུལ་འཁོར་གྱི་ངེས་པའོ། །དེ་ནས་མཁར་གྱི་རྩིག་པ་འཇིག་པ་རྡོ་རྗེ་གུར་གྱི་འཁྲུལ་འཁོར་གསུངས་པ། ཤིང་རྟའི་འཁོར་ལོ་ལྟ་བུའི་འཁོར་ལོ་རྣམས་ཀྱི་སྟེང་གི་ཆ་ལ་ལྕགས་དང་ཤིང་རྣམས་དག་གིས་གུར་གྱི་རྣམ་པའི་ཁང་པ་ཆེན་པོ་བཀོད་པ་དེ་ནི་བར་མཚམས་རྣམས་སུ་ཡང་སྤང་ལེབ་བམ་ཕུབ་དང་ནི་ཕྱི་ནས་མ་ཧེའི་པགས་པ་
རྣམས་ཀྱིས་ཀུན་ནས་གཡོགས་པར་གྱུར་པ་ཟླུམ་པོའི་རྣམ་པ་སྟེ། དེ་འཁོར་ལོ་འདྲེན་པའི་མི་རྣམས་དག་གིས་བསྐྱོད་པར་གྱུར་པ་དེ་ནི་གཞི་ཀུན་ནས་མཉམ་པའི་ས་ལ་འོབས་ཀྱིས་བསྐོང་བ་ལ་ནི་མ་ཐུག་པ་ཇི་སྲིད་ཉིད་དུ་འགྲོ་བར་འགྱུར་ཞིང་། དེ་ནས་མི་རྣམས་ཀྱིས་འོབས་དེ་སས་བཀངས་ནས་མཉམ་པར་བྱས་ཏེ་དགྲ་བོའི་མཁར་གྱི་རྩིག་པ་དང་ནི་ལམ་སྲང་ངམ་འཐབ་ར་དག་ཏུ་འཕྲལ་ལ་རབ་ཏུ་འཇུག་པར་འགྱུར་ཞིང་ཚུལ་དེས་མཁར་གྱི་རྩིག་པའམ་ལམ་སྲང་གི་འཐབ་ར་རྣམས་བཤིག་པ་ལས་སྟོབས་དང་ལྡན་པར་འགྱུར་རོ། །རྡོ་རྗེ་གུར་གྱི་འཁྲུལ་འཁོར་རོ། །ཙོག་ནི་འདི་དང་ཆ་འདྲ་ཞིག་ཡིན་ནམ་སྙམ་མོ། །དེ་ནས་གོ་ཆ་འབིགས་པ་ལྕགས་མདའི་འཁྲུལ་འཁོར་གསུངས་པ། གཞུ་སོགས་གང་ལ་འཛུགས་པའི་གཞི་གདང་བུའམ་སྟེགས་བུ་ཞེང་སོར་དྲུག་པ་དཀྱུས་ལྕགས་མདའི་ཚད་དང་མཉམ་པ་ལ། ལྕགས་མདའི་ཞེང་ཚད་དང་མཉམ་པའི་་གསུམ་ནས་དྲུག་གི་བར་བརྐོས་པའི་་དེའི་འོག་དང་སྟེང་དང་གཡས་དང་གཡོན་གྱི་ཆར་ལྕགས་ཀྱི་དབྱུག་པ་སོར་དྲུག་པ་གྲུ་བཞི་པའི་རྩེ་མོར་སྟེགས་བུར་གཟེར་གྱིས་རྒྱས་བཏབ་པའི་བུག་པ་ལ་ལྕགས་ཀྱི་ཕུར་པ་གྲུ་བཞི་པ་རྣམས་ཀྱིས་མཚམས་གཉིས་དང་དབུས་མ་ལ་ངེས་པར་རྒྱུད་དང་བཅས་པའི་གཞུ་བཅུག་པ་ནི་གཡས་གཡོན་གྱི་ལྕགས་གཟེར་ལ་གཡོ་བ་མེད་པར་བཅིངས་པའམ་བཏགས་པར་བྱས་ནས་སྔར་གྱི་ལྕགས་དབྱུག་གི་རྩེ་མོར་ཕུར་པ་བཏབ་པའི་ཕུར་བའི་སྣའི་བུག་པར་འཁྲུལ་ཤིང་གི་རྩེ་མོ་གཉིས་པོ་གཞུག་པར་བྱའོ། །སླར་ཡང་འཁྲུལ་འཁོར་གྱི་སྟེགས་བུ་དེའི་རྒྱབ་ཀྱི་ཆ་དག་ཏུ། གཡས་དང་གཡོན་དུ་ལྕགས་ཀྱི་ཕུར་པ་གྲུ་བཞི་པ་གཉིས་བཏབ་པ་ལ་ལེགས་པར་བཀོད་པའི་འཕྲུལ་ཤིང་གི་དབུས་ལ་ནི་བྲེ་བའི་སོ་ལྟ་བུའམ་སོར་མོ་ལྟ་བུ་ཕྱེད་འཁྱོགས་གཉིས་ནས་དྲུག་གི་བར་རྣམས་སོ། །འོག་ཏུ་ལྕགས་ཀྱི་དབྱུག་གུ་མཐེའུ་ཆུང་གི་ཚད་ཆུར་སོར་གསུམ་པ་གཅིག་འོག་གི་ཕུར་པའི་ཨ་ལོང་གཡོ་བ་དང་བཅས་པ་ལ་
གཞུག་པར་བྱའོ། །སྟེང་གི་སོར་མོའི་རྩེ་མོ་དག་ལ་གཞུ་རྒྱུད་རྣམས་བཅིངས་པར་བྱའོ། །སོར་མོའི་རྩེ་མོ་དེ་ལ་སོ་སོའི་མཚམས་སུ་ལྕགས་མདའ་དང་རྒྱུད་རྣམས་སོ། །གཞུ་ཡི་རྒྱུད་དེ་ཉིད་ཀྱིས་ནི་མང་ཞིང་ཤུགས་མཉམ་པའི་མདའ་འམ་ལྕགས་མདའ་རྣོན་པོ་རྣམས། གཡུལ་གྱི་དུས་སུ་འཕངས་པས་གོ་ཆ་བགོས་པ་དང་བཅས་པའི་གླང་ཆེན་གྱི་ལུས་པོ་ཐལ་བྱུང་དུ་ཕུག་ནས་རབ་ཏུ་འགྲོ་བར་འགྱུར་རོ། །གོ་ཆ་དང་བཅས་པའི་གླང་ཆེན་འབིགས་བ་ལྕགས་མདའི་འཁྲུལ་འཁོར་རོ། །འདི་ལ་འགྲེལ་པས་ཅུང་ཞིག་རྒྱས་བཤད་མཛད་པ་འདུག་ཀྱང་འདིར་རྒྱུད་རྩ་བའི་འབྲུ་ནོན་ཙམ་ཞིག་གི་ཆེད་དུ་བཀོད་པ་སྟེ། འཁྲུལ་འཁོར་འདི་རིགས་མིག་མཐོང་ལག་ལེན་མེད་པས་བཤད་ཡམ་གྱིས་ཇི་བཞིན་ཤེས་པ་མི་འོང་ཞིང་བོད་ཀྱི་སྔ་འགྲེལ་རྣམས་སུའང་ཞིབ་ཏིག་ཅི་གསུང་མ་བྱུང་བ་ལྟར་གྱུར་ཅིང་། མཐོང་རྒྱུན་ཡོད་ན་ལས་སླ་བར་ཟད་མོད། མ་ཤེས་ཐབས་ཆགས་ཀྱང་མེད་པས་འོལ་སྤྱི་ཙམ་མོ། །དེ་ལྟར་ཕ་རོལ་གྱི་སྡེ་འཇོམས་པའི་འཁྲུལ་འཁོར་བདུན་བཤད་པ་སོང་ནས།ད་ནི་རང་གི་ཕྱོགས་བསྲུང་བའི་འཁྲུལ་འཁོར་ལས། རྒྱལ་པོའི་ཕོ་བྲང་བསྲུང་བའི་སླད་དུ་ས་འོག་རལ་གྲིའི་འཁྲུལ་འཁོར་གསུངས་པ། ཀ་བ་གྲུ་བཞི་པ་རྒྱར་སོར་བཅུ་གཉིས་ཀྱི་ཚད་རིང་ཐུང་ཁྲུ་བཞི་པ་གཉིས་ནི། ཁྲུ་གཉིས་ཐུར་དུ་བརྐོས་པའི་ས་ཡི་ནང་དུ་ནུབ་ཅིང་བརྟན་པར་བཙུགས་པ་དག་ཏུ་བྱས་ལ། ས་ཡི་གནས་ནས་སྟེང་དུ་ཁྲུ་ཕྱེད་དང་གཉིས་དོར་ཏེ་དེ་ནས་གཡས་དང་གཡོན་གྱི་ཀ་བའི་བུག་ལ་འཕྲུལ་ཤིང་ངམ་གདང་བུ་གཞུག་པར་བྱའོ། །སྟེང་དུ་སོར་དྲུག་དོར་ནས་ཐག་པ་རྣམས་ཀྱིས་དམ་པོར་དཀྲིས་པར་གྱུར་པ་སྟེ། ཕན་ཚུན་གཉིས་ཀྱི་ཐག་པའི་དབུས་ཀྱི་ཟླུམ་པོའི་དབུས་སུ་རལ་གྲི༷འི་ཆང་ཟུང་ཚུད་པ་དག་ཏུ་བྱ་བའི་ཆེད་དུ་སྦུ་གུ་ཟླུམ་པོ་དང་བཅས་པའི་ཐག་པ་གཅུས་ཏེ་སྐོར་བ་དུ་མས་བསྐོར་བར་གྱུར་པ་ཚད་དུ་ཕྱིན་པ་ན་ཟླུམ་པོ་དེ་ཡི་དབུས་སུ་
རལ་གྲིའི་ཆང་ཟུང་བཅུག་ལ། ཟླུམ་པོ་དང་རལ་གྲིའི་ཆང་ཟུང་ཐད་ཀར་ཕུག་པ་ལ་ངེས་པར་གཡོ་བ་མེད་པར་བྱ་བའི་དོན་དུ་སྣ་གཟེར་གྱིས་བཏབ་པར་རབ་ཏུ་འགྱུར་རོ། །དེ་བཞིན་དུ་མདུན་ནས་ཀ་བ་གཉིས་པོ་ལ་རལ་གྲི་སྔ་མ་བསྐོར་ལུགས་ལས་བཟློག་པས་བསྐོར་བས་རལ་གྲི་གཉིས་ཀའི་རྩེ་མོ་ཕྱོགས་ལྷན་ཅིག་ཏུ་འོང་བ་བྱས་ལ། གཟེར་དང་ཐག་པར་བཅས་པ་རལ་གྲི་འཐོན་པའི་ས་མ་གཏོགས་པ་སྤང་ལེབ་ཀྱིས་གཡོགས་པར་བྱ་ཞིང་མི་མངོན་པར་བྱའོ། །རལ་གྲིའི་སོ་ཡི་རྩེ་མོའི་ཆ་ཡང་སྟེང་ནས་དགྲ་ཡི་རྐང་པས་མནན་ཏེ་མ་བསྐུལ་བར་དུ་རང་གར་རལ་གྲི་མི་གཡོ་བར་མནན་པར་བྱའོ། །དེ་ཡི་སྟེང་དུ་རལ་གྲི་འཐོན་པའི་བུག་པའི་རེ་ཁཱ་ཅན་གྱི་སྤང་ལེབ་བསྒྲིག་པ་དེ་ལ་གང་གི་རྐང་པ་བཞག་པ་ལས་ནི་རལ་གྲི་བསྐུལ་བར་འགྱུར་བ་སྟེང་དུ་འཐོན་པའོ། །རལ་གྲིའི་སྟེང་དུ་ཟླ་བའི་ཞེས་པ། རལ་གྲིའི་ཆང་ཟུང་གི་སྟེང་དུ་གནས་པའི་འཕྲུལ་ཤིང་གི་མིང་ལ་ཟླ་བ་ཞེས་གསང་བའམ་སྦས་པའི་བརྡས་བརྗོད་པ་སྟེ་འཕྲུལ་ཤིང་དེའི་ཚད་ནི་སོར་དྲུག་པའོ། །དབུས་ཀྱི་ཆ་ལ་ལྕགས་ལས་བྱས་པ་ཆུང་ངུ་ཡང་ལ་སྲབ་པ་གཅིག་ཀྱང་བཞག་པར་བྱ་སྟེ་རལ་གྲི་མནན་པའི་དོན་དུའོ། །འཕྲུལ་ཤིང་ཟླ་བའི་སྟེང་དུ་གང་གི་རྐང་པ་བཞག་པ་དེ་ནི་འཕྲལ་ལ་རལ་གྲི༷་ཡིས་ཀྱང་གཅོད་པར་བྱེད། བསྲུང་བྱའི་མཁར་གྱི་སྒོ་ཡི་རྒྱུན་གྱི་ལམ་སྲང་མ་གཏོགས་པའི་མཐའ་རྣམས་དང་ནི་མི་ཡི་བདག་པོའི་ཁང་བར་འཁྲུལ་འཁོར་ཁོ་ན་དགྲ་རྣམས་ལ་བསྣུན་པའི་མཚོན་ཆ་མཆོག་ཡིན་པའོ། །དེ་ནས་རྒྱལ་རིགས་འཐབ་པ་ཤིང་རྟའི་མཚན་ཉིད་གསུངས་པ། ཤིང་རྟའི་དོན་དུ་དང་པོར་སྲོག་ཤིང་བརྟན་པོར་བྱས་ལ། སྲོག་ཤིང་གི་སྟེང་དུ་ཉི་མའི་ལག་པས་ཞེས་རྒྱར་སོར་དྲུག་པའི་ཤིང་ཁྲུ་བཅུ་གཉིས་ཏེ་ཤར་དང་ནུབ་ཀྱི་དྲུག་དང་ལྷོ་དང་བྱང་གི་དྲུག་གིས་གདན་ནམ་རྩ་བའི་གནས་སུ་འགྱུར་ཏེ། དེ་ཡང་སྲོག་ཤིང་གི་སྟེང་དུ་མི་རྣམས་ཀྱི་གདན་ནམ་སྡོད་གནས་ཀྱི་ཁང་པ་བྱའོ། །ཇི་ལྟར་ན་ཕྱོགས་བརྒྱད་དང་དབུས་སུ་ཤིང་རྟའི་འཁོར་ལོའི་ཚད་དང་མཉམ་པ་ལ་གནས་སམ་གདན་གྱི་རེའུ་མིག་དགུ་ཡི་ཆའོ། །སྲོག་ཤིང་རྒྱར་སོར་བཅུ་བཞི་པ་སྟེ་དེ་ཆ་གསུམ་དུ་བྱས་ནས་དབུས་ཀྱི་ཆ་སྤངས་ཏེ་རྩེ་མོ་
གཉིས་ཀྱི་གནས་སུ་བུག་པ་བྱ་ཞིང་། བུག་པ་དེ་དག་ཏུ་འཁོར་ལོའི་རྩིབས་བཅུག་ནས་སྲོག་ཤིང་དང་ལྷན་ཅིག་གཟེར་བཏབ་པར་བྱ་སྟེ་གཞིའི་བུག་པ་ཟླུམ་པོ་ལ་འཁོར་ལོ་དང་བཅས་པ་འཁོར་བའོ། །དེ་ནས་གདན་དེའི་ཟུར་བཞི་པོ་ཉིད་དུ་ཀ་བ་བཞི་དང་སྟེང་འོག་ཏུ་འཕྲད་ལ་གདང་བུ་ཡིས་སྦྲེལ་བ་བྱའོ། །མཉམ་པའི་ཤིང་རྟ་ནི་མཉམ་པའི་རྟ་སོགས་ཀྱིས་འདྲེན་པ་དང་། མི་མཉམ་པའི་ཤིང་རྟ་ནི་རྟ་སོགས་གྲངས་མི་མཉམ་པས་འདྲེན་པ་ཡིན་ལ། དེ་ལྟར་ཤིང་རྟ་གཉིས་པོ་རིམ་བཞིན་གནས་ལས་གཉིས་དང་ཕྱེད་ཀྱི་ཚད་ཀྱིས་སོ། །སྟེང་གི་ཀ་བ་རྣམས་ཀྱི་ཆ་གཅིག་གནས་ཀྱི་ཚད་དོར་ནས་སྟེང་དུ་ཆ་ཕྱེད་དག་ལ་འཐབ་མོ་པ་ཡི་ས་སྟེ། མཉམ་དང་མི་མཉམ་པའི་འདྲེན་བྱེད་རྟའམ་གླང་པོ་རྣམས་ནི། གཉིས་བཞི་དྲུག་རྣམས་མཉམ་པ་དང་། གསུམ་ལྔ་བདུན་རྣམས་མི་མཉམ་པ་ཡིན་ཞིང་འདྲེན་བྱེད་ཀྱི་ལུས་དཔངས་ཀྱི་ཚད་ཀྱིས་ཤིང་རྟ་མཐོ་དམན་དུ་འགྱུར་རོ། །དེ་ནས་འཐབ་མོ་པའི་སྟེང་གི་གནས་འཁོར་ལོའི་ཕྱེད་ཀྱི་ས་ལ་སྟེང་དུ་མེ་ལོང་དང་དོ་ཤལ་རྒྱལ་མཚན་དྲིལ་བུ་ལ་སོགས་བཀོད་པ་ཡིས་མཛེས་པར་བྱས་པའོ། །གཅིག་ཕྱེད་ཆ་གཉིས་དག་སྟེ་ཞེས་པ། རྩ་བའི་གནས་ཀྱི་འོག་ཏུ་འཐབ་མོ་པའི་ས་ལ་ཆ་གཅིག་གོ། རབ་ཏུ་གསལ་བ་ཞེས་གློ་སྐར་ལྟ་བུའི་བུག་པ་ལ་ཆ་ཕྱེད་དང་། སྟེང་གི་མཚན་མོའི་ལྟད་མོ་ལྟ་བའི་རབ་གསལ་ལ་ཡང་ཆ་ཕྱེད་དོ། །དེ་གཉིས་ཆ་འདྲ་སྟེ་བསྡོམ་པས་ཆ་གཅིག་དང་། འཐབ་མོ་པའི་ཆ་བཅས་ཆ་གཉིས་སོ། །གཡུལ་གྱི་འཐབ་མོའི་དོན་དུ་ཕྱོགས་བཞི་པོ་རྣམས་སུ་ལྟ་བར་བྱེད་པའི་གློ་སྐར་ནི་འཐབ་མོ་དང་མཚན་མའི་ས་ལ་བྱའོ། །ཟླ་བ་ལག་པ་རྩེ་མོ་ཅན་རྣམས་ཞེས་པ་ཀ་བའི་གདང་བུ་རྣམས་ཀྱི་རྩ་བའི་གནས་ཀྱི་སྟེང་དུ་འདྲེན་པའི་གནས་ལ་སོར་བཞི་པ་རྣམས་ཀྱི་ཆ་གཅིག་གོ། དེ་ནས་ཀ་བ་རྣམས་ཀྱི་འཐབ་མོ་པའི་གནས་ལ་སོར་བཞི་པ་རྣམས་ཀྱི་ཆ་གཉིས་སོ། །དེ་ནས་ཀ་བ་རྣམས་ཀྱི་སྟེང་དུ་སོར་བཞི་པ་རྣམས་ཀྱི་ཆ་གསུམ་པ་སྟེ། དེའི་སྟེང་དུ་རྒྱལ་མཚན་
སོགས་ཀྱི་མཚན་མའི་སའོ། །དེ་ལྟར་ཟླ་བ་ཆ་གཅིག་ལ་སོགས་པ་རྣམས་རྩ་བའི་གནས་དང་སོ་སོའི་གདན་ལ་སོགས་པ་རྣམས་ཀྱི་ཚད་ངེས་པར་ཤེས་པར་བྱའོ། །ཤིང་རྟ་དེ་ཡི་དབྱེ་བ་ལ་རྟ་རྣམས་ཀྱིས་འདྲེན་པའི་ཤིང་རྟའི་འཕང་ལོའམ་འཁོར་ལོའི་ཚད་ནི་ཕྱེད་དང་བཅས་པའི་ཁྲུ་གཉིས་སོ། །སྲོག་ཤིང་ནི་འཁོར་ལོའི་ཚད་དེའི་བཞི་འགྱུར་ལ་མུ་ཁྱུད་ཀྱི་ཆས་ཅུང་ཟད་ལྷག་པ་དང་བཅས་པའོ། །ཤིང་རྟའི་དཀྱིལ་འཁོར་ཡོངས་རྫོགས་ཀྱི་ཆ་ལ་འཁོར་ལོའི་ཚད་དེ་ཉིས་ལྡབ་ཀྱི་ཚད་ཀྱིས་ཕྱོགས་བཞིར་གྲུ་བཞི་དང་། མཐའ་གཉིས་སུ་འཁོར་ལོའི་ཚད་ཀྱིས་ཟླུམ་པོ་བྱའོ། །གླང་པོའི་ཤིང་རྟ་ནི་རྟའི་ཤིང་རྟ་ལས་ཉིས་འགྱུར་རོ། །དེ་ལྟར་ཟླུམ་པོ་ཕྱེད་དང་བཅས་པའི་གཅིག་གི་ཆ་ཅན་བཤད་མ་ཐག་པ་ལྟར་ལ། ཟླུམ་པོ་དེ་ནི་པདྨའི་ཤིང་རྟའི་ས་ནི་ཡིན་ཏེ། དགའ་བའི་ཤིང་རྟས་དབྱེ་བ་དག་ལ་གྲུ་བཞི་པར་མཉམ་པར་འགྱུར་རོ། །རྟེན་གཞི་དང་བཅས་པའི་འཕང་ལོའམ་འཁོར་ལོའི་ཚད་ནི་རྟ་དང་གླང་པོའི་དབང་གིས་ཕྱེད་དང་བཅས་པ་ཡི་ཁྲུ་རྣམས་དང་། དེ་གཉིས་འགྱུར་ཀྱང་རིམ་པས་སོ། །དེ་ཡང་ལྷ་རྣམས་ཀྱི་ཤིང་རྟ་ནི་པདྨའི་རིགས་ཟླུམ་པོ་ཡིན་ཏེ། ལྷ་ཡི་བུ་ཡིས་ཞེས་པ་སྲིད་སྒྲུབ་ཀྱིས་བཀོད་པ་དགའ་བའི་རིགས་གྲུ་བཞི་ནི་སྲིད་སྒྲུབ་ཀྱི་ཤིང་རྟ་སྟེ། མི་གཞན་རྒྱལ་རིགས་རྣམས་ཀྱི་ཡང་གྲུ་བཞིའོ། །བརྒྱད་དང་ཆུ་གཏེར་སྲོག་ཤིང་འཁོར་ལོ་རྣམས་ཀྱིས་ཞེས་པ། སྲོག་ཤིང་བཞི་དང་འཁོར་ལོ་བརྒྱད་ཀྱིས་གཡུལ་དུ་ཕྱིར་མི་ལྡོག་པའི་ཤིང་རྟ་ཆེན་པོར་འགྱུར་རོ། །འོག་དང་སྟེང་དུ་སྲོག་ཤིང་གཉིས་དག་དང་འཁོར་ལོ་བཞི་ཡིས་ཤིང་རྟ་ཆེན་པོའི་ཕྱེད་དུ་འགྱུར་རོ། །དེས་ན་ཤིང་རྟ་རྣམ་པ་གསུམ་དུ་འདིར་ནི་འགྱུར་ཏེ་ཤིང་རྟ་ཆེན་པོ་དང་། དེ་ཡི་ཕྱེད་དང་། དེ་ཡིས་ཕྱེད་དང་མཉམ་པ་འཁོར་ལོ་གཉིས་ཡོད་པའོ། །འཁོར་ལོ་གཅིག་གིས་ལྷ་རྣམས་ཀྱི་ཤིང་རྟར་འགྱུར་ཏེ་དེ་བཞིན་དུ་གཟའ་ཉི་མའི་ཤིང་རྟ་ཡང་ཡིན་ཏེ།
ཇི་ལྟར་ན་ཉི་མའི་ཤིང་རྟ་མཆོག་ནི་འཁོར་ལོ་གཅིག་པ་འདྲེན་བྱེད་མི་མཉམ་པ་བདུན་གྱི་གྲངས་ཀྱི་རྟ་ཡིས་དྲངས་པ་ཡང་ཡིན་ལ། ལྷ་མ་ཡིན་རྣམས་རྣམ་པར་འཇོམས་པ་ཡི་ཤིང་རྟའོ། །གཡུལ་དུ་ཕྱིར་མི་ལྡོག་པར་འཇུག་པར་འགྱུར་བ་མི་མཉམ་པ་དང་མཉམ་པའི་ཤིང་རྟ་ཆེན་པོ་རྒྱལ་རིགས་རྣམས་ཀྱི་ཤིང་རྟའོ། །ཤིང་རྟ་དེས་སྟེང་དང་མངོན་དུ་ཕྱོགས་པ་འཇོམས་ཏེ་མཉམ་དང་མི་མཉམ་པའི་ཤིང་རྟ་དེ་དག་གཡུལ་དུའོ། །རྒྱབ་ནི་འཇོམས་པ་ཞེས་པ། གཡུལ་དུ་མི་ལྡོག་པའི་ཤིང་རྟ་ལ་མཉམ་པའི་འདྲེན་བྱེད་ཀྱི་གཉའ་ཤིང་བཅུ་བདུན་གྱི་ཐག་པ་རྣམས་ཀྱིས་རྟ་བཅུ་དྲུག་གི་སྟེང་ངམ་རྒྱབ་བཅོམ་པར་འགྱུར་རོ། །དེ་བཞིན་དུ་སྲོག་ཤིང་གཅིག་དང་འཁོར་ལོ་གཉིས་ཀྱི་མཉམ་པའི་ཤིང་རྟ་ལ། དེ་འདྲེན་པའི་གཉའ་ཤིང་གསུམ་དང་ཐག་པ་གཉིས་ཀྱིས་རྟ་སོགས་འདྲེན་བྱེད་དེའི་རྒྱབ་ཀྱི་སྟེང་གནོན་ཅིང་འཇོམ་པས་ན་མངོན་དུ་ཕྱོགས་པའི་དགྲ་འཇོམས་དང་འདྲེན་བྱེད་ཀྱི་སྟེང་ངམ་རྒྱབ་འཇོམས་པ་ནི་མཉམ་པར་འགྱུར་རོ། །དེ་ལྟར་རང་ཕྱོགས་བསྲུང་བའི་ཆེད་དུ་ས་འོག་རལ་གྲིའི་འཁྲུལ་འཁོར་དང་རྒྱལ་རིགས་འཐབ་པའི་ཤིང་རྟའི་མཚན་ཉིད་གཉིས་གསུངས་སོ། །དེ་ནས་ཞར་ལ་བདེ་བར་སྤྱོད་པའི་འཁྲུལ་འཁོར་གསུངས་པ་ལས། ལྷ་རྣམས་ཀྱི་གཞལ་ཡས་ཁང་དང་ཆ་འདྲ་བ་མི་བདག་རྣམས་ལྟད་མོའི་དོན་དུ་བསྐྱོད་པའི་གནས་ཀྱི་མཚན་ཉིད་གསུངས་པ། ཀ་བ་ཁྲུ་ཉི་ཤུ་ལ། རྒྱལ་སོར་མོ་ཉི་ཤུ་པ་བཞི་ལ། བུག་པའི་གྲངས་མཉམ་པར་བུག་པར་འགྱུར་ཏེ་གང་ཞེ་ན། བུག་པའི་མཐའ་གཅིག་ནི་ཁྲུ་དྲུག་གི་ཆ་ལའོ། །གཉིས་པ་ནི་ཁྲུ་ལྔ་ཡི་ཆ་ལའོ། །གསུམ་པ་ནི་ཆུ་གཏེར་ཏེ་བཞི་ཡི་ཆ་ལའོ། །བཞི་པ་ནི་མེ་ཡི་སྟེ་གསུམ་པའི་ཆ་ལ་འགྱུར་རོ། །དེ་ལྟར་ཆ་རྣམས་དག་གིས་ཀ་བའི་རྩེ་མོར་ཐུག་གི་བར་དུ་ཁྲུ་རེ་རེ་བར་དུ་དོར་བའི་བུག་པ་མཉམ་པར་རབ་ཏུ་འགྱུར་ཏེ། བཞི་ཀ་ལ་འདྲ་བར་ཕུག་པའོ། །རྩ་བའམ་འོག་གི་ཆ་ལ་ཁྲུ་བཅུ་གསུམ་དུ་འགྱུར་རོ། །
རྩ་བ་ཡི་ཆ་དག་ལས་སྟེང་དུ་དེའི་ཕྱེད་ཀྱི་ཆ་ཁྲུ་ཕྱེད་དང་བདུན་དུ་ནི་འགྱུར་ཏེ་ཁང་པ་བརྩེགས་མའི་དབང་གིས་དེ་ལྟར་འགྱུར་ཏེ། ཚོགས་ཀྱི་གཞལ་ཡས་ཁང་ལ་གདང་བུ་བཞི་བཞིའི་སྟེང་ནི་ཐོག་འབུབ་ཀྱི་སའམ་གནས་སུ་འགྱུར་ཏེ་ལྷ་རྣམས་ཀྱི་གཞལ་མེད་ཁང་བརྩེགས་མའི་རྣམ་པ་དང་འདྲ་བའོ། །ལྷའི་ཕོ་བྲང་དེ་བཞིན་དུ་ས་ལ་མི་བདག་རྣམས་ཀྱི་གནས་ཀྱང་རྣམ་གསུམ་བརྩེག་མའི་དབང་གིས་ཡུལ་གྱི་ལྟད་མོ་དང་དགའ་སྟོན་ལ་བསྐྱོད་པའི་ཚེ། ཁྲུ་ནས་ཁྲུ་ཡི་བར་དག་གིས་ནི་ཕྱོགས་རྣམས་ཀུན་དུ་འཁོར་བ་དང་ལྡན་པ་ནི་ཆེན་པོར་རབ་ཏུ་འགྱུར་ཏེ། དང་པོའི་རྩེག་མ་ལ་ཀ་བའི་ཕྱི་རོལ་དུ་བྱུང་བའི་གདང་བུའི་སྟེང་དུ་སྤང་ལེབ་རྣམས་ཀྱིས་ཐམས་ཅད་དུ་འཁོར་བ་ནི་ཁྲུ་གསུམ་གྱིས་འཁོར་བའོ། །གཉིས་པའི་རྩེག་མ་ལ་ཁྲུ་གཅིག་གིས་འཁོར་བའོ། །ལྷའི་གཞལ་ཡས་ཁང་དང་མི་བདག་ལྟད་མོ་ལ་བགྲོད་པའི་ཁྱིམ་གྱི་མཚན་ཉིད་ངེས་པའོ། །ད་ནི་དཔྱིད་ཀྱི་དགའ་སྟོན་གྱི་སླད་དུ་འཁོར་ལོའི་ཁྱོགས་ཀྱི་མཚན་ཉིད་གསུངས་པ། སྔར་བཤད་པའི་ཤིང་རྟ་སྲོག་ཤིང་བཞི་དང་འཁོར་ལོ་བརྒྱད་གནས་དང་བཅསཔ་དེ་བཞིན་དུ། བརྒྱད་ཀྱི་གྲགས་སུ་གྱུར་པའི་ཤིང་རྟའི་འཁོར་ལོའི་སྟེང་དུ་གླང་པོ་ཆེའི་ཤིང་རྟའི་ཀ་བའི་ཚད་ཀྱི་ཀ་བ་བཞི་བཙུགས་པའི་ཀ་བའི་རྩེ་མོ་སྟེ་འོག་ནས་སྟེང་དུ་གནས་པའི་ཆ་དག་ལ་གོང་བཤད་ལྟར་ཁང་པ་རྣམ་པ་གསུམ་བརྩེགས་མའི་དབང་གིས་ཁྱོགས་རྣམས་ཕྱོགས་བཞི་པོ་ཀུན་ཏུ་འཁོར་བར་གནས་པ་སྟེ། གདང་བུ་བཞི་བཞིའི་སྟེང་དུ་རྩེག་མ་དང་པོ་ལ་ཕྱོགས་བཞི་རྣམས་སུ་བརྒྱད་གཉིས་ཏེ་ཁྱོགས་བཅུ་དྲུག་ཏུ་འགྱུར་རོ། །གཉིས་པ་ལ་བརྒྱད་དང་། དེ་ནས་གསུམ་པ་ལ་སྔ་མའི་ཕྱེད་དེ་བཞིའོ། །རྩེག་མ་དང་པོ་ལ་ཕྱོགས་ཞེས་ལག་པ་བཅུ་གདང་བུའི་སྟེང་ན་གནས་པ་ནི་ཕྱོགས་རེ་རེའི་དབང་དུ་བྱས་པ་སྟེ་དེ་བཞིན་ཕྱོགས་གཞན་ལ་ཤེས་པར་བྱ་བ་དང་། རྩེག་མ་གཉིས་པར་ཕྱོགས་རེ་ལ་དུས་ཞེས་པ་ལག་པ་དྲུག་དང་། བཞི་པར་
ཕྱོགས་རེར་དུས་དག་ཅེས་ལག་པ་བཞི་ཡིས་བརྟེན་པའོ། །དེ་ལྟར་ལག་པ་རྣམས་ཀྱི་རྟེན་ཉིད་ནི་ས་གསུམ་མམ་རྩེག་མ་གསུམ་གྱི་གདང་བུ་རྣམས་ཡིན་ཏེ་དེ་ཡང་ས་གསུམ་ལ་འོག་མ་རྣམས་ཀྱི་སྟེང་དང་སྟེང་མ་རྣམས་ཀྱི་འོག་ཏུ་འཁོར་བར་བྱེད་པ་གང་ཞིག་ལག་པས་བཟུང་བའི་འཕྲུལ་ཤིང་ཀ་བ་རྣམས་ཀྱི་བུག་པར་བཅུག་པ་དེ་ལ་ནི་བུ་མོ་གཞོན་ནུ་ཡིད་དུ་འོང་བའི་བཙུན་མོ་རྣམས་ཀྱིས་སྟེན་པར་བྱེད་དོ། །ཁྱོགས་དེ་དག་ནི་སྟེང་མ་རྣམས་ནང་དང་འོག་མ་རྣམས་དེ་ལས་ཕྱི་རོལ་དག་ཏུ་གནས་པ་དང་། རྩེག་མའི་དབང་གིས་འོག་དང་སྟེང་དུ་སོན་ཅིང་། ཕྱོགས་བརྒྱད་དུ་ནི་གཡོ་བའམ་འཁྱོགས་པ་སྟེ་མངོན་པར་ཕྱོགས་པའམ་འཁོར་བར་གྱུར་པ་རྣམས་སོ། །འཁོར་ལོའི་ཁྱོགས་ཀྱི་མཚན་ཉིད་དོ། །ད་ནི་མེ་ཏོག་གི་ལྡུམ་ར་ལ་སོགས་པར་ཆུ་འདྲེན་པ་བུམ་པའི་ཆུའི་འཁྲུལ་འཁོར་གསུངས་པ། སྟེང་དང་འོག་ཏུའམ་གཡས་དང་གཡོན་བྱས་ཀྱང་རུང་སྟེ། སྟེང་སྟེ་གཡས་གྱེན་གྱི་ཕྱོགས་དང་། འོག་སྟེ་གཡས་ཐུར་གྱི་ཕྱོགས་སུ་སྙུག་དོང་ལྟ་བུ་སྦུབས་ཅན་གྱི་འཁྲུལ་འཁོར་ནི་འཁྱོགས་པོར་འགྱུར་ཏེ། གཅིག་ལ་གཅིག་མཐུད་དུ་བྱ་རྒྱུའི་འཁྲུལ་འཁོར་ཐམས་ཅད་ཀྱང་ཀུན་ནས་སྦུབས་ཀྱི་རྣམ་པ་དག་གིས་སོ། །རྩ་བའི་འཁྲུལ་འཁོར་ནི་ཀུན་ནས་ནང་གྲུ་བཞི་པའི་སྦུབ་ཀྱི་རྣམ་པ་དག་གིས་ཆུ་འདྲེན་པར་བྱེད་པའི་འཁྲུལ་འཁོར་རོ། །དེ་ཡང་དེའི་རྒྱབ་ངོས་ཀྱི་དབུས་སུ་ཆུ་འཇུག་པའི་བུག་པ་དང་བཅས་པའོ། །དེའི་རྒྱབ་ཀྱི་བུག་པར་བཅུག་པའི་སྦུབས་ཀྱི་རྩེ་མོར་བུམ་པའི་གཟུགས་ལྟ་བུའི་སྣོད་ཀྱི་ཁའི་མགྲིན་པའི་སྦུབས་ཀྱི་རྩེ་མོ་བཅུག་པར་བྱའོ། །འོག་ཏུ་བུམ་པའི་ཁ་ལ་ཡང་བུག་པ་ཡང་ནི་སྦུབས་ཀྱི་བུག་པ་དག་གི་ཚད་དུ་འགྱུར་རོ། །བུམ་པའམ་སྦུབས་ཀྱི་རྣམ་པ་གཞན་རྣམས་ནི་རྩ་བའི་འཁྲུལ་འཁོར་དུ་འཇུག་པའི་སྦུབས་རིང་ལ། དེའི་རྩེ་མོའམ་ཕྱེད་དམ་སུམ་གཉིས་ཙམ་དུ་སྦུབས་གཞན་གྱི་རྩེ་མོ་བར་མཚམས་མེད་པར་
སྦྱར་བ་གཅིག་ལ་གཅིག་མཐུད་པ་ཆུའི་གནས་ནས་གང་དུ་ཆུ་འདྲེན་པའི་སར་སླེབ་པར་བྱའོ། །རྩ་བའི་འཁྲུལ་འཁོར་གྱི་རྒྱབ་ཀྱི་བུག་པ་ནི་སྦུབས་ཀྱི་རྩེ་མོར་ཆུད་པའི་བུམ་པའི་མགྲིན་པའི་སྦུབས་ཀྱི་ཚད་དུ་བྱས་ནས། བུམ་པ་ཡོད་པའི་སྦུབས་ལས་གཞན་པའི་སྦུབས་རྩ་བའི་འཁྲུལ་འཁོར་གྱི་ཆུའི་ནང་དུ་གཞུག་པར་བྱའོ། །དེ་ནས་རྩ་བའི་སྦུབས་ཀྱི་རྩེར་སྦུབས་གཞན་སྦྱར་བ་ཡིན་ན། བུམ་པའི་བུག་པ་སྦུབས་ཀྱི་རྩེ་མོའི་མདུན་ནས་བཅུག་སྟེ་ང་མི་འཆོར་བར་རྒྱས་གདབ་པའམ་རྩ་བའི་སྦུབས་ཀྱི་སུམ་གཉིས་སོགས་ཀྱི་བུ་གར་སྦུབས་གཞན་སྦྱར་བ་ཡིན་ན་བུམ་པས་མདུན་ནས་བཀག་ལ། ཆུར་སོན་པའི་སྦུབས་ཀྱི་རྩེ་མོའི་བུག་པ་འབོལ་དོས་དགག་པར་བྱ་སྟེ། དེ་ནས་ཇི་སྲིད་རྩ་བའི་འཁྲུལ་འཁོར་ཆུས་གང་བར་གྱུར་གྱི་བར་དུ་རྩ་བའི་འཁྲུལ་འཁོར་གྱི་དབུས་སུ་བུག་པ་ནས་ཆུ་གཞུག་པར་བྱའོ། །དེ་ནས་འཁྲུལ་འཁོར་ཕྱི་མ་ལ་ཆུའི་ནང་གི་རྩ་བའི་འཁྲུལ་འཁོར་གྱི་སྦུབས་ཀྱི་བུག་པ་འབོལ་དོས་བཀག་པའམ། སྦུབས་ཀྱི་རྩེ་མོའི་མགྲིན་པའི་བུག་དང་། འཁྲུལ་འཁོར་སྔ་མ་ལ་རྒྱབ་ཀྱི་སྦུབས་ཀྱི་བུམ་པའི་བུག་པ་བཀག་པ་ཅིག་ཅར་བྱུང་བ་ན། མཚོ་སོགས་ལས་བུམ་པའི་ནང་གི་རླུང་གི་དབུགས་ཀྱིས་ཆུ་ནི་འདྲེན་པར་བྱེད་ཅིང་། དྲངས་པའི་ཆུ་དེ་ཉིད་ནི་བཏང་བར་གྱུར་པ་དག་ཀྱང་བུམ་པའི་བུ་ག་ནས་མེ་ཏོག་གི་སྐྱེད་མོས་ཚལ་དང་སྨན་གྱི་ལྡུམ་རྭ་སྟེ་དེ་དག་གི་མཉམ་པའི་ས་ལ་གང་དུ་དྲངས་པ་དེར་ནི་འགྲོ་བར་འགྱུར་རོ། །ཆུ་བཅུ་བའི་འཁྲུལ་འཁོར་གྱི་ངེས་པའོ། །འཁྲུལ་འཁོར་གྱི་སྐབས་སུ་ངེས་དོན་གྱི་བཤད་པ་སྦྱར་བ་དག་མཆིས་ཀྱང་འགལ་བ་ཆེར་མེད་མོད། སྐབས་མིན་ལ་མི་དགོས་པར་མཁས་པ་དག་བཞེད། འཁྲུལ་འཁོར་འདི་དག་མིག་མཐོང་མེད་པས་རྩ་བའི་གནད་མ་ངེས་པ་དང་། འགའ་ཞིག་གོ་སླར་དགོངས་ཏེ་འགྲེལ་པས་མ་བཤད་ལ། ཅི་རིགས་བཤད་པ་རྣམས་ཀྱང་འགྲེལ་པའི་
ཚིག་མདོར་བསྡུས་ཤིང་བརླིང་བ་དང་། འགྱུར་སྣ་ཚོགས་སུ་གྱུར་པ་དང་། བླ་མ་གོང་མ་དག་གིས་ཀྱང་གསལ་བར་མ་གསུངས་པས་བཏང་སྙོམས་སུ་བཞག་འོས་ཡིན་ནའང་། རྒྱུད་རྩ་བའི་ཚིག་གི་འབྲུ་མནན་པའི་གྲས་སུ་འདི་རྣམས་ལའང་འབྲུ་ཅུང་ཞིག་མནན་ཏེ་བཤད་མོད། དོན་དུ་མི་གནས་པ་ཅུང་ཟད་ཡོད་ན་མཐོལ་ཞིང་བཤགས་སོ། །འཁྲུལ་འཁོར་གསུངས་པའི་སྐབས་ཀྱི་མཇུག་བསྡུ་བ་ནི། ཆོས་ཀྱི་རྒྱལ་པོ་འཇམ་དཔལ་གྲགས་པས་བྲམ་ཟེ་ཉི་མའི་ཤིང་རྟ་ལ་ངེས་པ་སྦྱིན་པ་གསུངས་པ། རབ་མཆོག་འཛམ་གླིང་ཆེན་པོའི་ས་གཞི་སངས་རྒྱས་ཀྱི་བསྟན་པ་གནས་པའི་ཡུལ་དག་ལ་བསྟན་ལ་འཚེ་བའི་ཕྱོགས་ཀླ་ཀློ་སོགས་ལ་ཚར་གཅོད་པ་གདུག་པ་ཅན་གྱི་ལས་རྣམས་སྒྲུབ་པའི་དོན་དང་། ཆོས་དང་ལྡན་པ་རྒྱལ་བའི་དོན་དུ་མཆོག་གི་དང་པོའི་སངས་རྒྱས་སུ་ནི་བཅོམ་ལྡན་འདས་ཤཱཀྱ་སེང་གེ་སྲིད་པ་གསུམ་གྱི་བླ་མས་ཕྱག་ན་རྡོ་རྗེའི་སྤྲུལ་པའི་སྐུ་རྒྱལ་པོ་ཟླ་བ་བཟང་པོ་ལ་དབྱངས་འཆར་བ་དང་འཁྲུལ་འཁོར་གྱི་མཚན་ཉིད་ཐམས་ཅད་སྔོན་དུ་གསུངས་པ་གང་ཡིན་པ་དེ་ཡི་ནང་ནས་ཅུང་ཟད་ཙམ་ཞིག་བསྡུས་རྒྱུད་འདིར་ནི་དེ་རིང་ཤམ་བྷ་ལའི་ཡུལ་འདི་ཉི་མའི་ཤིང་རྟ་ཁྱོད་ལ་འཕགས་པ་འཇམ་དཔལ་གྱི་སྤྲུལ་པའི་སྐུ་མིའི་དབང་པོ་གྲགས་པ་བདག་གིས་གསལ་བར་བསྟན་ཏོ། །ཆོས་ལྡན་རང་གི་གནས་བསྲུང་བའི་དོན་དུ་འདི་རྣམས་མཐའ་དག་གྱིས་ཤིག། ཞེ་སྡང་དང་ཆགས་པས་བྱ་བ་མིན་ནོ་ཉི་མ་ཀྱེ། ཞེས་གསུངས་པ་ལྟར་དུས་ཀྱི་འཁོར་ལོ་ཡོངས་སུ་ཤེས་པ་དང་ལྡན་པའི་རྗེས་འཇུག་གཞན་རྣམས་ཀྱིས་ཀྱང་དེ་ལྟར་བྱ་བ་ནི་བཅོམ་ལྡན་འདས་ཀྱི་བཀའི་ངེས་པའོ། །དེ་ཡན་ཆད་ཕྱི་ནང་གཞན་གསུམ་གྱི་གནས་སམ། རྣམ་བཅུ་དབང་ལྡན་དག་པའི་མཚོན་བྱེད་འགྲེལ་ཆེན་གྱི་མདོར་བསྡུས་བཅུའི་སྒོ་ནས་རྣམ་པར་བཤད་ཅིང་འདི་མན་ཆད་གོ་སླ་བས་འགྲེལ་བཤད་མ་མཛད་དོ། །ཉི་ཤུ་
པ་འཁོར་ལོས་སྒྱུར་བ་དུམ་བུ་བཅུ་གཉིས་སུ་འཁོར་བའི་ངོ་བོ་ཉིད་ཀྱི་གནས་པ། ཆང་དང་ལན་ཚྭའི་སོགས། ཚིགས་བཅད་བརྒྱ་ཞེ་དགུ་པ་ནས། བརྒྱ་ང་དགུ་པའི་བར་གྱིས་བསྟན་ཏེ། ནང་གི་མཚོ་དྲུག་པ་ཆང་གི་རྒྱ་མཚོ་དང་། ཕྱིའི་མཚོ་བདུན་པ་ལན་ཚྭའི་ཆུ་གཏེར་གྱི་བར་རམ་དབུས་སུ་ཐུབ་པ་སྟེ་གླིང་བདུན་པ་ས་ཡི་དཀྱིལ་འཁོར་ལ་ནི་འཛམ་གླིང་ཆེན་པོ་ལས་ཀྱི་ས་ཡང་དག་པར་གནས་པ་དེ་ཉིད་ཀྱི་ཕྱིའི་མཐའ་བསྐོར་དཔག་ཚད་འབུམ་ཕྲག་གསུམ་ལ་ཉི་མའི་དུམ་བུ་སྟེ་གླིང་བཅུ་གཉིས་རྣམས་སུ་མི་ཡི་བདག་པོ་ཆོས་ཀྱི་འཁོར་ལོས་སྒྱུར་བ་རིམ་པས་འཁོར་བར་འགྱུར་རོ། །འདི་ལ་དཀའ་འགྲེལ་པདྨ་ཅན་ལས་བཅོམ་ལྡན་འདས་དུས་ཀྱི་འཁོར་ལོ་འཁོར་བར་འགྱུར་རོ་ཞེས་བཤད་པ་སྔགས་ཀྱི་བསྟན་པ་འཁོར་བ་ལ་དེ་ལྟར་བརྗོད་པར་ཟད་དོ། །གླིང་དུམ་བུ་བཅུ་གཉིས་པོ་དེ་དག་གི་ནང་ནས་དུམ་བུ་གཅིག་འཛམ་གླིང་ཆུང་ངུ་འདི་ལ་དཔག་ཚད་སྟོང་ཕྲག་ཉི་ཤུ་རྩ་ལྔ་སྟེ། འབུམ་ཕྲག་གསུམ་ལ་བཅུ་གཉིས་ཀྱིས་ཐོབ་པ་ཤར་ནུབ་ཀྱི་མཐའི་རིང་ཚད་དེ་ལྷོ་བྱང་གི་ཐད་ཀར་ཡང་ཚད་དེ་ཉིད་དོ། །འདི་སྐབས་སུ་ནོར་གྱི་འདབ་མ་ཞེས་པ་འཛམ་གླིང་ཆུང་ངུ་འདི་ལ་ཕྱོགས་བཞི་མཚམས་བརྒྱད་དུ་ཕྱེ་བ་ལ་བཤད་ན་ཤམ་བྷ་ལ་འཛམ་གླིང་གི་དབུས་ན་ཡོད་པ་སོགས་སུ་འགྱུར་བས་མི་འཐད་ཅིང་འཕགས་ཡུལ་དང་བོད་ལ་སོགས་པར་ཐུར་གྲིབ་ཀྱི་ཁྱད་པར་སྔར་གསུངས་པ་བཞིན་འཕགས་བོད་ལི་དང་རྒྱ་ནག་རྒྱ་ནག་ཆེན་པོ་ཀཻ་ལ་ཤའི་དུམ་བུ་རྣམས་ནི་འཛམ་གླིང་ཆུང་ངུ་འདི་ལ་ལྷོ་བྱང་དུ་དཔག་ཚད་ཉེར་ལྔའི་ཞེང་ཚད་ཡོད་པ་དེ་ཉིད་དྲུག་གིས་བགོས་པས་དཔག་ཚད་སྟོང་ཕྲག་བཞི་བརྒྱ་དྲུག་ཅུ་རེ་ཕྱེད་བདུན། གཞུ་འདོམ་སུམ་བརྒྱ་དང་སོ་གསུམ་ཁྲུ་གང་སོར་བརྒྱད་འབྱུང་བས་ཀཻ་ལ་ཤའི་དུམ་བུའི་ཞེང་ཚད་དེ་ཙམ་ལ། ཀཻ་ལ་ཤའི་དུམ་བུ་དེ་ཉིད་ཀྱི་བྱང་ན་ལྷུན་པོ་གནས་པ་རྒྱབ་དང་། ལྷོ་ན་ཆུ་བོ་ཤཱི་ཏ་འབབ་པ་མདུན་དུ་བྱས་
པའི་རྒྱབ་མདུན་ལ་ལྟོས་ནས། དུམ་བུ་དེའི་ཕྱེད་ནུབ་ཕྱོགས་ནི་དུམ་བུ་དེའི་ཕྱེད་གཡས་དང་། ཕྱེད་ཤར་མ་གཡོན་མར་བྱས་ཏེ་དེའི་ཕྱེད་གཡས་ན་ཤམ་བྷ་ལ་ཞེས་པའི་ཡུལ་ཡོད་པ་དེ་ཉིད་ལ་པདྨ་འདབ་བརྒྱད་ལྟར་བྱས་ནས་འཆད་དགོས་པར་མཁས་གྲུབ་འགྲེལ་ཆེན་དེ་ཉིད་སྣང་བར་གསུངས་ལ། བླ་མ་འགའ་ཞིག་ཤམ་བྷ་ལའི་ཡུལ་གླིང་འདིའི་ཕྱེད་ཀྱི་ཚད་ཙམ་དང་འགའ་ཞིག་སུམ་གཉིས་ཙམ་དང་སུམ་ཆ་ཙམ་དུ་བཞེད་པ་སོགས་རྒྱ་ཆེན་པོར་འདོད་ཀྱང་འདིར་རིགས་པས་བརྟགས་ན་ཡུལ་དྲུག་ཏུ་ཕྱེ་བའི་ཚད་རྣམས་རགས་པ་ཙམ་དུ་མཉམ་པ་དང་ཆུ་བོ་ཤཱི་ཏའི་བྱང་ཕྱོགས་ན་ཤམ་བྷ་ལ་ཡོད་ཅིང་དེ་ཡི་ཡུལ་གྱི་ཆ་ལ་འདབ་མ་བརྒྱད་དུ་ཕྱེ་བ་ཡིན་པ་ལས་འོས་མེད་པས་འདིར་འཛམ་གླིང་ཆུང་ངུ་འདིའི་ཆུ་བོ་ཤཱི་ཏའི་བྱང་ན་གནས་པ་ཤམ་བྷ་ལའི་ཡུལ་གྱི་དུམ་བུ་དེ་ལ་པདྨ་འདབ་བརྒྱད་དང་འདྲ་བར་དབུས་ཀྱི་ལྟེ་བའི་ཕྱོགས་བཞི་དང་མཚམས་བཞི་རུ་ནོར་གྱི་འདབ་མ་དག་ཅེས་པ་འདབ་མ་བརྒྱད་དང་བཅས་པའོ། །འདབ་མ་བརྒྱད་པོ་དེ་ཡི་དབུས་ན་ཀེ༷་ལ་ཤ་ཡི་རི་བོ་ཟླུམ་པོ་སྟེང་གི་ཐེལ་ཆེ་ཞིང་ཤིན་ཏུ་ཡངས་པའི་དབུས་ན་ཆོས་རྒྱལ་རིགས་ལྡན་རྣམས་ཀྱི་ཕོ་བྲང་ཀ་ལཱ་པ་ཞེང་དུ་དཔག་ཚད་བཅུ་གཉིས་པ་ཡོད་དོ། །ཕོ་བྲང་དེའི་མདུན་ལྷོའི་ཕྱོགས་ཀྱི་དབུས་ན་མ་ལ་ཡའི་སྐྱེད་མོས་ཚལ་དཔག་ཚད་བཅུ་གཉིས་པའི་དབུས་སུ་རྒྱལ་པོ་ཟླ་བ་བཟང་པོས་བཞེངས་པའི་དུས་ཀྱི་འཁོར་ལོའི་གཞལ་ཡས་ཁང་ཡོད་ཅིང་། སྐྱེད་ཚལ་དེའི་ཤར་ན་ཉེ་བའི་ཡིད་ཀྱི་མཚོ་དང་། ནུབ་ན་པདྨ་དཀར་པོའི་མཚོ་གཉིས་ཀ་རྒྱར་དཔག་ཚད་བཅུ་གཉིས་པའོ། །ཕོ་བྲང་དེའི་འཁོར་དུ་གཏོགས་པའི་གྲོང་བྱེ་བ་ཕྲག་གཅིག་སྟེ། དེ་ཐམས་ཅད་གནས་པའི་ཁྱོན་ཡངས་པ་དེའི་མཐའ་རི་དང་ནགས་ཚལ་གྱིས་བསྐོར་བའི་རི་རྣམས་ཀྱི་རྩེ་མོར་གངས་ཀྱི་རི་དང་བཅས་པའོ། །དེ་ལྟར་ན་དབུས་སུ་ཀེ་ལ་ཤ་ཞེས་པ་གངས་རི་
གཅིག་གི་རྩེ་ན་ཕོ་བྲང་ཡོད་པ་ལྟ་བུའི་རྒྱ་ཆུང་ངུར་བསམ་པར་མི་བྱ་སྟེ། ཤམ་བྷ་ལའི་ཡུལ་གྱི་ཆགས་ལུགས་པདྨ་འདབ་བརྒྱད་ལྟ་བུ་དེ་ཡི་སུམ་ཆའི་ཚད་ཀྱི་ས་ཡི་ལྟེ་བ་ཟེའུ་འབྲུའི་ཚུལ་དུ་གྱེན་དུ་མཐོ་བའི་རྩེ་དབུས་ན་ཕོ་བྲང་དང་དེའི་ཕྱོགས་ཀྱི་གྲོང་རྣམས་གནས་པའི་མཐའི་རི་རྣམས་ཀྱི་རྩེ་མོ་གངས་རིས་བསྐོར་བས་ན་ཀེ་ལ་ཤ་ཞེས་བཏག་པ་སྟེ། མཆོག་གི་གངས་རི་ཡིས་ནི་ཕྱོགས་རྣམས་ཀུན་ཏུ་བསྐོར་བའོ། །ཤམ་བྷ་ལའི་ས་ལ་དབུས་ཀྱི་ཀཻ་ལ་ཤ་ཡི་དུམ་བུ་མཐའ་གངས་ཀྱི་རི་དང་བཅས་པ་དེ་ནི་ཀུན་ནས་ཡུལ་དེའི་སུམ་ཆ་སྟེ། དབུས་ཀཻ་ལ་ཤ་ཡི་དུམ་བུ་ཕོ་བྲང་ཀ་ལཱ་པ་གྲོང་བྱེ་བ་དང་བཅས་པ་གནས་པ་དེའི་ཕྱི་རོལ་དུ་ནི་པདྨའི་འདབ་མ་བརྒྱད་པོ་རེ་རེ་དག་ཀྱང་ཉིན་བྱེད་ཅེས་བཅུ་གཉིས་ཀྱི་ཡུལ་ཆེན་པོ་དགུ་བཅུ་རྩ་དྲུག་པོ་དང་། ཡུལ་ཆེན་པོ་དེ་རེ་རེ་ལའང་གླིང་གི་ཡུལ་རྣམས་བརྒྱ་རེ་བརྒྱ་རེ་དག་གིས་བརྒྱན་པས་ཡུལ་དགུ་བཅུ་རྩ་དྲུག་ཏུ་འགྱུར་རོ། །ལྟེ་བ་ཡུལ་གྱི་ཚད་ཀྱི་སུམ་ཆ་ཡིན་པ་བཞིན་དུ་འདབ་མ་རེ་རེའང་སུམ་ཆ་ཡིན་ཏེ་པདྨ་འདབ་བརྒྱད་ཀྱི་ཚུལ་གྱིས་སོ། །འགྲེལ་བར་སྐབས་དུ་མར་ཤམ་བྷ་ལ་ལ་སོགས་པའི་ཡུལ་གོ་དྲུག་ཅེས་གསུངས་པས་ཀཻ་ལ་ཤའི་དུམ་བུ་དང་ཤམ་བྷ་ལ་ནི་དབུས་ཀྱི་ཕོ་བྲང་ཀ་ལཱ་པའི་གྲོང་དེ་ལ་ཐོགས་པར་མངོན་ཞིང་བྱེ་བྲག་གི་མིང་སྤྱི་ལ་ཞུགས་པའི་ཚུལ་གྱིས་ཕྱིའི་ཡུལ་གོ་དྲུག་དང་བཅས་པ་ལ་ཤམ་བྷ་ལ་ཞེས་བཏགས་པའི་སྐབས་ཀྱང་ཡོད་པ་ཤེས་པར་བྱའོ། །འདིར་ཇོ་འགྱུར་དུ། དུམ་བུ་གཅིག་ལ་དཔག་ཚད་སྟོང་ཕྲག་ཉི་ཤུ་ལྔ་སྟེ་གཡས་ཀྱི་ཕྱེད་ལ་ཤམ་བྷ་ལར་གྲགས་པ། །ཐུབ་མཆོག་གི་གནས་གྲོང་ནི་བྱེ་བ་ལྷག་པར་གནས་ཏེ་ནོར་གྱི་འདབ་མ་རྣམས་དང་བཅས་པ་ཡི། །ཕྱོགས་རྣམས་ཀུན་ཏུ་མཆོག་གི་གངས་རི་ཡིས་ནི་རྣམ་པར་བསྐོར་ཏེ་དེ་ཡི་དབུས་ན་ཀཻ་ལ་ཤ །ས་ལ་ཀེ་ལ་ཤ་ཡི་དུམ་བུ་དེ་ནི་གངས་ཀྱི་རི་དང་བཅས་པའི་ཀུན་ནས་སུམ་ཆ་སྟེ། །ཕྱི་རོལ་དུ་ནི་འདབ་མ་རེ་རེ་དག་ཀྱང་ཉིན་བྱེད་ཡུལ་དང་གླིང་གི་ཡུལ་རྣམས་དག་གིས་
བརྒྱན། །བྱེ་བའི་གྲོང་གིས་ངེས་པར་བཅིངས་པ་ཡུལ་དུ་འགྱུར་ཏེ་འབུམ་ཕྲག་གྲོང་རྣམས་ཀྱིས་ནི་ཡུལ་འཁོར་རོ། །གཅིག་གཉིས་གསུམ་དང་ཆུ་གཏེར་མདའ་རོ་ཐུབ་པ་ལྔ་དང་འཇིག་རྟེན་ལ་སོགས་དབྱེ་བ་ཡིས། །ཕྱེ་བ་མི་དབང་འཁོར་ལོ་ཅན་ནི་ས་ཡི་གཞི་ལ་འཁོར་ཏེ་རྣམ་ཤེས་ལྡན་པས་བཙལ་བར་བྱ། །ཞེས་བསྒྱུར་བ་ཤིན་ཏུ་གོ་བདེ་བར་དོན་བཞིན་བསྒྱུར་བའོ། །དེ་ལྟ་བུའི་ཤམ་བྷ་ལའི་ཡུལ་དེ་འཛམ་གླིང་ཆུང་ངུ་འདིའི་ཕྱོགས་གང་ན་ཡོད། མིང་ཅི་ཞིག་ཡིན། གྲོང་ཇི་ཙམ་ཡོད། བདག་པོ་ཇི་ལྟ་བུ་གནས་ཞེ་ན་གསུངས་པ། ཆུ་བོ་ཤཱི་ཏ་འབབ་པ་ཚུན་ཆོད་གཡས་དང་། དེ་ཕན་ཆད་གཡོན་དུ་བྱས་ཏེ་འཛམ་གླིང་ཆུང་ངུའི་ས་འདི་དུམ་བུ་གཉིས་སུ་ཕྱེད་མར་བྱས་པ་ནི་གླིང་འདིའི་ཤར་ལ་མདུན་དུ་བརྩིས་ཤིང་ནུབ་ལ་རྒྱབ་ཏུ་བྱས་པའི་ཚུལ་གྱིས་ལྷོ་ལ་གཡས་དང་བྱང་ལ་གཡོན་ཅེས་རྒྱུད་འདིར་དུ་མར་གསུངས་པ་ལྟར་བྱས་ནས། གཡས་ཀྱི་ཕྱེད་ཅེས་བརྗོད་ན་ས་ལ་གཡས་གཡོན་གྱི་ཆ་གཉིས་སུ་བགོས་པའི་ཕྱེད་གཡོན་པ་གོ་བ་ཡིན་པས་ཆུ་བོ་ཤཱི་ཏའི་བྱང་ན་ཤམ་བྷ་ལ་ཡོད་ཅེས་པའི་དོན་དུ་འགྱུར་ཏེ། ཆུ་བོ་ཤཱི་ཏ་དབུས་སུ་བྱས་པའི་ཕྱེད་ཀྱི་ཆ་ཡི་ཕྱོགས་སུ་ཤམ་བྷ་ལའི་ཡུལ་ཡོད་ཀྱང་འཛམ་གླིང་གི་ཕྱེད་ཆའི་ས་ཁྱོན་ཡིན་མི་དགོས་སོ། །དེང་སང་ཡུལ་དྲུག་གི་ནང་ཚན་བྱང་ཕྱོགས་ཀྱི་དུམ་བུའི་ས་ཡི་དབུས་སུ་ཡོད་ཀྱི། དེའི་གཡས་གཡོན་གྱི་ཕྱེད་ལ་མ་ཡིན་ནོ། །མཁས་གྲུབ་འགྲེལ་ཆེན་ལྟར་ན་གོང་དུ་གསུངས་པ་བཞིན་དུ་དུམ་བུའི་ཕྱེད་གཡས་པ་ན་ཡོད་པར་བཤད་ཀྱང་འདིར་གཡས་ཀྱི་དོན་བཤད་མ་ཐག་པ་ལྟར་ཤེས་པར་བྱའོ། །དེ་ཡང་ཡུལ་དེའི་མིང་སྤྱིར་ཐོགས་པ་ཤམ་བྷ་ལར་གྲགས་པ་སྟེ། བྲམ་ཟེ་དང་ཐུབ་པ་མཆོག་དག་གི་གནས་གྲོང་ནི་བྱེ་བ་ཕྲག་དགུ་བཅུ་རྩ་དྲུག་དང་དབུས་ཀྱི་ཕོ་བྲང་གི་འཁོར་གྱི་གྲོང་བྱེ་བ་ལྷག་པར་གནས་པ་སྟེ། དེ་ཡང་པདྨའི་འདབ་མ་རེ་རེར་ཡུལ་ཆེན་པོ་བཅུ་གཉིས་རེ་གནས་པའི་ཡུལ་
རེ་རེ་ལ་བྱེ་བའི་གྲོང་གིས་ངེས་པར་བཅིངས་པ་ནི་ཡུལ་ཆེན་པོར་ཉིད་དུ་འགྱུར་ཏེ། ཡུལ་གོ་དྲུག་པོ་དེ་རེ་རེ་ལ་ལྷ་དང་ཀླུའི་སྤྲུལ་པའི་མི་ཡི་བདག་པོ་གསེར་ཅོད་པན་དང་ལྡན་པ་རེ་རེ་དབང་བྱེད་པར་འགྱུར་རོ། །ཡུལ་ཆེན་པོ་རེ་རེ་ལ་ནང་གསེས་སུ་ཡུལ་གླིང་ངམ་ཡུལ་འཁོར་རམ་རྒྱལ་ཁམས་ཀྱི་གྲོང་ནི་བརྒྱ་ཡོད་པ་དེ་རེ་རེ་ལ་མི་ཁྱིམ་འབུམ་ཕྲག་གཅིག་རྣམས་ཀྱིས་སོ། །སྐབས་འདིར་ཡུལ་དྲུག་ཏུ་ཕྱེ་བའི་གངས་ཅན་གྱི་ནུབ་ཕྱེད་ཀྱི་དུམ་བུ་ལ་ཤམ་བྷ་ལ་ཡོད་པར་བཞེད་པ་དེའི་ལུགས་ལ། ཤམ་བྷ་ལའི་ཡུལ་གྱི་གྲོང་མང་པོ་དེ་ཙམ་ཤོང་བར་མི་སྲིད་སྙམ་དུ་དོགས་པ་བསལ་བ་མཁས་གྲུབ་པའི་འགྲེལ་ཆེན་དེ་ཉིད་སྣང་བྱེད་དུ་གསུངས་པ། ཤམ་བྷ་ལའི་ཡུལ་ཁྱོན་ལ་ཆེ་ཆུང་འདོད་ཚུལ་དུ་མ་བྱུང་ཡང་ཆུང་མཐའ་འདོད་པ་དེའི་དབང་དུ་བྱས་ན་ཡང་། ཤམ་བྷ་ལའི་ཡུལ་སྤྱིའི་ཚད་ཐད་ཀར་དཔག་ཚད་ལྔ་བརྒྱ། ལྷོ་བྱང་གི་ཚད་དེའི་སུམ་ཆ་ལྟེ་བ། སུམ་ཆ་རེ་འདབ་མའི་ཕྱི་ནང་གི་བར་ཚད་དུ་བྱས་ན། ལྟེ་བའི་ཐད་ཀའི་ཚད་དཔག་ཚད་ལྔ་བརྒྱའི་སུམ་ཆ་ཡིན་ཞིང་། མཐའ་སྐོར་ལ་དཔག་ཚད་ལྔ་བརྒྱའོ། །སྤྱིའི་ཚད་དང་དཔག་ཚད་ལྔ་བརྒྱ་དེ་ལ་བརྒྱད་ཀྱིས་བགོས་པས་དཔག་ཚད་དྲུག་ཅུ་རེ་གཉིས་དང་། དཔག་ཚད་ཕྱེད་རེ་ཐོབ་པ་འདབ་མ་གཅིག་གི་རྩ་བའི་ཐད་ཀའི་ཞེང་ཚད་དོ། །ལྷོ་བྱང་གི་འདབ་མའི་ཕྱི་མཐའི་ཐད་ཀར་དཔག་ཚད་ལྔ་བརྒྱ་ཡོད་པ་དེ་མཐའ་སྐོར་ལ་སུམ་འགྱུར་ཡིན་པས་དཔག་ཚད་སྟོང་ཕྲག་ཕྱེད་དང་གཉིས་པོ་དེ་ལ་བརྒྱད་ཀྱིས་བགོས་པས་དཔག་ཚད་བརྒྱ་དང་བརྒྱད་ཅུ་གྱ་ཕྱེད་དང་བརྒྱད་ཐོབ་པ་འདབ་མ་རེ་རེའི་ཕྱིའི་མཐའ་བསྐོར་གྱི་ཚད་དོ། །འདབ་མ་གཅིག་གིས་ཁྱོན་མཐའ་དག་བརྩི་བ་ལ་ཕྱི་མཐའི་ཚད་དང་ནང་མཐའི་ཚད་ལ་སུམ་ཆ་དང་སུམ་གཉིས་ཀྱི་ཆེ་ཆུང་གི་ཚད་ཡོད་པས་བརྩི་དཀའ་བ་བྱ་སླ་བར་བྱ་བའི་དོན་དུ་ཕྱི་མཐའི་ཚད་ཀྱི་སུམ་ཆ་ཕྲིས་ནས་ནང་མཐའི་ཚད་ལ་བསྲེས་པ་ན་ཕྱི་མཐའ་ནང་མཐའ་གཉིས་ཀ་དཔག་ཚད་བརྒྱ་ཉེར་ལྔར་ཚད་མཉམ་
པར་འགྱུར་རོ། །འདབ་མ་གཅིག་གི་ཕྱི་མཐའ་ནས་ནང་མཐའི་བར་གྱི་དཀྱུས་ཚད་ནི་དཔག་ཚད་ལྔ་བརྒྱའི་སུམ་ཆ་ཡིན་པས། དཔག་ཚད་བརྒྱ་དང་དྲུག་ཅུ་རེ་ཕྱེད་དང་བདུན། འདོམ་སྟོང་སུམ་བརྒྱ་སོ་གསུམ། ཁྲུ་གང་སོར་བརྒྱད་དོ། །འདབ་མ་གཅིག་གི་ཞེང་ཚད་དང་དཀྱུས་ཚད་བསྲེས་པས་འདབ་མ་གཅིག་གིས་ཁྱོན་རིལ་པོའི་ཚད་དུ་འགྱུར་བ་གནས་མེད་པ་བྱིས་པས་ཀྱང་ཤེས་པས་འདབ་མ་གཅིག་གི་ཞེང་ཚད་དང་དཀྱུས་ཚད་བསྲེས་པ་ལ་གྲོང་བྱེ་བ་ཕྲག་བཅུ་གཉིས་ཀྱིས་གྲངས་ཀྱིས་བགོད་ན་ད་གདོད་བསྒྱུར་བགོད་བསླབ་དགོས་ཏེ་བགོད་ཚུལ་མ་ཤེས་པས་ལན་པའོ། །དེ་ཉིད་དཔེར་ན་རི་མོ་བཅུ་བདུན་གྱེན་མཐུར་དུ་བསྣོལ་བའི་རེའུ་མིག་གྱེན་དུ་བཅུ་དྲུག་འཕྲེད་ལ་བཅུ་དྲུག་ཡོད་པ་ལ་རེའུ་མིག་ཉིས་བརྒྱ་ང་དྲུག་ཡོད་མོད། གྱེན་འཕྲེད་ཀྱི་བཅུ་དྲུག་བསྡོམ་པས་སོ་གཉིས་ལས་མི་འབྱུང་བ་བཞིན་དུ་ཤེས་པར་བྱའོ། །དེས་ན་གོང་དུ་འདབ་མའི་མགོ་མཇུག་གི་ཆེ་ཆུང་མཉམ་པའི་གྲངས་དེ་དཀྱུས་ཚད་ཀྱི་གྲངས་དེས་བསྒྱུར་བ་ནས་ཁྱོན་ཇི་ཙམ་ཡོད་པའི་ཚད་དུ་འགྱུར་རོ། །དེ་ཡང་གྲོང་རེའི་ཕྱོགས་རེ་ལ་དཔག་ཚད་དང་རྒྱང་གྲགས་སུ་ལོངས་བ་ལུགས་འདི་ལ་མི་ཐོབ་པས། བསྒྱུར་བྱ་སྒྱུར་བྱེད་གཉིས་ཀ་འདོམ་གྱི་ཕུང་པོར་བྱས་ནས་ཤེད་མཚུངས་པར་བསྒྱུར་བར་བྱ་སྟེ། འདབ་མའི་མགོ་མཇུག་གི་ཚད་དཔག་ཚད་བརྒྱ་ཉེར་ལྔ་བཞིས་བསྒྱུར་བས་རྒྱང་གྲགས། དེ་གཉིས་སྟོང་གིས་བསྒྱུར་བས་འདོམ་ཚད་ཁྲུ་བཞི་པ་ཞེང་ལ་བསྒྲིག་པ་འཕྲེང་གཅིག་གི་གྲངས་སུ་འགྱུར་ཏེ། འདོམ་གྲུ་བཞི་པའི་གྲངས་ས་ཡ་གཅིག་འབྱུང་ངོ་། །དཀྱུས་ཚད་དཔག་ཚད་བརྒྱ་རེ་དྲུག་བཞིས་བསྒྱུར་བ་རྒྱང་གྲགས། དེ་ཉིས་སྟོང་གིས་བསྒྱུར་བ་འདོམ་གྱི་གྲངས་ཏེ། སྔར་ལྷག་དཔག་ཚད་ཕྱེད་འདོམ་དུ་བསིལ་བས་འདོམ་སྟོང་ཕྲག་བཞི་དང་། ཡང་འདོམ་སུམ་བརྒྱ་སོ་གསུམ་ཡོད་པ་རྣམས་བསྡོམ་པས། འདོམ་ས་ཡ་གཅིག །འབུམ་གསུམ།
སུམ་ཁྲི། སུམ་སྟོང་སུམ་བརྒྱ་སུམ་ཅུ་སོ་གསུམ་འབྱུང་སྟེ་འདོམ་རེ་དཀྱུས་ལ་བསྒྲིག་པའི་འཕྲེང་གཅིག་གི་གྲངས་སོ། །དཀྱུས་འཕྲེང་གཅིག་གི་འདོམ་གྲངས་ངེས། ཞེང་གི་འཕྲེང་གཅིག་གི་འདོམ་གྲངས་བསྒྱུར་བས་ཁྲག་ཁྲིག་ཆེན་པོ་གཅིག །ཁྲག་ཁྲིག་གསུམ། ཐེར་འབུམ་ཆེན་པོ་གསུམ། ཐེར་འབུམ་གསུམ། དུང་ཕྱུར་གསུམ། བྱེ་བ་གསུམ། ས་ཡ་གསུམ། རྣམས་འབྱུང་སྟེ། འདོམ་རེ་དཀྱུས་ལ་བསྒྲིགས་པའི་འཕྲེང་གཅིག་གི་གྲངས་སོ། །དཀྱུས་འཕྲེང་གཅིག་གི་འདོམ་གྲངས་དེ་ཞེང་ཕྲེང་གཅིག་གི་འདོམ་གྲངས་ཀྱིས་བསྒྱུར་བས། ཁྲག་ཁྲིག་ཆེན་པོ་གཅིག །ཁྲག་ཁྲིག་གསུམ། ཐེར་འབུམ་ཆེན་པོ་གསུམ། ཐེར་འབུམ་གསུམ། དུང་ཕྱུར་གསུམ། བྱེ་བ་གསུམ། ས་ཡ་གསུམ་རྣམས་འབྱུང་སྟེ། འདབ་མ་གཅིག་གི་སའི་ཁྱོན་རངས་པོ་ལ་འདོམ་གྲུ་བཞི་པ་ཇི་ཙམ་ཡོད་པའི་གྲངས་སོ། །དེ་ཉིད་འདབ་མ་རེ་ལ་ཡུལ་ཆེན་པོ་བཅུ་གཉིས་ཡོད་པས་བཅུ་གཉིས་ཀྱིས་བགོས་པས། ཁྲག་ཁྲིག་གཅིག །ཐེར་འབུམ་ཆེན་པོ་གཅིག །ཐེར་འབུམ་གཅིག །དུང་ཕྱུར་གཅིག །བྱེ་བ་གཅིག །ས་ཡ་གཅིག །འབུམ་སྟོང་། ཁྲི་བརྒྱད། སུམ་སྟོང་། སུམ་བརྒྱ་སོ་གསུམ་འབྱུང་བ་ནི་ཡུལ་ཆེན་པོ་གཅིག་ལ་འདོམས་གྲུ་བཞི་པ་ཇི་ཙམ་ཡོད་པའི་གྲངས་སོ། །དེ་ལ་ལྷག་བཞི་ལུས་པ་དོར་ནས། རྙེད་ནོར་དེ་ལ་བྱེ་བ་གཅིག་གིས་བགོས་པས་གྲོང་རེའི་ཐོབ་སྐལ་གྱི་སའི་ཁྱོན་ཕྱོགས་རེ་ལ་འདོམ་རེ་ཡོད་པ་གྲུ་བཞི་པ་སྟོང་ཕྲག་གཅིག་བརྒྱ་དང་བཅུ་གཅིག་གི་སའི་ཁྱོན་ཡོད་དོ། །ཤམ་བྷ་ལ་ཡི་ས་ཁྱོན་ཤིན་ཏུ་ཆུང་བར་འདོད་པའི་ལུགས་ལ་དེ་ཙམ་ཐོབ་ན་ཁོ་བོ་ཅག་ཤམ་བྷ་ལའི་ཐད་ཀའི་རྒྱ་ཚད་དཔག་ཚད་སྟོང་ཕྲག་བཞི་དང་། བརྒྱ་དང་དྲུག་ཅུ་རེ་ཕྱེད་དང་བདུན། རྒྱང་གྲགས་ཕྱེད། འདོམ་སུམ་བརྒྱ་སོ་གསུམ། ཁྲུ་གང་། སོར་བརྒྱད་ཡོད་པ་དང་། དེ་སུམ་འགྱུར་འདབ་མ་བརྒྱད་ཀྱི་མཐའ་བསྐོར་གྱི་ཚད་དུ་
སྨྲ་བའི་ལུགས་ལ་ལྟ་སྨོས་ཀྱང་ཅི་དགོས། དེ་ལྟ་ན་ཡང་ཞིབ་པར་མི་དཔྱོད་པ་དག་གིས་དུས་ཀྱི་འཁོར་ལོའི་རྒྱུད་ལ་མ་གུས་པ་དང་ཡིད་གཉིས་ཟ་བའི་རྒྱུ་བྱེད་པ་དག་མཐོང་ནས་བྱིས་པ་ལ་གཏམ་དུ་བྱ་བ་ལྟར་གསལ་པོར་སྨྲས་སོ། །ཞེས་གསུངས་པ་འདི་ཤམ་བྷ་ལ་འཛམ་གླིང་འདིའི་ཕྱེད་དང་སུམ་ཆ་ལྟ་བུའི་ས་ཁྱོན་ཅན་མིན་ན་གྲོང་མང་པོ་དེ་ཙམ་མི་ཤོང་སྙམ་པའི་དོགས་སེལ་དུ་འདིར་ཡང་ཚིག་སྣ་ཅུང་ཟད་བསྡུས་ཏེ་དོན་ཚང་བར་བཀོད་པར་བྱས་སོ། །མཁས་གྲུབ་རྗེའི་ལུགས་ཀྱི་བྱང་གི་དུམ་བུ་ཕྱེད་ཀྱི་ཆ་ལའང་བཤད་མ་ཐག་པ་ལྟར་ས་ཁྱོན་དེ་ཙམ་ཐོབ་ན། ཆུ་བོ་ཤཱི་ཏའི་བྱང་གི་དུམ་བུ་ཕྱེད་མ་ཡིན་པ་རིལ་པོར་འདོད་པའི་རང་ལུགས་སྔར་བཤད་པ་ལ་ཁྱོན་རྒྱ་ཆེར་འོང་བ་སྨོས་མ་དགོས་སོ། །དེ་ལ་ཤམ་བྷ་ལ་དེར་མིའི་བདག་པོ་ཇི་ལྟར་བྱོན་པ་གསུངས་པ། གཅིག་གཉིས་གསུམ་དང་ལ་སོགས་པ་སྟེ་འདི་ལ་བཤད་ཚུལ་མི་འདྲ་བ་འགའ་བྱུང་སྟེ། འགྲེལ་ཆུང་པདྨ་ཅན་དང་དེའི་རྗེས་འབྲངས་དག་གིས་ས་དུམ་བུ་བཅུ་གཉིས་སུ་བཅོམ་ལྡན་འདས་ཀྱི་ཆོས་ཀྱི་འཁོར་ལོ་བསྐོར་བ་འབྱུང་བ་དེའང་གཉིས་སུ་མེད་པའི་ཡེ་ཤེས་གཅིག་དང་ཐབས་ཤེས་གཉིས་དང་སྐུ་གསུང་ཐུགས་གསུམ་དང་། ཆུ་གཏེར་ཏེ་སྐུ་གསུང་ཐུགས་ཡེ་ཤེས་རྡོ་རྗེའི་དབྱེ་བ་ཡིས་བཞི་དང་། མདའ་སྟེ་ཕུང་ལྔ་དག་པའི་རིགས་ལྔའམ་ཡེ་ཤེས་ལྔ་དང་། རོ་སྟེ་ཡེ་ཤེས་ཀྱི་ཕུང་པོ་དང་བཅས་པ་རིགས་དྲུག་དང་། ཐུབ་པ་སྟེ་སངས་རྒྱས་ཀྱི་རིགས་བདུན་དང་ཕུང་པོ་ལྔ་དང་འཇིག་རྟེན་ཏེ་རིགས་གསུམ་ལ་སོགས་པའི་དབྱེ་བས་མི་དབང་འཁོར་ལོ་ཅན་ས་ལ་འཁོར་ཞེས་སུ་བཤད་དོ། །འདིར་ཕུང་པོ་ལྔའི་རིགས་ལན་གཉིས་སུ་ཟློས་པ་སོགས་ཀྱི་ཕྱིར་ཐུབ་པ་ནི་བྱང་ཆུབ་ཡན་ལག་བདུན་ནམ་ཁ་སྦྱོར་བདུན་དང་། ལྔ་དང་འཇིག་རྟེན་ནི་བརྒྱད་དེ་འཕགས་ལམ་བརྒྱད་ལ་སོགས་པ་ཆོས་ཀྱི་སྒོ་སྣ་ཚོགས་སྟོན་པའི་ཆོས་ཀྱི་འཁོར་ལོ་ལ་བཤད་ན་བདེའོ། །འདི་ཀླ་ཀློ་འཇོམས་བྱེད་མི་དབང་འཁོར་ལོ་ཅན་
བཤད་པའི་སྐབས་སུ་སངས་རྒྱས་བཅོམ་ལྡན་འདས་དངོས་བཤད་པ་སྐབས་སུ་མ་བབ་ཅེས་མཁས་པ་དག་གིས་བཀག་པ་བདེན་ཡང་། མི་དབང་འཁོར་ལོ་ཅན་གྱི་བསྐོར་རྒྱུའི་ཆོས་ལ་གོ་ན་མི་རུང་བའང་མེད་དོ། །ཡང་ཁ་ཅིག་གིས་གཅིག་ཅེས་པ་དྲག་པོར་འཁོར་ལོ་ཅན་དང་། དེའི་སྲས་གཉིས་དུས་གཅིག་ལ་བྱུང་བ་དང་། དེ་དག་གི་སྲས་གསུམ་དང་། བཞི་དང་། ལྔ་དང་། དྲུག་དང་། བདུན་དང་། ལྔ་དང་འཇིག་རྟེན་ཏེ་བརྒྱད་དང་ལ་སོགས་པ་དགུ་ཅིག་ཆར་འབྱུང་བ་ལ་སོགས་པའི་དབྱེ་བ་ཡིས་ཞེས་པ། རིགས་ལྡན་འཁོར་ལོ་ཅན་བཤད་པའི་སྐབས་སུ་དེའི་སྲས་དང་ཚ་བོ་སོགས་འཁོར་ལོ་ཅན་གྱི་དབྱེ་བར་འོང་དོན་མེད་ལ། དབྱེ་བ་ཡིས་ཕྱེ་བ་འཁོར་ལོ་ཅན་ནི་ཞེས་གསུངས་པའི་ཚིག་དོན་ལ་མ་ཞུགས་སོ་ཞེས་མཁས་པ་དག་གསུངས། ཡང་ཁ་ཅིག་གླིང་འདིར་ཀླ་ཀློ་འཇོམས་པ་དྲག་པོ་འཁོར་ལོ་ཅན་དང་པོ་ནི་གཅིག་དང་། དེ་ནས་དུམ་བུ་ལྷག་མ་བཅུ་གཅིག་ཏུ་ཀླ་ཀློ་འཇོམ་པར་རིམ་གྱིས་བྱོན་པའི་འཁོར་ལོ་ཅན་གཉིས་ལ་སོགས་པ་བཅུ་གཉིས་ཀྱི་བར་དུ་ལོ་སྟོང་བརྒྱད་བརྒྱ་རེས་བར་དུ་ཆོད་པའི་སྐྱེ་བ་སྔ་ཕྱི་བཅུ་གཉིས་སུ་འདོད་དོ། །སངས་རྒྱས་ཉིད་སྐུ་གཅིག་པོ་དེས་གླིང་བཅུ་གཉིས་སུ་ཆོས་སྟོན་གྱི་སྐྱེ་བ་བཅུ་གཉིས་བཞེས་དགོས་པ་མིན་པ་ལྟར་གླིང་འདིར་ཤམ་བྷ་ལར་བྱོན་པའི་རིགས་ལྡན་འཁོར་ལོ་ཅན་ཡང་སྐྱེ་བ་མི་འདྲ་བ་བཅུ་གཉིས་སུ་སྟོན་པར་ལུང་ལས་མ་བཤད་ལ། རིགས་པས་ཀྱང་འགྲུབ་དཀའ་བས་དེ་ལྟར་བཤད་པ་ལ་རྒྱུ་མཚན་ངེས་པ་ཅན་མེད་པར་བླ་མ་སྔ་མ་དག་གིས་བཞེད། དེས་ན་གླིང་འདིར་ཀླ་ཀློ་འཇོམས་པ་རིགས་ལྡན་འཁོར་ལོ་ཅན་དེ་ཉིད་ཀྱིས་གླིང་གཞན་བཅུ་གཅིག་པོར་ཡུན་ཐུང་ངུས་ཆོས་མིན་འཇོམས་པའམ། ཡང་ན་གླིང་འདིར་ཀླ་ཀློ་འཇོམས་པའི་དུས་སུ་དཔུང་དང་བཅས་པའི་སྤྲུལ་པའི་བཀོད་པས་གླིང་གཞན་རྣམས་སུའང་ཆོས་མིན་འཇོམས་ཏེ་ཀླ་ཀློ་སྟག་གཟིག་པའི་ཆོས་ལུགས་དངོས་
གླིང་འདིར་བྱུང་གི་གླིང་གཞན་ཐམས་ཅད་ན་འབྱུང་བར་ངེས་པའི་ལུང་དང་རིགས་པ་མེད་དོ་ཞེས་གསུངས། དེ་ལྟར་ན་དང་པོ་གླིང་གཅིག་འཛམ་གླིང་ཆུང་ངུ་འདིར་ཀླ་ཀློ་འཇོམས་པ་དང་། དེ་ནས་གཡས་བསྐོར་གྱིས་རིམ་པ་བཞིན་གླིང་གཉིས་གསུམ་བཞི་ལྔ་དྲུག་བདུན་དང་ལྔ་དང་འཇིག་རྟེན་བསྡོམས་པ་བརྒྱད་ལ་སོགས་པ་བཅུ་གཉིས་ཀྱི་བར་དུ་ཀླ་ཀློ་འཇོམས་ཤིང་། སངས་རྒྱས་ཀྱི་བསྟན་པ་འཇོག་པའི་དབྱེ་བས་འཁོར་ལོ་ཅན་བཅུ་གཉིས་འཁོར་བར་འགྱུར་རོ་ཞེས་འཆད་དོ། །འདི་དག་ལ་ལུང་གི་ངེས་པ་མེད་ན་རིགས་དཔྱད་ཀྱིས་མཐའ་གཅིག་ཏུ་ཁ་ཚོན་གཅོད་དཀའ་ཡང་། གང་ལྟར་ན་ཡང་ལུགས་འདིར་ས་དུམ་བུ་བཅུ་གཉིས་སུ་སངས་རྒྱས་ཀྱི་བསྟན་པ་རིམ་བཞིན་འཁོར་བ་དང་། དེའི་བྱེད་པོ་མི་དབང་ཆོས་ཀྱི་འཁོར་ལོས་སྒྱུར་བ་ཆེན་པོ་འཁོར་བར་གསུངས་པ་ལྟར་ངེས་པར་ཁས་བླངས་དགོས་ཤིང་། ལུང་གཞན་ལས་སྒྲ་མི་སྙན་སོགས་སུ་བསྟན་པ་མེད་པར་གསུངས་པ་སོ་ཐར་གྱི་སྡོམ་པའི་རྟེན་དུ་མི་རུང་བའི་ཆ་ནས་ཡིན་གྱི། སྔགས་དང་དམ་པའི་ཆོས་ཀྱི་སྣོད་དུ་མི་རུང་བ་མ་ཡིན་པས། སྤྱིར་དེ་བཞིན་གཤེགས་པའི་ཆོས་ནི་ལས་ཀྱི་ས་དུམ་བུ་བཅུ་གཉིས་སུ་འཁོར་བར་འགྱུར་ལ། དེར་ཡང་སྔར་གྱི་བསྟན་པའི་དུས་བཞིའི་མཇུག་ཏུ་འཇམ་དཔལ་གྱི་སྤྲུལ་པ་མི་དབང་འཁོར་ལོ་ཅན་གྱིས་གསོས་ནས་སླར་ཡང་བསྟན་པའི་དབང་དུ་བྱས་པའི་དུས་བཞི་རིམ་པར་འཇུག་སྟེ་དེ་ལ་བསྟན་པ་སྔ་དར་དང་ཕྱི་དར་གྱི་ཐ་སྙད་མཛད་པ་ཡིན་ནོ། །བསྟན་པའི་དུས་བཞི་ཡང་གླིང་ཐམས་ཅད་དུ་རིམ་ཅན་དུ་འཁོར་བ་དང་། གླིང་ཐམས་ཅད་དུ་ཡང་སྔ་མའི་དུས་བཞི་རིམ་ཅན་དུ་བྱུང་མཐར་དུས་བཞི་ཕྱི་མ་རིམ་ཅན་དུ་འབྱུང་བར་འདོད་པའི་ལུགས་གཉིས་བྱུང་ལ། ལུགས་སྔ་མས་རྒྱལ་པོའི་རྒྱབ་ཏུ་སུམ་ལྡན་སོགས་གླིང་གི་དབང་དུ་བྱས་ནས་འཆད། ཕྱི་མའི་རྒྱལ་པོ་བྱོན་པའི་དུས་རྫོགས་ལྡན། དེའི་
རྒྱབ་སྟེ་རྗེས་སུ་སུམ་ལྡན་སོགས་དུས་བཞི་རིམ་པར་འབྱུང་བ་ལ་འཆད་དོ། །དེ་ལྟར་ལུགས་སོ་སོའི་འདོད་པ་བརྗོད་ནས་འཐད་པའི་ཕྱོགས་ནི་སྐབས་འདིར་བསྟན་བྱ་ཆོས་ཀྱི་དབང་དུ་བྱས་ན་སྔ་མ་ལྟར་གཉིས་སུ་མེད་པའི་ཡེ་ཤེས་ལྷན་སྐྱེས་སམ། དེ་ཁོ་ན་ཉིད་གཅིག་དང་། ཐབས་ཤེས་གཉིས་དང་། སྐུ་གསུང་ཐུགས་ཀྱི་རྣལ་འབྱོར་གསུམ་དང་། ཆུ་གཏེར་ཏེ་རྡོ་རྗེ་བཞི་ཡི་དབྱེ་བ་དང་། མདའ་སྟེ་རིགས་ལྔའམ་ཡེ་ཤེས་ལྔ་དང་། རོ་སྟེ་ཕར་ཕྱིན་དྲུག་གམ་རིགས་ལྔ་ཡེ་ཤེས་དང་བཅས་པའི་རིགས་དྲུག་དང་། །ཐུབ་པ་སྟེ་བྱང་ཆུབ་ཀྱི་ཡན་ལག་བདུན་ནམ། ཁ་སྦྱོར་ཡན་ལག་བདུན་དང་། ལྔ་དང་འཇིག་རྟེན་ཞེས་འཕགས་ལམ་བརྒྱད་དང་། དེ་ལ་སོགས་པའི་དབྱེ་བ་ཆོས་ཀྱི་སྒོ་རྣམས་ཀྱི་འཁོར་ལོ་རབ་ཏུ་བསྐོར་བ་ཡིས་ཕྱེ་བ། འཇིག་རྟེན་གྱི་འཁོར་ལོས་སྒྱུར་བ་གཞན་ལས་ཁྱད་པར་དུ་འཕགས་པའི་མི་དབང་འཁོར་ལོ་ཅན་ནི་ས་ཡི་གཞི་དུམ་བུ་བཅུ་གཉིས་དག་ལ་འཁོར་བར་འགྱུར་ཏེ། ཡང་དག་པར་དཔྱོད་པའི་རྣམ་ཤེས་ལྡན་པས་ཏེ་མཁས་པ་རྣམས་ཀྱིས་ཕྱག་རྒྱ་ཆེན་པོའི་དངོས་གྲུབ་ཀྱི་སླད་དུ་བསྟན་པ་དམ་པའི་ཆོས་དེ་ཉིད་བཙལ་བར་བྱའོ། །ཚིག་དེས་ཤུགས་བསྟན་ས་དུམ་བུ་བཅུ་གཉིས་པོར་གཅིག་ནས་བཅུ་གཉིས་ཀྱི་བར་དུ་ཆོས་སྟོན་པ་པོ་མི་དབང་འཁོར་ལོ་ཅན་འཁོར་བ་ཡང་བསྟན་ཏེ། གཅིག་ནས་བརྒྱད་ལ་སོགས་པ་བཅུ་གཉིས་ཀྱི་མཐར་ཐུག་པར་ཡུལ་སོ་སོར་ཆོས་སྟོན་པ་པོའི་དབང་གིས་འཁོར་ལོ་ཅན་གཅིག་ལ་བཅུ་གཉིས་སུ་ཕྱེ་བ་སྟེ། ཉི་མ་གཅིག་ཁྱིམ་མམ་སའི་དུམ་བུ་བཅུ་གཉིས་སུ་བགྲོད་པའི་དབང་གིས་བཅུ་གཉིས་ཀྱི་དབྱེ་བ་ལྟར། བསམ་གྱིས་མི་ཁྱབ་པའི་ཡེ་ཤེས་ཀྱི་སྐུས་ཞི་བ་དྲག་པོ་གང་འདུལ་གྱི་རྣམ་པས་གླིང་སོ་སོར་དམ་པའི་ཆོས་ཉིན་མོར་བྱེད་པ་བཞིན་དུ་གསལ་བར་བྱེད་དོ། །ཞེས་སོ། །འཁོར་ལོ་ཅན་དེ་ཉིད་རྣམ་ཤེས་ལྡན་པས་རྒྱུད་འདི་ལས་གསུངས་པ་བཞིན་ཤེས་པར་བྱས་ནས་བཙལ་ཞིང་བསྟེན་
པར་བྱའོ། །ཞེས་དོན་དུ་འཁོར་ལོ་ཅན་ནི་ཡང་དག་ཡེ་ཤེས་སོགས་འོག་ནས་འཆད་པར་འགྱུར་བ་ལྟར་དུའོ། །འཁོར་ལོ་ཅན་དང་ཕྱེད་ཅན་སོགས་ཀྱི་ཚིགས་རྐང་གཉིས་ཀྱི་དོན་ལའང་སྔ་མ་རྣམས་ཀྱི་བཞེད་པ་ཐ་དད་བྱུང་སྟེ། དཀའ་འགྲེལ་པདྨ་ཅན་གྱི་རྗེས་སུ་འབྲངས་པ་རྣམས་ཀྱིས་བཅོམ་ལྡན་འདས་དེ་ཉིད་འདུལ་བའི་དབང་གིས་མུ་སྟེགས་ཀྱི་བསམ་པ་དང་མཐུན་པར་ཁྱབ་འཇུག་གི་མིང་བཟུང་ནས་སེམས་ཅན་གྱི་དོན་མཛད་པ་ནི། འཁོར་ལོ་ཅན་དང་། ཕྱེད་ཅན་དང་།དུམ་བུ་ཅན་དང་། ཡུལ་གྱི་མི་བདག་ཕྱག་རྒྱའི་ལག་པ་ཅན་དང་། དེ་ལས་གཞན་ཡང་ཁྱབ་འཇུག་གི་མིང་གིས་སེམས་ཅན་གྱི་དོན་མཛད་པ། ཕྱི་རོལ་དུ་ལོ་གཅིག་དང་བགྲོད་པ་གཉིས་ལ་སོགས་པའི་དུས་ཀྱི་དབྱེ་བར་ངེས་པར་འགྱུར་ཏེ། ཇི་ལྟར་འཇིག་རྟེན་མགོན་པོ་སངས་རྒྱས་ཀྱི་ཡང་གཅིག་དང་གཉིས་ལ་སོགས་པས་སེམས་ཅན་གྱི་དོན་མཛད་པ་ནི་དེ་བཞིན་ནོ་ཞེས་བཤད། ཁ་ཅིག་གོང་བསྟན་ལྟར་གཅིག་པ་ནི་འཁོར་ལོ་ཅན་དང་། སྲས་གཉིས་ནི་ཕྱེད་ཅན་དང་། གསུམ་དུས་ཅིག་ཆར་བྱུང་བ་ནས་དགུ་ཅིག་ཆར་འབྱུང་བའི་བར་ནི་དུམ་ཅན་དང་། ཡུལ་གྱི་མི་བདག་ཕྱག་རྒྱའི་ལག་ཅན་རྣམས་ནི་སྤྲུལ་པའི་སྐུ་དང་། དེ་ལས་གཞན་རྣམས་མི་དབང་ཐུབ་པ་ཕལ་པ་རྣམས་ཀྱང་། ཕྱི་རོལ་དུ་དུས་བཟང་ངན་གྱི་དབྱེ་བ་དང་འཚམས་པར་ངེས་པར་འབྱུང་བར་འགྱུར་ཏེ། ཇི་ལྟར་འཇིག་རྟེན་མགོན་པོ་སངས་རྒྱས་ཀྱི་ཆོས་དུས་བཟང་ངན་དང་འཚམས་པར་འབྱུང་བ་བཞིན་ནོ་ཞེས་འཆད་དོ། །རྭ་པ་ལྟར་ན། གཅིག་གཉིས་དང་མར་བཅད་ཀྱི་དོན་འདི་ལྟར་འཆད་དེ། གཅིག་གཉིས་གསུམ་དང་རྒྱ་མཚོའི་དབྱེ་བས་དུས་ལྡན་ཉི་མ་རྣམས་ཀྱིས་འཇིག་རྟེན་ལྔ་སོགས་དབྱེ་བ་ཡིས། ཞེས་བཀླག་ནས། ཆོས་ཀྱི་ཆ་གཅིག་དང་གཉིས་དང་གསུམ་དང་རྒྱ་མཚོ་སྟེ་བཞི་རྫོགས་པའི་དབྱེ་བས་རྩོད་དུས་དང་ཉིས་ལྡན་དང་སུམ་ལྡན་དང་རྫོགས་ལྡན་གྱི་དུས་
བཞི་དང་ལྡན་པའི་ཉི་མ་ནུས་པའི་ཉི་མ་སྟེ་ནུས་པའི་ཉིན་ཞག་གཅིག་གི་དུས་རྣམས་ཀྱི་ཕྱི་རོལ་འཇིག་རྟེན་པའི་སྟོན་པ་གོས་དཀར་ཅན་ལ་སོགས་པ་ལྔ་དང་། ཨརྡྷ་ནོ་ལ་སོགས་པའི་དབྱེ་བ་ཡིས་འབྱུང་བ་རྣམས་འདུལ་བའི་ཕྱིར་དུ་སངས་རྒྱས་ཀྱི་ཡང་མི་ཡི་བདག་པོ་བསྟན་པ་ཡོངས་རྫོགས་ཀྱི་བདག་བྱེད་པས་འཁོར་ལོ་ཅན་ནི་གང་འདུལ་གྱི་གཟུགས་ཀྱིས་ས་སྟེང་དུ་ཉི་མ་སྟེ་ས་དུམ་བུ་བཅུ་གཉིས་ཐ་དད་པ་རྣམས་སུ་བསྐོར་བར་བྱེད་པ་གདུལ་བྱ་འདུལ་བའི་ཐབས་ལ་མཁས་པ་རྣམས་འབྱུང་ངོ་། །ཇི་ལྟར་ན་བསྟན་པ་ཡོངས་སུ་རྫོགས་པའི་འཁོར་ལོ་ཅན་གླིང་བཞི་ལ་དབང་བ་དང་། བསྟན་པ་ཕྱེད་ཀྱི་བདག་ཕྱེད་པས་ཕྱེད་ཅན་གླིང་གཉིས་དང་། བསྟན་པ་དུམ་བུའི་བདག་པོ་ཕྱེད་པས་དུམ་ཅན་གླིང་གཅིག་དང་། གྲོང་བྱེ་བས་བཅིངས་པའི་ཡུལ་གྱི་བདག་ཕྱེད་པས་ཡུལ་གྱི་མི་བདག་དང་། ཕྱག་རྒྱ་ཐོགས་ནས་རྒྱལ་ཁམས་གྲོང་འབུམ་གྱི་བདག་ཉིད་ལ་དབང་བྱེད་པའི་ཕྱག་རྒྱའི་ལག་དང་། དེ་ལས་གཞན་མི་ཕལ་པའི་ཚུལ་བཟུང་ནས་བསྟན་པ་འཛིན་ནོ། །དེ་ཡང་ཕྱི་རོལ་དུ་དུས་ཀྱི་དབྱེ་བས་ཀླ་ཀློ་འབྱུང་བ་ལྟར་དེ་དང་འཚམས་པར་འདུལ་བྱེད་རིགས་ལྡན་ཡང་ངེས་པར་འབྱུང་བ་ཡིན་ཏེ། འཇིག་རྟེན་མགོན་པོ་སངས་རྒྱས་དང་བྱང་ཆུབ་སེམས་དཔའ་ཡིས་ཕྱི་རོལ་པའི་སྟོན་པ་འདུལ་བྱེད་ཇི་ལྟར་བསྟན་པ་དེ་བཞིན་ནོ་ཞེས་བཤད་དོ། །ཡང་ཁ་ཅིག་རིགས་ལྡན་འཁོར་ལོ་ཅན་དང་། དེའི་སྲས་གཉིས་འཁོར་ལོ་ཕྱེད་ཅན་དང་། ཚངས་པ་སོགས་ཀྱི་སྲས་མང་པོ་ཅིག་ཆར་བྱུང་བ་དུམ་བུ་ཅན་ཞེས་དང་། དེ་རྣམས་ཀྱི་ཡུལ་གྱི་མི་བདག་ཕྱག་རྒྱའི་ལག་ཅན་སྤྲུལ་པའི་སྐུ་རྣམས་ནི། མི་དབང་ཐུབ་པ་ཕལ་པ་རྣམས་ཀྱང་འབྱུང་ངོ་ཞེས་བཤད། དེ་ལ་སོགས་པ་འཆད་ཚུལ་དུ་མ་བྱུང་ངོ་། །དེ་རྣམས་ལས་འཐད་པའི་ཕྱོགས་གང་ཞེ་ན། དང་པོར་ཀླ་ཀློ་བཅོམ་ནས་སངས་རྒྱས་ཀྱི་ཆོས་འཇོག་པ་པོ་རིགས་ལྡན་དྲག་པོ་ནི་གླིང་བཅུ་གཉིས་པོ་ཐམས་ཅད་དུ་བྱོན་ནས་དེ་དག་ལ་
དབང་བསྒྱུར་བའི་འཁོར་ལོ་ཅན་དང་། དེའི་སྲས་ཚངས་པ་དང་ལྷ་དབང་ནི་གླིང་འདིའི་ཕྱེད་ཕྱེད་ལ་དབང་བྱེད་པས་ཕྱེད་ཅན་དང་། ཚངས་པའི་སྲས་པོ་འོད་སྲུང་མན་ཆད་ཆུ་བོ་ཤཱི་ཏའི་ལྷོ་ཚུན་ཆད་དུ་མི་འབྱོན་པས། གླིང་འདིའི་དུམ་བུ་དྲུག་གི་ཆ་གཅིག་ཤམ་བྷ་ལའི་ཡུལ་ཙམ་ལ་དབང་བྱེད་པས་དུམ་བུ་ཅན་ཞེས་བྱ་ལ། དུམ་བུ་ཅན་ནི་དེ་དག་གི་དང་པོ་འོད་སྲུང་ནས་བརྩམ་སྟེ་བརྒྱད་ཀྱི་བར་དུའོ། །དེའི་རྗེས་སུ་ཡུལ་གྱི་མི་བདག་ཕྱག་རྒྱའི་ལག་ཅན་ནི་རྒྱལ་པོའི་མཚན་མ་ཡི་རྒྱ་ལག་ཏུ་ཐོགས་པ་རྣམས་དང་། དེ་ལས་གཞན་པ་རྗེ་དཔོན་ལ་སོགས་པའི་རྣམ་པར་སྣང་བ། ཕྱི་རོལ་དུ་ནི་རྫོགས་ལྡན་ལ་སོགས་པའི་དུས་ཀྱི་དབྱེ་བ་བཞིན་དུ་ངེས་པར་འབྱུང་བར་འགྱུར་ཏེ། ཇི་ལྟར་འཇིག་རྟེན་མགོན་པོ་སངས་རྒྱས་དང་བྱང་སེམས་ཐབས་མཁས་ཅན་གྱི་མཛད་པའང་དེ་བཞིན་དུ་གང་འདུལ་དུ་སྟོན་པ་ཡིན་ནོ་ཞེས་སོ། །མཁས་གྲུབ་རྗེས། འཁོར་ལོ་ཅན་དང་ཕྱེད་ཅན་འཆད་ཚུལ་དེ་དང་འདྲ་ལ། འཛམ་གླིང་འདིའི་དུམ་བུ་ཤམ་བྷ་ལའི་ཡུལ་སྐྱོང་བའི་དུམ་ཅན་དང་པོ་འོད་སྲུང་དང་། དེའི་རྗེས་སུ་འབྱུང་བ་ཕྱག་རྒྱའི་གྲངས་ཏེ་དྲུག་དང་། ལག་པ་སྟེ་གཉིས་དང་བརྒྱད་པོ་ནི་རིགས་བཅུའི་དབང་ཕྱུག་དེ་ལས་གཞན་པ་ས་མ་ཐོབ་པ་འབྱུང་བ་དེ་དག་གི་དང་པོ་འཁོར་ལོ་ཅན་ནས་དུམ་བུ་ཅན་དགུ་པ་རྫོགས་ཀྱི་བར་ལ། ཤམ་བྷ་ལའི་ཕྱི་རོལ་དུ་སའི་གཞི་ལ་ནི་འཁོར་ལོ་ཅན་གྱི་བསྟན་པ་རྫོགས་ལྡན་ལ་སོགས་པ་བཞིའི་དུས་ཀྱི་དབྱེ་བ་རིམ་པ་ལྟར་ངེས་པར་འབྱུང་བར་འགྱུར་ཏེ། ཇི་ལྟར་འཇིག་རྟེན་མགོན་པོ་སངས་རྒྱས་ཀྱི་བསྟན་པའི་དུས་བཞི་རིམ་པ་ལྟར་འབྱུང་བ་དེ་བཞིན་ནོ། །འདི་ལས་གཞན་དུ་འཆད་པ་དག་གིས་ནི་དུམ་བུ་ཅན་གྱི་དོན་གང་ལ་བྱ་བའི་རྟོལ་མ་བྱུང་ལ། ཕྱག་རྒྱ་ལག་པས་འཛིན་པའི་དོན་ཡང་ཇི་ལྟ་བུ་ལ་བྱ་བ་ཤིན་ཏུ་དཀའོ་ཞེས་གསུངས་སོ། །དེ་ནས་ཆོས་རྒྱལ་རྣམས་ཀྱི་སྐྱེ་གནས་ཀྱི་ཁྱད་པར་དང་ཆོས་ཀྱི་འཁོར་ལོས་སྒྱུར་བ་
འབྱུང་བའི་དུས་བསྟན་པ་ནི། འོད་ཟེར་བདུན་དང་སོགས་གསུངས་ཏེ། འདིའི་རྐང་པ་སྔ་མ་གསུམ་གྱི་དོན་ལ་པདྨ་ཅན་རྗེས་འབྲངས་དང་བཅས་པས་མུ་སྟེགས་འདུལ་བའི་དོན་དུ་སངས་རྒྱས་ཀྱིས་དེ་རྣམས་ཀྱི་བསམ་པ་དང་མཐུན་པར་སྤྲུལ་པ་བསྟན་པ་ནི། འོད་ཟེར་སོགས་དྲང་སྲོང་བདུན་དང་། རི་གཟའ་སྟེ་གཟའ་བདུན་དང་ཐུབ་པ་བདུན་རྣམས་འདིར་ནི་སྙིང་སྟོབས་ལྡན་པ་སྟེ་དགེ་བའི་བསམ་པ་འབའ་ཞིག་གི་རང་བཞིན་ཅན་ལྷའི་སྐྱེ་གནས་དང་། ཁྱབ་འཇུག་གི་འཇུག་པ་དང་མིང་མཚུངས་པའི་སངས་རྒྱས་ཀྱི་སྤྲུལ་པ་བསྟན་པ་ཉ་ལ་སོགས་པ་བརྒྱད་ནི་དགེ་མི་དགེ་འདྲེས་པའི་བསམ་པ་ཅན་ཡིན་པས་རྡུལ་གྱིས་བསྐྱེད་པ་འབྱུང་པོ་ལྷ་མ་ཡིན་གྱི་རིགས་ཀྱི་སྐྱེ་གནས་སོ། །ཞེས་བཤད་དོ། །དེ་ལ་མཁས་པ་དག་གིས་སངས་རྒྱས་ཀྱི་སྤྲུལ་པ་མི་དགེ་བ་དང་འདྲེས་པའི་བསམ་པ་ཅན་ཆེས་ངོ་མཚར་ཞེས་ཧ་ཅང་ཐལ་བར་སྨྲ་ཞིང་དེ་བཞིན་ཅེས་པའི་དོན་ཡང་མ་སྨྲས་སོ། །ཞེས་སུན་འབྱིན་ཀྱང་སངས་རྒྱས་བྱང་སེམས་ཀྱི་སྤྲུལ་པ་ལ་དགེ་མི་དགེ་འདྲེས་པའི་བསམ་པ་ཅན་མེད་ཀྱང་གདུལ་བྱ་ལ་ཞི་བ་དང་དྲག་པོའི་ཕྲིན་ལས་འཇུག་པའི་ཆ་ནས་དེ་ལྟར་བརྗོད་པ་ལ་འགལ་བ་མེད་འདྲ་སྟེ་དགེ་མི་དགེའི་ལས་ཀྱི་རང་བཞིན་དུ་གྱུར་པ་ཞེས་གཞུང་དེར་སྣང་ངོ་། །ཡང་ཁ་ཅིག་འོད་ཟེར་ནི་དྲུག་དང་དེ་ནས་བདུན་དང་རི་སྟེ་བདུན་དང་གཟའ་སྟེ་བདུན་དང་ཐུབ་པ་སྟེ་བདུན་ནོ། །དེ་རྣམས་བསྡོམ་པས་འཁོར་ལོ་ཅན་སོ་གཉིས་ལ་ཕྱེད་ཅན་གཉིས་བསྣན་པའི་སོ་བཞི་པོ་འདི་རྣམས་སྙིང་སྟོབས་ལྡན་པ་ལྷའི་སྐྱེ་གནས་ཏེ། དུམ་ཅན་ཉའི་མིང་ཅན་རྣམས་དང་། རུས་སྦལ་ལ་སོགས་པ་སྡེ་ཚན་བརྒྱད་ནི་ལྷ་མིན་ཀླ་ཀློའི་རིགས་ལ་འཇིགས་པ་སྟེར་བ་རྡུལ་གྱི་རང་བཞིན་གྱི་འབྱུང་པོའི་སྐྱེ་གནས་ཅན་ནོ། །ཞེས་བརྗོད་པ་ལ། གཞན་དག་གིས་འོད་ཟེར་གྱི་སྒྲ་དྲུག་ལ་བཤད་པའི རྒྱུ་མཚན་མེད་ལ། སོ་གཉིས་པོ་ཐམས་ཅད་ལ་འཁོར་ལོ་ཅན་གྱི་མིང་འདོགས་པ་ཡང་མི་ལེགས་ཤིང་། དེ་བཞིན་གྱི་དོན་ཡང་ནོར་བའོ་ཞེས་བཤད། ཡང་ཁ་ཅིག་གིས་འོད་ཟེར་ནི་བཅུ་གཉིས་ཀྱི་མིང་སྟེ་གསང་འདུས་ཀྱི་བཤད་རྒྱུད་རྡོར་ཕྲེང་ལས། དེ་ནི་འོད་ཟེར་བཅུ་གཉིས་ཏེ། །འོད་
འཕེལ་འོད་ཟེར་གཟི་བརྗིད་མ། །ཞེས་སོགས་གསུངས་པ་ལྟར་གྲགས་པ་ནས་རིགས་ལྡན་བཅུ་གཉིས་དང་། དེ་ནས་བདུན་དང་། ཡང་བདུན་དང་། ཆོས་རྒྱལ་བདུན་ལས། ཆོས་རྒྱལ་བདུན་ནི་ཐུབ་པ་ལྷའི་སྐྱེ་གནས། གྲགས་པ་ཉའི་སྐྱེ་གནས། པད་དཀར་ནས་བཅུ་བཞི་རུས་སྦལ། དེ་ནས་དྲུག་ཕག །རིགས་ལྡན་མི་ཡི་སེང་གེ་ནས་དྲག་པོའི་བར་ལྔ་རིམ་པར་མི་ཡི་སེང་གེ་ནས་ནག་པོའི་བར་དུ་སྦྱར་ཏེ་དེ་བརྒྱད་འབྱུང་པོའི་སྐྱེ་གནས་སུ་བཤད་ཅིང་། དོན་འདི་ཚིགས་བཅད་བརྒྱ་རེ་བདུན་པ་ལས་ཤེས་སོ། །ཞེས་བཤད། ལུགས་དེ་ལ་གཞན་དག་གིས་འོད་ཟེར་བཅུ་གཉིས་ཀྱི་དོན་དུ་བཤད་པ། འདུས་པའི་བརྡ་ལ་མ་བྱང་བའི་གཏམ་སྟེ། འདུས་པ་རྩ་བཤད་དེ་དག་གི་ལུགས་ལ་འོད་ཟེར་ཅེས་པ་ང་གི་མིང་ཡིན་ལ། སྙིང་ག་ནས་མིག་སོགས་ཀྱི་སྒོར་བྱུང་སྟེ་གཟུང་འཛིན་གྱི་རྣམ་རྟོག་བསྐྱེད་པའི་རླུང་གི་འོད་ཟེར་བཅུ་གཉིས་ནི་འོད་འཕེལ་ལ་སོགས་པར་གསུངས་པའི་ཕྱིར་རོ། །ཞེས་གཞན་དག་གིས་སུན་འབྱིན་ནོ། །རྭ་པ་ལྟར་ན་ཕྱི་རོལ་པའི་སྟོན་པ་མཱ་རི་ཙི་སྟེ་འོད་ཟེར་དང་། ཨཾ་གི་ར་ལ་སོགས་པ་བདུན་དང་། གཟའ་བདུན་གྱི་སྤྲུལ་པ་བདུན་ཏེ་དེ་ལྟར་ཐུབ་པའམ་དྲང་སྲོང་བཅུ་བཞི་ནི་ལྷའི་སྐྱེ་གནས་དང་། ཉ་སོགས་ཀྱི་མིང་ཅན་བརྒྱད་འབྱུང་སྐྱེས་ཏེ་ཉི་ཤུ་རྩ་གཉིས་རིམ་པས་བྱུང་བའི་མཐའ་ཚེ་ལོ་བརྒྱ་བའི་དུས་སུ་ལྷ་མིན་དགྲ་བོ་ཕྱག་ན་འཁོར་ལོ་ཅན་འབྱུང་ཞེས་འཆད་དེ། སུམ་ཅུ་རྩ་གཉིས་གདན་གྱི་མཐར་ནི་ཞེས་པ་ཉི་ཤུ་རྩ་གཉིས་ཞེས་པར་འདོན་ཏོ། །དེ་ལྟར་འཆད་ཚུལ་མང་དུ་སྣང་ཡང་དོན་ལ་འགལ་བ་ཆེར་མེད་མོད་གདན་རབས་དང་སྦྱར་ན་འདི་ལྟར་བཤད་པ་ལེགས་ཏེ། དམ་པའི་ཆོས་ཀྱི་འོད་ཟེར་སྤྲོ་བ་པོ་རྒྱལ་པོ་ཟླ་བ་བཟང་པོ་སོགས་ཆོས་རྒྱལ་བདུན་དང་། དེ་ནས་འཇམ་དཔལ་གྲགས་པ་ལ་སོགས་པ་རིགས་ལྡན་རི་སྟེ་བདུན་དང་། ཉི་མ་གྲགས་སོགས་གཟའ་སྟེ་བདུན་དང་། མཐའ་ཡས་སོགས་ཐུབ་པ་སྟེ་བདུན་རྣམས་
དང་། བདུན་ཚན་གསུམ་པའི་རྗེས་འདིར་ནི་སྔ་མ་དེ་བཞིན་དུ་ཡང་རིགས་ལྡན་ལྷག་མ་བཞི་བསྣན་པ་ཁྱོན་སུམ་ཅུ་རྩ་གཉིས་ལས། དང་པོའི་ཆོས་རྒྱལ་བདུན་ནི་སྙིང་སྟོབས་ལྡན་པ་ལྷ་ཡི་སྐྱེ་གནས་ཏེ་ཆོས་ཀྱི་རྐང་པ་བཞི་ལ་རྫོགས་པར་ལོངས་སྤྱོད་པས་སོ། །རིགས་ལྡན་གྲགས་པ་ནི་ཉ་ཡི་སྐྱེ་གནས་དང་མཚུངས་ཏེ་ཀླ་ཀློའི་ཆོས་ཐོག་མར་འགོག་པ་པོའོ། །པད་དཀར་ནས་ཁྱབ་འཇུག་སྦས་པའི་བར་དྲུག་ནི་རུས་སྦལ་གྱི་དང་། ཉི་མ་གྲགས་པ་ནས་ཟླ་འོད་བར་བདུན་ཕག་པ་དང་མཐའ་ཡས་ནས་མ་འགགས་པའི་བར་བདུན་ནི་མི་ཡི་སེང་གེའི་སྐྱེ་གནས་དང་བཅས་པ་དང་། རིགས་ལྡན་མི་ཡི་སེང་གེ་ནི། མི་ཐུང་དང་། དབང་ཕྱུག་ཆེན་པོ་ནི་ཛཱ་མད་ཨགྣི་སྟེ། དྲང་སྲོང་གཤིན་རྗེ་མེའི་བུ་ར་མ་དགྲ་སྟ་འཛིན་པ་དང་། མཐའ་ཡས་རྣམ་རྒྱལ་ནི་རྒྱལ་པོ་ཤིང་རྟ་བཅུ་པའི་བུ་དགའ་བྱེད་རཱ་མ་དང་། དྲག་པོ་འཁོར་ལོ་ཅན་ནི། ནག་པོ་སྟེ་དེ་ལྟར་བརྒྱད་ནི་ལྷ་མིན་ཀླ་ཀློའི་རིགས་ལ་འཇིགས་པ་སྟེར་བ་རྡུལ་གྱི་ཡོན་ཏན་གྱི་སྟོབས་དང་ལྡན་པ་འབྱུང་པོ་མི་ཡི་སྐྱེ་གནས་སོ། །ཞེས་སོ། །སྐབས་འདིར་མཁས་གྲུབ་རྗེས། ཆོས་རྒྱལ་བདུན་དང་རིགས་ལྡན་བདུན་དང་ཡང་བདུན་དང་བདུན་སྟེ་ཉེར་གཅིག་པོའི་རྗེས་སུ་འདིར་ནི་དེ་བཞིན་ཞེས་པ་སླར་ཡང་བདུན་ཚན་གཅིག་སྟེ། འཁོར་ལོ་ཅན་ཡར་བཅད་བཞི་དང་སྲས་ཚངས་པ་དང་ལྷ་དབང་དང་འོད་སྲུང་བཅས་བདུན་པོ་བསྣན་ནས་དེ་ལྟར་སོ་ལྔ་པོ་སྙིང་སྟོབས་ཀྱི་ཡོན་ཏན་ལྡན་པ་ལྷའི་སྐྱེ་གནས་སོ། །དེའི་རྗེས་སུ་རིམ་པར་བྱུང་བ་སྔར་ཕྱག་རྒྱའི་ལག་ཅེས་བཤད་པ་དུམ་བུ་ཅན་བརྒྱད་པོ་ཉ་དང་རུས་སྦལ་ཕག་པ་མི་ཡི་སེང་གེ་དང་བཅས་མི་ཐུང་དང་། ཡ་མད་ཨགྣིའི་བུ་ར་མ་དགྲ་སྟ་འཛིན་པ་དང་། དགའ་བྱེད་རཱ་མ་དང་། ནག་པོའི་མིང་ཅན་རྣམས་ཏེ་དེ་ལྟར་བརྒྱད་ནི་ལྷ་མིན་རིགས་ལ་འཇིག་སྟེར་རྡུལ་གྱི་ཡོན་ཏན་གྱིས་འབྱུང་པོ་མིའི་སྐྱེ་གནས་སོ། །ཞེས་གསུངས། སྐབས་འདི་སོགས་འགྲེལ་
ཆེན་དང་ཁུངས་ཐུབ་ཀྱི་གཞུང་ལས་བཤད་པ་མ་མཐོང་བ་དག་ལ། འགྲེལ་བྱེད་རྣམས་ཀྱི་རང་བློས་འཐད་པ་བཙལ་ནས་འཆད་ཚུལ་མི་འདྲ་བ་དུ་མར་བྱུང་བ་ཡིན་ཀྱང་། འདིར་རང་ལུགས་སུ་བརྗོད་པ་འདི་དག་གི་འཐད་པ་ནི་སྐབས་འདི་གདན་རབས་སོ་གཉིས་ཀྱི་སྐྱེ་གནས་བཤད་པའི་སྐབས་ཡིན་པར་དངོས་སུ་གསལ་བས། རིགས་ལྡན་དྲག་པོའི་སྲས་གཉིས་དང་འོད་སྲུང་འདིར་བསྣན་དོན་མེད་ཅིང་། འོད་ཟེར་བདུན་དང་རི་གཟའ་ཐུབ་པ་འདིར་ནི་དེ་བཞིན་ཞེས་པའི་ཚིག་ལ་རྒྱུ་མཚན་ཡོད་དགོས་པས་འདི་ལྟར་སྦྱར་བ་ཡིན་ལ། རིགས་ལྡན་དྲག་པོ་ལས་གཞན་པའི་རིགས་ལྡན་རྣམས་ཀྱིས་ལྷ་མིན་རིགས་ལ་འཇིགས་པ་སྟེར་བ་པོར་བཤད་པ་མི་འཐད་སྙམ་ན། ལྷ་མིན་རིགས་ལ་འཇིགས་སྟེར་དཔལ་ལྡན་གྲགས་པ་ཕྱག་ན་མདུང་ཐུང་ཅན། ཞེས་གསུངས་པ་དང་། ལྷ་མིན་ཀླ་ཀློའི་སྟོན་པ་རྣམས་འབྱུང་བ་དང་མཐུན་པར་འདུལ་བྱེད་རྣམས་ཀྱང་རིམ་པར་འབྱུང་བར་གསུངས་པའང་མི་འཐད་པར་འགྱུར་ལ། ལྷ་མིན་རིགས་ལ་འཇིགས་པ་དངོས་སུ་སྟེར་བའི་གཙོ་བོ་འཁོར་ལོ་ཅན་དང་སྲས་གཉིས་སོགས་ལྷ་མིན་ལ་འཇིགས་པ་སྟེར་བའི་སྐྱེ་གནས་བརྒྱད་དུ་མི་གཏོགས་པར་འདོད་པའི་ལུགས་ལ། འོད་སྲུང་མ་གཏོགས་པའི་རིགས་བརྒྱུད་ལྷག་མ་དུམ་ཅན་བརྒྱད་པོས་ཀླ་ཀློའི་རིགས་ལ་ལྷག་པར་འཇིགས་པ་ཅི་ཞིག་སྟེར་ཏེ། དེ་དག་གི་དུས་སུ་འཁོར་ལོ་ཅན་གྱིས་ལྷ་མིན་རྒྱུན་བཅད་ཟིན་པའི་ཕྱིར་རོ་སྙམ་མོ། །སྤྱིར་གོང་འོག་གི་སྐབས་ཕལ་ཆེར་དུ་འགྲེལ་བཤད་སྔ་མ་དག་གི་འཐད་མི་འཐད་ཀྱི་ཆ་ཅི་རིགས་མཐོང་མོད། དུས་ཀྱི་དབང་གིས་དགག་སྒྲུབ་ཀྱི་ཚིག་མང་པོ་སྤྲོས་ཀྱང་གཞན་ལ་ཕན་པར་དཀའ་བས་མི་བརྗོད་ཀ་མེད་ཀྱི་གནད་རེ་ཟུང་ཙམ་ལས་སུ་ལའང་ཆེད་དུ་དགག་པའི་ཚིག་སྨྲ་བར་མ་བྱས་ཤིང་རྒྱུད་འདིའི་བསྟན་དོན་གྱི་ཆ་ཅི་རིགས་སྔ་འགྲེལ་རྣམས་ཀྱིས་ལེགས་པར་བཤད་པ་ལ་བྱས་པ་གཟོ་
བའི་བསམ་པས་གུས་པར་བྱེད་པ་གཙོ་བོར་བྱས་པ་ཡིན་ནོ། །དེ་ལྟར་ཆོས་རྒྱལ་བདུན་དང་རིགས་ལྡན་ཉེར་ལྔ་སྟེ་བྱང་ཆུབ་སེམས་དཔའ་དང་ཁྲོ་བོའི་རྒྱལ་པོ་རྣམས་ཀྱི་སྤྲུལ་པ་སུམ་ཅུ་རྩ་གཉིས་ཀྱི་གདན་གྱི་མཐར་ནི། གདན་རབས་སོ་གཉིས་པ་དང་། རིགས་ལྡན་ཉེར་ལྔ་པ། འཇམ་པའི་དབྱངས་རིགས་ལྡན་གྲགས་པ་ཉིད་སླར་ཡང་ལྷ་མིན་ཀླ་ཀློ་ཐམས་ཅད་འཇོམས་པའི་དགྲ་བོ་ཚེ་ལོ་བརྒྱ་པ་ཕྱག་ན་འཁོར་ལོར་འགྱུར་ཞེས་པ་ཕྱག་ན་འཁོར་ལོ་འཛིན་པ་ཉིད་འབྱུང་བར་འགྱུར་ཞེས་པའོ། །ཀླ་ཀློའི་འདུལ་བྱེད་རིགས་ལྡན་རྣམས་ཀྱིས་གཞོམ་བྱ་ཀླ་ཀློ་ཞེས་པ་ཅི་ལྟ་བུ་ཞིག་ཡིན་ཞེ་ན། ཀླ་ཀློའི་སྟོན་པ་འབྱུང་ཚུལ་དང་ཀླ་ཀློ་རྣམས་ཀྱི་ཀུན་སྤྱོད་གསུངས་པ། ཨཱ་དྲ་ཞེས་པ་ཕྱེད་དམ་གཤེད་པོ་ཞེས་སུ་ཡང་བསྒྱུར་ཏེ་དེ་ཉིད་དང་པོ་དང་། ཨ་ནོ་གྷ་ཞེས་པ་རླབས་མིན་ནམ་ནད་མེད་ཅེས་པ་དང་། ཕག་ལྡན་ཏེ་གསུམ་པོ་ནི་ལྷ་མིན་གྱི་རིགས་སོ། །ལྷག་མ་ལྔ་པོ་ལྷ་མིན་ལག་འགྲོའི་རིགས་ཏེ་ལྷ་མིན་གྱི་བྱེ་བྲག་ཀླུའི་རིགས་ལ་མུན་པ་ཡི་སྐྱེ་གནས་ཅན་ནི་ཀླ་ཀློའི་རྒྱལ་པོ་དང་སྟོན་པ་གཞན་ཡང་ལྔ་སྟེ། བྱི་བ་དང་། དབང་པོ་དང་། གོས་དཀར་ཅན་དང་། སྦྲང་རྩིའི་བློ་གྲོས་དང་། འཇོམ་བྱེད་དམ་འཁྲུག་བྱེད་ཅེས་པ་ནི་བརྒྱད་པ་སྟེ། བརྒྱད་པོ་གང་ཡིན་པ་དེ་དག་མུན་པ་ཡི་སྐྱེ་གནས་ཅན་ནོ། །ཨནྡྷ་ཀའི་སྒྲ་ལོང་བ་དང་མུན་པ་གཉིས་ཀར་འཇུག་པས་པདྨ་ཅན་དང་ག་རོད་ལོ་ཙཱས་བརྒྱད་པ་དེ་ནི་ལོང་བ་ཡིན་ཞེས་འདོན་ཏོ། དེ་ཡང་ཀླ་ཀློ་དེ་དག་གྲུབ་མཐའ་ངན་པའི་ནང་གི་མུན་པ་ཅན་ལོང་བ་ལྟ་བུ་ཤི་ནས་དམྱལ་བར་སྐྱེ་བས་ན་མུན་པ་ཅན་དུ་བརྗོད་པ་འདྲ་སྙམ་མོ། །གསལ་བར་སོག་པོའི་ཡུལ་ལམ་མ་ཁའི་ཡུལ་གྱི་བཱ་ག་ད་ངག་སྦྱིན་ཞེས་སོགས་གྲོང་ཁྱེར་དུ་ནི་ཀླ་ཀློའི་སྟོན་པ་བདུན་པ་སྦྲང་རྩིའི་བློ་གྲོས་ཡང་དག་པར་སྐྱེས་པ་སྟེ། དེས་ནི་ཀླ་ཀློའི་ཆོས་རཧྨ་ཎའི་འཇུག་པ་དར་བར་བྱེད་ཅིང་ཀླ་ཀློའི་ཆོས་ལུགས་དང་། བྱེད་
རྩིས་རྩོམ་པ་ཀླ་ཀློ་རྣམས་ཀྱི་བླ་མ་དང་རྗེ་བོར་བཀུར་པའོ། །ཀླ་ཀློ་རྣམས་ཀྱི་ཀུན་སྤྱོད་ནི་ཡུལ་གང་དུ་འཇིག་རྟེན་ན་ལྷ་མིན་གྱི་ཡན་ལག་གམ་ཕྱོགས་སམ་རིགས་སུ་གྱུར་པའི་བདུད་ཀྱི་རིས་སྟོབས་དང་ལྡན་པར་བྱེད་པ་ཉིད་དུ་གནས་ཤིང་། སེམས་ཅན་ལ་བརྩེ་བ་མེད་པ་ཀླ་ཀློའི་གཟུགས་སམ་ཆ་ལུགས་ཅན་ནོ། །ཡུལ་དེར་གནས་པའི་མི་རྣམས་ནི་རྔ་མོང་དང་རྟ་དང་བ་ལང་རང་གིས་བསད་ནས་དེ་ཡི་ཁྲག་དང་བཅས་པའི་ཤ་ནི་ཅུང་ཟད་བཙོས་པ་སྟེ་ཆེར་མ་ཚོས་པ་འབའ་ཞིག་ཟ་བ་དང་། བ་ལང་གི་ཤ་དང་དངུལ་ཆུ་ཞེས་པ་བརྒྱ་དཔེར་སུ་ཏ་ཞེས་ཡོད་པ་རྭ་འགྱུར་དུ་མངལ་ཆུ་ཞེས་དང་། ག་རོད་ལོ་ཙཱས་བུ་བཙས་ཆུ་ཞེས་བསྒྱུར་བས་ས་སྐྱའི་བླ་མ་དམ་པའི་འགྲེལ་ཆེན་དུ་ཕྱུགས་རྣམས་ཀྱི་སྤྲི་ལ་བཞེད་པར་སྣང་། འོ་མ་ལ་ཡང་བྱ་རུང་ངམ་སྙམ་མོ། །ཆུ་དང་མར་དང་ཚ་བ་གསུམ་རྣམས་མཉམ་པ་འབྲས་དང་ལོ་མ་དང་བསྲེས་པ་ནི། གཅིག་ཏུ་མེ་ལ་བཙོས་པ་དང་། ནགས་ཀྱི་འབྲས་བུ་ཤིང་ཐོག་དག་དང་བཅས་པ་ནི། མ་ཁའི་གྲོང་གང་དུ་གནས་པའི་ཀླ་ཀློའི་མི་རྣམས་དག་གི་ཟས་ཡིན་ལ། བཏུང་བ་བྱ་རྣམས་དག་གི་སྒོ་ངར་འགྱུར་རོ་ཞེས་པ་སྒོ་ང་བཙིར་པའི་ཁུ་བ་ལས་བཅོས་པའི་ཁུ་བའོ། །ཀྱེ་མི་ཡི་བདག་པོ་དེ་ལྟ་བུའི་ཡུལ་གྱི་སྤྱོད་པ་ཅན་ནི་ལྷ་མིན་ཀླ་ཀློའི་མི་རྣམས་ཀྱི་གནས་ཚུལ་ཡིན་ནོ། །དེ་ལྟར་མུན་པའི་བློ་ཅན་ཀླ་ཀློ་རྣམས་ཀྱང་དུས་ཀྱི་དབང་གིས་འབྱུང་བ་དེ་ལྟར་ན་བཅོམ་ལྡན་འདས་ཀྱིས་སེམས་ཅན་གྱི་ཁམས་སུ་རྣམ་པར་འཕྲུལ་པ་ཅི་ལྟ་བུ་འབྱུང་ཞེ་ན། ཐིག་ལེ་ནུས་མ་ཞེས་སོགས་གསུངས་ཏེ། འདི་ལ་དོན་དམ་དང་ཀུན་རྫོབ་ཀྱི་རྣམ་པས་བཤད་ཚུལ་གཉིས་ཐོབ་པས་དང་པོ་གདུལ་བྱ་མཆོག་རྣམས་ལ་ནི། ཐིག་ལེ་ནི་ཐབས་ཡབ་དང་། ནུས་མ་ནི་ཤེས་རབ་ཡུམ་སྟེ་དེ་གཉིས་དབྱེར་མེད་པར་སྦྱོར་བ་དང་པོའི་སངས་རྒྱས་ཡེ་ཤེས་ཀྱི་སྐུ་ལས། དེ་ཁོ་ན་ཉིད་ལ་སྒྲིབ་པའི་རབ་རིབ་སེལ་བའི་
མིག་སྨན་དག་དང་། ཉོན་མོངས་པའི་སྦྲུལ་གདུག་པ་ཟ་བའི་མཁའ་ལྡིང་དང་། སྒྲིབ་པའི་དྲི་མ་འཁྲུད་པའི་ལྷ་ཡི་ཆུ་བོ་དང་། འཇིག་རྟེན་ན་དྲང་སྲོང་གི་མཆོག་ཏུ་གྱུར་པ་མི་སྦྱིན་དང་འདྲ་བར་མཆོག་ཏུ་ལམ་དྲང་ཞིང་ཞི་བ་དང་ནི། དངོས་གྲུབ་གཉིས་ཀྱིས་འདོད་པའི་དོན་མ་ལུས་པ་འཇོ་བ་དང་། བདུད་ཀྱིས་གཞིག་པར་མི་ནུས་པའི་རྫོང་དང་། མ་རིག་པའི་མུན་ཁྲོད་དུ་ཡེ་ཤེས་ཀྱི་སྣང་བ་བྱེད་པའི་གློག་དང་། ཞེས་དེ་རྣམས་ཀྱིས་བྱེད་ལས་མཚོན་དོན་གྱི་སྒོ་ནས་བརྗོད་ཅིང་། བྱེད་ལས་དེ་ལྟ་བུ་དང་ལྡན་པའི་རིག་པ་བཟང་པོ་ནང་རིག་པའི་མཆོག་ཏུ་གྱུར་པ་འགྱུར་མེད་མཆོག་གི་ཆ་དང་ཞེས་སྐད་ཅིག་མ་ཉི་ཁྲི་ཆིག་སྟོང་དྲུག་བརྒྱ་རྫོགས་པའི་ཆ་བཅུ་དྲུག་པར་འགྱུར་བ་དང་ཞེས་པ་རྣམས་ཀྱི་སྟོན་པ་པོའི་ཐུགས་ཀྱི་ཁྱད་པར་གཙོ་བོར་བརྗོད་ཅིང་། ཀུན་སློང་གི་གཡོ་རྟོག་མེད་པར་གདུལ་བྱ་སོ་སོའི་སྐད་དང་མཐུན་པར་སྟོན་པའི་གསུང་རྣམ་པ་ཐམས་ཅད་པ་ལྷ་ཡི་སྐད་མཆོག་དང་ཞེས་གསུང་གི་ཁྱད་པར་དང་། རྡུལ་ཕྲ་རབ་བསགས་པའི་ལུས་མེད་པ་རྣམ་ཀུན་མཆོག་ལྡན་སྟོང་ཉིད་གཟུགས་ཀྱི་སྐུ་ཉིད་དེ། དེ་ལྟར་སངས་རྒྱས་ཉིད་ཀྱི་ཡེ་ཤེས་ཀྱི་སྐུ་ལས་མ་གཡོས་བཞིན་དུ་གདུལ་བྱའི་དོན་དུ་ཕྲིན་ལས་ཀྱི་འཇུག་པ་ཡང་དག་པར་རྒྱུ་བའི་གཟུགས་སམ་རང་བཞིན་འདི་ལྟ་བུ་རྣམས་ཀྱིས་ལས་ཀྱི་ས་ལ་སེམས་ཅན་རྣམས་ལ་ཕན་པ་དང་བདེ་བའི་དོན་དུ་འཇུག་པར་འགྱུར་རོ། །དེ་ལྟར་རྒྱལ་བ་ཡི་ནི་ཡེ་ཤེས་ཀྱི་སྐུ་གཉིས་སུ་མེད་ཅིང་མཆོག་ཏུ་མི་འགྱུར་བ་ནམ་མཁའ་དང་མཉམ་པ་ལ་བཞུགས་ནས། ཤེས་བྱ་གང་དག་སྔར་བྱུང་བར་གྱུར་པ་དང་། ད་ལྟར་བྱུང་བ་དང་། མ་འོངས་པ་ན་འབྱུང་བར་འགྱུར་བ་ཐམས་ཅད་ལུང་སྟོན་ཅིང་སྨྲ་བ་དང་། ཡང་ན་དུས་གསུམ་དུ་བྱུང་དང་འབྱུང་བ་དེ་དག་རིག་པར་བྱེད་པའམ། ཤེས་པར་བྱེད་པའི་ཆོས་སྟོན་པ་ཞེས་འབྲུ་མནན་པའང་ཡོད་དོ། །བྱེ་བྲག་ཏུ་རིག་བྱེད་ཀྱི་གཞུང་སྣ་ཚོགས་དང་རྟོག་གེ་སྟེ་ཚུར་
མཐོང་གི་གནས་ལ་སྒྲོ་འདོགས་ལེགས་པར་གཅོད་པའི་གཏན་ཚིགས་རིག་པ་ལ་སོགས་པ་བཟོ་གསོ་སྒྲ་ཡི་རིག་པ་རྣམས་དང་། ནང་རིག་པ་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་བསྟན་བཅོས་ཏེ་རྒྱུ་དང་འབྲས་བུའི་ཐེག་པ་མཐའ་དག་རབ་ཏུ་སྨྲ་ཞིང་ཆོས་སྟོན་པར་མཛད་དོ། །ཞེས་སོ། །གཞན་ནང་དོན་ལ་སྦྱར་ན་དགའ་བ་བཞིའི་དབྱེ་བས་ཐིག་ལེ་དང་། ནུས་མ་ཡེ་ཤེས་ཀྱི་རླུང་བཅུ་སོགས་ལ་སྦྱར་དུ་ཡོད་ཀྱང་མ་སྨྲོས་སོ། །ཐུན་མོང་པའི་གདུལ་བྱར་ཀུན་རྫོབ་ཏུ་སྣ་ཚོགས་ཀྱི་གཟུགས་སུ་སྣང་བས་སེམས་ཅན་གྱི་དོན་མཛད་པ་ནི་ཐིག་ལེ་སྟེ་རྫས་གྲུབ་པ་གང་གི་དཔྲལ་བ་སོགས་སུ་ཐིག་ལེ་བྱས་པས་མི་སྣང་བ་དང་མཁའ་ལ་འགྲོ་བ་སོགས་འགྲུབ་པ་དང་། ནུས་མ་ལྷ་མོ་སོགས་འགུག་པ་དང་། མིག་སྨན་དང་། ནམ་མཁའ་ལྡིང་གྲུབ་པ་དང་། ལྷ་ཡི་ཆུ་བོ་དང་འདྲ་བའི་ལོངས་སྤྱོད་མི་ཟད་པ་དང་། དྲང་སྲོང་མིས་བྱིན་དང་འདྲ་བར་འཇིག་རྟེན་ན་བཀུར་བ་དང་། སྣ་ཚོགས་པའི་འདོད་པ་འཇོ་བའི་རྫས་མང་པོ་རིགས་ཐ་དད་པ་གྲུབ་པ་དང་། ཕས་རྒོལ་གྱིས་མི་ཚུགས་པའི་རྫོང་དང་། གློག་དང་འདྲ་བར་གར་འདོད་དུ་ཕྱིན་པ་དང་། ཡིད་ལ་རིག་པ་བཟང་པོ་འགྱུར་མེད་མཆོག་གི་ཆ་ཡི་དེ་ཁོ་ན་ཉིད་མཐོང་བ་ཐོབ་པ་དང་། ལྷ་ཡི་སྐད་སོགས་སུ་ཆོས་སྨྲ་བ་དང་། རགས་པའི་ལུས་སུ་མེད་པ་དྭངས་མའི་ལུས་ཐོབ་པ་སོགས་སྔགས་ཀྱི་དངོས་གྲུབ་སྣ་ཚོགས་ཀྱི་གཟུགས་སམ་རང་བཞིན་གྱིས་ས་སྟེང་གི་སྒྲུབ་པ་པོ་རྣམས་ལ་ཕན་པ་མཛད་པར་འགྱུར་ཞིང་། དུས་གསུམ་གྱི་དོན་དུ་གྱུར་པའི་ཤེས་བྱ་དང་གནས་ལྔ་རིག་པ་རྣམས་གདུལ་བྱ་ལ་སྟོན་པར་མཛད་དོ་ཞེས་སོ། །མདོར་ན་ཀླ་ཀློའི་ཆོས་ནི་མི་ཤེས་པའི་མུན་པའི་རྒྱུ་ལས་བྱུང་བས་དངོས་པོའི་དོན་ཕྱིན་ཅི་ལོག་ཏུ་སྟོན་པ་སེམས་ཅན་ལ་འཚེ་བ་དང་། འདི་ཕྱིར་མི་བདེ་བ་སྐྱེད་པ་ཡིན་ལ། སངས་རྒྱས་ཀྱི་ཆོས་ནི་དེ་ལས་ལྡོག་
པར་ཤེས་པར་བྱའོ། །དེ་ནས་རྩ་བའི་རྒྱུད་ལས་བཅོམ་ལྡན་འདས་ཀྱིས་རྒྱལ་པོ་ཟླ་བ་བཟང་པོ་ལ་བཀའ་ཡི་ངེས་པ་བྱིན་པ་ནི། དཔལ་ལྡན་རྒྱལ་པོ་ཞེས་བོས་ནས། ཉི་མ་འགའ་ཞིག་དག་གིས་ཏེ་ལོ་གཅིག་གི་ཉིན་ཞག་སུམ་བརྒྱ་དྲུག་ཅུ་དག་གི་རིང་ལ་རྩ་རྒྱུད་ལ་འགྲེལ་བཤད་བྱས་ནས་གཞན་ལ་སྟོན་པ་དང་། དུས་ཀྱི་འཁོར་ལོའི་གཞལ་ཡས་ཁང་བཞེངས་པ་ལ་སོགས་པའི་བྱ་བ་དག་ནི་རྫོགས་པར་བྱས་ནས། ཤམ་བྷ་ལ་ཞེས་པར་རབ་ཏུ་གྲགས་པའི་ཡུལ་གྱི་དབུས་ན་ཕོ་བྲང་ཀ་ལཱ་པ་ཞེས་བྱ་བ་ཡོད་པའི་གྲོང་དེ་ཡི་མཐར་ཕྱོགས་བཞི་དག་ནི་གངས་ཀྱི་རི་ཡིས་མུ་ཁྱུད་ལྟ་བུར་བསྐོར་ཞིང་། ཕོ་བྲང་དེ་ནས་རི་ཡི་རྩ་བ་ལ་ཐུག་གི་བར་དུ་མདའ་ཡིས་བསྒྱུར་པ་བརྒྱ་ཡི་དཔག་ཚད་དེ་དཔག་ཚད་ལྔ་བརྒྱ་རྣམས་ཀྱི་ཚད་དུ་གྱུར་པ་ཡི་གནས་དེར་ནི། རང་གི་སྲས་པོ་ས་ཡི་སྙིང་པོའི་སྤྲུལ་པ་ལྷ་ཡི་དབང་པོ་ཉིད་རབ་མཆོག་མི་ཡི་བདག་པོར་བཞག་སྟེ་རྩ་རྒྱུད་སྟོན་པ་པོར་བསྐོས་ནས། ཟླ་བ་བཟང་པོ་ཁྱོད་ནི་དང་པོ་སྤྲུལ་པ་གང་ནས་འོང་བ་རང་གི་གནས་སུ་འགྲོ་བར་གྱིས་ཤིག་ཅེས་གསུངས་ཏེ། རང་གི་གནས་ནི་སྤྲུལ་གཞི་ཕྱག་ན་རྡོ་རྗེ་གང་དུ་བཞུགས་པ་སྟེ། ཁ་ཅིག་ལོངས་སྐུའི་གནས་དང་ཁ་ཅིག་གི་ལྕང་ལོ་ཅན་ལ་འཆད་དོ། །དེ་ལྟར་ངེས་པ་བྱིན་ནས་རིགས་ལྡན་འབྱུང་ཚུལ་ལུང་བསྟན་པ་ནི། དཔལ་ལྡན་ཤཱཀྱའི་རིགས་ཤམ་བྷ་ལའི་རྒྱལ་པོ་ཉི་མའི་འོད་ཀྱི་བརྒྱུད་ལ་རབ་ཏུ་གསལ་བར་མི་ཡི་བདག་པོ་ཟླ་བ་བཟང་པོ་ནས་ལྷའི་དབང་ལྡན་གྱི་བར་ཆོས་རྒྱལ་བདུན་འབྱུང་སྟེ། བརྒྱད་པ་དཔལ་ལྡན་གྲགས་པ་དག་དང་བཅས་པ་ཡང་ལོ་བརྒྱའི་བར་དུ་རྩ་བའི་རྒྱུད་སྟོན་པ་པོར་འགྱུར་ཞིང་། གྲགས་པ་འདི་ནི་དཔལ་ལྡན་འཇམ་པའི་རྡོ་རྗེ་དངོས་ཡིན་ཏེ་རྣམ་པའི་ཚུལ་ལ་ཤམ་བྷ་ལའི་རྒྱལ་པོར་སྣང་བ་སྤྲུལ་པའི་སྐུ་ཞེས་བྱའོ། །འདི་ལ་ལྷ་ཡི་མཆོག་རྣམས་དག་གིས་ཞབས་ཀྱི་པདྨོ་ལ་གུས་པས་བཏུད་པ་འདིས་ཆོས་བསྟན་ནས་ལོ་བརྒྱ་
རྫོགས་པ་ན་ཉི་མའི་ཤིང་རྟ་སོགས་ཚངས་པའི་དྲང་སྲོང་རྣམས་ལ་ངེས་པ་བྱིན་ཅིང་གསང་བ་སྔགས་ཀྱི་ཐེག་པ་མཆོག་རྡོ་རྗེའི་རིགས་ཀྱིས་དབང་བསྐུར་བ་སྦྱིན་པའི་རིགས་ལྡན་ཞེས་བྱ་བའི་མཚན་འཆང་བར་འགྱུར་ཏེ། ཅིའི་ཕྱིར་ན་རིགས་དང་རིགས་མ་ཡིན་པར་དབྱེ་བའི་བརྟུལ་ཞུགས་ཐ་དད་པ་ལ་གནས་པའི་བྲམ་ཟེ་སོགས་རིགས་བཞི་པོ་རྣམས་ལ། གསང་བ་སྔགས་ཀྱི་རྡོ་རྗེའི་དབང་བསྐུར་བ་བྱིན་ནས་མཐའ་དག་ཚངས་པའམ་ཐུབ་པའི་རིགས་རྣམས་དག་ནི་རྡོ་རྗེའི་རིགས་གཅིག་དག་ཏུ་བྱེད་པར་འགྱུར་བ་དེས་ན་རིགས་ལྡན་ཞེས་བརྗོད་ཅིང་དེ་ཕན་ཆད་ཤམ་བྷ་ལའི་རྒྱལ་པོ་བརྒྱུད་པ་རྣམས་ལའང་དྲག་པོའི་བར་དུ་རིགས་ལྡན་ཞེས་མཚན་ཆགས་སོ། །དེ་ལྟར་ཡང་དག་པའི་ཐེག་པ་སྟེ། འབྲས་བུ་གསང་སྔགས་རྡོ་རྗེའི་ཐེག་པར་མངོན་པར་འཛེགས་ཤིང་ས་བཅུའི་དབང་ཕྱུག་དམ་པར་གྱུར་པ། ལྷ་མིན་ཀླ་ཀློའི་རིགས་ལ་འཇིགས་པ་སྟེར་བར་མཛད་པ་དཔལ་ལྡན་གྲགས་པ་ཕྱག་ན་མདུང་ཐུང་ཅན་དེས། སེམས་ཅན་རྣམས་ཀྱི་ཐར་པའི་སླད་དུ་སྟེ་ཐར་པ་མཆོག་ཕྱག་རྒྱ་ཆེན་པོའི་དངོས་གྲུབ་ཀྱི་སླད་དུ་ས་ཡི་གཞི་འདི་དག་ལ་དུས་ཀྱི་འཁོར་ལོ་བསྡུས་པའི་རྒྱུད་ཡི་གེ་ཉེར་གཅིག་པ་རབ་བྱེད་ལྡན་གྱི་ཚིགས་བཅད་སྟོང་དང་སུམ་ཅུ་ལ་མེ་ཏོག་ཕྲེང་འཛིན་གྱི་སྡེབ་སྦྱོར་གྱིས་བཅིངས་པ་ཉིད་རབ་ཏུ་གསལ་བར་བྱེད་པར་འགྱུར་རོ། །རིགས་ལྡན་གྲགས་པ་ཉིད་ཐོག་མར་བྱས་ཏེ། རིགས་ལྡན་དེ་ཡི་ནང་ངམ་དབུས་སུ་གདན་ནི་ཉི་ཤུ་རྩ་ལྔ་རིམ་པར་ཡོངས་སུ་བགྲང་བ་དག་གི་དུས་ཀྱི་མཐར་རྩོད་པའི་དུས་དེར། གདན་རབས་ཉེར་ལྔ་པ་རིགས་ལྡན་གྱི་རིགས་མི་ཡི་རྒྱུད་ལ་འཁྲུངས་ཀྱང་མི་རྣམས་སུ་མ་ཟད་ལྷ་ཡི་ཚོགས་ཀྱི་ཡང་དབང་པོ་ཉིད་དུ་གྱུར་པ་དེ་ལ་ལྷ་ཡི་མཆོག་ཚངས་དབང་ལ་སོགས་པ་དག་གིས་ཀྱང་ཞབས་ཀྱི་པདྨོ་ལ་མངོན་པར་བཏུད་པ་འཇམ་དཔལ་སྤྲུལ་པ་དྲག་པོའི་རིགས་ལྡན་འཁོར་ལོ་ཅན་འབྱུང་བར་འགྱུར་ཏེ་དེ་ནི་ཀླ་ཀློ་རྣམས་འཇོམས་པར་བྱེད་པ་རྣམ་པ་དྲག་པོའི་
ཚུལ་དུ་བསྟན་ཀྱང་ཐུགས་ཆོས་ཉིད་ཞི་བའི་ངང་ལས་མ་གཡོས་པས་གང་ཟག་དམ་པ་རྣམས་ལ་འཇམ་དཔལ་དང་སྤྱན་རས་གཟིགས་སོགས་ཞི་བའི་གཟུགས་སུ་སྟོན་ཏེ་ཆོས་བསྟན་ནས་འགྱུར་མེད་མཆོག་གི་བདེ་བ་སྟེར་བ་པོ་ཞེས་པ་ཡིན་ཞིང་། དེ་བཞིན་དུ་ལོག་པའི་ལམ་དུ་ཞུགས་ཤིང་སེམས་ཅན་ལ་གནོད་པའི་ཆོས་ལུགས་འཛིན་པ་ཀླ་ཀློའི་རིགས་ལ་དམིགས་པ་མེད་པའི་སྙིང་རྗེ་ཆེན་པོའི་དབང་གིས་དེ་དག་གི་ལས་ངན་པའི་ལམ་རྒྱུན་བཅད་པའི་དོན་དུ་ཐབས་ལ་མཁས་པས་སྲོག་མཐར་བྱེད་པ་གཤིན་རྗེའི་གཤེད་ཉིད་དུ་སྣང་ངོ་། །དེ་ཉིད་ཀྱི་སྐུའི་རྣམ་པའང་སྤྲུལ་པའི་རྡོ་ཡི་རྟ་ལ་བཅིབས་ཤིང་འཁོར་ལོ་ཅན་གྱི་ཕྱག་ན་མདུང་ཐུང་བསྣམས་ནས་མཐའ་དག་དགྲ་ཡི་ཚོགས་ལ་སྣུན་པར་བྱེད་པའི་སྐུ་བལྟ་བར་མི་བཟོད་པ་ཉི་མའི་གཟི་བརྗིད་ཅན་ནོ། །དུས་ནམ་གྱི་ཚེ་རིགས་ལྡན་དྲག་པོ་དང་ཀླ་ཀློ་འཁྲུག་པ་འབྱུང་ཞེ་ན། རིགས་ལྡན་འཇམ་དཔལ་གྲགས་པའི་རིགས་བརྒྱུད་ཀྱི་ནང་ནས་སམ་དབུས་སུ་ལག་པས་བསྒྱུར་བའི་དུས་ཞེས་བཞི་སྟེ་བརྒྱད་ཀྱི་གྲངས་ཀྱི་རིགས་ལྡན་དང་པོའི་བུ་དང་ཚ་བོ་པད་དཀར་ནས་ཤིན་ཏུ་བཟང་པོའི་བར་དག་ནི་འདས་པར་གྱུར་པ་དེ་ཡི་དུས་སུ་ངེས་པར་མ་ཁའི་ཡུལ་དུ་སྦྲང་རྩིའི་བློ་གྲོས་ཀྱིས་ཀླ་ཀློ༷འི་ཆོས་ནི་རབ་ཏུ་འཇུག་པ་དག་ཏུ་འགྱུར་ཞིང་། དེ་ནས་བཟུང་སྟེ་ཇི་སྙེད་ཀླ་ཀློའི་དབང་པོ་གདུག་པ་ཅན་རིམ་པར་བྱུང་བ་ཇི་ཙམ་པ་དེ་སྙེད་དུ་ལྷ་ཡི་མཆོག་གིས་བཏུད་པ་ཡི་རིགས་ལྡན་དུ་མ་ཡང་འབྱུང་ཞིང་། རིགས་ལྡན་རྣམས་ཀྱི་ཐ་མར་དྲག་པོའི་སྔགས་དང་ལྡན་པའི་རིགས་ལྡན་དྲག་པོ་ཡང་འབྱུང་སྟེ། དྲག་པོ་འཁོར་ལོ་ཅན་དེ་ཡི་དུས་སུ་རིགས་ལྡན་དང་ཀླ་ཀློའི་དཔུང་གཉིས་པོ་དག་ཀྱང་འཛམ་གླིང་འདིའི་ས་ཡི་སྟེང་གི་གནས་སུ་འཁྲུག་པ་དྲག་པོ་འབྱུང་བར་འགྱུར་རོ། །ཉེར་གཅིག་པ་ཀླ་ཀློའི་ཆོས་བཅོམ་ནས་སངས་རྒྱས་ཀྱི་ཆོས་རབ་ཏུ་འཇོག་པའི་ངོ་བོ་ཉིད་ཀྱི་གནས་པ་ནི། གཡུལ་དུ་ཀླ་ཀློ་དག་ལ་སོགས། ཚིགས་བཅད་
བརྒྱ་དྲུག་ཅུ་པ་ནས་བརྒྱ་རེ་གཉིས་པའི་བར་གྱིས་བསྟན་ཏེ། དེ་ལ་རིགས་ལྡན་དྲག་པོའི་དམག་གི་དཔུང་ཇི་ལྟ་བུས་ཀླ་ཀློ་རྣམས་གཞོམ་པར་མཛད་ཅེ་ན། གཡུལ་དུ་ཀླ་ཀློ༷་དག་ལ་བསྣུན་པར་བྱེད་པ་མཐའ་དག་ས་ཡི་སྟེང་དུ་དྲག་པོ་འཁོར་ལོ་ཅན་རང་གི་དཔུང་ནི་ཤིང་རྟ་དང་རྟ་དང་གླང་པོ་ཆེ་དང་རྐང་ཐང་གི་དཔུང་ཡན་ལག་བཞི་དང་ལྡན་པ། ཀླ་ཀློ་དང་འཁྲུག་པའི་དུས་འདིར་ཀཻ་ལ་ཤ་ཡི་རི་བོ་ལ་གནས་པ་ལྷ་ཡིས་བཀོད་པའི་གྲོང་ཀ་ལཱ་པ་ནས་འཁོར་ལོས་སྒྱུར་བ་རིགས་ལྡན་དྲག་པོ་དཔུང་དང་བཅས་པ་ཕྱིར་འབྱུང་བར་འགྱུར་ཏེ། དེ་ཡི་ཚེ་ན་དྲག་པོ་དབང་ཕྱུག་ཆེན་པོ་དང་། ཕུང་པོ་ཞེས་པ་འདི་སྐནྡ་ཞེས་པའི་སྐད་དོད་ལས་འགྱུར་ཅུང་མ་ལེགས་པ་འདྲ་སྟེ། སྐེམ་བྱེད་དམ་གཞོན་ནུ་གདོང་དྲུག་གི་མིང་ཡིན་པས། དཔེ་ལ་ལར་གདོང་དྲུག་དང་ལ་ལར་གཞོན་ནུ་ཞེས་ཡོད་ལ་ག་རོད་ལོ་ཙཱས་སྨིན་དྲུག་ཅེས་དང་གྱི་ཇོས་ཚངས་པ་ཞེས་འདོན་ཏོ། །ཚོགས་ཀྱི་དབང་པོ་ཞེས་པ་ཚོགས་ཀྱི་བདག་པོའོ། །འཕྲོག་བྱེད་ཁྱབ་འཇུག་སྟེ་དེ་ལ་སོགས་པ་ལྷ་ཆེན་པོ་བཅུ་གཉིས་པོ་འཁོར་དང་བཅས་པ་དག་ཀྱང་རིགས་ལྡན་དྲག་པོ་ལ་ནི་དཔུང་གི་གྲོགས་དག་སྦྱིན་པར་འགྱུར་ཏེ། རིགས་ལྡན་གྱིས་རྟ་མཆོག་གི་ཏིང་ངེ་འཛིན་གྱིས་སྤྲུལ་པའི་རྡོ་ཡི་རྟ་དང་། གླང་པོའི་དབང་པོ་དང་། གསེར་གྱི་ཤིང་རྟ་པ་དང་། མི་ཡི་བདག་པོ་ཕྱག་ན་མཚོན་ཆ་དང་ལྡན་པ་དཔའ་བོ་རྣམས་ཀྱང་རིགས་ལྡན་གྱི་དཔུང་དུ་འབྱུང་ངོ་། །དཔུང་གི་གྲངས་ཇི་ཙམ་ཞིག་ཡིན་པ་གསུངས་པ། རྡོ་ཡི་རྟ་ནི་ང་གི་ཤུགས་ཅན་ཡོན་ཏན་གྱིས་བསྒྱུར་ཡོན་ཏན་བྱེ་བ་ཞེས་པ། གསུམ་ནི་གསུམ་གྱིས་བསྒྱུར་བ་དགུ་སྟེ། བྱེ་བ་ཕྲག་དགུའི་གྲངས་དང་ལྡན་པ། དེ་ཡང་ཁ་དོག་མི་འདྲ་བ་སྣ་ཚོགས་པ་ཅན་ནོ། །ཆང་གིས་དྲེགས་པའི་གླང་ཆེན་རིག་བྱེད་ཅེས་པའི་འབུམ་ཕྲག་གྲངས་དང་ཞེས་པ་འབུམ་ཕྲག་བཞིའོ། །དེ་བཞིན་དུ་ཤིང་རྟ་འབུམ་ཕྲག་འབྱུང་བ་
དང་ཞེས་པ་ལྔ་འབུམ་མོ། །ཨཱ་ཀྵཽ་ཧི་ཎཱི་དྲུག་དང་ཅེས་པ་འདི་དཔུང་བཞིའི་དམག་གི་གྲངས་ཞིག་གི་མིང་སྟེ། ཙནྡྲ་པའི་མདོར་ཨ་ཀྵ་ལས་ཨུ་ཧི་ནཱི་ལའོ། །ཞེས་པ་ལྟར། ཨཀྵ་འཁོར་ལོའམ་དབང་པོ་ལ་འཇུག །ཨུ་ཧིའི་སྒྲ་ཚོགས་པའམ་རྟོགས་པ་འཇུག །ལྡན་རྐྱེན་དཱིཔ྄་སྦྱར་བས་ཎཱིའོ། །མཚམས་སྦྱར་བས་ཨ་ཀྵཽ་ཧི་ཎཱི་ཞེས་གྲུབ་པ་སྟེ། དེ་ཡང་འཆི་མེད་མཛོད་རྩ་འགྲེལ་ལས་གསུངས་པ་གླང་པོ་གཅིག་ཤིང་རྟ་གཅིག་རྟ་གསུམ་རྐང་ཐང་ལྔ་དང་བཅས་པའི་མིང་ལ། བཏྟིཿ སྟེ་འགྲོ་ཤེས་ཞེས་བྱའོ། །འགྲོ་ཤེས་གསུམ་ལ་སེ་ན་མུ་ཁཾ་སྟེ། དམག་སྒོ། དེ་བཞིན་དུ་དམག་སྒོ་གསུམ་ལ་གུལྨཿ འགེལ་བྱེད། དེ་གསུམ་ལ་ག་ཎཿ ཚོགས་པ། དེ་གསུམ་ལ་བཱ་ཧི་ནཱི། རྟ་ཅན། དེ་གསུམ་ལ་པྲྀ་ཏ་ནཱ། སྐྱོང་བྱེད། དེ་གསུམ་ལ་ཙ་མཱུཿ ཟད་བྱེད། ཟད་བྱེད་གསུམ་ལ། ཨ་ནཱི་ཀི་ནཱི། ཚོགས་ཅན། ཚོགས་ཅན་བཅུ་ནི་ཨ་ཀྵཽ་ཧི་ཎཱི། སྟེ་འཁོར་ལོའི་ཚོགས་ཅན་ནམ་དབང་པོའི་རྟོགས་པ་ཅན་ཞེས་བྱའོ། །དེ་ལྟར་འཁོར་ལོའི་ཚོགས་ཅན་གྱི་དཔུང་ཚོགས་ལ། གླང་པོ་ཆེ་ལ་ཞོན་པའི་དམག་ཁྲི་གཉིས་དང་ཆིག་སྟོང་བརྒྱད་བརྒྱ་བདུན་ཅུ་ཡོད་ལ། རྟ་པ་ཡང་དེ་དང་གྲངས་འདྲའོ། །ཤིང་རྟ་པ་དེའི་སུམ་འགྱུར་གྱིས་མང་བས་དྲུག་ཁྲི་ལྔ་སྟོང་དྲུག་བརྒྱ་དང་བཅུ་ཡོད། རྐང་ཐང་ཆིག་འབུམ་དགུ་སྟོང་སུམ་བརྒྱ་ལྔ་བཅུ་ཡོད་དོ། །པདྨ་ཅན་ནས་རྐང་ཐང་ས་ཡ་ཕྲག་དྲུག་གསུངས། འདིར་ནི་ཨ་ཀྵཽ་ཧི་ཎཱི་དྲུག་ཅེས་གསུངས་པས་གོང་གི་གྲངས་དེ་དག་དྲུག་གིས་བསྒྱུར་བའི་གྲངས་ཡིན་ནོ། །ཨཀྵཽ་ཧི་ཎཱི་ཞེས་པ་དཔུང་གི་གྲངས་ཞིག་གི་མིང་ཡིན་པར་མ་རྟོགས་ནས། ག་རོད་ལོ་ཙཱས་མི་འཁྲུག་དྲུག་ཅེས་དང་། གྱི་ཇོས་མིག་གིས་མཐོང་ཚད་དྲུག་དང་ཅེས་བསྒྱུར་བ་དོན་མ་ཡིན་ལ། ཁ་ཅིག་དཔའ་བོ་མི་འཁྲུག་ཡིན་ནམ་ཡང་ཟེར། འདི་སྐབས་སྦ་འགྲེལ་རྣམས་སུ། རྟ་དང་གླང་པོ་ཤིང་རྟའི་གྲངས་གོང་དུ་སྨོས་ཟིན་པས་
འདིར་ཨ་ཀྵཽ་ཧི་ཎཱིའི་གྲངས་རྐང་ཐང་གི་གྲངས་འབའ་ཞིག་ལ་འཆད་པ་དང་། དེ་ཡང་འཆི་མེད་མཛོད་ལྟར་རྟ་པ་གསུམ་ལ་རྐང་ཐང་ལྔ་ཐོབ་པས་དེ་ཡི་འགྲོས་ཀྱིས་རྟ་པ་བྱེ་བ་དགུ་རྒྱུད་ལས་གསུངས་པས་རྐང་ཐང་དུང་ཕྱུར་གཅིག་དང་བྱེ་བ་ལྔ་ལ། བཏྟིཿ གཅིག་བྱས་ནས་སྔ་མ་ལྟར་ཨ་ཀྵཽ་ཧི་ཎཱིའི་བར་དུ་བརྩིས་པས་རྐང་ཐང་ཁྲག་ཁྲིག་གསུམ་དང་ཐེར་འབུམ་ཆེན་པོ་གཉིས་ཐེར་འབུམ་བརྒྱད་བྱེ་བ་ལྔ། ཨ་ཀྵཽ་ཧཱི་ཎཱི་གཅིག་གི་རྐང་ཐང་གི་གྲངས་དང་། དེ་དྲུག་གིས་བསྒྱུར་བས། ཁྲག་ཁྲིག་ཆེན་པོ་གཅིག །ཁྲག་ཁྲིག་དགུ། ཐེར་འབུམ་ཆེན་པོ་དྲུག །ཐེར་འབུམ་བརྒྱད། དུང་ཕྱུར་གསུམ་ནི་རྐང་ཐང་གི་གྲངས་སུ་བཤད་ཀྱང་། འདི་ཐད་འགྲེལ་ཆེན་ལས་གོ་སླར་མཛད་དེ་བཤད་པ་མེད་ལ། ཚད་ལྡན་གྱི་ཁུངས་གཞན་འདི་ཡིན་སྟོན་རྒྱུ་མེད་ན། འདི་འདྲའི་རྟོག་བཟོ་ལ་འཐད་པ་བཙལ་དུ་མེད་པས་དགོས་པ་ཅི་ཡང་མི་སྣང་སྟེ། གཞུང་དུ་རྡོ་ཡི་རྟ་དང་གླང་པོ་ཤིང་རྟའི་གྲངས་བསྟན་པ་དེ་དག་ཨཀྵཽ་ཧི་ཎཱིའི་གྲངས་སུ་མ་གཏོགས་པའི་རྒྱལ་རིགས་ཆེན་པོ་རྣམས་ཀྱིས་བཞོན་པ་དམིགས་བསལ་ཡིན་ལ། ཨཀྵཽ་ཧི་ཎཱི་ནི་འཆི་མེད་མཛོད་རྩ་འགྲེལ་ལས་གྲགས་པ་ལྟར་དཔུང་བཞི་ཀའི་གྲངས་སུ་བྱས་ནས་དེ་དྲུག་འགྱུར་ཞིག་ཡོད་པར་བྱས་ན་མི་རུང་བ་ཅི་ཞིག་ཡོད་དེ་དོན་མེད་ཀྱི་རྐང་ཐང་གྲངས་མང་བརྩི་བ་མི་དགོས་པ་འདྲ་ཞིང་། སྔར་ནས་འཇིག་རྟེན་ན་ཡོངས་སུ་གྲགས་པའི་དཔུང་གི་གྲངས་བརྩི་ཚུལ་འཆི་མེད་མཛོད་རྩ་འགྲེལ་དུ་བཤད་པ་ལ་ཁུངས་བྱས་ནས་དེར་མ་བཤད་པའི་རྩི་ཚུལ་ལོག་པོ་ཞིག་རང་བློས་བསྣན་པ་ལ་རྒྱུ་མཚན་ཅི་ཡང་མི་སྣང་སྟེ། འགྲེལ་ཆེན་ལྟ་བུ་ཚད་ཐུབ་ཀྱི་གཞུང་གི་ཁུངས་སྟོན་རྒྱུ་ཡོད་ན་ནི་དེ་ལྟར་ཡིན་པ་ལ་སུ་ཡང་རྩོད་པ་མེད་དོ། །ཤམ་བྷ་ལའི་ཡུལ་གོ་དྲུག་གི་མི་ཡི་དབང་པོ་ཅོད་པན་བཅིངས་པའི་རིགས་ནི་རོ་དང་དགུ་བཅུ་སྟེ་ཞེས་དགུ་བཅུ་གོ་དྲུག་གོ། དེ་ལྟར་ན་རིགས་
ལྡན་དྲག་པོ་འཁོར་ལོ་ཅན་དང་། ཁྱབ་འཇུག་དང་། འཕྲོག་བྱེད་ནི་དབང་ཕྱུག་ཆེན་པོ་སྟེ། འཕྲོག་བྱེད་ཀྱི་སྐད་དོད་ཧ་རིའི་སྒྲ་སེང་གེ་དང་ཁྱབ་འཇུག་དྲག་པོ་སོགས་དོན་མང་པོ་ལ་འཇུག་གོ། དེ་ལྟར་རིགས་ལྡན་གྱི་དཔུང་དང་ལྷ་ཆེན་པོ་བཅུ་གཉིས་ཀྱི་དཔུང་དག་དང་བཅས་པ་ཡི་སྡེ་འདི་དག་གིས་ཀླ་ཀློ༷་རྣམས་བརླག་པར་བྱེད་པར་འགྱུར་རོ། །ཇི་ལྟར་འཐབ་པའི་ཚུལ་ཀྱང་རིགས་ལྡན་གྱི་འཁོར་མཆོག་ཏུ་རྣོ་བའམ་དབལ་ཚ་བའི་དཔའ་བོ་ཞེས་ཕ་རོལ་གཞོམ་པའི་སྙིང་སྟོབས་དང་ལྡན་ཞིང་གང་གཏད་པར་ཐོག་མེད་དུ་འབིགས་པའི་འཕོང་སྐྱེན་པའི་དཔའ་བོ་རྣམས་ཀྱིས་ཀླ་ཀློའི་དཔུང་གི་ཚོགས་ལ་མཚོན་གྱིས་བསྣུན་པར་བྱ་བར་འགྱུར་ཞིང་། དེ་བཞིན་དུ་རིགས་ལྡན་གྱི་དཔུང་གི་གླང་པོའི་དབང་པོས་ཀླ་ཀློའི་གླང་པོ་ལ་དང་། རྡོ་ཡི་རྟ་ཡིས་ཕ་རོལ་གྱི་རྟ་རྣམས་ལ་བསྣུན་པ་སྟེ། དཔའ་བོ་མང་ཉུང་གྲངས་མཚུངས་པ་མཉམ་པ་དང་། གྲངས་མི་མཚུངས་པ་མི་མཉམ་པ་ཕན་ཚུན་འགྱེད་པའི་གཡུལ་དུ་རིགས་ལྡན་འཁོར་གྱི་ས་སྐྱོང་མི་བདག་རྣམས་ཀྱིས་ཀླ་ཀློའི་དབང་པོའི་འཁོར་གྱི་ས་སྐྱོང་རྣམས་ལ་བསྣུནཔར་བྱེད་དོ། །ཀླ་ཀློའི་དམག་དཔོན་རྟ་ཡི་བཞོན་པ་ལ་གནས་པ་ཟླ་བ་ཆེན་པོའི་བུ་ནི་རིགས་ལྡན་གྱི་འཁོར་ཧ་ནུ་མཱན་དཱ་ཞེས་བྱ་བས་རྣོན་པོའི་མཚོན་གྱིས་བསྣུན་པར་འགྱུར་ཞིང་། རིགས་ལྡན་གྱི་གྲོགས་སུ་གྱུར་པ་དྲག་པོ་དབང་ཕྱུག་ཆེན་པོ་ལ་སོགས་པ་ལྷ་ཆེན་པོ་རྣམས་ཀྱིས་ཀླ་ཀློའི་དབང་པོ་ཡི་མགོན་བྱེད་པ་ནག་ཕྱོགས་ལྷ་མིན་བདུད་ཀྱི་རིས་མཐའ་དག་ལ་བསྣུན་པར་བྱེད་དོ། །ལྷ་མིན་ཀླ་ཀློའི་བདག་པོ་བྱས་པའི་བློ་ལ་དྲག་པོའི་རིགས་ལྡན་འཁོར་ལོ་ཅན་ཉིད་ཀྱི་ཕྱག་གི་མཚོན་གྱིས་བསྣུན་པར་མཛད་དོ། །བྱེད་པའི་བློ་འམ་བྱས་པའི་བློ་ཞེས་སུ་ཡང་བསྒྱུར་རོ། །དེ་ལྟར་ཀླ་ཀློའི་དབང་པོ་སྡེ་དང་བཅས་པ་དང་མགོན་བྱེད་པའི་ནག་ཕྱོགས་རྣམས་དང་བཅས་པ་རྩད་ནས་གཞོམ་པར་འགྱུར་རོ། །ཉེར་གཉིས་པ་སེམས་ཅན་མཐའ་དག་ལ་འཇིག་རྟེན་དང་འཇིག་
རྟེན་ལས་འདས་པའི་དངོས་གྲུབ་ཀྱི་ལམ་སྦྱིན་པའི་ངོ་བོ་ཉིད་ཀྱི་གནས་པ་ནི། དཔུང་ནི་ཐམས་ཅད་སོགས་ཚིགས་སུ་བཅད་པ་བརྒྱ་རེ་གསུམ་པ་དང་དེའི་རྗེས་ཀྱི་རྐང་པ་གཉིས་ཀྱིས་བསྟན་ཏེ་དེ་ལྟར་རིགས་ལྡན་དྲག་པོའི་དཔུང་ནི་ཐམས་ཅད་དག་གིས་གཡུལ་དུ་ཀླ་ཀློ༷་ཡི་ཚོགས་མཐའ་དག་བཅོམ་ནས། ཁྱབ་འཇུག་དང་དྲག་པོ་ལ་སོགས་པ་འཁོར་དང་བཅས་པའི་རིགས་ལྡན་ཉིད་ནི། ཀཻ༷་ལ་ཤ་ཡི་རི་བོ་ལ་ལྷ་ཡིས་བཀོད་པའི་གྲོང་ཁྱེར་ཀ་ལཱ་པ་གང་དུ་འཁོར་ལོ་ཅན་དག་སྟེ་འཁོར་ལོས་སྒྱུར་བ་རང་ཉིད་གནས་པར་བྱེད་པའི་གཞི་དེ་ཉིད་དུ་འགྲོ་བར་འགྱུར་རོ། །པདྨ་ཅན་ནས་དུས་འཁོར་གྱི་སྤྱན་སྔར་འགྲོ་ཞེས་བཤད་དོ། །དེ་ལྟར་ཀླ་ཀློའི་རྒྱུན་བཅད་པ་དེ་ཡི་དུས་སུ་འཛིན་མ་ས་གཞི་དག་ལ་མཐའ་དག་སྐྱེ་བོའི་རིགས་ནི། སེམས་དགེ་ཞིང་ཚོགས་གཉིས་ཀྱི་ལས་ལ་སྤྱོད་པར་འགྱུར་བ་དང་། ཆོས་དང་འདོད་པ་ནོར་རྣམས་དང་ཐར་པ་སྟེ་ཕུན་སུམ་ཚོགས་པ་སྡེ་བཞིའི་འབྲས་བུ་ཡོངས་སུ་རྫོགས་པ་དང་། འབྲུ་རྣམས་ཀྱང་འབྲོག་དགོན་པ་དག་ཏུ་ཡང་ལེགས་པར་སྐྱེ་བ་དང་ནི་ལྗོན་ཤིང་རྣམས་འབྲས་བུ་བརྟན་པོའི་ཁུར་གྱི་ལྗིད་ཆེན་པོས་ཡལ་ག་རྣམས་དུད་པ་དེ་ལྟ་བུ་དག་འབྱུང་བར་འགྱུར་ཞིང་མི་རྣམས་དགྱེས་དགུར་ལོངས་སྤྱོད་པར་འགྱུར་རོ། །ཀླ་ཀློའི་ཚོགས་ནི་འཁོར་གྱི་སྐྱེ་བོ་དང་བཅས་པའི་ཆོས་མ་ཡིན་གྱི་རྒྱུན་རབ་ཏུ་བཅད་པ་དེ་ནས་མི་ཡི་ལོ་ནི་བརྒྱ་ཕྱེད་དེ་ལྔ་བཅུ་ན་རིགས་ལྡན་འཁོར་ལོ་ཅན་ནི་མཁའ་སྤྱོ ད་ཀྱི་རིག་འཛིན་དང་ཕྱག་རྒྱ་ཆེན་པོའི་དངོས་གྲུབ་གྲུབ་པར་འགྱུར་ཏེ། མཁའ་ལ་སྤྱོད་པའི་གནས་སུ་འབྲེལ་པ་ཐོགས་པའི་སེམས་ཅན་ཐམས་ཅད་འདྲེན་པར་འགྱུར་རོ། །གནས་གང་དུ་གྲུབ་པ་བརྙེས་ཞེ་ན་ལྷ་ཡིས་བཀོད་པའི་ཕོ་བྲང་མངོན་པར་མཐོ་བ་ཀ་ལཱ་པ་ཡོད་པའི་ཀཻ་ལ་ཤ་ཡི་རི་བོའི་རྒྱབ་ཏུའོ། །ཞེས་སོ། །འདིར་འགྱུར་གཞན་ན་ཀླ་ཀློའི་ཚོགས་ནི་རབ་ཏུ་བཅད་ནས་འཁོར་གྱི་སྐྱེ་བོ་དང་བཅས་ལོ་ནི་བརྒྱ་ཕྱེད་ན་
ཞེས་ཡོང་བ་ལེགས་ཏེ་རིགས་ལྡན་འཁོར་དང་བཅས་པ་མཁའ་ལ་སྤྱོད་པའི་གྲུབ་པ་བརྙེས་ཏེ་མཁའ་སྤྱོད་དུ་གཤེགས་པའི་དོན་དུ་འགྱུར་རོ། །འདི་ལ་རིགས་ལྡན་གྲུབ་པའི་གནས་སུ་གཤེགས་པར་འགྱུར་ཏེ་མྱ་ངན་ལས་འདས་པའི་ཚུལ་སྟོན་པར་བཤད་དགོས་ཀྱི། རིགས་ལྡན་ནི་འཇམ་དཔལ་དབྱངས་ཡིན་པས་བསྐལ་པ་དཔག་ཏུ་མེད་པའི་སྔོན་རོལ་ནས་མཆོག་གི་དངོས་གྲུབ་གྲུབ་ཟིན་པའི་ཕྱིར་ད་གཟོད་གྲུབ་པ་བརྙེས་པའི་འཆད་ཚུལ་དེ་ལེགས་པར་མི་སེམས་སོ་ཞེས་འགྲེལ་བཤད་འགར་གསུངས་ཀྱང་།དོན་ལ་དེ་ལྟར་ཡིན་མོད་ཀྱི་རྣམ་པའི་ཚུལ་དུ་གདུལ་བྱའི་ངོར་གསར་དུ་གྲུབ་པ་ལྟར་སྟོན་པའང་མི་འགལ་ཏེ། བདག་ཅག་གི་སྟོན་པ་ཤཱཀྱ་ཐུབ་པ་ཉིད་ཀྱང་དེ་བཞིན་གཤེགས་པ་དབང་པོའི་ཏོག་ཏུ་སངས་རྒྱས་སུ་ཟིན་ཀྱང་། ཞིང་འདིར་རྩོད་ལྡན་ཚེ་ལོ་བརྒྱ་པའི་དུས་སུ་རྡོ་རྗེ་གདན་གྱི་དྲུང་དུ་སངས་རྒྱས་པར་སྟོང་པ་ལྟར་དབང་ཐོབ་པའི་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་མཛད་པ་བསམ་གྱིས་མི་ཁྱབ་པས་དེ་ལྟར་བཤད་པའང་མི་ལེགས་པ་མེད་ཀྱི་ལེགས་པར་སེམས་སོ། །འགྲེལ་པ་པདྨ་ཅན་ནས་འཁོར་དང་ལྷན་ཅིག་ཏུ་བཅོམ་ལྡན་འདས་དུས་ཀྱི་འཁོར་ལོའི་སྤྱན་སྔར་གཤེགས་ཞེས་བྱ་བའོ། །ཞེས་བཤད་པ་ཡང་ལུས་མ་སྤངས་པར་གཤེགས་པར་བཤད་པའི་དོན་ནོ། །རྒྱུད་འདིར་རིགས་ལྡན་འཁོར་ལོས་སྒྱུར་བ་ཆེན་པོས་ས་དུམ་བུ་བཅུ་གཉིས་སུ་དབང་སྒྱུར་བར་གསུངས་པ་ལ། ཁ་ཅིག་གིས་རྩོད་པའི་དུས་སུ་འཁོར་ལོས་སྒྱུར་བ་མི་འབྱུང་བར་གསུངས་པའི་ལུང་དང་འགལ་བར་འཛིན་པ་ནི་གྱི་ན་སྟེ། འདི་ཉིད་ཆོས་ཀྱི་འཁོར་ལོས་སྒྱུར་བ་ཆེན་པོ་ཡིན་པས་འཁོར་སྒྱུར་དུ་གསུངས་ཀྱི། རྫོགས་ལྡན་དུས་ཀྱི་འཁོར་ལོ་རིན་པོ་ཆེ་སོགས་རྒྱལ་སྲིད་བདུན་དང་ལྡན་པའི་སྟོབས་ཀྱིས་འཇིག་རྟེན་དུ་འབྱུང་བའི་འཁོར་སྒྱུར་དེ་མ་ཡིན་ལ། རྩོད་ལྡན་གྱི་དུས་མི་བཟད་པ་ལ་ཡང་ཆོས་ཀྱི་འཁོར་ལོས་བསྒྱུར་བ་འདི་ལྟ་བུ་རེས་འགའ་འབྱུང་
བ་ཡང་དགག་ཏུ་མེད་དེ། སངས་རྒྱས་བྱང་སེམས་རྣམས་ཀྱི་སྨོན་ལམ་དང་ཡེ་ཤེས་ཀྱི་མཐུ་བསམ་གྱིས་མི་ཁྱབ་པའི་ཕྱིར། དཔེར་ན་ལས་ཁྱད་པར་ཅན་ནམ། སྔགས་གྲུབ་པའི་མཐུས་རྩོད་དུས་ན་ཡང་སྟོབས་ཀྱིས་འཁོར་ལོས་སྒྱུར་བ་རེས་འགའ་འབྱུང་སྲིད་པ་བཞིན་ནོ། །ཉེར་གསུམ་པ་འཇམ་དཔལ་དང་འཇིག་རྟེན་དབང་ཕྱུག་མདུན་དང་རྒྱབ་ཏུ་སྟོན་པ་པོའི་ངོ་བོ་ཉིད་ཀྱི་གནས་པ་ནི་ལྷ་དང་མི་ཡི་བླ་མའི་སྲས་ནི་སོགས་ཚིགས་བཅད་སྔ་མའི་རྐང་པ་གཉིས་ནས་ཚིགས་བཅད་བརྒྱ་རེ་དྲུག་པའི་བར་གྱིས་བསྟན་ཏེ། དྲག་པོ་འཁོར་ལོ་ཅན་ལྷ་དང་མི་ཡི་བླ་མའི་སྲས་ནི་འཇམ་དཔལ་གྱི་སྤྲུལ་པ་ཚངས་པ་དང་། འཇིག་རྟེན་དབང་ཕྱུག་གི་སྤྲུལ་པ་ལྷ་ཡི་དབང་པོ་ཟུང་གི་རྒྱལ་པོ་མཛད་དེ། སངས་རྒྱས་ཀྱི་ཆོས་ལ་སྟོན་པ་པོར་འགྱུར་བ་དག་གོ། དེ་ཡང་ཚངས་པ་དེ་ནི་ཆུ་བོ་ཤཱི་ཏའི་རྒྱབ་ཏུ་སྟེ་བྱང་ཕྱོགས་སུ་ཀཻ་ལ་ཤའི་དུམ་བུ་གཅིག་ལ་སྟེ་ཤམ་བྷ་ལའི་ཡུལ་དུ་མི་ཡི་བདག་པོར་འགྱུར་ཏེ། དེའི་མདུན་ནམ་སྔོན་ནམ་ཆུ་བོ་ཤཱི་ཏའི་ལྷོ་ཕྱོགས་ཀྱི་དུམ་བུ་ཐམས་ཅད་ཀྱི་ས་ཀུན་ལ་ནི་སྲས་ལྷ་ཡི་དབང་པོ་རྒྱལ་པོར་འགྱུར་ཞིང་དེ་རྣམ་པ་གཉིས་ཀྱིས་དུས་ཀྱི་འཁོར་ལོ་ལ་སོགས་པའི་ཆོས་རྒྱ་ཆེར་སྟོན་པར་འགྱུར་རོ། །བསྟན་པའི་དུས་བཞི་སྔ་མའི་རྩོད་ལྡན་གྱི་མཐར་རིགས་ལྡན་དྲག་པོས་གསར་དུ་གསོས་པའི་རྫོགས་ལྡན་གྱི་མགོ་འཇུག་པའི་མཚམས་སུ་ཀླ་ཀློའི་ཆོས་རྣམས་མཐའ་དག་སྲིད་པ་གསུམ་གྱི་བླ་མ་དྲག་པོ་འཁོར་ལོ་ཅན་དག་གིས་རྒྱུན་བཅད་པར་བྱས་ཏེ། བཅད་ཟིན་ནས་ལོ་ནི་བརྒྱད་བརྒྱ་རྣམས་སུ་སྲས་ཚངས་པ་ཕོ་བྲང་ཀ་ལཱ་པའི་སེང་གེའི་ཁྲིར་ཆོས་སྟོན་པ་པོར་བཞག་པ་ཉིད་མཛད་ནས། འཁོར་ལོ་ཅན་རང་ཉིད་དཔུང་བཅས་བདེ་བ་ཆེན་པོ་མཆོག་ཏུ་མི་འགྱུར་བདེ་བའི་གནས་སུ་འགྲོ་བར་འགྱུར་རོ། །སླར་ཡར་ཚངས་པ་དེ་ཉིད་ཀྱི་སྲས་བརྒྱུད་ཀྱི་དབུས་སུའམ། ནང་ནས་མི་ཡི་བདག་པོ་སྔ་མ་སྔ་མ་དག་གི་སྲས་རྣམས་རིམ་པར་བྱུང་བ་འོད་སྲུང་
ལ་སོགས་པ་དག་གི་རིགས་ཀྱི་དབྱེ་བ་དག་ཏུ་འགྱུར་ཏེ་ཞེས་ཤམ་བྷ་ལའི་ཁྲི་ལ་བཞུགས་པ་རིགས་ལྡན་གྱི་གདན་རབས་བཤད་ཀྱི་ལྷ་དབང་གི་རིགས་བརྒྱུད་ནི་སྐབས་འདིར་མ་གསུངས་སོ་ཞེས་སྔ་མ་རྣམས་བཞེད་དོ། །མི་ཡི་བདག་པོ་ཞེས་པ་འབོད་པའི་ཚིག་ཏུ་བཤད་པའང་ཡོད་ལ། ཚངས་པའི་སྲས་བརྒྱུད་རྣམས་སྔར་གྱི་པད་དཀར་ལ་སོགས་པའི་རིགས་ཀྱི་དབྱེ་བ་དང་སྦྱར་ནས་འཆད་པའང་ཡོད་དོ། །སྲས་བརྒྱུད་དེ་རྣམས་ཀྱི་དབུས་སུའམ་ནང་དུ་ལྷ་མིན་ཀླ་ཀློའི་ཚོགས་ཀྱིའང་དབང་པོ་མི་བདག་ཉིད་དུ་གྱུར་པ་ཐུབ་པ་དྲང་སྲོང་སྤྲུལ་པའི་སྐུ་རྣམས་དང་ནི་སྤྲུལ་པའི་སྐུ་མ་ཡིན་པ་ཕལ་པ་གཞན་རྣམས་དག་ཀྱང་འབྱུང་བར་འགྱུར་བ་ཞེས་པ་འདི་ཚངས་པའི་སྲས་བརྒྱུད་འབའ་ཞིག་ལ་འཆད་མོད་སྲས་གཉིས་ཀ་ལ་སྦྱར་ནའང་རུང་བར་མངོན་ནོ། །དེ་ཉིད་དབུས་སུ་ཞེས་པ་ལོ་བརྒྱད་བརྒྱའི་རིང་ལ་ཞེས་འཆད་པ་དང་། ལོ་བརྒྱད་བརྒྱའི་རྗེས་སུ་ལྷ་མིན་ཀླ་ཀློའི་མི་བདག་དང་། ཕྱི་རོལ་གྱི་ཐུབ་པ་དྲང་སྲོང་དང་། ཀླ་ཀློ་ཕལ་པ་སླར་ཡང་འབྱུང་བའི་དོན་དུ་འཆད་པ་སོགས་རང་བློས་བཙལ་བའི་འཆད་ཚུལ་མི་འདྲ་བ་དུ་མ་སྔ་འགྲེལ་རྣམས་སུ་སྣང་ངོ་། །གལ་ཏེ་རིགས་ལྡན་དྲག་པོ་འཁོར་ལོ་ཅན་དེས་འཛམ་གླིང་ཆུང་ངུ་འདི་འབའ་ཤིག་གི་ཀླ་ཀློ་འཇོམས་པ་ཙམ་ཡིན་ནམ་ཞེ་ན། དེ་མ་ཡིན་ཏེ་དུམ་བུ་བཅུ་གཉིས་མཐའ་དག་ཏུ་ཆོས་མིན་ཀླ་ཀློའི་ཕྱོགས་འཇོམས་པར་བསྟན་པ་ནི། ཀླ་ཀློ༷་རྣམས་ནི་གཞོམ་པའི་སླད་དུ་ལྷ་ཡི་བདག་པོ་དང་མིའི་དབང་པོ་འཁོར་ལོ་ཅན་རྣམ་པ་བཅུ་གཉིས་དག་དང་ལྡན་པར་འགྲོ་སྟེ། ས་ཡི་དུམ་བུ་དུམ་བུ་དག་ཏུ་ཀླ་ཀློའི་ཆོས་དར་བ་དེ་ནི་བཅོམ་ནས་འཁོར་ལོ་ཅན་ཡང་མཆོག་ཏུ་བདེ་བའི་གནས་སུ་འགྲོ་བར་འགྱུར་རོ། །སྐབས་གསུམ་པ་ལྷ་དང་མི་ཡི་བླ་མའི་སྲས་ནི་ཚངས་པ་དང་ལྷ་ཡི་དབང་པོ་རྒྱབ་དང་མདུན་དུ་རྒྱལ་པོར་བཞག་སྟེ། འཁོར་ལོ་ཅན་འདས་པའི་རྗེས་སུ་རྒྱབ་ཏུ་བཞུགས་པ་ཚངས་པ་ལ་སོགས་ཞེས་པའི་ལྷ་དབང་
དང་བཅས་པའི་སྲས་རིགས་བརྒྱུད་རྣམས་རྣམ་པ་སྣ་ཚོགས་ས་ཡི་སྟེང་དུ་རིགས་མཆོག་དམན་གྱི་དབྱེ་བ་དུ་མར་འགྱུར་རོ་ཞེས་སོ། །ཚིག་འདི་སྔར་གསུངས་ཟིན་དང་དོན་གཅིག་པས་ན་འདི་ཐད་ལ་བརྟེན་ནས་དུམ་བུ་སོ་སོར་འཁོར་ལོ་ཅན་རེ་འབྱུང་བར་འདོད་པའི་ལུགས་རྣམས་བྱུང་བར་གདའོ། །ལྷ་ཡི་བདག་པོ་དབང་པོ་བཅུ་གཉིས་ཞེས་པ་ལ་མཚན་དབང་པོ་ཞེས་བྱ་བ་ཞེས་འབྲུ་གནོན་པ་སོགས་བོད་འགྲེལ་རྣམས་སུ་བཤད་ཚུལ་འགའ་བྱས་པ་སྣང་ངོ་། །ཉེར་བཞི་པ་འཁོར་ལོས་སྒྱུར་བ་ཆེན་པོ་ལ་སོགས་པ་རིགས་ལྡན་གྱི་མཐར་ཐུག་པའི་མི་རྣམས་ཀྱི་མཆོག་གི་ཚེའི་ངོ་བོ་ཉིད་ཀྱི་གནས་པ་ནི། ཚངས་པ་སོགས་ལ་ཞེས་སོགས་ཚིགས་བཅད་བརྒྱ་རེ་བདུན་པ་དང་། དུས་བཞི་འཇུག་ཚད་བསྟན་པའི་ཚིགས་བཅད་རྗེས་མ་བརྒྱ་རེ་བརྒྱད་པ་དང་བཅས་པ་གཉིས་ཀྱིས་བསྟན་ཏེ། སྐབས་འདིར་བོད་ཀྱི་འགྲེལ་བྱེད་རྣམས་ཀྱིས་བཤད་ཚུལ་མི་འདྲ་བ་འདི་ལྟར་སྣང་སྟེ། ཁ་ཅིག་སྲས་ཚངས་པའི་དུས་ཀྱི་མི་རྣམས་ཀྱི་ཚེ་ལོ་སྟོང་བརྒྱད་བརྒྱ། དེ་ཡི་ཕྱེད་དགུ་བརྒྱ་ནི་འོད་སྲུང་གིའོ། །དེའི་ཕྱེད་བཞི་བརྒྱ་ལྔ་བཅུ་མི་ཡི་སེང་གེའི་དུས་ཀྱི་ཚེ་ཚད། དེ་ནས་མི་ཐུང་དང་། སོགས་སྒྲས་ར་མ་གཉིས་དང་ནག་པ་རྣམས་ཀྱི་དུས་ཀྱི་ཚད་ཀྱང་རིམ་བཞིན་སྔ་མ་སྔ་མ་ལས་དྲུག་ཅུས་དམན་པ་ཡིན་ནོ་ཞེས་འཆད། དེ་ལ་མཁས་པ་གཞན་དག་གིས་བརྒལ་པ། རིགས་ལྡན་འཁོར་ལོ་ཅན་གྱིས་ཀླ་ཀློ་བཅོམ་ནས་སངས་རྒྱས་ཀྱི་ཆོས་བཞག་པའི་དུས་བཞི་རིལ་པོའི་ཚད་ལ་ལོ་སྟོང་བརྒྱད་བརྒྱ་ལས་མེད་ལ། དེ་ཚངས་པའི་དུས་སུ་རྫོགས་ཟིན་པས་འོད་སྲུང་སོགས་ཀྱི་དུས་ན་བསྟན་པ་མེད་པར་ཐལ་བས་གནོད་པ་དང་། ཚངས་པའི་དུས་ཀྱི་མིའི་ཚེ་ཚད་འདོད་ཚུལ་འདིས་ཚངས་པའི་སྐུ་ཚེའི་ཚད་ཀྱང་ལོ་བརྒྱད་བརྒྱར་འདོད་པ་ཡང་བསལ་བར་ཐལ་བས་མི་འཐད་དོ། །ཞེས་དང་། ཚངས་པའི་རྗེས་ཀྱི་འོད་སྲུང་དང་མིའི་སེང་གེ་
དང་མི་ཐུང་ལ་སོགས་པའི་དུས་ཀྱི་མིའི་ཚེ་ཚད་ཀྱི་དབྱེ་བ་ཡང་། འཁོར་ལོ་ཅན་གྱི་བསྟན་པའི་དུས་བཞིའི་གནས་སྐབས་ལ་འཇོག་དགོས་པ་ནི་དུས་བཞི་སོ་སོའི་དུས་སུ་མི་ཐུང་སོགས་ལ་ཞེས་པའི་ཚིག་གིས་བསྙོན་མེད་དུ་གྲུབ་བོ། །ཞེས་གསུངས། ཡང་ཁ་ཅིག་ཚངས་པ་སོགས་ཀྱི་ཚིག་འདི་དག་རིགས་ལྡན་འཇམ་དཔལ་གྲགས་པ་དང་། པད་དཀར་སོགས་ལ་སྦྱར་ནས་གྲགས་པ་ནས་དྲག་པོའི་བར་གྱི་མི་རྣམས་ལོ་བརྒྱ་ཕྲག་བཅོ་བརྒྱད་དང་ལྡན་པར་འཆད་པ་སོགས་ཡོད་ལ། དེ་ལ་གཞན་དག་གིས་ཧ་ཅང་སྐྱོགས་བཤད་རྣ་བར་མི་འོང་བ་དང་དེ་ལྟར་བཤད་པའི་སྒོ་ནས་རྒྱལ་པོ་སོ་སོའི་སྐུ་ཚེའི་ཚད་རྣམ་པར་འཇོག་པ་མི་འཐད་པར་བསྒྲུབ་པར་མཛད་ནས་དེ་དག་གི་རང་ལུགས་འདི་ལྟར་འདོད་དེ། ཚངས་པ་དང་ལ་སོགས་པ་ར་མ་གཉིས་དང་ནག་པོ་ཡར་བཅད་ལ། འཁོར་ལོ་ཅན་གྱི་དུས་བཞིའི་ཚད་མི་ལོ་བརྒྱ་ཕྲག་བཅོ་བརྒྱད་ཀྱི་གྲངས་དང་ལྡན་པ་ལས། སྟོང་བརྒྱད་བརྒྱའི་གྲངས་འདི་དག་གི་ཚེ་ལོ་དེའི་ཕྱེད་དགུ་བརྒྱ་ནི་ཚངས་པས་ཐོག་མར་ཆོས་སྟོན་པ་ནས་འོད་སྲུངས་ཀྱི་ཆོས་སྟོན་པ་རྫོགས་ཀྱི་བར་གྱི་མི་རྣམས་ཀྱི་ཚེ་ཚད་དོ། །དེ་ནས་ཉ་རུས་སྦལ་ཕག་པའི་མིང་ཅན་གྱི་བར་ལ་རིམ་གྱིས་ཕྲི་བས་ས་ཡི་སྟེང་དུ་དཔལ་ལྡན་མི་ཡི་སེང་གེའི་དུས་ཀྱི་མི་རྣམས་ཀྱི་ཚེ་ཚད་ནི་དགུ་བརྒྱའི་ཕྱེད་དུ་དྲུག་ཅུས་དམན་པའི་ཚད་དོ། །དེ་དག་གི་དུས་ལ་རིམ་གྱིས་ཕྲི་བ་དེ་བཞིན་ཉིད་དུ་དུས་བཞི་སོ་སོའི་དུས་སུ་མི་ཐུང་དང་ལ་སོགས་པ་ཡ་མད་ཨགྣི་དང་། རཱ་མ་དང་ནག་པའི་བར་ལ་རིམ་གྱིས་ཕྲི་བར་འགྱུར་ཏེ་འཕྲོག་བྱེད་ཁྱབ་འཇུག་གི་འཇུག་པ་སོ་སོའི་མིང་ཅན་གྱི་རྒྱལ་པོ་རིགས་ལྡན་གྱི་རིགས་སུ་བྱུང་བ་དེ་དག་གི་མཇུག་ནག་པས་ཆོས་བསྟན་པ་རྫོགས་ཤིང་། འཁོར་ལོ་ཅན་གྱི་དུས་བཞི་རྫོགས་པའི་མཐར་ནི་བརྒྱ་ཕྲག་གཅིག་གི་ལོ་གྲངས་ཀྱི་སྐྱེ་བོའི་ཚེ་རུ་འགྱུར་རོ། །ཞེས་སོགས་སུ་བཤད་དོ། །སྤྱིར་སྲས་འོད་སྲུང་སོགས་ཀྱི་ལོའི་འཇོག་ལུགས་སོགས་དེ་ལྟར་ཡིན་དུ་ཆུག་མོད་ཀྱི། འཁོར་ལོས་
སྒྱུར་བ་ཆེན་པོ་སོགས་རིགས་ལྡན་གྱི་མཐར་ཐུག་པའི་མི་རྣམས་ཀྱི་མཆོག་གི་ཚེའི་ངོ་བོ་ཉིད་ཀྱི་གནས་པ་འཆད་པའི་སྐབས་ཡིན་པས་འདིས་རིགས་ལྡན་རྣམས་ཀྱི་སྐུ་ཚེའི་ཚད་མི་སྟོན་པ་ཞིག་ན་གནས་པ་དེ་ཉིད་འདིར་སྦྱར་བ་དོན་མེད་པ་དང་རིགས་ལྡན་མཐར་ནི་ཞེས་པའི་ཚིག་ཀྱང་སོར་བཞག་ཏུ་མི་འགྲིག་པར་སྐྱོགས་བཤད་དགོས་པར་འགྱུར་རོ། །དེས་ན་ཚངས་པ་སོགས་ལ་ཞེས་པའི་དོན་སྔ་མ་དག་གིས་བཤད་པ་དེ་ཉིད་དང་ཕྱོགས་མཐུན་པར་བཀོད་ན། ཚངས་པ་ཞེས་པ་འཁོར་ལོ་ཅན་གྱི་སྲས་ཚངས་པ་མ་ཡིན་གྱི་རྒྱལ་པོ་ཚངས་པའི་དུས་སུ་བྱུང་བ་རིགས་ལྡན་གྱི་ཐོག་མ་འཇམ་དཔལ་གྲགས་པ་ལ་གོ་བར་བྱའོ། །སོགས་ལ་ཞེས་པ་དྲག་པོ་འཁོར་ལོ་ཅན་གྱི་བར་གྱི་རིགས་ལྡན་རྣམས་ཀྱི་སྐུ་ཚེའི་ཚད་དེང་དུས་ཀྱི་མི་རྣམས་ཀྱི་མཆོག་གི་ཚེའི་ཚད་ནི་འདི་ལྟ་སྟེ། གླིང་གཅིག་གི་བསྟན་པ་ཕྱི་དར་གྱི་ཚད་མི་རྣམས་ལོ་ནི་བརྒྱ་ཕྲག་བཅོ་བརྒྱད་དང་ལྡན་པ་འདི་དག་ཡིན་ལ། འདི་དག་སྐབས་ཀྱི་བཤད་བྱའི་ཚེ་ལོ་རྣམས་བརྩི་བའི་གཞིར་བྱས་པ་ཙམ་སྟེ་བསྟན་པའི་དུས་བཞི་དང་སྦྱར་དགོས་པ་མ་ཡིན་ནོ། །མི་རྣམས་དག་གི་ཚེ་ཞེས་པ། མི་ཐམས་ཅད་ཀྱི་ཚེ་བཤད་པ་མ་ཡིན་ཏེ་འཁོར་ལོས་སྒྱུར་བ་ཆེན་པོ་དྲག་པོའི་རིགས་ལྡན་ནས། རིགས་ལྡན་དང་པོའི་བར་གྱི་མི་རྣམས་ཀྱི་མཆོག་གི་ཚེའི་ངོ་བོ་ཉིད་འཆད་པའི་སྐབས་ཡིན་པར་གཟུང་དགོས་སོ། །མཆོག་གི་ཚེ་ཞེས་བྱ་བ་ནི་འཛམ་གླིང་ཆུང་ངུ་འདིར་སྟོན་པ་ཤཱཀྱ་ཐུབ་པ་བྱོན་དུས་གླིང་འདིའི་མི་རྣམས་མཆོག་ལོ་བརྒྱ་པར་གྲགས་ཀྱང་། རིགས་ལྡན་ཐ་མ་དྲག་པོ་འཁོར་ལོ་ཅན་ཉིད་ཀྱང་ལོ་བརྒྱ་ལས་ལྷག་པར་བཞུགས་པ་ཡིན་ན་གཞན་གོང་མ་རྣམས་མཆོག་གི་ལོ་ལས་ལྷག་པ་ནི་སྨོས་མ་དགོས་སོ། །དེ་ལ་རྒྱལ་པོ་ཚངས་པའི་དུས་སུ་རིགས་ལྡན་གྲགས་པ། འོད་སྲུངས་ཀྱི་དུས་སུ་པད་དཀར། ཨནྡྷ་ཀའི་དུས་སུ་ས་སྐྱོང་། སྟོབས་ལྡན་གྱི་དུས་སུ་སེང་གེ། འདྲོ་བས་སྐྱོབ་གསེར་ཅན་གྱི་དུས་སུ་དབང་ཕྱུག་ཆེན་པོ་
བྱུང་བར་བཤད་ཀྱང་ཕྱི་མ་འདི་བརྟག་དགོས་པར་སྣང་། དེས་ན་དེ་ཡི་ཕྱེད་ནི་འོད་སྲུང་གིའོ་ཞེས་པ་དུ་མ་ཅན་བརྒྱད་ཀྱི་ཡ་གྱལ་འོད་སྲུང་དེ་མ་ཡིན་ཏེ་འདིར་རིགས་ལྡན་རྣམས་ཀྱི་སྐུ་ཚེ་འཆད་པའི་སྐབས་སུ་དེ་འཆད་དོན་མེད་མོད། ཚངས་པ་དང་འོད་སྲུང་ཞེས་པའི་མིང་འདིའི་དོན་མ་གོ་བར་སྲས་ཚངས་པའི་སོགས་ཀྱི་དུས་ཀྱི་མི་རྣམས་ཀྱི་ཚེ་ཚད་དང་། ཡང་དུ་མ་ཅན་བརྒྱད་ཀྱི་དུས་ཀྱི་བསྟན་པའི་དུས་བཞི་ཁོ་ནར་འཆད་པ་དག་བྱུང་ངོ་། །དེས་ན་སྟོང་བརྒྱད་བརྒྱ་དེ་ཡི་ཕྱེད་དགུ་བརྒྱ་ནི་རྒྱལ་པོ་འོད་སྲུང་གི་དུས་སུ་བྱུང་བ་པད་དཀར་སོགས་ཀྱི་སྐུ་ཚེའི་ཚད་ཡིན་ནོ་ཞེས་གསུངས་པ་སྟེ་གོང་དུ་སྐྱེ་གནས་བསྟན་པའི་སྐབས་ལྟར་ཉ་དང་རུས་སྦལ་གྱི་སྐྱེ་གནས་ཅན་རིགས་ལྡན་དང་པོ་བདུན་གྱི་སྐུ་ཚེའི་ཚད་དོ། །དེ་ནས་དགུ་བརྒྱ་ལ་དྲུག་ཅུ་རེས་རིམ་པར་ཕྲི་བ་ཕག་པའི་སྐྱེ་གནས་ཅན་བདུན་གྱི་ཚེ་ཡིན་པ་ནི་བར་གྱི་ཆ་འདི་དག་ཚིག་གོང་འོག་གི་ཤུགས་ལས་བསྟན་པའོ། །སྔ་མ་དག་རིགས་ལྡན་བཅུ་བཞིའི་བར་སྐུ་ཚེ་འདྲ་བར་བྱས་པའང་སྣང་ངོ་། །རབ་མཆོག་ས་ཡི་སྟེང་དུ་དཔལ་ལྡན་མི་ཡི་སེང་གེའི་སྐྱེ་གནས་ཅན་མཐའ་ཡས་ནས་མ་འགགས་པའི་བར་བདུན་ནི་སྔ་མ་དགུ་བརྒྱ་པོའི་ཕྱེད་བཞི་བརྒྱ་ལྔ་བཅུ་ལ་དྲུག་ཅུས་དམན་པ་སུམ་བརྒྱ་དགུ་བཅུ་ཡི་སྐུ་ཚེའི་ཚད་ཅན་ནོ། །དེ་བཞིན་ཉིད་དུ་དུས་བཞི་སོ་སོའི་དུས་སུ་ཞེས་པ་བསྟན་པའི་དུས་བཞི་མ་ཡིན་གྱི་ཁྱབ་འཇུག་གི་སྐྱེ་གནས་ལྷག་མ་མི་ཐུང་སོགས་བཞིའི་དུས་ལ་ནི་མི་ལོ་དྲུག་ཅུ་རེ་སྔ་མ་སུམ་བརྒྱ་དགུ་བཅུ་ལ་རིམ་པར་ཕྲི་བ་ཚེ་ཡི་ཚད་དེ། སུམ་བརྒྱ་སུམ་ཅུ་རིགས་ལྡན་མི་ཡི་སེང་གེ་མི་ཐུང་གི་དུས་ཀྱིའོ། །ཉིས་བརྒྱ་བདུན་ཅུ་ནི་རིགས་ལྡན་དབང་ཕྱུག་ཆེན་པོ་ར་མ་དགྲ་སྟ་འཛིན་པའི་དུས་ཀྱིའོ། །ཉིས་བརྒྱ་དང་བཅུ་ནི་རིགས་ལྡན་མཐའ་ཡས་རྣམ་རྒྱལ་རཱ་མ་ཕྱི་མའི་དུས་ཀྱིའོ། །བརྒྱ་དང་ལྔ་བཅུ་ཐམ་པ་ནི་ནག་པོའི་སྐྱེ་གནས་ཅན་རིགས་ལྡན་དྲག་པོ་འཁོར་ལོ་ཅན་གྱི་སྐུ་ཚེའི་ཚད་དོ། །དེ་ལྟར་འཕྲོག་བྱེད་ཁྱབ་འཇུག་
ཉིད་ཀྱི་འཇུག་པ་བརྒྱད་དང་སྦྱར་བའི་རིགས་ལྡན་རྣམས་ཀྱི་མཐར་ནི་ཇི་སྲིད་བརྒྱ་ཕྲག་གཅིག་གི་ལོ་ཡི་གྲངས་ཀྱི་སྐྱེ་བོའི་ཚེ་རུ་རབ་ཏུ་འགྱུར་ཏེ། ལྔ་བཅུ་ལྷག་པ་ཡོད་ཀྱང་བརྒྱར་མ་ལོངས་པས་བརྒྱ་ཕྲག་གཅིག་གི་སྟེང་དུ་བབ་པ་ཡིན་ལ་དྲག་པོ་ཡན་ཆད་ཀྱི་རིགས་ལྡན་རྣམས་ཀྱི་སྐུ་ཚེའི་ཚད་ནི་ཉིས་བརྒྱ་ལས་ཉུང་བ་མེད་ཅིང་དགུ་བརྒྱའི་མཐར་ཐུག་པའི་བར་གྱི་སྐུ་ཚེ་ཅན་ནོ། །དེ་ལྟར་བཤད་པ་ལ་འགའ་ཞིག་གིས་འདི་ནི་ཤིན་ཏུ་རྣ་བར་མི་འོངས་པའི་གཏམ་སྟེ་སྙིགས་མ་ཚེ་ལོ་བརྒྱ་པའི་དུས་སུ་གླིང་འདིའི་མི་རྣམས་ཚེ་མཚུངས་པ་ལ་རིགས་ལྡན་རྣམས་ལ་དེ་ལྟར་སྐུ་ཚེ་ཡར་ལྷག་མངའ་བར་ག་ལ་འགྱུར་ཞེས་བློ་ཆུང་ངུའི་བསམ་པས་ལུགས་འདི་ལ་ཁྲེལ་དགོད་བྱ་མི་རུང་སྟེ། སངས་རྒྱས་ཀྱིས་ལུང་བསྟན་པའི་རིགས་ལྡན་འདི་རྣམས་ནི། རིགས་གསུམ་མགོན་པོ་སོགས་བྱང་ཆུབ་སེམས་དཔའ་ཆེན་པོ་རྣམས་དང་ཁྲོ་བོའི་དབང་པོ་རྣམས་ཤམ་བྷ་ལའི་གྲོང་བྱེ་བ་ཕྲག་གོ་དྲུག་གི་རྒྱལ་པོའི་ཚུལ་དུ་བསྟན་ནས། སེམས་ཅན་མཐའ་དག་ལ་དེ་བཞིན་གཤེགས་པའི་ཆོས་རབ་ཏུ་སྟོན་པ། ཀླ་ཀློ་ལ་སོགས་པའི་ཆོས་ངན་པ་འཇོམས་པར་མཛད་པ་ཡིན་ཅིང་ཐམས་ཅད་སྐྱེས་བུ་ཆེན་པོའི་མཚན་བཟང་སོ་གཉིས་དང་དཔེ་བྱད་བརྒྱད་ཅུ་དང་ལྡན་པ། མངོན་པར་ཤེས་པ་ལྔ་ལ་སོགས་པ་དབང་ཕྱུག་གི་ཡོན་ཏན་ཡོངས་སུ་རྫོགས་པ་ཡིན་པར་གསུངས་པས་གང་ཟག་མཆོག་འདི་རྣམས་དང་དེང་དུས་ཀྱི་མི་རྣམས་ཀྱི་ཚེ་སོགས་དང་སྐལ་བ་མཉམ་མི་དགོས་ཤིང་། གཞན་ཡང་མགོན་པོ་ཀླུ་སྒྲུབ་དགུང་ལོ་དྲུག་བརྒྱར་བཞུགས་པར་བཤད་པ་སོགས་དེ་འདྲ་བ་དུ་མ་ཚད་ལྡན་གྱི་གཞུང་ལས་བཤད་པ་དང་། རྒྱུད་འདིར་ཡང་སྲས་ཚངས་པས་ལོ་བརྒྱད་བརྒྱར་ཆོས་སྟོན་པ་དང་། རིགས་ལྡན་རྒྱ་མཚོ་རྣམ་རྒྱལ་གྱིས་ཁྲི་བཞུགས་ཀྱི་ལོ་བརྒྱ་དང་གྱ་གཉིས་སུ་ཆོས་སྟོན་པ་དང་། རྒྱལ་དཀས་ཁྲི་བཞུགས་ཀྱི་ལོ་ཉིས་བརྒྱ་ཉེར་གཅིག་ཏུ་ཆོས་བསྟན་པ་རྣམས་གངས་ཅན་པའི་
ཕྱོགས་འདིར་ཕལ་མོ་ཆེས་ཁས་ལེན་པ་ལྟར། རིགས་ལྡན་འདི་གཉིས་མ་གཏོགས་གཞན་ཆོས་རྒྱལ་དང་རིགས་ལྡན་རྣམས་ཁྲི་ལ་བཞུགས་ནས་ལོ་བརྒྱ་རེ་བརྒྱ་རེར་ཆོས་སྟོན་པ་ཡིན་པར་ཕལ་མོ་ཆེས་འདོད་བཞིན་དུ། དེང་སང་གི་མི་ཕལ་པའི་ཚེ་ཚད་ཙམ་ལས་རིགས་ལྡན་རྣམས་ཀྱང་མི་བཞུགས་སྙམ་པ་ལོག་རྟོག་སྟེ། ཁྲི་ལ་བཞུགས་ནས་ལོ་བརྒྱར་ཆོས་སྟོན་པ་པོ་རྣམས་ཀྱང་རང་རང་གི་ཡབ་རྣམས་སྐུ་ཚེ་རིང་པོར་གཞེས་པ་དེ་དག་གཞོན་པའི་དུས་སུ་སྲས་རྣམས་འཁྲུངས་ནས་ཁྲི་ལ་མ་བཞུགས་ཀྱི་བར་དུ་ལོ་མང་དུ་སོང་བ་ཡིན་ཅིང་། ཁྲི་ལ་བཞུགས་ནས་ཆོས་སྟོན་པའི་ལོ་བརྒྱའི་རྗེས་སུའང་ཕལ་ཆེར་ལོ་ཇི་ལྟར་རིགས་པར་གཞེས་པ་ག་ལ་འགལ་ཏེ། སྲས་འཁྲུངས་པ་དང་མཉམ་དུ་ཡབ་འདའ་ཞིང་སྲས་ལོ་གཅིག་གི་དུས་སུ་ཁྲི་ལ་བཞུགས་ནས་ལོ་བརྒྱར་ཆོས་བསྟན་ནས་དེ་མ་ཐག་ཏུ་འདའ་བ་ལོངས་མེད་པོ་དེ་འདྲ་འཇིག་རྟེན་ཚུལ་ལུགས་དང་བསྟུན་ན་འོང་བ་གནས་མེད་ལ། དབང་ཐོབ་པ་རྣམས་མཛད་པ་ཇི་ལྟར་བཞེད་པ་བཞིན་སྟོན་པ་ལ་མངའ་བརྙེས་མོད་ཀྱི་རིགས་ལྡན་རྣམས་འཇིག་རྟེན་འདུལ་བའི་སླད་དུ་འཇིག་རྟེན་དང་མཐུན་པར་མངལ་ནས་འཁྲུངས་པའི་ཚུལ་སྟོན་པ་འབའ་ཞིག་ཡིན་གྱི་བརྒྱ་བྱིན་འཕོ་འཇུག་གི་རྫུས་སྐྱེས་ལྟ་བུར་སྟོན་པ་ནི་མ་ཡིན་ནོ། །དེས་ན་དབང་ཐོབ་པའི་བདག་ཉིད་ཆེན་པོ་འདི་དག་གདུལ་བྱའི་དུས་ལ་ལྟོས་ནས་ཇི་ཙམ་གཞེས་པ་ལ་དབང་འབྱོར་པས་སྙིགས་དུས་ཀྱི་མི་ཕལ་པའི་ཚེ་ཚད་ལས་རིང་དུ་མི་གཞེས་སྙམ་པ་མཁས་པ་དག་གི་རྣ་བར་ཆེས་མི་འོང་བའི་གཏམ་དུ་ཟད་དོ། །མི་ཕལ་པ་དག་གིས་ཀྱང་ལམ་རྡོ་རྗེའི་རྣལ་འབྱོར་ལ་གནད་དུ་བསྣུན་པས་རོ་རྐྱང་གི་རྒྱུ་བ་དྷཱུ་ཏིར་འགགས་ནས་འཆི་མེད་གྲུབ་པ་ལ་ཚེགས་མེད་ན་རིགས་ལྡན་རྒྱལ་པོ་རྡོ་རྗེའི་རྣལ་འབྱོར་སྟོན་པ་པོ་རྣམས་ཀྱིས་སྨོས་ཅི་དགོས་སོ། །འོ་ན་ལྷ་མིན་དགྲ་བོ་ཚེ་ལོ་བརྒྱ་པ་ཕྱག་ན་འཁོར་ལོར་འགྱུར་ཞེས་པ་དང་། འགལ་སྙམ་ན་ཅུང་ཟད་མི་འགལ་ཏེ། དེ་ནི་ལོ་བརྒྱ་ཁོ་ནར་ངེས་པར་བཟུང་བ་མ་
ཡིན་ནོ། །དེ་དུས་ཀྱི་མི་རྣམས་ཀྱི་མཆོག་གི་ལོའི་ཚད་བརྒྱ་ཡི་ཆ་དང་བསྟུན་ནས་རགས་པར་གསུངས་པ་སྟེ་ཚིག་ལ་སྡེབ་སྦྱོར་གྱི་དབང་དུ་དེ་ལྟར་གསུངས་ཀྱང་དོན་ལ་ལྔ་བཅུས་ལྷག་པ་མི་འགལ་ཏེ། དུས་འདིའི་མི་རྣམས་ལ་ཚེ་ལོ་བརྒྱ་པ་ཞེས་བརྗོད་ཀྱང་། དེ་ལས་རིང་བ་དང་ཐུང་བ་སྣ་ཚོགས་འབྱུང་གི་ཐམས་ཅད་བརྒྱ་འབའ་ཞིག་ཏུ་ངེས་མི་དགོས་པ་བཞིན་ནོ། །དེས་ན་མི་ཡི་ལོ་ནི་བརྒྱ་ཕྱེད་ན་རིགས་ལྡན་གྲུབ་པར་འགྱུར་ཏེ་ཞེས་གསུངས་པའང་། ཤམ་བྷ་ལའི་ཁྲི་ལ་བཞུགས་ནས་ཆོས་བསྟན་པ་སོགས་ཀྱི་སྐུ་ཚེའི་ཚད་བརྒྱ་སོང་བའི་ལྷག་མ་ལྔ་བཅུ་པོ་ལ་འཛིན་པར་བྱའོ། །དེ་ལྟར་མ་བྱས་ན་བརྒྱ་ཕྱེད་ལྔ་བཅུ་ལ་ཀླ་ཀློ་རྒྱུན་བཅད་ནས་རིགས་ལྡན་ཀཻ་ལ་ཤ་ཡི་རི་བོའི་རྒྱབ་ཏུ་གྲུབ་པ་བརྙེས་པར་བཤད་ན་འཁོར་ལོ་ཅན་ཁྲིར་བཞུགས་ཀྱི་ལོ་བརྒྱ་མི་ཚང་ཞིང་ཀླ་ཀློའི་གནས་ཚད་སོགས་བསྟན་པའི་རྩིས་དང་ཡང་མི་འགྲིག་པ་སོགས་འབྱུང་ངོ་། །གཞན་དག་འདི་སྙམ་དུ་རིགས་ལྡན་གྲགས་པ་སོགས་ཀྱི་སྐུ་ཚེའི་ཚད་དགུ་བརྒྱ་ཡིན་པར་ངེས་ན། གྲགས་པ་ཉིད་ཟླ་བཟང་གི་དུས་ནས་འཁྲུངས་པ་ཞིག་ན་རང་ཉིད་ཁྲིར་བཞུགས་ཀྱི་ལོ་བརྒྱ་རྫོགས་པའི་རྗེས་སུ་ཡང་ད་དུང་ལོ་བརྒྱར་བཞུགས་དགོས་ལ། ཟླ་བཟང་གི་རྗེས་ཀྱི་རྒྱལ་པོ་རྣམས་གང་རུང་གི་སྐུ་དུས་ནས་འཁྲུངས་པ་ཞིག་ན། བསྡུས་རྒྱུད་བསྟན་པའི་རྗེས་སུ་ཡང་ལོ་བརྒྱ་ཕྲག་འགའ་ཞིག་ཏུ་བཞུགས་དགོས་ན་ཡང་། འགྲེལ་ཆེན་ལས་རྩ་རྒྱུད་བསྟན་པའི་རྗེས་ནས་ལོ་དྲུག་བརྒྱ་ན་རིགས་ལྡན་གྲགས་པ་ཉིད་ཤམ་བྷ་ལར་སྤྲུལ་པའི་སྐུ་འཛིན་པ་དང་། གྲགས་པ་མྱ་ངན་ལས་འདས་པ་དེ་ནས་ལོ་བརྒྱད་བརྒྱ་ན་ཀླ་ཀློའི་བྱེད་རྩིས་འབྱུང་བར་དངོས་སུ་གསུངས་པ་འདི་དང་འགལ་བར་མི་འགྱུར་རམ་ཞེ་ན། ཁྱེད་ཅག་གིས་རིགས་ལྡན་རྣམས་ལོ་བརྒྱ་པ་ཤ་སྟག་ཏུ་འདོད་པའི་འཁྲུལ་གཞིའི་ཚིག་འདིའི་དགོངས་པ་ད་དུང་བརྟག་བྱར་ཡོད་ཀྱི། འདི་སྒྲ་ཇི་བཞིན་དུ་ཁས་ལེན་མི་དགོས་པའི་རྒྱུ་མཚན་བརྗོད་པར་བྱ་
སྟེ། སྤྲུལ་པ་འཛིན་པ་དང་འདས་པ་ཞེས་པའི་ཚིག་འདི་ཕལ་ཆེར་རང་རང་ཁྲི་བཞུགས་ཀྱི་ལོ་ཉིད་ལ་བརྗོད་པར་སྣང་བས་ཁྲིར་བཞུགས་ཀྱི་ལོ་གྲངས་དེ་ཙམ་ཁོ་ན་སྐུ་ཚེའི་ཚད་ཡིན་པར་རིགས་པས་མི་འགྲུབ་པའི་རྒྱུ་མཚན་གོང་དུ་བརྗོད་པ་བཞིན་དང་། གྲགས་པའི་ཁྲི་ལོ་རྫོགས་པ་དེ་ནས་ལོ་བརྒྱད་བརྒྱ་ན་ཀླ་ཀློའི་དུས་ཡིན་པར་རྩོད་པ་མེད་ཀྱང་། གྲགས་པ་མྱ་ངན་ལས་འདས་པ་དེ་ནས་ཞེས་པ་འདི་འགྱུར་གྱི་དབང་གིས་གོ་རིམ་ཅུང་མི་བདེ་བ་སྟེ། འདིར་མ་ཟད་འདི་འདྲའི་གོ་རིམ་མི་བདེ་བ་དུ་མ་ཡོད་པ་དོན་ལ་ལྟོས་ནས་བཤད་དགོས་པ་རང་གཞན་ཀུན་ལ་མངོན་སུམ་ཡིན་ན་འདི་ཙམ་གྱིས་གནོད་པ་སྟོན་མི་ནུས་ཏེ་མྱང་འདས་ཀྱི་སྐད་དོད་ནི་རྦ་ཎའི་སྒྲ་ཡང་སྐུ་ཚེའི་འདུ་བྱེད་གཏོང་པ་ཁོ་ནའི་མིང་མ་ཡིན་པར་བྱ་བ་རྫོགས་པའི་གནས་སྐབས་སོགས་དུ་མར་འཇུག་ཏུ་རུང་བས་བསྡུས་རྒྱུད་བསྡུས་པ་དང་། ཁྲི་ལོ་རྫོགས་པའི་སྐབས་ལའང་གོ་རུང་ལ། གཞན་ཡང་འགྱུར་འདི་དོན་གྱི་གོ་རིམ་བསྡེབས་ན། གྲགས་པའི་ཁྲི་ལོ་བརྒྱ་པོ་རྫོགས་ཤིང་བསྡུས་རྒྱུད་བསྡུས་པའི་ལོ་དེ་ནས་བརྒྱད་བརྒྱ་ན་གྲགས་པ་མྱ་ངན་ལས་འདས་པའི་རྗེས་སུ་ཀླ་ཀློའི་བྱེད་རྩིས་ཟུག་ཅིང་ཀླ་ཀློའི་ལུགས་རྒྱ་ཆེར་དར་བ་ཞེས་ཚིག་གོང་འོག་བརྗེས་ན་ལུགས་འདི་གྲགས་པ་ལོ་དགུ་བརྒྱར་བཞུགས་པའི་སྒྲུབ་བྱེད་དུ་ཡང་འགྱུར་ཏེ་རྒྱ་སྐད་ཀྱི་ཚིག་རྣམས་དོན་འགྱུར་གྱི་གོ་རིམ་བསྡེབས་པའི་འགྱུར་འགོ་དུ་མར་སྣང་བས་ན་འགྱུར་འདི་ཁོ་ནའི་ཚིག་གི་རྗེས་སུ་འབྲངས་དགོས་པའང་མ་ཡིན་ཏེ་དོན་ལ་བརྟེན་ནས་གོ་རིམ་བསྡེབ་ཚུལ་དུ་མར་སྣང་བའི་ཕྱིར་རོ། །སྐབས་འདི་ཉིད་འོད་སྲུང་དང་དུམ་ཅན་རྣམས་ཀྱི་དུས་འབའ་ཞིག་ལ་སྦྱར་བས་ནི། འཁོར་ལོས་སྒྱུར་བ་ཆེན་པོ་ནས་རིགས་ལྡན་གྱི་མཐར་ཐུག་པའི་མི་རྣམས་ཀྱི་ཚེའི་ངོ་བོ་ཉིད་ཀྱི་གནས་པ་ཞེས་པའི་དོན་ལ་རྟོག་དཔྱོད་མ་ཞུགས་པར་ཟད་དོ། །ད་ནི་ཀླ་ཀློའི་ཆོས་འཇུག་པ་དང་སངས་རྒྱས་ཀྱི་ཆོས་འཇུག་པའི་དུས་བཞི་བསྟན་པས་མཇུག་
བསྡུ་བ་ནི། དེ་ལྟར་ས་དུམ་བུ་བཅུ་གཉིས་པོ་ཐམས་ཅད་དུ་ཡང་ཐོག་མར་སངས་རྒྱས་ཀྱི་བསྟན་པའི་དུས་བཞིའི་དབྱེ་བ་བྱུང་བ་དེ་ཡི་ཐ་མ་རྩོད་ལྡན་གྱི་མཇུག་གི་དུས་སུ་ཀླ་ཀློའི་ཚེས་ནི་རབ་ཏུ་འཇུག་པ་སྟེ། ཀླ་ཀློའི་ཆོས་ཞུགས་པའི་དུས་ཀྱི་ཡུན་ལོ་ནི་བརྒྱད་དང་བརྒྱ་ཕྲག་གཅིག་ཏུ་ཞེས་པ་བརྒྱ་དང་བརྒྱད་དུ་སྣང་ཡང་འགྱུར་མི་བདེ་བ་ཡིན་པར་བཤད་ལ། བརྒྱད་དང་གཅིག་གི་བརྒྱར་ནི་ཞེས་འདོན་པ་ལྟར་འབྲི་བགྲང་སྣོན་པ་གཡས་ནས་བརྩམ་ཞེས་པ་བཞིན་དུ་བརྒྱད་དང་གཅིག་མས་ནས་ཡར་བཀོད་པ་བརྒྱས་བསྒྱུར་ན་སྟོང་བརྒྱད་བརྒྱ་འབྱུང་བ་དེ་ཡི་གྲངས་སུ་ངེས་པར་གནས་ཏེ་དེ་རྫོགས་ནས་ཀླ་ཀློའི་ཆོས་ནི་ཉམས་པ་དག་ཏུ་འགྱུར་བའོ། །ཞེས་རྒྱ་མཚོ་རྣམ་རྒྱལ་ཁྲིར་ཕེབས་ཀྱི་ལོ་ནས་རིགས་ལྡན་དྲག་པོ་ཁྲིར་བཞུགས་ཀྱི་ལོ་རྫོགས་པའི་བར་དུ་ཀླ་ཀློའི་ཆོས་གནས་པ་ཡིན་པས་ཚད་དེ་ལྟར་ངེས་སོ། །ཀླ་ཀློའི་ཆོས་རྫོགས་པ་དེ་ནས་ལོ་ནི་སྟོང་ཕྲག་ཉི་ཤུ་ལ་ལག་པ་བརྒྱ་དང་ཞེས་ཉིས་བརྒྱ་དང་བྲལ་བ་སྟོང་དང་བརྒྱད་བརྒྱར་འཁོར་ལོ་ཅན་གྱིས་གསོལ་བའི་བསྟན་པའི་དུས་བཞིར་སངས་རྒྱས་ཀྱི་ཆོས་ནི་རབ་ཏུ་འཇུག་པ་སྟེ། དུམ་བུ་བཅུ་གཉིས་སུ་འཇུག་པ་བསྡོམ་ན་མི་ལོ་ཉི་ཁྲི་ཆིག་སྟོང་དྲུག་བརྒྱར་འགྱུར་རོ། །དེ་ལས་གླིང་འདིའི་ཐོབ་སྐལ་སྟོང་བརྒྱད་བརྒྱ་ཕྲི་བའི་ལྷག་མ་ནི་དུམ་བུ་ལྷག་མ་བཅུ་གཅིག་པོར་སངས་རྒྱས་ཀྱི་ཆོས་འཇུག་པའི་ལོ་གྲངས་སོ། །གླིང་བཅུ་གཉིས་པོ་ཐམས་ཅད་དུ་བསྟན་པ་ཕྱི་དར་གྱི་དུས་བཞི་རྫོགས་ལྡན་གསུམ་ལྡན་གཉིས་ལྡན་རྩོད་པའི་དུས་བཞི་པོ་རྣམས་ནི་མི་ལོ་སྟོང་དང་བརྒྱད་བརྒྱ་རེར་འཇུག་པའི་ལོ་གྲངས་ཕྱོགས་གཅིག་བསྡོམ་པ་ནི་འོག་མིན་པ་ནུས་པའི་མིང་ཅན་གྱི་ཞག་གཅིག་གི་ཚད་དེ་མི་ལོ་ཉི་ཁྲི་ཆིག་སྟོང་དྲུག་བརྒྱ་ཉིད་ཀྱིས་ས་གཞི་དག་ལ་བསྟན་པའི་དུས་བཞི་པོ་དེ་ལྟར་ངེས་པར་རྒྱུ་ཞིང་འཁོར་བར་འགྱུར་རོ། །སྐབས་འདིར་བསྟན་རྩིས་སོགས་ལ་ཉེ་བར་མཁོ་བ་ལོ་དག་གི་ངེས་པ་
མདོར་བསྡུས་གོ་སླ་བར་བརྗོད་ན། དུས་ཀྱི་འཁོར་ལོ་རྩ་བའི་རྒྱུད་ལས། རྩ་རྒྱུད་བསྟན་པའི་ལོ་དེ་ནས་ལོ་དྲུག་བརྒྱ་ན་ཤམ་བྷ་ལའི་ཡུལ་དུ་རིགས་ལྡན་དང་པོ་འཇམ་དཔལ་གྲགས་པ་སེང་གེའི་ཁྲི་ལ་བཞུགས་ནས་ཆོས་སྟོན་པ་པོ་འབྱུང་བར་ལུང་བསྟན་པ་ལྟར། ཟླ་བཟང་གི་སྲས་ལྷ་དབང་དང་། གཟི་བརྗིད་ཅན་དང་། ཟླ་བས་བྱིན་དང་། ལྷའི་དབང་ཕྱུག་དང་། སྣ་ཚོགས་གཟུགས་དང་། ལྷའི་དབང་ལྡན་ཏེ་ཆོས་རྒྱལ་དྲུག་པོས་རིམ་པར་ལོ་བརྒྱ་རེ་བརྒྱ་རེར་ཆོས་བསྟན་པར་མཛད་པའི་ལོ་དྲུག་བརྒྱ་རྫོགས་པ་ན། ལྷའི་དབང་ལྡན་གྱི་སྲས་རིགས་ལྡན་དང་པོ་རྒྱལ་པོ་འཇམ་དཔལ་གྲགས་པ་ཁྲི་ལ་བཞུགས་ནས་ལོ་བརྒྱ་ཐམ་པར་རྩ་བའི་རྒྱུད་བསྟན་པར་མཛད་ནས། ལོ་བརྒྱ་པོ་རྫོགས་པའི་ཕྱི་ལོ་དེ་ལ་བསྡུས་རྒྱུད་བསྟན་ཅིང་། ལོ་དེར་གྲགས་པའི་སྲས་རིགས་ལྡན་པདྨ་དཀར་པོ་ཁྲི་ལ་བཞུགས་ནས་ཆོས་སྟོན་པར་མཛད་དོ། །རིགས་ལྡན་གཉིས་པ་པད་དཀར་དང་། གསུམ་པ་བཟང་པོ་དང་། བཞི་པ་རྣམ་རྒྱལ་དང་། ལྔ་པ་བཤེས་གཉེན་བཟང་པོ་དང་། དྲུག་པ་ཕྱག་དམར་རམ་རིན་ཆེན་ཕྱག་དང་། བདུན་པ་ཁྱབ་འཇུག་སྦས་པ་དང་། བརྒྱད་པ་ཉི་མ་གྲགས་པ་དང་། དགུ་པ་ཤིན་ཏུ་བཟང་པོ་སྟེ་བརྒྱད་པོ་འདི་དག་གིས་རིམ་བཞིན་ལོ་བརྒྱ་རེར་ཆོས་བསྟན་པས་ལོ་བརྒྱད་བརྒྱ་པོ་རྫོགས་པ་དང་། རིགས་ལྡན་བཅུ་པ་བརྒྱ་མཚོ་རྣམ་རྒྱལ་ཁྲིར་ཕེབས་པའི་ལོ་དེ་ལ། ཆུ་བོ་ཤཱི་ཏིའི་ལྷོ་ཕྱོགས་མ་ཁའི་ཡུལ་དུ་ཀླ་ཀློའི་ཆོས་འཇུག་ཅིང་ཀླ་ཀློའི་སྟོན་པ་བདུན་པ་སྦྲང་རྩིའི་བློ་གྲོས་ཀྱིས་ཉུང་ངུའི་བྱེད་རྩིས་བརྩམ་པ་ཡིན་པར་གསུངས་ཤིང་། རིགས་ལྡན་བཅུ་པ་རྒྱ་མཚོ་རྣམ་རྒྱལ་ཁྲི་ལ་བཞུགས་ནས་ལོ་བརྒྱ་དང་བརྒྱད་ཅུ་རྩ་གཉིས་སུ་ཆོས་བསྟན་ནས། དེའི་རྗེས་སུ་རིགས་ལྡན་བཅུ་གཅིག་པ་རྒྱལ་དཀའ་ཁྲི་ལ་བཞུགས་ཤིང་བྱེད་པའི་རྩིས་མགོ་བཟུང་། དེ་ཉིད་ལོ་ཉིས་བརྒྱ་ཉེར་གཅིག་གི་བར་དུ་ཁྲི་ལ་བཞུགས་ནས་
ཆོས་བསྟན་པར་མཛད་པའི་རྗེས་སུ་རིགས་ལྡན་བཅུ་གཉིས་པ་ཉི་མ་ཁྲི་ལ་ཕེབས་པའི་ལོ་འདི་རབ་བྱུང་དང་པོར་བརྩི་བའི་ཐ་སྙད་ཆགས་པ་མེ་ཡོས་ཡིན་ལ། དེའི་ཕྱིར་དེ་ཡན་ཆད་ཀྱི་ཀླ་ཀློ་ཞུགས་པའི་ལོ་གྲངས་མེ་མཁའ་རྒྱ་མཚོ་ལ་དེ་ཕྱིན་ཆད་རབ་བྱུང་བགྲངས་ཏེ་འདས་ལོ་བྱིན་པས་ད་ལྟའི་བར་ལོ་དག་ནོར་འཆུག་འབྱུང་དོན་མེད་དོ། །རིགས་ལྡན་ཉི་མའི་རྗེས་སུ་བཅུ་གསུམ་པ་སྣ་ཚོགས་གཟུགས། བཅུ་བཞི་པ་ཟླ་བའི་འོད། བཅོ་ལྔ་པ་མཐའ་ཡས། བཅུ་དྲུག་པ་ས་སྐྱོང་། བཅུ་བདུན་པ་དཔལ་སྐྱོང་། བཅོ་བརྒྱད་པ་སེང་གེ བཅུ་དགུ་པ་རྣམ་པར་གནོན། ཉི་ཤུ་པ་སྟོབས་པོ་ཆེ། ཉེར་གཅིག་པ་མ་འགག་པ། ཉེར་གཉིས་པ་མི་ཡི་སེང་གེ ཉེར་གསུམ་པ་དབང་ཕྱུག་ཆེན་པོ། ཉེར་བཞི་པ་མཐའ་ཡས་རྣམ་རྒྱ་ལ། ཉེར་ལྔ་པ་དྲག་པོ་འཁོར་ལོ་ཅན་ཏེ། རིགས་ལྡན་ཉེར་ལྔ་པོ་རིམ་པར་སྔ་མའི་སྲས་སུ་ཕྱི་མ་འབྱུང་ཞིང་དེ་རྣམས་ཀྱིས་དྲག་པོ་མ་གཏོགས་གཞན་རྣམས་ལོ་བརྒྱ་རེ་བརྒྱ་རེ་ཆོས་སྟོན་པར་མཛད་ལ། དྲག་པོས་ལོ་གོ་བདུན་བར་དུ་ཁྲི་ལ་བཞུགས་ནས་ཆོས་སྟོན་ཏོ། །དེ་ཡན་ཆད་ཀྱིས་བསྟན་པ་སྔ་དར་གྱི་ཚད་རྫོགས་ནས། དེ་ཕྱིན་ཆད་རིགས་ལྡན་དྲག་པོ་འཁོར་ལོ་ཅན་གྱིས་གསོས་པའི་བསྟན་པ་ཕྱི་དར་གྱི་གནས་ཚད་སྟོང་དང་བརྒྱད་བརྒྱར་གསུངས་སོ། །དེ་ལྟ་ན་ཆོས་རྒྱལ་ཟླ་བ་བཟང་པོ་ནི་རྒྱུད་ཞུ་བ་པོ་ཡིན་ལ། དེས་རྩ་རྒྱུད་ཀྱི་འགྲེལ་པ་སྟོང་ཕྲག་དྲུག་ཅུ་པ་མཛད་ནས་ཀུན་ལ་བསྟན། རྒྱུད་བསྟན་པའི་ཕྱི་ལོ་དུས་འཁོར་གྱི་བློས་བསླང་བཞེངས་ནས་གཟུགས་སྐུའི་བཀོད་པ་བསྡུས། ཟླ་བཟང་དང་དེའི་སྲས་བརྒྱུད་ལྷ་དབང་སོགས་དྲུག་པོ་དེ་ལ་ཆོས་རྒྱལ་བདུན་ཞེས་བྱ་ཞིང་། དེ་སྟེང་རིགས་ལྡན་ཉེར་ལྔ་བསྡོམ་པ་ལ་གདན་རབས་སུམ་ཅུ་རྩ་གཉིས་ཞེས་བྱའོ། །འདི་རྣམས་ཀྱི་གོ་རིམ་རྩ་རྒྱུད་ལས་ལུང་བསྟན་པ་དང་། བསྡུས་རྒྱུད་རྩ་འགྲེལ་ན་གསལ་པོར་གསུངས་པ་དཔང་པོར་བྱར་ཡོད་པས་
འདིའི་ལོ་དག་ལྟར་ན། རྩ་རྒྱུད་བསྟན་པའི་རྗེས་ཀྱི་ལོ་དྲུག་བརྒྱ་དང་། དེ་སྟེང་འཇམ་དཔལ་གྲགས་པས་ལོ་བརྒྱར་ཆོས་བསྟན་པས་བདུན་བརྒྱ། དེ་རྗེས་ཀྱི་རིགས་ལྡན་བརྒྱད་ཀྱིས་ཆོས་བསྟན་པའི་ལོ་གྲངས་བརྒྱད་བརྒྱ་བསྡོམས་པས་ལོ་སྟོང་དང་ལྔ་བརྒྱ་ལ་རྒྱ་མཚོ་རྣམ་རྒྱལ་དང་རྒྱལ་དཀའ་གཉིས་ཀྱི་ཁྲི་ལོ་བསྡོམ་པ་བཞི་བརྒྱ་དང་གསུམ་བསྣན་པས། སྟོང་ཕྲག་གཅིག་དང་དགུ་བརྒྱ་དང་ཉག་མ་གསུམ་འབྱུང་བ་འདི་རབ་བྱུང་དང་པོ་ཡན་ཆད་ལ་སྟོན་པས་དུས་འཁོར་རྩ་རྒྱུད་གསུངས་པའི་འདས་ལོར་ལུང་གིས་བསྙོན་མེད་དུ་གྲུབ་བོ། །དེ་ཕྱིན་ཆད་ཀྱི་རིགས་ལྡན་ཉི་མ་ལ་སོགས་པ་འཁོར་ལོ་ཅན་གྱི་མཐར་ཐུག་པའི་རིགས་ལྡན་བཅུ་བཞི་པོ་ཁྲིར་བཞུགས་ཀྱི་ལོ་བརྒྱ་རེར་མཉམ་པར་བྱས་ན་སྟང་དང་བཞི་བརྒྱ་འབྱུང་བ་དེ་སྔ་མ་ལ་བསྣན་པས་སུམ་སྟོང་སུམ་བརྒྱ་དང་ཉག་མ་གསུམ་འབྱུང་བ་འདི་བསྟན་པ་སྔ་དར་གྱི་ཚད་ཡིན་པར་གྲུབ་ལ། འདི་ལ་ཕྱི་དར་གྱི་སྟོང་དང་བརྒྱད་བརྒྱ་བསྣན་ན། ལྔ་སྟོང་དང་ཆིག་བརྒྱ་དང་གསུམ་འབྱུང་བ་འདི་ཙམ་བསྙོན་མེད་དུ་གྲུབ་བོ། །འོན་ཀྱང་དྲག་པོ་འཁོར་ལོ་ཅན་ལོ་གོ་བདུན་གྱི་བར་དུ་ཁྲི་ལ་བཞུགས་ནས་ཆོས་བསྟན་ཏེ་གོ་བརྒྱད་པ་ལ་ཀླ་ཀློ་འཇོམས་པར་མཛད་པར་བྱས་ན་བསྟན་པའི་གནས་ཚད་ལོ་ལྔ་སྟོང་དུ་གསུངས་པ་ལས་ལོ་བརྒྱ་ལྷག་པ་ཡོད་ལ། ཀླ་ཀློའི་གནས་ཚད་སྟོང་བརྒྱད་བརྒྱར་གསུངས་པ་དང་ཆད་ལྷག་མེད་པར་འགྲིགས། ལོ་བརྒྱ་ནི་ལྔ་སྟོང་ལས་ལྷག་ཀྱང་ཞིབ་རྩིས་སུ་སོང་བས་འགལ་བ་མེད་པར་རུང་སྟེ། གླིང་བཅུ་གཉིས་ལས་དུམ་བུ་གཅིག་གི་བསྟན་པའི་གནས་ཚད་ལྔ་སྟོང་བཞི་བརྒྱར་རྒྱུད་འདི་ལས་གསུངས་པས་ཤེས་སོ། །ཡང་འགའ་ཞིག་དྲག་པོ་འཁོར་ལོ་ཅན་ཉིད་སྐུ་ཚེ་བརྒྱ་པར་ངེས་པར་འདོད་པ་དག་གིས་ལོ་ལྔ་བཅུར་ཤམ་བྷ་ལའི་ཁྲི་ལ་བཞུགས་ནས་ཆོས་བསྟན་ཏེ་དེ་ནས་ཀླ་ཀློ་འཇོམས་པར་བཞེད། དེའི་ལུགས་ལ་ཀླ་ཀློའི་གནས་ཚད་ལས་བཞི་བཅུ་རྩ་བདུན་ཉུང་བར་
འགྱུར། ཕུག་པ་པས་གོ་དྲུག་བར་དུ་ཁྲིར་བཞུགས་གོ་བདུན་གྱི་ལོ་ལ་ཀླ་ཀློ་འདུལ་དུ་བྱོན་པར་བཞེད་ཅིང་སྐུ་ཚེའི་ཚད་བརྒྱར་འདོད་དོ། །རང་ལུགས་ལ་ནི་རིགས་ལྡན་རྣམས་ཁྲིར་བཞུགས་ཀྱི་ལོ་བརྒྱ་ཡིས་རྩི་ཚུལ་གོང་ལྟར་ལ་སྐུ་ཚེའི་ཚད་ནི་བརྒྱ་འབའ་ཞིག་ལས་མི་བཞུགས་པ་མིན་ཏེ་དེ་ལས་རིང་བར་གཞེས་པའི་ཚུལ་འགྲེལ་བའི་གཞུང་དུ་བཤད་པ་ལྟར་རོ། །ཡང་སངས་རྒྱས་པའི་ལོ་དེའི་ཕྱི་ལོ་དུས་འཁོར་རྩ་རྒྱུད་བསྟན་པར་བཞེད་པ་དང་། སངས་རྒྱས་པའི་ཕྱི་ལོ་ནས་ད་དུང་ལོ་ཞེ་དྲུག་བཞུགས་པའི་དབང་དུ་བྱས་ན་གོང་གི་ལྔ་སྟོང་གི་ལྷག་པོ་བརྒྱ་དང་གསུམ་ལ་ཞེ་དྲུག་ཕྲིས་པས་ང་བདུན་ལྷག་མར་ཡོད་དོ། །དེ་སྟེང་རིགས་ལྡན་དྲག་པོ་ཁྲིར་བཞུགས་ཀྱི་ལོ་ལྔ་བཅུར་འདོད་པ་ལྟར་ན་ལྔ་སྟོང་གི་ལྷག་བདུན་ལས་མེད་པས་མདོ་ཕྱོགས་ཀྱི་བསྟན་པའི་གནས་ཚད་དང་མི་འགྲིག་པ་མེད་ཀྱང་ཀླ་ཀློའི་གནས་ཚད་ལས་ཉུང་བས་མི་འགྲིག་གོ། དེས་ན་འཁོར་ལོ་ཅན་ཁྲིར་བཞུགས་ཀྱི་ལོ་གོ་བདུན་དུ་བྱས་ཤིང་དུས་འཁོར་རྩ་རྒྱུད་བསྟན་པའི་ལོ་དེ་སངས་རྒྱས་པའི་ཕྱི་ལོ་ཡིན་པར་བྱས་ནས་བརྒྱ་དང་གསུམ་ལྷག་པ་ལ་ཞེ་དགུ་ཕྲི་ན་ལྷག་ང་བཞི་ལས་མེད་པས་མདོ་ཕྱོགས་བསྟན་པའི་གནས་ཚད་དང་ཀླ་ཀློའི་གནས་ཚད་ལ་མི་འགྲིག་པ་མེད་མོད་རྩ་རྒྱུད་བསྟན་པ་དང་མྱང་འདས་ཀྱི་ལོ་གཅིག་ཡིན་མིན་འདི་ད་དུང་བརྟག་པར་བྱའོ། །འདི་རྣམས་སྤྱིར་བསྟན་ནས། སངས་རྒྱས་ཉིད་འཁྲུངས་ནས་དགུང་ལོ་ཉེར་དགུ་པ་ལ་ཁབ་ནས་ཕྱུངས་པ་དང་། དེ་རྗེས་ལོ་དྲུག་དཀའ་བ་སྤྱད་དེ་སོ་ལྔ་པ་ལ་སངས་རྒྱས་པ་དང་། དེ་རྗེས་ལོ་གྲངས་ཞེ་དྲུག་བར་དུ་ཆོས་འཁོར་བསྐོར་ནས་ལོ་རིལ་པོ་བརྒྱད་ཅུ་ཐམ་པ་འདས་ཤིང་ངོ་ཐོག་གྱ་གཅིག་པ་ལ་མྱ་ངན་ལས་འདས་པར་ཕལ་མོ་ཆེ་བཞེད་པ་མཐུན་མོད། འཁྲུངས་པ་སོགས་ཀྱི་ལོ་ཡི་ངོས་འཛིན་དང་། དེ་ནས་ད་ལྟའི་བར་འདས་ལོ་དུ་སོང་གྲངས་ལ་བཞེད་པ་མི་མཐུན་པ་དུ་མ་ཡོད་པ་དེ་དག་བདེ་བླག་ཏུ་རྟོགས་ཕྱིར། དང་པོ་ཡོངས་སུ་གྲགས་ཆེ་བའི་རྩིས་
གཞུང་ཕུག་པ་པའི་ལུགས་ཀྱི་དུས་འཁོར་རྩ་རྒྱུད་གསུངས་པའི་ལོ་དག་བརྗོད་པར་བྱས་པ་གཞིར་བྱས་ནས། དེ་ལས་མང་བ་དང་ཉུང་བར་འདོད་པ་རྣམས་ཕྲི་སྣོན་གྱི་སྒོ་ནས་ཤེས་པར་བྱ་བ་ལ། ཕུག་པའི་པད་དཀར་ཞལ་ལུང་གི་རྗེས་འབྲངས་བཻཌཱུར་དཀར་པོ་དང་། རྩིས་གཞུང་ཉིན་བྱེད་སྣང་བའི་བཞེད་པ་ལྟར་ན་སྟོན་པ་ཤཱཀྱའི་རྒྱལ་པོ་ཉིད། ས་ལུག་ཆུ་སྟོད་ཟླ་བའི་ཚེས་བཅོ་ལྔའི་མཚན་མོར་ལྷུམས་སུ་ཞུགས་ཏེ་ཟླ་བ་རིལ་པོ་དགུ་དང་ཞག་ཉེར་གསུམ་ལྷུམས་སུ་བཞུགས་ནས། ལྕགས་སྤྲེལ་ས་གའི་ཚེས་བདུན་གྱི་མཚན་མོའི་གུང་ཐུན་ཆ་ལ་ལུ་མྦི་ནིའི་ཚལ་དུ་སྐུ་བལྟམས། དེ་ཉིན་གྱི་ཚེས་རྩིས་བྱས་པས་རེས་གཟའ་སྤེན་པ། ཆུ་ཚོད་བཅོ་ལྔ། ཟླ་སྐར་རྒྱལ། ཆུ་ཚོད་ཐིག །ཉི་སྐར་ཐིག་དང་ཆུ་ཚོད་ང་བདུན་ཤར། འདུས་པ་ཏོག་གི་གཟུངས་དང་ཀླུ་སྒྲུབ་ཀྱིས་སྟོན་པ་རྒྱལ་ལ་འཁྲུངས་པར་གསུངས་པ་དང་འགྲིགས། དེ་ནས་དགུང་ལོ་ཉེར་དགུ་པ་ཀུན་འཛིན་ས་ཁྱི་ལོར་ཁབ་ནས་ཕྱུངས། དེ་ནས་ལོ་དྲུག་དཀའ་བ་སྤྱད་དེ་ལོ་སུམ་ཅུ་རྩ་ལྔ་བཞེས་པ་ཤིང་རྟ་ས་ག་ཟླ་བའི་ཚེས་བཅོ་ལྔའི་ཐོ་རངས་སྐྱ་རེངས་འཆར་བའི་དུས་སུ་མངོན་པར་རྫོགས་པར་སངས་རྒྱས། དེ་ཉིན་གྱི་ཚེས་རྩིས་དང་གཟའ་འཛིན་རི་མོ་བཏབ་པས་གདོང་འཛིན་ཡོད་པས་སངས་རྒྱས་ཚེ་ཟླ་བ་གཟས་བཟུང་བར་གསུངས་པ་དང་འགྲིགས། དེ་ནས་ལོ་གྲངས་བཞི་བཅུ་རྩ་དྲུག་བར་དུ་ཐེག་པ་གསུམ་གྱི་ཆོས་འཁོར་བསྐོར་ནས། སངས་རྒྱས་ནས་ལོ་ཞེ་བདུན་དང་། འཁྲུངས་ནས་ལོ་རིལ་པོ་བརྒྱད་ཅུ་དང་། ངོ་ཐོག་གྱ་གཅིག་པ་ལྕགས་འབྲུག་ནག་པའི་ཉ་ལ་འབྲས་སྤུངས་ཀྱི་མཆོད་རྟེན་དུ་དུས་འཁོར་རྩ་རྒྱུད་གསུངས། དེའི་ཟླ་བ་ཕྱི་མ་ས་གའི་ཉ་ཡི་མཚན་ཐུན་ཐ་མར་རྩྭ་མཆོག་གྲོང་དུ་མྱ་ངན་ལས་འདས་སོ་ཞེས་བཞེད་པ་འདིའི་ལུགས་ཀྱི་དུས་འཁོར་ཞལ་ཆེམ་གྱི་ཚུལ་དུ་བསྟན་ནས་ལོ་དེ་ལ་མྱ་ངན་ལས་འདས་པར་བཞེད་དོ། །ལུགས་འདིའི་དབང་དུ་བྱས་ན་དུས་འཁོར་འགྲེལ་ཆེན་རྡོ་རྗེ་ཉི་མའི་
སྣང་བ་འདི་བརྩམ་པའི་ལོ་རབ་བྱུང་བཅོ་ལྔ་པའི་ནང་ཚན་དུ་གྱུར་པ་ཀཱི་ལ་ཀ་ཞེས་པ་ཕུར་བུ་ས་སྤྲེལ་གྱི་གནམ་ལོ་འདི་ཡན་ལ་ལོ་གྲངས་ཉིས་སྟོང་བདུན་བརྒྱ་གྱ་བརྒྱད་འདས་པ་ཡིན་ནོ། །གོང་ལྟར་རྒྱུད་ཀྱི་དངོས་བསྟན་ལོ་དག་ལྟར་བརྩིས་ན། ཕུག་ལུགས་དུས་འཁོར་རྒྱུད་བསྟན་པའི། །ལོ་གྲངས་དེ་ལ་གསུམ་ཕྲི་བ། །ཉི་མ་ཞེས་པ་ཆུ་ལུག་ལོར། །དུས་འཁོར་རྩ་རྒྱུད་གསུངས་པ་དང་། །དེ་ལ་གཅིག་ཕྲི་ཤིང་སྤྲེལ་ལོར། །ལྷ་དབང་ཁྲི་ལ་ཕེབས་པ་ཡིན། །ལོ་འདི་ནས་ནི་དྲུག་བརྒྱའི་ལོས། །ཞེས་གསུངས་ཐོག་མ་འདི་ཡིན་ལ། །ཆོས་རྒྱལ་རིགས་ལྡན་རིམ་བྱོན་པའི། །ཁྲི་ལོ་དང་པོ་འདི་ནས་བརྩི། །འདི་ཉིད་རང་ལུགས་བཟུང་དགོས་སོ། །གོང་གི་ས་སྤྲེལ་འདས་ལོ་ལ། །བཅུ་དགུ་བསྣན་པར་བྱས་པ་ན། །རབ་བྱུང་བཅུ་དྲུག་པའི་ཐོག་མ། །མེ་ཡོས་སྟོན་པའི་འདས་ལོར་གྲུབ། །ལོ་དེར་མ་འགགས་པ་ཁྲིར་ཕེབས། །བསྟན་པའི་གནས་ཚད་ཚུལ་ཁྲིམས་ཀྱི། །སྟེང་ནས་སུམ་བརྒྱ་ང་བདུན་འདས། །དེ་ལྷག་མེ་ཡོས་འདི་བཅས་པ། །བརྒྱ་དང་གོ་གསུམ་ཡོད་པ་ནི། །ཕུག་པ་པ་ཡི་བཞེད་པའོ། །དྲུག་ཅུ་རེ་རེ་རིམ་བསྣན་པས། །རབ་བྱུང་སྐོར་རེའི་མཚམས་ནས་རྟོགས། །སོ་སོའི་ནང་གི་མེ་ཡོས་སོགས། །དུ་འདས་དྲུག་ཅུའི་ཤོག་ཁྲག་གསལ། ༈ །ཚུལ་འདི་རི་མོས་གཏན་འབེབ་ན། །རི་མཚོ་ཀླུ་གཟུགས་ལོ་ཚོགས་ལ། །རབ་བྱུང་དུ་ཡིན་གྲངས་དེ་ནི། །དྲུག་ཅུས་བསྒྱུར་བ་བསྲེས་བྱས་ན། །རབ་བྱུང་དེ་ཡི་མེ་ཡོས་ལ། །སྟོན་པ་མྱ་ངན་འདས་ནས་ལོ། །དུ་འདས་ཕུག་ལུགས་བཞེད་པ་སྟོན། །དེ་ནང་དུ་འདས་དེ་ལ་བསྲེ། །སྟོན་པ་འདས་ནས་ལོ་དུ་འདས། །དེ་ལ་ལྔ་བརྒྱས་བགོས་པ་ཡིས། །ཐོབ་ནོར་ལྔ་བརྒྱ་ཕྲག་བཅུ་ལས། །དུ་འདས་གྲངས་ཡིན་ལྷག་མ་ནི། །ངོ་ཐོག་པ་ཡི་འདས་ལོ་སྟེ། །དེ་ཡིས་ལྔ་བརྒྱ་ལ་ཕྲི་བའི། །ལྷག་མ་དེ་ཡི་མ་འོངས་པའོ། །
སྟོན་པ་འདས་ཕྱིན་འདས་ལོ་ལ། །བཞི་ཡིས་ཕྲི་བ་ཤིང་སྤྲེལ་ལོར། །ལྷ་དབང་ཁྲི་ལ་ཕེབ་པའི་ལོ། །དེ་ལ་མེ་མཁའ་བུག་གཟུགས་སྦྱངས། །རྒྱལ་དཀའི་ཁྲི་ལོ་ཡན་ཆད་རྫོགས། །དེ་ལྷག་བརྒྱ་ཡིས་བགོས་པའི་ནོར། །རིགས་ལྡན་བཅུ་གཉིས་པར་གྱུར་པ། །ཉི་མ་ནས་ནི་རིམ་བཞིན་ཏེ། །ཉི་མ་དང་ནི་སྣ་ཚོགས་གཟུགས། །ཟླ་འོད་དང་ནི་མཐའ་ཡས་དང་། །ས་སྐྱོང་དང་ནི་དཔལ་སྐྱོང་དང་། །སེང་གེ་དང་ནི་རྣམ་པར་གནོན། །སྟོབས་པོ་ཆེ་དང་མ་འགགས་པ། །མི་ཡི་སེང་གེ་དབང་ཕྱུག་ཆེ། །མཐའ་ཡས་རྣམ་རྒྱལ་འཁོར་ལོ་ཅན། །རིགས་ལྡན་བཅུ་བཞིའི་དུ་འདས་རྟོགས། །ལྷག་མ་རིགས་ལྡན་ད་ལྟ་བ། །གང་ཡིན་དེ་ཡི་ཁྲི་ལོ་འདས། །དེ་ཡིས་བརྒྱར་ཁྲི་མ་འོངས་ལོའོ། །མཚུར་རྩིས་བུམ་བཟང་ལུགས་ལྟར་ན། །གོང་བཤད་ལྷ་དབང་ཁྲིར་ཕེབས་ལོ། །དེ་ལ་དྲུག་བརྒྱས་ཕྲི་ལྷག་རྣམས། །བརྒྱ་ཡིས་བགོས་ནོར་དུ་ཡོད་པ། །རིགས་ལྡན་ཉེར་ལྔ་ལས་དེ་འདས། །ལྷག་མ་ད་ལྟ་བའི་ཁྲི་ལོ། །འདས་པར་འདོད་ཀྱང་དཔྱད་བྱར་སྣང་། །ལྷ་དབང་ཁྲི་ལ་ཕེབ་པ་ནས། །དུ་འདས་ལྔ་བརྒྱས་བགོས་པ་ཡིས། །བསྟན་པའི་གནས་ཚད་འདས་ལུས་རྟོགས། །ལུགས་གཞན་སྣོན་འབྲིད་བྱས་པས་ཤེས། །ཕུགས་ལུགས་སྟོན་པ་མྱང་འདས་ལོ། །དེ་ལ་ཞེ་དགུས་ཕྲི་ལྷག་ལ། །བསྟན་པའི་གནས་ཚད་བརྟག་པ་དང་། །ཤིང་སྤྲེལ་ལྷ་དབང་ཁྲིར་ཕེབ་ནས། །མགོ་བཟུང་ཆོས་རྒྱལ་རིགས་ལྡན་རྣམས། །རིམ་བཞིན་ཕུག་ལུགས་བཞིན་བརྩི་བ། །མཁས་གྲུབ་རྗེ་སོགས་བཞེད་པར་གྲུབ། །འདི་ལྟར་ཕུག་ལུགས་པའི་སྟོན་པ་མྱང་འདས་ཀྱི་ལོ་དེ་གཞིར་བཞག་ནས་འདི་ལ་གསུམ་ཕྲི་ན་གཡུང་སྟོན་རྡོ་རྗེ་དཔལ་གྱི་ལུགས་སོ། །བཞི་ཕྲི་ན་བསྟན་འཛིན་བཟང་པོ་སོགས་ཀྱི་ལུགས་སོ། །བཞི་བཅུ་རྩ་དྲུག་ཕྲི་ན་ཐེལ་པ་ཀུན་དགའ་རྒྱལ་མཚན་པའི་ལུགས་སོ། །བརྒྱ་དང་སོ་གཅིག་ཕྲི་ན་
ཙན་དན་ཇོ་བོའི་ལོ་རྒྱུས་ཀྱི་ལུགས་སོ། །ཉིས་བརྒྱ་སུམ་ཅུ་ཐམ་པ་ཕྲི་ན་གྲུབ་ཐོབ་ཨོ་རྒྱན་པ་ཡི་ལུགས་སོ། །སུམ་བརྒྱ་དང་བདུན་ཕྲི་ན་ས་སྐྱ་པ་དཔལ་ལྡན་བླ་མ་དམ་པའི་ལུགས་སོ། །སུམ་བརྒྱ་སུམ་ཅུ་རྩ་བདུན་ཕྲི་ན་ཨ་བྷ་ཡཱ་ཀ་ར་དང་། ཁ་ཆེ་པཎ་ཆེན་ཤཱཀྱ་ཤྲཱི་དང་། ནམ་མཁའ་བཟང་པོ་སོགས་ཀྱི་བཞེད་པ་སྟེ། པཎ་ཆེན་ཤཱཀྱ་ཤྲཱིས་མེ་བྱི་སྨིན་དྲུག་ཟླ་བའི་ཚེས་བརྒྱད་ནམ་གུང་ཟླ་བ་ནུབ་རིར་ནུབ་པའི་ཚེ་ཐུབ་པ་མྱ་ངན་ལས་འདས་སོ། །དེ་ཕྱིན་ཆད་ལོ་ཟླ་ཞག་གྲངས་དུ་སོང་ཤིང་བྱི་ལོར་ཁྲོ་ཕུར་བརྩིས་པ་ལྟར་རོ། །བཞི་བརྒྱ་དང་དྲུག་ཕྲི་ན་རོང་པ་ངག་དབང་གྲགས་པའི་ལུགས་སོ། །འདི་རྣམས་ཕུག་ལུགས་ཀྱི་སྟོན་པ་མྱ་ངན་ལས་འདས་པའི་ལོ་གྲངས་ལས་ཉུང་བ་རྣམས་སོ། །དེ་བཞིན་དུ་སྟོན་པས་དུས་འཁོར་གྱི་རྒྱུད་གསུངས་པའི་ལོ་གང་ཡིན་ངོས་འཛིན་པ་ལ་ཡང་བཞེད་པ་མི་འདྲ་བ་མཐོང་སྟེ་ཕུག་ལུགས་ཀྱི་དུས་འཁོར་རྩ་རྒྱུད་གསུངས་པའི་ལོ་གྲངས་དེ་ལ་གཉིས་ཕྲི་ན་ཀུན་མཁྱེན་བུ་སྟོན་དང་བྱང་པའི་ལུགས་ཏེ། འདི་དག་གིས་སྣ་ཚོགས་ཆུ་རྟ་ལོའི་ནག་པའི་ཉ་ལ་དུས་འཁོར་རྩ་རྒྱུད་གསུངས་པར་བཞེད། གསུམ་ཕྲི་ན་གཡུང་སྟོན་དང་འཇམ་དབྱངས་ཆོས་མགོན་སོགས་ཀྱི་ལུགས་ཏེ་འདིས་ཆུ་ལུག་ལོའི་ནག་པའི་ཉ་ལ་དུས་འཁོར་རྩ་རྒྱུད་གསུངས་པར་བཞེད། ཀརྨ་པ་མི་བསྐྱོད་རྡོ་རྗེ་དང་མཚུར་ལུགས་རྩིས་གཞུང་ཉེར་མཁོ་བུམ་བཟང་གི་ལུགས་ཀྱང་འདི་དང་མཚུངས་ལ་མཁས་གྲུབ་རྗེའི་དུས་འཁོར་འགྲེལ་ཆེན་ལས་ཀྱང་དུས་འཁོར་རྒྱུད་གསུངས་པའི་ལོ་འདི་དང་གཅིག་གོ། འོན་ཀྱང་བཞེད་པ་མི་འདྲ་བའི་ཁྱད་པར་ནི་མཚུར་རྩིས་ཉེར་མཁོ་བུམ་བཟང་གི་ལུགས་ལྟར་ན་ཁྲག་སྐྱུགས་ཆུ་ཕག་ལོར་སྟོན་པ་ཉིད་ལྷུམས་སུ་ཞུགས། དེའི་ཕྱི་ལོ་ཤིང་བྱི་ས་ག་ཟླ་བའི་ཚེས་བརྒྱད་རྒྱལ་ལ་སྐུ་བལྟམས། དེ་ནས་ལོ་སོ་བཞི་སོང་བ་རྣམ་འཕྱངས་ས་ཁྱི་ས་ག་ཟླ་བའི་ཉ་ཡི་ཐོ་རེངས་སངས་རྒྱས། དེ་ནས་ལོ་ཞེ་ལྔ་པར་ཆོས་
འཁོར་བསྐོར་ནས་ཆུ་ལུག་ནག་པའི་ཉ་ལ་དུས་འཁོར་རྩ་རྒྱུད་གསུངས། ཟླ་བ་དེའི་རྗེས་མ་ས་གའི་ཉ་ལ་མྱ་ངན་ལས་འདས་པར་བཞེད། ལུགས་འདི་ཉིད་རྒྱུད་ཀྱི་དངོས་བསྟན་ལོ་དག་དང་འགྲིགས་པ་སྔར་བཤད་ལྟར་ལ། ལུགས་འདིས་ཆོས་རྒྱལ་དྲུག་དང་འཇམ་དཔལ་གྲགས་པ་སོགས་རིགས་ལྡན་ཐམས་ཅད་ལོ་བརྒྱ་རེར་ཆོས་སྟོན་པ་ཤ་སྟག་ཏུ་འདོད་ཀྱི་རྒྱ་མཚོ་རྣམ་རྒྱལ་དང་རྒྱལ་དཀའི་ཁྲི་ལོ་ལྷག་པ་མི་འདོད་པའི་དབང་གིས་རིགས་ལྡན་གཉིས་ཀྱི་ཁྲིར་བཞུགས་ཀྱི་ལོ་ཕུག་ལུགས་ལས་སྔ་བར་སོང་བ་ནི་དཔྱད་བྱ་སྟེ། རིགས་ལྡན་ཉེར་དྲུག་ཏུ་འདོད་པ་མི་འཐད་ལ། རིགས་ལྡན་ཉེར་ལྔ་བྱས་ན་ལུགས་དེར་བསྟན་པའི་གནས་ཚད་ལྔ་སྟོང་ལས་ལོ་བརྒྱ་ལྷག་ཙམ་ཉུང་ཞིང་། ཀླ་ཀློའི་གནས་ཚད་སྟོང་བརྒྱད་བརྒྱ་ལས་ལོ་ཉིས་བརྒྱ་ལྷག་ཅིག་ཉུང་བ་སོགས་བརྟག་མི་བཟོད་པ་འགའ་སྣང་ངོ་། །མཁས་གྲུབ་དགེ་ལེགས་དཔལ་བཟང་གི་བཞེད་པས་སྟོན་པ་ཉིད་སྣ་ཚོགས་ཆུ་རྟ་ལོའི་དཔྱིད་ཐ་ཆུང་ས་གའི་ཉ་ཡི་སྐྱ་རེངས་འཆར་དུས་སུ་སངས་རྒྱས། དེ་ཉིན་ཚེས་རྩིས་བྱས་པས་གཟའ་འཛིན་དང་འགྲིགས། སངས་རྒྱས་པའི་དུས་དེ་ནས་ལོ་གཅིག་གི་བར་ཕར་ཕྱིན་ཐེག་པ་སྤྱི་དང་། བྱ་རྒོད་སྤུངས་རིར་ཤེར་ཕྱིན་གསུངས། སངས་རྒྱས་ནས་ཟླ་བ་བཅུ་གཉིས་སོང་བ་ཆུ་ལུག་ནག་པའི་ཉ་ལ་དུས་འཁོར་རྩ་རྒྱུད་གསུངས་པར་བཞེད་དེ་འགྲེལ་ཆེན་དྲི་མེད་འོད་ཀྱི་དབང་གི་ལེའུའི་ནག་པའི་མཐར་ནི་སོགས་ཀྱི་ཐད་དུ་འཕགས་ཡུལ་དུ་ས་གའི་ཉའི་སྐྱ་རེངས་འཆར་ཚེ་བཅོམ་ལྡན་འདས་སངས་རྒྱས་ཏེ་ཐེག་པ་གསུམ་གྱི་ཆོས་འཁོར་བསྐོར་ནས་ཟླ་བ་བཅུ་གཉིས་པ་ནག་པའི་ཉ་ལ་འབྲས་སྤུངས་ཀྱི་མཆོད་རྟེན་ཆེན་པོར་དུས་འཁོར་རྒྱུད་བསྟན་པར་གསུངས་པ་འདི་ཁུངས་སུ་བྱེད་དོ། །ལུགས་གཞན་དག་གིས་ལུང་འདིའི་དོན་དེ་ལྟར་མི་འཆད་དོ། །རྩ་རྒྱུད་བསྟན་པའི་ལོ་དང་ཟླ་བཟང་གིས་ཆོས་བསྟན་པའི་ལོ་གཉིས་ཀ་དྲུག་བརྒྱའི་ཁོངས་སུ་བརྩིས་ན་
གཟའ་འཛིན་རི་མོ་མི་འཆར། གཅིག་མ་བརྩིས་ན་འཆར་བས་ལོ་འདི་ནས་ནི་དྲུག་བརྒྱའི་ལོ་ཡིས་ཞེས་པ་ལོ་འདི་འདས་མ་ཐག་པ་ལ་གོ་བར་བྱའོ། །ཞེས་གསུངས། སངས་རྒྱས་ནས་ལོ་ཞེ་དྲུག་བར་དུ་བཞུགས་པར་བཞེད། རྩ་རྒྱུད་བསྟན་པའི་ཕྱི་ལོ་ནས་རབ་བྱུང་བདུན་པའི་ཀུན་དགའ་ཤིང་སྟག་ཡན་ལ་དུ་འདས་སླར་ལུས་པ་སོགས་བརྩིས་ཏེ་དུས་བཞི་སྔ་མར་ལོ་སུམ་སྟོང་ཉིས་བརྒྱ་ང་ལྔ། ཕྱི་མར་སྟོང་བརྒྱད་བརྒྱ་ཡོད་པ་བསྡོམས་པས་ལྔ་སྟོང་ང་ལྔ་འབྱུང་བའི་སྟེང་ནས་སྟོན་པ་སངས་རྒྱས་ནས་མྱ་ངན་ལས་འདས་པའི་བར་གྱི་ལོ་ཞེ་དྲུག་ཕྲི་བས་ལྔ་སྟོང་དང་དགུ་བྱུང་བ་མདོ་ཕྱོགས་བསྟན་པའི་གནས་ཚད་དང་འགྲིགས། ལོ་དགུ་ནི་རགས་རྩིས་ལ་མ་བརྩིས་ཀྱང་རུང་། སངས་རྒྱས་མྱང་འདས་ཕྱིན་གྱི་ལོ་ལ་དུས་འཁོར་ལུགས་ལས་ལོ་སྟོང་ཕྲག་ལྷག་ཙམ་གྱི་མང་བར་འདོད་པ་རྣམས་ནི་བབ་ཅོལ་ལོ་ཞེས་གསུངས། ཕུག་ལུགས་ཀྱི་སྟོན་པས་དུས་འཁོར་རྩ་རྒྱུད་གསུངས་ཕྱིན་གྱི་འདས་པའི་ལོ་གྲངས་དེ་ལ་བཞིས་ཕྲི་ན་ཇོ་ནང་ཕྱོགས་ལས་རྣམ་རྒྱལ་གྱི་ལུགས་སོ། །འདིའི་ལུགས་ལ་ཤིང་སྤྲེལ་ལ་རྩ་རྒྱུད་གསུངས་པར་བཞེད། འདི་རྣམས་ཕུག་ལུགས་ཀྱི་དུས་འཁོར་རྒྱུད་གསུངས་པའི་ལོ་དག་ལས་ཉུང་ངོ་། །ཡང་ཕུག་ལུགས་པའི་རྩ་རྒྱུད་གསུངས་པར་འདོད་པའི་ལོ་གྲངས་དེ་ལ་བཞི་བརྒྱ་དང་བདུན་ཅུ་རྩ་གཉིས་བསྣན་པ་འགོས་ལོ་གཞོན་ནུ་དཔལ་གྱི་ལུགས་སོ། །འདི་ནི་ཕུག་ལུགས་ཀྱི་དེ་ལས་ཆེས་མང་ངོ་། །ཡང་སངས་རྒྱས་མྱ་ངན་ལས་འདས་ནས་ལོ་དུ་སོང་ཕུག་ལུགས་པའི་བཞེད་པ་དེ་ལས་མང་བར་འདོད་པའི་ཕྱོགས་ནི། ཕུག་ལུགས་ཀྱི་འདས་ལོ་དེ་ཉིད་གཞིར་བཞག་ལ་འདི་ལྟར་བསྣན་པས་འགྲུབ་སྟེ་བརྒྱ་དང་ཉེར་བདུན་བསྣན་ན་ཐང་གི་ཡིག་ཚང་གི་ལུགས་སོ། །ཡང་ན་དེ་ཉིད་ལ་སླར་ཡང་དྲུག་ཅུས་ཕྲི་བའི་ལུགས་ཀྱང་ཡོད། སྟོང་དང་ཉིས་བརྒྱ་ང་གཉིས་བསྣན་ན་ས་སྐྱ་པཎྜི་ཏ་སོགས་ཀྱིས་བཞེད་དེ། ས་པཎ་གྱིས་སྟོན་པ་ཉིད་མེ་ཡོས་ལ་ལྷུམས་སུ་ཞུགས། ས་འབྲུག་ས་ག་ཟླ་བའི་
ཚེས་བརྒྱད་སྔ་དྲོ་རྒྱལ་ལ་སྐུ་བལྟམས། ཆུ་སྟག་ལོའི་དཔྱིད་ཐ་ཆུང་ས་གའི་ཉ་ཡི་ཐོ་རེངས་ཟླ་བ་གཟས་བཟུང་ཚེ་སངས་རྒྱས། མེ་ཕག་དཔྱིད་ཐ་ཆུང་ས་གའི་ཉའི་མཚན་མོར་མྱ་ངན་ལས་འདས་ཞེས་གསུངས། སྟོན་ཐའི་ཚེས་བརྒྱད་ལ་འདས་པར་འདོད་པའང་སྣང་། སྟོན་པ་འདས་ནས་ལོ་དུ་སོང་བརྩི་ཚུལ་ལ་མང་ཉུང་བྱུང་བ་ནི། རྒྱ་གར་དུ་ཉན་ཐོས་སེནྡྷ་པ་རྣམས་ཉིན་བཞིན་སྟོན་པ་འདས་པའི་ལོ་ཟླ་ཞག་གྲངས་བརྗོད་སྲོལ་ཡོད་པ་ལས། ཕྱིས་མ་ག་དྷར་སློབ་དཔོན་མཐོ་བཙུན་གྲུབ་རྗེ་དང་། བདེ་བྱེད་བདག་པོ་སྤུན་གྱིས་ཙན་དན་གྱི་ལྡེ་གུ་སྤུངས་པ་ལས་བྱང་ཆུབ་ཆེན་པོའི་སྐུ་རང་གྲུབ་ཏུ་བྱུང་བ་དེ་ཕྱིན་ཆད་དེ་ཡི་དུས་ཀྱང་བརྗོད་པ་ལས། ཕྱིས་བྱང་ཆུབ་ཆེན་པོ་བྱོན་པ་དང་སྟོན་པ་འདས་དུས་ནོར་བ་ཡིན་གསུངས། འདི་སྐབས་སུ་བླ་མ་དག་ལྷ་མོ་དྲི་མེད་འོད་ལུང་བསྟན་པའི་མདོ་ལས། ང་འདས་ནས་ལོ་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་ཆོས་རྒྱས་པར་འགྱུར་རོ་ཞེས་གསུངས་པ་གདོང་དམར་ཅན་བོད་ཡིན་ལ་དེར་ཆོས་དར་བའི་དུས་ཚིགས་དང་། གཞན་ཡང་ཀླུ་སྒྲུབ་སོགས་ལུང་བསྟན་པའི་ལོ་ཚིགས་དང་། རྒྱལ་པོ་སོགས་ཀྱི་རབས་བརྩིས་ན་དེ་དང་མི་འགྲིགས་པའི་ལུགས་གཞན་མི་འཐད་ལ། དུས་འཁོར་རྒྱུད་ཀྱི་དངོས་བསྟན་ལྟར་བརྩིས་པའི་ལོ་ཚིགས་དེ་ལས་ལོ་སྟོང་ལྔ་བརྒྱ་སོང་བ་ན་རྒྱ་མཚོ་རྣམ་རྒྱལ་ཁྲིར་ཕེབས་པ་དང་དེ་དང་མི་རིང་བར་སྲོང་བཙན་སྒམ་པོའི་སྐུ་དུས་དང་འགྲིགས་པ་སོགས་འཐད་པ་དུ་མ་ཡོད་པར་བཤད། ཡང་ཕུག་ལུགས་ཀྱི་སྟོན་པ་འདས་ནས་ལོ་དུ་སོང་གི་གྲངས་དེ་ལ་སྟོང་དང་ཉིས་བརྒྱ་ང་དྲུག་བསྣན་ན་མཉམ་མེད་ཇོ་བོ་རྗེ་མར་མེ་མཛད་དང་། དེའི་རྗེས་འབྲངས་མཆིམས་ཆེན་དང་དབུས་པ་བློ་གསལ་སོགས་གངས་ཅན་མཁས་པ་དུ་མས་བཞེད་དེ། ཇོ་བོ་རྗེས་སྟོན་པ་ཉིད་ཤིང་ཕོ་བྱི་བ་ལ་ལྷུམས་སུ་ཞུགས། ཤིང་གླང་ལ་སྐུ་བལྟམས། ས་ཕག་ལོར་སངས་རྒྱས། ཤིང་སྤྲེལ་སྟོན་ཐ་ཆུང་གི་ཚེས་བརྒྱད་ལ་མྱ་ངན་ལས་འདས་པ་ཞེས་བཞེད། ཡང་སྟོང་དང་ཉིས་བརྒྱ་རེ་ལྔ་བསྣན་ན་འདུལ་འཛིན་ནེལྤ་པཎ་ཆེན་གྱི་
ལུགས་སོ། །སྟོང་དང་ལྔ་བརྒྱ་སོ་དགུ་བསྣན་ན་ཆོས་རྒྱལ་སྲོང་བཙན་སྒམ་པོའི་བཀའ་ཆེམས་ཀྱི་ལུགས་སོ། །དེ་ལྟར་ཕུག་ལུགས་ལས་མང་བ་འདི་རྣམས་སོ་སོའི་ཁུངས་དང་འབྲེལ་མོད་ཀྱང་། རྒྱ་གར་ན་བྱི་བ་སོགས་ལོ་བཅུ་གཉིས་དང་། དེ་དབང་ཐང་ཤིང་སོགས་ཀྱིས་ཕྱེ་བའི་དྲུག་ཅུའི་རྣམ་གཞག་གི་སྲོལ་མེད་ཀྱང་། རབ་བྱུང་སོགས་དྲུག་ཅུའི་ཐ་སྙད་ཙམ་ཡོད་པས་མེ་ཡོས་དང་རབ་བྱུང་དོན་གཅིག་པར་བཞེད། དེ་ཡང་ལོའི་ཐ་སྙད་བཅུ་གཉིས་དང་དྲུག་ཅུ་ལྟ་བུ་མ་སྦྱར་བར་ལོ་དུ་སོང་རིམ་བརྩིས་བྱས་པས་ལོ་གྲངས་མང་ནས་ནོར་བའམ། གཞན་ཡང་བགྲོད་པ་རེ་ལ་ལོ་རེར་བརྩི་བའི་ལུགས་ཀྱང་ཡོད་ཅེས་གྲགས་པ་ལྟར་ཡིན་ནམ། རྒྱུ་མཚན་ཅི་ཞིག་གིས་ཡིན་མ་ངེས་ཀྱང་། དུས་འཁོར་རྩ་རྒྱུད་གསུངས་པའི་ལོ་གྲངས་ཕུག་ལུགས་ཀྱི་འདོད་པ་དེ་ལས་བཞི་ཕྲི་བ་ལས་མང་བར་ཕྲི་ན་དུས་འཁོར་རྒྱུད་ཀྱི་དངོས་བསྟན་ལོ་གྲངས་དང་མི་འགྲིགས་ཤིང་། དུས་འཁོར་རྒྱུད་གསུངས་པའི་ལོ་དང་མྱང་འདས་ཀྱི་ལོ་དུས་གཅིག་མིན་པར་དུས་འཁོར་རྩ་རྒྱུད་བསྟན་པའི་རྗེས་སུ་ལོ་ཞེ་དྲུག་བར་དུ་བཞུགས་པར་འདོད་པ་ལྟར་ན་ཕུག་ལུགས་ཀྱི་སངས་རྒྱས་མྱ་ངན་ལས་འདས་པའི་ལོ་གྲངས་དེ་ལ་ཞེ་དྲུག་གིས་ཕྲི་བ་འདི་ལས་མང་བ་ཕྲིས་ནའང་བསྟན་རྩིས་དང་ཀླ་ཀློའི་གནས་ཚད་སོགས་དང་ངེས་པར་མི་འགྲིགས། ཕུག་ལུགས་ཀྱི་དུས་འཁོར་རྒྱུད་གསུངས་པའི་ལོ་དང་སྟོན་པ་མྱ་ངན་ལས་འདས་པའི་ལོ་གྲངས་འདྲ་ལ་དེ་ལས་མང་བ་ནི་དུས་འཁོར་རྒྱུད་རྩ་འགྲེལ་གྱི་དངོས་བསྟན་དང་མི་འགྲིགས་པ་ལྟ་ཅི། ཕུག་ལུགས་ཀྱི་དེ་ལའང་གསུམ་ཙམ་གྱི་མང་སྐྱོན་ཡོད་དོ། །སྟོན་པའི་འདས་ལོ་མང་བ་ཅན་གྱི་ལུགས་ཕལ་མོ་ཆེ་ལྟར་ན། དེང་སང་གི་དུས་སུ་བསྟན་པ་སྔ་དར་གྱི་ཚད་སྔར་ནས་རྫོགས་ཏེ་དྲག་པོ་འཁོར་ལོ་ཅན་བྱོན་རྗེས་ལོ་མང་པོ་སོང་བར་འདོད་དགོས་པས། དེ་རྣམས་སྒྲ་ཇི་བཞིན་དུ་ཁས་བླང་དུ་མི་བཏུབ་པས་ལོ་དག་གི་ཞིབ་ཆའི་ངེས་པ་ཡོད་པ་དུས་འཁོར་རྒྱུད་ཀྱི་དངོས་བསྟན་
དང་འགྲིགས་པ་ཞིག་ཁས་ལེན་དགོས་པར་མངོན་ཏེ། ཞིང་འདིའི་ཐུན་མོང་གི་གདུལ་བྱའི་ངོར་སངས་རྒྱས་ཤཱཀྱ་ཐུབ་པ་གཅིག་གིས་ཆོས་བསྟན་ནས། མྱ་ངན་ལས་འདས་པ་ལས་དུ་མ་སྔ་ཕྱིར་བྱུང་བ་མི་སྲིད་པའི་ཕྱིར་རོ། །གཞན་ཡང་གདན་རབས་སོ་གཉིས་ཀྱི་ལོ་ཚིགས་སོགས་ལོ་དག་མ་འགྲིགས་ནས་བོད་འགྲེལ་རྣམས་སུ་འདོད་པ་མི་མཐུན་པ་དུ་མ་བྱུང་སྣང་སྟེ། ཁ་ཅིག་གིས་རྒྱ་མཚོ་དང་རྣམ་རྒྱལ་ཐ་དད་དུ་བགྲང་ནས་རིགས་ལྡན་ཉེར་དྲུག་བྱེད་པ་དང་། ཁ་ཅིག་གིས་དཔལ་སྐྱོང་དང་སེང་གེ་གཅིག་ཏུ་བགྲང་བ་དང་། ས་སྐྱ་བླ་མ་དམ་པས་མཐའ་ཡས་དང་རྣམ་རྒྱལ་ཐ་དད་དུ་བགྲང་སྟེ་རིགས་ལྡན་ཉེར་ལྔ་རྫོགས་པའི་རྗེས་སུ་དྲག་པོ་འཁོར་ལོ་ཅན་འབྱོན་པས་ཉེར་དྲུག་ཏུ་བཤད་ཅིང་། རིགས་ལྡན་འཇམ་དཔལ་གྲགས་པ་ལོ་ཉིས་བརྒྱར་བཞུགས་པ་དང་། དྲག་པོ་འཁོར་ལོ་ཅན་ལོ་བརྒྱ། རིགས་ལྡན་གཞན་རྣམས་ཀྱིས་ལོ་དྲུག་ཅུ་རེར་ཆོས་བསྟན་པར་བཞེད། དེ་ལ་སོགས་པ་ཤམ་བྷ་ལའི་རྒྱལ་རབས་འཆད་པའི་སྐབས་འདིར་འདོད་པ་མི་འདྲ་བ་དུ་མར་སྣང་བ་ཡི་གེ་མང་བས་འདིར་མ་བཀོད་ལ། དེ་རྣམས་ཕལ་ཆེ་བ་རྒྱུད་ཀྱི་ཚིག་དང་མི་མཐུན་ཞིང་ཁུངས་དང་མ་འབྲེལ་པའི་རྟོག་བཟོ་དཔྱད་མི་བཟོད་པར་སྣང་ཡང་འདིར་མ་སྤྲོས་སོ། །དེ་ཡང་བསྟན་པའི་གནས་ཚད་མདོ་རྣམས་ལས་སྟོང་ཕྲག་གཅིག་དང་ཡང་ཉིས་སྟོང་ལྔ་བརྒྱ་སོགས་ཅི་རིགས་སུ་གསུངས་པ་རྣམས་དགོངས་པ་ཅན་དང་། ལྔ་སྟོང་དུ་གསུངས་པ་དགོངས་པ་ཅན་མ་ཡིན་པར་དོན་ལ་གནས་པར་མཁས་པ་ཀུན་བཞེད་པ་མཐུན་ཅིང་། དེ་ཉིད་དུས་འཁོར་གྱི་རྒྱུད་ལས་གསུངས་པ་ཞིབ་རྩིས་ཡིན་པའི་ཁྱད་ཅུང་ཟད་ལས་ཁོག་འགྲིགས་པས་རྒྱུད་འདི་ལས་གསུངས་པ་བཞིན་རྩི་དགོས་ལ། སྟོན་པ་འདས་པའི་ལོ་དེ་ཡི་ཕྱི་ལོ་ནས་མགོ་བརྩམ་སྟེ། བསྟན་རྩིས་བརྩི་དགོས་པ་ཡིན་ནོ། །དེ་ཡང་སྟོན་པའི་བསྟན་པ་ལོ་ལྔ་སྟོང་དུ་གནས་པ་དེར་ལྔ་བརྒྱ་རེ་ལ་སྡེ་ཚན་དུ་བྱས་པའི་ལྔ་བརྒྱ་ཕྲག་བཅུ་འབྱུང་བའི་
དང་པོ་གསུམ་འབྲས་བུའི་དུས་ཞེས་དགྲ་བཅོམ་དང་ཕྱིར་མི་འོང་རྒྱུན་ཞུགས་ཀྱི་དུས་གསུམ། དེ་ནས་ཤེས་རབ་ཏིང་འཛིན་ཚུལ་ཁྲིམས་ཏེ་སྒྲུབ་པའི་དུས་གསུམ། དེ་རྗེས་མངོན་པ་མདོ་སྡེ་འདུལ་བ་ཡི་ལུང་གི་དུས་གསུམ། དེ་ནས་ལྔ་བརྒྱ་ཐ་མ་ནི་རྟགས་ཙམ་འཛིན་པའི་དུས་སུ་བཞེད་དོ། །དེ་ལྟར་བརྩིས་ནས་ད་ལྟ་ཅི་ཙམ་ལ་སླེབས། མ་འོངས་ཇི་ཙམ་གནས། ད་ལྟ་རིགས་ལྡན་གང་ཞིག་ཁྲི་ལ་བཞུགས་ནས་ལོ་དུ་སོང་། ད་གཟོད་དུ་ཡོད། དྲག་པོ་འཁོར་ལོ་ཅན་ནམ་འབྱོན་པ་སོགས་ལེགས་པར་རྟོགས་པ་ནི་ལོ་དག་ལ་རག་ལས་པས་འདིར་སོ་སོའི་ལུགས་དང་། ཁྱད་པར་དུས་འཁོར་གྱི་རྒྱུད་ནས་བསྟན་པའི་ལོ་དག་གི་གནད་མདོར་བསྡུས་སུ་བརྗོད་པ་སྟེ། སྤྱིར་བསྟན་པའི་གནས་ཚད་ཁྱད་པར་རིགས་ལྡན་སུ་ཞིག་ཁྲི་ལ་བཞུགས་པ་སོགས་རྒྱུད་འདིའི་དབང་གི་སྐབས་སུ་དུས་བརྗོད་པ་ལ་ཉེ་བར་མཁོ་བས་འདིར་བཤད་པ་ཡིན་ནོ། །དེ་བཞིན་དུ་བསྡུས་རྒྱུད་ལས་གྲུབ་མཐའི་རྩིས་སྦས་པར་མཛད་ཀྱང་། གྲུབ་རྩིས་ཀྱི་རྩིས་འཕྲོ་བཙལ་བའི་རྩིས་གཞུང་རྣམས་ལ། སྔོན་སྟོན་པ་སངས་རྒྱས་པའི་དུས་ཀྱི་གཟའ་འཛིན་སོགས་དང་བསྒྲིགས་ཤིང་། སྟོང་ཆེན་གྱི་ལོ་ཚོགས་སོགས་སྐར་རྩིས་ཀྱི་གནད་རྣམས་མཐར་ཆགས་སུ་དཔྱད་པ་ཞིབ་མོས་གཏན་ལ་ཕབ་པས་ཕུག་པའི་ལུགས་ཉིད་གྲགས་ཆེ་ལ། ཕུག་པའི་རྩིས་གཞུང་ལག་ལེན་དུ་བསྟར་བའི་གཞུང་ཚང་ལ་དཔྱིས་ཕྱིན་པར་བཤད་པ་སྨིན་གླིང་ལོ་ཆེན་པའི་རྩིས་གཞུང་ཉིན་བྱེད་སྣང་བ་འདི་ལེགས་བཤད་ཆེ་བར་མངོན། །འདི་དང་རྩིས་འཕྲོ་སྟེར་རྒྱུ་ཅུང་ཟད་མི་འདྲ་བའི་ཁྱད་པར་ལས། མཚུར་རྩིས་ཞེས་གྲགས་པ་དང་། ཕྱིས་སུ་སུམ་པ་ཡེ་ཤེས་དཔལ་འབྱོར་གྱིས་རྩིས་འཕྲོ་བཙལ་བ་དགའ་ལྡན་རྩིས་གསར་དུ་གྲགས་པ་དང་། ཐཱོ་ཀྭན་གྱི་རྩིས་གཞུང་སོགས་རྩིས་འཕྲོའི་དབང་གིས་ཅུང་ཟད་མི་འདྲ་བའི་རྩིས་གཞུང་
དུ་མ་གསར་དུ་བྱུང་། རྔ་པན་ཀུན་དགའི་མཚན་ཅན་གྱིས་རྩིས་གསར་ཐུབ་བསྟན་མཛེས་རྒྱན་ཞེས་པ་གཟའ་འཛིན་ཐིག་པར་དེ་དུས་གྲགས་ཆེ་ཡང་གཞུང་ནོར་ཚབས་ཆེ་བ་ཅན་དུ་མཐོང་། གཞན་རྣམས་རྩིས་འཕྲོའི་དབང་གིས་ཅུང་ཟད་མི་འདྲ་བར་གྱུར་ཅིང་། སོ་སོའི་ལུགས་ཀྱི་སྟོང་འཇུག་དང་འགྲིགས་པ་དང་། གཟའ་འཛིན་ཐིག་པ་སོགས་རང་བསྟོད་ཅན་དེ་དག་རྩ་རྒྱུད་དངོས་ལས་གསུངས་པའི་རྩིས་འཕྲོ་རྣམ་དག་རྙེད་པ་ཡིན་མིན་ངེས་དཀའ་ཡང་རེ་ཞིག་དེ་ལྟར་བྱས་པ་ལ་འགལ་བ་མེད་དོ། །འོན་ཀྱང་རགས་པ་ཙམ་དུ་མིག་སྐར་དང་མཐུན་པ་དང་། གཟའ་འཛིན་དང་བསྟུན་ན་ཉིན་སྣང་ལས་སྒྲ་གཅན་ལོངས་སྤྱོད་ལ་ནུར་ཕྲི་བསྣན་བྱེད་པ་འདི་མན་ངག་ཁུངས་ཅན་ཞིག་ཡིན་འདྲ་ལ། འདི་ལས་དཔགས་ནས་ཕུག་གྲུབ་ཉི་སྐར་ལ་ཆུ་ཚོད་སོ་གཅིག་གམ་སོ་གཉིས་ཙམ་བསྣན་ན་འགྲིགས་ཀྱི། དེ་ལས་མང་ན་མང་སྐྱོན་འདུག་པས། འདི་ཚུན་ཆད་རྩིས་འཕྲོ་སྣ་ཚོགས་བཙལ་བ་རྣམས་ལ་སྐྱོན་མི་འོང་འདྲ་སྟེ། རྩ་རྒྱུད་ཀྱི་རྩིས་འཕྲོ་རྣམ་དག་མིན་ཡང་དེའི་སྐྱོན་བསགས་ནས་འཕེལ་བ་མེད་དེ་བསྒྱུར་བགོད་ཀྱི་རི་མོ་དག་པའི་གནད་ཀྱིས་སོ། །ཉི་སྐར་ལ་ཆུ་ཚོད་གཟུགས་མེ། སྲང་གཟུགས་ཆུ་སོགས་བྱིན་ན་སྒྲ་གཅན་གདོང་མཇུག་ལ་ཕྲི་མི་དགོས་ཏེ་གནད་གཅིག་པའི་ཕྱིར་རོ། །འདི་ཡང་ཕུག་གྲུབ་གཞིར་བཞག་ལ་སྣོན་བཏབ་པ་ལེགས་པས་རྩིས་འཕྲོ་གསར་པ་འཚོལ་བའི་ངལ་བ་མི་དགོས་སོ། །རྩིས་འཕྲོ་ཙམ་གྱི་ཁྱད་མ་གཏོགས་གཞུང་གི་རི་མོའི་འགྲོས་མཐའ་དག་ལ་ཕུག་གྲུབ་ལ་ནོར་བ་མེད་ཅིང་ལེགས་པར་གཏན་ལ་ཕེབ་པར་མཐོང་ངོ་། །གཟའ་འཛིན་ནི་གཞུང་གི་རི་མོའི་སྟེང་དུ་མན་ངག་གི་ཞིབ་རྩིས་སྦྱར་ཤེས་ན་གང་གིས་ཀྱང་ཐིག་པར་བྱར་ཡོད་པར་མངོན། སྤྱིར་མཉམ་གཉིས་སྐབས་རི་མོ་ལ་ཤར་བ་བཞིན་འཛིན་ཆ་དང་དུས་སྔ་ཕྱི་ཕལ་ཆེར་ཐིག་ལ།
དེ་ལས་མཐོ་བ་བྱང་བགྲོད་དུ་འཛིན་ཆ་ཅུང་ཆེ་དུས་སྔ་བ་དང་། ལྷོ་བགྲོད་ཀྱི་ཕྱོགས་སུ་གྱུར་ཚེ་སྔ་མ་ལས་གོ་ལྡོག་པར་མཐོང་སྟེ། འདི་ཉི་ཟླ་དང་སྒྲ་གཅན་གྱི་སྐར་མ་སོགས་ཀྱི་རི་མོ་མ་དག་པ་མིན་ཡང་། གླིང་འདིར་མཐོ་དམན་གྱི་མཐོང་ཚུལ་ཞིག་གི་ཁྱད་ཡིན་པ་འདྲ་ཞིང་། དེར་མ་ཟད་འཛིན་དུས་ཀྱི་དབང་གིས་གླིང་འདིའི་སྟེང་ཐད་དང་ཤར་ནུབ་ཏུ་མཐོང་བའི་ཁྱད་པར་དང་། དེ་དང་བསྟུན་པར་ཡུལ་དུས་བསྒྲིག་པའི་ཞིབ་ཆ་སོགས་དུ་མ་ཞིག་དགོས་པར་མངོན་ནོ། །ཁྱད་པར་དུ་ཉི་འཛིན་ཐིག་དཀའ་བར་སྣང་། །སྤྱིར་རི་མོས་མ་ཐིག་པ་མིན་ཡང་། དུས་ལྟས་ལས་རི་མོ་བཞིན་དུ་མི་འཛིན་པ་དང་། རི་མོ་མ་ཤར་ཀྱང་འཛིན་པ་ཡོད་པར་གསུངས་པ་དང་། གཟའ་འཛིན་གྱི་དུས་གཅིག་ལ་ཡང་འོད་ཡུལ་བ་སོ་སོས་ལ་ལས་ཕྱེད་འཛིན། ལ་ལས་རིལ་འཛིན་སོགས་སུ་མཐོང་བ་སོགས་དངོས་སུ་བྱུང་བའི་ལོ་རྒྱུས་སྣང་བས་སྐབས་ལ་ལར་རི་མོར་ཤར་བ་བཞིན་གཟའ་འཛིན་མ་ཐིག་པ་ཙམ་གྱིས་རྩིས་འཕྲོ་མ་དག་པའི་ངེས་པ་མི་སྣང་ལ། རྣམ་པ་ཀུན་ཏུ་རི་མོར་ཤར་བ་བཞིན་ཐིག་པའི་རྩིས་གཞུང་བོད་ན་དཀོན་པར་སྣང་ངོ་། །རྒྱ་ནག་པས་གཟའ་འཛིན་བརྟག་པའི་རྭ་གདོང་བར་ཁྱད་ཟེར་བ་སོགས་རི་མོ་མང་པོ་ཅན་འདི་གནད་གང་ཡིན་བརྟགས་ཏེ་བོད་རྩིས་ཀྱི་སྟེང་དུ་ཕབ་ནས་དོན་གཅིག་པར་འགྱུར་བའི་ལག་ལེན་འཇུག་སླ་ཞིག་བྱེད་རྒྱུ་ཡོད་འདྲ་སྙམ་ཡང་བདག་གིས་ཕྱིས་ཚོད་འདི་འདྲའི་ངལ་བ་མི་ནུས་པས་སླར་རྩིས་རིག་སྨྲ་བའི་བློ་ལྡན་དག་གིས་བརྟགས་པར་བྱོས་ཤིག །གཞན་ཡང་མིག་སྐར་གྱིས་རགས་པ་ཙམ་ལས་ཞིབ་ཆ་མི་རྟོགས་མོད་ཀྱི། སྐར་མ་གང་ཡིན་དེའི་སྐར་མ་དང་པོའི་ཐད་དུ་ཟླ་བ་སོགས་སླེབས་པ་ན་དེའི་ཆུ་ཚོད་དང་པོའི་ས་ཁྱོན་ཡིན་པ་ལྟ་བུར་འཛིན་དགོས་འདྲ་ལ། ཟླ་སྐར་སོགས་ཀྱི་ཡུལ་གྱི་ལོངས་སྤྱོད་ལས་ཉིན་མོའི་ཆ་ཇི་ཙམ་པ་འདས་པ་སོགས་བལྟ་བཞིན་པའི་དུས་དེའི་ཡུལ་དུས་བསྒྲིག་ནས་
བརྟགས་དགོས་པ་ཡིན་ནོ། །དུས་སྦྱོར་འཕོ་ཁྱིམ་འདི་ཕུག་པས་ཉི་བར་ལས་བརྩི་ཡང་། ཉི་དག་ལས་བརྩི་དགོས་པར་མངོན་ལ། དེ་ལྟ་ན་ཕུག་གྲུབ་ཉི་དག་ལ་ཆུ་ཚོད་སོ་གཉིས་ཙམ་བྱིན་ནས་བརྩིས་པས་འགྲིག །དེ་ལ་རིས་སྦྱོང་བས་བྱེད་སླ་དང་དོན་ཁྱིམ་འབྱེད་མི་དགོས། དེ་བཞིན་དུས་གཟེར་རྣམས་ཉི་དག་གི་སྟེང་དུ་གཏན་ལ་ཕབ་ན་ལག་ལེན་བདེ། ཉིན་མཚན་རིང་ཐུང་མཐར་ཐུག་གི་ཚད་འདི་ལ་ཕུག་པས་སོ་གསུམ་དང་ཉེར་བདུན་གྱི་ཁྱད་དུ་འདོད་ཀྱང་། སྤྱིར་དབྱངས་འཆར་སོགས་ལས་བཤད་པ་ལྟར། ཉི་མ་རིང་བ་མཐར་ཐུག་དུས་ཉིན་ཆུ་ཚོད་སོ་དྲུག་མཚན་ཉེར་བཞི། ཐུང་བ་མཐར་ཐུག་ལས་དེ་ལས་ལྡོག་པ་འདི་འཐད་ལ། གཞན་དག་རིང་བ་མཐར་ཐུག་ལ་བཞི་བཅུར་བཤད་པ་སྣང་ཡང་འདི་ཙམ་རིང་ཆེས་སམ་སྙམ་སྟེ་ཆུ་ཚོད་འཁོར་ལོ་སོགས་ལ་བརྟེན་ནས་དཔྱད་པར་བྱའོ། །ས་ཁད་ཤིན་ཏུ་ཡང་བ་ལ་ཉི་འོད་ཕོག་སྔ་བའང་ཡོད། གཞན་གཟའ་ལྔ་མིག་སྐར་དང་མཐུན་པ་སོགས་ཉི་ཟླའི་ལོངས་སྤྱོད་མ་གཏོགས་རྩིས་འཕྲོ་གཞན་ཕུག་པ་ལྟར་ཀྱང་ལེགས། ཉི་ལྡོག་ནི་ཉིན་སྣང་གི་ཉི་ལྡོག་ཕོག་པའི་ཉིན་དེ་ཉིད་དང་པོར་བྱས་ནས་ཡར་བགྲོད་ནས་ཉིན་ཞག་དགུ་པ་ལ་ལྡོག་པ་འདྲ་སྟེ་ཉི་གྲིབ་བརྟག་པས་དེ་དང་འགྲིག་པ་འདྲ། འདི་རྒྱ་རྩིས་ཀྱི་ཉི་ལྡོག་དང་འདྲ་འདུག །དེ་བཞིན་དབུགས་ཐོབ་སོགས་དུས་གཟེར་གྱི་ཚད་རྣམས་ཉི་མའི་དབང་གིས་ཡིན་པས་གོང་གི་རིགས་པས་དཔགས་ཏེ་ཤེས་པར་བྱའོ། །གོང་བཤད་འདི་རྣམས་ཀྱི་ཁྱད་མ་གཏོགས་རྩིས་གཞུང་གཞན་ཐམས་ཅད་ཕུག་པའི་ལུགས་ལྟར་བྱས་ན་ལེགས་པར་མངོན་ནོ། །འདི་རྣམས་ཕྱི་དུས་ཀྱི་འཁོར་ལོའི་དགོངས་དོན་སྐར་རྩིས་ཀྱི་གནད་ཅུང་ཟད་འཕྲོས་དོན་དུ་སྨྲོས་པ་ལགས་སོ། །དེ་ཡན་ཆད་ཀྱིས་ལེའུ་དང་པོའི་དགོངས་དོན་གནས་པ་ཉེར་བཞིས་བཤད་པ་སོང་ནས། ཚིགས་བཅད་བརྒྱ་རེ་དགུ་པ་འདིས་འཇིག་རྟེན་ཁམས་ཀྱི་ལེའུའི་དོན་ཞུས་པ་བཤད་ཟིན་པ་དང་། ལེའུ་ཕྱི་མ་ཞུ་བའི་སྐབས་དབྱེ་བ་ཡིན་ཏེ། ཕྱི་
འཇིག་རྟེན་གྱི་ཁམས་ནི་ཐོག་མར་ཆགས་པ་དང་ཆགས་ནས་གནས་པ་དེ་དག་གི་རྣམ་པ་དང་ཚད་ལ་སོགས་པ་བསྐྱེད་པའམ་སྤྲོས་པ་དག་དང་། དུས་ཀྱི་ཆ་འཛིན་པ་ཁྱིམ་བཅུ་གཉིས་ལ་གནས་པའི་རྒྱུ་སྐར་དང་། དེ་ལ་གཟའ་ཡི་རྒྱུ་བ་ཇི་ལྟར་ཡིན་པ་དང་། དེ་དང་མཉམ་པའམ་མཚུངས་པར་དུས་གང་ལ་ས་དུམ་བུ་བཅུ་གཉིས་སུ་ཆོས་ཀྱི་འཁོར་ལོ་ཅན་ནི་འབྱུང་བ་དང་ཀླ་ཀློ༷་རྣམས་ཀྱི་ཆོས་ནི་ཉམས་པར་བྱས་ཤིང་མཆོག་གི་བདེ་བའི་གནས་ལ་རིགས་ལྡན་གྱིས་ནི་དམ་པའི་ལམ་སྦྱིན་པ་ཡི་ཚུལ་འདི་དག་ཐམས་ཅད་སྟོན་པ་བདག་གིས་ཁྱོད་ལ་དོན་ནི་ཇི་ལྟ་བ་བཞིན་དུ་བཤད་དོ། །ཟླ་བ་བཟང་པོ་ཞེས་བོས་ནས། དུས་གསུམ་ལས་བརྩམ་སྟེ་སླར་ཡང་ཁྱོད་ནི་སྐྱེ་བོ་ཀུན་ལ་འཕྲལ་གྱི་ཕན་པའི་དོན་དང་གཏན་གྱི་ཐར་པའི་སླད་དུ་སྟོན་པ་བདག་ལ་ཅི་ཞིག་འདྲི་ཞེས་ལེའུ་ཕྱི་མའི་དོན་ཞུ་བར་བསྐུལ་ཞིང་སྐབས་ཕྱེ་བའོ། །ལེའུའི་མིང་ནི། དཔལ་དང་པོའི་སངས་རྒྱས་ཆེན་པོ་རྩ་རྒྱུད་སྟོང་ཕྲག་བཅུ་གཉིས་པ་ལས་ཕྱུང་བ། རྒྱུད་ཀྱི་མིང་གཉིས་སུ་མེད་པའི་དཔལ་ཕྱི་ནང་གཞན་གསུམ་གྱི་ཁྱབ་བྱེད་དུ་འཇུག་པ་དུས་ཀྱི་འཁོར་ལོ་ཡི་བསྡུས་པའི་རྒྱུད་ལས། ཕྱི་དུས་ཀྱི་འཁོར་ལོའི་མིང་གིས་མངོན་པར་བརྗོད་པར་བྱ་བ་འཇིག་རྟེན་གྱི་ཁམས་རྣམ་པར་བཀོད་པའི་ལེའུ་སྟེ་དང་པོའོ། །ལེའུའི་སྐད་དོད་པ་ཊ་ལ་ཞེས་པ་པ་ཊ་གོས་སམ་སྣམ་བུ་སོགས་ལ་འཇུག་ཅིང་ལ་ལེན་པ་ལ་འཇུག་པས་གོས་ཀྱིས་ལུས་གཡོགས་ནས་སྐྱོབ་པ་ལྟར་རྒྱུད་དོན་གྱི་གནས་སྐབས་གོས་ལྟ་བུའི་ཆིངས་འདིས་བཅིང་ནས་འཇུག་པའི་དོན་གྱིས་ལེའུ་ཞེས་སོ། །གཞན་ཡང་ལེའུའི་སྐད་དོད་པ་རི་ཝ་ཏྲ་ཞེས་ཡོངས་སུ་བསྒྱུར་བའམ་ཡོངས་སུ་བརྗེ་བ་དང་། པ་རི་ཚེ་ད་ཞེས་ཡོངས་སུ་གཅོད་པ་དང་། ཀྲ་མ་བྷེ་ད་ཞེས་རིམ་པར་ཕྱེ་བ་སོགས་ཀྱི་ངེས་ཚིག་གི་དོན་ཅན་དུ་བཤད་དུ་ཡོད་ཀྱང་འདིར་ལེའུའི་སྐད་དོད་དུ་རྒྱ་དཔེ་ལ་པ་ཊ་ལ་ཡོད་ཅེས་བླ་མ་རྣམས་གསུངས་སོ། །ཕྱོགས་དང་དུས་ཀྱི་ཆས་དབྱེ་འཇིག་རྟེན་ཁམས་ཀྱི་བཀོད་པ་དང་། །དུས་ཀྱི་ཆ་འཛིན་རྣམས་ཀྱི་བགྲོད་པ་དག་དང་དུས་བཞི་སོགས། །ཕྱི་རོལ་དུས་ཀྱི་འཁོར་ལོའི་དགོངས་དོན་ཡིད་འོང་པདྨའི་ཚལ། །ལེགས་བཤད་ཉི་མས་ཕྱེས་ལ་མཁས་རྣམས་དགྱེས་པའི་གཟིགས་མོར་མཛོད། །ཅེས་བྱ་བ་བར་སྐབས་ཀྱི་ཚིགས་སུ་བཅད་པའོ། །ལེའུ་དང་པོའི་དོན་རྣམ་པར་བཤད་ཟིན་ཏོ།། །།