དཔལ་དུས་ཀྱི་འཁོར་ལོའི་རྫོགས་རིམ་རྡོ་རྗེའི་རྣལ་འབྱོར་གྱི་དགོངས་གནད་གསལ་བྱེད་བཻཌཱུརྱའི་མེ་ལོང་།
དཔལ་དུས་ཀྱི་འཁོར་ལོའི་རྫོགས་རིམ་རྡོ་རྗེའི་རྣལ་འབྱོར་གྱི་དགོངས་གནད་གསལ་བྱེད་བཻཌཱུརྱའི་མེ་ལོང་བཞུགས།
ན་མོ་མཉྫུ་ཤྲཱི་ཀཱ་ལ་ཙཀྲཱ་ཡ། དཔལ་དུས་ཀྱི་འཁོར་ལོའི་རྩ་བའི་རྒྱུད་སྟོང་ཕྲག་བཅུ་གཉིས་པ་ལས། སོ་སོར་སྡུད་པ་རྣམ་པ་བཅུ། །རྒྱལ་བ་ཡི་ནི་དབང་པོར་འགྱུར། །དེ་བཞིན་བསམ་གཏན་མི་བསྐྱོད་པ། །སྲོག་དང་རྩོལ་བ་རལ་གྲི་ཅན། །ཞེས་སོགས་དང་། སོ་སོར་སྡུད་པ་ཡུལ་དང་ནི། །ཡུལ་ཅན་རྣམ་པ་བཅུ་པོ་རྣམས། །ལུས་ལ་འཇུག་པ་མེད་པའོ། །ཤེས་རབ་རྟོག་དང་དཔྱོད་པ་དང་། །དགའ་བ་མི་གཡོ་བདེ་བ་དང་། །བསམ་གཏན་སེམས་ནི་རྩེ་གཅིག་པའོ། །སྲོག་དང་རྩོལ་བ་གཉིས་ཀྱི་ལམ། །མི་འཁྲུགས་པ་རུ་གྱུར་པ་ནི། །དབུ་མར་སྲོག་ནི་འཇུག་པའོ། །ཐིག་ལེ་རུ་ནི་སྲོག་འཇུག་
ཅིང་། །གཉིས་ཀ་འགྲོ་དང་འོང་བ་དག །གཟུང་བ་ཡིད་ནི་རྩེ་གཅིག་པ། །གཏུམ་མོའི་མེ་ནི་སྣང་བ་གང་། །ལུས་ལ་ངེས་པར་གསལ་གྱུར་པ། །ནམ་མཁའ་དེ་ནི་རྗེས་དྲན་འགྱུར། །ཤེས་རབ་ཐབས་ཀྱི་བདག་ཉིད་ཀྱིས། །ལྷན་ཅིག་སྐྱེས་པའི་བདེ་དབང་གིས། །ཡེ་ཤེས་སྐུ་ནི་ཏིང་འཛིན་ཏེ། །ཞེས་དང་། བསྡུས་པའི་རྒྱུད་ལས། སོ་སོར་སྡུད་པ་ལུས་ལ་ཡུལ་དང་ཡུལ་ཅན་བཅུ་པོ་རྣམས་ནི་རབ་ཏུ་འཇུག་པ་མེད་པའོ། །བསམ་གཏན་དག་ཀྱང་ཤེས་རབ་རྟོག་དང་དཔྱོད་པ་དགའ་དང་གཡོ་མེད་བདེ་བ་རྩེ་གཅིག་སེམས་པའོ། །སྲོག་གི་རྩོལ་བ་དག་ཀྱང་ལམ་ནི་གཉིས་པོ་བསྐྱེལ་ཞིང་དབུ་
མར་སྲོག་ནི་ཞུགས་པ་དག་ཏུ་འགྱུར། །ཐིག་ལེར་སྲོག་ནི་རབ་ཏུ་ཞུགས་ཤིང་གཉིས་ཀའི་བགྲོད་པ་བཅོམ་སྟེ་རྩེ་གཅིག་སེམས་པ་འཛིན་པའོ། །གཏུམ་མོའི་སྣང་བར་གང་ཞིག་གྱུར་པ་ངེས་པར་ལུས་དང་ནམ་མཁའ་ལ་ཡང་རྗེས་སུ་དྲན་པར་འགྱུར། །ཤེས་རབ་ཐབས་ཀྱི་བདག་ཉིད་ཀྱིས་ནི་འགྱུར་མེད་བདེ་བའི་དབང་གིས་ཡེ་ཤེས་གཟུགས་ལ་ཏིང་ངེ་འཛིན། །ཞེས་གསུངས་པ་ལྟར། སོར་སྡུད་ནི་ཡུལ་ཡུལ་ཅན་རྣམ་བཅུ་འདྲེས་བྱེད་ཀྱི་རླུང་ལུས་ལ་མི་འཇུག་པར་བྱེད་པའོ། །བསམ་གཏན་ནི་སྟོང་གཟུགས་ཡུལ་དུ་བྱས་ན་སྟོང་གཟུགས་སུ་ཤེས་པའི་ཤེས་རབ་དང་། རྟོག་དཔྱོད་དགའ་བདེ་སེམས་རྩེ་གཅིག་གནས་པ་ལྔ་ལྡན་ནོ། །སྲོག་རྩོལ་ནི་ང་དབུ་མར་འཇུག་པའོ། །སྲོག་མི་ཤིགས་པའི་ཐིག་ལེར་འཇུག་ཅིང་འགྲོ་འོང་བྱེད་པ་འཛིན་པ། །གཏུམ་མོའི་འབར་སྣང་གསལ་ཞིང་ཞུ་བདེ་འདྲེན་པ་རྗེས་དྲན། འཕོ་རླུང་དང་ཐིག་ལེའི་བྱ་བ་འགགས་ཤིང་ཐབས་ཤེས་དབྱེར་མེད་དོན་དམ་ལྷན་སྐྱེས་ཡེ་ཤེས་ཀྱི་སྐུ་འགྲུབ་པ་ཏིང་ངེ་འཛིན་ནོ། །དེ་ཡང་གཞི་རང་བཞིན་ལྷུན་གྱིས་གྲུབ་པའི་གནས་ལུགས། ཆོས་ཐམས་ཅད་ཀྱི་ཆོས་ཉིད་འོད་གསལ་བདེ་གཤེགས་སྙིང་པོ་ལ། སྔགས་རྒྱུད་རྣམས་ལས་གཉུག་མ་མི་ཤིགས་པའི་སྲོག་ཆེན་པོ་ཞེས་བརྗོད་པ། དེ་ཉིད་རྡོ་རྗེ་བཞི་ཡི་
རང་བཞིན་དུ་ཡེ་ནས་དུས་གསུམ་འཕོ་འགྱུར་དང་བྲལ་བར་བཞུགས་པ་ལས་ཆོས་ཐམས་ཅད་ཀྱང་མི་འདའ་བ་ཡིན་ནའང་། གློ་བུར་བའི་ལས་རླུང་དང་ཀུན་རྟོག་གཡོ་བས་འཁོར་བའི་འཁྲུལ་སྣང་ཐམས་ཅད་དོན་ལ་དེ་ལྟར་མ་གྲུབ་བཞིན་སྒྱུ་མ་དང་རྨི་ལམ་ལྟར་ཤར་བས་རང་གནས་ཆོས་ཉིད་ཀྱི་དོན་མ་མཐོང་ཞིང་འཁྲུལ་བར་ཁོར་མོ་ཡུག་ཏུ་འཕྱན་པ་དེ། ཐབས་ཟབ་མོས་འཁྲུལ་སྣང་དབྱིངས་སུ་བསྟིམ་ཞིང་། རང་དང་ལྷན་སྐྱེས་རྣམ་དག་འོད་གསལ་ཆེན་པོ་མངོན་དུ་བྱེད་པ་གང་ཞིག རྡོ་རྗེ་ཐེག་པ་ཐབས་ཀྱི་ལམ་ཐམས་ཅད་ཀྱི་ཟབ་པ་མཐར་ཐུག་པ་འདི་ཡིན་པ་དཔལ་ལྡན་དུས་ཀྱི་འཁོར་ལོས་རྒྱུད་ལས་གསུངས་པའི་རྫོགས་རིམ་རྡོ་རྗེའི་རྣལ་འབྱོར་གྱི་ལམ་བསྒོམ་པ་ལ། སྦྱོར་བ་ཡན་ལག་དྲུག་སྟེ། གཞི་འཛིན་པ་སོར་བསམ་གཉིས་སྐུ་རྡོ་རྗེའི་རྣལ་འབྱོར། རླུང་འཆིང་བ་སྲོག་འཛིན་གཉིས་གསུང་རྡོ་རྗེའི་རྣལ་འབྱོར། བདེ་སྟོང་བསྒྲུབ་པ་རྗེས་དྲན་ཐུགས་རྡོ་རྗེའི་རྣལ་འབྱོར། འཕོ་མེད་ཀྱི་བདེ་བ་སྒྲུབ་པ་ཏིང་ངེ་འཛིན་ཡེ་ཤེས་རྡོ་རྗེའི་རྣལ་འབྱོར་བཞི་སྟེ། འདི་ཐམས་ཅད་ཕྱག་རྒྱ་ཆེན་པོའི་རྣལ་འབྱོར་ཡིན་པར་ཚུལ་གཅིག་གོ། ཡང་རྗེས་ཏིང་གཉིས་ཀ་ཐུགས་རྡོ་རྗེའི་རྣལ་འབྱོར་དུ་བསྡུས་ན་རྡོ་རྗེ་གསུམ་གྱི་རྣལ་འབྱོར་ཐོག་བར་
མཐར་དགེ་གསུམ་མོ། །དེ་དག་གི་དང་པོ་སོ་སོར་སྡུད་པས་འོད་གསལ་གྱི་རྟགས་སྣང་སྟོང་གཟུགས་མཐོང་བར་བྱ་བ་དང་། དེ་ལ་སེམས་གནས་པའི་བསམ་གཏན་སྒྲུབ་པ་གཉིས་ཀྱི་དང་པོ་ཐོག་མར་ཡུལ་ཅན་དབང་པོ་ལྔ་ཡི་ལམ་ནས་རླུང་ལྔ་ལ་ཞོན་པའི་རྣམ་ཤེས་ལྔ་ཡུལ་གཟུགས་སོགས་ལྔ་ལ་འཇུག་ཅིང་གཡོ་བའི་འཕོ་བ་དེ་དག་ལུས་ལ་མི་འཇུག་པར། བསྡོམ་པས་ན་སོ་སོར་སྡུད་པ་ཞེས་བྱ་སྟེ། གནས་དབེན་ཤིང་བདེ་བར་སྟན་བདེ་བར་འཁོད་དེ་སྐྱབས་སེམས་རྡོར་སེམས་སྒོམ་བཟླས་མཎྜལ། བླ་མའི་རྣལ་འབྱོར་དང་ལྷན་སྐྱེས་ཀྱི་བསྐྱེད་རིམ་རྣམས་མདོར་བསྡུས་བྱས་ནས། མི་གཡོ་གསུམ་ལྡན་ཞེས་ལུས་ཀྱི་དགག་སྒྲུབ་བྱ་བྱེད། ངག་གི་སྨྲ་བརྗོད། ཡིད་ཀྱི་རྣམ་རྟོག་སྤང་བ་ནི། དེ་གསུམ་གཡོ་བ་མེད་པར་གནས་པའམ་དབེན་པ་གསུམ་ཞེས་བྱ་ཞིང་སྒོ་གསུམ་གྱི་ལོངས་སྤྱོད་ལ་ལྟོས་པ་མེད་པ་ཞེས་ཀྱང་བྱའོ། །དེའི་ཤུགས་ཀྱིས་རླུང་སེམས་འཕོ་བ་དངོས་སུ་མ་ཁེགས་ཀྱང་རང་སོར་ལྟོས་མེད་དུ་འཇོག་པ་འགྲུབ་པས་འཕོ་བའི་ལོངས་སྤྱོད་ལ་ལྟོས་པ་མེད་པ་དང་བཅས་པའི་ལྟོས་མེད་བཞི་ལྡན་དུ་ཡང་བརྗོད་དོ། །དབེན་གསུམ་འདི་སྔོན་འགྲོ་ཡིན་པས་ཞག་གཉིས་གསུམ་འདི་ག་རང་བསྒོམས་ཀྱང་ལེགས། དེ་ལྟར་མ་བྱུང་
ཡང་མི་གཡོ་གསུམ་ལྡན་དང་མ་བྲལ་བའི་སྒོ་ནས་སོར་བསྡུད་སོགས་ཉམས་སུ་ལེན་པར་བྱའོ། །སོར་སྡུད་ཀྱི་དངོས་གཞིའི་དུས་སུ། ཐོག་མར་མུན་ཁང་དུ་བསམ་གཏན་གྱི་འབོལ་ཆུང་སྟེང་། ལུས་གནད་རྐང་པ་རྡོ་རྗེའི་སྐྱིལ་ཀྲུང་བྱ་ཞིང་། འོག་ཆགས་དམ་པོ་རྒྱབ་པས་ཐུར་སེལ་གྱི་རླུང་འཆིང་། སྒལ་ཚིགས་དང་ལྟག་པ་དྲང་པོར་བསྲང་། སྙིང་ག་ནས་ལྟེ་བའི་བར་གྱི་རྩ་དྲང་བས་སྲོག་རླུང་འཆིང་། དེ་ལྟར་དྲང་པོར་མ་བྱས་ན་མདུན་དུ་རྐུར་ན་སྙིང་དབུས་ཀྱི་ནང་གི་མདུན་རླུང་དང་འཕྲད་པས་ཤེས་པ་ཧོལ་ལེ་བ་བྱུང་། གཡས་སུ་ཡོ་ན་མེ་དང་འཕྲད་པས་འཚུབ་ལོང་བ། གཡོན་དུ་ཡོ་ན་ཆུར་འཕྲད་ཉོག་གེ་བ། རྒྱབ་ཏུ་ཡོ་ན་ས་དང་འཕྲད་པས་བྱིང་ཞིང་སྲ་འཐས་ཀྱི་ཉམས་འབྱུང་། ལྐོག་མས་ཨོལ་མདུད་ནོན་ཙམ་གྱི་མགྲིན་པ་དགུགས་དེས་གྱེན་རྒྱུའི་རླུང་འཆིང་། ལུས་གནད་སྔ་མ་དེ་རྣམས་ཀྱི་ཤུགས་ལས་གསུས་པ་མཉམ་དུ་འབྱུང་བས་མཉམ་གནས་ཀྱི་རླུང་འཆིང་། སོ་དང་མཆུ་རང་སར་བཞག ལྕེ་རྩེ་ཡ་རྐན་ལ་སྦྱར། མགྲིན་པ་སོ་དང་ལྕེ་མཆུའི་ལུས་གནད་འདི་དག་གིས་རྣ་བ་དང་ལྕེའི་རླུང་འཆིང་ལ། སྦྱོར་བ་དེ་རྣམས་དང་རླུང་ཁ་ནས་དལ་བུར་བཏང་བས་སྣའི་རླུང་འཆིང་། ལག་གཉིས་མཐེ་བོས་སྲིན་
ལག་གི་རྩ་བ་མནན་པའི་ཕྱི་ནས་སོར་མོ་རྣམས་ཀྱིས་བསྡོམ་པའི་ཁུ་ཚུར་གཉིས་བརླའི་རྩ་བར་ཅུང་མནན་དུ་བཞག གྲིམ་ལྷོད་རན་པར་བྱ་ཞིང་ལག་ངར་བསྲང་། དེས་ལུས་དབང་ལ་རྒྱུ་བའི་རླུང་དང་ལུས་གནད་ཐམས་ཅད་སྡོམ་པས་ཁྱབ་བྱེད་ཀྱི་རླུང་འཆིང་། ཡང་ན་ལག་གཉིས་མཉམ་བཞག་བྱས་ཀྱང་རུང་། མིག་གི་གཙུག་ཏོར་འཁོར་ལོས་བསྒྱུར་བའི་ལྟ་སྟངས་ཞེས་སྨིན་མཚམས་ནས་སོར་བཅུ་དྲུག་གཞལ་བའི་སྟེང་གི་ནམ་མཁའ་ལ་བལྟ་ཞིང་དེ་ལས་མི་གཡོ་བར་བྱ་སྟེ། མིག་འབྲས་ཧ་ཅང་གདངས་པ་དང་། བཙུམ་པ་མིན་པར་རང་བབ་ཏུ་མིག་འབྲས་གྱེན་དུ་བཟློག་པར་བྱའོ། །ལྟ་སྟངས་དེས་མིག་ཏུ་རྒྱུ་བའི་རླུང་འཆིང་། དེ་ལྟར་རྩ་བ་དང་ཡན་ལག་གི་རླུང་བཅུ་འཆིང་བས་ལུས་གནད་དམ་བྱེད་བཅིང་འདི་གལ་ཆེའོ། །གཙོ་བོར་སེམས་ཀྱི་དམིགས་པ་མི་གཡོ་བ་ལ་བརྟེན་ནས་རླུང་འཆིང་དགོས་པ་ཡིན་ཡང་། དེའི་གྲོགས་སུ་ལུས་གནད་འདི་དག་གལ་ཆེ་སྟེ། སེམས་ཀྱིས་ལུས་ན་བར་བསྒོམས་ནས་ཡུན་རིང་གོམས་ན་ན་བར་འགྱུར་ཡང་། རྡོས་བསྣུན་ན་དེ་མ་ཐག་ན་བ་སོགས་དང་འདྲ་བར་ལུས་དང་རྩ་རླུང་གི་ཐབས་ལ་བརྟེན་ནས་བསྒྲུབ་པའི་ལམ་ཐམས་ཅད་མྱུར་ཞིང་ཟབ་པ་ཡིན་
ནོ། །དེ་ལྟར་དབེན་གསུམ་དང་ལུས་ཀྱི་བྱེད་པ་བཅིངས་པའི་འདུག་སྟངས་ཀྱིས་རྩ་གཡོ་མེད་དུ་འཆིང་། རླུང་མི་གཡོ་བར་འབྱུང་། སེམས་ཀྱི་གནད་ནི་ཅི་ཡང་ཡིད་ལ་མི་བྱ། ཡར་ནམ་མཁའ་དང་ནང་སེམས་སུ་མི་རྟོག ཆེད་དུའང་མ་བསྒྲིམ་མ་ལྷོད་པར་རང་བབས་སུ་ཕྱལ་ལེ་ཁྲིས་སེ་བཞག དེ་ལ་གནས་ན་ལེགས། མི་གནས་པར་རྟོག་པ་འོག་འབྱམས་འཕྲོ་ན་ཞེ་བཅད་དྲག་པོས་རྣམ་རྟོག་ཐམས་ཅད་རྦད་ཀྱིས་བཅད་དེ་ཅུང་ཟད་བསྒྲིམ་པའི་ཤུགས་ཀྱིས་བྱར་མེད་དུ་བཞག ཤུགས་མི་ཆེ་བའི་འོག་འགྱུ་ཕྲ་ཉོ་བ་བྱུང་ན་དེའི་རྗེས་མི་མཐུད་པར་རྩིས་མེད་དུ་བོར་ནས་རང་བབས་པར་ལྷོད་དེ་བཞག མིག་གཏད་སའི་ནམ་མཁའི་མུན་པ་ནག་དིང་ངེ་བ་འཆེམ་མེ་ཆེ་རེ་གཏད་ནས། ཡིད་མིག་རླུང་གསུམ་དེར་ཐིམ་པ་ལྟར་དབྱེར་མེད་དུ་བསྲེས་ཏེ་བཞག་གོ། དེ་ལྟར་མ་ཡེངས་པར་ཞག་གཅིག་གིས་ཚད་དབུགས་ཉི་ཁྲི་ཆིག་སྟོང་དྲུག་བརྒྱའི་ཡུན་ཚད་ལ་གནད་དུ་བསྣུན་ནུས་ན་སྟོང་གཟུགས་འཆར་བས། རྒྱུད་ལས། ཉི་མ་གཅིག་ཅིག་ཡོངས་སུ་བརྟགས་པས་རྟགས་སྣང་མཐོང་བས་གྲུབ་པར་གསུངས་བ་བཞིན་ནོ། །ཉིན་མོའི་རྣལ་འབྱོར་ནི་ལུས་གནད་སེམས་གནད། མཚན་མོའི་རྣལ་འབྱོར་དང་ཁྱད་མེད་ལ། སྤྲིན་
དང་དུ་བ་སེར་བུ་མེད་པའི་དུས་སུ་ཉི་མ་ལ་རྒྱབ་བརྟེན་ཏེ་ཉི་འོད་ཀྱིས་མིག་ལ་མི་ཕོག་པར། སྤྲིན་མེད་ཀྱི་ནམ་མཁའ་སྔོ་སང་ངེ་བ་དེར་སེམས་གསལ་རིག་འདྲེས་པའམ་དབྱེར་མེད་ལྟ་བུར་བཞག་ནས་རྟོག་པའི་འཛིན་པ་སྤངས་ཏེ་འབད་པར་བྱའོ། །ལས་དང་པོ་བས་བསྒོམ་པ་ལ་རྣམ་རྟོག་གཡོ་བ་ཁེགས་པ་མི་འབྱུང་སྟེ། གཡོ་ཐོབ་སོགས་ཉམས་ལྔ་བཤད་པ་སྒོམ་སྤྱི་ལ་འོང་ངོ་། །ཐབས་འདིས་མི་རྟོག་པའི་སྟོང་པ་བསྒོམ་པས་གཡོ་བྱེད་ཀྱི་ང་འགགས་ནས། སྟོང་གཟུགས་རྟགས་བཅུ་རིམ་བཞིན་མཐོང་བར་འགྱུར་ཏེ། བསྡུས་རྒྱུད་ལས། ནམ་མཁར་ཀུན་ནས་ཞེན་པའི་སེམས་དང་མིག་ནི་མི་འཛུམ་རྡོ་རྗེའི་ལམ་དུ་རབ་ཏུ་ཞུགས་པ་ཡིས། །སྟོང་པ་ལས་ནི་དུ་བ་སྨིག་རྒྱུ་རབ་གསལ་དྲི་མ་མེད་པའི་མཁའ་སྣང་ཉིད་ལས་མར་མེ་དང་། །འབར་བ་དང་ནི་ཟླ་བ་ཉི་མ་རྡོ་རྗེ་རྣམས་དང་མཆོག་གི་ཆ་དང་ཐིག་ལེ་མཐོང་བར་འགྱུར། །དེ་ཡི་དབུས་སུ་སངས་རྒྱས་གཟུགས་ནི་ཡུལ་དང་རྣམ་པར་བྲལ་བ་དུ་མ་ལོངས་སྤྱོད་རྫོགས་པའི་སྐུ། །ནམ་མཁའ་ཆུ་འཛིན་བྲལ་བ་དག་ནི་རྣལ་འབྱོར་པ་ཡི་བསྒྲད་པའི་མིག་གིས་བལྟ་བྱ་སྟེ། །རེ་ཁཱ་ནག་པོ་དྲི་མེད་འོད་ཟེར་འཕྲོ་བ་དུས་ཀྱི་རྩ་ལ་མཐོང་
བར་འགྱུར་གྱི་བར་དུའོ། །དེ་ལ་ཀུན་མཁྱེན་གཟུགས་ནི་ཆུ་ལ་ཉི་མ་ལྟ་བུར་གོས་པ་མེད་པར་ཁ་དོག་སྣ་ཚོགས་ཏེ། །རྣམ་པ་ཀུན་ལྡན་རང་སེམས་ཡུལ་དང་རྣམ་པར་བྲལ་བ་དག་གོ་སེམས་ནི་གཞན་པ་མིན་པ་ཉིད། །ཅེས་གསུངས་པ་ལྟར། རྟགས་བཅུ་པོ་གང་ཞེ་ན་མཚན་མོ་སྣང་མེད་མུན་པའི་རྣལ་འབྱོར་གྱི་རྟགས་བཞི། ཉིན་མོ་སྤྲིན་མེད་ནམ་མཁའི་རྣལ་འབྱོར་གྱི་རྟགས་དྲུག་སྟེ་བཅུར་རྣམས་གསུངས་པ་ལས། དང་པོ་ཤེས་རབ་ཀྱི་ཕྱོགས་ཀྱི་བྱུང་བ་ལ་སོགས་ཀྱི་ང་སྡུད་རིམ་གྱིས་འཆར་བ་ལྔ་ལས། ས་རླུང་དབུ་མར་འདུས་པ་ལས་དུ་བ་ལྟ་བུའི་རྟགས་སྣང་འབྱུང་། འདི་ལ་སྤོས་རིང་སོགས་ཀྱི་དུ་བ་ལྟ་བུར་ཕྱུར་ཕྱུར་འགྲོ་བ་དང་། སྔོ་ཕྱུར་ཕྱུར་བ་དང་། དུ་གདངས་ཆགས་པ་ལྟར་མེ་རེ་བ་དང་། ཆར་སྤྲིན་གསར་པ། སྨུགས་པ་འཐིབ་པ་ལྟ་བུ་སོགས་འབྱུང་ཞིང་། ཁ་དོག་ཀྱང་སྐྱ་ཐལ་ལེ་བའམ། སྔོ་བ་དང་། སེར་དམར་ནག་ལྗང་ཁྲ་བོ་སོགས་སྣ་ཚོགས། ཁ་དོག་གཅིག་པའམ། གཉིས་ལྡན་གསུམ་ལྡན། བཞི་ལྡན་ལྔ་ལྡན་སོགས་སྣ་ཚོགས་པ། ཚད་དང་དབྱིབས་དང་ཆེ་ཆུང་སོགས་མ་ངེས་པ། བརྟན་པ་དང་གཡོ་བ། སྟེང་འོག་སོགས་སུ་རྒྱུ་ཚུལ་ཡང་སྣ་ཚོགས་པ་འབྱུང་སྟེ། ནང་
གི་བྱེ་བྲག་མི་འདྲ་བའི་རྣམ་པ་སྣ་ཚོགས་རྣམས་ཀྱང་སྤྱི་རིགས་ནས་དུ་བའི་རྟགས་ཀྱི་ཁོངས་སུ་འདུའོ། །དེའི་ཚེ་ངག་ཉམས་ཀྱང་རླུང་ཐོན་དཀའ་བ་ལུས་ཉམས་ལྕི་བ་སྙམ་བྱེད་པ་དང་། སྙིང་ཁ་སོགས་མནན་བཙིར་ལྟ་བུ་སོགས་སྣ་ཚོགས་དང་། སེམས་ཉམས་བྱིང་རྨུགས་ཤས་ཆེ། རྨི་ལམ་དུའང་དུ་བ་རླངས་པ་འཚུབ་མ་སྨུག་པ་སོགས་དང་། སའི་འོག་ཏུ་མནན་པ། ས་ཕུག་དང་ཁང་སྟོང་དུ་ཉལ་བ་སོགས་ཅི་རིགས་འབྱུང་ངོ་། །ཆུ་རླུང་དབུ་མར་འདུས་པའི་རྟགས་སྨིག་རྒྱུ་ལྟ་བུ་སྟེ། དེ་ཡང་སོས་ཀའི་ཐང་ལ་སྨིག་རྒྱུ་མཐོང་བ་ལྟར་མེར་མེར་ཁྲིག་ཁྲིག་ཤིག་ཤིག་པ་དང་། ཆུ་བོ་ལྟར་རྒྱུག་པ་དང་། ཆར་ཟིམ་རླུང་བསྐྱོད་ལྟར་ཧྲིབ་ཧྲིབ་པ་སོགས་མདོག་དབྱིབས་རྒྱ་ཆེ་ཆུང་བརྟན་གཡོ་སོགས་མ་ངེས་སྣ་ཚོགས་སུ་མཐོང་། ལུས་བསིལ་ཡང་བདེ་འཇམ་མཉེན་པ་དང་། དབུགས་བསིལ་ལྷོད། སེམས་ཉམས་གནས། བདེ་མི་བདེ་རེས་མོས། རྨི་ཉམས་སུ་ཆུ་བོ་ཆར་དང་སྨིག་རྒྱུ་སོགས་འབྱུང་ངོ་། །མེ་རླུང་དབུ་མར་འདུས་པས་མཁའ་སྣང་སྟེ་སྲིན་བུ་མེ་ཁྱེར་ལྟ་བུ་འོད་ཕྲ་མོ་དམར་ཙིག་ཙིག་ནམ་མཁའ་ལ་སྐྱེ་ཡལ་བྱེད་པ་དང་། འཕྲོ་ཞིང་འཛུབ། ཏོག་ཡར་གྱིས་འགྲོ་
བ་སོགས་འབྱུང་། དེ་ཡང་རྣམ་པ་སྣ་ཚོགས་པར་འབྱུང་། ལུས་ཉམས་ཚ་དྲོད་དང་རྡུལ་འབྱུང་བ། བཀྲེས་སྐོམ་གྱི་སྣང་བ། ངག་ཉམས་དབུགས་ཚ་ལ་ཐུང་། སེམས་ཉམས་གསལ་ལ་འཕྲོ་ཞིང་རྩུབ་ལ་རྣོ། རྨི་ལམ་མེ་འབར་བ་སོགས་མེའི་སྣང་བ་མང་དུ་འབྱུང་ངོ་། །རླུང་གི་རླུང་དབུ་མར་འདུས་པས་མར་མེ་འབར་བ་ལྟ་བུ་སྟེ། འོད་ཚད་འབྲིང་ཙམ་དུ་གསལ་ཞིང་། འབར་བ་ཡུན་རིང་དུ་གནས་ཤིང་གཡོ་བ་མེད་པ། འདར་ཧྲིལ་ལེ་བ་འབྱུང་། དེ་ཡང་འཕྲེང་དུ་བསྒྲིགས་པ་དང་གཅིག་ཏུ་ཆེར་འབར་བ་དང་། གཅིག་རྟིང་ལ་གཅིག་འབྱུང་བ་སོགས་མདོག་དབྱིབས་ཚད་སོགས་མ་ངེས་པ་གོང་བཞིན་ནོ། །འདིའི་ཚེ་ལུས་ཉམས་ཡང་ཞིང་གཡོ། ངག་ཉམས་དབུགས་འཇམ་ལ་དལ། དབུགས་ཕྱི་ནང་རྒྱུ་བ་འགག་པ་ལྟར་མི་ཚོར་བ་སྙམ་བྱེད། སེམས་ཉམས་ཡལ་ཡུལ་བ་དང་བརྗེད་ངེས་ཆེ་བ་གཏད་མེད་ཚེ་ལང་ངེ་བ་འབྱུང་། རྨི་ཉམས་རླུང་འཚུབ་དང་། བྱ་སོགས་ལྡིང་བ། རྟ་སོགས་སྲོག་ཆགས་རྒྱུག་པའི་རྣམ་པ་ལྟ་བུ་གཡོ་བ་ཤས་ཆེར་འབྱུང་སྟེ། དེ་ལྟར་རྟགས་བཞི་དང་། ཉིན་མཚན་གཉིས་ཀ་ཡང་ཐུན་མོང་དུ་ནམ་མཁའ་སྤྲིན་མེད་དྭངས་བ་ལྟ་བུའི་རྟགས་འབྱུང་ཡང་འདི་ནི་རྟགས་རྣམས་
འཆར་བའི་གཞི་ཡིན་པས་རྟགས་བཅུ་ལས་ལོགས་སུ་མ་བགྲང་ངོ་། །དེ་ལ་སྤྲིན་མེད་ནམ་མཁའི་སྣང་བ་ནི། སྐར་ཁུང་གི་བུག་པ་ལྟ་བུ་དང་མཐོངས་ཀ་དང་། ཚགས་སེ་དང་། དྲ་མིག་ལ་སོགས་པའི་བར་གསེང་ལྟ་བུའི་རྣམ་པར་འབྱུང་ཞིང་། མཐར་དེ་དག་གཅིག་ལ་གཅིག་འདྲེས་ཏེ་སྟོང་སང་གི་ཆ་ཇེ་ཡངས་ཇེ་ཡངས་སུ་གྱུར་ནས་ནམ་མཁའ་མཐའ་དབུས་མེད་པ་སྣང་བ་འཆར་རོ། །དེར་ཡང་ཁ་དོག་སོགས་མ་ངེས་སྣ་ཚོགས་ཅིར་ཡང་འབྱུང་བ་གོང་དང་འདྲ། འོན་ཀྱང་ནམ་མཁའི་རྟགས་སྣང་ཡིན་ན་གང་ཡང་མི་སྒྲིབ་ཅིང་དྭངས་བ་ཞིག་ཏུ་འོང་ངོ་། །དུས་འཁོར་ལུགས་ཀྱི་རྟགས་བཅུ་བགྲང་ཚུལ་གོང་ལྟར་ལ། སྤྲིན་མེད་མཁའ་སྣང་ནི་རྟགས་ཅན་ཤེས་རབ་ཀྱི་ཕར་ཕྱིན་སྟོང་པ་ཉིད་དུ་བཞག་ཀྱང་། གཡས་ཀྱི་ནམ་མཁའི་རླུང་ཐིམ་པའི་རྟགས་ཡིན་པས་རྒྱུད་གཞན་དུ་རྟགས་ལྔར་བགྲང་པའང་ཡོད། གལ་ཏེ་འདི་རྟགས་སུ་བྱས་ནས་སྣ་གཡས་གཡོན་ནས་རྒྱུ་བའི་རླུང་ལྔ་དབུ་མར་འདུས་པའི་རྟགས་བཅུར་བྱས་ན། ཡེ་ཤེས་རླུང་གི་རྟགས་ཐིག་ལེ་ནི། རྟགས་ཅན་བདེ་བའི་ཡེ་ཤེས་སུ་བྱས་ཏེ་དེར་མི་བགྲང་བར་དོན་གྱིས་ཤེས་ལ། ནམ་མཁའི་རྟགས་མི་བགྲང་བར་ཐིག་
ལེ་དང་རྟགས་བཅུར་བྱས་ན། རྟགས་བཅུ་རྫོགས་པའི་མཐར་ཡེ་ཤེས་ཀྱི་རྟགས་སྣང་ཐིག་ལེ་ཆེན་པོའི་སྣང་བ་མདོག་སྔོན་པོའམ་ལྗང་ཤས་ཆེ་བ། རེ་ཁཱ་ནག་པོ་སྐྲ་ཡི་ཚད་ཙམ་ཕྲ་བའི་ཟླུམ་སྐོར་ཅན་གྱི་ནང་དུ། རྣམ་པ་ཐམས་ཅད་པའི་གཟུགས་བརྙན་སྣ་ཚོགས་དང་། སངས་རྒྱས་ཀྱི་གཟུགས་སྐུ་གཉིས་མཐོང་བ་ཉིད་ཡེ་ཤེས་ཀྱི་སྣང་བ་རྟགས་ཅན་དུ་བྱས་ཀྱང་རུང་ལ། ཡེ་ཤེས་འདི་ནི་དག་བྱ་དྲུག་ཚན་གྱི་སྐབས་ན་ཡེ་ཤེས་ཀྱི་ངོ་བོ་ཡེ་ནས་དང་ཡང་གློ་བུར་གྱི་དྲི་མ་དང་བཅས་པའི་ཆ་ནས་དང་། དག་འབྲས་ཀྱི་སྐབས་སུ་གློ་བུར་གྱི་དྲི་མ་དང་བྲལ་བའི་ཆ་ནས་བཞག་པ་ཡིན་ནོ། །དེས་ན་སྟོང་པ་མཁའ་སྣང་དང་། ཡེ་ཤེས་ཐིག་ལེའི་སྣང་བ་འདི་རྫོགས་པ་ཆེན་པོའི་རྒྱུད་དུ། མཐིང་དབྱིངས་དང་ཐིག་ལེ་སྟོང་སྒྲོན་སོགས་གསུངས་པ་དང་ཕྱོགས་མཚུངས། རྟགས་བཅུ་པོ་འདི་ལམ་དུས་སུ་རླུང་བཅུ་དབུ་མར་ཞུགས་པའི་འོད་གསལ་གྱི་རྟགས་སྣང་མངོན་སུམ་མཐོང་བ་ཡིན་ལ། དག་པའི་དཀྱིལ་འཁོར་དུ་ནུས་མ་བཅུའི་ངོ་བོ་ཡིན་ནོ། །རང་བཞིན་རྣམ་དག་ཆོས་ཉིད་འོད་གསལ་གཉུག་མའི་སེམས་ཡེ་ཤེས་ཀྱིས་བསྡུས་པ་དང་། དེའི་གོ་འབྱེད་ཡེ་ཤེས་ཀྱི་རླུང་ལས་དག་པ་མྱ་ངན་འདས་པའི་
སྣང་བ་འབྱུང་ཞིང་། བསྐྱོད་བྱེད་ལས་ཀྱི་རླུང་དང་ལྷན་ཅིག་པའི་གཟུང་འཛིན་ཅན་གྱི་སེམས་ལས་མ་དག་འཁོར་བའི་སྣང་བ་འབྱུང་བའི་ཕྱིར། འདིར་རང་གནས་ཆོས་ཉིད་འོད་གསལ་གྱི་ངང་དུ་མ་དག་པའི་ང་སེམས་བསྡམ་ནས་འགག་པར་བྱེད་པའི་ཐབས་ཀྱི་མྱུར་ལམ་འདིས་ནི་བློས་རྗེས་སུ་དཔག་པའམ་བཅོས་པ་མིན་པར་རང་བཞིན་ལྷན་སྐྱེས་འོད་གསལ་གྱི་རྟགས་སྣང་མངོན་སུམ་ལམ་དུ་བྱེད་པའི་ཕྱིར་རྫོགས་རིམ་ཡིན་ལ་ལམ་འདི་ལྟ་བུས་འཕོ་མེད་རྡོ་རྗེ་ལྟ་བུའི་ཡེ་ཤེས་ཀྱི་སྐུ་ཚེ་འདིར་འགྲུབ་ནུས་པའི་བདེ་ཞིང་མྱུར་བའི་ལམ་མཆོག་མཐར་ཐུག་ཡིན་ནོ། །ནམ་མཁའི་རླུང་དབུ་མར་འདུས་པ་ལས་སྤྲིན་མེད་མཁའ་སྣང་འདིའམ། ཐབས་ཀྱི་ཕྱོགས་ཀྱི་ནམ་མཁའི་རླུང་འདུས་པས་འོག་ཏུ་འཆད་འགྱུར་མཆོག་གི་ཆའི་རྟགས་ཀྱང་སྐབས་འདིར་འབྱུང་བའང་ཡོད་དོ། །འཆད་འགྱུར་གྱི་ཐིག་ལེ་ལྔ་པོ་དང་གོང་བཤད་ལྔ་པོ་ཤེས་རབ་ཕྱོགས་ཀྱི་རླུང་ལྔ་འདུས་པ་ཡིན་པས་ཁམས་ལྔའི་རླུང་འདུས་པ་ཡིན་ནོ། །སྐབས་འདིར་ཐབས་རིགས་ལྔ་འདུས་ཀྱི་རླུང་ལྔ་ཕུང་ལྔའི་རླུང་དང་། ཤེས་རབ་ཡུམ་ལྔ་གཡས་ཕྱོགས་ཀྱི་རླུང་ལྔ་འབྱུང་བའི་ཁམས་ལྔའི་རླུང་དུ་བྱས་
པ་གོ་དགོས་ཀྱི། སྤྱིར་སྣ་བུག་གཡས་རྒྱུ་ཐབས་དང་། གཡོན་རྒྱུ་ཤེས་རབ་ཟེར་བ་དང་མི་འདྲའོ། །ཐབས་ཀྱི་ཕྱོགས་ཀྱི་གཡོན་ནས་བསྐྱེད་རིམ་གྱིས་འཆར་བའི་འབྱུང་བའི་རླུང་དབུ་མར་འདུས་པ་ལས་རླུང་གི་རླུང་དབུ་མར་འདུས་པས་སེར་པོ་འབར་བའི་རྣམ་པ་འབྱུང་སྟེ་སྤྲིན་མེད་པའི་ནམ་མཁའ་ལ་མེ་འོད་ཀྱིས་ཁྱབ་པ་དང་། ཐབ་ཀའི་མེ་ལྟ་བུ་དང་། ནགས་མེས་ཚིག་པ་ལྟ་བུའི་རྣམ་པ་དང་། མེ་ལྕེ་གཡས་གཡོན་དུ་རྒྱུ་ཞིང་འབར་བ་སོགས་འབྱུང་སྟེ། དེར་སེར་པོ་གཙོ་བོ་ཡིན་ལ། གཞན་ཁ་དོག་མ་ངེས་སྣ་ཚོགས་འབྱུང་བ་སོགས་གོང་དང་འདྲ་ཁྱད་པར་མུན་ཁང་དུ་དམར་པོ་ཤས་ཆེ་བ་དང་། སྤྲིན་མེད་པའི་མཁའ་ལ་དཀར་པོ་ཤས་ཆེ་བར་འཆར་ཞེས་བླ་མ་གོང་མ་འགས་གསུངས། དེ་ཡང་མཐའ་གཅིག་ཏུ་མ་ངེས་པར་འདུག་ཅིང་ལྷབ་ལྷབ་འབར་བའི་རྣམ་པ་ཅན་དུ་བྱུང་ན། ཁ་དོག་ཇི་ལྟར་བྱུང་རུང་སེར་པོ་འབར་བའི་ཕྱོགས་མཐུན་དུ་བསྡུ། མེ་རླུང་དབུ་མར་འདུས་པས་དཀར་པོ་འབར་བ་ནི་ཟླ་བའི་རྣམ་པ་ལྟར་དཀར་ལམ་ལམ་པ་ཅན་ཡིན་པས་རྒྱུད་ལས་ཟླ་བ་ཞེས་གསུངས། འདི་ལ། འོད་དཀར་པོ་དང་། རྒྱུག་པ་དང་། གློ་སྐར་དང་། མཐོངས་ཀ་ནས་ཟླ་ཟེར་ཤར་བ་དང་། ཚེས་གཅིག་ནས་བཅོ་
ལྔའི་བར་གྱི་ཟླ་བའི་གཟུགས་སྣ་ཚོགས་པ་དང་། ཕྱོགས་ཐམས་ཅད་འོད་ཟེར་དཀར་པོས་ཁྱབ་པ་སོགས་མདོར་ན་ཁ་དོག་དཀར་པོ་ཤས་ཆེ་བའི་རྣམ་པ་སྣ་ཚོགས་པ་འབྱུང་སྟེ། སྐར་མདའ་འཕོ་བ་དང་ལྕགས་སྒྲོག་ལྟར་འབྲེལ་བ་དང་། སྐྱ་ལོང་པ་སོགས་འབྱུང་ངོ་། །ཆུ་རླུང་དབུ་མར་འདུས་པས་དམར་པོ་འབར་བ་ཉི་མ་ལྟ་བུའི་སྣང་བ་འབྱུང་སྟེ། ཉི་དཀྱིལ་མ་མཐོང་ཡང་། རི་རྩེ་ཁང་པ་ལ་སོགས་པའི་མཐིལ་དུ་ཉི་འོད་ཕོག་པ་ལྟ་བུ་དང་། གློ་སྐར་དང་མཐོངས་དཀར་ནས་ཉི་འོད་བྱུང་བ་ལྟ་བུ་དང་། མུན་ཁང་ནང་དུ་ཉིན་མོ་ལྟར་མཐོང་བ་དང་ཉི་མའི་དཀྱིལ་འཁོར་ལྟ་བུ་འོད་ཟེར་གསལ་བ་དབྱིབས་དང་ཁ་དོག་མ་ངེས་པ་དང་། འོད་གསལ་འཚེར་མི་བཟོད་པ་དང་། དམར་སྒོ་རེ་བ་འོད་མེད་པ་དང་། དཀྱིལ་འཁོར་ལྗང་གུ་དང་ལྗང་སེར་སོགས་འབྱུང་། ས་རླུང་དབུ་མར་འདུས་པས་ནག་པོ་འབར་བ་རྡོ་རྗེ་སྟེ་སྒྲ་གཅན་གྱི་ཉམས་སམ་རྣམ་པ་ཅན་ནི། རིན་པོ་ཆེ་ནག་པོ་ལྟ་བུ་དང་། མིག་གི་རྣམ་པ་ལྟ་བུ་དང་། མཚན་མོའི་སྤྲིན་དང་སྨུག་པ་བཞིན་ནག་ལིང་ལིང་བ་དང་། ནག་བུན་བུན་པ་དང་། ནག་སྒོར་སྒོར་བ་དང་། ནག་རིལ་རིལ་བ་སོགས་ཆེ་ཆུང་མང་ཉུང་དབྱིབས་མ་ངེས་པ་སྣ་ཚོགས།
དྭངས་ཤིང་སྒྲིབ་པ་མེད་པ། མདོར་ན་ཁ་དོག་ནག་པོ་ཤས་ཆེ་བའི་ཁ་དོག་དང་རྣམ་པ་སྣ་ཚོགས་འབྱུང་ཞིང་ལྟོ་འགྲོའི་དབྱིབས་དང་ཁྲོ་ཞལ་གྱི་རྣམ་པར་སྣང་བ་ཀུན་ཀྱང་སྐབས་འདིར་འབྱུང་ཞེས་བླ་མ་གོང་མ་འགའ་ཞིག་གསུངས། ལུས་ཀྱི་སྟེང་གི་ཕྱོགས་ན་གནས་པའི་ནམ་མཁའི་རླུང་དབུ་མར་འདུས་པས་མཆོག་གི་ཆ་སྟེ། གློག་འོད་ཀྱི་རྣམ་པར་འབྱུང་བ་ནི། དང་པོ་གློག་ལྟར་འོད་ཁྱག་ཁྱུག་པ་དང་། དེ་ནས་འོད་ཆེམ་པས་ཁྱབ་པ་སྔ་མ་ལས་ཡུན་རིང་བ་དང་། མཐར་གོམས་ནས་འོད་ཆེམ་མེ་བ་ཞིག་གིས་ཁྱབ་པའི་ངང་ནས། འོད་ཕྲ་མོ་མང་པོ་གཡོ་ཞིང་འཁྱུག་པ་འབྱུང་ངོ་། །དེ་ལྟར་ལྔ་པོ་དེ་རྣམས་ཐབས་ཀྱི་ཕྱོགས་འབྱུང་བ་ལྔ་འདུས་པ་ཡིན་པས་ཕུང་པོ་ལྔའི་རླུང་འདུས་པ་ཞེས་བྱའོ། །འོག་ཏུ་ཡེ་ཤེས་ཀྱི་རླུང་འདུས་པ་ལས་ཐིག་ལེའི་རྣམ་པ་འབྱུང་སྟེ་ཁ་དོག་སྔོན་པོ་གཙོ་བོ་ཡིན་ཡང་གཅིག་ཏུ་མ་ངེས། དབྱིབས་དང་ཆེ་ཆུང་མ་ངེས་པ་འབྱུང་སྟེ། ཁ་དོག་དྲུག་པོ་རེ་རེ་པ་དང་། གཉིས་ལྡན་ནས་དྲུག་ལྡན་གྱི་བར་དུ་འབྱུང་ཞིང་ཐིག་ལེ་ཟླུམ་པོའི་ནང་སྟོང་པ། ཐིག་ལེ་རང་འདྲ་བས་གང་བ་དང་། ཁ་དོག་མི་འདྲ་བ་སྣ་ཚོགས་པས་གང་བ་དང་། དབྱིབས་དང་ཆེ་ཆུང་མ་ངེས་སྣ་
ཚོགས་པར་འབྱུང་། དེ་ལྟར་ཉིན་རྟག་ལ་དྲུག་ལ་ཤས་ཆེར་མཐུན་པར། ལུས་ཉམས་འཇམ་ཞིང་བདེ་བ། ལུས་ཡོད་དུ་མི་ཚོར་བ། ངག་རླུང་རྒྱུ་བ་མི་མངོན་པ་ཙམ་དང་། སེམས་ཉམས་གསལ་སྟོང་རྟོག་མེད་དུ་སིང་ངེར་གནས་པ་འབྱུང་བ་དང་། སྐབས་འདིར་གཡང་ཟ་བ་སྙམ་བྱེད་པའི་འཇིགས་པ་དང་། གང་ཡང་མེད་སྙམ་པ་འབྱུང་ཞེས་ཀྱང་གོང་མ་ཁ་ཅིག་གསུངས། དེ་ལྟར་དུ་སོགས་རྟགས་བཅུ་སོ་སོའི་མིང་དང་རྣམ་པ་མཐུན་པར་འཆར་ཞིང་ལུས་ཉམས་སོགས་ཐམས་ཅད་ཚང་བ་གོ་རིམ་ངེས་ཅན་འབྱུང་བ་ངེས་པའི་རྟགས་དང་། ཕྱོགས་མཐུན་གྱི་སྣང་བ་གཞན་འཆར་བ་ལམ་ངེས་པའི་རྟགས་ཞེས་ཐ་སྙད་མཛད། མ་ངེས་པའི་རྟགས་དེ་ཡང་འདི་ལྟར་ས་རླུང་དབུ་མར་ཚུད་པས། རི་རབ་ཁང་ཁྱིམ་སོགས་ས་ཡི་ཕྱོགས་ཀྱི་སྣང་བ་དང་། ཆུ་རླུང་ལས་མཚོ་དང་འབབ་ཆུ་སོགས་དང་། མེ་རླུང་ལས་མེ་འབར་བ་སོགས་དང་། རླུང་གི་རླུང་ལས་འཚུབ་མ་བསེར་བུ་སོགས་དང་། མཁའ་རླུང་ལ། ནམ་མཁའ་དང་། བར་སྣང་ཕུག་སྟོང་སོགས་སྦུབས་སྟོང་པའི་རིགས་དང་། རས་ཡུག་སྔོན་པོ་བརྐྱང་བ་འདྲ་བ་སོགས་སྣ་ཚོགས་འབྱུང་། གཞན་ཡང་སྦྲང་གཤོག་ལ་ཉི་ཟེར་ཕོག་པ་འདྲ་བ་སོགས་
དང་། འཇའ་འོད་ཕྲ་མོ་དང་། སྐྱ་ཁྱམ་ཁྱམ་པ་སོགས་འབར་བ་དང་། ཟླ་བའི་རྣམ་པ་ཅི་རིགས་པར་བསྡུ་བ་དང་། གསེར་མིག་ལྟ་བུ་དང་། སྔོ་ལྗང་སོགས་ཉི་མར་བསྡུ་བ་དང་། ཤིང་སྡོང་གི་གྲིབ་མ་འདྲ་བ་དང་། སྲད་བུ་ནག་པོ་སོགས་སྒྲ་གཅན་དང་། སོག་མདའ་འམ་མེ་མདའ་འཕང་བ་འདྲ་བ་སོགས་ཁ་དོག་མ་ངེས་པ་ཕྲ་མོ་རྒྱུག་པ་གློག་དང་། ཁ་རླངས་ལྟ་བུ་དང་། མགལ་མེ་བསྐོར་བ་ལྟ་བུ་དང་། བྱ་ལྡིང་བ་འདྲ་བ་སོགས་ཐིག་ལེའི་རིགས་སུ་གཏོགས་ཞེས་བླ་མ་དག་གསུངས། རྒྱ་གར་མཁས་གྲུབ་འགས་ཞལ་རྒྱུན་ལ། རྟགས་སྣང་ཐམས་ཅད་རྟགས་བཅུའི་ཁོངས་སུ་འདུ་ལ། སྟོང་གཟུགས་ཡུལ་ལྗོངས་སོགས་མཐོང་བ་ཡུད་ཙམ་མི་གཡོ་ལ། དེ་ནས་ཡང་སྤྲིན་ལྟར་ཡལ་འགྲོ་ན་དུ་རྟགས་རགས་པ་དེའི་ཆ་ཤས་རགས་པ་ནས་གཡོ་ཞིང་སྐྱེ་འཇིག་བྱེད་པ་དུ་རྟགས་དངོས། ཆ་ཤས་ཕྲ་མོ་ནས་གཡོན་སྨིག་རྒྱུའི་རྟགས། འོད་བཅས་གཡོ་ཞིང་སྐྱེ་འཇིག་བྱེད་ན་མེ་ཁྱེར་རྟགས། འོད་བཅས་མི་གཡོ་ན་མར་མེའི་རྟགས། དེ་རྣམས་གཅིག་གི་གཅིག་བསྒྲིབ་པ་ལ། ཕན་ཚུན་མི་སྒྲིབ་དྭངས་གསལ་ནམ་མཁའི་རྟགས། དེ་བཞིས་གཞན་ལ་རིགས་འགྲེ་གསུངས་ཞེས་རྗེ་བཙུན་སྒྲོལ་མགོན་
གསུངས། ཉམས་གཞན་ཡང་ས་རླུང་གི་ལུས་ངག་ལྕི་ལ་བསྐྱོད་མི་འདོད་པ། སེམས་བརྟན་པ། ཆུ་རླུང་གིས་འཇམ་མཉེན་ཤེད་ཆུང་སོགས་དང་། མེ་རླུང་གི་འཕྲོ་རྒོད་བཀྲེས་སྐོམ་སོགས་དང་། རླུང་གི་རླུང་གིས། རླུང་གིས་ཁྱེར་བ་ལྟར་ནམ་མཁར་འགྲོ་སྙམ་བྱེད་པ། ལུས་འབར་བ། སེམས་གསལ་སྟོང་ཤས་ཆེ་བ་སོགས་དང་། མཁའ་རླུང་གིས་ལུས་མེད་སྙམ་བྱེད་པ། སེམས་ཉམས་ཅི་ལའང་ཐོགས་རེག་མེད་པར་སྟོང་སང་སང་བར་སྙམ་པ་སོགས་འབྱུང་། གཉིད་དུས་སྲབ་མོའི་འོད་གསལ་གཉིད་དུ་གསལ་སྟོང་གི་ཉམས་སྐྱོང་ཐུབ་པ་དང་། རེས་ཐམས་ཅད་གསལ་ལྟེམ་མེ་ནམ་ལངས་པ་ལྟ་བུ་འོད་ཀྱིས་ཁྱབ་པ། རིག་པ་དྭངས་གསལ། ཁམས་དྭངས་པའི་ངང་གཉིད་དུ་མ་སོང་བ་འདྲ་ལ་སད་རྒྱུ་ཡོད་པ་སད་མ་ཐག་མུན་ཁང་དུ་སྟོང་གཟུགས་ཀྱིས་ཁྱབ་པ། གཞོམ་མེད་ཀྱི་སྒྲ་རྗེས་མཐུན་ཚོར་བའང་ཡོད། གཉིད་དུ་འགྲོ་ཁར་ས་ལ་བྱིང་བ་སྙམ་བྱེད་པ་དང་། འོད་ཁྱུག་ཁྱུག་པ་རྣ་བར་གཙེར་རོང་གིས་འོང་འོད་གསལ་ངོས་མ་ཟིན་གོང་དུ་གཉིད་མི་བདེ་བ་དང་། འདྲེ་གནོན་འདྲ་བ། ལུས་སྦྲིད་པ་འོང་ཡང་མྱུར་དུ་ཟིན་པའི་རྟགས་ཡིན། དེ་ནས་གསལ་སྟོང་དང་རིམ་པས་བདེ་བ་འཆར་རོ། །མ་ངེས་པའི་རྟགས་འདི་རིགས་སོར་སྡུད་ནས་
བསམ་གཏན་དངོས་གཞིའི་བར་ནམ་ཡང་ངེས་མེད་དུ་འཆར་རོ། །ཁྱད་པར་རྡོ་རྗེ་འབེབས་པ་ཞེས་བྱིན་གྱིས་བརླབ་པའི་ཉམས། དང་པོར་སེམས་མི་རྟོག་པར་ཅུང་ཟད་གནས་ཤིང་རྟགས་སྣང་ཅི་རིགས་མཐོང་བ་ནས་བརྩམས་ཏེ། སེམས་མི་རྟོག་པ་རང་ཤུགས་སུ་གནས་པའི་ངང་ནས། ལུས་ཉམས་འཕར་འདར་གཡོ་བ་དྲག་པོ། བྲོ་གར་མཆོང་རྒྱུག་དང་། ངག་སྨྲ་དགོད་དུ་དང་གླུ་ལེན་སྔགས་ཚིགས་ཀུ་ཅོ་འདོན་པ་སོགས་དང་། ཐོག་མར་གསལ་ལ་སྟོང་དྲང་ཙམ་ལས་འབྱུང་ལ། ཕྱིས་བདེ་ཉམས་ཆེན་པོ་དང་བཅས་ཏེ་འབྱུང་། དེ་ཡང་མཉམ་བཞག་རྟོག་མེད་ངང་ནས་དེ་དག་བྱེད་འདོད་མེད་ཀྱང་ཕལ་ཆེར་རྗེས་ཐོབ་ཏུ་དགའ་སྐྱོ་ཁྲོ་འཚིག་རྒྱུག་འདོད་སོགས་འདོད་ཕྱིར་འདོད་སོ་དྲུག་གི་ཡེ་ཤེས་ཀྱི་ཆ་ཤས་བབ་པ་དག་ཡོད་ལ། ཉམས་གང་ཤར་བྱུང་རྒྱལ་དུ་བསྐྱངས་པས་སྐྱོན་ལས་གྲོལ་བས་ཡོན་ཏན་གོང་འཕེལ་དུ་འགྱུར། རྟགས་འདི་རྣམས་སོར་སྡུད་ནས་རྩོམ་སྟེ་གོང་མ་རྣམས་སུ་ཡོན་ཏན་ཡར་ལྡན་དུ་འབྱུང་། མདོར་ན་རྟགས་ཀྱི་རྣམ་པ་ལ་ཚད་བཟུང་མེད་པའི་སྣང་བ་སྣ་ཚོགས་ཡོད་ཀྱང་འོད་གསལ་རྟགས་བཅུ་པོ་དེའི་ཁོངས་སུ་མ་གཏོགས་པ་མེད་དོ། །དང་པོར་སྟོང་
གཟུགས་མཐོང་བ་དེའི་རྗེས་སུ་སེམས་དང་མིག་མི་འབྲང་བར་སེམས་ནམ་མཁའ་གང་བལྟ་ས་དེར་རྩེ་གཅིག་གཏད་པ་གལ་ཆེ། གོམས་པའི་ཚད་ནི། དུས་ཀྱི་རྩ་སྟེ་དབུ་མ་སྒྲ་གཅན་གྱིས་རེ་ཁ་ནག་པོ་ཤིན་ཏུ་ཕྲ་བ་སྐུ་ཡི་ཚད་ཙམ་མཐོང་བའི་བར་དུའོ། །རྫོགས་པའི་རིམ་པ་ནི། མངོན་སུམ་གྱིས་ཆོས་ཉིད་འོད་གསལ་བའི་དོན་དང་རྟགས་མཐོང་བར་གྱུར་པ་ཡིན་པས་སྦྱོར་བ་ཡན་ལག་དྲུག་པོ་ཐམས་ཅད་ལ་མངོན་སུམ་བཞི་ཆར་གྱིས་ཆ་ཡོད་ཀྱང་། སོར་སྡུད་ཀྱིས་སྟོང་གཟུགས་མཐོང་བ་འདི་དབང་མངོན་གཙོ་ཆེ་བ་ཡིན། དེ་ཡང་ཤ་ཡི་སྤྱན་དུ་གཏོགས་པའི་མིག་གིས་སྟོང་གཟུགས་པྲ་ཕབ་པ་ལྟར་མཐོང་བ་སྟེ། སེམས་ཀྱི་རང་བཞིན་འོད་གསལ་དོན་དམ་པའི་ཡེ་ཤེས་རང་ལ་ལྷན་སྐྱེས་སུ་ཡེ་ནས་བཞུགས་པ་ཉིད། ཐབས་ཀྱི་མན་ངག་ཟབ་མོའི་ལམ་བསྒོམ་པས་མངོན་དུ་སྣང་བ་ཡིན་གྱི། ཀུན་རྫོབ་འཁྲུལ་བས་བསྡུས་པའི་རྟགས་མ་ཡིན་ནོ། །སོར་སྡུད་འདིས་དག་བྱ་ཡེ་ཁམས་དྲུག་ཚན་སྦྱོང་། དག་བྱེད་སོར་སྡུད་རྟགས་བཅུ། འདི་བསྒོམ་པའི་འབྲས་བུ་གནས་སྐབས་སུ་སྔགས་ཀྱི་བདེན་ཚིག་གྲུབ་པ་དང་། མཐར་འབྲས་སངས་རྒྱས་དུས་རྡོ་རྗེ་སེམས་དཔའ་
སོགས་ཡེ་ཤེས་ཁམས་ཀྱི་ལྷ་དྲུག་ཚན་གཅིག་གི་དཀྱིལ་འཁོར་རང་འབྱམས་འབྱུང་བའོ། །རྟགས་འདི་མཐོང་ནས་ལམ་མཐར་མ་ཕྱིན་པར་ཤི་ན་ཡང་། ཚེ་ཕྱི་མར་སྔགས་ཀྱི་རིག་འཛིན་དུ་སྐྱེས་ནས་མཐར་འབྲས་ཐོབ་ངེས་པར་རྒྱུད་ལས་གསུངས་སོ། །སོར་སྡུད་ཀྱི་ངོ་བོ་ནི། མི་གཡོ་སུམ་ལྡན་རྣམ་པར་མི་རྟོག་པའི་ཐབས་ཀྱིས་རླུང་དབུ་མར་སྡུད་པའི་ནུས་པ་ཅན་ནོ། །ངེས་ཚིག་པྲ་ཏྱཱ་ཧ་ར་སྟེ། ཐ་མལ་པའི་དབང་ལྔ་ཡུལ་ལྔའི་འབྲེལ་བ་གཅོད་ཅིང་རྣམ་ཤེས་ཡུལ་ལ་ཡོད་པ་བསྡུས་ནས། ཡེ་ཤེས་ཀྱི་སྣང་བ་ལ་མངོན་སུམ་འཇུག་ཅིང་། ལེན་པའི་དོན་ཅན་ནོ། །འདི་ལམ་ཕྱི་མ་ལྔ་པོའི་གཞི་དང་རྨིང་འགྲམ་ལྟ་བུ་ཡིན་པས་རྟགས་ཚད་དུ་ཕྱིན་ངེས་འབྱོང་བར་བྱ་དགོས་སོ། །གཉིས་པ་བསམ་གཏན་ནི། ལས་དང་པོ་པས་སྟོང་གཟུགས་གསལ་བའི་ཕྱིར་མཚན་མོའི་རྣལ་འབྱོར་གཙོ་བོར་བྱེད་ཀྱང་། སྤྱིར་ཉིན་མཚན་གཉིས་ཀར་བསྒོམ་སྟེ་སྟོང་གཟུགས་གསལ་ན་ཁྱད་མེད་དོ། །ལུས་ངག་སེམས་གསུམ་གྱི་གནད་སྔ་མ་དང་འདྲ་ཡང་། དམིགས་པ་སྟོང་གཟུགས་དེ་འབའ་ཞིག་ལ་གཏད་ནས་སེམས་གནས་པ་བསྒྲུབ་པ་ཡིན་ཏེ།
སྟོང་གཟུགས་མཐོང་བ་ཁོ་ནས་མི་ཆོག སྟོང་གཟུགས་ལ་དམིགས་པའི་སེམས་བརྟན་ཆ་ཐོབ་པའི་ཕྱིར་འདི་བསྒོམ་པ་ཡིན་ནོ། །དེ་ཡང་སྟོང་གཟུགས་ཕྱོགས་སུ་འཕྱོ་བའི་རྗེས་སུ་མི་འབྲང་པར་ལྟ་སྟངས་དང་རིག་པ་དང་པོའི་གཏད་ས་དེར་ཁོ་ནར་གཏད་ཅིང་། སྟོང་གཟུགས་ལ་དཔྱད་ར་སོགས་རྣམ་རྟོག་གཞན་གང་ཡང་མི་འཇུག་པར་མཐོང་བ་དེ་དང་མི་འབྲལ་བར་བྱ་བ་ཙམ་གནད་དོ། །ཅིས་ཀྱང་སེམས་འཕྲོ་ན་སྟོང་གཟུགས་ལ་འབའ་ཞིག་ལས་གཞན་ཡིད་ལ་བྱེད་པ་བཅད་དེ་སྟོང་གཟུགས་ཆ་ཕྲ་མོའི་དབུས་སུ་སེམས་ཞུགས་ནས་ཐིམ་པ་ལྟར་གཏད། དེ་ལྟར་རྒྱུན་བསྐྱངས་བས་སྟོང་གཟུགས་ལ་དངོས་པོའི་མཚན་མ་མེད་པར་རང་སེམས་ཀྱི་རྩལ་སྣང་ཙམ་དུ་རྟོགས་པའི་རྣམ་ཀུན་མཆོག་ལྡན་གྱི་སྟོང་ཉིད་ཅི་རིགས་མངོན་སུམ་ཉམས་སུ་མྱོང་བའི་ཤེས་རབ་ལྷག་མཐོང་གི་ཆ་དང་རང་བཞིན་གྱིས་མི་འབྲལ་བའི་མཁའ་ལྟར་གཡོ་མེད་དྭངས་པའི་སེམས་གནས་ཀྱི་བསམ་གཏན་འབྱུང་སྟེ། གང་ཞིག་སྟོང་གཟུགས་ཀྱི་སྤྱི་རགས་པ་མཐོང་བའི་རྟོག་པ། དེའི་བྱེ་བྲག་འབྱེད་པའི་དཔྱོ༷ད་པ། སེམས་ལས་སུ་རུང་བའི་ཤིན་སྦྱངས་ཀྱིས་སམ་དབེན་པ་ལས་སྐྱེས་པའི་སྔོན་མེད་ཀྱི་དགའ་བས་ཡིད་
དགའ་བ་ལུས་ལས་སུ་རུང་བའི་བདེ་བ་དང་བཅས་པའི་སེམས་རྩེ་གཅིག་པར་གྱུར་པའི་བསམ་གཏན་ཡན་ལག་ལྔ་ལྡན་འབྱུང་ངོ་། །འདི་བསམ་གཏན་དང་པོའི་ཡན་ལག་ལྔ་དང་མིང་གཅིག་ཀྱང་བསམ་གཏན་དང་པོའི་དངོས་གཞིའི་ཡན་ལག་ལྔ་ཡིན་པའི་ངེས་པ་མི་དགོས་ཏེ། བསམ་གཏན་དང་པོའི་དངོས་གཞིའི་སེམས་ནི་འདོད་ཉོན་སྤངས་ཟིན་པའི་ཡན་ལག་ལྔ་ཡིན་པས། འདིར་འདོད་པའི་སས་བསྡུས་ཀྱི་ཞི་གནས་གྲུབ་པ་ལའང་ཡན་ལག་ལྔ་ཡོད་པ་ཡིན་ནོ། །མདོར་ན་སྟོང་གཟུགས་ལ་དམིགས་རྟེན་བྱས་ནས་འདོད་སེམས་རྩེ་གཅིག་པ་བསྒྲུབ་ཅིང་། སླར་ཡང་ཤིན་སྦྱང་གི་བདེ་བས་ཟིན་པའི་ཞི་གནས་སྐྱོན་མེད་གྲུབ་པ་ནི་བསམ་གཏན་གྱི་ཉམས་ལེན་དངོས་གཞི་ཡིན་པས་དེས་གོ་ཆོད་ལ་ཆེར་གོམས་པས་བསམ་གཏན་བཞི་སོགས་དང་བརྟན་ཆ་མཚུངས་པའི་ཏིང་འཛིན་གྲུབ་ན་སྨྲོས་ཅི་དགོས་སོ། །སྐབས་འདིར་ཡན་ལག་ལྔ་བགྲང་ཚུལ་ལ། རྩེ་གཅིག་སེམས་པ་བསམ་གཏན་གྱི་ངོ་བོར་བྱས་ནས། ཤེས་རབ་རྟོག་དཔྱོད་དགའ་བདེ་ལྔ་ཡན་ལག་ཏུ་བྱས་ཏེ། འོད་གསལ་རྟགས་བཅུ་ལ་སེམས་རྩེ་གཅིག་གཏོད་པ་ཤེས་རབ། རྟོག་པ་ཞེས་
སྟོང་གཟུགས་དེའི་མཚན་ཉིད་རང་སེམས་ཙམ་དུ་ཉམས་སུ་མྱོང་བ་དང་། རྟགས་སྣང་དེ་ཉིད་ལ། ཡུལ་ཡུལ་ཅན་སོགས་ཀྱིས་སྤྲོས་མཚན་གང་དུའང་མི་གནས་པར་ཉམས་སུ་མྱོང་བ་དཔྱོད་པ། ཕྱི་རོལ་ཏུ་སྔར་མེད་ཀྱི་འོད་གསལ་བའི་རྟགས་རྣམས་མཐོང་བས་དགའ་བ། ནང་དུ་ཏིང་ངེ་འཛིན་གྱི་བདེ་བ་མི་གཡོ་བ་བདེ་བའི་ཡན་ལག་ཡིན་ལ། དེའི་དབང་གིས་ལུས་སེམས་ཤིན་སྦྱང་གི་བདེ་བའང་དེའི་ཕན་ཡོན་ནོ། །དེ་ཡང་དང་པོ་ཤེས་རབ་རྐྱང་པ། དེ་ནས་རིམ་གྱི་རྟོག་པ་དང་གཉིས་ལྡན་དཔྱོད་པ་དང་སུམ་ལྡན། དགའ་བ་དང་བཞི་ལྡན། བདེ་བ་དང་ལྔ་ལྡན་དུ་འབྱུང་སྟེ། ལྔ་པོ་ཚོགས་པ་དེའི་ཚེ་བསམ་གཏན་གྱི་ཡན་ལག་རྫོགས་པར་སྐྱེས་པ་ཡིན་ཞེས་ཁྲིད་ཡིག་མཐོང་བ་དོན་ལྡན་སོགས་སུ་གསུངས། གང་ལྟར་ཡང་དོན་འདྲ་སྟེ་རྟགས་སྣང་ལ་བརྟེན་ནས་ཞི་ལྷག་ཟུང་འཇུག་གི་ཏིང་འཛིན་བསྒྲུབ་པ་ཡིན་ནོ། །སོར་བསམ་གྱི་རྟགས་སྣང་ཚད་དུ་ཕྱིན་པ་ན། འོད་གསལ་གྱི་རྟགས་སྣང་སྔར་ལས་ཚད་མེད་པ་འཕེལ་ཞིང་། དབུ་མའི་རྩ་ལ་རི་མོ་ནག་པོ་སྐྲ་ཡི་ཚད་ལྟར་ཕྲ་བའི་ནང་དུ་ཐིག་ལེ་ཕྲ་མོའི་དཀྱིལ་དུ་སངས་རྒྱས་ཀྱི་སྐུ་གཟུགས་དང་། གཞན་ཡང་ཁམས་གསུམ་བརྟན་གཡོའི་སྣང་
བ་རབ་འབྱམས་དང་། གཞོམ་མེད་ཀྱི་གཟུགས་སྒྲ་དྲི་རོ་རེག་བྱའི་རྡོ་རྗེའི་སྣང་བརྙེན་མཐའ་ཡས་པ་འཆར་ཞིང་ཁ་དོག་སྣ་ཚོགས་པ་དེ་དག་འོད་འཕྲོ་བ། ཆ་ཕྲ་བ། འཚེར་བ། འདར་བ། གཞིག་པར་དཀའ་བའི་ཆོས་ལྔ་ལྡན་དུ་མཐོང་ཞིང་། དེ་དག་རང་བཞིན་མེད་པ་རང་སྣང་ཙམ་དུ་ཤེས་ནས། རྣམ་ཀུན་མཆོག་ལྡན་གྱི་སྟོང་ཉིད་ཉམས་སུ་མྱོང་བའི་ཞི་ལྷག་ཟུང་འཇུག་འགྲུབ་ཅིང་། རླུང་སེམས་ལ་དབང་ཐོབ་པར་འགྱུར་བའི་ལམ་ཁྱད་པར་ཅན་ཡིན་ཞིང་། དེའི་མཐུས་སྣང་བ་ཐམས་ཅད་སྒྱུ་མ་ལྟར་རྟོགས་པ་ཤུགས་ཀྱིས་འབྱུང་ངོ་། །འདིར་ནི་ལྷའི་མིག་གི་དབང་པོའི་མངོན་སུམ་སྟེ། དེ་ལས་མངོན་ཤེས་ལྔ་འགྲུབ་པ་ཡིན་ཞིང་། གཞན་ཡང་སོར་སྡུད་ཀྱི་རྟགས་སྣང་ལས་ཀྱང་གསལ་ལ་རྒྱ་ཆེ་བ་བརྟན་པ་དང་། རྟགས་བཅུའི་ཐ་མ་ཐིག་ལེའི་ནང་དུ་རྟགས་གཞན་དགུ་ཅི་རིགས་འཆར་བ་དང་། རྟགས་བཅུ་ཆར་ཚང་བའི་ཐིག་ལེ་ལ་ཐིག་ལེ་ཆེན་པོ་ཞེས་འདོགས་པ་དང་། ཐིག་ལེ་ཆེན་པོ་ལ་མཉམ་པར་བཞག་པས། དམར་སེར་སོགས་ཁ་དོག་གཉིས་འདྲེས་ཀྱི་རྣམ་པ་དྭངས་ཤིང་གསལ་བའི་དབུས་སུ། དང་པོ་དབུ་ཕྱག་སོགས་ནས་མཐར་ལྷ་སྐུ་ཡོངས་རྫོགས་སུ་འཆར་ཞིང་། བསམ་གཏན་ཤིན་
ཏུ་བརྟན་པ་མཐར་ཕྱིན་ན་སངས་རྒྱས་ལོངས་སྐུའི་གཟུགས་དེ་ཡང་ཡུལ་ངེས་པ་ཐིག་ལེའི་དབུས། དུས་ངེས་པ་མཉམ་རྗེས་ཐམས་ཅད། རྣམ་པ་ངེས་པ་མཚན་དཔེ་ཡོངས་རྫོགས་སྟེ་ངེས་པ་གསུམ་ལྡན་དུ་འགྱུར་བར་གསུངས། གང་ཟག་ལ་འཆར་ཚུལ་མཐའ་གཅིག་ཏུ་མ་ངེས་པར། ཕལ་ཆེར་དང་པོར་རགས་པ་དང་ཅུང་མི་གསལ་བ་མཐར་ཕྲ་ཞིང་གསལ་བར་འགྱུར་བ་དང་། འགའ་ཞིག་སྔར་གྱི་རྟགས་སྣང་རགས་པ་དེ་བསམ་གཏན་བསྒོམ་པས་ཕྲ་མོར་སོང་ནས་རྟགས་སྣང་ཡལ་ཏེ་སྒོམ་སྟོར་བ་སྲིད་པ་ལ་རྗེས་དྲན་དུ་བཤད་པའི་ཡིད་ཀྱི་ཕྱག་རྒྱའི་རྣལ་འབྱོར་དང་བུམ་ཅན་བསྲེས་ཏེ་མི་གཡོ་སུམ་ལྡན་བསྒོམ་པས་རྟགས་སྣང་སླར་ཡང་འཆར་བ་དང་། སྔར་རྒྱུན་རྟགས་སྣང་ཅུང་ཟད་རེ་མ་བྱུང་ན། བསམ་གཏན་སྤོགས་ཆོག་བཞིན་བསྒོམ་པས་སོར་ཆུད་པ་འོང་ངོ་། །ཐིག་ལེའི་སྣང་བ་ལ་དབུས་སུ་སེམས་གཏད་ན་ཕྲ་བར་འགྱུར་ཞིང་། མཐའ་ལ་གཏད་ན་ཆེ་བར་འགྱུར་བ་ནི་སྟོང་གཟུགས་གཞན་ལའང་འདྲ། རགས་པ་ལ་བརྟན་པ་མ་ཐོབ་བར་དུ་དེ་ལྟར་བྱས་ཀྱང་འོང་ངོ་། །གཞན་ཡང་སྟོང་གཟུགས་ཀྱི་གསལ་ཆ་དང་། སྤྲོས་བྲལ་དབྱེར་མེད་ལ་མཉམ་པར་བཞག་པ་གོམས་པས་སེམས་གནས་
ན་སྟོང་གཟུགས་གནས་གཡོ་ན་གཡོ། སེམས་ལེགས་པར་གནས་དུས་མཐོང་བྱ་མཐོང་བྱེད་ཐ་དད་པར་སྣང་བ་མངོན་གྱུར་འགགས་པ་ནི་ཤེས་རབ་རྒྱུད་ལ་སྐྱེས་པའི་ཚད་ཡིན། དེའི་ཚེ་སེམས་གང་གཏད་དེར་སྟོང་གཟུགས་ཅི་རིགས་འཆར་ཞིང་། ཐིག་ལེ་ཆེན་པོ་ལ་མཉམ་པར་བཞག་པ་ན་དེ་ནང་སངས་རྒྱས་ཀྱི་སྐུ་མཐོང་བ་སོགས་གོང་བཤད་བཞིན་འབྱུང་བར་གསུངས་སོ། །ངེས་ཚིག་ནི་དྷྱཱ་ན་ཞེས་དམིགས་པ་ལ་སེམས་རྩེ་གཅིག་པར་འཛིན་པའི་དོན་ཅན་ནོ། །བསམ་གཏན་འདིས་རྣམ་ཤེས་སོགས་མཁའ་ཁམས་དག མི་བསྐྱོད་པ་སོགས་ལྷ་མཁའ་ཁམས་དྲུག་ཚན་གྱི་དཀྱིལ་འཁོར་འགྲུབ་བོ། །སོར་བསམ་སྐབས་སུ་སྤོག་ཆོག་ནི། བྱེད་བཅིངས་ཡིན་ཏེ། དེ་ལ་བྱེད་པ་ལྔ་ནི་དབང་པོ་ལྔའི་རླུང་། བཅིངས་པ་གཉིས་ནི་སྲོག་ཐུར་གཉིས་བཅིང་བའོ། །དེའི་ཐབས་ནི། ཉིན་མཚན་གྱི་རྣལ་འབྱོར་གང་ཡིན་ཡང་འདྲ། མིག་གཉིས་ལྟ་བ་རྒྱ་ཆེན་མིན་པའི་ཕྲ་མོ་གཅིག་ལ་དྲག་ཏུ་བསྒྲིམ། ལྕེ་ཕུག་ཏུ་བཟློག མཆུ་དང་སྣ་དང་རྣ་བ་གསུམ་གཅུད་བཞིན་ཁྲོ་བོའི་གདོང་དུ་བྱ། ལུས་ཉ་བཞི་བསྒྲིམ་ཞིང་རྐང་སོར་བསྐུམ། ཁུ་ཚུར་དང་སྐྱིལ་ཀྲུང་དམ་དུ་བྱ། དཔུང་བ་དྲག་ཏུ་བརྒྱང་བས་
དབང་པོ་ལྔའི་རླུང་འཆིང་། ལྟོ་བ་སྒལ་ཚིགས་ལ་གཅེར་བ་དང་། ཕྱི་ན་འཕེལ་ཀ་བསྐྱེད་པ་རེས་མོས་བྱ། དེ་ཡང་རེས་མོས་མྱུར་པོ་མིན་པར་ཆུ་ཚོད་རེ་ཙམ་སྤེལ་དགོས་སོ། །དེས་སྲོག་ཐུར་གཉིས་འཆིང་བར་འགྱུར། དེ་ལྟར་བྱས་པས་སོར་སྡུད་བསྒོམ་ཡང་ཉམས་རྟོགས་མ་སྐྱེས་པ་རྣམས་སྐྱེ་ཅུང་ཟད་སྐྱེས་པ་རྣམས་གསོ། སྐྱེད་མ་བྱུང་བ་ལ་བོགས་འདོན་པ་ཡིན་ཡང་། ཐོག་མ་ནས་འདི་བསྒོམ་ན་ཚེགས་ཆེ། གེགས་ལྡང་བོགས་ཆུང་བས། བོགས་འདོན་མ་དགོས་ན་རང་བཞིན་བསྒོམས་པར་མི་བྱ། གཞན་ཡང་བོགས་འདོན་ཅི་རིགས་གཞན་ལས་ཤེས་པར་བྱ། སོར་བསམ་གཉིས་ཀྱི་ཉམས་མྱོང་ཁྱད་པར་ཅན་སྐྱེས་པ་རྩ་བཟང་བའི་རིགས་འགའ་ཞིག་སྲོག་རྩོལ་ཆེད་དུ་མ་བསྒོམས་ཀྱང་། རླུང་དབུ་མར་ཚུད་ནས་གེགས་མེད་དུ་ཡོན་ཏན་ཕུན་སུམ་ཚོགས་པ་སྐྱེ་བ་དང་། བུམ་ཅན་རང་ཤུགས་ཀྱིས་འབྱོར་པ་གཙུག་གཏོར་དུ་རླུང་སེམས་བསླངས་པས་རྡོ་རྗེ་བསླངས་བའི་བདེ་བ་ཁྱད་པར་ཅན་ཐོབ་པའང་ཡོད་རླུང་དབུ་མར་འདུས་པ་ཙམ་དང་། རྡོ་རྗེ་བསླངས་པའི་ཉམས་ཕྱོགས་མཐུན་འགའ་ཞིག་ལས་རིམ་བཞིན་སྲོག་སྡུད་ཀྱིས་འཕོ་བའི་གེགས་དང་འཛག་གེགས་སུ་གྱུར་བའང་སྲིད། རྩ་འབྲིང་བ་མན་ཆད་ལ་སོར་བསམ་ཁོ་ནས་དེ་རྣམས་མི་འབྱུང་བར། སོར་བསམ་གྱི་
རྗེས་སུ་སྲོག་རྩོལ་བསྒོམ་ན་ལྟེ་བར་དྲོད་སྐྱེ། སྨིན་མཚམས་སུ་བདེ་ཟུགས། སྤྱི་བོ་ཟ་འཁྲིག་གཡའ་སོགས་གཏུམ་མོ་ཅུང་ཟད་འབར་རྟགས་འབྱུང་། མེ་སྟོབས་ཆུང་། ཐིག་ལེ་སྟོབས་ཆེ་ན། མགོ་དང་མིག་རུས་མི་བདེ། བྱད་ཤ་འགྱུར། མངས་ན་མགོ་འཁོར། མེ་སྟོབས་ཆེན་འགའ་ལ་འཛག་གེགས་འབྱུང་ཉེན་ཡོད་པ་རླུང་སྦྱོར་གྱིས་བསལ་དགོས། རླུང་དབུ་མར་འཇུག་ཏུ་ཉེ་ཚེ། རྟགས་སྣང་རྣམས་དབང་པོའི་སྒོ་ནས་འཆར་བ་དང་བ་སྤུའི་སྒོ་ནས་འཇུག་པ་སོགས་འབྱུང་། མེ་སྟོབས་ཆེ་བས་སྤྱི་བོའི་ཐིག་ལེ་ཞུན་རླུང་ཅུང་ཟད་མར་མནན་པས་རྟགས་རྣམས་ཀྱང་ཕྱི་དང་ནང་ནས་ཐུར་དུ་འགྲོ་བདེ་ཉམས་འཕེལ། མེ་སྟོབས་ཆུང་ལ་རླུང་གྱེན་དུ་སོང་བས་སྤྱི་བོའི་ཐིག་ལེ་འཁྱགས་པའི་རྟགས་སུ། རྟགས་སྣང་ནམ་མཁའ་ལ་འཁོར་བ་དང་། གྱེན་དུ་འགྲོ་བ་ཤས་ཆེ་ཁམས་ངན་པར་འགྱུར། རྟགས་སྣང་ནམ་མཁར་ལྡིང་བ་དེ་ཧ་ཅང་ཐལ་ན་གཙུག་ཏོར་གྱི་སྒོ་ཕུག་ནས་འཕོ་ཉེན་ཡོད་པས་དབབ་པར་བྱ། ཁྱད་པར་རྡོར་བཟླས་དང་འཇམ་རླུང་སྦྲགས་པས་སྙིང་ཚ་མགོ་ན། སྨིན་མཚམས་སུ་འདུས་ཤིང་གཅུས་པ་དང་འཁྱིལ་བ་སྙམ་བྱེད། སེམས་གསལ་སྟོང་འོད་གསལ་དུ་ཐིམ། འོད་སྐོར་དང་བཅས་པའི་རྟགས་སྣང་རང་གི་ལུས་ལ་ཉེ་བར་འཁོར། གཉིད་རང་སངས་ལ་སོང་རླུང་གི་རྒྱུ་བ་དང་རྣམ་པ་ཅུང་ཟད་མཐོང་། མིག་ན་གཙུག་ཏོར་ཟ་འཁྲིགས་སོགས་གོང་བཤད་བཞིན་བྱུང་ན། རླུང་དབུ་མར་ཚུད་ཐུབ་ཀྱང་། ད་ལྟ་བཅིང་
མ་ཐུབ་པའི་རྟགས་ངེས་པ་ཅན་ཡིན། དེ་ལ་འབད་རྩོལ་དྲག་པོར་བསྒོམ་ན། ཟུག་གཟེར་རྣམས་སྔར་བས་ཆེར་འགྲོ། སྨིན་མཚམས་ཡན་ཆད་སྦྲིད་ཅིང་མེད་པ་སྙམས་བྱེད། དེ་ནས་འོད་སྐོར་རང་གི་ལུས་ཀྱི་ནང་དུ་འཁོར་བ་འབྱུང་ངོ་། །སྤྱིར་འོད་སྐོར་དམའ་ས་ནས་ལངས་ཏེ་གྱེན་དུ་དྲག་པོར་འཁོར་བ་དེ་ཤིན་ཏུ་བཟང་བ་ཡིན། དེ་ཡན་ཆད་ཙམ་ལ་བུམ་ཅན་གྱིས་དབུ་མར་བཅུག་ནས་འབེབས་སོགས་མ་བྱས་ཀྱང་འཕོ་གེགས་སུ་མི་འགྱུར་བ་ཤས་ཆེ་གསུངས། བྱེད་བཅིང་ལོག་པའམ་དེ་ལས་ཀྱང་ཐལ་ན་རྟགས་སྣང་སངས། ཐོགས་པའི་འདུ་ཤེས་ནུབ། གཟུགས་མེད་བཞི་དང་ཕྱོགས་འདྲ་རུང་ཙམ་གྱིས་ཏིང་འཛིན་སྐྱེ། འདི་སྐབས་དང་པོར་དལ་བུས་འབེབས་མང་དུ་བྱས་ནས། མཐར་འབེབས་དྲག་པོས་བབ་ན་སྲོག་སྡུད་ཀྱིས་གེགས་སེལ་བར་འགྱུར། དེ་ལས་ཅུང་ཐལ་ནས་བརྒྱལ་བ་ལྟར་སོང་ན་འབེབས་དྲག་པོ་འགའ་ཞིག་གིས་དབབ་པར་བྱ། མཐར་འཕར་གཡོ་འདར་སྤྲུགས་སྨྱོ་འབོག་ལྟ་བུ་རིང་དུ་བྱུང་བའི་མཐར་སེལ་འགྲོའོ། །འཕོ་བའི་གེགས་འོག་ཏུ་འབྱུང་བ་རྣམས་ཀྱང་འདི་དང་འདྲ་བས་ཚོད་བཟུང་ཞིང་བསལ་དགོས་སོ། །རྡོར་བཟླས་སྐབས་འཇམ་རླུང་ཕྲལ་རིང་། རྒྱུ་བ་མི་ཚོར། ཤེས་པ་གསལ། རྨི་ལམ་འཇམ་
ཉལ་སོང་། སྟོང་གཟུགས་གསལ་འཚེར་ཕྲ་སིལ་འགྲོ་ན་ཡོན་ཏན་འཆར་བ་ཡིན། འཇམ་རླུང་དང་རྡོར་བཟླས་ལ་མཉམ་རྒྱུའི་སྐབས་སུ་ཕྱིར་འགྲོ་ཇེ་ཐུང་ངང་གནས་པ་ཇེ་རིང་བྱ། འཇམ་རླུང་མ་བྱང་བར་ཧ་ཅང་ཤུགས་དྲག་ན་རྒྱུ་མ་སྦོས་ཡོང་བ་དང་། དལ་བར་མ་མནན་པར་ཤུགས་དྲག་ན་མགོ་རོ་སྟོད་ན་བའང་སྲིད། འཇམ་རླུང་དུས་གྲེ་བ་ཀོག་ཀོག་ཟེར། སྤྱི་བོ་ཟ། དཔྲལ་བར་འབུར་ཡོང་བ་དང་། སྤྱི་བོར་བུ་ག་ཟང་ཐལ་ཡོང་བའང་སྲིད། དེ་གློད་ཅིང་འབེབས་དགོས་གོམས་ན་མཐོང་སྣང་ཐམས་ཅད་ལྗང་མེར་འགྲོ། སྐུ་དང་ཐིག་ལེ་ལྗང་གུ་ཕྲ་མོ་དང་། ཡོན་ཏན་འཆར་ཚུལ་སྔ་མ་དང་འདྲ་བ་ལས་ཆེས་བཟང་བར་འཆར་རོ། །ལུས་ཆུ་ལུད་པ་ལྟར་འཕྱར་བའི་ཉམས་དང་། རྨི་ལྟས་རི་ལ་འབབ་འཛེགས་འཕུར་བ་དང་རྟ་རྒྱུག་པ་སོགས་འབྱུང་། འབྱོངས་ན་རྨི་ལམ་འཇམ། ཟིན་སྦྱོངས་སྤེལ་སྤྲུལ་གྱི་རྣམ་ཐར་སོགས་ཤུགས་ལ་འབྱུང་ངོ་། །གསུམ་པ་སྲོག་རྩོལ་ནི། ཀུན་རྟོག་གི་བཞོན་པར་གྱུར་པའི་རླུང་རང་དབང་དུ་འགྱུར་བའི་ཆེད་དུ་བསྒོམ་པ་ཡིན་ལ། དེ་ཡང་རླུང་རོ་རྐྱང་གི་ལམ་གཉིས་སུ་རྒྱུ་བ་བཀག་ནས། དྷཱུ་ཏིའི་འཁོར་ལོ་རྣམས་སུ་འགྲོ་འོང་བྱེད་ཅིང་
རིམ་གྱིས་འགག་པར་བྱེད་པ་སྲོག་རྩོལ་དང་། དབུ་མའི་ནང་གི་མི་ཤིགས་པའི་ཐིག་ལེ་ལ་ཐིམ་པར་བྱེད་པ་འཛིན་པ་གཉིས་ཀྱི་དང་པོ་ལ། ལུས་གནད་གཞན་སྔར་དང་འདྲ། ལྟ་སྟངས་བགེགས་མཐར་བྱེད་ཀྱི་ལྟ་བ་བདུད་རྩིའི་ལམ་དུ་སོན་པ་ཞེས། ཐད་ཀ་ལས་ཅུང་ཟད་གྱེན་དུ་ཕྱོགས་པ་སྨིན་མཚམས་སུ་ཧྲིག་གེར་ལྟ་བ་བདུད་རྩི་འཁྱིལ་པའི་ལྟ་སྟངས་འདི་སྲོག་རྩོལ་དང་འཛིན་པ་གཉིས་ཀྱི་སྐབས་སུ་དམིགས་བསལ་རེ་ཟུང་མ་གཏོགས་སྤྱིར་འདྲ། ཐོག་མར་རླུང་རོ་ལན་གསུམ་བསལ་ནས། སྔོན་དུ་རླུང་འབྱིན་འཇུག་གནས་གསུམ་ཙམ་ལ་སེམས་གཏད། དེ་ནས་གཡས་གཡོན་དབུས་སུ་རོ་རྐྱང་དབུ་མའི་རྩ་གསུམ་གསལ་བཏབ་ལ། ཕྱིར་འབྱིན་པ་རོ་མ་དང་དབུ་མ་ནས་ཕར་སོང་། ནང་དུ་རྔུབ་པ་རྐྱང་མ་དང་དབུ་མ་ནས་ཚུར་འོང་། གནས་པ་ཁོང་དུ་དབུ་མར་གནས་པ་བསམ་པ་ཅི་རིགས་བྱ། དེ་རྗེས་འབྱིན་པ་ཨཱཿཡིས་སྒྲ་གདང་བཅས་འོད་ཟེར་ཨཱཿཡིག་དམར་པོའི་རྣམ་པར་འཕྲོ་བ། དེ་བཞིན་དུ་རྔུབས་པ་ཨོཾ་དཀར་པོ། གནས་པ་ཧཱུྃ་སྔོན་པོའི་རྣམ་པ་གདང་བཅས་དབུ་མ་ཁོ་ན་ནས་འགྲོ་འོང་གནས་གསུམ་བྱེད་པར་དམིགས། དོན་དམ་རྡོར་བཟླས་འབྱིན་རྔུབས་གནས་
གསུམ་སྟོང་གཟུགས་ཕྱག་རྒྱ་ཆེན་མོ་དང་དབྱེར་མེད། སྒྱུ་མ་ལྟར་རྟོགས་པ་ལས་མི་ཡེངས་པར་བྱ་བའོ། །འདི་སྐབས་རོ་རྐྱང་སོགས་ཀྱིས་ཁྱད་པར་མི་སྦྱར་བ་འབྱིན་འཇུག་གནས་གསུམ་ལ་སེམས་འཛིན་པ་སོགས་ལུགས་དུ་མ་ཡོད། མདོར་ན་རྡོ་རྗེའི་བཟླས་པས་རྩ་ཡི་ལམ་སྦྱང་བར་བྱས་ནས་བུམ་ཅན་བཟུང་བར་བྱ་བ་ལ། སྔོན་དུ་འཇམ་རླུང་དགང་གཏོང་གི་སྦྱོར་བས་སྲོག་དབུ་མར་གཞུག་པ་དང་། རྩུབ་རླུང་བུམ་ཅན་འཛིན་པ་གཉིས་ཡོད་པའི་དང་པོ། རྐང་པ་རྡོར་སྐྱིལ་ལམ། རྐང་པ་བརྐྱངས་བསྐུམ་དུ་འདུག རླུང་གཡས་ནས་རྒྱུ་ན་ལག་གཡོན་ཐལ་མོ་མཆན་ཁུང་གཡས་གྱི་ནུ་མ་བཅས་བསྡོམས་པའི་སྟེང་བར་ལྷུ་གཡོན་པས་མནན། རླུང་རོ་བསལ། གཡས་པའི་མཛུབ་མོས་སྣ་བུག་གཡས་པ་བཀག སྣ་བུག་གཡོན་ནས་རླུང་ཤུགས་ཆེ་རིང་བར་རྔུབ་སྟེ་ལྟེ་བར་མནན་པ་ཅུང་ཟད་བསྒོམ། མི་ཐུབ་པར་ཆ་བ་ན། སྣ་བུག་གཡས་མཛུབ་མོ་གཡས་པས་བཀག་ནས་གདོང་གཡས་སུ་ཕྱོགས་པས་སྣ་གཡོན་ནས་རླུང་དྲག་ཏུ་འབུད། དེ་འདྲ་བསྐྱར་ཏེ་ལན་མང་བྱས་པས། གཡོན་རྒྱུའམ་མཉམ་གྱུར་འཕོ། འདི་སྐབས་འོག་རླུང་རང་གནས་སུ་
འཆིང་དགོས་སོ། །གཡོན་རྒྱུ་སྤོ་ན་ཕྱག་རྒྱ་དང་འབུད་རྔུབ་གོང་མས་བཟློག་སྟེ་བྱས་པས་འགྱུར། འདི་ནུ་མ་གཅུད་པའི་མན་ངག་གིས་རླུང་ཡོ་བ་བཙོས་པའང་ཡིན་ནོ། །གཡས་གཡོན་ཕན་ཚུན་སྤོ་རེས་འགའ་བྱས་ན་མཉམ་རྒྱུར་ངེས་པར་འབྱུང་། མཉམ་རྒྱུར་སོང་ཚེ་བུམ་ཅན་ནམ་རྡོར་བཟླས་བྱས་ན་ཚེ་རིང་པོ་འགྲུབ་པ་ལ་བསྔགས། གཉིས་པ་རྩུབ་རླུང་བུམ་ཅན་ལ། རླུང་རོ་དགུ་ཕྲུག་གམ་སུམ་ཕྲུག་ཏུ་བསལ། ཐུར་སེལ་གྱི་རླུང་འཐེན་ཙམ་བྱ། སྟེང་རླུང་མྱུར་བར་རྔུབ་སྟེ་ལྟེ་བར་བསྒྱུར་ཐབས་སུ་མནན་ནས་མཆིལ་མ་མིད། དེ་རྗེས་ཐུར་སེལ་གཡས་གཡོན་དབུས་གསུམ་ནས་དྲངས་ཏེ་ཁ་སྦྱོར་དུ་ལྟེ་བར་མནན། མི་ཐུབ་འདྲ་ན་རྔུབ་ཆུང་ལན་གསུམ་བྱས་ཏེ་མནན། དེས་མི་ཐུབ་ན་དལ་བུས་ཕྱིར་བཏང་སྟེ་མཐར་སངས་ཀྱིས་འབུད། དེ་ལྟར་བུམ་ཅན་ལ་ཡང་ཡང་གོམས་པར་བྱ། བུམ་ཅན་བསྒོམ་པ་འདི་ལྟེ་བར་དམིགས་པ་གཏད་ཅིང་ལྟེ་བར་གཙོ་བོར་བསྒོམ། ལས་དང་པོ་པས་སྙིང་ག་ཡན་ཆད་ཀྱི་བུམ་ཅན་བསྒོམ་ན་འཕོ་གེགས་ཆེ་བས་མི་བསྒོམ་པར་བཤད་ཀྱང་། རན་ཙམ་བསྒོམ་ཡང་སྐྱོན་མེད་དེ། ལས་དང་པོ་པས་བསྒོམ་ན། ལྟེ་བའི་བུམ་ཅན་ཉི་ཤུ་ཙམ་སོང་ནས། སྙིང་
གའི་བུམ་ཅན་ལན་གཅིག་གཉིས་བྱས་ཏེ། ལྟེ་བའི་བུམ་ཅན་སྙིང་གར་དྲངས། སླར་ཡང་ལྟེ་བར་ཕབ་ནས་རླུང་གཏོང་། མགྲིན་དཔྲལ་གཙུག་གཏོར་རྣམས་ལ་ལྟེ་བའི་བུམ་ཅན་ཡར་དྲང་བར་མི་བྱ་ཡང་། དེ་དེར་བུམ་ཅན་འཇམ་པོ་བཟུང་ལ། རླུང་གཏོང་ཁར་ལྟེ་བར་ཕབ་དགོས་སོ། །སླར་ཡང་དེ་རྣམས་ཀྱི་མཐར་གསང་བའི་བུམ་ཅན་ཚར་རེ་བྱ། རླུང་འཁྱིམ་དོགས་ན། སྙིང་གའི་བུམ་ཅན་གྱིས་མཐར་རོ་སྟོད་གཅུད་ཅིང་ཧ་འདོན་བྱ། མགྲིན་པའི་མཐར་ཁ་གཙུམ་ནས་མགྲིན་པའི་རླུང་དྲངས་ཏེ་འབུད། དཔྲལ་བ་དང་གཙུག་གཏོར་གྱི་བུམ་ཅན་མཐར། སྣ་བཀག་ནས་ཐོད་པའི་རླུངས་ནས་འབུད་པ་སོགས་ཀྱི་ལག་ལེན་ཤེས་པར་བྱ། རླུང་ཕྱིར་འགྲོ་དུས་རྟགས་སྣང་ལ་སེམས་གཏད། འཇུག་དུས་སེམས་དང་རྟགས་སྣང་བསྲེ། གནས་དུས་སེམས་དང་སྟོང་གཟུགས་འདྲེས་པའི་མྱོང་འཛིན་བཤིག་སྟེ་གློད། ལྟེ་བར་གཏད་པའང་བྱ། དེ་ལྟར་སྦྱངས་བས་བུམ་ཆེན་གཅིག་གི་ཡུན་ལ་སེ་གོལ་གཏོགས་པ་སོ་དྲུག་ཐ་མ། དོན་གཉིས་འབྲིང་། བརྒྱ་དང་བརྒྱད་ཐུབ་པ་ཆེན་པོ་སྟེ། གནས་ཡུན་ཇེ་རིང་བསྲེ་བར་བྱ་ལུས་ནང་དུ་འོད་གསལ་སྟོང་གཟུགས་ཤར་བ་ལ་སེམས་གཏད།
གོམས་ནས་རྩ་གནས་གང་འདོད་དུ་རྟགས་སྣང་འཆར་ཞིང་གསལ་བས། ལུས་ཀྱི་རྩ་གནས་དེ་དང་དེར་རླུང་ཞུགས་པའི་སྐྱོན་ཡོན་སོགས་རང་གིས་ཤེས་པ་འབྱུང་། འདི་སྐབས་སུ་བཙན་ཐབས་ཀྱིས་སྦྱོར་བ་ནི་མགྲིན་པའི་འཕར་རྩ་གཏེམ་པ་ཡིན་ནོ། །དང་པོར་སྣ་བུག་ནས་སོར་བཅུ་དྲུག་གི་ནམ་མཁར་སྟོང་གཟུགས་ལ་སེམས་གཏད་ནས་ཇེ་ཉེ་ཇེ་ཉེར་བཏང་སྟེ་སྣ་ཡི་ནང་དུ་སྟོང་གཟུགས་ཤར་བར་སེམས་གཏད་དབུགས་དང་འགྲོགས་ཏེ་སྟོང་གཟུགས་ཡལ་ཡོལ་བྱེད་ཀྱང་དེ་རྗེས་མི་འབྲང་གང་དུ་རང་སོར་བཞག་པ་དེར་བསྒོམ། དེ་བརྟན་པས་སྣ་སྒོར་སྟོང་གཟུགས་རྟག་ཏུ་གསལ་བ་འབྱུང་། དེ་ལ་གོམ་པས་འབྱུང་བའི་རླུང་རྣམས་ཀྱིས་མདོག་དང་དབྱིབས་དང་། ཚད་དང་རྒྱུ་བའི་གྲངས་ཤེས་པ་འབྱུང་། དེ་བྱུང་ན་བུམ་ཅན་དང་ལྷན་ཅིག་ཟླ་བ་དྲུག་བསྒོམ་པས་བརྟན་པ་ཐོབ་པར་འགྱུར། དེ་ཚེ་རླུང་ལ་བརྟེན་ནས་འདུན་པ་བསྒྱུར་ཙམ་གྱིས་ཞི་སོགས་ལས་བརྒྱད་ཐོགས་མེད་འགྲུབ་བོ། །སྲོག་རྩོལ་དངོས་གཞིའི་ཉམས་ལེན་གྱི་སྐབས་འདིར། སྟོང་གཟུགས་རགས་ལ་གསལ་བ་དེ་དབུ་མར་འཇུག་དཀའ་སྟེ་འཆིང་སླ། ཕྲ་ཞིང་གསལ་བ་འཇུག་སླ་སྟེ། འཆིང་དཀའ། མི་གསལ་ན་འཇུག་འཆིང་གཉིས་ཀ་དཀའ་ལ་བོག་ཆུང་
རྩུབ་རླུང་བུམ་ཅན་བསྒོམ་པས་རྩ་བཟང་བར་གེགས་མེད་པར་ཡོན་ཏན་སྐྱེ་མོད་ཀྱང་། ཕལ་ཆེ་བ་ནི་སྡུག་བསྔལ་གྱིས་ཉམས་རེ་ཐོག་མར་འབྱུང་བས། རླུང་ཅིག་ཅར་འདུ་ན་ལུས་རང་དབང་མེད་པར་འདར། གློ་བུར་དྲོད་སྐྱེ། ཉམས་རྣམས་ཁྲ་ཆེན་པ་དང་། དམར་ཐིང་ངེ་བའི་ངང་ནས་འགྱེལ་ཞིང་དྲན་མེད་དུ་བརྒྱལ་བ་སོགས་འབྱུང་། རླུང་རིམ་གྱིས་འཇུག་ནས་སྟོང་གཟུགས་རང་ལ་འཁོར། ལུས་གཏུམ་ཤིང་བསྒྲིལ་བ་དང་འདྲ། རླུང་སུབས་འགྲོ་བ་ལྟ་བུ་འབྱུང་། དེ་ནས་ཅུང་ཟད་གོམས་པས་བདེ་སྡུག་སྤེལ་མར་འབྱུང་། དེ་ནས་གོམས་ན་མཐར་བཏང་སྙོམས་སུ་འགྲོ། གོང་བཤད་རྟགས་སྣང་ཐམས་ཅད་འབྱུང་བའི་སྟེང་དུ་ས་རླུང་འཆིང་ན་ལུས་སྡོད་ཚུགས་བཤིག་སྙིང་མི་འདོད། རྩུབ་ལ་ལྕི་ཞིང་སྣང་བ་སེར་སོར་མཐོང་། ཆུ་རླུང་འཆིང་ན་གྲང་མཉེན་ཆུའི་སྣང་བ་ཤས་ཆེ་ལ་ལར་ཆུ་ལ་གྲང་དྲོ་གཉིས་ཀ་ཡང་འབྱུང་། མེ་འཆིང་ན་དྲོད་འབར་མེའི་སྣང་བ་འབྱུང་། རླུང་འཆིང་ན་ལུས་ཡངས་ཤིང་འཕར། རླུང་གི་སྣང་བ་འབྱུང་། མཁའ་རླུང་འཆིང་ན་སྔོ་ཡམ་མེ་བ་དང་། བདེ་སིང་ངེ་བ་དང་། ལག་པས་བྱུག་པ་སོགས་ཆེད་དུ་རེག་ཚེ་མ་གཏོགས་ལུས་ཡོད་དུ་མི་ཚོར་ཞིང་། བུ་གའི་
རིགས་དང་། བར་སྣང་དང་སྟེང་འོག་ཕྱོགས་མཚམས་སྟོང་པར་སོང་བའི་སྣང་བ་འབྱུང་། ནམ་མཁའི་ནང་ཚན་དུ་ཡེ་ཤེས་ཀྱི་རླུང་གི་ཆ་ལ་ལྗང་གུ་དང་ཁྲ་ཆིལ་བ་འབྱུང་བ་ཡོད། དེ་འདྲ་རེ་རེ་བཞིན་མཐར་རྟགས་སྣང་ཐམས་ཅད་ཐིག་ལེ་ལ་འདུས་ནས་དབུས་སུ་ཐིམ་འགྲོ་བ་མཐོང་ན་གནད་དུ་སོང་བ་ཡིན། དེ་ལྟར་འབྱུང་བ་ཆ་མཉམ་དུ་ཞུགས་ན་གེགས་མི་འབྱུང་ལ་ཆ་མ་སྙོམས་ན་རྩུབ་ཉམས་སུ་འཆར་ཞིང་། དེ་ལས་ཐལ་ན་གེགས་སུ་འགྱུར། དེ་ཡང་ས་རླུང་ཟིན་ན་དེའི་ཚེ་རླུང་གི་སྟོབས་ཟད་པས། སྨྲ་བརྗོད་གཡོ་འགུལ་མི་ཤེས་པ་ལྟ་བུ་དང་ས་ལ་བྱིང་བ་དང་། མནན་པ་བྱིང་རྨུག་སོགས་འབྱུང་། མེ་ཟིན་དུས་སའི་སྟོབས་ཉམས་ཏེ། མེ་ཆར་དུ་བ་སེམས་ཚིག་པའི་སྣང་བ་དང་མྱུལ་ཆེ་ཞིང་ལུས་གཅིག་ཏུ་མི་ཚུགས། ཆུ་ཟིན་ན་མེ་ཉམས་པས། ཁོང་འདར། གྲང་ཤུམ་བྱེད། གངས་རི་དང་ཆུའི་རྦ་རླབས་ཀྱི་གསེབ་ཏུ་ཡོད་པ་སྙམ་བྱེད། དྲན་པ་མི་གསལ་བཀོལ་དུ་མི་བཏུབ་པ་འབྱུང་། རླུང་འཕེལ་ན་ཆུ་ཉམས་ཏེ་ལུས་ཡང་ཤིང་མགྱོགས། འགྲོ་སྙིང་འདོད། སེམས་བཟུང་ཡང་མི་ཟིན་པ་ཡོང་། ནམ་མཁའ་ཀུན་གྱི་གྲོགས་ཡིན་ཡང་། མཁའ་རླུང་ཁོ་ན་འཕེལ་ན་གཡང་ཟ་ཞིང་སྐྱོ་ཤས་
ཆེ་བར་འབྱུང་། དེ་དག་ཕལ་ཆེར་བྱུང་རྒྱལ་བསྐྱངས་ཤིང་། ལུས་ལ་ནད་ཁམས་འཕེལ་བར་འདུག་ན་གེགས་སེལ་གྱི་བཅོས། དེ་ལམ་དུ་བསྲངས་ཤིང་བསྐྱངས་བས་གཏུམ་མོའི་འབར་སྣང་ཅུང་ཟད་ཀྱང་འབྱུང་། བདེ་ཉམས་འཕེལ། འདི་སྐབས་རྡོར་བཟླས་དང་། འཇམ་རླུང་བུམ་ཅན་རིམ་པར་བསྒོམ་པའི་དབང་དུ་བྱས་ཀྱང་། སྤྱིར་རྟགས་རིམ་པ་གསུམ་པོ་དེ་རྣམས་རྩ་ལམ་བྱང་བ་དང་། དབུ་མའི་སྒོར་འདུས་པ་དང་། དྷཱུ་ཏིར་འཆིང་པའི་རྟགས་ཀྱི་རིམ་པ་ཙམ་ཡིན་པས་བུམ་ཅན་གྱིས་རྨུགས་པ་འདྲ་བའི་ལུས་ཉམས་དང་། ལུས་ནང་སྲོག་ཆགས་རྒྱུགས་པ། དོན་འཚང་བྱེད་པའི་རྨི་ཉམས་འབྱུང་། རྩ་ཆད་འབྲིང་པོ་རྣམས་སོས་པས། དགང་བ། འདྲིལ་བ། འདར་སྤྲུགས། འཕར་འཕྲིག་ཟུག་རྔུ་དང་བཅས་པ་ཡོང་། རྩ་ཆད་ཕྲ་མོ་རྣམས་གསོས་པ། ཚ་ཙེག་ཙེག་སོགས་ཟུག་རྔུ་མང་པོ་ལྡང་། འདི་དག་གང་དུ་འབྱུང་མ་ངེས་ཏེ་རྩ་ཆད་ཅི་རིགས་གསོས་པ་ཡིན་ནོ། །བར་སྐབས་སུ་བཏང་སྙོམས་དང་བདེ་ཉམས་ཤས་ཆེར་འབྱུང་བར་སྐབས་སུ་སྲོག་ཐུར་འདྲེས་པའི་རླུང་གིས་རྩ་ནང་ལ་དབྱིངས་སུ་ཐིམ་མ་ཐུབ་པས་འཕོ་གེགས་ཀྱང་འབྱུང་ཉེན་ཡོད་པའི་རྟགས་གོང་བཤད་འདྲ། ཡང་འདི་
སྐབས་སུ་རྩ་རླུང་ཅུང་ཟད་འབྱངས་པའི་སྐབས་ཡིན་སེམས་འཕོ་བ་དང་འབེབས་པ་གཉིས་ཀ་སྔར་ལས་སླའོ། །བུམ་པ་ཅན་དབུ་མའི་ནང་དུ་ཉིན་ཞག་གཅིག་འཆིང་བར་ནུས་ན་ནད་མཐའ་དག་འབྱང་ཞིང་ཚེ་ལ་ཅུང་ཟད་དབང་། སྲོག་ཐུར་འདྲེས་པའི་ཚད་ལ། འོག་རླུང་དྲངས་བས་ཁ་ནང་ཐོན་ན་ཐུར་སེལ་སྲོག་ལ་འདྲེས། དྲི་བཟང་ཁ་སྣར་རྔུབས་པ་འོག་སྒོ་ནས་འཐོན་ན་སྲོག་ཐུར་སེལ་ལ་འདྲེས་ཟེར་ཏེ། འདི་ཙམ་ནང་དུ་འདྲེས་པ་མིན། ཁོག་པའི་ནང་དུ་ཕྱི་ལ་རྒྱུ་བའི་སྲོག་ཐུར་རགས་པ་འདྲེས་པ་རྨོངས་པ་མཚར་སྐྱེད་ཙམ་ཡིན་གསུངས། ནང་རྟགས་ནི་སྟེང་རླུང་བཟུང་ན་འོག་རླུང་རང་འཐེམ་འོག་རླུང་བཟུང་ན་སྟེང་རླུང་འཐེམ་པ་ནི་རྩ་ནང་དུ་ཅི་རིགས་འདྲེས་པས་སྔ་མ་ལས་བཟང་། གསང་རྟགས་འབར་སྣང་དང་བདེ་དྲོད་དངོས་སུ་སྐྱེ་བ་ཆེས་མཆོག་གི་རྩ་དབུ་མར་སྲོག་ཐུར་འདྲེས་པ་ཡིན་ནོ། །སྲོག་རྩོལ་གྱི་རིམ་པའི་ཕྱེད་ཕྱི་མའི་སྐབས་འདིར་སྲོག་གཟུགས་ཕལ་པ་འགྲུབ་སྔ་ཕྱི་ནི་ཅི་རིགས་ཡོད། གཞན་ཡང་ཐིག་ལེ་བཞིའི་སྣང་བ་ལས་འཁོར་འདས་ཀྱི་ཆོས་མཐའ་དག་འཆར་ཏེ། གྲུབ་མཐའ་བཞི། མུ་སྟེགས་བྱེད་ཀྱི་རྒྱུད་བཞི། རིགས་བྱེད་བཞི། སྡེ་པ་བཞི། གསང་སྔགས་ཀྱི་རྒྱུད་སྡེ་བཞི་
ལ་སོགས་པའི་ལྷའི་སྣང་བ་དང་། སྔགས་ཀྱི་སྣང་བ་དང་། ཚིག་དོན་རྣམ་འབྱེད་ཀྱི་བློ་གྲོས་དང་། ལྟ་བསྒོམ་སྤྱོད་གསུམ་གྱི་ཉམས་མཐའ་ཡས་པ་འབྱུང་། འགྲོ་དྲུག་གི་གནས་སུ་ལོངས་སྤྱོད་པའི་སྣང་བ། བདེ་སྡུག་གི་ཚོར་བ། ཉོན་མོངས་པའི་ཁྱད་པར་མཐའ་ཡས་པར་ཡང་སྣང་སྟེ། སྔོན་གྱི་མན་ངག་པ་རྣམས་ལ་གནས་སྦྱོང་དུ་གྲགས་པ་དེ་ཡིན་ནོ། །མདོར་ན་སེམས་རང་བཞིན་གྱིས་འོད་གསལ་བ་རྣམ་པ་ཐམས་ཅད་པ་ཡིན་པའི་རྒྱུ་མཚན་གྱིས་ཤེས་བྱ་ལ་སྲིད་ཚད་སྣང་བ་ཡིན་ཞིང་། ཆོས་ཉིད་རྣམ་པ་ཐམས་ཅད་པར་རིས་མེད་དུ་ཁྱབ་པ་ཡིན་ཡང་གདུལ་བྱའི་ངོར་དེར་སྣང་གི་རྐྱེན་དང་ཕྲད་ཚེ་སྣང་བའི་སྒོ་ནས་རིམ་ཅན་དུ་སྣང་། སྣང་བའི་རྐྱེན་ནི་ནང་གི་རྩ་རླུང་ཐིག་ལེའི་འཕྲོ་འདུའོ། །སེམས་ཀྱི་སྣང་ཆ་རྩ་ཆུང་ཐིག་ལེར་སྣང་ཞིང་། སྣ་ཚོགས་སྣང་བ་དེ་རྣམས་སེམས་ཉིད་ཀྱི་ཐིག་ལེ་བཞིར་སྣང་བ་ལ་བརྟེན་ནས་བྱུང་བས་རྣམ་པ་ཐམས་ཅད་པའི་ཁོངས་སུ་འདུས་པ་ཡིན་ནོ། །ཀུན་རྫོབ་རྟེན་འབྲེལ་དུ་ལུས་ཀྱི་ཐིག་ལེ་དཔྲལ་བར་གནས་པས་སད་དུས་ཀྱི་སྣང་བ་རགས་པ་ཐམས་ཅད་དེས་བསྐྱེད་ངག་གི་ཐིག་ལེ་མགྲིན་པར་གནས་པ་དེ་རྨི་ལམ་བར་དོ་སོགས་ཀྱིས་སྣང་བ་བསྐྱེད། ཡིད་ཀྱི་ཐིག་
ལེ་སྙིང་གར་གནས་པས་གཉིད་འཐུག་བརྒྱལ་བ་འཆི་སོགས་ཀྱི་གནས་སྐབས་བསྐྱེད། བཞི་པའི་ཐིག་ལེ་ལྟེ་བར་གནས་པས། གཉིས་སྦྱོར་སོགས་ཆགས་པ་དང་། ཡུལ་བཟང་ངན་བར་མ་གསུམ་ལ་སྲེད་ཅིང་རྨོངས་པ་རྣམས་བསྐྱེད། དེ་བཞིན་རྩ་འཁོར་གཞན་ལའང་སྦྱར་དུ་ཡོད་དེ། ཐིག་ལེ་བཞི་པོ་དེ་དྲི་བཅས་སྐབས་སུ་གཞི་དུས་ཀྱི་འཁོར་ལོའི་ཞལ་བཞི། སྒྲིབ་པ་ཅི་རིགས་དག་པའི་ལམ་དུས་འཁོར་གྱི་ཞལ་བཞི། སྒྲིབ་པ་ཀུན་བྲལ་གྱི་སྐབས་སུ་འབྲས་བུ་དུས་འཁོར་གྱི་ཞལ་བཞི་སྟེ། རྒྱུད་ལས་ཞལ་བཞི་ལས་འཁོར་འདས་ཐམས་ཅད་སྤྲུལ་པར་གསུངས་པའི་དགོངས་པའི་གཙོ་བོའང་འདི་ཡིན་ནོ། །སྲོག་རྩོལ་གྱི་ངེས་ཚིག་ནི། པྲཱ་ཎ་སྲོག་སྟེ་རླུང་ཡིན་ལ། ཨཱ་ཡ་མ། དེ་འགོག་པའམ། དེ་ལ་རྩོལ་བ་ལ་འཇུག་པའམ་རིགས་བྱེད་དེ་དེ་ལ་བདག་བྱེད་པའི་དོན་ནོ། །ཚད་ནི་དབུ་མ་ཁོ་ན་ནས་རླུང་འབབ་པའི་བར་དུའོ། །དེའི་གཡས་གཡོན་གྱི་རླུང་བཅད་བུ་མར་གནས་པའི་རྟགས་སྣ་ཚོགས་འབྱུང་། སངས་རྒྱས་བྱང་སེམས་གྱིས་ལུང་སྟོན་དབང་པོ་དྲུག་གི་མངོན་ཤེས་འབྱུང་། ཟག་མེད་ཀྱི་ཡུལ་དྲུག་ལ་ལོངས་སྤྱོད་འདི་ཡིད་ཀྱི་མངོན་སུམ་གཙོ་བོར་གྱུར་པའི་མངོན་སུམ་མོ། །འདུ་བྱེད་ཀྱི་ཕུང་པོ་རླུང་ཁམས་
སོགས་དག མཐར་ཐུག་དོན་ཡོད་གྲུབ་པ་ཐོབ་བོ། །བཞི་པ་འཛིན་པ་ནི། རླུང་སེམས་དབུ་མར་ཞུགས་པ་ཉིད་མི་ཤིགས་པའི་ཐིག་ལེར་ཐིམ་ནས་རབ་ཏུ་བརྟན་པར་བྱ་བའི་ཕྱིར་སྒོམ་པ་ཡིན་ལ། དེ་ལའང་སྔོན་འགྲོ་དང་དངོས་གཞི་གཉིས་ལས། དང་པོ་ལྟེ་བའི་བུམ་ཅན་བཟུང་། དེ་བཞིན་འཁོར་ལོ་ལྔ་སོ་སོར་བཟུང་བ་ཟིན་ནས་སྲོག་དབུ་མར་ཐིམ་པར་བསམ་པ་འཛིན་པ་རྗེས་མཐུན་པའོ། །དངོས་ནི་འཁོར་ལོ་ལྔའམ་དྲུག་ཏུ་བུམ་ཅན་ཇི་འདོད་དུ་བཟུང་བས་སྲོག་དབུ་མའི་ཐིག་ལེར་ཞུགས་ནས་གཏུམ་མོ་འབར་བས་རང་བཞིན་གྱི་ཞུ་བདེའི་བདེ་དྲོད་ཁྱད་པར་ཅན་སྐྱེ་ཞིང་ཐིག་ལེ་འཛག་མེད་དུ་འཆིངས་ནུས་པས་འཕོ་མེད་ཀྱི་བདེ་བ་འདྲེན་པར་བྱེད་པའོ། །འདིའི་ཡུལ་ནི། བདེ་རླུང་སྟེ། མི་ཤིགས་པའི་ཐིག་ལེ་དང་འདྲེས་པའི་རླུང་ཡིན་ལ། དེ་བརྟན་པར་འཛིན་པས་རླུང་སེམས་དྷཱུ་ཏིར་ཕྲ་ཐིག་ལ་ཞུགས་ནས་མི་གཡོ་བར་བྱེད་པ་ཡིན་ནོ། །དེ་ཡང་ལུས་གནད་བཅས་འཁོར་ལོ་སོ་སོའི་མདོག་གྲངས་སོགས་གསལ་བཏབ་པའི་དབུས་སུ་མི་ཤིགས་པའི་ཐིག་ལེར་གཡས་གཡོན་གྱི་ང་བཅུ་ཐིམ་པར་བསམ་ལ་བུམ་ཅན་འཛིན་པ་དངོས་གཞིའོ། །འདིའི་སྐབས་སུ་སྲོག་ཐུར་འདྲེས་པ་ལ་བརྟན་པ་ཐོབ་པས་གཏུམ་
མོ་འབར་བས་རྩ་ཁ་ཐམས་ཅད་དྲོས། རྩ་དང་ཐིག་ལེ་ཐམས་ཅད་གླུམ་ལངས་པ་ལྟར་ཁོལ་ཞིང་སད། རྩ་མདུད་ཐམས་ཅད་མེས་དྲལ། ཐིག་ལེ་རྣམས་སོ་སོར་འབར་ཞིང་གཡོ། ཁམས་རྣམས་ཡར་མར་དུ་འདུ་ཞིང་ལྟེ་འོག་ཏུ་ཅུང་ཟད་གང་བ་རྣམས་ཡིན། བདེ་ཆགས་སྐྱེ་ལ་བུད་མེད་བསྟེན་ཀྱང་ཁམས་མི་འཛག ལུས་བརྟན། མ་ཟོས་ཀྱང་བཀྲེས་པ་མེད། ཟོས་ཀྱང་འཇུ་ལ། སྒྱུ་འཕྲུལ་རྡོ་རྗེ་གསུས་པོ་ཆེ། ཞེས་བྱ། ཐུར་སེལ་མི་འཛག་ལུས་ཡང་བདེ་བ་རྒྱས། ནད་བྲལ། འཆི་བ་མེད། ཉོན་མོངས་དང་རླུང་གི་འགྲོ་འོང་ཟད་པ་འབྱུང་། འདི་ནི་ལམ་འདི་ཉིད་སྒོམ་སྟོབས་ཀྱིས་འབྱུང་མོད། གོམས་པ་ཆུང་བའམ་སྤོག་ཆོག་ཏུ་འབར་འཛག་གི་ཞུ་བདེ་སྒོམ་པའི་ཚུལ་སྤྱི་ལྟར་བྱས་ནའང་རུང་། རྟགས་དངོས་ནི། དབུ་མའི་ནང་དུ་ཕྲ་བའི་རེ་ཁཱ་ནག་པོ་ནཱ་དའི་རྣམ་པ་ཅན། རྟ་རྔ་ཟླུམ་པོར་བཀུག་པ་ལྟ་བུའི་མུ་ཁྱུད་ཀྱི་ར་བས་བསྐོར་བའི་ཐིག་ལེའི་རྣམ་པ་ཅན། འོད་ཟེར་དཔག་མེད་འབར་བ། རེ་ཁཱ་ཕྲ་མོའི་ནང་ན་རྟགས་བཅུ་ཀ་རྫོགས་པར་འཆར་ཞིང་སྐུ་གཟུགས་སོགས་དག་མ་དག་གི་སྣང་བ་སྣ་ཚོགས་ཀྱིས་བརྒྱན་པ་ཞིག་འབྱུང་བ་དེ་ཡང་དྷཱུ་ཏིའི་ནང་དུ་གཏུམ་མོ་འབར་བའི་བར་སྣང་གི་དབུས་སུ་འབྱུང་བ་ཡིན་ལ།
མང་པོ་སྒྲ་གཅིག་ལས་གྲུབ་པ་འབྱུང་ངོ་། །ལས་དང་པོ་པས་སྲོག་འཛིན་གྱི་རྗེས་མཐུན་སྒོམ་པའི་སྐབས་སུ། མེ་ཤས་ཆེ་ན། དྲོད་ཆེ། རྡུལ་འབྱུང་། ཐིག་ལེ་འབབ་པའི་སྣང་བ་དང་། ལྕེའུ་ཆུང་ལས་ཐིག་ལེ་འབབ་པ་ཚོར་བ་སོགས་འབྱུང་། དེར་འགའ་ཞིག་ལ་འཛག་གེགས་དང་རུལ་བས་ལུས་སྟོབས་འཆོར་ན། འདྲེན་འགྲེམས་དང་ལུས་ཟུངས་མི་འཆོར་བའི་གདམས་ངག་བྱ། རླུང་ཁམས་ལྡང་བས་མགོ་ན་ཞིང་ལུས་གྲང་ན་ཐིག་ལེ་འཇུ་མ་ཐུབ་པ་དང་། ལུས་སྔོ་སྐམ་བདེ་ཉམས་ཡལ་ན་ཐིག་ལེ་རྒྱས་མ་ཐུབ་པ་ཡིན། འདི་རྣམས་ལ་ཆགས་ལམ་གྱི་བདེ་བ་སྤེལ་བས་སེལ། འཛིན་པའི་སྐབས་འདིར་ཡང་། གཏུམ་མོའི་འབར་སྣང་གིས་རྩ་སྒོ་ཕྱེས་ནས་སྲོག་སྡུད་ཀྱི་འཕོ་བ་འབྱུང་བའི་གེགས་ཅུང་ཟད་འབྱུང་བའི་སྐབས་ཡོད་ཀྱང་། རླུང་སེམས་ལ་དབང་ཅི་རིགས་ཐོབ་པས། གེགས་སེལ་གདམས་པ་གཞན་ལ་མ་ལྟོས་པར་སྒྲུབ་པོ་རང་ཉིད་ཀྱི་ཤེས་པར་འགྱུར་རོ། །སྲོག་རྩོལ་མཐར་ཕྱིན་ནས་གེགས་ཕལ་ཆེར་ལས་གྲོལ། འཛིན་པའི་ཕྱེད་སྔ་མ་མཐར་ཕྱིན་ནས། སྒོམ་གེགས་ཀྱི་མིང་ཡང་མེད་དོ། །འཛིན་པའི་སྐབས་སུ། འཁོར་ལོ་སོ་སོར་བུམ་ཅན་འཛིན་པ་དང་འདུག་
སྟངས་སྤོག་ཆོག་རྣམས་ཞིབ་པར་ཁྲིད་ཡིག་ལས་ཤེས་པར་བྱའོ། །ངེས་ཚིག་ནི། དྷཱ་ར་ཎ་སྟེ་རླུང་འགྲོ་འོང་དང་བྲལ་བར་དབུ་མའི་ནང་དུ་འཛིན་པར་བྱེད་པའོ། །འདི་ཡིད་མངོན་ཚད་མ་སྟེ། དབུ་མར་སྲོག་ཐིམ་པའི་ཡེ་ཤེས་ཀྱི་བྱེད་པ་ཅན་ནོ། །གནས་སྐབས་ཀྱི་འབྲས་བུ་དབང་བཅུ་སྟོབས་བཅུ་རྗེས་མཐུན་པ་ཐོབ། མཐར་འབྲས་ཚོར་ཕུང་སོགས་དག་ནས་རིན་ཆེན་འབྱུང་ལྡན་གྱི་དཀྱིལ་འཁོར་འགྲུབ་པའོ། །ལྔ་པ་རྗེས་སུ་དྲན་པ་ནི། ལམ་སྔ་མའི་སྟོབས་ཀྱིས་རང་ཤུགས་ཀྱིས་སམ་ཞུ་བདེ་འབར་བས་བདེ་བ་ཁྱད་པར་ཅན་སྐྱེས་པ་ན། རང་བཞིན་སྒོམ་སྟོབས་ཀྱིས་སྤྱི་བོའི་ཧཾ་ཞུ་བའི་བདེ་བ་གནས་བཞིར་དྲངས་པའི་དགའ་བཞིའི་མཐར། ནོར་བུའི་རྩེར་འཆིང་ཞིང་གྱེན་དུ་གཙུག་ཏོར་གྱི་བར་དུ་བཟློག་པའི་དགའ་བཞི་སྐྱེ་བ་ཡང་ཡང་མྱང་བ་སྟེ། འདིའི་དམིགས་ཡུལ་བདེ་བ་དེ་ཉིད་ཡང་ནས་ཡང་དུ་རྒྱུད་ལ་དྲན་པར་བྱེད་པའོ། །ལམ་ལ་གོམས་པ་ཆུང་ན་གཏུམ་མོ་འབར་བའི་ཞུ་བདེ་བསྐྱེད་པའི་དམིགས་པ་གཞུང་སྤྱི་ལ་གྲགས་པ་འདི་རྣམས་ངོ་བོ་བསྐྱེད་རིམ་དུ་གཏོགས་ཀྱང་མོས་སྒོམ་གྱི་རྫོགས་རིམ་དུ་གྲགས་པ་རྣམས་ཀྱང་། འདིར་ལས་དང་པོ་པས་བསྒོམ་པར་བྱ་ཞིང་བོགས་འདོན་དུ་ཡང་
འདི་རྣམས་བསྒོམ་བྱ་ཡིན་ནོ། །དེ་ཡང་འདི་ཡི་སྐབས་སུ་བདེ་བ་སྤེལ་བའི་རྟེན་དང་པོ་ལག་པའི་ཕྱག་རྒྱས་བསྐུལ་བའམ་དེ་ནས་ཡེ་ཤེས་དང་ལས་རྒྱ་དངོས་ལ་བསླབ། གོམས་ཤུགས་ཆུང་ན་འཛིན་འགྲེམ་པ་སོགས་ཀྱིས་རླུང་རྩོལ་དང་དམིགས་པ་བྱེད་པ་གཞུང་གཞན་འདྲ། དེ་ཡང་རང་དང་ཡུམ་དུས་འཁོར་ཡབ་ཡུམ་དུ་གསལ་བཏབ་རྩ་གསུམ་འཁོར་ལོ་བཞིའམ་དྲུག་གསལ་དེ་དང་སྟོང་གཟུགས་བསྲེ་ཐུབ་ན་རབ། མཁའ་གསང་བྱིན་གྱིས་བརླབས་ནས་སྙོམ་པར་ཞུགས་པའི་བདེ་བ་སྐྱེས་པས། དཔྲལ་བའི་འཁོར་ལོ་སོགས་སུ་རིམ་བཞིན་ཡས་བབ་ཀྱི་དགའ་བདེ་དང་སྟོང་གཟུགས་བསྲེས་ཏེ་བུམ་ཅན་བཟུང་། མཐར་ནོར་བུའི་རྩེར་བཅིངས་བ་གྱེན་དུ་དྲངས་ཏེ་གཙུག་ཏོར་གྱི་འཁོར་ལོའི་བར་མས་བརྟན་གྱི་དགའ་བ་དང་གཟུགས་བསྲེས་ཏེ་བུམ་ཅན་འཛིན་ཅིང་མཉམ་པར་བཞག འདི་ཐམས་ཅད་ལ་སྟོང་གཟུགས་དང་བསྲེ་བ་ཡོད་ན་རྗེས་དྲན་རྗེས་མཐུན་པ་ཡིན། མེད་ན་ལམ་གཞན་གྱི་རྫོགས་རིམ་དུ་འགྲོ་བ་ཡོད་ཀྱང་སྐབས་འདིའི་རྗེས་དྲན་གྱི་ཕྱོགས་སུ་མི་འགྲོ། མཐར་སྟོང་གཟུགས་ཕྱག་རྒྱ་ཆེན་མོ་དང་དངོས་སུ་མཉམ་པར་སྦྱོར་བས་འཛག་མེད་ཀྱི་བདེ་བ་འདྲེན་པ་ནི་རྗེས་དྲན་དངོས་ཡིན།
དེས་ཏིང་ངེ་འཛིན་མཚན་ཉིད་པ་འདྲེན་དེ་ས་ལམ་དངོས་སུ་བགྲོད་ནུས་པར་འགྱུར་རོ། །དེ་ཡང་ལས་དང་པོ་པ་དབང་རྟུལ་ཐིག་ལེ་སླ་བའི་གནས་སྐབས་སུ་ལས་རྒྱ་ལ་མ་བརྟེན་པར་དགའ་བཞི་རྫོགས་པར་འདྲེན་མི་ནུས་པས། དེའི་ཚེ་ལས་དང་ཡེ་ཤེས་ཕྱག་རྒྱ་ཆེན་པོ་གསུམ་གཅིག་དྲིལ་གྱིས་ཚུལ་དུ་བདེ་བ་རྗེས་དྲན་བསྒོམ། དབང་པོ་ན་འཕོས་ཏེ་འབྲིང་དུ་གྱུར་ཅིང་། ཐིག་ལེ་ཅུང་ཟད་བསྐ་བའི་སྐབས་སུ། ཕྱག་ཆེན་ཁོ་ནས་བདེ་བ་རྫོགས་པར་འདྲེན་མི་ཐུབ་པའི་དུས་ན། ལས་རྒྱ་མེད་ཀྱང་ཆོག་པས། ཡེ་རྒྱ་དང་ཕྱག་ཆེན་གཅིག་དྲིལ་དུ་བསྒོམ་དབང་རྣོན་ཐིག་ལེ་བསྐ་བའི་སྐབས་སུ་ཕྱག་ཆེན་ཁོ་ནས་ཞུ་བདེ་འདྲེན་བཏུབ་ཀྱང་མི་འགྱུར་བའི་བདེ་བ་དངོས་སུ་མ་ཐོབ་པའི་བར་དེར་ཕྱག་ཆེན་ཁོ་ནར་བརྟེན་ནས་རྗེས་དྲན་བསྒོམ་པ་ཡིན་པ་ནི་མཉམ་བཞག་གཙོ་ཆེ་བའི་དབང་དུ་བྱས་ཀྱི་རྗེས་ཐོབ་བརྟུལ་ཞུགས་ཀྱི་སྤྱོད་པ་ལ་ངེས་པ་མེད་དོ། །རྗེས་དྲན་གྱི་སྐབས་སུ་རྟགས་ནི་དགའ་བཞི་རྫོགས་པར་འདྲེན་ཐེམ་རེ་ལས་གཏུམ་མོའི་འབར་སྣང་མཐའ་ཡས་པ་འཕྲོ་ཚུལ་གོང་ནས་གོང་དུ་ཁྱད་ཞུགས་པ་འབྱུང་ལ། ཀུནྡ་བྱང་ཆུབ་ཀྱི་སེམས་གཏོང་བར་བཙལ་ཀྱང་མི་ལྷུང་བར་ནོར་བུ་ནས་ཤུགས་དྲག་གྱེན་དུ་རང་བཟློག་ཏུ་འགྲོ་བ་དང་། རང་ལུས་སྟོང་
གཟུགས་འོད་ཀྱི་དཀྱིལ་འཁོར་དུ་སྣང་ཞིང་། དག་པ་དང་མ་དག་པའི་སྲིད་གསུམ་གྱི་གཟུགས་བརྙན་སྤྲོ་ཞིང་སྡུད་པར་སྣང་བ་འབྱུང་ངོ་། །འདི་སྐབས་སུ་སམ་ཏྲ་དང་གདན་བཞི་སོགས་རྒྱུད་སྡེ་དུ་མ་ནས། དང་པོ་མར་མེའི་མཚན་མ་དང་། གཉིས་པ་གློག་གམ་མཁའ་སྣང་། གསུམ་པ་རྡུལ་ཕྲན་དཀར་པོའམ། དཀར་པོའི་འོད། བཞི་པ་འདོད་པའི་ལྷའི་ལོངས་སྤྱོད་ཀྱིས་མཚན་མ། ལྔ་པ་ལྷའི་གཟུགས། དྲུག་པ་གཟུགས་མེད་ཡེ་ཤེས་ཀྱི་མཚན་མ། བདུན་པ་ཆོས་ཀྱི་དབྱིངས་ཀྱི་མཚན་མ། བརྒྱད་པ་བདག་ཉིད་སངས་རྒྱས་སུ་འགྱུར་བའི་མཚན་མ་སྟེ། རྫོགས་རིམ་ལ་མཚན་མ་བརྒྱད་པོ་དེ་འབྱུང་བར་གསུངས་པ་འདི་དག་ལ་བཤད་ཚུལ་མི་འདྲ་པ་ཅི་རིགས་ཡོད་ཀྱང་། སྐབས་འདིར་མར་མེའི་མཚན་མ་ནི་སོར་བསམ་དུས་ཀྱི་རྟགས་ཐམས་ཅད་དེ་ཡན་ལག་ཕྱི་མ་ལ་ལྟོས་ནས་རྒྱ་ཆུང་དུ་གསལ་བར་བྱེད་པའོ། །སྲོག་རྩོལ་སྐབས་ཀྱི་རྟགས་རྣམས་གློག་གི་མཚན་མ་སྟེ། སྔ་མ་ལས་རྒྱ་ཆེ་ཡང་མི་བརྟན་པས་སོ། །འོད་དཀར་པོའི་མཚན་མ་འཛིན་པའི་སྐབས་ཀྱི་རྟགས་ཐམས་ཅད་དེ་དེར་ཞུ་བདེ་འཛག་མེད་ཀྱི་བྱང་སེམས་རྒྱས་པས་རྩ་ནང་ཀུན་ཏུ་ཐིག་ལེ་འགྲོ་འོང་མཐོང་བ་
དང་། དེའི་མཐུ་ལས་ཕྱི་རོལ་ཏུའང་ཟླ་འོད་སོགས་ཀྱི་སྣང་བ་འཆར་བས་སོ། །མཚན་མ་བཞི་བཞི་ནི་རྗེས་དྲན་གྱི་སྐབས་འདིར་འབྱུང་སྟེ། འདོད་པའི་ལྷའི་ལོངས་སྤྱོད་ནི། འདོད་ཁམས་ཀྱི་ལྷ་དང་མཚུངས་པར་མིའི་འདོད་ཡོན་ཐ་མལ་པ་མིན་པ་སྟོང་པའི་གཟུགས་སྒྲ་དྲི་རོ་རེག་བྱར་འཆར་ཞིང་། དེ་ལས་འཇུག་ཤེས་དྲུག་དགའ་བདེ་ལ་ལོངས་སྤྱོད་པ་དང་། ལྔ་པ་ལྷའི་གཟུགས་ཀྱི་མཚན་མ་ནི། གཟུགས་ཁམས་ཀྱི་ལྷ་རྣམས་འོད་ལུས་སུ་ཡོད་པ་བཞིན། རང་ཉིད་སྟོང་གཟུགས་ཀྱི་ལྷ་སྐུ་ཡབ་ཡུམ་དུ་གྱུར་ཏེ། འོད་ཟེར་དཔག་མེད་འཕྲོས་པའི་འོད་ཀྱི་དཀྱིལ་འཁོར་གྱི་ནང་དུ་ཚུད་ཅིང་། དཀྱིལ་འཁོར་མཐའ་ཡས་པ་སྤྲོ་ཞིང་སྡུད་པ་དང་། འདོད་སྦྱོར་གྱི་བདེ་བ་དང་། ཁམས་གསུམ་གྱི་གཟུགས་བརྙན་ཐམས་ཅད་ཀྱིས་དགའ་བདེ་བསྐྱེད་པའོ། །གཟུགས་མེད་ཀྱི་མཚན་མ་ནི། གཏུམ་མོ་འབར་བའི་ནུས་པ་རྫོགས་པས་ཞུ་བདེ་ཁྱད་པར་ཅན་སྐྱེས་ཏེ་རྩ་སྟོང་ཕྲག་བདུན་ཅུ་རྩ་གཉིས་ཀྱི་བྱང་སེམས་ཐམས་ཅད་དྲོས་ནུས་པ་དང་། རང་གནས་སུ་ཞུ་བ་དང་། སྤྱི་བོར་སྡུད་ནུས་ལ། དེ་ཤིན་ཏུ་ཞུ་ཤིང་དབུ་མར་དྲངས་ནས་བཟུང་གིན་བཟུང་གིན། འཁོར་ལོ་དྲུག་འགངས་ནུས་ཏེ། བརྟན་པ་ཐོབ་ན་དེ་ལྟར་འབྱུང་གི་གཞན་
དུ་མིན་ནོ། །དེ་ཡང་མཉམ་བཞག་དང་རླུང་སྟོབས་ཀྱིས་རླུང་དང་ཐིག་ལེ་འདྲེས་པ་དེ་ཉིད་ཞག་གཅིག་དབུ་མར་འཛིན་ནུས་ན་བརྒྱལ་བ་ཞེས་བྱ་སྟེ། དཔྲལ་བར་ཐིག་ལེ་འཛིན་པར་ནུས་ལ། ཞག་བཅོ་ལྔར་དབུ་མར་ཁེགས་ན་བཅིངས་པ་ཞེས་བྱ་སྟེ་མགྲིན་པར་འཛིན་ནུས། ཟླ་གཅིག་ཁེགས་ན་བསད་པ་ཞེས་བྱ་སྟེ་སྙིང་གར་འཛིན་ནུས། ཟླ་བ་དྲུག་ཏུ་ཁེགས་ན་བསྲེག་པ་ཞེས་བྱ་སྟེ། ལྟེ་བར་འཛིན་ནུས་པར་རྡོ་རྗེ་སྙིང་འགྲེལ་ལས་གསུངས། ལོ་གཅིག་ཁེགས་ན་གསང་བར་འཛིན་ནུས། རྟག་ཏུ་ཁེགས་ན་ནོར་བུར་འཛིན་ནུས་ཞེས་མན་ལུང་གུ་རུ་སོགས་གསུངས། དེ་ལྟར་རྡོ་རྗེ་ནོར་བུར་བརྟས་པའི་ཡེ་ཤེས་དེ་ནི་མཆོག་ཏུ་བདེ་བ་གཟུགས་མེད་པ། ཞེས་གསུངས་པ་ལྟར། གཟུགས་ཡིད་ཀྱི་ཡེ་ཤེས་སུ་མིང་བཏགས་པ་ཡིན་ནོ། །སྐབས་དེར་ཐིག་ལེ་བཟུང་ནུས་ཞེས་པ། གནས་སྐབས་རེས་འགའ་ཙམ་དུ་དེར་བཟུང་བ་ལ་མི་བྱ་སྟེ་ཁམས་ཀྱི་དྭངས་མ་དང་བདེ་བའི་ཡེ་ཤེས་གཉིས་གནས་དེ་དང་དེར་རྣམ་པ་ཀུན་དུ་ཡང་མི་ཉམས་ཤིང་རྐྱེན་གང་གིས་ཀྱང་མི་གཡོ་བར་གྱུར་པ། ཞུ་བདེ་འཛག་མེད་མཐར་ཕྱིན་པའི་གྲུབ་འབྲས་ཡིན་ནོ། །ཞུ་བདེ་འཛག་མེད་ལྷུན་གྱིས་གྲུབ་ཚེ། རྩོལ་མེད་དུ་བཞག་ཀྱང་ནོར་བུ་
ལས་བྱང་སེམས་མི་འཛག་པར་མ་ཟད་ཀྱི། ཆེད་དུ་གཏད་ནས་ཕྱིར་ཕབ་ཀྱང་འཛག་ཏུ་མི་བཏུབ་པ་ལ་ཟེར་རོ། །འཁོར་ལོ་འོག་མ་འོག་མར་ཕབ་པའི་སྐབས་སུའང་། གོང་མ་གོང་མ་གང་བ་དེ་ཉམས་པ་མེད་ཅིང་སྐད་ཅིག་སྐད་ཅིག་ལ་བྱང་ཆུབ་ཀྱི་སེམས་འཕེལ་བའི་ཆ་གང་ཡིན་པ་དེ་འོག་མ་འོག་མར་གསོས་པར་བྱེད་ཅིང་དེ་ལ་གོང་མ་གོང་མའི་རོ་བཅུད་དང་། ངད་དང་ནུས་པའི་ཆ་ཤས་ཡོད་པས་གོང་མའི་ཐིག་ལེ་འོག་མར་སོང་ཞེས་བརྗོད་པ་ཡིན་ནོ། །དེས་ན་འོག་མར་བབ་དུས་གོང་མ་དང་། ཡར་བཟློག་ཚེ་འོག་མ་སྟོང་པ་སོང་བ་མིན་པས་གནས་སྐབས་འདིའི་ཉམས་རྟོགས་རྒྱུད་ལ་བསྐྱེད་པའི་དགའ་བཞི་ལུགས་འབྱུང་ལྡོག་དང་། ལས་དང་པོ་པའི་དབབ་བཟློག་གི་རིམ་པ་ལ་ཁྱད་ཤིན་ཏུ་ཆེ་བ་ཡོད། ཞག་གྲངས་སོགས་འདི་ཙམ་ཁེགས་ཞེས་གོང་བཤད་དེ་རྣམས་མཉམ་བཞག་ཐུན་གཅིག་ལ་དེ་ཙམ་གནས་ནུས་ཀྱི་དེ་ལས་ལྷག་པར་མི་ནུས་ཏེ། རྩ་འཁོར་གོང་འོག་གང་རུང་གཅིག་ཏུ་འགྲོ་དགོས་པའི་དོན་ཡིན་ནོ། །དེ་ལྟར་ཞུ་བདེ་འཛག་མེད་ལྷུན་གྲུབ་ཐོབ་པའི་རྒྱུ་ནི། གཏུམ་མོ་འབར་བ་བརྟན་པ་དང་། གནས་དེ་དང་དེར་ཐིག་ལེའི་གང་བ་གཉིས་ཡིན་ནོ། །དེ་ཡང་གཏུམ་མོ་འབར་བ་གཡོས་ནས། སྙིང་གའི་ནང་མ་ཞེས། རླུང་གི་ཐིག་ལེ་
སྙིང་གར་གནས་པ་དེ་གཡོ་བས་ཐིག་ལེ་རྩོལ་མེད་དུ་ཁེགས་པ་མི་འབྱུང་། གཏུམ་མོ་གཡོ་བའི་རྒྱུ་ནི་རོ་རྐྱང་གི་རྒྱུ་བ་ཡིན་པས་དེ་ཁེགས་ན་གཏུམ་མོ་བརྟན། དེའི་སྙིང་གའི་ནང་བརྟན། དེ་གཉིས་མ་གཡོས་པས་ཐིག་ལེ་རྩོལ་མེད་དུ་བརྟན་པ་ཡིན་ནོ། །གང་བས་གཡོ་མེད་དུ་གནས་པ་ནི་བུམ་པ་གང་བ་བཞིན་ནོ། །བདུན་པ་ཆོས་ཀྱི་དབྱིངས་ཀྱི་ཉམས་ནི། ཞུ་བདེ་དེས་རང་བཞིན་ལྷན་སྐྱེས་ཆོས་ཐམས་ཅད་ཀྱི་གནས་ལུགས་དེ་དངོས་སུ་ཉམས་སུ་མྱོང་བ་སྙམ་བྱེད་ཅིང་། གནས་ལུགས་དེ་ཤིན་ཏུ་གསལ་པོར་མཚོན་པར་ནུས་པ་ཡིན་ནོ། །བརྒྱད་པ་བདག་ཉིད་སངས་རྒྱས་སུ་འགྱུར་བའི་ཉམས་ནི། ཏིང་ངེ་འཛིན་གྱི་ཡན་ལག་སྟེ། སྐུ་དང་ཡེ་ཤེས་ཟུང་འཇུག་གི་ཆ་ཤས་ཐོབ་པས། རང་ཉིད་སངས་རྒྱས་སུ་གྱུར་པ་དང་ཆ་འདྲ་བའི་ཕྱིར་རོ། །གཞན་ཡང་རྗེས་དྲན་གྱི་སྐབས་སུ་ཁམས་དྭངས་མ་ཐམས་ཅད་སྤྱི་བོར་འདུས། དྷཱུ་ཏི་ལ་དུས་མེ་འབར། བྱང་སེམས་བབ་པ་ཕྱག་ཆེན་གྱིས་བཅིངས། དབུ་མ་དྭང་མའི་ཐིག་ལེ་གང་བས་ལུས་ཀྱང་ཐིག་ལེ་གང་། ཐིག་ལེའི་ཆ་ཤས་རྡུལ་ཕྲན་གྱི་ཚད་ཙམ་ལས་ཀྱང་རྟགས་སྣང་མཐའ་ཡས་པ་འཆར་བའི་ཕྱིར། འཁོར་འདས་ལམ་གསུམ་གྱི་གཟུགས་བརྙན་དཔག་
མེད་ཅིག་ཅར་སྣང་བ་རྒྱུན་མི་འཆད་པར་འབྱུང་། དེ་རེ་རེས་ཀྱང་ཞུ་བདེ་དང་ཞུ་བདེ་མ་ཡིན་པའི་དགའ་བདེར་ཁྱད་པར་ཅན་རེ་འགྲུབ་མོད་ཀྱང་། བདེ་བ་སྐྱེད་བྱེད་ཀྱི་གཙོ་བོ་ནི་དབུ་མར་གནས་པ་གཏུམ་མོའི་རང་བཞིན་ལས་གྲུབ་པའི་རྟགས་བཅུའི་ལྷ་སྐུ་ཡབ་ཡུམ་གྱི་རྣམ་པ་ཅན་རྣམས་ཏེ། གཏུམ་མོའི་མེ་དང་རྟགས་བཅུ་དང་། སྲོག་ཐུར་གཅིག་ཏུ་འདྲེས་པའི་རླུང་ནི་དབུ་མར་རྣམས་གཅིག་གཅིག་ལ་འདུས་པའི་དཀྱིལ་འཁོར་གྱི་འཁོར་ལོའོ། །གཞན་ཡང་འཛིན་པའི་སྐབས་སུ་གཏུམ་མོ་འབར་བ་བཅུ་འགྲུབ་ཚུལ་འཛིན་པ་ནས་རྗེས་དྲན་ལ་མཚམས་སྦྱོར་ཚུལ། རྗེས་དྲན་གྱི་མགོ་ཐེབ་པ་ཙམ་ནས་སྟོང་གཟུགས་ཕྱག་རྒྱ་ཆེན་མོ་འདོད་པའི་ལྷ་དེ་གྲུབ་པ་ཡིན་ཡང་ཞུ་བདེ་རྫོགས་པར་འདྲེན་ཐུབ་མི་ཐུབ་ཀྱི་ཁྱད་པར་དང་། སྟོང་གཟུགས་ཀྱིས་བདེ་བ་འཕེལ་ཐུབ་མི་ཐུབ་དང་། མི་འགྱུར་བའི་བདེ་བ་སྐྱེད་ཐུབ་མི་ཐུབ། དགའ་བ་བཞི་དང་བཅུ་དྲུག་གི་རབ་དབྱེ་འདོད་པའི་གནས་སྐབས་བཅུ་རྣམ་པར་དག་པའི་ཡེ་ཤེས་ཀྱི་རིམ་པ། ཏིང་ངེ་འཛིན་གྱི་སྐབས་སུ་ཁམས་ཐམས་ཅད་དྭངས་མ་བཅུར་གྱུར་གྱི་བར་དུ་བཞུ་བཏུལ་བྱེད་པ་ཡེ་ཤེས་དག་བྱེད་དང་། ཕུང་ཁམས་སོགས་ལྷ་སྐུར་ཤར་བས་ལུས་དག་པ། ལས་རླུང་འགགས་པས་ངག་དག་པ། བྱང་སེམས་
དག་པས་སེམས་སྤྲོས་བྲལ་རྟོག་མེད་ཀྱི་རིག་པ་ཇི་ལྟ་བ་དང་། ཇི་སྙེད་པ་ཤེས་ཚུལ། ས་བཅུ་གཉིས་ཀྱི་ཡོན་ཏན་བཤད་པ་སོགས་གཞན་ལས་ཤེས་པར་བྱའོ། །འདི་ལྟའི་ལམ་འདིར་འབད་ན་དེང་སང་གི་གང་ཟག་རྣམས་ལས་འབྱུང་རུང་གི་ལུས་ངག་སེམས་ཉམས་དང་། མཐོང་ཉམས་རྨི་ཉམས་ཏེ་རྟགས་ལྔར་གྲགས་པ་ཉེར་མཁོ་ཆེ་རིགས་བརྟན་པ་འདིས་མཚོན་ནས་མཐའ་ཡས་པའི་བར་དུ་ཤེས་པར་བྱ་བ་དང་། སློབ་དཔོན་ཉམས་མྱོང་ཅན་དང་། ཡོན་ཏན་ཅན་གྱིས་ངོ་སྤྲད་པར་བྱ་སྟེ། ལམ་འདི་རྣམས་རྟགས་སྣང་གི་ལམ་ཁྲིད་ཡིན་པས་རྟགས་ཚད་ཤེས་པ་གལ་ཆེ་ཞིང་སྟོང་གཟུགས་ལ་གཅེས་སྤྲས་དང་རྩིས་པོ་ཆེར་བྱེད་དགོས། སྟོང་གཟུགས་མཐོང་བ་ཙམ་གྱིས་མི་ཆོག་སྟེ། ངོ་སྤྲོད་ཚུལ་དང་། ལམ་དུ་བསྲེལ་ཚུལ། བོགས་འདོན་ཚུལ་མ་ནོར་བ་བྱེད་དགོས་སོ། །གང་དག་འོད་གསལ་གྱི་རང་སྣང་མངོན་སུམ་མཐོང་བའི་སྟོང་གཟུགས་འཁྲུལ་སྣང་གི་ཉམས་ཙམ་དུ་སེམས་པ་ནི་རྒྱུད་སྡེའི་ཟབ་གནད་མ་ཤེས་པ་ཡིན་པས། བླ་མ་དམ་པའི་མན་ངག་ཡིད་བཞིན་ནོར་བུ་འདི་ལྟ་བུ་ལག་ཏུ་འོང་བ་ཆུད་མི་ཟོས་པ་བྱའོ། །ཞེས་རྗེ་བཙུན་སྒྲོལ་མའི་མགོན་པོས་གདམས་པར་མཛད་དོ། །ཨ་ནུ་སྨྲྀ་
ཏའི་ཞེས་པའི་ངེས་ཚིག་ནི། སྟོང་གཟུགས་ཕྱག་རྒྱ་ཆེན་མོ་ཡང་ཡང་རྗེས་སུ་དྲན་ཅིང་རྩོལ་བའི་དོན་གྱིས་དེ་ལྟར་བཏགས་པ་སྟེ། སྔར་འཛིན་པའི་དུས་ཀྱི་ཞུ་བདེ་ལས་ལྷག་པའི་འཛག་མེད་ཀྱི་བདེ་ཆེན་འགྲུབ་པའི་ཕྱིར་དུའོ། །རང་རིག་པས་བདེ་བ་མྱོང་བའི་རང་རིག་མངོན་སུམ་ཡིན་ལ། འདི་པའི་དུས་སུ་རྩ་ནང་ཀུནྡ་བྱང་ཆུབ་སེམས་ཀྱི་ཐིག་ལེས་གང་བས་རླུང་ཁམས་འཕོ་བའི་སྒྲིབ་པ་དག་ནས། འཕོ་མེད་ལྷན་སྐྱེས་ཀྱི་བདེ་བ་མངོན་དུ་ཤེས་པར་དབང་། མངོན་ཤེས་རྫུ་འཕྲུལ་སོགས་ཡོན་ཏན་རྣམས་སྔར་བས་ཆེར་འཕེལ་ཏེ་མཐའ་ཡས་པ་ཐོབ། ཕྱི་ནང་ཐམས་ཅད་དུ་འོད་ཀྱིས་ཁྱབ་པ་དང་། རྣམ་སྨིན་གྱི་ལུས་གནས་མ་གྱུར་ཀྱང་སེམས་ལྷའི་སྐུར་དངོས་སུ་གྱུར། སངས་རྒྱས་ཀྱི་གཟུགས་སྐུ་གཉིས་མངོན་སུམ་མཐོང་ནས་ངེས་པར་ལུང་བསྟན་པ་ཐོབ། མཐར་ཐུག་འདུ་ཤེས་དང་ཆུ་ཁམས་དག་ནས་འོད་དཔག་མེད་ཀྱི་དཀྱིལ་འཁོར་འགྲུབ་པའོ། །དྲུག་པ་ཏིང་ངེ་འཛིན་ནི། ལམ་སྔ་མར་གོམས་པའི་ལག་རྗེས་གྲུབ་འབྲས་སུ། མས་བརྟན་གྱི་དགའ་བ་ཁྱད་པར་ཅན་སྐྱེས་པའི་སྟོབས་ཀྱིས་གསང་བའི་འཁོར་ལོར་དྷཱུཏིའི་ནང་དུ་རླུང་སེམས་འགགས་ནས་མི་འགྱུར་བའི་བདེ་བ་སྐད་ཅིག་མ་
དང་པོ་ཐོབ་པ་ནས་བརྩམ་སྟེ། མཐར་གཙུག་ཏོར་གྱི་འཁོར་ལོར་སྲོག་ཐིམ་སྟེ་མི་འགྱུར་བའི་བདེ་བ་ཉི་ཁྲི་ཆིག་སྟོང་དྲུག་བརྒྱ་ཡོངས་སུ་རྫོགས་པའི་བར་དུ་སྒྲུབ་པ་ཡིན་ལ། དུས་སྦྱོར་རེ་རེའི་རླུང་སྟོང་བརྒྱད་བརྒྱ་རེ་འགགས་པས་ཏིང་ངེ་འཛིན་གྱི་ས་བཅུ་གཉིས་རིམ་པར་ཐོབ། སྐུ་བཅུ་དྲུག་དག་པར་འགྱུར། མཐར་དཀར་ཆའི་ཐིག་ལེ་སྤྱི་བོ་དང་རྡུལ་དམར་ཆ་ནོར་བུར་བརྟན་པས་མི་གནས་པའི་མྱང་འདས་ཐོབ། ཡོན་ཏན་རྫོགས་ཏིང་ངེ་འཛིན་ལ་དབང་བསྒྱུར་བ་ཙམ་གྱིས་དྲི་མ་ཐམས་ཅད་བྲལ་བར་བྱེད་དོ། །འདིའི་ཡུལ་ནི་སྟོང་གཟུགས་ཕྱག་ཆེན་དང་། མི་འགྱུར་བའི་བདེ་བ་ཆེན་པོ་ཟུང་དུ་འཇུག་པ་ལ་ས་མ་དྷཱི་ཞེས་རྩེ་གཅིག་གནས་པའི་ཏིང་ངེ་འཛིན་ཏེ། དམིགས་བཅས་སྟོང་གཟུགས་དང་། དམིགས་མེད་བདེ་ཆེན་རོ་མཉམ་པ་ལ་སེམས་མི་གཡོ་བར་བརྟན་པ་ཐོབ་པའོ། །དེའི་དབང་གིས་བརྟན་གཡོའི་དངོས་པོ་ཐམས་ཅད་བདེ་བ་ཆེན་པོའི་རོལ་པར་འཆར་ཞིང་མི་འགྱུར་པའི་བདེ་ཆེན་གྱི་སྐུ་བཞི་འགྲུབ། འདིའི་སྒོམ་ཚུལ་ཕྱག་ཆེན་ཁོ་ནར་བརྟན་པའི་རྗེས་དྲན་དང་ཕལ་ཆེར་འདྲ་ལ། སྤོག་ཆོག་ཏུ་ལས་ཀྱི་ཕྱག་རྒྱ་ཐ་དད་པ་མང་པོ་ལས་ཀྱང་བསྒྲུབ་པར་བཤད་
མི་འགྱུར་བ་དེ་དང་རྣམ་ཀུན་མཆོག་ལྡན་གྱི་སྟོང་ཉིད་དབྱེར་མེད་ལྷན་སྐྱེས་དོན་གྱི་ཡེ་ཤེས་སོ་སོར་རང་གི་རིག་པས་མངོན་སུམ་དུ་མཐོང་བའི་རྣལ་འབྱོར་མངོན་སུམ་ཚད་མའོ། །དེ་ཡང་དང་པོར་སོར་སྡུད་ཀྱིས་རྟགས་སྣང་མཐོང་བ་ནི་རླུང་བཅུ་དབུ་མར་ཞུགས་པའི་རྟགས་ཡིན་ལ། དེ་ནས་རིམ་པས་སྲོག་རླུང་དབུ་མར་ཐིམ་པ་དང་། ཏིང་འཛིན་འདིའི་སྐབས་སུ་ཕྲ་བའི་རླུང་བཅུ་རྩ་བ་ནས་སླར་མི་སྐྱེ་བའི་ཚུལ་དུ་གཏན་འགགས་ཡིན་ཅིང་། དེ་ཡང་ཞུ་བདེ་འཛག་མེད་མཐར་ཕྱིན་པའི་རྐྱེན་བྱས་ནས། ལས་རླུང་གཅིག་འགགས། རྩ་གསུམ་གྱི་བཅུ་གཉིས་ཆ་གཅིག་དབུ་མར་ཐིམ། ཁམས་དཀར་དམར་གྱི་བགྲོད་པ་རེ་རེ་དབུ་མའི་ནང་དུ་གཡོ་མེད་དུ་བརྟན་ཞིང་རྩ་རླུང་ཁམས་རྣམས་ཕྱིན་ཆད་འཕོ་མེད་རྒྱུན་མི་ཆད་པའི་སྟོང་གཟུགས་སུ་གྱུར་སྟེ་དེ་དང་ངོ་བོ་གཅིག་པའི་ཡེ་ཤེས་མི་འགྱུར་བའི་བདེ་བ་འགྲུབ། བརྟན་ཟིན་རྣམས་སླར་གནས་འགྱུར་རྒྱུ་མེད་ལ། བརྟན་པར་མ་གྱུར་པ་རྣམས་དབབ་བཟློག་གི་ཞུ་བདེས་འཛག་མེད་དུ་བརྟན་པར་བཅིང་བར་བྱེད། ཐམས་ཅད་གནས་གྱུར་པ་ན་འཕོ་མེད་ཡེ་ཤེས་ཀྱི་སྐུ་འགྲུབ་སྟེ། དེ་ཡང་ཏིང་ངེ་འཛིན་གྱི་རྣལ་འབྱོར་དང་པོ་སྐྱེས་པ་ནས་
བཟུང་སྟེ་རྒྱུན་མི་ཆད་པར་བསྒོམ་ན་ལོ་གསུམ་ཕྱོགས་གསུམ་གྱིས་ཆོས་ཉིད་ཀྱི་བདེན་པ་མངོན་དུ་བྱེད་ཅིང་རྣམ་སྨིན་གྱི་ལུས་དབྱིངས་སུ་ཐིམ་ནས་ཟུང་འཇུག་ཡེ་ཤེས་ཀྱི་སྐུ་དབང་བཅུ་སོགས་ཀྱིས་བརྒྱན་པ་བྱང་ཆུབ་སེམས་དཔའ་ཆེན་པོར་འགྲུབ། ཏིང་ངེ་འཛིན་གྱི་སྐབས་འདི་ལ་འཁོར་ལོ་དྲུག་ཏུ་རླུང་འགགས་པའི་དབྱེ་བས་ཏིང་ངེ་འཛིན་གྱི་ས་བཅུ་གཉིས་དང་། རླུང་བཅུ་འགོད་པའི་ཏིང་ངེ་འཛིན་བཅུ་ཡི་དབྱེ་བར་བཤད། དེ་ལྟར་ན་སྦྱོར་བ་དྲུག་གི་མཐར་གྱུར་པའི་ཏིང་འཛིན་མཚན་ཉིད་པ་ནི་བཟོད་པ་དང་ཆོས་མཆོག་གི་སྐབས་ཡིན་ལ། གཙུག་ཏོར་རྩེ་མོར་རླུང་སེམས་ཡོངས་སུ་འགགས་པ་ནི་ས་དང་པོ་རབ་ཏུ་དགའ་བ་དངོས་ཐོབ་པ་ཡིན་ནོ། །འདིས་མཐར་འབྲས་གཟུགས་ཕུང་དང་ས་ཁམས་དག་ནས། རྣམ་པར་སྣང་མཛད་ཀྱི་དཀྱིལ་འཁོར་འཁོར་ལོ་འགྲུབ་བོ། །ཁྲིད་ཀྱི་རྗེས་ཀྱི་རིམ་པ་མཚན་མོ་དང་། ཐུན་མཚམས་ཀྱི་རྣལ་འབྱོར་སོགས་ལམ་གྱི་ཡན་ལག་རྣམས་གཞན་དུ་ཤེས་པར་བྱའོ། །དེ་ལྟར་རྒྱུད་སྡེའི་མཚན་བཅས་ཀྱི་རྫོགས་རིམ་གཞན་ལས་ཆེས་ཟབ་སྙིགས་དུས་ཚེ་ཐུང་གཅིག་ལ་སངས་རྒྱས་མངོན་དུ་བྱེད་པའི་ལམ་རྡོ་རྗེའི་རྣལ་འབྱོར་སྦྱོར་བ་ཡན་
ལག་དྲུག་གི་རིམ་པར་བཤད་པ་འདི། རྫོགས་རིམ་འདིའི་གོ་དོན་ཡང་ཡིན་ལ། ཁྲིད་ཡིག་རྟགས་ཚད་ཀྱི་ཡི་གེ་དང་བཅས་པ་ཡང་། འདི་ལས་གཞན་དུ་མི་དགོས་པའི་གནད་ཚང་བ་ཡིན་ཞིང་གེགས་སེལ་དང་བོགས་འདོན་གྱི་ཞིབ་ཆ་རྣམས་ཇོ་ནང་རྗེ་བཙུན་ཆེན་པོའི་ཁྲིད་ཡིག་མཐོང་བ་དོན་ལྡན་དང་གེགས་སེལ་སོགས་ལས་ཤེས་པར་བྱ་ཞིང་། སྤྱིར་གེགས་སེལ་ཀུན་གྱི་རྒྱལ་པོ་བླ་མའི་མོས་གུས་གཙོ་ཆེ་ཞིང་། གང་སྣང་སྒྱུ་མར་ལམ་དུ་ཁྱེར་སྙིང་རྗེ་དང་ཚོགས་བསག་སྒྲིབ་སྦྱོངས་ལ་འབད། ཉམས་རྣམས་ལ་སྐྱོན་ཡོན་དུ་རློམ་པས་མ་བཅིང་བར་བྱུང་རྒྱལ་དུ་བསྐྱངས་བས་གྲོལ་ལོ། །དེ་བཞིན་བོགས་འདོན་གྱི་གདམས་ངག་རྣམས་ཀྱང་ཤེས་པར་བྱའོ། །དེ་ལྟར་ལམ་ངེས་རྫོགས་སུ་སྒོམ་པ་བཤད་ནས། སྦྱོར་དྲུག་སྟན་ཐོག་གཅིག་མའི་ཉམས་ལེན་ནི། སྐྱབས་སེམས་རྡོར་སེམས་སྒོམ་བཟླས། མཎྜལ་བླ་མའི་རྣལ་འབྱོར་དང་། བསྐྱེད་རིམ་ལྷན་སྐྱེས་ཙམ་ཁྲིད་རྒྱས་བསྡུས་གང་ལའང་སྔོན་འགྲོར་བྱ། དངོས་གཞི་སོར་སྡུད་ནི་མི་གཡོ་སུམ་ལྡན་གྱི་སྒོ་ནས་ལུས་གནད་བཅས། འཁོར་སྒྱུར་གྱིས་ལྟ་སྟང་གིས་མཚན་མོ་མུན་པའི་རྣལ་འབྱོར་ཉམས་སུ་བླངས་པས་མཚན་རྟགས་བཞི། ཉིན་མོ་
སྤྲིན་མེད་ནམ་མཁར་རྣལ་འབྱོར་དུ་བྱས་པས་ཉིན་རྟགས་དྲུག་འབྱུང་། བསམ་གཏན་ནི་སྟོང་གཟུགས་ལ་དམིགས་རྟེན་བྱས་ཏེ་ཤེས་རབ་དང་། རྟོག་དཔྱོད་དགའ་བདེ་སེམས་པའི་ཡན་ལག་ལྔ་ལྡན་གྱི་བསམ་གཏན་སྒྲུབ་པས། འོད་སྣང་གསལ་ཞིང་འགྲོ་བ་སོགས་རྟགས་སྣང་སྔར་བས་གསལ་བ་འབྱུང་། དེ་ནས་རྡོ་རྗེའི་བཟླས་པས་རྩ་ལམ་སྦྱངས་ནས། སྦྱོར་བ་བཞི་ལྡན་གྱི་བུམ་ཅན་བསྒོམ་པའི་རླུང་ལ་དབང་ཐོབ་པའི་ཕྱིར་སྲོག་རྩོལ་བསྒོམ་པ་སྟེ་དོན་དྷཱུ་ཏིའི་འཁོར་ལོ་བཞིའི་ནང་དུ་རླུང་འགྲོ་འོང་བྱེད་པའོ། །དེ་ནས་སྲོག་རླུང་རྣམས་དྷཱུ་ཏིའི་ནང་གི་མི་ཤིགས་པའི་ཐིག་ལེ་ལ་ཐིམ་པའི་ཆེད་དུ། འཁོར་ལོ་སོ་སོའི་གནས་རྣམས་སུ་བུམ་ཅན་བཟུང་བས་གནས་དེ་དང་དེའི་ཐིག་ལེ་ལ་ཐིམ་པར་བསྒོམ་པ་འཛིན་པ། དྷཱུ་ཏིའི་ནང་དུ་བུམ་ཅན་བཟུང་སྟེ། ལྟེ་བའི་གཏུམ་མོའི་མེ་འབར་བས། སྤྱི་བོའི་ཧཾ་ཞུ་བས་འབར་འཛག་ལ་བསླབ་པས་ཞུ་བདེ་བསྐྱེད་པ་ནི་བདེ་བ་རྗེས་སུ་དྲན་པ་སྟེ། ཡས་བབ་ཀྱི་དགའ་བཞི་ངོས་བཟུང་ཞིང་སོ་སོའི་གནས་སུ་རླུང་རིག་སྟོང་གཟུགས་དབྱེར་མེད་དུ་བསྲེས་ཏེ་མཉམ་པར་བཞག་པའོ། །དེ་ནས་ནོར་བུའི་རྩེ་ནས་རླུང་སྟོབས་ཀྱིས་གྱེན་དུ་བཟློག་པས་ནོར་བུའི་འཁོར་ལོ་ནས་
བཙུག་ཏོར་ནམ་མཁའི་བར་དུ། རྩ་རླུང་ཐིག་ལེ་ཐམས་ཅད་སྟོང་གཟུགས་དང་མི་འགྱུར་བའི་བདེ་བ་དབྱེར་མེད་པའི་འོད་གསལ་འཕོ་མེད་དུ་ཐིམ་པར་བསམ་པ། མས་བརྟན་གྱི་དགའ་བཞི་མོས་སློབ་དུ་བྱེད་པ་ཏིང་ངེ་འཛིན་གྱིས་སྦྱོར་བའོ། །ཡན་ལག་ཕྱི་མ་འདི་བཞིར་སྟོང་གཟུགས་དང་བསྲེ་བ་རྗེས་མཐུན་ཙམ་འོང་ན་སྦྱོར་དྲུག་གི་ཉམས་ལེན་ཆ་མཐུན་ཙམ་དང་། མིན་ན་ཡིད་ཀྱི་མོས་པས་དེ་ལྟར་དམིགས་པས་ཀྱང་མོས་སློབ་ཙམ་དུ་འགྱུར་བ་ཡིན་ནོ། །དུས་ཀྱི་འཁོར་ལོའི་རྒྱུད་ལས་གསུངས་པའི་སྦྱོར་དྲུག་འདི་ནི་རྫོགས་རིམ་དངོས་ཡིན་ལ་གསང་བ་འདུས་པ་ལས་གསུངས་པའི་སྦྱོར་དྲུག་ནི་གཙོ་ཆེར་བསྐྱེད་རིམ་དང་འབྲེལ་བ་ཡིན་ཏེ། རྒྱུད་དེ་ལས། སོ་སོར་སྤོང་དང་བསམ་གཏན་དང་། །གཟུགས་དག་གཏོང་དང་གཟུང་བ་དང་། །རྗེས་སུ་དྲན་དང་ཏིང་འཛིན་ནི། །སྦྱོར་བའི་ཡན་ལག་དྲུག་ཅེས་བྱ། །ཞེས་རྣལ་འབྱོར་གྱི་ཡན་ལག་དྲུག་དང་ལྡན་པའི་ཏིང་ངེ་འཛིན་འདི་གསུང་པ་ཡིན་ལ། དེ་རྣམས་གང་ཞེ་ན། དང་པོ་ནི། སྡོམ་པ་ལ་གནས་པ་སྟེ། དེ་ཡང་ཇི་ལྟར་ཚུལ་ཁྲིམས་དག་པ་ལ་གནས་པ་རྣམས་འདོད་པས་གཡེང་བ་དང་འགྱོད་པ་མེད་པར་གནས་ཤིང་རྟག་ཏུ་དབང་པོའི་སྒོ་བསྡམས་
པ་ནི་ཏིང་ངེ་འཛིན་སྐྱེ་བའི་རྒྱུ་ཡིན་པ་དེ་བཞིན་དུ། སྐབས་འདིར་སོ་སོར་སྤོང་བ་ཡང་། ཡུལ་དང་དབང་པོའི་སྒོ་ནས་རྣམ་ཤེས་སྐྱེ་བ་ཐམས་ཅད་སྐྱོན་དུ་བལྟས་ཏེ་སྤོང་བ་དང་། དངོས་པོར་བལྟས་ཏེ་མཚན་མའི་རྗེས་སུ་འབྲང་བ་གཉིས་གང་ཡང་མིན་པར། རྟག་ཏུ་རང་ཉིད་ལྷའི་བདག་ཉིད་དུ་བལྟས་ཏེ་སྤྱད་པས། ཐ་མལ་པའི་དབང་པོ་རང་བཞིན་གྱིས་བསྡམ་པ་དང་། འདོད་པ་བཀག་པའི་གདུང་བས་ཀྱང་མ་ཡིན་ལ། རྒྱལ་བའི་བྱིན་བརླབས་ཀྱང་ཉེ་བར་གྱུར་པས། བསམ་གཏན་གྱི་སྣོད་དུ་གྱུར་པའི་ཕྱིར་སོ་སོར་སྤོང་བའོ། །ཞེས་འདོད་པའི་གཡེང་བ་སྤོངས་བས་སོ་སོར་སྤྱོད་པའང་ཟེར་ཏེ་བདེ་བར་ལོངས་སྤྱོད་པས་སོ། །བསམ་གཏན་གྱི་ཡན་ལག་ནི། ལྷ་ཡི་གསང་བ་གསུམ་ལ་དམིགས་པའི་བསམ་གཏན་འདོད་པ་དང་སྡིག་ཏོ་མི་དགེ་བའི་ཆོས་ཀྱིས་དབེན་པ་ལས་སྐྱེས་པ་སྟེ། རྟོག་དཔྱོད་དགའ་བདེ་སེམས་རྩེ་གཅིག་པའི་ཡན་ལག་ལྔ་ལྡན་ཏེ། གསང་གསུམ་གྱི་མཚན་ཉིད་རྟོགས་པའི་རྟོག་པ། དེ་ལའང་དཔྱོད་པའི་དཔྱོད་པ། དེ་ལས་གསང་གསུམ་འདྲ་སྣང་གི་རྣམ་པ་འབྱུང་ཞིང་། འདོད་པས་དབེན་པ་སྔར་མ་མྱོང་བའི་ཡིད་དགའ་བ་རླབས་པོ་ཆེ་སྐྱེ་བས་དགའ་བ། བདེ་བ་ནི་ལུས་སེམས་ཤིན་སྦྱང་
གི་བདེ་བ་མྱོང་བ། སེམས་ནི་རང་རིག་པའི་ངོ་བོར་གྱུར་པ་རྩེ་གཅིག་པའོ། །དེ་ནས་དབུགས་དགག་ཅིང་བཏང་བ་ནི། དབུགས་རྒྱུ་བ་དེའི་གནས་དང་ལམ་དང་བྱེད་པ་སོགས་ལ་དམིགས་ནས་འབྱིན་འཇུག་སོགས་བྱེད་པ་དང་། རྟགས་ཡོད་པར་ལུས་དང་ལྷའི་རང་བཞིན་དུ་ཡང་དམིགས་པའོ། །དེས་རྩ་ལམ་སྦྱངས་ནས། འཛིན་པ་ནི་དབུགས་ནང་དུ་འཛིན་ཅིང་ཕྱིར་མི་གཏོང་བར་བཀག་སྟེ་བསྐྱིལ་བ་ལ་རིམ་གྱིས་གོམས་པས། དབུགས་དང་སེམས་འདུས་ནས་དུ་བ་སོགས་རྟགས་ལྔ་མིག་ལམ་དུ་སྣང་བ་ཕྱི་རྟགས་དང་། ནང་རྟགས་སེམས་ཇེ་ཞི་ཇེ་བརྟན་དུ་གྱུར་པའོ། །དེ་ནས་རྗེས་དྲན་ནི་སྟེང་འོག་གི་སྒོ་གང་རུང་ནས་ལྷའི་གསང་གསུམ་གྱི་རྣམ་པའི་འོད་ཟེར་གྱི་སྤྲོ། བ་སྤུ་རྒྱ་ཆེ་ཆུང་གྲངས་མང་ཉུང་གིས་སེམས་ཀྱི་རྩལ་སྦྱངས་པར་བྱེད་པའོ། །དེ་གོམས་ནས་ཏིང་ངེ་འཛིན་ནི། གོང་མ་ལྟར་རྩལ་སྦྱངས་པའི་ཤུགས་ཀྱིས་ཡེ་ཤེས་རང་རིག་པ་རྣམ་པར་མི་རྟོག་པ་ཐོབ་སྟེ་སྒྲིབ་པའི་དྲྭ་བ་གཅོད་པའོ། །དེ་དག་གི་ཡོན་ཏན་ཡང་སོ་སོར་སྤོང་བ་ལས་སངས་རྒྱས་ཀྱི་དགོངས་པར་འགྱུར། བསམ་གཏན་ལས་མངོན་པར་ཤེས་པ་འགྲུབ་པ་སོགས་འབྱུང་ངོ་། །གྲུབ་ཐོབ་
ཨོ་རྒྱན་པ་ལ་རྡོ་རྗེ་རྣལ་འབྱོར་མས་དངོས་སུ་རྩལ་བའི་རྡོ་རྗེ་གསུམ་གྱི་བསྙེན་སྒྲུབ་ཞེས་པ་སོར་བསམ་སྐུ། སྲོག་འཛིན་གསུང་། དྲན་ཏིང་ཐུགས་རྡོ་རྗེའི་རྣལ་འབྱོར་ཞེས་སྦྱོར་བ་ཡན་ལག་དྲུག་སྟོན་པ་ཡིན་ཡང་། སྟེང་འོག་བར་གྱི་སྐྱིལ་ཀྲུང་སོགས་ལུས་གནད་དང་རླུང་སྦྱོར་དང་། འབྱུང་ལྔའི་གདན་དང་ལྷ་སྐུ་ཡབ་ཡུམ་བར་གྱི་དམིགས་པ་དང་། རྡོར་བཟླས་དང་ཞུ་བདེ་ལ་བརྟེན་ནས། རྟགས་བཅུའི་སྟོང་གཟུགས་མཐོང་བ་དང་། རླུང་དབུ་མར་འཛིན་ཞིང་ཐིམ་པར་བྱས་ཏེ་གཏུམ་མོའི་མེས་སྦྱངས་ཤིང་། ལས་དང་ཡེ་ཤེས་ཕྱག་ཆེན་གསུམ་རིམ་བཞིན་བརྟེན་ཏེ་མི་འགྱུར་བའི་བདེ་བ་སྒྲུབ་པས། དབུ་མ་སྒྲ་གཅན་གྱིས་ཐོག་མར་དཀར་ཆ་དང་། དེ་རྗེས་དམར་ཆ་ཟ་ཞིང་དེ་རྗེས་སྙིགས་མ་རྣམས་ཀྱང་ཟོས་ཏེ་རིམ་པས་དངས་མར་འགྱུར་ཞིང་། རྡུལ་བྲལ་འཕོ་མེད་ཀྱི་སྐུ་འགྲུབ་པར་བྱེད་ལ། དེའི་ཡན་ལག་ཏུ་ལས་བཞི་སོགས་བསྒྲུབ་པ་དང་། ནད་སོགས་ཀྱི་གེགས་བསལ་བའི་གདམས་ངག་མང་པོ་ཟབ་པར་བསྟན་པ་ཡོད་དོ། །དེ་ལ་སོགས་པ་རྒྱུད་སྡེའི་རྫོགས་རིམ་གཅིག་ལའང་གང་ཟག་གི་དབང་པོ་དང་བསྟུན་པའི་ལམ་གནད་ཀྱི་ཁྱད་པར་མི་འདྲ་བ་སྣ་ཚོགས་ཡོད་ཀྱང་
དུས་འཁོར་གྱི་རྒྱུད་དང་མན་ངག་ལས་གསུངས་པའི་སྦྱོར་བ་ཡན་ལག་དྲུག་གོང་དུ་བཤད་པ་རྣམས་ནི་རྫོགས་རིམ་གྱི་རྒྱལ་པོ་ཡིན་ནོ། །དེ་ལྟར་སྦྱོར་བ་ཡན་ལག་དྲུག་གི་དགོངས་གནད་གསལ་བྱེད་ཀྱི་མན་ངག་བཻ་ཌཱུརྱའི་མེ་ལོང་ཞེས་པ་འདི་ནི། རྗེ་བཙུན་སྒྲོལ་བའི་མགོན་པོའི་སྦྱོར་དྲུག་གི་ཁྲིད་ཡིག་མཐོང་བ་དོན་ལྡན་དང་སྦྱོར་དྲུག་གི་རྟགས་ཚད་ཀྱི་ཡི་གེ་གཉིས་ལ་གཞི་བྱས་དུས་ཞབས་དང་ཤ་ཝ་རིའི་སྙན་བརྒྱུད་སོགས་མན་ངག་གི་ཡིག་ཆ་རྣམས་ནས་ཅུང་ཟད་ཁ་བསྐངས་ཏེ་མི་ཕམ་འགྱུར་མེད་མི་བསྐྱོད་རྡོ་རྗེས་ཁྲ་འགུ་བདེ་མཆོག་ཕོ་བྲང་དུ་ས་སྤྲེལ་དབོ་ཟླའི་དམར་ཕྱོགས་རྫོགས་པ་གསུམ་པར་གྲུབ་པར་བགྱིས་པ་འདིས་གཞན་ལ་ཕན་པ་རྒྱ་ཆེན་འབྱུང་བར་གྱུ་ཅིག ཀུན་མཁྱེན་བླ་མའི་གསུང་རབ་རྨད་དུ་བྱུང་བ་འདི་ཉིད་ཕྱག་བྲིས་ལས་དཔེ་བཤུས་མ་གྲུབ་པར་ཞེ་ཆེན་དུ་སྐྱབས་རྗེ་པདྨ་བི་ཛའི་མཆོད་སྡོང་རིན་པོ་ཆེའི་ནང་དུ་བཞུགས་པ་མེ་བྱི་ནག་ཕྱོགས་དུས་ཀྱི་འགྱུར་བས་ཆོས་སྡེ་ཐམས་ཅད་ཀྱི་རྟེན་གསུམ་སྐྱ་འཇོག་སྐབས་རྟེན་རྣམས་ཕྱིར་ཕྱུང་པ་ན་མ་ཕྱི་སླར་འཛུད་མི་ཉན་པར་ཁོ་བོས་གསོལ་བ་བཏབ་པ་བཞིན་དད་དང་དམ་ཚིག་རྣམ་པར་དཀར་བའི་ལེགས་བྱས་ཀྱི་ཕྱག་བྲིས་ངོ་མ་ངོས་ལག་གནང་འབྱོར་བྱུང་བ་ཤིན་ཏུ་
དད་ཅིང་སྤྲོ་བ་ཆེན་པོས་སམྟྲ་ལ་རང་ཉིད་ཀྱི་ཞལ་བཤུས་ཤིང་། སླར་ཤོག་བུར་ཡི་གེའི་འདུ་བྱེད་རྨུགས་སངས་བླ་མ་བཀྲ་ཤིས་དབང་ཕྱུག་གིས་བགྱིས་པ་འདིས་ཀྱང་དཔལ་ལྡན་བླ་མ་དུས་ཀྱི་འཁོར་ལོས་རྗེས་སུ་འཛིན་པའི་རྒྱུར་གྱུར་ཅིག མངྒ་ལཾ། ཤུ་བྷཾ།། །།ཨོཾ་སྭ་སྟི། ཚེ་འདིར་ཟུང་འཇུག་སར་སྦྱོར་བའི། །མྱུར་ལམ་རྡོ་རྗེའི་རྣལ་འབྱོར་ནི། །སྦྱོར་བ་ཡན་ལག་དྲུག་གི་ཁྲིད། །འཇམ་དཔལ་དགྱེས་པའི་ཞལ་ལུང་འདི། །སྤར་དུ་བསྐྲུན་པའི་དགེ་ཚོགས་མཐུས། །བདག་གཞན་འབྲེལ་བཅས་སྒྲིབ་འཇོམས་ཤིང་། །བླ་མ་དུས་ཀྱི་འཁོར་ལོ་ཡིས། །རྗེས་བཟུང་དོན་གཉིས་བཀྲ་ཤིས་ཤོག །ཅེས་པའང་རྣམ་དཀར་བྱེད་པ་པོ་རང་ཉིད་ཀྱིས་སྨོན་པའོ།། །།