མཆོད་པའི་རིམ་པ།
༈ དམ་ཆོས་བདུད་རྩིའི་ཐིགས་པ་ལས། བདེ་གཤེགས་སྨན་པའི་རྒྱལ་པོ་མཆོད་པའི་རིམ་པ་བཞུགས། སློབ་དཔོན་ཆེན་པོའི་བཀའ་ལྟར་བདག་ལོ་ཙཱ་བས་བྲིས་པའི་ཤོག་དྲིལ། །སངས་རྒྱས་སྨན་གྱི་བླ་ལ་ཕྱག་འཚལ་ལོ། །ཨོ་རྒྱན་རིན་པོ་ཆེ་པདྨ་འབྱུང་གནས་ལ་བདག་ལོ་ཙཱ་བ་ཀླུ་དབང་བསྲུང་གིས་གུས་པའི་ཕྱག་དང་བསྐོར་བ་མང་དུ་ཕུལ། བདེར་གཤེགས་སྨན་པའི་རྒྱལ་པོ་མཆོད་པའི་གདམས་པ་ཞིག་གནང་བར་གསོལ་བ་བཏབ་པར། སློབ་དཔོན་ཆོས་ཀྱི་དབང་ཕྱུག་གུ་རུ་རིན་པོ་ཆེའི་ཞལ་ནས། ལོ་ཙཱ་བ་སྨན་རྒྱལ་མཆོད་པའི་ཆོ་ག་སྤྱི་ལྟར་མདོ་ལས་གསུངས་པའི་ལག་ལེན་རྒྱ་གར་སོར་བཞག་ཡིན་ཏེ། བྲམ་ཟེ་དང་རྒྱལ་རིགས་སོགས་གཙང་སྤྱོད་ཆེ་བའི་ཚུལ་བསྟུན་ལ། བོད་ཁམས་གདོལ་སྤྱོད་མཐའ་འཁོབ་དང་བསྟུན་འབྱུང་བ་སོགས་ཚ་གྲང་སྣ་ཚོགས་ཁ་ཟས་སྤྱོད་ལམ་དེར་མཐུན་མཆོད་པར་འོས་པའི་ལག་ལེན་གྱི་རིམ་པ་ནི། གནས་ཁང་སྐྱང་ནུལ་སྟེགས་བུར་མཚམས་པར་བཟོ་ཞིང་། རིན་པོ་ཆེའམ་དངུལ་གྱི་མཎྜལ་གྱི་སྟེང་དུ་འབྲས་སམ་ནས་བུ་རམ་སྦྲང་རྩི་མར་སོགས་གང་འབྱོར་གྱིས་སྦྲུས་པ་ལ་ཚོམ་བུ་བརྒྱད་བཀོད་པ་སྟེགས་བུའི་དབུས་སུ་འགོད། སྣོད་གཙང་མའི་ནང་དུ་ཕྱེ་གཙང་ལ་ཟླུམ་གཏོར་རྒྱན་ལྡན་གཙོ་བོ་གཅིག་ལ་འཁོར་བདུན་ཨུག་ཀྱུས་སུམ་རིམ་བསྐོར་བ་མདུན་དུ་བཤམས། དེའི་གཡས་སུ་གནོད་སྦྱིན་སྤྱི་གཏོར་བཤོས་ཟླུམ་རིལ་བུ་མང་པོས་མཐའ་བསྐོར་རྒྱན་ལྡན། །གཡོན་དུ་ཁོལ་པོ་ཁ་ལ་བཤོས་བུ་རྒྱན་ལྡན་རིལ་བུས་བསྐོར་བ། སྟེགས་ཀྱི་མཐར་མཆོད་པ་ཅི་འབྱོར་རྒྱས་པར་བཤམས། དམིགས་རྟེན་སྐུ་རྣམས་ཡོད་ཀྱང་འགོད། རབ་བྱུང་ཕོ་མོ་ཡིན་ན་རུང་གོས་བགོ །ཁྱིམ་པ་ཡིན་ཀྱང་རྒྱབ་གོས་བཅས་གསོ་སྦྱོང་ལེན་དང་བསྙེན་གནས་བྱུང་ན་རབ། མཆིལ་ལྷམ་ཕུད་ཅིང་ཆབ་བླང་གྲལ་ལ་འཁོད། སྐྱབས་སེམས་མོས་འདུན་རྩེ་གཅིག་ལྡན་པར་བྱ་སྟེ། མདུན་གྱི་ནམ་མཁར་ལག་ན་རྡོ་རྗེ་བྱང་ཆུབ་སེམས་དཔའི་ཚུལ་ལ་དཀོན་མཆོག་བརྒྱུད་ལྡན་སངས་རྒྱས་བྱང་སེམས་ཐམས་ཅད་ཁྲོམ་ཚོགས་པ་ལྟར་དམིགས་ཤིང་། ན་མོ་དེ་བཞིན་གཤེགས་པ་མཐུ་ཆེན་ཐོབ་དང་སྐྱབས་གནས་བརྒྱུད་ལྡན་ཐམས་ཅད་བདག་ལ་དགོངས་སུ་གསོལ། བདག་ཅག་འདིར་འདུས་པ་རྣམས་ཀྱི་ཕ་མ་འགྲོ་དྲུག་གི་སེམས་ཅན་ཐམས་ཅད་ཀྱི་དོན་དུ་དེ་བཞིན་གཤེགས་པ་རྣམས་ཀྱི་སྨོན་ལམ་གྱི་ཐུགས་རྗེའི་བྱིན་རླབས་རྗེས་སུ་བསྐུལ་ཞིང་རྗེས་སུ་འཐོབ་པར་འདོད་པས་བཀའི་གནང་བ་ཅི་འཚལ། ལན་གསུམ་བརྗོད་པས་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་དུ་སྤྱོད་འཚལ། ཞེས་གསུངས་ཤིང་རང་ལ་ཐིམ་པར་བསྒོམ། དེ་ནས་སྣོད་གཙང་ནང་དུ་བཤོས་དང་ཆང་བུ་ཆབ་ཀྱིས་སྦྲན། ཨོཾ་སྭ་བྷཱ་ཝ་སོགས། སྟོང་པའི་ངང་ལས་གཏོར་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་འདོད་པའི་ལོངས་སྤྱོད་བསམ་གྱིས་མི་ཁྱབ་པར་གྱུར། ཨོཾ་ཨཱཿཧཱུྃ་གསུམ། ཧཱུྃ། ཡུལ་འདིར་གཉུག་མར་གནས་པ་དང་། །ས་བདག་ས་ཡི་ལྷ་མོ་སོགས། །ཕྱི་རྒྱུད་སྐྱོང་བ་འཁོར་དང་བཅས། །མཆོད་སྦྱིན་གཏོར་མ་འདི་བཞེས་ལ། །གནས་རྟེན་གཞན་དུ་ཁྱོད་སྤོས་ཏེ། །ས་འདི་བཀྲ་ཤིས་དགེ་ལེགས་སྩོལ། །སེམས་ཅན་དོན་དུ་སེམས་བསྐྱེད་བྱོས། །དེ་བཞིན་གཤེགས་པའི་དམ་མ་བཀྲལ། །རྡོ་རྗེ་ཅན་གྱི་བཀའ་མ་གཅོག །སྦྱིན་པའི་ཟས་ཟོ་རང་གནས་སོང་། །ཨོཾ་སུམ་བྷ་ནི་སོགས། ཧཱུྃ། ཟབ་མོའི་དོན་ལ་མི་སེམས་དང་། །རྒྱལ་བའི་བཀའ་ལ་མི་ཉན་རྣམས། །དམ་ཚིག་ཡེ་ཤེས་རྡོ་རྗེ་ཡི། །སྲུང་བའི་འཁོར་ལོས་མཚམས་བཅད་དོ། །ཧཱུྃ་བཛྲ་རཀྵ་རཀྵ་ཡེ་སྭཱ་ཧཱ། བསྲུང་བའི་རྒྱས་གདབ། དེ་ནས་ཚོམ་བུ་མཆོད་རྫས་རྣམས་རཾ་ཡཾ་ཁཾ་གིས་སྦྱང་ཞིང་ངག་ནས་ཀྱང་རཾ་ཡཾ་ཁཾ་གསུམ། ཨོཾ་སྭ་བྷཱ་ཝ་གསུམ། སྟོང་པ་ཉིད་དུ་གྱུར། སྟོང་པའི་ངང་ལས་བྷྲུཾ་མཐིང་ག་ཡོངས་སུ་གྱུར་པ་ལས་བྱུང་བའི་མཆོད་པའི་སྤྲིན་ཕུང་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་ལྟར་བསམ་གྱིས་མི་ཁྱབ་པར་གྱུར། ཨོཾ་བཛྲ་ཨརྒྷཾ་ཨཱ་ཧཱུྃཿ སོགས་ནས་ཤཔྟའི་བར་ཿ ཨོཾ་བཛྲ་སྥ་ར་ཎ་ཁཾ། གསུམ། རང་གི་སྙིང་གར་ཟླ་བའི་གདན་ལ་ཧཱུྃ་ཡིག་སེར་པོས་མཚན་པ་ལས་འོད་ཟེར་འཕྲོས་པས་མདུན་གྱི་ནམ་མཁར་རྫོགས་པའི་སངས་རྒྱས་ལ་དེ་བཞིན་གཤེགས་པ་བདུན་འཁོར་དང་བཅས་པས་བསྐོར་བ་བཛྲ་ས་མ་ཡ་ཛཿཛཿ རང་གི་སྙིང་ག་ནས་སྤྲུལ་པའི་ལྷ་མོ་རྣམས་ཀྱིས་མཆོད་པར་གྱུར། ཨརྒྷཾ་ནས། ཤཔྟ་པྲ་ཏིཙྪ་ཡེ་སྭཱ་ཧཱ། ཅེས་མཆོད། ན་མོ། བླ་མ་སངས་རྒྱས་བདེར་གཤེགས་བཅོམ་ལྡན་འདས། །སྨན་རྒྱལ་མཆེད་བདུན་བྱང་ཆུབ་སེམས་དཔའི་ཚོགས། །སྐྱབས་གནས་མ་ལུས་ཇི་སྙེད་ཐམས་ཅད་ལ། །དེང་ནས་བཟུང་སྟེ་བྱང་ཆུབ་སྙིང་པོའི་བར། །འབྲལ་བ་མེད་པར་གུས་པས་སྐྱབས་སུ་མཆི། །གསུམ། ན་མོ། མཁའ་མཉམ་ཕ་མ་འགྲོ་དྲུག་སེམས་ཅན་རྣམས། །སྡུག་བསྔལ་འཁོར་བའི་གྲོང་ཁྱེར་ཆེན་པོ་ལས། །བསྒྲལ་ཞིང་བྱང་ཆུབ་མཆོག་ལ་འགོད་པའི་ཕྱིར། །འཕགས་པ་མཆོད་ཅིང་སྨོན་ལམ་རྗེས་སུ་བསྐུལ། །བླ་མེད་བྱང་ཆུབ་མཆོག་ལ་རེག་པར་ཤོག ན་མོ། རྒྱལ་བ་རྣམས་ལ་གུས་པས་ཕྱག་འཚལ་ཞིང་། །དངོས་འབྱོར་ཡིད་སྤྲུལ་མཆོད་པ་རྣམས་ཀྱིས་མཆོད། །མི་དགེ་སྡིག་སྒྲིབ་ཉེས་ལྟུང་བསགས་རྣམས་བཤགས། །ཆོས་ཀྱི་འཁོར་ལོ་དམ་པ་བསྐོར་བར་བསྐུལ། །མྱ་ངན་མི་འདའ་འགྲོ་བའི་མགོན་དུ་བཞུགས། །དུས་གསུམ་དགེ་བའི་ཚོགས་ལ་ཡི་རང་ངོ་། །འགྲོ་དྲུག་མ་ལུས་སངས་རྒྱས་མངོན་གྱུར་ཤོག །གསུམ། འཕགས་པ་ཚོགས་ཀྱི་ཞིང་རྣམས་རང་ལ་ཐིམ་པར་གྱུར་པས་བྱིན་རླབས་ཐོབ་པར་བསམས། ཨོཾ་མ་ཧཱ་ཤུ་ནེ་ཏ་ཛྙ་ན་སོགས། ཨོཾ་སྭ་བྷཱ་བ་སོགས། ཧཱུྃ། ཕྱི་ནང་སྣོད་བཅུད་བདག་འཛིན་ལས་བྱུང་བའི། །དངོས་དང་དངོས་མིན་སྣང་བའི་ཆོས་རྣམས་ཀུན། །སྟོང་ཉིད་ཆེན་པོ་བློ་བྲལ་མུ་མཐའ་མེད། །རྣམ་དག་རྒྱལ་བའི་ཞིང་མཆོག་རབ་འབྱམས་བརྡལ། །བཻཌཱུརྱ་ཡི་འོད་ཀྱིས་སྤྲས་པའི་མདངས། །ཀུན་ཏུ་འཁྲིག་ཅིང་འཚེར་ལ་གཟི་འོད་འབར། །རིན་ཆེན་རྣམ་མང་སྐུད་པས་དྲ་བར་སྤྲས། །དྲི་བསུང་ལྡན་པའི་སྤོས་ངད་ཕྱོགས་བཅུར་ཁྱབ། །ཡན་ལག་བརྒྱད་ལྡན་ཆུ་དང་རྫིང་བུ་འཁྱིལ། །མེ་ཏོག་སྣ་ཚོགས་དོ་ར་དོ་རས་མཛེས། །དཔག་བསམ་སྡོང་པོ་མང་པོར་འདོད་ཡོན་འཕྲོ། །སྣ་ཚོགས་རོལ་མོ་སྤྲུལ་པའི་འདབ་ཆགས་ལས། །ཐེག་མཆོག་བླ་མེད་ཆོས་ཀྱི་སྒྲ་དབྱངས་སྒྲོག །ཡེ་ཤེས་རོལ་པའི་ལྷུན་གྲུབ་ཞིང་གིས་དབུས། །བློ་འདས་དཔག་དཀའ་བརྗོད་མི་ལང་བའི་ས། །མེ་ལོང་མཉམ་ཉིད་སོར་རྟོག་བྱ་བ་གྲུབ། །ཆོས་དབྱིངས་ཡེ་ཤེས་བཻཌཱུཪྻ་ཡི་འོད། །རྣམ་པར་འཕྲུལ་པའི་གཞལ་ཡས་ལྟ་ན་སྡུག རྒྱ་ཆེ་དཔངས་མཐོ་བཀོད་མཛེས་ཁོར་ཡུག་སྒོ། །ཚད་མེད་བཞི་ལྡན་འདོད་ཡོན་ཕ་གུ་དང་། །དྲ་བ་དྲ་ཕྱེད་མདའ་ཡབ་པུ་ཤུས་མཛེས། །རྣམ་པར་བྱང་ཆུབ་རིན་ཆེན་འོད་འབར་ཏོག །ཆོས་ཀྱི་རྒྱལ་མཚན་གསེར་གྱི་གཡེར་ཁ་འཁྲོལ། །པད་རྡོར་མེ་རི་འོད་ལྔའི་དྲ་བས་འབྲེལ། །ཕྱི་གསལ་ནང་གསལ་ཀུན་ཁྱབ་རྒྱལ་བའི་ཞིང་། །མ་བཅོས་ལྷུན་གྲུབ་གཞལ་ཡས་ཆེན་པོའི་དབུས། །བདུད་བཞིའི་གདན་དང་མི་འཇིགས་སེང་གེའི་ཁྲི། །པདྨ་ཟླ་བས་མཚན་པའི་ཁྲི་བརྒྱད་ཀྱི། །དབུས་དང་ཁོར་ཡུག་རང་མདོག་ས་བོན་ཧཱུྃ། ཨཱ་ལི་ཀཱ་ལིའི་སྒྲ་དབྱངས་སྒྲོག་པས་མཚན། །འོད་ཟེར་འཕྲོས་པས་ཕྱོགས་བཅུའི་རྒྱལ་བ་མཆོད། །ཁམས་གསུམ་འཁོར་བའི་སེམས་ཅན་སྡུག་བསྔལ་སྦྱངས། །བརྩེ་ཆེན་རྒྱལ་བ་སྲས་བཅས་བྱིན་རླབས་བསྡུས། །འཕགས་པ་མཆོག་གི་ས་བོན་རྣམས་ལ་ཐིམ། །ཡོངས་སུ་གྱུར་པས་དེ་བཞིན་གཤེགས་པ་བརྒྱད། །ཞལ་གཅིག་ཕྱག་གཉིས་རྡོ་རྗེ་སྐྱིལ་ཀྲུང་བཞུགས། །རང་རྟགས་ཕྱག་རྒྱ་རང་འོད་གཟི་མདངས་ལྡན། །མཚན་བཟང་སུམ་ཅུ་དཔེ་བྱད་བརྒྱད་ཅུས་མཚན། །ངུར་སྨྲིག་ཆོས་གོས་ན་བཟའ་སྐུ་ལ་གསོལ། །བྱང་ཆུབ་སེམས་དཔའ་འཕགས་པ་སྐྱབས་གྲོལ་དང་། །འཇམ་དཔལ་གཞོན་ནུ་འཕགས་པ་མཐུ་ཆེན་ཐོབ། །ཉི་མ་ལྟར་སྣང་ཟླ་བ་ལྟར་སྣང་དང་། །བྱང་སེམས་དགྲ་བཅོམ་ཁྲི་སྟོང་བརྒྱད་བརྒྱ་དང་། །ཐེར་འབུམ་ཐེར་འབུམ་འཕགས་པ་ཕྱིར་མི་ལྡོག །བདེར་གཤེགས་བརྒྱད་ཀྱི་སྨོན་ལམ་སྟོབས་འཕྲུལ་འཁོར། །མ་ལུས་ལྷན་ཅིག་དཀྱིལ་འཁོར་འཁོར་ལོའི་ཞིང་། །མ་འགགས་རོལ་པའི་ཏིང་འཛིན་རང་མདངས་ལས། །ལྷང་ངེ་ལྷམ་མེ་ལྷན་ནེར་གསལ་བར་བསྒོམ། །གཞལ་ཡས་ཕྱི་རོལ་བར་ཁྱམས་ཁོར་ར་ཁོར། །ཚངས་པ་བརྒྱ་བྱིན་རྒྱལ་ཆེན་བྲན་འཁོར་དང་། །གནོད་སྦྱིན་བརྒྱད་དང་བདུན་འབུམ་བདུན་འབུམ་དང་། །བཀའ་ཡི་སྲུང་མ་ལས་བྱེད་འཁོར་བཅས་གསལ། །གནས་གསུམ་ཡིག་འབྲུ་ཐུགས་ཀའི་ས་བོན་ལས། །འོད་ཟེར་འཕྲོས་པས་བསྐྱེད་པའི་དེ་བཞིན་གཤེགས། །མ་ལུས་འཁོར་བཅས་གནས་འདིར་སྤྱན་འདྲེན་གཤེགས། །སྤོས་དང་ཕེག་རྡོབ་རོལ་མོ་རྣམས་ཀྱིས་མཚམས་སྦྱར། མོས་གུས་གདུང་ཤུགས་དྲག་པོས་འདུན་པ་རྩེ་གཅིག་བཅས། ཧཱུྃ། འཕགས་པ་མཆོག་སྐུ་རྒྱལ་བ་དེ་བཞིན་གཤེགས། །ཁྱེད་རྣམས་སྔོན་ཚེ་དཔག་མེད་གོང་རོལ་ནས། །མངོན་པར་བྱང་ཆུབ་རྫོགས་པར་སངས་རྒྱས་ཀྱང་། །ཐུགས་རྗེས་ཡལ་བར་དོར་བའི་བླུན་རྨོངས་བདག །སྐྱབས་དང་མགོན་མེད་སྡུག་བསྔལ་རྒྱ་མཚོར་བྱིང་། །ཀྱེ་མ་ཀྱི་ཧུད་ཉམ་ཐག་ང་རོས་འབོད། །བརྩེ་བའི་ཐུགས་རྗེས་དགོངས་ལ་གནས་འདིར་གཤེགས། །བསྐལ་པའི་ཡང་མཐའ་ཕྱི་མའི་ཕྱི་མ་འདིར། །སྙིང་ནས་འབོད་ལ་རྗེས་སུ་མ་དགོངས་ན། །འཕགས་མཆོག་ཐུགས་རྗེ་ཆེ་ཡང་ཅི་ཞིག་འཚལ། །མཆོད་པའི་རྫས་བཤམས་གདུང་བའི་ཤུགས་བསྐྱེད་པས། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །བསྐྱེད་པའི་གནས་འདིར་སྤྱན་འདྲེན་གཤེགས་སུ་གསོལ། །ཐུགས་རྗེའི་མཐུ་ཡིས་གནས་འདིར་གཤེགས་སུ་གསོལ། །བྱིན་རླབས་སྟོབས་ཀྱིས་གནས་འདིར་གཤེགས་སུ་གསོལ། །རྫུ་འཕྲུལ་ཤུགས་ཀྱིས་གནས་འདིར་གཤེགས་སུ་གསོལ། །ན་མཿསརྦ་ཏ་ཐཱ་ག་ཏ་ཨརྷ་ཏེ་བཛྲ་ས་མ་ཡ་ཕེཾ་ཕེཾ་ཛཿཛཿ གདན་དབུལ་བ་ནི། ཧཱུྃ། དེ་བཞིན་གཤེགས་པ་མ་ལུས་འཁོར་དང་བཅས། །ཟླ་བ་དང་ནི་ཆུ་ཟླ་ཇི་བཞིན་དུ། །བསྐྱེད་པའི་གནས་འདིར་བྱིན་གྱིས་བརླབ་ཕྱིར་བཞུགས། །མ་ལུས་འཁོར་དང་བཅས་པ་ཏིཥྛ་ལྷན། །མཆོད་པ་ནི། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །མ་ལུས་བཅོམ་ལྡན་འཁོར་དང་བཅས་ལ་འབུལ། །ཐུགས་རྗེས་བཞེས་ནས་བྱིན་གྱིས་བརླབ་ཏུ་གསོལ། །ན་མཿསརྦ་ཏ་ཐཱ་ག་ཏ་ཨརྷ་ཏེ་ཨརྒྷཾ་ནས། ཤཔྟ་པྲ་ཏིཙྪ་ཡེ་སྭཱ་ཧཱ། དབང་ནི། ཧཱུྃ། ཇི་ལྟར་དུས་གསུམ་མཁྱེན་མངའ་དེ་བཞིན་གཤེགས། །ཇི་སྙེད་མཁྱེན་པའི་ཏིང་འཛིན་ཡེ་ཤེས་རྩལ། །བླ་ན་མེད་པའི་དབང་མཆོག་འདི་ཕུལ་བས། །སྐུ་ལྔ་ཡེ་ཤེས་ལྔ་ལྡན་དབང་ཐོབ་ཤོག །ན་མཿསརྦ་ཏ་ཐཱ་ག་ཏ་ཨབྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཧཱུྃ། ཏིང་འཛིན་རོལ་པ་དབང་ལྷས་དབང་བསྐུར་བས། །མཆོག་གི་ཡེ་ཤེས་རྒྱས་ནས་སྤྱི་བོའི་རྒྱན། །རང་རང་རིགས་ཀྱི་བདག་པོ་བཅོམ་ལྡན་འདས། །མཚན་དང་དཔེ་བྱད་ལྡན་པས་དབུ་བརྒྱན་གྱུར། ཧཱུྃ། བདུད་བཞིའི་དཔུང་བཅོམ་ཉོན་མོངས་གཡུལ་ལས་རྒྱལ། །ཟབ་ཅིང་སྤྲོས་བྲལ་བྱང་ཆུབ་མངོན་དུ་གྱུར། །ལྷ་ཡི་ལྷ་མཆོག་འཕགས་པ་དེ་བཞིན་གཤེགས། །རྒྱལ་བ་སྲས་བཅས་རྣམས་ལ་ཕྱག་འཚལ་བསྟོད། །ཅེས་བསྟོད་ནས་བདག་བསྐྱེད་རང་དེ་བཞིན་གཤེགས་པ་ནས་སངས་རྒྱས་བདུན་ཐོ་བརྩེགས་དང་། །དབང་གི་བུམ་པ་བསྐྱེད་ཆོག་འདོན་དང་དམིགས་པ་རྣམས་ཀྱང་སོ་སོར་བསྒྱུར། གཟུངས་ཀྱི་ཏིང་ངེ་འཛིན་ནི། ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །དེ་བཞིན་གཤེགས་པ་སངས་རྒྱས་བཅོམ་ལྡན་འདས། །གསེར་མདོག་ས་གནོན་མཉམ་གཞག་མཚན་དཔེས་སྤྲས། །ཐུགས་ཀར་ཟླ་དཀྱིལ་ཧཱུྃཿཡིག་སེར་པོའི་མཐར། །གཟུངས་སྔགས་འཁོར་བས་འོད་ཟེར་ཕྱོགས་བཅུར་འཕྲོས། །འགྲོ་དྲུག་སེམས་ཅན་རྣམས་ཀྱི་སྡིག་སྒྲིབ་སྦྱངས། །རྒྱལ་བ་སྲས་བཅས་མཆོད་ནས་བྱིན་རླབས་བསྡུས། །བསྐྱེད་པའི་གཞལ་ཡས་བདག་དང་འགྲོ་ལ་ཐིམ། །ཐུགས་བསྐྱེད་སྨོན་ལམ་ཏིང་འཛིན་དབང་གིས་ཕྱུག །སྦྱངས་བསྒྲོད་མཐར་ཕྱིན་བྱང་ཆུབ་མངོན་གྱུར་བསམས། །ཏདྱ་ཐཱ། སིདྡྷེ་སིདྡྷེ་སུ་སིདྡྷེ། མོ་ཙ་ནི། མོཀྵ་ནི་མུཀྟེ་བི་མུཀྟེ། ཨ་མ་ལེ་བི་མ་ལེ་མཾ་ག་ལྱེ། ཧི་ར་ནྱ་གརྦྷེ་རཏྣ་གརྦྷེ། སརྦ་ཨརྠ་སཱ་དྷ་ནི། པ་ར་མརྠ་སཱ་དྷ་ནི། མ་ན་སེ། མ་ཧཱ་མ་ན་སེ། ཨད་བྷུ་ཏེ་ཨ་ཏྱད་བྷུ་ཏེ། བྷཱི་ཏ་བྷ་ཡེ་སུ་ཝརྞེ་བྲཧྨ་གྷོ་ཥེ། བྲ་ཧྨ་དྷྱུ་ཥི་ཏེ། སརྦ་ཨརྠེ་ཥུ་ཨ་པ་རཱ་ཛི་ཏེ། སརྦ་ཏྲ་ཨ་པྲ་ཏི་ཧ་ཏེ། ཙ་ཏུཿཤཥྛི་བུདྡྷ་ཀོ་ཊི་བྷཱ་ཥི་ཏེ། ན་མཿསརྦ་ཏ་ཐཱ་ག་ཏ་ནཾ་སྭཱ་ཧཱ། བརྒྱ་སྟོང་ཉེར་གཅིག་བདུན་སོགས་སྐབས་ལྟར་བཟླ། །དེ་བཞིན་གཤེགས་པ་བཅོམ་ལྡན་འདས་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་ཤཱཀྱ་ཐུབ་པ་དགེ་སློང་བརྒྱད་སྟོང་གི་དགེ་འདུན་བྱང་ཆུབ་སེམས་དཔའ་སུམ་ཁྲི་དྲུག་སྟོང་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། སོགས་ནས། ན་མཿསརྦ་ཏ་ཐཱ་ག་ཏ་ཨརྷ་ཏེ་ཨརྒྷཾ་ནས། ཤཔྟའི་བར་གྱིས་མཆོད། ཧཱུྃ། གྲངས་མེད་བསྐལ་མང་བསགས་སྦྱང་མཐར་ཕྱིན་ནས། །སྨོན་ལམ་ཁྱད་འཕགས་རྩོད་ལྡན་འགྲོ་བའི་སྐྱབས། །ལྷ་མིའི་སྟོན་པ་སངས་རྒྱས་བཅོམ་ལྡན་འདས། །ཤཱཀྱ་ཐུབ་པའི་ཞབས་ལ་ཕྱག་འཚལ་བསྟོད། །བཅོམ་ལྡན་འདས་རྒྱལ་བ་ཤཱཀྱ་ཐུབ་པ་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས་བདག་སོགས་སེམས་ཅན་ཐམས་ཅད་ཀྱི་ལས་ངན་པའི་རྒྱུ་ལས་བྱུང་བའི་ནད་གདོན་སྡིག་སྒྲིབ་སྡུག་བསྔལ་ཐམས་ཅད་བྱང་ཆུབ་ཀྱི་བར་དུ་ཞི་བ་དང་། ཚེ་དང་དཔལ་འབྱོར་དགེ་བའི་ཚོགས་ཐམས་ཅད་འཕེལ་ཞིང་རྒྱས་པར་བྱིན་གྱིས་བརླབ་ཏུ་གསོལ། ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །དེ་བཞིན་གཤེགས་པ་སྨན་རྒྱལ་བཻཌཱུར་མདོག །མཆོག་སྦྱིན་མཉམ་བཞག་ཨ་རུ་རྣམ་རྒྱལ་མཚན། །ཐུགས་ཀར་ཟླ་དཀྱིལ་ཧཱུྃ་ཡིག་མཐིང་ཀའི་མཐར། །གཟུངས་སྔགས་འཁོར་བས་འོད་ཟེར་ཕྱོགས་བཅུར་འཕྲོས། །འགྲོ་དྲུག་སེམས་ཅན་རྣམས་ཀྱི་སྡིག་སྒྲིབ་སྦྱངས། །རྒྱལ་བ་སྲས་བཅས་མཆོད་ནས་བྱིན་རླབས་བསྡུས། །བསྐྱེད་པའི་གཞལ་ཡས་བདག་དང་འགྲོ་ལ་ཐིམ། །ཐུགས་བསྐྱེད་སྨོན་ལམ་ཏིང་འཛིན་དབང་གིས་ཕྱུགས། །སྦྱངས་སྒྲོད་མཐར་ཕྱིན་བྱང་ཆུབ་མངོན་གྱུར་བསམས། ཏདྱ་ཐཱ། གྷུ་མེ་གྷུ་མེ། ཨི་མི་ནི་མི་ཧི། མ་ཏི་མ་ཏི། སཔྟ་ཏ་ཐཱ་ག་ཏ། ས་མཱ་དྷྱ་དྷིཥྛཱི་ཏེ། ཨ་ཏི་མ་ཏེ། པཱ་ལེ་པཱ་པཾ་ཤྭ་དྷ་ནི། སརྦ་པཱ་པཾ་ནཱ་ཤ་ཡ། མ་མ་བྷུདྡྷེ་བུདྡྷོཏྟ་མེ། ཨུ་མེ་ཀུ་མེ། བུདྡྷ་ཀྵེ་ཏྲ་པ་རི་ཤྭ་དྷ་ནི། དྷ་མེ་ནི་དྷ་མེ། མེ་རུ་མེ་རུ་མེ་རུ། ཤི་ཁ་རེ། སརྦ་ཨ་ཀཱ་ལ་མྲྀ་ཏྱུ་ནི་པཱ་ར་ཎི། བུདྡྷེ་སུ་བུདྡྷེ། བུདྡྷ་ཨ་དྷཱིིཥྛཱི་ཏེ་ན། རཀྵནྟུ་མེ། སརྦ་དེ་བཱ། ས་མེ་ཨ་ས་མེ། ས་མ་ནྭཱ་ཧ་རནྟུ་མེ། སརྦ་བུདྡྷ་བྷོ་དྷི་ས་ཏྭ། ཤ་མེ་ཤ་མེ་པྲ་ཤ་མནྟུ་མེ། སརྦ་ཨི་ཏྱུ་པ་དྲ་བཱ་བྱཱ་དྷ་ཡ། པཱུ་ར་ཎི་པཱུ་ར་ཎི་པཱུ་ར་ཡ་མི། སརྦ་ཨཱ་ཤཱ་ཡ། བཻ་ཌཱུརྱ་པྲ་ཏི་བྷཱ་སེ་སརྦ་པཱ་པཾ་ཀྵ་ཡཾ་ཀ་རི་སྭཱ་ཧཱ། གོང་ལྟར་བཟླ། དེ་བཞིན་གཤེགས་པ་སྨན་རྒྱལ་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །སོགས་ཤཔྟའི་བར་གྱིས་མཆོད། ཧཱུྃ། ཉི་མ་ལྟ་བུས་མ་རིག་མུན་པ་སེལ། །ཟླ་བ་ལྟ་བུས་ཉོན་མོངས་དུག་ལྔ་འཇོམས། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུརྱ་ཡི་འོད་ལ་ཕྱག་འཚལ་ལོ། །བཅོམ་ལྡན་འདས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། འཇིག་རྟེན་འོད་ཀྱིས་ཁྱབ་ཅིང་འགྲོ་བ་མཚན་བཟང་དང་ལྡན་པ། སྐུའི་འོད་ཀྱིས་མུན་པའི་འཇིགས་པ་སེལ་བ། ཡིད་ལ་དྲན་པས་ལོངས་སྤྱོད་ཕུན་སུམ་ཚོགས་ཤིང་བདེ་བ་དང་ལྡན་པ།ཉན་རང་རྣམས་ཐེག་པ་ཆེན་པོའི་ལམ་ལ་སྦྱོར་བ། ཚུལ་ཁྲིམས་བསྲུང་བ་ཐམས་ཅད་རྣམ་པར་དག་པ། ལོག་པ་རྣམས་ཀྱང་ངན་སོང་དུ་མི་ལྟུང་བ། དབང་པོ་སྐྱོན་ཅན་ཐམས་ཅད་དབང་པོ་ཚང་ཞིང་བདེ་བ་དང་ལྡན་པ། ནད་ཀྱིས་བཏབ་པ་སྐྱབས་མགོན་མེད་ཅིང་བཀྲེས་ཕོངས་ཀྱིས་མནར་བ་ནད་དང་སྡུག་བསྔལ་ལས་ཐར་བ། བུད་མེད་རྣམས་བུད་མེད་ཀྱི་སྐྱེ་གནས་ལས་ཐར་བ། ལྟ་བ་ལོག་པ་རྣམས་ཡང་དག་གི་ལྟ་བ་ལ་སྦྱོར་བ། །རྒྱལ་པོའི་ཆད་པ་སོགས་འཇིགས་ཚོགས་རྣམས་ལས་ཐར་བ། །བཀྲེས་སྐོམ་ཕོངས་པ་རྣམས་བཟའ་བཏུང་འཐོབ་པ། །རྒས་འཁོགས་སྐྱབས་མེད་ཟས་གོས་འཐོབ་པ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། །ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །རྒྱལ་བ་མཚན་ལེགས་གསེར་མདོག་གཟི་བརྗིད་འབར། །སྐྱབས་སྦྱིན་མཉམ་གཞག་ཕྱག་རྒྱ་མཚན་དཔེས་སྤྲས། །ཐུགས་ཀར་ཟླ་དཀྱིལ་ཧཱུྃ་ཡིག་སེར་པོའི་མཐར། །གཟུངས་སྔགས་འཁོར་བའི་འོད་ཟེར་ཕྱོགས་བཅུར་འཕྲོས། །འགྲོ་དྲུག་སེམས་ཅན་རྣམས་ཀྱི་སྡིག་སྒྲིབ་སྦྱངས། །རྒྱལ་བ་སྲས་བཅས་མཆོད་ནས་བྱིན་རླབས་བསྡུས། །བསྐྱེད་པའི་གཞལ་ཡས་བདག་དང་འགྲོ་ལ་ཐིམ། །ཐུགས་བསྐྱེད་སྨོན་ལམ་ཏིང་འཛིན་དབང་གིས་ཕྱུགས། །སྦྱངས་སྒྲོད་མཐར་ཕྱིན་བྱང་ཆུབ་མངོན་གྱུར་བསམས། །ཏདྱ་ཐཱ། གྷུ་མེ་གྷུ་མེ་སོགས་གོང་ལྟར། དེ་བཞིན་གཤེགས་པ་མཚན་ལེགས་པ་ཡོངས་གྲགས་དཔལ་གྱི་རྒྱལ་པོ་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་མཚན་ལེགས་པ་ཡོངས་གྲགས་དཔལ་གྱི་རྒྱལ་པོ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །ཤཔྟའི་བར་གྱིས་མཆོད། ཧཱུྃ། བྱང་ཆུབ་རྒྱལ་བའི་སྐུ་མཆོག་དྲི་མེད་ཞལ། །མཚན་གྱི་མེ་ཏོག་དཔེ་བྱད་འོད་སྟོང་འཕྲོ། །མཐོང་ཐོས་དྲན་རེག་བྱང་ཆུབ་ལམ་ལ་སྦྱོར། །མཚན་གྱི་རྒྱལ་པོ་དེ་ལ་ཕྱག་འཚལ་ལོ། །བཅོམ་ལྡན་འདས་མཚན་ལེགས་པ་ཡོངས་གྲགས་དཔལ་གྱི་རྒྱལ་པོ་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། ལུས་གྱི་ནད་གདོན་ཐམས་ཅད་ཞི་བ། དབང་པོ་ཉམས་པ་ཐམས་ཅད་སོས་ནས་ཚང་བ། མཚམས་མེད་ལྔའི་ལས་སྒྲིབ་རྒྱུན་འཆད་པ། བཀྲེས་ཕོངས་དཔལ་འབྱོར་རྒྱས་པ། བརྡུངས་རྡེག་བསད་བཅད་ཉེས་པ་ཞི་བ། འཇིགས་པ་བརྒྱད་ཀྱི་གནོད་པ་ཞི་བ། འཐབ་འཛིང་རྩོད་པ་སེལ་བ། གྲུ་དང་ཆུ་བོར་ཞུགས་པ་ལ་ཆུའི་འཇིགས་པ་སྐྱོབ་པ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །མཁས་པ་གཟི་བརྗིད་སྒྲ་དབྱངས་རྒྱལ་པོ་ནི། །བཙོ་མ་གསེར་གྱི་མདོག་ལས་འོད་སྟོང་འཕྲོ། །མཆོག་སྦྱིན་མཉམ་བཞག་ཕྱག་རྒྱའི་རྟགས་ཀྱིས་སྤྲས། །ཐུགས་ཀར་ཟླ་དཀྱིལ་ཧཱུྃཿཡིག་སེར་བོའི་མཐར། །གཟུངས་སྔགས་འཁོར་བའི་སོགས། །ཏདྱ་ཐཱ་སོགས། དེ་བཞིན་གཤེགས་པ་སྒྲ་དབྱངས་རྒྱལ་པོ་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །སོགས་ཤཔྟའི་བར་གྱིས་མཆོད། ཧཱུྃ། ཟླ་དཀྱིལ་པདྨས་སྤྲས་པ་རྒྱལ་བའི་སྐུ། །འགྲོ་བའི་མགོན་མཆོག་སྟོང་ཁམས་ལམ་མེ་བ། །ཤེས་བྱ་ཀུན་མཁྱེན་མཚན་དཔེའི་དཀྱིལ་འཁོར་རྒྱས། །སྒྲ་དབྱངས་རྒྱལ་པོའི་ཞབས་ལ་ཕྱག་འཚལ་ལོ། །བཅོམ་ལྡན་འདས་མཁས་པ་གཟི་བརྗིད་སྒྲ་དབྱངས་རྒྱལ་པོ་འཁོར་དང་བཅས་པའི་ཐུགས་རྗེ་དང་བྱིན་བརླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། ཞིང་ལས་དང་ཚོང་གིས་ལས་ངན་བསགས་པ་དག་ནས་དཔལ་འབྱོར་རྒྱས་པ། སྐྱེ་གནས་བཞིའི་སྡུག་བསྔལ་ལས་ཐར་བ། བུད་མེད་ཀྱི་སྐྱེ་སྒོ་ཆོད་པ། འཆི་བའི་དགྲ་དང་སྡུག་བསྔལ་སེལ་བ། མུན་ནག་དང་གདོན་གྱི་འཇིགས་པ་སྐྱོབ་པ། །ཆོས་ལས་ལོག་པའི་ལས་སྤྱོད་པ་ལས་ལོག་ནས་ཆོས་ལ་སྤྱོད་པ། ཉན་རང་ལས་ལོག་ནས་ཐེག་ཆེན་ལ་སྦྱོར་བ། བསྐལ་པ་ཆེན་པོ་ཞིག་པའི་མེ་ཡི་འཇིགས་པ་སྐྱོབ་ནས་ཉིད་ཀྱི་ཞིང་དུ་སྐྱེ་བ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །བདེ་གཤེགས་གསེར་བཟང་དྲི་མེད་རིན་ཆེན་སྣང་། གསེར་གྱི་ལྷུན་པོ་ལྟ་བུར་བརྗིད་པའི་སྐུ། །སྐྱབས་སྦྱིན་མཉམ་པར་བཞག་པའི་ཕྱག་རྒྱར་ལྡན། །ཐུགས་ཀར་ཟླ་དཀྱིལ་ཧཱུྃ་ཡིག་སེར་པོའི་མཐར། །གཟུངས་སྔགས་འཁོར་བའི་འོད་ཟེར་ཕྱོགས་བཅུར་འཕྲོས། །སོགས། ཏདྱ་ཐཱ། སོགས། དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་ཡིད་ལ་དྲན་བཞིན་ཐལ་མོ་སྦྱར་སྟེ། ན་མོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །སོགས་ཤཔྟའི་བར་གྱིས་མཆོད། ཧཱུྃ། འཕགས་མཆོག་རྒྱལ་བ་དེ་བཞིན་གཤེགས་པ་ནི། །ཉི་མ་སྟོང་གི་གཟི་མདངས་འོད་ཀྱིས་འཁྱུད། །ངོ་མཚར་ཡ་མཚན་བཀོད་རབ་མཆོག་མངའ་བ། །གསེར་བཟང་དྲི་མེད་སྣང་ལ་ཕྱག་འཚལ་ལོ། །བཅོམ་ལྡན་འདས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། སྲོག་བཅད་པའི་ཉེས་པས་ཚེ་ཐུང་བ་རྣམས་ཚེ་རིང་བ། བརྐུས་ཕྲོགས་བཅོམ་པས་མེད་ཕོངས་རྣམས་བཀྲེས་ཕོངས་ལས་ཐར་བ། འཐབ་འཛིང་གི་འཇིགས་པ་ལས་གྲོལ་བ། ཚུལ་ཁྲིམས་འཆལ་བའི་ཉེས་པ་མེད་པ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །མྱ་ངན་མེད་མཆོག་འཕགས་པ་དེ་བཞིན་གཤེགས། །སྐུ་མདོག་དམར་སྐྱ་མཉམ་གཞག་ཏིང་འཛིན་ཅན། །ཐུགས་ཀར་ཟླ་དཀྱིལ་ཧཱུྃ་ཡིག་དམར་པོའི་མཐར། གཟུངས་སྔགས་འཁོར་བའི་འོད་ཟེར་ཕྱོགས་བཅུར་འཕྲོས། །སོགས། ཏདྱ་ཐཱ། སོགས། དེ་བཞིན་གཤེགས་པ་མྱ་ངན་མེད་མཆོག་དཔལ་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་མྱ་ངན་མེད་མཆོག་དཔལ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །སོགས་ཤཔྟའི་བར་གྱིས་མཆོད། ཧཱུྃ། ཐམས་ཅད་མཁྱེན་མངའ་སྟོན་པ་དེ་བཞིན་གཤེགས། །མ་ལུས་འགྲོ་བའི་མགོན་མཆོག་ཐུགས་རྗེའི་གྲུ། །མཚན་ཙམ་ཐོས་པས་འགྲོ་དྲུག་འཇིགས་པ་སྐྱོབ། །མྱ་ངན་མེད་མཆོག་དཔལ་ལ་ཕྱག་འཚལ་ལོ། བཅོམ་ལྡན་འདས་མྱ་ངན་མེད་མཆོག་དཔལ་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། མྱ་ངན་དང་སྡུག་བསྔལ་ཐམས་ཅད་ལས་ཐར་བ། དམྱལ་བ་ཚ་གྲང་གི་འཇིགས་པ་ལས་སྐྱོབ་པ། །བཀྲེས་ཕོངས་ལས་ཐར་ཞིང་འདོད་ཡོན་ཕུན་སུམ་ཚོགས་པ། གནོད་སྦྱིན་དང་ཤ་ཟ་འབྱུང་པོའི་གནོད་པ་ཞི་བ་སོགས་སྨོན་ལམ་ཆེན་པོ་དེ་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ཧཱུཾ་ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །དེ་བཞིན་གཤེགས་པ་ཆོས་གྲགས་རྒྱ་མཚོའི་དཔལ། །དྲི་མེད་དུང་མདོག་ཆོས་འཆད་ཕྱག་རྒྱ་ཅན། །ཐུགས་ཀར་ཟླ་དཀྱིལ་ཧཱུྃ་ཡིག་དཀར་པོའི་མཐར། །གཟུངས་སྔགས་འཁོར་བའི་འོད་ཟེར་ཕྱོགས་བཅུར་འཕྲོས། །སོགས། ཏདྱ་ཐཱ། སོགས། དེ་བཞིན་གཤེགས་པ་ཆོས་གྲགས་རྒྱ་མཚོ་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོ། བཅོམ་ལྡན་འདས་དེ་བཞིགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་ཆོས་གྲགས་རྒྱ་མཚོའི་དབྱངས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །སོགས་ཤཔྟའི་བར་གྱིས་མཆོད། ཧཱུྃ། དྲི་མེད་དུང་མདོག་མཆོག་ཏུ་གཟུགས་བཟང་བ། །ཆོས་ཀྱི་གྲགས་པས་ཁམས་གསུམ་དབུགས་འབྱིན་ཅིང་། །སྲིད་གསུམ་མི་གནས་མྱ་ངན་འདས་ལ་འགོད། །ཆོས་གྲགས་རྒྱ་མཚོའི་དབྱངས་ལ་ཕྱག་འཚལ་ལོ། བཅོམ་ལྡན་འདས་ཆོས་གྲགས་རྒྱ་མཚོའི་དབྱངས་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། ལོག་པར་ལྟ་བའི་ལམ་ལས་ལྡོག་སྟེ་ཐར་པའི་ལམ་རྙེད་པ། མཐའ་འཁོབ་ཏུ་སྐྱེས་ནས་ལམ་ལོག་པ་རྣམས་ཐར་པའི་ལམ་ཟིན་པ། བཀྲེས་ཕོངས་ཀྱིས་མནར་ནས་སྡིག་པ་བྱེད་པ་རྣམས་དཔལ་འབྱོར་དང་ལྡན་ནས་སྡིག་ལས་ལྡོག་པ། འཐབ་རྩོད་གསོད་གཅོད་ཀྱི་འཇིགས་པ་སེལ་བ་སོགས་སྨོན་ལམ་ཆེན་པོ་དེ་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ཧཱུྃ། ཆོས་དབྱིངས་རྒྱལ་བའི་ཞིང་ཁམས་ཆེན་པོའི་དབུས། །མི་འཇིགས་སེང་ཁྲི་པདྨ་ཉི་ཟླའི་སྟེང་། །ཆོས་ཀྱི་བློ་གྲོས་དམར་པོ་གཟི་འོད་རྒྱས། །མཆོག་སྦྱིན་མཉམ་གཞག་ཕྱག་རྒྱའི་འཁོར་ལོར་ལྡན། །ཐུགས་ཀར་ཟླ་དཀྱིལ་ཧཱུྃ་ཡིག་དམར་པོའི་མཐར། །གཟུངས་སྔགས་འཁོར་བའི་འོད་ཟེར་ཕྱོགས་བཅུར་འཕྲོས། །སོགས། ཏདྱ་ཐཱ། སོགས། དེ་བཞིན་གཤེགས་པ་ཆོས་ཀྱི་བློ་གྲོས་ཡིད་ལ་དྲན་བཞིན་ཐལ་མོ་སྦྱར་ཏེ། ན་མོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་འཕགས་པ་ཆོས་ཀྱི་བློ་གྲོས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མའི་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན་བརྗོད། ཧཱུྃ། གཙང་ཞིང་གཙང་མར་སྦྱར་བའི་མཆོད་པའི་ཚོགས། །སོགས་ཤཔྟའི་བར་གྱིས་མཆོད། ཧཱུྃ། པདྨ་རཱ་གའི་མདངས་ལ་མཚན་དཔེས་སྤྲས། །གསུང་དབྱངས་ཆོས་ཀྱིས་ཐེག་མཆོག་ལམ་ལ་འགོད། །དུས་གསུམ་མཁྱེན་མངའ་ཁམས་གསུམ་འགྲོ་བ་སྒྲོལ། །ཆོས་བློ་མངོན་པར་མཁྱེན་ལ་ཕྱག་འཚལ་ལོ། བཅོམ་ལྡན་འདས་ཆོས་རྒྱ་མཚོ་མཆོག་གི་བློ་གྲོས་རྣམ་པར་རོལ་པ་མངོན་པར་མཁྱེན་པ་འཁོར་དང་བཅས་པའི་ཐུགས་རྗེ་དང་བྱིན་རླབས་ཡིད་ལ་དྲན་བཞིན་གཟུངས་བཟླས་པ་དང་མཚན་བརྗོད་པའི་མཐུས། ཚོང་དང་ཞིང་ལས་འཐབ་རྩོད་ཀྱི་སྡིག་པ་དང་སྡུག་བསྔལ་སེལ་བ། །དམྱལ་བའི་སྐྱེ་སྒོ་ཆོད་པ། སྲོག་ལ་བར་དུ་གཅོད་པའི་རྐྱེན་ཐམས་ཅད་སེལ་བ། །འཆི་བའི་འོག་ཏུ་ངན་སོང་གསུམ་གྱི་སྐྱེ་སྒོ་ཁེགས་ནས་མཐོ་རིས་འཐོབ་པ་སོགས་སྨོན་ལམ་ཆེན་པོ་དེ་དག་གི་བཀའ་དྲིན་ཐུགས་རྗེ་བྱིན་རླབས་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ན་མོ། རྡོ་རྗེ་འཛིན་པ་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ་བཛྲེ་པཱ་ཤ་དྷ་ར་ཎི། ས་མ་ས་མ། ས་མནྟ། ཨ་པྲ་ཏི་ཧ་ཏ་བཛྲེ། ཤ་མ་ཤ་མ། པྲ་ཤ་མནྟུ་སརྦ་བྱཱ་དྷ་ཡ། ཀུ་རུ་ཀུ་རུ་སརྦ་ཀརྨྨ་ཎི་ས་མ་ཡ་མ་ནུ་སྨ་ར་བྷ་ག་ཝན། བཛྲ་པཱ་ཎི། སརྦཱ་ཨཱ་ཤཾ་མེ་པ་རི་པཱུ་ར་ཡེ་སྭཱ་ཧཱ། གོང་ལྟར་བཟླས། ན་མོ། རྒྱལ་བ་སྲས་བཅས་ཁྱེད་རྣམས་ཀྱིས་ཇི་ལྟར་སྩལ་བའི་ཐུགས་བསྐྱེད་སྨོན་ལམ་ཐམས་ཅད་བདག་སོགས་སེམས་ཅན་ཐམས་ཅད་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། གཏོར་མ་འབུལ་བ། མཆོད་བསྟོད། །རྟགས་བརྒྱད་སྣ་བདུན་འབུལ་བ་གཤེགས་གསོལ་སོགས་རྒྱས་སྡུས་སྐབས་ལྟར་ཐུན་མོང་བཞིན་ཀྱང་སྤྱོད་པར་བྱའོ། ཅེས་པ་འདི་རྣམས་དུས་གསུམ་མཁྱེན་པའི་གྷུ་རུ་རིན་པོ་ཆེ་ལ་ཞུས་པ་ལྟར་བཀའ་སྩལ་བའི་གདམས་པ། བདག་ཀླུ་དབང་བསྲུང་གིས་ཡི་གེའི་རིས་སུ་བཏབ། དབེན་རྩ་དཔལ་གྱི་ལྷ་ཁང་དུ་མཁན་པོ་རྒྱལ་བློན་འཁོར་བཅས་ཀྱི་ཚོགས་ནས་ཕྱག་དང་སྐོར་བ་རིན་པོ་ཆེའི་རིགས་མང་པོའི་མཎྜལ་གྱིས་མཆོད། རོ་བདའ་བའི་སྐྱེམས་མང་པོ་ཟ་འོག་གི་བེར་སོགས་སྐུ་ལ་སྒྲོན་ཞིང་ཞལ་དུ་མཆོད་ནས་བདག་རྒྱལ་པོས་འདི་སྐད་ཞུས་སོ། །སློབ་དཔོན་ཆེན་པོ་སྤྱིར་ཁམས་གསུམ་ཐམས་ཅད་འདུས་བྱས་འགྱུར་བའི་རང་བཞིན་ཡང་། འཕགས་ཡུལ་རྒྱ་གར་སོགས་ལ་དེ་བཞིན་གཤེགས་པ་རྣམས་ཀྱི་དུས་སྲིད་ཀྱི་རྒྱལ་པོ་སོགས་དེང་སང་བར་ལ་རྒྱལ་རབ་གསལ་བར་བཞུགས་ཐོས་དེ་བཞིན་ཀྱང་བོད་ཁམས་ཀྱི་ཡུལ་འདིར་ད་ནས་བཟུང་རྒྱལ་རབས་རྣམས་ལ་འཕེལ་འགྲིབ་མང་དུ་འབྱུང་ཚུལ་གསང་སྔགས་ཀྱི་ཆོས་སྐོར་འདི་དག་ལས་མང་དུ་སྩལ་བ་འདིའི་རྒྱུ་རྐྱེན་ཇི་ལྟར་ལགས། མཁན་ཞི་བ་མཚོས་སྨན་བླའི་མདོ་ཆོག་ལྟར་མཆོད་པ་དང་། །སློབ་དཔོན་ཆེན་པོའི་བཀའི་སྐོར་ལ་ཁྱད་ཆེ་ཙམ་ལ་དགོངས་པ་འདི་བཞིན་ཟབ་ཁྱད་ཆེ་བས། ད་ནས་བོད་ཀྱི་གཙུག་ལག་ཁང་རྣམས་སུ་མཆོད་ཆོག་འདི་བཞིན་སྤྱད་དམ་ལགས་ཞུས་པས། སློབ་དཔོན་ཆེན་པོའི་ཞལ་ནས་རྒྱལ་པོ་འགྱུར་བའི་སྡུག་བསྔལ་སྤྱིར་ཁམས་གསུམ་སྒོས་འཛམ་གླིང་སྤྱི་ལ་ལས་ཀྱིས་སྒྱུར་བ་སྤྱི་མཐུན་ཡིན། སེམས་ཅན་རྣམས་ཀྱི་ཚེ་བསོད་བྲི་བཞིན་དུག་ལྔ་ཇེ་རགས་ཉོན་མོངས་ཇེ་རྒྱས་རྨུ་ཇེ་རྒོད་ལ་འགྲོ་བས་འགྱུར་བའི་སྡུག་བསྔལ་ཡང་དེ་བཞིན་ཆེ། བདེར་གཤེགས་རྣམས་མཆོད་པའི་གདམས་པ་གཞི་ལ་ཁྱད་མེད། ཅུང་ཟད་ཀྱི་ཁྱད་བྱུང་བ་བདག་སངས་རྒྱས་ཐམས་ཅད་ཀྱི་བཀའི་དགོངས་པ་རྗེས་སུ་ཐོབ་ཅིང་དག་པའི་ཞིང་ཁམས་ཐམས་ཅད་དང་། ཁྱད་པར་སྨན་བླ་མཆེད་བདུན་གྱི་ཞིང་དུ་ཡང་ཡང་སོང་ཞིང་ཐུགས་རྗེ་དང་བྱིན་རླབས་དེ་བཞིན་ཐ ོབ་པས་གདམ་སྐོར་འདི་ཅུང་ཟབ་པར་ཡོད་ཀྱང་། མཁན་རིན་པོ་ཆེ་ཆོ་རིགས་བཙུན་པ་ཟ་ཧོར་གྱི་རྒྱལ་རིགས་ཀྱི་མདོ་ཆོག་སྤྱད་པ་འདི་དེང་སང་ཤིན་ཏུ་བཟང་ཞིང་། འདི་ནས་རིམ་བཞིན་ཆོས་སྤྱི་དང་མདོ་ཆོག་གི་གདམས་པ་འདི་ཡང་གྲུབ་མཐའ་ངན་པས་བསླད་པ་ཡང་མང་པོ་འབྱུང་བས། མ་འོངས་པའི་དུས་ན་རྒྱལ་པོ་ཡབ་སྲས་སྐྱེ་བ་དབུས་སུ་འབྱུང་། མཁན་པོའི་སྤྲུལ་པ་གཙང་ནས་འབྱུང་། རྒྱལ་པོའི་བླ་སྨན་ཛྙ་ན་ཤྲཱིའི་སྤྲུལ་པས་བསམ་ཡས་ཀྱི་གཉེར་ཁ་འཛིན་ཅིང་བླ་ན་མཆོད། ལྷ་ལུང་དཔལ་རྡོར་སྤྲུལ་པས་བོད་ཀྱི་ཁྲིམས་ཁ་བསྲུང་བའི་དུས་སུ་ལོ་ཙཱ་བ་ཀླུ་དབང་བསྲུང་གིས་གདམས་པ་འདི་ལ་སྤྱོད་དུས་ཉམས་སུ་ལེན་ཞིང་སེམས་ཅན་ལ་ཕན་པའི་སྨོན་ལམ་ཐོབ་གསུངས་པ་དང་། དེ་བཞིན་སྨོན་ལམ་སོ་སོར་བཏབ་ཅིང་རྒྱལ་པོས་ཞུས་པ། སློབ་དཔོན་རིན་པོ་ཆེ་ཀླུ་དབང་བསྲུང་གིས་གདམས་པ་འབྱིན་ཅིང་མཁན་པོ་བདག་ཅག་རྣམས་གཙང་དབུས་སུ་འབྱུང་གསུངས་པའི་དུས་སུ་ས་རྟགས་སོགས་ཅི་ལྟར་འོང་ལགས་ཞུས་པས། སློབ་དཔོན་ཆེན་པོའི་ཞལ་ནས། དེ་ཙ་ན་ས་རྟགས་དུས་རྟགས་མང་པོ་འབྱུང་ཡང་རྟགས་སླ་བ་ཞི་བ་འཚོའི་དབུ་ཐོད་བདུད་ཀྱི་སྤྲུལ་པས་ཡས་མས་དབྱེ་བའི་དུས་འབྱུང་བས། མདོ་སྔགས་ཆོས་ལ་བདུད་སྤྲུལ་མང་པོས་གཟུ་ལུམ་རས་གཅོད་མང་དུ་བྱེད་ཅིང་བཀའ་ཡི་བསྲུང་མ་ཐམས་ཅད་འཁྲུག་སྟེ་འགྲོ་བའི་བདེ་བ་བཅོམ་པའི་དུས་འབྱུང་། དེ་ནས་ཐོད་པའི་གའུ་འགྲིགས་པའི་དུས་སུ་ཁྱེད་རྣམས་ཀྱི་སྤྲུལ་པ་འབྱུང་བ་དང་གཏེར་འདི་ཡང་རྡོལ་ཞིང་། བློན་ཀླུ་གོང་དང་བཙུན་མོའི་དམོད་པས་མ་བསླུས་ན་མདོ་སྔགས་ཆོས་ཀྱི་བསྟན་པ་ཟུང་ཅིག་རྒྱས་ཤིང་། སྲོང་བཙན་སྤྲུལ་པ་བསྟན་པའི་དཔལ་དུ་འབྱུང་། དེ་དུས་སོ་སོར་ལས་ཀྱིས་ཤེས་རྒྱུད་བསྐུལ། །བྱེ་བྲག་གསལ་བས་དག་སྣང་འཆར་བའི་དུས། །ཕྱི་བཤོལ་བདུད་དབང་མ་གཏོང་ལུང་བྱང་ལ། །སྨོན་ལམ་མཚམས་སྦྱོར་ཡོད་པ་ངོ་ཤེས་བཞིན། །རྡོ་རྗེ་གདན་གསུམ་སྒྲུབ་པའི་གནས་རྣམས་སུ། །ཆོས་འདིའི་གཉེར་བྱང་མཆོད་ཆོག་དང་དུ་ལོངས། །མཐའ་བདེ་དབུས་འཇམ་སྐྱེ་འགྲོ་བདེ་ལ་སྤྱོད། ནད་མུག་མཚོན་འཁྲུག་འཚུབ་མ་རང་སོར་ཞི། །ཀློང་ཐང་བུ་ཆུ་པྲ་དུན་བྱམས་པ་སྤྲིན། །མཆོད་ཆོག་འདི་ཚུགས་འདྲ་འབག་ལྷ་ཁང་བཞེངས། །ལས་སྒོ་བཞི་དར་ཕྱོགས་བཞིའི་འགྲོ་བ་བདེ། །ཁྱད་པར་གནས་དགོན་ཡུལ་གྲོང་ཇི་སྙེད་དུ། །མཆོད་པ་འདི་བཟུང་བདེར་གཤེགས་འདྲ་འབག་བཞེངས། །བཙའ་སད་སེར་གསུམ་ནད་མུག་བབ་ཀྱིས་ཉུང་། །འོན་ཀྱང་བདུད་འགོང་སྤྲུལ་པའི་རྩལ་ཤུགས་ཀྱིས། །བོད་ཁམས་འགྲོ་བ་སྡུག་ལ་བཀོལ་ཀྱང་སྲིད། །ཅེས་གསུངས་པའི་དུས་སུ་དེར་འདུས་པ་ཐམས་ཅད་ཀྱིས་བདུད་ཀྱི་བར་གཅོད་ཟློག་པ་དང་། ཆོས་ཀྱི་བསྟན་པས་འགྲོ་བ་སྐྱོབ་པའི་སྨོན་ལམ་བཏབ། འདི་དག་རྣམས་ཀྱང་བདག་ཀླུ་དབང་བསྲུང་གིས་བྲིས་པ་བསྟན་པ་དང་སེམས་ཅན་ལ་ཕན་ཐོགས་ནས་བདུད་ཀྱི་སྟོབས་ཐམས་ཅད་ཉམས་ཤིང་སངས་རྒྱས་ཀྱི་བསྟན་པ་དར་བར་ཤོག །མངྒ་ལཾ། །ཁམས་པ་ཉི་མ་གྲགས་ཀྱིས་ལྕགས་རྟ་ལ་ཀློང་ཐང་སྒྲོལ་མ་ནས་གདན་དྲངས་པའོ། །ལགས་གདམ་སྐོར་འདིའི་ཡིག་བྲིས་ལ་མ་མྱ་ད་དྲག་སྔགས་སོགས་འདོན་མི་བདེ་འདྲ་འདུག་ལ་ལོ་ཙཱ་བའི་ཕྱག་བྲིས་སོར་བཞག གཞུང་གིས་མདོ་ལ་ཅི་འཁྱོངས་གཟུངས་རྣམས་ཀྱང་འབྲུ་ལེན་བྱས་ཡོད་ཅིང་། ཆ་ལག་སྐོར་འབྲི་གང་ཐུབ་ལས་ཕྱག་བྲིས་སོར་བཞག་གི་མ་མྱ་ད་དྲག་སོགས་མ་འཁྱོངས་པ་དགོངས་འཚལ། །ཨཱོཾ་སྭཱ་སྟི་པྲ་ཛྙཱ་བྷྱཿ ཐུབ་དབང་སྨན་གྱི་རྒྱལ་པོ་བདེར་བཤེགས་བདུན། །ལྷར་བཅས་སྐྱེ་དགུའི་འདྲེན་མཆོག་ཁྱད་པར་ཅན། །དུས་འདིར་ཐུགས་བསྐྱེད་རྗེས་དགོངས་མཐུ་དཔུང་བསྐྱེད། །སྲིད་གསུམ་དུཿཁའི་ཉེན་ལས་སྒྲོལ་བར་མཛོད། །འཁོར་བའི་ཆོས་ཉིད་དུག་གསུམ་བག་ཆགས་ཀྱིས། །བསྐོས་པའི་ཟུག་རྔུ་གཞིལ་བྱེད་དམ་པའི་ཆོས། །བདུད་རྩིའི་ཐིགས་པས་ཡུན་དུ་སྲོག་འཚོའི་དཔྱིད། །སྩོལ་མཛད་བདེ་གཤེགས་མཆེད་བདུན་མཆོད་ཆོག་འདི། །མཆོག་གསུམ་བླ་མ་བཀུར་བའི་ཐབས་ཀྱི་མཆོག །བརྩོན་པས་པར་དུ་བགྱིས་པའི་བསོད་ནམས་དེས། །བསྟན་དང་བསྟན་འཛིན་ཆོས་ལྡན་རྒྱལ་པོ་རྣམས། །ཡུན་འཚོ་དབུ་འཕང་མཐོ་ཞིང་ཆོས་སྲིད་རྒྱས། །འཇིག་རྟེན་ཀུན་ཏུ་སྐྱོ་སྔོགས་ཞི་བ་དང་། །མི་གེ་མེད་ཅིང་རྐང་འགྲོ་ལོ་ཏོག་འཕེལ། །ལུས་སེམས་བདེ་སྐྱིད་ལང་ཚོ་སྒེག་པ་དངོམ། །མཐར་ཐུག་རྒྱལ་བའི་ཞིང་དུ་བསྙེགས་གྱུར་ཅིག །ཅེས་པ་འདི་པདྨ་ཐེག་མཆོག་བསྟན་པའི་རྒྱལ་མཚན་གྱིས་པར་བྱང་དུ་སྨྲས་པ་དགེ། །།མངྒ་ལཾ། །༈ དམ་ཆོས་བདུད་རྩིའི་ཐིགས་པ་ལས།