གཏེར་སྲུང་ཁོལ་པོ་ཁ་མཆོད་ཐབས།
༈ དམ་ཆོས་བདུད་རྩིའི་ཐིགས་པ་ལས། སངས་རྒྱས་སྨན་བླའི་གཏེར་སྲུང་ཁོལ་པོ་ཁ་མཆོད་ཐབས་ཤོག་དྲིལ་བཞུགས། བཅོམ་ལྡན་འདས་སྨན་གྱི་བླ་ལ་ཕྱག་འཚལ་ལོ། རིན་པོ་ཆེའི་སྣོད་དུ་ཟླུམ་གཏོར་གཅིག་ལ་ཀྱུ་གུའམ་རིལ་བུ་མང་པོས་བསྐོར་བ་རྒྱན་མཛེས་པར་བྱས། འབྲུ་སྨན་དང་དཀར་མངར་ཅི་འབྱོར་བཏབ། ཆུ་གཙང་གིས་བྱིན་གྱིས་བརླབས་ནས། རང་ཉིད་སྐད་ཅིག་གིས་གསང་བའི་བདག་པོའི་སྐུར་གྱུར། ཨོཾ་བཛྲ་པཱ་ཎི་ཧཱུྃ། ཅི་མང་བཟླ། ཧཱུྃ། ཡན་ལག་བརྒྱད་ལྡན་རྒྱ་མཚོ་ཆེན་པོའི་ཟུར། །དཔག་བསམ་ཤིང་ཆེན་ལོ་འདབ་རྒྱས་པའི་དྲུང་། །རིན་ཆེན་པདྨ་ལྗང་སེར་ཟེའུ་འབྲུའི་དབུས། །ཧཱུྃ། སྔོན་ཡོངས་གྱུར་གནོད་སྦྱིན་དབང་གི་རྒྱལ། །མཐིང་མདོག་ཞལ་གཅིག་ཕྱག་གཉིས་སྒྲོམ་བུ་བསྣམས། །ཁྲོ་འཛུམ་སྨ་ར་སྨིན་མ་དམར་སེར་འབར། །རྒྱན་དང་ཕྲེང་བ་དར་ཟབ་ན་བཟའ་འཕྱོ། །སྐྱིལ་ཀྲུང་ཕྱེད་པའི་གར་ལ་འོད་ཟེར་འབར། །གཡུ་རལ་གྱེན་བརྫེས་མཐུར་འཕྱང་ནོར་བུས་སྤྲས། །དགྱེས་སྡེ་ཡུམ་སྲས་བཀའ་འཁོར་མང་པོ་ཡང་། །སྣ་ཚོགས་མདོག་ལ་རང་འདྲའི་རྒྱན་གོས་བཅས། །མངོན་སུམ་ཁྲོམ་ཚོགས་ལྟར་གསལ་འོད་ཟེར་འཕྲོས། །བྱང་ཕྱོགས་གནོད་སྦྱིན་རྫོང་ནས་སྤྱན་འདྲེན་ནོ། །ཧཱུྃ། སྟོན་པ་བདེ་གཤེགས་སངས་རྒྱས་སྤྱན་སྔ་རུ། །ཁས་བླངས་དམ་བཅས་གནོད་སྦྱིན་དབང་གི་ལྷ། །ད་ཚུར་ད་ཚུར་མཆོད་པའི་གནས་འདིར་སྤྱོན། །སྤྱན་འདྲེན་བཞུགས་གསོལ་ཕྱག་འཚལ་མཆོད་ཅིང་བསྟོད། །བྷ་ལིང་གཏོར་མ་འདོད་ཡོན་རྒྱན་གྱིས་སྤྲས། །དངོས་འབྱོར་ཡིད་སྤྲུལ་ནམ་མཁའི་མཐར་ཁྱབ་པའི། །ཉེར་སྤྱོད་རྣམ་ལྔ་གཟུགས་སྒྲ་དྲི་རོ་རེག །མཆོད་པར་འབུལ་ལོ་དགྱེས་པར་ཡོངས་བཞེས་ཏེ། །སངས་རྒྱས་བསྟན་དང་བསྟན་འཛིན་སྐྱེས་བུ་སྲུངས། །མདོ་སྔགས་བསྟན་པ་ཕྱོགས་བཅུར་རྒྱས་པ་དང་། །ཁྱད་པར་མདོ་སྡེ་ཉན་འཆད་མཆོད་བསྟོད་འཆང་། །ཁྱོད་ཀྱིས་སྲུངས་ཤིག་ཁྱོད་ཀྱིས་སྡོངས་གྲོགས་མཛོད། །སྔོན་གྱི་ལས་ངན་ཐམས་ཅད་ཟད་པ་དང་། །འཕྲལ་གྱི་རྐྱེན་ངན་ཐམས་ཅད་ཞི་བ་དང་། །རྒྱལ་ཁམས་འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་དགེ་བཅུ་ཆོས་འཕེལ་དང་། །བསམ་པའི་དོན་ཀུན་ཡིད་བཞིན་གྲུབ་པར་མཛོད། །གཏོར་མ་སྤོས་རེང་དང་མར་མེ་བཅས་བཏེགས་ལ་གཙང་སར་དབུལ་ཞིང་། ཧཱུྃ། རྒྱལ་བའི་སྤྱན་སྔར་ཁས་བླངས་དམ་བཅས་པའི། །དམ་ཚིག་གཉན་གྱི་སྲུང་མ་ཁོལ་པོ་ཁ། །མ་གཡེལ་མ་གཡེལ་དམ་བཅས་རྗེས་སུ་དགོངས། །བདག་ཉིད་སློབ་དཔོན་པདྨ་སམྦྷ་ཝས། །ལྷ་ལུང་རྡོ་རྗེའི་བྲག་གི་གཞལ་ཡས་སུ། །གནས་མཆོག་ཆེན་པོ་ཀློང་ཐང་སྒྲོལ་མ་ཡི། །བསྲུང་མར་བསྐོས་ཤིང་གཏེར་གྱི་གཉེར་བྱང་གཏད། །མ་འོངས་རྗེས་འཇུག་བསྟན་པ་བསྲུང་བར་ཆད། །དམ་རྫས་རྒྱན་གྱིས་མཆོད་གཏོར་འདི་འབུལ་བཞེས། །རྣལ་འབྱོར་སྒྲུབ་པ་པོ་ཡི་མགོན་སྐྱོབ་མཛོད། །བཅོལ་བའི་ཕྲིན་ལས་བཀའ་བཞིན་གཉེར་གཏད་སྒྲུབས། །ཅེས་པ་འདི་ཡང་སློབ་དཔོན་ཆེན་པོའི་གསུང་བཞིན་བདག་ལོ་ཙཱ་བ་ཀླུ་དབང་བསྲུང་གིས་ཡི་གེར་བྲིས་པས་སྲུང་མས་བྱ་ར་མཛོད། །ཁམས་པ་ཉི་མ་གྲགས་ཀྱིས་ཀློང་ཐང་སྒྲོལ་མ་ནས་རྟ་ལོར་གདན་དྲངས་པའོ།། །།མངྒ྄་ལཾ།། །།