དབང་ཆོག་ཆིག་དྲིལ་ནག་འགྲོས་སུ་བཀོད་པ།

དམ་ཆོས་བདུད་རྩིའི་ཐིགས་པ་ཡི། དབང་ཆོག་ཆིག་དྲིལ་ནག་འགྲོས་སུ་བཀོད་པ་འདི་རང་གཞན་འགའ་ཞིག་ལ་གྲོང་ཆོག་སོགས་ལ་མཁོ་ཕྱིར་བྲིས་པ་བཞུགས་སོ།འཕགས་པ་དེ་བཞིན་གཤེགས་པ་རྣམས་ལ་ཕྱག་འཚལ་ལོ། །བདག་ལོ་ཙཱ་བ་ཀླུ་དབང་གིས་གུ་རུ་རིན་པོ་ཆེ་ལ་གུས་པས་ཕྱག་དང་སྐོར་བ་བྱས། གསེར་གྱི་མཎྜལ་ཕུལ། དངུལ་སྐྱོགས་ཆང་གིས་གཏམས་ཏེ་ཞུས་ནས། ཕྱི་མའི་འགྲོ་བ་རྣམས་ཀྱི་དོན་དུ་དེ་བཞིན་གཤེགས་པ་རྣམས་ཀྱི་བྱིན་བརླབས་དབང་གི་གདམས་པ་རིན་པོ་ཆེ་ཟབ་ལ་འདྲིལ་བ་ཞིག་གནང་དུ་གསོལ་ཞུས་པས། སློབ་དཔོན་ཆེན་པོའི་ཞལ་ནས། རིགས་ཀྱི་བུ་ཚུལ་བཞིན་ཉོན་ལ་ཡི་གེར་ཐོབ་ཅིག འཕགས་པ་དེ་བཞིན་གཤེགས་པ་མཆོག་གི་སྨོན་ལམ་གྱི་དབང་བསྐུར་འདོད་པས། གནས་ཁང་སྐྱང་ནུལ་དང་དྲི་བཟང་གིས་ཆག་ཆག་གདབ་སྟེ། སྟེགས་བུ་གནས་ཀྱི་ཁྱོན་ལྟར་མཛེས་པར་བྱས་ཤིང་ག་བུར་གྱི་ཆུས་བྱུག དེ་སྟེང་བུམ་པ་ལྷ་གྲངས་དྲི་བཟང་གི་ཆུས་སུམ་ཆ་བཀང་བ་གཟུངས་ཐག་དུང་ཆོས་འབྲས་བུ་ཅན་གྱི་ཤིང་དང་རྨ་བྱས་བརྒྱན་པ་བརྒྱད་དབུས་དང་ཕྱོགས་སུ་འགོད། རིན་པོ་ཆེའི་མཎྜལ་གྱི་སྟེང་དུ་སྦྲང་བུ་རམ་མར་དྲི་བཟང་གི་ཆུ་སོགས་གང་འབྱོར་གྱིས་སྦྲུས་པའི་ཚོམ་བུ་བཟང་པོ་གཙོ་བུམ་མ དུན་དུ་འགོད། འབྲས་སམ་ཕྱེ་གཙང་ལ་ཟླུམ་གཏོར་རྒྱན་ལྡན་ལྷ་གྲངས་དེའི་ཕྱི་ནས་བཀྲམ། རས་བྲིས་ཀྱི་ཙཀླི་དམིགས་རྟེན་བུམ་པ་རྣམས་ཀྱི་ཁ་རྒྱན་དུ་བྱུང་ཡང་ལེགས། བཀྲ་ཤིས་པའི་རྫས་བརྒྱད་དང་། རྟགས་བརྒྱད་སོགས་ཀྱང་འགོད། བཀའ་གཏེར་སྲུང་མའི་གཏོར་མ་རྣམས་ཀྱང་བཟང་དུ་བཤམས། མཆོད་པ་སྣ་ཚོགས་སྤོས་དང་མེ་ཏོག་མར་མེ་སོགས་གྱ་ནོམ་པར་བཤམས་ཤིང་བུམ་པ་བསྐྱེད་ཆོག་མཆོད་བསྟོད་བཟླས་པ་སོགས་གྲུབ་ནས་བདག་འཇུག་བླངས། ལས་བུམ་གྱི་ཆུས་སློབ་མ་རྣམས་ལ་ཡན་ལག་ལྔ་ཁྲུས་བྱ། ལག་གཡོན་མཎྜལ་བཟང་པོ་ཐོགས་ནས་འདི་སྐད་ཞུ། ན་མོ་ཕྱག་འཚལ་ལོ་མཆོད་དོ་སྐྱབས་མཆིའོ། །དེ་བཞིན་གཤེགས་པ་ས་རྒྱལ་བ། །འཇོམས་པ་ཆེན་པོ་རྡོ་རྗེའི་སྐུ། །དཔའ་བོ་ཆེན་པོ་མཐུ་ཆེན་ལྡན། །བདག་ཅག་འཁོར་བའི་འཇིགས་ལས་སྐྱོབས། །ཐར་པ་མཆོག་གི་ཞིང་ལ་སྦྱོར། །ཡང་དག་མཆོག་ལ་སྨིན་པར་མཛོད། །སློབ་དཔོན་གྱིས། ཉོན་ཅིག་འདིར་ཚོགས་རིགས་ཀྱི་བུ། །སྡུག་བསྔལ་འཁོར་བའི་འཇིགས་པ་ལས། །ཐར་འདོད་ངེས་འབྱུང་སེམས་ཡོད་ན། །བླ་མེད་སྟོན་པ་བཅོམ་ལྡན་འདས། །བདེ་གཤེགས་བརྒྱད་ཀྱི་དཀྱིལ་འཁོར་དུ། །ཁྱེད་རྣམས་རྗེས་སུ་འཛིན་པར་བྱ། །ཡན་ལག་བརྒྱད་པའི་སྡོམ་པ་ལོངས། ཞེས་གནང་བ་བྱིན། རྒྱུན་ཞུགས་རྣམས་ལ་གསོ་སྦྱོང་དང་། ཁྱིམ་པ་རྣམས་ལ་བསྙེན་གནས་འབོག །དེ་ནས་དངོས་གཞི་དབང་དོན་དུ། །མོས་གུས་ཤུགས་ཕྱུང་ཐལ་མོ་སྦྱར། །གསོལ་བ་འདེབས་པ་འདི་བཞིན་བརྗོད། ན་མོ་རྡོ་རྗེ་འཆང་ཆེན་སློབ་དཔོན་དང་། །བདེ་བར་གཤེགས་པ་བཅོམ་ལྡན་འདས། །སྐུ་གསུང་ཐུགས་ཀྱི་སྨིན་གྲོལ་སྩོལ། །བྱིན་རླབས་ཡེ་ཤེས་དབང་བསྐུར་ཞུ། ཞེས་ཞུ། སྐྱབས་སེམས་སོགས་འབོག་པ་ནི། ན་མོ་བླ་མ་སངས་རྒྱས་བདེ་གཤེགས་བཅོམ་ལྡན་འདས། །སྨན་རྒྱལ་མཆེད་བདུན་བྱང་ཆུབ་སེམས་དཔའི་ཚོགས། །སྐྱབས་གནས་མ་ལུས་ཇི་སྙེད་ཐམས་ཅད་ལ། །དེང་ནས་བཟུང་སྟེ་བྱང་ཆུབ་སྙིང་པོའི་བར། །འབྲལ་བ་མེད་པར་གུས་པས་སྐྱབས་སུ་མཆི། །ལན་གསུམ། ན་མོ་མཁའ་མཉམ་ཕ་མ་འགྲོ་དྲུག་སེམས་ཅན་རྣམས། །སྡུག་བསྔལ་འཁོར་བའི་གྲོང་ཁྱེར་ཆེན་པོ་ལས། །བསྒྲལ་ཞིང་བྱང་ཆུབ་མཆོག་ལ་འགོད་པའི་ཕྱིར། །འཕགས་པ་མཆོད་ཅིང་སྨོན་ལམ་རྗེས་སུ་བསྐུལ། བླ་མེད་བྱང་ཆུབ་མཆོག་ལ་རེག་པར་ཤོག །ན་མོ་རྒྱལ་བ་རྣམས་ལ་གུས་པས་ཕྱལ་འཚལ་ཞིང་། །དངོས་འབྱོར་ཡིད་སྤྲུལ་མཆོད་པ་རྣམས་ཀྱིས་མཆོད། །མི་དགེ་སྡིག་སྒྲིབ་ཉེས་ལྟུང་བསགས་རྣམ་བཤགས། །ཆོས་ཀྱི་འཁོར་ལོ་དམ་པ་བསྐོར་བར་བསྐུལ། །མྱ་ངན་མི་འདའ་འགྲོ་བའི་མགོན་དུ་བཞུགས། །དུས་གསུམ་དགེ་བའི་ཚོགས་ལ་ཡི་རང་ངོ་། །འགྲོ་དྲུག་མ་ལུས་སངས་རྒྱས་མངོན་གྱུར་ཤོག །ལན་གསུམ། ད་ཁྱེད་རང་རྣམས་འདུག་སྟངས་བཟང་པོ་དང་ལྡན་པའི་ངང་ནས་དམིགས་པ་འདི་བཞིན་གཏོད་ཅིག རང་རང་གི་སྤྱི་བོར་དབུས་སུ་པདྨ་དང་ཟླ་བའི་གདན་གྱི་སྟེང་དུ་ས་བོན་ཧཱུྃ་ཡིག་སེར་པོ་དང་། དེ་མཐར་མདུན་ནས་གཡས་བསྐོར་དུ་པད་ཟླའི་གདན་ལ་ཧཱུྃ་ཡིག་སྔོན་པོ། སེར་པོ་གསུམ། དམར་སྐྱ། དཀར་པོ། དམར་པོ་རྣམས་ཨ་ལི་ཀཱ་ལིས་མཚན་པ་ལས་འོད་ཟེར་འཕྲོས་སེམས་ཅན་ཐམས་ཅད་ཀྱི་སྒྲིབ་པ་སྦྱངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་ནས་བྱིན་རླབས་བསྡུས། ས་བོན་ལ་ཐིམ་ཡོངས་སུ་གྱུར་པ་ལས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། དབུས་སུ་ཤཱཀ་ཐུབ་སེར་པོ་ས་གནོན་དང་མཉམ་གཞག་ཅན། དེ་མཐར་སྨན་བླ་སྔོན་པོ་ཕྱག་གཉིས་མཆོག་སྦྱིན་མཉམ་བཞག་ཨ་རུ་རྣམ་རྒྱལ་འཛིན་པ། མཚན་ལེགས་པ་ཡོངས་གྲགས་སེར་པོ་སྐྱབས་སྦྱིན་མཉམ་གཞག །མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་སེར་པོ་མཆོག་སྦྱིན་མཉམ་གཞག གསེར་བཟང་དྲི་མེད་རིན་ཆེན་སྣང་སེར་པོ་སྐྱབས་སྦྱིན་མཉམ་གཞག མྱ་ངན་མེད་མཆོག་དཔལ་དམར་སྐྱ་མཉམ་གཞག་ཏིང་འཛིན་ཅན། ཆོས་གྲགས་རྒྱ་མཚོའི་དབྱངས་དཀར་པོ་ཆོས་འཆད། ཆོས་བློ་མངོན་མཁྱེན་དམར་པོ་མཆོག་སྦྱིན་མཉམ་གཞག་གི་ཕྱག་རྒྱ་མཛད་པ་རྣམས་ཞལ་གཅིག་འཛུམ་མདངས་དང་ལྡན་པ་ལ་རང་འོད་འབར་བ་ཞབས་རྡོ་རྗེའི་སྐྱིལ་ཀྲུང་གིས་གཞུགས་པ། དབུ་གཙུག་ཏོར། ཞབས་འཁོར་ལོ། མཚན་བཟང་དང་དཔེ་བྱད་ཀྱིས་བརྒྱན་ཅིང་བླ་གོས་ངུར་སྨྲིག་གིས་བཀླུབས་པར་གསལ་བ་རྣམས་ཀྱི་སྤྱི་བོར་འཁོར་ལོ་དཀར་པོ་ཨོཾ་གྱིས་མཚན་པ། མགྲིན་པར་པདྨ་དམར་པོ་ཨཱཿས་མཚན་པ། ཐུགས་ཀ་རྡོ་རྗེ་ཧཱུྃ་རང་མདོག་གིས་མཚན་པ་ལས་འོད་ཟེར་རང་མདོག་ལྟར་བསམ་གྱིས་མི་ཁྱབ་པ་འཕྲོས་པས། འོག་མིན་ཆོས་ཀྱི་དབྱིངས་ཀྱི་ཕོ་བྲང་དང་རང་རང་གི་ཞིང་ཁམས་ནས་བསྒོམས་པ་དང་འདྲ་བའི་ཡེ་ཤེས་སེམས་དཔའི་སྐུ་དྭངས་ལ་རྣམ་པ་གསལ་བ། གསུང་ཨ་ལི་ཀཱ་ལིའི་ཡིག་འབྲུ་རང་སྒྲ་ཅན། ཐུགས་རྡོ་རྗེ་མདོག་མཚུངས་འོད་ཟེར་དང་གཟི་མདངས་ལྡན་པ་མང་པོ་རྒྱ་མཚོ་ཆེན་པོ་ལ་ཆར་བབས་པ་ལྟར་སྤྱི་བོའི་སྐུ་ལ་ཐིམ་པའི་མོས་པ་རྩེ་གཅིག་ཏུ་གཏོད་ཅིག ཅེས་བརྗོད་སྤྱན་འདྲེན་ནི། ཧཱུྃ། འཕགས་པ་མཆོག་སྐུ་རྒྱལ་བ་དེ་བཞིན་གཤེགས། །ཁྱེད་རྣམས་སྔོན་ཚེ་དཔག་མེད་གོང་རོལ་ནས། །མངོན་པར་བྱང་ཆུབ་རྫོགས་པར་སངས་རྒྱས་ཀྱང་། །ཐུགས་རྗེས་ཡལ་བར་དོར་བའི་བླུན་རྨོངས་བདག །སྐྱབས་དང་མགོན་མེད་སྡུག་བསྔལ་རྒྱ་མཚོར་བྱིང་། །ཀྱཻ་མ་ཀྱི་ཧུད་ཉམ་ཐག་ང་རོས་འབོད། །བརྩེ་བའི་ཐུགས་རྗེས་དགོངས་ལ་གནས་འདིར་གཤེགས། །བསྐལ་པའི་ཡང་མཐའ་ཕྱི་མའི་ཕྱི་མ་འདིར། །སྙིང་ནས་འབོད་ལ་རྗེས་སུ་མ་དགོངས་ན། །འཕགས་མཆོག་ཐུགས་རྗེ་ཆེ་ཡང་ཅི་ཞིག་འཚལ། །མཆོད་པའི་རྫས་བཤམས་གདུང་བའི་ཤུགས་བསྐྱེད་པས། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །བསྐྱེད་པའི་གནས་འདིར་སྤྱན་འདྲེན་གཤེགས་སུ་གསོལ། །ཐུགས་རྗེའི་མཐུ་ཡིས་གནས་འདིར་གཤེགས་སུ་གསོལ། །བྱིན་རླབས་སྟོབས་ཀྱིས་གནས་འདིར་གཤེགས་སུ་གསོལ། །རྫུ་འཕྲུལ་ཤུགས་ཀྱིས་གནས་འདིར་གཤེགས་སུ་གསོལ། །ན་མཿསརྦ་ཏཱ་ཐ་ག་ཏྱ་ཕེཾ་ཕེཾ་ཨ་བེ་ཤ་ཡ་ཨ་ཨཱཿ བརྗོད་མེ་ཏོག་སྤྱིར་བོར་བཀོད། རྡོ་རྗེ་གནས་གསུམ་དུ་འཇོག །ཨོཾ་ཨཱཿཧཱུྃ་ཏིཥྛ་བཛྲ་ཡེ་སྭཱ་ཧཱ། བརྗོད། དེ་ནས་འདུ་ཤེས་དང་མོས་པ་གཏད་ཅིང་ཐལ་མོ་སྦྱར་བཞིན་ངག་ནས། ན་མོཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་ཤཱཀྱ་ཐུབ་པ་སྐུ་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱིན་གྱིས་བརླབ་པར་མཛད་དུ་གསོལ། །ལན་གསུམ། དེ་བཞིན་ཐོག་མཐའ་འདྲ་བ་ལས། སངས་རྒྱས་སྨན་པའི་རྒྱལ་པོ་སྐུ་འཁོར་དང་བཅས༴ སངས་རྒྱས་མཚན་ལེགས་པ་ཡོངས་གྲགས་དཔལ་གྱི་རྒྱལ་པོ་སྐུ་འཁོར་དང་བཅས༴ མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་སྐུ་འཁོར་དང་བཅས༴ སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་སྐུ་འཁོར་དང་བཅས༴ སངས་རྒྱས་བཅོམ་ལྡན་འདས་མྱ་ངན་མེད་མཆོག་དཔལ་སྐུ་འཁོར་དང་བཅས་པ༴ སངས་རྒྱས་བཅོན་ལྡན་འདས་ཆོས་གྲགས་རྒྱ་མཚོའི་དབྱངས་སྐུ་འཁོར་དང་བཅས་༴ སངས་རྒྱས་བཅོམ་ལྡན་འདས་ཆོས་རྒྱ་མཚོའི་མཆོག་གི་བློ་རྣམ་པར་རོལ་པ་མངོན་པར་མཁྱེན་པ་སྐུ་འཁོར་དང་བཅས༴ ཞེས་སོ་སོར་ལན་གསུམ་རེ་བརྗོད། འོ་དེ་ལྟར་གསོལ་བ་བཏབ་ཅིང་མོས་པ་གཏད་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་གཤེགས་བརྒྱད་ཞལ་འཛུམ་མདངས་ཀྱིས་རིགས་ཀྱི་བུའམ་རིགས་ཀྱི་བུ་མོའི་སྒོ་གསུམ་གྱི་སྒྲིབ་པ་ཐམས་ཅད་བྱང་ཞིང་དག་ནས་དབང་གི་སྣོད་དང་ལྡན་པར་གྱུར་ཅིག །གསུངས་ནས་འོད་ཕུང་དུ་གྱུར་ཏེ། སྒོ་གསུམ་ལ་ཐིམ་པས་དེ་བཞིན་གཤེགས་པའི་སྐུ་གསུང་ཐུགས་ཀྱི་དཀྱིལ་འཁོར་གསུམ་ལ་སྤྱོད་པའི་སྐལ་ལྡན་དུ་གྱུར་པར་བསྒོམ། དེ་ནས་སྐུའི་དབང་ཞུ་བའི་དོན་དུ་འདི་བཞིན་སྨྲོས་ཤིག ན་མོ་རྡོ་རྗེ་འཆང་ཆེན་སློབ་དཔོན་དང་། །བདེ་བར་གཤེགས་པ་བཅོམ་ལྡན་འདས། །སྐུ་གསུང་ཐུགས་ཀྱི་སྨིན་གྲོལ་སྩོལ། །བྱིན་རླབས་ཡེ་ཤེས་དབང་བསྐུར་ཞུ། །དེ་ལྟར་གསོལ་བ་བཏབ་པས་སློབ་དཔོན་དབང་ལྷར་རྒྱལ་བར་རིགས་ལྔ་འཁོར་གསལ་བའི་ཕྱག་ན་ཟག་པ་མེད་པའི་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ཏེ་སྤྱི་བོ་ནས་དབང་བསྐུར་བས་དེ་བཞིན་གཤེགས་པའི་སྐུའི་དཀྱིལ་འཁོར་དུ་མངོན་སུམ་དུ་གྱུར་པར་བསྒོམས་ཏེ། དེ་ཡང་ཁྱེད་རང་རྣམས་བསྟན་པའི་བདག་པོར་གསལ་བའི་ཐུགས་ཀར་ཟླ་གདན་གྱི་འཁོར་ལོའི་ལྟེ་བར་སྨན་བླ་དང་། དེ་མཐར་མཚན་ལེགས་སོགས་སངས་རྒྱས་དྲུག་གིས་བསྐོར་བར་གསལ་ཞིང་རང་གི་ལུས་ངག་ཡིད་གསུམ་དག་པའི་སྣང་ཆ་ལས་ཡོངས་སུ་གྲུབ་པའི་ལྷ་དེ་རྣམས་ཀྱང་ཞལ་བླ་མ་ལ་ཕྱོགས་ཏེ་བཞེངས་པར་མོས་ཤིག །བློ་དམན་རྣམས་ཀྱིས་གནས་སྐབས་ཀྱི་མོས་ངོར་འདི་ལྟར་བྱས་ན་རྣམ་པ་གསལ་བ་ལྟར་སྣང་ཞིང་། གཞན་དུ་ནི། ཞལ་ཕྱོགས་ལུགས་ཐུགས་རྗེས་ཀུན་ལ་སྙོམས་པའི་བཅོམ་ལྡན་འདས། ཞེས་གསུངས་པ་ལྟར་ཤེས་པར་བྱའོ། ཧཱུྃ། ཇི་ལྟར་དུས་གསུམ་མཁྱེན་མངའ་དེ་བཞིན་གཤེགས། །ཇི་སྙེད་མཁྱེན་པའི་ཏིང་འཛིན་ཡེ་ཤེས་རྩལ། །བླ་ན་མེད་པའི་དབང་མཆོག་འདི་ཕུལ་བས། །སྐུ་ལྔ་ཡེ་ཤེས་ལྔ་ལྡན་དབང་ཐོབ་ཤོག །ན་མཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བརྗོད་དབང་བསྐུར་བུམ་ཆུ་སྩལ་ཞིང་སྤྱི་བོར་བརྒྱན་ཏེ། ཧཱུྃ། ཏིང་འཛིན་རོལ་པ་དབང་ལྷས་དབང་བསྐུར་བས། །མཆོག་གི་ཡེ་ཤེས་རྒྱས་ནས་སྤྱི་བོའི་རྒྱན། །རང་རང་རིགས་ཀྱི་བདག་པོ་བཅོམ་ལྡན་འདས། །མཚན་དང་དཔེ་བྱད་ལྡན་པས་དབུ་རྒྱན་གྱུར། །ཞེས་དང་། མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་གྲགས་མངོན་མཁྱེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། །བདེ་བར་གཤེགས་པ་བརྒྱད་ཀྱི་བཀྲ་ཤིས་ཤོག །སོགས་ཤིས་པ་བརྗོད་མེ་ཏོག་འཐོར། དེ་ལྟར་དེ་བཞིན་གཤེགས་པ་སངས་རྒྱས་ཤཱཀྱ་ཐུབ་པས་དབང་བསྐུར་བས་ཁྱེད་རང་རྣམས་ཀྱི་ལུས་ཀྱི་བག་ཆགས་དང་སྡིག་སྒྲིབ་དག་ནས་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་པའི་སྐུའི་གོ་འཕང་འཐོབ་པའི་ས་བོན་རྒྱུད་ལ་བཞག་པ་ཡིན་ནོ། །གཉིས་པ་གསུང་གི་དབང་ཞུ་བའི་དོན་དུ་འདི་བཞིན་སྨྲོས་ཤིག །ན་མོ་རྡོ་རྗེ་འཆང་ཆེན་སློབ་དཔོན་དང་། །བདེ་བར་གཤེགས་པ་བཅོམ་ལྡན་འདས། །སྐུ་གསུང་ཐུགས་ཀྱི་སྨིན་གྲོལ་སྩོལ། །བྱིན་རླབས་ཡེ་ཤེས་དབང་བསྐུར་ཞུ། །དེ་ལྟར་གསོལ་བ་བཏབ་པས་སློབ་དཔོན་གསང་སྒྲུབ་ལྟར་བཅོམ་ལྡན་འདས་བདེ་བར་གཤེགས་པ་བརྒྱད་དུ་གསལ་བའི་སངས་རྒྱས་ཤཱཀྱ་ཐུབ་པའི་ཐུགས་ཀ་ནས་སྔགས་ཕྲེང་འོད་ཟེར་སེར་པོའི་རྟ་ལ་ཞོན། ཁྱེད་རང་རྣམས་བཅོམ་ལྡན་འདས་སངས་རྒྱས་ཤཱཀྱ་ཐུབ་པར་གསལ་བའི་ཞལ་དུ་ཞུགས། གཏེར་སྟོན་གྱིས་མཛད་པ་ལྟར་རོ། མགྲིན་པར་ཟླ་གདན་གྱི་སྟེང་དུ་ས་བོན་གྱི་མཐར་གཡས་སུ་འཁོར་བས་བཅོམ་ལྡན་འདས་སངས་རྒྱས་ཤཱཀྱ་ཐུབ་པའི་གསུང་གི་བྱིན་རླབས་ཐོབ་པར་བསྒོམས་ལ་འདིའི་རྗེས་ཟློས་མཛོད། །ཏདྱ་ཐཱ། སིདྡྷེ་སིདྡྷེ་སུ་སིདྡྷེ། མོ་ཙ་ནི། མོཀྵ་ཎི་མུཀྟེ་བི་མུཀྟེ། ཨ་མ་ལེ་བི་མ་ལེ་མཾ་ག་ལྱེ། ཧི་ར་ནྱ་གྷརྦྷེ་རཏྣ་གྷརྦྷེ། སརྦ་ཨརྠ་སཱ་དྷ་ནི། པ་ར་མཱརྠ་སཱ་དྷ་ནི། མ་ན་སེ། མ་ཧཱ་མ་ན་སེ། ཨད་བྷུ་ཏེ་ཨ་ཏྱ་བྷུ་ཏེ། བྷི་ཏཱ་བྷ་ཡེ་སུ་ཝརྞེ་བྲཧྨ་གྷོ་ཥེ། བྲཧྨ་དྷྱུ་ཏེ། སརྦྦ་ཨཪྠེ་ཥུ་ཨ་པ་རཱ་ཛི་ཏེ། སརྦྦ་ཏྲ་ཨ་པྲ་ཏི་ཧ་ཏེ། ཙ་ཏུཿཤཥྛི་བུདྡྷ་ཀོ་ཊི་བྷ་ཥི་ཏེ། ན་མཿསརྦ་ཏ་ཐཱ་ག་ཏཱ་ནཱཾ་སྭཱ་ཧཱ། ལན་གཅིག་གམ་གསུམ། ཨོཾ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ནེ་ཡེ་སྭཱ་ཧཱ། ལན་གསུམ། ཡང་སློབ་དཔོན་སངས་རྒྱས་སྨན་བླ་སོགས་བདེ་བར་གཤེགས་པ་བདུན་དུ་གསལ་བའི་ཐུགས་ཀ་ནས་སྔགས་ཕྲེང་འོད་ཟེར་སྐུའི་མདོག་མཚུངས་ཀྱི་རྟ་ལ་ཞོན། ཁྱེད་རང་རྣམས་བཅོམ་ལྡན་འདས་བདེ་བར་གཤེགས་པ་བདུན་དུ་གསལ་བའི་ཞལ་དུ་ཞུགས། གཏེར་སྟོན་གྱིས་བཞེད་པ་ལྟར་རོ། ཐུགས་ཀར་ཟླ་གདན་གྱི་སྟེང་དུ་ས་བོན་རང་མདོག་གི་མཐར་གཡས་སུ་འཁོར་བས་བཅོམ་ལྡན་འདས་བདེ་བར་གཤེགས་པ་བདུན་གྱི་གསུང་གི་བྱིན་རླབས་ཐོབ་པར་བསྒོམ་ལ་འདིའི་རྗེས་ཟློས་མཛོད། ཏདྱ་ཐཱ། གྷུ་མེ་གྷུ་མེ། ཨི་མེ་ནི་མི་ཧི་མ་ཏི་མ་ཏི་སཔྟ་ཏ་ཐཱ་ག་ཏ་ས་མཱ་དྷྱ་ངྷིཥྛི་ཏེ། ཨ་ཏེ་མ་ཏེ། པཱ་ལེ་པཱ་པཾ་ཤོ་དྷ་ནི། སརྦ་པཱ་པཾ་ནཱ་ཤཱ་ཡ་མ་མ་བྷུདྡྷ་བྷུདྡྷོཏྟ་མེ། ཨུ་མེ་ཀུ་མེ། བྷུདྡྷ་ཀྵེ་ཏྲ་པ་རི་ཤོ་དྷ་ནི། དྷ་མེ་ནི་དྷ་མེ་མེ་རུ་མེ་རུ་མེ་རུ་ཤི་ཁ་རེ། སརྦ་ཨ་ཀཱ་ལ་མྲྀ་ཏྱུ། ནི་པཱ་ར་ཎི། བྷུདྡྷེ་སུ་བྷུདྡྷེ། བྷུད་དྷ་ཨ་དྷིཥྛཱ་ན། རཀྵནྟུ་མེ། སརྦ་དྷེ་ཝ་ས་མེ་ཨ་ས་མེ་ས་མ་ནྭཱ་ཧ་རནྟུ། སརྦ་བྷུདྡྷ་བྷོ་དྷི་སཏྭ། ཤ་མེ་ཤ་མེ་པྲ་ཤ་མནྟུ་མེ་སརྦ་ཨི་ཏྱུ་པ་དྲ་བ་བྱཱ་ཏ་ཡ། པཱུ་ར་ཎེ་པཱུ་ར་ཎི་པཱུ་ར་ཡ་མེ། སརྦ་ཨ་ཤཱ་ཡ། བཻཌཱུཪྻ་པྲ་ཏི་བྷཱ་སེ་སརྦ་པཱ་པཾ་ཀྵ་ཡངྐ་རི་སྭཱ་ཧཱ། ལན་བདུན། ཏདྱ་ཐཱ། ཨོཾ་བྷཻ་ཥ་ཛྱེ་བྷཻ་ཥ་ཛྱེ་མ་ཧཱ་བྷོ་ཥ་ཛྱེ་རཱ་ཛ་ས་མུངྒ་ཏེ་སྭཱ་ཧཱ། ལན་བཅུ་བཞི་རྣམས་རྗེས་བཟློས་བྱེད་སློབ་མ་རྣམས་ཀྱིས་ལྷའི་མདོག་མཚུངས་མེ་ཏོག་གི་ཕྲེང་བ་རེ། སློབ་དཔོན་ལ་དབུལ་ཞིང་། རིན་ཆེན་མེ་ཏོག་མདོག་མཚུངས་ཕྲེང་བ་འདི། །རྡོ་རྗེ་འཛིན་པ་ཆེན་པོར་འབུལ་གྱིས་བཞེས། །ལྷག་པའི་ལྷ་མཆོག་རྒྱལ་བ་བཅོམ་ལྡན་འདས། །བདག་ལ་རྗེས་སུ་མཐུན་པའི་དངོས་གྲུབ་སྩོལ། །ཞེས་བརྗོད། སློབ་དཔོན་གྱིས་སྔགས་ཕྲེང་སློབ་མ་རྣམས་ཀྱི་སྤྱི་བོར་བཀོད་ནས། འཕགས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བར་གཤེགས་པ་བརྒྱད། སློབ་མ་འདི་ལ་ལེགས་སྩལ་བས། །འདི་ཉིད་རྗེས་སུ་འཛིན་མཛད་ནས། །སྔགས་ཀྱི་དངོས་གྲུབ་སྩོལ་བ་དང་། །ལོངས་སྐུའི་འབྲས་བུ་མཆིས་པར་མཛོད། །མཚན་ལེགས་རིན་ཆེན་གསེར་བཟང་མྱ་ངན་མེད། ཆོས་གྲགས་མངོན་མཁྱེན་སྨན་བླ་྄ཤཱཀྱ་ཐུབ། རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། བདེ་བར་གཤེགས་པ་བརྒྱད་ཀྱི་བཀྲ་ཤིས་ཤོག །ཅེས་ཤིས་པ་བརྗོད། མེ་ཏོག་འཐོར། གསུམ་པ་ཐུགས་ཀྱི་དབང་ཞུ་བའི་དོན་དུ་འདི་བཞིན་སྨྲོས་ཤིག །ན་མོ་རྡོ་རྗེ་འཆང་ཆེན་སློབ་དཔོན་དང་། །བདེ་བར་གཤེགས་པ་བཅོམ་ལྡན་འདས། །སྐུ་གསུང་ཐུགས་ཀྱི་སྨིན་གྲོལ་སྩོལ། །བྱིན་རླབས་ཡེ་ཤེས་དབང་བསྐུར་ཞུ། །དེ་ལྟར་གསོལ་བ་བཏབས་པས་སློབ་དཔོན་དེ་བཞིན་གཤེགས་པ་བརྒྱད་དུ་གསལ་བའི་ཐུགས་ཀ་ནས་ཧཱུྃ་ལྷའི་མདོག་མཚུངས་འོད་ཟེར་ཡང་མདོག་མཚུངས་རེག་བྱ་ཚ་ལ་རང་བཞིན་མྱུར་བ་མང་པོ་ནམ་མཁའི་སྐར་མདའ་ལྟར་འཕྲོས་པས། ཁྱེད་རང་རྣམས་ལྷར་གསལ་བ་ལ་ཕོག་པས་དམིགས་མེད་སྟོང་པ་ཆེན་པོར་གྱུར་པར་བསྒོམ་ལ་མ་བཅོས་པར་ཞོག་ཅིག བླ་མས་ཕྱག་མཚན་ནམ་མཁར་གདེངས་ཤིང་ཧཱུྃ་སྒྲ་ལན་གསུམ་བརྗོད་ཅིང་མཉམ་པར་བཞག །སླར་ཡང་ཆུ་ལས་ཆུ་བུར་བརྡོལ་བའམ། བར་སྣང་ནས་འཇའ་ཤར་བ་ལྟར་སྐད་ཅིག་གིས་ཁྱེད་རང་རྣམས་དེ་བཞིན་གཤེགས་པའི་སྐུར་གསལ་བ་ལ་ཚོམ་བུ་ཐུགས་ཀྱི་ས་བོན་ཧཱུྃ་ཡིག་མདོག་མཚུངས་གཟི་བརྗིད་དང་ལྡན་པས་དབང་བསྐུར་བས་དེ་བཞིན་གཤེགས་པའི་ཐུགས་གསང་བ་བསམ་གྱིས་མི་ཁྱབ་པའི་དབང་ཐོབ་པར་བསྒོམ། ཧཱུྃ། དེ་བཞིན་གཤེགས་པ་རྒྱལ་བ་ཐམས་ཅད་ཀྱི། །ཡང་དག་ཐུགས་ཀྱི་སྙིང་པོ་ཡི་གེ་ཧཱུྃ། །ཚོམ་བུའི་རྣམ་པར་འོད་མདངས་གཟི་བརྗིད་ལྡན། །སྐལ་ལྡན་རིགས་ཀྱི་བུ་ལ་དབང་བསྐུར་བས། །དེ་བཞིན་གཤེགས་པའི་ཐུགས་ཀྱི་དབང་ཐོབ་ཤོག །ན་མཿསརྦ་ཏ་ཐཱ་ག་ཏ་ཙིཏྟ་ཨ་བྷི་ཥིཉྩ་ཧཱུྃ། སྙིང་གའམ་སྤྱི་བོར་ཚོམ་བུ་སྦྱིན། མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་གྲགས་མངོན་མཁྱེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། །བདེ་བར་གཤེགས་པ་བརྒྱད་ཀྱི་བཀྲ་ཤིས་ཤོག །ཅེས་ཤིས་པ་བརྗོད་མེ་ཏོག་འཐོར། དེ་ལྟར་དེ་བཞིན་གཤེགས་པ་བརྒྱད་ཀྱི་ཐུགས་ཀྱི་དབང་བསྐུར་བས་ཁྱེད་རང་རྣམས་ཀྱི་སེམས་ཀྱི་བག་ཆགས་དང་སྡིག་སྒྲིབ་དག་ནས་རྫོགས་རིམ་བསྒོམ་པ་ལ་དབང་། འབྲས་བུ་ཆོས་སྐུ་འཐོབ་པའི་ས་བོན་རྒྱུད་ལ་བཞག་པ་ཡིན་ནོ། །དེས་དེ་བཞིན་གཤེགས་པ་བརྒྱད་ཀྱི་སྐུ་གསུང་ཐུགས་ཀྱི་དབང་གསུམ་ཐོབ་ཅིང་། །སླར་ཡོངས་རྫོགས་ཀྱི་དབང་ཞུ་སྙམ་པས་འདི་བཞིན་སྨྲོས་ཤིག །ན་མོ་རྡོ་རྗེ་འཆང་ཆེན་སློབ་དཔོན་དང་། །བདེ་བར་གཤེགས་པ་བཅོམ་ལྡན་འདས། །སྐུ་གསུང་ཐུགས་ཀྱི་སྨིན་གྲོལ་སྩོལ། །བྱིན་རླབས་ཡེ་ཤེས་དབང་བསྐུར་ཞུ། །དེ་ལྟར་གསོལ་བ་བཏབ་པས་གཏོར་མ་འདི་དེ་བཞིན་གཤེགས་པ་བརྒྱད་ལ་འཁོར་བྱང་སེམས་དགྲ་བཅོམ་ཐམས་ཅད་ཀྱིས་བསྐོར་བ་ཁྱེད་རང་རྣམས་ཀྱི་སྤྱི་བོར་བྱོན་ནས་བྱིན་གྱིས་་བརླབས་པས་སྔོན་སྨོན་ལམ་ཐུགས་བསྐྱེད་ཀྱི་ཐུགས་རྗེ་བྱིན་རླབས་ཐམས་ཅད་སྐད་ཅིག་འདི་ཉིད་ལ་ཐོབ་པའི་མོས་པ་མཛོད། ཨོཾ་ཨཱཿཧཱུྃ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། གསང་བདག་ཕྱག་ན་རྡོ་རྗེ། གུ་རུ་པདྨ་འབྱུང་གནས། མཁའ་འགྲོ་ཡེ་ཤེས་འཚོ་རྒྱལ། མཁན་ཆེན་ཞི་བ་མཚོ། ཆོས་རྒྱལ་ཁྲི་སྲོང་ལྡེའུ་བཙན། ལོ་ཆེན་ཀླུ་ཡིི་དབང་པོ། རིག་འཛིན་ཉི་མ་གྲགས་པ། རྒྱས་སྲས་ཨོ་རྒྱན་བསྟན་འཛིན། རྗེ་བཙུན་བློ་གྲོས་རྒྱ་མཚོ། དྲིན་ཅན་རྩ་བའི་བླ་མ་སོགས་རྒྱལ་བ་སྲས་བཅས་སྐུ་འཁོར་དང་བཅས་པ་རྣམས་ཀྱིས་བྱིན་གྱིས་རློབས་ཤིག ཁྱད་པར་དུ་བཅོམ་ལྡན་འདས་ཤཱཀྱ་ཐུབ་པའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས། རྡོ་རྗེའི་སློབ་མ་ཁྱེད་རྣམས་ཀྱི་ལས་ངན་པའི་རྒྱུ་ལས་བྱུང་བའི་ནད་གདོན་སྡིག་སྒྲིབ་སྡུག་བསྔལ་ཐམས་ཅད་བྱང་ཆུབ་ཀྱི་བར་དུ་ཞི་བ་དང་། ཚེ་དང་དཔལ་འབྱོར་དགེ་བའི་ཚོགས་ཐམས་ཅད་འཕེལ་ཞིང་རྒྱས་པར་བྱིན་གྱིས་བརླབ་པར་མཛད་དུ་གསོལ། བཅོམ་ལྡན་འདས་སྨན་པའི་རྒྱལ་པོའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས་འཇིག་རྟེན་འོད་ཀྱིས་ཁྱབ་ཅིང་འགྲོ་བ་མཚན་བཟང་དང་ལྡན་པ། སྐུའི་འོད་ཀྱིས་མུན་པའི་འཇིགས་པ་སེལ་བ། ཡིད་ལ་དྲན་པས་ལོངས་སྤྱོད་ཕུན་སུམ་ཚོགས་ཤིང་བདེ་བ་དང་ལྡན་པ། ཉན་རང་རྣམས་ཐེག་པ་ཆེན་པོའི་ལམ་ལ་སྦྱོར་བ། ཚུལ་ཁྲིམས་བསྲུངས་པ་ཐམས་ཅད་རྣམ་པར་དག་པ། ལོག་པ་རྣམས་ཀྱང་ང ན་སོང་དུ་མི་ལྟུང་བ། དབང་པོ་སྐྱོན་ཅན་ཐམས་ཅད་དབང་པོ་ཚང་ཞིང་བདེ་བ་དང་ལྡན་པ། ནད་ཀྱིས་བཏབ་པ་སྐྱབས་མགོན་མེད་ཅིང་བཀྲེས་ཕོངས་ཀྱིས་མནར་བ་ནད་དང་སྡུག་བསྔལ་ལས་ཐར་བ། བུད་མེད་རྣམས་བུད་མེད་ཀྱི་སྐྱེ་གནས་ལས་ཐར་བ། ལྟ་བ་ལོག་པ་རྣམས་ཡང་དག་པའི་ལྟ་བ་ལ་སྦྱོར་བ། རྒྱལ་པོའི་ཆད་པ་སོགས་འཇིགས་པ་དང་འཇིགས་ཚོགས་ལས་ཐར་བ། བཀྲེས་སྐོམ་ཕོངས་པ་རྣམས་བཟའ་བཏུང་འཐོབ་པ། རྒན་འཁོག་སྐྱབས་མེད་རྣམས་ཟས་གོས་འཐོབ་པ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་རྡོ་རྗེའི་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ་ལོ། བཅོམ་ལྡན་འདས་མཚན་ལེགས་པར་ཡོངས་གྲགས་དཔལ་གྱི་རྒྱལ་པོའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས། ལུས་ཀྱི་ནད་གདོན་ཐམས་ཅད་ཞི་བ། དབང་པོ་ཉམས་པ་ཐམས་ཅད་སོས་ནས་ཚང་བ། མཚམས་མེད་ལྔའི་ལས་སྒྲིབ་རྒྱུན་ཆད་པ། བཀྲེས་ཕོངས་རྣམས་དཔལ་འབྱོར་རྒྱས་པ། བརྡུང་བརྡེགས་བསད་བཅད་ཀྱི་ཉེས་པ་ཞི་བ། འཇིགས་པ་བརྒྱད་ཀྱིས་གནོད་པ་ཞི་བ། འཐབ་འཛིང་རྩོད་པ་སེལ་བ། གྲུ་དང་ཆུ་་བོར་ཞུགས་པ་ལ་ཆུའི་འཇིགས་པ་ལས་སྐྱོབ་པ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་དང་ཐུགས་རྗེ་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ་ལོ། །བཅོམ་ལྡན་འདས་མཁས་པ་གཟི་བརྗིད་སྒྲ་དབྱངས་རྒྱལ་པོའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས། ཞིང་ལས་དང་ཚོང་གི་ལས་ངན་པ་བསགས་པ་དག་ནས་དཔལ་འབྱོར་རྒྱས་པ། སྐྱེ་གནས་བཞིའི་སྡུག་བསྔལ་ལས་ཐར་བ། བུད་མེད་ཀྱི་སྐྱེ་སྒོ་ཆོད་པ། འཆི་བའི་དགྲ་དང་སྡུག་བསྔལ་སེལ་བ། མུན་ནག་དང་གདོན་གྱི་འཇིགས་པ་སྐྱོབ་པ། ཆོས་ལས་ལོག་པའི་ལས་སྤྱོད་པ་ལས་ལོག་ནས་ཆོས་ལ་སྤྱོད་པ། ཉན་རང་ལས་ལོག་ནས་ཐེག་ཆེན་ལ་སྦྱོར་བ། བསྐལ་བ་ཆེན་པོ་ཞིག་པའ་ིམེས་འཇིགས་པ་ལས་སྐྱབས་ནས་ཉིད་ཀྱི་ཞིང་དུ་སྐྱེ་བ་སོགས་སྨོན་ལམ་ཆེན་པོ་འདི་དག་གི་ཐུགས་རྗེ་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ་ལོ། །བཅོམ་ལྡན་འདས་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པའི་རྒྱལ་པོའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས། སྲོག་བཅད་པའི་ཉེས་པས་ཚེ་ཐུང་བ་རྣམས་ཚེ་རིང་བ་བརྐུ་འཕྲོག་བཅོམ་པས་མེད་ཕོངས་རྣམས་བཀྲེས་ཕོངས་ལས་ཐར་བ། འཐབ་འཛིང་གི་འཇིགས་པ་ལས་གྲོལ་བ། ཚུལ་ཁྲིམས་འཆལ་བའི་ཉེས་པ་མེད་པ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ་ལོ། །བཅོམ་ལྡན་འདས་མྱ་ངན་མེད་མཆོག་དཔལ་གྱི་རྒྱལ་པོའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས། མྱ་ངན་དང་སྡུག་བསྔལ་ཐམས་ཅད་ལས་ཐར་བ། དམྱལ་བ་ཚ་གྲང་གི་འཇིགས་པ་ལས་སྐྱོབ་པ། བཀྲེས་ཕོངས་ལས་ཐར་ཞིང་འདོད་ཡོན་ཕུན་སུམ་ཚོགས་པ། གནོད་སྦྱིན་དང་ཤ་ཟ་འབྱུང་པོའི་གནོད་པ་ཞི་བ་སོགས། སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་པར་མཛད་དུ་གསོལ་ལོ། །བཅོམ་ལྡན་འདས་ཆོས་གྲགས་རྒྱ་མཚོའི་དབྱངས་ཀྱི་རྒྱལ་པོའི་དབང་བསྐུར་བའི་ཐུགས་རྗེའི་བྱིན་རླབས་ཀྱི་མཐུས་ལོག་པར་བལྟ་བའི་ལམ་ལས་ལྡོག་ཏེ་ཐར་པའི་ལམ་རྙེད་པ། མཐའ་ཁོབ་ཏུ་སྐྱེས་ནས་ལམ་ལོག་པ་རྣམས་ཐར་བའི་ལམ་སྣ་ཟིན་པ། བཀྲེས་ཕོངས་ཀྱིས་མནར་ནས་སྡིག་པ་བྱེད་པ་རྣམས་དཔལ་འབྱོར་དང་ལྡན་ནས་སྡིག་ལས་ལྡོག་པ། འཐབ་རྩོད་གསོད་གཅོད་ཀྱི་འཇིགས་པ་སེལ་བ་སོགས་སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་པར་མཛད་དུ་གསོལ་ལོ། །བཅོམ་ལྡན་འདས་ཆོས་རྒྱ་མཚོ་མཆོག་གི་བློ་གྲོས་རྣམ་པར་རོལ་པ་མངོན་པར་མཁྱེན་པའི་དབང་བསྐུར་བའི་ཐུགས་རྗེ་བྱིན་རླབས་ཀྱི་མཐུས།ཚོང་དང་ཞིང་ལས་འཐབ་རྩོད་ཀྱི་སྡིག་པ་དང་སྡུག་བསྔལ་སེལ་བ། དམྱལ་བའི་སྐྱེ་སྒོ་ཆོད་པ། སྲོག་ལ་བར་དུ་གཅོད་པའི་རྐྱེན་ཐམས་ཅད་སེལ་བ། འཆི་བའི་འོག་ཏུ་ངན་སོང་གསུམ་གྱི་སྐྱེ་སྒོ་ཁོག་ནས་མཐོ་རིས་འཐོབ་པ་སོགས། སྨོན་ལམ་ཆེན་པོ་འདི་དག་གི་བཀའ་དྲིན་ཐུགས་རྗེ་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་ཀྱི་བར་དུ་འཐོབ་པར་བྱིན་གྱིས་བརླབ་ཏུ་གསོལ། ཞེས་དེ་བཞིན་གཤེགས་པ་སོ་སོའི་སྨོན་ལམ་ལྟར་བརྗོད། མཐའ་རྟེན་རྣམས་ཀྱང་སྤྱི་ལྟར་བསྐུར། མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་གྲགས་མངོན་མཁྱེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། །བདེ་བར་གཤེགས་པ་བརྒྱད་ཀྱི་བཀྲ་ཤིས་ཤོག། ཅེས་སོགས་ཤིས་པ་བརྗོད་མེ་ཏོག་འཐོར། དབང་གི་དམ་ཚིག་ཏུ། གཟུངས་དང་དེ་བཞིན་གཤེགས་པའི་མཚན་ཉིན་ལན་གསུམ་མཚན་ལན་གསུམ་དུ་མ་ཆགས་པར་འཛིན་པ་དང་། ཆོ་འཕྲུལ་ཟླ་བའི་ཡར་ངོ་ལ་འཕགས་པ་རྣམས་མཆོད་པར་རྩོམ་པ་སོགས་བྱའོ། །དེ་དག་གི་ཕན་ཡོན་ནི་མདོ་ལས་གསུངས་པ་ལྟར་འཐོབ་པའི་ལོ་རྒྱུས་ཀྱང་སྤྲོ་ཞིང་སློབ་མ་རྣམས་ཡིད་དབྱུང་བར་བྱའོ། ཞེས་པ་འདི་ཡང་གུ་རུ་རིན་པོ་ཆེའི་གསུངས་བཞིན་བདག་ལོ་ཙཱ་བས་ཡི་གེར་བྲིས་པའོ། གནོད་སྦྱིན་དམ་པ་ཁོལ་པོ་ཁས་བཀའ་འདི་ཟུངས་ཤིག །རྗེས་སུ་སྐྱོངས་ཤིག །མངྒ་ལཾ། དེ་ལྟར་དམ་ཆོས་བདུད་རྩིའི་ཐིགས་པའི་དབང་བསྐུར་གྱི་རིམ་པ་རྩ་བ་གཏེར་གཞུང་ལས་ཇི་ལྟར་བྱུང་བ་བཞིན། གཏེར་སྟོན་སྤྲུལ་པའི་སྐུ་རིན་ཆེན་པོ་ཆེས་བཀྲལ་ཏེ། བདེ་གཤེགས་བརྒྱད་རེ་རེ་བཞིན་སྐུ་གསུང་ཐུགས་མཐའ་རྟེན་སྨོན་ལམ་དང་བཅས་སོ་སོར་བསྐུར་བ་ཕྱག་ལེན་རྒྱས་པའི་ལུགས་རྣམ་པར་དག་པ་ཤིན་ཏུ་ལེགས་པར་སྣང་ཡང་། འོན་ཀྱང་ཚིག་ཚོགས་མང་ཆེས་པ་དང་། ཕྱག་ལེན་ཤིན་ཏུ་ལྕི་བས་ཕལ་ཆེར་གྱིས་གྲོང་ཆོག་སོགས་སུ་མི་ལྕོགས་པར་འདུག་གཤིས། འདི་ལྟར་བགྱིས་ན་གནས་སྐབས་སུ་རྣམ་པ་གསལ་ཞིང་འཇུག་པ་བདེ་ལ། གཞུང་གི་དངོས་བསྟན་གྱི་དབང་གི་ཚིག་དོན་ཐམས་ཅད་ཕྱིན་ཅི་མ་ལོག་པར་ཚང་བ་བདེ་གཤེགས་བརྒྱད་དཀྱིལ་འཁོར་གཅིག་ཏུ་བསྒྲུབ་པའི་གཤིས་ལྟར་དབང་རྣམས་ཀྱང་ཆིག་དྲིལ་དུ་བསྐུར་བ་མི་འགལ་ཞིང་། གཙོ་བོར་མཚན་དང་གཟུངས་སྔགས་སྨོན་ལམ་སོགས་རྒྱས་པར་བཀོད་པ་འདིས་དབང་གི་གདམ་དོན་ཐམས་ཅད་ལེགས་པར་ཚང་བའང་ཡིན་ནོ། །ཞེས་པ་པདྨ་ཀུན་གྲོལ་རྣམ་པར་རྒྱལ་པས་བཀོད་པ་འདིས་ཀྱང་། ཟབ་གསང་བསྟན་པ་རིན་པོ་ཆེ་འདི་ཉིད་ཕྱོགས་མཐར་དར་ཞིང་རྒྱས་པ་དང་། འགྲོ་ཀུན་རྣམ་མཁྱེན་རྫོགས་པའི་སངས་རྒྱས་བདེ་བར་གཤེགས་པ་བརྒྱད་ཀྱི་གོ་འཕང་མངོན་དུ་གྲུབ་པའི་རྒྱུར་གྱུར་ཅིག སརྦ་མངྒ་ལཾ