རྫོགས་པ་ཆེན་པོ་གསང་བ་སྙིང་ཐིགས་ཀྱི་སྐོར་ལ་ཉི་མ་གྲགས་པའི་གཏེར་འབྱུང་དང་པོ།
སྤྲང་བན་ཉི་མ་གྲགས་པའི་གཏེར་འབྱུང་དང་པོ་བཞུགས་སོ། །སྐྱབས་གནས་ཀུན་འདུས་གུ་རུ་རིན་པོ་ཆེས། །བྱིན་གྱིས་རློབས་ཤིག་མཆོག་ཐུན་དངོས་གྲུབ་སྩོལ། །ཨ་ཧོ། བདག་འདྲ་སེམས་ཅན་རབ་ཏུ་རྨོངས་པ་ལ། །ལྔ་བརྒྱའི་དུས་ཀྱི་ཐ་མ་འདི་ལྟ་བུར། །ཐུགས་རྗེའི་འོད་ཟེར་འཕྲོས་ཀྱང་ཡི་ཆད་རྒྱུ། །འོན་ཀྱང་སྔོན་གྱི་ལས་འཕྲོ་འདི་ལྟར་ལགས། །ཁ་བྱང་ལས། འདི་ལྟར་བསྟན་པའི་ཐ་ཚིག་བདུན༔ ཚུལ་བཞིན་ཡིད་ལ་ཆོངས་ཤིག་བུ༔ གནས་མཆོག་ཙ་རིའི་བྱང་ཕྱོགས་ན༔ མ་མོ་མཁའ་འགྲོ་འདུ་བའི་གླིང་༔ ཁམས་ཀྱི་སྲིང་མོ་རྫོང་དུ་ནི༔ ང་ཡིས་སྦས་བའི་ཟབ་ཏིག་ཆོས༔ ཡང་གསང་གདམས་པ་ཟབ་མོ་རྣམས༔ དུས་དང་རྟགས་དེར་ཚུལ་བཞིན་སྤྱོད༔ ཁྱད་པར་རྡོ་རྗེ་སྙིང་རྫོང་གི༔ རི་བོ་བན་རྫོང་བརྩིགས་འདྲ་ཡི༔ བྱང་ཤར་མཚམས་ཀྱི་ཕྱོགས་རོལ་ན༔ མདའ་ལ་རྒོད་སྒྲོ་བསྐྱོན་འདྲའི་བྲག༔ ཉི་མ་འཆར་སྔ་འགྲིབ་མགྱོགས་པའི༔ འདབ་ན་ཕ་བོང་སྟག་ཉལ་འདྲ༔ དེ་ནས་གྱེན་དུ་མིག་རྒྱང་གང་༔ བལྟས་པའི་ས་ན་རྟ་ཞལ་གྱིས༔ མཚན་པའི་བྲག་གདོང་སྔོན་པོའི་མགུལ༔ མཚལ་གྱི་ཨ་ཡིག་གསུམ་རྩེགས་པའི༔ མདུན་ནས་འདོམ་གང་འཇལ་བའི་སར༔ བྲག་སྒོ་ཞ་ཉེས་བསྡམས་པའི་ནང་༔ བྱེ་ཚིགས་སོལ་བས་གཏམས་པའི་དཀྱིལ༔ ལ་སྒྲོམ་སྨྱུག་ཚིགས་ནང་དུ་ནི༔ རྫོགས་ཆེན་གསང་བ་སྙིང་ཐིགས་དང་༔ སྐུ་ཚབ་དྲི་མེད་བཤེས་གཉེན་ཡོད༔ གཏེར་བསྲུང་རྒྱལ་བ་ཐོད་དཀར་ལ༔ མཆོད་བསྟོད་གྱིས་ལ་གཏེར་འདི་ལོངས༔ དེ་ཚེ་འགྲོ་བ་སེམས་ཅན་རྣམས༔ དགེ་དང་མི་དགེ་སྣ་ཚོགས་སྤྱོད༔ འཇང་ནས་མི་གསར་སྐད་གསར་མང་༔ ཤོད་ཆེན་རྣམས་སུ་འབྲུ་མི་སྨིན༔ བྱང་གི་རུ་བ་འཚུབ་མས་འཁྱེར༔ དུད་འགྲོ་རྣམས་ལ་གོད་ཡམས་སྡང་༔ ནགས་ལྷ་ཛམ་བྷའི་ཤར་ལྷོ་ན༔ བདུད་ཀྱི་སྤྲུལ་པས་མཁར་ལས་བྱེད༔ བསམ་པ་ལས་མཐུན་དེར་སྨིན་ཚེ༔ ནགས་སུ་མི་ལ་དུད་འགྲོ་སྐྱེ༔ ལུང་དུ་འགོང་སྤྲུལ་འབྱུང་༔ དེ་དུས་གདམས་པའི་ཡང་སྙིང་འདི༔ ཉམས་སུ་ལོངས་ཤིག་རིགས་ཀྱི་བུ༔ ཁྱད་པར་ང་ཡི་སྐུ་ཚབ་འདིཿ གནས་མཆོག་ཉི་ཤུ་རྩ་བཞི་ཡི༔ ས་སྣ་རྡོ་སྣ་ལས་གྲུབ་པ༔ འདི་ཉིད་བཞུགས་དང་མཆོད་བསྟོད་ཡུལ༔ དཔའ་བོ་མཁའ་འགྲོ་ངེས་པར་འདུ༔ མཆོག་ཐུན་དངོས་གྲུབ་དེར་ཐོབ་འགྱུར༔ ཞེས་གསུངས་པ་འདིའི་དགོངས་དོན་འགྲུབ་བློར་སེམས། བླ་མ་རིན་པོ་ཆེ་ཟབ་བུ་ལུང་དུ་སྒྲུབ་པ་ལ་གཤེགས། ཕྲན་བུ་རིག་འཛིན་རྣམ་རྒྱལ་བདག་སྲིང་མོ་རྫོང་དུ་སྒྲུབ་པ་ལ་འོངས་པས་གནས་མཆོག་ཙ་རི་ཊ་ནས་རྙེད་པའི་ཁ་བྱང་དང་ཡང་བྱང་སྲིང་མོ་རྫོང་དུ་བབས་པ་ལ་བརྟེན་ཤིང་ཕོ་སྟག་གི་ལོ་ལ། ཟབ་ཆོས་གསང་བ་སྙིང་ཐིགས་དང་། སྐུ་ཚབ་དྲི་མེད་བཤེས་གཉེན། དམ་རྫས་ཨ་དམ་མ་བརྒྱ ། ཧྲི་དམ་མ་སྟོང་དང་བཅས་སྤྱན་དྲངས་པའོ། །སྐྱབས་གནས་ཀུན་འདུས་གུ་རུ་པདྨ་འབྱུང་། །བྱིན་གྱིས་རློབས་ཤིག་ངན་བུ་ཐུགས་རྗེས་བཟུང་། །ཞེས་སྤྲང་བན་གྱི་གཏེར་འབྱུང་དང་པོའོ།། །།