ལོ་རྒྱུས་གསལ་བའི་སྒྲོན་མེ།
༁ྃ༔ བཀའ་རྫོགས་པ་ཆེན་པོ་རྩ་གསུམ་གསང་བ་སྙིང་ཐིགས་ལས༔ ལོ་རྒྱུས་གསལ་བའི་སྒྲོན་མེ་བཞུགས་སོ༔ རྩ་བ་གསུམ་ལ་ཕྱག་འཚལ་ལོ༔ རྩ་གསུམ་གསང་བ་སྙིང་ཐིགས་ཀྱི༔ ལོ་རྒྱུས་གསལ་བའི་སྒྲོན་མེ་འདིར༔ གྷུ་རུ་རྗེ་ལ་ལུང་ཞུས་ནས༔ མ་འོངས་ཕྱི་མའི་འགྲོ་དོན་དུ༔ ཤོག་སེར་མཁའ་འགྲོའི་ཡི་གེར་འདེབས༔ ལས་འཕྲོ་ཅན་དང་འདི་འཕྲད་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་ཐེག་པ་ཐམས་ཅད་ཀྱི་རྩེ་རྒྱལ༔ མན་ངག་ཐམས་ཅད་ཀྱི་སྙིང་ཏིག༔ ཆོས་ཉིད་ཀྱི་དོན་སྐད་ཅིག་གིས་མངོན་སུམ་རང་ཐོག་ཏུ་གཏན་ལ་འབེབས་པའི་གདམས་པ་ཟབ་མོ༔ རྩ་གསུམ་གསང་བ་སྙིང་གི་ཐིགས་པ་ཞེས་བྱ་བའི་ཆོས་འདིའི་ལོ་རྒྱུས་ནི༔ ཆོས་ཀྱི་སྐུའི་ཞིང་ཁམས་སྣང་ལ་རང་བཞིན་མེད་པ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ཞེས་བྱ་བ༔ མུ་དང་མཐའ་མེད་པར་ཡོངས་སུ་བརྡལ་ཞིང་ཁོད་སྙོམས་པ༔ གདོད་མ་ཉིད་ནས་ལྷུན་གྱིས་གྲུབ་ཅིང་སུས་ཀྱང་མ་བྱས་པ༔ རྣམ་པར་དག་པའི་ཞིང་ཁམས་ཆེན་པོ་དེ་ཉིད་ཀྱི་དབུས་སུ༔ ལྟ་ན་སྡུག་པའི་བཀོད་པ་ཚད་མེད་པས་ཡོངས་སུ་བརྒྱན་པའི་ཡེ་ཤེས་དབྱིངས་ཀྱི་གཞལ་ཡས་ཁང་ཆེན་པོའི་དབུས་སུ༔ བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་ཆོས་ཀྱི་སྐུ་དྲི་མ་དང་བྲལ་བ༔ ཅིའི་ངོ་བོར་ཡང་མ་གྲུབ་པ་ལས༔ སྐུ་ཞལ་ཕྱག་གི་རྣམ་པར་བཞེངས་ཏེ༔ སྤྲོས་པ་ཐམས་ཅད་དང་བྲལ་བའི་ངང་ནས༔ ལོངས་སྐུ་རྡོ་རྗེ་སེམས་དཔའ་ལ༔ རང་བཞིན་བྱིན་རླབས་ཀྱི་ངང་ནས་བཤད༔ ལོངས་སྤྱོད་རྫོགས་སྐུ་སྟོན་པ་རྡོ་རྗེ་སེམས་དཔས༔ དུར་ཁྲོད་ཆེན་པོ་མེ་རི་འབར་བའི་གཞལ་ཡས་ཁང་དུ༔ སྤྲུལ་པའི་སྐུ་མཆོག་ཆེན་པོ་རིག་འཛིན་དགའ་རབ་རྡོ་རྗེ་ལ་ཚིག་གིས་མཚོན་ནས་གསུང་༔ སྤྲུལ་སྐུ་དགའ་རབ་རྡོ་རྗེས་རྩུབ་འགྱུར་ཚལ་གྱི་དུར་ཁྲོད་དུ༔ གྷུ་རུ་ཤྲཱི་སིངྷ་ལ་མངོན་སུམ་རང་ཐོག་ཏུ་ཕབ་ནས་བསྟན༔ གྷུ་རུ་ཤྲཱི་སིངྷས་དུར་ཁྲོད་ཆེན་པོ་སོ་ས་གླིང་དུ༔ གུ་རུ་མཚོ་སྐྱེས་རྡོ་རྗེ་པདྨ་སམ་བྷ་ཝ་ལ་གནས་ལུགས་ཡིད་དཔྱོད་དང་བྲལ་བར༔ བཀའ་རྫོགས་པ་ཆེན་པོའི་རྒྱུད་ལུང་མན་ངག་རྣམས་གསུངས༔ ཨོ་རྒྱན་གྱི་སློབ་དཔོན་ཆེན་པོ་དེ་ཉིད་ཀྱིས༔ གཞོ་སྟོད་གཏེར་སྒྲོམ་བྲག་གི་ཕུག་པར༔ བདག་བུད་མེད་ཡེ་ཤེས་མཚོ་རྒྱལ་ལ་རྒྱུད་ལུང་མན་ངག་ཐམས་ཅད་ཀྱི་སྙིང་པོ་བསྡུས་ཏེ༔ སྙིང་ཐིགས་བླ་མེད་ཀྱི་གདམས་པ་མང་པོ་སྣང་བཞི་མཐའ་གྲོལ་གྱི་ངང་ནས་གནང་ཚེ༔ སློབ་དཔོན་ཆེན་པོ་པདྨ་འབྱུང་གནས་ལ༔ བདག་བུད་མེད་ཡེ་ཤེས་མཚོ་རྒྱལ་གྱིས་མཉེས་པའི་ཞབས་ཏོག་བསྒྲུབས༔ མོས་གུས་ཀྱིས་ཕྱག་བཙལ༔ རིན་པོ་ཆེའི་མཎྜལ་ཕུལ་ནས་བདག་གིས་ཞུས་པ༔ གུ་རུ་རིན་པོ་ཆེ་ཁྱེད་ཀྱིས་བདག་བུད་མེད་ཀྱི་ལུས་སུ་སྐྱེས་ཀྱང་༔ ཐུགས་ཀྱིས་རྗེས་སུ་བཟུང་ནས་བཀའ་རྫོགས་པ་ཆེན་པོའི་མན་ངག་རྣམས་ཉམས་ཁྲིད་དུ་གནང་བ་ཐམས་ཅད༔ སྐུ་དྲིན་དུ་ཡང་དག་པར་ཆེ་ལགས་ཤིང་༔ ད་དུང་ཀྱང་བདག་ལ་ཕྱི་ལྟར་གུ་རུ་རིན་པོ་ཆེ་ཁྱེད་ལ་རྩ་གསུམ་འདུས་པའི་བསྐྱེད་རིམ་ཡོད་པ༔ ནང་ལྟར་རྒྱུད་དང་གདམས་པ་ཚང་བ༔ གསང་བ་ལྟར་དུ་ཚིག་ཉུང་ལ་དོན་ཟབ་པ༔ མན་ངག་གི་གདམས་པ་རྣམས་གོ་བདེ་ལ་འཁྱེར་སླ་བའི་ཆོས་ཤིག་ཐུགས་རྗེས་འཛིན་པར་ཞུ་ཞུས་པས༔ སློབ་དཔོན་ཆེན་པོ་པདྨ་འབྱུང གནས་ཀྱིས་ཞལ་ནས༔ ཇོ་མོ་མཚོ་རྒྱལ་ཁྱོད་ལ་སྔར་བསྟན་པའི་གདམས་པ་ཟབ་མོ་དེ་རྣམས་ལས་ཟབ་པ་སྟོན་དུ་མེད་ཀྱང་༔ ཁྱོད་ཀྱིས་ནན་གྱིས་ཞུས་པ་དེ་ཤིན་ཏུ་ལེགས་ཏེ༔ ཅིའི་ཕྱིར་ཞེ་ན༔ མ་འོངས་དུས་ན་བོད་ཁམས་ཁ་བ་ཅན་གྱི་རྒྱལ་ཁམས་འདི་ཉིད་དུ༔ བདེ་བར་གཤེགས་པའི་བསྟན་པ་འདི་ཡང་དར་གུད་སྣ་ཚོགས་ཤིག་འོང་༔ རྫོགས་ཆེན་མཁའ་འགྲོ་སྙིང་ཐིག་གི་བསྟན་པ་ཡང་དར་དྲག་ལ་ཡུན་ཐུང་བ་ཞིག་ལས་ཉམས་ལེན་གྱི་བསྟན་པ་མི་འབྱུང་༔ དཔེ་རྒྱུད་ལུང་ཐོབ་ཙམ་ལ་ཆོས་ཕུགས་སུ་རྩི༔ བདེ་བར་གཤེགས་པའི་གསུང་བཀའ་མ་ཐམས་ཅད་ནི་ཚོང་འདུས་ཀྱི་འོ་མ་ལྟར་འགྱུར་ནས༔ དཔེ་བུམ་གསེར་རིས་ཀྱིས་བརྒྱན་པའི་དར་ཤུབས་ཅན་མང་དུ་འོངས་ཀྱང་ལྟ་སྒོམ་ཐམས་ཅད་འཆལ་ཏེ༔ འགྲོ་བ་ཐམས་ཅད་ལོག་པའི་ལམ་ལ་འཁྲིད༔ སྔོན་བདུད་ལྷས་བྱིན་གྱིས་སྨོན་ལམ་ལོག་པར་བཏབ་པའི་མཐུས༔ སྟོན་པའི་བསྟན་པ་འདིའི་མཇུག་ཏུ་བདུད་སྤྲུལ་མང་པོ་དགེ་བཤེས་ཀྱི་གཟུགས་སུ་འོང་༔ ཁྱད་པར་བདུད་ཀྱི་སྤྲུལ་པའི་རྒྱལ་པོ་ཞིག་ཆོས་པའི་ལུས་བླངས་ནས་སློབ་འབངས་ཕྱོགས་བཅུར་རྒྱས༔ རྒྱལ་བའི་བཀའ་འཆལ༔ འདུལ་བའི་ཁྲིམས་འཆལ༔ སྔགས་ཀྱི་དམ་ཚིག་འཆལ༔ བྱང་སེམས་ཀྱི་སེམས་བསྐྱེད་འཆལ༔ རྒྱུད་སྡེའི་ལྟ་སྒོམ་འཆལ༔ ། ང་བཟང་ང་ཆེ་ཟེར་བའི་གྲུབ་མཐའ་བཅོ་བརྒྱད་འབྱུང་༔ ཁ་ནས་ཆོས་བཤད་སེམས་ལ་གཡོ་རྒྱུ་སྣ་ཚོགས་འཆང་༔ གཅོང་ནད་ཅན་གྱི་ལུས་པོ་ལ་མེ་ཚུགས་ཀྱི་དྲ་བས་བསྐོར་བ་ལྟར༔ ཁ་བ་ཅན་གྱི་རྒྱལ་ཁམས་འདི་ཉིད་དུ་འགྲོ་བའི་དོན་བྱེད་ཟེར་ཞིང་གྲུབ་མཐའ་ངན་པས་རང་རྒྱུད་ཁེངས་པའི་དགོན་སྡེ་སྟོང་རྩ་འབྱུང་༔ རང་རྒྱུད་ཆོས་ལ་མི་མོས་བཞིན་དུ་ཁྲལ་བཙུན་བསྟན་པར་འཇུག༔ བྱི་ལ་ལྐོག་རྒྱུག་བྱེད༔ འདུལ་ཁྲིམས་ཆུ་ལ་འཕོ༔ སེམས་བསྐྱེད་རླུང་ལ་བསྐུར༔ དམ་ཚིག་མེ་ལ་བསྲེག༔ འདོད་ཆགས་ཆུ་ལྟར་གཡོ༔ ཕྲག་དོག་རླུང་ལྟར་འཚུབ༔ ང་རྒྱལ་རི་ལྟར་ཉིལ༔ ཏིང་ངེ་འཛིན་ཕྲག་དོག་དང་ཟུར་ཟ་ལ་བྱེད་པའི་ཚེ༔ ཡུལ་མི་སྡེ་དཔོན་ཐམས་ཅད་ཀྱིས་ཀྱང་གྲུབ་མཐའ་འཛིན་ཅིང་རྩོད༔ བོད་རུ་བཞིའི་གཙུག་ལག་ཁང་རྣམས་ཉམས༔ ཁྱད་པར་ཆོས་འཁོར་བསམ་ཡས་ཁྱི་རོ་ལྟར་རུལ༔ སྡེ་འཁྲུག་ནང་དམེ་སྣ་ཚོགས་བྱེད༔ བཙུན་པས་ལུས་རྒྱན་མཚོན་ཆ་འདོགས༔ མི་དཔོན་སྤྲང་བོས་བྱེད༔ མོ་དང་བོན་དར་༔ བྱང་ཆུབ་སེམས་དཔའ་ཐམས་ཅད་ཀྱི་ཐུགས་དཀྲུག༔ དཀོན་མཆོག་གསུམ་དགྲ་ལ་འཁུར༔ དེ་དུས་བདུད་སྤྲུལ་འགོང་པོ་སྤུན་དགུ་སྙིང་ལ་ཞུགས་པའི་སྐྱ་བཙུན་མང་པོ་ཡོང་ཞིང་མཐའ་དམག་བོད་ལ་འཁྲིད༔ དབུས་མི་མཐའ་ལ་འབྲོས༔ ཐེའུ་རང་སྡེ་དགུའི་སྤྲུལ་པས་བོད་ཁམས་འཇོམས༔ ལ་ལུང་མེད་པར་ཁྲག་མཚོར་གཏོང་༔ གནམ་ས་མགོ་ཞབས་ལོག་པས་རྡུལ་ཆར་དང་ཁྲག་གི་ཆར་པ་འབབ༔ ཉི་ཟླ་གོ་ལོག་པས་དབྱར་དགུན་ཁོད་མི་སྙོམས༔ རྒྱུ་སྐར་གོ་ལོག་པས་སྐར་ཆེན་ནུབ་ནས་འཆར༔ སྐྱ་བཙུན་གོ་ལོག་པས་བཙུན་པ་ཐམས་ཅད་ཁྲིམས་དང་དམག་ལས་མཁས༔ མི་དཔོན་ཐམས་ཅད་ཆོས་ཀྱི་ཉམས་ལེན་དང་གླེང་མོ་བྱེད༔ སྐྱེ་འགྲོ་གོ་ལོག་པས་བཟང་དགུ་བསྣུབས་ནས་ངན་དགུ་དར༔ མོ་བཙུན་གོ་ལོག་པས་བོད་ཆེ་དགུའི་མོ་བཙུན་རྣམས་ཀྱིས་འབངས་འཁོར་གྱི་བྱི་ཕོ་བསྟེན༔ རིགས་ངན་ཀྱི་བུ་མོ་མང་པོས་རྒྱལ་མོ་བྱེད༔ རྒྱལ་བློན་གོ་ལོག་པས་རྒྱལ་བརྒྱུད་ཐམས་ཅད་དམངས་སུ་འབེབས་ཤིང་ཁ་དག་ཏུ་གཏོང་༔ བློན་འབངས་ངན་གསུམ་རྣམས་ཀྱིས་རྒྱལ་པོ་བྱེད༔ བཤད་སྒྲུབ་གོ་ལོག་པས་བཤད་གྲྭས་སྔགས་སྤྱོད་གཏོར་ཟོར་འཕེན༔ སྒྲུབ་གྲྭ་ཐམས་ཅད་དུ་སྒྲིགས་དང་རྣམ་བཞག་གཙོ་བོར་འདོན༔ ཆོས་དང་གང་ཟག་གོ་ལོག་པས་ཆོས་པར་རློམ་པའི་བཟང་གསུམ་གྱི་གྲུབ་ཐོབ་རྣམས་ཀྱང་ཤེས་རྒྱུད་འགྲོ་བ་ཕལ་མོ་ཆེ་ལས་གྱོང་ཞིང་༔ ཉོན་མོངས་པ་ཐམས་ཅད་ཤིན་ཏུ་རགས༔ ཟག་བཅས་དང་ཟག་མེད་གོ་ལོག་པས་ནོར་དང་ཆོས་དབང་ཉོ་ཚོང་བྱེད༔ སྲིད་དང་དགོན་གཉིས་གོ་ལོག་པས་ཡུལ་གྲོང་ཐམས་ཅད་བསེར༔ དགོན་སྡེ་ཐམས་ཅད་ཕྱུག་ཅིང་འཕེན༔ ཡུལ་ཁམས་གོ་ལོག་པས་རྒྱ་དཀར་ནག་གི་ནོར་སྣ་མང་པོ་བོད་མཐའ་འཁོབ་འདིར་དར༔ ལ་ལུང་གོ་ལོག་པས་ཕུ་ནས་འབྲུ་དྲུག་སྨིན༔ མདའ་ན་སད་སེར་མང་༔ ལྷོ་བྱང་གོ་ལོག་པས་ལྷོ་ན་གཞོན་འཕེལ་བྱང་པས་འབྲས་ཟ༔ དེ་དུས་སངས་རྒྱས་བསྟན་པའི་ཡང་མཐའ་ཆེན་པོ་ལ་ཐུག་ཅིང་༔ རྩོད་ལྡན་སྙིགས་མ་བདུད་ཀྱི་བསྟན་པ་དར་བའི་དུས་དེར༔ ཇོ་བོ་ཤཱཀྱ་མུ་ནེའི་རབ་གནས་བཞི་ཆ་གཅིག་མ་གཏོགས་ཉམས༔ སྤྱིར་བོད་ཁམས་ཀྱི་ཆོས་ཀྱི་བྱིན་རླབས་སུམ་ཆ་གཅིག་མ་གཏོགས་ཉམས༔ སྐུ་གསུང་ཐུགས་རྟེན་ཕལ་མོ་ཆེའི་ཡེ་ཤེས་པ་གཤེགས༔ དེའི་རྟགས་ལ་སྐུ་འདྲ་མང་པོའི་སྤྱན་ལས་མཆི་མ་འབབ་པ་དང་༔ བྱི་བས་རྟེན་གྱི་གཟུངས་འདོན་པ་ཡོང་༔ དེ་དུས་བཀའ་དང་བསྟན་པ་སྐྱོང་བའི་སྲུང་མ་ཐམས་ཅད་རི་རབ་ལ་བྲོས་ཤིང་༔ ནག་པོའི་ཕྱོགས་ལ་མངོན་པར་དགའ་བ་མང་པོས་གཙུག་ལག་ཁང་དང་ཡུལ་དགོན་བདག་བྱེད༔ དེའི་རྟགས་སུ་གཙུག་ལག་ཁང་དང་ཆོས་གྲྭ་གང་བཟང་ཐམས་ཅད་དུ་བཤས་ཀྱི་དམར་གཡོས་བྱེད༔ དགེ་བ་བཅུའི་ཆོས་གྲྭ་ནས་མི་དགེ་བ་བཅུའི་ཁྲིམས་ལས་གཏོང་༔ གསང་སྔགས་ཟབ་གཏེར་གྱི་བསྟན་པ་ལ་ཡང་དམ་སེལ་མང་པོ་ཡོང་༔ ཁྱད་པར་རྫུན་གཏེར་ཟོབ་ཆོས་ལྟ་སྒོམ་ལོག་ཅིང་བཅའ་གཞི་མ་ཚང་བ་མང་པོས༔ འགྲོ་བ་མགོ་བསྐོར་ཞིང་བདུད་སྤྲུལ་མང་པོས་སྐྱེ་བོ་ཕལ་མོ་ཆེ་ལོག་ལྟའི་ལམ་ལ་འཛུད་ཅིང་ངན་སོང་དུ་འཁྲིད༔ དེ་ལྟ་བུའི་དུས་ངན་ཤར་བའི་ཚེ་ནའང་༔ བདག་ཉིད་པདྨ་འབྱུང་གནས་ཀྱི་སྤྲུལ་པ༔ ཆོས་རྒྱལ་ཚངས་པའི་སྐྱེ་མཐའ་གཅིག་གིས་བོད་ཁམས་ཀྱི་ས་ཡི་གནད་གཟེར་ཉམས་པ་ཐམས་ཅད་གསོ་ཞིང་༔ པདྨ་བདག་གི་སྒྲུབ་གནས་རྣམས་སུ་ཚེས་བཅུ་དང་སྒྲུབ་མཆོད་འཛུགས༔ བསྟན་པ་བསྲུང་ཐབས་ཀྱི་ལུང་བསྟན་ཁོ་ན་ལྟར་སྤྱོད་ཅིང་བསྲུང་བཟློག་ལ་བརྩོན༔ ལྷ་སྲས་ཀྱི་སྤྲུལ་པ་ཞིག་གིས་བདུད་བློན་གྱི་དབང་བསྒྱུར་བའི་རྐྱེན་ལ་མ་ཤོར་ན༔ བསམ་ཡས་མཐའ་དབུས་ཀུན་གྱི་ཞིག་རལ་བསུབ་པ་སོགས་ཀྱིས་རྟེན་འབྲེལ་གྱིས༔ ཧོར་དམག་ལྕགས་ཁྱི་ལ་གཡུལ་འགོ་འཚོལ་ཞིང་༔ ཆུ་རྟ་ལ་རྟ་བན་རྒྱུག༔ མེ་གླང་ལོ་ལ་གདུག་རྩུབ་བྱེད་ཅིང་༔ ཤིང་མོ་ཡོས་ལ་ཐེབས་གཅིག་བཟློག༔ དེ་ཚེ་མ་རུངས་པའི་བདུད་ཚོགས་ཅུང་ཞིག་ཉམས་དམའ་བས༔ ང་ཡི་སྤྲུལ་པའི་གཏེར་སྟོན་ཡང་མང་ཞིག་འོང་ཞིང་༔ ལ་ལས་ཕྱི་ཡི་བསྟན་པ་འཛིན༔ ལ་ལས་ནང་གི་བསྲུང་བཟློག་འབད༔ ལ་ལས་སྒྲུབ་པ་ཁོ་ནར་བྱེད་དེ་མདོར་ན་བོད་ཁམས་བདེ་ཐབས་ཁོ་ནར་མཛད་པ་ཡོང་༔ དེ་དུས་ཟབ་པ་ལས་ཀྱང་ཆེས་ཟབ་པ༔ ཡང་གསང་བླ་མེད་རྩ་གསུམ་གསང་བ་སྙིང་གི་ཐིགས་པ་འདི༔ ལོ་ཙཱ་བ་ཀླུའི་དབང་པོའི་སྐྱེ་མཐའ་ཁམས་པ་ཉི་མ་གྲགས་པ་རྩལ་གྱིས་ལྟ་སྒོམ་སྤྱོད་གསུམ་གྱི་ཐེ་ཚོམ་བསལ་ནས༔ གསང་བའི་དམ་ཚིག་གི་རྒྱ་མ་རལ་ན༔ མཆོག་སྤྲུལ་གྱི་བུ་གསུམ་གྱིས་བསྟན་པའི་སྙིང་པོ་མཆོག་འདི་འཛིན་ཞིང་༔ སྒྲུབ་སྡེ་བརྒྱ་རྩ་མདོ་ཁམས་སྒང་དྲུག་ཏུ་འབྱུང་ཞིང་༔ སངས་རྒྱས་ཐོབ་པ་བརྒྱ་རྩ་བརྒྱད༔ ཕྱིར་མི་ལྡོག་པ་སྟོང་རྩ་གཉིས༔ ལམ་སྣ་ཟིན་པ་ཁྲི་འབྱུང་བར་འགྱུར་རོ༔ ཞེས་གསུངས་ཤིང་བཀའ་བསྩལ་བའི་ཟབ་ཆོས་བླ་མེད་ཀྱི་གདམས་པ་འདི་རྣམས་བདག་གིས་ཤོག་སེར་གསང་བའི་ཟབ་ཤོག་ཏུ་བྲིས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ བརྡ་ཐིམ༔ ས་མ་ཡཱ༔ རྒྱ་རྒྱ་རྒྱ༔ སྤྲུལ་པའི་རིག་འཛིན་ཆེན་པོ་ཉི་མ་གྲགས་པས་གནས་མཆོག་ཆེན་པོ་ཁམས་སྲིང་མོ་རྫོང་ནས། ཤིང་ཕོ་སྟག་གི་ལོ་ལ་གདན་དྲངས་ཤིང་། ལྕགས་ཕོ་སྤྲེལ་ལོ་སྟོན་ཟླ་འབྲིང་པོ་ལ་ཤོག་སེར་ལས་ཞལ་བཤུས་པའོ། །མངྒ་ལཾ།། །།