བདེ་སྟོང་བོགས་འདོན་ཟག་མེད་རྡོ་རྗེ།
བཀའ་རྫོགས་པ་ཆེན་པོ་རྩ་གསུམ་གསང་བ་སྙིང་ཐིགས་ལས༔ བདེ་སྟོང་བོགས་འདོན་ཟག་མེད་རྡོ་རྗེ་བཞུགས་སོ༔ ཡང་དག་གསང་བའི་སྐད་དུ༔ དྷཀྐི་མནྚ་དྷརྟུ་ན་མ༔ བོད་སྐད་དུ༔ བོགས་འདོན་ཟག་མེད་རྡོ་རྗེ་ཞེས་བྱ་བ༔ རྩ་བ་གསུམ་ལ་ཕྱག་འཚལ་ལོ༔ རྩ་གསུམ་གསང་བ་སྙིང་ཐིགས་ཀྱི༔ བོགས་འདོན་ཟག་མེད་རྡོ་རྗེ་འདི༔ ད་ལྟ་མཚོ་རྒྱལ་ཁྱོད་ལ་གདམས༔ ཉམས་སུ་ལོངས་ཤིག་སྐལ་ལྡན་མ༔ ཟབ་ཕྱིར་གསང་ཤོག་ལོགས་སུ་ཐོབ༔ མ་འོངས་དོན་དུ་གཏེར་དུ་བཅོལ༔ ཐུགས་ཀྱི་སྲས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་བོགས་འདོན་རླུང་གི་ཟབ་ཁྲིད་འདི༔ ཉམས་སུ་ལེན་པ་ལ་དོན་རྣམ་པ་གསུམ་སྟེ༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ནི༔ མི་མེད་ཀྱི་ལུང་སྟོང་ངམ་གོང་མས་ཞབས་ཀྱིས་བཅགས་པའི་གནས་སུ༔ མཚན་ཉིད་དང་ལྡན་པའི་བུ་མོ་ལོ་བཅོ་ལྔ་ནས་ཉེར་ལྔའི་བར་དུ་གནས་པའི་རིགས་བརྒྱུད་ཆོས་ལ་མོས་ཤིང་གསང་བའི་དམ་ཚིག་ཐུབ་པ༔ གསང་སྤྱོད་སྦྱོར་བ་ལ་མཁས་ཤིང་བདེ་བ་ཆེན་པོ་དང་ལྡན་པ་ཡིད་དུ་འོང་བ་ཞིག་བཙལ་ནས༔ དྲང་དོན་དང་ངེས་དོན་སོགས་ཀྱི་ཆོས་ཀྱི་བློ་ཁ་ཡང་དག་པར་བསྒྱུར་ཞིང་༔ གསང་སྔགས་ཀྱི་ཕན་ཡོན་བཤད་དབང་བསྐུར༔ ཁམས་བཅུད་འཕེལ་བའི་ཟས་བསྟེན་ཞིང་ཡབ་ཡུམ་གཉིས་ཀ་བསྐུ་མཉེ་དང་རླུང་སྦྱོར་འབད༔ ནང་ཚངས་ཅན་གྱི་གདན་གྱི་ཁར་ཡུམ་ཁ་ཤར་ནས་ནུབ་ཏུ་བལྟ༔ ཡབ་ནུབ་ནས་ཤར་དུ་བལྟ་སྟེ་ཕྱེད་སྐྱིལ་དུ་འདུག་ཅིང་༔ ཕན་ཚུན་བལྟ་རེས་དང་འོ་བྱེད་གཡའ་སྒོག་གསང་གནས་དང་ནུ་མ་མཉེ༔ ཆགས་པའི་གཏམ་བྱ་ཞིང་རྡོ་རྗེ་དང་པདྨ་ལས་སུ་རུང་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་རིམ་པ་ནི༔ རང་ཉིད་བླ་མ་གསང་བ་འདུས་པ་སྐུ་མདོག་མཐིང་ནག༔ རྗོ་རྗེ་འཆང་གི་ཆ་ལུགས་ཅན་རྡོ་རྗེ་དང་དྲིལ་བུ་འཛིན་པ་ཞིག་ཏུ་བསྐྱེད་པའི་པང་དུ༔ ཡུམ་གསང་བ་ཡེ་ཤེས་ཀྱི་མཁའ་འགྲོ་མ་མཚོ་རྒྱལ་དཀར་མོ་གྲི་ཐོད་འཛིན་པས་འཁྱུད་པ་ཞིག་ཏུ་བསྒོམ་ཞིང་༔ ཡབ་ཀྱི་རྡོ་རྗེ་དེ་རྡོ་རྗེ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ༔ ཡུམ་གྱི་པདྨ་དེ་པདྨ་དམར་པོ་འདབ་མ་བཞི་པ་ཟེའུ་འབྲུ་ལ་ཨས་མཚན་པར་གསལ༔ ཡབ་ཡུམ་གཉིས་ཀྱི་གནས་ལྔར་རྒྱལ་བ་ཀུན་ཏུ་བཟང་པོ་ནས༔ གྷུ་རུ་ཤྲཱི་སིངྷའི་བར་གྱི་བསྐྱེད་རིམ་སྒྲུབ་པ་ལས་བྱང་ལྟར་གསལ་ཞིང་༔ གཞན་ཡང་བ་སྤུའི་འོད་ཀློང་རེ་རེ་བཞིན་དཔའ་བོ་དཔའ་མོ་གྲངས་མེད་དཔག་ཏུ་མེད་པ་ཐམས་ཅད་བདེ་བ་གཡོ་བའི་རྣམ་འགྱུར་ལིང་ལིང་ཡོད་པར་བསམས་ལ༔ བདེ་སྟོང་ལས་སུ་རུང་བར་བྱིན་གྱིས་རློབས༔ ཟག་མེད་ཆོས་སྐུ་འགྲུབ་པར་བྱིན་གྱིས་རློབས༔ ཅེས་པས་གསོལ་བ་ལན་ཅི་མང་དུ་བཏབ་ནས༔ ཡུམ་གྱི་པདྨའི་ཟེ་འབྲུ་ཨའི་སྟེང་དུ༔ ཡབ་ཀྱི་རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུྃ་ཡིག་གིས་མཚན་པ་དེ་བསྣུན་ཏེ༔ བསྐྱེད་པའི་ལྷ་ཚོགས་ཐམས་ཅད་ཀྱང་སྙོམས་པར་ཞུགས་པར་དམིགས་ཏེ༔ དར་ཅིག་མ་བཅོས་པའི་ངང་ལ་མཉམ་པར་བཞག༔ དེ་ནས་བདེ་བ་ཡལ་བ་དང་ཅུང་ཟད་སྤྱོད༔ བདེ་ཆིལ་བྱུང་བ་དང་༔ སྙིང་གའི་འོད་གསལ་བའི་རང་སྣང་ལས་གྲུབ་པའི་བླ་མ་ཡབ་ཡུམ་སྙོམས་འཇུག་ཏུ་སྤྱོད་པ་ལས་འོད་འཕྲོས༔ སྤྱི་བོའི་བླ་མ་ཡབ་ཡུམ་ལ་ཕོག༔ བླ་མ་ཡབ་ཡུམ་རྩ་འཁོར་དང་བཅས་པ་འོད་དུ་ཡ་ལེར་བསྒོམ་ཞིང་དར་ཅིག་སེམས་བཟུང་༔ ལུས་སེམས་ཁོང་ཀློད་དེ་མ་བཅོས་པར་བཞག༔ དེ་ནས་བདེ་བ་ཡལ་བ་དང་༔ དར་ཅིག་སྤྱོད་དེ་བདེ་ཆིལ་བྱུང་བ་དང་སྤྱི་བོའི་འོད་ཟེར་འཕྲོས༔ མགྲིན་པའི་བླ་མ་ཡབ་ཡུམ་རྩ་འདབ་རྣམས་འོད་དུ་འཚེར་བ་ལ་སེམས་བཟུང་༔ ལུས་སེམས་ཁོང་ཀློད་ནས་མ་བཅོས་པར་བཞག༔ དེ་ནས་ཡང་བདེ་བ་ཡལ་བ་དང་༔ ཅུང་ཟད་རེ་སྤྱོད་པས་བདེ་ཆིལ་ལེ་བྱུང་བ་དང་༔ མགྲིན་པ་ལས་འོད་ཟེར་འཕྲོས༔ སྙིང་གའི་བླ་མ་ཡབ་ཡུམ་གཞི་གནས་ཀྱི་འོད་གསལ་དང་བཅས་པ་ལ་ཕོག༔ སྙིང་གའི་རྩ་འཁོར་ལོ་འོད་གསལ་གྱི་ཡེ་ཤེས་སུ་གསལ་བ་ལ་སེམས་བཟུང་༔ ལུས་སེམས་ཀློད་ཅིང་མ་བཅོས་པར་དར་ཅིག་བཞག༔ བདེ་བ་ཡལ་བ་དང་ཅུང་ཟད་རེ་སྤྱོད༔ བདེ་ཆིལ་བྱུང་བ་དང་སྙིང་གའི་འོད་གསལ་ལས་འོད་ཟེར་ལྔ་ལྡན་དུ་བབས༔ ལྟེ་བའི་བླ་མ་ཡབ་ཡུམ་རྩ་འཁོར་ལོ་འོད་དུ་གསལ་བ་དང་བཅས་པ་ལ་སེམས་བཟུང་༔ ལུས་སེམས་དལ་བར་ཀློད་ཅིང་མ་བཅོས་པར་བྱ༔ བདེ་བ་ཡལ་བ་དང་ཅུང་ཟད་རེ་སྤྱོད་པས་བདེ་ཆིལ་བྱུང་བ་དང་༔ གསང་གནས་ཀྱི་བླ་མ་ཡབ་ཡུམ་རྩ་འཁོར་ལོ་འོད་དུ་འཚེར་བ་ལ་སེམས་བཟུང་༔ ལུས་སེམས་ཁོང་ཀློད་མ་བཅོས་པར་བཞག༔ བདེ་བ་ཡལ་བ་དང་ཅུང་ཟད་རེ་སྤྱོད༔ རང་གི་ལུས་ཕུང་ཁམས་བསྐྱེད་པའི་ལྷ་ཚོགས་དང་བཅས་པ་ཐམས་ཅད་༔ སྟོང་གསལ་འཇའ་འོད་ལྔ་ལྡན་དུ་ལམ་ལམ་འོད་དུ་བུན་བུན་བསམ་ཞིང་སེམས་བཟུང་༔ ལུས་སེམས་ཁོང་ཀློད་མ་བཅོས་པར་བཞག༔ བདེ་བ་ཡལ་བ་དང་ཅུང་ཟད་རེ་སྤྱོད་ཅིང་༔ རང་ལུས་འོད་ཕུང་དུ་འཚེར་བ་དེ་ལས་འོད་ཟེར་འཕྲོས༔ ཡུམ་ལ་ཕོག༔ ཡུམ་གྱི་ཤ་ཁྲག་རྡོས་བཅས་ཀྱི་ལུས་སུ་གྲུབ་པ་ཐམས་ཅད་འོད་ཟེར་ཐིག་ལེ་ལྔ་ལྡན་གྱི་ཀློང་དུ་ཞུ༔ འོད་ཀྱི་རང་བཞིན་དུ་གྱུར་པ་དེ་རྣམས་ཡབ་ཀྱི་རྡོ་རྗེའི་སྦུ་གུ་ནས་བརྒྱུད༔ ཡབ་ཀྱི་འོད་ཟེར་ཐབས་ཀྱི་རང་བཞིན་དང་༔ ཡུམ་གྱི་འོད་ཟེར་ཤེས་རབ་ཀྱི་རང་བཞིན་གཉིས་མེད་འདྲེས༔ ཟག་པ་དང་བཅས་པའི་ཆོས་ཐམས་ཅད་ཟག་མེད་རྡོ་རྗེ་ལྟ་བུའི་ཡེ་ཤེས་ཀྱི་ཀློང་དུ་ཐིམ་ཞིང་གྲོལ༔ ཡེ་ཤེས་རྡོ་རྗེ་ལྟ་བུ་དམིགས་སུ་མེད་པའི་ཡེ་ཤེས་དེའི་ཆ་འཛིན་པའི་འོད་ལྔ་ལྡན་ཞིག་ཤར༔ དེ་ཡང་ཀུན་བཟང་ཡབ་ཡུམ་ལ་གཉིས་སུ་མེད་པའི་ངང་ནས་ཐིམ་ཞིང་༔ རིས་སུ་མ་གྲུབ་པའི་ངང་ནས་ཆམ་གཅིག་ཏུ་བློ་ལས་འདས་པར་བཞག་པར་བྱའོ༔ འདི་དག་རྣམས་ཀྱི་མཚམས་མཚམས་སུ་གཡང་མོའི་རྩ ལ་སྤྲུག་རེ་བྱ༔ རླུང་གནད་ཕྱིར་འཛིན་ཁོ་ན་གཅེས་སོ༔ དེ་ནས་ཡབ་ཡུམ་བྲལ་མ་ཁད་ཧ་ཡིས་སྤྲུག་ཅིང་འབེབས་ཆུང་བརྒྱག༔ ཡན་ལག་ལྔ་སྦྱོང་གཞན་ལྟར་འབད༔ ཟག་མེད་ཉམས་རྟོགས་ཡེ་ཤེས་ཀྱི༔ བསོད་ནམས་ཟག་བཅས་འགྲོ་ལ་བསྔོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་ཕན་ཡོན་བསྟན་པ་དང་དམ་ཚིག་གོ༔ དང་པོ་ཕན་ཡོན་ནི༔ གཞུང་འདི་ལྟར་ཚུལ་བཞིན་ཉམས་སུ་བླངས་པའི་ཚེ༔ ལུས་ངག་ཡིད་གསུམ་གྱི་ཞེན་པ་རང་སར་གྲོལ་ཞིང་བདེ་དགའི་ཡེ་ཤེས་ཟག་མེད་རྡོ་རྗེ་ལྟ་བུ་མངོན་དུ་བྱེད༔ ཟག་བཅས་ཀྱི་ལས་རླུང་འབྱུང་བའི་ཕུང་པོ་དང་བཅས་པ་ཟག་མེད་དུ་གྲོལ༔ རབ་ཚེ་འདིར་མཁའ་སྤྱོད་དུ་འོད་ལུས་ལ་གཤེགས༔ འབྲིང་ཆོས་ཉིད་འོད་གསལ་མ་བུ་འདྲེས་པས་བར་དོར་འཚང་རྒྱ༔ ཐ་མའང་རང་བཞིན་སྤྲུལ་པ་སྐུའི་ཞིང་ཁམས་སུ་མེ་ཏོག་ལས་རྫུས་ཏེ་སྐྱེས་ནས༔ ལྷ་ཡབ་ཡུམ་གྱི་ཚུལ་དུ་མངོན་པར་འཚང་རྒྱ་བར་ཐེ་ཚོམ་མེད་དོ༔ གནས་སྐབས་སུའང་ལས་རླུང་རང་སོར་རྒྱུ་ཞིང་ནད་གདོན་བར་ཆད་སྡིག་སྒྲིབ་ཐམས་ཅད་ཕྱགས་མས་དེད་པ་ལྟར་འགྱུར་རོ༔ གཉིས་པ་དམ་ཚིག་ནི༔ ཉོན་མོངས་པའི་དབང་ཁོ་ནར་ཤོར་ནས༔ གདམས་པའི་ཉམས་རྟོགས་ལ་སོགས་གོལ་ཤོར་བསྒྲིབས་ཏེ་ཁམས་ཀྱི་དངས་མ་ལ་སོགས་ཉམས་ན༔ ཚེ་འདིར་ཡང་མི་རུང་བ་སྣ་ཚོགས་འབྱུང་ཞིང་༔ ཕྱི་མ་དམྱལ་བར་སྐྱེ་བས་ཤིན་ཏུ་ཉེས་ཆེ་བས་ལྟ་སྒོམ་ཀློང་དུ་གྱུར་པའི་རྣལ་འབྱོར་བ་མ་གཏོགས༔ སོ་སོའི་ཐུན་མོང་མ་ཡིན་པས་སྐལ་མེད་ལ་གསང་ཞིང་༔ ཚུལ་བཞིན་སྤྱོད་པའི་རྣལ་འབྱོར་པས་ཀྱང་དམ་ཚིག་གི་རིམ་པ་གསང་སྔགས་སྤྱི་ལྟར་བསྲུང་བ་གཅེས་སོ༔ འདིའི་གྲོགས་སུ་བཙལ་བའི་ཡུམ་དེ་ཡང་གསང་སྒོ་འཆལ་བ་དང་༔ དམ་ལས་འདས་ན་འདོད་ཆགས་འབར་བའི་དམྱལ་བར་སྐྱེ་བར་འགྱུར་བས་དམ་ཚིག་ཏུ་ཡང་དག་པར་གནས་པར་བྱའོ༔ སྐལ་མེད་འགྲོ་ལ་ཨ་ཐམ་རྒྱ༔ སྐལ་ལྡན་མཆོག་གི་རྣལ་འབྱོར་ལ༔ ཆིག་བརྒྱུད་གདམས་པ་སྙན་དུ་སྐྱུགས༔ ས་མ་ཡཱ༔ རྒྱ་རྒྱ་རྒྱ༔ ཁ་ཐམ་གྷུ་ཧྱ༔ གསང་རྒྱ༔ སྦས་རྒྱ༔ གཏེར་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་སྤྲང་བན་དེས་ཨོ་རྒྱན་རིན་པོ་ཆེའི་སྒྲུབ་གནས་ཁམས་སྲིང་མོ་རྫོང་ནས་ཤིང་ཕོ་སྟག་གི་ལོ་ལ་གདན་དྲངས་ཤིང་། ལྕགས་ཕོ་སྤྲེལ་གྱི་ལོ་ལ་ཤོག་སེར་ལས་བོད་ཡིག་ཏུ་ཕབ་པའོ། །མངྒ་ལཾ།། །།