རྩ་གསུམ་གསང་བ་སྙིང་ཐིག་གི་ཁྲིད་འཆད་པའི་དམིགས་རྐང་ཟིན་བྲིས།
བཀའ་རྫོགས་པ་ཆེན་པོ་རྩ་གསུམ་གསང་བ་སྙིང་ཐིགས་ལས་ཁྲིད་འཆད་པའི་དམིགས་རྐང་གི་ཟིན་བྲིས་རིག་འཛིན་པས་སྦྱར་བ་བཞུགས། དཔལ་ཀུན་ཏུ་བཟང་པོ་དགུ་ལྡན་བརྒྱུད་པའི་ཚོགས་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། བཀའ་རྫོགས་པ་ཆེན་པོ་རྩ་གསུམ་གསང་བ་སྙིང་ཐིགས་ཀྱི་གཞི་ཁྲེགས་ཆོད་ཀྱི་ཁྲིད་འཆད་པའི་དམིགས་ཐུན་དང་པོར། དལ་འབྱོར་རྙེད་དཀའི་ལམ་འཁྱེར་དང་སྐྱབས་སུ་འགྲོ་བ། གཉིས་པ་མི་རྟག་པའི་ལམ་འཁྱེར་དང་སེམས་བསྐྱེད་པ། གསུམ་པ་ལས་འབྲས་ཀྱི་ལམ་འཁྱེར་དང་ཡན་ལག་བདུན་པ། བཞི་པ་འཁོར་བ་སྡུག་བསྔལ་གྱི་ལམ་འཁྱེར་དང་རྡོ་རྗེ་སེམས་དཔའི་སྒོམ་བཟླས། ལྔ་པ་བྱང་ཆུབ་དད་པའི་ལམ་འཁྱེར་དང་མཎྜལ་གྱི་མཆོད་པ། དྲུག་པ་རྫོགས་ཆེན་འདི་པའི་ལོ་རྒྱུས་དང་བླ་མའི་རྣལ་འབྱོར། བདུན་པ་དགེ་རྩ་བྱང་ཆུབ་ཏུ་བསྔོ་སྨོན་གྱི་ལམ་འཁྱེར་དང་དབང་བཞི་ལེན་པའི་རིམ་པ་འདི་རྣམས་ལ་ཐུན་དྲུག་ཐུན་ལྔ་ཐུན་བཞི་གང་འཐད་དུ་བཅད་པའི་དམིགས་རྐང་རེ་ལ་ཞག་བདུན་ལྔ་གསུམ་སྐབས་སུ་གང་བབས་ལྟར་བྱ། དེ་ནས་དངོས་གཞིའི་སྔོན་འགྲོ་ལུག་ངག་ཡིད་གསུམ་གྱི་རུ་ཤན་དབྱེ་བའི་དམིགས་རྐང་གསུམ་ཆ་མཉམ་གྱི་དམིགས་རྐང་དང་བཞི། སྒྲིབ་སྦྱོང་འབྲུ་གསུམ་གྱི་བཟླས་པ་དང་ལྔ། ལུས་ཀྱི་སྔོན་འགྲོ་རྡོ་རྗེའི་འདུག་སྟངས་དང་དྲུག ངག་གི་སྔོན་འགྲོ་རྒྱས་གདབ་པ་རྩལ་སྦྱོང་བ་མཉེན་བཙལ་བ་ལམ་དུ་ཞུགས་པ་དང་དམིགས་རྐང་བཞི་སྟེ། ཁྱོན་སྡོམ་དམིགས་རྐང་བཅུ་བོ་འདི་དག་ལ་གོང་གི་སྔོན་འགྲོའི་སྐབས་ལྟར་གྱི་ཞག་གྲངས་བྱ། འདི་དག་གི་སྐབས་རྣམས་སུ་དམིགས་རྐང་སོ་སོའི་ལོ་རྒྱུས་ཀྱི་རྒྱས་བཤད་རྫོགས་ཆེན་སྐུ་གསུམ་གྱི་སངས་རྒྱས་སྟོན་པ་བཅུ་གཉིས་བསྟན་པ་བབས་ལུགས་ལ་སོགས་ཀྱི་ལུང་རྣམས་བཤད། ༧ དེ་ནས་སེམས་ཀྱི་སྔོན་འགྲོ་རྩད་གཅོད་པ་ལུས་ངག་ཡིད་གསུམ་གཅིག་གམ་ཐ་དད་ལ་བརྟགས་པ། ཚང་བཙལ་བ་སེམས་དང་ཡུལ་སྣང་གི་བྱེ་བྲག གཟུང་ཡུལ་སྣང་བ་དང་འཛིན་བྱེད་ཤེས་པའི་མཚན་ཉིད། གནས་ལུགས་ལ་བརྟག་པའི་འབྱུང་ཁུངས་ཀྱི་སྐབས་ཀྱི་ཡུལ་ཕྲ་རགས་གཉིས་སེམས་ལས་སེམས་བྱུང་མ་བྱུང་། བར་དུ་གནས་ས་གནས་མཁན། ཐ་མར་འགྲོ་ས་འགྲོ་མཁན་ལ་བརྟག་པ་དང་དམིགས་རྐང་བརྒྱད་པོ་འདི་རྣམས་སློབ་མའི་གོ་ཡུལ་དང་བསྟུན་ཏེ་ཞག་གྲངས་ཀྱང་དེར་མཐུན་དུ་བཅད་ནས་ཉམས་མྱོང་རྒྱུད་ཐོག་ཏུ་ཁེལ་བར་བྱ། འདི་དག་རྣམས་སྔོན་འགྲོ་ཡང་ཡིན་ལ་དངོས་གཞི་ཡང་ཡིན་པས་གལ་ཆེའོ། །འདི་དུས་རྣམས་སུ་བཤད་པ་མི་མང་བར་མན་ངག་གིས་གོལ་སྒྲིབ་ཀྱི་བརྡར་ཤ་ཆོད་པར་བྱ་ཞིང་། ཞག་གྲངས་སྐབས་མཐུན་ལྟར་རྣལ་དུ་དབབ་པར་བྱའོ། ༧ དེ་ནས་དངོས་གཞིའི་ངོ་སྤྲོད་ཉི་མ་ལྔ་གསུམ་བདུན་སོགས་གང་འོས་སུ་གདབ། སོ་སོར་དབང་པོའི་བྱེ་བྲག་ལྟར་མན་ངག་སྟོན་མཁས་པར་བྱ། བཅུ་བདུན་རྒྱུད་ལས་བྱུང་བའི་འོས་མཚམས་ཀྱི་ལུང་གི་ངོ་སྤྲོད་དང་ཁྱད་པར་ཐེག་མཆོག་རིན་པོ་ཆེའི་མཛོད་ཀྱི་ཁྲེགས་ཆོད་ཀྱི་ངོ་སྤྲོད་རྣམས་བྱུང་ན་མཆོག་ཏུ་ཤིས་སོ། །དེ་ལྟར་དངོས་གཞིའི་ངོ་བོ་ཉིད་ལ་དྲོད་རྙེད་པ་དང་རྗེས་ཤེས་ཀྱི་རྩལ་སྦྱངས་པའི་རང་གནས་ཀྱི་བསམ་གཏན་ངོས་བཟུང་བ། མཉམ་བཞག་དང་རྗེས་ཐོབ་བསྲེ་བའི་ཐབས་བསྟན་པ། ཁྲོ་བོའི་འགྱིང་བག་གྱད་ཀྱི་དོར་སྟབས། སེང་གེའི་མཆོང་སྟབས་དང་གསུམ། གནས་པ་སེམས་ཀྱི་རྒྱན་དུ་ཤར་བ། འཕྲོ་བ་སེམས་ཀྱི་རོལ་པར་ཤར་བ། གཉིས་མེད་མཉམ་པའི་ངང་དུ་གནས་པ་དང་གསུམ། དུག་ལྔ་རང་གྲོལ། སྒོ་ལྔ་རང་གྲོལ། ཚོགས་དྲུག་རང་གྲོལ་དང་བཅས་པའི་དམིགས་རྐང་ཉེར་གསུམ་པོ་འདི་དག་རྣམས་ཀྱང་སྔོན་འགྲོའི་སྐབས་ལྟར་གྱི་ཞག་གྲངས་སམ། གོ་ཡུལ་ལྟར་གཏན་ལ་དབབ་སྟེ་ངོ་སྤྲོད་ཅིང་སྟོན་མཁས་པར་བྱའོ། །འདི་དག་གི་སྐབས་སུ་ཆོས་དབྱིངས་རིན་པོ་ཆེའི་མཛོད། མན་ངག་རིན་པོ་ཆེའི་མཛོད། ཐེག་མཆོག་རིན་པོ་ཆེའི་མཛོད་ཀྱི་ཁྲེགས་ཆོད་ཀྱི་རིམ་པ་རྣམས་ཀྱིས་རྒྱབ་ཆོས་བྱ། དེ་རྣམས་ཀྱི་དཔེ་མ་འཛོམ་ནའང་བླ་མའི་མན་ངག་གིས་ས་མཚམས་ཆོད་པར་ངོ་སྤྲོད་ཅིང་། སློབ་མས་ཀྱང་དེས་ཆོག་མེད་པར་བརྩོན་འགྲུས་དྲག་པོས་བརྟན་པ་མ་ཐོབ་བར་དུའམ། བྱེ་བྲག་མ་ཕྱེད་བར་དུ་ཉམས་སུ་ལེན་པར་བྱའོ། །ཐུན་མོང་གི་སྔོན་འགྲོའི་སྐབས་སུ་དམིགས་རྐང་ཞག་གྲངས་གང་འོས་གོང་སྨོས་ལྟར་ལ། ཆོས་ཐུན་ཉིན་རེ་བཞིན་ཚོགས་ནས་རྒྱུ་འབྲས་ཀྱི་ཞིབ་ཉམས་རྒྱས་པར་བཤད་པར་བྱའོ། །རྗེས་ཤེས་ཀྱི་དམིགས་རྐང་ཉེར་གསུམ་པོ་འདི་དག་རྣམས་དབང་པོ་ཡང་རབ་དང་བསྒོམ་ཡུན་རིང་བ་རྣམས་ལ་ངོ་སྤྲད། གསར་བུ་རྣམས་ཕ་རོལ་གྱི་ཡུལ་དང་བསྟུན་པར་བྱའོ། །ཡང་གསང་བླ་ན་མེད་པའི་ཁྲིད་ཆེན་མོ་འདི་ལ་ཕྱིའི་སྔོན་འགྲོར་དམིགས་རྐང་བདུན། ནང་ཐུན་མོང་མ་ཡིན་པའི་སྔོན་འགྲོར་དམིགས་རྐང་བཅུ། ཁྱད་པར་སེམས་ཀྱི་སྔོན་འགྲོར་དམིགས་རྐང་བརྒྱད། དངོས་གཞི་ངོ་སྤྲོད་ཆེན་མོ་དང་། རྗེས་ཤེས་རྩལ་སྦྱང་བའི་དམིགས་རྐང་ཉེར་གསུམ་སྟེ་ཁྱོན་བསྡོམས་དམིགས་རྐང་བཞི་བཅུ་ཞེ་དགུ་ཡིན་པས་ཁྲིད་ཞག་རབ་དམིགས་རྐང་རེ་ལ་ཞག་བདུན་རེ་བྱས་ན་ཞག་སུམ་བརྒྱ་དང་བཞི་བཅུ་ཞེ་གསུམ་གྱིས་འགྲོ། འབྲིང་དམིགས་རྐང་རེ་ལ་ཞག་ལྔ་རེ་བྱས་ན་ཞག་ཉིས་བརྒྱ་དང་བཞི་བཅུ་ཞེ་ལྔ། ཐ་མ་དམིགས་རྐང་རེ་ལ་ཞག་གསུམ་རེ་བྱས་ན་ཞག་བརྒྱ་དང་བཞི་བཅུ་ཞེ་དགུས་འགྲོ། ཇི་ལྟར་མགྱོགས་ཁྲིད་བྱེད་ཀྱང་དམིགས་རྐང་རེ་ལ་ཞག་རེ་སྟེ་ཞེ་དགུ། ངོ་སྤྲོད་ལ་གསུམ། དབང་ལ་གཅིག་དང་ལྔ་བཅུ་རྩ་བཞིས་ཚང་བར་བྱེད་དགོས་སོ། དེས་ཁྲེགས་ཆོད་ཀྱི་ཁྲིད་སོང་ནས་གཉིས་པ་ལམ་ཐོད་རྒལ་གྱི་ཁྲིད་ལ། ཁྲིད་གཞུང་ནས་གསུངས་པ་ལྟར་གྱི་ཕྱིའི་སྔོན་འགྲོ་བདེ་གཤེགས་སྤྱི་ལམ་ལྟར་གྱི་དམིགས་རྐང་བདུན་རང་གཞུང་ལྟར་བཤད། གཉིས་པ་ནང་གི་སྔོན་འགྲོ་ཁྲེགས་ཆོད་ཀྱི་ཁྲིད་ལྟར་རུ་ཤན་དབྱེ་བ་ནས་ངག་ལམ་ཞུགས་ཡན་གྱི་དམིགས་རྐང་བཅུ་པོ་འབོགས། རྒྱབ་ཆོས་གོང་མ་ལྟར་དང་རྒྱ་བོད་ཀྱི་རྫོགས་ཆེན་བརྒྱུད་པའི་བླ་མ་རྣམས་ཀྱི་རྣམ་ཐར་རྣམས་ནན་ཏན་གྱིས་བཤད། དེ་ནས་གསང་པའི་སྔོན་འགྲོའམ་ཁྱད་པར་གྱི་སྔོན་འགྲོ་སྒོ་གསུམ་གྱི་བྱ་བ་གཏོང་ཚུལ། ལུས་ཀྱི་གཞུགས་སྟངས་རྣམ་གསུམ་གྱི་འཕྲུལ་འཁོར། ངག་གི་གནད། སེམས་ཀྱི་གནད། མིག་གི་གནད་གཟིགས་སྟངས་གསུམ། རླུང་གི་གནད། རིག་པའི་གནད། དེ་རྣམས་སློབ་མའི་དབང་པོ་ལྟར་གནད་ཐོག་ཏུ་ཕེབས་པར་སྟོན་མཁས་པར་བྱའོ། །དེ་ནས་གཞུང་ལྟར་རི་བོ་མཐོན་པོའི་རྩེར་རིག་པའི་རྩལ་དབང་བསྐུར་བ་ཡན་གྲུབ་ནས། གོང་གི་གནད་རྣམས་གཟིར་ཞིང་ཟེར་དང་པོའི་དུས་སུ་སྐུ་དང་ཡེ་ཤེས་ཀྱི་རང་སྣང་འོད་དང་ཐིག་ལེར་སྣང་བ་འབེན་དུ་བཙུགས་ནས་སྐུ་ལྔ་ཡེ་ཤེས་ལྔ་རིགས་ལྔ་ཁ་དོག་ལྔ་རླུང་ལྔ་སྐུ་གསུམ་བསྐྱེད་རྫོགས་གསུམ་མཁའ་འགྲོ་ལྔ་སྟེ། དངོས་གཞིའི་འོད་གསལ་བླ་ན་མེད་པའི་ངོ་སྤྲོད་ཀྱི་དམིགས་རྐང་བརྒྱད་དང་། རྗེས་རྣལ་འབྱོར་བཞིའི་རིམ་པས་ཉམས་སུ་ལེན་ཚུལ་དང་བཅས་པ་རིམ་གྱིས་ཉམས་ཐོག་ཏུ་ཁེལ་བར་ངོ་འཕྲོད་པར་བྱའོ། །དེ་ནས་རྗེས་ཀྱི་རིམ་པ་མཐའ་རྟེན་བཞིའི་གོམས་ཚུལ་ལས ། ཆོས་ཉིད་མངོན་སུམ་གྱིས་ཙིཏྟ་ཤའི་སྒྲོན་མ་རྒྱང་ཞགས་ཆུའི་སྒྲོན་མ་དབྱིངས་རྣམ་པར་དག་པའི་སྒྲོན་མ་ཐིག་ལེ་སྟོང་བའི་སྒྲོན་མ་སྟེ་བཞི་དང་། དབྱིངས་དང་ཡེ་ཤེས་སྐུ་དང་ཐུགས་རྗེ་ངོ་བོ་དང་བཅས་པའི་བཞུགས་ཚུལ་རྟགས་ལྔའི་ངོ་སྤྲོད་དང་། ཉམས་གོང་འཕེལ་གྱི་དང་པོའི་དབྱིངས་ཁྲུ་གང་བའི་ཚད་དང་། དེ་ནས་དབྱིངས་སྨིན་མཚམས་ལས་བྲལ་བའི་དུས་དང་། དེ་ནས་འོད་ལྔའི་དབྱིངས་སྣང་དུམ་བུ་སོགས་ཀྱི་རིམ་པ་རྣམས་དང་། དེ་ནས་དབྱིངས་སྣང་རིན་པོ་ཆེའི་དྲ་བ་དྲ་ཕྱེད་སོགས་ཀྱི་དུས་དང་། དེ་ནས་འོད་སྣང་ཡུལ་ཁམས་ཙམ་དང་། དེ་ནས་འོད་སྣང་སྟོང་གསུམ་ཀུན་ཁྱབ་ཀྱི་རིམ་པ་ཕྱེད་སྐུ་དང་སྐུ་རྐྱང་སོགས་དབྱིངས་རིག་གི་ངོ་སྤྲོད། དེ་ནས་རིག་པ་ཚད་ཕེབས་ཀྱིས་འབྱུང་བཞི་འོད་གསལ་དུ་གྲོལ་བས་རྡོ་རྗེ་དབྱིངས་ཀྱི་ལྷ་ཚོགས་ནམ་མཁའི་མཐའ་ཁྱབ་ཏུ་འཆར་བ་སྣང་བ ། སྒྱུ་ལུས་ཉོན་མོངས་པ་དང་བཅས་པ་འོད་གསལ་དུ་གྲོལ་ནས་སྐུ་དང་ཡེ་ཤེས་ཀྱི་སྣང་བ་ལ་སྤྱོད་པ་རིག་པ་ཚད་ཕེབས་ཀྱི་དུས་དང་། དེ་ནས་ཆོས་ཉིད་ཟད་པ་ཞེས། ཟད་པ་རྣམ་གསུམ་གྱི་བྱེ་བྲག་རྣམས་དང་། དེ་ནས་མཐའ་བཞིའི་གོམས་ཚུལ་གྱིས་མི་འགུལ་བ་གསུམ་ལ་གཞི་བཅའ་བའི་བཞུགས་སྟངས་གསུམ་དང་། གཟིགས་སྟངས་གསུམ་གྱི་གནད་ལས་ལུས་དང་། རྩ་དང་མིག་དང་རླུང་དང་སེམས་དང་རིག་པ་དང་སྒྲོན་མ་རྟོག་ཚོགས་དང་བཅས་པའི་དབྱེ་གསལ་གྱི་ངོ་སྤྲོད་དང་། སྡོད་པ་གསུམ་གྱི་ཚད་བཟུང་བའི་ཕྱི་ནང་གསང་གསུམ་རྨི་ལམ་གྱི་རིམ་པ། སྣང་བ་བཞིའི་རྟགས་ལུས་ངག་ཡིད་གསུམ་གྱི་བྱེ་བྲག་བཅུ་གཉིས། ཐོབ་པ་གསུམ་གྱིས་གཟེར་ཐེབས་པའི་རིམ་པ་གསུམ། ཡར་མར་གྱི་གདེང་བཞིའི་གྲོལ་ཚད་རྣམ་པ་བཞི་དང་བཅས་པ་སྟེ། ལྟ་སྒོམ་སྤྱོད་གསུམ་འདི་དག་མཐོང་ཉམས་རྣམ་གསུམ་གྱི་ངོ་སྤྲོད་དང་། མ་འོངས་པའི་ཐོབ་ཉམས་ཀྱིརྟོག་པ་རྣམས་མཐར་ཕྱིན་ཉམས་སུ་བླངས་པས། གྲོལ་ཚད་ཀྱི་ཞལ་གདམས་འབོགས་པ་སོགས་ཀྱི་ནང་ཚན་ལྔ་བཅུ་རྩ་གཅིག་པོ་འདི་རྣམས་རིམ་གྱིས་གནད་དུ་ཐེབས་པར་སྟོན་ཅིང་། འདི་དག་གི་དུས་སུ་ཐེག་མཆོག་རིན་པོ་ཆེ་དང་ཚིག་དོན་མཛོད་སོགས་ཀྱི་འོད་གསལ་ཐོད་རྒལ་གྱི་སྐབས་ཀྱིས་རྒྱབ་ཆོས་བྱ། དཔེ་དེ་རྣམས་མ་འཛོམ་ཀྱང་བླ་མའི་མན་ངག་དང་རྟགས་ཀྱི་ཡིག་སྣ་ལྟར་འོད་གསལ་རྫོགས་པ་ཆེན་པོའི་ལྟ་སྒོམ་བརྩོན་པ་དྲག་པོས་ཚད་ལ་ཕེབས་པར་བྱའོ། །༧ དེ་ནས་དེ་དག་ལ་གོམས་པ་དང་ལྡན་ངེས་ཤེས་པའི་སློབ་མ་ལ། བོགས་འདོན་མུན་པ་ལམ་བྱེད་ཀྱི་གདམས་པ་ཡང་སྦྱིན་པར་བྱ་སྟེ། སྒྲུབ་ཁང་ཕྱི་ནང་གི་སྟ་གོན། སྐྱབས་འགྲོ་སེམས་བསྐྱེད་སོགས་ནས་སྔོན་འགྲོ་སྦྱོར་བ་བ ཞི་ལྡན་འདོན་བསྒོམ་ནན་གྱིས་ཚར་གཅིག་བཏང་། དེ་ནས་དྲང་སྲོང་གི་འདུག་སྟངས་དང་ལག་པའི་འཕྲུལ་འཁོར་བཅའ་ཞིང་ངོ་སྤྲོད་རྣམས་འདེབས། མཛུབ་མོའི་རྩོལ་བ་མི་དགོས་པའི་དུས་བྱུང་ཚེ་ལུས་ཆོས་བདུན་དང་ལྡན་པའི་སྐབས་ཀྱི་ངོ་སྤྲོད་རྣམས་འདེབས། དེ་དག་གི་རྟགས་ཚད་ཐོབ་ནས་ཉིན་མོ་ཉི་མ་མཚན་མོ་མུན་པ་ཟུང་འཇུག་ཏུ་བསྒོམ་ཞིང་། རྨི་ལམ་སོགས་ཀྱི་དྲོད་ཐོབ་རིམ་བཞིན་རིགས་ལྔའི་སངས་རྒྱས་རྣམས་ལ་ཞིང་སྦྱོང་དང་། ལུས་སྒྲོན་མའི་རང་བཞིན་གྱི་དམིགས་རྐང་། ཙིཏྟ་ཤའི་དཀྱིལ་ན་འོད་དཔག་མེད། སྙིང་པདྨ་དཀར་པོ་སོགས་ཀྱི་དམིགས་རྐང་གསུམ་པོ་ཡན་ཆད་དྲོད་མ་ཐོབ་ཀྱི་བར་ལ་ལོ་ཟླ་དུས་ཀྱི་བར་ལ་མ་བལྟོས་པར་དབང་པོའི་ན་རིམ་ལྟར། རང་རྒྱུད་དང་མཐུན་པར་གེགས་སེལ་བོགས་ཐོན་པར་བྱའོ། །དེང་སང་གི་བླ་ཆེན་གྲགས་གཡེར་ཅན་ཕལ་མོ་ཆེ། ཕྱག་རྫོགས་ཀྱི་ཐེག་པའི་བྱེ་བྲག་ཙམ་ཡང་མ་ཕྱེད་བཞིན་དུ་ཕྱག་རྫོགས་ཐམས་ཅད་ཚང་བའི་ཆོས་ཡིན་ཟེར་ནས། གནས་འགྱུ་ལ་སེམས་སུ་ངོ་སྤྲོད། སེམས་དམིགས་པ་དང་བཅས་པའི་སྟོང་ཆ་ལ་ཞི་གནས་སུ་འཛིན་ཅིང་། བསྒོམ་གྱི་མཐིལ་བཅའ་ཧྭ་ཤང་གི་བེམ་སྟོང་ཕྱོགས་ལ་སྒོམ་མེད་དུ་ཡིད་ཀྱིས་སྨོན་ཏེ་ཕྱག་ཆེན་ཡིན་པར་རློམ། གཞི་ཁྲེགས་ཆོད་ཀྱི་ལྟ་སྒོམ་སྤྱོད་གསུམ་ཐམས་ཅད་གོང་མའི་ནང་དུ་འདུ་ཟེར་ནས། བཀའ་རྫོགས་པ་ཆེན་པོ་རྒྱ་ཆེ་གྲངས་མང་གི་ལྟ་སྒོམ་སྤྱོད་གསུམ་ཐམས་ཅད་ཁུགས་སྐྱུར་དུ་བཏང་སྟེ། ཉི་ཟླའི་ཟེར་མཐོང་ཙམ་བྱས་ནས་ཐོད་རྒལ་ཡིན་ཟེར་བདུན་ཞག་གཅིག་གཉིས་མུན་ཁུང་དུ་ཞུགས་ནས་མ་ཎི་བགྲངས་ཏེ། འོད་གསལ་ཐོབ་ཟེར་བའི་ཉན་འཆད་འཇིགས་ཚོགས་སུམ་བརྒྱ་དྲུག་ཅུའི་ཕྱོགས་ལས་མ་འདས་པའི་ལུགས་སྲོལ་འདི་འདྲ་བ་ལས་ལོག་པར་བྱ་ཞིང་། མཚན་ལྡན་གྱི་སློབ་དཔོན་ལ་སྣོད་ལྡན་གྱི་སློབ་མས་ཉམས་མྱོང་རྒྱུད་ལ་ཁེལ་བར་བྱའོ། །དེ་ནས་རླུང་ཁྲིད་ཀྱི་རིམ་པ་ཡང་ཐོག་མར་སྔོན་འགྲོའི་ཁྲིད་ཡིག་བདེ་གཤེགས་སྤྱི་ལམ་ལྟར་དམིགས་རྐང་བདུན་པོ་ཞག་གྲངས་སྐབས་མཚུངས་ལྟར་འབོགས། དེ་ནས་དངོས་གཞི་རྡོ་རྗེ་སེམས་དཔའི་སྟོང་ར་དང་། དེ་ནས་རྩ་གསུམ་འཁོར་ལོ་བཞི་རོ་རྐྱང་གི་ལམ་ནས་རླུང་རོ་འབུད་པ་དགུ་ཕྲུག དེ་ནས་རླུང་ཁ་ནས་རྔུབ་ཅིང་མགྲིན་པའི་རྩ་འདབ་རྣམས་ནས། སྙིང་གའི་རྩ་འཁོར་ཀྱི་དབུ་མའི་ལྟེ་བར་བདེ་སྟོང་གི་རང་མདངས་ཙིཏྟའི་ངོ་བོ་ཉི་ཟླའི་གའུ་ཁ་སྦྱོར་གྱི་དབུས་སུ། སེམས་ཉིད་ཀྱི་ངོ་བོ་ཧཱུྃ་ཡིག་མཐིང་གསལ་གྱི་རིམ་པ་དང་། རླུང་ཕྱིར་འབུད་པའི་དུས་སྤྱི་བོའི་རྩ་འཁོར་གྱི་ལྟེ་བའི་ཀུན་བཟང་ཡབ་ཡུམ་གྱི་ཐུགས་ཀའི་ཧཱུྃ་ཡིག་ལ་རླུང་རིག་བསྟིམ་ཞིང་ཕྱིར་འཛིན་བྱེད་པ་དང་། དེ་བཞིན་དུ་རྩ་འཁོར་འཇའ་འོད་ཐིག་ལེ ། ཤ་རུས་འཇའ་འོད་ཐིག་ལེ་སོགས་དམིགས་རྐང་ཕྱི་ནང་བཞིའམ་བརྒྱད་པོ་འདི་རྣམས་རིམ་གྱིས་དབང་པོའི་ཡུལ་ལྟར་འབོགས། གཞུང་ལྟར་རླུང་ཁུག་རབ་འབྲིང་ཐ་མ་གསུམ་ལ་བརྩོན་པའི་དམ་བཅའ་དང་འཕྲུལ་འཁོར་ཡན་ལག་ལྔ་སྦྱོང་སྤྱི་འགྲོས་ལྟར་སྦྱིན། དེ་ནས་གཞན་ལུས་ཀྱི་རིམ་པ་ཡང་། སྣོད་དང་ལྡན་ངེས་ལ་བདེ་སྟོང་གི་བོགས་འདོན་དུ་གཞུང་ལྟར་རྩལ་བར་བྱའོ། །དེ་ནས་བར་དོ་རྣམ་པ་བཞིའི་རིམ་པ་རྣམས་ཀྱང་ནམ་འཆི་ངེས་མེད་ཡིན་པས་གཞུང་ལྟར་གོམས་འདྲིས་དང་ལྡན་པར་བྱའོ། །བཀའ་གསང་བ་ལས་ཀྱང་ཆེས་གསང་བའི་ཟབ་ཆོས་འདིའི་བསྐྱེད་རིམ་གྱེར་སྒོམ་གྱི་རིམ་པ་ཡང་། གཞུང་ཚིག་ལྟར་དུ་ཁྲེགས་ཆོད་དང་ཐོད་རྒལ་ཟུང་འཇུག་གི་དགོངས་པ་ཡང་དག་གི་ངང་ནས། ཕྱི་སྣོད་གཞལ་ཡས་ནང་བཅུད་ལྷ་དང་ལྷ་མོ་འཁོར་འདས་སྐུ་གསུམ་ཆོས་དབྱིངས་ཀྱི་རོལ་བའི་ངང་ནས། རང་ཉིད་ལྷག་པའི་ལྷར་གསལ་བའི་རྩ་གསུམ་འཁོར་ལོ་བཞིའི་ཐུགས་ཀར་ཉི་གདན་ཧཱུྃ་ཡིག་གི་མཐར། སྔགས་འཁོར་བསྐོར་ཞིང་ཡབ་ཡུམ་ཐམས་ཅད་བདེ་སྟོང་ཡེ་ཤེས་ཀྱི་རང་གདངས་འོད་དང་ཟེར་དུ་འཁྲིགས་པའི་རང་རྩལ། མདུན་བསྐྱེད་ཀྱི་ལྷ་ཚོགས་རྣམས་ལ་ཕོག་པས། བདེ་སྟོང་རབ་ཏུ་འབར་ཞིང་སྙོམས་པར་ཞུགས་པའི་རང་གདངས་ཀྱི་འོད་ཟེར་གྱིས་འཁོར་འདས་ལམ་གསུམ་ཁྱབ་ཅིང་། ཐུགས་རྗེ་བྱིན་རླབས་ནུས་མཐུ་ཚེ་བསོད་དཔལ་འབྱོར་ཐམས་ཅད། ཐིག་ལེ་ཐིག་ཕྲན་དབྱིངས་དང་ལུག་རྒྱུད། འོད་དང་འོད་ཟེར་སྣ་ཚོགས་ཀྱི་རང་བཞིན་དུ་བསྡུས་ནས། བདག་མདུན་རྣམས་ལ་རྒྱ་མཚོ་ཆེན་པོ་ལ་ཆར་བབས་པ་ལྟར་སིབ་སིབ་ཏུ་ཐིམ་པས། ཉམས་སྣང་བ་རྣམ་པ་བཞིའི་རྟོག་ཚོགས་ཐམས་ཅད་མངོན་དུ་གྱུར་ནས་གདོད་མའི་མགོན་མཆོག ཆོས་སྐུ་གསང་བ་འདུས་པ་དང་གཉིས་སུ་མེད་པའི་འབྲས་བུ་སྐད་ཅིག་དེ་ཉིད་ལ་མངོན་དུ་གྱུར་པའི་ཏིང་འཛིན་གྱི་ངང་ནས་སྒྲུབ་གཞུང་ལྟར་བསྙེན་སྒྲུབ་འབུང་། སྐབས་སྐབས་སུ་ཚེ་སྒྲུབ་ཀྱི་དམིགས་པ་འདོན་ལྟར་བསྒྱུར་ཞིང་གནད་དུ་བསྣུན་མདའ་དར་གཡབ། ཐུན་མཚམས་རྣམས་སུ་དབང་བཞི་གཞུང་ལྟར་ལེན་ཞིང་། རྗེས་སྒྲུབ་གཞུང་བཞིན་སྤྱད། ཅེས་པ་འདི་རྣམས་ཤར་རྒྱལ་མོ་རོང་པའི་བླ་མ་སངས་རྒྱས་འོད་ཟེར་གྱིས་ཁྲིད་རྣམས་ལ་མཛུབ་ཁྲིད་དང་ཟིན་བྲིས་ཤིག་དགོས་ཟེར་བར་རང་གི་ཉམས་ལེན་ལ་ཅུང་ཟད་གནོད་བྱུང་ཡང་བཟོད་ཐུབ་པར་བྱས་ཏེ་བཀོད་པ་འདི་ཡང་ཁང་དམར་གུ་རུ་ཕུག་ཏུ་བྲིས། །མངྒ་ལཾ། བྱ་བྲལ་ཉི་མ་གྲགས་པས་གཏེར་ཆེན་བདུན། གཏེར་ཕྲན་བརྒྱད་གདན་དྲངས་པའི་ཆོས་སྐོར་ལ། བླ་མ་བདེ་མཆོག་དབང་གི་འཁོར་ལོ། རྫོགས་ཆེན་གསང་བ་སྙིང་ཐིགས། ཐུགས་རྗེ་ཆེན་པོ་མ་རིག་མུན་སེལ། ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ། ཟབ་ཆོས་པདྨ་དྲག་ཁྲོས། རྟ་མགྲིན་དྲེགས་པ་ཟིལ་གནོན། ཕག་མོ་ཟབ་ཏིག་སྐོར་ལྔ། སྔགས་བདག་འབར་མའི་ཐུགས་ཐིག ཁྱབ་བདག་ན་ག་རཀྵ། ནོར་བདག་ཡིད་བཞིན་ནོར་བུ་རྣམས་སོ། །དེ་རྣམས་ཀྱི་ཆོས་སྐོར་གྱི་མདོ་རྩ་ལ་རྒྱུད་སྡེ་ཆེན་པོ་བཞི། དཀྱིལ་འཁོར་བཅོ་བརྒྱད། སྒྲུབ་ཐབས་བཞི་བཅུ་ཞེ་བདུན། སྒྲུབ་ཆེན་གསུམ། བདུད་རྩི་སྨན་གྱི་སྒྲུབ་པ། བུམ་སྒྲུབ་རིགས་གཉིས། ཁྲིད་ཆེན་བཅུ་བདུན། དབང་ཆེན་ཉེར་ལྔ། སྨད་ལས་ཀྱི་ཟློག་པ་བདུན། བསྐང་མདོས་ཆེན་མོ་གསུམ། གླུད་ཀྱི་མདོས་མོ་ཆེ། སྦྱིན་སྲེག་ཉི་ཤུ། རབ་གནས་ཀྱི་ཆོ་ག་གཉིས་སོགས་ལས་རབ་འབྱམས་ཡོངས་རྫོགས་ཆོས་ཚན་སུམ་བརྒྱ་དང་སུམ་ཅུ་རྩ་ལྔ་བཞུགས་སོ། །