སྒྲུབ་པའི་ཁོག་དབུབ་དངོས་གྲུབ་སྒྲོམ་བུ།
ཐུགས་རྗེ་ཆེན་པོ་མ་རིག་མུན་སེལ་ལས༔ སྒྲུབ་པའི་ཁོག་དབུབ་དངོས་གྲུབ་སྒྲོམ་བུ་བཞུགས༔ རིགས་བདག་ཐུགས་རྗེ་ཆེན་པོ་ལ་ཕྱག་འཚལ་ལོ༔ ཐུགས་རྗེ་ཆེན་པོ་མ་རིག་མུན་སེལ་གྱི་སྒྲུབ་པའི་ཁོག་དབུབ་དངོས་གྲུབ་ཀྱི་སྒྲོམ་བུ་འདི་ལ་དོན་གསུམ་སྟེ༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ལ་བཅུ་གསུམ་སྟེ༔ སློབ་དཔོན་སློབ་མའི་མཚན་ཉིད༔ གཉིས་པ་སྙན་གསན་དབབ་པ༔ གསུམ་པ་གནས་དང་ཡོ་བྱད་སྟ་གོན༔ བཞི་པ་གཟའ་སྐར་བརྟག་པ༔ ལྔ་བ་ས་ཆོག་བྱ་བ༔ དྲུག་པ་མ་ཏྲཾ་བསྒྲལ་བ༔ བདུན་པ་དཀྱིལ་འཁོར་འབྲི་བ༔ བརྒྱད་པ་སློབ་མ་སྟ་གོན༔ དགུ་པ་ཕྱི་མཚམས་གཅོད་པ༔ བཅུ་པ་ལྷག་ཆད་གསོ་བ༔ བཅུ་གཅིག་པ་རྒྱན་འགོད་པ༔ བཅུ་གཉིས་པ་ཞལ་བཀོད་གདབ་པ༔ བཅུ་གསུམ་པ་དམ་རྫས་བཤམས་ཤིང་བྱིན་དབབ་པའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སློབ་དཔོན་གྱི་མཚན་ཉིད་ནི་གཉིས་ཏེ༔ ཡོན་ཏན་ཅན་བསྟེན་པ་དང་སྐྱོན་ཅན་སྤང་པའོ༔ དེ་ཡང་ཡོན་ཏན་ལྡན་ཞིང་བསྟེན་པར་འོས་པའི་སློབ་དཔོན་ནི༔ ཐེག་པ་མཐའ་དག་གི་ཐོས་པ་དང་ལྡན་ཞིང་དོན་བསྐྱེད་རྫོགས་ལ་དྲོད་ཐོབ་པ༔ དངོས་པོ་ལ་མི་ཞེན་ཅིང་ཆོས་ཉིད་ཀྱི་གདེང་དང་ལྡན་པ༔ སྙིང་རྗེ་ཆེ་ཞིང་ཐབས་ལ་མཁས་པ༔ རྒྱུད་དག་ཅིང་དཀྱིལ་འཁོར་གྱི་བྱ་བ་ལ་མཁས་པ༔ དེ་ལྟ་བུའི་སློབ་དཔོན་ནི་དུས་གསུམ་གྱི་རྒྱལ་བ་ཐམས་ཅད་ཀྱི་གདུང་འཛིན་པ་ཞེས་བྱ་བས་ལུས་སྲོག་ལ་ལྟོས་པ་མེད་པར་ཡང་དག་པར་བསྟེན་པར་བྱའོ༔ གཉིས་པ་སྐྱོན་ཅན་སྤང་བ་ནི༔ ཐོས་བསམ་ཞན་ཅིང་སྙིང་རྗེ་ཆུང་བ༔ ང་རྒྱལ་ཆེ་ཞིང་ཕྲག་དོག་རྒོད་པ༔ བསྐྱེད་རྫོགས་ཀྱི་དྲོད་དང་མི་ལྡན་ཞིང་ཆོས་བརྒྱད་ཀྱི་ཕོ་ཚུགས་ཆེ་བ༔ ཁ་ལྟ་མཐོ་ཞིང་གྲུབ་མཐའ་དམན་པ༔ དེ་ལྟ་བུ་ནི་སློབ་མའི་བདུད་ཡིན་པས་ཡང་དག་པར་སྤང་བར་བྱའོ༔ སློབ་མའི་མཚན་ཉིད་ལ་ཡང་གཉིས་ཏེ༔ སྐྱོན་མེད་དང་སྐྱོན་ཅན་ནོ༔ དང་པོ་སྐྱོན་མེད་ནི༔ དད་པ་ཆེ་ཞིང་བློ་གསལ་བ༔ ངང་རྒྱུད་རིང་ཞིང་བརྩོན་འགྲུས་དང་ལྡན་པ༔ ཕྱི་ཐག་བཟང་ཞིང་ཐེག་པ་ཆེན་པོ་ལ་མོས་པ༔ ཚེ་འདིར་མི་ཆགས་ཤིང་ཕྱི་མ་ཡིད་ལ་བཅགས་པ༔ མོས་གུས་འདེམ་རྐྱང་མེད་པ་ཞིག་ནི་ཡང་དག་པའི་གདམས་པ་ཟབ་མོ་བཤད་སའི་སྣོད་དམ་པའོ༔ གཉིས་པ་སྐྱོན་ཅན་ནི༔ བློ་རྨོངས་ངང་ཐུང་རྒྱུད་རྩུབ་ཅིང་༔ ཕྲ་མ་གཡེམ་ཆེ་འགྱུར་ལྡོག་རྐྱེན༔ ཁ་མཁས་ལག་དམ་ཕྱི་ཐག་ཐུང་༔ དད་བརྩོན་ཤེས་རབ་སྙིང་རྗེ་ཆུང་༔ ཚེ་འདིའི་ཁེ་གྲགས་གཏམ་ལ་དགའ༔ ཐོས་བསམ་ཆོས་ལ་རྒྱབ་ཀྱིས་ཕྱོགས༔ འདི་ནི་མི་གཙང་འདམ་རྙོག་དང་༔ དུག་ལྟར་འཕུང་བས་རིང་དུ་སྤང་༔ གཉིས་པ་སྙན་གསན་དབབ་པ་ནི༔ དེ་ནས་ཡོན་ཏན་ལྡན་པའི་སློབ་དཔོན་ཕྱོགས་གང་དུ་འདུག་པའི་དྲུང་དུ་དད་གུས་དང་ལྡན་པའི་སློབ་མས༔ གདམས་པ་ཟབ་མོ་ཟབ་ལ་རྒྱས་པ་གོ་བདེ་ལ་འཁྱེར་སླ་བ༔ ཚིག་བསྡུས་ལ་དོན་ཟབ་པ་ཞིག་བདག་ཅག་རྣམས་ལ་སྐུ་དྲིན་དུ་སྩལ་དུ་གསོལ༔ ཞེས་ལོ་ཟླའི་གོང་ནས་ཞུ་ཞིང་ཞལ་བཞེས་ཟུར་ཙམ་བྱུང་ཚེ་ཡུལ་དུ་གདན་དྲངས་ནས༔ མཉེས་པའི་ཞབས་ཏོག་ཕུན་སུམ་ཚོགས་པས་བསྟེན་ཅིང་༔ བཀའ་ཟུར་ཙམ་ཡང་མ་ཉམས་པར་བྱ་སྟེ༔ འདོད་པའི་ཆོས་ཟབ་ཀྱི་དབང་ལུང་མན་ངག་ལ་གསོལ་བ་རྩེ་གཅིག་ཏུ་གདབ་ཅིང་བརྩོན་འགྲུས་དང་ལྡན་པས་ཡང་དག་པའི་མན་ངག་རྣམས་ནོད་པར་བྱའོ༔ གསུམ་པ་གནས་དང་ཡོ་བྱད་སྟ་གོན་ནི༔ བཀྲ་ཤིས་ཤིང་ཉམས་དགའ་བའི་གླིང་ཆུ་བོ་དབང་གི་ཕྱོགས་ནས་འབབ་པ༔ རྒྱབ་རི་བཟང་ཞིང་མི་རྒོད་དང་ཅེ་སྤྱང་གི་འཚེ་བ་མེད་པ༔ གོང་མས་བྱིན་གྱིས་བརླབས་པའི་གནས་སམ་གཞི་བདག་དཀར་ཕྱོགས་ཅན་གནས་ས་ཞིག་ཏུ༔ ཡོ་བྱད་ནི་རྡོ་རྗེ་རྒྱལ་པོ་མཆེད་ལྕམ་དྲལ་ཐམས་ཅད་ཀྱིས་མཁོ་བའི་ཡོ་བྱད་ན་བའི་གསོ་སྨན༔ གྷ་ནའི་ལོངས་སྤྱོད་རིན་ཆེན་མཎྜལ་ལ་སོགས་པ་རྣམས་མ་ཚང་བ་མེད་པར་བསག་གོ༔ བཞི་པ་གཟའ་སྐར་བརྟག་པ་ནི༔ ཉ་དང་གནམ་སྟོང་ཚེས་བརྒྱད་ཚེས་བཅུ་ལ་སོགས་ལ་དབང་ཁྲིད་ཆོས་སྤྱོད་སོགས་གང་ལ་ཞུགས་ཀྱང་ཁྲི་འབུམ་དུ་འཕེལ་བས་བཟང་ཞིང་༔ གཟའ་ནི་ཉི་མ་ཟླ་བ་ཕུར་བུ་པ་སངས་སྤེན་པ་ལྔ་ལ་དབང་ཆོས་ལ་ཞུགས་ན་བསམ་དོན་འགྲུབ༔ སྣར་མ་དཔོ་དང་རྒྱལ་ནབས་སོ་ས་རི་ས་ག་ཁྲུམས་སྟོད་ནམ་གྲུ་ལ་སོགས་ལ་བསོད་ནམས་འཕེལ༔ དཔལ་བཟང་དངོས་གྲུབ་འཐོབ་པས་བཟང་ཞིང་༔ དུས་ཀྱང་དབྱར་མ་སྟོན་ལྟ་བུའམ༔ དཔྱིད་ཀ་མེ་ཏོག་བཀྲ་བའི་དུས་སམ་མདོར་ན་འབྱུང་བ་སྙོམས་པ་ཞིག་གི་དུས་གལ་ཆེའོ༔ ལྔ་པ་ས་ཆོག་བྱ་བ་ནི༔ ས་མདོག་དམར་ཞིང་ཟླ་གམ་ལྟ་བུ་ཞིག་ནས་ས་བླངས་ཏེ༔ དེ་ཡང་ས་བདག་ལྟོ་འཕྱེ་བྱ་བ་གང་ཤར་ཟླ་བ་སྔས་སུ་བྱས་ཏེ༔ ཕོ་བྲང་ལ་བསྐོར་བ་ལས་དཔྱིད་གསུམ་མགོ་བོ་ནུབ་ཁ་བྱང་༔ དབྱར་གསུམ་མགོ་བོ་བྱང་ཁ་ཤར༔ སྟོན་གསུམ་མགོ་ཤར་ཁ་ལྷོ་དགུན་གསུམ་མགོ་བོ་ལྷོ་ཁ་ནུབ་ཏུ་བལྟ་བ་བརྟགས་པས་ཁོའི་ལྟོ་བ་ནས་ས་བླང་ངོ་༔ དེ་ཡང་ལས་བཞི་སོ་སོའི་ས་ནི༔ རང་རང་གི་གཞུང་གཙོ་ཞིང་ཁྱད་པར་དུ་ཞི་བའི་ས་དཀར་ལ་འཇམ་པ༔ རྒྱས་པའི་ས་སེར་ལ་སྣུམ་པ༔ དབང་གི་ས་དམར་ལ་སྤྱིན་པ༔ དྲག་པོའི་ས་ནག་ལ་བརྔམ་པ༔ ཕྱོགས་ཀྱང་ལས་བཞི་དང་མཐུན་པར་ཤར་ལྷོ་ནུབ་བྱང་གཙོ་ཞིང་༔ དེར་མ་ཟད་པའི་རིགས་ནི༔ སྲིད་འབེབས་ཀྱི་ས་མཚོ་བཟང་པོའི་འགྲམ༔ ཤི་ཁ་གཅོད་པའི་ས་རི་གསུམ་གྱི་རྩེ་མོ༔ དགྲ་སྲི་གནོན་པའི་ས་ལུང་གསུམ་གྱི་མདོ༔ ལས་རབ་འབྱམས་ཡོངས་སུ་བསྡོམས་པའི་ས་ནི་དབུས་ནས་བླང་ངོ་༔ དེ་ལྟར་ལས་མཐུན་ལྟར་དཔྱད་པའི་ས་སློང་བའི་རི་དེར་སློབ་དཔོན་གྱི་བུམ་གཏེར་རྫས་དང་བཅས་པ་ཁྱེར་ཏེ༔ ས་གང་ནས་སློང་བའི་གནས་དེར་རས་དཀར་སྟེང་དུ་ཚོམ་བུ་ལྔ་བཀོད་ལ༔ གཏོར་མ་ཆ་གསུམ་བཤམས་ནས་རང་གི་མདུན་དུ་ལྷ་མོ་བསྟན་མ་སྐུ་མདོག་སེར་མོ་བུམ་པ་དང་མཆོག་སྦྱིན་ཅན་འཁོར་ལྷ་མོ་མང་པོའམ་ས་བདག་གི་ཚོགས་ཀྱིས་བསྐོར་བར་དམིགས་ཤིང་༔ རང་གི་ཐུགས་ཀའི་འོད་ཟེར་གྱིས་ལྷ་མོ་འཁོར་བཅས་སྤྱན་དྲངས་བསྟིམ་ཞིང་༔ རྡོ་རྗེ་སློབ་དཔོན་གྱི་ཕྱག་གཡས་པ་ས་ལ་ལན་གསུམ་བརྡེག་ཅིང་གཏོར་མ་བྱིན་གྱིས་བརླབས༔ ཧཱུྃ༔ ལྷ་མོ་ཆེན་མོ་བསྟན་མ་དཔལ་ལྡན་མ༔ སྐུ་མདོག་སེར་མོ་མཆོག་སྦྱིན་བུམ་པ་ཅན༔ ན་བཟའ་རྒྱན་ཕྲེང་ཅོད་པན་སྤྲིན་ལྟར་གཏིབས༔ འཁོར་དུ་ལྷ་མོ་ས་བདག་རྣམས་ཀྱིས་བསྐོར༔ མཆོད་པའི་གནས་འདིར་སྤྱན་འདྲེན་གཏོར་མ་བཞེས༔ བཅུ་གཉིས་ལོ་ཡི་རྟར་ཞོན་ནས༔ ཀོ་ལོང་སྡོམ་པའི་ལྷ་དགུ་སོགས༔ མ་ལུས་འཁོར་དང་བཅས་པ་རྣམས༔ མཆོད་སྦྱིན་གཏོར་མ་འདི་བཞེས་ལ༔ ས་འདི་བདག་ཅག་རྣམས་ལ་སྩོལ༔ ཇི་ལྟར་ཤཱཀྱ་སེང་གེ་ཡིས༔སྔོན་ཚེ་ས་འདི་བཏུལ་ནས་ཀྱང་༔ རྫོགས་སངས་རྒྱས་ཤིང་ཆོས་འཁོར་བསྐོར༔ དེ་བཞིན་བདག་ཅག་སྒྲུབ་པ་པོས༔ ཚོགས་གཉིས་གསོག་ཅིང་སྒྲིབ་སྦྱང་ཕྱིར༔ ས་འདི་ཞུའོ་བདག་ལ་སྩོལ༔ ཁྱེད་ཅག་བདེ་བར་གནས་སྤོས་ཤིག༔ བཀྲ་ཤིས་བདེ་ལེགས་མཛད་དུ་གསོལ༔ ཅེས་གཏོར་མ་འབུལ་ཞིང་ལྷ་མོ་འཁོར་བཅས་དགྱེས་པའི་མདངས་ཕྱུངས་ནས་ཐུགས་ཀྱིས་གནང་བ་བྱིན་ཏེ་འོད་དུ་ཡལ་ནས་ས་ལ་ཐིམ་པར་བསམས༔ དེ་ནས་ས་འདུལ་བ་ནི་རང་ཡི་དམ་དུ་བསྒོམ་ཞིང་ས་ལ་ཕུར་བུས་གཟིར་ཞིང་༔ ཧཱུྃ༔ ང་ནི་དབང་ཆེན་དབང་མཛད་ལྷ༔ སྤྲུལ་པས་ས་གཞི་བར་སྣང་གང་༔ གནམ་ལྕགས་ཕུར་བུ་འདྲིལ་ཞིང་འདེབས༔ སྐུ་སྟོད་ཞལ་གསུམ་ཕྱག་དྲུག་པ༔ སྐུ་སྨད་ཟུར་གསུམ་དབལ་དང་ལྡན༔ སྤྲུལ་པ་མེ་དཔུང་ཁྲོ་ཚོགས་འཕྲོ༔ ཡེ་ཤེས་སྲས་མཆོག་ཀཱི་ལཱ་ཡ༔ ས་འདི་བདག་ཏུ་བཟུང་བར་བགྱིད༔ བདེ་གཤེགས་བཀའ་ལ་མི་ཉན་ཞིང་༔ བྱང་ཆུབ་བསྒྲུབ་ལ་མི་དགའ་བའི༔ ལོག་འདྲེན་ས་བདག་འབྱུང་པོའི་ཚོགས༔ འཕྲིན་ལས་གནམ་ལྕགས་ཕུར་བུས་སྲེག༔ ཨཱོཾ་གྷ་གྷ་གྷ་ཏ་ཡ་གྷ་ཏ་ཡ་ཧཱུྃ་ཕཊ༔ སརྦ་བྷིགྣན་བཛྲ་ཀཱི་ལི་ཀཱི་ལ་ཡ༔ ཀཱ་ཡ་ཝཱཀྐ་ཙིཏྟ་རོ་ལ་ཉ་པ་ཏི་དུཥྟན་ཧཱུྃ་ཕཊ༔ དེ་ནས་ས་བརྟག་པ་ནི༔ ས་བདག་འཁོར་ཚུལ་གོང་ལྟར་བསྟུན་ཞིང་ཁྲུ་གང་བརྐོས་པའི་ནང་ནས་གྱོ་མོ་གསེག་མ་སོལ་བ་རྣམས་བུད་ན་སྤང་ཞིང་༔ ས་མདོག་སྣུམ་ལ་ལས་བཞི་གང་ཡིན་གྱི་ཁ་དོག་མཚུངས་ན་བརྐོ༔ སླར་ས་བརྐོས་པ་རྣམས་ཤུལ་དུ་བླུགས་ཏེ་བརྟགས་པས་ཁེངས་ཤིང་ལུད་ན་མཆོག༔ སྙོམས་པར་ཁེངས་ན་འབྲིང་༔ མ་ཁེངས་སྟོང་ན་ངན་པས་ས་གཞན་ན་སྤོ་ཞིང་ས་ཆོག་བྱའོ༔ དེ་ནས་ས་སྦྱང་བ་ནི༔ རང་ཉིད་ལྷར་གསལ་བའི་ཐུགས་ཀ་ནས་ཡི་གེ་བྷྲཱུྃ་དམར་པོ་ཞིག་འཕྲོས་པས༔ འཕགས་པའི་ཡེ་ཤེས་ཀྱི་ངོ་བོ་དེ་ས་ལ་ཐིམ༔ སའི་ཕུང་པོ་དེ་ཡི་གེ་བྷྲཱུྃ་གཅིག་ཏུ་གྱུར༔ འོད་ཟེར་འཕྲོས་པས་ཕྱོགས་བཅུའི་ཞིང་ཁམས་ནས་རྒྱལ་བ་རྣམས་ཀྱི་བྱིན་རླབས་བསྡུས་ཤིང་ས་ལ་ཐིམ༔ སླར་འོད་འཕྲོས་པས་ཕྱི་སྣོད་ནང་བཅུད་ཀྱི་སེམས་ཅན་རྣམས་ལ་ཕོག༔ འབྱུང་བའི་དུག་དང་སེམས་ཅན་རྣམས་ཀྱི་མ་དག་པའི་ཤེས་རྒྱུད་སྦྱངས༔ འབྱུང་བའི་དངས་མ་དང་སེམས་ཅན་རྣམས་ཀྱི་དཔལ་འབྱོར་ཐམས་ཅད་དབང་དུ་བསྡུས༔ ཕོ་བྲང་འདེབས་པའི་ས་ལ་ཐིམ་པས་འཁོར་འདས་ལམ་གསུམ་གྱི་ཡོན་ཏན་ཐམས་ཅད་དང་ལྡན་ཞིང་༔ དངོས་གྲུབ་འབྱུང་བའི་རྒྱུ་རིན་པོ་ཆེ་སྣ་ཚོགས་ཀྱི་ཕུང་པོ་ཡེ་ཤེས་སེམས་དཔའི་བྱིན་རླབས་དང་ལྡན་པ་ཞིག་ཏུ་བསམས་ཤིང་༔ ཧཱུྃ་བྷྲཱུྃ་ཛྙཱ་ན་སིདྡྷི་ཕ་ལ་ཧཱུྃ་ཧཱུྃ༔ ཅེས་བརྗོད་དོ༔ དེ་ནས་སྒྲུབ་ཁང་དུ་དྲི་བཟང་གི་ཆུས་འཐོར༔ གཙང་ཆབ་ཀྱིས་སྟེགས་བུའི་ས་སྦོལ་ཞིང་༔ མཚོ་སྨན་ལྷ་མོ་འབྱུང་བ་བཞི་ཡི་བདག༔ ར་བ་བཞི་ལ་ནམ་མཁའི་དབྱིངས་སུ་བཞུགས༔ འབྲིང་པོ་བཞི་ལ་བར་སྣང་ཁམས་ན་གནས༔ ཐ་ཆུང་བཞི་ལ་རྒྱ་མཚོའི་ཀློང་དུ་སྤྱོད༔ ཁྱོད་ནི་འགྲོ་བའི་བདེ་ལེགས་སྩོལ་བའི་མ༔ རྒྱལ་བའི་ཕོ་བྲང་འདེབས་ཕྱིར་ཆུ་འདི་སྩོལ༔ ས་ཆུ་ནང་འཕྲད་སྟོབས་སྦྱོར་སྦོལ་ཞིང་སྤེལ༔ འགྲོ་བ་སྒྲོལ་ཕྱིར་ཕོ་བྲང་འདི་བསྒྲུབ་བོ༔ ཅེས་བརྗོད་ཅིང་འདམ་བསྲུབ༔ ད་ལ་གནས་ཁང་དང་དཔག་པར་བཟོའོ༔ དྲུག་པ་མ་ཏྲཾ་བསྒྲལ་བ་ནི༔ ཁམས་ལ་བཟོས་པའི་མ་ཏྲཾ་སྟེགས་བུའི་དབུས་སུ་འགུགས་བསྟིམ་བྱས་ལ༔ གིང་པ་རྣམས་ཀྱིས་གྲི་མཚོན་ཐོགས་ཤིང་༔ ད་ལ་འཆམས་སྟབས་ཀྱིས་བསྐོར་ཞིང་འདི་སྐད་དོ༔ ཧཱུྃ༔ དབང་ཆེན་ཐུགས་ལས་སྤྲུལ་པ་ཡི༔ ཕོ་ཉ་གིང་ཆེན་སྡེ་བཞིའི་སྡེ་བཞིའི་ཚོགས༔ སྔོན་ཚེ་འདས་དུས་བསྐལ་པ་ལ༔ ལོག་རྟོག་རུ་ཊའི་སྡེ་དཔུང་བཅོམ༔ སངས་རྒྱས་བསྟན་པའི་རྒྱལ་མཚན་སྒྲེངས༔ གསང་སྔགས་བསྟན་པའི་སྒྲོན་མེ་སྦར༔ དེ་བཞིན་དེང་དུས་ཐུགས་དམ་བསྐུལ༔ སྔོན་ཚེ་དབང་ཆེན་བཀའ་ལུང་ལྟར༔ གནས་ཡུལ་དུར་ཁྲོད་ཐམས་ཅད་ནས༔ ཕོ་ཉ་གིང་ཆེན་ཐམས་ཅད་གཤེགས༔ སྦྱོར་སྒྲོལ་སྤྱོད་པ་རྨད་བྱུང་གིས༔ རྣམ་རྟོག་ལོག་རྟོག་ངན་པ་ཡི༔ མ་རིག་རཱུ་ཏྲའི་སྡེ་དཔུང་ཐུལ༔ ཅེས་བརྗོད་ཐུན་གྱིས་བྲབ་ཅིང་༔ ཧཱུྃ༔ མ་ཏྲཾ་བྱ་བའི་སྡིག་ཅན་ལས་ངན་ཁྱོད༔ སྔོན་ཚེ་བསྐལ་པའི་དུས་ནས་ད་བར་དུ༔ བྱང་ཆུབ་བསྒྲུབ་ལ་བར་དུ་གཅོད་པའི་བགེགས༔ དངོས་གྲུབ་འཕྲོག་པའི་བདུད་སྡེ་ལས་ངན་ཁྱོད༔ དབང་མཛད་ཏིང་འཛིན་ཕོ་ཉ་གིང་ཆེན་གྱིས༔ ཁྱོད་ཀྱི་མ་དག་རྣམ་སྨིན་ང་བདག་འདྲེ༔ དབྱིངས་སུ་བསྒྲལ་ནས་ཕུང་པོ་གཞལ་ཡས་ཁང་༔ འགྲོ་དྲུག་སྐྱོབ་ཕྱིར་རྒྱལ་བའི་ཕོ་བྲང་འདེབས༔ དུར་ཁྲོད་གནས་ཡུལ་དཀྱིལ་འཁོར་ལྷུན་གྱིས་གྲུབ༔ ཨཱོཾ་བཛྲ་རཏྣ་པདྨ་ཀརྨ་གིང་ཀ་ར་ས་མ་ཡ༔ མ་ཏྲཾ་རཱུ་ཏྲ་ཨ་ཀར་ཤ་ཡ་རཱུ་ཏྲ་ཛ༔ ཁ་ཏྲཾ་རཱུ་ཏྲ་ཛ༔ པྲ་ཝེ་ཤ་ཡ་ཕཊ༔ ཅེས་བསྒྲལ་ཞིང་རཱུ་ཏྲའི་ཁོག་པ་དུམ་བུ་བརྒྱད་དུ་བཅད་དེ་དཀྱིལ་འཁོར་གྱི་ཕྱོགས་བཞི་མཚམས་བརྒྱད་དུ་འགོད་དོ༔ བདུན་པ་དཀྱིལ་འཁོར་འབྲི་བ་ནི༔ བའི་རྣམ་ལྔ་དང་དྲི་བཟང་གིས་ཆག་ཆག་གདབ་ཅིང་༔ ཐིག་ཆོག་རྫོགས་པ་དེའི་ནུབ་ནས་སློབ་དཔོན་རྒྱན་གྱིས་སྤྲས་ཤིང་ཤར་ཕྱོགས་ལ་བལྟ༔ རིག་མ་མཚན་ལྡན་ཤར་ནས་ནུབ་ཏུ་བལྟ་སྟེ་ཐིག་སྐུད་མཚན་ཉིད་དང་ལྡན་པ་ཐོགས་ལ་རོལ་མོ་འཁྲོལ་ཞིང་དྲི་བཟང་གི་དུད་པ་གཏོང་སྟེ༔ དཀྱིལ་འཁོར་གྱི་གཙོ་བོ་ཡབ་ཡུམ་དུ་སྐད་ཅིག་གིས་ཝལ་གྱིས་བསྐྱེད་ཅིང་༔ ཧཱུྃ༔ བདག་ནི་འཕགས་མཆོག་བཅོམ་ལྡན་འདས༔ ལྷ་མོ་ཡུམ་མཆོག་དྷཀྐི་མ༔ བློ་འདས་ཆོས་དབྱིངས་ངང་ཉིད་ལས༔ འགག་མེད་རང་བྱུང་ལོངས་སྤྱོད་རྫོགས༔ སྤྲུལ་པ་ཡབ་ཡུམ་གཙོ་དང་འཁོར༔ སྣང་སྟོང་ཟུང་འཇུག་ལྷ་རུ་ཤར༔ སྟོང་པའི་རང་བཞིན་ཤེས་རབ་ཡུམ༔ སྣང་བའི་རང་བཞིན་ཐབས་ཀྱི་ཡབ༔ སྣང་སྟོང་བདེ་སྟོང་བྱང་ཆུབ་སེམས༔ དཀར་དམར་ཐབས་ཤེས་འཕྲོ་འདུས་བསྟིམ༔ ནམ་མཁའ་ཆོས་དབྱིངས་ཞིང་ཁམས་སུ༔ ཆོས་སྐུ་སྤྲོས་བྲལ་ཐིག་གདབ་བོ༔ བར་སྣང་འགག་མེད་ཕོ་བྲང་དུ༔ ལོངས་སྤྱོད་རྫོགས་སྐུའི་ཐིག་གདབ་བོ༔ སྣ་ཚོགས་སྣང་བའི་ས་གཞི་ལ༔ འགྲོ་འདུལ་སྤྲུལ་སྐུའི་ཐིག་གདབ་བོ༔ མཚན་ལྡན་བཅུ་དྲུག་བདེ་བའི་ཡུམ༔ མཁའ་དབྱིངས་དག་པའི་ཕོ་བྲང་དུ༔ དགའ་བཞིའི་ཡེ་ཤེས་ཐིག་གདབ་བོ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ བྷྲཱུྃ་སཾ་ཏྲི་ཏ་ཛྙཱ་ན་མཎྜལ་བྷྲཱུྃ༔ ཅེས་ཐིག་གདབ་བོ༔ ཚངས་ཐིག་གི་ཆར་འཕགས་པ་མ་རིག་མུན་སེལ་གྱི་ལྷ་ཚོགས་ཐམས་ཅད་ནམ་མཁའི་མཐོངས་ལ་ཡོད་པར་བསམས་ཤིང་༔ མཆོད་བསྟོད་བསྡུས་པ་ཞིག་བྱའོ༔ དེ་ནས་ཐིག་སྐུད་སིན་དྷུ་རའི་ཆུར་སྦངས་པས་ཆ་ཆེན་བཅུ་དྲུག་གི་ཐིག་རྣམས་གདབ་ཅིང་དཀྱིལ་འཁོར་རྣམས་བཅད༔ སྒོ་རྫོགས་སོགས་ཐིག་རྣམས་མཚལ་གྱིས་གདབ་པར་བྱའོ༔ དེ་ནས་རབ་རིན་པོ་ཆེ་རྣམ་ལྔ༔ འབྲིང་གནས་ཆེན་རྣམས་ཀྱི་ས་རྡོ༔ ཐ་ནའང་ཅོང་ཞི་ཞིབ་མོར་འཐག་ཅིང་མཛེས་པའི་ཚོན་གྱིས་ཁ་དོག་བསྒྱུར་ཏེ༔ སྣོད་སོ་སོར་བཏབ་ཅིང་རིགས་ལྔའི་ས་བོན་བྲིས་ལ༔ ཕྱོགས་དང་མདོག་མཚུངས་པར་ད་ལའི་དབུས་དང་ཕྱོགས་མཚམས་སུ་དགྲམ་ཞིང་༔ སྔགས་ཀྱིས་སྟོང་པར་སྦྱངས༔ སྟོང་བའི་ངང་ལས་རིགས་ལྔ་ལོངས་སྤྱོད་རྫོགས་པའི་སྐུ་རུ་གསལ་ཞིང་༔ སྤྱན་འདྲེན་མཆོད་བསྟོད་བྱས་པའི་མཐར༔ ལྷ་ཚོགས་རྣམས་འགྲོ་བའི་དོན་དུ་འོད་དུ་ཞུ་ནས་རྡུལ་ཚོན་དང་གཉིས་སུ་མེད་པར་བསམས་ཤིང་༔ དཀྱིལ་འཁོར་གྱི་ཤར་ནས་སློབ་དཔོན་གྱིས་ཚོན་བཀྱེ་སྟེ་འདི་སྐད་དོ༔ ཧཱུྃ༔ བདག་ནི་འགྲོ་དྲུག་ཕ་མའི་དོན༔ བྱང་ཆུབ་སེམས་ཀྱི་སྡོམ་ལ་འཇུག༔ རྡུལ་ཚོན་ཡེ་ཤེས་ལྔ་ཡི་ངོས༔ སྟེགས་བུ་རྒྱལ་བའི་ཞིང་གི་གཞིར༔ ཐིག་འདི་བྱང་ཆུབ་བཅུ་དྲུག་ཤར༔ ཡེ་ཤེས་དམ་ཚིག་གཉིས་མེད་ཕྱིར༔ ཚོན་གྱིས་གླན་ཞིང་མཛེས་པར་འབྲི༔ བྱང་ཆུབ་མཆོག་གི་བསོད་ནམས་མཐུས༔ ཁམས་གསུམ་སྐྱེ་འགྲོ་མ་ལུས་པ༔ འཕགས་པའི་ཞིང་དུ་གྲོལ་བར་ཤོག༔ ཅེས་བརྗོད་ལས་ཀྱི་སློབ་དཔོན་སོགས་ཀྱིས་བརྩོན་འགྲུས་ཀྱི་གོ་གྱོན་ཏེ༔ བརྟུལ་ཞུགས་ཀྱི་རྟ་ལ་ཞོན་ནས་གཟབས་ཏེ་འབྲི་བར་བྱའོ༔ དེ་ཡང་ཐིག་སྐུད་ཕྲ་ན་རྣལ་འབྱོར་པའི་ཚེ་ལ་གཟན༔ སྦོམ་དྲག་ན་གཅོང་གིས་འཛིན༔ ཧ་ཅང་རིང་ན་བསམ་དོན་མི་འགྲུབ༔ ཐུང་ན་སྒྲུབ་པ་ལམ་དུ་མི་འགྲོ༔ ཆད་ན་བར་གཅོད་འཕྲལ་དུ་འོང་༔ འཇུར་མ་སོགས་བྱུང་ན་ནོར་ལ་གོད་འབྱུང་བས་ཤིན་ཏུ་གཟབ༔ ཚོན་ཁ་དོག་མི་གསལ་ན་ཏིང་ངེ་འཛིན་རྒྱུད་ལ་མི་སྐྱེ༔ རྩིང་ཞིབ་མ་སྙོམས་ན་དངོས་གྲུབ་མི་འཐོབ༔ མཐུག་ན་ཉམས་རྟོགས་འཐིབ་ཅིང་མི་གསལ་ཞིང་ནད་འབྱུང་༔ བསྲབས་ན་བསོད་ནམས་ཉམས་ནོར་དབུལ༔ ཚོན་ཆད་ན་དཔོན་སློབ་ཐམས་ཅད་ལ་ངན༔ རེ་ཁ་འཁྱོགས་ན་འཕྲིན་ལས་བཞིའི་ལས་མི་འགྲུབ་པ་སོགས་ཀྱི་སྐྱོན་ཤིན་ཏུ་ཆེ་བས་བརྩོན་འགྲུས་དང་ལྡན་པས་འབྲིའོ༔ ལྟེ་བ་རྣམས་ནི་ལྷའི་སྐུ་མདོག་ལྟར་ཚོན་གྱིས་བསྒྱུར་ཞིང་སྒོ་གྲུ་རྟ་བབས་སོགས་སྤྱི་དང་མཚུངས་སོ༔ བརྒྱད་པ་སློབ་མ་སྟ་གོན་ནི༔ རྡོ་རྗེ་སློབ་དཔོན་ཁྲི་ལ་འགོད༔ སློབ་མ་རྣམས་ཀྱིས་ཕྱག་འཚལ་འདི་སྐད་ཞུའོ༔ ཀྱེ༔ རྡོ་རྗེ་རྒྱལ་པོ་བདེ་གཤེགས་རྒྱལ་བའི་གདུང་༔ སངས་རྒྱས་ཐམས་ཅད་འདུས་པའི་ངོ་བོ་ཉིད༔ བདག་ཅག་རྣམས་ལ་བརྩེ་བས་དགོངས་སུ་གསོལ༔ བདག་ནི་ཚེ་འདིར་བྱང་ཆུབ་སྒྲུབ་འདོད་ཅིང་༔ གསང་བ་སྔགས་ཀྱི་ཐེག་མཆོག་སྤྱད་འདོད་པས༔ ཐབས་ཤེས་ཐུགས་རྗེས་བདག་ཅག་སྨིན་པར་མཛོད༔ སློབ་དཔོན་གྱིས༔ ཀྱེ་ཧོ་ཁྱེད་ཅག་འདིར་ཚོགས་རྣམས༔ བྱང་ཆུབ་ལམ་ལ་འཇུག་འདོད་ན༔ སྣོད་ལྡན་དམ་ཚིག་བསྲུང་ནུས་སམ༔ ཐེག་པ་མཆོག་ལ་སྤྱོད་འདོད་ན༔ ཚེ་འདི་བློ་ཡིས་གཏོང་ཕོད་དམ༔ ལན་གསོལ་བ༔ རྒྱལ་བའི་གདུང་འཛིན་འགྲོ་བའི་མགོན༔ དཔལ་ལྡན་བླ་མ་དགོངས་སུ་གསོལ༔ བདག་ཅག་སྣོད་ལྡན་དམ་ཚིག་བསྲུང་༔ ཚེ་འདི་བློས་གཏོང་བྱང་ཆུབ་བསྒྲུབ༔ བླ་མ་རིགས་བདག་དཀྱིལ་འཁོར་ལྷ༔ ནམ་ཡང་མི་སྤང་བསྒྲུབ་པར་བགྱིད༔ བདག་ཅག་བརྩེ་བས་རྗེས་སུ་བཟུང་༔ སློབ་དཔོན་གྱིས༔ ཀྱེ༔ རིགས་ཀྱི་བུ་རྣམས་ལེགས་པར་ཉོན༔ འདས་དང་མ་འོངས་ད་ལྟར་གྱི༔ དུས་གསུམ་སངས་རྒྱས་ཐམས་ཅད་ཀྱི༔ བླ་མེད་ཆོ་ག་འདི་མཁྱེན་ནས༔ འབྲས་བུ་རྡོ་རྗེའི་སྐུ་གྲུབ་ཅིང་༔ བདག་གཞན་དོན་གཉིས་ལྷུན་གྱིས་གྲུབ༔ དེང་འདིར་སྐལ་ལྡན་ཁྱེད་རྣམས་ཀྱང་༔ ཆོ་ག་ཟབ་མོ་འདིར་ཞུགས་ལ༔ ཉོན་མོངས་འདུལ་བའི་སྡོམ་པ་དང་༔ བླ་མེད་ས་བོན་དམ་ཚིག་བསྲུང་༔ བདག་གི་རྗེས་སུ་ཡང་དག་ཞུགས༔ ཅེས་གནང་བ་བྱིན་ཞིང་འདི་སྐད་བརྗོད་དོ༔ འོ་ལས་དང་སྐལ་པར་ལྡན་པ་ཁྱེད་རྣམས་མ་ཡེངས་པར་ཉོན་ཅིག༔ ནམ་མཁའ་འདི་གདོད་ནས་ངོ་བོ་ཉིད་ཀྱི་དག་པ་ཡིན་པས༔ ཆོས་ཀྱི་དབྱིངས་སུ་དམིགས་ལ༔ དེའི་དབུས་སུ་ཆོས་དབྱིངས་འགྱུར་མེད་སྤྲོས་པ་དང་བྲལ་བའི་ལྷ་ཆོས་སྐུ་སྣང་བ་མཐའ་ཡས༔ ལོངས་སྐུ་འཕགས་པ་མ་རིག་མུན་སེལ་ལ་འཁོར་སྤྲུལ་སྐུའི་ལྷ་ཚོགས་སངས་རྒྱས་བྱང་སེམས་མཁའ་འགྲོ་ཆོས་སྐྱོང་དང་བཅས་པ་ཐམས་ཅད་མངོན་སུམ་དུ་བདག་ཅག་ལ་སོགས་པའི་འགྲོ་བ་མཐའ་ཡས་ཤིང་མུ་མེད་པ་རྣམས་ཀྱི་སྐྱབས་མགོན་དུ་ལྷམ་མེ་ལྷན་ནེར་བཞུགས་པའི་མོས་པ་རྩེ་གཅིག་ཏུ་དུང་དུང་བ་ལན་གསུམ་བསྐྱེད་ལ༔ དུས་ད་ནས་བཟུང་སྟེ་ཇི་སྲིད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་སྙམ་པའི་འདུན་པས་འདིའི་རྗེས་བཟློས་མཛོད༔ ན་མོ་ཕྱོགས་བཅུའི་ཞིང་གི་རྡུལ་སྙེད་ཀྱི༔ བླ་མ་རྒྱལ་བ་སྲས་དང་བཅས༔ སྐྱབས་གྱུར་འཕགས་པ་བྱང་ཆུབ་སེམས༔ མ་ལུས་བདག་ལ་དགོངས་སུ་གསོལ༔ རྐང་གཉིས་གཙོ་བོ་སངས་རྒྱས་དང་༔ ཞི་བ་ཆགས་བྲལ་དམ་པའི་ཆོས༔ ཚོགས་ཀྱི་མཆོག་གྱུར་དགེ་འདུན་སྡེ༔ བདག་ནི་གུས་པས་སྐྱབས་སུ་མཆི༔ སྐུ་བཞིའི་བདག་ཉིད་རྡོ་རྗེ་འཆང་༔ དཔལ་ལྡན་རྩ་བའི་བླ་མ་དང་༔ མཆོག་དང་ཐུན་མོང་དངོས་གྲུབ་བདག༔ ཡི་དམ་རྒྱལ་བའི་དཀྱིལ་འཁོར་ལྷ༔ ལེགས་སྦྱིན་རྟེན་འབྲེལ་ཀུན་གྱི་བདག༔ བར་ཆད་སེལ་ཞིང་མཁའ་འགྲོ་མ༔ རྩ་བ་གསུམ་ལ་སྐྱབས་སུ་མཆི༔ རྣམ་དག་སྤྲོས་བྲལ་ཆོས་ཀྱི་སྐུ༔ ངེས་པ་ལྔ་ལྡན་ལོངས་སྤྱོད་རྫོགས༔ གང་ལ་གང་འདུལ་སྤྲུལ་པའི་སྐུ༔ བདག་སོགས་འགྲོ་རྣམས་སྐྱབས་སུ་མཆི༔ ལན་གསུམ་བརྗོད༔ སོ་ཐར་གྱི་སྡོམ་པ་བླང་བ་ནི༔ ཧོ༔ དམ་པ་མཆོག་གི་སྤྱན་སྔ་རུ༔ སོ་ཐར་སྡོམ་བཟུང་མི་གཏོང་བསྒྲུབ༔ ལུས་ངག་ཡིད་ཀྱིས་འགྲོ་བ་ལ༔ གནོད་པ་སྤང་ཞིང་དགེ་བ་བསྒྲུབ༔ དགེ་བསྙེན་དགེ་ཚུལ་དགེ་སློང་གི༔ སོ་སོར་ཐར་པའི་གནང་བཀག་རྣམས༔ བདག་གིས་ཚུལ་བཞིན་སྤྱད་ཅིང་སྲུང་༔ དེ་ནས་སྨོན་པའི་སེམས་བསྐྱེད་ནི༔ དེ་རིང་དུས་གཉན་མཆོག་འདི་ནས༔ ཁམས་གསུམ་འགྲོ་བ་མཐའ་དག་ལ༔ ཕ་མའི་འདུ་ཤེས་ཉེར་བཞག་ཅིང་༔ མ་བསྒྲལ་བ་རྣམས་བསྒྲལ་བ་དང་༔ མ་གྲོལ་བ་རྣམས་འགྲོལ་བའི་ཕྱིར༔ དབུགས་མ་ཕྱུང་རྣམས་དབུགས་དབྱུང་བྱ༔ སྨོན་པ་མཆོག་གི་སེམས་བསྐྱེད་དོ༔ ལན་གསུམ༔ འཇུག་པ་ནི༔ སྔོན་ཚེ་རྒྱལ་བ་དེ་བཞིན་གཤེགས༔ བྱང་ཆུབ་སེམས་བསྐྱེད་སྡོམ་གནས་ལྟར༔ ཕ་རོལ་ཕྱིན་དྲུག་སྡོམ་པ་གསྲུང་༔ བརྩོན་འགྲུས་བརྩམ་ཞིང་ཐམས་ཅད་བསྒྲལ༔ ཚུལ་ཁྲིམས་རྣམ་གསུམ་ཡང་དག་བསྲུང་༔ མ་ལུས་འགྲོ་བ་ཡོངས་སྒྲོལ་ཏེ༔ མྱ་ངན་འདས་པ་དེ་བཞིན་གཤེགས༔ འཕགས་པའི་གོ་འཕང་མཆོག་ལ་འགོད༔ དེ་ནས་སྡོམ་པ་བཟུང་བ་ནི༔ དཀོན་མཆོག་གསུམ་བཟུང་མི་གཏོང་ངོ་༔ སྤྱན་རས་གཟིགས་དབང་རྟག་ཏུ་བསྒྲུབ༔ སངས་རྒྱས་དཀོན་མཆོག་དམ་ཚིག་ཏུ༔ སྐྱོན་རྣམས་སྤངས་ཤིང་ཡོན་ཏན་སྤེལ༔ དམ་ཆོས་དཀོན་མཆོག་དམ་ཚིག་ཏུ༔ ཡི་གེ་འབྲི་མཆོད་ཁ་ཏོན་བགྱིད༔ དགེ་འདུན་དཀོན་མཆོག་དམ་ཚིག་ཏུ༔ སྡོམ་པ་བསྲུང་ཞིང་ལྟ་ལོག་སྤང་༔ རྡོ་རྗེ་རིགས་ཀྱི་དམ་ཚིག་ཏུ༔ རྡོ་རྗེ་དྲིལ་བུའི་ཕྱག་རྒྱ་དང་༔ བྱང་ཆུབ་སེམས་ལ་ཡང་དག་བལྟ༔ མི་བསྐྱོད་པ་ཡི་དམ་ཚིག་ཡིན༔ རིན་ཆེན་རིགས་ཀྱི་དམ་ཚིག་ཏུ༔ སྦྱིན་པ་རྣམ་བཞི་རྟག་ཏུ་སྦྱིན༔ རིན་ཆེན་རིགས་ཀྱི་དམ་ཚིག་ཡིན༔ པདྨ་རིགས་ཀྱི་དམ་ཚིག་ཏུ༔ ཐེག་པ་གསུམ་གྱི་ཆོས་རྣམས་བཤད༔ པདྨ་རིགས་ཀྱི་དམ་ཚིག་ཡིན༔ ལས་ཀྱི་རིགས་ཀྱི་དམ་ཚིག་ཏུ༔ འགྲོ་བའི་དོན་ལ་བརྩོན་པར་བྱ༔ ལས་ཀྱི་རིགས་ཀྱི་དམ་ཚིག་ཡིན༔ དེ་བཞིན་རིགས་ཀྱི་དམ་ཚིག་ཏུ༔ དཀྱིལ་འཁོར་གསུམ་དང་འབྲལ་མི་བྱ༔ དེ་བཞིན་རིགས་ཀྱི་དམ་ཚིག་ཡིན༔ ཆོས་ཀྱི་སྐུ་ཡི་དམ་ཚིག་ཏུ༔ ལྟ་བ་སྤྲོས་བྲལ་སྙེམས་ཐག་གཅོད༔ ཆོས་ཀྱི་སྐུ་ཡི་དམ་ཚིག་ཡིན༔ ལོངས་སྤྱོད་རྫོགས་སྐུའི་དམ་ཚིག་ཏུ༔ སྒོམ་པ་བློ་འདས་ཟང་ཐལ་སྐྱོང་༔ ལོངས་སྤྱོད་རྫོགས་སྐུའི་དམ་ཚིག་ཡིན༔ སྤྲུལ་པའི་སྐུ་ཡི་དམ་ཚིག་ཏུ༔ སྤྱོད་པ་གཏད་མེད་རང་གྲོལ་སྤྱད༔ སྤྲུལ་པའི་སྐུ་ཡི་དམ་ཚིག་ཡིན༔ ལུས་སྲོག་གཅེས་ཀྱང་དཔང་དུ་འཛུགས༔ རྩ་བ་ཡན་ལག་དམ་ཚིག་བསྲུང་༔ མཆོག་གི་བསོད་ནམས་རྡོ་རྗེའི་མཐུས༔ བདག་ཅག་རྡོ་རྗེའི་སྐུ་འགྲུབ་ཤོག༔ ཅེས་བརྗོད་ཅིང་ཕན་ཡོན་གྱི་རིམ་པ་རྒྱས་པར་བཤད་དོ༔ དེ་ནས་སློབ་མ་རྣམས་སྟོང་པར་སྦྱངས་ཤིང་༔ སྟོང་པའི་ངང་ལས་གསང་བ་ཡེ་ཤེས་ཀྱི་མཁའ་འགྲོ་མར་སྐད་ཅིག་གིས་བསྐྱེད་དེ༔ དེའི་དཔྲལ་བར་གཡུང་དྲུང་དམར་པོའི་ལྟེ་བ་ལ་ཧྲཱིཿཡིག་རྭ་བཞི་ལ་ཧ་རི་ནི་ས་བཞི་གཡས་སུ་འཁོར༔ གཡུང་དྲུང་གཡོན་དུ་འཁོར་བ་ལས་འོད་ཟེར་འཕྲོས༔ རྒྱལ་བ་རྒྱ་མཚོ་མ་རིག་མུན་སེལ་གྱི་ལྷ་ཚོགས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་སློབ་མའི་ལུས་ངག་ཡིད་གསུམ་ལ་ཐིམ་པར་བསྒོམ་ཞིང་༔ སློབ་བུ་རྣམས་མ་ཡེངས་པར་སྨིན་མཚམས་ཀྱི་གཡུང་དྲུང་དང་སྔགས་འཁོར་ལ་རིག་པ་རྩེ་གཅིག་ཏུ་གཏོད་བཅུག༔ སྤོས་སྲེག་རོལ་མོ་འཁྲོལ་ལོ༔ བྱིན་ཕེབས་པའི་རྟགས་ནི་འཁྲབ་པ་དང་འདར་བ་དང་གཏད་མེད་ཀྱི་ཉམས་སོགས་འཆར་རོ༔ མེ་ཏོག་འཐོར་བརྟན་པར་བྱ༔ དེས་ནི་དངོས་གྲུབ་རྣམ་གཉིས་མྱུར་དུ་འཐོབ་པའི་དགོས་པ་ཡོད་དོ༔ དཔེར་ན་བཅུད་བཟང་པོ་བླུགས་པའི་ཐོག་མར་སྣོད་གཙང་མར་སྦྱང་བ་ལྟ་བུའོ༔ དེ་ནས་མཎྜལ་གྲུ་བཞིའི་སྟེང་དུ་དབུས་སུ་འཁོར་ལོ༔ ཤར་དུ་རྡོ་རྗེ་ལྷོར་རིན་པོ་ཆེ་ནུབ་ཏུ་པདྨ་བྱང་དུ་རྒྱ་གྲམ་མཚམས་བཞིར་མཛེས་ཚོན་གྱིས་བྱུགས་པའི་ཚོམ་བུ་དེ་ལ་རིགས་ལྔའི་ལྷ་ཚོགས་བསྐྱེད་བསྟིམ་མཆོད་བསྟོད་བསྡུས་པ་ཞིག་བྱས་པའི་མཐར༔ དྲི་བཟང་གི་ཤིང་ལ་རྩེ་མོར་རྒྱ་མདུད་རྩ་བ་ཕྲ་བར་བཟོས་པ་མེ་ཏོག་གི་ཅོད་པན་བཏགས་པ་སློབ་བུའི་ལག་ཏུ་བཞག་ཅིང་༔ ཧཱུྃ༔ བྱང་ཆུབ་སྐུ་ལྔ་ཡེ་ཤེས་ལྔའི༔ དཀྱིལ་འཁོར་ཚོམ་བུ་དམ་པ་འདིར༔ དངོས་གྲུབ་པྲ་རྟགས་བརྟག་པའི་ཕྱིར༔ བདག་གིས་སོ་ཤིང་འདི་འདོར་བས༔ མཆོག་ཐུན་དངོས་གྲུབ་གང་འཐོབ་པའི༔ ལེགས་ཉེས་པྲ་རྟགས་གསལ་བར་ཤོག༔ ཨཱོཾ་ཨཱཿཧཱུྃ་ཏྲཱཾཿཨཱཿསིདྡྷི་ཕ་ལ་ཧཱུྃ༔ ཅེས་སྐུ་ལྔའི་དཀྱིལ་འཁོར་དུ་དམིགས་ཤིང་མོས་པ་རྩེ་གཅིག་ཏུ་དོར་བར་བྱའོ༔ ཤར་དུ་བབས་ན་རྡོ་རྗེ་རིགས་ཀྱི་དངོས་གྲུབ་འཐོབ༔ ནད་གདོན་བར་ཆད་ཞི༔ ཕྱི་མ་མི་བསྐྱོད་པའི་ཞིང་དུ་གྲོལ༔ ལྷོར་བབས་ན་རིན་ཆེན་རིགས་ཀྱི་དངོས་གྲུབ་འཐོབ༔ ཚེ་དཔལ་འབྱོར་བ་རྒྱས༔ ཕྱི་མ་དཔལ་ལྡན་དུ་སྐྱེ༔ ནུབ་ཏུ་བབས་ན་པདྨ་རིགས་ཀྱི་དངོས་གྲུབ་འཐོབ༔ ཁམས་གསུམ་སྲིད་གསུམ་ཉམས་རྟོགས་ཐམས་ཅད་དབང་དུ་འདུ༔ ཕྱི་མ་བདེ་བ་ཅན་དུ་སྐྱེ༔ བྱང་དུ་བབས་ན་ཀརྨ་རིགས་ཀྱི་དངོས་གྲུབ་འཐོབ༔ གདོན་བགེགས་འབྱུང་པོས་གླགས་མི་རྙེད༔ ཕྱི་མ་ལས་རབ་རྫོགས་པར་སྐྱེ༔ མཚམས་བཞིར་དངོས་གྲུབ་ཕྲན་ཚེགས་འཐོབ༔ སྡིག་པ་ཕྲན་ཚེགས་འདག༔ ཕྱི་མ་མཐོ་རིས་སུ་སྐྱེ༔ དབུས་སུ་བབས་ན་དེ་བཞིན་གཤེགས་པའི་དངོས་གྲུབ་འཐོབ༔ ཚེ་འདིར་མཆོག་ཐུན་གཉིས་ཀ་འགྲུབ༔ ཕྱི་མ་འཕགས་པའི་ཞིང་མཆོག་ཆོས་དབྱིངས་རྣམ་པར་དག་པའི་ཕོ་བྲང་དུ་གྲོལ༔ རྩ་བ་རང་ལ་བསྟན་ན་ངན་པས་སྤོང་དག་དང་འཆི་བསླུ་དང་ཚེ་ཆོག་སོགས་བྱའོ༔ དེ་ནས་སྲད་བུ་ལྔ་དྲིལ་དུ་བྱས་པ་ལ་རྡོ་རྗེའི་མདུད་པ་བརྒྱབ་ཅིང་འཕགས་པའི་སྙིང་པོར་རཀྵ་བཏགས་ཏེ་བཟླས་པ་སློབ་བུ་རྣམས་ཀྱི་དཔུང་པར་བཅིངས་ཏེ༔ ཧཱུྃ༔ ཡེ་ཤེས་ལྔ་ལྡན་སྲད་བུ་འདི༔ རྡོ་རྗེའི་མདུད་པས་རྒྱས་གདབ་ནས༔ ཁྱོད་ཀྱི་དཔུང་པར་བཅིངས་པ་ཡིས༔ བར་ཆད་གཡུལ་ལས་རྒྱལ་བར་ཤོག༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ བཛྲ་རཀྵ་རཀྵ༔ ཞེས་བརྗོད་དོ༔ དེ་ནས་ཀུ་ཤ་ཡི་གེ་གསུམ་གྱི་བྱིན་གྱིས་བརླབས་པ་སློབ་མ་རྣམས་ལ་སྔས་གདན་དུ་སྦྱིན་ཞིང་༔ ཧཱུྃ༔ རྩྭ་མཆོག་དམ་པ་བྱང་ཆུབ་རྫས༔ འདི་ནི་བཀྲ་ཤིས་ཡོན་ཏན་ལྡན༔ སྔོན་ཚེ་རྫོགས་པའི་སངས་རྒྱས་ཀྱིས༔ རྡོ་རྗེ་གདན་གྱི་གནས་མཆོག་ཏུ༔ བྱང་ཆུབ་རྡོ་རྗེའི་རྩྭ་འདི་ལ༔ བརྟེན་ནས་མངོན་པར་བྱང་ཆུབ་ཅིང་༔ རྡོ་རྗེ་སྐྱིལ་ཀྲུང་རྫོགས་སངས་རྒྱས༔ དེ་ཕྱིར་སྐལ་ལྡན་བུ་ཁྱོད་ཀྱིས༔ རྩྭ་མཆོག་རྡོ་རྗེའི་རྫས་མཆོག་འདི༔ སྔས་དང་གདན་དུ་ཁྱེར་མཛོད་ལ༔ སེང་གེ་བཞིན་ཉོལ་རྨི་ལམ་རྟོགས༔ ནང་པར་གང་བྱུང་བདག་ལ་སྨྲོས༔ ཅེས་བརྗོད་རྩྭ་གཏད་སློབ་བུ་རྣམས་དཀྱིལ་འཁོར་ལྷ་ཚོགས་ལ་གསོལ་བ་རྩེ་གཅིག་ཏུ་བཏབ་ཅིང་ཉལ་བར་བྱའོ༔ བཟང་པོའི་རྟགས་ནི༔ དར་འཕྱར་བ་དུང་འབུད་པ་རོལ་མོའི་རིགས་འཁྲོལ་བ༔ ཞལ་མཇལ་བ་གསུང་ཐོས་པ་ལུང་བསྟན་འཐོབ་པ༔ ཉི་ཟླ་ཤར་བ་གངས་རི་ལ་འཛེག་པ༔ མཆོད་རྟེན་ལ་བསྐོར་བ་ཉི་ཟླ་ཞོན་པ་གྱེན་ལ་འགྲོ་བ༔ རྣག་ཁྲག་ཟགས་པ་ཆས་གོས་གཟབས་པ་མེ་ཏོག་འཐུ་བ་གཏེར་སྟོན་པ་ནམ་མཁའ་ལ་འཕུར་བ༔ ཕྱག་མཚན་རྙེད་པ་གྲུ་བཏང་བ་ཟམ་ལས་བརྒལ་བ་ལ་སོགས་སོ༔ ངན་པའི་རྟགས་ནི༔ གོས་ཧྲུལ་དང་ནག་པོ་སོགས་གྱོན་པ༔ དམག་གིས་བསྐོར་བ་ཆུས་ཁྱེར་བ་རྦབ་ལ་འདྲིལ་བ༔ གཡང་ལ་ལྷུང་བ༔ ཁང་སྟོང་མང་པོ་འགྲིམ་པ༔ ཁ་ཟས་ངན་པ་ཟ་བ་ཉི་ཟླ་ནུབ་པ་སྣོད་སྟོང་ཐོགས་པའམ་རྙེད་པ༔ མཚོན་ཆ་ཆག་པ་ཕ་རོལ་དང་འཐབས་པས་རང་ཕམ་པ༔ གཅན་སྤྱང་གིས་འདྲེད་པ་སོགས་ཀྱི་རྨི་ལམ་རྣམས་སོ༔ དེ་ཡང་བཟང་ན་གསོལ་བ་གདབ་མཎྜལ་འབུལ༔ ངན་ན་རྨི་ལམ་གྱི་ཚུལ་དང་བསྟུན་ལ་རིམ་གྲོ་འགྱོད་བཤགས་བསྐང་གསོལ་ལ་སོགས་བྱའོ༔ དགུ་པ་ཕྱི་མཚམས་བཅད་པ་ནི༔ སྒྲུབ་ཁང་གི་ཕྱི་རོལ་དུ་ཐོ་བཞི་བརྩིགས་པའི་སྟེང་དུ་རྒྱལ་པོ་ཆེན་པོ་སྡེ་བཞིའི་སྐུ་ལ་བསྐྱེད་བསྟིམ་བྱས༔ གཏོར་མ་འབུལ་བ་ནི༔ ཧཱུྃ༔ རྒྱལ་པོ་ཆེན་པོ་ཡུལ་འཁོར་སྲུང་༔ སྔོན་གྱི་དམ་མཅའ་རྗེས་དགོངས་ལ༔ རྒྱན་གྱི་གཏོར་མ་འདི་བཞེས་ཏེ༔ བྱང་ཆུབ་བསྒྲུབ་ལ་བར་གཅོད་བགེགས༔ ཕོ་བྲང་ཤར་སྒོ་ཁྱོད་ཀྱིས་སྲུངས༔ དངོས་གྲུབ་འཐོབ་པའི་སྡོང་གྲོགས་མཛོད༔ ཨཱོཾ་བཛྲ་ཏིཥྛ་ར་ཙ་ཡེ་སྭཱ་ཧཱ༔ ཧཱུྃ༔ རྒྱལ་པོ་ཆེན་པོ་འཕགས་སྐྱེས་པོ༔ སྔོན་གྱི་དམ་བཅའ་རྗེས་དགོངས་ལ༔ རྒྱན་གྱི་གཏོར་མ་འདི་བཞེས་ཏེ༔ བྱང་ཆུབ་བསྒྲུབ་ལ་བར་གཅོད་བགེགས༔ ཕོ་བྲང་ལྷོ་སྒོ་ཁྱོད་ཀྱིས་སྲུངས༔ དངོས་གྲུབ་འཐོབ་པའི་སྡོང་གྲོགས་མཛོད༔ ཨཱོཾ་བྷེ་རུ་ར་ཏ་ཡེ་སྭཱ་ཧཱ༔ ཧཱུྃ༔ རྒྱལ་པོ་ཆེན་པོ་མིག་མི་བཟང་༔ སྔོན་གྱི་དམ་བཅའ་རྗེས་དགོངས་ལ༔ རྒྱན་གྱི་གཏོར་མ་འདི་བཞེས་ཏེ༔ བྱང་ཆུབ་བསྒྲུབ་ལ་བར་གཅོད་བགེགས༔ ཕོ་བྲང་ནུབ་སྒོ་ཁྱོད་ཀྱིས་སྲུངས༔ དངོས་གྲུབ་འཐོབ་པའི་སྡོོང་གྲོགས་མཛོད༔ ཨཱོཾོཾ་བྷེ་རུ་བྷཀྵ་ཡེ་སྭཱ་ཧཱ༔ ཧཱུྃ༔ བྱང་ཕྱོགས་རྒྱལ་པོ་རྣམ་ཐོས་སྲས༔ སྔོན་གྱི་དམ་བཅའ་རྗེས་དགོངས་ལ༔ རྒྱན་གྱི་གཏོར་མ་འདི་བཞེས་ཏེ༔ བྱང་ཆུབ་བསྒྲུབ་ལ་བར་གཅོད་བགེགས༔ ཕོ་བྲང་བྱང་སྒོ་ཁྱོད་ཀྱིས་སྲུངས༔ དངོས་གྲུབ་འཐོབ་པའི་སྡོངས་གྲོགས་མཛོད༔ ཨཱོཾ་བྷེ་ཤ་ར་མ་ན་ཡེ་སྭཱ་ཧཱ༔ ན་མོ་དེང་གི་གནས་མཆོག་དམ་པ་འདིར་སྒྲུབ་པའི་ཆོ་ག་མ་ཐོན་གྱི་བར་དུ་ཕྱིའི་དགྲ་བགེགས་ནང་དུ་མི་བཏང་ཞིང་ནང་གི་དངོས་གྲུབ་ཕྱིར་མི་གཏོང་བའི་འཕྲིན་ལས་དམ་པ་མཛད་དུ་གསོལ༔ ཅེས་བཞི་ཆར་ལ་རིགས་འགྲེས་ཏེ་བརྗོད་དོ༔ དེ་ནས་དམ་སྲི་མནན་པ་ནི༔ ར་སོགས་ལ་ནང་དུ་དམ་སྲིའི་ལིངྒ་བྲི༔ སྙིང་གར་དམ་སྲི་ནན་བྱ་བ་འབྲི༔ ཐ་མ་ལ་དམ་སྲི་ས་ག་པ་རི་མཱ་ར་ཡ་ཛཿནན༔ ཏྲེའུ་ཏྲེའུ་ཡ༔ ན་མ་ཤྭ་ཛ༔ ཁུག་ནན༔ ཅེས་བྲིས་ལ་སྒྲུབ་ཁང་གི་ཕྱི་སྒོའི་ཐེམ་པའི་འོག་ཏུ་མནན་ནོ༔ རང་ཉིད་དབང་ཆེན་དུ་བསྒོམས་ལ་ཕོ་ཉ་བསྐུལ་ཞིང་དགུག་གཞུག་དྲག་ཏུ་བྱ༔ རྒྱ་གྲམ་གྱིས་ཁ་བཅད་ཅིང་སྟེང་དུ་བྲོ་བྱ་བ་འདི་སྐད་དོ༔ ཧཱུྃ༔ དམ་སྲི་བྱ་བའི་ལས་ངན་ཁྱོད༔ མ་རིག་ལས་ཀྱི་རྒྱུ་ལས་སྐྱེས༔ འདོད་ཆགས་ཞེ་སྡང་གཏི་མུག་འཐི བས༔ བླ་མ་ལ་བསྡོས་བསྟན་ལ་སྡང་༔ མཆེད་ལྕམ་ཡོངས་ལ་གནོད་ཅིང་འཚེས༔ དེ་ཕྱིར་ཉེས་ཅན་རུ་ཏྲ་ཁྱོད༔ ཁྲོ་བོ་ཆེན་པོའི་བརྟུལ་ཞུགས་ཀྱིས༔ རང་དབང་མེད་པར་བཀུག་ནས་ཀྱང་༔ དྲག་ཏུ་ཁྲོས་པའི་ཏིང་འཛིན་གྱིས༔ གླིང་བཞིའི་འཇིག་རྟེན་འོག་ཏུ་མནན༔ བསྐལ་པའི་མེ་ཆེན་འབར་བས་བསྲེག༔ མཐའ་མེད་རྒྱ་མཚོའི་ཀློང་དུ་སྐྱུར༔ རྔམ་བྱེད་ཕོ་ཉའི་ཞལ་དུ་སྟོབ༔ མུན་པ་རིམ་དགུའི་དོང་དུ་སྦ༔ ཆུ་སྲིན་འབར་བའི་གྲེ་བར་བརྫངས༔ ནམ་ཡང་ཐར་པའི་དུས་མེད་པའི༔ རྡོ་རྗེ་འབར་བའི་རྒྱས་གདབ་བོ༔ དེ་ནས་བྲོ་དྲག་ཏུ་འཁྲབ་ཅིང་༔ ཧཱུྃ༔ ཆོས་སྐུ་ཐིག་ལེ་ཉག་ཅིག་རྒྱ༔ དམ་སྲི་རྒྱ་ལས་མ་འདའ་ཞིག༔ ལོངས་སྐུ་སྐུ་ལྔ་ཡེ་ཤེས་རྒྱ༔ དམ་སྲི་རྒྱ་ལས་མ་འདའ་ཞིག༔ སྤྲུལ་སྐུ་སངས་རྒྱས་སྟོང་རྩའི་རྒྱ༔ དམ་སྲི་རྒྱ་ལས་མ་འདའ་ཞིག༔ ཨཱོཾ་ཨཱཿཧཱུྃ་བཛྲ་ས་མ་ཡཱ་རྒྱ་རྒྱ་རྒྱ༔ ཨ་ལཾ་ཧཱུྃ་ལཾ་སྟམ་བྷ་ཡ་ནན༔ དེ་ནས་སྒྲུབ་ཁང་གི་ཕྱི་སྒོའི་ཡ་ཐེམ་ལ་རྟ་མགྲིན་གྱི་སྐུ་བཏགས་ཤིང་༔ ཧཱུྃ༔ སུམ་ཅུ་རྩ་གསུམ་དགའ་ལྡན་ལྷ་ཡུལ་ན༔ ཆོས་རྗེ་བཅོམ་ལྡན་ཆེན་པོས་བཀའ་སྩལ་ལྟར༔ དེང་གི་སྒྲུབ་པའི་གནས་མཆོག་དམ་པ་འདིར༔ དངོས་གྲུབ་རྣམ་གཉིས་མངོན་དུ་མ་གྱུར་བར༔ ཁྲོ་བོ་ཆེན་པོ་པདྨ་དབང་ཆེན་གྱིས༔ བར་ཆད་བྱེད་པའི་འབྱུང་པོ་མཚམས་ཆོད་ཅིག༔ ཨཱོཾ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ དེ་ནས་བདུད་རྩི་འཁྱིལ་བའི་སྐུ་ཡ་ཐེམ་གྱི་ནང་དུ་གདགས་ཤིང་༔ ཧཱུྃ༔ ཡེ་ཤེས་ཁྲོ་བོ་བདུད་རྩི་འཁྱིལ་བའི་སྐུ༔ སྤྲུལ་པའི་འོད་ཟེར་འབར་བ་ཆེན་པོ་ཡིས༔ དངོས་གྲུབ་བསྒྲུབ་ལ་བར་དུ་གཅོད་པའི་བགེགས༔ ལོག་པར་འདྲེན་པའི་ཚོགས་རྣམས་རྒྱུན་ཆོད་ལ༔ ས་འདི་ཡན་ཆད་བསྲུང་བའི་གོ་སྒོས་ཤིག༔ ཨཱོཾ་བཛྲ་ཨ་མྲྀ་ཏ་ཀུཎྜ་ལི་ཚིན་དྷ་ཚིན་དྷ་དམ་སྲི་སརྦ་མཱ་ར་ཡ་ཧཱུྃ་ཕཊ༔ རཀྵ་རཀྵ༔ བཅུ་པ་ལྷག་ཆད་གསོ་བ་ནི༔ རྡོ་རྗེ་རྒྱལ་པོ་མཆེད་ལྕམ་རྣམས་ཀྱིས་རྡོ་རྗེ་གསོར་དྲིལ་བུ་དཀྲོལ་ཞིང་ད་ལ་བསྐོར་ཏེ་ཡི་གེ་བརྒྱ་པ་བཟླ་རོལ་མོ་འཁྲོལ་ཞིང་འདི་སྐད་དོ༔ ཧཱུྃ༔ ཆོས་སྐུ་སྐྱེ་མེད་བློ་ལས་འདས་ན་ཡང་༔ འགག་མེད་རང་རྩལ་ཐུགས་རྗེའི་དཀྱིལ་འཁོར་ཤར༔ འགྲོ་དྲུག་འདྲེན་པའི་ཕོ་བྲང་ཆེན་པོ་འདིར༔ མ་རིག་མུན་སེལ་འཕགས་པའི་ལྷ་ཚོགས་རྣམས༔ ཆོས་ཀྱི་དབྱིངས་ནས་གནས་འདིར་སྤྱན་འདྲེན་ན༔ སྐུ་གསུང་ཐུགས་ཀྱིས་བྱིན་གྱིས་བརླབ་ཏུ་གསོལ༔ མོས་པའི་མཐུ་ཡིས་དབང་དང་དངོས་གྲུབ་སྩོལ༔ འདུ་འབྲལ་མེད་པའི་ངང་དུ་བཞུགས་ནས་ཀྱང་༔ ལྷག་ཆད་འགལ་འཁྲུལ་ཉམས་ཆག་བཟོད་པར་གསོལ༔ ཚངས་པར་མཛད་ནས་དངོས་གྲུབ་སྩལ་དུ་གསོལ༔ ཅེས་བརྗོད་མཆོད་བསྟོད་བསྡུས་པ་ཞིག་བྱའོ༔ བཅུ་གཅིག་པ་རྒྱན་བཀོད་པ་ནི༔ མཆེད་ལྕམ་རྣམས་ལངས་ནས་དཀྱིལ་འཁོར་གྱི་མཆོད་རྫས་རྒྱན་རྣམས་ཐོགས་ཏེ༔ ཧཱུྃ༔ བཀྲ་ཤིས་བུམ་པ་འཕགས་པའི་གཞལ་ཡང་ཁང་༔ ད་ལ་ཞིང་ཁམས་དབུས་སུ་བཞུགས་སུ་གསོལ༔ མེ་ལོང་སྐུ་བཞིའི་ཡེ་ཤེས་འདུ་འབྲལ་མེད༔ བདུད་རྩི་སྨན་མཆོད་དངོས་གྲུབ་མཆོག་གི་རྫས༔ བྷ་ལིང་ཆེན་པོ་ཐུགས་དམ་བསྐང་བའི་རྟེན༔ དམར་ཆེན་ཨརྒྷཾ་ཉོན་མོངས་བསྒྲལ་བའི་ཁྲག༔ ཕྱི་མཆོད་རྣམ་ལྔ་འདོད་ཡོན་ལོངས་སྤྱོད་རྟེན༔ མཚན་ལྡན་དྷཀྐི་གསང་མཆོད་བདེ་བའི་ཡུམ༔ རྡོ་རྗེ་དྲིལ་བུ་ཐབས་ཤེས་གཉིས་སུ་མེད༔ རྔ་དུང་རོལ་མོ་རྒྱལ་བ་མཆོད་པའི་རྟེན༔ ཕུར་པ་རལ་གྲི་བར་ཆད་སྒྲོལ་བའི་རྫས༔ མེ་ལོང་མདའ་དར་ཚོན་སྐུད་སྲུང་བའི་གུར༔ ཡོལ་བ་བླ་རེ་འཕན་གདུགས་སྤྱན་གཟིགས་རྟེན༔ གིང་ཕོ་གིང་མོ་དཔལ་གྱི་ཕོ་ཉ་བ༔ གྷ་ནའི་མཆོད་རྫས་ཀུན་བཟང་མཆོད་པའི་སྤྲིན༔ ཐམས་ཅད་ཡོངས་རྫོགས་འཕགས་པའི་ཞིང་འདིར་འབུལ༔ མ་ལུས་ཐམས་ཅད་ཕོ་བྲང་རྒྱན་དུ་བཀྲམ༔ འཕགས་པ་མ་རིག་མུན་སེལ་ལྷག་པའི་ལྷ༔ ཁྱེད་ལ་རྩེ་གཅིག་མོས་པ་གཏད་པའི་མཐུས༔ ཁམས་གསུམ་འཁོར་བ་དོང་ནས་སྤྲུགས་ནས་ཀྱང་༔ ལས་བཞི་རབ་འབྱམས་དངོས་གྲུབ་རྒྱ་མཚོའི་ཚོགས༔ བདག་ཅག་སྒྲུབ་པོ་རྣམས་ལ་སྩལ་དུ་གསོལ༔ ཅེས་བརྗོད་ཕྱི་མཆོད་རྣམ་ལྔ་ཤར་དུ་འགོད༔ ནང་མཆོད་འདོད་ཡོན་སྣ་ཚོགས་ལྷོ༔ གསང་མཆོད་སྨན་ཕུར་རཀྟ་ནུབ༔ ལས་གཏོར་རོལ་ཆས་བྱང་དུ་བཀོད༔ རྒྱན་དང་བཀོད་པས་མཛེས་པར་བརྒྱན༔ བག་དྲོ་བརྗིད་དང་ལྡན་པར་བྱའོ༔ བཅུ་གཉིས་པ་ཞལ་བཀོད་གདབ་པ་ནི༔ མཆེད་ལྕམ་རྣམས་གྲལ་དུ་འཁོད་ཅིང་༔ རྡོ་རྗེ་ལས་བྱེད་པས་རྡོ་རྗེ་སློབ་དཔོན་ལ་ཕུད་དྲངས་ཤིང་འདི་སྐད་དོ༔ ཧཱུྃ༔ རྡོ་རྗེ་རྒྱལ་པོ་བདེ་གཤེགས་རྒྱལ་བའི་སྐུ༔ རྡོ་རྗེ་རྒྱལ་ཐེབས་རྒྱལ་བའི་གདུང་གསོབ་པ༔ རྡོ་རྗེ་རིག་མ་བྱང་ཆུབ་བདེ་བའི་ལམ༔ རྡོ་རྗེ་མཚམས་པ་ཕྱི་ནང་བརྡ་སྤྲོད་པ༔ ལས་ཀྱི་རྒྱལ་ཐེབས་ཕོ་བྲང་ཕྱག་ཚང་འཛིན༔ རྡོ་རྗེ་གཡོས་པ་ལོངས་སྤྱོད་གཏེར་གྱི་མཛོད༔ རྡོ་རྗེ་དུས་འཛིན་དངོས་གྲུབ་བསྐུལ་བའི་བདག༔ རྡོ་རྗེ་ཕྱག་ཚང་འདོད་དགུའི་གཏེར་འཆང་བ༔ རྡོ་རྗེ་གར་གིང་ཕོ་ཉ་ལས་བྱེད་དེ༔ ཐམས་ཅད་མ་ལུས་བཀོད་པ་ཕུན་སུམ་ཚོགས༔ དཀྱིལ་འཁོར་ཆེན་པོའི་བཀོད་པ་ལྷུན་གྱིས་གྲུབ༔ སྟོན་པ་རྡོ་རྗེ་རྒྱལ་པོས་དགྱེས་སྐོངས་ཤིག༔ དེ་ནས་མཚན་ལྡན་མུ་དྲ་ལྔ་གསུམ་བདུན་སོགས་གང་འབྱོར་རྒྱན་གྱིས་སྤྲས་པ་རྡོ་རྗེ་སློབ་དཔོན་ལ་འབུལ་སྟེ༔ ཧཱུྃ༔ འགྲོ་བའི་མགོན་པོ་རྡོ་རྗེ་རྒྱལ་པོ་དགོངས༔ བཀྲ་ཤིས་ལྷ་མོ་སྒྱུ་འཕྲུལ་ལྟ་ན་སྡུག༔ བྱང་ཆུབ་མཆོག་གི་བདེ་བ་སྩོལ་པའི་ཡུམ༔ ཟག་མེད་ཏིང་འཛིན་བསྐྱེད་པའི་ཤེས་རབ་མོ༔ དགའ་བཞིའི་ཡེ་ཤེས་འཆང་བའི་གར་མཁན་མ༔ ལང་ཚོའི་འདབ་སྟོང་གཡོ་བའི་གཟི་བརྗིད་ཅན༔ རྡོ་རྗེ་རྒྱལ་པོ་བདེ་ཆེན་ཧེ་རུ་ཀ༔ མུ་དྲའི་མཆོད་པ་དམ་པ་འདི་བཞེས་ལ༔ བདག་ཅག་རྣམས་ལ་དགའ་བཞིའི་དངོས་གྲུབ་སྩོལ༔ མ་ཧཱ་མུ་དྲ་ཛྙཱ་ན་པུཥྩ་ཧོ༔ ཅེས་འབུལ་སློབ་དཔོན་གྱིས་བསྒོ་གདམས་ཞལ་བཀོད་འབོགས་པ་ནི༔ ཧོ༔ འདིར་ཚོགས་སྐལ་ལྡན་འདུས་པའི་ལྕམ་དྲལ་ཉོན༔ ཚེ་རབས་བསྐལ་པ་མང་པོའི་གོང་རོལ་ནས༔ ཐོས་བསམ་སྒོམ་སྒྲུབ་ཟབ་མོ་སྤྱད་པའི་མཐུས༔ ད་ལམ་དལ་འབྱོར་བཅོ་བརྒྱད་མི་ལུས་རྙེད༔ གསང་སྔགས་བླ་མེད་དཀྱིལ་འཁོར་འདིར་ཚོགས་ཤིང་༔ སྒོ་གསུམ་དཀྱིལ་འཁོར་གསུམ་གྱི་འཁྱེར་སོ་ཡིས༔ དུག་གསུམ་མ་སྤངས་སྐུ་གསུང་ཐུགས་སུ་གྲོལ༔ བསྐལ་པ་མང་པོའི་སྦྱངས་སྒྲོད་ལྟ་བཞག་ནས༔ ཚེ་གཅིག་སྒྲུབ་རྩོལ་ཙམ་ཡང་མ་སྨོས་པར༔ མཆོག་ཐུན་དངོས་གྲུབ་ཞག་གི་གྲངས་འཛིན་ཚེ༔ བརྩོན་འགྲུས་སྲོག་དང་བསྡོ་དགོས་སྐལ་ལྡན་རྣམས༔ བར་ཆད་བདུད་ནི་སྣ་ཚོགས་གཟུགས་སུ་འོང་༔ དངོས་གྲུབ་ཟབ་པར་རྐྱེན་ཡང་དེར་ཟབ་པས༔ ལེ་ལོ་མ་བྱེད་དུག་གསུམ་དབང་མ་གཏོང་༔ གཏི་མུག་གཉིད་དང་མྱོས་བྱེད་ཆང་ལ་སོགས༔ འཆལ་གཏམ་འཇོ་སྒེག་ཁོང་ཁྲོ་ང་རྒྱལ་ཚིག༔ སྒོ་གསུམ་ཉེས་ཚོགས་བྱ་བ་ཐམས་ཅད་སྤོངས༔ དད་པ་མོས་གུས་བརྩོན་འགྲུས་ངེས་འབྱུང་དང་༔ བསྐྱེད་རྫོགས་སྒོམ་བཟླས་ཐུན་དུ་ཤེས་རབ་བསྐྱེད༔ འདི་འདྲའི་དབང་སྒྲུབ་འཇིག་རྟེན་གསུམ་ན་དཀོན༔ སྤྲོ་བ་བསྐྱེད་ཅིང་བརྩོན་འགྲུས་གལ་ཆེའོ༔ ཐར་པའི་དེད་དཔོན་བྱང་ཆུབ་ས་ལམ་མཁན༔ རྡོ་རྗེ་རྒྱལ་པོའི་ཚིག་ལ་གུས་པས་ཉོན༔ བཀའ་ལས་འདས་ན་དངོས་གྲུབ་བརླག་པར་འགྱུར༔ དེ་ཕྱིར་སྙིང་ལ་བྲོ་བོར་སྐལ་ལྡན་རྣམས༔ ཅེས་ཉིན་རེ་བཞིན་བསྐུལ་ལོ༔ བཅུ་གསུམ་པ་དམ་རྫས་བཤམས་ཤིང་བྱིན་དབབ་པ་ནི༔ རིན་པོ་ཆེའི་བུམ་པའམ་ཐོད་པ་སོགས་ཀྱི་སྣོད་ཁྱད་པར་ཅན་གྱི་ནང་དུ་བདུད་རྩི་མྱོང་གྲོལ་གྱི་རིལ་བུ་མཚན་ལྡན་རིག་མས་དཀྱིལ་འཁོར་གྱི་དབུས་སུ་འགོད་ཅིང་ལྷ་ཚོགས་བསྐྱེད་བསྟིམ་དྲག་ཏུ་བྱ༔ གུ་གུལ་སོགས་སྤོས་བཟང་པོ་བསྲེག་ཅིང་འདི་སྐད་དོ༔ ཧཱུྃ༔ བདེ་གཤེགས་རྒྱལ་བ་རྒྱ་མཚོའི་དཀྱིལ་འཁོར་ལྷ༔ ཁྱེད་རྣམས་ཆོས་སྐུ་ཉག་གཅིག་སྤྲོས་བྲལ་ཡང་༔ འགག་མེད་རབ་འབྱམས་འཕྲིན་ལས་མཐའ་ཡས་ཀྱིས༔ མཁའ་དབྱིངས་ཀློང་ནས་སྤྲིན་བྲལ་ཉི་མ་ལྟར་༔ མ་རིག་མུན་སེལ་འཕགས་པས་རྗེས་དགོངས་ལ༔ གསང་བའི་རྫས་མཆོག་འདི་ལ་བྱིན་གྱིས་རློབས༔ སྒྲུབ་པོ་རྣལ་འབྱོར་བདག་ལ་དབང་བཞི་བསྐུར༔ མཆོག་ཐུན་དངོས་གྲུབ་ཕུང་པོ་བྱིན་བརླབས་སྩོལ༔ ཅེས་ད་ལ་འཆམས་སྟབས་ཀྱིས་བསྐོར་ཞིང་འདི་སྐད་དོ༔ ཧཱུྃ༔ ཆོས་དབྱིངས་ཕོ་བྲང་ནུབ་ཕྱོགས་བདེ་ཆེན་ནས༔ རྒྱལ་བ་འོད་དཔག་མེད་མགོན་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ རྣམ་དག་སྤྲོས་བྲལ་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཕོ་བྲང་རི་བོ་ཏ་ལའི་གཞལ་ཡས་ནས༔ འཕགས་མཆོག་སྤྱན་རས་གཟིགས་དབང་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ མ་འགགས་ལྷུན་གྲུབ་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ལྷོ་ནུབ་རྔ་ཡབ་གླིང་གི་གཞལ་ཡས་ནས༔ རིག་འཛིན་པདྨ་འབྱུང་གནས་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་བརྩེར་དགོངས་ལ༔ འགྲོ་འདུལ་འཕྲིན་ལས་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ མཁའ་སྤྱོད་དྷཀྐི་ཐུགས་ཀྱི་ཀློང་ཡངས་ནས། །ཛྙཱ་ན་ཌཱ་ཀི་འབུམ་ཕྲག་གཙོ་དང་འཁོར། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །མཁའ་སྤྱོད་མཁའ་འགྲོའི་གནས་ནས་སྐུར་བཞེངས་ཏེ། །སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར། །བྱིན་ཆེན་དབབ་ཅིང་དབང་མཆོག་བསྐུར་དུ་གསོལ། །སྦྱངས་པའི་ཡོན་ཏན་མཐར་ཕྱིན་ཕོ་བྲང་ནས། །ལོ་ཆེན་ཀླུ་དབང་པཎ་གྲུབ་གཙོ་དང་འ ཁོར། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །ཚད་མེད་རྣམ་བཞིའི་ཀློང་ནས་སྐུར་བཞེངས་ཏེ། །སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར། །བྱིན་ཆེན་དབབ་ཅིང་དབང་མཆོག་བསྐུར་དུ་གསོལ། །སྔོན་གྱི་སྨོན་ལམ་སད་པའི་ཕོ་བྲང་ནས། །ཉི་མ་གྲགས་པ་ཆོས་བདག་གཙོ་དང་འཁོར། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །ཟབ་གཏེར་རྒྱ་མཚོའི་ཀློང་ནས་སྐུར་བཞེངས་ཏེ། །སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར། །བྱིན་ཆེན་དབབ་ཅིང་དབང་མཆོག་བསྐུར་དུ་གསོལ། །འགྲོ་དྲུག་འདྲེན་པའི་ཐུགས་རྗེའི་གཞལ་ཡས་ནས༔ འཕགས་པ་མ་རིག་མུན་སེལ་ཡུམ་སྲས་བཅས༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ བསྐྱེད་རྫོགས་སྨིན་གྲོལ་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ པདྨ་དབང་གི་གཞལ་ཡས་ཆེན་པོ་ནས༔ རྟ་མཆོག་རྒྱལ་པོ་པདྨ་དབང་ཆེན་ཚོགས༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ དབང་དྲག་འབར་བའི་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཤར་ཕྱོགས་མངོན་པར་དགའ་བའི་ཞིང་ཁམས་ནས༔ མི་བསྐྱོད་རྡོ་རྗེ་ཡབ་ཡུམ་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ མེ་ལོང་ཡེ་ཤེས་དབྱིངས་ནས་སྐུར་བཞེངས་ཏེཿ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིརཿ བྱིན་ཆེན་དབབ་ཅིང་དབང་མཆོག་བསྐུར་དུ་གསོལཿ ལྷོ་ཕྱོགས་དཔལ་དང་ལྡན་པའི་ཞིང་ཁམས་ནསཿ རིན་ཆེན་འབྱུང་ལྡན་ཡབ་ཡུམ་གཙོ་དང་འཁོརཿ སྔོན་གྱི་ཐུགས་བསྐྱེད་སྨོན་ལམ་རྗེས་དགོས་ལ ཿ མཉམ་ཉིད་ཡེ་ཤེས་དབྱིངས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ སྣང་བ་མཐའ་ཡས་ཡབ་ཡུམ་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ སོར་རྟོགས་ཡེ་ཤེས་དབྱིངས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ བྱང་ཕྱོགས་ལས་རབ་རྫོགས་པའི་གཞལ་ཡས་ནས༔ དོན་ཡོད་གྲུབ་པ་ཡབ་ཡུམ་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ བྱ་གྲུབ་ཡེ་ཤེས་དབྱིངས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ དབུས་ཕྱོགས་སྟུག་པོ་བཀོད་པའི་གཞལ་ཡས་ནས༔ རྣམ་པར་སྣང་མཛད་ཡབ་ཡུམ་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ ཆོས་དབྱིངས་ཡེ་ཤེས་དབྱིངས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ དུས་གསུམ་སངས་རྒྱས་ཐུགས་ཀྱི་དཀྱིལ་འཁོར་ནས༔ བྱང་ཆུབ་སེམས་དཔའ་བརྒྱད་དང་སེམས་མ་བརྒྱད༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ ཚོགས་བརྒྱད་ཡུལ་དག་དབྱིངས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཐུགས་རྗེས་འགྲོ་དྲུག་སྒྲོལ་བའི་གཞལ་ཡས་ནས༔ དེ་བཞིན་གཤེགས་པ་བཅོམ་ལྡན་ཐུབ་པ་དྲུག༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ ཕ་རོལ་ཕྱིན་དྲུག་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ངོ་མཚར་བསྐལ་པ་བཟང་པོའི་གཞལ་ཡས་ནས༔ རྫོགས་པའི་སངས་རྒྱས་བདེ་གཤེགས་སྟོང་རྩ་གཉིས༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ རྒྱུ་འབྲས་མཐར་ཕྱིན་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཁྲག་འཐུང་རོལ་པའི་གཞལ་ཡས་ཆེན་པོ་ནས༔ རིགས་བཞི་དཔལ་ཆེན་ཡབ་ཡུམ་གཙོ་དང་འཁོར༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ དུག་ལྔ་རྣམ་དག་ཀློང་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ སྟེང་འོག་ཕྱོགས་བཅུ་གནས་ཡུལ་དུར་ཁྲོད་ནས༔ རྩ་གསུམ་མཁའ་འགྲོ་ཆོས་སྐྱོང་སྲུང་མའི་ཚོགས༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ རང་རང་སོ་སོའི་གནས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ རྒྱ་བོད་གནས་མཆོག་སྒྲུབ་གནས་ཐམས་ཅད་ནས༔ དངོས་གྲུབ་བརྙེས་པའི་རིག་འཛིན་ཕོ་མོ་རྣམས༔ སྔོན་གྱི་ཐུགས་བསྐྱེད་སྨོན་ལམ་རྩེར་དགོངས་ལ༔ དག་པ་མཁའ་སྤྱོད་གནས་ནས་སྐུར་བཞེངས་ཏེ༔ སྒྲུབ་པའི་གནས་མཆོག་གསང་བའི་དཀྱིལ་འཁོར་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཅེས་བརྗོད་བསྙེན་སྒྲུབ་ཀྱི་འཛབ་བགྲང་བའི་མཐར་སརྦ་ས་མ་ཡཱ༔ ཕེཾ་ཕེཾ་ཧྲིང་ཧྲིང་ཨ་ཝེ་ཤ་ཡ་ཨ་ཨཱ༔ སོགས་བརྗོད་ཅིང་ལྷ་ཚོགས་ཐམས་ཅད་སྒྲུབ་པའི་གཞལ་ཡས་བསྐྱེད་པའི་དཀྱིལ་འཁོར་ལ་ཐིམ་པར་བསྒོམ་མོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་རིམ་པ་ལ་བདུན་ཏེ༔ ལས་གཞུང་བསྲང་ཞིང་བསྙེན་སྒྲུབ་ཀྱི་རིམ་པ་དང་གཅིག༔ བར་ཆད་གདོན་བགེགས་ཉུ་ལེ་བསྐྲད་པ་དང་གཉིས༔ བསྒྲུབ་པའི་ལྟས་བརྟག་པ་དང་གསུམ༔ སློབ་མ་དཀྱིལ་འཁོར་ལ་འཇུག་པ་དང་བཞི༔ ལྷ་ངོ་སྤྲོད་པ་དང་ལྔ༔ དབང་བསྐུར་བ་དང་དྲུག༔ དངོས་གྲུབ་བླང་བ་དང་བདུན་ནོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ལས་ཀྱི་གཞུང་བསྲང་ཞིང་བསྙེན་སྒྲུབ་ལ་འཇུག་པ་ནི༔ རྒྱུན་དུ་འཕྲིན་ལས་ནར་མར་གཞུང་བསྲང་ཞིང་དུས་བཞིར་ཚོགས་དང་ལྷག་མཆོད་ཐེམ་པར་བྱ༔ དེ་ནས་བསྙེན་སྒྲུབ་ལས་སྦྱོར་ཐུན་དུ་བཅད་དེ༔ ཞག་ལྔ་བྱེད་ན་ཞག་གཅིག་བསྙེན་པའི་འཛབ་བགྲང་ཞིང་༔ ཞག་བཞི་ལ་སྒྲུབ་པ་གཙོ་བོར་འདོན༔ ཞག་བདུན་གྱི་དབང་ཡང་དེ་བཞིན་རིགས་པས་འཁྲོལ་ཤེས་པར་བྱ་ཞིང་༔ ཟླ་བ་གཅིག་བསྒྲུབ་ན་ཞག་བདུན་བསྙེན་པ་དེ་ནས་སྒྲུབ་པའི་འཛབ་དབྱངས༔ ལར་སྒྲུབ་པ་ཡུན་རིང་ཐུང་གང་ལྟར་བརྩམ་ཡང་ནམ་ལངས་ཞི་བའི་དུས་བསྙེན་པ་དུམ་རེ་བསྐྱལ་ཞིང་༔ ཐུན་མགོ་རྣམས་སུ་བསྙེན་སྒྲུབ་དལ་རེ་སྦྲེལ་ཏེ་བཟླ༔ སྐབས་སྐབས་སུ་འཕྲིན་ལས་བཞིའི་ལས་སྦྱོར་ཡང་བཟླ་བར་བྱ་བ་ནི་ཡང་དག་པའི་རིམ་པའོ༔ གཉིས་པ་སྒྲུབ་པ་ལ་བར་དུ་གཅོད་པའི་བགེགས་བསྐྲད་པ་ནི༔ སྒྲུབ་པ་ལ་ཞུགས་ནས་ཐུན་དྲུག་གམ་བཅུ་གཉིས་སུ་གིང་པ་ཆས་སུ་ཞུགས་ཏེ༔ སྒྲོལ་གིང་ལས་ཀྱི་ཕོ་ཉར་མངའ་གསོལ་བསྐྱེད་བསྟིམ་ནན་དུ་བྱ་ཞིང་༔ སྐུ་གསུང་ཐུགས་ཀྱི་བཀྲ་ཤིས་པའི་ཚིགས་བཅད་ཀྱིས་རབ་གནས་བྱས་ཏེ༔ སྒྲུབ་པའི་ཕོ་བྲང་འདུས་པའི་ལྕམ་དྲལ་རྣམས་ཀྱི་མཐའ་དཀྱིལ་ཡོངས་སུ་ཁྱབ་པར་རྒྱུག་སྟེ༔ ཞལ་ནས་ཧཱུྃ་དང་དྲགས་སྔགས་བརྗོད༔ རྐང་པ་རྡོ་རྗེའི་སྟངས་སྟབས་འཕྱོ༔ ལག་ན་ཐུན་དང་མཚོན་ཆ་དང་༔ མི་ལྤགས་བོང་བུའི་མཇེ་སོགས་ཐོགས༔ ཕོ་ཉ་ཀུན་ཐུབ་རྒྱལ་མོ་བསྐུལ་བ་འདི་སྐད་དོ༔ ཧཱུྃ༔ ཤར་ཕྱོགས་དཀར་བོ་དུང་གི་གཞལ་ཡས་ནས༔ དཔལ་ཆེན་ཐུགས་སྤྲུལ་ལས་བྱེད་དབང་མོ་ཆེ༔ ཁྲག་གི་མདོག་ཅན་བསེ་ཡི་ལན་ཕྲན་འཕྱོ༔ སྡང་མིག་སྤྱན་ལས་ཉི་ཟླའི་འོད་ཟེར་འཕྲོ༔ ཨག་ཚོམ་སྨིན་མའི་མེ་ཆེན་སྲིད་གསུམ་སྲེག༔ ཤངས་ནས་རྡོ་རྗེའི་རླུང་འཚུབ་ཐོག་ཆར་འབེབས༔ ཞལ་གདངས་ལྗགས་འདྲིལ་མེ་འབར་གློག་དམར་འཁྱུག༔ ཞལ་ནས་བསྐལ་པའི་འབྲུག་སྒྲས་སྟ ོང་གསུམ་འགེངས༔ ལག་པ་དམར་པོ་སྤུ་གྲི་འབུམ་གྱིས་གཏམས༔ སེན་མོ་ལྕགས་ཀྱུའི་རྩེ་ལས་བསྐལ་མེ་འབར༔ རལ་པའི་གསེབ་ནས་ཁྲག་གི་ཆར་པ་འབེབས༔ བ་སྤུའི་ཀློང་ནས་རྡོ་རྗེའི་ཚྭ་ཚྭ་འཐོར༔ སྨིན་མའི་མཚམས་ནས་ཁྲོ་ཆུང་བུ་ཡུག་འཚུབ༔ ཞབས་ཀྱི་འཁོར་ལོས་སྲིན་མོ་ལྔ་བརྒྱ་གཟིར༔ ཤིན་ཏུ་མི་བཟད་གཏུམ་ཆེན་ཁྲག་འཐུང་མ༔ སྲིན་མོའི་སྙིང་ཁྲག་ཁ་ཟས་སྐོམ་དུ་གསོལ༔ དཔག་ཚད་མང་པོ་འཕྱོ་ཞིང་ཉུ་ལེ་སྒྲོལ༔ ཕྱོགས་བཅུའི་བར་ཆད་འབྱུང་པོ་རྡུལ་དུ་བརླག༔ ན་བཟའ་དམར་པོ་སྲིན་གྱི་གཡང་གཞི་གྱོན༔ བདུད་ལ་བབས་ན་སྙིང་ཁྲག་དྲོན་མོ་འཐུང་༔ སྲི་ལ་བབས་ན་སྲོག་རྩ་དམར་པོ་གཅོད༔ དགྲ་ལ་བབས་ན་དུག་གི་ཁ་ཕྲུ་འདེབས༔ བགེགས་ལ་བབས་ན་ཐལ་བའི་རྡུལ་དུ་བརླག༔ དཔལ་གྱི་སྤྲུལ་པ་དཔལ་གྱི་ལས་མཁན་མོ༔ དམ་ཉམས་དགྲ་བགེགས་ལོག་འདྲེན་འབྱུང་པོ་དང་༔ བསྐྱེད་རྫོགས་སྒྲུབ་ལ་བར་ཏུ་གཅོད་པའི་བགེགས༔ དུས་ལ་རྒྱུ་བའི་ཉུ་ལེ་བཅུ་གཉིས་ཚོགས༔ རྡུལ་དུ་རློག་ལ་ཤ་རུས་དོན་སྙིང་གསོལ༔ དམ་ཚིག་ཆེན་པོའི་ཐུགས་དམ་དུས་ལ་བབས༔ མ་གཡེལ་བཅོལ་བའི་འཕྲིན་ལས་གྲུབ་པར་མཛོད༔ ཨཱོཾ་གྲུ་སུ་ཨ་པ་ཙེ༔ རུ་པ་ཙེ༔ ནེ་རེ་ཙེ༔ ཙ་མེ་ཐུན་ཐུན༔ ན་ཤ་སྟམ་བྷ་ཡ་བྱི་ན་ཡ་ག་ཕྱེ་མ་ཕྱེ་མ༔ རྡུལ་ཕྲན་རྡུལ་ཕྲན་ཙིཏྟ་རྦད་ནན༔ ཅེས་བཟླས་ཤིང་བསྐྲད་པས་ཉུ་ལེ་བར་གཅོད་བྱེད་པའི་ཚོགས་ཐམས་ཅད་དཔག་ཚད་དང་རྒྱང་གྲགས་སུ་ཡང་མི་གནས་པར་འབྲོས་པར་འགྱུར་རོ༔ འཚུབ་ཤིན་ཏུ་ཆེ་ན་ཉུ་ལེ་བཅུ་གཉིས་སམ་ཡང་ན་དམ་སྲིའི་ལིངྒ་བྲིས་ཏེ་ཧོམ་དུ་བཅུག་ནས་དགུག་གཞུག་བྱ༔ ཕོ་ཉ་བསྐུལ་ཞིང་ཨཱོཾ་སུམ་བྷ་ནིའི་སྔགས་ཤམ་དུ༔ ཨཱོཾ་གྷ་གྷ་གྷ་ཏ་ཡ༔ སརྦ་དུཥྟཱན་བཛྲ་དྷ་རོད་ཨ་ཛྙཱ་པ་ཡ་ཏི༔ སརྦ་བྷིགྣན་ཀཱ་ཡ་ཝཱཀྐ་ཙིཏྟ་སོགས་ཀྱི་ཤམ་བུ་ལ་དྲག་སྔགས་བཟླས་ཤིང་ཐུན་མཚོན་ཆ་སྣ་ཚོགས་ཀྱི་ཆར་པ་ཕབ་བོ༔ ཕྱི་ཕོ་ཉས་བསྐྲད་པ་དང་ནང་སྔགས་དམིགས་ཏིང་ངེ་འཛིན་གྱིས་བསྐྲད་པ་ཞེས་བྱ་བ་འདི་གཉིས་ནི་ཐབས་ཤེས་མ་བུས་བར་གཅོད་སྒྲོལ་བའི་ལག་ལེན་ཤིན་ཏུ་ཟབ་པའི་རིམ་པའོ༔ གྲུ་གསུམ་གྱི་ཁ་རོ་གཡམ་རྒྱ་གྲམ་བྲིས་པས་བཅད༔ སྒྲུབ་པ་གྲོལ་ནས་སྟེགས་བུའི་འོག་ཏུ་མནན་པར་བྱའོ༔ དེས་ནི་ཕྱིས་ཀྱང་སྒྲུབ་པ་ལ་བར་ཆད་མི་འབྱུང་བའི་དགོས་པ་ཡོད་དོ༔ གསུམ་པ་སྒྲུབ་པའི་ལྟས་བརྟག་པ་ནི༔ ཉམས་སྤྲོ་བ་དང་བླ་མ་མཆེད་ལྕམ་ལ་མོས་གུས་ཐུན་མོང་མ་ཡིན་པ་སྐྱེ་བ་དང་༔ བག་དྲོ་བ་ཤེས་པ་དྭངས་པ་བྱིན་ཆགས་པ་ཏིང་ངེ་འཛིན་གསལ་བ་སྒྲུབ་རྫས་ལ་འོད་འཁྱུག་པ༔ རིལ་བུ་འཕུར་ཞིང་མར་མེ་འཛིན་པ་དྲི་བཟང་འཐུལ་བ་ལ་སོགས་ཀྱི་རྟགས་ཁྱད་པར་ཅན་མངོན་སུམ་དུ་འབྱུང་བ་དང་༔ རྨི་ལམ་དུ་ཡང་གྱེན་ལ་འཛེག་པ་ཉི་མ་དང་ཟླ་བ་ཤར་བ༔ ཆུ་ཟམ་བརྒལ་བ་དར་འཕྱར་བ་དུང་བུས་པ་རོལ་མོ་བཀྲོལ་བ༔ ཁྲི་གདན་བཟང་པོ་ལ་འདུག་པ་ཁྲུས་བྱས་པ༔ རྒྱན་བཏགས་པ་བུད་མེད་བཟང་མོས་ཟས་སྟེར་བ༔ གོ་མཚོན་སོགས་ལུས་ལ་གྱོན་པ་དང་ལག་ཏུ་འཁྱེར་བ་སོགས་ཀྱི་ལྟས་རྣམས་འབྱུང་བར་འགྱུར་རོ༔ ལྟས་དེ་དག་རྣམས་ལས་ལོག་པའི་རིགས་སོགས་བྱུང་ན༔ བཤགས་རྒྱུད་བཀླག་ཅིང་ཚོགས་འཁོར་བསྐོར༔ བསྐང་བཤགས་ཆོ་ག་ཅི་མང་གཏོང་༔ མཆེད་ལྕམ་ཐམས་ཅད་ལུག་རྒྱུད་སྦྲེལ་ཞིང་འདི་སྐད་དོ༔ ཧཱུྃ༔ རྒྱལ་བའི་དཀྱིལ་འཁོར་དག་པ་ཆེན་པོ་འདིར༔ ལས་ཀྱིས་བསྒྲིབས་པའི་འགྲོ་བ་བདག་ཅག་གིས༔ བསམ་པ་བྱང་ཆུབ་མཆོག་ཏུ་སེམས་བསྐྱེད་ནས༔ ཚུལ་བཞིན་བསྙེན་སྒྲུབ་ལས་སྦྱོར་དམ་བཅས་ཀྱང་༔ མ་རིག་དབང་གིས་སྐུ་གསུང་ཐུགས་ལ་སོགས༔ རྩ་བ་ཡན་ལག་ཉམས་ཆགས་འགལ་འཁྲུལ་རྣམས༔ ཅི་མཆིས་ཆོས་དབྱིངས་ཡངས་པའི་ཀློང་དུ་བཤགས༔ དཀྱིལ་འཁོར་ལྷ་ཚོགས་རྣམས་ལ་བཟོད་པར་གསོལ༔ མཁའ་འགྲོ་ཆོས་སྐྱོང་རྣམས་ལ་བཟོད་པར་གསོལ༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཧཱུྃ༔ མ་རིག་མུན་སེལ་འཕགས་པ་དེ་བཞིན་གཤེགས༔ དཀྱིལ་འཁོར་ལྷ་ཚོགས་ཐམས་ཅད་དགོངས་སུ་གསོལ༔ འདའ་དཀའ་ཁས་བླངས་གསང་སྔགས་ཟབ་མོའི་ཆོས༔ སྤྲོས་མེད་དོན་གྱི་སྙིང་པོ་འཐོབ་བྱའི་ཕྱིར༔ སྲོག་གི་ཕྱིར་ཡང་མི་གཏོང་བསྒྲུབ་པར་བགྱིད༔ བདག་ཅག་འདུས་པའི་མཆེད་དང་ལྕམ་དྲལ་ལ༔ རྡོ་རྗེ་རྒྱལ་པོས་བྱིན་གྱིས་བརླབ་ཏུ་གསོལ༔ སྙིགས་མ་ལྔ་ལྡན་དུས་ཀྱི་ཐ་མ་འདིར༔ སངས་རྒྱས་རྣམས་ཀྱི་མཛད་པ་བདག་གིས་སྒྲུབ༔ དམ་ཚིག་གཅིག་གིས་འབྲེལ་བའི་ཕྲེང་ཐག་ལ༔ རིག་པ་སྲོག་གིས་བསྡུས་པའི་ལུ་གུ་རྒྱུད༔ བླ་མེད་སངས་རྒྱས་མ་ཐོབ་དེ་ཡི་བར༔ ལུས་དང་སྲོག་ལ་མི་བལྟ་རྩེ་གཅིག་བསྒྲུབ༔ ཁམས་གསུམ་ཕ་མ་འགྲོ་བའི་དོན་གྱི་ཕྱིར༔ བདག་གི་བསམ་པ་སྐྱོན་མེད་འགྲུབ་པར་ཤོག༔ ཅེས་བརྗོད་དོ༔ གོང་གི་བཟང་ལྟས་ལེགས་པ་ནམ་བྱུང་སྐབས་སུ་ཐོད་པར་བདུད་རྩི་བླུགས་པ་ཐོགས་ཏེ༔ མཆེད་ལྕམ་རྣམས་ལངས་ནས་མཐེབ་སྲིན་གྱིས་བདུད་རྩི་འཐོར་ཞིང་༔ ཧཱུྃ༔ འཕགས་པ་ཡབ་ཡུམ་མཁའ་ཀློང་ཡངས་པ་ནས༔ ཡེ་ཤེས་ལྔ་ཡི་བདུད་རྩི་འཕྲོ་འདུ་བསྒྱུར༔ དམ་ཚིག་ལྡན་པའི་ལྷ་སྲུང་རྒྱ་མཚོ་ཡིས༔ འཁོར་འདས་ས་ལམ་ཡོན་ཏན་བཅུད་བསྡུས་ཏེ༔ དམ་ཚིག་བདུད་རྩིར་ཡེ་ཤེས་བཅུད་ཀྱིས་རླན༔ རང་བྱུང་སྣོད་མཆོག་ཐོད་པའི་ནང་དུ་བསྐྱིལ༔ མཆོག་དང་ཐུན་མོང་དངོས་གྲུབ་རྒྱ་མཚོ་འདིས༔ ཡར་ལ་མཆོད་པས་བདེ་གཤེགས་རྒྱལ་བ་མཉེས༔ མར་ལ་མཆོད་པས་རིགས་དྲུག་ཕ་མ་ཚིམ༔ ཕར་ལ་མཆོད་པས་དམ་ཅན་ཐུགས་དམ་བསྐོང་༔ ལུས་ལ་བཏབ་པས་ནད་གདོན་བར་ཆད་ཞི༔ ངག་ལ་སྦྱར་བས་བསྙེན་སྒྲུབ་ལས་སྦྱོར་འཕེལ༔ སེམས་ལ་གསལ་བས་ཆོས་སྐུ་མངོན་དུ་འགྱུར༔ ལྗགས་ལ་མྱང་བས་དངོས་གྲུབ་ཕུང་པོ་འཐོབ༔ བླ་མ་ཡི་དམ་མཁའ་འགྲོའི་ཐུགས་དམ་བསྐང་༔ དམ་ཅན་ཆོས་སྐྱོང་སྲུང་མ་དགྱེས་པར་རོལ༔ འདུས་པའི་མཆེད་ལྕམ་རྣལ་འབྱོར་བདག་ཅག་ལ༔ མཆོག་དང་ཐུན་མོང་འཕྲིན་ལས་རྣམ་པ་བཞི༔ ཚེ་དང་བསོད་ནམས་དཔལ་འབྱོར་ཕུན་སུམ་ཚོགས༔ མ་ལུས་ཐམས་ཅད་བདག་ལ་དེང་འདིར་སྩོལ༔ ཅེས་བརྗོད་ཅིང་བདུད་རྩི་ལ་རོལ་ལོོ༔ བཞི་པ་སློབ་མ་འཇུག་པ་ནི༔ ཕོ་བྲང་ཕྱི་སྒོའི་དྲུང་དུ་སློབ་མ་རྣམས་ཚོགས་ནས༔ ལས་ཀྱི་རྒྱལ་ཐེབས་པས་གསོལ་བ་གདབ་པ་ནི༔ ཧོ༔ དགོངས་ཤིག་དཀྱིལ་འཁོར་གཉེན་པོའི་ལྷ་ཚོགས་དགོངས༔ བདག་ཅག་འདིར་ཚོགས་ལས་དང་སྐལ་པར་ལྡན༔ བསྐྱེད་རྫོགས་མྱོང་གྲོལ་མཆོག་ཐུན་དངོས་གྲུབ་སྩོལ༔ བཀའ་ཡི་སྒོ་བའི་ཚོགས་ཀྱིས་སྐབས་དབྱེ་འཚལ༔ ལྷ་ཚོགས་རྣམས་ལས་གནང་བ་ཐོབ་པར་བསམ་ཞིང་ལས་ཀྱི་རྒྱལ་ཐེབས་པས་བུམ་ཆུས་སྒྲུབ་ཁང་གི་སྒོ་དྲུང་དུ་གདོང་སོགས་ཡན་ལག་རྣམས་དག་པར་བཀྲུ༔ རྡོ་རྗེ་སེམས་དཔའི་སྒོམ་བཟླས་འབོག་ཅིང་ཡི་གེ་བརྒྱ་པ་ཅི་མང་བཟླ༔ དེ་ནས་སློབ་བུ་རྣམས་ལ་མིག་དར་དམར་པོ་རེ་བཀབ་ཅིང་༔ ཐམས་ཅད་ལུ་གུ་རྒྱུད་སྦྲེལ་ཏེ་ལས་ཀྱི་སློབ་དཔོན་གྱི་གསེར་གྱི་རྡོ་རྗེས་སྣ་ཁྲིད་ནས༔ རྡོ་རྗེ་སེམས་དཔའི་འཛབ་ཀྱི་དབྱངས་དང་བཅས་ཕོ་བྲང་ལ་སྐོར་བ་གསུམ་བསྐོར་ནས༔ ཕོ་བྲང་གཉན་པོའི་སྒོ་དྲུང་ནས་གསོལ་བ་འདི་ལྟར་གདབ་བོ༔ ཧཱུྃ༔ དཔལ་ཆེན་རིགས་ལྔ་ཁྲོ་བོའི་རྒྱལ༔ ཉོན་མོངས་བདུད་བཞི་འདུལ་བའི་ལྷ༔ ཁྲོ་གཏུམ་མི་བཟད་རྔམ་པའི་སྐུ༔ བདག་ཅག་མ་རིག་སེམས་ཅན་རྣམས༔ རིགས་དྲུག་འཁོར་བའི་ལམ་བགགས་ནས༔ བྱང་ཆུབ་རྡོ་རྗེ་མཆོག་ཐོབ་ཕྱིར༔ ཁྱེད་ཀྱིས་ཕོ་བྲང་སྒོ་ཕྱེ་ཞིག༔ ཐུགས་རྗེ་མཆོག་གིས་སྐྱང་དུ་གསོལ༔ ཅེས་ལན་གསུམ་སྒོ་བ་ཡབ་ཡུམ་ལ་ཞུ་བ་ཕུལ་ལོ༔ དེ་ནས་སྒོ་བ་ཡབ་ཡུམ་གྱིས་ལན་བཏབ་པ༔ ཧོཿཁྱེད་ཅག་འདིར་ཚོགས་སློབ་བུ་རྣམས༔ ཕོ་བྲང་འདི་རུ་འཇུག་པ་ལ༔ སྒོ་གསུམ་དམ་ཚིག་བསྲུང་དགོས་པས༔ སྐལ་ལྡན་རེ་རེའི་སྤྱོད་ཡུལ་ལས༔ སྐལ་མེད་ལོག་ལྟ་སྲེག་ཅིང་བརླག༔ དེ་ཕྱིར་དམ་ལྡན་ནང་དུ་ཤོག༔ སྐལ་མེད་ཐམས་ཅད་ཕྱིར་དེངས་ཤིག༔ ཅེས་ལན་གསུམ་བྱའོ༔ དེ་ནས་སློབ་མ་རྣམས་ཀྱིས༔ ཀྱེཿ དགོངས་ཤིག་དཔལ་ཆེན་ཡབ་ཡུམ་དགོངས༔ བདག་ཅག་འདིར་ཚོགས་སྐལ་ལྡན་བུ༔ རིགས་དྲུག་སྡུག་བསྔལ་མུན་གླིང་འདིར༔ ཐོག་མ་མེད་ནས་ལས་ཀྱིས་མནར༔ ཤིན་ཏུ་སྐྲགས་ཤིང་སྐྱི་གཡའ་ནས༔ བླ་མ་ལྷ་དང་བཅས་པ་ལ༔ སྐྱབས་ཕྱིར་ཁྱེད་ཀྱིས་ནང་དུ་ཐོང་༔ ཅེས་ཞུས་ཤིང་ལས་ཀྱི་སློབ་དཔོན་གྱིས་སྣ་ཁྲིད་ནས་ཡོལ་བའི་ཕྱི་རོལ་གྱི་བར་འཁྱམས་སུ་བཞག༔ སློབ་དཔོན་ཐམས་ཅད་ཆས་ཀྱིས་བརྒྱན་ཞིང་རོལ་མོ་འབིར༔ གུ་གུལ་བདུག༔ གིང་པ་བརྒྱད་དམ་བཞི་སོགས་ཀྱི་ལག་ན་ཐོད་དབྱུག་ཞགས་པ་ལྕགས་སྒྲོག་ལ་སོགས་འཁྱེར་ནས་དབང་ཞུ་བ་རྣམས་ལ་བརྡེག་ཅིང་འདི་སྐད་དོ༔ ཧཱུྃ༔ ཕོ་བྲང་ཆེན་པོ་དངོས་གྲུབ་འཕྲོ་བའི་གླིང་༔ ཐར་པའི་ཞིང་ཁམས་གསང་སྔགས་དཀྱིལ་འཁོར་འདིར༔ སྒོམ་སྒྲུབ་ཟབ་མོ་གསང་བའི་ཆོ་ག་ལ༔ བལྟ་བར་མི་དབང་ཉན་བཤད་སྣོད་མེད་པའི༔ བདུད་དང་ལོག་འདྲེན་འབྱུང་པོ་བྱད་མའི་ཚོགས༔ འབར་བའི་ཏིང་འཛིན་འབར་བའི་བརྟུལ་ཞུགས་ཀྱིས༔ རབ་ཏུ་གཟིར་ཞིང་ཐལ་བའི་རྡུལ་བཞིན་བརླག༔ ཧཱུྃ་ཧཱུྃ་ཕཊ་ཕཊ་སོགས་དྲག་སྔགས་ཅི་མང་བརྗོད༔ དཔལ་དབང་ཆེན་ཁྲོས་པའི་ཏིང་ངེ་འཛིན་གྱིས་བགེགས་རྣམས་བསྐྲད་དོ༔ དེ་ནས་སློབ་མ་རྣམས་ཀྱི་ལག་ན་མེ་ཏོག་ཁྱེར་ནས་ཡོལ་བའི་ཕྱི་རོལ་ནས་འདི་སྐད་ཞུའོ༔ ཧོཿ རྡོ་རྗེ་རྒྱལ་པོ་བྱམས་མགོན་བརྩེ་བའི་བདག༔ ཐུགས་རྗེས་བདག་ཅག་འདིར་ཚོགས་བུ་རྣམས་ལ༔ སྨིན་གྲོལ་ཆོས་ཀྱི་དངོས་གྲུབ་སྩལ་དུ་གསོལ༔ ཅེས་ཞུ༔ དེ་ནས་བླ་མས༔ ཀྱེ་མ༔ སྐལ་ལྡན་རིགས་ཀྱི་བུ་རྣམས་ཉོན༔ ཁྱེད་རྣམས་ལས་དང་སྐལ་བར་ལྡན༔ སྔོན་ལས་བསོད་ནམས་ཚོགས་བསགས་པས༔ ད་ལམ་ཕོ་བྲང་གཞལ་ཡས་འདིར༔ སྨིན་གྲོལ་ནོད་པའི་དུས་ལ་བབས༔ མཆོག་ཐུན་མ་ལུས་བདག་གིས་སྦྱིན༔ གསང་སྔགས་བླ་མེད་ཆོ་ག་འདི༔ གནས་ཁང་འདི་ཡི་ཕྱི་རོལ་དུ༔ དམ་མེད་ལོག་ལྟ་བདུད་ཀྱི་རིགས༔ རྟོག་གེ་འགྲན་སེམས་ཐེ་ཚོམ་ཅན༔ མ་དག་འགྲོ་ལ་མ་སྨྲ་ཞིག༔ གསང་བའི་དམ་ཚིག་འདི་སྲུངས་ན༔ མཆོག་གི་དངོས་གྲུབ་ཚེ་འདིར་འཐོབ༔ ཐུན་མོང་ཙམ་ལ་སྨོས་ཅི་དགོས༔ གསང་དམ་ཉམས་ན་དམྱལ་བར་ལྟུང་༔ རྡོ་རྗེའི་མེ་འདག་འབར་བས་བསྲེག༔ དེ་ཕྱིར་ཁྱོད་ཀྱིས་ཡང་དག་སྲུངས༔ ཨཱོཾ་ཨཱཿཧཱུྃ་ཨ་མྲྀ་ཏ་ས་མ་ཡཱ༔ ན་ར་ཀན་ཧཱུྃ༔ དེ་ནས་ཕྲེང་བ་ལག་ཏུ་གཏད་ལ༔ ཧཱུྃ༔ དམ་ཚིག་གཟུངས་ཀྱི་ཕྲེང་བ་ལ༔ རིག་པ་མི་འགྱུར་ལུ་གུ་རྒྱུད༔ བསྙེན་སྒྲུབ་ལས་སྦྱོར་ཡང་དག་ཏུ༔ ཚུལ་བཞིན་བསྒྲུབ་པའི་དམ་བཅའ་ལོང་༔ ཅེས་བརྗོད་ཨཱ་ལི་ཀཱ་ལི་བགྲང་༔ དེ་ནས་རྡོ་རྗེ་སྙིང་གར་བཞག་ཅིང་༔ ཧཱུྃ༔ རང་བྱུང་ཡེ་ཤེས་རང་སེམས་འདི༔ མ་རིག་འཛིན་པའི་མུན་པར་འཐུམས༔ ད་ནས་བརྩམས་ཏེ་བུ་ཁྱོད་ཀྱི༔ བླ་མ་འཕགས་པ་སྤྱན་རས་གཟིགས༔ སྙིང་གི་དཀྱིལ་དུ་མ་ཤར་བར༔ ཚུལ་བཞིན་ལྟ་སྒོམ་ཉམས་སུ་ལོང་༔ ཐུགས་ཀྱི་དམ་ཚིག་ཡང་དག་སྲུངས༔ དེ་ནས་བླ་མའི་ཕྱག་གཉིས་རྡོ་རྗེ་དྲིལ་བུ་དང་བཅས་རིན་ཆེན་འབར་པའི་ཕྱག་རྒྱ་སྤྱི་བོར་བཞག་ཅིང་༔ ཧཱུྃ༔ བུ་ཁྱོད་མ་ཡེངས་རྩེ་གཅིག་ཉོན༔ ང་ནི་སྐུ་གསུམ་བདག་ཉིད་མཆོག༔ འཁོར་འདས་ཐམས་ཅད་ང་ཡི་རྩལ༔ སངས་རྒྱས་ཐམས་ཅད་འདུས་པའི་སྐུ༔ འགྲོ་དྲུག་ཀུན་གྱི་འདྲེན་པ་མཆོག༔ ཁྱེད་ལ་དངོས་གྲུབ་སྦྱིན་པའི་ལྷ༔ རྡོ་རྗེ་སློབ་དཔོན་ང་ཡིན་པས༔ ང་ལ་བརྙས་པར་མི་བྱ་ཞིང་༔ སྒོ་གསུམ་ཚུལ་དང་མཐུན་པ་ཡི༔ དམ་ཚིག་རྣམས་ཀྱང་ཡང་དག་བསྲུང་༔ མ་རིག་མུན་སེལ་དཀྱིལ་འཁོར་འདིར༔ ཁྱོད་གཞུག་དངོས་གྲུབ་ཐམས་ཅད་སྦྱིན༔ དེ་ཕྱིར་སྙིང་ནས་དམ་ཚིག་སྲུངས༔ ཨཱོཾ་བཛྲ་ས་མ་ཡ་ཛ༔ སརྦ་སིདྡྷི་ཧཱུྃ༔ ཅེས་བརྗོད་དོ༔ དེ་ནས་རིན་པོ་ཆེའི་མེ་ཏོག་ཅོད་པན་དང་བཅས་པ༔ སློབ་བུའི་ལག་པ་ཐལ་མོ་སྦྱར་བའི་བར་དུ་བཟུང་ཞིང་དཀྱིལ་འཁོར་ལ་འདོར་བ་ནི༔ ཧཱུྃ༔ མ་རིག་མུན་སེལ་རྒྱལ་བའི་ཕོ་བྲང་འདིར༔ རིན་ཆེན་མེ་ཏོག་གསེར་གྱི་ཅོད་པན་ཅན༔ བདག་གིས་མོས་གུས་གདུང་བའི་བརྟུལ་ཞུགས་ཀྱིས༔ དཀྱིལ་འཁོར་ལྷ་ཚོགས་རྣམས་ལ་མཆོད་པར་འབུལ༔ ཚེ་རབས་སྔོན་གྱི་ལྷ་ལ་འབབས་པར་ཤོག༔ པུཥྤེ་པཱུ་ཙ་སརྦ་སིདྡྷི་སྟོམ༔ ཅེས་མེ་ཏོག་དོར་རོ༔ དེ་ནས་སློབ་དཔོན་གྱིས་གསེར་གྱི་ཐུར་མ་ཐོགས་ཏེ༔ ཧཱུྃ༔ སྔོན་ཚེ་མིག་མཁན་རྒྱལ་པོ་ཡིས༔ ཐུགས་རྗེའི་ཐབས་ཤེས་གསེར་ཐུར་གྱི༔ མ་རིག་རྨོངས་པའི་མིག་བསལ་ལྟར༔ དེང་འདིར་སྐལ་ལྡན་བུ་ཁྱོད་ཀྱི༔ མ་རིག་འཁྲུལ་སྣང་ལས་སྒྲིབ་མིག༔ ཡེ་ཤེས་སྤྱན་དང་ལྡན་པར་བྱ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཙཀྵུ་བྷྱ་སྭཱ་ཧཱ༔ ཅེས་མིག་དར་དཀྲོལ༔ དེ་ནས་སློབ་དཔོན་གྱིས་མེ་ཏོག་གར་བབས་ལེགས་པར་བརྟག་ཅིང་༔ ཤར་དུ་བབས་ན་སེམས་དཔའ་བཛྲ་རྩལ༔ ལྷོ་རུ་སེམས་དཔའ་རཏྣ་རྩལ༔ ནུབ་ཏུ་སེམས་དཔའ་པདྨ་རྩལ༔ བྱང་དུ་སེམས་དཔའ་ལས་རབ་རྩལ༔ ཤར་ལྷོར་བཛྲ་ལས་འབྲེལ་རྩལ༔ མཚམས་གསུམ་ལ་ཡང་དེ་བཞིན་འགྲེ༔ དབུས་སུ་དབང་ཕྱུག་འཁོར་ལོ་རྩལ༔ ཅེས་གདགས་མེ་ཏོག་ཅོད་པན་དང་བཅས་པ་སྤྱི་བོར་འགོད་ཅིང་༔ ཧཱུྃ༔ བཀྲ་ཤིས་མེ་ཏོག་ཅོད་པན་འཆང་༔ གསང་བ་རིག་འཛིན་མིང་གི་དབང་༔ སྐལ་ལྡན་ཁྱོད་ཀྱིས་ཐོབ་ནས་ཀྱང་༔ དམ་ཚིག་ཡེ་ཤེས་གཉིས་མེད་པའི༔ ཅོད་པན་མིང་གི་དབང་ཐོབ་ཤོག༔ ཨཱོཾ་སརྦ་ཨ་བྷི་ཏིཥྛ་ཨ་བྷི་ཥིཉྩ་ཧཱུྃ༔ ཅེས་བརྗོད་མེ་ཏོག་གཏོར་རོ༔ ལྔ་པ་ལྷ་ངོ་སྤྲོད་པ་ནི༔ རྡོ་རྗེ་སློབ་དཔོན་གྱིས་གསེར་གྱི་ཐུར་མ་ཐོགས་ཏེ༔ འོ་སྐལ་བ་དང་ལྡན་པའི་རིགས་ཀྱི་བུ་རྣམས་མ་ཡེངས་པར་ཉོན་ཞིག༔ རྒྱལ་བ་རྒྱ་མཚོ་འདུས་པའི་ཞིང་མཆོག༔ མ་བཅོས་ལྷུན་གྲུབ་ཀྱི་དབྱིངས་ལས་རང་ཤར་བའི་ཕོ་བྲང་ཆེན་པོ་གྲུ་བཞིར་ལྡན་པ་ནི་ཚད་མེད་བཞི་དང་ལྡན་པའི་བརྡ་ཡིན༔ སྒོ་བཞི་དང་ལྡན་པ་ནི་རྣམ་པར་ཐར་པ་ཆེན་པོའི་སྒོ་བཞི་མཚོན་པའི་བརྡ་ཡིན༔ སྒོ་བཞི་ཕྱོགས་མདོག་དང་མཐུན་པར་བསྒྱུར་བ་ནི་ཁྲག་འཐུང་རིགས་བཞི་ལ་ཞིང་ཁམས་སོ་སོར་ཡོད་པའི་བརྡ་ཡིན༔ གྲུ་ཆད་བཞི་དང་ལྡན་པ་ནི་འཕྲིན་ལས་གང་བརྩམས་ཐོགས་མེད་དུ་འགྲུབ་པའི་བརྡ་ཡིན༔ ཤར་ཕྱོགས་དཀར་པོར་སྣང་བ་ནི་མངོན་པར་དགའ་བ་ཤེལ་ལས་གྲུབ་པའི་བརྡ་ཡིན༔ ལྷོ་ཕྱོགས་སེར་པོར་སྣང་བ་ནི་དཔལ་དང་ལྡན་པ་གསེར་ལས་གྲུབ་པའི་བརྡ་ཡིན༔ ནུབ་ཕྱོགས་དམར་པོར་སྣང་བ་ནི་བདེ་ཅན་པདྨ་རཱ་ག་ལས་གྲུབ་པའི་བརྡ་ཡིན༔ བྱང་ཕྱོགས་ལྗང་གུར་སྣང་བ་ནི་ལས་རབ་རྫོགས་པ་ཨིནྡྲ་ནཱི་ལ་ལས་གྲུབ་པའི་བརྡ་ཡིན༔ དབུས་དམར་པོར་འདུག་པ་ནི་ཐུགས་རྗེ་ཆེན་པོའི་འཕྲིན་ལས་ཐོགས་པ་མེད་པས་འཁོར་འདས་ཐམས་ཅད་ལ་དབང་སྒྱུར་ཞིང་སེམས་ཅན་ཐམས་ཅད་ལས་ངན་པའི་དབང་དུ་མི་གཏོང་སྟེ་ཡེ་ཤེས་ཆེན་པོས་རང་དབང་མེད་པར་དབང་དུ་བསྡུས་ནས་ཐར་པའི་ལམ་ལ་སྦྱོར་བའི་བརྡ་ཡིན༔ སྟེང་འོག་ཐམས་ཅད་རིན་པོ་ཆེ་སྣ་ཚོགས་ཀྱི་རྒྱུ་བཀོད་པ་དུ་མས་བརྒྱན་པ་ནི་དགོས་འདོད་ཐམས་ཅད་ལྷུན་གྲུབ་ཏུ་ཡེ་ནས་བཞུགས་ཤིང་འདོད་པའི་རེ་བ་ཕྱོགས་མེད་དུ་སྐོང་པའི་བརྡ་ཡིན༔ ཉི་ཟླའི་སྐར་ཁུང་བཞི་རུ་གསལ་བ་ནི་ཐུགས་རྗེ་སེམས་ཅན་ཐམས་ཅད་ལ་འགྱུར་བ་མེད་པར་གཟིག་པའི་བརྡ་ཡིན༔ འདོད་ཡོན་གྱི་སྣམ་བུ་ལ་ལྷ་མོ་མང་པོས་གར་འཁྲབ་ཅིང་མཆོད་པའི་ཆར་སྤྲིན་གཏིབས་པ་ནི་འདོད་པའི་ཡོན་ཏན་ལྔ་མི་སྤོང་ཞིང་ལམ་དུ་སློང་བའི་བརྡ་ཡིན༔ རིན་པོ་ཆེའི་ཕ་གུ་སེར་པོར་འདུག་པ་ནི་ཆེ་བའི་ཡོན་ཏན་དུ་མ་དང་ལྡན་པའི་བརྡ་ཡིན༔ དྲ་བ་དང་དྲ་ཕྱེད་མང་པོས་བརྒྱན་པ་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པའི་བརྡ་ཡིན༔ ཀ་རྒྱན་རྣམ་པ་སྣ་ཚོགས་མཛེས་པར་བརྒྱན་པ་ནི་རྣམ་པར་ཐར་པ་ཆེན་པོ་བརྒྱད་དང་ལྡན་པའི་བརྡ་ཡིན༔ རྡོ་ཀ་མ་ལ་ཤི་ལའི་མཆོད་རྟེན་གྱི་ཕྲེང་བས་ཡོངས་སུ་བསྐོར་བ་ནི་ཁམས་གསུམ་ལས་རྣམ་པར་རྒྱལ་བའི་བརྡ་ཡིན༔ གཞལ་ཡས་ཁང་གི་ཕྱོགས་ཕྱོགས་སུ་བཀྲ་ཤིས་པའི་རྒྱལ་མཚན་རྣམས་ཀྱིས་བརྒྱན་པ་ནི་དམ་པའི་ཆོས་ཡོངས་སུ་མི་ནུབ་པའི་བརྡ་ཡིན༔ རི་དྭགས་གཉིས་གཉིས་དང་ལྡན་པ་ནི་ཉོན་མོངས་པའི་རྣམ་རྟོག་གི་དབེན་པའི་བརྡ་ཡིན༔ ཆོས་ཀྱི་འཁོར་ལོ་བཅུ་གཉིས་སུ་འདུག་པ་ནི་འགྲོ་བའི་དོན་དུ་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར་པའི་བརྡ་ཡིན༔ རིན་པོ་ཆེ་སྣ་ཚོགས་ཀྱི་གདུགས་ཕུབ་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོགས་ཡེ་ཤེས་ལྔ་ལྡན་གྱིས་འཁོར་པའི་སྡུག་བསྔལ་སྐྱོབ་པའི་བརྡ་ཡིན༔ དར་སྣ་ཚོགས་ཀྱི་ཅོད་པན་ཕྱོགས་ཐམས་ཅད་དུ་འཕུར་བ་ནི་རྣམ་རྟོག་གི་འགྱུ་བ་དྲན་རིག་དང་བྲལ་བའི་བརྡ་ཡིན༔ པདྨའི་ཕྲེང་བས་བསྐོར་བ་ནི་བག་ཆགས་ཀྱི་དྲི་མ་ཐམས་ཅད་དང་ཡོངས་སུ་བྲལ་བའི་བརྡ་ཡིན༔ དུར་ཁྲོད་བརྒྱད་ཀྱིས་བསྐོར་བ་ནི་རྣམ་ཤེས་བརྒྱད་རང་སར་དག་པའི་བརྡ་ཡིན༔ རྡོ་རྗེའི་ཕྲེང་བས་བསྐོར་བ་ནི་ཆོས་དབྱིངས་ཀྱི་ཞིང་ཁམས་གཞོམ་གཞིག་དང་བྲལ་བའི་བརྡ་ཡིན༔ ཡེ་ཤེས་ཀྱི་མེ་ཁ་དོག་ལྔ་ལྡན་དུ་འབར་བ་ནི་ཕྱིན་ཅི་ལོག་པའི་རྣམ་རྟོག་ཐམས་ཅད་བསྲེག་པའི་བརྡ་ཡིན༔ དེ་ལྟ་བུའི་ཕོ་བྲང་གི་དབུས་སུ་དབང་གི་བུམ་མཆོག་ཟླུམ་པོ་ལ་མཚན་ཉིད་ཐམས་ཅད་ཡོངས་སུ་རྫོགས་པ་ནི་ཆོས་སྐུ་སྤྲོས་པ་དང་བྲལ་བའི་བརྡ་ཡིན༔ བུམ་པའི་ཁ་རྒྱན་རྨ་བྱའི་སྒྲོ་ཁ་དོག་ལྔ་ལྡན་གྱིས་བྱས་པ་ནི་ལོངས་སྐུ་རིགས་ལྔ་མཚོན་པའི་བརྡ་ཡིན༔དཔག་བསམ་ཤིང་གི་སྡོང་པོས་བརྒྱན་པ་ནི་ཐུགས་རྗེ་སྤྲུལ་སྐུས་འགྲོ་བའི་དོན་མཛད་པའི་བརྡ་ཡིན༔ གཟུངས་ཐག་སྣ་ལ་རྡོ་རྗེ་བཏགས་པ་ནི་རང་རིག་གདོད་མའི་ཡེ་ཤེས་ལ་འགྱུར་བ་མེད་པའི་བརྡ་ཡིན༔ མགུལ་ཆིངས་ཁ་དོག་ལྔ་ལྡན་དུ་འདུག་པ་ནི་ཉོན་མོངས་དུག་ལྔ་ཡུལ་ནས་དག་པའི་བརྡ་ཡིན༔ གཟུངས་ཐག་ལྔ་དྲིལ་དུ་འདུག་པ་ནི་ཡེ་ཤེས་ལྔས་འགྲོ་བ་འདྲེན་ཞིང་སྐུ་ལྔའི་དངོས་གྲུབ་སྩོལ་བའི་བརྡ་ཡིན༔ ལྷ་ཚོགས་ཐམས་ཅད་ཀྱི་འདྲ་འབག་ཙཀ་ལིས་བརྒྱན་པ་ནི་སྐུ་དང་ཞིང་ཁམས་འདུ་འབྲལ་མེད་པའི་བརྡ་ཡིན༔ བདུད་རྩི་སྨན་གཏོར་རཀྟས་བརྒྱན་པ་ནི་ཐབས་ཤེས་འདུ་འབྲལ་མེད་ཅིང་དཀྱིལ་འཁོར་ལྷ་ཚོགས་ལ་མཆོད་པས་ཡང་དག་པར་མཆོད་པའི་བརྡ་ཡིན༔ རྒྱལ་མཚན་དང་འཕན་དར་སྣ་ཚོགས་འཕྱར་བ་ནི་སངས་རྒྱས་ཀྱི་བསྟན་པ་མི་ནུབ་ཅིང་སྙན་གྲགས་ཕྱོགས་བཅུར་སྒྲོགས་པའི་བརྡ་ཡིན༔ མདའ་བཞི་གྲི་བཞི་ཚོན་སྐུད་ཀྱི་དྲ་བ་དྲ་ཕྱེད་རྣམས་ཀྱིས་བརྒྱན་པ་ནི་བར་ཆད་ཀྱི་ཚོགས་ཐམས་ཅད་ཡོངས་སུ་བསལ་ནས་འཕྲིན་ལས་ཀྱི་ཚོགས་བསམ་གྱིས་མི་ཁྱབ་པ་དང་ལྡན་པའི་བརྡ་ཡིན༔ ཡོལ་བ་བླ་རེས་མཛེས་པར་བརྒྱན་པ་ནི་རྒྱལ་བའི་ཕོ་བྲང་དང་གཉིས་སུ་མེད་པའི་བརྡ་ཡིན༔ གདན་ཁྲི་བཀོད་པ་དང་ལྡན་པར་བརྩིགས་པ་ནི་བདུད་དང་ལོག་པར་འདྲེན་པ་ཐམས་ཅད་ཟིལ་གྱིས་གནོན་པའི་བརྡ་ཡིན༔ རྔ་དུང་རོལ་མོ་སྣ་ཚོགས་སྒྲོག་པ་ནི་ཆོས་ཀྱི་སྒྲ་དབྱངས་ཕྱོགས་བཅུར་སྒྲོགས་པའི་བརྡ་ཡིན༔ གཞན་ཡང་བཀོད་པའི་བྱེ་བྲག་བསམ་གྱིས་མི་ཁྱབ་པས་བརྒྱན་པ་ནི་དབང་བཞིའི་ཆུ་བོ་མ་ཉམས་པར་དད་ལྡན་རྣམས་ལ་དབབ་པའི་བརྡ་ཡིན༔ རྡོ་རྗེ་སློབ་དཔོན་རྒྱལ་ཐེབས་གཟུངས་མ་མཆེད་ལྕམ་ཐམས་ཅད་ཚང་བར་བཞུགས་པ་ནི་ཕུན་སུམ་ཚོགས་པ་ལྔ་དང་ལྡན་པའི་བརྡ་ཡིན༔ དེ་ལྟ་བུའི་གཞལ་ཡས་ཁང་ཆེན་པོའི་དབུས་སུ་དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་མ་རིག་མུན་སེལ་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དམར་པོ་བྱི་རུའི་སྡོང་པོ་ལ་ཏིལ་གྱི་མར་ཁུས་བྱུགས་པ་ལྟར་དམར་གསལ་མདངས་དང་ལྡན་པར་བཞུགས་པ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་རྗེ་ལ་དབང་པའི་དཔལ་དང་ལྡན་ཞིང་འགྲོ་དྲུག་གི་སེམས་ཅན་རྣམས་འཁོར་བ་ལས་སྒྲོལ་བའི་ཕྲིན་ལས་ཟབ་མོ་མངའ་བས་རྗེས་སུ་བཟུང་བའི་ཕྱིར་རྗེས་སུ་ཆགས་པའི་བརྡ་ཡིན༔ ཞལ་གཅིག་དང་ལྡན་པ་འདི་ཆོས་སྐུ་ཉག་གཅིག་དང་ལྡན་པའི་བརྡ་ཡིན༔ ཕྱག་བཞི་དང་ལྡན་པ་འདི་ཚད་མེད་པའི་ཕྲིན་ལས་བཞི་དང་ལྡན་པའི་བརྡ་ཡིན༔ ཞབས་སྐྱིལ་ཀྲུང་དུ་བཞུགས་པ་ནི་འཁོར་འདས་གཉིས་སུ་མེད་པའི་བརྡ་ཡིན༔ དང་པོའི་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པ་ནི་ཐབས་ཤེས་འདུ་འབྲལ་མེད་པའི་བརྡ་ཡིན༔ དེའི་འོག་མ་གཉིས་ཀྱིས་ཕྲེང་བ་དང་བུམ་པ་བསྣམས་པ་འདི་བསྙེན་སྒྲུབ་ལས་སྦྱོར་རྩོམ་པ་ལ་དངོས་གྲུབ་འདོད་འབྱུང་གི་ཆར་འབེབས་པའི་བརྡ་ཡིན༔ དབུ་སྐྲ་ཐོར་ཚུགས་ལ་པྲོག་ཞུས་བརྒྱན་པ་ནི་ཉོན་མོངས་པའི་ཚོགས་ལས་རབ་ཏུ་རྒྱལ་ཞིང་སྐུ་དང་ཡེ་ཤེས་མངོན་དུ་འགྱུར་བའི་བརྡ་ཡིན༔ སྤྱི་གཙུག་ཏུ་རིགས་ཀྱི་བདག་པོ་སྣང་བ་མཐའ་ཡས་བཞུགས་པ་ནི་ཆོས་སྐུའི་ལྷ་ཚོགས་དང་འདུ་འབྲལ་མེད་པའི་བརྡ་ཡིན༔ རྒྱན་ཕྲེང་དུ་མས་ཡོངས་སུ་བརྒྱན་པ་ནི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གི་ཚོགས་ཐམས་ཅད་མ་འདྲེས་པར་སོ་སོར་སྟོན་པའི་བརྡ་ཡིན༔ དེའི་པང་དུ་ཡུམ་མཆོག་ཆེན་མོ་དུས་གསུམ་གྱི་སངས་རྒྱས་ཐམས་ཅད་ཡོངས་སུ་བསྐྱེད་པའི་མཁའ་འགྲོ་མ་གསང་བ་ཡེ་ཤེས་ཀྱི་ལྷ་མོ་དམར་མོ་སྐུ་ལ་གཉིས་མེད་དུ་འཁྲིལ་བ་ནི་དགའ་བ་བཞིའི་ཡེ་ཤེས་ཀྱི་དངོས་གྲུབ་སྩོལ་པའི་བརྡ་ཡིན༔ ཡུམ་མཆོག་དེའི་ཕྱག་གཡས་ན་པདྨས་མཚན་པའི་གྲི་གུག་བསྣམས་པ་ནི་མ་རིག་པའི་སྐྱེ་ཤི་རྩད་ནས་གཅོད་པའི་བརྡ་ཡིན༔ ཕྱག་གཡོན་ན་ཚེའི་བུམ་པ་བསྣམས་པ་ནི་འཆི་མེད་ཚེའི་དངོས་གྲུབ་སྩོལ་བའི་བརྡ་ཡིན༔ གཞོན་ནུའི་མདངས་ལྡན་དམར་ལ་ལང་ཚོ་རབ་ཏུ་རྒྱས་པ་ནི་བདེ་བའི་ཡོན་ཏན་ཐམས་ཅད་སྐུ་ལ་རྫོགས་པའི་བརྡ་ཡིན༔ རྒྱན་དང་ཕྲེང་བ་མང་པོས་བརྒྱན་པ་ནི་སྣང་བ་ཐམས་ཅད་དབང་དུ་འདུས་ཤིང་དབྱིངས་སུ་དག་པའི་བརྡ་ཡིན༔ གཡས་གཡོན་གཉིས་སུ་སྲས་པོ་ནོར་བུ་འཛིན་པ་དང་སྲས་མོ་གསང་སྔགས་འཛིན་མ་གཉིས་འདུ་འབྲལ་མེད་པར་བཞུགས་པ་ནི་ཐབས་ཤེས་དབྱེར་མེད་འཕྲིན་ལས་ཟབ་མོས་ཁམས་གསུམ་གྱི་སྐྱེ་འགྲོ་ཐམས་ཅད་མ་འབད་བཞིན་དུ་སངས་རྒྱས་ཀྱི་ཞིང་ལ་སྦྱོར་བའི་བརྡ་ཡིན༔ རྒྱབ་ཕྱོགས་སུ་པདྨ་དབང་ཆེན་བཞུགས་པ་ནི་བདུད་བཞི་དྲེགས་པ་ཅན་ཞི་བས་མི་ཐུལ་པ་རྣམས་དབང་དྲག་གི་འཕྲིན་ལས་ཟབ་མོས་ཡོངས་སུ་སྒྲོལ་བའི་བརྡ་ཡིན༔ བཅོམ་ལྡན་འདས་འཕགས་པ་སྤྱན་རས་གཟིགས་རིགས་ལྔ་ཡབ་ཡུམ་འཁོར་དུ་བསྐོར་ནས་བཞུགས་པ་ནི་སྐུ་ལྔ་ལྷུན་གྱིས་གྲུབ་པའི་བརྡ་ཡིན༔ བྱང་ཆུབ་སེམས་དཔའ་བརྒྱད་དང་སེམས་མ་བརྒྱད་ཀྱིས་བསྐོར་བ་ནི་ཚོགས་བརྒྱད་དང་ཡུལ་བརྒྱད་གནས་སུ་དག་པའི་འགག་མེད་ཀྱི་རོལ་པ་ལས་སེམས་དཔའ་སེམས་མ་ཐམས་ཅད་རང་ཤར་བའི་བརྡ་ཡིན༔ བཅོམ་ལྡན་འདས་ཐུབ་པ་དྲུག་གི་ཚོགས་ཡོངས་སུ་གསལ་བ་ནི་ཕ་རོལ་ཏུ་ཕྱིན་པ་དྲུག་གི་ངང་ནས་རྒྱུད་དྲུག་གི་འགྲོ་བ་ཐམས་ཅད་ཐར་པའི་ཞིང་དུ་འདྲེན་པའི་བརྡ་ཡིན༔ བསྐལ་པ་བཟང་པོའི་སངས་རྒྱས་སྟོང་རྩ་གཉིས་ཀྱི་སྐུ་མ་འདྲེས་པར་བཞུགས་པ་ནི་ཁམས་གསུམ་གྱི་འཁོར་བ་དོང་ནས་མ་སྤྲུགས་ཀྱི་བར་དུ་གང་ལ་གང་འདུལ་གྱི་སྐུ་རུ་སྤྲུལ་ནས་འཁོར་བ་དོང་ནས་སྤྲུག་བག་ཆགས་ཐམས་ཅད་ཕྱིར་བསྙིལ་ཏེ་ཡང་དག་པར་ཕྱིར་མི་ལྡོག་པའི་ཞིང་ལ་སྦྱོར་བའི་བརྡ་ཡིན༔ ཀྱེ་རིགས་ཀྱི་བུ་རྣམས་མོས་པའི་གདུང་ཤུགས་དྲག་པོས་མ་རིག་མུན་སེལ་འཕགས་པའི་ཞིང་ཁམས་ཆེན་པོ་འདི་ཡང་དག་པར་མཇོལ་ལ་ཅི་འདོད་པའི་དངོས་གྲུབ་ཐམས་ཅད་ཞུས་ཤིག༔ ཅེས་བརྗོད་དཀྱིལ་འཁོར་ལྷ་ཚོགས་ལ་མཎྜལ་འབུལ༔ དྲུག་པ་དབང་བསྐུར་བ་ནི་སྒྲུབ་པ་བསྙེན་སྒྲུབ་ལས་སྦྱོར་མཐའ་རུ་ཕྱིན་པའི་སྐབས་ལས་ལྡན་རྣམས་ལ་རིམ་པར་བསྐུར་ཞིང་༔ དབང་རྐྱང་བྱེད་ན་ཞག་ལྔ་གསུམ་བདུན་སོགས་ཀྱི་སྐབས་དང་བསྟུན་ཞིང་རྒྱས་བསྡུས་རིགས་པས་འཁྲོལ༔ སྒྲུབ་པ་དང་འབྲེལ་བར་བྱེད་ན་སྔོན་འགྲོ་དབང་དང་སྒྲུབ་པ་གསུམ་གབ་འཁྲུགས་སྤྲད་ཤེས་པར་བྱའོ༔ གཞུང་ལུགས་མ་ནོར་བར་བྱས་ནས་ཟབ་ལ་རྒྱས་པར་བསྐུར་བར་བྱའོ༔ བདུན་པ་དངོས་གྲུབ་བླང་བའི་རིམ་པ་ནི༔ མཚན་ལྡན་ཐོད་པའི་ནང་དུ་ཕྱེ་གཙང་མ་ཆང་གི་ཉིང་ཁུས་སྦྲུས་པ་ལ་ཨ་མྲྀ་ཏ་དང་དཀར་གསུམ་མངར་གསུམ་སྤོད་དང་མར་ཁུ་སོགས་ཀྱིས་སྦྲན་པར་གཏོར་མ་རིན་ཆེན་འབར་བ་བྱས་པ་ལ་སློབ་དཔོན་འོད་ཟེར་སྤྲོ་བསྡུས་དངོས་གྲུབ་ཀྱི་ཕུང་པོ་ཆེན་པོར་བྱིན་གྱིས་བརླབས་པ་རིག་མ་རྒྱན་གྱིས་སྤྲས་པས་ཐོགས༔ གཞན་ཡང་བདུད་རྩིའི་བུམ་པ་འབྲང་རྒྱས་ཚོགས་ཀྱི་ཡོ་བྱད་བྷ ན་ཆང་ལ་སོགས་ཐོགས་ཏེ༔ སྒྲུབ་པ་དང་དབང་སོགས་གྲོལ་བའི་དུས་ཡིན་ན་སྐྱ་རེངས་དང་པོའི་ནམ་མཁའ་ལངས་པའི་ཚེ༔ དཀྱིལ་འཁོར་མཐའ་ནས་མཆེད་ལྕམ་ཐམས་ཅད་ལངས་ཏེ་པད་སྐོར་གྱི་ཕྱག་རྒྱ་བསྒྱུར་ཞིང་བསྐུལ༔ སྒྲུབ་གཞུང་གི་ཚེ་ཡང་ཉིན་རེ་བཞིན་རིག་མས་ཐོད་ཆང་ཐོགས་ནས་དངོས་གྲུབ་ཀྱི་རྟེན་དུ་དམིགས་ཤིང་བསྐུལ་བར་བྱའོ༔ དཀྱིལ་འཁོར་ལྷ་ཚོགས་རྡོ་རྗེ་སློབ་དཔོན་མཆེད་དང་ལྕམ་དྲལ་ཐམས་ཅད་འཕགས་པའི་སྐུ་རུ་གསལ་བའི་ཐུགས་ཀ་ནས་འོད་ཟེར་སྣ་ཚོགས་ཕྱོགས་བཅུར་འཕྲོས༔ ཕྱོགས་བཅུ་དུས་གསུམ་གྱི་བདེ་གཤེགས་རྒྱལ་བ་རྒྱ་མཚོ་ཐམས་ཅད་མདུན་གྱི་ནམ་མཁར་སྤྱན་དྲངས༔ ལྷ་ཚོགས་ཐམས་ཅད་སྙོམས་འཇུག་མཛད་པས་བདུད་རྩིའི་རྒྱུན་བབས་དངོས་གྲུབ་འབྱུང་བའ ི་རྫས་རྣམས་ལ་ཐིམ་པར་བསྒོམ་ཞིང་སྙིང་པོ་འདི་བཟླའོ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཀཱ་ཡ་ཝཱཀྐ་ཙིཏྟ་གུ་ཧྱ་སིདྡྷི་ཧཱུྃ་སྭཱ་ཧཱ༔ ཅེས་མང་ཉུང་སྐབས་དང་བསྟུན་ཏེ་བཟླས་ཤིང་གདུང་བའི་དབྱངས་ཀྱིས་འདི་སྐད་དོ༔ ཧཱུྃ༔ བླ་མ་ཡི་དམ་མཁའ་འགྲོ་དགོངས༔ མ་རིག་མུན་སེལ་དཀྱིལ་འཁོར་ལྷ༔ མ་ལུས་ཐམས་ཅད་དགོངས་སུ་གསོལ༔ དང་པོ་བསྙེན་ཅིང་བར་དུ་བསྒྲུབས༔ ད་ལྟ་བདག་དང་གཉིས་སུ་མེད༔ སྐྱ་རེངས་དང་པོ་ཤར་བའི་ཚེ༔ རྡོ་རྗེ་སྲིན་པོའི་ནམ་ལངས་དུས༔ བསྙེན་སྒྲུབ་ལས་སྦྱོར་ཞག་གྲངས་ཐེམས༔ བཟླས་བརྗོད་བསྙེན་སྒྲུབ་ཁ་ཡང་ཁེངས༔ སྨན་གཏོར་ཡོ་བྱད་གཞུང་ལྟར་ཚོགས༔ སྒྲུབ་པའི་གནས་མཆོག་ཉམས་རེ་དགའ༔ རིག་འཛིན་མཆེད་ལྕམ་དམ་རེ་གཙང་༔ འཕགས་པ་ཐུགས་རྗེའི་རང་བཞིན་ཀྱང་༔ གནད་ནས་བསྐུལ་དུ་མི་འཚལ་ཡང་༔ དེ་རིང་ཐུགས་དམ་གནད་ནས་བསྐུལ༔ དངོས་གྲུབ་སྩོལ་བའི་དུས་ལ་བབས༔ སྐུ་ཡི་བྱིན་རླབས་ལུས་ལ་སྩོལ༔ བུམ་པའི་དབང་མཆོག་བསྐུར་དུ་གསོལ༔ གསུང་གི་བྱིན་རླབས་ངག་ལ་སྩོལ༔ གསང་བའི་དབང་མཆོག་བསྐུར་དུ་གསོལ༔ ཐུགས་ཀྱི་བྱིན་རླབས་སེམས་ལ་སྩོལ༔ བླ་མེད་དབང་མཆོག་བསྐུར་དུ་གསོལ༔ ཡོན་ཏན་ལྷུན་གྲུབ་དཀྱིལ་འཁོར་ནས༔ དགོས་འདོད་ཀུན་འབྱུང་དངོས་གྲུབ་སྩོལ༔ འཕྲིན་ལས་འགྲོ་འདུལ་དཀྱིལ་འཁོར་ནས༔ ལས་བཞི་རབ་འབྱམས་དངོས་གྲུབ་སྩོལ༔ འདིར་འདུས་མོས་པའི་བདག་ཅག་གིས༔ གདུང་ཤུགས་དྲག་པོས་འབོད་པའི་ཚེ༔ ཁྱེད་ཀྱི་ཐུགས་རྗེ་གཡེལ་ནས་ཀྱང་༔ དངོས་གྲུབ་བདག་ལ་མ་བསྩལ་ཏེ༔ བསྒྲུབ་པའི་འབྲས་བུ་མ་ཐོབ་ན༔ ཐུགས་བསྐྱེད་ཉམས་པར་མི་འགྱུར་རམ༔ སྔོན་གྱི་ཐུགས་དམ་ཞལ་བཞེས་ལྟར༔ བསྒྲུབ་པའི་བུ་ལ་དངོས་གྲུབ་སྩོལ༔ རྣམ་འབྱོར་བདག་ལ་དངོས་གྲུབ་སྩོལཿ སྐད་ཅིག་འདི་ལ་དངོས་གྲུབ་སྩོལ༔ མྱུར་བ་ཉིད་དུ་དངོས་གྲུབ་སྩོལ༔ ད་ལྟ་ཉིད་དུ་དངོས་གྲུབ་སྩོལ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ནྲི་བྷྲཱུྃ༔སརྦ་སིདྡྷི་ཕ་ལ་ཧོ༔ ཅེས་དངོས་གྲུབ་ཐམས་ཅད་ཐོབ་པར་བསམས་ཤིང་རྡོ་རྗེ་རྒྱལ་པོ་ཡབ་ཡུམ་སོགས་འདུས་པའི་དམ་ཚིག་གཅིག་ལ་ཞུགས་པ་ཐམས་ཅད་ཀྱིས་རྫས་ལ་རོལ་ལོ༔ སླར་སློབ་བུ་རྣམས་ཀྱིས༔ ཧཱུྃ༔ རྡོ་རྗེ་རྒྱལ་པོ་ཡབ་ཡུམ་དགོངས་སུ་གསོལ༔ མ་བསྒྲུབ་སངས་རྒྱས་མངོན་དུ་བྱེད་པའི་རྫས༔ མྱོང་གྲོལ་བུམ་པའི་དབང་གིས་བདག་སྨིན་མཛོད༔ ཅེས་ཞུ༔ དཀྱིལ་འཁོར་དབུས་ནས་བུམ་སྒྲུབ་རིལ་བུའི་ཕོ་བྲང་རིག་མ་རྣམས་ཀྱིས་དར་གྱི་འདོ་ལེ་ལ་བཏེགས་ཤིང་སློབ་དཔོན་ལ་འབུལ་ཏེ༔ ཧཱུྃ་ཧོ༔ དགོངས་ཤིག་རྡོ་རྗེ་རྒྱལ་པོ་མཆོག་དགོངས་ཤིག༔ མ་རིག་མུན་སེལ་འཕགས་མཆོག་བཅོམ་ལྡན་འདས༔ ལྷ་ཚོགས་རྣམས་དང་གཉིས་སུ་མེད་པའི་རྫས༔ བསྟེན་པས་བླ་མེད་རྫོགས་འཚང་མྱུར་དུ་རྒྱ༔ འདི་ནི་ཡིད་བཞིན་ནོར་བུ་དབང་གི་རྒྱལ༔ རྡོ་རྗེ་རྒྱལ་པོ་མཆོག་གིས་རྫས་འདི་ལོང་༔ ཅེས་དབུལ༔ སློབ་དཔོན་གྱིས་སྒྲུབ་པའི་སྒྲོམ་བུ་ཕྱག་ཏུ་བསྣམས་ཤིང་༔ ཧཱུྃ༔ ངོ་མཚར་རྫས་མཆོག་ཟག་མེད་སྙིང་པོའི་བཅུད༔ མ་རིག་མུན་སེལ་ལྷ་དང་གཉིས་སུ་མེད༔ དུས་གསུམ་བདེ་གཤེགས་རྒྱལ་བ་བསྐྱེད་པའི་ཡུམ༔ དྷཱཀྐིའི་སྐུ་ལས་སིདྡྷིའི་འོད་ཟེར་འཕྲོ༔ བདག་ལ་མཆོག་གི་དངོས་གྲུབ་སྩལ་དུ་གསོལ༔ ཅེས་བརྗོད་གནས་གསུམ་དུ་གཏུག་ཅིང་བསྙེན་སྒྲུབ་ཀྱི་འཛབ་བགྲང་ཞིང་༔ ཀཱ་ཡ་ཝཀྐ་ཙིཏྟ་སརྦ་སིདྡྷི་ཧཱུྃ་ཧཱུྃ༔ ཅེས་བཟླས༔ རྡོ་རྗེ་རྒྱལ་པོ་ཡབ་ཡུམ་རྣམས་ཀྱིས་ལྕེ་ལ་མྱང་༔ དེ་ནས་མཆེད་ལྕམ་རྣམས་ལ་དབང་བསྐུར་བ་ནི༔ ཧཱུྃ༔ གསང་བའི་ཕོ་བྲང་སྒྲུབ་པའི་བུམ་པ་འདི༔ འཕགས་པའི་སྐུ་གསུང་ཐུགས་དང་གཉིས་སུ་མེད༔ དམ་ཚིག་གཅིག་པའི་མཆེད་དང་ལྕམ་དྲལ་ལ༔ མཆོག་གི་དངོས་གྲུབ་འཐོབ་པའི་དབང་བསྐུར་རོ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཀཱ་ཡ་ཝཱཀྐ་ཙིཏྟ་སིདྡྷིི་ཨ་བྷི་ཥིཉྩ་ཧཱུྃ༔ ཅེས་དབང་བསྐུར་མཆོག་གི་རྫས་ལ་མྱོང་དུ་འཇུག་གོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་ལ་བཅུ་གཅིག་སྟེ༔ ཚེ་འགུགས་པ་དང་གཅིག༔ ལྷག་ཆད་བསྐང་བ་དང་གཉིས༔ སྨོན་ལམ་འདེབས་པ་དང་གསུམ༔ དཀྱིལ་འཁོར་བསྡུ་བ་དང་བཞི༔ གཏེར་སྦ་བ་དང་ལྔ༔ གཏོར་མ་སྐྱོང་བ་དང་དྲུག༔ ཡོན་འབུལ་བ་དང་བདུན༔ བསྔོ་བ་བྱ་བ་དང་བརྒྱད༔ བཀྲ་ཤིས་བརྗོད་པ་དང་དགུ༔ ལུས་བསྲུང་བ་དང་བཅུ༔ གནས་བསྲུང་བ་དང་བཅུ་གཅིག་གོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ཚེ་འགུགས་པ་ནི༔ རིན་པོ་ཆེའི་བུམ་པའི་སྣོད་དུ་སྨན་ལྔ་འབྲུ་ལྔ་སྙིང་པོ་ལྔ་སྦྲང་རྒོད་བུ་རམ་བ་དམར་མོའི་འོ་མ་ར་མོ་ཤག་དབང་ལག་ཅོང་ཞི་ཤ་སྙིང་འདི་རྣམས་བུམ་ཆུ་དང་ཛ་གད་ལ་སྦྱར༔ མར་གྱི་ཉི་ཟླ་རིལ་བུ་ལ་སོགས་ཀྱིས་བརྒྱན་ཅིང་༔ ཁ་རྒྱན་མགུལ་ཆིངས་སོགས་ཀྱིས་ལེགས་པར་བརྒྱན་པ་འབྲས་སམ་ནས་དཀར་མོ་བྲེ་གང་ཚོམ་བུར་བཀོད་པའི་སྟེང་དུ་བཞག༔ གཡས་སུ་ཚེ་ཟན་གཡོན་དུ་ཚེ་ཆང་མདུན་དུ་ཚེ་རྟེན་རིན་ཆེན་སྣ་ལྔ་བཏགས་པའི་མདའ་དར་རྣམས་འགོད༔ བགེགས་བསྐྲད་མཚམས་གཅོད༔ བུམ་པ་གཞལ་ཡས་ཁང་གི་ནང་དུ་བཅུད་ཀྱི་ངོ་བོ་མགོན་པོ་ཚེ་དཔག་མེད་ཀྱི་ལྷ་ཚོགས་སུ་བསྐྱེད་ཅིང་༔ ཐུགས་ཀའི་ཧྲཱིཿལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ལྷ་དང་དྲང་སྲོང་འཁོར་འདས་ལམ་གསུམ་གྱི་ནུས་པ་དང་ཡོན་ཏན་ཚེ་བསོད་དབང་ཐང་ཐམས་ཅད་རང་དབང་མེད་པར་དབང་དུ་བསྡུས་ནས་ཚེའི་རྫས་རྣམས་ལ་གཉིས་སུ་མེད་པར་ཐིམ་པར་བསམ་ཞིང་༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ བཛྲ་ཨ་ཡུ་ཛྙ་ན་ཚེ་བྷྲཱུྃ་སིདྡྷི་ཕ་ལ་ཧཱུྃ་ཧྲཱི༔ ཅེས་མང་དུ་བཟླ༔ དེ་ནས་མདའ་དར་གཡབ་ཅིང་དམིགས་པ་གོང་ལྟར་གནད་དུ་བསྣུན་ལ༔ ཧཱུྃ༔ བཅོམ་ལྡན་མགོན་པོ་ཚེ་དཔག་མེད༔ དམར་གསལ་དྲི་མེད་ལོངས་སྤྱོད་རྫོགས༔ གསང་བ་ཡུམ་དང་གཉིས་མེད་འཁྲིལ༔ སྐུ་གསུང་ཐུགས་ཀྱི་སྤྲུལ་པ་དང་༔ ཡང་སྤྲུལ་ཉིང་སྤྲུལ་མང་པོ་ལས༔ དཀྱིལ་འཁོར་ཚེ་ལྷ་གྲངས་མེད་གསལ༔ ཐུགས་རྗེའི་སྤྲུལ་པ་གློག་ལྟར་འཁྱུག༔ ཚེ་ལྷ་མགྱོགས་མ་སྐར་ལྟར་འཁྲུག༔ འཁོར་འདས་ཀུན་གྱི་ཚེ་བསོད་དཔལ༔ རྒྱལ་བ་ཀུན་གྱི་བྱིན་རླབས་དང་༔ དྲང་སྲོང་རིག་འཛིན་ནུས་མཐུའི་རྩལ༔ འོད་ཀྱི་འཕྲོ་འདུས་དབང་དུ་སྡུས༔ ཚེ་རྫས་བསྐྱེད་པའི་ལྷ་ལ་བསྟིམ༔ ལྷ་ཚོགས་ཚེ་ཡི་བདུད་རྩིར་འཁྱིལ༔ བདུད་རྩིའི་དྭངས་མ་རླངས་པའི་འོད༔ བདག་ཅག་རྣལ་འབྱོར་ལུས་ལ་ཐིམ༔ སྐུ་གསུང་ཐུགས་ཀྱི་དབང་མཆོག་ཐོབ༔ རིག་འཛིན་རྡོ་རྗེ་ཚེ་དབང་གྲུབ༔ སྤྲོས་པས་ཁམས་གསུམ་བཀྲག་དང་ལྡན༔ བསྡུས་པས་ཚེ་སྲོག་རྣམས་ལ་ཐིམ༔ སྲུང་བས་ལུས་ལ་གཟི་བརྗིད་རྒྱས༔ བཅིང་བས་རྡོ་རྗེ་ལུ་གུ་རྒྱུད༔ འཆི་མེད་ཚེ་ཡི་དངོས་གྲུབ་སྩོལ༔ ཧཱུྃ༔ བུམ་པ་འཆི་མེད་བཅུད་ཀྱིས་གང་༔ ཚེ་དཔག་མེད་དང་གཉིས་སུ་མེད༔ བདག་ཅག་རྣམས་ལ་བྱིན་གྱིས་རློབས༔ འཆི་མེད་ཚེ་ཡི་དངོས་གྲུབ་སྩོལ༔ གོང་གི་སྔགས་བརྗོད༔ ཀཱ་ཡ་ཨ་བྷི་ཥིཉྩ་ཧཱུྃ༔ ཅེས་བརྗོད་བུམ་པ་སྤྱི་བོར་གཏུག༔ བུམ་ཆུ་འཐུང་༔ ཧཱུྃ༔ མཚན་ལྡན་ཐོད་པའི་སྣོད་མཆོག་ཏུ༔ འཆི་མེད་བདུད་རྩིའི་བཅུད་ཀྱིས་གཏམས༔ སྙིང་པོ་ཚེ་ཡི་དངོས་གྲུབ་སྩོལ༔ ཝཱཀྐ་ཨ་བྷི་ཥིཉྩ་ཧཱུྃ༔ ཅེས་བརྗོད་བྷནྡྷ་མགྲིན་པར་གཏུག༔ ཚེ་ཆང་འཐུང་༔ ཧཱུྃ༔ འབྲུ་བཅུད་རོ་མཆོག་བརྒྱ་དང་ལྡན༔ ཟག་མེད་ཟས་མཆོག་ཚེ་ཡི་ཟས༔ དངོས་གྲུབ་དམ་པ་དེང་འདིར་སྩོལ༔ ཡང་དག་ཚེ་ཡི་དངོས་གྲུབ་སྩོལ༔ ཙིཏྟཱ་ཨ་བྷི་ཥིནྩ་ཧཱུྃ༔ ཅེས་བརྗོད་ཚེ་ཟན་ལ་རོལ༔ ལྷ་ཚོགས་ཚེ་རྫས་དང་གཉིས་སུ་མེད་པར་རང་ལ་ཐིམ་པར་བསམས་ཤིང་བསྙེན་པ་དུམ་ཅིག་བྱའོ༔ གཉིས་ལ་ལྷག་ཆད་ཁ་བསྐང་པ་ནི༔ རྡོ་རྗེ་དྲིལ་བུ་ཐུགས་ཀར་བསྣོལ་ཏེ༔ ཧཱུྃ༔ འཕགས་པ་མ་རིག་མུན་སེལ་གྱི༔ ལྷ་ཚོགས་བདག་ལ་དགོངས་སུ་གསོལ༔ བདག་ཅག་ཐོག་མ་མེད་པ་ནས༔ མ་རིག་གཏི་མུག་རྨོངས་པས་སྒྲིབས༔ རང་སེམས་ཆོས་སྐུར་མ་རྟོགས་ཤིང་༔ རང་རིག་ལྷ་རུ་མ་ཤར་བས༔ འཕགས་པའི་དཀྱིལ་འཁོར་ཞལ་མ་མཇལ༔ ཉེས་བྱས་འགལ་འཁྲུལ་སྣ་ཚོགས་བསགས༔ སྨིན་གྲོལ་སྒྲུབ་པ་འདིར་ཞུགས་ཀྱང་༔ ལྟ་བ་དམའ་དང་སྒོམ་པ་གཡེལ༔ བཟླས་བརྗོད་མ་དག་སྒྲ་ཟུར་ཉམས༔ མཆོད་རྫས་མ་ཚང་ནོར་འཁྲུལ་ཤོར༔ རྡོ་རྗེ་རྒྱས་པོ་ཡབ་ཡུམ་དང་༔ མཆེད་ལྕམ་ལ་སོགས་སྒྲུབ་ཟླའི་ཚོགས༔ ཐུགས་དང་འགལ་ཞིང་ནོར་འཁྲུལ་འཆལ༔ ཉེས་བྱས་སྡིག་སྒྲིབ་ཅི་མཆིས་པ༔ བྱམས་མགོན་ཐུགས་རྗེའི་ཀློང་དུ་བཤགས༔ ཕྱིན་ཆད་ནོངས་པར་མ་གྱུར་ཅིག༔ ཅེས་བརྗོད་དབྱངས་གསལ་བྱེད་དང་ཡི་གེ་བརྒྱ་པ་ཅི་མང་བཟླའོ༔ གསུམ་པ་སྨོན་ལམ་གདབ་པ་ནི༔ རྡོ་རྗེ་སློབ་དཔོན་གྱི་མདུན་དུ་རིག་མ་རྣམས་རྒྱན་གྱིས་སྤྲས་ཤིང་ཐོད་ཆང་ཐོགས༔ མཆེད་ལྕམ་རྣམས་ཀྱི་ལག་ཏུ་མར་མེ་དང་སྤོས་ཀྱི་རེང་བུ་ཐོགས་ཏེ༔ ཡིད་གཉིས་ཐེ་ཚོམ་མེད་པར་རྡོ་རྗེ་རྒྱལ་པོ་ཡབ་ཡུམ་རྣམས་འཕགས་པ་མ་རིག་མུན་སེལ་མངོན་སུམ་དུ་བསྒོམ་ཞིང་མོས་གུས་ཀྱི་གདུང་ཤུགས་བསྐྱེད་དེ་དབྱངས་སྙན་པོས་འདི་སྐད་དོ༔ ཧཱུྃ༔ དུས་གསུམ་རྒྱལ་བ་ཐམས་ཅད་བཞུགས་པའི་གནས༔ མ་རིག་མུན་སེལ་འཕགས་པའི་ལྷ་ཚོགས་དང་༔ སྟོན་པ་རྡོ་རྗེ་རྒྱལ་པོ་ཡབ་ཡུམ་རྣམས༔ མཆེད་དང་ལྕམ་དྲལ་འདུས་པ་རྒྱ་མཚོའི་ཚོགས༔ མ་ལུས་ཐམས་ཅད་བདག་ལ་བརྩེར་དགོངས་ལ༔ བྱང་ཆུབ་མཆོག་གི་དཀྱིལ་འཁོར་འདིར་ཞུགས་ཏེ༔ བདག་གི་སྨོན་ལམ་འགྲུབ་པའི་དཔང་པོ་མཛོད༔ རྡོ་རྗེ་རྒྱལ་པོ་སངས་རྒྱས་འདུས་པའི་དཔལ༔ རྒྱལ་བའི་ཡུམ་མཆོག་རྒྱལ་བ་བསྐྱེད་པའི་ཡུམ༔ ཐུགས་སྤྲུལ་རྒྱལ་སྲས་བྱང་སེམས་བསྟན་པའི་བཙས༔ མཆེད་ལྕམ་དམ་ཚིག་གཅིག་པའི་རིགས་འཛིན་ཚོགས༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ མི་འབྲལ་སྤྱི་གཙུག་རྒྱན་དུ་འགྲོག་པར་ཤོག༔ བདག་གི་དུས་གསུམ་ཀུན་ཏུ་སྒོ་གསུམ་ཡུལ༔ ཐ་ན་རྨི་ལམ་གཉིད་དུ་འཕྲེང་བའི་ཚེ༔ བླ་མ་ཡབ་ཡུམ་མཆེད་ལྕམ་མཐོང་བར་ཤོག༔ སྐུ་གསུང་ཐུགས་ཀྱི་དགྱེས་པ་ཀུན་བསྒྲུབ་ཅིང་༔ དད་གུས་གདུང་བའི་སྲི་ཞུས་བསྟེན་པར་ཤོག༔ ཚེ་འདིའི་སྣང་བ་ནུབ་པར་གྱུར་པའི་ཚེ༔ འཆི་བ་དང་པོ་འོད་གསལ་ཆོས་ཀྱི་སྐུ༔ ངོ་ཤེས་རྩལ་རྫོགས་བརྟན་པ་མཆོག་ཐོབ་ནས༔ ཆོས་སྐུ་འོད་དཔག་མེད་དང་དབྱེར་མེད་པར༔ ཀ་དག་ཆོས་སྐུའི་དབྱིངས་སུ་གྲོལ་བར་ཤོག༔ རང་རིག་ཆོས་སྐུར་རང་རྩལ་མ་རྫོགས་ནས༔ བར་དོའི་སྣང་ཤེས་རང་སྣང་ལྷར་ཤར་ན༔ རང་སེམས་དག་པའི་རྩལ་དུ་ངོ་འཕྲོད་དེ༔ སྒྲ་འོད་ཟེར་གསུམ་མདངས་ལྡན་རང་སྒྲར་བཅས༔ ལྔ་ལྡན་ལོངས་སྐུའི་ཞིང་དུ་གྲོལ་བར་ཤོག༔ དེ་ལྟར་རང་རིག་ཚད་ལ་མ་ཕེབས་ནས༔ སྲིད་པ་བར་དོའི་འཁྲུལ་བས་གཡེང་གྱུར་ན༔ རྡོ་རྗེ་རྒྱལ་པོ་ཡབ་ཡུམ་རྗེས་དྲན་ཏེ༔ སྣང་གསལ་མར་མེ་འདི་ཡི་རྒྱུད་བརྟེན་ནས༔ དཔའ་བོ་མཁའ་འགྲོའི་ཚོགས་ཀྱིས་ཡོངས་བསྐོར་ཏེ༔ མཁའ་སྤྱོད་དག་པའི་གནས་སུ་གྲོལ་བར་ཤོག༔ ལས་ཀྱི་དབང་གིས་རིགས་དྲུག་ཡུལ་མཐོང་ཞིང་༔ བག་ཆགས་དབང་གིས་འཁོར་བ་འདིར་འཁྱམས་ཀྱང་༔ བསྐྱེད་རྫོགས་ཟབ་མོ་འདི་ཡི་མཚམས་སྦྱོར་ནས༔ དལ་འབྱོར་བཅོ་བརྒྱད་ལྡན་པའི་ལུས་ཐོབ་སྟེ༔ དཀྱིལ་འཁོར་གཅིག་ཏུ་ཚོགས་པའི་རྟེན་འབྲེལ་དང་༔ མར་མེ་གཅིག་ལ་བལྟས་པའི་ཏིང་འཛིན་གྱིས༔ མི་འབྲལ་ཚོམ་བུ་གཅིག་ཏུ་འཚོགས་པར་ཤོག༔ དེ་ཚེ་འཕགས་མཆོག་ཡི་དམ་ལྷར་འགྱུར་ཞིང་༔ རྡོ་རྗེ་སློབ་དཔོན་བྱམས་པའི་སྐུ་དྲིན་གྱིས༔ ཐོས་བསམ་སྒོམ་གསུམ་ཡང་དག་རང་རྒྱུད་ལྡན༔ ཚུལ་བཞིན་སྤྱོད་ལ་ཉེར་འཚེ་ཀུན་ཞི་ཞིང་༔ བསྒྲུབ་པའི་འབྲས་བུ་མཐར་ཕྱིན་འགྲུབ་པར་ཤོག༔ དངོས་གྲུབ་རྣམ་གཉིས་མཆོག་གི་ནོར་འཆང་ཞིང་༔ མ་དག་འགྲོ་བ་དྲུག་གི་ཁམས་རྣམས་སུ༔ རྒྱལ་རིགས་རྗེའུ་རིགས་དམངས་རིགས་བྲམ་ཟེའི་རིགས༔ གདོལ་པ་བུད་མེད་ཁྱེའུ་དགེ་སྦྱོང་དང་༔ ཀུན་ཏུ་རྒྱུ་དང་སླབ་གནས་རིག་བྱེད་མཁན༔ རིགས་ཀྱིས་བཀུར་བ་དང་ནི་མ་བཀུར་བ༔ སྨད་དང་བསྟོད་དང་ནད་པ་ཆོས་སྨྲ་དང་༔ བྱ་དང་རི་དྭགས་གྲོང་ཁྱེར་སློང་མོ་བ༔ གང་ལ་གང་འདུལ་དེ་ལ་དེར་མཐུན་དུ༔ སྣ་ཚོགས་གཟུགས་ཀྱིས་འགྲོ་བ་འདུལ་བར་ཤོག༔ སྦྱིན་དང་སྙན་སྨྲ་དོན་མཐུན་དོན་སྤྱོད་སོགས༔ བསྡུ་བ་རྣམ་པ་བཞི་ཡི་དཔུང་གྲོགས་བཅས༔ ཐབས་ལ་མཁས་པའི་རྣམ་གྲངས་དཔག་མེད་ཀྱིས༔ རང་སྐལ་གང་ལྡན་ཆོས་ཀྱི་ཆར་འབེབས་ཤིང་༔ ཕ་མ་འགྲོ་དྲུག་འཁོར་བ་ལས་སྒྲལ་ཞིང་༔ མ་རིག་མུན་པའི་སྒྲོན་མེ་བྱེད་པར་ཤོག༔ སྣང་སྲིད་འཁོར་འདས་ཆོས་དབྱིངས་ཡེ་གནས་ཀློང་༔ མ་རིག་དག་པ་རང་བྱུང་རྡོ་རྗེ་མཆོག༔ བྱ་རྩོལ་མེད་པར་འགྲོ་ཀུན་ཕྱམ་ཅིག་ཏུ༔ རིགས་བདག་ཡི་དམ་ལྷ་དང་གཉིས་མེད་པར༔ གཉིས་སུ་མེད་པའི་འབྲས་བུ་འཐོབ་པར་ཤོག༔ ཅེས་སྨོན་ལམ་གདབ་བོ༔ བཞི་པ་དཀྱིལ་འཁོར་བསྡུ་བ་ནི༔ ལས་ཀྱི་རྡོ་རྗེས་དཀྱིལ་འཁོར་གྱི་མཐའ་ནས་བསྡུང་ཞིང་ལས་བྱང་ལྟར་བྱ༔ རྡུལ་ཚོན་རྣམས་ཀྱང་མཐའ་ནས་དབུས་སུ་བསྡུའོ༔ ལྔ་པ་གཏེར་སྦ་བ་ནི༔ རྫའི་གའུ་སོ་བཏང་བའི་ནང་དུ་སྨན་ལྔ་འབྲུ་ལྔ་སྙིང་པོ་ལྔ་དར་སྣ་ལྔ་རིན་པོ་ཆེ་རྣམ་ལྔ་དང་༔ རྡུལ་ཚོན་དང་གཏོར་མ་སོགས་ནས་དུམ་རེ་བཅད་པ་བཅུག་ཅིང་༔ སློབ་དཔོན་གྱིས་རྒྱས་གདབ་པ་གཟུངས་མས་ཐོགས༔ སློབ་དཔོན་མཆེད་ལྕམ་ཐམས་ཅད་སྟེགས་བུ་ལ་བསྐོར་ཞིང་མེ་ཏོག་འཐོར་ཏེ་འདི་སྐད་དོ༔ ཧཱུྃ༔ འབྱུང་བ་ལྔ་ནི་ཡུམ་ལྔའི་ཀློང་༔ ས་ཡི་ལྷ་མོ་ས་ཡི་བདག༔ བདག་ཅག་རིག་འཛིན་འཁོར་དང་བཅས༔ སྒྲུབ་པའི་འབྲས་བུ་མངོན་དུ་གྱུར༔ བྱང་ཆུབ་ས་བརྟེན་སྐུ་དྲིན་མཆོད༔ སྨན་སྤོས་འབྲུ་སྣ་དར་ཟབ་ལྔ༔ གསེར་དངུལ་ཟངས་ལྕགས་རིན་པོ་ཆེ༔ རྡུལ་ཚོན་སྨན་གཏོར་རཀྟ་བཅས༔ དངོས་གྲུབ་མཆོག་གི་རིལ་བུས་བརྒྱན༔ ལྷ་མོ་ཁྱོད་ལ་མཆོད་པར་འབུལ༔ རིན་ཆེན་ས་ལ་གཏེར་དུ་སྦ༔ འདུས་པའི་མཆེད་ལྕམ་གཙོ་དང་འཁོར༔ འདི་ནས་བྱང་ཆུབ་མ་ཐོབ་བར༔ མཆོག་ཐུན་དངོས་གྲུབ་བསྟན་པའི་བཙས༔ གཏེར་འདི་སྦས་པས་ཐོབ་གྱུར་ཅིག༔ ཡུལ་དང་ཕྱོགས་དང་རྒྱལ་ཁམས་སུ༔ ནད་མཚོན་མུ་གེ་ལ་སོགས་པའི༔ འཇིགས་པ་ཆེན་པོ་བརྒྱད་བཅུ་དྲུག༔ ཐམས་ཅད་མ་ལུས་ཞི་བར་ཤོག༔ བཀྲ་ཤིས་ཐམས་ཅད་འབྱུང་གྱུར་ཅིག༔ དགེ་ལེགས་ཐམས་ཅད་འཕེལ་བར་ཤོག༔ ས་མ་ཡཱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཅེས་བརྗོད་སྟེགས་བུའི་དཀྱིལ་དུ་སྦ༔ ཡང་ན་དཔལ་བཟང་རི་ལ་སྦེད༔ དྲུག་པ་གཏོར་མ་སྐྱོང་བ་ནི༔ ཆད་ཐོ་སོགས་གྱེར་ཞིང་ཟོར་དུ་འཕང་༔ ཕལ་ཆེར་ཆུ་ལ་སྦྱངས༔ ཕལ་ཆེར་རི་བོ་བཟང་པོའི་རྩེ་ལ་སྐྱེལ༔ ཕལ་ཆེར་མཛོད་ཀྱི་དབུས་སུ་སྦ༔ ཚུར་ལོག་ནས་སྒྲུབ་ཁང་ཐེམ་འོག་ཏུ་སྒབ་འདྲེ་དགུག་གཞུག་བྱས་སྟེང་དུ་གཏོར་གཞོང་སྦུབ་ཅིང་ལས་བྱང་ལྟར་བྲོ་བྱ༔ མེ་ཆུས་རྒྱས་གདབ་བོ༔ བདུན་པ་ཡོན་དབུལ་བ་ནི༔ མཆེད་ལྕམ་རྣམས་ཀྱི་རྔུལ་གཟན་སྟེགས་བུའི་སྟེང་དུ་བཏིང་ནས་བླ་མ་ཡབ་ཡུམ་ཐུགས་སྲས་རྒྱལ་ཐེབས་པ་རྣམས་འཁོད༔ མཆེད་ལྕམ་རྣམས་ཀྱིས་རིན་པོ་ཆེ་སྣ་ཚོགས་དང་༔ མདོར་ན་བུ་དང་ཆུང་མ་ནོར་གྱི་དབྱིག་རང་ལ་གང་ཡོད་སྦ་སྲི་མེད་པར་སློབ་དཔོན་གྱི་མདུན་དུ་སྤུངས༔ གསེར་དངུལ་གྱི་སྐྱོགས་ཆང་སྣ་མང་པོས་གཏམས་ཤིང་སྐྱེམས་སུ་དྲངས་ཏེ་འདི་སྐད་ཞུའོ༔ ཧཱུྃ༔ སངས་རྒྱས་ཀུན་འདུས་རྡོ་རྗེ་རྒྱལ་པོ་དང་༔ རྒྱལ་ཐེབས་གསང་ཡུམ་ཐུགས་སྲས་ཚོམ་བུར་བཅས༔ མ་ལུས་ཐམས་ཅད་བདག་ལ་དགོངས་སུ་གསོལ༔ བདག་ཅག་འདིར་འདུས་མཆེད་དང་ལྕམ་དྲལ་གྱི༔ མོས་གུས་གདུང་བས་ཁྱེད་ལ་གསོལ་བཏབས་པས༔ སྒྲུབ་པའི་འབྲས་བུ་མངོན་གྱུར་དངོས་གྲུབ་སྩོལ༔ རང་རིག་འཕགས་པའི་ཐུགས་དང་གཉིས་མེད་གྲོལ༔ བཀའ་དྲིན་ཟབ་མོ་རྒྱ་ཆེ་དཔག་དཀའ་ཞིང་༔ སྟོང་གསུམ་རིན་ཆེན་གསེར་དངུལ་ནོར་གྱིས་བཀང་༔ ཡོངས་སུ་ཕུལ་ཀྱང་སྐུ་གསུང་ཐུགས་ཀྱི་དྲིན༔ ཆ་ཙམ་ཞིག་ཀྱང་འཁོར་བ་ག་ལ་སྲིད༔ ཁྱད་པར་ལྔ་བརྒྱའི་སེམས་ཅན་བསོད་ནམས་དམན༔ བདག་ཅག་རྣམས་ཀྱིས་འབད་རྩོལ་རྔོ་མ་ཐོགས༔ དངོས་སུ་གང་འབྱོར་ཕངས་སྲི་མེད་པར་འབུལ༔ བློ་ཡིས་སྤྲུལ་ཏེ་ཀུན་བཟང་མཆོད་པའི་སྤྲིན༔ དུས་གསུམ་མཉམ་ཉིད་རྟག་པ་རྒྱུན་འཁོར་ལོར༔ རིགས་བདག་བླ་མ་ཡབ་ཡུམ་སྐུ་ལ་མཆོད༔ དེང་ནས་བཟུང་སྟེ་ཚེ་རབས་ཐམས་ཅད་དུ༔ བདག་ཅག་རྣམས་ཀྱི་འདྲེན་པར་ཁྱོད་གྱུར་ཅིག༔ སྐུ་གསུང་ཐུགས་ཀྱི་དགྱེས་པར་མཛད་དུ་གསོལ༔ ཅེས་བརྗོད་ན་བཟའ་སོགས་སྐུ་ལ་སྒྲོན་ཞིང་མཁོ་བའི་མལ་ཆ་རྣམས་ཡོངས་སུ་བཟུང་བ་མེད་པར་དབུལ་བར་བྱའོ༔ བརྒྱད་པ་བསྔོ་བ་ནི༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཕྱོགས་བཅུར་བཞུགས་པའི་སྐུ་གསུམ་གྱི་སངས་རྒྱས་འཕགས་པ་རྒྱལ་བ་རྒྱ་མཚོ་མ་རིག་མུན་སེལ་གྱི་ལྷ་ཚོགས་མ་ལུས་པ་ཐམས་ཅད་བདག་ཅག་རྣམས་ལ་དགོངས་སུ་གསོལ༔ བདག་ཅག་རྣམས་ཀྱིས་དུས་གསུམ་ཀུན་ཏུ་རྣམ་པར་སྤྱོད་པའི་དགེ་བའི་རྩ་བ་ཟག་བཅས་དང་ཟག་མེད་ཀྱི་ཚོགས་ཅི་མཆིས་པ་ཐམས་ཅད་ཡོངས་སུ་བསྡུས་ནས་གཅིག་ཏུ་བསགས་ཏེ༔ ད་ལྟར་གྱི་དུས་ཕུན་སུམ་ཚོགས་པ་འདིར་བདག་དང་མཐའ་ཡས་པའི་སེམས་ཅན་ཐམས་ཅད་སངས་རྒྱས་སྐུ་གསུམ་གྱི་གོ་འཕང་འཐོབ་པའི་རྒྱུར་ཡོངས་སུ་བསྔོ་བར་བགྱིའོ༔ དགེ་བའི་རྩ་བ་དེ་ཡོངས་སུ་བསྔོས་པའི་མཐུ་ཆེན་པོ་ལ་བརྟེན་ནས་བདག་སོགས་ཕ་མ་རིགས་དྲུག་གི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་མྱུར་བ་ཉིད་དུ་འཐོབ་པར་གྱུར་ཅིག༔ དེ་ལྟར་མ་ཐོབ་ཀྱི་བར་དུ་ཡང་སྐྱེ་བ་ནས་ཚེ་རབས་ཐམས་ཅད་དུ་གནས་ངན་ལེན་ངན་སོང་གསུམ་གྱི་སྐྱེ་སྒོ་ཡང་དག་པར་ཆོད་ཅིང་༔ མཐོ་རིས་ལྷ་མིའི་ལུས་རྟེན་ཕུན་སུམ་ཚོགས་པ་ཐོབ་པར་གྱུར་ཅིག༔ རིགས་མཆོག་ཏུ་གྱུར་པའི་ལུས་རྟེན་དེ་ལ་ཕ་རོལ་ཏུ་ཕྱིན་པ་དྲུག་གི་ཆོས་ཐམས་ཅད་ཚངས་ཞིང་བླ་མ་རྡོ་རྗེ་སློབ་དཔོན་གྱིས་བརྩེ་བས་རྗེས་སུ་བཟུང་ནས་ཐོས་བསམ་སྒོམ་གསུམ་ལས་སུ་རུང་སྟེ་སྐུ་དང་ཡེ་ཤེས་ལ་མངོན་དུ་སྤྱོད་པར་གྱུར་ཅིག༔ བྱམས་དང་སྙིང་རྗེ་ཚད་མེད་པའི་སྤོབས་པས་འགྲོ་བ་མཐའ་དག་གི་དོན་གང་ལ་གང་འདུལ་དུ་བསྒྲུབ་ནུས་པར་གྱུར་ཅིག༔ དེ་ལྟར་གྱི་ལྷག་བསམ་རྣམ་པར་དག་པ་སྤྱོད་པ་ལ་ཉེ་བར་འཚེ་བ་དང་བར་དུ་གཅོད་པ་ཐམས་ཅད་རབ་ཏུ་ཞི་བར་གྱུར་ཅིག༔ མཐར་ཐུག་རྫོགས་པའི་སངས་རྒྱས་ཀྱི་ས་ལ་མངོན་པར་བྱང་ཆུབ་ཅིང་༔ ཁམས་གསུམ་འཁོར་བ་དོང་ནས་སྤྲུགས་ཏེ་མ་རིག་པའི་མུན་པ་ཐམས་ཅད་རབ་ཏུ་བསལ་ནས༔ ཁམས་གསུམ་ཆོས་ཀྱི་རྒྱལ་པོའི་འཕྲིན་ལས་རབ་འབྱམས་ཀྱིས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པར་གྱུར་ཅིག༔ དེ་ལྟར་གྱི་དགེ་བའི་བསམ་པ་ཕུན་སུམ་ཚོགས་པ་འདིའི་མཐུས་སངས་རྒྱས་ཀྱི་བསྟན་པ་རིན་པོ་ཆེ་འདི་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག༔ གསང་སྔགས་རྡོ་རྗེ་ཐེག་པ་འདིས་ཀྱང་འགྲོ་བ་ཐམས་ཅད་སྨིན་གྲོལ་གྱི་ལམ་ལ་འགོད་པར་གྱུར་ཅིག༔ བསྟན་པའི་རྩ་ལག་བླ་མ་དགེ་བའི་བཤེས་གཉེན་རྣམས་ཀྱང་སྐུ་ཚེ་དང་མཛད་འཕྲིན་ཐམས་ཅད་ཡར་ལྡན་དུ་འཕེལ་ཞིང་སེམས་ཅན་གྱི་སྒྲོན་མེ་ཡུན་རིང་དུ་མཛད་པར་གྱུར་ཅིག༔ འཇིག་རྟེན་གྱི་ཁམས་ཐམས་ཅད་དུ་ལོ་ཕྱུགས་ལེགས་ཤིང་ཆར་ཆུ་དུས་སུ་འབབ་ནས་ནད་མཚོན་མུ་གེའི་བསྐལ་པ་ཐམས་ཅད་ཞི་ཞིང་བསྐལ་པ་རྫོགས་ལྡན་གྱི་དུས་ལྟར་དཔལ་འབྱོར་ཕུན་སུམ་ཚོགས་པ་ལ་སྤྱོད་པར་གྱུར་ཅིག༔ འཇིག་རྟེན་མི་དབང་གི་རྒྱལ་པོ་རྣམས་ཀྱང་དགེ་བའི་དཔལ་གྱིས་ས་སྐྱོང་ཤིང་༔ ཆབ་སྲིད་འབངས་མངའ་འཁོར་ཐམས་ཅད་དར་ཞིང་རྒྱས་ནས་དགེ་བའི་ལས་སྣ་ཚོགས་བརྩམ་ཞིང་བཀྲ་ཤིས་པའི་ཡོན་ཏན་དུ་མ་མངོན་དུ་བྱེད་པར་གྱུར་ཅིག༔ ནམ་མཁའི་མཐར་ཐུག་མཐའ་ཡས་སེམས་ཅན་རྣམས༔ མ་འབད་བཞིན་དུ་སྐུ་གསུམ་མངོན་གྱུར་ཏེ༔ ཕ་མ་འགྲོ་དྲུག་སེམས་ཅན་མ་ལུས་པ༔ ཕྱམ་ཅིག་གདོད་མའི་ས་ལ་ཕྱིན་པར་ཤོག༔ ཅེས་བརྗོད་ཅིང་འཁོར་གསུམ་དམིགས་མེད་ཀྱི་ངང་ནས་བསྔོ་བས་རྒྱས་འདེབས་པར་བྱའོ༔ དགུ་པ་བཀྲ་ཤིས་བརྗོད་པ་ནི་ལས་བྱང་ལྟར་རམ་བཀྲ་ཤིས་པའི་ཚིགས་སུ་བཅད་པ་ཅི་མང་དུ་བྱའོ། །བཅུ་པ་ལུས་བསྲུང་བ་ནི༔ རང་ཉིད་སྐད་ཅིག་གི་དབང་ཆེན་རྟ་མགྲིན་དམར་པོར་བསྐྱེད་ཅིང་འདི་སྐད་དོ༔ ཧཱུྃ༔ ང་ནི་ཆེ་བཙན་དབང་གི་རྒྱལ༔ སྐུ་ལས་བསྐལ་པའི་མེ་དཔུང་འབར༔ སྟེང་འོག་ཕྱོགས་མཚམས་བསྲུང་བའི་གུར༔ འཇིགས་མེད་ཡེ་ཤེས་སྟོང་ཉིད་མཁར༔ རྣམ་རྟོག་མ་རིག་གདོན་བགེགས་རྣམས༔ བསྐྲད་ཅིང་གཟིར་ཏེ་རྡུལ་དུ་བརླག༔ ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་རཾ་རཾ་རཀྵ་རཀྵ༔ འབྱུང་པོ་སརྦ་ཨུ་ཙ་ཏ་ཡ་ཧཱུྃ་ཕཊ༔ ཅེས་བརྗོད་ཅིང་ཏིང་ངེ་འཛིན་ལ་མཉམ་པར་བཞག་གོ༔ བཅུ་གཅིག་པ་མཚམས་འགྲོལ་ཞིང་གནས་བསྲུང་བ་ནི༔ ཟླུམ་གཏོར་བྱིན་གྱིས་བརླབས་པ་རྒྱལ་པོ་བཞི་དང་སྒོ་བསྲུང་རྣམས་ལ་འབུལ་ཞིང་ཤིང་བྱང་རྣམས་བསྡུ༔ གཤེགས་གསོལ་བྱ༔ བླ་མ་ཡི་དམ་གྱི་གཏོར་མ་རྒྱས་པར་བཤམས་ཤིང་ལས་གཞུང་བསྲང་༔ ཚོགས་ཀྱི་འཁོར་ལོ་བསྐོར༔ བཀྲ་ཤིས་པའི་གླུ་བྲོ་སྣ་ཚོགས་བྱ༔ གནས་གཞན་དུ་མི་འགྲོ༔ དམེ་ཡུགས་མཛེ་སྤྲང་དམ་མེད་རྣམས་བསྲུང་༔ དཀྱིལ་འཁོར་རྡུལ་ཚོན་དར་གྱི་འདོ་ལེར་བཏེགས་ནས་རོལ་མོའི་རིགས་ལྡིར་ཞིང་རི་བོའི་རྩེ་དང་ཆུ་བོའི་གཞུང་ལ་སྐྱེལ་ལོ༔ ས་མ་ཡཱ༔ རྒྱ་རྒྱ་རྒྱ༔ སྒྲུབ་པའི་ཁོག་དབུབ་རིན་པོ་ཆེ་དངོས་གྲུབ་ཀྱི་སྒྲོམ་བུ་ཞེས་བྱ་བ་འདི༔ བདག་འདྲ་པདྨ་འབྱུང་གནས་ཀྱིས་ཕྱི་རབས་རྣམས་ལ་ཕན་པའི་ཕྱིར་འཕགས་པའི་སྒྲུབ་ཐབས་དངོས་གྲུབ་ཀྱི་སྒྲོམ་བུར་བྲིས་ཏེ༔ མངའ་བདག་རྗེ་འབངས་རྣམས་སྨིན་གྲོལ་ལ་བཀོད་ནས་རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མང་ཡུལ་བྱམས་པ་སྤྲིན་གྱི་གཙུག་ལག་ཁང་ནས་མེ་ཕོ་འབྲུག་གི་ལོ་ལ་སྤྱན་དྲངས་ཤིང་ལྕགས་ཕོ་སྤྲེལ་གྱི་ལོ་ཧོར་ཟླ་དྲུག་པའི་ཚེས་བཅུའི་ཉིན་མོ་ཤོག་སེར་ལས་མགྱོགས་པར་ཕབ་པའོ།། །། སརྦ་མངྒ་ལཾ།། །།