བསྐང་བཤགས་ཉམས་ཆགས་རང་དག
ཐུགས་རྗེ་ཆེན་པོ་མ་རིག་མུན་སེལ་ལས༔ བསྐང་བཤགས་ཉམས་ཆག་རང་དག་བཞུགས༔ ཐུགས་རྗེ་ཆེན་པོ་མ་རིག་མུན་པ་ཐམས་ཅད་རབ་ཏུ་སེལ་བའི་མངའ་བདག་ལ་ཕྱག་འཚལ་ལོ༔ མ་འོངས་པའི་རྣལ་འབྱོར་པ་རྣམས་ལ་མཚན་རྟགས་འཁྲུགས་པའམ༔ ཉམས་ཆག་རྟོག་སྒྲིབ་བྱུང་ན་བསྐང་བའི་ཆོ་ག་འདི་ལྟར་བྱ་སྟེ༔ གནས་ཡིད་དང་མཐུན་པར་མ་རིག་མུན་སེལ་གྱི་དཀྱིལ་འཁོར་ཞལ་ཕྱེས་ཏེ༔ ཕྱི་ནང་གསང་བའི་མཆོད་རྫས་ཅི་འབྱོར་དང་༔ སྤྱན་གཟིགས་སྣ་ཚོགས་དྲི་ཞིམ་གྱི་སྤོས༔ མདངས་ལྡན་གྱི་མེ་ཏོག༔ སྣང་གསལ་གྱི་མར་མེ༔ རོ་ལྡན་གྱི་ཞལ་ཟས༔ དྲི་ལྡན་གྱི་བྱུག་པ༔ སྒྲ་སྙན་གྱི་རོལ་མོ་སྨན་རག་གཏོར་གསུམ་ཚོགས་ཀྱི་འཁོར་ལོ་ལ་སོགས་རྒྱས་པར་བཤམས་ཤིང་༔ ལས་གྱི་གཞུང་བསྲང་བསྐྱེད་རིམ་གསལ་གདབ༔ བསྙེན་སྒྲུབ་བརྒྱ་སྟོང་གིས་ཁ་གསོ་ཞིང་༔ གདུང་བའི་ཡིད་ཀྱི་དབྱངས་སྙན་པོས་འདི་སྐད་དོ༔ ཧཱུྃ༔ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ ཆོས་སྐུའི་རྒྱལ་བ་འོད་དཔག་མེད་མགོན་ནི༔ སྐུ་མདོག་དམར་པོ་མཉམ་གཞག་མཚན་དཔེས་སྤྲས༔ ཆོས་སྐུའི་ལྷ་ཚོགས་མང་པོའི་འཁོར་གྱིས་བསྐོར༔ བསྐང་ངོ་མཆོད་དོ་ཐུགས་དམ་གཉན་པོ་བསྐང་༔ རིག་འཛིན་འཆི་མེད་ཚེ་ཡི་དངོས་གྲུབ་སྩོལ༔ ཧཱུྃ༔ གནས་མཆོག་ཆེན་པོ་རི་བོ་ཏ་ལ་ནས༔ ཐུགས་རྗེའི་བདག་ཉིད་འཕགས་མཆོག་སྤྱན་རས་གཟིགས༔ རིན་ཆེན་རྒྱན་ལྡན་ལོངས་སྤྱོད་རྫོགས་པའི་སྐུ༔ ལོངས་སྐུའི་བྱང་སེམས་མང་པོའི་འཁོར་གྱིས་བསྐོར༔ བསྐང་ངོ་མཆོད་དོ་ཐུགས་དམ་གཉན་པོ་བསྐང་༔ ས་ལམ་ཡོན་ཏན་ཡོངས་རྫོགས་དངོས་གྲུབ་སྩོལ༔ ཧཱུྃ༔ གླིང་གི་གླིང་མཆོག་རྔ་ཡབ་དཔལ་རི་ནས༔ སྤྲུལ་པའི་སྐུ་མཆོག་ཨོ་རྒྱན་པདྨ་འབྱུང་༔ དཀར་དམར་མདངས་ལྡན་རྒྱལ་པོ་རོལ་པའི་ཚུལ༔ འཁོར་དུ་སྤྲུལ་སྐུ་དཔའ་བོ་མཁའ་འགྲོས་བསྐོར༔ བསྐང་ངོ་མཆོད་དོ་ཐུགས་དམ་གཉན་པོ་བསྐང་༔ འཕྲིན་ལས་འགྲོ་བ་འདུལ་བའི་དངོས་གྲུབ་སྩོལ༔ ཧཱུྃ༔ བསྐང་ངོ་བསྐལ་པར་ཐུགས་དམ་བསྐང་བའི་རྫས༔ ཕྱི་མཆོད་འདོད་ཡོན་ལྔ་དང་ལོངས་སྤྱོད་ཚོགས༔ ནང་མཆོད་སྨན་གཏོར་རཀྟ་དམར་གྱིས་བརྒྱན༔ གསང་མཆོད་རྣམ་དག་བདེ་སྟོང་དགའ་བ་བཞི༔ མཆོད་པའི་བྱེ་བྲག་སྤྱན་གཟིགས་སྐར་ལྟར་བཀྲམ༔ འདས་དང་མ་བྱོན་ད་ལྟ་དུས་གསུམ་གྱི༔ སྐུ་གསུམ་བླ་མ་བརྒྱུད་པའི་ཐུགས་དམ་བསྐང་༔ ཐུགས་དམ་བསྐང་ལ་དབང་དང་དངོས་གྲུབ་སྩོོལ༔ ཧཱུྃ༔ མ་རིག་མུན་སེལ་དཀྱིལ་འཁོར་ཆེན་པོ་ནས༔ དུས་གསུམ་སངས་རྒྱས་ཐམས་ཅད་འདུས་པའི་སྐུ༔ སྐུ་མདོག་དམར་པོ་ཞལ་གཅིག་ཕྱག་བཞི་པ༔ ཚད་མེད་རྣམ་བཞི་མཆོག་ཐུན་ཕྱག་རྒྱས་སྤྲས༔ ལོངས་སྤྱོད་རྒྱན་ལྡན་གསང་བའི་ཡུམ་མཆོག་འཁྲིལ༔ མ་རིག་མུན་སེལ་ཡབ་ཡུམ་ཐུགས་དམ་བསྐང་༔ ཐུགས་དམ་བསྐང་གྱུར་མཆོག་ཐུན་དངོས་གྲུབ་སྩོལ༔ གཡས་གཡོན་ནོར་འཛིན་གསང་འཛིན་དཀར་དམར་ཞལ༔ ཕྱག་ན་རིན་ཆེན་པད་རཱག་ཕྲེང་བ་འདྲེན༔ མེ་ཏོག་དོ་ཤལ་དར་དཔྱངས་ཅོད་པན་འཕུར༔ ཐུགས་སྲས་མཆོག་སྤྲུལ་ལྕམ་དྲལ་ཐུགས་དམ་བསྐང་༔ ཧཱུྃ༔ མ་ཆགས་པདྨ་དབང་གི་དཀྱིལ་འཁོར་ནས༔ རྟ་མཆོག་རྒྱལ་པོ་དབང་ཆེན་རྟ་སྐད་འཚེར༔ སྐུ་མདོག་དམར་པོ་གྲི་ཐོད་དོར་སྟབས་བགྲད༔ ཁྲོ་རྒྱལ་ཡོངས་ཀྱི་ཆེ་བཙན་ཐུགས་དམ་བསྐང་༔ ཧཱུྃ༔ བསྐང་ངོ་བསྐལ་པར་ཐུགས་དམ་བསྐང་བའི་རྫས༔ ཕྱི་མཆོད་འདོད་ཡོན་ལྔ་དང་ལོངས་སྤྱོད་ཚོགས༔ ནང་མཆོད་སྨན༴ གསང་མཆོད་རྣམ་དག༴ མཆོད་པའི་བྱེ་བྲག་སྤྱན༴ རྩ་གསུམ་དཀྱིལ་འཁོར་ལྷ་ཚོགས་ཐུགས་དམ་བསྐང་༔ ཐུགས་དམ་བསྐང་གྱུར་མཆོག་ཐུན་དངོས་གྲུབ་སྩོལ༔ ཧཱུྃ་གཏི་མུག་རྣམ་དག་ཆོས་དབྱིངས་ཡེ་ཤེས་ལྷ༔ གཟུགས་ཕུང་རང་གྲོལ་ལོངས་སྤྱོད་རྫོགས་པའི་སྐུ༔ འཁོར་ལོ་དྲིལ་བུའི་ཕྱག་རྒྱ་སྐུ་མདོག་དཀར༔ བཅོམ་ལྡན་རྣམ་པར་སྣང་མཛད་ཐུགས་དམ་བསྐང་༔ ཞེ་སྡང་རྣམ་དག་ལེ་ལོང་ཡེ་ཤེས་ལྷ༔ རྣམ་ཤེས་རང་གྲོལ་ལོངས་སྤྱོད་རྫོགས་པའི་སྐུ༔ རྡོ་རྗེ་དྲིལ་བུའི་ཕྱག་རྒྱ་སྐུ་མདོག་མཐིང་༔ བཅོམ་ལྡན་རྡོ་རྗེ་སེམས་དཔའི་ཐུགས་དམ་བསྐངས༔ ང་རྒྱལ་རྣམ་དག་མཉམ་ཉིད་ཡེ་ཤེས་ལྷ༔ ཚོར་བ་རང་གྲོལ་ལོངས་སྤྱོད་རྫོགས་པའི་སྐུ༔ རིན་ཆེན་དྲིལ་བུའི་ཕྱག་རྒྱ་སྐུ་མདོག་སེར༔ བཅོམ་ལྡན་རིན་ཆེན་འབྱུང་ལྡན་ཐུགས་དམ་བསྐང་༔ འདོད་ཆགས་རྣམ་དག་སོར་རྟོག་ཡེ་ཤེས་ལྷ༔ འདུ་ཤེས་རང་གྲོལ་ལོངས་སྤྱོད་རྫོགས་པའི་སྐུ༔ པདྨ་དྲིལ་བུའི་ཕྱག་རྒྱ་སྐུ་མདོག་དམར༔ བཅོམ་ལྡན་སྣང་བ་མཐའ་ཡས་ཐུགས་དམ་བསྐང་༔ ཕྲག་དོག་རྣམ་དག་བྱ་གྲུབ་ཡེ་ཤེས་ལྷཿ འདུ་བྱེད་རང་གྲོལ་ལོངས་སྤྱོད་རྫོགས་པའི་སྐུ༔ རྒྱ་གྲམ་དྲིལ་བུའི་ཕྱག་རྒྱ་སྐུ་མདོག་ལྗང་༔ བཅོམ་ལྡན་དོན་ཡོད་གྲུབ་པའི་ཐུགས་དམ་བསྐང་༔ ཧཱུྃ༔ བསྐང་ངོ་བསྐལ༴ ཕྱི་མཆོད༴ ནང་མཆོད༴ གསང་མཆོད༴ མཆོད་པའི༴ བཅོམ་ལྡན་རྒྱལ་བ་རིགས་ལྔའི་ཐུགས་དམ་བསྐང་༔ ཐུགས་དམ་བསྐང་གྱུར་ཡེ་ཤེས་ལྔ་ལྡན་སྩོལ༔ ཧཱུྃ༔ ནམ་མཁའ་རྣམ་དག་སངས་རྒྱས་རིགས་ཀྱི་ཡུམ༔ སྐུ་མདོག་དཀར་སྐྱ་འཁོར་ལོ་དྲིལ་བུ་འཛིན༔ མཉེན་ལྕུག་འཁྲིལ་ལྡེམ་ཡབ་ཀྱི་མགུལ་ནས་འཁྱུད༔ མཁའ་འགྲོ་དབྱིངས་ཕྱུག་མ་ཡི་ཐུགས་དམ་བསྐང་༔ ས་ཁམས་རྣམ་དག་རྡོ་རྗེ་རིགས་ཀྱི་ཡུམ༔ སྐུ་མདོག་མཐིང་སྐྱ་རྡོ་རྗེ་དྲིལ་བུ་འཛིན་༔ མཉེན་ལྕུག༴ མཁའ་འགྲོ་སངས་རྒྱས་སྤྱན་མའི་ཐུགས་དམ་བསྐང་༔ ཆུ་ཁམས་རྣམ་དག་རིན་ཆེན་རིགས་ཀྱི་ཡུམ༔ སྐུ་མདོག་སེར་སྐྱ་རིན་ཆེན་དྲིལ་བུ་འཛིན༔ མཉེན་ལྕུག་འཁྲིལ་ལྡེམ་ཡབ་ཀྱི་མགུལ་ནས་འཁྱུད༔ མཁའ་འགྲོ་མཱ་མ་ཀི་ཡི་ཐུགས་དམ་བསྐང་༔ མེ་ཁམས་རྣམ་དག་པདྨ་རིགས་ཀྱི་ཡུམ༔ སྐུ་མདོག་དམར་སྐྱ་པདྨ་དྲིལ་བུ་འཛིན༔ མཉེན་ལྕུག་འཁྲིལ་ལྡེམ་ཡབ་ཀྱི་མགུལ་ནས་འཁྱུད༔ མཁའ་འགྲོ་ན་བཟའ་དཀར་མོའི་ཐུགས་དམ་བསྐང་༔ རླུང་ཁམས་རྣམ་དག་ལས་ཀྱི་རིགས་ཀྱི་ཡུམ༔ སྐུ་མདོག་ལྗང་སྐྱ་རྒྱ་གྲམ་དྲིལ་བུ་འཛིན༔ མཉེན་ལྕུག་འཁྲིལ་ལྡེམ་ཡབ་ཀྱི་མགུལ་ནས་འཁྱུད༔ མཁའ་འགྲོ་དམ་ཚིག་སྒྲོལ་མའི་ཐུགས་དམ་བསྐང་༔ ཧཱུྃ༔ བསྐང་ངོ་བསྐལ་པར་ཐུགས་དམ་བསྐང་བའི་རྫས༔ ཕྱི་མཆོད༴ ནང་མཆོད༴ གསང་མཆོད༴ མཆོད་པའི༴ དབྱིངས་ཕྱུག་ཡུམ་ཆེན་ལྔ་ཡི་ཐུགས་དམ་བསྐང་༔ ཐུགས་དམ་བསྐང་གྱུར་དབང་དང་དངོས་གྲུབ་སྩོལ༔ ཧཱུྃ༔ མིག་གི་རྣམ་ཤེས་མ་སྤངས་གནས་སུ་དག༔ སྐུ་མདོག་དཀར་པོ་མྱུ་གུ་དྲིལ་བུ་འཛིན་༔ བྱང་ཆུབ་སེམས་དཔའ་ས་ཡི་སྙིང་པོ་སོགས༔ ཤར་ཕྱོགས་བྱང་སེམས་རྒྱ་མཚོའི་ཐུགས་དམ་བསྐང་༔ ལྕེ་ཡི་རྣམ་ཤེས་མ་སྤངས་གནས་སུ་དག༔ སྐུ་མདོག་སེར་པོ་རལ་གྲི་དྲིལ་བུ་འཆང་༔ བྱང་ཆུབ་སེམས་དཔའ་ནམ་མཁའི་སྙིང་པོ་སོགས༔ ལྷོ་ཕྱོགས་བྱང་སེམས་རྒྱ་མཚོའི་ཐུགས་དམ་བསྐང་༔ ལུས་ཀྱི་རྣམ་ཤེས་མ་སྤངས་གནས་སུ་དག༔ སྐུ་མདོག་དམར་པོ་པདྨ་དྲིལ་བུ་འཆང་༔ བྱང་ཆུབ་སེམས་དཔའ་སྤྱན་རས་གཟིགས་ལ་སོགས༔ ནུབ་ཕྱོགས་བྱང་སེམས་རྒྱ་མཚོའི་ཐུགས་དམ་བསྐང་༔ ཉོན་ཡིད་རྣམ་ཤེས་མ་སྤངས་གནས་སུ་དག༔ སྐུ་མདོག་ལྗང་གུ་རྒྱ་གྲམ་དྲིལ་བུ་འཛིན་༔ བྱང་ཆུབ་སེམས་དཔའ་ཕྱག་ན་རྡོ་རྗེ་སོགས༔ བྱང་ཕྱོགས་བྱང་སེམས་རྒྱ་མཚོའི༴ རྣ་བའི་རྣམ་ཤེས་མ་སྤངས་གནས་སུ་དག༔ སྐུ་མདོག་དཀར་པོ་ཀླུ་ཤིང་དྲིལ་བུ་འཛིན༔ བྱང་ཆུབ་སེམས་དཔའ་བྱམས་པ་མཻ་ཏྲི་སོགས༔ ཤར་ལྷོ་བྱང་སེམས་རྒྱ་མཚོའི༴ ཀུན་གཞིའི་རྣམ་ཤེས་མ་སྤངས་གནས་སུ་དག༔ སྐུ་མདོག་དཀར་པོ་པོ་ཏི་དྲིལ་བུ་འཛིན༔ བྱང་ཆུབ་སེམས་དཔའ་སྒྲིབ་པ་རྣམ་སེལ་སོགས༔ ལྷོ་ནུབ་བྱང་སེམས་རྒྱ་མཚོའི༔ སྣ་ཡི་རྣམ་ཤེས་མ་སྤངས་གནས་སུ་དག༔ སྐུ་མདོག་མཐིང་ག་སྙེ་མ་དྲིལ་བུ་འཆང་༔ བྱང་ཆུབ་སེམས་དཔའ་ཀུན་ཏུ་བཟང་པོ་སོགས༔ ནུབ་བྱང་བྱང་སེམས་རྒྱ་མཚོའི་ཐུགས་དམ་བསྐང་༔ ཡིད་ཀྱི་རྣམ་ཤེས་མ་སྤངས་གནས་སུ་དག༔ སྐུ་མདོག་སེར་པོ་ཨུཏྤལ་དྲིལ་བུ་ཅན༔ བྱང་ཆུབ་སེམས་དཔའ་འཇམ་དཔལ་གཞོན་ནུ་སོགས༔ བྱང་ཤར་བྱང་སེམས་རྒྱ་མཚོའི༴ ཧཱུྃ༔ བསྐང་ངོ་བསྐལ་པར༴ ཕྱི་མཆོད་འདོད་ཡོན༴ ནང་མཆོད༴ གསང་མཆོད༴ མཆོད་པའི༴ བྱང་ཆུབ་སེམས་དཔའ་བརྒྱད་ཀྱི་ཐུགས་དམ་བསྐང་༔ ཐུགས་དམ་བསྐང་གྱུར་དབང་དང་དངོས་གྲུབ་སྩོལ༔ ཧཱུྃ༔ གཟུགས་སུ་སྣང་བ་མ་སྤངས་གནས་སུ་དག༔ ལྷ་མོ་དཀར་མོ་མེ་ལོང་དྲིལ་བུ་འཛིན༔ བཛྲ་ལཱ་སེ་མ་ཡི་ཐུགས་དམ་བསྐང་༔ དྲི་རུ་བྲོ་བ་མ་སྤངས་གནས་སུ་དག༔ ལྷ་མོ་སེར་མོ་དྲི་ཞིམ་སྤོས་ཕོར་ཅན༔ བཛྲ་དྷཱུ་པེ་མ་ཡི༴ སྒྲ་རུ་གྲག་པ་མ་སྤངས་གནས་སུ་དག༔ ལྷ་མོ་དམར་མོ་པཱི་ཝཾ་སྒྲ་སྒྲོགས་མ༔ བཛྲ་གིརྟི་མ་ཡི༴ རོ་ཡི་བྲོ་བ་མ་སྤངས་གནས་སུ་དག༔ ལྷ་མོ་ལྗང་མོ་བཅུད་ལྡན་ཞལ་ཟས་འཛིན༔ བཛྲ་ནཻ་ཏི་མ་ཡི༴ འདས་པའི་རྟོག་པ་མ་སྤངས་གནས་སུ་དག༔ ལྷ་མོ་དཀར་མོ་པད་དཀར་དྲིལ་བུ་འཛིན༔ བཛྲ་པུཥྤེ་མ་ཡི༴ ད་ལྟའི་རྟོག་པ་མ་སྤངས་གནས་སུ་དག༔ ལྷ་མོ་ལྗང་མོ་དྲི་བཟང་དུང་ཕོར་འཛིན༔ བཛྲ་གྷནྡྷེ་མ་ཡི༴ ཆོས་ཅན་རྟོག་པ་མ་སྤངས་གནས་སུ་དག༔ ལྷ་མོ་དམར་སེར་ཕྲེང་བ་དྲིལ་བུ་ཅན༔ བཛྲ་མཱ་ལེ་སེར་མོའི༴ མ་འོངས་རྟོག་པ་མ་སྤངས་གནས་སུ་དག༔ ལྷ་མོ་དམར་མོ་སྣང་གསལ་མར་མེ་འཛིན༔ བཛྲ་དྷི་པཾ་མ་ཡི་ཐུགས་དམ་བསྐང་༔ ཧཱུྃ༔ བསྐང་ངོ་བསྐལ་པར༴ ཕྱི་མཆོད་འདོད་ཡོན༴ ནང་མཆོད ༴ གསང་མཆོད༴ མཆོད་པའི༴ བྱང་ཆུབ་སེམས་མ་བརྒྱད་ཀྱི་ཐུགས་དམ་བསྐང་༔ ཐུགས་དམ་བསྐང་གྱུར་དབང་དང་དངོས་གྲུབ་སྩོལ༔ ཧཱུྃ༔ ང་རྒྱལ་རྣམ་དག་ལྷ་ཡི་འཇིག་རྟེན་འདྲེན༔ སྐུ་མདོག་དཀར་པོ་སྤྲུལ་སྐུའི་མཚན་བཟང་འཛིན༔ པི་ཝང་ཕྱག་རྒྱས་ཆོས་ཀྱི་སྒྲ་སྒྲོགས་པ༔ བཅོམ་ལྡན་ལྷ་དབང་ཐུབ་པའི་ཐུགས་དམ་བསྐང་༔ ཕྲག་དོག་རྣམ་དག་ལྷ་མིན་འཇིག་རྟེན་འདྲེན༔ སྐུ་མདོག་ལྗང་གུ་སྤྲུལ་སྐུའི་མཚན་བཟང་འཛིན༔ འཐབ་རྩོད་འཇིགས་སྐྱོབ་གོ་མཚོན་ཕྱག་རྒྱ་ཅན༔ བཅོམ་ལྡན་ལྷ་མིན་ཐུབ་པའི་ཐུགས་དམ་བསྐང་༔ འདོད་ཆགས་རྣམ་དག་མི་ཡི་འཇིག་རྟེན་འདྲེན༔ སྐུ་མདོག་སེར་པོ་སྤྲུལ་སྐུའི་མཚན་དཔེས་བརྒྱན༔ ལྷུང་བཟེད་མཁར་གསིལ་བསྣམས་པའི་ཕྱག་རྒྱ་ཅན༔ བཅོམ་ལྡན་མི་ཡི་ཐུབ་པའི༴ གཏི་མུག་རྣམ་དག་བྱོལ་སོང་འཇིག་རྟེན་འདྲེན༔ སྐུ་མདོག་མཐིང་ག་སྤྲུལ་སྐུའི་མཚན་འཆང་བ༔ ཕྱག་ན་སྡེ་སྣོད་གླེགས་བཾ་པོ་ཏི་བསྣམས༔ བཅོམ་ལྡན་བྱོལ་སོང་ཐུབ་པའི་ཐུགས༴ སེར་སྣ་རྣམ་དག་ཡི་དྭགས་འཇིག་རྟེན་འདྲེན༔ སྐུ་མདོག་དམར་པོ་སྤྲུལ་སྐུའི་མཚན་བཟང་ཅན༔ རིན་ཆེན་འདོད་འབྱུང་སྒྲོམ་བུ་ཕྱག་ན་བསྣམས༔ བཅོམ་ལྡན་ཡི་དྭགས་ཐུབ་པའི་ཐུགས༴ ཞེ་སྡང་རྣམ་དག་དམྱལ་བའི་འཇིག་རྟེན་འདྲེན༔ སྐུ་མདོག་ནག་པོ་སྤྲུལ་སྐུའི་མཚན་འཆང་བ༔ ཚ་གྲང་སྐྱོབ་མཛད་མེ་ཆུའི་ཕྱག་རྒྱ་ཅན༔ བཅོམ་ལྡན་དམྱལ་བའི་ཐུབ་པའི༴ ཧཱུྃ༔ བསྐང་ངོ་བསྐལ་པར་ཐུགས་དམ་བསྐང་བའི་རྫས༔ མདངས་ལྡན་ཡིད་འོང་མེ་ཏོག་སྣ་ཚོགས་དང་༔ དྲི་ཞིམ་ཙན་དན་དཀར་དམར་བདུག་པའི་སྤོས༔ སྣང་གསལ་མར་མེ་ཉི་ཟླ་སྒྲོན་མེའི་མདངས༔ དྲི་ཡི་ཆབ་བཟང་རྡོ་རྗེའི་བྱུག་པ་དང་༔ འབྲུ་བཅུད་དཀར་མངར་ལོངས་སྤྱོད་ཞལ་ཟས་བཤོས༔ སྒྲ་སྙན་རོལ་མོ་སྣ་ཚོགས་མཆོད་པའི་སྤྲིན༔ མཆོད་པའི་བྱེ་བྲག་སྤྱན་གཟིགས་སྐར་ལྟར་བཀྲམ༔ བཅོམ་ལྡན་ཐུབ་པ་དྲུག་གི་ཐུགས་དམ་བསྐང་༔ ཐུགས་དམ་བསྐང་གྱུར་དབང་དང་དངོས་གྲུབ་སྩོལ༔ ཧཱུྃ༔ བསྐལ་བཟང་སངས་རྒྱས་བདེ་གཤེགས་སྟོང་རྩ་གཉིས༔ སྐུ་མདོག་སྣ་ཚོགས་འོད་ཟེར་མདངས་ལྡན་ཞལ༔ སྤྲུལ་པའི་སྐུ་མཆོག་མཚན་དང་དཔེ་བྱད་འབར༔ ས་གནོན་མཉམ་གཞག་ཕྱག་རྒྱ་སྐྱིལ་ཀྲུང་ཅན༔ བསྐལ་བཟང་སངས་རྒྱས་སྟོང་རྩའི་ཐུགས་དམ་བསྐང་༔ ཧཱུྃ༔ བསྐང་ངོ་བསྐལ་བར་ཐུགས་དམ་བསྐང་བའི་རྫས༔ མདངས་ལྡན་ཡིད་འོང་མེ་ཏོག་སྣ་ཚོགས་དང་༔ དྲི་ཞིམ་ཙན་དན་དཀར་དམར་བདུག་པའི་སྤོས༔ སྣང་གསལ་མར་མེ་ཉི་ཟླ་སྒྲོན་མེའི་མདངས༔ དྲི་ཡི་ཆབ་བཟང་རྡོ་རྗེའི་བྱུག་པ་དང་༔ འབྲུ་བཅུད་དཀར་མངར་ལོངས་སྤྱོད་ཞལ་ཟས་བཤོས༔ སྒྲ་སྙན་རོལ་མོ་སྣ་ཚོགས་མཆོད་པའི་སྤྲིན༔ མཆོད་པའི་བྱེ་བྲག་སྤྱན་གཟིགས་སྐར་ལྟར་བཀྲམ༔ སངས་རྒྱས་སྟོང་དང་རྩ་གཉིས་ཐུགས་དམ་བསྐང་༔ ཐུགས་དམ་བསྐང་ལ་དབང་དང་དངོས་གྲུབ་སྩོལ༔ ཧཱུྃ༔ ཤར་སྒོར་བཛྲ་ཁྲག་འཐུང་ཡབ་ཡུམ་དཀར༔ རྡོ་རྗེ་དྲིལ་བུ་ཀྲོ་ཏི་ཡུམ་ལ་འཁྱུད༔ གྲི་གུག་ལྕགས་ཀྱུའི་ཕྱག་རྒྱས་ཡབ་ལ་འཁྲིལ༔ ཡབ་ཡུམ་གཉིས་སུ་མེད་པའི་ཐུགས་དམ་བསྐང་༔ ལྷོ་སྒོར་རཏྣ་ཁྲག་འཐུང་ཡབ་ཡུམ་སེར༔ རིན་ཆེན་དྲིལ་བུའི་ཕྱག་རྒྱས་ཡུམ་ལ་འཁྱུད༔ གྲི་གུག་ཞགས་པའི་ཕྱག་རྒྱས་ཡབ་ལ་འཁྲིལ༔ ཡབ་ཡུམ་གཉིས་སུ༴ ནུབ་སྒོར་པདྨ་ཁྲག་འཐུང་ཡབ་ཡུམ་དམར༔ པདྨ་དྲིལ་བུའི་ཕྱག་རྒྱས་ཡུམ་ལ་འཁྱུད༔ གྲི་གུག་ལྕགས་སྒྲོག་ཕྱག་རྒྱས་ཡབ་ལ་འཁྲིལ༔ ཡབ་ཡུམ་གཉིས་སུ་མེད་པའི༴ བྱང་སྒོར་ཀརྨ་ཁྲག་འཐུང་ཡབ་ཡུམ་ལྗང་༔ རྒྱ་གྲམ་དྲིལ་བུའི་ཕྱག་རྒྱས་ཡུམ་ལ་འཁྱུད༔ གྲི་གུག་དྲིལ་བུའི་ཕྱག་རྒྱས་ཡབ་ལ་འཁྲིལ༔ ཡབ་ཡུམ་གཉིས་སུ་མེད་པའི༴ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ མཆོག་ཆེན་དམ་པ་མཆོག་ཕྲན་མཚན་ལྡན་དང་༔ བདུད་རྩི་སྨན་མཆོད་རཀྟའི་ཨརྒྷཾ་དམར༔ བྷ་ལིང་གཏོར་མ་ཚོགས་ཀྱི་ལོངས་སྤྱོད་དང་༔ ཤ་ཆེན་གསུར་གྱི་དུད་སྤྲིན་སྣང་གསལ་མེ༔ ཐོད་པའི་རྔ་སྒྲ་རྐང་གླིང་རོལ་མོ་དུང་༔ མཆོད་རྫས་བསྐང་རྟེན་ཡོ་བྱད་སྣ་ཚོགས་ཀྱིས༔ ཁྲག་འཐུང་དཔལ་གྱི་འཁོར་ཚོགས་ཐུགས་དམ་བསྐང་༔ ཐུགས་དམ་བསྐང་ལ་དབང་དང་དངོས་གྲུབ་སྩོལ༔ ཧཱུྃ༔ ཕོ་བྲང་ཕྱི་ནང་བར་འཁྱམས་ཁོར་ཡུག་ནས༔ རྩ་གསུམ་ཆོས་སྐྱོང་སྲུང་མ་གཏེར་བདག་རྣམས༔ སོ་སོའི་གཡོག་འཁོར་བྱེ་བ་དཀའ་སྡོད་འབུམ༔ རང་རང་མཆོད་པའི་རྫས་ཀྱིས་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ མཆོག་ཆེན་དམ་པ་མཆོག་ཕྲན་མཚན་ལྡན་དང་༔ བདུད་རྩི་སྨན་མཆོད་རཀྟའི་ཨརྒྷཾ་དམར༔ བྷ་ལིང་གཏོར་མ་ཚོགས་ཀྱི་ལོངས་སྤྱོད་དང་༔ ཤ་ཆེན་གསུར་གྱི་དུད་སྤྲིན་སྣང་གསལ་མེ༔ ཐོད་པའི་རྔ་སྒྲ་རྐང་གླིང་རོལ་མོ་དུང་༔ མཆོད་རྫས་བསྐང་རྟེན་ཡོ་བྱད་སྣ་ཚོགས་ཀྱིས༔ རྩ་གསུམ་ཆོས་སྐྱོང་གཏེར་སྲུང་ཐུགས་དམ་བསྐང་༔ ཐུགས་དམ་བསྐང་ལ་རྐྱེན་ངན་བར་གཅོད་ཟློག༔ དེ་ནས་གནོང་འགྱོད་དྲག་པོས་དཀྱིལ་འཁོར་ལྷ་ཚོགས་ལ་འགྱོད་བཤགས་འབུལ་བ་ནི༔ རྣལ་འབྱོར་པ་རྣམས་ཀྱི་ལག་ཏུ་མར་མེ་དང་སྤོས་ཀྱི་རེང་བུ་ཐོགས་ཏེ༔ ད་ལ་འཆམས་སྟབས་ཀྱིས་བསྐོར་ཞིང་དབྱངས་སྙན་པོས་འདི་སྐད་དོ༔ ཀྱེ་མ་ཀྱེ་མ་བྱམས་མགོན་དཀྱིལ་འཁོར་ལྷ༔ མ་རིག་མུན་སེལ་ལྷ་ཚོགས་དགོངས་སུ་གསོལ༔ ཐོག་མ་མེད་ནས་འཁོར་བའི་གཡང་ས་འདིར༔ མ་རིག་ལས་ཀྱིས་མནར་བའི་སྡིག་ཅན་བདག༔ བདེ་བ་འདོད་བཞིན་མི་དགེའི་ལས་ལ་སྤྱད༔ སྡུག་བསྔལ་མི་བཟོད་དུ་མས་རང་རྒྱུད་མནར༔ གཅིག་ནས་གཅིག་ཏུ་ཟོ་ཆུའི་འཁྱུད་མོ་ལྟར༔ སྡུག་བསྔལ་འཁོར་བའི་དོང་རིང་འདིར་ལྷུང་ཚེ༔ སྐྱབས་དང་མགོན་བྲལ་ལས་ཀྱིས་དབང་བཙན་ན༔ སྙིང་ནས་སྐྱབས་གསོལ་ཐུགས་རྗེ་རྒྱལ་བའི་ལྷ༔ ཁྱེད་ཀྱིས་ཡལ་ཡོལ་ལེ་ལོ་མ་མཛད་པར༔ འཁོར་བའི་འདམས་ནས་དྲོངས་ཤིག་སྤྱན་རས་གཟིགས༔ ལས་ཀྱི་འཕྲོ་ཆད་སྐྱབས་དང་མགོན་མེད་ན༔ བྱམས་མགོན་ཐུགས་རྗེ་ཆུང་བར་མི་འགྱུར་རམ༔ བདག་ནི་ཐེག་མཆོག་ཟབ་མོ་འདིར་ཞུགས་ཤིང་༔ རྡོ་རྗེ་རྒྱལ་པོ་རྒྱལ་བའི་རྒྱལ་ཚབ་ལ༔ དད་གུས་མོས་པའི་སྲི་ཞུ་ཆུང་བ་དང་༔ སྒོ་གསུམ་ནོར་རྫས་འབུལ་བ་མ་འབྱོར་ཏེ༔ རྡོ་རྗེ་སློབ་དཔོན་སྐུ་ཡི་དམ་ཚིག་འགལ༔ ཉེས་བྱས་འགལ་འཁྲུལ་ཐམས་ཅད་མཐོལ་ལོ་བཤགས༔ ཞལ་གྱི་གདམས་པ་མན་ངག་རྒྱས་བཏབ་སྟེ༔ ཐུགས་ཀྱི་ཉིང་ཁུ་ཕྱུངས་ནས་གནང་ན་ཡང་༔ ཚེ་འདིའི་དབང་ཤོར་ཐོས་བསམ་གོལ་ཤོར་འདས༔ གསོལ་འདེབས་བསྙེན་སྒྲུབ་བཟླས་བརྗོད་མཐར་མ་ཕྱིན༔ གསུང་གི་དམ་ཚིག་ཉམས་ཆག་མཐོལ་ལོ་བཤགས༔ ཆོས་ཉིད་སྤྲོས་བྲལ་ཀ་དག་གཉུག་མའི་དོན༔ སྐྱེ་མེད་རང་རིག་མངོན་སུམ་ངོ་སྤྲད་ཀྱང་༔ ལེ་ལོ་གཡེང་བས་ཉམས་ལེན་ཕྱི་དུས་འགྱངས༔ ཉམས་རྟོགས་རྒྱུད་ལ་སྐྱེ་བའི་དུས་མ་མཆིས༔ ཐུགས་ཀྱི་དམ་ཚིག་ཉམས་ཆག་མཐོལ་ལོ་བཤགས༔ མདོར་ན་བླ་མ་ཡི་དམ་དཀྱིལ་འཁོར་ལྷ༔ མཁའ་འགྲོ་ཆོས་སྐྱོང་སྲུང་མ་རྒྱ་མཚོའི་ཚོགས༔ བདག་ནི་མ་རིག་ལས་ཀྱིས་དབང་ཁྱེར་ཏེ༔ རྩ་བ་ཡན་ལག་དམ་ཚིག་ཉམས་ཆགས་འགལ༔ སྦོམ་པོ་ཕྲ་མོ་ལ་སོགས་ཉེས་ལྟུང་ལས༔ ཐོག་མེད་བསྐལ་པའི་གོང་ནས་ད་བར་དུ༔ མི་དགེ་སྡིག་པའི་ལས་གྱུར་ཅི་བསགས་པ༔ གནོང་ངོ་འགྱོད་དོ་མཐོལ་བཤགས་དག་གྱུར་ཅིག༔ ཐུགས་རྗེ་ཆེར་མངའ་ཁྱེད་རྣམས་བརྩེར་དགོངས་ནས༔ བྱང་ཞིང་དག་ནས་ཚངས་པའི་དངོས་གྲུབ་སྩོལ༔ ཅེས་སོགས་བཤགས་ཚིག་སྣ་ཚོགས་སུ་བརྗོད་པས་ཉམས་ཆག་རྟོག་སྒྲིབ་ཐམས་ཅད་རབ་ཏུ་བྱང་ཞིང་དངོས་གྲུབ་སྣ་ཚོགས་འཐོབ་པ་དང་༔ བར་ཆད་ཐམས་ཅད་རབ་ཏུ་བྱང་ནས་འཕྲིན་ལས་ཐམས་ཅད་འགྲུབ་པར་འགྱུར་རོ༔ བསྐང་བཤགས་ཉམས་ཆག་རང་དག་ཅེས་བྱ་བ་འདི་ནི༔ ཨོ་རྒྱན་གྱི་སློབ་དཔོན་པདྨའི་གསུང་བཞིན་བདག་བུད་མེད་ཡེ་ཤེས་མཚོ་རྒྱལ་གྱིས་བརྡ་ཡིག་ཏུ་བཏབ་སྟེ༔ མ་འོངས་པའི་གང་ཟག་རྣམས་ཀྱི་དོན་དུ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མང་ཡུལ་བྱམས་པ་སྤྲིན་གྱི་གཙུག་ལག་ཁང་ནས་མེ་ཕོ་འབྲུག་གི་ལོ་ལ་གཏེར་ནས་གདན་དྲངས་ཤིང་། ལྕགས་ཕོ་སྤྲེའུའི་ལོ་ལ་ཤོག་སེར་ལས་ཕབ་པའོ།། །།སརྦ་མངྒ་ལཾ།། །།