འཛབ་དགོངས་དོན་གྱི་སྙིང་པོ།
ཐུགས་རྗེ་ཆེན་པོ་མ་རིག་མུན་སེལ་ལས༔ འཛབ་དགོངས་དོན་གྱི་སྙིང་པོ་བཞུགས༔ འཕགས་པ་མ་རིག་མུན་སེལ་ལ་ཕྱག་འཚལ་ལོ༔ ཐུགས་རྗེ་ཆེན་པོའི་རྣལ་འབྱོར་པས༔ བསྙེན་སྒྲུབ་དབང་དང་བུམ་སྒྲུབ་སོགས༔ ཏིང་འཛིན་དྲོད་ལ་སྒོམ་སྒྲུབ་ཚེ༔ འཛབ་དགོངས་དོན་གྱི་སྙིང་པོ་འདི༔ ལྟ་སྒོམ་འདྲེས་པར་ཉམས་སུ་ལོང་༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་བསྙེན་སྒྲུབ་སོགས་ཀྱི་བསྐྱེད་རྫོགས་རང་གཞུང་ལྟར་ལ༔ སྐབས་སྐབས་སུ་སྤྲོ་བསྡུ་བསྒྱུར་ཞིང་དབྱངས་དང་བཅས་ཏེ་འདི་སྐད་དོ༔ ཧྲཱིཿ རང་ཉིད་འཕགས་པའི་ཐུགས་ཀ་ནས༔ སྔགས་འཕྲེང་འོད་ཟེར་དཀར་པོ་འཕྲོས༔ བདེ་གཤེགས་ཀུན་གྱི་སྐུ་ལ་ཕོག༔ མཆོད་པས་སྐུ་མཉེས་བྱིན་རླབས་བསྡུས༔ བདག་ལ་ཐིམ་པས་བུམ་དབང་ཐོབ༔ སླར་ཡང་འོད་ཟེར་ཕྱོགས་བཅུར་འཕྲོས༔ འགྲོ་དྲུག་སེམས་ཅན་ལུས་ལ་ཕོག༔ ཁམས་གསུམ་སེམས་ཅན་ལུས་སྒྲིབ་སྦྱངས༔ སེམས་ཅན་ལུས་ཀུན་དབང་བསྡུས་ཏེ༔ འཕགས་པའི་སྐུ་རུ་གྲོལ་བར་བསམས༔ ཨཱོཾ་ཨཱ༔ཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ རང་ཉིད་འཕགས་པའི་ཐུགས་ཀ་ནས༔ སྔགས་འཕྲེང་འོད་ཟེར་དམར་པོ་འཕྲོས༔ བདེ་གཤེགས་ཀུན་གྱི་གསུང་ལ་ཕོག༔ མཆོད་པས་གསུང་མཉེས་བྱིན་རླབས་བསྡུས༔ བདག་ལ་ཐིམ་པས་གསང་དབང་ཐོབ༔ སླར་ཡང་འོད་ཟེར་ཕྱོགས་བཅུར་འཕྲོས༔ འགྲོ་དྲུག་སེམས་ཅན་ངག་ལ་ཕོག༔ ཁམས་གསུམ་སེམས་ཅན་ངག་སྒྲིབ་སྦྱངས༔ སེམས་ཅན་ངག་ཀུན་དབང་བསྡུས་ཏེ༔ འཕགས་པའི་གསུང་དུ་གྲོལ་བར་བསམས༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ རང་ཉིད་འཕགས་པའི་ཐུགས་ཀ་ནས༔ སྔགས་འཕྲེང་འོད་ཟེར་མཐིང་ག་འཕྲོས༔ བདེ་གཤེགས་ཀུན་གྱི་ཐུགས་ལ་ཕོག༔ མཆོད་པས་ཐུགས་མཉེས་བྱིན་རླབས་བསྡུས༔ བདག་ལ་ཐིམ་པས་ཚིག་དབང་ཐོབ༔ སླར་ཡང་འོད་ཟེར་ཕྱོགས་བཅུར་འཕྲོས༔ འགྲོ་དྲུག་སེམས་ཅན་ཡིད་ལ་ཕོག༔ ཁམས་གསུམ་སེམས་ཅན་ཡིད་སྒྲིབ་སྦྱངས༔ སེམས་ཅན་ཡིད་ཀུན་དབང་བསྡུས་ཏེ༔ འཕགས་པའི་ཐུགས་སུ་གྲོལ་བར་བསམས༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ རང་ཉིད་འཕགས་པའི་ཐུགས་ཀ་ནས༔ སྔགས་འཕྲེང་འོད་ཟེར་འཕྲོ་འདུ་ལས༔ ཁྲོ་ཆུང་མཚོན་ཐོགས་སྟེང་འོག་གང་༔ ཚ་ཚ་འཁྲུག་ཅིང་ཧཱུྃ་ཕཊ་སྒྲོག༔ སྟོང་གསུམ་ཀུན་ཀྱང་ཡོམ་ཡོམ་ཤིག༔ ཞི་བས་མི་ཐུལ་བདུད་དང་བགེགས༔ བསྐྲད་གཟིར་མནན་ཏེ་རྡུལ་དུ་རླགས༔ དྲེགས་པ་མ་ལུས་ཚར་བཅད་བསམས༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ཕཊ་སྭཱ་ཧཱ༔ རྔུབ་པའི་རླུང་ལ་ཨཱོཾ་ཨཱཿཧཱུྃ༔ ཧྲཱི་རྣམས་རང་སྒྲ་དི་རི་རི༔ གནས་པའི་རླུང་ལ་ཨཱོཾ་མ་ཎི༔ པད་རྣམས་ཡེ་ཤེས་ཟངས་སེ་ཟང་༔ འབྱིན་པའི་རླུང་ལ་མེ་དང་ཧཱུྃ༔ འགྲོ་འདུལ་སྤྲུལ་སྐུ་ཤར་ར་ར༔ རྡོ་རྗེའི་རླུང་གིས་བཟླས་པར་བྱ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ རང་སྣང་ཐུགས་རྗེ་ཆེན་པོའི་སྐུ༔ གཟུང་འཛིན་བྲལ་བའི་སེམས་ལ་ལྟོས༔ སྣང་བ་ཐམས་ཅད་རང་སྣང་ཡིན༔ ཡེ་ཤེས་རིག་པ་ངོ་མཚར་ཆེ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ སྒྲ་གྲགས་ཐམས་ཅད་འཕགས་པའི་གསུང་༔ བརྗོད་པ་བྲལ་བའི་དོན་ལ་ལྟོས༔ གྲགས་སྟོང་བརྗོད་མེད་ངོ་མཚར་ཆེ༔ ཡེ་ཤེས་རིག་པ་བླ་ན་མེད༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ དྲན་རྟོག་ཐུགས་རྗེ་ཆེན་པོའི་ཐུགས༔ རྟོག་པ་ཐམས་ཅད་རང་གྲོལ་ཡིན༔ གཉིས་འཛིན་བྲལ་བའི་ངང་ལ་ཞོག༔ ཡེ་ཤེས་རིག་པ་ངོ་མཚར་ཆེ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ བལྟས་པས་འཕགས་པའི་ཞལ་མི་མཐོང་༔ མ་ལྟས་བཞག་ན་ལྷ་དང་མཇལ༔ མ་བསྒྲུབས་བཞག་པས་སངས་རྒྱས་འགྲུབ༔ རང་བྱུང་ཐུགས་རྗེ་ཆེན་པོ་ཡིན༔ མ་ཡེངས་མི་བསྒོམ་སྔགས་འདི་བགྲང་༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ རང་སྣང་སྣང་བ་མཐའ་ཡས་ཏེ༔ རང་རིག་འཕགས་པ་སྤྱན་རས་གཟིགས༔ རིག་སྟོང་ངོ་བོ་གསང་ཡེ་ཡུམ༔ ཐབས་ཤེས་རང་གྲོལ་ལྕམ་དྲལ་སྲས༔ འགག་མེད་ཟང་ཐལ་རྟ་མཆོག་དཔལ༔ དུག་ལྔ་རྣམ་དག་སྐུ་ལྔ་སྟེ༔ འབྱུང་བ་ལྔ་དག་ཡུམ་མཆོག་ལྔ༔ ཚོགས་བརྒྱད་གནས་དག་སེམས་དཔའ་བརྒྱད༔ ཡུལ་བརྒྱད་གནས་དག་སེམས་མ་བརྒྱད༔ རྟོག་ཚོགས་རང་གྲོལ་ཐུབ་པ་དྲུག༔ མཁྱེན་རྩལ་ཡེ་ཤེས་སངས་རྒྱས་སྟོང་༔ རང་གསལ་ཁྲོ་ཚོགས་སྒོ་བ་ཡབ༔ རང་གྲོལ་ཀྲོ་ཏི་ཤེས་རབ་ཡུམ༔ ཡེ་ནས་ལྷ་ཚོགས་རང་ལ་རྫོགས༔ ཡེ་ཤེས་རིག་པ་ངོ་མཚར་ཆེ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཧྲཱི༔ འཁོར་འདས་གཉིས་མེད་ཆོས་ཀྱི་སྐུ༔ མ་འགགས་གསལ་སྟོང་ལོངས་སྤྱོད་རྫོགས༔ རིག་རྩལ་འགག་མེད་སྤྲུལ་པའི་སྐུ༔ སྐུ་གསུམ་སངས་རྒྱས་ལོགས་ན་མེད༔ ཡེ་ཤེས་རིག་པ་ངོ་མཚར་ཆེ༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཅེས་ཐུན་མཚམས་རྣམས་སུ་གསལ་གདབ་ཅིང་བསྙེན་པར་བྱའོ༔ འདི་ནི་ཡང་དག་ལྟ་བ་སྟེ༔ འདི་ནི་ཚུལ་བཞིན་སྒོམ་པ་མཆོག༔ འདི་ནི་སྙིང་པོའི་མཐར་ཐུག་སྟེ༔ འདི་ནི་བསྙེན་སྒྲུབ་འཛབ་དགོངས་སོ༔ འདི་ཡི་དོན་དང་ལྡན་པ་ན༔ ཐུགས་རྗེ་ཆེན་པོར་རང་གྲོལ་སྟེ༔ རྒྱལ་བ་ཀུན་དང་གཉིས་སུ་མེད༔ ཟབ་ཕྱིར་བོད་འབངས་འགྲོ་ལ་གདམས༔ ད་ལྟ་ཁྱེད་རྣམས་ཉམས་ལེན་འབུངས༔ མཐའ་འཁོབ་བོད་ཀྱི་ལུང་པ་འདིར༔ སངས་རྒྱས་བསྟན་པ་ད་ལྟ་དར༔ ཐོས་བསམ་སྒོམ་གསུམ་ཉི་མ་ཤར༔ ཁྱེད་རྣམས་སྐལ་བཟང་ལས་འཕྲོ་བཟང་༔ མ་འོངས་རྩོད་ལྡན་སྙིགས་མའི་དུས༔ བཀའ་དང་བསྟན་བཅོས་ཡ་མ་ཟུང་༔ གྲུབ་མཐའ་རྩོད་ཅིང་ཆོས་ལུགས་མང་༔ སངས་རྒྱས་བཀའ་ལ་རས་གཅོད་བྱེད༔ མདོ་སྔགས་ཆོས་ལ་གཟུ་ལུམ་རྒྱག༔ ཆོས་དང་གང་ཟག་རྒྱལ་བསྟན་གསུམ༔ ཡ་བྲལ་རྟགས་འཛིན་བསྟན་པ་འཆར༔ དེ་དུས་ཟབ་པའི་མཐར་ཐུག་བཀའ༔ ང་ཡི་ཆོས་འདིས་འགྲོ་བ་འདུལ༔ ཅེས་གསུངས་པ་རྣམས་བདག་བུད་མེད་ཡེ་ཤེས་མཚོ་རྒྱལ་གྱིས་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མེ་ཕོ་འབྲུག་གི་ལོ་ལ་མང་ཡུལ་བྱམས་པ་སྤྲིན་གྱི་གཙུག་ལག་ནས་གདན་དྲངས་ཤིང་། ལྕགས་ཕོ་སྤྲེའུ་ལོ་ལ་སློབ་དཔོན་ཆེན་པོའི་སྒྲུབ་ཕུག་ཁམས་སྲིང་མོ་རྫོང་གི་ཆགས་རུ་ཕུག་ནག་བདེ་བ་ཆེན་པོར་ཤོག་སེར་ལས་མགྱོགས་པར་ཞལ་བཤུས་པའོ། །སརྦ་མངྒ་ལཾ།། །།