མཐོང་གྲོལ་འགྲོ་བ་ཀུན་གྲོལ།
ཐུགས་རྗེ་ཆེན་པོ་མ་རིག་མུན་སེལ་ལས༔ མཐོང་གྲོལ་འགྲོ་བ་ཀུན་གྲོལ་བཞུགས༔ འཕགས་པ་མ་རིག་མུན་པ་ཐམས་ཅད་རབ་ཏུ་བསལ་བའི་སྐུ་ལ་ཕྱག་འཚལ་ལོ༔ བསྒྲུབ་ལ་བརྩོན་པའི་རྣལ་འབྱོར་པས༔ འགྲོ་བའི་དོན་དུ་སེམས་བསྐྱེད་དེ༔ མཐོང་གྲོལ་འཁོར་ལོ་འདི་ལྟར་འབྲི༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་མཐོང་གྲོལ་འབྲི་བ་ནི༔ རྒྱུད་ལས༔ གཟའ་སྐར་ཤིས་པའི་ཉི་མ་ལ༔ དར་ཟབ་ཤོག་བུ་གང་རུང་ངོས༔ འཕགས་པའི་ལྷ་དང་སྔགས་འཁོར་འགོད༔ ལྷ་ཚོགས་དཀྱིལ་འཁོར་ཚོམ་བུར་བསྐྱེད༔ དྲི་བཟང་བྱུག་ཅིང་མེ་ཏོག་འཐོར༔ ཤིས་བརྗོད་རབ་གནས་ཚོང་འདུས་སམ༔ མགྲོན་ཁང་བཞི་མདོ་དག་ཏུ་བཞུགས༔ དེ་མཐོང་འཕགས་པའི་སྐུ་རུ་གྲོལ༔ ཅེས་པས་སྔོན་འགྲོ་དང་དངོས་གཞི་རྗེས་གསུམ་གྱི་རིམ་པས་སྟོན་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྔོན་དུ་འགྲོ་བ་ནི༔ བཀྲ་ཤིས་ཤིང་གཟའ་སྐར་དར་བའི་ཉི་མ་ལ༔ བྱང་ཆུབ་མཆོག་ཏུ་སེམས་བསྐྱེད་ཅིང་༔ རབ་དར་བཟང་པོ་འབྲིང་རས་ཐ་ནའང་ཤོག་བུ་ལ༔ རབ་གསེར་འབྲིང་དངུལ་ཐ་ནའང་རྒྱ་སྣག་དང་རྒྱ་མཚལ་སོགས་རྒྱུ་བཟང་པོས༔ འཁོར་ལོ་མུ་ཁྱུད་བཅུ་བཞིར་བསྐོར་ཞིང་༔ ལྟེ་བ་ལ་འཕགས་པ་གཙོ་འཁོར་ལྔ་ཚོམ་བུའི་རྣམ་པར་འབྲི་ཞིང་༔ གཙོ་བོའི་གཙུག་ཏོར་གྱི་སྟེང་དུ་རིགས་བདག་དང་བཅས་པ་ཚད་དང་ལྡན་པར་འབྲི༔ དེའི་ཕྱི་རིམ་མུ་ཁྱུད་ལ་སྙིང་པོ་ཡི་གེ་བཅུ་པ་ཅི་མང་འབྲི༔ དེའི་ཕྱི་རིམ་མུ་ཁྱུད་ལ་འཕགས་པ་སྤྱན་རས་གཟིགས་རིགས་ལྔ་ལེགས་པར་ཡུམ་དང་འཁྲིལ་བ་འབྲི༔ དེའི་ཕྱི་རིམ་མུ་ཁྱུད་ལ༔ ཨཱོཾ་ཛཱི་ན་ཛི ཀ་ལཾ་ཏེ་ཤྭ་ར་ཏི་ཧཱུྃ༔ ཨཱོཾ་བཛྲ་དྷྲི ཀ་མུཾ་དྷརྟུ་ཤྭ་རི་སྟྭཾ༔ སྭ་རཏྣ་དྷྲི ཀ་པྱཾ་རཱ་ག་ར་ཏི་སྟྭཾ༔ ཨཱཾ་ཨ་རོ་ལིཀ་མཾ་མོ་ཧ་ར་ཏི་སྟྭཾ༔ ཧ་པྲ་ཛྙ་དྷྲིག་ཏཾ་བཛྲ་ར་ཏི་སྟྭཾ༔ཅེས་ཚར་ཅི་མང་འབྲི༔ དེའི་ཕྱི་རིམ་མུ་ཁྱུད་ལ༔ བྱང་ཆུབ་སེམས་དཔའ་བརྒྱད་དང་སེམས་མ་བརྒྱད་ཟུང་འཇུག་ཏུ་མངོན་རྟོགས་ལྟར་འབྲི༔ དེའི་ཕྱི་རིམ་མུ་ཁྱུད་ལ༔ ཀྵི་ཧི་རཱ་ཛ་ཡ་ཧཱུྃ་ལ་སྱ་ས་མ་ཡ་སྟྭཾ༔ ཏྲཾ་ཨ་ཀཪྴ་ཡ་ཡཾ་ཏཱཾ་མཱ་ལེ་ས་མ་ཡ་སྟྭཾ༔ ཧྲཱིཿཔདྨ་བྷནྡྷ་དྷ་ར་ཧྲཱི་གྷིརྟི་ར་ཧོ་ཧཾ༔ ཛིཾ་ཀུ་རུ་པ་ན་ཧྲི༔ ཨ་ནིརྟི་རྭ་ག་ཡ་མི་སྟྭཾ༔ མེ་དྷ་ར་ནི་སྭཱ་ཧཱ༔ ཛ་དྷུ་པེ་པྲ་ཝེ་ཤ་ཡ་སྟྭཾ༔བྷ་ནི་པ་རཾ་པ་ན་ཡེ་སྭཱ་ཧཱ༔ བཾ་ཏི་བ་སུ་ཀི་ནི་སྟྭཾ༔ ཨཱོཾ་པྲ་ཏ་བྷ་ཏྲ་ཡ་ཧཱུྃ༔ པུཥྤེ་ཨ་ཝེ་ཤ་ཡ་སྟྭཾ༔ མུཾ་ཤྲཱི་ར་ག་ཡ་སྭཱ་ཧཱ༔ ཧོ་གྷནྡྷེ་ཙིཏྟ་སྟྭཾ༔ཅེས་འབྲི༔ དེའི་ཕྱི་རིམ་མུ་ཁྱུད་ལ་ཐུབ་པ་དྲུག་འབྲི༔ དེའི་ཕྱི་རིམ་མུ་ཁྱུད་ལ༔ ཨཱོཾ་མུ་ནེ་ཏྲཾ་སྭཱ་ཧཱ༔ ཨཱོཾ་མུ་ནེ་ཏྲུམ་སྭཱ་ཧཱ༔ ཨཱོཾ་མུ་ནེ་ཧཱུྃ་ཏྲུཾ་སྭཱ་ཧཱ༔ ཨཱོཾ་མུ་ནེ་བྷྲཱུཾ་སྭཱ་ཧཱ༔ ཨཱོཾ་མུ་ནེ་ཀྵཾ་སྭཱ་ཧཱ༔ ཨཱོཾ་མུ་ནེ་ཡེ་སྭཱ་ཧཱ༔ ཞེས་འབྲི༔ དེའི་ཕྱི་རིམ་པདྨའི་ཁོར་ཡུག་ཕྱི་ནང་གསུམ་གྱི་ནང་དུ༔ བསྐལ་བཟང་གི་སངས་རྒྱས་སྟོང་རྩ་གཉིས་འབྲི༔ དེའི་ཕྱི་རིམ་མུ་ཁྱུད་ལ་སངས་རྒྱས་སྟོང་གི་མཚན་སྔགས་འབྲི༔ དེའི་ཕྱི་རིམ་མུ་ཁྱུད་ལ་ཕྱོགས་བཞིར་ཁྲག་འཐུང་རིགས་བཞི་འབྲི་ཞིང་༔ ཁྲག་འཐུང་རིགས་བཞིའི་བར་མཚམས་རྣམས་སུ་ཞི་ཁྲོ་བཀའ་བརྒྱད་ཀྱི་སྙིང་པོ་མང་དུ་འབྲི༔ དེའི་ཕྱི་རིམ་མུ་ཁྱུད་ལ་ཐུགས་རྗེ་ཆེན་པོས་དམ་བཅས་པའི་གཟུངས་མདོ་སྔགས་ཀྱི་ལུགས་ཅི་མང་འབྲི་ཞིང་༔ འདོད་གསོལ་འདི་ལྟར་འབྲི་བར་བྱའོ༔ འཕགས་པ་ཐུགས་རྗེ་ཆེན་པོ་མ་རིག་མུན་སེལ་གྱི་ལྷ་ཚོགས་འཁོར་དང་བཅས་པ་ཁྱེད་རྣམས་ཀྱིས་བསྐལ་པ་མང་པོའི་གོང་རོལ་ནས་ཐུགས་བསྐྱེད་དང་སྨོན་ལམ་རླབས་པོ་ཆེ་འགྲོ་བའི་དོན་དུ་བཏབ་པ་རྗེས་སུ་དགོངས་ཏེ༔ མཐོང་གྲོལ་གྱི་འཁོར་ལོ་ཟབ་མོ་འདི་དང་སྐུ་གསུང་ཐུགས་ཀྱི་ཡེ་ཤེས་ཆེན་པོ་གཉིས་སུ་མེད་པར་ཇི་སྲིད་ཀྱི་བར་དུ་བཞུགས་ནས༔ རྟེན་མཆོག་དམ་པ་འདི་མཐོང་བའི་འགྲོ་བ་སེམས་ཅན་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་མྱུར་དུ་བསྒྲལ་ཏེ༔ སངས་རྒྱས་སྐུ་གསུམ་རྒྱལ་བ་རྒྱ་མཚོ་ལྷ་ཚོགས་རྣམས་ཀྱི་གོ་འཕང་འཐོབ་པར་མཛད་དུ་གསོལ༔ ལམ་སྣ་འདྲེན་པར་མཛད་དུ་གསོལ༔ ཕྱིར་མི་ལྡོག་པའི་དངོས་གྲུབ་སྩལ་དུ་གསོལ༔ ཅེས་འབྲི༔ དེའི་ཕྱི་རིམ་མུ་ཁྱུད་ལ་དབྱངས་གསལ་བྱེད་དང་ཡེ་དྷརྨཱ་འབྲི༔ དེའི་ཕྱི་རིམ་མུ་ཁྱུད་ལ་སྐུ་གདུང་སྟོང་གི་རི་མོ་བྱ༔ ཕྱི་རོལ་འོད་ལྔའི་ར་བས་བསྐོར༔ ལྷ་ཚོགས་ཐམས་ཅད་སྒྲུབ་ཁོག་ལས་བྱང་ལྟར་སྐུ་མདོག་ཕྱག་མཚན་མཚུངས་པར་འབྲི་ཞིང་༔ སྔགས་ཀྱི་ཡིག་འབྲུ་རྣམས་ཀྱང་མུ་ཁྱུད་ཕྱི་ནང་རང་མལ་མ་གང་བར་དུ་འདེབས་པར་བྱའོ༔ བྲིས་བསུབས་དང་ལྷག་ཆད་སྤངས་ཏེ་བརྩོན་འགྲུས་དང་ལྡན་པས་འབྲིའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞི་ནི༔ དེ་ལྟར་ཡིད་བཞིན་ནོར་བུ་ལྟ་བུའི་འཁོར་ལོ་དེ་ལ་དྲི་བཟང་པོའི་ཚོགས་དང་༔ མཛེས་པའི་ཚོན་གྱིས་ལེགས་པར་བྱུགས་ནས༔ འབྲུའི་ཚོམ་བུ་ལྷ་གྲངས་དང་མཉམ་པ་བཀོད་པའི་སྟེང་དུ་བཤམས༔ སྨན་གཏོར་རཀྟ་སོགས་མཆོད་པ་དང་ཚོགས་ཀྱི་ཡོ་བྱད་རྒྱས་པར་བཤམས་ཤིང་༔ གུ་གུལ་བདུག་ཅིང་བགེགས་བསྐྲད༔ བསྲུང་བའི་འཁོར་ལོ་བསྒོམ༔ ལས་ཀྱི་གཞུང་བསྲང་ལྷ་ཚོགས་བསྐྱེད་བསྟིམ་དང་ཁྲུས་གསོལ་རབ་གནས་རྒྱས་པར་བྱ་ཞིང་༔ ཤིས་བརྗོད་ཀྱི་ཚིགས་སུ་བཅད་པ་མང་པོས་མེ་ཏོག་འཐོར༔ མཆོད་བསྟོད་རྒྱས་པར་བྱ༔ གཟུངས་སྔགས་རྣམས་ལ་རྒྱལ་བ་ཐམས་ཅད་ཀྱི་གསུང་༔ སྐུ་གཟུགས་རྣམས་ལ་བདེ་བར་གཤེགས་པའི་སྐུ༔ སྐུ་གདུང་རྣམས་ལ་ཐུགས་ཀྱི་བྱིན་རླབས་ཐམས་ཅད་ཡོངས་སུ་རྫོགས་ནས༔ མིག་གིས་མཐོང་བའི་འགྲོ་བ་ཐམས་ཅད་འཕགས་པ་མ་རིག་མུན་སེལ་གྱི་གོ་འཕང་ཐོབ་པའི་རང་བཞིན་དུ་བསམས་ཏེ་རྣམ་པར་དག་པའི་སྨོན་ལམ་ཡང་ཅི་མང་གདབ་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་ནི༔ དེ་ལྟ་བུའི་མཐོང་གྲོལ་གྱི་གདམས་པ་འདི༔ རབ་རེག་གྲོལ་དང་སྦྲེལ་ཏེ་ཀ་ནི་ཀའི་གཞལ་ཡས་མས་ཕིབས་སུ་བྱ་བའམ༔ ཡང་ན་ཚོང་དུས་མགྲོན་ཁང་བཞི་མདོ༔ མདོར་ན་སྐྱེ་འགྲོ་རྣམས་ཀྱི་འགྲིམ་འགྲུལ་ཆེ་བའི་སར་ལྷ་ཁང་གི་རྣམ་པ་ལྟ་བུ་ལ་སོགས་འབྱུང་བས་མི་འཇིགས་པའི་གནས་བཟོ་ཞིང་༔ དེར་བཞུགས་སུ་གསོལ་བས་སྐྱེ་འགྲོ་སེམས་ཅན་སུས་མཐོང་ཐམས་ཅད༔ བསོད་ནམས་ཀྱི་ཚོགས་ཀྱི་རིམ་པ་ལྟར་སྐུ་གསུམ་གྱི་ཞིང་དུ་གྲོལ་བར་འགྱུར་བ་ནི་གདོན་མི་ཟའོ༔ དེ་ལྟ་བས་ན་བྱང་ཆུབ་ཀྱི་སེམས་དང་ལྡན་པའི་རྣལ་འབྱོར་པས༔ བརྩོན་འགྲུས་ཀྱི་གོ་ཆ་གྱོན་ཏེ་ཡང་དག་པར་བརྩོན་པར་བྱའོ༔ ཚུལ་བཞིན་ཉམས་སུ་བླང་བར་བྱའོ༔ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མེ་ཕོ་འབྲུག་གི་ལོ་ལ་གཏེར་ནས་སྤྱན་དྲངས་ཤིང་༔ ལྕགས་ཕོ་སྤྲེའུའི་ལོ་ལ་ཤོག་སེར་ལས་བཤུས་པའོ།། སརྦ་མངྒ་ལཾ།། །།