ཚེ་སྒྲུབ་སྙིང་གི་ནོར་བུ།
ཐུགས་རྗེ་ཆེན་པོ་མ་རིག་མུན་སེལ་ལས༔ ཚེ་སྒྲུབ་སྙིང་གི་ནོར་བུ་གཞུགས༔ ཐུགས་རྗེ་ཆེན་པོ་མ་རིག་མུན་སེལ་ལ་ཕྱག་འཚལ་ལོ༔ རྒྱུད་ལས༔ མཎྜལ་དབུས་སུ་བུམ་པ་འགོད༔ ཁ་རྒྱན་མགུལ་ཆིངས་བཅུད་ཀྱི་བཀང་༔ རང་ཉིད་འཕགས་པའི་སྐུ་རུ་བསྒོམ༔ བུམ་པ་སྣང་མཐའ་ཚེ་དཔག་མེད༔ ཕྱི་ནང་གསང་བ་དེ་ཁོ་ནས༔ ཚེ་བསྒྲུབ་ཚེ་ཡི་རིག་འཛིན་རྙེད༔ ཅེས་པས༔ གནས་དབེན་ཞིང་དངས་ལ་རིག་པ་གསལ་བའི་ཡུལ་དུ༔ བརྩོན་འགྲུས་དང་ལྡན་པའི་རྣལ་འབྱོར་པས༔ སྟེགས་བུ་མཛེས་འཇམ་མཁྲེགས་པའི་སྟེང་དུ་འབྲུའི་ཚོམ་བུ་བཀོད་ཅིང་༔ དབུས་སུ་བུམ་པ་མཚན་ཉིད་དང་ལྡན་པ་ཁ་རྒྱན་མགུལ་ཆིངས་བུམ་སྨན་ལྡན་པ་བཤམས༔ གཡས་གཡོན་རྣམས་སུ་ཚེ་ཆང་ཚེ་གཏོར་མདར་དར་སོགས་འགོད༔ མཐར་མཆོད་པ་རྣམས་འབྱོར་ཚད་བཤམས༔ རྣལ་འབྱོར་པ་བདེ་བའི་གདན་ལ་འདུག༔ མ་རིག་མུན་སེལ་གྱི་ལས་གཞུང་བསྲང་༔ བསྙེན་པ་བརྒྱ་སྟོང་གིས་ཁ་གསོའོ༔ དེ་ནས་སྐད་ཅིག་གི་མདུན་གྱི་བུམ་པ་མགོན་པོ་སྣང་བ་མཐའ་ཡས་ཚེ་དང་ཡེ་ཤེས་དཔག་ཏུ་མེད་པ་ཞལ་གཅིག་ཕྱག་གཉིས་མཉམ་གཞག་གི་སྟེང་ན་ཚེ་བུམ་བསྣམས་པ༔ རྡོ་རྗེ་སྐྱིལ་ཀྲུང་པད་ཉི་ཟླ་གདན་ལ་བཞུགས་པ༔ ལོངས་སྤྱོད་རྫོགས་པའི་སྐུ་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོ་བ༔ ཚེ་ཡི་ལྷ་ཚོགས་ཐམས་ཅད་འདུས་པའི་སྐུ་རུ་བསྒོམ༔ དེའི་གནས་གསུམ་ལས་འོད་ཟེར་འཕྲོས་པས་ནུབ་ཕྱོགས་བདེ་བ་ཅན་གྱི་ཞིང་ཁམས་ནས་ཚེ་དཔག་མེད་ཀྱི་ལྷ་ཚོགས་ཐམས་ཅད་ཆར་སྤྲིན་འཐིབ་པ་ལྟར་བྱོན་ནས་མདུན་གྱི་དམ་ཚིག་པ་ལ་ཐིམ་གཉིས་སུ་མེད་པར་བསམས་ཤིང་མཆོད་བསྟོད་ཅི་རིགས་པར་བྱའོ༔ ཨཱོཾ་ཨ་མི་དྷེ་ཝ་ཚེ་བྷྲཱུྃ་སྭཱ་ཧཱ༔ འབུམ་ཚོ་གཅིག་བཟླས་ཤིང་ཐུན་སྐབས་རྣམས་སུ་མགོན་པོ་ཚེ་དཔག་མེད་ཀྱི་སྐུ་གསུང་ཐུགས་ལས་འོད་ཟེར་དཀར་དམར་མཐིང་གསུམ་འཕྲོས༔ རང་གི་ལུས་ངག་ཡིད་གསུམ་ལ་ཕོག་པས་སྐུ་གསུང་ཐུགས་ཀྱི་བྱིན་རླབས་ཐོབ༔ ཚེ་ཡི་རིག་འཛིན་བརྙེས་པར་བསམས༔ དེ་ཚེ་རྟགས་ཀྱི་རིམ་པ་ནི༔ ཉི་ཟླ་ཤར་བ་གངས་རི་ལ་འཛེག་པ་རྣག་ཁྲག་ཟགས་པ་ནམ་མཁའ་ལ་འཕུར་བ་གོས་དྲི་མ་མེད་པ་གྱོན་པ་སོགས་ཀྱི་རྟགས་རྣམས་འོང་ངོ་༔ རྟགས་གསལ་བསྙེན་པ་རྫོགས་ནས་སྒྲུབ་རྫས་རྣམས་གནས་གསུམ་དུ་གཏུག་ཅིང་དབང་བཞི་ལེན༔ ཡེ་ཤེས་པ་གཤེགས་དམ་ཚིག་པ་བསྡུ༔ རྗེས་མི་མངོན་པར་བྱ་ཞིང་སྒྲུབ་རྫས་རྣམས་དངོས་གྲུབ་ཏུ་རོལ་ལོ༔ ནང་ལྟར་དུ་ཚེ་བསྒྲུབ་པ་ནི༔ བྱ་རོག་སྐད་མ་གྲགས་གོང་ལུས་འདུག་སྟངས་བཟང་པོ་བྱ་ཞིང་རླུང་རོ་འབུད༔ སྐྱབས་སེམས་སྔོན་དུ་བཏང་སྟེ༔ སྐད་ཅིག་གི་རང་ཉིད་འཕགས་པ་མ་རིག་མུན་སེལ་དུ་གསལ་བའི་ཐུགས་ཀར་མགོན་པོ་སྣང་བ་མཐའ་ཡས་ཚེ་དཔག་མེད་མངོན་སུམ་དུ་བསྐྱེད་དེ༔ དེའི་ཐུགས་ཀར་ཉི་མའི་དཀྱིལ་འཁོར་གྱི་དབུས་སུ་ཐུགས་ཀྱི་ས་བོན་རང་རིག་གི་ངོ་བོ་ཡི་གེ་ཧྲཱིཿདམར་པོ་མདངས་དང་ལྡན་པ་ཚེག་དྲག་རིང་ཆར་ལྡན་པ་ཞིག་ཏུ་གསལ༔ དེའི་མཐའ་སྐོར་དུ་ཨཱོཾ་ཨ་མི་དྷེ་ཝ་ཛྙ་ན་སརྦ་ཚེ་བྷྲཱུྃ་སིདྡྷི་སྭཱ་ཧཱ༔ ཞེས་པའི་སྔགས་འབྲུ་རྣམས་གཡས་སྐོར་དུ་འཁོར་བ་ལས་སྒྲ་རང་གྲགས་སུ་དི་རི་རི་ཡོད་པར་བསམས་ཤིང་མ་ཡེངས་པར་རྩེ་གཅིག་པའི་ངང་ནས་སྟོང་ཚོ་བཅུ་བཟླས་པའི་མཇུག་ཏུ༔ རང་གི་ཐུགས་ཀའི་ཚེ་དཔག་མེད་ཀྱི་གནས་གསུམ་དང་ཁྱད་པར་ཧྲཱིཿཡིག་སྔགས་འབྲུ་དང་བཅས་པ་རྣམས་ལས་འོད་ཟེར་ཉི་མའི་ཟེར་ལྟར་ཕྱོགས་བཅུ་ཀུན་ཏུ་འཕྲོས་པས༔ འཁོར་འདས་ལམ་གསུམ་གྱི་ཐུགས་རྗེ་བྱིན་རླབས་ཚེ་བསོད་དཔལ་འབྱོར་དབང་ཐང་ཐམས་ཅད་རྡོ་ཁབ་ལེན་གྱིས་ལྕགས་བསྡུས་པ་ལྟར་འུབ་འུབ་བསྡུས་ཏེ༔ ཐུགས་ཀའི་ས་བོན་རང་གི་ལུས་ངག་ཡིད་གསུམ་དང་བཅས་པ་རྣམས་ལ་འོད་ཟེར་དཀར་སེར་དམར་ལྗང་གི་རྣམ་པར་སིབ་སིབ་ཏུ་ཐིམ་པས༔ རང་གི་བླ་ཚེ་ཆད་ཉམས་ཐམས་ཅད་ཡོངས་སུ་སྐོངས་ཤིང་ནུས་སྟོབས་དང་གཟི་བརྗིད་ཆེས་ཆེར་རྒྱས་པས་འཆི་བ་མེད་པའི་རིག་འཛིན་ཚེ་ཡི་དངོས་གྲུབ་ཐོབ་པས་བསམས་ཤིང་༔ གོང་གི་སྙིང་པོ་བརྒྱ་རྩ་བརྒྱད་བཟླས་པའི་མཇུག་ཏུ་ལྷ་སྐུ་སྔགས་འཁོར་དང་བཅས་པ་འོད་དུ་སྟེམ་གྱིས་ཞུ་སྟེ༔ རང་དང་གཉིས་སུ་མེད་པར་ཆུ་དང་འོ་མ་འདྲེས་པ་ལྟར་བསམས་ཤིང་༔ དར་ཅིག་དམིགས་མེད་ཕྱག་རྒྱ་ཆེན་པོའི་ངང་ལ་མཉམ་པར་གཞག་གོ༔ འདི་ནི་ཞག་གསུམ་བསྒོམས་པས་ཚེའི་བར་ཆད་ཐམས་ཅད་བྱང་༔ བདུན་གཅིག་བརྩོན་ན་བླ་ཚེ་ཆད་ཉམས་སོར་ཆུད༔ ཟླ་བ་ལོ་སོགས་རྒྱུན་ཏུ་ཆག་མེད་བྱས་ན་ཚེའི་དངོས་གྲུབ་འཐོབ་ཅིང་ཚེ་མཐར་ཕྱིན་པར་ཐེ་ཚོམ་མེད་དོ༔ རྨི་ལམ་དུའང་ཐོད་ཆང་འཐུང་བ༔ བུད་མེད་བཟང་མོས་ཟས་གོས་སྟེར་བ༔ གོ་གྱོན་པ་གཡུལ་ལས་རྒྱལ་བ༔ རྒྱན་བཏགས་པ་ཁྲུས་བྱས་པ་མཁར་བརྡུང་བ་སོགས་ཀྱི་ལྟས་ཁྱད་པར་ཅན་ཡོང་ངོ་༔ གསང་བ་ལྟར་དུ་ཚེ་བསྒྲུབ་པ་ནི༔ ནམ་ལངས་ཞི་བའི་དུས་སུ་ལུས་ཆོས་བདུན་དང་ལྡན་པའི་ངང་ནས༔ རྩ་གསུམ་འཁོར་ལོ་བཞི་གསལ་ཞིང་སྤྱི་བོའི་ཧཾ་ཡིག་མགོན་པོ་ཚེ་དཔག་མེད་ཀྱི་ངོ་བོ༔ ཨ་ཤད་ཡུམ་གསང་བ་ཡེ་ཤེས་ཀྱི་མཁའ་འགྲོ་མར་གསལ་བདེ་སྟོང་གི་འབར་འཛག་སྙོམས་འཇུག་གི་རང་བཞིན་དུ་བསྒོམས་ཏེ༔ སྣ་བུག་ནས་རླུང་ཕར་འབུད་པའི་དུས་སུ་ཚེ་དཔག་མེད་ཡབ་ཡུམ་གྱི་སྐུ་གསུང་ཐུགས་ལས་འོད་ཟེར་གྱི་ཚོགས་གྲངས་མེད་དཔག་ཏུ་མེད་པ་འཁོར་འདས་ཐམས་ཅད་ལ་ཁྱབ་པར་འཕྲོས༔ ཚུར་རྔུབ་པའི་དུས་སུ་དེ་ཐམས་ཅད་ཀྱི་ཐུགས་རྗེ་བྱིན་རླབས་ནུས་མཐུ་ཡོན་ཏན་ཐམས་ཅད་བསྡུས་ནས་རྩ་འཁོར་ཐིག་ལེ་རྣམས་ལ་ཆིལ་ཆིལ་ཐིམ་པས་ཚེ་བསོད་དཔལ་འབྱོར་ཉམས་རྟོགས་ཐམས་ཅད་ཡར་ངོའི་ཟླ་བ་ལྟར་ཡོངས་སུ་རྒྱས་ཤིང་གོང་དུ་འཕེལ་བར་བསྒོམས་ལ་རླུང་ཁུག་བ་བདུན་གསུམ་ལས་མི་ཉུང་བར་བཟུང་སྟེ་མཐར་མི་དམིགས་པས་རྒྱས་གདབ༔ སྟོང་ཉིད་དུ་མཉམ་པར་གཞག་ཅིང་ལུས་སྦྱོང་ལ་སོགས་འབད་བས་རིག་འཛིན་ཚེ་ཡི་དངོས་གྲུབ་འཐོབ༔ ལས་རླུང་དབུ་མར་དྭངས་ཤིང་བག་ཆགས་ཀྱི་རྟོག་པ་འགག༔ ཟག་བཅས་ཐམས་ཅད་ཟག་མེད་དུ་གྲོལ་ཞིང་ཐུན་མོང་གྲུབ་པ་བརྒྱད་མངོན་དུ་སྤྱོད༔ རྩ་རླུང་ཐིག་ལེ་ལས་སུ་རུང་བས་ཡེ་ཤེས་དང་འཇིག་རྟེན་གྱི་མཁའ་འགྲོ་མ་ཐམས་ཅད་ལུས་དང་གྲིབ་མ་ལྟར་འགྲོགས༔ ཚེ་ཡི་ལྷ་མོ་འགྱོགས་མ་དང་བཅས་པས་བར་ཆད་སེལ་ཞིང་ཚེའི་དངོས་གྲུབ་ཐོགས་པ་མེད་པར་སྟེར༔ དེ་ལྟར་ཡང་ཟབ་ཚེ་སྒྲུབ་སྙིང་གི་ནོར༔ མང་པོའི་བཅུད་བསྡུས་རྒྱུད་ཀྱི་དགོངས་པར་བརྟེན༔ ཚེགས་ཆུང་དོན་ཆེ་སྙིང་གི་བརྣག་པ་འདི༔ ཕྱི་རབས་དོན་དུ་པདྨ་བདག་གིས་བྲིས༔ ལྔ་བརྒྱ་རྩོད་ལྡན་དུས་ཀྱི་ཐ་མ་ལ༔ ལས་འཕྲོ་ཅན་གྱི་བུ་དང་འཕྲད་ནས་ཀྱང་༔ ཆོས་ལྡན་རྣམས་ཀྱི་བར་ཆད་སེལ་བར་ཤོག༔ སྡིག་སྤྱོད་མ་དག་འགྲོ་ལ་ཨ་ཐམ་རྒྱ༔ དཔལ་ལྡན་ཡེ་ཤེས་མགོན་པོས་བཀའ་འདི་སྲུངས༔ ལས་མགོན་བྱ་རོག་གདོང་གིས་གཏེར་འདི་འཚོས༔ དུས་ལ་བབས་ཚེ་ལས་འཕྲོ་ཅན་ལ་སྤྲོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མེ་ཕོ་འབྲུག་གི་ལོ་ལ་མང་ཡུལ་བྱམས་པ་སྤྲིན་གྱི་གཙུག་ལག་ཁང་ནས་གདན་དྲངས་ཤིང་༔ ལྕགས་ཕོ་སྤྲེལ་གྱི་ལོ་ལ་ཁམས་སྲིང་མོ་རྫོང་གི་ཆགས་རུ་ཕུག་ནག་བདེ་བ་ཆེན་པོར་ཧོར་ཟླ་དྲུག་པར་ཤོག་སེར་ལས་ཞལ་བཤུས་པའོ།། སརྦ་མངྒ་ལཾ།། །།