ཐུགས་རྗེ་ཆེན་པོ་མ་རིག་མུན་སེལ་གྱི་སྔོནའགྲོའི་ཉམས་ལེན་ཟིན་བྲིས།

འཕགས་པ་ཐུགས་རྗེ་ཆེན་པོ་མ་རིག་མུན་སེལ་གྱི་སྔོནའགྲོའི་ཉམས་ལེན་ཟིན་བྲིས་བཞུགས་སོ། །བླ་མ་དང་མགོན་པོ་སྤྱན་རས་གཟིགས་ལ་ཕྱག་འཚལ་ལོ། །དེ་ཡང་སྔོན་འགྲོ་ཕྱི་ནང་གི་རིམ་པ་ཉམས་སུ་ལེན་ཚུལ་ཐོག་མར། ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པའི་ཕྱིར་དུ་འདི་ལྟ་བུའི་གདམས་པ་ཟབ་མོ་ཉམས་སུ་བླང་བར་བྱ་སྙམ་དུ་སེམས་བསྐྱེད། དེ་ནས་རང་གི་ལུས་རྙེད་པར་དཀའ་བ་བསམ་པ་ལ་དངོས་པོའི་སྒོ་ནས་བསམ་པ་ནི། བརྒྱད་སྟོང་འགྲེལ་ཆེན་ལས། དམྱལ་བ་ཡི་དྭགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་དང་། །ལོག་ལྟ་སངས་རྒྱས་ཀྱིས་སྟོངས་བ། ལྐུགས་པ་འདི་དག་མི་ཁོམས་བརྒྱད། །ཅེས་པ་ལས་ལོག་པ་ནི་དལ་བ་བརྒྱད་དང་། འབྱོར་བ་བཅུ་ནི། མིར་གྱུར་དབུས་སྐྱེས་དབང་པོ་ཚང་། །ལས་མིན་གནས་དད་བདག་འབྱོར་ལྔ། སྟོན་བྱོན་ཆོས་གསུངས་བསྟན་པ་གནས། །རྗེས་འཇུག་འགྲོ་བརྩེ་གཞན་འབྱོར་ལྔ། །ཞེས་གསུངས་པས་དལ་འབྱོར་བཅོ་བརྒྱད་ཚང་བའི་ལུས་རྟེན་འདི་ནི་སྔོན་བསགས་དགེ་བའི་འབྲས་བུས་ད་རེས་ཐོབ་པ་མ་གཏོགས་ཡང་ཡང་རྙེད་པར་མི་འགྱུར་བས་མྱུར་དུ་དམ་པའི་ཆོས་ལ་འབད་ནས་དོན་དང་ལྡན་པ་ཞིག་དགོས། དཔེའི་སྒོ་ནས་བསམ་པ་ལ། ཞི་བ་ལྷས། རྒྱ་མཚོ་ཆེར་ནང་གཉའ་ཤིང་བུ་ག་དང་། རུས་སྦལ་འཕྲད་པ་བས་ཀྱང་ངན་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གི། དམ་ཆོས་སྤྱོད་ལ་དེ་འབྲས་མཆིས་པར་མཛོད། །ཅེས་དང་གྲངས་ཀྱི་སྒོ་ནས་བསམ་པ་ནི། དམྱལ་བ་ནི་ས་ཆེན་པོའི་རྡུལ་ཙམ་དང་། ཡི་དྭགས་གངྒཱའི་ཀླུང་གི་བྱེ་མ་སྙེད་དང་། དུད་འགྲོ་ཆང་འགགས་ཀྱི་སྦང་མ་དང་། ལྷ་མིན་ཁ་བ་བུ་ཡུག་དང་། ལྷ་དང་མི་རྣམས་སེན་མོའི་རྡུལ་རྩ མ་དང་། མི་ལུས་ཆོས་ལྡན་ནི་ཉིན་མོའི་སྐར་མ་ལས་ཀྱང་དཀོན་པར་གསུངས་སོ། །དེ་བས་ན་མྱུར་དུ་བརྩོན་འགྲུས་དྲག་པོས་མ་འབད་ན་སང་བྱེད་གནང་བྱེད་སྙོམས་ལས་ཀྱི་ངང་ལ་མི་ཚེ་ཟད་ནས་ནམ་འཆི་ཆ་མེད་ལ་བསམ་སྟེ། དེ་ཡང་རང་གཅིག་པུ་མ་ཟད་སྟོང་གསུམ་འཇིག་རྟེན་གྱི་ཕྱི་སྣོད་འབྱུང་ལྔའི་ཁམས་ལས་གྲུབ་པ། ནང་བཅུད་ཀྱི་སེམས་ཅན་རབ་ལྷ་ཚངས་པ་དང་བརྒྱ་བྱིན་སོགས་དང་། མིའི་འཁོར་ལོས་བསྒྱུར་བའི་རྒྱལ་པོ། ཆེ་བ་རྒྱལ་པོ་རྒྱལ་ཕྲན་བློན་པོ་བཙུན་མོ་ཆེ་བཙན་གྲགས་ལྡན། འབྲིང་ཁྱིམ་བདག་འབྱོར་ལྡན་ཕྱུག་པོ་རང་དང་འདྲ་བའི་དགྲ་གཉེན་བར་མ། ཆུང་བ་རང་བས་ཞན་པ་འོན་ལྐུགས་ལོང་སྤྲང་ལ་སོགས། དེ་བཞིན་རིགས་དྲུག་གི་འགྲོ་བ་མཐའ་དག་ཀྱང་མཐར་དུས་མིན་འཆི་བ་ཁོ་ན་དང་ལྷ་དང་བཅས་པའི་མཆོད་གནས་དཀོན་མཆོག་གསུམ་ཀྱང་མི་རྟག་མྱ་ངན་ལས་འདས་པའི་ཚུལ་སྟོན་དགོས་པ་སོགས་མི་རྟག་པའི་རང་བཞིན་ཁོ་ན་རང་གི་རྒྱུད་ལ་སྦྱར་ནས་བློ་སྣ་ཐུང་ངུ་མ་སོང་བར་དུས་རྟག་ཏུ་བསྒོམ་པར་བྱའོ། །དེ་ལ་ལག་ཏུ་བླང་བྱའི་ངོ་བོ་དགེ་སྒྲུབ་སྡིག་སྤང་གི་བླང་དོར་ལ་འབད་དགོས་སྟེ། བསྒྲུབ་བྱའི་རྒྱུ་དགེ་བ་བཅུ་ནི། གཞན་གྱི་སྲོག་སྐྱོབ་པ། སྦྱིན་པ་གཏོང་བ། ཚུལ་ཁྲིམས་བསྲུང་བ་ནི་ལུས་ཀྱི་དགེ་བ། དྲང་པོར་སྨྲ་བ། འཁོན་པ་ཟླུམ་པ། ཞི་དུལ་བདེན་པར་བརྗོད་པ། གཏམ་དོན་དང་ལྡན་པར་སྨྲ་བ་བཞི་ནི་ངག་གི་དགེ་བ། འདོད་པ་ཆུང་ཞིང་ཆོག་ཤེས་པ་སེམས་ཅན་ལ་ཕན་པའི་བྱང་སེམས་དང་། དད་པ་དག་སྣང་རྩལ་སྦྱང་བ་སོགས་གསུམ་ནི་ཡིད་དེ་དགེ་བ་བཅུ་པོ་ཆུང་ངུས་ཕལ་པ་དང་ལྷ་མིན། འབྲིང་གིས་དལ་འབྱོར་ཆོས་ལྡན། ཆེན་པོས་ནི་ལྷར་སྐྱེ་ལ། ཟག་བཅས་ཀྱི་དགེ་བ་དེ་དག་དམ་པ་གསུམ་དང་འབྲེལ་ན་གནས་སྐབས་མཐོ་རིས་དང་མཐར་ཐུགས་བྱང་ཆུབ་ཐོབ་པའི་རྒྱུ་བྱེད་ཅིང་། ཟག་མེད་བསྐྱེད་རྫོགས་བསྒོམ་བཟླས་ཀྱི་རྣལ་འབྱོར་བརྩོན་ན་ཚེ་འདི་དང་། འབྲིང་བར་དོ། ཐ་མ་སྐྱེ་བ་བདུན་ཚུན་ཆད་དུ་སངས་རྒྱས་པ་ནི་གསང་སྔགས་ཐབས་ཀྱི་ཁྱད་ཆོས་སོ། །སྤང་བྱའི་རྒྱུ་སྡིག་པ་མི་དགེ་བ་བཅུ་ནི་སྲོག་གཅོད་པ། མ་བྱིན་པ་ལེན་པ་དང་མི་གཙང་པ་སྤྱོད་པ་གསུམ་ནི། ལུས་ཀྱི་མི་དགེ་བ་གསུམ། རྫུན། དབྱེན། ཚིག་རྩུབ། ངག་འཁྱལ་བཞ ི་ནི་ངག་གི་བཞི། བརྣབ་སེམས། གནོད་སེམས། ལོག་ལྟ་གསུམ་ནི། ཡིད་ཀྱི་ལས་གསུམ་སྟེ། དེ་ལྟར་མི་དགེ་བ་བཅུ་གཞི་བསམ་སྦྱོར་བ་མཐར་ཐུག་ཚང་བ་ཆེན་པོས་ནི་དམྱལ་བ་དང་། འབྲིང་གིས་ཡི་དྭགས། ཆུང་ངུས་དུད་འགྲོ། གལ་སྟེ་དགེ་སྡིག་འདྲེས་མའི་ལས་ཙམ་གྱིས། མིར་སྐྱེས་ནའང་སྣོད་བཅུད་མི་བདེ་བའི་རང་བཞིན་ཁོ་ན་ཅན་སྟེ་མདོར་ན། མི་དགེ་བ་སྡུག་བསྔལ་དང་དགེ་བས་བདེ་བ་བསྐྱེད་པ་ནི་ས་བོན་གང་བཏབ་ཀྱི་མྱུ་གུ་སྨིན་པ་ལྟ་བུ་བསྐལ་པར་ཆུད་མི་ཟ་ཞིང་ལུས་དང་གྲིབ་མ་ལྟར་རང་གི་རྗེས་སུ་འབྲང་བའོ། །དེ་ལྟར་གྱི་རྒྱུ་དགེ་བའི་འབྲས་བུ་བདེ་བ་ནི་གནས་སྐབས་ལྷ་མིའི་བདེ་འབྱོར་མཐོང་ཆོས་སུ་གྱུར་པ་ལྟར་དང་། མཐར་ཐུག་སངས་རྒྱས་ཀྱི་བདེ་བ་ནི་འཇིག་རྟེན་གྱི་ཁམས་བདེ་བ་ཅན་ཁོ་ནའི་བདེ་བ་ནི་འོད་མདོ་ཞིང་བཀོད་སོགས་སུ་གསལ་བ་ལྟར། སྐུ་གསུམ་གྱི་ཞིང་རྣམས་སུ་དེ་མཚུངས་དང་དེ་ལས་ལྷག་པ་དང་ཆེས་ལྷག་པའི་བདེ་བ་ལ་ལོངས་སྤྱོད་ནས། སླར་འགྲོ་བའི་དོན་སྤྲུལ་པའི་རྫུ་འཕྲུལ་གྱིས་མཛད་ནའང་དངོས་ཕྱིར་མི་ལྡོག་པའི་ས་ལ་བཞུགས་པའོ། །རྒྱུ་མི་དགེ་བའི་འབྲས་བུ་སྡུག་བསྔལ་བ་ནི། དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་སྲེག །ཞེས་ཚ་གྲང་ཉི་ཚེ་ཉེ་འཁོར་སོགས་ཀྱི་སྡུག་བསྔལ་དང་། ཡི་དྭགས་བཀྲེས་ཤིང་སྐོམ་པས་ཉམས། ཞེས་རང་ཡུལ་དང་མཁའ་ལ་རྒྱུ་བའི་རིགས་ཐམས་ཅད་གཟུགས་ཞན་པ་ལྟོགས་སྐོམ་དང་ཚ་གྲང་གིས་སྡུག་བསྔལ་བ་དང་། དུད་འགྲོ་གཅིག་ལ་གཅིག་ཟས་ཉམས། །ཞེས་སྤྱིར་བཏང་དུ་གླེན་ལྐུགས་དང་ཆེ་ཆུང་རབ་འབྲིང་གི་བབ་ཀྱིས་རེ་རེས་རེ་རེ་ཟ་བ་སྟེ། བྱིང་གནས་དང་ཁ་འཐོར་ལ་བཀོལ་སྤྱོད་ཀྱིས་སྡུག་བསྔལ་བ། མི་དག་འཚོ་བ་ཐུང་བས་ཉམས། །ཞེས་སྤྱིར་སྐྱེ་རྒ་ན་འཆི་དང་། ཁྱད་པར་ཡོད་པ་གསོག་སྲུང་མེད་པ་ཚོལ་རྙེད་དང་དགྲ་དང་འཕྲད་དོགས། གཉེན་དང་འབྲལ་དོག་སྟེ་སོགས་དང་། ལྷ་རྣམས་བག་མེད་པ་ཡི་ཉམས། །ཞེས་སོ་སོར་ཕྱེད་པའི་ལྷ་མིན་རྣམས་ལ་འཐབ་རྩོད་གསོད་གཅོད་འཕྲོག་བཅོམ། ལྷ་དངོས་ལ་ལོངས་སྤྱོད་ཚེ་དཔལ་འབྱོར་བས་བརྒྱན་ནའང་། དེ་ལ་རྣམ་གཡེང་ལེ་ལོས་བདུད་དབང་བག་མེད་དུ་སོང་ནས་མཐར་འཆི་འཕོས་ཚེ་དམྱལ་བར་ལྟུང་བ་སྟེ་མཐོ་དམན་གྱི་གནས་གང་ནའང་། སྡུག་བསྔལ་མ་གཏོགས་བདེ་བ་མེད་པ་ལ་བསམ་པ་ཞིག་གིིས། རྟག་ཏུ་དམ་པའི་ཆོས་ཁོ་ན་འབད་དགོས་ཏེ། མེ་ཡི་འོབས་ན་བསིལ་བ་མེད། །མི་གཙང་ཁང་པར་དྲི་ཞིམས་མེད། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་འདུལ་བ་ལུང་ནས་གསུངས་པ་ལྟར་རོ། །དེ་ལྟར་ཕྱི་ཐུན་མོང་གི་སྔོན་འགྲོ་ལེགས་པར་ཉམས་སུ་བླང་མཐར། ནང་ཐུན་མོང་མ་ཡིན་པའི་སྔོན་འགྲོ་ནི། ཐོག་མར་ཚོགས་ཞིང་གསལ་གདབ་པ་ནི། རང་གནས་པའི་ས་ཕྱོགས་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་གསེར་གྱི་ས་གཞི་ཁོད་སྙོམས་ཡངས་པར་བརྡལ་བའི་དབུས་སུ། ལྷའི་ཡན་ལག་བརྒྱད་ལྡན་གྱི་རྒྱ་མཚོ་ཆེན་པོ་འཁྱིལ་བའི་ཀློང་དུ་པདྨའི་སྡོང་པོ་ཡལ་ག་ལོ་འདབ་སྟོང་དང་ལྡན་པའི་ཟེའུ་འབྲུར་པདྨ་ཉི་ཟླའི་སྟེང་དུ། ངོ་བོ་རང་གི་དྲིན་ཆེན་རྩ་བའི་བླ་མ་ལ་རྣམ་པ་ཨོ་རྒྱན་པདྨ་འབྱུང་གནས་རྒྱལ་བ་དཀོན་མཆོག་སྤྱི་འདུས་ཟ་ཧོར་མའི་ཆས་ཅན་གྱི། སྟེང་འོག་བར་གསུམ་དུ་བརྒྱུད་པའི་བླ་མ་ཐམས་ཅད་སྤྲིན་ལྟར་དུ་གཏིབས་པ། དེའི་གཡས་སུ་སངས་རྒྱས་དཀོན་མཆོག རྒྱབ་དུ་དམ་ཆོས། གཡོན་དུ་དགེ་འདུན། མདུན་དུ་གང་མོས་ཡི་དམ་ལ་རྒྱུད་སྡེ་བཞི་དྲུག་ཐེག་རིམ་དགུ་དང་འབྲེལ་བའི་དཀྱིལ་འཁོར་གྱི་ལྷ་ཚོགས་དང་བཅས་པ་སྣང་སྟོང་གཉིས་མེད་འཇའ་ཟེར་འོད་ཕུང་གི་ཀློང་དུ། རང་ལ་ཞལ་གྱིས་ཕྱོགས་སྤྱན་གྱིས་གཟིགས་ཐུགས་ཀྱིས་དགོངས་ནས་མངོན་སུམ་ལྟ་བུར་བཞུགས་པའི་མདུན། རང་གི་མཐར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱིས་བསྐོར་ནས་སྐྱབས་གནས་རྣམས་ཀྱི་སྤྱན་སྔར་ལུས་ཀྱི་ཐལ་མོ་སྦྱར། ངག་གི་སྐྱབས་འགྲོའི་ཚིག་འུར་དི་རི་རི། ཡིད་དད་འདུན་མོས་གུས་གདུང་ཤུགས་དང་བཅས་ཏེ། རང་གཞན་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་མ་ཐོབ་ཀྱི་བར་དུ། རྣམ་མཁྱེན་སངས་རྒྱས་ཀྱི་གོ་འཕང་ཐོབ་པའི་ཆེད་དུ། མཐོ་དམན་གང་དུ་གཏོང་ཅི་མཛད་ཁྱེད་རྣམས་མཁྱེན་དང་བློ་གཏད་ལིངས་ཀྱིས་བསྐྱུར་ནས་སྐྱབས་འགྲོ་ལ་འབད་ཅིང་། མཐར་ཚོགས་ཞིང་རྣམས་ལས་འོད་ཟེར་དཔག་མེད་བྱུང་ནས་བདག་གཞན་ཐམས་ཅད་ལ་ཕོག་པས་སྡིག་སྒྲིབ་བག་ཆགས་དག་སྟེ། སེམས་ཅན་ཐམས་ཅད་བྱ་ཁྱུ་འདྲོག་པ་བཞིན་འཇའ་འོད་ཀྱི་རྣམ་པར་སངས་རྒྱས་པར་བསམ་ལ། བསྔོ་སྨོན་དང་། ཚོགས་ཞིང་མི་བསྡུ་བར་ལངས་འདུག་གི་ཚེ། ཕྱག་འཚལ་བ་དང་། འགྲོ་དུས་བསྐོར་བ། བཟའ་བཏུང་ལ་རོལ་ཚེ་ཕུད་ཀྱིས་མཆོད་པར་མོས་པ་སོགས། ཚོགས་གསོག་རྒྱུན་འཁྱེར་ལ་བརྩོན་ཞིང་འོག་མ་རྣམས་འདིས་རིགས་འགྲེའོ། ༈ བྱང་ཆུབ་སེམས་བསྐྱེད་ནི། ཚོགས་ཞིང་རྣམས་ཀྱི་སྤྱན་སྔར་བདག་གིས་སྔོན་གྱི་རྒྱལ་དང་དེ་སྲས་རྣམས་ཀྱིས་ཇི་ལྟར་བྱང་ཆུབ་ཏུ་ཐུགས་བསྐྱེད་པ་ལྟར། བླ་ན་མེད་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པར་དམ་བཅས་ཏེ། དངོས་གཞི་སྨོན་པ་ཚད་མེད་བཞི་སེམས་ཅན་གང་དག་སྲིད་ཞིའི་བདེ་སྐྱིད་ཀྱིས་འབྱོར་བ་རྣམས་དེ་ལས་མི་ཉམས་ཤིང་མི་ལྡན་པ་དག་དེ་དང་ལྡན་ན་སྙམ་པའི་བྱམས་པ་དང་། སེམས་ཅན་ཐམས་ཅད་ངན་སོང་འཁོར་པའི་སྡུག་བསྔལ་དང་བྲལ་ནས་གཏན་བདེ་བྱང་ཆུབ་ལ་གནས་ན་ཅི་མ་རུང་སྙམས་པའི་དགའ་བ་དང་། སེམས་ཅན་ཐམས་ཅད་དགྲ་གཉེན་བར་མ་ཐམས་ཅད་ལ་ཕ་མ་ཁོ་ནའི་བློ་བཞགས་ནས་ཉེ་རིང་དང་ཆགས་སྡང་མེད་པའི་བཏང་སྙོམས་ཚད་མེད་པ་བཞི་པོ་ལ་ཡང་དག་པར་བསླབ་བོ། ༈ འཇུག་པ་ཕར་ཕྱིན་དྲུག་ནི། ཟང་ཟིང་། མི་འཇིགས། ཆོས་དང་། བྱམས་པ་སྟེ་སྦྱིན་པ་རྣམས་གཏོང་། ཉེས་སྤྱོད་སྡོམ་པ། དགེ་བ་ཆོས་སྡུད་པ། སེམས་ཅན་དོན་བྱེད་དེ་ཚུལ་ཁྲིམས་གསུམ་སྲུང་། གནོད་བྱེད་དགྲ་བགེགས་ལ་ཅི་མི་སྙམ་པས་རྒྱུད་མི་འཁྲུགས་པ་དང་། ཆོས་ཟབ་མོའི་ལྟ་སྒོམ་སྤྱོད་པ་ཐོས་པ་ལ་མི་སྐྲགས་པ། ཆོས་ལ་ངེས་རྟོགས་དང་། ཕུགས་ཀྱི་བདེ་བ་བྱང་ཆུབ་སྒྲུབ་པའི་ཚེ་འཕྲལ་གྱི་སྡུག་བསྔལ་ལྟོག་སྐོམ་ཚ་གྲང་ཚོར་བ་བཟོད་ཐུབ་པ་སྡུག་བསྔལ་བདེན་པ་དང་ལེན་གྱི་བཟོད་པ་གསུམ་བསྒོམ། བསམ་པ་བྱང་ཆུབ་ཀྱི་སྤྱོད་པ་ནམ་ཡང་མི་འདོར་བའི་ཞེ་དམ་ཀྱི་གོ་ཆ་ཆེར་བགོ་ཞིང་། སྦྱོར་བ་དམ་པའི་ཆོས་སྒོ་གསུམ་འབྲེལ་བར་ལག་ཏུ་ལེན་པ་ལ་ལེ་ལོ་སྙོམ་ལས་སུ་མ་སོང་བ་དང་། སེམས་ཅན་གྱི་དོན་ཡང་དག་པར་སྒྲུབ་པ་ལ་ཁྱད་པར་བརྩོན་པ་མི་ལྷོད་པ་སྟེ་བརྩོན་འགྲུས་རྣམ་གསུམ་བརྩམ། འཇིག་རྟེན་པའི་ཞི་གནས་མཚན་ཉིད་པ་དང་། འཇིག་རྟེན་ལས་འདས་པའི་ལྷག་མཐོང་སངས་རྒྱས་ཀྱི་དགོངས་པ་ཡང་དག་པ་དང་ཟུང་དུ་འབྲེལ་བ་སྟེ་བསམ་གཏན་གཉིས་ཉམས་སུ་བླངས། ཐོས་པར་རིག་པའི་གནས་ཐམས་ཅད་མདོ་རྒྱུད་ཀྱི་གཞུང་གོ་དོན་ལག་ལེན་དང་བཅས་མཐར་ཕྱིན་པར་སློབ་པ་དང་། བསམ་པ་ནི། ཐོས་པའི་གནས་དེ་དག་གི་དོན་འདི་དང་འདིའོ་ཞེས་གོ་ཡུལ་སྙོམས་པར་མ་ལུས་པར་ཐོས་བསམ་གྱིས་སྒྲོ་འདོགས་ཆོད་པ་དང་། སྒོམ་པ་ནི་ཐོས་བསམ་དེ་དག་གི་དོན། སྙིང་པོར་དྲིལ་ཏེ་ཉམས་སུ་ལེན་པར་རྩེ་གཅིག་ཏུ་གཞོལ་བ་སྟེ་ཤེས་རབ་གསུམ་སྦྱང་སྟེ། མདོར་ན་དེ་དག་གི་མི་མཐུན་ཕྱོགས་བདུད་ཀྱི་ལས་དྲུག་སྤངས་ནས་དམ་པ་སྔོན་འགྲོ་དངོས་གཞི་རྗེས་གསུམ་དང་འབྲེལ་བ་ཉམས་སུ་བླངས་ཏེ་མཐར་ཕྱིན་དུས་ཕ་རོལ་དུ་ཕྱིན་ཞེས་བརྗོད་དོ། །དེ་ཐམས་ཅད་ཀུན་རྫོབ་དང་། དོན་དམ་པར་བདག་མེད་ཀྱི་དོན་ལ་མཉམ་པར་འཇོག་པ་སྟེ་བསམ་གཏན་དང་ཤེས་རབ་ཀྱི་ནང་དུ་འདུའོ། བྱང་ཆུབ་སེམས་བསྐྱེད་ཀྱི་ཡན་ལག་ནི། ཚོགས་ཞིང་ཁྱད་པར་ཅན་རྣམས་ཀྱི་དྲུང་དུ་བདག་གཞན་སེམས་ཅན་ཐམས་ཅད་ཀྱི་ལུས་ཞིང་གི་རྡུལ་རྙེད་དུ་སྤྲུལ་ནས་ཕྱག་འཚལ་བ། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་སྤྲིན་སྤྲོ་ཞིང་དབུལ་བ། སྡིག་པ་མི་དགེ་བའི་ཚོགས་སྟོབས་བཞིའི་སྒོ་ནས་བཤགས་པ། རང་གཞན་གྱི་དགེ་རྩ་ཇི་སྙེད་བསགས་པ་ལ་དགའ་སྤྲོའི་རྗེས་སུ་ཡི་རང་བ། འགྲོ་བའི་དོན་དུ་ཆོས་ཀྱི་འཁོར་ལོ་བསྐོར་བར་བསྐུལ་བ། རྒྱལ་དང་དེ་སྲས་རྣམས་མྱ་ངན་ལས་མི་འདའ་བར་གསོལ་བ་འདེབས་པ། དགེ་རྩ་བླ་ན་མེད་པའི་བྱང་ཆུབ་ཆེན་པོར་བསྔོ་བ་སྟེ་བདུན་རྣམ་དག་ཚིག་ཕྱིར་དོན་གྱིས་གསོབ་པར་བརྗོད། ༈ རྡོ་རྗེ་སེམས་དཔའི་བསྒོམ་བཟླས་ནི། རང་གི་སྤྱི་བོར་ཁྲུ་གང་དཔག་པར་པད་ཟླའི་སྟེང་དུ་བླ་མ་རྡོ་རྗེ་སེམས་དཔའི་སྐུ་མདོག་ཕྱག་མཚན་ཐུགས་ཀར་ཟླ་དཀྱིལ་ཧཱུྃ་མཐར་སྔགས་འཕྲེང་སོགས་གཞུང་ལྟར་གསལ་བར་བསྒོམ་པ་གཉེན་པོ་རྟེན་གྱི་སྟོབས། ཡི་གེ་བརྒྱ་བ་བཟླས་པའི་ཚེ་སྔགས་འཕྲེང་ལས་ཐུགས་རྗེ་ཡེ་ཤེས་ཀྱི་བདུད་རྩིའི་རྒྱུན་འབབ་པ་བུམ་པའི་མཆུ་ནས་སྩལ་བ་ལྟར། ཞབས་གཡས་ཀྱི་མཐེ་བོང་ནས་སྤྱི་བོར་བབས་ལུས་ཕྱི་ནང་གི་ཚེ་རབས་ཀྱི་ནད་གདོན་སྡིག་སྒྲིབ་བཀྲུ་བར་དམིགས་པ་གཉེན་པོ་ཀུན་ཏུ་སྤྱོད་པའི་སྟོབས། སྔར་བྱས་ཀྱི་སྡིག་པ་ཐམས་ཅད་ཡིད་ལ་དྲན་བཞིན་འགྱོད་པ་དྲག་པོས་བཤགས་པར་གསོལ་བ་ནི་སུན་འབྱིན་པའི་སྟོབས་དང་། ཕྱིན་ཆད་སྲོག་ལ་བབས་ཀྱང་མི་བགྱིད་པར་དམ་མཅའ་བ་ནི་གཉེན་པོ་སོར་ཆུད་པའི་སྟོབས་བཞི་ཚང་པའི་སྒོ་ནས་བཟླས་པ་ལ་འབད་པ་བྱའོ། ༈ དེ་ནས་མཎྜལ་འབུལ་བ་ནི། སྒྲུབ་པའི་མཎྜལ་ནི་ཚོགས་ཞིང་ཡང་གསལ་གདབ་བོ། ༈ མཆོད་པའི་མཎྜལ་ནི། ཕྱི་སྣོད་ཀྱི་འཇིག་རྟེན་བྱེ་བ་ཕྲག་བརྒྱའི་བཀོད་པ། ནང་བཅུད་ཀྱི་སེམས་ཅན་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མདོར་ན་ཕྱི་ནང་གསང་བའི་མཆོད་སྤྲིན་མ་ཚང་བར་མེད་པ་དངོས་སུ་འབྱོར་བཤམས་ཡིད་ཀྱིས་སྤྲུལ་ཏེ་དབུལ་བ་ནི་ཕྱིའི་མཎྜལ། རང་གི་ལུས་ལོངས་སྤྱོད་བདག་ཏུ་བཟུང་བའི་འཁོར་གཡོག་ཉེ་དུ་བཅས་པ་དགེ་བའི་དངོས་པོ་སོགས་ཐམས་ཅད་ཀུན་ཏུ་བཟང་པོའི་མཆོད་སྤྲིན་དུ་དམིགས་ཏེ་འབུལ་བ་ནང་གི་མཎྜལ། དག་པ་སྐུ་གསུམ་གྱི་ཞིང་གི་མཆོད་སྤྲིན་རྣམས་བློ་ཡིས་བླངས་ཏེ་རང་རིག་དྲི་མ་མེད་པས་བརྒྱན་ཏེ་འབུལ་བ་ནི་གསང་བ་དང་། དེ་ཁོ་ན་ཉིད་ཀྱི་རིམ་པའོ།། ༈ དེ་ནས་ཚོགས་ཞིང་རྡོར་སེམས་དང་བཅས་པའི་ཐུགས་རྗེེ་འོད་ཟེར་དང་གནང་བ་སྩལ་ཏེ་རང་ལ་བསྟིམ་ཞིང་། ༈ བླ་མའི་རྣལ་འབྱོར་བསྒོམ་ཞིང་གསོལ་བ་གདབ་པ་ནི། དུར་ཁྲོད་མེ་རི་འབར་བའི་ཀློང་། པདྨ་ཉི་ཟླ་བམ་རོ་ཕོ་མོའི་སྟེང་དུ་རང་རིག་ཧཱུྃ་དམར་གྱི་འོད་ཟེར་འཕྲོ་འདུས་རྒྱལ་བ་མཆོད་ཅིང་འགྲོ་སྒྲིབ་སྦྱང་སྟེ་ཡོངས་སུ་གྱུར་པ་ལས་སྣང་བའི་ངོ་བོ་རྟ་མགྲིན་དམར་པོ་གྲི་གུག་ཐོད་ཁྲག་འཛིན་ཅིང་ཞབས་དོར་སྟབས་ཅན། སྤྱི་བོར་རྟ་དབུ་ལྗང་ཞུར་འཚེར་བ་གར་གྱི་ཉམས་དགུ་རྒྱས་ཤིང་དུར་ཁྲོད་ཀྱི་ཆས་བརྒྱད་ཀྱིས་སྤྲས་པའི་དཔང་དུ། སྟོང་པའི་རང་མདངས་རྡོ་རྗེ་ཕག་མོ་དམར་མོ་གྲི་ཐོད་ཀྱི་ཕྱག་རྒྱས་འཁྱུད་ཅིང་བརྐྱང་བསྐུམ་གྱིས་རོལ་པ་རྣ་ལྟག་གཡས་སུ་ཕག་ཞལ་ངུར་ཞིང་རུས་རྒྱན་གཟིག་ཤམ་ཅན་ཡེ་ཤེས་ཀྱི་མེ་ཀློང་ནས་བཞུགས་པའི་སྨིན་ཐད་ཀྱི་ནམ་མཁར། པདྨ་ཉི་ཟླའི་སྟེང་དུ་ངོ་བོ་རྩ་བའི་བླ་མ་ལ་རྣམ་པ་ཨོ་རྒྱན་པདྨ་བཛྲ་དམར་སེར་བཅུ་དྲུག་ན་ཚོད་ཀྱིས་མཛེས་ཤིང་རུས་རྒྱན་སྟག་ཤམ་སོགས་ཀྱི་རྒྱན་ཆས་ཅན། ཕྱག་གཡས་ཁ་ཊཱཾ་གཡོན་ཉི་ཟེར་བསྣམས་པ་ཞབས་ཕྱེད་སྐྱིལ་དུ་བཞུགས་པའི་པང་དུ་བདག་མེད་ལྷ་མོ་དམར་གསལ་གྲི་ཐོད་ཀྱི་ཕྱག་རྒྱ་དང་ཞབས་གཉིས་སྐེད་པར་འཁྲིལ་ཞིང་འཇའ་ཟེར་རང་མདངས་ཀྱི་ཀློང་དུ་བཞུགས་པའི་སྤྱི་བོར་པདྨ་ཉི་ཟླའི་སྟེང་དུ་ཐུགས་རྗེ་ཆེན་པོ་དམར་པོ་ཕྱག་བཞི་དང་པོ་རྡོར་དྲིལ་ཐུགས་ཀར་བསྣོལ་ཞིང་། གཡས་འོག་པད་ཕྲེང་དང་གཡོན་འོག་ཚེ་བུམ་འཛིན་ཅིང་ཞབས་སྐྱིལ་ཀྲུང་གི་གསང་ཡེ་དམར་མོ་གྲི་ཐོད་ཀྱིས་འཁྱུད་པ། ཡབ་ཡུམ་གཉིས་ཀ་ལོངས་སྐུའི་རྒྱན་དང་མཚན་དཔེས་སྤྲས་པ། དེའི་སྤྱི་བོར་སྣང་བ་མཐའ་ཡས་དམར་པོ་མཉམ་བཞག་ཚེ་བུམ་འཛིན་ཅིང་སྐྱིལ་ཀྲུང་ཆོས་གོས་གསུམ་གྱིས་བཀླུབས་ཤིང་མཚན་དཔེར་ལྡན་པའོ། །བླ་མ་སྤྲུལ་སྐུའི་མདུན་ནས་གཡས་སྐོར་དུ་མཁའ་འགྲོ་མཚོ་རྒྱལ་བོད་མོའི་ཆས་རིན་ཆེན་པྲོག་ཞུ་ཅན་མཉམ་བཞག་བྷནྡྷ་འཛིན་པ། མཁོན་ཀླུ་དབང་རབ་བྱུང་གི་ཆས་ཅན་པཎ་ཞུ་དང་ཕྱག་གཡས་མཆོད་སྦྱིན་གཡོན་པདྨ་ཐུགས་ཀར་འཛིན་པ། ཉི་མ་གྲགས་པ་སྔགས་ཆས་ཅན་ཕྱག་གཡས་པདྨ་ཐུགས་ཀ་དང་གཡོན་མཉམ་གཞག་གཏེར་སྒྲོམ་བསྣམས་པ། རྒྱལ་སྲས་ཨོ་རྒྱན་བསྟན་འཛིན་རྡོར་དྲིལ་འཛིན་ཅིང་སྔགས་ཆས་ཅན། ཁྱབ་བདག་བསྐལ་བཟང་དབང་ལྡན་རབ་བྱུང་ཆས་ཅན་ཆོས་འཆད་ཀྱི་ཕྱག་རྒྱ་ཅན། པདྨ་ཐེག་མཆོག་བསྟན་པའི་རྒྱལ་མཚན་རབ་བྱུང་གི་ཆས་ཅན་གཡས་པད་དཀར་གཡོན་གླེགས་བམ་འཛིན་པ། དྲིན་ཅན་དཔའ་བོ་ལས་རབ་རྩལ་གཡས་ཕུར་པ་གདེངས་ཤིང་གཡོན་ཚེ་བུམ་འཛིན་པ་སྔགས་ཆས་ཅན་ཐམས་ཅད་ཀྱང་སྐུ་མདོག་མི་ཤ་ཁ་དཀར་ལ་དམར་མདངས་ཞབས་སྐྱིལ་ཀྲུང་དབུ་སྐྲ་མ་སྨྲོས་པ་ཐམས་ཅད་པད་ཞུ་གསོལ་བའོ། །དེ་དག་གི་མཐའ་བསྐོར་སྟེང་འོག་བར་གསུམ་དུ་ཕྱོགས་མེད་རྩ་རྒྱུད་ཀྱི་བླ་མ་ཡི་དམ་ཞི་ཁྲོ་རབ་འབྱམས། དཔའ་བོ་མཁའ་འགྲོ་ཆོས་སྐྱོང་དང་བཅས་པ་སྤྲིན་གཏིབས་པ་ལྟར་འཇའ་ཟེར་འོང་ཕུང་གི་ཀློང་ན་བཞུགས་པའི་སྤྱན་སྔར་རང་གཞན་སེམས་ཅན་ཐམས་ཅད་དད་མོས་ཀྱི་གདུང་ཤུགས་དྲག་པོས་བ་སྤུ་གཟེངས་འཆི་མ་འཁྲུགས་པའི་ངང་ནས། བླ་མ་སངས་རྒྱས་དང་ཅི་མཛད་ཆོས་མཐོང་གི་ངེས་ཤེས་དང་ལྡན་པས། མཆོག་ཐུན་གྱི་དངོས་གྲུབ་འཐོབ་པའི་ཆེད་དུ་གསོལ་བ་ཕུར་ཚུགས་སུ་གདབ་བོ། མཐར་དབང་བཞི་བླང་ཞིང་ཐུགས་ཡིད་བསྲེ་བ་ནི། ལྷ་ཚོགས་ཐམས་ཅད་ཀྱི་གནས་བཞི་ལས་འོད་ཟེར་དཀར་དམར་མཐིང་ལྗང་འཕྲོས་པས་བདག་སོགས་འགྲོ་བའི་སྤྱི་མགྲིན་སྙིང་ལྟེར་ཐིམ་པས་དབང་བཞི་ཐོབ། སྒྲིབ་བཞི་སྦྱངས། ལམ་བཞི་བསྒོམ་པར་དབང་། སྐུ་བཞིའི་འབྲས་བུ་མངོན་དུ་གྱུར་པར་བསམ་ཞིང་འོད་ཟེར་གྱིས་སེམས་ཅན་ཐམས་ཅད་མྱང་འདས་ས་ལ་བཀོད། འཁོར་རྣམས་རིམ་བཞིན་གཙོ་བོ་རྣམས་དང་ཆོས་ལོངས་གཉིས་སྤྲུལ་སྐུ་ལ་ཐིམ། དེ་འོད་དུ་ཞུ་ནས་རང་ལ་ཐིམ་པས་བླ་མའི་ཐུགས་རྣམ་པར་མི་རྟོག་པའི་ཡེ་ཤེས་དང་། རང་གི་སེམས་ཨ་འཐས་གཉིས་འཛིན་གྱི་འཁྲུལ་རྟོག་ཅན་གཉིས་འོད་གསལ་ཉམས་སྣང་གི་དབྱིངས་རིག་མ་བུ་འདྲེས་ཏེ་སངས་རྒྱས་ཀྱི་ས་ཐོབ་པར་བསམ་ལ་མ་བཅོས་པའི་ངང་ལ་མཉམ་པར་བཞག་ཅིང་བསྐྱེད་རྫོགས་གཞུང་ལ་འཇུག་པའི་རྗེས་སམ་ཡང་ན་འདིར་བསྔོ་སྨོན་བྱའོ། །སྔོན་འགྲོ་རེ་རེ་ནས་སྦྱོང་སྐབས་བསྡུ་ཆོག་གོང་ལྟར་རང་རང་གི་མཇུག་དང་། མཉམ་དུ་བསྐྱང་བ་དང་རྒྱུན་འཁྱེར་གྱི་ཚེ་མཎྜལ་གྱི་འཕྲོ་བསྡུ་བ་ཁོ་ནས་ཆོག་གོ། ༈ དེ་ལྟར་ཐུན་མོང་མ་ཡིན་པའི་སྔོན་འགྲོས་རྒྱུད་སྦྱངས་ནས། རྩ་རླུང་ཁྱད་པར་གྱི་སྔོན་འགྲོ་ལ་ལུས་སྦྱང་བ་ནི། སྟན་བདེ་བ་ལ་ལུས་དྲང་པོར་བསྲང་ཞིང་རྐང་པ་གཉིས་རེའུ་མིག་ལྟར་བསྣོལ། སྒལ་ཚིག་བསྲང་ལག་པ་མཉམ་བཞག་ཕྱག་རྒྱ་ལ་དཔུང་བ་གཉིས་བསྐྱང་། མགྲིན་པ་བཀུག་ཅིང་ལྕེ་ཡ་སྐན་ལ་སྦྱར། མིག་སྣ་རྩེར་ཕབ་སྟེ་སྐད་ཅིག་གིས་ལུས་སྟོང་ལ་གསལ་བར་སྒོམ་པའི་ངང་ལས་གསང་བ་ཡེ་ཤེས་ཀྱི་ཌཱཀྐི་མར་གསལ་ཞིང་། དེ་ཡང་དམར་མོ་མཉམ་བཞག་དཀྱིིལ་ཀྲུང་ཅན་གཅེར་བུ་ཕྱི་ནང་སྟོང་པ་འོད་དམར་གྱི་རང་བཞིན་ལས་རྡོས་བཅས་སུ་མ་གྲུབ་པ་སྣང་སྟོང་ཟུང་འཇུག་ལ། ཤེས་པ་རྩེ་གཅིག་ཏུ་གཏད་དེ་མ་ཡེངས་པར་བསྒོམ། རྩ་སྦྱང་བ་ནི། ལུས་སྟོང་པའི་རྩལ་སྣང་དྷཀྐིར་གསལ་བའི་དབུས་སུ་དྲང་པོར་རྩ་དབུ་མ་སྤྱི་བོ་ནས་གསང་བའི་བར་དུ་ཁང་སྟོང་ནང་གི་ཀ་བ་ལྟར། ཟང་ཐལ་ལེར་གསལ་བའི་གཡས་སུ་རོ་མ། གཡོན་ན་རྐྱང་མ། ཡར་སྣ་དུང་ཁང་གི་ཀླད་རྒྱ་ནས་སྣ་བུག་གཉིས་ལ་ལྕགས་ཀྱུའི་རྣམ་པ་ལྟར་གུག་ནས་ཟུག་པའི་ཁ་ཕྱེ་བ། མར་སྣ་ལྟེ་འོག་གཉེར་པོ་ཆེ་ནས་དབུ་མའི་ནང་དུ་ཟུག་པའི་སྤྱི་བོ་བདེ་ཆེན་གྱི་འཁོར་ལོར་རྩ་འདབ་སུམ་བརྒྱ་དྲུག་ཅུ། མགྲིན་པ་ལོངས་སྤྱོད་ཀྱི་འཁོར་ལོར་རྩ་འདབ་བཅུ་དྲུག་སྙིང་ཁ་ཆོས་ཀྱི་འཁོར་ལོར་སུམ་ཅུ་རྩ་གཉིས། ལྟེ་བ་སྤྲུལ་པའི་འཁོར་ལོར་རྩ་འདབ་དྲུག་ཅུ་རྩ་བཞི། འཁོར་ལོ་དེ་ཐམས་ཅད་གདུགས་ཀྱི་རྩིབས་མ་ལྟར་ཡོད་པ། དབུ་མ་མཐིང་རོ་མ་དཀར། རྐྱང་མ་དམར། ཐམས་ཅད་སྟོང་པ་ཁྲག་དང་ཆུ་སེར་མེད་པ། དྲང་པ། སྲབ་པ། གསལ་བ་སྟེ་མཚན་ཉིད་བཞི་ལྡན། དབུ་མ་མདའ་སྨྱུག་ཙམ། རོ་རྐྱང་གཉིས་སོག་སྦུག་ཙམ། གཞན་རྣམས་དེ་ལས་ཅུང་ཟད་ཕྲ་བ་སྒོམ། རླུང་སྦྱང་བ་ནི། སྣ་བུག་གཡས་གཡོན་དབུས་གསུམ་ནས་རླུང་དལ་དྲག་སྙོམ་པ་གསུམ་གསུམ་དགུ་བུས་པས། ཞེ་སྡང་འདོད་ཆགས་གཏི་མུག་གསུམ་གྱི་ངོ་བོ། སྔོ་དམར་ནག་གསུམ་གྱི་རྣམ་པར་ཕྱིར་སོང་བར་བསམ། དེ་ནས་རླུང་དལ་བར་རྔུབ་སྟེ་ལུས་ཀྱི་སྟོད་དུ་མ་ལུས་པར་ཕོ་བར་དགང་ཞིང་འཇམ་བར་གཏོང་། ཐིག་ལེ་སྦྱང་བ་ནི། དབུ་མའི་ཡར་སྣེ་རྒྱ་མཐོང་ཁ་ཕྱེ་བ་ལྟར་ཡོད་པའི་བུག་པ་ཟླ་བ་ཆེ་ཆུང་རན་པ་ཉ་གང་བས་བཅད་པ་ལ་རྩ་བ་ཟུག་པའི་ཐབས་བྱང་ཆུབ་སེམས་ཀྱི་ངོ་བོ་ཧཾ་ཡིག་དཀར་པོ་དངུལ་ཆུའི་མདོག་ཅན་མགོ་ཐུར་དུ་བསྟན་པ། མར་སྣ་རྩ་གསུམ་འདུས་མདོར་ཉི་དཀྱིལ་དམར་སྒར་རེ་བ་ཆེ་ཆུང་དབུ་མའི་ནང་དང་མཉམ་པའི་སྟེང་དུ། ཤེས་རབ་དྲོད་ཀྱི་ངོ་བོ་ཨ་ཤད་དམར་པོ་སྟེ་དཀར་དམར་གཉིས་ཀ་བདེ་སྟོང་དྲོད་ཀྱི་ངོ་བོ་དང་རེག་བྱ་ཅན་དུ་བསྒོམ། དངོས་གཞི་དམིགས་བཅས་ནི། གོང་གི་དམིགས་པ་རྣམས་བརྟན་པ་དང་རླུང་ཁུག་བདུན་གྱི་རིང་ལ་སྣ་བུག་ནས་རོ་རྐྱང་གི་ལམ་བརྒྱུད། མར་སྣ་དབུ་མའི་ནང་གི་ཨ་ཤད་ལ་རླུང་གོང་ལྟར་སི་རི་རི་བུས་པས་མེ་ལྕེ་ཁབ་ཀྱི་རྩེ་ཙམ་མེ་སྒྲ་དང་བཅས་དམར་ཉུག་གེ་འོང་པ་དང་དེ་ནས་སོར་གཉིས་ཙམ་རྒྱུན་ལྡན་དང་། དྲོད་ཀྱི་བོག་འདོན་པ་ལ་ཐོར་ཁ་དང་། དགོང་ཀའི་ཚེ་རླུང་ཁུག་བདུན་ཕྲག་རེའི་རིང་ལ་མེ་དམར་འུར་གྱིས་འབར་ཏེ། འཁོར་ལོ་བཞི་དང་ལུས་ཕྱི་ནང་སྣང་སྲིད་ཐམས་ཅད་ཚ་ཆིལ་གྱིས་གང་བར་བསྒོམ། བདེ་བ་གཙོ་བོར་འདོན་ན། མེ་འབར་བས་སྤྱི་བོའི་ཧཾ་ཡིག་ཆབ་རོམ་མེའི་འོད་ལ་ཞུ་ནས་ཐིགས་པ་ལྷུང་བ་ལྟར། བྱང་སེམས་ཐིགས་པ་བཅུ་དྲུག་བབས་པའི་བཞི་རེས་སྤྱི་བོ་མགྲིན་པ་སྙིང་ག་ལྟེ་བ་རྣམས་ཀྱི་འཁོར་ལོ་རྣམས་ཀྱི་ནང་མེར་མེར་ཤིག་ཤིག་གང་བར་བསམ་ཞིང་། རླུང་ཁུག་གི་གྲངས་གོང་གི་མེ་དམིགས་ལྟར་ལ། སྤྱི་བོ་ནས་བབ་པས་དགའ་བ་དང་། དེ་ནས་མཆོག་དགའ། དགའ་བྲལ། ལྷན་སྐྱེས་ཏེ་རིམ་པས་བདེ་བ་བདུན་འགྱུར་གྱིས་ཇེ་ཆེར་འཁོར་ལོ་བཞི་ལས་ཡས་དབབ་ཀྱི་དགའ་བཞི་ངོས་བཟུང་། དེ་བཞིན་ལྟེ་བ་ནས་བྱང་སེམས་ཚུར་འདུས་ཐིག་བཞིར་གྱུར་པ་སྙིང་ག་ནས་མགྲིན་པ་སྤྱི་བོའི་བར་བཅུ་དྲུག་པོ་ཐིམ་པ་རིགས་འགྲེ་ཞིང་དགའ་བ་བཞི་ཡས་བརྟན་དུ་བསྒོམ་ནས་ཧཾ་ལ་བསྡུ་ཞིང་མེ་དང་འབྲོས་འདེད་ཡུན་རིང་དུ་བྱའོ། །བདེ་བ་ལ་ངོས་འཛིན། གསལ་བ་ལ་ཐག་གཅོད། མི་རྟོག་པར་ལ་བཟླ་ཞིང་མཐར་བདེ་དྲོད་སོ་སོར་ཧཾ་དང་ཨ་ལ་བསྡུ། ལར་རྒྱུན་དུ་ལྟེ་བར་མེ་སོར་བརྒྱད་ཙམ་རེ་འབར་ཞིང་། ཧཾ་ཡིག་ལས་ཐིག་ལེ་དཀར་པོ་ཡུངས་འབྲུ་ཙམ་ཧྲིལ་གྱིས་བྱུང་བ་གཏུམ་མོ་དང་འདྲེས། ཚེག་སྒྲ་དང་བཅས་བདེ་དྲོད་ཆེས་ཆེར་འབར། ཧཾ་ཡིག་ལས་བྱང་ཆུབ་ཀྱི་རྒྱུན་རྟ་རྔ་ཙམ་གྱི་འདུ་འཕྲོའི་འབར་འཛག་བདེ་སྟོང་དབྱེར་མེད་ལ་སེམས་བཟུང་བ་ནི་ཡང་ཟབ་ཀྱི་སྙིང་པོ་ཡིན་ནོ། དམིགས་མེད་ནི། དམིགས་བཅས་ཀྱི་གཏུམ་མོའི་མཇུག་ཏུ་རྩ་དང་རླུང་ལུས་སོགས་ཀྱི་དམིགས་པ་ཡིད་ལ་མི་བྱེད་ཅིང་། སྣང་སྟོང་གཉིས་སུ་མེད་པའི་རིག་པ་སྐད་ཅིག་གི་ཆོས་ཉིད་ཕྱག་རྒྱ་ཆེན་པོ་མ་ཡེངས་མི་སྒོམ་པའི་ངང་ནས་རླུང་དལ་བུས་བརྡུབ་ཅིང་། ནེམ་པར་མནན་ལ་འཇམ་པར་གཏོང་ཞིང་མ་བཅོས་པར་ཡུན་རིང་དུ་བཟུང་ངོ་། །དེ་ལྟར་སྐབས་སུ་བདེ་དྲོད་ཀྱི་བོག་འདོན་ཞིང་ཉམས་སུ་བླངས་པས། ཟག་བཅས་ཀྱི་ཚོགས་ཐམས་ཅད་ཟག་མེད་ཀྱི་དབྱིངས་སུ་རང་དངས་ནས། རྩ་དབུ་མ་ཆོས་དབྱིངས་སྤྲོས་བྲལ་གྱི་ཞིང་ཁམས་སུ། རླུང་རིག་བྱང་ཆུབ་དམ་པ་མཆོག་གི་རྡོ་རྗེར་རྩོལ་མེད་དུ་འཚང་རྒྱ་བར་ཐེ་ཚོམ་མེད་དོ། །རྗེས་ཀྱི་རིམ་པ་རླུང་ལས་སུ་རུང་བའི་ཕྱིར་འཕྲུལ་འཁོར་ནི། ལུས་གནད་བསྲང་ཞིང་རླུང་དགང་སྟེ། སྐེད་པ་གཡས་གཡོན་གསུམ་གསུམ་བསྐོར་བས་ལྟེ་བའི་རྩ་མདུད་དང་། རོ་སྟོད་དེ་བཞིན་གཅུས་པས་སྙིང་ག་དང་། མགྲིན་པ་བསྐོར་ཞིང་དགྱེ་སྒུས་མགྲིན་པ་དང་། མགོ་བོ་མཉེ་བསྲུབ་འཕུར་བས་དུང་ཁང་དང་། རྐང་ལག་བརྐྱང་བསྐུམ་འཕུར་བས་རྩ་ཕྲན་ཐམས་ཅད་ཀྱི་མདུད་པ་འགྲོལ་ལ། འབེབ་ཆུང་གསུམ་གྱི་འཕྲུལ་འཁོར་བྱས་པས་དངས་མ་ཀྲེམ་འདྲེན་ཁྲེམ་པར་འགྱུར་རོ། །རླུང་རོ་ཧ་གསུམ་སྤྲུག་ཅིང་གསིག་པས་རླུང་གི་ཉེས་སྐྱོན་ཐམས་ཅད་གྲོལ་བར་འགྱུར་རོ། །ཧ་སྤྲུག་གསུམ་རེ་པོ་རླུང་འཇོག་པའི་དུས་ཐམས་ཅད་དུ་གལ་ཆེ་ཞིང་མཐར་བསྔོ་སྨོན་མཐའ་རྒྱས་སུ་བྱའོ།། ཞེས་དེང་སང་གལ་ཆུང་ཆོས་ལ་བྱེད་དུས་འདི་ལྟར་དགོས་ཆེད་ཀྱིས་དབེན་ཀྱང་དད་བཙུན་པ་ཉ་མོ་ཚེ་རིང་གིས་ཡང་ཡང་བསྐུལ་ངོར་མ་ལྡོག་ཙམ་དུ་གཞུང་དང་གསུང་རྒྱུན་ལྟར་རིག་འཛིན་རྒྱ་མཚོས་བྲིས་པ་དགེ་ཞིང་ཤིས་པར་གྱུར་ཅིག། །།