རྒྱུ་འབྲས་བསྟན་པ་ལས་ཀྱི་མེ་ལོང་།
ཐུགས་རྗེ་ཆེན་པོ་མ་རིག་མུན་སེལ་ལས༔ རྒྱུ་འབྲས་བསྟན་པ་ལས་ཀྱི་མེ་ལོང་བཞུགས༔ འཕགས་པ་མ་རིག་མུན་སེལ་ལ་ཕྱག་འཚལ་ལོ༔ རྒྱུད་ལས༔ དང་པོ་གཞི་མེད་ཕྱོགས་ལྷུང་མེད༔ འཁོར་འདས་གང་དུའང་མི་དམིགས་ཀྱང་༔ གློ་བུར་མ་རིག་རླུང་གིས་སྣུན༔ འགྱུ་རྟོག་ཚོར་བའི་ཕུང་པོ་ལངས༔ འཁོར་བ་མྱང་འདས་གཉིས་སུ་གྲུབ༔ རང་སྣང་མ་རིག་མུན་པས་བསྒྲིབས༔ ཕྱི་སྣོད་འབྱུང་བའི་ཁམས་ལྔ་དང་༔ ནང་ནི་ཉོན་མོངས་དུག་ལྔ་པོ༔ མ་རིག་ལས་ཀྱིས་བདག་ཏུ་བཟུང་༔ དེ་ལས་འགྲོ་དྲུག་ས་བོན་གྲུབ༔ ལས་དྲུག་འབྲས་བུས་འགྲོ་དྲུག་མནར༔ སྲིད་རྩེ་མནར་མེད་བར་དག་ཏུ༔ སྡུག་བསྔལ་མི་བཟོད་རྦ་ཀློང་འཁྲུག༔ དམྱལ་བ་དམྱལ་མེ་འབར་བས་འཇིགས༔ ཡི་དྭགས་བཀྲེས་ཤིང་སྐོམ་པས་འཇིགས༔ དུད་འགྲོ་གཅིག་ལ་གཅིག་ཟས་འཇིགས༔ མི་རྣམས་སྐྱེ་རྒ་ན་དང་འཆི༔ ལྷ་རྣམས་བག་མེད་པ་ཡིས་འཇིགས༔ ལྷ་མིན་མཚོན་ཆའི་འཁོར་ལོ་འབར༔ འཁོར་བ་དག་ནི་སྡུག་བསྔལ་རྒྱུ༔ མ་རིག་མུན་པ་འཐིབས་པོ་ཆེར༔ འཕགས་པའི་ཐུགས་རྗེའི་འོད་ཟེར་གྱིས༔ གང་ལ་གང་འདུལ་འཕྲིན་ལས་ཀྱིས༔ འགྲོ་དྲུག་མུན་པ་ཐབས་ཀྱིས་སོལ༔ ཅེས་པས༔ རྒྱུ་འབྲས་ཀྱི་བསྟན་བཅོས་ལས་ཀྱི་མེ་ལོང་འདི་སྐབས་ལྔ་སྟེ༔ འཁོར་འདས་ཀྱི་གྲུབ་གཞི༔ ཕྱི་སྣོད་དང་ནང་བཅུད་ཀྱི་ཆགས་ཚུལ༔ རིགས་དྲུག་ལས་ཀྱི་རང་གཟུགས་སུ་ཤར་ཞིང་ས་བོན་རྒྱུ་དྲུག་གི་གྲུབ་ཚུལ༔ སྡུག་བསྔལ་ལས་དྲུག་གི་བག་ཆགས་ཀྱིས་མནར་བ༔ འཕགས་པའི་ཐུགས་རྗེས་འཁོར་བ་ལས་སྒྲོལ་བའི་སྤྲུལ་པ་བཀྱེ་བའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་དང་པོ་འཁོར་འདས་ཀྱི་གྲུབ་གཞི་ཇི་ལྟར་ཞེ་ན༔ བཀྲ་ཤིས་མཛེས་ལྡན་གྱི་རྒྱུད་ལས༔ དེ་ལ་ལྷུན་གྲུབ་རིན་པོ་ཆེའི་སྣང་ལུགས་འབྱུང་སྟེ༔ དེ་ནི་ཆོས་ཉིད་འབྱུང་བའི་གཞི༔ དེ་ལས་ནི་སངས་རྒྱས་བྱུང་ངོ་༔ སེམས་ཅན་བྱུང་ངོ་༔ ཡེ་ཤེས་བྱུང་ངོ་༔ འོད་བྱུང་ངོ་༔ རིག་པ་བྱུང་ངོ་༔ མ་རིག་པ་བྱུང་ངོ་༔ ལས་བྱུང་ངོ་༔ ཐུགས་རྗེ་བྱུང་ངོ་༔ ཡོད་པ་ལྟར་སྣང་བ་བྱུང་ངོ་༔ དེ་ལ་ངོ་བོ་ཡོད་དོ༔ རང་བཞིན་སྣང་བ་ཡོད་དོ༔ ཐུགས་རྗེ་ལྟར་སྣང་བ་ཡོད་དོ༔ རྩལ་ཡོད་དོ༔ སྣང་བ་ཡོད་དོ༔ སེམས་ཡོད་དོ༔ ཡིད་ཡོད་དོ༔ འཁྲུལ་པ་ཡོད་དོ༔ མ་འཁྲུལ་བ་ཡོད་དོ༔ ཐམས་ཅད་འབྱུང་བ་ཆེན་པོའོ༔ དེ་ནི་སངས་རྒྱས་དང་སེམས་ཅན་གྱི་སྤྱི་ས་ཆེན་པོ་ཞེས་བྱའོ༔ ཅེས་པ་འཁོར་འདས་གཉ ིས་ཀའི་མིང་མེད་པའི་གོང་རོལ་དུ་གཞི་སྣང་སྟོང་པ་ཆེན་པོ་ཞེས་བྱ་བའི་ངང་དུ་ཐམས་ཅད་ཆམས་གཅིག་ཏུ་གནས་པ་ལས༔ རང་རིག་པ་དང་རང་མ་རིག་པ་ཞེས་བྱ་བའི་རླུང་༔ བར་སྣང་སྟོང་པའི་རྩལ་ལས་སེར་བུ་ལྡང་བ་ལྟར་ལངས་པས༔ རང་རིག་པའི་ངོ་བོ་ཡེ་ནས་བྱ་རྩོལ་མེད་པར་བྱང་ཆུབ་པའི་དོན་དམ་པ་ཀློང་དུ་གྱུར་པས༔ གདོད་མའི་མགོན་པོ་ཆེན་པོ་མངོན་པར་རྫོགས་པར་སངས་རྒྱས་པ་སྟེ༔ ཐལ་འགྱུར་ལས༔ དེ་ལྟར་འཁོར་འདས་ཐོག་མ་ལས༔ སངས་རྒྱས་འཁྲུལ་བར་མ་གྱུར་པས༔ གཞི་ལས་དཔག་པ་དབང་པོ་ཡིས༔ རང་སྣང་རང་བཞིན་མེད་པར་ཤེས༔ རྟོག་དཔྱོད་ཡིད་རྣམས་ཕྱིར་མ་ཤོར༔ འགྱུ་བ་རང་ཐོག་ཆོད་པའོ༔ ཞེས་སོ༔ རང་ངོ་མ་རིག་པས་བསྒྲིབས་ཏེ་འཁྲུལ་བ་རྣམས་རིགས་དྲུག་ཏུ་མ་རིག་པའི་ལས་ཀྱིས་རྒྱུ་བྱས༔ ཀུན་བརྟགས་ཀྱིས་རྐྱེན་བྱས་ནས་འཁྲུལ་བ་ཡིན་ཏེ༔ ཇི་སྐད་དུ་ཐིག་ལེ་མཆོག་རྒྱུད་ལས༔ རྩ་བ་གཅིག་པའི་སེམས་ཉིད་ལས༔ ཐག་ཁྲ་སྦྲུལ་དུ་བཟུང་བ་ལྟར༔ ལྷན་སྐྱེས་མ་རིག་རྒྱུ་བྱས་ཤིང་༔ ཀུན་བརྟགས་མ་རིག་རྐྱེན་བྱས་ནས༔ ལེ་ལོ་སྙོམས་ལས་དམན་ལ་སྤྱོད༔ ཆགས་སྡང་ལྔ་ལ་ལོངས་སྤྱོད་པས༔ དམྱལ་བས་ལྕགས་བསྲེགས་ས་གཞིར་མཐོང་༔ ཡི་དྭགས་མི་གཙང་མཐོང་ཡུལ་སྣང་༔ བྱོལ་སོང་ངམ་གྲོག་གྱེན་ཐུར་མཐོང་༔ མི་ཡིས་འབྱུང་བ་བཞི་རུ་སྣང་༔ ལྷ་མ་ཡིན་གྱིས་གོ་མཚོན་མཐོང་༔ ལྷ་རྣམས་རིན་ཆེན་སྣ་བདུན་ཏེ༔ ཅེས་པས་དེ་ནི་འཁོར་འདས་གཉིས་ཀྱི་གྲུབ་གཞི་བསྟན་པའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་ཕྱི་སྣོད་དང་ནང་བཅུད་ཀྱི་གྲུབ་ཚུལ་ནི༔ དག་པ་དང་མ་དག་པ་གཉིས་ཏེ༔ ཐལ་འགྱུར་ལས༔ ངོ་བོ་ཉིད་ཀྱི་ཡེ་ཤེས་ལ༔ རྣམ་པར་མཚོན་པ་ཀ་དག་ཀྱང་༔ འཁོར་བ་དང་ནི་མྱ་ངན་འདས༔ དག་དང་མ་དག་གཉིས་སུ་བྱུང་༔ ཅེས་པས་དག་པ་མྱ་ངན་ལས་འདས་པའི་སྐུ་དང་ཞིང་ཁམས་ཀྱི་གྲུབ་ཚུལ་ནི༔ བཏགས་གྲོལ་སྙིང་པོའི་རྒྱུད་ལས༔ མ་བྱུང་མ་སྐྱེས་སྔོན་རོལ་ནས༔ ཐོག་མའི་མགོན་པོ་འོད་མི་འགྱུར༔ རང་བྱུང་ལྷུན་གྲུབ་སངས་རྒྱས་ཏེ༔ ཀུན་གྱི་འབྱུང་གནས་ཆེན་པོར་གནས༔ སྐུ་དང་ཞིང་ཁམས་ལྷུན་གྱིས་གྲུབ༔ ཅེས་པས་དཔེ་ནི་མེ་ལོང་རྣམ་པར་དག་པའི་ངོས་ལ་གཟུགས་བརྙན་གང་ཡང་འཆར་དུ་རུང་བ་དང་། ནམ་མཁའ་རྣམ་པར་དག་པ་ལས་ཉི་ཟླ་གཟའ་སྐར་ཐམས་ཅད་ལྷུན་གྲུབ་ལ་རང་ཤར་བ་ལྟར༔ ངོ་བོ་ཉིད་སྤྲོས་པའི་མཐའ་ཐམས་ཅད་དང་བྲལ་བའི་ཆ་ལས༔ འོད་བྱེད་སྣང་བ་ཆོས་ཀྱི་སྐུ༔ རང་བཞིན་དུ་གསལ་ལ་འགགས་པ་མེད་པའི་རོལ་པ་ལོངས་སྤྱོད་རྫོགས་སྐུ༔ གཉིས་མེད་གོ་མ་འགགས་པའི་ཐུགས་རྗེ་རིག་རྩལ་ཀུན་ཁྱབ་ཏུ་བཞུགས་པ་སྤྲུལ་པའི་སྐུ༔ རྒྱུ་རྐྱེན་ཐམས་ཅད་དང་བྲལ་བ་རྡོ་རྗེ་ལྟ་བུའི་སྐུ༔ སྒྲིབ་པའི་ཚོགས་ཐམས་ཅད་ཀ་ནས་དབྱིངས་སུ་དག་པ་མངོན་པར་བྱང་ཆུབ་པའི་སྐུ༔ ངོ་བོ་ཉིད་རང་བཞིན་དག་པ་ཆེན་པོར་ཡེ་ནས་སྟོང་པ་ཆོས་ཀྱི་དབྱིངས་ཀྱི་ཡེ་ཤེས༔ དེའི་རང་གདངས་གོ་མ་འགགས་པར་གསལ་བ་མེ་ལོང་ལྟ་བུའི་ཡེ་ཤེས༔ དེ་དབྱེ་བསལ་ཐམས་ཅད་ཀྱི་མཐའ་ལས་རྣམ་པར་འདས་པ་མཉམ་པ་ཉིད་ཀྱི་ཡེ་ཤེས༔ སོ་སོར་གསལ་ཞིང་ཡོངས་སུ་མ་འདྲེས་པར་རང་གསལ་བ་སོར་རྟོག་ཡེ་ཤེས༔ མ་བྱས་འབད་པ་མེད་པར་རང་བཞིན་དུ་གྲུབ་པ་བྱ་གྲུབ་ཡེ་ཤེས༔ རང་བྱུང་རིག་པ་ཆེན་པོ་དེའི་ངོ་བོ་ལས་ཐམས་ཅད་མ་འདྲེས་པར་གསལ་ཞིང་སྣང་བ་རྣམ་པར་སྣང་མཛད༔ རང་རིག་པའི་ཡོན་ཏན་གོ་མ་འགགས་པ་རིན་ཆེན་འབྱུང་ལྡན༔ ཐུགས་རྗེ་ཆེན་པོའི་སྟོབས་དང་ཡང་དག་པར་ལྡན་པས་ན་སྣང་བ་མཐའ་ཡས༔ ཤེས་པར་བྱ་བའི་མཐའ་ཐམས་ཅད་ལ་ཐོགས་པ་མེད་པས་དོན་ཡོད་གྲུབ་པ༔ གནས་ལུགས་ཀྱི་སྙིང་པོ་མཆོག་དེ་ནམ་ཡང་འགྱུར་བ་མེད་པས་ན་རྡོ་རྗེ་སེམས་དཔའ༔ དཀར་སེར་དམར་ལྗང་མཐིང་ག་ལ་སོགས་མཚན་མར་འཛིན་པའི་ཞེན་པ་བྲལ་བས༔ སྐུ་མདོག་དང་ཞིང་ཁམས་ལ་སོགས་སྣང་ལ་རང་བཞིན་མེད་པ་ཆེན་པོ་ཡེ་ནས་ལྷུན་གྲུབ་ཀྱི་ཚུལ་དུ་རང་བྱུང་དུ་རང་ཤར་བས་ན་དག་པ་སྐུ་དང་ཡེ་ཤེས་ཀྱི་ཞིང་ཁམས་སོ༔ མ་དག་པ་རིགས་དྲུག་གི་ཕྱི་སྣོད་ནང་བཅུད་ཀྱི་གྲུབ་ཚུལ་ནི༔ ཀློང་གསལ་ལས༔ ཡེ་ཤེས་ཉིད་ལས་མ་རིག་འཁྲུལ༔ ཡེ་ཤེས་ཁ་དོག་འབྱུང་བ་ལྔ༔ གདོད་ནས་ཡེ་ཤེས་རྩལ་ཉིད་དོ༔ འབྲལ་བ་མེད་ཀྱང་མ་རིག་འཁྲུལ༔ ཅེས་པས༔ ལྷུན་གྲུབ་ཆེན་པོའི་འོད་རང་སྣང་རང་བྱུང་གི་འོད་དུ་ངོ་མ་ཤེས་པས༔ ཡུལ་སྣང་གི་འཛིན་པ་ཞུགས་ནས་ཕྱི་སྣོད་ནང་བཅུད་གཉིས་སུ་འཁྲུལ་ཏེ༔ ཐལ་འགྱུར་ལས༔ འཁྲུལ་པའི་རྒྱུ་ནི་མ་རིག་པ༔ མ་རིག་པ་ནི་རྣམ་པ་གསུམ༔ བདག་ཉིད་གཅིག་གིས་འཁྲུལ་རྩ་བྱས༔ ལྷན་ཅིག་སྐྱེས་པའི་རྟོག་པ་གཉིས༔ ཀུན་ཏུ་བརྟགས་ལས་ཡུལ་དུ་གྱུར༔ ཅེས་གསུངས་པས་དང་པོ་གདོད་མའི་གཞི་ནང་གསལ་ཆེན་པོ་དེ་ཉིད་ལའང་༔ གློ་བུར་བག་ལ་ཉལ་གྱི་དྲི་མ་ལུང་མ་བསྟན་ཙམ་དུ་ལུས་པ་དེ་ཉིད༔ བདག་ཉིད་གཅིག་པའི་མ་རིག་པ་སྟེ༔ འཁྲུལ་པ་ཐམས་ཅད་འབྱུང་བའི་རྩ་བའོ༔ ཐལ་འགྱུར་ལས༔ རྒྱུ་གཅིག་རྩ་བ་དབྱེར་མེད་དེ༔ རང་ངོ་ཡིན་པར་མ་ཤེས་པས༔ འདི་ནི་འཁོར་བའི་ཐོག་མའོ༔ ཅེས་སོ༔ གཉིས་པ་ལྷན་ཅིག་སྐྱེས་པའི་མ་རིག་པ་ནི༔ གཞི་ལ་གཞི་སྣང་གི་རང་རྩལ་གསལ་བའི་དུས་སུ༔ ཕ་ཀི་ང་ལས་བྱུང་ངམ་ང་ཕ་ཀི་ལས་བྱུང་སྙམ་པའི་རྟོག་པ་གཉིས་འགྱུས་པས་བཟུང་འཛིན་གྱི་རྟོག་པ་ཤར་རོ༔ ཀུན་ཏུ་བརྟགས་པའི་མ་རིག་པ་ནི༔ འོད་སྣང་གི་ཡུལ་དུ་བཅད་དེ༔ ཡུལ་ཡུལ་ཅན་དུ་བཟུང་བའི་རྟོག་པ་ཅུང་ཟད་རགས་པར་གྱུར་པས༔ ཀུན་ཏུ་བརྟགས་པའི་ཡུལ་དུ་གྱུར་པ་ཉིད་དེ༔ རྒྱུད་ཀུན་གསལ་ལས༔ གཞི་ཉིད་རང་ངོ་མ་ཤེས་པས༔ གཟུང་འཛིན་སྐྱེས་པའི་དུས་ནས་འཁྲུལ༔ སྣོད་བཅུད་སྲིད་པ་རིམ་བཞིན་ཆགས༔ ཅེས་པས་དང་པོ་རྒྱུའི་རྐྱེན་ནི༔ བདག་ཉིད་གཅིག་པའི་མ་རིག་པ་དེའོ༔ གཉིས་པ་བདག་པོའི་རྐྱེན་ནི༔ ལྷན་ཅིག་སྐྱེས་པའི་མ་རིག་པ་དང་༔ ཀུན་ཏུ་བརྟགས་པའི་མ་རིག་པ་འཛིན་སྣང་དང་བཅས་པའོ༔ གསུམ་པ་དམིགས་པའི་རྐྱེན་ནི༔ ལྷུན་གྲུབ་ཀྱི་འོད་སྣང་ཡུལ་དུ་ཤར་བ་དེའོ༔ དེ་མ་ཐག་པའི་རྐྱེན་ནི༔ དེ་གསུམ་མཚུངས་ལྡན་དུ་ཤར་བས་དེ་མ་ཐག་པའི་རྐྱེན་བྱས་པ་སྟེ༔ བཀོད་པ་ཆེན་པོ་ལས༔ ལྷུན་གྲུབ་སྟོང་པའི་ཡུལ་ལ་ཤར༔ དེ་ཚེ་རྐྱེན་བཞིའི་འཁྲུལ་འཁོར་ལས༔ འཛིན་པའི་རྒྱ་དང་བཅས་པར་གྱུར༔ ཞེས་སོ༔ དེ་ཡང་འོད་ལྔ་ལས་འཛིན་སྣང་ཐ་དད་པས༔ ཕྱི་སྣོད་ཀྱི་འབྱུང་བ་བཞི་པོ་སོ་སོར་བྱུང་ཚུལ་ནི༔ ཀློང་གསལ་འབར་མ་ལས༔ འོད་ཁྱིམ་ཁ་དོག་ལྔ་པོ་ལས༔ མ་རིག་དངོས་པོ་ཅན་དུ་བཟུང་༔ འོད་ལྗང་བྱ་གྲུབ་ཡེ་ཤེས་ལ༔ དེར་འཛིན་ཞུགས་པས་རླུང་གི་གཞི༔ བྱི་བའི་ཁ་རླངས་ཙམ་ཞིག་བྱུང་༔ འོད་དཀར་མེ་ལོང་ཡེ་ཤེས་ལ༔ དེར་འཛིན་ཞུགས་པས་ཆུ་ཡི་གཞི༔ དཀར་པོ་སྲན་མ་ཙམ་ཞིག་བྱུང་༔ འོད་སེར་མཉམ་ཉིད་ཡེ་ཤེས་ལ༔ དེར་འཛིན་ཞུགས་པས་ས་ཡི་གཞི༔ སེར་པོ་ར་རིལ་ཙམ་ཞིག་བྱུང་༔ འོད་དམར་སོར་རྟོག་ཡེ་ཤེས་ལ༔ དེར་འཛིན་ཞུགས་པས་མེ་ཡི་གཞི༔ དམར་པོ་མཐེ་བོང་ཙམ་ཞིག་བྱུང་༔ འོད་མཐིང་ནམ་མཁའ་དང་འདྲ་བར༔ ཆོས་དབྱིངས་ཡེ་ཤེས་དབྱེར་མེད་གནས༔ ཅེས་པས༔ འོག་རླུང་རྒྱ་གྲམ་ཅུང་ཟད་གཡོས་པས༔ སྟེང་ཕྱོགས་ཀྱི་ཆུའི་དཀྱིལ་འཁོར་ལ་ཕོག༔ རླངས་པས་སའི་དཀྱིལ་འཁོར་དྲོས༔ དེ་ལས་འབྱུང་བ་བཞིའི་རང་འོད་སྦ་ཕུབ་ཙམ་པ་གསུམ་བྱུང་༔ འོད་དཀར་པོ་གཉིས་ལས་ཉི་མ་དང་ཟླ་བ༔ དེའི་རྩལ་ལས་གཟའ་དང་རྒྱུ་སྐར་ལ་སོགས་ནམ་མཁའི་བཅུད་དང་རྒྱན་དུ་གྲུབ༔ འོད་གཅིག་ལ་ལྷ་གནས་གོང་མ་སྐྱེ་མཆེད་མུ་བཞི༔ དེ་ནས་གཟུགས་ཁམས་གནས་རིས་བཅུ་བདུན༔ འཛིན་སྣང་གི་ཤེས་པ་ཇེ་རགས་སུ་སོང་བས་འདོད་པའི་ཁམས་ལ་སྤྱོད་པའི་སེམས་ཅན་རིགས་དྲུག་རྣམས་ཀྱི་ཚོགས་མང་པོ་བྱུང་སྟེ༔ ཀློང་གསལ་ལས༔ མ་རིག་བདག་འཛིན་དབང་གིས་ནི༔ རིགས་དྲུག་སེམས་ཅན་དཔག་མེད་བྱུང་༔ མ་རིག་འཁྲུལ་བ་འདི་ལ་ཟད་མེད་འཕེལ་བ་མེད༔ ཅེས་པས༔ ལྷུན་གྲུབ་ཀྱི་འོད་སྣང་རིམ་བཞིན་ནུབ་ནས༔ ནང་དུ་འོད་ལ་འཛིན་སྣང་ཐ་དད་དུ་ཤར་བས༔ འགྲོ་བ་རིགས་དྲུག་གི་རང་བཞིན་དུ་དེ་མ་ཁད་འཁྲུལ་པས་མཐོ་རིས་དང་ངན་སོང་གཉིས་སུ་གྲུབ་པ་སྟེ༔ བཀོད་པ་ཆེན་པོ་ལས༔ མ་རིག་འཁྲུལ་པས་འཛིན་པ་ཞུགས༔ འོད་དུ་གསལ་བ་རང་ནུབ་ཅིང་༔ མཐོ་རིས་ངན་སོང་གཉིས་སུ་སྲིད༔ ཅེས་པས༔ མཐོ་རིས་ལ་ཡང་ལྷ་དང་ལྷ་མིན་མི་དང་གསུམ་མོ༔ དང་པོ་ལྷ་ལ་ཡང་གཟུགས་མེད་གཟུགས་ཁམས་འདོད་ཁམས་སོ༔ དང་པོ་གཟུགས་མེད་ཀྱི་ལྷ་རྣམས་ནི་རྟོག་པ་མེད་པའི་ཡུལ་ལ་བརྟེན་པའོ༔ གཟུགས་ཁམས་ཀྱི་ལྷ་འོད་གསལ་གྱི་ཡུལ་ལ་བརྟེན་པའོ༔ འདོད་པའི་ལྷ་དགའ་བདེའི་ཡུལ་ལ་བརྟེན་པའོ༔ ལྷ་མ་ཡིན་དང་མི་རྣམས་གླིང་བཞིའི་ཡུལ་ལ་བརྟེན་པའོ༔ ངན་སོང་གསུམ་ནི་རང་གི་སྣང་བ་ལོག་པའི་ཡུལ་ལ་བརྟེན་པའོ༔ དེ་ནི་ཕྱི་སྣོད་ཀྱི་གྲུབ་ཚུལ་ལོ༔ ད་ནང་བཅུད་སེམས་ཅན་གྱི་གྲུབ་ཚུལ་ནི༔ རྒྱུད་རང་ཤར་ལས༔ འདོད་དང་གཟུགས་དང་གཟུགས་མེད་ཀྱི༔ ཁམས་གསུམ་པོ་ནི་དེ་ལ་བརྟེན༔ ཡོད་མིན་མེད་མིན་ཅི་ཡང་མེད༔ རྣམ་ཤེས་ཅུང་ཟད་མེད་པ་ཡི༔ གཟུགས་མེད་རྣམས་ནི་དེ་ལས་སྐྱེས༔ གནས་གཙང་ལ་སོགས་གཟུགས་ཅན་ནི༔ གོང་འོག་ཏུ་ནི་ཐེག་པའི་ཚུལ༔ འོག་མིན་ལ་སོགས་འདོད་པ་ཡི༔ ལྷ་དང་ལྷ་མིན་མི་རྣམས་ནི༔ མངོན་མཐོ་དེ་ནས་གནས་གསུམ་ཉིད༔ བྱོལ་སོང་ཡི་དྭགས་དམྱལ་བ་དང་༔ ཁམས་གསུམ་པོ་ཡང་དེ་ལ་བརྟེན༔ ཅེས་པའི་དོན་ནི་འདོད་ཁམས་དང་༔ གཟུགས་ཁམས་དང་༔ གཟུགས་མེད་ཀྱི་ཁམས་སོ༔ དང་པོ་འདོད་ཁམས་ལ་ཡང་དྲུག་སྟེ༔ འདོད་པའི་ལྷ་དང་ལྷ་མ་ཡིན་དང་༔ མི་རྣམས་ནི་བདེ་འགྲོའི་གནས་ཡིན་ལ༔ དམྱལ་བ་ཡི་དྭགས་དུད་འགྲོ་རྣམས་ནི་ངན་སོང་གི་གནས་ཡིན་ནོ༔ ལྷ་ལ་དབྱེ་ན་རྒྱལ་པོ་ཆེན་པོ་སྡེ་བཞི་པའི་ལྷ་དང་༔ སུམ་ཅུ་རྩ་གསུམ་པའི་ལྷ་གཉིས་ནི་རི་རབ་ལ་བརྟེན་ནས་གནས་སོ༔ འཐབ་བྲལ་དང་དགའ་ལྡན་དང་འཕྲུལ་དགའ་དང་༔ གཞན་འཕྲུལ་དབང་བྱེད་དང་དྲུག་ནི་གནས་སྐབས་བདེ་དགའ་ལོངས་སྤྱོད་ཆེན་པོས་མངོན་པར་མཐོ་བའི་ཟག་པ་དང་བཅས་པའི་དགེ་བའི་ཡོན་ཏན་སྣ་ཚོགས་ལྡན་པའི་ཡུལ་ཡིན་ནོ༔ ལྷ་མ་ཡིན་རྣམས་ལ་ཡང་ལོངས་སྤྱོད་ཀྱི་དགའ་བདེ་ཡོད་ཀྱང་༔ འཐབ་རྩོད་ལ་ལོངས་སྤྱོད་དགོས་པའི་ཡུལ་ལོ༔ མིའི་གླིང་ལ་དབྱེ་ན་གླིང་ཆེན་པོ་བཞིའི་མི་རིགས་རྣམས་ལ་ཡང་སོ་སོར་ལས་དབང་གིས་གཟུགས་བརྙན་བསྟན་པའི་གླིང་སྟེ་ཤར་ལུས་འཕགས་ཀྱི་གླིང་དང་༔ ནུབ་བ་ལང་སྤྱོད་ཀྱི་གླིང་དང་༔ བྱང་སྒྲ་མི་སྙན་གྱི་གླིང་དང་གསུམ་ནི༔ གནས་སྐབས་སུ་ཚེ་དང་ལོངས་སྤྱོད་དུ་མས་བརྒྱན་པའི་གླིང་ཡིན་ཞིང་༔ རང་ཅག་ལྷོ་ཕྱོགས་འཛམ་གླིང་གི་ཡུལ་འདི་ནི་ལས་ཀྱི་ས་པར་གྲུབ་པ་སྟེ༔ སེམས་ཅན་སྣ་ཚོགས་ལས་སྣ་ཚོགས་ལས་མངོན་པར་སྣང་བའོ༔ ངན་སོང་གི་གླིང་གསུམ་ལ་ཡང་དབྱེ་ན༔ དམྱལ་བ་ལ་ཚ་བའི་དམྱལ་བ་བརྒྱད༔ གྲང་བའི་དམྱལ་བ་བརྒྱད༔ ཉི་ཚེ་ཉེ་འཁོར་གཉིས་དང་བཅོ་བརྒྱད་ཚ་གྲང་གི་དམྱལ་བ་རྣམས་སོ༔ ཡི་དྭགས་ལ་ཡང་ཕྱིའི་སྒྲིབ་པ་ཅན་དང་༔ ནང་གི་སྒྲིབ་པ་ཅན 
་དང་༔ མེ་ལྕེའི་ཕྲེང་བ་ཅན་དང་༔ ལྗན་ལྗིན་ཟ་བ་ཅན་དང་བཞི་ནི་བཀྲེས་སྐོམ་ཡི་དྭགས་ཀྱི་གནས་སོ༔ དུད་འགྲོ་ལ་ཡང་རྐང་གཅིག་དང་༔ རྐང་མང་དང་འདབ་ཆགས་དང་འགྲེང་བུ་དང་༔ ལྟོ་འགྲོ་ལྔ་ནི་བཀོལ་སྤྱོད་གླེན་ལྐུག་གི་སྡུག་བསྔལ་དུད་འགྲོའི་གནས་སོ༔ རྒྱུད་རང་ཤར་ལས༔ སེམས་ཅན་དེ་དག་སྐྱེ་བ་བཞི༔ དེ་ལྟར་འཇིག་རྟེན་གསུམ་པོ་ཉིད༔ ཅེས་པས༔ འགྲོ་བ་དྲུག་པོ་དེ་དག་ཀྱང་སྐྱེ་གནས་རྣམ་པ་བཞིར་སྐྱེ་སྟེ༔ བརྫུས་ཏེ་སྐྱེ་བ་དང་༔ སྒོ་ང་ལས་སྐྱེ་བ་དང་༔ དྲོད་གཤེར་ལས་སྐྱེ་བ་དང་༔ མངལ་ལས་སྐྱེ་བའོ༔ དེ་རྣམས་ཀྱི་ལུས་དང་སེམས་ཅན་གྱི་མཚན་ཉིད་ཀྱི་རྣམ་དབྱེ་ཇི་ལྟར་ཞེ་ན༔ རང་ཤར་ལས༔ ཕུང་པོ་ལྔ་དང་འབྱུང་བ་ལྔ༔ ཡན་ལག་ལྔ་དང་དོན་སྙིང་ལྔ༔ ཡུལ་ལྔ་དང་ནི་ཉོན་མོངས་ལྔ༔ སེམས་ལྔ་ཡུལ་ལྔ་རྟོག་པ་ལྔ༔ གཟུང་འཛིན་འཁོར་བ་ཉིད་དུ་གྲུབ༔ ཅེས་མ་རིག་པས་རྒྱུ་བྱས་གཅིག་ལ་གཅིག་རྟེན་ཅིང་འབྲེལ་བར་འབྱུང་བ་ལས༔ རིགས་དྲུག་གི་འཁོར་གནས་ཐམས་ཅད་གྲུབ་བོ༔ གཟུགས་ཀྱི་ཁམས་ལ་དབྱེ་ན༔ ཚངས་པའི་འཇིག་རྟེན་ལ་སོགས་གནས་རིས་བཅུ་བདུན་ནོ༔ འདི་རྣམས་རྡོས་བཅས་ཀྱི་ལུས་མ་ཡིན་པར་འཁྲུལ་པ་ཡིད་ཀྱི་རྒྱུད་བརྟེན་པའི་འོད་ལུས་སོ༔ གཟུགས་མེད་ལ་དབྱེ་ན་ནམ་མཁའ་མཐའ་ཡས་དང་༔ རྣམ་ཤེས་མཐའ་ཡས་དང་༔ ཡོད་མིན་མེད་མིན་དང་༔ གང་ཡང་མ་ཡིན་པ་དང་བཞི་ནི་སྐྱེ་མཆེད་མུ་བཞི་ཡིན་ཏེ༔ འདི་ནི་རྟོག་མེད་ཀྱི་ཡུལ་ལ་རིག་པའི་རྟོག་འཛིན་ཕྲ་མོ་ཙམ་གྱི་གཞི་ཡོད་ཀྱང་༔ ལས་ངན་ཆེན་པོའི་འཁྲུལ་པ་དང་སྡུག་བསྔལ་ཆེན་པོའི་རགས་པ་རྣམས་ནི་མེད་དོ༔ དེ་ལྟར་འགྲོ་བ་རིགས་དྲུག་འཁོར་བའི་སེམས་ཅན་ཡིན་པ་མཉམ་ཡང་༔ ལས་ཀྱི་རང་བཞིན་ལས་གཟུགས་སྣང་གནས་ཡུལ་ཕྱི་སྣོད་ནང་བཅུད་ཀྱི་ཚོགས་ནི་ཐ་དད་སྣ་ཚོགས་སོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རིགས་དྲུག་ལས་ཀྱི་རང་གཟུགས་སུ་ཤར་ཞིང་རྒྱུ་ས་བོན་དྲུག་གི་གྲུབ་ཚུལ་ནི༔ རིན་ཆེན་ཀུན་རྫོགས་འདུས་པའི་རྒྱུད་ལས༔ འདོད་ཆགས་ཞེ་སྡང་གཏི་མུག་དང་༔ ང་རྒྱལ་ཕྲག་དོག་སེར་སྣའི་ལས༔ མ་རིག་ལས་བྱུང་ས་བོན་གྲུབ༔ འགྲོ་བའི་ཁམས་དང་གཟུགས་སྣང་ཤར༔ ཅེས་པས༔ ཉོན་མོངས་པ་མ་རིག་པ་ལས༔ འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་དང་ཕྲག་དོག་དང་སེར་སྣ་སྟེ༔ ཉོན་མོངས་པ་དྲུག་གི་རྟོག་ཚོགས་བག་ཆགས་དང་བཅས་པ་འཕྲོས་པས༔ ས་བོན་ཨ་ནྲི་སུ་ཏྲི་པྲེ་དུ་ཞེས་པའི་ཡི་གེ་འབྲུ་དྲུག་པོ་འདི་འགྲོ་བ་དྲུག་གི་སྲོག་བསྐྱེད་པའི་རྩའི་འཁོར་ལོ་ཡི་གེའི་རྣམ་པར་རང་ཤར་བས༔ ལས་ཀྱི་རང་གཟུགས་བག་ཆགས་ཨ་འཐས་པས་ས་བོན་དུ་ཤར་ཞིང་༔ ས་བོན་གྱི་རང་མདངས་གཟུགས་སུ་གྲུབ་སྟེ༔ ལས་རང་མཐུན་དུ་ཤར་བའི་གཟུགས་སྣང་དེ་ལ༔ ཉོན་མོངས་པ་དྲུག་གི་ཚོགས་ཀྱི་སྡུག་བསྔལ་གྱིས་ཡང་དག་པར་མནར་བར་གྱུར་པ་སྟེ༔ རྒྱུད་རྣམ་བཀོད་ལས༔ འགྲོ་དྲུག་ལས་ཀྱི་ཉོན་མོངས་དྲུག༔ རང་སྣང་རང་གཟུགས་ལས་ཀྱིས་མནར༔ ཅེས་སོ༔ བཞི་པ་སྡུག་བསྔལ་ལས་དྲུག་གི་བག་ཆགས་ཀྱིས་མནར་ཚུལ་བསྟན་པ་ནི༔ མ་རིག་མུན་སེལ་ལས༔ དམྱལ་བ་དམྱལ་མེ་འབར་བས་འཇིགས༔ ཡི་དྭགས་བཀྲེས་ཤིང་སྐོམ་པས་འཇིགས༔ དུད་འགྲོ་གཅིག་ལ་གཅིག་ཟས་འཇིགས༔ མི་རྣམས་སྐྱེ་རྒ་ན་དང་འཆི༔ ལྷ་རྣམས་བག་མེད་པ་ཡིས་འཇིགས༔ ལྷ་མིན་མཚོན་གྱི་འཁོར་ལོ་འབར༔ འཁོར་བ་འདི་ནི་སྡུག་བསྔལ་རྒྱུ༔ ཞེས་པས༔ དམྱལ་བ་ལ་ཡང་ཚ་བའི་དམྱལ་བ་དང་གྲང་བའི་དམྱལ་བ་གཉིས་སོ༔ དང་པོ་ཚ་བའི་དམྱལ་བ་ལ་ཡང་བརྒྱད་ཡང་སོས་དང་ཐིག་ནག་དང་བསྡུས་འཇོམས་དང་ངུ་འབོད་དང་༔ ངུ་འབོད་ཆེན་པོ་དང་ཚ་བ་དང་རབ་ཏུ་ཚ་བ་དང་༔ མནར་མེད་པ་སྟེ་བརྒྱད་དོ༔ རྡོ་རྗེ་མེ་ལྟར་འབར་བའི་རྒྱུད་ལས༔ འདི་འོག་སྟོང་ཕྲག་ཉི་ཤུ་ན༔ མནར་མེད་ལ་སོགས་ཚ་དམྱལ་བརྒྱད༔ ཁང་ཁྱིམ་ཐོག་བརྩེགས་རྣམ་པའི་ཚུལ༔ དེ་དག་རྣམས་སུ་ལྷག་དང་བཅས༔ རྡོ་རྗེ་མེ་འདག་འབར་པས་འཇིགས༔ ཅེས་པས༔ མནར་མེད་པའི་དམྱལ་བ་ཆེན་པོ་རྡོ་རྗེ་གདན་དུ་སྐྱེས་པའི་སེམས་ཅན་རྣམས་ཀྱི་ཚེའི་ཚད་ནི༔ བསྐལ་པ་ཆེན་པོ་ཁྲི་ཕྲག་བཅུ་དང་སྟོང་ཕྲག་བརྒྱད་དུ་སྡུག་བསྔལ་ལ་སྤྱོད་དགོས་སོ༔ སྡུག་བསྔལ་ནི་ལྕགས་བསྲེགས་ཀྱི་ས་གཞི་མེ་རབ་ཏུ་འབར་བའི་དཀྱིལ་དུ་ལྕགས་བསྲེགས་ཀྱི་ཁང་སྒྲོམ་་མེ་འདག་ཆལ་ཆིལ་ཉལ་ཉིལ་རབ་ཏུ་འབར་བའི་ནང་དུ་ཁྲོ་ཆུ་དང་ཟངས་ཆུ་ཁོལ་མའི་ནང་ན་འཚོད་ཅིང་རབ་ཏུ་འཚོད་པའི་སྡུག་བསྔལ་ལ་སྤྱོད་དགོས་པའོ༔ རབ་ཏུ་ཚ་བའི་དམྱལ་བའི་ཚེའི་ཚད་ནི༔ བསྐལ་བ་ཆེན་པོ་འབུམ་ཕྲག་གཉིས་དང་སྟོང་ཕྲག་དྲུག་དང་ཁྲི་ཕྲག་ལྔའི་བར་དུ་སྡུག་བསྔལ་ལ་སྤྱོད་དགོས་སོ༔ སྡུག་བསྔལ་ནི་ཁྲོ་ཆུ་དང་ཟངས་ཆུ་ཁོལ་མ་མང་པོས་ཕྱི་ནས་འཁྲུད་པ་ལྟར་འབྲབ་པ་དང་༔ ནང་དུ་ཁ་ཟས་ལྟར་བཟའ་བ་དང་བཏུང་དགོས་པའི་སྡུག་བསྔལ་ལ་སྤྱོད་པའོ༔ ཚ་བའི་དམྱལ་བ་ཆེན་པོར་སྐྱེས་པའི་ཚེའི་ཚད་ནི༔ བསྐལ་པ་ཆེན་པོ་འབུམ་ཕྲག་ལྔ་དང་ཁྲི་ཕྲག་གཉིས་སྟོང་ཕྲག་གཅིག་གི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་ནི་ས་གཞི་ཐམས་ཅད་ལྕགས་བསྲེགས་ཀྱི་མེ་ཐོ་རོ་རོ་འབར་བ་ལས་མེ་སྟག་ཚུབ་ཚུབ་ཏུ་འཁྱིལ་ཞིང་༔ རང་གི་ལུས་ལ་གཞོབ་བུན་བུན་བསྲེགས་པ་སྙམ་གྱི་སྡུག་བསྔལ་ལ་སྤྱོད་དགོས་པའོ༔ དེའི་སྟེང་གི་དམྱལ་བ་ངུ་འབོད་ཆེན་པོའི་ཚེའི་ཚད་ནི༔ བསྐལ་པ་ཆེན་པོ་བྱེ་བ་བརྒྱ་ཕྲག་ཁྲི་སྟོང་གི་བར་དུ་སྡུག་བསྔལ་ལ་སྤྱོད་དགོས་སོ༔ སྡུག་བསྔལ་ནི་ནམ་མཁའི་མཐོངས་ལས་མེ་རབ་ཏུ་འབར་བའི་འཁོར་ལོ་རྩིབས་སྟོང་ཕྲག་མང་པོ་ཡོད་པའི་ཆར་ཆེན་པོས༔ གང་དང་གང་དུ་འབྲོས་ས་དང་ཡིབ་སའི་གནས་མེད་པར་ལུས་ལ་དབང་མེད་དུ་འཕོག་པས༔ མི་བཟོད་པའི་སྡུག་བསྔལ་དྲག་པོས་འདི་ལྟར་ཡོངས་སུ་མནར་བ་འདི་ནི་ཅི་ཞིག༔ ཀྱེ་མ་ཕའོ༔ ཀྱེ་མ་མའོ༔ ཀྱེ་མ་སུ་ཞིག་ང་སྐྱོབས་ཤིག་སྨྲ་ཞིང་འོ་དོད་ཀྱི་ཆོ་ངེ་དྲག་པོས་འབོད་པར་བྱེད་པའོ༔ དེའི་སྟེང་གི་དམྱལ་བ་ངུ་འབོད་ཀྱི་ཚེའི་ཚད་ནི༔ བསྐལ་པ་ཆེན་པོ་བྱེ་བ་གཅིག་དང་བསྐལ་པ་སྟོང་ཕྲག་བཞིའི་བར་དུ་སྡུག་བསྔལ་ལ་སྤྱོད་དགོས་སོ༔ སྡུག་བསྔལ་ནི་བར་སྣང་སྟོང་པ་ལས་མེ་སྟག་གི་ཆར་པ་ཚྭ་ཚྭ་ཕྲོམ་ཕྲོམ་དུ་འབབ་ཅིང་༔ རང་གི་ཕ་མ་ཉེ་དུ་རྣམས་ཀྱི་མིང་ནས་འབོད་དེ༔ ང་སྡུག་བསྔལ་འདི་ལས་སྐྱོབས་ཤིག་སྨྲ་བཞིན་མི་བཟོད་པའི་ཆོ་ངེ་དབྱངས་ནས༔ ལུས་ཐམས་ཅད་བན་བུན་ཐལ་ཐུལ་དུ་འཚིག་པར་བྱེད་པའི་སྡུག་བསྔལ་ལ་སྤྱོད་དགོས་སོ༔ དེའི་སྟེང་གི་དམྱལ་བ་བསྡུས་འཇོམས་ཀྱི་ཚེའི་ཚད་ནི༔ བསྐལ་པ་ཆེན་པོ་བྱེ་བ་བརྒྱ་དང་འབུམ་ཕྲག་གསུམ་ཁྲི་ཕྲག་བརྒྱད་དང་སྟོང་ཕྲག་གཅིག་གི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་གྱི་ཚད་ནི༔ དཔག་ཚད་སྟོང་ཕྲག་མང་པོའི་བར་གྱི་གནམ་ལྕགས་ཀྱི་ནམ་མཁའ་དང་༔ ཁྲོ་ཆུའི་ས་གཞི་ཆེན་པོ་ལས་ཀྱི་དབང་ལས་བྱུང་བའི་རླུང་ཆེན་པོས་ཆ་ལང་ལྟར་བརྡབས་པས༔ ཤ་ཁྲག་གི་གཟུགས་ཕུང་ཐམས་ཅད་དམར་ཉིལ་ཉིལ་ཁྲག་ཆིལ་ཆིལ་དུ་བརྡབས་པའི་སྡུག་བསྔལ་ལ་སྤྱོད་དགོས་པའོ༔ དེའི་སྟེང་གི་དམྱལ་བ་ཆེན་པོ་ཐིག་ནག་གི་ཚེའི་ཚད་ནི༔ བསྐལ་པ་ཆེན་པོ་ས་ཡ་གཅིག་དང་བྱེ་བ་འབུམ་ཕྲག་དྲུག་ཁྲི་སྟོང་ཕྲག་ལྔའི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་གྱི་ཚད་ནི་ལུས་གན་རྐྱལ་དང་ཁ་བུབ་ཏུ་བསྒྱེལ་བའི་སྟེང་དུ༔ ལྕགས་ཀྱི་ཐིག་སྐུད་ནག་པོས་གཤིན་རྗེ་རྣམས་ཀྱིས་ཐིག་མིག་མང་རིས་སུ་བཏབ་ནས༔ མཚོན་ཆ་སྣ་ཚོགས་པ་སྟེ༔ རལ་གྲི་དང་དགྲ་སྟ་དང་སོག་ལེ་དང་ཁ་ཊྭཱཾ་དང་ཏྲི་ཤུ་ལ་སོགས་མེ་འབར་བ་དང་བཅས་པས་འབུགས་པ་དང་གཤག་པ་དང་འདྲལ་བར་བྱེད་པའི་སྡུག་བསྔལ་ལ་སྤྱོད་དགོས་པའོ༔ དེའི་སྟེང་གི་དམྱལ་བ་ཡང་སོས་ཀྱི་ཚེའི་ཚད་ནི༔ བསྐལ་པ་ཆེན་པོ་བཞི་དང་འབུམ་ཕྲག་གཅིག༔ ཁྲི་ཕྲག་དྲུག༔ སྟོག་ཕྲག་བཞིའི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་ནི་རང་བཞིན་གྱི་ནམ་མཁའ་ནས༔ ནད་ཧུར་ཐུམ་དྲག་པོ་ལ་གདོན་ལས་ངན་གྱི་རྣམ་སྨིན་བསྡོངས་ནས༔ དམྱལ་བའི་ཡུལ་ཁམས་དེར་སྐྱེས་པའི་སེམས་ཅན་རྣམས་ལ་ཐོགས་མེད་དུ་ནད་གདོན་དེ་གཉིས་བརྒྱབ་པས༔ ཐམས་ཅད་ཤི་བར་གྱུར་ཅིག་པའི་སྒྲ་ཆེན་པོ་ཡོངས་སུ་གྲགས་པས༔ མི་མཟོད་པའི་སྡུག་བསྔལ་སྲོག་འཆད་དགོས་པའི་ཚོར་བ་དང་བཅས་པའི་ངང་སྐད་ཅིག་དེ་ལ་འཆི་བར་བྱེད་དོ༔ སླར་ཡང་ལས་ངན་པའི་རླུང་གིས་སྒྲ་འབྱིན་ཏེ༔ སླར་ཐམས་ཅད་སོས་པར་གྱུར་ཅིག་པའི་སྒྲ་བྱུང་ཚེ༔ སྔ་མ་ཤི་བའི་རོ་དེ་རྣམས་སྔར་བཞིན་སོས་པར་འགྱུར་རོ༔ དེ་བཞིན་ཡང་ཤི་ཡང་སོས་ཀྱི་སྡུག་བསྔལ་ལ་སྤྱོད་དགོས་པའོ༔ དེ་དག་བརྒྱད་པོ་ནི་ཚ་བས་བསྲེག་ཅིང་འཇོམས་པར་བྱེད་པའི་དམྱལ་བ་ཆེན་པོ་བརྒྱད་དོ༔ དེ་ལྟར་གྱི་དམྱལ་བ་དེ་རྣམས་ཀྱི་ཚེ་ཚད་སྡུག་བསྔལ་རྣམས་རྫོགས་ནས༔ སླར་ལས་ངན་གྱི་ལྷག་རོལ་གྱི་རྣམ་སྨིན་ཐམས་ཅད་སྦྱང་བའི་གནས༔ དམྱལ་བ་དེ་རྣམས་ཐམས་ཅད་ལ་ཕྱོགས་ཕྱོགས་མཚམས་མཚམས་རྣམས་སུ་མེ་མ་མུར་དང་༔ ཐལ་ཆུ་ཁོལ་མ་དང་༔ རོ་མྱགས་ཀྱི་འདམ་ཆེན་པོ་དང་༔ སྤུ་གྲིའི་ལམ་པོ་ཆེ་དང་༔ ཆུ་བོ་རབ་མེད་དང་༔ ལྕགས་ཀྱི་ཤལ་མ་རི་དང་༔ རལ་གྲིའི་ལོ་མའི་ཚལ་དང་༔ འདི་ལྟར་ལྷག་མ་བརྒྱད་པོ་ཕྱོགས་བཞིར་རེ་རེ་རྣམས་གནས་ཤིང་༔ ཚེའི་ཚད་ཀྱང་ས་ཡ་གསུམ་དང་བྱེ་བ་གསུམ་འབུམ་ཕྲག་གསུམ་སྟོང་ཕྲག་གཉིས་ཀྱི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་གྱི་ཚད་ནི་མེ་མ་མུར་གྱི་ནང་དུ་རང་དབང་མེད་པར་ཤ་ཁུ་འཛག་ཁྲག་ཐིགས་འབབ་བཞིན་འགྲོ་དགོས་པ་དང་༔ ཐལ་ཆུ་ཁོལ་མའི་ནང་དུ་ཤ་རུས་སྐྱ་ཟེང་ཟེང་འཚོད་བཞིན་འཕྱོ་དགོས་པ་དང་༔ རོ་མྱགས་ཀྱི་འདམ་ཆེན་པོར་སྐྱི་བུང་བུང་མགྲིན་པ་ཡན་ཆད་ནུབ་པར་འགྲོ་དགོས་པ་དང་༔ སྤུ་གྲིའི་ལམ་པོ་ཆེར་ཤ་རུས་ཐམས་ཅད་དུམ་བུ་དང་ཚལ་བར་འཆད་བཞིན་འགྲོས་དལ་མེད་དུ་རྒྱག་དགོས་པ་དང་༔ ཆུ་བོ་ཆེན་པོ་རབ་མེད་ཞེས་བྱ་བ་ཚ་ཞིང་རབ་ཏུ་སྲེག་པར་བྱེད་པའི་གཞུང་ལ་འཁྱེར་ཞིང་བྱིང་བར་བྱེད་པ་དང་༔ ལྕགས་ཀྱི་ཤལ་མ་རི་ཞེས་བྱ་བ་གནམ་ལྕགས་ཞུན་མའི་རི་བོ་ཤིང་སྡོང་གི་རྣམ་པ་ལ༔ ཚེར་མ་ཁྲི་འབུམ་ས་ཡ་མང་པོས་རབ་ཏུ་གཏམས་པའི་ངོས་ལ་གྱེན་ཐུར་དུ་འགྲོ་ཞིང་རྐང་མཐིལ་དང་སྤྱི་བོ་ལ་སོགས་དབང་མེད་དུ་ཏུལ་ཏུལ་དབུག་པར་བྱེད་པའི་སྡུག་བསྔལ་ལ་སྤྱོད་དགོས་པ་དང་༔ རལ་གྲིའི་ལོ་མའི་ཚལ་ཞེས་པ་ནམ་མཁའི་མཐོངས་ནས་སྤུ་གྲི་མེ་ལྟར་ཚ་བའི་ཆར་པ་སི་ལི་ལི་འབབ་ཅིང་༔ ལུས་མགོ་མཇུག་གང་དང་གང་དུ་ཕོག་པའི་སར་ཚལ་བར་བཤག་ཅིང་རབ་ཏུ་གཅོད་པའི་སྡུག་བསྔལ་མི་བཟོད་པ་ལ་སྤྱོད་དགོས་པའོ༔ སེམས་ཅན་ཉི་ཚེ་བའི་ཚེའི་ཚད་ནི་བསྐལ་པ་ས་ཡ་ཆེན་པོ་དྲུག་དང་༔ བྱེ་བ་དྲུག་འབུམ་ཚོ་དྲུག་སྟོང་ཕྲག་བཞིའི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་གྱི་ཚད་ནི་ཉིན་མཚན་མེད་པར་བཤའ་བ་དང་གཏུབ་པའི་སྡུག་བསྔལ་ལ་དལ་མེད་དུ་སྤྱོད་པར་བྱེད་དགོས་སོ༔ ཉི་ཚེ་ཆུང་བའི་ཚད་ནི་སྲིད་རྩེ་མནར་མེད་ཀུན་གྱི་ཡུལ་དུ་ཁྱབ་པར་གནས་སོ༔ ཚེའི་ཚད་ནི་བསྐལ་པ་ཆེན་པོ་གཅིག་ཐུབ་པའི་བར་སྡུག་བསྔལ་ལ་སྤྱོད་པའོ༔ སྡུག་བསྔལ་གྱི་ཚད་ནི་ནམ་མཁའ་ལང་བ་དང་དུས་མཉམ་པར་བརྫུས་ཏེ་སྐྱེ་ཞིང་༔ ཉི་མ་ནུབ་པའི་དུས་འཆི་བར་བྱེད་དགོས་པའོ༔ དེ་དག་རྣམས་ནི་ཚ་དམྱལ་བརྒྱད་དང་ཉི་ཚེ་ཉེ་འཁོར་བ་གཉིས་ཀྱི་རིམ་པའོ༔ དེ་དག་རྣམས་ཀྱང་རང་རང་གི་ལས་ཀྱི་སྣང་བ་ལས་གྲུབ་པ་ཤ་སྟག་སྟེ༔ ལས་བརྒྱ་པའི་མདོ་ལས༔ ལྕགས་བསྲེགས་ས་གཞི་སུ་ཡིས་བྱས༔ མེ་ཚོགས་འདི་དག་ཅི་ལས་བྱུང་༔ འདི་འདྲ་འདི་དག་མ་ལུས་པ༔ སྡིག་སེམས་ལས་ཀྱི་སྣང་བར་གྲུབ༔ ཅེས་སོ༔ དེས་ན་དེ་དག་རྣམས་སུ་སྐྱེ་བར་བྱེད་པའི་རྒྱུ་རྐྱེན་དང་འབྲས་བུ་ལས་གང་དང་གང་ལས་བྱུང་བ་ཡིན་ཞེ་ན༔ ཉོན་མོངས་པ་ཞེ་སྡང་གི་ལས་ཀྱིས་ཀུན་ཏུ་བསགས་པའི་རྒྱུ་རྐྱེན་འབྲས་བུ་དང་བཅས་པ་ལས༔ སེམས་ཅན་ཚ་བའི་དམྱལ་བ་དེ་དག་རྣམས་སུ་སྐྱེ་ཞིང་སྡུག་བསྔལ་མྱོང་བའི་རྒྱུ་ཁོ་ན་བྱེད་པ་ཡིན་ཏེ༔ མདོ་སྡེ་ལས་བརྒྱ་པ་ལས༔ ཞེ་སྡང་ལས་ཀྱི་འབྲས་བུ་ལས༔ སེམས་ཅན་དམྱལ་བའི་འཇིག་རྟེན་སྲིད༔ ཅེས་སོ༔ ཁྱད་པར་དུ་དབྱེ་ན༔ མཚམས་མེད་པ་ལྔའི་ལས་བྱས་པ་རྣམས་ནི་མནར་མེད་པའི་དམྱལ་བར་སྐྱེའོ༔ དེ་དང་ཉེ་བ་ལྔ་བྱས་པས་རབ་ཏུ་ཚ་བའི་དམྱལ་བར་སྐྱེའོ༔ མི་དགེ་བཅུ་བྱས་པའི་འབྲས་བུས་ཚ་བའི་དམྱལ་བར་སྐྱེའོ༔ ལོག་པར་ལྟ་བ་བརྒྱད་བྱས་པའི་འབྲས་བུས་ངུ་འབོད་ཆེན་པོའི་དམྱལ་བར་སྐྱེའོ༔ ལྕི་བ་བཞིའི་ལས་བྱས་པའི་འབྲས་བུས་དམྱལ་བ་ངུ་འབོད་དུ་སྐྱེའོ༔ ཁ་ན་མ་ཐོ་བའི་ལས་ཀྱི་འབྲས་བུས་དམྱལ་བ་བསྡུས་འཇོམས་སུ་སྡུག་བསྔལ་ལ་སྤྱོད་དོ༔ སེམས་ཅན་ཕ་རོལ་བོ་བཤའ་བ་དང་གཏུབ་པའི་ལས་ཁོ་ན་གཙོ་བོར་བཏོན་ཏེ་སྤྱད་པའི་འབྲས་བུས་དམྱལ་བ་ཐིག་ནག་ཏུ་སྐྱེ་བར་བྱེད་དོ༔ གསོད་གཅོད་ཁོ་ན་གཙོ་བོར་སྤྱོད་པ་རྣམས་ནི་སེམས་ཅན་དམྱལ་བ་ཡང་སོས་ཞེས་བྱ་བའི་འཇིག་རྟེན་དུ་སྐྱེ་བར་བྱེད་དོ༔ དཀར་པོ་དགེ་བ་བཅུའི་ལམ་བཀགས་པ་རྣམས་ནི་སྤུ་གྲི་འབར་བའི་ལམ་པོ་ཆེ་ཞེས་བྱ་བའི་དམྱལ་བར་སྐྱེ་བར་བྱེད་དོ༔ བརྡུང་བ་དང་གཙོགས་པ་དང་འཁྱིག་པ་དང་འབིགས་པ་དང་གཏར་བ་སོགས་བྱས་པའི་སེམས་ཅན་རྣམས་ནི༔ གནམ་ལྕགས་ངར་མ་རབ་ཏུ་འབར་བའི་ཤལ་མ་རི་ཞེས་བྱ་བར་སྐྱེའོ༔ ཡུལ་གྱི་དེད་དཔོན་དུ་གྱུར་ནས་དམག་ལ་སོགས་པའི་ལས་ལ་རབ་ཏུ་ཞུགས་ཤིང་༔ ཕ་རོལ་གྱི་འགྲོ་བ་རྣམས་ལ་མཚོན་ཆ་སོགས་ཀྱིས་བསད་བཅད་ཁོ་ནར་སྤྱད་པ་རྣམས་ནི་མཚོན་ཆ་སྣ་ཚོགས་ཀྱི་ཆར་འབབ་པ་ཞེས་བྱ་བའི་དམྱལ་བར་སྐྱེ་བར་འགྱུར་རོ༔ དཀོན་མཆོག་གསུམ་གྱི་དཀོར་ལ་འབགས་པ༔ དེ་བཞིན་གཤེགས་པའི་བཀའ་ལ་ཀློག་རྫུན་དུ་བཏབ་པ༔ བདག་པོས་བཟུང་བའི་ཆུང་མ་དང་༔ རྒྱལ་རིགས་ལ་སོགས་ཀྱིས་བསྲུངས་བ་དང་༔ ཆོས་ལ་ཞུགས་ནས་ཁྲིམས་ལ་གནས་པའི་དགེ་བསྙེན་ཡན་ཆད་ཀྱི་མོ་བཙུན་རྣམས་ལ་ཆགས་པ་སྤྱད་པ་དང་༔ དཀོན་མཆོག་གསུམ་དང་ཕ་མ་སློབ་དཔོན་རྣམས་ཀྱི་ཉེ་འཁོར་དུ་མི་ཚངས་པར་སྤྱད་པ་རྣམས་ནི༔ དེ་འདག་འབར་བའི་འདམ་རྫབ་ཞེས་བྱ་བའི་དམྱལ་བར་སྐྱེ་བར་འགྱུར་རོ༔ ཆུར་གནས་ཀྱི་དུད་འགྲོ་བསད་པ་དང་༔ བདེན་པའི་དོན་ལ་ངག་འཁྱལ་བ༔ ཆོས་སྤྱོད་དགེ་བའི་ཚོགས་གཞན་གྱིས་བསགས་པ་ལ་བཞད་གད་དང་ཁྲེལ་བའི་གཏམ་སྨྲ་བ༔ དཀོན་མཆོག་གསུམ་དང་ཕ་མ་སློབ་དཔོན་ལ་མ་དད་པ་དང་མ་གུས་པའི་ལས་བགྱིས་པ་རྣམས༔ ཆུ་བོ་རབ་མེད་མེ་འདག་འབར་བ་ཞེས་བྱ་བའི་དམྱལ་བར་སྐྱེ་བར་འགྱུར་རོ༔ སེམས་ཅན་ཆུང་ངུ་དང་འབྲིང་པོ་ལ་སོགས་པ་གསོད་གཅོད་ཀྱི་ལས་ཁོ་ན་བྱས་པ་རྣམས་ནི༔ ཉི་ཚེ་བའི་སེམས་ཅན་ཞེས་བྱ་བའི་དམྱལ་བར་སྐྱེ་བར་འགྱུར་རོ༔ ལས་བརྒྱ་པའི་མདོ་ལས༔ མི་དགེ་བཅུ་དང་མཚམས་མེད་ལྔ༔ ལོག་པར་ལྟ་བ་ཁོ་ནར་སྤྱད༔ དམྱལ་བའི་འཇིག་རྟེན་དེས་མཐོང་སྟེ༔ དེ་ནི་དེ་ཡི་ལས་ཀྱིས་མནར༔ ཅེས་སོ༔ གྲང་བའི་དམྱལ་བ་ལ་ཡང་བརྒྱད་དེ༔ ཆུ་བུར་ཅན་དང་༔ ཆུ་བུར་རྡོལ་བ་ཅན་དང་༔ སོ་ཐམ་ཐམ་པ་དང་༔ ཨ་ཆུ་བ་དང་༔ ཀྱི་ཧུད་ཟེར་བ་དང་༔ པདྨ་ལྟར་གས་པ་དང་༔ ཨུཏྤལ་ལྟར་གས་པ་དང་༔ ཨུཏྤལ་ལྟར་ཆེར་གས་པ་བརྒྱད་པོ་རྣམས་ཀྱི་ཚེའི་ཚད་ནི༔ བསྐལ་པ་ཆེན་པོ་གྲངས་མེད་དཔག་ཏུ་མེད་པ་མང་པོ་ཐུབ་བོ༔ སྡུག་བསྔལ་གྱི་ཚད་ནི་གྲང་བ་ཆེན་པོས་རབ་ཏུ་མནར་བའི་ལས་མངོན་དུ་གྱུར་པ་ཁོ་ན་སྟེ༔ མུན་ནག་རབ་ཏུ་དམ་པའི་སྨག་རུམ་བུ་ཡུག་འཚུབ་ཅིང་འཁྱག་སྦུབས་ཤིན་ཏུ་གྲང་བའི་འཇིག་རྟེན་ན༔ གྲང་བས་ཉམ་ཐག་པའི་སྡུག་བསྔལ་བརྗོད་ལས་འདས་པ་ལས་སྤྱོད་དགོས་པའོ༔ དེར་སྐྱེ་བའི་ལས་ནི་མི་དགེ་བ་བཅུ་དང་༔ དཀོན་མཆོག་གསུམ་གྱི་བསྟན་པ་ལ་སྡང་ཞིང་ལོག་པར་ལྟ་བ་དང་༔ སྐུ་གསུང་ཐུགས་ཀྱི་རྟེན་གཙུག་ལག་ཁང་རྣམས་བཤིགས་པ་དང་༔ བྲ་ཟེའམ། དགེ་སྦྱོང་དཀའ་ཐུབ་ཅན་ནགས་ལ་གནས་པ་དབེན་པ་བསྟེན་དུ་མ་བཅུག་པའི་ལས་ལ་སྤྱད་པ་རྣམས་སྐྱེ་བར་འགྱུར་རོ༔ མདོ་ལས༔ ཏིལ་སྦྱངས་ནང་ནས་ལོ་བརྒྱ་བཞིན༔ ཏིལ་རེ་ཕྱུང་བས་དེ་ཟད་ན༔ ཆུ་བུར་ཅན་གྱི་ཚེ་ཡིན་ཞིང་༔ གཞན་གྱི་ཚེ་ནི་ཉི་ཤུར་འགྱུར༔ ཅེས་སོ༔ དེ་དག་རྣམས་ནི་ཚ་གྲང་གི་དམྱལ་བ་འཇིག་རྟེན་གྱི་ཚེའི་ཚད་དང་བདེ་སྡུག༔ དེར་སྐྱེ་བར་བྱེད་པའི་ལས་འབྲས་བསྟན་པའི་རིམ་པའོ༔ དེ་དག་རྣམས་སུ་མ་ཟད་པའི་གསང་སྔགས་བླ་ན་མེད་པའི་དབང་བཞིའི་དམ་ཚིག་ཉམས་པ་དང་༔ ལྟ་སྒོམ་ཁྱད་པར་ཅན་སྤྱོད་ཉེས་པ་དང་༔ རྒྱལ་བའི་དགོངས་པ་ཁྱད་པར་ཅན་གྱི་ལྟ་སྒོམ་ཟབ་མོ་ལ་ལོག་པར་བལྟས་པའི་སེམས་ཅན་རྣམས་སྐྱེ་བའི་ག ནས་དམྱལ་བ་ཆེན་པོ་རྡོ་རྗེ་འབར་བ་ཅན་ཞེས་བྱ་བ་དང་༔ སྣ་ཚོགས་འབར་བ་ཅན་ཞེས་བྱ་བའི་དམྱལ་བ་རྣམས་ཀྱང་ཡོད་དེ༔ དེ་ཡང་རྡོ་རྗེ་འབར་བ་ཞེས་བྱ་བའམ༔ རྡོ་རྗེའི་དམྱལ་བ་ཆེན་པོ་ཞེས་བྱ་བའི་ཚེའི་ཚད་ནི༔ བསྐལ་པ་ཆེན་པོ་གྲངས་མེད་པ་བཞི་དང་ས་ཡ་གསུམ་བྱེ་བ་གཉིས་འབུམ་ཕྲག་བརྒྱད་ཁྲི་ཕྲག་གསུམ་སྟོང་ཕྲག་བཞིའི་བར་དུ་སྡུག་བསྔལ་ལ་སྤྱོད་དགོས་པའོ༔ སྡུག་བསྔལ་གྱི་ཚད་ནི་གནམ་ལྕགས་ཞུན་མ་ལས་གྲུབ་པའི་ས་གཞི་ཆེན་པོའི་འཇིག་རྟེན་དེར༔ མེ་ཆེན་པོ་དུས་མཐའི་བསྐལ་བ་ལྟར་འབར་བའི་ཀློང་ནས༔ ཚ་བའི་ཟེར་རྣོ་བའི་དབལ་ཁྲོ་ཆུའི་ཞུན་ཐིགས་ཕྲོམ་ཕྲོམ་ཤར་ཤར་དུ་འཕྲོ་བའི་རྡོ་རྗེའི་ཆར་པ་སི་ལི་ལི་འབབ་ཅིང་༔ དེར་སྐྱེས་པའི་སེམས་ཅན་ཐམས་ཅད་མགོ་བོ་ཚལ་བ༔ ཤ་རུས་ཕྱེ་མ་དང་ཚལ་པ་ཚལ་པར་གཏོང་བར་བྱེད་པའི་སྡུག་བསྔལ་ལ་སྤྱོད་དགོས་པའོ༔ སྣ་ཚོགས་འབར་བའི་དམྱལ་བ་ཞེས་བྱ་བ་ནི་ཚེ་ཚད་ཀྱང་གོང་གི་ཚ་བའི་དམྱལ་བ་ཐམས་ཅད་ཀྱི་ཚེ་ཕྱོགས་གཅིག་ཏུ་སྨོས་པ་ཐུབ་ཅིང་༔ སྡུག་བསྔལ་ཡང་གནམ་ལྕགས་ཀྱི་ས་གཞི་རབ་ཏུ་འབར་བའི་གླིང་ཆེན་པོ་དེར༔ མཚོན་ཆ་སྣ་ཚོགས་རྒྱོབ་སོད་ཀྱི་སྒྲ་དང་བཅས་ཏེ༔ སྐད་ཅིག་རེ་རེ་ལའང་སེམས་ཅན་རེ་རེའི་སྟེང་དུ་མཚོན་ཆ་སྟོང་ཕྲག་བརྒྱ་བརྒྱའི་ཆར་པས་རྡུལ་དུ་བརླག་ཅིང་འཇོམས་པར་བྱེད་པའི་དམྱལ་བ་ཡོད་དོ༔ ཡི་དྭགས་ལ་ཡང་ཕྱིའི་སྒྲིབ་པ་ཅན་ཞེས་བྱ་བ༔ ཟས་སྐོམ་ལོངས་སྤྱོད་ཐམས་ཅད་རྣག་ཁྲག་དང་ངན་སྐྱུགས་སྣ་ཚོགས་སུ་མཐོང་ནས་སྤྱོད་པར་མི་ནུས་པས་ཕྱིའི་སྒྲིབ་པ་ཅན་ཞེས་བྱའོ༔ ཚེའི་ཚད་ཀྱང་བསྐལ་བ་ཁྲི་ཕྲག་གཅིག་ཐུབ་ཅིང་བར་སྲིད་པ་ཡང་ཡོད་དོ༔ སྡུག་བསྔལ་གྱི་ཚད་ནི་སྐོམ་པ་ཆུ་ལ་གདུང་བ་ཙམ་གྱི་བཀྲེས་སྐོམ་དང་ལྡན་ཡང་༔ བཟའ་བཏུང་གི་ལོངས་སྤྱོད་མཐོང་བའི་དུས་སུ་རྣག་ཁྲག་དང་མི་གཙང་བ་སོགས་སུ་མཐོང་ནས་བཟའ་བ་དང་བཏུང་བའི་དབང་མེད་པའོ༔ དེར་སྐྱེ་བའི་ལས་ནི་སྐྱེ་བ་སྔ་མ་གཞན་གྱི་ནོར་རྫས་ཕྲོགས་པ་དང་བརྐུས་པ་ལས་བྱུང་བའོ༔ ལུས་ནི་སྣ་ཚོགས་སམ་ཁྲུ་བཅུ་དྲུག་པའོ༔ གནས་ནི་མངོན་པ་ལས༔ འཛམ་བུའི་གླིང་གི་དབུས་ནས་དཔག་ཚད་ལྔ་བརྒྱའི་ས་ན་ཕྱིའི་སྒྲིབ་པ་ཅན་ཡོད་དོ༔ 
ནང་གི་སྒྲིབ་པ་ཅན ་ནི༔ ཁ་ཟས་ལ་ལོངས་སྤྱོད་པར་སེམས་ཤིང་རོལ་བའི་དུས་སུ༔ ཁ་ཟས་སུ་རོལ་བ་དེ་ལས་མེ་འབར་བར་བྱེད་པས་ན་ ནང་གི་སྒྲིབ་པ་ཅན ་ཞེས་བྱའོ༔ ཚེའི་ཚད་ནི་ལོ་འབུམ་ཕྲག་གཅིག་གོ༔ དེར་སྐྱེ་བའི་ལས་ནི་ཚེ་སྔ་མ་རང་གི་ནོར་ལ་སེར་སྣ་ཆེན་པོ་བྱས་ཤིང་སྦྱིན་པའི་ཕྱོགས་སུ་ཡེ་ནས་མ་ཉེ་བ་ཁོ་ནས་བྱས་སོ༔ སྡུག་བསྔལ་གྱི་ཚད་ནི་ལྟོ་བ་ཆེ་བས་ཁ་ཟས་གང་རོལ་ཀྱང་མི་ཁེངས་པ་དང་༔ གལ་སྲིད་ཁེངས་ཀྱང་ཡན་ལག་ཕྲ་བས་མི་ཐེགས་ཤིང་༔ ཟས་བཟའ་རྒྱུ་རྙེད་ཀྱང་ཁ་ཤིན་ཏུ་དོག་པས་མི་ཤོང་བ་དང་༔ གལ་སྲིད་ལྟོ་བར་བཟའ་བཏུང་གང་སོང་མེའི་ཕུང་པོར་འབར་ཏེ་རབ་ཏུ་སྲེག་པ་སོགས་ཀྱི་སྡུག་བསྔལ་ལ་ལོངས་སྤྱོད་དགོས་པའོ༔ ལུས་ཀྱང་ལྟོ་བ་ལ་དཔག་ཚད་ལྔ་བརྒྱའི་རྒྱ་ཁྱོན༔ ཡན་ལག་རྣམས་རྟ་རྔ་ཙམ༔ ཁ་ཁབ་མིག་ཙམ་མོ༔ མདོ་ལས༔ ཁ་ཅིག་ཁ་ནི་ཁབ་ཀྱི་མིག་ཙམ་ལ༔ ལྟོ་བ་རི་ཡི་གཏོས་ཙམ་ལྡིར་བས་མནར༔ ཅེས་སོ༔ མེ་ལྕེའི་ཕྲེང་བ་ཅན་ནི༔ སྣང་བ་ཐམས་ཅད་མེ་ལྕེ་འབར་བའི་སྣང་བས་བསྲེགས་ཤིང་རབ་ཏུ་བསྲེགས་པར་སེམས་པས་ན་མེ་ལྕེའི་ཕྲེང་བ་ཅན་ཞེས་བྱའོ༔ ཚེའི་ཚད་ནི་ལོ་བྱེ་བ་གཅིག་གོ༔ སྡུག་བསྔལ་ནི་བཟའ་བ་དང་ལོངས་སྤྱོད་ཅུང་ཟད་རེ་ཐོབ་པ་ཁྲོ་ཆུ་དང་ཟངས་ཆུ་ཁོལ་མར་འགྱུར་ཞིང་བསྲེག་པར་བྱེད་པའོ༔ དེར་སྐྱེ་བའི་ལས་ནི་རང་གི་དབང་མེད་ཀྱང་༔ གཞན་གྱིས་མཆོད་སྦྱིན་བྱེད་པ་ལ་བཤོལ་བའི་ཐབས་སྣ་ཚོགས་སུ་བྱས་པ་དང་༔ བླ་མའི་དཀོར་ལ་ཐུབ་ཐུབ་ཏུ་བགྱིད་ཅིང་འབགས་པ་ལས་བྱུང་བའོ༔ ལུས་ཀྱང་སྣ་ཚོགས་ཀྱི་གཟུགས་ཅན་ལ༔ མགོ་བོ་གཉིས་པ་དང་༔ མགོ་བོ་གསུམ་པ་དང་༔ མགོ་བོ་ལྔ་པ་དང་༔ ལྟོ་བ་རྫིང་བུ་ཙམ་པ་དང་༔ དཔག་ཚད་ཙམ་པ་དང་༔ ཟག་པའི་བུག་པ་གཉིས་མེད་པ་དང་༔ ཁ་ལ་རྒྱང་གྲགས་རེ་རེ་གཉིས་གཉིས་གསུམ་གསུམ་ཡོད་པ་རྣམས་སོ༔ གནས་ནི་ས་འོག་གི་ནུབ་ཕྱོགས་སུ་དྲན་པའི་གླིང་ཞེས་བྱ་བ་ན་ཡོད་དོ༔ ཟས་སུ་ལྗན་ལྗིན་ཟ་བ་ཞེས་བྱ་བ་ཡང་༔ འཇིག་རྟེན་ཁམས་ཐམས་ཅད་ཀྱི་ལྗན་ལྗིན་སྣ་ཚོགས་ལ་བཟའ་བར་བྱེད་པས་ན༔ ལྗན་ལྗིན་བཟའ་བ་ཅན་ཞེས་བྱ་བའི་ཡི་དྭགས་སོ༔ ཚེའི་ཚད་ཀྱང་ལོ་ས་ཡ་གསུམ་ཐུབ་པ་ཡོད་དོ༔ སྡུག་བསྔལ་གྱི་ཚད་ཀྱང་དྲི་ཆེན་དྲི་ཆུ་ལ་སོགས་མ་བསྔོས་ན་མི་འཐོབ་ཅིང་༔ ལ་ལས་ཐོབ་ཀྱང་ ནང་གི་སྒྲིབ་པ་ཅན ་ལྟར་སྡུག་བསྔལ་གྱིས་མནར་བ་ལ་སོགས་པ་དང་ལྡན་པའོ༔ དེར་སྐྱེ་བའི་ལས་ཀྱང་༔ ཡུལ་མཐོན་པོ་རྣམས་ལ་ངག་འཁྱལ་སྨྲས་པ་དང་༔ མཆོད་པའི་རྫས་ལ་འབགས་པ་དང་༔ བླ་མ་དང་སློབ་དཔོན་གྱི་གསོལ་མཆོད་ལ་འབགས་བཙོག་དང་ཚང་ཚིང་དུ་སྤྱད་པ་ལས་སོ༔ ལུས་ཀྱང་སྣ་ཚོགས་པ་སྟེ༔ ཆེ་བ་དག་ནི་དཔག་ཚད་གསུམ་ཁྱབ་པའི་གཟུགས་ལ་མགོ་བོ་མང་པོ་དང་ལྡན་པའམ༔ ཁྲུ་བརྒྱད་པ་ལ་མགོ་བོ་བཅོ་བརྒྱད་ལ་སོགས་པའོ༔ གནས་ནི་གླིང་དང་འཇིག་རྟེན་ཐམས་ཅད་ལ་ཁྱབ་བོ༔ དེ་དག་རྣམས་མ་ཡིན་པའི་ཡི་དྭགས་ཀྱང་སྣ་ཚོགས་སུ་ཡོད་དེ༔ ལུས་པོ་རེ་རེ་ལའང་མགོ་པོ་གསུམ་པ་དང་ལྔ་པ་དང་བཅུ་པ་དང་བཅོ་བརྒྱད་ལ་སོགས་པ་ཡོད་པ་ལ༔ ཟས་སྐོམ་གྱི་འདུ་བ་ལ་བཀྲེས་སྐོམ་དང་དགག་སྒྲུབ་ལ་སོགས་རྣམ་པ་སྣ་ཚོགས་ཀྱི་སྣང་བ་ཅན༔ ལྟོ་བར་ཆུ་བོ་ཆེན་པོ་འཕྲུག་ཅིང་འབབ་སྙམ་བྱེད་པ་དང་༔ འགྲོ་དྲུག་མང་པོའི་གླིང་རང་གི་ཁོག་པར་ཆགས་ནས་ཀུ་ཅོ་འོ་དོད་རྒྱོབ་སོད་འཐབ་རྩོད་ལ་སོགས་ཀྱི་སྣང་བ་འཆར་བ་སོགས་ཀྱང་ཡོད་དོ༔ ཚེ་ཡང་ལོ་ས་ཡ་རེ་རེ་ཐུབ་པ་དང་དེ་ལས་མང་བ་དང་ཉུང་བ་སྣ་ཚོགས་པའོ༔ དེར་སྐྱེ་བའི་ལས་ཀྱང་༔ རྫུན་དང་ཕྲ་མ་དང་མཐུན་པ་གཉིས་དབྱེན་བྱས་པ་དང་༔ གཡོ་སྒྱུ་སྣ་ཚོགས་ཀྱིས་གཞན་གྱི་ནོར་ལ་བརྔམས་པ་ལ་སོགས་ལས་འབྱུང་བའོ༔ གནས་ནི་ས་འོག་གི་དྲན་པ་སྣ་ཚོགས་ཞེས་བྱ་བའི་གླིང་ན་གནས་སོ༔ གཞན་ཡང་འཇིག་རྟེན་གྱི་ཁམས་རྣམས་ཆགས་པ་དང་མཉམ་དུ་སྲིད་པའི་ཡི་དྭགས་ཞེས་བྱ་བ༔ འབྱུང་བ་རྣམས་ལ་དབང་བའི་ཡི་དྭགས་ཀྱི་སྡེ་དང་༔ ལྷའི་གདོན་དང་༔ འབྱུང་པོའི་གདོན་དང་༔ དྲི་ཟ་དང་གནོད་སྦྱིན་དང་སྲིན་པོ་དང་ཤ་ཟ་དང་བྲམ་ཟེ་དང་༔ ལྟོ་འཕྱེ་དང་མ་མོ་དང་མྱོས་བྱེད་དང་བརྗེད་བྱེད་དང་༔ དྲག་པོ་དང་གཞོན་ནུ་དང་བདུད་དང་བཙན་དང་དམུ་དང་ལྷ་མ་ཡིན་དང་༔ གཟའ་དང་ནམ་མཁའ་ལྡིང་དང་ཕྱོགས་སྐྱོང་བ་རྣམས་དང་༔ ཁྱབ་འཇུག་གི་བུ་དང་ནག་མོ་ཆེན་པོ་དང་༔ ཟ་བའི་འདྲེ་ལྔ་དང་ལྷན་ཅིག་སྐྱེས་པའི་འདྲེ་དང་༔ དཀར་ཕྱོགས་ལ་གནས་པ་ལ་མི་དགའ་བ་ལ་སོགས་ཏེ༔ མདོར་ན་གནས་སྣ་ཚོགས་པར་ལུས་སྣ་ཚོགས་པ༔ ལས་སྣ་ཚོགས་པ་ལ་སྤྱོད་ཅིང་སྡུག་བསྔལ་སྣ་ཚོགས་པ་མྱོང་བའི་སྡེ་ཚན་ནི༔ ཉི་ཟེར་གྱི་རྡུལ་ལས་ཀྱང་ཆེས་ཆེར་གྲངས་མང་བ༔ སྔ་མའི་མི་དགེ་བ་སྣ་ཚོགས་པར་སྤྱད་པའི་འབྲས་བུ་ལས་བྱུང་བ༔ གཟུགས་དང་ཚེ་ཡང་སྣ་ཚོགས་སུ་གྱུར་པ་རྣམས་ཀྱང་ཡི་དྭགས་ཀྱི་སྡེ་ཞེས་བྱ་བའོ༔ དུད་འགྲོ་ལ་ཡང་༔ རྐང་གཅིག་པ་ཞེས་བྱ་བ་རྐང་པ་གཅིག་པུའི་སྟེང་ན་འགྲོ་བའི་རིགས་དང་༔ རྐང་མང་ཞེས་བྱ་བ་ལུས་མགོ་མཇུག་ཐམས་ཅད་རྐང་པས་ཁེངས་པའི་རིགས་དང་༔ འདབ་ཆགས་ཞེས་བྱ་བ་གཤོག་པས་འགྲོ་བའི་རིགས་དང་༔ འགྲེང་བུ་ཞེས་བྱ་བ་རྐང་པ་ཕྱི་ན་མི་མངོན་ཞིང་དབུགས་ཀྱིས་འགྲོ་བའི་རིགས་དང་༔ ལྟོ་འགྲོ་ཞེས་བྱ་བ་ལྟོ་བ་ས་ལ་དྲུད་དེ་འགྲོ་བའི་རིགས་དང་༔ ཕྱི་འབྱུང་བ་བཞིའི་ཁམས་ལ་གནས་པའི་དུད་འགྲོ་དང་༔ ནང་འགྲོ་བའི་ལུས་ལ་གནས་པའི་སྲིན་འབུ་ཉི་ཁྲི་ཆིག་སྟོང་གི་ཚོགས་ཀྱི་དུད་འགྲོ་དང་༔ གཞན་ཡང་ཆེ་བ་དང་ཆུང་བ་དང་ཤིན་ཏུ་ཕྲ་བ་སྣ་ཚོགས་ཀྱི་ཚོགས་དང་བཅས་པའོ༔ གནས་ནི་ཕྱི་སྣོད་ནང་བཅུད་ཀུན་ལ་ཁྱབ་ཅིང་༔ ཁྱད་པར་དུད་འགྲོ་བྱིངས་ཀྱི་གནས་ནི་ཉི་མ་དང་ཟླ་བ་སོགས་ཀྱིས་མ་སླེབས་པའི་གླིང་བར་མུན་ནག་གི་སྨག་རུམ་ལ་སོགས་པར་གནས་པ་དང་༔ རི་རབ་ལ་སོགས་ཀྱི་ཁོང་གསེང་རྣམས་སོ༔ གྲངས་ནི་གྲངས་མེད་བརྗོད་ལས་འདས་པ་བསམ་གྱིས་ཀྱང་མི་ཁྱབ་པའོ༔ གཟུགས་ནི་གོང་ལྟར་ལ་ཁྱད་པར་ཆེ་བ་རྣམས་ནི་དཔག་ཚད་མང་པོ་དང་ལྡན་པ་ཡང་ཡོད་ལ༔ ཆུང་བ་རྣམས་ནི་བ་སྤུའི་རྩེ་མོ་བཅད་པ་ཙམ་གྱི་གཟུགས་ཀྱང་ཡོད་དོ༔ དབྱིབས་ནི་སྣ་ཚོགས་པ་སྟེ་འཇིགས་སུ་རུང་བ་དང་༔ ལྟར་མི་བཟོད་པ་དང་༔ ཤིན་ཏུ་ཉམས་ངན་པ་ལ་སོགས་སོ༔ ཚེའི་ཚད་ཀྱང་བསྐལ་པ་མང་པོ་ཐུབ་པ་དང་༔ བསྐལ་པ་རེ་རེ་ཐུབ་པ་དང་༔ བསྐལ་པ་ཕྱེད་ཕྱེད་ཐུབ་པ་དང་༔ ལོ་ཁྲི་འབུམ་བྱེ་བ་ས་ཡ་དུང་ཕྱུར་བརྒྱ་སྟོང་ལྔ་བཅུ་བཅོ་ལྔ་བདུན་བརྒྱད་གཉིས་གསུམ་གཅིག་དང་༔ ཟླ་བ་ལྔ་དྲུག་བཞི་གཅིག་དང་ཞག་བཅོ་ལྔ་ཉིན་རེ་སོགས་ཐུབ་པའི་རིགས་ཀླུའི་ཁམས་དང་བཅས་སྣ་ཚོགས་པའོ༔ མང་ཉུང་གི་ཚད་ཀྱང་ཆང་གི་སྦང་མ་ཁོལ་བ་ལྟ་བུའམ༔ ཉི་མའི་ཟེར་ལ་རྡུལ་འཚུབ་པ་ལྟ་བུའོ༔ སྡུག་བསྔལ་གྱི་ཚོགས་ནི་གཅིག་གིས་གཅིག་ཟ་བ་དང་༔ གསོད་པ་དང་གཅོད་པ་ལ་སོགས་ཀྱི་སྡུག་བསྔལ་དང་༔ གླེན་ཞིང་གཏི་མུག་པའི་རང་བཞིན་དུ་གནས་པ་ལ་སོགས་ལ་སྤྱོད་དགོས་པའོ༔ དེ་དག་རྣམས་སུ་སྐྱེ་བའི་ལས་ཀྱང་༔ མ་རིག་པའི་གཏི་མུག་གིས་ཀུན་ནས་བསླངས་པའི་གཟུགས་དང་སྡུག་བསྔལ་མངོན་སྣང་དུ་རང་ཤར་བའི་ལས་དེར་མཐུན་གྱི་མི་དགེ་བ་ལ་སྤྱད་པས་སྐྱེ་བར་བྱེད་དོ༔ མདོ་སྡེ་ལས་བརྒྱ་པ་ལས༔ རིགས་ཀྱི་བུ་རྣམས་རང་གི་ལས་ཀྱི་རྣམ་པར་སྨིན་པ་ལས་རང་ཤར་བའི༔ ཡི་དྭགས་དང་དུད་འགྲོ་ལ་སོགས་ཀྱི་ལུས་སྣ་ཚོགས་པ་ལ་སྡུག་བསྔལ་ཀྱང་སྣ་ཚོགས་ཀྱིས་མནར་བ་དང་བཅས་པའི་སྡེ་ནི་བསམ་གྱིས་མི་ཁྱབ་བོ༔ བརྗོད་པར་ཡང་མི་ལང་ཞིང་སྡུག་བསྔལ་གྱིས་ཀུན་ཏུ་ཁ་འཁོར་བའོ༔ ཡང་དག་པར་ཁ་འཁོར་བའོ༔ ཅེས་སོ༔ ལྷ་མ་ཡིན་གྱི་གནས་ནི་རི་རབ་ཀྱི་ཁོང་གསེང་ངོ་༔ ལོངས་སྤྱོད་དང་དགའ་བདེ་སུམ་ཅུ་རྩ་གསུམ་པའི་ལྷ་ལ་འགྲན་ཀྱང་༔ འཐབ་རྩོད་དང་གཡུལ་འགྱེད་པ་སོགས་ཀྱི་སྡུག་བསྔལ་ནི་དཔག་ཏུ་མེད་པ་མྱོང་དགོས་པའོ༔ ཚེའི་ཚད་ཀྱང་འདོད་ལྷ་རྣམས་དང་མཉམ༔ དེར་སྐྱེ་བའི་ལས་ཀྱང་ཉོན་མོངས་པ་ཕྲག་དོག་གི་ལས་ཁོ་ན་ལས་བྱུང་བའི་འབྲས་བུའོ༔ གཟུགས་ནི་འདོད་ཁམས་ཀྱི་ལྷ་རྣམས་དང་དབྱེ་བ་མེད་པའོ༔ ལྷའི་འཇིག་རྟེན་ལ་ཡང་རྒྱལ་པོ་ཆེན་པོ་སྡེ་བཞི་པའི་ལྷ་དང་༔ སུམ་ཅུ་རྩ་གསུམ་པའི་ལྷ་གཉིས་ནི་རི་རབ་ལ་བརྟེན་ཏེ་གནས་པའོ༔ ཚེའི་ཚད་ཀྱང་མི་ལོ་ལྔ་བཅུ་ཉིན་ཞག་གཅིག་ཏུ་བརྩིས་པའི་རང་ལོ་ལྔ་བརྒྱའི་བར་དུ་ཐུབ་བོ༔ ལུས་ཀྱི་ཚད་ཀྱང་རྒྱང་གྲགས་བཞི་ཆའི་ལུས་པོ༔ སྡུག་བསྔལ་ནི་ཞག་བདུན་གྱི་སྟེང་ནས་མི་སྙན་པའི་སྒྲ་ལས་འཆི་བའི་ལུང་བསྟན་འཐོབ་པས་འཕོ་ལྟུང་གི་སྡུག་བསྔལ་སྣ་ཚོགས་མྱོང་དགོས་པའོ༔ དེར་སྐྱེ་བའི་ལས་ཀྱང་དཀར་པོ་དགེ་བ་བཅུའི་ལས་སྤྱད་པ་རྣམས་བྱང་ཆུབ་ཀྱི་སེམས་ཀྱིས་མ་ཟིན་ཞིང་༔ ང་རྒྱལ་གྱི་དབང་དུ་ཤོར་བའི་འབྲས་བུས་སོ༔ དེའི་སྟེང་ན་རིམ་བཞིན་འཐབ་བྲལ་དང་འགའ་ལྡན་དང་འཕྲུལ་དགའ་དང་༔ གཞན་འཕྲུལ་དབང་བྱེད་སོགས་ཀྱི་ལྷའི་ཞིང་ཁམས་དཔག་ཏུ་མེད་པ་རྣམས་ཀྱང་༔ བདེ་དགའ་ལོངས་སྤྱོད་ཀྱི་ཚོགས་དཔག་ཏུ་མེད་པས་མངོན་པར་མཐོ་ཞིང་༔ ཚེ་ལ་སོགས་པ་ཡང་གྲངས་མེད་མང་པོ་ཐུབ་པ་དག་ཡོད་ཀྱང་མཐར་ལྟུང་བའི་སྡུག་བསྔལ་ཁོ་ན་ལས་མ་འདས་ཏེ༔ ལས་བརྒྱ་པའི་མདོ་ལས༔ རིགས་ཀྱི་བུ་རྣམས་ཚངས་པ་ཆེན་པོ་ལྟ་བུའི་ལྷའི་ཞིང་ཁམས་ལོངས་སྤྱོད་དཔག་ཏུ་མེད་པ་ལ་སྤྱོད་པར་སྐྱེས་ཀྱང་༔ མཐར་ངན་སོང་གི་འཇིགས་པ་ལས་མ་འདས་པས་འཁོར་བ་འདི་ནི་སྡུག་བསྔལ་གྱི་རྒྱ་མཚོའོ༔ ཅེས་སོ༔ མིའི་འཇིག་རྟེན་ལ་ཡང་༔ སྟོང་དང་པོ་དང་གཉིས་པ་གསུམ་པ་ལ་སོགས་ཀྱི་འཇིག་རྟེན་རྒྱ་ཆེ་ལ་གྲངས་མང་བར་གསུངས་པའི་ཚོགས་རྣམས་ཀྱང་༔ གནས་ནི་གླིང་བཞི་དང་གླིང་ཕྲན་ལ་སོགས་ཀྱི་རྣམ་པར་གནས་ཤིང་༔ ཚེ་ཡང་སྣ་ཚོགས་པ་ལ༔ ལས་ཀྱི་དབང་གིས་བདེ་སྡུག་ཀྱང་དེ་བཞིན་དུ་སྣང་ཞིང་༔ ཁྱད་པར་དུའང་སྐྱེ་རྒ་ན་དང་འཆི་བའི་སྡུག་བསྔལ་མང་པོས་ཀུན་ལ་ཡོངས་ཁྱབ་ཀྱིས་མནར་བའོ༔ དེར་སྐྱེ་བའི་ལས་ཀྱང་འདོད་སྲེད་འཛིན་པའི་ལས་འབྲས་ལ་སྤྱོད་པས་སོ༔ དེ་དག་རྣམས་ཀྱི་ནང་ནས་རི་རབ་ལྷོ་ཕྱོགས་ཀྱི་ཆར་གནས་པའི་འཛམ་བུའི་གླིང་ཞེས་བྱ་བ་འདིར་ཡང་༔ ད་ལྟ་མི་ལུས་ཐོབ་པ་འདི་རྣམས་ཀྱང་གླིང་གཞན་ལྟར་ལས་སྤྱི་མཐུན་པའི་སེམས་ཅན་མིན་ཞིང་ལས་སྣ་ཚོགས་འགྲོ་བ་སྣ་ཚོགས་ཀྱི་གཟུགས་སུ་གྱུར་པས་སྡུག་བསྔལ་ཡང་སྣ་ཚོགས་སུ་ཡོད་པའི་གླིང་ངོ་༔ དེ་ལ་དང་པོ་གླིང་དེར་སྐྱེ་བའི་སྡུག་བསྔལ་ནི༔ དགའ་བོ་མངལ་འཇུག་གི་མདོ་ལས༔ ཇི་ལྟར་མངལ་གྱི་གྲོང་ཁྱེར་དམྱལ་བའི་དོང་༔ དྲི་ང་བག་ཚ་ཚ་གྲང་སྡུག་བསྔལ་ཅན༔ ཅེས་པས༔ སྐྱེས་བུ་གང་ཞིག་འཆི་བའི་དུས་བཏབ་ནས་ཚེ་ཡོངས་སུ་ཕ་རོལ་དུ་འདའ་བའི་དུས་ཤར་བའི་ཚེ༔ འཆི་ཀའི་བར་དོ་དང་༔ ཆོས་ཉིད་བར་དོ་དང་སྲིད་པ་བར་དོ་ཤར་བའི་ཚེ༔ ཞག་བཞི་བཅུ་ཞེ་དགུར་སེམས་བྱ་སྒྲོ་རླུང་གིས་སྐྱོད་པ་ལྟར་ཡད་ཡུད་ཕྱད་ཕྱོད༔ ལུས་ཀྱང་དབང་པོ་ཀུན་ཚང་ཞིང་འབྱུང་བ་བཞི་ལ་ཟང་ཐལ་དུ་སྤྱོད་ནུས་པ་ལ༔ སྡུག་བསྔལ་གྱི་ཚོགས་ཀྱང་རྣམ་པ་མང་པོས་ཡོངས་སུ་མནར་ཞིང་༔ ཁྱད་པར་ཞག་བདུན་བདུན་ན་འཆི་བ་རེ་དང་༔ སྐད་ཅིག་དེ་ཉིད་ལ་སྐྱེ་བའི་སྡུག་བསྔལ་རེ་མྱོང་དགོས་པའི་དུས་དེར་ཕོ་མོ་སྦྱོར་བ་བྱེད་པའི་མངལ་སྒོར་ཤ་རུལ་ལ་སྦྲང་བུ་འཁོར་བ་ལྟར༔ རྣམ་ཤེས་ཡད་ཡུད་ཕྱད་ཕྱོད་དུ་འཁོར་བའི་ཚེ༔ སྔ་མའི་ལས་ཀྱི་འཕེན་པ་བཟང་ངན་གྱིས་འགྲོ་བ་དྲུག་གི་མངལ་སྒོ་དྲུག་སོ་སོར་མཐོང་སྟེ༔ ལྷ་རུ་སྐྱེ་ན་གཞལ་མེད་ཁང་༔ ལྷ་མ་ཡིན་ལ་སྐྱེ་ན་གོ་ཁྲབ༔ མི་ལ་སྐྱེ་ན་ཁང་ཁྱིམ༔ དུད་འགྲོར་སྐྱེ་ན་དུད་འགྲོའི་ར་བ་དང་ནགས་ཚལ༔ ཡི་དྭགས་ལ་སྐྱེ་ན་ཆར་རླུང་དྲག་པོ་དང་གད་སྐྱིབས་དམར་ཧྲལ་ཧྲོལ༔ དམྱལ་བ་ལ་མེ་ཆུའི་ནང་ལྟ་བུའམ་འོད་ནག་པོ་སོགས་སུ་མཐོང་ཞིང་༔ དེ་རྣམས་ལ་ཆགས་པའི་སྣང་བ་ཤར་བའི་ཚེ༔ རིགས་དྲུག་སོ་སོར་གང་ལ་ཞེན་ཅིང་ཆགས་པ་དེར་སྐྱེ་བར་འགྱུར་སྟེ༔ མངལ་འཇུག་གི་མདོ་ལས༔ གང་ལ་ལ་དག་ལས་ཀྱི་འཕེན་པ་ཟད་ནས་ཡོངས་སུ་ཤི་བའི་སྡུག་བསྔལ་ལ་སྤྱོད་དགོས་པའི་ཚེ༔ མངལ་གྱི་སྣང་བ་རྣམས་ཀྱང་འཆར་ཞིང་འགྲོ་བ་དྲུག་གི་གཟུགས་སྣང་སོ་སོར་ལེན་པར་བྱེད་དོ༔ དེ་ནི་དེར་ཡོངས་སུ་གང་ཆགས་པ་དེ་ཡང་སྡུག་བསྔལ་གྱི་གནས་ཆེན་པོའོ༔ ཞེས་སོ༔ དེ་ནས་ཕ་མའི་རྒྱུ་རྐྱེན་གཉིས་དང་རང་གི་ལུས་ལེན་བྱེད་ཀྱི་ལས་ཀྱི་རླུང་བཞི་ལྷན་ཅིག་ཏུ་འདྲེས་པའི་དུས་སུ༔ རང་གི་ཤེས་པ་ལ་དུམ་བུ་དང་ཚལ་པ་མང་པོར་སོང་ངོ་སྙམ་པའི་སྡུག་བསྔལ་ཆེན་པོ་མྱོང་དགོས༔ དེ་ནས་ཞག་བདུན་གྱི་སྟེང་ནས་ལུས་ཀྱི་རྒྱ་ཆགས་པས་ཤེས་པ་འདུ་སྟེ༔ བྱ་སྒྲོ་མེ་ལ་བཤུར་བ་ལྟ་བུའི་སྡུག་བསྔལ་ལ་སྤྱོད་དགོས་སོ༔ དེ་ནས་ཞག་བདུན་པའི་དུས་ན་ནུར་ནུར་པོ་ཞིག་ཏུ་འགྲོ་སྟེ༔ ཞག་དང་པོར་འབྱུང་བ་ཆུས་སྡུད་པར་བྱེད་པས༔ ཁ་ཆར་དང་བུ་ཡུག་འཚུབ་པའི་དཀྱིལ་དུ་ལུས་གཅེར་བུར་འདུག་པ་སྙམ་བྱེད་པའི་སྡུག་བསྔལ་དང་ལྡན༔ ཞག་གཉིས་པར་རླུང་གིས་སོ་སོར་ཕྱེ་བས༔ ཤེས་པ་འཕྱོ་ཞིང་གཡང་ལ་ལྷུང་བ་ལྟ་བུའི་སྡུག་བསྔལ་དང་ལྡན༔ ཞག་གསུམ་པའི་སྟེང་དུ་སས་བརྟན་པར་བྱེད་པས༔ ཤེས་པ་འཐིབ་ཅིང་ས་འཚུབ་ཆེན་པོའི་དཀྱིལ་དུ་གཏུམས་པ་སྙམ་བྱེད་པའི་སྡུག་བསྔལ་དང་ལྡན༔ ཞག་བཞི་པའི་སྟེང་དུ་མེས་སྨིན་པར་བྱེད་པས༔ ཤེས་པ་རབ་ཏུ་ཚ་བའི་ཟེར་དང་ལྡན་ཏེ༔ མགར་བའི་སྐོལ་ཕོར་ནང་དུ་བཞུས་པ་ཙམ་གྱི་སྡུག་བསྔལ་དང་ལྡན༔ ཞག་ལྔ་པའི་སྟེང་དུ་རླུང་དང་མེས་བསྲེགས་པའི་ཚེ༔ རླུང་གིས་ཁྱེར་བ་སྙམ་དང་མེས་ཚིག་པ་སྙམ་བྱེད་པའི་སྡུག་བསྔལ་ལ་སྤྱོད་དོ༔ ཞག་དྲུག་པའི་སྟེང་དུ་ཆུ་དང་ས་གཅིག་ཏུ་བསྡུས་པའི་དུས་ན༔ སས་མནན་པ་ལྟ་བུ་དང་ཆུས་ཁྱེར་བ་ལྟ་བུའི་སྡུག་བསྔལ་གཉིས་ལྡན་དུ་ཡོད་དོ༔ ཞག་བདུན་པའི་སྟེང་དུ་འབྱུང་བ་བཞི་འདུས་ནུར་ནུར་པོར་གྱུར་པའི་ཚེ༔ རླུང་ཆེན་པོས་བསྐྱོད་པ་ལྟ་བུ་དང་༔ སས་འཚུབས་པ་ལྟ་བུ་དང་༔ སོལ་མེས་བསྲེགས་པ་ལྟ་བུ་དང་༔ ཆབ་ཕྲོམ་གྱི་དཀྱིལ་དུ་ཆུད་པ་ལྟ་བུའི་སྡུག་བསྔལ་བཞི་ལྡན་དུ་སྤྱོད་དགོས་སོ༔ ནུར་ནུར་པོ་དེ་ལས་ལྟེ་བའི་རྩ་ཤིན་ཏུ་ཕྲ་བའི་འཁོར་ལོ་ཆགས་ཤིང་༔ རྩ་མདུད་གྲུ་གསུམ་དུ་ཆགས་པའི་དབུས་སུ་ཉུང་འབྲུ་ཆ་མང་པོར་བགོས་པ་ཙམ་གྱི་མིག་གཉིས་ཆགས་པར་བྱེད་དོ༔ དེ་བཞིན་འབྱུང་བ་བཞིའི་དྭངས་སྙིགས་ཀྱི་དབྱེ་སྡུད་རྣམས་སྔ་མ་ལྟར་ནམ་སྤྱོད་པའི་ཚེ༔ སྡུག་བསྔལ་གྱི་ཚོགས་གོང་དུ་སྨོས་པ་ལྟར་འབྱུང་ཞིང་༔ ལྟར་ལྟར་པོ་དང་༔ མཁྲང་གྱུར་ལ་སོགས་པའི་མཇུག་ཏུ་ཟླ་བ་གཉིས་དང་ཞག་པོ་དྲུག་ན་ཁྱབ་འཇུག་རུས་སྦལ་གྱི་རྣམ་པར་འགྱུར་ཏེ༔ སོ་སོའི་མ་ཉིད་ཀྱི་མཐོ་གང་བའི་ཚུལ་རྫོགས་པའི་ཚེ༔ མས་ཁ་ཟས་གང་ཟོས་པའི་དྭངས་མས་གཟུགས་ཡོངས་སུ་སྐྱེད་པར་བྱེད་དོ༔ སྡུག་བསྔལ་ཆེར་གྱུར་རྣམས་ཅུང་ཉམས་ཤིང་༔ ཕྲན་ཚེགས་ནི་སྣ་ཚོགས་སུ་སྣང་ངོ་༔ དེ་ནས་ཟླ་བ་གསུམ་པའི་སྟེང་དུ་ཤེས་པ་རབ་ཏུ་གཡོ་བའི་རྩལ་འབྱུང་བས༔ མའི་མངལ་དུ་ཡང་འགུལ་ཞིང་འཕྲིག་པའི་ལས་བྱེད་དོ༔ ཁ་ཟས་གྲང་མོ་ལ་མས་རོལ་ན་གྲང་དམྱལ་ལྟ་བུའི་སྡུག་བསྔལ་ལ་སྤྱོད༔ ཚ་བ་ལ་རོལ་ན་ཚ་དམྱལ་ལྟ་བུའི་སྡུག་བསྔལ་ལ་སྤྱོད༔ ལྟོ་འགྲངས་ན་རི་བྲག་གི་བར་དུ་བཙིར་སྙམ་བྱེད༔ ལྟོ་ལྟོགས་ན་ནམ་མཁའ་དང་བར་སྣང་ལ་དབྱུག་པ་སྙམ་བྱེད༔ འཆོང་བ་དང་རྒྱུག་པའི་ལས་བྱས་ན་གཡང་ལ་ལྷུང་བ་དང་སྦབ་ཏུ་འདྲིལ་བ་སྙམ་བྱེད་པའི་སྡུག་བསྔལ་ལ་སྤྱོད༔ དེ་ནས་འབྱུང་བའི་རང་རྩལ་དེར་མཐུན་དུ་རྒྱས་པས༔ ཟླ་བ་དགུ་ལ་ལུས་ཀྱི་ལང་ཚོ་རྒྱས་ཤིང་༔ ངོ་བཅུའི་སྟེང་ནས་ལས་ཀྱི་རླུང་གིས་མགོ་མཇུག་བཟློག་སྟེ༔ མའི་མངལ་སྒོ་འགྲིམས་པའི་དུས་སུ་གནམ་ས་མགོ་ཞབས་ལོག་པ་ལྟ་བུའི་སྡུག་བསྔལ་དང་༔ ལྕགས་ཀྱི་འཇུར་མིག་རབ་ཏུ་དམ་པོ་ནས་དྲངས་པ་ཙམ་གྱི་སྡུག་བསྔལ་མྱོང་ངོ་༔ མངལ་ནས་འཐོན་ཏེ་སར་ལྷུང་བའི་དུས་སུ་ཚེར་མའི་དོང་དུ་ལྷུང་བ་ཙམ་གྱི་སྡུག་བསྔལ་དང་༔ ས་ནས་ལག་ཏུ་བླངས་པའི་དུས་སུ་བྱིའུ་ཁྲས་ཁྱེར་བ་ཙམ་གྱི་སྡུག་བསྔལ་མྱོང་བ་དང་༔ ལྟེ་ཐག་བཅད་པའི་དུས་སུ་སྲོག་གི་རྩ་བྲེགས་པ་ཙམ་གྱི་སྡུག་བསྔལ་དང་༔ གོས་ཀྱིས་གཡོགས་པའི་ཚེ་ལུས་ཀྱི་ཤུན་ལྤགས་བཤུས་པ་ཙམ་གྱི་སྡུག་བསྔལ་དང་༔ ནུ་ཞོ་ཁར་བླུད་པའི་དུས་སུ་ཁྲོ་ཆུ་འཐུང་བ་ཙམ་གྱི་སྡུག་བསྔལ་རྣམས་འབྱུང་བ་སྟེ༔ དགའ་བོ་མངལ་འཇུག་གི་མདོ་ལས༔ ཇི་ལྟར་མངལ་ན་གནས་པའི་བདེ་སྡུག་རྣམས༔ བཟོད་པར་དཀའ་བ་སྡུག་བསྔལ་རྒྱ་མཚོ་སྟེ༔ ལས་དྲུག་འཁྲུལ་བའི་ཉོན་མོངས་རྒྱུ་ལས་བྱུང་༔ ཅེས་སོ༔ ད་ནི་རྒས་པའི་སྡུག་བསྔལ་བྱུང་ཚུལ་ནིི༔ དང་པོ་མ་ལས་སྐྱེས་པ་ནས་ལོ་ལྔ འམ་བཅུ་མན་ཆད་ལ་རང་གི་རྩལ་མ་རྫོགས་པས༔ ལུས་ཀྱི་དྲི་ཆུ་དཀར་ནག་འདོར་བ་ཙམ་གྱི་ལས་མི་ཡོང་བས་ན༔ སྡུག་བསྔལ་གྱི་ཚོགས་ནི་སྣ་ཚོགས་པའོ༔ ལོ་བཅུ་ཡན་ཆད་ལ་ཤེས་པ་ཡང་ཇེ་གསལ་ཇེ་གསལ་ལ་འགྲོ་བ་ནི༔ འབྱུང་བ་བཞིའི་རྒྱ་ལ་འཐུམས་པ་དེ་རྣམས་སྲབ་ཏུ་སོང་པའི་རྟགས་ཡིན་ཞིང་༔ ཉི་ཤུ་ནས་སུམ་ཅུའི་བར་ལ་འབྱུང་བའི་རྩལ་རང་སོར་རྒྱས་པས་ལུས་ཀྱི་སྟོབས་དང་རྩལ་ཤུགས་རྣམས་ཀྱང་དེར་མཐུན་དུ་རབ་ཏུ་དར་བར་འགྱུར་བའི་ཚེའོ༔ བཞི་བཅུ་ལོན་པའི་དུས་སུ་འབྱུང་བ་ཆུའི་སྡུད་པ་ཡལ་བའི་རྟགས་སུ་བཏུང་བ་དང་སྐོམ་ལ་གདུང་བ་ཞིག་འོང་༔ ལྔ་བཅུའི་ལོ་ལ་འབྱུང་བ་སའི་བསྐྱེད་ཆད་པས་ལུས་སྟོབས་ངན་ཞིང་ལྡང་འདུག་ལ་ལྕི་བ་ཞིག་འོང་༔ དྲུག་ཅུའི་ནང་དུ་འབྱུང་བ་རླུང་གི་དབྱེ་འབྱེད་གུད་པས་ཤིན་ཏུ་འགྲོ་འདུག་ལ་འཚེར་བར་འབྱུང་༔ མིག་ལ་སོགས་པའི་དབང་པོ་རྣམས་ཀྱང་ཆ་ཆེ་བ་རྣམས་རྒུད་དོ༔ བདུན་ཅུའི་ནང་དུ་འབྱུང་བ་མེའི་དྲོད་ཡལ་བའི་རྟགས་སུ་སོ་དང་སེན་མོ་ལ་སོགས་ཀྱི་བཀྲག་འཆོར༔ ལུས་ཀྱི་ཤ་འཆོར་ཞིང་བཀྲག་མདངས་ཐམས་ཅད་རྒུད་དོ༔ བརྒྱད་ཅུའི་ནང་དུ་ཆུའི་རླན་དང་སའི་བརྟན་གཉིས་ཉམས་པའི་རྟགས་སུ་ཁ་ཆུ་དང་མིག་ཆུ་མང་པོ་ཕྱི་རོལ་དུ་འཛག་ཅིང་༔ ཟས་ཀྱི་རོ་ལ་སྲེད་འཛིན་ཤིན་ཏུ་གདུང་བ་ཞིག་འོང་༔ དགུ་བཅུའི་ནང་དུ་མེ་རླུང་གི་སྲེད་འཛིན་ཉམས་པའི་རྟགས་སུ་ལངས་དུས་འགྱེལ་བ་དང་༔ ཤེས་པ་མི་གསལ་བ་དང་༔ ཁ་ནས་ཀྱང་འཆལ་ཚིག་སྨྲ་བ་དག་འབྱུང་ངོ་༔ དེ་ལྟར་ལོ་ཟླ་ཞག་དུས་ཀྱི་དམག་གིས་མི་འདང་མི་ཕྱིད་པའི་ངང་ལ་མ་ཚོར་བཞིན་དུ་མི་ལུས་ཐོབ་པ་སྟོང་ཟད་དུ་འགྱུར་ཞིང་༔ རྒས་ཤིང་འཁོགས་པའི་ཚེ༔ ལུས་ཤིན་ཏུ་དར་ལ་ལང་ཚོ་དང་ལྡན་པ་དེ༔ ཡི་དྭགས་ལྟར་ཚིགས་བཞི་རྣམས་ལྷངས་ལ་བུད་ཅིང་༔ བཤོངས་བཞི་གཉེར་མས་གང་༔ སྐྲ་ནག་པོ་བུང་བ་ལྟར་གནག་པ་དེ་ཡང་༔ ཁ་དོག་དཀར་བའི་བལ་གདན་ལྟར་འཕྱིངས༔ ཚེམས་ཀྱི་ཕྲེང་བ་ཆུ་ཤེལ་ལྟར་དཀར་བ་དེ་ཡང་༔ ལོ་བརྒྱ་སོང་བའི་རུས་རྙིང་བཙས་ཁྱེར་བ་ལྟར་སོང་༔ མིག་གི་དབང་པོ་ཟར་མའི་མེ་ཏོག་ལྟར་གསལ་བ་དེ་ཡང་༔ ཆུ་དཀར་ཉོག་པོ་ལྟར་སོང་༔ རྣ་བའི་སྒྲ་རི་དྭགས་ལྟར་གསང་བ་དེ་ཡང་༔ དམུས་ལོང་ལྟར་འོན་འཐིབས་ཅིག་ཏུ་གྱུར༔ ལུས་ཀྱི་སྤྱོད་ལམ་མཛེས་དགུར་ལྡན་པ་དེ་ཡང་༔ སྨྱོན་པ་ཐལ་དོང་དུ་འཕངས་པ་ལྟར་གྱུར༔ ཡར་ལང་ན་ཕྱིར་འགྱེལ་ཞིང་ཁ་སྣ་མིག་གསུམ་ནས་ཆུའི་རྒྱུན་རེ་འཕྲུག༔ གཏམ་ལབ་ན་ཀུན་གྱི་ཁྲེལ་གད་བསླང་ཞིང་༔ རང་ལུས་ཀྱང་ཚགས་སུ་མི་ཚུད་ཅིང་རང་གིས་ཀྱང་འཆི་བ་ལ་སྨོན་ཞིང་༔ གཞན་གྱིས་ཀྱང་འདི་ལ་འཆི་བའི་དུས་མེད་པ་ཟེར་ཏེ་ཀུན་གྱིས་སྡང་༔ ཁའི་བཟའ་བཏུང་དང་ལུས་ཀྱི་རྒྱབ་གོས་ཙམ་ཡང་ཁ་ལོར་མི་འདུ་བའི་སྡུག་བསྔལ་ཆེན་པོས་ཡོངས་སུ་མནར་བར་བྱེད་དེ༔ མདོ་སྡེ་རྒྱ་ཆེ་རོལ་པ་ལས༔ ཀྱེ་རིགས་ཀྱི་བུ་རྣམས༔ ལོ་ཟླ་ཞག་དུས་ཀྱི་དམག་གིས་མ་ཚོར་བཞིན་དུ་མནར་ཏེ༔ རྒས་པའི་སྡུག་བསྔལ་ནི་མྱོང་བར་འགྱུར་རོ༔ ཅེས་པ་དང་༔ སྐུ་གདུང་འབར་བ་ལས༔ ལས་ལས་སྐྱེས་ནས་ལས་ཀྱི་དབང་གིས་འཁྲུལ༔ ལང་ཚོ་དར་མ་རྒས་པའི་སྡུག་བསྔལ་མང་༔ ཅེས་སོ༔ དེ་ནས་ན་བའི་སྡུག་བསྔལ་ནི༔ ཆུའི་ཟུག་པ་གནས་སུ་གྱུར་པས་བད་ཀན་གྱི་ནད་དུ་གྱུར་པ་དང་༔ མེའི་ཟུག་པ་གནས་སུ་གྱུར་པ་མཁྲིས་པའི་ནད་དུ་སྨིན་པ་དང་༔ རླུང་གི་ཁམས་ལོག་པས་རླུང་གི་ནད་དུ་གྱུར་པ་དང་༔ སའི་ཁམས་ལོག་པས་འདུས་པའི་ནད་དུ་གྱུར་པ་དང་བཅས་པའི་ནད་རིགས་མི་གཅིག་པ་བཞི་བརྒྱ་རྩ་བཞི་གང་དང་གང་དུ་གྱུར་པ་ཞིག་གིས་མནར་བའི་ཚེ༔ དེ་ཡང་གར་འོངས་ཆ་མེད་པ་ཞིག་ནས༔ གདོན་རིགས་སྟོང་ཕྲག་བརྒྱད་ཅུའི་བགེགས་ཅིག་དང་བསྡོང་སྟེ༔ ཟུང་འཇུག་གིས་སྐྱེས་བུའི་ལུས་ལ་བཏབ་པའི་ཚེ༔ མི་བཟོད་པའི་གཟེར་དྲག་པོས་ནི་མཁུན༔ མི་འདོད་པའི་སྡུག་བསྔལ་དུ་མས་ནི་གཟིར༔ ཡ་ང་བའི་ཚོར་བ་ཆེན་པོས་ནི་གདུང་༔ ཉིན་ཆོད་ཀྱང་མཚན་མི་ཆོད་པར་ཨ་ན་དང་ཨ་ཚའི་སྐད་ངན་ནི་སྒྲོག༔ སྐད་ཅིག་རེ་རེ་ལའང་ལོ་ཟླ་མང་པོའི་སྣང་བ་ལྟར་འགྲོ་མི་ཐུབ༔ ཟས་ཞིམ་དགུ་མངར་བཅུ་གང་ཟོས་ཀྱང་དང་ཁས་ནི་མི་ལེན་ཞིང་༔ སྐྱུག་ལོག་པའི་སྣང་བ་མང་པོ་འཆར་ཞིང་དབང་པོའི་སྒོ་ཐམས་ཅད་ཉམས༔ ཡིད་ཀྱི་གདུང་བ་ནི་རགས༔ ནད་ཀྱི་ཟུག་པ་ནི་ཆེ༔ རྐང་ལག་སྐྱོང་སྐུམ་དང་སྟེང་འོག་འགྱུར་བ་ཙམ་ཡང་མི་ཐུབ་ཅིང་༔ ན་བ་དང་ཚ་བ་དང་སྦྲིད་པ་དང་འཐོམ་པ་དང་འཁོར་བ་སྙམ་བྱེད་པ་ལ་སོགས་པའི་སྡུག་བསྔལ་རྣམས་ཀྱིས་གདུང་བར་འགྱུར་ཞིང་༔ སྡུག་བསྔལ་གྱི་ཚོགས་དཔག་ཏུ་མེད་པ་མྱོང་དགོས་སོ༔ དེ་ནས་འཆི་བའི་སྡུག་བསྔལ་ཡང་༔ སྙིང་རྗེ་མེད་པའི་གཤིན་རྗེའི་ཞགས་པ་དེས་ཟིན་ནས༔ དབུགས་ངར་ངར་བོའི་ནད་ཀྱི་འཚེ་བ་དྲག་པོ་དེས་བཏབ་པའི་ཚེ༔ གདན་ཇི་ལྟར་འབོལ་ཡང་གྲམ་ཁྲོད་དུ་ཉལ་བ་ལྟ་བུ་ལ༔ གོས་ཇི་ལྟར་བཟང་ཡང་ཚེར་དོང་དུ་སྐྱུར་པ་ལྟ་བུར་ལྡན་ཚེ༔ སྨན་དཔྱད་མཁན་དང་སྔས་སྲུང་བ་རྣམས་ཀྱིས་ཀྱང་ཕན་པའི་ཐབས་ནི་ཟད༔ ཉེ་དུ་དང་གཉེན་བཤེས་མང་པོ་རྣམས་ཀྱིས་མཐའ་བསྐོར་བཞིན་དུ༔ གཏམ་ལབ་པའི་ཐ་མ་ཁ་ཆེམས་སུ་སྨྲ༔ ཟས་བཟའ་བའི་ཐ་མ་དུར་བརྒྱགས་ལ་སྤྱོད༔ སེམས་བསམ་པའི་ཐ་མ་འཆི་བའི་ཚོར་བ་ཉ་བྱེ་ཚན་ལ་བཏོན་པ་ལྟ་བུའི་ངང་ནས༔ ས་ས་ལ་ཐིམ་པས་ལུས་ལྕི་ཞིང་འཐིབ༔ ཆུ་ཆུ་ལ་ཐིམ་པས་ཁ་ཆུ་དང་སྣ་ཆུ་ལུད་ཅིང་སྐམ༔ དྲོད་མེ་ལ་ཐིམ་པས་ལུས་ཀྱི་མཐའ་ནས་དྲོད་རྣམས་རིམ་གྱིས་ཡལ༔ དབུགས་རླུང་ལ་ཐིམ་པས་དབུགས་ངར་ངར་དུ་རྩེག་ཅིང་ནང་རླུང་ཕྱིར་འཕུལ༔ ཕྱི་དབུགས་ནང་དུ་འཐེན་མི་ཐུབ༔ མི་འདོད་བཞིན་དུ་གཤིན་ཡུལ་དུ་སྙོག་ནས་འགྲོ་དགོས་པ་སྟེ༔ མདོ་ལས༔ འཇིག་རྟེན་འདི་ནི་འདོར༔ འཇིག་རྟེན་ཕ་རོལ་དུ་ནི་འགྲོ༔ སྐྱས་ཆེན་པོ་ནི་འདེགས༔ མུན་པ་ཆེན་པོར་ནི་འཇུག༔ ཕ་མ་ཕུ་ནུ་བུ་བུ་མོས་ནི་བསྐོར༔ དབུགས་ནི་འཆད༔ ནོར་རྣམས་ནི་བགོ་བཤའ་བྱེད་དེ༔ ཀྱི་ཧུད་ཕ༔ ཀྱི་ཧུད་མ༔ ཀྱི་ཧུད་བུ་ཞེས་ནི་ཟེར༔ སྐྲ་ནི་བཤིག༔ ཆོས་མ་གཏོགས་སྐྱབས་དང་གནས་དང་དཔུང་གཉེན་གཞན་མེད་དོ༔ དེའི་དུས་ན་ཆོས་ནི་གླིང་དང་མགོན་དང་སྟོན་པར་འགྱུར་རོ༔ ཅེས་སོ༔ དེ་ལྟར་རིགས་དྲུག་གི་ཁམས་གང་ནས་གང་དུ་སྐྱེས་ཀྱང་སྡུག་བསྔལ་འཁོར་བའི་བཙོན་དོང་ཁོ་ན་སྟེ༔ ལས་བརྒྱ་པའི་མདོ་ལས༔ འཁོར་བ་དག་ན་བདེ་བ་མེད༔ མི་གཙང་ཁང་པར་དྲི་ཞིམ་མེད༔ འཁོར་བ་ཁབ་ཀྱི་རྩེ་ཙམ་ལ༔ བདེ་བ་ནམ་ཡང་ཡོད་མ་ཡིན༔ ཅེས་སོ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་འཁོར་བ་རིགས་དྲུག་གི་གྲོང་ཁྱེར་འདི་རྣམས་སུ༔ འཕགས་པའི་ཐུགས་རྗེས་འགྲོ་བའི་སྐྱབས་མགོན་དུ་སྤྲུལ་པ་ཇི་ལྟར་བཀྱེས་ཚུལ་ནི༔ ཆོས་སྐུ་ཡང་དག་པ་བདེ་བ་ཆེན་པོ་འགྱུར་བ་མེད་པའི་ངང་ལས༔ འཕགས་པ་ལོངས་སྤྱོད་རྫོགས་སྐུ་སྤྱན་རས་གཟིགས་རིགས་ལྔའི་རྣམ་པར་ཞལ་ཕྱག་གི་གཟུགས་བརྙན་དུ་བསྟན་ཞིང་༔ སྤྲུལ་པའི་སྐུ་ནི་རིགས་དྲུག་གཟུགས་དང་མཐུན་པར༔ གང་ལ་གང་འདུལ་གྱི་ཐུབ་པ་དྲུག་ཏུ་སྤྲུལ་ནས༔ སྐུ་གསུམ་གྱི་སྟོན་པ་དེ་དག་རྣམས་ཀྱི༔ སྐུ་གསུམ་གྱི་རྒྱུད་དང་སྒྲུབ་ཐབས་དཔག་ཏུ་མེད་པའི་ཆོས་རྒྱ་ཆེ་ལ་གྲངས་མང་བར་ཡོངས་སུ་གསུངས་ཤིང་༔ སྤྲུལ་པ་དང་ཡང་སྤྲུལ་ཉིང་སྤྲུལ་གྲངས་མེད་བསམ་འདས་བརྗོད་ཀྱིས་མི་ལང་བའི་ཚོགས་རྣམས་ཀྱིས་རྒྱལ་བའི་བསྟན་པ་འཛིན་སྐྱོང་སྤེལ་གསུམ་མཛད་ཅིང་༔ འགྲོ་བའི་དོན་མཐར་ཕྱིན་པར་མཛད་པ་སྟེ༔ རྒྱུད་ལས༔ འགྲོ་བའི་ཁམས་ནི་སྣ་ཚོགས་པར༔ འཕགས་པའི་སྤྲུལ་པ་དེར་མཐུན་སྤྲུལ༔ འགྲོ་དྲུག་མུན་པ་ཐབས་ཀྱིས་བསལ༔ ཅེས་སོ༔ དེ་ནི་རིགས་དྲུག་སོ་སོའི་གནས་སུ་གང་ལ་གང་འདུལ་གྱི་སྐུ་རུ་སྤྲུལ་ནས་འགྲོ་བའི་དོན་མཛད་པའི་ནང་ནས་ཀྱང་༔ ཆོས་བཞིན་སྤྱོད་པའི་སྐལ་བ་དང་ལྡན་པ་མིའི་འཇིག་རྟེན་ཀུན་ཏུ་འགྲོ་དོན་རྒྱ་ཆེ་བས༔ སྤྲུལ་པ་མང་དུ་འབྱུང་བར་འགྱུར་ཞིང་༔ ཁྱད་པར་དུའང་མི་མཇེད་པ་ཐུགས་ཀྱི་ཞིང་ཆེན་པོ་འདིར༔ གསང་བ་སྔགས་ཀྱི་ཐེག་པ་ཉི་མ་ཤར་བ་ལྟར་འབྲས་བུའི་ཆོས་དར་ཞིང་འགྲོ་དོན་མཛད་ཚུལ་ནི༔ མདོ་རྒྱུད་རྣམས་ལས་གསལ་བ་ལྟར་ཡིན་ཞིང་༔ ཡང་སྒོས་སུ་ཁྱེད་བོད་ཡུལ་གྱི་སྐྱེ་འགྲོ་ཕོ་མོ་རྣམས་འཕགས་པ་ཐུགས་རྗེ་ཆེན་པོ་ཁོ་ནའི་སྤྲུལ་པས་འགྲོ་བ་འདྲེན་པའི་ཡུལ་ཏེ༔ ཅིའི་ཕྱིར་ཞེ་ན༔ སྔོན་ཐུབ་པ་ཆེན་པོས་ཆོས་ཀྱི་འཁོར་ལོ་མང་དུ་བསྐོར་ཞིང་འགྲོ་བའི་དོན་མཐར་ཕྱིན་པར་མཛད་ཀྱང་༔ བྱང་ཕྱོགས་བོད་ཀྱི་སྐྱེ་འགྲོ་རྣམས་ལ་ཆོས་ཀྱི་སྣོད་དུ་མ་གྱུར་བར་མཁྱེན་ཏེ༔ འཕགས་པ་ཐུགས་རྗེ་ཆེན་པོ་ལ་བཀས་གནང་ཞིང་ལུང་དུ་བསྟན་ཏེ༔ བྱང་ཕྱོགས་མཐའ་འཁོབ་གངས་ཀྱི་ར་བར་ཆུད་པའི་འགྲོ་བ་རྣམས་ཁྱེད་ཀྱིས་ཐུལ་ལ༔ དམ་པའི་ཆོས་ཀྱི་ཐེག་པ་འདི་ཡང་རབ་ཏུ་སྟོན་ཞིག༔ ཅེས་གསུངས་ཤིང་བཀས་གནང་བ་ལྟར༔ ཁྱེད་སྤྲེའུའི་ཚ་བོ་བོད་ཀྱི་སྐྱེ་འགྲོ་ཕལ་མོ་ཆེ་རྣམས༔ འཕགས་པས་ཆོས་ཀྱི་བསྟན་པ་དར་བའི་ཕྱིར་དུ་སྤྲེའུའི་སྣང་བ་བསྒྱུར་བའི་རིགས་ལས་ཁྱེད་རྣམས་ཀྱི་ལུས་འདི་ཆད་ཅིང་༔ འཕགས་པ་ཉིད་མངོན་སྣང་གིས་བོད་འབངས་སྐྱོབ་པའི་ཕྱིར་བྱོན་པ༔ སྤྲུལ་པའི་རྒྱལ་པོ་གཉའ་ཁྲི་བཙད་པོ་དང་༔ དེ་ནས་རིམ་གྱིས་བརྒྱུད་པའི་བར་མ་ཆོད་པར་བྱོན་པ་རྣམས་དང་༔ ཁྱད་པར་དུའང་ཐོ་ཐོ་རི་སྙན་ཤལ་དང་༔ མེས་ཆེན་པོ་སྲོང་བཙན་སྒམ་པོ་དང་༔ ད་ལྟར་གྱིའང་ཆོས་སྐྱོང་བའི་རྒྱལ་པོ་ཁྲི་སྲོང་ལྡེའུ་བཙན་དང་བཅས་པ་འདི་རྣམས་ཀྱང་༔ ཁྱེད་བོད་ཡུལ་གྱི་འགྲོ་བ་འདྲེན་པའི་ཕྱིར་དུ་རིགས་གསུམ་གྱི་མགོན་པོ་དང་༔ ཁྱད་པར་དུ་འཕགས་པ་ཇོ་བོ་ཐུགས་རྗེ་ཆེན་པོའི་སྤྲུལ་པ་ཁོ་ན་ཡིན་ཏེ༔ འདི་རྣམས་ནི་སེམས་ཅན་རང་རྒྱུད་པ་མིན་ཞིང་༔ ཕལ་མོ་ཆེ་སྐྱེ་འཇུག་ལ་རང་དབང་ཐོབ་ཀྱང་༔ འགྲོ་བའི་གླིང་གཞན་དུ་མི་འབྱོན་པར་བོད་ཡུལ་ཁོ་ན་ལ་ཡང་ཡང་དུ་ཐུགས་རྗེས་སུ་ཆགས་པའི་ཚུལ་གྱིས་འགྲོ་བའི་དོན་ལ་འབྱོན་པ་སྟེ༔ ཞི་བ་དང་དྲག་པོ་དང་ཞི་མ་ཁྲོ་སྣ་ཚོགས་ཀྱིས་འགྲོ་བའི་དོན་དུས་གསུམ་རྒྱུན་ཆད་མེད་པར་མཛད་པ་ཡིན་ཏེ༔ སྤྲུལ་པ་འོད་གསལ་ལྷ་ལས་ཆད་པའི་རྒྱལ་པོའི་རིམ་པ་སྔ་མ་རྣམས་ཀྱང་༔ སྐྱེ་བ་སྣ་ཚོགས་པར་བཟུང་ཡང་མི་འགལ་ཞིང་༔ ཕལ་ཆེ་བ་རྣམས་ནི་གཅིག་ནས་གཉིས་སུ་འཕགས་པའི་སྤྲུལ་པས་བོད་འབངས་བློས་མི་གཏོང་ཞིང་ངོ་བོ་གཅིག་ལ་སྐྱེ་བ་སྣ་ཚོགས་སུ་བརྒྱུད་ནས་འགྲོ་བའི་དོན་མཛད་པ་ནི་གཙོ་ཆེ་བར་ཡོད་དོ༔ ད་སྟེའང་ད་ལྟར་གྱི་རྒྱལ་པོ་ཆེན་པོ་ཁྲི་སྲོང་ལྷའི་ལྡེའུ་བཙན༔ ཆོས་བློན་ལོ་པཎ་དང་བཅས་པ་རྣམས་ཀྱང་༔ ད་ལྟར་ཡང་ལྷན་ཅིག་དང་ཐབས་ཅིག་ཏུ་ཚོགས་ནས་མདོ་སྔགས་ཀྱི་ཆོས་ཀྱི་འཁོར་ལོ་འདི་རྣམས་འགྲོ་དོན་དུ་བསྐོར་ཞིང་༔ བོད་ཁམས་དཀར་པོར་བཏང་བ་ཡང་འཕགས་པའི་སྤྲུལ་པ་ཡིན་ཞིང་༔ ཁོ་བོ་པདྨ་འབྱུང་གནས་ཀྱང་རི་བོ་ཏ་ལ་དབང་གི་རྩེ་མོར༔ འཕགས་པ་ཐུགས་རྗེ་ཆེན་པོ་དང་མངོན་སུམ་དུ་མཇལ་ཞིང་༔ བོད་ཕྲུག་སྤྲེའུའི་ཚ་བོ་རྣམས་ཡང་དག་པར་དུས་གསུམ་དུ་ཁྱོད་ཀྱིས་སྐྱོངས་ཤིག༔ དེ་ཅིའི་ཕྱིར་ཞེ་ན༔ ཆོས་ཀྱི་སྐུ་འོད་དཔག་ཏུ་མེད་པ་དང་༔ འཕགས་པ་བདག་དང་རྡོ་རྗེ་པདྨ་འབྱུང་གནས་གསུམ་ལ་དབྱེ་བ་མེད་པས༔ བོད་ཁམས་ཀྱི་འགྲོ་བ་འདུལ་བ་དང་༔ མཐའ་འཁོབ་ཀྱི་སེམས་ཅན་འདུལ་བའི་སྨོན་ལམ་ཡོད་དོ་གསུངས་ཤིང་ལུང་བསྟན་པ་ཡང་མང་དུ་ཡོད་པས༔ ད་ལྟར་གྱི་ཟབ་ཆོས་འདི་རྣམས་ཉན་བཤད་འཛིན་གསུམ་བྱེད་པར་བྱུང་བ་འདི་ཡང་འཕགས་པའི་ཐུགས་རྗེ་ཁོ་ན་ལས་བྱུང་བ་དང་༔ བོད་ཁམས་འདིར་ཀླ་ཀློའི་བསྟན་པ་དར་ཡང་༔ ནམ་ལངས་ཤིང་ཉི་མ་ཤར་བའི་སྟོབས་ཀྱིས་བ་མོ་ཇི་ལྟར་འཐུག་ཀྱང་༔ སྐད་ཅིག་དེ་ཉིད་གར་སོང་ཆ་མེད་དུ་གཏོང་བ་ལྟར༔ མུ་སྟེགས་པའི་བསྟན་པ་ནུབ་ཅིང་སངས་རྒྱས་ཀྱི་བསྟན་པ་དར་བ་དང་༔ ཆོས་འཁོར་ཆེན་པོ་དཔལ་གྱི་བསམ་ཡས་ཞེས་བྱ་བ༔ དབུས་འགྱུར་རྡོ་རྗེ་གདན་གཉིས་པ༔ བཞེངས་པ་མི་འདྲ་སྐྱེས་པ་འདྲ་བ༔ མིག་གིས་མཐོང་བས་ངན་སོང་གསུམ་གྱི་སྒོ་ཡང་དག་པར་ཁེགས་ཤིང་༔ ཚུལ་བཞིན་འདུན་པ་རྣམས་ནི་བྱང་ཆུབ་མྱུར་དུ་སྟེར་བར་བྱེད་པའི་གཙུག་ལག་ཁང་ཆེན་པོ་འདི་འབྱོངས་ཤིང་༔ དགའ་སྟོན་ལ་འཕགས་པའི་ཟབ་ཆོས་འདི་ལྟ་བུ་བདག་གིས་བཤད་ཅིང་༔ ཁྱེད་རྣམས་ཀྱིས་ཐོས་ནས་ཉམས་སུ་ལོང་དང་༔ འཕགས་པ་ཐུགས་རྗེ་ཆེན་པོ་དང་གཉིས་སུ་མེད་པར་གྲོལ་ཞིང་༔ མ་འོངས་ལྔ་བརྒྱ་རྩོད་ལྡན་ཡང་མཐའི་དུས་ནའང་༔ འཕགས་པ་ཐུགས་རྗེ་ཆེན་པོ་དང་བདག་ཅག་རྣམས་དབྱེར་མེད་གཅིག་ཏུ་འགྱུར་ཏེ༔ བསྟན་པ་དང་སེམས་ཅན་སྣ་ཚོགས་ཀྱི་དོན་བྱེད་པར་འགྱུར་རོ༔ དེ་ལྟ་བས་ན་འཕགས་པའི་སྤྲུལ་པ་ཡང་སྤྲུལ་འགྲོ་བ་སོ་སོའི་གནས་སུ་བྱོན་པ་ཐམས་ཅད་ཀྱི་ནང་ནས༔ སྨྲ་ཤེས་དོན་གོ་མིའི་འཇིག་རྟེན་དུ་རྐང་གཉིས་ཀྱི་དེད་དཔོན་ཆེན་པོར་བྱོན་པ་འདི་མཆོག་གི་སྤྲུལ་པ་ཡིན་ཏེ༔ བསྟན་པའི་བདག་པོ་ཤཱཀྱ་ཐུབ་པ་ལ་སོགས་བསྐལ་བཟང་འདི་ལའང་༔ འཕགས་པ་ཐུགས་རྗེ་ཆེན་པོ་ནམ་མཁའ་འོད་བྱེད་ཀྱི་རྒྱལ་པོའི་སྤྲུལ་པ་ལས༔ ཕྱག་སྟོང་འཁོར་ལོས་སྒྱུར་བའི་རྒྱལ་པོ་སྟོང་༔ སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་དུ་སྤྲུལ་ནས་འགྲོ་བའི་དོན་མཛད་པའི་ཚེ༔ ལྷ་དང་མི་དང་ལྷ་མ་ཡིན་དང་༔ དྲི་ཟ་དང་གྲུལ་བུམ་དང་མིའམ་ཅི་དང་ལྟོ་འཕྱེ་ཆེན་པོ་དང་༔ ནམ་མཁའ་ལྡིང་ལ་སོགས་པའི་འགྲོ་བ་མཐའ་དག་གི་དོན་བྱེད་པར་ནུས་ཤིང་༔ སོ་སོའི་སྐད་དུ་ཆོས་ཀྱི་འཁོར་ལོ་ཡང་དེར་མཐུན་དུ་བཤད་པར་ནུས་ཤིང་༔ རིགས་དྲུག་གཞན་གྱི་ཡུལ་དུ་སྤྲུལ་པ་བཀྱེ་བ་རྣམས་ཀྱིས་ནི༔ སོ་སོའི་ཡུལ་དེ་མ་གཏོགས་གཞན་ལ་ཆོས་སྟོན་པ་དང་སྤྲུལ་པ་འགྱེད་པ་སོགས་ནི་མི་ནུས་ཏེ༔ ཆོས་ཀྱི་ཁམས་ལ་སྤྱོད་པའི་དགེ་བའི་རྟེན་མི་ལུས་ཁྱད་པར་འཕགས་པས༔ སྤྲུལ་པ་དང་ཆོས་ཀྱི་ཐེག་པ་རྣམས་ཀྱང་ཁྱད་པར་དུ་འཕགས་པའོ༔ དེའི་ཕྱིར་ན་མི་ལུས་འདི་འཐོབ་པར་ཤིན་ཏུ་དཀའ་བ་ཡིན་ཏེ༔ ཡོན་ཏན་ཡོངས་སུ་བཀོད་པའི་མདོ་ལས༔ མི་ཁོམ་པའི་གནས་རྣམས་ལས་ལོག་ཅིང་༔ དལ་འབྱོར་གྱིས་བརྒྱན་པའི་ལུས་འདི་ཤིན་ཏུ་ཐོབ་པར་དཀའ་འོ༔ ཞེས་དང་༔ མངོན་པ་ལས༔ དམྱལ་བ་ཡི་དྭགས་དུད་འགྲོ་དང་༔ ཀླ་ཀློ་ཚེ་རིང་ལྷ་དང་ནི༔ ལོག་ལྟ་སངས་རྒྱས་ཀྱིས་སྟོངས་པ༔ ལྐུགས་པ་འདི་རྣམས་མི་ཁོམ་བརྒྱད༔ ཅེས་པས་དེ་ལྟར་སྡུག་བསྔལ་གྱི་གྲོང་བརྒྱད་དམ་མི་ཁོམ་པའི་གནས་བརྒྱད་ལས་ལོག་ཅིང་༔ ཆོས་ལ་འཇུག་པའི་སྐལ་བ་ཅན༔ འབྱོར་བ་བཅུས་ཕྱུག་པའི་ལུས་འདི་ཤིན་ཏུ་རྙེད་པར་དཀའ་ཞིང་༔ འབྱོར་བ་བཅུ་ཡང་༔ སའི་སྙིང་པོ་འཁོར་ལོ་བཅུ་པའི་མདོ་ལས༔ མིར་གྱུར་ཡུལ་དབུས་སྐྱེས་དང་དབང་པོ་ཚང་༔ ལས་མཐའ་བཟང་བས་བསྟན་ལ་དད་པ་དང་༔ སངས་རྒྱས་བྱོན་ཞིང་ཆོས་ཀྱི་བསྟན་པ་གནས༔ ཐེག་པར་ཞུགས་ཤིང་སྙིང་རྗེས་ཡོངས་སུ་ཟིན༔ ཅེས་དང་༔ པདྨ་དཀར་པོ་ལས༔ མིར་སྐྱེ་བ་ནི་རྙེད་པར་དཀའ༔ སངས་རྒྱས་འཇིག་རྟེན་དུ་འབྱུང་བ་ཡང་རྙེད་པར་དཀའ༔ དལ་བ་ཕུན་སུམ་ཚོགས་པའང་རྙེད་པར་དཀའ༔ དགེ་བའི་ཆོས་ལ་འདུན་པའང་རྙེད་པར་དཀའ༔ ཡང་དག་པའི་སྨོན་ལམ་ཡང་རྙེད་པར་དཀའ༔ ཞེས་སོགས་རྒྱ་ཆེ་ཡང་དག་པར་བསྔགས་པའི་ལུས་བརྟེན་འདི་ལྟ་བུ་ཐོབ་པའི་དུས་སུ་རྒྱུ་འབྲས་ལ་ཚུལ་བཞིན་བརྩོན་དགོས་པ་སྟེ༔ པདྨ་དཀར་པོ་ལས༔ འཇིག་རྟེན་དག་ནི་ལས་ལས་སྤྲུལ་པའོ༔ སེམས་ཅན་རྣམས་ནི་ལས་ཀྱིས་བྱས་པས་ལས་ཀྱི་རྒྱུ་ལས་རབ་ཏུ་དབྱེ་བའོ༔ ཅེས་དང་༔ ལས་བརྒྱ་པ་ལས༔ མི་དགེ་བ་སྤྱད་པ་རྣམས་ནི་ངན་སོང་གསུམ་མྱོང་ཞིང་༔ མིར་སྐྱེས་ཀྱང་སྡུག་བསྔལ་བ་སྟེ༔ སྲོག་བཅད་པས་ནི་ཚེ་ཐུང་བར་འགྱུར་རོ༔ གཞན་ལ་འཚེ་བས་ནི་གནོད་པ་དང་བཅས་པའོ༔ བརྐུས་པས་ནི་ལོངས་སྤྱོད་དབུལ་བར་འགྱུར་བའོ༔ བྱི་བྱས་པས་ན་དགྲ་སྡང་བའོ༔ བརྫུན་དུ་སྨྲས་པས་ནི་སྐུར་བ་ཅན་ནོ༔ ཕྲ་མ་བཅུག་པས་ནི་གཉེན་བཤེས་དང་འབྲལ་ལོ༔ ཚིག་རྩུབ་མོར་སྨྲས་པས་ནི་མི་སྙན་པ་ཁོ་ན་ཐོས་སོ༔ གཞན་ལ་སྡང་བས་ཚིག་མི་བཙུན་པར་བྱེད་དོ༔ བརྣབ་སེམས་ཀྱིས་རེ་བ་ཐམས་ཅད་འཇོམས་སོ༔ གནོད་སེམས་ཀྱིས་འཇིགས་པ་མང་པོ་འབྱུང་ངོ་༔ ལོག་པར་ལྟ་བས་ནི་མནར་མེད་པའོ༔ ཞེས་དང་དེ་ཉིད་ལས༔ ལུས་ཅན་རྣམས་ཀྱི་ལས་རྣམས་ནི༔ བསྐལ་པ་བརྒྱར་ཡང་ཆུད་མི་ཟ༔ ཚོགས་ཤིང་དུས་ལ་བབས་པ་ན༔ འབྲས་བུ་ཉིད་དུ་སྨིན་པར་འགྱུར༔ ཅེས་སོགས་གསུངས་པས་ཕ་རོལ་ཏུ་ཕྱིན་པ་དྲུག་སོགས་ཀྱི་ཆོས་ལ་ཡང་དག་པར་སྤྱོད་པར་བྱའོ༔ རྣམ་དཀར་དགེ་བའི་ལས་ནི་ནམ་ཡང་མི་འདོར་བར་བྱའོ༔ སྡིག་པ་དང་བཅས་པའི་ཚོགས་ནི་ཡང་དག་པར་སྤང་བར་བྱའི༔ འཆི་བ་མི་རྟག་པ་ཡང་བསྒོམ་ཞིང་ལས་འབྲས་བུ་དང་བཅས་པའི་ཆོས་ལ་ཆོས་ཉིད་ཀྱི་བདེན་པ་དང་༔ ཀུན་རྫོབ་ཀྱི་བདེན་པ་ཡོད་པར་བློ་གཏད་ཅིང་༔ ཡང་དག་པར་ཡིད་ཆེས་པར་བྱའོ༔ དེ་ལྟར་སྟོན་པའི་ལམ་མཆོག་ཐེག་པ་ཐམས་ཅད་ཀྱི་མངའ་བདག༔ བླ་མ་རྡོ་རྗེ་འཛིན་པ་དང་བཅས་པའི་ཚོགས་ལ་ཡང་ཡང་དག་པར་བཀུར་ཞིང་བསྟོད་དེ་དད་པར་བྱའོ༔ དེ་ལྟར་དུ་སྤྱོད་པའི་གང་ཟག་རྣམས་ནི་མཐར་འཕགས་པ་ཆེན་པོ་ཆོས་ཀྱི་སྐུ་དང་༔ ལོངས་སྤྱོད་རྫོགས་པའི་སྐུ་དང་༔ སྤྲུལ་པའི་སྐུ་ལ་སོགས་པར་མངོན་པར་བྱང་ཆུབ་ཅིང་འཚང་རྒྱ་བར་འགྱུར་རོ༔ ས་མ་ཡཱ༔ རྒྱ་རྒྱ་རྒྱ༔ ཞེས་བོད་འབངས་ཀྱི་སྐྱེ་འགྲོ་ཕལ་མོ་ཆེ་རྣམས་ལ་ཆོས་འཁོར་ཆེན་པོ་འབྱོངས་པའི་གྲོལ་སྟོན་ཆོས་ཀྱི་ཕ་འབབས་སུ༔ རྒྱུ་འབྲས་ཀྱི་རིམ་པ་གསལ་བར་བསྟན་པ་འདི་ཡང་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མང་ཡུལ་བྱམས་པ་སྤྲིན་ནས་གདན་དྲངས་ཤིང་། ལྕགས་སྤྲེལ་ལོ་ལ་ཤོག་སེར་ལས་ཕབ་པའོ།། ༈ འདི་བཞེངས་དགེ་བས་རྒྱུ་སྦྱོར་བརྩོན་བྱེད་དང་། ལྟོས་བཅས་ཀྱིས་མཚོན་དུས་གསུམ་མར་གྱུར་འགྲོའི། །སྒྲིབ་དག་ཚོགས་རྫོགས་ཟབ་ལམ་འདིར་བརྟེན་ནས། །འཕགས་མཆོག་ཐུགས་རྗེ་ཆེན་པོའི་སྐུ་འགྲུབ་ཤོག། སརྦ་མངྒ་ལཾ།། །།