རླུང་སྦྱོར་གྱི་ཉམས་ལེན།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རླུང་སྦྱོར་གྱི་ཉམས་ལེན་ཡོད༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ མ་འོངས་འགྲོ་བའི་དོན་ཕྱིར་དུ༔ རླུང་རྩོལ་ཟབ་ལམ་མན་ངག་ཅིག༔ བདག་ཉིད་པདྨས་ཡི་གེར་འདེབས༔ ཉམས་སུ་ལོངས་ཤིག་སྐལ་ལྡན་བུ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་དབེན་ཞིང་དངས་ལ་རིག་པ་གསལ་བའི་གནས་ཤིག་ཏུ༔ བདེ་བའི་གདན་ལ་འདུག་ཅིང་༔ སྐྱབས་སེམས་དང་རྡོར་སེམས་བསྒོམ་བཟླས་སྔོན་དུ་བཏང་༔ རང་གི་སྤྱི་གཙུག་ཏུ་བླ་མ་ཡབ་ཡུམ་ལ་རྒྱལ་བ་ཐམས་ཅད་ཀྱིས་བསྐོར་ནས་བཞུགས་པར་བསྒོམས་ལ༔ མོས་གུས་རྩེ་གཅིག་གི་ངང་ནས་གསོལ་བ་ཕུར་ཚུགས་སུ་གདབ་ཅིང་༔ བླ་མ་འོད་དུ་ཞུ་ནས་རང་ལ་ཐིམ་པར་བསྒོམ་ས་མ་ཡཱ༔ རྒྱ་རྒྱ་རྒྱ༔ དེ་ནས་རང་གི་ཕུང་པོ་འབྱུང་བ་བཞི་འདུས་པའི་རྡོས་བཅས་འདི་མི་དམིགས་པ་སྟོང་པར་བསྒོམས༔ སྟོང་པའི་ངང་ལས་འོད་སྣང་ལས་གྲུབ་པའི་ལུས་ཕྱི་ནང་ཡོངས་སུ་གསལ་ལ་གོ་མ་འགགས་པ་གཅིག་ཏུ་བསམས༔ དེའི་དབུས་སུ་དབུ་མ་མདའ་སྨྱུག་ཙམ་པ་ཕྱི་དཀར་ལ་ནང་དམར་བ༔ སྲབ་ལ་དྭངས་པ་ཁྲག་དང་ཆུ་སེར་མེད་པ༔ ཡར་སྣེ་སྤྱི་གཙུག་ཏུ་ཟླ་བའི་དཀྱིལ་འཁོར་གྱིས་ཁ་བཅད་པ་ལ་ཧཾ་ཡིག་གིས་མཚན་པ༔ མར་སྣ་ལྟེ་འོག་ཏུ་ཟུག་པའི་ནང་དུ་རོ་རྐྱང་གི་སྣེ་འདུས་པ༔ སུམ་མདོར་ཨ་ཤད་ཀྱིས་མཚན་པ༔ གཡས་ཀྱི་རོ་མ་དང་གཡོན་གྱི་རྐྱང་མའི་ཡར་སྣེ་སྣ་བུག་གཉིས་སུ་ཟུག་པ༔ གྲོ་སོག་ཙམ་པ༔ ཡོ་བ་དང་འཁྱོགས་པ་འཁྲིས་པ་སོགས་ཀྱི་སྐྱོན་མེད་པར་ཁང་སྟོང་གི་ཀ་བ་ལྟར་ཐ་ལེར་གནས་པ་ཞིག་ཏུ་གསལ་བའི་སྤྱི་གཙུག་བདེ་ཆེན་གྱི་འཁོར་ལོར་རྩ་འདབ་སུམ་ཅུ་རྩ་གཉིས༔ མགྲིན་པ་ལོངས་སྤྱོད་ཀྱི་འཁོར་ལོར་རྩ་འདབ་བཅུ་དྲུག༔ སྙིང་ག་ཆོས་ཀྱི་འཁོར་ལོར་རྩ་འདབ་བརྒྱད༔ ལྟེ་བ་སྤྲུལ་པའི་འཁོར་ལོར་རྩ་འདབ་དྲུག་ཅུ་རྩ་བཞི་རྣམས་ཕྱི་གསལ་ནང་གསལ་འོད་གཟུགས་ལས་གྲུབ་པ༔ ཁྲག་དང་ཆུ་སེར་མེད་པ་ཡར་མར་གྱི་རྩ་འཁོར་གཉིས་གཉིས་ཁ་སྦྱར་བའི་ཚུལ་གྱིས༔ གདུགས་ཀྱི་རྩིབས་མ་ལྟར་བསམས༔ ཉོན་མོངས་པ་དང་གཉིས་འཛིན་གྱི་བག་ཆགས་སྡིག་སྒྲིབ་ཐམས་ཅད་སྣ་བུག་ནས་སོང་བར་བསམས་ཤིང་རླུང་རོ་འབུད༔ ཚ་ཤས་ཆེ་ན་ཞི་བ༔ གྲང་ཤས་ཆེ་ན་དྲག་པོ༔ ཚ་གྲང་སྙོམས་པའི་གང་ཟག་གིས་དལ་ལྷོད་རན་པ་སྟེ༔ མན་ངག་འདི་གསུམ་གྱི་ཉམས་ལེན་རིགས་པའི་མདས་བསྣུན་ཞིང་ཁམས་དང་སྦྱར་ལ་ཕོ་བར་དགང་༔ རོ་རྐྱང་གི་རླུང་རྩ་གསུམ་འདུས་མདོར་ཨ་ཤད་ལ་ཕོག་པས༔ བདེ་དྲོད་ཀྱི་མེ་ལྕེ་དམར་ཉུག་ཉུག་ཏུ་འབར་བར་བསམས་ལ་ཤེས་རིག་མ་ཡེངས་པར་རྩེ་གཅིག་ཏུ་གཏད༔ རླུང་ཁུག་པ་ཉེར་བརྒྱད་ཀྱིས་རྩ་འཁོར་ལོ་ལྔ་ཡེ་ཤེས་ཀྱི་མེས་གང་བས༔ སྤྱི་གཙུག་གི་ཧཾ་ཡིག་དཀར་པོ་ལས་ཆབ་རོམ་ཆུར་ཞུ་བ་ལྟར༔ བདེ་ཆེན་བྱང་ཆུབ་སེམས་ཀྱི་ཐིགས་པ་བཅུ་དྲུག་འཛགས་པས༔ ཐིགས་པ་བཞིས་སྤྱི་གཙུག་བདེ་ཆེན་འཁོར་ལོའི་རྩ་འདབ་སུམ་ཅུ་རྩ་གཉིས་པ་གང་༔ དགའ་བའི་ཡེ་ཤེས་རྒྱུད་ལ་སྐྱེས་པར་བསམས༔ བཞི་ཡིས་མགྲིན་པ་ལོངས་སྤྱོད་འཁོར་ལོའི་རྩ་འདབ་བཅུ་དྲུག་པ་གང་༔ ལྷན་ཅིག་སྐྱེས་པའི་དགའ་བ་རྒྱུད་ལ་སྐྱེས་པར་བསམས༔ ཐིགས་པ་བཞི་བབས་སྙིང་ག་ཆོས་ཀྱི་འཁོར་ལོའི་རྩ་འདབ་བརྒྱད་པ་གང་༔ མཆོག་དགའི་ཡེ་ཤེས་རྒྱུད་ལ་སྐྱེས་པར་བསམས༔ ཐིགས་པ་བཞི་བབས་ལྟེ་བ་སྤྲུལ་པའི་འཁོར་ལོའི་རྩ་འདབ་དྲུག་ཅུ་རྩ་བཞི་པ་གང་༔ དགའ་བྲལ་གྱི་ཡེ་ཤེས་རྒྱུད་ལ་སྐྱེས་པར་བསམས༔ སླར་ཡང་བྱང་ཆུབ་སེམས་ཀྱི་ཐིག་ལེ་རྣམས་ཡར་ལྡོག་པས༔ མས་འབེབས་ལྟར་ཡས་འཛེག་ལ་སྦྱར་ཏེ་དགའ་བ་བཞི་བསྒོམ༔ འདིའི་སྐབས་སུ་ལུས་གནད་ཆོས་བདུན་བསྲང་བ་དང་༔ སེམས་གནད་རྩེ་གཅིག་མ་ཡེངས་པར་དབུ་མའི་ནང་དང་རླུང་རྩོལ་ལ་གཏད་པ་དང་༔ རླུང་གནད་སྟེང་འོག་གི་རླུང་བསྡམས་ཤིང་བུམ་པ་རབ་ཏུ་དགང་བ་གནད་ཡིན་ནོ༔ དེ་ཐམས་ཅད་མཚན་བཅས་ཀྱི་ལས་རླུང་སྲོག་རྩོལ་དུ་ཆུད་པའི་རིམ་པ་ཡིན་ཞིང་༔ མཚན་མེད་དེ་བཞིན་ཉིད་ཀྱི་ལས་རླུང་ཡེ་ཤེས་ཀྱི་རླུང་དུ་དག་པར་བྱ་བ་ནི༔ རྩ་དང་རླུང་གི་དམིགས་པ་སོགས་བློ་གཏད་ཀྱི་འཛིན་པ་ཐམས་ཅད་དུས་གསུམ་མཉམ་བརྡལ་ཆེན་པོར་ཆམ་གཅིག་པའི་དགོངས་པའི་ངང་ནས་རླུང་ཁུག་པ་ཅི་མང་ལ་སྦྱངས་པས་གཟུགས་སྣང་གི་བག་ཆགས་མཚན་བཅས་ཀྱི་རླུང་རང་སར་དག་ཅིང་༔ འཛིན་པའི་བག་ཆགས་མཚན་མེད་ཀྱི་རླུང་ཡེ་ཤེས་ཀྱི་རླུང་དུ་རྒྱུ་སྟེ༔ དགའ་བྲལ་བླ་མེད་བདེ་གསལ་མི་རྟོག་པའི་ཉམས་མྱོང་རྒྱུད་ལ་སྐྱེ་བར་བྱེད་དོ༔ ས་མ་ཡཱ་༔ རྒྱ་རྒྱ་རྒྱ༔ ཟབ་ལམ་བླ་མེད་རླུང་གནད་འདི༔ ཉམས་སུ་ལེན་པའི་སྐལ་ལྡན་གྱི༔ ལུས་ཀྱི་རྩ་མདུད་གྲོལ་བ་དང་༔ རླུང་རྣམས་རང་སོར་རྒྱུ་བའི་ཕྱིར༔ ནད་གདོན་སྡིག་སྒྲིབ་སྦྱང་བའི་ཐབས༔ རྩ་འདུད་ལུས་སྦྱོང་འདི་ལྟར་བྱ༔ ས་མ་ཡཱ༔ རྒྱ་རྒྱ་རྒྱ༔ རླུང་བཟུངས་དྲག་ལངས་ལག་པ་གཉིས༔ གསུམ་གསུམ་འཕུར་ཞིང་མཆན་ལ་བརྡེག༔ རྐང་པ་གཡས་གཡོན་གསུམ་གསུམ་འཕུར༔ བརྐྱང་བསྐུམ་རེས་མོས་ལན་གསུམ་བྱ༔ ལག་གཉིས་གཞུ་འགེངས་གསུམ་གསུམ་མཐར༔ རྒྱབ་མདུན་འཕུར་ཞིང་མགོ་བོ་མཉེ༔ ཧ་སྤྲུག་དང་བཅས་བར་འབེབས་རྒྱག༔ སྐྱིལ་ཀྲུང་ངང་ནས་ཕོ་རྐེད་མགོ༔ ལག་གཉིས་པུས་མོར་བཀབ་ཅིང་བསྐོར༔ སོག་སྲུབ་གཡས་གཡོན་ལན་གསུམ་གཅུ༔ མིག་བསྐོར་ལྕེ་བསྒྲིལ་ཁ་མིག་གཉིས༔ གདངས་བཙུམ་ལན་གསུམ་རེས་མོས་བྱ༔ འབེབ་ཆུང་བདུན་དང་ཧ་སྤྲུག་བདུན༔ དེ་ནས་མ་བཅོས་ངང་དུ་གློད༔ དེ་ལྟར་ཆགས་མེད་བརྩོན་པའི་མཐུས༔ གདོན་དང་བགེགས་ཞི་ཁྱད་པར་དུ༔ ནད་རིགས་འབྱུང་འཁྲུགས་མ་ལུས་ཚོགས༔ ནམ་ལངས་མུན་པ་ལྟ་བུར་སངས༔ ཁ་ཟས་བཅུད་ཅན་བསྟེན་པ་དང་༔ ཚིལ་ཆེན་རྐང་མར་བསྐུ་མཉེ་བྱུག༔ ཚྭ་གཡེར་རྗེན་གྱི་རིགས་རྣམས་སྤངས༔ ཉེ་ཤིང་ར་མོ་ཤག་ཤིང་དང་༔ དབང་ལག་རྒྱལ་པོའི་བཅུད་ལེན་མཆོག༔ རླུང་གནད་མན་ངག་འདི་གསུམ་པོ༔ གཅིག་ཏུ་དྲིལ་ཞིང་ཉམས་བླངས་ནས༔ རང་ལུས་ཚགས་ཚུད་གཞན་ལུས་བསྟེན༔ མཁའ་སྤྱོད་རིག་འཛིན་མ་འགྲུབ་ན༔ བདག་འདྲ་རིག་འཛིན་པདྨ་འཁྲུལ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ་༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གངས་རིའི་རྒྱལ་པོ་ཏི་སེའི་བདེ་ཆེན་གསང་བ་ཕུག་ནས་རྙེད། །མངྒ་ལཾ། །