ཆོས་ཀྱི་ལོ་རྒྱུས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ལོ་རྒྱུས་བཞུགས་སོ༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ བླ་མ་བདེ་མཆོག་འཁོར་ལོ་ཡི༔ ལོ་རྒྱུས་རིམ་པ་གསལ་བར་བཀོད༔ མ་འོངས་ལས་ཅན་སྙིང་གི་བུ༔ སྐལ་ལྡན་རྣམས་ཀྱིས་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་ཆོས་དབྱིངས་ངོ་བོ་ཡེ་དག་བྱ་རྩོལ་ལས་འདས་པའི་ཕོ་བྲང་དུ༔ གདོད་མའི་མགོན་པོ་འོད་མི་འགྱུར་བའི་རྣམ་རོལ་ཡེ་ཤེས་ཀྱི་རྩལ་ལས་རང་ཤར་ཏེ༔ རིགས་འཛིན་རོལ་པའི་དུར་ཁྲོད་དུ༔ དཔལ་ཆེན་པོ་རིགས་འཛིན་འདུས་པ་རྩལ་གྱིས༔ དུས་གསུམ་དུས་མེད་ཀྱི་ངང་ནས༔ རིགས་འཛིན་འདུས་པའི་རྩ་རྒྱུད་བཀའ་སྩལ་པ་དང་༔ རྡོ་རྗེ་ནུས་འབྱིན་རྩལ་ལས་རྡོ་རྗེ་སེམས་དཔས་བཀའ་ཡི་བསྡུ་བ་མཛད་ནས༔ དུར་ཁྲོད་ཆེན་པོ་བསིལ་བ་ཚལ་དུ་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་ཏེ་བཞག་པ་ལས༔ བདག་པདྨ་ཐོད་ཕྲེང་རྩལ་དུར་ཁྲོད་ཆེན་པོ་བརྒྱད་ལ་སྤྱོད་པ་སྤྱད་དུ་སོང་ཞིང་༔ ཁྱད་པར་དུར་ཁྲོད་བསིལ་བ་ཚལ་དུ་བམ་རོའི་སྒྲུབ་པ་ལ་ཡོད་དུས༔ ཐོ་རངས་ཀྱི་ནམ་མཁའ་ལས་དཔལ་རྡོ་རྗེ་སེམས་དཔས་ལུང་བསྟན་པ༔ ཨེ་མ་པདྨ་ཐོད་ཕྲེང་རྩལ༔ ཁྱོད་ནི་འཁོར་འདས་ཡོངས་ཀྱི་དཔལ༔ གདོད་མའི་མགོན་པོ་ཧེ་རུ་ཀ༔ ཆོས་དབྱིངས་ངང་ནས་རང་ཤར་ཏེ༔ རིགས་འཛིན་འདུས་པའི་རྩ་རྒྱུད་གསུངས༔ བཀའ་ཡི་བསྡུ་བ་བདག་གིས་བྱས༔ མཆོད་རྟེན་བདེ་བྱེད་བརྩེགས་པ་ཡི༔ ཉི་མའི་སྙིང་པོར་གཏེར་དུ་ཡོད༔ གཏེར་སྲུང་མཆོད་ལ་རྒྱུད་དཔེ་བཤུས༔ མ་དཔེ་རང་གནས་བཞུགས་སུ་ཆུག༔ རྒྱ་གར་འཕགས་པའི་ཡུལ་འདི་ན༔ རིགས་འཛིན་རྒྱུན་མི་འཆད་པ་ཡི་༔ བསྟན་པའི་བཙས་ཡིན་ཨེ་མ་ཧོ༔ པདྨ་ཐོད་ཕྲེང་ལེགས་པར་ཉོན༔ རྒྱུད་ལ་བརྟེན་པ་སྒྲུབ་པའི་ཐབས༔ མ་བུ་ཆ་ལག་ཁ་ཁོངས་ལ༔ ལས་དང་སྐལ་བར་ལྡན་པ་འགའ༔ སྨིན་གྲོལ་འཐོབ་པའི་འཕྲིན་ལས་སྐྱོངས༔ གསུངས་པ་དང་༔ བསྟོད་པ༔ ཨེ་མ་ཧོ༔ ཨ་ལ་ལ༔ ཡེ་ཤེས་རོལ་པ་འགྲོ་བའི་སྐྱབས༔ སངས་རྒྱས་ཀུན་འདུས་རྡོ་རྗེ་སེམས༔ རིགས་བདག་མགོན་པོ་ཁྱོད་ལ་བསྟོད༔ ཅེས་བསྟོད་པས་རྡོ་རྗེ་སེམས་དཔའ་མཁའ་ལ་འོད་དུ་ཡལ༔ དེ་ནས་གཏེར་གྱི་སྲུང་མ་ནི༔ མཁའ་འགྲོ་ལས་ཀྱི་དབང་མོ་ཆེས༔ པདྨ་བདག་ལ་འདི་སྐད་གསུང་༔ སྟོན་པ་རྡོ་རྗེས་བཀའ་སྩལ་པའི༔ རིགས་འཛིན་འདུས་པའི་རྩ་རྒྱུད་ཆོས༔ རིགས་འཛིན་ཆེན་པོ་མཆོག་ཁྱོད་ཀྱིས༔ ཅི་དགར་སྤྱོད་ཅིག་འགྲོ་དོན་སྤྱོད༔ ཅེས་གསུངས་བཀའ་ཡི་གནང་བ་བྱིན༔ ཉི་མའི་འཁོར་ལོའི་སྙིང་པོ་ནས༔ ཟབ་ཆོས་ཀུན་གྱི་མཐར་ཐུག་པ༔ རྫོགས་པ་ཆེན་པོ་བླ་ན་མེད༔ རིགས་འཛིན་འདུས་པའི་རྩ་རྒྱུད་བླངས༔ བུ་དཔེ་བཤུས་ནས་མ་དཔེ་སྦས༔ རྒྱུད་ལ་བརྟེན་པའི་སྒྲུབ་ཐབས་བརྩམས༔ རིག་འཛིན་རྣམས་རིགས་འཛིན་ཆེན་པོ་བརྒྱད་དང་བཀའ་ཡང་བགྲོས༔ འཕགས་པའི་ཡུལ་དུ་བག་ཙམ་བཤད༔ བོད་ཡུལ་སྟོན་པས་ཞབས་མ་བཅགས༔ འདུལ་བའི་སྨོན་ལམ་བདག་ལ་ཡོད༔ མ་འོངས་ཤེས་པའི་པདྨ་ངས༔ བོད་དུ་འོང་བ་སེམས་ཀྱིས་ཤེས༔ ཤོག་སེར་བྲིས་ནས་བོད་དུ་ཁྱེར༔ སྤྱན་རས་གཟིགས་ཀྱིས་བྱིན་བརླབས་པའི༔ ཐུགས་ཀྱི་སྲས་གྱུར་ཀླུ་དབང་དང་༔ མཚོ་རྒྱལ་དཔལ་གྱི་ཡེ་ཤེས་དང་༔ རྗེ་འབངས་ཉི་ཤུ་རྩ་ལྔ་ལ༔ བསམ་ཡས་མཆིམས་ཕུའི་ནགས་ཁྲོད་དུ༔ བཀའ་བརྒྱད་ཆོས་ཀྱི་སྨིན་གྲོལ་བཀོད༔ བདེར་འདུས་འོ་མའི་རྒྱ་མཚོ་ལས༔ སྙིང་པོའི་བཅུད་བསྡུས་བླ་མེད་གནད༔ རིགས་འཛིན་བླ་མའི་སྒྲུབ་ཐབས་དང་༔ མ་བུ་ཆ་ལག་རྒྱུད་སྐོར་རྣམས༔ ཉམས་ལེན་ཆིག་དྲིལ་སྒྲུབ་པར་བསྟན༔ མ་སྤེལ་སྙིང་གི་དཀྱིལ་དུ་སྦོས༔ བཀའ་རྒྱས་བཏབ་སྟེ་ཉམས་ལེན་སྤྲད༔ ཁྱད་པར་ཀླུ་ཡི་དབང་པོ་ལ༔ ཆོས་འདི་དབང་བའི་སྨོན་ལམ་བཏབ༔ ཏེ་སེ་གངས་ལ་གཏེར་དུ་སྦས༔ ས་མ་ཡཱ༔ རྒྱ་རྒྱ་རྒྱ༔ མ་འོངས་ང་བུ་ལས་འཕྲོ་ཅན༔ ཟབ་མོའི་ཆོས་ལ་སྤྱོད་པའི་ཚེ༔ གངས་ཅན་བོད་ཀྱི་རྒྱལ་ཁམས་འདིར༔ བསྟན་པ་རྟགས་འཛིན་ཡང་མཐའ་དུས༔ མི་དགེ་བཅུ་ལ་ཉམས་ལེན་བྱེད༔ མཚམས་མེད་ལྔ་ལ་དམར་གཡོས་བྱེད༔ བདུད་དང་རྒྱ་འདྲེ་ཟ་ཁ་དར༔ མཐའ་དབུས་ཀུན་ཏུ་འཁྲུག་རྩོད་མང་༔ ཨེ་མ་བསྐལ་བའི་སྙིགས་མ་ལ༔ སྨོན་ལམ་དབང་གིས་ལུས་བླངས་པའི༔ གར་དབང་འགྲོ་འདུལ་གླིང་པ་ཁྱོད༔ བར་གཅོད་འཕྲང་དགུ་དག་ལ་འགྲིམ༔ བསྐལ་པ་དུས་ཀྱི་ཡང་མཐའ་ལ༔ རང་དོན་ཆོས་ཀྱི་སྒྲུབ་པར་འབུངས༔ གཞན་དོན་སྨོན་ལམ་རྒྱ་མ་ཆུང་༔ ལས་ཅན་ཆོས་བདག་བུ་རྣམས་ལ༔ བཀའ་རྒྱས་ཐོབ་ལ་ཆོས་འདི་སྤྲོད༔ དང་པོ་རང་གིས་ལེགས་པར་སྒྲུབས༔ དེ་ནས་ཆོས་བདག་མ་ནོར་བུ༔ ཉམས་སྣང་དངོས་དང་རྨི་ལམ་ལ༔ མཁའ་འགྲོའི་ལུང་བསྟན་འབྱུང་གི་གསལ༔ ལུང་ཟིན་སྐལ་ལྡན་མ་གཏོགས་པ༔ ཁྲོམ་ཆོས་མཁའ་འགྲོས་བར་ཆད་འོངས༔ དམ་ཆོས་འཚོ་ཤེས་གྱིས་ཤིག་བུ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ་༔ སྦས་རྒྱ༔ གསང་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ དུས་ངན་ཐ་མའི་སྤྲང་བན་འགྲོ་འདུལ་གླིང་། །སྨོན་ལམ་ཆུད་ཟོས་མ་བཏང་སྙིང་རུས་བྱས། །ལྟོགས་སྡུག་ཚ་གྲང་བཀྲེས་སྐོམ་དཀའ་བ་སྤྱད། །ཏེ་སེ་གངས་ནས་ཨོ་རྒྱན་ཟབ་གཏེར་ཐོབ། །སྔོན་སྦྱངས་ལས་འཕྲོ་སད་པའི་སྤྲང་པོ་དགའ། །སུ་མ་མགུ་ཡང་རང་གིས་ཉམས་སུ་ལེན། །པདྨ་འབྱུང་གནས་དེ་དང་གཉིས་མེད་ཤོག། ཤིང་མོ་ཡོས་ལོ་ཧོར་ཟླ་བཅུ་པའི་ཚེས་བཅོ་ལྔའི་ནུབ་མོ་གངས་ཏེ་སེའི་བདེ་ཆེན་གསང་བ་ཕུག་ནས་གདན་དྲངས་ཤིང་། རང་ཉམས་ལེན་ཕྱིར་ཁམས་སྲིང་མོ་རྫོང་གི་ཕུག་ནག་བདེ་བ་ཆེན་པོར་ས་ཕོ་རྟ་ལོ་ཧོར་ཟླ་བཅུ་པར་ཤོག་སེར་ལས་ཕབ་པའི་ཡི་གེ་པ་ནི་སྤྲང་པོ་རང་ངོ། །མངྒ་ལཾ། །