སྤྲོས་བཅས་བུམ་པའི་ལྷ་དབང་།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ སྤྲོས་བཅས་བུམ་པའི་ལྷ་དབང་ཡོད༔ དཔལ་ཧེ་རུ་ཀཿལ་ཕྱག་འཚལ་ལོ༔ ལྔ་བརྒྱའི་འགྲོ་ལ་ཕན་དོན་དུ༔ སྤྲོས་བཅས་དབང་གི་ཆོ་ག་ཞིག༔ པདྨ་འབྱུང་གནས་བདག་གིས་བཀོད༔ གསང་སྔགས་བསྟན་པའི་སྲོག་ཏུ་ཤོག༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་འདུས་པའི་རྒྱུད་ལས་ཀྱང་༔ དུར་ཁྲོད་རི་སུལ་དབེན་གནས་སུ༔ ཅེས་གསུངས་པས་གནས་དབེན་པར་གད་བརྡར་དང་སྐྱང་ནུལ་སྒྲུབ་པའི་ཁོག་འབུབ་ལྟར་བྱས་ནས༔ སྣོད་ལྡན་གྱི་སློབ་མ་སྨིན་གྲོལ་ལ་འཇུག་པ་འདི་ལ་སྔོན་འགྲོ་དངོས་གཞི་རྗེས་དང་གསུམ་གྱིས་སྟོན་ཏེ༔ སྔོན་དུ་འགྲོ་བ་ལ་ཐུན་མོང་དང་ཐུན་མོང་མ་ཡིན་པ་གཉིས༔ ཐུན་མོང་ལ་ལྔ་སྟེ༔ བུམ་པ་དང་དཀྱིལ་འཁོར་སྟ་གོན༔ དབང་རྫས་དགྲམ་པ་དང་དབང་བསྒྲུབ་པ༔ བདག་འཇུག་བླང་བ་དང་ལྔའོ༔ ས་མ་ཡཱ༔ རྒྱ་རྒྱ་རྒྱ༔ དེ་ལ་ཐོག་མར་དཀྱིལ་འཁོར་སྟ་གོན་ནི༔ ཚངས་པའི་ཐིག་གདབ་བཅུ་དྲུག་ཐིག་ཏུ་གདབ༔ ལོ་མ་ལོ་ཆུང་ལན་གསུམ་གཏུབས་པ་ཡིས༔ བཅུ་དྲུག་ཐིག་གིས་ཆ་རྣམས་ལེགས་པར་དབྱེ༔ དེ་ནས་ཆ་ཆེན་དང་པོ་ལྟེ་བའི་ཆ༔ གཉིས་དང་གསུམ་པ་པདྨའི་ཆ་ཡིན་ཞིང་༔ བཞི་པ་མི་གདབ་ཁྱམས་ཀྱི་རིམ་པའོ༔ ལྔ་པ་ཕྱེད་གདབ་ཕྱི་མ་བསྲེ་བར་བྱ༔ དྲུག་པ་དབུས་དོར་མཐའ་གཉིས་གདབ་པར་བྱ༔ བདུན་པ་ཆ་བཞིར་ཡོངས་སུ་བགོ་བར་བྱ༔ བརྒྱད་པ་ཕྱེད་གདབ་ཕྱི་མ་བསྲེ་བར་བྱ་༔ སྒོ་བཞི་པ་ལ་གྲུ་ཞི་པ༔ རྒྱན་དང་རྟ་བབས་བཞི་བཞིར་ལྡན༔ བུམ་པ་ཆོས་འཁོར་གདུགས་ཏོག་མཛེས༔ པདྨ་རྡོ་རྗེ་མེ་རི་བྲག༔ མཛེས་པའི་ཚོན་གྱིས་འབྲི་བར་བྱ༔ དབུས་སུ་ཆ་ཆེན་ལྟེ་བར་བཅད༔ དེ་ཡི་ཕྱི་རོལ་པད་འདབ་བརྒྱད༔ མུ་ཁྱུད་མཛེས་པས་བསྐོར་བར་བྱ༔ དེ་ཡི་ཕྱི་རིམ་པད་འདབ་བརྒྱད༔ ཕྱི་ནང་པདྨ་བཅུ་དྲུག་རྣམས༔ དཀྱིལ་འཁོར་ལྷ་ཡི་སྐུ་མདོག་དང་༔ མཐུན་པའི་རྫས་ཀྱིས་བསྒྱུབ་པར་བྱ༔ ཁྱམས་བཞི་ཕྱོགས་ཀྱི་མདོག་ཅན་ལ༔ སྒོ་གྲུ་རྟ་བབས་སྤྱི་དང་མཐུན༔ ས་མ་ཡཱ༔ རྒྱ་རྒྱརྒྱ༔ དེ་ནས་བུམ་པ་སྟ་གོན་ནི༔ མཚན་ཉིད་ལྡན་པའི་བུམ་པ་ལ༔ གུ་གུལ་བདུག་ཅིང་སྔགས་འདི་བཟླ་༔ ཨཱོཾ་བཛྲ་མ་ཧཱ་ཀྲོ་ཏ་ཧཱུྃ་ཕཊ༔ རཾ་རཾ་གནོད་བྱེད་འབྱུང་པོ་ཕཊ༔ རིགས་བཟང་ཁྱེའུ་བཀྲ་ཤིས་ཀྱི༔ ཁྲུས་བྱས་གཙང་པོའི་ཆུ་བླངས་ཤིང་༔ མཚན་ལྡན་གཟུངས་མས་བུམ་པར་བླུགས༔ སྔགས་འདི་ངག་ནས་བརྗོད་པར་བྱ༔ ཨཱོཾ་བཛྲ་ཨ་མྲྀ་ཏེ་ཧཱུྃ༔ སྨན་ལྔ་འབྲུ་ལྔ་སྙིང་པོ་ལྔ༔ རིན་ཆེན་ལྔ་དང་དྲི་ལྔ་སོགས༔ བུམ་པར་བཏབ་ཅིང་སྔགས་འདི་བརྗོད༔ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཐ་སྭཱ་ཧཱ༔ དར་སྣ་ལྔ་ཡི་ཅོད་པན་བཏགས༔ མགུལ་ཆིངས་བརྒྱན་ཅིང་སྔགས་འདི་བཟླ༔ ཨཱོཾ་བཛྲ་ཝཥྟ་ཨ་ཝེ་ཤ་ཡ༔ འབྲས་བུ་ཅན་གྱི་ཤིང་གིས་བརྒྱན༔ ཨཱོཾ་བཛྲ་མངྒ་ལཾ་སྭ་ཏི༔ ཞེས་བརྗོད་གཟུངས་ཀྱི་ཐག་པ་བཏགས༔ ཨཱོཾ་བཛྲ་པ་ཏི་ཀ་པ་ར་ལི་པི་ཏི་ཨཱོཾ་ཨཱཿཧཱུྃ༔ ཞེས་བརྗོད་དཀྱིལ་འཁོར་དབུས་སུ་བཤམས༔ ཨཱོཾ་ཛྙཱཛྙ་ན་མཎྜ་ལ་ཧཱུྃ་བྷྲཱུྃ༔ ས་མ་ཡཱ༔ རྒྱ་རྒྱ་རྒྱ༔ དཀྱིལ་འཁོར་ལྷ་དང་རྫས་དབང་སོགས༔ ཙ་ཀ་ལི་ནི་འགོད་པ་དང་༔ མཚན་ལྡན་ཐོད་པར་བྱང་སེམས་བཅས༔ མེ་ལོང་སིནྡྷུ་ར་ཡིས་མཚན༔ ཆོས་འབྱུང་ཧ་རི་ནི་ས་འབྲི༔ དར་དམར་དང་བཅས་ཐོད་པ་བཀབ༔ སྤོད་ལྡན་གཏོར་མ་རིན་ཆེན་འབར༔ རྒྱན་ལྡན་བཀའ་སྲུང་གཏོར་མ་བཤམས༔ མཚན་ལྡན་བུ་མོ་བཅུ་དྲུག་མ༔ དབང་གི་སྒོས་རྫས་རྒྱན་གྱིས་སྤྲས༔ མེ་ལོང་མན་ཤེལ་རྨ་བྱའི་སྒྲོ༔ དུང་དཀར་ཤོག་སེར་བུ་དཔེ་དང་༔ རྒྱལ་མཚན་དབང་ཞུ་རྡོ་རྗེ་དྲིལ༔ ཆོས་གོས་ཕོད་ཀ་རྣམས་ཀྱང་འགོད༔ དབང་རྫས་དགྲམ་པའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དབང་སྒྲུབ་སྟ་གོན་ནི༔ བསྙེན་སྒྲུབ་ཐེམས་པའི་རྣལ་འབྱོར་པས༔ སྐབས་སུ་སློབ་མ་འཇུག་པའི་ཚེ༔ སྒྲུབ་ཁོག་ཆེན་མོའི་ལག་ལེན་བཞིན༔ ལས་བྱང་བཞུང་བསྲང་འཛབ་ཐུན་བཟུང་༔ སྔགས་དམིགས་སྒྲུབ་པའི་སྐབས་དང་བསྟུན༔ བསྙེན་པ་ཁྲི་སྟོང་ཁ་གསོའོ༔ ས་མ་ཡཱ༔ རྒྱ་རྒྱ་རྒྱ༔ བདག་འཇུག་དམིགས་པའི་འཕྲུལ་འཁོར་གྱིས༔ དབང་བཞི་ཏིང་འཛིན་ངང་ནས་བླངས༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ཐུན་མོང་མ་ཡིན་པའི༔ སྔོན་དུ་འགྲོ་བའི་རིམ་པ་ནི༔ སྣོད་ལྡན་སློབ་བུས་ཐལ་མོ་སྦྱར༔ དཀྱིལ་འཁོར་གཉེན་པོའི་ཤར་སྒོ་ནས༔ ཕོ་བྲང་སྒོ་བར་གསོལ་འདེབས་ནི༔ ཀྱེ༔ ཁྲོ་བོ་ཆེན་པོ་མི་བཟད་གཏུམ་པའི་སྐུ༔ ཡེ་ཤེས་མཁའ་ཀློང་ཆོས་དབྱིངས་ཕོ་བྲང་ནས༔ རྒྱལ་བའི་རྣམ་འཕྲུལ་མཆོག་ཐུན་ཀུན་གྱི་བདག༔ བདག་ཅག་འདིར་ཚོགས་བླ་མ་ལྷ་དང་སྤྲོད༔ དངོས་གྲུབ་འཐོབ་ཕྱིར་ནང་དུ་གཏོང་བར་འཚལ༔ ཞེས་ལན་གསུམ་གྱིས་གསོལ་བ་གདབ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་ལས་ཀྱི་སློབ་དཔོན་གྱིས༔ ཀྱེ་ཧོ༔ ཁྱེད་ཅག་འདིར་ཚོགས་འདོད་དོན་གང་༔ གསོལ་འདེབས་འབྲས་བུ་ཅི་དགོས་ལགས༔ ཞེས་དྲི་སློབ་མས་འདི་སྐད་དོ༔ ཨེ་མ་ཧོ༔ རྡོ་རྗེ་རྒྱལ་ཐེབས་འགྲོ་བའི་མགོན༔ བདག་ཅག་འདིར་ཚོགས་རིགས་ཀྱི་བུ༔ རིག་འཛིན་འདུས་པའི་ཕོ་བྲང་དུ༔ སྨིན་གྲོལ་དངོས་གྲུབ་བསྒྲུབ་ལ་སྤྲོ༔ བདག་ཅག་བླ་མ་ལྷ་དང་སྤྲོད༔ ཅེས་ལན་གསུམ་ཞུའོ༔ དེ་ནས་རྡོ་རྗེ་རྒྱལ་ཐེབས་པས༔ ཧོ༔ འདིར་ཚོགས་སྐལ་ལྡན་རིགས་ཀྱི་བུ༔ ལས་ལྡན་དམ་ལ་གནས་ནུས་ན༔ རིག་འཛིན་བླ་མའི་ལྷ་ཚོགས་ལ༔ གསོལ་བ་ཐོབ་ལ་ནང་འདིར་ཤོག༔ དམ་མེད་ལོག་ལྟ་ཕྱིར་དེངས་ཤིག༔ ཅེས་བརྗོད་ལས་ཀྱི་སློབ་དཔོན་གྱིས༔ རྡོ་རྗེས་སྣ་ཁྲིད་ཕོ་བྲང་ལ༔ ཕྱག་དང་སྐོར་བ་གསུམ་གསུམ་བྱས༔ སྒོ་ནང་ཡོལ་བའི་ཕྱི་རོལ་འཁོད༔ ས་མ་ཡཱ༔ རྒྱ་རྒྱ་རྒྱ༔ རྡོ་རྗེ་གིང་གིས་ཆུ་ཡིས་སྦྱངས༔ ཤུ་ནྱ་ཏ་ཡི་སྔགས་ཀྱང་བརྗོད༔ རིན་ཆེན་གིང་གིས་དུད་པས་བདུག༔ ཧཱུྃ་བཞིའི་སྔགས་ཀྱིས་སྦྱང་བར་བྱ༔ པདྨ་གིང་གིས་མེ་ཐུན་བྲབ༔ ཛྭ་ལ་རཾ་གྱིས་བསྲེག་པར་བྱ༔ ལས་ཀྱི་གིང་གིས་ཐུན་སྣ་གཏོར༔ དམ་མེད་ལོག་ལྟ་རྡུལ་དུ་བརླག༔ དམ་ཚིག་ལྡན་བའི་སྔགས་པ་དགུས༔ རོལ་མོ་ལྡིར་ཞིང་དྲག་སྔགས་བཟླ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྡོ་རྗེ་སློབ་དཔོན་ལ༔ ཐལ་སྦྱར་གསོལ་བ་འདི་ལྟར་གདབ༔ ཀྱེ་སངས་རྒྱས་ཀུན་གྱི་རང་བཞིན་སྐུ༔ ཐུགས་རྗེ་ཆེར་ལྡན་འགྲོ་བའི་སྐྱབས༔ བདག་ཅག་འཁོར་བའི་སྡུག་བསྔལ་ལས༔ འདྲེན་ཕྱིར་དབང་དང་དངོས་གྲུབ་སྩོལ༔ ཅེས་ལན་གསུམ་ཞུའོ༔ བླ་མས༔ ཧོ་འདིར་ཚོགས་སྐལ་ལྡན་རིགས་ཀྱི་བུ༔ རིག་འཛིན་ཡོངས་འདུས་ཕོ་བྲང་འདིར༔ འཇུག་ནས་དམ་ལ་གནས་ནུས་སམ༔ རིག་འཛིན་ཡོངས་འདུས་དབང་སྒྲུབ་འདི༔ སྔོན་ཆད་འཛམ་གླིང་མ་གྲགས་ཤིང་༔ མཁའ་འགྲོའི་གསང་མཛོད་གཏེར་ཁ་ནས༔ གཏད་རྒྱ་བརྒྱུད་དེ་བདག་ལ་བབས༔ མཆོག་ཐུན་དངོས་གྲུབ་ཚེ་འདིར་འཐོབ༔ དམ་ཚིག་གསུམ་ལས་མི་འདའ་ན༔ མཆོག་ཐུན་དངོས་གྲུབ་སྦྱིན་པར་བྱ༔ དམ་ལས་འདའ་ན་དམྱལ་བར་བསྲེག༔ དེ་བས་ད་ལྟ་ཕྱིར་དེངས་ཤིག༔ ཅེས་བརྗོད་ལན་དུ༔ རིག་འཛིན་དཀྱིལ་འཁོར་ལྷ་ཚོགས་དང་༔ དཔལ་ལྡན་བླ་མ་དགོངས་སུ་གསོལ༔ བདག་ཅག་སྔོན་སྦྱངས་ལས་འཕྲོ་ཅན༔ གསང་བའི་དཀྱིལ་འཁོར་ཆེན་པོ་འདིར༔ ཞུགས་ཏེ་སྨིན་གྲོལ་དངོས་གྲུབ་སྩོལ༔ དམ་ཚིག་བཀའ་ལས་བདག་མི་འདའ༔ ཞེས་ཞུའོ༔ ས་མ་ཡཱ༔ རྒྱ་རྒྱ་རྒྱ༔ མིག་དར་བཀབ་ཅིང་ཡོལ་བ་བཀྲོལ༔ རྡོ་རྗེ་སེམས་དཔའི་སྒོམ་བཟླས་འབོགས༔ ཁྲུས་ནས་ཕྱུང་བ་འདི་སྐད་དོ༔ ཧཱུྃ་ཧྲཱི༔ ལས་ཀྱི་བུམ་པ་སྟོན་པ་རྡོ་རྗེ་སེམས༔ འོད་དུ་ཞུ་བ་ཐུགས་རྗེའི་ཆུ་ཡིས་གང་༔ དག་པར་བཀྲུས་པས་སྒོ་གསུམ་སྒྲིབ་པ་སྦྱངས༔ ནང་དུ་འཐུང་ན་དངོས་གྲུབ་ཚེ་འདིར་འཐོབ༔ དེས་ན་ཁྱེད་ཅག་ལས་ངན་ཀུན་དག་ནས༔ དབང་བཞི་སྦྱིན་པའི་སྣོད་དུ་རུང་བར་ཤོག༔ ཨཱོཾ་བཛྲ་ས་ཏྭ་ཧཱུྃ༔ ཤུངྔྷེ་ཤུངྔྷེ་ཨཱ༔ ཞེས་བུམ་ཆུས་བཀྲུའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གླུད་གཏོར་བསྔོ་ཞིང་བགེགས་བསྐྲད་དྲག་ཏུ་བྱ༔ རོལ་མོ་འཁྲོལ་ཞིང་གིང་པ་རྒྱུག༔ སློབ་མས་ཐལ་སྦྱར་གསེར་དངུལ་གཡུ༔ མཎྜལ་ཕུལ་ལ་འདི་སྐད་ཞུ༔ ཨེ་མ་རྡོ་རྗེ་རྒྱལ་པོ་ཆེ༔ རིག་འཛིན་ལྷ་ཚོགས་སྤངས་ནས་ཀྱང་༔ སྐྱོབ་པ་གཞན་ན་མ་མཆིས་པས༔ ཁྱོད་ཀྱི་ཐུགས་རྗེས་བཟུང་དུ་གསོལ༔ ཅེས་ལན་གསུམ་ཞུའོ༔ བླ་མས་གནང་བ་བྱིན་ཞིང་༔ ཀྱེ་ཧོ༔ ཁྱེད་རྣམས་བསོད་ནམས་བསགས༔ རིག་འཛིན་རོལ་པའི་དཀྱིལ་འཁོར་འདིར༔ ཁྱེད་རྣམས་བདག་གིས་སྨིན་པར་བྱ༔ འདོད་པའི་དངོས་གྲུབ་སྦྱིན་པར་བྱ༔ ཞེས་བརྗོད་ཡོན་འབུལ་གྲལ་ལ་འཁོད༔ བསྲུང་སྐུད་སོ་ཤིང་ཀུ་ཤ་རྣམས༔ སྒྲུབ་པའི་ཁོག་འབུབ་ནང་ལྟར་སྦྱིན༔ ས་མ་་ཡཱ༔ རྒྱ་རྒྱ་རྒྱ༔ དེ་ནས་གནས་གསུམ་དུ་དྲི་ཡིས་ཐིག་ལེ་བྱ་ཞིང་བྱིན་དབབ༔ མེ་ཏོག་ལག་ཏུ་ཐོགས་ཤིང་དཀྱིལ་འཁོར་ལ་དོར་ཏེ་འདི་སྐད་དོ༔ ཧཱུྃ་གསང་འདུས་རིག་འཛིན་ལྷ་ཚོགས་ལ༔ བདག་གི་ཚེ་རབས་ལས་ཀྱི་ལྷ༔ གང་ཡིན་བརྟག་ཕྱིར་མེ་ཏོག་དབུལ༔ ཚེ་རབས་སྔོན་གྱི་ལྷ་ལ་ཕོབ༔ ཨཱོཾ་བཛྲ་པུཥྤེ་པྲ་ཏི་ཙ་གྷྲི་ཧ་ན་ཧོ༔ ཞེས་དོར་ལྷ་ངོ་སྤྲད་ཅིང་སྒོམ་བཟླས་འབོགས༔ ལས་བཞི་ཕྲན་ཚེགས་དཀྲོལ་ཏེ་བཤད༔ ཤར་དུ་རྡོ་རྗེ་བཞད་པ་རྩལ༔ ལྷོ་རུ་རྡོ་རྗེ་དགའ་བ་རྩལ༔ ནུབ་ཏུ་རྡོ་རྗེ་དབང་སྡུད་རྩལ༔ བྱང་དུ་རྡོ་རྗེ་དྲག་པོ་རྩལ༔ དབུས་སུ་རིག་འཛིན་ཐོད་པ་རྩལ༔ མཚམས་བཞིར་རྡོ་རྗེ་རིན་ཆེན་དང་༔ པདྨ་ཀརྨ་དབང་ལྡན་རྩལ༔ བུད་མེད་རྣམས་ལ་ལས་་བཞི་དང་༔ མཐུན་པའི་བདེ་འབྱིན་རྩལ་ཞེས་བཏགས༔ དབུས་སུ་ལྷ་ལྕམ་བདེ་འབྱིན་ནོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གསོལ་བ་འདི་ལྟར་གདབ༔ ཐུགས་རྗེའི་བདག་ཉིད་འདྲེན་པའི་གཙོ༔ བདག་ནི་ལས་ཉོན་རྨོངས་པས་བསྒྲིབས༔ མ་རིག་རྨོངས་པའི་ལིང་ཏོག་འདི༔ ད་ལྟ་ཉིད་དུ་བསལ་དུ་གསོལ༔ ཞེས་ཞུའོ༔ དེ་ནས་སློབ་དཔོན་གྱིས་གསེར་ཐུར་ཐོགས་ཏེ༔ ཧཱུྃ་ཧྲཱི༔ སྔོན་གྱི་མིག་མཁན་རྒྱལ་པོ་ཡིས༔ མ་རིག་རྨོངས་པའི་མིག་བསལ་ལྟར༔ ཁྱོད་ཀྱི་ཉོན་མོངས་སྒྲིབ་པའི་མིག༔ བདག་གིས་ཡེ་ཤེས་སྤྱན་དུ་དབྱེ༔ ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ༔ དཀྱིལ་འཁོར་གྱི་རྣམ་དག་བཤད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དམ་ཚིགས་བསྒྲགས་ཏེ་སྤྱི་བོར་རྡོ་རྗེ་བཞག་ལ༔ ཧཱུྃ་ཧྲཱི༔ འདི་ནི་སངས་རྒྱས་ཀུན་གྱི་དཔལ༔ གསང་བ་བླ་མེད་མཆོག་གི་ཆོས༔ གནས་ཁང་འདི་ཡི་ཕྱི་རོལ་དུ༔ དམ་མེད་རྣམས་ལ་སྨྲ་མི་བྱ༔ གལ་སྲིད་སྨྲ་ན་ཉམས་པར་འགྱུར༔ ས་མ་ཡཱ༔ རྒྱ་རྒྱ་རྒྱ༔ དེ་ནས་མགྲིན་པར་བཞག་ལ༔ ཧཱུྃ་ཧྲཱི༔ རིག་འཛིན་རོལ་པ་ཆེན་པོ་ལས༔ སྦྱོར་དང་སྒྲོལ་བ་བླ་ན་མེད༔ ཤ་ལྔ་བདུད་རྩི་གསང་བའི་རྫས༔ དམ་མེད་རྣམས་ལ་མ་སྨྲ་ཞིག༔ ས་མ་ཡཱ༔ རྒྱ་རྒྱ་རྒྱ༔ བཛྲ་ཧཱུྃ༔ དེ་ནས་སྙིང་གར་བཞག་སྟེ༔ ཧཱུྃ་ཧྲཱི༔ ད་སྟེ་བླ་མ་བདེ་མཆོག་རྩལ༔ སྐལ་ལྡན་ཁྱོད་དང་གཉིས་སུ་མེད༔ རང་བྱུང་རིག་པ་ཆོས་ཀྱི་དབྱིངས༔ མ་བཅོས་སྤྲོས་བྲལ་ངོ་བོ་ཉིད༔ གཞན་ལ་སྨྲ་ན་ཉམས་ཏེ་རལ༔ ཨཱོཾ་ཨཱཿ་ཧཱུྃ་ས་མ་ཡཱ༔ དེ་ནས་ལས་བུམ་ཆུ་དང་བདུད་རྩི་བསྲེས་ལ་སྦྱིན་ཞིང་༔ ཧཱུྃ་ཧྲཱི༔ འདི་ནི་དམ་ཚིག་གསང་བའི་ཆུ༔ དམ་ཚིག་སྲུང་ན་དངོས་གྲུབ་འཐོབ༔ དམ་ཚིག་ཉམས་ན་དམྱལ་བར་བསྲེག༔ ཡང་དག་རྡོ་རྗེ་ཆུ་འདིས་འགྲུབ༔ ས་མ་ཡ་ཨི་དནྟི་བྷཀྴ་སི་ཧཱུྃ༔ དེ་ནས་རྡོ་རྗེ་འབར་བའི་ཕྱག་རྒྱ་སྤྱི་བོར་བཞག་ལ༔ ཧཱུྃ་ཧྲཱི༔ ང་ནི་བཅོམ་ལྡན་བདེ་མཆོག་རྩལ༔ སྐལ་ལྡན་རིགས་ཀྱི་བུ་ཁྱེད་ཀྱི༔ རྡོ་རྗེ་སློབ་དཔོན་ང་ཡིན་པས༔ ང་ཡིས་ཇི་ལྟར་བསྒོ་བའི་བཀའ༔ ཁྱོད་ཀྱིས་འདའ་བར་མི་རུང་ངོ༔ ང་ཡི་བཀའ་དང་དམ་འདས་ན༔ མནར་མེད་གནས་སུ་སྐྱེ་ཏ་རེ༔ དེ་བས་དམ་ཚིག་ཡང་དག་སྲུངས༔ ཨཱོཾ་ཨཱཿཧཱུྃ་བཛྲ་ས་མ་ཡཱ་ཡཀྴ་ཧཱུྃ་ཛ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སློབ་མ་སྔགས་ཀྱིས་སྦྱངས༔ ལངས་ཏེ་སྤྱི་བོར་ཐལ་མོ་སྦྱར༔ བསྐྱེད་རིམ་གཏད་ཅིང་ལྷ་རུ་བསྒོམས༔ སྙིང་དཀྱིལ་རྡོ་རྗེ་ཕག་མོ་ནི༔ མན་ངྷ་རཱ་བ་སྐུ་མདོག་དམར༔ བརྐྱང་བསྐུམ་གྲི་ཐོད་གར་སྟབས་འཁྲབ༔ ཐུགས་ཀར་གཡུང་དྲུང་ར་བཞི་ལ༔ ཧ་རི་ནི་ས་འབྲུ་བཞི་པོ༔ དྲག་ཏུ་གཡས་སུ་འཁོར་བ་ཡིས༔ གཡུང་དྲུང་གཡོན་དུ་འཁོར་བར་བསམས༔ མ་ཡེངས་ཤེས་པ་རྩེ་གཅིག་གཏད༔ ལྷ་ཚོགས་སྤྱན་དྲངས་སློབ་མར་བསྟིམ༔ རཀྟ་ཤ་ཆེན་གུ་གུལ་དང་༔ བདུད་རྩི་ལྔ་དང་མི་ཀླད་དང་༔ བྱི་ལའི་བྲུན་དང་སྐྲ་སེན་དང་༔ ར་ཡི་ཉྭ་བཞིའི་ཤ་དང་ནི༔ སྤོས་དཀར་སྲེག་ལ་རོལ་མོ་འཁྲོལ༔ ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་རྡོ་རྗེ་སྤྱི་བོར་བཞག༔ བྱིན་རླབས་ཡེ་ཤེས་ཕེབས་པའི་རྟགས༔ འཁྲབ་དང་འདར་དང་ངུ་དང་རྒོད༔ སཾ་སྐྲྀ་ཏ་ཡི་སྐད་སྨྲ་ཞིང་༔ བདེ་གསལ་མི་རྟོགས་ཉམས་མྱོང་འབར༔ དངོས་གྲུབ་ཐོབ་རྟགས་ཨེ་མ་ཧོ༔ རྟགས་རྣམས་རིམ་པར་མ་གསལ་བར༔ བསྐྱར་ཏེ་གནད་དུ་དབབ་པར་བྱ༔ དེ་དག་ཐུན་མོང་མ་ཡིན་པའི༔ སྔོན་དུ་འགྲོ་བའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིའི་རིམ་པ་ནི༔ བུམ་པ་སྐུ་དང་ཕྱག་མཚན་དང་༔ རྫས་དང་ལྷ་དབང་ཡོངས་རྫོགས་ཀྱིས༔ སྐལ་ལྡན་སློབ་མ་སྨིན་གྲོལ་བཀོད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྣོད་ལྡན་སློབ་མ་ཡིས༔ འདེམས་རྐྱང་མེད་པའི་མོས་གུས་ཀྱིས༔ དངོས་གཞིའི་ལྷ་དབང་ཞུ་བའི་དོན༔ ཐལ་སྦྱར་གསོལ་བ་འདི་ལྟར་གདབ༔ ཧཱུྃ༔ དུས་གསུམ་སངས་རྒྱས་འདུས་པའི་སྐུ༔ དཔལ་ལྡན་བླ་མ་མཆོག་གི་རྒྱལ༔ བདག་ཅག་འདིར་ཚོགས་བུ་རྣམས་ལ༔ དབང་མཆོག་དམ་པ་བསྐུར་དུ་གསོལ༔ ལན་གསུམ་བརྗོད༔ དེ་ནས་རྡོ་རྗེ་སློབ་དཔོན་གྱིས༔ རྣམ་རྒྱལ་བུམ་པ་སྤྱི་བོར་བཞག༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ་ཧྲཱི༔ ཕྱི་ནི་བུམ་པ་ནང་ནི་གཞལ་ཡས་ཁང་༔ བཅུད་ནི་འཁོར་ལོ་བདེ་མཆོག་ཡབ་ཡུམ་སྐུ༔ དུས་གསུམ་སངས་རྒྱས་ཀུན་དང་འདུ་འབྲལ་མེད༔ མཚན་དཔེ་ཡོངས་རྫོགས་གར་གྱི་ཧེ་རུ་ཀ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ལུས་ངག་ཡིད་གསུམ་སྨིན་ཅིང་གྲོལ་བར་ཤོག༔ ཨཱོཾ་བཛྲ་མ་ཧཱ་གུ་རུ་ཀཱ་ཡ་ཨ་བྷི་ཥིཉྩ་ཨཱོཾ་ཨཱོཾ༔ སྤྱི་བོར་བསྐུར་ཞིང་བུམ་ཆུ་བླུད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གཙོ་བོ་ཡབ་ཡུམ་གྱི་སྐུ་སྤྱི་བོར་བཞག་ལ༔ ཧཱུྃ་ཧྲཱི༔ ཆོས་དབྱིངས་སྐྱེ་མེད་མ་བཅོས་ཐུགས་རྗེའི་རྩལ༔ འགག་མེད་རོལ་པ་འཁོར་ལོ་བདེ་མཆོག་དཔལ༔ གང་ལ་གང་འདུལ་གར་མཁན་ཧེ་རུ་ཀ༔ དབྱིངས་ཀྱི་ཡུམ་མཆོག་ལྷ་ལྕམ་མནྡྷ་རཱ༔ ཡབ་ཡུམ་གཉིས་སུ་མེད་པའི་དབང་མཆོག་འདི༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཨཱོཾ་བཛྲ་མ་ཧཱ་གུ་རུ་ཛྙཱ་ན་ཀཱ་ཡ་ཏིཥྛ་ཨ་བྷི་ཥིཉྩ་ཨཱོཾ༔ རིག་འཛིན་གྱི་དབང་ཕྱུག་ཧེ་རུ་ཀཿདཔལ་ཆེན་པོ་འཁོར་ལོ་བདེ་མཆོག་ཡབ་ཡུམ་གྱི་སྐུ་ཡི་དབང་ཐོབ་པར་གྱུར་ཅིག༔ ཅེས་བརྗོད་མེ་ཏོག་གཏོར༔ ས་མ་ཡཱ༔ རྒྱ༔ དུར་ཁྲོད་རྫས་ཀྱི་དབང་ལ་རིམ་པ་གསུམ་སྟེ༔ ཧེ་རུ་ཀཿཡི་དཔལ་གྱི་ཆས༔ དུར་ཁྲོད་ཆས་ལྡན་དྲག་པོའི་ཆས༔ ཕྱག་མཚན་བརྡ་མཚོན་རྫས་ཀྱི་ཆས༔ ས་མ་ཡཱ༔ རྒྱ་༔ དེ་ནས་ཐོག་མར་ཧེ་རུ་ཀའི་ཆས་ཀྱི་དབང་བསྐུར་བ་ནི༔ ཐོད་སྐམ་རཏྣའི་རྩེ་བྲན་ཅན༔ པྲོག་ཞུ་སློབ་མའི་སྤྱི་བོར་སྐོན༔ ཧཱུྃ་ཧྲཱི༔ ཐོད་སྐམ་པྲོག་ཞུ་རིན་ཆེན་རྩེ་བྲན་བརྒྱན༔ ཁྲག་འཐུང་རིགས་ལྔ་ཡོངས་སུ་རྫོགས་པའི་དཔལ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རིན་ཆེན་ཐོད་སྐམ་དབུ་རྒྱན་དབང་ཐོབ་ཤོག༔ ཨཱོཾ་རཏྣ་ཨ་བྷི་ཥིཉྩ་ཨཱ༔ དར་གྱི་སྟོད་གཡོགས་སྨད་དཀྲིས་སྐོན་ལ༔ ཧཱུྃ་ཧྲཱི༔ སྣ་ཚོགས་དར་ལ་རེག་འཇམ་ལྷ་ཡི་གོས༔ ལྷབ་ལྷུབ་རྒྱན་ལྡན་སྟོད་གཡོགས་སྨད་ཀྱི་དཀྲིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ན་བཟའ་སྟོད་གཡོགས་སྨད་དཀྲིས་དབང་ཐོབ་ཤོག༔ ཨཱོཾ་ནི་ར་གྷི་ཨ་བྷི་ཥིཉྩ་ཧཱུྃ༔ ཨུཏྤལ་མེ་ཏོག་ཕྲེང་བའི་དོ་ཤལ་སྐོན་ལ༔ ཧཱུྃ་ཧྲཱི༔ བཀྲ་ཤིས་ལྷ་རྫས་མེ་ཏོག་ཨུཏྤལ་འཕྲེང་༔ དུས་གསུམ་རྒྱལ་བའི་ཆས་ཏེ་དྲི་མེད་རྫས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དོ་ཤལ་མེ་ཏོག་ཕྲེང་བའ་ིདབང་ཐོབ་ཤོག༔ ཨཱོཾ་བཛྲ་པུཥྤེ་ཛྙཱ་ན་མ་ལེ་ཨ་བྷི་ཥིཉྩ་ཧཱུྃ༔ སྙན་རྒྱན་སློབ་མའི་རྣ་བར་སྐྱོན་ལ༔ ཧཱུྃ་ཧྲཱི༔ རིན་ཆེན་སྣ་ཚོགས་སྙན་རྒྱན་བླ་ན་མེད༔ བདེ་གཤེགས་རྒྱལ་བའི་རྒྱན་མཆོག་དམ་པ་འདིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རིན་ཆེན་སྙན་རྒྱན་འབར་བའི་དབང་ཐོབ་ཤོག༔ ཨཱོཾ་བྷ་ཏ་རཏྣ་ཨ་བྷི་ཥིཉྩ་ཧཱུྃ༔ མགུལ་རྒྱན་སྐོན་ལ་འདི་སྐད་དོ༔ ཧཱུྃ་ཧྲཱི༔ མེ་ཤེལ་ཆུ་ཤེལ་ཨིཎྜ་ནཱི་ལ་སོགས༔ རྒྱལ་བའི་མགུལ་རྒྱན་རིན་ཆེན་སྣ་ཚོགས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མགུལ་རྒྱན་རིན་ཆེན་འབར་བའི་དབང་ཐོབ་ཤོག༔ ཨཱོཾ་བཛྲ་ཛྙཱ་ན་ཨ་བྷི་ཥིཉྩ་ཧཱུྃ༔ དཔུང་རྒྱན་བཏགས་ཏེ༔ ཧཱུྃ་ཧྲཱི༔ རྒྱན་མཆོག་དམ་པ་དཔུང་རྒྱན་དཔལ་གྱི་ཆས༔ རྒྱལ་བའི་དཔུང་རྒྱན་རིན་ཆེན་སྣ་ཚོགས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔུང་རྒྱན་རིན་ཆེན་འབར་བའི་དབང་ཐོབ་ཤོག༔ ཨཱོཾ་བཛྲ་ཛྙཱ་ན་མ་ཎི་ཨ་བྷི་ཥིཉྩ་ཧཱུྃ༔ གདུ་བུ་བཞི་དཀྲིས་ཏེ༔ ཧཱུྃ་ཧྲཱི༔ ཕྱག་ཞབས་གདུ་བུ་རིན་ཆེན་དཔལ་གྱི་ཆས༔ རིན་ཆེན་སྣ་ཚོགས་རྒྱན་ཕྲེང་འོད་དུ་འབར་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཕྱག་ཞབས་གདུ་བུ་རྣམ་བཞིའི་དབང་ཐོབ་ཤོག༔ ཨཱོཾ་བཛྲ་ཛྙཱ་ན་སརྦ་རཏྣ་ཨ་བྷི་ཥིཉྩ་ཧཱུྃ༔ རུས་པའ་ིརྒྱན་བཏགས་ཏེ༔ ཧཱུྃ་ཧྲཱི༔ དུར་ཁྲོད་རུས་དུམ་སྟོད་དང་སྨད་ཀྱི་རྒྱན༔ རྒྱལ་བ་རྣམས་ཀྱི་རྒྱན་མཆོག་རུས་འཕྲེང་གིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རིན་ཆེན་དུར་ཁྲོད་རུས་རྒྱན་དབང་ཐོབ་ཤོག༔ ཨཱོཾ་བཛྲ་ཛྙཱ་ན་བྷ་དྲ་གུ་ན་ཨ་བྷི་ཥིཉྩ་ཧཱུྃ༔ དར་དཔྱངས་ཏེ༔ ཧཱུྃ་ཧྲཱི༔ བཀྲ་ཤིས་དར་ལ་སྣ་ཚོགས་ཅོད་པན་འཕུར༔ མ་འདྲེས་ཆོས་རྣམས་སོ་སོར་སྟོན་པའི་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྣ་ཚོགས་དར་དཔྱངས་ཅོད་པན་དབང་ཐོབ་ཤོག༔ ཨོཾ་བཛྲ་ཛྙཱ་ན་མ་ཧཱ་ཀཱ་རུ་ནི་ཀཱ་ཡ་ཨ་བྷི་ཥིཉྩ་ཧཱུྃ༔ ཞི་བ་དཔལ་ཆེན་པོ་ཧེ་རུ་ཀའི་ཆས་ཀྱི་དབང་ཐོབ་པར་གྱུར་ཅིག༔ ཅེས་བརྗོད་མེ་ཏོག་གཏོར༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དུར་ཁྲོད་རྒྱན་ལྡན་དྲག་པོའི་ཆས་ཀྱི་དབང་ནི༔ ཐོད་ཕྲེང་སྐོན་ནས༔ ཧཱུྃ་ཧྲཱི༔ ང་རྒྱལ་མ་སྤངས་མཉམ་ཉིད་ངང་དུ་གྲོལ༔ ཚར་གསུམ་ཐོད་ཕྲེང་སྐུ་གསུམ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿཡི་བརྟུལ་ཞུགས་དབང་ཐོབ་ཤོག༔ གླང་ཆེན་ཀོ་རློན་སྐོན་ལ༔ ཧཱུྃ་ཧྲཱི༔ གཏི་མུག་མ་སྤངས་ཆོས་དབྱིངས་ངང་དུ་གྲོལ༔ གླང་ཆེན་ཀོ་རློན་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ སྦྲུལ་གྱི་ཆུན་པོ་དཀྲིས་ལ༔ ཧཱུྃ་ཧྲཱི༔ ཞེ་སྡང་མ་སྤངས་མེ་ལོང་ངང་དུ་གྲོལ༔ སྦྲུལ་གྱི་ཆུན་པོ་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ མི་ལྤགས་སྐོན་ལ༔ ཧཱུྃ་ཧྲཱི༔ འདོད་ཆགས་མ་སྤངས་སོར་རྟོག་ངང་དུ་གྲོལ༔ མི་ལྤགས་གཡང་གཞི་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ སྟག་ཤམ་སྐོན་ལ༔ ཧཱུྃ་ཧྲཱི༔ ཕྲག་དོག་མ་སྤངས་བྱ་གྲུབ་དབྱིངས་སུ་གྲོལ༔ སྟག་གི་ཤམ་ཐབས་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ རཀྟས་བརྒྱན་ཅིང་༔ ཧཱུྃ་ཧྲཱི༔ ཁམས་གསུམ་སྐྱེ་འགྲོ་དབང་དུ་བསྡུ་བའི་ཕྱིར༔ རཀྟའི་ཐིག་ལེ་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ ཞག་གི་སོར་རིས་བྱུག་ཅིང་༔ ཧཱུྃ་ཧྲཱི༔ ཁྲག་འཐུང་རྔམ་བརྗིད་འབར་བའི་སྐུ་མངའ་ཕྱིར༔ ཞག་གི་སོ་རིས་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ ཐལ་ཆེན་བྱུག་ཅིང་༔ ཧཱུྃ་ཧྲཱི༔ གདུག་པའི་དགྲ་བགེགས་མ་ལུས་འདུལ་བའི་ཕྱིར༔ ཐལ་ཆེན་ཚོམ་བུ་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ གཤོག་པ་སྐྱོན་ཏེ༔ ཧཱུྃ་ཧྲཱི༔ ཐོགས་མེད་རྫུ་འཕྲུལ་ཐབས་ཀྱི་རང་བཞིན་ལས༔ རྡོ་རྗེའི་གཤོག་པ་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ མེ་དཔུང་གཏད་དེ༔ ཧཱུྃ་ཧྲཱི༔ མ་རིག་ཉོན་མོངས་བག་ཆགས་དབྱིངས་སུ་བསྲེག༔ ཡེ་ཤེས་མེ་དཔུང་དཔའ་བོ་རྟགས་ཀྱི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཧེ་རུ་ཀཿདཔལ་བརྟུལ་ཞུགས་དབང་ཐོབ་ཤོག༔ ཡུམ་གྱི་ཆས་རྣམས་གཏད་ལ༔ ཧཱུྃ་ཧྲཱི༔ ཤེས་རབ་རྣམ་དག་ཡུམ་གྱི་མཁའ་ཀློང་ནས༔ གཟིག་ཤམ་རུས་རྒྱན་དར་དཔྱངས་དཔའ་མོའི་རྒྱ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡེ་ཤེས་འཇིག་རྟེན་མཁའ་འགྲོའི་དབང་ཐོབ་ཤོས༔ ཨཱོཾ་ཤྲཱི་ཧེ་རུ་ཀཿས་མ་ཡེ་ཤྲཱི་ཡེ་ཧཱུྃ་སྭཱ་ཧཱ༔ ངྷརྨཱ་ངྷརྟུ་ཛྙཱ་ན་ཨ་བྷི་ཥིཉྩ་ཧཱུྃ༔ ཕྱག་མཚན་བརྡ་མཚོན་རྫས་ཀྱི་དབང་ནི༔ རྡོ་རྗེ་རྩེ་ལྔ་པ་གཡས་སུ་གཏད་ལ༔ ཧཱུྃ་ཧྲཱི༔ རྡོ་རྗེ་རྩེ་ལྔ་ཡེ་ཤེས་ལྔ་ཡི་དངོས༔ ཉོན་མོངས་དུག་ལྔ་འཇོམས་པའི་རྫས་ཀྱི་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཐབས་ཀྱི་ཕྱག་རྒྱ་རྡོ་རྗེའི་དབང་ཐོབ་ཤོག༔ ཛྙཱ་ན་བཛྲ་ཨ་བྷི་ཥིཉྩ་ཨཱཾ༔ དྲིལ་བུ་གཡོན་དུ་གཏད་ལ༔ ཧཱུྃ་ཧྲཱི༔ ཆོས་དབྱིངས་སྒྲ་སྒྲོག་ཤེས་རབ་དྲིལ་བུ་འདི༔ གསུང་དབྱངས་དྲུག་ཅུ་མ་འགགས་རྫས་ཀྱི་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཤེས་རབ་ཕྱག་རྒྱ་དྲིལ་བུའི་དབང་ཐོབ་ཤོག༔ ངྷརྨཱ་ངྷརྟུ་ཤཔྟ་ཨ་བྷི་ཥིཉྩ་ཨཱོཾ༔ དེ་ནས་ཡུམ་གྱི་ཕྱག་མཚན་སྦྱིན་ཏེ༔ ཧཱུྃ་ཧྲཱི༔ གྲི་གུག་འབར་བས་སྐྱེ་ཤི་རྩད་ནས་གཅོད༔ འཕྲིན་ལས་ཐོགས་མེད་རྫས་ཀྱི་དབང་མཆོག་འདིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཕྲིན་ལས་ཕྱག་རྒྱ་གྲི་གུག་དབང་ཐོབ་ཤོག༔ ཐོད་ཁྲག་སྦྱིན་ལ༔ ཧཱུྃ་ཧྲཱི༔ བྷནྡྷ་འབར་བས་ཁམས་གསུམ་ཁྲག་གི་རོལ༔ ཡོན་ཏན་མ་ལུས་རྫོགས་པ་དཔལ་གྱི་རྫས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡོན་ཏན་ཕྱག་རྒྱ་ཐོད་ཁྲག་དབང་ཐོབ་ཤོག༔ ཨཱོཾ་བྷན་ངྷ་ཛྙཱ་ན་ཨ་བྷི་ཥིཉྩ་ཨཱ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དཀྱིལ་འཁོར་ལྷ་དབང་བསྐུར་བ་སྟེ༔ ས་གནས་རིག་འཛིན་ཡབ་ཡུམ་གྱི་དབང་བསྐུར་བ་ནི༔ ཧཱུྃ་ཧྲཱི༔ ཆོས་དབྱིངས་མེ་ལོང་ཡེ་ཤེས་གཞལ་ཡས་ནས༔ ས་ལ་གནས་པའི་རིག་འཛིན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་ས་གནས་རིག་འཛིན་དབང་ཐོབ་ཤོག༔ དེ་ནས་ཚེ་དབང་རིག་འཛིན་ཡབ་ཡུམ་གྱི་དབང་བསྐུར་བ་ནི༔ ཧཱུྃ་ཧྲཱི༔ ཆོས་དབྱིངས་མཉམ་ཉིད་ཡེ་ཤེས་གཞལ་ཡས་ནས༔ ཚེ་ལ་དབང་བའི་རིག་འཛིན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་ཚེ་དབང་རིག་འཛིན་དབང་ཐོབ་ཤོག༔ དེ་ནས་ཕྱག་རྒྱའི་རིག་འཛིན་ཡབ་ཡུམ་གྱི་དབང་ནི༔ ཧཱུྃ་ཧྲཱི༔ ཆོས་དབྱིངས་སོར་རྟོག་ཡེ་ཤེས་གཞལ་ཡས་ནས༔ ཕྱག་རྒྱ་ཆེན་པོའི་རིག་འཛིན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་ཕྱག་རྒྱའི་རིག་འཛིན་དབང་ཐོབ་ཤོག༔ དེ་ནས་ལྷུན་གྲུབ་རིག་འཛིན་ཡབ་ཡུམ་གྱི་དབང་བསྐུར་བ་ནི༔ ཧཱུྃ་ཧྲཱི༔ ཆོས་དབྱིངས་བྱ་གྲུབ་ཡེ་ཤེས་གཞལ་ཡས་ནས༔ ལྷུན་གྱིས་གྲུབ་པའི་རིག་འཛིན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་ལྷུན་གྲུབ་རིག་འཛིན་དབང་ཐོབ་ཤོག༔ ཚེ་རབས་སློབ་དཔོན་ཡབ་ཡུམ་གྱི་དབང་ནི༔ ཧཱུྃ་ཧྲཱི༔ རྣམ་དག་སྨོན་ལམ་ཀློང་ནས་སྐུར་བཞེངས་པ༔ ཚེ་རབས་ལས་ཀྱི་སློབ་དཔོན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་ཚེ་རབས་སློབ་དཔོན་དབང་ཐོབ་ཤོག༔ དམ་ཚིག་སློབ་དཔོན་ཡབ་ཡུམ་གྱི་དབང་ནི༔ ཧཱུྃ་ཧྲཱི༔ རྣམ་དག་དམ་ཚིག་ཀློང་ནས་སྐུར་བཞེངས་པ༔ དམ་ཚིག་དབང་གི་སློབ་དཔོན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་དབང་གི་སློབ་དཔོན་དབང་ཐོབ་ཤོག༔ མན་ངག་སློབ་དཔོན་ཡབ་ཡུམ་གྱི་དབང་ནི༔ ཧཱུྃ་ཧྲཱི༔ རྣམ་དག་རྒྱུད་ལུང་ཀློང་ནས་སྐུར་བཞེངས་པ༔ མན་ངག་ལུང་གི་སློབ་དཔོན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དུས་གསུམ་ལུང་གི་སློབ་དཔོན་དབང་ཐོབ་ཤོག༔ ཉམས་ཆག་སྐོང་མཛད་ཡབ་ཡུམ་གྱི་དབང་ནི༔ ཧཱུྃ་ཧྲཱི༔ སྒྲིབ་གཉིས་རྣམ་དག་ཀློང་ནས་སྐུར་བཞེངས་པ༔ ཉམས་ཆག་སྐོང་བའི་སློབ་དཔོན་ཡབ་ཡུམ་སྐུ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཉམས་ཆག་རྟོག་སྒྲིབ་བསྐང་བའི་དབང་ཐོབ་ཤོག༔ བྷོ་ངྷི་ས་ཏྭ་ཤྭ་ར་གྷིརྟི་ཛྙཱ་ན་ཨ་བྷི་ཥིཉྩ་ཧཱུྃ༔ དེ་ནས་གྲུབ་ཆེན་བརྒྱད་ཀྱི་དབང་ནི༔ ཧཱུྃ་ཀ་ར་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ ཤར་ཕྱོགས་བསིལ་བ་ཚལ་གྱི་དུར་ཁྲོད་དུ༔ ཡང་དག་གྲུབ་པའི་སློབ་དཔོན་ཧཱུྃ་ཀ་ར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ འཇམ་དཔལ་བཤེལ་གཉེན་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ ལྷོ་ཕྱོགས་སྐུ་ལ་རྫོང་གི་དུར་ཁྲོད་དུ༔ གཤིན་རྗེ་གྲུབ་པའི་རིག་འཛིན་འཇམ་དཔལ་བཤེས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ ནཱ་ག་རྫུ་ན་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ ནུབ་ཕྱོགས་པདྨ་བརྩེགས་པའི་དུར་ཁྲོད་དུ༔ དབང་ཆེན་གྲུབ་པའི་ནཱ་ག་རྫུ་ན་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ པྲ་ཆེན་ཧསྟི་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ བྱང་ཕྱོགས་ལས་རབ་རྫོགས་པའི་དུར་ཁྲོད་དུ༔ ཕུར་པ་གྲུབ་པའི་པྲ་ཆེན་ཧསྟི་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ ངྷ་ན་སཾ་སྐྲྀ་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ ཤར་ལྷོ་ལྷུན་གྲུབ་གཏེར་གྱི་དུར་ཁྲོད་དུ༔ མ་མོ་གྲུབ་པའི་ངྷ་ན་སཾ་སྐྲྀ་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ བི་མ་མི་ཏྲ་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ ལྷོ་ནུབ་གསང་ཆེན་རོལ་བའི་དུར་ཁྲོད་དུ༔ ཆེ་མཆོག་གྲུབ་པའི་བི་མ་མི་ཏྲ་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ རོམ་བྷུ་གྷུ་ཡ་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ ནུབ་བྱང་ཧེ་ཆེན་བརྡལ་བའི་དུར་ཁྲོད་དུ༔ མཆོད་བསྟོད་གྲུབ་པའི་རོམ་བྷུ་གྷུ་ཡ་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ ཤཱནྟིང་གྷརྦྷ་ཡབ་ཡུམ་གྱི་སྐུ་ཐོགས་ལ༔ ཧཱུྃ་ཧྲཱི༔ བྱང་ཤར་མཆོད་རྟེན་བརྩེགས་པའི་དུར་ཁྲོད་དུ༔ དམོད་པ་གྲུབ་པའི་ཤཱནྟིང་གྷརྦྷ་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡབ་ཡུམ་གཉིས་སུ་མེད་པའི་དབང་ཐོབ་ཤོག༔ ཨཱོཾ་ཨཱཿཧཱུྃ་ཛྙཱ་ན་བཛྲ་བྷི་ངྷ་ར་སརྦ་ཀཱ་ཡ་ཝཱཀྐ་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་བཀའ་ཡི་སྒ་ོབ་གིང་ཆེན་ཡབ་ཡུམ་གྱི་དབང་བསྐུར་བ་ནི༔ ཧཱུྃ་ཧྲཱི༔ རིག་འཛིན་འདུས་པའི་ཕོ་བྲང་ཤར་སྒོའི་བདག༔ རྡོ་རྗེ་གིང་ཆེན་ཡབ་ཡུམ་གཉིས་མེད་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཞི་བའི་ཕྲིན་ལས་མཐར་ཕྱིན་དབང་ཐོབ་ཤོག༔ ཨཱོཾ་བཛྲ་ཛྙཱ་ན་གིང་ཀ་ར་བཛྲ་ངྷཱཀྐི་ནི་ཨ་བྷི་ཥིཉྩ་ཧཱུྃ༔ རཏྣ་གིང་གི་སྐུ་ཐོགས་ལ༔ ཧཱུྃ་ཧྲཱི༔ རིག་འཛིན་འདུས་པའི་ཕོ་བྲང་ལྷོ་སྒོའི་བདག༔ རཏྣ་གིང་ཆེན་ཡབ་ཡུམ་གཉིས་མེད་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རྒྱས་པའི་ཕྲིན་ལས་མཐར་ཕྱིན་དབང་ཐོབ་ཤོག༔ ཨཱོཾ་རཏྣ་ཛྙཱ་ན་གིང་ཀ་ར་རཏྣ་དྷཱཀྐི་ནི་ཨ་བྷི་ཥིཉྩ་ཧཱུྃ༔ པདྨ་གིང་གི་སྐུ་ཐོགས་ལ༔ ཧཱུྃ་ཧྲཱི༔ རིག་འཛིན་འདུས་པའི་ཕོ་བྲང་ནུབ་སྒོའི་བདག༔ པདྨ་གིང་ཆེན་ཡབ་ཡུམ་གཉིས་མེད་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དབང་གི་ཕྲིན་ལས་མཐར་ཕྱིན་དབང་ཐོབ་ཤོག༔ ཨཱོཾ་པདྨ་གིང་ཀ་ར་པདྨ་ངྷཱཀྐི་ནི་ཨབྷི་ཥིཉྩ་ཧཱུྃ༔ ཀརྨ་གིང་གི་སྐུ་ཐོགས་ལ་༔ ཧཱུྃ་ཧྲཱི༔ རིག་འཛིན་འདུས་པའི་ཕོ་བྲང་བྱང་སྒོའི་བདག༔ ཀརྨ་གིང་ཆེན་ཡབ་ཡུམ་གཉིས་མེད་དབང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དྲག་པོའི་ཕྲིན་ལས་མཐར་ཕྱིན་དབང་ཐོབ་ཤོག༔ ཨཱོཾ་ཀརྨ་གིང་ཀ་ར་ཀརྨ་ངྷཱཀྐི་ནི་ཨ་བྷི་ཥིཉྩ་ཧཱུྃ༔ ཆོས་དབྱིངས་རོལ་པ་ཆེན་པོར་ཚོམ་བུའི་སྐུར་བཞེངས་པ་དཀྱིལ་འཁོར་ཡོངས་སུ་རྫོགས་པའི་ལྷ་དབང་ཐོབ་པར་གྱུར་ཅིག༔ ཅེས་བརྗོད་མེ་ཏོག་འཐོར༔ རྩ་གསུམ་མཆོད་ཕྱིར་དཔལ་གྱི་གཏོར་དབང་དང་༔ འགྲོ་དོན་འཇུག་པ་རྡོ་རྗེ་སློབ་དཔོན་དབང་༔ དབང་སྲོག་ཡིན་པས་དམ་ཚིག་རྒྱས་འདེབས་དང་༔ བཀའ་དྲིན་དྲན་ཕྱིར་མཎྜལ་ཚོགས་འཁོར་ཏེ༔ ས་བཅད་བཞི་ཡིས་དབང་འདིའི་རྗེས་སྐྱོང་ངོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དང་པོ་དཔལ་གྱི་གཏོར་ཆེན་ཐོགས་ཏེ༔ ཧཱུྃ་ཧྲཱི༔ དམ་རྫས་གཏོར་མ་ལྷ་དང་གཉིས་སུ་མེད༔ རྩ་གསུམ་རིག་འཛིན་ལྷ་ཚོགས་མཆོད་པ་དང་༔ མ་མོ་མཁའ་འགྲོའི་ཕྲིན་ལས་བསྒྲུབ་པའི་ཕྱིར༔ དཔལ་གྱི་གཏོར་དབང་སྐལ་ལྡན་བུ་ལ་བསྐུར༔ མཆོག་དང་ཐུན་མོང་དངོས་གྲུབ་འཐོབ་པར་ཤོག༔ ཨཱོཾ་ཨཱཿཧཱུྃ་གུ་རུ་ངྷེ་ཝ་དྷཱཀྐི་ནི་སརྦ་བྷ་ལིངྟ་སརྦ་སིངྔྷི་ཨ་བྷི་ཥིཉྩ་ཧཱུྃ༔ ཞེས་བསྐུལ་གཏོར་མ་དངོས་གྲུབ་ཏུ་རོལ༔ གཉིས་པ་འགྲོ་དོན་འཇུག་པ་རྡོ་རྗེ་སློབ་དཔོན་གྱི་དབང་ནི༔ སེང་གེའི་ཁྲི་བཤམས་པའི་སྟེང་དུ་སློབ་མ་འགོད་པའམ་ཡང་ན་བྲིས་པ་གཏད་ཅིང་༔ ཧཱུྃ་ཧྲཱི༔ སྟོབས་རྩལ་ལྡན་པ་མི་འཇིགས་སེངྒེ་ཁྲི༔ དུས་གསུམ་རིག་འཛིན་མ་ལུས་བཞུགས་པའི་གདན༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ ཇི་སྲིད་འཁོར་བ་འཇིག་རྟེན་མ་སྟོངས་བར༔ དེ་སྲིད་འགྲོ་དོན་མཐའ་རུ་ཕྱིན་པར་ཤོག༔ ཏིཥྛ་བཛྲ་ལྷན༔ དེ་ནས་ཕོད་ཀ་བསྐོན་ཏེ༔ ཧཱུྃ་ཧྲཱི༔ ཟ་འོག་སྨུག་བེར་ཕོད་ཀ་རིན་ཆེན་འདི༔ ཁམས་གསུམ་དབང་སྡུད་སློབ་དཔོན་དཔལ་གྱི་ཆས༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ དེ་ནས་ཆོས་གོས་བསྐོན་ཏེ༔ ཧཱུྃ་ཧྲཱི༔ ཉིས་བརྒྱ་ལྔ་བཅུའི་འདུལ་ཁྲིམས་མཐར་ཕྱིན་ནས༔ དགའ་བཞིའི་དབབ་ཟློག་ལམ་གྱི་རྩལ་འབྱོངས་ཏེ༔ སྟོན་པའི་བསྟན་པ་མི་ནུབ་ངུར་སྨྲིག་གོས༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ པྲོག་ཞུའམ་དབང་ཞུ་བསྐོན་ལ༔ ཧཱུྃ་ཧྲཱི༔ སྙན་ཞུ་འདབ་ལྡན་བླ་མའི་དམ་ཚིག་རྟེན༔ ཁམས་གསུམ་དབང་སྡུད་སྲིད་གསུམ་ཟིལ་གནོན་རྫས༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ རྡོ་རྗེ་དྲིལ་བུ་གཏད་ཅིང་༔ ཧཱུྃ་ཧྲཱི༔ ཐབས་ཤེས་ཡོངས་རྫོགས་ཕྱག་རྒྱ་གར་གྱི་རྫས༔ ཕྲིན་ལས་སྐྱོང་བ་སློབ་དཔོན་དཔལ་གྱི་ཆས༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ ཤོག་སེར་གྱི་བུ་དཔེ་གཏད་ཅིང་༔ ཧཱུྃ་ཧྲཱི༔ རིག་འཛིན་ཡོངས་འདུས་རིག་འཛིན་བསྒྲུབ་པའི་ཆོས༔ བླ་མེད་བཀའ་གསང་རྨད་བྱུང་པོ་ཏི་འདི༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ ཕྲེང་བ་གཏད་ཅིང་བཟླས་ལུང་འབོགས༔ རྒྱལ་མཚན་གཏད་ལ༔ ཧཱུྃ་ཧྲཱི༔ ཨ་ཏིའི་བསྟན་པ་མི་ནུབ་རྒྱལ་མཚན་འདི༔ གཡུལ་ལས་རྒྱལ་བ་མི་ནུབ་དཔལ་གྱི་ཆས༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ དུང་གཏད་ལ༔ ཧཱུྃ་ཧྲཱི༔ བཀྲ་ཤིས་དུང་དཀར་གཡས་འཁྱིལ་ཆོས་ཀྱི་སྒྲ༔ མ་འགགས་རོལ་པ་སློབ་དཔོན་དཔལ་གྱི་ཆས༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ རྔ་གཏད་ལ༔ ཧཱུྃ་ཧྲཱི༔ ཐབས་ཤེས་གཉིས་མེད་གསང་བའི་རྔ་བོ་ཆེ༔ བདུད་པོ་རཱུ་ཏྲ་བཏུལ་བའི་ལྤགས་པས་བསྟུམས༔ རྡོ་རྗེ་སློབ་དཔོན་དཔལ་གྱི་ཆས་མཆོག་ཏེ༔ སྐལ་ལྡན་སློབ་མ་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ སྒྲོན་མེ་གཏད་ཅིང་༔ ཧཱུྃ་ཧྲཱི༔ མ་རིག་མུན་སེལ་ཡེ་ཤེས་ཤེས་རབ་མེ༔ མཁྱེན་པ་གཉིས་ལྡན་འོད་ཀྱི་སྒྲོན་མེ་འདི༔ རྡོ་རྗེ་སློབ་དཔོན་དཔལ་གྱི་ཆས་མཆོག་ཏེ༔ སྐལ་ལྡན་བུ་མཆོག་ཁྱོད་ལ་འདི་སྦྱིན་པས༔ རྒྱལ་ཚབ་སྤྱི་བླུགས་འགྲོ་དོན་དབང་ཐོབ་ཤོག༔ གསུམ་པ་དབང་སྲོག་དམ་ཚིག་རྒྱས་གདབ་པ་ནི༔ བཀའ་སྲུང་གཏོར་མ་གཏད་ཅིང་༔ ཧཱུྃ་ཧྲཱི༔ ལེགས་ཉེས་སྟངས་འཛིན་བཀའ་ཡི་བྱ་ར་བ༔ དམ་ལྡན་སློབ་བུ་རྗེས་སྐྱོང་དངོས་གྲུབ་སྟེར༔ དམ་མེད་རྣམས་ཀྱི་སྲོག་གི་བཤན་པ་བྱེད༔ སྐལ་ལྡན་བུ་ལ་གཏད་དོ་དམ་ཚིག་སྲུངས༔ ཆོས་སྐྱོང་སྲུང་མས་དམ་ལྡན་རྗེས་འཇུག་སྐྱོངས༔ དམ་མེད་ལོག་ལྟ་ཐལ་བ་བརྡུལ་དུ་རློགས༔ ཞེས་བསྐུལ་དེ་ནས་འདི་སྐད་བརྗོད༔ ཨེ་མ་འདིར་ཚོགས་སྐལ་ལྡན་སྐྱེས་བུ་རྣམས༔ གསང་སྔགས་བླ་མེད་ཆོས་ཀྱི་སྨིན་གྲོལ་འདིི༔ ཁེ་ཆེ་ཚེ་གཅིག་སངས་རྒྱས་འཐོབ་པས་འཚེང་༔ ཉེན་ཆེ་དམ་མེད་སྲུང་མས་སྲོག་དབུགས་དབྲལ༔ མནར་མེད་དམྱལ་བར་སྐྱེ་བས་ཉེན་ཀྱང་ཆེ༔ དེས་ན་ཁྱེད་ཅག་འདིར་ཚོགས་ཐམས་ཅད་ཀྱིས༔ སྐུ་གསུང་ཐུགས་དང་རྩ་བ་ཡན་ལག་གི༔ དམ་ཚིག་མ་ཉམས་བླ་མ་ལྷ་དང་ནི༔ མཆེད་དང་ལྕམ་དྲལ་གསང་ཡུམ་རིག་མར་སྲུངས༔ དམ་ཚིག་སྲོག་ལ་བབས་ཀྱང་འདའ་མི་བྱ༔ ཞེས་བརྗོད་བདུད་རྩི་བླུད་ཅིང་རྡོ་རྗེ་གཏད༔ བཞི་བ་བཀའ་དྲིན་འཁུར་ཞིང་ལུས་ངག་ཡིད་གསུམ་དང་༔ གསེར་དངུལ་དར་ཟབ་ཡོན་གྱིས་སློབ་དཔོན་མཆོད༔ མཁོ་བར་གྱུར་དང་མཉེས་བྱེད་མཎྜལ་མཆོད༔ རང་ལ་ཅི་ཡོད་བདག་འཛིན་མེད་པར་དབུལ༔ ཚོགས་འཁོར་བསྐོར་དང་བཀྲ་ཤིས་བསྔོ་སྨོན་དང་༔ ཆད་ཐོ་བསྟན་མ་སྐྱོང་ཞིང་དཀྱིལ་འཁོར་བསྡུ༔ ལས་བྱང་སྒྲུབ་པའི་ཁོག་འབུབ་ལྟ་བུར་སྤྱོད༔ གླུ་བྲོ་གར་སོགས་བདེ་བའི་ཉམས་སྐྱོང་ངོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་བདག་འདྲ་པདྨ་འབྱུང་༔ ཤཱཀྱ་ཐུབ་པའི་བསྟན་པ་ལ༔ འབྲས་བུའི་བསྟན་པ་དར་ཕྱིར་དུ༔ ཆོས་དབྱིངས་བདེ་བ་ཆེན་པོ་ནས༔ འོད་དཔག་མེད་ཀྱིས་སྤྲུལ་བ་བསྐྱེད༔ ཐུགས་ཀྱི་ས་བོན་ཧྲཱིཿཡིས་སྤྲོས༔ རིག་འཛིན་འདུས་པའི་མཁའ་སྤྱོད་དུ༔ རྡོ་རྗེ་ཁྲག་འཐུང་ཐུགས་ཀར་བསྟིམས༔ སྐུ་གསུང་ཐུགས་ཀྱི་དབང་བསྐུར་ནས༔ ཀླུ་རྒྱལ་འཇོག་པོའི་ཁང་སྟེང་ན༔ མདངས་ལྡན་དྲི་མེད་མཚོ་ལ་བབས༔ པདྨ་གེ་སར་རྩེ་ལས་སྐྱེས༔ ཨིཎྜ་བྷོ་ངྷིའི་གདུང་བ་བསལ༔ རྒྱལ་སྲིད་སྤངས་ན་བརྟུལ་ཞུགས་སྤྱད༔ དུར་ཁྲོད་བསིལ་བ་ཚལ་དུ་སོང་༔ སྟོན་པ་རྡོ་རྗེ་སེམས་དཔའ་མཇལ༔ མཆོག་དང་ཐུན་མོང་དངོས་གྲུབ་བརྙེས༔ རིག་འཛིན་འདུས་པའི་རྒྱུད་ཆར་ཕབ༔ ཧེ་རུ་ཀ༔ དཔལ་པདྨ་ངས༔ འཕགས་ཡུལ་བསྟན་འགྲོའི་དོན་ཆེན་བསྐྱངས༔ ད་ལྟ་བོད་ཡུལ་གངས་ཅན་འདིར༔ མངའ་བདག་རྗེ་བློན་ཁྱེད་རྣམས་ལ༔ མདོ་སྔགས་ཆོས་ཀྱི་ཆར་པ་ཕབ༔ བོད་ཡུལ་ལུང་པ་དཀར་པོར་བཏང་༔ ཁྱེད་རྣམས་ཚོགས་བསགས་བསྐལ་པ་བཟང་༔ ང་ནི་སྲིན་པོ་འདུལ་དུ་འགྲོ༔ ཁྱེད་རྣམས་མི་རྟག་མྱ་ངན་འདའ༔ མ་འོངས་བསྐལ་པའི་སྙིགས་མ་ལ༔ ཁ་བ་ཅན་གྱི་རྒྱལ་ཁམས་འདིར༔ ཐུབ་པའི་བསྟན་པ་རྟགས་ཀྱིས་འཛིན༔ དགེ་བྱེད་དམོད་ཅིང་སྡིག་བྱེད་བསྟོད༔ དགེ་བཤེས་བན་བཙུན་དམག་ལས་བྱེད༔ ཧོར་སོག་མཐའ་དམག་རླུང་ལྟར་འཚུབ༔ དགེ་སྦྱོང་ཚོགས་གསོག་ཁྲལ་དུ་རྒྱུག༔ གཤིན་ཟས་དཀོར་ལ་ཧབ་ཐོབ་རྒྱག༔ བཙུན་པ་རྣམས་ཀྱིས་སྔགས་ཆས་བྱེད༔ སྔགས་པར་ཁས་བླངས་བཙུན་ཆས་བསྒྲུབ༔ སྒྲུབ་སྡེ་རྣམས་སུ་བཤད་གྲྭ་འཛུགས༔ བཤད་གྲྭས་སྔགས་བསྒྲུབ་གཏོར་ཟོར་འཕེན༔ སྐྱེ་བོས་མཐའ་མིའི་ཆས་གོས་གོན༔ བུད་མེད་ཧོར་འདྲའི་ཆས་ལ་འཇུག༔ དེ་ཚེ་ལྷོ་ནུབ་རྔ་ཡབ་ནས༔ པདྨ་ང་ཡི་སྤྲུལ་པ་ཞིག༔ ཆོས་འཁོར་གཉན་པོའི་ཤར་དུ་འབྱུང་༔ ཁམས་པ་ཉི་མ་གྲགས་པ་ཞེས༔ འགྲོ་བ་འདྲེན་པའི་སྐྱེས་བུ་ཡོང་༔ སྐལ་ལྡན་མཚོ་ལ་ངང་འདུ་འདྲ་༔ སྐལ་མེད་དགོང་ཀའི་གྲིབ་སོ་འདྲ༔ ལོག་ལྟ་བུ་ཡུག་འཚུབ་པ་འདྲ་༔ དད་པ་རི་མཐོའི་ཉི་མ་འདྲ་༔ འོན་ཀྱང་སྔོན་གྱི་སྨོན་ལམ་མཐུས༔ དབང་ཆོས་འདི་ཡི་འབྲེལ་ཐོགས་ཀུན༔ དག་པའི་ཞིང་དུ་ངེས་པར་སྐྱེལ༔ གསང་སྔགས་ཆོས་རྣམས་འོ་མའི་མཚོ༔ རིག་འཛིན་ཡོངས་འདུས་མར་དུ་དྲིལ༔ སྨིན་བྱེད་དབང་གི་རིམ་པ་འདི༔ རྩོད་ལྡན་འགྲོ་བའི་དོན་ཕྱིར་དུ༔ པདྨ་འབྱུང་གནས་བདག་གིས་བཀོད༔ དམ་ལྡན་འགྲོ་བ་ཕོ་མོ་ལ༔ ཚེ་གཅིག་སངས་རྒྱས་འབྲས་བུ་སྟེར༔ དམ་མེད་ན་རཀ་དམྱལ་བར་བསྲེག༔ དེ་བས་མ་འོངས་རྗེས་འཇུག་བུ༔ བཀའ་འདི་རྐུན་ནོར་ལྟ་བུར་སྤྱོད༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་འགྲོ་འདུལ་གླིང་པས་བདེ་ཆེན་གསང་བ་ཕུག་ནས་རྙེད༔ སརྦ་མངྒ་ལཾ༔