ཤིན་ཏུ་སྤྲོས་མེད་ཀྱི་དབང་མཆོག

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཤིན་ཏུ་སྤྲོས་མེད་ཀྱི་དབང་མཆོག་ཡོད༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ ཆོས་དབྱིངས་ཀུན་བཟང་པདྨ་འབྱུང་༔ མ་འགགས་རང་གསལ་མཁྱེན་བརྩེའི་ངང་༔ ཐུགས་རྗེས་འགྲོ་བ་སྒྲོལ་བའི་ཕྱིར༔ ཤིན་ཏུ་སྤྲོས་མེད་དབང་མཆོག་ཅིག༔ ཕྱི་རབས་དོན་དུ་བཀོད་པར་བྱ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་སྔོན་འགྲོ་དངོས་གཞི་རྗེས་གསུམ་གྱིས་སྣོད་ལྡན་སྨིན་པར་བྱའོ༔ སྔོན་འགྲོ་ཐུན་མོང་དང་ཐུན་མོང་མ་ཡིན་པ་གཉིས་ལས༔ ཐུན་མོང་ལ་གསུམ་འདོད་དོན་སློབ་མའི་གསོལ་འདེབས༔ ཐུན་མོང་རྫས་ཀྱི་སྟ་གོན༔ སློབ་དཔོན་དབང་གི་བསྙེན་སྒྲུབ་གསུམ་མོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྣོད་ལྡན་གྱི་སློབ་མ་ལྔ་གསུམ་བདུན་སོགས་སྒྲུབ་པ་ཚུལ་བཞིན་བྱེད་པ་རྣམས་ཀྱིས༔ བླ་མའི་དྲུང་དུ་ཚོགས་རྫས་ཀྱི་ཡོ་བྱད་དང་༔ མཎྜལ་གྱི་རྫས་ཁྱད་པར་ཅན་ཐོགས་ཏེ་འོངས་ནས༔ ཚོགས་འཁོར་བསྐོར་ཞིང་མཎྜལ་དབུལ༔ ཐལ་མོ་སྦྱར་ཞིང་འདི་སྐད་ཞུའོ༔ ཀྱཻ་དུས་གསུམ་སངས་རྒྱས་ཐམས་ཅད་འདུས་པའི་སྐུ༔ དཔལ་ལྡན་བླ་མ་བདག་ལ་དགོངས་སུ་གསོལ༔ བདག་ནི་མ་རིག་ཉོན་མོངས་ལས་ཀྱིས་བསྒྲིབས༔ རང་རིག་ཆོས་སྐུའི་རང་ངོ་མ་མཇལ་བས༔ གནས་ལུགས་དོན་གྱི་སྙིང་པོའི་དབང་བསྐུར་སྩོལ༔ ལན་གསུམ་ཞུའོ༔ དེ་ནས་སློབ་དཔོན་གྱིས༔ ཀྱེ་ཧོ་ཁྱེད་ཅག་སུ་ཡིན་འདོད་དོན་གང་༔ སྤྲོས་མེད་ཆོས་དབྱིངས་དབང་ཞུ་ནས༔ དམ་ཚིག་བཀའ་ལྟར་བསྲུང་ནུས་སམ༔ སྒྲུབ་པ་སྲོག་དང་བསྡོ་ནུས་སམ༔ ཚེ་འདི་བློ་ཡིས་གཏོང་ཕོད་དམ༔ དམ་མེད་རྡོ་རྗེ་དམྱལ་བས་འཇིགས༔ དམ་ཚིག་བསྲུངས་ན་དངོས་གྲུབ་འཐོབ༔ རིགས་ཀྱི་བུ་རྣམས་དྲི་ལན་དགོས༔ ཅེས་སྨྲ། སློབ་མས༔ བདག་ནི་སྐལ་ལྡན་རིགས་ཀྱི་བུ༔ དམ་ཚིག་སྲོག་ལ་བབས་ཀྱང་བསྲུང་༔ ཚེ་འདི་བློ་ཡིས་རབ་ཏུ་གཏོང་༔ གནས་དང་དུར་ཁྲོད་ཞིང་རྣམས་ཉུལ༔ གསོག་འཇོག་སེར་སྣའི་མདུད་པ་སྤང་༔ ཡང་དག་དོན་གྱི་དབང་བསྐུར་སྩོལ༔ ཞེས་ཞུའོ༔ དེ་ནས་སློབ་དཔོན་གྱིས༔ འོ་དེ་ལྟར་སྣོད་དང་ལྡན་གྱུར་ན༔ བདག་གིས་ཡེ་ཤེས་ཆེན་པོའི་དབང་༔ ད་ལྟ་ཉིད་དུ་སྦྱིན་པར་བྱ༔ རྡོ་རྗེའི་དམ་ཚིག་ཆུ་འདི་འཐུང་༔ དམ་མེད་འགྲོ་བ་ལོག་ལྟ་ཅན༔ སྣོད་མེད་རྣམས་ལ་མ་སྨྲ་ཞིག༔ ཛྙཱ་ན་ས་མ་ཡ་ཧཱུྃ༔ ཞེས་དམ་ཆུ་བླུད༔ གནང་བ་སྦྱིན༔ གཉིས་པ་ཐུན་མོང་དབང་རྫས་སྟ་གོན་ནི༔ དེ་ནས་ལིའི་མཎྜལ་ཞིག་ཕྱིས་པའི་སྟེང་དུ་མན་ཤེལ་དྲི་མེད༔ མེ་ལོང་གཡའ་དག༔ རྨ་བྱའི་སྒྲོ་གསུམ་བཞག་ཅིང་༔ ཨཱོཾ་ཧཱུྃ་ཛྙཱ་ན་བཛྲ་བྷྲཱུཾ༔ ཞེས་བརྗོད་དོ༔ མཐར་མཆོད་པ་དང་ཚོགས་འཁོར་བཤམས༔ གསུམ་པ་སློབ་དཔོན་དབང་གི་བསྙེན་སྒྲུབ་ནི༔ ཨཱོཾ་མ་ཧཱ་ཤུ་ནྱཻ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ་྅་ཧཾ༔ ཞེས་བརྗོད་པ་ཙམ་གྱིས་འཁོར་འདས་ཀྱི་ཆོས་ཐམས་ཅད་མི་དམིགས་པ་སྟོང་པར་བསམས༔ སྟོང་པའི་ངང་ལས་རང་དང་དབང་རྫས་རྒྱལ་བ་ཀུན་ཏུ་བཟང་པོ་ཡབ་ཡུམ་དུ་བསྒོམ་ཞིང་༔ དམ་ཚིག་ཡེ་ཤེས་གཉིས་མེད་ཀྱི་སྐུར་གསལ་བའི་ངང་ནས༔ ཨཱོཾ་དྷརྨཱ་དྷརྟུ་ཛྙཱ་ན་བཛྲ་སརྦ་སིངྔྷི་ཧཱུྃ༔ སྟོང་ཕྲག་གཅིག་བཟླ་༔ ཀ་དག་བློ་འདས་ཀྱི་ངང་ལ་དར་ཅིག་བཞག་གོ༔ ས་མ་ཡཱ༔ རྒྱ་རྒྱ་རྒྱ་༔ དེ་ནས་ཐུན་མོང་མ་ཡིན་པའི་སྔོན་འགྲོ་ལ༔ དོན་ལྔ་སྟེ༔ གསོལ་བ་གདབ་པ༔ མེ་ཏོག་འདོར་བ༔ ཅོད་པན་མིང་དང་བཅས་པའི་དབང་བསྐུར་བ༔ མིག་དབྱེ་བ༔ ལྷ་ཞལ་བསྟན་པ་དང་ལྔའོ༔ ས་མ་ཡཱ༔ རྒྱ་རྒྱ་རྒྱ༔ བླ་མ་ཧེ་རུ་ཀཿའི་ཆས་ཀྱིས་སྤྲས༔ སློབ་མ་གཅེར་བུར་བྱ༔ གྲལ་ལ་འཁོད་ཅིང་༔ དང་པོ་གསོལ་བ་གདབ་པ་ནི༔ ཀྱེ་བླ་མེད་བླ་མའི་སྟོན་པ་པོ༔ ཁྱབ་བདག་ཆེན་པོ་རྡོ་རྗེ་འཆང་༔ བདག་ཅག་འདིར་ཚོགས་བུ་རྣམས་ལ༔ ཤིན་ཏུ་སྤྲོས་མེད་དབང་བསྐུར་སྩོལ༔ ལན་གསུམ་ཞུའོ༔ ཁྲུས་ནས་ཕྱུངས་བགེགས་བསྐྲད༔ བསྲུང་འཁོར་བསྒོམ༔ དཔུང་སྐུད་གདགས༔ མིག་དར་བཀབ༔ གཉིས་པ་མེ་ཏོག་འདོར་བ་ནི༔ དར་སྔོན་གྱི་ཅོད་པན་ཐལ་མོ་སྦྱར་བའི་བར་དུ་བཟུང་ཞིིང་དཀྱིལ་འཁོར་ལ་དོར་སྟེ༔ ཧཱུྃ༔ བྱང་ཆུབ་སེམས་ཀྱི་མེ་ཏོག་འདི༔ ཆོས་ཀྱི་དབྱིངས་ཀྱི་དཀྱིལ་འཁོར་དུ༔ བདག་ཅག་རྣམས་ཀྱིས་དབུལ་བར་བགྱིད༔ ཚེ་རབས་ལྷ་དང་མཇལ་བར་ཤོག༔ བྷོ་ངྷི་པུཥྤེ་པཱུ་ཙ་ཧོ༔ ཞེས་དོར་ཕྱོགས་བཞི་དབུས་དང་ལྔར༔ མེ་ཏོག་ཕོག་པའི་ལྷ་ངོ་སྤྲོད༔ མཆོག་ཏུ་གྱུར་པ་དབུས་ཉིད་དོ༔ གསང་མཚན་ལས་བཞི་སོ་སོ་ལ༔ རང་གྲོལ་རྩལ་ཞེས་སྦྱར་ཏེ་བཏགས༔ མོ་ལ་དཔའ་མོ་རང་གྲོལ་སྦྱར༔ གསུམ་པ་ཅོད་པན་མིང་གི་དབང་ནི༔ ཅོད་པན་ཐོགས་ཏེ༔ ཧཱུྃ་ཧྲཱི༔ བྱང་ཆུབ་སེམས་ཀྱི་ཅོད་པན་འདི༔ མཐིང་ག་མི་འགྱུར་ཆོས་དབྱིངས་རྟགས༔ སྐལ་ལྡན་བུ་ཡི་གཙུག་ཏུ་རྒྱན༔ ཁམས་གསུམ་གཡུལ་ལས་རྒྱལ་ནས་ཀྱང་༔ འོག་མིན་ཆོས་དབྱིངས་ཕོ་བྲང་དུ༔ མངོན་པར་རྫོགས་པར་འཚང་རྒྱ་ཏེ༔ གསང་མཚན་ཆོས་དབྱིངས་རང་གྲོལ་རྩལ༔ ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་མེ་ཏོག་འཐོར་རོ༔ བཞི་པ་མིག་དབྱེ་བ་སྟེ༔ ཧཱུྃ་ཧྲཱི༔ ཀུན་གཞི་སེམས་དང་སེམས་བྱུང་གི༔ བག་ཆགས་མ་རིག་སྒྲིབ་པའི་ཚོགས༔ ཐབས་ཤེས་ཐུགས་རྗེའི་ཐུར་མས་དབྱེ༔ ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ མིག་དར་བསལ༔ ལྔ་པ་ལྷ་ཞལ་བསྟན་པ་ནི༔ བླ་མས་འདི་སྐད་དོ༔ ཀྱེ༔ རིགས་ཀྱི་བུ་ཁྱེད་རྣམས་མ་ཡེངས་པར་ཉོན་ཅིག༔ ཆོས་དབྱིངས་རྣམ་པར་དག་པའི་ཞིང་ཁམས་ཆེན་པོ་ན༔ རང་སེམས་ཀ་དག་གི་སངས་རྒྱས་གཞོན་ནུ་བུམ་པའི་སྐུའི་རང་མདངས་ཕྱོགས་བཅུར་འབར་ཞིང་བཞུགས་པའི་རང་ཞལ་ལ་ལྟོས་ཤིག༔ འདི་ནི་མ་མཐོང་མཐོང་བ་ཆེན་པོའི་སངས་རྒྱས་ཞལ་མཇལ་བ་ཡིན་པས་དགའ་བ་སྒོམས་ཤིག༔ ཨཱཿཨཱཿཨཱཿཞེས་བརྗོད༔ དེ་ནས་དངོས་གཞིའི་དབང་ལ་གསུམ་སྟེ༔ མེ་ལོང་སྐུ་སྟེ་སྐུ་ཡི་དབང་༔ རྨ་བྱའི་སྒྲོ་ཕོད་གསུང་གི་དབང་༔ ཤེལ་གོང་དྲི་མེད་ཐུགས་ཀྱི་དབང་ཿསེམས་ཉིད་བརྡ་དོན་ངོ་སྤྲོད་གདབ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྐུ་ཡི་དབང་བསྐུར་སྟེ༔ མེ་ལོང་གི་ངོས་ལ་གཙོ་བོའི་སྐུ་བསྟན་ཞིང་༔ ཧཱུྃ་ཧྲཱིཿམེ་ལོང་སྤྲོས་བྲལ་ཆོས་དབྱིངས་ཞིང་ཁམས་ན༔ མ་འགགས་སྣང་བརྙན་ཡི་དམ་ལྷ་ཚོགས་གསལ༔ སྣང་སྟོང་གཉིས་མེད་སྐྱེ་འགགས་གནས་གསུམ་བྲལ༔ ངོ་བོ་ཉིད་སྐུ་མ་བཅོས་རྫོགས་པ་ཆེ༔ སྐུ་ཡི་དམ་ཚིག་བསྐྱེད་རིམ་མཐར་ཕྱིན་དབང་ཿསྣོད་ལྡན་སློབ་མ་ཁྱོད་ཀྱིས་ཐོབ་ནས་ཀྱང་༔ སྣང་སྟོང་གཉིས་མེད་རྡོ་རྗེའི་སྐུ་འགྲུབ་ཤོག༔ ཧཱུྃ་ཧཱུྃ་ཧཱུྃ༔ བརྗོད་ཅིང་སྐུ་མེ་ལོང་ལ་ཤར་བའི་གཟུགས་བརྙན་བསྟན་ཞིང་སྤྱི་བོར་དབང་བསྐུར་རོ༔ གཉིས་པ་གསུང་གི་དབང་རྨ་བྱའི་སྒྲོ་མགྲིན་པར་བཞག༔ ཧཱུྃ་ཧྲཱིཿངོ་བོ་ཀ་དག་ཆོས་སྐུའི་ཕོ་བྲང་ནས༔ སྒྲ་གྲགས་མ་འགགས་རང་བྱུང་ལོངས་སྤྱོད་རྫོགས༔ གྲག་སྟོང་གཉིས་མེད་སྐྱེ་འགག་གནས་གསུམ་བྲལ༔ ངོ་བོ་ཉིད་སྐུ་མ་བཅོས་རྫོགས་པ་ཆེ༔ གསུང་གི་དམ་ཚིག་གྲག་སྟོང་བརྗོད་མེད་དབང་༔ སྣོད་ལྡན་སློབ་མ་ཁྱོད་ཀྱིས་ཐོབ་ནས་ཀྱང་༔ བཟླས་པ་མཐར་ཕྱིན་ལོངས་སྐུའི་དབང་ཐོབ་ཤོག༔ ཨཱོཾ་ཨཱོཾ་ཨཱོཾ༔ བརྗོད་ཅིང་མགྲིན་པར་བསྐུར་རོ༔ གསུམ་པ་ཤེལ་ཐོགས་ཏེ༔ ཧཱུྃ་ཧྲཱི༔ ཡེ་ནས་རྣམ་དག་རྒྱུ་རྐྱེན་མཚན་མ་བྲལ༔ གདོད་ནས་རྣམ་དག་རང་བཞིན་ལྷུན་གྱིས་གྲུབ༔ གཅིག་ཏུ་མ་ཡིན་སོ་སོར་རང་རིག་སྤྱོད༔ སྐྱེ་འགག་གནས་གསུམ་སྤྲོས་པའི་མཐའ་དང་བྲལ༔ མན་ཤེལ་དྲི་མེད་བརྡ་ཡིས་དབང་བསྐུར་བས༔ ཀ་དག་ཆོས་སྐུའི་དོན་དུ་རྟོགས་པར་ཤོག༔ ཨཱ༔ ཨཱཿཨཱཿཞེས་བརྗོད་དཀར་ནག་མཚམས་སུ་དབང་བསྐུར་རོ༔ དེ་ནས་ཚིག་གི་བརྡ་དོན་ངོ་སྤྲོད་གདབ་པ་ནི༔ སློབ་མ་རྣམས་ཆོས་བདུན་བཅས་ལ༔ སློབ་དཔོན་གྱིས་ཐོད་རྔ་འཁྲོལ་ཞིང་༔ ཀྱེ༔ མ་སྐལ་ལྡན་རིགས་ཀྱི་བུ་ཁྱོད་ཉོན༔ དབང་གསུམ་བསྐུར་ཏེ་སྐུ་གསུམ་ས་བོན་བཏབ༔ ད་ནི་མ་དག་མིང་མེད་ཆོས་དབྱིངས་ཀློང་༔ བུ་ཁྱོད་མ་ཡེངས་རང་སེམས་ཆོས་སྐུར་ལྟོས༔ ཡང་ལྟོས་ཡང་ལྟོས་མ་ཡེངས་ལེགས་པར་ལྟོས༔ མ་མཐོང་ཙ་ན་མཉམ་པར་ཞོག་ལ་ལྟོས༔ བལྟ་བྱ་ལྟ་བྱེད་རྟོག་ཚོགས་ཀ་ནས་དག༔ རང་བྱུང་ཆོས་སྐུ་མ་བཅོས་རྫོགས་པ་ཆེ༔ ཨཱཿཨཱཿཨཱཿ་ཞེས་བརྗོད༔ དེ་ནས་སློབ་མ་རྣམས་ལངས་ནས་ཨ་ཡིག་ཕྱག་རྒྱ་བཅས་ཏེ༔ ཡང་བླ་མས་འདི་སྐད་དོ༔ ཨེ་མ་སྐལ་ལྡན་རིགས་ཀྱི་བུ་རྣམས་ཉོན༔ རང་བྱུང་སེམས་ཉིད་ཟང་ཐལ་རྗེན་པ་འདི༔ རྒྱངས་རྒྱངས་ལིང་ལིང་སྟེང་ཕྱོགས་མཁའ་ལ་སོང་༔ སྟེང་ཕྱོགས་ནམ་མཁའ་ཆོས་དབྱིངས་ཕོ་བྲང་ན༔ མ་བཅོས་རང་བྱུང་ཆོས་སྐུ་ཀུན་བཟང་བཞུགས་༔ རང་ཞལ་ལྟོས་དང་རང་རིག་སྐྱེ་འགག་མེད༔ འགྲོ་བར་སྣང་ཡང་འགྲོ་མཁན་རྒྱུ་དང་བྲལ༔ མཇལ་བར་སྣང་ཡང་མཇལ་མཁན་རྐྱེན་ལས་འདས༔ མཐོང་བར་སྣང་ཡང་མཐོང་མཁན་གཞི་རྩ་བྲལ༔ ཨཱ་ཨཱ་ཨཱ༔ ཞེས་ལན་དགུར་བརྗོད་ཅིང་ལིང་ལིང་གྱེན་ལ་འཕག༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དབང་གི་རྗེས་ཀྱི་རིམ་པ་གསུམ་སྟེ༔ དམ་ཚིག་གདབ་ཅིང་ཞལ་གདམས་འབོགས་པ་དང་༔ བཀའ་དྲིན་འཁུར་ཞིང་ཡོན་གྱིས་མཆོད་པ་དང་༔ ཚོགས་འཁོར་བསྔོ་སྨོན་བརྗོད་མེད་ཉམས་སྐྱོང་ངོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ལ་གཉིས་ཏེ༔ དམ་ཚིག་གསལ་གདབ་པ་དང་ཞལ་གདམས་འབོགས་པའོ༔ དང་པོ་དམ་ཚིག་གསལ་གདབ་པ་ནི༔ སློབ་མ་རྣམས་ཆོས་བདུན་ལྡན་པར༔ སློབ་དཔོན་གྱིས་འདི་སྐད་བརྗོད་དོ༔ ཀྱེ་ཧོ་ཁྱོད་འདིར་ཚོགས་ཤིང་འདུས་པ་རྣམས་ལེགས་པར་ཉོན་ཅིག༔ གསང་སྔགས་ཟབ་མོའི་དབང་མཆོག་འདི་ནི༔ སངས་རྒྱས་ཐམས་ཅད་ཀྱི་གཤེགས་ཤུལ་འདི་ཡིན་པས༔ ད་ཁྱེད་རྣམས་དབང་འདིར་ཞུགས་པའི་དམ་ཚིག་ཏུ་ལུས་དང་སྲོག་ལ་མི་བལྟ་བར་སྒྲུབ་པ་ལ་བརྩོན༔ སྐུའི་དམ་ཚིག་ཏུ་བླ་མ་བདེ་མཆོག་འཁོར་ལོའི་སྐུ་ཆོངས་ཤིག༔ གསུང་གི་དམ་ཚིག་ཏུ་སྒྲུབ་པའི་པོ་ཏི་ཟུངས་ཤིག༔ ཐུགས་ཀྱི་དམ་ཚིག་ཏུ་ཚེ་འདི་བློས་ཐོངས་ཤིག༔ ཡོན་ཏན་གྱི་དམ་ཚིག་ཏུ་ཆགས་མེད་གྱིས༔ ཕྲིན་ལས་ཀྱི་དམ་ཚིག་ཏུ་ཞེན་མེད་དུ་སྤྱོད་ཅིག༔ ཅེས་བརྗོད་བདུད་རྩི་བླུད་ཅིང་རྡོ་རྗེ་མགོར་བཞག་གོ༔ གཉིས་པ་ཞལ་གདམས་འབོགས་པ་ནི༔ བླ་མས༔ ཀྱེ༔ སྐལ་ལྡན་རིགས་ཀྱི་བུ་ཁྱེད་རྣམས་ཀྱིས༔ རྒྱལ་བའི་བཀའ་ལ་སློབ་དཔོན་གྱིས་ཤིག༔ ཕྱོགས་མེད་གནས་ལ་སྒྲུབ་པ་གྱིས་ཤིག༔ བླ་མ་སངས་རྒྱས་དངོས་སུ་སྒོམས་ཤིག༔ མཆེད་དང་ལྕམ་དྲལ་དམ་ཚིག་སྲུངས་ཤིག༔ ནོར་རྫས་གསོག་འཇོག་ཞེན་པ་ཕྲོལ་ཞིག༔ ལྟོ་གོས་གཏམ་ལ་གྱོང་དུ་ཁུར་ཅིག༔ ཆགས་སྡང་རྨོངས་གསུམ་མདུད་པ་ཁྲོལ་ཅིག༔ སྐྱེ་མེད་ཆོས་སྐུའི་ལྟ་བ་ལྟོས་ཤིག༔ འགག་མེད་རང་གསལ་སྒོམ་པ་སྐྱོངས་ཤིག༔ སྣ་ཚོགས་རང་གྲོལ་སྤྱོད་པ་སྤྱོད་ཅིག༔ མི་ཚེ་མི་རྟག་འཆི་བ་སྒོམས་ཤིག༔ འདུས་བྱས་ཆོས་རྣམས་འཇིག་པར་སོམས་ཤིག༔ རྒྱུ་འབྲས་ཆོས་ལ་ཡིད་ཆེས་སྐྱེད་ཅིག༔ རང་གི་སློབ་དཔོན་རང་གིས་གྱིས་ཤིག༔ དམ་བཅའ་དྲག་པོ་མཐའ་རུ་ཐོན་ཞིག༔ བརྩོན་འགྲུས་འཆི་གཞུག་ཆོས་དང་སྙོམས་ཤིག༔ འཆི་བའི་དུས་སུ་འགྱོད་མེད་མཛོད་ཅིག༔ བཛྲ་ས་མ་ཡཱ༔ ངྷ་ཐིམ༔ ཞེས་བརྗོད་སློབ་དཔོན་གྱི་ཕྱག་མགོར་བཞག་གོ༔ གཉིས་པ་ལ་གཉིས་ཏེ༔ བཀའ་དྲིན་འཁུར་བ་དང་ཡོན་གྱིས་མཆོད་པའོ༔ དང་པོ་བཀའ་དྲིན་འཁུར་བ་ནི༔ གསེར་དངུལ་ཟངས་ལྕགས་རྟ་དང་གླང་པོ་ཆེ༔ ལོངས་སྤྱོད་ཅི་ཡོད་ཕངས་མེད་བླ་མར་འབུལ༔ བུ་དང་ཆུང་མ་ལུས་ངག་ཡིད་གསུམ་སོགས༔ བླ་མར་ཕུལ་བའི་ཕན་ཡོན་རྣམ་པ་གཉིས༔ གནས་སྐབས་འདི་ནས་བྱང་ཆུབ་མ་ཐོབ་བར༔ ཆོས་ཀྱི་ལོངས་སྤྱོད་འདོད་དགུས་ཕྱུག་པ་དང་༔ མཐར་ཐུག་རྫོགས་པའི་སངས་རྒྱས་གྲུབ་པའི་དུས༔ གནས་དང་དུས་དང་འཁོར་དང་ཆོས་རྣམས་ལ༔ ཕུན་སུམ་ཚོགས་པ་ལྔ་ལྡན་རྒྱན་བཟང་འཐོབ༔ གཉིས་པ་ཡོན་གྱིས་མཆོད་པ་ནི༔ ཅི་འབྱོར་གྱི་མཎྜལ་ཐོགས༔ སྐྱེམས་དང་བཅས་ཏེ་འདི་སྐད་ཞུའོ༔ ཨེ་མ་ཐུགས་རྗེ་ཆེར་ལྡན་པ༔ ཐམས་ཅད་མཁྱེན་པ་སྟོན་པ་པོ༔ ཡེ་ཤེས་བླ་མེད་སྨིན་གྲོལ་གྱི༔ ཐུགས་རྗེ་ཐབས་མཁས་ཕྲིན་ལས་སྐྱོངས༔ བདག་ཅག་རྗེས་བཟུང་སྐུ་དྲིན་ཆེ༔ ཞེས་བརྗོད་མཎྜལ་དབུལ༔ གསུམ་པ་ལ་གསུམ་ལས༔ ཚོགས་འཁོར་བསྐོར་བ༔ བསྔོ་སྨོན་རྒྱས་འདེབས༔ བརྗོད་མེད་ཀྱི་ཉམས་སྐྱོང་བའོ༔ ཚོགས་འཁོར་བསྔོ་སྨོན་རྣམས་ལས་བྱང་ལྟར་བྱའོ༔ བརྗོད་མེད་ཀྱི་ཉམས་སྐྱོང་བ་ནི༔ མདུན་གྱི་ཚོམ་བུ་ལ་མཆོད་བསྟོད་བསྡུས་པ་ཞིག་བྱས་ཏེ༔ ཀུན་བཟང་ཡབ་ཡུམ་ཆོས་དབྱིངས་བརྗོད་མེད་ཀྱི་ངང་དུ་ཡལ་བར་བསྒོམས་ཤིང་༔ ཀ་དག་བློ་འདས་སྤྲོས་བྲལ་གྱི་ངང་ལ་མཉམ་པར་བཞག་གོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཧོ༔ རིག་པའི་ཡེ་ཤེས་པད་འབྱུང་ང་༔ རྒྱུ་རྐྱེན་མཚན་མའི་དྲི་མ་དག༔ རྡོ་རྗེ་སེམས་དཔས་ངོ་སྤྲོད་བཏབ༔ སྐུ་གསུམ་སངས་རྒྱས་རང་ལས་རྙེད༔ ཆོས་ཉིད་བདེན་པ་མཐོང་བའི་ཚེ༔ འགྲོ་ལ་ཕན་ཕྱིར་བསྟན་བཅོས་བརྩམས༔ དུས་གསུམ་འགྲོ་དོན་མཐར་ཕྱིན་བྱས༔ མ་འོངས་བོད་ཀྱི་རྒྱལ་ཁམས་འདིར༔ རྟོག་གེ་མཁན་གྱི་སློབ་དཔོན་འགས༔ སྦྱངས་པའི་རིག་གནས་ཚིག་སྐམ་རེས༔ ཤེས་བློར་བཅང་ཞིང་བསྟན་བཅོས་རྩོམ༔ དམུས་ལོང་འགྲོ་རྣམས་རྗེས་སུ་འཇུག༔ དྲོད་རྟགས་་མེད་ཅིང་ཉམས་མྱོང་བྲལ༔ ཁ་བཤད་རྒྱག་ཅིང་རང་ཆེ་འདོན༔ འཆི་དུས་ཆོས་ཀྱིས་གང་ཟག་འཆིང་༔ མནར་མེད་འཁྱམས་པའི་ཆོས་པ་འགྱོད༔ ཨོ་རྒྱན་ང་ལ་གཉིས་ཡོད་ཟེར༔ གཏེར་ཆོས་ཟབ་མོར་མིག་ལོག་ལྟ༔ ལྟ་སྒོམ་སྤྱོད་གསུམ་གོ་བ་བཞག༔ ཚིག་སྐམ་རེ་རེའི་སྔ་ཕྱི་རྩོད༔ དུས་རྟགས་གྲངས་གསུམ་ནོར་རོ་ཟེར༔ མི་མཁས་འདོད་ཆགས་མེ་ལྟར་འབར༔ ཡང་ན་ལྷ་ཡིས་བྱིན་གྱིས་བརླབས༔ ཡང་ན་སྒྲིབ་པ་གཉིས་བྲལ་ཚེ༔ བསྟན་བཅོས་རྩོམ་དང་སྤེལ་བསྡུ་དབང་༔ དེ་མིན་བསྟན་བཅོས་རྩོམ་པ་རྣམས༔ ནམ་མཁའ་སྦར་མོས་བཟུང་བ་འདྲ༔ རྒྱ་འགྱུར་མ་འཆུགས་པདྨའི་བཀའ༔ ཁ་ཚང་དོན་གསལ་ཉམས་ལེན་འདྲིལ༔ གཏེར་ཆོས་ཡིན་ནོ་སྐལ་ལྡན་རྣམས༔ ཁྱད་པར་བདེ་མཆོག་བླ་མེད་ཆོས༔ བླ་མ་ཡི་དམ་ཟུང་དུ་འཇུག༔ བསྐྱེད་རྫོགས་གཉིས་ལྡན་ཡིད་བཞིན་ནོར༔ ས་འོག་གཏེར་ཆོས་ཀུན་གྱི་བཅུད༔ ཕྱི་རབས་སྐལ་ལྡན་ཉམས་སུ་ལོང་༔ གནས་ཆེན་ཏེ་སེའི་གངས་ལ་སྦས༔ རྡོ་རྗེ་ལེགས་པས་བཀའ་འདི་སྲུངས༔ ལྷ་བཙན་ཆེན་པོས་གཏེར་འདི་སྲུངས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ་༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་འགྲོ་འདུལ་གླིང་པས་གངས་རིའི་རྒྱལ་པོ་ཏེ་སེ་ནས་གདན་དྲངས་པའོ། །སརྦ་མངྒ་ལམ། །