དཔའ་བོ་མཁའ་འགྲོའི་སྒྲུབ་ཐབས།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ དཔའ་བོ་མཁའ་འགྲོའི་སྒྲུབ་ཐབས་བཞུགས༔ དཔལ་ཆེན་པོ་བདེ་བའི་ཧེ་རུ་ཀཿལ་ཕྱག་འཚལ་ལོ༔ མ་འོངས་སྐལ་ལྡན་བུ་ཡི་དོན༔ གྷུ་རུ་རྗེ་ལ་ལུང་ཞུས་ནས༔ དཔའ་བོ་ངྷཱཀྐིའི་སྒྲུབ་ཐབས་ཤིག༔ ཁོ་མོས་ཤོག་སེར་ལོགས་ལ་འདེབས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ ལས་གཞུང་ལས༔ ལས་སྦྱོར་འཕྲིན་ལས་བཞི་ལ་རང་གསལ་གདབ༔ ཅེས་པའི་འཕྲིན་ལས་བཞི་སྒྲུབ་ཀྱི་རིམ་པ་ཁོ་མོས་སྦྱར་བའི་ཟིན་བྲིས་ལ་བལྟ་ཞིང་༔ དོན་རྣམ་པ་གཉིས་ཀྱི་དངོས་གྲུབ་འཐོབ་པར་འདོད་པས་དཔའ་བོ་ངྷཱཀྐིའི་སྒྲུབ་ཐབས་འདི་བཞིན་ཉམས་སུ་ལེན་པར་བྱའོ༔ གནས་དང་དཀྱིལ་འཁོར་བཅའ་གཞི་གཏོར་ཚོགས་བཀོད་པའི་བྱེ་བྲག་དང་བཅས་པ་ནང་སྒྲུབ་སོར་བཞག་གི་སྟེང་ནས༔ ལས་ཀྱི་གཞུང་བསྲང་ཕྱི་ནང་གཉིས་དང་དཔལ་བརྒྱད་ཀྱི་བསྙེན་དམིགས་ཐུན་འགོ་ན་དུམ་རེ་བསྐྱལ་ཞིང་༔ རང་ཉིད་དཔལ་ཆེན་པོ་ཧེ་རུ་ཀཿཡབ་ཡུམ་དུ་གསལ་བའི་ཡན་ལག་བཞིའི་ཚིགས་ཁར་དུར་ཁྲོད་ཀྱི་ཕོ་བྲང་འཇིགས་རུང་བཀོད་པའི་ཚོམ་བུ་ཚང་བར་ལྡན་པའི་དབུས་སུ༔ པུས་མོ་གཡས་ནས་གཡས་སྐོར་དུ་དཀྱིལ་འཁོར་ཆེན་པོའི་སྒོ་སྐྱོང་དུར་ཁྲོད་དང་གནས་ཡུལ་ཀུན་གྱི་དེད་དཔོན་ཆེན་པོ་བཛྲ་རཏྣ་པདྨ་ཀརྨ་སྟེ༔ དཔའ་བོ་དཔའ་མོ་ཡབ་ཡུམ་བརྒྱད་འཁྲིལ་སྦྱོར་གར་སྟབས་ཅན་གྲི་ཐོད་ཀྱི་ཕྱག་རྒྱ་དང་དུར་ཁྲོད་ཀྱི་ཆས་ཀྱིས་བརྒྱན་པར་བསྐྱེད་པའི་བ་སྤུའི་འོད་ཀློང་དང་གནས་ལྔར་རིགས་བཞིའི་དཔའ་བོ་དཔའ་མོ་འབུམ་ཕྲག་འབུམ་ཕྲག་གི་ཚོགས་གྲངས་མེད་དཔག་ཏུ་མེད་པ་ཏིལ་གྱི་གོང་བུ་ཁ་ཕྱེ་བ་ལྟ་བུར་བསྒོམ་ཞིང་༔ རིགས་བཞིའི་དཔའ་བོ་མཁའ་འགྲོ་རྣམས་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཡབ་བཞི་ལ་ར་ཙ་ཧྲི་ཡ༔ ཡུམ་བཞི་ལ་ཧ་རི་ནི་སའི་ཐུགས་སྲོག་ས་བོན་གྱིས་མཚན་པའི་མཐར་ཡབ་རྣམས་ལ་ར་ཙ་ཧྲི་ཡ༔ ཡུམ་རྣམས་ལ་ཧ་རི་ནི་ས་བཞིའི་སྔགས་འབྲུ་ཚང་བ་རེ་གཡས་གཡོན་དུ་ཐབས་ཤེས་ཀྱི་ཚུལ་དུ་འཁོར་བ་ལ་ཤེས་པ་རྩེ་གཅིག་ཏུ་གཏད་ཅིང་༔ ཞལ་ནས་སྙིང་པོ་དུམ་གཅིག་བཟླས་པས་སྔགས་ཕྲེང་འོད་ཟེར་གྱི་རྣམ་པར་གཅིག་ལས་གཉིས་མཆེད༔ མདུན་བསྐྱེད་དཔལ་ཆེན་པོ་ཡབ་ཡུམ་དུ་གསལ་བ་དང་སྒོ་བཞིའི་གཞལ་ཡས་དང་དཔའ་བོ་དཔའ་མོ་བརྒྱད་ཀྱི་ཐུགས་ཀར་ཕོག་ཅིང་༔ དེ་རྣམས་ཀྱི་ཐུགས་ཀའི་སྔགས་འཁོར་ཡང་དྲག་ཏུ་འཁོར་ཡབ་ཡུམ་ཐམས་ཅད་བདེ་བ་ཆེན་པོ་རབ་ཏུ་རྒྱས་པ་ལས༔ དཔལ་ཆེན་པོ་དབང་གི་ལྷ་ཚོགས་རྣམས་དང་ཁྱད་པར་དུ་དཔའ་བོ་དཔའ་མོ་རྣམས་ཀྱི་གནས་གསུམ་དང་ཐུགས་ཀ་རྣམས་ལས་འོད་ཟེར་འབུམ་ཕྲག་དུ་མ་ཕྱོགས་བཅུའི་དག་པའི་ཞིང་མཁའ་སྤྱོད་ཀྱི་གནས༔ ཁྱད་པར་དུ་གནས་ཉི་ཤུ་རྩ་བཞི་ཡུལ་སུམ་ཅུ་སོ་ལྔ་དུར་ཁྲོད་ཆེན་པོ་བརྒྱད་ནུབ་ཕྱོགས་ཨོ་རྒྱན་ཟངས་མདོག་པདྨ་འོད་ལ་སོགས་སུ་བཞུགས་པའི་སངས་རྒྱས་བྱང་སེམས་ཡི་དམ་མཁའ་འགྲོ་ཐམས་ཅད་ཀྱི་ཐུགས་ཀར་ཕོག༔ བདེ་བ་ཆེན་པོའི་རང་བཞིན་ལས་རང་ཤར་བའི་མཆོད་པའི་སྤྲིན་ཕུང་དུ་གྱུར་ཞིང་མཆོད་པས༔ དེ་རྣམས་ཐམས་ཅད་མཉེས་ཤིང་ཡོངས་སུ་དགྱེས་ནས་ཡེ་ཤེས་དང་བྱིན་རླབས་ཀྱི་རྣམ་པ་ཐམས་ཅད་བུམ་པ་གང་བྱོའི་ཚུལ་དུ་འོད་ཟེར་སྣ་ཚོགས་ཀྱི་རྣམ་པར་ཁ་བ་བུ་ཡུག་འཚུབ་པའམ་ཉི་རྡུལ་ལྟར་ཚུར་འདུས་ཤིང་རང་དང་མདུན་བསྐྱེད་ལ་གཉིས་སུ་མེད་པར་ཐིམ་པས༔ མཁའ་སྤྱོད་གནས་ཡུལ་དུར་ཁྲོད་ཀུན་གྱི་དཔའ་བོ་དཔའ་མོ་རྣམས་ཀྱི་ཆེ་བཙན་དུ་གྱུར་ཅིང་༔ ནུས་སྟོབས་ཆེས་ཆེར་འབར་བའི་གཟི་བརྗིད་ཀྱིས་སྟོང་ཁམས་ཀུན་ཏུ་ཁྱབ་ཅིང་འཁྲུག་པས༔ གཟུགས་ཅན་གཟུགས་མེད་ཁམས་གསུམ་གྱི་སེམས་ཅན་ཐམས་ཅད་དབང་དུ་སྡུས་བྲན་དུ་བཀོལ་ཟིལ་གྱིས་མནན་ཏེ༔ ཁམས་གསུམ་འཁོར་བའི་མིང་མེད་པར་དཔའ་བོ་མཁའ་འགྲོའི་ཞིང་ཁམས་དཔའ་བོ་དཔའ་མོའི་རང་བཞིན་དུ་མེར་མེར་ཤིགས་ཤིགས་ཡོམ་ཡོམ་ཏིང་འཛིན་དུ་ལམ་ལམ་སྔགས་སྒྲ་རུ་དིར་དིར་ཡོད་པར་བསམས་ཤིང་གསང་སྔགས་རྒྱལ་པོ་འདི་ལ་འབུམ་ཚོ་གཅིག་བགྲང་བར་བྱའོ༔ ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲིང་ཧྲིང་ཛ༔ ཛ༔ ཐུན་སྐབས་རྣམས་སུ་མཆོད་བསྟོད་སོགས་ལས་བྱང་ལྟར་བྱ༔ བསྙེན་པ་རྫོགས་ནས་སྒྲུབ་རྫས་གནས་གསུམ་དུ་གཏུག་ཅིང་དབང་བཞི་ལེན༔ མཐར་དམིགས་མེད་དུ་རྒྱས་འདེབས་སྟོང་ཉིད་དུ་ལམ་འཁྱེར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ཉམས་སུ་བླངས་པའི་ཚེ་རྟགས་ཀྱི་རིམ་པ་ནི་སྔར་སྒྲུབ་ཐབས་སྤྱི་དང་མཐུན་ཞིང་༔ ཁྱད་པར་དུ་དཔའ་བོ་དཔའ་མོའི་ཞལ་མཐོང་བ་གསུང་ཐོས་པ་ཉམས་མྱོང་ཁྱད་པར་ཅན་སྐྱེ་བའི་ཏིང་འཛིན་ཁོར་ཡུག་ཏུ་འཆར་བ༔ ཟག་བཅས་ལ་བློ་ལོག་ཅིང་ཟག་མེད་མངོན་དུ་འགྱུར་བ༔ སྒྲུབ་རྫས་དང་གཏོར་མ་སོགས་ལ་མེ་འབར་བ་དུད་པ་འཐུལ་བ་དྲི་བཟང་པོ་བྲོ་བ༔ ཁྲོམ་མང་པོ་ལ་དབང་བསྐུར་བ་ཆོས་བཤད་པ་ཁྲི་བཟང་པོ་ལ་འདུག་པ་རྒྱན་བཏགས་པ་གོ་གྱོན་པ༔ བུད་མེད་མང་པོའི་འཁོར་གྱིས་བསྐོར་བ༔ དངོས་གྲུབ་ཀྱི་རྫས་ཁྱད་པར་ཅན་གཏད་པའི་རིག་པ་འུར་བ༔ ནམ་མཁའ་ལ་འཕུར་ཞིང་གནས་ཆེན་པོ་རྣམས་མཐོང་བ་ལ་སོགས་དངོས་ཉམས་རྨི་ལམ་དུ་འབྱུང་བར་འགྱུར་རོ༔ ངན་པའི་རྟགས་ལ་རྐུབ་དང་མོ་མཚན་སྟོན་པ༔ མཛེ་མོ་སྤྲང་མོ་ཡུགས་ས་མོ་ངན་སྤྲང་ལང་ལོང་མུན་རུབ་པ་བོང་བུ་ཞོན་ནས་ནུབ་བྱང་ལ་རྒྱུག་པ༔ གོས་ནག་པོ་ཧྲལ་ཧྲོལ་གྱོན་པ་ཐུར་ལ་རྒྱུག་པ་སོགས་བྱུང་ན་ངན་ནོ༔ དེ་ལྟར་བཟང་པོའི་རྟགས་རྣམས་བྱུང་ཡང་དགའ་སྤྲོ་མི་བྱ་ཞིང་ཆོས་ཉིད་ཀྱི་རོལ་པར་ཤེས་པའི་ངང་ནས་ཏིང་ངེ་འཛིན་གྱིས་དབང་བཞི་ལེན༔ ངན་རྟགས་ཤར་ཀྱང་རྣམ་རྟོག་ཏུ་མི་འཛིན་ཞིང་དཔའ་བོ་མཁའ་འགྲོའི་བསྐང་བཤགས་ལ་འབད་ཅིང་གྲིབ་དང་མི་གཙང་བ་ལ་འཛེམ་སྒྲུབ་པ་ལ་བརྩོན་འགྲུས་བསྐྱེད་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དཔའ་བོ་མཁའ་འགྲོའི་དྲིལ་སྒྲུབ་གསང་བའི་གནད༔ བདེ་མཆོག་དབང་གི་དཔལ་གྱི་བཀའ་འཁོར་བདག༔ དངོས་གྲུབ་རྣམ་གཉིས་འབྱུང་བའི་ཡིད་བཞིན་ནོར༔ སྙིང་གི་ཐིགས་པ་ཤོག་སེར་ལོགས་ལ་བཏབ༔ སྒྲུབ་པ་འདི་ལ་ལན་གཅིག་ཞུགས་པས་ཀྱང་༔ མཆོག་དང་ཐུན་མོང་སྐད་ཅིག་དེ་ལ་འགྲུབ༔ དཔའ་བོ་མཁའ་འགྲོའི་གསང་བའི་དམ་ཚིག་ནི༔ གསང་དབང་ཤེས་རབ་ཡེ་ཤེས་ཚིག་དབང་སོགས༔ དབང་གི་དམ་ཚིག་ཇི་ལྟར་བཤད་བཞིན་བསྲུང་༔ དེས་ནི་ལུས་དང་གྲིབ་མ་ཇི་བཞིན་དུ༔ དཔའ་བོ་དཔའ་མོ་འགྲོག་པར་གདོན་མི་ཟ༔ བཅུ་བཞི་ཉེར་གཉིས་ཉེར་ལྔ་ཉེར་དགུ་སོགས༔ དཔའ་བོ་མཁའ་འགྲོ་རྒྱུ་བའི་དུས་ཡིན་པས༔ ཚོགས་འཁོར་བསྐང་བཤགས་གཏོར་མཆོད་བསྒོམས་བཟླས་བྱ༔ མ་འོངས་སྐལ་ལྡན་ཐུགས་ཀྱི་སྲས༔ བདེ་མཆོག་དབང་གི་ཆོས་སྐོར་ལ༔ ཉམས་ལེན་སྒྲུབ་པ་ཚུལ་བཞིན་སྐྱོར༔ རྟེན་འབྲེལ་འབྲིང་ལ་བབས་པའི་ཚེ༔ ཐུགས་གཏེར་གདམས་པའི་ཆོས་འདིར་འཕྲད༔ གཞན་དོན་རྒུད་པའི་དུས་ཡིན་གསུང་༔ རང་དོན་གཙོ་བོར་འདོན་པའི་སྐབས༔ ཧཱུྃ་ཕཊ་སྦྱོར་བས་རིག་མ་བསྟེན༔ དུར་ཁྲོད་ཉུལ་ཞིང་གནས་ཡུལ་འགྲིམས༔ སྒྲུབ་ཐབས་ཟབ་མོ་ཉམས་སུ་ལོང་༔ གཙང་བཙོག་ཆོས་བརྒྱད་མེད་པར་གྱིས༔ གཤེ་སྐུར་བདུད་ཀྱི་འུར་བ་ཡོང་༔ འདུ་འཛི་བོར་ལ་ཕྱལ་པར་ཐོང་༔ འདི་ནས་མ་འོངས་དུས་ཀྱི་མཐར༔ མཚོན་འཁྲུག་ནམ་མཁའི་ཆར་ལྟར་འབེབས༔ མོན་བོད་གཉིས་ལ་འདོན་འཇུག་མང་༔ སྟོད་སྨད་ཧོར་བོད་འཐབ་ཅིང་འཛིང་༔ དགེ་བཤེས་གླང་སྙིང་དམག་དཔོན་བྱེད༔ དེ་དུས་གུ་རུའི་སྤྲུལ་པ་མང་༔ ཟབ་ཆོས་གསང་སྔགས་མཐའ་ནས་རྡོལ༔ སྒྲུབ་གནས་ཁྱད་འཕགས་དབུས་ནས་རྡོལ༔ གསེར་དངུལ་ཧོར་གྱི་ཡུལ་ནས་རྡོལ༔ བདུད་ཀྱི་སྤྲུལ་པས་ས་གཞི་གང་༔ རྒྱ་འདྲེ་འགོངས་པོས་བར་སྣང་གང་༔ སྐྱེ་འགྲོ་སེམས་ཅན་བདུད་དབང་སྒྱུར༔ དེ་ནས་ཆོས་འདི་སྤེལ་མི་རུང་༔ སྤེལ་ན་མི་རུང་སྣ་ཚོགས་ཡོང་༔ ཚོད་ལ་བརྟག་མཁས་གྱིས་ཤིག་བུ༔ དེ་ནས་གནམ་སའི་གོ་ལོག་གམ༔ ཡང་ན་གསང་བའི་ལུང་བསྟན་ལྟར༔ དུས་རྟགས་ངེས་པ་འཆོལ་མེད་ན༔ ཆོས་བདག་སྐལ་ལྡན་བུ་བདུན་ལས༔ མང་བར་མི་བྱ་མནའ་རྒྱས་ཐོབ༔ གསང་བར་སྤེལ་ལ་བསྒྲུབ་ལུང་བྱེད༔ བསྟན་དང་འགྲོ་དོན་དཔག་མེད་འབྱུང་༔ ས་མ་ཡཱ༔ རྒྱ་རྒྱ་རྒྱ་༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་དེས་གངས་རིའི་རྒྱལ་བོ་ཏེ་སེ་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། སརྦ་མངྒ་ལམ།