ད་ལའི་རྣམ་དག
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ད་ལའི་རྣམ་དག་ཡོད༔ དཔལ་ཧེ་རུ་ཀཿལ་ཕྱག་འཚལ་ལོ༔ མ་འོངས་སྐལ་ལྡན་བུ་ཡི་དོན༔ དཀྱིལ་འཁོར་རྣམ་དག་རིམ་པ་ཞིག༔ པདྨ་འབྱུང་གནས་བདག་གིས་བཀོད༔ ས་མ་ཡཱ༔ རྒྱ་རྒྱ་རྒྱ༔ སློབ་བུ་སྤྱན་དབྱེ་རྡོ་རྗེ་སློབ་དཔོན་གྱིས༔ གསེར་ཐུར་རྡོ་རྗེ་ཕྱེད་པས་མཚན་པ་ཐོགས༔ དཀྱིལ་འཁོར་ཤར་ནས་རྣམ་དག་འདི་ལྟར་བརྗོད༔ ཀྱེ་ཧོ་སྐལ་ལྡན་རིགས་ཀྱི་བུ་མཆོག་རྣམས༔ དད་གུས་མོས་འདུན་རྩེ་གཅིག་རིག་པ་སྒྲིམས༔ མ་ཡེངས་ངང་ནས་དཀྱིལ་འཁོར་འདི་ལ་ལྟོས༔ རྟེན་གཞི་འབྱུང་བ་རིམ་བརྩེགས་དང་༔ ལྷུན་གྲུབ་གཞལ་ཡས་རིན་པོ་ཆེ༔ བརྟེན་པ་ཡི་དམ་དཀྱིལ་འཁོར་ལྷ༔ ཕྱི་ནང་གསང་བ་བླ་ན་མེད༔ བླ་མེད་གསང་བའི་དཀྱིལ་འཁོར་འདི༔ དུས་གསུམ་རྒྱལ་བའི་ཐུགས་ལས་སྤྲུལ༔ ངོ་མཚར་རྨད་བྱུང་མཆོག་གི་གནས༔ ལྷུན་གྲུབ་ཡེ་ཤེས་གཞལ་ཡས་ཁང་༔ གྲུ་བཞི་པ་ལ་སྒོ་བཞི་པ༔ རྒྱན་དང་རྟ་བབས་བཞི་བཞིར་ལྡན༔ ཕྱི་གསལ་ནང་གསལ་ཕོ་བྲང་དབུས༔ བཅོམ་ལྡན་དཔལ་ཆེན་ཐོད་པ་རྩལ༔ ཆོས་སྐུ་འགྱུར་མེད་ཞལ་གཅིག་པ༔ ཐབས་ཤེས་དབྱེར་མེད་ཕྱག་གཉིས་ན༔ སྣང་སྟོང་ཟུང་འཇུག་རྡོར་དྲིལ་བསྣམས༔ རིན་ཆེན་རྒྱན་ལྡན་ལོངས་སྤྱོད་རྫོགས༔ དུར་ཁྲོད་ཆས་ལྡན་ཧེ་རུ་ཀ༔ དཔལ་གྱི་ཆས་ལྡན་ཁྲོ་བོའི་རྒྱལ༔ འཁོར་འདས་དབྱེར་མེད་ཞབས་གཉིས་འགྱིང་༔ ཆགས་མེད་ཆོས་དབྱིངས་སྟོང་པའི་ཡུམ༔ འགག་མེད་མཁྱེན་རྩལ་སྤྲུལ་པའི་སྐུ༔ ཉོན་མོངས་སྒྲིབ་བྲལ་ཉི་ཟླའི་གདན༔ རྣམ་འཕྲུལ་དཔག་ཡས་དཀྱིལ་འཁོར་ལྷ༔ མུ་མཐའ་མེད་པ་ཆོས་ཀྱི་དབྱིངས༔ ས་ལམ་ཡོན་ཏན་མཐར་ཕྱིན་རྫོགས༔ སྐུ་ལྔ་ཡེ་ཤེས་ལྷུན་གྱིས་གྲུབ༔ དུག་ལྔ་ཚོགས་བརྒྱད་རྣམ་པར་དག༔ རྟག་ཆད་འཛིན་པ་རང་སར་གྲོལ༔ རྣམ་པར་ཐར་པ་བརྒྱད་ལྡན་ཞིང་༔ འདི་ནི་རིག་འཛིན་ཕོ་བྲང་སྟེ༔ མཁའ་སྤྱོད་དག་པ་དཔལ་གྱི་དབྱིངས༔ དཔའ་བོ་མཁའ་འགྲོ་འདུ་བའི་ཞིང་༔ ཡེ་ཤེས་ཟངས་ཐལ་འོད་ཀྱི་ཀློང་༔ མ་བཅོས་ཆོས་དབྱིངས་ཕོ་བྲང་འདི༔ མཐོང་བ་ཙམ་གྱིས་སྡིག་སྒྲིབ་འདག༔ བརྟེན་ཅིང་བསྒྲུབ་ན་མཆོག་ཐུན་འགྲུབ༔ རིག་འཛིན་བླ་མའི་ཕོ་བྲང་འདི༔ མོས་གུས་མ་ཆུང་དྭངས་བས་མཇོལ༔ ཅེས་བརྗོད་དཀྱིལ་འཁོར་མཐོང་བ་འདྲི༔ དཀར་པོར་མཐོང་ན་ཞི་བའི་ལས༔ དམར་པོ་དབང་དང་སེར་པོ་རྒྱས༔ མཐིང་ག་ཆོས་དབྱིངས་ནག་པོ་ནི༔ མངོན་སྤྱོད་ལ་སོགས་གང་མཐོང་གི༔ ལས་བཞི་འགྲུབ་གྱུར་ཐེ་ཚོམ་མེད༔ དཀྱིལ་འཁོར་བལྟ་བའི་མཐོང་སྣང་དང་༔ མེ་ཏོག་ཕོག་པའི་ལྷ་སྐལ་གཉིས༔ མཐུན་ན་མི་དེ་སྐལ་ལྡན་བུ༔ དངོས་གྲུབ་འཐོབ་པར་གདོན་མི་ཟ༔ དེ་ནས་སྐལ་ལྡན་བུ་དེ་ལ༔ གནས་གསུམ་དྲི་ཡིས་ཐིག་ལེ་བྱ༔ ཡེ་ཤེས་དབབ་ཅིང་མེ་ཏོག་འཐོར༔ ཏིཥྛ་བཛྲ་བརྗོད་པར་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ་༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་རྙེད༔ མངྒ་ལམ། །