གསང་བའི་སྨན་སྒྲུབ་ཁྲོལ་བུའི་རིམ་པ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ གསང་བའི་སྨན་སྒྲུབ་ཁྲོལ་བུའི་རིམ་པ་བཞུགས་སོ༔ དཔལ་ཧེ་རུ་ཀཿལ་ཕྱག་འཚལ་ལོ༔ རྒྱུ་རྐྱེན་མེད་པའི་ཟང་ཐལ་ལུས༔ འཁོར་འདས་མངའ་དབང་ཧེ་རུ་ཀ༔ པདྨ་ཐོད་ཕྲེང་བདག་ཉིད་ཀྱིས༔ ཕྱི་རབས་བསྟན་དང་འགྲོ་བའི་དོན༔ བདུད་རྩི་གསང་བའི་སྒྲུབ་པ་ཞིག༔ ཡི་གེར་བྲིས་ནས་གཏེར་དུ་སྦ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ་༔ རྒྱ་རྒྱ་རྒྱ༔ དེ་ལ་བདུད་རྩི་གསང་བའི་སྒྲུབ་པ་བྱེད་པར་འདོད་པའི་གང་ཟག་གིས༔ སྔོན་འགྲོ་མཆོག་གི་རྫས་འགོད་པ་དང་༔ དངོས་གཞིའི་སྒྲུབ་པ་རྗེས་དབང་དང་བསྔོ་སྨོན་རྒྱས་འདེབས་སོ༔ ས་མ་ཡཱ་༔ རྒྱ༔ རྒྱ༔ རྒྱ༔ སྔོན་འགྲོ་མཆོག་གི་རྫས་འགོད་པ་ལ་ཐུན་མོང་དང་ཐུན་མོང་མ་ཡིན་པའོ༔ ཐུན་མོང་ནི་ཁོག་འབུབ་ལྟར་གསལ་ཞིང་༔ ཐུན་མོང་མ་ཡིན་པ་ནི༔ ཐོད་པ་མཚན་དང་ལྡན་པ་ཕོ་ཐོད་མོ་ཐོད་གཉིས་ཀྱི་ནང་དུ༔ རབ་གསེར་འབྲིང་དངུལ་ཐ་མ་ཡང་རྒྱ་མཚལ་གྱིས་འཁོར་ལོ་མུ་ཁྱུད་ལྔ་པ་རེ་བྲི༔ ཕོ་ཐོད་ཀྱི་ལྟེ་བ་ལ་ཨཱོཾ༔ དེའི་ཕྱི་རོལ་དུ་རྩིབས་བཞིའི་ནང་དུ༔ ཧཱུྃ་ཏྲཱྃ་ཧྲཱི༔ ཨཱཿརྣམས་བྲི༔ རྩིབས་མཆན་བཞི་ལ༔ ར་ཙ་ཧྲི་ཡ་བཞི་བྲི༔ དེའི་ཕྱི་རིམ་མུ་ཁྱུད་ལ་བསྙེན་སྒྲུབ་ལས་སྦྱོར་གསུམ་གྱི་མཐར༔ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲིཿཐཱ༔ ཀཱ་ཡ་ཝཱཀྐ་ཙིཏྟ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཐཱ༔ ཅེས་བྲི་དེ་ཡི་ཕྱི་རིམ་མུ་ཁྱུད་ལ༔ ཨཱ་ལི་ཀཱ་ལི་དབྱངས་གསལ་བྲི༔ དེ་ཡི་ཕྱི་རིམ་མུ་ཁྱུད་ལ༔ ཡིག་བརྒྱ་རྟེན་འབྲེལ་སྙིང་པོ་བྲི༔ ཕྱི་རིམ་ཉི་ཟླ་སྐར་གསུམ་བྲི༔ མོ་ཐོད་དབུས་སུ་མུཾ༔ རྩིབས་བཞི་ལ་ལཾ་མཾ་པཾ་ཏཾ་བྲི༔ རྩིབས་མཆན་བཞི་ལ་ཧ་རི་ནི་ས་བཞི་བྲི༔ མུ་ཁྱུད་ཕྱི་ནང་གོང་དང་མཚུངས༔ མཐའ་ལ་འབྱུང་བཞིའི་རི་མོ་ལ༔ ཡཾ་བཾ་རཾ་སུཾ་བཞི་ཡིས་མཚན་པ་བྲི༔ མཛེས་པའི་ཚོན་བྱུག་རབ་གནས་བྱ༔ ས་མ་ཡཱ༔ རྒྱ་རྒྱ་རྒྱ་༔ མོ་ཐོད་ཀྱི་ཤར་དུ་བྱང་སེམས་འོ་མ་ཁྱིའི་ཤ་ཅོང་ཞི་ཛཱ་ཏི་དབང་ལག་ག་བུར་རྣམས་འགོད༔ ལྷོ་རུ་དྲི་ཆུ་གླ་རྩི་ཀ་ཀོ་ལ་མར་རྟ་ཤ་འཚེ་བ་རུ་ར་རྣམས་འགོད༔ ནུབ་ཏུ་པདྨ་རཀྟ་གུར་གུམ་སྦྲང་རྩི་རྨ་བྱའི་ཤ་ལི་ཤི་མཁན་པ་སྐྱུ་རུ་ར་རྣམས་འགོད༔ བྱང་དུ་ཤ་ཆེན་ཚིལ་ཆེན་བུ་རམ་ཁྱུང་ཤ་བྲག་ཞུན་ཡུང་བ་གི་ཝང་རྣམས་འགོད༔ དབུས་སུ་དྲི་ཆེན་ཙན་དན་གླང་ཤ་ཤུག་འབྲུ་ཨ་རུ་ར་སེང་ཤ་སྤྲེལ་ཤ་སྦལ་པའི་ཤ་ཉ་སྲམ་གྱི་ཤ་ཤང་ཤང་གི་ཤ་ཕྱི་བའི་ཤ༔ མིག་སྣ་རྣ་བ་ལྕེ་སྙིང་རྨིག་ལེབ་རྨིག་ཟླུམ་རྨིག་པ་ཁ་དབྲག་མཆེ་བ་ཅན་གཤོག་པ་ཅན་སོགས་བརྒྱ་བརྒྱ་རྣམས་དང་མེ་ཏོག་སྣ་ཚོགས་སྨན་སྣ་དང་འབྲུའི་རིགས་གྱུར་དབུས་སུ་འགོད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ཕོ་ཐོད་སྟེང་ནས་བཀབ༔ དར་གྱིས་དྲིལ་ནས་ཚོན་སྐུད་བསྡམས༔ པྲོག་ཞུ་བསྐྱོན་ཞིང་གཟུངས་ཐག་གདགས༔ རྡོ་རྗེ་སློབ་དཔོན་ལྕམ་དྲལ་རྣམས༔ ཆས་སུ་གཞུག་ཅིང་ད་ལ་བསྐོར༔ ཁྱེའུ་བཞི་དང་བུ་མོ་བཞི༔ རྒྱན་དྲུག་རིགས་ལྔ་དར་གྱིས་བརྒྱན༔ དཀར་དམར་དར་གྱི་མདོ་ལེ་ལ༔ བདུད་རྩི་སྨན་གྱི་ཐོད་པ་བཏེག༔ རོལ་མོ་འཁྲོལ་ཞིང་དྲག་སྔགས་བརྗོད༔ གུ་གུལ་བདུག་ཅིང་སྤོས་རྣམས་བསྲེག༔ སྙན་པའི་དབྱངས་ཀྱིས་འདི་སྐད་བརྗོད༔ དུས་གསུམ་རྒྱལ་དང་རྒྱལ་པའི་ཕྲིན་ལས་པ༔ སྙིགས་མ་ལྔ་བརྒྱའི་འགྲོ་བ་འདྲེན་པའི་མགོན༔ མ་ཧཱ་གུ་རུ་རྡོ་རྗེ་ཐོད་པ་རྩལ༔ རིག་འཛིན་དཔའ་བོ་དཔའ་མོ་ཡི་དམ་གིང་༔ གནས་ཡུལ་མཁའ་འགྲོ་ཆོས་སྐྱོང་བསྲུང་མར་བཅས༔ རང་སྣང་རྣམ་དག་འོག་མིན་ཆོས་དབྱིངས་ནས༔ འགྲོ་བའི་དོན་དུ་གནས་འདིར་གཤེགས་སུ་གསོལ༔ ཐུགས་རྗེའི་དབང་གིས་གནས་འདིར་གཤེགས་ནས་ཀྱང་༔ གསང་བའི་ཕོ་བྲང་འདི་ལ་བྱིན་ཅིག་ཕོབ༔ དམ་རྫས་བདུད་རྩི་འདི་ལ་བཅུད་ཅིག་སྩོལ༔ མཚན་ལྡན་རིག་མ་འདི་ལ་མདངས་ཤིག་ཕྱུངས༔ བཀྲ་ཤིས་ཁྱེའུ་འདི་ལ་བདེ་བ་བསྐྱེད༔ རྡོ་རྗེ་རྒྱལ་པོར་རྒྱལ་ཚབ་དབང་མཆོག་བསྐུར༔ སྒྲུབ་མཆོག་མཆེད་ལྕམ་རྣམས་ལ་དངོས་གྲུབ་སྩོལ༔ ཕྱི་ནང་གསང་བའི་བར་གཅོད་དབྱིངས་སུ་སོལ༔ བགེགས་དང་ལོག་པར་འདྲེན་པ་རྡུལ་དུ་རློགས༔ དུས་གསུམ་རིག་འཛིན་དཔའ་བོ་མཁའ་འགྲོ་རྣམས༔ རིགས་བཞིའི་དཔའ་བོ་དཔའ་མོ་གཙོ་དང་འཁོར༔ གདོད་ནས་རྣམ་དག་རྫས་མཆོག་ཁྱད་པ་ཅན༔ ར་ས་ཡ་ན་འདི་དང་གཉིས་མེད་བཞུགས༔ བྱང་སེམས་བདུད་རྩིའི་རྒྱ་མཚོར་བསྒྱུར་དུ་གསོལ༔ མཆོག་དང་ཐུན་མོང་གཉིས་ཀྱི་དངོས་གྲུབ་སྩོལ༔ ཅེས་བརྗོད་བུམ་སྟེགས་ལྡིང་ཁྲིའི་དབུས་སུ་བཞག༔ དཀར་དམར་མདངས་ལྡན་དར་གུར་ལེགས་པར་ཕུབ༔ ཞི་ཁྲོ་བཀའ་བརྒྱད་གཞུང་གི་བྱིན་འབེབས་འདོན༔ དབྱངས་གསལ་ཡེ་ངྷར་སྔགས་ཀྱིས་ནན་པར་བྱ༔ སྔོན་འགྲོ་མཆོག་གི་རྫས་འགོད་རིམ་པ་རྫོགས༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞི་སྒྲུབ་པའི་རིམ་པ་ནི༔ རྣལ་འབྱོར་ཕོ་མོ་གཡས་གཡོན་གྲལ་དུ་འཁོད༔ གིང་པ་དཀར་ནག་སྔགས་ཐུན་བཅས་པ་རྒྱུག༔ བགེགས་བསྐྲོད་བསྲུང་འཁོར་ནན་ཏན་དྲག་ཏུ་བསྒོམ༔ ལས་བྱང་གཞུང་བསྲང་མཆོད་བསྟོད་འཛབ་ཀྱི་གོང་༔ བདུད་རྩི་གསང་བའི་རིག་འཛིན་ཕོ་མོ་རྣམས༔ རང་བཞིན་ཆོས་དབྱིངས་མཁའ་སྤྱོད་ཕོ་བྲང་ནས༔ གསང་བའི་དམ་རྫས་དཀྱིལ་འཁོར་ཕོ་བྲང་ལ༔ སིབ་སིབ་གཉིས་མེད་ཐིམ་པའི་མོས་འདུན་ངང་༔ ཚིག་གིས་གསལ་གདབ་འདི་སྐད་བརྗོད་པར་བྱ༔ ཧཱུྃ༔ རིག་འཛིན་ཚངས་པ་གཙོ་བོའི་མཆོག༔ དུང་གི་ཐོར་ཅོག་ཁོང་གསེང་ཅན༔ ཚངས་པ་ཆེན་པོ་ཀུན་ཏུ་སྒྲོལ༔ དྲང་སྲོང་ཆེན་པོ་ལྗང་སྔོན་ཅན༔ ར་ཙ་ཀ་དང་ནབས་སོ་སྐྱེས༔ ཐ་སྐར་བུ་དང་ལྷས་སྐྱབས་དང་༔ རྒྱུན་ཤེས་དང་ནི་གཡོན་ཕྱོགས་ལྷ༔ ཐང་ལ་གནས་དང་མེ་བཞིན་འཇུག༔ རྐང་གཉིས་སྤྱོད་དང་ཀ་ན་ཡ༔ ཤིང་ཁྱེར་དང་ནི་ལྗང་སྔོན་བུ༔ ཉི་མ་ཟླ་བ་ཀླུ་རུ་བཅས༔ བྲམ་ཟེ་གཞོན་ནུ་སྤྲིན་དང་ནི༔ རིན་པོ་ཆེ་དང་གྷོ་དེ་ཤན༔ གཞོན་ནུ་སྲེད་ཅེས་བྱ་བ་དང་༔ འགྲོ་སྐྱོབ་ཞེས་ནི་བྱ་བ་དང་༔ རྩིབས་ཀྱི་མུ་ཁྱུད་འཛིན་ལ་སོགས༔ ཁྱེད་རྣམས་མ་ལུས་འཁོར་བཅས་ཀྱིས༔ སྔོན་ཚེ་ཡིད་བཞིན་བདུད་རྩི་བསྒྲུབ༔ མཐར་ཕྱིན་བླ་མེད་གྲུབ་པ་ལྟར༔ དེང་འདིར་བྱིན་གྱིས་བརླབས་ནས་ཀྱང་༔ ར་ས་ཡ་ནའི་དངོས་གྲུབ་སྩོལ༔ ཧཱུྃ༔ རང་བྱུང་རྣམ་དག་བདུད་རྩིའི་ལྷ༔ བཻཌཱུར་འོད་ཀྱི་རྒྱལ་པོ་དང་༔ དྲང་སྲོང་ཆེན་པོའི་ཚོགས་རྣམས་དང་༔ འཇོག་པོ་དང་ནི་རིག་འཛིན་ཚོགས༔ བདུད་རྩི་སྨན་གྱི་ལྷ་མོ་རྣམས༔ འཁོར་འདས་ཀུན་གྱི་བཅུད་བསྡུས་ལ༔ གསང་བའི་གནས་འདིར་མགོན་ལ་གཤེགས༔ གཞལ་ཡས་འདི་ལ་བཀྲག་ཅིག་བསྐྱེད༔ ཕོ་བྲང་འདི་ལ་བྱིན་ཅིག་ཕོབ༔ དམ་རྫས་འདི་ལ་བཅུད་ཅིག་སྩོལ༔ གསང་བའི་དཀྱིལ་འཁོར་བསྲུང་དུ་གསོལ༔ ལན་གསུམ་བརྗོད་ཅིང་རོལ་མོ་འཁྲོལ༔ མདའ་དར་ཕྱོགས་བཞི་མཚམས་བཞི་ནས༔ ཁྱེའུ་ཕོ་མོ་བཞི་བཞིས་གཡབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ཆང་ལ་བདུད་རྩི་བཏབ༔ རྟོག་པ་བསལ་ཕྱིར་འདི་སྐད་བརྗོད༔ ཧཱུྃ༔ གཙང་མ་བྲམ་ཟེས་གཙང་མ་ཟ༔ གཙང་མར་ཟོས་ཀྱང་གྲོལ་མི་འགྱུར༔ དྲང་སྲོང་རྣམས་དང་ཀླུ་རྣམས་ཀྱིས༔ གཙང་ལྡན་སྤྱོད་ཅིང་གཙང་མར་གནས༔ གཙང་ཡང་དེ་དག་གྲོལ་མི་འགྱུར༔ བྱོལ་སོང་དུད་འགྲོ་རི་དྭགས་ཀྱིས༔ རྩྭ་གཙང་བཟའ་དང་ཆུ་གཙང་འཐུང་༔ ཇི་སྲིད་སྤྱོད་ཀྱང་དེ་མི་གྲོལ༔ ཁྱི་དང་ཕག་པ་ལ་སོགས་པས༔ མི་གཙང་ཁ་ཟས་རྒྱུན་དུ་བསྟེན༔ དེ་ཡང་གྲོལ་བར་མི་འགྱུར་རོ༔ སྲིན་པོ་རྣམས་དང་བགེགས་རྣམས་ཀྱིས༔ ཤ་ཆེན་བཟའ་དང་ཀླད་ཁྲག་འཐུང་༔ དེ་ཡང་གྲོལ་བར་ག་ལ་སྲིད༔ གདོལ་བའི་ཚོགས་དང་བཤན་པ་ཡིས༔ ཤ་དང་ཁྲག་ལ་ལོངས་སྤྱོད་བྱེད༔ དེ་ཡང་གྲོལ་བར་འགྱུར་མི་སྲིད༔ ཧཱུྃ༔ ད་ལྟ་ཕོ་བྲང་གཞལ་ཡས་འདིར༔ བརྟེན་ཞིང་བསྒྲུབ་པའི་ལྷ་བསྲུང་དང་༔ རིག་འཛིན་རྣལ་འབྱོར་ཕོ་མོ་རྣམས༔ གཙང་དང་མི་གཙང་གཉིས་འཛིན་གྱི༔ བླང་དོར་འཛིན་པ་དབྲལ་བའི་ཕྱིར༔ གཙང་ལྡན་འབྲུ་བཅུད་སྨན་སྤོས་དྲི༔ བཙོག་པ་ཤ་དང་བདུད་རྩི་ལྔ༔ གཙང་བཙོག་མེད་པར་གཅིག་ཏུ་བསྡུས༔ གཟུང་འཛིན་བྲལ་ཡང་སྣོད་དུ་སྤུངས༔ དུ་མར་སྣང་ཡང་གཅིག་ཏུ་བསྐྱིལ༔ གཟུགས་སུ་མེད་ཀྱང་སྐུ་རུ་བསྒོམས༔ བརྗོད་པ་བྲལ་ཡང་འཛབ་ཀྱིས་བསྐུལ༔ གཉིས་སུ་མེད་ཀྱང་བསྙེན་ཅིང་བསྒྲུབས༔ རེ་དོགས་ཟད་ཀྱང་སྤྲོ་བསྡུ་སྒྱུར༔ འདི་ནི་བླ་མེད་ཚོགས་ཀྱི་རྫས༔ ཡེ་ནས་རྣམ་པར་དག་པ་སྟེ༔ སྐུ་ལྔ་ཡེ་ཤེས་མ་འགགས་རྩལ༔ ཐམས་ཅད་རིགས་ལྔ་ཡབ་དང་ཡུམ༔ རང་རང་ཆོས་ཉིད་ངོ་བོར་རྫོགས༔ བླང་དོར་མེད་པར་སྤྱོད་པར་བྱ༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་དཔའ་བོ་དཔའ་མོའི་ཚོགས༔ རིག་འཛིན་རྣལ་འབྱོར་མཆེད་དང་ལྕམ༔ རྒྱལ་ཐེབས་མཚན་ལྡན་གཟུངས་མ་དང་༔ རྡོ་རྗེ་རྒྱལ་པོ་གཙོ་དང་འཁོར༔ སརྦ་པཉྩ་སིངྔྷི་ཁཱ་ཧི་ཁཱ་ཧི༔ སིངྔྷི་ཕ་ལ་ཧོ༔ ལྷ་ལ་མཆོད་ཅིང་རྣལ་འབྱོར་རོལ༔ མཆོད་ཅིང་བསྟོད་པས་ཡོངས་སུ་བསྟོད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་འཛབ་དམིགས་འཕྲུལ་འཁོར་ནི༔ བདག་བསྐྱེད་འཁོར་ལོ་བདེ་མཆོག་རྩལ༔ ཡབ་ཡུམ་ཐུགས་ཀའི་ས་བོན་ལས༔ འོད་ཟེར་འཕྲོས་པས་སྨན་སྒྲོམ་འོག༔ ཀེཾ་ལས་ཐོད་སྒྱེད་གསུམ་དུ་བསམས༔ འོག་ཏུ་ཡཾ་ལས་རླུང་གཡོས་པས༔ རཾ་ལས་མེ་འབར་སྨན་གྱི་སྒྲོམ༔ མཚན་ལྡན་ཐོད་པ་དྲོས་པའི་ཚེ༔ ཤ་ལྔ་བདུད་རྩི་སྨན་འབྲུ་རྣམས༔ རིག་འཛིན་དཔའ་བོ་དཔའ་མོ་ཡི༔ ས་བོན་རྣམས་སུ་གྱུར་ནས་ཀྱང་༔ འོད་དང་ཟེར་ནི་སྐར་ལྟར་འཁྲུག༔ ཕྱོགས་བཅུ་ཀུན་ཏུ་འཕྲོས་པ་ཡིས༔ སེམས་ཅན་ཀུན་གྱི་ལས་སྒྲིབ་སྦྱངས༔ སངས་རྒྱས་རྣམས་ལ་མཆོད་པ་ཕུལ༔ འཁོར་འདས་ཀུན་གྱི་བྱིན་རླབས་བསྡུས༔ ས་བོན་ཡིག་འབྲུ་རྣམས་ལ་ཐིམ༔ བྷནྡྷ་མཾ་དང་ཨཱཾཿཡིག་དང་༔ ཉི་ཟླ་ཁ་སྦྱོར་གཞལ་ཡས་དབུས༔ རིག་འཛིན་འདུས་པའི་གཙོ་མཆོག་ནི༔ འཁོར་ལོ་བདེ་མཆོག་ཡབ་ཡུམ་ལ༔ རིག་འཛིན་རྡོ་རྗེ་སློབ་དཔོན་དང་༔ གྲུབ་པ་ཐོབ་དང་བཀའ་བབས་ཚོགས༔ ཡི་དམ་རྣམས་དང་ཆོས་སྐྱོང་དང་༔ སྨན་གྱི་དྲང་སྲོང་རིག་པ་འཛིན༔ འབུམ་ཕྲག་དཔའ་བོ་དཔའ་མོ་རྣམས༔ མ་འགགས་རོལ་པར་ཡོངས་རྫོགས་གསལ༔ སྣང་སྟོང་ངང་ནས་ལམ་མེར་བསྐྱེད༔ བསྙེན་དང་སྒྲུབ་པ་ལས་སྦྱོར་གསུམ༔ འཛབ་ཀྱི་བཟླས་པས་ཐུགས་རྒྱུད་བསྐུལ༔ མར་མེ་གཅིག་ལས་གཉིས་མཆེད་ཀྱི༔ རྣམ་པའི་ཚུལ་དུ་སྔགས་ཕྲེང་རྣམས༔ བདག་བསྐྱེད་ལྷ་ཡི་ཞལ་ནས་འཐོན༔ གཟུངས་ཐག་ལ་ཞོན་མདུན་དུ་སོང་༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་དཔའ་བོ་དཔའ་མོ་ལ༔ མཆོད་པས་མཆོད་ཅིང་བསྟོད་པས་བསྟོད༔ ཞལ་དུ་ཞུགས་ནས་ཐུགས་ཀར་ཐིམ༔ ཐུགས་དམ་རྒྱུད་བསྐུལ་སྦྱོར་བ་མཛད༔ ཡབ་ཡུམ་གསང་བའི་མཁའ་ཀློང་ནས༔ བྱང་སེམས་གཞལ་ཡས་བྷན་ངྷར་བསྐྱིལ༔ བདུད་རྩིའི་རྒྱ་མཚོ་ཆེན་པོར་བསམས༔ ཕྱི་སྣོད་འཇིག་རྟེན་གཞལ་ཡས་ཁང་༔ ཆོས་ཀྱི་དབྱིངས་དང་འདུ་འབྲལ་མེད༔ ནང་བཅུད་འགྲོ་བ་ཡི་དམ་ལྷ༔ རིག་འཛིན་ཚོམ་བུར་ཐ་མི་དད༔ སྒྲ་རུ་གྲགས་པ་སྔགས་ཀྱི་རྒྱུན༔ བསྙེན་སྒྲུབ་ལས་སྦྱོར་ཐ་དད་མེད༔ བརྗོད་མེད་ཡང་དག་ཆོས་ཀྱི་སྐུ༔ བདེ་མཆོག་ཐུགས་དང་གཉིས་སུ་མེད༔ དེ་ལྟར་གསལ་ཞིང་སྤྲོ་བསྡུ་གཟིར༔ ཉིན་དང་མཚན་མོ་ཐུན་གསུམ་དུ༔ བསྙེན་སྒྲུབ་ལས་སྦྱོར་གསུམ་ལ་འབད༔ ཕྱི་ནང་གསང་བའི་འདུ་འཛི་དང་༔ རྣམ་གཡེང་ལེ་ལོ་སྤང་སྟེ་བསྒྲུབ༔ གིང་པ་རྒྱུག་ཅིང་ཉུལ་ལེ་བསྐྲད༔ ལྔ་གསུམ་བདུན་དང་ཞག་གཅིག་སོགས༔ སྒྲུབ་པའི་དངོས་གཞི་དག་དང་བསྟུན༔ ས་མ་ཡཱ༔ རྒྱ་རྒྱ་རྒྱ༔ དེ་ནས་མཚན་ལྡན་རིག་མ་རྣམས༔ ཆས་ཀྱིས་བརྒྱན་ཞིང་འཛབ་བྲོ་བྱ༔ རྡོ་རྗེ་སློབ་དཔོན་ཏིང་འཛིན་གསལ༔ བསྐྱེད་པའི་ལྷ་ཚོགས་དེ་རྣམས་ཀྱང་༔ བདུད་རྩིའི་སྒྲོམ་ལ་གཉིས་མེད་བསྟིམ༔ མཆོག་ཐུན་བསྒྲུབ་པའི་རྫས་སུ་བསམས༔ རིག་མས་འདོ་ལེའི་དར་ལ་བཏེག༔ སྨན་སྒྲོམ་རྡོ་རྗེ་རྒྱལ་པོར་དབུལ༔ ལྕམ་དྲལ་རྣམས་ཀྱིས་འདི་སྐད་ཞུ༔ ཧཱུྃ༔ གསང་བ་བླ་མེད་མཆོག་གི་རྫས༔ ར་ས་ཡ་ན་སྨན་གྱི་མཆོག༔ དུག་གསུམ་ཉོན་མོངས་རྒྱུ་དང་བཅས༔ ཡེ་ཤེས་བདུད་རྩིའི་རྒྱ་མཚོ་ཆེ༔ མཆོག་ཐུན་དངོས་གྲུབ་འབྱུང་བའི་རྫས༔ སྐྱེ་འགག་འགྱུར་མེད་ཕྲིན་ལས་རྫོགས༔ འདི་ནི་དངོས་གྲུབ་མཆོག་གི་ཚོགས༔ སྟོན་པ་རྡོ་རྗེ་རྒྱལ་པོ་ལ༔ འབུལ་ལོ་ཆོས་དབྱིངས་ཀློང་དུ་བཞེས༔ ཨ་ལ་ལ་ཨེ་མ་ཧོ་སིངྔྷི་ཕ་ལ་ཞེས་བརྗོད་རྡོ་རྗེ་རྒྱལ་པོར་འབུལ༔ དེ་ནས་རྡོ་རྗེ་རྒྱལ་པོ་ཡིས༔ པདྨའི་ཕྱག་རྒྱས་བླང་ནས་ཀྱང་༔ འདི་སྐད་བརྗོད་ཅིང་ཆེ་བ་བསྐྱེད༔ ཧཱུྃ༔ ཡ་མཚན་བླ་མེད་མཆོག་གི་རྫས༔ ཤ་ལྔ་བདུད་རྩི་རྣམ་པ་ལྔ༔ ཕྱི་ནང་གསང་བའི་རྩ་བ་བརྒྱད༔ ཡན་ལག་སྟོང་གི་སྐྱོབས་སུ་སྦྱར༔ འདི་ནི་འཁོར་འདས་ཀུན་གྱི་བཅུད༔ མཆོག་ཐུན་དངོས་གྲུབ་འབྱུང་བའི་གནས༔ བླ་མ་ཡི་དམ་སྒྲུབ་པའི་རྫས༔ མ་དང་མཁའ་འགྲོ་བརྟེན་པའི་རྫས༔ ཆོས་སྐྱོང་སྲུང་མ་བསྐང་བའི་རྫས༔ དབང་བཞིའི་ཡེ་ཤེས་འཐོབ་པའི་རྫས༔ ས་ལམ་དྲོད་རྟགས་འབྱུང་བའི་རྫས༔ རང་བྱུང་ཆོས་སྐུ་རྟོགས་པའི་རྫས༔ འཆི་མེད་གསང་བའི་ཨ་མྲྀ་ཏ༔ དུས་གསུམ་སངས་རྒྱས་བཅོམ་ལྡན་འདས༔ བླ་མེད་གསང་སྒྲུབ་འདི་མཛད་ཅིང་༔ རྡོ་རྗེ་ལྟ་བུར་རྫོགས་སངས་རྒྱས༔ ཨེ་མ་བླ་མེད་མཆོག་གི་རྫས༔ ཀ་དག་ངང་ནས་དབང་བཞི་སྩོལ༔ སྤྲོས་བྲལ་ངང་ནས་བྱིན་ཅིག་ཕོབ༔ ཆོས་དབྱིངས་ཀློང་ནས་བརྟན་པར་མཛོད༔ མཆོག་གི་བུད་མེད་མཁའ་འགྲོའི་ཚོགས༔ དཀར་སེར་དམར་ལྗང་ལས་བཞིའི་བདག༔ འོད་དང་གཟི་མདངས་ཡ་ལ་ལ༔ རྒྱན་དྲུག་གཡེར་ཁ་སི་ལི་ལི༔ དར་དང་ཅོད་པན་པུ་རུ་རུ༔ ཕྱག་ཞབས་གར་སྟབས་ཁྱུགས་སེ་ཁྱུག༔ རིན་ཆེན་པྲོག་ཞུ་ལྡེམས་སེ་ལྡེམ༔ གཙོ་མོ་ཆོས་ཀྱི་དབྱིངས་ན་བཞུགས༔ འབུམ་ཕྲག་དཔའ་བོ་དཔའ་མོར་བཅས༔ བདག་ལ་མཆོག་ཐུན་དངོས་གྲུབ་སྩོལ༔ སརྦ་པཉྩ་སརྦ་སིདྡྷཱི་ཧཱུྃ༔ ཅེས་བརྗོད་སྨན་སྒྲོམ་ཞལ་ཕྱེ་ནས༔ སྐུ་གསུང་ཐུགས་ཀྱི་དངོས་གྲུབ་རྫས༔ ཨ་བར་སྐྱུར་གསུམ་ཕྱག་ཏུ་བླངས༔ ཡི་གེ་གསུམ་བཟླས་ཞལ་དུ་གསོལ༔ མཆོག་ཐུན་དངོས་གྲུབ་ཐོབ་པར་བསམས༔ ས་མ་ཡཱ༔ རྒྱ་རྒྱ་རྒྱ༔ རྗེས་ནི་བསྔོ་སྨོན་གླུ་བྲོ་གར༔ ཚོགས་འཁོར་ལ་སོགས་གཞུང་བཞིན་བྱ༔ བདུད་རྩི་གསང་བའི་སྨན་སྒྲུབ་ལས༔ ཁྲོལ་བུར་སྒྲུབ་ཐབས་རིམ་པ་འདི༔ ཡི་གེར་བྲིས་ནས་གཏེར་དུ་སྦ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་བདེ་ཆེན་གསང་བ་ཕུག་ནས་རྙེད་ཅིང་ཤོག་སེར་ལས་ཕབ་པའོ། །མངྒ་ལཾ། །