བདུད་རྩི་སྨན་གྱི་གསང་སྒྲུབ་ཀྱི་མན་ངག་ལག་ལེན།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་རྩི་སྨན་གྱི་གསང་སྒྲུབ་ཀྱི་མན་ངག་ལག་ལེན་བཞུགས་སོ༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ རྒྱ་གར་ཡུལ་གྱི་སྔགས་འཆང་པདྨ་ངས༔ ཁ་བ་ཅན་དུ་བསྟན་པའི་རྒྱལ་མཚན་བཙུགས༔ མདོ་སྔགས་ཐེག་པ་སྣ་ཚོགས་དམ་ཆོས་ཀྱིས༔ བོད་ཡུལ་འགྲོ་བ་སྨིན་གྲོལ་ལམ་ལ་བཀོད༔ ཁྱད་པར་ར་ས་ཡ་ནའི་རྫས་མཆོག་གིས༔ མྱོང་བས་གྲོལ་བའི་སྒྲུབ་ཐབས་བརྒྱ་རྩ་བརྒྱད༔ ཡི་གེར་བཏབ་ནས་རིན་ཆེན་གཏེར་དུ་སྦས༔ ལས་འཕྲོ་ཅན་ལ་སོ་སོར་སྨོན་ལམ་བཏབ༔ ས་མ་ཡཱ༔ རྒྱ་རྒྱ་རྒྱ༔ དེ་ལ་བདུད་རྩི་གསང་བའི་སྒྲུབ་ཐབས་འདི་ལ་དང་པོ་རྫས་བསགས་པ༔ བར་དུ་བསྒྲུབ་ཅིང་ལྟས་བརྟག་པ༔ ཐ་མར་བཅང་ཞིང་ཕྲིན་ལས་སྐྱོང་བའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་རྫས་བསགས་པ་ལ་གསུམ་སྟེ༔ ངོས་འཛིན་པ་དང་གཅིག༔ བསགས་པ་དང་གཉིས༔ ཆ་སྙོམས་པ་དང་གསུམ་མོ༔ དང་པོ་ངོས་འཛིན་པ་ལ་བཞི་སྟེ༔ ཕྱིའི་རྩ་བརྒྱད་དང་༔ ནང་གི་རྩ་བརྒྱད་དང་༔ གསང་བའི་རྩ་བརྒྱད་དེ༔ དེ་དག་རེ་རེ་ལ་ཡན་ལག་སྟོང་དུ་སྦྱར་བས་རྩ་བརྒྱད་སྟོང་སྦྱར་དུ་གྲགས་སོ༔ དང་པོ་ཕྱིའི་རྩ་བརྒྱད་ནི༔ ཙན་དན་སྦྲུལ་གྱི་སྙིང་པོ་ལ་ཚང་སྟེ༔ རྩ་བ་མུ་བཞི་བྷ་ཏི་ཏ༔ སྡོང་པོ་ནི་ཙན་དན་སྨུག་པོ༔ ཡལ་ག་ནི་ལི་ཤི་དམར་པོ༔ ལོ་མ་ནི་གྷ་ལ་བྷ་དྲ༔ མེ་ཏོག་ནི་དྲི་ཞིམ་གུར་གུམ༔ འབྲས་མཆོག་དམ་པ་ནི་ཛཱ་ཏི༔ ཡོངས་འདུས་སྙིང་པོ་ནི་ག་བུར༔ ཕྱིའི་ཤུན་པ་ནི་ཤིང་ཚ༔ དེ་ལྟར་རྣམ་པ་བརྒྱད་པོ་ཡང་མ་སྨིན་པ་དང་༔ རུལ་བ་སོགས་ཀྱི་སྐྱོན་མེད་པར་བསྒྲུབ་པར་བྱའོ༔ གཉིས་པ་ནང་གི་རྩ་བརྒྱད་ནི་མཆོག་ཆེན་གྱི་བམ་ལ་ཚང་སྟེ༔ ཕའི་རྒྱུ་ལས་བྱུང་བའི་རྩ་བ་གསུམ་ནི༔ ཀླད་པ་དང་༔ རུས་པ་དང་༔ རྐང་དང་གསུམ༔ མའི་རྐྱེན་ལས་བྱུང་བའི་རྩ་བ་གསུམ་ནི༔ ཤ་དང་༔ པགས་པ་དང་༔ ཁྲག་དང་གསུམ༔ ཕའི་རྒྱུ་ལྷག་ཚིལ་བུ་དང་༔ མའི་རྐྱེན་ལྷག་རྐང་མར་གཉིས་ཏེ་བརྒྱད་དོ༔ དེ་དག་རྣམས་ཀྱང་མཚན་དང་ལྡན་པའི་བམ་ནས་བླང་བར་བྱའོ༔ གསུམ་པ་གསང་བའི་རྩ་བརྒྱད་ལ༔ ཡབ་ཀྱི་རྒྱུ་བཞི་དང་༔ ཡུམ་གྱི་རྐྱེན་བཞི་སྟེ་བརྒྱད་དུ་ཡོད་པ་ལས༔ ཡབ་ཀྱི་རྒྱུ་བཞི་ནི༔ བྱང་ཆུབ་ཀྱི་སེམས་འབྱུང་བའི་ཡུལ་བདེ་ཆེན་གྱི་གོ་རོ་ཙ་ན༔ བྱང་ཆུབ་སེམས་ཀྱི་རྒྱུ་ལམ་ནི་རྩ་ཨ་ཝ་ངྷཱུ་ཏི༔ བྱང་ཆུབ་སེམས་ཀྱི་བསྐྱིལ་ས་ནི་ཙིཏྟ་དམར་པོ༔ བྱང་ཆུབ་སེམས་ཀྱི་གཤེགས་ཤུལ་ནི་བཛྲ་གྱི་སྦུ་གུ༔ གཉིས་པ་ཡུམ་གྱི་རྐྱེན་བཞི་ནི༔ རཀྟ་གནས་སའི་ཡུལ་ནི་མཆིན་པ༔ རཀྟ་གསོག་སའི་གནས་ནི་བྷ་གའི་ཕུག༔ རཀྟ་ལེན་པའི་གནས་ནི་ཡུམ་གྱི་མཁའ༔ རཀྟ་རྒྱུ་བའི་ལམ་ནི་བྱ་ལྕེ་དང་དྲེ་ལྕེ་ཡང་ལྕེ་སྟེ༔ འདི་དག་རྣམས་ཀྱང་མཚན་དང་ལྡན་པའི་ཡབ་ཡུམ་གྱིས་ཆོ་ག་བཞིན་དུ་དགའ་བ་བཞིའི་ངང་ནས་ཉོན་མོངས་པའི་དྲི་མ་སྤངས་ཏེ༔ མེ་ལོང་ཡུ་བ་ཅན་གྱིས་བླང་བར་བྱའོ༔ བཞི་པ་དེ་དག་གི་སྐྱོབ་ལ་རྩ་བ་དང་ཡན་ལག་གཉིས་ལས༔ རྩ་བ་ལ་ལྔ༔ དང་པོ་དྲི་ཆེན་གྱི་རྩ་བརྒྱད་ནི༔ མཚན་ལྡན་གྲུབ་ཐོབ་ཀྱི་དྲི་ཆེན༔ འབྲས་ལྔ་རོལ་པའི་དྲི་ཆེན༔ ཤི་བ་བམ་གྱི་དྲི་ཆེན༔ ཀུ་ཀུ་ར་ཙའི་དྲི་ཆེན༔ འདབ་ཆགས་དྲི་ཆེན་སྦྲང་རྩི༔ གཤོག་ཅན་དྲི་ཆེན་སྣ་མང་༔ མཆེ་ཅན་གླང་ཆེན་དྲི་ཆེན༔ འདི་དག་རྣམས་ཀྱང་ཚུལ་དང་མཐུན་པར་བསག་གོ༔ གཉིས་པ་བྱང་ཆུབ་སེམས་ཀྱི་རྩ་བརྒྱད་ནི༔ རུས་པའི་དྭངས་མ་སོ༔ དབང་པོའི་དྭངས་མ་མིག་འབྲས༔ བྱང་སེམས་ཀྱི་དྭངས་མ་གདུང་རིགས་ལྔ་གང་འཛོམ༔ བྱང་སེམས་འབྱུང་གནས་ཀླད་པ༔ བྱང་སེམས་རྒྱུ་ལམ་གཞུང་པ༔ བྱང་སེམས་རོ་འདུས་གསང་མཚན་འབྲས་བུ་དང་བཅས་པ་བསྒྲུབ་བོ༔ གསུམ་པ་མཾ་ས་ཤའི་རྩ་བརྒྱད་ནི༔ ལག་པའི་ཉྭ་ཤ་གཉིས༔ རྐང་པའི་ཉྭ་ཤ་གཉིས༔ ལྕེ་དང་༔ གློ་བ་དང་༔ སྙིང་དང་༔ མཁལ་མ་དང་༔ གཞང་ཁ་དང་བརྒྱད་རྣམས་བསག་གོ༔ བཞི་པ་རཀྟའི་རྩ་བརྒྱད་ནི༔ ཁྱིའི་ཁྲག་དང་༔ རྟ་ཁྲག་དང་༔ མ་ཧེའི་ཁྲག་དང་༔ ཤི་བ་བམ་གྱི་ཁྲག་དང་༔ ཡབ་ཀྱི་སྣ་གཡས་པའི་ཁྲག་དང་༔ ཡུམ་གྱི་པདྨའི་ཁྲག་དང་༔ འབྲས་བུ་ཆེན་པོ་བསྒྲལ་བའི་ཁྲག་དང་༔ བྱ་རྒོད་ཀྱི་ཁྲག་སྟེ་མུ་ལ་བརྒྱད་པོ་ཡང་ལེགས་པར་བསག་གོ༔ ལྔ་པ་དྲི་ཆུའི་རྩ་བརྒྱད་ནི༔ རྒྱ་མཚོ་སྦུ་བའི་ཆུ༔ བྲག་ཞུན་རྡོ་ཡི་ཆུ༔ བདུད་རྩི་ཅོང་ཞིའི་ཆུ༔ ལན་ཚྭ་ལྷ་ཆེན་བྱང་སེམས་ཆུ༔ མཚན་ལྡན་མུ་དྲའི་ཆུ༔ དཔའ་བོ་ཡབ་ཀྱི་ཆུ༔ འབྲས་བུ་བསྒྲལ་བའི་ཆུ༔ ཤི་བ་བམ་གྱི་ལྒང་ཆུ་དང་བརྒྱད་པོ་ཡང་བསག་གོ༔ གཉིས་པ་ཡན་ལག་གི་སྐྱོབ་ནི༔ རྒྱལ་པོ་དང་༔ བློན་པོ་དང་༔ དཔོན་ཆེན་དང་༔ བཙུན་མོ་དང་༔ ལོངས་སྤྱོད་དང་༔ ཕྱི་སྣོད་དང་༔ ནང་བཅུད་དང་༔ འབངས་རྣམས་ཏེ་ཡན་ལག་གི་སྐྱོབ་ལ་བརྒྱད་དོ༔ དང་པོ་རྒྱལ་པོ་ལྔ་ནི་༔ མིག་དང་༔ སྙིང་དང་༔ སྣ་དང་༔ ལྕེ་དང་༔ རྣ་བ་དང་ལྔའོ༔ གཉིས་པ་བློན་པོ་ལྔ་ནི༔ སྟག་ཚེར་དང་༔ སེང་ཚེར་དང་༔ སླེ་ཏྲེས་དང་༔ དབང་པོ་ལག་པ་དང་༔ ཤུ་དག་དཀར་པོའོ༔ གསུམ་པ་དཔོན་ལྔ་ནི༔ ཤེལ་ཀ་ར་དང་༔ ག་པུར་དང་༔ ཛཱ་ཏི་དང་༔ ཀ་ཀོ་ལ་དང་༔ ཙན་དན་སྨུག་པོའོ༔ བཞི་པ་བཙུན་མོ་ལྔ་ནི༔ ཞོ་ཤ་གསུམ་དང་༔ ཤིང་ཚ་དང་༔ སུག་སྨེལ་དང་༔ ལི་ཁྲི་དང་༔ ཙན་དན་དཀར་པོའོ༔ ལྔ་པ་ལོངས་སྤྱོད་ལྔ་ནི༔ ཨ་རུ་ར་དང་༔ དུ་རུ་ཀ་དང་༔ རྩི་སོགས་དང་༔ གླ་རྩི་དང་༔ ལྕེ་སོགས་དཀར་པོའོ༔ དྲུག་པ་ཕྱི་སྣོད་ནི༔ སེང་གེའི་ཤ་སོགས་སྡེར་ཆགས་སྣ་ཚོགས་ཀྱི་ཤ་སྣ་བརྒྱ༔ གླང་ཆེན་ལ་སོགས་རྨིག་པ་ཁ་དབྲག་སྣ་ཚོགས་ཀྱི་ཤ་སྣ་བརྒྱ༔ རྟའི་ཤ་སོགས་རྨིག་ཟླུམ་སྣ་སོགས་ཀྱི་ཤ་སྣ་བརྒྱ༔ རྨ་བྱའི་ཤ་སོགས་འདབས་ཆགས་སྣ་ཚོགས་ཀྱི་ཤ་སྣ་བརྒྱ༔ ཤང་ཤང་ཏེའུ་ལ་སོགས་གདོང་པ་ཅན་སྣ་ཚོགས་ཀྱི་ཤ་སྣ་བརྒྱ༔ བདུན་པ་ནང་བཅུད་ལྔ་ནི༔ དུང་དང་༔ གསེར་དང་༔ གཡུ་དང་༔ ཟངས་དང་༔ ལྕགས་རྣམས་སོ༔ བརྒྱད་པ་འབངས་ནི༔ ཁ་དོག་དཀར་བ་ཅུ་གང་ལ་སོགས་པའི་འོ་མ་སྣ་ཚོགས་དང་༔ ཨ་རུ་ར་གསེར་མདོག་དང་༔ ཆུ་རྩ་དང་༔ ཡུང་བ་དང་༔ ལུག་རུ་སེར་པོ་དང་༔ དཔའ་བོ་སེར་པོ་ལ་སོགས་པའི་སེར་པོ་སྣ་ཚོགས་དང་༔ ལི་ཁྲི་དང་༔ སྐྱུ་རུ་ར་དང་༔ གི་ཝང་ལ་སོགས་པའི་དམར་སེར་སྣ་ཚོགས་དང་༔ བ་རུ་ར་སྤྱི་བཞུར་སྔོ་སྨན་གྱི་རིགས་ཅི་མང་སྟེ་སྣ་ཚོགས་པའི་ལྗང་གུའི་རིགས་ཐམས་ཅད་དང་༔ འབྲས་ཆང་དང་༔ ནས་ཆང་དང་༔ རྒུན་ཆང་དང་༔ གྲོ་ཆང་དང་༔ སྦྲང་ཆང་དང་༔ ཆུ་དང་༔ འོ་མ་རྣམས་བྷནྦྷ་སོ་སོར་བསག་གོ༔ དེ་དག་རྣམས་ནི་རྩ་བ་དང་ཡན་ལག་གི་རིམ་པ་སྟེ༔ བདུད་རྩི་འབྱུང་བའི་རྒྱུད་ལས་པདྨ་བདག་གིས་ཟུར་དུ་ཕྱུངས་པའོ༔ མན་ངག་གསང་བའི་གདམས་པ་ཁྱད་པར་ཅན་ནི༔ དབང་པོ་ལག་པའི་ཕྱེ་དང་༔ མེ་ཏོག་འོད་ལྡན་གྱི་ཕྱེ་དང་༔ ཕབས་བཟང་པོ་དང་༔ བཟང་པོ་དྲུག་རྣམས་ཀྱི་ཕྱེ་མ་སྨན་མང་ཉུང་གི་ཚོད་དང་དཔགས་པའ་ིཚྭ་ཚོད་དུ་སྦྱར་བ་ནི་ཁྱད་པར་ཅན་ནོ༔ གསུམ་པ་ཆ་སྙོམས་པ་ནི༔ གཙོ་བོ་ལྔ་དང་བདུད་རྩི་ལྔ་རྣམས་ཡིན་ཞིང་༔ རྩ་བརྒྱད་གཞན་རྣམས་ནི་གཙོ་བོའི་དཔུང་ཚོད་དང་རྒྱལ་བློན་གྱི་ཚུལ་དུ་སྦྱོར་མཁས་པར་བྱའོ༔ སྐྱོབ་རྣམས་ནི་དེའི་རྒྱལ་བློན་འབངས་གསུམ་གྱི་རིམ་པ་རིགས་པའི་མདས་བསྣུན་ཤེས་པར་བྱའོ༔ བཞི་པ་སྒྲུབ་པ་ནི་ཁྲོལ་བུ་དང་ཕྱེ་མ་རང་གཞུང་ལྟར་རོ༔ ལྟས་བརྟག་པ་ནི༔ སྒྲུབ་པ་ལ་ཞུགས་ཚེ་འོད་འཁྱུག་པ་དང་༔ ཟེར་འཁྲིག་པ་དང་༔ དྲི་བཟང་པོ་འཐུལ་བ་དང་༔ སྨན་གྱི་དཔུང་འཕེལ་བ་དང་༔ ལྷ་དང་ལྷ་མོའི་སྐུ་མཐོང་བ་དང་༔ མེ་འབར་བ་དང་༔ དུ་བ་འཐུལ་བ་དང་༔ རླངས་པ་འཕྲོ་བ་དང་༔ ནམ་མཁའ་ནས་འཛབ་ཀྱི་སྒྲ་སྒྲོགས་པ་སོགས་འབྱུང་བར་འགྱུར་རོ༔ ཐུན་མོང་དུ་བུམ་པ་འཕར་བ་དང་༔ སྨན་རཀ་ཁོལ་བ་དང་༔ མར་མེ་རིང་བ་དང་༔ བཀྲག་དང་ལྡན་པ་དང་༔ ལྷ་ཀླུ་མི་གསུམ་གྱི་ལོངས་སྤྱོད་འབུལ་བ་ལ་སོགས་སོ༔ རྨི་ལམ་དུའང་གངས་རི་མཆོད་རྟེན་ལ་སོགས་ལ་འཛེག་པ་དང་༔ དར་འཕྱར་བ་དང་༔ དུང་འབུད་པ་དང་༔ ཉི་ཟླའི་རྟ་ལ་ཞོན་པ་དང་༔ བུད་མེད་བཟང་མོས་བཅུད་ཅན་གྱི་ཟས་དང་ཐོད་པ་ཆང་གིས་བཀང་ནས་འདྲེན་པ་ལ་སོགས་ཏེ༔ བཟང་ལྟས་ཀྱི་རྨི་ལམ་རྣམས་འོང་བར་འགྱུར་རོ༔ ཁྱད་པར་གྱི་རྟགས་སུ་ཉམས་རྟོགས་ཀྱི་ཡོན་ཏན་བདེ་གསལ་མི་རྟོག་པ་སོགས་དང་༔ ཆོས་སྐུ་སྤྲོས་བྲལ་ཁོར་ཡུག་ཏུ་ཁྲེ་སེ༔ ཤིག་གེ༔ བུན་ནེ༔ དེའི་ངང་ནས་སྣང་སྟོང་གི་སྐུ་རུ་ལམ་མེ༔ ཀ་དག་གི་ཉམས་སུ་སང་ངེ༔ ཟུག་འཇུག་གི་སྔགས་དབྱངས་དིར་རེ་བ་སོགས་འབྱུང་བར་འགྱུར་རོ༔ ལྟས་ངན་པ་རྣམས་ནི་དེ་རྣམས་ལས་བཟློག་པའོ༔ ལྟས་བཟང་པོ་རྣམས་གང་བྱུང་ཡང་རེ་བ་མེད་པའི་ངང་ནས་ཏིང་ངེ་འཛིན་གྱི་དབང་བཞི་ལེན༔ ངན་པའི་ལྟས་ཤར་ཡང་དོགས་པ་དང་བྲལ་བའི་ངང་ནས་ཉུལ་ལེ་བསྐྲད་ཅིང་གིང་པ་རྒྱུག༔ ཧཱུྃ་དབྱངས་ལྡིར༔ སྲུང་མ་བསྐུལ་བར་བྱའོ༔ ལར་བཟང་ངན་ཐམས་ཅད་སེམས་ཀྱི་འཛིན་པ་ལས་བྱུང་བས་སྤང་བླང་རེ་དོགས་དགག་སྒྲུབ་དང་བྲལ་བ་ཞིག་དགོས་སོ༔ བཞི་པ་དེ་ལྟ་བུའི་རྫས་མཆོག་ཁྱད་པར་ཅན་དེ་བཅང་ཐབས་དང་༔ ལས་སྦྱོར་ཕྲིན་ལས་ཀྱི་རིམ་པའོ༔ བཅང་བ་ལ་གཉིས་ཏེ་རང་དང་གཞན་ནོ༔ དང་པོ་རང་གིས་རྩ་གསུམ་དབྱེར་མེད་ཀྱི་ངོ་བོར་བསམ་ཤིང་༔ སྐུ་གསུམ་འདུ་འབྲལ་མེད་པའི་ཕོ་བྲང་༔ ལྕགས་སྣ་གསུམ་གྱི་གའུར་ཡེ་ཤེས་ལྔ་མཚོན་དར་སྣས་དྲིལ་ཏེ་ལུས་ལ་བཅངས་ན༔ རྩ་གསུམ་གྱི་ལྷ་ཚོགས་མ་བསྒྲུབས་ཀྱང་སྤྲིན་བཞིན་འདུ་ནས༔ སྐལ་ལྡན་དེ་ལ་བྱིན་གྱིས་བརླབ་ཅིང་དངོས་གྲུབ་སྟེར་ཏེ༔ སྲུང་མ་རྣམས་ཀྱིས་ཕྲིན་ལས་བསྒྲུབ་བོ༔ དེའི་ལུས་ལ་རེག་པའི་རླུང་ཕོག་པ་དང་༔ དེའི་གྲིབ་མ་ལ་འགོང་པའི་འགྲོ་བ་དུད་འགྲོ་ཡན་ཆད་གྲོལ་བར་འགྱུར་རོ༔ གཞན་གྱི་ཡང་བཅང་ཐབས་དང་ཡོན་ཏན་ནི་དེ་དང་མཉམ་པར་འགྱུར་རོ༔ ལས་སྦྱོར་ཕྲིན་ལས་ཀྱི་རིམ་པ་ནི༔ བླ་མེད་གསང་བའི་རྫས་མཆོག་འདི་མཆོད་གཏོར་སྨན་རཀ་རྟེན་གཏོར་སྒྲུབ་གཏོར་ལ་སོགས་ལ་སྦྲན་ན་ལས་བཞི་གང་བརྩམས་པ་འགྲུབ་བོ༔ མེ་མཆོད་དུ་ཕུལ་ན་ལྷ་ཚོགས་ཐམས་ཅད་ཐུགས་དམ་སྐོངས་ཤིང་རྣལ་འབྱོར་པས་དངོས་གྲུབ་འཐོབ་པ་དང་༔ དགྲ་བགེགས་ལོག་འདྲེན་བར་ཆད་འབྱུང་པོ་ཐམས་ཅད་རང་སར་གྲོལ་བར་བྱེད་དོ༔ བྲིས་སྐུ་དང་ལྡེར་བཟོའི་ནང་རྟེན་དུ་བཙས་ན་དུས་གསུམ་གྱི་བདེ་གཤེགས་ཀུན་གྱི་མཆོད་སྡོང་དུ་འགྱུར་རོ༔ དཀོར་མཛོད་དུ་སྦས་ན་ལོངས་སྤྱོད་དང་ལྡན་པར་འགྱུར་རོ༔ ནད་གདོན་གྱིས་གཙེར་བས་ཟོས་ན་བར་ཆད་ལས་གྲོལ་བར་བྱེད་དོ༔ ཕྱུགས་ཀྱི་ལུས་ལ་བཏགས་ན་གོད་ཀ་འཆད་པར་འགྱུར་རོ༔ ཁ་ཟས་ལ་བཏབ་སྟེ་ཟོས་ན་བདུད་རྩིར་འགྱུར་ཞིང་ཚེའི་དངོས་གྲུབ་འཐོབ་བོ༔ ཞིང་དཀྱིལ་དུ་སྦས་ན་བཙའ་སད་སེར་གསུམ་མི་འབྱུང་ངོ༔ མདོར་ན་འདི་ལྟར་གྱི་རྫས་མཆོག་འདི་འཆང་བ་དང་༔ མྱོང་བ་དང་༔ རེག་པ་ཐམས་ཅད་ནི་གྲོལ་བར་བྱེད་དོ༔ རབ་ཏུ་གྲོལ་བར་བྱེད་དོ༔ ཤིན་ཏུ་གྲོལ་བར་བྱེད་དོ༔ ཡོངས་སུ་གྲོལ་བར་བྱེད་དོ༔ དེ་དག་རྣམས་ཀྱིས་བདག་གཞན་གྱི་ཕྲིན་ལས་བསྟན་པའོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ༔ འདི་ལྟར་གསང་བའི་མན་ངག་བླ་མེད་གནད༔ ཕྱི་མའི་དོན་དུ་པད་འབྱུང་བདག་གིས་བྲིས༔ མ་འོངས་དུས་ཀྱི་ཡང་མཐའ་ཤར་བའི་ཚེ༔ དམ་ཆོས་དར་ལ་བླང་དོར་ཡ་བྲལ་ཞིང་༔ གསང་སྔགས་དར་ལ་འགྲོ་བ་མ་སྨིན་དུས༔ འཛམ་གླིང་སྐྱེ་འགྲོ་ངན་སོང་སྙོགས་པའི་ཚེ༔ བདེ་མཆོག་དབང་གི་འཁོར་ལོའི་ཆོས་སྐོར་གྱིས༔ སྐལ་ལྡན་མང་པོ་ཐར་པའི་ལམ་ལ་འདྲེན༔ དེ་དུས་ང་སྤྲུལ་བུ་དང་འདི་འཕྲད་ནས༔ མ་འབད་བཞིན་དུ་འགྲོ་རྣམས་ཡོངས་གྲོལ་ཤོག༔ རྡོ་རྗེ་འབར་བས་བཀའ་འདིའི་བྱ་ར་གྱིས༔ ལྷ་བཙན་ཆེན་པོས་གཏེར་འདིའི་སྲུང་མ་མཛོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཉན་རྒྱ༔ གཏད་རྒྱ༔ ཁམས་པ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་གདན་དྲངས་པའོ། །མངྒ་ལཾ། །