བདུད་རྩིའི་ལས་ཚོགས་གསོ་དཔྱད།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་རྩིའི་ལས་ཚོགས་གསོ་དཔྱད་བཞུགས་སོ༔ དཔལ་ཆེན་ཧེ་རུ་ཀཿལ་འདུད༔ སྔོན་བྱོན་རྒྱལ་བས་ལུང་བསྟན་ཞིང་༔ རང་དོན་གྲུབ་ནས་གཞན་དོན་དུ༔ ལས་བཞི་རབ་འབྱམས་འཕྲིན་ལས་ཀྱིས༔ འགྲོ་བ་འདྲེན་པའི་པདྨ་ངས༔ བསྐལ་པ་ཡང་མཐའི་སྙིགས་མ་ལ༔ ཕན་ཕྱིར་ཟབ་པའི་གདམས་པ་བཤད༔ ཉམས་སུ་ལོངས་ཤིག་ཕྱི་རབས་བུ༔ ས་མ་ཡཱ༔ རྒྱ་རྒྱ་རྒྱ༔ མཚན་ཉིད་ལྡན་པའི་བླ་མ་དང་༔ གྲུབ་པ་ཐོབ་པའི་རྣལ་འབྱོར་པ༔ ཚུལ་ཁྲིམས་རྣམ་དག་དགེ་སྦྱོར་གསུམ༔ ས་ཕྱོགས་གང་དུ་འདུག་ཀྱང་བཙལ༔ བདུད་རྩི་དྲི་ཆེན་དངོས་གྲུབ་ཞུ༔ རང་གི་འབག་བཙོག་ཁ་ཟས་སྤང་༔ བསིལ་དྲོད་སྙོམས་པའི་དུས་དག་དང་༔ ཁྱད་པར་འབྲས་བུ་སྨིན་པའི་དུས༔ རང་གི་དྲི་ཆེན་རྩ་བ་སྤང་༔ རྩེ་མོ་དོར་ཞིང་རྐེད་པ་བསྒྲུབ༔ མང་ཉུང་རང་གི་འདོད་ལྟར་བསགས༔ སྐྱེ་བ་བདུན་པའི་ཤ་ཆེན་ནམ༔ བྱིས་པ་ལོ་བརྒྱད་བཅུ་དྲུག་སོགས༔ ནད་ཡུན་དྲག་པོས་མ་མནར་ཞིང་༔ སྨྱོ་དང་དུག་གིས་མ་ཤི་བའི༔ ཤ་ཆེན་དག་ནི་བསགས་པར་བྱ༔ མཚན་ལྡན་བླ་མའི་བྱང་སེམས་དང་༔ བཅུ་དྲུག་གཞོན་ནུའི་ཀུནྡ་དང་༔ བུད་མེད་རིགས་ལྡན་མགོ་གཙང་གཞོན༔ དམ་ཚིག་གཙང་མའི་རཀྟ་སྟེ༔ བྱང་སེམས་དཀར་དམར་གཉིས་ཀྱང་བསགས༔ བླ་མ་ཡབ་ཡུམ་རང་ཉིད་དང་༔ བྱིས་པ་ལོ་བརྒྱད་དག་གི་ཡང་༔ དྲི་ཆུ་རྣམས་ཀྱང་གསོགས་པར་བྱ༔ དེ་ནས་ཚད་དུ་སྦྱར་བ་ནི༔ དཔེར་ན་བདུད་རྩི་འཇམ་ཆུ་ཙམ༔ ཤ་ཆེན་འཇམ་ཐལ་ཙམ་དུ་བཏབ༔ རཀྟ་དེ་ཡི་སྡོར་ཚད་ལ༔ བྱང་སེམས་ཀླད་པ་ཚྭ་ཚོད་ཙམ༔ དྲི་ཆུ་མང་ཉུང་ཅི་འབྱོར་ཆོག༔ མར་ཁུ་དེ་དང་མཉམ་པར་སྦྱར༔ དེ་དག་མ་ལུས་རྩི་བཞིན་བཏགས༔ ས་མ་ཡཱ༔ རྒྱ་རྒྱ་རྒྱ༔ བདུད་རྩིའི་རྒྱལ་པོ་དེ་ཉིད་ལ༔ སྨན་མར་འདོད་ན་འདི་ལྟར་བྱ༔ ཚྭ་དང་བྲག་ཞུན་ཐུན་རེ་ལ༔ ཅོང་ཞི་བཏུལ་མ་ཕུལ་གང་སྦྱར༔ མར་རྙིང་ཞུན་མ་ཁལ་གཅིག་སྟེ༔ འབྲས་བུ་གསུམ་དང་ནད་མཐུན་གྱི༔ སྨན་སྣ་རིག་པས་དཔྱད་དེ་སྦྱར༔ གཙོ་བོ་བདུད་རྩི་བྲེ་གང་གཞི༔ དེ་ལ་རིལ་བུའམ་ཞུན་དུ་བྱས༔ འདི་ལྟར་ཞག་བདུན་ཟླ་བ་དང་༔ ལོ་ལ་སོགས་པར་བརྟེན་གྱུར་ན༔ གཅོང་ཆེན་བཞི་ཡི་ནད་རྣམས་བྱང་༔ ཡོན་ཏན་དཔག་ཏུ་མེད་པ་འཐོབ༔ སྤྱི་འཇོམས་མན་ངག་ཨེ་མ་ཧོ༔ ས་མ་ཡཱ༔ རྒྱ་རྒྱ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ འབྲས་བུ་གསུམ་དང་ཙན་དན་དཀར༔ ཡུངས་ཀར་སྐྱེར་པའི་བར་ཤུན་སྦྱར༔ མིག་གི་ནད་དང་སྦྱར་དུག་ཞི༔ ས་མ་ཡཱ༔ རྒྱ༔ གཙོ་བོ་བདུད་རྩིའི་རྒྱལ་པོ་ལ༔ ཚ་བ་གསུམ་དང་དོམ་མཁྲིས་སྦྱར༔ གག་པ་ཨོག་འགག་སེལ་བར་འགྱུར༔ ས་མ་ཡཱ༔ རྒྱ༔ གཙོ་བོ་བདུད་རྩིའི་རྒྱལ་པོ་ལ༔ བྱང་སེམས་དཀར་དམར་ཚིལ་ཆེན་དང་༔ བཟང་དྲུག་གླ་རྩི་སྦྱར་བ་ཡིས༔ མཛེ་ནད་སོས་པར་ཐེ་ཚོམ་མེད༔ ས་མ་ཡཱ༔ རྒྱ༔ གཙོ་བོ་བདུད་རྩིའི་རྒྱལ་པོ་ལ༔ འབྲས་བུ་གསུམ་དང་ཏིག་ཏ་དང་༔ བཟང་དྲུག་བ་ཤ་བ་ལེ་ཀ༔ ཙན་དན་དཀར་དམར་གླ་རྩི་སྦྲང་༔ གཅོང་ཞི་སྐྱེར་གྱི་ཁཎྜ་སྦྱར༔ མཁྲིས་པའི་ནད་རྣམས་སེལ་བར་བྱེད༔ ས་མ་ཡཱ༔ རྒྱ༔ གཙོ་བོ་བདུད་རྩིའི་རྒྱལ་པོ་ལ༔ བུ་རམ་མར་རྙིང་ཛ་ཏི་དང་༔ ཚིལ་ཆེན་མངར་གསུམ་འབྲས་བུ་གསུམ༔ སྦྱར་བས་སྙིང་རླུང་མགོ་འཐོམ་སེལ༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ རྟ་དཀར་ཁྲག་དང་མར་ཁུ་སྦྱར༔ སྟོད་ནད་ཤ་འཛེར་སེལ་བར་བྱེད༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ གུ་གུལ་ཤུ་དག་ནག་པོ་གཉིས༔ སེའི་འབྲུ་སྦྱར་བས་ཕོ་ལྷོག་ཞི༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ མུ་ཟི་གུ་གུལ་སྦྱར་བ་ཡིས༔ ཕོལ་མིག་རུས་ནད་ཞི་བར་བྱེད༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ ཚ་བ་གསུམ་དང་ཚྭ་སྣ་སྦྱར༔ གྲང་ནད་མ་ལུས་སེལ་བར་བྱེད༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ མུ་ཟི་སེར་པོ་ཅོང་ཞི་དང་༔ སྒོག་སྐྱ་སྦྱར་བཏང་བད་མཁྲིས་སེལ༔ ས་མ་ཡ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ ཤུ་དག་དཀར་པོ་སྦྱར་བཏང་ན༔ གློ་བའི་ནད་རིགས་སེལ་བར་བྱེད༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ བྲག་ཞུན་སྦྱར་ཟོས་མཆིན་ནད་སེལ༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ བཟང་དྲུག་ཀ་ར་སྦྱར་བ་ཡིས༔ ཁྲག་ནད་སེལ་བར་བྱེད་པའོ༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ ཉེ་ཤིང་ཁལ་གཅིག་སྦྱར་ནས་ཀྱང་༔ ཟླ་དྲུག་བསྟེན་ན་རྐང་མགྱོགས་འགྲུབ༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ ར་མོ་ཤག་སྦྱར་རྒྱུན་བསྟེན་ན༔ མཁའ་ལ་བྱ་བཞིན་འཕུར་བར་ནུས་༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ བྱ་ཕོ་ཚ་ལུ་མཆིལ་པའི་ཤ༔ སྦལ་པ་སྨུག་པོའི་སྨན་སྦྱར་ན༔ བུད་མེད་བརྒྱ་ལ་བུ་འབྱིན་ནུས༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ བུར་རྙིང་མར་ཁུ་བྲེ་རེ་རེ༔ ཛ་ཏི་བོང་ང་ལུག་རིལ་ཙམ༔ ཚ་བ་གསུམ་སྦྱར་དུས་གསུམ་དུ༔ ཁ་ཟས་ཞུ་བའི་མཚམས་བསྟེན་ན༔ གློ་སྙིང་སྟོད་ཀྱི་ནད་རིགས་སེལ༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ འབྲུམ་ཤི་མི་ཡི་ཐོད་པ་དང་༔ ཡུངས་ཀར་སྒོག་སྐྱ་མི་རུས་སྙིང་༔ རྟ་ཡི་སྦངས་ཁུས་རིལ་བུ་སྒྲིལ༔ ཞག་བཞིར་བསྟེན་པས་འབྲུམ་ནད་སེལ༔ ས་མ་ཡཱ༔ ཨྠིྀ་རྒྱ༔ གཙོ་བོ་བདུད་རྩིའི་རྒྱལ་པོ་ལ༔ ལྕགས་ཕྱེ་ཨ་བར་ཙན་དན་གཉིས༔ སྐྱེར་གྱི་ཁཎྜ་རྣམས་སྦྱར་བས༔ མིག་གི་ནད་རྣམས་སེལ་བར་བྱེད༔ ས་མ་ཡཱ༔ ཨྠིྀ་རྒྱ༔ བདུད་རྩིའི་རྒྱལ་པོ་མཆོག་དེ་ནི༔ གོང་དུ་སྨོས་བཞིན་བསྒྲུབས་ནས་ཀྱང་༔ གཞན་གྱི་ཁ་ཚར་མེད་པ་རུ༔ བདུན་གཅིག་ཟླ་བ་ལོ་ལ་སོགས༔ བསྟེན་པས་དངོས་གྲུབ་མཐའ་ཡས་ཏེ༔ མཆོག་གི་འབྲས་བུ་མཁའ་སྤྱོད་འགྲུབ༔ ཐུན་མོང་གྲུབ་ཆེན་སྨོས་ཅི་དགོས༔ ཟབ་ཕྱིར་རིན་ཆེན་གཏེར་དུ་སྦས༔ ལས་འཕྲོ་ཅན་ལ་སྨོན་ལམ་བཏབ༔ རྡོ་རྗེ་འབར་བས་བྱ་ར་གྱིས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་བདེ་ཆེན་ཕུག་ནས་གདན་དྲངས་པའོ། །མངྒ་ལཾ།