བསྒྲལ་ལས་བསྡུས་པ།
བསྒྲལ་ལས་བསྡུས་པ་ཞིག་ཡོད། ཧཱུྃ་བྷྱོ། དུས་གསུམ་བདེ་གཤེགས་ཐུགས་རྗེའི་སྤྱན་ཅན་གྱིས། །མི་མངོན་དབྱིངས་ནས་གཟུ་དང་དཔང་པོ་མཛོད། །ཡི་དམ་མཁའ་འགྲོ་དམ་ཅན་ཆོས་སྐྱོང་གིས། །ལེགས་ཉེས་སྟངས་གཟུང་དམ་ཚིག་ཆད་པ་ཆོད། །བྷྱོ་གདོད་ནས་མ་སྐྱེས་བྱང་ཆུབ་སེམས་ཉིད་འདི། །མ་དག་སྐྱེ་བོ་རྣམས་ཀྱིས་མ་རྟོགས་ཏེ། །རྣལ་འབྱོར་བདག་གིས་འགྲོ་དོན་བྱ་སྙམ་ཡང་། །བདུད་དང་སྲིན་པོས་ཚེ་ལ་བར་བཅད་ཅིང་། །བགེགས་དང་འབྱུང་པོས་བདག་ལ་གླགས་བལྟས་ན། །ཀུན་མཁྱེན་མགོན་པོས་གཟུ་དང་དཔང་པོ་མཛོད། །མི་མངོན་ཡེ་ཤེས་ལྷ་ལ་མཁྱེན་པར་གསོལ། །ངེས་པའི་དོན་འདིའི་འབྲས་བུ་ཆུད་མ་གསོན། །ཆོས་སྐྱོང་སྲུང་མ་མེད་དམ་ར་མདའ་མཛོད། །བྷྱོ་ཐོས་བསམ་སྒོམ་གསུམ་ཤེས་རབ་རྣམ་གསུམ་གྱིས། །ཁྲེགས་ཆོད་ཐོད་རྒལ་ཟུང་འཇུག་བསྒོམས་པའི་ཚེ། །བླ་མེད་བྱང་ཆུབ་མངོན་བྱེད་རྒྱུ་ཡིན་ཀྱང་། །གདོན་བགེགས་འབྱུང་པོས་སྒོམ་དུ་མ་སྟེར་བས། །ཀུན་མཁྱེན་མགོན་པོས་གཟུ་དང་དཔང་པོ་མཛོད། །མི་མངོན་ཡེ་ཤེས་ལྷ་ལ་མཁྱེན་པར་གསོལ། །ངེས་པའི་དོན་འདིའི་འབྲས་བུ་ཆུད་མ་གསོན། །ཆོས་སྐྱོང་སྲུང་མ་མེད་དམ་ར་མདའ་མཛོད། །བྷྱོ་འཇིག་རྟེན་ཁམས་འདིར་འདུ་བའི་ཟས་དང་ནོར། །འཕགས་པ་མཆོད་ཅིང་འགྲོ་ལ་སྦྱིན་བསམས་ཀྱང་། །དམ་ཉམས་དགྲ་བོས་བགྱིད་དུ་མ་སྟེར་བས། །ཀུན་མཁྱེན་མགོན་པོས་གཟུ་དང་དཔང་པོ་མཛོད། །མི་མངོན་ཡེ་ཤེས་ལྷ་ལ་མཁྱེན་པར་གསོལ། །ངེས་པའི་དོན་འདིའི་འབྲས་བུ་ཆུད་མ་གསོན། །ཆོས་སྐྱོང་བསྲུང་མ་མེད་དམ་ར་མདའ་མཛོད། །བྷྱོ་བདག་ནི་རྣལ་འབྱོར་བྱང་ཆུབ་སྒྲུབ་པ་པོས། །སྨྲས་ཀྱང་མི་གསན་བཤགས་ཀྱང་མི་བྱང་ན། །བྱམས་མགོན་ཐུགས་རྗེ་ཆུང་བར་མི་འགྱུར་རམ། །བཅོལ་ཡང་མི་མཛད་རྦད་ཀྱང་མི་རྒྱུག་ན། །སྔོན་གྱི་དམ་བཅའ་འགལ་བར་མི་འགྱུར་རམ། །ཐུགས་དམ་གནད་ནས་བསྐུལ་ལོ་འཕྲིན་ལས་མཛོད། །བསྟན་པའི་རཱུ་ཏྲ་བར་གཅོད་རྣམ་གཉིས་པོ། །མངོན་སྤྱོད་དྲག་པོའི་ཚུལ་གྱིས་ད་སྒྲོལ་ཅིག། བྷྱོ་དགོངས་ཤིག་རྒྱལ་བ་ཞི་ཁྲོའི་ཚོགས། །གསོན་ཅིག་ཆོས་སྐྱོང་བསྲུང་མ་རྣམས། །འགྲོ་མགོན་ཤཱཀ་ཐུབ་ལྷ་སྦྱིན་ངན་པས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། རྫོགས་པའི་སངས་རྒྱས་ཐོབ་པ་དོན་མ་ཆུང་། །བྱ་རྒྱལ་ཁྱུང་ལ་ཀླུ་ཐེའུ་རྣམས་ཀྱིས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། མཐུ་རྩལ་ལུས་ལ་རྫོགས་པ་དོན་མ་ཆུང་། །གཡུ་འབྲུག་སྔོན་མོ་མེ་ཏོག་བུང་བས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། སྟོང་གསུམ་སྒྲ་ཡིས་གང་བ་དོན་མ་ཆུང་། །སེང་གེ་དཀར་མོ་ཞེལ་འུ་ཁྱི་ཡིས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། གཡུ་རལ་གྲ་རུ་རྒྱས་པ་དོན་མ་ཆུང་། །བྱ་ཆེན་རྒོད་པོ་ཁྱིམ་བྱ་དེ་ཕོས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། གཤོག་དྲུག་ལུས་ལ་རྫོགས་པ་དོན་མ་ཆུང་། །ཡིད་བཞིན་ནོར་བུར་གོར་མོ་རྡོ་ཡིས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། དགོས་འདོད་འབྲས་བུ་འབྱུང་བ་དོན་མ་ཆུང་། །སྟག་མོ་རི་བཀྲ་སེ་ལེ་ག་མས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། འཛུམ་དྲུག་ལུས་ལ་རྫོགས་པ་དོན་མ་ཆུང་། །ས་བདག་སྤྱི་རྗེ་མཐའ་འཁོབ་འབངས་ཀྱིས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། རྒྱལ་སྲིད་ཆོས་བཞིན་བསྐྱངས་པ་དོན་མ་ཆུང་། །རྡོ་རྗེ་སློབ་དཔོན་དམ་ཉམས་སློབ་མས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། ཤེས་རབ་གསུམ་ལ་སྦྱངས་པ་དོན་མ་ཆུང་། །རྣལ་འབྱོར་བདག་ནི་དམ་ཉམས་དགྲ་ཡིས་བརྙས། །སུ་བདེན་ཀུན་མཁྱེན་མགོན་པོས་དཔང་མཛོད་ཅིག། ཡི་དམ་ལྷ་ཚོགས་བསྟེན་པ་དོན་མ་ཆུང་། །བདེན་སྟོབས་མཐུ་རྩལ་མེད་པར་མི་སྲིད་ཀྱིས། །མངོན་སྤྱོད་དྲག་པོའི་ཆད་པ་དགྲ་ལ་ཆོད། །མཐུ་རྩལ་མ་ཆུང་དམ་ཉམས་དགྲ་བོ་བཞེས། ཕུད་མཆོད། ཕཊ་ཨེ་རཾ་ཡཾ་ཁཾ། བདག་ཉིད་ཡི་དམ་དུ་གསལ་བའི་མདུན་དུ། ཨེ་མཐིང་ནག་གཅིག་ཡོངས་སུ་གྱུར་པ་ལས། དུག་གསུམ་ལས་གྲུབ་པའི་བཙོན་ཁང་དུས་མཐའི་ཆར་སྤྲིན་ལྟར་གནག་པ། ཕྱི་ན་ཞེ་སྡང་བསྐལ་པའི་མེ་ཆེན་འབར་བ། ནང་ན་འདོད་ཆགས་ཁྲག་གི་རྒྱ་མཚོ་ཁོལ་བ། བར་ན་གཏི་མུག་ནག་པོའི་མུན་པ་འཐིབ་པ། མཐའ་ན་ཕྲག་དོག་དམར་པོའི་རླུང་དམར་འཚུབ་པ། ལོགས་ན་ང་རྒྱལ་ཆེན་པོའི་བྲག་རི་ཉིལ་བ། སྟེང་ནས་ཐོག་དང་མཚོན་ཆ་སྣ་ཚོགས་ཀྱི་ཆར་འབབས་པ། ཕྱི་རོལ་དུ་ཕོ་ཉ་ཟ་བྱེད་གསོད་བྱེད་མི་སྡུག་པའི་ཚུལ་ཅན་གྱི་ལག་ན་འགུགས་སྒྲོལ་གྱི་མཚོན་ཆ་སྣ་ཚོགས་འཛིན་ཏེ་སྐར་ལྟར་དུ་འཁྲུག་པ། ཁ་དོག་ཅིང་མཐིལ་ཡངས་པ། ཟིན་ནས་ཐར་བ་མེད་པའི་ནང་དུ་ནྲི་དང་ཏྲི་ལས་སྐྱེས་པའི་དགྲ་བོ་སྐྱ་ལ་ཧམ་པ། སྔོ་ལ་རིད་པ། མགོ་བོ་ལྷོ་ནུབ་ཏུ་བསྟན་པ། རྐང་པ་བྱང་ཤར་དུ་བསྟན་པ། ཁ་ནས་མྱ་ངན་གྱི་འོ་དོད་ལྷང་ལྷང་འབོད་པ། མིག་ནས་ཁྲག་གི་མཆི་མ་ཕྲུ་ལུ་ལུ་འབབས་པ། ལག་པ་གཡས་ཀྱིས་བྲང་བརྡུང་ཞིང་གཡོན་གྱིས་སྐྲ་འབལ་པ། རྐང་པ་ལྕགས་སུ་བཅུག་པ། བུ་ག་ཐམས་ཅད་ནས་རྣག་ཁྲག་འཛག་པ། ཉམ་ཐག་པའི་གཟུགས་ཅན། དབུགས་དང་བྲལ་ལ་ཁད་པ། མགོན་སྐྱོབ་ཀྱི་ལྷ་སྲུངམེད་པ། འདར་ཕྲི་ལི་ལི་བྱེད་པ་ཞིག་ཏུ་གྱུར། ༈བདེན་སྟོབས་བརྗོད་པ་ནི། ན་མོ་རྒྱལ་བ་དགོངས་པའི་བརྒྱུད་པ་ལ་སོགས་མདོ་སྔགས་བཀའ་གཏེར་བརྒྱུད་པ་དགུ་ལྡན་གྱི་དཔལ་ལྡན་རྩ་བའི་བླ་མ་དམ་པ་རྣམས་ཀྱི་བཀའ་བདེན་པ། ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་ནས་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་རྣམས་ཀྱི་བཀའ་བདེན་པ། ཁྲག་འཐུང་རོལ་པའི་དུར་ཁྲོད་ཆེན་པོ་ནས་དཔལ་ཁྲག་འཐུང་གི་རྒྱལ་པོ་བདེ་མཆོག་འཁོར་ལོའི་ལྷ་ཚོགས་ཡབ་ཡུམ་དྲུག་ཅུ་ཐམ་པའི་བཀའ་བདེན་པ། ཁྲོ་བོ་རོལ་པའི་དུར་ཁྲོད་ནས་ཡི་དམ་ཞི་ཁྲོ་བཀའ་བརྒྱད་ཀྱི་ལྷ་ཚོགས་རྣམས་ཀྱི་བཀའ་བདེན་པ། བཀའ་དང་དམ་ཚིག་གསང་བའི་དུར་ཁྲོད་ནས་བཀའ་ཡི་ལས་བྱེད་མ་གཤིན་ཕུར་གསུམ། ཉེར་བཞིའི་དཔའ་བོ་དཔའ་མོ། གནས་ཡུལ་དུར་ཁྲོད་ཀུན་གྱི་ཞིང་སྐྱོང་། ཕྱི་ནང་གསང་བའི་ལྷ་སྲིན་སྡེ་བརྒྱད། བོད་ཀྱི་མགུར་ལྷ་བཅུ་གསུམ། མ་ཡམ་བསྟན་མ་བཅུ་གཉིས། དགེ་བསྙེན་ཉི་ཤུ་རྩ་གཅིགགཙང་རིས་ཀྱི་དཔལ་མགོན་བདུན་ཅུ་རྩ་ལྔ། དྲེགས་པའི་སྡེ་དཔོན་སུམ་ཅུ་ལ་སོགས་པ་སྐུ་འཁོར་དང་བཅས་པའི་བདེན་པ་དང་། རྒྱུ་འབྲས་བསླུ་བ་མེད་པ་ཆོས་ཉིད་དེ་བཞིན་ཉིད་ཀྱི་བདེན་པའི་མཐུ་ལ་བརྟེན་ནས། སངས་རྒྱས་ཀྱི་བསྟན་པ་བཤིག་པ། དཀོན་མཆོག་གི་དབུ་འཕང་དམད་པ། རྡོ་རྗེ་སློབ་དཔོན་གྱི་སྐུ་ལ་བསྡོ་བ། སེམས་ཅན་ཡོངས་ལ་འཚེ་བ། དཀར་པོ་དགེ་བ་བཅུའི་ལམ་བཀག་ཅིང་ནག་པོ་མི་དགེ་བ་བཅུའི་ལམ་ལ་འཇུག་པ། མཆེད་དང་ལྕམ་དྲལ་རྣམས་ཀྱི་སྤྱི་དགྲསྔགས་འཆང་བ་རྣལ་འབྱོར་པ་བདག་གི་སྒོས་དགྲསྔ་དགྲ་ལག་ཏུ་བླངས་པ། ད་དགྲ་དངོས་སུ་བསྡོ་བ། ཕྱི་དགྲ་ཡིད་ལ་སེམས་པ། གཟུགས་ཅན་གྱི་དགྲ། གཟུགས་མེད་ཀྱི་བགེགས་གང་ཡིན་པའི་བླ་སྲོག་རྣམ་པར་ཤེས་པ་མཐོ་སྲིད་པའི་རྩེ་མོ་མན་ཆད། དམའ་ན་རཀ་དམྱལ་ཁམས་བཅོ་བརྒྱད་ཡན་ཆད། བར་རི་རབ་གསེར་རིའི་ཁོང་གསེང་། རྒྱ་མཚོའི་གླིང་བར། ཉི་ཟླའི་འོད་ཁྱིམ། ས་འོག་ས་སྟེང་ས་བླ། བར་མ་ཆོས་བོན་བསྲུང་མའི་སྐྱབས་གནས་གང་དུ་གནས་ཀྱང་། ལས་བྱེད་ཀྱི་ཕོ་ཉ་ལྕགས་ཀྱུ་ཅན་གྱིས་སྙིང་ནས་བཟུང་། ཞགས་པ་ཅན་གྱིས་མགུལ་ནས་ཆིངས། ལྕགས་སྒྲོག་ཅན་གྱིས་ཡན་ལག་སྡོམས། དྲིལ་བུ་ཅན་གྱིས་སྨྱོ་རུ་ཆུགཐོ་བ་ཅན་གྱིས་རྒྱབ་ནས་དེད། གཤོག་པ་ཅན་གྱིས་གཡས་ནས་ཆུམས། སྡེར་མོ་ཅན་གྱིས་གཡོན་ནས་གཟུང་། མཆུ་ཅན་རྣམས་ཀྱིས་ཀླད་ནས་ཕུག། མཆེ་བ་ཅན་གྱིས་སྙིང་རྩ་དྲོངས། ཡར་གྱི་སྲོག་སྒོ་ཕྱེས། མར་གྱི་བདུད་སྒོ་ཕྱེས། ལྟག་པའི་བདུད་དང་སྤྲོད། གདོང་པའི་འོད་ཕྲོགས། ཁོང་པའི་དོན་སྙིང་ཕྱུངས། གནམ་གྱི་འཇུ་ཐག་ཆོད། ས་ཡི་བརྟན་ཕུར་ཕུད། སེམས་ཀྱི་མར་མེ་སོད། ལས་རླུང་ནག་པོའི་རྟ་ལ་བསྐྱོན། ལོ་དང་ཟླ་བར་མ་འགྱངས། ཞག་དང་ཟ་མར་མ་འཇོགནམ་མཁའ་སྟོང་པ་ལ་ཚད་མ་འཛུགས། ཚེ་ཕྱི་མ་ལ་དུས་མ་འདེབས། སྐྱེ་འཆི་ལ་ཁག་མ་སྙད། ལས་ཀྱི་དབང་བཙན་ཞེས་ཐ་སྙད་དུ་མ་འདོགས་པར། ནམ་མཁའ་ལ་ཕྱོར། བར་སྣང་ལ་གཡུགས། ས་གཞི་ལ་རྡོབས། གཟུགས་ལིངྒ་རུ་བྱས་ཤིང་། མིང་བྱང་བུ་རུ་བྲིས་པ་འདིའི་ནང་དུ་ཉ་མོ་སྲམ་གྱིས་དེད་པའམ། བྱིའུ་ཁྲས་བཤུར་བའམ། ཉེས་ཅན་བཙོན་དུ་འཁྲིད་པ་ལྟར་སྐད་ཅིག་རང་དབང་མེད་པར་འདིར་ཁུག། ཛཿཧཱུྃ་བཾ་ཧོ༔ བཛྲ་ཨངྒུ་ཤ་ཡ་ཛཿ བཛྲ་པཱ་ཤ་ཧཱུྃ། བཛྲ་སྥོ་ཊ་བཾ། བཛྲ་གྷཎྜེ་ཧོ། བཛྲ་ཨ་ཝེ་ཤ་ཡ་ཨ་ཨཱཿཅེས་བརྗོད། དགྲ་བགེགས་དངོས་སུ་ཁུགས་ནས་བསྲུང་མ་རྣམས་ཀྱིས་བསྒྲལ་བར་བསམས་ཤིང་། །༈དེ་ནས་བླ་སྲོག་འགུགས་པ་ནི། ཧཱུྃ་བྷྱོ། དཔལ་གྱི་བཀའ་ཉན་རཀྟའི་དྲི་སྣོམ་མ། །ཁྲག་མདོག་དམར་མོ་བསེ་ཡི་རལ་པ་ཅན། སྡེར་མོ་ལྕགས་ཀྱུའི་རྩེ་ལས་མེ་འབར་མས། །ཉམས་པའི་སྙིང་ཕྱུངས་མཆན་ཁུང་ཆུག་ལ་ཤོག། ཁྲོས་པའི་ཞལ་མདོག་ཁྲག་གི་མཆིན་པ་ཁ། །རྒྱུག་པའི་བྲང་ནི་སྤྱང་མོ་ངར་མ་འདྲ། དྲག་པོའི་སྐད་ནི་ནམ་མཁའི་འབྲུག་ལས་ཆེ། །མཆོངས་པའི་སྟོབས་ནི་བར་སྣང་གློག་ལས་མྱུར། །ཟངས་ཀྱི་སྡེར་མོ་དམར་མོ་འཕྱར་བ་ཡིས། །མགོན་མེད་བྱིའུ་ཕྲུག་ཁྲ་ཡིས་ཁྱེར་བ་ལྟར། །དམ་ཉམས་དགྲ་བོའི་དོན་སྙིང་ཁྱེར་ལ་ཤོག། བླ་སྲོག་རྣམ་ཤེས་ཁྲིད་ལ་ཤོག། ལྷ་ལྔའི་ལག་ནས་ཕྲོགས་ལ་ཤོག། འབྱུང་བ་ལྔ་ནས་ཆོམས་ལ་ཤོག། བྱད་ཐག་གིས་དཀྲི་བ་ནི། ཧཱུྃ་བྷྱོ། ཁྲག་འཐུང་ལྷ་ཚོགས་ཐུགས་དམ་ཅན། །དྲག་པོའི་འཕྲིན་ལས་དུས་ལ་བབས། བསྟན་པ་བཤིག་པའི་དགྲ་བགེགས་འདི། །བྱད་ཐག་ཞགས་པ་རྣམ་ལྔ་ཡིས། །ལུས་ངག་ཡིད་གསུམ་དམ་དུ་ཆིངས། །ལྷ་དབྱེ་བ་ནི། ཧཱུྃ་བྷྱོ། ཁ་ཁཱ་མུ་ཁ་མཐུ་མོ་ཆེ། །མཐིང་ནག་ཆེན་པོ་བྱ་རོག་དབུ། །རྟོག་མེད་ཟས་སུ་ཤ་ལ་བཟའ། །ཁྱོད་ཀྱི་ཐུགས་དམ་དུས་ལ་བབས། །ཧུ་ལུ་མུ་ཁ་མཐུ་མོ་ཆེ། །སེར་ནག་ཆེན་མོ་འུག་པའི་མགོ། ཁྱེད་གཉིས་ཉིན་མཚན་མེད་པར་རྒྱུག། ཁྱོད་ཀྱི་ཐུགས་དམ་དུས་ལ་བབས། །དགྲ་དང་དགྲ་ལྷ་ཕྲོལ་ལ་ཤོག། ལུས་དང་བསྲུང་མ་ཕྲོལ་ལ་ཤོགམངོན་སྤྱོད་དྲག་པོའི་འཕྲིན་ལས་མཛོད། །ཧཱུྃ་བྷྱོ། སྡིག་ཅན་དགྲ་བོ་ལས་ངན་འདིའི། །དགྲ་ལྷ་སྤྱི་བོའི་གཙུག་ནས་ཕྲོལ། །སྲོག་ལྷ་སྙིང་གི་དཀྱིལ་ནས་ཕྲོལ། །ཞང་ལྷ་ལྟེ་བའི་ཁུང་ནས་ཕྲོལ། །མ་ལྷ་གསང་བའི་གནས་ནས་ཕྲོལ། །ཕོ་ལྷ་ཕྲག་པ་གཡས་ནས་ཕྲོལ། །ཡུལ་ལྷ་ཕྲག་པ་གཡོན་ནས་ཕྲོལ། །བང་ལྷ་མཛོད་ཁང་ནང་ནས་ཕྲོལ། །བན་བོན་ལ་སོགས་འགོ་བའི་ལྷ། །རིགས་འཛིན་སྲུང་མ་རྒྱབ་ནས་ཕྲོལ། ཚེ་ལུང་ནི། ཧཱུྃ། སྲས་མཆོག་འབར་བའི་ཐུགས་ཀ་ནས། །འོད་ཟེར་དཀར་པོའི་འཕྲོ་འདུ་ཡིས། །སྡིག་སྒྲིབ་སྦྱངས་ཏེ་རྣམ་ཤེས་ཨ། བསྐྱེད་པའི་ལྷར་བསྟིམ་སངས་རྒྱས་གྱུར། ཁྲུས་ལུང་ནི། ཧཱུྃ། འོད་ཟེར་ལྕགས་ཀྱུའི་རྣམ་པ་ཡིས། །ཚེ་བསོད་ནྲི་ཡིག་རང་ལ་ཐིམ། །ནུས་སྟོབས་གཟི་བརྗིད་དཔལ་འབར་ཞིང་། །དབང་དྲག་འཕྲིན་ལས་ཐོགས་མེད་གྱུར། །བསྒྲལ་ལས་ནི། ཧཱུྃ་བྷྱོ། རྡོ་རྗེ་ཕུར་པ་ཀཱི་ལཱ་ཡ། །སངས་རྒྱས་ཡོངས་རྫོགས་ཕྲིན་ལས་སྐུ། །དྲག་སྔགས་ཐོག་སེར་འབར་བ་འདིས། །དགྲ་བགེགས་ཐལ་བ་རྡུལ་དུ་རློག། ཧཱུྃ། ཡུངས་ཀར་རྒྱལ་པོ་ཤ་རི་རམ། །ཁྲོ་རྒྱལ་ཡོངས་རྫོགས་འདུས་པའི་སྐུ། དྲག་སྔགས་འབར་བའི་ཡུངས་ཐུན་འདིས། །དགྲ་བགེགས་ཐལ་བ་རྡུལ་དུ་རློག། ཧཱུྃ། རཀྟའི་རྒྱ་མཚོ་རྦ་རླབས་འཁྲུག། མ་མོ་ཡོངས་རྫོགས་འདུས་པའི་སྐུ། །དྲག་སྔགས་འབར་བའི་ཁྲག་ཐུན་འདིས། །དགྲ་བགེགས་ཐལ་བ་རྡུལ་དུ་རློག། ཧཱུྃ། ཚེ་མདའ་དྲག་པོ་སྐར་ལྟར་འཁྲུག། དྲེགས་པ་ཡོངས་རྫོགས་རྩལ་གྱི་སྐུ། །དྲག་སྔགས་འབར་བའི་ཚེ་ཐུན་འདིས། །དགྲ་བགེགས་ཐལ་བ་རྡུལ་དུ་རློག། ཧཱུྃ། འབྱུང་བའི་དུག་ཐུན་རླུང་ལྟར་འཚུབ། །གདུག་པ་དུག་ལྔ་ཡོངས་རྫོགས་སྐུ། །དྲག་སྔགས་འབར་བའི་དུག་ཐུན་འདིས། །དགྲ་བགེགས་ཐལ་བ་རྡུལ་དུ་རློག། ཧཱུྃ། ཐོགས་མེད་དྲག་པོ་ལས་ཀྱི་མཚོན། །ཕྱག་མཚན་ཡོངས་རྫོགས་མཚོན་ཆའི་སྐུ། །དྲག་སྔགས་འབར་བའི་མཚོན་ཆ་འདིས། །དགྲ་བགེགས་ཐལ་བ་རྡུལ་དུ་རློག། ཧཱུྃ། སྟོབས་ཆེན་འདུས་པ་མདའ་རྡོའི་ཐུན། །བདུད་འཇོམས་ཡོངས་རྫོགས་འདུས་པའི་སྐུ། །དྲག་སྔགས་འབར་བའི་ཐུན་སྣ་འདིས། །དགྲ་བགེགས་ཐལ་བ་རྡུལ་དུ་རློགཅེས་དྲག་སྔགས་ཀྱིས་བསྒྲལ་ལོ། བསྟབ་པ་ནི། ཧཱུྃ། དཔལ་ཆེན་ཁྲག་འཐུང་ལྷ་ཡི་ཚོགས། །དགྲ་བགེགས་བསྒྲལ་བའི་ཤ་ཁྲག་རུས། །ཞལ་དུ་སྟབ་བོ་ཁ་རཾ་ཁཱ་ཧི། །མགུལ་དུ་སྒྲིམས་ཤིག་ཨ་ར་ལི། །དབྱིངས་སུ་བསྟིམ་མོ་ས་མ་ཡ། །དགྲ་བགེགས་ཀྱི་ཤ་ཁྲག་དབང་པོ་དོན་སྙིང་དང་བཅས་པ་ལ་ཁ་རཾ་ཁཱ་ཧི་ཁཱ་ཧི། ཅེས་ལིང་རོ་གཏོར་མ་ལ་འབུལ། །བསྐུལ་བ་ཕྱག་ལེན་ལྟར་འདོན་ནོ། བསྒྲལ་ལས་བསྡུས་པ་འཁྱེར་བདེ་འདི་ནི་བཀའ་བརྒྱད་ལྟར་བདག་སྤྲང་བན་ཉི་མ་གྲགས་པས་སྦྱར་བའོ། །མངྒ་ལཾ།། །།