བཀའ་བརྒྱད་ཁྲོ་བོ་རོལ་བའི་རྩང་བཟློག

བཀའ་བརྒྱད་ཁྲོ་བོ་རོལ་པའི་རྩང་བཟློག་བཞུགས། དེ་ནས་དམར་གཏོར་གྱི་ལྕགས་རིར་བཙུགས་པའི་ལས་བཞིའི་རྩང་ཕུར་ལ་དམིགས་ཏེ་འདི་སྐད་དོ༔ ཧཱུྃ༔ བཅོམ་ལྡན་དཔལ་ཆེན་ཧེ་རུ་ཀའི༔ དྲག་པོ་དཔལ་གྱི་གཏོར་ཆེན་ལྕགས་རི་ལ༔ སྤྲུལ་པའི་ཕོ་ཉ་མང་པོ་མངགས་པའི་རྟེན༔ དམར་ནག་རྩང་ཕུར་ཟུར་གསུམ་པ༔ བསྣོལ་ཐབས་སྲིན་མོ་འགྲོས་སུ་བཙུགས་པ་ནི༔ ཉོན་མོངས་གདུག་པ་མ་ལུས་འདུལ་བའི་རྟགས༔ སྤྲུལ་པའི་ཕྱག་བརྙན་རྟགས་ཀྱི་ཕྱག་རྒྱ་གསལ༔ གདུག་པའི་རྩང་ཕུར་ཟུར་གསུམ་རྩེ་མོ་གཉིས་དང་ལྡན༔ ཡར་གྱི་རྩེ་མོས་ཆོས་ཉིད་དབྱིངས་སུ་འབིགས༔ མར་གྱི་རྩེ་མོས་ངན་སོང་གནས་སུ་འབིགས༔ རྐེད་པ་རྒྱ་མདུད་ཕོ་ཉ་འབྱུང་བའི་གནས༔ ཡར་གྱི་རྩེ་མོས་ལྷག་མཐོང་ཡུལ་ལ་འཇུག༔ མར་གྱི་རྩེ་མོས་རྒྱུད་དྲུག་གནས་སུ་ཟུག༔ རྐེད་པ་རྒྱ་མདུད་ཁམས་གསུམ་དོན་དང་ལྡན༔ སྟོད་ཀྱི་རྩེ་མོ་ཟུར་གསུམ་གདུག་པའི་མེ་སྟག་འབར༔ སྨད་ཀྱི་རྩེ་ལས་གདུག་པའི་མེ་འོད་འཕྲོ༔ རྐེད་པ་རྒྱ་མདུད་མཚོན་ཆའི་གུར་དུ་ཕུབ༔ ཡར་གྱི་རྩེ་མོས་རཾ་གྱི་ཐོག་སེར་འབེབས༔ མར་གྱི་རྩེ་ལས་མཚོན་ཆའི་བུ་ཡུག་འཚུབ༔ རྐེད་པ་རྒྱ་མདུད་ལྷ་ཡི་ཕོ་བྲང་བཅས༔ དམར་ནག་རྩང་ཕུར་སྲིན་མོ་འགྲོས་སུ་བཙུགསཿ རྩང་ཕུར་རྔམ་སྟབས་ཁྲབས་སེ་ཁྲབ༔ རྩང་ཕུར་གར་སྟབས་ཁྲིགས་སེ་ཁྲིག༔ རྩང་ཕུར་ཤ་ཟ་འཇིབས་སེ་འཇིབ༔ རྩང་ཕུར་ཁྲག་འཐུང་ཀྱུ་རུ་རུ༔ རྩང་ཕུར་རུས་འཆའ་ཆེམས་སེ་ཆེམ༔ ལས་མཁན་ཕོ་ཉ་རྣམས་ཀྱི་ཐུགས་དམ་དུས་ལ་བབ༔ བར་ཆོད་སོལ་ལ་རྐྱེན་རྣམས་བཟློག༔ དགྲ་བགེགས་བྱད་མ་རྡུལ་དུ་རློག༔ བཟློག་ཅིག་དགྲ་བགེགས་དམག་དཔུང་བཟློག༔ ས་མ་ཡ་བྱད་དང་རིགས་སྔགས་བཟློག༔ ཧཱུྃ༔ བཅོམ་ལྡན་དཔལ་ཆེན་ཧེ་རུ་ཀས༔ འཇིག་རྟེན་ཁམས་ནི་ཐམས་ཅད་ཀུན༔ སྐད་ཅིག་ཉིད་ལ་ཞི་མཛད་དེ༔ ཐུགས་རྗེ་ཞི་བའི་འཕྲིན་ལས་ཀྱིས༔ གནོད་བྱེད་དགྲ་བགེགས་བྱད་མ་ཡི༔ རིགས་སྔགས་རྦོད་གཏོང་ཞི་བར་མཛོད༔ ཞི་བར་མ་གྱུར་གང་ཡང་མེད༔ དངུལ་ལམ་དཀར་པོའི་ཤིང་རྣམས་ལ༔ ཞི་བའི་རྩང་ཕུར་ཟུར་གསུམ་རྩེ་མོ་གཉིས་དང་ལྡན༔ རྐེད་པ་རྒྱ་མདུད་ཟླུམ་པོ་གཞལ་ཡས་ཁང་༔ ཧེ་རུ་ཀ་ཡི་སྐུར་བསྒོམས་པས༔ དགྲ་བགེགས་བྱད་མའི་ཤ་ཟ་བ༔ ཤར་ཕྱོགས་གཏོར་ཆེན་ལྕགས་རི་ལ༔ བཙུགས་པས་ཐམས་ཅད་ཞི་བར་འགྱུར༔ ཞི་བར་མ་གྱུར་གང་ཡང་མེད༔ གནོད་བྱེད་དགྲ་བགེགས་བར་ཆོད་དང་༔ རིགས་སྔགས་རྦོད་གཏོང་བྱད་སྟེམས་རྣམས༔ ཞི་མཛད་བཅོམ་ལྡན་ཧེ་རུ་ཀས་ཞི་བར་མཛོད༔ ཨཱོཾ་བཛྲ་ཤྲཱི་ཧེ་རུ་ཀ་ཧཱུྃ་ཕཊ༔ ཞི་བར་གྱུར་ཅིག་ཤཱནྟིཾ་ཀུ་རུ་ཡེ་སྭཱ་ཧཱ༔ ཞི་མཛད་རྣོ་དབལ་རྩང་ཕུར་གྱིས༔ ཡར་གྱི་རྩེ་ལ་དུང་གི་སེང་གེ་འགྱིང་༔ སྤྲུལ་པའི་སེང་གེས་ནམ་མཁའ་གང་༔ གཡུ་རལ་སྔོན་པོ་སྤྲིན་ལྟར་གཏིབས༔ སེང་གེའི་ངར་སྐད་ལྷབས་སེ་ལྷབ༔ མར་གྱི་རྩེ་ལས་ཆུ་སྲིན་མཆེ་བ་གཙིགས༔ སྤྲུལ་པའི་ཆུ་སྲིན་བསམ་མི་ཁྱབ༔ ཞལ་གདངས་མཆེ་གཙིགས་རྐན་སྒྲ་བརྡེབ༔ རྐེད་པ་རྒྱ་མདུད་མེ་འབྲུག་རླུང་འབྲུག་རྒྱུག༔ སྤྲུལ་པ་འབྲུག་གིས་བར་སྣང་གང་༔ འབྲུག་སྒྲ་ཆེམ་ཆེམ་གློག་མོ་འགྱུར༔ ཞི་བྱེད་རྩང་ཕུར་སྲིན་མོ་འགྲོས་སུ་བཙུགས༔ རྩང་ཕུར་རྔམ་སྟབས་ཁྲབས་སེ་ཁྲབ༔ རྩང་ཕུར་གར་སྟབས་ཁྲིགས་སེ་ཁྲིག༔ རྩང་ཕུར་ཤ་ཟ་འཇིབས་སེ་འཇིབ༔ རྩང་ཕུར་ཁྲག་འཐུང་ཀྱུ་རུ་རུ༔ རྩང་ཕུར་རུས་འཆའ་ཆེམས་སེ་ཆེམ༔ ལས་མཁན་ཕོ་ཉ་རྣམས་ཀྱི་ཐུགས་དམ་དུས་ལ་བབ༔ བར་ཆོད་སོལ་ལ་རྐྱེན་རྣམས་བཟློག༔ དགྲ་བགེགས་བྱད་མ་རྡུལ་དུ་རློག༔ བཟློག་ཅིག་དགྲ་བགེགས་དམག་དཔུང་བཟློག༔ གསོད་ཅིག་དགྲ་བགེགས་དམག་དཔུང་གསོད༔ བཟློག་ཅིག་རིགས་སྔགས་བྱད་སྟེམས་བཟློག༔ ས་མ་ཡ་བྱད་མ་རིགས་སྔགས་བྷྱོ་བྷྱོ་བཟློག་བཟློག༔ ཧཱུྃ༔ བཅོམ་ལྡན་དཔལ་ཆེན་ཧེ་རུ་ཀས༔ འཇིག་རྟེན་ཁམས་ནི་ཐམས་ཅད་ཀུན༔ སྐད་ཅིག་ཉིད་ལ་རྒྱས་མཛོད་ཅིག༔ ཚེ་དང་ལོངས་སྤྱོད་རྒྱས་པའི་འཕྲིན་ལས་ཀྱིས༔ བདག་དང་རྒྱུ་སྦྱོར་ཡོན་བདག་གི༔ ཚེ་དང་བསོད་ནམས་རྒྱས་པར་མཛོད༔ རྒྱས་པར་མ་གྱུར་གང་ཡང་མེད༔ གསེར་རམ་སེར་པོའི་ཤིང་རྣམས་ལ༔ རྒྱས་པའི་རྩང་ཕུར་སྲིན་མོ་འགྲོས་སུ་བཙུགས༔ རྐེད་པ་རྒྱ་མདུད་གྲུ་བཞི་གཞལ་ཡས་ཁང་༔ ཧེ་རུ་ཀཿཡི་སྐུར་བསྒོམས་ཏེ༔ དགྲ་བགེགས་བྱད་མའི་ཤ་ཟ་བ༔ ལྷོ་ཕྱོགས་གཏོར་ཆེན་ལྕགས་རི་ལ༔ བཙུགས་པས་ཐམས་ཅད་རྒྱས་པར་འགྱུར༔ རྒྱས་པར་མ་གྱུར་གང་ཡང་མེད༔ བདག་དང་རྒྱུ་སྦྱོར་ཡོན་བདག་གི༔ ཚེ་དང་བསོད་ནམས་ལོངས་སྤྱོད་རྒྱས༔ རྒྱས་མཛད་ཧེ་རུ་ཀས་རྒྱས་པར་མཛོད༔ ཨཱོཾ་རཏྣ་ཤྲཱི་ཧེ་རུ་ཀ་ཧཱུྃ་ཕཊ༔ བདག་དང་རྒྱུ་སྦྱོར་ཡོན་བདག་གི༔ ཚེ་དང་བསོད་ནམས་དཔལ་དང་གྲགས་པ་ཐམས་ཅད་རྒྱས་པར་གྱུར་ཅིག༔ པུཥྟིཾ་ཀུ་རུ་ཡེ་སྭཱ་ཧཱ༔ རྒྱས་མཛད་རྣོ་དབལ་རྩང་ཕུར་གྱི༔ ཡར་གྱི་རྩེ་ལ་མཚལ་སྟག་དམར་པོ་མཆོང་༔ སྟག་མཆོང་འཛུམ་མདངས་ཤིགས་སེ་ཤིག༔ མར་གྱི་རྩེ་ལ་ཕག་རྒོད་མཆེ་བ་གཙིགས༔ ཕག་རྒོད་ངུར་སྒྲ་འུ་རུ་རུ༔ རྐེད་པ་རྒྱ་མདུད་དྲེད་མོ་རལ་པ་གསིགས༔ དྲེད་མོའི་རལ་པ་ཡེངས་སེ་ཡེང་༔ རྒྱས་མཛད་རྩང་ཕུར་སྲིན་མོ་འགྲོས་སུ་བཙུགས༔ རྩང་ཕུར་རྔམ་སྟབས་ཁྲབས་སེ་ཁྲབ༔ རྩང་ཕུར་གར་སྟབས་ཁྲིགས་སེ་ཁྲིག༔ རྩང་ཕུར་ཤ་ཟ་འཇིབས་སེ་འཇིབ༔ རྩང་ཕུར་ཁྲག་འཐུང་ཀྱུ་རུ་རུ༔ རྩང་ཕུར་རུས་འཆའ་ཆེམས་སེ་ཆེམ༔ ལས་མཁན་ཕོ་ཉ་རྣམས་ཀྱི་ཐུགས་དམ་དུས་ལ་བབ༔ བདག་དང་རྒྱུ་སྦྱོར་ཡོན་བདག་གི༔ བར་ཆད་སོལ་ལ་རྐྱེན་རྣམས་བཟློག༔ དགྲ་བགེགས་བྱད་མ་རྡུལ་དུ་རློགས༔ བཟློག་ཅིག་དགྲ་བགེགས་དམག་དཔུང་བཟློག༔ གསོད་ཅིག་དགྲ་བགེགས་བྱད་མ་གསོད༔ བཟློག་ཅིག་རིགས་སྔགས་བྱད་སྟེམས་བཟློག༔ ས་མ་ཡ་བྷྱོ་བྷྱོ་བཟློག་བཟློག༔ ཧཱུྃ༔ བཅོམ་ལྡན་དཔལ་ཆེན་ཧེ་རུ་ཀསཿ འཇིག་རྟེན་ཁམས་ནི་ཐམས་ཅད་ཀུན༔ སྐད་ཅིག་ཉིད་ལ་དབང་དུ་སྡུད༔ གསུང་གི་ང་རོ་འབྲུག་ལྟར་སྒྲོག༔ རྒྱལ་བློན་རྗེ་འབངས་འབྲུ་བཅུད་སོགས༔ ཁམས་གསུམ་མ་ལུས་དབང་དུ་སྡུད༔ དབང་དུ་མ་འདུས་གང་ཡང་མེད༔ ཟངས་སམ་དམར་པོའི་ཤིང་རྣམས་ལ༔ དབང་གི་རྩང་ཕུར་ཟུར་གསུམ་རྩེ་མོ་གཉིས་དང་ལྡན༔ རྐེད་པ་རྒྱ་མདུད་ཟླ་གམ་གཞལ་ཡས་ཁང་༔ ཧེ་རུ་ཀ་ཡི་སྐུར་བསྒོམས་པས༔ དགྲ་བགེགས་བྱད་མའི་ཤ་ལ་ཟ༔ ནུབ་ཕྱོགས་གཏོར་ཆེན་ལྕགས་རི་ལ༔ བཙུགས་པས་ཐམས་ཅད་དབང་དུ་སྡུད༔ དབང་དུ་མ་འདུས་གང་ཡང་མེད༔ ཚེ་དང་བསོད་ནམས་ལོངས་སྤྱོད་རྣམས༔ དབང་མཛད་ཧེ་རུ་ཀ་དཔལ་གྱི་དབང་དུ་སྡུས༔ ཨཱོཾ་པདྨ་ཤྲཱི་ཧེ་རུ་ཧཱུྃ་ཕཊ༔ རྒྱལ་བློན་རྗེ་འབངས་འབྲུ་བཅུད་ཐམས་ཅད་དབང་དུ་སྡུས་ཤིག༔ པ་ཤཾ་ཀུ་རུ་ཡེ་སྭཱ་ཧཱ༔ དབང་མཛད་རྣོ་དབལ་རྩང་ཕུར་གྱི༔ ཡར་གྱི་རྩེ་ལ་གསེར་གྱི་གཟིག་མོར་ངུར༔ གཟིག་ཆེན་ཉེར་སྒྲ་འུར་རུ་རུ༔ མར་གྱི་རྩེ་ལ་དོམ་ནག་མཆེ་བ་གཙིགས༔ དོམ་ཆེན་མཆེ་བ་ཐབས་སེ་ཐབ༔ རྐེད་པ་རྒྱ་མདུད་གཡུ་ཡི་སྤྱང་མོ་ངུར༔ གཡུ་སྤྱང་ངུ་འབོད་ལྷངས་སེ་ལྷང་༔ དབང་གི་རྩང་ཕུར་སྲིན་མོ་འགྲོས་སུ་བཙུགས༔ རྩང་ཕུར་རྔམ་སྟབས་ཁྲབས་སེ་ཁྲབ༔ རྩང་ཕུར་གར་སྟབས་ཁྲིགས་སེ་ཁྲིག༔ རྩང་ཕུར་ཤ་ཟ་འཇིབས་སེ་འཇིབ༔ རྩང་ཕུར་ཁྲག་འཐུང་ཀྱུ་རུ་རུ༔ རྩང་ཕུར་རུས་འཆའ་ཆེམས་སེ་ཆེམ༔ ལས་མཁན་ཕོ་ཉ་རྣམས་ཀྱི་ཐུགས་དམ་དུས་ལ་བབ༔ བདག་དང་རྒྱུ་སྦྱོར་ཡོན་བདག་གི༔ བར་ཆོད་རྐྱེན་རྣམས་བཟློག་ཏུ་གསོལ༔ དགྲ་བགེགས་བྱད་མ་རྡུལ་དུ་རློག༔ བཟློག་ཅིག་དགྲ་བགེགས་དམག་དཔུང་བཟློག༔ གསོད་ཅིག་དགྲ་བོ་བྱད་མ་གསོད༔ བཟློག་ཅིག་རིགས་སྔགས་བྱད་སྟེམས་བཟློག༔ ས་མ་ཡ་བྷྱོ་བྷྱོ་བཟློག་བཟློག༔ ཧཱུྃ༔ བཅོམ་ལྡན་དཔལ་ཆེན་ཧེ་རུ་ཀས༔ འཇིག་རྟེན་ཁམས་ནི་ཐམས་ཅད་ཀུན༔ སྐད་ཅིག་ཉིད་ལ་བརླག་པར་མཛོད༔ སྡིག་ཅན་དགྲ་བོ་བྱད་མ་འདི༔ མངོན་སྤྱོད་དྲག་པོའི་འཕྲིན་ལས་ཀྱིས༔ ཐམས་ཅད་མ་ལུས་བརླག་པར་བྱེད༔ བརླག་པར་མ་གྱུར་གང་ཡང་མེད༔ ལྕགས་སམ་དྲག་པོའི་ཤིང་རྣམས་ལ༔ དྲག་པོའི་རྩང་ཕུར་རྩེ་མོ་གཉིས་དང་ལྡན༔ རྐེད་པ་རྒྱ་མདུད་ཟུར་གསུམ་གཞལ་ཡས་ཁང་༔ ཧེ་རུ་ཀ་ཡི་སྐུར་བསྒོམས་པས༔ དགྲ་བོ་བྱད་མའི་ཤ་ཟ་བ༔ བྱང་ཕྱོགས་གཏོར་ཆེན་ལྕགས་རི་ལ༔ བཙུགས་པས་དགྲ་བགེགས་བརླག་པར་བྱེད༔ བརླག་པར་མ་གྱུར་གང་ཡང་མེད༔ བརླག་མཛད་ཧེ་རུ་ཀས་རླག་པར་མཛོད༔ ཨཱོཾ་ཀརྨ་ཤྲཱི་ཧེ་རུ་ཀ་ཧཱུྃ་ཕཊ༔ དགྲ་བགེགས་བྱད་མ་བརླག་པར་མཛོད༔ མཱ་ར་ཡ་ཕཊ༔ དྲག་པོ་ལས་ཀྱི་རྩང་ཕུར་འདི༔ ཡར་གྱི་རྩེ་ལ་བྱ་གླག་མང་པོ་འཇུམ༔ བྱ་གླག་འཇུམ་ཆུང་ཅུངས་སེ་ཅུང་༔ མར་གྱི་རྩེ་ལ་ལྕགས་ཀྱི་ཕོ་རོག་འགྱེད༔ ཕོ་རོགས་འགྱེད་སྒྲ་ཁྲབས་སེ་ཁྲབ༔ རྐེད་པ་རྒྱ་མདུད་གསེར་གྱི་འུག་པ་འཁུན༔ འུག་པ་ཧཱུྃ་སྒྲ་དི་རི་རི༔ གསེར་མིག་འཁྱིལ་བ་ཁྱི་ལི་ལི༔ གདུག་པ་དྲག་པོའི་རྩང་ཕུར་འདི༔ དམར་ནག་སྲིན་མོ་འགྲོས་སུ་བཙུགས༔ གསོད་བྱེད་རྔམ་སྟབས་ཁྲབས་སེ་ཁྲབ༔ རྩང་ཕུར་གར་སྟབས་ཁྲིགས་སེ་ཁྲིག༔ རྩང་ཕུར་ཤ་ཟ་འཇིབས་སེ་འཇིབ༔ རྩང་ཕུར་ཁྲག་འཐུང་ཀྱུར་རུ་རུ༔ རྩང་ཕུར་རུས་འཆའ་ཆེམས་སེ་ཆེམ༔ རྩང་ཕུར་རྣོ་དབལ་ཟངས་སེ་ཟང་༔ ལས་མཁན་ཕོ་ཉ་རྣམས་ཀྱི་ཐུགས་དམ་དུས་ལ་བབ༔ བདག་དང་རྒྱུ་སྦྱོར་ཡོན་བདག་གི༔ བར་ཆོད་སོལ་ལ་རྐྱེན་རྣམས་བཟློག༔ དགྲ་བགེགས་བྱད་མ་རྡུལ་དུ་རློགས༔ བཟློག་ཅིག་དགྲ་བགེགས་དམག་དཔུང་བཟློག༔ གསོད་ཅིག་དགྲ་བགེགས་བྱད་མ་གསོད༔ རིགས་སྔགས་བྱད་སྟེམས་བཟློག་ཏུ་གསོལ༔ ས་མ་ཡ་བྷྱོ་བྷྱོ་བཟློག་བཟློག༔ གདུག་རྩུབ་དྲག་པོའི་རྩང་ཕུར་འདི༔ ཡར་གྱི་རྩེ་མོ་གདུག་ལ་རྩུབ༔ མར་གྱི་རྩེ་མོ་དབལ་དང་ལྡན༔ རྐེད་པ་རྒྱ་མདུད་བྷྲཱུྃ་ལས་གྲུབ༔ ཟུར་གསུམ་སྐུ་གསུང་ཐུགས་སུ་གྲུབ༔ ངོས་གསུམ་རིགས་གསུམ་ངོ་བོར་བརྡུངས༔ རྐེད་པ་རྒྱ་མདུད་གཞལ་ཡས་ཁང་དུ་བརྡུངས༔ ཡར་གྱི་རྩེ་མོ་ངར་དང་ལྡནཿ མར་གྱི་རྩེ་མོ་དབལ་དང་ལྡན༔ གདུག་རྩུབ་དྲག་པོའི་རྩང་ཕུར་འདི༔ བྱད་མ་གསོད་པའི་མཚོན་ཆ་བརྡུངས༔ དབང་དྲག་རྩང་ཕུར་ཡར་རྩེ་ལ༔ ལྕགས་ཀྱི་སེར་བ་ཁྲ་ལ་ལ༔ དབང་དྲག་རྩང་ཕུར་མར་རྩེ་ལ༔ མཚལ་གྱི་ཁུ་འཕང་ཤ་ར་ར༔ རྐེད་པ་རྒྱ་མདུད་ཟུར་གསུམ་ལ༔ ཁྲག་གི་ཆར་པ་སི་ལི་ལིཿ རྣོ་དབལ་ཟུར་གསུམ་ཡར་རྩེ་ན༔ གཡུ་ཡི་དུད་འཐུལ་ཕྱུ་རུ་རུ༔ རྣོ་དབལ་ཟུར་གསུམ་མར་རྩེ་ན༔ སོལ་བའི་མཚོ་འཁྱིལ་མེ་རེ་རེ༔ རྐེད་པ་རྒྱ་མདུད་ཟུར་གསུམ་ལ༔ ཟངས་ཀྱི་མེ་འབར་ཡ་ལ་ལ༔ དབང་དྲག་ལས་ཀྱི་རྩང་ཕུར་འདི༔ དགྲ་བགེགས་བྱད་མའི་སྙིང་ལ་གདབ༔ ཆོས་སྐྱོང་ཕོ་ཉའི་རྟེན་དུ་འཛུགས༔ རྩང་ཕུར་ཡར་གྱི་རྩེ་མོ་ན༔ ལས་མཁན་ཚོགས་ནི་སྤྲིན་ལྟར་གཏིབས༔ རྩང་ཕུར་མར་གྱི་རྩེ་མོ་ན༔ མ་མོ་མཁའ་འགྲོའི་ཚོགས་རྣམས་ས་གཞི་གང་༔ རྩང་ཕུར་རྒྱ་མདུད་ཟུར་གསུམ་ལ༔ ཧཱུྃ་ཕཊ་འབྲུག་སྒྲས་སྟོང་གསུམ་ཁེངས༔ དམར་ནག་རྩང་ཕུར་སྲིན་མོ་འགྲོས་སུ་བཙུགས༔ རྩང་ཕུར་རྔམ་སྟབས་ཁྲབས་སེ་ཁྲབ༔ རྩང་ཕུར་གར་སྟབས་ཁྲིགས་སེ་ཁྲིག༔ རྩང་ཕུར་ཤ་ཟ་འཇིབས་སེ་འཇིབཿ རྩང་ཕུར་ཁྲག་འཐུང་ཀྱུ་རུ་རུ༔ རྩང་ཕུར་རུས་འཆའ་ཆེམས་སེ་ཆེམ༔ ལས་མཁའ་ཕོ་ཉ་རྣམས་ཀྱི་ཐུགས་དམ་དུས་ལ་བབ༔ བདག་དང་རྒྱུ་སྦྱོར་ཡོན་བདག་གི༔ བར་ཆོད་སོལ་ལ་རྐྱེན་རྣམས་བཟློགཿ དགྲ་བགེས་བྱད་མ་རྡུལ་དུ་རློག༔ བཟློག་ཅིག་དགྲ་བགེགས་དམག་དཔུང་བཟློག༔ གསོད་ཅིག་དགྲ་བགེགས་བྱད་མ་གསོད༔ རིག་སྔགས་རྦོད་གཏོང་ཐམས་ཅད་བཟློག༔ ས་མ་ཡ་བྷྱོ་བྷྱོ་བཟློག་བཟློགཿ དེ་ལྟར་མངའ་གསོལ་མཆོད་པ་ཡིས༔ ད་ནི་བཟློག་པའི་འཕྲིན་ལས་མཛོད༔ བཟློག་ཅིག་མགོན་པོའི་མཐུ་བྱེད་བཟློག༔ གཤིན་རྗེའི་འཁོར་ལོ་བསྐོར་བ་བཟློག༔ མགོན་པོའི་སྦྱིན་སྲེག་བྱེད་པ་བཟློག༔ མ་མོའི་ཐུན་ཟོར་འཕེན་པ་བཟློག༔ ཡུངས་ཀར་ཁྲོ་བོའི་རྦབ་ཟོར་བཟློག༔ བྱད་མ་ལྷ་དང་བཅས་པ་བཟློག༔ བནྡྷེ་ཡོངས་ཀྱི་སྔགས་ཟོར་བཟློག༔ དགེ་སློང་འཆར་ཀའི་པར་བུ་བཟློག༔ ཀླུ་བདུད་ནག་པོའི་གཏད་ཁྲམ་བཟློག༔ ཞང་ཞུང་བཙོ་དམར་འཕེན་པ་བཟློག༔ བོན་པོ་ཡོངས་ཀྱི་ལྟ་བྱད་བཟློག༔ མུ་སྟེགས་ངན་སྔགས་ཐམས་ཅད་བཟློག༔ མ་མོའི་ངན་སྔགས་དམོད་པ་བཟློག༔ རྒྱ་གར་ཆོས་ཀྱི་མཐུ་བྱད་བཟློག༔ དྲང་སྲོང་དམོད་པ་འདོར་བ་བཟློག༔ ཕྲ་མེན་མ་ཡི་ངན་བྱེད་བཟློག༔ སུམ་པས་གླང་དམར་རྨོ་བ་བཟློག༔ བོད་ཀྱི་རྦོད་བྱ་གཏོང་བྱེད་བཟློག༔ བྲམ་ཟེས་ངན་སྔགས་དམོད་པ་བཟློག༔ དྲི་ཟས་མྱོས་ཤིང་འཐིབས་པ་བཟློག༔ རྒྱལ་པོས་སྨྱོ་འབོག་གཏོང་བ་བཟློག༔ སྲིན་མོས་ཤོད་ཁ་གཏོང་བ་བཟློག༔ ཀླུ་ཡིས་བྱད་དུ་བཅུག་པ་བཟློག༔ བདུད་ཀྱིས་ཁྲམ་ལ་བཏབ་པ་བཟློག༔ བཙན་གྱིིས་ཞགས་པ་འཕེན་པ་བཟློག༔ གནོད་སྦྱིན་རྩིས་ལ་འདེབས་པ་བཟློག༔ འབྱུང་པོས་མྱུལ་ལེ་བྱེད་པ་བཟློག༔ འཚེ་ཟོར་ཡུངས་ཟོར་འཕེན་པ་བཟློག༔ ཐེའུ་རང་སྲིད་ལ་བརྐུ་བ་བཟློག༔ གློ་བུར་ཡེ་འབྲོག་བྱེད་པ་བཟློག༔ འབྱུང་པོས་གོད་འདྲེ་བྱེད་པ་བཟློག༔ བསེ་རགས་བསྲིས་ལ་བརྐུ་བ་བཟློག༔ ཕ་ཚན་ནང་གི་རྒྱ་འདྲེ་བཟློག༔ མ་ཚན་ནང་གི་སྟོང་འདྲེ་བཟློག༔ བདུད་བཙན་ཡོངས་ཀྱི་ཡུངས་ཟོར་བཟློག༔ མ་མོ་ཡོངས་ཀྱི་རིམས་ནད་བཟློག༔ ནད་དང་མཚོན་གྱི་དྲུ་བུ་བཟློག༔ རིམས་ནད་གག་ལྷོག་གཟེར་གསུམ་བཟློག༔ མི་ནད་ཡོངས་དགུ་ཐམས་ཅད་བཟློག༔ ཡས་ཀྱི་བདུད་དུ་གཡོས་པ་བཟློག༔ མས་ཀྱི་སྲི་རུ་ལངས་པ་བཟློག༔ ཕ་ཁུའི་སྲི་ཅན་ལངས་པ་བཟློག༔ མ་སྲུའི་སྒབ་འདྲེ་བྱུང་བ་བཟློག༔ བྱིས་པའི་ཆུང་སྲི་ལངས་པ་བཟློག༔ གསོན་པོའི་བདུད་དུ་གཡོས་པ་བཟློག༔ གཤིན་གྱི་དུར་སྲི་ཐམས་ཅད་བཟློག༔ རུས་ལ་ཚིག་ངན་སློང་བ་བཟློག༔ གནག་ལ་མཆིན་ངན་འཐབ་པ་བཟློག༔ རྟ་ནད་ནོར་ནད་ཐམས་ཅད་བཟློག༔ ལོ་དགྲ་རྩ་དང་སད་སེར་བཟློག༔ ཡེ་འབྲོག་སུམ་བརྒྱ་དྲུག་ཅུ་བཟློག༔ ནད་རིགས་བཞི་བརྒྱ་རྩ་བཞི་བཟློག༔ སྐེག་ཆེན་སུམ་བརྒྱ་དྲུག་ཅུ་བཟློག༔ ལྟས་ངན་ཉིས་ཁྲི་ཆིག་སྟོང་བཟློག༔ བགེགས་རིགས་སྟོང་ཕྲག་བརྒྱད་ཅུ་བཟློག༔ ཕྱི་ཡི་བར་ཆད་ཕྱི་རུ་གཞིལ༔ ནང་གི་བར་ཆད་ནང་དུ་གཞིལ༔ གསང་བའི་བར་ཆད་དབྱིངས་སུ་གཞིལ༔ ས་མ་ཡ་བྷྱོ་བྷྱོ་བཟློག་བཟློག་སྒྱུར་ཅིག༔ སརྦ་མངྒ་ལཾ་དགེའོ།། །།