ཟངས་མདོག་དཔལ་རིར་སྐྱེ་བའི་སྨོན་ལམ།
ཟངས་མདོག་དཔལ་རིར་སྐྱེ་བའི་སྨོན་ལམ་བཞུགས་སོ། །ན་མོ་མ་ཧཱ་གུ་རུ་ཡེ། །མཁའ་ཁྱབ་ཞིང་རྡུལ་གྲངས་མཉམ་རྒྱལ་བ་ཡི། །ཇི་སྙེད་གསང་གསུམ་ཡོན་ཏན་ཕུང་པོའི་ཚོགས། །གང་གི་མཁྱེན་བརྩེ་ནུས་པར་ཡོངས་སྨིན་པའི། །ཨོ་རྒྱན་རྡོ་རྗེ་འཆང་ལ་གསོལ་བ་འདེབས། །མགོན་ཁྱོད་དཀྱིལ་འཁོར་ཀུན་གྱི་གཙོ་བོ་ཉིད། །ངོ་མཚར་སྤྲུལ་པའི་རོལ་གར་སྣ་ཚོགས་ཀྱང་། །གདུལ་བྱའི་སྣང་ངོར་རིག་འཛིན་འདུས་པའི་གཙོ། །བདེ་མཆོག་འཁོར་ལོར་བཞེངས་ལ་གསོལ་བ་འདེབས། །བདག་དོན་མ་དམིགས་གཞན་ཕན་སྤྱོད་པའི་ཚུལ། །རྒྱལ་སྲས་རྒྱ་མཚོའི་རྣམ་ཐར་མཛད་པ་ལས། །རྨད་བྱུང་ཐུགས་བསྐྱེད་ནམ་ཡང་མི་འདོར་བ། །གཏན་གྱི་སྐྱབས་མཆོག་ཁྱོད་ལ་གསོལ་བ་འདེབས། །ཡེ་ཤེས་ལུས་ཅན་ཉིད་ཕྱིར་གཤེགས་བཞུགས་ཀྱི། །དངོས་མཚན་བྲལ་ཡང་རྔ་ཡབ་དཔལ་གྱི་རིར། །བཞུགས་ནས་མཁའ་ཁྱབ་འགྲོ་དང་བོད་ཡུལ་ཀུན། །རྟག་ཏུ་ཐུགས་རྗེས་འཛིན་ལ་གསོལ་བ་འདེབས། །གང་གི་ཞིང་དེའི་ཡོན་ཏན་མཐོང་ཐོས་དྲན། །ངན་སོང་འཁོར་བའི་སྡུག་བསྔལ་ལས་སྐྱོབ་པ། །མཁའ་ལ་སྤྱོད་པའི་གནས་དང་དབྱེར་མེད་པའི། །པདྨ་འོད་ཀྱི་ཞིང་དེར་སྐྱེ་བར་ཤོག། ཕྱོགས་མཚམས་ལངྐའི་གྲོང་དང་ཡུལ་ལྗོངས་ཀྱིས། །ཡོངས་སུ་བསྐོར་དབུས་ཟང་མདོག་དཔལ་གྱི་རི། །ལྷུན་ཆགས་མངོན་མཐོ་གཟི་བྱིན་རབ་འབར་བ། །མཐོང་བས་དགའ་བསྐྱེད་གནས་དེར་སྐྱེ་བར་ཤོག། ཁོར་ཡུག་ཆུ་མཚོ་ལྗོན་ཤིང་པདྨོའི་ཚལ། །སྤྲུལ་པའི་འདབ་ཆགས་རྐང་དྲུག་འཕུར་ལྡིང་གཡོ། །ཆོས་དབྱངས་སྙན་སྒྲོགས་དྲི་བཟང་ངད་པ་ཡིས། །ཕྱོགས་ཀྱི་འཁོར་ལོ་འགེངས་དེར་སྐྱེ་བར་ཤོག། རྣམ་བཀྲ་དབང་པོའི་གཞུ་ཡི་གུར་ཁྱིམ་འཁྲིགས། །རབ་མཛེས་དཔའ་བོ་ཌཱ་ཀིའི་ཚོགས་རྣམས་ཀྱིས། །རོལ་མོའི་སྒྲ་དང་འཕན་གདུགས་རྒྱལ་མཚན་སོགས། །མཆོད་པའི་སྤྲིན་ཕུང་སྤྲོ་དེར་སྐྱེ་བར་ཤོག། དེ་དབུས་རིན་ཆེན་ཐོད་པ་སྐམ་རློན་ལས། །གྲུབ་པའི་གཞལ་ཡས་མཚན་ཉིད་རྒྱན་རྫོགས་དབུས། །རཏྣའི་ཁྲི་དང་པད་ཟླ་ཉི་གདན་སོགས། །ཕུལ་བྱུང་བཀོད་པས་བརྒྱན་པ་མཐོང་བར་ཤོག། ཡེ་ཤེས་དྭངས་གསལ་འོད་ལྔ་འཁྲིགས་པའི་དབུས། །རྒྱལ་བའི་སྤྱི་གཟུགས་རིག་འཛིན་ཐོད་པ་རྩལ། །ཡིད་འཛིན་མེ་ཏོག་མན་དྷ་རཱ་ཝར་བཅས། །སྣང་སྟོང་གར་གྱི་རོལ་པ་མཇལ་བར་ཤོག། མགོན་དེའི་གསང་གསུམ་མི་བཟད་རྒྱན་འཁོར་ལོར། །སྒྲུབ་སྡེ་བརྒྱད་ཀྱི་ལྷ་ཚོགས་ཡོངས་རྫོགས་ཤིང་། །བགྲངས་ཡས་རིག་འཛིན་གྲུབ་པའི་ཚོགས་རྣམས་ཀུན། །འཁོར་དུ་བསྐོར་བའི་ཞལ་མཆོག་མཐོང་བར་ཤོག། གང་གི་ཞལ་ལུང་སྨིན་གྲོལ་བདུད་རྩི་ལ། །ངོམས་མེད་སྤྱོད་པའི་བསྐལ་བཟང་མངོན་གྱུར་ནས། །རིག་འཛིན་རྣམ་བཞིའི་ས་རྣམས་རིམ་བགྲོད་ཅིང་། །གང་འདུལ་སྤྲུལ་པས་འགྲོ་བའི་དོན་བྱེད་ཤོག། མདོར་ན་ཕུང་ཁམས་སྐྱེ་མཆེད་ལངྐའི་གྲོང་། །རང་སྙིང་ཟངས་མདོག་དཔལ་གྱི་རི་བོའི་རྩེར། །བཞུགས་པའི་རང་རིག་དོན་གྱི་ཐོད་ཕྲེང་རྩལ། །ངོ་སྤྲོད་ཞལ་མཇལ་འཕོ་མེད་གྲོལ་བར་ཤོག། དེ་ལྟར་མ་གྱུར་གནས་སྐབས་ཐམས་ཅད་དུ། །ཁྱེད་ཤེས་བློ་ཡིས་རྩེ་གཅིག་གསོལ་འདེབས་ཤིང་། །བསྙེན་བསྒྲུབ་བཟླས་པས་ཐུགས་དམ་རྒྱུད་བསྐུལ་ན། །དངོས་སུ་ཞལ་སྟོན་དབུག་དབྱུང་མཛད་དུ་གསོལ། །ཆེས་ཆེར་སྙིགས་མའི་དུས་འདིར་ལས་རྐྱེན་གྱི། །འཚེ་བ་མང་བས་ཐར་ལམ་བགྲོད་དཀའ་བར། །ཐུགས་རྗེའི་མཐུ་དཔུང་བསྐྱེད་ལ་གེགས་རྣམས་སོལ། །ཆོས་ཀྱི་བསམ་པ་མཐར་ཕྱིན་འགྲུབ་པར་མཛོད། །འབྱུང་འཁྲུགས་ཟུག་རྔུའི་ཚོགས་རྣམས་ཞི་བ་དང་། །རིང་པོའི་ཚེ་དང་འབྱོར་བའི་ཚོགས་རྣམས་ཀུན། །དཀར་ཆའི་ཟླ་བཞིན་གོང་འཕེལ་མཆོག་ཐུན་གྱི། །རེ་འབྲས་མ་ལུས་མྱུར་དུ་འགྲུབ་པར་ཤོག། ཅེས་བླ་མ་བདེ་མཆོག་དབང་གི་འཁོར་ལོ་དང་འབྲེལ་བའི་ཟངས་མདོག་དཔལ་རིར་སྐྱེ་བའི་སྨོན་ལམ་ཉུང་ངུ་ཞིག་དགོས་ཞེས་རྣམ་རྒྱལ་འབུམ་གྱིས་མཎྜལ་དང་བཅས་ཡང་ཡང་བསྐུལ་བའི་ངོར་པདྨ་ཐེག་མཆོག་བསྟན་པའི་རྒྱལ་མཚན་གྱིས་དཔལ་ལྡན་སྟག་མོ་སྒང་དུ་སྦྱར་བའོ།། །།