ཟབ་ལམ་ཐུགས་རྗེ་ཆེན་པོའི་བུམ་སྒྲུབ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཟབ་ལམ་ཐུགས་རྗེ་ཆེན་པོའི་བུམ་སྒྲུབ་བཞུགས༔ དཔལ་ཧེ་རུ་ཀཿལ་ཕྱག་འཚལ་ལོ༔ ཟབ་ལམ་གསང་སྒྲུབ་རིམ་པ་ལས༔ སྐྱེ་བདུན་ཤ་རིལ་སྒྲུབ་ཐབས་ཤིག༔ བདག་འདྲ་པདྨ་འབྱུང་གནས་ཀྱིས༔ ཕྱི་རབས་དོན་དུ་ཡི་གེར་འདེབས༔ ས་མ་ཡཱ༔ རྒྱ་རྒྱ་རྒྱ༔ གཞན་དོན་འགྲོ་ལ་སེམས་བསྐྱེད་ནས༔ སྐྱེ་བདུན་ཤ་རིལ་བསྒྲུབ་འདོད་པས༔ སྔོན་འགྲོ་དངོས་གཞི་རྗེས་གསུམ་གྱི༔ རིམ་པར་ཕྱེའོ་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ སྔོན་འགྲོ་ཐུན་མོང་ཁྱད་པར་གཉིས༔ ཐུན་མོང་དག་གི་སྔོན་འགྲོ་ནི༔ སྒྲུབ་པའི་ཁོག་དབུབ་གཞན་བཞིན་ལས༔ གསང་སྒྲུབ་དཀྱིལ་འཁོར་ལག་ལེན་སྤྲད༔ ཁྱད་པར་དག་གི་སྔོན་འགྲོ་ནི༔ མཚན་ཉིད་ལྡན་པའི་བུམ་པ་ལ༔ གུ་གུལ་བདུག་ཅིང་ཐུན་གྱིས་བྲབ༔ རིགས་ལྔའི་ཕྱག་མཚན་བྲིས་པའི་དཀྱིལ༔ ཨཱོཾ་ཧཱུྃ་ཏྲཱཾ་ཧྲཱིཿཨཱ༔ མུཾ་ལཾ་མཾ་པཾ་ཏཾ༔ ས་བོན་ཡིག་འབྲུ་ཟུང་འཇུག་འགོད༔ མགུལ་ཆིངས་རྒྱན་ཞིང་པྲོག་ཞུ་བསྐྱོན༔ མཚན་ལྡན་བུམ་པ་དེ་ཡི་ནང་༔ སྐྱེ་བདུན་ཤ་རིལ་ཨཱཿཐམ་མ༔ གཙོ་བོར་བསགས་ཤིང་དེ་ཡི་སྐྱོབས༔ ཨ་བར་སྐྱུར་གསུམ་སླེ་ཏྲེས་དང་༔ མ་ནུ་དང་བཅས་སྨན་མཆོག་ལྔ༔ ནས་འབྲས་གྲོ་དང་སོ་བ་དང་༔ སྲན་མ་དང་བཅས་འབྲུ་སྣ་ལྔ༔ ཙན་དན་ག་པུར་གླ་རྩི་དང་༔ ཛ་ཏི་གུར་གུམ་དྲི་བཟང་ལྔ༔ བུ་རམ་སྦྲང་རྩི་འོ་མ་མར༔ ལན་ཚྭ་དང་བཅས་སྙིང་པོ་ལྔ༔ གསེར་དངུལ་གཡུ་དང་མུ་ཏིག་དང་༔ བྱི་རུ་དང་བཅས་རིན་ཆེན་ལྔ༔ ལྔ་ལྔ་ཉེར་ལྔའི་བུམ་རྫས་དང་༔ སྲིད་པའི་བྱང་སེམས་དཀར་དམར་རིགས༔ སྣ་མང་བསགས་ཤིང་སྐྱོབས་སུ་སྦྱར༔ འབྲས་ཀྱི་ཕྱེ་དང་སུམ་བསྲེས་སྦྱོར༔ ཁྱེའུ་ཕོ་མོ་རིགས་བཟང་གིས༔ རིན་ཆེན་སྣོད་དུ་གཙང་ཆབ་བླངས༔ རིལ་བུ་སྲན་མ་ཙམ་དུ་བསྒྲིལ༔ མཚལ་ལམ་དམར་པོའི་ན་བཟའ་གསོལ༔ བུམ་པར་བླུགས་ཤིང་གཟུངས་ཐག་གདགས༔ དཀྱིལ་འཁོར་དབུས་སུ་ལེགས་པར་དགོད༔ སྨན་རཀ་གཏོར་གསུམ་བཀའ་སྲུང་གི༔ བཤོས་བུ་རྣམས་ཀྱང་བཟང་དུ་བཤམས༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྒྲུབ་པའི་དངོས་གཞི་ནི༔ དམ་ལྡན་རྣལ་འབྱོར་ཕོ་མོ་རྣམས༔ ཞལ་བཀོད་གདབ་ཅིང་གྲལ་དུ་འཁོད༔ ལས་བྱང་གཞུང་བསྲང་འཛབ་བསྙེན་བསྐུལ༔ བདག་མདུན་རྫས་མཆོག་རིལ་བུ་རྣམས༔ ཟབ་ལམ་གསང་འདུས་སྐུ་རུ་བསྒོམ༔ བདག་བསྐྱེད་ལྷ་ཡི་ཐུགས་ཀ་ནས༔ སྔགས་ཕྲེང་གཟུངས་ཀྱི་ཐག་པར་ཞོན༔ མར་མེ་གཅིག་ལས་གཉིས་ཆད་ལྟར༔ འདུན་བསྐྱེད་ལྷ་ཡི་ཐུགས་ཀར་ཕོག༔ ཐུགས་དམ་རྒྱུད་བསྐུལ་འོད་དང་ཟེར༔ འཁོར་འདས་ཕྱོགས་བཅུ་སྟེང་འོག་ཁྱབ༔ རིགས་དྲུག་སེམས་ཅན་ལས་སྒྲིབ་སྦྱངས༔ རྒྱལ་བ་རྣམས་ལ་མཉེས་མཆོད་ཕུལ༔ སྐུ་གསུང་ཐུགས་ཡོན་འཕྲིན་ལས་ཀྱི༔ བྱིན་རླབས་ནུས་མཐུ་འོད་ཀྱིས་བསྡུས༔ བདག་མདུན་སྒྲུབ་རྫས་རྣམས་ལ་ཐིམ༔ ཐུགས་རྗེའི་སྟོབས་ཀྱིས་ཕྱི་སྣོད་ཞིང་༔ ནང་བཅུད་སྤྱན་རས་གཟིགས་ཀྱི་སྐུ༔ སྒྲ་གྲག་འཕགས་མཆོག་ཐུགས་རྗེའི་གསུང་༔ དྲན་རྟོག་སྐྱེ་འགག་གཉིས་མེད་ཐུགས༔ ཡེ་ནས་འཕགས་མཆོག་སྤྱན་རས་གཟིགས༔ འདུ་འབྲལ་མེད་པའི་ཕོ་བྲང་དུ༔ གཉིས་སུ་མེད་པར་བྱིན་རླབས་ཤིང་༔ སྐད་ཅིག་ཉིད་ལ་མཆོག་ཐུན་ཀུན༔ མ་ལུས་ཐོབ་པའི་འདུན་པ་ཡི༔ རྩེ་གཅིག་ངང་ནས་འཛབ་འདི་བགྲང་༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་བྷུདྡྷ་ཛྙཱ་ན་གྷུ་རུ་དྷེ་ཝ་དྷཀྐི་ནི་ཙིཏྟ་ཧྲིང་ཧྲིང་ཛཿཛཿསརྦ་སིདྡྷི་ཧཱུྃ༔ ཨཱོཾ་ཨ་ར་པ་ཙ་མི་ཏ་ཧྲཱིཿད་ཡ་སྭཱ་ཧཱ༔ དེ་ལྟར་མ་ཡེངས་ཏིང་འཛིན་ངང་༔ འཛབ་བསྙེན་བགྲང་ཞིང་ཐུན་མཚམས་སུ༔ མཆོད་བསྟོད་བྱ་ཞིང་བཟླས་པ་བསྐུལ༔ ཐུན་དུ་གཅོད་ཅིང་ཞག་བདུན་བསྙེན༔ ས་མ་ཡཱ༔ རྒྱ་རྒྱ་རྒྱ༔ དེ་ཚེ་རྟགས་ཀྱི་རིམ་པ་ནི༔ དངོས་ཉམས་རྨི་ལམ་ལ་སོགས་ལ༔ ཞལ་མཇལ་གསུང་ཐོས་དྲི་བཟང་འཐུལ༔ རིལ་བུ་འཕེལ་ཞིང་འཕུར་བ་དང་༔ དབྱིངས་ནས་འཛབ་ཀྱི་སྒྲ་གྲག་ཅིང་༔ འོད་འཁྱུག་འཇའ་འཛུག་བཀྲག་མདངས་ལྡན༔ སྨན་རཀ་གཏོར་མར་རླངས་པ་འཕྲོ༔ རྨི་ལམ་ཉི་ཟླ་ཤར་བ་དང་༔ མཁའ་ལ་འཕུར་དང་རོལ་མོ་འཁྲོལ༔ ཁྲུས་བྱས་མེ་ཏོག་གླིང་ཕྱིན་དང་༔ ཤེལ་གྱི་མཆོད་རྟེན་དུང་དཀར་རྙེད༔ དེ་ཚེ་བསྙེན་སྒྲུབ་ཐེམས་པའི་རྟགས༔ ཁོག་འབུབ་བཞིན་དུ་རྗེས་བསྐྱང་ངོ་༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་བསྒྲུབ་པའི་ཤ་རི་དེ༔ སུ་ཡི་ལྟོར་སོང་འགྲོ་བ་ཡང་༔ ངན་སོང་གསུམ་གྱི་སྒོ་ཁེགས་ཤིང་༔ བླ་མེད་བྱང་ཆུབ་ས་ལ་རེག༔ རི་བོའི་རྩེ་དང་ཚོང་འདུས་དཀྱིལ༔ ཆུ་བོའི་གཞུང་དང་གནས་གཞིའི་ནང་༔ གཅན་གཟན་འགྲིམ་པའི་སྒང་དག་དང་༔ ཉ་སྲམ་འཚོག་པའི་མཚོ་རྣམས་དང་༔ དུད་པ་ཅན་གྱི་མེ་ལ་སོགས༔ ལས་ལ་སྦྱོར་ཞིང་སེམས་བསྐྱེད་ན༔ འགྲོ་བ་གང་དག་སེམས་ཅན་རྣམས༔ དྲི་ཚོར་གྲིབ་མས་འགོམ་པའམ༔ མྱངས་དང་བཀྲུས་དང་བཏུངས་ཀྱང་རུང་༔ གྲོལ་འགྱུར་འདི་ལ་ཐེ་ཚོམ་མེད༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་བདག་འདྲ་པདྨ་འབྱུང་༔ རི་བོ་ཏ་ལའི་དབང་ཕུག་ཏུ༔ འཕགས་པ་སྤྱན་རས་གཟིགས་དབང་གི༔ སྒྲུབ་ཐབས་རྒྱུད་སྡེ་ཁྲི་ཕྲག་གི༔ བཀའ་བབས་ལུང་བསྟན་རྗེས་གནང་ཐོབ༔ དེ་ཕྱིར་ཟབ་མོའི་སྒྲུབ་ཐབས་འདི༔ སྐལ་ལྡན་བུད་མེད་ལྔ་ལ་གདམས༔ ཕྱི་རབས་དོན་དུ་གཏེར་དུ་སྦས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པའི་གཏེར་མའོ།། །།