ཟབ་ལམ་ཐུགས་རྗེ་ཆེན་པོའི་དཔའ་མོ་ཡུམ་གྱི་ཐབས་ལམ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཟབ་ལམ་ཐུགས་རྗེ་ཆེན་པོའི་དཔའ་མོ་ཡུམ་གྱི་ཐབས་ལམ་བཞུགས༔ བདེ་ཆེན་ཧེ་རུ་ཀཿལ་འདུད༔ ཟབ་ལམ་མྱུར་གྲོལ་གདམས་པའི་བཅུད༔ སྐལ་ལྡན་བུད་མེད་ཁྱེད་ལྔ་དང་༔ མ་འོངས་དོན་དུ་བཤད་ཀྱི་ཉོན༔ ཡི་གེར་ཐོབ་ལ་གཏེར་དུ་སྦོས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ ལུང་སྟོང་ནགས་དང་གངས་ཁྲོད་རྫ༔ མི་མེད་གཡེང་བ་བྲལ་བའི་སར༔ དགོས་པའི་ཡོ་བྱད་མཐུན་རྐྱེན་བསགས༔ གཞུང་བཞིན་རྩ་ཐིག་རླུང་སེམས་ཀྱི༔ ཉམས་ལེན་ཚད་དུ་འཁྱོལ་བར་བྱ༔ ཁྱད་པར་ཟབ་ལམ་རང་ལུས་ཀྱི༔ རླུང་སྦྱོར་འཁྲུལ་འཁོར་གནད་དུ་བསྣུན༔ ཚགས་སུ་ཚུད་ནས་ལས་སྦྱོར་འདི༔ ཚུལ་དང་ལྡན་པར་ཉམས་སུ་ལེན༔ ས་མ་ཡཱ༔ རྒྱ་རྒྱ་རྒྱ༔ ཐབས་ཀྱི་དཔའ་བོ་མཚན་ལྡན་པ༔ ཚེ་འདི་དོན་དུ་མི་གཉེར་ཞིང་༔ ན་སོ་གཞོན་ལ་སྐྱེ་མཆེད་དྭངས༔ ངང་རྒྱུད་དལ་ཞིང་བདེ་བ་ཆེ༔ དད་བརྩོན་སྙིང་རྗེ་ཤེས་རབ་བཟང་༔ བློ་ཁོག་ཡངས་ཤིང་གསང་ཐུབ་པ༔ གསང་མཚན་སྨེ་བས་བརྒྱན་པའམ༔ གདོང་གཡས་ཆ་སྨད་སྨེ་བ་ཅན༔ དཔྲལ་བར་གྱེན་འགྲེང་གཉེར་མ་གསུམ༔ ཡང་ན་ཁ་ཊྭཱཾ་པདྨའི་རིས༔ དྲི་བཟང་སྐད་སྙན་ལུས་བོང་མཚམས༔ མཚན་དང་ལྡན་པའི་དཔའ་བོ་བཙལ༔ ཁྲུས་བྱས་རྒྱན་སྤྲས་དྲི་བཟང་བྱུག༔ ཁམས་སྤེལ་བཅུད་ལྡན་ལོངས་སྤྱོད་བསྟེན༔ ནང་ཚངས་ཅན་གྱི་གདན་སྟེང་དུ༔ ཡབ་ཡུམ་གཅེར་བུ་ཕྱེད་སྐྱིལ་འདུག༔ སྟོང་དང་སྙིང་རྗེའི་ངང་ཉིད་ལས༔ དཔའ་བོ་ཟབ་ལམ་ཐུགས་རྗེ་ཆེ༔ དཔའ་མོ་གསང་ཡེ་དྷཀྐི་མ༔ སྣང་ལ་རང་བཞིན་མེད་པར་བསྒོམ༔ རང་རང་སྤྱི་གཙུག་ཉི་ཟླའི་སྟེང་༔ བདག་ཉིད་པདྨ་ཐོད་ཕྲེང་རྩལ༔ ལྷ་ལྕམ་དམར་མོ་ཡུམ་དང་སྦྱོར༔ བདེ་སྟོང་དགའ་བཞིའི་ཡེ་ཤེས་ཀྱིས༔ རྩ་ཐིག་རླུང་གསུམ་ལས་རུང་ནས༔ སྣང་སྟོང་ཕྱག་རྒྱ་ཆེན་པོའི་སྐུ༔ མཁའ་སྤྱོད་འགྲུབ་པའི་གསོལ་བ་གདབ༔ བླ་མ་ཡབ་ཡུམ་སྙོམས་པར་ཞུགས༔ བྱང་སེམས་དཀར་དམར་གསང་ལམ་ནས༔ རང་གི་སྤྱི་བོའི་གཙུག་ཏུ་བབ༔ རྩ་གསུམ་འཁོར་ལོ་ཀུན་གང་རྒྱས༔ དབང་བཞི་ཐོབ་ནས་དགའ་བཞི་འཕེལ༔ སྐུ་བཞིའི་ཡེ་ཤེས་མངོན་གྱུར་བསམས༔ མ་ཡེངས་འདུན་པ་དྲག་ཏུ་གཏད༔ ཀྱེ་མ་མ་གྱུར་འགྲོ་བ་ཀུན༔ བདེ་སྟོང་ཡེ་ཤེས་མ་རྟོགས་པར༔ ཉོན་མོངས་འཁྲུལ་པའི་དབང་དུ་སྤྱོད༔ ལས་དྲུག་རྨི་ལམ་འཁྲུལ་སྣང་འདྲ༔ འགྲོ་དྲུག་བག་ཆགས་རྒྱུད་སྦྱངས་ནས༔ བདེ་སྟོང་དགའ་བཞིའི་ཡེ་ཤེས་ཀྱིས༔ འགྲོ་རྣམས་སྒྲོལ་བར་དམ་བཅའོ༔ བདེ་ཆེན་བླ་མེད་སེམས་བསྐྱེད་ནས༔ ལག་འཁྱུད་གཡའ་སྒོག་ནུ་འཕུར་མཉེ༔ གསང་གནས་བལྟ་རེས་སོ་སེན་འདེབས༔ ལྕེ་འཇིབ་ཆགས་གཏམ་སྣ་ཚོགས་སྨྲ༔ རྡོ་རྗེ་ཧཱུྃ་ལས་བུ་ག་ཧཱུྃ་སྔོན་བཀག༔ ཨཱཿལས་པདྨ་བུ་ག་ཕཊ་སེར་བཀག༔ དེ་ནས་རང་ཉིད་གན་རྐྱལ་ཉལ༔ རྡོ་རྗེ་པདྨའི་མཐའ་ནས་བརྩེག༔ དལ་བུས་བསྲུབ་ཅིང་དར་ཅིག་ཀློད༔ རང་ཉིད་ཟབ་ལམ་ཡབ་ཡུམ་སྐུ༔ གནས་ལྔར་རིགས་ལྔ་ཡབ་ཡུམ་དང་༔ ཡན་ལག་སྒོ་བ་ཡབ་ཡུམ་བཞི༔ བ་སྤུའི་འོད་ཀློང་རེ་རེ་ན༔ དཔའ་བོ་རེ་དང་དཔའ་མོ་རེ༔ བདེ་སྟོང་སྦྱོར་བས་སྐུ་ལུས་དགྱེས༔ ཕྱོགས་བཅུའི་རབ་འབྱམས་ཞིང་གི་ཁྱོན༔ བླ་མེད་མཆོད་པས་འགྲོ་ཀུན་གྱི༔ སྒྲིབ་གཉིས་དག་ཅིང་ཚོགས་གཉིས་བསགས༔ ས་ལམ་ཡོན་ཏན་ཡོངས་རྫོགས་ནས༔ མ་རིག་ཉོན་མོངས་དབྱིངས་སུ་བསྒྲལ༔ ཟག་མེད་དགའ་བཞི་མཐར་ཕྱིན་ནས༔ བདེ་སྟོང་ལྷན་ཅིག་སྐྱེས་སྦྱོར་ཏེ༔ ཡེ་སྦྱོར་ཡེ་སྒྲོལ་ཀ་དག་བློ་འདས་ངང་༔ དགའ་བཞི་ངོས་འཛིན་ཚད་དང་ལྡན་པར་སྦྱོར༔ དེ་ཚེ་རྩ་སྣ་རྡོ་རྗེ་འཕྲད་པའི་རྟགས༔ ཐོག་ཐོག་ཧྲེང་ཧྲེང་འབུར་འབུར་གར་གར་ཡོང་༔ མི་སྤྱོད་རྟོག་པ་ཀློད་ཅིང་ཧཱུྃ་རིང་དང་༔ ཧཱུྃ་ཐུང་ཧིང་གིས་འདྲེན་ཅིང་ཧ་ཡིས་སྤྲུག༔ རླུང་ནི་ཁོང་འདྲེན་ཕྱི་འཛིན་ལག་གཉིས་སྦྲེལ༔ རྐང་གཉིས་ཁ་སྦྱར་ལག་པས་མགོ་ནས་འཇུ༔ རྐང་མགོ་ནང་འཐེན་ཚང་ར་ཕྱི་རུ་ཕུལ༔ མདུན་རླུང་ཕྱིར་མནན་རྒྱབ་རླུང་གྱེན་ལ་འཐེན༔ སྟག་མོའི་སྐྱུགས་དང་ཝ་ཡི་སྣོམ་ཚུལ་བྱ༔ ཡན་ལག་འདུལ་སྦྱོང་ཧ་སྤྲུག་བར་འབེབས་འབད༔ དགའ་བཞིའི་ཡེ་ཤེས་མྱུར་དུ་མཐར་ཕྱིན་ནས༔ བླ་མེད་འབྲས་བུ་མངོན་གྱུར་ཨེ་མ་ཧོ༔ ཟབ་ལམ་ཉམས་ལེན་འདྲེན་འཛིན་ཁྲེམས་གསུམ་རྫོགས༔ ཡོན་ཏན་ཀུན་ཚང་ཡིད་བཞིན་ནོར་བུ་འདི༔ སྐལ་ལྡན་བུད་མེད་ལྔ་དང་འབྲོམ་བཟའ་ལ༔ ལེགས་པར་བཤད་ནས་མ་འོངས་ཕྱི་མའི་དོན༔ གཏེར་དུ་སྦས་ཏེ་སྨོན་ལམ་རྒྱ་ཡིས་བཏབ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་བདེ་ཆེན་ཕུག་ནས་རྙེད། མངྒ་ལཾ།། །།